[تانياتاني]

الفصل الثاني


٦- العروسة.


في الليل وصلت طائرة الخطوط الجوية الفرنسية و في داخلها 'جمال' مع عيلته و مساعده 'أكرم' اللي بيهتم بطلباته إلى مطار القاهرة الدولي ..
كان في إستقبالهم 'عبد الحميد' و ساعدهم في الإنتهاء من إجراءات الوصول ..
أخذهم 'عبد الحميد' في عربيته إلى فيلته للإستقرار فيها مؤقتاً حتى يقدر يتابع حالة 'جمال' الصحية عن قرب ..

وصل 'عبد الحميد ' لفيلته و فتح الباب لنفسه أتوماتيك و دخل لحديقة الفيلا ..
جه العاملين و أخذوا شنط المسافرين من العربية و وصلوها لأوض كل واحد منهم ..

دخل الكل للصالة و هناك طلب 'جمال' من 'أكرم' يروح يطلب له من الطباخ يجهز له العشاء و يطلعه على أوضة نومه ..
و طلب من 'عبد الحميد' إنه يمشي معاه للمكتب علشان يتكلموا مع بعض و هم لحالهم ..

مسك 'عبدالحميد' إيد 'جمال' و سنده و مشي جنبه حتى دخلوا على أوضة المكتب و ساعده حتى يقعد على الكرسي ..
'عبد الحميد' : - على مهلك !!

قعد جمال' بشويش على الكرسي ..
'جمال' : - أيوااا كدا اشكرك !!!

ترك 'عبد الحميد' إيد 'جمال' و قعد على الكرسي المقابل ليه ..
'عبد الحميد' : - ايوه قولي إيه الكلام اللي سمعته منك !!
'جمال' - بأسف - : - زي ما كلمتك في الموبايل أنا تعبان قوي و عايزك تأخذني لأحسن دكتور في مصر و تعمل لي من جديد كل الفحوصات اللي عملتها في باريس علشان اقدر أتاكد من حالتي الصحية !!
'عبدالحميد' : - حاضر يا عمي و أتطمن إن شاء الله خير !!
بس يا عمي لو كنت قولتلي من البداية كنت أخذتك لأشهر دكتور متخصص في علاج الأورام و هنا بقت كل حاجة متوفرة زي فرنسا !!
أو ممكن كنت اخذك لو انت عايز و نسافر لخارج مصر !!
بس دلوقتي عايز أعرف منك هي 'نرجس' سافرت ليه !!!
هو أنت اللي طلبت منها تسافر معاكم !!
'جمال' : - لا أبداَ أنا كنت متفق مع 'إيزابيل' إن إحنا نسافر لوحدنا لكن بعد ساعات لقيتها مع 'نرجس' حجزوا التذاكر لينا احنا الثلاثة و سافرنا بسرعة !!
'عبدالحميد' : - الحقيقة كان غلط منك إنك تسافر من غير ما تقولي و تاخذ مراتي معاك من غير إذني !!
'جمال' : - أنا فاهم زعلك بس لما بدأت أحس بالتعب فكرت إني مااشغلش بالك حتى تقدر تنتبه لمصالحنا في القرية و الفندق !!
'عبدالحميد' : - طيب خلاص أهو اللي حصل حصل !!
'جمال' : - 'عبد الحميد' أنا حاسس إن مراتي و بنتي عملوا خطة مع الدكتور حتى يقولوا عليا إني مريض بالسرطان !!
'عبد الحميد' : - بعد الشر عليك يا عمي !!
بس هو معقولة يكذبوا عليك بمرض زي ده !!!

'جمال' - بعصبيه - : - إيواااا علشان يأثروا عليا و يقنعوني أتنازل ل 'نرجس' عن كل ممتلكاتي بعقد البيع و الشراء !!

أخذ 'عبدالحميد' يمسح ذقنه بطرف أصابعة عدة مرات يفكر بكلام 'جمال' ..

و 'جمال' كمل كلامه ..
'جمال' : - و دلوقتي بعد ما رجعت لمصر خايف يفكروا في خطة ثانية و يجي يوم و أصحى و ألاقي كل حاجة بقت بإسم 'نرجس' !!!
'عبدالحميد' : - خلاص أنت تعمل توكيل باسمي إني الوحيد من له الحق في التوقيع بالنيابة عنك على أي ورقة رسمية !!
و أنا في الفترة دي هكون مركز أكثر على اي ورقة احط عليها إمضتي !!
'جمال' : - حاضر بس أنت هتكون المسؤول الوحيد قدامي لو قدروا ينفذوا اللي في دماغهم و لو حتى بالتزوير ..!!
'عبدالحميد' - مقاطع - : - أنا عايز أقولك على حاجة و المفروض اني ما اقولش عليها علشان حالتك بس انت لازم تعرفها !!
'جمال' : - أعرف إيه !!!
'عبدالحميد' : - إني تجوزت !!
'جمال' - بدهشة - : - إتجوزت !!
'عبدالحميد' : - انا كنت حاسس أن 'نرجس' مش هتقولك على جوازتي !!
'جمال' : - و انت إمتى إتجوزت و ليه !!!
'عبد الحميد' : - اتجوزت من ايام قليلة و السبب سفر بنتك من غير ما تأخذ إذني او على الأقل تبلغني بالسفر !!
'جمال' : - و مين دي اللي اتجوزتها !!
'عبد الحميد' : - هقول لك كل حاجة عنها بس في وقته !!
'جمال' : - و انت بالسرعة دي قررت تتجوز !!
واضح إنك كنت بتحبها من قبل و رتبت أمورك قبل ما نسافر فما تخليش سفر 'نرجس' عذر لجوازتك !!
'عبدالحميد' : - و الله عمري ما فكرت اتجوز على 'نرجس' و لا كان في بالي اصلاً فكرة حاجة إسمها جوازه ثانية !!
غير بس لما تعبت من تصرفات "بنتك" معايا و تحديها لكل كلمة أقولها عليه !!

'جمال' - بسخرية - : - "بنتي" هه !!
مش لايق عليها الكلمة !!
دي عايزه مع والدتها تموت ابوها علشان الفلوس رغم انها مش محتاجة لفلوس اكثر !!
'عبدالحميد' : - هو لسه في حاجة ناقصها علشان تفكر تشتريها !!!
الطمع اللي في بنتك مالوش نهاية كان لازم تفكر تربي بنتك من غير دلع زايد !!
'جمال' : - و انت لما بتفكر تعمل حاجة بتعملها من غير ما تقول لي !!
'عبدالحميد' : - و عمري ما اخذت قرار و ندمت عليه لاني بفكر زي لاعبين الشطرنج بشوف ايه الخطوات اللي جايه بعد قراري !!
'جمال' : - طب و قرارك بالعروسة اللي اتجوزتها هتناسب عيلتنا و مركزنا الاجتماعي و لا واحدة وقعتك من ...!!
'عبدالحميد' - مقاطع - : - هي صديقة اختي المقربة من إيام الجامعة !!
'جمال' : - اااه يعني زي ما قولت كان في بينكم قصة حب قديمة و دلوقتي لقيت الفرصة تتجوز من حبك القديم !!!
'عبدالحميد' - بسخرية - : - هاهاهاها انا أحب واحدة زيها !!
هو يعني من قله النسوان !!
'جمال' : - قصدك ايه !!
'عبد الحميد' : - لما تشوفها هتعرف قصدي !!
'جمال' : - لما اشوفها !!
ممكن تفسر قصدك !!
'عبد الحميد' : - أنا أخذت واحدة مافيهاش اي ملامح جمال و مصابه بضعف شديد في البصر و فيها عرج في مشيتها !!
'جمال' : - نعم !!!
و دي هتعمل بيها ايه !!
'عبدالحميد' : - و لا حاجة بس علشان تعرف 'نرجس' إن الجمال مش كل حاجة و إني حبيت واحدة أقل منها بكثير !!
طبعا أنا ما حبيتهاش و لا حتى أعرفها بس قدام بنتك هي حبيبتي الغالية !!
'جمال' : - خلي في بالك إنها لسه بنتي و قطعة مني و ما بحبش أشوف دمعه نازله من عينيها فلو سمحت العروسة دي مش هتخليها تعيش مع بنتي في فيلا واحدة !!
'عبدالحميد' : - هاهاها و هي بنتك معاها قلب علشان تحس بيه !!
دي هي مش حاسه باولادها فلذات اكبادها و سافرت و سابتهم من غير ما تعيط على فراقهم زي بقية الأمهات !!!
و الحقيقة انا عايزك تعذرني لأني بفكر أجمع بنتك مع عروستي قريب علشان تشوف بعينها إختياري الجديد بس بعد ما أخلص من فرح 'عماد' إبن خالي !!

قام 'عبد الحميد' من مكانه ..
'عبدالحميد' : - و دلوقتي بعد اذنك هروح أشوف الهانم بنتك أسلم عليها و ابشرها بالهانم الجديدة !!
تحب يا عمي أوصلك على اوضتك علشان ترتاح !!
'جمال' : - لا يابني روح انته و شوف مراتك !!
بس انده لي 'أكرم' يجي يساعدني !!
'عبدالحميد' : - حاضر يا عمي و بكرة جهز نفسك هنروح للدكتور مع بعض و اعمل لك كل الفحوصات اللازمة و إن شاء الله نطمن عليك !!
'جمال' : - إن شاء الله !!!

# * # * # * # * #

خرج 'عبدالحميد' من اوضة المكتب و طلع لأوضة نومه ..
دخل 'عبدالحميد' أوضته و لقى 'نرجس' قاعده على الكرسي مسترخيه و العاملة 'علية' واقفه قدام الدلاوب بترتب ملابس 'نرجس' من الشنطة ..
'عبدالحميد' : - 'علية' !!

التفتت 'علية' ناحية 'عبدالحميد' ..
'علية' : - نعم سعادتك تحت امرك !!
'عبدالحميد' : - ممكن تسيبينا دلوقتي و تكملي شغلك بعدين !!

التفتت 'علية' ل 'نرجس' بقلق و شافت في عيونها نظرات تهديد إنها ما تنفذش أمر 'عبدالحميد' و تخرج ..

انتبه 'عبدالحميد' لنظرات 'نرجس' لكنه تجاهل تهديدها و التفتت مرة ثانية ل 'علية' ..
'عبدالحميد' : - 'علية' !!!
إنتي مش عايزاني أسلم على مراتي حبيبتي بعد رجوعها من السفر بالسلامة !!
مش حاسه ازاي احنا مشتاقين لبعض !!

نفخت 'نرجس' أنفاسها بتأفف و أشرت بايدها ل 'علية' إنها تخرج ..
خرجت 'علية' و هي خايفة من رد فعل 'نرجس' لما ترجع لها و قفلت الباب عليهم بهدوء ..

التفت 'عبدالحميد' ل 'نرجس' و ابتسم لها بسخرية و فتح لها ذراعيه ..
'عبدالحميد' : - حبيبتي وحشاني قوي تعالي لحضني اشبع منك !!

إبتسمت 'نرجس' و إنبسطت إنه لسه واقع تحت سيطرة فتنة جمالها و دلالها ..
'نرجس' - بإحتقار و سخرية - : - مش أنت يا عريس إتجوزت عليا !!!
خلاص خليها هي اللي تحضنك هاهاها !!
و لا انت إتجوزت حركات منك علشان بس اغير عليك !!!
اطمن مش هغير عليك و لو اتجوزت ثلاث ستات مرة واحدة !!

إتضايق 'عبدالحميد' من تصرف 'نرجس' أنها مش مهتمه بجوازته و نزل ذراعيه ..
'عبدالحميد' : - أنا فعلا إتجوزت عليكي بس قولت إنه من حقوقك إني أفرح برجوعك لبيتك و أسلم عليكي !!

قامت 'نرجس' من مكانها بغضب والشرر بيخرج من عنيها ..
'نرجس' : - اسكت !!!
انا عارفه انك إتجوزت وصلني خبر جوازك من السفارة المصرية !!
'عبدالحميد' : - و ليه ماشفتش منك اي رد على جوازي و كمان خبيتي الخبر عن والدك !!
'نرجس' : - لأنك أصلاً ماتهمنيش و اقدر اجيب عشرة زيك وما قولتش لبابا لاني عارفاه مش هيقول حاجة لأنه دايما واقف في صفك !!
انا بس اللي بيهمني دلوقتي فلوس بابا مش هسمح لك تصرف عليها قرش واحد !!

ابتسم 'عبدالحميد' بسخرية و شاف لعنيها بحزن ..
'عبدالحميد' : - مش غريبة عليكي كنت عارف إنك هتخافي على الفلوس أكثر مني و مش هيهمك إن في زوجة ثانية هتشاركك فيا !!
'نرجس' : - خليها حتى تاكلك أنت ماتهمنيش يا عريس لكن قرش واحد زيما قولت لك مش هتصرف عليها !!
اسمع انا هقول لبابا يشغل محاسب مهمته بس يراجع كل جنية انت هتصرفه !!
'عبدالحميد' - بجدية - : - مين هو يا ماما اللي هيراجع بعدي !!
انا الوحيد اللي بتحكم في الحسابات و انتي هربيكي من جديد و همنع عنك تاخذي اكثر مما تحتاجيه دا انتي بقيتي زي الحوت عايز يأكل كل حاجة !!
'نرجس' : - ههههه هو مين ده اللي هيربيني أنت !!!
انت يا حبيبي هتسيب كل حاجة و تخرج من هنا زيما جيت و كمل بقى مع عروستك شهر العسل بس في الشارع ههههه !!
'عبدالحميد' : - إسمعي أنا بستحملك بس علشان خاطر والدك الطيب و أعملي حسابك إننا بعد أسبوع هنسافر شرم الشيخ و نتجمع مع العيلة علشان نحتفل بجواز ابن خالي و بعدها هجيب لك عروستي "الحلوة" تسكن معاكي هنا في فيلتي و إنتي اللي هتقومي على خدمتها !!!
'نرجس' : - انت هطلق و تروح معاها سكة السلامة او ممكن أسمح لكم تشتغلوا عندي مع بقية العاملين هههههه !!!
'عبد الحميد' : - الطلاق مش في بالي علشان اولادك و علشان والدك الطيب و بس و أنا هعرف اربيكي من جديد !!!

خرج 'عبد الحميد' بغضب و قفل الباب وراه بقوة و فكر إنه لازم يجيب عروسته تعيش مع 'نرجس' في فيلا واحدة حتى يقدر يقضي على غرورها ..

لكن إزاي و هو مش عايز يشوف نهائياً العروسة اللي أختارها تبقى مراته ..

# * # * # * # * #

７- لازم.

في اليوم الثاني أخذ 'عبدالحميد' 'جمال' لطبيب مشهور في أمراض السرطان و بعد عمل الفحوصات اللازمة طلعت النتيجة فعلاً 'جمال' عنده سرطان في القولون في المرحلة الثانية و انه لازم في الأول يستأصل الورم لأنه فيه نزيف و كتل متورمه و بعدها يتم عمل فحوصات ثانية و يبدا العلاج بالكيماوي حتى يقدر يقضي على السرطان نهائياً بإذن الله ..

# * # * # * # * #

بعد يومين تم إستئصال الورم و خرج 'جمال' من غرفة العمليات و نقلوه لغرفة العناية المركزة حتى يبقى تحت الملاحظة و منع عنه الدكتور أي حد يدخل عليه و لو حتى من أفراد عيلته ..

قدام باب العناية المركزة ..
قربت 'نرجس' من والدتها 'إيزابيل' و هم قاعدين على كرسي الإنتظار ..
" و الكلام دايماَ بينهم باللغة الفرنسية " ..
'نرجس' : - ماما !!
'إيزابيل' : - أنا فاهمة أنت عايزه تقولي إن دي فرصتنا نستغل تعبه و نخلي قلبه يحن عليكي !!
'نرجس' : - ايوه صح بس ازاي هندخل عنده و الدكتور منع اي حد يدخل عليه !!
'إيزابيل' : - بسيطة بس مش وقته دلوقتي لأن 'جمال' لسه تحت التخدير !!
هنستنى لما يصحى !!
'نرجس' : - ماما إحنا لازم نشوف طريقة اقدر اتكلم فيها مع بابا !!
'إيزابيل' : - هشش خلي الكلام لبعدين 'عبد الحميد' بيراقبنا !!
'نرجس' : - ااه حاضر !!

بص 'عبد الحميد' ناحيتهم ..
'عبد الحميد' – لنفسه - ... " يارب اديني الصبر شبه الشياطين و هم بيوسوسوا لبعض !! " ...

بعد مرور أربع ساعات ..
خرجت الممرضة 'أحلام' من غرفة العناية المركزة و قربت ناحية 'إيزابيل' و 'نرجس' ..
'أحلام' - بهمس - : - البيه صحي !!

برقت عينين 'نرجس' بالفرحه ..
'نرجس' : - يلا يا ماما خلينا ندخل لبابا !!
'أحلام' سمحت لنا ندخل عنده !!
'إيزابيل' : - في الأول خلينا نخلص من جوزك !!!

قامت إيزابيل' و مشيت برقة ناحية 'عبد الحميد'
و هو قام من كرسيه لأدأب الاتكيت و الاحترام لحماته ..
'عبدالحميد' : - شايفكم إنبسطتوا هي الممرضة قالت لكم على حاجة تفرحكم عن حالة عمي !!
'إيزابيل' : - ااه بلغتنا انه حالته مستقره اطمن !!
'عبد الحميد' : - حالة عمي مستقرة من وقت ما خرج من أوضة العمليات فإيه هو الجديد !!
'إيزابيل' : - عادي مانفرحش !!
هي استقرار حالة عمك لحد دلوقتي مش تخلينا نفرح !!
'عبد الحميد' : - إنتوا بجد فرحانين !!!
انا كنت فاكر انكم عايز ..!!
'إيزابيل' - مقاطعة - : - من مصلحتنا انه يفضل عايش علشان نكون مطمنين على ميراثنا أنا و بنتي !!
'عبد الحميد' : - أه دلوقتي وضحت الرؤيا و الله بجد فكرت انكم فرحتوا لصحة عمي مش خوف على ثروته !!

قربت 'إيزابيل' من 'عبد الحميد' ..
'إيزابيل' : - اسمع وقت ما 'جمال' يدي لنا حقنا فعادي هو يغور لأي داهية و أنت معاه لو عايز و أخواته كمان !!

رفع 'عبد الحميد' حواجبه دهشة من صراحة 'إيزابيل' و تكلم قدامها بالعربية ..
'عبدالحميد' : - إقلب القدرة على فمها تطلع البنت لأمها !!
اللهم احفظنا من غدرهم !!!
يعني بنتك هتعمل معايا زيك بالضبط لو أنا تعبت في يوم زي عمي !!
'إيزابيل' : - كلمني بالفرنسي ما انت عارف أنا ماقدرتش اتعلم اللغة العربية !!
'عبد الحميد' - باللغة الفرنسية - : - صح خليكي على الفرنسي العرب حاجة ثانية !!
بين العرب لو في زوجين متخاصمين و حصل لواحد منهم شدة هتلاقي الثاني نسي كل الخلاف اللي بينهم و جري خايف عليه !!!
'إيزابيل' : - و بعدين إيه اللي هيحصل بينهم !!
يعني هم هيكسبوا حاجة لو خافوا على بعض !!
'عبد الحميد' : - ايوه هيكسبوا الحب و الرحمة و الاحترام لنهاية حياتهم !!

هزت 'إيزابيل' رأسها إنه كلام فارغ و مش عايزه تسمع منه كلام اكثر ..
'إيزابيل' : - خلاص أسكت انا جيت اقول لك انا و 'نرجس' عاوزينك تروح الفيلا و تجيب لنا هدوم علشان نغير الهدوم اللي علينا !!
'عبدالحميد' : - ما تروحوا ترتاحوا عمي مش هيصحى دلوقتي فبلاش تضيعوا وقتكم على الفاضي !!
'إيزابيل' : - احنا قاعدين هنا علشان اي حد لو جه يزور 'جمال' يشوفنا اننا قايمين معاه بالواجب !!
'عبدالحميد' : - ايوه ما انا فاهم سبب قعادكم هنا مش حب لعمي!!
أنا بقصد بس انه محدش عارف بمرضه فمحدش هيجي اطمني !!
و دلوقتي يلا خذي بنتك و روحوا !!
'إيزابيل' : - قولت لك لا مش هنروح !!!
'عبد الحميد' : - خلاص معاكي موبايل اتصلي ل 'علية' و خليها تجهز لكم هدوم في شنطة و تبعثها مع 'أكرم' !!
'إيزابيل' : - هوفف خلاص مش عايزين هدوم !!
روح هات لنا اكل من مطعم راقي ممتاز مش من كافتريا المستشفى و ما تنساش تجيب لنا القهوة !!
هو أنت ناوي تسبنا نموت من الجوع !!
'عبدالحميد' - بإبتسامة - : - مش أحسن ليا و ليكم !!!
'إيزابيل' - بعصبيه - : - روح هات الاكل يمكن يطلع الأكل مسموم و نرتاح منك !!

رفع 'عبد الحميد' عيونه للسقف ..
'عبد الحميد' : - امين يارب ربنا يسمع منك !!!

سكتت 'إيزابيل' و تركت 'عبد الحميد' قبل ما تعمل معاه مشكلة و يرفض يخرج يشتري لهم الأكل و تفشل خطتهم ..

خرج 'عبد الحميد' من المستشفى و بسرعة من غير تضييع وقت دخلت 'نرجس' و 'إيزابيل' لغرفة العناية بمساعدة الممرضة 'أحلام' و أتجهوا ناحية سرير 'جمال' ..

شافت 'نرجس' والدها صاحي فبدأت التمثيل بالبكاء و ارتمت في حضنه ..
'نرجس' : - حمدالله على سلامتك يا بابا هيء انا ما قدرتش اروح غير لما اشوفك و اطمن عليك !!
'جمال' : - أي يا بنتي وجعتيني انا لسه عامل عملية صعبة !!
'إيزابيل' : - مسكينة بنتك مش مصدقة نفسها انك فقت من التخدير !!
احنا مستنين نشوفك من اكثر من ست ساعات و انت تقابلنا كده !!
'جمال' : - اعذروني مش قادر استحمل التخدير و الوجع !!
'نرجس' : - يا رتني كنت انا !!
ما كنتش متصوره ان مرضك خطير كده !!
'جمال' : - ده سرطان مش حاجة بسيطة بيهاجم الجسم كله !!
'نرجس' : - مدامك انت عارف بمرضك إنه خطير كده يعني انت راضي اني اتبهدل من بعدك !!
'جمال' : - و مين ده اللي هيبهذلك !!

تدخلت الممرضة 'احلام' و قطعت عليهم الكلام ..
'أحلام' : - بسرعة لو سمحتوا اخرجوا قبل محد يجي و يشوفكم و تحصل لي مصيبة !!

سحبت 'إيزابيل' الممرضة بعيد عن 'جمال' و 'نرجس' ..
'إيزابيل' : - مش إحنا دفعنا لك و كمان لما نخرج هندفع لك اكثر بس دلوقتي سيبينا خمس دقايق لوحدنا يلا اخرجي و اقفلي الباب وراكي !!!

انبسطت الممرضة من سماع كلمة الفلوس و استمعت لأمر 'إيزابيل' ..
'أحلام' : - حاضر هخرج و اسيبكم لوحدكم بس بسرعة لو سمحتي !!
'إيزابيل' : - طيب قولت لك خمس دقايق و هنخرج يلا أمشي !!!
'أحلام' : - أمرك مدام !!!

خرجت الممرضة 'أحلام' من غرفة العناية و 'إيزابيل' أشرت لبنتها 'نرجس' تستعجل كلامها قبل ما يوصل 'عبد الحميد ' ..
'نرجس' : - بابا أنا خايفة !!
مش عارفه هيحصل لي إيه لو انت مُت لا قدر الله !!
انا بنتك الوحيدة المفروض انك من غير ما تفكر تديني كل حاجة !!
مش انت تعبت كل السنين اللي راحت علشان مين !!
مش علشاني انا !!

حن قلب الاب 'جمال' على بنته 'نرجس' ..
'جمال' : - ايوه بس في حاجات كثيرة هتحصل لو قمت ببيع كل حاجة ليكي !!
'نرجس' - بغضب - : - شفت انت بتفكر بكل حاجة الا مستقبل بنتك بعدما انت تموت !!
'إيزابيل' - بصوت واطي - : - 'نرجس' !!!

انتبهت 'نرجس' لخطأها في الكلام مع والدها ..
'نرجس' : - قصدي بعد الشر عليك !!!

حزن 'جمال' من أنانية بنته و فكر بحل يخلص من زنها و هو تعبان مش قادر مواصلة الكلام معاها ..
'إيزابيل' : - بنتك مش تقصد حاجة !!!
هي خايفة من اخواتك يمكن يزيد فيهم الطمع و يخرجوا بنتك من غير ميراث و كمان 'عبد الحميد' بنتك مش مطمنه ليه !!
'جمال' : - و لا بنتك تقصد ما بقاش يهمني !!
اسمعي انا تعبان دلوقتي و لما ترجع لي صحتي شويه انا هصدر قرار تكوني شريكة مع 'عبد الحميد' في إدارة الفندق و القرية !!
خلاص اطمنتي !!!
'إيزابيل' - بلهفة - : - يعني 'نرجس' هتقدر تمضي على أي ورقة رسمية !!
'جمال' : - ايوه انا من زمان طلبت منها و اكثر من مرة تشتغل معانا و هي خريجة هندسة بس بنتك عايزه الفلوس تيجي لحد عندها من غير ما تتعب !!

دخل 'عبد الحميد' و سمع اخر كلمات 'جمال' ..
'عبد الحميد' : - و دلوقتي بعدما نجحت خطتكم مع عمي تقدروا تتفضلوا و تخرجوا !!

انتفضت 'نرجس' لما سمعت صوت 'عبد الحميد' و التفتت ناحيته بكره ..
'نرجس' : - و انت مالك !!!
هو بابايا انا !!

التفت 'عبدالحميد' ناحية 'إيزابيل' ..
'عبد الحميد' : - و جوز الهانم ايوه انا عارف
ما فيش داعي يا حماتي تكرري كلام بنتك انا فاهم بس اللي انا عايز منكم تفهموه انكم مش هتقدروا تاخذوا اي قرار من عمي لانه هيهدم كل اللي بنيناه طول عمرنا !!!
'إيزابيل' : - و انت دخلك ايه بينا و بينه !!
هو إبوها و حر يديلها اللي هو عاوزه لو حتى روحه !!

قرب 'عبد الحميد' بهدوء من سرير 'جمال' و قعد على الكرسي اللي جنبه ..
'عبد الحميد' : - سامع يا عمي هيأخذوا روحك بعد ما تدي لهم كل حاجة !!!
الحقيقة انا اسف يا عمي لانك سمعت منهم كلام زي السم و انت في الحالة دي فلو سمحت سيبني انا اللي أرد عليهم !!!

أشر له 'جمال' برأسه و هو حزين منهم إنه موافق التفت 'عبد الحميد' ناحية 'إيزابيل' و 'نرجس' ..
'عبد الحميد' : - إحنا خبينا مرض عمي عن الصحافة و الناس علشان انتوا نسيتوا من طمعكم إنه في حاجة إسمها سمعة شركة حاجة إسمها أسهم في بورصة حاجة إسمها شركاء في الفندق و القرية السكنية !!
فلو عمي مشي بعد كلامكم و أصدر قرار إي قرار و هو تعبان هتحصل مشاكل كثيرة و هنخسر حاجات اكثر و بغبائكم هتضيعوا كل حاجة و مش هتلاقوا و لا مليم !!
فأحسن حل انكم تختاروه يا أما تحترموا عمي و تقفوا معاه في مرضه و أنا مستعد أوظف نرجس معايا لحد ما تتعلم ..!!!
'نرجس' : - نعم !!!
عايزني انا صاحبه الكل أتوظف عندك زي اي موظف !!!
'عبد الحميد' : - بقيتي صاحبه الكل و عمي لسه موجود قدامك !!
يا غبية انا كان قصدي أنك أول حاجة تتعلمي أصول الشغل و بعدين تقدري تديري أملاك والدك !!
بس دلوقتي بقى تحدي بيني و بينكم لو تقدروا تاخذوا شبر واحد من ممتلكات عمي يلا اخرجوا دلوقتي و سيبوا عمي يرتاح من وشكم !!
'نرجس' : - مش بأمرك هنخرج !!
'عبد الحميد' : - يلا يا قمرات العفاريت بره قبل ما انده لكم الحراس ييجوا يطردوكم زي الكلاب المريضة !!

من غير إي كلمة سحبت 'إيزابيل' أيد 'نرجس' و خرجوا من اوضة 'جمال' ..
دخلت 'نرجس' مع والدتها عربيتها و قفلت الباب و بصت ناحية الدريكسيون بحقد ..
'نرجس' : - ماما إحنا لازم نخلص من 'عبد الحميد' قبل ما يموت بابا و يضيع مننا كل أملاكنا !!!
سندت 'إيزابيل' مرفق إيدها على شباك العربية و سندت صدغها بصباعها تفكر ..
'إيزابيل' : - ايوه لازم يا 'نرجس' !!!

# * # * # * # * #



８- أول لقاء.

بعد مرور أسبوع ..
سافر 'عبدالحميد' للقرية السياحية و بدأ بتجهيز البيوت اللي هيسكنوا فيها أفراد عيلته و عيلة العروس و المعازيم اللي هيحضروا الفرح ..
أشتغل 'عبد الحميد' بجهد كبير حتى يقدر ينسي عقله زعله من مراته 'نرجس' ..
و ينسي نفسه تسرعه في جوازته من مراته الثانية ..

و في الأسبوع الثاني بدأ وصول الضيوف و المعازيم للقرية السياحية لبدء الإحتفالات بمراسم زاوج 'عماد' إبن خال 'عبد الحميد' ..

وصلت عربية بيضاء صغيرة و وقفت قدام منتزه صغير و نزلوا من العربية 'حنان' و جوزها 'فادي' و أولادهم الثلاثة و الخالة 'زهراء' و معاهم 'توليب' ..
'فادي' : - أنا لما كلمت 'عبدالحميد' طلب منا نستناه هنا !!

قربت 'توليب' من 'حنان' و مسكت ذراعها بقوة ..
'توليب' : - 'حنان' أنا بدأت أخاف و حاسه بقلبي بيموت و هو بيرجف من الخوف !!
'حنان' : - ما تخافيش انا فاهمة شعورك و إطمني إحنا مش هنبتدى بخطتنا إلا بعدما تقابلي أخويا و تتعودي عليه و تثقي بنفسك إنه مش عارف أنتي مين !!
و دلوقتي خذي نفس طويل لإن وشك بدأ لونه يصفر !!
'توليب' : - حاضر !!
'فادي' : - طب خلونا دلوقتي نرتاح و نروح نقعد على الكراسي !!

مشي الكل و قعدوا على كراسي عليها مظلات واقية من الشمس ..
و أخذت 'توليب' تتنفس بطريقة "اليوجا" تسحب نفس طويل من الأنف و تخرجه ببطء من الفم ..

التفتت 'حنان' للجميع و بدأت بمراجعة الخطة ..
'حنان' : - هاه زي ما أتفقنا أنتى ممرضة أسمك 'أمل' و جايه معانا علشان تهتمي بصحة خالتي !!
و أنتي يا خالتي أكيد فهمتي خطتنا فياريت الكل يلتزم باللي أتفقنا عليه !!
'زهراء' : - ماتخافوش من 'عبد الحميد' هو بيحبني قوي و بيسمع كلامي و أنا هقول له على كل حاجة و هطلب منه يطلق مراته المجنونة !!

... " 'زهراء' ، 57 سنة ، طويلة ' ممتلئة ، بشعر رمادي ، و بشرة بيضاء ، عيون رمادية عليهم نظارة طبية " ...

خافوا 'حنان' و 'توليب' من 'زهراء' و صاحوا بصوت واحد : - لااااااا !!!
'توليب' : - مش دلوقتي عايزين نصبر شويه !!
'حنان' : - الله يخليكي يا خالتي خليكي انتي ساكته و أرجوكي بس تفكري بخطتنا إنها ممرضة إسمها 'أمل' إسمها إيه !!
'زهراء' : - 'أمل' أنا فاهمة بس إحنا ليه هنلف و ندور على 'عبد الحميد' و مراته أهي قدامه !!
'حنان' : - معلش يا خالتي إحنا كده بنحب نتعب و أخويا بيحب يلعب فسيبينا نلف و ندور براحتنا لحد ما نوصل لنهاية خطتنا !!
'زهراء' : - أفهموني 'عبدالحميد' عاقل و هيحب مراته الجديدة و انتي حلوة ما شاء الله عليكي !!
'توليب' - بخوف - : - 'حنان' أنا بدات أفكر أنسحب من الخطة و هرجع مكان ماجيت !!
'حنان' : - تنسحبي إزاي و إحنا خلاص بقينا في الخطوة الثانية !!
'زهراء' : - أنا مش فاهمة أنتوا ليه عايزين تصعبوا الموضوع في خطوات طويلة !!
أطمنوا أنا هكلمه دلوقتي و أخليكم ترتاحوا !!

بدأت الدموع تخرج من عيون 'توليب' من الموقف اللي هيحصل لها لو فضحت 'زهراء' بحقيقتها ل 'عبد الحميد' بعد دقايق ..
'توليب' : - أنتي السبب يا 'حنان' ياريتك ماخططتي و لا جبتيني هنا أشوف نهايتي بعنيا !!
'زهراء' : - ههههه أومال هتشوفي نهايتك برجليكي ههههه كلنا هنشوف نهايتنا بعنينا !!
'توليب' : - يارب ياريتني ماسمعت كلامك يا 'حنان' !!
'حنان' : - خالتي الله يخليكي لما يجي 'عبدالحميد' سلمي عليه بس و في الليل هنفكر نعمل معاه إيه !!

قربت 'زهراء' نظارتها لعنيها ..
'زهراء' : - و هو فين دلوقتي عايزه أدخل أنام أستريح !!
'حنان' : - حالاااا يجي !!
خليكي بس قاعده شويه على الكرسي !!
و أنت يا 'فادي' أرجوك اتصل له مرة ثانية خليه يستعجل !!
'فادي' : - حاضر !!

فتح 'فادي' شاشة موبايله بس شاف عربية 'عبدالحميد' جايه من بعيد ..
'فادي' : - أهي عربيته جايه !!

إتجه 'عبدالحميد' ناحيتهم بالعربية و نزل منها بسرعة يستقبلهم ..
قفز قلب 'توليب' فرحة و سعادة و هي بتشوفه قريب منها و على الطبيعة لأول مرة ..
'توليب' - لنفسها - ... " معقول الراجل الوسيم ده بقى جوزي !!! " ...

خلع 'عبدالحميد' نظارته الشمسية و إبتسم لهم و راح يحضن أخته 'حنان' و أولادها و يسلم على جوز أخته 'فادي' و يبوس إيد و رأس خالته 'زهراء' ..
'عبدالحميد' : - أهلاً بالغاليين أنا جيت بنفسي علشان أوصلكم على بيوتكم و أطمن على راحتكم !!

رفع 'عبدالحميد' رأسه و التقت عيونه بعيون 'توليب' و هي من خوفها و توترها وقع قلبها منها و ذاب تحت رجليها ..
'عبد الحميد' : - هي دي الممرضة اللي هتقعد معاكي يا خالتي !!
'زهراء' : - هاه عجبتك !!

تفاجأ 'عبدالحميد' من سؤال خالته 'زهراء' ..
و 'توليب' أحمر وشها من الخجل ..
و 'حنان' أصفر وشها من قرب إنكشاف خطتهم ..

إبتسم 'عبدالحميد' مجاملة لخجل 'توليب' لكنه حس ناحيتها بمشاعر غريبة ما قدرش يفسرها ..
'عبدالحميد' : - أسف يا دكتورة بس خالتي كدا بتحب الهزار قوي !!

التفت 'عبد الحميد' ناحية خالته 'زهراء' و ابتسم ..
'عبد الحميد' : - إيه يا خالتي أنتي مش هتبطلي حركات "هالة فاخر" !!


شاف 'عبدالحميد' إيدين 'توليب' بترتجف فكمل كلامه بسرعة حتى ينسيها مزحه خالته و تقدر تأخذ أنفاسها ..
'عبدالحميد' : - يلا خلوني اوصلكم لبيوتكم اللي هتسكنوا فيها و أبقوا ارتاحوا لكم بقية اليوم و في الليل هنجتمع على العشاء في مطعم الفندق اللي أنا ساكن فيه !!

أخذهم 'عبدالحميد' لشقتين متقاربتين واحدة ل 'حنان' و عيلتها الصغيرة و الثانية ل 'زهراء' و ممرضتها 'أمل' "توليب" و سلمهم المفاتيح ..
'عبد الحميد' : - يلا اسبكم ترتاحوا باي يا بنات !!
و راح 'عبد الحميد' و حضن بنات 'حنان' و مشي لعربيته و سابهم ..

أشرت 'حنان' ل 'فادي' ناحية بيتهم الجديد ..
'حنان' : - 'فادي' خذ البنات و أدخلوا البيت و أنا خمس دقايق و هرجع لكم !!
'فادي' : - اوكيه بس هاتي 'كريم' !!!
دخل 'فادي' البيت مع بناته 'فرح' و 'سارة' و ابنه 'كريم' ..
و 'حنان' جريت وراء 'توليب' و 'زهراء' و دخلت البيت ..
اتجهت 'توليب' لأقرب سرير و قعدت عليه تستريح و ترجع الضغط المنخفض ..

قربت 'حنان' من خالتها 'زهراء' ..
'حنان' : - هو ينفع يا خالتي لو احط شريط لاصق على بقك و أبقى كدا مطمنه على سرنا !!
'زهراء' : - اللاصق ده أنتي تخذيه و تلصقيهم مع بعض أومال إنتي هتقربي بينهم إزاي !!!
'حنان' : - يا خالتي يا سفيرة النوايا الحسنة إحنا صح عايزين نلصقهم مع بعض بس عايزين نلصقهم بصمغ ماينفكش لما يقربوا بشويش و يتعارفوا و يحبوا بعض مش خبط لصق زيما أنتي عايزه !!
'زهراء' : - حاضر يا بنت أختي أنا هسكت و مش هساعدكم و مش هفتح بوقي بكلمة واحدة و إنتوا تستاهلوا !!
'حنان' : - يا سلاااام عليكي يا خالتي لما تساعدينا بسكاتك بتجنني كأنك قمر بينور بهدوووء في ظلام الليل !!

سكتت 'زهراء' إنها مش راضية من خطة 'حنان' ..
'حنان' : - و 'توليب' فين يا خالتي !!
'زهراء' : - أنا شفتها دخلت الأوضة اللي قدامنا !!
خلينا نشوف هي مالها ساكته كده ليه !!!

دخلت 'حنان' مع خالتها و شافوا 'توليب' مسترخيه على السرير و بتلف شعرها بصباعها و بتبتسم سرحانه في عالم ثاني ..
قربوا منها بشويش ..
'زهراء' : - يا حرام شفتي اهي دي نهاية خطتك !!
ضيعتي الوقت عليها لما ضيعتي لها عقلها !!
'حنان' : - 'توليب' !!!
ردي عليا انتي بخير !!
ابتسمت 'توليب' و التفتت ناحيتهم ..
'توليب' : - ايوه انا بخير و سمعت كل كلمة أنتوا قولتوها بس انا دلوقتي برجع الزمن للوراء و أكرر اللقطة لما جت عيني في عينه !!
'زهراء' : - شوفتي يا 'حنان' خلاص خليكي كدا ساكتة لحد ما تضيع البنت منك !!
'حنان' : - يا بنت فوقي يعني لما تقربي منه هتعملي إيه !!

قامت 'توليب' بسرعة من السرير ..
'توليب' : - إمتى امتى هنقرب من بعض !!!
'حنان' - بخبث - : - عايزه الليلة نقول له !!!
'توليب' - بخوف - : - لاااا أنا بس كنت بمزح معاكي !!

'زهراء' : - طب يا 'حنان' قولي لي دلوقتي إمتى هنقدر نقول ل 'عبد الحميد' إنه جوزها !!
'حنان' : - خالتي إحنا مش هنقدر نقوله على الأقل في الوقت الحاضر !!
'زهراء' : - آه قصدك نقوله في يوم فرح 'عماد' !!
'حنان' : - لا و لا في يوم فرح 'عماد' !!
'زهراء' : - طب ما تطمنوني إمتى هنقدر نقولوه !!
'حنان' : - اطمني يا خالتي معاكي و لا عمرنا هنقدر نقوله !!
'زهراء' : - مادام كده خلاص أنا الليلة هقوله !!

خافت 'توليب' من 'زهراء' انها تنفذ كلامها و تقول ل 'عبد الحميد' بحقيقتها ..
'توليب' : - 'حنااان' إلحقيني !!!
'زهراء' : - ما تخافيش خليكي أنتي معايا بس !!
'توليب' : - معاكي !!!
يا لهوي واضح إني إنتهيت !!

# * # * # * # * #

يتبع ..