آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
11-05-19, 01:03 PM
| #21 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب  
|  الحلقه ٢٠ لو الحلقه وصلت لالف لايك هنزل حلقه كمان هيام قعدت في بيت فارس وايمان بتخدمها هيا وامه وهو مستغرب جدا من رد فعل ايمان لانه ما تخيلوش ابدا ... هيام مهما تحاول تدلع بتلاقي ايمان فوق دماغها ديما وبتبعد فارس عنها نهائي مجدي عدي علي فارس ايمان فتحتله الباب ودخل اتفاجئ بهيام في الصاله قاعده معاها فشار ورافعه رجليها علي التربيزه وتنح وبص لايمان مجدي : ايه ده؟؟ ايمان بتريقه : شوفت الهنا اللي انا فيه ؟؟ مجدي : لا بجد ايه ده ؟؟ هيام : بتتوشوشو علي ايه كده ؟؟ هاه ؟؟ لسه زي ما انت يا مجدي ما اتغيرتش مجدي : الحمد لله علي كل حال هيام : ايمان .. عايزه قهوه ايمان بصتلها ويدوب هترد فارس خرج فارس : مجدي ازيك كنت لسه هكلمك اشوفك اتأخرت ليه ؟ جيت امتي ؟ مجدي : يدوب ولسه ما فوقتش من اللي انا شايفو فارس ضحك : ادخل تعال .. ايمو حبيبي اعمليلنا قهوه بعد اذنك ايمان : عنيا حبيبي هيام : جيت في وقتك يا فارس بقالي ساعه بتحايل عليها تعملي وهيا مش راضيه .. ايمان : المنبهات غلط عليهاحبيبي وبعدين غلط جدا مسكنات مع منبهات .. ممكن انتي مش عايزه تخفي بسرعه بس انا عيزاكي تخفي .. هعملك لبن هيام بنرفزه : انتي شيفاني عيله قدامك هتشربيني اللبن ؟؟ ايمان : طالما مش عارفه مصلحتك تبقي عيله ولا ايه يا فارس ؟؟ فارس : اه اعمليلها لبن خليه يقويها شويه هيام : مش عايزه منك حاجه ايمان : براحتك يا قلبي سابتهم ودخلت وهيام كمان دخلت اوضتها ومجدي فاتح بوقه مذبهل مجدي : لا قادر ... انت قادر ... فارس ضحك : اقفل بوقك بس مجدي : الاتنين في بيت واحد ؟؟؟ طيب ازاي افهم اوعي تكون ردتها ؟؟ فارس : انت اهبل يالا ؟؟ ارد مين ؟؟ مجدي : قادر وتعملها فارس : اسكت والنبي مش نقصاك مجدي : ليه ؟؟ لو مكانك اعملها والاتنين يتنافسوا ازاي يرضوني وانا اعيش ملك متوج فارس : وايوه ولو اتفقوا عليك يخلو نهارك اسود من ليلك ويخلوك تلف حوالين نفسك مجدي : تقوم رازعهم بوحده تالته تظبطهم الاتنين ايمان جت وراهم : يا تري ايه الاتنين اللي عايزين تظبطوهم بواحده تالته ؟؟ مجدي : انتي بتيجي في اوقات يا ايمان ؟؟ فارس : هيا اللي بتيجي في اوقات ولا انت اللي لسانك متبري منك ؟؟ ايمان : اتفضلوا القهوه ... وبعدين يا مجدي مش كل حاجه بتيجي بالعند في حاجات محتاجه تتصرف بعقل مش ترزع واحده تالته ؟؟ وبعدين معرفتش تسلك اتنين مع بعض بالعقل كده هتقدر علي تلاته ازاي ؟؟فارس ما تسمعش كلام الواد ده هيغرقك فارس : انتي عارفاني حبيبي انا ما بسمعش لحد سابتهم ودخلت مجدي : لا بجد بقي هيا بتعمل ايه هنا ؟؟ فارس حكاله كل اللي حصل مجدي : مراتك اخدت مبدأ بيدي لا بيد مش عارف مين ؟؟ هههه ناصحه بدال ما انت تروحلها كل شويه والتاني والامور تتطور قالتلك ايه اجيبها هنا واخليها قدام عيني !!! فارس : فعلا ده تفكيرها المهم سيبك بقي من الحوارات دي ونتكلم في الشغل ... كريم هيبقي ريسبونسر علي سباق كبير وهيدخل عربياته في السباق وطلب مني اننا نعدلهم بحيث كل العربيات هتبقي نسخه واحده وسرعه واحده بحيث هنا تبان المهاره وعايزين نبدأ .. هما عشر عربيات اوك ؟ مجدي : الواحد بطل الشغل بايده !! فارس : بطل كسل بقي مجدي : خلاص خلاص ما تزوقش هساعدك ونخلصهم بسرعه ... بالليل فارس سهران قدام التليفزيون لوحده وايمان دخلت تنوم ابنها ونامت معاه من التعب وطبعا هيام استغلت الفرصه ان فارس لوحده فطلعت وقعدت معاه بفستان اشبه لقميص النوم ... هيام : امال مراتك سيباك لوحدك ليه ؟؟ فارس : بتنوم حمزه ونامت معاه هيام : وانت في الوقت ده بتعمل ايه ؟؟بتفضل لوحدك ؟؟ فارس : عاده بنام انا كمان لان عندي شغل نادرا ما بسهر كتير .. وبعدين هيا كتر خيرها .. شغل طول النهار مع حمزه ومسؤليته .. الله يعينها ما بتقصرش في حق حد ابدا هيام : برافو ست بيت ممتازه ... بس يا تري كعشيقه وصاحبه ايه ؟؟ فارس : ما تتعبيش نفسك يا هيام هيام : ما اتعبش نفسي في ايه بالظبط ؟ خايف مني ليه يا فارس ؟ فارس : انا خايف منك ؟ اتعدل وبصلها فارس : خايف منك ازاي ؟؟ هيام : خايف اني اقرب لاحسن تضعف لانك ماسك نفسك مني بالعافيه واي قرب منك هتنهار مقاومتك فارس ضحك : بجد ؟؟ انتي شايفه كده ؟؟ يعني لو المعتقد ده بيريحك نفسيا اتمسكي بيه !! هيام : يعني انا لو قربت منك كده مش هتخاف ؟ قربت قوي منه لدرجه انها كلها في حضنه هيام : فاكر ليالينا كنا بنقضيها ازاي ؟؟ عمرنا ما زهقنا ولا ملينا ومهما نتخانق كان لازم بالليل نتصالح لاننا ما بنقدرش نبقي جنب بعض ونفضل زعلانين فاكر ؟ عمر ما ليله واحده قضيناها جنب بعض زعلانين ولو كنت عايز تزعل كنت بتسيب البيت كله لانك ما بتقدرش تقاومني تنكر ده ؟ فارس : لا ما انكرش بس ده يا هيام مش معناه اني بحبك للدرجه اللي انتي متخيلاها هيام بتهمس في رقبته : امال معناه ايه ؟؟ فارس قرب من رقبتها قوي وافتكرت انه هيلمسها بس قالها فارس : معناه انك محترفه في السرير مش اكتر قام وقف : تصبحي علي خير وما تحلميش كتير قوي .. سابها ودخل لمراته اللي كانت صاحيه بترضع ابنها وبصتله جامد اول ما دخل وفضل يسأل نفسه ياتري هيا كانت صاحيه من بدري وخرجت وشافتهم ولا هيا هنا وما خرجتش ؟؟ طيب بتبصله كده ليه ؟ ومعني نظراتها دي ايه ؟ فارس : صاحيه من بدري ؟ ايمان : لا يدوب رقد جنبها وباسها في رقبتها فارس : تحبي تكملي نوم واسهر انا بيه ؟؟ ايمان بصتله كتير باستغراب لان مش من عوايده يطلب انه يسهر بيه ؟ ولا عايز حجه يسهر بيها مع هيام ؟؟ ويا تري هيفضل يقاومها لامتي ؟؟ هيا شافتهم وشافت محاولاتها لاغرائه واه جوزها رفض بس يا تري لامتي ؟؟؟ ايمان : لا ريح انت .. انا هفضل معاه انت عندك شغل فارس : فعلا عندي شغل طحن .. موضوع تعديل عربيات السباق ده واكل وقتي كله ايمان : فعلا وبعدين كنت بطلت ترجع مشحم فارس : وده مضايقك ؟؟ الشحم ؟؟ ايمان : لا طبعا بالعكس ده واحشني .. انك ترجع وتبهدلني انا معاك شحم وبعدها تفضل تنظفه من علي جسمي فارس ضحك : انتي بتبقي مجنونه انا اعملك ايه؟وكل مره بتقنعي نفسك انك هتعرفي تنظفيه ايمان بدلع : مش يمكن انا بضحك عليك علشان انت تنظفهولي ؟؟ مش يمكن ده شيء بيعجبني وبيعجبني انك انت تعمله بايدك ؟؟ فارس : مش بقولك مجنونه!!! ايمان : وهيا الواحده لو ما اتجننتش مع جوزها هتتجنن فين ؟؟ فارس : ابنك نام ولا لسه ؟ ايمان ضحكت : نام بس انت عايز تنام فارس : وهو في راجل عاقل ينام وجنبه قمر !! .............................. هيام هتتجنن من ايمان ومراقبتها ليها وعايزه تمشي بس لو مشيت مش هتعرف تجيب فارس عندها تاني ليها ... تاني يوم الصبح طلبت من فارس شويه حاجات يجيبها وهو استغرب بس بعتلها اللي هيا عيزاه علي البيت ايمان فتحت الباب لقت العامل بتاع السوبر ماركت جايب حاجات كتير ايمان : سوري بس انا ما طلبتش حاجه العامل : باشمهندس فارس هو اللي طلبها وطلب مننا نوصلها لحد البيت هيام طلعت : اه اتفضل انا عايزه الحاجات دي .. ايمان : انتي ؟؟ العامل دخل : احط الحاجات فين ؟؟ هيام : دخلها المطبخ العامل : فين المطبخ ؟؟ ايمان : حطها قدامك واتفضل انت .. حسابك ايه ؟؟ العامل : فارس بيه حاسبني وعطاني بقشيشي كمان اي حاجه حضرتك تحتاجيها تليفون هتكون عندك ايمان : متشكره جدا لذوقك العامل مشي وهيام وايمان واقفين قصاد بعض هيام : ليه مخليتهوش يدخلها المطبخ غاويه تعب انتي ايمان : لان ما ينفعش راجل غريب يدخل لحد المطبخ ومفيش راجل في البيت هيام : ده العامل بتاع الديلفيري ايمان : مش راجل يعني ولا ايه ؟ هيام : ما علينا انا مش حمل جدال معاكي ..ممكن بقي تساعديني ندخل الحاجات دي المطبخ ؟؟ ايمان : انتي طلبتيها انتي دخليها وبعدين ايه الحاجات دي اصلا ؟؟ هيام : قررت اعمل لفارس اكل اتمني انك ما تعارضيش او تخافي انه اكلي يعجبه عن اكلك ايمان ضحكت بصوتها كله : انتي تعملي اكل ؟؟ وانا اخاف ان اكلك يعجبه ؟؟ لا انتي دماغك لسعت . عارفه مع اني مكنتش ناويه اساعدك في مجرد انك تدخلي الحاجه لا ده انا كمان هتفرج عليكي ( ضحكت تاني ) قال اخاف منها قال (ضحكت تاني ) منيره خرجت علي ضحكها منيره : في ايه يا ايمان حبيبتي ربنا يفرحك كمان وكمان ايمان : لا ابدا يا ماما بس هيام ناويه تعمل اكل بنفسها وبتقولي اوعي اغير منها لاحسن اكلها يعجب فارس عن اكلي منيره ضحكت جامد هيا كمان وده نرفز هيام جدا هيام : بتضحكوا .. ماشي هتشوفوا هعمل ايه ؟؟ الاتنين كملوا ضحك وايمان اخدت الحاجه تدخلها المطبخ ومنيره دخلت تتفرج ايمان : الشيف هيام ناويه تعملي ايه سيادتك ؟ هيام : هعمل لازانيا اصلا تلاقيكي حتي ما تعرفيهاش ايمان : مش هرد عليكي وريني سيادتك هتعملي ايه اتفضلي هيام : لعلمك اه انا ما بعرفش اعمل اكل الا حاجتين اتنين بحبهم وبتقنهم جدا وهما فطيره التفاح واللازانيا وهتشوفي بنفسك وفعلا هيام بدأت تعمل وايمان ومنيره بيتفرجوا عليها واستغربوا انها فعلا عارفه بتعمل ايه !!!! فارس في الشغل مع مجدي مجدي : اتأخرت ليه ؟؟ الطريق حتي مكنش واقف ولا فضلت في البيت بعد ما كلمتني ؟ فارس : لا ما فضلتش بس عديت علي السوير ماركت اشتريت شويه حاجات للبيت مجدي : اشمعني ماهي ايمان بتطلب اللي هيا عيزاه وبيوصلها لحد البيت ؟ فارس: هيام اللي كانت طالبه الحاجه مش ايمان .. تخيل انها ناويه تعمل اكل بنفسها ؟ مجدي ضحك : نعم ؟ هيام هتعمل اكل ؟؟ هههههه ابوس ايدك اعزمني النهارده عندك هههههه فضل يضحك كتير وفارس مستغرب هو بيضحك ليه فارس : افهم بس الاول سيادتك بتضحك ليه ؟؟ مجدي بيضحك جامد وكريم كان جاي شايف مجدي بيضحك وفارس واقف حاطط ايديه في وسطه كريم : في ايه ماله ؟ فارس : حاله هبل بعيد عنك مجدي اخيرا وقف يتنفس : طليقته في بيته مع مراته وناويه تطبخله بنفسها وتأكله لا وطليقته دي ايه عمرها اصلا ما دخلت المطبخ ابوس ايدك اعزمني كريم ضحك : انا كمان يا فارس عايز اتعزم فارس : انتو في ايه ؟ ايه المشكله ؟ كريم : بجد انت مش شايف مشكله في ان طليقتك اصلا في بيتك لا وكمان هتدخل لمركز التحكم اللي هو المطبخ وتعمل اكل بايدها لسيادتك !! بجد انت مش شايف اي مشكله ؟ فارس : لا مش شايف واحده عند ناس وبتعرض مساعدتها فيها ايه ؟ مجدي : اولا دي مش واحده دي طليقتك .. دي حبيبتك القديمه اللي ياما عذبت ايمان علشانها .. ثانيا دي واحده عمرها ما دخلت المطبخ ناويه تدخل علشانك معني كده انها بتحاول تغريك باي شيء مهما يكون لدرجه انها هتتنازل وتدخل المطبخ .. ثالثا بقي والاهم اي ست في الدنيا ما بتحبش حد يدخل مطبخها لان ده مملكتها فما بالك الست دي حبيبتك السابقه وما بالك انها بتحاول ترضيك انت متخيل النار هتبقي عامله ازاي في بيتك ؟؟ كريم : اصلا يا فارس قعدتها في بيتك غلط مع مراتك .. مراتك مستحمله الوضع ده ازاي ؟ فارس : هيا اللي طلبته مش انا مجدي : مراته بتحبه ومستعده تعمل اي شيء علشانه كريم : المفروض يا فارس تقدر الحب ده ؟ فارس : انتو محسسني اني قايم اتجوز عليها دي مجرد اكله كريم : طيب طالما مجرد اكله اعزمنا بقي عليها وخليك جدع فارس : بس كده حاضر هعزمكم مجدي : تخيل يا كريم فارس قاعد وايمان علي يمينه وهيام علي شماله ودي تديله معلقه ودي معلقه الاتنين بيضحكوا كريم : الا بقي لو شبع هيختم بمعلقه مين ؟؟ الاتنين بيضحكوا جامد عليه فارس : والنعمه انتو عيال هبله هروح اكلم ايمان اقولها انكم جايين ده انتو غلسين صح ؟ فارس اتصل بايمان فارس : ايوه يا ايمان بقولك حبيبي .. كريم ومراته جايين علي الغدا ومجدي ومراته كلمي انتي بقي مراتاتهم واعزميهم ايمان : هتعزمهم علي اكل ست هيام ولا ايه ؟؟ فارس : هيام مين يا ماما.. هيام اخرها تسلق بيضه وهتسألك تسلقها ازاي ؟؟ معلش انتي اتعبي واعمليلنا اي حاجه كده من ايديكي قال هيام قال ولا اجيب من بره لو مش فاضيه او مش عايزه ؟؟ ايمان : لا يا حبيبي طبعا اهلا بضيوفك بس هاتلي رقم مرات كريم انا معرفوش وما اتقابلتش معاها غير مره واحده انا اصلا مش فاكره اسمها فارس : اسمها هدير هبعتلك رقمها واتس ايمان : وانت اشمعني فاكر اسمها يعني ؟ ومعاك رقمها منين ؟ فارس : اولا مش معايا رقمها هجيبه من كريم ثانيا فاكر اسمها لان كريم كتير بيتكلم قدامنا وبيقول اسمها زي ما انا مثلا بكلمك واقول اسمك قدامه ايمان : ماشي يا عم ماشي فارس بعتلها الرقم من كريم ايمان كلمتهم ودخلت المطبخ وبدئت تجهز غدا معتبر لضيوف جوزها ومنيره بتساعدها ونوعا ما هيام غارت من علاقتهم ببعض وحبهم الظاهر حست ان منيره ام لايمان مش حمي فارس اتصل وقال انه جاي هو وضيوفه .. هيام : انا رايحه اجهز نفسي لاستقبال الضيوف بعد اذنكم .. منيره : روحي انتي كمان يا ايمان جهزي نفسك مش عيزاها احلي منك في اي حاجه ايمان : هيبان قوي اني بعمل كده علشانها منيره : لا طبعا ضيوف جايين عندك انتي في بيتك انتي .. انتي تستقبليهم وبعدين مش كريم ده هو يعتبر رئيسهم في الشغل يعني حد تقيل هتقابليهم اول مره في بيتك بريحه الطبيخ والاكل دي .. روحي وانا جنب الاكل وبعدين للاسف الكل هيقارنكم ببعض فخليكي رافعه راسك لفوق انتي احلي واقوي واجمل وانتي اصلا احلي مليون مره بقلبك وبحبك وبابتسامتك .. يالا وابنك كمان انا هغيرله واخليه قمر زي ابوه .. اتحركي مفيش وقت فعلا ايمان سمعت كلام حماتها ودخلت اخدت شاور بسرعه ولبست فستان شيك جدا ولبست حجابها وحطت ميكب خفيف ابرز جمالها وكانت جميله فعلا بحجابها وقلبها الجميل فارس دخل هو وضيوفه وايمان طلعت تستقبلهم فارس : ايه الجمال ده .. انتي بتحلوي كل شويه ليه ؟؟ ايمان : بحلو بحبك انت كريم : نروح احنا بقي ايمان : لا طبعا اهلا بحضراتكم اتفضلو سلمت علي الكل ودخلوا كلهم وقعدوا وابنه طلع يجري فابوه شالو فارس : موزو حبيبي .. كريم : ما شاء الله شبهك قوي هدير : فعلا بيقولو اللي بتحب جوزها قوي بتجيب عيال تشبهو فارس : بجد ده ؟؟ انا عرفت عيال مجدي مش شبه ليه مجدي : قصدك ايه بقي؟؟ بت يا نجاه انتي ما بتحبنيش ولا ايه ؟ نجاه بصت لفارس : ايه يا فارس ده انت العاقل فارس : مره من نفسي بقي الكل بيضحك وهيام خرجت فالكل سكت .. كانت جميله بس عامله زي الملكه الشريره في فيلم سنووايت .. الكل سكت وبصلها فارس بصلها قوي وحس فعلا بالفارق بينها وبين ايمان .. ايمان جميله بطريقه مختلفه تماما عن هيام .. هيام جمالها جريء وغجري .. ولبسها فاضح للاسف غير ايمان اللي زي الجوهره المصونه.ودي كانت نقطه ضد هيام مش لصالحها القعده بقت مليانه توتر وقلق بعد دخول هيام ومنيره كمان دخلت وقعدت ايمان وقفت تجهز السفره ووقفت كمان منيره فنجاه وقفت نجاه : انا هساعدها ارتاحي انتي يا ست الكل هدير كمان : ممكن تسمحولي اساعدكم ؟ هيام : اتفضلي انتي ارتاحي هما اصحاب من حاره واحده وعارفين بعض مش هترتاحي معاهم هدير سكتت بس ايمان اتدخلت ايمان : طبعا لو تحبي اهلا بيكي اتفضلي بصوا الاتنين لبعض بتحدي ومجدي عايز لب يتسلي دخلو البنات التلاته يساعدوا بعض هدير : هو لو ينفع اسأل مين دي اللي بره ؟ نجاه وايمان بصوا لبعض ايمان : طليقه جوزي هدير فتحت بوقها : نعم وبتعمل ايه هنا ؟؟ ردها ؟ ايمان : لا طبعا بس هيا عامله فيلم ومتعوره في رجلها وكانت عيزاه يروحلها كل شويه شقتها فانا بدال ما هو يروحلها خليته جابها هنا هدير : شاطره بس انا لو مكانك كنت ... كنت سميتها ولا خنقتها .. انتي شايفه بتلبس ازاي ؟ ايمان : امال لو شوفتيها بالليل ؟ نجاه : اوعي تكون بتلبس قمصان نوم يا ايمان؟ ايمان : بتلبس يا اختي حاجات انا اتكسف البسها قدام فارس هدير : وجوزك بيبقي فين سيادته ؟ بيشوفها ؟ ايمان : طبعا ولو ما شفهاش تعمل نفسها تعبانه وتناديله لاوضتها هدير : وانتي ايه ؟ بتعملي ايه ؟انا كنت قتلته ؟ هو وهيا ؟! قال تناديلو اوضتها وهيا بقميص نوم ايمان : والله ما عارفه اعمل ايه ؟ هدير : ارفضي الوضع ده !! خيريه نجاه : لا طبعا فارس ما بيجيش بلوي الدراع ابدا ايمان : هيام سر مشاكلنا في اول كام سنه جواز وبعد ما استقرينا وشيلناها من دماغنا تماما رجعت تاني وبعدين سبق وخيرته وكان ديمابيبعد بحجه انه ما بيحبش الاسلوب ده وبيعند عليا هدير : وطبعا لو خيرتيه ممكن يعند تاني البت دي عايزه خطه نخلص منها ايمان : ان شاء الله نخلص منها علي خير بس عارفه انا متخيلتش انك حبوبه كده هدير : كريم علي طول ما بيتكلمش غير عن فارس وكان نفسي اتعرف عليكي نجاه : انتو معندكوش اولاد ؟؟ هدير بصت للارض : لسه ربنا ما ارادش ايمان : فعلا كله باراده ربنا .. لما اتجوزت فارس كنت هموت علي الخلفه ولما حملت بغبائي سقطت نفسي وبعدها لما ربنا اراد عطانا حمزه .. خلي املك في ربنا كبير هدير : ونعم بالله يالا بقي نخرج الاكل لاحسن الرجاله يفضحونا بره هيام بتتدخل في كلام الرجاله يمكن لانها مهندسه زيهم او يمكن لانها متحدثه لبقه منيره اتضايقت : حبيبتي انتي طفيتي علي الاكل اللي في الفرن اللي انتي عملاه هيام : هو حضرتك ما طفتيش عليه ؟ منيره : انتي ما قولتيش هيام : انتي عايزه تفهميني انها لسه في الفرن لحد دلوقتي ؟؟ منيره : انا معرفش قومي شوفي هيام قامت بسرعه ومجدي كتم ضحكته بالعافيه منيره : بس يا واد ... مجدي : اه من شغل الحموات منيره : انا مش حماتها .. انا حماه ايمان وبس فارس : انتي ما بتعامليش ايمان كحمي منيره : علشان هيا ما بتعتبرنيش حمي .. هيا اعتبرتني امها وانا اعتبرتها بنتي .. العلاقه متبادله يا فارس .. اللي بيحبك بصدق لازم تحبه بصدق كريم : قصف جبهه اسكت يا فارس منيره : هقوم اشوف البنات دي بتعمل ايه جوه هيام دخلت كانوا بيضحوا : هو الصينيه في الفرن فعلا ايمان : مفيش حاجه في الفرن هيام : امال قالت كده ليه ؟ عايزه تقومني وخلاص ايمان : مش يمكن لانه ذوقيا المفروض طالما الستات قامت تقومي معاهم ! هيام : الكلام ده انتي تعمليه يا جاهله لكن انا لأ ايمان : خدي صنيتك وشوفي هتعملي فيها ايه اتفضلي وبعدين خلينا العلم ليكي طلعوا الاكل والكل قعد وفعلا هيام قعدت جنب فارس وايمان منيره قعدتها جنبه من الناحيه التانيه وهنا مجدي مقدرش يسكت وضحك بهستيريه خلت الرجاله كلها تضحك ومحدش من الستات فاهم في ايه ؟؟ فارس ضحك لانه تخيل نفسه شهريار وواحده علي يمينه وواحده علي شماله والاتنين بيأكلوه اخيرا هديت موجه الضحك وبدؤا ياكلو بس الرجاله كل شويه يضحكوا كل ما ايمان او هيام يتحركوا هيام : عجبتك اللازانيا يا فارس ؟ الكل بص لفارس اللي مش واخد باله فارس : اول مره اعرف انك بتعرفي تعملي اي اكل هيام بصت لايمان : يعني عجبتك ؟؟؟ فارس هيجاوب بس اخد باله ان ايمان بصاله مستنيه اجابته ومش ايمان بس ده الكل مستني والكل بيبصله ومجدي متحفز للضحك كريم : جميله تسلم ايدك مدام هيام .. وحضرتك مدام ايمان تسلم ايديكم صراحه الاكل كله تحفه وبما اننا اتجمعنا وبصراحه القعده لذيذه يبقي ايه رأيك هدير الاسبوع الجاي يبقي عندنا هدير : اه يا ريت بس تنبيه انا مش بشطاره ايمان طبعا فهتضطروا تاكلوا بدون تعليق ايمان : يا حبيبتي كفايه ذوقك انتي كلك عسل كريم انقذ الموقف وانقذ فارس من حبل المشنقه واخيرا الرجاله لوحدهم فارس : متشكر يا كريم لحقتيني مجدي : كنت سيبتنا نتفرج عليه شويه كان نفسي اعرف هتقول ايه ؟؟ فارس : من يومك واطي يا مان .. كريم : وضعك كده مش حلو يا فارس وفعلا الوضح محرج ومراتك ليها حق عليك فحاول تخلص منه فارس : عندك حق واخيرا خلصت العزومه علي خير والكل ارتاح ايمان في حضن جوزها : علي فكره كريم انقذك النهارده فارس : انقذني من ايه ؟ ايمان : من سؤال هيام بس دلوقتي مفيش حد ينقذك مني .. عجبك اكلها ؟؟ فارس : انتي بتقولي ايه ؟؟ يعني واحده اول مره تدخل مطبخ وتعمل اكل .. هل انتي مثلا متخيله ان لو اكلها عجبني هرجعلها مثلا ؟؟ علشان اكله واحده ؟ ايمان : لأ مش حكايه ترجعلها فارس : ايمو انا بحبك وبحب اي اكل انتي تعمليه ولو كنت قلتلها اه عجبني كان هيبقي من باب الذوق والمجامله مش اكتر ايمان : واكلي انا عجبك ؟؟ فارس : بجد بتسألي نامي يا ايمان نامي .... ايمان امها تعبت وطلبت منها تروحلها وفعلا ايمان راحت وللاسف اضطرت تبات هناك ودي كانت فرصه لهيام تستغلها كويس فارس كان مع ايمان بالليل ومش عيزاه يروح ايمان : ما تبات معايا هنا ؟؟ فارس : انا من امتي ببات في بيت ابوكي يا ايمان !! ايمان : طيب بات في شقتنا القديمه؟ فارس : يعني مش فاهم انظفها الاول ولا ابات في ترابها كده ؟ في ايه يا ايمان مالك ؟ ايمان : مش عيزاك تبعد عني فارس : مش عيزاني ابعد عنك ولا خايفه عليا من هيام ؟؟ ايمان : الاتنين عندك مانع ؟ فارس : لا معنديش وبعدين امي في البيت ايمان : امك بتنام بدري فارس : انتي بتشكي فيا ؟؟ اني هخونك طالما انتي مش موجوده ؟؟ فارس رجع خطوتين لورا فارس : انا لو عايزها هرجعلها ولو عايز انام معاها من غير ما انتي تعرفي هنام مش محتاج اني استغل ليله هتقضيها بره ؟؟ ايمان : مش قصدي كده يا فارس فارس : انتي قصدك بالظبط كده !! عارفه الموضوع بقي يخنق ... بعد اذنك مشي خطوتين ورجع تاني فارس : معلومه صغيره انا لو فكرت ارجعلهاهقولك ما تخافيش مش هعملها من وراكي فبلاش موضوع المراقبه ده كل شويه .. لاني ببقي شايفك كويس وانتي واقفه مستنيه تشوفي رد فعلي ايه ومش بعيد اعمل حاجه مش عايز اعملها لمجرد اني اضايقك .. تصبحي علي خير مشي متغاظ منها وروح علي البيت ودخل من غير ما يرن الجرس رنته المعتاده وراح عند امه اللي كانت بتتكلم في التليفون منيره : ما تخافيش يا ايمان انا موجوده !! مش هنام حاضر واسيبهم .. يا بنتي فارس مالوش في العك ده ولو هيعمل حاجه هيعملها في النور يالا اول ما يوصل هبلغك ..... حاضر هكلمك كل شويه .... يا بت كلتي دماغي بقي ... حاضر مش هسيبهم يسهروا مع بعض فارس واقف وفي قمه غيظه ومتضايق جدا من ايمان ومن عدم ثقتها فيه ... هيام وراه بهمس : مراتك ما بتثقش فيك صح ؟؟ عينت مامتك حارس عليك ... صح يا بيضه كلهم خايفين مني .. يا تري هما شايفينك ضعيف قوي كده ولا شايفيني انا جميله قوي كده ؟؟ سابته ودخلت وهو علي اخره خبط ودخل لامه اللي قفلت تليفونها بسرعه فارس : قفلتي ليه ؟؟ ما تكملي خليها تكمل تعليماتها منيره : تعليمات ايه يا حبيبي ؟؟ فارس : انا عارف بقي تعليمات ايه ؟؟ منيره : يا حبيبي دي بس بتطمن عليا وعلي صحتي واتعشيت ولا لأ وبتشوف انت وصلت بالسلامه ولا لأ؟ فارس : لا فيها الخير وبعدين ماهي ممكن تكلمني انا تشوفني وصلت ولا لسه ؟ منيره: بقولك ايه قاطعها: ما تقوليش .. وموضوع المراقبه ده سخيف جدا وقسما بالله لولا ان عامل حساب لعشرتنا ووقفتها معايا لكنت اخدت هيام دلوقتي علي اقرب مأذون عندا فيها بس منيره : استهدي بالله يا فارس وادخل نام ايمان بتحبك فارس : عارف انها بتحبني وعلشان كده مستحمل بس قسما بالله يا امي ان طلعتي الليله تراقبيني زي ما هيا قالتلك مش هيحصل خير فانتي استهدي بالله بقي ونامي وما تخربيهاش عليها تصبحي علي خير لو محتاجه حاجه ناديلي سابها وخرج وايمان رنت تاني عليها وهو سمع امه بترد عليها بس سابهم ودخل اوضته كان متغاظ بس مش قادر يفهم ايه اللي مضايقه بالظبط ؟؟ غيره ايمان ؟ طيب ما هو ده حقها !! ولا دفاعاته اللي قربت تنهار قدام هيام ؟؟ ولا غيظه من هيام انها ما استحملتش زي ايمان وساعدته يقف علي رجليه ؟؟ ولا الجزء البسيط اللي جواه اللي لسه بيحن لهيام ؟؟ ولا احساسه بالذنب ناحيه ايمان لانها عملت كتير قوي واستحملت اكتر واكتر؟ ايه اللي مضايقه بالظبط ؟ اكيد مش مكالمه ايمان لامه لان ده شيء طبيعي جدا ولو هو مكانها استحاله يقبل ان مراته تبات في مكان مع راجل سبق وكان لها علاقه بيه ؟؟ مابالك انهم يباتوا لوحدهم !!! فارس : فوق لنفسك .. بتفكر كتير في ايه وليه ؟؟ هيام لازم تمشي بقي من هنا !!! دخل ياخد شاور يروق دماغه اللي هتنفجر دي يمكن الميه البارده تريح اعصابه وتهديه ... وهو جوه اتفاجئ بالباب اتفتح ودخلت هيام اللي كانت فرصتها اللي لو ضيعتها خلاص مش هترجع تاني فارس بصلها وهيا قلعت روبها فارس : سيادتك بتعملي ايه ؟؟ هيام : بستغل الظروف دخلت هيام معاه وهوغيظه من ايمان خلاه يفكر يستجاب لهيام او هو اقنع نفسه بكده بس فجأه عرف ان في خطوط حمرا مافيش بعدها رجعه وفي حاجات ما ينفعش نتمادي فيها زق هيام بعيد عنه وطلع هو بره وسابها ،،هيام لفت نفسها وطلعت وراه هيام :في ايه ؟ واوعي تقولي انك بتحب مراتك ؟؟ فارس : ماشي مش هقولك اني بحب مراتي هقولك اني مش هرتكب غلط زي ده هيام : محدش هيعرف اوعدك اني مش هعرف حد فارس : ديما بتبصي للناس وبس هيام : امال في ايه تاني هنبصله ؟؟ فارس : تبصي للي خلقك وتعملي حساب للحرام والحلال ولا ده شيء ما بيخطرش علي بالك ؟؟ اللي انتي عيزاه يحصل بينا ده من اكبر الكبائر وللاسف مالوش تكفير او ربك ما بيسامحش فيه .. ده اللي انا عامل حسابه هيام : انا مراتك يا فارس فارس : لا طبعا انتي طليقتي وانا طلقتك عند مأذون ... هيام : ردني فارس : حتي لو وخلي بالك من لو دي .. لو حبيت اردك لازم اتجوزك من تاني علي يد مأذون ... هيام : تعال نشوف مأذون فارس : هيام انا مش عايز ارجعلك افهمي بقي وابعدي عني .. انا جربت وفشلت معاكي ومقدرتش ولا اسعدك ولا حتي اكفي طلباتك اللي مكنتش بتنتهي.. انتي وصلتينا للطريق ده ودمرتي كل السكك بينا .. هيام : فارس انا بحبك ومقدرتش ابدا انساك ولا قدرت اعرف غيرك .. حاولت كتير وسافرت بره مصر خالص علشان اقدر انساك اواعرف غيرك بس مفيش راجل ابدا قدر يملي ولو جزء من الفراغ اللي انت سيبته جوايا.. واوعي تقول ان ايمان ملت الفراغ ده فارس : ايمان مش بس ملته لا ده دي عملت اكتر من كده بالكتير يا هيام .. وبعدين حتي لو ما مليتوش اللي عملته معايا مهما اعمل مش هقدر اعوضه او اسدد ديونها وافضالها عليا .. هيام : اوك عارفه ده كويس وما طلبتش منك اي شيء بخصوصها.. انا عايزه ابقي معاك وهرضي باي حاجه انت تقول عليها فارس : قصدك ايه ؟ هيام : اقصد اني هرضي ولو بساعه واحده كل يوم تيجي تقضيها في حضني واوعدك مش هطلب منك اكتر من ساعه واوعدك اني عمري ما هحاول اضايق ايمان او اتدخل في حياتها ومش هرهقك بطلباتي ابدا انا عايزه حضنك وبس يا فارس .. ده طلب كبير ؟؟ اتجوزني ومش عايزه غير ساعه وبس منك كل يوم ولو يوم ما فضيتش او ايمان احتاجتلك مش هتكلم ولا هطلبك ولو مش عايز حد يعرف باتفاقنا ده برضه موافقه المهم ان يبقي ليا حق اشوفك وبس فارس سكت ومعرفش يرد عليها وخصوصا لما دموعها نزلت وحس بحبها ونسي كل اللي فات فارس : هيام اطلعي بره ارجوكي ولو سمحتي لو انتي فعلا بتحبيني الصبح امشي من هنا ولو بتحبيني ما تهديش بيتي ده .. وما تنسيش ان في حمزه دلوقتي مش ايمان بس .. هيام : حاضر هطلع ومش هضايقك تاني بس ارجوك فكر في كلامي خرجت بره وبره شافتها منيره اللي بتبصلها وهيا عايزه تقتلها سابتها ودخلت اوضتها وقفلت علي نفسها بس منيره راحت وراها ودخلت وقفلت الباب وكلمتها بصوت واطي بس حازم منيره : عملتي فيلم وقبلناه !! بتحاولي ديما تغريه وسكتنا!! دمرتيه قبل كده وبرضه سكتنا ؟ راجعه تاني ليه ؟؟ عايزه ايه منه؟؟ هيام: بحبه منيره : كدابه انتي متعرفيش يعني ايه حب انتي بس عيزاه ملكك مش اكتر هيام : حتي التملك نوع من انواع الحب اوعي تنكري ان فارس كان مبسوط معايا منيره : كانت السكينه سرقاه دلوقتي هو مبسوط مع مراته وانتي جايه تهدي بيته تاني وتدمريه من تاني . انتي مالكيش مكان في البيت ده والصبح قاطعتها هيام : ماشيه الصبح ريحي نفسك بس انتي برضه مش عادله انتي عمرك ما عاملتيني بالطريقه اللي بتعاملي ايمان بيها ولا عمرك حبتيني زيها منيره : لان انتي من ساعت ما دخلتي بيتنا بصيتلنا من فوق وكأننا مش من مستواكي .. انتي اعتبرتينا غرماء ليكي وحاربتينا لكن ايمان من اول ما دخلت اعتبرتني ام ليها وعاملتني علي الاساس ده وانا اعتبرتها بنتي هيا عطت وانا قبلت وعطيت ..ايمان بتقعد تحت رجليا وتدلكهملي وانا تعبانه .. بتقعد جنبي وتعملي اي حاجه من غير حتي ما اطلبها منها مش انتي اللي لما مره واحده تعبت حبستيني نسيتي يا هيام عملتي ايه؟؟ اطلعي من حياه ابني سابتها وخرجت ووقفت قدام المرايه تفكر خطوتها الجايه ايه ؟؟ منيره حضرت الفطار وفارس طلع وقعدوا مع بعض يفطروا بصمت منيره : انا شفت هيام خارجه من اوضتك بالليل مبلوله فارس بصلها : مفيش حاجه حصلت بينا اطمني منيره : طبعا عارفه ان مفيش حاجه حصلت لان ابني انا وابوه ربيناه كويس وعلمناه الصح والغلط وربيناه علي قيم ومباديء اتمني انه ما ينسهاش فارس : ولما انتي عارفه انك مربياني صح بتتكلمي في الموضوع ده ليه ؟ انا طلبت منها تمشي ريحي نفسك منيره : انا عايزه اعرف انت بتسمحلها تدخل حياتك من تاني ليه ؟؟ ليه فاتحلها طريق يا فارس .. ايمان ما تستاهلش منك ده فارس : عارف عارف عارف ... عارف يا امي منيره : واما انت عارف ليه ؟؟ ليه يا فارس فارس : عايزه تعرفي ليه ؟؟ لاني اكتشفت انها لسه جوه ... ما خرجتش ابدا .. في جوايا شويه شك لازم انهيهم تماما .. اعمل ايه هاه؟؟؟ عارف ان ايمان ما تستاهلش مني غير الحب والاحترام وانا اقسم بالله بحاول بس ظهورها في حياتي تاني ملخبطني مش عارف اخد قرار مش عارف اخد حكم قاطع مش قادر اقفل الباب تماما .. عرفتي بقي ؟؟ منيره : طيب مش هقولك ايمان وهيام .. مش هقولك غير حاجه واحده بس .. فكر في حمزه وبس .. وانت هتعرف هتختار ايه ؟؟؟ مش هنتكلم تاني وايمان مش هقولها علي حاجه فارس : مفيش حاجه حصلت علشان تتقال منيره : مجرد دخولها اوضتك ده حاجه وحاجه كبيره كمان ... وبعدين لو مفيش حاجه ازاي دخلت ناشفه وخرجت مبلوله ؟؟؟؟ فارس بص لامه وسكت وما اتكلمش لان فعلا في كتير حصل مش ما حصلش .... هيام قامت لمت حاجتها وخرجت كان فارس وامه بيفطروا وهيا خرجت ومثلت الانكسار وهيا ماشيه فارس : اصبري هوصلك هيام : لا معلش خليك افطر براحتك فارس : قولت اصبري هوصلك وهما خارجين كانت ايمان داخله فبصتلهم ايمان : علي فين كده ؟ هيام : متشكره علي استضافتك ليا في بيتك يا ايمان انا مش عارفه اشكرك ازاي ؟ محدش يعمل اللي انتي عملتيه معايا واسفه لو ضايقتك باي شكل ايمان مش مصدقه : لا ده واجب .. انت رايح فين؟ فارس : هوصلها واروح علي الشغل .. والدتك اخبارها ايه ؟ ايمان : كويسه .. روح علشان ما تتاخرش علي شغلك يالا فارس اخد هيام ووصلها شقتها وطلعها فوق وهو نازل مسكته من دراعه هيام : ارجوك فكر في كلامي ساعه وبس مش عايزه اكتر من ده ...مش هكلمك تاني ولا هضغط عليك بس ارجوك فكر فارس اليوم كله مش عارف يركز .. هيام طلبها مش كتير ومش صعب وهو عايز ده اكتر من اي شيء .. وبعدين هو مش هيجي علي ايمان ابدا .. ممكن اصلا ما يعرفهاش .. بس ما يضمنش هيام لانها ممكن تروح تقولها وساعتها هيخسر ايمان وهو مش مستعد لده ابدا .. فضل يومين تايه ومش عارف يعمل ايه ؟؟ ايمان : طول عمرك بتتكلم معايا في اي شيء مهما يكون ليه المره دي ساكت ومش عايز تتكلم؟؟ فارس : يمكن لان الكلام هيوجع ايمان : وانا علي طول بتحمل قول وهسمعك فارس بصلها كتير ايمان : عندك شك انك هتلاقي حل لمشكلتك عندي ؟؟ فارس : لأ بس خايف انك فعلا تحليها بس علي حساب حاجه تانيه انا مش مستعدلها ايمان : طيب فكر بصوت عالي ايه رأيك ؟؟ فارس : موافق بس بشرط ايمان : موافقه علي شرطك قول فارس : اسمعيه الاول ايمان : قول سامعاك فارس : تسمعيني كصديقه او عشيقه مش زوجه ابدا ايمان عرفت هو هيتكلم عن ايه وعارفه هيقول ايه وقاومت دموعها تنزل ووافقت ايمان : هسمعك حاضر وعد هسمعك كصديقه قول فارس : اوكي انا بحب مراتي وبحب بيتي فوق ما تتخيلي وبحب ابني جدا ومتمسك بكل حاجه فيه ايمان : لكن الماضي ظهر ومش عارف تعمل فيه ايه ؟ فارس : هيام عرضت عليا عرض حسسني ان كل حاجه سهله وكل حاجه ممكنه ايمان : ايه هو العرض ده ؟؟ فارس : انها مش عايزه اكتر من ساعه واحده كل يوم مع وعد انها ما تطلبش اكتر منها وما تضايقكيش ابدا وما تدخلش في حياتنا نهائي بس عايزه تفضل معايا ساعه وبس ايمان الدنيا لفت بيها لانها ما تخيلتش ابدا ان فارس هيقولها كده بالصراحه دي .. ايوه كانت عارفه انه هيتكلم عن هيام بس مش انه بيفكر يرجعلها ومعرفتش تعمل ايه ؟؟؟ ونكمل بكره توقعاتكم ShiMoOo | ||||||||||
|  |
|
11-05-19, 01:04 PM
| #22 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| لعنه الماضي الحلقه ال ٢١ فارس : انها مش عايزه اكتر من ساعه واحده كل يوم مع وعد انها ما تطلبش اكتر منها وما تضايقكيش ابدا وما تدخلش في حياتنا نهائي بس عايزه تفضل معايا ساعه وبس ايمان الدنيا لفت بيها لانها ما تخيلتش ابدا ان فارس هيقولها كده بالصراحه دي .. ايوه كانت عارفه انه هيتكلم عن هيام بس مش انه بيفكر يرجعلها ومعرفتش تعمل ايه ؟؟؟ ايمان اتصدمت : وانت عايز الساعه دي ؟؟ فارس : لو قلتلك مش عارف هتصدقي ؟؟ مش عارف انا عايز ايه ؟؟ ايمان : طيب تعال نتكلم بالعقل الساعه اللي هتقضيها معاها هتكفيها ؟؟ هتكفيك انت ؟؟ ماهو اكيد انتو مش عايزين مجرد علاقه شهوانيه وخلاص لان احنا بني ادامين مش حيوانات !!! بلاش هل مع الوقت هتكفيكم الساعه دي ولا هيا مجرد جر رجل مش اكتر وهيا عارفه انه تلقائي الساعه هتزيد من نفسها !! بلاش كل ده نفترض انها حملت منك هتعمل ايه ساعتها ؟؟ هتفضل برضه ساعه بس ؟؟ الساعه دي يا فارس مجرد جر رجل مش اكتر ولا اقل ايوه هتبدأ بساعه بس عمرها ابدا ما هتفضل ساعه !! فارس : انا مفكرتش في كل ده ايمان بنرفزه : امال فكرت في ايه ؟؟ انك تنام معاها وخلاص ؟؟ هو ده اللي شاغلك ؟؟ ولا حنيت لاحترافها ؟؟ نسيت اول ما اتجوزنا انك شكيت خبرتها دي جابتها منين ؟؟ نسيت اول ما هيا ظهرت ؟ فارس : اللي بتكلمني حاليا دي مراتي مش صحبتي ؟؟ ايمان هديت وقعدت جنبه : لا مش مراتك لانها لو مراتك كانت عملت تصرف تاني ما تتخيلوش ابدا بس حتي الصاحب بيتنرفز علي صاحبه لما يلاقيه غبي بالشكل ده ؟؟ فارس : اوكي يا ايمان عندك حق انا غبي بس في جزء بسيط جوايا عمال يقول لو لو .. وانا مش عايز اللو دي تفضل عايز قلبي بنسبه ١٠٠٪ لمراتي وبس ايمان : وعلشان توصل لده عايز ايه ؟؟؟ فارس : عايز اجرب قربها ايمان بصتله بسرعه وبصدمه : نعم ؟؟ فارس : ما تفهمنيش غلط يا ايمان مش قصدي اني انام معاها ايمان : امال تقصد ايه يا فارس ؟؟ قربها ده يطلع ايه ؟؟ فارس : قرب مجرد قرب .. ايمان : وايه معني القرب بالنسبالك ؟؟ غير انكم تناموا مع بعض فارس : القرب له معاني كتيره غير النوم مع بعض ايمان : وانت متخيل انها عايزه المعاني التانيه ؟؟ اللي تيجي بيتك وتلبس قمصان نوم اشكال والوان علي الرغم من وجود مراته فدي مش في دماغها غير حاجه واحده بس فارس : ايمان .. كل كلمه انتي بتنطقيها انا فكرت فيها مليون مره قبلك ايمان : انت عايز ايه يافارس ؟؟ انت واخد قرار بلغهولي فارس : انا محتاج وقت .. اقرب فيه منها هقضي معاها الساعه دي لحد ما اثبت لنفسي اني تخطيتها تماما انا محتاج لده .. بعيد عنك انتي او بعيد عن اي ضغوط من اي حد انا محتاج انا بنفسي ابعد عنها فده مش هيحصل الا لما اقرب منها واوعدك اني مش هلمسها ايمان : لحد امتي ؟؟ فارس : يعني ايه لحد امتي ؟؟ ايمان : يعني مش هتلمسها لحد امتي ؟؟؟ ولو اكتشفت انك لسه بتحبها وانك ما تخطيتهاش ساعتها ايه العمل ؟؟؟انت عارف ايه هو الجنون ؟؟ هو انك تكرر نفس التجربه مره وري مره وتتوقع نتيجه مختلفه .. ده الجنون بعينه واللي انت بتعمله بتعيد نفس التجربه ومتوقع النتيجه تختلف .. فارس : اوكي انا معاكي بس انا ما بحبهاش وتخطيتها والاحتمال اللي انتي بتقوليه مرفوض تماما بس محتاج انا اكده لنفسي انتي فهماني ولا انا كلامي ملوش معني ايمان : للاسف انا فهماك .. روح يا فارس خد قرارك براحتك وخد الوقت اللي انت عايزه وشوف هتعمل ايه ؟؟؟؟ تصبح علي خير سابته ودخلت تنام او بمعني تاني معدتش قادره تمسك دموعها اكتر من كده .. هو حاسس بيها وحاسس بمنتهي غباؤه بس مش عايز عمره كله يفضل يسأل نفسه لو راحلها كان هيفضل معاها ولا هيختار ايمان ؟؟؟ الصبح اخيرا طلع وهو راح شغله لانه المفروض يسلموا العربيات النهارده .... ايمان استنت لحد ما مشي ولمت هدومها وهدوم ابنها وماشيه منيره : غلط تسيبيه يا ايمان ايمان : اسفه يا ماما مش قادره ابقي عارفه ان جوزي رايح لوحده تانيه علشان يقرر هيختار مين فينا وافضل في بيته مش هقدر منيره : هيختارك انتي ايمان : الله اعلم .. فارس لما هيام بتبقي موجوده بيلغي عقله تماما واهو اول ما ظهرت برجلته وشقلبت دنيته كلها .. للاسف فارس لسه بيحبها منيره : اديله فرصه يا ايمان ايمان : ربنا يسهل يا ماما بعد اذنك منيره : ايمان انا ما اقدرش اعيش من غيرك ومن غير حمزه ايمان : كل يوم بعد ما فارس ينزل شغله هيجبهولك منيره : فارس لو لف الكون كله مش هيلاقي ضفرك ايمان : تسلمي يا ست الكل تسلمي مشيت وفارس رجع اخر النهار مهدود بينادي علي ايمان لانها هيا اللي بتريحه دخل اوضه النوم بس ما لقاهاش فارس : امي .. ماما .. ايمان فين ؟؟ راحت فين ؟؟ منيره : راحت بيت ابوها يا فارس فارس : ايه ؟؟ ليه ؟؟ منيره : لما راجل يقول لمراته انه مش عارف يختار بينها وبين واحده تانيه مستني منها ايه ؟؟ تقولك هاتها هنا وتنام وسطنا !!! فارس بص لامه وما ردش ساب البيت وخرج وراح لايمان .. دخل بيتهم واخدها لوحدهم فارس : سيبتي البيت ليه ؟؟ احنا ما اتفقناش علي كده !!! انتي وعدتيني تسمعيني كصديقه ايمان : وسمعتك كصديقه وعطيتك رأي لكن كزوجه مش هقدر استني في بيتك وانت مش قادر تختار .. فارس انا مقبلتش دبلتها بس في ايدك ازاي عايزني اقبلها هيا كلها .. ومرضيتش اقولك يا انا يا هيا فارس : لو قولتيها هختارك انتي من غير ما افكر حتي ايمان : عارفه بس هتختارني علشان حمزه مش اكتر فارس : لأ ايمان : متأكد ؟؟؟ فارس :........ ايمان : طبعا مش متأكد .. فارس عارفه انك محتاجني وعارفه انك بتحب علاقتنا وبتحب بيتك وابنك بس للاسف ده مش مكفيني .. عايزه قلبك كله ومش عايزه شريك فارس : وده نفس اللي انا عايزو ايمان : خلاص يبقي لما قلبك كله يبقي ليا ابقي تعال غير كده اسفه مش هقبل انصاف حلول .. قبلتها قبل كده وما عجبتنيش فارس : طيب خلي مسافه بينا بس ارجعي البيت معايا ايمان : ارجوك يا فارس سيبني دلوقتي بدال ما اتهور .. فاكر اخر مره اتهورت فيها خسرت فيها بيبي فارجوك انا مش حمل خساير تانيه .. احترم رغبتي زي ما انا بحترم رغباتك سابها ومشي وللاسف معرفش يروح فين فراح لهيام ودخل قعد معاها هيام : اخدت قرار ولا لسه ؟ فارس : لسه .. هيام محتاج وقت شويه خلينا كده مع بعض .. نتكلم نرغي لكن مش علاقه ومش هردك دلوقتي هيام : براحتك حبيبي جت تقرب منه بس هو بعد فارس : من غير اغراءات يا هيام هيام : يعني ايه مش من حقي المسك ؟؟ فارس : ايوه مش من حقك هيام : وايمان بس من حقها ؟؟ فارس : من اولها .. سيادتك قولتي مالكيش دعوه بايمان ولا نسيتي بسرعه هيام : مش قصدي اتدخل في ايمان .. بس قصدي اني بحبك وعايزه اقرب منك مش اكتر فارس : انا قايم سلام هيام : الساعه مخلصتش فارس : تعبان اليوم كان طويل ومتعب هيام : انا ماليش دعوه دي هيا ساعه فارس : كنت متخيل انك اتغيرتي لكن انتي زي ما انتي .. الظاهر اني غلطان هيام : فارس فارس : تصبحي علي خير سابها ومشي وروح علي بيته وخاف انه يكون باع الغالي بالرخيص ... تاني يوم كريم عزمو علي السباق وراح فضل معاهم شويه وبعدها اتخنق فسابهم وروح وراح عند هيام يقعد معاها شويه هيام : ايمان اخبارها ايه وحمزه ؟؟ فارس : كويسين .. حمزه كالعاده بيسهرها طول الليل هيام : عارف لما كنت بشوفها سهرانه بيه وهتموت وتنام احمد ربنا اني ما اتهورتش وخلفت فارس : وهو كان بايدك وانتي منعتيه ؟؟ هيام بقلق : ايه ؟؟ ايه اللي كان بايدي ؟؟ لا طبعا قصدي اني مكنتش هقدر اتحمل مسؤليه زي دي .. كنت هبقي ام فاشله .. مش اكتر فالحمد لله اني مخلفتش كنت هعذبه معايا فارس : اه .. انا ماشي يالا سلام اشوفك بعدين ... الصبح راح علي شغله وهناك كريم اول ما شافه كريم : فارس مصيبه حصلت فارس : يا ساتر خير في ايه ؟؟ كريم : امبارح في السباق حصلت حادثه واحد فقد السيطره علي عربيته والمشكله انه اخد في وشه كام عربيه تانيه فارس : يا الله علشان كده ما بحبش السباقات .. بحس انهم بيعرضوا نفسهم للخطر بدون ادني سبب المهم حد جراله حاجه كريم : طبعا عربيه الولد اتدمرت تماما وهو جواها وحالته حرجه والعربيتين اللي اتقلبوا العيال يرضه اللي فيها في العنايه المركزه فارس : لا حول ولا قوه الا بالله كريم : فارس العربيات سليمه ؟؟ فارس : قصدك ايه بسليمه ؟؟ كريم : اقصد ان هيكون في تحقيق لان العربيه اتعدلت فانت متأكد ان العربيه سليمه ولا فيها خلل؟ فارس : لا طبعا العربيات العشره سليمه وجربتهم كلهم بنفسي في الاخر واتأكدت من كل واحده وسوقتها علي اقصي سرعه ممكن توصلها كريم : يعني احنا في السليم ؟؟ فارس : طبعا في السليم من الناحيه دي ما تقلقش بس انا مش عايز اشتغل في تعديل السرعات تاني .. التعديل في الموتور .. في استهلاكها للبنزين .. في قطع غيار تكون اوفر لكن في سرعتها وعربيات سباق تاني فياريت لأ كريم : ان شاء الله يالا ربنا يسترها فارس روح عند هيام وقعد معاها شويه وحكالها اللي حصل وكالعاده ما اهتمتش فارس : علي فكره انا ممكن اضر في الموضوع ده هيام : لا طبعا واحد متخلف معرفش يسيطر علي عربيته انت مالك .. فارس : علي فكره ده شاب صغير وممكن يموت ؟ هيام : ما يموت احنا مالنا كل واحد مسؤل عن نفسه فارس بصلها وعرف انها زي ما هيا مفيهاش اي شيء اتغير وحن لايمان وكلامه معاها واهتمامها بيه سابها وقام روح علي بيته اللي اشتاق لايمان فيه الصبح قام بيلبس والجرس رن وامه فتحت وجتله منيره : الحق يا فارس فارس : في ايه يا امي خير ؟؟ منيره : بوليس بيسألوا عليك فارس : بوليس ؟؟ ما تقلقيش ده بسبب السباق منيره : سباق ايه ؟؟ فارس : ما تشغليش بالك انتي خرج فارس وقابلهم الظابط : باشمهندس فارس محمد عبد السلام؟؟ فارس : ايوه انا خير ؟ الظابط : اتفضل معانا فارس : ليه ؟؟ الظابط : حضرتك متهم بقتل هيثم السيد احمد فارس : نعم ؟؟ يطلع مين ده ؟؟ الظابط : اتفضل معانا وهناك هتفهم كل حاجه . اتفضل بلاش شوشره منيره : يا لهوي فارس فارس : اتصلي بمجدي يا امي وهو هيعرف يتصرف وما تقلقيش فارس مشي معاهم ومنيره اتصلت بمجدي اللي اتصدم بس قالها انه هيتصرف واتصل بكريم وبلغه كريم : هاخد المحامي واروحله ان شاء الله خير منيره لبست وطلعت جري مش عارفه تعمل ايه فراحت لايمان ايمان : اهلا اتفضلي يا ست الكل في ايه مالك؟؟ منيره : فارس قبضوا عليه يا ايمان ايمان : ايه ؟؟ليه؟؟ ازاي ؟؟ منيره : معرفش بيقولوا متهم بالقتل !!! قتل يا ايمان ايمان اتصدمت وحست انها هتموت .. لو فارس جراله حاجه هيا تموت ايمان : ماما فارس مش هيجراله حاجه اهدي .. هنتصل بمجدي ونشوف في ايه اتصلت بمجدي اللي لسه مش عارف اي حاجه الكل راحوا علي القسم وطبعا معرفوش يشوفوا فارس نهائي بس الكل فهم ايه اللي حصل ابو الولد اللي عربيته اتقلبت مات في المستشفي وابوه عرف بموضوع تعديل العربيه واتهم فارس انه بوظ العربيه وده سبب قتل ابنه .... فارس اتحبس علي ذمه التحقيق طبعا واتحول للنيابه ومعرفوش يشوفوه هيام ابوها رجع من السفر وراحتله بسرعه هيام : بابي انا محتاجه المحامي بتاعك بسرعه عاصم : الله يسلمك احنا الحمد لله كويسين وانتي كمان وحشتينا هيام : بابي ارجوك المحامي عاصم : في ايه مالك ؟ عملتي ايه؟؟ هيام : انا ما عملتش ده لفارس عاصم : تاني فارس يا بنتي سيبيه في حاله بقي هيام : يا بابا افهم هو مقبوض عليه ومحتاج محامي عاصم : مقبوض عليه ليه ؟؟ حكت لابوها كل حاجه وابوها فعلا بعتله المحامي بتاعه وراحله النيابه بس كريم كان جاب محامي وشكروا محامي عاصم وخلوه يمشي ايمان عايزه تشوف فارس وهيام كمان وكلهم مع بعض ايمان - هيام - المحامي - كريم المحامي : انا مقدرش اجيبلكم انتو الاتنين اذن بالزياره هيام : انا لازم اشوفه اتصرفوا ايمان بصت للارض وسكتت ما اتكلمتش وكريم حس بيها كريم : اصلا ما ينفعش تشوفيه .. هنعملك الزياره بصفتك ايه ؟؟ هيا ومراته لكن انتي ايه ؟ هيام : فارس ردني ايمان بصتلها بوجع لانها ما تخيلتش ده ابدا كريم : ردك ؟؟ امتي ؟؟ هيام : ردني من فتره المحامي : طيب هاتي قسيمه الجواز هيام : ردني بالكلام مش عند مأذون .. كان مستني بابي يرجع من السفر علشان نعمل حفله صغيره علي الضيق كريم : يعني رسمي حضرتك برضه مش مراته .. مراته هيا اللي من حقها تشوفه والزياره مسموحالها هيا بس المحامي : بكره ان شاء الله مدام ايمان تصريح الزياره هيكون جاهز وهتشوفيه .. وفعلا الصبح راحت ايمان علشان تقابل فارس وكريم اخدها وقابلوا المحامي بس اتفاجؤا بهيام كمان جايه كريم : انا قلتلك انه مش هينفع هيام : وانا مقولتلكش اني محتاجه منكم حاجه انا المحامي بتاعي اتصرف وهدخل معاكم اشوفه وبالفعل دخلوا كلهم يقابلوا فارس اللي جالهم واتفاجيء بيهم كلهم بس ما شافش غير ايمان بس فراحلها هيا وهيا رمت نفسها في حضنه واكتشف انها وحشاه جدا زي ما يكون بقاله سنين ما شفهاش كل ما تيجي تبعد من حضنه مش بيسيبها ايمان : المحامي اكيد عايز يتكلم معاك اخيرا بعد شويه فارس : طمنيني الاول انتو عاملين ايه ؟؟ امي اخبارها ايه وصحتها عامله ايه وحمزه وفرح كلكم ؟؟ ايمان : احنا كلنا كويسين ما تقلقش انت علينا فارس : ما تسيبيش امي وحدها يا ايمان ايمان : هو انا محتاجه انك تقولي ده !! ما تخافش عليها انا معاها فارس : عارف انك معاها وعارف انك مش محتاجه اوصيكي علي اي حاجه هيام : ازيك يا فارس وحشتني فارس ابتسملها بالعافيه : الحمد لله كويس اتكلموا كلهم مع بعض لحد ما وقت الزياره خلص وماشيين سلم علي ايمان جامد وحضنها جامد فارس : ان شاء الله هتعدي يا ايمان ايمان : اكيد يا حبيبي وهترجع تنور بيتك فارس : وانتي مش هتسيبي بيتي تاني فاهمه ؟؟ هقتلك لو سيبتيه ؟؟ واتحبس بقي بجد ايمان : بعد الشر عليك اطلع بس الاول وكل حاجه تتعدل بعدها لو محتاج اي حاجه بلغني مشيوا والمحامي بدأ يطلب لجنه تكشف علي العربيات كلها اللي فارس عدلها وقالهم ان العشر عربيات اتعدلوا بنفس الطريقه وده ممكن يتأكدوا منه بسهوله فلو في عيب هيبقي موجود في الباقيين وان الحادثه حصلت نتيجه ان السائق فقد قدرته علي السيطره علي العربيه وده خطأ منه مش من التعديل وفعلا بدأت اللجنه شغلها وبدأ يدرسوا العربيات كلهم ايمان مرضيتش تكلم فارس او تسأله عن هيام بس فارس حس ان في حاجز بينهم هو مش عارف يتخطاه كريم كان معاه وقبل ما يمشي فارس : كريم خلي بالك من بيتي وخلي مراتك تروح لايمان وتتكلم معاها حاسس ان في حاجه مضيقاها كريم : غير انك محبوس يعني ؟؟ فارس : ايوه غير حبسي كريم : وانت مش عارف ليه سيادتك ؟؟ فارس مستغرب : انت بتتكلم كده ليه ؟؟ اكيد لو عارف مش هسألك كريم : مش يمكن لان سيادتك رجعت طليقتك لذمتك تاني فارس : رجعتها ؟؟ رجعت مين ؟ انت بتتكلم عن ايه ؟؟ كريم : عن ست هيام فارس : مين قال اني رجعت هيام ؟؟ انا ما رجعتهاش كريم : هيا قالت قدامنا كلنا انك رديتها ومستني ابوها يرجع علشان تعمل حفله وتتجوزا رسمي فارس : نعم !! لا طبعا كل ده كدب علشان كده ايمان زعلانه .. انت لازم تروحلها دلوقتي وتقولها فاهم ؟؟ دلوقتي كريم : حاضر هعدي عليها واقولها وفعلا عدي زي ما قال لفارس ومنيره دخلته وايمان خرجت تقابله ايمان : يا اهلا بيك باشمهندس كريم .. مفيش جديد كريم : انا لسه جاي من عند فارس دلوقتي ايمان : واخباره ايه كويس ؟؟ كريم : اه الحمد لله بس قلقان عليكي انتي ايمان : انا ؟ انا كويسه كريم : ان شاء الله ديما بس هو بلغني برساله اقولهالك ايمان : ايه هيا ؟؟؟ كريم : انه ما ردش هيام ولا اتفق معاها علي ده ولا في اي شيء من اللي هيا قالته ايمان : امال هيا بتكدب يعني ؟؟ طيب هتكدب ليه ؟ كريم : الله اعلم بس يمكن لانها عايزاكي تبعدي بنفسك او تزيحك من طريقها ؟ الله اعلم الستات بيفكروا ازاي ؟ ان كيدهن عظيم ايمان : طيب انا متشكره جدا لوقفتك معانا دي ومش عارفه من غيرك كنا عملنا ايه ؟ كريم : فارس وقف جنبي واحنا الاتنين رفعنا بعض قوي وبعدين احنا مفيش جميل بينا انا اعتبرته زي اخويا واكتر شويه بكره ان شاء الله المحاكمه وانا متفاءل خير ..والمحامي برضه متفاءل ايمان : ان شاء الله .. ان شاء الله كريم مشي وايمان فرحت ان هيام مش درتها بس لازم تعمل اي شيء او تاخد موقف لازم هيام تطلع من حياتهم بقي منيره : ايمان حبيبتي ادخلي ارتاحي بقي بكره محاكمه فارس وان شاء خير ايمان : بإذن الله يا امي ربنا عمره ما هيتخلي عنا ابدا ايمان دخلت تنام وبتحلم بفارس يخرج ويعيشوا حياتهم بقي وبتفكر تخلف تاني ودعت تجيب بنوته تبقي قلب ابوها بس حمزه صغير !! النهار طلع والكل راح للمحاكمه ومستنين .. اول ما فارس خرج ايمان جريت عليه وهو ضمها ايمان : عايزه اخلف تاني يا فارس فارس : ايه ؟؟ تخلفي ؟؟ ايمان : اه عايزه بنوته فارس : مجنونه انتي .. اطلع من هنا الاول وبعدين نشوف الموضوع ده يا مجنونه ايمان : بس حمزه صغنن قوي فارس : حمزه ... يا مجنونه .. مش صغير عقبال ما يحصل حمل ومع شهور الحمل هيكون كبر وبعدين معاكي يا مجنونه ابتسملها والقاضي هيخرج فكل واحد قعد مكانه المحاكمه كانت طويله وفيها جدل كتير والمحامي اللي ضد فارس كان قوي وحط كل الغلط علي فارس والامور مش مبشره نهائي .. ابو الولد اتهم فارس انه قتل ابنه واخيرا جت اللحظه اللي الكل مستنيها .. لحظه النطق بالحكم القاضي : حكمت المحكمه حضوريا علي المتهم فارس محمد عبد السلام بتحويل اوراقه لمفتي الجمهوريه .. رفعت الجلسه ايمان صرخت ومنيره وقعت من طولها وهيام اتصدمت وفارس كمان بص لعيلته واخدوه وسط حاله هرج ومرج .. ايمان : انت قولت انك متفاءل المحامي : القضيه كانت مضمونه .. واللجنه معرفش غيرت تقريرها ليه ؟؟ في حاجه مش صح ايمان : جوزي هيتعدم كريم : احنا ممكن نطعن في الحكم ونطلب استئناف صح ؟ المحامي : وده اللي انا هعمله بعد اذنكم منيره تعبت واخدوها المستشفي وايمان في حاله انهيار وهيام طلبت من ابوها يتدخل حتي لو هيهربوه من البلد هيام راحت لايمان ايمان : عايزه ايه مني ؟؟ جايه ليه ؟؟ هيام : انا رحت لفارس وعرضت عليه مساعدتي ورفضها وجايالك انتي تقنعيه روحيله بكره واقنعيه ايمان : اقنعه بإيه ؟؟ هيام : يهرب .. بابا هيجهز كل حاجه وهيهربه بره مصر ايمان : وانتي طبعا هتسافري معاه ؟؟ هيام : تفرق دي دلوقتي ؟؟ ايمان فارس هيتعدم ولا انا ولا انتي .. ايمان : هروحله بكره ايمان اول النهار راحت لفارس وقابلته واول ما شافها حضنها جامد فارس : انا قصرت معاكي كتير قوي يا ايمان .. سامحيني وخلي بالك من حمزه وامي ايمان : هششش ما تتكلمش كده انت هتطلع من هنا انت ليه لابس كده ؟؟ فارس : البدله الحمرا .. ده اللبس للي زيي .. للي هيتعدموا ايمان عيطت : انت مش هتتعدم هيام بتقول ابوها قاطعها فارس : عايز يهربني بره مصر .. لا طبعا ايمان : ليه لأ ؟؟ هاه ؟؟ هتعيش فارس : اعيش هربان عمري كله ؟؟ واسمي يتلطخ بالعار انا هقف هنا وهحاول اثبت براءتي ولو معرفتش انتي هتربي ابني وتعرفيه اني مقصدتش ابدا ااذي حد ابدا .. وبعدين يمكن اكون انا غلطان فعلا .. انا السبب في موت الولد ده وحرقه قلب ابوه بالشكل ده .. ايمان : فارس انت بتقول ايه ؟؟ انا مقدرش اعيش من غيرك فارس : وانا مقدرش اهرب يا ايمان واعيش عمري كله بره بلدي .. مش هعرف اعيش بره .. مش هقدر .. ده نفسه حكم الاعدام .. وبعدين انتي هتسافري ازاي معايا وابني ؟؟ اعيش من غيركم ؟؟ يبقي لازمتها ايه ؟؟ ايمان ريحي نفسك انا مش ههرب ولو عمري خلص لكده مش هعترض .. الاستئناف اترفض وفارس اخد حكم الاعدام واخدوه ينفذوه ... وحطوا حبل المشنقه حوالين رقبته ... حياته كلها مرت قدام عنيه هيام ابوه امه ايمان فرح عيالها ابنه ودي كانت اخر صوره جت في باله واتمسك بيها وابتسم وغمض عنيه وصوره ابنه بيضحك وبيقول بابا قدام عنيه لازم يتمسك باللحظه دي قوي .. غطو راسه بغطا اسود وحطوا الحبل حوالين رقبته وسمع حد بيقوله اتشهد .. ونكمل بكره توقعاتكم ShiMoOo | ||||||||||
|
| |
|
11-05-19, 01:05 PM
| #23 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه ٢٢ فارس سمع حد بيقوله اتشهد وفجأه حس بالحبل بيخنق رقبته وهو متشعلق في الهوا وروحه بتطلع واحده واحده ايمان بتصرخ بصوتها كله وبتنادي عليه @@ ايمان ... ايمان ... ايمان @@ ايمان قامت تصرخ وتعيط وتنتحب منيره : لا حول ولا قوه الا بالله ايه يا بنتي قومي استعيذي بالله وقومي ايمان بتبص حواليها مش فاهمه حاجه وفرح ومنيره فوقها بيكلموها وفجأه استوعبت ان كل ده حلم مش اكتر ففضلت تعيط ومحدش فاهم مالها .. منيره قعدت جنبها واخدتها في حضنها تطبط عليها منيره : اكيد كابوس استهدي بالله واستعيذي بيه وان شاء الله ربك كل اللي عنده خير استهدي بالله فرح : تلاقيها قلقانه من محاكمه بكره .. ايمان ادعيله رينا يفك ضيقه مش بايدينا حاجه غير اننا نقول يا رب ايمان فضلت تدعي وتقول يا رب ما يحرمها من جوزها ابدا .. فجأه حست بمدي تفاهه كل حاجه .. ازاي كانت بتزعله او تزعل منه ؟؟ الدنيا اصغر من اننا نقضيها زعل او خناق وبعدين ممكن الانسان اللي بتتخانق معاه تصحي من النوم ما تلقيهوش جنبك وساعتها ندم الدنيا مش هيكفي .. النهار اخيرا طلع والكل اتحرك علي المحكمه وهناك ايمان اترجت كريم يحاول يخليها تشوف فارس قبل المحاكمه باي طريقه .. وفعلا دخلوا كلهم يشوفوه ايمان اول ما شافته جريت عليه واتعلقت في رقبته وفضلت تعيط كتير قوي وتبوس فيه ... فارس محرج لانهم مش لوحدهم والكل حواليهم وهيام بصالهم والغيره ماليه قلبها فارس : يعني انا مش بعترض بس افهم في ايه مالك ؟؟ ايمان مالك ؟؟ بيحاول يبعدها علشان يفهم مالها بس هيا متعلقه في رقبته وبس فارس : امي في ايه مالها ؟؟ في حاجه حصلت ؟ منيره : لا يا ابني هيا صحيت بالليل تصرخ ومن ساعتها مش مبطله عياط نهائي فارس : ايمان كلميني في ايه مالك ؟؟ ايمان بعدت وشها عن رقبته ثواني ومسكته بايديها الاتنين ايمان : في اني بحبك قوي فوق ما تتخيل ..فارس لو بتحب هيام وهتسعدك اتجوزها وما تضيعش وقت تاني ابدا وانا مش هتكلم ولا هزعل منك حتي ولو تحب تجيبها في البيت معنديش اي مانع لدرجه اني مستعده اخدمها كمان وهيبقي علي قلبي زي العسل المهم انك انت تكون مبسوط وسعيد فاهم ؟ المهم انك تكون موجود معايا !! المهم انك تكون في الدنيا دي اي شيء تاني يهون ... اي شيء تاني مالوش معني .. اي شيء يفرحك ويسعدك اعمله وانا هكون اكتر من مبسوطه كمان .. فارس : انتي مالك يا ايمان ؟ انتي كويسه حبيبتي ؟؟ ايمان : طول ما انت كويس انا كويسه يا عمري كله المحامي دخل : يالا هنبدأ الكل قلبه بيدق بخوف وقلق ومستنين ايه اللي هيحصل .. بدئت المحاكمه والكل بيتكلم كتير وايمان مش سامعه ولا شايفه غير فارس وبس وهو كمان مش شايف غيرها .. عنيه عليها هياوبس .. دموعها نزلت وهو من بعيد مركز معاها فبيشاورلها وكأنه بيقولها تمسح دموعها وعمل اشاره انها تبتسم فهيا مسحت دموعها وابتسمتله وهو كمان ابتسم معاها ساعتها كان الكلام موجهه ليه بس هو مش سامع اصلا لحد ما المحامي زقه وطلب منه يركز فبدأ يركز معاهم وطلبوا منه يشرح هو عمل ايه في العربيات بالظبط قدام اللجنه .. المحامي : انت اتأكدت ان العربيات كويسه وشغاله؟ فارس: طبعا .. كل عربيه بخلصها كنت باخدها وبطلع بيها وبسوقها علي اقصي سرعه ولفتره طويله علشان اشوف رد فعلها او اشوف السيطره عليهاايه ؟؟ او لو في اي عيوب في حاله السرعه ؟؟ المحامي : وعملت ده بنفسك في كل عربيه ؟؟ فارس : طبعا .. كل عربيه اتأكدت منها بنفسي واتأكدت من تعديلها بنفسي وجربتها بنفسي المحامي : انت تعرف اي حد من اللي شاركو في السباق ؟؟ فارس : لأ .. معرفش اي حد المحامي : طيب العربيات مختلفه ولا زي بعض ولا ايه بالظبط ؟؟ فارس : العربيات كلها موديل واحد وسنه واحده المختلف بس الوانهم المحامي : في رأيك ايه اللي سبب الحادثه ؟؟ فارس : الله اعلم بس اعتقد انه فقد تركيزه للحظات او حاجه تانيه شغلته وطبعا لو شرد للحظه مع السرعه العاليه ده كفايه حد وقف : انت قتلته .. انت السبب القاضي : هدوء في المحكمه والا هطلعك بره .. فضل كتير في المحكمه وفي النهايه القاضي: بعد الاطلاع علي القضيه رقم ... وسماع كافه الشهود وسماع رأي اللجنه التنفيذيه حكمت المحكمه ببراءه فارس محمد عبد السلام رفعت الجلسه الكل هيص ومنيره زغرطت وايمان جريت علي فارس حضنته وهو شالها وفرحه ماليه الجو .. هيام سلمت علي فارس وحاولت تقرب اكتر بس هو خلي مسافه بينهم وهما خارجين ايمان : بابا وماما بره ومعاهم حمزه فارس : بجد وحشني جدا خرجوا بره وهو شال ابنه في حضنه ومراته جنبه عاصم : دي عيله حرام تدخلي بينهم ؟ لو انتي حبتيه بجد ما تدمريش بيته تاني هيام بصت لابوها باستغراب هيام : انت بابايا انا ؟؟ عاصم : وعلشان انا ابوكي فمش عايزك تبقي خرابه بيوت !!! انتي سبق واتجوزتيه وما ارتحتوش مع بعض عايزه ايه منه تاني ؟؟ هيام : بحبه عاصم : لا ده مش حب .. علي الاقل خليكي صريحه مع نفسك .. انتي بس وجعك انه تخطاكي وراح لواحده انتي حاسه انها اقل منك وبقي عنده بيت واولاد .. انتي كان ممكن تكوني مكانها لو وقفتي جنبه وخلفتي منه لكن انتي اختارتي الحياه عنه وبالتالي خسرتيه فكفايا بقي ما تضيعيش عمرك .. شوفي حد يحبك وتحبيه وابني بيتك الخاص .. كفايا بقي يا بنتي ... فارس ما اعتقدش ابدا هيضحي باللي في ايديه .. علي الاقل مش علشانك ... يالا بينا مشيوا وهما ماشيين هيام اصرت تسلم عليه قبل ما تمشي فراحتلهم وسلمت وباركت وحضنت فارس وهيا باصه لايمان علشان تشوف الغيره في عنيها بس اتفاجئت بيها مبتسمه وباصه للارض فارس : هيام .. احنا محتاجين نتكلم انا وانتي هيام : يالا بينا فارس : لا لا مش دلوقتي ... دلوقتي عايز اروح بيتي وارتاح بعدين ايمان : لو تحبي يا هيام تيجي معانا اهلا بيكي ؟ فارس بصلها باستغراب وهيا مبتسمه بحب هيام : لا متشكره هيبقي بينا تليفون سلام سابتهم ومشيت مع ابوها وهما روحوا علي بيتهم والكل بيهني ويبارك لفارس وهو قاعد وسطهم بس نفسه يقوم وياخد مراته في حضنه وينام وبس ... ايمان : قوم ارتاح بقي ما اعتقدش حد هيجي تاني فارس : طيب يالا بينا ايمان : لا ادخل انت انا هجهز غدا فارس : غدا ايه ؟؟ انا بقالي قد ايه ما شفتكيش ؟ وجايه تقوليلي غدا !! ايه يا ايمان ؟؟ مش واحشك ؟؟ ايمان : انت عارف اجابه سؤال كويس فارس : لا مش عارفه بقولك يالا بتقوليلي غدا !! ده معناه ايه ؟ ايمان : معناه ان احنا محتاجين ناكل فارس : هبعت اجيب اكل من بره .. عندك حجج تانيه ايه ؟؟ ايمان مسكت وشه بايديها الاتنين ايمان : انت متخيل ان انا بتحجج !! انا بعشقك يا فارس وبعشق التراب اللي انت بتدوس عليه فارس : كان باين الصبح الكلام ده لكن دلوقتي اشك ايمان قاطعت فارس بانها باسته ومنعته يكمل كلامه وهو شالها ودخل بيها اوضتهم يوريها وحشاه قد ايه !!!! فارس: مش هتقوليلي بقي ايه اللي غيرلك كل مفاهيمك كده ؟؟ ايمان : مفيش خفت بس اني اخسرك فارس : تخسريني ازاي ؟ ايمان اتعدلت وسندت علي صدره وبصتله بحب ايمان : مش عايزه افكر في الموضوع ده المهم انك دلوقتي في حضني ومعايا وبس فارس : كنتي خايفه اني مثلا اخد حكم بالاعدام ؟؟ ايمان : بس بقي يا فارس ارجوك فارس رفعلها وشها واتعدل هو كمان فارس : حبيبه قلبي .. احكيلي ايه اللي كان مخوفك كده الصبح وايه اللي خلاكي تعيطي امبارح طول الليل .. حلمتي بايه ؟؟ ايمان سندت علي صدره : حلمت انك اتحكم عليك فعلا بالاعدام وشفتهم وهما بينفذوا الحكم عيطت وهو ضمها قوي يسكتها فارس : وده كان مجرد كابوس وانا اهوه في حضنك صح ولا ايه ؟ بس ده ايه علاقته بهيام ؟ ايمان : لان فعلا محدش يضمن الحياه والموت فالمفروض محدش يبقي في نفسه حاجه ويمنعها علشان اعتبارات ملهاش اي قيمه ... طالما الشيء اللي هيعمله لا حرام ولا عيب يمنع نفسه ليه ؟؟ لو اتجوزت هيام لا هو حرام ولا هو عيب حقك ربنا قال مثني وثلاث ورباع فالشرع حللك ده فمين انا علشان امنعك وبعدين انا اكتشفت ان انا اهم حاجه عندي هيا سعادتك انت سواء في حضني او في حضن غيري المهم النتيجه فارس : شوفي يا ايمان ... هيام كانت في فتره من الفترات هيامي وعشقي او علي الاقل انا كنت مفكر كده لكن بعد ما اتجوزتك وقربت منك ومليتي بيتي حب وحنيه لكل حد دخل البيت ده لقيت تفسي غصب عني بحبك وكل ما احاول افكر في هيام الاقيكي انتي اللي في بالي.. انا اه اخدت وقت لحد ما اعترفت بده بس انتي كنتي علي طول بتقارني نفسك بيها .. انتي بتفكريني بيها .. مع اني انتي ملاك نازلي من السما .. انتي ما تتخيليش انتي ايه بالنسبالي ...روح قلبي انا .. انا حاليا في المكان اللي انا بحبه وبتمناه .. انا في حضنك انتي ومش عايز غيره فاهمه ؟ الباب خبط عليهم وامه علي الباب ووشها في الارض فارس : خير يا ست الكل منيره : تليفون ليك فارس : طيب قوليلهم نايم منيره : حبيبي .. قوم رد علي التليفون ده فارس : مين هو ؟؟في ايه ؟؟ منيره : ابو الولد اللي اتوفي في الحادثه فقوم رد عليه وطيب خاطره بكلمتين ده برضه خسر ابنه الوحيد .. معلش قوم كلمه فارس : حاضر يا امي لحظه بس منيره طلعت وقفلت الباب وفارس قام يلبس بسرعه علشان يطلع يكلمه ايمان : يا تري عايز ايه منك ؟ فارس : ممكن عايزني مثلا اعتذرله ايمان : وهتعتذر ؟؟ فارس : هطيب خاطره ده برضه اب وابنه ده اللي كان حيلته من الدنيا ايمان : امال مراته فين ؟ فارس : اعتقد انها ماتت من زمان وعلشان كده هو متعلق قوي بابنه فارس خرج كلمه فارس : الو السلام عليكم الراجل : انت فارس ؟ فارس : ايوه انا .. البقاء لله وربنا يصبرك الراجل : يا رب يا ابني يا رب .. حقك عليا يا ابني انت عندك بيت وعيال وانا ... فارس : معلش حصل خير .. المهم انك تشد حيلك وربنا باذن الله يصبرك ويعوضك خير الراجل : ان شاء الله اتجمع معاهم قريب فارس : ربنا يديك الصحه يا عمي الراجل : لا يا ابني لا .. هو كان مصبرني علي فراق مراتي لكن دلوقتي انا ماليش حد ولو مت اصلا محدش هيحس بيا .. لا صاحب ولا قريب ولا ليا اي حد فارس : والله ما عارف اقولك ايه ربنا يصبرك بس انا موجود اعتبرني ابنك ولو اي شيء محتاجه ما تترددش ابدا وانا لو تحب هاجي ازورك كل يوم والتاني واطمن عليك الراجل : فيك الخير يا ابني .. ياريت انا من ساعه ما ابني ... ما اتكلمتش مع اي حد واخيرا عرفت النهارده لما شفت عيلتك وفرحتهم برجوعك وسطهم اني ظلمتك .. فاخدت رقمك من المحامي علشان اعتذرلك فارس : لا حضرتك مش محتاج تعتذر ابدا الراجل : طيب لو قبلت اعتذاري يبقي تشرفني انت والمدام تشربوا معايا فنجان قهوه وتسلوا الراجل العجوز في وحدته ممكن يا ابني ؟ فارس : طبعا تحب نيجي امتي ؟ الراجل : الوقت اللي يناسبك انا لوحدي فارس : طيب الساعه دلوقتي ٣ العصر .. ٦ يناسبك ؟ الراجل : يا اهلا بيك يا اهلا .. ربنا يحفظك يا ابني قفل فارس وبص لقي امي ومراته وراه منيره : ايه هو اللي الساعه ٦ ده ؟؟ فارس : هروحله انا وايمان نعذيه ده لو معندكيش مانع يا ايمان ؟؟ ايمان : لا يا حبيبي معنديش واجب برضه منيره : طيب هو اتنرفز عليك ؟؟ فارس : لا بالعكس ده كان بيعذرلي علي المحاكمه والقضيه وكله وبيشرحلي موقفه ووحدته .. حالته صعبه الصراحه منيره : ربنا يصبره .. الضنا غالي برضه .. علي الساعه ٥ ونص اتحرك فارس وايمان ورايحنله ايمان : ناخد حمزه معانا ولا نسيبه مع ماما ؟ فارس : لا سيبيه طبعا واحد ابنه ميت وانتي تاخدي ابنك !! لا سيبيه وهما في الطريق عاصم اتصل بفارس فارس : ايوه خير يا عمي ؟ عاصم : اهلا ازيك يا فارس يا ابني .. بقولك هيا هيام معاك ؟ فارس : هيام ؟؟ لا مش معايا . خير في حاجه ؟ عاصم : شدينا انا وهيا شويه ومشيت وبصراحه قلقان عليها ومش عارف بيها فارس : شوفتها في شقتها الجديده ؟ عاصم : اه انا هناك مفيش فارس :اكيد عند حد من صحباتها انت عارف صحباتها كتير جدا عاصم : ممكن .. علي العموم لو عرفت حاجه بلغني فارس : اكيد .. انا ورايا مشوار وبعده هكلمك او اجيلك ايمان : خير هيام مالها ؟ فارس : ملهاش .. طفشانه من ابوها .. هيا لما بتتخانق مع حد بتختفي مع نفسها كده ايمان : امم طيب وصلوا عند الراجل ودخلوا وقعدوا ساكتين شويه ولقوه راجل عجوز مكسور غلبان عملهم قهوه وشربوها وبيتكلموا فجأه ايمان بصت لفارس ايمان : فارس انا ... دايخه ويدوب هتكمل اغمي عليها فارس عايز يقوم يلحقها بس هو كمان بيدوخ ومش متحكم في اعصابه نهائي الراجل قاعد قصاده مبتسم الراجل : متقاومش ده مخدر ومش هتقدر حتي تقف والدنيا كلها بقت سوااااااد وغاب عن الوعي ... فارس بدأ يفوق حاول يتحرك بس اكتشف انه متربط علي كرسي بدأ يفتح عنيه ويبص حواليه الراجل : اخيرا فقت ... فتحلي عنيك وبص حواليك فارس عدل دماغه بالعافيه وبص حواليه كان قاعد علي سفره ولقي علي يمين السفره ايمان مربوطه زيه وعلي شمال السفره هيام متربطه .. وهو علي راس السفره وبص للراجل فارس : انت بتعمل ايه ؟؟ الراجل : بعمل ايه ؟؟ عازمك علي العشا انت ومراتاتك ... ما تتخيلش انا فرحت قد ايه انك متجوز اتنين فارس : انا مش متجوز اتنين الراجل : اه سوري واحده طليقتك وواحده مراتك .. بس الاتنين معاك والاتنين بتحبهم والاتنين معاك طول القضيه تحضن دي وتبوس دي فارس : انت عايز ايه ؟؟ انا ماليش علاقه بموت ابنك واهو المحكمه برأتني واللجنه قالو ان العربيه سليمه الراجل : انا ماليش دعوه بكل الكلام ده .. انت قتلت ابني واخدت اغلي ما املك والنهارده هتدفع التمن ... عمال تقول انه مش مركز وان انتباهه اتشتت .. يعني ايه هاه ؟؟؟انت عارف انا اتخانقت معاه قبل ما يروح السباق ده .. حاولت امنعه ورفض يسمعني كان قلبي حاسس ... ولاول مره اتخانق معاه كده ولاول مره يرد عليا كده .. اول مره ازعله كده وبعدها يموت !! ملحقش حتي اصالحه !! فارس : اكيد هو مش زعلان منك .. انا صدقني عارف احساس ان حد يموت منك وما تكونش جنبه او يكون في كلام نفسك تقوله بس بطمن نفسي انه بيبقي عارف انك بتحبه مهما يحصل الراجل : بجد !! بس للاسف الكلام ده مش نافع معايا .. انا اتخانقت معاه وانت اخدت مني فرصه اني اصالحه انت قتلته فارس : انا ما قتلتوش انا ما اعرفوش اصلا الراجل جاب صور وحطهم قدام فارس الراجل : اهو اتعرف عليه .. شوف الشاب اللي زي الورد اللي انت قتلته فارس : انت زعلان علشان اتخانقت معاه .. معلش بتحصل بس الاعمار دي حاجه بايد ربنا والباقي كله مجرد اسباب الراجل : وانت كنت السبب ... تعرف انا اتصلت بيه ورد عليا كنت عايز اقوله بحبك بس بعدها دربكه كتير والخط اتقطع وملحقتش اقوله بسببك فارس بصله باستغراب : انت اللي شتته وهو سايق ..، انت اللي خليته يمسك التليفون وهو سايق ... انت اللي اتسببت في الحادثه الراجل رجع لوري مذهول : انت عايز تقول ان انا اللي قتلته !! انت اتجننت ولا ايه ؟؟ فارس : علشان كده عايز حد تلومه صح ؟ علشان تليفونك شتت تركيز ابنك صح ؟ عايز تلومني انا الراجل : اخرس خالص انت قتلته واخدت اغلي ما املك فارس : وعايز تعمل ايه ؟ تقتلني ؟ اتفضل انا متكتف قدامك اهوه اقتل ايمان : ارجوك سيبني نمشي فارس مالوش علاقه ابدا الراجل : اخرسوا ... مش عايز حد يتكلم ... انت فاكر اني جايبك هنا اقتلك ؟؟ لا طبعا انت هتعيش زيي .. انت مطلوب منك تختار .. بتحب مين فيهم ؟؟؟ كلهم اتفاجؤا بسؤاله وفارس عنده ذهول لانه عمره ابدا ما تخيل انه ممكن يتحط في وضع زي ده ؟؟ الراجل طلع مسدس وايمان وهيام عيطوا جامد وهو بيلف حواليهم الراجل : هاه ... بتحب طليقتك اللي عشت سنين متعذب بحبها وكاره الحياه واللي فيها بسببها ؟؟ ولا مراتك اللي استحملت منك كتير وام ابنك حاليا ؟؟ مستغرب ؟ ايوه انا اعرف كل حاجه عنك ؟؟ كل صغيره وكبيره !! اختار بقي بتحب مين فيهم ؟؟؟ عند منيره قلقت جامد ان فارس وايمان اتأخروا واتصلت بأمجد وكريم والاتنين راحواها البيت ومعاها وقالتلهم انه راح لبيت الراجل ده كريم : وهو جاب تليفون فارس منين اصلا ؟ غريبه ؟ مجدي : طيب انتي تعرفي عنوانه نروحلهم ؟ منيره : لا يا حبيبي ... بس دول ماشيين اهو داخلين علي التلات ساعات شويه وعاصم جالهم بيدور علي بنته عاصم : انا اسف فارس فين ؟؟ هيام مش لاقيها في اي مكان ومختفيه من بدري كريم : طيب انت اتصلت علي فارس ؟ عاصم : كلمته من تلات ساعات وقالي ورايا مشوار واكلمك وما اتصلش تاني قلت اجيله يمكن يكون عرف يوصلها ؟؟ مجدي : فارس ومراته نفسهم مش عارفين نوصلهم عاصم : ايه ؟ هو راح فين ؟ منيره : ابو الولد اللي اتوفي اتصل بيه وراحوا يعذوه عاصم : وايه اللي وداه ... واحد اتهمه بقتل ابنه يروحله برجليه ليه ؟؟ بيغيظه مثلا انه اخد براءه ؟ ايه الجنان ده ؟؟ منيره : الراجل كان في منتهي الذوق معاه وقعد يعيطله ويقوله انه وحداني عاصم : وابنك اخدته الشهامه واخد مراته وراح !! انتو مجانين ؟؟ ده ابنه اللي مات !! متخيله انه هيطبطب علي ابنك ويقوله حصل خير كلب وراح ؟؟ متخيله ايه ؟؟ كان لازم تمنعي ابنك ؟؟ الراجل كان عايز ابنك يتعدم وابنك اخد براءه .. ما شفتيهوش في المحكمه بعد الحكم كان زي المجنون ولو طال ابنك كان خنقه بايديه ... جاي ابنك يروحله برجليه لا وياخد مراته كمان ... ما اخدش ابنه بالمره خليه يقتلهوله قدام عنيه واهو يبقي ابن قصاد ابن منيره : انت بتقلقني ليه ؟؟ الراجل شكله مكسور وبيعتذر لفارس عاصم : ايوه بيجر رجله علشان يروحله .. هما بقالهم قد ايه ؟ منيره : تلات ساعات عاصم : تلات ساعات ؟؟ ومستنيه ايه ؟ يدفنهم ويروح .. انتو ازاي بتفكروا عاصم طلع تليفونه وكلم محاميه وحكاله اللي حصل بسرعه والمحامي كانت عنده نفس شكوك عاصم وطلب منهم فرصه يجيبلهم عنوانه ويبلغ البوليس كمان وبالفعل المحامي جابلهم العنوان واتحركوا كلهم بس كريم ومجدي وعاصم راحوا علي بيت الراجل بس الطريق طويل وزحمه ... فارس : لا ارجوك .. مالكش دعوه بيهم هما .. انت بتقول انا اللي قتلته يبقي خليك معايا انا ... ايمان بتعيط ورجع قدام عنيها حلمها وفارس بيموت الراجل : اختار .. بتحب مين فيهم ؟؟ فارس : مش هختار ... انت مجنون مش هختار الراجل : مش هتختار هقتلهملك الاتنين .. بص انا كده كده ميت ومش فارق معايا ... فاختار انت بدال ما اخدهم الاتنين منك .. بتحب مين ؟؟ فارس : انت مجنون مش طبيعي ... انت اللي قتلت ابنك ... تلاقيك كنت مكتفه زي ما انت مكتفنا كده .. كتفته في كل حاجه في حياته فعلشان كده كان بيهرب منك بالسباق بيعيش لحظه جنون مش متكتف فيها من ابوه وبيسوق علي اقصي سرعه ودي اللحظات اللي كان بيبقي عايش فيها .. صح كلامي صح ؟ وانت عارف ده كويس قوي وعلشان كده محتاج لاي حد علشان تلومه الراجل : اختار بتحب مين فيهم ؟؟ فارس : مش هختار الراجل : انت عايزني اقتلهم الاتنين معقوله !!! لا لا انت مش عارف تختار !! ايوه صح !! اه سوري سؤالي غلط ... انت بتحب الاتنين وعلشان كده مش عارف تختار .. طيب هسهلهالك ... هغير السؤال تختار مين فيهم تموت ؟؟؟ اموت مين فيهم ؟؟اعتقد كده سهلتها قوي ؟ انت بتحب الاتنين ؟ بس ممكن تستغني عن واحده ؟ مين هيا بقي ؟؟؟ الاتنين بصوا لفارس وكل واحده فيهم عارفه فارس هيختار مين ؟؟ فارس : انت مجنون وانا مش هلعب لعبتك دي مش هختار الراجل : خلاص براحتك ودع الاتنين الراجل رفع صمام الامان وقرب منهم فارس : وقف .. قولتلك اقتلني انا ... مالكش دعوه بيهم الراجل : انت هتعيش وانت عارف ان بسببك الاتنين ماتوا او تختار وساعتها واحده بس هتموت ويفضل معاك واحده .. شفت انا حنين ازاي ؟ وبعدين انا كان ممكن اخطف ابنك واقتله .. بس انا بتجربتي اكتشفت ان خسران الزوجه بيوجع اكتر من الابن .. مش هنرغي كتير بقي هتختار ولا اقتلهم .. فارس : ارجوك الراجل زعق : شكلك مش هتختار .. اقتل مين فيهم انطق فارس زعق : لأ لأ ... مش هختار الراجل : اقتل مين فيهم ؟؟؟ الكل قلبه بيدق بسرعه وخوف مسيطر علي الكل الراجل : خلاص كده انت اخترت ودعهم فارس زعق : اقتل ايمان ... اقتل ايمان ايمان شهقت وبصتله والراجل وجه المسدس ناحيتها والصدمه جمدت دموعها في عنيها .. الرصاصه طلعت واستقرت في هدفها مظبوط ونكمل بكره توقعاتكم انتظروني في الحلقه الاخيره بكره ShiMoOo | ||||||||||
|
| |
|
11-05-19, 01:05 PM
| #24 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| طبعا النهارده لانها الاخيره مش هلاقي تفاعل عليها ولا ايه ؟ الحلقه ٢٣ والاخيره فارس زعق : اقتل ايمان ... اقتل ايمان ايمان شهقت وبصتله والراجل وجه المسدس ناحيتها والصدمه جمدت دموعها في عنيها .. وفارس غمض عنيه علشان ما يشوفش اللحظه دي .. الرصاصه طلعت واستقرت في هدفها مظبوط وهيام وقعت في الارض وفارس فتح عنيه وبص لايمان هنا الباب اتفتح بقوه ودخل كريم وعاصم ومجدي واخدوا المسدس من ايد الراجل وعاصم جري علي بنته اللي اتضربت بالنار واتصلوا بالاسعاف بسرعه والبوليس وصل وصمت مسيطر علي الكل .. فارس راح مع هيام علي المستشفي وطلب من مجدي يروح مراته علي البيت .. فارس هو و عاصم بره اوضه العمليات في صمت عاصم : كنت عارف ان هيام حاجه حصلتلها فارس : انا اسف ان كل ده حصل بسببي عاصم : بسببك ليه ؟؟ هيا اللي رجعت واتدخلت في حياتك من تاني .. قولتلها تبعد .. بتقول انك بتحبها فارس : كنت بحبها ... وممكن اكون لسه بحبها بس بيتي وابني وحياتي كلها بقت مع ايمان فمعدش ينفع انا اسف عاصم : ما تتأسفش انا اللي غلطان من الاول .. كنت عارف انكم مش هتنفعوا مع بعض وقلت خليها تجرب ونسيت ان دي حياتها اللي بتجرب فيها .. عودتها للاسف ان اللي عيزاه تاخده بغض النظر عن اي شيء تاني وده غلط بس للاسف اكتشفت ده متأخر قوي الدكتور طلع من العمليات وطمنهم ان الرصاصه خرجوها بدون اي اضرار وانها هتبقي كويسه عند امجد بيحكي لمامته داليا كل اللي حصل مع فارس ومراته داليا راحت المستشفي وهناك شافت فارس وعرفت انه مع هيام مستنيها تفوق ... ضميرها بيأنيها .. هيا اه استقرت ان طالما هو مستقر فمالوش لازمه يعرف بالماضي لكن هو اهو سايب مراته وابنه وبيته وجاي واقف مع هيام .. مع واحده منعت نفسها انها تخلف منه .. واختارت تكدب عليه .... لازم تقوله وتريح ضميرها فارس هيام فاقت ودخلها وابتسملها ومسك ايديها فارس : حاسه بايه ؟ هيام : زي ما يكون رصاصه جوايا ابتسم فارس : بس هيا خلاص مش جواكي ... انا اسف هيام : علي ايه بالظبط ؟ انك اختارت مراتك ؟ فارس : هيام انا هيام : انت ايه ؟ انت بتحبها .. اخترت اقدم خدعه في التاريخ .. كنت عارف انك لما تقوله يقتل ايمان هو هيعمل العكس .. واخترت ان انا اللي اموت فارس : انا اسف انا مكنتش عارف افكر هيام : انت بتحبها وهيا بتحبك وانا كنت في يوم من الايام بتحبني فارس : انا اسف فعلا مكنتش متخيل بجد انه هيضرب .. كنت متخيل انه بيهدد بس هيام : المهم ان الكل كويس .. روح لمراتك يا فارس وانا سيبيني بقي وسامحني لو كنت عملتلك قلق فارس : اتمني اننا نبقي اصحاب انا فعلا بعزك هيام : اه سوري مش هينفع .. انا كمان محتاجه اتخطاك وعلشان ده يحصل لازم ابعد واحاول اشوف حد زي ايمان يحبني ويتمسك بيا ويمكن مع الوقت احبه انا كمان فارس : اتمني ده .. بس ابقي ساعتها طمنيني عليكي اتفقنا ؟ هيام : اتفقنا روح لمراتك بقي فارس قام ويدوب هيخرج هيام نادتله هيام : لحظه يا فارس فارس : خير هيام : في حاجه انا كدبت عليك فيها زمان فارس : خلي الماضي في الماضي يا هيام هيام : لا معلش لاني ندمانه عليها قوي فارس : طيب ايه هيا ؟ هيام : انا كدبت عليك وخليت الدكتوره تقنعك اني عندي مشاكل في الرحم وده سبب عدم الخلفه بس الحقيقه اني مكنتش عايزه اخلف في الوقت ده وكنت خايفه اقولك تزعل يمكن لو كنت خلفت كان ساعتها انا وانت نبقي مع بعض فارس : او يمكن يبقي بينا عيل متعذب مش فاهم ابوه وامه بيتخانقوا ليه ومش مع بعض ليه ؟ يمكن ده احسن .. لو اطلعتم علي الغيب لاخترتم الواقع .. كان ممكن ساعتها ازعل بس دلوقتي اعتقد ان ده احسن .. وزي ما قولتلك خلي الماضي في الماضي يا هيام .. شدي حيلك واطلعي بقي من هنا بسرعه سابها ومشي وهو ماشي قابلته دكتوره داليا ووقفته وسلمت عليه واطمنت علي مراته وابنه داليا : انا في حاجه مهمه عايزه اقولهالك واتمني انك تسامحني فارس : خير يا دكتوره ؟ داليا : هيام مراتك زمان هيا ووالدتها طلبوا مني فارس : انك تكدبي عليا وتقنعيني ان مراتي عندها مشاكل وده اللي مأخر الخلفه .. ده اللي حضرتك عايزه تقوليه ؟ داليا بذهول: انا اسفه انا عارفه ان ده ضد مبادئي وقسمي كدكتوره بس هيا قالت انها فتره بسيطه وانا فاطعها فارس : اهدي خلاص الموضوع انتهي من زمان وعادي مش فارق معايا بس ليه دلوقتي جايه تقوليلي؟؟ داليا : علشان انت اهو هترجعلها وهتسيب بيتك فمن حقك تعرف فارس ضحك : مين قالك اني هرجعلها او هسيب بيتي ؟ انا بحب مراتي ولو هيا في كفه والكون كله في كفه هختارها هيا !! بعد اذنك ريحي ضميرك يا دكتوره كريم عدي عليه يروحه فارس: الراجل عملوا في ايه ؟ كريم : اعتقد انه اتجنن لانهم حولوا لمستشفي الامراض العقليه فارس : لا حول ولا قوه الا بالله كريم : الحمد لله انكم بخير .. بس اشمعني هيام يعني ؟ فارس : هو طلب مني اختار يقتل مين ؟ كريم : وانت قلتله هيام ؟؟وهو قتلها ببساطه ؟؟ فارس : لأ انا قلتله يقتل ايمان كريم بصله : اممم ولو سمع كلامك كنت هتعمل ايه ؟ فارس : كنت هبقي اتعس راجل علي وجه الكره الارضيه وكنت هعرف ان فعلا البني ادم غبي ما بيعرفش قيمه الحاجه الا لما تضيع كريم : طيب الحمد لله انك فهمت انه اكيد هيقتل عكس اللي تختارها فارس : في كلتا الاحوال كانت مخاطره .. الحمد لله عدت علي خير كريم: الحمد لله .. حمدالله علي سلامتك فارس : طيب اطلع معايا كريم : لا مش وقته حاليا انت محتاج تقعد مع مراتك تفهمها انت قلتله يقتلها هيا ليه اطلع وربنا في عونك فارس ابتسم وطلع علي بيته واول ما دخل امه جريت عليه ضمته جامد قوي فارس : خلاص يا امي انا كويس ما تخافيش منيره : انا اسفه انا اللي قولتلك تروحله حقك عليا والنبي .. معرفش لو كان جرالك حاجه انت ولا ايمان كنت عملت ايه ؟ فارس : احنا كويسين وبعدين انا كنت هروح حتي لو انتي ما اتكلمتيش .. انتي مالكيش علاقه بالموضوع ده منيره : هيام عامله ايه ؟ فارس : كويسه يومين وهتخرج ما تقلقيش .. المهم ايمان فين ؟ منيره : في اوضتها بتنيم حمزه فارس : طيب هدخلها لان في كتير محتاجين نتكلم فيه ؟ منيره : اكيد .. فارس فارس : خير يا امي ؟ منيره : انت ليه قولت للراجل يقتل ايمان ؟ انت لسه بتحب هيام ؟ فارس ابتسم : لانه كان عندي امل والحمد لله املي طلع في محله .. منيره : مش فاهمه فارس حضن امه : امي المهم حاليا ان كلنا بخير ... وبعدين انا بعشق ايمان مش بحبها بس .. منيره: ربنا يهدي سركم ادخلها وبعدين تفهمني بالتفصيل ادخلها بدال ما انت مش علي بعضك كده ... فارس : تسلمي يا روح قلبي فارس راح ووقف قدام الاوضه وقلبه بيدق مش عارف اذا كان هيعرف يفهم ايمان ولا مش هتفهمه؟ خايف من رد فعلها .. ولاول مره يعرف مدي حبه لايمان ايه ؟؟؟ خبط علي الباب ودخل وهيا قاعده وبتهز ابنها في سريره ومن غير ما تبصله ايمان : اول مره تخبط ! فارس : مش عارف فارس راحلهاووقفها وشدها بعيد عن ابنه فارس : اتكلمي معايا يا ايمان ايمان : عايزني اقول ايه يا فارس ؟ فارس : معرفش ...اي حاجه يا ايمان ايمان : انت قلتله يقتلني .. وانا بصراحه مش عارفه افكر فارس : طيب اساعدك ... تعالي نفكر بصوت عالي .. هو اخدنا كلنا وهدفه ايه ؟ ايمان : انه ينتقم منك فارس : طيب تمام فليه هيخليني اختار ؟؟؟ ايمان : علشان يعرف انت بتحب مين ؟ فارس : بالظبط كده .. واحد عايز ينتقم مني فهل هسيبلي اللي انا اختارها ؟ يعني انا مثلا قولتله بحبك انتي فهيقتل هيام ويسيبك انتي معايا ؟؟ ايمان بصتله وكأنها بدئت تفهم : كنت عارف انه هيختار عكس اللي انت تختاره علشان يوجعك اكتر فارس : بالظبط كده او ده اللي انا فكرت فيه .. لما اقوله يقتلك انتي معناه اني مستعد اتخلي عنك انتي ومش عايز استغني عن هيام واتمنيت انه يختار العكس ايمان : بس حرام هيام فارس : متخيلتش اني ممكن اعيش من غيرك انتي لحظه.. وساعتها عرفت احساسك ايه لما جيتيلي الصبح واترميتي في حضني وقولتي انك خفتي اروح منك ... عرفت احساسك ايه لاني عيشته ... خفت يا ايمان تروحي مني .. خفت ما الحقش اقولك اني بعشقك انتي وبس ... انا اكتشفت ان قلبي ما حبش غيرك .. ولا دق بالطريقه دي لغيرك .. كنت حاسس اني هموت لحظه الاختيار دي .. خفت انه يقتلك فعلا وخفت انه ما يختارش العكس .. كنت هتجنن يا ايمان .. وعرفت ساعتها انا بحبك قد ايه ... بحبك فاهمه ؟؟ ردي عليا ؟؟ قولي اي حاجه ؟؟ ايمان : وهو في ايه يتقال ... انا فتحت عنيا علي الدنيا دي علي حبك انت ... حبيتك من وانا عيله بضفاير فارس ابتسم : والظاهر ان انا كمان حبيتك من ساعتها بدليل كنت بتجنن لو حد عاكسك وكأن عقلي الباطني بيقولي انك ملكي انا وبس ايمان :النهارده اسعد يوم في عمري كله .. يوم حبك انت فارس : وكل يوم هيكون فرحه باذن الله .. ودلوقتي يالا بقي ايمان باستغراب : يالا ايه ؟ فارس : مش انتي عايزه عيل كمان .. يالا نجيبه ايمان ضحكت وهو كمان واتفجؤا بابنهم واقف علي حرف السرير بيضحك معاهم فارس راحله وشاله وباسه فارس : هنضطر نأجل العيل لبليل ... ايمان ضحكت بحب لجوزها وعرفت ان هيا وبس اللي في قلبه وان هيام ملهاش اي وجود في قلبه نهائي .. هيا بس اللي ملكه عرش قلبه ..... توته توته خلصت الحدوته اتمني انها متبقاش ملتوته انتظروني قريبا مع حكايه جديده في اول ايام رمضان كل سنه وانتو طيبين علشان بس الكل يعرف انا هيقي موجوده من اول يوم رمضان لحد ما الاجازه تنتهي راجعالكم بكذا قصه انتظروني المتمرده جراح قلب جميله حب في الظلام ShiMoOo | ||||||||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
.png)
العرض العادي
