نوح الحمام / للكاتبة طيف الأحباب ام الوليد.متميزة

[هرجوان]

السلام عليكم ورحمة الله وبركاته

الله يعطيك العافية على هالقصة اللي روعة قليله عليها

بس متى موعد نزول الاجزاء

[مارشيلمو]

يسلمووو روعــــه يعطيك العافيه

[جرح الذات]

بسم الله الرحمن الرحيم


هلا وغلا بكل الغوالي الي يعطرون متصفحي المتواضع سواء با لردود او التقييم او الشكر..,

او الرسائل الي تجيني على الخاص ممتنه للجميع ولثقتهم بخربشاتي ..,

اليوم عوق المزايين بتتعرف على شخصية زياد اكثر وبنعرف تخصص زياد

في البارت الاستثنائي الي وعدتكم فيه..,

في نهايةالبارت قفله حلووووه تمهيد لليله السرمديه الي وعدتكم فيها وخصوص الغاليه امووله..,

بارت اليوم اهداء للكل العابرين من هنا من دون استثناء..,

وخاصةالي توقعوا تخصص زياد الغاليات ؛ ساعه بلا****ب ام تركي ,ملاذ,والهدوء المستحيل,

مع انه ما جا في بالي ابدآ ان احد يتوقعه ماهو والله ثقه بلي اكتبه لكن لأن التخصص اكثر الاقبال عليه من العنصر النسائي

يا الله تعالوا معاي...!!

وسالفه جديدة؛
.
.
.

البارت الثامن عشر

.
.
.
انا قلبي مع امي حتى لو تبي تبعدني عنها..!

امي فيها شي وشي كبير صوتها با التلفون غير لما اقابلها ..,

ما ادري وشلون نمت لكن صحيت بنفسيه افضل من امس...,

دخلت الحمام غسلت وجهي وفرشت اسناني وغيرت لبسي ونزلت ..,

دخلت على خالتي لقيت زياد عندها ...,

سلمت على راسها وجلست اناظرهم هي وزياد يوكلها ومرات ترضى تاكل ومرات لا

يعاملهاكأنها طفله حتى الاكل مرات ترميه من يده ياخذه وياكله وهو يضحك..,

زيادبعطف\ يمه اليوم بنطلع لسوق انا وعوق بنجيب اشياء ناقصه تطلعين معانا...!

العنود بتعب\لا الله يوفقكم..!

يعجبني زياد محسس امه بأاهميتها وحتى وهي عاجزة طلعنا من غرفة خالتي ..!

زياد \ترى ما افطرت انتظرك..,

عوق بضحك\ خلاص بحضر الفطور مع اني اتوقع انك شبعت ..,

زياد يبتسم بدهشه \ليش..؟!

عوق تبتسم\علشان الاكل الي خالتي ترميه ماترضى تاكله انت تقوم با الواجب..,

زياد بضحك\امي حساسه مره اسوي كذا اخاف تحس اني مستقرف منها..,

غير كذاانتي تعرفين نفسية المريض يحس مرات انه ثقيل على اهله وخصوص الام حساسيتها اكثر..,

دخلت المطبخ وصلحت فطور وقهوه وطلعت لزياد الي كل تصرف منه يزيدني اعجاب فيه واستغراب منه..,

عوق\ وين تبغانا نفطر..!

زياد\ بكيفك ..؟!

عوق\هنا با الصاله ...,

ونزلت الفطور وشغلت التلفزيون على الاذاعه..

يومي احسه كئيب بدون ما اسمع قرآن الصباح فقدت صوت الشيخ عبد الباسط والشيخ محمد ايوب...,

من تزوجت 3ايام لا قرآن ولا اذكار ببدى من اليوم..,

افطرنا على صوت القرآن...,

عوق\ يوميآترى هذا برنامجي الفطور على صوت القرآن..,

زياديبتسم\احسن برنامج انتي مخططه وش بتسوين او وش بتغيرين والا بس كذاضربةحظ..,

عوق\اصبر خليني ارفع الفطور واجيب القهوه علشان اعرف افكر...!

حضرت القهوه وقعدنا نتقهوى..,

عوق\ با ابدى من فوق ارتب وانزل تحت ..!

زياد\ خلاص سوي الي يعجبك ...؟!

عوق منحرجه\ترى ماراح اتعبك واجد..!

زيادبمحبه\تعبك راحه بس ليش تقولين كذا تحسسيني انه احنا اغراب عن بعض ..,

عوق تبتسم با ارتباك\لا ماهو قصدبس البيت كله لونه واحد صبغتكم قديمه ..,

زياد بممازحه \ليش تردينها لي..

عوق منحرجه\لا والله بس استفسر .,

زيادبتفهم\علشان اللون بيج موحي لك ها الفكره..!

العالم كلها طاحت با الالوان ما اعجبتني تبين اصبغ لك عادي ..,

عوق \ لا الصبغ شغلانه طويله ماهو لازم مع انه ودي والله..!

زياد\الألوان تقيد لون الاثاث والا ترى صبغة بيتنا اخر ما نزل ..!

غرفة النوم توني مغير البويه حقتها خليتها تختلف عن باقي البيت لمعه بزياده واضفت لها لون ثاني ..,

وعمومآبيتنا كله ناقص اشياء كثير ماسويتها مافضيت له..,

اردف زياد وهو يناظر ساعته\بتطلعين الحين السوق والا اطلع اخلص اشغال عندي وارجع ..!؟

عوق\خلص شغلك وترجع تلقاني جاهزه...,

طلعت فوق بعرف من وين با ابدى جناحنا با اخليه اخر شي..!

دخلت مكتبة زياد واخذت ورقه وقلم علشان اعرف وش اسوي..,

لازم اتخلص من كل الاشياء الزايده...!

وطلعت لسطح الي قال عنه زياد لقيت غرفة غسيل وغرفه ثانيه لشغاله..!

جات الخادمه تركض تسألني ابغى شي قلت لا ...,

الخادمه مافي داعي تنام فوق تنزل تحت با الغرفه الصغيره الفاضيه ..!

والغرفه الي فوق تتحول لمخزن..!

كتبت بورقه كل الخطوات الي راح اسويها والاشياء الي محتاجينها فوق..,

رحت ادور على جوالي الي دايم ناسيه وجوده ...!

ولقيت مكالمات لزياد اتصلت عليه..,

زياد\وينك عن الجوال..؟

عوق\موجوده بس انسى وجود هالجوال..,

زياد\يا الله تجهزي دقيقتين وانا عند الباب من يوم اعطيك نغمه تطلعين..,

اخذت عباتي وقفلت غرفتي ولبست قفازي وشرابي ..

دق جوالي على طول طلعت وركبت السياره

زياديبتسم\تأخرت عليك ..!

عوق\لا عادي ماحسيت با الوقت كنت اشوف وش ناقص فوق وش بسوي..!

زياد\كويس عرفتي وش تبين ..,

عوق\سجلت كل شي بورقه..!

عوق بتردد\زياد ..!

زياد\هلا ...!

عوق\الخدامه ما ابغاها فوق السطوح...!

زياد با استفسار\والسبب..؟

عوق\عدة اسباب بعيده ما ندري وش تسوي فوق...!

وغرفتها ابيها مخزن للاشياء الزايده وخصوص الي بغرفة الاشباح بطلعها فوق..,

زياديضحك\ ابشري ما طلبتي أي اوآمر ثانيه..؟

عوق\الخدامه في الغرفه الصغيره تنام وتكوي فيها وبعدين الحمامات كثيره تحت واحد نخصصه للغساله..؟

زياد با ابتسامه\وبعد..,

عوق بخجل\خلاص سلامتك ..,

زياد\الله يسلم الي بيخلي بيتنا جنه وين تبين الحين وقولي لي خطتك..؟

عوق\غرفة الاشباح بخليها جلسه خاصه تلفزيون وكنب والمطبخ التحضيري يبي له اضافات..,

وحتى المكتب حقك على ان موقعه غلط فوق لكن عادي بس يبي له ترتيب ..!

زياد بتسأل\طيب الصاله الي فوق وش بتسوين فيهاتصميمها جلسة خاصه با الاساس ولاتنسين الي فوق لنوم ماهو اي احد يطلع ..,

عوق \ زيادة الخير خيرين اذا تبي رايي والا بكيفك..,

زياد\ لا ماهو ماشي الا الي انتي تبينه..!

نزلنا السوق وزياد كان كريم جدآمعاي يحاسب بدون تردداشترينا كنب وستاير للغرف واخذنالوحات وتحف اعجبتني ..,

زياد\الحين سيارتنا ما تاخذ شي العصر برسل واحد من عيال خواتي واعطيه الفواتيرو يخلص شغلنا بسرعه ويوصلها للبيت..,

رجعنا للبيت مع صلاة الظهر ما اشوف الطريق..,

زياد نزلني وطلع يصلي وانا دخلت غرفتي دايخه ابي ارتاح علشان العصر ابدا بشغلي...,

نمت ولا صحيت من التعب الا مع المغرب ..!

الي صحاني زياد..

قمت مفزوعه ما ادري حلم والا كابوس والا ثقل نوم..,

زياديبتسم\ من اليوم طلباتك وصلت والبنات تحت يسألون عنك..!؟

عوق بكسل\خلاص الحين بنزل لهم...

نزلت على طول بعد زياد..!

لقيت عبير واثير واصايل يتقهوون ..

سلمت عليهم وجلسنا نسولف ونتقهوى

عبير \عوق انتي اي مرحله تعليميه واصله..!

عوق \ الحمدلله معي بكالوريوس ..

عبير \وش تخصصك..!

عوق \لغه عربيه ...؟

عبير\ تدرين انك مع خواتي وخوات اصايل ما مر عليك وفاء وسناء ساري..,

ومنان وتذكار بنيان..

عوق\عبير الجامعه جامعه امة محمد والبنات كثار يمر عليك با اليوم اكثر من الف وجه با القسم الواحد..!

يمكن مروا علي لكن نسيت وبعدين ترى صديقاتي محدودات..,

اصايل \كم لك متخرجه..

عوق \السنه هذي ثالث سنه..,

اثير تبتسم\ لا هم تخرجوا العام وها السنه علشان كذا انتي ماتعرفينهم...,

عبيرتلتفت لأثير\ لابس البنات يوم جاو للعشا عرفوها..!

وفاء اختي تقول عوق نعرفها مميزه اسمآ وشكلآ..,

عوق بخجلوارتباك \لا عاد اختس تبالغ ..

اصايل \لا والله ما شاء الله عليك حلوه لاتستهينن بنفسك..

اردفت بضحك\ توقعنا انكم سافرتو لكن خالي فاجئنا اليوم طلب من امي ترسل ساري اخوي مع السواق يقول محتاجينه..!

عوق\ايه طلعت انا وزياد ناقصنا اشياء للبيت..,

طلعوا البنات من عندي ودخلت المطبخ لقيت الشغاله تصلح عشا..,

ياربي جوعانه على فطور الصباح وانا ما احب طبخ الشغالات ..,

[جرح الذات]

سمعت زياد ينادي وطلعت..,

زياد\ ماشاء الله با المطبخ ..,

عوق\ايه كنت بصلح عشا لكن لقيت الشغاله سبقتني ..

زياد\ لا انا وانتي بنتعشى برا هذا لأمي هي ماتاكل اي اكل اطلعي البسي بنطلع ..,

صعدت فوق تفاجئت ان زياد طالع وراي

عوق بدهشة\في شي انا بسرعه ماراح أأخرك ..؟

زياد بضحك\لا ابد وش فيك خفتي كنت بقولك ترى كل مشترواتنا اليوم وصلوا...؟

نزلوهم ودخلناهم بمجلس الرجال باقي بس كنب غرفة الاشباح على قولتك..,

عوق\الحمدلله اجل اللوحات الله لايهنيك شف لنا عامل يركبهم والكتب الطبيه والا شباح لازم نطلعهم فوق بسرعه..؟!

زياد\خلاص ما عليك بكلم خدامات خواتي يجون يساعدون خادمتنا

لبست عباتي ونزلناواحنا با السياره كلم عبير...,

زياد\بسرعه عبير شوفي خدامةامك وخالتك بشرى واطلعي فيهم لبيتي..؟

الغرفه الي فيها كراتين ونماذج تعرفينها...!

ايوا ابغى كل الي فيها يطلع لغرفة السطوح ..,

تسلم عيونك عبوره ..,

انا وعوق طالعين ..,

لا ماعليك الخدامه عندها خبر انا فهمتها كل شي انتي بس راقبيهم..,

ما ابغى ارجع الا كل شي خالص ..,

انتهت المكالمه بين عبير وزياد وهو يضحك على كلامها..,

زياد بضحك\عبير بتقوم با الواجب..,

اردف زياد\ تقول ماصار هذا شهر عسل شهر عمل ..,

ونزلنا تعشينا ورجعنا للبيت..,

زياد بتهكم \غريبه اليوم ما طلبتي امك..,

عوق تبتسم \ لا عادي بس انشغلت اخلص شغلي الي هنا وبعدين امرها اكيد مالي غناة عنها..,

وتركت زياد عند امه..,

صعدت فوق لقيت عبير والخدامات مخلصين شغلهم با قي نكمل الفرش..

طلع زيادبعدي,

زياد \ان شاء الله اعجبك شغل عبير..

عوق با اعجاب\ماشاء الله احسن مما توقعت ..,

زياد يبتسم\حددتي وين تبين اللوحات والتحف..,

عوق\ايه خلاص بحط لك اشارات علشان تركبون اللوحات مكان الاشاره وبعدين كل يوم بنخلص شغله وش مستعجلين عليه..,

زياد بتهكم\الظاهر ان عبير صادقه هذا صار شهر عمل ماهو عسل..,

دخلت غرفتي وعلى اني نمت با النهار لكن دايخه ابي انام ماتعودت اطلع هالمشاوير..,

قلبي موجعني على امي ولا ابي زياد يحس بشي غيرت ودخلت فراشي ..,

زياد كان يصلي وتره والتفت علي و ضحك يوم شافني اقرا اذكاري من كتيب معاي..,

عوق تبتسم \ليش تضحك لايكون علشان اقرا اذكاري من كتيب ترى سنين وانا اقراها من الكتيب ولا حفظتها..,

زياد بتودد\انا الي يضحكني اني اليوم حسيتك كبرتي ..,

ما طلبتي امك وبدون ما اقول تعالي نامي دخلتي السرير وبتنامين..,

لا احنا في تقدم عقبال ماتكبرين شوي وتصيرين مراهقه وتحبيني..,

ضحكت على تعليق زياد من قلب \يعني مايحبون الا المراهقين ..,

زياديبتسم\لابس علشان الفتره هذي انتقال من مرحلة الطفوله لشباب تكون انفعالات الشخص وتأثره مبالغ فيه..,

طلع زياد لسرير وقعد يفرفر بجواله طرى في بالي سؤال..؟

عوق با استفهام\زياد انتوا عندكم سواقين ..؟!

زياد يبتسم \لا هو سواق بشرى ..!

عوق بدهشه\سواق بشرى والا نجلاء..,

زياديبتسم\لابشرى نجلاء ماعندها سواق هذاكان عامل بمزرعة بنيان وخلاه سواق ..

عوق با استغراب\بنيان الوحيد الي ماله حس بينكم..,

زياد يضحك\ابوساري حبيب لكن الله يهديه ماتقدرين تتكلين عليه بشي مفوض بشرى بكل شي

وبشرى ماشاءالله عليها صايره ام واب لعيالها..,

عوق بتساءل\ولد بشرى ساري..,

زياد\ايه عندها ساري اول ثنوي مسمينه على ساري زوج نجلاء وبسام ومسلم با المتوسط ..,

عوق \اهااا ساري هو الي طلع مع السواق علشان اغراضنا..,

زياد بضحك \ ايوا السواق كان اخر انجازات بنيان علشان يريح راسه قال لبشرى بخلي واحد من عمال المزرعه سواق لمشاويركم

وريحوني من ود وجب ..,

بشرى عيالها للحين صغار على السواقه وتخاف عليهم وبنيان اهم شي عنده المزرعه ..,

عوق \يمكن بشرى ماعودته..,

زياد يبتسم \ماهو مسألة تعويد احيان يكون طبع با الانسان ماهما حاول ما يتغير ..

زياد \ بعكس ساري الله يرحمه مع انهم اخوان..,

عوق بدهشه\الحين بشرى ونجلاء متزوجات اخوان ..,

زياد\ايه اخوان نجلاءتزوجت ساري اول وبعدها بكم شهر بشرى على ان نجلاء اكبر من بشرى بثلاث سنوات ..,

ساري وبنيان امي تصير عمتهم هم متزوجات عيال خالهم..,

عوق \سبحان الله الي فهمته من كلامك بشرى حاره وبنيان بارد كيف اتفقوا..

زيادبضحك\والله جبتيها واثنينهم ممرضين ..,

عوق تضحك

زياد يبتسم با استغراب\ ليش تضحكين..,

عوق تبتسم \لا عادي بس مستغربه ترتيب زواج خواتك الممرضه تزوجت ممرض والمدرسه مدرس ..,

زياد\لابعد ساري ونجلاء خريجين كليه متوسطه ونفس التخصص توظفوا وكملوا بعدين..,

ايام ماكانت الوظايف تنادي الخريجين ماهو هم يدورونها..,

عوق ترفع حواجبها بضحك \ماشاء الله بعد..,

زياد يضحك \ لا بعد خوذي عندك بنيان وبشرى الله يسلمك ..

زمان كانوايدخلون معاهد التمريض بعد المرحله المتوسطة..,

بنيان درس تمريض وتوظف على طول وبعده التحقت بشرى بمعهد التمريض بعد المتوسط..

امي ماكان عاجبها الوضع خايفه على بشرى انتي عارفه التمريض اختلاط والبنت كانت بفترة مراهقه

فبعد ماخطب ساري نجلاء امي اصرت على خالي مسلم الله يرحمه يخطب بشرى معاها..

رفضت بشرى با البدايه لكن امي اجبرتها قالت تبين التمريض وافقي على بنيان ..,

وبنيان ماكان يبي الزواج وقتها يحس انه صغير..

تخرجت بشرى ممرضة وهي متزوجه وتوظفت على طول وتعينت مع زوجها بنفس المستشفى..

عوق بدهشه \ماشاء الله عليهم وطاوعوا امك..

زيادبضحك\غصبآعنهم امي اذا قالت الكلام ينفذونه وهم ما يشوفون الطريق امي بزواج بشرى من بنيان كانت تشوف المصلحه لطرفين

عوق \كيف مصلحه وهم شكلهم ماكانو مقتنعين في بعض ..,

زياد\بنيان لما توظف ماكان يستفيد من راتبه وخالي الله يرحمه كان يجي يشتكي لأمي منه انه ماعنده مبالاه ولا اهتمام بمستقبله..,

خافت امي عليه من اشياء اكبر فا اجبرتهم على ها الزواج وزي مايقولون ضربت عصفورين بحجر..,

زوجت بنت اختها لولد اخوها وفعلن بزواجهم تعبوا مع بعض فتره ..,

عوق بملامه\اسمح لي زياد ماهو حل هذا كل شاب بيعدلون اهله من حاله زوجوه والي يبتلون البنات..,

زيادبتفهم\لا عوق مافي احد عاقل يرضى يضيع بنته بها الصوره..؟!

اردف زياد\بنيان ماكان والله سيئ الي هذي الدرجه لكن انتي تصورتيه منتهي وصايع او انا يمكن ما قدرت اشرح لك صح..,

عوق بتأثر\لاوالله زيادبغض النظر عن بنيان حقيقه كثير بنات راحو باالرجلين من منطلق زوج ولدك يعقل..

زياد\كلامك صحيح لكن بنيان كان حاله خاصه وبعدين عايلة امي ماشاء الله عليهم متماسكين والكبير فيهم كلمته ماشيه

اردف زياد\امي مستحيل بتضيع مستقبل بشرى علشان تعدل بنيان ماتسويها العنودتفكيرها اكبر من كذابكثير..

بنيان كان توه متخرج وخوالي كانت حالتهم الماديه اقل من المتوسط ..,

وبنيان بعد ما توظف تحسينه استغرب انه ينزل له راتب بها المبلغ ..

فتشوفينه ماهو عارف وش يسوي كان يصرف يمين وشمال بدون حساب وخالي ماكان ذيك الشخصيه القويه على عياله ..,

بنيان لما تزوج بشرى صارت بينهم مشاكل وصلت لطلاق لكن اهلهم قدروا يسيطرون على الوضع..

وبعض التنازلات من الطرفين مشت حياتهم ..

عوق \احس انكم صراحه ظلمتوا بشرى اذا مشاكلهم وصلت لطلاق..

زياد\عوق انتي تعرفين مشكلةبشرى مع بنيان ايش !

انه انسان غير مبالي مايحب يربط نفسه بمسؤليات لدرجة انه قدم تقاعد مبكر

وحكمته با الحياه اصرف ما بلجيب يجيك مافي الغيب..,

تصادم مع بشرى الي عكسه انسانه حريصه ومنظمه وشخصيتها قويه تحب عملها..

فحاولت انها تغير من اطباع بنيان ويكون مثلهاومن هنا كانت مشاكلهم..!

لدرجة انه الله يهديه ما يدري عياله بأي مراحل دراسيه مجلس الاباء ساري الله يرحمه هو الي يحضره..,

ويحل مشاكلهم واذا قاله ساري يا بنيان عيالك محتاجينك..,

يرد عليه ما عليك العم والد وانا وانت واحد ومع هذا والله بشرى غيرت بنيان كثير..,

عوق بتساءل \طيب وكيف قدروا يوصلون لحل ..,

زيادبضحك\انا اقولك بشرى وخالتي موضي اي مشكله تصير بين بنيان وبين بشرى يلجئون لأمي بماان زواجهم كان برغبة امي..,

فتشوفين امي على طول الخط مع بشرى ضد بنيان وهذا بنيان كل ماشكت بشرى منه يلقى حقه من امي على انه كثير بشرى تكون الغلطانه..,

اخر شي اقترحت عليه بشرى يوم عجزت معاه انه يشتري مزرعه ويشغل نفسه فيها بدال ما يشغلها..,

لما اشتروا المزرعه كلنا لمناهم ليش يضيعون فلوسهم فيها ماتنفع ابد

وبشرى وامي هم الوحيدات الي يشجعون بنيان انه بيسوي معجزه من ها المزرعه

وفعلن الحين خلاها بنيان ماشاء الله جنه واشتغل عليها صح..,

ماتتصورين كيف ابدع فيهاحولها لمشروع زراعي ناجح بكل المقاييس ..

وحتى انه الآن تاجرخضار كبيرو يبيع من محاصيل مزرعته وعليه طلب ..!!

عوق بتعجب واستغراب \معقوله شخص ماهو عارف يتعامل مع عياله ولاحياته الزوجيه ابدع بمزرعه تبي اهتمام اكثر من البشر..,

ابي افهم هذا كيف اقنعته بشرى..,

زياد \ليش مستغربه بنيان يقدر ويحب بشرى بشكل ما تتخيلينه لكن طبعه الفوضوي هو الي كان واقف بينهم ..,

اردف زياد\كنت احيانآ اعاتب امي ليش زوجتيهم لبعض تقول الاثنين مالهم الا بعض

بشرى شخصيتها قويه وطبعها حاد ولاتتنازل بسهوله ماهو اي رجل تقدر تعيش معاه

بعكس بنيان الي لو ما تزوج وحده مثل بشرى راح يضيع ولا راح يكون له مستقبل ..

عوق با استغراب\يمكن تكون نظريتها صحيحه عش رجب ترى عجب..

زياد\مره سألت بشرى لو رجع فيك الزمن توافقين على بنيان قالت وانا مغمضه بعد

انا مستحيل اعيش مع غير بنيان او يستحملني رجل غيره ..,

اردف زياد\لحظه بجيب البوم صور با المكتبه بوريكيها

رجع زياد ومعاه البوم وفتح الالبوم كان اول البوم صور لرجل كبيرواسمرحيل ولحيته بيضا

زيادبوجع\هذاابوي اخر صوره له كانت علشان تجديد رخصة سواقه ..,

عوق\يا الله شايب ماتوقعته كبير ..,

زيادبحزن \الله يرحمه توفى من 17سنه ولما توفى كان عمره با السبعينات ..,

اردف زياد\ وهذي صورته في حفل المدرسه لما نجحت بنظام ثلاث سنوات بسنه نادوه وكرموه..

عوق تبتسم\ ماشاء الله عليه رزه ابوك ولابس بشت ومين الدب الي ماسك يده..,

زيادبتهكم\معقوله ماعرفتيني ..,

عوق تضحك\والله توقعتك لكن وش قلب حالك من ماشاءالله الي ها النحف ..,

زيادبممازحه\ياويلك لو امي سمعتك تقولين يا الدب ..

عوق تتهكم بمزح\يعني وش بتسوي ..,

زياد\اقل شي تمسك اذنك ولا تفكهاالا وانتي قاريه كل آيه ودعاء حافظتهم علي ..,

عوق بضحك\والله شكل امك ماهي بعيده عن امي ماتحب كلمة يازين بنتس والا وش اخبار بنتس..,

اردفت عوق \تدري زياد انه مرات يكون معاهم حق احيانآيكون الانسان عنده نعمة هو ماهو حاس فيهاويظهرها بحسن نيه

تجيه عين من صديق والا عدو تقلبها عليه نقمه ..,

زياد\العين حق مانقدر ننكر لكن شوفي صورة الي واقف جنبي من تتوقعين ..,

عوق\ما ادري والله بس اتوقع من عايلتكم علشان السمار لكن هذا نحيف وقصيرمره با النسبه لك ..,

بناتكم وناجي كلهم طوال واجسامهم مليانه يمكن من معارفكم..

زياد يبتسم\هذا بنيان..,

عوق بذهول \معقوله هذااقصر منك بوااااجد واتوقع اقصر من بشرى..,

زيادبضحك\تقريبآ طول بشرى او اقصر شوي امي تسميه عود كبريت محروق ولا عمرها نادته با اسمه ماتقول الا عود كبريت محروق ..,

عوق تبتسم بتعجب \امك عليها تشبيهات ..,

اردفت عوق \هذي الصوره شكله انت وبحفل ماشاء الله ناحف كثير عن صورتك الاولى لكن من الي معاك بالصوره يضحك..,

هذا شكله منكم طويل وجسم ماشاء الله ..,

زياديتنهد بوجع \هذا ساري ابو راكان الله يرحمه بحفل تخرجي من كلية الطب ..,

عوق \وش فيك احس انقلب مزاجك..,

زياد بحزن\ساري كان الاب الثاني لي يعاملني كأني اخوه بوفاته فقدت اخو لي من لحمي ودمي..,

امي وابوي ماكانو يشوفوني الا طفل ما اكبروخصوص امي ويعاملوني على ها الاساس لكن ساري كان يعاملني كرجل..,

عوق\يا حظ الي تذكره الناس بخير..,

قفل زيادالبوم الصور ورجعه للمكتبه

واناالنوم غلب عيوني ونمت على طول ..,

اليوم الثاني قضيته ترتيب للبيت وتنظيف وزياد جاب عمال ..,

ركبوا لي اللوحات على طلبي ..,

وكملت طلبات المطبخ التحضيري الي فوق..,

وقررت اصلح عشا لزياد ذبحني با اكل المطاعم..!

ودخلت المطبخ صلحت صينية دجاج با الفرن

ورز ابيض ونوعين سلطه وحلى سريع ..,

جهزته وطلعت بغير لبسي عن ريحة الطبخ..,

اخذت دش ورتبت عمري واخذت جوالي الي دايم ناسيته ونزلت ..,

[جرح الذات]

مكالمات لم يرد عليها ..!

اكيد كلها من زياد حتى قبل افتحها مافي احد يعرف رقمي غيره..,

شفت المكالمات وفعلن كانت من زياد

فتحت الرسايل برسل لزياد..,

لقيت رسالة من زياد

يسأل (قلبي متى نطلع مكه)

استحيت من رسالته و تلفت حولي خفت احد يقراها معاي..,

ارسلت له (وينك عندي مفاجئه حلوه)

دخلت عند خالتي لقيتها كا العاده على سريرها

طلبت منها تطلع معاي لصاله وحاولت معاها حتى رضت ..,

ساعدت الممرضه ونزلناها على كرسيها ام زياد ضخمه حيل طويله وسمينه..,

تعبت وانا احاول انزلها تمنيت اني اشوفها بعافيتها تمشي احس انها شخصيه قويه خصوص بعد كلام زياد عنها البارحه ..,

المرض هادها هد ولاحول ولاقوة الا بالله ..,

دفت ممرضتها الكرسي وجلسنا با الصالون نتفرج على التلفزيون ..,

حاولت اسولف معاها كلامها بطيئ ولسانها ثقيل..,

لكن سبحان الله على طول ذكر الله بفمها اكثر من كلامها..,

دخل زيادوفرح يوم شاف امه جالسه ..,

زياديبتسم\ما شاء الله عنودتي اليوم تتفرج على التلفزيون هذي المفاجئه وانا راح بالي بعيد..,

عوق بمشاكسه\ ليش ماهي حلوه ها المفاجئه..,

زياد بفرح \الا واحلى مفاجئه بعد..,

عوق تبتسم\ وبها المناسبه صلحت لك عشى طبخ بيت..,

زياد\ماتقصرين وين العشا جاتني رسالتك وانا افكر اليوم اي مطعم اعزمك عليه..؟

انقذتيني الله ينقذك من النار..,

جهزت العشا وتعشينا خالتي لها اكلها الخاص ..,

وانا وزياد تعشينا الي صلحته لمه حلوه لكن ناقصها امي ..,

زياد با اعجاب\تسلم ايدك ما توقعتك طباخه صراحه..,

عوق بغرور\ليه ما قالولك تربية الوضيح..,

زياد\الا قالت خالتي انك طباخه لكن مشيتها لها انتي عارفه من يمد ح البنت غير امها

حتى يوم تغديت عندكم توقعت غداكم طبخ شغاله..,

رفع عيونه لسماء وقال ياربي لك الحمد انك عطيتني عوق ..,

وناظر امه قال صح يمه والله ان دعوتك لي من قلب

ضحكت على هبال زياد..,

وخالتي تبتسم مثل عادتها وزياد يمزح معاها يمكن هي ما تستوعب كثير من كلامه

لكن هو يعاملها كأنها انسانه عاديه ..,

يستأذن منها ويمزح معاها يهديها ياخذ رأيها..؟

كل هذا لاحظته عليه با الكم يوم الي انا معهم ..!

طلعت فوق لغرفتي غيرت لبسي بقميص ورتبت نفسي ..,

وكلمت امي الحمدلله صوتها طيبه وقعدت تمدحني اني ما مريتها اليوم وتشجعني اني اهتم في بيتي ..

سكرت منهاوجلست اخطط كيف برتب غرفتي هي الوحيده الي بقت لي..,

دخل زياد

زياد بمزح\ نفسي ادخل مره ولا اشوفك سرحانه ..,

عوق\لا ماهو قصد بس كنت افكر بموديل غرفة النوم ليه شكله كذا..,

زياد بمحبه\تبين اغيرها ابشري من عيوني قبل جيبي..,

عوق بخجل\لا با العكس حلوه وغريبه..,

زياد با استغراب \ كيف غريبه...!

عوق\كبيره بزياده غير الغرف العاديه..,

زياد\لا اصلن كبرها له حكايه..؟

انتي عارفه اسرة النوم المزدوجه عادة طولها مترين في مترين اقصى حد...

وبما ان زوجك الموقر متوسط الطول ..,

عوق بضحك\واضح صراحه لكن تعد ميزه ..!

زياد بتهكم \اما عاد ميزه الا بلشه وين الميزه فيه ..!

آردف زياد\ المهم طلبت انهم يخلون كبر السرير مترين ونص زياده علشان اخذ راحتي بماني صرت رجل متزوج

وفي شخص ثاني بيشاركني سريري ..,

ما فهموا علي بدال مايخلون الطول مترين ونص بس لا خلو الطول مترين ونص والعرض مترين ونص ..!

لما شفته اعجبتني الفكره وقلت خلاص كبروا كل ملحقات السرير علشان تتناسب مع بعض..,

واللون انا احب ها اللون لو تبين اغيره عادي ..,

الغرفه عليها ضمان عشر سنوات وانا توني مفصلها بعد الملكه..,

عوق\لا عادي اللون اصلن شكله فخم ويناسب مع اي مفرش مو مشكله

زياد منحرج\ عوق قريتي رسالتي..,

عوق تبتسم \ايوا...

زياد\متى تبين نطلع عمره..؟

عوق با ارتباك\بكرا وبا الكثير بعده..؟

زياد بتفهم\عوق انا ما اقدر اطول بأجازتي محتاجيني المستشفى كثير..,

مهنة الطب متعبه وتخصصي بزياده اضطر ادخل غرفةالعمليات با اليوم عدة مرات ..,

ومرات استدعى لحالات طارئه بغير وقت الدوام ..!!

عوق بتساءل \زياد انت ايش تخصصك ..!؟

زياد يضحك\تخصصي نساء وتوليد..,

عوق بدهشه \معقوله ..,

زياد بتهكم \ليش ..,

عوق با استغراب\ لابس توقعتك باطنه ..!

زياد يبتسم\ ليش جا في بالك كذا..,

عوق\ زوجة جزاع قالت لي..,

زياد\ الباطنه نواف ماهو انا..,

عوق\الحين انت ونواف زملاء..؟!

زياد\ نواف اصغر مني هو بعد الثانوي طلع لأمريكا وانا بعد بكالوريوس ..,

عوق\توقعته كبرك ..,

زياد\ لا انا اصغر من جزاع واكبر من نواف..,

زميلي جزاع وهو الي درس معاي طب على انه اكبر مني ..,

عوق با استفهام \ جزاع مهندس على حسب علمي..

زياد\جزاع دخل طب سنه وبعدهاحول هندسه ..,

عوق بتعجب \ليش طيب..؟!

زياد\لماطلعنا سنه ثانيه انهار ما قدر يستحمل..,

وقت التطبيق بمادة التشريح استفتحو له براس آدمي..!

طاح واغمى عليه واخذ فتره نفسيته تعبانه ..!

بعدين الطب ما كانت رغبته هذي رغبة اهله وحول بعدها هندسه ومشى وضعه..,

اردف زياد بضحك\ شكلك خفتي عادي كل طلبة الطب تمرهم ها الاشياء اناكرهت اللحم بسبب ها الماده والي الآن آكل اللحوم غصب

زيادبا استغراب\معقوله ما تدرين انه كان طب ...

عوق با انفعال واشمئزاز\وش دراني عنهم وش قالو لك فضوليه..!

زياد بضحك\طيب وش فيك عصبتي عادي بنات خواتي لما يجلسون اخبار الكره الارضيه كلها يتداولونها توقعتك مثلهم..!

عوق \الحين انت قضيت السنين الي فاتت با امريكا كلها بس دراسه..,

زياد \حصلت الماجستير والدكتوراه واخذت دورات هناك وتعينت فتره ولو ما امي وخواتي مارجعت ..,

بعدين ترى ماهو كلها با امريكا انا درست فتره با المانيا..,

عوق بدهشه واستغراب\المانيا ..,

زياد يضحك\وش فيك مستهينه با المانيا هذي تعتبر ثاني دوله با العالم من ناحية التطور بالمجال الطبي ..

عوق \لا ماهو قصد انا ماسمعت الا انك دارس با امريكا ..,

زيادبضحك\اكيد الي وصلك المعلومه اهل جزاع علشان نواف كان معي بفترة دراسته هناك..,

عوق تبتسم \صحيح انت تعرف عيال عبد الرزاق من زمان..,

زياد بتهكم\ كل ها الاسئله ولا انتي فضوليه اعرفهم من ايام المدرسه واحنا صغار..,

واثنيهم اعتبرهم مثل اخواني جزاع خوذي منه ضحك وناسه اذا جلست معه تنسى همومك ..,

ونواف حبيب ومظلوم مع الناس ..,

عوق با استنكار \ وش معنى..!؟

زياد \نواف الي مايعرفه يقول شايف نفسه والا هو والله ملك واخلاقه توب وسهل التعامل معاه ..,

عوق\ما اعرف الا عايلة عمي مسلط ..,

زياد\طيب انتي ماعرفت تخصصك ..؟

عوق \ بما انك عطيتني شرح مفصل عن دراستك اكيد تبي مني تفاصيل..,

زياد يضحك بتهكم\اكيد بما انا في مرحلة تعرف على بعض ..!

عوق تبتسم\ ببساطه خريجة لغه عربيه تخرجت بتقدير جيد جدآقدمت على وظيفه جا تعييني بمنطقه بعيده ورفضته..,

درست سنه في مدرسه اهليه وتركتها..,

زياد \ليش تركتيها...,

عوق بقهر\تعب مو طبيعي والراتب ما يشجع..,

قدمت ماجستير قلت اشغل فراغي..,

خلصت السنه التحضيريه ..,

واجلت خفت ما افلح..,

زيادبممازحه \والله يا انك صريحه اجل خفتي ما تفلحين لو غيرك كان جابت الف سبب انها ما قدرت تكمل الا ان الدراسه صعبه عليها..!!

عوق تبتسم\رحم الله امرءعرف قدر نفسه..,

زياد\ شوفي عوق تبين تكملين ما عندي مانع بغض النظر عن الشرط الي بينا..,

عوق بمصارحه\لا ماهو قصد لكن انا ماني راعية دراسه حفظي شوي صعب ..,

زيادبضحك\ رجعنا نحطم مجاديفنا..,

لو مثل ما تقولين حفظك صعب كيف حافظه القرآن على حسب ما سمعت ..,

عوق با امتنان \ الحمدلله من فضل ربي حافظه القرآن لكن فرق عن الدروس القرآن ربي ميسر حفظه..,

اردفت عوق \نامت امك..,

زياد\اخذت علاجها ونامت..,

عوق بتساءل \امس كنت بتعلمني ليش بنات خالتك يفتشون عليك هم وبناتهم..,

زياد\ السالفه طويله تسمعينها والا فيك نوم..,

عوق تبتسم\لا عادي اسمع واذا جاني النوم نمت..,

تبدى من عند امي العنود..,

امي العنود وخالتي موضي الله يرحمها هم الي ربوني بينهم ..,

امي كانت متزوجه واحد من اقاربها..؟!!
.
.
.
(كلمه اخيره)


سمعت محآضره گانت تتگلم عن
[القنوت] وشلون نگون من [القانتين]
للدگتور / خالد الجبير
ماتصورت ان الأمر مررره بسيط
والله مايستغرق أگثر من (عشر دقايق)
الا وأنتو خالصين !
تدرون وشلووون نصير من القانتين
مثل ماقال الد گتور خالد الجبير
بأحد المحاضرات~
يقول لماتقرا باليوم( 100) آيه أوأگثر
يومياَ تگون من( القانتين)
بقولگم على طريقه سهله تخلينامن القانتين
اللّي لهم اجر عظيم والّلي ذكرها الدكتور
بمحاضرته
(1)
اقرا آيه الكرسي اعظم ايه بالقران
عدد اياتها 1
(2)
سوره الملك المانعه من عذاب القبر عدد اياتها 30
(3)
سوره السجده وهي تغيض الشيطان عدد اياتها 30
(4)
سوره الاخلاص وهي تعدل ثلث القران
عدد آياتها 4
(احسبوا لحد الان صار المجموع65ايه ))
نگمل،،
(5)
سوره الفلق عدد آياتها 5
(6)
سوره الناس عدد آياتها 6
(7)
سوره القارعه عدد اياتها 11
(8)
سوره التكاثر عدد اياتها 11
(9)
احسبوا هنا وصلنا 110ايه
بگل سهوووله
قبل النوم كل يووم ماتاخذ حول 10دقايق
{فوائدهاإ}
اولا: يكتب عند الله انه من القانتين
ثانيا:- اتباع سنه الرسول عليه الصلاه والسلام
ثالثاً :- لايكتب من الغافلين
رابعا:- تشفع له سوره تبارك وتمنعه من عذاب القبر
خامسا:- يتضايق الشيطان من سوره السجده
لانه يقول امر الله عبدي فسجد وامرني ربي ولم اسجد..
سادسا:- يأخذ أجر ثلث القران واجر ربع القران
سابعا:- سوره الاخلاص قراءتها من اسباب حب الله تخيلوا وانتم كل يوم تقرونها..
ثامنا:- اذا قرأت هذا بالبيت لايقربك الشيطان باذن الله
تاسعا:- تاخذ ستين الف حسنه والحسنه تضاعف
عاشراً:- انت بحرز من الجن
احدى عشر:- سيكون القران نور لك بالأرض وذخر لك بالسماء
بعد گل هذي الفوائد وشرايگم نعزم
گل يوم قبل ماننام نگون من القانتين
(وعسئ اللّ?ٌ يكتبنآ من القانتين )

.
.
.

الي الملتقى قريبآبأذن الله

وسالفه جديده


طيف الأحباب

ام الوليد


تذكروني واحبابي بدعوه طيبه

[جرح الذات]

بسم الله الرحمن الرحيم


هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

مثل ما قلت انا الروايه خالصه ومنتهيه احداثها عندي من فتره طويله..,

لكن تقسيم البارتات هوالي اشتغل عليه قبل كل بارت..

ولا ابي انزلها مره وحده لأني حابه اتواصل معاكم واشوف ردودكم واعطي كل وحده حقها با الرد..,

بما انها استقطعت من وقتها قراءه واتبعتها رد..

فمن حقها علي اني اردعليها ما اقدر انزل اكثر من بارتين با الاسبوع ..,

الي اعجبتها الروايه فهذا من فضل ربي والي ما اعجبتها الناس اذواق ..,

الي خايفه تابع معانا وما تكتمل الروايه تنتظر لنهايه.

كثير كنت اتمنى اشوف انطباعهم ولو برد واحد يكفيني ..

لكن ماكل ما يتمناه المرء يدركه يكفيني عدد المشاهدات..,

ولهم بدال العذر اعذار..,

البارت اهداء لكل العابرين من هنا من دون استثناء..,

واهداء خاص خاااااااص للغاليه امووله..,

اليوم بنشوف الليله السرمديه الي وعدتكم فيها..,

البارت هذا من البارتات الي بجد اتعب نفسيتي با الكتابه يمكن يعجبكم ويمكن

تقولون طيف ماعندها سالفه وتبالغ ..؟؟!!

اليوم عوق المزايين بتعرف حقيقة زياد وهل هو لقيط فعلن اولا وبنشوف ردة فعلها..,

يا الله تعالوا معاي...!!

وسالفه جديدة؛
.
.
البارت التاسع عشر
.
.
زياد\ السالفه طويله تسمعينها والا فيك نوم..,

عوق تبتسم \لا عادي اسمع واذا جاني النوم نمت..,

تبدى من عند امي العنود..,

امي العنود وخالتي موضي هم الي ربوني بينهم ..,

امي كانت متزوجه واحد من اقاربها..؟!!

وكل ما ولدت طفل توفى مع الولاده او ينزل ميت وتحمل بعده وتولد ويموت وسنوات هذا حالها ...

والمشكله انها تولدهم على التاسع ..,

هم شخصوهابينهم انها التابعه ولا حول ولا قوة الا بالله لكن علميآ اكيدغير..,

ينزل الطفل ويختنق ويموت او تنفصل عنه المشيمه اوالحبل السري يلتف على رقبته واسباب كثيره ..!

وفي ذاك الوقت كان الطب بدائي مافي تطور والولادات اكثرها تتم في البيوت..

والا لو الحين بمشيئةالله بيكون في حلول..!

ابوي مساعد الله يرحمه كان كداد بعد داومه يطلع بسيارته يكد مثل ما يقولون يترزق الله..,

امي العنودكانت توها والده ومتوفي طفلهم وابوي كان مره متضايق على طفله الي مات..,

اخذ ناس مشوار لجده يمكن الطريق يخفف ضيقته بفقدان طفله ..,

ولما وصل الركاب مشوارهم شاور نفسه انه يزور بيت الله وياخذ عمره بماانه قريب من مكه..,

اعتمر ورجع لرياض وهوراجع كان الوقت ليل يقول وقفت سيارتي بااقضي حاجه وقبل انزل من سيارتي..!

الا اشوف كرتون على يمين الخط مبعدينه عن الأسفلت مسافه شوي يعني مايشوفه بالظلام الا الي يوقف

ومجتمعه عليها كلاب البر وتنبح تهيئ لي اني اسمع صوت صياح طفل مع نبح الكلاب..,

قلبي اوجعني من شوفة الكرتون واكبس النور على الكرتون

واتعوذ من الشيطان وانزل بعصى غليظه دايم معي بسيارتي ..,

واطرد الكلاب واناظر با الكرتون الا طفل ملفوف بقميص بدله رجالي

ومرمي عليه قماش تلبيسة سياره غرقان دم..!

ابوي توقع ان الطفل حديث ولاده من صوت صياحه..

و لما رفع الكرتون وكشف عن الطفل لقى السره ماهي مقطوعه كويس ودم الولاده ملطخ جسم الطفل..,

وعلى طول اخذ الكرتون وللمستشفى حققوامعاه

وكان اكثر شي نفع ابوي هواختلاف لون البشره بيني وبينه والاكان راح يدخل في مشاكل..,

كنت في حالة خطره لأني تقريبآ من لحظة ولادتي تخلصوا مني على طول وشكلي مولود داخل سياره..!

لأن المكان بعيد ومقطعه قليل السيارات تمرفيه الا المسافرين لأماكن بعيده..

حتى ابوي يقول لو ماكان الوقت ليل يمكن شفت الي رموا الكرتون الي فيه الطفل

لأني لمحت سياره وفيها شخصين او ثلاث واقفه على يمين الخط الثاني ..؟!

الوقت ليل وارعبني نبح الكلاب واربشني صياح الطفل اخذته ومشيت ..,

والسيارةالي كانت واقفه شكلهاتنتظر مصير الطفل شفتها مشت عكس طريقي..!

كانوا يراقبوني وش اسوي اكيد عارفين وش با الكرتون..,

اتوقع انهم هم الي رموا الطفل ينتظرون احد ياخذه من المسافرين والا كلاب البر تاكلة..,

او ان الحرمه الوالده كانت معاهم تعبانه وأخرتهم لايمشون بسرعه ..,

زياد بتأثر\عوق ليش ها الدموع ترى خلاص ماراح اكملك اذا بتبكين..,

عوق من بين دموعها\لا عادي كمل بسمع بقية الملحمه...!

زياديبتسم ويبلع غصه\اما عليك مصطلحات ..!

اردف زياد بحزن\ابوي يوم لقاني امي كانت والده من يومين

طفلها متوفي ومريضه وتعبانه نفسيتها على طفلها الي مات..,

الجيران وزملاءابوي بعمله عارفين بحالة ابوي وامي وفقدهم لأطفالهم والكل متعاطف معاهم..,

يعني من جهه انسانيآ ومن جهه ثانيه امي وابوي ناس طيبين وفي حالهم

ويقدرونهم جيرانهم ومعارفهم..,

ابوي خبر هم انه لقى طفل لقيط وهو يوصل ناس مشوار..,

والطفل تعبان احتمال يعيش والاغلب انه يموت وشرح لهم كل الي شافه..,

كثير اقترحوا عليه قالوا اذا عاش اللقيط اكفله انت وزوجتك ..!

يمكن ربي يعوضكم فيه وخصوص ان زوجتك توها والده ترضعه ويصير محرم لكم وكأنه ولدكم..!

او يمكن زي ما يقولون تفك عن امي التابعه الي تذبح مواليدها ويعيش لها اطفال..!

ابوي كان مترددلكن امي اصرت الا تكفلني..,

وراجعوا المستشفى و ما طولت متنوم في المستشفى اقل من اسبوع..!

لأنه لما احضرني ابوي للمستشفى كانوا حاطين وقت تقريبي لولادتي حوالي خمس ساعات وتلاحقوا وضعي

وفعلن لما لقاني ابوي كان عمري اقل من نصف ساعه

ومع مسافة الطريق كانت اكثر من اربع ساعات ونص حتى وصل للمستشفى..!

خالتي موضي كانت تخبرني ان امي وهي توها والده

ماتترك ابوي يراجع با اوراقي با الحاله تحس انه ماراح يكون حريص مثلها

تركب معاه واذا في ورقه تعسر مرورها تقعد تبكي وتهاوش حتى تخلص المعاملةبدموعها..

واصلوا ليلهم ونهارهم مراجعات علشان ياخذوني ..!

ومره في مسؤل كبير عقد الموضوع ورفض الواسطات ما رضى انهم يكفلوني علشان لون البشره مختلف..!

ايش تتوقعين امي سوت..!

عوق خانقتها العبره \ما ادري وش سوت ..!

زياديتنهد ويبتسم بوجع \سألت عن بيت المسؤل ودخلت على عايلته هي وخالتي موضي..

وكان يوم مشهود في بيت ذاك المسؤل قعدت تبكي عندهم..,

لدرجة انها طلعت صدرها قدام زوجة المسؤل وعايلته وهويصب حليب قدامهم ..,

وتصيح وتضرب صدرها كأنها تشحذهم وتستجديهم ولدها الي من بطنها ماخذينه منها ..,

تقول ارحموني توني دافنه مولود..,

احسنوا علي بها اللقيط الله يحسن عليكم قبل يجف حليبي يمكن ينفعني ربي فيه ان كفلته وارضعته...,

وفعلن مامر كم ساعه الا المسؤل بنفسه خلص اوراقي..,

وارسل على ابوي مساعد وقال له وهو يبكي سلم على ام زيادوقلها تجي تاخذ ولدها..,

والله لو كانت امه ماسوت الي سوته ..,

كانت بتسميني عبدالوهاب لأن هالاسم الكل يناديها فيه لكن لمسؤل سماني زياد..!

وقال لأمي يوم قالت ابغى اسم عبد الوهاب ..!

ان شاء الله يوهبك الوهاب عبد الوهاب واليتيم هذا زيادة الخير خيرين..

وارضعتني صدرها بدال الطفل الي مات ..,

ماكانت ترضعني مثل الامهات وهي جالسه او منسدحه لا..!!

ترضعني وهي واقفه تقول اخاف يجيني النوم وانا ارضعه ويصير له شي..,

ولا تجلس حتى اشبع وتنومني ..,

و دايم تغني لي وهبك الوهاب لأم عبد الوهاب..

اردف زياد با الم \انا قلت لك ها الكلام بغيتك تعرفين كيف عانت امي حتى اكفلتني ..,

ولاتفكرين بيوم تحطين نفسك بموقع مقارنه لأنها بتكون هي الفايزه بدون تردد او نقاش..

عوق بمراره \طيب كيف بنات خالتك صارو خواتك..,

زياد\خالتي موضي ولدت ناجي بعدشهرين من كفالتي وطلبتها امي ترضعني علشان اصير محرم للكل..,

اردف زياد وهو يبتسم بوجع\ارضعتني لأنهم خافوا على امي من شدة تعلقها بي تصير بعدين مشاكل بينا وبينهم بسببي..,

وفعلن ارضعتني خالتي وصرت اخو لعيالها انا الي يخبرني بها الاحداث خالتي موضي بنفسها وزوجهاعمي خليل ..

هم كان قصدهم يشرحون كيف عانت امي علشان تكفلني واتعلق فيها..,

خالتي موضي وعمي خليل كل ما خبروني سالفه...!

تشوفيني عندهم ساكت واضحك على تعليقاتهم واخذ وعطي معاهم ..

ولما اطلع من عندهم شعور يجتاحني يخليني اتخبى بمكان محد يشوفني فيه وابكي بحرقه..,

وارجع احب امي العنود وابوي مساعد اكثر واكثرواتعلق فيهم..

والا امي وابوي عمرهم ما فتحوا معاي هالسيره..

يخافون على مشاعري انهم لقوني بها الطريقه الغير انسانية..

اويمكن يجي في بالي اني اتركهم فتشوفينهم لو بيدهم سكروا اذاني علشان ما اسمع كلام يجرحني ..!

امي وابوي كفلوني وهم كبار با السن امي كان عمرها بمنتصف الاربعينات وابوي اكبر منها ..,

بعدما كفلوني امي ماحملت تقدم فيها السن خلاص واكتفت فيني..,

كبرت بين العايلتين ولا حسيت الا انهم اهلي توفى ابوي مساعدالله يرحمه وانا ادرس با الكليه..!

وترك فراغ كبير بحياتي فقدت الاب الحنون العطوف ..,

اذكره يوم كان ياخذني للمسجد والا للمدرسه شايلني على رقبته..؟!

ويقول بكرا ولدي يشيلني مثل ما شلته..!

زياد يتنهد بمراره\راح قبل اشيله مثل ماشالني لكن ان شاء الله تتعوض با امي ..,

عمي خليل توفى بعد ابوي بسنه وخالتي بعده بفتره قصيره..,

خالتي على انها ارضعتني لكن كانت هي وزوجها عمي خليل يقولون...

انت امك العنود وابوك مساعدواحنا خالتك وعمك..,

عمي خليل وخالتي كانوا خفيفين دم..

يقولون لأبوي وش دعيت يامساعد بعمرتك الي جابت لنا زياد من افواه وحوش البر..,

الله يقدرني وابر امي العنود واكون عون لبنات خالتي موضي واخو لناجي ..

عوق بوجع وقهر\سبحان الله الحين انت وش اسمك الكامل..,

زياد يبتسم\ليه..!

عوق با اصرار\ لاابي اعرف وش اختاروا لك اسم...!

زياد بدهشه\اسمي زياد عبد الله محمد عبد اللطيف..

عوق بمراره\وانا تعرف اسمي ..!

زياد يضحك\ايه اعرفه والا نسيتي انك زوجتي..

واردف با ابتسامه\ وابيك تخبريني كيف لقتك امك والا طلبتك من دار الرعايه عادي..!

عوق تقاطعه بتهكم \بتعرف لكن علمني وش اسمي..,

زيادبترقب \اسمك عوق عبد الله عبد الملك احمد..

واضحك ضحك هستيري حتى زياد استغرب من ضحكي..,

ويمسكني مع ايديني وش فيك عوق وش ها الضحك..

وانقلب ضحكي بكى ما ادري وش جاني ماني عارفه افسر الشعور الي صارلي ذاك اليوم..!!!

عوق ببكى مرير\ زياد اسمي واسمك اسامي شايعه ومصففه..!

الحمدلله ما تصادف ان اسمي نفس اسمك والا يحسبونا اخوان ..؟؟!!!

جابونا اهلنا ورمونا والي عاش مناالجهات المسؤله عن رعاية الايتام لزقوا له كم اسم يعيش فيه بين الناس

لكن مافكروا كيف بنعيش والا كيف بتكون حياتنا..!

وفي منا الي اكفلوهم ناس فيهم خير وفي الي للحين بدار الرعايه..,

ويكبرون وينولد غيرهم نفس الحكايه و نفس السيناريو مافي احد يتعظ ..,

والي تحاول تجهضه امه هي تموت وهو يعيش او يموتون الاثنين..!

والي يموت مننا يستخسرون اهله حتى يدفنونه ..؟!!

تخيل عظم الجريمه اعماهم ربي حتى عن الدفن الي هو حق من حقوق الميت..!

يغلطون ويرمونا كأنا حيوانات كم مره با الجرايد..

موضوع موجود فيه عثر على طفل لقيط متوفي على قارعة الطريق..,

حرمو الطفل الي ماله ذنب من حق انه يدفن بعد موته مثل ما حرموه من حق النسب في حياته..,

زياد بدهشه\عوق وش فيك اعو ذبالله ليتني ما فتحت معك الموضوع...!

عوق تبكي بمراره\هذي الحقيقه زياد ليش نتجاهلها احنا عاله على المجتمع..!

من قبل نخرج لدنيا واهلنا يحاربونا يبون يتخلصون منا ..!

واخرتها محذوفين بكرتون والا بكيس قمامه وينسون ها اللقيط ..,

عوق تضحك بمراره\تدري زيادان اللقيط هو شاهد الاثبات الوحيد الي ما في احد يبي يسمع شهادته..,

سواء الجاني او المجني عليه...ّ!

تصور ان احنا الوحيدين الي اهلنا يفرحون بموتنا اكثر من حياتنا..,

ولا يختارون لنا اسمائنا...

[جرح الذات]

عوق بتهكم موجع\اصلن من سابع المستحيلات انا نتشرف ان نسمى على اجدادنا او اقاربنا..,

او حتى ال التعريف يلحق با اسمنا الاخير مثل العالم والناس..,

انت ربي سخر لك مساعد وانقذك ..!

والا كم واحد غيرك بنفس وضعك اكلت وجهه الكلاب شمت ريحة دمه والا سمعت صوته يصيح

لقته محذوف بجنب طريق صحراوي والا بين مزابل بعيده...,

لأن امه الحانيه الرءومه ابعدته عن العمران ورمته ..,

تدري ليش ...!

عوق تجهش با البكى \ انا اقولك علشان مافي احد يسمع صوته اذا فتكت فيك الضواري وينقذه..,

تخيل زياد لو ما امك وامي كفلونا كيف بيكون وضعنا ..؟؟!!

لو اكفلتنا اسر مستهتره يهملونا ونكون عرضه لتحرشات وضياع اكثر من مصيبة كونا لقطاء..,

تتوقع انت بتصير دكتور والا انا بكمل واخذ شهاده ويكرمني ربي بحفظ القرآن..!

تصور لو انك عشت في دار الرعايه وخصوص انك ولد ومرحله عمريه معينه وينقلونك لمكان ثاني

الي يشرفون على تربيتة رجال وتتربى على حزم الرجل وشدته ..

يعني محروم من الحنان الي تتميز فيه الانثى وتعطيه اطفالها تخيل كيف بيكون قلبك قاسي ..,

عوق تمسح دموعهابكمهاوتحاول تضبط اعصابها\مره حاولت ازور دار الايتام بعد ما عرفت اني لقيطه...!

يمكن احب الحياه ابي اي شي يعلقني با الحياه يخليني اتقبل نفسي على الاقل ..

او من باب من شاف بلاوي الناس هانت عليه بلوته..,

لأني صدمتي من كوني لقيطه افقدتني طعم الحياه خلتني اشوف نفسي شي مقززومستقذر...!

يا ما حاولت اذبح نفسي لكن اتراجع با اللحظه الاخيره..؟!

دخلت شفت بعيون الا طفال الانكسار وحياه جماعيه مافي خصوصيه..!

كل عدة اطفال ينامون بغرفه وحده..,

والعاملات هناك فيهم الحنونه وفيهم القاسيه وفيهم الجامده بدون مشاعر..!

تدري كنت اتكلم مع وحده من الاخصائيات..!؟

تقول احنا هنا نعاني اكثر شي من الطفل الذكي الي يتعبنا بكثر اسألته..!؟

ليش ماعندي ماما وبابا..؟!

ليش اسمي كذا ليش ماعندي اخوان يشبهوني..؟!

انت عارف ان بعض الاطفال يعاقبون على مثل ها الاسئله..!

الاسئله هذي الي كل ام واب ينتظرون اطفالهم يشاكسونهم ويجاوبون عليها وهم فرحانين..!

واذا كبرو اهلهم يتذكرون ها السوالف وهم يتمنون يستيعدون ها الذكريات

اللقطاء غير يعاقبون عليها معاقبه ما تتوقع كيف..؟!

اطفال يغلطون ويشاكسون ويخربون ويكسرون مثل غيرهم من الاطفال..!

انت عارف من وسائل التأديب لهم قطع المصروف عنهم فتره..؟!

طيب من وين بياخذون مصروف لا ام تحن وترحمهم ولا اب يعطف ويعوضهم..؟!

اوامر وتنفذ عليهم واساليب تربويه يعمل بها حرفيآ اوقات كثيره بدون تدخل المشاعر..؟!

عوق تشاهق \احنا يا زياد ذنوب غيرنا نمشي على الارض..!

ذيب وضحيه التقوا بغياب الرقيب والنتيجه اطفال يدفعون ثمن نزوة غيرهم الي ما اخذت خمس دقايق..

تخيل زياد نزوة دقايق بين حقيرين تجني على كائن بشري ..,

من ينولد لحد مايموت وهو بعذاب وحياته سواد بسواد سواء عاش يوم والا مية سنه..,

زياد بغضب\عوق خلاص اسكتي فضحتينا صوتك لا يرتفع..!

عوق بتهكم\ليش في شي غلط بكلامي ياليت امي ذبحتني يوم طلعت لدنيا..!

زيادبحده\عوق انتي ما انتي طبيعيه الليله ...!

اردف زياد بحده وتهديد\ والله ما يحصل لك طيب لو دق الباب والا جوالي احد يسأل وش صاير..

انتي شكلك مضغوطه من شي خلاص عبرتي عن شعورك اسكتي..!!؟

عوق تضحك بتهكم \ اسكت بالله معجبك حياتك..,

زياد بتأكيد\ايه معجبتني انا متصالح مع نفسي وراضي بقدر ربي لي..,

والله ماهو ذنبي اني لقيط اكيد ان الي جابوني اخذو جزائهم با الدنيا وبالآخره لهم عند الله حساب وعقاب ...!

وانا الله عوضني با اهل متأكد انهم احن علي من اهلي الحقيقيين ...,

انا ما انكر انه مرتني لحظات ضعف وتمنيت ان لي اهل من لحمي ودمي وادري انه مستحيل تتحقق ها الامنيه..!

لكن تغلبت مع الايام على ها المشاعر..؟!

ولو بيطلعون الآن اهلي ويخيروني بينهم وبين امي العنود اكيد با اختار امي العنود بدون تردد..!

حتى لو كان الثمن الاعتراف اني ولد شرعي..؟!

عوق بسخريه \يعني تبي تقنعني انك ما تتنمى انك ولد شرعي ..,

زياد بحده\اناكبرت على اني اعيش با الخيال امي العنود وبس هي امي وابوي واهلي وناسي ..,

تدرين لو تطلب عضو من اعضائي اعطيها وانا فرحان وبكون ممنون انها شرفتني بها الطلب ..,

لأن الام هي الي تربي ماهي الي تولد وترمي وغيرها يربي بأي شكل من الاشكال..!

اهلي الي جابوني ورموني بوقف قدام رب العالمين يوم تجتمع الخصوم واخذ حقي منهم..,

والا في الدنيا استغنيت عنهم من يوم العنود ضمتني وارضعتني صدرها..,

عوق بمراره\يا حظك بنفسك يا زياد اذا فعلن هذي افكارك بصراحه اشك انك تقول الحقيقه ..,

زياد با استنكار\عوق والله فيكي شي وشي خطير وش الي قلب حالك ..!

عوق بحزن\ما قلب حالي شي بس انت معيش نفسك بوهم وكل شي واضح قدامك..؟!

زياد بتعجب\واضح وش الي واضح..!!!؟

عوق با استهزاءوسخريه لاذعة\الي واضح ملامحك ماتوحي ابدآحتى انك سعودي ..!

الا احلف بعد انك ما انتي عربي اصلن ويمكن بعد اهلك ماهم مسلمين..,

او امك اجنبيه ضحك عليها احدومن ويوم انولدت تخلصو هي واهلها منك بها الطريقه البشعه..!

رحمك ربي وصرت سعودي لأنك انولدت هنا ولقاك مساعد محذوف بذاك المكان المهجور قبل تاكلك الكلاب..,

سحبت زياد مع ايده للمرايه..,

عوق بقهر وحسره وتهكم \يا اخي اذا انت مغمض فتح وشف وجهك با المرايه وانت تعرف صدق كلامي يا سعودي ...!

يشهد عليك ملامح وجهك وتكوين جسمك ان دمك ماهو حتى عربي..,

لوما قلت ان لقوك توك مولود كان قلت هذا ولد اجانب جايين يشتغلون هنا وضيعوه..,

عند اخر كلمه ماحسيت الا بلي نفض يده من يدي و دفعني يبعدني عن طريقه وطحت على الارض...!

اسمع صوت تسكيرة الباب الي هزت جدران الغرفه..!

اول مره انهار في حياتي ومن قدامه قدام زياد الي ما كملت معاه اسبوع..!

واقعد ابكي بكا سنين عمري ال25...

ونمت وانا ابكي وصحيت الفجر ما شفت زياد..

ورجعت نمت صحيت على الساعه عشر..

قعدت اراجع كلامي تحسفت اني انفجرت في وجه زياد طيب وش ذنبه..,

وش الفايده من كل كلامي الي قلته غير تقليب المواجع انا ليش قلت كذا..!

والا تفكرين ياعوق الاسم الرنان لعيالتك خلاك تتحسفين انك تزوجتي رجل مجهول النسب

هو بعد يمكن عايلته اكبر من عايلتك وابتلو بعرضهم..,

يا بنت الاصل والفصل ناسية انتي مين ..؟!!

انتي عوق اللقيطه الي كان المفروض نهايتك بحبوب تجهضك والا بعملية تنظيف عنداي دكتور

والا حتى عشبه عطوها امك وسقطتك ماهو مهم بأي طريقه المهم انه ما يكون لك وجود

الحين يا عوق وش تبين عمرك 25سنه وامك 92سنه الايام تمشي بتوقفين الزمن

وهذي امك قدام عيونك مريضه يعصرها المرض عصر لكن تصبر علشانتس ماهي راضيه حتى تروح لمستشفى

انصمختي وانعميتي عن حقيقتك..!!

عار وشنار على حموله كامله لو يتعرف عليتس احد..,

زياد مسكين ضحيه مثله مثلي با اختلاف ظروفنا نظل مجهولين نسب هو صادق اناما كنت طبيعيه...!

ويعني واذا قلت له الكلام الي قلته والاملامحك والادمك ماانت سعودي وش بيغير بحياته وحياتي

اكيد قالوها له غيري كثير وش غيرو في حياته لقى اهله والا تغير وضعه ..,

يمكن الي خلاني انفجر اني فعلن فقدت امي اواني ما لقيت احد مثل وضعي اشكي له...!

وكبت السنين الماضيه لقى له منفذوثرت مثل البركان..!

الحمدلله الي ما ناقشني زياد واخذ وعطى معاي يمكن انهبلت وعلمته طريق ..

ياربي هو وش بيسوي الحين بيرميني على امي والا يتركني شفقه على حالي..!

ان رجعت لأمي اكيد اما انها تهيني وترجعني اوانها تتعب ويصير لها شي وهي خلقه تعبانه وش الحل ياربي..!

ياليتني اصلي واطلب ربي يدبرني..!

[جرح الذات]

نزلت تحت يمكن اشوف زياد..

مالقيته سألت الخادمه قالت انه افطر وطلع من الصباح..

افطرت وانا مالي نفس بس ابي شي يسد جوعي..,

دخلت على خالتي ام زياد لقيتها نايمه طلعت لغرفتي

ياربي وش اسوي مالي حتى نفس ارتب شي ...!

كل تخطيطاتي امس لغرفتي طارت با الهوى ما صار لي نفس اسوي شي ابدآ ..!

لا حول ولاقوة الا بالله هذا وين راح اظلم الليل ولا رجع..!

توقعت يجي يغير ملابسه ماله اثر ...!

نزلت تحت شغلت التلفزيون كل شي ممل ..؟!

دخلت غرفة الشغاله الي تحت وسألتها زياد اليوم رجع

قالت ايوااخذ ملابس جديده و اخذ بالطوا دوام وطلع ..!

معقوله يروح ويرجع على البيت لكن ما يطلع فوق..!

يطلع فوق وش يطلع له يشوف وحده معقده مثلتس سوالفها تجيب الهم والغم

ياربي دخيلك انا وش سويت بنفسي وش عذري عند امي ان رجعت لهااليوم والا بكره

صعدت لغرفتي برتبها بضيع الطفش وانسى التفكير الي شوي والا يجنني ..,

بديت فيها شغل من بعد صلاة العشا وانا مندمجه بشغلي ما سمعت الا اذ ن الفجر..؟!

كل شي رتبته لبسي ولبس زياد رتبت السرير والتسريحه حتى الارضيات والحمام مسحتهم ورتبتهم..!

حسيت ان جناحي صار شكل ثاني ..؟!

لكن لو طلع الحين زيادوقال يا الله لمي عفشك وش بسوي..؟!

يروح تعب الليل كله با الترتيب...!

يعني ياعوق همك تعب ايديك ولا فكرتي بالناس الي بتطلع عليك اشاعات من كل حدب وصوب..!

ووصايا امي لي كلها راحت با الهوا ياخسارة تربيتس يا الوضيح الظاهر كنتي تنفخين بقربه مشقوقه..,

ما شفت شقها الا يوم صرت با الحالي واعتمدت على نفسي..,

باخذ لي دش الحمدلله اليوم اول صلاتي في بيت زياد واطلب ربي..!

فرشت سجادتي وصليت الفجر..,

ودعيت ربي ((اللهم إني أعوذ بك من جهد البلاء ودرك الشقاء وسوء القضاء وشماتة الأعداء,

اللهم اني اسئلك باسمك الحبيب الكافي ان تكفيني كل اموري مع زوجي مما يشوش خاطري ويسهر ناظري ,

اللهم الف بين قلبي وقلبه كما الفت بين قلوب عبادك اللهم اصلح بيننا,

واكشف عنا ضرنا مسنا انت اعلم به منا اللهم انا نسألك رحمتك ,

اللهم انا نشكو اليك ضعف حالنا وقلة حيلتنا وهواننا على الناس,

اللهم ان الم يكن بك غضب علينا فلا نبالي غير أن عافيتك هي أوسع لنا))

يمكن الي صار فيني عقوبه هاجره كتاب ربي من كم يوم ..

ولا حصنت نفسي من ليلة عرسي ..,

قريت وردي واذكاري وخلصتها..,

ناظرت جوالي يمكن لعل وعسى زياد مرسل رساله لو عتاب اهم شي يعبرني ..!

ما لقيت شي رجعت نمت..,

صحيت على دق الباب..؟!

كانت الشغاله تقول مدام الحين بيطلعون عمال لا تطلعين..!

رجعت نمت وصحيت على ازعاج وصوت سحب..!

صحصحت من النوم وصليت الضحى ..,

توقعت ان زيادبأي لحظه بيفتح الباب ويدخل غرفتي وخاب ظني ..

بعدها هدا الصوت انتظرت حتى اختفى الصوت..

فتحت باب غرفتي وانا لابسه جلالي خفت اصادف احد غريب

كان المكان فاضي مافي احد...!؟

وطلعت اشوف سبب الاصوات لقيت غرفة الاشباح مفتوحه...!

الشغاله تنظفها بعد ما العمال ركبوا الستاير..؟!

وجابوا الكنب لها حتى التلفزيون وباقي لوحات حددت مكانها امس كملو تركيبها ..؟!

سألت الشغاله وين زيادقالت طلع مع العمال ...

يا الله يا زياد الي ها الدرجه حاقرني ..؟

الصباح مرسل الشغاله تخبرني ان فيه عمال ما تبي تشوف وجهي ..,

نزلت تحت بفطر اليوم الاثنين ليتني نويت اصوم من زمان ما صمت..,

افطرت ودخلت لغرفة خالتي ام زياد...

لقيتها صاحيه سولفت معاها شوي وطلعت لجناحي

جلست اقرا قرآن قبل صلاة الظهر اذن وصليت...,

قررت انزل اصلح غدا يمكن اشوف زياد صلحت الغدا وطلعت اخذ شور عن ريحة الاكل والبس..,

كشخت من الخاطر حتى شعري الي كنت اتحاشى ان زياد يشوفه فكيته و خليته على طوله..,

يمكن اذا شافني زياد كاشخه يحن شوي علي ويرضى..,

بشوف تعليماتس ياريم اليوم يجي منها فود اولا..,

يوم تقولين اذا زعل جزاع من يوم يشوفني كاشخه يطيح مابراسه ..,

شباك غرفة الاشباح كبير وعلى طول يطل على الحوش رحت بشوف سيارة زياد موجوده فتحت الشباك..,

وماجات عيني الا بعين زياد الي توه نازل من سيارته وكأنه ينتظر بس متى افتح الشباك..,

عيونه بغت تاكلني حسيت فيها تهديد..,

ياربي زاد الطين بله وش اسوي لكن ما فيه الا المواجهه والي يصير يصير..؟!

شيكت على شكلي ورشيت عطر نزلت تحت ما شفت زياد,

سألت الشغاله وينه..؟!

قالت بغرفة ماما كبير..,

جهزت الغدا ورتبته على طاولة الطعام ومشيت لغرفة خالتي..!؟

عطري يسبقني وقلبي يرقع من موقف البارحه وكمله اليوم..؟!

عوق بهدوء\زياد الغدا جاهز با المقلط..!

مارد علي ولا حتى ناظرني..

رجعت للمقلط وطولت جالسه بعدها سمعت حركه احد جاي للمقلط يارب زياد..,

ماخاب ظني كان هو..!

الحمدلله اكيد اعجبه شكلي ولحقني

يا بعد قلبي يارويمه انتي ونصايحتس ..,

جلس على كرسي قريب مني بدون ما يناظر وجهي..,

زيادبحده وهوخافض صوته \اسمعي يا بنت الناس ها العايله الي معتبريني ولدهم طول عمرهم ناس مستورين..ّ!

ما عمر احد نقدهم ولا شكك با اخلاقهم..,

تفتح الشبابيك ماهو لهم ولاتخلينه لك طبع ..,

بنات خواتي عورات ولهم سمعتهم..,

لو مر احد ولمحك مع الشباك ماراح يعرف انه انتي..!

ماراح يقولون الا بنات ساري والا بنيان وهذا الي انا ما ارضاه لبنات عايله ضفتني واعتبرتني فرد من افرادها ..!

استري علينا الله يستر عليك..!

جمدت في محلي من قو كلامه ماعرفت ارد عليه بشي بس دنقت ودموعي ملت حظني بدون شعور..!

زياد قام ولا حتى ناظر للي طبخته ولا شده شكلي ولا لبسي...,

قمت لغرفتي مكسوره ومقهوره من كلام زياد ترك الموضوع الي زعل منه اساسآ..!

ومسك على موقف الشباك ..!

انا طول عمري محد شاف مني اظفر الحين يقول زياد استري علينا الله يستر عليك..,

ياربي عفوك وش الذنب الي سويته علشان اتعاقب عليه...!

قضيت نهاري بغرفتي مابين بكا وحيره بوضعي المعلق..,

وحرقة كلمةزياد كنها خنجر بصدري ..,

تذكرت امي بسمع صوتها كلمت من الجوال على تيلفون البيت..,

وردت الشغاله سألتها وين امي

شوي وجاني صوت امي

عوق\هلا يمه كيف حالتس ..!

ام عوق\بخير يا مال الخير ..,

كلمتها والحمدلله ما حست ان في صوتي شي..,

وهي بعد صوتها طمني حسيت بدوخه شكله من الجوع..,

نزلت ابي اي شي يسد جوعي علشان اخذ بنادول..!

البيت هادي مافي حس ابد الكل مشغول حتى بنات خوات زياد ماطل منهم احد اليوم..!

دخلت المطبخ اكلت تفاحه اسد جوعي احس طعمها مر بحلقي غصب ابلع ..!

اخذت حبوب بنادول وطلعت بصلي العشا وانام..,

صليت العشا فتحت دولاب الملابس اناظر ملابسي الي اشتريتها..!

انا والبنات واتذكر سوالفهم وتعليقات ريم وخواتها...,

يا خوفي ياريم اني ارجع لأمي مالبست شي منها...

اخذت لي قميص نوم خفيف غيرت ودخلت السرير اتذكر كلام زياد..!

يوم يخبرني ان حجم السرير ماكان مقصود وانه غلطه لكن غلطه حلوه..,

اخذت جوالي اتسلى فيه حتى يجيني النوم..

ناظرت الساعه الوقت متأخر وهو لاحس ولاخبر حتى سيارته ما اسمع لها حس با الحوش..!!

فتحت الرسايل مافي الا رساله زياد يوم يسأل متى بنروح مكه..؟!

فكرت طيب ليش ما ارسل اعتذار لزياد

انا مسالمه ودايم امشي جنب الحيط عمري ما زعلت احد مني بقصد..,

ويوم زعلت جبت الطامه مع زوجي...!

زوجي كلمه غريبه علي واحس يجيني الضحك اذا قلتها ...!

فتحت انشاء رساله وكتبت

(اسفه زيادوالله ماكنت اقصد سواءموقف اليوم اوالموقف البايخ الي قبله..

وبعدين لايحق للمسلم ان يهجر اخاه المسلم فوق ثلاث)

وارسلت الرساله انتظرت شوي ماجاني رد..؟!

قلت يمكن الرساله ما وصلت ..؟

بدق اشوف دقيت وعطاني مشغول..!

شكل الرجال بايع ومخلص ومنتهي وضعي عنده

لأن كلامي يوم فكرت فيه لقيته قوي وما تقوله وحده فيها مخ..!

زيادماهو مجبور على وحده مثلي مطيوره قمت كملت صلاتي ورجعت..!

ضبطت المنبه على صلاة الفجر ونمت وصحيت على صوت المنبه مع الاذان..,

قمت اجهز نفسي لصلاه وصدري ضايق والحيره ذابحتني..!!

ورفعت ايديني لربي ودموعي تصب آلهي لاتكلني الي نفسي طرفة عين وانت ارحم الرحمين..,

صليت وجلست على سجادتي اقرا قرآني واذكاري

وقعدت ارتب غرفتي ابي اشغل نفسي عن التفكير

خلصت شغلي لكن عقلي مشغول مع هالمصيبه..!

ياربي هو وش قرر وش قصده من ها الصمت الي يذبح..!

يعني خلاص بننفصل عن بعض..!

ناظرت في ايدني ورجولي للحين اثر حنة عرسي علي ما انمحت ..!

وهذا المعرس طفش مني ومن هبالي..,

وش اسوي هو بس لو يعطيني وجه علشان اعتذر منه يمكن يرضى علي..,

خلاص ما ابي شي منه حتى زيارات امي ما راح ازعجه يكفي مرتين اوثلاث با الاسبوع اشوفها...!

والجوال يطمني عليها..,

راحة امي ماهي بشوفتها لي ناطه بوجها كل يوم..!

راحتها انها تشوفيني سعيد في بيتي..!

لكن زيادشكله بيستغني عني بسهوله..؟!

هو وش يذكر مني غير صياحي على امي ولساني الطويل..!

اكيد هو مخطط كم يوم وانا وهو كل واحد يروح بحاله..,

وارجع لحياتي قبل حياه بارده صقيع مافيها شي حلو الا امي وضحى..!

الي لو رجعت لها الله اعلم وش بتسوي فيني..!

آآآآخ عشت حياتي كلها احلام جميله واصحى على واقع مرير..,

يا ماحلمت انه يكون عندي اهل ولما تحقق الحلم اهلي كانوا يبوني وسيله علاجيه وبا الخفاء..؟!

مثل الي يراجع طبيب نفسي وبا الخفاء ما يبي احد يدري والا يكون نصيبه من المجتمع لقب مجنون..!

ليالي طويله احلم اني اتزوج ويكون عندي اطفال مثل كل البنات ..

يوم جاالزوج يعني ضاقت ما لقيت الا هو افرغ عقدي فيه...!

استغفر الله ان قعدت كذا يمكن انجن مافي الا اني اواجه زيادواحدد معاه كل شي..!

وخير وسيله لدفاع الهجوم اول مره ما نفعت نجرب ثاني مره وش ورانا..!

انتظرت حتى صارت الساعه سبع ونص ..,

امس الشغاله تقول انه طلع لدوام يعني قطع الاجازه وبيرجع لحياته عادي..,

يعني لاشهر عسل ولا عمره لمكه..,

خلاص اعزمي امرتس ياعوق وانهي الموضوع يا ابيض يا اسود..,

دخلت لغرفة الاشباح كنت بفتح الشباك خفت يشوفني زياد واقطع اخر خيط بيني وبينه..,

نزلت ودخلت المطبخ مافي احد..,

[جرح الذات]

جلست في الصاله وهي المكان الي يفتح على البيت كله اذا هو موجودبشوفه ...!

الساعه قربت ثمان ولا في له حس مافي الا الخدامه...

داخله طالعه تشتغل وتنظف ...

وقفت بناديها الا زياد طلع من المجلس الداخلي حق الحريم ...!

شكله بيطلع الدوام لأن البالطوا بيده

مشى قدامي حتى ما قال السلام عليكم سلمت عليه مارد مشى بدون ما يتكلم..؟!

ناديته وهو خلاص بيفتح الباب ..!

عوق بترددوارتباك\ زياد ابيك بموضوع ..؟

كلمني بدون حتى ما يلتفت علي...!

زياد \ انا تأخرت عن شغلي خلي مواضيعك وقت ثاني ..,

عوق\خلاص اذا رجعت مو مشكله انتظرك فوق..,

زياد بتهكم\ برجع متأخر عندي حالات مستعجله وانتي مواضيعك طويله ولا هو ضروري تنتظريني...,

وسكر الباب وراه وطلع...!!!!!!

صعدت لغرفتي ما شوف طريقي من الدموع يعني وش يقصد بكلامه..؟!

ماهو ضروري تنتظريني يعني خلاص بينهي كل شي بينا..؟!

.
.
.
(كلمه اخيره)

يقول د . عائض القرني ,,

بعض الناس عنده مقدرة عجيبة في تكدير خاطره ,,

ويجلب الهم والغم لنفسه ,,

ويجيد فن الخيالات الفاسدة لذهنه ,,

فكم يصفو له من هذه الحياه اذا كان دائما يتذكر الماضي بآلامه

ويتوقع حوادث المستقبل ويخاف ان مرضا ما سوف يصيبه !!

فيا من اراد السعادة والراحه ’’

لا تقصر حياتك ,, فهي قصيرة اصلا ,,

عش في حدود يومك ,, ولا تبكي على مافات ,,

واترك المستقبل حتى يأت ِ ,, ولا تلق بالا لكلام الحساد ,,

وتوكل على الله فهو حسبك ,,

وكفى هموم وغموم واحزان ,,

الحياة قصيره فلا نقصرها اكثر ,,

قلوب تريد ,, ورب يشاء ,,

فيارب حقق لقلوبنا ماتريد بمشيئتك يا ارحم الراحمين,,

.
.
.

الي الملتقى قريبآبأذن الله

وسالفه جديده


طيف الأحباب

ام الوليد


تذكروني واحبابي بدعوه طيبه

[جرح الذات]

بسم الله الرحمن الرحيم


هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,

يا خواتي اللقطاء مآساتهم ماتصطرها روايه وربي كل الحزن الي نشعر فيه اتجاهم

ما يجي جزء بسيط من حزن يوم واحد في حياة الكثير منهم

الروايه بتكون نهايتها من وجهة نظر ي نهايه مرضيه وملمعه لأنه مهما سطرنا من وجع ماراح نوصل لوجعهم..

نسأل الله السلامه لنا والجميع اعراض بنات المسلمين والله الاعداد في ازدياد..

الف الف لابآس على بنت الغاليه حكيمه اسأل الله العظيم ان يشفيها شفاءلايغادر سقما وجميع مرضى المسلمين
.
.
.
اليوم بنشوف عوق المزايين كيف بتواجه اول مشكله في حياتها الزوجيه وهل بتستسلم او لا


البارت اهداء للعابرين من هنادون استثناء...!!

واهداااء خاص للغاليه نوفاه,
.
.
.
يا الله تعالوا معاي...!!

وسالفه جديدة؛
.
.
.
البارت العشرين
.
.
.
عوق بترددوارتباك\ زياد ابيك بموضوع ..؟

كلمني بدون حتى ما يلتفت علي...!

زياد \ انا تأخرت عن شغلي خلي مواضيعك وقت ثاني ..,

عوق\خلاص مومشكلةاذارجعت انتظرك فوق..,

زياد بتهكم\ برجع متأخر عندي حالات مستعجله وانتي مواضيعك طويله ولا هو ضروري تنتظريني...,

وسكر الباب وراه وطلع...!!!!!!

صعدت لغرفتي ما شوف طريقي من الدموع يعني وش يقصد بكلامه..؟!

ماهو ضروري تنتظريني يعني خلاص بينهي كل شي بينا..؟!

ياربي وين كلام البنات عن الحياه الزوجيه والعالم الوردي الي يعيشونه..؟!

انا من اول مشكله انهد ما بيني وبين زياد ..!

طيب المفروض انه يراعي نفسيتي اني اول مره ابعد عن امي..!؟

وضايق صدري يعني ما يصير الواحد يفض فض شوي..

وكلامي الي قلته حابسته من زمان بصدري يعني من بيفهمني غيره انا وهو نفس الجرح

ياربي وش اسوي تسكرت بوجهي وضاقت على الوسيعه..,

اللهم بحق قولك "وربك يخلق مايشاء ويختار ماكان لهم الخيره"

خرلي مايسعدني ويرضيك في أموري كلها الدنيويه والأخرويه

با اصلي الاستخاره واشوف وش ربي يهديني عليه ..!

علشان بعدين ما الوم نفسي على اي شي يصير..,

صليت الضحى وركعتين االاستخاره..,

و حاولت انام ولا ادري كيف غفت عيوني..

اذكر الساعه تسع ونص قمت على صوت الاذان ..

بيت زياد قريب منه المسجد اذا اذن صوت الاذان اسمعه داخل البيت..,

بصلي الظهر وانزل اكل اي شي بس اسد جوعي على ان مالي نفس بشي..,

صليت ونزلت وظهر اليوم مثل ظهر امس البيت جوه واحد..!

الشغاله من المطبخ لغرفة الكوي ماشيه بشغلها ..!

والممرضه ما اشوفها اكيد بغرفة خالتي..,

خالتي يا الله نسيت حتى وجودها..

ليتها بصحتها كان اجلس اسولف معاها اضيع ها الملل والضيقه الي انا احس فيها..

دخلت غرفتها لقيتها صاحيه سلمت على راسها وجلست مقابلتها..!

قلت للمرضه بنطلع نجلس في الصاله..,

قالت لا الحين دخلتها غرفتها من اليوم هي في الصاله..!

وقفت بطلع قلت خاله ادعي ان ربي يفرجها ...,

ما ادري فهمت علي اولا لكن سمعت الله كريم..

ياربي وش اسوي النهار طويل ..

وبعد ما استخرت حسيت بشوي راحه لكن ماعرفت اقرر امشي والا اقعد..,

صرت امشي في البيت واتفرج على التعديلات الي طلبتها من زياد كلها نفذها

وكل شي في مكانه ..,

كلمت امي من تيلفون الصاله كان صوتها فيه نوم

قلت يمه وش رايك امرك قالت لا وش يجيبتس عروس وتدوجين

قابلي رجلتس ازين..,

تقول الي تقوله ام العوق اهم شي انها طيبه..,

تذكرت ريم احس من زمان عنهابكلمها..,

كلمتهافرحت يوم سمعت صوتها ...

ريم بضحك\وينتس يا القاطعه اعو ذبالله كنتس ما صدقتي تعرسين..,

انتي ناذره ان اعرستي ما تكلمين احد..,

عوق\حرام عليتس ماهو قصد لكن توني القى تيلفون..,

ريم بتهكم\يا النصابة كل ما كلمت خالتي وضحى تقول عوق كلمتني وطيبه..,

عوق بضحك \اكلم امي من جوالي...!

ريم بممازحه\احلى طلعتي جوال اخيرآهذا من بركات الزواج طيب ليش ما كلمتيني على جوالي..؟!

عوق\وش عرفني بجوالتس انا تيلفون بيتس ويا الله بعد انتي خابره امي ما تحب تشوفني ماسكه تيلفون..!

ريم بتساءل \عوق ماكنتوا بتطلعون عمره وش اخركم..,

عوق بوجع \زياد عنده اشغال واجلها..,

ريم \ الله يسهلها لكم دريتي الجوهره انخطبت ..!

عوق بفرحه\بالله الف مبروك ..,

ريم\والي خطبها بعد تعرفينه..,

عوق با ستنكار\وش عرفني فيه انا اهلتس ويا الله اعرفهم من هو هذا الي اعرفه..!؟

ريم\نواف ..,!

عوق با استغراب\من نواف ...؟ّ!

ريم \اخو جزاع يا مال الصلاح اخيرآاقتنع يعرس الظاهر ان زياد مادح له العرس..,

الجوهره تقول ليت عوق معرسه من زمان..,

عوق بضحك \ والله جوجو بايعتها...

وام جزاع وش قالت..!؟

ريم\ما قالت شي هي بس تبيه يعرس ملت من كثر ما يترززن حريم جماعتنا عندها تبي ولدها يستقر..,

اردفت ريم\البلا ماهو في خالتي البلا عيال عماني يوم سمعوا زعلوا ...؟!

يقولون بنات مسلط كلهن راحن لخوالهن وطولوا لسانهم على امي ولا خلو ولا بقواعليها وانه كله من تحت راسها ..!

عوق با استنكار\ استغفر الله هذي قسمه ونصيب مالهم حق يعترضون اذا ما كانو خاطبين قبل خوالتس..؟

ريم بقهر \لا خاطبين ولا شي بس قطع رزق بعدين ما تجوز خطبه على خطبه يا فهيمه...

اردفت ريم \والله قهرو ابوي يوم تبلوا على امي وقال كنت ناوي ازوجكم من الصغار..

لكن عقب كلامكم هذا مالكم لا صغيره ولا كبيره عندي..!

عوق بدهشه\عاد عمي مسلط حليم وباله طويل مايزعله الشي الهين...!

ريم\حركة عيال عماني تدبل الكبد,

لكن عماني الله يعافيهم تعذروا عن كلام عيالهم..,

وقالو يا مسلط لا تفوت نواف على بنتك وعيالنا بيلقون نصيبهم..,

اهم شي ان عماني سمحو من خاطرهم والباقي ماعلينا منهم..!

عوق بشرود\ما توقعت ياريم عمي مسلط يسوي كذا علشان خالتي..!

ريم بضحك \وليه يا حبيبتي ما توقعتي هذي زوجته وام عياله وامي ما مثلها با الحريم..,

عوق \وخالتي نوره وش سوت..,

ريم \ما سوت شي ابوي الله يطول بعمره واقف معها ماهمها لو كل عماني ضدها يعني وش بيضرونها فيه..,

اذا زوجتس على قلبتس ما عليتس من باقي الناس تزعل ومصيرهاترضى..!!

البلا يا عوق اذارجلتس جفاتس والا وقف ضدتس والله تحسين ان كل البشر محاربينتس..,

عوق بضيقه\ صادقه ياريم ..,

ريم بضحك\البارحة زياد عند العيال تحت والله يا ضحكهم استغفر الله كنه صياح..!!

اسمعهم وانا فوق بشقتي حتى جزاع يقول ما شاء الله زياد باين في وجه الراحه..,

يقول لهم يويلكم من الله تاركيني عزوبي كل ها المده ذنبي برقبتكم ورى ما زوجتوني غصب ..!!

عوق با استنكار\امس زياد عندكم..!

ريم بدهشه\لاتقولين ما تدرين وين انتي عن رجلتس..,

عوق باارتباك\ هو جا متأخر بس ما سألته استحيت وهو ما خبرني..,

ريم بضحك\كل ليله البارح وهو عندنا جزاع يقول نشبنا لزياد ما خليناه يطلع ..,

وهو يقول فكوني من شركم شوفوا زوجتي ترسل وتدق تدورني وانتم ماسكيني...,

المهم عوق متى اشوفتس دوري اي طريقه نتلاقى فيها تعالي في بيتي..,

والا في بيتس والا عند خالتي مشتاقه لتس يا الدبه..؟

ودي اشوفتس وانتي مدام ورجلتس هو الي يجيبتس لنا..

قهرني جزاع يقول زياد صاك صكه على حرمته عزمته شكله يتهرب ما يبي يجيبها..,

عوق بضيقه\مو مشكله خليني افضى وارتب وضعي وما يصير الا كل خير..!

ريم\خلاص قبل تقفلين عطيني رقم جوالتس..؟

عوق بحزن \والله ما عرفه اكلمك وقت ثاني واعطيك ..!؟

قفلت من ريم كلمتها ابي استانس زاد همي هم..,

هو مستانس وفالها وانا دموعي على خدي..,

ما عليه اليوم لازم يقرر يا نستمر يا كل واحد يمشي بطريق هذي ماهي حاله ..؟

اشغلت نفسي بشغل البيت غيرت ورتبت مع الشغاله صلحت قهوه وحلى ..,

يمكن خواته يمرون والا بناتهم..

طلعت لغرفتي صليت العصر وخلصت وردي واذكاري ..,

دخلت غرفة الاشباح شغلت التلفزيون وجلست افر با القنوات ..!

ياربي النهار طويل ماهو راضي ينتهي ..

غريبه نفسية الانسان يبي حتى الوقت على كيفه...

يوم زواجي كان النهار قصير والليل طويل ..

ومع مشكلتي مع زياد انقلب الوضع النهار طويل..,

نزلت تحت وجلست با الصاله با الحالي ..

يا ليتني اعرف ارقام تيلفونات نجلاء ولابشرى

كان كلمتهم يتقهوون معي هم والا بناتهم..,

واخيرآ دق جرس الباب مين يا ترى ..,

دخلو بنات ناجي وهم مستحيات ويناظرون وراهم...!

كانت معاهم امهم شايله صواني حلى وقهوه وكيس دخلتها وسلمت عليها هي وبناتها..!

عوق \وين تبينا نجلس هنا والا داخل..,

ام موضي\الي يريحك داخل احسن مابدنايجي زياد وينحرج ..,

عوق\ حياك بنتقهوى بمجلس النساء العربي..!

اخذت الصواني منها..,

ام موضي\بدخل على خالتي العنود اسلم وجايه وراك ..,

ناديت الشغاله تساعدني اخذت القهوه والحلى للمجلس...,

وجلست انتظر ام موضي اهم شي وجه جديد يغير جوي الكئيب ...,

رجعت من خالتي وجلسنا نتقهوى ونسولف ..!

بناتها مؤدبات ما شاء الله..,

عوق\ماعندك غيرهم..,

ام موضي\لا بس موضي سبع سنين وسمر خمس سنين وحامل بشهرين يارب يكون ولد..!

عوق\تبارك الله ..,

الله يعطيك الولد الصالح ما شاء الله مرتبه فترات حملك..,

ام موضي بضحك\ لا ترتيب ولا أشي ..,

ناجي عندو مشاكل صحيه وانا سليمه وفتره نتعالج علشان يتم الحمل

والحمدلله على كل حال الله يطعميك عوق موهيك اسمك..!

عوق تبتسم\ايوا..,

ام موضي\اسمك غريب..,

عوق تبتسم بخجل\كل من سمع اسمي اول مره يستغربه بعدين عادي يتعودون عليه..!

ام موضي تضحك\انا اسمي دينا ئبل ما تسئلي..,

عوق\لا انا بقولك ام موضي احلى..!

وموضي تضحك مستانسه على كلامي...,

عوق \انتي شفتي خالتي قبل تتعب.

دينا\انا متزوجه من شي عشر سنين وهيا اجتها الجلطه بعيد عنك ئريب

اردفت دينا بوجع\يالله ياعوق ما بتسدئي انو هي هذيك الانسانة القويه

حبابه كتير وما بتجامل حدا ولو تفوتي على بيتها وتاخديه كله ما بتئول ليش

الا ازا اشي يتعلق بزياد تنئلب شخص تاني مابتعرفيه

وزيادكمان ماشاء الله عليه حباب كتير ترك وظيفه كبيره با امريكامن شانه ..,

جلسنا اكثر من ساعتين انا ودينا وبعدها استأذنت وقبل تمشي..!

دينا منحرجه\ هديه مو من مئامك ..,

عوق بخجل\ ليش تكلفين على نفسك

دينا\لا كلافه ولا أشي احنا اخوات..,

يالله مع السلامه..,

طلعت ام موضي لبيتها ناديت الشغاله ترتب المكان وترفع الحلى..؟!

وانا طلعت اصلي المغرب صليت المغرب وفتحت هدية ام موضي لقيتها طقم عطورفاخر..!

رفعتها على التسريحه..,

طلعت لغرفة الاشباح شكلها حلو ما ناقصها شي ..,

اذن العشاء وصليت بغرفة الاشباح اول مره اصلي فيها..,

اتجاه القبله خمنته من شكل المسجد الي قدام بيت زياد..

اعتمدت على نفسي وحددت الاتجاه عسى صلاتي صحيحه...

نزلت وانا بالي مشغول كيف بواجه زياد وش الكلام الي بقوله له..!

جلستي مع دينا طلعت منها بدروس تصحي الغافلين..؟!

انا ليش احكم على نفسي اني مثل الارض البورالي ما تستصلح ولا فايده تنرجى منها..!!

دينا بنت بعز شبابها جميله وتنبض با الحياه..؟!

متزوجه ناجي فرق بينها وبينه بكل شي

ناجي انولد اطرافه السفليه رجل طبيعيه والثانيه قصيره ومشوهه ..,

وحتى النطق تعجزه بعض الكلمات يتأتأ الي ما يركز بكلامه ما يفهم وش يقول

كم مره سمعته يسولف مع زياد..!

من غير وظيفته البسيطه حتى بيته الي ساكن فيه الي بناه له خواته وزياد..!

دينا هي الي خبرتني بكل هالتفاصيل الا انها مبسوطه وهي تتكلم عن ناجي وحبه لها..

والله لو ما شفت ناجي كان قلت تتكلم عن شخص ثاني ..!

كل شي في حياتها كانت تفسره لي با اجمل صوره..,

الاعاقه الي انولد فيها ناجي امتحان من الله له...,

وحتى تأخرها با الحمل الي هو كان السبب فيه

فسرته انه ربي كافئهم على صبرهم وهبهم ها البنات وحملهاالي يتمنونه ولد..

حتى بيتها الي عايشه فيه تقول عيلة زوجي احسن عيله وقلوبهم على بعض

ساعدونا نبني جنبهم علشان ما نفترق..,

ماقالت احنا عاله على خلق الله والاحاولت تستنقص من رجولة ناجي..,

انسانه بانيه حياتها على التفائل وان بكرا بيكون احلى وافضل من اليوم..,

ماهو مثلي دافنه نفسي بصفحات الماضي وماني قادره انسى اني مجهولة نسب ..!

تشائمي نقلته لحياتي هنا ربي يعطيني من النعم وانا لاحمدآ ولا شكورا..!!

انا كنت راضية بناجي حتى بعد ماشفت اعاقته كنت ابي زوج يستر علي واستر عليه

حتى اعاقته ما كانت مهمه عندي وربي رزقني بزياد اكبر من كل احلامي..

مهما كانت جنسية اهله الحقيقين والا دينهم ماعاد لهم وجود..,

زياد نعمه ربي انعم فيها علي لو كنت بنت شرعيه لايمكن احصل على زوج بها المواصفات

خلاص بغير نفسي من ها الحين وراضية بأي عقوبه من زياد الا اننا ننفصل عن بعض..,

الي جابوني لدنيا لقوا جزاهم مثل ماقال زياد وانا بعيش حياتي..,

دخلت المطبخ وصلحت عصير تذكرته زمااااان ازعجتني فيه ريم اسمه عصير الحب..!

وعملت تورته بسيطه وسريعه بشكولاته وانا ما ادري هو زياد يحبها او لا..؟!

اهم شي اني اخطي خطوه اعدل بها حالي المايل الي ميلته بلساني ..!

قلت لشغاله تطلعهم با الثلاجه الي فوق مع اكواب وصحون وشوك في المطبح التحضيري ..!

دخلت عندخالتي ام زياد لقيت الممرضه تساعدها علشان تاكل ..!

اخذت من الممرضه صينية العشا وانا الي صرت اوكلها وتحاول تتكلم معي ..!

لكن لسانها ما يساعدها الا بكلمات بسيطه ..!

سألتني عن زياد قلت بيجي بعد شوي عنده شغل ضروري..,

وانا ما ادري هو بيجي الليله او لا ..,

تذكرت كلام زياد عنهاوخنقتني العبره

كيف حاولت وحاولت يوم رفضوا يعطونه لها...,

واصرت عليه تاخذه وتمشي وهي توها نافس وفاقده ظناها..,

كيف جتها الجرأه تطلع صدرها علشان زوجة المسؤل تشوف حليبها الي ما جف وتصيح تبي زياد يرضع..!

وش ها العزيمه والااصرار الي تمتلكهن ها الانسانه ماخلت اليأس يكسرها..,

مالوم زياد يومه يتنفس غلاتس ..,

زرعتي وحصدتي يا العنود..!

وزاد اصراري اصرار اني اتمسك بزياد..,

لو يصدني زياد بحاول واحاول لحد ما اصلح الي خربته ماراح ايئس..!

تعشت خالتي والممرضه عطتها ادويتها وانا طلعت من عندها..,

جلست شوي على التلفزيون ياربي للحين ماجات الساعه عشر..

طلعت فوق رتبت شكل غرفة الاشباح ورشيت فيها عطر

شبكت المدخنه الكهربائيه وبخرتها سكرت بابها..,

شيكت على الاغراض الي قلت لشغاله تطلعهم فوق..,

جهزت التورته الي صلحتها وخليتها با الثلاجه خفت تذوب..,

رتبت الشوك والصحون والسكين وخليتهم في مكانهم على طاولة المطبخ..!

سكرت انوار القسم الي فوق كلها الا نور بسيط خليته يعطي جو للمكان..,

دخلت غرفتي رتبتها ورشيت فيهاعطر وبخرتها بعود ريحة العود تحسسك بجو الافراح والمناسبات السعيده ...

والعود ميزته انه ما يكتم الصدر..,

وعلشان لا يلقى زياد حجه يقول كتمتينا بريحةالبخور..,

وشغلت فواحه اضائتها معطيه جو للغرفه..,

طلعت قميص نوم طويل ومفتوح مع الجنبين وصدره شيفون وعليه روب طويل..

يستر شوي على الاقل من ها الفتحات الي تروع والشيفون ..,

الله يذكر امي باالخير يوم كانت ترفض اني البس قصير ولا حتى بنطلونات في البيت ..,

تقول عيب اذا اعرستي البسي الي تبين عند رجلتس حتى يوم جهازي كنت احاول ادور استر شي واشتريه..!

على ان ريم ما قصرت لكن لبس ريم الي اشترته خليته بشنطه حتى ما فتحتها على طول فوق الدولاب..!

وجلست بغرفة النوم افكر بزياد ما ادري كيف بتكلم معاه...!

وكيف با اعتذر منه واطلب منه يسامحني..!

والا بقوله يحدد موقفه اتجاهي..

خير هو وهالسكوت الي يذبح..

لاانا لازم اضبط نفسي ولا احاول اثير اعصابه اذا كنت فعلن ابي اعيش معاه ..,

طيب اجلس انتظره هنا بغرفة النوم والا اروح للغرفه الثانيه..!

احس جو الغرفه هنا يرجعني ليلة الانفجار الي عساها ماترجع ..,

اخاف اذا رحت للغرفه الثانيه يفهمني غلط يظن اني اراقب من الشباك..!

اخذت شور معتبر..

فكيت شعري بخرته..,

وعطيته هوا سريع على شان يجف ورتبته بتسريحه بسيطه على طوله..,

لبست عدسات عسلي..,