حكايات مرعي الدون جوان ف شهر رمضان ... مكتملة - الصفحة 10

لـوريــن · 17-09-09, 01:21 PM

أنا إحساسي زي إحساس البت علية ..

دا انا تحمست خالص ..

عايزة اعرف شكلها هيطلع ازاي ..

هبة · 17-09-09, 06:30 PM

والله يا مى مى أنا حاسة مثل خواتك و لورين إنك هتأكل مقلب مرتب

:icon_smil e_rotating... >>> بتذكر لما كلمتك أم صوت حنين أول مرة و قلتلك بلاش تتأمل كثير

... بس مش عارفة ليه حاسة أن خواتك ليهم دور فى قصة أم صوت حنين :41::41::41:

زاهرة رائعة جداً اليوميات ربى لا يحرمنا منك و لا منها...

زاهرة متابعاكى و شكراً لك

زاهره · 18-09-09, 09:31 AM

اقتباس:

المشاركة الأصلية كتبت بواسطة لـوريــن

أنا إحساسي زي إحساس البت علية ..

دا انا تحمست خالص ..

عايزة اعرف شكلها هيطلع ازاي ..

لورين حبيبتي
منوووره

و حاضر ما رح أتاخر عليكم
معلش إمبارح كنت تعبانه و معرفتش انزل حلقه بالليل

زاهره · 18-09-09, 09:33 AM

اقتباس:

المشاركة الأصلية كتبت بواسطة هبة

والله يا مى مى أنا حاسة مثل خواتك و لورين إنك هتأكل مقلب مرتب

:icon_smil e_rotating... >>> بتذكر لما كلمتك أم صوت حنين أول مرة و قلتلك بلاش تتأمل كثير

... بس مش عارفة ليه حاسة أن خواتك ليهم دور فى قصة أم صوت حنين :41::41::41:

زاهرة رائعة جداً اليوميات ربى لا يحرمنا منك و لا منها...

زاهرة متابعاكى و شكراً لك

إلهي ما أنحرم منك و من طلتك الحلوه

فيييييييييينك يا بنوته مختفيه من حلقتين
تقلان علينا لييييييييه يا جميل؟؟؟

زاهره · 18-09-09, 09:35 AM

اليوم الــ26
المقابله المنتظرة و المقلب المعتبر
النص الأولاني من اليوم (قبل الفطار) كان غير معروف المعالم... كان كل تفكيري مركز على اللقاء المنتظر... اخيرا هقابل المعجبه المدلهه بهوايا (جامده المدلهه دي مش كده؟)...هتشوف مي مي الدون جوان...اسطورة الحب...الفرعون الصغير مالك قلوب الكليوبترات المراهقات.
بعد الفطار لبست و اتشيكت...ضربت تي شيرت بيج عليه صورة جمجمه شاعريه جدا و بنطلون جينز و غرقت نفسي برفان لما تحيّه شمته قالتلي بنرفزه( دي ممكن تستدل عليك من ريحتك).
نزلت من البيت و أنا بغني تليفوني رن آآآه آآآه... بس رجعت سكت على قولة البت تحيّه الاغنيه دي آخرتها من تمام لما أمشي ساكت... تليفوني رن... لا لا أنا مش بغني ده تليفوني اللي رن:
- الو.
- مي مي... عامل إيه يلا؟
- تمام.
- مالك غطسان بقالك يومين؟
- مفيش... ظروف عائليه.
- طب مش هشوفك النهرده؟
- ألو...ألوووو...أ....أ...عدوي... الشبـــ...كه...وحشه... الووو... إنــ...ـت سامعني... ألو...
قفلت السكه و قفلت الموبايل... أنا عارف إنها حركة نداله مني بس اعمل ايه و رايا مهمه لازم أخلص منها.
*******************
كنت داخل اتنطط زي الأهبل...تقولش عيل في أولى ابتدائي طالع أول رحلة تبع المدرسة و فجأة هوووووووب اتكفيت على وشي... قمت أنفض هدومي و انا ف نص الكلوزس بتاعتي و بصيت على الناس اللي قاعده جنب حمام السباحه...برقت... فنجلت... مفيش فايده اللي شفته فعلا صح...كنت عاوز اعيط... بجد كنت عاوز اعيط.
كملت الاغنيه بحرقه...تليفوني رن آآه آآه ترررن تررن و اللي ردت آهر يا عيني صوتها أحن... بصراحه بقيت مش على بعضي و صحابي خدوني و رحتلها لقيتها شبه واحد صاحبي... شبه واحد صحبي ايه بس؟...ده حتى العدوي اللي وشه شبه قفاه لو دخل معاها ف مسابقه جمال هياخد مس كونجنياليتي... و لا ايه اللي ف وشها ده؟؟؟ ياختييييييييييييييييييييي ييي ده طلع بق.... و لا الكلكيعه... يالهوووووووووووووووي دي مناخير... لقيتها بتتلفت نحيتي و فتحت فتحة الفرن اللي ف وشها (في مكان البُق عندنا)...دي بتبصلي...بصيت للتي شيرت كنت هقولها أنا مش لابس احمر... انا مش مي مي... مسكت موبايلها و طلبت رقم...بصيت برعب للموبايل بتاعي و بعدين اتنهدت براحه...الحمد لله إني قفلته... لازم أفتكر لما أشوف العدوي آخد بالأحضان و البوس... فعلا صديق حقيقي.
اديت ضهري للترعه قبل البلهاريسيا ف جتتي ما ترعى... ترعة ايه بس...اديت ضهري لحمام السباحه و يا فكيك... شافتني البت ياسمينا و باعلى صوت:
- مييييييييييي ميييييييييييييييي.
نفضتلها و جريييييييييييييت موقفتش إلا و انا في اوضتي و قافل الباب بالمفتاح و الترباس... على فكرة أنا غبي غبي... بس نجيت باعجوبه... البنت كانت عارفه شكلي مش هيه شافتني في عيد الميلاد يعني عارفه شكلي بس الظاهر إنها بالإضافه لمميزاتها كانت عوره او حتى عاميه ده المسافه بينا كانت مفيش...يادوب تلاته متر.
أما كان حتتة مقلب... طبعاً عاهدت نفسي إني مقولش لتحيّه عاللي حصل بس كنت هطرشق لو مفضفضتش و في الآخر اقتحمت اوضة فتحيه و أنا بصرخ:
- إزاي يا عالم صوت زي اللي سمعته يكون للخلقه اللي انا شفتها دي.
بعد لما وصفتلها أمنا الغوله استحملت جزاءاً ليا ربع ساعه من الضحك و ربع ساعه تانيه من التريقه و ربع ياعه تالته من الكلام اللي من نوع ( مش قلتلك... علشان تبقى تسمع كلامي....) و غيره من الكلام اللي يفوّر الدم.. و لا كله كوم و رقيّه المفعوصه كوم لما قالتلي:
- هربت منك دي يا دون جوان.
آه منكم يا أوباش...بس اقول ايه أنا اللي عملته ف نفسي...كويس ان المقلب جه على قد كده.

اشوفكم بكره
مش قادر أتصور لو كنت لبست القميص الأحمر و كانت لمحتني من بعيد كان ايه اللي حصل... الحمد لله العواقب جت سليمه و لو كلمتني تاني هقولها.... احترمي نفسك أنا مش بتاع بنات... و لا ايه رأيكم؟؟؟

لـوريــن · 18-09-09, 04:50 PM

أول حاجة .. سلاااااامتك ياعسل ..

تاني حاجه ..

ياحراام ياميمي ..

دي راااحت عليك ..

بس يلاا عشان ماتعملهاش تاني ..:d

بس حلوة مش بتاع بنات.. ايه اللي ناكبك غير البنات .. :d

تسلمي يازاهره على هاليوم ..

زاهره · 19-09-09, 09:02 AM

مشكوره يا حبيبتي على مرورك و ردك السكر

زاهره · 19-09-09, 10:11 AM

اليوم الــ27
رحلة رمضانية

اتصل العدوي بيا و قالي إنه حجزلي معاهم في الرحلة اللي طالعة القاهرة... طب أعمل إيه دلوقتي؟ مش عارف لو قلت لنوجه هتكون ردة فعلها إيه؟
أحسن حاجه أقولها و هيه واقفه مشغوله ف المطبخ:
- نوووووووجه.
- ايوه يا مي مي أنا هنا ف المطبخ.
كده كويس لما أتأكد إن محدش من الشياطين الثلاثة موجودين... كله مرزوع ف اوضته...كده اشطه:
- ماما.
و هيه بتقطع بصل و منهمكه و مدمعه و مبربر.... احم احم بلاش الكلمه الأخيره دي:
- ايوه يا حبيبي.
- أنا مش هفطر النهرده معاكم.
- ليه؟
- هفطر مع اصحابي ف الحسين.
- ماشي.
اتلفت و لسه همشي:
- فين؟
الظاهر إنها مكانتش مشغوله بما فيه الكفايه و ركزت في الكلمه:
- ف الحسين يا ماما.
بعد جدال قصير من بتوع ماما اقتنعت:
- معلش بقه يا ماما... إنتي عارفه بابا مرضاش يطلعني رحلة السنه اللي فاتت خالص.
بتردد:
- ماشي يا مي مي...طب هتمشي امته؟
- قبل الفطار بتلت ساعات.
- طب استنى لما أجيبلك فلوس.
يا سلاااام على الأم و حنية الأم لو كان بابا ف الموقف ده كان إداني خرزانتين على جنابي و قالي اتنيل افطر ف البيت بلا حسين بلا حسن.

****************************

في الاتوبيس تفاجأت إن كل الموجودين صبيان بصيت للعدوي اللي فهمها و هيه طايره:
- جرى ايه يا عم؟ مين ناس هيخلوا بنتهم تطلع رحله ف رمضان؟
كبّو:
- يا سلام عليك يا عم الدون جوان... مش كنت رافض مبدأ الرحلة ف رمضان أصلاً؟
- كريم:
- امال بتسأل على البنات ليه يا مفتري؟
إيه الهجوم ده كله:
- خلااااااااص... في ايه؟ مكانتش كلمه... كلمة ايه هوه انا فتحت بقي... مكانتش بصه.
في الرحلات العاديه بنقضيها غنا و طبل و هيصه طب احنا ف رمضان هنقضي السكه ابتهالات و اناشيد و لا ايه؟ أنا زهقان.
ميلت على سواق الباص:
- في مايك عندك؟
- ايوه.
- طب ممكن تفتحهولي.
ناولي الميكرفون و فتحته، عملت إختبارات الصوت:
- هلا سيت سيت... هلا... واحد إتنين تلاته... هلا سيت سيت.
السواق:
- خلاص يا ابني اهو شغال.
- يلا يا جماعه كله يبصلي هنا قدام... بالصلى عالنبي كده احنا قدامنا ساعتين طوال عراض في السكه عاوزين نقضيهم خفاف لطاف.
واحد ظريف:
- ده هيبعلنا خضار و لا إيه؟
- لا يا روح مامي...دي خالتك اللي هتبيع خضار...ركزوا معايا...
كملت كلام و لمحت العدوي و كبّو بيطبطبوا عليه علشان ميزعلش و يقوم يتخانق... ما هوه محدش قاله يستظرف:
- مبدئيا كده يا حلوين... في شاب جميل هيلف عليكم بكيس كل واحد يحط فيه جنيه و نص.
صوت جماعي:
- بتوع إيه إن شاء الله؟
- دخان عم مدبولي.
ميلت على السواق:
- مش اسمك عم مدبولي؟
ابتسم:
- بدام فيها دخان امشيها عم مدبولي.
- بس ابو قسم يا عم مدمد.
ضحك:
- ابو قسم يا عم النصاب.
فضلنا ساعة و نص نلعب فقرات راااااائعه بين الفوازير و الحزازير و النكت و دفع الغرامات و الدمغات لغاية لما وقف واحد:
- ف عرضك كفايه كده.
- لييييييه؟ انتم مش مستمتعين؟
واحد تاني بتوسل:
- و الله مستمتعين بس جيوبنا خلاص هتشطب و مش هنلاقي نصرف.
طبطبت على جيبي المنفوخ:
- خلاص... براحتكم أساسا معدش على وصولنا إلا نص ساعه.
قعدت في مكاني أعد فلوس الغنيمه، العدوي قعد جنبي فدسيت الفلوس ف جيبي:
- عاوز ايه يا عدوي؟
- يا مفتري يا ابن المفتريه....
- احترم نفسك.
- و لا تزعل يا مفتري يا ابن المفتري...
- ايوه كده... كمل كنت هتقول ايه؟
- بقه تعمل فيها هتلعبهم و تنفضهم.
- ابعد عني يا عدوي... القانون لا يحمي المغفلين.
- مغفلين مين دول لما يفوقوا يقطعوك.
- يقطعوا مين يابا ده أنا أخلي عم مدبولي ميروحهمش...هنرميهم ف اي حته و نروح احنا.
- و ميييييييين عم مدبولي ده؟ السواق اسمه مصطفى.
- هوه موافق... عم مدبوووووووولي.
السواق:
- ايوه يا حبيبي.
العدوي فتح عينيه على آخرهم و ضرب كف على كف:
- انا قايم من جنبك أحسن اتلسع و على آخر الرحله يبقى اسمي سنيه.
مسكت ايده:
- سوووووونه سايباني و رايحه على فين؟
نفض ايدي:
- بس يلا اتلم.

***************************

فطرنا عالواقف ف الحسين و بعدين تفرقنا بس بعد لما اتفقنا نتقابل تاني ف الحسين على السحور... أخدت العدوي و كبّو و إنطلقنا... مفيش داعي بقه للتفاصيل اللي ملهاش لازمه أنا هقول المهم و خلاص علشان تعبت من الحكي... و المهم هوه إن بقه عندي حصيلة من أرقام الموبايلات لا بأس بها (ههه حلوه ياد يا مي مي لا بأس بها دي)، بس بنات القاهره ايه؟... بساكيت يا ناس بساكيت... و آل إيه بنات المنصوره أحلى بنات... معتقدش... الرحله دي غيرت إعتقادي خالص مش عارف مين هيكونله نفس يرجع لبنات المنصوره بعد النهرده.
على السحور أغلب الناس كانت مشطبه فلوس علشان كده رحت اتسحرت أنا و العدوي و كبو و كريم و علي على حسابي في مطعم مزنوق مش متشاف كده:
- ابقوا افتكروا الجمايل دي يا حوش.
على:
- آل يعني من جيبك يلا.
كريم:
- كله من جيب الشعب...قصدي الاتوبيس.
- بس يلا انت و هوه اطفحوا و انتم ساكتن ما هوه لو مكنتش نهبت الشعب زي ما بتقولوا كانت السلطه الحاكمه... قصدي احنا مكناش قاعدين بناكل و نلغوص براحتنا...اكتموا و كلوا.
قعدنا شويه على قهوة الفشاوي...حيث تكثر الشعور الصفراء و العيون الزرقاء... اللهم صلي على النبي...حاجه آخر حلاوة...هيه السياحة شغاله ف رمضان برضه؟ أمال بيقولوا السياحه انضربت ليه؟:
- هااااي
اتلفتتلي حتت لادي... لوفلي آخر حاجه:
- اكس كيوز مي... يو توك وز مي؟
- يس و أنا هتوك وز مين غيرك يا وزه؟
الست بصلتلي بارتباك:
- الظاهر مش فاهماني كويس.
احم احم.. أظبط يا واد يا مي مي و ركز و بلاش عربي على انجليزي:
- ايام جست سوربرايسد ...يور آيس از فيري بريتي.
الدم بَجْ ف وشها و احمرت على حمارها:
- ات از نايس فروم يو تو ساي ذات.
قعدت اتغزلت ف عنيها شويه و ف جمالها _و الحق يتقال عنيها كانت حكايه_ و لما خلصت قصيدتي الشعريه الانجليزيه...أخدت بنتها نتمشى علشان افرجها على الحسين كويس... ايه فيها ايه؟ بشجع السياحه ف مصر و على رأي المثل.... السياحه فيها خير لينا كلنااااااااااااا.
رجّعت البنت لامها مع انحناءة احترام :
- نايس تو ميت يو.
قعدوا بقه يشكروني على زوقي و جنتلتي و الست بتديني نمرتها و ايميلها و البت طبعا سبق و ادتني كل حاجه... في ايه؟ انا اقصد نمرتها و ايميلاتها و صورتها... نيتكم زي الزفت كده ليه؟... عالم رجعية.
ركبنا الاتوبيس و في طريق الرجعه مسكت المايك:
- ها يا حلويييييييين مين عاوز يلعب...
قاطعوني ف صوت واحد:
- مش عاوزين الله يباركلك.
ههههههه يا عيني... مساكين بقو على الجنط، اختلفنا نروح مول و لا بلاش و ف الآخر قررنا نرجع علشان الكل كان تعبان.

اشوفكم بكره
لما اروح اضيف البت كاترين و مامتها طنط جينيفر على الايميل...هلزق صورتها ف ارضيه درج المكتب علشان بابا لما ييجي معمليش جنايه.
أما كانت رحلة... كانت اول مره اطلع رحلة رمضانيه بس الظاهر هتكون عادة... و ربنا ما يقطعلي عادة

زاهره · 19-09-09, 10:21 AM

اليوم الــ28

لم الشمل

لما ماما قالتلي إننا هنفطر عند والدتها الحيزبونه قصدي المصونه جتلي رعشه ف ركبي:
- و اللي عملته فيكي يا ماما.
- انت لسه فاكر؟
يااااااااااه و دي حاجه تتنسي... دي سحلت بيها و بالحاج سيد الأرض، بس مش غريبه ستو تطبخلنا و هيه عامله عاجزه؟:
- بس إزاي ستو اللي عامله فيها متكسحه تطبخلنا؟
- عيب يا مي مي اتكلم على ستك باحترام... بص يا ابني... خالك محمود هوه اللي عامل العزومه هيكلفها و أنا اللي هروح أطبخ في بيت ستك و العيله كلها معزومه.
- يا سلام؟ يعني خالو محمود و محمد و أحمد و مصطفى و خالتي إنعام و إكرام و إسراء و إحنا كلنا رايحين؟
- بالضبط.
- العيله دي أساسا كارهه بعضها إزاي هيتلموا؟
- يا ابني بطّل تعليقاتك دي.
- يعني الموضوع زي لم شمل كده؟
- أيوه خالك محمود قال يلم اخواته كلهم صبيان و بنات ف بيت ستك.
- يعني إنتي عاوزه تقنعيني إنهم جايين كلهم... و كل واحد بعيلته.
- ايوه.
- يا ماما محدش هييجي.
- لا هييجوا و هتشوف.
دي هتبقى مردغانه... ربنا يستر يلا يا يتلمو عند ستو يتلموا عند الجن الازرق مش مهم.. و اهو تشوفهم قبل ما تموت:
- طيب انتي هتطبخي لكل الناس دي؟
تحيّه بظت من الباب:
- قولها يا مي مي قولها... إحنا نطبخ و الناس تاكل على الجاهز...بتقول إننا هنروح من دلوقتي.
- ده الساعه 10 الصبح يا ماما.
- علشان الحق أخلص يا حبيبي.
- إنتي هتبهدلي نفسك و البنات معاكي على الفاضي.
سبتهم و دخلت أنام شويتين...كانت تحيّه و عليّه عاملين يدبدبوا ف الأرض و مش عاوزين يروحوا من الصبح... أنا طبعاً ملك زماني هروح قبل الفطار بربع ساعة نقضيها سلامات و ندخل على الأكل... و المره دي انا متطمن لأن نوجه اللي هتطبخ... بس يارب خالو محمود اللي ميستخسرش و يكلف العزومه كويس.

*************************

ايه الأمم دي كلها؟ شباب و بنات أول مره أشوفهم... ماما خرجت قدام البيت و مسكتني من ايدي:
- تعاله لما أعرفك.
- بس اصبري يا ماما.
سحبتني:
- تعاله.
خدتني لشويه شباب واقفين... بس شباب ايه... و لا نخيل الخليج جايبين الطول ده منين؟ عيلة ماما قصيرة أصلا، ماما:
- وليد و محمد و أكرم و يس أولاد خالك محمود.
- إزيك يا وليد؟ إزيك يا محمود؟ إزيك يا أكرم؟ إزيك يا يس؟
- رأفت و عبدالرحمن و محمود أولاد خالك محمد
مش هكلم كل واحد باسمه بقه كده كتير بقي هيخدل و واضح إن وصلة التعارف هتطول في العيله الطويله دي:
- إزيكم يا شباب؟
- محمود و محمد و توفيق و زكريا أولاد خالك أحمد.
همه ليه بيسموا على أسماء بعض... دي حتى حاجه تلخبط لما تلاقي 25 واحد اسمه محمود ف العيله و 75 واحد اسمه محمد... كويس إني متفرد... شكرا يا بابا على اسم مرعي...جه اليوم اللي أحب اسمي فيه.
- شاهين و كرم و عمرو ولاد خالك مصطفى.
شاهين؟ ده الواد شكله فيات مش شاهين ههههههه و ايه تنظيم الاسره بتاع خالو مصطفى ده؟ مكتفي بتلت اولاد بس؟
بعد لما خلصنا سلامات و اتعرفت على الشباب وشوش بس معرفتش اركب الاسماء كلها على الوشوش ما همه كتير برضه.. أنا معذور.
و انا ف نص الكلام مع الكتيبه اللي ماما عرفتني عليها سحبتني فجأة، قلتلهم و انا بتجرجر:
- معلش يا جماعه عن إزنكم.
- في ايه يا ماما؟
- هعرفك...
قاطعتها:
- هوه فيه في حد تاني؟
- بنات خالاتك و اخوالك.
ايووووووه... هوه ده؟ هيه دي حنية الأمهات... كنت عاوز اغني الست دي أمي:
- ماما اولاد خالتو إنعام و إكرام و إسراء عارفهم صبيان و بنات ادخلي بينا على بنات اخوالي على طول.
ضحكت:
- ماشي يا لمض... بس تحترم نفسك دول زي اخواتك.
- طبعااااااااا... عيب عليكي.
هههههههه ان ما فضحكتك يا ماما... علشان تعملولي فيها لم شمل الاحبه...و لقاء العمالقه.
- ازيكم يا بنات؟ جايبالكم ابن خالتكم مر....مي مي.
لما لكزتها ف جنبها ضبطت الاسم... ما هيه مش طالبه يتريقوا على الاسم اقوم ارتكب جنايه:
- بص يا مي مي...دول مي و نهى و إسراء بنات خالك محمود.
- إزيكم يا بنات؟
أول بنتين بصوا في الأرض بكسوف:
- الحمد لله.
البت الصغيره قعدت تبحلق فيا... ايه البجاحه دي؟ البت اسراء دي شبه خالتي اسراء بالضبط يا ساااااااتر.
- تنسيم و رقيه و جهاد بنات خالك محمد.
- إزيكم يا بنات... أنا عارف تنسيم كانت جتلنا مره في العيد.
تنسيم:
- ايوه... إزيك يا مرعي؟
يا خراشي عليها و على مرعي من بقها... و الله حبيت اسمي.
- تمام يا قمر.
ماما سحبتني من كمي و ف ودني:
- بطل يا عم النحنوح... اتعدل ف كلامك.
- ماشي يا ماما كملي حفلة الكوكتيل اللي احنا فيها دي معدش حاجه على الأذان.
- إنعام و منه و آيه بنات خالك أحمد.
- إزيكو يا بنات كله سنه و نتم طيبين.
- و إنت طيب.
- ها يا ماما و بنات خالو مصطفى.
- معندوش بنات.
معندوش بنات...طول عمري مش بحب الراجل ده بقه جايبلي كم شحط عاملين زي عامود النور و مش عارف يجيب نواعم....ده عيلتنا طلعت حكايه و انا مش عارف.
ماما:
- يلا يا بنات علشان نرص الأكل.
ف ثانيه لقيت البنات اختفت من حواليا... ماما الشريره، لما اروح اقف مع الأشناف:
- ها يا شباب.
قعدوا يتكلموا و انا اسمع... و طبعاً أغلبهم طلع منفسن و حاجه كده كرافاته بس اعمل ايه... مستني الأكل مش معقول أدخل أرص ف الأكل... طب ليه لأ.
دخلت البيت اول ما شافتني تسنيم قالتلي:
- بتعمل ايه هنا؟ اقف مع الرجاله بره.
- أنا قلت آجي اساعدكم.
بصتلي باعجاب:
- ماشي...خد طلع دول الدور التاني.
- ليه؟
- ما الرجاله هتاكل فوق و احنا تحت.
ييييييييه؟ بقه أنا هاكل مع الأشكال اللي تسد النفس و المشهيات كلها بتاكل تحت... يلا أمري لله.
طبعاً كسبت جماهيريه كبيره جدااااا عند البنات و خالاتي لأني "الفحل" الوحيد اللي ساعدتهم في رص الأكل و توضيب السفرتين_ أنا مساعد... مساعد أنا_ و ماما كانت بتبصلي (يعني مش بتعملها ف البيت يعني) رديت على بصتها ببصه (عديها بقه يا نوجه عديييييييها)
بعد لما الأذان أذن كله هجم و أنا كنت ف الصفوف الأولى... يا سلام على أكلك يا نوجه اللحمه الهبر دي تجنن و لا الكفته...هاتلي يا خالو من صينيه البطاطس اللي قدامك... مممممم جميل جدا... يس ناولي لو سمحت حتة فراخ من قدامك...أنا مش يس أنا كرم...يووووه مش مهم ...مش الاتنين خوات...طب ناولي ورك يا كرم....هتخنق من كتر الأكل بس مش عارف أبطل.
خلصت أكل و إترميت في كورنرد و حصلني خالي محمود:
- ياااااه ياد يا مرعي... أمك ايديها تتلف ف حرير...أكلها يجنن.
- عارف بس قولي يا خالو اشمعنى قلت لماما تطبخ؟
ميل عليا و بصوت واطي:
- بيني و بينك مرات خالك أكلها تعبان خالص... و لو كانت هيه اللي طبخت مكانش الأكل اتمسح كده... اتمسح ايه ده مكانش اتلمس.
هههههههه هوه ده ولاء الأزواج... خالي واثق من قدرات مراته عالآخر.
نزلت الأكل زي ما طلعته و ده كسبني نظرات إعجاب رهيبه ملهاش حدود... بعد لما الأكل اتلم كنت أول الحاصلين على كبايه شاي بس ايه... مظبوووووووووووطه و البنات اتلمو حواليا كان بداية الكلام إن يا بخت تحيّه و ليّه و رقيّه أخوهم بيساعدهم ف البيت.... ههههههه مغفلين، انا بدهشه:
- هوه إنتم اخواتكم مش بيساعدوكم؟
- و لا بيمدوا ايدهم ف حاجه.
- دول بشوات يا مرعي.
- يساعدوا مين بس يا مرعي دي حاجه مستحيله.
سكتهم بالعافيه:
- خلاص خلاص... بقولكم ايه يا بنانيت عاوزين نتفق على حاجه...نادولي مي مي اوك.
ف صوت واحد:
- أووووووك.
- كده تمام... يلا بقه نلعب.
تسنيم:
- نلعب ايه؟
- أنا جايب كتشينه و دومينو يلا بقه نقسم نفسنا علشان نلعب بالدور.
بعد لما اتقسمنا و كل 4 قعدوا مع بعض تحيّه قعدت جنبي و قلدتني:
- هوه إنتم اخواتكم مش بيساعدوكم؟ آه يا ضلالي... انت من امته بتمد ايدك على حاجه؟
- خلاص بقه يا تح تح...عديييييييها.
واحده من بنات اخوالي معرفش اسمها ايه... تقريبا مي:
- انتو بتقولو ايه؟
تحيّه طبطبت على دراعي:
- كنت بشكر اخويه حبيبي على إنه وافق يسلفني الــ25 جنيه.
بصيتلها شزراً... 25 جنيه ايه يا نصابه، لسه هقول كده البت مي صرخت:
- بجدددددددد... الحقوا يا بنات مي مي بيدي لاخواته البنات فلوس.
إن ما وريتك يا تحيّة الكلب...
قعدنا نلعب لغاية صلاة العشا و بعدها قلت لما اقعد شويه مع الرجاله... اتريقت على حلق الله أنا و خالي محمود... الراجل ده دماغ.
روحنا بعد صلاة التراويح (اللي مصليتهاش) بس مروحتش ايدي فاضيه كانت معايا ورقة... لا دي عريضه طوييييله بإيميلات البنات و أخدت ايميلات الاولاد احتياطي كده.
اشوفكم بكره
مكنتش متوقع إن لم الشمل هيكون حلو كده... و لا عيلة ماما... طلعت حكاااااااااايه.

زاهره · 19-09-09, 10:23 AM

دلوقتي ليكم ف ذمتي حلقه واحده و بعدها تكون حكايا مي مي الرمضانيه خلصت
و كل عام و إنتم بخير

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري