دنيتي إتغيرت ( بقلمي ) مكتملة

[جود الدنيا]

أسلوبك روعة

عجبتني مرة

شكررررررا

[~sẳrẳh]

تويتي
رائعه الاجزاء والاحداث في تصاعد بين مازن وكندا

قراءات الاولى وكان بروعه هذة مبدعه الله يحفظك

[nouranosh]

كندا ربنا يصبرك و ان شاء الله اللي جاي يكون احسن

مازن اتمنى ان دي تكون اخر مرة تجرحها لكندا

خالة روعة انا حبيتك قوي و حبيت طيبتك و حنيتك

ميرو قصة رائعة و مشوقة و تختلف عن قصتك السابقة متابعاكي و في انتظار القادم

[tweety-14]

شكرا لكل اللى بيتابعوا القصه
بجد بيسعدنى جدا كلامكم الطيب و تشجيعكم
و اتمنى ان ابقى عند حسن ظنكم

[tweety-14]

الفصل العاشر:
مر على وجود كندا و عمرو فى المنزل أكثر من شهر توطدت فيه العلاقه بشكل كبير بينهما. كبرت الصداقه و الثقه بين كندا و مازن, كما تعلق عمرو بمازن بشكل كبير, و كانت الخاله روعه دائما بجوارهم. تفهم كلا من كندا و مازن ما مر به كلا منهما من قبل و هذا جعلهم أقرب لبعض و لم يحاول أيا منهم الاساءه للأخر بأى شكل, و أصبح جو من الهدوء و الأمان و الاستقرار يخيم على المنزل و اصبحوا كأسرة واحدة.
عاد مازن فى أحد الأيام من عمله فى المساء متأخرا و كان الجو سيئا فى هذا اليوم و البرق و الرعد فى أسوأ أحوالهما, دخل البيت فوجده مظلما و من الواضح ان كندا و عمرو ناما مبكرا على غير العاده و لكنه عندما دخل فوجأ بكندا جالسه على الكنبه ضامة رجليها إلى قدميها. وضع يده بخفه على كتفها فصرخت و وقفت خائفه. أشعل نورا بسيطا و اقترب منها.
مازن: انا مازن .. مالك خايفه من أيه؟
كندا ( برعب واضح ) : صوت الرعد رهيب و انا بخاف منه من صغرى.
مازن : اهدى مفيش حاجه تخوف. انا معاكى و جنبك اهه مش هسيبك الا لما تطمنى.
كندا: انت كلت حاجه بره.
مازن: لا من ساعة الغدا مكلتش حاجه و بصراحه هموت من الجوع.
كندا: طيب انا هحضرلك حاجه تاكلها.
عندما همت بالتحرك سمعت صوت رعد عال جدا كما ظهر نور رهيب من النافذه خافت و انزلقت فسندها و اخذ يحدثها و يحاول طمئنتها.
بعد قليل توجهت إلى المطبخ. اعدت له بعض السندوتشات و جلسا على الكنبه سويا و هو يأكل.
مازن: تسلم أيديكى.
كندا: الله يسلمك. انا كنت عاوزه اكلمك فى موضوع كدا.
مازن: موضوع واحد بس, قولى موضوعين تلاته عشره.
ابتسمت له كندا بخجل قائله: هو موضوع واحد.
مازن: اتفضلى يا ستى كلى اَذان صاغيه.
كندا: انا من ساعة ما جيت انا و عمرو و انت قايم بمصاريف البيت كلها حتى عمرو بتجيبله كل حاجته بس انا بصراحه مش مرتاحه للوضع دا و حاسه اننا بقينا حمل عليك و فكرت انى لازم اشتغل لان الفلوس اللى باقيه معايا من بعد ما بعت الشقه اللى كان سايبهالى مدحت فى مصر قربت تخلص و انا مبحبش ابقى قاعده من غير فلوس كدا فأنا قررت انى اشتغل و يا ريت لو تساعدنى الاقى شغل.
مازن ( محاولا السيطره على انفعاله ) : انا قصرت معاكى فى حاجه او اشتكيتلك.
كندا: لا طبعا بس انت كتر خيرك اوى لحد كدا. و انت مش مجبر تتحملنى انا و ابنى.
مازن: انا مش بعمل كدا عشان مجبر بس انتوا من ساعة مدخلتوا البيت دا و بقيتوا مسئوليتى, انا مش موافق على موضوع الشغل دا على الاقل عشان عمرو مينفعش يقعد لواحده و لا حتى مع الخاله روعه مينفعش نتعبها معانا.
كندا: ممكن اوديه حضانه.
مازن: و ليه كل دا.
كندا: خلاص لو مش عاوز تساعدنى هدور انا لواحدى.
مازن: طيب ممكن نأجل شويه الكلام فى الموضوع دا لحد بس ما أرجع.
كندا ( بدهشه ) : ترجع منين!
مازن : انا كنت لسه هحكيلك. انا مسافر بكره و هقعد يومين او يمكن ثلاثه. سفريه تبع الشغل, و لما ارجع نبقى نتكلم فى موضوع الشغل دا براحتنا.
كندا شعرت بحزن غريب يتملكها و كأن قلبها يعتصر فقد اعتادت على وجود مازن لدرجة انها لم تعد تستطيع النوم اذا تأخر فى العمل الا بعد عودته و اطمئنانها انه فى المنزل و فكرة غيابه عن المنزل لمدة يومين او ثلاثة ايام كانت مخيفه بالنسبه لها.
مازن: سرحانه فأيه؟
كندا: و لا حاجه. بس ليه مقولتليش انك مسافر قبل كدا.
مازن: لسه مبلغنى فى الشغل النهارده و بعدين انا مش هتاخر.
صمتت و اطرقت برأسها, فرفع رأسها و نظر لعينيها نظرة جعلتها ترتجف من الداخل.
مازن ( بصوت رقيق و هامس ) : خلى بالك من نفسك و من عمرو. هكلمك كل يوم اطمن عليكم و لو خوفتى او حسيتى بأى قلق روحى اقعدى عند خاله روعه.
ابتسمت له و هزت رأسها موافقه و لكن الدموع كانت ظاهره بعينيها و الحزن بادى عليها.
مازن : ممكن افهم الحزن اللى فى عينيكى دا ليه. اعتبر يعنى ان دا معناه انى هوحشك.
كندا ( مبتسمة بخجل ) : انا بس مش بحب لحظات الوداع.
مازن : اهاااااااا. يعنى صعبان عليكى تقولى اى كلمه حلوه قبل ما اسافر. على العموم يا ستى انا مش هتأخر و لما نشوف بقى هوحشكم و لا لا, رغم انى واثق من عمرو و عارف انى هوحشه زى ما هيوحشنى.
كان ينظر لها و نظراته تتفحصها و احست بشعور لم تشعره من قبل و لا حتى مع مدحت و تمنت لو تعبر له عن مدى اشتياقها له من الاَن قبل ان يتركها بالفعل و لكن خجلها منعها من ذلك.
مازن: تصبحى على خير.
كندا: و انت من أهله.
و ذهبت مسرعة إلى غرفتها لتطلق العنان لدموعها الصامته التى تعبر عن حزنها.
استيقظ مازن مبكرا و أعد كل شئ لسفره و مر على غرفة كندا و عمرو ليراهما نائمان بهدوء و براءه فإبتسم و نظر إليهما نظرة سريعه كلها حنان و غادر المنزل.

[tweety-14]

الفصل الحادى عشر:

مر أول يوم على سفر مازن دون أن يتصل, كانت كندا تعلم انه يوم سفره و من الطبيعى الا يتصل لكن هذا جعلها تشعر بحزن كبير فكانت تريد الإطمئنان على وصوله سالما كما انها شعرت بفراغ كبير بدونه. و لكن اليوم الثانى جاءها اتصال منه فى فترة الظهيره.
رن جرس الهاتف فأجابة كندا: ألو
مازن: الو كندا.
شعرت بسعاده كبيره عند سماع صوته و لكنها حاولت اخفائها.
كندا: هاى مازن.. ازيك؟
مازن: انا بخير الحمد لله بس مطحون فى الشغل. المهم طمنينى عليكم انتوا عاملين ايه؟
كندا: احنا بخير الحمد لله و الخاله روعه دايما معانا.
مازن: طيب الحمد لله انا كنت بفكر فيكم طول الوقت و قلقان عليكم.
كندا: انت هترجع امتى؟
مازن: وحشتك؟
كندا صمتت و لم ترد.
مازن: مش عارف لسه بس يمكن أطول شويه. يعنى يمكن أقعد لنهاية الأسبوع؟
كندا ( و الحزن بادى على صوتها ) : مش قولت يومين او تلاته بالكتير.
مازن: بس الشغل اللى جيت علشانه لسه مخلصش.
كندا: تمام.. ربنا يوفقك.
مازن: ربنا يخليكى. انا مضطر اقفل دلوقتى عشان ورايا شغل كتير. بوسيلى عمرو و خلى بالك من نفسك.
كندا: اوكى و انت كمان خلى بالك من نفسك.
مازن: ان شاء الله. باى
كندا: باى
ظلت تحمل بيدها سماعة الهاتف لفتره و كأن ذلك يشعرها بقربه منها.
فى هذا الوقت سمعت طرقات الخاله روعه على الباب, ففتحت لها.
لاحظت الخاله روعه الحزن الظاهر على وجه كندا.
الخاله روعه: شو بكى يا قلبى. ليش كل هاد الحزن.
كندا: لا انا مش زعلانه و لا حاجه.
الخاله روعه: ما تخبى على, كتير مبين عليكى.
كندا: لا مفيش حاجه. على فكره مازن اتصل من شويه.
الخاله روعه: و الله و كيفه هالضرسان و ايمتى بيرجع.
كندا ( بحزن ) : يمكن يقعد لأخر الاسبوع لانه لسه مخلصش شغله.
الخاله روعه: اي فهمت مشان هيك زعلانه. لا تزعلى كل هالقد بتفتحى عين و تغمضى عين بتلاقيه قبالك. الأيام بتفوت بسرعه و بعدين خليه يشتاقلك.
خجلت كندا من كلام الخاله روعه و لم تعرف بم ترد فهذه المرأه الذكيه دائما ما تكشف ما يدور بداخلها.
قضت الخاله روعه معظم اليوم مع كندا ثم عادت إلى منزلها. توجهت كندا لغرفتها و نيمت عمرو ثم خرجت لترتب الريسيبشن قبل نومها و اذا بها تسمع صوت غريب عند باب الشقه خافت و لكنها اقتربت قليلا من الباب لتحاول اكتشاف ما يحدث و اذا بالباب يفتح و يدخل مازن حاملا حقيبته. لم تدرك كندا ما تفعل و اذا بها تجرى فى اتجاهه لتستقبله و الفرحه تملأ وجهها.
مازن: انتى كمان وحشتينى أوى.
خجلت كندا من نفسها كثيرا فدون ان ينطق لسانها نطق قلبها. حاولت كندا ان تنهى هذا الخجل الذى تشعر به. فقالت له: ايه هنفضل واقفين على الباب كتير. ادخل انت اكيد تعبان من السفر.
جلس على الكنبه و جلست بجواره.
كندا: انت قولت فى التليفون انك هتطول و يمكن ترجع على نهاية الاسبوع.
مازن : حبيت اعملهالك مفائجه على رأى عمرو.
ابتسمت كندا له.
مازن: هو عموره نام خلاص.
كندا: اه كان بيلعب طول اليوم فتعب و نام اول ما حطيته على السرير.
مازن ( و هو ينظر لكندا بخبث ) : وحشنى اوى اوى اوى.
كندا ( بخجل ) : انت كمان وحشته اوى.
ضحك مازن لخجلها لانه فهم انها فهمت تلميحه.
شعرت كندا بخجلها يزداد بسبب نظراته لها, فحاولت ان تعفى نفسها من هذا الموقف.
كندا: اكيد انت تعبان و محتاج تنام و ترتاح.
مازن: بصراحه انا مجهد جدا بس مش عاوز اقوم كدا مرتاح اكتر.
كندا ( بنظرة عتاب مصطنعه ) : لا لازم تقوم ترتاح.
مازن : بس الاول عاوز اطلب منك طلب بس قبل ما اقولك عليه اوعدينى انك تنفذيه.
كندا: اكيد لو اقدر هنفذه.
مازن: تقدرى طبعا.
كندا: يبقى اوعدك.
مازن: بكره عندى عشاء عمل مع مهندس فرنساوى بس هيبقى معاه مراته و انا كمان لازم يبقى معايا فى العشا دا واحده عشان يعنى الاتيكيت, فى الشركه عرضوا عليا ان تروح معايا واحده من السكرتيرات بس انا بصراحه محتاج اللى تكون معايا تكون ذكيه و جميله و الاهم من كل دا بتفهمنى لان العشا دا مهم جدا للشركه و محتاج حد يكون واقف جنبى و يدينى قوه.
كندا ( مبتسمه ) : رغم انى مليش فى السهرات و خصوصا لو ليها علاقه بالشغل بس اكيد مقدرش اسيبك طالما محتاجنى جنبك.
مازن ( بسعاده ) : بجد انتى تجننى. دلوقتى بقى اقدر أقوم انام و انا مرتاح و يا ريت انتى كمان تنامى و ترتاحى و بكره هتفق مع خاله روعه انها تخلى عمرو يبقى عندها وقت السهره. اه ..صحيح انا اسف على سؤالى بس عندك فستان مناسب للسهره و لا تحبى ننزل الصبح نشترى.
ابتسمت له كندا قائلة: لا متخفش عندى فستان جديد ملبستهوش قبل كدا و مناسب جدا للسهرات.
وقف مازن قائلا و الابتسامه لم تفارق وجهه: كدا يبقى تمام يا قمر. تصبحى على خير.
ردت كندا كالمنومه من كلمته : و انت من اهله.
ذهب كلا منهما إلى غرفته يسترجعان لقائهما الليله بعد عودة مازن ثم استسلم كل منهما للنوم و السعاده تملأ قلبه.

[هبة]

مشكورة tweety-14 على البارتين الروعة ...


كندا و مازن ... شو القصة الجرأة زادت ... هيك ما بينفع صرت أخاف يصير شيئ كده و لا كده >>> ما إجتمع رجل و إمرأة إلا و كان الشيطان ثالثهما ... فما بالكما برجل و إمرأة محبين ؟؟؟ مازن يلا تشجع و إطلب يدها للزواج




tweety-14 متابعاكى و شكراً لك

[tweety-14]

الفصل الثانى عشر:

استيقظت كندا صباحا و لم تجد عمرو إلى جانبها, بدلت ملابسها و أرتدت شيئا مناسبا لتخرج به من غرفتها لمعرفتها ان مازن لن يذهب للعمل اليوم لرحوعه متأخرا أمس و للتحضير لسهرة المساء. خرجت من غرفتها لتجد عمرو فى الصاله يشاهد التلفاز. قبلته قائلة: صباح الخير يا قلب ماما.
عمرو ( مبتسما ) : صباح الخير. انتى نمتى كتير.
كندا: معلش يا حبيبى سهرت امبارح.
عمرو: عمو مازن قالى و خلانى مصحيكيش.
كندا: طيب يا حبيبى انا هروح احضرلك الفطار زمانك جعان اوى.
عمرو ( هز رأسه نفيا ) : لا انا فطرت.
كندا ( مستغربه ) : ازاى.
أتى مازن من خلفها قائلا: انا حضرلتله الفطار و مستنيكى تصحى عشان نفطر سوا.
ابتسمت له قائلة: صباح الخير.
مازن ( و على وجهه ابتسامه ساحره ) : صباح الورد.
كندا ( محاولة ان تدارى خجلها من طريقته معها ) : انا اسفه انى اخرتك على الفطار, هدخل احضره دلوقتى.
مازن: الفطار جاهز من بدرى و الشاى على النار.
كندا ( ضاحكة ) : لا كدا كتير انا مش واخده على الدلع.
ضحك مازن و توجهها إلى السفره لتناول الافطار. و اثناء تناول الفطار استمر الحديث بينهما.
مازن : انا اتفقت مع الخاله روعه ان مازن يفضل عندها وقت السهره و هو فى الوقت دا بيبقى نايم فمش هيحس انك سايباه.
كندا: حتى لو صحى هو بيحب الخاله روعه و مش هيتضايق.
مازن: طيب انتى مش ناقصك حاجه خالص تحبى نجيبها. مش محتاجه تروحى للكوافير. أى حاجه من بتاعت البنات, أصل انا عارف انك مش هتطلبى حاجه من نفسك و هتتكسفى بس انا بصراحه مش بفهم فى الحاجات دى.
كندا ( مبتسمة له بإمتنان) : متقلقش انا عامله حساب كل حاجه و مش ناقصنى حاجه, و بعدين انا متعوده من زمان انى بحب اكون سيمبل و بعرف اوضب نفسى من غير ما احتاج اروح للكوافير الا قليل اوى.
مازن ( بنظرة اعجاب ) : انتى اصلا زى القمر من غير حاجه.
شعرت كندا بخجل شديد من مغازلته المستمره لها من الامس فرغم سعادتها بذلك و خصوصا ان اسلوبه يتمتع برقه لا تؤذى مشاعرها ابدا الا انها لا تعلم كيف تتصرف فى مثل هذا الموقف فهى غير معتادة عليه. و لكن احمرار وجنتيها كان ردا كافيا. شعر مازن انه يوترها شديدا بمغازلته لها فقرر ان يتوقف مؤقتا ليرحمها قليلا.
مازن : على العموم انتى النهارده معفيه من اى حاجه و سيبى عليا انا الغدا و انتى بس ارتاحى و جهزى نفسك لبليل, و بجد انا مش عارف اشكرك ازاى انك هتكونى معايا.
ابتسمت له كندا قائلة: بالعكس انا اللى المفروض اشكرك لانى مسهرتش من فتره طويله أوى.
أخذ مازن عمرو لخاله روعه قرب حلول المساء و بدأ كلا من مازن و كندا تحضير نفسيهما لسهرة المساء. اختفت كندا فى غرفتها منذ ذهاب عمرو لتكون جاهزه لهذه السهره الهامه. و عند الثامنه مساءا سمعت دقات على باب غرفتها.
مازن: كندا انتى جهزتى.. المفروض نتحرك دلوقتى.
كندا: ثوانى و اخرج انا شبه جاهزه خلاص.
مازن : طيب انا مستنيكى.
بعد دقائق فتحت كندا الباب و خرجت لتجد مازن امامها. ما ان رأها حتى ثبت فى مكانه و علامات الانبهار على وجهه. كانت كندا ترتدى فستان احمر طويل يبرز جمال جسدها و لون بشرتها , و اطلقت العنان لشعرها الأسود الطويل الجميل المموج بشكل رائع و وضعت مكياج بسيط و لكنه مناسب للفستان و خاصة احمر الشفاه المماثل للون الفستان و العيون المكحله المرسومه بدقة و رقه. كان الفستان و المكياج و لون جسدها الخمرى الجميل يرسمون لوحة رائعة لإمرأة عربية غايه فى الجمال و الجاذبيه.
أخذ مازن بجمالها الرائع و انوثتها الطاغيه, فقد اعتاد ان يراها كامرأه جميلة رقيقة و لكن الملابس الكاجوال التى كانت ترتديها لم تظهر هذا الجانب الأنثوى الرائع. لم يعلم ماذا يقول. نظراته لها كانت تتفحصها من رأسها لقدميها بإعجاب كبير جعلها تخفض رأسها و تشعر بخجل شديد, و أول كلمة سمعتها من مازن كانت: ربنا يستر.
كندا: نعم.
مازن: مفيش بس شكلى هرتكب جنايه النهارده.
كندا: ليه بس؟
مازن : لإن مضمنش رد فعل اللى هيشوفوكى.
كندا: ليه شكلى وحش.
مازن: رووووووووووووعه لدرجة انى عاوز اخليكى تفضلى هنا و محدش يشوفك غيرى.
كندا ( معاتبة ) : مازن.. بلاش الكلام دا.
مازن ( اخذ نفسا عميقا و تنهد بقوه ) : طيب اتفضلى معايا و ربنا يعدى الليله دى على خير.
اعطاها ذراعه لتتأبطه و خرجا سويا.

[tweety-14]

المشاركة الأصلية كتبت بواسطة هبة

مشكورة tweety-14 على البارتين الروعة ...


كندا و مازن ... شو القصة الجرأة زادت ... هيك ما بينفع صرت أخاف يصير شيئ كده و لا كده >>> ما إجتمع رجل و إمرأة إلا و كان الشيطان ثالثهما ... فما بالكما برجل و إمرأة محبين ؟؟؟ مازن يلا تشجع و إطلب يدها للزواج




tweety-14 متابعاكى و شكراً لك

ميرسى يا هبه على متابعتك و تشجيعك الدائمين

[هبة]

تسلمى tweety-14 على الفصل الحلو ...



مازن ... فعلاً ربنا يستر و تعدى السهرة على خير >>> حاسة إنك مش هتسمح لأى حد أنه يبص ليها و لو بصة




tweety-14 متابعاكى و شكراً لك