03-08-21, 11:33 PM
| #1 | ||||
|  حديقة إبليس / للكاتب أحمد الوحيشي / ليبية [align=center] رواية #حديقة_إبليس الحلقة 1 الرواية تحكي علي عائلة كلهم يسكنُو في مزرعة وحدة في القوارشة ,, مع باتهم الحاج علي الحاج علي زوجته اسماها الحاجة سدينة عنده ثلاث أبناء وبنتين وحدة مخطوبة وفرحها اقريب والثانية مزالت تقرى في الجامعة الأبناء اسماهم أحمد وإسلام ونزار والبنتين نور و آية آية هي المخطوبة وفرحها اقريب أحمد عنده عيل وبنت ,, اسماهم ونيس وزمرد ويقرو في الابتدائي وزوجة أحمد أميرة اسلام عندة ثلاث بنات يقرن في الابتدائي يقين ويُمنى ويارا ,,\ وزوجة اسلام وداد نزار مزال لم يرُزق باي مولود وزوجة نزار اسماها مروة ,,,, كانت حياتهم عادية وفي تفاهم وصلة رحم والحب بيناتهم وبين صبايا خوتهم لعند ما ازوّج نزار وجتهم مروة انقلبت المزرعة حرب في بعضهم وحقد وحسد وبغضاء وأصبحت مزرعتهم كحديقة ابليس ,,,,, ,,,, كَيَومْ عادي ,,, زي أي يوووم ,, كانت نور اتجهز في الغداء لباتها اوامها الحاج علي كان مضايق ويهدرز مع الحاجة سدينة الحاجة سدينة : خلاص لعند امتى وانت تبقى زعلان الحاج علي : واجعيني اعيالي بعد ماكانُ يد وحدة شوفيهم اليوم كل حد في حالة بالرغم قاعدين في مزرعة وحدة لكن كل حد مع نفسه الحاجة سدينة : كل العائلات هكي مش نحنا بس الحاج علي : خايف اليوم اللي انموت فيه حيقتلوو بعضهم الحاجة سدينة : بعد عمر طويل يارب الحاج علي : انا بلعاني طلعت من الماجوري وشريت ارض كبيرة في القوارشة وبنيت عمارة كبيرة فيها واستراحة عشان نبي اعيالي يكبرو بين ايدية ويزوجوو قدامي وانحق اعيالهم يلعبو قدامي الحاجة سدينة : اهُو شفتهم قاعدين يلعبو قدامك خلاص جت نور فكنا من النكد عالغداء " كانت في حرب كبيرة بين اعيالهم وزواجتهم وكل حد مع نفسه والحرب هذه بدت من اول ما ازوج نزار لكن اجتمعت بيهم الحاجة سدينة كلهم وخذوو عهد مع بعضهم الخوووت وصبياهم انّ كل حد يبقى في حالة ويكسرو الشر علي بعضهم واقعدو فترة طويلة معاملة رسمية للسلفات البعضهن خاصّة لكن الخوت كانت علاقتهم ماشي حالها " " و الحاجة سدينة واعرة نفس الوقت حنونة دايريلها الف احساب اعيالها وكنّاينها " خشّت عليهم نوور بالغداء لما كانُ يهدرز الحاج علي والحاجة سدينة نور : كنكم سكتُّ لما جيت الحاج علي : اهو جت الهرجة امتى تزوج ونفتكو منها نور : معقولة يا باتي ,, تي انا اصغر وحدة ونكهة الحوووش الحاجة سدينة : يبصّر عليك الحاج , وين اختك آية وهي من يوم انخطبت ومعش قعدت تطلع من الدار نور : قاعدة في دارة تو نمشي انكلمها ,,, آية كان خطيبها اسمه محمود وكان يقرى امعاها في الجامعة تخرجوو مع بعضهم آية كانت تحكي مع محمود اتصال آية : عارف انّك حبيبي وعمري وقلبي محمود : حتى انتي يا اقليبي آية : هيا امتى نزّوجووو مليت من حوش هلي نبي انعيش امعاك نور : صار مليتي ,, اللي يسمعك يقول امقطعة روحك علي حوسة الحوووش آية : ههههه مش قتلك معش تقعديلي تصنتي من ورا الباب نور : هيا حطينا الغذاء تعالي آية : آني جايتك ,, تم ياحودة حنكلمك بعدين بعد محمود : تم ومشت نور للصالة تتغدى مع باتها وامها ولحقت عليها آية ,,,, أحمد كان في شقته يلعب مع اعياله ونيس وزمرد اميرة : بعدين عندي لمّة ماشيا لعيت خالتي أحمد : تمام حنشيلك ,,, أميرة : بس اعيالك خليهم هنا مش شيلتهم ونيس : شليني ماما ,,, مليت هنا مزرعة مايخلّش فينا بابا نطلعوووو زمرد : باهي ماما اميرة : انت كبير توا ياونيس تقرا في سنة سادسة معش تمشي مع الصبايا ,, وانتي زمرد مانبش انشيلك لاني عارفتك ملوله وكل اشوية اتقولي نبي انروح احمد سمع باب الشقة يدق طلع يبي يفتح طلعت مروة مرات نزار احمد : خشي خشي مروة : لا كلمها ليا تطلعلي هنا مستعجلة الغداء عالنار طلعت اميرة وسلمن علي بعضهن مروة : اليوم مش تنزلي نشربو قهوة نبو انديرو تكسيدة في المزرعة انا وياك ووداد اميرة : اسمحيلي اليوم طالعة عندي لمة خليها مرة ثانية مروة : لا عادي ابراحتك " كانت أميرة تخدم دكتورة نساء وتوليد " مروة وهي راقية لشقتها فوق مروة : تحساب روحها حاجة كبيرة هالمريضة هذي اوكي ع أساس دكتورة وعندي مواعيد قالت لمة قالت ,, قولي مانبش انهدرز امعاك وخلاص وخشّت مروة راقيلها واصفقت باب الشقة بالبقووة نزار : تي فجعتي امنا ازح كنك مروة : هذينا اخر رايتك اتقولي خليك احسن منها امشيلها ابدي انتي بالسلام نزار : باهي شن صار مروة : مشيتلها نبيها اتكسد امعانا واتهدرز امعانا بعدين قالت لي مش فاضية نقعد مع الاشكال اللي زيّك نزار باستغراب : من اميرة قالت هكي مروة : اها كنّك مش امصدق نزار : الدكتورة اميرة قالت هكي مروة : تي اها ,, قالك دكتورة دايرة روحه متحضرة وراقية وهي اكناسة حشاك ياقلبي نزار : غير فكينا , نحنا قلنا انبطلو مشاكل وانا قتلك نبيك تمشيلها عشان يردن المياه لمجاريها ماكنتش نتوقعها هكي حيكون ردة فعلها ,,, " مروة حقودة حسدية كائن غريب ماتفهموش كيف شيطان علي هيئة انسان " ,,, أحمد : كنها شن تبي فيك هذي اميرة : قالت يبّن يهدرزن بعدين قتلها مش فاضية أحمد : الحمد لله جاتك معناها في بوادر صلح بعد الحرب اللي كانن بيناتكن من قبل اميرة : انا عادي من ناحيتي من اول ما خذاها نزار وهي حاطه راسها براسي ومرة براس وداد لكن انا عشان خاطرك وخاطر عمي وعمتي طلعتها من راسي أحمد : تي حتّى نزار مرخي مش قادر عليها مفروض يتحكم في مراته مش يخليها هكي اميرة : فكنا منهم توا ,,, مش داعي نفتحُ عليهم مواضيع ونيس : ها ماما شن قلتي اتشيليني احمد : عليك سكنان كلا انت ,, خلاص تو انشيلكم انحط امكم عند خالتها ,, وانا حنمشي بيكم مول اوف بنغازي شن رايكم زمرد : هيييييييييي ونيس : اوووووووو وجرووو احضنوو باتهم اميرة بحّتت في احمد وابتسمت ,,, إسلام : كان يدخن في بلكووني الشقة ويبحت في المزرعة " سبحان الله بالرغم من كبر هالمزرعة لكن انحس في روحي قاعد في حبس " خشّت عليه وداد بالقهوة اسلام : باهي اللي جيتي ,,, السبسي قريب يكمل وانتي ماجيتي ,, هذا كله اديري القهوة وداد : كنت انعاني في بناتك اسلام : من اللي امبدري خبّط عالشقة وداد : هذي مروة قالت تبي اتهدرز بعدين العشية قتلها باه كساد كساد ومنهن خلي البنات يشمّن الهواء اشوية اسلام : اها تمام ,, شن قعدتن اتهدرزن عادي زي قبل وداد : هي اعزمت وانا رحبت بالفكرة قلت ليش لا اسلام : نجّها ليا كبيرة العقل كمل السّبسي اسلام وشرب جغمتين قهوة مسك يد وداد ,, هيا تعالي ليا واجد عليك وداد : البنات وعيات قعدات اسلام : غير تعالي قاعدات راكبهن التوحد من التفريج علي قنوات الأطفال وخشو للدار مع بعضهم ,,, العشية الساعة 5 عصرا ,,, كان الحاج علي قاعد مع الحاجة سدينة في المزرعة ويتمشّوووو مع بعضهم وكانت آية اتهدرز بالتليفون مع الحب ونور شافت من بعيد يهدرزن " وداد ومروة مع بعضهن " مشت شووورهن ,,, اسلام طلع من المزرعة وكان عنده شغل ,,, امّا نزار قاعد في الشقة ويتفرج عالكووورة وداد : هاللمة الحلوة مانقصتها الا اميرة مروة : تي فكيني منها هالسوسة وداد : كنها شن دارت مروة : مشيتلها وقتلها مش نبو انهدرزو مع بعضنا قالت في البداية باهي ,, بعد قتلها حتى وداد كلمتها قالت لالا فكيني منها هالولية ,, انا لين استغربت وداد : قصدك مزالت شايله مني مزالت وكنها فيش اتحس اللي دايرة ورحها دكتورة مروة : حتى انا معش فهمت ,, قتلها شن في بينك وبينها مشاكلنا اللي من قبل وخليناهن علي جنب قلنى نبدو مع بعضنا صفحة وحدة مابتش اترد عليا وخشّة وسكرت باب الشقة وداد بعصبية : حيوانة الولية هذي ,, مهما درنا صلح عشان ازواجنا لكن مزالت مش ناوية علي خير مروة : تي حرام فيها القدر نور : خير عليكن يا , من ورايا قاعدات مروة ببرود ردت عليها خير وسلّمت عليها بروس صوابعها لكن وداد سلّمت عليها بالاحضان والبوس هكي استايلها وداد حبوبة ودمها خفيف نور : كنك قالبة وجك يا مروة اتقول شفتي ابليس مروة : نستأذنك انا ياوداد نمشي انشووف نزار بالك يبي حاجة ,,, وداد : خلاص تعالي بعدها هدرزلي مروة : تمام عالسريع ومشت مروة من تلاهن نور : هذي كنها مادرتلها شي انا راهُو وداد : فوتي عادي ,, مادققش نور : كان شي دايرة لقطة عفوية فهمتها مني غلط وداد : ممكن , ,,,, مروة وهي ماشية شور شقتها شافت آية قاعدة في مكان دكنوي ومش باين ع حد مروة : هالساقطة هذي مخطوبة وادير في العار مع خطيبها عيشي حياتك كلنا ياما درنا من عار أيام خطوبتنا ومشت شورها بدوون ماتفطن اية وكانت آية الحق تحكي عادي مع خطيبها واخذة مكان في ساتر مش تأخذ راحتها هكي اشوية شافت مروة فوووقها انفجعت آية آية : بسم الله الكريم , قولي خير قولي احم أي حاجة مروة : كنك شفتيني انفجعتي ,, عابيين عليك هلك وانتي اديري في العار من وراهم ياساقطة آية سكّرت الخط من محمود وصبّت قدام مروة آية بصوت عالي آية : احترمي نفسك خيرلك ,,, كاسرة شرّي وفايتك مش ناسية شن درتي فيا زمان وقلبتي عليا نزار بالظلم مروة : كاسرة شرّك ,, اسكتي خير ما انكلم فيك نزار يكسّرك عائلة قليلة الادب آية اصفقت مروة بككككككككككف آية : قليلة الادب من يوم خويا خذاك ياتافهة مروة قعدت تبكي : تضربيني صح والله حنوريك وكان صوتهم عالي " الحاج علي : شن هالصوت العالي الحاجة سدينة : ماني عارفها ,,, نور : تعالي بسرعة شكلها مشكلة بين اية وداد مشن يجرن شوورهن ,,,, نزار وهو يتفرج عالكووورة شاف رقم مروة اترن نزار : هذي كنها شن تبي فتح الخط عليها مروة وهي تبكي : تعال لوووطة بسرعة اختك الحيوانة قليلة الادب ضربتي آية : اسكتي راه نعطيك بكف ثاني ياوقحة نزل نزار يجري لوووطة ,,, أحمد كان قاعد في مول اوف بنغازي ويتفرج علي اعياله يلعبووووووو يحكي مع نفسه " سامحني ياباتي لكن يعلم الله خاطري نطلع من هالمزرعة وانشووف حالي مانش متريح فيها غير مانبو انزعلووك وجابرين بخاطرك " سمع نقاله يرن أحمد طلع اسلام احمد : مرحب اسلام : مرحبتين أحمد : شن جو إسلام : تمام , قاعد في المزرعة ولا برة احمد : برة اسلام : باهي نبي انجيب دجاج واجد وانتبله عندهم وانت جيب خبزة والمشروووب احمد : كنك عليش اسلام : نبّو انديرو تكسيدة في الليل انلمو باتي وامي والبنات وصبايانا وانديرو جو ,, لازم انرطبو الجو ,, حنكلم نزار يوتينا القعدة ويجهز هالفحم أحمد : حتى هذا راي ,,, باتي له واجد معش شافنا مع بعضنا اسلام : خلاص تم تم ,, بعد المغرب حنروح احمد : نفس الجو حتى انا اسلام : هيا خلاص خليني توا انوقض نزار ,,,, وداد : وسّعن بالكن يابنات آية , مانش اموسعة بالي ياما دارت فيا وتقلب في وجها وتعزق في هالكلام , كان انتن اتخاف منها انا لا مروة : بلاش كذب شن درتلتك يافتانة علي جيّة نزار نزار : كنكم ازّح ,, ماهو قلنا خلاص مشاكل شن هالعيشة السودة النودة هذي مروة : اختك ضربتني كف خوذلي حقي منها توا نزار : كنك انتي الاخرة // كنك حاطة راسك براس مروة فيش اتحسي يا اية ,, طلعيها من راسك ازّح كرهتو امنا في هالمزرعة آية : مراتك كذابة مادرتلها شي مروة : شفت هالحيوانة كيف تحكي قدامي نزار بعصبية : امشي ارقي للشقة , مروة : بس ضربتني نزار : قتلك امشي ارقي للشقة كلمة وحدة مروة : انقولك ضربتني ومهزلت بيا وقالت كذابة عليا قدامك وماتبش ادافع عليا اقعد فيها انت واهلك وعدت شوور شقتها تبكي ,, الحاج علي شافهم من بعيد يتعاركوو الحاجة سدينة : ها تبي تمشيلهم اتشوفوهم كنهم الحاج علي : خليهم يتعاركوو ياما حكينا الحاج علي للرد للعمارة ومشت شورهن الحاجة سدينة ,,, كان وقتها نقال نزار قاعد فوق في الشقة ويرن ويرن اسلام اسلام : تي رد ازّح وانت مافيك فائدة من فوائد ربي ,,,, نزار : يا آية عشان باتي و امي مانبي انمد يدّي عليك لكن والله لو مديتي يدك مرة ثانية او حطيتي راسك براسها عندي امعاك تصرف ثاني آية : بس انا ما درت شي ,,, هيا قالت عيلة قليلة الادب غلطت فينا وغلطت فيا حتى انا سبتني علي جيّة الحاجة سدينة نور وداد واية يبسن في مكانهن الحاجة سدينة : تي كنكم انتم , ماتبّوش تحمدُ ربي عالعز اللي عايشينّه ,, واكلين شاربين عايشين احلى عيشة برزق باتكم ومزال اتعاركووو نزار : هذي بنتك آية ياحاجة مدت يدها علي مروة الحاجة سدينة : صح يا آية مديتي يدك عليها آية ساكته وقعدت تبكي آية : حرام عليكم والله غلطت فينا وسبتني شخصية الحاجة سدينة : فكيني من البكاء ودموع التماسيح امشي قدامي شوور الدار اني جايتك احسابك امعايا بعدين قول لمروة عمتك تو تأخذ حقك ,, وهي نور وداد قريب اظلّم خلونا انخشو جوا خير " حاولت الحاجة سدينة اتلم الموضوع بسرعة " ,, ركب نزار لشقته شاف مروة ماسكة ساكُو دبش نزار : كنك شن فيه خذيت حقك مروة : شيلني الحوش هلي ,, معش نبي نقعد امعاكم هنا نزار : غير شن هالكلام هذا اللي اتقولي فيه مروة : نزار ارجوك شيلني ساد اني عايشة امعاك بلا اعيال وساد نكد اهلك نزار : بلا اعيال , اتعايري فيا مروة : لا ما انعاير فيك هذا واقع نزار : ماهو مشينا لكل دكتور وقال انا وياك مافش شي وجونا تمام ,, مروة : شيلني الحوش هلي ماعندش جو نبقالك هنا الراجل اللي مش قادر يأخذ حق مراته مايسمّاش راجل نزار : استغفر الله , تستفتزي فيا قاعدة ياسي هيّا اقلبي وجك ,, تو ننزل انسخّن السيارة حنشيلك هيا انزلي ورايا ,,,, علي خشّت احمد واميرة للعمارة " " عمارتهم كان نظامها اول ما اتخشي من باب العمارة صالة كبيرة معيشة هذه ديرينها للمناسبات وباقي الشقق للحاج علي واعياله " كانت نور وداد قاعدت في الصالة مع الحاجة سدينة وكانت آية في دارها تبكي لما خش عليهن احمد واميرة واعيالهم وكانُ امروحين " , أحمد : السلام عليكم اهلين ونيس وزمرد : اجديدة واقعدو يجروو شورها حضنتهم جدتهم سدينة اميرة : خير يابنات نور : خيرات وداد بحتت فيها باستحقار ومابتش اترد عليها الخير وقالت بينها وبين نفسها " اتقرمي فيا عند مروة واتقولي خير مبرد وجك " أميرة حسّت في حاجة غلط وكأن الجو مشحووون خذت اعيالها ورقت شوور الشقة وهي راقية قالت بينها بين نفسها " كانها وداد ماردّتش الخير ,, شن هالعائلة اللي قاعدة فيها " وهي راكبة لشقتها كانت نازلة مروة وهي تبكي وماسكة في يدها ساكُو امتاع دبش " وكان قدامها نزار اميرة : بكل عفوية , شن في كنك ان شاء الله خير مابتش اترد عليها مروة اميرة : لاحول ولا قوة الا بالله وكملت طريقها شور شقتها زمرد مسكت كراع أمها زمرد : كنها تبكي اعميمة مروة اميرة : مش عارفة ياماما هيا امشو قدامي ,,, أحمد : هذي الخبزة والمشروب نبو انديرو تكسيدة اشويات كلمني اسلام جايب دجاج قالي مزال ماجا قصدكم وداد : مزال ماجشش شافوو نزار طالع هو ومروة من العمارة أحمد طلع وراهم برة للمزرعة ولعّ السيارة يبي يطلع شاف احمد جي شوره نزل نزار ومشاله ,,, احمد : كنك شن فيه نزار : نفس هالقصة الأولى طحنات عيت حنّة علي أساس حرجانة عند هلها يومين حترد عارفها مش اول مرة تحرج عند أمها احمد : الله المستعان ,, قبل دايريين تكسيدة شوايات اشوية اخرة , نزار : تو انحطها عند هلها وجايكم , حنعيشو اللحظة غير اللي عندي شكلها وجها وجه نكد خليني انشيلها خير مروة اتشوف فيهم وهي في السيارة قالت بينها وبين نفسها شن يحكو ازعمك , اكيدة احمد قاله خليها تنزل واترد خير كان قالي صفي النية وانزلي حننزل ,, تو نمشي الامي للحوش حتهزبني ,, استعجلت حتى انا ,,, جا ركب نزار للسيارة وخّر بالسيارة وطلع من المزرعة وماحكش ولا كلمة وماشي بيها شور حوووشها وحال السانها يقووول خلاص غيّرت راي معش نبي نمشي الحوش هلي لكن مش قادرة اطيح كلمتها " ,,,, بعد مرور بعض الوقت كانُ يجهزّو في التكسيدة كلهم عشان اشوايات وكانت وداد اتحاول تتفادى في اميرة وماتقعمزش تلاها وجنبها اعيالها واميرة فهمت الجو وقعدت ما اتبحتش فيها كانُ كلهم قاعدين في التكسيدة والجو الفايح الا آية في دارها ونزار مزال ماجاهم ,,, كانت في دارها وقافله نقالها آية محمود انشغل عليها واجد آية شافت أمها خاشة عليها الحاجة سدينة : هيا اطلعي سلّم ابنيتي آية : مانبش خلوني قاعدة هنا الحاجة سدينة : يبيك الحاج عارفة مايتحمل فيك شي آية : بس والله اغلطت فيها وسبتني الحاجة سدينة : توا اللي صار صار لكن معش اتمدي يدك عليها عيب مهما كان هذي مرات خوك تعاليلي انا اشكيلي امشي الخوك مهما كان خوك حيصبّي في صف مراته \ ومروة الله يهديها وخلاص وكنت من الأول مش راضية علي زيزة نزار منها لكن سكّر راسه عليها ويبيها عرفتيها امنابشيّة مش امعاك بس ,, امعا البنات كلهن لكن الوحدة شن تبي اتقول الله يهديها وخلاص الحاجة سدينة مسحت دمعت اية وخذتها بالحظن وكانت الحاجة سدينة من النادر جدا تحظن في بناتها لانها طبعها واعر وجدي آية فرحت وحست بالأمان آية : خلاص يا امي انسقم روحي وجايتكن غادي الحاجة سدينة : سلّم ابنيتي , نرجو فيك خلاص ,,,, كان اسلام دايرلهم جو واغاني اهياجة والحاج علي والحاجة سدينة جوهم رايق نور حسّت بجو مش تمام بين وداد واميرة وكانت اية امكسدة امعاهن ونست نقالها مقفل في دارها علي جيّة نزار عليهم من غادي مشت شورة اية قبل مايوصل فيهم آية : حقّك عليا واسفة جايا نبي نعتذرلها امي قالت شالها الحوش هلها نزار : مافش موضوع تعالي انطقو في الشوايات تماسيح اسلام واحمد حيكملووهن أية : هيا هيا ,, ام مروة بعصبية : هبلة انتي ولا شن مش قتلك معش اتجيني حرجانة مروة : تفعلت بس ياماما ام مروة : ياغبية استفيدي من زوجك سيوره حيموت باته ويطلعلكم ورث مروة : امالا شن اللي امصبرني عليه لعند توا الا عشان العز اللي عايشيين فيه ومزال حنعيشو فيه لما يموتو شيابهم علي خشّت خووها وكان امتاع مخدرات واحبووب اسمه فيصل مروة : اهلين فيصل فيصل : مرحبتين ,, انتي كل بعد شهر اتجي حرجانة عليك زيزة شكلها ويقولك ازّوج قيسه هم وغم ام مروة : كيف صار في الموضوع اللي قتلك عليه مروة : شن ياماما ام مروة : مش قتلك طيّبي نور علي خوك فيصل كان فيصل يأخذ بنتهم تكمل هكي مروة : بنت ثقيلة الدم ماحبيتها بكل انا وياها مش واحد ام مروة : حاولي تكسبيها نبوها الخووووك مروة : بس هل يرضو بيه خوويا فيصل : كني مايرضو بيا خليني حتى انعيش بعزهم زي ما انتي عايشة مروة : مافهمتش قصدي نور تقرى في الجامعة وطالبة جامعية وبنت هاي اكلاس مرات ماتمشش مع مودك فيصل : غير كنك اتسكري فيها جرّبي بس انتي ام مروة : باهي تعالي هنا ,, المره هذي مع من العركة مش ع أساس كل حد في حالة ,,, مروة : مع آية استفزيتها وضربتني كف كنت نقدر انكسرلها يدها لكن خليتهم ينقلبو عليها كلهم اكيدة توا عندهم الجو نكد غادي ام مروة : حاولتي تكسبي عمتك مروة : عمتي واعرة واتخوف ماتعرفهش كيف مرة حنونة مرة واعرة انحس فيها تعرف تقرى الاعيون ما انعامل فيها الا احسن معاملة ام مروة : المهم كان رن عليك راجلك روحي علي طووول ما اديرش جو الزعل فاهمة مروة : حاضر فيصل : راك تنسي موضوعي مع بنتهم الهاي كلاس علي قولتك مروة : يصير خير ,,, مروة فتحت النّت وشافت عالاستوري امتاعها آية ونور وداد واميرة امهيجات اشواية وضحك وجو لعب وداد تلعب مع عيالها واميرة مع اعيالها ونور واية دايرات جو ويصوّرن تعقد ورقالها مروة : شفتي ياماما دايريين جو من ورايا كان قاعدة ,, راهُ ما التمّو بكل ماني متريحة لين انطرطشها العيله هذي كلها وبيناتنا الأيام ,, يتبع | ||||
|  |
|
03-08-21, 11:35 PM
| #2 | ||||
| رواية #حديقة_إبليس الحلقة 2 مروة فتحت النّت وشافت عالاستوري امتاعها آية ونور وداد واميرة امهيجات اشواية وضحك وجو لعب وداد تلعب مع عيالها واميرة مع اعيالها ونور واية دايرات جو ويصوّرن تعقدت ورقالها مروة مروة : شفتي ياماما دايريين جو من ورايا كان قاعدة ,, راهُ ما التمّو بكل ماني متريحة لين انطرطشها العيله هذي كلها وبيناتنا الأيام ,, حشّت علقت عالاستوري امتاع وداد وقالت ربي يدوم اللمة بيناتكم وداد وهي في عز التكسيدة لقت الرد امتاع مروة وداد : كان وسعتي بالك الموضوع مش مستاهل مروة : شفتيها كيف حكت امعايا قدام حتى زوجي وداد : كبّري عقلك هذينا مزال اصغار مش يقولو العتب علي كبير العقل مروة : باهي نزار وين ,, قاعد امعاكم وداد : قاعد امكسد امعانا وجوّا فايح مروة : تمام ,, خليني انسكر توا خير مروة سكّرت النت ورقالها مروة بعصية : امهيّج بلايا حنّدمك عليها اووووووووووووو منّك يابارد مراتك حرجانة وانت تاكل في اشويات ,,,, اميرة بحّتت في آية اميرة : خلاص فوتي وانسي الموضوع آية : حتى انا فتتها ,,, القيت محمود منشغل عليا مشيت ناخذ في نقالي القيت رسائل واجد اميرة : كل شي الا محمود عاد آية : اكيدة حتى هو حبيب القلب هههههه آميرة : ربي يدوم الضحكة وكانت كلها تضحك وتلعب وكان نزار وإسلام واحمد يذكّرو في مواقفهم أيام زمان هما واصغار وكانت الحاجة سدينة والحاج علي فرحانين عالاخر عشان هاللمة السمحة هذي ,, بعد مرور ساعتين كانُ كلهم خشّووو للحوووش الا احمد ونزار وإسلام قاعدين قدام الكانون ويهدرزو أحمد : وسع بالك عليها مروة انت عارفها عصبية نزار : وقضتها قتلها خلاص فكينا اهدي لكن مزال خاطرها في علل اسلام : خلّكم من الدي راهُ اغلبهن هكي يديرن موضوع من لا شي يضحكن مرة ومرة يبكن معش تفهم شي آحمد : ربي يصلح حالهن نزار : المهم نبوو التكسيدة امتاع اليوووم تقعد زي عهد الصلح بيناتنا نبوو انردو زي قبل يد وحدة ماعش يخشن بيناتنا صبايا خليهن يتعاركن يصّافقن يضاربن ابجوووهن علي جيّة الحاجة سدينة شوورهم احمد : اهُو جتكم البركة اسلام عزق السبسي امتاعه نزار بحّت في اسلام : ياخوّاف احمد : هههههههه الحاجة سدينة : كنكم تضحكوو نزار : اسلام شافك عزق السبسي اسلام : كيف انحقو الحاجة جايتنا واندخنو قدامها الحاجة سدينة قعمزت بيناتهم الحاجة سدينة : الحاج علي فرحان بيكم واجد عشان اتهدرزو وتحكو مع بعضكم ويتفرج عليكم من البلكوني وقاعد يدخن من غادي نزار : خلاص ياحاجة خذينا عهد معش انتخالفووو وقعدت اتهدرز امعاهم الحاجة سدينة وضحك وجو سمح ,,,, آية : المهم صلفقتها بكف محمود : شكلها سوسة آية : تي هذي مش دايرة خير فينا من قبل كلهم سامحووها الا انا مزال مش طيقتها والنافق فيها محمود : أفطنيلها مرات اتحطك في راسها و اتعبّك آية : لا نعجبك متخافش ,,,, مروة دارت ايميل فيس جديد وسماته " آية علي " وحطّت صورة بنت عريانة عليها واتخش في القروبات وتنشر اللي يبي جو ودلع يبعث كرت 5 عالخاص ويتصل عالرقم هذا وكتبت رقم آية خشت جميع القروبات وصفحات الفيس كلهن , كان اتهدرز آية اتصال خش رقم غريب عليها انتضار آية : ترا اشوية سكّر انشوف هذا من محمود : باه 'آية : من امعايا شخص غريب : نعليا وخلاص كرتي واتي نبعثلك اديرنا جو اية : امشي ياحيوان ياتافه وسكّرت الخط اية : من هذا زعمك وبعدها رن رقم غريب مرة ثانية مختلف آية : مش حنرد مرات هووو وبعدها رن رقم غريب امخالف ورسائل واجد عالنقال " ردي علينا يا %$#%$ "" نعليا منك ما انحصلووش ^%##@$| ارقام غريبة بالهبل يرنن ورسائل بالهبل يجنها كلام بذيء ومحمود يحاول يرن عليها مش قادر يطلعها مشغول آية : شن في شن صاير كنهم هذيما كلهم ,,, كانت مروة اتشلط امعاهم عالخاص وادرز صور عاهرات كل حد اتقوله " قتلك رن عليا , ماتوقفش رن , كان طولت ومارديت جنبي ماما بس هيا رن " " دزلي كرت هنا قبل عالخاص حنفتح عليك " ,,,, آية دارت وضع الطيران وفتحت نت نقطة من اختها ودزت مسج عالواتس صوتي " توا حنسكر لاني نعست وبكرة حنقولك شن صار شكله في حد اموزع رقمي " وسكّرت النت وأقفلت نقالها ,,, شخص غريب : وين ياسموحة انرنوو مقفل كانت مزالت مروة تحكي خاص امعاهم مروة : غير شحني كمل بس نشحن النقال ونفتح وتاخذ احلى جووو مروة قالت بينها وبين نفسها " مزال ماشفتي شي يا آية غير انطيح في صورك حنوريك الويل اتشوفي ابليس امعاك مش مروة " ,,,, صباح اليوم التالي اميرة اتوتي في الفطور وتحكي بينها وبين نفسها " غريبة زعمك مزالت وداد حاقدة عليا مش وقت مشاكل " أحمد : هيا وقت عالعمل وين الحليب والشاهي اميرة : اتقول انفطر في عيل اصغير احمد : حليب والشاهي لايعرف كبير ولا اصغير صح ولا لا ياونيس ونيس : صح يابابا اميرة بحتت في احمد وابتسمت ومشت شورهم بالفطوور ,,, ناض نزار وفطر ابرووحه ويحكي مع نفسه نزار : المرة هذي حنخليك اطولي في حوش هلك بالك تشعفي, صار اتعايري فيا بالاعيال حنشعفك عليها عالجملة ولبس ونزل للعمل امتاعه ,,, إسلام : كنك امس مش عاجبتيني وداد : كيف اسلام : انا مانش اصغير ومش كيف أحمد ما نفطنش وداد : مافهمتش اسلام : انشوف فيك انتي واميرة كيف اللي تّفادن في بعضكن وداد : وانت ليش زاقب الاميرة اتشوف فيها اسلام : هذي كنها ,,, الحالة قصدي حسيت في جو مش تمام بيناتكم وداد : امقرمتني عند مروة كرهتها مزالت مش ناوية الخير امعايا اسلام : معقولة بس شكل الظاهر امتاعه اكويسة واتحب الخير وصافية نيتها وداد : ماشاء الله شكلك زاقبلها وتاكل فيها بعيونك اسلام : تي ازّح شن هالولية النفسية هيا اقعدي فيها خليني نمشي العمل ,,, قاعدة تفطر مروة مع أمها مروة : وين فيصل ام مروة : فكينا من وجه , مدام طلع مروة : وتيت الساكّو امتاعي " شنطتها " اكيدة جايني في الطريق نزار \ ام مروة : اها كلّمك هووو مروة : لا ما كلمنّش بس ديما هو هكي يحطني عندك ,ثاني يوم يرّوح بيا ,, بعد نهدى ,, حنون العطيب امعايا ام مروة : معش اتجيني حرجانة فاهمة خليك واكسبي عمتك وعمك واكسبي ارضاهم وتاخذي اللي تبيه بعد يموتوو مروة : حاضر ,, بس مزال خاطري انفرق بين سلفاتي و ازواجهن مش هاينة عليا هنا عندهن اعيال وانا لا هنا متريحات وعايشات احسن مني وانا نزار عايش ع رزق باته اقل شي احمد وإسلام فاتحين مشاريع بأرواحهم مش نفس هالفسخة اللي عندي " وطبعا كانت تكذب مروة يخدم موظف وعنده عمل حكومي لكن اتحب ديما اتزطل في راجلها واتوري روحها محرومه من خيره " ام مروة : ياهبلة اصبري علي زرقك ,,,, كانت آية مضايقة وسكّرت شفرتها وقررت تشري شفرة جديدة وخلاص كل ماتفتح نقالها رسائل بالهبل واتصالات بالهبل أية بينها وبين نفسها آية : زعمك هذي مروة دارت هكي بس معقولة توصل بها درجة اتوزع رقمي اكيدة مش هيا ,, استحالة هي ادير هكي ,,,, بعد مرور بعض الوقت ,,, كان أحمد في الغشل شاف رقمه يرن طلعت نور احمد : نعم نور أية : انا آية خذيت نقالها احمد : كنك ان شاء الله خير اية : شكله في حد اموزع رقمي وأرقام واجد يرنن ممكن اتجيبلي شفرة مدار امعاك امتاع جينة كان امعاك بطاقتك الشخصية ورقمك الوطني احمد : تم تم , وانا امروح حنجيبهن امعايا ,,, وردت النقال النوور نور : عليك قصة شن هذا آية : موال مش وقته زعمك اديرها مروة نور : انا عرفتها سوسة وياما دايرة من قبل من اسواسة فينا ,, لكن مش لدرجة اتوزع رقمك وكيف حتوزعه بسرعة آية : خطرها كنك معش قعدتي تمشي للجامعة نور : معش نبي نمشي الا للامتحان معش عندي فيها جو آية : هانت قريب اتخرّجي ,, اندير قهوة نحسبك امعايا نور : ياريت ,, ,,,, كانت وقتها مروة اتفرج علي صور زفتها هي ونزار وتذكر كيف برمت عليه وضحكت عليه ,,, فلاش باك " في الماضي " كان احمد داير حفلة لونيس عشان نجح هو وزمرد ويبي اديرلهم حتى جووو وكانُ كلهم قاعدين غادي في واحد من منتجعات بنغازي ,, الحاج علي والحاجة سدينة وإسلام وأهله وخووواته الاثنين وكان امعاهم نزار ,,, طبعا وقتها نزار كان عزابي راقي افلووس رتش باين عليه العز امتاع باته يلبس في احسن الماركات وسيارته حديثة ومهتم ابروووحه وكانت مروة تخدم في المنتجع " نادلة" بالليبي "قرصونة " وهي تبرم بين الطاولات شافت شاب وسيم نقاله ايفوون وشكله هاي كلاس واضح علي العز مروة : انجرب حضي بالك اتشد امعايا " كانت مروة كل ما اتشوف شاب افلوس ورتش اتحاول تلفت انتباه وتغريه عشان تأخذ رقمه بالك اطيح فريسة بين ايديها وكان الأغلبية اطيحوو بين اديها بس مش امتاعين زواج امتاعين كيف وتغيير جووو وهي كانت مالّا من الجو هذا وتبي تستقر واتسيب جو المنتجعات كلهن خشت مروة شور الحمام صقّمت الميكب امتاعه وثقّلت احمر الشفاه امتاعها وكانت وقتها طالقة شعرها ورابطة نفس ايشرب علي رقبتها وبخّت هذكي العطر وقعد منظرها مغري واشحطت اشوية من دبشها من فوق عشان يقعد ضابط وقالت بينها وبين نفسها " يارب اتشد امعانا المرة هذي ويطلع امتاع زواج مش امتاع كيف وتمشاي وقت " وطلعت شور الحفلة وقعدت اتحاول تاكل نزار بعيوونها وكل مرة ادير لقطة مغرية عشان تلفت انتباه نزار طلع خفيف العطيب ومصرع ما صارلّه " بس الحق يُقال حتى هيا كانت قمة في الانوثة لما سقّمت روحها في الحمام حتى اللي بصبايهم اقعدو يبحتو فيها وقعد حتى هو ياكل فيها بعيوونها وياكل في تفاصيل جسمها بعيووونها مروة قالت بينها وبين نفسها شكله خفيف ومسرع مايذوووب ,, في الوقت الحاضر ام مروة : انتي يابنت نحكيلك انا من امبدري وين سرحتي مروة :نعم ماما كنت في وادي مش امعاك بكل ام مروة : باهي تعالي انشري الدبش مدام مزال ماجاك نزار مروة : هيا هيا , حاضر ياماما ,,,, ونيس :عادي ماما نمشي نلعب مع بنات عمي اسلام اميرة : ياماما انت كبير توا ,, تعلب مع الاعيال ونيس : بس مافش اعيال خليني ننزل انا اختي نلعب امعاهن لوووطة زمرد : باهي ماما خلينا اميرة : باهي انزلوو وافطنووو من الدرووج بس ونيس : هيييييييييي زمرد : هييييييييي اميرة : امسك اختك من يدها ماتطلقهش ونيس : حاضر ياماما وطلع ونيس وزمرد ماشيين شور شقة وداد ,,,,,, كانت تنشر في الدبش مروة وعقلها سرح مرة ثانية في نزار ,,, فلاش باك " في الماضي " قعدت اتحاول اتقرب منّا وتلصق في نزار وكأنها اتصقم في الطاولات نزار قعد ينابش فيها ويلحق فيها ويغازل فيها نزار :المن هالسماحة هذي معقولة وحدة زيك تخدم هنا ومروة تبتسمله وخلاص الحفلة كلها وهي تاكل فيه باعيوونها احمد ضرب اسلام بكراعة اسلام : تي ها كنّك احمد : بحّت المراهق وين حل غادي يلحق في هالبنت اسلام : اووووف علي فرس تو نمشي نلحقها حتى انا احمد : رَزْرَزْ جنبك مراتك وبناتك اسلام : قصدك هذي من امبدري قاعدة هنا وداد افطنت إسلام يبحتّ في نادلة من بعيد وعرفته نسونجي وامتاع صبايا مشت شوور اسلام وصبّت قدامه اسلام بينه بين نفسه : زي الصل في كل مكان زرقتلي كملت الحفلة كلها بدت اتروح نزار استغل الفرصة بدت تفضى مشى يبي يعطيها رقمه نزار : عليك سماحة فيك يحفضك الله ويرعاك مروة : تفضل بيش نخدمك نزار : ممكن ورقة وبنينا اللي عندك مروة : هذينا نكتب فيهن بالطلبيات نزار : دقيقة بس ممكن مروة : هاك نزار : كتب رقمه وعطاها الورقة مروة بحتت فيه وشرّطت الورقة مودة وبحتت فيه تبحييت اغراء وقالت بدلع وجعونة " مش بالساهل تكسبني " ومشت اتشوف باقي شغلها في المنتجع نزار : بس ارجي راك عجبتيني بجديات نبيك انا مروة قالت بينها وبين نفسها " كان تبي اتربي راجل اكسريله خشمة وحسسيه انّ اقل منك حيجيك جيجيك " نزار طلع مع اهلة وكان مضايق وزعلان ومكسور الخاطر ,,, في الوقت الحاضر كملت مروة نشر الدبش شافت نقالها استغربت لا نزار اتصل لا جا وخذاها مروة : كنّا طوّل غريبة راهو يطلع ناسيني ,,,,, اميرة سمعت : ونيس وزمرد يبكو قدام الشقة مشت تجري تفتح في الباب كنكم شن فيه ونيس : عمتي وداد مابتش اتخلينا انخشو زمرد : قالت تعالو بكرة اميرة : عادي ياماما انت وياها تو نلعب امعاكم انا أميرة : وداد انقانك الا مريضة حسس بيني بينك شن دخلّ اعيالنا ,,,, يقين: عليش ماما ماخلتنش نلعبو مع ونيس وداد : باتكن قال ماتطلعنش من الشقة يقين : بس ياماما نلعبو قدام الشقة بس وداد بعصبية وصوت عالي : خلاص بلاش سكنان العبن هنا باتكن قالي ماتطلعنش كلمة وحدة ,,,, بعد مرور كم ساعة كانت اميرة علي اعصابها ترجى في احمد أحمد اول ماجا عطى الشفرة لآية ورقى للشقة فوق خش احمد للشقة لقى اميرة قالبة وجها احمد : كنك بسم الله الكريم اميرة : وداد راهُ ماصبرت عليها الا واجد لا اتقولي مرات خوك لا شي احمد : شن صار اميرة : قالبة وجها عليا امس في التكسيدة قلنى ابجوّها عادي لكن اتلز الاعيال وماتبهمش يخشو للشقة هذي معناها وقاحة احمد : تي مشّي الجو وفوتيها يا اميرة مش فاضي للدفنقي هذا كله اميرة : توا كلامي قعد دفنقي احمد : واحد امروح تالف من العمل يبي يتغدى ويقيّل علي حاله اتجي هكي تستقبليه اول مايخش للشقة اميرة : شن نبي اندير باهي احمد بعصبية : تي ازح خليني نتغدى ونرقد واحكيلي بعدين ع مشاكلك مش قادرة تصبري خشت اميره الدارة وزعلت احمد : عليك قصّة ,, توا تبي اتعيش دور الزعل والنكد وعدّي رضيّها وغيرله جوّها شكلها زيزة سودا نودة الواحد مش قادر يتريح بكل في شقته ,,,,, آية : أخيرة تريحت توا اشوية محمود : قتلك خليني انجيبلك شفرة واندزه لكي دلفري ماتبّش ,, آية : تو لما تقرا فاتحتك عليا هذكي الوقت اشريلي انت خاطب بس ودافع فيا وكأني محجوزة لكّي لكن مش من حقي نطلب منك حاجات تشريهن ليا مازلت مش حلالك '' محمود : المهم شن قصة هالارقام آية : ربي يسامحني انقاني شاكة في السوسة مروة محمود : اديرها عادي ,,, ها شن رايك انديرو جونا توا آية : قتلك مدام ماقريتش فاتحتك عليا وعقدت قرانك استحالة اندير حاجة كيف هكي ,, عالنقال محمود : ياهبلة انا حبيبك , واغلب المخطوبين اديرو هكي عادي ,, سيّوري واخذك آية : تبي اندلعك عالتليفون وانديرو جونا اعقد قرانك عليا ,, عادي اهلي يصبرو عليك عالفرح اقل شي حتى لو درت حاجة انديرها وانا متريحة محمود : عليك اللي راسك امسكر ,,,, وداد لقت مروة فاتحة نت وداد : ها شن روحتي ولامزال مروة : مزال ,, ماجنش لعند توا وداد : باهي رني عليه قوليله تعالي مروة : ما انرن علي حد انا اللي يبيني يجيني وداد : اها تمام ,,,, مروة : ترا شوفي من بلكوني امتاعك سيارة نزار في المزرعة ولا لا طلعت وداد ومالقتش السيارة وداد : لا مش قاعدة مروة : معناها اكيدة جاي في الطريق وداد : كان جيتي بعدين نبي انكسدو اخرة في المزرعة الهدرزة امعاك حلوة مروة : نجك ليا قرعتي " مروة استغربت نزار فاتها ومادوّرهش " ,,,, الحاجة سدينة :حسيتك استعجلت في القرار هذا الحاج علي : لا رسمي خلاص نبي ناخذة قبل ما انموت ويقتلوو بعضهم عالورث الحاجة سدينة : بعد عمر طويل يارب الحاج علي :: حنكتب لكل واحد شقة باسمه ونور واية حنكتب الدور الأرضي باسمهن حتى الأراضي اللي برة عندي حنقسمهن وكل حد يأخذ قرعته وحتى انتي حنكتبلك ارض باسمك الحاجة سدينة : انا مانبي شي لا ارض لا افلوس غير تبقالي طيب وبصحّتك عندي بالدنيا ومافيها ويقعدو يشربو في الشاهي مع بعضهم بعد تغدوو ,,, ام مروة : رنّي عليه انتي وبلاش اهبال مروة : حنطيّح من قدري اكيدة حيجيني ام مروة : أي قدر هذا راجلك ومافش قدر بيناتكم وانتم الاثنين واحد مروة : مانش رانّة , حيجيني حيجيني تذكري من قبل كيف يقعد يجدّى فيا عشان نرضى عليه ام مروة : كان زمان الراجل مع الوقت تتغير شخصيتك واللي كان يحبك ويبيك مرات ينساك ياهبلة اسمعي كلامي راهُ تبرم عليه ولية ثانية وتستغل اغيابك ,, ماتكفرش بالنعمة اللي عايشة فيها امعاهم هيا رنّي عشان خاطري قوليله وينك انا امك وعارفة مصلحتك مروة قعدت ماسكة التليفون وحاطة عالاسم امتاعه مروة : مرات يقعد جاي ياماما خليني نصبر اشوية ام مروة : هيا رنّي قتلك ,, ,,,, كان نزار وقتها قاعد في مطعم يتغدى وهو يتغدى كان يذكر كيف كان منكلب ويجري ورا مروة ,,,,, فلاش باك " في الماضي " بعد شرّكت الرقم قدامه وكسرت بخاطرة روّح زعلان ومضايق الحاجة سدينة : كنك شن فيه هاليومين جوّك مش تمام نزار : لا مافي شي جو تمام يا امي آية : من يوم روحنا من المنتجع وهو متنكد ضارب النكد نور : بالك يبينا نزوّجوووو هههه نزار : اتشفطن علي أساس وصبّى وطلع من تلاهن الحاجة سدينة : هذا كنّا يابنات فيش يحس شن صارله ,, كانت مروة قاعدة في المنتجع وتبرم عالزبائن واتشوف فيهم وجوّها فايح ورايق وبارمة علي روحها طالعة طرف ,, شافت من بعيد خاش نزار للمنتجع مروة دارت روحها ماشفتش وكمّلت شغلها عادي قعمز نزار عالطاولة ويبحت فيها مروة بلعاني مابتش اتبحت فيه ولا اديرله أي قدر وقالت بينها وبين نفسها " حنعرف كيف انطيّبك علي نار هادية " ,,,, في الوقت الحاضر لما كمّل الغداء امتاعه نزار في المطعم ولّع سيارته وامروح شور حووشهم وفات مروة بكل وكان امولع المسجل " اغنية لفوزري صغيرونة ومنسجم امعاها وامعليها عالآخر كانت الاغنية اتقول " هذا عيبك هذا عيبك تبعد يوم اتقول خطاني ويوم اتقول عليْ حبيبك هذا عيبك هذا عيبك تهجرني وتبّي تنساني وثاني يوم الشوق يجيبك ,,,, نزار بينه وبين نفسه وهو يسمع في الاغنية " مش عارف كيف كنت نجري وراك ونبي ارضاك زمان مش عارف وين كان عقلي\ يا ماذلّيت روحي عشان انرضيها " وقعد يذكّر المشاكل والاهموم والطحنات وياما دار عشان خذاها وحتى الحاج علي والحاجة سدينة مش راضيين علي زيزته بيها ومع هذا كله خذاها وياما دارت فيه وكان امكبر عقله لكن اليوم لما قعد مع نفسه بانن عليه حاجات واجد وحط القديم عالجديد ونسى حتى موضوع اللي هي احرجت عليه وقعد يذكر في الماضي الأليم ,,, سمع نقاله يرن نزار شاف الرقم طلعت مروة هي اللي اترن ابتسم لما شاف الرقم ومابش يرد عالرقم وخلّاها اترن لين فصل ,,, خاش علي اسم مروة بالنقال وخش عالرسالة وكتب فيها " انرضّي فيك ومليت الله لا يردك كان جفيت " ودزّه المسج ليها يتبع ''' ,, | ||||
|
| |
|
04-08-21, 09:46 PM
| #4 | ||||
| رواية #حديقة_إبليس الحلقة 3 سمع نقاله يرن نزار شاف الرقم طلعت مروة هي اللي اترن ابتسم لما شاف الرقم ومابش يرد عالرقم وخلّاها اترن لين فصل ,,, خاش علي اسم مروة بالنقال وخش عالرسالة وكتب فيها " انرضي فيك ومليت الله لا يردك كان جفيت " ودزّه المسج ليها ,,,,, مروة قعدت تبكي مروة : مابش يرد ياماما تريحيتي هكي شافت رسالة اللي جتها طالعة من الاشعار قرتها مروة : هذا كنا فيش يحس اخته ضربتني ولا ناسي شن دارت فيا ام مروة : حي عليك شكله بدا يفطن لحركاتك الراجل بعد يقعد طايح ومغرم وامكبد في ولية ,,, مايراقبش في تصرفاته يقعد زي السكران امعاها ,, لكن لو غلطتي او جرحتي او كسرتي بخاطرة و فكّت السكرة امتاعه وفاق العقلة ينقلب كله عليها شر ونار وتتغير شخصيته مروة : توا انا فاضية للكلام هذا كله اتقوليلي فيه نبي حل ياماما ضروري , شن اندير مايردش عالنقال ام مروة : تو بالك يوم , يومين ,, ويتعدل مزاجة مروة قعدت خايفة ومضايقة اول مرة ادير فيها هكي وسرحت في عقلها ,,,, فلاش باك ’ في الماضي ’ كان ديما يجيها ويتفرج عليها ويحاول يتقرب منها لكن هيا فايته الموضوع واتفشك عليه مرة من مرات قعد يرجى فيها لين اتروح خذتها حافلة المنتجع وامروحة بيها وقعد يلحق فيها لعند حوووشها واتشوف فيه سيارته من الحافلة وقالت بينها وبين نفسها " شكله طاب رسمي ,, بس خليني انفشك عليه اخرة " عرف حوووشها وروح الحووشهم مضايق اول مرة يتعلق بانثى ويكبد عليها هكي مع انّ ماحكتش معا بكل لكن معروف في علم النفس " لما شخص يحس روحه اقل من الشخص الثاني ويكسر بخاطرة , ينجذبله اكثر واكثر لو كان مختلف عن الجنس امتاعه " ,,, قعد فترة طويلة هو يمشيلها للمنتجع او يخطم من تلا حوشهم , كان في الصالة سرحان وهايم فيها خشّت علي امه الحاجة سدينة الحاجة سدينة : عرفت عليش زعلان ومضايق جبتلك عروس حرة تعجبك واتهني اخت اميرة واسمها سعاد تقرا طب بشري حتعجبك واجد شفتها اكويسة نزار : لا ماعندش جو انشووفها الحاجة سدينة : ياهبل سموحة انقولك وحرة انا عارفة مصلحتك انا اللي زوجت خوتك الاثنين وانا اللي اخترتهن نزار : غير خليها اشوية يا امي الحاجة سدينة : ابراحتك وطلع للمزرعة يمد كرعية ويتمشى فيها ويفكر في مروة فقط لاغير " ماتخاف ماننسى سريبك يوم انت القمر يالقمر والباقي احداك نجووم " في الوقت الحالي ام مروة : خلاص سادّك بكا صدقيني يوم يومين وحيجيك مروة : خايفة نخسرة ياماما وقعدت تبكي واطبطب عليه أمها ,,, ,,, الساعة 5 عصرا ,, كان احمد قاعد مع اسلام في المزرعة ويهدرزو مع بعضهم وكان نزار قاعد في شقته ابروووحه احمد : نسالك ياسلام اسلام : انعم اسال احمد : كنهم هلك مزال في خاطرهم علل ومشاكل اسلام : لا ,, تي هما يقولو انّ هلك هما اللي يدورو في المشاكل احمد : امبدري جا ونيس وزمرد يبو يلعبو مع البنات لزتهم وداد اسلام : مافش منها الدوة هذي استحالة اديرها احمد : يعني ونيس وزمرد يبكو بالعاني وبالكذب كانُ اسلام : تي معش فهمت شي انا , وهي اتقول علي أساس اميرة امقرمتها وزي هالكلام احمد : هبلنّا هذا خويط الصبايا اسلام : تسمع نصيحتي فووت امهن خليهن يتخابطن في بعهضن حنلقو روحنا انا وياك خاسرين ارواحنا احمد : تي امروح تالف ومضايق دغري بكتها في وجي القيت روحي فاصل عليها اسلام : ايييييييييي خليها ساكته اسلام شاف نزار طالع للبلكوني وسرحان اسلام : اووووووووووي تعال انزل اشرب قهوة امعانا أحمد : شكلها مزال ماروّحش بيها مراته اسلام : مش عارف الحق ,, تذكر لما جيت نبي انكحلّها والنّابشها زمان زقبلتي وداد ههههههه احمد : كلا انت بارد بالعين القوية تي انا قدام اميرة ما اندير في شي حتى كان نطلق النظر امتاعي نطلقة دكنوني مش قدامها اسلام : ياخواف احمد : لا مش قصة خوف , قصة احترام متبادل اسلام : كلا انا فقدت الامل فيا ’,, عرفتني نسونجي لكن خلّك مهما متعت بنظري بالصبايا برة زي هالولية مانلقى ربي يحفظها قديش صابرة امعايا أحمد : اهووو جاك نزار من غادي ,,, فلاش باك " في الماضي |" مروة استغربت معش قعد يجي للمنتجع مروة : هذا وين مشى ,, شكلي حتى انا ثقلت علي واجد انقاني هبله , رفست النّعمة بايديّة : نزار فقد الامل بعد شافها اتكابر عليه واجد : كانت الحاجة سدينة اتخيط في الصالة خش عليها نزار وكان فاقد الامل مروة وعرف انّ صعب الوصول اليها فقال افضل حل عشان ننساها ونتريح من هالعذاب نخطب ونشغل روحي ابروحي نزار : اهلين بالغالية الحاجة سدينة : اهلين وليدي الغالي نزار : تمام حنمشي بكلامك ,, شوفيها ليها سعاد اخت اميرة وحددونا يوم انديروو مقابلة امعاها الحاجة سدينة : لولولوولوولولي وكانت ماتعرفش اتزغرت قعد يضحك نزار الحاجة سدينة : تضحك علي امك باهي باه جن نور واية يجّارن شن فيه كنكم الحاجة سدينة : قالي شوفيلي العروس عادي نور واية قعد يزغرتن بلعاني بصوت عالي نزار : بلاش شهدره هههههههه آية : فرحانات بيك نحنا واجد ,,, في الوقت الحاضر أحمد : اهووو جاك نزار من غادي اسلام : كنك ضارب النكّد اتقول عندك حد ميّت نزار : ترا عطيني سبسي قبل احمد : مش علي أساس سيبّته نزار : تي امزاط وجو شين بكل اسلام : كنك , مزالت عند هلها مراتك نزار : فكني منها كارهها ومش قابل وجهها احمد : عيب كنك اذكر الله نزار : لا اله الا الله غير هات سبسي يانزار توا هذا حيقعد يقلبها ليا نصايح احمد أحمد سمع نقاله يرن احمد : نعم اميرة : قتلك اختي سعاد قاعدة برة كيف حطّها راجلها خلي الغفير يفحتلهم الباب شكله مش قاعد عند الباب شووفه " سعاد حاليا دكتورة متزوجة وعندها طفل ديما عمره ثلاث سنوات " "| احمد : تو انجيكم اخت الولية جت قاعدة برة شكله الغفير مش قاعد عند الباب نزار : اختها من احمد : ههههههههه اسلام : مدام احمد ضحك عرفتها شكله طيرك القديم اللي ماصارش منّا وخسرته انت بيدك نزار عرفها سعاد مشى احمد يشوف في الغفير او يمشي هو ابروحه يفتحلهم الباب ,, ,,, فلاش باك " في الماضي " كان نزار داير المقابلة وعجباته واجد وخطبها بالرسمي وكان ديما يهدرز امعاها بالتليفون وطلّعها من راسه مروة ونساها سعاد : خير يانيزارو كانت ادلع فيه نيزارو نزار : وينك من امبدري انرن سعاد : عارفني قاعدة في جامعة العرب ومحاضرات وجو شين مش قتلي تو اتجي كنك معش جيت نزار : فكينا منهم الجامعة امن والجو هذا انا مش قابلهم , سعاد : بكرة فيه زي المهرجان امتاع حفلة تخرج دفعة الصيدلة عائلات واجد جيّات تعال مافش حد يزقبلك انهدرزو اشوية نزار : تم تم جايك ياحبي سعاد : ربي يخليك ليا نيزاروووو ,, في الوقت الحاضر كانت سعاد وهي وطفلها خاشيين للعمارة وكان يهدرز نزار وإسلام مع بعضهم نزار سمع صوت سعاد وهي اتقول سعاد : نزار نزار بحّت لاورا نزار فيها سعاد : افطن يانزار راك اطيّح بشوية امشي كنك تجري كان ولدها نزار يجري وهو خاش للعمارة كان نزار يتأمل فيها من بعيد ونفس الوجع والحسرة بانت علي وجه ,, فلاش باك " في الماضي " كانُ يهدرزو مع بعضهم في الجامعة سعاد : باهي اللي جيت وشفناك نزار : كنك رايحة طرف اليوم سعاد : لا ديما طرف انا في دكتورة أصلا مش طرف نزار : بس نسالك صح قالو اغلب الدكتورات عندهن حالة نفسية هذا عليش اغلبهن مش متزوجات سعاد : ومن قالها لكي ههههههه بالعكس متزوجات واجد عليك معتقدات مؤمن بيهن نزار : بس صح عندكن حالة نفسية وعصبيات سعاد : اهُو توا انا قدامك عندي حالة نفسية وعصبية نزار حرّك راسه وقال " يعني مرة مرة " ضرباته سعاد علي كفته سعاد : بطل سماطة مسك يدّها نزار وقال : حيجي اليوووم وتبقي حلالي : سعاد : نرجى فيه اليوم هذا مش متخيلة روحي قاعدة مع راجل ثاني غيرك حبيتك وعشقتك , " سعاد عوضّت الحنان اللي كان ناقص عند نزار وقعد معش يشووف فيها الا هيا قدامه " ,, في الوقت الحاضر اسلام بحّت في نزار واضربه علي اكراعه وغمزله نزار : كنك لاباس اسلام وهو يغمز : شوف الحب لدرجة سمّت ولدها باسمك نزار : غير فكنّا من البصارة امتاعك اسلام : حتى انت يارب يبشّرك بمولود اقريب نزار : ياااااااااارب اسلام : حتى انت كان جاتك بنت سميها سعاد ههههههههههههه نزار : انقانك كلووط ,, ومافيك جو وصبّى نزار من تلا اسلام : تي تعال انصبر ازّح وانت زعال علي جيّت احمد عليهم احمد : كنّا صبّى هذا شن فيه اسلام : انركبّو عليه زعل احمد : انقانك الا سامط عارفة مضايق ومتنكد اسلام : نبي انغيرله الجو بس ,,, نزار رد للعمارة وراكب للشقة وقتها سعاد وهي راكبة من عالدروج وقفت اشوية وقالت بينها وبين نفسها " زعمك هذكي اللي كان يبحت فيها من بعيد نزار لان كان في شجر واجد مارزكزتش " سعاد : هيا اركب حسّك مزطّني كان وقتها نزار الصغير ولدها يرقى بالدرجة ويسمّط سعاد : هيا ياماما حرام عليك اركب نزار رفّع نزار الصغير نزار : شكله حيتعبك هذا تو انرقيه لكي لعند الشقة واشمرة نزار ويلعب هو وياه كان هوو قدامها بواجد وهي كانت وراه بأكثر من درج ,, فلاش باك " في الماضي " سعاد : زعمك حيجي يوم واتحب وحدة غيري نزار : استحالة في القلب مافي الا سوسو اللي هي سعاد غلايا واعويناتي سعاد : هانت فرحنا اقريب قريب انطير من الفرحة نزار : بس عندي شرط , اول عيل يجي حنسميه باسم الحاج علي فيه جو علي نزار علي سعاد : ساهل ساهل غير نزوجووو وساهل في الوقت الحاضر سعاد ابتسمت وقالت بينها وبين نفسها " ذكريات كذابة " نزار كان حاط ولدها عند الشقة نزار الصغير : شكرا عمّووووو نزار بحّت فيه وابتسم وقاله عفوا يا نيزاروو هذا كان الدلع اللي اتقولّا في سعاد زمان لكن سعاد مابتش اتبحت فيه ولا اتحط عينها في عينه لانها خلاص ع ذمت راجل قاعدة وركب لشقته فوق نزار والدمعة علي خدّة وقال بينه وبين نفسه " كل حد يأخذ نصيبه في هالدنيا " ,,,, فلاش باك " في الماضي " نزار كانت علاقته مع سعاد مش طويلة واجد ممكن امتاع 6 اشهور لكن تعلقو ببعضهم واجد وكبّدو علي بعضهم واجد وخلّاته ينسى كل حد وعبّت فراغة وشبعاته بالحب كان نزار ماشي لنفس المنتجع اللي من قبل كانُ دايريين حفلة لاعيال احمد المرة هذي دايريين عيد الميلاد لوحدة من بنات اسلام يارا نزار كان ناسي مروة بكل خلاص حتّى قال بينه وبين نفسه " ياما جيت هنا نجري ورا هذكي الطير ربي عوضّني بالاحسن منها بواجد " وكانُ كلهم قاعدين غادي حتى سعاد جت لعيد ميلاد عشان اتكسد مع نزار وقتها مروة فقدت الامل في نزار وقالت انا هبلة خسرته تبرم عالطاولات واتشوف الزباين مشت شور وحدة من الطاولات ماسكة الدفتر عشان اتسجل طلاباتهم مروة : شن تبي نطلبلكم انصدمت مروة وثلّجت في مكانها كان عالطاولة نزار وسعاد نزار وهو اموطّي راسه قال : نبّو اثنين كريب بعدها رفّع راسه وقال " امعاهن اثنين كبا اتشي " ,, السانة ثقل لما جت عينه في عين مروة مروة وهي مصدومة " واثنين شن " نزار : كبتشينوو وقعدت اتبحت فيه زين ومانزلتش اعيونها من علي اعيووون نزار سعاد حسّت بلقطة مش تمام سعاد : هذينا بس اللي نبووهن وعدت مروة سعاد : كنها هذي اتبحت فيك هكي تعرفها انت من قبل هذي نزار دار علامة التعجب ع وجه " لا مانعرفها اول مرة انشووفها سعاد : باهي كنها كلاتك باعيووونها نزار : وانا شن دارني سعاد : كنك قعدت اتلكلك وارتبكت نزار : بجديات مانعرفهش مروة مشت لكافي منتجع مروة : هو نفس الشاب , شكله حصّل طير جديد وقعدت اتخبط في راساها عالساس انقاني غبية خسرته بيدي كان يجري ورايا لعند الحوش لازم انحاول لفت انتباه مش حنخسره مرة ثانية لان بحّت فيا تبحيتت شخص معجب مزال وعطت الطلبات للامتاع الكافية عشان يوتيهن له ,, في الوقت الحاضر اميرة : انستينا لكي واجد ما جيتنيا سعاد : الله يانسك ,, قالي زوجي ماشي الصاحبي شور القوارشة قتلى شيلني بالمرة انغير جوي مع اميرة لنّا فترة عليها اميرة : كيف حالك وحال امي كلهم تمام معش جيت غادي بالك أسبوع الجاي جايا الحوش اهلي زيارة سعاد : الحمد لله كلهم تمام ,, نزار بس امهبلني وامركبلي حالة نفسية اميرة : خلي يعيش طفووولته حقاته هذا سعاد : توا قابلت نزار ,, هو اللي اشمرة ليا تعبني مابش يرقى من عالدروج يسمط اميرة : نزار عارفة من يوم ازوج هالبنت اللي اسماها مروة وهو نكد في نكد ممكن اول شهر من الزواج بس بعدها اتقول ابليس جا للحوووش سعاد : مزال صح ربي مازرقهمش بمولود اميرة : مزال مسكين خاطرة فيه ربي يجبر بخاطرة كلا هالسوسة هذكي يارب نفتكو منها سعاد : انا كثر انسانة حاقدة عليها وياما دعيت عليها نذكر اول مرة لما جتنا عالطاولة وشافت نزار زمان واقعدو يبحتو في بعضهم كنت هبلة ع نياتي وصدقته لما قالي مانعرفهش هي طلعت امخوطة عالزمار من ورايا اميرة : هذي مش انسانة هذي شيطان مرات جن عفريته تذكري أيام بداية زيزتها وكانت عندنا مناسبة بعد اعرفت انّك اختي حطّتني في راسها اسرقت نقال وداد وعزقاته في شنطتي وكانت وداد ادور علي نقالها القيته في شنطتي يحسابوني انا اللي سارقته سعاد : هذي لو ماشافهش ونيس راك انهبلتي اميرة : ونيس يفهم مزال قالي شفتها وهي حطّت حاجة في شنطة وهي تحلف وتقسم انّها مش هيا المشكلة صدقووها وقعد منظري بايخ سعاد : ربي يفكنا من شرّها ياما خلتني نبكي بالعبرة لمّا فكّت منّي نزار لكن لعله خير كلهن أشياء مقدرة من الله ونحنا عبارة عن أسباب فقط ربي هو اللي رايد هكي اميرة : تي باهي مش انتي توا متريحة مع زوجك سعاد : الحمد لله ربي يحفظه ويرعاه مانقصني شي , الله يسامحه في الدنيا والأخر اميرة : خلاص فووتي معناها سعاد : لا انفضفضو وانهدرزو بس عادي ,,, مروة اترن علي نزار وتلقى فيه مقفل تحكي مع روحها مروة : حرام عليك افتح نقالك ماتخلش صبايا خوتك يشمتّو فيا ,, فلاش باك " في الماضي " جابتلهم الطلبية امتاعتهم مروة ونزار يحاول يتفادى مروة ومايبحتش فيها مروة بابتسامة بحّتت في نزار : تبو حاجة ثانية مني : نزار : لا خلاص ,, وعدّت مروة من تلاهم وكانت من بعيد اتراقب فيهم سعاد : هيا تعال بسرعة شكلها التورتا جت نزار : باهي والكابتشينو والكريب شن وضعة انسيبووو سعاد : غير خليه هنا تو انردو عليه نزار : عدّي تو انجيك خليني نشرب كابتيشنو راسي صداع نبي انتكيف اشوية سعاد : خلاص لحّق عليا ’’ نبي انصور مع اميرة أصلا نزار : تمام مشت سعاد دغري شور الحفلة وقعد نزار يشرب في الكابتشينو هكي اشوية لقى زي الظل جنبه بحّت جنبة نزار لقى مروة تلا نزار : قتلك يا اختي نبو الكريب هذينا الاثنين برة باهي مروة : يا اختي صار وبحتت في اعيونه نزار : جريت وراك واجد وماعدلتي عليا درت اللي عليا خلاص القيت اللي يملى عيني مروة : كذاب ,, مزال اتحبني ومغرم بيا كان هذا راك ما ارتبكتش وماقعدتش في مكانك هنا ليشم اعديت امعاها في من ترجى نزار : شن تبي توا مروة : مانبي شي نبي ناخذ الكريب بس مش قلتي تبيه برة نزار : تمام خوذي مروة لمّا طبّست تبي تأخذ الكريب بلعاني حاولت تلصق فيه واهمست عند وذنة مروة : نرجى فيك عند الكافيه جوّا نبيك ابروحك راك اطوّل نزار يبس في مكانه وثلّج جسمة ومشت مروة بدلع من تلاه وسيّباته نزار : شن نبيه فيها ,, خلاص انا مرتبط توا وخاطب ,,, معقولة مزلت نضعف قدامها ,, نزار لقى روحها لاحقها وماشي شور الكافيه .,, في الوقت الحاضر نزل نزار للصالة شاف ونيس يلعب مع نزار لوووطة قعد يتفرج عليهم ويتفرج علي نزار ولد سعاد علي جيّة الحاجة سدينة شورة الحاجة سدينة : جبت مروة ولا لا نزار : لا خليها ,, يومين ثلاثة أربعة نبي نأدبها بطريقتي الحاجة سدينة : لا عيب عدي روّح بيها نزار : عندي امعاها موضوع آخر خاطي موضوع آية الحاجة سدينة : موضوع شن نزار : سامحيني يا امي المرة هذي مش حنسمع كلامك ولازم انجيبها للطريق ياما دارت فيكم وهي سبب التفرقة في هالعائلة خليني نأدبها بطريقتي الخاصة الحاجة سدينة : امسامحتك ياوليدي دنيا وآخرة نزار : وين الحاج مش باين عليا الحاجة سدينة : قاعد عالبلكوني دخان وخلاص قريب يودّره عالدخان ,, نزار : تو انعدي شورة انهدرزو معا اشوية ,,,, فلاش باك : في الماضي كانت سعاد ادوّر علي نزار في المنتجع سعاد : تي وين عدّا هذا ,, وين اختفى اترن عليه سعاد مايردّش كان وقتها قاعد في الكافية جوّا نزار امقعمز مع مروة في مكان دكنوني مروة : عارفتك حتجيني لانّي عارفتك اتحبني نزار : بس ليش درتي فيا هكي الفترة اللي فاتت مدام عارفة انّي انحبك ,, سعاد وهي ادوّر علي نزار شافت الطاولة اللي كانُ امقعمزين عليها مافيها شي زعمك قاعد في الكافيه جوّا يدفع في حق اللي خذيناه وماشيا شور الكافية اللي قاعدين فيه مروة ونزار امقعمزين في طاولة وحدة نزار : احكي ليش درتي هذا كلها مدام عارفة انحبك تي ازح نلحق فيك يوميا لعند حوشك يوميا انجيك هنا وانتي اتكابري عليش هذا كله مروة : عشان انّحبك كنت انشوف فيك هل حدير المستحيل عشاني ولا حتفوت وتستسلم للواقع بس انا كنت نرجى فيك اتجي اخرة للمنتجع عشان انصارحك بحبي ليك نزار : بس انا توا خاطب خلاص مروة : هات نقالك ترا اشوية نزار : هاكي ترا افتحلي الرمز امتاعك مروة كتبت رقمها في النقال ودارت الإسم عليه رامي منتجع مروة : سجلت اسمي وكتبت عليه رامي منتجع ونبيك تعرف اني مزلتا نحبك ونبيك وشوف انت جوّك ,, ’’’\علي خشّت سعاد للكافيه مروة : اوف قصدك هذي خطيبتك اللي وراك نزار : وين مروة : ما اتبحتش وراك بس يتبع ,,, | ||||
|
| |
|
08-08-21, 08:19 AM
| #5 | ||||
| رواية #حديقة_إبليس الحلقة 4 نزار : بس انا توا خاطب خلاص مروة : هات نقالك ترا اشوية نزار : هاكي ترا افتحلي الرمز امتاعك مروة كتبت رقمها في النقال ودارت الإسم عليه رامي منتجع مروة : سجلت اسمي وكتبت عليه رامي منتجع ونبيك تعرف اني مزلت نحبك ونبيك وشوف انت جوّك ,, ’’’\علي خشّت سعاد للكافيه مروة : اوف قصدك هذي خطيبتك اللي وراك نزار : وين مروة : ما اتبحتش وراك بس في طاولة امغطية عليك مروة خطّمت من تلاها صحبتها تخدم امعاها وكانت ماسكة طالبيات وماشيا بيهن لوحدة من الطوالات عكفتها مروة بكراعها طاحت وطاح اللي في يدها الزبائن اللي في مطعم كلهم مشو شورها يساعدوها اللي طاحت في طيحتها شريني صبّت بسرعة مروة بدون ماتفطن سعاد و ابروحه قاعد عالطاولة نزار سعاد حتى هي مشت اتشوف في النادلة اللي طاحت بعدها شافت نزار قاعد ابروحه امقعمز في الطاولة مشت شوره سعاد سعاد : فيش ادير هنا انت من امبدري واندوّر فيك انا نزار : حاس بدوخة وراسي صداع ودار روحه مريض قدامها وصبّى هو ويّاها وطلعو من الكافيه في الوقت الحاضر كان الحاج علي يدخن في البلكوني علي خشت نزار عليه نزار : مرحب بالحاج الحاج علي: مرحبتين نزار : سادك من الدخان ياباتي الحاج علي : يمشي الجووو نزار : نبي ناخذ رايك في حاجة ياباتي الحاج علي : شن نزار : انا نبي انحول من الحوش وناخذ السموح منّك الحاج علي : أي حوش نزار : العمارة اللي قاعدين فيها الحاج علي : لالا مافش حد يطلع من هنا بعد انموووت اطلعوو نزار : بعد عمر طويل ياباتي الحاج علي : الموضوع هذا حتى احمد وإسلام قبلك ياما فتحووو ليّا انا مادرت العز هذا كله الا عشان تبقوو امعايا واتجي توا اتقولي نبي انحول لما انموووت , ديرو اللي تبوووو نزار : بعد عمر طويل ياباتي,, غير الموضوع واقعدووو يهدرزووو عادي ,,, فلاش باك " في الماضي " كان نزار قاعد راقد عالسرير ويبحّت في السقف وفي عقلة مروة نزار : مدام مزال في عقلي هالبنت امتاع المنتجع ليش ازّح من الأول نتعلق ببنت ثانية راسي قريب ينفجر حاط ع رقم مروة يبي يرن وما اتردد في الوقت الحاضر كانت وداد قاعدة في المزرعة اتلعب في بناتها شافن باتهن قاعد لوطة مشن يجرن شووره بناته أحمد شاف وداد وبناتها جايت شوورهم صبّى من تلاهم أحمد : حنخليك توا ابرووحك اسلام : تم ياباشا وداد : كنك معش رقيت نرجى فيك من امبدري إسلام : خذتنا الهدرزة انا ونزار واحمد وداد : ربي يدوم لمتكم يقين : بابا ترقص امعايا عادي اسلام : تي اعيونك ليا عادي يقين ولّعت اغنية ليبية وقعد اسلام يرقص مع بناته الثلاثة واتبحت فيه وتضحك وداد وداد : بلاش اهبال قعمز يشوف فيك خوك نزار والحاج علي من البلكوني اسلام : عادي نلعب مع بناتي ,,, بعد مرور ساعات كانت الساعة وقتها 10 الليل و كانت امروحه سعاد وكان فيهم كل حد قاعد في شقته وجوّا رايق الا نزار ضارب النكد والحزن نزار كان يشوف في رنات مروة ومسجاتها نزار : يعلم الله مادرتي خير فيا يارب فرّجها من عندك ,, مروة كانت من البكاء والدموع لين نفسيتها ادمّرت في دارها ,, كانت اتفرج عالتلفزيون أم مروة خش عليها فيصل وكان منزطل زطلة لين معش يشوف في شي قدام فيصل : خير يانبع الحنان ام مروة : أي خير اللي تحكي عليه حيقتلك هالشي اللي تأخذ فيه 24 ساعة فيصل : تي قتلك يا ن ب ع الحنان ام مروة : نعم , فيصل : كيف صار في اخت نزار نهيتولي موضوعي تي نبي نزوج حتى انا ام مروة شفاته طافي بكل خذاته ومشت بي شور داره وعزقاته عالفراش امتاعه وخطمت ع دار مروة وتسمع فيها تبكي جت تبي تفتح الباب واتخشلها بعدها وخّرت وقالت بينها وبين نفسها " خليها تأخذ راحتها في البكاء خير وردت للتلفزيون امتاعها اتفرج عليه ,,,, آية كانت اتشلط واتهدرز مع محمود ومحمود كل مرة يحاول امعاها يخشّو عالجو الاخر عالتليفون لكن هي كانت امسكرة راسها واتهرب منّا آية : راك كثرت عليا ,, ماتخلنش نكرهك قتلك الجو اللي تبيه انت مش حنديره انا مش عاهرة محمود : تي انا خطيبك ياهبلة وسيورك حتبقي مراتي آية : من قالك سيوري مرات اتفوتني واتغير عليا محمود : كيف انتغير عليك آية : كم بنت نعرفها صاحبتي خشّت عالجو هذا فاتها خطيبها مع الوقت محمود : انا مش نفسهم انا راجل وقد كلامي آية : وانا قتلك مانبي اندير الجو اللي في بالك محمود : معناها اقعدي فيها آية : اربح ابراحتك وسكّر محمود الخط منها أية قعدت زعلانة ومضايق وأقفلت نقالها بعد سكّر الخط عليها ,,,, نور امكسدة عالفيس وتقرا في روايات وخلاص لا عندها في جو الحب لا التكبيد يا دراسة يا روايات هذا جوّها ,,, الحاجة سدينة جايّة تبي تعطي دواء للحاج علي اتحرك فيه مابش يتحرك من مكانة الحاجة سدينة : يانوض ياحاج هذا وقت الدواء امتاعك هيا نوووض الحاجة سدينة حسّت يده امصقعة الحاجة حسّت بنفس الغصة في قلبها الحاجة سدينة : نووض حرام عليك كنّا نووومك ثقيل قعد تبي تشمر يده طاحت الحاجة سدينة : اوووووك عليا اووووووووك عليا اووووك عليا اوووووووك عليا طلعت من باب الشقة الحاجة : اوووووووووك عليا تعالوووووو بسرعة نزار نزل يجري احمد طلع وإسلام يجّاروووووووو نزار : شن فيه كنك يا امي الحاجة سدينة وهي تبكي " باتكم مابش يتحرك من مكانة حي عليا وحي راه يطلع ميّت نزار واحمد بسرعة انزلووو بي وشالووو لل 1200 وكانو يجرووو بي بالسيارة احمد كان يبكي من جنبه نزار : عليش تبكي انت الاخر باتي مزال حي كنكم قتلتووه أحمد : نعليا ياباتي نزار : تي ازح اسكت ما اتورتنش الاعياط للصبايا مش لنا وباتك مزال حي وكان اسلام يجري وراهم بالسيارة اميرة وداد كانن وقتها لوطة اتحاول اميرة ووداد يخففن علي الحاجة سدينة وبناتها وداد : شن صارله يا اميرة اميرة : طلع بي نزار بسرعة ماخلوونش انشووفه كنّا نور : ياباتي راد بالك اتسيّبنا آية وامها ونور يبكّن واجد وكانو حتى بنات وداد يبكن من الخوف فلاش باك " في الماضي " كان نزار متردد يتصل بي مروة ولا ولا وخذا القرار واتصل بيها مودة :عرفتك حترن عليا لكن أسبوع واجد قعدت انراجي نزار : مش عارف مش قادر انطلعك من راسي مودة : عارفتك تعشقني واجد نزار : باهي وانتي اتحبيني صح زي ماقلتي مودة : انمووووووت في حبك نزار واقعدوو يهدرزووو مع بعضهم في الوقت الحاضر وصل نزار واحمد وحطّولهم باتهم في العناية اسلام وصل فيهم قاعدين قدام غرفة العمليات احمد يبكي قدام غرفة العمليات اسلام يدخن في سبسي ورا سبسي نزار حاط راسه عالساس وساكت طلع الدكتور : للأسف جبتوه لنا متوفي باتكم ربي يغفرله ويرحمه سكته قلبية جاته أحمد : لالا لا يابااااااااااتي اسلام : ان لله وان اليه راجعون نزار طاح عالارض وقعد راسة لووووطة ويبكي نزار : ان لله وانّ اليه راجعون اسلام : تي كنتُ اتفرجو علينا امبدري اسلام مسك نزار اسلام وهو يبكي : تي مش كنت اتفرج عليا انت وهو وانتم قاعدين عالبلكوووني امبدري كان حي باتي قدامنا احمد وهو يبكي سمع نقاله يرن شاف الرقم اميرة احمد وهو يبكي : نعم اميرة : يا احمد كنك تبكي راك اتقولها بس احمد : عطاكم عمرة الحاج ان لله وان اليه راجعون طاح النقّال من يد اميرة نور : شن فيه شن صار في باتي احكي آية مشت تجري شورها اية : شن صار في باتنا آميرة : عطاكم عمره الحاج علي الحاج سدينة : يانعليا يانعليا وداد : واك عليا واك عليا واميرة تبكي وكلهم يتباكوو وانقلبت المزرعة كلها اعياط وغيمة سووودة من الحزن قعدت فوق المزرعة ,,,,, فلاش باك : في الماضي سعاد حسّت انّ نزار متغير عليها ومعش قعد يرن زي قبل حتى أسلوبه تغير ونظامه تغير امعاها سعاد اتصلت بي نزار سعاد : كنك معش لا اترن لا تسال نزار : مشغول اشوية بس سعاد : اها , تمام نزار : تمام سعاد : قصدي ليا فترة معش سمعت كلمة حلوة منّك ,, خاطي انّك معش ادور زي قبل نزار : نكذبش عليك قعدت معش انحبك زي قبل انحس فيك متغيرة عليا مش زي سعاد اللي من قبل نعرفها نزار حاول يقلب الطاولة عليها ويطلّع العيب منها نزار خلاص قعد امكبد علي مروة ويحبها موت وديما يمشي يكسد امعاها في المنتجع ويهدرزو ويغيروو في جوهم مع بعضهم سعاد والدمعة علي خدها " حرام عليك شن درتلك زي ما انا ,, انت اللي امتغير عليا وفايتني بكل مش انا " ,,, في الوقت الحاضر نزار قاعد قدام غرفة العمليات امقعمز وحاط ايدي عليه راسه وإسلام : لازم واحد منّا يمشي غادي اكيدة منقلبه المزرعة اعياط احمد : تو نمشي انا نزار : عزق مفتاح سيارته شور احمد طلع احمد ماشي شور المزرعة اسلام : انا تو نمشي للتشاركية انوتي خيمة العزاء والكراسي نزار : تمام انا خلوني هنا قاعد نزار بينه وبين نفسه " ربي يصبرنا علي افراقك ياحاج " ,,,, " فلاش باك " في الماضي كان قاعد نزار في المنتجع يهدرز مع مروة وماسك يدها وعايشيين احلى رومنسية مروة : مش قتلي تبي تفسخ خطوبتك وتخطبني كيف صار نزار : اكيدة ياحبي ,, ماني متريح لين ناخذك انتي يا اعيوووني مروة : راهُ معش انديرو جونا في الليل ونحرمك من شوفتي فيديووو نزار : لالا ,, خلاص حنحاول في هالايام انطرطشها وننهي كل شي بيناتنا مروة : لكن هل اهلك يرضو بوحدة زي نادلة نزار : حندير المستحيل عشان ناخك ياقلبي مروة : اهو حبيبي الصح اللي يسمع في الكلام السمّووووح " وكانت تحكي مروة بدلع وجعونة ومكياج عالاخر وطالقة شعرها وجسمها الفاتن نزار : بس بعد نخطبك تستري روحك واتخشي عالعبايات ومكياج لا واجد برة مروة : اكيدة حنسيب حتى المنتجع زي ماوعدتك غير انت اخطب وريني الجدية امتاعك وحتلقاني كيف ماتبي ياسموووحي نزار كان ذايب عالاخر فيها في الوقت الحاضر كان اسلام جايب تشاركية للقوارشة عشان خيمة العزاء واحمد جاب المية وحليب وتمر وكان جو الحوش نكد في نكد وانتشر خبر موووتة الحاج علي بين العائلة كلها ورنت دواد قلتها لمروة مروة الحق بكت وزعلت عالحاج علي مروة : هيا خليه يشيلني للمزرعة توا فيصل ام مروة : اها مش قتلك سيورة ميّت مروة : مش وقته هالكلام ,, انرن عليه مايردش نزار واكيدة توا جوا شين بكل نبي فيصل يشيلني ام مروة : فيصل منتهي بكل توا خليه الصبح بدري حيشيلك مروة : قصدك امروح فاقد ام مروة :اها مروة : هالراجل التافه اللي مزال مادار سيور علي حالة اللي من جيلة كلهم مزوجين وعاقلين وبعيالهم ام مروة : انحس فيك زعلانة علي عمك اللي توفى مروة :قصدي طبيعي بات زوجي توفى شن تبيني اندير ياماما ام مروة : كنت نحسابك مش متعلقة بيهم واجد مروة : الله يسامحه زيّة زي عمتي ماشفت منهم الا كل خير ام مروة هي اللي كانت سبب فساد بنتها ونشر الشر بين العائلة وتسمع في كلامها هي اللي خلّتها شريرة وعدوانية وخلّت هكي شخصيتها اتقول ابليس مروة كان اكبر طمووحه تزوج شخص افلوس ورتش وغني خاطرها اتعيش عيشة الملوووووك وكانت حدير المستحيل عشان اتحقق هدفها لكن الجو اللي صار بعد الزواج من حرب ونقل للكلام وفتنة كان كلّه من ورا أمها هي العقل المدبر في كل حاجة ,,, ام مروة : معناها الصباح رباح يقعد فايق يشيلك مروة \: المهم يشيلني بدري نبش نتاخر عليهم غادي ام مروة :حاضر ,, صباح اليوم التالي , جابو الحاج علي اشوية للمزرعة بعد ماغسلوه عشان يشوفه اهله وبعدها مشو بي شوور المقبرة وقتها كانت قاعدة مروة وجابها خوها الصبح بدري مروة جت عينها في عين نزار لكن كان علي وجه الحزن والحسرة والكآبة علي موتة باته ومادرش أي ردة فعل وكأنها مش زوجته او كأن ماشاف حد قدامه ,,,,\ فلاش باك : في الماضي : سعاد كانت مضايقة ومتنكدة من علاقتها مع نزار وقعدت متوترة مش زي قبل سعاد : باهي الل تواضعت ورنيت عليا نزار : نبيك في موضوع لكن ماتزعلش مني سعاد : شن فيه كنك نزار : عارفة اني كنت انحبك واجد من كل قلبي سعاد : كنت كيف نزار : انا اسف من كل قلبي انا كنت نبي نخطب وخلاص عشان انعوض النقص والحنان اللي عندي , وانا حسيت روحي حاليا ما انحبكش وما انحسش باي شعور اتجهاك سعاد : كنت تبي تخطب وخلاص وبنات الناس لعبة قصدك نزار : مش حنرد عليك سعاد : شن تبي اترد ,, شن تبي اتقول مثلا وقعدت تبكي عالنقال سعاد نزار : وسعي بالك عليش تبكي سعاد : تخدعني وتكذب عليا وتلعب بمشاعري مدام ماتحبنش ليش خليتني نتعلق بيك نزار : والله حتى انا حبيتك من كل قلبي لكن حاليا توا ’,, معش انحس باي شعور اتجاهك نقعد امعاك صريح ,, سعاد وهي تبكي يعني شن نزار : يعني كل حد يشوووف حالة خلاص سكّرت الخط وقعدت تبكي سعاد " من المؤسف حقاً أن تبحث عن الصدق في عصر الخيانة وتبحث عن الحب في قلوب جبانة " ,,, نزار بينه وبين نفسه " سامحيني ياسعاد مانقدرش انكمل اكثر من هكي حتزعلي توا بعدها اتعودي عالوضع عادي , في الوقت الحاضر بعد ما ادفنوووو الحاج علي كانُ كلهم قاعدين في خيمة العزاء يستقبلو في التعزية من الناس وكانُ نزار واحمد وإسلام قاعدين جنب بعضهم جا ونيس ولد احمد شور نزار نزار : نعم شن تبي ونيس : يبوك اشوية في الخيمة مشى نزار للخيمة اول ماخش للخيمة شاف قدامة مروة نزار كانت الدمعة مزالت ع خدة مروة اضبت نزار وقعدت تبكي مروة : نعليا ياعمي والله واجعني والله واجعني يانزار نزار قعد يطبطب عليها علي ظهرها نزار : مالنّا الا الدعاء له اللهم اغفر له وارحمه نزار : راهُ لما شفتك امبدري تحسابني تجاهلتك بلعاني غير كنت مستعجل عالدفينة بس خلاص خليني نطلع توا الصبايا قاعدات يخشّن مروة خشت شور الخيمة جوّا ورد نزار لخيمة الرجالة فلاش باك ,, في الماضي ,, نزار : خلاص ياحبي نهيت كل شي انا وياها انا امتاعك انتي بس ياعمري مروة : حبيبي انا وحياتي ,, انحبك مووت ياقلبي ها امتى تحكي الاهلك عليا نزار : هاليومين هذينا اكيدة مروة : مستعجلة امتى بس نبقى حلالك نزار : هانت هانت وكانت سعاد تبكي تبكي وتبكي حتى للكلية قعد معش تمشي ونفسيتها تعبت وقعدت معش تطلع من دارها " أن يطعنك أحدهم في ظهرك فهذا أمر طبيعي ولكن أن تلتفت وتجده أقرب الناس إليك فهذه هي الكارثة " في الوقت الحاضر بعد مرور يومين من العزاء كانت اميرة ووداد ومروة حايسات في العزاء برواحهن امّا الحاجة سدينة كانت تعبانة ومزال اثار الصدمة عليها مروة : ياناري عليها عمتي اميرة : الله يخفف عليها وداد : تاعبة واجد عمتي اميرة : خلووها بعد فترة حتقتنع وتتاقلم عالوضع ترا يا مروة رني علي نزار قوليله الغداء واتي كان تبي اطلعوو للرجالة مروة : حاضر " في العزاء كل حد كسر شرّة وجنب بعضهن يساعدن في بعضهن " كانت وقتها الحاجة سدينة قاعدة في دارها وفايته خيمة الصبايا واتفرج ع صورة الحاج علي امعلقة عالساس الحاجة سدينة : ياريت نلحقك حياتي بلاك ماتسوى شي فقدتك يالعزيز عليْ بلاك نسوى لا شي افراقك ظلم عذاب وقلة نوم والم يالعزيز افراقك ظلم ياحالي نا ,, اللي ميّت من غير عزاء لانرقد لا انتهنى ناخذ طول الليل ابكاء امغير انصبّر في روحي ديما يالانا ,, اليوم توارو في الجبّانة طيبك ناس كانُ امعانا واليوم افقدناهم يانا لكن ماهو في ايدينا شي فقدتك يالعزيز عليْ بلاك نسوى لا شي يتبع ,,, | ||||
|
| |
|
08-08-21, 08:20 AM
| #6 | ||||
| رواية #حديقة_إبليس الحلقة 5 مزالت الحاجة سدينة قاعدة في دارها وضاربه النكد وواجعها الحاج علي خشّت عليها وداد وداد : ياعمتي فيه صبايا برة يبّن يعزنّك الحاجة سدينة : هيا اشوية وطالعتلهن ,,,, بعد مرور أسبوعين من موتة الحاج علي كان الحوش في حالة هدوء كل حد قاعد مع نفسه وفي شقته وكأن الحوش مهجور كل عشية بس ينزلووو للناس لان مزال في رجالة وصبايا يجنهم ع موتة الحاج علي نزار قاعد في شقته مع مروة نزار : سامحتك عشان عزاء باتي وجبرةً بخاطر امي مروة : تمام ,, مهناك الا كل خير فلاش باك ,,في الماضي نزار : معش نبيها انا يا امي سعاد الحاجة سدينة : حرام عليك اتسيب وحدة قريب التخرج وتبقى دكتورة وتاخذ هذي اللي مانعرفهش من نزار : سعاد انا مش متريح امعاها الحاجة سدينة : هذي من تطلع اللي اسماها مروة من أهلها وين تسكن هل تعرفها زين وشن مستواها الدراسي اتهني عالحوش ولالا محافظة علي صلاتها الظاهر امتاعه الصلاح نزار : شن هذا كله الحاجة سدينة : ماهو قتلك انا امك وعارفة مصلحتك نزار : تو بكرة انشيلك انتي واية ونور لحوشهم ,, حدَّت امعاهم يوووم اتهدرزو مع بعضكم الحاجة سدينة : إخرة امنسق امووورك كلهن من ورايا ووراء الحاج نزار : غير هيا يامي ,, قولي باهي عشان خاطري , في الوقت الحاضر نزار : امي كانت اول وحدة ضد زيزتك وتبيني ناخذ سعاد لكن سكرت راسي وخذيتك مروة : قصدي عليش هالكلام توا نزار : لاني كارهك وقعدت معش انحبك كل يوم يخطم عليا شريط ذكرياتي مافش حاجة درتيها ليها تشفعلك ومع هذا كله امي اتعامل فيك احسن معاملة مروة : خلاص خلاص شن هذا وانت من يوم ماتوفى عمي راكب فيا شن هالعيشة هذي وخشّت الدارها وسكّرت علي روحها نزار : تي كارهك ,, سكّري الدار علي روحك ولّا اطربقي ,,,,, فلاش باك في الماضي الحاجة سدينة : صدقني مش لكي هذينا يانزار عديت انا وخواتك وسمعنا كلامك مش لكي ومش شورك بكل هذيما ,, غير كيف طحتي فيها عالعائلة نزار : انا نبيها يا امي كنك الحاجة سدينة : تعال اقنعنا يابنات آية : عائلة بيئة بكل ,, حوشهم بيئة نزار : راقدت الريح الحاجة سدينة : تعال هنا انا مانحكش ع رقادة ريح ماملي راقدين ارياح ومعروف عنهم بالعفة والطهارة ونظافة الحوووش النظافة الشخصية ونظافة المنزل ما الهش علاقة لا بالفلوس لا برقادة الريح نزار : قصدي شن المطلوب توا نور : يانزار شن عجبك فيها البنت حتى لما شفتنا مادارتش أي احترام لامي ولابسة لبسة بايخة وصابغة شغرها هالخبر هذا ماهو لنّا بكل نزار : انا نبي نزوجها ولا انتم الحاجة سدينة : لا حول ولاقوة الا بالله مش عارف كيف تبي تفهمنا بس ,, في الوقت الحاضر كانت الحاجة سدينة قاعدة مع الصبايا في الصالة لوطة مزال يجنها كل عشية وقعدات اميرة وداد امعاهن لوطة وكانت اشوية اخرة تبي تنزل مروة ,, لكن نكّد عليها نزار خشت للدار وداد : بس غريبة ام مروة ماجتش اميرة : عليك فضيحة ,,, مش عارف كيف حترقعها مروة وداد : الباين عليها مروة واجعها الحاج علي اميرة : كلنا وجعنا ماهو كلنا عايشيين ابخيرة قاعدين بس نسألك بما انّ جو هدرزة توا ليش الفترة اللي قبل العزاء قالبة وجك عليا واتلزي في العيال وحتى خير ربي ما اتقولي فيه وداد : تسألي فيا انا ,, من بدا الجو هذا ماهو انتي ياميرة اميرة : انا , حرام عليك شن درت بالك ناسية وداد : جاتك مروة ع أساس نبو انهدرزو وانكسدو قتلك وداد امعايا , انتي مابيتي تنزلي وقرمتيني عندها اميرة : انا درت هكي ,, عطني دا كان طلع مني هالكلام قتلها ماشيا بس عندي طلعة تقريبا ماجبت سريبك بكل وداد : هذا الكلام اللي جاني من مروة اميرة : غريبة الولية هذي معش فهمتها كيف توا في العزاء اتقولي طيوبة واكويسة وبالك نحنا ظالمينها وتوا طلعت اتخبط فينا في بعضنا علي نزلة مروة من الدروج جايّا شورهن وداد : غيري الموضوع جايتك من غادي قاعدة اميرة : المهم زمرد تعبتني لابت ترقد لا شي سهرتني الليل كله مش جايها نوووم واتقولي خليك امعايا ماما وداد : نفس الجو بناتي مرات اديرلي فيه الجو هذا " غيرن الموضوع في ثواني بعد شافن مروة " مروة : السلام ,, اهلين اميرة : اهلين , كنك طولتي ومانزلتي مروة : كالعادة لازم من طحنات مع نزار وداد : عادي حتى انا وإسلام علي مواضيع تافهات روتين يومي قعد اميرة : خطرها مروة مروة : نعم , اميرة : غريبة امّك ماجتش بكل للعزاء مروة : اها اعتذرت العمتي منها مريضة واكلتها بكل وتاعبة واجد وداد : اها ,, لاباس عليها اميرة : ربي يشفيها مروة : امين طبعا مروة كانت تكذب وامها بلعاني مابتش اتجي علي مارنّت عليها مروة واصرّت انّ اتجي لكن فاتت وماعدلتش وكانت صحتها ماشاء الله مافيها ولا حاجة اسواسة قرمة وتخبيط الناس في بعضها هذا روتينها اليوم ام مروة حتى مع جيران شارعها ,,,, فلاش باك : في الماضي نزار اقنع باته وخوته عشان يحكو مع امهم علي موضوع زواجه وفعلا تلسّنت الحاجة وخطب نزار مروة ام مروة : المهم يابنتي زي ماقتلك توا اللي يبيها قولي حاضر لكن بعد تزوجي نبيك اتقربي من عمك وعمتك وحاولي اتفرقي بين صبايا خوتك مروة : بس ياماما مش ليا الجو هذا انا عندي اهم شي ازوجت من حد حالته مادية اكويسة ام مروة : اسمعي كلام امك بس ومش حتخسري شي وكانت ام مروة هي اللي اتعبي في راسها من أيام خطوووبتها ,, وسعاد جاها علم من اختها اميرة انّ خطب وحدة جديدة وخشت في حالة نفسية وقعدت تأخذ في المهدئات مزالت مش هاينة عليها نفسها انّ نزار باعها بالرخيص ,,,, في الوقت الحاضر كانُ قاعدين احمد وإسلام ونزار في المزرعة وفي كم شخص قاعد امعاهم لان مزال مفتوح حوشهم ويستقبل في الناس نزار : باتي كان اهم شي نبقو مع بعضنا ديما اسلام : فعلا نزار : ياريت كلنا انطلعو من راسنا قصة التحويل من هالمزرعة عشان حتى الحاجة بس احمد : صدقت ماقلت الا الصادقة نزار : ونفس الوقت نبقو يد وحدة مع بعضنا مالنّا الا بعضنا اسلام : كلا انا خيكم امعاكم في أي حاجة عالحلوة والمرة احمد : هذا وقتنا ما انتفارقوووش نزار : يعني جو الورثة ما ورثة مش وقته حاليا خلوونا انخلوو الحاجة تطلع من المود الزعل اللي قاعدة فيه بعدها ساهل مستقبلا اسلام : متفقين احمد : متفقين علي جيّة فيصل عليهم وكان منزطل اسلام : اهو جاك نسيبك المسطول انخليك توا انا احمد : حتى انا خليني انشوف حالي وصبّو احمد وإسلام من تلا علي جية فيصل شوورهم فيصل : اوو نزار ولدنا نزار : انقانك فكنا من جو السنكحة عزاء باتي وفي برانية اهدالي كيف ماهديت الأيام اللي فاتن فيصل : توا عشان جيت فضيت روحي قلت نقعد مع نسيبي اشوية نزار : بارك الله فيك فيصل : باهي شن تحكيلنا نزار : هذا كنّا , هاك اشرب شاهي ولع سبسيّك وخليك مع نفسك ونزار قال بينه وبين نفسه " عليك نسبة سودة نوووودة يوم اللي جيت خذيت بنتكم " ,,, فلاش باك " في الماضي ازوج نزار وخذا مروة وكانُ اول شهر من الزواج كيف أي عرسان جو سمح ورومانسي وكانت ام مروة مزالت تشحن فيها علي عربها وتنفخلها في راسها 24 ساعة بالتليفون اول واحد كان في راسها اسلام لان كان من النوعية النسونجي ويبحّت واجد فقالت نستغل الموقف فكانت كل ما اتشوفه قاعد في المزرعة ادير روحها تطلع تنشر في الدبش وكانت ديما تطلق في الخير عليه وصباح الخير ومساء الخير وهكذا ,,, اسلام كان يرد رد عفوي بحكم مرات خوه وماعمرش بحّت فيها تبحيته مش تمام وداد حسّت بجو مش تمام وقعدت تفطن انّ مروة تطلع بلعاني وهي اللي تبدا في الكلام وهكي فبدت الحرب أولا بين اسلام وداد وبدت الغيرة بيناتهم والمشاكل وداد : قصدي عيب عليك طيّحت بوجي قدام اهلك اسلام : كنك شن درت انا وداد : تسعبطش عليا ,, وين ماتطلع تنشر في الدبش مروة نلقاك قاعد في المزرعة اسلام : عفوية اتجي مش بقصد ومرات خويا شن نبي انابشها او انعاكسها بعقلك انتي وداد : يا اسلام نحنا نعرفو بعضنا اكويس وانا اكثر وحدة عارفتك وعارفة كل حاجة عليك وعارفة ماضيك النجس اسلام : احترمي نفسك خير ما انهبّكك علي وجك وداد : والله والله لو شفتك مرة ثانية في المزرعة وهي تنشر في الدبش حيصير فيها كلام ثاني وقضتك ,, راهُ حنطلع وانسيبلك الشقة اسلام : عليك تكبير اشورخ كلا انتي ,,,, فعلا بعد فترة هكي ,, قعد اسلام يتفادى فيها كل مايبقى في المزرعة ويلقاها قاعدة عالبلكوني كان يخش للشقة او يغير مكانة مروة : غريبة قعد معش لايرد في السلام لا الخير شكلها قرصتله وذنه وداد هههههههه مزال ماشفتُو شي منّي ,,, كان امروح نزار وتالف من العمل كانت مروة قالبة وجها طبعها وقتها كان نزار العاشق الولهان اللي يحب ويكبد وطايح بوجه استغفر الله قريب حتى يعبدها كان وكان واضح سيطرة مروة عليه نزار : كنها حبي مضايقة شن في مروة : لا جو تمام مش مضايقة نزار : لا زوجتي وعارفها لما اديرلي الوجه هذا معناها متنكدة وغمتلها بكل مروة : اسلام نزار تغيرن ملامح وجه نزار : كنّا اسلام مروة : ليا فترة مابيتش ندويلك عشان مانبش المشاكل والعرايك لكن كثّر عليا نزار : شن فيه احكي بلا غموض مروة : كل مانطلع ننشر الدبش يقعد يبحت فيا نظرات غريبة عيب عليه انا ع ذمة راجل ومش أي راجل خوووه اخرة ولّا مش راجل انت ياعمري نزار : راجل وغصبن عنّا مروة قرّبت منّا واجد والصقت فيه وقعدت تحكي بدلع مروة : نبيك تدويلة قوله يخطاني لعند امتى يقعد ياكل فيا بعيونه عيب عيب زوجته مش مالية عينة يعدي يطلقها ويزوج ولية ثانية مش يبحت في مرات خوووه نزار طلع يجري من الشقة ونازل شور شقة اسلام مروة : تعال ياحبيبي مش توا تدويله حتى بعدين هي بينها وبين نفسها " خليها اتخش بعضها عليك جو سمح " ,,,, في الوقت الحاضر أحمد : بديت نضايق ,, العزاء له أسبوعين ومزال الناس يجووو مليت بكل , معش خدمنا اسلام : الله غالب باتك اجتماعي كان تحمل هاليومين اكيدة حيبدو يخفّوووو أحمد : بحّت نزار شكله نسيبه امنخفهن له نفخة اسلام : هههههه تي مش قاعد بكل هذا ديما فاقد ,, مانقبلهم بكل تذكّر زوجته تبلّت عليا بالكذب احمد : خلّك ساكت ,, اذكر حاجة اكويسة ,,, فلاش باك ,, في الماضي كان اسلام يتغدى وجوّا رايق ويشفط ويضحك هو وداد واسبعوو الباب يدق بالقووووة اسلام : تي من ازح هذا يدق هكي وداد : اطلع وشووف من ,, تسال فيا انا طلع اسلام فتح الباب لقى قدامة نزار وكان اثار الغضب علي وجه اسلام : كنك ادق هكي طرشقت انت ولا شن نزار : انّك تبقى نسونجي هذي حاجة اتخصك اتخون مراتك هذي حاجة اتخصك حياتك كلها درايق وبنات وعار كذالك حاجة اتخصك لكن تزقب المراتي ندفنك وانت حي اسلام بعصبية وقعد يخبّط علي صدر نزار اسلام : تي غير وطّيلي صوتك وفكنا من الاعياط غير مانلصق فيك توا نزار : تلصق في عينك يافاسد انت واحد مش راجل زاقب المرات خوووك انا بدل مانوثق فيك اتحافظ ع عرضي نقعد خايف منّك اسلام : فيش اتهرس انت ومن جا شور مراتك علي طلعة وداد بملاية الصلّاية وداد : كنك يانزار شن فيه نزار : مش شورك بيني وبين خويا اسلام مسك نزار من عند ارقبته اسلام : ماتحكش مع مراتي هكي خيرلك راه انطربقك يانزار راك خيي اصغير ماتخلش حد يكذب عليك انا لاني زاقب المراتك لا شي علي جية احمد والحاج علي والحاجة سدينة احمد : شن فيه كنكم الحاج علي : فجعتونا مااتخلوش حد يتغدى نزار : زاقب المراتي ويبحت فيها وينابش فيها اسلام تعقد خلاص لصق في نزار بدماغ في نص وجه اسلام : تي شهدرت بيا معيلت بيا بالكذب ياعيل والله مانك راجل وقعد يضرب فيه اسلام قدام باته وخوته وتمكّن فيه احمد قعد بيناتهم يحز والحاج علي : عيب يا عويل احترموني الحاجة سدينة : خلاص راك تقتل خوك يا اسلام في الوقت الحاضر محمود يحكي اتصال مع آية محمود : وينك معش لا فتحتي نت لا هدرزنا آية : انت بليد ولا تستعبط مانك عارف باتي ميّت شن تبيني نحكي امعاك ديما خاطي انّ حوشنا امعبي ديما يعني مش وقت لا هدرزة لا شي محمود : هذا نهايته اتقولي عليا بليد آية : غمتلي ومزال واجعني باتي اسمحلي الفترة هذي حنقصر امعاك لانحكو اتصال لادردشة النفسية تعبانة زيرووو محمود : تمام خوذي راحتك ,,,, وداد : مزال ماتحكش مع آية مروة : حاولت انعزيها لكن هيا ماتبش اكثر من مرة نمشيلها وهي ماتبش اميرة : خليها عليا انا آية نعرف كيف انطيبها مروة : انا مشيت عشان خاطركن وبديت بالصلح وداد : في ميزان حسناتك وكانت آية جايا من بعيد شورهن وطقّت فيهن وداد : وين كنتي مختفيه اية : مزطني محمود معش نبي نحكي معا بكل اميرة : كنّا اية : عارف عندي حالة وفاة ومش أي وفاة باتي هذا ومش امقدرني بكل اميرة : توا خلينا موضوع خطيبك علي جنب معقولة اتجيك مروة تبي اتعزيك ماتبش ,, عهدنا بيك عاقلة وطيبة آية : بس انتن عارفات شن كانت وداد : خلاص حتى عشان باتك سامحي وانسي مروة صبّت شورها مروة : حقك عليا كان غلطت فيك واسفة آية بحتت في وداد واميرة آية : مافش موضوع وحنسامحك عشان باتي بس مروة مسكت اعصابها قدام صبايا راجلها وماتبش ادير ردة فعل بايخة قدامهم مروة : الحمد لله ربي يدوم المحبة بيناتنا واقعدن يهدرزن مع بعضهن " مروة اترطب في الجو عشان العزاء وعشان نزار فقط لاغير " فلاش باك في الماضي " كان نزار واخذ طريحة سمحة من اسلام لان كان مجهد وجسمه احسن منّا اسلام وكان قاعد في شقته نزار مروة : عادي قلبي المهم طيحت بكرامته الأرض وريته انّك اتغار ع عرضك نزار : مانش متريح لين انرد ضربتي ولو حتى قتلته يكسرلي خشمي انا قدام اهلي حندّمه عليها وانوريه مروة : عارفتك اتهني وبطل يا احسن راجل في الدنيا ,, احمد : معقولة ازح تضربة من جدك وانت عارف روحك اصح منّا اسلام : شن نبي انديرله كثّر عليا قدامكم معش سكت تكذب عليه مراته وتضحك عليه ويجي يدويلي ’,, بعد درتها تي هيا اللي كانت تطلع بلعاني غير الواحد مايبش يدوي بس احمد : المهم بلّطة من راسك توا عشان خاطر حتى الحاج والحاجة اسلام : لا خاطر لا شي يصيع يتنطر يشلّط علي وجه نعرف هكي انا ,,,, في الوقت الحاضر كانت سعاد جايّا للعزاء عشان اتهدرز مع اختها وشافت وداد واية واميرة مع بعضهن يهدرزن وامعاهن مروووة لما شافت مروة اضايقت سعاد بينها وبين نفسها " فرحت اول يوم عزاء جيت مالقيتهش قاعدة توا قاعدة قدامي عليك قصة لازم انمدلها يدي زعمك " ومشت شورهن سعاد ,,, أول ماشفتها مروة جايّا شورها انقلب وجها وبان الشر والحقد علي وجها وصبّت من مكانها واتبحت فيها اميرة : كنّك صبيتي يامروة وداد : بحّتي من جاك من غادي اميرة : سعاد قصدك وداد مسكت يد مروة وداد : قعمزي عشان خاطري وبلاش فضايح قدام الصبايا يامروة يتبع ,,, | ||||
|
| |
|
10-08-21, 06:35 AM
| #7 | ||||
| رواية #حديقة_إبليس الحلقة 6 كانت سعاد جايّا للعزاء عشان اتهدرز مع اختها وشافت وداد واية واميرة مع بعضهن يهدرزن وامعاهن مروووة لما شافت مروة اضايقت سعاد بينها وبين نفسها " فرحت اول يوم عزاء جيت مالقيتهش قاعدة توا قاعدة قدامي عليك قصة لازم انمدلها يدي زعمك " ومشت شورهن سعاد ,,, أول ماشفتها مروة جايّا شورها انقلب وجها وبان الشر والحقد علي وجها وصبّت من مكانها واتبحت فيها اميرة : كنّك صبيتي يامروة وداد : بحّتي من جاك من غادي اميرة : سعاد قصدك وداد مسكت يد مروة وداد : قعمزي عشان خاطري وبلاش فضايح قدام الصبايا يامروة سعاد : اهلين ,, اميرة : مرحب ,, باهي اللي جيتي عندي امانة نبيك تعطيها الامي وسلّمت سعاد ع اميرة ووداد وآية وجت تبي اتمد يدها لمروة مروة : مزال عندك وجه اتسلمي بعد كنت اتكلمي في راجل مزّوج وداد مسكت مروة سعاد : اقل شي انا احسن منّك مانش قرامة وسوسة انفتن بين الناس وداد: سالتك بالله اسكتي واكسري شرّك اميرة : سعاد عشان خاطري ما اتردش وكبّري عقلك صبّت اميرة وخذت سعاد بعيدة منهم وداد : شن قتلك انا يامروة ,, كنك هكي انتي راسك امسكر مروة : مش ناسية الموقف اللي دراته ليا من قبل لما ازوّجت كانت اترن علي نزار وتبي تحكي امعاه اللي ما اتحشم علي وجها وداد : يامروة الصبايا يبحّتن فينا غيّري الموضوع توا ,,, فلاش باك ,, في الماضي ,, سعاد خطبها دكتور في نفس مجالها بعد كملت دراستها وكان علي فرحها مزال شهر كانت اتحاول اترن علي نزار عشان اتقوله انها كانت تتمنى انّ هو يكون حلالها حتى بعد باعها بالرخيص اترن واترن وكان فايت نزار مايردّش لان كان مايدس علي مروة في شي وقتها أيام كان طايح بوجه وامكبدة علي مروة مروة : شن ,, قصدك هيا نفس الفرخة اللي كنت تعرفها نزار : اها هيا مروة : هات نفتح عليها نزار : هاكي مروة : ياباردة توا راجل متزوج عليش رانّة عليه تحشمي علي وجك دايرة روحك دكتورة حنشهدر بيك وانقولها لعيت عمي سعاد وهي تبكي : وينه هو نبيه دقيقة بس مروة : انقانك الا وحدة باردة وتفاهة سعاد : تافهة في عينك يا %#@$# انتي اللي سراقة الرجالة يا $@$@% مروة : دكتورة واتقول في كلام فاسق سكّرت سعاد منها الخط وقعدت تبكي سعاد : حتى انا عليش بس انرن عليه يمشي ينحرق ويطربق خلاص حنزوّج وحننساك وانطلعك من راسي بس انا نكذب علي روحي انت اول حب في حياتي كسرت بخاطري الله يكسر خاطرك عمرش درت علاقة حب في حياتي الا امعاك اول مرة نعرف الحب امعاك ليش بس ادير فيا هكي وقعد تبكي وتبكي وتبكي ومروة شهدرت بيها عند صبايا خوتها وعمتها واميرة اضايقت بكل مش عشان اختها دارت هكي عشان موقف مروة وهي اتنشول واتشهدر بالموضوع ,,,, في الوقت الحاضر اميرة : انقانك الا هبلة ,, معقولة اديري هكي سعاد : شفتيها شن قالت ,, هللفعة كنت ماشيا ونبي انسلم ونكسر الشر هيا اللي بدت اميرة : فكينا منها مدام كاسرة شرّها سعاد : حاضر اميرة : تعالي امعايا للشقة فوق اشوية يتغير حتى جوّك اشوية ,,,, نزار قاعد بين الناس اللي قاعدين في المزرعة وسارح وشارد الذهن " مش كنت نبي انفووتها وانأدبها اخسارة موتة باتي خلاني انتنازل وانسامحها لكن ,, انا خلاص قعدت مش طايقها مش عارف شن اندير شريط ذكرياتي كله قاعد يمر قدامي ... فلاش باك في الماضي نزار كان في عز النوووم وراقد حس بحاجة اتحرك عند راسه برم لقى مروة اتقص في شعرة وتبي تأخذ منّا اشوية نزار : فيش اديري انتي دسّت المقص واحضنت نزار مروة : لا شفت شعر فيه شيب قلت انقصها وقعدت اتبوس فيه عشان يغير الموضوع في الوقت الحاضر نزار : معقولة كنت مُغيب انا للهدرجة زعمك سحرتني زي ما قالت امي , فلاش باك ,, في الماضي روح الليل متأخر لقى مروة تبكي نزار : شن فيه كنّك مروة : درت مشكلة مع نور عمتي هزبتني ومابتش اتهزب نور نزار : امي انا هزباتك ,, غير فكينا مروة : والله زي ما نحكيلك بدل ما اتهزب بنتها ركبت فيا انا معقولة هذا قدري انا نزار نزل فاصل للصالة لووووطة كانت هي وبناتها يتفرجن عالتلفزيون شافن نزار جي شورهم واضح عليه الغضب نزار : يانور كنك حاطة راسك براس مروة نور : مادرتلها شي ,, صار سوء تفاهم بيني وبينها في المزرعة قعدت اتعيط , وفتتها عشان خاطر امي نزار : بلاش كذب ,, لكي فترة حطيتيها في راسك بلطّيها وانسيها خيرلك الحاجة سدينة : احترم نفسك اتعلي في صوتك وامك جنبك ,, كنك انت /, ديرلي قدر اقل حاجة نزار : مش شورك انتي يا امي حتى انتي بدل ماتبقي محايدة امصبية في صف بنتك الحاجة سدينة : فيش تحكي انت مافهمتش نور : كنك تحكي مع امي هكي بعقلك انت الحاجة سدينة : خليه خليه بس نزار : عليش هزبتي مروة ونور لا عليش طيحتي بقدر مروة قدام النور نور : حي علي أمها الكذابة وقعدت اتبلّا حتى علي امي هالسوسة صدقت اية لما قالت عليها ابليس نزار ضرب نور كف نزار : ماتقولش عليها عقرب خيرلك نور وهي تبكي نور : شفتي يا امي آية : شن تحساب روحك انت من امبدري ساكته انا مراتك كذابك اتبلّا علينا الحاجة سدينة تعقدت الحاجة سدينة : تعرف ترقى للشقة امتاعك نزار : تو نرقى واقعدو فيها ماني متريح لين انحول منها هالمزرعة الحاجة سدينة : اتصدق في ولية اول امس كيف جاتك ,, واتكذب امّك , ياريت حتى سألتني وقلت صار دغري تسمع كلام مراتك الحاجة سدينة قعدت تبكي الحاجة سدينة : هذا قدري انا كبرتك وعلمتك وزوجتك ,, انا اللي زوجتك من اللي باعت ذهبها انت بالذات اصغر واحد من خوتك قلت للحاج ما انزوجه الا انا هذا جزائي هذا قدري هكي اتكافئ امك يا اخسارة ياخسارة يا اخسارة نزار ركب فوق ومابش يرد عليها الحاجة سدينة : نزار نزار وقف في نص الدروج وبحّت لووطة وكانت امه اتبحت فيه الحاجة سدينة : خايفة تطلع ساحرتك ولا دايرتلك شي حاجة انت تغيرت وقعدت شخص ثاني مش نزار ولدي اللي نعرفها ورقى نزار للشقة امتاعه وفعلا كان نفس المسحور ,,, معش تعرفه هل حب هل عشق هل سحر وشن قصة المقص في الوقت الحاضر فيصل : اووي اوووي نحكو امعاك نحنا وين سرحت انت نزار : تي انت مزال قاعد فيصل : كنّك اتلز فينا مزلنا قاعدين نتعشو وتو نربحوووو شن امطول العشاء نزار : دخّن سبسيك وخليك مع نفسك يانقشة فيصل : اطيب ياغالي نزار : نستاذنك توا فيصل : وين تبي اتسيبني نزار وهو مبتسم : نبي انشوفلك العشاء واتي ولالا فيصل : لا مدام هكي تمام نزار بين وبين نفسها " عطّك سمسامك " ,,,, بعد مرور ساعات الساعة 12 بعد منتصف الليل كانت الحاجة سدينة قاعدة في دارها وعالسرير ابرووحها وتحكي مع نفسها الحاجة سدينة : سيبت فراغ كبير في الحوش صح كنّا مانسمعُ في صوتك لكن كنت مشجعة بيك ديما خاطري نلحقك وين ماقاعد الدنيا بلاك شينة ,,, كانُ نزار ومروة قاعدين في غرفة نومهم وعالسرير بس كل حد معطي ظهرها للاخر ويهدرزو بدون مايبحتو في بعضهم نزار : راك تطلعي اليوم درتلي فالطة قدام الصبايا مروة : لا خلاص قتلك كسرت الشر ومعش دخلني بحد نزار : باهي نسألك امبدري خطرت في بالي حاجة لكن نبيك اتجاوبيني بصراحة مروة : شن نزار : تذكري مرة لما نظت القيت قاعدة فوق راسي بالمقص تبي اتقصي شعري مروة : اها قصيت شعره في شيب نزار : متاكدة يامروة مروة : اها متاكدة ,, شن خطرها عليك نزار : لا قلت نسال , مروة : سؤالك غريب نزار : خليني توا ناخذ غفوة ليلتك سعيدة ,,,, احمد : صار قتيلي قبل اطحنت بين مروة وسعاد اميرة : تي بكل ,, اللي اسماها مروة كانت تضحك امعانا عادي لما شافت اختي سعاد اتقول تحولت الى ابليس شي يخوف بكل مش طبيعية الولية هذي احمد : ربي يكون في عون نزار امعاها مش عارف كيف داير امعاها اميرة : رسمي كلامك احمد : يارب بكرة مايجينا حد ,, نبو نخدمو علي حالنا والمزرعة معش فضت اميرة : حتى الصبايا مزالن دايرات ميعاد وهدرزة مع عمتي احمد : باهي الحمد لله انطلقت وقعدت اتهدرز الحاجة اميرة : اكيدة ,, بدت تتاقلم مع الوضع ,, بعد مرور شهرين من العزاء الناس معش اقعدت اتجيهم كيف قبل وكانت شبه الحياة عادية في المزرعة ومروة هدّت الكارطة عشان ماتبش تخسر نزار لانها حسّت بدا يتغير ومش زي قبل وقعدت علاقتها مع العائلة كلهم تمام نزار : اليوم حنمشو لدكتورة جديدة قالو اكويسة ويشكروها فيها في عيادة المروة مروة : ماهو مشينا واجد وكلهم نفس الكلام نزار : مش حنمل ولا انكل حندير المستحيل خاطري في مولود عارفك انتي مش في يدك ولا في يدي انا لكن حنسعووو وخلاص مروة : حاضر , نزار : معناها العشية حنطلعووو مروة : تمام نزار جا يبي يطلع من الشقة مروة : خلاص ارضى عليا قعدت زي ما تبي معش درت مشاكل مع حد حرام عليك نزار : كني شن درت مروة : قصدي وين نزار امتاع زمان نزار مع ابتسامة : قاعد زي ما انا ماتغيرتش مروة : تذكر يوم زفتنا قعدت تضحك عليا نزار : قلت هذي شكلها ضاربها الشر مروة : هههههههه فلاش باك ,, في الماضي كان طالع بيها من الصالة وماشي بيها شور القوارشة وصل للشقة هو وياها مزال قاعدين عند الصالة مجرد ماسكّر باب الشقة قعد امصبي قدامها نزار ورفع الطرحة من علي راسها نزار : أخيرا قعدتي حلالي وحب حياتي انحبك وانموت فيه وعطاها بووسا علي جبينها وخش بيها شور دار النوووم وطلع عشان حتى هو يغير ويلبس حاجة ثانية هي طولّت في الدار ماطلعت نزار : انقاني ضاربني جووع خذا العشاء وحطّا عالطاولة نزار : الواحد يتعشى قبل وبعدها يدير جوّا طلعت مروة كانت قمة في الجمال لين قريب طرشق من جمالها وملابسها جت قعمزت جنبه عالطاولة نزار : كووولي اكيدة جعانة مروة : لا ماعندش نية نزار : غير كووولي بس خذا من عالسفرة وقعد يوكل فيها مروة قعدت تاكل وبعدها هكي بشوية قعدت تاكل برووحه وتاكل بشراهة حوّل الحشم نزار استك واستغرب وقال بين وبين نفسه " هذي كنها توحشت معش قبتلي شي مروة وهي تاكل شافت نزار يبحّت فيها بغرابة مروة اضحكت وقريب اشرقت مروة : هههههههه قبل شرقتني كووول نزار : هذا كلّا وماعندكش نية هههههه في الوقت الحاضر مروة : كنت جعانة موووت ومش واكلة شي من الصبح غير تحشمت في البداية بس نزار سكّر باب الشقة ورد مابش يطلع ومشى شوورها وقعد ماسك وجها ويبحت في اعيووونها نزار : مرات نكرهك ونندم عاليوم اللي زوجتك ومرات انقول لالا عسل ومافش زيّها بكل ونفرح انّك مراتي مروة : معقوولة حبيبي نزار : انحس في داخلك انسانة طيبّة وحنونة لكن الظاهر امتاعك عكس اللي انحس بي ممكن نحكُو بصراحة اشوية مروة مروة : مرات وقت علي مشوراك تبي تطلعي نزار : لا خليني عادي , المهم احلفي توا والله ماتكذبي واتقولي الحق مروة : والله حنقول الحق ,,,, نور شافت آية سرحانة ومضايقة نور : كنها خيتي شن في كنك آية : ماكني شي ,, جو تمام يانور نور : غير احكيلي مش انا ما اندس عليك في شي آية : خاطري ننهي كل شي مع محمود نور : عليش كنّا , في مشكلة صارت آية : من قبل العزاء رايح مش تمام وصايع وشهواني قبل كنت انمشي وانقول أي شاب هكي بعد يخطب لكن كثّر عليّا حتى في عزاء باتي مافش أي ردة فعل يفكر في نفسه وخلاص نور : انتي ادرى برووحك ورد بالك اتفكري في كلام الناس لو تبي تنهي انهيها بدري خير آية : مش عارفة شن اندير نبي نسال امي بعدين وناخذ راي امتاعها نور : شن رايك عندي حاجة احسن آية : شن هيا نور : عندي شفرة القديمة امتاعي ومافش حد عنده رقمها آية : باهي نور : انرن عليه وانحاول انزقبة انشوفه يطيح ولا لا آية : لا فكينا ما انحبش نلعب بمشاعر حد خليني ننهيها هكي خير نور : شوفي اللي يريحك ,,,, وداد : بالك اتحشم علي وجك يا اسلام وطلّعنا اسلام : وين تبو تطلعوو وداد : شيلنا لاي مكان مول اوف بنغازي ,, البووسكو ردو فتحووو الكورنيش أي مكان انغيرو جونا اشوية اسلام : باهي حنشيلكم الأيام الجايا وداد : لالا نبوها اليووم ,, صح ولا لا يابنات قعدن بناته كلهن يقولن صح صح وقعدن يجّدن في باتهن طبعا اسلام كان مايتحمل شي في بناته الثلاثة اسلام : تريحتي هكي دفتيلي طاجين وداد : غير هيا صفي النية وفكنا من الهروب وازقبن عليه بناته ويجدن فيه مرة ثانية اسلام: تي باهي باهي حولن بس حنطلعوو مع العشية حاضر وداد وبناته قعدن ينطن من الفرحة اسلام بحّت فيهن وقعد مبتسم ,,,, احمد كان يهدرز مع اميرة في دار نومهم أحمد : من يوم اكبرو ونيس وزمرد معش خذيت راحتي بكل امعاك اميرة : حرام عليك فيش قصرت في حقك احمد : وقتك كله قعد ياعيادة يا اتعاني في اعيالك اميرة : حرام عليك في شن قصرت امعاك احمد : مافهمتش قصدي امرايف علي اميرة امتاع أيام زمان اميرة اللي قدام الناس جدية وحاصلة في ورحها لكن امعايا في الشقة صايعة واحسن رقّاصة اميرة : هههههههههه تحشم علي وجك شن صايعة وشن هالكلام أحمد : اعيالك وين بس اميرة : قاعدين يتفرجو عالتلفزيوون غديتهم خلاص ما قاعدين في الصالة احمد سكّر دار النوم اميرة : كنك انت ههههههه , قايلة راه احمد ولّع التلفزيون وحط علي قناة أغاني اميرة : باهي وبعدها احمد : نبي انشوف اميرة امتاع زمان اميرة : ههههههههه مش وقت بصارتك احمد : هيا ارقصي حلالي ونبي نستمتع بي اميرة قعدت ترقصلة وتضحك احمد : عليش تضحكي , اميرة : خلاص مش ليا الجو هذا انا احمد : غير هيّا بس وشريني طلّع افلووس من جيبة وقعد يعزق فيهن عليها اميرة ترقص وتضحك واحمد يضحك وبعدها هي ترقص تعكفت وطاحت عليه واقعدو يضحكوو بصوت عالي اسمعو باب الدار يدق اميرة : شكلها زمرد سمعت صوت الأغاني جت احمد : مافش تصباي خليك هنا في حظني اميرة : احمد خلاص كنك هكي انت احمد : لالالالا ,, احمد : من اللي يدق ونيس : انا يابابا نبيك اتصقم التلفزيون معش غيرت القناة احمد : باهي هيا طالعلك عدي شور الصالة اني جايك ,,,, كان نزار مزال يهدرز هو مروة وقلبووها صراحة نزار : انتي صح كنتي اتحبيني ولالا اول مرة لما شفتيني ,,, راك حلفتي بالله تكذبش مروة :تبي الحق يا حبيبي في البداية كنت طامعة في افلوسك وخاطري انعيش حياة الرفاهية والاغنياء هذا عليش تعلقت بيك حتى لما شفتك انخطبت قريب طرشقت وانهبلت وحاول انعبيك حنان وحب وعشق عشان نخطفك منها وتقعد ليا نزار : يعني كنت في نظرك مجرد وسيلة مش حب مروة : لكن توا قعدت انحبك نزار : توا قصدك بعد موتة الحاج ولا من بعد الزواج سكت مروة وطولت الرد مروة : لا من بعد الزواج على طول " وطبعا في الفقرة هذي كانت تكذب صح قعدت اتحبه اكثر ممكن بعد مات الحاج وحسّاته تغير خافت تخسرة وتخسر كل شي عندها نزار : اها تمام اسمعو باب الشقة يدق طلع نزار يفتح طلعت نوووور نزار : نعم يانونا نور : امي تبيكم العشية قالت كلمي خوتك وصبايهم تبيكم مع الساعة 6 العشية تبي تحكي امعاكم في موضوع نزار : ان شاء الله خير في حاجة صارت للحاجة قصدك نور : لا مافي الا كل خير نزار : خلاص حاضر تمام مروة : من نزار : امي قالت نبيكم عالعصر كلكم مروة : شن في زعمك ,,, نزار : مش عارف ,, معناها حنبلطووها مشيتنا للعيادة اليووم انشوفو الحاجة قبل مروة : اللي تبيها انت تمشي ,, بعد مرور ساعات الساعة 6:00 كانُ كلهم قاعدين في الصالة نزار ومروة احمد وعائلته اسلام وعائلته وكانت نور واية امعاهم في الصالة وكانُ كلهم يهدرز مع بعضهم وصوت دوشة عالي اسلام : ما اتبحتش فيا هكي انتي وبناتك قبل شايلكم اليووووم لكن شفتي الجو ابروحك تبينا الحاجة وداد : باهي شيلنا حتى بعد المغرب اسلام : ساهل اهو جت الحاجة من غادي اول ماشافو الحاجة سدينة جايّا شورهم كلكم اسكتوووووو كان الهدوء والسكون والوقار علي وجها الحاجة سدينة وهي جايا شورهم كانت الابتسامة علي وجها نزار استغرب وبحّت في اسلام اسلام رفّع حواجبه لنزار " جو حتى انا مستغرب كيفك " قعمزت امعاهم وكانت علي يمينها نور وعلي يسارها آية واعياله وصبايهم قاعدين قدامها الحاجة سدينة : اكيدة مستغربين صح عليش نبيكم كلكم علي بعضكم اول حاجة ربي يدوووم هاللمة الحلوة بيناتنا ويرفع عنّا غيمة الحسد والحقد ونبقووو كلنا مع بعضنا كسجد واحد في هالمزرعة " كلهم قالو آمين " الحاجة سدينة : ثاني حاجة وهي اللي بسببها لميتكم كلكم علي بعضكم عشان انقولها لكم حبيت انقوللكم ,,,,,, يتبع ,,, | ||||
|
| |
|
11-08-21, 11:21 PM
| #8 | ||||
| رواية #حديقة_إبليس الحلقة 7 الحاجة سدينة : اكيدة مستغربين صح عليش نبيكم كلكم علي بعضكم اول حاجة ربي يدوووم هاللمة الحلوة بيناتنا ويرفع عنّا غيمة الحسد والحقد ونبقووو كلنا مع بعضنا كسجد واحد في هالمزرعة " كلهم قالو آمين " الحاجة سدينة : ثاني حاجة وهي اللي بسببها لميتكم كلكم علي بعضكم عشان انقولها لكم حبيت انقوللكم اني حنعطيكم من توا كلكم ورث الحاج علي نزار وخوته بحتّو في استغراب في امهم وصباياهم الفرحة والبسمة علي وجوهن نزار : كيف ورث باتي الحاجة سدينة : باتكم قبل مايموت كان قايلّي انّ كل شقة تنكتب باسمكم وعلي أساس يبي ادير وصية لكن توفى ومالحقش عليها اسلام : الله يرحمه باتي الحاجة سدينة : مش ديما اتقول خاطرنا نطلعو من هالمزرعة وكلكم مش عاجبتكم المزرعة احمد : لحظة غضب بس يا امي لكن نحنا مانقدروش انسيبوها المزرعة الحاجة سدينة : ماشاء الله المزرعة كبيرة وفيها العمارة هذي حنخليكم اتبيعوووهن وكل حد يأخذ حقه من الورثة نزار : وانتي والبنات وين تقعد الحاجة سدينة : حندبّر راسي انا وبناتي نزار : لا مدام حيّة مانبوش انبيعو اسلام : اكيدة وانا امعا نزار مدام انتي بيناتنا مش حنبيعو يا امي احمد : هذا الصح لازم نبقوو مع بعضنا " وكانن صبايهم مش عاجبتهم الدوّة وأول مرة يتفقن علي حاجة وحدة مع بعضن الحاجة سدينة : عندكم أسبوع فكّروو اكويس وردّو عليا تبو حقهم من الورث حنبيع كل حاجة باسم الحاج تبوا تقولو لالا مش وقته الكلام هذا وساهل مستقبلا ,, نقعد انا درت اللي عليا وتقعدوو انتم قعدتو برضاكم مش غصبن عنكم زي أيام الحاج علي وتوا خلوني انخش لداري انحس روحي دايخة نبي ناخذ غفوة وصبّت الحاجة سدينة من تلاهم وكلهم يبحتو في بعضهم منستهين ومش فاهمين شي الصبايا كل وحدة فيهن رقت للشقة امتاعها ونور واية مشن لدراهن كانُ نزار وإسلام واحمد مع بعضهم نزار : كيف الراي أحمد : انا الحق خاطري انقوللكم ناخذو حقنا خير بما انّ الحاجة راضيا اسلام : حتى انا هكي خاطري لكن حاليا انحس فيه مش وقته هالكلام نزار : ياهو فكرو في الحاجة من قبل كنا انعيطو انقولو خاطرنا نطلعو من هالمزرعة لكن توا مات باتنا يعني الحاجة توا هي مستحقتلنا واجد واجد احمد : خلونا ناخذو قرار من توا اسلام : انا مع الورث لكن حاليا مش وقته نزار : انا مع الورث لكن مدام امي حيّة مش وقته احمد : خلاص معناها الموضوع هذا يسكر ونبقوو مع الحاجة هنا وانوَنْسُوها ,, متفقين اسلام : تم نزار : متفقين ,,,, مروة واميرة وداد كانت مضايقات عالقرار اللي خذووو رجالتهن لان قبل خاطرهن يطلعن من هالمزرعة فرصة وجتهن لعندهن ,,,, بعد منتصف الليل مروة : رقدت ولا مزال واعي نزار : طاير النوووم مروة : اكيدة اتفكر في الورث نزار : بالعكس عادي , قرار وخذيته انا خوتي توا مش وقت بيع ولا ورث لا شي هذا وقتنا نبقو مع الحاجة مروة : مش ديما كنت اتقول امتى نطلعو بس من هالمزرعة ونستقر ليش غيرت كلامك نزار : مرات الظروف يغيرّنك ويغرن تفكير مروة : اها تمام ,, بس ياريت ترضو انكم اتبيعو اقل شي انعيشو حياة برواحنا في استقرار نزار : استقرار ؟؟؟؟ فلاش باك ,, في الماضي بعد فرح نزار بشهر مروة : هاكي ياماما شعرة اللي قلتيلي عليها من نزار وهذي الصورة من الصور امتاعته ام مروة : نجكّ ليا ,, اللي تسمع في الكلام مروة : قبل زرق عليا يا ماما ام مروة : اها , تي هو طايب من غادي بس الاحتياط واجب تو بكرة نمشي للشيخ الروحاني اللي نعرفه ويتملك موضوعك يقعد خاتم بين ايديك ,, في الوقت الحاضر مروة : كنك قلت استقرار وانت مستغرب نزار : لاني ما انشوفش في استقرار الأيام هذينا امعاك لكن امخليها على الله وخلاص مروة : باهي نبيك بكرة اتشيلني الحوش هلي امرايفة علي امي نزار : حاضر ,, خلينا انرقدوو توا ,,,, صباح اليوم التالي كانت وداد تفطر مع اسلام هيا وبناتها وداد : ياريت تحكي الخوك واتبيعووو خلينا نطلعو خير عشان نتريحوو اسلام : سيورنا حناخذو الورث ماعندنا عليش مستعجلين وداد : شي غريب , الحاجة اتقوللكم بيعو بالسموح وانتُ ماتبّووش اسلام : غيريلنا الموضوع مش وقته توا ,,,,, كانت تفطرآية مع أمها آية : يا امي نبي ناخذ رايك في حاجة حاجة سدينة : شن ان شاء الله خير آية : مهناك الا كل خير لكن متحشمة نحكيلك حاجة سدينة : احكي شن فيه شغلتيني آية : نبي نفسخ خطبتي مع محمود معش تريحتله وحسيته مش تمام حاجة سدينة : كنّك يا ابنيّتي مش كانت كل حاجة تمام شن صار آية : لا من قبل عزاء الحاج وهو مش عاجبني وتوا تاكدت اخرة معش نبي انكمل معا الحاجة سدينة : لا عادي يا ابنيتي ابراحتك المهم صليتي صلاة استخارة آية : صليتها اها الحاجة سدينة : خلاص معناها مدام مافش قبول حننهوها آية : خلاص نبيك اتكلمي امه محمود واتقولي مافش نصيب الحاجة سدينة : هذي خليها عليا انا نعجبك اسهل حاجة وقتنا توا تخريب الميعاد ,,,,, كان احمد في الطريق ومعا اميرة شايلها للعيادة اميرة : استغربت فيك امس يا احمد احمد : كنك عليش اميرة : معقولة في حد يجي ورث لعنده ويفوووته احمد : مش وقته يا اميرة الورث معقولة نورثووو والحاجة حيّ اميرة :عادي برضاها ماهُو احمد : لا تحكي هكي بس قدامنا جبرةً بخاطرنا اميرة : يصير خير احمد : خليها ع الله حنلحقو علي الورث علي قولت اسلام ,,,, الساعة 10 صباحا كانت نور تبكي شفاتها الحاجة سدينة مشت شورها الحاجة سدينة : كنك شن فيه نونا نور : صح تبوا تبيعو المزرعة الحاجة سدينة : لا متخافش خوتك عرفتهم مش حيبيعو ويسيّبوني ابروحي وحتشوفي بعد أسبوع شن يقولو نور : مش خاشة راسي نمشي مكان ثاني الحاجة سدينة : هابا عليك انتي يانور مش كنتي اتقولي ياريت الوحدة تسكن في المدينة جوا السلماني ولا الماجوري جيران وشوارع وجو سمح هيا تعالي ورايا فيه خبزة يابسة تعالي كسدي امعايا انكسرووها وانخلوها مرحية عشان شهر رمضان قرّب نور : اها عليك جو شهر رمضان نرجى فيه الحاجة سدينة : بس اخسارة يكون مافش طعم بلا الحاج علي اللهم اغفر له وارحمه نور : آمين يارب ,,,, ام مروة : غريبة جايا من الصبح بدري راك اتقولي عركة انت وياه مرة ثانية مروة : لا قلت انغير جوّي امرايفه عليك بس يا امي ام مروة : ومن امتى اترايفي انتي ياسوسة اطلعي ع راس حاجتك بنتي وعارفتك مروة : نزار ام مروة : كنا شن دار مروة :تذكري عطيتك شعر وصورة وقلتيلي خلاص يبقى خاتم بين ايديك ام مروة : اها اهُو قعد خاتم بين ايديك انسيتي انتي الوحيدة كنتي تطلع مكيجة ومش قادر يدويلك من قبل واللي تبيها تاخذيها مروة : عارفة لكن ليش كل شي تغير توا معقولة السحر انتهى مفعولة ام مروة : ياهبلة ماهُو الأوقاف دارو حملة نظافة في القبوور مرات يقعد انفك السحر امتاعه مروة : رايح متمرد وخاطري انجيبه للطريق توا قعدت خايفة منّا نخسرة ام مروة : كلا توا ماتحلمي بكل العين عليهم ويصيّدو فيهم وكلهم خايفيين امتاعين السحر مروة : رايح متمرد ومتغير ولولا عزاء باته راهُ عزقني عندك ام مروة : باهي شن تبو اديرو من راي بعد مات الحاج علي اكيدة حيتقسمو الورث هذا وقتكم مروة : حنحكيلك شن صار ماهُو اجتمعت بيهن الحاجة سدينة عشان الموضوع هذا ,,,, فلاش باك ,, في الماضي لما نزار دار مشكلة مع امه عشان قصة نووور وقالت له خايفتك تطلع مسحور قعدت اتزن في راسه الجملة هذي مشى الصاحبة شيخ سلفي نزار : اهلين يا شيخ مازن مازن : مرحب خونا نزار ليك وحشة نزار : ليا فترة اندور عليك رقمك رايح مني مازن : كنك ,, ان شاء الله خير نزار : الشخص كيف يعرف روحه مسحوور مازن : اعراض واجد السحر بس كنك شن في نزار : الواحد شن يدير لو حس روحه مسحور مازن : تأخذ أوراق سدر وقعد يشرحله في الطريقة واتحافظ علي اذكار الصباح والمساء اهم شي اذكار الصباح بعد صلاة الفجر افضل واذكار المساء بعد صلاة المغرب واتحافظ علي اذكار الصلوات المفروضة كل ما اتكمل صلاة في كم ذكر لازم اتقوله قبل ماتطلع من المسجد قعد يسمع منّا نزار ويبي يطبق كل شي وكل ماقالة الشيخ مازن " مش خاسر شي زياد الخير خيرين " في الوقت الحاضر ام مروة : صار مابوش الاعيال مروة : اها قالووو مايبّوش يسيّبو امهم ام مروة : انتي اسكنيله وزنّي علي راسه مروة : حتى انا نبي اندير هكي ام مروة : بعد خطرها مش قتيلي امبدري اشوية كّنا قعد السحر معش يدير مفعوولة بس تذكري لما قلتيلي نزار قعد يصلي ويقرا في القران واجد مروة : اها صح ام مروة : تقريبا من يومها قعدتو مشاكل واجد وديما اتجيني حرجانة مروة : انقانة رسمي ,,, قعدت نربط في الاحداث وتقريبا الشي هذا صار بعد عركتي مع اخته نور ام مروة : معناها ياشاطرة بالك كاين عارف روحه انّك ساحرتيه ,, وعدّى للشيخ وعالجوو مروة : لا بس ماتغيرّش عليا ام مروة : معناها زي ماقتلك بعد نظفو القبور انفك سحره المهم بعدين اتصلي اميرة وداد وشجعيني عالبيعة اسكنيلهن اشحنيهن عبيلهن راسهن ولما اتروحي كل وحدة امشيلها لشقتها وعبيلّها راسها عالبيعة ,,, فلاش باك ,, في الوقت الحاضر نزار كل مايبي يحاول يقرا قران في الشقة مايقدرش وحاجة تمنعه وماحوتك مايقرا حتى لما يصلي كانت الصلاة ثقيلة عليه لما مشى حكى للشيخ نزار قاله بالك في حد ساحرك انت والمدام ورد بالك اتقولها للولية لانهن خوافات امشي بنفس الجو اللي قتلك عليه بعد فترة باذن الله وتوفيقه حيخف السحر نزار استغرب وقعد يقول بينه وبين نفسه من زعمك يطلع ساحرني انا ومروة وماجشش في باله حتى بالكذب انّ هي اللي ساحرته ,,\ ومابش يقوللها شي عالشيخ مازن خايف يقوللعل يركبها الوسواس في الوقت الحاضر كان نزار قاعد في العمل ويحكي مع روحه " زعمك انبيعو ولا لا راسي قريب ينفجر ,, اسلام قاعد يدخن في المزرعة مع نفسه ويحكي مع روحه " فرصة جت لعندنا خايف انقوللهم بيعو نطلع بايخ قدامهم " ,,, الساعة 6 عصرا كانن يهدرزن آية ونور مع الحاجة سدينة ويشربن امعاها في قهوة نور : تذكري زمان الفالطة اللي درتيها لنا مع اسلام حصلنا طريحة الحاجة سدينة : الله يذكرك بالخير فضحت بيكن فلاش باك ,, في الماضي كان اسلام في طيش شبابه واعر ع خواته وممنوع يطلعن حتى بمكياج خفيف كان يضرب فيهن عليه المهم كانن دايرات تليفون من ورا خوتهن وباتهن وامهن كانت عندها علم بي في يوم طلعن يحسابن خوهن مش قاعد برة وكانن دايرات مكياج قعد يهزب فيهن ويعيّط عليهن وجاي بي يضرب شافتهم الحاجة سدينة جتهم من بعيد واتقوللهم الحاجة سدينة : الشفرة امتاعي انا ,, مش شورهن عندي بيها علم تبّي اتكحلها عمتها وزاد كمّل عليهن اسلام بعد عرف قصة الشفرة ,, في الوقت الحاضر اية : عليك طريحة حصلناها وقعدن يهدرزن ويضحكن مع بعضهن ,,, وداد : باهي اللي جيتي اميرة : تعبني ونيس خليتهم في الشقة وداد : شن يصير يا اميرة كلماتك مروة انا اسلام امسكر راسه ومايبش يبيع اميرة : كلمتني مروة اها ,, بس حتى انا احمد نفس اسلام ,, اول مرة يتفقوو مع بعضهم وداد : باهي شن الراي اميرة : خلينا انا وياك ومروة انزنّوو عليهم عالبيع 24 ساعة زن زن زن زنين علي روسهم وداد : تمام حتى هذا راي اميرة : لازم نطلعووو من المزرعة وداد : هذا وقتنا لو نبو نطلعو من هالمزرعة اميرة : ماقلتي الا الصادقة " مروة واميرة وداد كلهن يفكرن في مصلحتهن الشخصية ومافش ولا وحدة فكرت في الحاجة سدينة ولا كيف حيصير فيها ,,, بعد مرور أسبوع كانن مروة وداد اميرة 24 ساعة سكنان علي نفس الموضوع بيع الأرض عشان الورث وكانت مروة كل اشوية تحكي مع وداد اميرة واتجشع فيهن عالبيعة عشان يحكن مع ازواجهن أسبوع كامل هنا الثلاثة يزنّن علي ازواجهن علي قصة بيعة المزرعة , نزار ومروة مشو للدكتورة ونفس الجو قالتلهم مافيكم شي انتم الاثنين تمام وعطت كورس علاج لمروة لعلى وعسى اتشد امعاهم \ ’’’ جا اليوم الموعووووود كانُ كلهم ملتمين في الصالة عشان يتخذو القرار الأخير يا يبيعووو وكل حد يأخذ حصته يا يسكّرو الموضوع ويتأجل نور وآية كان عارفات انّ استحالة خوتهم حيرضو بيبعة المزرعة عشان الحاجة سدينة الحاجة سدينة : ها شن قلتُ , خذيتُ قراركم انجيبو حد يثمن المزرعة وانبيعووها ولاخلاص ,, انسكرو عالموضوع وانعيشو مع بعضنا كلهم اقعدو ساكتين الحاجة سدينة بحّتت في نزار ها شن قررت كنكم سكتُو نزار : الحق ياحاجة كلنا اتفقنا انّ انبيعو وكل حد يأخذ حقّه الدمعة قعدت ع خد الحاجة سدينة الحاجة سدينة بحتت في احمد وإسلام الحاجة سدينة : حتى انتم نفس الاتفاق خلاص اسلام : اها ياحاجة احمد : مدام انتي راضية وبالسماح ,, امعاهم حتى انا الحاجة سدينة بحّتت في صبايا اعيالها الحاجة سدينة : وانتن شن رايكن اميرة : هدرت مع احمد واجد في الموضوع لكن اللي داره احمد هو اللي صاح وداد : وانا اللي يبيها اسلام نمشي عليها مروة قعدت ساكتة الحاجة سدينة : وانتي يامروة شن رايك اميرة وداد كانن فرحانات عشان عرفات رد مروة مروة : لا ,, انا ضدهم ومش امعاهم معقولة انسيبوووك ابروحك كيف حتبقي بعيدة عن اعيالك نزار بحّت في مروة باستغراب وقال بينه وبين نفسها " هذي بعد ما اقنعتني غيّرت راي امتاعها " اسلام واحمد بحتّو مصدومين في نزار اميرة وداد بحّتن بتعجب في مروة مشت مروة صبّت قدام عمتها الحاجة سدينة مروة : معقولة اتسيبو الحاجة وتمشووو نزار بعصبية : يا كذابة ما انتي اللي سكنتيلي في الشقة ,,, فلاش باك ,,, في الماضي كانت قاعدة مروة عند أمها مروة : خلاص يا ماما اتفقنا كلنا علي بيعة المزرعة ام مروة : كلكم كلكم مروة : اها زوجي وخوته وصبياهم وبكرة نبو انقولووها للحاجة ام مروة ابتسمت مروة : فرحانة اكيدة عشان حنلعبو بالفلوس ام مروة : هذا وقتك ياهبلة تكسبي عمّتك في الحالتين مبيوعة المزرعة ومافش حاجة رايحة عليك مروة : كيف ام مروة : اقلبي الطاولة عليهم وديري روحك ضدهم مروة : بس انا سكنت لنزار ,, حنطلع كذّابة قدامة نزار حينفصل عليا ام مروة : بالعكس حتبقي تحت حماية عمّتك في الوقت الحاضر نزار : كنك كذابة ندويلك انا مروة : شن كذبت عليك نزار : مش انتي قلتيلي انبيعو وسكنتيلي ازّح مروة : لا ابدا ,, وجيب حتى المصحف نحلف عليه جا نزار شورها يبي يتهجم عليها صبّت قدام الحاجة سدينة الحاجة سدينة : شن تبي تضربها قدام امك نزار : بس كذّابة هذي يا امي والله كذابة احكن حاجة يا اميرة ووداد صّبن اية ونور جنب مروة اية : متخافش مدام نحنا جنبك مافش حد يجي شورك نور بحّتت في اميرة وداد وقالت " يا اخسارة تاريتنا ظالمينا مروة والفسس فيكن انتن ياطماعات " اميرة : هذي اكبر منافقة ولفعة كبيرة وداد : هذي سوسة هذي ابليس الحاجة سدينة : سمعت رايكم كلكم وانا مدامة حيّة في هالدنيا مافش حاجة حتنباع واللي يبي يطلع يطلع بدون لاحصة لاشي تبو حصّتكم ارجوني لعند ما انموتُ وخوذو حصتكم مروة قالت بينها وبين نفسها " الحمد لله سمعت كلامك ياماما زي ماتوقعتي طلع اختبار وتخبر في اعيالها وصبياهم " الحاجة سدينة : خلاص هيا عليش قاعدين قدامي اركبوو لشققكم كلهم بدووو يرقو لشققهم مروة تبي تركب وخايفة من نزار الحاجة سدينة : ارجي انتي يامروة ماترقش خليك امعانا هنا اليووووم نزار وقّف في نص ادروج نزار : بس ياحاجة الحاجة سدينة : ماتحكش امعايا , مافي حد يقول امي المن نبو انخلووها ,, كلكم بعتوني الا هالبينة صبّت في صفي والله مافي واحد جي شووورها خليها توا قاعد مع البنات تو ترقالك بعدين ,, كلهم خشّو لشققهم عليهم علامة الصدمة وانّ مروة اضحكت عليهم واكسبت ثقة الحاجة سدينة وخشّت مروة مع اية ونور لدارهن وكانت قاعدة بيناتهن ومبتسمة نزار اول ما خش للشقة مشى لدار النووووم صبّى قدام المرايا امتاع الدولاب نزار بغضب : تكذبي عليا انا يامروة وضرب المرايا ابوووووني تكسّر القزاز وقعدت يدة كله دم ,,,, كانت ام مروة تاكل في زريعة واتفرج عالتلفزيون وجنبها ولدها فيصل فيصل : شن صار في اخت نزار ام مروة :اصبر ع رزقك يا وليدي بعدها سمعت رسالة مسج فتحت النقال لقت مسج من بنتها مروة " درتي اللي قلتيه عليه ,, طلع زي ماتوقعتي ,, تختبر فيهم فقط لاغير " ابستمت ام مروة وبحتت في فيصل وقالت " مش قتلك اصبر علي رزقك " ,, كانت اية اتهدرز مع نور ومروة ومزالن يقرّمن في اميرة وداد سمعت مروة صوت مسج من نقالها طلع من امّها وكاتبه فيه " هذا وقتك تقرّبي من نور واجد عشان فيصل " ابستمت مروة ودارت نقالها صامت وقرّبت من نور واجد وكملن هدزرتهن عادي آية : كنك يانزار شن صارلك نور ومروة فحتن عند باب الدار شافن نزار جسمه كله دم اللي طالع من يده ورابط يده بمنشف جت عينة علي عين مروة وامعبية بالغضب وبحّت نزار في مروة زين وقاللها نزار : " إنْتِ طالق " يتبع ,,, نهاية الموسم الأول ..... تحياتي , اخوكم احمد الوحيشي لنا لقاء قريبا مع الموسم الثاني لرواية #حديقة_ابليس في امان الله ,, | ||||
|
| |
 |
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
العرض العادي
