[اسطورة !]

لما بيبقى فـى حاله وفاه
بيبقى اهل الميت فى حاله من التناقض لا هما قادرين يستوعبوا الناس اللى حواليهم وكلامهم ولا هما قادرين يقعدوا من غيرهم ويسيبوا نفسهم للوحده والحزن

وفـى اخر اليوم التالت للعزا

مها بتعب : اااه دماغى مصدعه هموت

عمتها : الف بعيد الشر عنك يا حبيبتى اجبلك دوا

مها باستغراب : لا يا عمتو شكرا انا هدخل انام

الام : كلى الاول يا بنتى مصطفى بيجب العشا اهو

مها : معلش يا ماما تصبحوا على خير

دخلت مها اوضتها وحاولت تنام بس مقدرتش من الصداع

بعد شويه

مصطفى : ايه مها فين ؟

الام : دخلت تنام بتقول مصدعه
ادخل شوفها يابنى

مصطفى : حاضر

دخل مصطفى الاوضه لقى مها نايمه

مصطفى : مها نمتى ولا لسه

مها وقعدت : لا لسه

مصطفى : ايه مالك بس ؟

مها : صدااااع هيموتنى

مصطفى : بعيد الشر طب قومى كلى وهو هيروح

مها : لا مش قادره بجد

قرب منها مصطفى وقعد جنبها
مصطفى : قوليلى بجد مالك

مها : زهقت من كتر الناس والكلام الكتير

مصطفى بابتسامه : الناس كتير عشان انتوا الحمد لله محبوبين وعايزين يفضلوا جنبكوا فى ظرف زى دا

مها : منا عارفه بس تعبت

مصطفى : اممم هو دا بس اللى تعبك ؟

مها بتردد : اه

مصطفى : بتفكرى فى ايه لدرجه الصداع

مها : مش فى حاجه

مصطفى : طب بصى فى عينى كدا
اهو شوفتى بتفكرى ف حاجه

مها : مش عارفه يا مصطفى مستغربه

مصطفى مسك ايديها : من ايه احكيلى

مها : من تصرفات عمتو

مصطفى : ازاى يعنى مش فاهم

مها بتنهيده : هحكيلك
بص ياسيدى عمتو وبابا كان بينهم مشاكل كتير اوى من زمان وكانت مقاطعه بابا وحاول يكلمها كتير بس مفيش فايده

مصطفى : تمام ايه بقى اللى مخليكى مستغربه

مها : انها تيجى وتفضل معانا
الحنيه دى بصراحه مش مطمنانى

مصطفى : حرام عليكى يا مها دا مهما كان اخوها برده واكيد محدش زعلان دلوقتى قدها

مها : الله اعلم بس قلبى مش مستريح

مصطفى : اممم خلينا معاها للاخر لما نشوف

مها : ربنا يستر

مصطفى : يلا بقى عشان تاكلى

مها : يوووه مصدعه بجد ومبحبش الادويه مش بتأثر معايا

مصطفى : عيب عليكى اكون صيدلى وتقوليلى فى وشى كدا

مها : ههههه مش قصدى والله بس مش بحبها بجد

مصطفى : اممم طيب انا عندى فكره
بما ان الصداع اللى عندك دا ناتج عن تفكير زياده ومش عارض لمرض لقدر الله

مها : ايون

مصطفى : قومى صلى ركعتين وزودى فى السجود شويه

مها : ماشى بس اشمعنى ؟

مصطفى : عشان السجود ياستى راحه
ومن الناحيه العلميه انت بتسجدى ع الارض والارض شحنتها سالبه وانت موجب بتسحب منك الكهربا الزياده اللى فى دماغك واللى بينتج عنها صداع

مها بابتسامه : اول مره اعرف

مصطفى : ماشى يلا بقى وهنستناكى ع العشا

وبعد ما خلصت صلاه راحت على السفره عشان تتعشى

الام : يعنى لازم مصطفى اللى يجيبك

مها بابتسامه : عادى يا ماما

الام : ربنا يهدى سركوا يا بنتى

مصطفى : يا رب

وبعد فتره من السكوت

العمه : كنت عايزه اتكلم معاكوا فى حاجه

مها بصتلها باستغراب : خير يا عمتو اتفضلى

العمه : هو انتوا مش هتفتحوا الوصيه ولا ايه ؟
....