حكايات مرعي الدون جوان ف شهر رمضان ... مكتملة - الصفحة 8

زاهره · 14-09-09, 02:23 AM

اليوم الــ22
رغم أنف كل فيروسات العالم

- يا ابني إنت نازل رايح فين؟ إنت لسه تعبان.
- أنا بقيت كويس يا ماما كح كح.
- شفت...دي الحكه لسه مــ...
- يا ماما الله يخليكي انا مخنوق و محتاج أنزل.
- طب قولي بس إنت رايح فين علشان أتطمن عليك.
بعد لما إديت لماما أرقام تليفونات تلت أرباع صحابي و علقتلي الموبايل بتاعي في رقبتي و زودتني بوصايا نوجه الـعشره... لا مش العشره دي الخمسه و سبعين سابتني اخرج بس طلّت بدماغها من الشباك و نادتلي:
- متتأخرش يا ابني.
عارف أنا غرضها من الحركة دي...عاوزه تعرفني إنها هتقعد قلقانه عليا علشان ارجع بسرعه...مش عارف هيه عامله دوشه ليه؟ أنا بقيت كويس كح كح...ده حتة فيروس غبي حابب يتفرعن عليا بس على مين كح كح... مكانوش شويه ميه اتبليت بيهم و كم لفحه هوا...بس برضه مش هنام ف السرير... ما هوه لو قدر عليا حتة فيروس تافه هبقى ملطشه لكل فيروسات المنطقه.
رحت للعدوي أخدته و عدينا على كبّو و علي و كريم و طلعنا على عم مدبولي بتاع الصنانير أخدنا العدة و على الترعه، العدوي:
- يا ابني إنت شكلك تعبان.
- لا أنا كويس كح كح.
كبّو:
- مي مي قوم يا ابني نروّحك ده إنت شكلك متكحرت خاااالص.
- بطلوا بقه يا شباب و خلوا نركز ف الصيد.
علي بعد لما رمى الصناره بتاعته في الميه:
- صيد إيه بس؟ من إمته و إحنا غاويين صيد؟
- ولااااااااا...إنتا رميت الصنارة في الميه ليه؟ إنت اللي هتدفع حقها لعم مدبولي إنت فاهم؟ كح كح
كريم:
- على فكره يا مي مي إنت مخترع طلعه الصيد دي عند في روحك...إنت عاوز تثبت لنفسك إنك كويس و إنت تعبان...متعادنش و قوم ناخدك البيت.
رميت الصنارة من ايدي و وقفت و رغم إني حاسس الدنيا بتلف بيا إلا إني شخطت فيهم:
- إنتووو كلكوو عليا و لاّ إيييييييييييه؟ كح كح
العدوي بيجري عليا:
- مالك يا مي مي؟
كريم:
- امسكه يا عدوي ده باينله هيقع.

************************

فتحت عنيا و حسيت إن الدنيا مرغوشه:
- أنا...أنا فين؟
سمعت صوت العدوي بيكلم ماما:
- اغمى عليه فجأة يا طنط.
صوت عليّه النشاز:
- الدكتور جه يا ماما.
شويه كلام مفهمتش منه حاجه غير كلمه حقنه...حقنه؟ فتحت عنيا على وسعهم:
- ماما أنا كويس.... مش هاخد حقن.
رقيّه:
- ها ها ها خايف من الحقنه؟ يا خواف.
- طلعووووو البت دي بره.
الدكتور:
- إهدى يا مرعي.
- عمو رأفت... بلاش الحقنه أنا كويس.
- يا مرعي مش هتحس بيها ...هديهالك وريد مش عضل.
قرب من دراعي فاتنفضت:
- لا...لا...سيبوني أنا كويس.
بعد خمس دقايق من المقاومة ماما إتهدت:
- يا ابني اهدى مش عارفين نديك الحقنه.
- أنا كوييييييييس...ده كان فيروس و راح لحاله.
الدكتور:
- لااااا...الواد ده عفريت...كتفوووووووه.
هجمت عليا تحيه و تبعتها عليه و رقيه:
- سيبوني....آآآآه.
حسيت إني مهدود...إيه ده أنا بنام و لا إيه؟ الراجل ده إداني إيــ...ــه؟

أشوفكم بكره
على فكره بعد لما قمت من النوم قمت متسحّب و طلعت على السطوح... حيث كانت تنتظرني قدريه بطبق الملوخيه المعتبره و اللي اتبعناه بشويه تسالي...كانت قعده فل الفل... و برضه مرقدتش في السرير... رغم أنف كل فيروسات العالم.

همسات القلوب · 14-09-09, 02:30 AM

سلامتك يامي مي والله يعينك على حملة النظافة تسلمي زاهرة

زاهره · 14-09-09, 08:31 AM

اقتباس:

المشاركة الأصلية كتبت بواسطة همسات القلوب

سلامتك يامي مي والله يعينك على حملة النظافة تسلمي زاهرة

الله يسلمك و يسلم عمرك يا حبيبتي
منوره بتواجدك

زاهره · 14-09-09, 09:44 AM

اليوم الــ23
مكالمه بعد نص الليل

بعد الحقنه اللي إداهاني الدكتور الغم ده و أنا مش عارف أصلب دماغي... لما بدأت أحس إني فقت نزلت للعيال على القهوه...كويس إن ماما مشافتنيش و أنا نازل ...بصيت ف الساعه 11 و نص بالليل... و أنا قاعد مع الشباب تليفوني رن الساعه 12 و شويه رديت:
- ألو
صوت حنين أوي:
- ألو
- مين معايا؟
- مش لازم تعرف أنا مين... أنا واحده معجبه بشخصيتك... معجبه بيها جدا.
قمت متنحنح و متكلم بجنتله و بإحساس مرهف:
- إيه اللي عاجبك فيها بالظبط؟
نعمة الحنيه زادت:
- أنا مبحبكش كده بحبك على طبيعتك.
يالهوي ع اللي بيحصل... لازم أعمل فرامل:
- بتــإيه؟
- بحبك على طبيعتك.
- إنتي شفتيني فين؟
- شفتك و إنت واقف على دي جي ف عيد ميلاد.
أكيد ده عيد ميلاد الواد توفيق... الظاهر إن الليله الغم إياها هييجي من وراها فايده:
- و جبتي رقمي منين؟
- بعت واحده أخدت رقمك من صاحب العيد ميلاد.
توفيق... الظاهر إني هبدأ احب الواد ده، قالتلي:
- عاوزه أشوفك.
أوباااااااا... عاوزه أشوفك؟ وش كده؟ إيه البنت المستعجله دي؟ ... بصيت للمنديل المتقطع اللي ف ايدي... لا ياد يا مي مي لازم تراعي ربنا شويه ده إنت لسه مقمتش من المرض:
- إنتي مش مراعيه إن إحنا ف رمضان و لا إيه؟
- هنقد نتكلم عادي.
- طب ابقي كلميني بعدين.
قلت لما أقفل أحسن علشان لو العيال عرفوا إني بكلم بنت كانوا قلبو الدنيا... العدوي كان هيتحشر بيني و بين السماعه .....حبيب قلبي كريم بقه كان هيلتحم مع باطي في محاولة إنه يسمع الحوار.. و لا كبّو مش بعيد كان يسجلي المكالمه.
روحت البيت و أنا في حالة من التخدير اللذيذ... لما قارنت بين صوت البت بتاعت المكالمه و صوت اختي عليّه حسيت إن طبلة ودني كانت مظلومه طول السنين اللي فاتت دي.
ماما قفشتني بس و أنا قدام أوضتي:
- إنت كنت فين يا مي مي؟
- أنا... كنت... في الحمام.
واضح إنها كانت نعسانه أوي لأنها مخدتش بالها إني لابس هدوم خروج:
- إنتي بقه قايمه من النوم تعملي ايه يا نوجه؟
- أنا بشرب ميه.
- طيب يا نوجه... تصبحي على خير.
دخلت الأوضه و نمت زي الطفل... لا لا طفل إيه... هوه في طفل بيحلم بملاك صوته حنين كلمه بعد نص الليل... لا و إيه ده معجب بشخصيتي أوووي.

أشوفكم بكره يا معلمين
على فكره أنا نمت كأني محروم من النوم بقالي قرون... صحيت على آذان المغرب ...كنت ف غيبوه... بس غيبوبه لذيذه... لذيذه جدا... لذيذه خالص... لذيذه و صوتها حنين.

هبة · 14-09-09, 11:46 AM

يا لهوى سلامتك يا مى مى

ده أنا كنت مفتكراه شوية زكام و هيروح لحاله ... بس شكله دخل على نزلة و لا إلتهاب شعب هوائية ما دامك دوخت و أغمى عليك >>> كل ده من عيون الناس إبقى خلى الست نوجة تقرأ عليك و تحوطك من العيون اللى ما تصلى على النبى

بعدين تعال هنا إنت من شوية صوت مت على نفسك ... ما تتأملش كثير يمكن الشكل ما يطابقش الصوت و بكده ممكن تشرب حتة دين مقلب

زاهرة متابعاكى و شكراً لك

لـوريــن · 14-09-09, 09:53 PM

هاااااااي .. زهرة ..

قريت أول يومين ..

مرررره خطييييرة ..

دا الواد ميمي .. مش سهل ..

و ماتهونش النفحات الايمانية في أول يوم رمضان ..

هأكملها .. وأرجع أعلق ..

زاهره · 15-09-09, 06:18 AM

اقتباس:

المشاركة الأصلية كتبت بواسطة هبة

يا لهوى سلامتك يا مى مى

ده أنا كنت مفتكراه شوية زكام و هيروح لحاله ... بس شكله دخل على نزلة و لا إلتهاب شعب هوائية ما دامك دوخت و أغمى عليك >>> كل ده من عيون الناس إبقى خلى الست نوجة تقرأ عليك و تحوطك من العيون اللى ما تصلى على النبى

بعدين تعال هنا إنت من شوية صوت مت على نفسك ... ما تتأملش كثير يمكن الشكل ما يطابقش الصوت و بكده ممكن تشرب حتة دين مقلب

زاهرة متابعاكى و شكراً لك

هههههههههههههههههههه
الله يسلمك و يسلم عمرك يا حبيبتي

زاهره · 15-09-09, 06:23 AM

اقتباس:

المشاركة الأصلية كتبت بواسطة لـوريــن

هاااااااي .. زهرة ..

قريت أول يومين ..

مرررره خطييييرة ..

دا الواد ميمي .. مش سهل ..

و ماتهونش النفحات الايمانية في أول يوم رمضان ..

هأكملها .. وأرجع أعلق ..

حبيبتي سعيده إنك انضميتي لصفوف المتابعين لمي مي
نورتيني مرورك العسل يا عسل انتي

أتمنى باقي اليوميات تعجبك مثل ما الأولى عجبتك
في انتظار رايك و تعليقاتك

دمت بود

لـوريــن · 15-09-09, 09:29 PM

ياسلااااااااااااام ..:blushing:

دا انا حبيت الواد مي مي ..:blushing:

مع انو مبهدل ابوووه ..

بس برضوووو سكرة ..

أما حكاية البطة المخطووفة ..:d

دي قطعت قلبي ..

ربنا مايحطنيش مكانها ..

و حكاية البت جنى ..

مالومش مي مي ..

بعد قدرية .. هوا كان بيحلم بزي جنى ..:icon_smile_eyebrows:icon_smile_eyebrows

دااا انا حبيييت اليوميااااااات جداً ..

هأكمل الباقي و أرجع أرد ..

لـوريــن · 15-09-09, 10:18 PM

ايه دا .. كترت الردوود ..

بس أعمل إيه ..

لازماً أعلق على كل حاجه ..

وصلت لعند زيارة ست الاشباح خخخخ ..

دي بهدلت نووجة بهدلة ..

ولا لما راح حفلة حمادة ..

والشنبات اللي فيه .. خخخخ

اما جية جنى والشلوت اللي اكلوو ميمي ..

دي لو عرفت جنى باللي سار له هتحبووو ..

ارجع للواد ميمي..

دا انا حبيتوو اوووي ..

دا وااد حنين اووي وبيستااهل ..:blushing:

يلا معليش استحملي ردوودي الكتيرة ..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري