28-06-21, 09:09 PM
| #401 | |||||
|  اقتباس:
آمين يا رب يسعدك ويحفظلك كل احبابك . زي ستي لما تحكيلي بكره تجمعي عيديات كتيره وهدايا . لازم اطلع الجانب الحلو فالموضوع حتى اسلم من لسان نبض المهم للتذكير يا رمد يوم الثلاتا بفوت كمان ثلاث ساعات عادي تنزلي الروايه ها ما بنتفاجأ | |||||
|  |
|
28-06-21, 11:49 PM
| #404 | ||||||||||
| عضو ذهبي 
| اقتباس:
| ||||||||||
|
| |
|
29-06-21, 01:16 PM
| #405 | ||||
 
| جعل الله لكم من كل هم فرجاً، ومن كل ضيق مخرجاً، ورزقكم الله من حيث لا تحتسبون، وجعل أيامكم مليئة بالفرح والسرور .. ، ، وبدأ السر يلوح في السماء ... خطوات قليلة تفصلنا عن انجلاء الحقيقة ... المتاهة العاشرة - متاهة الزواج قل لها .. إنّه يفيق على جرح وتغـفـو سنينه فـوق لوعهْ سكب الدهر من أساه رحيقا فـتحساه جُـرعة إِثْـر جُرعهْ طرق لاهوب الباب بشكلً مُرعب وهو ما زال ممسكاً بطرف عباءتها والمُذهل صمت المهابة ولأول مرة يُخيفها شخصاً بهذه الطريقة .. ارتعبت نوره من طريقة طرق الباب اخذت خمارها وفتحت الباب لتُشاهد لاهوب ممسكا بطرف عباءة المهابة نوره بلعت ريقها وباستفسار / وش صار؟ لاهوب بكلام جارح / ربيها من جديد يا نوره ما عرفتي للأسف تربينها والبيت لا عاد تطلع منه وللعلم انا حجرت عليها حجر قتل بعد عرس مثايل بملك عليها وبتحذير وهو يأشر بأصبعه ناحية المهابة / واضح كلامي وخلك شاهدة يا نوره ما راح يصير لها طيب لو كسرت كلامي نوره برُعب / وين مثايل وش صار عشان تقول كذا لاهوب وهو ما زال ممسكا بطرف العباءة / مثايل خذها الوليد وها البنت لا عاد اعرف انها متواصلة مع منال والله ما يفكني عنها أحد ليدفع المهابة بكل قسوةً لتقع على الأرض مصدومةً من كل ما يحدث حولها ... وقفت بصدمةً لم تستطع ان تستوعب كل ما يحدث فقط نطقت بكلمة/ منك لله يا ولد ال لاهوب .. الله لا يوفقك ... اتجهت إلى غرفتها وأغلقت الباب بإحكام تنفست بعمقً وهي تستند على الباب لا تعلم لماذا الجميع ضدها؟ لماذا كُل ما تفعلهُ لا يمر كما تُريد ؟ وها هو يخرجُ من جُحره ليُلعنَ حجره بدون أي حق وأن كان هو ابن العم.. فاين كان تلك السنوات السابقة؟ لماذا لم يكن متواجداً؟ لماذا لم يسأل أحدا عن حالنا وكيف نقضي قوت يومنا؟ والان بعد كل ما كان يأتي بكل وقاحة يُعلن الحجر .. وإن لم يبقى سواه أُفضل البقاء كالمنزل الواقف على الزواج منه ... ، وقفت نوره بحيرةً كبيرة لا تعلم ما الذي حصل حتى تصل الأمور الى هذا الحال ولكن كُل ما استطاعت معرفته ذكر لاهوب لمنال ، اتجهت نوره الى غرفة المهابة وبدأت بالطرق لكن ما من مجيب ... نورة برجي/ تكفين فتحي الباب أبغي اعرف وش الموضوع ومثايل وينها ؟ لا رد من المهابة التي التزمت الصمت لا تشعرُ بتأنيب الضمير ابدا ولكن تشعرُ بالقهر بسبب تصرف لاهوب وتصرف منال التي لم تكُن لها يوما سواء أُخت وصديقه هل جزاء الثقة إن تطعنها بهذا الشكل .. نوره بقلة حيلة / تكفين فتحي الباب أبغي ارتاح تكفين المهابة بصوتً مسموع / بفتح بس حلفي وعطيني وجهك ما تضربيني نوره تهز رأسها برجي / والله ما اضربك المهابة بتأكيد / عطيتني وجهك ما تمدين يدك تكفين الا الضرب وبفتح الباب تنهدت نوره / والله ما بضربك بس فتحي وبعدين من متي اضرب؟ المهابة بتذكير / قبل فترة نسيتي؟! تري للحين يرن بإذني لا تكسريني وتضربيني الا الضرب والله ما عاد اسامحك نوره بوعد / فتحي أبغي اعرف وش الموضوع والله ما امد يدي فتحت الباب بملامحً هادئة وكأن لا شيء حدث قبل قليل .. وبملامح تشعُ براءةً وهي ترفع يداها للسماء / حسبي الله عليهم عيال ال لاهوب طلعوا متفقين مع منال على؟! تقدمت نوره الى الطاولة الصغيرة والتقطت المصحف وبصوتً جاد / يا الله احلفي تقولين الصدق بلعت ريقها المهابة وبعبط / الصدق يعني الصدق نوره بقلة صبر / ايه انجزي لا تجلطيني .. المهابة بتأكيد / الصدق ها انتِ طلبتي الصدق فلا تعصبين ... ، ، توجه لاهوب إلى السيارة وهو يُهدئ من غضبه فقد أفقدته أعصابه بتصرفاتها غير المدروسة سيبدأ باتخاذ طريقة جديدة في التعامل معها حتى تعود إلى رُشدها ... بينما الوليد بتحذير لمثايل وهو يضغط بكلتا يداه على المقود حتى اتضحت عروق يداه/ لا اسمع حتى نفسك والا والله لأقطعه تنكتمين لين أوصل للبيت انحني لاهوب ليصعد السيارة ، اغلق الباب وزفر بضيق، الوليد وهو يناظر للأمام / وصيت نوره عليها ما تشبر برا البيت لاهوب يهزُ رأسه / وصيتها وعطيتها خبر لو طلعت من البيت والله ان تعيفني صدق الوليد بقهر / أحسن جعلك الزين فيها قليلة حيا محمد يقول ردحت له وترادد له كلمة ولها عشر لازم تنضبط ذي البنت فضحتنا والله وصل الوليد إلى القصر لينزل ويفتح الباب وهو يُأشر بيده لمثايل / يا الله قدامي بكل هدوء وما أبغي اسمع لك حس وبصوتً صارخ / يا الله مشت أمامه مثايل بخطي متقطعة خائفة لا تعلم كيف لها العيش في هذا القصر بدون والدتها وأختها لا تستطيع تخيل الحياة بدونهم .. رآها تترنح أمامه بخطي بطيئة دفعها وبصوتً قاسي / خلصيني حركي دخل الوليد ومعه مثايل بينما لاهوب توجه الى المجلس الخارجي حتى لا يُسبب احراج للوليد .. دخل الوليد ليجد والده والدته وجدته وجده ليزمجر بصوتً عالي / اخذيها يمه للغرفة داخل لين املك عليها صيته بصدمة وهي لا ترى سواء السواد / من ذي؟ الجد بغضب / ما تستحي جايب علومك للبيت الوليد بفخر / متعب ال لاهوب ما منه علوما رديئة ابد ثم أردف بسخرية / هذي بنت محمد بنت ولدك جبتها من المركز سطام بصدمة / مركز الشرطة ؟ هز رأسه الوليد بالإيجاب / أي والله شفت أخر ما وصلت له تقدمت مثايل لعمها تسحب يدهُ وتُقبلها وبصوتً باكي / تكفي يا عمي في وجهك والله ثم والله ما سويت شيء جيب المصحف احلف لك بس تكفي رجعني لأمي ما ابغي غيرها الوليد وهو يتكتف/ والمطلوب نصدقك وترجعين لخالتك تبطين عظم صيته بنهر/ وليد .. ثم التفت إلى عمها / عمي قول شيء وقف الجد ليسند الجدة وبصوتً حازم / محمد عزلها عنها وما لي شور عليها شورها عند خالتها والوليد يا الله يا ام سلطان وغادروا الى الغرفة الأخرى الوليد بأمر / يمه الله يخليك لي اخذيها للغرفة لين أرسل يجيبون ملابسها صيته بهدوء/ ما يصير يمه خل ترجع لخالتها لين بعد العيد الوليد وقبل ان يُكمل كلامه قطعه سطام / قومي اوصلك لخالتك يا الله الوليد بقهر وبصوتً مُهدد / روحي لنوره بس قسم با الله وهذا انا احذرك قدام ابوي وامي لو شمية خبر أنك معتبه باب البيت بدون نوره او متواصلة مع الكلبة منال والله ما أخلى فيك عظم صاحي ولا تقولين ما قلت لك لا يسمع سوأ صوت شهقاتها وبُكاءها .. وبصوتً غاضب / عساه دم رد سطام بغضب / وليد خير شاد حيلك حدك يا تضف لسانك وتحترمها وتحشمها يا تفارق مني ذي الساعة والا والله ما يحصل زواج الوليد باستهزاء / خل تحشم نفسها بالأول وتركهم وغادر المكان وهو يغلي من الغضب ،، صيته بأسف / الله يهديه ويصلحه نار وبكُل حنان حاوط سطام مثايل وبصوتً محب / هدئ يا قلب عمك ما به الا الخير يا الله اخذك لخالتك وبصوتً متقطع باكي وهي تشاهق / والله ما سويت شيء سطام يهز راسهُ بالإيجاب / مصدقك والله ما منك رديء يا بنت محمد بس معليه طولي بالك ، يا الله حياك معي لخالتك تبعت مثايل سطام إلى حيث تتواجد السيارة أمسكت بمقبض الباب الخلفي لتصعد بالخلف ناظرها سطام وبهدوء وهو يُأشر بعيناه / تعالي قدام جنبي ليه رائحة وراء؟ ، ، تجلسُ بيأس وترخي راسها بين يداها وبصوت يأس / يا رب سترك ما ظن الوليد يرجع لنا مثايل عقب الى صار المهابة بعدم مبالاة/ صدقيني وليدوه بو خشم ولوهيب بو قحز ( تقصد الرأس) متفقين مع منال عشان وليد يقدر يأخذ مثايل وانا لوهيب يحجر على ... وقفت نوره بفقدان للأمل / ابدا لا إحساس ولا ضمير عندك نوره تسحب عباءتها وبصوت يأس / الله يصلحك ويهديك يا المهابة اللحين وش استفدت من الى صار كم مره حذرتك المهابة برواقه / وانا عالمه الغيب ان كل هذا راح يصير وبعدين انا في ورطة لاهوب حجر على وانا ما أبغي لوهيب نوره بتشفي / أحسن تستاهلين الله يبيض وجه وان شاء الله يعزم ويعرس عشان تلقين من يرجع لك عقلك المهابة بصدمة / لهدرجة مفقوعة كبدك مني وكارهتني نوره بضبطه نفس / بسم الله على كبدي وبعدين مو كارهتك بس كارهه تصرفاتك الصبيانية كنك ولد واللحين ما حد تأذي غير مثايل الله اعلم وش راح يسوي فيها الوليد الله يستر المهابة بتأكيد / يخسئ يسوي شيء لمثايل كان والله احطه في لستة الثأر عندي أما لوهيب فيبطئ ولد سليطين اخذه إذا ما اجلطه ما أكون بنت فهيد تجاوزتها نوره تاركتها تتحدث مع نفسها فقد تعتب نوره وبدأت أعصابها بالتلف من تصرفات هذه الفتاة والتي لا تجلُبُ سواء المشاكل .. ، ، سطام بصوتً هادئ ومُحب / سمعي يُبه صحيح انتِ ما تربيتي عندنا بس ربتك نوره وانا اعرف نوره واعرف اخلاقها واعرف انها انسانه دينه وخلوقة الى بطلبه منك لا عاد تطلعين مكان الا مع نوره عشان ما يكون للوليد حجه مثايل بصوتً باكي / بس والله ما سويت شيء ظلمني الوليد سطام يبتسم/ أدرى ما سويتي شيء وادري انصدمتِ من الوليد بس ترى الوليد طيب بس فقد اعصابه من الى شافه تدخلين المركز مو شيء بسيط ابدا وأدري السبب بنت فهيد بس بعد صار الى صار .. ابتسم وهو يري التزامها في اللبس والذي لم يُلاحظه الوليد بسبب غضبه مما حصل .. ادخل يدهُ في جيبه واخرج كرتً له بالإضافة الي مبلغ مادي ومدهُ لها وبصوتً مُحب/ هذا رقمي كلميني إذا قصرك شيء وهذا مبلغ خليه معك مثايل سحبت الكرت فقط اما المبلغ فقالت بصوتً هادئ / ما على قاصر جعل عمرك طويل سطام بحزم وهو يعقدُ حاجبيه/ تردين عمك أقول اخذيه يا بنت مدت يدها بتردد وهي تلتقط المبلغ لتقترب منهُ وتُقبل جبينه / عمرك طويل يا عمي ثم أردفت بصوتً هادئ / تسمح لي أكلم أمي هز رأسه بالإيجاب.. التقطت مثايل هاتفها لتتصل لوالدتها ، رن هاتف نوره وهي تنحني لتصعد سيارة الأجرة نوره بخوف / هلا بقلبي وعمري مثايل بنبرة بكاء/ انا في الطريق مع عمي سطام قريب البيت نوره براحة/ بانتظارك يا عيون نوره ، ، عادت نوره أدراجها الى المنزل الصغير دفعت الباب بهدوء تنهدت بسعادة كبيرة لرجوع ابنتها لتجد المهابة تجلسُ ترتشف الشاي ولا يتضح على ملامحها الندم وقفت المهابة وغادرت الى غرفتها تنهدت نوره بضيق من حال هذه الفتاة والتي بدأت بالانحدار الى مستوي لا يُبشر بالخير طُرق الباب تقدمت نوره وهي تتغطى بشكلً كامل فتحت الباب لترتمي في حضنها مثايل وبصوتً باكي / يممممممممه نوره بسعادة/ بسم الله عليك هدي يممه تعالي داخل وتعوذي من الشيطان بينما في الخلف يقف سطام وبصوت هادئ / شلونك يا نوره نوره ببحه/ الحمد الله يسرك الحال والله لا يهينك ويعلي قدرك ابتسم سطام وتركهم وغادر ... اخذت نوره مثايل الى غرفتهم وبصوتً امر / سمعي السالفة ما أبغي اعرفها ابدا بس أبغي من اليوم ما عاد تتكلمين مع المهابة نعاملها والطوفة واحد لين يرجع لها عقلها جننتني قسم با الله مثايل برعب/ يمه لو شفتيها في المركز كان أغمي عليك الشرطي محترم ويقول لها عطيني بطاقتك تقول له ما عندي بطاقة ما لي اهل مجهولة الهوية نوره بصدمة إصابة قلبها / مجهولة الهوية مثايل وهي تفرك يداها في بعضها البعض / قال لها تري بسجنك ردت عليه اهم شيء توصيهم على يعطوني اكل بالساعة تراني بطينه وحلقي يشتر ( تعلك) طول اليوم ، ترجيته يسفهها وقلت له انها اختي وعقلها مضروب وتركها عشاني والا والله انه وصل حده منها بغي يحذفها في السجن نوره تزفر بضيق وبصوتً هادئ/ جعل لاهوب الزين حيله فيها ان شاء الله مثايل بصدمة / ليه وش سوى ؟ نوره وهي تخلع نقابها وتبتسم/ حجر عليها حجر قتل .. برعب مثايل / خبل يحجر عليها والله إن تجلطه وما راح تأخذه لو يموت قدامها نوره بتأكيد وهي تبتسم / بأذن الله تأخذه ورجلها فوق راسها ما ينفع لها الا لاهوب ، ، ، عاد سطام ليجد الوليد ولاهوب متوسطين الجد والجدة لينضم لهم باقي الشباب فلاح والكاسر ... سطام بصوتً عاتب / وليد اسلوبك ماش اليوم مع زوجتك تراها بنت عمك الوليد وهو يرتشف القهوة / ما كان ودي تكسر كلمتي وترجعها لخالتها بس شغلها عندي عقب لاهوب بجدية/ تري بعد عرس الوليد بأسبوعين بملك على بنت فهيد وبسوى حفلة عائلة مو لازم عرس وطقطقه وحالة فلاح باستغراب / ليه بنت من حقها تستأنس وتعيش اللحظة الكاسر بضحك / لا يكون بخيل يا ولد لاهوب بضحك / لا طبعا مهرها وفلوس العرس بنزلها في حسابها كيفها فيها بس انا مطلق وهي مطلقة وجربنا البهرجة والخربطة ولا فيها بركة نسوى شيء بسيط والله يطرح فيه البركة ويكون فاتحة خير فلاح بطنازه / من حبك للوليد ههههههه الوليد بعدم استيعاب / وش تقصد ما فهمت؟! الكاسر التقطي مغزى فلاح / شدعوه انا فهمت وانت يا الحوت ما فهمت سطام بضحك / يقصد البنت تشبهه حركاتك عشان كذا حبها لاهوب الوليد بقرف/ تهبي والله يا فويلح اللحين هذي تشبهني با أفعالي والله ما صدقت لاهوب بضحك/ تبغي الصدق تراه صادق غرورها وخبثها سبحان الله مثل غرورك وخبثك تفرق عنها انت معتز با أفعال متعب وهي معتزه با أفعال الرديء فهيد الوليد بملاعبة / عجل خل اخذها انا وانت شوف غيرها لاهوب يأشر بصبعه / سبقتك وحجرت حتى انت لو قربتها مثلك مثل غيرك بقتلك سطام باستغراب/ يبه ليش ما تكلمت يوم كانت بنت محمد هنا وانسحبت حتى ما طيبت خاطرها بكلمة؟ الجدة بغضب التقطت الحديث / وش نقول وهي يوم شافتنا ما جات وسلمت ولا كلمتنا كل همها أبغي اعود لأمي وهي ما هي أمها خالتها الكاسر يبتسم/ الخال ثالث الوالدين يا جدة فلاح بحزن/ تكسر خاطري بنت محمد بين نارين نار الوليد ونار بنت فهيد الوليد بغرور / واكيد نار الوليد بتأكل نار بنت فهيد الكاسر ضحك بصوت عالي / والله شكلها هي الى بتحرقكم كلكم وبصوت ناصح / لاهوب خلها عنك وفك عنها الحجر تري الى فيها كافيها سطام باستغراب / تعرف شيء ما نعرفه وقف الكاسر / استأذن عندي شغل صغر سطام عيناه بشك لم يتكلم الكاسر من فراغ ليتذكر أن مناري ما هي الا صديقة المهابة المقربة قد تكون أخبرته بموضوع لا يعلمون عنهُ شيئا .. ، ، ، ميرا بابتسامة / غزل صبي لي شاي وبحب / مناري تبين شاي مناري ببحه / ايه فديتك صيته قادمة تحملُ صينية الموالح / صنع ايدي وحياة عينيا ميرا بحُب/ مناري ما قلتي لي ان شاء الله مرتاح مع الكاسر مناري بخجل / الحمد الله انا طلعت من اهلي وجيت عند اهلي صيتة بفرح / ما قلتوا لي متى ننزل السوق عشان عرس الوليد وفلاح مناري برقة / انا عندي فستان جديد للحين ما لبسته بلبسه بأذن الله ميرا بتأفف / أي والله للحين غزل ما جهزتها عدل أشرائك اليوم نروح انا وانتِ نأخذ قطع عشان الجلابيات قطع عليهم صوت العاملة / بابا متعب يبغي أنتو صيته تقف / يا الله ميرا عن اذنكم بنات وبأخذ صينية الموالح بس يا الله كل وحده تأخذ لها كم حبة قبل يغزونه الشباب غادرت ميرا وصيته ولم يتبقى سواء غزل ومناري غزل ترفع حاجبها الايسر / الا ما قلت لي شلون كنتي مرافقة بنت فهيد مناري بتأكيد/ مو مرافقتها هذي اخت دنيا لها مواقف معي كثيرة وهي اختي الى ما جابتها أمي غزل بتأفف / بالمشاكل والا بالخير مناري كاتمه غضبها/ ما اسمح لك تغلطين عليها قدامي المهابة لولا ظروفها بس كان صارت وحده ثانيه غزل بسخرية/ والله ما عمره الفقر كان عيب والله خلقنا طبقات بس هي يا كافي الشر مناري بقهر / قولي الحمد الله الى صابها مصيبة وابتلاء الله يرفع عنها ويحميها لشبابها ولامها واختها، وضعت مناري كوب الشاي وبصوت هادئ /عن اذنك ، يتبع ... | ||||
|
| |
|
29-06-21, 01:17 PM
| #406 | ||||
| ، ، مرت يومي الجمعة والسبت هادئة على الجميع ، نوره ومثايل لا يتحدثون ابدا مع المهابة في انعزال تام عنها ، اما المهابة فقد ملت من هذا العقاب بصورة فظيعة لا أحد يتحدث معها وكأنها منبوذة .. المهابة تهمسُ لنفسها / ايه بكرا الاحد راح اداوم اغير جو ثم صمتت قليلاً وهي تتذكر لاهوب وتهديده لتُردف / اعلي ما فيه خيله يركب ولد سليطين ، الصباح كالعادة الصباحية مثايل تستيقظ باكراً تُحضر سفرة الإفطار وتبدأ بتنظيف الصالة وترتيب المكان وتعطيره .. العمة نوره / صباح الورد للوردة مثايل تُقبل راسها / صباح الخير يمه جلستا حول السفرة مثايل بصوتً متردد وهي تشبك أصابعها / يمه خاطري أسولف مع هبهب اشتقت لها نوره بلهفه وشوق / وانا مثلك بموت من الشوق لها بس خليها شوي تتأدب خرجت المهابة وهي ترتدي العباءة وتحمل حقيبتها .. نوره بقلة صبر / على وين يا بنت ما توبين انتِ ؟ المهابة برسمية وهي ترتدي نقابها/ زين حن قلبك وتكلمتِ معي نوره بأمر/ رجعي ولا تسوين لنفسك مشاكل مع لاهوب تجاهلت كلام العمة لا تستطيع البقاء اكثر في المنزل .. اتجهت للباب وادرت المقبض وهي تشتمُ نفسها بصوت خافت .. ، لاهوب يقود السيارة بسرعة جنونية .. الوليد بتعب / وش ها الملل اللحين ليه رائح لهم مع ذا الصبح لاهوب بجدية / أبغي أتأكد انها ما طلعت وكسرت كلامي وبالمرة اعطيها مصروف ها الشهر الوليد بقلة صبر/ لا بصراحة كفو وهي انا اعرفها بنت فهيد مطيعه بتقول لك تم وحاضر يا ابن عمي لاهوب التقط سخريته/ عادي تطنز بس بتشوف لاهوب وش يسوي اذا ما تشوفنا مثل عصافير الحُب وتنقهر منا وقف أمام المنزل الصغير انحني قليلا ليفتح الدرج ويلتقط الظرف الوليد ابتسم وهو يُأشر ناحية المنزل الصغير / واضح الحب مو هذي المهابة ارتخت ملامح لاهوب وهو يرفع رأسه قليلاً ويراها تخرجُ من المنزل أنحني بغضب واضح لينزل بشكلً سريع لتشاهدهُ المهابة ليتضح لها الغضب الذي يتفجر من ملامحه عادت ادراجها فتحت الباب بشكل مخيف وأغلقته وهي بالكاد تلتقط أنفاسها تضع يدها على صدرها بتعب نوره بفجع / بنت وش فيك صاير شيء ؟ المهابة بنفس متقطع وبصوتً مقهور/ لاهوب النذل برا وتجاوزتها الى غرفتها وهي في قمة قهرها .. ابتسمت نوره وبهمس داخلي ( جعل بطن شله الجنة ) طرق الباب التقطت نوره خمارها لتتغطي ثم توجهت الى الباب لتفتحهُ وتجد لاهوب لاهوب بصوت رجولي / صباح الخير يا وصمت قليلا وبصوت هادي / تسمحين لي أقول لك يا عمتي ابتسمت نوره تحت الغطاء / ويشرفني ويسعدني لاهوب مد لها ظرف وبصوتً سعيد / هذي الفلوس للمهابة مصروف لها وتموين البيت كامل انا مسؤول عنه تقدمت نوره خطوة ليعود لاهوب خطوتين الى الخلف أغلقت باب الصالة خلفها وبصوتً هامس / اسفه ما قدر اقلطك ما عندي رجال بس سؤال وعليك امان الله تقول الصدق لاهوب يهز رأسه / امريني نوره تنهدت وبصوت خافت / انت حجرت على المهابة حجر قتل بس كذا تبغي توقف نصيبها والا لك غرض فيها لاهوب اتسعت عيناه/ لا والله نيتي نية سليمة ابغيها على سنة الله ورسولة ابغيها مرتي وام عيالي وهي بنت عمي وعارف أصلا وفصلها وبنت كل مجرب نوره براحة / الله يطمئنك لاهوب بحرص/ بس انا بشد شوي عليها لين تفهم انها بنت حركاتها حركات عيال والا بالصدق مكانها بأذن الله عيوني ادخل يده في جيبه واخرج له كرت / هذا رقمي خليني على بينه ما قدر اراقبها طول اليوم بس بحاول أرعبها شوي عشان تتأدب نوره التقطت الكرت وبصوت سعيد / ابشر من عيوني كل اخبارها عندك ، ، ، بعد ان خلعت نقابها وعباءتها خرجت للصالة لتجد مثايل تقدمت وجلست وسحبت صينية الفطور وبدأت بسكب الشاي لها مثايل تبتسم/ شدعوه ما فيه صباح الخير المهابة بطنازه / صدق والله توك متذكرة قفزت مثايل لتحتضن المهابة وهي تُقبلها وبصوتً مرتبك / تدرين والله خفت افقدك بغيت اموت لو ما رجعني عمي سطام المهابة بهدوء/ حصل خير خلاص سامحتك يا قلب هبهب مثايل برجي/ تكفين افزعي لي ما ابغي الوليد ما بغيه وش اسوي المهابة بملل / اخذيه واشتغلي له في الأزرق مثايل باستغراب / شلون ؟ المهابة بتأفف / يعني قدام الوليد سوقي عليه الغباء وقلة الفهم والبراءة واذا راح حيلك فيهم كلهم بس مناري لا تضايقنها ابدا عشان ما استلمك انا مثايل بغباء/ بعد ما فهمت المهابة تصغر عيناها/ غباءك وبراءتك قدام عمتي وخبثك ومكرك في الخفاء طبقيه عندهم مثايل بغباء اكبر / بعد وضحي لي اكثر المهابة تهزُ رأسها بأسف / يعني الوليد لا يشوف وجهك الخبيث دايما خليه ما يعرف الا مثايل الهبله الى ما تعرف راسها من رجلها يعني على البركة خليك لبيك ونفداك وأمر وتدلل قدامه أول مايطلع طلعي وجهك المخبئ ابتسمت مثايل / جبيتها صح المهابة بسعادة / الله يقدرني على فعل الخير ثم اردفت / لا ما ابغيه تكفين ما أبغي ذا العرس بكبره المهابة بتأكيد/ متأكدة اذا كذا عندي خطة تخليه يطلقك وهو الى يطردك مثايل تصفق بفرح / يا الله هاتيها وانا اطبقها المهابة بتحذير / بس ها انتِ الى قلتي ما تبغينه يعني بكرا لا تقولين هبهب السبب مثايل برجي / تكفين انقذيني ابغي الفكه منه المهابة بخُبث/ شفتي جارتنا الهندية عندها ولد صغير عمره تقريبا سنة وشوي مثايل تقاطعها / بس وش دخلني فيهم ابغي خطة المهابة تضربها بخفه / صبري خليني اكمل وعقب قاطعيني اسمعي اخذي حفايض ( وانتوا بكرامة ) ولدها بخنيزها وحطيها بكيس وليلة العرس وبعد ما تدخلون غرفتكم روحي للحمام ومسحيها على جسمك عقب لبسي وطلعي له مثايل تغيرت ملامحها للقرف/ اععع وجع وش ذا القرف برجع جعل امحق خطة المهابة ترفع كتفيها/ كيفك اذا تبغينه يعيفك للابد سوي كذا حتى لو عقبها تكشخين وتتعطرين والله ما عاد يقربك مثايل بصدمة / حشى تفكير شيطاني من وين جايبه ذي الفكرة المهابة تغمز لها / مثل تفكيرك الخبيث الى ما يخلص ، دخلت نوره وهي تبتسم ثم شاهدت ملامح مثايل وكأنها مصابه بإمرا ما نوره بخوف / اشفيكم ؟ مثايل تبلع ريقها بقرف/ ولا شيء المهابة وهي ترتشف الشاي / لا صائر هي ما تبي الوليد وانا عطيتها حل عشان تفتك منه للابد بس ما دري تسويه أو لا نوره بتحذير/ قلت لك مثايل لا تدخلين فيها وانتِ خير ليه وش فيه الوليد مثايل وهي تأشر بكلتا يداها / خلاص يمه والله ما أسوي الكلام الي قالته أصلا مستحيل اسويه حتى الشيطان ما فكر في ها السالفة نوره بصدمة / ليه وش خطتها ؟ المهابة برواقه / ابدا قلت لها تأخذ حفايض ولد الهندية بخنيزها وليلة دخلتها تلطخ جسمها فيه وعقب تلبس قميصها عشان يعيفها للأبد ثم ابتسمت ابتسامة عريضة بصوت عالي نوره/ ووووع وبسرعة تجاوزتهم للحمام للترجيع مثايل بخوف / ويلي امي لاعت كبدها ورجعت المهابة بسخرية / كبدها حساسة اشوف كبدك صاملة مثايل بلوعة / لا والله ما أنى بخير بزوع بعد المهابة باستغراب / عجل ليه الفكرة عجبتني وبطبقها مع لاهوب واشوف كبدي صاملة مثايل بملامح تغيرت / انتِ عندك كبد أصلا ؟ المهابة بصوتً عالي لمثايل / خلاص اذا كذا اخذي خنيزك ولطخي نفسك فيه قال ايش قال ما ابغي اتزوجه... مثايل بتوتر وهي تحاوط نوره / يمه انت طيبه نوره بتعب / طيبه بس كبدي وش ها القرف ها البنت عقلها فيه شيء لا ضروري افحصها مب صاحية مثايل تبتسم/ بس تدرين فكرتها خطيرة وجديدة رمقتها نوره بنظرة لتصمت .. ، ، الجد متعب / سطام وينه يا صيته صيته بحب / في الشركة يا عمي الوليد / امر يبه بغيت شيء الجد / لا بس أسال ثم أردف / انت ولاهوب ليه ما تسافرون يومين تغيرون جو قبل الدوام الوليد يناظر لاهوب / مو فاضي للسفر يبغي يحرس بنت فهيد ... دخلت غزل تحمل صينية القهوة ليفز لاهوب واقفاً ويحمل بدلا منها الصينية غزل ببحه / شلون الوليد طيب؟ الوليد بصوت هادئ / طيب يسرك الحال انتِ شلونك طيبه غزل تبتسم من تحت الغطاء / الحمد الله الوليد بتأكيد / إذا قصرك شيء قولي لي لا تستحين هزت رأسها بالإيجاب ، الكاسر يُرخي رأسهُ بين يداه ليرفعهُ مجددا / فلاح مصيبة والله ما عاد شيء واضح فلاح بتفكير / انت اصبر شوي بعد عرسي راح نبدأ ندور الكاسر بحزن / جدي لو عرف والله ليقيم الدنيا ولا يقعدها فلاح بهدوء / انت تعوذ من الشيطان وخل الموضوع بينا لين نخلص كل التزاماتنا وبعدها لكل حادث حديث ثم أردف / اشرايك نأجل العرس ونروح نبحث ونتأكد أكثر ... الكاسر وهو يرمي الملف بغضب / درت كل المستشفيات حولنا نفس الكلام نفسه فلاح تنهد بضيق / الله يستر بس .. الكاسر برجي / تكفي الموضوع بينا لا احد يعرف فلاح بتأكيد / افا عليك والله بينا والله ما يطلع لمخلوق بعد عرسي بأسبوعين بأذن الله نتعاون انا وانت ونشوف حل لها الموضوع ، ، صباح اليوم التالي نوره بصوت عالي/ مثول مثول مثايل تبتسم / لبيه يمه نوره برعب/ وين المهابة ؟ مثايل ترفع كتفيها / ما دري والله التقطت هاتفها لتتصل للمهابة المهابة بملل / سمعيني يسرى يا قلبي انا احتمال كل يوم أتأخر غطي على تكفين يسرى تعقد حاجبيها/ هو فيه ايه يا بتي المهابة بكذب / ابوي تعبان يسرى بصدمة / انت ما قولتيش ان باباك ميت المهابة متسمرة بالكذب / لا الحمد الله رجع للحياة يسرى بفرح / والله انا فرحت اوي ليكي رن هاتف المهابة برقم عمتها ابتسمت / هلا عمه نوره تبلع ريقها خوفاً من مصيبة جديدة / وينك يا بنت المهابة بضحك/ بالدوام اسمعي بعد صوت يسرى يسرى / ايوه يا ستي ألف مبروك رقوع باباها نوره بصدمة أغلقت الخط وهي تستدير لمثايل / البنت فعلا ما عاد فيها عقل هبل فيها لاهوب وفعلته عادت المهابة الي المنزل نوره بقهر/ شلون طلعتي من البيت بدون علمي وما خفتي لاهوب يشوفك او يجي يسال عنك ولا يحصلك المهابة بملل/ لا وين قديمة انتِ مثايل بطنازه / عجل شلون طلعتي بطاقية الاخفاء المهابة بمكر/ شقحت الطوفة حقت جارنا الهندي وطلعت من باباهم ونفس الشي بالرجعة لين اشوف لي حل مع مصيبة لوهيب مثايل بتصفيق / عاشت اختي أفكار نوره بصدمة / شلون شقحتي؟ المهابة تذكر لها الموقف بالتفصيل طلعت العصر وحصلت ولدهم الى دوم اضربه وسالته عندكم سلم عاد الله وكيلك ساعة عشان يفهم على وبعد ما فهم طلع عندهم المهابة / اسمع صديق انت كل يوم صباح حطي سلم وانا يجي منيه عشان يطلع من هذا باب وبعطيك كل أسبوع عشرة ريال الطفل بسعادة / جيين وعاد لا يطوفك ساعة كامله عشان افهمه ان الساعة ست لازم يحط لي السلم تميت أقوله ساعة ست صباح وانا اهز راسي وعقب اشرت بيدي عجزت وانا افهمه بس الحمد الله وصلته المعلومة نوره بقلة حيله / الله يرد لك عقلك الله يرده مثايل والمهابة / وللجميع اممممين ... غادرت نوره الي غرفتها غاضبة بشكل لا يتصوره أحد التقطت كرت لاهوب وبدأت بالاتصال به / لاهوب / مرحبا نوره برسمية/ والبقي انا نوره عمة المهابة لاهوب بحب / مرحبا نفداك اشحالك اموركم طيبه نوره بتردد/ طيبين بس تري المهابة طلعت اليوم للدوام لاهوب بهدوء / صدق عجل بكرا قدام باب بيتكم نوره بتنبيه/ لا تجي قدام بيتنا تعال قدام بيت قصيرنا الجنوبي لاهوب باستغراب / وليه اروح هناك ؟ نوره بتردد/ لانها تشقح الطوفة وتطلع من هناك ضرب لاهوب جبهته بقلة استيعاب / ولو تكسرت اشفيها بايعه نفسها نوره بنصف ابتسامة / لا مضبطة ولد جارنا الصغير يمسك السلم ويساعدها وبتعطيه فلوس لاهوب بضحكة صافية/ خلاص من النجمة هناك بانتظرها ومهرها بعطيها إياه مع مثايل وبسوى لها عشاء عائلي بعد عرس الوليد وفلاح بأسبوعين نوره بحزن / ليه يا لاهوب ما تفرحها بعرس حالها حال الباقين لاهوب / خلاص هي اعرست قبل وانا اعرست وعشنا هالجو بنزل لها فلوس العرس وتجهيزاته أبرك لها نوره بنبرة حزن/ ترى مهابة ما سوت عرس بزواجها الأول بس ملكة وعشاء وخذها لاهوب بصدمة / صدق ؟ ما عندي خبر والله نوره بتأكيد/ أي والله ما سوت عرس ابدا لاهوب يبتسم / خلاص ابشري بسعدك اسوي عرس لها القاصي والداني يحكي عنه بعد عرس الوليد بأسبوعين وبتحضرين نوره بفرح / راح يسمحون لي لاهوب بحب/ ومكانك العين وبأخذ لي فيلا برا القصر وبتجين مع المهابة تؤانسينها لان اغلب شغلي شفتات ابتسمت نوره وفرحت من قلبها فقد بدأ الحظ يبتسم للمهابة ، ، المهابة رد رد يوم ابغيه ما يرد جراح بفرح / هلا وغلا توني برسل لك امي بتجي تخطبك الأسبوع هذا المهابة بتحذير/ اسمعني لاهوب حجر على حجر قتل جراح بصدمة/ لا مو من صدقك ما حجر الا اللحين المهابة تبتسم / والحل عندي جراح يتنهد / ابوي او امي لو عرفوا بيرفضون العرس نهائيا المهابة بصوت خافت / عجل اسمعني والكلام الى أقوله تنفذه بالحرف طبعا مو اللحين رمضان خلاص باقي كم يوم بس اخر أسبوع رمضان نضبط كل شيء ولين ذاك الوقت خلاص لا تكلمني بينا فقط مسجات بس اللحين تسمع الى بقوله لك وتحفظه زين لأنه ما بعيد الكلام لك ابدا ... جراح بصدمة كبيرة/ بس عمتك شلون بتقتنع المهابة بتاكيد/ عمتي عندي وأي شيء من طرفي عندي انت ضبط الى عندك وامشي بالخطة وجهز كل شيء جراح يهز راسه بالإيجاب / حصل بس اهم شيء حرصي عليها لا تجيب طارئ الحجر عشان امي لو قالت لأبوي بيخرب كل شيء المهابة بخُبث / ان شاء الله ولين ذاك اليوم لا عاد تراسلني فقط بينا مسجات ، قصر ال لاهوب الوليد بتردد/ يبه متعب وابوي سطام أشرائكم نملك انا وفلاح اللحين على بنات عمنا على الأقل ليلة العرس بس تكون احتفالات الجد برفض / ما عاد به وقت رمضان بدخل علينا الوليد بتاكيد/ ملكة بدون عشاء او حفلة بس نملك حتى فلاح يملك معي سطام باستغراب/ وش عندك الوليد بتوتر /بقولكم قبل لا يجي لاهوب لان كل مره اشوف فلاح يتعرض لغزل وما أبغي أي مشكلة مع ولد عمنا الجد يهز راسه بأسف / الله يصلحه ذا الولد خبل مرجوج سطام بجدية / خلاص ما بقي الا شهر واسبوع ويملك خلنا على موعدنا ولا عاده متعرض لها وانا بتصرف. ، ، صباح اليوم التالي استيقظت بكل نشاط لتخرجَ للعمل وبصوتً خافت / حسبي الله عليك يا لوهيب عباءتي تتوسخ واقعد انظفها طول اليوم بدأت التصفير لابن الجيران وضع السلم لها لتصعد من السلم من منزلهم لتنزل منزل جارهم .. المهابة تبتسم/ شكرياه صديق بدأت بنفض عباءها لتفتح باب منزل جارهم لتُشاهد لاهوب يقف مستندً على باب السيارة عادت ادراجها مسرعةً لتصعد السلم وتعود من حيث أتت وهي بالكاد تتنفس لتجد عمتها تجلس لوحدها بينما مثايل في المطبخ المهابة بغضب / وش عرفة اني اشقح من بيت جيرانا نوره تلوي شفتيها/ والله رجال كل شيء بيعرفه طرق الباب التقطت نوره خمارها لتفتح الباب .. لاهوب بصوتً حاسم / وينها قليلة الحيا ليشاهدها تقف بمنتصف الصالة وبصوت عالي / وش خليتي للعيال أردف وهو يشاهدها تقفُ لوحدها / شوي يا عمه اتسعت عينيها من كلمتهُ لتسبقهُ وتختبئ خلف العمة وبغباء / عمتي خلك واقفه بينا ايه كذا بينا عشان اخذ راحتي وأسفل فيه وبصوت عالي / خير وش عندك تلاحقني ما علموك اهلك السنع لاهوب يكتم غضبه/ علموني بس شكلك ما انتِ مخليتني اغض البصر عنك وشكلي بتلك اللحين وبملك عليك وبأخذك معي المهابة بتحدي / تخسي والله ان تبطي عظم ما اني ملطشة عندك لاهوب بغضبً واضح / صدق يعني تتحديني عجل ؟ المهابة وهي ما زالت تحتمي بالعمة وترفع يدها عاليا وتنزلها بطريقة ساخرة نوره بصوتً غاضب / فكيني يا بنت وعيب عليك ترادين المهابة بسخرية / لا صدق والله اشرايك اخليه يمسخرني واسكت وتقليدا لصوت لاهوب / أقول لو فيك خير زوجتك ما طالعت غيرك وهي بحضنك وما طالت عينها الا سندك الوليد هذا اذا ما كان هو الى ركض وراءها وعيونه طالتها رفع يدهُ عاليا / تخسين تقدم ليضربها أبعدته نوره وبصوت مترجى / تكفي خلها تراها سفيه المهابة بأكمال / والله ما حد سفيه غيره نوره بغضب/ بس انطمي لاهوب يزمجر وقد فأر الدم في راسه / عطيني وعد يا عمه ما تشبر البيت لين أملك عليها نوره بتأكيد / لك وعد ما تشبر خطوة برا وعرسها مع عرس مثايل بيوم واحد صمتت المهابة وعادت إلى غرفتها وهي في قمة غضبها وبصوت خافت متحدي / والله ما اخذه اوريها عمتي اذا ما اسوى الى في راسي ما أكون من ظهر رجال ، ، عاد لاهوب للمنزل ليجد الوليد ينزلُ درج القصر بشكلً سريع وبصوتً سعيد / وينك يا ولد مختفي اتصل لك من الصبح لاهوب تجاوزه ليتركهُ بدون رد، استغرب الوليد تصرفه عاد الوليد ادراجه ليتبع لاهوب الذي دخل المجلس الداخلي الوليد باستفسار/ ولد اشفيك لاهوب بقهر/ ابعد عني ما اني طايق نفسي الوليد بحزن / اشفيك وش صار لك انا اخوك لاهوب بصوت متحشرج / تدري بنت فهيد وش قالت لي اليوم الوليد بصدمة / وش قالت ؟ لاهوب وقد امتلت محاجرهُ بالدموع / تقول طليقتك يوم خانتك يمكن ولد عمك طالت عيونه عليها عشان كذا استسهلت الموضوع وبنبرة عبرة / يعني الكل يعرف الموضوع الكل عارف انها خانتني ومع من ؟ معك .. الوليد بهدوء/ وعشان كلامك هالخبل تتضايق خل الى يتكلم يتكلم انت تعرفني وانا اعرفك الا اذا انت شاك فيني اخذ السلاح واذبحني وحلك الله وبأحك في دمي والله ثم والله لو أنك ما خطبتها وتبغيها كان وريتها شغلها وأدبتها لاهوب بصوتً حزين / ما دري يا الوليد احسها نهشت قلبي وهي تعايرني حسيت أنى مو رجال ولا كفو يكون لي بيت انحني الوليد ليقبل راسه / انت أخوي والى يرضيك أسويه لاهوب وقف ليحتضنه اسمح لي بس ضاقت فيني الوسيعة من كلامها .. الوليد بتفهم / انت اخوي وضلعي ومعذور ومسموح لو ذبحتني وهي سفيه ما تنعطي وجه والله انك خساره فيها بس انت اخترت والله يوفقك ويسعدك ، ، مر شهر رمضان بجماله وطقوسه التي تعودها كل بيت في منزل نوره والفتيات تعودن على عمل إفطار بسيط بشكل يومي وأداء صلاة التراويح في المسجد وقضاء ساعة لمحاضرة دينية وعند الساعة العاشرة مساء يتابعون لهم أحد المسلسلات لتسليه ثم بعد الساعة الواحدة صباحا يبدأن بقراءة القران حتى اذان الفجر.. بينما عائلة متعب ال لاهوب كان رمضان جميل هادئ لهم كما كُل سنة وكان من أجمل الاخبار التي صاحبت هذا الشهر الفضيل تأكيد حمل مناري وقدوم حفيد للسطام .. ، قبل انتهاء رمضان بأسبوع المهابة بجمود/ عمتي ممكن شوي بتكلم معك نوره باستغراب / ايه قولي يا قلبي المهابة بهدوء/ بروحنا تعالي لغرفتي مثايل بسخرية / عشتوا اسرار يعني ابتسمت نوره وتبعت المهابة المهابة بأمر / بتجيك ام جراح وبتخطبني وانتِ وافقي نوره ارتخت ملامحها/ شلون لاهوب حاجر عليك تستهبلين صح المهابة بجدية / سمعيني انا وجراح متزوجين من شهرين زواج مسيار وما كنت اداوم كنت اقضي وقتي معه وحتى لو طلقني اللحين لازم عدة ويمكن فيه شيء في الطريق استري على نوره بصدمة تبلع ريقها / قولي انك تمزحين المهابة بجدية / ما ينمزح في المواضيع هذي ودك تزوجيني سكاتي ولا من شاف ولا من دري والا ودك اهرب معه لك الخيار ؟! واهم شيء ام جراح لا تعرف بحجر لاهوب ترى فضيحة لنا وقفت نوره وبنفس متقطع / لا كذا ما اقدر كثير والله كثير يا رب خذني يا رب لتقع العمة ، في أروقة الطوارئ تقف المهابة جنبا الى جنب مع مثايل مثايل بغضب / وش قلتي لها علميني المهابة بهدوء / كل خير بس عمتي الله يهديها حساسة مثايل بقهر / الله ياخذك يا ساس المصايب المهابة تبتسم / امين اقلها افتك من وجهك مثايل بخوف / بشر دكتور امي وش فيها دكتور /انخفاض بالضغط حاولنا نضبطه ان شاء الله تكون أفضل بس بعدوها عن أي ضغوطات رجاء دخلت مثايل / يمه شلونك احسن ؟ لا يسمع سوي صوت بُكاها دخلت المهابة لتردف العمة بصوت مبحوح / مثايل طلعي شوي برا المهابة تقف بجود لا شيء يتضح منها لا ندم ولا ضمير يوحي بالاسف المهابة بتردد / عمتي نوره تتنهد بتعب / خسارة عمري خسارة تربيتي خسارة كل شيء عشانك مطلقة استسهلتي الموضوع وتزوجتي مسيار المهابة تبلع ريقها / بالحلال يا عمتي حلال ما سويت شيء حرام بكت نوره بصوتً مسموع / الله حسيبك يا بنت فهيد الله حسيبك انا بمشي في الموضوع مو خوفا منك بس خوفا من ربي ما أقدر اخدع الرجال الى شاريك بس والله لو تلفين العالم ما تحصلين نفس لاهوب المهابة تبتسم بغباء / بحصل يا عمتي بداله الف بس عجلي في الموضوع انا اتفقت معه عرسنا ثاني أيام العيد قبل عرس مثايل بإسبوع وبيكتب لي بيت باسمي وبتروحين معي وبنعيش بإذن الله بأمان ... ، ، صعدت المنصة وبأنفاسً متقطعة وكأنها للمرةَ الأُولي تتزوج وإنِ لم تكُن هذه المرة الأولي، ولكن هذا الزواج مميزً لها وليس كذلك الزواج الذي عفا عليه الزمن … سقطت المسكة من بين يداها بعدَ أن انحنت أحداهم تخُبرها بخبرً صادم … ، أعتذر عن القلب الذي مات وحلّ محله حجر؟ عن الطهر الذي غاض فلم يلمح له أثر؟ وقولي كيف أعتذر؟ وهل تدرين ما الكلمات زيف كاذب أشر لنغلق متاهة الزواج ونتجه إلى متاهة الحدث الي الملتقي باذن الله .... سنابي / rraamad انستغرام / rrammad | ||||
|
| |
 |
| أدوات الموضوع | |
| انواع عرض الموضوع | |
|
|
35Likes
العرض العادي
