إلى زوجي العزيز مع التحية/ الكاتبة ليل العشاق ، مكتملة

[لامارا]

عبدالله : خالي شوف ولدك ...قلب امي علي ...
سوا سامي حركة يعني بايده يعني يحره ..
سامي: موت قهر ...
استانسنا وسوالف وضحك ..بس طبعا مادام ام السعف والليف موجودة لازم النكد يكون موجود ...
عالية: عاد عمي نبي نسمع من قصايدك ..
وكانت تكلم ابو سامي ... طالعها عمي باستخفاف ..كفاية انها من اهل طليقته اللي ما يدانيها ...
عمي : والله انا ما اقصد ولا اشعر ... ليش اشايفتني ابو نواس ولا المتنبي ؟؟
ضحكت انا على الزفة المعتبرة اللي خذتها من عمي ...يا سامي وكملها بطنازة ..
سامي : لا يبا وانت الصاج .. قيس بن الملوح ...
متنا ضحك حنا ..بس امي قالت تقهر سامي ..
امي : يعني انت تعرف تقصد ؟؟
وكانت تحاجي سامي ...اللي سكت واكتفى بالإبتسام وقال بهدوء احسده عليه ..
سامي: لا عمة ..انا ما اقصد ولا اعرف ..
قام عبدالله هني وقال بطنازة ..
عبدالله : وكتاب الشعر اللي عندك اربع وعشرين ساعة اشوفك تقراه هذا شنو ..
قال سامي ..
سامي: اقرا شعر مو القي ...بعدين انا جم مرة اقولك لا تحاجيني باط جبدي انت اليوم ..
ابتسم عبدالله ..وقال عصام ..
عصام : سمعنا عاد من اللي تقراه ...
انصدم سامي وصار ويهه احمر ...قلت انا ازيدها ..
هناء: ئي صح يلا ..
طالعني متفاجأ وقال ..
سامي: حتى انتي ؟؟
تكلم طلال هني واخيرا بعد طول صمت ..
طلال : ليش ما تعرف ..ولا ما تفهم اللي تقراه ؟
لف سامي لطلال وطالعه شوي بعدين قال وهو يبتسم ..
سامي: لا افهم ..اشدعوة مكتوب بالهندي ؟؟
كانت نغزة من طلال لسامي اللي استقبلها برحابة صدر ...قالت عالية ..
عالية: انزين قول ...
طالع سامي عالية اللي قاعدة جدامه يم انتصار بس بسرعة نزل نظره للارض وقال بجفاف..
سامي: قلت اني ما اقصد ولا اشعر ...
قال عبدالله ..
عبدالله : مستحي ... صح ؟؟
رفع سامي راسه لعبدالله وهو يبتسم وقال ..
سامي: استحي منك انت ؟؟ ليش ؟؟
بو عبدالله : ياهل ويستحي منك ...
ضحكنا حنا كلنا ...وقال سامي ..
سامي: هههههه ...كاهو قالها عمي ... ياهل وانا ماارد على يهال ..يا ياهل ..
ابتسم عبدالله ...فقال طلال ..
طلال : خلاص اللي يعرف يقصد خل يقصد ..
قال عصام ...
عصام: خلاص سمعوا ..بس تراه فصحة لأني ما احب النبطي ..
قالت امه ..
ام عصام : خلاص عادي ..
عصام :
إذا المرء افشى سره بلسانه ولام عليه غيره فهو احمق
إذا ضاق صدر المرء عن سر نفسه فصدر الذي يستودع السر اضيق

صفقنا حنا وقال عبدالله ..
عبدالله : احلى ..طلعت شاعر مو هين ...
سامي : ئي هاذي مالت الشافعي ..
قال بو عصام ..
بو عصام : عيل مو خسارة فيك التعليم والدراسة ...
ابتسم عصام وقال ..
عصام : شكو التعليم انا قاريها بالنت مو ماخذينها بالمدرسة ...
قال طلال بنص عين ..
طلال :يعني تبي تقول انك تستفيد من النت ...علينا عصوم ؟؟
قال بحرج ..
عصام: لا تفضحنا ...
ضحكنا ...فقال عبدالله ..
عبدالله : انا عندي لكم شعر حلو ..
قال سامي : الله يستر ..اكيد مثل ويهك ..
خزه عبدالله وقال ..
عبدالله : عيل مثل ويهك ...
فضحك سامي وقال ..
سامي: ما تنغلب ...
قال بغرور ..
عبدالله : اشعبالك ..مو شوية انا ..
قال ابوه بملل ..
ابوعبدالله : انت الحين خلص وقول شعرك ...طالع لي فيها ابواسود الدؤلي ..
ضحكت وما قدرت امسك روحي ...وسامي معاي ..وكلنا .قال عبدالله ..
عبدالله : يبا الله يهداك ابو اسود الدؤلي نحوي مو شاعر ..لا تفضحنا ...يا محمد ..جم مرة اعلم فيك ..
قال ابوه بحرج ..
ابو عبدالله : والله ؟؟ توني ادري ..عيل منو اللي اسير المحبسين ماادري شهيدها ؟؟
قال سامي وهو يحاول يكتم ضحكته ..
سامي: عمي هذا ابو العلاء المعري ..بعدين هو رهين المحبسين ...
طقت خلود اخوها وقالت ..
خلود : اخلص قول ..
عبدالله : ئي ..يلا .. احم ..حق المتنبي ..
الخيل والليل والبيداء تعرفني والسيف والرمح والقرطاس والقلم
سكتنا نبيه يكمل ..بس قال ..
عبدالله : وسلامتكم ..
قال طلال ..
طلال : الحين انت ويا ويهك هذا اللي ذابحنا فيه ..نعرف هالبيت مالت عليك ...
قال وهو يعدل قعدته ..
عبدالله : هذا اللي حافظه اشتبون بعد ؟؟
ام عبدالله : يا حظي ..مالت بس ..
وكشت بويهه ...ضحكنا على عبدالله وخباله ...
قال عمي بو سامي ...
عمي : خلاص يلا بتنازل وبقولكم بيت شعر حق ابو فراس الحمداني ...
اقول وقد ناحت بقربي حمامة ايا جارتا لو تعلمين بحالي ..
معاذ الهوى ما دقت طارقة النوى ولا خطرت منك الهموم ببال
بعدين سكت وقال ..
عمي والباجي ما اذكره ..
كمل سامي عنه وقال ..
سامي: ايا جارتا ما انصف الدهر بيننا ....تعالي اقاسمك الهموم تعالي
ايضحك مأسور وتبكي طليقة ...ويسكت محزون ويندب سال ..
لقد كنت اولى منك بالدمع مقلة ...ولكن دمعي في الحوادث غال..
عبدالله : احلى ..وتقول ما اعرف ها ؟؟
ابتسم سامي ... وما علق ..بس البقرة اللي جدامه قالت ..
عالية: وااا سامي رائع .. انت معروف بحبك للشعر .. قول وحدة ثانية ..
لاعت جبده سامي وبين على ويهه ..بس مارد عليها ...وعطاها طاف ..وانا بس اقعد اضحك ...
قال عمي ..
عمي : ئي صج انت ما شاء الله تحب الشعر سمعنا
بو عبدالله : ئي يا ولدي سمعنا بدل هالخبل اللي عندنا ..
وكان يقصد عبدالله اللي قال ..
عبدالله : افاا محمد افاا وين العشرة اللي بينا ..وين عيش وجبن ومربى وتوست وبيض ..
قاطعه عصام ..
عصام : حشى جمعية مو عشرة بينكم ...
متنا من الضحك ...
قال سامي ..
سامي: خلاص مااردكم ...بقولكم وصف لابو نواس لخبز ريال بخيل اسمه سعيد ..
رغيف سعيد عنده عدل نفسه ...يقلبه طورا وطورا يلاعبه
ويخرجه من كمه فيشمه ...ويجلسه في حجره ويخاطبه
وان جاءه المسكين يطلب فضله ... فقد ثكلته امه واقاربه ..
يكر عليه السوط من كل جانب ...وتكسر رجلاه وينتف شاربه ..
ضحكنا على هالأبيات ...
وهني سمعنا صوت الألعاب النارية ..بدا الأحتفال والمسيرة ... بعد ما خلصت المسيرة ردينا البيت ..
الصراحة استانست ..وعجبني رد سامي لعالية ... ريحني الصراحة ... نزلني سامي عند العمارة ورحا يصفط السيارة ...
دخلت الشقة ..وتفاجأت ...ريال موجود ...ظليت ماسكة الباب وانا مصدومة ...منو هذا ؟؟
قالت خالتي ..
خالتي : دشي اشفيج تسبهتي ؟؟
دخلت وصكيت الباب ورحت داخل ...
ياحسرة قلبي ينت هاذي عشان تييب ريال غريب هني ؟؟
رحت المطبخ اشرب ماي استوعب اللي شايفته ...حمدلله اني ما قطيت شيلتي اول ما دخلت والعداة اسويها ..
لما طلعت من المطبخ ...فضولي ذبحني ..وقفت ورا الستاير وطبعا اشوف لاني موخرة شوي منها ..
بس بهاللحظة دخل سامي اللي انصدم ....
سامي: شنو هذا ؟؟
واشر على الريال اللي قاعد وهو يوجه الكلام لأمه ..
قامت خالتي وقالت وتبجي ..
خالتي: يما ..فكني منه ..
ووقفت يم سامي ... طالعها سامي مو مستوعب وقال ..
سامي: افكج منه ؟؟
ولف للريال وقال ..
سامي: انت شنو تسوي هني ؟؟
شكله يعرفه ...
وقف الريال وقال بهدوء ..
الريال : سلم بالأول ...ولا نسيت السلام ..
قال سامي بعصبية ..
سامي: انا مااسلم على واحد مثلك ...اشتبي ياي ؟؟
ابتسم الريال وقال ..
الريال : مابي شي ...بس ابي حقي ..
قال سامي متفاجأ ..
سامي: حقك ؟؟ اي حق يا بو حق ؟
قالت خالتي وهي ماسكة سامي من جتفه ..
خالتي: يما واللي يسلمك فكني منه ..يبي فلوسه ولا رح يسجني ..
ابتسم سامي وقال للريال ..
سامي: زيادوه ..قمنا نعرف سجون بعد ... ولا شكلك تعودت عليها ..
زياد : لا وانت الصاج امك بتعود عليها ... عطوني حقي وما رح تشوفون رقعة ويهي مرة ثانية ..
هز سامي راسه بتفهم وقال ..
سامي: وجم تبي ؟؟
زياد: 20 الف ...الفلوس اللي خذتها مني امك ..
ضحك سامي ..وظل يضحك من قلبه ... استغربت اشفيه هذا ؟؟
سامي: ههههههه...حلوة المسرحية الي سويتوها ...لا عيدوها عيدوها ....هههههههههه
وقعد على القنفة ...طالعت خالتي زياد مستغربة بعدين طالعت ولدها ...
سكت سامي ...وهني قال بهدوء ..
سامي: عبالكم ماادري عن اللي تسوونه ...ماادري انكم متفقين ..
قالت خالتي ..
خالتي : متفقين على شنو ؟؟
قال سامي ببرود ..
سامي: اهاا ...متفقين على شنو ؟؟؟
وهز راسه بتفهم ووقف وقال ..
سامي : انا اعلمج متفقين على شنو ... انت وهالتعبان اللي يمج مو مطلقين ...
شهقت ...مو مطلقين!!!!!!!!!!
قال زياد بدفاع مستميت..
زياد : لا بلى طلقتها ..ومن شهرين ..
سامي: من شهرين ؟؟ من شهرين وعدة المطلقة ثلاث اشهر وهي ما كملتهم وتطلع وتروح وترد ؟؟... مطلقها وقاعد معاها بفندق واحد وغرفة وحدة؟؟ مطلقها وهي تروح وتيي عندك كل شوي ؟؟
غمضت عيوني ابي استوعب اللي قاعد يقوله سامي ...
كمل وقال يوجه الكلام لأمه ..
سامي: عبالج شنو خبل انا ...مدمغ ...ما اعرف ارضي من سماي ...ماادري انج قبل ما تيين عندي كنت موجودة بالديرة من ثلاثة ايام ..واتفقتي مع هالنذل تاخذين مني جم فلس ؟؟
وابتسم هني وقال وهو يحط ايدينه مخابي بنطلونه ..
سامي: بس الغلطة الوحيدة اللي سويتيها ..انج كنت تطلعين وتروحين وتردين ...وين راحت عن بالج هاذي ؟؟ ها ؟؟
وعلى صوتها شوي وقرب من امه المصدومة المشلولة عن الكلام ..
سامي : العبي غيرها ...
ولف لزياد وقال بحزم ..
سامي: وانت ...يلا فارج واخذ مرتك معاك ..
احتر زياد وكان مبين على ويهه وطالع سامي بحقد بعدين طالع امه المذهولة .. وطلع ...
لف سامي لأمه وقال ..
سامي: شنو تنطرين ؟؟
طالعت ام سامي ولدها ونزلت دموعها هني صج مو تمثيل ...قال سامي يسوي روحه زعلان من دمعتها ..
سامي: لا لا ...لا تبجين .. لا تعورين قلبي ...
ورد لطبيعته بسرعة خيالية وقال وهو يبتسم ..
سامي: حيل متأثرة باللي صار .؟؟..
وضحك بخفة واستهزاء وقال ...
سامي: بس تدرين ؟؟ مثلتي الدور عدل ...اتقنتيه ...
قربت منه امه بسرعة ومسكت ايده وقالت برجا وبجي ..
ام سامي: يما سامي ..سامحني ولا ما ..
سحب سامي ايده ولف ويهه الناحية الثانية وقاطعها وقال ..
سامي: خلي اسفج لج مابي منج شي ...
نزلت ام سامي على ركبها وقالت وهي تترجاه واول مرة اشوفها مذلولة..
ام سامي : آسفة والله آسفة ...سامحني ...سامحني ..
ودخلت بدوامة بجي ...
طلعت انا ومسكتها ووقفتها وقلت ..
هناء : خالتي لا تبجين ...سامي بيسامحج بس لا تبجين ..
وطالعت سامي بس ظل قالب ويهه عنا ... تقربت ام سامي من ولدها وقالت ..
ام سامي : لا تلومني لا تلومني ...اللي عشته واللي شفته خلاني اقلب جذي ..ابوك ما خلاني اتهنى بشبابي ...زوجوني له وانا عمري 16 سنة ... شنو تتوقع مني ؟؟ .. شفت الويل معاه وعيشني في جحيم ..ليما يبتك ونورت لي حياتي ...
ومدت ايدها له بس هو مسكها بقوة وقال يطلع كل الكره اللي بقلبه ..
سامي: وانا ؟؟؟ انا مافكرتي فيني ؟؟ مافكرت باللي سويتيه فيني ؟؟ بدل ما تعاقبين ابوي عاقبتيني انا جني انا اللي تزوجتج وقلبت حياتج جحيم ...لا تحطين اللي سواه ابوي فيج مبرر لأفعالج واخطاءج ..تراني تحملتج وايد ...
وهزها بقوة وبحقد ..
سامي : وايد ..
ودزها بعيد وقال ..
سامي: والحين ...مابيج في حياتي ...طلعي برة ..
شهقت وقلت بتعجب ..
هناء: سااامي ..
مارد علي ...تقربت منه كمحاولة اخيرة انه يسامحها ..وقالت تمسك كف ايده وتضمه لصدرها وتقول ..
ام سامي : سامحني ...انت ولدي اللي احبه ..
قاطعها سامي بعصبية ..
سامي : قصدج ولدي الغبي اللي مايدري عن شي ...
تقربت منه وايد ضمت ويهه بادينها وقالت ببجي ..
ام سامي : لا لا ...ولدي اللي احبه بطيبته ..انت ولدي قلبي اللي ينبض بين ضلوعي ...والهوا اللي اتنفسه .
غمض سامي عيونه بقهر ومسك ايدينها وبعدهم بعصبية وقال ..
سامي: جذب جذب ...كل اللي تقولين جذب ...انت ما يهمج إلا الفلوس وبس ... حياتج كلها فلوس وبس ..
قطيتيني عشانها تسع سنين بدار الأيتام ...
ظلت ام سامي تبجي وقالت ..
ام سامي : لا تحرمني منك .... يما انت ولدي ...لاتخليني ...حرام عليك ..
مرر سامي ايده على شعره بتوتر وقال بحسم اخر شي ..
سامي: انا خلاص ..عفتج ...خلاص ارحميني وخليني اعيش البقية الباقية من حياتي بهدوء ...
بس تقربت منه امه وظمته لها بس بعدها ...ومسكها من ايدها بقوة بطريقة انا نفسي تألمت ماادري ليش ..
وقال بحقد الدنيا كله وكرهه ..
سامي : انتي شنو ؟؟ ما تفهمين ؟؟ انا خلاص فاض فيني ...فاض فيني ...طلعي من حياتي عاد ...
ويرها للباب وقطها برة وصك الباب بقوة ....
صدمة ....
صعقة ...
شنو اقول شنو اعبر عن اللي شفته ...
تخربطت عندي الأسماء ...
شفت سامي ينهار عند الباب ويقعد على عند عتبته ...وسند ظهره للباب ... وحط ايدينه على صدغه ويتنفس بسرعة ...
تجدمت منه وقعدت يمه وحطيت ايدي على جتفه وما عرفت شقول بس طلعت مني هالكلمة ...
هناء: سامي ..
رفع سامي راسه وبعد ايدينه واخذ نفس يهدي روحه .. بس ما قدر وطلعت منه آهة وبضعف وانكسار..
سامي: آآآآه ..يا هناء ...
وقربته مني وحطيت راسه على صدري وظميته لي ...
حالته تكسر الخاطر والله ..
نزلت مني دمعة من اللي سمعته واللي شفته ....
ماادري اوقف بصف منو ...ام سامي اللي سوته مو شوية ...لعبت على ولدها ...

بعد ثلاثة الأيام من اللي صار ...ماردت امه لنا كلش ...ولا سألت .. وسامي نفسيته تحسنت شوي ولو انه ما ياكل ويشرب وايد ...وعلمني اشلون عرف عن امه وزوج امه من جوازهم وتاريخ الدخول للديرة ...ظل يومين العطلة قاعد في البيت بس انا اطلع ازور اهلي وارد ةاعتذرت عن القعدات والعزايم اللي تييني عشانه مااقدر اخليه في البيت وهو بهالحالة..
واليوم بدت الدوامات ..والحين انا رادة من الجامعة ...بس سيارتي ماادري اشفيها تمشي بطيء ..طالعت عداد البنزين لقيته خالص ...
لاااا ....الحين شنو اسوي ؟؟
وقفت السيارة على جنب وطفيتها ودقيت على سامي ..
هناء: هلا حبيبي ..
قال بصوت حزين شوي ..
سامي: هلا هناء..
هناء: سامي ترى البنزين خلص من سيارتي وانا واقفة الحين بنص الشارع ..
سامي: صج ؟؟ خلاص الحين بييج ..وينج انتي ؟؟
قلت وانا اطالع سيتي سنتر السوبر ماركت ..
هناء: انا جدام ستي سنتر ..
سامي: خلاص الحين بييج ..خلج داخل السيارة لا تطلعين ...
هناء : اوكي ..
وصكيت عنه ..وقعدت داخل سيارتي ..اطالع الرايح والراد ..ليما لمحت احد ياي لي ...اخترعت ..دققت بالريال وكان طلال ...
ارتحت ...علمته ان بنزين سيارتي خلص فسألني ..
طلال : وينه ريلج عيل؟؟
هناء: ياي بالطريج ..
قال ..
طلال: لا قومي واصلج بطريقي على بال ما ايي ريلج ياخذله وقت ..
هناء : احسن بعد بخيس انا هني ..
وطلعت من السيارة وقفلتها وركبت مع طلال ... مشينا ودقييت على سامي لقيته مشغول ..حسيت ان سيارته بطات بعد فقلت ..
هناء: اشفيك لا يكون انت بعد بنزين خلص عندك ؟؟
قال وهو يؤشر بعيد ..
طلال : هاذي مو جنها عالية ؟؟
لفيت للمكان الللي يؤشرله ..لقيته وحدة وواحد واقفين جدام سيارة ويتحجون...دققت ..
هناء: ئي والله هي ..
لف لهم طلال ووقف بعيد عنهم شوي للشارع الثاني ونزل ..
نزلت انا بعد ابي اشوف صج هي عالية ولا لأ بس للأسف طلعت هي ورحت لهم ...طالعت طلال وابتسمت له وقالت ..
عالية: هلا طلال ...اعرفك ..اخوي ..
لفيت اطالع اخوها اللي تقول عنه ..
طلع عصااااام!!!!!!
عصام اخوها ؟؟؟؟؟
هذا لاحقني وين مااروح ؟؟؟
ارتبكت وبين على ويهي ...
مد ايده لطلال بس طلال مامد ايده ..قال جنه يتذكر ..
طلال : جني شايفك ...
قال عصام ..
عصام: وين ؟؟ انا اول مرة اشوفك عاد ..
تقرب طلال من عصام وقال باحتقار ..
طلال : عاد انا تذكرتك عدل ...انت نفسه اللي قص على غالية ...
تذكرت هني طلال لما كان يسألني عن صاحب الصورة وانا كنت ارفض اقوله ...وتذكرت بعد اني ما رديت اخذت الصورة منه ...يعني من الآخر رحنا فيها اليوم ..
مسك طلال عصام ...وقال بعصبية ..
طلال : انت تلعب على غالية بنت عمي ؟؟ صج انك نذل ..
قالت عالية تدافع عن اخوها ..
عالية: طلال ينيت ؟؟
صرخ بويهها وقال ..
طلال :جب انتي ...
مسك عصام ايد طلال وبعدها وقال ..
عصام : هييه انت ياي تبلى على خلق الله ...منو هاذي غالية ؟؟
راح طلال لسيارته ونبش فيها وياه مرة ثانية وحط الصورة جدام ويه عصام وعالية وقال بصراخ ..
طلال : هاذي منو ؟؟ مو انت ؟؟ تدري وين لقيت هالصورة ؟؟ عند غالية بنت عمي اللي انت قصيت عليها ..
انصدم عصام جنه ما حط في باله هالشي ...عاد ثار طلال وبدوا يتهاوشون ....وانا احاول اني امسك طلال وابعده عن عصام بس ماكو فايدة ... مسكت تلفوني ودقيت على سامي ..
هناء: سامي بسرعة تعال الله يخليك ..
كنت اتكلم بسرعة وبنفس الوقت احاول اني افرق بينهم ..
سامي: هناء ...هناء ...ماني سامع شي وينج انتي ؟؟
قلت بصراخ ..
هناء: تعال بسرعة طلال وعصام يتهاوشون بسرعة الله يخليك ...
سامي: خلاص خلاص انا ياي ياي ..
ماادري عاد صكيت بويهه انقطع الخط ماادري ...انا ماسكة طلال وعالية ماسكةعصام ولأول مرة انا وعالية نتفق على شي ...
هناء: طلال بس احنا بالشارع ....خلاااااص ..
بس لا حياة لمن تنادي ...ماحسيت إلا بسامي واقف بينهم يحاول يوقف اللي صاير ...والناس متيمعة وحوسة ... صارنا فرجة بالشارع ...
كان سامي ماسك طلال يحاول يبعده ..وعالية ماسكة عصام ...
سامي: طلال بس خلاص ...
قال طلال بعصبية وثورة ..
طلال : هدني خل ادفن هالنذل الحقير هني ...شنو شايف بنات الناس لعبة ؟؟
قال عصام بصراخ ولو انه بعيد شوي ..
عصام : والله هي اللي يتني مو انا اللي قطيت روحي عليها ..
قالت عالية تسكت عصام ..
عالية: بس عصام خلاص فكنا ...
وركبته السيارة ومشوا وطلال بغى يفلت من سامي وينط عليهم داخل السيارة ...بس سامي مسكه الحمدلله ...
سامي: طلا هدي شوي ...صل على النبي ....
قعد طلال على الرصيف يحاول يهدي روحه وقال ...
طلال : عليه الصلاة والسلام ...
قال سامي .
سامي: قو قوم روح بيتكم ارتاح وعين من الله خير ...اذكر ربك يا ريال مو جذي تنحل هالسوالف ..
مارد طلال وقام وهو معصب ومشى لسيارته ...
لف لي سامي وقال..
سامي : هذا اللي كان ناقصنا ...اففففف الله ياخذهم ..
قلت بحقد ..
هناء : الله ياخذهم ونفتك منهم يا رب ...
سامي : اشلون عرفتوا ان...
وقطع كلامه وظل يطالع جدامه بصدمة ..لفيت انا اطالع اللي يشوفه ...وهالني منظر اللي شفته ....
يت سيارة ودعمت طلال اللي كان رايح لسيارته ...
شفته طاير بالهوا وطاح على الأرض بقوة وسكن سكون الأموات وما تحرك قيد انملة ...
صرخت انا بكل ما عندي من قوة وبانهيار ...
هناء: طلااااااااااااااااااااااا ل ..

[لامارا]

"الأخدود"


انقطعت عن الدنيا ..ظلت عيوني معلقة بس باللي قاعدة اشوفه الحين … صرختي اللي اطلقتها فقدت بعدها القدرة على الكلام وظليت ساكتة او بالأحرى خرسة .. ريولي ما تحرك جنه اعصابي وقفت ..المنطقة المتخصصة في المشي بمخي اساسا تعطلت فانزرعت ريولي بالشارع ..
انا للين الحين مو مستوعبة اللي قاعد يصير …
"هناء ….هنااااء"
نقلت بصري لسامي اللي يناديني وهو جاثي يم طلال …متى راح هناك ؟؟ ..
قال سامي لما شافني اطالعه وبسرعة وبصوت عالي ..
call an ambulance:سامي
ظليت على حالي ما ادري شنو قالي ولا سمعت اصلا ...شنو اللي قاعد يصير ؟؟؟ احد يفهمني ..وليش الناس متيمعة؟؟ ...
قال سامي مرة ثانية ..
سامي : يلا بسرعة ...اشتنطرين؟؟
وحط ايده على راس طلال يمنع النزيف ...
واخيرا تحركت ايدي ...وطالعت التلفون بس طاح التلفون مني وايدي ترجف ...رديت خطوات ورا وانا اهز راسي مو مصدقة ...
وقمت اقول بصوت هامس ..
هناء: لأ ...لأ ..طلال لأ ...
وحطيت ايدي على اذوني امنع اصوات الناس اللي تدعي واللي تهز راسه بشفقة على المنظر ....
وعليت صوتي ..
هناء: لأ ....لأ اااااا
وقمت اصرخ ... وانا حاطة ايدي على اذوني واهز راسي معترضة على اللي اسمعه ...
انهرت على الأرض لان ريولي فقدت القدرة على الوقوف ... وبديت بالنحيب .... حسيت بأحد يهديني وكانت مرة ...
" صلي على النبي يا اختي ..ان شاء الله خير "
" ادعيله الله يشافيه ..."
وهني صرخت بويهها ...
هناء : جذابة ....لا ...طلال ما مات ...ما ماااات ..
قربت مني وحاولت تمسكني ...بس انا بعدت ايدينها ..
هناء: وخري عني ..وخري ....
وما حسيت إلا بسامي ياي عندي ...هني تحركت ريولي وبسرعة ماادري شطاري عليها توها ما تحرك ..
ومسكتها من جاكيته وبديت اهزه ..
هناء: طلال ..
قاطعني وقال وهو يمسكني ويهديني ..
سامي: خلاص خلاص الأسعاف يت خذته ...
اسعاف !!!! ليش ؟؟
ظليت اطالع سامي مو مستوعبة اللي قاله ...وقلت وانا ابعد عنه بضع خطوات ..
هناء: اسعاف ؟؟ ..
قرب مني مشفق على حالتي بس بعدت ايده بدفاشة وقلت بصراخ ..
هناء: انت شنو تقول ؟؟
مد ايده مرة ثانية يحاول يمسكني وقال ..
سامي : صلي على النبي هناء ...امشي اود.....
قاطعته بصراخي ..
هناء: يعني صج ؟؟؟
ما قدر يرد ظل ساكت وعيونه تأكد لي ... هزيت راسي مو مصدقة ..وايدي تأشر بـ لأ ...
هناء: لا مو صج ..مو صج ...
قرب مني وقال وهو يمسك ايدي ..
سامي : هناء ما صار شي ما ندري حتى شنو حالته ...
صرخت باعلى صوتي ..
هناء: لأ ...طلال ....لأ اااااا
قرب مني بسرعة وانا اتلوى بألم وهو يحاول يمسكني ويوقفني وانا اطق صدره وهو ماسكني بقوة ليما طوقني بايدينه وما لقيت غير اني استسلم ...وقال بصوت يهديني ..
.. هدي ...هدي ..calm down سامي:اشششش ...
وغمضت عيوني ودموعي تنزل جنها شلال ...
ماادري شنو اللي صار ولا اشلون وصلت المستشفى بس لقيت روحي واقفة جدام غرفة الكشف ..انطر اي احد يطلع منها ...
قربت من الدريشة مالت الغرفة ابي اشوف شي ... لقيت طلال نايم على السرير والدم مغرق لابسه والطبيب يركب الكمام والممرضات حوله رايحين رادين ... شفت الطبيب يهز راسه جنه رافض او مو عارف شنو يسوي ..
دخلت عليهم جنب مينونة ... وقمت اصرخ ...
هناء: لا تقولون مات ...طلال ما مات ...ما مات ..
مسكتني وحدة من الممرضات ويرتني برة عشان لا ازعجهم ...
ممرضة : اختي خلينا نشوف شغلنا الله يهديج ...
مسكتها اترجاها ..
هناء: الله يخليج ...
قاطعتني وقالت وهي تهز راسها بتأكيد ..
ممرضة : ما عليه شر ان شاء الله بس انتي اهدي ..
ودخلت داخل .. وخلتني ...
يا ويلي ...اللي صار لطلال مني انا ...لو انا ما خليته يشوف الصورة ...استغفر الله ...لازم اكون اقوى من جذي لازم عشان لا انصدم بعدين ...
حسيت بايد تلمس جتفي .. نقزت من الخوف ...لما شفت انه سامي ...تجمعت الدموع في عيوني ...ودفنت ويهي بصدره ...وقمت انتحب ...
هناء: سامي ...ابي طلال ...ابي طلال ...
وما قدرت اكمل لأن صوتي اختفى تحت جبال الدموع اللي لازمتني طول الحادث ... طوقني سامي وبدا يهديني ويمسح على راسي من تحت الشيلة ...
قعدت على الكرسي وريولي تهتز بسرعة كبيرة .. وشوي اوقف وامشي واروح ارد وسامي قاعد يستغفر ويذكر الله ..استحيت على عمري وقعدت وتذكرت " ألا بذكر الله تطمئن القلوب " ....ظليت جذي لدقايق بس ما تحملت وقلت ..
هناء: ما صارت طولوا ...
وقمت وانا اقول متجهة للغرفة...
هناء: لازم في شي ...لازم اشوف ...
بس مسكني سامي باخر لحظة وقال وهو يبعدني عن الباب ..
سامي : وين رايحة هناء الله يهداج ...خليهم يشوفون شغلهم ...
قلت باعتراض ..
هناء: بس طولوا ..خل احد يطلع يعلمنا شنو صار ..اشفيه طلال ...ما يصير جذي ...
قال وهو يحاول يقعدني وباسلوب مقنع ...
سامي: هناء عمري ...انتي اهدي واذكري ربج ترى اللي تسوينه رح يتعبج اكثر ...
بغيت اقعد بس شفت الباب يتبطل ...انفلت من ايد سامي وطيران هناك ..بس تفاجأت انهم طالعين بسرير وطلال نايم فيه وبسرعة ماشيين ..
قلت بتساؤل وخوف..
هناء: اشفيه ؟؟ شنو صاير ؟؟
محد رد وبسرعة ما شيين ..مسكت الطبيب بقوة ولفيته صوبي نسيت كل قواعد والقوانين ...وهزيته بقوة ..
هناء: شنو فيه ؟؟طلال شنو فيه ؟؟
ما قدر الطبيب يبعد ايدي بس قال وهو يحاول يبعد عني ..
الطبيب : اختي اذركري الله ..ما عليه شر ان شاء الله احنا رح نسوي له عملية سريعة ما تتحمل التأجيل ..
عملية ؟؟ سريعة ؟؟
هديته وايدي وانا مصدومة وقلت بصوت خافت ..
هناء :عملية ؟؟؟ ..
وطالعت سامي مصعوقة ابي احد يأكد لي اللي اسمعه ...راح الطبيب بسرعة ورا الممرضات ودخل غرفة العمليات وصك الباب ....
" انت اللي قصيت على غالية بنت عمي .."
" يا النذل ..خلني ادفنه "
تذكرت الهوشة والحادث وسقوط طلال على الأرض بقوة على ارض الشارع وتجمع الناس حواليه ..ونداءات سامي المتكررة لي ...
" بنت عمك هي اللي لزقت فيني "
عصام ...
" بس عصام فكنا "
عالية ...
" منو هذا ؟؟؟ مو انت ؟"
طلال ...
كل شي صار من تحت راسهم ...
يا ليتها ما خربت سيارتي ...
يا ليتني ما رضيت اروح مع طلال ...
رضيت مت قبل هاليوم ....
غمضت عيوني وهزيت راسي متألمة ...احس سجاجين تطعن قلبي ... لطمت ويهي وقمت اقول ..
هناء: ليتني انا بدالك ...ليتني انا بدالك ..
طول الوقت يحاول سامي يهديني وانا مو حاسة فيه ...واكمل نحيب ودموع ...وإلى الآن ما دقينا على احد ولاعلمنا احد ...
بعد ساعتين ...طلع الطبيب من الغرفة ..وانا طيران عنده ...
هناء: ها بشر ؟؟
وانفاسي تراكض ورا بعضا ...
قال الطبيب وانا عيوني مركزة على عيونه...اقولكم محيت القواعد والقوانين والإلتزامات من مخي ...
الطبيب : عنده ارتجاج في المخ ..وكسر في ايده اليمين ...
ارتجاج؟؟ كسر ؟؟؟
ارتجفت شفايفي ودموع زحفت على رموشي معلنة السقوط ...
كمل الطبيب وقال ..
الطبيب : بس ... سوينا احنا عملية شريان مقطوع الحمدلله قدرنا نصكه ...
شريان مقطوع !!
الكلمات دخلت في مخي بس ما قدرت اترجمها ... اهتزت الصورة جدامي ..وصورة الطبيب بالأخص صارت ضباب ...
" هناء ..."
بعدها ما حسيت بشي ...
حسيت اني بوسط الشارع .. تلفت حوالي ..
هذا طلال ...
ولفيت الناحية الثانية ..
هذا عصام ..
وهاذي عالية ..
طلال وعصام يتهاوشون ...
وعالية واقفة تصرخ تحاول تبعدهم عن بعض ...
الحادث ...
طلال يطيح بقوة على الأرض ...
الناس ...الناس متيمعة حوله ...
سامي ... سامي قاعد يأشر لي ويتكلم بس مو سامعة شي ...
جني قاعدة اطالع فيلم ...
كل شي من حولي يصير بدون صوت ...
سمعت صوت صراخ اخيرا ..التفت لقيت روحي ...هاذي انا !!!!
واقفة واصرخ وانتحب والطم ... ووحدة واقفة يمي تهديني وانا ابعدها ...
لفيت لطلال لقيته على حاله ...طايح على الأرض بس سامي جاثي يمه يحاول ينعشه ... رفع راسه طالع وراي لفيت لقيته يحاجيني بس انا اصرخ والتلفون طايح على الأرض.. اشر لي وقال بصراخ ..
سامي: يلا بسرعة ...اشتنطرين ؟؟
طالعت طلال والدم اللي على الأرض ..
هناء: طلاااااال ..
قعدت بسرعة وانا مخترعة ... وانفاسي تركض جني بسباق ... تلفت حوالي ما لقيت احد .. ابصرت سرير جدامي ..لفيت الناحية الثانية ..هم سرير ... شسالفة ؟؟ انا وين ؟؟
بس وخرت الكمبل ( البطانية ) ونطيت من السرير وانتزعت المغذي وانا في بالي شي واحد بس ..
طلال ...
طلعت من الغرفة ما لقيت احد ...ركضت برة الجناح ...ادور على احد بس مافي ... سامي وين ؟؟ طلال وين ؟؟
هديت عمري وتذكرت الطريج ...احس الناس تطالعني بس مطنشة .. بغيت الحق على المصعد قبل ما يتسكر بس صك ...
بسرعة للسلم ... ركبت اثنين اثنين ..ماادري من وين يتني القوة بس وقت الحاجة كل شي يصير ...
اخيرا شفت احد اعرفه ...
عبدالله ..
ركضت لعنده لمحني بس تفاجأ ...قلت بسرعة وخوف ..
هناء: طلال شنو صار عليه ؟؟
تأتأ بالكلام ..ونزل عينه ...اخترعت انا ..
هناء: لا تقول ...
لف وعطاني ظهره وقال ..
عبدالله : طلال ما عليه شر الحين هو بالعناية المركزة ولما تستقر حالته رح يحطونه بالجناح العادي ..
بغيت اتكلم بس سمعت صراخ ..لفيت مالقيت احد ...
اتبعت مصدر الصوت لقيت امي وام عبدالله وام عصام قاعدين وامي تبجي وخالاتي يحاولون يهدونها ...
" هناء ..شنو تسوين هني "
التفت لقيت سامي ... قرب مني ودخلني داخل ..وقال ..
سامي: مينونة طالع جذي ؟؟؟
قلت ببجي ..
هناء: طلال بالعناية ...عبدالله قالي ... الله يخليك خلني اشوفه ..
صك الباب وامي يعلو صراخها ...وقال ..
سامي: انزين صبري ..تدخلين عليه وانتي جذي ؟؟ بعدين هو بالعناية ومانعين عنه الزيارة لين ما تستقر حالته ...
قلت بترجي ..
هناء: بس ..
قاطعني صراخ امي واصوات خالاتي وهم يهدونها ..قال سامي وهو يحاول يركز ..
سامي: ظلي هني بقاعة الأنتظار ..
يغى يطلع ..بس مسكته وقلت بتوسل ..
هناء: تكفين خلني اشوفه ... خلني اتطمن ..
مسك ايدي وقال ..
سامي : انت الحين تعبانة ما اقدر اوديج مكان .. انت اصلا اشلون طلعتي ؟؟
قلت بتشتت وبجي وصراخ بنفس الوقت ..
هناء: ما يهمني ..ابي اشوفه ...ما...
على صوته وغطى على صوتي وقال وهو يحظن ويهي بايدينه ويخليني اركز عيوني بعيونه..
سامي: هناء..هناء ...
سكت مرعوبة فقال وهو يحاول يوطي صوته ..
سامي: اللي صار صار ..الحين بدل ما تبجين وتصارخين ساعدي امج المسكينة اللي مو قادرة تستوعب ... هذا مخرجنا الوحيد من focus ان طلال بالمستشفى ... لا تزودينها علينا احنا مو ناقصين كافي واحد .
الحالة اللي احنا فيها ...
وسكت ... ظلينا نطالع بعض ... دخلت الكلمات في مخي اخيرا ..وترجمها ...واستوعبت ...
هزيت راسي بايجاب وباضطراب وقلت بصوت مهزوز ..
هناء: ان شاء الله ..
ابتسم بامتنان ولو انها ابتسامة باهتة ...
سامي: حلو .. يلا اخليج الحين ... دخلتيني قاعة الأنتظار مالت الحريم ..
وابتسم مرة ثانية بخفة ..خلاني ابتسم ع الخفيف وبعدت شعري عن ويهي ...
طلع هو بس قال قبل لايطلع ..
سامي: بييب لج الشيلة صبري ..
التف لأمي اللي هدت شوي ...تجدمت ووقفت جدامها ... نزلت على ركبي .. ومسكت ايدينها ...بطلت عيونها ولما شافتني قالت بضعف ...
امي : هناااء ..
ودمعت ... حظنتها وقلت بصوت واثق ..
هناء: ان شاء الله خير ...طلال مافيه شي ...

اليوم الثاني ... ظل طلال بالعناية المركزة ...ومانعين عنه الزيارة ...وعرفت ان الشريان المقطوع اللي تكلم عنه الطبيب امس بريله ..بس عالجوه الحمدلله .. بس لسة شاكين بتدفق الدم لريله مرة ثانية وهذا اللي مخليه في غيبوبة مرة ثانية ...
وقفت جدام زجاج غرفة طلال ...اطل عليه ..
راسه ملفوف ..وايده مجبسة ..واثار الكدمات من الهوشة لسة على ويهه ..
حسبي الله ونعم الوكيل ...
طقيت راسي على الجامة على الخفيف وقمت اردد بقهر ..
هناء: حسبي الله ونعم الوكيل ...
التفت لأمي القاعدة بالكراسي مو راضية تحرك من مكانها وبايدها المصحف قاعدة تقرا ..وخالاتي اللي قاعدة تستغفر واللي قاعدة تصلي ...وخلود اللي ما هدتني من اول ما درت ماادري حبها لطلال لسة موجود ولا واجب وبس ...
واسما اللي غابت عن مدرستها مو راضية تروح ... لين الحين مصدومة ...
وهاني اللي ماصدق ان طلال بالمستشفى إلا بعد ما شافه ...وما نزلت دمعة من عينه رافض ومعترض ...
بعد كل هذا ما اقدر اقول إلا ان حب طلال متوغل في قلوبنا كلنا ....
اشلون ما نحبه وهو اللي تأخر سنة عن دخوله للجامعة عشان يفتح الكراج ويعيشنا منه ...؟؟
اشلون ما نحبه وهو اللي أخر فكرة الزواج من غالية لين ما يتطمن علينا كلنا واولهم انا ...؟؟
اشلون ما نحبه وهو اللي ضحى بحياته عشان غالية ؟؟
اشلون ما انا احبه بوجه الخصوص وهواللي عرفني على احلى واغلى شي بحياتي ..سامي ... اللي وقف معاي وقفة ما انساها طول عمري ... لولا مساندته لي ما كنت بهالحالة ...
الحمدلله على كل شي ...
لمحت غالية ياية وبايدها جلاص الماي لامي ...مسكينة ما تدري ان السالفة كلها صارت بسببها...
يت صوبي ووقفت يمي وطلت على طلال ...وظلينا ساكتين ...وانا ما كنت اطالع طلال كنت اطالع غالية .. ومتأكدة انها حاسة اني اطالعه ..لفت لي وابتسمت ..ابتسمت انا مجاملة وقلت ..
هناء: للحين تكلمينه ؟؟
طالعت طلال وقالت بهدوء وثقة ..
غالية: لأ ...مسحت رقمه من تلفوني وهددته إذا بيدق بعلم ابوي ...
وطالعتني وابتسمت بخفة ..
غالية: وانتي تعرفين ابوي ..
اشلون ما اعرفه وهو اللي لزم علينا بعد وفاة ابوي ان نقعد عنده بس امي مارضت ...
وهو اللي ساعد طلال بالكراج وموله ...
قربت مني وقالت بامتنان ..
غالية: لولاج ما كنت عرفت ..
قلت وانا احط ايدي على جتفها ..
هناء: بفضل الله صار كل هذا ...
عانقتني بحب ...منو يقول ان هاذي غالية المغرورة اللي فضلت مشعل على طلال وهو اللي يموت عليها ..
ما قدرت الومها على اللي سوته ..وصج ان لولا تعرفها لعصام ما كان صار كل هذا وما كان طلال تذكر عصام ...بس ما اقدر هي خلاص تابت والتزمت وتركت هالسوالف ... الله له الحق فقط بالمحاسبة ...
بعدت عني وقالت وهي تقول ..
غالية: مشكورة على كل شي سويتيه ...
هناء: لا شكر على واجب ..انت بنت عمي ...وما اقدر اشوفج تغرقين واسكت ...

بليل ...كلنا كنا موجودين ..انا وامي وخلود واسما وانتصار وام عصام وام عبدالله وشهد اللي قاعدة بحظن عمتها قاعدين جدام الغرفة ..
والرياييل قاعدين شوي بعيد ...
عمي وعصام وعبدالله وسامي وعمي بو سامي وهاني ..
انا واقفة وريل رافعتها وساندتها على الطوفة ومجتفة اطالع حولي مرات ومرات افكر ... والباجي ساكتين ومو عارفين شنو نسوي ...
سمعت صوت تلفون وكان تلفون سامي ... استأذن وقام ..شفته يتكلم ويدخل غرفة الإنتظار ..ولانها شفافة شفته يأشر بعصبية ..
وطبعا فضولي اشتغل ورحت دخلت الغرفة وراه ...كان معطيني ظهره ويتكلم بصبية يحاول يخفيها ..
no …look..:سامي
وقال بوعيد ..
I don’t want to see you here ..ok?:سامي
وجنه اللي بالتلفون مو راضي يفهم فقال سامي بحسم ..
mom …listen …it’s over .سامي:
وسد الخط ... تنهد قلت وانا اتقرب منه ..
هناء: امك؟؟
لف لي متفاجأ مني ..بعدين قال وهو ينزل راسه..
سامي: ئي ...
ومسك ايدي وقال ..
سامي: امشي خل نقعد برة ..
ويرني وراه وطلعت معاه بطواعية ...رحت ناحية الحريم ووقفت يم خلود ...
مر وقت طويل واحنا قاعدين ننطر على الأقل اشارة من أي احد من الأطباء او الممرضات .. ابتعدت عنهم ووقفت جدام دريشة عودة ماخذة مساحة جبيرة من الطوفة ...يعني اطالع كل شي بوضوح ... طالعت السما والناس اللي رايحة رادة والسيارات المصفوفة بالمواقف وانا تفكيري مشلول ... موقف ..
حسيت بأحد واقف يمي لفيت وكان سامي ...
سحبت نفس اهدي روحي ...ظلينا ساكتين وانا مو عارفة سامي شنو يفكر فيه .. قلت اخيرا وويهي للدريشة ..
هناء: ما قلت لأمي عن سبب الحادث ..
قال بنفس وضعيتي ..
سامي : لا تقولين لها ...مو وقته ..كافي اللي فيها ..
لفيت له وقلت وهو موجه ويهه للدريشة ..
هناء: ما اقولها ؟؟ المفروض تعرف الحين عشان تبعد عالية عن طريج طلال وتعرف انها خايسة ..
لف لي بهدوء وهز راسه بالنفي وقال..
سامي : لو قلتي لها الحين بتحس بالذنب وهي مو ناقصة .. ما انصحج ..
سكت وانا احاول اخمد النار اللي في قلبي ناحية عالية ..هذا الوقت المناسب عشان اطرد عالية من حياتنا مولية ..
قال سامي ..
سامي : هناء..خذي امج وخليها ترتاح من امس وهي هني ..
هزيت راسي بايجاب ومشيت عنه ...وقفت جدام امي وقلت ..
هناء : يما ..
ما رفعت راسها وطالعتني وظلت ساكتة ...نزلت لمستواها جثيت على ركبي وحطيت ايدي على ركبتها وقلت ..
هناء: يما اشرايج تروحين البيت ترتاحين شوي بعدين اردج هني؟
رفعت راسها لي متفاجأة وقالت ..
امي : واخلي طلال ؟؟ لأ ...
وهزت راسها بالنفي وقالت ..
امي : مستحيل ..
مسكت ايدها وقلت ..
هناء : بس ساعة ونرد بس انتي لازم ترتاحين ..صدقيني بردج ...
ما تكلمت وردت لوضعها ..طالعت خالتي ام عصام فقالت هي تقنعها ..
ام عصام : يا ام طلال روحي ارتاحي ساعة بس ...بس ساعة وهناء بتردج ..
قلت اوافقها ..
هناء: والله ساعة بس خل نروح ترتاحين بالبيت ..
طالعتني امي بعدين طالعت ام عصام ..مسكت ايدها انا اقومها وااكد لها اني صاجة ..حمدلله قامت معاي ووصيت خالتي وسامي على اسما وهاني ..
ركبنا المصعد واني لسة ساكتة من امس ...
لو صار بطلال شي والله امي بتموت ..
ساعتها بحرقها عالية بأوصخ غاز واولع فيها وهي واخوها ...
صج ...عصام اخو عالية ؟؟
" شلي صار بالحادث ؟"
قطع تفكيري سؤال امي التفت لها لقيتها تطالع الأرض ...قلت بتلعثم ..
هناء: ما صار شي ..كنت مع طلال بالسيارة يوصلني البيت ..وصار الحادث مثل ما علمتج يما قبل ..
رفعت ايدها وهي ماسكة صورة ...وقالت ..
امي : منو هذا ؟؟
طالعت الصورة وكانت صورة عصام ...بهت ...اشلون وصلت لها ؟؟ منو عطاها الصورة ؟؟ ..
قلت بخوف ..
هناء : من وين يبتيها يما ؟؟
رفعت عينها لي وقالت باسلوب خوفني اكثر ..
امي: كانت معاج لما طحتي بالمستشفى ...
وقربت مني وقالت بهدوء..
امي : منو هذا ؟؟
قلت ..
هناء: لما نوصل البيت بقولج ..
قالت امي باصرار وبهدوء .
امي: انا مارح اتحرك من هني إلا لما تقولين لي ..
وهني تبطل باب المصعد وازعاج المراجعين وصل لنا ونور الليتات وضح شكل امي اللي انرسمت عليه القسوة فجأة ..
قالت امي ..
امي : له علاقة بالحادث صح ؟؟
صج لين قالوا الأم تصير اي شي عشان عيالها ...
مسكت ايدها وطلعتها من المصعد وقلت وانا اوقفها اهديها وبنفس الوقت احاول اهدي روحي ..
هناء : يما اللي رح اقولج اياه مابي احد يعرفه بتاتا ...
ما تغيرت ملامحها ابدا وظلت جامدة وخالية من التعابير مثل الأموات ..وهذا اربكني اكثر ..
هناء: عالية اللي كنت بتزوجينها لطلال هي السبب بالحادث واخوها اللي كنت بتخطبين عالية منه هو بعد له يد بالحادث وهاذي صورته ...غالية كانت على علاقة معاه بس هدته ولما طلال شافه امس مع عالية تذكره وتهاوشوا وسامي تدخل ومنع الهوشة وفرق بينهم ولما طلال ياه يعدي الشارع دعمته السيارة ..
بدت ملامح القهر والعصبية تبان عليها والدليل ايدها اللي ماسكة الصورة ضغطت عليها لما جعدتها وقالت وشفايفها ترجف ..
امي : يعني اخو عالية هو سبب الحادث ؟؟
قلت اكمل البقية الباقية ..
هناء: فعليا لأ ...
نزلت دموع امي على خدها ... بس مسحتها بسرعة ومشت ...رحت وراها وطلعنا من المستشفى بس عند الباب شفناها ...
بسرعة راحت لأمي ..وقالت وهي تمسك ايدها وتسأل..
عالية: خالتي ...طلال اشصار عليه ؟
مسكتها انا وبعدتها عن امي وقلت ..
هناء: وفيج عين تيين يا الحقيرة ... ذلفي يلا ..
قالت عالية بترجي ..
عالية: والله ماادري عن اللي سواه عصام ...انا ماتوقعت ان له علاقة بغالية والله صدقوني ..
قلت وانا ادزها ..
هناء: انت اصلا مالج حق تكلمين .. المفروض تقطين روحج من اعلى مكان وتموتين ... قلبي ويهج احسن ..
ردت عالية ومسكت ايد امي الجامدة وقالت ..
عالية: انا كنت ابي اعرف طلال على عصام بس تهاوشوا وانا حاولت افرق بينهم بس اندعم طلال ...خالتي صدقيني والله ما ادري عن شي ... والله ..
مسكتها انا من ذراعها وغرست اصابعي فيها وقلت بعصبية وحقد ..
هناء: انتي شنو ما تفهمين ؟؟ قلت لج قلبي ويهج يلا ..
بس هي سحبت ذراعها من ايدي وقالت ودموعها تنزل على خدها ..
عالية : انتوا ليش مو راضيين تصدقوني انا ماادري عن شي ...
بغيت امد ايدي عليها وارجع للمصارعة على قولت سامي ..بس مو انا اللي مديت ايدي امي ..رفعت ايدها وبقوة صكت عالية كف خلتها ترجع ورا خطوات وايدها على خدها من قوة الصفعة ...
قالت امي بتهديد وبصوت يخرع ..
امي: والله إذا صار بطلال شي بتدفعين انتي واخوج الثمن ...
وطالعتها بحقد ومشت ...
ظليت انا مبحلقة بأمي اللي مشت ...مو مصدقة اخيرا انها فهمت ..الصراحة استانست ...
مشيت وراها بعد ما استوعبت انها بعدت شوي ... ووديتها البيت ...

بعد ساعة وقفت امي فوق راسي تبيني اوديها ..لبست عباتي وكانت الساعة 11 ووقت الزيارة خلص من زمان بس امي مصرة اني اوديها ...
دقيت على سامي اللي علمني انهم لسة هناك ...ارتحت ...حلو لما يكون عندك احد تعتمد ليه وقت الشدة ..
اهل يساندونك لما تطيح او تغرق ..
وصلنا وبعد جهد جهيد خلونا نظل قاعدين بالمستشفى ... وانسحب عمي بو سامي ومعاه شهد واخته وياه وبنتها واسما وهاني وياهم غالية عبدالله راح يوصل هاني واسما وغالية ويرجع..
ظل انا وسامي وعصام و امي وعمي ...قعدت امي وانا يمها وفتحت القرآن وقامت تقرا ...
اليوم طلعت امي ويهها الثاني ..الويه اللي ما يطلع إلا بالمصايب والمشاكل ..وهدوءها المقلق اللي يخوفني ...
يارب ارحمنا برحمتك ...
وقفت رحت عند سامي وقلت ..
هناء: عالية يتكم ؟؟
طالعني باستغراب وقال ..
سامي: عالية ؟؟ لأ ...ليش ؟؟
قلت له اللي صار ...قال وهو يهز راسه باستنكار ..
سامي : فيها عين تيي بعد ؟؟
انا ادري ...
بعد نص ساعة طلع لنا الطبيب ومنع تواجدنا هني لأنه ماله فايدة ...امي رفضت تحرك ...مو راضية ..انا حاولت فيها عمي حاول فيها وعصام ...واخيرا قال سامي بهدوءه المعتاد ..
سامي : عمتي تواجدنا هني ماله لزمة ...باجر ان شاء الله بتييبج هناء برسم الخدمة ..
قلت وانا اهز راسي ااكد لها ..
هناء: ئي صح انا بييبج هني من الصبح لا تخافين ...
هزت امي راسها باعتراض وما نطقت ..قال سامي يقنعها ..
سامي: عمتي ادري ان اللي صار مو شوية ..بس مو بايدج شي مو بايد احد اصلا شي ..
طالعت امي سامي بطريقة غريبة وقالت ..
امي : لو انت واهلك ما تدخلون بحياتنا احنا بخير ...
انصدم سامي ..وانا بعد ... شنو قصدها ؟؟؟ انا كا قلت لها هالشي إلا عشان اطرد عالية مو اكرهها بسامي ..
وقفت وقالت وهي تأشر عليه ورد سامي ورا..
امي : بنت خالتك قصت على ولدي واخوها بغى يذبحه ..انت واهلك السبب ..لو صار شي لطلال ولو صغير ما رح اسامحك لا انت ولا عالية واخوها ..

[لامارا]

ظل سامي مبهت يطالع امي مو مستوعب اللي قالته ...
قلت انا باستنكار ..
هناء: يما ..سامي ماله شغل ..
لفت لي وقالت ودموعها تجمعت ...
امي : انا مالي شغل له دخل ولا لأ ...انا اللي اعرفه ان اللي سووا بولدي جذي اهله وهو اكيد منهم ..انا ابي طلال ...ابي طلال ..
ونزلت دموعها ...ما تحملت منظرها وحظنتها وعيوني على سامي اللي منزل راسه للأرض رفع راسه وطالعني بعيون كسيرة نفس النظرة اللي يطالعني فيها لما يزعل ...وسامي اعرفه لما يزعل ...
رد نزل راسه مرة ثانية وسحب نفس ... ومشى من جدامنا ...
هدت امي ومسحت دموعها وطلعنا من المستشفى ..ورحت البيت ... وانا لسة مشغولة بالكلام اللي قالتها امي بحقد لسامي ..
سامي ماله علاقة باللي صار ..
لولاه كان الحين طلال يا بالسجن بتهمة قتل عصام يا بالمستشفى من الهوشة ...وانا اعرف طلال لما يعصب من احد ايده تشتغل سيدة ...
وصلنا البيت وخليت امي تنام بالغرفة وخالتي معاه ...ام عصام اصرت تبات معانا اليوم ..
رحت داري وبدلت هدومي ومسكت تلفوني ودقيت على سامي اللي ياني صوته من الأعماق السحيقة ..
سامي : هلا هناء ..
قلت بخجل من اللي صار ..
هناء: انت بالبيت ؟؟
قال وهو يتنهد ..
سامي : ئي ...
وسكتنا ... ادري انه زعل معاه حق ما له ذنب هو باللي صار ...
قلت اراضيه ..
هناء: سامي ...انت مالك شغل باللي صار ..امي من خوفها طلعت حرتها فيك ..
سكت ومارد كملت انا ..
هناء: لا تزعل من امي امي هي امك ..مو قلت لي جذي مرة ؟؟
قال بصوت حزين ..
سامي: انا مو زعلان من عمتي انا زعلان ليش اني سمحت لهالأنذال يتدخلون ويهدمون حياة بنيتها معاكم وحبيتها وهديت الحياة معاهم لأني عرفتهم على حقيقتهم ... حياتي معاكم تعلقت فيها بحلوها وبمرها انا مابي منكم شي ...غير اني ...
وسكت ...مو عارف شنو يقول ...
اول مرة يقول كل شي بقلبه ومايخش شي ..العادة يسمت وما يتكلم ...
قلت بحنان وانا ابتسم على هالشي ..
هناء: حبيبي ...آسفة والله ..إذا انت زعلان انا اتعذر لك بالنيابة عن امي ...
قال بسرعة ..
سامي : لا لا هناء...لا تعتذرين ..انا ما قلت لج الكلام هذا عشان تعتذرين عمتي على عيني وراسي تقول اللي تبي انا مارح ازعل ...
وكمل بصوت كئيب ومحبط ...
سامي: بعدين اللي قالته صج ...
قلت باستنكار واعتراض ..
هناء: سامي ..لا تخليني اندم اني دقيت عليك ...انت وين وهم وين ...لا تقارين نفسك فيهم ..فرق بين الثرى والثريا ... هذول حثالة ..انذال ...
سكت وما رد ... بس قال اخيرا ..
سامي : هناء ...هذول اهلي ...ما ارضى احد يسبهم ولا ينتقدهم ..مهما صار بيظلون اهلي ...
يا قلبي ..بالرغم اللي سووه يزعل عليهم ..قلت وانا انزل انظاري للأرض وباحراج من الكلام اللي قلته ..
هناء: آسفة ..ما قصدت ..
تنهد وقال بضيق ..
سامي: ما عليه ما صار شي .. بصك الحين عنج بخليج تنامين ..
حسيته لسة متضايق فقلت ..
هناء: كليت ؟؟
قال ببلاهة ..
سامي: ها ؟؟
ابتسمت على صوته الطفولي لما يتفاجأ ..
هناء: اقول كليت ؟؟
سامي: ومنوا له نفس ياكل ؟؟ لا ما كليت ..
قلت بعتاب ..
هناء: ليش بالله ؟؟ ...لا تخليني اييك الحين واوكلك غصب ...
سامي: لا يا معودة ..الحين نص الليل وين تييني ؟؟ خلج وانا باكل ...
هناء: اكيد ؟؟
سامي: بحاول ...ما اوعدج ..
هناء: سموي ..لا تخليني اسويها واييك ..
قلتها بتهديد .. سكت وما رد علي ...قلت بتشكك .
هناء: سامي معاي ؟؟
قال بصوت عذاااب ...
سامي : مع اني اكره هالدلع بس منج انتي غير ...
تفاجأت ...بس بعدين ابتسمت بخجل وقلت ..
هناء: اشلون غير يعني ؟؟
سامي: كنت اذبح عامر عشان بس يناديني بهالدلع ودلال بعد نفس الشي ...تدرين ليش كرهته ؟؟
هناء: ليش ؟
سامي: لان العلة عالية كانت تناديني فيه ...
والصراحة ما قدرت اكتم ضحكتي ...قعدت اضحك جني من زمان ما ضحكت ...
سامي: دوم هالضحكة يا رب ...ئي جذي اضحكي مو مبوزة اربع وعشرين ساعة ...
ابتسمت وقلت ...
هناء: وين لي خلق اضحك واحنا بهالحالة ؟؟
قال بهدوء ..
سامي: معاج حق ...
قال بعدين ..
سامي: يلا عمري ديري بالج على روحج واكلي عدل ..
هناء: انا ولا انت ...سامي اكل عدل ..اوكي ؟؟
سامي: ان شاء الله ماماتي ...مع السلامة ..
صكيت عنه ...ضميت التلفون لصدري ..ماادري اشلون بنام بدون ما اشوفك ...
صوته ينسيني الدنيا بمشاكلها وبلاويها ومصايبها ...
شوفته تهون علي كل شي جايد ...
آآآه يا سامي ...احبك والله العظيم احبك ...

اليوم الثالث ..وطلال لسة بغيبوبة ... وامي ما تتعب من القعدة عنده ..وسامي من بعد اتهامات اللي وجهتها امي له صار يتحاشها ..ايي عند طلال بس يسأل ويروح وما يقعد ..
وقفت يم امي اللي تطل على طلال من الدريشة ..وقلت ..
هناء: يما ... ما تعبتي ؟؟
ماردت علي وظل ويهها على الدريشة ما التفتت لي ...
تنهدت وقلت ..
هناء: يمكن طلال يطول اكثر من جذي ...بتظلين واقفة جذي ؟؟
قالت اخيرا بصوت هادي وجامد ..وبدون ما تطالعني ..
امي : بظل واقفة حتى لو ظل جذي لآخر عمري ...
جملتها هاذي كانت حاسمة ووضحت موقفها النهائي من هذا كله ... خليتها وقعدت على واحد من الكراسي ...
شفت الدكتور مع الممرضة يدخلون واحنا ظلينا برة ... نزلت راسي هقانة من هالوضع اللي احنا فيه ...
تنهدت ورفعت راسي وسندته لورا على الطوفة ...
صارلي ثلاثة ايام غايبة بدون عذر من الجامعة ...بيعطوني انذار ثاني هذا اقل شي ...
شفت الطبيب يطلع من الغرفة ويحاجي امي وهو يبتسم ...عدلت من قعدتي احاول افهم ...سفت امي تدخل داخل بسرعة ...مع انه ممنوع ..فزي ودخلت وراها ..والممرضة داخل واقفة وهي تبتسم ...لفت لي وقالت ..
الممرضة : قرت عينج ..
عرفت هني ان طلال صحى من الغيبوبة ... لا اراديا تجمعت الدموع في عيوني ورحت وقفت يم امي وشفت طلال مغمض عيونه ويهز راسه بايجاب ..
قالت امي بصوت باكي ..
امي : يما حبيبي ..حمدلله على السلامة ..
بطل عيونه طلال وطالع امي بتعب ...وقال بصوت واطي ..
طلال : الله يسلمج يما ...
واتجهت انظاره لي ..طالعني وابتسم ...ابتسمت انا بين دموعي ومسكت ايده وهو شد عليها على الخفيف ..
قلت وانا اقرب منه وابوس جبينه ..
هناء : حمدلله على سلامتك ..طلال ..
ضغط اكثر على ايدي وقال بصوت هامس لأذني ..
طلال : الله يسلمج ...
العصر تيمع الباجي بالستشفى لما دروا ان طلال قعد ... نقلوا طلال لغرفة خصوصي وقعدنا كلنا عنده ...
عصام : عاد يلا الحين طلال قعد مالكم حجة لازم نسافر ...
ابتسم طلال وقال بصوته المريض ..
طلال : يا التعبان اصبر على شوي ليما اطلع ...بتسافر وانا لسة هني ؟
قال عصام وهو يقعد يم طلال ..
عصام : اكيد ..احنا كنا بنسافر بس حظرتك طحت علينا ...خربت علي ...
قال عبدالله وهو يقعد بالناحية الثانية من جهة طلال ...
عبدالله : وانا وعصوم كنا متفقين انا نروح العمرة ..بس خلاص خلك انت هني ونروح ونرد بعدين نطلعك ..
قال عصام وهو يحاجي عبدالله ..
عصام : لا لا قصدك نفكر نطلعه..
قال طلال وهو يبتسم لهم ..
طلال: بعد ؟؟ تفكرون ؟؟
عبدالله : ئي اكيد عيل نوقف مشاويرنا عشانك ؟؟
بقق طلال عيونه بطريقة تضحك لعبدالله وقال ..
طلال : لو ريولي ما تعورني كنت شتك الحين ...هذا حجي تقوله لواحد توه طالع من غيبوبة ..
قالت امي ..
وطالع امي اللي قاعدة بعيد شوي ..
طلال : يمااااا ..
امي اخترعت عبالها صار شي ..يت عنده بسرعة ..قال طلال ..
طلال : يما وخريهم عني ..رفعوا ضغطي ..
طقت امي عصام بجتفه وقالت ..
امي: عصوم وثول ..بعد عن ولدي ..
قال عبدالله ..
عبدالله : ياه محامي الدفاع ...
كفخته امه على راسه وقالت بأمر ..
ام عبدالله : اقول اشرايك تقوم ؟؟
ضحكنا كلنا على شكل عبدالله ...
الله يا حلاة اليمعة .. ظلينا نسولف ونضحك والقعدة ما خلت من الغشمرة من عصام وعبدالله ...
دق تلفوني وكان سامي ...
قلت وانا ابتسم ..
هناء: هلا حبيبي ...
وقفت بعدين لاني قادة مع البنات وطلعت برة..
سامي: ها وينج اذن العصر وما ييتي ؟؟
قلت بفرح وانا اطل على طلال وعصام وعبدالله يمه ..
هناء: طلال صحى من الغيبوبة ..
سكت بعدين قال متفاجأ ..
سامي: صج ؟؟؟
هناء : ئي ..
سامي: متى ؟؟
هناء: الظهر تقريبا ...كلنا عنده بتيي ؟؟
سامي : اكيد .. خل اقول لأبوي ونييكم يميع ..
صكيت عنه ورديت دخلت داخل ..شفت عبدالله يزنط طلال فقلت وانا اشهق ..
هناء: عبدالله ..بعد ايدك عن اخوي ..تذبحه وجدامنا بعد ..
قال عبدالله ..
عبدالله : خلوني افك العالم من غباءه ..الحين انا قاعد اقوله بنسافر بعد ما تتطيب يقولي ما طبت لسة ..
بعدين طالع طلال بعصبية وقال بطريقة تضحك ..
عبدالله : انت من وين يايب هالغباء ؟؟
ضحكت عليهم وقعدت يم امي ...ساسرتني وقالت ..
امي: وينه ريلج ولا ما يتنازل ايي ؟؟
لا حول ولا قوة إلا بالله ...طالعتها وقلت ..
هناء: بيي الحين مع ابوه ...
سكتت عني وما ردت ... انا ماادري ليش حاطة عليه ..بس لأنه حذرهم من عالية ؟؟؟
غريبين الصراحة ..بدل ما يشكرونه يزعلون منه ..
قعدت اسولف مع طلال شوي ومع البنات ليما دق تلفوني وكان سامي ...
هناء: هلا سامي ..
سامي: يلا تراني برة مع ابوي سوي لي درب ...
صكيت عنه والتفت للبنات وامي وخالاتي وقلت ..
هناء: ترى سامي وعمي برة ...
ما ردت امي بس طالعتني بنظرة غريبة ...وتعدلوا بقعدتهم وبعدوا عن الباب وقعدوا بعيد شوي ...
بغيت اروح اناديهم بس قالي عصام ..
عصام: خلج خلج ..انا ببطل الباب ..
قام وبطل الباب ودخل مع سامي وعمي اللي سلموا على طلال وتحمدوله بالسلامة ..التفت سامي لنا وهو منزل راسه وقال ..
سامي : قرة عينج عمتي ام طلال ..
سكتت امي ما بغت ترد بس مسكت ايدهها وضغطت عليها فقالت اخيرا ..
امي : بويه نبيك ...
وسحبت ايدها من ايدي بعصبية ... هزيت راسي انا باستنكار من اللي سوته ...
طلع سامي ومعاه الشباب وظل عمي اللي هو ابوه داخل ...بعدها دخل علينا بو عصام وبو عبدالله واحنا طلعنا البنات ...
شفتهم قاعدين برة ويسولفون وعبدالله وعصام بدوا خبالهم على سامي ...
شفته فاطس من الضحك .. ويبعد عبدالله عنه لأنه لازق فيه ...
سامي : عبود ويهد بعد يلا ...
قام عبدالله ومسك راسه وخلاه يطالعه وقال يقلد الهنود ..
عبدالله :بابا ...انا ماكو معاس عسرة سهر ...انت ليس يسوي انا سزي ...انت بابا سرير ..
بعد سامي ايدين عبدالله عنه وه ويضحك عليه يا عصام يكملها وغنى مالت عبدالحسين ابريت بساط الفقر مع سعاد عبدالله لما قلدوا الهنود ..وعبدالله وياه ..وقلبوا المستشفى سمرة ...قال سامي وهو يحط ايدينه على اذونه ..
سامي: واااي انتوا فضيحة ...ما اقدراقعد وياكم ..
وقام عنهم ..وبعد عنهم وهم لسة يغنون ويضحكون ..
التفت لي سامي وانا ابتسمت فقال ...
سامي: تعالي فكيني من هالميانين اللي عندي ...
نط عبدالله على سامي وقاله ..
عبدالله : احنا ميانين ....لا زعلتنا منك ...
قال عصام ..
عصام: وثمن رضانا غالي ...
قلت انا ..
هناء: انا بدفعه لكم ..بس فجوا عنه ..
قال عبدالله بخبث ..
عبدالله : الله الله ..بدا الدفاع ...
قال عصام يكمل ..
عصام : الحين انا ولد خالتج ما تدافعين عني ...معلوم ...معلوم .. امش عبود مالنا احد احنا بهالدنيا ..
قال عبدالله ..
عبدالله : ئي والله مالنا احد ..
دز سامي على الخفيف وقال ..
عبدالله :انت عندك مرتك تدافع عنك ...آآآه متى بس اتزوج ..
طالعه سامي متفاجأ وكفخه على راسه وقال ..
سامي: استح عيب وجدام اختك بعد ..
ضحكت خلود وقالت ..
خلود : لا تستغرب يا ولد عمتي تراه فاصخ الحيا مولية ..
قال سامي ..
سامي : حتى اختك طحت من عينها... اثقل شوي فضحتنا ...
قال عصام ..
عصام : متى انا اتزوج ..
وطالع فوق بحالمية ...هز سامي راسه وقال ..
سامي: لا بالله كدينا خير ..إذا تزوجتوا انا من الحين ما اعرفكم ..
قال عبدالله وهو يتخصر ..
عبدالله :ليه بالله ؟؟
سامي: اكيد بتطلب الطلاق اللي بتاخذك ...واحد خبل واثول وما يعرف راسه من ريوله ..وين الله يوفقها وهي متزوجتك ؟؟
طالع عصام وقال ..
عبدالله :مو جنه سبني ؟؟؟
ولف لسامي وقال ..
عبدالله : اولا تحمد ربها اللي باخذها ...السيد عبدالله محمد بياخذها اشتبي بعد ؟؟ بعدين تعال اللي يسمعك يقول ما لوعت جبد مرتك ... اقص ايدي إذا ما كرهت حياتها وتبي تنتحر ..
وطالعني وقال ..
عبدالله : مو صح هناء ؟؟
هزيت راسي بالنفي وقلت ..
هناء: لا مو صح ..
عاد هني انفجرنا كلنا نضحك .. حتى سامي ...
قال عصام ..
عصام : لا لا يا بنت خالتي ... لا تفشلينا جذي ... انا ادري مطلع عينج بس مو راضية تقولين ...
قلت وطلعت مني بدون قصد ..
هناء: على قلبي مثل العسل ...
صفقوا هني كلهم وقال عبدالله ..
عبدالله : احلى ...احلى ...
عصام : طلعتي ما انت هينة يا بنت خالتي ...
طالعت سامي اللي منزل راسه مبتسم مستحي وعصام وعبدالله يضايقونه ...
عبدالله : شفتي اشسويتي بريلج ..ويه صار طماطة ...
قال عصام ..
عصام: لا سامي ارفع راسك لا تستحي ...
طالعهم وهو يضحك وقال وهو يمشي عنهم ..
سامي : حمدلله والشكر ...
طلعوا وراه يكملون خبالهم عليه ..
ما توقعت سامي بيدمج مع اهلي ..وبالذات عصام ...اللي يشوفه الحين ما يقول هذا اللي كان يغار منه وبهدلني عشان بس طلعت معاه ذاك اليوم بالعرس ...
قاطعتني خلود وقالت وهي تساسرني ..
خلود : ريلج خجول واايد ..
ابتسمت انا على طاريه وقلت ..
هناء: خجول بحدود وهذا اللي عاجبني فيه ..
طالعتني بخبث فقلت لها وانا ايرها وراي ...
هناء: امشي بس ..
ضحكت هي ودخلنا عند طلال ...

رديت البيت بعد ما خلصت الزيارة وانا مرتاحة ومستانسة ... ايام الحزن ولت ...
مالقيت سامي ..يمكن بالمكتب ...بدلت هدومي ونمت ... قمت من النوم على صوت تلفوني ...
منو هالمزعج ؟؟
مسكته وكانت غالية بنت عمي ...
هناء: الو..
غالية : السلام عليكم ...
تعدلت بقعدتي وقلت ..
هناء: وعليكم السلام ....هلاغالية ..
قالت مستحية ..
غالية: كنت نايمة ؟؟
قلت وانا ابعد شعري عن عيني ..
هناء: لا عادي ...
غالية: بغيتج في موضوع مهم ..
موضوع مهم ؟؟ ..
هناء: خير ؟؟
غالية: اول شي قرة عينج بقعدة طلال ...
هناء : بويه نبيج ...
غالية: انا مابغيت اتكلم الحين بس لأنه مهم فـ..
قاطعتها وقلت ..
هناء: غالية ..دشي بالموضوع ..
سكتت مو عارفة شنو تقول بس قالت ..
غالية: عصام يهددني ..
هناء: يهددج بشنو ؟؟
غالية: مسجل صوتي لما كنت اكلمه ...وهددني ان هو رح ينشرها إذا ما سويت اللي يبيه ..
هناء: وشنو اللي يبيه منج ؟؟
غالية: نص مليون دينار ...
شهقت ...قلت بصدمة ..
هناء: شنو ؟؟؟ ين هذا ؟؟
قالت بخوف ..
غالية: مو بس جذي ...انا ...انا كنت ..
وسكتت ...وسمعت صوت بجيها ...قلت وانا اقعد عدل ..
هناء: غالية ...شنو في ؟؟
قال بصوت باكي ..
غالية : انا كنت ...اطلع معاه قبل كان يقص علي بكلامه الحلو ..واختلينا مع بعض في ..
قلت بصدمة ..
هناء: اختليتوا مع بعض ؟؟؟...لا تقولين في شقته ؟؟ ..
سكتت وماردت ... ينيت انا وقلت بصوت عالي شوي ..
هناء: ينيتي انتي تروحين له شقته ؟؟..
قالت وهي تبجي ..
غالية: شسوي ؟؟ اقولج غرني بكلامه الحلو ...
قلت بخوف ..
هناء: ولا تقولين ان ...
قاطعتني بسرعة وقالت ..
غالية: لا لا ..لايروح فكرج بعيد ..ما سوالي شي بس كنا نقعد ونسولف ...
قلت بقهر ..
هناء : تقعدون وتسولفون ؟؟؟ غالية ما..
ما عرفت شنو اقول ..شنو اسوي قلت ..
هناء: انتي وين عقلج ؟؟ ما فكرتي ان بهالأسلوب يقدر يسوي فيج اي شي ...
بجت هي واناغمضت عيوني متحسرة عليها ... الحين بدل المصيبة مصيبتين انا وغالية ..قص علينا شخص واحد بس ...
قلت اهديها ..
هناء: بس خلاص لاتبحين غالية ...
قالت بصوت متحشرج..
غالية: هناء..كلمي ريلج الله يخليج يبعد ولد خالته عني ...
ها؟؟ شنو ؟؟؟ ينت هاذي ؟؟ اكلم سامي عشان يعرف اللي القصة كلها ..لا يا معودة والله يذبحني بروحه جاكني عنده مرة كافي اللي صار ..
تنهدت وقلت ..
هناء: يصير خير ...بس انتي اهدي وخلينا نفكر اشلون ناخذ الشرايط بدون ما احد يعرف ..
غالية: بس الباجي كلهم يعرفون اني كنت اكلمه وفوق كل هذا قلت اني مخطوبة له وهو اصلا ما يخطبني ..
هناء: ادري قالي طلال ...
عيل لو تدرين ان طلال صارله الحادث عشانج شنو بتقولين ؟؟؟
الله يستر علينا دنيا وآخرة ...
قالت بترجي ..
غالية : هناء ..حاجي ريلج يبعد ولد خالته عني ... حرام اللي يسويه فيني ..
هناء: انتي تبين فضيحتج بالديرة كلها ؟؟؟ المفروض محد يدري عن اللي صار بينج وبين هالنذل عصام ..
قالت بصراخ ..
غالية : يعني اسوي اللي يبيه ؟؟
قلت انا متنرفزة وصرخت بويهها ..
هناء: عيل تبين الديرة كلها تعرف انج على علاقة فيه ... انا لو علمت سامي عصام رح يعصب ويزعل ورح ينشر صوتج وما يندرى يمكن مصورج وانتي ما تدرين ..
غالية : لا ابشرج اليوم دق علي يهددني انه مصورني ولازم ادفع نص مليون ولا رح ينشرهم ...
انصدمت ...لا مستحيل ...هذا مو بشر ..هذا شيطان ...شيطان ...
هزيت راسي بأسف وحسرة ..مو عارفة شنو اقول ولا اشلون افكر ؟؟ شل تفكيري الله ياخذه ...
حسبي الله ونعم الوكيل ...
لهدرجة حاقد على سامي شان بس وحدة كان يحبها وهي ما تطيقه ...
صج مريض نفسي ...انا ادري انه يسوي جذي عشان ينتقم من سامي ...
نذل ...حقير ...انا ماادري امه كانت تنسى بشنو لما كانت حامل فيه ...
عاد خربت علي غالية ...كنت مخططة اني اعطيه امية الف واحط عقد الماس في بيته واعلم الشرطة عليه ..وبدل ما ياخذ امية الف ...لازم ياخذ نص مليون معاها ...مصيبة وحلت على راسي ..بس يحلم اخليه يتهنى باللي سواه ...
هديت غالية ووعدتها ان نتعاون انا وهي عشان نفتك من هالوحش البشري ...
والحين صاروا اربعة اللي انتقم لهم ..
انا ...
وسامي ..
وغالية ...
وطلال ...

[لامارا]

الحلقــــة الرابعة والعشرون
"وفقدت حلمي "


ماني مصدقة لين الحين اللي سمعته من غالية ... يعني ما كفاه اللي يسويه فيني راح عند غالية ...
وهي من حبها له عطته اللي يبي ...وانا اقول من وين عرف رقمي اكيد من غالية ... الحين انا بعدل خطتي الأولية بس لازم اتأكد ان عنده صور يمكن يقص علينا مثل ما سوى بسالفة الأعتداء ...
مسكت تلفوني وتأكدت ان سامي مو منتبه لي ..كان قاعد بالصالة يطالع تلفزيون ...
قلت بهمس ..
هناء: الو ..هلا غالية ..
قالت بصوت محبط ..
غالية: هلا هناء ...
تعجبت منها وقلت ..
هناء: اشلونج ؟؟ ..
غالية: بخير ...
وتنهدت ...قلت وانا اطالع سامي اتأكد انه قاعد بالصالة ..
هناء: اشفيج تقولينها بهالطريقة ؟؟
سكتت شوي بعدين قالت ..
غالية: هناء ..مافيني على عصام ...تراه شري ...خلصيني منه ..
وانا بعد مافيني عليه بس شسوي لازم نصبر ..قلت وانا اصك الباب ..
هناء: سمعي غالية ..انا وانتي لازم نتحد على هالنذل هذا ... دقي عليه واتفقي معاه على موعد نروح له و..
قاطعتني بخوف وقالت ..
غالية: نروح له بعد اللي سواه فينا ؟؟؟ وليش ان شاء الله ؟؟
قلت وانا امسك روحي لا اعصب ..
هناء: لأن يمكن مو صج اللي قاعد يقوله ...نشوف الصور ونسمع الشريط وبعدها لكل حادث حديث ... فاهمة ؟؟
سكتت بعدين قالت بتردد..
غالية: وإذا طلع صج؟؟
تنهدت وقلت وانا اطالع الباب .
هناء: حزتها نعطيه فلوسه ..
قالت بضعف ..
غالية: وبيرد كل مرة يبتزني ...هذا إذا عطيناه ويه يمصخها ...
قلت بسرعة ..
هناء: سمعي ..بعد ما تتفقين معاه على موعد تعالي عندي اوكي ..ابي افهمج اشلون نتخلص منه ...
قالت بفرح ..
غالية: ان شاء الله ..
وصكيت عنها ...
مسكينة خايفة منه ...الأشكال هاذي المفروض ما نخاف منها ...المفروض نعطيها على راسها ...
قربت نهايتك يا عصام وعلى ايدي ان شاء الله ..
دخل علي سامي فجأة ...خرعني ...حطيت ايدي على صدري مخترعة وقلت ..
هناء: خرعتني ...افتح الباب شوي شوي ..
ابتسم وقال ..
سامي: ان شاء الله عمتي ...
وراح ياخذ ملابسه قلت ..
هناء: طالع ؟؟
قال وهو يطلع ..
سامي: بروح المكتب كالعادة ...
بدل هدومه وراح ... الحمدلله ما جكني وانا اتكلم بالتلفون ..افففففففف متى الله بفكني من هالمصيبة اللي انا فيها ...
محد قالج تدخلين روحج فيها ...ان شاء الله بس اخلص من هذا كله ..بعترف بكل شي واللي فيها فيها ...بس اخلص ..
دخلت المطبخ وفتحت الثلاجة وطلعت عصير وصبيت لي جلاص ...قعدت اشربه بس تلفوني طقع علي اكيد غالية ...
رفعت التلفون بدون ما اشوف الإسم ...
هناء: هلا غالية ..
عصام : اهلين هناء ...
هو .... النذل .. مسكت اعصابي وقلت وانا اضغط على جلاص العصير ...
هناء: اشتبي داق ؟؟
عصام : اولا انا داق على عشان اسأل عن فلوسي ..ثاني شي انا داق لأن بنت عمج المصون اتفقت وياي على موعد ..وانا ادري انج انتي اللي قلت لها ...
هناء: واشدراك بالله ؟؟
عصام : غالية اعرفها خبرة سنة كاملة ..اعرفها قبل ما اعرفج ..غالية غبية ما تفكر بعقلها همها اشلون تستانس وبس ...وانا ونستها مثل ما طلبت ...
قلت بعصبية ..
هناء : انت نذل ...
ضحك وقال ..
عصام : شكرا ...المهم ترى انا حددت الموعد اليوم الساعة سبع بشقتي ..
قلت وانا منصدمة ومنفعلة بنفس الوقت ..
هناء: شنو ؟؟؟ تحلم اييك الشقة ..
عصام : خلاص عيل ...الصور بتوصل لريلج واهلج كلهم وتكون فضيحتج انتي وغالية بالديرة كلها ..وانا اضمن لج هناء مو بس الكويت تعرف العالم كلها بظرف ساعة ...
بدت ايدي ترجف من القهر والعصبية ...
قلت ..
هناء : جدم الموعد شوي ...مااقدر اييك الساعة سبع ...
عصام : امممم..اوكي تعالي الحين ...وغالية تعرف شقتي سأليها عن العنوان ..
وصك عني ...
بدت الدموع تتجمع بس مسحتهم بسرعة ....صج اني خايفة ومرتبكة ...بس لازم اكون قوية على الأقل عشان غالية ...
خرعني صوت تلفوني يدق مرة ثانية وكانت غالية ...اتفقنا انها تييني الحين ونروح بسيارتي لهالنذل ...
دخلت داري ولبست عباتي ..وطلعت للصالة انطر غالية ...بعدها عطتني رنة ونزلت تحت ...ركبنا سيارتي ومشينا ...
هناء : وين العنوان ؟؟
دلتني وانا اطالعها مستغربة منها ...اشلون حبت واحد مثل هذا ما عنده ضمير ولا دم ...
وصلنا العمارة ...وركبنا الأصنصير ..
شكلنا غلط ...احنا شنو نسوي هني ؟؟ انا شلي يابني هني ؟؟ ..
تبطل باب المصعد وطلعت منه وانا خايفة ... وقفت غالية جدام باب شقة ..وطقت الباب ولفت لي وقالت ..
غالية: هاذي شقته ..
مستانسة حظرتج ؟؟!!! يالله عدي اليوم على خير ...
تبطل الباب وكان واقف عصام اللي اول ما شافنا ابتسم وقال ..
عصام : حيا الله كونيسات الكويت ... دخلوا دخلوا ..
ودخل داخل وخلا الباب مفتوح ...دخلت الشقة وانا ريولي ترجف كل شي فيني يرجف ...
ادري اللي اسويه غلط بس عشان اساير هالتعبان ...
وقفنا عند الباب ...قالت غالية ..
غالية: هاذي بنت عمي ....
لف لها عصام وطالعني وقال ..
عصام : ادري ...زوجة ولد خالتي ..اشلون ما اعرفها ؟؟
وابتسم لي ابتسامة خبيثة ..وقال وهو يقعد ..
عصام: قعدوا اشفيكم ...مارح اقرب عليكم لا تخافون ...
مسكت ايد غالية وضغط عليها لا تروح تقعد اعرفها خوافة ..طالعتني هي فقلت اوجه الكلام حق عصام ..
هناء: انت قلت انك عندك صور لغالية وصوتها ...
طالعني وهو يشرب جلاص العصير اللي جدامه وبابتسامة ..
عصام: بس غالية ؟؟ عندي الخير كله ..
وطالعني بخبث ...
ادري قصده علي الحقير ...
مسكت روحي وقلت منطشة كلامه ..
هناء: ورنا الصور وسمعنا صوتها إذا انت صاج ..
شرب شوي ...سم ان شاء الله ... وقال ..
عصام: ليش ما تصدقيني ؟؟
هناء : انت قلتها ...ما اصدقك ...
طالعني بخبث ..بعدين وقف وراح داخل وياب ملف ...مده لنا وقال ..
عصام : تعالي شوفي ..
تحركت غالية بس مسكتها ...وقلت ..
هناء: حطه على الطاولة ...
طالعني بمكر وقال ..
عصام: تراني ما اعض ...
عضتك حية قول آمين ...
حط الملف على الطاولة وتجدمنا انا وهي مع بعض كل وحدة ماسكة ايد الثانية جنا بروضة ...
مسكت الملف وبطلته ...وشفت صورها معاه وهم بالشقة ...ولا بالحديقة ...ولا بالسيارة ...يضحك لها وهي تضحك له ..
" انت عمري كله ...هههههههههههه"
صوت غالية هذاا ..رفعت راسي له وكان ماسك تلفونه ويطالعنا بخبث ...
طلع صوته يقول ..
" لا عاد عمرج كله ...مابي شي انا إلا سعادتج يا بعد طوايف اهلي كلهم "
ووقف التسجيل ...وقال ..
عصام : ها ؟؟؟ صدقتوا ؟؟
كنت ابي ابط راسه بالجلاص اللي جدامه ...احس بنار بجوفي ابي احرقه فيها ... لفيت لغالية لقيتها منزلة راسها للأرض ودموعها تنزل ...
غمضت عيوني انا بحسرة ...
عصام : ها الحين على شنو رسيتوا ؟؟بتعطوني فلوسي ولا اخذها بطريقة ثانية ؟؟
قلت وانا اصك الملف بقهر ..
هناء: خلاص لك اللي تبي ...
ابتسم وقال ..
عصام: حلو ...يعجبني فيج انج ذكية ...بس ها ..
وطالعنا انا وغالية واشر بسبابته ...
عصام : مابي خيانة ...اللي تخوني مو بس بفضحها بخليها تنتحر تذبح روحها بنفسها ...اوكي يا حلوين ؟؟
انا والله اللي بذبحك ...بس اصبر علي ...
طلعنا من الشقة وانا بنفجر من القهر ...ابي اصرخ واهز العالم بصراخي ...
ركبنا السيارة وسندت راسي على السكان ..
غالية : هناء ..انا آسفة اني حطيتج بهالموقف ...
تو الناس بعد شنو ...بعد خراب مالطة ...
رفعت راسي عن السكان ..وقلت بضيق ..
هناء: عادي ..ماصار شي ..
لفيت لها وانا ابتسم ابتسامة باهتة وحطيت ايدي بالجنطة وطلعت مسجل صغير واقول ..
هناء: سمعي ..
وشغلته ...
" مابي خيانة اللي تخوني مو بس بفضحها بخليها تنتحر تذبح روحها بنفسها اوكي يا حلوين ؟؟"
وكان صوته... عصام طبعا ...
قالت غالية بتفاجأ ..
غالية: سجلتي صوته ؟؟!!!!!
هزيت راسي وانا اطالعها وابتسم ....وقلت ..
هناء: نهايته قربت ...بفكج منه ..
وافك عمري بعد ... وكل شي يرد لسابق عهده ..
وصلتها ورديت البيت ...
صكيت الباب لقيت الشقة فاضية ...الحمدلله ما ياه ...اروح ابدل بسرعة ...
طلعت من الغرفة ورحت المطبخ اسوي لي اي شي يسد يوعي ...
سمعت صوت تلفوني ...اففففففففف منو هذا ؟؟؟
رحت الغرفة وكانت امي ..
هناء : هلا يما ..
طلال : انا طلول ...
ابتسمت عليه وقلت ..
هناء: هلا طلال .... اشلونك ؟؟
طلال : حمدلله ...وينج ما يتي ..امي تسأل عنج ..
كنت بيي بس هالنذل خرب علي كل شي ...قلت وانا اطلع من الغرفة اروح للمطبخ ..
هناء : باجر ان شاء الله بييكم ...
طلال : تعالي البيت ..انا طالع اليوم ..
استانست وقلت ..
هناء: والله؟؟ يعني خلاص ؟؟
طلال : ئي خلاص بعد صارلي تقريبا ثلاثة اسابيع عندهم ما ملوا مني ...
ضحكت وقلت ..
هناء: ولا يهمك ..باجر انا عندك برسم الخدمة ..
طلال : وريلج وياج لو سمحتي ..
ريلي ؟؟؟ غريبة ....
بس قلت ..
هناء: ان شاء الله ..
وصكيت عنه ...
اليوم الثاني قلت لسامي ان طلال طلع من المستشفى ..طالعني وابتسم وقال ..
سامي : صج ؟؟ حمدلله على سلامته ..
ورد طالع الكاتب اللي جدامه ... للحين شايل على خاطره منهم ...
قلت وانا اقعد يمه واتربع ...
هناء: بس بنروح بيتهم ...
مارد علي فقلت وانا اهزه من جتفه ..
هناء: سامي اكلمك انا ..
طالعني وقال ..
سامي: تدرين اني مااقدر اروح اشحقة تسألين ؟؟
افففففففف ياربي ..
هناء: انت قلت انك مو زعلان من امي ..
لف لي وقال ..
سامي: وانا عند كلمتي ..انا ماني زعلان منها ..بس إذا رحت هناك بتقط علي كلام جارح ونغزات وانا ماني حمل حجي يعور القلب ..
معاه حق ...امي بس تشوفه تستلمه ... الله يهداج يا يما ...
كمل وقال ..
سامي: روحي انتي انا اعذريني ..
هناء: وإذا قلت لك ان طلال يبيك ...
لف لي باستغراب وقال ..
سامي: طلال يبيني ؟؟؟ ليش ؟؟
هناء:ماادري ...قال تعالي ويا ريلج ...
طالعني شوي بس رد للكتاب وقال ..
سامي: يصير خير ...
قمت انا وقلت ..
هناء: بروح ابدل ...
وقفت بس قال ..
سامي: الحين بتروحين ؟؟
واشر على الساعة وكانت ثلاث ونص ...
كمل وقال ..
سامي: صبري للمغرب على الأقل ..
قلت وانا اسحب الكتاب منه واصكه واقول ..
هناء: الحين بنروح يلا قوم ..
ومسكت ايده ايره ...
بعد نص ساعة كنا واقفين جدام بيتنا ...بغيت انزل بس وقفني صوته ..
سامي: هناء..انتي متأكدة ان طلال يبيني ؟؟
لفيت له وقلت ..
هناء: انت اشفيك هاذي المرة الألف اللي اقولك فيها طلال هو لزم علي إلا ايي وياك...
سامي: لأني لو سمعت كلمة ما تعجبني هناء برد البيت ومارح اطب بيتكم مرة ثانية ...
هناء: الله لهدرجة ؟؟؟
قال بضيق ..
سامي : واكثر ...
ونزل من السيارة وهو متضايق ...راح الديوانية وانا دخلت البيت ...لقيت امي قاعدة ومعاها اسما وخالتي ام عصام وام عبدالله ...طبعا هاذي حزتهم ...
هناء: السلام عليكم ...
امي + ام عبدالله + اسما + ام عصام : وعليكم السلام ..
قعدت يم اسما قالت امي .
امي: وينه ريلج ولا ما يبي يسلم ...
مارح نخلص احنا اليوم ...
قلت بنفاد صبر ..
هناء: يما ...ترى اللي تسوينه هذا كله ماله داعي ...سامي ماله ذنب ..إذا انتي حيل متحاملة عليه اشحقة رضيتي فيه ؟؟
لفت لي وقالت بصدمة ..
امي : قدر يغيرج ..انا امج يا الخبلة ...رضيت فيه لأن طلال قالي انه ريال ما عليه شي بس طلع العكس ..
صج انه ما سوى شي بس من اول ما عرفناه واحنا بمشاكل ...اولها غالية بنت عمج والحين طلال ...وما يندرى شنو رح اييج من ورا اهله انتي بعد ...
ياني وخلصت السالفة من زمان ...
مارديت عليها لأني مابي ادخل معاه بجدال عقيم ... الحجي ضايع بهالحالة ... شفت شهد وقعدت العب وياها ..اشتقت لهالبنت ...كل ما اشوفها ودي الله يرزقني بولد او بنت من سامي ...
إذا الله اراد وحملت حزتها حياتنا انا وسامي بتتغير وتصير احلى بوايد ...
طلعت برة بالحوش مع شهد والعب وياها ... ومر الوقت ..شفت سامي طالع من الديوانية ووراه طلال اللي يمشي بعكازة لين ما الله يشافي ريله ... واشك ان بينهم شي ..لأن سامي طلع بويه غير اللي دخل فيه ...
ان شاء الله خير ...
شلت شهد ورحت لهم اللي اول ما شافت سامي مدت ايدها تبيه يشليها ..اخذها عني وهي قامت تصرخ وتضحك ..وتعلقت فيه بجنون ...لهدرجة تحبه ؟؟؟..
ومنو ما يحب سامي ؟؟ في البداية كنت اكرهه لأني اخذني من احلى حب كنت عايشته ..ما كنت ادري انه بعيشني بأحلى حب ...
انتبهت لطلال اللي وقف يمي وقال بهمس ..
طلال : ها كاهو ريلج وراضيناه .. بعد اشتبين ؟؟
التفت له متفاجأة وقلت بهمس بعد عشان لا ينتبه سامي ..
هناء :راضيته والله ؟؟
هز راسه وهو يبتسم لي ...مسكت ايده وقلت بامتنان ..
هناء: الحمدلله ... انا كنت خايفة ان المسالة تتطور ويصير خلاف بينا ..
شفت سامي يرفع شهد فوق وهي تضحك وكملت..
هناء: ما تتصور اشلون كان متضايق قبل لا انييكم ... عباله لسة انكم حاطين عليه ...
تسند طلال على العكاز وقال ..
طلال : لا ما يهون علينا سامي ...مهما صار منا وفينا ..بعدين ما كان مبين عليه ان زعلان اصلا حتى لما اعتذرت له قالي ماله داعي اصلا ما صار شي ..
طالعته لقيته يضحك مع شهد ويمسك خشمها ويشده ... بعدين التفت لطلال وقلت ..

[لامارا]

هناء: المشكلة الحين امي ... حاطة عليه جنه ماكل حلالها...
طلال :امي ؟؟ ...وانا اقول اشحقة عصبت لما قلت لج يبي ريلج ...
هناء: هي حاطة عليه من سالفة عالية ...وزودتها لما انعدمت انت ..والحين توني بغيت اتهاوش وياها جدام خالاتي ..
تنهد وقال ..
طلال : امي سالفة عودة ...احاول اعرف السبب وارد لج خبر ..وان شاء الله نحاول انا وانتي نرد المياه لمجاريها ...
ومشى لسامي بعكازه وقال ..
طلال : بس ما مليت منها ..
ضمها له وقال ..
سامي: هاذي حبيبتي ما اقدر امل منها ..صح شهودة ؟
هزت راسها وهي مو فاهمة شي ..وقالت جنها توها تستوعب ..
شهد : سامي ..انا احبك ..
باسها سامي وقال ..
سامي : يا قلبي ..وانا اموت فيج ... اشرايج تيين تقعدين عندي اليوم ؟؟
شهد : انام معاك ؟؟
سامي: تنامين وتاكلين وتطالعين توم وجيري في بيتي ...حلو ؟؟
صفقت هي بايدينها بفرح ..ابتسمت عليها ..فقال طلال ..
طلال : ها شهودة مليتي منا ؟؟؟ خلاص خلاص مافي دكان مرة ثانية ...
لف له سامي وقال ..
سامي: ليش توديها الدكان انت ؟؟
قرب طلال من شهد ومسك خدودها وقال يرد على سامي ..
طلال: كل يوم ...صح شهودة ؟؟
لف سامي لشهد وقال بتعب ..
سامي : شهودة شقلنا عن الحلاو ...خلاص مافي نوم معاي ولا في توم وجيري ..
قالت وهي تمسك سامي تطوقه من رقبته ..
شهد : خلاص خلاص مااروح مرة ثانية ...
ضحكنا عليها ..
مشينا للبيت ومعانا شهد ...وبالطريج كانت شهد بحظني .. الاعبها ...وهي تضحك ببراءة ... ابتسمت عليها ..والتفت لسامي ..وقلت ..
هناء: الله لو يكون عندنا ياهل مثلها ...
لف لي وطالعني بنظرة غريبة وقال ..
سامي: مو وقت اليهال الحين ...
سمعتها الجملة من قبل بس ما اعرف سببها فقلت ..
هناء: ليش عاد ؟؟
هز جتوفه ببساطة وقال ..
سامي: بس جذي ... مابي الحين على الأقل ...
قلت بعناد ..لازم اعرف السبب ..
هناء: قولي سبب مقنع ..
تنهد وما رد ..فقلت وانا اقعد شهد لا تطل من الدريشة ..
هناء: احنا صارلنا سبع شهور متزوجين .. مو معقولة الناس مارح تكلم عنا ..إذا ما تكلمت الحين باجر سالفتنا على كل لسان ..
طالعني بتعجب وقال ..
سامي : اللي يسمعج يقول مسويين جريمة ..مانبي عيال غصب ؟؟
هناء: لا تقول ما نبي ..قول مابي ... تكلم عن روحك ...
طالع جدام وقال بملل..
سامي: مابي ..انا مابي ..ارتحتي ؟؟
بغيت اتكلم بس وصلنا البيت نزلت ومعاي شهد ..
انا ماادري كل ما اييب له هالسالفة يرد علي ببرود ... بدلت هدومي وهدوم شهد ..ورحت المطبخ اسوي العشا ...سمعت صوت الباب يتبطل ..طنشته وكملت شغلي وشهد قاعدة على التلفزيون تطالعه سبيس تون ..
لما خلصت طلعت من المطبخ وبايدي الصينية والسماط .. فرشت على الأرض وحطيت الأكل ...
هناء: يلا شهودة ..عشا ..
يبتها وقعدتها بحظني ... وبديت اوكلها ... وانا مطشنة سامي على الآخر ...
سامي: يعني ما آكل ؟؟
رفعت راسي له وبايدي خبزة بوكلها لشهد .. وقلت ..
هناء: جدامك الأكل ...تبي تاكل اكل ..
تنهد وقال ..
سامي : انا ماادري من كل شي تسوين منه سالفة ...
مارديت عليه وكملت اللي كنت اسويه ..قعد ومد ايده وقصر على الصوت ... وطول العشا ما تكلمنا ..
بس ابي اعرف اشحقة ما يبي يهال ...عيل اشحقة متزوج ؟؟ نطالع بعض ؟؟..
بعد ما خلصت شهد كليت شوي بعدين خليتها تتابع التلفزيون ..قمت انا وشلت الصحون اللي خلصت منهم ووديتهم المطبخ عشان اغسلهم ...
انشغلت بغسل الصحون ما حسيت إلا بشعري ينشد ..
هناء : آآي ..
ولفيت لقيته سامي ..الصراحة انصدمت ..عبالي شهد لأنها دايما تشد شعري جذي إذا تبيني ...
سويت روحي معصبة ولفيت عنه ...وقف يمي اقصد لزق فيني فقلت اتصنع العصبية ..
هناء: نعم ؟؟ خير ؟؟ اشتبي لازق ؟؟
قرب من اذوني وقال بهمس ..
سامي: ما تعرفين تمثلين ..
الله يا واثق ...
لفيت له وطالعته باستخفاف وقلت ..
هناء: لا انت اللي تعرف ... بس فكني مابي احاجيك ..
مسك ايدي وبعدها عن الحنفية وقال وهو يغطيها بايده الثانية ويبتسم بحب ..
سامي: افا ..اهون عليج ..
الصراحة لأ ... بس سحبت ايدي من ايده ورديت فتحت الحنفية وحطيت ايدي تحتها وقلت وعيوني على الماي .
هناء: وانا اهون عليك ؟؟؟ بدل ما تحن فوق راسي عشان العيال تقولي مابي يهال ...
طوقني من خصري ويرني ناحيته وقال وهو يحط راسه براسي ويقول ..
سامي: تزعلين إذا قلت لج اني مابي احد يشاركني فيج ؟؟
طبعا انا ويهي ما اقدر اعبر عنه ..قلب صار طبول عرس داخل ... حطيت ايديني على جتفه وقلت بدلع ..
هناء: هذا مو مبرر ..انا بعد مابي احد يشاركني فيك ...بس ..
قاطعني وقال ..
سامي : شنو ؟؟ عيدي عيدي ما سمعت ؟؟
قلت وانا مو فاهمة ..
هناء: اعيد شنو ؟؟
سامي: ما تبين احد يشاركج فيني ؟؟
وابتسمت ابتسامة تذبح وقال ..
سامي: اخيرا قلت شي يبرد قلبي ...
بعدته عني وقلت بابتسامة خجلى ..
هناء: صج فاضي ..الحين انا اكلمك عن اليهال وانت طايح لي مغازل ..
مات من الضحك سامي وما قدر يمسك روحه ..قلت وانا ابتسم عليه ..
هناء: على شنو تضحك ؟؟
صك ماي الحنفية وقال وهو يحاول يمسك روحه ..
سامي: انا قلت انتي ما تعرفين تعصبين ...
وسكت يطالعني وهو يبتسم ...طالعته باستغراب وانا مستحية من نظراته ...فقلت ..
هناء: لا تطالعني بهالنظرات ...تذكرني لما كنا بالسوق ...
وقف يمي وقال ..
سامي: واشلون كانت نظراتي ؟؟
قلت احره ..
هناء: تقهر ...احمد ربك انك للحين عايش بغيت ازنطك ...
ضحك وقال ..
سامي : ويلوموني يوم اقول اني اموت فيج ؟؟
قلت بخجل واحراج ..
هناء: احم احم ..البيت مو فاضي ترى ..
قرب مني وقال بهدوء ..
سامي : ما يهمني .. بيتي وانا حر اسوي اللي ابيه ..
ومسك راسي وضمه بايدينه ..وباسني بين عيوني... قلبي هني وقف ...خلاص ذبت ...شايفين الأرضية ؟؟
طالعني بعدها بنظرات اول مرة اشوفه يطالعني عليها ..
بسجلها بقائمة النظرات اللي دومه يطالعني فيها ...
انا عيوني علقت على عيونه وركزت فيها ... جني استعرض شريط الذكريات اللي مرت بينا من اول مرة شفنا بعض بالسوق لين الحين ...
ضمني له فجأة ... تحت انظاري المستغربة ... بس طوقته انا بعد .. سمعته يقول بهمس ..
سامي: لا تزعلين مني ..
وبعد عني شوي وكمل وقال وهو منزل راسه للأرض ..
سامي: يمكن غثيتج لأني مابي يهال ..بس هناء ..
وطالعني بترجي لأول مرة ..
سامي: لا تيبين هالطاري ... احلفج بالله ..لاتيبين هالطاري ..
استغرب طبعا ...وطالعته وانا مو فاهمة ...بس احترمت رغبته ... وقلت بعدم اقتناع ..
هناء: ان شاء الله ..
وابتسم لي وقال ..
سامي: الحمدلله ...يلا عيل ..أخليج تكملين شغلج ..
وطلع ...
والله ماني فاهمتك ...مرة تكون واضح مرة تكون غامض وانتي جذي اغلب الأوقات ...
مر وقت وانا انظف المطبخ واغسل الصحون ...بعدها طلعت ورحت غسلت ايدي ورحت الغرفة اييب كريم ارطب ايدي ..
طلعت للصالة ..واستوقفني صوت سامي ..بس كان يغني ...سرعت شوي شفته قاعد على القنفة ومعطيني ظهره ..قربت شفته حاط شهد على حظنه ويغني لها وهو يهزها عشان تنام ...
كان صوته هامس شوي بس ينسمع ... وقفت اسمعه وعجبني المنظر الصراحة ...ويقولي مابي يهال ..
قطع عن الغنى ..وتنهد حسيته طالعة من القلب ..ماادري شنو فيه اليوم ...احسه أنه مجروح..
طالع شهد وقال بصوت مسموع ..
سامي: نمتي ؟؟ ياحليلج ما عندج مشاكل تفكرين فيها ...ودي ارجع مثلج بس اعيش حياتج انتي مو الحياة اللي عشتها معاهم ..
لا اليوم كلش مو صاحي ..ابد ...
تجدمت منه وقلت ..
هناء: هاتها عنك ..
التفت لي ومد لي شهد ..خذيتها ووديتها الدار تنام ...ورديت للصالة ..لقيته قاعد بس سرحان ...
قعدت يمه وقلت ..
هناء: سامي ..
التفت لي وما تكلم ...
هناء: اشفيك ..متضايق ؟؟
رد طالع جدام وتنهد ...وقال بعدين ..
سامي: شوي ..
هناء: طلال قالي انكم تراضيتوا ..
لف لي وهو يبتسم ابتسامة باهتة ..وقال ..
سامي : ما تراضينا ...ما صار شي اصلا عشان نتراضى ..مهما صار انا وطلال اخوان ..
ابتسمت بهدوء وقلت ..
هناء: تصدق ...احسدك .
سامي: على شنو ؟؟
مسكت ايده وشبكتها باصابعي وقلت ..
هناء: على صبرك ..
ضغط على ايدي على الخفيف وقال وهو يبتسم ابتسامة حسيتها ابتسامة الم ..
سامي : اللي شفته واللي عشته خلاني اصير جذي غصبن عني ...
وغمض عيونه بألم ...ماادري اشفيه اليوم ...تقربت منه وايدي لسة شابكتها بايده ... ومررت ايدي الثانية بشعره وقلت بحنان ممزوج بخوف ..
هناء: حبيبي ...متضايق من شنو ؟؟
بطل عيونه وتنهد وقال ..
سامي: حاس اني ...
وماكمل ..طالعني وظل يطالعني لثواني ...قلت وانا ابحر بعيونه الفاتحة الكئيبة ..
هناء: لا تقول خلاص اهم شي ..انك ما تفكر وايد ترى التفكير الكثير يتعب ...
نزل انظاره لايدينا وغمض عيونه ...وحط راسه على فخوذي وغمض عيونه ...قلت اسليه ..
هناء : عاد لا تصدق عمرك وتنام ..تراني بقطك على الأرض ..
ابتسم وهو مغمض عيونه ...
كملت انا وقلت ..
هناء: الحين ما قلت لي عن شغلك ...ماشي عدل ..
عدل من وضع رقبته ورد غمض عيونه وقال ..
سامي: ربحت آخر صفقة ..
وطالعني وقال ..
سامي : نسيت اقولج تراني حطيت نص الأرباح بحسابج ..
ابتسمت له بامتنان وقلت وانا العب بشعره ..
هناء: حبيبي ..انا مابي منك شي ..ابي راحتك وبس ..
طالعني شوي بعدين ابتسم لي وقال..
سامي: ولو ..انا من عرفتج وانا الحمدلله الخير زايد ..من حقج الفلوس هاذي ...
هناء : انا وانت واحد ..
قعدنا فترة ساكتين وهو غمض عيونه ...حسيته نام ..فناديته ..مارد علي ...يعني نام ... قمت عنه بشويش وانا ماسكة راسه وحطيته على القنفة ورحت داخل ويبت لحاف ومخدته ورديت الصالة ولحفته ...وعدلت من وضعية رقبته ...
حسيت ان في هوا بالصالة تلفت لقيت الدريشة مبطلة ...عادته دايما يخلي الدريشة مبطلة ...صكيتها ورحت الغرفة مرة ثانية ... ونمت ..
ما نمت عدل ..قعدت اتقلب بمكاني ..ألم في بطني ماادري اشفيها شابة علي ... آآي ...
بطلت عيوني وانا مالي خلق ...حتى النوم محرومة منه ... قمت ورحت المطبخ اشرب لي شي يهدي بطني
مسكت عصير وشربته ...
ادري خبلة ..بطني يعورني واشرب صج ثولة بس يلا يمكن يخف لما تتحرك وتهضم العصير ...طلعت من المطبخ بعد ما خلصته ..
رحت اجيك على سامي لقيته نايم على وضعيته ..رحت سميت بالله ونمت ...
قمت الصبح على صوت ...فركت عيوني وتمغط بكسل ..بعدت عني اللحاف وطلعت من الغرفة ... بس الصوت رد مرة ثانية ... وكان مصدره الحمام عزكم الله .. كان الباب مبطل شوي ...دزيته وشفت سامي متسند على الحنفية وقاعد يرجع ( يتقيأ ).. شهقت بخوف ودخلت الحمام وقلت ..
هناء: سامي ..اشفيك تعبان ؟؟
بطل الحنفية وغسل ويهه وبعدها سند على الحنفية بتعب وقال بصوت واطي ..
سامي : شوي ...
ورد يتنفس بصوت مسموع ... حطيت ايدي على يبهته واخترعت من حرارتها ..وقلت ..
هناء: انت مصخن ...تعال ..
ومسكته من ايده ووديته الغرفة ونومته ...طرت للمطبخ وهني رد لي ألم بطني مرة ثانية بس طنشت ... سويت كمادات ورديت للغرفة مرة ثانية ...لقيته نايم على يمينه مواجه للباب ..لما شافني ياية ومعاي الكمادات
قال باعتراض وبصوته المريض ..
سامي: هناء ..ماله داعي كمادات ..بس عطيني دواي اللي ..
ما كمل حط ايده على حلجه وقام بسرعة من السرير ورد للحمام وقام يرجع مرة ثانية ...
لا حالته ما ينسكت عنها ... قلت بخوف عليه وانا اتألم اصلا من عوار بطني ..
هناء : بدق على عمي ايي ..
ما كملت لأنه قال باعتراض كالعادة ..
سامي: لأ ..لا تدقين ..
قلت بعناد وانا اروح للصالة ادق ...
هناء: بدق ...انت تعبان وايد..
مسكت السماعة بس انسحبت مني وكانت ايد سامي ..ردها مكانها وقال ..
سامي: قلت لج لا تدقين على احد ..تعب بسيط وبيروح ...
بغيت اعترض بس قال ..
سامي: باكل دواي وبخف ان شاء الله ..
يبت له الدوا وبعد ما كلاه انسدح على القنفة ...لحفته عدل ..وقعدت يمه على الأرض وألمي كل ماله ويزيد ..
انتظمت انفاسه وعرفت انه نام ...حطيت ايدي على يبهته ولقيتها لسة حارة ...مسكت ايده وبديت امسح عليها ...
امس ما كان فيه شي ...
فطع تفكيري صوت التلفون ...قمت وايدي على بطني ...
هناء: السلام عليكم..
الطرف الثاني : وعليكم السلام ...اا ..اختي استاذ سامي موجود ؟؟
لفيت لسامي النايم وقلت ..
هناء: ئي موجود بس نايم هو الحين ..
قال بتفاجأ ..
الطرف الثاني : نايم ؟؟
هناء: ئي نايم ..اقوله منو إذا قعد ؟؟
الطرف الثاني: قولي له عادل ...وإذا قعد خليه يدق على المكتب ضروري لو سمحت ..
هناء: ان شاء الله ..
صكيت السماعة ...
"منو؟"
التفت لسامي وكان صاحي ...قلت وانا اتجدم منه ..
هناء: انت ما نمت ؟؟
بعد عنه اللحاف وقال ..
سامي: لأ ...بس ارتحت شوي ..
وقف وهو ماسك اللحاف وقال ..
سامي: ما قلت لي منو؟؟
هناء: واحد اسمه عادل يبيك ضروري ..
استغرب بس راح داخل ...قعدت انا على القنفة والألم مو راضي يروح ... شفته يلبس هدومه ..
قلت ...
هناء: وين ؟؟
سامي : بروح المكتب ..عادل إذا دق يعني في شي ..لازم اروح ...يلا عمري مع السلامة ..
وطلع بسرعة حتى ما خلاني اقول شي ..
المهم انه خف ...وضغطت على بطني وتأوهت ...ماادري اشفيني اليوم ...الحمدلله ان اليوم خميس يعني عطلة ...
رحت الغرفة ونمت ..بس تلفوني دق هني ..مسكته وكانت غالية ...اشتبي هاذي بعد ؟؟
مسكته وايدي على بطني وقلت ..
هناء : هلا غالية ...
غالية : هلا هناء ...تقدرين تيين ..اا ...تيين عندي ؟؟
حسيتها مترددة فقلت ..
هناء: ايي عندج ؟؟ ليش ؟؟
غالية : في موضوع مهم ما اقدر اقوله لج بالتلفون ...
يا كثر مواضيعج المهمة ...
قلت ..
هناء: ئي بس مااقدر اطلع وزوجي مو موجود ..
قالت بإصرار عجيب ..
غالية: مو مهم ...دقي عليه وقولي له انج رايحة السوق ...هناء تعالي بسرعة ..
استغربت ..
هناء: لهدرجة الموضوع مهم ؟؟
غالية: اكثر مما تتصورين ..
امري لله ...شسوي بعد ...
هناء: خلاص بيي انتي وين ؟؟
غالية: انا ...اا...انا عند عصام ...
شهقت ...بطلت عيوني مصدومة ...قلت باندهاش ..
هناء: شنو تسوين عنده ؟؟
بجت هي هني ..فقلت ..
هناء : غالية ردي علي ..انتي شنو تسوين عنده ؟؟
هالمرة مو غالية اللي ردت علي ..عصاموه ..
عصام : عندج ربع ساعة تيين عندي ..ولا تعرفين شغلج ..
وصك السماعة ...
لا هذا ما ينسكت عليه ابد ..بدلت هدومي ورحت ركبت سيارتي وشخطت لبيته ...وانا مطنشة كل شي ..المي وعدم استئذاني من سامي ...
وصلت فوق وطقيت باب الشقة بقوة ..واخيرا تبطل ..وكانت غالية المبطلة ...
قلت وانا اتقرب منها ..
هناء: انتي مينونة تيين عنده ؟؟
كنت واقفة عند عتبة الباب ...ماحسيت إلا بايد تسحبني وتدخلني وتصك الباب ...لوى ايدي بقوة فصرخت متألمة ..وهو قال بعصبية ..
عصام : تلعبين علي هناء ؟؟...انا عصام تيين انتي تلعبين عليه ...والله اوريج ..
حاولت ابعد ايدي عنه بس كل ماله ويلويها بقوة اكبر ..كنت اقول ..
هناء: هد ايدي رح تكسرها ..
غالية: عصام مو جذي ..انت ما وعدتني انك ما رح تأذيها ؟؟
صرخ عصام بغالية وقال ..
عصام : جب انتي ...
والتفت لي وهد ايدي ومسك ذراعي ...
عصام : وين الشريط ؟؟
هناء: اي شريط ؟؟
ضغط بقوة اكبر وقال وهو يهزني ..
عصام: شريط اللي سجلتي فيه صوتي ..طالعتلي فيها ذكية يعني ؟؟ ولا شايفة روحج كونان ؟؟
دزيته بعيد وقلت بعصبية ..
هناء: وانت عبالك اني بعطيك فلوسك جذي بدون ما ابهدلك واخليك عبرة لكل الناس ؟ انت غلطان ...
دزني على القنفة واخذ جنطتي وطلع كل اللي فيها ...واغراضي تطشروا بالأرض ومعاهم طبعا الشريط اللي حطيته بالجنطة من ذاك اليوم وما طلعته ...
شفته يكسره ..
مسك الملف اللي فيه الصور وقال وهو ماسك رقبتي ويحطه جدام عيوني ..
عصام : شايفة هالملف ؟...شايفته؟؟ اليوم بيكون عند ريلج ...
وبعد عني شوي والتفت لغالية الواقفة تبجي ...
عصام: وانتي ...ان ما خليتج تبجين دم ما اكون عصام العالي ...
استغليت انا هاللحظة وهجمت على ايده واخذت الملف ...وقمت بسرعة قبل لا يمسكني ودورت على المطبخ والحمدلله كان اول غرفة شفتها ...دخلتها وصكيت الباب ..وركضت للطاولة ودزيتها ...وهني زاد علي ألم بطني اضعاف بس طنشته ... خليتها عائق عن فتح الباب ...
وبسرعة فتحت الملف وايدي رجف طاحت بعض الصور ...دورت على جبريت وقمت اتلفت وهني طاحت عيني على الباب ...شفته شوي مبطل ووهو يحاول يدز الباب ..
رقع قلبي وايد ...طنشته واخيرا لقيت الجبريت ...من رجفة ايدي طاحت جباريت ( اعواد الثقاب) من ايدي ..مسكت وحد وولعتها ..ومكست الصور وقربت النار منها ..بس هني انفتح الباب بقوة ...بس مع ذلك طنشت وولعت بالصور..بس مسكهم عصام بآخر لحظة ... ودزني بعيد ...طحت على الأرض وصرخت من الألم ...بس مسكني وخنقني وقال بصراخ ..
عصام: تبين تحرقينهم ؟؟ انا الحين بحرقج ...
مسكني ويرني وراه وانا اطق ايده واصرخ ..بس لا حياة لمن تنادي ...زاد المي وعوار بطني ... ماحسيت إلا انا محذوفة بالأرض وعلى غالية ...طحت عليها ...
قال بعصبية ..
عصام : بتقعدين لين ما انا اقرر شي ثاني ...
وصك الباب وقفت انا ورحت للباب اطقه واصرخ ..
هناء: بطل الباب .....
وطقيته عدة ضربات قوية ..بس ماكو رد ... قفله علينا ...انهرت عند الباب وانا ابجي .. طالعت غالية وقلت ..
هناء: منو قاله عن الشريط ؟؟
سكتت وماردت علي ...قمت انا وقلت بصراخ ..
هناء : انتي قلت ليه ؟؟؟
ماردت علي بس اكتفت بالدموع .... ما حسيت روحي إلا وانا ادزها واعطيها جم طراق ...
هناء: انتي مينونة ؟؟...ليش ؟؟
قالت وهي تحاول تبعدني عنها ..
غالية: هددني بالصور ..تبينه يوديني فداهية ؟؟؟
قلت بصراخ مينون ..
هناء: داهية تاخذج وتفكني منج ...
وسكت اخذ نفس ودموعي مو راضية توقف ...قلت بحسرة ..
هناء: الحين اشلون نطلع ...اشلون ؟؟؟
سمعت صوتها تبجي قلت محترة منها ..
هناء: انطمي ..مابي اسمع صوتج ...مابي ...
مازاد هذا إلا من نحيبها ....
ياربي شسوي الحين ؟؟؟ وين قاعدين احنا يحبسنا ؟؟ والله احس اني دخلت عمري بلعبة انا مو قدها ...
انا خلاص بعلم سامي عن كل شي ...ايي يتصرف مع هالمختل عقليا ... الله ياخذ الصور ..اللي فيها فيها ..
تذكرت التلفون ..بس هو من ضمن الأغراض اللي طاحت بالأرض اللي نبشهم عصاموه المينون ...
سامي لو حس بغيابي بروح فيها ...والله لو درى اني طلعت من البيت بدون ما يدري بيذبحني ...
آآآه بطني ....
ضغطت على بطني احاول اخفف الألم ...
لما شافتني غالية دايحة على الأرض اتأوه قربت مني حطت ايدها على جتفي وقالت بخوف ..
غالية: هناء ...اشفيج ؟؟
سحبت نفس وقلت بضعف ..
هناء: بطني يعورني ..
حسيت فجأة بدوخة ...
مسكتني ونومتني على فخوذها وعدلت شيلتي وعباتي علي ...وانا مغمضة عيوني مو قادرة اتحمل الألم ..
بهاللحظة سمعنا صوت المفتاح والباب يتبطل ...عدلت من قعدتي ...شفته واقف عند الباب ويقول ..
عصام: طلعوا ...يلا ..
اسندتني غالية وقفنا وطلعنا من الغرفة ...
قلت وانا اضغط على بطني وبألم..
هناء: بقول للشرطة انك حبستنا هني ...وبعلمهم كل شي ..
قعد وقال بضحك ..
عصام : قولي لهم ...انتي ناسية انج ياية بكيفج ؟؟ تراني مسجل كل كلمة تقولينها وقلتيها من اول ما ييتي اول مرة لين الحين ... ولما ريلج يشوف الصور ...بيفرح وايد ..صدقيني ...
قالت غالية وهي تطالع عصام بحقد ..
غالية: يلا هناء ...الله ييعاقبه ...امشي ..
عصام : لحظة ...اخذوا اغراضكم ...
لمت غالية اغراضي وحطتهم بالجنطة ... وطلعنا ... ركبنا السيارة ...سندت على السكان وانا مو قادرة ..
اطلقت أهة ..قالت غالية ..
غالية: هناء ..دقي على ريلج ايي ياخذج ..
مينونة ادق عليه ...
التفت لها وقلت بصوت مخنوق ..
هناء: شنو اقوله ؟؟ انا عند عمارة عصام ؟؟؟ بيكرني ..
ومسكت بطني ..وشغلت السيارة ...وصلت غالية بعد جهد جهيد ... ورحت البيت ...الحمدلله وصلت بدون ما اسوي حادث ..طبعا كان في مكالمات من سامي مارديت عليها اصلا ما قدرت .. يا ويلي منه ... اكتشفت انه عصاموه حبسنا بس ساعة عشان لا ينكشف النذل ...بس انا خلاص بقول لسامي كل شي ...كل شي ..وهو كيفه عاد ..
طول الطريج للشقة احس بدوخة تروح وتيي علي ...بذلت مجهود خارق عشان اوصل للشقة ..بطلت الباب ودخلت وانا عارفة مارح اخلص من سامي ..
بس انصدمت لما شفته نايم على الكرسي ..ِكله كان ينطرني ...
هديته وبصعوبة رحت بدلت هدومي ... حسبي الله عليك من بني آدم ..انت مستحيل تنعد من البشر ..
نزعت عباتي ..بس ما قدرت بطني زادت علي ...
بسرعة رحت الحمام ... وتسند على الباب هني حسيت اني مبللة ...طالعت الأرضية ...لقيت قطرات من الدم
نازلة ..
شنو هالدم ؟؟
بس ما قدرت افكر لأني حسيت بدوخة ..
ماادري من وين يتني القدرة اني افتح باب الحمام عزكم الله ..وناديت على سامي ...
هناء: سـ....ا...سامـ..ي....
وانهرت على الأرض ...مارد علي ...عليت صوتي اكثر ..
هناء: سا.....ا.....مي..
وقمت اتأوه بصوت عالي .... اخيرا حس علي ...بس للأسف بآخر لحظة لأني ...حسيت اني اطيح على الأرض ...
والدنيا ...ظلمت جدامي ...

[لامارا]

"الفاجعة"

مرت جدامي مواقف كثيرة ...عشتها لحظة بلحظة ...من اول ما تخرجت من الثانوية لين ما رديت البيت آخر مرة وطحت هناك ...
حاسة روحي مخدرة ...واشياء تعيقني عن الحركة ...بطلت عيوني بس بسرعة رديت صكيتهم لأن الضوء عماني ...سحبت نفس بعدين رديت بطلتهم .. السقف فوقي .. تلفت لقيت سامي واقف عند الدريشة يطالعها وهو متجتف ...
حاولت اقعد بس عوار بطني منعني ... اطلقت اهة وغمضت عيوني متألمة ...
سامي: هناء ..
بطلت عيوني شفته واقف جريب من السرير ...لما تأكدت اني صحيت ..قعد يمي وقال وهو يمسك ايدي وبشوق ..
سامي: اخيرا قعدتي ...حمدلله على سلامتج حبيبي ...
بللت شفايفي وبلعت ريجي وقلت بصوت ضعيف ...
هناء: شلي صار ؟؟
بغى يتكلم بس تبطل الباب ودخلت امي وخلود والبنات ومعاهم غالية ... امي اول ما شافتني صايحة ..يتني بسرعة وقعدت يمي وحضنتني ..
سمعت خلود تقول ..
خلود : خالتي شوي شوي ...
ابتسمت انا وامي قالت ..
امي: خليني خلود يما ..
وطالعتني وقالت ..
امي: اخيرا قعدتي ... حمدلله ..الحمدلله ..
قلت وانا اتسند على المخدة ..
هناء: الله يسلمج ...
بغيت اتكلم واسأل شنو صار فيني بس ما اقدر بطني ذابحتني .. تلحفت عدل وطبعا مدام بنات وامي وخالاتي اللي يو توا اكيد بتحلى القعدة وبنسى كل شي ...لاحظت ان سامي انسحب من اول ما دخلت امي والبنات ..
شفت امي تقعد يمي وتقولي بحنان ..
امي: اشفيج ساكتة حبيبتي ؟؟
التفت لها وابتسمت وقلت ..
هناء:ماكو شي ..
قربت امي مني وقالت بهمس ..
امي : الله يعوضج بدال الواحد عشرة .. المهم صحتج ..
استغربت ..
هناء: عن شنو تكلمين يما ؟؟
قالت وهي تسند على المخدة يمي ..
امي: هناء ..انا اعرفج لما تزعلين .. هذا واحد وراح الله يعوضج ان شاء الله .. بس انتي لا تزعلين ما صدقنا قعدتي بالسلامة ..
امي شقاعدة تقول ؟؟ اي يعوضني اي زعل ؟؟ شنو السالفة ؟؟
هناء: يما ..انا مو فاهمة شي .. انا اصلا ابي اعرف انا ليش موجودة بالمستشفى ؟؟
طالعتني باستغراب وقالت ..
امي: انتي من صجج ما تدرين ؟؟
هناء: لأ ..ليش ؟
طالعتني بتعجب بعدين قالت اخيرا ..
امي : انتي اجهضتي ...
قالتها ببطء وخوف .. بس انا ظليت جامدة صرت لوح خشب ...
شنو ؟؟؟ اجهضت ؟؟ يعني انا كنت .....
كنت حامل !!!!!!
يعني الألم اللي كنت احس فيه ..والدم اللي نزل مني كان ....
لأ ...جذب ....جذب ...مو صج ...
مرت جدامي اللي صار معاي بشقة عصام واشلون كان ايرني ...
ارتجفت شفايفي وبدت دموعي تنزل ....
قربت مني امي وقالت بخوف علي ..
امي : يما لا تبجين ...مثل ما كنتي حامل بتحملين ان شاء الله مرة ثانية ...
تجمعوا حولي يهدوني ..ودموعي تنزل وانا مصدومة للين الحين اللي قالته امي مو داخل مخي ...
ام عصام : يما هناء...ان شاء الله تحصلين اللي احسن من الياهل اللي راح ..
احصل احسن منه ؟؟؟
افقدني حلمي حسبي الله ونعم الوكيل ...
قمت اصرخ وابجي وانتحب ...لدرجة ان امي والباجي خافوا ..ونادوا الطبيب ...شفت طلال وسامي اللي بسرعة مسكني يهديني جلبت فيه مثل المينونة وقمت اقول كلام مو مفهوم ...
هناء: كله منه ...كله منه ...
لمني سامي وقعد يقرا علي ..
سامي : اسم الله عليج ...هناء شصار عليج ؟؟
دزيته وقلت بصراخ ..
هناء: طلعوا برة ...طلعوا برة ..مابي اشوف احد ...برررررررررة..
حسيت ان في احد يمسكني ونومني غصب وانا ارافس واصرخ احاول اني افج عمري ..
مسكتني الممرضة غصب ويا سامي اللي شد علي ...ويقول ..
سامي: هناء اهدي ...اهدي ...
بس انا قمت اصرخ ..وطالعت سامي وتكونت لي صورة عصام ... فلت ايدي من ايدي الممرضة غصب ومسكت سامي من قميصه وقمت اصرخ بويهه ..
هناء: كله منك ..انت اللي موت ولدي ...انت ..
ما قاومني سامي وظل يطالعني مصدوم ... مدهوش من اللي اقوله ...بس هني مسكتني الممرضة وشفت الطبيب يجهز الأبرة بسرعة فقلت وانا اصرخ ..
هناء: لأ ....لااااا ...وخروا عني ...
بس ولا كأن احد سمعني .. غرس الأبرة بايدي وبعدها ...ما حسيت بشي ...
بطلت عيوني تلفت حولي ايقنت اني بنفس المكان ...تذكرت كل شي ...دمعت عيوني مرة ثانية ..وقمت انتحب ...
ضيع املي ...الله ياخذه ...الله ينتقم منه ..
قمت اخذ نفس اهدي عمري ودموعي تنزل ... سمعت صوت الباب يتبطل ما تعبت روحي ولفيت اطالع منو غمضت عيوني ولفيت الناحية الثانية متمنعة ومتصددة ...قلت وانا اغمض عيوني وتنزل منها دمعة ..
هناء: مابي اشوف احد ..
سامي : ولا انا ؟؟
التفت وقلت بوقاحة انا استغربت منها ..
هناء: مابي اشوف احد ..اتكلم عربي على ما اظن ..
قعد يمي بس انا صديت عنه الناحية الثانية ...
سامي: هناء ...اللي صار مو بايدج ..الله كتب ان هالياهل يموت ..
يمكن ارضى اني اسمع لو كنت بحالة احسن بس وانا بهالحالة المتردية مستحيل ...وطاري الياهل بروحه يخلي الشياطين تنطط جدامي ..
التفت له وانا بعيوني شر ...وقلت وانا احط ايدي على بطني اخفف الألم ..
هناء: انت تعرف شنو مريت فيه ؟؟ انت تدري شنو صارلي ؟؟ ما تعرف ...لأنك ما جربت ..لا تسوي روحك متعاطف وياي ..انت اصلا ما كنت تبي الياهل ...
وقربت منه وقلت بحقد .
هناء: انت السبب في موت هالياهل ... وعمري مارح اسامحك ..ابدا ..
ورديت نمت وبس معطيته ظهري ... ما همني شنو حاس فيه الحين ..زعل ولا ما زعل ...
ما سمعت صوت وخمنت انه انسحب .. غمضت عيوني بألم ...
اليوم الثاني ... يوا الأهل وزاروني وانا قاعدة معاهم بس عقلي مو وياهم ابد... صايرة عصبية ومو طايقة احد .. العصر يتني امي وطلال بس .. وامي يت بذكر السالفة اجهاضي مرة ثانية ..
امي: وليش ريلج ما اييج ولا خلاص اجهضتي ما يبيج ؟؟
قال طلال معترض ..
طلال: يما الله يهداج ..اشقاعدة تقولين ؟؟
التفت له امي وكملت ..
امي: قاعدة اقول الصج ...
ولفت لي ..
امي : ريلج هذا ماادري على شنو شايف عمره ..مغرور ورافع خشمه ..
غمضت عيوني انا ولفيت الناحية الثانية مالي خلق اتكلم ..اصلا مابي اشوف احد ..
طلال : يما ..سامي مافي احسن منه ...انتي ناسية انه حذرنا من عالية ؟؟
امي : قصدك هو اللي وصلك لحالتك هاذي ...هو واهله ...كافي ان احنا مزوجينه بنتنا بدون رضى امه وابوه ..
تنهدت بضيق ...بغيت اسكتهم كلهم بس سمعت طق على الباب ...قام طلال بعكازته وبطل الباب ..
طلال : حياك سامي ...
تأففت امي ..اما انا ..لحفت عمري وصديت عن الباب ..
سامي: السلام عليكم ...
امي + طلال : وعليكم السلام ..
سامي : اشلونج عمتي ؟؟
قالت امي باحتقار ..
امي: هلا ..
طلال: حياك سامي ...اقعد ..
هالمرة وجه طلال حجيه لي وقال ..
طلال : هناء ..ريلج موجود لفي سلمي عليه ..
اففففففف ...قلت بعصبية وقرف ..
هناء: خير ؟؟ نعم ؟؟
طالعني بألم وما تكلم .. بس سحب نفس يهدي عمره ...
هناء: انا قلت مابي اشوفك غصب حتى اشوفك ؟؟
والتفت لأمي لعلمي المسبق بكرهها لسامي ..
هناء: يما مابي اشوف احد ...
قالت امي هني ..
امي: سمعت شقالت ..
هني تدخل طلال وقال وهو ايير امي ..
طلال : يما احنا مالنا شغل ..امشي خل نطلع ..
طالعتني امي وطالعت سامي بحقد وقامت ...
اول ما طلعت امي قام وسامي وقعد يمي وقال بحزن ..
سامي : لهدرجة شوفتي تلوع جبدج ؟؟
قلت بحقد ..
هناء: واكثر ...ممكن تطلع برة ؟؟
تنهد بس قال بعناد ..
سامي: ماني طالع ...
طالعته بكره ...صج كارهته بهاللحظة ..وقلت وانا اصد عنه واتلحف ..
هناء: لا تطلع ...تراني حيل ميتة فيك ماابيك تطلع ..
بس مسك ذراعي واجبرني اني اطالعه ...وقال يحاول يمسك روحه لا يعصب ..
سامي: عندي سؤال واحد وابيج تجاوبيني عليه وبعدها بطقاق اللي يطقج ..
قرب من ويهي وقال ببطء ..
سامي: انتي وين كنت قبل ما تردين البيت ؟؟
بهت ...ظليت اطالعه مصدومة من سؤاله مو عارفة شنو اجاوبه ..فقال وهو يضغط على ذراعي اكثر ..
سامي: انتي اشلون تطلعين بدون ماادري؟؟ ادق عليج ما تردين ...ممكن اعرف وين ذلفتي ؟؟
سحبت ذراعي منه وقلت بارتباك وعصبية .
هناء: كنت بالسوق ...يعني لازم كل ما اطلع استأذن منك ؟؟
طالعني بصدمة اول شي بس بعدين قال بعصبية وهو يطق راسي على الخفيف ..
سامي: انتي صج ما تستحين ..ينيتي ؟؟ شكلها الطيحة اثرت بعقلج ...
بعدت ايده بعصبية وقلت بصراخ ..
هناء: لا تطق ...انا كيفي اسوي اللي ابيه ...اطلع وادخل محد له شغل فيني ...
مسكني من رقبتي وشدني ناحيته ..الحركة هاذي خلت الألم يشتد في بطني ..قرب مني اذني وايد وقال بصوت عصبي ..
سامي: لولا خوفي من ربي كنت ذبحتج هني ...
ودزني وقال يكمل بوعيد ..
سامي: هناء...لا تخليني اقلب للويه الثاني ..تراني مجرم واسوي اي شي ... فيستحسن انج تقولين لي وين كنتي ؟؟
قلت وانا ابجي واصرخ ..
هناء : قلت لك كنت بالسوق ..شنو انت ما تفهم ؟؟
هني لأول مرة مد سامي ايده بس وقفها بنص الطريج ...بغى يصكني كف بس وقف ...
سحب نفس وغطى ويهه بايدينه وبدا يتمتم ..
سامي: استغفر الله ...استغفر الله .
وبعَدهم وقال بعصبية ..
سامي: ارتحتي ؟؟ لازم تطلعيني من طوري يالله تستناسين ؟؟؟
هز راسه باستنكار وطلع ...
اما انا ..ظليت طول الوقت مصدومة ...اول مرة يسوي جذي ...اول مرة ... يمد ايده ... تجمعت الدموع في عيني وبدت تنزل ...
قمت ابجي بصوت عالي ... واطق ويهي بايديني جني مينونة ....دخلت علي امي ولما شافت حالتي جذي
يتني بسرعة وبخوف ...
امي: شنو سوى فيج ؟؟؟ يعله ما يربح لا دنيا ولا آخرة ...اسم الله عليج ..اسم الله عليج ...
هاذي بعض الجمل اللي قالتهم امي ..الباقي ما سمعته لأني نمت ....
ظليت على هالحالة ثلاثة ايام لين ما ياه اليوم اللي اطلع فيه من المستشفى ...وطول هالثلاثة ايام ما ياني سامي ولا سأل ..
وهذا اللي مكدرني ..كل ما اتذكراللي صار ابجي بدل الدموع دم ...
كنت قاعدة اطالع امي ترتب هدومي بالجنطة ...تبطل الباب فجأة ..وكان سامي .. طبعا فرحت لما شفته بس سويت روحي ثقيلة وزعلانة وانا من داخلي اتقطع الف مرة ...اللي صارلي مو شوية ... وهو ما قدر حالتي النفسية وبدا بالهجوم ...
سامي: السلام عليكم ..
امي : وعليكم السلام ..
طبعا قالتها وهي معطيته ظهرها ...اما انا قلبت ويهي الناحية الثانية ..
سامي: إذا خلصتي انا برة ..
وطبعا كان يوجه الكلام لي ..فقلت وانا التفت له وبعناد ..
هناء : انا بروح مع امي ..بروح بيتنا ..
كأنه توقع هالشي ..ابتسم بقهر وقال ..
سامي : للاسف بتيين معاي ..
امي هني التفت له وقالت ..
امي: خلها ترتاح عندي شوي .. مستعيل عليها يعني ؟
سند سامي على الباب وتجتف وقال ببرود ..
سامي : وايد ..
وبطل الباب وقال بأمر ..
سامي: خلصتي انا برة ...
طلع وصك الباب ..
امي: عمى ان شاء الله ...قلت لج مغرور هذا ...
نزلت راسي بأسى ... انا ادري ليش يسوي جذي ..يبي يتوحد فيني عشان يعرف وين كنت ذاك اليوم ...
هني تذكرت كل شي ..واللي صار ...منعت نفسي اني ابجي ..ولما خلصت امي مسكت الجنطة بس قالت ..
امي : خليها انا بشيلها ..انتي بتيين معاي ...امشي ..
لا بتصير هوشة ...وسامي معند ...وسامي ماكو اعند منه ...بغيت اعترض بس امي مشت جدامي ...طلعنا من الغرفة مالقينا احد .. مسكت امي نقالها ودقت على عصام لأن طلال ما يقدر يسوق ...
نزلنا تحت وظلينا واقفين برة لين ما ايي عصام ... ما اهتميت وين يكون راح سامي ولا فكرت اصلا ...
المهم عندي اني اروح البيت وانام تعبانة وايد ...
وصل عصام وبنفس الوقت شفت سامي طالع من باب المستشفى ...مسكت امي فانتبهت علي وقالت بثقة ..
امي: ماعليج منه ...باخذج عندي لا تحاتين ..
الله يستر ...

[لامارا]

قرب سامي منا ... وكانت مبينة عليه علامات العصبية ... بغى يتكلم بس نزل عصام من السيارة وقال وهو يبتسم..
عصام: هلا سامي ...اشلونك يا القاطع ؟؟
التفت له سامي على مضض وابتسم بويهه مجاملة وقال ..
سامي: هلا والله عصام ..شخبارك ؟
عصام : انا الحمدلله ...
والتفت لأمي وقال ..
عصام: وهذا هو سامي وصل يعني انا خلصت مهمتي ..
امي قالت بعناد وهي تطالع سامي ..
امي: لا ما خلصت ...انت بتوصلنا بيتنا ..
قال عصام بتساؤل ..
عصام : اوصلج انتي بس خالتي ؟؟
بغت تتكلم امي بس سامي قال ..
سامي: ئي بس عمتي ..
ولف لي وقال ..
سامي: امشي ..
بس انا وقفت ...مابي اروح معاك ابي ارتاح شوي حرام عليك ارحمني ...ولما شافني واقفة قال يطالعني بحقد بس يحاول يخفي هالنظرات ..
سامي : امشي ...
امي قالت بعصبية ..
امي : ما تبي تروح معاك غصب ؟؟
مارد عليها سامي بس كلمني وقال..
سامي : يلا هناء ..
مابي ...ليش مو راضي تفهم ..
قلت اخيرا ..
هناء: انا بروح مع عصام وامي ..بيتنا ..
قالت امي منتصرة ..
امي: سمعت ؟؟
ومسكت ايدي وبغينا نركب السيارة ..بطلت امي الباب الوراني وبغيت اركب بس سامي صكه بقوة ..اخترعت ...
وقال بتهديد ..
سامي: هناء...آخر مرة اقولج امشي ...
استنبط عصام هني ان في شي بينا ...فقال يهدي الوضع ..
عصام : يا جماعة هدوا ..اشفيكم ؟؟
وطالعنا يبي يفهم ... بس ما تكلمنا بس ظلت نظراتنا الحاقدة لبعض هي سيدة الموقف ... بس تكلم سامي اخيرا ..
سامي: ها ؟؟؟ بتيين ولا ..
ما كمل لأني اعرف شنو رح يسوي ... سامي مينون إذا عصب ..يسوي أي شي ...
بس امي قالت بعناد مو راضية تخلي اليوم هذا يعدي ..
امي : انت ليش مقفل ؟؟ قلنا لك ما تبي ...
طالع سامي امي بعصبية وقال ..
سامي: حاجيت مرتي انا ...
قلت لكم سامي يصير مجرم إذا عصب ..واوقح منه مافي ...
فقلت انا بعصبية ...
هناء: لا تحاجي امي جذي ...
ابتسم بعصبية وقال ..
سامي: آسف ..ممكن تيين الحين؟؟ ..لأني بدا عندي العد التنازلي ...
هديت امي ومشيت ناحيته وقلت ..
هناء: ماني ياية ..ابي اقعد عند اهلي ..حرام ؟
طالعني كأنه وده يزنطني ..بس قال بهدوء ..
سامي: انا قلت كلمة وحدة بتيين يعني بتيين ...
وقرب مني وايد وقال بهمس ..
سامي: سامعة ؟؟
الصراحة اخترعت منه لما قرب .. خفت يسويها واييرني جدام عصام وامي .. فانصعت ومشيت جدامه وريولي تخطو خطوات القهر على الأرض ..بطلت باب السيارة بقوة ودخلت وصكيتها حيل لدرجة ان صوت الصكة تردد في الهوا ..
ركب السيارة وشغلها ..تحركنا وانا طول الوقت لافة ويهي عنه ...مابي اكلمه ..احس بنفور منه ...
وصلنا العمارة وصعدت فوق ... دخلت وانا نفسي عايفة المكان ...
مريت على المكان اللي طحت فيها آخر مرة ...ولأني مابي اقلب المواجع تحركت بسرعة من المكان ودخلت الغرفة ابدل هدومي ... بس سمعت صوت الباب يتبطل ... ما تعبت نفسي والتفت لاني اعرف منو ..
فصخت عباتي ..ماسمعت صوته منه ...ما اهتميت وفصخت الشيلة ..كنت ابي اروح اعلقها بس حسيت بايده تمسك ايدي ...تنهدت وقلت ..
هناء: سامي...
قاطعني وقال بهدوء ..
سامي :آسف ...ماكان قصدي اسوي جذي ..
تدرون لما بيعتذر جنه تلميذ نسى الواجب ...
نزلت راسي وسحبت نفس ...احس انه مافي هوا يدخل رئتي ..احس بأن الدنيا ضايقة على وسعها ...
رفع سامي راسي بايده وخلاني اطالعه تجمعت الدموع بعيوني ..وهو قال ..
سامي : هناء ...انسي خلاص ...الياهل الله كاتب عليه يموت ...
ما قدرت اكتم عبراتي ...دفنت ويهي بصدره وبديت ابجي ...الوحيد اللي دايما احس بالراحة معاه ...
الوحيد اللي يمسح دمعتي ...
بعد ما هديت ..قعدني على السرير ..سمعته يقول ..
سامي: هديتي الحين ؟؟؟
هزيت راسي بصمت وانا امسح دمعة نزلت مني ... مسك ايدي بحنان وقال ..
سامي: حبيبي .. لا تتوقعين اني ما زعلت على فقدان الياهل ...صج اني كنت رافض فكرة اليهال على الأقل الحين بس والله ما اجذب عليج ...انا زعلت وتضايقت عشانج ...بس هذا اللي كاتبه الله ..وهو بيعوضنا احسن منه ...
رفعت راسي له وطالعته وقلت ..
هناء : انزين ليش كنت رافض اليهال ؟؟
غمض عيونه وتنهد وقال ..
سامي: ما كنت مستعد ..
بطل عيونه وقال بتساؤل ..
سامي: انتي ما كنت تدرين انج حامل ؟؟
هزيت راسي بالنفي وقلت ..
هناء: لو ادري كنت قلت لك ...
وسكتنا ...ظل يطالعني بنظرات غريبة بعدين قال ..
سامي: هناء..
طالعته وقال ..
سامي: وين كنت قبل ما تيين البيت ؟؟
بهت ...ما عرفت شقول ...ذكي قدر يهديني بكلمتين ...
انقذني صوت تلفونه رفعه وهو يطالعني بتشكك ...
سامي: هلا عادل ..
(............................)
تنهد بعدين قام وما سمعت الباجي لأنه طلع من الغرفة ...تنهدت بارتياح ..صج اني ابي اقوله كل شي بس الحين مو وقته ....اصلا انا ماني عارفة اشلون اقوله ..
بعد هالحادثة مرت الأيام طبيعي ما عدا مناوشات من امي لسامي ... ماادري ليش مو راضية تشيله من راسها ..
رديت للجامعة والدراسة مع انه نازلني انذار ثاني ..بعدها فصل ... انتبهت لدراستي اكثر وعصام غريبة ما تكلم ولا سوا شي ...الله يستر منه ...احسن انا اصلا خلاص بقول لسامي كل شي وهو كيفه عاد ...
ما عندي شي اخسره ..
طلعت من الغرفة مترددة ...انا ناوية اقوله كل شي الحين ...واللي فيها فيها ...
لما وصلت للصالة لقيته قاعد على الطاولة ويكتب ...واللاب توب جدامه واوراق منثورة حواليه ...حسيته مشغول ...بغيت ارد الغرفة بس وقفني صوته ..
سامي: هناء ..
لفيت له لقيته يطالعني كمل وقال ..
سامي: اشفيج ؟؟
ماعرفت شقول .. اصلا ما ادري اشلون اقدر اقوله ...
قرى التردد في ويهي ..مد ايده وقال ..
سامي: تعالي ...
قربت منه جني ياهل مسوية ذنب ... مسكتي ايده وقعدني وقال ..
سامي: في شي تبين تقولينه ...
استغربت وقلت ..
هناء: اشلون عرفت ؟؟
ابتسم بعذوبة وقال ..
سامي: مرتي واعرفج ...
ابتسمت باضطراب وارتباك ... حسيت برجفة تسري في جسمي ... خفت يحس فيها ..فسحبت ايدي من ايده ومسكت فيها ايدي الثانية وبديت افركهم في بعض بتوتر ... وقفت مابي اشوف ويهه لأنه يربكني ...
وقلت بارتباك واضحة في صوتي ..
هناء: ااا....سامي ...
ولفيت له لقيته يطالعني ينطرني اتكلم ...
هناء: بقولك شي بس ما تعصب ولا تفهمني غلط ...
ابتسم يخفف من حدة توتري ..وقال ..
سامي : اشفيج جنج مسوية شي جايد ؟؟
هو جايد وبس ؟؟ انت لو تدري بتذبحني ....ياربي ماادري شقول ....
غمضت عيوني وانا خلاص بقوله كل شي مرة وحدة...
هناء : انا ...
قطع علي صوت تلفوني ..هاذي ثاني مرة ينقذني فيها تلفون ... رحت داخل اشوف منو ...وكانت رقم عمي ...انصدمت ...عمي داق ...
هناء: هلا عمي ..
قال بصرامة وحزم كعادته ..
عمي: هناء ...تعالي عندي الحين ...
استغربت ..طالعت الساعة ولقيتها خمس العصر ...
هناء: الحين ؟
قال بحسم ..
عمي: ئي الحين ..
وصك بويهي ...الله يستر معصب ...
رديت الصالة ...لقيت سامي ردا لأوراقه لما حس فيني رفع راسه وقال ..
سامي: ها ؟؟ بتقولين ؟؟
مو وقتك ...وقفت يمه وقلت ..
هناء : عمي يبيني الحين ماادري ليش ؟؟
استغرب وقال ..
سامي : ما سألتيه ؟؟
هزيت راسي بالنفي ...فقال ..
سامي: خلاص روحي ..
نزلت راسي وقلت بخوف ..
هناء: انزين تعال معاي ..
طالعني ببلاهة وقال ..
سامي: ها ؟؟ لأ طبعا ..عمج يبيج انتي مو انا ..
قلت بترجي ..
هناء: سامي ..الله يخليك ..
استغرب من لهجتي ...ما قدرت اخفي خوفي ..قلبي ناغزني من هالسالفة ...
قال يحاول يهديني ..
سامي: عمري ...روحي شوفي عمج شنو يبي فيج ...انا مااقدر اتدخل ..هو يبيج انتي مو انا ..
هالمرة قلت بتوسل مع اصرار..
هناء: مابي ..مارح اروح إلا وانت وياي ..
هناء صج استغرب وبنفس الوقت شك وقال ..
سامي : انتي تعرفين اشحقة عمج طالبج ؟؟
هزيت راسي بالنفي وانا منزلة راسي وقلت ..
هناء: قلبي ناغزني من هالسالفة ..عمي كان معصب وماادري شنو فيه .. ابيك تيي وياي ..
ومسكت ايده ونظرات التوسل في عيني ..قال بمزح ..
سامي: خلاص يبا لاتبجين علينا بيي وياج ..
ابتسمت بين خوفي وارتباكي ...ردت الغرفة بدلت ونطرته يبدل ويسخن سيارته وطلعنا ...
بالطريج ...
سامي: ترى مارح ادخل ..بنطرج بالسيارة ..
لاوالله مسوي شي الحين ...
هناء: عيل اشحقة ياي ؟؟
ابتسم على شكلي المعصب وقال ..
سامي: انتي الي قلت لي تعال..
قلت وانا الف للدريشة ..
هناء: لا بتدخل وياي ...عمي مارح يطردك إذا ييت ..
سمعته يقول ..
سامي: ادري ..بس مالي حاجة هناك .. جني راز ويهي ..
ابتسمت وقلت بمزح احاول اخفف حدة توتري ..
هناء: هو من ناحية راز ويهك فأنت راز ويهك ..
طالعني وابتسم وقال وهو يلف السكان ..
سامي: اوكي نرد البيت ...
قلت بسرعة ..
هناء: لا لا ..خلاص انا اللي يايبتك ..انت مو راز ويهك ..
ضحك علي وقال ..
سامي: ئي تسنعي ..
الوحيد اللي يقدر يطلعني من حالتي هو سامي ...مهما صار بينا هو اللي يقدر يقدر يخفف من خوفي والمي ...
وصلنا بيت عمي ...ونزلنا ...دخل سامي الديوانية ...وانا دخلت البيت ...بطلت لي خدامتهم ..وقعدت انطر عمي يطلع لي ...
سمعت صوت ناحية السلم سفت عمي ومرته المغرورة نازلين ...سلمت عليهم وقعدنا ...طلعا مرت عمي ما تنازلت تسالني عن احوالي ولا احوال اهلي فطنشت انا ...بس حسيتهم يطالعوني بنظرات كره وحقد ...
قلت لما تذكرت سامي منقع بالديوانية ..
هناء: عمي ..سامي موجود بالديوانية ..
قالت مرت عمي ..
مرت عمي : اشحقة تعبتيه كنتي يتي بروحج ؟؟
عشان تاكلوني بهالنظرات ؟؟ لا حبيبتي اخاف على عمري انا ..
ابتيمت مجاملة وقلت ..
هناء : تعبج راحة ..
وقف عمي وقال بلهجة اول مرة اسمعها منه ..
عمي : زين انج يبتي ريلج ...بروح اناديه ..
طلع عمي وخلاني مستغربة ... شيبي بسامي ؟؟؟
طالعت مرت عمي اللي ما تعبت وهي تطالعني بهالنظرات الغريبة ...وقلت ..
هناء: إلا وين غالية ؟؟
ماردت في البداية بس قالت اخيرا ..
مرت عمي : اشتبين فيها ؟؟
هني صج استغربت ...اشفيها هاذي ؟؟؟ مو صاحية ...كافي نظراتها لي طول الوقت ...بغيت ارد بس دخل عمي وسامي اللي تنحنح عشان مرت عمي تغطى ...
قعد سامي يمي ... ونطرنا عمي شنو يبي ...مسك عمي ظرف جبير بالحجم شوي . وهو يطالعنا بنظرات غريبة ...وقطه علينا ...مسكت الملف وطلعت اللي فيه ....
شهقت بصدمة ....
هاذي صور غالية ويا عصام ....
النذل سواها ...
سمعت عمي يصرخ بعصبية ..
عمي: اشحقة ما قلت لي ؟؟
رفعت راسه له وقلت بتردد..
هناء: ما كنت ...ما ..
وسكت ...ما عرفت شقول ... التفت لسامي اللي كان يطالع الصور بصدمة كبيرة بس لف ويهه لان غالية ما كانت لابسة حجابها ...
لف عمي لسامي وقال ..
عمي : مستحي حظرتك ؟؟ مسوي لي فيها شريف ؟؟
طالعت سامي وهو لسة منصدم وقال ..
سامي: وانا شكو ؟؟
صج سامي ماله شغل ..قال عمي بثورة وهو يقرب من سامي ..
عمي : ولد خالتك النذل لعب على بنتي وقص عليها ...
وسكت ياخذ نفس ..
عمي : مو حرام اللي تسوونه ؟؟ مو حرام ؟؟
وقفت انا هني وقلت ..
هناء: عمي سامي ماله شغل ...
قالت مرت عمي ..
مرت عمي : مايدري ؟؟؟ انزين نفرض انه مايدري ..انتي كنتي تدرين ..ورحتي مع غالية لشقته ...اشحقة ما علمتينا ؟؟
غمضت عيوني لما قالت يت مرت عمي بذكر روحتي لشقة عصام ... يا ويلي سامي بيذبحني ...
سمعته يقول بصوت خفيف مصدوم ..
سامي: انتي رحتي له ؟؟
قال عمي بصراخ ..
عمي: لا تسوي روحك ما تدري ...غالية قالت انها يتكم وترجتكم تخلصونها من هالنذل بس انتوا ما رديتوا عليها ..
سامي: يتنا ؟؟؟
وهز راسه بالنفي وقال ..
سامي : مايتنا ...انا اصلا ماادري عن السالفة بكبرها ...
بغيت اتكلم واقول كل شي بس قال عمي ..
عمي: مالي شغل انا تدري ولا ما تدري ..انا اللي ابيه هالنذل يكون عندي .. وانت اكيد تعرف وينه ..
وقف سامي وقال ..
سامي : اسمح لي بو غالية ..اتهاماتك مالها داعي ...عصام اللي تحجى عنه صج ولد خالتي بس انا بطريج وهو بطريج وما اعرف وينه .. من اول مارديت الديرة ما شفته ..وإذا على الصور ترى غالية بنتك بعد غلطانة ..هي اللي كانت تطلع معاه وما يندرى شنو صار ..
ثار عمي هني وقال بصراخ ..
عمي :جب ...بنتي ارف منك ومن امثالك ...اطلع برة ...اطلع ...الله لا يبارك فيك ولا في ولد خالتك ...
سكت سامي ومارد ... وطلع من البيت ..
انصدمت انا من اللي صار ... كل مالها وتتعقد السالفة ...
طلعت ورا سامي بسرعة شفته يبطل باب السياريبي يركب بس مسكته وقلت ..
هناء: سامي اسمعني ..
بعد ايدي بدفاشة وعصبية ..وقال ..
سامي: وخري عني ..
وركب السيارة فقلت ..
هناء : آسفة والله آسفة ..عمي ما كان يقصد اللي قاله ما..
قاطعين وبعصبية ..
سامي : عشان جذي اصريتي تيبيني معاج ...عشان انهان ؟؟ ...
ونزل من السيارة جنه تذكر شي ..
سامي : وبعدين تعالي ...
ومسك ايدي بقوة ..
سامي: منو سمح لج تروحين لعصام ؟؟؟
كنت ابي اتكلم بس دزني وقال ..
سامي: ركبي الحين ..حسابج معاي في البيت ..
هناء: بس سا..
صرخ علي وقال ..
سامي: ركبي ..
ركبت وريولي ترجف ... مو عارفة الون ابرر له ...طول الطريج كنا ساكتين كل ما التفت له القى ويهه صاير احمر من العصبية ..معاه حق اللي صار مو شوية ...
وصلنا البيت وانا خايفة من شي واحد اني اخر الأولي والتالي ويعرف عن صيبتي وهو بهالحالة ...حزتها على الدنيا السلام ..
دخلنا الشقة مع بعض حتى ما راح يصفط السيارة كعادته ... دزني بغيت اطيح وقال ..
سامي: ممكن اعرف اشحقة رايحة عند عصام ؟؟
قلت بخوف ..
هناء: انا كان قصدي اسحب منه الصور بدون مشاكل وعوار راس .كنت خايفة عمي يدري وتصير مصيبة ..
قال بعدم تصديق ..
سامي: والحين عمج ما يدري يعني ؟؟ ...
هناء: درى وخلص ..بس انا كان قصدي اني اخليه يطيح في شر اعماله ..
قرب مني وبعصبية فانكمشت على روحي لا يسوي فيني شي ..وقال يمسك روحه ..
سامي: يطيح في شر اعماله ؟؟ انتي تبين تذبحيني ؟؟ عصام انذل منه ماتلقين ..الحين لو سوا فيج شي انتي ولا غالية ؟؟
قلت ..
هناء: بس ما سوى شي ...غالية يتني تبيني انقذها منه ..
قال باستخفاف ..
سامي: لا والله ؟؟ليش شقالولها عنج؟؟ جيمس بوند ولا شارلوك هومز ؟؟
بعد عني وهز راسه باستنكار وراح داخل ...
خبلة ...غبية ...ثولة ..ماافهم ...
اللي سواه عصام رسالة تنبيه لي يحذرني انه بدا صبره ينفد ...
تخيلت نفسي مكان غالية ...
غمضت عيوني مخترعة من الفكرة ..إذا هي فكرة واخترعت جذي عيل لو صج اشلون بتصرف ؟؟
بعد هالسالفة ...سامي طبعا زعل وإلى الآن زعلان ما يكلمني إلا نادرا ... وإذا كلمني يكلمني وهو قالب ويهه عني ..
اما عن غالية فما شفتها ..وعمي حارمها من كل شي ..ومنعني اني ازورها ..طبعا محد يدري عن شي ..وكتمنا على الموضوع ..
في يوم ..دق علي عمي وطبعا استغربت اتصاله ...بس لما رديت عليه كان صوته حزين وبدا يكلمني عن غالية وحالتها ...مسكين ..هي اكبر عياله وبنته الدلوعة ..وطلب منب اني ايي ازورها لأنها هي اللي طالبتني ..إلا تشوفني ...
تنهدت ..الحين اشلون اقول لسامي اني بطلع وهو اصلا مو طايق يسمع صوتي ..
طلعت للصالة وكان قاعد يطالع تلفزيون ...
هناء: سامي ..
مارد علي ...فكملت ..
هناءك عمي يبيني اروح اشوف غالية ..
سامي: روحي ..
جنه يبي الفكة مني ... نزلت راسي بحزن ..بدلت هدومي ورحت لها ...
وصلت البيت وطلعتني خدامتهم لها ...طقيت الباب ودخلت لقيتها في حالة يرثى لها .. اول ما شافتني مسكتني وظلت تبجي وتنتحب ... هديتها وفهمتها ان اللي صار مو بايدها كله من النذل عصاموه ...
ولاني دريت انها ما تاكل عدل اصريت انها تنزل وياي المطبخ ...
هناء: بسوي لج احلى صمونة ...بس ماادري إذا عندكم جبن ولا قيمر ..
ابتسمت لي على مضض وبطلت الثلاجة وعطتني الجبن ..وبدينا نسوي اكل خفيف ...
تذكرت اني خليت تلفوني بدارها ..اتسأذنت منها اروح اييبه ..ليما رديت ...
انصدمت صدمة عمري ...
لقيت غالية طايحة على الأرض وحواليها دم ...قطعت شرايينها ...
لا يا ربي ....استغلت طلعتي ...وانا مستغربة من موافقتها انها تنزل معاي اثاريها تبي تنتحر ...
تجدمت منها بسرعة ... وحاولت اني اوقف النزيف ...صرخت بأعلى صوتي ..يت الخدامة ومرت عمي ..
وطبعا مرت عمي بدت بالصراخ والبجي ...
مسكت تلفوني ودقيت على الإسعاف ...
مسكت طرف عباتي ولفيت ايدها احاول اني اوقف النزيف ...
يت الإسعاف وخذوها ...ركبت معاها مرت عمي ..اما انا ركبت سيارتي ولحقتهم ...
دخلت المستشفى وانا اير معاهم السرير اللي نايمة فيه غالية وقلبي ينبض بسرعة ...
قلت لكم السالفة مارح تعدي على خير ...
دخلوها غرفة الكشف ..
تسندت على الطوفة ..
ليتني ما عرفت عصام ..
ليتني ما عرفت غالية ..
ليتني ما عرفت عن السالفة كلها اصلا ..
انتهبت لمرت عمي واقفة ودموعها تنزل ...رحت لها اهديها ..
بس قالت بعصبية وصراخ ..
مرت عمي : لو صار في بنتي شي مارح اسامحج لا انتي ولا ريلج ..
اخترعت من كلامها ...وسكت ما رديت عليها ...
من حقها تقول جذي ...
اللي داخل بنتها ...وضناها ...
غير ان سمعتها صارت بالأرض ...
حسبي الله ونعم الوكيل فيك يا عصام ...الله ينتقم منك ..
شفت الدكتور طالع ...
مرت عمي: ها بشر ؟؟
ويهه ما يبشر بخير ...
قال ويا ليته ما قال ..
الدكتور : عظم الله اجركم ...
شهقت ومن الصدمة حطيت غطيت حلجي بايديني ...
صرخة مرت عمي هزت المستشفى ...
ومعاها هو قلبي بعنف ... حسيته بيطلع من مكانه ...
طالعت ايديني اللي فيهم من دم غالية شوي ...
تذكرت جملتها لما قال عن الخيانة ..
" اللي تخوني بخليها تنتحر ...تذبح روحها بنفسها ..."
وصج هذا اللي صار ...
شفت مرت عمي تطيح على الأرض وتولول وتنتحب ...
ماتت غالية وصورها الله اعلم انتشرت ولا لأ ..
ماتت غالية وهي تحمل في قلبها آهات كتمتها في داخلها ..
ماتت غالية وهي تنطر مني اني انقذها بس ما فكرت إلا في نفسي ..
ماتت غالية وهي تحمل رسالة تحذير لي من عاقبة اللي قاعدة اسويه ...
ماتت وانا ماادري ...بتظل حقيقة امري مخفية ولا بنكشف في يوم من الأيام ..

[لامارا]

الحلقـــة الخامسة والعشرون
"نهاية اللعبة "

من بعد موتها ...اقصد انتحارها ...ما همتني الدنيا ...ولا همني احد ...ما افكر إلا اني انتقم من عصام النذل ...
انتبهت على روحي لما سمعت صوت بجي ونحيب ..وكانت من مرت عمي ...وانتبهت بعد على امي قاعدة يمها تهديها وتصبرها ...
تذكرت صراخ مرت عمي بالمستشفى ...وتذكرت لما كنا بشقة عصام ... وتذكرت لما كانت علمت غالية عصام عن الشريط ...
على قولت سامي طالعتي لي فيها جيمس بوند ..
ابتسمت باستهزاء على روحي ..وبنفس الوقت نزلت دمعة ...دمعة ألم وقهر ...
لو تكلمت وقلت لسامي ما كانت انتحرت غالية ....
لو قلت ان عصام بدا فيني انا وبينهيها بغالية ما كانت انتحرت ...
لو ما خليتها بروحها بالمطبخ ما كانت انتحرت ...
استغفرت ربي لأن لو تفتح اعمال الشيطان ...قمت من المكان وطلعت من البيت ابي اشم هوا ...حاسة روحي بموت ..ريحة الموت تخنقني ...
وقفت بالحديقة وضوء الشمس المغيبة والوان السما المتدرجة من البرتقالي والأزرق الفاتح والغامج خلاني اسحب نفس اتنفس الهوا اللي منعت عنه طول العزا ...
ما قلنا لأحد عن اللي صار ...خلينا موتها موتة طبيعية .. الوحيد اللي تأثر بموتها فينا طلال ...
هني حسيت انه يحبها حيل ...
تذكرت لما كانت تتصدد عنه ..
تذكرت لما قالت لي ابعد طلال عنها وعن طريجها ..
تذكرت بحيها ولهفتها اني اساعدها ...
دمعت عيوني مرة ثانية وسالت على خدي ...
انا ملومة هني ...لو تكلمت ما كان صار جذي ...
آآآه يا قلبي ...
وفوق كل هذا سامي مجافيني ...مو راضي يرد مثل قبل ..من اول ما درى بروحتي لعصام وهو متغير ..
معاه حق ...
عيل لو درى بسالفتي ...شنو رح يسوي ؟؟؟
حاولت اني اكلم الحقير عصام بس ما يرد ..او مغلق ..
لو قعدت اكثر هني رح انهار ...خل اروح البيت احسن ..ركبت سيارتي ورحت البيت ... بطلت دريشة السيارة وهذا ذكرني بسامي ...
ابتسمت على هالذكرى ...ولو اني زعلانة منه ..
وصلت الشقة ودخلت ... حطيت المفاتيح على الطاولة .. بغيت اتحرك بس شفته طالع من الغرفة ...
انتبه لي ورفع راسه يطالعني ...
حسيت ان الزمن وقف بينا ... على هالنظرات ... نزل نظراته وتجدم للصالة ...ظليت انا واقفة ماادري من حدة نظراته ولا اشتياقي له ...
قال وهو ماسك تلفونه ويدق ..
سامي: خلص العزا ؟؟
حتى ما عطاني نظرة ..قلت بحزن ..
هناء: ئي خلص ..اليوم ثالث يوم ..
تكلم وعبالي يحاجيني بس احبطت لما سمعته يتكلم بالتفلون...من لهفتي بس اسمع صوته اين ..
دققت بويهه لما كان يتكلم ..
مشتاقة لك لو تدري .. ابيع الدنيا عشانك بس اكون معاك ...
شفته يبتسم ..وآآه من ابتسامته...تذبح ...
قبل ما كنت اتعب تفسي واشوف وادقق بويهه .. ما كنت حتى ابي اعرف عنه شي ..
كنت خبلة ..ما كنت ادري اني بعيش حالة حب مجنونة ...
شفته يلوح بايده وهو يتكلم كأنه منهمك بشرح شي مهم ..
حتى طريقة كلامه تخلي اللي جدامه ينتبه له غصب ...
رغم المآسي والمشاكل اللي عاشه بس احسه قوي ..جبل ما يهزه شي ...ثقته بنفسه عززت الحصن المنيع اللي بناه حوالين نفسه ...
حسيته يطالعني ويبتسم ..انتبهت على روحي ونزلت نظراتي فقال ..
سامي: اشفيج تطالعيني ؟؟
قلت بارتباك واضح ...
هناء: منو قال ؟؟
ورفعت راسي احاول ابين اني قوية وكمل وهو يبتسم بخبث وثقة ..
سامي : انا اقول ...
طالعته باستخفاف ومشيت عنه ..دخلت الغرفة ابدل هدومي .. بعدها صليت المغرب وانسدحت على السرير ...
بطلت عيوني ...نمت ما حسيت بروحي .. قعدت وتمغطت وبعدت اللحاف عني .. ورحت الحمام عزكم الله اغسل ويهي واتوضى لصلاة العشا ..
طلعت للصالة لقيتها فاضية ..شكله راح المكتب ..
حسيت اني وحيدة ...ان محد وياي ..يوقف معاي ..احس ان الله يعاقبني ليش اني ما قلت لسامي ..
انا وغالية ضحية انتقام عصام من سامي ..
تجمعت دموعي مرة وحدة ونزلت ...وقمت ابجي بصوت مسموع ...
وينك يا سامي ...وينك ... انت اللي تمسح دمعتي واللي تضمني لصدرك لما تضيق علي الدنيا ...
دق تلفوني فجأة خرعتني ..وكانت امي ..مسحت دموعي بسرعة ورديت ..
هناء: هلا يما ..
امي: يما هناء ..تقدرين تيين الحين ؟؟
الحين ؟؟
طالعت الساعة وكانت سبع ونص ..
هناء: في شي يما ؟؟
امي : تعالي انتي بعدين اقولج ..
صكيت عنها ..وانا مستغربة .. بس غسلت ويهي وعدلت من شكلي ولبست عباتي ..ومسكت تلفوني ودقيت على سامي ...
نطرت وايد ليما حسيت انه مارح يرد علي بعدت التلفون عن اذني بغيت اصك بس وقفني صوته ..
سامي : هلا ..
اخيرا ...مابغيت ..رديت التلفون لأذني ...حزت في خاطري ..لهدرجة ثقيلة عليك كلمة هناء ...اسمي ما تبي تنطقه ؟؟
كنت ابي ابجي واستسمح منه بس مسكت روحي وقلت وانا احاول امنع دموعي تنزل ..
هناء: بغيت اقولك اني ..احم ...اني بروح بيت اهلي ..
سامي : وليش ؟؟
هناء: ماادري بس امي دقت علي تبيني اييها ...
سامي: ضروري ؟؟
ولاني كنت سرحانة في صوته وذايبة فيه ..قلت بعد ما انتبهت ..
هناء: ها ؟؟
حسيته استغرب وقال ..
سامي: هناء ..اشفيج ؟؟ اقول ضروري تروحين لها ؟؟
قلت باحراج ..
هناء: ئي ..احم ئي..
سامي : خلاص روحي ..
سكت ما رديت عليه ...اقولكم مشتاقة لصوته ..كنت اتخيله جدامي يحاجيني ...
سمعته يقول ..
سامي: هناء...
واااي يا حلاة اسمي منه ... قلت ..
هناء: نعـ...نعم ..
سامي: اشفيج ؟؟ روحي خلاص ...
هناء: وين ؟؟
مو قلت لكم مو صاحية ...
سامي : انتي اشفيج شاربة شي ؟؟ انتي مو تقولين انج بتروحين بيت اهلج ؟؟
شاربة حبك ... غمضت عيوني وسحبت نفس وقلت ..
هناء: خلاص مع السلامة ..
وصكيت عنه ...الصراحة حسيت باحراج ... اول مرة اكون جذي ..العادة اكتم مشاعري ...ماقدرت هالمرة ..
طردت هالأفكار من مخي وطلعت من البيت ورحت لأمي ...
لما وصلت لقيت خالاتي قاعدين بالحوش دخلت الحوش وكانوا يتكلمون عن غالية طبعا ..ولأن الموضوع هذا يسبب لي حساسية تجبر دموعي تنزل سلمت بسرعة واجتزتهم ودخلت داخل ...والصالة كانت فاضية ..
يمكن لسة بالعزا ..جايز ...شفت امي نازلة من السلم ...ابتسمت وقلت ..
هناء: اشلونج يما ؟؟
ورحت بست راسها ...
امي :هلا والله يما ..
وقعدنا ...
تلفت حولي وقلت ..
هناء: إلا وين الباجي ؟؟
امي : طلال بداره ..واسما قاعدة مع غصون بنت عمج تواسيها باللي صار ...
وتنهدت بحزن ..صح اللي صار يكسر الصخر ..تذكرت ويه عمي لما درى ان غالية ماتت .. بغى اين ..
بنته واكبرعياله ..تنتحر !!
قلت اغير الموضوع ..
هناء: بغيتي شي يما ؟؟
رفعت راسها وقالت لي ..
امي : انتي ..مرتاحة مع ريلج ؟؟
شنو ؟؟ شياب طاريي انا وريلي ؟؟
قلت باستغراب ..
هناء: ئي مرتاحة ...ليش تسالين يما ؟؟
قامت من مكانها ويت قعدت يمي ..ماادري اشفيها اليوم ..الله يستر ..
امي: انتي تعرفين منو سبب باللي صار لغالية ؟؟
التفت لها وقلت ..
هناء: لأ ...انتي تعرفين؟؟
قلت جذي لأني مابي افضح غالية اكثر من جذي ..
طالعتني بنظرات غريبة ..الصراحة شكيت ...فقلت ..
هناء: يما ..دشي بالموضوع ..
امي : ام عبدالله قالت لي ان عبدالله ناوي يتزوج ..
ولو اني حسيت ان هذا ماله شغل بس قلت اسايرها ..
هناء: صج ؟؟
امي : ياي يخطبج انتي ..
ها ؟؟؟!!!!!!
هناء: حلوة يما ... اشلون يخطبني وانا متزوجة ؟؟
عبالي نكتة ..بس ويه امي ما كان يوحي انها نكتة ..قالت ..
امي: انا مو مرتاحة لسامي ..من اول ما تزوجتيه واحنا بمشاكل ...حادث طلال وموت غالية ...ولد خالته الله لا يوفجه لا دنيا ولا آخرة خرب حياتها قبل لا تموت ..عبالج ماادري ان غالية انتحرت عشان عصاموه دز صورها لأبوها ؟؟ لا يا يما ... مرت عمج قالت لي كل شي ..وعمج اكد لي ...
كانت تتكلم وتقول الجمل ورا بعض مخي ما قدر يستوعبها ...بس قلت ..
هناء: انزين كاهو دريتي ...
كتت امي شوي جنها تجمع الكلمات ..والقت بالقنبلة بويهي وقالت ..
امي: انتي لازم تطلقين من سامي ..
مااقص عليكم لما اقولكم ان عيوني تطلع من مكانها .. قلت بصدمة ..
هناء: اتطلق من سامي ؟؟
ووقفت مع ان ريولي موقادرة تشيلني ..
هناء: يما انتي شقاعدة تقولين ؟؟
قالت امي بحزم ..
امي: اللي سمعتيه ...انا الصراحة ما اتحمل نظرات مرت عمج ولا عمج لي كل ما ييت اعزيهم ..مو بس هم الناس كلها ...
قلت بعصبية ..
هناء: انا مالي شغل بالناس ولا لي شغل بمرت عمي وعمي ...لو هم خايفين على بنتهم كانوا ربوها عدل ما خلوها على راحتها على انها بنتهم الكبيرة ..
ماادري شلي خلاني اقول جذي والبنت ميتة بس هالشي نرفزني ..
قالت امي بصدمة ..
امي: بنت عمج ميتة ...صج انج خبلة ... الحين انا ابي سعادتج وراحتج تسمعيني هالكلام ؟؟؟
قربت منها وقلت كقرار اخير..
هناء: طلاق من سامي مارح اتطلق .. وهالموضوع لا تفتحينه جدامي مرة ثانية يا يما ...
ومشيت عنها .. بس وقفني صوتها عند الباب ..
امي: إذا ما طلبتي الطلاق منه ..لا انا امج ولا انتي بنتي ..
بهت ... لفيت لها ..طالعتني ومشت ...
لا يا يما ..مو جذي ... اففففففففف ...انا ماادري اشحقة حاقدة على سامي ...عشان جذي طالبتني ؟؟ تبين تفرقين بيني وبين حبيب قلبي ؟؟
سامي الهوا اللي اتنفسه ...العيون اللي اشوف فيها ...القلب اللي ينبض باسمه ..
ركبت سيارتي وانا افكر بكلام امي ...
بعد ما لقيت السعادة تبيني اهدها ؟؟
بعد ما لقيت الصدر الحنون اللي احط راسي عليه وابجي وقت الضيقة ..تبيني اهده؟؟
بعد ما لقيت الأمان والدفى اهده؟؟؟
مستحيل يما ..انتي تطلبين مني المستحيل ...
وصلت البيت اول ما دخلت لقيته قاعد وعينه على التلفزيون .. وكان ياكل .. ابتسمت لما شفته ... قلت ..
هناء: يوعان ؟؟
لف لي بعدين رد طالع التلفزيون .. وقال ببرود .
سامي : تأخرتي قلت خل اسوي لي عشا ..
طالعت الساعة وكانت تسع .. تجدمت منه وشفت الصحن اللي ماسكه وكان فيه سلطة بس ...
الحين هذا عشا ؟؟؟
تذكرت انه نباتي ..بس خل ياكل اي شي ..جبن ولا اي شي ..
انتبه لي وقال ..
سامي: اشفيج واقفة فوق راسي ؟؟
هناء: بروح ابدل وبسويلك اللي تبي ..
رد للتلفزيون وقال ..
سامي: لا تعبين روحج .. باكل هالسلطة ..
يالله على هالجفا ...
قعدت يمه وقلت ..
هناء: سامي ..انا آسف والله ماكان قصدي اني اروح له إلا عشان اخذ منه الصور ..
مارد علي وظلت عيونه للتلفزيون ...
هناء: سامي ..
لف لي هني وقال ..
سامي : نعم ..
قربت منه وقلت برقة ..
هناء: حبيبي ..والله انا آسفة ..
سامي: آسفة على شنو ؟؟؟
هناء: على روحتي لعصام ..
نزل نظراته للأرض ..وقال ..
سامي: عشان جذي فقدتي الياهل ؟؟
وطالعني وابتسم بخبث ..اما انا بققت عيوني عليه منصدمة وكمل ..
سامي: رحتي له هناك ويتي البيت هني وصار اللي صار ..صح ؟؟
وقرب مني وقال ..
سامي : من اول ما يت غالية عندنا اول مرة وانا حاس ان في شي ...
قلت بصوت مبحوح من الصدمة ..
هناء: كنت تدري ؟؟
سند ظهره على القنفة وقال ..
سامي: كنت ادري عن سالفة الصور بس ما توقعتج تصيرين لي جيمس بوند وتروحين عنده
ولف ويهه عني ...وقفت انا جني مقروصة وقلت بذهول ..
هناء : اشحقة انزين ما تكلمت وحذرتني ...ليش ؟؟
طالعني وقال بدفاع ...
سامي: الحين قولي اني انا اللي خليتج تروحين له ؟؟ انا مالي شغل ..
قلت بصراخ ..
هناء: شنو مالي شغل ؟؟ انت كنت تدري بولد خالتك ...اشحقة ما منعتني ؟؟
وقف وصار بطوله جدامي ..رفعت راسي عشان اطالع عيونه اللي ركزت علي بعصبية ..
سامي: امنعج من شنو ؟؟ انا قلت لج كنت ادري عن سالفة الصور بس ماادري انج بتروحين له ..
طنشت جملته الأخيرة وقلت بحقد ..
هناء: صاجة امي يوم قالت ان من اول ما تزوجتك واحنا بمشاكل ...وما يندرى يمكن انت وولد خالتك نفس الطينة ..
طالعني بصدمة وذهول ...قال وهو يأشر على روحه بألم ..
سامي: من اول ما تزوجتيني وانتوا بمشاكل ؟؟؟
سكت وما رديت عليه ..بس قلت اقهره مثل ما قهرني ..
هناء: ئي ..من حادث طلال وموت غالية ...انتوا السبب فيه ..
سامي: احنا ؟؟ منو احنا ؟؟
قلت وانا اتخصر ..
هناء: انت واهلك ..
وقلت بطفش من هالسالفة وانا بايعتها ..
هناء: انا خلاص زهقت من كثر المشاكل اللي مريت فيها ...خلاص ارحمني ..امك تيي عندنا وتهيني وتخليني بيزة ما اسوى ..عالية تحبك وتبيك وانت تتغلى عليها وتصدد عنها ..وياية تنتقم ولما انتقمت راحت عند اخوي وخلته يطيح في حبها ..عرفت تدوس على الجرح كانت تعرف انه يحب غالية قالت خل استغله اتفقت مع عصام الحقير ..هي على طلال وهو على غالية ...وما يندرى شنو بعد رح يطلع لنا من تحت راسكم ...انا خلاص مليت زهقت ...
القيت قنبلتي عليه ومشيت للغرفة وصفعت الباب بقوة .. قعدت على السرير الهث من كثر العصبية ..
قلت كل كلامي بدون وعي... بس ماني ندمانة على اللي قلته ..المفروض انا ازعل مو هو ...تعبت والله تعبت ..
حطيت راسي بين ايديني مكسورة ...والله خلاص فاض فيني ...كل شي من حولي يدور ...
بدلت هدومي وصليت العشا ..وانخمدت .. مابي افكر باللي قلته ... تعبت وانا افكر ..
بطلت عيوني على صوت المنبه لصلاة الفير .. طفيته وبعدت عني اللحاف ..طالعت مكان سامي لقيته فاضي ..
هني تذكرت كل شي .. قمت وطلعت من الغرفة وانا ارد خصلة ورا اذني .. لقيت الصالة فاضية ..رحت المطبخ والغرفة الثانية حتى الحمام عزكم الله دورته فيه بس مو موجود .. وين راح ؟؟
مسكت التلفون ودقيت عليه بس مغلق ..قمت ورحت للدريشة بعدت الستارة اشوفه ..بس طولت بالوقفة
رحت صليت ودعيت ربي يحميه ويخليه لي ..
شلت لبس الصلاة ورحت للدريشة مرة ثانية وبايدي التلفون ..دقيت عليه هم مغلق .. تسندت يم الدريشة وقعدت انطره ...
كل اللي قلته غلط ..كل اللي سويته غلط ...ماكان لازم انفجر بويهه هو ماله ذنب ... سندت راسي على الدريشة وغمضت عيوني خايفة يصير له شي ..اكيد طلع هو زعلان من كلامي ...
غبية ..غبية ..
كنت اردد هالكلمات بسري واطق راسي بالجامة متندمة ...
حسيت بالباب لفيت بسرعة وارتحت لما شفته .. ابتسمت وطرت له بشوق وقلت وانا اوقف جدامه ..

[لامارا]

هناء: وينك ؟؟
طالعني بنظرات غريبة ومشى من جدامي بهدوء ... لحقته وقلت بسرعة ..
هناء: سامي ..
مارد علي وصك الباب بويهي .. كانت هاذي رسالة منه انه مايبي يشوفني ولا يحاجيني ..
رجعت للصالة محبطة ..اجر اذيال الخيبة ...
مالي إلا اني انام في الغرفة الثانية ...بس ما ياني نوم ...قعدت اتقلب في الفراش وذاكرتي ترجع للكلام اللي قلته واشلون قلته بطريقتي الدفشة ..
بطلت عيوني وانا اصلا ما نمت عدل ..مخي شغال طول الوقت ..احمد ربي ان اليوم خميس ...ماكو دوام ..
طلعت من الغرفة وتذكرت سامي ..طقيت الباب بس محد يرد .. بطلت الباب بهدوء وشويش شفته نايم تجدمت ليما صرت فوق راسه بالضبط ..كان نايم على جنبه اليمين ..لحفته عدل وطلعت ..
رحت سويت ريوق مع اني ما اشتهي آكل بس لسامي على الأقل .. حطيت الأكل على الطاولة وقعدت انطره يقعد ..
تذكرت امي لما قالت لي لازم اتطلق من سامي ..اتطلق من سامي واتزوج عبدالله ...ابتسمت باستهزاء على هالشي ...تدرون ليش ؟؟؟ تذكرت لما خلود كانت تلزقني بأخوها ..لا انا ولا عبدالله حاطين في بالنا هالشي ...
تفاجأت لما شفته على مد بصري ...واقف جدامي وعلامات النوم تعلو ويهه .. شكله مانام ... بعد نظره عني ومشى للحمام عزكم الله ..
نزلت انا راسي بألم ...ادري اني غلطانة والله ..
سمعت صوت تلفونه داخل الغرفة ...ولأنه طول ما طلع رحت اشوف منو ...دخلت الغرفة واتبعت صوت الرنة ..وكان يم الأبجورة .. شفت مكتوب على الشاشة ..
( دلووووولة يتصل بك )
منو دلولة ؟؟ تذكرت هني انها اخته ...رديت وقلت ..
هناء: هلا دلال .
اول شي استغربت من صوتي بس قالت اخيرا بعد ما تذكرتني ..
دلال : هلا والله هناء ...شخبارج ؟؟شنو مسوية ؟؟ ان شاء الله بخير ؟؟
ماتوب دايما تتكلم بسرعة وتسأل ستين سوال بوقت واحد ..ابتسمت عليها وقلت ..
هناء: انا بخير ..انتي اشلونج ؟؟ شنو مسوية ؟؟
دلال : انا الحمدلله ..ها وينه سامي ما رد علي ؟؟ اكيد مخليج هالتعبان وراح المكتب ادري فيه خبل ..
ضحكت وقلت ..
هناء: لا حرام عليج ...هو بالحمام ..
قالت بعد ما ضحكت ..
دلال : حرام ظلمته ..بس له سوابق ..
هناء: تبيني اناديه لج ؟؟
دلال : لو تفضلتي ..
هناء: اوكي لحظة ..
لفيت عشان اقوم من السرير بس تفاجأت انه وراي ...خرعني ... كان ويهه وشعره مبللين .. خمنت انه كان يتسبح ..
مد لي ايده بدون ما يتكلم يبي التلفون..ظليت اطالعه ماادري ايدي وقفت ولا مخي عيز يترجم الرسالة ..
قال لما طولت وبجمود ..
سامي : بتطولين ؟
مديت له ايدي واخذ التلفون ...بس قال قبل ما يحطه على اذونه ويقعد على السرير ..
سامي: صكي الباب وانتي طالعة ..
وحطه على اذونه ..
سامي : هلا دلولة ...
طالعته بحزن ..لهدرجة كارهني ..طردني من الغرفة عشان لا اسمع ؟؟ طلعت ورحت للصالة ..قعدت على القنفة مجروحة ...
منعت الأفكار تغزو مخي ..وظليت اسمع صوته وهو يكلمها ويضحك معاها .. وقفت امشي بالصالة رايحة رادة ..
واخيرا لمحته طالع من الغرفة .. شفته ياي عندي ..وقف عند الستارة الفاصلة بين الممر والصالة وقال ..
سامي : ممكن اخت هناء إذا شفتي تلفوني يدق ما تردين عليه ؟؟
عبالي ياي يكلمني باللي صار امس ..طالعته ببلاهة وقلت ..
هناء: ها ؟؟
رد علي وهو يتسند على الطوفة ..
سامي: شنو ها ؟؟ اتكلم هندي انا ...
وغير من نبرة صوته وقال بأمر ..
سامي: إذا شفتي تلفوني يدق لا تردين عليه سامعة ؟؟
وعطاني ظهره ومشى ..بس قلت ..
هناء: ليش بالله ؟؟ انا رديت على دلال مارديت على احد غريب ..ولا متفشل مني ؟؟
لف لي وقال ..
سامي: زين انج عرفتي .
بهت ...قلت وانا ااشر على روحي ..
هناء: انت متفشل مني انا ؟؟
قال باستهزاء ..
سامي: لا من اللي وراج ..
وتجدم مني وقال بقهر جنه ما صدق اني فتحت الموضوع .
سامي : ئي انتي .. كافي عاد كافي .. انتي واهلج طايحين فيني تجريح من كل صوب ...وتتهموني بشي انا مالي ذنب فيه..حادث طلال عالية وعصام هم اللي كانوا السبب فيه مو انا ...وموت غالية كان لهم يد فيه ..ما قدرتوا عليهم حاطين حرتكم فيني جني طوفة ما احس ...سكت مرة مو معناها اني راضي باللي تسوونه ...انا خلاص فاض فيني ... يا ليتني ما تزوجتج ولا رضيتي فيني..ليتج تزوجتي عصام حبيب القلب على الأقل يوم يغلط ما تسوون فيه مثل ما تسوون فيني .. ليتج قلتي لأ لما طلال ياه بخبر خطبتي لج ..
وبح صوته وصار ضعيف من القهر وكمل وهو يحط ايده على صدره .
سامي: ليتني ما شفتج بالسوق ولا تعلقت فيج ...
غمض عيونه بألم وبطلهم بعدين وقال ..
سامي : هناء ... خليني في حالي الله يخليج انا ماني ناقص ..
وانسحب بهدوء ..اما انا .. ماادري اشلون اوصف لكم حالتي .. اقول اني منصدمة ولا مذهولة ولا مجروحة ولا ..ولا شنو بالضبط ؟؟
كانت اشارة منه لي اني ارد بيت اهلي ونخلي المسألة بينا معلقة ...نرتاح من بعض شوي ..اخذت سويج سيارتي ورحت بيتنا .. وانا ماني قادرة افكر ...انشل تفكيري عند كلماته اللي طلعت من قلبه المجروح ..
دخلت البيت واللي يشوفني رح يقرا الصدمة على ويهي على طول لاني كنت مثل اللوح امشي مسبهة ..
شفت امي قاعدة بروحها ..استانست لما شافتني وقالت ..
امي : هلا والله بهناء ..
مارديت عليها قعدت على اول قنفة شفتها ..استغربت امي من ويهي وقالت ..
امي: هناء ..اشفيج يما ؟؟
طالعتها كاني روبوت وما نطقت ...قعدت يمي وقالت ..
امي: يما تحجي اشفيج ؟؟
اشفيني ؟؟ تبيني اقولج ان سامي خلاص مل مني وشكله بيطلقني؟؟.. سحبت نفس وقلت ..
هناء: ولا شي ...
استانسي الحين ...انا وسامي افترقنا ... صعدت داري وقفلت على روحي .. الوحيد المظلوم بينا سامي ..
من اول المفروض اقوله ..ولا اخش عنه ... انا غلطانة اعترف ...غرني الشيطان وحبي لنفسي وانانيتي وخلتني ما اتنازل واقول لسامي ..
ظليت يومين جذي بدون ما اسمع عنه شي ..وطبعا امي وطلال اللي طلع من صومعته الحزينة والكئيبة من بعد موت غالية يبون يعرفون شنو اللي صار بيني وبين سامي ...
هناء: زعل لما قلت له اني رحت لولد خالته عشان صور ...
وطالعت طلال اللي قال وهو يبتسم بحنان ..
طلال: كملي ..
نزلت راسي لايديني وكملت ..
هناء: عشان صور غالية ...
قامت امي هني وقالت بعصبية ..
امي: قلت لج كان مشترك ويا ولد خالتج ما صدقتيني ...وتلقينه كان يدري عن كل شي ..
طالعت امي وانا ودي ما اصدق هالشي ..قلت بدفاع عنه ..
هناء: يما سامي يقول كان يدري عن الصور بس ما توقع اني اروح له ..
امي: شفتي شفتي ؟؟ يعني كان له يد في الموضوع .. مان يدري ليش ما قالج ..يعرف دناءة ولد خالته اشحقة ما حذرج ؟؟ على الأقل اخذ صور منه مادام يعرف ...
صح ..صاجة امي .. كان على الأقل اخذ الصور منه ..
بس قال طلال ..
طلال : هناء..
طالعته فوقف هو وقال ..
طلال: قومي روحي لريلج ..
استغربت انا وامي قالت ..
امي: تروح له بعد كل اللي قاله ؟؟
طنش طلال كلام امي وقالي كلمة عمري ما رح انساها ..
طلال : السالفة بينج وبين ريلج لا تخلين احد في هالدنيا يأثر عليج ..روحي له وتفاهمي معاه واعرفي السالفة من الأول ...يلا ..
كلام طلال هيج فيني مشاعر كنت اخمدها كل ما حسيت فيها .. لبست عباتي تحت نظرات امي المعارضة بس طلال كان يشجعني ...
طلعت من البيت وانا غير عن اول ... المفروض اسوي جذي من الأول ما اخلي عواطفي تتحكم فيني ..
شغلت السيارة ومشيت بالطريق المؤدي لبيتنا ...بيتي انا وسامي .. نصفي الأخر ..
بطلت الباب بهدوء ..لقيت الصالة فاضية ...دخلت داخل وخمنت انه يكون داخل ماادري ..حسيته جذي ..مسكت مقبض الباب وانا ادعي ربي يسهل علي جني داخلة حرب ...دفعت الباب وبشويش .. لقيته نايم على السرير ...
تنهدت بارتياح الحمدلله يعني موجود طلع احساسي صح ...
تقربت منه وقعدت يمه .. ملامح ويهه تدل على التعب .. ويهه صاير اصفر غير شعره اللي طول بالآونة الأخيرة ومنسدل على يبهته بعشوائية مو مرتب ... ولحيته اللي انبتت بكثافة شوي ...
ما قدرت امنع نفسي مديت ايدي لشعره وغمست ايدي بين خصلاته البنية ..
هني بطل عيونه وتلاقت نظراتنا وتعانقت احلى عناق .. تمنيت لو ظليت جذي اطالعه للأبد ... ابتسمت له بعذوبة وقلت بهدوء ..
هناء: صح النوم ..
غمض عيونه وقال بصوت كسول ..
سامي : ساعة جم الحين ؟؟
بعدت ايدي عن شعره اشوف الساعة وقلت ..
هناء: اربع ونص ..
قال هو يسحب نفس ويبعد شعره بضيقة ..
سامي: طولت بالنومة ..
بس رد غمض عيونه فقلت انبهه ..
هناء: صليت العصر ؟؟
قال بدون ما يبطلهم ..
سامي :الحمدلله ...
وسكتنا ...وظل السكوت سيد الموقف ... نزل انظاري للساعة اللي بايدي وقلت ..
هناء: سامي ..
قال بنفس وضعيته وبملل ..
now what??? .. سامي:
من طريقة كلامه عرفت انه ما يبي يتكلم بالموضوع ..حرام اللي ياه كافيه .. اشفقت على حالته وسكت ..
قلت اغير الموضوع ..
هناء: كليت ؟؟
مارد فقلت ..
هناء: سامي ..
قال هني بعصبية خفيفة ..
سامي: هناء..تكفين ارحميني وخليني بروحي ...لو سمحتي ..
ورد حط راسه لى المخدة وغمض عيونه .. انصدمت انا من طريقة كلامه ...تجمعت الدموع في عيوني وطلعت من الغرفة بسرعة ..احث الخطى للباب ..
انا ياية عشان اعتذر له عن كل اللي سويته وبنفس الوقت اعرف السالفة من الأول ..
بطلت الباب ودموعي مانعتني من الرؤية ...مسحتهم بس دعمت شي رديني لورا خطوات ...رفعت راسي اشوف منو ....
شهقت وسالت دمعة على خدي ..
عصام !!!!!!!!!!!!!!!
دخل الشقة وهو يبتسم وحاط ايدينه بمخابيه ...وقال بخبث ..
عصام : السلام عليكم ..
وطالع الشقة وقال بعد ما استقر نظره اخيرا علي..
عصام : وااو ..شقتكم حلوة .. مثل ما توقعت ..
منعتني الصدمة من اني اروح انادي سامي ولا اتكلم واسأله عن ييته ...
قال ..
عصام : شنو بظل واقف هني طول الوقت ولا مارح تدخليني ؟؟
ما رديت ..ظليت اطالعه مثل اللعبة اللي خلصت بطاريتها ..
عصام : انزين إذا بتظلين واقفة مثل اللوح قولي لي وينه ريلج ؟؟
قلت اخيرا وبصوت متقطع ..
هناء: اشتبي فيه ؟؟
ابتسم ببلاهةو قال بطنازة ..
عصام: اتصور معاه مشتاق له وايد وياي اخذه بالأحضان قبل ما اسافر ..
قلت ...
هناء : ما اعتقد بأنك بهالغباء تيي وتوري سامي الصور ؟
طالعني بانبهار وقال ..
عصام: نسبة الذكاء عندج عالية ..شنو ماكلة اليوم ؟؟
تجدمت منه وقلت ..
هناء: لا تتوقع سامي بخليك تطلع من هني حي ..
ضحك وقال ..
عصام: هذا إذا خليته يعيش اصلا ..
رحت للتلفون وقلت ..
هناء : انت مينون بدق على الشرطة يفكونا منك ..
" انت ؟؟"
التفت وراي وكان سامي واقف يطالع عصام ...لا رحنا فيها .. اليوم ميتة ميتة ..
عصام : اخيرا شفتك ؟؟
تجتف سامي وقال ..
سامي: اشتبي ياي ؟؟
وقف عصام جدام سامي وصار وجها لوجه وقال ..
عصام: ياي اسلمك امانة ... امانة كانت عندي من اول ما تزوجت .
ولف لي وابتسم ..
عصام: بهالحلوة هاذي ..
دز سامي عصام وقال ..
سامي: خل حجيك وياي ...شنو هالأمانة ؟؟
طلع ظرف بني وعطاه لسامي ..وقال بمكر ..
عصام: استمتع فيه ..
وعطانا ظهره وقال ..
عصام: اشوفكم على خير ان شاء الله ..
ولف لي وقال ..
عصام :سعيد بالتعامل معاج ..
غمضت عيوني وانا خلاص قاعدة اردد الشهادة .. بطلت عيوني وشفت سامي يطالعني بصدمة ... وانفاسه صارت سريعة .. التفت لعصام اللي بغى يطلع وصرخ بقوة ..
سامي: يا النذل ..
وهجم عليه مثل الأسد ...ذكرني هذا لما كنا بامريكا ...لما جكني عندهم بالشقة ...
لصق سامي عصام بالطوفة وقال ..
سامي: جبان طول عمرك بتظل جبان .. إذا تبي تنتقم مني كنت لا تلف وتدور كاني جدامك ...
كان ماسكه من هدومه ولما خلص حجيه طقه بالطوفة حيل ...
قلت وانا اتقرب منهم اثنيناتهم ..
هناء: سامي ..خلك عنه بدق على الشرطة اييون ياخذونه بـ...
قاطعني عصام وقال وهو يوجه الكلام لسامي وبحقد ..
عصام : اخيرا عرفت اني بنتقم منك ...سويت كل هذا عشان اوصلك انت ..بغيت احرق قلبك مثل ما حرقت قلبي وذبحت ريم ...
ودز سامي وكمل ..
عصام: انا الحين بذبحك واخذ بثاري ...بموتك بتنطفي النار اللي بصدري طول هالثلاث سنين ...
صرخ سامي وقال بثورة ..
سامي: انا ما ذبحتها ..ما ذبحتها ...ماتت هي لان الله كاتب عليها تموت..بعدين تعال .. ريم اصلا ما كانت تحبك ..ما كانت تحبك ...هي يتني واشتكت لي منك ومن مضايقتك لها طول الوقت ...
قال عصام بقهر ..
عصام: رحت دقيت الصدر ودافعت عنها ...تقص علي ؟؟ مو مهم انها تحبني بس انا احبها ..
سامي : انت مختل عقليا ..عشان وحدة تروح تسوي كل هذا وتلعب بأعراض الناس ؟؟ .. عشان وحدة ما حبتك ولا عمرها كانت تفكر ولا مريت في بالها اصلا ؟؟
صرخ عصام وقال ..
عصام: جـــــب .. انا وريم كنا نحب بعض بس انت اللي خربت علينا ... حتى في هاذي ما خليتي اتهنى ..
وقرب من سامي وايد ..وقال بحقد .
عصام : وياه اليوم اللي تدفع فيه ثمن حقدك وجشعك..
دز سامي عصام وقاله ..
سامي: انت مو صاحي ..انصحك تروح لمصحة نفسية تعالج روحك ... يا المينون ..
ومشى سامي عنه بس نط عليه عصام من ورا ..وانا هني حطيت ايدي على حلجي ...وبدوا يتصارعون ..
وكل واحد يطلع حرته في الثاني ..
هني اجزمت ان عصام صج مينون ..مريض نفسيا ... حقده على سامي وحبه المجنون لريم خلاه يسوي كل هذا ..
طردت هالأفكار وبسرعة رحت للتلفون ادق على الشرطة يشوفون هالمينون ... بس ما حسيت بروحي إلا وانا انير ...مسك ايديني وقال ..
عصام: وين يا حلوة ؟؟
حاولت اخلص روحي منه بس كانت ايدينه اقوى مني .. دزني على القنفة .. ومسكني من رقبتي ...حسيت ان الهوا خلاص وقف ..ما صار يدخل .. حاولت اني ابعده عني بشتى الطرق ... ايديني كانت ماسكة هدومه احاول ارفعه عني بس ماكو فايدة .. ما حسيت إلا الهوا فجأة صار يندفع بسرعة اخيرا لرئتي ..ايقنت بعدها ان عصام انرفع من فوقي .. وكان سامي اللي دزه بعيد ...نطيت من القنفة بسرعة ورحت برة ماادري شنو اللي خلاني اسوي جذي بس مانحشت ..على الأقل انادي احد ..
حسيت بايد تمسكني فصرخت ...
طلال : هناء ...هناء ..اهدي اشفيج ؟؟
بطلت عيوني لما سمعت صوته .. وقلت بسرعة ورجفة ..
هناء: طلال ..الحق على سامي ..رح يموت بسرعة ...
طالعني مستغرب ..وانتبهت ان عبدالله وياه اللي قال بسرعة ..
عبدالله : ليش اشفيه ؟؟
ما جاوبتهم بس صرخت عليهم وقلت ..
هناء: روحوا له بسرعة .. عصام ولد خالته فوق رح يذبحه ...يلااااا...
طاروا فوق وعبدالله سبق طلال اللي كان يحاول يدوس على ريله اللي تعوره عشان يلحق عبدالله ...
انهرت انا على الأرض اصرخ وابجي واندب حظي ...والطم...
كله مني ..لو سامي صار فيه شي ..انا السبب ..ما ادري جم ساعة ظليت منهارة عند وحدة من طوف العمارة ..بعدها انتبهت على روحي ولما ما شفت احد نازل .. خفت ..صعدت فوق وانا قلبي يرجف ..طقيت زر المصعد ونطرت لين ما ياه وانا ما ادري اشلون قدرت اصبر .. وصل المصعد وركبته وضغطت على دورنا وايدي ترجف ..
انصك الباب وانا غمضت عيوني ولزقت بالطوفة وراي وطول الوقت ادعي ...تبطل الباب وعمتني اضواء اللي تنير الممر ..حركت ريولي وانا مو حاسة فيها اصلا ..وقلبي واقف عن النبض حاسة مكانه بفراغ ..
" طلال دق على الأسعاف بسرعة "
سمعت اصواتهم وشفت الناس متجمهرة حوالين الشقة ...الله يستر ...
" هدوني ...هدوني انتوا ما تعرفون منو انا ؟؟ خلوني "
وكان صوته ...صوت عصام .. تقربت من الخلق ودخلت بينهم ...شفت طلال قاعد ومعطيني ظهره ...ما قدرت اشوف شي ...دخلت والتفت لما انتبهت لأحد واقف عند التلفون ..وكان عبدالله يتكلم بالتلفون ..
طالعت عصام لقيته مربط ..
تجدمت من طلال وشهقت لما شفت سامي طايح بحظن طلال وحاط ايده على حلجه ويرجع دم ..
لما شافني طلال قال ..
طلال : هناء صكي الباب عن الفضايح ..
لما شافني واقفة مثل الهبلة متنحة ...قال بصوت اعلى ..فأنصعت على مضض ورحت صكيت الباب ورحت ركض لسامي وقعدت يمه بالضبط وقلت بخوف ..
هناء: اسم الله عليك ..اسم الله عليك ..
كله من النذل ...طالعته بحقد بس سمعت طلال يقول لعبدالله ..
طلال : دقيت على الإسعاف ؟؟
ياه عبدالله وقال ..
عبدالله :ئي ..يايين بعد شوي ..
وقرب من سامي وقال ..
عبدالله : سامي قوم معاي ..
وطالع طلال ...
عبدالله : خل نوديه يرتاح شوي داخل ...حالته حالة ..
مسكوه وكل واحد من صوب اما انا رحت وراهم بسرعة بس انعطفت ناحية المطبخ اييب جلاص ماي ...
رحت طيران للغرفة ... شفته مغمض عيونه وعبدالله ساند راسه ...اخذ مني الماي وقربه من سامي .. شرب شوي وما قدر يكمل قعد يكح ...
سلامات يا بعد عمري ..ان شاء الله فيني ولا فيك .. حسيت باصوات برة وطلال قال ..
طلال : اكيد الشرطة ...
قاموا طلال وعبدالله طلعوا برة ...وخلونا برة ... قربت من سامي وشفت كدمات وجرح ينزف منه الدم ..مديت ايدي له امسحه بس وقف لما شفت علامات الألم على سامي ..اللي بطل عيونه ولما شافني قال وهو يعدل من وضعه وهو يتألم اصلا ..
سامي: طلعي برة ...
انصدمت ...بس قربت منه وقلت وانا امد ايدي امسح جرحه بس بعَد ايدي بقوة وصرخ ..
سامي: طلعي برررة...
وغمض عيونه ويتأوه بألم ...تمنيت اني اضمه لصدري واخفف آلالامه ..
تشجعت هالمرة وقلت بخوف ..
هناء: سامي ..
قاطعني وهو يحاول بتغلب على المه ..
سامي: انتي شنو ما تفميـ...
واطلق آهة ومسك ايده وغمض عيونه حطيت ايدي على جتفه بخوف وقلت ..
هناء: سلامتك حبيبي ..
رفع راسه وسنده على المخدة ..وغمض عيونه ..حرام يتألم .. كل آهة وانة يطلقها احسها سجين تنغرس في قلبي ...
نزلت دموعي متأثرة من الحال اللي وصلنا لها ...
لاحظت انه ما يتحرك ..قربت منه وايد وقلت بتوجس ..
هناء: سامي ..
مارد ...خفت ..ناديته مرة ثانية وبخوف اكبر ..بس ماكو استجابة ولا حركة .. طقيته على الخفيف بس ما بطل عيونه على الأقل ...صرخت بقوة ..
هناء: طلاااال ...طلااال..
ورديت طقيته على خده مرة ثانية بس لاجواب ..دخل طلال علي بسرعة مخترع من نداءاتي ...لما شفته قلت بخوف وبجي ..
هناء: مايرد علي ...ماادري شنو صار له ؟؟
قعد طلال يم سامي وناداه بس ماكو جواب ...مسك عكازته ووقف ونادى على عبدالله وهو طالع ...
ياه عبدالله مخترع ونفس الحالة ...
شنو للين الحين ما استوعبوا ان مايتحرك ؟؟؟
صرخت فيهم وقلت ..
هناء: ييبوا الأسعاف ..اخذوه المستشفى ..سووا شي ..
ورديت ابجي ...بعدها سمعت اصوات برة ...وشفت ناس تدخل وكانوا مسعفين ...شفتهم يفحصونه قلت بخوف ..
هناء : شوي شوي ..ترى ايده تعوره ..
شفت واحد منهم يحط له كمام وبعدها شالوه بعد ما عدوا للثلاث .. لحقتهم لبرة ...نزلنا وهناك التفت لطلال وقلت ..
هناء: انا بروح معاهم ..
وقارنت القول بالفعل وما عطيت فرصة لطلال يتكلم...ودخلت سيارة الأسعاف وقعدت يم سامي ..تحركت السيارة وانا كل ماله وقلبي يرقع مثل الطبول ..
نزلت دموعي مثل السيل وانا اتذكر كل شي صار ...مسكت ايد سامي وقربتها مني وضميتها لصدري ..
وانا امسح على شعره ..
هناء: آسفة والله آسفة ..كان المفروض اقولك من الأول ..بس ماقدرت ما قدرت ..
طبعا لا حياة لمن تنادي ..كنت احاجيه وهو في العالم الأخر ...
وصلنا المستشفى ونزلت معاهم وامشي بسرعة احاول الحقهم وهو ايرون السرير ...وصلوا لغرفة الكشف بس منعوني اني ادخل وطلعوني برة ...بغيت اصرخ بويه الممرضة بس مسكني طلال ...وهداني ..
ظليت اروح وايي واعد بلاط الأرضية من التوتر ...لفيت لطلال وعبدالله وقلت ..
هناء: طولوا ...اكيد فيه شي جايد ..
قال عبدالله ولو انه بعد خايف ..
عبدالله : هدي هناء ان شاء الله خير ..
شفت باب الغرفة يتبطل وشفت الطبيب يطلع ..طرت عنده فقال يطمني ..
الطبيب : اهدي اختي ما عليه شر ان شاء الله ..بس رضة في الأيد ..
هناء: انزين شنو سبب اغماءته ؟
حسيته ارتبك بس قال ..
الطبيب : بس ضربة خفيفة على الراس ...
واشر داخل وقال..
الطبيب: كاهو صاحي إذا تبين تشوفينه ..
وابتسم لي باطمئنان وانا ما صدقت بسرعة دخلت ... شفته ماسك ايده الملفوفة ..قربت منه بسرعة وقلت ..
هناء: سلامتك يا بعد عمري ...سلامتك ..
لف لي وطالعني بعصبية ..
سامي : انتي لسة هني ؟؟
ما استغربت لهجته معاي فقلت وانا مطنشة جملته ..
هناء:ايدك لسة تعورك ؟؟
قال بعصبية ..
سامي: مالج شغل ..وطلعي برة لاني مابي اشوفج ...
نزلت راسي بحزن بغيت اتكلم بس دخلوا طلال وعبدالله .. وانا انسحبت لان ادري بيحرجني جدامهم ..
دمعت عيوني وبديت ابجي بصمت ..
ماادري لين متى بتظل هالعيون تبجي وهالقلب يحمل الهم طول عمره ...
تنهدت ابي انسى كل اللي صار...
ابي افتح صفحة جديدة ..ابي ايش بسلام ..
شفت طلال وعبدالله طالعين مسحت دموعي بسرعة ...
طلال : يلا هناء ..تبين تيين معانا ولا بتقعدين معاه ؟؟
هناء: اشقالكم الطبيب ؟؟
عبدالله : ما قال شي رضة بالأيد وضربة خفيفة على الراس سببت له هالأغماءة ..بس ماادري ليش الطبيب رفض يطلعه مع انه مافيه شي ..
وطالعنا بعض بتشكك ..بس قلت .
هناء: لاتخرعوني لو فيه شي كان قال الطبيب ..
طلال : صح ..ماله داعي هالخوف ...دخلي انتي الحين واحنا بنروح ..
راحوا طلال وعبدالله وانا ما تجرأت ادخل ...ظليت برة شوي مابي اسمع كلمة مو حلوة ..بس كله مني ..
شجعت روحي ودخلت ..لقيته يطالع الدريشة وماسك ايده الملفوفة ...
قربت منه وهو حس فيني فلف وطالعني عطاني نظرة قاتلة ولف عني ...
هناء: ليش زعلان مني ؟؟ انا مظلومة ..ولد خالتك النذل صورني بدل ما ..
قاطعني وهو يلف لي ويقول ..
سامي : انت بعد كل اللي صار فيج عين تيين تساليني ليش زعلان ؟؟؟ عبالج ماادري انج كنتي طايحة في ورطة معاه ..؟؟
انصدمت ... في هاذي بعد يدري ؟؟؟ !!!!!
كمل وقال بقهر ..
سامي: انت شنو خبلة ولا غبية ؟؟ عبالج لما رضيت عنج اول مرة لما كنا بأمريكا جذي ..مني والدرب رضيت عنج ؟؟؟ لا يا مدام ..انا رضيت عند لاني كنت شاك فيج ...اخذتج على قد عقلج وسايرتج عشان اعرف شنو خاشة عني .. كنت حاس ان في شي اكبر من عشرة الالاف ...ادري انج ما بقتيني ولا فكرتي تبوقيني لأنج لو تبين كنت سويتها من اول وبطريقة احسن من هاذي ...عصام كان يبي ينتقم مني فيج ..مالقى طريقة غيرج ...لقاج لقمة سهلة قدر يبلعج ..
بققت عيوني عليه مو قادرة استوعب اللي قاعدة اسمعه ...
قرب مني وقال بحقد ..
سامي : عبالج غافل عن اللي تسوينه ؟؟ طلعاتج وروحاتج ويياتج كلها حاسبها بورقة وقلم ...كنت ادري انج ما رح تتكلمين ..فاتخذت هالطريق عشان اوصل للي خاشته عني ... فتحت لج حساب وحطيت لج فيه فلوس عشان تعطينهم لعصام وشريت لج عقد الماس عشان يكون شاهد عليج لما تعطينه له ..لا تقولين انج ما فكرتي بجذي ..تراني حافظج ..من نظرة عيونج اعرف انتوا شنو تفكرين فيه ...شريت لج سيارة عشان اسهل عليج المهمة وتروحين وتردين بكيفج ..سويت كل هذا بس عشان اعرف شنو اللي خاشته عني .. دست على قلبي وقلت باجر تقولي بس ماكو فايدة ...الحقد والأنانية عموا قلبج .. لهدرجة ما تثقين فيني هناء ؟؟ لهدرجة قلبج صار اسود ؟؟ انا اقدر انتقم منهم وبضربة وحدة ...اقدر اوقف عصام وعالية عند حدهم باشارة وحدة مني ...بس مابي تدرين ليش؟؟ لأني ماني حقود ولا قلبي اسوج مثلهم ..
اللي سووه فيج ما ينعد شي باللي سووه فيني ... انا عانيت الأمرين منهم بس كنت اسكت لأن مهما صار مابي العيبة تطلع مني ...الحين شنو الفرق بينج وبين امي وعصام وعالية ؟؟؟ شنو الفرق ؟؟ هم انانيين وحقودين وانتي بعد مثلهم ...
ظليت مسبهة طول ما كان يتكلم ... الجم لساني ..
نزل راسه وقال ..
سامي: الحين ..ياه اليوم اللي تنتهي فيه هاللعبة ...اللعبة اللي لعبتيها علي ...
وقال بعد ما غير نبرة صوته ..
سامي : من اليوم ...كل واحد فيني بطريج ...انتي بصوب وانا بصوب ..اللي بينا ..
وسكت شوي بعدها رماني برصاصة قاتلة ...
سامي :انتهى ..

[لامارا]

الحلقــــة السادسة والعشرون
"بداية الفراق "

ردت ريولي تلقائيا ورا خطوات ببطء .. مو عارفة شنو اسوي ..اصدق اللي سمعته ولا امنع اذوني تسمع ولا انحاش ولا اظل واقفة ولا شنو بالضبط ؟؟
كمل وهو يلف ويهه عني وبقسوة .
سامي: طلعي برة رجاااء ..مابي اشوفج ..
سالت من عيني دمعة شقت طريقا لخدي بعدها للارض ... رديت خطوة ...بعدها خطوتين ..وبسرعة اطلقت ساقي للريح ... ركضت ودموعي مختلطة بصوتي بجيي ركضت بين جموع الناس اللي داخلة واللي طالعة واللي واقفة ..ما اهتميت لمنظري المهم اني اطلع من هني .. طلعت من الباب للشارع ولما وقفت اطالع حوالي ابي مكان فاضي ...لفيت ورا للحديقة الورانية مالقيت احد ....سندت ايدي على الطوفة وويهي للأرض وايدي الثانية مقبوضة ابي اطلع حرتي بأي شي ...
هناء: ليش ؟؟؟ لييييش ؟؟
وطقيت ايدي على الطوفة بقوة ...صرخت من الألم بس مو نفس الألم اللي بداخلي ...انهرت على الأرض ودموعي مبللة ويهي ..
هناء: مادام تعرف ليش سويت جذي ؟؟لييييش ؟؟ انا ما كان قصدي اخش عنك ..سكت عشان تنهدم الجسور اللي بينا ...سكت عشان ...
وسكت اخذ نفس بس من القهر كملت ..
هناء: عشان حبي ...
وصرخت بصوت عالي ..
هناء : ئي احبك ..احبك وما اقدر ابتعد عنك ...
بعدها سندت ويهي على الطوفة وبديت انتحب ...
بعد ما خلصت حصة البكاء والنحيب ..وقفت وانا مو قادرة اوقف اصلا ...ماادري اشلون تحركت ريولي اصلا ..
تذكرت اني ييت مع طلال وعبدالله بسيارته الحين اشلون ؟؟
مسحت دمعة بغت تنزل ...
لأ ...خلاص ما رح ابجي عليه ...مارح ابجي ...هو غلطان بعد ..وانا مارح اتنازل لين ما يطلقني لاني اكتشفت اني كنت اعيش مع واحد مينون ...مختل عقليا ...
بس نزلت دمعة ثانية ...احب واحد مينون ومو قادرة انشيله من بالي ... غطيت ويهي بايديني ...
انت كلي إذا تدري ...
انت حياتي اللي كانت فراغ ييت انت واحييتها من يديد ..
انت قلبي اللي ينبض باسمك ...
انت حبي اللي بنيته على انقاض حبي المتلاشي ...
بس خلاص ...مثل ما انت ماتبيني ...انا ...ماابيك ...
مسحت دموعي بعصبية ورحت دخلت المستشفى مرة ثانية ودقيت على البيت ... بعد ربع ساعة ياني عبدالله وطلال مرة ثانية ..ركبت السيارة وويهي خالي من التعابير ... قال طلال ..
طلال: ها هنوي اشلونه الحين ؟؟
قلت بعصبية خفيفة وانا التفت للدريشة ..
هناء: بخير ما فيه شي مثل الحصان ..
طبعا استغربوا لهجتي بس سكتوا ...انا حسيت جذي ...مع اني ما شفت ويوهم ..
انتبهت للطريج ...هذا طريج بيتنا انا وسامي ..بغيت اتكلم بس سكت في آخر لحظة ..خل يقطوني وبعدين اخذ سيارتي ...
وفعلا وصلت وهم راحوا ...ولاني خلاص انتهيت من حياته ...طلعت الشقة ..بطلت الباب ودخلت ..طبعا الصالة على حوستها ...شفت التلفون طايح وتذكرت لما يرني عصام .. والمخدات موزعة بكل مكان بعشوائية ..تذكرت لما طاحوا على الأرض اثنينهم وبدوا يتصارعون .. شفت الدم وتذكرت سامي لما كان طايح بحضن طلال ويرجع دم ..
غمضت عيوني امنع نفسي ابجي ...مارح ابجي على واحد ما يستاهل ..خلاني اعيش في تمثيلية بايخة ..كنت اداري شعوره لين درى شنو رح يسوي ..بس خلاص كاهو درى وقلب الدنيا فوق راسي وما قدر مشاعري ولا احساسي وقط علي كلام مثل السم ...
امي صاجة اتطلق منه احسن لي بدل العيشة اللي كلها مشاكل ... عوار راس صج ...
تحركت بسرعة عن المكان ولا رح اضعف جذي ...دخلت الغرفة وبطلت الكبت واخذت الجنطة وبطلتها وحطيت فيها كل هدومي .. كل شي خاص فيني ... وطلعت من الشقة .. بطلت سيارتي وحطيت الجنطة ..
صكيت الباب ..
" هناااء "
اخترعت من الصوت التفت ولا دلال بويهي .. هاذي متى يت ؟؟
ابتسمت لي وانا ابتسمت لها مجاملة وسلمت عليها ...
هناء:متى يتي ؟؟
دلال : انا دقيت على سامي عشان اقولها اني بالديرة بس التعبان ما تعب روحه اييني ...
نزلت راسي على ذكراه ..سألتني ..
دلال : إلا سامي وين ؟
رفعت راسي بثقة قلت ..
هناء: بالمستشفى ...تعب علينا ..
طبعا انصدمت ...وقعدت تحقق وياي بس انا منعت انها تفتح معاي شي لأني مالي خلق ودلال هذرتها زايدة ..
قلت بحسم ..
هناء: روحي له ...تراه محتاج احد يقعد معاه ..عن اذنج ..
وركبت سيارتي وحركت للبيت ...
بمحيك من حياتي ..
بنساك وللأبد ...
وصلت البيت وطبعا العيلة الكريمة كانت هناك ..بس ما علي منهم ..ركبت الدري بروح داري شفت طلال نازل بعكازه ومستغرب من وجودي ..
طلال : انتي مو وديناج بيتج ؟؟
قلت وانا اطوف من يمه ..
هناء: بلى ..
وخليته وكملت طريجي للغرفة ...دخلت وانا ادز الجنطة معاي .. صكيت الباب ... سمعت طق على الباب ..
اففففففف منو هذا ؟؟ ..
هناء : مفتوووح ..
ورحت ببطل الكبت ...
" هناء "
التفت وكان طلال ..ماسك مقبض الباب بايد وايد الثانية ساند على العكاز ...التفت للكبت مرة ثانية وقلت ..
هناء: نعم ..
طلال : ريلج اشلونه ؟؟
ريلي ؟؟ ضحكتني طلال ...قلت وانا ابتسم ابتسامة استهزاء قبل لا التفت له ..
هناء: ريلي الله يسلمك ..ماعليه شر ..
استغرب لهجتي ..شفته يدخل ويصك الباب وقال باهتمام ..
طلال : صار شي هناء؟؟
شي ؟؟ قول اشياء ...
مسكت اول بدلة لي وقلت وانا اعلقها ..
هناء: مثل شنو ؟؟
طلال : هناء لفي طالعيني ...صار شي بينج وبين ريلج ؟؟
التفت له وقلت وانا اسوي روحي مستغربة ..
هناء: ليش تقول جذي ؟؟
طلال : اشحقة عيل يايبة هدومج وياج ؟؟
هناء: لا بس كإستعداد ..
طالعني بغرابة وقال ..
طلال : استعداد ؟؟ استعداد حق شنو ؟
استعداد حق الطردة ... لميت هدومي عشان ..
قطع تفكيري سؤاله الملح ..
طلال : هناء .. شسالفة بالضبط ؟؟
ولاني ابي افتك من السالفة لاعت جبدي منها ...هديت الهدوم وقعدت على السرير وسكت اجمع الكلمات بس ما طلع معاي إلا هذا..
هناء: انا ابي اتطلق ...
انرسمت علامات الذهول على ويه طلال فقال بصدمة ..
طلال : خير ؟؟
شكله لسة ما استوعب ...كررت وباصرار ..
هناء: انا ابي اتطلق ..
لسة مذهول فقال ..
طلال : انتي ...تغشمرين ولا شنو ؟
وبهالأشياء الواحد يتغشمر ؟؟؟ قلت وانا اقلب ويهي عنه ..
هناء: لأ طبعا ..
ولفيت له وقلت ..
هناء: طلقني منه ..
قرب مني وباهتمام وهو يقول ..
طلال : ليش ؟؟ صار شي جايد بينكم ؟؟
تنهدت وقلت ..
هناء: انا وسامي ما نليق على بعض ... افكارنا مختلفة ...انا ما اقدر اتفاهم معاه ...هادي مرة وعصبي مرات ...رايق مرة ومتضايق مرات ...ما اعرف اشلون ارضيه .. وإذا سويت غلط قامت القيامة ...جني سويت جريمة ...
كنت اقول هالكلام وانا قاعدة اتذكر اللي صار بالمستشفى ..كملت وانا لسة سرحانة بنفس الموقف ..
هناء: كلش هو ما يغلط ابدا ... يطلع حرته فيني دوم ..
طلال : اشلون يطلع حرته فيج ؟؟
سكت لما تذكرت اشلون بغى يذبحني لما شافني مع عصام يوم العرس .. ويوم هديت البيت لأني اكتشفت انه يحب ريم مع اني كنت غلطانة بس ييت اعتذر له بهدلني وذلني ...
نزلت دمعة مني فقال طلال بخوف ..
طلال : يمد ايده عليج ؟؟
ولأني سكت لأني بعد تذكر اشلون بغى يمد ايده علي بالمستشفى ...
كرر طلال كلامه بس بصيغة غير ..
طلال : يطقج هناء ؟؟
انتبهت له وقلت وانا اهز راسي بالنفي..
هناء: لأ لأ ..بس يعصب ويزف ...
لفيت له وقلت بحزم ..
هناء: انا بتطلق منه يعني بتطلق..
طبعا ما مر اليوم وإلا امي تدري ...وطبعا بدت حجيها اللي يغث اكثر ..
" انا قلت لج من الأول ما يصلح لج "
" الحمدلله انج تبين الطلاق منه "
" خلاص لا نعرفه ولا يعرفنا ..."
ولما خلصت حصة التوجيهات من امي ..رديت داري وانا ماسحة من مخي نهائيا ...
تحملته وايد ..تحملت شكوكه واتهاماته لي ...إذا يدري من زمان اشحقة ماعلمني عنه ... ليش ما تكلم ؟
يايني المستشفى يوم اجهضت ومسوي روحه زعلان ولا هو اصلا مشترك معاه بهالجريمة ... حاقدة عليه صج .. كارهة حتى اسمع اسمه ... خاين ...شكاك ... بدل ما يلمني ويراضيني ويحاول ينسيني اللي صار هب بويهي وطردني .. انا سويت كل هذا عشانه ..عشان لا ابتعد عنه ...مايدري اني احبه ...مايدري ؟؟
بس خلاص هناء ..انسيه ...انسيه مثل ما نسيتي عصام ...
مرت الأيام وقدرت اني اتناساه على الأقل ..طبعا لا سأل ولا حتى حاول يدق علي ... وانا اللي ...
ابتسمت باستهزاء وسخرية من نفسي وانا اركب السيارة اروح الجامعة ..شغلتها وحركت .. شغلت الراديو ...
تذكرت لما طلال قالي انه راح لسامي البيت بس ما لقاه ...وراح المستشفى بعد وهم ما لقاه ... طبعا انشغل تفكيري وسؤال المطروح هني وين راح ؟؟ ..
لين الحين ما ادري شي عنه ..خله يولي ..عساه يروح وما يرد ...
" والآن ننصت خاشعين لايات من الذكر الحكيم يتلوها علينا الشيخ عبدالرحمن السديس "
قطع علي تفكيري هالجملة ...ولأني احتاج لراحة البال رفعت الصوت ... وركزت بالأيات ... وصلت طبعا ونزلت من السيارة بس وقفني صوت تلفوني ..عبالي خلود ...بس انصدمت لما شفت سامي .. هذا شيبي ؟؟
صكيت بويهه وكملت طريجي للمحاضرة ... وقبل لا اوصل القاعة سمعت صوت مسج ...بطلتها وكانت ..
" هناء انا دلال ابي اكلمج ضروري "
داز لي اخته ...حلو والله ...عارف نفسه غلطان ... دخلت المحاضرة ولما اخلصها اشوف لي صرفة معاها ..
بعد ساعتين خلصت ..بس مابي ادق على تلفون سامي يمكن هو يرد علي وانا مابي ...احترت اشلون الحين اكلمها ...
"وينج انتي ؟؟"
التفت وكان خلود وانتصار ...
هناء: انتوا وينكم ؟؟ ها خلصتوا ؟؟
انتصار : ئي بس بعد ساعة عندي محاضرة ..المهم ..خل نروح الكافتيريا ..
تحركنا واحنا بالطريج دق تلفوني وكان سامي ... بس طبعا دلال هاذي فعشان جذي اشرت لخلود وانتصار يسبقوني ...رديت وقلت ..
هناء: هلا ..
دلال : هلا هناء ...متى اقدر اشوفج ؟؟
ماشاء الله لهدرجة الموضوع خطير حتى نست تسلم وتسأل عن الأحوال ...
هناء: امممم...انا الحين عندي محاضرة ...رح اخلص الساعة 12 ونص ...
دلال : اوكي دقي علي لما تخلصين ..
قلت بسرعة ..
هناء: لأ ...اقصد ..انتي اللي ..دقي علي ..
سكتت شوي جنها تفكر بس قالت ..
دلال : اوكي ...سي يو ..
وصكت عني ...دخلت محاضرتي وانا بالي مشغول ..مو بسامي لأ ..انا خلاص بنساه وهاذي اول خطوة ..
خلصت محاضرتي ودقت علي دلال وتواعدنا انها تمرني ...بعد عشر دقايق دقت علي وعلمتني انها برة ..جنها تنطرني ...طلعت لبوابة الرئيسية بس ما اعرف سيارتها شفت احد يأشرلي لي وكانت هي سيارتها كانت لكزس سودة ذكرني هذا بعصام النذل ..ركبت السيارة وانا اطرد هالشي من بالي ...
هناء: السلام عليكم ..
التفت لي وقالت ..
دلال : وعليكم السلام ...هلا بالزعلانين ...
كما توقعت ...ردينا للموضوع الأصلي ...تأففت من داخل وقلت على مضض ..
هناء: هلا دلال ..
وسكتنا ...حسيتها تطالعني ..فقلت اقطع السكوت ..
هناء: بغيتيني ؟؟
دلال : ئي ... زعلانة من سامي ؟؟
نعم ؟؟؟ شهالسؤال ؟؟
التفت له ابي اتأكد من اللي سمعته ..كملت وقالت ..
دلال : ما قدرت اخلي سامي بروحه في البيت ..
لفت لي جنها تأكد لي ..
دلال : سامي تعبان وايد هناء .. من طلع من المستشفى وهو حالته حاله ... صج انه يكابر بس من داخل مكسور ...اخوي واعرفه ... ما تكلم وقال شنو اللي بينكم بس عرفت انا انكم متهاوشين ماادري على شنو ..حاولت اني اعرف بس سامي كتوم درجة اولى .. ما يتكلم ...ينجرح من الداخل وما يقول ...
وانا ؟؟؟
ترجمتها على لساني وقلت ..
هناء: وانا ؟؟ ما انجرح ؟؟ ما احس ؟؟
وسكت لاني مابي اتكلم اكثر بس قلت ..
هناء: دلال اخوج ما يهمه إلا نفسه وبس ..
وطالعت الدريشة ...قالت دلال ..
دلال : لا حرام عليج ...سامي اللي شافه مو شوية ...من امي وابوه اللي حمدلله بدا يتقرب منه ..ومن عصام وعالية الأنذال ... سامي مثل الزجاج اللي انكسر وملزق عشان لا يرد ينكسر مرة ثانية ... ما اقولج هالكلام هذا عشانه اخوي لأ..اقوله لأني اعرفه عدل ..مارح امدحه لج واقول سامي ماكو منه..
بس والله الشاهد انه اول ما شافج تعلق فيج ...هناء ..سامي يحبج ...
التفت لها انا هني مصدومة من كلمتها ..فكملت ..
دلال : ئي يحبج ..انتي ما تدرين شنو سوى فيني لما شافج ؟؟ ما خلاني انام ولا آكل ..كله يتحجى عنج واول مرة يصير ثرثار هالكثر مع انه معروف بالهادي وما يحب الهذرة ...
سكتت شوي وقالت اخيرا وهي تقرب مني جنها تقول حقيقة ما تقدر تخفيها ..
دلال : اول مرة بحياته يتكلم عن بنت بالذات هالكثر ... طبعا قالج عن ريم وحبها له وعالية ولزقتها ..
هزيت راسي بايجاب ..اشلون ما اعرفهم وانا اكتشفتهم بنفسي وجربت لدغة وحدة فيهم .. بس قتل باصرار ..
هناء: ما قالي ...انا اللي اكتشفت ...دلال ..حياتنا انا وسامي مبنية على الصدف ..بالصدفة اكتشف انه كان بعلاقة مع وحدة قبل ...وانها كانت تحبه ...بالصدفة اكتشفت اني في وحدة تبي تخرب حياتنا ...وهي عالية ..
دلال : لأنه مايبي ينبش بالماضي ...ما يبي يتذكر شي .. انتي شفتي امي وخالاتي اشلون متحاملين عليه ..
هناء: شفت ..بس يقدر يتكلم ويقول ..مو يجبرني اني اعيشه بكل مآسيه ...عانيت الأمرين من ماضيه الأسود .. انا مالي ذنب بكل اللي شافه واللي صارله من اهله .. انا ضحية مثل ماهو ضحية ...بس الفرق اني مو ملزومة اتحمل هالشي اما هو مجبور ..
ومسكت مقبض الباب لأني بنهي هالحوار ..
هناء : عن اذنج دلال ...
وبطلت الباب وطلعت ..ورحت لسيارتي ...وركبتها حتى ما دقيت على خلود وانتصار اللي مواعدتهم ورحت البلعت ..ورحت لسيارتي واتجهت للبيت ...والذكرى بدت ترجع لي .. مابي مابي ...هزيت راسي اطرد هالذكرى المؤلمة .. مابي اعرف شي عنه ومابي قلبي يضعف عشانه ... خلاص مثل ما باعني انا بعته ...واللي بينا مثل ما قال انتهى ...
رديت البيت لقيت امي وخالتي ام عبدالله قاعدين .. سلمت وقلت ..
هناء: اشلونج خالتي ؟؟ شخبارج ؟؟
طالعتني وابتسمت لي ..
ام عبدالله : هلا والله ببنتي هناء ..اشلونج يما ؟؟ شخبارج ؟؟
رديت ...
هناء: الحمدلله .. عن اذنكم ...
وصعدت فوق ... رحت داري ونمت لي شوي ...قعدت على حزة الغدا ..ولأول مرة تجمعنا كلنا على الطاولة وبدينا الأكل ...حسيت بالشوق لهطاولة وماضيها الحلو ...قعداتنا وضحكاتنا وغشمرتنا ويا بعض ..
كليت بشهية ولاول مرة بعد ... وخلصت الصحن ..وبعد الغدا بغيت اصعد داري ادرس لي كلمتين ...بس وقفتني امي ..
امي: تعالي هناء ..ابي احاجيج ..
طبعا استغربت رحت وراها دارها ..دخلت وهي صكت الباب ...الله يستر ...
امي : انا مارح الف وادور عليج .. انتي مثل ما قلتي تبين تطلقين من ريلج ...وانا ..
طالعتني بحذر وكملت ..
امي : انا قلت لها انج تبين الطلاق من سامي ...
بطلت عيوني على وسع وكملت بسرعة ..
امي: انا ابيج تاخذين عبدالله ..
ردينا لطير ياللي ..قلت بملل ..
هناء: يما ...تراني على ذمته لسة ...
امي : تطلقي منه ومارح تصيرين على ذمته ..بعدين ابيج تحاجينه وكل شي ينتهي بينكم بسرعة ..لاني ابي افاتح ام عبدالله بهالشي وما اقدر اكلمها وانتي متزوجة ..
لاااا ...انا يوم عن يوم اشوف امي تتغير ..من اول حادث طلال وهي الله بالخير ..اشلون تكلمني بالموضوع اصلا ؟؟؟ انا متزوجة ..غير اني مابي اتزوج اصلا بعد ما اتطلق ..
هزيت راسي باستنكار ...ناس يبوني ارضى بسرعة وانسى اللي صار من سامي ..وناس يبوني اتطلق واتخلص منه ...حتى الأختيار بهالشي حارميني منه ...زوجوني اياه بالغصب والحين يبوني يطلقوني منه بالغصب...والله حالة ..ارضيهم ولا ارضي نفسي بالأول؟؟؟
طلعت داري وانا متضايقة ....قلت ابي انسى كل شي يذكرني فيه ..
خليت امي معلقة وما رديت عليها ...ارد عليها شقول ؟؟؟ امي حاذفة سامي نهائيا من الحسبة ... تبيني اتطلق منه بسرعة وتزوجني عبدالله ... خل اتطلق بعدين اقولهم اني مابي عبدالله ولا غير ..
مرت الأيام وامي كل شوي تفاتحني بنفس الموضوع ... من غير ما يدري طلال ... ولاني ابي افتك من هالسالفة قلت له ...
وقف مصدوم وقال ..
طلال : شنو ؟؟؟ امي قالت جذي ؟؟ لا ...امي خلاص قضت ..
وطلع من الغرفة يروح لامي ...
طلال : يمااا ....يمااا ..
طلعت امي من المطبخ وقالت ..
امي: ها اشفيك تصارخ ؟؟
طلال : في ام بالدنيا تبي بنتها تطلق ؟؟
طالعتني امي بعدين فهمت السالفة وقالت..
امي: انا ... اختك لازم تطلق من هاللي اسمه سامي ...من اول ما ناسبنا واحنا بمشاكل ..اولها انت واخرها غالية ...
انرسمت معالم الصدمة والحزن على طلال بس كابر وقال ..
طلال : يما ..الله يهداج هو ماله شغل ..بعدين يما ما يجوز تكلمينها بهالشي وهي على ذمته ما طلقها حراام ..ثاني شي بالله هي ماتبي تطلق ؟؟ خلي لها حرية الأختيار ...هناء وسامي هم بيحلون الموضوع مو احنا ... وإذا في خلاف ..
ولف لي جنه ينبهني ..
طلال : هم ادرى اشلون بيحلونه ..
ومشى ...خلاني مع كلماته ...بس لو كلمته الحين ببين اني ميتة عليه ..خل يولي ..هذا اللي قاصر ادق عليه ..
مرت أسابيع ولا حس ولا خبر منه ... وانا سالفتي معلقة ...ودلال من بعد الكلام اللي قالته خلتني في مع نفسي افكر ...
افكر بشنو ؟ افكر بواحد عيشني بوهم ؟؟بتمثيلية كنت انا البطلة والضحية فيها ؟؟؟ تمثيلية كان هو يحركها مثل الدمى المتحركة ؟؟؟
اشفقت عليه من اللي صارله من اهله وعاشه ..بس خلاص مصخت كل ما سوى شي خلى المعارك الضارية والحروب الدامية اللي عاشها مع اهله عذر ...وللأسف عذر اقبح من ذنب ...
عرفت ان عبدالله خطب انتصار اخت عصام ... هني انا طقيت اصبع ...افتكيت منه ...ومن حنة امي كل يوم ...
طبعا امي زعلت مني وما خلت كلمة جارحة ما قالتها ...بس طنشت ...يعني بالله اتطلق وبعدها اقعد بالعدة ثلاث شهور وعبدالله اييني يخطبني بعدها ؟؟ إذا الحين هو مستعيل اشلون ينطر اربع خمس شهور لى بال ما اتطلق من سامي؟؟؟
حددوا الملجة ورح تكون بعد اسبوع ... وطبعا تكفلت انا بتوصيل البنات من وإلى السوق ..جني سيارة لتوصيل الطلبات ... بس كل شي يهون ..عشان انسى سامي ...وفرحة عشان افتكيت من سالفة عبدالله ..
انتبهت على خلود اللي قاعدة يمي ..
خلود : هييه ..دري بالج لا تدعمين ترى معاج ارواح مو بايعين اعمارنا ...
التفت وانا ابتسم لها واقول وعيني على الطريج ..
هناء : افا عليج ..انتي راكبة مع شوماخر ..
اسما : الله يستر ...انا مارح اصدق لين ما اوصل السوق ...
ضحكت عليهم ...وكملنا الطريج سوالف وضحك ومعانا انتصار اللي مسوية روحها مستحية ..عاد احنا استلمناها ..بس بنفس الوقت اضحك على روحي ...ناس تطلق ..وناس تزوج ...سبحانك ربي ...
وصلنا السوق ونزلت بعد ما صفت السيارة .. والبنات اسبقوني لداخل ..مسكت تلفوني عشان اتأكد من الوقت بس دعمت شي ..رفعت راسي وكان شاب ...طبعا ما صدق شق الحلج وابتسم ...هزيت اسي وماعطيته فرصة يتكلم ومشيت عنه ...
من بعد سامي ..عفت كل الرياييل ... دخلت السوق وتجمعنا وبدينا نفر ...طبعا ما خليت شي ما شريته ..من محل لمحل .. جني مو شايفة خير .. شريت ثوب عاري شوي ومكلف وبنفس الوقت حلو ...طبعا اعترضوا البنات على هالشي بس طقت في بالي اشتريه وفعلا اشتريته ...الفتحة الورانية واصلة لنص ظهري غير انه علاق والفتحة من جدام كبيرة ...كان لونه زهري على بنفسجي على وردي وهذا اللي خلاني اشتريه لأني اموت على الوردي ...
خلود : بنات ..تعبت تراني ..الحين بيأذن الظهر واحنا هني من الساعة تسع ..خل نروح نتوضى ونروح نصلي ...ونتغدا