حكايات مرعي الدون جوان ف شهر رمضان ... مكتملة

[زاهره]

اليوم الثامن عشر
قعدة عرب

جيت من برّه و أنا على آخري....لازم أشوف حل...بقه أنا مي مي الدون جوان على آخر الزمن أتبهدل البهدله دي؟ أنا يتعمل فيا كده؟
- آآآآآآه خد بالك يا مرعي و إنت ماشي.
من بين سناني:
- رقيّه...متقوليش مرعي.
بلماضه:
- أمال أقولك إيه؟ أحمد السقا؟ مش مرعي إسمك و لا إيه؟
مسكت دراعها و لويته...جت عليّه جري:
- سيبها يا مرعي رقيّه مش قدك.
- اخرسي يا علّه ملكيش دعوة.
- مرعي سيـــ...
- متقوليييييييييييييش مرعي.
تحيّه:
- إيه الصوت ده؟... إيه ده بقه يا سي مرعي؟ بتضرب رقيّه إن ما قلت لماما.
- اقفلي بقك بدل ما....
ظهر وحش الشاشة و صرخ:
- إيه اللي بيحصل؟ إيه الدوشه دي؟...مالك يا مرعي؟ إنت طايح في اخواتك البنات كده ليه؟
سبت دراع رقيّه:
- بيستفزوني يا بابا.
ماما خرجت من المطبخ:
- محصلش حاجه يا ابني... إنت اللي جاي من بره عصبي.
اتلفت لبابا:
- بابا في موضوع مهم عاوز أكلمك فيه.
- خير؟ تعالا اقعد نتكلم.
- لا مش هينفع... الموضوع عاوز قعده...لازم كلنا نعمل قعدة عرب.
- قعدة عرب؟ في إيه؟ خير؟
بصيت لماما:
- لما تخلصي اللي وراكي يا ماما ابقي قوليلي علشان لازم كلنا نكون موجودين.
بابا:
- إنت قلقتني... ما تقول و تخلصنا.
- لا ...بعد لما ماما تخلص و البنات كمان يخلصوا اللي وراهم.
سبتهم و دخلت الأوضه و هبدت الباب ورايا... أنا خلاص لو معملتش حاجه هنتهي...أنا هتدمر.

****************************

بعد العصر إتجمعت العيلة كلها في الصاله و الكل مستني يعرف الموضوع الخطير...لغيت كل مواعيد بعد الفطار و قفلت تليفوني...هبقى أرجع لنشاطاتي بعد لما الأزمه دي تعدي.
بابا:
- و آدي يا سيدي قعدة العرب اللي إنت طلبتها قول يا مرعي...إيه المشكلة؟
- هيه دي الشكلة.
- فين المشكلة يا مرعي؟
انا بنفاد صبر:
- مرعي...هيه دي المشكلة.
بابا بعصبية:
- بطل كلام بالألغاز يا ولد.
- بابا...إنت ليه سميتني مرعي؟
- يااااااه إحنا هنعيده تاني؟
- معلش قولي تاني.
- سميتك على إسم جدك.
- بس ده اسمه برعي مش مرعي.
سمعت عليّه بتقول لتحيّه بصوت واطي :
- تخيلي لو كان بابا سمّاه برعي...كنا ندلعه نقوله بي بي ...ده كان بقه حمامات.
مسكت نفسي علشان مقومش أوقعلها صف إسنانها...واجهتها لو باظت مش هتتجوز و تقعد ف أرابيزنا:
- جدي اسمه برعي يا بابا.
- بس كانو بينادوله مرعي.
بنرفزة:
- مش ملاحظ إنه اسم قديم...من الآخر كده يا بابا الإسم عاملي أزمة بين زميلاتــ...زمايلي.
- يعني بقالك 18 سنه اسمك مرعي و جاي يعملك أزمة دلوقتي.
- ما الكل بيقولي مي مي... و قليل أوي اللي يعرف مرعي و مش بيستخدموه...الموضوع إنتشر و كده مش مريحني.
بابا وقف بعصبية:
- يا أخي إن شالله عنه ما ريحك...بقه مقعدني جنبك و معطلني و معطل أمك عن اللي وراها و تقولي قعدة عرب و في الآخر إسمك مش مريحك.
وقفت:
- يا بابا إفهمني.
زعّق:
- عاوزنا نقولك إيه يا كتموتو؟ نناديلك نقولك إيه؟ توتو؟ و لا لولو؟
- لا يا بابا...قولولي مي مي...ده حتى ماما و البنات ساعات بيقولولي مي مي.
- مي إيه؟ مي مي؟ يا أخي أنا مش عارف أنا غلطت ف إيه و انا بربيك؟
ماما:
- يا حاج فيها إيه؟ إعتبر إن مي مي ده إسم دلع.
- يا نجاة حنِيّتك دي اللي هتبوظه...لما أقوله النهرده مي مي...بكره يلبسلي سلسلة.
مديت ايدي أداري السلسلة تحت القميص أحسن يشوفها، قعد يزعق و خلصت قعدة العرب على إن مرعي هيفضل مرعي و أي مناقشة في الموضوع ده أو (طلب قعدة عرب) هتكون العواقب وخيمة أوي.
قعدت مكتئب في أوضتي...افتكرت بداية المشكلة لما جايدا إتصلت بيا:
- إزيك يا مرعي؟
حسيت إني إتكهربت...جايدا عرفت موضوع مرعي ده منين؟ و آه لما إمتد الموضوع لجي جي و في في و كمان وصل لجنا...و مين السبب؟ المسحوبة من لسانها قدرية...إن ما وريتك يا قدورة مبقاش مي مي.
اتقطع حبل الغسيل...قصدي حبل أفكاري لما ظهر على باب أوضتي الأوباش الثلاثة و وراهم ماما و عملوا معايا قعدة عرب تانيه راضوني فيها و بقيت من هنا ورايح مي مي بس طبعاً مش قدام بابا، قمت بست راس رقيّه على فقرة العنف بتاعت الضهر و إعتذرت لتحيّه و عليّه... جدعنتهم معايا صدمتني... يا ترى في أغراض من ورا الوقفه دي و لا إيه؟... يلا الأيام جايه و أكيد هعرف.

أشوفكم بكره
و إوعوا تنسوا أنا إسمي مي مي... مي مي مش مرعي، هتفتكروا و لا هحتاج أعمل قعدة عرب معاكم إنتم كمان؟

[زاهره]

اليوم التاسع عشر
اسم كله قوة و رجولة

أول ما دخلت النادي لمحتني جنا و جرت عليّا...ياربي هودي وشي من البنت فين؟ من يوم ما عرفتها و هاتك يا رسم و قنعرة تقولش الواد جاي من باريس ف علبة مقفولة و في الآخر تعرف إن اسمي مرررررررعي.
حتة كسفة، رزعتني حتة إبتسامة نستني موضوع مرعي و اللي خلفوا مرعي كمان:
- إزيك يا مرعي؟
خشّبت وشي:
- كويس.
- مالك؟ إنت زعلان من حاجه؟
- لا مفيش.
العدوي اتسحب من لسانه:
- أصله بيتضايق لما حد بيقوله مرعي.
بصتلي بعتاب بس بصة إيه...سهم و رشق ف قلب العبد لله...هيه البت دي تخصص نظرات؟:
- ليه كده بس؟ده إسمك حلو أوي...تحس إنه اسم قوي.
بصوت واطي:
- آه...ما إسمي بيشيل حديد في الجيم.
- بتقول إيه؟
- لا مفيش...العدوي هيروح الجيم يشيل حديد.
- كويس... تعالو نقعد عند حمام السباحة.
العدوي شدني من إيدي:
- يا عم فكك بقه....متفكرش ف اسمك كتير أحسن تكره نفسك و تكره اللي سماك الإسم ده.
- و مين قالك إني لسه مكروهتوش.
جنا اتلفتت لينا:
- بتكره مين؟
- ابويه...قصدي واحد مزعل أبويه.

********************************

في عز القعدة و الواحد متألق و واكل الجو جه واد ظريف...واد توتّي فروتّي كده بيرسم على جنا... دايماً بيستظرف معايا بس أنا و لله الحمد بزحّفه على الأرض و آخر مره عملت بقه جزّامه، شد كرسي و قعد معانا و كان واضح على وشه إنه هيلعب فقرة خفة دم من بتوعه...كنت جاهزله لكن أول ما قالي:
- إزيك يا مررررعي.
بصيتله...حتى تموره الأموره عرف موضوع مرعي؟ و ماله بيتقّل على الإسم كده؟ هوه بُقّه علّق و هوه بينطقه؟، جيت أقوم من على الكرسي علشان ألطشله العدوي مسك ايدي و وشوشني:
- إهدى يا معلم.
طبعاً أكتر من بنت قعدوا يضحكوا و الولاد يتظارفو...أنا حسيت بخنقه رهيبه، جنا قامت و بعصبيه:
- إنتم بتضحكوا على إيه؟ يعني إنتم تحبوا حد يتريق على أساميكم؟
بصتلي:
- متزعلش يا مرعي...و مصرّه إني أقولك مرعي...أنا زهقت من تامر و هيثم و كل الاسامي الرقيقه دي.
الرقيقه دي؟ البنت مش واخده بالها هيه بتتكلم إزاي؟ ده هيه مثال للرقه كلها...دي منبع رقّه...يا خراشي يا ناس، كملت بقوة (بس القوة بتاعتها مش زي القوة العادية بتاعتنا):
- ده حتى مرعي اسم كله قوة و رجولة...اسم راجل.
روحت نزلت ف بابا بوس و أحضان و هوه مندهش من اللي أنا بعمله:
- بسم الله الرحمن الرحيم...مالك يا ابني؟ إنت اتهبلت.
- لا أبداً...شكراً يا بابا.
- على إيه؟
- على الإسم اللي كله قوة و رجولة.
- قوة إيه و رجولة إيه؟
سبته بيضرب كف على كف و دخلت أوضتي و أنا بغني...مرعي يا جامد يا قبهه إيه القوة دي كلها...مرعي يا جامد يا قبهه إيه الرجوله دي كلها...
أشوفكم بكره
لو حد مستني مولود أقترح عليه يسميه اسم قوي... مش اسم رقيق من أسامي اليومين دول...يعني عندكم مثلاً (مرعي) اسم تتجلى فيه كل معاني القوة... و الرجوله.

[زاهره]

اليوم العشرين
مي مي الشاعر

سألت نفسي كتير أنا إيه هدفي في الحياة_غير الصرمحة و المشي مع البنات_ أو بمعنى أصح أنا بعمل إيه في الدنيا؟ مواهبي إيه؟ أنا متميز في إيه؟ و لما عملت إستطلاع رأي في البيت بابا قالي:
- إنتي متميز أوي في حرق دمي...إنت موهوب يا ابني...ممكن تجيلبي ذبحة في وقت قياسي.
إخواتي البنات(مجمعين):
- مش موهوب في أي حاجه.
ماما:
- طول عمرك شاطر في التعبير...و إنت في الإبتدائي و الإعدادي كنت بتجيب 9 من 10 في الإنشا.
هيه دي...لقيتها...الكتابه، جريت على إوضتي و طلعت شوية ورق و إستلفت قلم من رقيّه و قفلت الأوضه عليا...حاولت أستجمع شتات أفكاري و إنفعالاتي المتقوقعه في زنخُق نفوخي لكن فشلت المحاولة لما رن تليفوني:
- أيوووووه مين؟
كبّو:
- أيوه يا مي مي في رحلة للقاهرة تطلع معانا؟
- رحلة إيه يا عم ف رمضان؟ يعني هنروح فين؟
- هنفطر في الحسين و هنلف شوية و بعدين نتسحر في الحسين برضه و نروح.
- بقولك إيه أنا مش فاضي دلوقتي...ممكن نأجل الكلام في الموضوع ده دلوقتي.
- مشغول في إيه بس يا عم؟
- بكتب.
- بتكتب إيه؟
- إنت مالك إنت؟
- طب بس قولي يا مي مي إنت طالع؟
- الإسبوع ده مش هقدر خليها الإسبوع الجاي... حتى يكون بابا راح يعتكف مش عاوز مشاكل معاه...هوه هيروح النهرده.
- ماشي...سلام.

**********************

بعد محاولات كتيره و ورق مكرمش في كل سنتيمتر من الأوضه إكتشفت إني منفعش في القصص أنا هكتب شعر...أو أغاني... أنا عندي حس الشاعر...إيه الصوت ده؟ طقطقت ودني فسمعت صوت رقيّه و هيه بتغني أغنيتها المفضلة اللي من أول ما طلعت و هيه فلقانا بيها (مشربتش من نيلها)...لقيتها...انا هتكب حتة أغنية هتمسح الإغنية دي... استعدي يا شيرين أغنيتك هتتمسح من على وجه الأرض محدش هيفتكرها... من دلوقتي إبتدى عهد جديد...فلتشهد الدنيا مولد شاعر جديد سيضئ العالم بأشعاره.
ورقة جديدة...نفس عميق...تركيز عالي...الذبذبات مالية الجو...
بعد ساعتين طلعت فيهم عصارة إبداعي مسكت الورقة طلعت أدوّر على الشعب لقيت ماما و البنات في المطبخ:
- اسمعوا يا جماعه... من حظكم هتكونوا أول ناس تسمع القصيدة العظيمة اللي أنا كتبتها...اول إبداعاتي.
بصيت لرقيّه:
- و دي إهداء ليك يا صغنن...علشان اغنيتك المفضله هيه اللي ألهمتني.
ابتسمت بانشكاح:
- ليا أنا؟...متحرمش منك يا اخويه يا حبيبي.
- اي خدمه يا روقه...صمت بقه...هدووووووووووء القصيدة بعنوان (مشربتش من برميلها)
مشربتش من برميلها...طب جربت تغنيلها...
جربت ف عز ما تمرض تمشي ف مشافيها و تشكلها...
ممشتش ف خرايبها و نواحيها...طيب متضربتش فيها...
و لا ليك صورة و إنت واقف طول اليوم على نواصيها...
دوّر جواك تلقى البلهراسيا و كل عيلتها و الأهل...
عِلَلْ الدنيا كلها شفاها و خروجها من الجسم مش سهل...
يمكن ناسي لأنك تيها مش فايق للأرض و ما عليها...
بس اللي مركز دماغه و فايقلها...قال الدنيا دي مش عايش فيها...
و شكراً
صحيت من حالة النشوة العارمة على تصفيق حاد كان مصدره رقيّه و على ضحك ماما و تحيّه و عليّه:
- بتضحكوا عليا؟ ماشي.
ماما:
- يا روحي أنا بضحك علشان إبني زي العسل.
- زي العسل؟ يعني جميله؟
- ايوه يا مي مي.
مسكتني رقيّه من ايدي و خرجتني من المطبخ:
- سيبك منهم دول عالم محبطه... يا ابني انت شاااااااااعر...ميعرفش الشاعر إلا الشاعر اللي زيه تعاله لما أوريك قصيدتي اللي اسمها (إرمي ديونك عليا).

أشوفكم بكره
يا سلام عليك ياد يا مي مي يا شاعر...بكره يسطع نجمك و متعبرش العالم المحبطه اللي معاك في البيت...ده انا ممكن معبركوش إنتم كمان و مكتبلكومش اليوميات...متزعلوش ما هيه مش جايبه همها.

[هبة]

بى بى سورى قصدى مى مى يوه مرعى ... و الله أختك علية طلعت إنما إيه فلة أقال بى بى قال ... الحمد لله إنك أخيراً رضيت على الحاج سيد اللى أتنبأ أنه راح يقطع هدومه و يشد شعره من وراك ... بعدين إخص عليك متمرتش فيك العشرة و عايز تبطل تكتب يومياتك لينا ... طب هيحصل فينا إيه مش كفاية أن زاهرة إكتشفت خفة دمى اللى محصلتش:syria8: :c4a5c142f5c88b253c6بس من ردودى عليك عاجبك إنى أرجع جدية :smi80:؟؟؟ يلا خليك حلو إمال و بلاش الغرور يا شاعرنا الهمام :44:هههههههههه سورى و النبى ماكنش قصدى أضحك هههههههههههههه بس مش قادرة أوقف ضحك هههههههههههه



زاهرة متابعاكى و شكراً لك :icon30:

[همسات القلوب]

ليه يامي مي عاوز تبطل من اليوميات انا كده زعلت منك يعطيكي الف عافيه يازاهره

[زاهره]

المشاركة الأصلية كتبت بواسطة هبة

بى بى سورى قصدى مى مى يوه مرعى ... و الله أختك علية طلعت إنما إيه فلة أقال بى بى قال ... الحمد لله إنك أخيراً رضيت على الحاج سيد اللى أتنبأ أنه راح يقطع هدومه و يشد شعره من وراك ... بعدين إخص عليك متمرتش فيك العشرة و عايز تبطل تكتب يومياتك لينا ... طب هيحصل فينا إيه مش كفاية أن زاهرة إكتشفت خفة دمى اللى محصلتش:syria8: :c4a5c142f5c88b253c6بس من ردودى عليك عاجبك إنى أرجع جدية :smi80:؟؟؟ يلا خليك حلو إمال و بلاش الغرور يا شاعرنا الهمام :44:هههههههههه سورى و النبى ماكنش قصدى أضحك هههههههههههههه بس مش قادرة أوقف ضحك هههههههههههه



زاهرة متابعاكى و شكراً لك :icon30:

ههههههههههههههه
لا تخافي
مي مي ميقدرش يبطل يوميات
ده بيتدلع عليكم عاوز يعرف غلاوته مش اكتر

متحرمش من ردودك العسل يا عسل
و بعدين إنت جديه و لا مش جديه بكون سعيده بتواصلك الجميل

[زاهره]

المشاركة الأصلية كتبت بواسطة همسات القلوب

ليه يامي مي عاوز تبطل من اليوميات انا كده زعلت منك يعطيكي الف عافيه يازاهره

ميقدرش يبطل يوميات و لا يقدر على زعلكم
ده شويه دلع و راحو لحالهم لما عرف إنه غالي عليكم
الله يعافيكي حبيبتي

[زاهره]

اليوم الــ21
حملة نضافة

- يا ماما سيبيني...
- مي مي لو مقمتش من على الجهاز هشد الفيشه.
- يوووووووه يا ماما... يعني بابا مشى إنتي هتستلمي مكانه.
بصتلي بعتاب...عارف أنا البصه دي، عاوزاني أحس بالذنب عاللي قلته بس لأ:
- يا ابني عاوزة أروّق الأوضه.
- هبقى أروقها أنا و بعدين إيه الهبد و التخبيط اللي شغالين فيه من الصبح ده؟
- بننضف علشان العيد.
- يا ماما العيد لسه عليه 10 أيام...بدري...بدري اللي إنتم بتعملوه ده.
بنفاد صبر:
- لا مش بدري... و يلا بقه متناحيش فيا.
- يلا إيه يا ماما؟
- خد السجاجيد نزلهم المدخل و إبدأ.
أبدأ؟ حاسس بمصيبه جيالي يا لطيف يا لطيف:
- أبدأ إيه يا ماما؟
- هتبدأ إيه يعني يا مي مي...هتغسل السجاجيد.
- لاااااا بقه...
قاطعتني:
- قوم يا ابني بقه... أنا و إخواتك شغالين في البيت من صباحية ربنا.
رقيّه:
- قوم بقه و بطل كسل عمالين نمسح و نغسل في الستاير و المفارش و كمان الجدران و الابواب و إنت نايملي.
- نايملك؟ امشي يا بت اخفي من قدامي أحسن أخنفك.
ماما:
- مي ميييييييي.
- حاضر يا ماما ...حاااااااضر.
خرجت من الأوضه و انا برزع و بهبد ف كل حاجه:
- أيوه كده يا ابني الله يرضى عليك.
عليّه:
- ايوه كده ايه يا ماما ده عمال يترفس.
صرخت:
- ملكيش دعوة إنتي.
*****************************
- زي ما اكون عطشاااااااااااان و شربت زي ما أكون جربااااااااااان و نضفت... الميه تروي العطشاااااااااااان و تطفي نار الــ.....
- ميييييييييييييي مييييييييييييييييي... حرام عليك دماغنا ورمت.
رديت بصريخ علشان صوتي يوصل للبجمه اللي فوق:
- ملكيش دعوه يا تحيييييييييييييييييييه...خ� �يكي ف غسيلك...كل واحد يخليه ف اللي ف إيده.
سمعت ماما و هيه بتقولها:
- يا بنتي سيبيه براحته أحنا ما صدقنا وافق يعمل معانا حاجه.
- بس ده صدعنا يا ماما...بقاله ساعه بيغني لما فلقنا.
هههههههه انتو لسه شفتو حاجه:
- و كتاب حياتي يا عيييييييييييييييييييييييي ين ما شفت زيه كتاااااااااااااب الفرح فيه سطرييييييييييييييييين و الباقي كله عذااااااااااااااااب عذااااااااااااااااب عذااااااااا....
تليفوني بيرن... قمت نشفت ايديا و رديت:
- عدوووووي...حبيب قلبي.
- مساء الروقان... باين إن مزاجك حلو النهرده.
- ايوه.
- بتعمل إيه بقه مكيّفك كده؟
- بغسل سجاجيد.
- بتإيه؟
- بغسل السجاجيد...تيجي تاخدلك فمين معايا؟
-هههههههه إنت مزيكه ياد يا مي مي... بقولك إيه؟ عيد ميلاد اخت نورهان الصغيره النهرده هيعملوه ف دار الضيافه هتيجي؟
- مش عارف...على حسب.
- على حسب ايه؟
- على حسب إمته هتخلص حملة النضافه اللي عندنا في البيت.
- يا عم إقلبهم.
- بص أنا غسلت 3 سجاجيد لسه إتنين... لو خلصتهم قبل الفطار هاجي لو ملحقتش ابقى سلملي على نورهان و قولها متقوضه يا قمر.
- إنت هتتنحنحلي في التليفون إبقى كلمها إنت.
- طب إقفل السكه يلا أحسن أقفل على صوابعك...سلام.
مممممممممم هغني إيه دلوقتي؟ أحلى حاجه ف غسيل السجاجيد دي إني غرقان ميه و الهوا بيسفخ فيا من كل إتجاه... وداعاً للحر و العرق و أهلاً بالــ... بالميه:
- و الميه تروي العطشاااااااااااان.
**********************************
- بردان يا ماما...بردان.
- لا حول و لا قوة إلا بالله...إجري يا عليه هاتي بطانيه كمان.
- معادش في يا ماما... إحنا لافينه بكل البطاطين.
تحيّه بشماته:
- شفت بقه آخرة المية اللي بتروي العطشان؟
- شمتانه فيا يا تحيّه كح كح كح...انا هوريكي كح كح كح بكره تشوفي أنا هعــ كح كح كح.
ماما بتطبطب عليا:
- متتكلمش يا حبيبي... يا ابني ده سخن أوي.
- شفتي يا ماما حصلي إيه؟ علشان تبقى تقوليلي اغسل الـــ عااااااااااااااااتسوووووو وووو.
رقيّه بتريقه:
- إيه العاتسووووووو دي؟ ده اسم جديد للسجاجيد؟
- ماااااااااماااااااااا خرجي الأوباش دول من هناااااااااا كح كح كح .
- بره يا بنات... سيبو أخوكم يرتاح.


أشوفكم بكره
دي آخرة حملة النضافه كح كح كح ده انا كح كح كح... مش عارف أقولكم أنا حاسس بإيه دلوقتي كح كح كح
أنا جسمي كله عاااااااااتسووووووووووو... مش قادر اتكلم أكتر من كده كح كح كح

[هبة]

سلامتك يا مى مى إنشاء الله فى إلى ما بيحبوك ... خد بالك العيد اللى جاى و أنت بتغسل السجاد >>> نفسى أفهم ليش كل عيد بتقوم حملة النظافة فى كل بيت ... يعنى إحنا بنكون عيشين فى مزبلة و بنظف فى العيد ... ده البيت بيكون بيبرق من النظافة و برضة الست الوالدة بتشن حملة النظافة الشاملة و الكاملة >>> الله يعينا




زاهرة متابعاكى و شكراً لك

[زاهره]

المشاركة الأصلية كتبت بواسطة هبة

سلامتك يا مى مى إنشاء الله فى إلى ما بيحبوك ... خد بالك العيد اللى جاى و أنت بتغسل السجاد >>> نفسى أفهم ليش كل عيد بتقوم حملة النظافة فى كل بيت ... يعنى إحنا بنكون عيشين فى مزبلة و بنظف فى العيد ... ده البيت بيكون بيبرق من النظافة و برضة الست الوالدة بتشن حملة النظافة الشاملة و الكاملة >>> الله يعينا




زاهرة متابعاكى و شكراً لك

هههههههههههه
معليش يا هبهوبتي
كل البيوت كدا

لازم قبل العيد الواحد ينطحن شغل

تسلمي على مرورك الغالي
منوره كعادتك