01-07-09, 01:31 PM
| #377 | ||||
| نجم روايتي وكاتبة في قسم قصص من وحي الأعضاء 
|  عزيزتي سوون ادري انج بتعصبين في البارت هذا بس ماعليه السموحه......ّ الجزء العاشر...... اول ما دخل حمد البيت اتفاجئ ان امل نفذت كلامها واشتكت عليه عند ابوه اول شي تم واقف ايريد يستوعب الي سوته في حياته ما قد حد اشتكى عليه عند ابوه لين ماعاد عليه ابوه النبخه ابو حمد:شو مستوي عليك ماتخطفها المكتبه هاااه كانت امل قاعده عدال عمها واطالعه من وراه بنظرات ان حقيه بينخذ منك ابو حمد:بينقص منك يد ولا ريل حمد بخاطره"ااااااه يعني هيه ناويه على حرب مقويه ابويه عليه زين اراويج مع منوه تلعبين"ّ ابوحمد:اسمعنيه زين اي شي تباه امل وتطلبه لازم اتنفذه ابتسم حمد:ابويه شو قلت؟ سكت الاب وهو يدري ان نبرة حمد هذي الي يعرفها زين وما يدانيها ابوحمد:انا اقووول يعني مب زين اتحقربها وماتوديها وين ماتريد حمد:واذا ماوديتها شو بيستوي؟ ابو حمد:انا بوديها حمد:زين عيل دربكم سمح اتوكلو على الله سر ودها التفت عنهم حمد وراح فوق لغرفته وهو يطالع امل بنظرات متحلفه ابو حمد:ماعليج امنه يابنيتيه هذا من استوا نحيس ....امه مدلعتنه ام حمد:شتقول يابو حمد منوه الي مدلعنه ؟انا ولا انته مب اهو الي اتقول عنه هذا وحيديه وخليه ايسوي الي يباه اشوفه الحين انجلب عليك ابو حمد:هيييييه حتى انتي دلعتيه ام حمد:انا امل:عميه عمتيه خلاص فديتكو ......انا باجر بروح المكتبه وباخذ الي اباه بعد اشوي طلعت امل لفوق وتفاجئت بالايدين الي مسكتها وثبتتها على الجدار حمد:تعالي اهنيه امل وهيه تنتفض بين ايديه :شووووه؟؟ حمد:رايحه تشتكين عليه عند ابويه أأأ؟؟..................تدرين ان في حياتيه محد قد اشتكى عليه ولا يستجرئ....خواتيه الي هن خواتيه على كل الي اسويه فيهن من ظرب ووقعه وغيره عمرهن مافكرن يشتكن عند ابويه .....اتين انتي اليوم وتشتكين عليه بس عشان مامريتبج المكتبه تمت امل اطالعه بنظراتها الي ايحس حمد ان قلبه ذايب منها حمد:شوفي وقرب بويهه لويهها حمد:ياوييييييييييييلج ياويلج مره ثانيه ان عدتيها تركها بعدين حمد وراح لتحت وطلع من البيت تمت امل واقفه اتحاول اتهدي دقات قلبها عقب مسكة حمد الها على المسا كانت امل صاعده لفوق ومر من عدالها حمد راقي لفوق واتعداها وتم واقف عند لمرايه الي في الممر الي ايودي لاقسامهم مرت امل من وراه حمد:صبري وقفت امل والتفتت له قرب منها حمد:اندوج....لوما حن عليه ابويه في المسيد جان مايبتهن لج امل:شو هذا؟ حمد:فجي الكيس وبتعرفين بعدها اتوجه لغرفته لاكنه وقف قبل لايدخل امل:انا ياهل تيبليه الدفتر هذا وعلبة خشب الالوان هذي؟ ابتسم حمد والتفت الها:والي تروح تشتكي عند عمها هب ياهل؟ بعدها دخل غرفته وسكر الباب وقفت امل مقهوره اطالع دفتر الرسم الصغير مع علبة خشب الالوان بعدها فتحت الدفتر ورسمت حمد ههههه طبعا كان شكله ايضحك ولصقت الرسمه على باب غرفته ونزلت بسرعه تحت عقب نصف ساعه نزل حمد وهو لابس اوزار وفانيله ولقى الريم والعاش بس عند التلفزون حمد:وينها؟ العاش:منوه؟ حمد:منو يعني غيرها الرسامه الصاعده امل العاش:في غرفة اميه حمد:شو تسوي اهناك اخر الليل الحين الريم:اتقول بتبات عندهم التفت الها حمد منصدم:شوووو؟....من صدقج انتي الحين تتكلمين ولا تجذبين عليه الريم:اذا ماتصدق روح اتاكد التفت عنهن حمد وراح لغرفة امه الي كانت في الدور الارضي فتح الباب ولقاه مغفول تم فاتح عيونه مستغرب رجع لخواته حمد:ابويه داخل؟؟ العاش:هيييه حمد:واهيه الحين صدق بتبات عندهم داخل؟!!!!!!ّ العاش:توها ساحبه فراشها وراحت داخل تم حمد واقف ايطالع خواته واحساس غريب يداعبه في خاطره يضحك لاكن الموقف ما يضحك..."اوكيه اليوم قدرت تفلت منه لاكن باجر وين بتروح" وراح فوق ورجع يضحك اول ما شاف صورته الي مكتوب عليها اسمه في اليوم الثاني بعد مانزل حمد وفطر سال الخدامه عن اهل البيت وقالتله عن وجهة كل واحد وبان الريم وامل طلعن مع الدريول حمد:اكيد رايحات المكتبه اتصل على الريم حمد:وين انتي؟ الريم:انا وامل رايحين المكتبه حمد:ياسلام جذيه مره بدون شور ومشاور الريم:اميه تدري حمد:والي معاج ليش تطلع بدون ماتستاذن منيه ولا انا طرطور حقها الريم:هااه مادري تريد اتكلمها حمد بصوت غاضب:ماريد اكلمها اعطينيه الدريول الريم:لحضه الدريول:ايوا باباه حمد:الحين اتلف وترجع البيت سيده تفهم الريم خبرت امل امل:ماعليه امنه انا مستاذنه من عميه ياله خلينا ننزل وصلنا الدريول:سوي كلام بابا الريم:الوو حمد:الحين اتردون البيت تسمعين الريم:احنا وصلنا صرخ حمد:قلت الحين اتردن البيت تسمعين ولالا؟ الريم:انزين امل نزلت وترقبنيه حمد:والله ياريم ان ما مشيتي الحين وخليتيها تنقلع وراج انج اتشوفين شي ماقد شفتيه .....خمس دقايق ان ما لقيت السياره برا البيت بحرقج انتي والدريول فيها الريم الخوف عندها مايباله على طول قالت للدريول ايحرك راجع بعد ما شافت ان امل دخلت المكتبه بعد نصف ساعه راح حمد لامل المكتبه وما حصلها تم ايدورها وايدورها لاكنه ما حصلها حمد:وين بتروح يعني؟ اتصل للدريول:تعال اليه المكتبه الي وديت البنات صوبها اتاكد حمد انها نفس المكتبه لاكن مافي فايده ماحصلها وقال للدريول يمشي في الطريق لين البيت يدورها يمكن رجعت مشي واتصل على ريم للمره العاشره حمد:هاه رجعت؟ الريم:لا حمد:وليش ماعندها اهيه تيلفون؟ الريم:مادري اتقول ماتحتاج له حمد:ابويه يا؟ الريم :يا وخايفه يسالنيه عنها حمد:يعني وين بتروح.....تعتقدين اتعرف حد اهنيه في المنطقه هذي الريم:لا حمد امل ماتعرف حد عمرها ماكانت اتزور حد من قبل الابيتنا حمد:كانت تي بيتنا؟ الريم:هييه من يوم اهيه صغيره كان عميه الله يرحمه ابوها ايبها عندنا حمد ما يتذكر انه في يوم اتلاقا معاها حمد:المهم طالعيلها اذا يت انا برد المكتبه ادورها ولاتقولين حق ابويه شي الريم:ان شاالله حمد عيز من كثر ما دورها في المكتبه طرشتله الريم رساله "حمد امل يت تعال بسرعه" خاف حمد ان شي صار الها وبسرعه رجع للبيت واول مادخل كان ويه امل احمر من الصياح والاب صوته شال الدنيا يتحلف حق حمد ابو حمد:ماعليج والله لايشوف حميدان وانه يتربا من اول ويديد مسود الويه صرخ حمد اول مادخل وهوخايف ان شي صار الها حمد:شوو صااااااار؟؟؟ بلع ابو حمد ريجه وهو ايشوف الغيض بويه حمد ابو حمد:يا حمد الله ايهديك ليش اتقول للدريول ايرد عنها حمد:تستاهل ليش اتروح وما تشاور امل:اناقلت لعميه حمد:جاااااب انتي امل:والله انا بكيفيه وشوريه عند عميه مب عندك قالتها وهي معصبه وراحت فوق ابو حمد:صدقها شورها عنديه هب عندك حمد:وانا شو انشالله؟ ابو حمد:انا قلتلك من البدايه انته مالك خص فيها انته بس اسم زوج وحر بنفسك اما اهيه فانا الي اليه خص فيها وشورها عنديه مسح حمد ويهه بيديه والتفت للريم حمد:مع منوه يت؟ الريم:مع الدريول حصلها راده مشي ويابها حمد:الكلب ولا قال اليه انا ارويج فيه وطلع عنهم حمد والاب ايهز راسه ابو حمد:بالعون اننا مرتاحين وهو في بوظبي من ايي نفخ النا روسنا ام حمد:خاف ربك ولدك هذا ابو حمد:كله منج انتي الي مدلعتنه ام حمد:بو حمد انا؟؟؟؟ قامت الريم وراحت لانها حافظه اسطوانة امها وابوها اليوميه .................................................. ... كانت سلمى في بيت امها وحصلت تيلفون سعيد وحبت تاخذ امنه كم رساله حلوه لان سعيد راح فوق ونساه تحت لاكنها انصدمت من الرسايل وكانت الصدمه اكبر يوم حصلت صوره لصاحبة الرسايل سعيد:انتي شو تسوين؟ قرب منها وخذ التيلفون سعيد :شوه ياسلمى اتنبشين في تيلفونيه؟ سلمى:انا مانبشت انا كانت نيتيه اخذليه كم رساله حلوه سعيد:جذيه بدون استاذان سلمى:الله اكبر عليك تراك دوم اتفتح تيلفوناتنا وعمرك ما ستاذنت.....ولا نسيت انيه انا ختك العوده سعيد:انزين ....مره ثانيه لاتفتحين تيلفونيه سلمى :مره ثانيه ليش...احب اقولك ان الي انته خايف امنه انا عرفته سعيد:وعندج مانع؟ سلمى:طبعا عنديه مانع سعيد:لو سمحتي محظراتج خليها لغيريه انا في غنى عنها وماحتاج الها سلمى:ليش انشالله...تدري انك مسسوي سعيد:ياليتج ماتتدخلين في خصوصياتيه انا هب ياهل ...واعرف الي اسويه سلمى:لمغازل صار من الخصوصيات سعيد:اووووه ياسلمى ....انا ماداني حد يتكلم معايه في الموضوع هذا سلمى:والريم ياسعيد انته نسيتها؟ سعيد:شبلاها بعد هذي؟ سلمى:شوووه؟؟؟!!!!!ّ الريم قدت هذي بعد......سعيد شبلاك انته تدري ان الي اتسويه غلط سعيد:بكيفيه وحر بنفسيه سلمى:لا مب ابكيفك.......لو تدري بك الريم بتبطي ماخذتها سعيد:والله ...هذي الي ماتعطي ويه؟ سلمى:اتسمي مستحاها بماتعطي ويه...انته شبلاك؟ سعيد:يابنت الحلال فضيها سيره ....ودرت انزين خليها اتسوي الي تباه سلمى:لاااااا السالفه فيها شي انته مستحيل تتكلم جذيه سعيد:انتي شو تبين الحين؟ سلمى :اباك تعقل وتترك عنك بنات الناس...تدري كم عمرها هذي الي قاعد اتغازلها؟ سعيد:مايهمنيه عمرها سلمى:حتى لو كانت ياهل سعيد ايطالعها بطرف عينه:هذي عيوز الاخره وين يت ياهل سلمى:هذي ياسعيد الي صورتها في تيلفونك ياهل صف ثاني اعدادي يعني ثلاثة عشر سنه التفت الها سعيد:وانتي شدراج؟ سلمى:بنت يراننا واعرفها زين ....ياهل الرمسه ماتسنعها عدل اي مغازل الي انته اتسميه مع وحده مثلها تم سعيد واقف ايطالعها مش مستوعب الي تقوله سعيد:في ذمتج؟؟ انتي شفتي الصوره عدل؟؟ سلمى:هيه شفتها واعرفها زين وهذا المكياج امكبرنها ....عيب عليكو والله عيب هاك كبركو وتضحكون على بنات الناس بدال لاتعطونهن كم كلمه اتعلمهن ان الله حق وان الي يسونه غلط دام الاب والام مب قايمين بواجبهم مع بناتهم.....تدري ان امها وابوها مطلقين وحاذفينها عند يدتها الي لاهيه دوم مع غنمها وموفره الها كل شي من تيلفون ونت وسياره وكل شي سعيد بعد كلام سلمى قعد على الكرسي ايريد يستوعب الموضوع عدل سعيد:صارليه شهرين اكلمها ...ابدن ماحسيت انها ياهل سلمى:شوووه انا اول مافتحت الرسايل استغربت الكلمات ودريت انها ياهل لين ما شفت الصوره سعيد:انزين ياسلمى والي عندها اخوانها وابوها ومن قبايل ليش بعد اهيه اتغازل سلمى:عاده هذا يرجع لضروفها والبيئه الي اهيه عايشه فيها...وللوازع الديني وعدم الخوف من الله سعيد وهو سرحان:الله حق....ولااله الا الله سلمى:وترا مب الا البنت الي بتتحاسب سعيد:ادري ....المشكله انيه كل ماقول بودر العاده هذي احصل نفسيه منغمس فيها سلمى:اطلب العون من الله والله اذاشاف صدق نيتك عانك على ماابتلاك....اتحمل ياسعيد الريم اتشم خبر وتخسرها والله لو اتلف الدنيا ماحصلت مثل الريم الحريم كلهن يتمننها لعيالهن التفت سعيد لسلمى:ماشالله مطوعه ثرج وانا مادري...زين عيل سيري حدثي على اختج هذي الي فوق وشاله الدنيا بالاغاني سلمى:ياربي منك ياسعيد قام سعيد وقرب من سلمى وحبها على راسها سعيد:اباج اتسيرين صوب حمارة القايله بنت الذين الي عدال بيتكم واتعطينها كف من عنديه....السبال قاعده تلعب عليه من شهرين بعدها طلع سعيد من عند سلمى وتمت اتهز راسها بلاحول ولا قوة الا باله اول ماركب سعيد سيارته طلع تيلفونه وتم يقرا الرسايل وشافها لاول مره انها تافهه وصدق من عند ياهل اغلب الرسايل تساله اهو وين وشو يسوي وشو تغدا واتقوله اهيه وين راحت وعند منو كانت وشو شترت للحفله سعيد:السباله وانا مصدق عمريه معاها واقول حليلها تستحي تتكلم معايه عن الحب وخرابيطه....ياهل امضيع وقتيه مع ياهل والله اعلم كم وحده ضيعت وقتيه معاها واهيه ماتستاهل لاكن انا الي استاهل ولا جنس هذا ينعطن فيه ويه عنلات ابوهن ......................................... في اليوم الثاني بعد ما طلع حمد من غرفته كان يمشي في الممر بين الغرف وكان في الممر باب لبلكونه عوده مليانه احواض زراعه ...الباب كان مفتوح ولفت نظر حمد....اتوجه له حمد ووقف عند الباب وشاف الاستاند الي يرسمون عليه رفع حواجبه"اوووووه اظاهر الرسامه مسويه الها اهنيه مرسم خلنا انروح انشوف الفن...كانت اللوحه مطله على الجانب الثاني ...اتقرب منها حمد ولف وشافها....كانت عباره عن حوض زراعه تتدلى امنه النباتات والورود فيها ومن وراها جانب لستاره والخلفيه اشعة الشمس...حمد عجبته الرسمه وما توقع انها صدق ترسم...مسك فرشاه وبعد خمس دقايق دخلت امل امل:انته شو تسوي اهنيه رفع حمد نظره الها حمد:مشالله تعرفين ترسمين تمت واقفه اطالعه مستغربه انه يمدح رسمها واتقرب هو منها ومازال ماسك الفرشاه حمد:اللوحه ماعليها كلام بس كان خاطريه اشوفها كيف بتكون اذا نزلتي عليها المطر ورفع الفرشاه ولون راس خشمهاباللون البحري امل :عطنيه فرشاتيه حمدوهو ايقرب براسه اكثر منها:شوووه؟ لمس حمد بخشمه خشم امل واتلون خشمه بنفس اللون الي كان على خشمها حمد:اتفضلي ...وهااه اول ماتخلصين عشر لوح قوليليه عشان احجز لج في ارض المعارض واسويلج معرض ههههه باي حياتي مشا حمد وخلاها وهيه واقفه عدها مش مستوعبه الي قاله وخص كلمة حياتي كان وقعها غير مشت امل ولفت اطالع اللوحه وصرخت اول ما شافتها امل:لااااااااااااااااا مشالله حمد اتفنن في اللوحه وهو منقطنها كامله باللون البحري اونه مطر نازل عليها امل:والله لاخبر عليه عميه والله لااخبره وماعليه امنه ...انا من الصبح ارسم وتعبانه وفي الاخر ايي حضرته ايخربها نزلت امل وحصلت الكل قاعد ومعاهم حمد الي قاعد يتقهوا وقفت امل:عميه طالع حمد شو سوا بلوحتيه الكل التفت الها ومن بينهم حمد الي فتح اعيونه "لاااا ويايه تشتكي وانا موجود"قام ابو حمد وقرب من امل ابو حمد:اشوف اللاااااااااه شو هالرسمه الحلوه امل:عميه الرسمه خربها حمد......حرام عليه انا من البارحه ارقب الصبح يطلع متشفقه في خاطريه ارسم ومن الصبح وانا واقفه معاها ايي هو اخر شي ويخربها اليه التفت ابو حمد لحمد:حمد شتبا بلوحتها اتخربها الها حمد:انا ما خربتها انا زدت عليها لمسه جماليه امل:لا خربتها اتسمي هذا لمسه جماليه...انته شو تتحسبنيه قاعده العب انا مع اللوحه حطت امل يدها بلا اراده على قلبها تسحب نفس وهيه ما تحس وحركتها هذي يننت ابو حمد الي خاف عليها امل:عميه قول له ماله خص فيه ولا في اغ****ه التفت ابو حمد لحمد مره ثانيه :اسمعنيه يا حمد لين اهنيه واتوقف بان في صوت ابو حمد الغيض بجد ابو حمد:ماريدك اتمد يدك على اي شي يخص امل لا في شوي ولافي وايد.....احترم نفسك واقلع لبنيه في حالها ايانيه واياك اسمعها تشتكي منك مره ثانيه...عندك البيت طول بعرض احرقه ان بغيت لاكن امل ماتدوس الها على اي طرف تفهم وقف حمد.....ايطالعهم وهو ايحس بنار شابه فيه من الغيض عليها قربت العاش من الريم وهمست الها العاش:اتحيدين يوم كنا يهال وانروح نشتكي على حمد شو كان ابويه ايسوي ابتسمت الريم وهزت راسها العاش:كان ايقول احسن تستاهلن خليه ايادبكن.....الحين حرمته بتاخذ حقنا امنه اكيد مستصيب ان ابويه واقف معاها ضده الريم:بس انجبي لف ابو حمد كتف امل:تعالي معايه انروح داخل امره لاتحطين شي في خاطرج الي تبينه بيصير وان ماتسنع معاج بسنعه من اول ويديد مشت امل مع عمها ولفت بعدها راسها وهيه رايحه ناحية حمد الي مسح على ويهه واشار الها بيده حمد:ماعليه بذاللحيه طنشته امل وكملت طريقها مع عمها طلع بعدها حمد من البيت معصب ظل حمد طول اليوم خارج البيت وامه كل شوي اتقول اتصلن عليه ويعطيهن مغلق ووترت معاها الكل ام حمد:لاحول ولا قوة الابالله وين بيروح يعني وليش يغلق تيلفونه امل:عموه انا اسفه كله منيه ام حمد:الله يستر يابنتيه ...اتصلي يالريم اتصلي عليه مره ثانيه الريم:اميه يعطي مغلق ام حمد:وين بيروح يعني الريم:ياميه حمد هب ياهل اتحاتينه......بيرجع انشالله اكملت البنات السهره في غرفتهن وكانت امل معاهن الي كانت اكثر الوقت سرحانه وعلى الساعه وحده استاءذنت امل رايحه لغرفتها وفي الممر اتفاجئت بحوض السمك وفيه اسماك الزينه اول شي فرحت لان الي يابه اكيد حمد معناه انه يا ثانيا اهيه اتموت على السمج مشت بسرعه وقربت امنه فرحانه وابتسمت واهيه تقرا الورقه المكتوبه وملصقه عليه كان مكتوب"الحوض والما والسمك ملك لحمد بن..............ممنوع اللمس وممنوع النظر لاي حد غير المالك" امل:ههههه وليش حاطنه عيل في الطريق وقفت امل عنده لين ماشبعت وراحت لغرفتها واهيه مصممه انها ترسمهن باجر امل"اكيد يا في خاطره انيه برسمهن عشان جذيه قال ملك وممنوع النظر الهن ههههه ماعليه امنه" في اليوم الثاني بعد ماقامت امل مرت بالحوض وماشافت السمج فيه امل :ليش وين راحن؟ نزلت امل لتحت وحصلت عمها عند الفطور وقعدت معاه اتقهويه بعدها مشت معاه لين الباب واهناك اتفاجئت بالي تشوفه كان حمد قاعد وعداله طاسه فيها السمج وجدامه قطوتين ياكلن شي قربت امل اتريد تستوعب....هذا شو اياكلهن ويوم وضحت الصوره صرخت ونزلت نعلها وفرت به لقطاوه امل :انته شو تسوي؟ وقف حمد:انتي الي شو تسوين وليش اتروقين اقطاوتيه امل:شووه قطاوتك...وليش تعطيهن السمج ياكلنه؟ كان ابوه واقف وراها حمد:كيفيه ...انا حر هذيلا سمجيه وانا حر ااكلهن لقطاوه اشويهن املحهن واحطهن فوق البيت كيفيه امل والدموع بدت تنزل من اعيونها:حرام عليك حمد الي تسويه كيف هانن عليك حمد:مالج خص فيه امل:ياويلك من ربك كييييف اتاكلهن لقطاوه...حرام عليك...انته بس اتريد تقهرنيه انا ادري بك كانت دموعها تنزل بسرعه وصوتها بدا يتغير من العبره الي فيها امل:معقوله انته جذيه قلبك مايعرف الرحمه....معقوله كل هذا بس عشانيه على ذمتك التفت حمد بسرعه الها ورفع نظره لبوه ماكان متخيل انها بتقول جذيه واتمنى ان ابوه يتكلم ايواقعه ايقوله اي شي بس ايسكتها عشان ماتكمل كلامها امل:انزين انا شو اسوي اذا قدريه جذيه.....ماليه حد في الدنيا هذي غير عميه حمد ماقدر يستحمل:اووووووه وبعدين يعني بتفتحون اليه سالفه ....عضمهن الا سميجات ابو حمد:حمد شل اثيابك ورح بوظبي وقف حمد:اتروغنيه؟ ابو حمد: لا ماروغك بس ياولديه رح لين تهدا الامور شوي انتو كل يوم وقعه وكل يوم امصيحنها يابويه ما صارت هذي حياه نقزت امل بسرعه ونزلت السلم واهيه اتروغ لقطاوه مره ثانيه وهيه تمسح دموعها مبتعده عنهم ابو حمد:ياولديه لبنيه يتيمه حرام تقهرها حمد:خلاص تم الي تباه وتركه حمد وراح للداخل ايلم اثيابه ناوي على الرجعه لبوظبي امل:عميه انته رغته؟ ابو حمد:لا مارغته بس اباه ايروح لين ايصك من لينان الي هو فيه...وانتي شلي السمج هذا الي بقا خلينا انردهن للحوض قبل لا يموتن طلع حمد من غرفته وهو شال ثيابه وشنطه صغيره وقبل لاينزل من السلم كانت اهيه صاعده اتلاقت عيونهم ببعض وكانت اثار الصياح عدها في ويهها كانت اعيونها ترفض الي تشوفه في ايديه واول مامرت من عداله ترك الي في يده ومسكها وثبتها على الجدار وتم لدقايق ايطالعها وكل واحد فيهم دقات قلبه اتزيد...ماقدرت اتقول شي ولا هو بعد عرف شو بيقول الا ان وقفتهم انتهت اول ما سمعو صوت المفتاح يفتح من الغرفه القريبه منهم تركها حمد وشل اثيابه ونزل بسرعه العاش:شبلاج امل مسحت امل دموعها:ماشي وراحت لغرفتها .................................................. ..... في بيت الخاله كانت عندهم عزيمه وسببها خطبة شما لولد عمها الي ياي من السفر وطلب من هله يخطبون له ويعجلون بالعرس لان اجازته قصيره كلمت شما بنات خالتها الي باركن الها العاش:ووين بتقدرين اتخلصين كل شي بسرعه شما:مادري....خليها على الله...جهازيه كله بيكون خاص بالسفر العاش:ياسلام قاطع قلبج انتي السفر....المهم مبروك غناتيه الله ايوفقج شما:ترا عنده اخو بقوله ايخطبج بعد العاش:لا واله احنا مانتنزل حق هل بوظبي ....هل العين حق هل العين الزين للزين شما كانت اتكلم العاش وحاطه سبيك لانها كانت اتقطع ظفورها قعد عدالها سهيل وسمع كلامها سهيل:شحالج بنت خالتيه العاش سكتت منصدمه سهيل:العاش انتي معايه؟ العاش:شموه وين؟ شما :انا موجوده اسمعج العاش:فارقت ويهج حاطه سبيك ضحك سهيل:اقول بنت هل العين...ولا مايصلح هل بوظبي ياخذون من عندكم؟ العاش:لا مايصلح سهيل:ترانا ماخذين من عندكم .....شو الي استجد؟ العاش:صبوع ايديك مش كلهن سوا سهيل:اووووه بنشوف العاش:شقصدك؟ سهيل:مافيه احرجج وشما تسمع العاش:شموه ياله مع السلامه سكرت العاش وهيه معصبه"شفاكر نفسه هذا"؟ شما:شو تقصد سهيل؟ سهيل:مااقصد شي بس اريد ارفع ضغطها....مبروك العروس...ياسلام شميم في امريكا عاد خبرو الكنغرس قبل لاتروحون عشان يستقبلونج اهناك شما:سهيل عن الطنازه سهيل:قدر يضحك عليكو خلوف اتوافقون عليه ...مسكينه طالعي عرسج جيف باجر بيكون حيالله كلام ...بسرعه بسرعه قامت شما وراحت سهيل:قويه ما ياز الها كلاميه تبا العرس .................................................. ........... الجزء الحادي عشر . بعد اسبوع مر على كل من حمد وامل وكل واحد فيهم مشتاق للثاني لاكن حمد ماقدر ايرد وماعرف كيف ايرد اتصل له صديقه راشد راشد:شحالك ياريال: حمد:الحمد لله ايسرك الحال راشد:وين دارك؟ حمد:في بوظبي وبروح دبي راشد:افااا اتحسبتك اهنيه في العين حمد:لاا والله شي في الخاطر؟ راشد:كنت اباك بخصوص السالفه الي اتفقنا عليها حمد:اي سالفه؟؟ راشد:سالفة امل وانيه اودي اميه اتشوفها حمد ماعرف شو هالدم الي اندفع في عروقه مره وحده اولا لانه قال اسمها وثانيا تذكره للسالفه القديمه الي بينهم حمد:راشد انسى السالفه ابويه سمعنا ومايازله راشد:زين انه سمعنا على الاقل بتتسهل الامور حمد:ياريال قلتلك انسى السالفه راشد:شووه بتخلف اليه وعدك حمد:اي وعد اقولك ابويه مابيرضى راشد:ماعليه بنشوف عقب مايردن اليه اميه وخواتيه خبر عن لبنيه حمد:امك وخواتك ليش هن وين؟؟ راشد:تونيه منزلنهن بيتكم حمد:راشد الله ايهديك كيف اتسويها وما تشاورنيه اول شي؟؟؟؟ راشد:اشاورك في شوه احنا متفقين من قبل على اساس يوم بتي اييب اميه اتشوفها حمد:لاحوووووووه....انته تدري الحين لو يدري ابويه شو بيسوي .....مش كفايه انه رايغنيه من البيت بسبتها الله يهديك ياراشد حمد:اميه يايه بس اتشوفها احنا هب الحين بنتكلم حمد ماعرف بشوه ايرد على راشد وهو ايحس بنار اتشب فيه حمد:طيب طيب اخليك الحين سكر حمد عن راشد واتصل بريم حمد:ريم ينكو حريم غرب الريم:هييه من نصف ساعه حمد:وامل وين؟ الريم:مع اميه في المطبخ اتساعدها حمد:ياسلااااام ...سيري صوبها الحين وخليها تقلع اي شي في يدها واتروح فوق ....قوليلها هذا امر من عند حمد وياويلج ان خالفتيه الريم:حمد شو صار؟؟ حمد :ماشي سيري قوليلها ويالله انا ياي في الطريق وقفت الريم عدال امل في المطبخ الريم:امل رفعت امل نظرها للريم الريم:ايقولج حمد اول ماسمعت اسمه بدا قلبها ايدق وتركت الي في يدها امل:شبلاه حمد؟ الريم:ايقولج حمداتركي اي شي في يدج وروحي فوق غرفتج امل:ليش؟ الريم:مادري بس هو ملزم لازم اتروحين امل تمت اطالع الريم مستغربه:انزين وعمتيه اخليها بروحها الريم:انا بتم عندها امل:ليش انتي اتمين وانا لا الريم:مادري هو سالنيه قاليه ينكو حريم غرب قلتله هيه وقاليه عقبها خلي امل اتروح غرفتها بسرعه تمت امل واقفه سرحانه بعدها رفعت نظرها للريم وكآآنها اكتشفت شي امل:جذيه يعني السالفه...اوكيه قوليله امل ما طاعت اتروح الريم:امل فديتج اتجنبي المشاكل مع حمد امل:مابتجنبها وانا ترانيه فهمت ليش اهوه ايسوي جذيه الريم:ليش؟ امل:تدرين ان الحرمه الي برا ام صديق حمد والي معاها خواته....يعني افهمي الريم:افهم شووه؟ امل:يعني الاستاذ حاط عينه على وحده منهن ومايباهن يدرن انيه حرمته فهمتي ابتسمت الريم:وانتي شو مغيضنج؟ امل:الريم فارقي عن ويهيه....اوووف عضت امل ظفرها امل:الحين اتذكرت الحرمه يوم راحت عمتيه داخل....قالت اليه صح يابنتيه انتي حمد ماتزوجنج بس على الورق الريم:اووف وشو قلتي الها؟ امل :ماقلت شي قمت ورحت......والله انه يقهر اتصل حمد بالريم بعد ماشلت امل صنية حلويات وراحت داخل عند الحريم حمد:هااه راحت فوق الريم:هااه ا ا حمد بغيض:انتي قلتيلها ولالا الريم:قلتلها بس ...اهيه اتقول ان اميه بتم ابروحها حمد:ريموووه قسمن بالله شوفي ان ماخليتيها هالساع اتروح فوق ماستوالج خير الريم:انشالله انشالله راحت الريم للصاله داخل ونادت امل الي طنشتها وتمت اتسولف مع البنات وتثبت الهن انها حرمة حمد صدق والي اكد شكوكها نظراتهن الي تغيرت عليها اما حمد فكان يسوق بكل سرعته وازعج الريم بالاتصلات كان خايف ان ام راشد يفلت لسانها واتقول شي وقبل لايوصل حمد البيت اتصل به راشد وقاله ان امه تمدح له في البنت راشد:حمد ماتتخيل اميه شكثر مستانسه واتقول هذي الي انا كنت اتمناها لك من زمان وحتى خواتيه كل شوي مطرشات اليه رساله ماباقي الا يصورنها اليه...سمع يوم بتي بقولك طريقه اتخلي عميه ايوافق سكر حمد التيلفون في ويه راشد وهو نازل من السياره ودار من ورا البيت عشان يدخل على المطبخ التحضيري من الباب الخلفي كانت امل شاله صنيه فيها عصير وانصدمت من حمد الي دخل ووقف جدامها ارتبكت امل لان قذلتها نازله وكانت مجحله عيونها طبعا غياظ للبنات مادرت انها ذبحة حمد وبنظره سريعه من حمد لكل الترتيبات في المطبخ مسك الصنيه الي في يدها وجلبها في المطبخ وراح سيده للسلطات والحلويات المجهزه ومسح كل شي على الطاولات والاسطح كله على الارض مسوي ضجه عاليه في المطبخ بعدها التفت لامل ومسكها بايديها حمد:وانتي يوم بييج امر منيه مره ثانيه نفذيه وانتي ساكته تفهمين؟؟؟؟؟ كانت ترتجف بين ايديه واهيه اتشوف كل شي حواليها مرمي بالارض ساعه واهيه اتراكض مع الخدامه اتجهز للعشا كله راح في غمضة عين والسبب ان الاستاذ مايريد خوات صديقه يشوفنها هزها حمد:ماتتكلمين ....غامضتنج ترتيباتج راحت على الفاضي ...انتي ليش اتناحسينيه...ليش ماتسمعين الرمسه من البدايه واتنفذينها حطت امل عيونها في عيون حمد امل:بطلنيه حمد اتجاهل طلبها وضغط اكثر بيديه لين ما صرخت امل فيه امل:قلتلك بطلنيه.......انته حقير......تبانيه الحين اروح اقول الهم ان زواجنا على الورق بس حمد:جااااااااااب وياها كف من عنده عقها على الارض حمد:والله لاذبحج وتدرين بالسالفه يعني كلها ام حمد:لااله الا الله حمد ياولديه شبلاك على حرمتك حمد:لاتقولين حرمتيه اتخسي هذي حرمتيه طلع بعدها حمد وخلاهن وهو مش عارف شو صايبنه حمد:الكلب راشد....اكيد امخطط حق كل شي ومرتب له وهيه ماصدقت خبر...تبا الفكه لاكن انا اراويهم .......... نزلت ام حمد لامل على الارض وساعدتها توقف ام حمد:بنتيه تانسين شي؟ امل:لا عموه مافيه شي انا بس اريد اروح غرفتيه ام حمد:سيري فديتج سيري ...الريم روحي فديتج معاها امل:لا ماعليه طلعت امل وراحت لغرفتها وغفلت عليها الباب وبدت اتصيح واهيه تتخيل ان حمد ايريد وحده من خوات راشد ااااه والله لاموت لو يفكر صدق يتزوج وبعد ماراحو الضيوف اتصل حمد لراشد:راشد امك قالت لامل شي؟ التفت راشد لامه:اميه قلتي حق لبنيه شي ام راشد:سامحنيه ياولديه غصبن عنيه فلت لسانيه راشد:حمد اتقول قالت الها حمد:اوكيه ممكن عاده اتشل الفكره من راسك ....ولين اهنيه وخلاص انا مب امطلق سكر بعدها حمد وهوه مقهور زياده يعني درت بالسالفه ويايزه الها على الساعه وحده اندق باب حمد عليه فتح الباب وكانت امل الي اول ما شافته كتفت ايديها واتساندت على حافة الباب امل :طلقنيه ضوق حمد عيونه وهو ايشوفها بعدها مسكها من يدها ويرها لغرفتها دخلها لداخل غرفتها وسكر عليها الباب ورجع غرفته الصبح كان الاب محتشر على حمد وعلى الي سواه ابو حمد:ريغنك بوظبي عشان اتصك وتعقل اترد اليه ارضي متلبسنك شيطان بتقوليه ليش ترفع يدك عليها حمد:تستاهل ليش يوم اييها الامر ماتسمعه ابو حمد:انته ياصبي ماتفهم اقولك مالك خص فيها حمد:اسمع ابويه طول ما اهيه على ذمتيه لازم تستحمل اوامريه واتنفذهن ولا .............. ابو حمد:ولا شوه ياحمد؟ حمد:انته تدري ابو حمد:انته تريد تمسكنيه من يديه الي تعورنيه....يعني تبا الطلاق لامحال...انزين لك الي تباه بخليك اطلقها...بس امهلنيه اشوي التفت حمد لبوه وموضوع البارحه يدق في راسه حمد:ابويه راشد شي قالك؟ ابو حمد:خويك الي تبا اتيوزه حرمتك....مفهومه يا حمد حركاتك حمد:لاتفهمنيه غلط....هو قال شي؟ ابو حمد:لا ماقال شي بس انا فهمت سبب ييته حمد:خلاص يابويه خلاص سكر الموضوع هذا تركهم حمد وطلع برا ام حمد:جيف يبا ايوزها خويه ابو حمد:ماتعرفينه انتي ولدج ...داهيه ام حمد:ماشالله...مادري من وين يايب الدهاوه ....................... يومين كملت امل مش ****ه تطلع من غرفتها والبنات دايمن عندها وحمد كل مامر من جدام غرفتها وقف عند الباب نصف ساعه متكي براسه على الباب يسمع صوت تحركاتها في الغرفه ولا تجرا يدق عليها الباب وفي يوم كان نازل وشافها قاعده عدال ابوه نظره ثبته عليها وهو ايسلم على الكل لين مايا وقعد معاهم وهو مازال ايطالعها متجاهل نظرات الكل على امل انها ترفع نظرها له...لاكن امل ظلت اطالع تحتولازمه السكوت بعدها بشوي قامت وراحت للمطبخ وخمس دقايق ولحقها حمد وابوه عيونه عنده ابو حمد:ماقولج راعي مشاكل الحين شو يباها لاحقنها المطبخ ام حمد:ياريال يمكن يبا ماي ولا بيوصي الخدامه على شي ابو حمد:وهذيلا خواته الي قاعدات ليش مايامر عليهن.....تدرين لو تينيه تشتكي عليه بروغه صدق من البيت انا ماهقيت طلعت من غرفتها دخل حمد المطبخ وشافها قاعده وجدامها كوب ماي واتوجه للثلاجه وخذله كوب ماي والتفت ناحيتها يشرب كوبه وهو ايطالعها وهيه منزله راسها تحت واول مالتفت ايرد الكوب ورجع ايطالعها ما حصلها وتمو على هالحال كم يوم كل ما يدخل حمد عليهم اتقوم واتروح لمكان ثاني وهو ميت ما يعرف شو يسوي وفي مره من المرات كان حمد داخل ميلس الريايل وحس بحركه عند المغاسل والوقت كان تو ماذن العصر راح للمغاسل وحصلها واقفه اترتب الفود الصغيره في السلال وقف وراها حمد:شو تسوين؟ رفعت امل راسها وشافته في المرايه جدامها وبعدها رجعت اتكمل شغلها قرب اكثر وراها وهمس الها حمد:سمعتينيه شو قلت؟ امل:اعتقد فيك اعيون اتشوف ابها حمد:وما جن الشغله هذي شغلة الخدامه امل:الخدامه ماتعرف اترتبهن زين حمد:واتشوفين الوقت زين ...افرضي يا حد الحين من الشباب شو بتسوين امل :مابسوي شي...ممكن تعطينيه طريق في الوقت هذا كان ابو حمد ايقرب من المغاسل وسمع صوته حمد الي مسك امل ويرها معاه لورا الباب حمد:ابويه...تعالي ضم حمد امل لحضنه على اساس ابوه ماينتبه الهم الي دخل وفتح الباب ومسكه حمد وجره عليهم اكثر ضاغط به على ظهر امل الي لمها اكثر لصدره يد ماسك فيها حركة الباب ويد لام ابها امل لحضنه وهم حاشرين انفسهم ورا الباب حمد حس ان روحه ردت فيه وهو ايضمها اكثر وامل اتوترت من قربها لحمد هالكثر لدرجة انها حطت راسها على صدره وسمعت دقات قلبه بعدها شبكت ايديها ورا ظهره وحمد ايحس بنفسه في عالم ثاني...كانو يسمعون ابو حمد وهو يتجهز للصلاه ويتوضا عند المغاسل وكان حمد ايقول في خاطره الله ايهديك يابويه وتتوضا بذمه وما تستعيل اما امل فكانت مستطربه على صوت دقات قلبه حركت راسها شوي ورفعته ناحيته وهي تهمس له بكلمات ما سمعها اظطر بعدها ايقرب راسه اكثر الها ويخلي اذنه عند شفايفها عشان يسمعها حمد:شوووه امل بهمس:اسمع دقات قلبك لمها اكثر له وهو يدري ان ابوه طلع وعلى طول سكر الباب وراه واتساند بيديه على الباب وامل مجابلتنه وهو ايحس بتنفسه ايزيد ابو حمد استغرب الباب على طول سكر وراه رجع له وحاول يفتحه لاكن ما قدر ابو حمد:بسم الله عطنو خوان شما....انا بروح المسيد الحين اصلي ويوم بايي بشوف شو سالفتك ياذلباب عيونه مافارقتها وهي منزله راسها تحت منحرجه وويهها محمر امل:حمد بطل اليه الباب حمد:خلي ابويه اشويه ايروح وتم ايطالعها واول ماسمعت امل صوت سيارة عمها دفعت حمد عنها وفتحت الباب وشردت مربقية اليوم على حمد وهو مكيف لين ما ياه اتصال طالبينه في الدوام لازم باجر يداوم وطلع فوق ايلم اثيابه وهو يلعن ويشعن بعد يومين اتصلت الخاله تعزمهم على رحله للبحر في بيت اخوهن الي له بيت عند البحر وهو من اهل المناطق الغربيه وبعدها بدا الكل ايجهز للرحله هذي اما حمد اول ما رجع للدوام حصل ضغط قوي في الدوام منعه بالتفكير باي شي كان يريد ايخلص ويرجع ايكمل ايجازته الي قطعوها لامر ضروري من بيت الخاله عزمو الشباب بعد للرحله سعيد وسهيل واختهم سلمى والعروس شما الي باقب الها اسبوعين عن العرس ................................ ## ## ## ودمتم وديمه التعديل الأخير تم بواسطة كاردينيا الغوازي ; 31-12-17 الساعة 03:22 PM | ||||
|  |
|
01-07-09, 04:40 PM
| #379 | ||||
|  عزيزتي سوون ادري انج بتعصبين في البارت هذا بس ماعليه السموحه......ّ مش بس سووون اللي بتعصب حتى انا يا مدام وديمه.... اولا مبروك اللاب توب ... وبما ان اللاب توب موجود عندج المفروض تتحفيننا باكثر من جزء في الاسبوع.... ثانياا... اطرمبه حمد و حركات اليهالوووه تراني قلت لج قبل حراكات يهااال يالسين يلعبون على بعض بس بين زوجين مش مقدرين بعض... المفروض امل ما تطلب الطلاق .... وحمد لين متى يعني اتشوف حرمتتك يعني مافي تنازل بينكم الواحد زييين اكذيه الحركه الكريه اللي سواها رفيجك راشد ... ابصراحة يزاتك وزياده ,,, يمكن تشعل الغيره فيك شويه على اموووله ... حليلها كاسره خاطري ..... ثالثا ... بو عسكور شوف تراني ساكته عليك اخر مره وترا الله ما يضرب ابعصى والله تراه بيبلاك ... بس ما اقول غير الله يهديييد انشاء الله على يد سلمي وترد حق ريم وترضيها خصوصا الاجزاء اليايه ... رابعا شو سالفه سهيل والعاش؟؟؟؟؟؟؟؟ شو ناويه عليه ؟؟ شو ايريد يوصله معها .... متخوفه منك يا سهيل الله يستر عليك انشاء الله وديمه اتريا البارتات على احر من الجمر ولا تبطييين عليننا الله ايبارك فيج .... | ||||
|
| |
 |
| أدوات الموضوع | |
| انواع عرض الموضوع | |
|
|
47Likes
.gif "Eh S(7)")
العرض العادي
