آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
05-12-10, 04:32 AM
| #31 | ||||||||||||||
| مراقبة ومشرفة سابقة ونجم روايتي  
|  (( الجزء الثاني )) الساعه 5:30 المغرب .. دخل البيت وشاف ام سالم بالصاله جالسه وحاطه يدها على خدها .. قرب منها وباس جبينها : كيفك يالغاليه ام سالم: الحمد لله ياوليدي احمد مستغرب: شفيك؟ ام سالم بضيقه: ماادري وش اقول لك ياولدي اليوم لجين راحت المستشفى تبي تسوي تحليل حمل عشان تفاجأك لكنها رجعت متضايقه و للحين وهي حابسه نفسها بغرفتها مدري شفيها احمد بسرعه : من متى هالكلام ام سالم: من الصبح مدري أي ساعه رقى الدرج بسرعه واول ماوصل للغرفه حاول يفتح الباب لقاه مقفول طق الباب بقوه وهو يصارخ: نونه قلبي افتحي الباب لجين بصوت عالي وواضح عليه انها تبكي: مابي افتح الباب روح عني احمد بنبرة ترجي: لجين يرحم امك افتحي الباب ابي اتكلم معاك لجين بقهر: مابي اتكلم معاك انت سبب تعاستي بسببك ماعاد اشوف طفل وافرح فيه رووووووووح احمد مابي اشوفك احمد بحزن: لجين لاتقولين هالكلام لجين بحسره: من يومي انتظر متى يصير عندي ولد او بنت يعوضوني حرماني من الأخوان كنت احلم بهالطفل واول ماحملت حسيت بفرحه غريبه وانت جازيتني بزعلك من هالحمل الى ان ضاع ولدي وهالحين ماعاد اقدر احمل بغيره احمد روح خلاص من اليوم نبي نرجع مثل اول انت بحالك وانا بحالي احمد بتوتر: يالجين مايصير هالكلام افتحي خل نتفاهم لجين تصارخ بعصبيه: قلت لك مابيننا تفاهم خلاااااااااص انا تعبت احمد بهدوء: طيب طيب خلاص لاتعصبين بتركك تهدين وبعدها يصير خير ..تحرك من جنب الغرفه وهو مقهور وبصوت واطي : كله من هالدكتوره الغبيه انا ماكنت راح اقول لها شي : : : الرياض ..سنة 1425 للهجره .. شوال ..يوم الأربعاء.. جالسه على الكنبه بشقته وتبكي : والله خلاص ماعاد اتحمل هالوضع اللي سوياناه واللي صار بيننا اكبر غلط حنا لازم نصلح اللي صار عبد العزيز بهدوء: وشلون نصلحه ريم بحزن: عبد العزيز انت لازم تتقدم لي ونتزوج انا الليل ماانامه وانا افكر.. اللي سوياناه اكبر غلط عبد العزيز بحزن: ريم انا احبك اكثر من نفسي بس مااقدر اتزوجك ريم مصدومه: ليــه ماتقدر عبد العزيز بهدوء: اسباب كثيره اساساً اهلك ماراح يوافقون علي ريم مستغربه : ليه مايوفقون عليك وش فيك يعيبك عبد العزيز بعد مانزل راسه: ريم انا مو سعودي ريم متخرعه: مو سعودي عبد العزيز : انا يمني ريم واللي بدت دمعاتها تنزل:ليه ماعلمتي من البدايه عبد العزيز بحزن: انتي ماسألتيني وان علمتك من البدايه ماكنتي راح تحبيني ريم بحزن : لا بس اهلي ..سكتت وكملت بنبره جاده: تعال اطلب يدي وماعليك عبد العزيز بحزن : ريم انا مابي اتزوج ريم بعصبيه: عبد العزيز انت كل شوي عذر الظاهر ماتحبني كفايه ..وانا مجرد غلطه بحياتك عبد العزيز مسك يدها بسرعه وقالها بحب: لاريم والله انا احبك وانتي كل حياتي بس انا مابي اتزوج ونجيب عيال ونظلمهم معنا ريم مستغربه: وش قصدك عبد العزيز بهدوء: ريم انا قبل فتره سويت حادث واحتجت نقل دم والظاهر نقلو لي دم ملوث لأني سويت تحليل دم ..سكت شوي وكمل كلامه بنبره يملاها اليأس : ريم انا مصاب بالأيدز ريم مصدومه: وش قلت : : : الزمن الحالي..يوم الخميس.. الساعه 2 الفجربتوقيت السعوديه 5المغرب بتوقيت امريكا.. دخلت المطعم وهي تتلفت يمين ويسار ..اول ماشافت مشعل قربت منه للطاوله اللي كان ياخذ طلباتها عبير بهدوء: مشعل ابي اكلمك مشعل بدون لايلتفت لها: ماتشوفيني اشتغل عبير وقفت تنتظره يخلص واول ماتحرك للكونتر مشت وراه :مشعل ابي اكلمك مشعل بعد مااعطى الموظف اللي معاه الطلب التفت لها وقالها بدون نفس: امري عبير : وش فيك قلبي مشعل بهدوء: سلامتك مافيني شي عبير تناظره بحب: ليه ماترد على مكالماتي مشعل : ناسي جوالي سايلنت عبير : طيب ليه ماجيت للدرس اليوم؟ مشعل ببرود : صحيت متأخر يادوب لبست وجيت ع الدوام عبير مستغربه: مشعل وش فيك متغير علي مشعل بنبره جاده : عبير انا مافيني شي وهنا مكان عمل ياليت تمشين وانا لاخلصت بدق عليك عبير بنبره ملاها الحزن: انا بمرك اليوم قبل نهاية دوامك مشعل مستغرب: وليه تمريني عبير : ابي اتعشى معاك عندك مانع؟ مشعل بهدوء: طيب يصير خير : : : الرياض الساعه 2:30 بتوقيت السعوديه.. طق الباب بيأس: نونه الى متى بتحبسين نفسك بغرفتك والله مو قادر انام لجين بقهر وبصوت عالي: والله مو شغلي روح غرفتك من اليوم ورايح مالك شغل فيني ولا لي شغل فيك احمد بهدوء: لجين ليه تسوين كذا هذا امر الله انا وش ذنبي لجين بقهر: كل شي وله سبب وانت السبب باللي انا فيه احمد روح عني ماعاد ابيك وان كان هالوضع مو عاجبك طلقني وبرجع الشرقيه لأنها ماعاد تفرق احمد بحزن: لاعاجبني هالوضع واللي تبينه يصير ..هز راسه وقالها بهدوء: بكره تهدين ان شاء الله وتفهمين الأمور صح : : : الرياض الساعه 3 الفجر.. جالسه على الأرض ومسنده جسمها للطوفه وتكمل السالفه بهدوء: ايه وبعدين بدا يطقها ويصارخ مدري وش يقول وجا بابا وكسر الباب وشافها مغمى عليها ونقلوها للمستشفى عبد العزيز مستغرب: وليه اخوك يسوي بحرمته كذا ريم بصوت واطي: مدري عنهم ماعلي منهم عبد العزيز وهو يناظرها بحب: احبك ريم وهي تتبسم : انا بعد احبك ..وكملت بنفس النبره الواطيه القريبه للهمس: اقول قلبي انا بدخل داخل قبل يصحى احد وانت تسحب بعدي بشوي طيب؟ عبد العزيز بعد مامسح على شعرها: طيب حبيبتي مشت وسط الظلام بخطوات هاديه وخفيفه كانت بالممر ورى البيت مشت الى ان وصلت لباب الصاله الرئيسي فتحت الباب بشويش ودخلت بهدوء وهي تتلفت واول ماشافت الظلام يملى المكان رقت الدرج بسرعه متجهه لغرفتها .. اما عبد العزيز تسحب بعدها بـ 5 دقايق الى باب البيت الرئيسي فتحه بهدوء وطلع وقفل الباب وراه بشويش ..ومشى بسرعه الى سيارته اللي واقفه قبل البيت بمسافه : : : الساعه 8 الصبح.. المستشفى تحدداً.. وصل للمستشفى وراح بسرعه للدكتور المشرف على حالة العنود ..صافح الدكتور ..وقالها بكل هدوء: كيف زوجتي اليوم الدكتور وهو يتبسم: لاابشرك زوجتك بخير وتحسنت بشكل كبير نقلناها لغرفه عاديه وابوها قبل شوي كان عندها سلمان يتبسم: مشكور دكتور ..مشى بخطوات يملاها التردد بعد مااخذ رقم الغرفه ..اول ماوصل مسك مقبض الباب تنهد وفتح الباب بهدوء ..دخل وناظرها من بعيد .. فتحت عيونها بهدوء ابتسمت بخفه وقالتها بتعب : تعال سلمان قرب ووقف قبالها وهو مكتف يدينه وساكت عنود بتعب : سلمان انا ..سكتت شوي وهي تتنفس بصعوبه من الألم اللي بكل جسمها وكملت كلامها بتعب: انا مسامحتك بس لازم تعرف انك ظلمتني ..انا كنت ضحية صديقة سوء وصلتني لهنا ..اخذت نفس وكملت : انا مابي اظلمها بس هي كانت عندي ببيتكم يوم اللي صار يمكن لعبت بجوالي ..سكتت شوي وكملت بصوت هادي: انا بسألك وش خلاك تفتش جوالي بنفس اليوم؟ سلمان وهو يفكر: وحده دقت علي وقالت لي عنود تبتسم: وش هالصدفه الغريبه انا متأكده انها هي لأنها خبيثه سلمان بسرعه: تعرفين رقمها؟ عنود بتعب: ايه حافظته سلمان طلع جواله بسرعه وحط على رقم نوف اللي حفظه بأسم فاعلة خيروقالها بنبره ملاها القهر: قولي الرقم عنود بعد ماقالت الرقم ببطىء شديد ..ضرب سلمان الجدار بقوه : نفس الرقم عنود بتعب: هذي وحده خبيثه وكان لها علاقه بياسر انا كشفتها من فتره بسيطه ..غمضت عينها بتعب : بس بعد وشو كشفتها قرب منها وناظرها بنظره بان فيها الحب اللي يحاول يخفيه: خلاص عنود اسكتي انا بحاول اكتشف هالموضوع واذا هالبنت ورى هالسالفه محد غيري بيربيها : : : الساعه 9:30 صباحاً بتوقيت السعوديه 12:30 بعد منتصف الليل بتوقيت أمريكا.. نايف وهو يرتب الأغراض بالكونتر مع مشعل: البنت تنتظرك لها اكثر من نص ساعه مشعل وهو منزل راسه: اول شي لاتناظرها ثاني شي ادري شفتها نايف وهو يحاول يكتم ضحكته: اول شي ماناظرتها ثاني شي ياعيني ع الغيره بس ..اقول رح بس للبنت مشعل بهدوء : طيب دخل غرفة الموظفين بدل ملابسه بسرعه اخذ شنطته وطلع لها ..ناظرها وبأبتسامه باهته: اسف تأخرت عليك عبير تتبسم بحب: لا عادي ..ضغطت ع زر الريموت اللي فتح ابواب السياره : ياللا اركب بعد ماركب وتحركت السياره ناظرها وقالها بهدوء:وين رايحين ؟ عبير وهي مركزه بالطريق: مطعم بس راح يعجبك هز راسه بهدوء وراقب الطريق بصمت كانت مستغربه صمته واسلوبه اللي تغير بس ماحبت تسأله مره ثانيه .. ناظر بالشارع بتركيز نفس الشارع وبعد ماوقفت السياره ناظر بالبيت اللي وقفو بجنبه نفس البيت .. نزلت وقالتها بحماس: ياللا انزل مشعل ينزل بهدوء وهو يناظر المكان بأستغراب: وش هالمكان عبير وهي تضحك: هذا بيت ادري شكله غريب بس البيت مره قديم ومعظم الأماكن اللي حوله تحولت لمحلات ..مشت وهي تقولها بحماس: ياللا تعال معاي مشى معاها وبعد ماوصلو للباب دفت الباب اللي كان مفتوح وقالتها بنعومه : تفضل دخل بهدوء وهو يراقب المكان اللي ملاه الظلام : وراه المكان ظلام ..اول ماخلص جملته انفتح النور وسمع صوت عالي : هبي بيرت ذي عبير التفتت له بحب : كل عام وانت بخير مشعل رد عليها وهو مفهي ويراقب الصاله الصغيره اللي مزينه بالبالونات وشوية زينه والطاوله اللي يملاها الأكل وتتوسطها كيكه وبجنبها واقفه بنت ومعاها نفس الولد اللي شافه لما جا هنا عبير وهي تأشر على البنت وتتبسم : مشعل اعرفك صديقتي مي مصريه بس مفيش زيها ..لفت يدها ورى كتوف مي وقالتها بحب: مي من زمان متحجبه وانبسطت مره لما شافتني بالحجاب مشعل يتبسم : شي حلو اشرت على الولد: وهذا خطيبها ثامر ..كملت وهي تضحك: اللي ناشب لها 24 ساعه ..ناظرت مشعل بحب : حبيت اسويلك شي مميز بعيد ميلادك ومي اهلها مسافرين فرتبت كل شي هنا ومي ساعدتني كثير وقلت لهم يكونون معانا عشان لانكون لحالنا مشعل يناظرها بحب وهو حاس بالعبره تخنقه: الله يخليك لي قلبي ..وبينه وبين نفسه: الله يلعنك يابليس كنت راح اخسرالبنت بغبائي عبير بحماس: وش تفكر فيه تعال طفي الشمعات حطيت لك 20 شمعه مشعل يضحك: غطيتي الكيكه كلها بالشمع عبير مبسوطه : ايه لعيونك بس بعد مانفخ بقوه وطفى الشمعات اخذ الشوكه وحط فيها قطعة كيك صغيره ووكلها لعبير عبير اخذت الصحن بسرعه: قلبي انا بحط لك اكل طيب؟ مشعل مبسوط: وانا بحط لك اكلك حطت له شوية سلطه وشوية دجاج بالخضار وهو حط لها شوية سلطه ولحم بالجبن ودجاج بالخضار وشوية مقبلات عبير تناظربالصحن: كل هذا باكله؟ مشعل يتبسم: غصب عنك وناظر بصحنه وهو ياخذه منها : سبحان الله كل واحد يحط على قده مالت عليك عبير تدفه: وش على قده ذي مي تضحك: دنتو ليأين اوي على بعض مشعل يهمس بأ ذن عبير : هالحين خويتك تشوفنا وتقول الشعب السعودي عايشين فري عبير تضحك: لا لا تعرف طبيعة الشعب السعودي ماعليك مشعل بهدوء: ايه ماودي اشوه الصوره العامه عبير تتخصر: وش قصدك وش جالسين نسوي حنا لاسوينا حفله ولاشي كله شوية عشا ومعنا ناس مشعل يناظر بثامر ومي: اقول امشي خل ناكل فضحتينا جلسو على الطاوله وبدو ياكلون بهدوء.. مشعل يقطع الهدوء: مي وين تدرس عبير : معنا بالجامعه مشعل يهز راسه: اها وخطيبها؟ ثامر بسرعه: لا دنا سبقتكو خلاص وتخرجت مشعل يتبسم: ماشاء الله ارتحت من الدراسه وقرفها ثامر مبسوط: آيوه وبستنا نتجوز انا ومي وحخدها على مصر .وكمل بسرعه : الا بالحق قولي انا شوفتك قبل كدا فين مشعل يضحك: انا اشتغل بمطعم بيتزا ويومها كنت اوصل بيتزا مع خويي وجينا هنا بالغلط وشفتك ثامر: ايوه ايوه افتكرت حتى بالأماره مشيتو على طول عبير بسرعه: متى هالكلام ثامر: قبل يومين كدا عبير بعد ماتغيرت ملامح وجهها : أي ساعه مشعل بتوتر: شي مو مهم عبير بقهر: أي ساعه مي بسرعه: بعد مامشيتي انتي بسواني عبير هزت راسها بالأيجاب وواضح القهر عليها وبينها وبين نفسها: تراقبني يامشعل ..تشك فيني وانا اقول وش فيه متغير ..حاولت تخفي توترها وابتسمت وهي تمد يدها تحت الكرسي وتسحب الهديه وتمدها لمشعل : هذي هديتك يامشعل مشعل اخذها وهو ملاحظ الشحوب اللي على وجهها : مشكوره عبير بعد ماوقفت : ياللا انا بمشي مابي اتأخر اكثر من كذا ..كملت كلامها وهي تتبسم : مشعل تقدر تكمل عشاك براحتك ..خلصت جملتها وانسحبت من المكان بسرعه مشعل وقف بسرعه: اسمحولي لازم الحقها مشى بسرعه وراه .. فتحت الباب بسرعه كبيره وطلعت وهو يمشي وراها ويصارخ: عبير اصبري ضغطت زر الريموت وهي تبكي ..اول ماوصلت عند باب السياره وحطت يدها ع المقبض مسكها من زندها بدون تفكير ولفها له بسرعه ..ناظر فيها وقالها بذهول: عبير تبكين عبير سحبت يدها بسرعه وقالتها بعصبيه: لاتلمسني مشعل ووخر عني مابي اشوفك مشعل بتوتر: عبير افهمي السالفه عبير بكل عصبيه وهي تصارخ: وش افهم يامشعل افهم ان الأنسان اللي حبيته وسويت كل شي عشانه يشك فيني مابي افهم شي مشعل بحزن: اسف عبير سامحيني مدري وشلون شكيت فيك عبير تهز راسها : للأسف اسفك مايفيدني بشي ..خلصت كلامها وركبت سيارتها وتحركت بسرعه كبيره مشعل يصارخ: عبير عبير دقيقه اوقفي ..ضرب الأرض برجله بقوه : ياربي : : : الرياض ..الساعه 1 الظهر .. بعد مادخل غرفته وقفل الباب دق عليها وبعد ماسمع صوتها حس بالقرف لكنه مابين هالقرف بنبرته اللي كان يملاها الهدوء: الو انا اسف داق بهالوقت بس حبيت اشكرك عشانك خلصتيني من بلوه نوف واللي انبسطت من كلامه وبدت تتصنع الغباء: بلوه أي بلوه سلمان : زوجتي كانت اكبر بلوه بحياتي انجبرت اتزوجها عشان استر عليها ومكالمتك كانت البلسم الشافي بالنسبه لي وخلاص طلقتها وارتحت نوف قالتها بأنفعال : طلقتها سلمان بهدوء: ايه وش ابي بها ماصدقت متى اتخلص منها ..وكمل بنبره ساحره : اقول نوف : سم سلمان : عدوك يسم ..خلنا من عنود انا خاطري اقول لك شي نوف مبسوطه : وشو سلمان بنبره دافيه: صوتك غريب فيه سحر من اول ماسمعت صوتك وانا مشغول فيه اقول وش هالصوت الحلو نوف وهي تعض شفاهها وبينها وبين نفسها: جيت اخرب بيتها وصدت عصفورين بحجر..زوجها وخراب بيتها سلمان : شفيك سكتي نوف تسوي فيها مستحيه: مادري وش اقول لك سلمان بهدوء: الا ماقلت لي انتي وش اسمك نوف وهي مبتسمه وبنبرة دلع: اسمي نوف سلمان واللي حس ببركان يثور بداخله قالها بينه وبين نفسه: هين يالخايسه انا اعلمك ..وبصوت عالي : ياربي يانوف وش سويتي فيني لو تسمعين قلبي وشلون ينبض مكالمتين وعفستيني وش تبين تسوين فيني اكثر نوف بدلع: ايه انا اللي يعرفني ومايحبني انسان مو صاحي سلمان بينه وبين نفسه: مالت عليك يالخايسه وبصوت عالي : اقول نوف ممكن اطلب منك طلب وانتي حره توافقين او ترفضين نوف بدلع: اكيد ممكن سلمان بهدوء: ودي اشوف البنت اللي صوتها سحرني من اول مكالمه اخاف الصوت احلى من الصوره نوف تضحك: لاابشرك الصوره احلى سلمان : خلاص اشوفك واحكم نوف : خلاص موافقه حدد المكان والزمان سلمان : خلاص ارتب اموري وادق عليك نوف بدلع: اوكي انتظرك سلمان :ياللا مع السلامه ..بعد ماقفل بدا يضرب الجوال بباطن كفه وهو يفكر وبصوت مسموع: ابي اخلص من سالفتك بسرعه يانوف : : : الساعه 2 الظهر .. راحت لأمها اللي كانت جالسه تشوف تلفزيون بالصاله ومسكتها من يدها تسحبها بعجله.. ام فارس مستغربه: وين ساحبتني ياماما حور بنبره ملتها البراءه: تعالي الحين تشوفين رقت الدرج بخطوات صغيره وامها كانت تلحقها وهي مبسوطه وتناظر بنتها بحب ..اول ماوصلو عند غرفة فارس ..اشرت على الباب وهي تقولها بدلع: ماما اسمعي فارس يقرا قرآن صوته مره حلو قربت ام فارس ا ذنها للباب وبدت تسمع صوت فارس الحلو وهو يقرا كتاب الله بصوت هادي جميل ..تبسمت وطقت الباب بهدوء فارس قفل المصحف وقالها بهدوء: صدق الله العظيم ..تفضل دخلت غرفة فارس وناظرته بحب: صوتك مره حلو وانت تقرا كتاب الله فارس يتبسم: الحمد لله نعمه من رب العالمين اللي عطاني هالصوت عشان اقرا فيه شي يحبه سبحانه وتعالى ام فارس بعد مامسحت على راسه: الحمد لله اللي هداك الله يحبك ياوليدي الحمد لله فارس بهدوء: الحمد لله ..سحب حوربسرعه : وانتي يافصعونه وش تسوين بغرفتي حور وهي تضحك : انت الفعثون ولاتقلي فعثونه فارس وهو يضحك: اسمها فصـــعونه حور ببطىء: فعـــثونه فارس فطس ضحك: مافي فايده فيك طيب قولي صحن حور: ثحن فارس بسرعه: وش ثحن ..وقالها ببطىء: صــحن حور ببطىء: ثــــحن فارس يضحك وهو يناظر امه: والله ماما بنتك مشكله : : : الساعه 5:30 المغرب.. دخل البيت وشافها قباله ماشيه قدام الدرج عشان تطلع فوق .. ناظر فيها وقالها بهدوء: نونه للحين زعلانه لجين تلف عنه وترقى الدرج بهدوء: قلت لك مابيننا كلام وكل واحد بحاله احمد بهدوء: نونه انا احمد زوجك حبيبك اهون عليك لجين بنبره جاده: ايه اذا كنت راح تحرمني من اغلى شي تهون ونص قرب منها وقالها بنبره حزينه: نونه هذا امر الله انتي على بالك انا مبسوط بس شسوي ربك كريم ناظرت فيه بقهر وبدت ترقى الدرج بسرعه وهو يركض وراها : لجين لحظه اسمعيني ..ركضت بسرعه ودخلت غرفتها وقفلت الباب ..اول ماوصل عند الباب حط يده على صدره وقالها بتعب : لجين ..وبنبره ملاها الألم : آآآآآآه ..طاح على الأرض بقوه ..فتحت الباب بسرعه ونزلت لمستواه تهزه بخوف: احمد شفيك احمد وهو يضحك : دامك تخافين علي ومايطاوعك قلبك ليه تسوين فيني كذا لجين تدفه: بايخ خرعتني احمد وهو يمسح على شعرها بحنان: بسم الله عليك ياقلبي بس انا قلت لازم اختبر غلاتي ..تدرين لو ماهمك ومافتحتي الباب لجين بدلع: ايوه وش كنت راح تسوي احمد : كنت انا اللي بزعل وبجحدك لجين تضحك: لا قوي ياللا قوم ..ساعدته عشان يوقف وناظرت فيه بحب: احمد انا اسفه صح كلامك انت مالك ذنب وهذا امر الله ضمها بحب ..وبعد مامسح على شعرها قالها بسرعه: ميت جوع لجين تأشر على عينها: من عيوني ياقلبي هالحين اجهز لك احلى اكله : : : الساعه 8 مساءً .. وبأحد مطاعم الرياض ..كان جالس معاها بأحد الكباين ..يراقبها وهي تتبسم وتتكلم بدلع رغم جمالها الا انه كان يشوفها اقبح مخلوق شافه بحياته فيه بداخله نار تحرقه بركان ممكن بأي لحظه يثور كان يخفي كل هذا بأبتسامه يزينها اعجاب كاذب.. سلمان بعد ماشرب شوية مويه : تصدقين نوف نوف بدلع: وشو سلمان : كنت متوقع ترفضين نتقابل خصوصاً وان مابيننا غير مكالمتين نوف بهدوء: انا عادي ماعندي مشكله المهم اعرف حدودي سلمان بينه وبين نفسه وهو يناظر وجهها اللي مليان مكياج وحركاتها اللي تزينها الوقاحه: صح واضح تعرفين حدودك زين نوف تقطع افكاره: وش فيك سكت سلمان بسرعه: لابس افكر بحظي الحلو اللي جمعني بأنسانه مثلك نوف تسوي مستحيه: تسلم ياقلبي سلمان يفكر: بهالسرعه صرت قلبك الله يعينك على نفسك بس ..وبصوت عالي: وش رايك اخذك للبيت عشان لاتتأخرين؟ نوف بهدوء: لاعادي لو تأخرت اخواني مو بالبيت سلمان يبتسم ابتسامه تخفي الأفكار اللي بدت تدور بداخله: اها اهم شي محد غيري بيوصلك للبيت طيب ياقلبي؟ نوف مبسوطه وهي تناظر سلمان اللي وسامته تسحر : اوكي قلبي : : : الساعه 10 مساءً.. دخلت الغرفه وهي ممسكه بسلطان الصغير اللي مو راضي يسكت وبصوت ملاه التوتر: فهد شف ولدك ماهو راضي يسكت من الظهر وهو على هالحاله فهد بعد مالبس التي شرت حقه : وش فيه صغيري الحلو ..اخذ سلطان من يدها وحطه ع السرير وبدا يفحصه ..تبسم وهو يناظرها ..قلبي هذي غازات ببطنه ..حاولي دايم تحطينه على بطنه فوق رجلك ..وسويله تمرين بهالطريقه ..بدا يرفع رجلين سلطان الصغيره لبطنه ..وهو يناظرها بحب: عرفتي كيف شذا تهز راسها : ايه عرفت فهد بعد مااعطاها سلطان : بروح اجيب له طارد غازات من الصيدليه ..الولد مافيه الا العافيه لاتخافين عليه : : : الساعه 10:30 مساءً .. بعد ماوصلها للبيت .. راقبها الى ان دخلت ..طفى السياره وانتظر اول ماشاف جارهم متجه لبيته بيدخل نزل بسرعه وناداه : يالطيب الجار بعد ماوقف : أنا؟ سلمان يتبسم : ايه .. مد يده يصافح الرجال: السلام عليكم الرجال بهدوء: وعليكم السلام سلمان وهو يأشر على بيت نوف : بغيت اسألك هذا مو بيت ابو .. حط يده على جبينه وكأنه ناسي : ياربي وش اسمه الرجال وهو يحاول يذكره: ابو سعود ؟ سلمان بأنفعال : ايوه ابو سعود الرجال وهو يتبسم: ايوه هذا بيتهم سلمان مبسوط: مشكور ماقصرت ..تقدم لبيت نوف بخطوات بطيئه ينتظر الجار يدخل بيتهم واول مادخل الجار البيت ..رجع سيارته بسرعه ودق على احمد.. سلمان بسرعه: هلا والله ..عسى ماازعجتك احمد : لاوالله امرني سلمان : مايامر عليك ظالم ..ابي ادلك على بيت وابيك تجيه هالحين على اساس انك تبي سعود ..راح يقولون لك ماهو موجود ابيك تقولهم انك تبيه ضروري ومضيع رقمه حاول قد ماتقدر يعطونك رقمه احمد وهو يتبسم بخبث: افا عليك اجيب ارقام العايله كلها لو تبي سلمان مبسوط: تعجبني قفل الخط وتحرك بسرعه ..ماكان يبي يجيب الرقم هو عشان لاتشوفه نوف ولو بالغلط : : : الساعه 12:30 بعد منتصف الليل بتوقيت السعوديه 4:30 بتوقيت امريكا.. بعد مابدل ملابسه طلع من غرفة الموظفين ..كان يربط المريله ورى ظهره وواضح الأكتئاب بملامح وجهه نايف بعد ماقرب منه : وش فيك مشعل متضايق مشعل بحزن: ظلمت البنت يانايف البيت اللي شفناه كان بيت خويتها ومسويتلي عيد ميلادي مفاجأه هناك نايف بهدوء: طيب عادي تصير حنا بشر وعادي تجينا شكوك غريبه مشعل بحزن: مو هنا المشكله يانايف .. المشكله انها عرفت بالسالفه وزعلانه من البارح ادق عليها وجوالها مقفل ..رحت اليوم بيتهم والخدامه قالت لي انها مو موجوده ..عبير مو عادتها تطلع هالوقت انا خايف سافرت مع امها نايف بعد ماحط يده على كتف مشعل: حاول تدق عليها اكثر وان شاء الله راح تفتح جوالها مشعل بقهر: ياربي نايف وان سافرت ومافتحت جوالها انا وين القاها مابي اخسرها يانايف نايف بهدوء : مشعل الدراسه راح تبدا واكيد راح ترجع عشان دراستها مشعل بعد ماتنهد : ياربي مااقدر انتظر كل هالمده الى ان ترجع نايف علمني شسوي نايف واللي مو عارف وش يقول له: مالك الا الصبروانا اخوك مشعل : انا ماصدقت لقيتها وبغبائي ضيعتها نايف يهز راسه بالأيجاب: اذا تحبك بترجع لك لاتخاف : : : الرياض ..الساعه 12:30 الظهر.. بغرفته حاط الجوال بأذنه ويسولف معها: تصدقين مره طفشان وش رايك نتغدا سوا نوف تفكر: اممممم ماادري اخواني هنا سلمان بهدوء: قولي لهم بتغدا مع العنود وتعالي بيتنا انا بفتح لك الباب ننتظرهم يمشون ونطلع نتغدا سوا وبعدين ارجعك البيت وش قلتي؟ نوف بحماس: فكره حلوه موافقه ..خلاص بلبس وبخلي اخوي يوصلني سلمان وهو يخفي ضحكت النصر: طيب انتظرك ..قفل الخط وقام بسرعه بدل ملابسه وسرح شعره ..حط رشتين عطر..ونزل الصاله ..وكلها دقايق وجاه اتصالها اعطاها بزي وطلع بسرعه فتح لها الباب وبعد ماتحرك اخوها طلع وراقب السياره الى ان اختفت وبصوت واطي : ياللا تعالي بعد ماركبو السياره وتحرك ..ناظر فيها وقالها بهدوء: ابي اقترح اقتراح بس لاتفهميني غلط نوف: عادي قول سلمان : انا مااحب جو المطاعم وش رايك ناخذ الغدا سفري وناكله بشقة خويي ..كمل كلامه بسرعه: اذا كنتي موافقه يعني نوف وهي مبسوطه: عادي ماعندي أي مشكله وقف عند اقرب مطعم وقالها بسرعه قبل ينزل: ثواني بس وراجع لك راقبته وهو يدخل المطعم وفتحت شنطتها بسرعه طلعت العطر وبدت ترش بملابسها وعبايتها ..طلعت القلوس بسرعه وحطت على شفايفها وقالتها بخبث: والله واخذت زوجك منك يالعنود اخيراً صار عندي شي تملكينه رجعت اغراضها للشنطه بالوقت اللي فتح فيه سلمان الباب الخلفي وحط الأكل ..بعد ماقفل الباب ركب مكانه وتحرك بسرعه اول ماوصلو شقة خويته اللي متفق معاه يترك له مفتاحها ..اخذ الأكياس ومشى معها وهو مبسوط ..دخل معها العماره ورقو الدرجات بهدوء ..وصل عند باب الشقه وحط يده تحت الباب واخذ المفتاح فتح الباب ودخل معها شقة خويه ..كانت شقه متواضعه عباره عن صاله تحوي كنب بني فاتح طاوله صغيره وتلفزيون ..يسارها موزع يحوي غرفتين وحمام وانتم بكرامه ويمينها المطبخ ..دخل معها الصاله واول ماحط الأغراض ناظر فيها بأستغراب وهي تشيل عبايتها تبسم وهو يخفي دهشته وبينه وبين نفسه: هذي مره فالتها تستاهل اللي بسويه فيها اجل نوف كانت تمشي بدلع وهي تعتقد ان سلمان شارد بجمالها وحلاوة جسمها حط الأغراض على الطاوله وقالها بسرعه: اوف ياربي نسيت البيبسي تحت.. ضبطي الوضع قلبي دقايق وراجع نوف بدلع: طيب نزل بسرعه اول ماوصل عند السياره فتحها وركب ودق على رقم اخوها اللي جابه له احمد ..وكلها ثواني وجاه صوت اخوها الحاد: الو سلمان بهدوء: السلام عليكم اخ سعود؟ سعود : وعليكم السلام ايوه معاك سلمان بنبره ملاها التردد: ياخوي مدري وش اقول لك بس ياليت لو تمسكون اختكم تاركينها تأذي خلق الله سعود بكل عصبيه: وش هالكلام يالتعبان سلمان بهدوء: والله هذا الصدق اختك ناشبه فيني وملاحقتني من مكان للثاني يارجال غربلتني وانا متزوج سعود بصوت عالي: انت ياحيوان لاتقول هالكلام على اختي سلمان منفعل: ماتبي تصدق كيفك بس ابشرك اختك جالسه معاي الحين بشقتي سعود واللي بدت تزيد عصبيته: وش جالس تقول صح انك حقير سلمان : انا بعطيك العنوان وبترك لك باب الشقه مفتوح وانت تعال وتأكد بنفسك وفكني من قلة حيا اختك سعود بعصبيه: هات العنوان بسرررررررررررررعه بعد مااعطى سعود العنوان قفل الخط بوجهه ..وضحك وهو يفكر باللي راح يصير بعد شوي ..اخذ علب البيبسي وطلع بسرعه للشقه ..وماقفل الباب عشان تبدا الحفله لما يوصل اخو نوف شافها حاطه رجل على رجل ومجهزه الأكل فوق الطاوله ..وقالها وهو مبتسم : اسف تأخرت عليك نوف بدلع: لا عادي راح المطبخ وجاب صحنين وملعقتين ..حط لها اكل بصحنها وحط اكل بصحنه وبعد مابدو ياكلون قالها بهدوء: تصدقين مستغرب فيك وشلون كذا عايشه فري نوف بهدوء: عادي انا متعوده كذا مااحب القيود ..خلصت جملتها وسمعت صوت اخوها العالي واللي واضحه العصبيه فيه : ماتحبين القيود يالحيوانه نوف وهي متخرعه: سعود وش جابك هنا سعود وهو يقرب منها وعيونه يطلع منها شرار: جابني هالرجال اللي بليتيه بعيشته بتصرفاتك الوصخه سودتي وجيهنا الله ياخذك بس انا اللي بربيك نوف وهي مرتبكه: انا مشيت وراه او هو جاني سلمان بقرف: اسكتي يالوصخه هذا جزا اللي سويتيه بزوجتي وتبليك عليها قرب سعود من نوف ومسك شعرها بقوه وهو يصارخ: وين عبايتك يالتعبانه نوف وهي ممسكه بشعرها بألم : انا ان كنت تبليت عليهابالأخير فزوجتك يامحترم هي اللي جات ياسر من البدايه وكلمته حس بكلام نوف مثل المويه البارده اللي انكبت عليه ..كان يراقب مشهد نوف واخوها يسحبها لبرى بعنف وهو مصدوم ويفكر: كم مره راح انصدم ووين الحقيقه عنود قالت انها ماكلمته جوال حتى بالبدايه انا كنت حاس بهالشي كم مره شفتهم مع بعض ..اخذ مفتاحه وطلع بسرعه ركب سيارته وبدا يسوقها مثل المجنون ..اول ماوصل المستشفى دخل وبدا يركض بالممرات الى ان وصل غرفتها فتح الباب بقوه ناظرت فيه بخوف وهي تشوف نظرته القاسي .. قفل الباب وتقدم لها : عنود انا تأكدت ان السالفه الأخيره كذب بكذب بس بسألك سؤال وجاوبيني بصدق ..صرخ عليها بصوت عالي : ياويلك تكذبين علي عنود بخوف: طيب سلمان وهو يتنفس بهدوء: نوف تقول انك كلمتي ياسر هذا من البدايه وانتي قلتي ماكلمتيه ابد وين الحقيقه عنود وهي تبكي: سلمان حرام عليك انت ليه ماتفهم ..والله انا انسانه انظلمت كنت ضحية الوحده وصديقة سوء استغلت غبائي ووحدتي انا كنت اشوف ياسر من دريشة غرفتي وخلاص عمري مافكرت اسوي شي بس نوف واللي كانت تعرفه لعبتها معاه صح واقنعتني اتجرأ واكلمه واتفقت معاه علي انا صح كلمته بس والله عمري ماكنت راح اتجاوز هالمكالمات وهو لو شاف مني رجا ماكان جاني بالغصب سلمان وهو يصارخ: وان كنتي ضحيه ليه ماقلتي لي من البدايه لييييييييييييييه قرب منها وبدا يهزها : انا بنجن من هالسالفه فتح ابو مشعل الباب بسرعه وبدا يناظر سلمان بنظره تحمل القوه وقالها بنبره جاده: سلمان وش تسوي مو ملاحظ ان البنت بالمستشفى وتعبانه ..انا بنتي عمري مارفعت صوتي عليها وانت صوتك واصل لأخر الممر سلمان بأرتباك: بس انا ابو مشعل يقاطعه: هذي العنود قدرها كبير ان ماكنت عارف ياسلمان عنود بهدوء: بابا سلمان اسلوبه كذا بالنقاش ابو مشعل بكل عصبيه: اسلوبه على نفسه انا ماارضى أي شخص يعامل بنتي كذا وياللا امشي من هنا خلي البنت ترتاح سلمان وقف مرتبك مو عارف وش يسوي ابو مشعل بصوت عالي: امشي اقول لك سلمان ابتسم وانسحب من المكان بهدوء : : : الساعه 2 الظهر بتوقيت السعوديه 5 الفجر بتوقيت امريكا.. يتقلب بسريره مو قادر ينام وكل شوي ياخذ جواله ويدق عليها يلقى جوالها مغلق حاس بنار بداخله ..جلس على السرير وبدا يمسح على شعره: ياربي وش اسوي جوالها مغلق وهي مو بالبيت ..ياترى وين رحتي يا عبير ..وبسرعه: ايوه بروح اسأل مي خويتها ..وقف بسرعه وبحماس وفجأه بدا يفكر : وش جاك يامشعل تبي تروح للعالم الساعه 5 الفجر خلاص بكره يصير خير .. رجع سريره وبعد تفكير : بدق على اهلي هالحين الظهر عندهم ..دق على جوال عنود كم مره ولقاه مقفل ..اخيراً دق على جوال امه ..وبعد ماجاه الرد قالها بحب: هلا والله بالغاليه ام مشعل بحنان : هلا بك ياوليدي مشعل بفرح : كيفك ماما وبابا كيف اموره ام مشعل: كلنا بخير لاتشغل بالك بشي مشعل بهدوء: ماما عنوده ليه قافله جهازها ادق عليها ابي اكلمها ام مشعل وهي تحاول تخفي ارتباكها: يمكن خلص شحنه مشعل : اها طيب سلمي لي عليها كثير وقولي لها تكلمني ام مشعل: ان شاء الله بقول لها مشعل : ياللا توصين شي ام مشعل مبسوطه: سلامتك يابعد قلبي مشعل : الله يسلمك فمان الله .. قفل الخط وتلحف وانقلب على يمينه يحاول ينام : : : الرياض .. الساعه 3 الظهر .. سمعت صوت التلفون اللي بجنبها ..عدلت جلستها واخذت سماعة التلفون وقالتها بهدوء: الو سلمان والحزن مالي صوته: الو عنود ابوك معاك والا مشى عنود بهدوء: لا خلاص راح سلمان واللي مو عارف وش يقول : عنود انا ماادري وش اقول لك ..يمكن بجد انتي ضحيه ويمكن انتي مظلومه لكن انا ورغم هالحب اللي بقلبي لك مو قادر انسى هالسالفه كل ماناظرت بوجه وتذكرت انك كنتي لغيري وانه اخذ منك شي ماكان لازم ياخذه احس اني كارهك ومو قادر اعيش معاك عنود والحزن يملاها قالتها بهدوء: سلمان طلقني : : بعد ماسمع كلامها ماقدر يركز بالطريق ورغم محاولاته الا انه فقد السيطره على السياره ..الى ان تدحرجت من المنحدر العالي وكلها دقايق وطلع صوت الأنفجار القوي للسياره نهاية الجزء ماقبل الأخير | ||||||||||||||
|  |
|
05-12-10, 04:34 AM
| #32 | ||||||||||||||
| مراقبة ومشرفة سابقة ونجم روايتي
| في عالم سكنته النفوس القذره ولوثته كل افعال الرذيله ..ماتت النوايا الحسنه وبقيت الأحقاد الدفينه تلوث البقعه الصغيره التي بقيت تقاوم كل هذه الأوســـــاخ من منا شكر الباري جل وعلا على وجوده في هذه الحياه ينعم بما انعمه الله عليه ..هل اخلصنا في عبادتنا .. وقدمنا مانستطيعه لأخرتنا؟؟ هل افنينا الدنيا في حب الله ورضاه؟؟ يارب أنا لست الا عبداً من عبادك الضعفاء اهدني الصراط المستقيم ووفقني لما تحبه وترضاه الفصل الثلاثين والأخير ((الجزء الأول)) الساعه 2 الظهر.. قبل أن نتوقف .. بالشارع مقابل باب العماره تحديداً.. كانت تحاول توقف لكنها ماقدرت تقاومه وهو ماسكها من زندها ويسحبها بكل قوته ويصارخ مو معطي أي اعتبارلوجود الناس : امشي ياحقيره ..امشي يالتعبانه ..والله لوريك يالخايسه اصبري نوصل البيت وانا اعلمك نوف كان الخوف يتملكها لو صار ووصلت البيت مع اخوها مو بعيده اخوانها يذبحونها وبلحظه سيطرة عليها قوه غريبه وبدت تقاومه بكل قوتها وتحاول توقف ..وقف وهو يهزها بعنف: امشي معاي احسن لك..بهالحظه داست على رجله بكعبها العالي وبحركه لاأراديه ومع احساسه بألم فضيع برجله تركها وبدا يتأوه من الألم..ونوف استغلت الموقف وبدت تركض مبتعده .. سعود واللي بدا يستوعب الموقف ..صار يلحقها مثل المجنون ويصارخ : اوقفي نوف والله للعن خيرك اوقفي والله لمسكك ومااخلي فيك عظمه صاحيه يالحقيره يالتعبانه كانت تركض بأقصى سرعه ..تركض وبداخلها مجموعة احاسيس ..احساس الغرقان اللي يبي نفس بأي طريقه ..احساس المتشبث بالحياه ..احساس اللي الموت من وراه والحياه قدامه .. تركض وتركض وتركض بلا شعور ..اخذت يمين بسرعه وهي تركض شافت باب عماره مفتوح دخلت بسرعه ولصقت بالجدار وصارت تناظر من الجزء البسيط المفتوح من الباب وهي تحاول تكتم انفاسها القويه والسريعه ..اخيراً شافت اخوها وحست بخوف كبير يتملكها ..قلبها بدا ينبض بقوه لدرجه حست نبضاتها مسموعه كان قريب منها مره ويتلفت يمين ويسار ..وفجأه تحرك من المكان بسرعه ..حست براحه وبدت تتنفس بهدوء ..ناظرت بشنطتها اللي كانت متشبثه فيها كل الوقت..فتحتها بسرعه وطلعت جوالها ودقت على ياسر.. وبعد ماجاها رده الهادي قالتها بسرعه وخوف: الو ياسر تعال لي بسرعه ياسر مستغرب: وش فيك نوف بخوف اكبر :ياسر تعال وبعدين اعلمك الله يخليك ياسر بسرعه: طيب طيب ..انتي وين نوف وهي مرتبكه : ماادري انا وين ..ياسر انا خايفه تعال خذني تكفى ياسر بعد تفكير : طيب وشلون اجيك وانا ماادري وينك نوف التفتت تناظر بالشقق بالعماره وقالتها بسرعه : طيب دقيقه ..عدلت عبايتها وطرحتها وتغطت زين وراحت لأول باب وبعد ماضغطت بهدوء على الجرس فتح لها الباب رجال بالعقد الرابع من عمره .. نوف وهي تحاول تخفي ارتباكها : اخوي ممكن توصف المكان لأخوي لأني عجزت ادله الرجال بكل طيبه: ايه عادي ..اخذ الجوال منها وبدا يوصف لياسر المكان : : : الرياض ..الساعه 3:15 الظهر .. حيث توقفنا .. عنود والحزن يملاها : سلمان طلقني سلمان بسرعه : وش هالكلام وش اللي اطلقك عنود بهدوء: سلمان الحب مو اهم شي بالحياه ..بعدين وان كنت تحبني وانا احبك بنعيش براحه وسعاده؟ سلمان سكت وماعرف يرد عليها وش يقول لها عنود بسرعه : جاوبني سلمان بنعيش براحه ؟ سلمان بهدوء: ماادري عنود : الا تدري الجواب لا طبعاً وانت تو قلتها قبل شوي كل ماتذكرت حسيت انك كارهني وماتقدر تعيش معاي والحياه بهالطريقه تصير صعبه الا مستحيله عشان كذا طلقني احسن لك واحسن لي سلمان بهدوء : انتي الدكتور كتب لك على خروج صح عنود : ايه انا قلت له ابي اطلع ووافق على شرط ارتاح سلمان : خلاص تعالي البيت ويصير خير عنود : بجي البيت عشان اخذ اغراضي وبس انا ابي الطلاق سلمان وانت مشكور ماقصرت حاولت معاي لكن للأسف المحاوله فشلت سلمان بحزن : طيب انا بسوي اللي تبينه بس نوره اليوم طالعه من المستشفى ومشتاقتلك خليك اليوم بالبيت وبكره يحلها الف حلال عنود بهدوء: طيب : : : الرياض ..الساعه 3:30 الظهر .. ياسر يناظر بنوف : ياربي نوف من ركبتي السياره وانتي تبكين مافهمت منك شي نوف وهي تبكي وبصوت عالي: ياسر كله منك انت السبب انا اول مره احس بالخوف كذا ياسر متفاجأ : ليه يعني انا السبب ؟وش سويت ووش صار نوف بحزن مسيطر على داخلها بشكل غريب : انا كنت صغيره وبريئه وانت كنت الذيب اللي بجد مايهرول عبث ياسر وهو يضحك: نوف لاتسوين فيها هالحين جايه تحاسبيني بعدين انتي اللي كنتي صيده سهله شسويلك رجعت بذاكرتها لورى وبدت تذكر وشلون تحولت من بنت بريئه لبنت ماتملك حس البراءه .. سنة 1422 للهجره تحديداً .. كان عمرها 15 سنه وقتها .. بصعوبه اقنعت امها انها تروح للبقاله القريبه من بيتهم ..وبعد مالبست عبايتها وطلعت ..راحت للبقاله بسرعه شرت خرابيط ولما جات تحاسب كان اول لقاء لها بياسر اللي كان متوهق بالدفع باقي له ريال على حسابه ..دفعت الريال عنه وقالتها بنعومه : خلاص هذا الريال الباقي للأخ .. عمرها ماراح تنسى اول نظراته ..بدت تذكر وشلون بعدها بدا مطارداته لها عشان يرجع الريال لدرجه حسته انسان امين ..ومن يومها بدت علاقة الحب الطايشه كانت لما تروح المدرسه يلحقها ولما ترجع يلحقها ..بدت تفرح بوجوده ..تفرح بكلامه ..وتنبسط فيه وهو يلحقها حتى لما تروح عند خوياتها ..وكلها اشهر وكان اليوم الموعود اخذها فيه لبيت اهله الخالي ..هناك صار اللي ماكانت تتوقعه بلحظه ممكن الأنسان ينسى دينه ويغفل عن التفكير ويتناسى اللي عينه ماتنام ..وبكل وقاحه فقدت شرفها بالحرام ..وتكررت اللقاءات اللي من هالنوع .. سنة 1423 للهجره تحديداً .. كان اول يوم ياخذها معاه على حفله.. الأجواء كانت غريبه بنات ورجال مع بعض ..طاوله زجاجيه تملاها المكسرات وكأوس تحوي شراب غريب اللون ..سحب عبايتها بهدوء وقالها بمكر: هنا لازم تفسخين عبايتك ..ماقاومت بالعكس عجبها الوضع وحست انها تطلع من روتين بيتهم القاتل ..وفي نهاية السهره قدمها ياسر لواحد من الرجال اللي بدا يترنح من كثر الكاسات اللي شربها .. نوف وهي تناظره بتوتر: ياسر وش تبيني اسوي ياسر بعد ماغمز لها : ابيك تنبسطين وتبسطين خويي نوف مرتبكه: بس ياسر ياسر يدفها : ياللا انا وخويي واحد سوي معاه مثل ماتسوين معاي هزت راسها بهدوء ..ودخلت احد غرف الشقه مع خويه ..ومن يومها وهالقصه تتكرر كثير .. : : ناظر فيها بعد ماخلصت كلامها : نوف انا ماجبرتك انتي جيتي معاي بأرادتك واول مره دخلتك على واحد مااعترضتي بالعكس كم سؤال ورضيتي بعدها على طول نوف وهي تبكي: كنت ابي ارضيك انا ياغبي كنت احبك وللحين احبك موووووووووت ولما شفتك مرخص فيني قلت عادي دامه يبي كذا ياسر مستغرب: وش قلتي نوف بصوت عالي: ايه احبك بس انت حمار انا كنت ادور راحتك حتى لما تقولي طفشان وماعندي بنات انا كنت ادور لك على بنات واجيبهم لين عندك وانا بداخلي اموت واحترق كنت ابيك تحس اني غير ولي قيمه وفاهمه جوك زين عشان مايجي يوم وتستغني عني لأني مالي غناة عنك حس بتوتر كبير وماعرف وش يقول .. وبنبره وضح فيها انه مصدوم : انتي بجد يانوف كان لك قيمه عندي وكنت دايم احب ارضيك وانفذ طلباتك عشانك فاهمتني بس عمري مافكرت بالحب نوف بحسره: ايه انت تحب ترضيني عشاني اضبط لك جوك الخايس ياسر بعصبيه: اللي يسمعك يقول انتي اللي جوك نظيف نوف بقهر: محد وسخني غيرك ياسر بقهر: انتي وش فيك ووش هالخرابيط اللي تقولينها نوف بنبره جاده: اخواني عرفو بالسالفه وانا قلت لهم بهرب مع حبيبي ومن اليوم انت لي ياسر واللي بدا يعصب : وش هالخرابيط اللي تقولينها تبين اخوانك يذبحوني نوف : عادي يذبحونك ويذبحوني معك ياسر وهو يصارخ: ومين قالك ابي اموت الشرهه مهيب عليك الشرهه علي قال هربانه واخوانها يلحقونا ..الحين بدور وبرجعك بيتكم نوف قربت بسرعه ومسكت الدركسون وهي تعكس اتجاهه : انت لي ومن اليوم ماعاد اتنازل عنك لو الموت بعد ماسمع كلامها ماقدر يركز بالطريق ورغم محاولاته عشان يعدل الدركسون وبسبب سياره ظهرت بطريقه فجأه ويد نوف اللي كانت ع الدركسون فقد السيطره على السياره ..الى ان تدحرجت من المنحدر العالي وكلها دقايق وطلع صوت الأنفجار القوي للسياره .. الوقت كان ظهر والشارع مليان ..بدت العالم تتجمهربشكل فضيع ..كانت سيارات العالم توقف بسرعه والناس تنزل عشان تشوف هول الحادث.. واحد من الجماهير صرخ بسرعه: لاحول ولا قوة الا بالله السياره احترقت دقو على الأسعاف بسرعه وبسرعه مجموعه من الناس بدو يطلبون النجده ويوصفون مكان الحادث بدقه : : : الساعه 4 العصر .. حاطه رجل على رجل تشوف تلفزيون ..تهز رجلها بعنف وواضح على معالمها الطفش .. التفتت بسرعه لجنا وقالتها بطفش: انتي وش تسوين من اليوم باللاب توب جنا وهي تناظر بالشاشه وبكل برود : ابد اسولف مع صديقاتي بالماسن واتصفح جود بنبرة ملل : يااختي هذا مو جوي انا طفشانه قومي نطلع نتمشى جنا ببرود: وين نروح جود: أي مكان خلينا نتغدا برا مثلاً جنا تضحك: يامهبوله مالنا ساعه من تغدينا جود بسرعه: اوه صح طيب ..وبعد تفكير : طيب نروح نتعشى أي شي انا طفشانه جنا وهي تكتب بسرعه : قريب تبدا الدراسه وينتهي هالطفش جود بقرف : يع ياشين الدراسه بس وقفت بطفش واخذت جوالها : بروح اسولف مع دانا شوي ابرك من هالطفش رقت الدرج بسرعه واول ماوصلت غرفتها دقت رقم دانه .. دانه بحماس: هلا والله بجوجو الحلوه جود تضحك: هلا بك ياقلبي كيفك دانه: بخير أنتي كيفك جود بطفش: ماشي الحال بس طفشانه مافيه شي اسويه دانه: ليه مالقيتي لك بديل جود مستغربه: بديل عن وشو دانه بخبث: يعني حب جديد جود بسرعه: لا اعوذ بالله اجلس بالطفش طول عمري ولاارجع اسوي حركات زمان دانه بهدوء: تمام عقابلنا يارب ونتوب جود وهي تضحك: اقول ليه مانطلع طلعه كذا حلوه دانه بعد تفكير: والله فكره خلاص اقول للبنات وارد لك خبر جود : خلاص انتظرك بعد ماقفلت شردت للحظات وبدت تتذكر سامي وكيف كانت تحبه موت وهو كان يلعب فيها .. حست بالحزن وهي تتذكر حب فارس الصادق لها وكيف جازته بخبثها وكذبها ..تذكرت كيف بهذلت حالها واتهمت انسان بريء ..حست بضعفه وهو مظلوم وهي تفكر بضعفها وهي بالمزرعه بيد سامي ومافيه حولها احد ..رفعت راسها لفوق وقالتها بصوت عالي : سبحانك يالله عالم بكل شي ..سامحني يارب انا اخطيت وابيك تغفر لي : : : الساعه 5المغرب .. دخلت البيت وهي حاسه بخنقه ..حاولت قد ماتقدر انها تتبسم لزوجة خالها اللي جات عندها بسرعه ترحب فيها.. حط الشنطه الصغيره ع الأرض وقالها بهدوء: انا بطلع غرفتي ام سلمان وهي تناظر وجهه اللي بان الحزن عليه : لازمك راحه ياوليدي سلمان بهدوء: ايه لازمني راحه من زمان ماحسيت براحه التفتت بسرعه وهي تسمع صوت نوره العالي اللي ملاه الحماس: هلا والله بالغاليه عنود وهي تقرب من نوره وتتبسم: هلا بك زود اخبارك ياقلبي نوره: انا بخير انتي اللي طمنيني عنك وش جاك عنود بعد ماناظرت سلمان وهو يطلع الدرج تنهدت وقالتها بهدوء: ابد طحت من الدرج ريم بسخريه: ايه وسلمان هو اللي دفها عنود ناظرت ريم وبينها وبين نفسها: انا عندي شي لازم اسويه قبل امشي من هالبيت نوره مستغربه : جد سلمان ..وبسرعه: لا اخوي مايسويها عنود لفت يدها حول كتوف نوره وبدت تمشي معاها : ماعليك من هالسالفه انتي علميني كيف صدرك الحين : : : الساعه 7 المغرب .. المستشفى تحديداً .. قرب من علي وبعد ماحط يده على كتفه التفت علي بسرعه ..قالها وهو يتبسم: هاه خلصت حالة الطوارىء اللي عندك علي بهدوء: ايه خلصت بس مااعتقد الولد يعيش حالته مره صعبه هو لو ماقمز من السياره كان صار فيه مثل البنت وصلت للمستشفى ميته ومتفحمه ماقدرنا نتعرف عليها ولاعندها اوراق ثبوتيه فهد يهز راسه بأسى : لاحول ولاقوة الا بالله .. الحين وش بتسوون علي : راح ننتظر أي شخص يسأل عليها وبعدها نسوي تطابق لـ الدي ان أي او إن صارت معجزه وعاش الولد هو يقلنا عن هويتهم لأنه هو الثاني ماقدرنا نعرف أي شي عنه ماكان معهم أي شي يثبت هويتهم فهد : الله يعين .. حط يده على بطنه: انا بموت جوع من الظهر حاله ورى الثانيه وكلها طوارىء مدري وش السالفه اليوم علي يتبسم : وش تلمح له تبي تاكل يعني فهد بسرعه: طبعاً اجل ابي اتأمل محاسن وجهك ..بتجي تاكل معاي والا لا علي ببرود: لا فهد بقهر: الشرهه مو عليك الشرهه علي اللي جاي اعزمك تدري شلون بستأذن وبروح اكل مع زوجتي ابرك من مقابل وجهك علي بسرعه: لا لا خلاص بجي معك انا بعد جايع مثلك فهد بلا مبالاة : لا بروح اكل مع زوجتي علي بهدوء: طيب رح استأذن وبشوف يخلونك تطلع والا لا فهد يسحبه: اقول ياللا ناكل شي ع السريع انت تدري مااقدر اطلع علي يضحك: ادري بس بشوف وش تبي تسوي : : : الساعه 10 مساءً .. فتحت باب الغرفه بعد تردد ..شافته جالس على السرير ومسند راسه للجدار.. عنود بعد ماقفلت الباب : يعني مانمت سلمان بهدوء: ماجاني نوم عنود بنبره ملاها التوتر: سلمان انا اول مااصحى بروح بيتنا وانت ياليت تنتهي من هالسالفه بسرعه سلمان بعد ماتنهد : ان شاء الله ..سكت شوي وكمل بعدها : تدرين عنود انا صح حبيتك بس انتي كلامك صح انا معاك مو قادر ارتاح ولاقادر انسى اللي صار ..مستحيل انسى انك سمحتي لنفسك تكلمين غريب حتى لو كنتي لعبه بيد نوف وخويها ..مكالماتك هي اللي وصلتك لدور الضحيه وانا هالشي مستحيل انساه ..مستحيل اعتبرها غلطه وعدت لأنك خسرتي شرفك والسبب هالغلطه ..مسح شعره بهدوء وكمل بنبرة حزن: تصدقين انا ودي امسك يدك وابوسها واقول لك اسف عشاني مديت يدي عليك بس كل مااتذكر انك كنتي له قبل تكونين لي حتى لو بالأكراه مااقدر اسويها عنود بحزن: عشان كذا الفراق احسن حياتنا مع بعض مستحيله سلمان بعد ماوقف: انا بروح انام مع واحد خويي ..وانتي ورقة طلاقك بتوصلك قريب ان شاء الله : : : الساعه 10:30 مساءً بتوقيت السعوديه 1:30 الظهر بتوقيت امريكا.. دخل غرفة نايف بسرعه وبدا يهزه بقوه وهو منفعل ويصارخ: نايف قوم ..قوم يادب النوم نايف فز بسرعه: هاه وش صاير مشعل بهدوء: عطني مفتاح موترك نايف ينافخ: يلعن شكلك خرعتني ..اخرها تبي المفتاح ماتقول ماتحب تركبهم مشعل يمد يده: هات بس اخلص علي عندي مشوار ضروري اعطاه المفتاح ورجع يكمل نومه وهو يتحلطم: مزعج ركض بسرعه بعد ماربط خيوط جزمته بسرعه ..ركب البانشي وتحرك بسرعه وهو متبسم ..قطع المسافه اللي توصله للمزرعه بسرعه كبيره وهو كله امل انه يلاقاها هناك ..اول ماوصل شافها تتمشى على بعد مسافه من البيت وكانت بكامل اناقتها مثل العاده ..كانت لابسه قميص برتقالي للركبه وكان يتوسطه حزام ابيض عريض ..بنطلون ابيض ..وشال برتقالي يحوي دوائر بيضا ..نزل بسرعه وراح يركض لعندها وهو يصارخ: عبيرررررررررر التفتت تناظر فيه وهي مستغربه وواضح على معالمها الحزن مشعل وهو ينافخ : توقعت القاك هنا..حرام عليك عبير شغلتي بالي خفت تكوني سافرتي عبير بهدوء ملاه الحزن : ماراح اسافر بس كنت ابي اكون لحالي مشعل بحب: عبير لا تزعلين مني انا احبك والله العظيم احبك بس ماادري وش الافكار الغبيه اللي جاتني انتي لازم تعذريني انا مريت بتجربه صعبه عبير بحزن: مو معناة انك عرفت وحده خاينه لعابه كذابه ..تجي تحسبني انا مثلها انت لو تحبني كنت وثقت فيني وماشكيت ولو للحظه انك حياتي واني مستحيل اخونك مشعل يتبسم: والله واثق فيك بس هالشكوك الغبيه ماادري وش كانت تبي انا احبك ..عبورتي لاتزعلين امانه عبير :مشعل انا سويت شغلات كثيره عشانك وتغيرت عشانك بس للأسف ظلمتني وماوثقت فيني مااقدر اسامحك مشعل يتمسكن: اهون عليك حبيبتي ..انا مشعل حبيبك ..والله والله حاس اني ظلمتك وحاس بغلطتي بعدين انا لو مااحبك مااهتميت ورحت للمكان عبير بهدوء: انا ادري انك تحبني بس وش الفايده ماعندك ثقه فيني مشعل بحب: الا عندي ثقه بعد هاللي صار صدقيني زادت ثقتي فيك وزاد حبي لك عبير ..ناظر فيها وهو يتبسم وقالها بهدوء: انا اسف عبير بسرعه: لامشعل لاتقول اسف مشعل بعد مارفع كيس بيده قالها وهو مبسوط: هديتك للحين مافتحتها عبير مستغربه: وليه مشعل وهو مبتسم للأخر: قلت اذا ماعاد تبيني برجعها لك عبير تضحك: طيب افتحها مشعل بهدوء: يعني خلاص رضيتي عبير مستحيه: تقدر تقول راضيه ..فتح الكيس وطلع العلبه الصغيره ..بحجم علبة الساعه ..بعد مافتحها طلع منها مفتاح وقالها بذهول: هذا كأنه مفتاح سياره عبير تتبسم: ايه مشعل اللي استغرب قالها بسرعه: جايبتلي سياره؟ عبير بهدوء: ايه مشعل وهو يمد المفتاح: خذ ي مااقبلها هالهديه سلامات تجيبين لي سياره عبير : اذا تحبني وتبيني ارضى تاخذها انت قلت لي ان فلوس السياره اخذتهم هذيك الحقيره وانك ماتقدر تطلب من ابوك مره ثانيه مشعل بسرعه: هذي مشكلتي وانا احلها مستحيل اخذ كذا هديه عبير تناظره بحب: مشعل والله العظيم لما اشتري لك سياره كأني شاريتلك ساعه ماتفرق معي الحمد لله الخير كثير عشان كذا خليني اهديك شي انت محتاجه وتبيه احسن .. وبعدين كل ماسقتها راح تتذكرني وتفكر فيني على طول مشعل سكت وماعرف وش يقول عبير بهدوء: مشعل اذا تحبني وتبيني ارضى بعد اللي صار تاخذها مشعل بعد ماحط المفتاح بجيبه : طيب بس لاتعترضين ع الهديه اللي بجيبها لك بعيد ميلادك عبير تضحك: طيب ماراح اعترض : : : الرياض .. الساعه 12:30 بعد منتصف الليل .. جالسه بالصاله ورى الكنبه لها اكثر من ساعه .. عنود بينها وبين نفسها : الظاهر تعبت نفسي ع الفاضي وشكوكي كلها غلط شكلي بتسحب وبروح غرفتي جاني النوم ..فجأه وبعد ماكانت مستعده عشان توقف شافت ريم وهي نازله وبسرعه ركزت نظرها على ريم اللي كانت تتلفت مثل الحراميه الى ان طلعت برى للحديقه من باب الصاله ..قامت من مكانها بسرعه فتحت باب الصاله بشويش ولمحت ريم اللي كانت متجهه لممر خلف البيت راحت بسرعه ووقفت قبل الممر بشوي ..وبدت تسمع حوار ريم وعبد العزيز بوضوح.. عبد العزيز : وحشتيني ياعسل ريم بهدوء: انت اكثر عبد العزيز : الجو صاير حر مانقدر نجلس هنا وش رايك تروحين معاي شقتي ننبسط لنا شوي ونرجع ريم بعد تفكير : لا اخاف احد يصحى عبد العزيز بخبث: مين راح يصحى اقفلي باب غرفتك وهاتي عبايتك ساعه ونرجع ريم بعد ماوقفت : طيب انتظرني شوي وبجي مشت بسرعه متجهه لباب الصاله واول ماانعطفت يسار .. ناظرتها عنود بحقد وقالتها بقهر: ماتستحين على وجهك تدخلين رجال غريب البيت ..لا وتبين تطلعين معاه ماتخافين ربك انتي ..آه لو تدرين بس وش كثر اخوك واثق فيك ..وكملت كلامها بعصبيه: عندك دقيقتين عشان تخلينه يمشي ..والا ورب البيت بسويلك فضيحه هنا ريم بخوف: لاخلاص الحين بخليه يروح دخلت العنود الصاله وجلست تنتظر ريم ..وكلها دقيقتين ودخلت ريم وهي منزله راسها للأرض ومتجهه للدرج عنود بصوت مسموع: تعالي هنا فيه كلام لازم نقوله ريم قربت منها وقالتها بنفس خايسه : وش الكلام اللي تبين تقولينه مابي نصايح لأن نصايحك ماراح تفيدني بشي عنود بقرف: انا مستغربه وشلون تتكلمين بهالطريقه وانتي غلطانه ريم : وليه اتكلم بأسلوب حلو واضحك وانبسط خلاص انا خسرت كثير وماعاد فيه أي شي يستاهل عنود وهي معصبه: ليه تعاملين الناس كذا كأنهم السبب بخساره صارت لك والسبب انتي ريم بقهر: لامو انا السبب انا غلطت ومافيه انسان مايغلط بس غلطتي كان جزاها كبير عنود تناظرها بحده: مااحس تصرفاتك تصرفات انسانه حاسه بغلطتها لأنك مستمره فيها للحين ..ياريم العيب مو انك تغلطين العيب انك تستمرين بالغلط ريم بعد مادمعت عينها : عنود انتي موفاهمه شي عنود بهدوء: طيب فهميني ريم بعد مانزلت راسها: مااقدر عنود : ريم وش بيكون فيه ابلى من اللي شفته وسمعته خلاص علميني يمكن اقدر اساعدك وانا اقسم لك بالله العظيم ان الكلام مايطلع لأي مخلوق ريم وهي تفكر: خلاص بقول لها يعني هي صارت عارفه السالفه تقريباً وبعدين خلني اطلع هاللي بداخلي حارقني ومنعكس على اسلوبي ونفسيتي ..وبصوت عالي: خلاص بقولك بس عنود امانه لاتحتقريني او تطلعين الكلام برى عنود تتبسم: سبحان الله انتي كذا ريم احلى الف مره من ريم اللي كنت دايم اشوفها ريم تبسمت وبدت تسرد احداث قصتها بشكل سريع ومختصر..واثناء سردها للقصه قالتها بحزن : وبعد ماصار اللي صار بفتره جيت له وقلت له حنا لازم نتزوج وقتها اعترف لي ان جنسيته مو سعوديه قلت له عادي قالي اسف مااقدر اتزوجك سألته ليه ووقتها صدمني وقال انه بفتره نقلو له دم غلط وصار معه الأيدز عنود حطت يدهاعلى فمها وشهقت بقوه .. ريم تسترسل: ومن يومها للحين وحنا نتقابل بالطريقه اللي انتي شفتيها عنود بعصبيه: انتي وشلون مكمله معاه للحين ريم بهدوء:احبه وبعدين كسر خاطري واستسلمت لقدري انا وهو معانا الأيدز ومالنا امل بالزواج بعدين والله صرت بايعه الدنيا ماهمني شي ولاهمني احد عنود بقهر: حرام عليك تدفنين نفسك بهالطريقه مع واحد حقير هذا لو يحبك ماكان تجرأ وحط يده عليك بدون زواج ..لو يحبك ماكان لمسك ونقل لك هالمرض ..لو يحبك مارضى تكملين معاه علاقه حرام ..انتي وشلون ترضين ريم وهي تبكي: ماادري عنود ماادري عنود بنبره صارمه: انتي من اليوم لازم تقطعين علاقتك فيه والله العظيم وشوفيني احلف هالأنسان مايحبك ..ومن بكره بروح معاك المستشفى نسوي تحليل ريم بسرعه: لا لا مابي انكشف اخاف عنود بهدوء: ماعليك انا بتفق مع خالي وبقوله وحده صديقتي خايفه لايكون انتقل لها المرض من زوجها وماتبي احد يعرف بالسالفه ريم بسرعه: طيب والاسم والملف كيف عنود تتبسم: قلت لك بتفق مع خالي ماعليك الحين روحي نامي وبكره بروح معاك ريم بهدوء: طيب : : : الرياض ..الساعه 3:30 الظهر .. كانت تمشي بالحديقه بطريقها لباب الصاله وهي تتبسم مبسوطه ..رفعت الكيس بشويش : راح تنبسط امي بهالحلى ..هي تحب الحلويات وانا مانعتها من زمان عشان السكر فتح باب الصاله وهو يتبسم : اكيد راح يعجبها اول مادخلت ابتسمت وهي تسمع صوت التلفزيون قربت من كنب الصاله والأبتسامه تملا وجهها : جبت لك حلى يااحلى ام بالدنيا ..فجأه غابت الأبتسامه اللي تملا وجهها وهي تشوف منظر الجده ام سالم وهي مسنده راسها على الكنبه وعيونها مفتوحه قربت منها وهي مصدومه وبدت تهزها : ياماما ..ياام سالم ..جدتي شفيك ردي علي ..وصرخت بصوت عالي : احمممممممممممممممممممممد تعال امي مدري وش فيها احمد واللي كان يحط اكياس بيده قرب منها بسرعه ..جلس بسرعه بجنب ام سالم وبدا يتحسس انفاسها ونبضها ..كتم دمعته وهو يغمض عينها بيدينه وقالها بثبات : اطلبي لها الرحمه لجين وهي تبكي وتصارخ: لالالالالالالالالالا ..دخلت بنوبة بكاء وحالة هستيريا وصارت تهزها : لا يالغاليه لاتروحين وتخليني انا مااقدر على فرقتك ..كملت وهي تناشق : ادري زعلتك وسويت شغلات كثير تغضبك بس والله تغيرت تكفين لاتخليني وقف وقرب من لجين اللي كانت جالسه على الأرض ومسنده راسها على رجلين جدتها وتبكي حط يدينه عند ابطينها وبدا يرفعها لفوق بقوه بس ماقدر يرفعها لأنها كانت متشبثه بجدتها ..قالتها بنبره ملتها الحسره والحزن : خلني احمد خلني احس بدفى حظنها يوم اني كنت مرخصه بحقها وهي قدامي ماعرفت قيمتها ..والحين يوم اني بديت احس انها بجد امي راحت مني ليه ياربي احمد وهو يرفعها بقوه اكبر: لجين قومي قومي اللهم لااعتراض الله يرحمها الموت علينا حق لجين وهي تناشق وترجع تهزها: لا لا لا انت اكيد مو متأكد شوفها تتنفس ..احمد قولي انها ماماتت احمد واللي نزلت دمعته اللي حابسها نزل لمستواها وضمها بقوه : لاتزعلين حبيبتي هذي سنة الحياة اذكري الله وخليني اكمل اجرائات الوفاة عشان ندفنها اكرام الميت دفنه بعد ماسمعت كلامه زاد صوت بكاها وهي تدفن راسها بصدره : : : الساعه 4:30 العصر .. كانت جالسه مع ريم بأنتظار النساء وتلاحظ التوتر بعيونها ..بعد مااتفقت مع خالها ووافق بصعوبه ..حست هي بعد بالخوف بعد ماسحبو عينة الدم من ريم ..معقوله تكون مصابه بالأيدز .. حاولت تكسر توتر ريم رغم انها متأكده ان الملامه الأولى هي ريم وتماديها : اقول ريومه ريم بنبره هاديه: هلا عنود: لاتخافين ربك كريم ريم وهي تتبسم : ماعليك مو خايفه عنود ممكن اسألك سؤال عنود : امري ريم: ليه اخذتي كل اغراضك من بيتنا عنود بهدوء: انا واخوك مااتفقنا ريم مستغربه: كيف يعني عنود: بعدين تفهمي ريم بعد تردد: عنود انا اسفه على اسلوبي الفض معاك ..ماعرفت مصلحتي ولاعرفت للناس اللي يبون مصلحتي عنود: ماعليك خير الخطائين التوابين اهم شي تعرفين وشلون ترجعين لربك سبحانه وتعالى ترى محد بينفعك غير رضاه سبحانه وتعالى ريم تهز راسها بالأيجاب بعد مامسحت دمعه تسللت بهدوء الى خدها ..بالوقت اللي دق فيه جوال العنود .بعد ماشافت رقم خالها ع الشاشه ناظرت بريم وقالتها بهدوء: اصبري هنا شوي وراجعه بعد ماطلعت العنود صارت تفرك بيدينها بتوتر كبير ..وبعدها بدقايق رجعت العنود لغرفة الانتظار وقالتها بحده : ياللا مشينا ريم بخوف: طلع فيني المرض صح عنود بعد ماتحركت بسرعه: امشي بالسياره بعلمك كانت تتحرك ورى العنود بيأس شي طبيعي انها مصابه بالمرض ..بعد ماركبو السياره وتحركت التفتت للعنود : قالك خويتك معاها الأيدز ولازمها حجر؟؟ عنود تناظرها وتقولها بحده : تدرين ان هالحقير كان يلعب فيك وماخذك تسليه له ..طول هالوقت وانتي لعبه بيده مبسوط فيك وبغبائك لأنك معتبرته الحبيب المسكين وتلبين له طلباته الحقيره ..كملت كلامها بقهر: ريم انتي مافيك الا العافيه وهذا معناه انه نصاب كبير ..خالي يقول زوج خويتك سليم لو معاه الأيدز استحاله تنفذ هي من المرض ..انتي لازم تقطعين علاقتك فيه دامه مو ناوي زواج هالكذاب والخوف يكون سعودي وقالك يمني بس عشان لايعشمك بزواج ريم واللي الصمت كان ملجأها وصوت بكاها كان ردها ..حست انها غبيه ..ضيعت نفسها وباعت دنيتها عشان واحد مايسوى بعد ماوصلت لبيت خالها ..انتظرت ريم تنزل وطلعت جوالها ودقت بسرعه على اخوها وبعد ماجاها رده ..قالتها بسرعه: مشعل ابي اجيك امريكا ماعاد اتحمل العيشه هنا مشعل مستغرب :كيف وزوجك وبيتك عنود بهدوء : انا خلاص مشعل: كيف يعني خلاص عنود: سلمان طلقني مشعل مستغرب: ليه يطلقك وش صار عنود بحزن: مشعل لاتسألني اسأله ماعندي لها اجابات انا نفسيتي تعبانه ..بخلص اوراقي وعدتي وبجيك امريكا : : : يتبع,, | ||||||||||||||
|
| |
|
05-12-10, 04:36 AM
| #33 | ||||||||||||||
| مراقبة ومشرفة سابقة ونجم روايتي
| ((الجزء الثاني)) وبعد مرور 3 أشهر و15 يوم.. يوم الأثنين 20\11\1427 للهجره. الساعه 11 مساءً بتوقيت السعوديه 2 ظهراً بتوقيت امريكا .. مشعل وهو يلبس التي شرت السماوي: نايف لاتحاول قلت لك مستحيل ماراح تجي معاي لو الموت سلامات تشوف اختي كاشفه نايف يتحلطم : عادي اختك بتسكن هنا مصيري راح اشوفها بالجامعه او بأي مكان مشعل ببرود: من هنا الى ان تبدا بدراستها الجامعيه يصير خير نايف: ياخي ماراح اناظر بأختك وعد بغض البصر مشعل يناظره: انا مو فاهم وراك مصر تجي معاي نايف بطفش: مشاور للمطار وبتروح وتبي تبطي وبجلس انتظرك للغدا انواع الجوع وانواع الطفش وش اسوي هنا بلحالي مشعل بعد تفكير: امري لله ياللا تعال معاي بس ياويلك تناظر بأختي نايف : افا عليك مو اخلاقي طول الطريق للمطار كان يسولف يدخل بسالفه ويطلع بسالفه.. مشعل بصوت عالي: نيوف وجعت راسي ماتعرف تسكت نايف يناظره : مالت عليك جزاتي ابي اونسك مشعل بعد ماوقف السياره : اقول انزل بس تسمع بالوناسه انت اول ماوصلو لصالة المغادرين ..صار مشعل يراقب القادمين بحماس كبير وفجأه صرخ بقوه : اختي اختي والله اختي نايف بهدوء:جد مشعل بسرعه :اقول لف وجهك يمين بس وياويلك تناظر نايف لف وجهه يمين وهو يضحك :الحمد لله والشكر مشعل يصفقه على كتفه: انطم بس انطم راح بسرعه وهو حاس بشوق كبير لأخته اول ماوصل لها ناظر فيها بحب وهو يراقب ملامحها الحلوه واناقتها ..كانت لابسه شال اسود مثبته ع جنب بكرستاله صغيره ..ولابسه جاكيت اسود فخم لتحت الركبه ..يخفي البنطلون والتي شرت اللي لابستهم تحت الجاكيت .. ضمها بحنان وقالها وهويتبسم: خلصتي اجرائاتك عنود بهدوء: ايه خلصتها مشعل :شاطره ماشاء الله ياللا مشينا.. اول ماوصلو لنايف دفه بقوه: ياللا امشي قدامنا عنود وهي تناظر بنايف اللي مشى قدام مشعل بدون أي اعتراض: مين هذا السواق؟ مشعل فطس ضحك: لاهذا خويي نايف بصوت عالي: هين يامشيعل اصبر نوصل قبل لايوصلون لباب الخروج مشى متجه لثلاجة البيبسي وقالها بصوت عالي: بسحب لي ببسي تبي شي مشعل بصوت عالي: لا اول ماوصلو السياره ناظرت بالفراري الفخمه وقالتها وهي مبتسمه: مدلع نفسه اخوي ماشاء الله قالها وهو يركب:شسوي تعرفين اخوك مايسوق أي سياره بعد ماركبت بجنبه : لاوالله سياره حلوه حملها معاك للسعوديه بعدين مشعل وهو يضحك: خلاص بدرس الموضوع ..بس عنوده اركبي ورى خويي بيجي معي عنود بهدوء:طيب فتحت الباب ونزلت بالوقت اللي كان نايف يشرب من البيبسي وماد يده للباب يبي يفتحه..نزل علبة البيبسي وصار يناظر بالعنود بذهول توتر ماعرف وش يسوي ..تسمرت رجلينه مكانها وماعرف يتحرك خطوه لورى او يشيل عينه ..حس بأنفاسه سريعه وضربات قلبه تزيد مايدري وش صار له بس هذا هو الأحساس اللي كان يتكلم عنه ووده يحسه مشعل وهو يدفه: خير يابو الشباب وراك وقفت مكانك نايف وهو يبعد عن طريقها بأرتباك: اسف والله مادريت انها جلست معك هنا مشعل بقهر : طيب طيب يانويف اوريك نايف يضحك رغم خفقان قلبه اللي مو راضي يوقف: انقلع زين والله مادريت بعد ماركبو السياره وتحركو كان ساكت طول الطريق يفكر بقلبه وشلون خانه ونبض بهالطريقه لأول مره ..كان يفكر بشكلها جمال عيونها :ياربي وش صار لك يانايف : : : الرياض الساعه 12:15بعد منتصف الليل .. صحت من النوم وراحت للحمام بسرعه وبعدها بدقايق رجعت للسرير وهي تتنفس بصعوبه وحاسه بتعب احمد بعد ماالتفت لها :لجين لازم تروحين المستشفى حالك ماينسكت عليه لجين بعد ماانسدحت: مايحتاج مافيني شي احمد بهدوء: نونه اذا لي خاطر عندك بتروحين المستشفى لجين بهدوء: طيب خلاص اللي تبيه احمد : خلاص بكره الصبح بستأذن من دوامي وبجي اخذك للمستشفى ومابي نقاش لجين: طيب بروح وامري لله مع اني عارفه مافيني شي : : : الساعه 1 الفجر.. الممرضه وهي تفتح باب غرفة الدكتور بسرعه وتقولها بحماس : دكتور دكتور مريض غرفة 110 بدا يتحرك الدكتور وقف بسرعه : فاق يعني الممرضه: لا بس حرك يدينه وحاول يفتح عينه الدكتور وقف بسرعه :هذي بشرا ساره مشى بسرعه للغرفه وبدا يعاين ياسر ..وبعد ماحرك رجله لاحظ ردة الفعل اللي سواها ياسر ..ناظر بالممرضه وقالها وهو يتبسم: المريض يستجيب اتوقع انه يصحى بأقرب وقت ممكن : : : الساعه 1:30 الفجر بتوقيت السعوديه 4:30 العصر بتوقيت السعوديه.. فتح الغرفه اللي قبال غرفته :هذي راح تكون غرفتك مأقتاً الى ان القى لنا انا وانتي سكن خاص ..طبعاً انا ونايف نطلع ومانرجع الا الساعه 12 والصباح نروح الجامعه الله يعينك ع الجلسه هنا بس بساعدك تخلصين كل امورك عشان تبدين دراسه بالفصل الثاني ..قرب منها وقالها بهدوء: وبعرفك ع البنت اللي ابي اتزوجها عنود متخرعه: حبيت امريكيه مشعل يضحك: لاسعوديه معاي بالجامعه بنت ولاكل البنات ..بعرفك عليها وماوصيك فيها عنود وهي تتبسم: وصيها هي فيني مشعل بعد تردد: طبعاً ماعرفتك فيها عشان سواد عينك بس ابيك تساعديني عشان اقنع امي وابوي واتزوجها مع اني مااعتقد يرفضون عنود: ومتى ناوي تتزوج مشعل بهدوء: بعد التخرج عنود بسرعه: باااااااال يعني مطول مشعل بأبتسامه عريضه: لابس ابي اقنعهم من هالحين مابي البنت تطير من يدي عنود مبسوطه: الله يسعدك ياخوي مشعل بسرعه: المهم انا هالحين بروح تأخرت انا ونايف استأذنا ساعه بس عنود مستغربه: تشتغل بعد الجامعه مشعل يحاول يخفي توتره: لا انا قصدي استأذنا من اخويانا لايروح فكرك بعيد المهم ارتاحي ادري تعبانه من السفر وانا اشوفك بعدين عنود بأبتسامه : ان شاء الله بعد ماطلع من الغرفه ناظر فيه نايف وبنبرة سخريه: هاه خلصت نصايحك الاخويه والا باقي مشعل يضحك: اقول قم بس عن الهياط الزايد بعد ماركبو السياره وتحرك مشعل ..قالها نايف بهدوء: مشعل لو اطلب منك طلب تردني؟ مشعل بسرعه: لاوالله مااردك تامر على روحي نايف بتردد: ابي اتزوج اختك مشعل وقف السياره بسرعه وناظر نايف بذهول : وش قلت نايف بعد مااخذ نفس : مشعل انا بكون معاك صريح واتمنى ماتزعل مشعل يناظره: ايوه نايف : انا والله يعلم ماكنت ابي اشوف اختك ابد بس شفتها صدفه ..مشعل تذكر يوم اقول لك انا مااصدق الحب وهالخرابيط وماعمري شفت بنت وحسيت بأي احساس والبنت اللي بشوفها وبحس بقلبي ينبض لها بتزوجها على طول لأني ماحب الحب قبل الزواج ابي احبها وهي على ذمتي مشعل بهدوء: وش يعني نايف يتبسم: انا اختك لما شفتها ماادري وش صار فيني قلبي صار ينبض بقوه ماادري وش هذا لأني ماعمري سويت أي علاقه مع بنت بس بما ان قلبي نبض لها انا ابيها زوجه لي على سنة الله ورسوله مشعل بعد مارفع حاجبه: والله جريء ِ نايف يتنفس بقوه: وبعدين بدال ماتدور لك سكن عشانك انت واختك يصير سكني بيت اختك وانت ضيف معنا مشعل بسرعه: حلوه ضيف نايف يتبسم: مشعل انا جيتك سيده بدون لف او دوران ..شاري اختك تعطيني والا لا؟ مشعل بهدوء: بس نايف اختي نايف بسرعه: اختك مطلقه ادري لأنك قلت من فتره اختي تطلقت وانت ماعندك غير اخت وحده ..وانا ماهمني انها مطلقه اختك للحين بسن صغيره والف واحد يتمناها مشعل يتبسم : خلاص اسألها وارد لك خبر نايف وهو مبتسم: عاد مااوصيك حاول تقنعها فيني كرجل مشعل فطس ضحك: امحق نايف يصفقه: وش قصدك تلاقي مثلي زوج اخت انت ووجهك مشعل يضحك: لاوالله ماالاقي رجال والنعم نايف بغرور: ايوه خلك سنع : : : الرياض ..الساعه 9 صباحاً .. كانت جالسه على احد كراسي الأنتظار ..تنتظر الدكتوره تناديها بأسمها بعد مااخذت منها مجموعة تحاليل ..وبعد انتظار سمعت اسمها وتوجهت الى غرفة الدكتوره .. الدكتوره وهي مبتسمه: كيفك يالجين لجين بهدوء: الحمد لله الدكتوره: انتي عارفه الحاله اللي انتي فيها من ايش لجين ببرود : لا الدكتوره بعد مازادت ابتسامتها : لجين مبروك انتي حامل لجين بعد مافتحت عينها على اقصاها : حامل وشلون وانتم فهمتوني انه صعب يصير عندي حمل الدكتوره: صعب بس ماهو مستحيل وربك كريم لجين واللي بدت تبكي بعنف : جد والله دكتوره انا حامل الدكتوره : وهي تضحك: ايوه جد المهم مااوصيك بالراحه وراح اكتب لك على شوية فيتامينات تاخذيها بأنتظام لجين بعد ماوقفت اخذت الورقه ومشت وهي تبكي مو مصدقه الخبر ..دقت على احمد وهي تبكي وبعد ماجاها صوته: الو احمد وصلت والا باقي احمد مستغرب: الا وصلت بس بشوف موقف لجين تناشق : مايحتاج موقف انا عند الباب احمد بسرعه: طيب طيب جايك وصل عندها ونزل بسرعه لها وبصوت مسموع: شفيك ياقلبي ليه تبكين لجين وواضح البكا على صوتها: مافيني شي خذ جيب هالوصفه احمد بخوف :أي وصفه علميني شفيك لجين وهي تناشق: احمد انا حامل احمد وللي ابتسم بعنف قالها بأنفعال: جد والله لجين حامل؟ لجين وهي تبكي: أي والله احمد وهو يضحك :وليه تبكين ياعمري هذا خبر يفرح لجين بهدوء: ماادري فتح لها باب السياره وناظرها بحب: اركبي بشويش ياقلبي ثواني اجيب الوصفه وراجع راح بسرعه اخذ الوصفه ورجع للسياره ..اول ماركب وتحرك قالها وهو مبسوط: ياربي لجين مو مصدق انك حامل من اليوم ممنوع الحركه واي شي تبينه امريني بس لجين وهي تبكي: احمد تمنيت جدتي معي بهاللحظه كان ودها تشوف عيالي احمد بهدوء: معليه قلبي هذا امر الله وانا متأكد انها فرحانه لك حتى لو ماكانت معانا : : : الساعه 11 الظهر .. دخل غرفة ياسر بسرعه ..ناظر فيه وشلون يصارخ بهستيريا وقالها بذهول : وش صاير الممرضه وهي تحاول تهديه : ماادري المريض بحالة هستيريا يصارخ من اول ماصحى الدكتور قرب منه وبدا يفحصه ..حاول يمسكه بقوه بس ياسر كان يحاول يفلت منهم بكل قوته وهو يصارخ: نوف السياره انا خايف ..صرخ فجأه وخرو عني بموووووووووووووووووووت الدكتور بسرعه: هاتي الأبره بسرعه المريض لازم يهدا راحت الممرضه بسرعه والدكتور بدا يحاول يهديه: لاتخاف انت بالمستشفى الحادث خلاص انتهى وانت بخير ياسر وهو ينافخ: نوف ..وينها الدكتور : انت تذكر البنت اللي معاك وش اسمها ياسر وهو متسمر مكانه ويتذكر المشهد المخيف للسياره وهي تتدحرج فيهم قالها وهو مفهي : ايه اذكر اسمها : : : الساعه 1الظهر .. سعد وهو يناظر اخوه : ماتبي تروح معانا سعود بكل هدوء: مابي اروح مكان روح عني سعد : والى متى تبي تجلس بالبيت سعود وهو يفكر: كل مااتخيل انها هربانه مع واحد احس بوجع بكل جسمي ليه صار معنا كذا ..ماعرفنا نحافظ عليها والا ربك يجازينا ع اللي نسويه قطع كلامهم صوت التلفون ..سعد بعد ماالتفت للصاله: بشوف التلفون سعود يأشر له (روح ) بلا مبالاة سعد راح للتلفون اخذ السماعه وقالها بكل هدوء: الو المتصل : الو السلام عليكم سعد :وعليكم السلام المتصل: هذا منزل ابو سعود الـ....... سعد: أي نعم المتصل : بنتكم نوف بمستشفى الـ....... سعد بسرعه: وش فيها المتصل : توفت بحادث سياره الظاهر كانت بصحبة احد اقاربها ياليت تجون عشان نكمل اجرائات الوفاة سعد بهدوء: طيب حط سماعة التلفون وهو مصدوم توجه الى غرفة سعود وقالها بحزن: يقولون نوف توفت بحادث سياره وهي مع واحد من اقاربها حنا ماعندنا اقارب اكيد مع ..وسكت سعود وقف وقالها بكل عصبيه: هالكلبه هالحيوانه حتى بموتها تبي تفشلنا وتحط روسنا بالتراب سعد بحزن: اسكت ياخوي اختك ماتت ومايجوز عليها غير الرحمه سعود بعصبيه: هالحقيره حتى دفنها حرام لأنها جابت لنا الكلام ام سعود وهي تبكي بحسره: اسكتو الله لايوفقكم ظلمتوها وهي عايشه والحين تبون تظلمونها وهي ميته محد وصلها لهنا غيركم ياحسرتي عليك يابنيتي : : : الساعه 2 الظهر .. ماسكه سلطان الصغير وتغني له وتلاعبه .. شذا بعد ماقربت منها : يايمه لاتتعبين نفسك معاه اشيله عنك ام سلطان وهي مبسوطه: لاخليه مااتعب وانا معاه هذا الغالي ولد الغالي شذا وهي تتبسم: طيب يمه الغدا جاهز تبين نتغدا هالحين والا بتنتظرين فهد شهد وهي تقامز: ننتظر بابا ننتظر بابا ام سلطان بحب: خلاص مثل ماقالت بنيتي ننتظر فهد شذا : خلاص مثل ماتبون ..اخذت جوالها ودقت على فهد : الو فهد: هلاقلبي شذا : قلبي نبي ننتظرك للغدا لاتتأخر طيب فهد: ليه تنتظرون انا راح ارجع ع الساعه 4 شذا: هذي اوامر امي وشهوده فهد وهو يضحك : خلاص اذا كذا مانقدر نتكلم : : : الساعه 5المغرب.. دخلت على اختها غرفتها وشافتها مشغوله مره..جالسه على سريرها تطلع شغلات من اللاب توب وتكتبها ع المدونه بسرعه وترجع تبحث عن غيرها.. جنا بهدوء: جود وش تسويين جود: اضبط البحث حقي جنا :طيب قومي نروح السوق وبعدين كمليه جود وهي منهمكه بالبحث: لا مااقدر اطلع لازم اخلصه بدري عشان اسلمه جنا تناظرها: سبحان الله اللي يشوفك هالحين مايشوفك قبل جود وهي تضحك: لا للحين احب اطلع واروح واجي بس بحدود وبعدين فيه اشياء مهمه وفيه اشياء اهم جنا تهز راسها: سبحان مغير الاحوال الله يهديك جود تترك القلم وتتخصر: وش قالو لك مجنونه جنا تضحك: ايوه هذي جود اللي اعرفها : : : الساعه 6 المغرب .. واقفه عند الدريشه وتسولف معاه ع الجوال :خلاص بندر ياللا روح بندر بأصرار: والله مامشيت مااتحرك من هنا الا لما اشوفك نوره بدلع: ياربي بندر انت ليه كذا بندر: مالي شغل وحشتيني شسوي بعدين انتي هالحين على ذمتي ولي حق اشوفك متى ماابي نوره ببرود: لامالك حق باقي ماسوينا عرس وزحمه بندر بقهر: وش دخلني بالعرس انا .. هالحين انتي بالشرع زوجتي والا لا نوره : مدري بندر واللي عصب: ياربي لاترفعين ضغطي تدرين شلون خلاص لاتجين خليك كذا شاطره ..بس وربي لأفضحك الحين بدق ع الشرطه وبرفع ع ابوك قضيه بقول حارمني زوجتي نوره واللي بدت تخاف : لامايصير كذا وحنا ماسوينا عرس ولاشي مايسوون لك شي الشرطه بندر :طــــيب طـــيب يانوره الحين اوريك وش تسوي الشرطه لا وراح اتبلى عليك وبقول مسوي عرس وفخم وبجيب شهود وبقول ان ابوك يطالبني فلوس عشان يعطيني زوجتي انا اعلمك نوره واللي صدقت : لالاخلاص الحين بنزل وامري لله بندر وهو مبسوط: ايه خلك سنعه والبسي عبايتك بروح معك مشوار صغنن نوره بسرعه: لامابي عند الباب وبس تبي والا كيفك ارفع دعوتك وانا بطلب الطلاق دام الدعوه كذا بندر واللي حس انها لوت ذراعه: مالت عليك ياللا تعالي عند الباب الحمد لله اشحذ الشوفه شحذ ماكأنك حلالي نوره بدلع: والله عاد اصبر تتخرج والبس لك الفستان الأبيض وبعدها سوي اللي تبيه بندر بعد ماتنهد: ياربي صبرك ..قفل الجوال وتحرك للباب وكلها دقايق وفتحت نوره الباب ناظر فيها بحب كان صامت ويتأمل ملامحها الحلوه نوره بسرعه: خلاص كحلت عينك بشوفتي ياللا مع السلامه ..دفت الباب تبي تقفله بس بندر حط يده ومسك الباب وقالها بسرعه: خير ان شاء الله تراك زودتيها انا اسوي اللي ابيه قالت كحلت عينك نوره ببرود : روح بندر مسكها من يدها :وين اروح نوره تحاول تفك يده : بندر وخر بلا جنون بندر يدفها لداخل البيت ويدخل معاها ويناظر بالمكان : ايه كذا الواحد يقدر يغازل حرمته هو صح المكان مكشوف بس اقدر اخذ راحتي بالكلام بما اني بحديقة بيتكم واقدر اقول لك انتي حلوه انتي حلوه انتي احلى ..سكت شوي وبعدها كمل : مدري وش باقي الأغنيه نسيت بس الزبده انك حلوه وانا احبك موووووووووووت نوره واللي فطست ضحك: مجنون مو صاحي بندر يناظرها بحب: أي والله اني مجنون من عرفتك وانا مو صاحي تدرين انتي لو ماكنتي نصيبي انا وش صار فيني نوره بهدوء: وش صار؟ بندر : كنت هالحين ميت نوره بسرعه: بسم الله عليك بندر بخبث: تخافين علي نوره مستحيه: وش رايك انت يعني نوره: خلاص لاتفكر بشي راح كانت غلطه والحمد لله رجعنا لبعض بندر: الحمد لله نوره انتي ماتدرين انا وش كثر احبك انتي حياتي وبدونك مااحس بطعم الدنيا نوره تناظره: وياترى هالحب بيستمر للأبد بندر: من هنا الين اموت بضل احبك واعشقك : : : الساعه 7 المغرب بتوقيت السعوديه 10 الصبح بتوقيت امريكا.. طق باب غرفتها بهدوء:عنوده صاحيه ادخل؟ عنود بصوت عالي: ايه مشعل تعال بعد مادخل وجلس بجنبها ع السرير: هاه عنوده كيف جو امريكا معاك عنود بهدوء: عادي مشعل بأرتباك: عنود ابي اكلمك بموضوع وموعارف من وين ابتدي عنود وهي تتبسم : ابتدي من المكان اللي يريحك وقول أي شي تبيه مشعل بتردد: صراحه عنود خويي متقدم لك يبي يتزوجك عنود مستغربه: خويك مين مشعل يتبسم: هذا نايف اللي معي بالسكن لمحك بسرعه وجا طلب يدك مني عنود تو فتحت فمها تبي تتكلم ..بس مشعل قاطعها بسرعه: لاتتسرعين بجوابك فكري بأنك مطلقه وبظروفك الحاليه محتاجه من يوقف معاك انا صح ماارح اخليك وبوقف معاك بس انتي محتاجه لرجال يراعيك ويخاف عليك يطلعك من هالوضع اللي انتي فيه ونايف والله ونعم الرجال انسان نادر الوجود شخص وقفته تقوي الواحد ووجوده يعطيك دافع بالحياه رجال بمعنى الكلمه ورغم وجوده بأمريكا الا انه ماسوى علاقه مع أي بنت ابيك تفكرين زين بحياتك الجايه وانك بزواجك راح تغيرين اشياء كثير وانا متأكد راح تغيرينها للأفضل عنود بهدوء: خلاص ياخوي اللي تشوفه مشعل بسرعه: لا مو اللي اشوفه الراي رايك العنود بينها وبين نفسها: وش بخسر اكثر من تجربتي الخايسه مع ياسر والا تجربتي القاسيه مع سلمان ..رفعت راسها وبنبره هاديه : خلاص انا موافقه مشعل مبسوط: اجل مبروك مقدماً العنود وهي مستحيه: بس ياخوي استحي اسوي زواج وسوالف مره ثانيه مشعل يتبسم: هو توقع كذا وقالي شوف اختك وش تبي المهم توافق ..نايف ماعنده احد بالسعوديه يبي يجبره يسوي عرس وزحمه ماعنده غير ابوه وابوه مايبي غير سعادته ..بس نايف شرط علي شرط العنود مستغربه: وشو مشعل : قالي مو لازم نسوي عرس انا ابي اتزوج بسرعه لأني طفشت من العزوبيه ..اذا وافقت راح نتزوج هنا بس ابيها تلبس لي فستان ابيض حتى لو ماسوينا عرس عنود بتوتر: من وين اجيب الفستان وكيف اتصرف حنا بأمريكا مو بالسعوديه مشعل مبتسم بعنف: انا توقعت اقنعك بالسالفه عشان كذا طلبت من عبير تساعدك عنود بخبث: اها حبيبت القلب اسمها عبير ..اشوف مكالمات وحركات مشعل واللي ارتبك: لاوش مكالماته كلها شوية مسجات عنود تناظره بطرف عين: ايه صح صدقتك لأن حنا بالسعوديه مو بأمريكا وانت شايف البنت مدري كم مره مشعل واللي انحرج من كلامها : لا السالفه مو كذا المهم البسي بروح اغير ملابسي عشان اوديك تتعرفين على عبير وتنسقين معاها بعد ماطلع من غرفتها راح غرفته بسرعه ودق على عبير .. عبير بحماس: هلا قلبي مشعل : هلا ..عبوره اسمعي بقول لك عبير: قول مشعل : الحين لما اجيك مع اختي لاتسوين تمونين علي مره وانتبهي تغلطي قدامها وتقولين قلبي والا أي كلمه كذا تكفين عبير تضحك: ليه تخاف من اختك مشعل: لا مو سالفة خوف بس استحي ماتعودت اختي تشوف مني كذا حركات وبعدين احبك مو معناها نتجاوز حدودنا حتى لو بس بالكلام الغلط غلط ومايرضي احد عبير بقهر: وش قصدك مشعل : قصدي انك باقي ماصرتي زوجتي عشان اخذ راحتي ولاتسوين فيها هالحين وتزعلين لااجيك واجلدك عبير تضحك: طيب خلاص اوامرك يااستاذ شي ثاني بعد؟ مشعل : لا سلامتك ياللا باي : : : الرياض,, الساعه 8 مساء.. نازل الدرج بسرعه واول ماشاف امه بالصاله قالها بصوت عالي: ماما انا طالع مع اخوياي تبين شي ام فارس وهي تتبسم: مابي غير سلامتك ..والله اني فرحانه عشانك طالع من زمان وانت حابس نفسك بغرفتك فارس يتبسم: مو حابس نفسي ياماما بس ماكان لي مزاج طلعات وقلت اجلس اقرا قرآن اصلح لي ام فارس بفرح: الله يوفقك ياوليدي حور واللي جات ركض لفارس: فروس فروس فارس يناظرها بحده: اسمي فارس حور بكل ادب: فارس اخوي حبيبي صديقي فارس يناظرها: وش تبين اخلصي حور بدلع: خذني معاك البيت يطفش فارس يضحك: وين اخذك بطلع مع شباب سلامات جايب معي اختي الصغيره حور بنبرة ترجي : ياللا عاد فروس لاتصير شرير فارس يناظرها : شرير بعينك مااقدر اخذك حور تتحلطم: اف ماعمري طلبت منه شي وقال تم فارس يسحبها : تعالي هنا يالفصعونه انا ماعمري لبيت لك شي حور تهز راسها بالأيجاب وتقولها بثقه: ايوه فارس بعد تفكير : وانتي ماعمري قلت لك قولي فصعونه وقلتيها صح حور تقولها ببطء شديد: فعثونه فارس فطس ضحك: خطأ عليك اسمها فصعونه يافصعونه لاقلتيها صح علميني واوديك وين ماتبين حور بقهر: مالت عليك اكرهك فروس ماحبك فارس وهو يمشي للباب : طيب وانا بعد مااحبك : : : الساعه8:30 مساءً بتوقيت السعوديه 11:30الظهر بتوقيت امريكا.. اول ماوصلو عند بيت عبير طلعت لهم وهي تتبسم ناظرت بالعنود وقالتها بسرعه: انتي العنود ماشاء الله عليك حلوه مثل مشعل مشعل بدا يكح بقوه منحرج من كلام عبير عنود تضحك: وانتي بعد حلوه ماالوم اخوي يوم يتمناك زوجه مشعل واللي زادت كحته من الحرج قالها وهو مرتبك: وش هالكلام المهم انا بخليكم تتفاهمون مع بعض وبروح عنود تناظره: وين بتروح؟ مشعل: انتم بنات مع بعض وش يجلسني بينكم انا بروح وعبو.. سكت وكمل بسرعه :عبير بتوصلك البيت بعدين عنود بهدوء: طيب عبير بحماس: اول شي نبي نتعرف على بعض شوي وبعدها بنروح نتغدا سوا ومن بكره بروح معاك ندور فستان حلو يليق فيك وبجيب لك وحده شاطره تسوي شعرك وتحط لك مكياج ..صح ماتحط مكياج ثقيل بس انتي حلوه أي مكياج بيطلعك ملكه عنود وهي مستحيه : مشكوره من ذوقك : : : الرياض ..يوم الثلاثاء ..وبعد مرور اسبوع .. فتحت باب غرفة سلمان وقالتها بهدوء: سلمان قوم فيه واحد يبيك تحت سلمان مستغرب: واحد مين عهود تهز كتوفها: مادري .. بس بابا خلاه يدخل المجلس سلمان وقف بطفش مثل عادته ..من يوم ترك العنود وهو دايم طفشان وماله مزاج شي حتى دوامه يروح وهو ماله خلق احد .. : : يتبع,, | ||||||||||||||
|
| |
|
05-12-10, 04:38 AM
| #34 | ||||||||||||||
| مراقبة ومشرفة سابقة ونجم روايتي
| ((الجزء الثالث)) كان يمشي خطوه تجر الثانيه ماله خلق يقابل احد اول مافتح باب المجلس تسمر مكانه وحس ببركان بدا يثور بداخله وبدون شعور بدا يصارخ بعصبيه : انت وش جايبك هنا يالتعبان ياسر بهدوء : ابي اتكلم معاك بموضوع سلمان قرب منه وسحبه بقوه من ملابسه وقالها بصوت عالي: ولك عين تجي هنا يالحيوان انت دمرتني تدري وش يعني دمرتني ..دفه بقوه الى ان طاح ع الأرض ياسر وعينه تملاها دموع الندم قالها بكل حزن: انا مقدر وضعك بس تكفى اسمعني انا تعبان ومحتاج انك تسامحني الليل ماانامه سلمان واللي صار يناظر برجولة ياسر المكسوره قالها بدون نفس وهو يأشر ع الكنبه: طيب استريح وقول اللي عندك بسرعه انا مو فاضي ياسر جلس ع الكنبه وبد يتكلم بهدوء: انا ماادري من وين ابتدي والا وش اقول بس اهم شي بالسالفه انها كانت حبكه دراميه ضبطناها انا ونوف ..من وقفتي قبال بيت العنود الى رجعتي لبيتي القديم بس عشانها سلمان مستغرب: كيف يعني ياسر بحزن : انا ساكن ببيت خالي وتارك بيت اهلي اللي متوفين من زمان واروح له من وقت للثاني ..السالفه بدت بعد ماكلمتني نوف واتفقت معي اني اوقف قبال بيتنا كل يوم اسوي حركات طالعه ونازله على اساس اني رايح الدوام وجاي من عند اخوياي وغيره ..نوف كانت تعرف طباع العنود ومتأكده انها لاتروح ولاتجي بس توقف وقت طويل تراقب الشارع من دريشتها اللي تطل اساساً على بيتي وكل اللي كانت تتمناه نوف ان العنود تلتفت لي او تشوفني ماادري ليه نوف كانت تحمل حقد كبير للعنود..المهم اول مابدت العنود تلاحظ وجودي قالت لنوف ووقتها افتعلنا صدفه بالأتفاق بيني وبين نوف وبديت بعدها اسحب العنود لعندي لكن رغم خبرتي مع البنات وعلاقاتي الكثيره ماقدرت عليها كانت قويه وثابته وتخاف على نفسها ..وقتها بس قالت لي نوف مالك الا الحيله ..تنهد بقوه وهو يكمل كلامه : انا كنت مثل أي حقير يبي يرضي خويته وخلاص عشان كذا نفذت كلامها بالحرف دخلت بيت عمتك ضربت العنود على راسها بالليل وبكذا صار سهل علي اخذها لأي مكان سلمان وهو منفعل: حقير ومبسوط من نفسك جاي تقول لي هالكلام ناوي تموت على يدي ياسر وهو يحاول يهديه: اصبر الله يخليك فيه شي مهم بالقصه هو اللي خلاني اجيك لهنا خصوصاً بعد ماسمعت انك طلقتها ..انا ظلمتك وظلمت هالأنسانه عشان كذا تكفى اسمعني سلمان وهو يحاول يهدا: وش تبي تقول ياسر بحزن : انا رغم كثر علاقاتي مااحب اخذ شي من البنت غصب يابرضاها والا مايصير بس يومها كنت ابي ارضي نوف بأي طريقه عشان كذا نفذت كلامها ..لكن رغم كل شي ماقدرت المس العنود غصب وشفتها خايفه وتصارخ وحسيتها غبيه مو فاهمه شي عشان كذا كل اللي سويته خوفتها قربت منها وبس ..انا زوجتك ماأخذت منها شي ومالمستها عنود عذراء للحين لأني متأكد انك انت بعد مالمستها والا كنت عرفت انها للحين شريفه ..انا بس خوفتها وهي صدقت انها خلاص فقدت كل شي من خوفها ومن غبائها او يمكن لأنها ماتعرف لهالأمور مو انا اللي اخذ شي من بنت غصب .. وانا ماصورتها انت لو شغلت التسجيل كنت شفته فاضي مافيه شي سلمان صار يناظر ياسر وهو فاتح عيونه ومومصدق الكلام اللي ياسر يقوله ومو عارف كيف يتصرف والا كيف يرد والا وش يعلق ياسر قرب منه: تكفى سامحني انا ضميري معذبني صح انا مالمستها بس طلاقك علمني وش كثر انا اخطيت ..نوف اخذت جزاها وماتت محترقه بس انا ربك عطاني عمر مدري كيف انا عايش للحين بعد الحادث ..بس الله يعلم اني تغيرت ونادم سلمان بدون احساس رفس ياسر وصار يصارخ: حقيييييييييييييييييير اطلع برا بيتي ..طلع بسرعه من المجلس وراح ركض غرفته يدور مفتاح السياره وبعد مالقاه اخذه بسرعه ونزل ركض لدرجه كان راح يطيح من الدرج ..ركب سيارته وتحرك بأقصى سرعته واول ماوصل عند بيت عمته صار يطق الباب ويضغط ع الجرس مرات متتاليه وهو يصارخ : افتحووووووووووووووووووووو وو الباب ابو مشعل فتح الباب مذعور : وش صاير..ناظر سلمان بذهول كانت حالته صعبه ..قالها بسرعه: سلمان وش فيك وش صاير ابوك فيه شي سلمان واللي ماقدر يمسك نفسه وبدا يبكي بحسره : عمي وين عنود انا ابي ارجعها على ذمتي انا ابيها انا اخطيت بحق بنتك عيشتها وعشت معها بوهم كذبه حاسبتها عليها مثل الغبي ماقدرت اغفر او اسامح عشان اكتشف انها كذبه كنت مثل الغبي ..الله يغفر ويسامح وانا لا لو اني مسامح كنت عرفت انها مظلومه ابو مشعل واللي مو فاهم شي صار يمسح على راس سلمان بحنان: معليه ياولدي لاتزعل مالك نصيب فيها لاتلوم نفسك سلمان يهز راسه بـ (لا ) بسرعه :وش مالي نصيب اقول لك ابيها برجعها انا احبها ابو مشعل بحزن: للأسف سلمان انت تأخرت عنود اليوم ملكت على غيرك وصارت له سلمان جلس على الأرض منهار: لا انت ماتقول الصدق تبي تعاقبني بس والله حسيت بظلمي لها عمي الله يخليك رجعها لي ابو مشعل يساعد سلمان يوقف: قوم ياولدي لاتسوي كذا الدنيا قسمه ونصيب سلمان يصارخ: لاوش قسمه ونصيب ابيهــــــــــــــــــا خلوه يطلقها ابو مشعل واللي حس بالحزن على وضع سلمان عشان كذا حاول مايلومه على أي كلمه ..ناظر فيه وقالها بحنان: روح بيتكم ياولدي وتعوذ من ابليس واقرا لك قرآن البنت خلاص راحت بنصيبها مشى بدون لايرد على ابو مشعل ركب سيارته وهو منهار وشلون ضيعها والسبب كذبه صار يلف الشوارع مايدري وين يروح مرت ساعات طويله وهو يلف من شارع للثاني اخيراً قرر يرجع بيتهم ..الوقت كان متأخر والساعه تشير للـ 1فجراً .. دخل البيت بهدوء كان يمشي بالحديقه بشويش وهو حاس بنفسه منهاره اول ماوصل عند باب الصاله سمع صوت غريب كأنه فيه شخص يسولف بس بصوت واطي توجه لمصدر الصوت واول ماشاف المشهد ركض لأخته بسرعه وشدها من شعرها وبصوت عالي:وش تسوين هنا ياحمااااااااره ومين هالحيوان اللي معاك ..دفها للجدار بقوه وبعد ماطاحت بدا يرفسها بقوه : يالخايسه مدخله غريب البيت ..تفل عليها بقوه : صح انك حقيره ..وانا اللي كنت اقارن بينك وبين العنود والله العنود اشرف منك الف مره ..عبد العزيز بدا يتسحب بهدوء بعد ماشاف هول المنظر ..سلمان التفت له ومسكه بسرعه : وين بتروح مني انت تحسب بيوت الناس لعبه ..ضربه بوكس قوي طيحه على الأرض ..بعد ماطاح عبد العزيز على الأرض قرب منه سلمان وعيونه تظهر الحقد والغضب اللي بداخله عبد العزيز وهو يرجع لورى : انـ نـــ نــا احب اختك وابي اتزوجها ..اول مره ادخل هنا بس سلمان مسكه وبدا يضربه بقوه ..جلس فوقه وصار يضرب راسه بالأرض وهو يصارخ : انت تحسب الدنيا سايبه ماعندك خوات يالتعبان التفت لريم وصار يصارخ بهستيريا : انتي يالتعبانه وش صار بينك وبين هالحقير ريم سكتت وماعرفت وش تقول الخوف تملكها ونظرات سلمان حسستها ان موتها قرب سلمان وهو يناظر عبد العزيز بحقد: شف انت انا ماادري انت وش نيتك بس اذا كنت صادق وقصدك زواج من بكره تجيب اهلك وتطلب يد اختي والا وقسم بالله بعلمك وشلون تدخل بيوت الناس والقصد تلعب : : : قبل ثلاث اشهر شعبان \1427 للهجره.. دقت عليه وهي تبكي .. عبد العزيز بعد مارد عليها : ريومه وش فيك تبكين ريم وهي تبكي: لعبة علي ياعبد العزيز وعيشتني عمر بوهم خليتني افقد املي بالحياه اصير انسانه ثانيه عبد العزيز مستغرب: وش يعني ريم وهي معصبه: خلاص كفايه كذب انا رحت سويت تحليل للأيدز ومافيني شي وهذا معناه انك انت بعد مافيك شي عبد العزيز بينه وبين نفسه: اف هذي مين قال لها تروح تحلل ..وبسرعه وبصوت زائف ملته الفرحه الكذابه: احلفي ريومه مافيني شي لاتلعبين علي ريم مستغربه : وش يعني عبد العزيز وهو يسوي مصدوم: ريومه انا مثلك عشت فتره على بالي اني بأي لحظه بموت ريم لاتلعبين علي ريم بهدوء: يعني ماكنت تلعب علي عبد العزيز بهدوء: بذمتك يعني فيه مخلوق عاقل يحط بنفسه نفس هالمرض ريومه انا احبك لاتخليني وصدقيني بضبط اموري وبأقرب وقت بتقدم لك وبتزوجك دامي مافيني الا العافيه ريم بعد تفكير: احلف عبد العزيز ناوي تتزوجني عبد العزيز : والله ابي اتزوجك انا من لي غيرك يابعد روحي : : : الزمن الحالي ,, الساعه 2 الفجر بتوقيت السعوديه 5 المغرب بتوقيت أمريكا.. بعد مالبست الجاكيت الأسود عشان تستر الجزء العلوي من الفستان لفت الشال على شعرها وثبتته على جنب غطت وجهها اللي مزين بالمكياج وركبت بسرعه مع عبير بسيارتها .. عنود وهي تضحك: يازين السعوديه بس الحين الناس تناظرني يقولون وش هالعروس الخبله ..ناظرت بالسارعه والتفتت لعبير: وش رايك فيني ..الساعه 5 زفتي لعريسي عبير تتبسم: وناسه.. بيني وبينك ماحب الحفلات والزحمه..الا تعالي بسألك شافك هو امس بعد ماخلصتو اجرائات الزواج عنود بهدوء: لاقال يبي يشوفني ويتأملني زين بالفستان الأبيض ..تصدقين عبير انا تزوجت قبل بس هالمره حاسه بتوتر وخوف اكبر كأني اتزوج لأول مره المره اللي راحت كـنــ .. قطع كلامها صوت جوالها يدق بعد مااخذته شافت رقم غريب ..ضغطت الزر الأخضر وقالتها بهدوء: الو سلمان وصوته ماليه الحزن : الو كيفك عنود تكفين لاتقفلين بوجهي عنود بهدوء: بخير لاماراح اقفل سلمان بحزن : عنود انا اسف عشاني ظلمتك وضيعتك من يدي بغبائي عيشتك وعشت معاك بكذبه وماسمحت لنفسي اسامحك ..وهم غرقني ماتحملت فكرت انك كنتي بيوم لغيري واخرها طلع كل هذا كذب عنود مستغربه: وش يعني سلمان بسرعه: ماتزوجتي انتي عنود؟ عنود بهدوء: الا تزوجت والحين رايحه بيت زوجي سلمان بعد ماتنهد: اجل بعدين راح تفهمين وش قصدي..عنود مو قادر اتحمل فكرة اني ضيعتك من يدي عنود : معليه لاتزعل الدنيا قسمه ونصيب سلمان بحزن : وشلون ماازعل تخيلي حبيبتي كانت قدامي وعلى ذمتي وماقدرت اضمها واقول لها وش كثر انا احبها ياربي عنود مو قادر انام تكفين سامحيني عشاني ظلمتك عنود بهدوء : مسامحتك والله يوفقك دنيا واخرى بعد ماقفلت ناظرت بعبير :هذا ولد خالي وطليقي داق يبارك لي عبوره لاتقولين لمشعل طيب عبير تتبسم: من عيوني اول ماوصلو نزلت بسرعه وبالصاله شالت الشال والجاكيت القت نظره سريعه على نفسها بالمرايا ودخلت غرفة النوم الأمريكيه كانت روعه بكل معنى الكلمه انوار خافته وريحة الورد اللي تملى المكان كانت تزيده روعه قرب منها وبدا يتأمل ملامح وجهها الحلوه وبعد مامسك يدها حست بتوترها الظاهر ..كان مبسوط وهو يتأملها حاس انه لقى جوهره نادره ناظرت فيه بسرعه ونزلت عينها كان مثل البدر بكماله ..وسيم بشكل غير طبيعي شعره الأسود الناعم مره كان يزيد سمرت بشرته جمال عيونه الحاده وابتسامته الساحره كلها حسستها انها فازت اخيراً وانها غصب عنها راح تحب هالأنسان اللي وسامته ماتقل عن المدح اللي تلقته من اخوها عليه.. وكلها ساعه حتى بدا يناظرها بأستغراب: انتي ماكنتي متزجه عنود بأرتباك: ايه بس سلمان مالمسني ماادري ليه : : : بعد مرور حوالي السنه .. يوم السبت ..11\شعبان\1428 للهجره.. جالسه على الكنبه ومبرطمه: مالي دخل نيوفي ابي احظر زواج نوره نايف وهو يمسح على شعرها: ياعنود ياحبيبتي وين القالك حجز انا الزواج الخميس عنود واللي زاد برطومها: مالي دخل اخوي يبي يسافر بكره شوف لي حجز بنفس الطياره نايف بهدوء: عنوده انتي حامل ماتتحملين كل هالساعات سفر عنود لفت وجهها عنه : شفت شلون ماتبيني اسافر لكن خلاص لاتكلمني ومن اليوم بسوي اضراب عن الطعام ..وقفت بسرعه ونايف لحقها ومسكها وهو يضحك : اضراب مره وحده تبين تذبحين ولدي عنود بقهر: يعني موخايف علي خايف على ولدك ..نايف لاتكلمني نايف بعد مافطس ضحك: يالبى الدلوعه..شوفي ان لقيت لك حجز ع الدرجه الأولى نسافر مالقينا خلاص اسمحيلي عنود تقرب منه وتمسح على ظهره: نيوفي حبيبي مايرفض لي طلب والله انا سألت الدكتوره قالت عادي عشان عنوده حبيبتك نايف وهو يحاول يكون جدي: لكن ياحبيبتي عنود تمسح على شعره: مااستاهل نايف يبعد عنها: لاانتي كذا تحاولين تأثري على قراراتي عنود بدلع: عشان خاطري نايف بعد ماتنهد: امري لله بس ان صار شي بالولد ياويلك عنود مبسوطه: ياسلام بحظر زواج نوره : : : الرياض ..يوم الأربعاء ..والساعه تشير للـ8 مساءً .. دخلت على احمد الغرفه كان يبدل ملابسه بعد ماخلص ناظر فيها وهو ملاحظ توترها: وش فيك قلبي لجين بتوتر: احمد للحين ماغيرت لـ سالم حفاظه احمد مستغرب: من متى الحفاظ لجين : من لما غيرت له عمتي البارح ببيتهم احمد بسرعه: يلعن ابليسك الحفاظ بينفجر ع الولد ..مسك يدها وسحبها تعالي نشوف صرفه ..دخلو الغرفه اللي قبال غرفتهم واللي جهزوها للبيبي كانت كلها باللون الأزرق ومجهزه من كل شي ..ناظر بالسرير الصغير كان سالم بسابع نومه .. احمد يناظرها: هالحين وش نسوي؟ لجين : نغير الحفاظ احمد مبتسم: لاشاطره ادري بس وشلون نغيره لجين تأشر ع السطح المخصص لتغيير الحفاظ وحوله كل الأغراض: نحطه هناك احمد قرب يبي يشيله بس غير رايه وهو يناظر ولده اللي ماكمل الشهر: لاولدك مره صغير اخاف يطيح شيليه انتي بعد ماشالت الولد وحطته على مكان التبديل ناظرت احمد وهي مفهيه :وش نسوي الحين احمد ببرود: نغير له يعني وش نسوي لجين بيأس : ياربي حمودي ماعرف احمد: خلاص نشيله ونوديه لعمتك لجين بسرعه: لامابي امس تركتها من شهر وهي تفهم فيني هالحين بتقول غبيه احمد بقهر: طيب وش نسوي يقعد الولد كذا بحفاظ خايس لجين وهي قريب تبكي : لاخلاص بغير له ..فتحت ملابسه بهدوء ..وبعد مافتحت الحفاظ قالها احمد بسرعه: اعوذ بالله حرام عليك الحفاظ فل لجين بسرعه: شسوي عطني المناديل بس ..بعد مااخذت المناديل بدت تمسح بشويش وهي خايفه وبعد مانظف اخذت الحفاظ الثاني وفتحته وناظرت بأحمد: وشلون ارفعه احس رجلينه ممكن تنكسر.. احمد مسك رجلين سلوم الصغير ورفعها بشويش وقالها بسرعه: ياللا حطي الحفاظ حطت الحفاظ وسكرته زين ..زررت ملابس سلوم ولفته زين ورجعته سريره وهو مازال نايم احمد يناظره بحب: طالع دب نوم ع امه لجين بسرعه: اتحداك الا قل طالع عليك : : : يوم الخميس الساعه 7:30 المغرب .. بعد ماخلصت مكياجها لبست فستانها ..اول ماطلعت من الغرفه الكل انبهر بجمالها ..الفستان الأفوايت كان زايد جمالها ..مديله الفرنسي اللي بدون كموم ابرز جسمها الرشيق الفاتن النفشه الكبيره للفستان زادت زهوتها كعروس ..عيونها الواسعه كانت مرسومه بدقه مكايجها اللي كان خليط من اللونين الموف والوردي كان معطيها تألق وسحر ..شعرها الأسود الكثيف كانت مسويته غجري على جنب ومثبته الطرحه على جنب ..والمسكه كانت عباره عن اسوار كرستال يحمل المسكه المرصعه بالكرستال ومزينه بورود الأجراس الورديه.. عنود بعد ماقربت منها: ماشاء الله ..الله يحفظك من عيون الحساد .. ريم قربت من اختها وباستها: مبروك يالغاليه الله يسعدك نوره بعد ماضمت اختها : ليه احس هالحزن بعيونك ريم تتبسم: مبسوطه لك نوره تناظر بالعنود: بأي شهر عنود ماشاء الله بطنك كبير عنود قربت من نوره : انابالخامس بس بطني كبير عشان فيني توم بس ماعلمت نيوفي بفاجأه نوره واللي انفعلت: قولي قسم عنود تناظر حولها: وجع اسكتي هذا سر نوره تضحك : طيب ..وبصوت عالي : حتى ريومه حامل بشهرها الأول عنود مبسوطه : جد ريومه ريم بهدوء: ايه عنود: مبروك ريومه ريم : الله يبارك فيك عنود: ياليتك مسويه عرس ريومه كنا فرحنا فيك ريم بهدوء: انا وعبد العزيز فضلنا نسافر ومانسوي عرس جود وجنا فتحوالباب ودخلو بحماس ..قربو من زوجة اخوهم اللي تعدل طرحتها واللي تعدل ثوبها مبسوطين فيها .. جنا وهي تناظرها : والله صبر وضفر اخوي جود وهي تحرك يدينها: الله يساعدك ياخوي مااعتقد راح تتحمل هالجمال نوره تدفها: جود اسكتي ترى استحي جود تحط يدها على فمها : خلاص سكت دخلت شروق وهي حامله بنتها وتزغرد : يازينك بس يانوره قمر قمر ..قربت بنتها لنوره : ياللا فرح سوي بوسه للخاله ..فرح سندت راسها على امها بدون لاتبوس نوره..شروق تبوس نوره : انا ابوسك عنها نوره تضحك: للحين صغيره ماتعرف تبوس لبى قلبها : : : الساعه 8:30 مساءً .. قاعدة الرجال تحديداً.. طول ماهو جالس كان يفرك بيدينه .. مشعل واللي كان جالس بجنبه ..قرب منه وقالها بهدوء : وراك متوتر بندر يناظره: مو متوتر بس متحمس مشعل يضحك : احسك تغني والله وتحقق منايا شوفو حبيبي معاي بندر يضحك بأستخفاف: مالت عليك ماتضحك مشعل مبتسم بعنف : اخيراً تزوجت ..حط يدينه عند فمه وكأنه يبي يصارخ: نوره بندر يصفقه: كل هوا وانطم مشعل فطس ضحك: ماكنت ادري ان هالنوره اللي حاشرنا فيها بنت خالي لو ادري كنت علمت خالي انك ..سوى بيده حركت تلفون وحطها عند اذنه بندر بثقه: ماكنت اكلمها لاتألف مشعل مبسوط: ايه صح نسى ايام التسحب بالجوال ونسأله تكلم مين يقول حبيبة قلبي نوره ..فطس ضحك: لكنك مادريت انها بنت خالي ويمكن يجي يوم افتن عليك بندر: ماتسويها مشعل يوقف : طيب نشوف اسويها والا لا بندر يسحبه:اقول انثبر وش جايبك انت ..جاي من امريكا بس عشان تغثني مشعل يضحك : لا شدعوه بس لابد من المشادات بندريضحك: مالت عليك انت ومشاداتك نايف يدف مشعل: تصدق احس شكلي غلط بالثوب مشعل يضحك: بالعكس وش زينك ..اهم شي اختي وش قالت نايف يضحك: قالت لي معرس مشعل : اهم شي بعدها بدقايق دخل سلمان القاعه قرب من بندر سلم عليه: الف مبروك منك المال ومنها العيال معليه تأخرت بس كنت محتاس مع الحريم بندر يتبسم: الله يبارك فيك ..ايه اعرف الحريم تعلمني بحوستهم وقف مشعل وسلم على سلمان: هلا والله سلمان ..اخبارك سلمان : الحمد لله انت اخبارك مشعل: الحمد لله بخير ..اشر على نايف وقالها بهدوء: اعرفك نايف زوج اختي سلمان مد يده يسلم على نايف وهو حاس بغصه بقلبه .قالها بهدوء وهو يحاول يتبسم : تشرفنا نايف :الشرف لي بعد ماجلس لاحظ نايف اللي ناظرفيه كم مره ..رغم نظرات نايف اللي كانت بدون قصد لأنه مو مهتم لسلمان وناسي انه طليق العنود ..سلمان وهو يفكر: اكيد هالحين يناظر فيني ويقول علي مو رجال ..انا لازم اتزوج بس اخاف اظلم بنت الناس معي انا مستحيل انسى العنود : : : الساعه 1:30..وبأحد فنادق الرياض .. كان واقف قبالها يتأمل جمالها مو مصدق عيونه نوره قباله وله ومحد يقدر يبعدها عنه ..ناظر بعيونها الحلوه والمكياج اللي زايد جمالها وقالها بحب: ويلوموني فيك كانت منزله راسها وساكته .. بندر بعد ماحط يده تحت ذقنها ورفع راسها: وش فيك مستحيه مني؟ نوره بخجل : لا بندر يمسح على شعرها: شكلك خايفه ..لاتخافين تراي بحطك بعيوني ياربي يانوره مو مصدق اني اقدر اتأملك للصبح ..المس يدينك وشعرك ..مو مصدق انك خلاص صرتي لي قرب منها وحاول بالطرحه الى ان فكها وحطها على السرير ..حط يدينه عند خدودها ..رفع راسها شوي وحط عينه بعينها: نوره تدرين اني احبك نوره بخجل : انا بعد بندر: انتي بعد وشو نوره بهدوء: احبك بندر بعد مالف حول نفسه: ياويلي مو مصدق والله قرب منها وضمها لصدره بقوه: الله لايحرمني منك يابعد قلبي : : : الساعه 2 الفجر .. اول مادخل البيت ناظر امه واخته اللي كانو يتكلمون عن العرس بحماس سلمان بنبره جاده: انتو للحين مانمتو عهود وهي تتبسم: اخذتنا السوالف سلمان بعد تردد :ماما ابي اتزوج ام سلمان بفرح: هذي الساعه المباركه ..تبي نخطب لك بنت معينه سلمان ببرود: لااي وحده المهم ابي اتزوج ام سلمان :طيب ماعندك مواصفات تبيها بالبنت سلمان : لا أي بنت ام سلمان وهي مبتسمه : خلاص بخطب لك جنا اخت بندر ماشاء الله عليها ادب واخلاق وجمال كل ماشفتها مااقدر اشيل عيني من عليها سلمان : اللي ودك فيها اخطبيها لي ماتفرق معي : : : يوم الأثنين .. الساعه 6 مساءً بتوقيت السعوديه 9 صباحاً بتوقيت امريكا .. كانت تمشي مع زوجها واخوها متجهين لباب المطار ..حاطه يدها على ظهرها وتمشي بصعوبه .. عنود بعد ماوقفت قالتها بتعب: ياربي نايف مو قادره امشي حاسه بألم فضيع نايف يناظرها بخوف: ماقلت لك راح تتعبين بس انتي ماتسمعين الكلام قرب منها حط يده ورى ظهرها وشالها بصعوبه .. عنود وهي متشبثه فيه: ياربي نيوفي وش تسوي نايف وهو يمشي بسرعه: مالك دخل حنا بأمريكا ..وبصوت عالي: مشعل وقف تاكسي بسرعه مشعل وهو يركض: طيب طيب بعد ماوصلو البيت ..نزل من التاكسي ..وتوجه بسرعه لسيارته : انا بروح الجامعه وانت تفاهم مع حرمتك والشنط نايف وهو يتحلطم : شف الفاضي عنود مستغربه: وش فيه مستعجل ع الجامعه نايف يناظرها : مستعجل ع الحب يعني شفيه : : : الساعه 7 بتوقيت السعوديه .. بعد مافتح الباب ناظر فيها وهي لابسه عبايتها : هاه جاهزه نوره بهدوء: ايه جاهزه بندر : ياللا مشينا مسك يدها وطلع معاها اول ماوصلو للسياره فتح لها الباب وبعد ماركب وتحرك وقبل لاينفتح باب الكراج ناظر فيها : غطي وجهك نوره ببرود: وليه اغطيه انتم متعودين عادي عندكم خواتك دايم كاشفات بندر يناظرها : خواتي بحكم ابوهم مالي دخل فيهم بس انتي حرمتي واغار عليك نوره : حلوه تغار بندر: أي والله اغار تخيلي عاد يشوفك احد غيري نوره بعد ماغطت وجهها : طيب بسمع الكلمه بس انت أي شي يخليني اغار ماتسويه اتفقنا بندر يضحك: اتفقنا : : : الساعه 7:30 مساءً بتوقيت السعوديه 10:30 صباحاً بتوقيت امريكا.. مرت من جنبه وحده من الأمريكيات ناظرت فيه بأعجاب حطت يدها على كتفه وقالتها بذهول : wow بالوقت اللي مد يده عشان يبعد البنت الأمريكيه عنه ..اخذ باله من عبير اللي رمقته بنظره وطلعت تركض ..دف الأمريكيه بقوه ولحق عبير وهو يصارخ :عبير اوقفي دقيقه بتفاهم معاك .. كانت تركض بسرعه ماقدر يمسكها ركبت سيارتها وركب هو سيارته مسرع وراها ..زاد سرعته الى ان وصل لها وتعداها وقف سيارته بشكل عرضي اجبرها توقف سيارتها ..نزل من سيارته بسرعه فتح باب سيارتها وقالها بعصبيه :انزلي نزلت من سيارتها وهي لافه وجهها عنه .. مشعل بصوت عالي: ناظري فيني بعد ماناظرت فيه قالها بقهر :شكلي شكل واحد لعاب وخاين ..بعدين ماراح اخونك الا مع امريكيا خايسه ..هي جات تحكرشت فيني ..انا وصلت امريكا على طول جيت الجامعه عشان اشوفك مشتاق لك اخرها هذا استقبالك لي ..خلص كلامه وطلع سيجارته شعلها وبعد ماشفط منها نفث الهوا بسرعه عبير تسحب السيجاره من يده : لاتدخن حنا وش اتفقنا مشعل يسحب السيجاره ويشفط منها وبعد مانفث الهوا ..قالها بقهر: وخري زين ترفع ضغط الواحد وتقول لاتدخن عبير بدلع: شسوي احبك واغار عليك مشعل بنبره جاده: شوفي عبير حركاتك هذي ودلعك الزايد بطليهم تكفين عشان نستمر مع بعض عبير بهدوء: ان شاء الله : : : وبعد مرور سنتين .. يوم الأربعاء ..16\جمادى الثاني \ 1430 للهجرهـ,, الساعه 1 الفجر بتوقيت السعوديه 4 العصر بتوقيت امريكا.. جالسين قبال مكتب ابو عبير البالغ الفخامه .نظرته الحاده وثباته هيبته اللي تملى المكان ..كلها كانت تصيبهم بالتوتر..كان يمسك بسيجاره من افخم الأنواع ..يشفط منها بشويش وينفث الهوا بهدوء.. قالها ببرود وهو يناظر بالأوراق اللي على مكتبه: ايوه مشعل وهو يناظر نايف بتردد: والله حنا ياعم ..وسكت وهو يضغط على اصابعه بتوتر نايف بسرعه : جايين نطلب يد بنتك لولدنا واللي تبونه حنا حاظرين فيه ابو عبير بهدوء: وش يشتغل ولدكم ووين بسكن بنتي نايف: السكن اللي تبيه لو تبي فله الحمد لله الخير كثير ..والشغل مشعل راح يشتغل بشركة ابوه بالسعوديه ..ابو مشعل هو خالد الـ.... اعتقد انه غني عن التعريف ابو عبير يهز راسه: ايوه ايوه.. انا بصراحه ماتعودت اتدخل بقرارات بنتي عبير عاقل وتعرف تتخذ قرارها بنفسها واللي تبيه انا موافق عليه مشعل ابتسم ابتسامه عريضه وصار يناظر نايف بفرح ابو عبير يكمل كلامه : بس مااعتقد عبير راح ترضى انها تروح السعوديه عبير مستقره بأمريكا ومااضنها راح تطلع منها مهما يكون وانا قلت لكم القرار قرارها مشعل واللي بدت الأبتسامه تغيب من وجهه:طيب خير ان شاء الله..وقف بسرعه :ياللا نايف مشينا ..كان يمشي وهو معصب ونايف يلحقه: يارجال اوقف اصبر انت ماسمعت كلام البنت مشعل بقهر: انت ماشفت ابوها مالي يده انا وهي عمرنا ماتكلمنا بهالموضوع ويمكن كلام ابوها صحيح نايف بسرعه: انت قلتها يمكن اول ماوصلو للسياره وقبل يطلعون سمع صوت عبير اللي طلعت من باب الصاله وبدت تصارخ: مشعل دقيقه وين بتروح نايف اخذ مفتاح السياره وقالها بهدوء: بنتظرك بالسياره مشعل يناظرها بدون نفس : وش تبين عبير مستغربه: مشعل ليه تكلمني كذا بابا وش قالك مشعل : قالي القرار بيد بنتي بس مااعتقد انها راح ترضى تروح معاك السعوديه عبير تناظره: ليه انت ماراح تستقر هنا مشعل بقهر: لا برجع السعوديه ولاراح يصير لي أي صله بأمريكا حتى زوج اختي قدم استقالته ويبي يشتغل مع ابوي بالسعوديه ..عبير انتي عارفه من البدايه اني بس راح ادرس هنا دامك ماتستغنين عن العيشه بأمريكا ليه تعلقيني فيك وتخليني احبك اكثر من روحي عبير بهدوء: انا كنت احسبك بتخلص دراسه وبتشتغل هنا مشعل: لا انا مااقدر اعيش هنا انا ماادري هالسنين كيف مرت علي ماصدقت تنتهي عشان ارجع السعوديه عبير : طيب ليه انت ماتتنازل وتعيش معاي هنا ليه انا اروح معاك السعوديه مشعل يضحك بأستخفاف : العاده الحرمه تلحق زوجها مهوب العكس ..عبير انا طيارتي الخميس الجاي عندك اسبوع تفكرين وانتي حره بقرارك عن اذنك مشى بدون لايسمع منها جواب ركب السياره والضيقه واضحه بملامح وجهه نايف بعد ماتحرك : لاتزعل يامشعل مشعل بحسره: وشلون ماازعل علقتني فيها كل هالسنين واخرها تقوللي تنازل واجلس انت معاي وش هالكلام نايف بهدوء: مشعل ازعل ع اللي تحبك هي لو تحبك بتترك حياتها هنا وبتروح معاك اول ماوصلو البيت ناظرت فيه العنود وهو يدخل غرفته بسرعه ..والتفتت لنايف بسرعه : وش فيه مشعل نايف بهدوء: عبير يمكن ماتروح معاه ع السعوديه عنود متأثره : ياربي ليه مشعل يبيها نايف بهدوء: مدري عنها وين العيال عنود تتبسم: بالمطبخ جالسه اوكلهم دخل المطبخ وشاف وجيههم الصغيره ملطخه بالأكل ..كانو حلوين ويشابهون امهم بشكل غريب .. ناظرفيهم وقالها بحب: كيفهم حبايبي الحلوين فهودي وفصولي فهد وفيصل يصفقون مبسوطين : نحب بابا نايف قرب منهم وباس كل واحد على خده : يالبى قلوبكم ناظر بالعنود وباس راسها : الله لايحرمني منك ماتدرين وشلون كانت فرحتي لما قالو لي بالمستشفى توأم اولاد عنود بفرح: الله لايحرمهم ولايحرمني منك : : : الرياض ..الساعه 2 الفجر .. صوت صراخ الصغيره مالي المكان .. عبد العزيز بعصبيه : انقلعي انتي وبنتك الخايسه برا ريم وهي تبكي: حرام عليك البنت حرارتها مرتفعه عبد العزيز بعصبيه : الله ياخذك انتي وبنتك انقلعي برا لا اقوم ا ذبحك لمست بنتها بحنان وهي تتحسس حرارتها وقالتها وهي تبكي : طيب خلاص ماتبي تشوف حل لبنتي بدق على اخوي يودينا المستشفى عبد العزيز فز من مكانه وشدها بعنف من شعرها: اسمعي يالتبن تعتبين برا البيت والله لتحسبين ربك ماخلقك انقلعي شوفي صرفه للبنت ..الله ياخذكم انا مدري وش بلاني فيك..رجع فراشها وهو يقولها بصوت عالي: والله لأتزوج الزواجه اللي ترد الروح واحبسك انتي وبنتك بهالبيت مو ناقصني غير حثاله مثلك : : : يوم الخميس ..الساعه 10 صباحاً .. كانت جالسه على السرير بجنب سلمان تتأمل ملامح وجهه اللي كلها رجوله وبينها وبين نفسها : ياربي انا وش سويت شي حلو بدنيتي عشان ربي يرزقني رجال مثل سلمان سلمان بعد مافتح عيونه : جنا وش فيك تناظريني كذا جنا بدلع: اتأمل ملامحك الحلوه سلمان يتبسم: امحق ملامح جنا بحب: والله ماشافت عيني ولاراح تشوف مثلك..الفطور جاهز تقوم تفطر سلمان بهدوء: لاياقلبي مالي خلق جنا تناظره: سلمان دايم مالك خلق لايكون ماعجبتك كزوجه سلمان بعد ماحط يده ورى راسها وقدمها لها باسها بحب: بالعكس انا ماشفت بحنانك وطيبتك ياجنا الله لايحرمني منك جنا تتبسم: خلاص اجل تقوم تفطر عشاني سلمان يبعد اللحاف: نقوم نفطر ليه لا : : : الساعه 4 العصر.. جايبه صحن الأكل تحطه ع الطاوله وسلطان لاحقها ويبكي بصوت عالي شذا بعد ماحطت الصحن: نعم ماما وش تبي سلطان بنبره بريئه: ابي سوكلاته شذا: لا مافيه الحين وقت الغدا سلطان يبكي بصوت عالي: لا ماهو وقت الغدا ابي سوكلاته فهد بعد مادخل البيت : وش فيه سلطوني حبيبي صوته للشارع شذا: يبي شوكلاته فهد بعد ماشاله وباسه: عطيه شوكلاته لاتزعلونه هذا الغالي شهد بعد ماقربت من فهد: بابا اكل شوكلاته كثير فهد يناظرها: وانتي كم واحد اكلتي شهد تضحك: مااكلت شي ماحب الشوكلاته سلطان بدلع: بابا ابي سوكلاته فهد: ماطلبت شي الحين نروح السوبر ماركت وخذ اللي تبيه شذا بقهر: ياربي فهد مايصير كذا ماياكل شي غير الشوكلاته هذا وانت دكتور اطفال فهد يمسح على شعره: لاولدي بيسمع كلامي وبياكل صح حبيبي سلطان بدلع الاطفال: صح انا شاطر : : : الساعه 7 المغرب.. لاف يده حول خصرها وينزلها الدرج بهدوء ويقولها بكل حنان: شوي شوي ياقلبي اقل من مهلك نوره وهي حاطه يد عند خصرها ويدها الثانيه على بطنها: ياربي احس نفسي ثقيله لازم يعني نطلع اليوم بندر بأصرار: ايه لازم انتي من زمان ماطلعتي نوره بعد ماسندت راسها على كتفه: ياربي بندوري تعبت متى اولد بندر مبسوط: هانت ياعمري كلها كم يوم وتولدين بالسلامه وتجيبين لنا كتكوت صغير نوره تناظره: بتحبه اكثر مني بندر يناظرها بحب: افا عليك انتي الأصل يابعد روحي ..باس جبينها وقالها بحنان: انتي قلبي وحياتي وروحي وكل كلي وشلون احبه اكثر منك نوره بفرح : الله لايحرمني منك يالغالي بعدين عادي حبه اكثر مني لأني بحبه اكثر منك بندر يناظرها بقهر: الحين لي ساعه اقول كلام حلو اخرها بتحبينه اكثر لاتخليني احقد عليه قبل يجي نوره تضحك: لا الا ذي تراي امزح معاك ..ولامخلوق له مكانتك بقلبي بندر يضبط كلر قميصه : ايوه هذا الكلام : : : الساعه 8 مساءً.. ماسكه الكاميرا وتناظر بـ أحمد اللي حاط ولده بحظنه : ياللا سلومي حبيبي سوي بوسه للبابا سالم يبوس ابوه بعنف بالوقت اللي تلتقط لجين الصوره وتصارخ: ياقلبي الصوره تجنن سالم وهو يتلعثم بالكلام: بعد ثوره بعد احمد قام بسرعه : اشوف وريني ..وقف يناظر بالصوره مع لجين وهو يتبسم : ياللا حبيبتي دورك تصورين مع سلوم لجين بدلع: لاياقلبي مابي اصور احمد يدفها: عشان خاطري ماراح تحلى الصوره الا بوجودك بعد ماجلست وحطت سالم على حظنها صرخ احمد بحب : ياللا حبيب بابا بوسه كبيره للماما : : : يوم الخميس ..موعد الرحيل .. الساعه 10 مساءً بتوقيت السعوديه 1 الظهر بتوقيت امريكا.. كان يمشي بالمطار بحزن خطوه تجر الثاني ..رغم قلبه اللي متعلق معاها وحبه لها الا انه مستحيل يرجع عن قراره ..كانت كل شوي تناظر اخوها ويصعب عليها حاله ولاتدري وش تسوي له والا كيف تساعده .. وفجأه سمعو صوت الصرخه من بعيد : مشعل مشععععععععععععععععععل دقيقه التفت بسرعه وشاف عبير اللي جايته ركض وقفت قباله وهي تلهث من التعب وبعد مااخذت انفاسها قالتها بسرعه: مشعل انا مالي غناة عنك انا بخلص اوراقي واموري وبلحقك على السعوديه بابا وماما راح يجون معاي عشان نخلص ترتيبات الزواج ..انا احبك وادري انك بتسعدني وبتعوضني كل شي ومعاك مستعده اعيش بأي مكان مشعل قالها بهدوء: جد والله عبير وهي مبسوطه: أي والله اول ماخلصت كلمتها طاح ع الأرض وهو شبه فاقد للوعي ..عبير نزلت لمستواه وهي خايفه تناظر عنود بتوتر : وش فيه عنود بعد ماسندت راسه: مافيه شي بس له كم يوم ماياكل زين وبس يدخن عبير تبكي: كله مني انا السبب عنود بهدوء: لاتقولين كذا مشعل مافيه شي نايف بعد ماجاب المويه نزل بسرعه لمستواه وصار يصفقه بالمويه اول ماصحى سند راسه ورفعه: اشرب اشرب مشعل بعد ماشرب المويه التفت لعبير وقالها وهو مبسوط: جد عبير بتجين معاي السعوديه عبير بفرح : ايه جد عنود بعد مااخذت ولدها من يد عبير ضربت مشعل على كتوفه بقوه: اقول امشي ياروميو لاتفوتنا الطايره مشى بسرعه وهو مبسوط ويصارخ: خلاص انتظرك عبوره وبعد رحله دامت ساعات طويله حطت الطائره في مطار السعوديه بالرياض ..بعد مالبست العبايه وتوجهت لصالة المغادرين صرخت بقوه: ياربي انا بالسعوديه مو مصدقه والله اشتقت لها واشتقت لأمي مشعل رفع يده يلوح لبندر: هنا تعال هنا بندر قرب بسرعه: هلا والله بالغالي نورت السعوديه مشعل مبسوط: منوره بوجودك عاد تدري ماقلت لأحد غيرك بوصولنا ابي اسويها مفاجأه ..صرت ابو والا باقي بندر يضحك: يعني يبي لي كم يوم بعد ماركبت السياره كانت تحس بتوتر تحسب الدقايق والثواني .. وقفو عند اشاره وكان صوت الاغاني بسيارة اللي بجنبهم عالي مره ..( بلاحب بلا وجع قلب وش جانا من ورى هالحب .. مشعل يضحك: اكيد شريط راشد الجديد بندر يضحك: وفيه غيره يحشرونه فيه كل سنه هذا حالهم من اول مانزل الشريط للحين مشعل : الله يخلف بس اول ماوقفت السياره عند البيت اخذت واحد من عيالها ونزلت بسرعه تركض .. نايف يضحك: خلاص عنودتي الشوق ذبحها فتحت الباب بقوه وصارت تصارخ : ماما حبيبتي انا جيت ام مشعل قربت من الباب تناظرها وعيونها مليانه دموع : ياربي مو مصدقه الحمد لله اللي شفتك يابنيتي والله كنت مشتاقتلك حيل ..بعد ماضمتها بحنان ..اخذت الصغير من يدها: هذا مين فصولي والا فهودي عنود تضحك: هذا فصولي دخل مشعل وهو شايل فهد بيده ..قرب من امه وضمها لصدره وهي تبكي : لاتبكين يالغاليه خلاص حنا هنا وماراح نفارقك أبد ام مشعل بحب: الله لايحرمني منك يااااااارب : : : وبعد مرور 4 سنوات .. يوم الخميس .. 20 \رجب \1434 للهجره الرياض الساعه 1 بعد منتصف الليل ..بغرفه بالغة الفخامه خليط من اللونين الذهبي والبني ..اضواء خافته ..وصوت الموسيقى الهادئه .. رفع راسها بهدوء وهو يتأمل ملامحها الحلوه لاحظ خجلها الكبير وقالها بحنان: عهود خلاص انتي صرتي زوجتي انا وانتي الحين ببيت واحد عهود نزلت راسها ومانطقت بكلمه فارس بعد ماتأمل فستانها الأبيض اللي زايدها جمال قالها بحب: عاد تصدقين انتي احلى عروس شفتها بحياتي عهود :............... فارس بكل رومنسيه: يعني ماراح تسمعيني صوتك الحلو عهود بخجل: وش اقول فارس بسرعه: يالبى قلبك قولي أي شي عهود نزلت راسها بسرعه واستحت اكثر وبدت تتغير الوان وجهها للأحمر فارس حط يده بسرعه تحت ذقنها ورفع راسها : خلاص خلاص توبه ماعاد اقول شي يخجلك ..اساعدك عشان تشيلين الطرحه؟ عهود بهدوء: اللي تبيه : : : يوم السبت ..الساعه 2 الظهر .. دخل البيت وهو يسمع صراخ بنته الصغيره ..ويناظر ببنته الكبيره تلعب.. قالها بقرف: اعوذ بالله جينا للقرف ..وبنبره حاده جافه قالها بعصبيه: هي انتي يالزفت غداك جاهز ريم بهدوء: ايه جاهز عبد العزيز بقرف: ياللا حطيه لابارك الله فيك ولا في بناتك ريم بعد ماتنهدت: ان شاء الله عبد العزيز وهو قالب وجهه : شوفي ببدل ملابسي بس وبجي وياويلك اجي ومااشوفه جاهز دانه وهي يادوب تتكلم بطلاقه: مامتي اساعدك عشان بابا لا يضربك ريم نزلت لمستواها وهي تبكي: لاحبيبتي روحي العبي وانتبهي لأختك انا بحطه بسرعه دانه ببراءه: طيب حطت الاكل بسرعه وهي خايفه يطلع ومايلقاه جاهز ..اول ماطلع ولقى الاكل على الطاوله جلس وبدا ياكل وهو مو مهتم لعدم وجود أي شخص غيره على الطاوله : : : الساعه 4:30 العصر .. كانت بأحد محلات الأطفال تتمشى مع زوجها محمد .. تناظر بطنها المنفوخه وتسند ظهرها بيدها ..وبينها وبين نفسها : الله يوفقك يافارس وين ماكنت لولاك ماكنت انا هالحين متزوجه وعايشه حياتي بشكل طبيعي محمد يهزها: ها حبيبتي تنقيتي شي للبيبي جود بدلع: ماادري قلبي انت قولي أي وحده احلى هذي والا هذي محمد بهدوء: اللي تشوفينه والا تدرين خذي الاثنين جود مبسوطه: خلاص ناخذ الاثنين اخذ الملابس من يدها ومسكها وصار يمشي معها بهدوء : : : الساعه 5 المغرب.. دخل البيت وسمع صوت صراخ خلودي ..دخل المطبخ وشافه بيد الخدامه تحاول تسكته ..اخذه منها بسرعه وقالها بنبره حاده: وين ماما عبير الخدامه بهدوء: ماادري وين روح رجع الصاله اعطى الصغير رضاعته وحاول فيه الى ان نومه ..وبعد حول نص ساعه فتحت الباب ودخلت ..كانت بكامل زينتها وريحة عطرها واصله لعنده ..قرب منها وهو معصب: وين كنتي ياهانم عبير ببرود: كنت معزومه ع الغدا ببيت صديقتي مشعل بعصبيه: وماتقدرين تبلغيني عبير بطفش: اوه مشعل نسيت وطفشت من هالسجن انا ماتعودت على هالعيشه مشعل بقهر: انا قبل لااتزوجك فهمتك على الوضع والعيشه هنا وانتي رضيتي عبير بدون نفس: ايه بس مااقدر اجلس بالبيت 24 ساعه انا متعوده على حياة امريكا كفايه اني متحمله السعوديه وحرها وكتمتها حتى سياره مااقدر اسوق ومو قادره الاقي سواق مثل العالم مشعل مسكها بقوه من يدها: عبير لاتطلعيني من طوري انتي الحين ام وشلون تتركين خالد عند الخدامه طول اليوم وبعدين الف مره اقول لك حتى لو تبين تروحين لخوياتك لاتحطين عطر بهالطريقه عبير تبعد يده عنها: اوووووووف كتمه كتمه كتمه انا طفشت خلاص بجلس بالبيت كل الوقت كذا راضي مشعل بهدوء: ايه راضي مع اني ادري مامنك فايده وبكره ترجعين لعوايدك الله يعينني عليك بس : : : الساعه 8 مساءً.. جالسين بالصاله يشوفون تلفزيون .. نايف بعد مالف يدينه حول كتوفها : عنوده حبيبتي وش رايك اسوي معاك صفقه عنود تناظره : وش صفقته نايف: تجيبين لي بيبي ثالث واسفرك المكان اللي تبينه عنود وهي تناظر فهودي وفيصل يلعبون بشطانه : لا لا مستحيل مابي عيال نايف بثقه: ياحبيبتي هذا عرض مغري عنود بسرعه: لاتحاول مستحيل بعد عيالك هالشياطين ماافكر نهائي اخلف مره ثانيه نايف بعد ماباس خدها: والله ودي ببنوته حلوه مثلك ..مسح على شعرها وقالها بحب: شعرها مثلك وخدودها مثلك ياويلي بس عنود بعد ماتخصرت: وان ماجاتنا بنت وجانا ولد ..ازيد العصابه واحد مستحيل نايف بهدوء: شوفي انتي اتركي عنك هالحبوب ونجرب حضنا عنود تهز راسها بـ(لا) : مستحيل نايف يتمسكن: طيب وعشان نيوفي حبيبك عنود بتردد: عشان نيوفي ابيع الدنيا كلها بس مافيني حيل ازيد هالشياطين واحد نايف: الا الا ..ونادى عياله بسرعه: اقول فصولي فهودي تبون بيبي صغير يلعب معكم فهد وفيصل بصوت واحد: ايه ايه نبي نايف يناظرها : شفتي خلاص نبي بيبي بالأجماع عنود تضحك: صح يالأجماع : : : الساعه 9 مساءً .. حاط اذنه على بطنها المنفوخه يحاول يسمع شي ..وبعد دقايق معدوده رفع راسه : مااسمع شي وين اللي يرافس لجين تضحك: ركز ركز احمد يناظرها: صار لي ساعه مركز ماسمعت شي سالم وهو يتلعثم بالكلام: يصير انا اسمع لجين تقربه منها: أيه حبيبي يصير بعد ماحط راسه الصغير على بطنها ضحك بقوه : ياربي والله اسمع طق طق صغيره احمد يبعده بسرعه: وخر مهوب قبول انت تسمع وانا لا ..لصق اذنه عند بطنها وهي تضحك على حركاته احمد يناظرها: نونه عاد لاتضحكين خليني اركز ابي اسمع لجين تحط يدها على فمها : طيب ياللا ركز لصق اذنه ببطنها وركز بعنف وبعد دقيقتين صرخ بقوه: أي والله سمعته ههههههههههههه والله باين عليه شيطون لجين تناظره: قصدك شيطونه المستشفى قالو لي بنوته احمد يناظرها بحب: راح تطلع حلوه كذا مثلك : : : يوم الأربعاء ..الساعه 4 العصر.. قالتها بقهر: ياربي بندر والله واعده البنت بروح لها بندر بأصرار: قلت لك مافيه دقي واعتذري لها اخوها حركاته كلها بطاله مابيك تروحين هناك نوره بقهر: تشك فيني بندر بندر بقهر: ياليل تشك فيني اللي بكل سالفه نوره بعصبيه: ايه شغلات كثيره تمنعني اسويها وش تعني هالحركات مو شك بندر بهدوء: لاموشك هذي غيره ولو مااحبك مااغار عليك نوره بقهر: لاانت تشك وانا كنت متوقعه منك كذا تصرفات بندر قرب منها وحط عينه بعينها: ناظري بعيني تشوفين نظرة الشكاك هاه؟ انا اغار شسوي غصب عني اغار ..اعتبريه مرض أي شي بس مافيه روحه نوره جلست وهي مقهوره : اف خلاص مو رايحه خلك كذا يالغيور حارمني من كل شي جنا بعد مادخلت البيت : وش فيكم اليوم بعد سلمان واللي دخل وراها : وش فيهم بعد هواش كالعاده جنا تتلفت : امي مو هنا؟ بندر يضحك: من متى يعني امك وابوك هنا انتي تجين تجلسين مع حرمتي كل اسبوع بعد ليه النصب جنا تضحك: مالت عليك ..وينها جود هذيك اللي تعرف لك ياري ري بندر بقهر: ري ري بعينك جود باقي ماوصلت هي وكرشها يبي لها ساعه عشان توصل جنا تضحك: هين لاجات بعلمها ..الا وين سلمان الصغيرون نوره بهدوء: نايم وكلته ونام جنا تتبسم: نوم العوافي يارب ..وتروك وحرمته بندر : مسافر مثل عوايده كل يومين والثاني ماخذ اجازه ومسافر تقولين ماصدق اعرس سلمان يضحك: خله توه بالبدايه بعدين يطفش جنا تناظر سلمان بقهر: وش قصدك سلمان بسرعه: هاه ولاشي بندر فطس ضحك : تجيب الكلام لنفسك بعد ماجلست جنا ناظر فيها وقالها بهدوء:توصين بشي جنا : لاسلامتك شال بنته بحب وباسها على خدها بحنان : عنوده حبيبتي ما تتعبين الماما طيب عنود بدلع الاطفال: تيب بابا النـــــــــــــــــــهــ ــــــــــــــــايـــــــ ــــــــــــــــــــــــه | ||||||||||||||
|
| |
|
05-12-10, 04:40 AM
| #35 | ||||||||||||||
| مراقبة ومشرفة سابقة ونجم روايتي
| الخاتمه .. الشيطان موجود وهذا امر لايمكن الجدال فيه ولكننا بالأيمان والعزم والقوه ..وبالأراده يمكننا التغلب عليه ..في احيان كثيره نحيى وحولنا شيطان من الأنس يفتك بنا ويقودنا للهاويه دون ان ندري .. امثال مشعل هم كثر بهذه الحياه فكثيرات هن مثل نجلاء شرسات قاتلات ..امثال بندر هم نادري الوجود وربما لاوجود لهم ..وبعكس هذا فأمثال ياسر وسامي كثر بحياتنا يستغلون الضعف بأنفسنا ليصلون لغايات دنيئه بداخلهم .. احبتي النهايات السعيده موجوده بالواقع وليست حكراً على الروايات ولكن ماذا بعد النهايه السعاده؟؟ انا اعتقد بأن النهايه السعيده ليست مهمه بقدر ماهو مهم استمرار هذه السعاده ومايحدث بعد النهايه . : : كلمتي ..سأشكر أمي وأبي فهما سر وجودي في هذه الحياه..سأشكر والد اطفالي فهو من منحني نجومي المضيئه في سماء الحياه..سأشكر اخواتي الحلوات ..إبتهال أحمد تعليقاتك وانتقاداتك دائماًَ كانت تقدمني للأفضل ولن انسى رسالتك الحماسيه التي زادت حماسي..ألاء أحمد تعقيبك الأول على روايتي طبع في نفسي سعاده بالغه رزقك الله مولودك بصحه وعافيه.. أفنان أحمد قبلة حباً اطبعها على خدك الممتلىء كنتي اجمل متابعه واجمل رفيقه واصلتي معي الدرب بـأخلاص .. كما سأوجه كلمة شكر لصديقتي وأختي ورفيقة دربي أمــــــــــــــل .. سأشكر كل اقاربي وكل من شجعني واوصل لي كلمة تشجيع ولو كانت صغيره .. فضيله عبد الله اشكرك على اطرائك الجميل فقد شجعني ..ياسمين عبد الله سؤالك الدائم عن روايتي زاد من حماسي وشعني لمتابعت الطريق .. ولن انسى القراء ومتابعي في هذا المنتدى وفي كل منتدى اشكركم جزيل الشكر فأنتم اساس هذه الروايه وبدونكم ماكانت ولن تكون : : اهم من ارغب بشكره (( نقطة الوصول )) في حياتي ..فهي تلك النقطه التي احدثت فرقاً في داخلي ..هي تلك النقطه التي علمتني كيف احاول التفريق بين لغة القلب ولغة العقل .. هي تلك النقطه التي لم اصل لها بعناء وانما اوصلتني لها الصدفه فتغلغلت في داخلي وعاشت معي ..هي تلك النقطه التي سأواصل طريقي معها وبسببها ..هي كبصمه في حياتي احبها ولاانساها فهي كـ يوم ولادتي .. وكـ يوم اصبحت اماً لأول مره .. اليك يا أجمل نقطه في حياتي اهديك روايتي الأولى لكم مني انا أيــات أحمد اجمل تحيه وتقدير تابعوني بأول كتاب يصدر لي بالأسواق قريباً ان شاء الله وانتظروني بروايتي الثانيه (( سما غابة الأوهام)) | ||||||||||||||
|
| |
|
29-05-11, 02:53 PM
| #38 | |||||||||||
| نجم روايتي وقاصة بقصص من وحي الأعضاء وكاتبة في قلوب أحلام وكاتبة ومحرر لغوي بقسم وحي الخيال - مقيم التسالي - منسق المجلد الأول لوحي الخيال - م  
| يسلمو علي الرواية | |||||||||||
|
| |
|
| أدوات الموضوع | |
| انواع عرض الموضوع | |
|
|
1Likes
.png)
.png)
العرض العادي
