|
روعـــــــه أبدعتــي. |
تابع بارت 7 قبل ما يغادر طالع جواد بضيق : الجازي امانه عندك...تراها صغيره ..اصبر عليها ...وانا نبهتك من قبل اني ما ابغى ازوجها للحين احسها ما حملت المسؤولية ....تضارب مع اخوانها الصغار وتبكي على الريموت ....للحين متعلقه بعالم الطفوله ! ...لكن الله يسامح ابوك وجدك ضغطوا علي بزواجها ! جواد بابتسامة رايقه : لا تخاف يا عمي الجازي بالحفظ والصون ...بس إلي ابغاه ما هو كل ما قالت «الو» تلبيها وتيجي ...كذا مارح تتحمل المسؤولية وليد هز راسه بتفهم : من هذي الناحيه تطمن ...ما رح يصير الاإلي يسرك ! رجع خطواته لبيت جده .... ابتسم لما شاف ابوه وجده جالسين بالحديقة ... ابو جواد بابتسامه يناظر ولده ....الروقان مرسوم على ملامحه : اشوفك رايق ومبتسم ؟! جلس على الارض براحه : ما توقعت رد فعل ابوها كذا ؟!!! يعني لو احد ثاني حتى لو ابنته غلطانه ما رح يوقف ضدها ! ابو جواد مط شفته : مضطر يمشي الموضوع من فوق خشمه دام ابنته عروس ...تبغى الناس تأكل وجهه ! ابو ناصر هز راسه بالنفي : صدقني لو الجازي صار لها متزوجه 20 سنه ما تغير موقفه ! بغض النظر عن علاقتنا فيه الا انه رجال تنهز له مجالس الرجال ...ما دخل بمشكله الا اصلح بين الطرفين ! ما هو غريب عليه يصلح بين ابنته وزوجها ! ابو جواد : وش ناوي عليه الحين معها ! ناظر ابوه بغموض : رح اربيها من اول وجديد ...لانها الظاهر ما لقت احد يوقفها عند حدها ! كنت بالبدايه ابغى ارجعها مع أبوها وتتربى عنده ... وبعدها ترجع مربيه ..لكن لما شفت رد فعل ابوها ..غيرت رأيي ونويت اربيها بنفسي ! ابو ناصر عجبه الكلام : قدها وقدود ...نفسي احد يذوق وليد نفس الكاس إلي ذقناه ...احسه خطف ابنتي من حضني ...لعب بعقلها ولا كأنه لها اهل ....تسأل عننا من فتره لفتره وكأنها تؤدي واجب ... احس بداخلي جمره لما اشوف اغلى بناتي باعتني ....وما اقدر افتح حلقي بكلمه دامها متعلقة بزوجها بشكل جنوني ! ابو جواد بقهر من اخته : يبه ترى هو ما يمنعها عنكم لكن هي باعتكم !، جواد بهدوء :انا ما همني لا عمتي حنين ولا زوجها ..كل يهمني إلي نشبت بحلقي ...ودمرت كل احلامي ومخططاتي،!، ابو ناصر ضاق صدره على حفيده : لك عهد برقبتي الجازي بنت عمك لك وما تنزف لغيرك ...بس انتظر لوقت وبعدها يصير خير ! هز راسه بأمل : ربي يحفظك يا جدي ويطول بعمرك ...والحين اسمحوا لي مواعد ربعي اليوم عندنا مباراه ! ** ** ** ** من بعد سالفة ابوها ما شافت جواد وما شافت احد من اهله .....اكلها يوصل للجناح لغرفة النوم ...زفرت بضجر من الملل والضيق إلي تشعر فيه ....عندها غيابات كثير بالجامعه اكيد رح يفصلوها ...رجلها تمشي عليها وضعها افضل من اول بكثير ...لازم تكلمه حتى تداوم ...بس وين تلقاه الحين ...وكيف تسأل عنه ! مطت شفتها بسخريه من حظها ...زوجها ما تدري عنه ! ناظرت ساعه الحائط 6:30 يمديها تجهز نفسها للجامعه ! اخذت نفس عميق وهي تناظر نفسها بالمرايه ...صفحه جديده رح تفتح ... رح تثبت لهم انه الوليد احسن تربية عياله ! رح تنسى معاملتهم الزفت معها ! مطت خدها بيدها حتى تبتسم وهي تردد حتى تشحن نفسها بالايجابيه «بدايه جديده» ابتسمت ابتسامه عريضه ...غمزت لنفسها ...وهي تهمس لنفسها «اجننن» ....مدت لسانها بطفوله ... عبست ملامحها مسحت عقدة حواجبها باصبعها وبنفس الهمس «وانا ابتسم احلى » رجعت تناظر نفسها وهي تبتسم ...ضحكت بصوت مرتفع شوي «يا مامي ما احلى ضحكتي » رفعت صوت ضحكتها وهي تراقب شكلها بذي الضحكه «عذاااااب بس الاحول إلي متزوجني ما هو شايف هالجمال » بنظره اخيره وهي تطالع شعرها المنفوش تموت على هالنفشه تحس تزيد جمالها ! مسكت المشط ونفشت شعرها بزياده...تاملت شعرها وهي مسحوره « يا حلااااتي » قبل ما تترك المرايه ..ناظرت نفسها وقبلت نفسها بالهواء دارت نفسها حتى تأخذ الشيله وتلبسها تصلبت وهي تشوفه واقف عند باب الغرفه ...يناظرها وهو رافع حاجب بقرف ! ** ** ** اليوم راجع من السفر ..صار له تقريبا اسبوع ..ما يدري وش اخبارها ...جوالها ارسله بنفس ذاك اليوم مع الشغاله ..نوى لما يرجع من السفر يبدأ يربيها ! استغرب لما دخل الجناح والهدوء يعم بالمكان ...توقع تكون نائمه ...توجه لغرفة النوم بخطوات هاديه ..وحقيبة السفر الصغيره بيده .. تفاجئ وهو يشوفها لابسه العبايه ..واقفه قدام المرايه ...وتعمل حركات مثل المخبوله ..وتهمس بكلام بس ما سمعه ! مستعد يحلف يمين انها مجنونه رسمي ! كل يوم يضيف صفه سيئه لها بقاموسه «مجنونه وخبلة» كتم قهره ..ليه يتزوج فتاه نقيض مواصفات احلامه..يبغاها عاقله ما هي خبله مثل هذي ! مط شفته بقرف لما انصدمت بوجوده ....تصنمت وملامحها متخرعه وكأنها شافت جني ! المفروض هو إلي يتخرع من كشتها !!! تكلم بترفع وبحده : مجنونه انت؟! الحمد لله على نعمة العقل!! » ..ناظرته بابتسامه وهي متفشله من حركات الخبال ...ليه دوم حظها انه جواد يشوفها بالمواقف هذي ...تكلمت متجاهله الموقف :-هلا صباح الخير ! وقع نظرها على حقيبه السفر وبابتسامه عبيطه: مسافر ! هيه تصدق دوبني ابغى اطلع ادورك ! .....حكت شعرها بارتباك ! رد بنبره حاده ارعبتها : قالوا لك طفل طالعه تبحثي عني ! - تنهدت بهدوء وهي تردد بنفسها«صفحة جديده» وبترقيع ارفقتها بابتسامة مكسوره: لا ما هو كذا ..بس عندي جامعه ضروري اداوم ما بقى شيء على الإمتحانات النهائ قاطعها بقرف وهو يشوف يدها للحين الجبيره عليها : اول شيء جهزي فطوري وبعدها يصير خير ! انكسفت من طريقته و بكل قوتها بالغصب ابتسمت له بنعومه : ان شاء الله ! وش اجهز لك ؟! زفر بطول بال : اي شيء ! هزت راسها وبملامح بشوشه :تبغى شاهي، قهوه ،حليب ،نس قاطعها بضجر : قهوة هزت راسها بتفهم : ان شاء الله لفت الشاله بيدهاالسليمه بعد ما جمعت شعرها بالشباصه... تحركت خطوه ..ورجعت تناظره : قهوة حلوه والا قاطعها بغضب من كثر أسئلتها : ابغاها مره مثل حياتي معك ! مطت شفتها بحزن وبصوت هامس ما وصل لسمعه «جعلك من هالحال واردى » ...رسمت ملامح هاديه وبابتسامه مزيفه: ان شاءالله مرت من جنبه بخطوات بطيئه ما تدري وش يستفيد من تجريحها ! ... بحركه سريعه مسحت دمعه تدحرجت على خدها النحيل ...حاست بوزها لما حست بفرق الطول بينهم ...طلعت من الجناح وهي تفكر لو تزوجت رجال طوله عادي يعني اممم 165 سم رح يكون تناسب بينهم اكثر! شتمت نفسها هي وين وجالسه تفكر كذا !! تنهدت على حظها تتزوج رجال اجمل منها وشايف نفسه عليها ! تحس خنجر بحلقها ...اخذت نفس لازم تتحمل وتثبت لهم انها غير ! دخلت المطبخ بتردد لما شافت ام جواد ..وبملامح مبتسمه : صباح الخير خالتي! ام جواد عفست ملامحها بعد ما اعطتها نظره تقييم...وبدون نفس ردت : صباح الخير الجازي بابتسامه تكلمها : القمر بذاته يجهز الفطور؟! هاتي عنك يا خالتي انا اساعدك لا تعبين نفسك ! ومدت يدها تجهز القهوة : هاتي عنك ! ام جواد دفت يدها : لا تخافين جايك رزقك لا تظنين نفسك اميره نرسلك الاكل لغرفتك ... انا تركتك حتى تنجبر يدك وبعدها تنزلين للمطبخ قاطعتها الجازي بابتسامة استفزت ام جواد ما توقعت ردها كذا ،: من عيوني يا احلى خالة بالعالم ! ام جواد انتفخت ملامحها : تتريقين علي !!! هزت راسها بالنفي وبملامح بريئه : لا والل قاطعتها باستعلاء : خلاص اسكتي صجيتي رأسي دخل المطبخ وناظر امه ملامح الغضب واضحه عليها: وش فيك يمه ! طالعت ولدها:-صجت راسي بسوالفها رفعت ضغطي! طالعته وهزت كتوفها ببراءه والدموع تلمع بعيونها : ما قلت شيء! طالعها بحده : انا وش قلت لك ؟! امي تحطينها على راسك تفهمين ! ابتسمت باستغراب ما قالت شيء ليه حاقدين عليها كذا ..هذي البدايه لازم تحاول وما تستسلم من اول موقف ...وبخطوات هاديه تقدمت من ام جواد ..وقفت على رؤوس اصابع رجلينها حتى تقدر توصل لرأسها ...قبلت رأسها وبايتسامه : اسفه خالتي ازعجتك من صباح ربنا ....اجلسي وانا اكمل عنك ! طالعت ام جواد ولدها وبنبره قرف : انا ما احب التمثيل والكذب ...عشانك تعتذر لانك موجود ...وطول سفرك ما شفت رقعة وجهها ! انقهرت من رد حماتها المفروض هي تزعل ما دخلت تتطمئن عليها وهي تعرف انها مكسره ....والحين عتبانه عليها ...وش هالعالم تفكير متخلف ....مالها طاقه تحكي كلمه وحده لانها ما تضمن نفسها تبكي ...لفت وجهها بهدوء تكمل تجهيز الفطور ! سحب كرسي واشر لامه تجلس: اجلسي يمه ...الجازي تجهز عنك ... بدأت تجهز الفطور وكل شوي تسأل عن مكان الأغراض ! وقفت بغضب ام جواد : انا وش غاثني اقوم اجهز بنفسي افضل لي ! مسك يد امه يمنعها تقوم وبنبره هاديه : يمه الله يهديك وش يعرفها بترتيب اغراضكم ! ناظر الجازي إلي واقفه تناظرهم بنظره ما فهم مغزاها ...وبهدوء اشر لها مكانه ! ناظرت مكان ما اشر ...بهدوء سحبت كرسي حتى تركب على ظهره ...لانه بالطابق الثاني وقفتها ام جواد بكلامها : لا تركبين على الكرسي .. اشرت لجواد بضجر : قوم يمه اعطيها ....نبتلش بأقزام ! وقف وتوجه لها ..تناول الغرض وناولها وهو يكلمها : عجلي اخذت منه بقلب موجوع : مشكور ! ورجعت تكمل شغلها بهدوء .....وعقلها يفكر كيف تقدر تتأقلم معهم ! مشوارها طويل ما تضمن نفسها تقدر تكمل ! جهزت كل شيء ..وهي تتحرك بالمطبخ وكأنها نحله بنشاط وحيويه عكس قلبها الميت ...طالعت خالتها لما اتمت كل شيء وبابتسامه : بالعافيه على قلبك ! سحبت لها كرسي وجلست ...وهي تحس رجلها بدات تضرب عليها ...الظاهر انضغطت وهي تتحرك ... ارتشفت من كوب القهوة ..وهي تستنشق رائحة القهوة ...تحس بالانتعاش ....القهوة الصبح عشقها رفعت راسها لما حست في نظرات مسلطه عليها ...استغربت لما شافت خالتها وجواد يناظرونها ...ارتبكت ملامحها ما تدري وش سبب هالنظرات .وبتساؤل : تبغين شيء خالتي ! ام جواد بانتقاد : كيف تشربين وخالك للحين ما جاء ؟!!! عقدت حواجبها وش هالعادات ...رشفه وحده وانتقدوها ...كتمت ضيقها من عاداتهم إلي متوقعه ما تقدر تتأقلم معهم ..كل شوي تطلع لها عادات جديده ...اخذت نفس عميق وهي تشحن عزيمتها «ابنة وليد قدها وقدود» ناظرت خالتها باعتذار: اسفه خالتي ما كنت اعرف ! وينه خالي ؟! اروح اشوفه قاطعها جواد بهدوء : انت اجلسي الحين ينزل لوحده! هزت راسها واكتفت بالصمت ... لحظات ودخل خالها رد السلام وجلس بهدوء مكانه .....ناظرت خالها لازم تحسن الوضع بينهم ......ابتسمت له : صباحك خير وعافيه يا خالي ! طالعها باستغراب وهو يناظر جواد وكانه يسأله بعيونه «وش فيها هذي » اتفشلت من رد فعل خالها وبتدارك للموقف سألته: وش اصب لك يا خالي ؟! طالعها ببرود : ابغى شاهي ! صبت له بيدها السليمه وناولته بابتسامه : بالعافيه يا خالي ! جلست مكانها وبداخلها تبغى تنفجر من معاملتهم وبرودهم معها ...حتى لو غلطت بنظرهم تراها اعتذرت وانتهى الموضوع ! نزلت نظرها باحباط ...وهي تتأمل فنجان القهوة بصمت .... رفعت نظرها لما كلمها خالها : اعطيني صحن البيض قبل ما يكمل ناولته ...طالعت جواد : تبغى من قاطعها وهو يحرك ملامحه بالرفض بدون كلام ! كتمت بقهر وهي تناظره «يقال انه برستيج مااالت عليك ..مبسوط على جماله » رفع حاجب بغرور وهو يشوف نظراتها عليه : فيه شيء ؟! ابتسمت بتورط وكأنه يقرأ افكارها : هاه لاااا ولا شيء ! ناظرت خالتها تغير السالفه : خالتي تب قاطعتها بنبره جافه : اهتمي بنفسك بدون هالحركات لو بغينا شيء طلبناه تراه بيتنا وما نحن ضيوف ! بقلبها تصرخ «يا رب صبرك على هالحرمه » وبلطافه ردت : ما هو قصدي كذا نزلت راسها بضيق وش هالحياه كل حرف تنطقه تعتذر عنه ...يفسرون الكلام على كيفهم ! رجعت تشرب من القهوة بهدوء ...لازم تكون قدامهم فتاه عاقله رزينه بدون حركات البزران ! بعد وقت كان طويل على قلبها ..وقف خالها وهو يكلم جواد : خذ الجازي بطريقك للمستشفى ..تكشف على الكسر قاطعه جواد وهو عافس ملامحه: يبه انا ما يمديني عندي اليوم اجتماعين وبنبره رجى :خذها معك يبه وبعدها للجامعه ... ناظرته وهو يرتجي ابوه يأخذها وبنفسها «خف علينا يالمشغووول ...نفسي يتركوني عليه اكسر خشمه » ناظرت خالها إلي عفس ملامحه وقعت السالفه برقبته ..ناظرها بتهديد : وقسم بالله حركات البزران لو تكررينها اليوم بالمستشفى...صدقيني تصرفي ما رح يعجبك ! تتصرفين كحرمه عاقله رزينه ! بهتت ملامحها من اسلوب خالها الهجومي ...تحول نظرها لجواد إلي يكلم ابوه وعيونه عليها بنظره تهديد: اي تصرف ما يعجبك يا يبه بس اتصل فيني ! وانا اعرف اتصرف معها ! خلاص طق قلبها من تعاملهم ...ردت بعد ما اخذت نفس والدموع بدت تتجمع بعيونها ما رح ترد عليهم: اجهز اغراضي الحين يا خالي ! هز راسه باستعجال : ايه عجلي بعدك واقفه ؟! تحركي بسرعه! توجهت لسفرة الاكل حتى تنظف المكان ...وقفتها ام جواد :اتركيها شوي والبنات ينزلون للفطور ..انت تحركي ولا تأخرين خالك ! تمثيل انك سنعه ما هو لايق عليك ! رددت بداخلها « طنشي يا الجازي » ..هزت راسها بدون اي كلمه... طلعت من المطبخ ..ورغبتها بالبكاء تزيد ....ما هي قادره تنسجم معهم ..تحس نفسهاغريبه بينهم ..والسبب يعود لهم ! رفضهم لوجودها يذبحها ! دخلت الجناح وهي تمسح دموعها إلي رافضه التوقف ..ما في وقت لتفريغ الكبت ....اخذت شنطتها وجوالها ...وقبل ما تطلع ناظرت نفسها بالمرايه ...تمسح الدموع ...اخذت نفس عميق مره ومرتين وثلاث ....حست انها افضل ! حاولت تمرن عضلات خدودها على الابتسامه ! تنهدت وطلعت من الجناح بخطوات هاديه ...تبحث بعيونها عن خالها .... استقرت بالصالة ....وقبل ما تسال عن خالها ..اقترب منها جواد وبصوت هادي : اسمعيني اذا شفت اخواتي بجهة الشرق ..صدي لجهة الغرب ...لا تعرفينهم ولا يعرفونك متى بتنتهي محاضراتك اليوم ؟! غمضت عين بتفكر : اليوم الثلاثاء ؟! رد بدون نفس : اليوم الاربعاء يا حظي ! ابتسمت بارتباك :على بالي انه اليوم الثلاثاء قاطعها بضجر : اخلصي علي اليوم رح تفتحين قضية اليوم الاربعاء والا الثلاثاء! اي ساعة تنتهي محاضراتك ! يا حبك للفلسفه! ردت بدون ما تناظر ملامحه المتكبره : 1:00 هز راسه : انتظري للساعه 2.30 يمرك ابوي طالعته باستنكار : وش اعمل لهذا الوقت قاطعها : وش رايك نحطلك سائق خاص لحضرتك؟! لماترجعين ابغى اشوف جدولك ..الحين اطلعي لا تأخرين ابوي ! يا ويلك اذا اشتكى ابوي منك ! ردت بقهر من اسلوبه : تراني مو بزر تكلمني كذا ! مسك يدها السليمه بتوعد وهو يشوف عيونها الدامعه : وقسم بالله اكسرها ...اختصري ....ويا ويلك لو سمعت هذي النبره مره ثانيه ! تفهمين ! سحبت يدها بشويش ...وطلعت بدون ما تنطق حرف واحد !- وبداخلها تردد « يقهر يقهر » زفر بضيق بعد ما خرجت ...تظن ان نزلت كم دمعه يحزن عليها ..تبغى تضحك عليه بالدمعتين ! انسانه نصابه كذابه ما يصدقها بشيء ..للحين صورتها تمر بذاكرته لما كذبت بالشركه انه عندها عيال...وحتى لما طرقت بيت جدته كذبت عليه انها عجوز ! بحياته ما شاف بنت جريئه كذا ! ارتاح وهو مسافر منها ...لكن الحين مضطر يقابلها ويربيها ..هز راسه بتوعد وهو يخطط عليها ! *** *** *** ركبت السياره بهدوء ...صدت لجهة الشباك .حتى ما يشوف خالها دموعها ....تحس بالانكسار ....وبداخلها تردد وينك يبه تعال شوف وين تركتني ! اعيش بين ناس تكرهني وما تواطني ! فتحت معهم صفحه جديده ..لكن ما اح قطعت حديث نفسها وهي تكتم شهقاتها ...غصب عنها ما هي قادره تتحمل اكثر من كذا ! زادت شهقاتها وهي تسمع خالها الغاضب : بدأنا بالبكاء ! الحين ألف وارجع للبيت وبلاها هالفشيله ! مسحت دموعها وتكلمت بين شهقاتها : ما رح أبكي ! طالعها وهي تمسح دموعها : وش سبب هالبكاء ؟! هزت كتوفها وهي تحاول تتكلم بدون بكاءوبترقيع : اخاف الجامعه يفصلوني بسبب الغيابات ! طالعها باستخفاف: يا صغر عقلك ! لا تخافين الحين يعطونك تقرير طبي ! اهم شيء ما تفشليني بالمستشفى ! هزت راسها بدون اي كلمه ! تنهدت وبداخلها تحمد ربها السالفه مرت على خالها ....كيف تشكي جرحها لمن جرحها ؟!! دخلت المستشفى مع خالها...بخطوات هاديه ..ما في بينهم اي احتكاك بالكلام ... طالعها بهدوء : اجلسي هنا ثواني وارجعلك ! جلست بكراسي الانتظار بملل ....ناظرت السقف بتأمل بعيون لامعه ... سبحان الله كيف تنقلب حياه الإنسان بيوم وليله ! ناظرت خالها إلي اشر لها ..تحركت بملل وتوجهت خلفه بدون كلام ...دخلت الغرفه وعبست ملامحها وهي تشوف نفس الدكتور إلي كان موجود يوم انكسرت .... ابو جواد بهدوء اشر على الدكتور: هذا خال جواد ..يكون ولد عمي ! تقدمت وهزت راسها بنعومه للامام : عساك بخير يا دكتور ! طالعها الدكتور وهو يشوف ملامحها الباكيه ..والدموع ما زالت تلمع بعيونها ...ابنة حنين المفروض تكون هذي ابنته ! لكن النصيب ...مط شفته : لاتقولين رح تبكين الحين ! ابتسمت والدموع بعيونها : ما رح ابكي،! هز راسه بهدوء : على خير ان شاء الله ..الحين نشوف يدك ونعطيك تقرير طبي علشان الجامعه ! ردت بصوت اقرب للهمس : مشكور! طالعها خالها باستغراب صايره مؤدبه ...يمكن تهديد جواد نفع معها ! كملت الاجراءات ...وطلعت من المستشفى بمرافقة خالها ...مستغربه من ملامحه المعصبه ... تبغى تساله بس تخاف يهب فيها ....اول ما ركبت السياره وحرك ...طالعته بتردد : خالي صاير شيء ! ناظرها بنظرات ما فهمتها وهو يناظر من المرايه ...نفس الرجال طول الوقت يلاحقهم ...وبنبره غاضبه : انكتمي ! تنهدت وهي تردد بنفسها تستاهلين بالحريقه وش عليك منه معصب والا رايق !!! لفت لجهة للشباك ..تتأمل الطريق ...ابتسمت تلقائيا لما وقع نظرها على رجال وقع على طوله امام البقاله ! تذكرت صار لها نفس الموقف مره ..ووقعت على طولها..وقتها تفشلت والناس تناظرها ! تنهدت وهي تناظر الناس ...كل واحد له قصه وحياه سواء سعيده او تعيسه ...ربنا وحده العالم بكل الاحوال .. التفتت على خالها لما وقف عند البوابه : خالي متى تمرني ؟! ناظرها بهدوء :اي ساعه ينتهي دوامك ؟! ردت باقتراح : خالي اعطيني رقم جوالك اتواصل معك ! مسك جواله وبنبره تحذير : يا ويلك لو كل شوي تتصلين ! بعد الساعه 2:30 تذكريني اتفقنا ! اخذت الرقم وحفظته ...ابتسمت بروقان ولا كانها من الصبح تبكي: اممم وش اسجلك ؟! احفظه باسم خالي الغالي ...ختمت كلمتها بابتسامه مع غمزه ! ناظرها : اووووووه يا سخافتك ...اقول انزلي ترى اخرتيني ! والله حاله ! تدرين عمري ما شفت ممثلة مثلك ساعه تبكي وساعه جالسه توزعين ابتسامات و ساعه تستخفي دمك ! توسعت ابتسامتها وبصوتها الطبيعي بدون ماتغيره : حرام هالموهبه تضيع ...وش رايك نستغل هالموهبه استغربت وهو يناظرها ....معقد حواجبه : وليه تتدلعين كذا ! تكلمي عدل بدون غنج ! بنات اخر زمن ! ابتسمت بنعومه دوم تغير نبره صوتها حتى ما احد ينتقدها انها تتغنج ...اخذت شنطتها وبهدوء: ان شاء الله خالي ..والحين بالاذن ! ناظرها وهي متوجه للبوابه ...قبل ما تدخل التفتت اليه ...ولوحت يدها له بابتسامه حرك السياره وهو يردد «الله يعينا على هالبلوى» *** ** ** يتبع جلست بالكفتيريا ...وهي حاسه صار لها سنه ما دخلت الجامعه ! شربت من العصير ....ريقها نشف ...وهي تركض من دكتور لدكتور علشان الغيابات ! الامتحانات النهائيه على الأبواب ....لازم تستدرك المحاضرات إلي فاتتها ! رفعت نظرها لصديقاتها ..سلمت بهدوء ...وابتسمت على تعليقات البنات : الحمد لله على السلامه علام يدك؟ ردت بابتسامة مرهقة : تدعثرت عن الدرج ! فجر بمزاح : وش صار بالدرج ؟! ليلى خزتها : اعترفي ما حصلتي طراق من الماما او البابا؟! سلوى بابتسامة : لازم نزورك ونجيب لك هديه ! مطت الجازي شفتها و بداخلها «ما ابغى هديه بس كفو اذاكم عني »: ما ابغى هداياكم بس ابغى المحاضرات إلي فاتتني ! فجر بضجر من الدراسة : يا سخافتك ..تفضلين المحاضرات على الهديه! وبتأمل : احسك متغيره بعد هالغياب !- الجازي ناظرتها : اكيد للاسو قاطعتها فجر : لا للأفضل ...ما ادري وش إلي تغير فيك ! سلوى : يا بنات شوفوا ام خرطوم دخلت الكفتيريا ! ليلى بحماس مسكت يد الجازي : عليك بها ! بالله فشليها مثل كل مره ...تراها باطه كبدي ! سحبت الجازي يدها بضيق .....وما التفتت لجهة شذى....تخاف يزل لسانها وش يخلصها من جواد ! فجر تراقب الوضع بدقه : شوفوا كيف تناظر الجازي وكأنها مالكه حلالها ! شذى تكلم البنت إلي معها ..مقتصده توصل الكلام للجازي : اففف الريحه هنا خايسه من وجود بعض ناس ! سلوى استغربت سكوت الجازي...ابتسمت بشقاوة ...وبصوت مرتفع يوصل لشذى إلي جلست قريب منهم وكانها متعمده: اقول يا بنات فاتكم الحدث بالتفصيل ...تخيلوا اني حضرت العرس ! طالعوها البنات باستغراب أي عرس تتكلم عنه! تابعت كلامها وهي كاتمه ضحكتها على شكل صديقاتها : تخيلوا انها العروس تقرف ! ملامحها ما هي باينه من كثر المكياج ...وفوق هذا العروس عرجاء وقصيره ونحيله! عاملين حالهم برستيج وبالاخير وقعوا على راسهم تخيلوا هالعريس بجماله يأخذ هالجوكر ! صدق المثل حظ الملايح بالارض طايح وحظ القبايح بالسماء لايح! انتم ما حضرتم الزواج ؟! فجر ابتسمت تكمل عن سلوى بخبث: لا والله بس سمعت يقولون الناس انهم تكبروا على البنات حتى تزوج ولدهم جوكر ! ليلى بحماس : اليوم على التي في رح يطلع ..مسكين الحلقه الماضيه تحسينه مكتئب وما هو كالعاده بفرفشته ! فجر : مسكين ما ينلام من البومه إلي عنده ! سلوى تناظر الجازي : ما عجبها ام خرطوم تكونين زوجة اخوها ...والله انك اجمل منها ناظرتهم بملامح باهته ...انمسح فيها الارض ....جالسين يشتموها وهي جالسه مثل البلهاء ...تخاف يزل لسانها بكلمه وتسمعها شذى وتوصلها لجواد مع شوي من البهارات اخذت نفس وبدفاع عن نفسها ما رح تسمح لشذى تتشمت بها : لا تغركم الحفله ! ترى انا شفت العروس من وجه لوجه ! فجر بحماس: صدق ! وين شفتيها ؟! الجازي تتغزل بنفسها : شفتها بالسوق ..اخخخ لو شفتوها على طبيعتها بدون مكياج ! ملكة جمال قليله بحقها ! سلوى رفعت حاجب :تتريقين ؟! الجازي تبتسم بنعومه : لا والله ما اتريق ...اقولك اعرفها وجه لوجه ...البنت هذي عذاااااب ...تجنننن عيونها وسيعه مثل عيون الغزال ....رموشها طويله ...عيون بلون سواد الليل ...انفها ااااه هذا حكايه ثانيه صغير يجنن اما فمها مرسوم رسم ...شفايف بلون التوت .....لما تبتسم وش اقول عذااااب ابتسامتها مع الغماز إلي بخدها ..شعرها طويل بنفشه زايده حلاتها كانها قطعت كلامها وفتحت عيونها لما انضربت على راسها سلوى والكتاب ما زال بيدها : اي غزال واي ابتسامه ترى اقولك شايفها بعيوني عيونها مثل عيون الحمار انفعلت الجازي : حمار يرفسك يازفته ! وبعدين المزينه الحماره عجبت عليها ودفنت ملامحها فجر رفعت حاجب : علامك تدافعين عنها وكأنك محامي دفاع!- مطت الجازي شفتها بقهر رفعوا ضغطها ونسيت تواجد شذى: ادافع لان البنت عسل بس حظها الاقشر انها تكون من نصيب هالمتخلف! ليلى رفعت حاجب :الحين هالجوكر عسل وزوجها المتخلف! صدق ما عندك سالفه فجر تهف بالدفتر على وجهها : الظاهر الكسر اثر على عقلها .... قاطعتهم اقتراب وفاء بابتسامة : هاي بنات ! ناظرت الجازي : واو الجازي هنا ! مبارك يا عروسه سمعت انك تزوجتي ..وسحبتي على الدراسه! مبارك ياعروسه سلمت عليها بحراره : مبارك يا عسل ..علام يدك مكسوره لا تقولين عريس الغفلة كسرك ! ابتسمت بخجل : الله يبارك فيك ....وش عرفك بزواجي! وفاء بابتسامه: نسيتي انها خالتي جارتكم ! ابتسمت الجازي بتورط : ايه ايه تذكرت ! فجر عقدت حواجبها : اشم ريحه خيانه! تزوجتي وما خبرتينا ! الجازي توسعت ابتسامتها بتورط وهي تشوف نظرات شذى عليها : صار الموضوع بسرعه ! وارقامكم راحت من جوالي ...ما قدرت اعزمكم ..امممم وبس ! ختمت كلامها بابتسامة عبيطه ! سلوى بغيره : ومين سعيد الحظ إلي رفضتي المزيون وبهمس «اخو ام خرطوم» عشانه ! ابتسمت : انا تزوجت ولد خالي ! ليلى بلقافه : وش يشتغل ؟! الجازي عفست ملامحها لذكره ما تعرف عنه شيء ...حب الانتقام تغلغل بداخلها ...ابتسمت بخبث ...وبصوت يوصل لشذى :والله زوجي عطال بطال ..بس ان شاء الله قريب يتوظف ! في واحد وعدنا رح يتوسط له قريب حتى يتوظف بإحدى المستشفيات عامل نظافة ! البنات بصوت واحد مستنكر : عامل نظافة ! توسعت ابتسامتها وهي تشوف عيون شذى الشرار يطلع منها ...تابعت الجازي بنبره رايقه : وش فيها هالوظيفه ؟! ترى ما هو شرط تتزوجين واحد دارس ...تراني اعرف رجال درسوا هندسه وعقولهم مصديه ! حركت حواجبها تغيض شذى إلي جالسه وتناظرهم بغيض وما هي قادره تتكلم بحرف واحد ! فجر حطت رجل على رجل : والله عقلك المصدي ! وبعدين وين الذبله ما اشوفها ! ابتسمت بروقان : ان شاء الله لما يتوظف رح يشتري لي ذبله ...تعرفين وضعه مفلس ومطفر الحين ! سلوى بقرف : غبيه كيف تقبلين ترتبطين بإنسان كذا ! انت متعلمه ومهندسه لازم يكون بينكم توافق ! شربت من العصير باستمتاع : تعرفين لما يتقدملك واحد يقربلك اهلك يغصبونك حتى ما تصير مشاكل ! زفرت وفاء : اوووو يا قلبي مغصوبه ! طيب كيف شكله عساه مقبول ! الجازي كتمت ضحكتها لما فتحت عيونها شذى بتوعد ...توسعت ابتسامتها متأكده خاربه خاربه : وش اقول ...تنكسر رقبتك وانت رافعيتها حتى تشوفين وجهه ..طويل وكانه اصبع معكرونه «الطويل» مايل من كثر الطول وكانه فيه عرق هبل ! عيونه مثل عيون البرص ....انفه يشبه ام خرطووووووم ! وقفت شذى ما قدرت تتحمل وقاحتها اكثر وهي تشوفها تضحك بصوت مرتفع مع شلتها رفعت اصبعها وهي تقترب منهم : تدرين انك وقحه ! وقاحتك هذي رح تندمين عليها ...وقولي شذى ما قالت ! الجازي ابتسمت بروقان : اعلى ما بخيلك اركبي ! وبعدين انت من كلمك ! انا اكلم صديقاتي ...فاتحه اذانك عندي بحجم اذان الفيل ! ناظرت شلتها ..عقدت حواجبها : ما هو بس خرطوم واذان فيل الله يعافينا ! حركت حواجبها تغيضها ! شذى طالعتهم بقهر وما هو باين غير عيونها المتوعده : وقسم بالله الا لتندمين ! اعطت نظره احتقار وغادرت المكان ...تغلي من القهر ! تنهدت الجازي براحه ...متاكده الكلام رح يوصل لجواد ....ما رح تهتم ...ما رح تسمح لاحد يدوس على طرفها ...مستعده تحترم اهله وتحطهم على راسها باستثناء « شذى ورنيم » مستحيل تترك اي فرصه ل قهرهم ما احد خرب علاقتها جواد بزياده غيرهم ! ناظرت ليلى إلي جالسه تكلمها : يا اختي ما احد يفشلها غيرك ....تعجبيني ! فجر بابتسامه : الظاهر المره ذي متوعده فيك الله يستر ! مطت شفتها الجازي بلا مبالاه : بقلعتها ! ناظرت ساعتها : وقت المحاضره الحين ! استأذنت وغادرت المكان بهدوء ! وفاء تطالع زولها : هذي البنت احبها تجننن ...تدخل القلب ...وخاصه لما تنتفخ ملامحها من الغضب ! اروح احضر معها المحاضره افضل من وجهكم ! غادرت بخطوات سريعه تلحق على الجازي ! *** *** *** ام جواد رفعت حاجب على كلام سلفتها: وان شاء الله الجازي موافقه ! ام احمد : والله ما ادري ...الرجال ما يعيبه شيء ! ام جواد بانفعال : يعيبه انها محيره لجواد ! ام احمد بفقدان امل : اي جواد ! تراه تزوج ام جواد قاطعتها بهمس : عندي اخبار من مصدر موثوق ترى عمي خطبها له بس ينتظرون الوقت المناسب ويعلنون الخطوبه ...بس انتبهي تخبرين احد ! استبشرت ملامح ام احمد : صدق ! هزت راسها ام جواد : ايه اكيد ...بس السالفه يبغى لها وقت ...من هنا لوقت تخرج الجازي يكون الوقت مناسب ! ام احمد بابتسامة فرح: ان شاء الله خير ..على هذا الطاري كيف الجازي معكم ! عفست ملامحها : لو تشوفينها اليوم الصبح لسانها ينقط عسل تظن تضحك علي بكلمتين ! ام احمد : يمكن البنت تكون طيوبة قاطعتها بقرف : ابنة حنين وش تلاقينها ؟! حتى لو كانت عسل ما اقبل بها ...ما هي من مستوى ولدي ! يكفي فشيلتي فيها يوم الزواج ! حسبي الله عليها حنين ...زفتها للناس بالغصب ما ادري على وش تتفاخر فيها ! ام احمد بهدوء: القرد بعين امه غزال ! ام جواد بضحكه :بهذي صدقتي ! قاطعهم دخول شذى وخلفها رنيم ...ناظرت امها ببكاء : انا اكثر من كذا ما اتحملها ...انا تتمسخر علي قدام البنات !، ام جواد باستغراب : وش صاير ! رنيم تقدمت : ما احد غيرها زوجة ولدك الجازي ...قدام البنات تتريق وتتمسخر عليها ! ام جواد بغضب : وليه ما عرفتيها قدرها ! شذى تمسح دموعها : ما حبيت اكلمها أخاف أحد يعرف انها زوجة اخوي !، حضرتها استغلت هالنقطه وبدأت تتمسخر علي تقول ام خرطوم واذاني مثل اذان الفيل ...حتى جواد ما تركت شتيمه الا حطتها فيه ! ام جواد طالعت ام احمد : قلت لك ابنة حنين رح تطلع الشيب برأسنا ! يصير خير ...صدقيني ما رح يمشي موضوعها بالساهل حتى لو وصلت لطلاقي ! ونشوف يا انا يا هي بالبيت ! انتظري يرجع اخوك ونحط لها حل ! زمت شذى شفايفها برضى ...متى يرجع اخوها وتشتفي فيها ...ما في مجال لانكارها ! ** ** ** ** كل شوي تناظر الساعه بضجر ....وش هالحال تجلس تنتظر خالها طول هالوقت ...لو اخذت سياره اجره كان وصلت البيت ! ما تدري ليه مستعجله للرجوع للبيت ...اكيد شذى قلبت البيت عليها ! لمعت في ذهنها فكره ...لازم تتصل بأبوها وتحطه بالصوره قبل ما يخبره جواد ..بحركه سريعه اتصلت ...بلعت ريقها لما سمعت صوت ابوها : مرحبا ...كيفك يبه عساك بخير ! رد بهدوء كل ما يشوف رقم الجازي يتوقع فيه كارثه : هلا جازي ...كيفك ! الجازي بتردد المذنب : بخير الله يسلمك ..ءءء توقع عندها سالفه : تكلمي وش صاير ! ردت بنبره طفوليه منفعله : يبه ابغى اقولك وتسمعني وتتفهم موقفي ! بهتت ملامحه وهو ينتظر وش المصيبه إلي عملتها : تكلمي يالجازي ! الجازي : يبه انا اليوم صار بيني وبين اخت جواد بالجامعه تلاسن بالكلام ...وهي تتوعد فيني الا تخبر جواد قاطعها : يعني لذي الدرجه خايفه من جواد ؟! ما عرفت تجمع الاجابه : انا ما ادري ما ابغى تصادم و مشاكل معه أخاف يرجع يزعل مني ت قاطعها : لو تخافين على مشاعر زوجك كان احترمتي اهله حتى لو كان طفل دوبه مولود ردت باعتراض : بس يبه هي تغلط علي يعني تبغاني مالي شخصيه يغلطون علي واسكت ! قاطعها بحده : الجازي وبعدين معك ؟! اذا احد غلط عليك كلمي زوجك وخبريه وهو يتصرف ...وانت تبقين قدام الكل العاقله الرزينه ما تنزل عقلها للامور التافهة ! ردت بعجز : ما اقدر يبه ...اكرهن وما اقدر اتحمل نظراتهم لي ..افقد اعصابي ...وبعدين مستحيل يوقف معي ضد اخواته حتى لو كان لي الحق قاطعها بغضب من تفكيرها : اقول اتركي عنك الهذره عمرك خبرتيه بحركات اخواته ! قوست شفتها للاسفل : ما خبرته لاني متأكده ما رح قاطعها بهدوء وهو متاكد الجازي جابت العيد بالكلام مع ابنة خالها والا كان ما اتصلت فيه : وش المطلوب مني الحين ! ردت بنبره خايفه : انا الحين بالجامعة اتصل بجواد ..وقول له اختك ما تترك الجازي بحالها ...اذا ما اختصرت اختك رح اخذ الجازي عندي ويا دار ما دخلك شر ! رد بسخرية: والله ! اسمعيني لما تكملين دوام ..بترجعين لبيتك وتحملي نتائج طول لسانك ! قاطعته بقهر : علشان يطقوني ويستفردون فيني ! سالها بهدوء : احد طقك منهم ؟! ردت بعد ما تنهدت : لا سكت للحظات وبعدها تكلم : شوفي ترجعين للبيت ولا كأنه شيء صار ...واذا كنت فعلا غلطت بحق أخته اعتذري لها وافتحي صفحة جديده ! انقهرت من برود ابوها : يبه انت معي والا معهم ! رد بهدوء : انا مع الحق ..ما سمعت من طرف اخته ...اعرفك يالجازي تاخذين حقك وزياده ! لمعت عيونها بالدموع لما حست بخذلان ابوها لها وبنبره تهديد مبطنه : والله لو يمد يده علي ما رح اسكت وتحملوا نتائج هالزواج الفاشل ...ما ادري وش قصرت معكم حتى ترموني على اهل امي! جعلك تسمع خبري الليله حتى ترتاحون مني ومن مشاكلي .. قاطعها بغضب : الجازي ..وقسم بالله لوكنت قدامي الا اكسر راسك ! يا ويلك لو سمعت شكوى عنك ..وانت حره اعملي الي تبغينه ! الجازي برجاء : يبه انا الحين بحاجتك ...تصلح بين الناس بدل ما تصلح وضعي ! تنهد وتكلم بهدوء : وش اقولك ..وانت رافضه تشغلين عقلك!! ما ادري حالفه يمين تسليمنه بالكرتونه! ردت باستسلام : شور علي يبه ...وش اعمل ؟! تكلم بتنبيه: اسمعيني الانثى لازم تتمتع بالذكاء ...شغلي عقلك وفكري بعقلانيه كيف تخرجي من هالموقف ....مثل ما دخلتي نفسك بالسالفه تخرجينها ...وانا انتظر منك اتصال فكري بعقلك واتركي حركات البزران ..والحين انا رح اقفل الخط وانتظر منك الخبر ... ردت بإحباط وهي تشعر بصعوبة الموقف : ان شاءالله يبه ! قفلت الخط بقهر ..وش يضر ابوها لو اتصل بجواد ...وريحها من هالموقف ! نفخت هواء بضجر ..ناظرت الجوال ..الساعه 2:15 قررت تتصل بخالها تشوف وينه ....ضغطت الرقم وبداخلها فكره تراودها تروح لعمتها نجوى ..بس خايفه من ابوها ..اخذت نفس لما رد جواد على تلفون ابوه : السلام عليكم ! متاكده اليوم يوم الخراب العالمي ...ابتسمت بخبث ...وردت بصوتها الطبيعي : الو ! ناظرجواد الجوال وهو معقد حواجبه من صوت الغنج إلي يكلمه ...دار بعيونه بمكتب ابوه ...وبعدها رد : مين معي ؟! ابتسمت وزادت من دلعها : وين حبيبي! عقد جواجبه والشك وقع بقلبه معقول ابوه متزوج ..بس صوتها صغيره ..معقول ابنته ..قطع شكوكه وهو يسأل بهدوء :-انت مين طالبه بالضبط ؟! ردت بطريقه نرفزته :انا تالبه «طالبه» ابو جوجو رد بعصبيه : يا جعل عيونك للفقع يا قليله الحياء !- وش عرفك بابوي ! صار قلبها يدق طبول من صراخه ...لو يشوفها ابوها بدل ما تحكلها عمتها ! دخل المكتب ابو جواد واستغرب عصبية جواد وهو ماسك جواله : وش صاير ؟! مين على الجوال؟! جواد مدالجول لابوه بغضب: وحده قليله ادب تتدلع طالبيتك ما اعرفها! عقد حواجبه باستغراب ...اخذ الجوال وبهدوء : الو الجازي تقضم اظافرها بتوتر تكلمت بسرعه: خالي بالله لا تقول لجواد اني انا على الجوال ! ارخى حواجبه : انت ! بنبرة رجاء : خاااالي لا تقول كان واقف قريب من ابوه يبغى يعرف صاحبة المكالمه ...انتفخ وجهه وصوتها يوصل لمسمعه ... ابو جواد : تراه واقف جنبي وسمعك خذي كلميه...... يتبع يوم السبت بإذن الله ....اذا شفت حماس ومتابعه منكم رح يكون الثلاثاء ...دمتم بخير |
مازلت أقول الجازي خبله مثل ماقال جواد حتى وهى تبي تصير مؤدبه مو لايق اما ابوها وليد بدري تو انتبهت لبنتك الان تبيها تصير انثي وفاهمه وذكيه ! غريبه! طبخ طبختوه كلوه ي اهل الجازي بنتكم محتاجه إعادة تأهيل بالكامل يبيلها موجه ومرشد يقيم سلوكها يبيله صدمه تجعله تصحى ع عمرها وتفكر بعقلها !! |
اكره جواد كره شديد 😑😑😑😑 وليد تواصل الخذلان قبل ان تكون حكيم قوم حكم نفسك😑😑😑 انهزامية الجازي في بعض المواقف تثير اعصابي اكثر و اكثر على وليد لكن تصرفاتها تستفزني اكره هذا النوع من النصرفات لانه عندنا مخ لنفكر و نميز بع الصح من الغلط و لكن ارجع و اتذكر عمرها يشفع لها عندي صغره..... كثيييير متحمسة لان لما نقرأ الرواية بالاول نحس انو سيرورة الاحداث واضحة و لكن لما نخمن شو ممكن يصير كأحداث نبدا نلتمس غموض كبير برافو دمت مبدعة و ارجوك طولي شوي في البارتات 😍 سيرين من تونس |
السلام عليكم ورحمة الله وبركاته ......روايه اكثر من رائعه 😍😍 |
يعطيك العافيه. بانتضارك يوم الثلاثاء ان شاء الله. |
انا ماحبيت تصرفات الجازي وخاصه قبل الزواج تصرفات غبيه لكن هذا غير مبرر لجواد واهله لانهم عندهم فكره كان فسخو الخطوبه بحجه تصرفاتها خاصه جواد ليش يكمل بموضوع وهو مايبقى يعطيها فرصه لازم يصبر سنه واذا مافي فايدة يفكر يتزوج لكن يفكر يتزوج وهي لسى عروسه هذا حرام بنات الناس ماهي لعبه وانا بقول من الان اذا زوجتيه هاتي بطل ثاني اكره شي عندي ندم وسامحته😊 |
ررررررررررروووووووووووووو عه |
اتمني منك تطويل البارت |
وين البارت منتظرين ......😥😥 |
| الساعة الآن 12:41 AM |
Powered by vBulletin®
Copyright ©2000 - 2024, vBulletin Solutions, Inc.