خيال عيشني بظلمته *مميزة* - الصفحة 64

dam3ahel3in · 30-12-14, 09:41 AM

ههههههههههههههههههههههههه ..
الحين بوح و ندى .. ليه الكره ..!!
الشر بيكون موجود دايما ولو كانوا قاعدين لـ حالهم ..
العنزي الله يكفيينا شره و شر من يتعامل بالسحور ..

ندى اانا قلت مناقيش ما قلت اللي كان فيه اكيد ما راح اعزمج ع شي يسم البدن ..

وحرام ارحموا هالقلوب و انا شخصية روومنسيه اميل للرومنسيه اكثر ..
ولا اعتقد ان الحياة تكتمل بدون اكشناات
بس يعجبني التعذيب .. فـ خلوني امخمخ لكم شر ع حسب المواقف

و شغله مهمه في صلاحيات سوف تستخدم ضدكم ..

اقتباس:

انا حستخدم صلاحياتي كمشرفة واخذف او اغير اي تعليقات شريرة تؤثر على دمع

حينها لن ينفع الندم وقت الندم ..
جاري تجهيز الخوذات رقية بييب لج معاي خوذه

الله يسعدكم ع خفة الدم ..
دمــع العيـــن

أريج الزهور · 31-12-14, 04:19 AM

يسعدك يااقلبي المقدمه جداً حلوه حطت على الروايه وأنا شارده من المذاكره حقت الاختبار
شكراً شكراً من قلبي كل ماا مليتت من المذاكره إن شاء الله راح أقرأ غصل لين ما أتابعها معاك
أول بأول

dam3ahel3in · 31-12-14, 09:19 AM

أريد زوجتي ..
كلمة كثُر صداها و زاد ترددها في أذني ..
لمست قلبي و قتلت روحي .. لكن لما أشعُر بـ هذا الفراغ ..!!
أريد زوجتي ..
كلمة تخرج منك كـ عاشق ..
تصل لـ قلبي كـ حبيبه .. لما لا اريد ان اقتراب ..!!
أنظر .. لـ ننتظر قليلاً .. كـِ نعشق بعضنا ..
دعنا نرتوي بالعشق حتى تذوب الشكوك ..
دعنا نستطعم مُرِّها قليلا .. لـ نذوق حلوها ..
لا تستعجل حبي لا تطلب عشقي .. أكسر مخاوفي ..
لن ألبي النداء لن ادعك تقترب .. حتى تمتلكني كُلي ..

كاردينيا الغوازي · 31-12-14, 01:38 PM

اقتباس:

المشاركة الأصلية كتبت بواسطة dam3ahel3in

أريد زوجتي ..
كلمة كثُر صداها و زاد ترددها في أذني ..
لمست قلبي و قتلت روحي .. لكن لما أشعُر بـ هذا الفراغ ..!!
أريد زوجتي ..
كلمة تخرج منك كـ عاشق ..
تصل لـ قلبي كـ حبيبه .. لما لا اريد ان اقتراب ..!!
أنظر .. لـ ننتظر قليلاً .. كـِ نعشق بعضنا ..
دعنا نرتوي بالعشق حتى تذوب الشكوك ..
دعنا نستطعم مُرِّها قليلا .. لـ نذوق حلوها ..
لا تستعجل حبي لا تطلب عشقي .. أكسر مخاوفي ..
لن ألبي النداء لن ادعك تقترب .. حتى تمتلكني كُلي ..

(أبي حرمتي) لو سمحت هههههههههههههههههه

dam3ahel3in · 31-12-14, 03:23 PM

السلام عليكم و رحمة الله وبركاته ..

البارت الـ 20 ..

طول ما انا قاعده وياهم و اسولف .. اجوف العيون اللي بعدها أتجوفني بـ غيض ..

رفعت لها نظري وعطيتها نظرة " خير..!!" .. صدت بـ نظرها للصوب الثاني كأنها مقهوره من شي ..
حركة رأسي مستغربه من افعالها و تصرفاتها وياي .. " ألحين انتي تنوين لي بالشر و تزعلين بعد ..!!
لا صدق لازم اعرفها بـ غلطها ولو فيها فضيحتها .." سويت طاف للي معاي و علقت فكري فيها ..
تتكلم ويا عمتي تفر علي نظره و ترجع تتكلم مع عمتي .." خير ماااما ..!!"
طالعت صوب امل ..: بسير المطبخ اسوي لي شاهي .. وبسوي لكم وياي دله ..
: دام قلتي شاهي انا ابي ..
: ترا قلت بسوي لكم وياي ما قلت بـ سوي لي نفسي بس ..
: خلاص عيل بيي وياج .. المهم الكناري ما ايي معانا ..
: اعرف اسوي شاهي .. اشر علي ..: ما قصرت حياتها كله شاهي ..
: توك اتعرف ..!! هاي من الصغر ع الشاهي و القلاص اللي بينصب لها لازم كبير ..
: بس يا فضايح بس .. قلنا بنت العم و صديقة الطفوله و الأخت لا تنشرين فضااايحنا ..
: لا خليه يعرف بـ الشغلات اللي تحبينها عسب اجوف القلوب اتزيد فوق رؤوسكم ..
حطيت إيدي ع يبهتي و بديت احرك رأسي بـ قلة حيله من خباالها .. " بتفضحني وقريب بعد"
صديت صوب وليد ..: بسير المطبخ و برجع ..
: ادري .. سيري حد ماسكج ..!!
عطيته نظرة حقد و اشرت ع امل و نظري بعده امعلق عليه ..: هاي الخبله متعوده عليها ..
بـ ترفع ضغطي و تفصل علي مستعده اتحمل ردودها .. انت تسوي مثلها بـ قلب عليك ..
: إشمعنى يعني هيه تتحملين سوالفها ..!! وانا لازم تقلبين علي ..!!
ييت برد عليه ..: لأني حبيبة قلبها من الصغر و اتدلع عليها ع كيفي ..
كانت اتكلمه وهيه تحرك له حواجبها .. " آآخ منج إتزيدينه غيض يعني ..!!" : اوكي و بعدين ..!!
لـ متى بـ تقعدين تتحرشين فيه و بدون سبب .!!
: لـ يقول انا آسف يا أختي العزيزه ..
: ولا بـ اعتذر لج .. ما سويت لج شي انا ..
هاه ردوا يتناقرون اروح المطبخ ابرك لي .. غمضت عيني وقفت بعيد عنهم شوي ..
طالعت صوبهم ..: تناقروا وانا بسير اسوي اللي قلت بـ سويه ..
عطيتهم ظهري و كملت طريقي للمطبخ .. إللي حارق دمي انه سعاد اتطالعني بـ حقد وبدون سبب ..
ما يكفي اني واجهّتها وعطيتها اللي تستاهله ع حركتها وياي فوق هاه اتطالعني بـ حقد ..
وصلت للمطبخ و طلبت من وحده من البشاكير اتطلع لي غوري و مكونات الشاهي ..
جهزت كل شي و حطيت الغوري ع النار .. حطيت ورق الشاهي يا دور السكر ..
حطيت قفشة (ملعقه) سكر كبيره و غطيت الغوري .. رفعت عيني لقيت سعاد واقفه عند الباب ..
تمت إتطالع فيني بـ حقد ..: خير شو عندج اتطالعيني جيه ..!!
بعدها اتطالع بـ حقد صدت بـ ويهها و سارت صوب الثلاجه .. " نفسية عافانا الله "..
نزلت عيني ابي ألتهي بـ اي شي ثاني غير وجودها و نظراتها إللي قربت تنرفزني ..
عادي اشل الغوري و افره عليها .. سمعت صوت الزجاج شي ينحط عدالي..
لفيت ع يميني كانت ايد ماسك بـ قلاص ماي يوم رفعت نظري خوفتني بـ نظرتها ..
عيون اتطالعني بـ حقد و سواد تحت عيونها و الويه اصفر كأن الدم انسحب منه ..
: اعوذ بالله منك يا ابليس .. وخري بعيد شكلج اييب الهم ..
: ابي اتكلم وياج ..
: عن شو تبين تتكلمين ..!!
: ع اللي قلتيه لي ..
دورت الكلام في راسي .. ابي تأكيد منها بس .. : شو اللي قلته لج .. ذكريني ..
يمكن اكون ناسية .. تدرين ذيج الأيام ما كنت بـ كامل وعيّ ..
: قلت لي انه العنزي بيي يذبحني ..
عطيتها نظره و صديت عنها ..: ما قلت هالكلام ..
: بلاا قلتي لي هالكلام و كنتِ واثقه من كلامج ..
: متى قلته بالضبط ..!! ذكريني .. !!
: يوم وليد يابج عندنا و حطج في حجرتكم .. حتى خل امل بس تقعد عندج ..
لفيت عليها و عطيتها نظرة " كملي " : كنت ساعتها قاعده في الصاله و صوتج وصل لي ..
دقايق اجوفج يايه عندي شكلج كان يخوف .. يوم تقربتي مني ع بالي اللي فيج هو اللي يتقرب مني ..
ويبي يدخل فيني و يسوي فيني مثل اللي يصير فيج .. يوم حضنتيني وقلتِ لي ذاك الكلام ..
ما عرفت بـ شو ارد عليج بـ وجود اخوي .. خفت يسمع كلامنا ..
: سلامات ..!! خفتي يسمع الكلام بس ما خفتي من اللي خلقج وانتي اتسوين هالشي ..!!
ما خفتي اموت وانا كل يوم اطلع الدم من جسمي ..!!
: انا ما يخصني .. انا بس ..
: انتي بس شو ..!! ساعدتي ..!! شو من قطعه خذيتيها من الحجره و عطيتيها للحرمه ..!!
تمت إتطالع تحت اتحرك عيونها يمين يسار .. يا انها تبي تتهرب و اتجذب يا اتعق الموضوع ع غيرها ..
رفعت لي رأسها مستغربه .. : شو دراج ..!! خذيت قطعة من عباتج ..
ضحكت بـ قهر ..: بعد عباتي .. زين شو استفدتي .. غير موت الحرمه طبعاً ..!!
فجأه القلاص يتكسر ع الأرض .. الأجزاء تتناثرت لـ قطع صغيره و كبيرة و تختفي في الماي ..
انا واقفه بدون صندل يغطيني او يحميني من دخول شظيه لـ ريولي (رجلي) وقفت مكاني ..
كنت اطالع الماي وهو يمشي من بين اصابع ريولي (رجلي) رفعت رأسي لها ..
: ألحين كسرتي القلاص جــ....
مسكتني من إيدي و بدأت تهزني بـ قو .. كانت تصرخ فيني بدون سبب ..
كنت احاول ما اتحرك .. : كيف عرفتي انها ماتت ..!! كيف وصلج خبر موتها ..
مسكت إيدها و نزلتها من ع كتفي ..: لا تلمسيني .. وجع .. شو هالنفسيه اللي فيج ..!!
رجعت مسكتني من كتوفي و هالمره غرست اظافرها .. بدأت تردني لـ ورا ..
حسيت إني دست ع شظيه .. غمضت عيني و فتحتها بـ ألم .. بعدها تردني لـ ورا
تحركني ناحية الغوري .. جفت ظهري وهو يتقرب من النار .. : وخري بـ تحرقيييني
"وليد" ليش طلع اسمه في بالي ما ادري
: هدييييييها ..
كنت احس بـ شي حار يقرب من ظهري .. : وخري عني ..
: خلها اتخبرني كيف درت بـ ان الحرمه ماتت .. عقب بهدها ..
اشم ريحة شي يحترق .. ريحة قطعه تحترق .. شي حار بدا يقرب من ظهري ..
بديت اشم ريحة جلد يحترق .. : هديني لا اوريج شغلج ألحين ..
: خبريـ...
شي حركها من جدامي و سحبني له و ع هالسحبه دست ع قطعة قزاز (الزجاج) حسيت بها كبيره ..
حسيت بـ شي ينسحب عن رأسي و شي يغطي ظهري .. فوق هاه شي ينغمس في ريلي (رجلي) ..
حسيت بـ إيد تربت ع ظهري بـ قو كأنها تمسح شي كان موجود عليه .. تغيرت و صارت هاديه ..
اللي كان يغطي ظهري انشال و حسيت بـ بروده ع حرق بسيط .. بس فيه ريحة شوّي ..
انسحبت بـ فعل فاعل .. لـ شي أبيض غطى ع نظري .. رفعت رأسي كان وليد ..
كان يجوفني ولون ويهه متغيير .. سحبني شوي لـ عنده بدون قصد دست ع المنطقه اللي اتعورني ..
مسكت كتفه و رصيت عليه ابي انبهه .. : صبر دست ع قزااز ..
كنت بمشي عادي وانا سانده نفسي عليه ورافعه ريلي اللي فيها القزاز ..
: وقفي ..
نزل بـ عمره و شلني .. : لالالا .. ولييد لا اتشييل .. انت ع اي شي تشيل ..
نزلني انا اروم اتحرك و امشي بدون هالتشييل .. سعاد كانت طايحه في نص مكان القلاص المتكسر ..
اشرت له ع كرسي في المطبخ ..: حطني ع الكرسي هناك .. سير جوف اختك يمكن طاحت ع القزاز بعد ..
عاطني نظره " مايهمني " .. : سير جوفها .. انا بطلع اللي بـ ريولي عادي .. هيه طاحت ع المكان ..
يمكن تتويع سير لها .. نزلت رأسي اطلع اللي في ريلي و منها يسير لها ..
عطر بدا يتقرب مني رفعت رأسي لقيتها امل .. : انتي بخير ..!!
: انا إبخير سيري جوفي اختج لا يصير عليها شي .. تأكدي انها بخير ..
و انتبهي من الأرض ترا الإقزاز تارِسْها ..
: امل .. اطلبي من فيصل يجهز السياره .. اختج تسبحت بالإقزاز ..
: ان شاء الله ..
لف ع البشكاره ..: جيبي شيوال و مخمه يلا نظفي هالـ قزاز بسرعه ..
شال سعاد بين إيديه و قرب صوبي .. نزل لي رأسه : شيلي الحمدانيه و غطي رأسج فيها ..
بحطها في السياره و بيي اشيلج ..
جفته بـ هدوء ..: أقدر اتحرك ..
: بهالظهر المكشووف ما تتحركين .. قرب رأسه من ويهي وحط يبهته ع يبهتي ..
ييت بـ وخر رأسي : لا اتوخرين عسب ما اطيح السبب في اللي انتي فيه ألحين ..
جف النذل يعق اخته عشاني .. فجيت حلجي ابي اتكلم .. قرب رأسه من خدي باسني ..
هو المفروض ما احس بـ هالشي و بوجود احد حولنا لكن صدق قلبي كان يرجف له ..
طالعني شوي بـ قهر ولف ع سعاد لمحت ويهها إللي دفنته في كتفه ..
رد لف علي .. : شوي و ارجع لج ..
حركة له رأسي بـ اوكي .. مشى من جدامي وانا احس بـ ضيق فـ صدري ..
غطيت رأسي بالحمدانيه ورجعت اطلع القزاز من ريولي .. حطيت القطعه ع الطاوله ..
طلعت الثانيه .. تأكدت مافي غيرهم ونزلت ريلي عادي .. انتبهت لـبقع دم كبيره عند الكرسي ..
وتمتد لـ برع المطبخ .. اشرت ع البشكاره اتييب الشيله اللي احترق نصها ..
حطيتها ع ظهري وهي ما اتغطي شي.. درت ع نفسي اسأل البشكاره اذا غطى ظهري ولا لا ..
من قالت هيه تحركت ع مكان سعاد وقفت بعيد شوي .. كان في دم بس مب ع مكانها ..
دم منو عيل ..!! مشيت ورا البقع وصلتني للباب الرئيسي ..
جفته يحط سعاد في السياره و يسكر الباب .. رد لـ ورا شي بقعه تحت ريله ..
وقفت منصدمه هو اللي يقطر و يمشي عادي .. ولا حد منتبه ع الدم اللي يظهر منه ..!!
اطالع يمين يسار ابي انادي حد .. حد يخبره انه هو اللي مجروح ..
هو اللي متعوور .. محد حوولي .. صرخت له ..: وليييييييد ..
لف علي .. : لا تمشي ع ريولك ..
: قلت لج لا تتحركين .. بدا يقرب مني .. : خبرتج لا تتحركين من مكانج ..
: قلت لك لا تمشي ع ريوولك .. لو دخلت القزازه داخل كيف بـ اتظهرها ..
جاف ريوله و لف وراه يجوف خطواته .. : هاه مني ..!!
: عيل مني طوف بسرعه داخل امشي ع اطراف اصابعك و اقعد ع الكنبه و مد ريوولك ..
قعد ع الكنبه و قبل ما يمدها انضرب بالطاوله ما اتعور ..!!
ناديت حد من البشااكير عسب اتيب ماي اسبيرتو قطن و منقاش (ملقط)..
دقايق و يابت الاغراض بديت انظف الجروح .. كنت امعصبه وانا اظهرهم من ريله ..
4 قطع في اليسار و 3 في اليمين ولا حس فيهم .. لفيت ع البشكاره : هاتي لزق جروح ..
بديت امسح بالسبيرتو شوي شوي ع الجروح .. : آآآخ ..
رفعت رأسي بسرعه .. : حرقتك ..!!
: لا انا اجوف لحم يطلع من تحت الشيله ..
: شو ..!! اي لحم ..!!
: ظهرج طالع وشكله حلو .. بس احمر شوي حطي عليه مال حرو... : آآآآآآآي
: قليل ادب .. هاه وانا احط لك دوا و فكرك بدا يروح يسااار .. علق بعد وبـ نشف دمك ..
ييت البشكاره تركض من بعيد ..: شنو فيه ..
: ما في شي هو في خوف من سبيرتو .. مديت ايدي لها ..: جيب لزقه ..
من عطتني تمت واقفه ع رأسي .. جفتها "شو عندج واقفه".. : مشكوره روحي المطبخ ..
تمت اتطالع فيني امبهته .. عقب حركة رأسها و مشت للمطبخ .. شوي و تدخل في ريوله ..
رجعت اكمل تنظيف الجرح .. عصبت عليه الغلس ناقصه لـ فصلتك ..
: ألحين ليش طردتيها كانت مستمتعه بالمنظر ..
ما شيلت عيني عن ريله ..: أناديها لك عسب اتكمل ..!!
: عادي ..!!
: هيه عادي .. دامك انت تبيها اتكون هنيه و تقعد اتطالع في ريلك الملحه ..
خلصت من التلزيق ضربت ريله و وقفت .. قعدت عداله اجوف جرح ريلي ..
: أرف .. خيسنا البيت كله دم .. هاه كله من قلاص مكسور .. لو متبرعين فيه احسن ..
مسحت الدم نظفت جرحي و لصقتها .. مالي خلق ازعج حد معاي ..
: قمنا الحجره .. ابي افهم منج شغله .. خليج واقفه جدامي ..
: حد في البيت ..!!
: امل موجوده في حجرتها .. حسن و فيصل ويا امي و سعاد .. العود و سلطان عند ابوي ..
يلاا قومي ابي اعرف الموضوع منج انتي ..
: اي موضوع ..!! يوم توقف اوقف شوي شوي و امشي ع راحتك ..
: بسوي اللي اتقولينه لو مشيتي جدامي بس ..
"هاه شو يخربط الحين ..!!" حركة رأسي و بديت انفض الأفكار ..: ما علينا يلاا مشينا ..

كنت امشي شوي شوي بس في شي يقول لي سرعي .. يوم اسرع بالخطوة يصرخ ويطلب اخفف ..
كنت استغرب من طلبه و اصلاً مستغربه من موضوع امشي جدامي ..
بديت امشي ع راحتي و افكر في سبب يخليه يصرخ غير انه يتويع و مافيه يمشي بسرعه ..
بس المفروض الحين انكون في الحجره مب بيننا و بين الحجره هالمسافه ..
حسيت بـ رجفه غريبه تسري ع كامل ظهري .. سحبت الشيله اغطي ..
شوي رفعت رأسي ولفيت ورا .. عيونه كانت تحت الهيييس .. : يا قليل الأدب ..
من الصبح افكر ليش امخليننا نمشي بـ هالبطء و الحجره جدااامنا.. مب من الويع من قلة الحيا ..
: ما كنت اجوف ..!!
: ما كنت اتجوف ..!! ليش انت وين كنت اتجوف ..!!
: هاه ..!! ولا شي ..
طالعته بـ غيض وقهر .. تقربت منه دسته ع ريوووله و عطيته شوته ..
: آآآآي والله حراام فوق القزاز احصل شووته ..
: ان شاء الله زود يا قليل الحيا .. خلك في الممر بروحك انا بسير داخل اغير ..
غطيت ظهري عدل ومشيت عنه .. كنت اسمعه وهو يأأن و يناديني ..
كنت برد له بس من تذكرت قلة أدبه كملت لـ داخل ..
طلعت لي مطاط تركوازي اكمامه قصيره وشيله بنفس اللون .. مشيت للحمام "انتوا بكرامه" ..
فجيت الباب لقيته ماسك باطن ريوله و يعصر ع عينه .. " برأيه " قلبي كان يبعث لي اشارات ..
شكله وهو قاعد بهالشكل يقهر قلبي .. " اوووف" سيرت قعدت عنده .. تبطل الجرح شوي ..
: قول آسف ..
: ما سويت شي ..
جفته في عينه ..: طالع عيوني و قول انك ما كنت اتجوف ظهري ..
: صد الصوب الثاني و رجع يطالع عيوني ..: ما كنت اطالع ..
: جذاب .. ارص عليها الحين !!
حط إيده جدامي .. : والله ما كنت اجوف ظهرج وانتي غصب تبين تتضاربين معاي ..
: عيل شو كنت اتجوف ..!!
: كنت اجوفج وانتي تعرين ولا ظهرج ما جفته .. ومايحتااي اجوفه ..
: شو تقصد ..!!
: يمكن احترق شوي شي دوا للحروق حطيه ع ظهرج .. رمسي امول خليها تحطه لج ..
: ليش مب انت ..!!
عطااني نظره .." مب ناقص لج انا ".. : يعني لو انا بـ يكون عادي اقول لج أبي حرمتي ..!!
: شو ياب هاه لـ هاه .. انت في شو وانا في شو ..!!!
: دوا احطه ع ظهر حرمتي المحروق شوي .. و اتقول لي شو ياب هاه لـ هاه ..
رفع رأسه للسقف .. : حد يرحم حالي يفهمها و يقول لها مع الشرح لـ حالتي الآن ..
لف علي ..: وداد قلت لج اني ابي حرمتي وابيها بـ رضاها .. انتي ما اتساعديني ..
إنتي اتزيديني ..اتخليني غصب اشتاق لج ما يكفي اني ساكت و قاعد ..
" أي ساكت وانت كل يوم ابي حرمتي " .. رفعت له حاجبي ..: ...
: ايوه ساكت إلا امساات .. ضرب ريوله بـ إيده مرتيين ..: آآخ بس آآخ ..
ما علينا من هالدوا اللي رفع ضغطي .. شو موضوعج ويا سعاد .. !!
: ماشي مواضيع ..!!
: ماشي مواضيع ..!! وانا قلت موضوع بس .. ابي اعرف شو المستوي من بينكم ..
عسب اتقربج هالكثر من النار وما اتفج .. ليش استخفت عليج ..!!
طالعت يمين و يسار افكر بـ رد .. عدلت قعدتي و صرت اطالع جدامي ..
: في حلم خبرتك يوم الريال و العنزي و الـ 3 حريم ..
: هيه شو فيه هالموضوع ..!!
: الـ 3 حريم .. اختك وصايل و الساحره .. الساحره ماتت و اختك تبي تعرف كيف عرفت ..
: قولي لها تبين تعرفين اسألي العنزي .. ما يبيلها ضرابه ..
: انا ما قربت منها .. هيه اللي ييت عندي .. هاجت علي كنت والله بـ فلعها بالغوري ..
: تسوينها وانتي خبله .. و إتظل اختي ..
: إتظل اختك و سويت لها طاف يوم جفتها بـ تحرقني ..!!
: ذيج الساعه ما كنت افكر .. ع كلامج سيرت لها وو ..
: جوف اختك متوهقه ويا وصايل دير بالك عليها لا يصير فيها شي من تحت رأس هذيج ..
ولا اتخبر بالسبب عسب لا يعاملونها بالشين .. انت جوف شو الموضوع وسكره ..
: ليش مهتمه يعني كيف بـ يعاملونها ..!!
: لأننا من نفس العياله .. المعامله الشينه و النكران طبع من طبايعنا .. انت لا تتطبع فيه ..
بـ اتصير مثلهم .. بـ تتعامل معاها مثل ما هم عاملوني .. انسى كل شي و سرحني ..
عطاني نظره قرب ويهه من ويهي .. رد ورا ووجهه نظره لـ جدام .. : شو تتوقعين صاير ..!!
: مب عالمة غيب .. اقعد وياها و اعرف شو صار .. شو مايكون السبب لا اتمد إيديك ..
بـ اتصل ع امل بـ خليها اتييب لي مرهم حروق ..
قمت من عداله و سيرت اكلم امول .. دقايق كانت عند الباب عطتني الدوا و سارت حجرتها ..
كان ساند نفسه ع الكرفايه في مكانه .. انظاره امعلقه علي متى ما خطيت حرك عيونه ..
يقدم نفسه شوي و يرجع مكانه عادي .. كنت اجوف كل حركه يسويها وقلبي يطرش لي رعشات ..
لـ ما وقفت جدامه هديت شوي لكن قلبي ما هدا..مديت له الدوا ..: حطه ع الحرقه ..
: امل كانت واقفه ع الباب .. ليش ما طلبتي منها ..
جفته بـ برود ..: قالت لي " خلي ريلج يحطه لج .. لا اشتغل خداما عند ابيكِ "
إنت اتخلي هالنتفه تتحرش فيني و تتطاول علي بسبب طلباتك الغريبه ..
المفروض انت تسويها لي مب غيرك ..
: زين انا لو سويتها برجع اقول ابي حرمتي ..
: وليد واللي يرحم والديك .. حط لي الدوا .. لبست مطاط عسب تقدر تدهن ظهري عادي ..
مسك إيدي و قربني منه .. حاوط ظهري و حرك إيده ع مكان .. حرقني و عورني وايد ..
جفته بـ ويع .. كان يجوفني منقهر بس ابتسم في ويهي ما يبي يقول لي شي يقهره ..
: حرقتج في مكان غلط .. دام امل ما تقدر انا بعد ما اقدر ..
: انت مخك فيه قلة الأدب بس .. ما فيه احط دوا لله و اخفف الويع ..
: ترا قلة ادبي ع حرمتي بس ما طلعتها ع غيرها .. واللي بسويه بيطلع قلة الأدب ..
مديت إيدي ع كتوفه .. : يعني كيف ألحين اتم جيه متويعه من الحرق ..!!
: لا حطيه بـ نفسج ..
: كيف بجوفه يعني ..!!
خوز إيده عن ظهري .. و بدا يمثل طريقة الدهن و الفرك و الحط و يقول لي ابي حرمتي ..
: عادي .. مدي ايدج .. حطي الدوا و يلاا دهني كل ظهرج ..
: هات بس هات .. شليت الدوا و سيرت للحمام " انتوا بكرامه " سكرت الباب ..
قال بـ صوت عالي ..: لا تنسين توزيعينه اوكي ..
فتحت الباب .. : بوزع الويع في كامل ريوولك بس اخلص وبـ اتجووف ..

عقب 5 ساعات في المستشفى .. ردت عمتي معاها سعاد كانت تمشي عادي مافيها شي ..

وقفت عند امل .. رفعت لي رأسها و حركة لي حواجبه " بـ شو" حركة رأسي " ولا شي"
عقبها تمت تطالع بـ اختها بس بهدوء عمرها ما كانت فيه مب بـ هالهدوء ..
العاده لو حد تعبان اتسير اتضحكه وعقب تسكت لكن هاي اختها ليش ما اتضحكها ..
حركة رأسها لليمين ماتبي اتطالع سعاد .. مسكتها من كم إيدها .. طالعتني مستغربه ..
حركة لها رأسي بـ " روحي لها " .. حطت إيدها ع ايدي .. ربتت عليها شوي شوي ..
كأنها اتقول " يصير خير " .. : الحمدالله ع سلاامتج سعاد ..
طالعتني و ردت اتطالع تحت بدون ما اترد ..: قالت لج الحمدالله ع سلامتج .. صمخى ..!!
رصيت ع ايدها اوقفها .. قلت لها بـ صوت واطي .. : لا تبدين بالمشاكل ..
طالعتني بـ عصبية ..: كانت بـ تحرقج ..
: ما احترقت اخوج كان موجود .. هيه طاحت ع القزاز و دخل في جسمها ..
انا مب عاقله ولا ادعي اني اوكي .. بس اجوف وضعها اصعب من وضعي ..
: كنت بـ تحترقين و السبب هيه ..
: طبي الموضوع بدون مشاكل .. مابي مشاكل ع شي ما يسوى ..
: انتي ما بتتغيرين لا ألحين ولا بعدين .. لفت ع سعاد ..: الحمدالله ع سلامتج ..
هدتني و مشت للممر .. كنت اجوف ظهرها لـ ما اختفت .. صديت صوب عمتي ..
: السموحه منج عمتي .. بقوم لـ حجرتي .. و مره ثانيه الحمدالله ع سلامتج سعاد ..
: الله يسلمج ..
أخيراً تكلمت .. مشيت عنهم وانا اعّري ( أعرج) شوي .. كنت احس بـ ألم ..
ألم الجرح في ريولي و ألم الحرق في ظهري .. اللبس كل ماله يلصق فيه من اسحبه يسحب معاه الحرق ..
فجيت باب الحجره وييت بدخل .. وقفتني امل كانت تمشي بسرعه .. وراها شي ..
كم خطوة و صارت عندي ..: شو فيج ..!! ليش تركضين .. !!
: وليد في الحجره ولا برع الحجره ..!!
: والله انا ظهرت و هو فيها .. بجوف لج لو موجود او لا ..
دخلت و دخلت وراي الخبله .. لفيت عليها ..: ما قلت بجوف و اخبرج ليش دخلتي ..!
: مب وقتج .. ابيج في موضوع ..!!
: يخص سعاد .. !!
حركة رأسها بـ هيه .. جفتها تحرك حلجها تبي اتقول لي شي .. اشرت لها بالسبابه بـ لا ..
: ليش ..!!
: انا بنت عمج هيه لكن هالموضوع عن اختج ..
: اذا ما قلت لج اقول لـ منو ..!!
جفت وراي مكانه فاضي لكن باب الحمام " انتوا بكرامه " امسكر .. : يوم يظهر اخوج كلميه ..
لفت بندت الباب و رجعت لي .. : البنت لقيت عندها صور وهو قاعده مع واحد مب ريلها ..
أخوي بـ يذبحها .. حتى لو وليد بـ يذبحها ..
: قلت لج لا اتخبريني و انتي خبله غصب اتخبريني ..
: لأنج انتي اتقولين شغلات انا عمري ما سويتها ولا فكرت فيها .. اخوي ع طول يضرب ..
طلعت تنهيده .. فوضت امري لله .. : كلمتيها ..!!
: لا ما جفتيني كيف اطالعها بـ حقد الـ..
: امسكي لسانج يمكن امسوين فيها مقلب و هاي حركات قديمه ..
انتي ادرى بـ هالحركات من ايام الكلية .. هذيج ما سلمتي منها لـ ما انا تدخلت و لعنت خيرها ..
انطردت من عقبها ما جفنا رقعت ويهها في المكان لـ ما اتخرجنا ..
: جفتي قلت لج انتي اتقولين شغلاات انا عمري ما سويتها ولا فكرت فيها ..
: شو اللي ما سويتيه ولا فكرتي فيه ..!!
ظهر من الحمام و هو ينشف شعره .. تقرب مني ..: ابي لزق جروح ايديده (جديده)..
اللي في ريولي تِخّرسن ماي (امتلوا بالماي) .. لف ع امل طلعي برع ابي اتلبس ..
غمضت عينها وقفت حركتها .. : بـ غمض عيوني وانت تلبس مابا اغش صدقني ..
: استحي ع ويهج و اطلعي ..
: عندي لك حل ثاني شل ملابسك و ارجع من وين ما ييت .. تلبس و اظهر ..
: حجرتنا و تتشرطين ..!! يلا برع ..
: ممكن تهدون شوي .. اووف كلما اجتمعتوا تتناقروون ..!!
: علميها .. حجرتنا واتقول لي شو اللي لازم اسويه ..
جفته بـ غيض ..: تراك بتظهر ملابسك و بترجع تلبسه في الحمام"انتوا بكرامه" ليش اتضااارب ..!!
طالعني بـ زعل ..: إنتي ليش كله علي و معاها .. !! انا بعلج ..
: وييييع ياشين السرج ع البقر .. يابوي بطلع تلبس بسرعه ابي اكلم حرمتك ..
طلعت بدون ما تسمع رده .. " استغفر الله " : انت شو عندك وياها ..!! تراها اختك ..
مشى عني للكبت ظهر له ملابس و مشى ساير يلبس في الحمام " انتوا بكرامه" ..
: اختي مب معناته تسرق انتباه حرمتي و تحرق كرتي عندها .. و بـ اتضارب وياها غصب ..
ازعاج و صداع قسما بالله ..: أمل ادخلي ..
صوته من داخل ..: لا تدخلين محد يبيج ..
: ياخي تلبس و فكنا من شرك بس .. خلنا انسولف شوي ..
: يصير خييير ..
لفت علي بسرعه ..: قبل ما يظهر هالـ لزقه .. شو اسوي في الموضوع ..
اشرت ع باب الحمام " انتوا بكرامه "..: يظهر اتخبرينه
: بـ يذبحها ..
انفج قفل الباب و اول كلمه طلعت ..: من بـ يذبح من ..!!
جافتني بـ زعل و خوف .. مسكت إيدها وقربتهم من قلبها .. : خبريه و ما عليج ..
: بس .. لفت ع وليد .. : بخبرك بس تحلف تتفهم و عقب تسوي اللي تبيه ..
كنت ادقق ع ملامحه كيف انقلبت من مزح لـ جدية لـ عصبية خفيفه .. : شو المستوي ..
: اقعد عسب اخبرك .. و تتفهم الموضوع بدون عصبية ..
حتى في هالشي بـ يتناقرون .. لفيت وراي انا بقعد ظهري يعورني و ريولي توون علي ..
فجيت الشيله و اتعمدت افج شعري و ارجع ارفعه شوي شوي .. سرحت بـ افكاري ..
اني اخليه يقعد عدالي يسوي اي شي إلا انه يعصب و يروح يسوي مشاكل ..
رجعت نزلت شعري و هالمره رفعته بسوي بان كيك و بنزل كم خصله ..
: انتي قاعده اتسوين اغراءات لـ رييلج ولا شو الموضوع ..!!
دخلت الـPin رفعت عيوني لها ع اني مب فاهمه عليها .. : شو ..!!
: ممكن اتودرين شعرج شوي .. ابيه يركز معاي ..
اشرت ع نفسي ..: انا شو يخصني ..!!
: لا اتسوين لي فيــ..
خطف من عدالها و يا قعد عدالي طالعني بـ غيض و رجع يطالع في امل .. : جفتي مايخصني ..
ممكن اعدل شعري باقي اثنين ..
طالعتني بـ نص عين ..: كملي كملي .. لفت ع وليد .. : اتكلم ألحين ولا كيف ..!!
ركز نظره عليها و انا اعرف انه باله عندي .. : كملي ..
طلعت تنهيده ..: سعاد صار لها فترة تطلب من امي انها اتكنسل الملجه ..
وامي رافضه هالشي .. حالها تغير وصارت ما اتنام وكله امعصبه ..
كان امركز عليها مايبي يجوفني .. وانا اجوف الإيد اللي كل شوي تبي اتسوي شي ..
: توي كنت اخبرها .. اشرت علي .. : ع موضوع صور لقيتهم في حجرة سعاد ..
هنيه ركزت نظري ع ايد وليد .. كورها ع شكل قبضه .. : زين ..!!
رفعت رأسي لـ امل كانت اتطالعني بـ خوف ..: الصور فيها سعاد و ريال غريب ..
كان بـ يوقف مسكته من ايده .. : ما خلصت الكلام اقعد كمل الباقي ..
طالعني بـ غيض و لف ع امل ..: كملي ..
: الصوره اتقول انه بينهم شي لكن حرمتك قالت يمكن يكون مقلب ..
طالعني ..: كيف مقلب ..
: تذكر يوم الكلية وحده كانت تصورني و اتطرشها لـ اربيعها وطرشت لك ..!
يومها انت دخلت البيت و ضربتني .. منعتني من روحة الكليه عسب هالموضوع ..
عقب هاي الخبله تدخلت و حلتها لي .. !!
: هيه اذكر هالشي .. شو يخصه ..!!
: صبري امل .. موضوع امل ان البنت تهدد البنات و تباهم يصيرون مثلها ..
وانا سيرت اشتكيت عليها انفصلت من الأكاديمية بشكل تام .. موضوعها منتهي ..
اختك سعاد يمكن امسوين لها نفس الموضوع و من طرف بنت خالتكم يلا حلوا الموضوع ..
قرب مني .. : انتي كل مره يصير شي تتدخلين فيه ..
طلعت تنهيده .. جفت يساري ..: انا قلت لـ اختك ما اتدخلني .. بس انت تدري فيني ..
رجعت اجوفه .. : ويهي لوح و اتدخل في اشياء تربشني .. بتتفاهم وياها و تعرف منها كل شي ..
بدون ضرب و صريخ و غيره .. امل سكت عنك ومررتها لك .. لا اتعيد الغلط مرتين ..
جافني بـ عصبية ومسكني من إيدي .. كنت اجوفه عادي ..: اعتبر هالكلام تهديد ..!!
: أعتبره بالطريقه اللي تعجبك .. بـ اتمد ايديك ع اختك بـ نرجع للصفر ..
: امل طلعي برع ..
: لا يكون بتضرب حرمتك ..!!
: طلعي ولا تتدخلين ..
: مـ...
: لا اتحاتين اعرف شو يبي فـ طلعي عادي ..
وقفت شوي اتطالع فينا وتحركت صوب الباب .. انا اعرف شو اتجوف الحين ..
اثنين قربوا يتضاربون .. اما اللي احس فيه ايد ترتجف و ترتفع لـ كتوفي و تتمسك فيني ..
حرك إيده رفعهم لـ رقبتي وقربني منه .. دفن رأسه في رقبتي : اكره هالثقه اللي فيج ..
ترفعين ضغطي يوم اتكونين فاهمه الموضوع من وجهة نظرج ..
تقهريني يوم تعرفين كل نقط ضعفي .. اتعصبيني يوم تستغلينها لـ صالحج ..
اختي لها حبيب و تبيني اسكت ولا اسوي شي .. تبيني انطم ولا اقول شي ..
عسب تطيح في الغلط اللي انا غلطته و ينعاد علينا الهم .. نقعد في نفس الدوامه ..
وتتكرر علينا مره مرتين ثلاث و عشرين لـ ما اقول بس .. رفع رأسه ..: تبيني انطم ..!!
حركة له رأسي بـ لا ..: سير دور ع السبب لا تظلم و اتزيد حالتك ..
دفن رأسه .. فجأه رفع رأسه ..: ع شرط ..
حركة رأسي بـ شو ..: شو شرطك ..!!
: اخذ حرمتي ..
: برع وليد ..
: وافقي زين ..
: ولييد برع ..
: ألحين شو قلت انا ..
صرخت ..: امل تعالي خذي اخوج لا ارتكب فيه جريمه ..
قرب مني شوي .. : ابي حر..
امل فجت الباب .. جافتني امعصبه عليه ..: خير بلااج اتصارخين ..
أشرت ع وليد و نظري ما خاز عنها ..: خذي اخوج معاج .. لفيت عليه ..: يلا برع ..
قربت من وليد و سندت إيدها ع كتفه ..: اقول الأخو ..
كان يطالعني .. "اختك في موضوع صعب وانت في شي سخيف" ..: هممممم ..
: بلااها الحرمه امعصبه ..
كان يجوفني بـ نظره .. قربت تذوبني .. : قلت لها ابي حرمتي ..
وخرت عنه و بعدت عنه بعيد ..: والله انك ما تستحي .. احنا في شو وانت في شو ..
قم برع قم ..
مشت عنه لـ برع الحجره وهو بعده واقف ..: برع وليد ..
: إرحمي قلبي و قول لي عطيتك ..
اشرت ع الباب .. : مابا اعطيك شي .. برع .. بسرعه برع ..
لف صوب الباب ..: والله حرام الله ما يرضى بـ هالظلم .. ابي حرمتي انا ..
كان بيظهر بدون ما يسكر الباب وراه ..: وسكر الباب وراك لو سمحت ..
لف علي بعده يطالعني بزعل " صدق ما عنده سالفه" : ابي حرمتي انا ..
أشرت ع الباب ..: برع وليد .. برررع
طلع و سكر الباب وراه .. من الصوب الثاني قلبي ما وقف عن الرجف ..

التكمله ع يوم الجمعه او السبت ..
دمتــم بـــود ..
دمــع العيـــن

كاردينيا الغوازي · 31-12-14, 09:10 PM

اسفة جدا النت عملها معي وانا بدخل فقط من الموبايل

اكيد فيه تطور واضح بعلاقة وليد ووداد

المسألة تجي بشكل غير مباشر

مثل ما قلت سابقا

ضروري يتواجدون بمحيط ناس مقربين وفي هذه الحالة عائلته

الاندماج معهم بمشاكلهم وفرحهم والعيش بقصصهم حيخلي وداد تخرج شوي شوي من اخر دوائر الظلمة الي تفصلها عن وليد

وداد تغار عليه

وداد تقلق عليه وتعالج جرح رجله بنفسها

وداد تتصرف كزوجة وهي توصيه بالهدوء والعقل بالتعامل مع موضوع اخته

وداد تغريه ولو لاجل موضوع اخته بس المهم هي صارت عندها الثقة حتى تعملها

اما وليد فالله يعينه

اكيد وهو يشوف هذه الاشارات منها تزيد لوعته وهو اصلا متولع فيها

المسألة تطورت عنده من أبي حرمتي ل آخذ حرمتي ههههههههههههههه

المهم برضاها يا وليد اهم شي برضاها يا صبووووووور

متت ضحك على تصرفاته باخر الفصل مثل الجهال رجع (أبي حرمتي والله)

مستمتعة بكل الاجواء العائلية منها وال(وليدية) هههههههههه

عاشت الايادي

•~بِوُحّ أُلأعًم?أُق~• · 31-12-14, 10:50 PM

أخ ..اخ ..يا وليد ... حالتك ما تسر قريب او بعيد

خخخخخخخخخ ذالك في صالحي على اي حال

لقد أستجبتي لمطالبنا اخيرا لبعض الأكشن

لمسألة تطورت عنده من أبي حرمتي ل آخذ حرمتي ههههههههههههههه

المهم برضاها يا وليد اهم شي برضاها يا صبووووووور

عاد ما اوصيك خذ بنصيحه كاردينيا وبلا أبي حرمتي بلا خرابيط لا تروح في داهيه

ألحين

هبة · 01-01-15, 05:24 AM

تطورات وليد باشا والله تطورات قال آخذ حرمتى

حرمت عليك عيشتك

لهلأ و رغم كل شيئ عن يقدمه و كل تصرفاته الرائعة مش قادرة أنسى منظره و هو بيغتصب وداد ... هو حتى إلى الآن ما إعتذر كأن اللى عمله حقه ... هو بيصلى يعنى أكيد بيعرف شو معنى كبيرة من الكبائر واللى عمله بيعتبر كبيرة و فعل يهز عرش الرحمن و لا كل هاد ما له معنى عنده ؟؟؟

وداد ... أن تنشغلى يمشاكل الآخرين يشغلك عن همك و مشاكلك و لكنى أستغرب من طيبتك مع سعاد رغم يقينك بكون لها ضلع فى سحرك و كونك دافعتى عنها أمام وليد يجعلنى أفكر بكون كل ما مر بك علمك ألا تأخذى الأمور بظاهرها بل أن تبحثى عما خلفها لأن الأمور ببواطنها لا بمظاهرها ... ربى معك

دمع متابعاكى و شكراص لك

مورا اسامة · 01-01-15, 05:25 AM

هههههههه وليد علق علي ابي حرمتى

تقوله اطلع بره يرجع يقول ابي حرمتى

الراجل نسي مصيبته اخته الِ عايزه تتحل ومش فاكر غير (ابي حرمتى)!

فقد عقله تماما ومش متذكر غير حرمته ههههههههه الله يعينه

تسلم الايادى واشفقى على الشاب الِ مخه ضرب يادمع واعطيه حرمته ههههههه

كاردينيا الغوازي · 01-01-15, 11:56 AM

تعرفي هبة مسألة الاعتذار من وداد صعب تكون بالكلام احيانا الخطأ يكون كبير جدا بحيث الانسان يحس كلمة الاعتذار تخجله من نفسه ان يقولها

بس انا اشوف وليد اعتذر بكل فعل مع وداد وابدى الندم بكل تصرف نحوها

بس الي اريد واتمنى يتوضح هو استغفاره لربه لان الي عمله مثل ما قلتي يهتز له عرش الرحمن

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري