|
| LinkBack | أدوات الموضوع | انواع عرض الموضوع |
27-07-23, 02:37 PM | #1 | ||||
| رواية جديدة باسم :- ليتني ما حبيتك ،،، بس صار بقلم #هدوئي_كارثة كان يوم عادي كأي يوم بالنسبة للعالم ولكن لها كان أسعد يوم بحياتها ، اليوم الي كانت تنتظره على أحر من الجمر ، أخيرا بتتزوج حب حياتها وبتروح عنده وبتكون ملكه ، قاعدة تحضر كل شي وهي تطير وتنقز وتروح شمال ويمين كأنها نسمة هواء وهي بعز حماسها سمعت الصوت الي كانت تتمنى ما تسمعه ابدا ، صوت يهز قلبها ويزعله صوت يخليها تفكر مليون مرة في قرار الزواج غمضت عيونها بقوة وفتحتها وهي تتنفس بهدوء وتردد :- كل شي بخير كل شي بخير اليوم زواجي ،،، اليوم بتزوج ،،، لا تفكرين خلص خلص لا تفكرين .... - قطع عليها دخوله الغرفة وهو يناديها بلقبها لدرجة نست اسمها :- يالغيث يالغيث لفت عليه وراحت عنده بسرعة :- سم يبه أمرني مسك يدها وجلسها وجلس جنبها وهو يبتسم :- ها جاهزة يبه هزت راسها وهي تحاول ما تبكي تمسك نفسها وتكون قوية :- جاهزة يبه بس انتظر فارس يجي ياخذني وبروح بيت جدي زي ما قلت حط يده على راسها وبدأ يمسح عليها :- الله يحفظك يا بنيتي ويحميك ويسعدك بزواجك ولا يضيمك يا رب ما تمالكت دموعها ونزلت وقفت وحبت راس ابوها :- ويحفظك لي يا ابوي ولا يحرمني منك كانت بتاخذ شنطتها بس مسكها ابوها ووقف قبالها وطلع علبة من مخباته وبصوت متكسر :- اليوم زواجك يا بنيتي وانا عارف انكي ما تغريك الهدايا وش ما كانت عشان كذا اليوم الي بعطيك اياه ابغاك تحطينه بعيونك لانه من ريحة الغالية ومحد شاركني في غيرك ... - فتح العلبة وكان في عقد ذهب واسوارة وخاتم وساعة وكان تصميمه قديم واضح بس جديد وكأنه مو ملبوس ابدا - غرغرت عيونه وهو يعطيه لبنته :- هذه أول هدية أعطيته امك واول هدية بيننا ، ويشهد ربي يبنيتي اني ما قد حبيت حد كثرها واليوم انا اعطيك اياه لانها وصتني تلبسينه ويكون هدية منها لك يوم زواجك حضنت ابوها بقوا وهي تصيح :- الله يرحمها ويغفر لها ويديمك لي يا رب ... عم الصمت بالغرفة رغم ضجيج البيت عندهم ، رفع راسه ومسك راس بنته :- أوصيك يا بنيتي اهم شي تنتبهين لنفسك ولبيتك والسمعة الحسنة هزت راسها وأخذت شناطها وطلعت من الغرفة نزلت الدرج وهي تمسح دموعها وشافتها زوجة ابوها ونادتها :- نور ،، نوور نور :- هلا امريني ميثاء ( زوجة ابوها ) :- البنات ينتظرونك برا انتي للحين ما طلعتي لهم نور ابتسمت :- اسفة كنت مع ابوي وتأخرت شوي ميثاء مسحت على راسها :- يلا لا تتأخرين وروحي بسرعة ما عاد في وقت نور هزت راسها وطلعت ، اول ما طلعت شافت الكل واقف ومعصب بدت تمشي بخطوات سريعة وبصوت عالي :- اسفة اسفة اسف... - قطع عليها صوت اخوها الصغير زياد وهو معصب :- الحين اركبي ونتفاهم بعدين جدي شوي ويطلع لنا من الجوال كل شوي يدق فارس ( اخوها الكبير ) :- بنوصلكم الحين بتتجهزين انتي والقطيع هذا والساعه ٧ بنجي ناخذكم ولازم نكون هناك ع ٧ونص بتبدأ الزفة والأشياء هذه البنات بشهقة وحده :- قطيع لي شايفنا غنننممم عندك فارس بعصبية :- اقول لا يكثر واخلصو علينا بسرعة الكل ركب السيارة واتجهوا لبيت الجد عشان تبتدي تجهيزات الزواج .... [ نبدأ تعريف العايلة الأولى لروايتنا المتواضعة مع الاب الحنون العصبي صاحب القلب الطيب والمتحجر " مساعد " الي تزوج نور زوجته قبل ٢٨ سنه وجاب منها ولد وبنت الي هم فارس ونور وتوفت بعد ولادة نور بسبب مضاعفات ونزيف صار معها ، شخص طيب ويحب اولاده وصاحب مال وعز وما يحب اللف والدوران بس مشكلته عصبي وانسان يحب القواعد والعادات والتقاليد وما يحب احد يكسر كلمته . ♡ فارس :- الابن الأكبر للعايلة عمره ٢٥ سنه ، انسان جميل رياضي ومعضل ومن الصفات الحلوة هذه وزي ما يقولون يطيح البنات بغمزة ، انسان ثقيل وما يحب التهاون ابدا بس مع القريبين منه ضحوك وونيس ويتغير مليون درجة ، يشتغل مع ابوه بالشركة وهو ال cio لشركة قام بتأسيسها هو وعيال عمه بمشروع خاص فيهم . ♡ نور :- عمرها ٢٤ سنه ، انسانة مرحة وقلبها طيب بس قوية ما تسكت عن حقها ، شخصيتها قوية وما ترضى احد يقلل منها ، خلصت جامعة جديد وتدرس مهندسة معمارية وتطمح تكون مهندسة عالمية ، تحب ولد عمها ناصر وهو يحبها وبعد مشاكل كثيرة وافقوا على زواجهم . ♤ زياد :- عمره ٢١ سنه ، بعده يدرس جامعة وحاط هدف قدامه انه يكون طيار ولسا يشتغل على نفسه ، يشبه امه بطيبتها وماخذ عصبية ابوه وجميل ومن هالاشياء < تعرفون عاد التفاصيل الزيادةمالها طعم بس تخيلو حلو وعضلات واسمراني كذا ))) ،،،، ( بعد وفاة ام فارس ابو فارس جلس سنتين بدون ما يتزوج لانه كان يحب زوجته وبسبب اصرار امه وابوه قرر يتزوج " ميثاء " تقرب للعايلة كانت مطلقة وعندها ولد بس زوجها اخذ ولدها لما تزوجت بحجة انه ما يسمح لولده يتربى عند عيلة ثانية بس كل فترة يزور امه ، تزوجت " مساعد " وجابت منه اول شي زياد وبعدها توأم بنات منار وميار ) ♡ منار وميار :- توأم مختلف بس يتشابهون بكل شي أعمارهم ١٩ وبنات حلوين طيوبات وقويات بنفس الوقت توهم مخلصين ثانوي وماخذين جامعة وحدة تطمح تكون دكتورة نسائية ( منار ) ووحده رائدة أعمال وحاليا عندها مشروع تشتغل عليه وناجح وهي بسن صغير ( ميار ) وهكذا تعرفنا عالعائلة الأولى وباقي عيلتين ابو ناصر ، وابو فهد ونبدأ أحداث الرواية بصح وصحيح ، احنا تعرفنا على البطلة والابطال بجهتها باقي نشوف البطل والابطال من جهته ، الرواية رح تكون متساوية يعني ما رح يكون بس في بطل وبطلة لا الكل بنركز عليه لان في قصص كثيرة حابه اني ابينها وتكون واضحة بالقصة ... | ||||
27-07-23, 02:42 PM | #2 | ||||
| ضجيج فكرت كثير صراحة ما عرفت كيف ابدا بالرواية جتني الفكرة وحبيت اكتبها واتمنى تنال اعجابكم ، الرواية ما رح اقول مختلفة كثير بس حتكون غير وفيها قصة جميلة وما رح تكون طويلة مرة لاني بعتمد اسلوب غير المرة هذه ... أحداث كثير بمدة قصيرة ... اتمنى تنال اعجابكم وتحبوها #هدوئي_كارثة | ||||
27-07-23, 04:59 PM | #3 | ||||
| اللهم صل على سيدنا محمد وعلى آل سيدنا محمد كما صليت على سيدنا إبراهيم وعلى آل سيدنا إبراهيم وبارك على سيدنا محمد وعلى آل سيدنا محمد كما باركت على سيدنا إبراهيم وعلى آل سيدنا إبراهيم في العالمين إنك حميد مجيد لا تنسوا الباقيات الصالحات سبحان الله الحمد لله لا إله إلا الله الله أكبر لا حول ولا قوة إلا بالله العلي العظيم | ||||
الكلمات الدلالية (Tags) |
روايات ، خيال ، سعودية ، رومانسية ، هدوء ، حب |
أدوات الموضوع | |
انواع عرض الموضوع | |
|
|