(""_حقك علي ان كنت زعلان _"")..كاملـــه

[مكفخة خواتهاااا]

	(على الجوال) خالد: ههههههههههههه... احلف عبدالرحمن:أرجوك ياخالد أنا أتكلم من جد فكر بالموضوع خالد: ياحليلها أجل امي راحت وحددت الخميس الشوفه هاه يا حليلها ههههههههه عبدالرحمن: ابعرف انت ليه تضحك؟؟ خالد: لابس اتخيل الشوفه من غير عريس هههههههه عبدالرحمن: لاتركب راسك ياخالد خالد: والله صدق من قال تجيك التهايم وانت نايم... الحين فجأه القى نفسي عريس وشوفتي يوم الخميس وأنا ياغافلين لكم الله وين صارت هذي؟؟ عبدالرحمن: أمي خايفة عليك ياخالد ومستغربة عن سبب رفضك للزواج بشكل عام عشان كذا تبي تزوجك .. خالد: لاااا يعني أنا اذا خفت على أحد أمسكه وازوجه؟؟ عبدالرحمن: خالد فكر بالموضوع ولا تعاند والحين انت وين..لا تقول بالإستراحه مع زملاءك؟؟ خالد: ليه تبون تزوجون زملائي بعد.. ماحد له شغل أنا ماني بزر متى ماتزوجت تزوجت ووين ما أروح أروح وقول لأمك لاتزوجت هي تزوجت معها.. وقفل خالد السماعه بوجه عبدالرحمن... .................................................. .................................................. ... ........................................... انتهى الجزء الثاني.. *هل بتبعد منيرة عن طريق رهف؟؟ *هل بيوافق خالد يتزوج رهف؟؟ *وشالمصيبة اللي بتسير في الجزء الثالث؟؟ *وإلى الآن مين ياترى البطل الغير المتوقع لهالقصة؟؟ *وهل يجوز في الدين انه عيال لطيفة يختلطون بحريم أخوانهم وهل بيطول هالاختلاط؟؟؟؟

[مكفخة خواتهاااا]

	((الجزء الثالث)) ****** ******** (في بيت أبوصالح) في الملحق الخارجي كانت جالسة منيرة وسلطان ولأول مرة صالح كان يجلس معهم بس مو على كيفه لأ,, لأنه كان جاي من الجامعة ولا يبي يدخل ويشوف أحد فجلس بالملحق يطالع التلفزيون الين غلبه النوم ونام عالكنبه بس من حدة النقاش قام صالح وسمع بالحديث اللي يدور بين سلطان ومنيرة... منيرة: لاتنسى ياسلطان ان انت اللي بتنضر أنا مو ضارني شي رهف لا تزوجت بتاخذ بطاقتها منك وتجحدك وتبيعك لاعاشت مع خالد في الحلال والخير.. سلطان:الحين ماقلتي لي انها بتخطب أبرار وراها حولت لرهف منيرة: أكيد عينها على هالراتب.. سلطان: وشو راتبه؟؟ الناس أهل خير فلوسهم تغطي عين الشمس بالله عليك بتستنى راتب رهف. منيرة: أنا سمعت انه ولد ماهوبزين وداج وماظنيت ان رهف بترتاح معه,, وكله يوم ولا يومين وترجعلنا مطلقه وانت تعرف وشمعنى يكون ببيت الواحد مطلقة.. سلطان: سبحـــــان الله ماكان هذا رايك يوم كنتي تحسبينها تبي تخطب ابرار كنتي بتطيرين من الفرح والحين طلع في خالد عيوب الدنيا.. منيرة: شوف ياسلطان ماعلي منك انت وبنتك تبي تزوجها تبي تخليها عندك في الأخير هذي بنتك ماعلي منك ومنها.. ,,سكت سلطان وجلس يناظر في الأرض فترة من غير ماينطق ولا كلمة ويشرب الشاهي المر وهو في عالم ثاني... بعد سكوت دام لمدة دقايق وبعد ماقلب السالفة في راسه وحسبها صح... سلطان: منيــــرة اسمعي ... وهنا منيرة خافت وقام قلبها يرقع وطيرت عيونها فيه وتستنى قراره بكل خوف.. سلطان: دقي على أم عبدالرحمن وقوليلها أبوصالح يقول....... ماعندنا بنات للزواج.. وهنا منيرة ابتسمت ابتسامة عريضة وارتاح قلبها: تامر يابوصالح ابدق عليهم يوم الاثنين واتعذرهم.. ....ومن دون سابق إنذار فجأه بعد الهدوء اللي كان مخيم على الملحق صرخ صالح بأعلى صوته وقال: وبأي حق ترفض خالد.. منيرة: بسم الله عليك ياولدي انت وش اللي مقومك؟؟ صالح: اتوقع انكم سمعتموني....يبه بأي حق ترفض خالد وش السبب؟؟ سلطان: انت خلك بدراستك ومالك دخل؟؟ صالح: ابفهم شي واحد انت أب انت أب العدو مايسوي سواتك... صاك على بنتك وحارمها من شرع الله وسنة الله في خلقه عشان راتبها يالطماع حتى في بنتك تطمع.. بالله عليك لا طحت بالفراش تستنى رحمة ربك وكلنا متزوجين ومرتاحين الابنتك عانس جنبك تناظرلك بكل لوم وتدعي عليك لأنك بطمعك وجشعك في راتبها خليتها عندك وشتفيدك فلوسها ووشتفيدك فلوس الدنيا.. منيرة: استح على وجهك عيب عليك ياصالح هذا ابوك.. صالح: أنا مايشرفني إن واحد مثل هذا يسير أبوي.. ويطير سلطان من مكانه ويسحب عقاله من على راسه ويطيح بصالح ضرب على ظهره ورجوله: تخسى وتعقب ياقليل الأدب أجل من اللي جابك ورباك لين كبرت انت واختك......ها تكلم,,تكلم,, والله وطلعلك لسان يا أطرم يامريض.. واستمر يضرب سلطان في صالح على ظهره ورجوله وفخوذه وبعض المرات يطلع بالعقال على وجهه ومنيرة تصرخ وتبكي وتحاول تمسك سلطان وتهديه بس ماقدرت وكانوا افنان وأثير وابرار ورهف عند الباب يبكون على أخوهم وموقادرين يسوون شي ... وكل هذا وصالح واقف مثل الجبل مايرد ولا بكلمة وساكت ويناظر في أبوه ووجهه تجرح من شدة لسع العقال وفجأه مسك إيد أبوه بيد وبيده الثانيه مسك ثوب أبوه من عند صدره وقاله: اسمـــــــــــــــع والله والله إذا ماوافقت على خالد لأروح أنا ورهف عند القاضي ونشتكي عليك إنك عاضلها طمع في راتبها وأنا بسير وليها وأزوجها ..... وبعد هالشي أبروح المحكمة وأحجر عليك وعلى أملاكك وأقول إنك منت كفؤ.... وانا حذرتك وانت كيفك..... ,,,,,, وبعد مارمى صالح هالقنبلة على أبوه خذ مفتاحه وجواله ودف امه اللي وقفت بطريقه عشان تهديه وركب سيارته وراح... منيرة: سلطان سلطان الولد راح الولد راح.. سلطان: الله لا يرده ابن...... منيرة: لاتدعي على ولدي لا تدعي عليه سلطان: ماسمعتيه وشقال يبي يحجر علي أنا سلطان ولدي يبي يحجر علي.. منيرة: كله عشان بنتـــ....... حسبي الله ونعم الوكيل حسبي الله ونعم الوكيل.. أبرارتلتفت على رهف: حسبي الله عليك مايجي من وراك الا المصايب.. ,,,,,, وبعد ماسمعت رهف هالكلام وهالدعاوي طلعت غرفتها فوق وهي ترتجف من الخوف وميته من الصياح ومو مستوعبه اللي حصل وتقول أنا وشدخلني وليه مرة أبوي تدعي علي هي وابرار ومين خالد ومعقوله معقوله صالح يسوي كذا؟؟؟ ...... ........ كان الجوال عالصامت والساعة 2,30 بعد منتصف الليل... وشوي ولا الجوال يهز.. رهف بكل خوف: ألوووو صالح.....حبيبي وينك صالح: رهف لاتعلين صوتك تكلمي بشويش رهف وهي تبكي: صالح تكلم وينك انت طيب انت كويس ليش ماترد على اتصالات أمي منيرة عليك؟؟ صالح:أهلي ناموا ولا لسه صاحين؟؟ رهف: لا كلهم ناموا صالح: طب اسمعي روحي غرفتي بتلاقين عالمكتب كتابين فوقهم دفتر محاضرات خذي الشنطة السودا اللي جوا درج الملابس وحطي فيها هالكتابين مع الدفتر وحطيلي كذا فنيلة مع سراويل سنة وكم طاقية وادخلي الملحق دوري يمين يسار الين تلقين بوكي حطيه في الشنطة مع الأغراض الظاهر انه طاح من جيبي.. رهف وهي تبكي: صالح ارجع البيت تكفى ماله داعي المشاكل.. صالح: رهــــــــف لا تخليني أندم اني كلمتك من بد خواتي اسمعي الكلام انا عند باب الشارع واقف استناك اطلعي بشويش لاحد يسمعك وافتحي باب الشارع وعطيني الاغراض يالله انا استناك بسرعه.. .....وتروح رهف تسوي اللي قالها أخوها وهي ميته من البكى وتنزل الملحق وجلست تدور البوك وتسمي بالله الين لقته وراحت بشويش عند باب الشارع وفتحته وكانت الدنيا ظلام ولما افتحت الباب على طول نط صالح ودخل بسرعه وصك الباب وراه وأخذ الشنطة من يد رهف ولازال وجهه مو واضح من الظلمه وقالها: ها حطيتي اللي قلتلك؟؟ رهف: أي حطيت صالح: لايكون نسيتي الدفتر ترى مهم.... ومن غير ماتجاوبه راح جهة النور وفتح الشنطة عشان يتأكد إن كل الأغراض موجودة.... وفجأة رهف اشهقت وحطت ايدها على فمها لما شافت وجه صالح... كان وجهه مرعب ,,ازرق من الضرب ومليان جروح... انخرطت رهف في موجة بكاء على أخوها وجلست على درج الملحق وقامت تصيح وايدينها على فمها... راح عندها صالح وحط ايده على راسها وقال: والله والله يارهف لتتزوجين, والحال المايل اللي انتي فيه مارح يستمر وإذا انتي سكتي أنا مارح أسكت , وحقك بيرجعلك ثالث ومثلث ولا تخافين يارهف دام صالح في الوجود.. رهف: صالح انا ما أبي شي بس أبيك ترجع صالح: انتي هدي وريحي بالك ولا تقولين لأحد أبدآ إني جيت هنا وأخذت شي وأنا أعرف إنهم يضايقونك ويلقحون عليك بالحكي بس ماعليك منهم كلها أيام وتسيرين في بيت رجلك...ياللاه أنا بطلع قبل ما يصحى أحد.. رهف: طب صالح وين بتروح صالح: شوفي بقولك بس لاتعلمين أحد بروح سكن الجامعه رهف: طيب صالح أنت ما أخذت ثياب ماتبي ثياب؟؟ صالح: بروح آخذ ثيابي والشمغ من الغسال ....خلاص يالله رهف مع السلامه انتبهي لنفسك وزي ماقلتلك لاحد يدري اني جيت.. رهف: الله يحفظك انتبه لنفسك ....وطلع صالح وعلى طول رهف رجعت غرفتها ودخلت في موجة من البكاء وهي ماتدري شاللي صار بالضبط وشاللي بيسير لها وتقول" وشهالزواج اللي بالمشاكل والضرب مادرت مسكينه عن المشاكل اللي في بيت خالد ومادرت عن اللي يستناها بعلم الغيب...

[مكفخة خواتهاااا]

	أبرار: يمه خلاص لك يومين وانتي تدقين عليه ماهوبراد عليك. منيرة وهي في حالة مزرية جدآ: انتي ولا كلمة ولا أحد يتكلم الولد له يومين مايرد علي يا الله لا يكون صار فيه شي؟؟ أثير تطالع بأمها وتفكروتقول في نفسها ياالله يايمه على كثر ماغاب صالح وسافر ويجي ويطلع ماتدرين عنه الحين سبحان الله كيف حالتك وهو بس غاب عنك يوم الله يستر لا يكون صارله شي.. وفجأة منيرة وهي حاطة إذنها عالجوال انهارت من الصياح.. منيرة:صالح صالح ياولدي أخيرآ رديت أخيرآ وينك فيه وينك تكفى ياولدي تكفى ارجع!! صالح: خير نعم؟؟ منيرة:ياصالح ياولدي الله يهديك ويرضى عليك تعوذ من ابليس وارجع لبيتك والله والله ياصالح اني ماذقت النوم ولا ارتحت من يوم ماطلعت من البيت صالح: لااا ماذقتي النوم...وشتبين ازينلك؟؟ منيرة: صالح صالح ياولدي نسيت اني امك؟؟ صالح:لا مانسيت بس انتي الظاهر انك نسيتي ان الله في الوجود والدنيا سلف ودين منيرة:ياولدي ليه وشصار لهذا كله؟ صالح: انا متأكد انك قاعدة وبناتك حولينك ورهف تغسل وتكوي ولا واقفه بالمطبخ صح ولا لا منيرة: صالح يا ولدي..... صالح: أقــــــــول الحين انتي داقة تبيني ارجع صح ولا لا؟؟ منيرة: أي ياولدي أي يا صالح ارجع لامك صالح: لااااااء منيرة: وش اللي لا؟ صالح: رجعه لهالبيت مانيبراجع منيرة وهي تبكي ومنهاره:ليه ليه ياصالح تبي تموتني؟؟ صالح: لامابي اموتك ليش تموتين؟؟ تموتين وتخلين الفلوس وراتب رهف,,لالاحرام اقعدي جمعي بالفلوس وتمتعي ليش تموتين منيرة وهي منهارة: صــــــــــــاااالح صالح: لا تصرخين..... شوفي انا بأرجع,,,, بس على شرط منيرة: كل اللي تبيه تحت أمرك من الألف للمية ألف صالح: ايه لوانها فلوسك ماقلتي كذا,,, انا سمعتك يمه تقولين لابوي انك بتدقين على خالتك ذي وتتعذرينهم صح.. منيرة: أي صح صالح: واليوم وشو؟؟ منيرة:اليوم الاثنين ياصالح صالح: طب دقيتي عليها وتعذرتي؟؟ منيرة:لا والله ياصالح نسيت,, سالفة هروبك من البيت نستني اسمي صالح: أجل دقي عليها الحين وقوليلها حياكم الله البنت موافقة منيرة: انت ارجع ومايسير الا الخير صالح: اقول ياللاه ياللاه مع السلامه منيرة: ياصالح استنى استنى ياولدي صالح: تبيني يمه,,,خلي هالزواج يتم منيرة: ياصالح انت تعرف اني ماعندي مانع لكن ابوك هو اللي معارض صالح:شوفي هالكلام قوليه لخالتك قوليه للناس لكن انا مايمشي معي هالحكي تبيني ارجع زوجي رهف لخالد,,, والا اقول اسمعي اسمعي.. والله والله اني ما أدخل بيتكم هذا الا يوم ملكة رهف... خلاص يمه ارتحتي منيرة وهي تصرخ: صالح لا تحلف صالح: كيفك أنا حلفت,,, لاانتشر خبر خطبة رهف وصار يوم ملكتها جيت هالبيت كشاهد على العقد... بعدين أفكر ارجع ولا لا.. منيرة:خلاص خلاص ياصالح انا بدق عليها الحين واقولهم انه احنا موافقين وخواتك بيسوونلك عشا الين تجي صالح: انا حلفت اني ما ادخل هالبيت الا يوم ملكة رهف انشالله بعد عشر سنين.. ويقفل الخط بوجه امه اللي ماترددت لحظه انها تنفذ اللي طلبه منها.. ******** ********** ((في بيت أم عبدالرحمن)) أسيل: ميـــــشو وين رايح؟؟ مشاري وهو يضبط شماغه ويطالع بالمراية: قد جربتي أحد يرقعك بقارورة هالعطر على جبهتك؟؟ أسيل: بسم الله علي خير انشالله ليه وشسويت؟؟ مشاري: استحي على وجهك أنا عمك تناديني ميشو أصغر عيالك تناديني ميشو؟؟ أسيل: يووووه ياميـــشو صدق إنك قروي ياخي خلك استايل مثل عمي خالد كلنا من أصغرنا لأكبرنا نناديه خلودي ومبسوط ومتشقق وانت مسويلي فيها,, نادوني عمي نادوني عمي وبعد ين انت مو أكبر مني بواجد.. فليه اناديك عمي؟؟ مشاري: حتى لو أنا أصغر منك احترميني يا أسيلوه وناديني عمي أحسلك.. أسيل: اوووه أوكي أوكي وين رايح عمو ميشو؟؟ مشاري: أقول ماكني في برناج أطفال عالـ Lbc .. وش عموميشو انتي؟؟ اللي يشوفني يقول إني أبمسكم وأجمعكم حاوليني واقولكم قصة ليلى والذئب؟؟ ناديني يا حلوة عمي مشــــــــــــاري.. أسيل: أقول لا يكثر وين رايح؟؟ مشاري: معزوم.. أسيل: إخس عالبزران كبروا وساروا يروحون عزايم يا اللـــــه إهئ إهئ والله وكبرت يامشاري وسرت تنعزم....هههههههههههه ويمسك مشاري أسيل من رقبتها ويحطها تحت ذراعه ويفك شباصتها ويخرب شعرها ويقعد يمزح معها بكل محبة وبراءة وهي ميته من الضحك ... وفجأة مشاري يصرخ في أسيل بكل عصبية ويقولها خلاص خلاص اسكتي اسكتي..

[مكفخة خواتهاااا]

	طارت عيون أسيل وخافت وسكتت والتفت على مشاري: مشاري اشهالصوت؟؟ مشاري: مادري خلننزل نشوف وشفيه ....وركضت هي ومشاري الين تحت ولقت أمها وإيمان قاعدين في الصالة مفجوعين وكل وحدة تقول الله يستر.. مشاري: خير انشالله وشهالصوت وشفيه؟؟ منى: هذا صوت عمتي وخالد وتركي وعبدالرحمن في الديوانية برا.. مشاري: وشفيهم..؟؟؟ إيمان: الله يستر يا مشاري بالله عليك روح وهدي عمتي وحاول انك تهديهم كلهم.. ... راح مشاري واتجه للديوانية وهو مستغرب من هالأصوات ويقول بنفسه الله يستر.... ,,,,دخل مشاري الديوانيه وخاف من المنظر اللي قدامه... &&كان عبدالرحمن حاظن خالد بين ايدينه ويحاول يرجع يجلسه عالكنب ويهديه لكن خالد كان ثاير ووجهه أحمر.. وتركي جالس جنب أمه ويحاول يهديها وي****ها.. لطيفة: اسمع ياخالد المرة دقت توها الحين وقالت موافقين الخميس تروح ياخالد أحسلك معي وتشوف البنت.. خالد: لالا.. احلفي,, وشرايك تشوفينها بدالي مرةوحدة عبدالرحمن: اهدا وانا أخوك نتفاهم باللتي هي أحسن.. خالد:ماتشوفها اشتقول..يعني مافادت الحشيمة ومسك الأعصاب معها راحت وخطبت وزينت كل شي وانا ساكت وأقول إنها بتعقل وتترك المعاند وتتراجع عن الخطبة مثل كل مرة.. لكن مافاد هي للحين ماتدري إن كل شي يمكن يجي بالغصب الا العرس,,,, لكن الظاهر إنها خرفت,,, وهنا تركي وعبدالرحمن ومشاري مسكوا فمه وكل واحد قام يسكته عشان مايقول كلام أكبر من كذا.. أم عبدالرحمن وقفت بكل عصبية: طيب ياخالد مايخالف لك الن يوم الخميس اذا ماجيت اعتبر نفسك محروم من كل شي من الحلال كله ومن السكن مع أخوانك والأهم من هذا كله انه لا أنت ولدي ولا أعرفك.. وهنا كل واحد من العيال طارت عيونه في أمه ولا هم مصدقين اللي قاعده تقوله خالد: بالطقـــــــاق....ورهف روحي انتي تزوجيها,,, وفز خالد من مكانه وحاولوا عبدالرحمن ومشاري انهم يمسكونه لكن كانت قوة الدنيا مجتمعه فيه ولا أحد قدر انه يمسكه وطلع برا البيت وركب سيارته ومشى وهم كلهم واقفين مذهولين ويتبادلون النظرات.. عبدالرحمن:يمـــه.. لطيفة: ولاااااااااكلمة..يبيني ويبيكم ويبي حلاله يتزوج... مايبي باللي مايحفظه...,, وتركتهم لطيفة مذهولين ومصدومين وصعدت لغرفتها من غير ماتكلم ولاأحد.. وبعد هالمشكلة الكل صعد لغرفته حزين ومصدوم وخايف من اللي بيسير حتى مشاري اعتذر عن العزيمة وصعد لغرفته وهو قلبه ناغزه ومو مرتاح أبدآ.. ***** ******* (الساعة 4الفجر) كان في المسجد يصلي ويحس جواله في جيبه يهز تعوذ من الشيطان ولا حب انه يشغل باله بالجوال,,لكن الجوال رجع يهز مرة ومرتين وثلاث وهنا قلبه قرصه ,,وبس سلم الإمام على طول طلع جواله من جيبه وشاف من المتصل..لقى اربع مكالمات لم يرد عليها من رقم ثابت غريب استغرب وقال وشهالرقم وشوي والا الرقم يتصل مرة ثانية وعلى طول رد عليه.. مشاري:ألو ...:السلام عليكم مشاري:عليكم السلام ...:الأخ مشاري؟ مشاري:إي نعم مين؟؟ ...:معاك مستشفى الشميسي قسم الطوارئ مشاري:....طوارئ,اشفيه؟؟ ...:أخ مشاري اهدأ انشالله مافي الا الخير,للأسف حصل حادث لخوك خالد وهو عندنا بالعنايه وعطانا رقم جوالك وطلبك لحالك بالإسم وطلب منا إنا نقولك لاتخبر أحد الين تروحله ولاتجيب معك أحد مشاري وهو يتنهد: مسافة الطريق وانا جاي عبدالرحمن وهوماسك كتف مشاري وهوكان خلفه: مشاري من تكلم هالحزة واشفي وجهك منقلب؟؟ مشاري:ها.....ماحد بس واحد من الربع عبدالرحمن:يللاه طب مشينا نرجع البيت مشاري:ها....لالاإنت ارجع انت وتركي بعدين أنا بلحقكم تركي:وين رايح هالحزة؟؟ مشاري: أي هذا اللي دق خربت سيارته ويبيني اروح اساعده عبدالرحمن:طب لا تتأخر وفي حفظ الله :::::::::: كانت الأجهزة محاوطته من كل مكان ومعالم وجهه مو واضحة أبدآ.. مشى بخطوات ترجف وعيونه مو مصدقه اللي قاعد يشوفه..وفجأه خالد رفع ايده اليمين اللي كانت فيها الإبرة اللي توصل لكيس الدم.. انطلق مشاري للاخوه ومسك ايده وجلس يبوسها ويبكي.. مشاري:بسم الله عليك ياخالد جعله فيني ولا فيك خالدوهو تعبان يالله يالله يتكلم ويالله قادر يفتح عينه ووجهه مغطى بالدم: مشاري اسمع مشاري: خالد لا تعب نفسك وتتكلم كلها ايام وترجع بيتك بالسلامة خالد يبتسم بصعوبة:مشاري أنا ميت ميت مشاري:ياخالدلاتقول كذا انت بتقوم بترجع ياخالد بترجع خالد:اسمع يامشاري اللي بقولك ابيك تروح لأمي وتقولهابينك وبينها ارضي على خالد ولا تغضبين عليه مشاري:خـــــــــــالد... خالد يقاطع مشاري ويغمض عيونه بألم:مشاري اسمعني ياخوي روح عندها وقولها خالد ماعصاك بكيفه ولا طلع عن شورك بمزاجه,,مشاري قبل سنتين وأنا في الامارات طحت من على الدباب ونقلوني ربعي المستشفى وتأذيت بشكل كبير وقعدت فترة بالمستشفى وقالولي الدكاتره اني لا يمكن في يوم من الايام اني أتزوج أو اجيب عيال لأني ببساطة سرت عاجز.. وأنا من بعد هالشي تعبت نفسيتي وتغيرت ولاصدقت كلام الدكاتره ولكن للأسف كلامهم صح... وحسيت انه انا ولا شي ومستقبلي الاجتماعي انتهى.. ماتتخيل يامشاري قد ايش اموت واتحسر على نفسي لما أحد من ربعي يتزوج ولا أسمع انه أحد تزوج وأنا للأسف كلمة"يبه"ابنحرم منها طول عمري. وعاهدت نفسي انه هالشي بيكون سر طول عمري ولارح أتزوج وأخلي نفسي تحت رحمة المرة اللي بتزوجها اللي ممكن بأي لحظه انها تفظحني.. مشاري حاول في أمي انها ترضى علي بس من غير ماتقولها هالشي لأنه يامشاري هالحكي اللي قلته لك أمانة برقبتك إلى يوم القيامة لأن انت الوحيد اللي تعرف,, **وهنا كان خالد يتنفس بصعوبة ويقبض على ايد مشاري بقوة.. خالد:مشاري وصيتي الأخيرة مهما صار يامشاري مهما صار لاتعصي أمي ولاتخليها تغضب عليك......اللي سارلي نتيجة غضبها سافرت الامارات وهي ميب ****ة ودفعت الثمن غالي... الثمن هو متعتي بالزواج,, واهم ثمن دفعته حرماني من احساسي بالأبوة.. وعصيتها للمرة الثانية وهذا أنا على سرير الموت.. مشاري ودموعه مغطيه وجهه:خلاص...خلاص ياخالد لاتعب نفسك ارتاح الحين وكل اللي تبي بيسير ...خالد قعد يشاهق ويشخص نظره لفوق...جو الدكاتره بسرعه وتجمعوا حولين خالد وطلبوا من مشاري ينتظر برا...طلع مشاري برا ودق على عبدالرحمن وتركي وطلب منهم الحضور حالآ.. (بعد ساعتين) الكل واقف متوتر,,,طلع الدكتور وعلى طول قاموا كلهم عنده.. تركي: بشر يادكتوركيفه الحين؟؟ غبدالرحمن:دكتور انا دقيت على مستشفى المملكة وحجزتله هناك ضبطت الأمور وابيكم تنقلونه الدكتور:مايحتاج عظم الله اجركم احنا حاولنا لكن الإصابة كانت قوية والاعمار بيد الله ....تعالت أصوات البكاء والتهليل من أكبرهم الى أصغرهم...كلهم توجهوا لخالد وانكبواعليه يبكون ويحبون بجبهته ووجهه ودقنه وكل مكان بوجهه

[مكفخة خواتهاااا]

	الكل مجتمع بالصالة ومتوتر وام عبدالرحمن تلف سبحتها بين أصابعها وايمان حاطة ايدها على خدها وسرحانة بالأرض وخايفة ومنى ماسكة حمودي الصغير وتلبسه نعاله.. أسماء:يمه اشفيكم؟؟ منى:مافينا شي بس يالله اطلعي انت واخوانك ترى تأخرتوا على مدارسكم.. وانتي ياأسيل البسي عشان تروحين مدرستك. أسيل: والله ماأطبها الين يجون أبوي وأعمامي.. راحوا العيال مدارسهم والكل عينه على باب الصالة.. بعد ساعه ولاعبدالرحمن داخل وماسك عقاله بيده وعيونه حمر وتركي ومشاري وراه نفس الحاله.. منى حطت يدها على قلبها وايمان شهقت ولطيفة تسمرت بمكانها وعيونها تتنقل بين عيالها.. مشى عبدالرحمن بخطوات مهزوزة ورمى نفسه عالأرض وجلس على ركبتيه عند رجول أمه وقال خبر وفاة خالد.. الكل صرخ وبكى وام عبدالرحمن جامدة مكانها وعيونها مفتوحة عالآخر ويالله يالله قدرت تفتح فمها وقالت: ذبحت ولدي....ذبحت ولدي عبدالرحمن: يمه اذكري الله لاتقولين كذا حرام الأعمار بيد الله شوي ولاوقفت لطيفة ومشت خطوتين مثل العمياء اللي مو شايفة طريقها شوي ولاطاحت عالأرض طيحة قوية جدآ...وتعالت الصرخات والكل تجمع عليها.. وشالوها وودوها على طول المستشفى... ::: لطيفة جاها جلطة بالقلب وتنومت بالمستشفى وجا عبدالاله من جدة وقام العزا ببت العايلة لمدة ثلاث أيام وبعد 15 يوم طلعت لطيفة من المستشفى وكان البيت كله في حالة حزن شديدة وبالأخص مشاري اللي موقادر ينسى شكل أخوه وهو ينازع بين يدينه... :::::::::: ::::::::::::::: منيرة:صالح أنت ماتفهم أقولك الولد مات صالح:الله يرحمه.....المطلوب؟؟ منيرة:المطلوب!!..الولد مات والشي اللي أنت طالع من البيت عشانه انتهى يعني لافي عريس ولافي زواج صالح:ولافي صالح بعد منيرة:صالح إنت وشتقول؟؟ صالح:أنا حلفت إني ما أدخل هالبيت إلا كشاهد على عقد زواج رهف,,, وإذا مات خالد تراه مو الرجال الوحيد اللي على وجه الأرض,,, بيتقدملها غيره وإذا تقدملها غيره ووافقتوا ذيك الساع أعيد وأكرر زي ماقلت يايمه أبجي عشان أشهد على عقد النكــــااااااح... منيرة:صالح أختك ذي كل ست سنين يخطبها واحد تبيني أقعد استنى لين يجيها جني ياخذها؟؟ صالح: وشوراك استني,,, ويقفل صالح الخط وتجلس منيرة تبكي وتدعي على رهف.. وأبرار جنبها ومختلطة مشاعر الدنيا فقلبها فرحانه انه خالد مات ورهف مارح تتزوجه وشمتانه فيها ومقهوره من سلوك صالح اللي يسويه عشان رهف.. وتركض أبرار وتطلع فوق وتفتح باب غرفة رهف بأقوى ماعندها,,وكانت رهف جالسه عالأرض تسفط الجلال وتبي تقوم.. أبرار:يعنني مسكينه صدق إنك وجه شر مافادتك صلاتك,,مافادتك الرجال بس خطبك وفطس مات ياوجه النحس,الله يحب كل اللي خطبوك وابوي رفضهم الا لو قبلهم كان حضرتك مقبرتهم زي هالمسكين خالد.. رهف ونفسيتها جدآتعبانه:أبرار اطلعي برا وصكي الباب لو سمحتي.. أبرار:ياعيني عالمؤدبة عاجبك صالح هاج من البيت عشان خاطر تتزوجين يالتافهه وتصك أبرار الباب بأقوى ماعندها وتترك رهف في حالة بكاء شديــــدة,, ::::: :::::: (بعد مرور شهر) عبدالإله:يمه مايصلح لازم تاكلين لطيفة وهي على سريرها:......وين مشاري؟؟ تركي:قاعد يذاكر بغرفته يمه لطيفة:كيف خطيبتك ياعبدالاله؟؟ عبدالاله:زينه يمه الحمدلله لطيفة:قولها لايضيق صدرها موعد العرس زي ماهو ماتغير عبدالرحمن:يمه انتي اشقاعده تقولين عبدالاله:يمه أنا لايمكن أرضى لطيفة تقاطعه:اللي سار سار وتأجيلك لعرسك مابيرجع خالد.. باقي على موعد زواجك الأصلي شهرين,, انت تزوج زواج عائلي من غير لاطقطقه ولاغيره ودخل هالفرحه البيت,,الحزن ماينفع أحد.. هنا سكت عبدالاله وناظر لأمه وقال:يمه بس.... لطيفة:من غير بس أنا مابي خالد يختفي من البيت أبيك تتزوج بسرعه وتجيب خالد الجديد..الحين الوقت تأخر والله يستر عليكم روحوا ناموا وريحوا وواحد منكم يناديلي مشاري ابيه لحاله... راحوا عيال لطيفة غرفهم وعبدالاله نادى مشاري وراح غرفته ومشاري راح عند امه.. لطيفة:مشاري حبيبي أقرب مني وأنا أمك وراك واقف بعيد مشاري يرمي نفسه على سرير أمه ويحط راسه على فخذها وتدمع عيونه ويقول: يمه أحس بضيقة صدر أبي أصرخ أبي أرتاح بس مو قادر لطيفة:مشاري العمر يخلص والحزن مايخلص,, خالد مات الله يرحمه ولا شفت عياله مشاري أنا خايفة أموت ولا أشوف عيالك... وتذكر مشاري هنا العيب اللي بخالد الله يرحمه وقال في نفسه أي عيال يايمه الله يهديك.. مشاري ودموعه تنزل:طلبتك يمه طلبتك لاتجيبين سرت الموت لطيفة:مشاري,,,,لو أقولك شي... تطاوعني؟؟ مشاري:يمه أنا كلي فداك أنتي آمريني وأنا بنفذ لطيفة:[[[رهف]]] مشاري:رهف وشفيها؟؟ لطيفة:أبيك تتزوجها مشاري رفع راسه وناظر في أمه وبدون نقاش أوتفكير: اللي تامرين فيه يمه لطيفة:يعني أدق بكرة وارجع اخطبها مشاري: ايه يمه اخطبيها لطيفة مدت يدها ومسحت على شعرمشاري:زواجك بيسير مع عبدالاله مشاري,,انشالله انك ماتندم وأنا نظرتي بالناس ماتخيب... الله يوفقك وأنا أمك ؛؛؛وبعد هالقرار الخطير المصيري اللي اتخذه مشاري بدون مجرد أي تفكير راح غرفته وحط راسه ونام.... >>>>>>>>>>>>>>>>> انتهى الجزء الثالث *اتوقع اتضح من البطل الغير متوقع لهالقصة,,,, *هل بيتمم مشاري سالفة زواجه من رهف ؟؟ *هل رهف بتتزوج مشاري؟؟ *اش الحياة اللي منتظره رهف؟؟

[مكفخة خواتهاااا]

	((الجزء الرابع)) ( بيت أبوصالح) سلطان:انهبلتي انتي,,واشلون تتصرفين من راسك وتوافقين ولا بعد حددتي الملكة وأنا ماأدري ليه سواق ولا مجنون,,وتوك تجين وتعطيني خبر..الحين ترجعين تدقين وتعتذرين لهم.. منيرة:اسمع ياسلطان ماعلي منك انت وبنتك موافقين رافظين أنا كل همي انها تملك الله لايبارك فيها وأشوف ولدي..أنا لي شهرين,شهرين ياسلطان ماشفت ولدي صالح وهذا كله منك أنت أنت ماهومن غيرك بكل وحشية قطعت العقال عليه,,الين حلف انه مايدخل إلا يوم ملكة رهف.. وخلاص أسبوعين كاملين يمدي بنتك ترتب أمورها فيه ويتم الزواج.. سلطان: انتي تدرين كم عمر الولد؟؟بزر بزر رهف أكبر منه بسنين طويلة وشيبي فيها واشلون بتعرف تتعامل معه؟؟ منيرة: لو يكون انشالله توه ثاني ابتدائي,ماعلي منها أنا علي من ولدي,شوف ياسلطان ترى الرجال بيجون ويملكون أبيك تملك بدون أي طمع أو شروط تعجيزية الولد تراه في عمر الزهور وبنتك عجوز خيبر ماهيبصغيره عشان تلوي ذراعهم وتقعد تتشرط..""وتقوم منيرة وتترك سلطان أمام الأمر الواقع..ومن جهة سلطان هذي المرةالوحيدة اللي يحس نفسه موقادر انه يرفض وحاس بالضعف وسبب احساسه هذا هوولده صالح اللي قدر انه يمشي العائلة كلها على مزاجه... ..... ....... (الساعة 10 الليل عالجوال) خلود:يارهف خلاص اسكتي قطعتي قلبي,,الحين انتي وشفيك مكبره الوضع؟؟ رهف وهي تبكي:خلوووود أنا ابفهم اشسويتلهم ليه كذا يتصرفون من غير مايشاوروني,,ياخلود يبون يزوجوني واحد كبر صالح...صغيــــــــر خلود:والله مادري شقولك..أنا موقادرة أفهم الحين اللي خطبك الله يرحمه مات,, بس أبي أعرف اش الحكمة يرجع ياخذك الصغير؟؟ رهف:مـــــــا أدري,,ماأدري أنا خايفة موقادرة أفهم شي,,أحس إني ضايعة خلود:خلاص عاد يابنت الحلال لاتوسوسين وخليها على ربك,,بعدين رهف تراه ماهوبأكبر منك بواجد.. رهف:أقولك أصغر مني بخمس أو أكثر اشلون مو أصغر مني بواجد؟؟ خلود:؟لا ماأتوقع خمس سنين يمكن أقل بعدين يابنت الحلال دام الحب موجود العمر مايضر.. رهف:أشلون مايضرالحين رجال أعمارهم بالثلاثينات وأكثر يالله يالله يقدرون المره ويحترمونها ويقدرون الحياة الزوجيةأشلون وهذا يادوبك عمره عشرين أو واحد وعشرين.. خلود:هذي الأمور غيبية وبيد الله يارهف وانتي لاتقعدين تبكين وتندبين حظك وكلي أمرك لله والله مابيضيعك.....شبغيت أقول رهف؟؟ رهف:ونعم بالله.. وشبغيتي تقولين ياخلود؟؟؟ خلودوهي مترددة:إي.....رهف............وشبغي ت أقولك؟؟؟إي صح وليد ملكته الخميس الجاي انشالله,,,عقبالك يارهف رهف بألم:,,,,,الله يوفقه ::::::: ::::::::::::: (في السيارة) عبدالرحمن:مبروك,,مبروك يامشاري مشاري:الله يبارك فيك تركي:الحين بعد ما أملك الشيخ ليه يوم قالك أبوها ماتبي تشوفها يامشاري ترى البنت جاهزة أنت قلتله لأ؟؟ مشاري وهوسرحان:...... مادري تركي:أشلون ماتدري ماتبي تشوف زوجتك؟؟ مشاري:ماله داعي,,,يوم العرس أشوفها "" يوم دخلوا البيت,,عبدالرحمن:السلاام عليكم الكل بالصالة مجتمع: وعليكم السلاام.... وأم عبدالرحمن عينها على شخص واحد..مشاري. عبدالرحمن:باركوله باركوله تمت ملكة مشاري يمه باركوله سار عريس نزل مشاري وباس راس امه ومسك يدها وجلس جنبها... أم عبدالرحمن:مبروك ياولدي مشاري:الله يبارك فيك ...وسحب يده من يد أمه والحزن مغطي على ملامح وجهه وقام من جنب أمه.. لطيفة:وين رايح يامشاري؟؟ مشاري:هاه..واحد من الربع يبي كتب وأوراق ضرورية بروح أعطيه..معليش عن إذنكم.....وطلع مشاري وكل واحد ينظرله بنظره تختلف عن الثاني... اللي ينظر نظرة فرحه وهي طبعآ من شخص واحد فقط...اللي هي أمه. واللي ينظرله نظرة حزن وشفقه واللي ينظرله نظرة عتاب إنه تسرع باتمام هذا الزواج.. :::: ::::::: (بيت أبوصالح) كانت جالسه على السريرومعطيها ظهرها الباب ولابسه تنورة جنز وبلوزه زهرية ناعمة جدآ فتحة الصدر على شكل سبعة وفيها وردة عالصدر من جهة اليسارويادوبك عليها كحل ومسكرة وقلوس خفيف...لكن مافي آثار للفرح على وجهها...وسرحانة وعيونها طايرة على صندوق الخشب المورد المليان عطور وطقمين ألماس فخمين وساعة ماركة ريموند ويل ألماس وكذا طقم ذهب ناعمين ودبلة ألماس في علبة خاصة فخمة......ومستغربة"معقول أحد يملك من غير مايشوف عروسته؟؟؟ وينفتح باب الغرفة عليهاوهي مي قادرة حتى تلتفت وتشوف من اللي فتح الباب.. صالح:مبرووووك ياعروس رهف تلتفت وعيونها مليانة دموع بكل صدمة وبعدين شهقت وطارت حضنت صالح.. صالح وهو لامها بكل حب:مبروك مبروك الله يوفقك انشالله رهف:متى رجعت؟؟ صالح:أفا عليك يارهف منتي واثقة فأخوك لاقال كلمة مايثنيها أبد,جيت ودخلت المجلس طوالي عشان لاأأخر الشيخ اللي يملك..... ويشد صالح أطراف ياقة الثوب ويمد دقنه على تحت ويتنحنح,,, أنا الشاهد الأول على زواجك يارهف... ويمسك راس أخته ويحبها على جبهتها,,,الله يوفقك وأنا أخوك..بس لحظة لحظة وشهالزين وشهالجمال...هنا رهف نزلت راسها تحت وبانت عليها الكآبة وكسرت الخاطر صالح:رهف حبيبتي لاتزعلين عشانه ماشافك تراهم كلهم حزينين صحيح مر قرابة ثلاث شهور على وفاة خالد الله يرحمه بس تراهم للحين مو قادرين ينسون.. تدرين رهف اني اعرف مشاري بس ما أعرفه معرفه شخصية دايمآ أشوفه بالجامعه يدرس,, بس ماشالله معروف إنه مؤدب ومحترم ومتفوق ومو حق خناقات ومضاربات أنا اللي لفت انتباهي له وخلاني أتذكره هو سيارته الbmw لماشفتها عند باب بيتنا واقفة عرفته من اللوحة لأنه مره قفل على سيارتي واحنا بمواقف الجامعه وقعدت استناه ساعة كاملة الين يجي حضرته ويبعد سيارته بس من جد لما شافني واقف بالشمس تأسف وبغى يتشقق من الإحراج وعلى طول شال سيارته.. وكمان ماشالله أخوه تركي دكتورعندنا بالجامعه.... المهم انتي داريه إن زواجك ياحلوة مابقى عليه شي,,,لكن ما أقول إلا الله يعني عالفرفرة بالأسواق......هنارهف ابتسمت وضحكت ونزلت راسها تحت,,بالعكس يارهف ما أتوقع تتعبيني أبدآ وإذا انتي بتعبيني تعبك راحة,,,, :::::::::

[مكفخة خواتهاااا]

	(في جامعة الملك سعود) طارق:يامشاري أنت تسرعت مشاري:طارق واللي يرحم والديك أنا ما أبي سالفة خالد تنعادلي,, خلاص أمي اختارتها وتشوفها زينة ليه أعاند أيبس راسي.. طارق:طب عالأقل كمل دراستك؟؟ مشاري:وليه لاتزوجت أبقعد بالبيت يعني,,, عادي بكمل دراستي.. طارق:مشاري أنا أحسك تكابر,,,مشاري بيني وبينك الحين ماحد يسمعنا أنت مقتنع؟؟ مشاري:طارق بالله عليك ياطارق إنك تغير السالفة بعد ساعة بندخل قاعة الامتحان وأنا خلقه نفسيتي تعبانة ما أبي أجيب العيد عالورقة,,, وبعدين خلاص أنا ملكت عالبنت وزواجي بالصيفية أقتناعي ولا عدم أقتناعي مابيغير بالسالفة شي.. طارق: أجل يامشاري تذكر إن اللي أخذتها هذي إنسانة ومالها ذنب تجاه رأيك بهالزواج...أنت الغلطان انك وافقت موبهي.. مشاري بعد كلمة طارق شرد بذهنه وجلس يفكر,,,وقال بنفسه,,إي نعم أنا الغلطان لكن بعد إيش... ::::::::: :::::::::::::: ومرت الأيام والخوف مقيد تفكير رهف ومشاري يتهرب من التفكير أصلآ ويحاول قد مايقدر إنه مايفكر بزواجه لأنه للحين مو مستوعب اللي يسير وكل ماسألته امه هل كلم رهف أولأ يقول انه عليه امتحانات ومو فاظي.. " " " اليوم هو يوم زواج عبدالإله ومشاري"" *كانت الحفلة بسيطة في منزل أم عبدالرحمن بما إنها أم العرسان تعبوا منى وإيمان إلين خلوها تلبس فستان سهرة بسيط يليق بها كأم عرسان... كان أكثر واحد فرحان عبدالرحمن جاب الحلويات والهدايا اللي تتقدم للمعازيم الحريم ,,,من أوبراوباتشي... وريحة العودة الغالية في كل مكان,, لكن لازال الحزن طاغي على عيون الكل.. حجز عبدالرحمن للعرسان بالفيصلية حجز مفتوح كل واحد يقضي فيه عدد الأيام اللي هويبيها هو وزوجته الما كل عريس يحدد هو وعروسته وين يبون يقضون شهر العسل... * * وصلت سيارة دينا زوجة عبدالاله ودخلت البيت مع أهلها وكان يوجد بالصالةالداخلية الكوشة اللي اختاروها منى وإيمان للعرايس وجلست دينا بالكوشة ودخل عبدالإله ووقف جنب عروسته وكان طاير من الفرحة وموقادر ينزل عينه من عليها ولا يخفي الابتسامه من وجهه أبدآ وكانت أم مشاري جالسة على أطرف كنبةفي الصالةموجودة جنب الكوشةوانتبه لها عبدالآله وهي تمسح دموعها ويقوم ينط وياخذها مع يدها ويجلسها جنبه على كرسي الكوشة الكلاسيك وحاولت كم مرة تقوم لكن عبدالإله كان ماسك فيها ويبيها جنبه.. وبعد ساعة وصلوا أهل رهف وكانت رهف راكبة بسيارة صالح لوحدها,,انبهرت رهف لما دخلت السيارة بداخل حوش البيت كان البيت كبير جدآ والحوش واسع بشكل لايصدق,,يفتح الباب صالح لرهف: رهف ياللاه انزلي هم بيستقبلونك ويزفونك,, بالفعل إيمان استقبلت رهف وأهلها ودخلت أهل رهف الصالة الخارجية اللي فيها باقي المعازيم,,وكانوا منيرة وبناتها مو مصدقين اللي قاعدين يشوفونه..اشهالفخامة اشهالذوق الراقي.. وأسيل طلعت رهف لغرفتها انبهرت رهف بكل جزء من البيت تمشي فيه وانبهرت بزيادة لما دخلت غرفتها من فخامة الديكور والسرير والغرفة ككل.. أسيل لما طلعت معها رهف كانت طول الوقت جوالها بإذنها وتكلم أمها منى عشان تقولها أمها متى تخلي رهف تنزل وكانت طول الوقت تسمع التعليمات منها لكنها قفلت الخط والتفتت بعد مافصخت رهف عباتها ومسكت مسكةالوردبيدها وجلست على طرف السرير انبهرت,,,أسيل من جمال رهف ونعومتها ووضوح معالم الجمال فيها...تنحت أسيل وقالت بنفسها معقولة كل هالجمال وعمي خالد الله يرحمه كان رافضها ولا يبيها,, ولا لايكون هذا مكياج وجمال مؤقت.. كانت رهف جالسة على طرف السرير وخايفة...حبت أسيل تخفف من توتر رهف.. أسيل:أكيد ماعرفتيني صح؟؟ رهف:لا والله ماعرفتك أسيل: أنا أسيل أبوي عبدالرحمن وأمي منى رهف:ماشالله تشبهين أمك نفس عيونها أسيل:عاد يارهف يابختك بعمي ميشو يجنن أنا بصراحة إذا تمنيت عريس مابتمنى إلا واحد زي ميشو.. ابتسمت رهف وعرفت انها تقصد بميشو مشاري.. جوال أسيل يدق وترد:هلا يمه منى:أسيل عمك عبدالإله وزوجته ركبوا سيارتهم وراحوا الفندق خلاص خلي رهف تنزل.. أسيل:انشالله طيب....رهف ياللاه الحين وقت زفتك * * نزلت رهف من الدرج الرئيسي بالبيت اللي ينزل عالصالة الخارجية اللي فيها المعازيم والكل مو مصدق اللي يشوفه بعيونه كانت رهف ملاك وطالعة آية بالجمال والكل يهلل ويذكر الله.. ومشت وقطعت الصالة الخارجية وتوجهت للصالة الداخلية اللي فيها كوشتها ومافيها أحد غيرلطيفة وحريم عيالها وبنات عبدالرحمن بس,, وهناك لقت أم عبدالرحمن واقفة تستقبلها مسكتها رهف وباستها على إيدها وراسها... ومشت الين كوشتها وجلست وشوي ولا ام عبدالرحمن تفتح الباب اللي من جهة المقلط وتدخل فيه....ثواني والا رجعت مرة ثانية للصالة وهي ماسكة مشاري وأول ما انتبهت رهف لا إراديآ نزلت راسها,,كانت واقفة جنبها منى زوجة عبدالرحمن اللي كانت متلثمة بشال نفس لون فستانها نزلت راسها لعند رهف وقالتلها: رهف حبيبتي مشاري هذا هو يمشي متجه لك لو توقفين أزين.. على طول وقفت رهف وهي عينها بالأرض,, والكل كان متوقع انه يسوي زي عبدالإله ويبوسها ويسلم عليها لكنه من دون أي كلمة أول ماطلع عالكوشة جلس وبقت رهف واقفه لوحدها,, رهف بدون أي تفكير جلست,,,,كانت في عالم ثاني وكل الأصوات اللي حواليها ماهي معطيتها أي اهتمام بس كانت متلهفة إنها تسمع صوت شخص واحد اللي هومشاري لكن مشاري كان طول الوقت ملتفت جهة أمه وماسك سارة وسيرين ومحمد عيال أخوانه ويرقصهم.. منى تقرب من عند رهف: رهف حبيبتي يالله ترى مشاري قام وراح للسيارة أسيل راحت تنادي خواتك وامك عشان يودعونك وبتجيب عباتك لاتتأخرين تراه بالسيارة يستناك جوا منيرة وبناتها وسلموا على رهف وهم مجبورين لكن أثير هي اللي كأنها شوي فرحانة لرهف,, * * دخلت السيارة وكان فيصل ولد عبدالرحمن هو اللي شايلها شنطتها وحطها ورى.. كان مشاري سرحان ويناظر جهة اليسار.. راح فيصل عند قزازة عمه:مبروك ياعمي الله يوفقك مشاري: تسلم تسلم يالله أنا ماشي...

[مكفخة خواتهاااا]

	كان مشاري طول الطريق وهوساكت.. يا الله معقول اللي أنا فيه واقع موحلم...خلاص تزوجت..تزوجت يالله قد إيش أنا غبي اشلون سكت وماقلت لأ اشلون رضيت,, يعني أنا خلاص طول عمري بأعيش مع هالإنسانة اللي ماعرف الا اسمها حتى وجهها ماشفته.. والأدهى والأمر ان هي السبب بكل اللي احنا فيه,, هروب خالد الحادث اللي سارلخالد موت خالد الجلطة اللي جت أمي ,,,,إي صح هي السبب كل اللي سار من تحت راسها.. من يوم ماشافتها أمي وحياتنا مقلوبة فوق تحت,,,وآخر شي أنا اللي تدبست.. ***صوت مسج وصل لمشاري قطع أفكاره انتبه مشاري لنفسه انه ضيع طريق البرج وبعد عنه بمسافة كبيرة.. قعد يتنهد ويطالع يمين ويسار الما وصل للبرج وطول هالوقت ماناظر لرهف ولا نظرة ولا وجه لها أي كلمة.. طلعوا للجناح اللي حاجزة عبدالرحمن أول مادخلوا جلست رهف على طرف الكنبة اللي بالصالون التابع للجناح وهي متوترة ومرتاعة ولا تدري وين تروح وتحس بدوخة كبيرة عشان كذا أول ماشافت الكنبة جلست.. جلس مشاري على آخر الكنبة وهو ملتفت للجهة الثانية ومعطي رهف ظهره.. ويقول في نفسه:لاحول ولا قوةالابالله الله يسامحك يمه الله يسامحك.. شال غترته وطاقيته وعقاله من على راسه ودخل أصابعه في شعره وقام يدلك راسه بهدوءوهومغمض عيونه...تذكرانه جته رساله عالجوال.. طلع جواله من جيبه وفتح الرسالة ولاهي من طارق مرسل: [مبروووووك ياعريس وعقبالي,وترى ها..ياويلك ان سويت حركات نذاله زي اللي اعرفهم يوم تزوجوا وتسحب علي أبذبحك ذبح,, الله يعيني على فراقك بشتاق لثقالة دمك وهبالتك...تصدق من الحين مشتاقلك ماكني من اول اليوم وانا معك مافارقتك الايوم زفوك.. الله يوفقك..انتبه لنفسك ولااوصيك ببنت الناس] قفل مشاري جواله والتفت على يمينه لقى رهف زي ماهي قاعدة, وموشايف منها شي لانه أطراف طرحتهااللي مثبته بتسريحتها مغطية على وجهها,وهوماكان حريص أصلآ انه يطالع..**ياربي هذي للحين قاعدة ماقامت تغير.. الظاهر انها فرحانة إنها أخيرآ عروس وماودها تغير.. مشاري:ادخلي داخل غيري الين اقولهم يجيبون العشى.. سمعت الكلام رهف وعيونها زي ماهي بالأرض دخلت غرفة النوم وأخذت شور سريع ولبستلها بجامه حرير لونها سكري كانت مستحية انها تطلع لأنه بنطلون البيجاما برمودا وكمها حفر(جبنيز) خافت مشاري انه ينقد عليها,,بس قالت ياليته بالأول يطالع وإذا طالع يسير خير.. حطت كحل بسيط وجلوس زهري وتعطرت.. طلعت رهف ولقت مشاري فاتح التلفزيون وحاط طاولة الأكل قدامه.. طبعآ رهف إلى الآن ماشافت وجه مشاري بس وهو جالس ومعطيها ظهره كان زوله من ورى نفس زول أخوها صالح.. هنا رهف ابتسمت ابتسامه وحست بالحنان تجاه هذا الرجل الغريب لمجرد إنه ذكرها بأخوها... توجهت رهف لعند مشاري وسلمت وجلست جنبه..لكن للأسف مارد السلام.. رهف كانت كارهه هالسكوت وقالت خلني أبدى أنا بالحكي.. رهف:كيفك مشاري؟ مشاري:حمدالله,,,اسمعي انا بروح أريح داخل تعشي إذا خلصتي ناديني عشان أطلعه برا.. رهف وهي مصدومةوهالمرةماقدرت تمسك نفسها إنهاماتناظربوجه مشاري وتتكلم: طيب وإنت؟؟ مشاري:تعبان شوي.. رهف لاحظت ملامح التعب بوجه مشاري,, زي مالاحاظت وسامته وحدة نظراته.. كانت ملامحه وقسمات وجهه تذكرها بملامح الأمراء..اللي كانت تشوفهم بجلسات الشعر.. دخل مشاري ورمى نفسه عالسريرومد ظهره.. حاولت رهف إنها تاكل لو شي بسيط لأنها جدجدجوعانة,, يادوبك أكلت لقمتين.. لكنها قامت لأنه نفسها انسدت,,,ياالله معقولة حتى مو قادريستحمل الجلسة معي.. دخلت عند مشاري عشان تقوله إنه يطلع الأكل.. لكنها لقته بالحمام.. جلست على طرف السرير عشان تشوفه إذا طلع وتملي عينها منه,, حست بحب بقلبها مو طبيعي له ماتدري وشتفسيره؟؟ لكن لفت انتباهه صوت تأوهات يطلع من الحمام جرت رهف لباب الحمام وحطت إذنها وقعدت تسمع وهي خايفة على مشاري كانت تسمع صوت مشاري وهو يستفرغ ويتأوه ومشاري من النوع اللي حساس جدآكان وهوفي الحمام يشوف الدنيا تلف فيه وبطنه يألمه ويصدره يألمه.. ومنظرخالدوهوينازع بين إيدينه يمر عليه بالبطيئ أكثر من مرة...ماقدر يمسك نفسه...جلس على طرف البانيووانخرط في موجة من البكاء.. رهف خافت خوف شديد وقالت ياربي هذا اشفيه لايكونه تعبان أو يتعاطى شي؟؟ ليه يبكي بهالطريقة؟؟؟ ماقدرت رهف تمسك دموعها لأنه ماتوقعت انه يسيرلها في أحلى ليلة بعمرها هالشي راحت على السرير ودخلت تحت البطانية وغطت نفسها وغمضت عيونها بشدة وقالت بكرةانشالله يسيركل شي أحسن من كذا ..طلع مشاري وهو دايخ وموقادريشوف اللي قدامه..قرب جنب السرير لقاها نايمةعلى طولل طلع في الصالون وتمدد عالكنبة وراح بسابع نومه.. وهولازال يصدر أنين مثل أنين الأطفال ::::::::::: :::::::::::: من جهة ثانية عبدالإله ودينا قضوا أحلى ليلة وكانوا مبسوطين وطايرين من الفرح.. * * :::::: :::::::::: ((في بيت أبوصالح)) ناصر:عقبالنا يالغلا,, أبرار تضحك ضحكة حياء: انشالله.....بس متى؟؟ ناصر:قريب ياحياتي بس إنتي اصبري

[مكفخة خواتهاااا]

	((في بيت أبوصالح)) ناصر:عقبالنا يالغلا,, أبرار تضحك ضحكة حياء: انشالله.....بس متى؟؟ ناصر:قريب ياحياتي بس إنتي اصبري وانشالله الله يفرجها قريب.. أبرار:ناصرأنا أعرفك لي سنة وشوي وانت تحبني وأنا أحبك وإلى الحين ماتزوجنا,وإختي انخطبت وتزوجت في ظرف شهرين بس.. ناصر:أبرار أناماظحكت عليك في شي ولالعبت عليك أنا من أول ماكلمتك وأنا قايلك عن كل ظروفي,,,أبرار مافيها شي لو تظحين شوي وتستنيني إلما تتحسن ظروفي... أبرار: وانا إشوراي إلا الصبر ياناصر..ابستناك لو طول العمر.. ,,,ناصرلما قالت أبرار هالكلمة استغلها فرصة وعلى طول قلب الحكي لغزل وكلام حب وكلام بطال وأبرار تطاوعه بكل شي يقوله.. ::::::: ::::::::::: الساعة 4الفجر,,, ***صلت الفجروالتفتت عالباب وهي تفكر:ياربي أقومه يصلي ولالا؟؟ أخاف يطلع من النوع اللي مايصلي ويزاعق علي,,, ياربي اشهالبلشة.. فكرت وقررت إنها تروح عنده وتقومه يصلي.. لمادخلت كان نايم على جنبه والصالة مظلمةومو باين من ملامحه شي قربت وقالت:مشاري...مشاري.. قربت زيادةعشان تناديه لكنها سمعت صوته وهويأن وكأن عنده صعوبة بالتنفس هنا رهف خافت عليه وفتحت الأبجورة اللي قريبة من راسه عشان تشوف وشفيه؟؟ لما فتحت رهف الأبجورة كان مشاري فاتح فمه ونص عيونه مفتوحات وحواجبه معقودين. رهف سارت الأفكارتوديها وتجيبهالكن جربت مدت إيدها وحطتها على جبين مشاري كان جمرةومولع من الحرارة.. رهف تعوذت من إبليس ومن الأفكار اللي جتهاوحطت يدها على كتفه وهزت بشويش: مشاري,,,مشـــــاري مشاري فتح عيونه بشويش ورجع غمضها وتنهد تنهيده قوية وابتسم وقال: أسيــــل.. رهف وهي متألمة:لأيامشاري أنا رهف مشاري رجع عقد حواجبه وفتح عيونه بسرعه بعد ماحسب ان اللي قدامه أسيل وكل الأموراللي مرفيهاحلم لكنه رجع لأرض الواقع وان كل اللي سار حقيقه مو حلم واللي قدامه رهف مو أسيل.. مشاري جلس يتأمل ملامح رهف ويناظر بعيونها السود الوسيعة وخشمها الدقيق الطويل,,وفمها الصغير..رجع تنهد وانقلب على ظهره وحط يده اليمين على عيونه ورفع راسه فوق: نعم وشتبين؟؟ رهف:مشاري ترى أذن قوم صلي مشاري يتحرك ببطئ وتبعد عن طريقه رهف وهي عيونها مانزلت من عليه والود ودها تمسكه وتساعده انه يقوم بس حست نفسها مو لهالدرجة تمون.. دخل مشاري الحمام وكانت رهف واقفه عند باب الحمام وتسمع كل تحركاته لأنهاكانت خايفة يسيرله شي.. طلع مشاري وصلى وخلص وهي كانت وراه جالسه: ياربي عادي أروح وأمسكه وأشوف حرارته نزلت ولا لسه؟؟بس ولو عيب المفروض العروس تكون مستحية وساكته وعريسها هو يكلمها ماهوهي تلحق وراه...يابنت الحلال أي عروس صدقتي عمرك...قال إيش عروس ولا سمعت منه خمس كلمات على بعض,,, بس يللاه يابنت الحلال استحملي...أكيدهو موخلقي لأنه في حرارة وتعبان شكله متسمم ولاماخذبرد... رهف: أقول مشاري..وشرايك تتروش؟؟ مشاري وهووده انه يتروش من قبل ماينام بس مايقدر لأنه خايف إنه يدوخ بالحمام وبعدين إذا داخ من ينقذه؟؟ مشاري: بعدين.. قام مشاري من عالسجاده وهو يحاول إنه يحافظ على توازنه ورجع نام عالكنبه من دون مايقول لرهف أي كلمة اللي يوم شافته نام رجعت حتى هي نامت .. ::::::::::: ::::::::::::::: ((في بيت أم عبدالرحمن)) لطيفة:ياهلاوالله ياهلا.. عبدالاله يطيح على راس امه ويحبه:هلايمه هلايمه وتجي دينا وهي مافصخت عباتها تحب راس عمتها وتلتفت على تركي وعبدالرحمن وهم يباركونلها وتجلس بكل حياء جنب زوجها.. لطيفة:أقول مادق مشاري على واحد منكم ودي أدق عليه.. ,,التفت تركي على عبدالرحمن وقاله بصوت واطي: هذا وهو مغصوب على هالزواج له يوم كامل الحين ماسمعنا صوته شكله غرقان بالعسل,,أجل لوكان **** وشسوى؟؟ عبدالرحمن:ياخي الله يسمع منك ويكون غرقان بالعسل ويبطل دلع.. عبدالاله:يمه أنا ودينا جينا اليوم نتعشى عندكم ونودعكم عشان خلاص رحلتنا بكرة على نيس.. لطيفة:صدق خلاص مسافرين بكرة!! عبدالاله:إي يمه انشالله.. تركي:أجل أنا بوصلكم.. عبدالاله:ماتقصر وأنا أخوك.. الكل قضى السهرة مبسوط وسوالف وضحك وملامح الفرح والسعادة تنطق بوجه دينا وعبدالاله... على العكس تمامآ لمشاري ورهف.. :::::::: :::::::::::: كانت تبكي بكاء كله خوف وحيرة وتحس بإحساس كبير بالضياع بجانب احساس أكبربالمسؤولية تجاه هالإنسان اللي قاعد يرجف وحرارته كل مالها تزيد وجبينه يقطر عرق وماهجد من التأوهات والألم.. كانت جالسة على ركبتيها ومكتفة إيدينها:ياربي شسوي يارب ساعدني ألطف يارب ألطف.. رهف:مشاري,,,,مشاري,,إنت تاكل أدوية معينة تبيني أعطيك منها.. ,,,مشاري موقادريرد بس كان يحرك راسه بالنفي.. رهف:مشاري خلني أدق على صالح يجي وياخذك للدكتور.. مشاري:رهف سألتيني كم مرة وقلتلك لأ.. رهف:طيب أدق على واحد من أخوانك.. ,,مشاري وهو يهز راسه بالنفي... سكتت رهف وحطت إيدها على فمها وهي تناظر فيه وكل مال حرارته تزيد...هنا رهف ماقدرت تمسك نفسها..شدته مع يده وحطت إيدها الثانية حولين خصره وقالت: أجل قوم معي بسرعة.. مشاري:وين...وين,,رهف إبعدي....إبعدي رهف:قوم معي بوديك الحمام تتروش.. مشاري بكل عصبية:لايابنت الناس إبعدي بس.. رهف:ليه يامشاري حرارتك كل مالها تزيد,,قوم وروح الحمام تروش وبعطيك بنادول وانشالله تنزل حرارتك.. مشاري:يابنت الناس ما أقدر أوقف لو بأوقف بدوخ.. رهف:لاتخاف أنا بدخل معاك خل شورتك عليك..يالله تكفى الله يخليك قوم.. وجلست تحاول فيه الين رضى يقوم معها...كانت طول الوقت جنبه وجلسته بالبانيو وتاخذ الموية وتمررها على راسه ووجهه وتمسح بيدها بكل حنية وتسمي عليه.. كان مشاري مو مصدق إن اللي معه هذي وحدة توها عروس لأن على حد علمه إن العروس تتدلع ولاتسوي شي...وهذي شالتني شيل وقاعدة تروشني؟؟... كانت كل لمسة تلمسها رهف لمشاري...مشاري يتذكر لمسات أمه وحنيتها عليه.. ويحس إن رهف ماكانت تصطنع هالحنان...بالعكس كانت رهف تبذل كل اللي بوسعها عشان تريح مشاري..وتنزل هالحرارة.. طلعت من الحمام وراحت جابتله ملابس وحطتهاقدامه: مشاري هذي منشفتك وملابسك خلاص إنت الحين أحسن تقدر تقوم وتلبس....تبيني أساعدك؟؟ مشاري وكأنه خف الألم شوي:لأ...اطلعي وصكي الباب.. رهف طلعت وصكت الباب وتكت جنب الباب لأنها خايفة يسيرله شي.. طلع مشاري وشافها جنب الباب بس عطاها ظهره... رهف آلمها هالصدود بس قالت يالله مو مشكله: مشاري كيفك الحين.. مشاري :......لا أحسن وتمشي رهف وتحط إيدها على جبينه وتلقى حرارته خفت بكثير.. حركة رهف هذي ضايقت مشاري وقال بنفسه خير شايفتني بزر؟؟ رهف:طب مشاري اطلبلنا أكل أنت من أمس ما اكلت شي وانا كمان جوعانه,, مشاري بالفعل حس نفسه جوعان ومن دون مايردعليها دق على خدمة الغرف وطلبلهم أكل.. دخلت رهف وغيرت ملابسها وطلعت عند مشاري.... رهف: مشاري وشرايك نطلع.. مشاري وهوياكل ومايناظر فيها:نعم,,وشقلتي؟ رهف:يعني نروح أي مكان عند أهلك عند أهلي.. مشاري:أصلآ ناوي نطلع ونرجع البيت كرهت هالمكان.. رهف جرحها هالكلام بس قالت ماينلام الحرارة هي السبب في انه يكره هالمكان.. >>>>>>><<<<<<<< انتهى الجزء الرابع.. *ايش رح تكون مصير علاقة أبرار بناصر؟؟ *كيف رح تكون معاملة رهف لمشاري؟؟ *هل بتستحمل رهف العيشة في بيت مشاري مع أهله؟؟ *هل بيستحمل مشاري رهف ولا بيرجعها بيت أهلها؟؟

انتظروووووووووووووووووووو ووووووووووووووووووووووووو وووني

[وردة النارنج]

واااااااااااااااااااااااا اااااو والله اني ما توقعت هيك فكرت خالد البطل حزنت كتيييييييييييييير عليه ولهلا مو قادره استوعب انها تزوجت الصغير وقد اخوها صحيح هي بتصير بالواقع وفي ناس كتير هيك بس نسبتهم قليله وبصراحه الفرق 5 سنين واكتر كتير يعني ممكن اكبر منه بسنه او سنتين مهضومه يالله ما ضطولي علينا يا عسل بجد الروايه روووووووعه وغريبه من نوعها وبنستنا التكمله حبي