27-01-23, 01:42 AM
| #114 | |||||||||||
| نجم روايتي  
|  الذين يشاهدون محتوى الموضوع الآن : 45 ( الأعضاء 12 والزوار 33) موضى و راكان, •.نســــــناس الليـــل, زهورر, ألأمال, الميرا, ويبقى, أجياد., ام سعد ×××, asaraaa, سرى النجود, أم نوره, بسمه أمل السلام عليكم و رحمة الله و بركاته طابت أوقاتكم بذكر الله و الصلاة و السلام على رسول الله لا إله إلا الله وحده لا شريك له ..له الملك و له الحمد و هو على كل شىء قدير الله صل و سلم و بارك على نبينا محمد و آله و صحبه أجمعين | |||||||||||
|  |
|
28-01-23, 12:12 AM
| #117 | ||||
| #6 سبحونة سبحان الله الفرد الصمد و صلى الله على نبيه محمد. ، رجع بيت أهله على صوت آخر رصاصه!! كان رايح الصيدليه يجيب خافض حراره لبنته، و استغرب ان هالشيء صار خلال غيابه القصير!! وقف سيارته عند البوابه وهو يشوف سيارة غريبه ملطخه بالدم و رجال طايحين حولها!!!! قلبه بيطلع من مكانه من شدة خوفه على أهله، دخل يصيح و شاف شافي واقف و معه مسدسه و هناك باتل توه طاح قدام عينه!! ركض ناحيته يرفعه وهو يناديه/بااااتل!!!وش صاار حاول يهديه/بخير ماعلي الرميه شطفتني بس استوعب شافي الحاصل و تكلم/كنا بالمجلس نتحراك ترجع و نكمل سمرتنا ثم نمسي و لكن سمعنا رمي رشاش و حاول باتل يطلع و زين ما طلع، لولا الله ثم اللي رمى من جهة البيت من فوق و صد الحراميه كان الله اعلم وش بيصير باتل بخوف همس لسكاب بصوت منخفض/روح لأختك بسرعه شوفها استغرب سكاب و تذكر انها هي وهيله فقط هم اللي يتقنون التصويب غيرهم و هيله ماهي موجوده /هوى!! شدد عليه لأنه رفع صوته بأسمها/ايييه رح لها بسررعه سمع اسمها و أكبرها ،و بعدين متى امداها تجي بالوقت المناسب و بسلاحها و صدتهم واحد واحد؟!!، اللي سوته ماهو طبيعي على رجال شلون على بنت!!! لو أنه سمع اللي صار من أحد ما صدق و لكنه شافه بعينه و سمع صوت شهقتها على طيحة أخوها..! اتجه لباتل و ساعده يطلعون للي طايحين برا هنا تكلم/الرجال حيين!! ابتسم باتل و بسرعه اختفت ابتسامته، ما نست اللي تعلمته بنت ابوها قرب منهم و نزل عند أول واحد و شده من ياقته/من انتم يا كلاب؟!! انطق كان بيتكلم و لكنه يتألم بشده صاح/الله لا يوفقك يا سرور تكلم سرور من بين اسنانه وهو يكبت ألمه/اعقب يا عمر لا تقولهم كلمه!! هنا التفت له شافي و شافه يمسك كتفه المصوبه بيده اللي مقطوعه اصابعها و عرفه، هذا اللي مر عليهم فالبر يدور طماط هنا نفض باتل عمر بتهديد /انطق ماعليك منه و الا حطيت الرصاص بروسكم و دفنتكم هنا تكلم عمر وهو يحسن ان خلاص ما عنده شيء يخسره لأن الرصاصه اعدمت ركبته/بنتكم رمتنا بمسدسها و طيرت اصابع سرور رفيقنا وهو انجن يبي ينتقم و ليتنا ما طاوعناه ، تكفى لا تذبحنا و الله يا أمي ماعندها غيري ولد تف بوجهه وهو يقوم و يتركه/يا عزتي لها يومنك ولدها!! اخس عليكم ماعندكم مروه و لا غيره!!! رجع لهم سكاب بهاللحظات وهو يبتسم لباتل/الامور طيبه ما صار لها شيء و اتصلت بالشرطه جايين بالطريق غمز له باتل علشان معاد يجيب سيرة اخته قدام الضيف.، لاحظ شافي و فهم و تكلم باعجاب/بيّض الله وجهها اخت الرجال، فعلها ما يسويه الا بنت قروم الرجال. فعلٍ شفته بعيني ارتاح باتل بعد تصريحه بأدب/ماعليك زود يا .. << تذكر انه ما يعرف اسمه نطق شافي بأسمه/شافي نايف ال راقي عرفه ابوه كان امير قبيلته و هو!!/و لد الامير فهد الله يرحمه! بابتسامته/الله الله ولده باتل /المعذره يا بو نايف اللي ما يعرفك مايثمنك ، الله يبيح من العم نايف كان رفيق الوالد الله يرحمه لكن ما قد جيتنا معه ماعرفتك كان يجي معه واحدن اصغر منك يقال له فهد في هاللحظات وصلت الشرطه و تجمعوا بعض اهل الحاره و عرفوا اساس الموضوع و اخذت الشرطه و الاسعاف الحراميه..، و انتهت الحادثه و كلن راح لفراشه بعد هالتعب ، كانت الساعه بمعصم يده 12 … هالليله طويله حيل و كنها بلا صبح!! انقلب شافي على جنبه الثاني لعلّه يغفى ساعه او ساعتين قبل صلاة الفجر. . ، ، بعدما تمشى معها شوي بالحوش اللي يتوسط البيت تكلم سكاب بعتب بعدما تطمن عليها و وقف قبالها بنظرته الحانيه/بس اللي سويتيه غلط ، دخولك لغرفة السلاح بدون اذن باتل غلط بإصرار/ما علي منك، اذا كنت بفزع لأخوي ما أهاب شيء ابتسم/تفزعين لأخوتس ! افرضي واحد من هالحراميه انتبه لتس و رفع سلاحه عليك فوق بحاجب مرفوع وثقه/من هالناحيه ماخفت لانهم شوية قطاع طرق ماهم رجال كفو استغرب/شعرفتس انهم قطاع طرق؟! سردت له موقفها اللي صار لها يوم رجعت مع متعب للديره/ واحد منهم اعدمت له اصابعه ، توقعته بيتوب و لكنه قعد يحفر و يدور علي كل هالفتره هنا استغرب،لأنها ذكرت ان الوقت كان ظلام/و انتي شدراتس انتس صوبتي يده و كنتوا فالليل و ظلام ردت و كأنها متعوده/الخبل كان يدخن وراء السياره و شفت شعلة الزقاره و قايست المسافات براسي و رميته و انا متعمده ، هنا ناظرها بإعجاب/جعل يدتس ما تحزم يا عزوة اخوانتس، كفوو بس تكفين انتبهي من الاسلحه كتمت ضحكتها/نسيت يوم كنت انت و باتل تعصبون علي تبوني امسك السلاح بيد وحده بدال اليدين؟! و كنت تحلف ما تخليني امسك اسلحه اذا برمي بيدين، بعد هذا كله تبيني اعقل؟! هدأ من ضحكه ثم ناظرها بفخر/لا تعقلين بس هدي شوي انا طالبتس يا هوى سمعت صوت بكى بنته الصغيره و التفتت له/ما علي الا العافيه تطمن محد ياخذ مني لا حق و لا باطل.. انت روح للشيخه و تطمن على حرارتها و ساعد مرتك مسكينه غزيل طول الليل تشيلها و هي تصيح عليها ما تهنت لا بقهوه و لا بقعده و لا حتى عشاء زي الناس هز راسه/صادقه يلا تصبحين على خير ، روحي بعد انتي امسي لا تسهرين راقبته لين راح و حطت يمينها على يسارها المكسوره، حست روحها بتطلع من الألم، ما حست على نفسها الا اللحين كتمت الألم واجد بس خلاص ما بقى الا تبكي، راحت المطبخ تدور شيء يسكن ألمها و سمعت صوت كنها تعرفه بس تجاهلت يمكن تتخيل تكرر الصوت و كان ذكوري غريب…./ يدتس توجعتس؟! هنا التفتت ناحية الصوت و شافت البسّه جالسه عند باب المطبخ اللي صوب حوش المزرعه/الصوت منتس؟!! ردت و عينها تلمع/العلبه اللي الطاوله و غطاها احمر ..حطي منها على اطراف اصابعتس بس و بتطيبين مارتبكت حست ان قلبها من هالناحيه مات لأنها شافت اكثر رعب من كذا، راحت للعلبه الغريبه اللي على الطاوله و رمتها على البسّه و لكن البسّه قفزت لمكان ثاني/انقلع و لعاد اشوفك رد ببرود/لا تعاندين كسروا يدتس و بجبرها لتس، انا مالي دخل باللي سووه هدأت شوي وهي تحاول تتحكم باعصابها لأن الوضع صار صعب، جلست على الكرسي الخشبي بإرهاق روح قبل اي ارهاق جسدي، تنهدت وهي تناظر بالبسّه/و انت مالقيت الا القطوه عاد جلس القطو و هو يناظرها/محد ملاحظ شيء سكتت شوي وهي تمسح على راسها بيدها و تحاول تستجمع نفسها، حست انها محاصره مهما سوت و مهما فعلت/انت من؟! وقف البسّ وهو يستنكر سؤالها/ما عرفتيني؟!! هذا و انا دايم معتس!! أنا جهس تأففت/من ميلت البخت انك دايم معي يا جهس، باعتراض/بالعكس لو اني ما كنت معتس كان توحدت بتس هجير لحالها ، و ورطتس بذبح خوي الذيب و لو اني ماني معتس كان توحدن بتس اللي سروا بتس تالي اللي من بيت امتس لطيفه هنا تذكرت سالفة ذابح الذيب/يعني انت كنت موجود!! من ذبح الذيب و من صوب الرجال تكلم وهو يسرد لها التفاصيل/السالفه ان واحد من ربعنا شافه الذيب و الذيب انهبل و ما خلوا بعض لين تذابحوا و خوي الذيب كان موجود و مافهم اللي صار و طاله بعض الشيء، دافع عنه الذيب و مات بداله فالاخير حست راسها صدع اكثر هذا عالم غير عالمها صدق ، هذا شيء فوق خيالها و تصورها..الليله كانت صعبه و هالجني قاعد يصعبها اكثر، استنطقها/تبين شيء بروح ابتسمت للهواء الفاضي قدامها /و الله مايندرى صدق بتروح!! و الا تقعد ترزز لي!! راح وهو يحرك ذيله و تبخر من تحت باب المطبخ الخارجي…! كانت ام سعود تطل و هي تسمعها تكلم الفراغ و تتبوسم لحالها لشيء ماهو موجود! سمت بالرحمن وهي تترك باب المطبخ و تهرب..، سمعت صوت خطوات و تركت المطبخ بعدما شربت ماء و تطلع تشوف فيه احد غيرها و مالقت أحد، راحت لغرفتها وهي تسمي بالرحمن..، . ، . ، اليوم الثاني في جلسه لأم زامل و ام سعود مع الجارات .. ام زامل تتفرج على بضاعه جايبته هياء معها من الرياض و لاهيات فيها.. عالجهه الثانيه ام سعود تهمس لجارتهم لولوه/البارح هوى هي اللي ثورت بالسلاح عالحراميه واحد واحد فالظلمه!! لولوه بدهشه/بسم الله شلون شافتهم ذي الظاهر مخاويه ام سعود تزيد الطين بلّه/مثلما اقولتس يا لولوه و الله انها تكلم روحها و تسولف كنها تسولف مع عرب.. لولوه بحماس/من زمان احسها ماهي بخير طلعت نوره من المطبخ هاللحظه و هي تحط لهم ابريق الشاهي و تصب لهم و تلاحظ نظرات لولوه و ام سعود و ما عجبتها،بس طنشتهم وهي تشوف هوى نازله و عبايتها على كتفها واضح تبي تطلع مكان! لولوه لنوره/وين ناويه تروح اختتس بهالعصريه؟!! ام سعود/ ايييه يا لولوه مات الشايب معاد لها والي نهرتها نوره/هييي يا مره امسكي لسانتس لا ارسل لتس اللي في رجلي!! استكر الجميع ردة صوتها اللي ارتفع و ماسمعوا صوت ام سعود اللي كان واطي.!! ام زامل بحده/نوره!!! التفتت نوره لأمها وهي تعذر/المعذره يمه ، بس انتي عارفه من اللي يطلع الواحد من طوره في ذالقعده.. هياء اكتفت بنظره ناقده وهي تشوفها تترك جلستهم و تروح..! ، مسكتها هوى اللي اكتفت بالمشاهده من بعيد و سألتها وهي تاخذها لعند الباب قبل تطلع/شفيتس طلع صوتتس عند الحريم؟! ترددت نوره وهي متردده تعلمها و الا ما تعلمها/تعرفين سوالف ام سعود لازم تقط حكي ماله داعي تأففت من طاريها/عوايدها الله يفكنا منها و من شرها نوره /مصممه تطلعين و يدتس توجعتس، اقعدي مب لازم تروحين لصديقتتس فاطمه ذي عندتس عذر لفت لثامها و رفعت العبايه على راسها/لا حرام وعدتها وهي لحالها ، ان اقنعتها جبتها تعشى عندنا الليله.. يلا سلام سعيد برا ينتظرني،.. واقف مع سعيد برا ينتظرها و يأكد عليه/تكفى يا سعيد انتبه لها ترى يالله اقنعتها انها ما تروح لحالها سعيد بابتسامه/ما عليك عيني عليها ، ضيفكم راح؟ سكاب/لا اخذه باتل لمشوار و بيعودون ياخذ غرضه و يمشي طلعت لهم بهاللحظات و هي تشوفهم واقفين و تخزهم/واقفين تخططون كيف تحكمون في صح؟!! لكن ماعليه خل يدي تسلم ضحكوا و تكلم سكاب/انتي طيبي و بعدين سوي اللي تبين راحت تركب و هي تنادي سعيد/يلا مشينا يا ولد اترك هالسوسه راح سعيد و ركب وهو يضحك/يعني لازم نطاوعتس علشان نكون كلنا يا حليلنا؟!! هوى بابتسامه/كيفي خلوني اتغلى على اخواني يلا شغل لنا بدر الغريب بس خلنا ننطرب مد يده للمسجل و جحط شريطه المفضل/مالتس لوا ..بتسمعين اللي اسمعه لاحظت سيارة الضيف هنا/ما شاء الله الضيف هنا للحين! سعيد/اي يقول سكاب اخذه باتل يمشيه شوي ؛ وين نروح انفداتس؟! بدأت توصف له الطريق داخل القريه قريب من السوق و مدرستها.،، نزلت و طقت الباب و هي تنتظر احد يفتح و لكن تأخرت و بدأت تناديها بعدما سمعت صوت خطوات وراء الباب/فاطمه!! لحظات و فتحت فاطمه و هي واضح مرتبكه و متوتره ماتدري شلون ترفض الطلعه معها ، كلما تتذكر كلام عايشه عن هوى تخاف/هلا هوى تفضلي استغربت انها مالبست عبايتها/السلام عليكم مابعد خلصتي شكلي جيت بدري! خافت/و عليكم السلام ..لا لا بس مدري احس اني تعبانه و ابي استريح ببيتي لين يوم السبت ناظرتها مستغربه ان عيونها تتهرب منها/لا سلامتتس ، طيب تبين شيء اسوي لتس شيء؟! تراني حسبت اختتس بنفي قاطع/لا لا سلامتتس مابي شيء مشكوره.. هزت راسها و هي تودعها و تطلع ترفع عبايتها من جديد على راسها و هي مستغربه انها حتى ما عزمتها على فنجال قهوه، ما راح تقبل دعوتها بس عالاقل تقولها مجامله!، يلا بصرها ان شاء الله اني سويت اللي علي.. استغرب سعيد رجوعها لحالها/شالسالفه؟! وين رفيقتتس؟! بلا مبالاة/ابد تقول تعبانه و تبي ترتاح …هونت يعني سعيد/نرجع البيت يعني؟! هوى/لا يا حبيبي بنمر المربط و بنتمشى شوي..مبطيه منك يا ولد ! . ، . ، . ، . في جهه ثانيه و قريه ثانيه…، جالس مشعل يلعب مع عياله عادي و يشوف امه جت و معها القهوه و تجلس ، عرف ان عندها علم بيسد نفسه كالعاده/ارحبي يمه اخذت الدله تبي تصب و تنهر عياله/يلا حصه و صالح روحوا لامكم داخل صجيتوني تكلمت حصه و هي تتخصر بدلع بنات/منا رايحين!! كلما شفتينا قلتي صجيتوني! ام مشعل باستنكار/لا يالعوبا !!! كتم ضحكته بابتسامه/خليهم يمه بيلعبون وهم هادين ناظرتها ام مشعل وهي تروح مع اخوها و يلتهون بلعبة معهم توه جايبها لهم ابوهم..و التفتت لولدها بعدما صبت له فنجال/دريت يمه؟! عرف ان عندها موضوع يغثه/وشو يمه؟! تكلمت بشماته/هوى طلقها ولد عمها،و ما عليها عيال منه، الله العالم…. قاطعها/يمه تكفين كبي سيرة الناس خلاص باصرار/و الله ماقدر يا ولدى ما اشمت في هوى فيصل بلاك ماتدري ليه كانت لاهيه بلعبتها و لكن شدها نبرة الزعل من ابوها و اسم معلمتها المميز!!! نطق بتعب، لانه يعرف حقد امه اللي ما ينتهي/انتبهي تضرين هوى لو بكلمه ، يا يمه ما اسامحتس دخلت على الجمله الاخيره من زوجها و تعقدت الابتسامه على محياها، كانت بتجلس و لكن قررت تاخذ عيالها/حصه صلوح تعالوا يمه نوم خلاص التفت لها/ام حصه تعالي اجلسي شوي ردت بضيق/لا معليه راسي مصدع ابي انوم عيالي و امسي بعد أنا . طلعوا وهي تمسك عيالها كل واحد بيد و ساكته لين تكلمت حصه/يمه جدتي سبت ابلا هوى ، و ابوي هاوشها استغربت و ابعدت بها وهي تسألها بفضول/شدراتس انهم يقصدون ابلا هوى؟!! تكلمت بتأكيد/سمعتهم يقولون هوى فيصل..جدتي قالت لابوي ان زوجها طلقها …يمه وشوي يعني طلقها؟!! هزت راسها و عرفت الآن ليه دايم ناشف معها و دايم سرحان، حست الدم يغلي بعروقها ماتدري شلون تتصرف ! . . ، . ، . ، …،،، وصلوا البيت و كان الضيف طالع مع باتل و واضح يودعه، قررت ما تنزل لين يمشي /سعيد تبي تنزل انزل انا بقعد لين يروح ذالرجال نزل سعيد و راح لهم يسلم…و هي تتلهى بأي شيء و طفشت، يحول طوّلها هذا…التفتت بشكل خاطف و لفتها فيه لابس جزمة بنيه جلد!! و شراب..! ثوبه الشتوي يختلف عن باقي رجال الجماعه!، و شماغه من الجوخ و لابس ساعه !.. من هيئته واضح انه ماهو من هالقرايا اللي حولهم هذا يا من الرياض او الشرقيه حولها ..! كان ودها تلمح وجهه لكن ما امداها ركب سيارته و راح..! هنا نزلت و استغرب اخوها باتل لانه مانتبه لها/كنتي بالسياره؟! نزعت لثامها/اي طال عمرك، بس قلت لين يروح الرجال ثم انزل انا ابتسم لتصرفها/ززين سويتي، شلون يدتس اليوم؟! بابتسامه/بخير، عشاكم الليله بيدي حتى ، وين رايح سعيد؟! ضحك سعيد وهو يتجه لسيارته/معليش مابي من يدتس المكسوره شيء بروح لأمي امسى الليل ما رجعت للبيت سلااام راقبوه لين راح و تكلم باتل/خلينا ندخل و حطي لنا قهوه نسولف على جالها و اخذ علومتس يا راعية العلوم اما عشاء لا والله لا تسوين لين تطيب يدتس ضحكت معه وهي ترافقه و مبسوطه من داخلها ان الامور مع اخوها صارت افضل، و الجليد بدأ يذوب فعلاً.. . ، . ، . التعديل الأخير تم بواسطة لامارا ; 28-01-23 الساعة 02:50 PM | ||||
|
| |
|
28-01-23, 12:13 AM
| #118 | ||||
| في مكان ثاني بعيد كل البعيد عن هالديار.. في الشرقيه تحديداً الدمام.. بيت كبير و يدّهر بالعايله اللي واقفه بنت بالعشرينات من عمرها اسمها صيته مع خدامتهم يجهزون جلسة قهوه معتبره و خلصت و هي تشوف اختها الاصغر جايه بالبخور .. صيته باهتمام/ريم خلي البخور و روحي المطبخ، خليت بالفرن صينية كيك شوفي خلصت؟ دخل عمر بهاللحظات و فهم اللي حاصل/ما شاء الله قهوه في هالليل ! معناته الشيخ شافي فالطريق التفتت له بابتسامه وهي تعرف سخريته/اي كلم قبل المغرب يعني اللحين حروة وصول ان شاء الله تلفت مستغرب/وين الوالده عنكم لا يكون هي اللي تسوي العشاء!! اشرت لها /هذا هي وصلت لبى عينها التفت و شافها مقبله بوقارها كأنها تحسب خطاها و ابتسامتها/علامك يا عمر تنشد!! يستااهل شافي ادخل المطبخ و اطبخ له استقبلها و حب راسها و هو يمازحها كعادته/ايييه لنا الله يمه الفزه لشافي بس جلست وهي ترد على مزاحه/والله قد زوجتك وحدتن كفو تسد لزومي الله يعينها عليك عمر /الله الله حتى شافي زوجتيه و طلق..مالنا فيه علاقه ضحكت صيته/يا حبك للتشره التفت لها/اييييه حتى انتي يا صيته!! اللي كنت اقول الوحيده العاقله!! هنا تذكرت الأم شخص مهم/وين فهد؟! هالولد ما يقر بالبيتابد هنا تأفف عمر و تكلم بجديه/والله من رفض شافي يخليه يرجع لامريكا بدون زواج وهو قاضيها مع سرابيته ويـ.. غمزت له صيته علشان يسكت قدام أمه و قاطعته/يمه بيجي اللحين ماعليه..حتى انه جاء و انتي تصلين المغرب بغرفتتس و قعد معنا شوي و طلع على اذان العشاء لقى الباب مفتوح كعادتهم و دخل و هو ينادي كعادته/يا صيته اسقيني ماء! ابتسمت وهي تسمع نداءه المعتاد اذا رجع البيت و ردت عليه قبل تشوفه/ابشر بالماء يا عين صيته عمر بابتسامه/ابشروا جاء شايبنا يالله حيه نزل طفل صغير بعمر الاربع سنوات بعدما سمعت صوت شافي وصل/عمي ثااافي !! استقبله بالحضن و شاله على كتفه/ارررحب يابو صيته سلموا عليه و جلسوا كلهم يتقهوون و اخذوا علوم بعض و ضحكوا و الطفل مازال بحضنه يلعب بسبحته.. صيته بحب/سلطان حبيبي اترك عمك يرتاح توه واصل من سفر ضحك عمر/لصقه هالولد شافط حط عيالي ضحكوا و اخذت ام شافي من الماء باصابعها و رشت على عمر/قل ما شاء الله لا تنحت الولد حب راسه شافي و هو يبتسم/ولد صيته غير مير لحدن يزايد عليه.. صيته بنظرة فخر لاخوها و ولدها/يا جعلني ما ابكيكم ام شافي /اميين، يلا يا بنات خلونا نقوم نحط العشاء تأخر الوقت و شافي جاي من طريق سفر .. عمر بنهيده/اي اخيراً جاي ادور الاكل انا ، حطوه يلا راقبهم لين راحوا و اخذت صيته ولدها معها و هنا تكلم بعدما فقد اخوه/وين فهد يا عمر ماشوفه و لا شفت موتره برا عمر/و الله فهد من رحت لنجد ما عيّنته الا مره بس و هاوشته فيها استغرب و ارتفع ضغطه بنفس الوقت/افااا ليه؟!! لا يكون ما سمع كلامي و رجع مع نفس شلّته!! رد و هو يزيد النار حطب/اي و هالمره ما يسمع حتى كلامي و حتى يوم هددته بك قال ماعندي فيه و لعاد ابي ارجع للبيت مسح على وجهه وهو يتنفس الغضب و وقف و هو يطلع لحقه عمر و لكن خطواته كانت اوسع و اسرع ركب سيارته و راح للمكان اللي يعرفه زين و سبق قد حذره يرجع له و لكنه مايفهم ..، في طريق الدمام الحسا، مزرعه على جنب الطريق و تبعد عنه يمكن عشرة كيلو، اقتحم المزرعه المسكره بسياج بسيارته الدفع الرباعي اللي مخصصها للصيد متعمد يسوي كل هالفوضى و يجمع الكل هنا… ثم دق بوري السياره لين يزعجهم.. طلعوا كم واحد و كل منهم زقارته بيده/خييير يخووي خير!! نزل وهو يسألهم بصوته العالي/وين فهد نايف تكلم واحد منهم و لسانه ثقيل/يليييل انت من اهله بعد!!وش قصته ذا تركهم و دخل للمكان اللي طلعوا منه و لقى اخوه جالس مروووق جنب الشيشه و معه واحد يدق له عود!! و ناداه/فهد!!! رمى الشيشه من يده و وقف بشكل ماهو ثابت/شـ شافي!! دخل و مسكه من ذراعه و طلع به للسياره و سكر الباب و طلع من هالمزرعه بنفس الفوضى اللي دخل بها/و الله يا فهد انك مرض ماله طب لكن الله يعيني عليك رفع يديه و هو يتكلم بحالة سكر/قلت لك ياتزوج ماريتا يا لا .. بس انت اخذت جوازي و منعتني ارجع اكمل دراستي تحملني تنهد تنفسه وهو يكمل طريقه و يطلب من الله يزيده من الصبر لين يعقل هالولد و الا يموت..، كان اسوأ قرار وهو السماح له بالسفر للدراسه برا، مايدري شلون يداري فضايحه اللي كلما لها تزيد ، و مكانته القبليه ما تسمح بأي غلطه ممكن تمس القبيله بما انهم شيوخ القبيله..و بيتهم منصى لربعهم و جماعتهم … حتى بليلة رجوعه ما خلاه يرتاح ، فهد طيّر وناسته بالسجّه في نجد.. ، . ، . ، رجعنا الهوى لنجد و هوى نجد ..، مرت ايام و ليالي، كانت شبه هاديه على هوى رغم كسر يدها اللي بدا يتعافى…، .. الليله عزيمه كبيره لهيله اللي مبطي ما جات بيت اهلها، التموا الجيران و الحاره ما قعد احد ما جاء كعادة عزايمهم يمتلي البيت عرب.. كانت نوره تمشي و تصب القهوه للحريم و ترحب بهم و تسمع سوالف الحريم و تضحك و ترد على اللي تسألها عن نفسها و عند وحده منهم استوقفتها وهي ماتعرفها/ما شاء الله انتي اي وحده فيهم جاوبتها نوره بحسن نيه/أنا نوره هزت راسها و اشرت على هيله/هذيك هوى صح؟! هنا استغربت انها ما تعرفهم/لا هذي اختي هيله اللي العزيمه لها . سألت العجوز بفضول/اجل وين هوى؟! ملت من اسئلتها و اشرت على هوى اللي تمشي هناك و بيدها بخور/هذيك اللي معها بخور هنا استنكرت العجوز/تقولينه صادزه؟! هذي قد تزوحت و تطلقت!! استغربت ردة فعلها المبالغ فيها/فيه شيء يا خاله تبين قهوه؟! اعطتها فنجالها و هي ترفض/ لا بس يا بنتي مشكوره راحت نوره وهي للحين مستغربه هالعجوز و حطت الدلّه على الطاوله وهي تكلم امها اللي قالت لها خذي الدله الثانيه/يماه فيه عجوز بين الحريم ماقد شفتها من هي؟! استغربت عذبه/ماعزمت الا ربعنا يا بنتي كلهم تعرفينهم قربت منها و قالت لها /شوفيها هنا بطرف المجلس متلثمه ما كشفت مثل باقي الحريم حتى عرفت اللحين من هالعجوز و ابتسمت/مدري من مرسلها تدور له عروس عندنا ، هذي يمه عجوز وظيفتها تدخل عزايم و عروس الناس و تنقى البنات على ذوق اللي معطيها فلوس و موصيها بالعروس زاد استغرابها/هذي جايه مخصوص لـ هوى سألتني عنها و استغربت انها هي مدري ما صدقت انها هوى.. دخلت هوى بهالحوار على طاري أسمها و حطت البخور عالطاوله/فيه احد فضولي هنا وينه؟! كتمت نوره ضحكتها/شدراتس انتي؟! التفتت عالحضور و لققتها وااضحه هي الوحيده الغريبه/علمني القطو عنها، ام زامل/يا بنات كبو السوالف و باشروا الحريم بالشاهي مابقى الا شوي و يسرون لبيوتهم شافتها هوى راحت تبي تطلع من البيت و لحقتها/يا خاله خير يقولون سألتي عني قبل شوي! بغيتي شيء انحرجت العجوز من هالبنت اللي بنظرها ما تستحي/ابد يا بنتي و لا شيء قربت منها و قصرت صوتها بنبرتها المرعبه/ايً كان اللي ارسلتس تعسين له اخباري ،قولي له حتى لو ولد البعير بدال الناقه منت متزوج هوى فيصل استغربت كلامها/يا بنتي عيب انتي ماتدرين من مرسلني حتى!! بابتسامة سخريه/ماهو مهم… لأن اللي بتزوجه ماهو مرسل عجز يعسوني فالعزايم… هنا تتكلمت العجوز بفضول/دامها وصلت لذا ابشري بقوله، بس ابي اعرف شلون تزوجتي ولد عمتس خمس سنين و للحين بنت بنوت!! استنكرت سؤالها و تمنت لو قطعت لسانها/وشو!!! عيب عليتس ذالكلام ماهو لتس احترمي سنتس! كانت بتتكلم العجوز و لكن قاطعتها و هي تشوف نفس القطو فوق الباب/توكلي قبل لا ارسلتس جن لا يرحم و لا يكن طلعت العجوز و كأنها ما نجت منها وهي التفتت للي يناظرها فوق و كأنه يسألها/لا تروح خل الضعيفه بحالها يحول… وين ضعيفه و هي تعرف شيء حتى امهاتي ما يعرفونه!!! وقفت وراها هيله تسألها/وشو اللي حتى امهاتتس ما يعرفونه؟!! هاااه!! جات نوره بفضول/هوى يمكن اللي مرسل العجوز هو نفسه شافي بن نايف ابتسمت ثم ضحكت/يحليلتس ماتوقع ، وصلنا لبيتنا كان تكلم نوره بسخريه/ضمن الفعل بس يخاف تكونين شيفه و يتورط بتس ضحكت هيله/يا سلااام صايرتن عندكم علوم من ورااي!! من هو شافي بن نايف؟! تأففت وهي تسكر فمها لا تنفضح/لاااا هالليله فيها شيء اكيد… تعالي اذا راحوا العرب جلسنا جلسة حلوه و سولفنا مشتاااقه لتس حيييل تعرف هيله انها اخذتها بالكلام لكن ما راح تخليها، بتلاحقها لين تخليها تفضفض لها…. همست لها نوره بحماس وهم داخلات/فيه علوووم واااجد يا هيله طافتتس والله ، ، . ، . في الدمام…، انتهى شافي من كاسة النعناع و التفت لأمه/هاه يمه وش قلتي؟!بتروحين نجد؟ دوبها وصلت ريم و جلست بحماس/الدعوه فيها روحه تكفون خذوني! شافي بنفس هدوءه و رزانته/ان وافقت الوالده روحي معها انتي و صيته بعد بيوديكم فهد ريم بحماس/وناااسه تكفين يمه خلينا نسافر صيته بخجل/يا ربي بندخل على ناس ما نعرفهم شافي بابتسامه/علشاني ياعين شافي و الا ماني كفو؟! صيته ببتسامتها/الا كفو لبى قلبك ، ان شاء الله تكون من نصيبك ياخوي شافي برجاء/هاه يمه شرايتس؟! تكلمت اخيراً/شورك و هداية الله ، انت بتخاوينا؟! شافي/بيخاويكم فهد، انا بلحقكم بعدين دخل عمر بهاللحظات/هاااه وش العلم بتروحون مكان من وراي ريم بحماس/ابشرك شايبنا قرر يتزوج ضحك عمر/ما شاء الله عالبركه ، قد خفنا عليك قلنا مايداني الحريم!! ناظره بنص عين/عمر!!! احشم عمرك زاد ضحكه و ضحكت امه معه، فرحانه اخيرا بعد سنوات من انفصاله قرر يتزوج..، تمنت ان تتم هالزواجه على خير و تكون هالبنت من نصيبه..، .، . ، . ، صبح يوم جديد و نهار جديد على ارض نجد و هذيك المزرعه اللي تمتد على طرف وادي..، تركت نوره و هيله يسوون الفطور و هي اخذت قهوتها و راحت لأخوها اللي طلبها قبل يجيه احد..ماتقدر تخفي توترها، خايفه حاسه ان فيه شيء ما تبيه بانتظارها..اكثر شخص عنده حاسه سادسه مزعجه..، دخلت وهي تصبح عليه وجلست و صبت له اول فنجال/سم اخذه منها وهو يحاول يلقى مفتاح لسالفته/سم الله عدوتس يا هوى ..شلونتس عقب التعب البارح بابتسامه/مافيه تعب تعودنا جعل خيرك يكثر.. هز راسه ثم تكلم/ هيله انا جبت شيخ و حصر الورث و استغربت/وش مستعجل عليه ياباتل تراني عندك بالبيت تنهد بعد جملتها هذي و حاول يكمل كلامه/طيب يمكن تزوجين طيب ليه ما حسبتي حساب الزواج ماقدرت تكلم …!!!! تنهد و تكلم اخيراً باللي في خاطره/شوفي و انا اخوتس البارح خطبتس واحدن من جماعتنا و كفو .. الطيبين ما ينردون و انا عطيتك له غمضت عيونها بضيق ثم فتحتها وهي تسأله/دامك عطيته وشوله تسأل ، انا ابوي مات الله يرحمه و شوري صار بيدك سو اللي تبيه مافهم هل هي مرحبه بالزواج او لا ..هي حتى ما سألت من العريس!!!/ماتبين تعرفين من هو اللي بتزوجينه؟! وقفت وهي ترد بيأس/ما يحتاج بعرفه ليلة الزواج… بروح اجيب لك الفطور و انادي سكاب يجي يفطر معك.. طلعت وهي تحس الدنيا تضيق بها ، سالفة الزواج و كوابيسه وراها وراها..، . ، . ، يتبع التعديل الأخير تم بواسطة لامارا ; 28-01-23 الساعة 02:50 PM | ||||
|
| |
|
28-01-23, 01:31 AM
| #119 | |||||||||||
| نجم روايتي
|  الذين يشاهدون محتوى الموضوع الآن : 69 ( الأعضاء 27 والزوار 42) موضى و راكان, zohorat, امان—, السبعاويه, Sahar12, سفره الليل, Lazy4x, غآلية الأثمآن, ألزنابق, سرى النجود, بنت العوالق, وجدان احمد, Arw2, Layla884, F.s236, الميرا, هتاف عبدالله, أوجاع قديمة, asaraaa, حلا يس, زاي., زهورر, منـال مختار, سينا العرب, رشا الخياليه, عذرا ياقلب, النايفه22 تسلمى كاتبتنا المبدعة فصل مثير و ممتع | |||||||||||
|
| |
 |
| أدوات الموضوع | |
| انواع عرض الموضوع | |
|
|
3990Likes
.png)
العرض العادي
