الحب الخجول / للكاتب طارق لبيب ، سودانية مكتملة

[لامارا]

الحلقة 9

فتحت الدولاب فعلا بدت تفتش .. وبتتحسس في الهدوم
قطعة .. قطعة .. فجأة وكت هبشت الاستكيرت بتاع
الجنز .. لقتو قوووي كدي .. زي طبقة الحلومر .. عرفت
انو ملفوفة فيهو حاجة .. لامن طلعتو وفرتو . الدفتر
وقع في السراميك . وانفتح والورقة طلعت منو وقعت
قدامو كدي ..
طوالي عايدة انشغلت بالورقة واهملت الدفتر ..
شالت الورقة بيدها اليمين .. ورفعت الدفتر بيدها
الشمال .. ودخلت الدفتر في الدولاب وعينها في
الورقة .. وما ملت عيونا في الدفتر نهائي .. ولاشافتو
دفتر شنو ..
وبتعاين في الورقة وبتقفل في الدولاب ..
وبراحة جات قعدت .. وبدت تقرأ في الورقة .. بي كل
انتباه وخوف شديد ..
عرفت من خلال الكلام المكتوب في الورقة .. انو في
دفتر خواطر حق بتها سلمو عبد الرحمن لي فارس . من
غير رضاها ..
وانو عبرت فيهو عن حبها لفارس ..
وعرفت انو استاذ فارس بحب بتها .. لكن ماعايز يستمر
في تفعيل العلاقة حاليا " .. وعرفت انو همو الوحيد انها
تتفوق ..
المهم بقت همها انها تشوف الدفتر بتاع الخواطر
المذكور في الورقة ..
او ل مافكرت فكرت في الدفتر الختتو في الدولاب ..
وفعلا اتناولته .. وفتحتو من الاول .. وبدت تقرا من اول
كلمة ..
المراة دي اتفاعلت مع كلام بتها تفاعل عجيب وغريب ..
لدرجة انها بكت بكا لامن قعدت تكح ..
وعرفت انو بتها وصلت مرحلة متقدمة جدا في بحر
العشق المدسوس ..
وقعدت تتبسم .. وبتقول والله ياسارة لكن حكايتك
حكاية .. ده انا طلعت مسكينة كلو كلو .. كنت قايلاك
لسه صغيرة ومابتفهمي كلام زي ده ..
على كل حال .. بي قراءة متأنية للدفتر والورقة عايدة
عبد الله عرفت كل الحاصل على بتها ..
وختت الدفتر قدامها .. وختت الورقة من فوق ليهو وبقت
تفكر .. تعمل شنو؟ ..
بعد مسافة فكرت ورست على راي وعايزة تنفذ
طواالي ..
سريع شالت الورقة ودخلتها في نص الدفتر ..
ودخلت الدفتر في الاسكيرت زي ماكان .. وطبقتو وختتو
تحت الهدوم .. وقفلت الدولاب وختت المفتاح فوق
راسو ..
وطلعت وقفلت الاوضة تلات قفلات زي ماكانت ..
لحظة طيب ..
هناك في المدرسة سارة وصلت في زمنها .. الاعتيادي
والمفتاح بتاع اوضتها في جيبها وهي مطمئنة جدا ..
ومبسوطة وكل التوترات الكانت معاها الفترة الفاتت ..
كانت ماافي .
كل مرة تجي ماشة بي قدام مكتب المدير بي بعيد ..
عشان تلقي ليهو نظرة من الشباك موجود ولا ما
موجود .. وكلو كلو ماقدرت شافتو لامن الفسحة
انتهت .. وكل مرة نفسها تحدثها انها تقلع قلبها من
جواها وترسلو ليهو ..
..
فارس موجود في المكتب .. مع عبد الرحمن .. بتكلمو
مع بعض . اليومين ونستهم كلها عن سارة ..
عبدالرحمن قال ليهو يا فارس ممكن اسألك سؤال مادام
بالك رايق كدا ؟
قال ليهو اتفضل ياعبدو ..
قال ليهو طيب انت ماحكيت لي قصة منال شطة ..
قال ليهو هسي بحكي ليك بالتفصيل ..
ناس منال ديل اساسا ساكنين جيرانا .. وهم ناس فقراء
شديد . وانا صاحب اخوها الكبير من نحن اطفال .. وكان
عندي ليها حب غريب ..
وهي من طفلة كانت بتبيع الشطة الخضراء لناس الحلة
بالكيس ..
بديها ليها ابوها تحوم بيها بالبيوت ..
من الزمن داك نحن مسمنها منال شطة ..
انا كنت بحبها شديد .. من هي طفلة لغاية مادخلنا
الجامعة .. وهي قدمت في نفس الجامعة البقرا فيها
انا .. بس هي لمن دخلت انا كنت في السنة الاخيره ..
غايتو يازول في السنة الواحدة دي .. علاقتنا اتعمقت
شديد وكانت مابتقدر تفارقني .. وانا ماكنت بقدر افارقها
كمان .
وارتبطنا لدرجة انا لمن اتخرجت .. كلمت اهلي ومشو
طلبوها لي .. .. الاسرتين رحبو بالفكرة .. وقالت لي
انتظرني لمن اتخرج بس .. .. الحمد لله انا اشتغلت
وبقيت منتظرها ..
اها يوم من الايام وهي في سنة رابعة .. باقي ليها
شهرين بس وتخلص الجامعة .. رسلت لي اجيها في
البيت ..
لقيتها قاعدة في البيت براها .. بس معاها اختها
الصغيرة ..
وكانت متوترة زي الشايله لي خبر بكا .. قلت ليها مالك
يامنال ان شاء الله خير ؟
قالت لي يافارس كل حاجة قسمة .. وانا والله حاسة
باني ماقادرة اواصل معاك ..
قلت ليها ليه يا منال انا غلطان في حاجة ؟ قالت لي
ابدا والله ..
انت الخير والبركة .. لكن انا عايزة لي زول يكون وضعو
المادي ممتاز ..
كفاية يا فارس .. انا عشت كل سنين حياتي معاناه . مع
اسرتي .. المفروض بعد اتزوج تكون حياتي احسن ..
ماممكن اطلع من بيت ناس مهدي .. لبيت فارس ..
مهدي ده ابوها كان ببيع الخضار في طربيزة قدام
البيت ..
اها قالت لي عندي صاحبتي .. اخوها جاي من برة
الاسبوع الجاي .. وهو مدير حسابات في شركة كبيرة ..
وعمل راس مال كبير وعندو اسثمارات في البلد دي مالا
حد ..
واختو طلبتني ليهو .. ورسلت ليهو صورتي .. وانا
وافقت موافقة مبدئية ..
تتصور ياعبد الرحمن .. البت دي من بجاحتها .. وقلة
حياها تقول لي كلام زي ده وانا بحبها اكتر من 15
سنة .. ؟؟
المهم يا عبدالرحمن انا غلبني الكلام .. وطلعت من دون
ما أرد عليها ..
والحمد لله اتزوجت .. وربنا اكرمها وهسي عايشة ملكة
مع الراجل الغني ..
وانا قفلت باب البنات من اليوم داك .. وبقيت عايش عادي
ومافكرت في اي تذكرني بي عرس ذاتو ..
بس البت الاسمها سارة دي .. مع مرور الوقت بدت
تنخر في اعصابي زي نخر الموج لي قيفة حجرية ..
وهسي انتهت مني كلو كلو .. وخايف والله خوف
شديد .. انو اقوم اغرق فيها .. وانا عارف انو الموضوع
بعيد المنال ..
بس تفكيري فيها فاق حد الخيال .. وما كنت بتوقع اني
قريب اقع وقعة زي دي بعد صدمة منال ..
عبد الرحمن كان بستمع لي فارس بكل انتباه .
بعد انتهى فارس من كلامو ..
عبد الرحمن قال ليهو انت بس اصبر لي .. انا لو
ماعرست ليك سارة دي اكون اسمي ببسي كولا ..
بعد شوية في تلفون ضرب في تلفون مكتب المدير
الثابت ..
فارس قال ليهو رد على التلفون ياعبد الرحمن .. انا
ماشي اصلي الضهر وجاي ..
قام عبدالرحمن رد على المكالمة ..
الو سلام عليكم .. عليكم السلام ..
انا ام سارة ممكن اتكلم مع المدير؟
عبدالرحمن قال ليها اتفضلي معاك المدير .. ‏( والمدير
كان طلع ‏)
قالت ليهو فارس ؟
قال ليها نعم نعم اتفضلي يا ام سارة ..
قالت ليهو طبعا انا قريت الورقة الانت مرسلا لي سارة
بتي ..
وبي طريق الورقة قريت الدفتر الجابو ليك استاذ
عبدالرحمن كامل ..
عايزة اقول ليك حاجة .. وياريت سارة ماتكون عارفة
اتصالي ده ..
انا بعد شفت بعيني وقريت كل كلمة منك ومنها ..
عرفت انو بتي انسانة قويمة .. والاحساس الكتبتو
احساس طبيعي ..
والظاهر عليها كانت بتكتب في خواطر فقط ..
وماكانت عايزة الدفتر يصلك .. على حسب كلامك في
الورقة انو حتى عبدالرحمن قراهو رغما " عنها ..
وحتى الورقة الكتبتها انت ليها .. كلها ادب واحترام ..
ومشاعر حقيقية .
مافيها اي نوع من الاستقلالية .. والسفاهه ..
واهتمامك بتفوقها ودراستها .. انت نعم الاستاذ .. ونعم
الحبيب ..
وانا من هنا بعلن ليك .. اني موافقة موافقة تامة .. انك
تكون زوج بتي .. وفي الزمن ده ما ح القى ليها احسن
منك .. بس عايزاك تجي تزورنا زيارة تعارف .. بس
عشان ابوها يكون بعرفك .. والكلام بعدين مايجيهو
مفاجأة ..
وبعدين . بمجرد ماتنتهي سارة من امتحاناتها مافي زول
حيمسك يدها غيرك ..
بس انت قول ربنا يهدي ابوها ويوافق ..
وشكرا " ليك .. مع السلامة
عبد الرحمن طبعا ماسك التلفون يسمع في الكلام قرب
يغمى عليه ..

الى اللقاء

[لامارا]

الحلقة 10

بعد نهاية التلفون .. طلع عبد الرحمن .. وبقى حايم في
حوش المدرسة زي الزول المضيق عليهو الضرس ..
وبقى في حيرة زي الحيرة .. اها ياربي الخطوة الجاية
شنو؟ انا ماعايز فارس في الفترة الحالية يحس باي
حاجة ..
عايزو يكون عادي زي المافي حاجة .. وخايف من الحريم
ديل يطرشقو لي الخطة .. الحريم قاصد بيها سارة
وامها ..
المهم مشى صلى وجاء .. لقى فارس قاعد .. واليوم
ماشي على نهاياتو ..
قال لي فارس .. اسمعني يا استاذ .. انا عندي منك
طلب وياريت ماتخيب ظني ..
قال ليهو اطلب يا عبدالرحمن ..
قال ليهو رايك شنو نمشي يوم زيارة لي بيت ناس
سارة .. ؟
زيارة عادية ولا نفتح ليهم اي موضوع ..
قال ليه ياعبدالرحمن نحن موش الموضوع ده قفلناهو؟
والبت حرقت الدفتر وخلاص ولاشنو؟
وقلنا ما ح نتحرك اي حركة .. لانو الموضوع ده شكلو
فشوش .. وامال محطمة ساي .. وماعندي فيهو امل ..
ولا عشرة في المية ..
قال ليهو انت خسران شنوياخي ؟ نمشي زيارة بس
للتعرف ..
قال ليهو ليه ؟ والمناسبة شنو؟ ويقولو عننا شنو؟
لالالا
ده موضوع تاني ماتفتحو لي لو سمحت .. انت زول
اخوي ماتزعلني منك ..
المهم يازول بعد حناسة تقيلة .. عبد الرحمن قنع من
حكاية فارس يمشي معاهو دي ..
وقال لازم يتصرف .. اي يتصرف .. يطلع من الورطة
بتاعة عزيمة ام سارة دي ..
اها هناك سارة مشت البيت .. وامها تعاين ليها
وتتبسم .. وهي ذاتها نفسياتها في السماء ..
وامها بتقول عان عليك الله كمان سرورة .. والحب
العميق .. والله يا ما تحت السواهي دواهي ..
اصلا ما قالت ليها انا كشفتك .. ولا حسستها انها عارفة
اي حاجة ..
طبعا لانو سارة انسانة حساسة .. لدرجة مبالغة فيها ..
ولو عرفت انو انو كشفتها . الموضوع ده ممكن يوترها
يومين تلاتة .. ويحميها القراية وعشان امها عارفة كدا .
.. عملت فيها اضان الحامل طرشا ..
والوضع ماشي طبيعي .
بعد كم يوم عبدالرحمن اتصل على ام سارة وقال ليها
معاك فارس المدير ..
والله انافكرت في موضوع زيارتي ليكم في البيت ولقيت
الوقت ما مناسب .
لانو البت في مرحلة حرجة .. وانا ماعايزها تحس باي
تحركات خلاف اتفاقي معاها .. وانا عايزها تكون بس
مركزة في دروسها ..
وانتي ماتستعجلي الموضوع ده .. ان شاء الله يتم وربنا
يسهل .. وحسن ابوها . انا بعرف اخش ليهو بياتو باب ..
قالت ليهو خير ان شاء الله استاذ فارس تسلم والله كلك
عقل وفهم ..
وبي كدا عبدالرحمن بالو ارتاح من قصة توتر الزيارة
والزوغان منها ..
.
اريج في المدرسة محولقة لي شنطة سارة قريب
الاسبوع مالقت فيها طريقة ..
وسارة مبسوطة تتبسم ساي ..واريج مغيوظة من
الانبساطة بتاعة سارة دي ..
يوم من الصباح قبل الطابور اريج لاقت مسرة قالت ليها
انتي ياخالتي مسرة ماخدمتيني اي خدمة .
قالت ليها ليه في شنو يابتي .. الحمد لله البت ما
اشتكتك .. وماشايفاك حصلت ليك اي حاجة كعبة ..
قالت ليها بس انا شاكة انو البت دي بتحب الاستاذ
الاسمو عبدالرحمن .. وعايزاك تتأكدي لي من القصة
دي .
قالت ليها اها اها .. مالك ومالها؟ خليك في قرايتك ..
كدي قومي جيبي لي كباية شاي .. انا فترت من الكنس
وضهري انقص ..
الكلام ده كان في في ضل المزيرة الغربي .. مسرة
كانت قاعدة ليها في بمبر وشايلة مكنستها .. كانت بتكنس
في الناحية الجنوبية بتاعة الحوش ..
قالت ليها هسي البنات يشوفوني جايبة ليك الشاي يعملو
لي موضوع .
قالت ليها انا موش خالتك ؟
قامت اريج مشت اشترت شاي سادة جابتو لي مسرة ..
ومشت جابت ليها بمبر وجات قعدت جمبها ..
.. قالت ليها ياخالتي مسرة انا عندي منك طلب ..
وبتتكلم معاها وماده ليها قريشات زي تلاتين جنيه
تقريبا ..
مسرة شالت القروش وقالت ليها اطلبي ..
اريج قالت .. لها .. انا متأكدة انو الورقة الشفتيها بتقرا
فيها وبتضحك دي جواب حب .. من عبدالرحمن ليها ..
وهسي قاعد في شنطتها ..
اها انا عايزة الورقة دي باي طريقة ..
مسرة قالتلا اها انا اجيبا ليك كيفن الوريقة دي؟ ..
قالت ليها نحن بنطلع الطابور كلنا وبنخلي شنطنا في
الفصل ..
اول ما الطابور يبدا انت خشي الفصل حقنا .. وشيلي
شنطت سارة .. ختيها لي في الشباك الفاتح في
الزقاق ..
وانا مما يبدأ الطابور بستاذن من الاستاذة بقول ليها
عايزة استفرغ .. وبمشي بيورا بشيل الشنطة .. وبفتحها
اشيل الورقة وارجعها سريع .. قبل الطابور مايخلص ..
مسرة قالت ليها .. اول حاجة هاك قروشك ..
انتي كان انتي دايراني اخون الاساتذة والطالبات .. عشان
انتي بتديني قروش .. قروشك بتبقى حرام ..
انا يابتي كان دايرة الحرام ماكان بقيت فراشة .. ومهملة
وليداتي عشان لقمة العيش ..
انا يابتي بوصيك وصية مجرب .. كل ماتشتغلي بالناس
وتحاولي تضريهم ربنا بضرك وانتي في عز نومك ..
خلي الخلق لي خالقها .. وكان لقيتي اختك محتاجة ليك
ساعديها بدل تدخليها في مشكلة .. واستريها بدل
تفضحيها ربنا يسترك في الدنيا والاخرة .. انتي بت
وبتحتاجي للسترة ..
طبعا " بتتكلم معاها ومادة ليها القروش كدا ..
بعد خلصت كلامها اريج شالت منها القروش وقالت ليها
شكرا للوصية .. احتفظي بباقي كلامك ..
وقامت من جمبها ..
مرت الايام تقيلة والاوضاع طبيعية ..
والامتحانات قربت يمكن ما اكتر من شهر ونص
وطيلة الفترة دي مافي جديد ..
يوم من الايام في فترة فسحة الفطور .. في عربية
جديدة وقفت برة .. وكان في بنات قدام باب المدرسة
بشترو ..
العربية سايقاها مرة سمحة سماحة .. عجيبة .. وناقشة
حنة انما ايه .
عمرها زي 28 .. 29 سنة .. نزلت القزاز وقالت
للبنات المدير فارس موجود؟
البنات زي تلات اربعة كدا جو اتلمو ليها جمب الشباك
بتاع العربية حقتها ..
قالو ليها ايوة موجود .. في انزلي خشي ليهو ..
قالت ليهو لالا ما بنزل انا لبسي ماكويس .. ودي
مدرسة ..
قالو ليها نقول ليهو منو ؟؟
قبل ماتقول اسمها فارس وعبد الرحمن جو من هناك من
نهاية الشارع .. كانوا مشو فطرو مع واحد بتاع فولاية
خطيرة كدا اسمو موسي الدايخ ..
المهم المراة لمن شافت فارس جاي من هناك
بالمراية .. قالت ليهم خلاص هوداك فارس جا ..
فارس جاء ماشي عليها .. ولمن شافها .. لامن داير يقع
على خشمو .. وجاء سلم عليه بي كل حفاوة وشوق ..
وفرحة شديدة خلاص ..
وركب معاها ودورت مشت ..
وسارة طبعا " كانت جوة المدرسة . ماشافت المشهد
ده .. والبنات خشن جوة بتكلمن بي سماحة المرة الركب
معاها اساتذ فارس .. وطريقة سلامو ليها ..
ياربي اختو؟ ياربي زميلتو .. يا ربي دي منو .. ولامن
خشن الفصل
وهن بتكلمن ..

الى اللقاء

[لامارا]

الحلقة 11

البنات ديل بعد دخلن الفصل . اتكلمن قدام سارة قالن
والله الليلة فارس عملها ظاهره .. عاد لاخجل و لا
استحى .. على ا لاقل كان يراعي انو نحن طالباتو .. شنو
الخفة والرشاقة دي ..
واحدى قالت ليهن امكن اختو يابنات ..
قالن ليها كان اختو كانت خشت ليهو جوة .. واختو هو
ماعارفها جاية؟ وجاية من وين ؟ لا لا ما اختو ..
مستحيل ..
سارة قاعدة تسرق في الكلام بي طرف اضانها ..
ومواصلة بتكتب في ملخص .. الكتابة كلها طالعة غلط ..
لانها با لا برة كلو كلو ..
في واحدة من البنات ما طلعت برة .. كانت في
الفصل .. سالتهن قالت ليهن في شنو بالضبط كدا
يابنات ؟
سارة بقت تسمع بي كل اضنيها .. ووقفت الكتابة ..
وختت مؤخرة القلم في خشمها وبقت تلوك في الغطاية
بتاعة القلم من طرفها وتسمع بانتباهـ .. البت سألت
السؤال الماقدرت سارة تسأله .
المهم البنات حكو الحكاية كلها الحصلت برة ..
وفعلا سارة اتضايقت شديد .. وبتحاول تصبر في نفسها
بي ثقتها في فارس وسلوكياتو ..
فارس من طلع مع المراة . لغاية نهاية اليوم ماجا ..
غايتو اتصل تلفون على عبدالرحمن ..
ووصاهو ببعض الترتيبات وا لاجراءات الروتينية ..
طبعا قبيل عبدالرحمن شاف المراة وسلم عليها ..
مع انو فارس حتى ماعرّفو عليها ركب معاها واستاذن
منو ومشى ..
يعني لغاية ا لان عبدالرحمن ماعارف المراة دي منو .
با لاختصار اليوم انتهى وفارس ماجا .. وسارة قبل
ماتمشي البيت
مشت البوفي وجات الفصل تلات مرات عشان تسرق نظرة
من الشباك تشوف فارس جا و لاما جا .. اخيرا اكتشفت
انو كرسيهو فاضي معناها ماجا ..
ومشت البيت . وخلاص .
بكرة فارس جاء المدرسة وكان مشغول شديد .. كان في
اجتماع و لاموضوع كدا في الوزارة .
فارس لملم اوراق وفوائل كدا .. بلملم فيهن من الصباح
وبرتب ..
وبكتب في نقاط كدا .. في شكل عناصر .. وكان مبسوط
وبنوني كدا براحة .. بي لحن زي غنية صابحني دايما "
مبتسم . حقة الكاشف .
وعبدالرحمن يعاين ليهو ساي . عايز يٍألو ومتردد ..
قام فارس استاذن وطلع . ناس سارة كانو في الحصة
ا لاولى يادوب ،، وكت هو طلع .. ومن طرف الفصل
البيغادي سارة شافت فارس، لمحة كدا ، شايل شنطة
سودا وطالع ..
وبعد داك ماقدرت تركز في الحصة نهائي ..
خصوصا " الليلة الحصة التانية . المفروض تكون في حصة
رياضيات من استاذ فارس .. وهو طالع .. ياربي بحصل
الحصة التانية و لا لا ؟
بعد الحصة انتهت .. جاءأستاذ تاني ،، وقال ليهم
المفروض الحصة دي تكون حصة رياضيات .. واستاذ
فارس عندو موضوع ضروري وطلع .. سارة بدون ماتحس
قالت ليهو مالو؟
لقت الكلمة طلعت منها بدون ماتحس .. بس ربنا انقذها
انو في كم بت قالو نفس الكلمة .. مالو يا استاذ ان
شاء الله ماعندو عوجة ..
ا لاستاذ قال ليهم لا لا كويس بس مشى الوزارة .. قالن
الحمد لله ..
غايتو قوه عين .. وخجل بالدين ..
يازول غايتوعبد الرحمن حارقو الشمار بتاع المراة
ا لامبارح ..
ومنتظر فارس بي فارق الصبر عشان يسألو ..
وفعلا. لمن جا فارس زي الساعة واحدة كدا ..
عبدالرحمن قال ليهو عندك حصة مع ناس تالتة الساعة
2 ..
قال ليهو ايوة متذكرها ..
عبدالرحمن قال ليهو .. انت ما حكيت ليه المرأة الركبت
معاها امس دي منو اليوم كلو ماخدو معاها ؟
قال ليهو ياخي معقول ماعرفتها؟ .. دي منال حبيبتي
روحي .. واهم انسان في الدنيا سيطر على دواخلي ..
عبدالرحمن قال ليهو معقول؟ تتكلم عنها كدا .. ودي
الباعتك بالقروش لي زول غني ؟
قال ليهو اصبر اصبر انا بحكي ليك ..
قال ليهو بس يا فارس ما تنسى ا لانسانة ست الدفتر
البتحبك لدرجة الجنون ؟ وراعي لي مشاعرها وهي
قاعدة في المدرسة ..
قال ليهو منو دي اوعا تكون سارة ؟
عبدالرحمن قال .: نعم سارة ..
قال ليهو .. دي كمان قصتها انت ماعارفها .. بحكي ليك
بعد الحصة عشان احكي وانا متأكد .. بس بعدين انت
ماتمشي انتظرني ..
وطلع مشى على الصلاة ..
عبدالرحمن بقى يقول احكي ليهو بالعملتو انا .. و لا
لا..
احكي لا مابحكي ..
المهم المدير مشى للحصة وكمل الحصة وجا ..
عبد الرحمن قال ليهو يافارس انا راجيك فوق جمر ..
ارح احكي لي سارة ما لا؟
قال ليهو عارف يا عبدالرحمن انا اصلا حبيت سارة
لانها .. انسانة مهذبة .. وسلوكياتها ممتازة ..
لكن هسي في الفترة ا لاخيرة دي بقت تعمل حركات
غريبة .. يعني بتعاين لي وبتتبسم في الفصل ..
لمن انا اتعقدت . زمان كانت اكتر انسانة جادة
ومؤدبة . وبتحترمني وهسي بتعاين لي بعيون زي التقول
انا خلاص متفق معاها على زواج .. وماعارف فهمها
شنو؟
غايتو بطني طمت منها .. اصلا انا من البداية قنعان ..
وحركاتها دي خلاص قدر الفي انتهى ..
عبدالرحمن قال ليهو انت قبل كدا قلت لي انا بحبها
شديد .. ومرة قلت لي حبها ينخر جواي زي الموج في
القيفة الحجرية ..
قال ليهو صاح ياعبدو بس انا من اول يوم قلت ليك ..
احرق الدفتر . وما تكلمها اني قريتو .. وقلت ليك ده
حب محكوم عليهو با لاعدام .. ونحن لازم نقتلو قبل
مايستفحل متذكر الكلام ده و لا أذكرك . ؟؟
فعلا انا اتمنيتها لكن لمن ظهرت حركاتها دي خلاص . ..
عبدالرحمن جواهو .. قال معناها لازم اكلمو واعترف
ليهو هسي ..
بس فارس مواصل في كلامو .. لانو سارة بتكون
ابتسمت معاهو بأعتبار انو عارف مشاعرها ..
قال ليهو انت عارف ياعبدو . منال جات لشنو؟
قال ليهو احكي ..
قال ليهو منال قالت عندها مشكلة ومافي زول تشكي
ليهو وتحكي ليهو غيري انا ..
تتخيل يا عبدالرحمن منال قالت لي ‏( طيلة الفترة ا لانا
متزوجة فيها الراجل ده مانسيتك يافارس ..
يافارس الراجل ده ايوة غني .. وانا بقيت غاتسة في العز
والقروش لكن فاقدة الحنان وا لالفة .. والحب .. الزول
بعاملني معاملة قاسية .. وبضربني .. وعندو ع لاقات
وسلوكيات ماياها .. انا ما مرتاحة نهائي يافارس .. قول
لي اعمل شنو؟
انا ندمت يافارس على اني فرطت فيك .. انا ندمت على
قراري السئ .
انا جيتك يا فارس وواقعة في عرضك تسامحني ..
انا طبعا ياعبدالرحمن انا ماصدقت انو حبي الاول يرجع
لي . بالطريقة دي .. وفرحت فرح .. قلت ليها اطلبي
منو الطلاق طوالي .. وانا بعد العدة طوالي بعقد
عليك ..
وهسي خلاص انا دربي مرق ..
عبدالرحمن قال ليهو معقول يافارس؟ تبيع ا لانسانة
الحبتك بي كل قواها؟ .. وترجع انسانة باعتك بي
القروش؟ ..
يعني شطة بتاعتك دي . لو لقت الراجل بتاعها معاملتو
كويسة .. ما كانت رجعت ليك .. يعني انت ‏(بدل فاقد ‏)
يافارس ..
فارس قال ليهو .. انا مابهمني شي .. بدل فاقد
و لاغيرو .. المهم حبي رجع لي ..
بعدين سارة البتقولها دي . انا ماوعدتها بي حاجة .
ومافي بيني وبينها ا لا انها طالبتي وانا استاذها ..
زوله كتبت خواطر في دفترها . وشخصيتها الخيالية كانت
مدير المدرسة .. وحتى ماكانت عايزاني حتى اشوف
الدفتر .. صح و لا أنا غلطان ؟؟
اها دي حبي ا لاول من زمن الطفولة ..
وهسع ربنا اكرمني ورجعت لي افوتو برضو؟ .. بالجد انا
سعيد جدا
المفروض تفرح لي .. بدل تتكلم لي عن سارة ودفترها
الخيالي ..
وظروفها الما معروفها وحبها الغير منطقي ..
قال ليهو يافارس بس في حاجة انا عايز اعترف ليك
بيها ..
قال ليهو اللهي شنو؟
قال ليهو انا كتبت ورقة بي اسمك .. ووعدت سارة انك
حتكون ليها .. المهم حكا ليهو .. حتى ا لاتصال .. وقال
ليو ماتخذلني ..
فارس وقف علي حيلو وقال ليهو .. معقول ؟؟؟
معقوووول؟؟
تكتب حاجة عني بدون ماتقول لي ؟ وتكذب بلساني .
وتغش . وتلف وتدور .. انا مستحيل اقبل حاجة زي
دي .. كمان تستقبل مكالمات من امها .. على اساس
انك فارس ؟؟
بالمناسبة انت بوظت اي حاجة .. ودخلت نفسك في
مشكلة كبيرة ..
شيل شيلتك .. واستحمل نتايج عمايلك وكذبك ..
ياخسارة يا وكيل المدرسة ..
بالمناسبة . انا تاني مافاضي لي سارة و لا لي امها .. انا
اصلا امنيتي في الدنيا . منال .. وربنا رجعها لي
انت تتصرف بطريقتك .. انا لو سألوني عن الورقة بقول
انا ماكتبتها وبوريهم الكتبها منو ..

الى اللقاء

[لامارا]

الحلقة 12

طبعا" عبدالرحمن اتلخبط وراسو جاط .. وبقى يقول ليهو يافارس الله يخليك .. اصبر لي شوية .. وامشي لي منال .. واتراجع من كلامك .. دي مراة مابتنفع .. دي مرة بتبيعك تاني لو لقت زول اغنى منك وبتطلقك ..
.. فارس خلاهو في كلامو وطلع ..طبعا ده كان اخر اليوم .. عبد الرحمن بقى قاعد محتار في المدرسة ..امكن قريب الساعة ونص وماعارف يسوي شنو؟
عبدالرحمن بعد حيرة وخوف وتوتر غريب .. قرر يسيب المدرسة ويقدم استقالتو ..بعد ما يواجه سارة بالحقيقة الصعبة ..
ولمن يتخيل شكل سارة لمن يحطم ليها امالها يقرب يبكي ..
المهم مشلى البيت بي نفسيات زي الواطه .. لامن شلاليفو ناشفات
والليل كلو يحسب في نجوم السماء بالسهر والقلق والتوتر ..
باكر الصباح جاء عبدالرحمن لابس لبس مختلف .. جلابية وطاقية .. وقعد فوق كرسي زي الضيف .. وما قعد في طربيزتو ..
فارس قال ليهو في شنو يا استاذ؟ ومالك لابس كدا ؟ وليه ماقاعد في طربيزتك ؟
.. قال ليهو انا داير اقدم استقالتي من التدريس يافارس ..
وعايز اكتب استقالتي وتمضي لي عليها ..اوديها الوزارة هسي .. بعد ما أكلم سارة بالحقيقة ..
قال ليهو اتصرف بي راحتك ..تستحق كل البحصل ليك كلو ..
لانك بتتصرف بهواجة وعشوائية ,,,
عبدالرحمن تاني ما أتكلم معاهو .. طوالي طلع مشى رسل لي سارة .. وسارة جات .. عايز يتكلم معاها .. وفارس قاعد هناك في كرسيهو ..بعاين ساي ..
اول عبدالرحمن مابدأ يتكلم مع سارة ..
فارس قاطعو قال ليهو ما تتكلم معاها يااستاذ عبدالرحمن ..
وسارة مندهشه ماعارفه عايزين يقولو شنو ..
فارس قال ليها امشي الفصل ياسارة ..
وتاني ماتشكي فيني فاهمة؟ سارة مدنقرة خجلانة وما قالت اي كلمة ..
مشت طوالي سريع كشت كشت بخطواتها المميزة المعروفة ..
عبد الرحمن قال ليهو في شنو يافارس؟ .. ليه منعتني اصارحها بالحقيقة ...
فارس فقعها ضحكة طويييلة ..
وبس مستمر يضحك .. قريب التلات دقايق يقرقر .. عبدالرحمن مندهش ومنطط عيونو .. قال ليهو في شنو يا فااااارس ؟
فارس قال ليهو .. خوفتك يا اب قلبا" ماكن ؟.. عشان تاني اعرف .. وماتلعب مع المدير ..
الموضوع ماشي زي ما انت رسمت ليهو يا صديقي العزيز ..
ومافي اي مشكلة .. ماتخاف ..
طيب ح احكي ليك .. بعد ما جاك ارتفاع في الضغط ..
طبعا ياعبد الرحمن ..سارة ما كانت بتتسم معاي في الفصل ولاشي .. وسارة ياها سارة نفس الادب والتهذيب .. وما اتغيرت حتى لمن عرفت انو انا عايزها على حسب ورقتك المزعومة .. ماغيرت طريقتها معاي .. لانها مستحية اساسا" من حبها .. ومستحية مني
..
انا كذبت عليك وبس ...
.
بس فعلا منال شطة جات وياها الزولة الجات بالعربيه ..
لكن عايزاني في موضوع تاني خالص غير الموضوع القلتو ليك ..
هي مستقرة في حياتها وسعيدة وماعندها اي مشكلة ..
بس انا ركبت معاها عشان ماتنزل للمدرسة بلبسها الحقير اللابساهو ..
ومشيت اتكلمت معاها في لبسها كلام زي الرصاص ..
كان قبل كدا وصتني على ولد اختها ..عايزين ليهو دروس خصوصية في الرياضيات .. ده الموضوع الجاية ليهو اصلا.. حنبدا معاهو الاسبوع الجاي ..

ولي علمك ياعبدالرحمن . انا منال لو بقت قبلة تاني ما بقبل عليها ..
لو اطلقت لو قعدت ..
حتى لو ربنا ماقسم لي سارة .. لانها منال ماقدّرت حبي .. وجرحتني جرح مايلتئم بسهوله .. وانا كرهت الحريم كلهن بي سببها .. ومافي زول فتح قلبي للحياة مرة تانية الاسارة .. الله يخليها ويحفظها ..
ومنال شطة بالنسبة لي اخت فقط لاغير .. واصلا ماغيرت تعاملي مع منال ومع اهلها واخوها مازال صديقي .. ومتواصل معاهم كلهم كانو مافي شي ..
بس كمشاعر عاطفية بيني وبين منال سالب الف ..
اها الحصل ياعبدالرحمن كالاتي ..
لمن البنات شافوني ركبت مع منال . حكو قدام سارة ..
سارة اتضايقت ومشت البيت بتبكي .. وامها لاحظت ليها وسألتها وسارة ابت تتكلم بالحاصل .. ودست على امها الموضوع المضايقها ..
امها اضطرت ورتها انها كشفتها .. وقرت الورقة والدفتر .. واتصارحو الاتنين ..
وامها قالت ليها انا معاك ياسارة .. وما تتخلي عن حبك .. ولازم تسأليهو .. الركب معاها دي منو؟ وعمل كدا ليه؟ عشان ماتشكي فيهو ساي ..
سارة قالت لامها انا بحترمو.. وبخجل منو يا ماما .. مابقدر اسأله ..
امها قالت ليهو انابسأله ليك .. اديني رقم تلفونو الجوال ..
عبدالرحمن قال ليهو وانت عرفت ده من وين؟
قال ليهو اصبر اكمل ليك ..
امها طوالي اتصلت علي في جوالي ..
شالتو من سارة .. وسارة ماعارفها جابت رقم جوالي من وين ؟
انا لمن المراة قالت لي يا فارس كيف حالك انا ام سارة ..حيلي كلو مات .. قالت لي يا استاذ فارس.. الليلة سارة جات مضايقة شديد من المدرسة.. بي سببك وسبب المراة الركبت معاها ..
وانا ياعبدالرحمن ساكت سااي زي المديني كف في البرد .
ووالمراة شغالة تتكلم ارررررر قالت .وانا يا استاذ قارس عشان اواسي بتي يااستاذ فارس.. كشفت ليها اني قريت دفترها .. وقريت الورقة الرسلتها ليها انت ..
طبعا ياعبدو انا هنا اتخلعت ..
وقلت ليها ياتو ورقة يا ام سارة .؟
قالت لي الورقة الرسلتها انت اول واحدة .. انت تاني رسلت غيرها؟

انا هنا راسي ضرب ..
وقلت ليها يا ام سارة انا بجي هسي قريب ليكم ..
ناس اختي .. ساكنين تاني شارع منكم ..
ممكن تجيني وتجيبي لي الدفتر والورقة دي .. قالت لي حاضر ..
عارف ياعبدالرحمن .. المراة وصلت وجابت لي الدفتر .. الاصلا انا قاريهو قبل كدا .. ومعاهو الورقة .. لمن قريت الورقة .. طبعا عرفت خطك .. والخطة الراسمها كلها .. حتى انك قلدت خطي واسلوبي .. وعرفت انك انت بتخدم فيني بدون ما اعرف ..
انا عملت فيها الورقة حقتي وبقيت بعمل في حركات زي المابقرا فيها .
واصلا ما حسستها انو الورقة دي انا ما كاتبها ..
انا اخوك انت كيف اخذلك يا عبدو؟ ..
مع انك غلطان.. لكن رجالتك عجبتني .. وانك بتحب لي الخير قدر ده .. والله انت اعز من الاخو الشقيق ..
اها طبعا" من خلال الورقة وكلام ام سارة .. انا عرفت كل الحاصل والتطورات الحصلت بي وراي.. وانا ماجايب ليها خبر ..
المهم يازول اني طمنتها .. قلت ليها قولي لي سارة انا ثابت على موقفي زي ماوعدتك ..وما تشيلي اي هم ..والمراة الركبت معاها .. دي واحدة عايزة تتفق معاي على دروس لي طالب .
وقولي لي سارة خلي بالك في قرايتك واحرقي الحاجات دي .. المشاعر في القلوب مافي الورق ..
وهسي الامور تمام التمام ياعبدالرحمن اطمن .. وانت ماتشيل هم .. بلا استقالة بلا كلام فارغ .. انا مابقدر افارقك اساسا" ..
ولو في استقالة بنقدمها الاتنين مع بعض ..
عبدالرحمن قاليهو والله طلعت زول مفتري .. وماعندك دم ..
ياخي انا البارح ماقدرت انوم ..
وفارس بس يضحك ..
عبدالرحمن قال ليهو الحمد لله الجات كدا .. وانت ماوقعت .. ونكرت الورقة ..
فارس قال ليهو .. انت عارف لو انا نكرت الورقة وعرفو كاتبها انت .. سارة ح يجيها احباط .. تقول الزمن كلو انا فرحانة بي ورقة الوكيل هههه ..
قال ليهو والله يافارس.. انا هدفي في الدنيا دي اسعدك باي طريقة ..
وانا شفت سارة وصفاتها وحبها الصادق النزيه .. ومالقيت زول بستحقها غيرك
وانا اسف لو كانت طريقتي غلط بس انا اضطريت لانك انت من البداية ابت تديني اي بوادر موافقة ..
وقفلت الباب في وشي .. وانا لو ماعملت كدا كنا خسرنا اي حاجة صاح؟ قاليهو صح والله ..
الامور هدأت كدا على المنوال ده ومرت الايام
وسارة مندمجة في مذاكرتها ومواظبة على دروسها ..
واريج وصاحباتها التلاتة وهي رابعتهم . ياكلن في اللبان ويمسحن في وشوشن بالبدرة
وبشيلن حواجبهن بالموس والمرايه في الفصل ..
وقمة الانحطاط الاخلاقي .. وعدم التربية .. ومافي مذاكرة ورسوب في اغلب المواد ..
والشكاوي منهن كترت .. ومشرفة سنة تالتة زهجت منهم .. ورفعت الموضوع للمدير .. والمدير عرف انو قائدة الفوضى هي اريج صاحبة الغمزة .. الكان بكت واعتذرت وطلبت العفو منو .. ومشت زورت المعلومة وقالت هو قال لي كيت كيت .. وعفا كان عنها برضو ..
اها قام أستاذ فارس نادى اريج على المكتب ..
قال ليها ازيك يا اريج قالت ليهو اهلا يا استاذ ..
وواقفة على على رجل واحدة ومربعة يديها وتانية رقبتها كدا وبتهتز هزة انفعالية ..
قال ليها صلحي وقفتك يابت وثبتي جسمك كويس ..
قالت ليهو اهو انا واقفة كويس .. قال ليها شنو الفوضى العاملنها في الفصل دي يا اريج ..
انا قبل كدا اتكلمت معاك انتي عايزاني ارسل لي ولي امرك يعني؟
قالت ليهو الفوضى يا استاذ طالعة من مكتبك وانت ماجايب خبر ..
قال ليها من مكتبي انا؟
قالت ليهو نعم اسأل استاذ عبدالرحمن .. وشكل العلاقة البينو وبين سارة حسن
والخطابات الغرامية البيناتهم .. ولو ما مصدقني فتش شنطتها ..وفتشها قدامنا ..
ونادي خالتي مسرة توريك الصورة الكاملة .. لانو نحن ذاتو عايزين نعرف مدرستنا دي ماشة على وين ؟

الى اللقاء ..

[لامارا]

الحلقة 13

طبعا اريج بتتكلم في مكتب المدير . وعبدالرحمن قاعد بسمع فيها.. زعلان لامن لونو اتغير ..من قلة الادب البتتكلم بيها اريج مع المدير..
فارس قال ليها ده كلام شنو البتقولي فيهو ده يابت .؟
قالت ليهو لو سمحت اتكلم معاي كويس . الكلام ده انا ماقطعتو من راسي .. حقيقة استاذ عبدالرجمن وساره دايخين في قصة حب . عبدالرحمن خلاص ..
دمو فار خلااص ...ووقف علي حيلو ..وفقد اعصابو ..ورشاها كف لامن شافت براق فوق عينها الشمال ..
وبحركة غير اراديه ..ارتمت في حضن عبد الرحمن.. وبقت تبكي بي هستريا .. عبدالرحمن مسكها من اكتافها ..وابعدها منو كدا ..وقعدها في الكرسي ..
وبتكلم معاها ..بقول ليها احسن تتعلمي الادب والتربية ..وتتكلمي زي بنات الناس . لو اهلك ماربوك انابربيك .. وهي تبكي ومهسترة ..وكل مرة تمسك عبدالرحمن من يدو . وهو ينتل يدو منها ..
فارس انزعج من تصرف عبدالرحمن وانفعالو .. ومارضى كونو يضربا ..
قال ليها اهدي يا اريج اهدي معليش ..
استاذ عبدالرحمن فقد اعصابو .. انا بعتذر نيابة عنو ..
قالت ليهو ماتعتذر .. بس خليهو يثبت لي براءته .. انا زاتي مابرضى فيهو حاجة ..
هي مدنقرة خاتة يديها في راسها وبتبكي ..عبدالرحمن طلع ورقة وقعد يكتب وهو متوتر ..جدا لمن برجف .. وطبق الورقة الكتبها .. وختاها تحت فايل كان قدامو ..
قال نادو لي مسرة ..مسرة جات سريع وخايفة.. وقفت كدا زي الضارباها مطرة ..
والاساتذة التلاتة في المكتب التاني جو ..
عبدالرحمن قال لي مسرة ..انتي قلتي لي اريج شنو يا مسرة ؟
قالت ليهو والله جاتني يوم خايفة.. وقالت لي سارة اشكتني لي استاذ عبدالرحمن ..لاني انا اساتها الصباح .شفتيها؟
قلت ليها لالا ما اشتكتك ..دخلت وعبدالرحمن اداها ورقة.. وهي كانت بتقرا في الورقة وتضحك ..بس انا ماعارفة الورقة فيها شنو؟؟
ده كل القلتو ليها يا استاذ انا بتأسف لو غلطت في حاجة ..
قال ليها مافي مشكلة يامسرة..
ماتتأسفي انتي زي امنا ربنا يكرمك ويديك العافية ..
بس اعملي حسابك من النوعية دي من البنات لي قدام ..
الاساتذة قالو الحاصل شنو ؟ عبدالرحمن حكا ليهم تهمة اريج ..
قالو ليها ننادي سارة حسن يا اريج ؟ .. أريج قالت ايوة نادوها وفتشو شنطتها ..
طوالي عبدالرحمن سحب الورقة من تحت الفايل
وطلع وقف في البرندة ..
لمن سارة جات داخلة بي البرندة ..خاشة على مكتب المدير .. عبدالرحمن قاطعها في الشارع.. زي الطالع يتف او يعمل حاجة ..وبي حركة سريعة وخفية ..رمى الورقة الكتبها في جيب شنطة سارة ..
وسارة زاتها ماحست بي حركتو .. وبعد سارة دخلت جا داخل وراها سريع ...
فارس طبعا كان خايف انو سارة تكون جابت معاها الورقة والدفتر وتتكشف اي حاجة ..
قام فارس سأل سارة.. قال ليها انتي ياســـارة جبتي معاك الmgl ؟
قالت ليهو لالا يا استاذ خليتو في البيت ..
واحد من الاساتذة قال ليهو.. ام جي ال ده شنو يا استاذ فارس؟ ..
قال ليهو ده دفتر خاص سارة كاتبة فيهو قصة حياتها ..
عبدالرحمن قال ليها ختي شنطتك ياسارة .. قوم يا استاذ بكري فتش الشنطة دي.. لو لقيت فيها ورقة مشبوهة مني انا طلعها لينا ..
استاذ بكري فضى الكتب والدفاتر بتاعات سارة فوق الطربيزة..
واريج بتعاين في التفتيش ...ودموعا فوق عيونها ..وجضمها محمر من كف عبدالرحمن ..
فجأة ظهرت ورقة مطبقة .. اريج قالت ليهو اهدي الورقة يا استاذ بكري ..
سارة لمن شافت الورقة اتهجمت ..
قالت والله الورقة دي ماحقتي يا استاذ.. ماعارفاها جات شنطتي كيف ..
عبدالرحمن قال ليهو افتح الورقة ورينا فيها شنو يا استاذ.. ماتشتغل بيها .. كيف يعني ماحقتك ياسارة ؟؟
ارح اقرا ..
بكري مسك الورقة وبقى يقرا ..
بسم الله الرحمن الرحيم ..
الى ولي امر الطالبة سارة حسن .. لك التحية على حسن التربية والسلوك .. الذي زرعتموهو في بنتكم ..
فهي طالبة مثالية ونموذجية في ادبها . واحترامها لنفسها واساتذتها ..
ونظافتها . احترام مواعيدها ..
وجديتها في دروسها ومذاكرتها ..
ومن أجل ذلك نحيطك علما"بان المدرسة قد وضعت عنها رسوم الامتحانات .. وتكفلت ادارة المدرسة برسومها كاملة ..
ولكم التحية والتقدير ..
امضاء عبدالرحمن محمد احمد ..
ــــــ

اريج قالت خلاص انا اسفة يا استاذ عبدالرحمن اتهمتك .. عليك الله عاقبني باي عقوبة ..انا يادوب هدات وبالي ارتاح ..
الاساتذة قعدو يعاينو لي بعض ..؟
بكري عاين لي عابدين وفارس وقال ليهم ...انتو فاهمين حاجة؟
انا والله قربت افهم ..لكن لسه مانفاهم التدعك ..
الاساتذة طلعو كلهم ..وبقو يتكلمو مع بعض .. بشير قال لي بكري انت فهمت شنو؟ يا وهمات .. دايما تتخلع فينا كدا ..
قال ليهو البت اريج دي بتموت في عبدالرحمن ..
والله انا اكون مافاهم اي حاجة لو البت دي مابتحب عبدالرحمن ..
واريج وسارة مشن الفصل ..
المهم كالعادة عبدالرحمن اتصدر الموضوع .. وعمل كل المجازفات والتصرفات عشان يبرء ساحة فارس ..
وعشان يغسل دماغ اريج ..من اي تهمة في حق سارة او فارس .. ولو كانت زرعت اي وساسوس واتهامات في عقول الطالبات.. تمشي هسي توصل الصورة الاخيرة دي ..
وبرضو نجح ..
بعد المكتب فضى ..وبقو الاتنين براهم فارس وعبدالرحمن.. فارس قاليو ..ده شنو ياعبدالرحمن؟
والله خليتني انا زاتي مافاهم حاجة كدي فهمني ..
الورقة بتاعة اعفاء الرسوم دي رسلتها لي سارة متين ؟ ..
قال ليهو اتصرفت وختيتها وهي ماعارفاها ..

يافارس يا اخوي .. اكعب حاجة انو نكون اساتذة بلداء واغبياء . والبنات يمكرن بينا ونحن نتعامل بطيبة النية ..
في شلليات بنات يشتكن من قصور في التربية .. نحن لازم نتعامل معاهن بنفس منطق الذكاء والدهاء ..
بعدين نحن لازم نعمل اي شي في حدود المبارح ..عشان صورة الاستاذ تكون محفوظة في النفوس نقية .. طاهرة .. خالية من اي سمعة لاتليق..
نحن يا فارس بشر .. ولينا الحق نحب ونتحب .. لكن المجتمع المتخلف .. لما يعرف انو استاذ بحب طالبة من طالباتو .. يختو الف علامة استفهام .. مع انو الموضوع اكتر من طبيعي ..
فارس قال ليهو عشان كدا انا كنت بتهرب من حب سارة.. مع اني جواي اكن ليها مشاعر اكبر من الخيال..
بس ده كلو صيانة لسمعة المدرسة ..وسمعة الاستاذ بصفة عامة ..

اها طبعا" سارة عرفت انو اريج متتبعة اخبارها.. وكانت عايزة تعمل ليها فضيحة بي الورقة بين الاساتذة .. وبرضو سارة قطعت الموضوع في مصارينها وبقت ماشة في حالها ..
و برضو مسرة زعلانة زعل شديد من البت الاسمها اريج .. بعد يومين تلاتة مسرة لاقت سارة قالت ليها .. اسمعي يابتي والله انا مابعرف عنك الا كل خير .. والكلام الطلع مني ده طلع بي غباي .. البت غشتني .. دايراك تسامحيني يابتي.. الموت من الحياة مو معروف ..
سارة قالت ليها ان شاء الله عمرك طويل يا خالتي مسرة ..
ولايهمك .. كلنا بنغلط .. وانتي ماكان عندك قصد كعب ..
طوالي مسرة حكت لي سارة قصة التلاتين جنية ..وطلب اريج انو مسرة تسرق ليها الشنطة وقت الطابور..
سارة قالت ليها .. شكرا ليك انك ماحكيتي حاجة زي دي للاساتذة ..عشان ما يزعلو و يفقدو الثقة في الطالبات ..
مسرة قالت ليها لالالا ياختي.. انا ح احكيهو الكلام ده لعبدالرحمن ..لمن القاهو براهو ..
هو اصلو صاحبي ومابقصر معاي ربنا يبارك في ايامو ..
سارة قالت ليها حلفتك بي الله يا خالتي مسرة.. لو بتعزيني الكلام ده تاني ماتفتحي سيرتو .. خلاص الموضوع انتهى ..
قالت ليها عشان خاطرك انتي يابتي اها هادي سكتة ..
الايام مرت سريعة.. والامتحانات كبست فاضل ليها ايام بس .وسارة شغالة كسر بالطريقة الصاح .. واريج ادعت انها عيانة وجابت امها لمكتب المدير عشان تجمد السنة ..بعد دفعت رسوم الامتحانات ورقم جلوسها استلمتو ..

الى اللقاء ..

[لامارا]

الحلقة 14

الليلة الحلقة اريجية بحتة .. هه
المدير سأل اريج قال ليها انتي يا اريج عايزة تجمدي
السنة عشان ماقريتي ولا عشان عيانة ؟
قالت ليهو الاتنين يا استاذ .. قال ليها لالا .. ما
تكذبي .. قولي الحقيقة حتى لو بقت صعبة ..
والكذب عمرو ما بفتح مخارج آمنة .. ممكن تفتكري انو
بفتح ليك مخارج لكن مخارج مضرة ..
ولي علمك الكذب ده بشوه شخصيتك امام العقلاء .. لانو
في ناس كتيرين بسمعو كلام الكذاب .. وهم عارفنو
كذاب .. لكن بستحو يقولو ليهو كذاب .. لانهم مهذبين ..
بس جواهم بيحتقروه ..
بترضي لنفسك كدا ؟؟
قالت ليهو ابدأ ..
قال ليها خلاص .. خليك معاي صادقة عايزة تجمدي السنة
ليه؟
قالت ليهو انا انتبهت لنفسي اخيرا .. ولقيت الوقت فات
وانا ما مذاكرة كويس ..
قال ليها للاسف .. فوتي الفرصة .. خلاص اسمك نزل
وخانتك اتحجرت بعد كدا تاني مافي تجميد ..
انتي امتحني .. لو نجحتي او رسبتي مافرقت .. والسنة
الجاية عندك فرصة الاعادة ..
قالت ليهو .بس انا عندي طلب يا استاذ .. لو ما اتوفقت
ونجحت عايزة اعيد في نفس المدرسة دي ..
المدير قال ليها مافي مشكلة يا اريج ..
كل الكلام ده وعبدالرحمن يسمع مافتح خشمو بي
كلمة .. وشكلو مشغول في اوراق ..
وكل مرة اريج تعاين ليهو بي طرف عينها .. وفارس
ملاحظ .
قامت اريج قالت ليهو انت يا استاذ عبدالرحمن رايك شنو
في الموضوع ده .. ؟
قال ليها راي انا نفس راي المدير ..
قالت ليهو خلاص بمتحن ..
امها مسكينة وشكلها هارشاها .. ساكتة ساي وتعاين
للناس .. كلما يتكلم زول هي تقبل عليهو كلها كدا
وتسمع ..
اها لمن دايرات يطلعن الام بقت تعاين لي عبدالرجمن
معاينة غريبة ..
وفارس مستغرب في الموضوع من اساسو ..
وكيف اريج بتتكلم بي ادب كدا ياربي .. احترام لي
امها ..
بعد طلعو .. فارس قال ياعبدالرحمن انت ملاحظ حاجة ؟
قال ليهو في شنو؟
قال ليهو اريج دي ماطبيعية .. وما من عوايدها تتكلم بي
ادب كدا ..
قال ليهو يافارس البنات ديل مابتفهمن .. احتمال تكون
دي تمثيلية جديدة .. انا حاسي بي تصرفاتها دي من قبل
فترة .. من يوم الاديتها الكف داك بقت عندها تصرفات
غريبة معاي ..
مرة لاقتني انا داخل على المدرسة .. قالت لي استاذ
عبدالرحمن عايزاك في كلمة .. انا بطني طامة منها
وقفت قلت ليها نعم ..
اولادك كويسين ؟ قلت ليها الحمدلله ..
قالت لي بس بسأل منك وصحتك واولادك ..
قلت ليها شكرا لي سؤالك ومشيت .. الحقيقة استغربت
في الموضوع لكن ما اشتغلت بيهو كتير ..
فارس قال ليهو الحركة العملتها يوم الكف دي انا مالية
راسي ..
يعني زول ضربها كف .. كيف ترتمي في احضانو ..
قال ليهو ايوة تصرف كان بغير اراده .. زي كانها
اتصرفت من دون ماتحس ..
قاليهو . فعلا ده الحاصل الكف كان سبب في انو اريج
استفاقت على رجل ..
لاول مرة تشعر بسطوة الرجولة ..
وده من عيوب اطلاق العنان من الاب .. وقت البت تكون
ماحاسة بي رجل في حياتها .. اول رجل يقتحمها
برجولة كاسرة .. بتتعلق بيهو .. وتقع في حبو
مكتوفة ..
اها حصلت قصة قبل ايام من اليوم ده ..
برضو بتدل على الموضوع ده ..
في واحدة اسمها سلمى . متزوجة وساكنة جم ناس
اريج في الحلة .. أريج سمعت انو سلمى اصلا من
الكدرو ام القرى .. نفس الحي الساكن فيهو
عبدالرحمن ..ونفس الشارع .. زي ماحكيت ليكم قبل كدا
انو ساكن في حي طرفي .. اللهو الكدرو ام القرى ..
اها سلمى متزوجة وساكنة جيران ناس اريج .. يوم من
الصباح اريج مشت ليها . معها بت خالتها من نفس
الشاكلة ..
وقالت ليها انا بقرا في مدرسة كدا .. وبدرسنا واحد
اسمو عبدالرحمن محمد احمد .. وهو وكيل المدرسة ..
وهو من الكدرو بتعرفيهو ؟
قالت ليها قريب لينا .. واختو كانت زميلتي في الدراسة
وصاحبتي ..
قالت ليها حلو .. الزول ده انا عايزة اعرف عنو .. وعن
حياتو . لو سمحتي ..
قالت ليها ..
عبدالرحمن عندو ولد واحد عمر 5 سنوات .. زوجته
اتوفت بالسرطان قبل اربعة سنين .. وكان عمر الولد
سنة ..
ومن الوقت داك .. الولد عايش مع حبوبتو ام امو في
امدرمان ..
وعبدالرحمن مافكر يتزوج تاني ..
اختو صاحبتي شديد .. قالو كل مايتكلمو معاهو في
الزواج .. بقول بعد ابتسام تاني العرس حرام ..
ابتسام دي مرتو الماتت ..
اريج قالت ليها والله انا الزول الاستاذ ده متعلقة بيهو
شديد .. كنت معجبة بي شخصيتو .. بس هسي بحبو
عديل .. لكن المشكلة الشعور ده جاني في نهاية
السنة .. لدرجة اني فكرت اجمد السنة عشان
ادي نفسي فرصة اتقرب منو ..
وانا كنت مفتكرة انو متزوج وبي اولاده ..
طيب يا سلمى الزول ده انا لو عايزة اخليهو يلتفت لي
تفكري اعمل شنو ..
قالت ليها .. لازم تجمدي السنة .. وتخليهو يتعلق بيك
هو كمان ..
عبدالرحمن انسان دغري وطيب واراجل بمعني الكلمة ..
واي بت تتمناهو ..
عشان كدا هي حكت لامها وجو للمكتب عشان التجميد ..
قلنا الامتحانات باقي ليها عشرة يوم تقريبا ..
والليلة الخميس .. المراة الاسمها سلمى دي مشت
اهلها في الكدرو وقابلت غادة اخت عبدالرحمن ..
وحكت ليها عن البت السمحة الاسمها اريج .. الساكنة
جمبهم وجات قالت مكسرة في عبدالرحمن .. وعبدالرحمن
تاني مابلقى فرصة زي دي ..
البت دي يا غادة شكلها عاقلة وبت حلال .. نعم صغيرة
بس بت نضاجة .. مكوة كهربا بس .. ‏( يعني فايقة
الجمال ‏) ..
وقعدت سلمى تتكلم مع غادة قريب الساعة عن اريج وعن
قوامها لونها وجسمها وجمال بسمتها .. وفهمها ..
وعن عشقها المجنون لعبدالرحمن .. وانها كانت عايزة
تجمد السنة عشانو ..
وقالت ليها بس يا غادة البت دي خجولة شديد وماقدرت
تصارح عبدالرحمن بالموضوع وانا خايفة البت دي تفك من
عبدالرحمن ..
انتي حاولي بطريقتك افتحي ليهو الموضوع ..
غادة قالت ليها بري يايمة .. يقوم يكشني بي مصيبة الا
اقول لامي ..
قالت ليها غايتو انا كلمتك والله عبدالرحمن مابستاهل الا
اريج دي ..
قالت ليها خلاص الليلة بالليل .. بنتحاوشو انا وامي وانا
بسأله منها ..
واشوف ..
اها بالمساء كدا مشت غادة اخت عبدالرحمن حكت
لامها ..
امها قالت ليها حمدنا يا يمة امكن ربنا داير يفرجها
عليهو ..
اها لمن جا عبدالرحمن بالليل بعد العشاء يتونس مع
امو ..
غادة سألتو قالت ليهو انت ياعبدالرحمن معاكم بت في
سنة تالتة اسمها اريج فلان؟
قال ليها اعوذ بالله من الشيطان الرجيم .. دي بتعرفيها
من وين العفريتة دي ؟؟
قالت ليهو بس عليك الله احكي لي عنها ..
قال ليها اسوء انسانة لاقيتها في حياتي .. كذابة
ومراوغة وقليلة ادب
وما مربية .. وحاقدة وحاسدة وقلبها اسود .. اها تاني
دايرة شنو؟
بس اظنها لاقتك وعجبك شكلها .. دي صورة بس
لاغير ..
ماتنغشي ..
بس انتي بتسألي عنها ليه ؟
قالت ليهو والله رشحوها لي عشانك ..
قال ليها أقول ليك .. الرشحوها ليك ديل .. عايزين
ينتقمو مني وبس ..
سبحان الله .. شوف سوء الاخلاق وعدم التربية حرم
البت من الارتباط بالرجل المثالي .. مع انو مؤهلاتها
الجمالية الشكلية فوق الحد المعقول ..
وبرضوحقوق سارة المظلومة وقفت ليها في طريقها ..
..

الى اللقاء

[لامارا]

الحلقة 15

بالاستفسار الشديد .. عبدالرحمن عرف انو اريج قابلت
سلمي بت الجيران .
وغادة اختو ما لاقتها .. وغادة مصرة تلاقي اريج .. قبل
ما تعكس لي سلمى راي عبدالرحمن في اريج .. بس ما
لاقتها لغاية ماجات الامتحانات ..
طبعا الايام مرت .. واريج قررت تمتحن . تفشل ولاتنجح
مامهم المهم . تعيد وهدفها من الاعادة . بقى بالنسبة
لينا مكشوف ..
مع انو عبدالرحمن وفارس ماعارفين الهدف ده ..
الامتحانات بدت في مارس ..2007 والبنات امتحنن في
مركز تاني .. غير المدرسة بتاعتهم .. اليوم الاول في
الامتحانات .. ده كان درامات عجيبة خلاص ..
قبل البنات يدخلن الامتحان .. كان التوتر ظاهر .. وكل
مرة تسمع واحدة بتقول ليهن اوووب علي عاد كان
صعب .. اها الليلة الورقة الاولى .. كان الساعة تمانية
صباحأ ..
اول ما الجرس بتاع الدخول ضرب .. واحدة قالت
وااااي .. بي طول حسها .. الباقيات جت طقنها
صرخة ..
وناس الشرطة الجايبنهم للرقابة .. وحراسة الامتحانات ..
اتخلعو قايلين قامت حريقة .. وقامو يتجارو زي
المجانين ..
قالو ليهم ده موضوع عادي .. كل سنة بيحصل كدا ..
وفي واحدات مستهبلات .. زي ناس اريج ورفاقتها ..
بصرخن وبضحكن ..
المهم دخلن على الامتحان .. وجوة قاعة الامتحان برضو
البكا .. وقشقيش الدموع .. راقد هبطرش ..
والمنايصة والنقنقة .. والمراقبين ينهرو فيهن ..
ويكررو في العبارات المعروفة ‏(هوي يابنات بطلن
الكلام .. اول زمان وكت بقولو ليكن اقرن وذاكرن ..
ماعارفات اليوم ده بجي .. ‏)
الطالبة سارة حسن ممتحنة علمي ..
ولمن تفتح ورقة الامتحان .. بتقعد تكتب ومكبسة في
ورقتها .. زي التقول في زول بملي فيها ..
ايدا كلو كلو مابتقيف .. جكجكجك .. جكجك جك ..
ولابتفكر .. ولا بتسرح .. ولابتتذكر .. ولابترفع راسها
تعاين للسقف ..
بس شغالة تكب في العلم على الورق ..
ولمن يقولو مضى نصف الزمن .. سارة بتكون خلصت ..
وبتقعد تراجع اجاباتها ..
وعبد الرحمن وفارس .. معسكرين عديل في الفسحة
القدام المركز .. الممتحنات فيهو بنات مدرستهم ..
اول ما البنات طلعن من الامتحان .. قامو الاتنين جارين
جري لاقو البنات .. و لاقو سارة حسن سارة اول
شي ..
وبسألو فيها اشتغلتي كيف؟ ..
غلبوك كم سؤال؟ .. دقيقة ورينا .. وهي تعجبك ..
الحمد لله يا استاذي .. اشتغلت تمام .. مافي اي حاجة
صعبة الحمد لله ربنا يستر في الجاي ..
بعد داك سألو البنات التانيات .. واحدات من البنات ببكن
بس .. يا استاذ ده لو اول امتحان كدا نحن الرماد كال
خشمنا ..
والبنات سألن سارة .. قالت ليهن اشتغلت تمام وحليت
كل الاسئلة ومتأكدو من اجاباتي وراجعتها كتير ..
وهن بقولن ليها بخخختك يا سارة ..
واي سؤال سألوها منو ناس فارس ورتهم الحل .. الكتبتو
وكان صحيح .. واريج بتقيف بعيد مع اتنين من صاحباتها
عشان عارفة انو مافي زول بسألها يقول ليها انتي
اشتغلتي كيف ..
في يوم واحد بس من ايام الامتحانات سارة طلعت
بتبكي .. او اتلخبطت في سؤال من الاسئلة ونست
تجاوب عليهو في امتحان الكيمياء ..
السؤال التاني وكانت درجتو 12 درجة .. السؤال كان
فيهو قسمين أ وب
في القسم ب كان السوأل . كالاتي :
عند اضافة محلول هيدروكسيد الصوديوم . الى محلول
كلوريد الهيدروجين .يحدث تفاعل .
i ماذا يسمى هذا التفاعل ..
ii اكتب معادلة ايونية توضح هذا التفاعل .
ـــــــــ
‏( هامش ‏) راجع امتحان الكيمياء
لعام 2007
سارة كانت جاوبت على الشق الاول من السؤال وهو
تعريف التفاعل لكن نست تكتب المعادلة .. وكلو كلو في
المراجعة ما انتبهت ليها ..
لما طلعت برة وشافت البنات براجعن .. انتبهت للمعادلة
وانقدت بالبكا ..
مع انو كل الامتحان حلتو واجابت على الاسئلة باجابات
نموذجية ..
ولو لاحظنا السؤال شق من شق .. يعني جزئية من
سؤال فرعي ..
لكن سارة كانت منهارة زي التقول جمعت ورقتها
فاضية ..
فارس وعبدالرحمن حاولو يخففو عليها ..
فارس قال ليها معليش ياسارة دي جزئية صغيرة فرعية
انتي حاولي ركزي في الجاي .. وان شاء الله مايحصل
الا الخير ..
قالت ليهو انا يا استاذ البكاني اني عارفة الاجابة ..
والمعادلة دي بالذات راجعتها كم مرة ..
ومرة كتبتها للبنات في الفصل .. ولمن شفتها في
الامتحان فرحت
بس ماعارفة نسيتها كيف .. سبحان الله زي العيوني
عمن منها ..
فارس قال للبنات البراجعن .. امشو سريع البيوت
والعصر تعالو لي في المدرسة نعمل مراجعة الليلة
العصر وبكرة الصباح للامتحان الجاي ..
وان شاء الله حنكون فوق حد التوقع ..
المهم ياجماعة الشي الانا عايز اقولو انو اساتذة
المدرسة دي كانو نموذج لي الاساتذة في بلادي يهتمون
لتفوق الطلبة وتربيتهم اكتر من اولياء الامور بكتير
وكتير ..
الاهتمام والمتابعة الحصلت من فارس وعبدالرحمن قصاد
سارة ..
حسن ابوها وعايدة امها .. ماعملو عشرها ..
وانتهت الامتحانات وسارة حاسة انو فارس وقف معاها
وقفة ماتنساها عمرها كلو ..
كان بتصل تلفون بالليل ويقول لي عايدة اديني سارة ..
ويقول ليها ركزي ياسارة على الحتة الفلانيه وراجعي
القانون الفلاني .. وحلي المعادلة الفلاانية ..
الملاحظ انو فارس ما داخل في جلابية المدير المترفع ..
وقاعد موظف اداري .. لا ثم لا ..
فارس كان بوجه وبدرس وبربي .. وكان صديق .. واخ
واب وكان حنين على الطالبات من يوم دخل المدرسة ما
حصل مد يدو على طالبة ..
لكن عبدو الكدراوي بلطش عاااااادي .. وعندو كف بيوزن
كهربة المخ ..
اخر يوم في الامتحانات سارة كانت مبسوطة شديد ..
وجات وقفت قدام فارس قالت ليهو اقول ليك حاجة يا
استاذ ..
قال ليها قولي ياسارة ..
قالت ليهو ان شاء الله انا ما ح اخيب ظنك .. ان شاء
الله غايتو على حسب شغلي الاشتغلتو متفاءلة شديد يا
استاذ ..
قال ليها خلاص ياسارة استاذ دي تاني بلاش منها ..
كانت زمان كلمة ضرورية لانك طالبتي في المدرسة ..
من الليلة انتي اتحررتي من القيد ده ..
قالت ليهو مستحيل مستحيل .. انت حتفضل استاذي
وقدوتي ونور في عقلي طول ما انا عايشة .
كل لحظة جميلة في حياتي انت ح تكون ليها عنوان
وطعم ..
فارس قعد يعاين ليها باستغراب .. كدا .. هي عان دي
بقت تعرف تتكلم كدي متين .. ؟
قالت ليهو . استاذي عبدالرحمن وينو ؟
مشت ليهو وقالت ليهو انا طول حياتي ما ح انساك يا
استاذي واخوي الكبير وسندي في كل خطوة .. شوف
عيني عبدالرحمن بكى
وقال ليها الله يحفظك انتي يا شرف المدرسة ..
وان شاء الله تكوني لينا فخر وصورتك تتعلق فوق باب
المدرسة من المتفوقات ..
من هناك اريج عاينت لي عبدالرحمن بتكلم مع سارة
وبقشقش في دموعو .. جات ماشة عليهم بي
سرعة .. زعلانة ومنفوخة زي الديك المحرش . ودمها
فاير .. وصارة وشها صرة شينة خلاص ..
الله يستر البت دي ماتعمل مشكلة وتبوظ اي حاجة
والليلة اخر يوم الناس ديل يتلاقو كدا .. وحايمين كلهم
اساتذة على طالبات في الفسحة القدام مدرسة المركز
الامتحانات ..
ولو فقددت اعصابها وعملت ليها فضيحة .. الدنيا كلها
بتعرف ..
المستور والمغطغط ..

الى اللقاء

[لامارا]

الحلقة .. 16 ..

اها عبدالرحمن وكت شاف اريج جاية .. ماشة عليهو قال
لي سارة عن اذنك ياسارة .. انا لازم امشي .. وفات من
مكانو الواقف فيهو .. مشى وقف براهو في الناحية
الشمالية للفسحة .. سارة تتلفت ساي .. بتفتش لواحدة
من زميلاتها اسمها سماهر .. عايزة تودعها لانها خلاص
ماشة البيت ..
وفارس واقف هناك مع اساتذة بتكلمو .. عاينت ليهو كدا
وبراحة كدا قالت بي همسة .. ودعتك الله ياسبب
الفرحة .. وراحة البال ..
اريج وكت شافت عبدالرحمن مشى .. جات لي سارة
بكل برود واستهبال ..
كيفك ياسارة والله مشتاقين .. اشتغلتي كيف
ياشطورة .. ؟
قالت ليها والله الحمد لله نسأل الله التوفيق .. وانتي يا
اريج ان شاء الله اشتغلتي تمام ؟
اريج قالت ليها ايوا اساسا ا لامتحانات السنة دي موية ..
ساهلات سهولية زي اللعب بس ..
قالت ليها معقول وانا هسي قلت ده اصعب امتحان جا
من قبل عشرة سنين .. لاني انا حافظة ا لامتحانات الفاتن
كلهن ..
المهم اتونسن ونسة عادية وكل واحدة با لا بعيد ..
اريج با لا في عبدو .. وسارة با لا في فارس ..
اريج قالت ليها ياسارة انا عايزة اقول ليك سر ..
انا بحب عبدالرحمن . وهو هسي في اليومين ديل بقى
بحبني . وبراسلني طوالي .. وان شاء الله عما قريب
نتوج .
سارة قالت ليها والله استاذ عبدالرحمن نعم ا لانسان ..
ربنا يتم ليكم على خير يا اريج .. ده احسن اختيار
بالمناسبة ..
اريج قالت لا .. والله ياسارة انا ماعايزة يكون دا اخر لقاء
لينا .. انا وانتي .. اديني رقم تلفونك . والله انا بتواصل
معاك وزياراتي ليك ما بتنقطع ..
سارة قالت ليها خلاص تمام بديك تلفون امي .. لغاية ما
اعمل لي تلفون ..
وملتها رقم تلفون غلط .. و لاقريب لي رقم امها .. طبعا "
سارة ماكانت عايزة تربطها باريج اي علاقة مهما كانت ..
اتوادعن كدا بي نص وعي ومشن ..
وبعض البنات كانو ببكو في الوداع ده ..
المهم غايتو الناس ديل اتفرتقو .. وكل زول مشى على
اهلو .. والسنة كدا انتهت ..
فارس قال لي عبدالرحمن اغشاكا معاي المدرسة ..
وبعدين اطلع على البيت ..
طبعا " ا لاتنين مافيهم واحد عندو عربية .. حتى المدير
بركب المواصلات .. وده طبعا " من ظلم بلادي لفلذات
اكبادها .. مصابيح الدجى .. وانوار الظلام .. ومربين
الاجيال .. هم اكثر الشرائح ظلما " ..
وماهية المعلم .. ادنى مما تتصور ..
ومرات مرتباتهم تتاخر بالشهور .. ومرات تروح في
خشوم التماسيح
لكن هم ربنا جاعل هواهم .. وهوايتهم في تربية
ا لاجيال .. وعشق السبورة والطبشير .. كان ا لاحرى ان
تكون رواتبهم كرواتب الوزاء
لكن مين يقول العمارة دي حقة منو؟
المهم . عبدالرحمن وفارس وصلو المدرسة ..
جم باب المدرسة فارس قال ليهو خش افتح المكتب
انتظرني .. انا غاشي الدايخ عندو معاي باقي حساب ..
عبدالرحمن قال ليهو مفتاحي في البيت .. اديني
مفتاحك .. اداهو مفاتيحو ومشى .. كانت كمية مفاتيح ..
عبدالرحمن فتح المكتب .. ومشى قعد فوق طربيزة
فارس ..
وعمل عملية مابتشبهو .. فتح درج فارس بواحد من
المفاتيح ..
بقلب في الحاجات كدا وبتبسم زي الكايس لي حاجة ..
لكن مافي حاجة كايس ليها . حب استطلاع وشلاقة بس .
لفت نظرو دفتر صغير كدا مكتوب عليهو M.T.L ..
فتحو لقى فيهو كتابة بسيطة زي خمسة سطور يمكن ..
ــفارس ــ كاتب ـــ
احببتك حبا " عميقا .. اكتسح فؤادي .. وم لا روحي .. لكني
سجنته في اضلعي حبيسأ .. حتى من احساس
ا لاخرين .. اشعر به يدب في اوصالي .. وجوانب
وجداني .. كانه هواء بارد .. ينطلق من مكيف .. في
غرفة حديدية ومغلقة .. كلما مرت ساعات اليوم ازدادت
الغرفة برودة وشدة ..
لا الهواء يتوقف .. و لا الغرفة تفتح ..
لقد تعب قلبي من كتمان هذا الحب الخجول ..
دليني بربك ماذا افعل وكيف انطق ؟ ..
انا في .......
والكلام ما مكتمل .. زي كانو كان مواصل في الكتابة
وفي حاجة قطعت عليهو كتابتو ..
عبدالرحمن .. قال الموضوع مفهوم .. بس المحيرني
عنوان الدفتر ده ..
بشبه .. ا لاسم بتاع دفتر سارة بس بختلف .. حرف ال T
ده ماعرفتو برمز لشنو ؟؟
فارس دخل لقاهو ماسك الدفتر بتاعو .. قال ليهو ما من
الذوق تفتح حاجات زول بدون اذنو ..
قال ليهو انت ما زول .. انت روح منفصلة من روحي ..
ونحن حاجة واحدة . ..
فارس قال ليهو .. دايما " بتبرد حيلي بكلامك .. اها
لقيت شنو؟
قال ليهو لقيتك مكسر عديل ..يا استاذ ..بس في حاجة
محيراني ..
ا لاسم ده معناهو شنو .. ؟
قال ليهو غلبك حرف الـ T ؟؟
دي ياسيدي ..
My timid love << حبي الخجول ..
والله فعلا حب خجول ..ومؤسس على ارقى ا لاداب
المجتمعية ..
قال ليهو الكلام ده كتبتو متين يافارس ؟
قال ليهو زمااان .. بعد ما قريت ال ام جي ل ..
قاليهو طيب ماكان توصلو ليها الكلام ده .. قال ليهو
مابقدر الحكاية دي صعبة شديد ياعبدالرحمن ..
بعدين هي خلاص عرفت الجواي .. وانا عرفت الجواها ..
لكن ماعارف الخطوة البعد كدا تكون شنو؟
انا والله ياعبد الرحمن .. انا دايما بستحي من الكلام في
المواضيع دي .. يا ما فوته بنات بي سبب الخجل ..
عبدالرحمن قال ليهو بس انت تديني فرصة المرة
دي .. اتصرف انا ..وانت ماتدخل في الموضوع نهائي ..
بس طلبي منك كمل الكتابة وتابع طلع الجواك ..
فارس سكت .. وتاني مارد ..
مرت ا لايام .. ومافي تواصل بين فارس وسارة نهائيا ..
وسارة كل مرة امها تسألها تقول ليها كيف المدير؟
سارة تتبسم وتدنقر وخلاص ..
اها يوم من ذات ا لايام .. الكلام ده بعد ا لامتحانات بي
فترة عشرين يوم كدا .. سارة كانت بتتونس مع امها ..
في البرندة برة .. بعد الفطور والبيت فاااضي .. وسارة
كان مزاجها رااايق ..
امها قالت ليها .. انتي عارفة ياسارة .. انا فكرت كتير
في موضوعك مع فارس المدير .. وعايزة اقول ليك
كلام .. انتي خلي بالك معاي كويس ..
فارس ده مابقدر ينتظرك لامن تخلصي جامعتك .. وانا
ماممكن اعرس ليك قبل الجامعة .. لاني بانية عليك
امال .. واذا قمتي عرستي كل ا لامال دي بتتلاشى ..
الليلة لو كان مستواك في الدراسة ضعيف .. مافرقت ..
لكن بي حالتك دي مستحيل عرس قريب ..
حتى ابوك بكون ده رايو ذاتو .. عشان كدا ماتحبسي
الراجل ساي ..
انا عارفاك بتحبيهو حب شديد ..
لكن العقل والمنطق بقول انو الحكاية دي ماجاية ..
وانا ابيت اقول ليك الكلام ده في البداية .. لانك كنت
ممتحنة وماكنت عايزة اسبب ليك صدمة وتوتر .. عشان
كدا وقفت معاك .. لكن كل يوم كنت بفكر وبزيد
قناعة ..
سارة قالت ليها طيب لو فارس قال ح ينتظرني !!..
امها قالت ليها بعد تكملي الجامعة .. انتي ما اقل من
خمسة اوست سنوات .. في الجامعة فارس بكون اتقدم
في العمر .. واهلو زاتو مابريحوه ..
عشان كدا يابتي الله يرضى عليك انهي الموضوع
ده . وواصلي قرايتك ..
قالت ليها كدي ياماما نحن نخلي الموضوع ده هسي ..
مانتكلم فيهو واكيد ربنا عندو تصرف وتدبير ..
انا ماقدرت قلت لفارس انا عايزاك .. لاني بحبو
وبحترمو .. كيف اقدر اقول ليهو انا ماعايزاك بالسهولة
دي ..
امها قالت ليها ما مشكلة انا بقول ليهو . بس انا عايزاك
تقتنعي انتي ..
قالت ليها بصراحة ياماما انا مابقدر .. دي اصعب من
الحكم با لاعدام ..
انتي ماعارفة انا وصلت لي يات مرحلة ..
بس البسويهو الله كلو انا راضية بيه ..
مرت ا لايام والنتايج بتاعة ا لامتحانات بقت على ا لابواب ..
ومامعروف غايتو البحصل شنو؟

الى اللقاء

[لامارا]

الحلقة ..17


يوم اعلان النتيجة ..كان يوم فرحة لي ناس سارة
والمدرسة ..
بالنسبة للمدرسة .. كانت المدرسة متفوقة من السنين
الفاتت بنسبة نجاح غير متوقعة .. وسارة احرزت نسبة
كبيرة .. ماعايز وقول النسبة كم بالضبط لكين فوق
التسعين . وكانت رغبتها الهندسة المعمارية .. لانها
تهوى الرسم من الصغر .. حتى لعباتها في
الطفولة .. كانت عبارة عن تركيب اشكال هندسية ..
وكان اليوم في المدرسة وفي البيت .. عبارة عن كرنفال
ومهرجان بالفرحة ..
والبنات في المدرسة .. رسلو ليها الهداية وخطابات
التهنئة ..
حتى الاقارب والجيران جو يباركو .. ويقدمو التهاني
والهدايا ..
واصحاب ابوها برضو ماقصرو .
في حاجة ملاحظة .. انو سارة ماكانت بتركز في الرسايل
والهداية ..
بتركز في الرسل منو .. وحتى بعد تعرف المرسل ..
بتقرا الخطاب وهي مشغولة ..
كانها منتظرة هدية من شخص معين ..
كانها تترقب تهنئة من زول بي عينو ..
امها وابوها كانو ملاحظين للحاجة دي ..
طبعا ياجماعة سارة كانت بتتمنى .. انو استاذ فارس يجي
يبارك ليها .. او على الاقل يرسل ليها تهنئة ..
وكانت بتقول جواها .. تعال يافارس هنيني .. ماتخيب
ظني تعال ..
لكن ماجا .. لغاية الواطة بقت العصر ماجا ..
وفعلا سارة بدا يظهر عليها الاستياء .. وعدم الرضا ..
وابوها قال لي امها براحة كدا .. سارة مالا متكربنة كدا
في يوم نجاحها .. ؟؟ قالت ليهو علمي علمك
ياحسن . ؟ ..
.......
بنات المدرسه كان اتواعدن بالتلفونات يتلاقن في
المدرسة يوم النتيجة وفعلا جن كم واحدة كدا ..
اها في المدرسة البنات فقدن سارة واريج الاتنين ..
والبنات الجن في المدرسة بباركو لي بعض ..
والاستاذات وكل الاساتذة كانو موجودين .. طبعا كانو
مشغلين التلفزيون في المدرسة .كان فيهو منتدى النتيجة
المهم .. وبعد شوية واحد من الاساتذة شغل الابتوب
وبقى يشوف في النتايج بي ارقام الجلوس ..
ويوريهن ..
وطبعا اريج ألامورة ديك ماطلعت ليها شهادة من
اساسو ..
اظنها بتكون نسبتها %6 ولاحاجة هه وهي نسبة كويسة
بالنسبة ليها ..
أها بالاختصار كدا ..
بعد الناس اتفرقو من المدرسة .. عبدالرحمن قال لي
فارس انت ليه ما مشيت هنيت سارة .. ؟
سارة كانت فخر للمدرسة لازم تمشي ليها ..
قال ليهو والله من الصباح بقنع في نفسي .. اني
امشي وخجلان .. عشان امها كاشفة حبي ..
واحتمال ابوها يكون عارف .. مابقدر امشي .. وهي
بتعذرني ..
قال ليهو عليك الله يافارس سيب الضعف .. وخليك زول
قوي ..
شنو يعني بتحبها؟ .. فرضنا .. انت عملت جريمة ؟
قال ليهو مابقدر وبس ..
عبدالرحمن قال ليهو طيب ياخي .. على الاقل رسل ليها
خطاب تهنئة
وهدية بسيطة كدا تعبير ..
والله لو ماعملت كدا . تمسخ عليها طعم النجاح .. انت
يازول بتفهم لمتين ؟ ..
قاليهو خلاص ارح معاي انت ..
قال ليهو انا ساسا " ماشي حتى لو انت ما مشيت ..
لكن خطاب التهنئة والهدية المفروض تكون منك انت ..
ولازم يكون خطابك خاص .. يعني مازي التهاني حقت
الناس ..
قال ليهو كيف يعني .. ؟
قال ليهو يافارس انت اطلع امشي جيبب الهدية .. وانا
بكتب الخطاب وتاني ماعندك شغلة ..
بعدين لمن تجي بديك ليهو تقراهو ماتعملي خجليشن ..
ومرر الموضوع على مسؤليتي ..
فارس قال ليهو لالا .. اصبر بكتبو براي .. ومسك
الورقة والقلم .. وكتب ..
بسم الله الرحمن الرحيم ..
اللهم لك الحمد بنعمك التامة والاءك المتوالية ..
لك التهنئة والاماني الطيبة الغالية سارة ..
فقد شرفتينا وشرفتي المدرسة وجعلتنا نفخر باننا نحن
اساتذتك ..
بالاضافة الى الفرحة التي شعرت بها انا شخصيا "
أسال الله لك التوفيق والسداد والتقدم ..
فارس ..
وطبق الورقة .. عبدالرحمن قال ليهو طيب خليني اقرا
كتبت شنو ؟
قال ليهو لا مابوريك ..حتقعد تنظر لي .. وانا ما حأغير
فيهو ..
انت عارف ياعبدو .. خطاب التهنئة ممكن يقراهو اي زول
وانا ماعايز ادخل سارة في حتة ضقة ..
وانا عارف طبائعها وحياءها ..
المهم غشو اشترو هدية .. ومشو على بيت ناس
سارة .. اسااسا مابعيد من المدرسة .. امكن عشرة
خمساشر دقيقة ..
ومشو الاتنين ولقو ابوها موجود .. سلمو عليهو وباركو
ليهو النجاح .. وعبرو عن فرحتهم وافتخارهم بي طالبتهم
سارة ..
وحسن اتبسط جدا جدا ودخل على البيت .. وقال لي
عايدة مدير المدرسة والوكيل وصلو .. اعملي عصير ..
وجهزو الشاي ..
سارة دي نطت وفرحت اكتر من فرحة النتيجة زاتها ..
بدون مبالغة ..
حتى ظهرت عليها خفة الحركة والتبسم ..
والدبرسة القبل شوية كلها اتبخرت .. ابوها استغرب قال
يمكن فرحت انو المدير والوكيل جوها .. وده تقدير
كبير ..
يعني الموضوع لسه عادي وماشك في اي حاجة ..
اها لمن شال ليهم العصير .. سلموهو صندوق
الهداية .. ومعاهو خطاب تهنئة ..
وحسن مافتح الخطاب .. اصلا هو زول منضبط بالعسكرية
الصحيحة . الاصلية الزمان ديك ..
لمن جا خت الخطاب والهدية .. سارة قامت بسرعة
وخطفت الهدية والخطاب .. ابوها طلع زي الماشاف
حاجة .. ووقف برة قصاد الشباك بتاع البرندة .. وهي
قعدت في الكرسي بتاع البرندة .. وبقت تقرا وتتبسم ..
وما كانت قايلة انها مراقبة من ابوها ..
وابوها من بره يعاين ليها ساي .. هو فعلا كان بين
الشك والظن ..
بقول ياربي دي فرحة انو خطاب من المدير .. ولا
الحاصل شنو بالضبط؟
المهم حركتها وردة فعلها كانت اكتر من المعقول
شوية .. ودي الحاجة الشككت ابوها ..
اها ابوها لمن جاء من برة وجاب كبابي العصيرالفاضية ..
عاين في الطاولة الفوقا الهداية والخطابات .. لقى هدية
المدير وخطابو مافي ..
وسارة دخلت غرفتها .. طوالي مشى وراها .وقف قدام
باب الغرفة وبعاين ليها من بعيد ..
فتحت الدولاب .. وطلعت دفتر من تحت الهدوم .. وختت
الخطاب في نصو .. وختت الصندوق في الرف الفوق ..
وبتتفلت كده زي الحرامية .. وهو سريع اتضارى كدا في
الباب عشان ماتشوفو ..
لامن بدت تقفل في الدولاب هو مشى ..
وما لاحظت ليهو .. عمك حسن طلع خطير الله يستر ..
وجا راجع للضيوف وقعد اتونس معاهم .. وبحكو عن
الامتحانت واختلافا من السنين الفاتن .. وعن الطالبات
وغلبتهن الكتيرة .. حسن قال ليهم ..
افضل حاجة انو الاستاذ يعامل البت زي بنتو بالضبط ..
ويحسسها بالابوة .. عشان يكون بالنسبة ليها قوة ومصدر
هيبة ..
اول ما تسمع في مدرسة انو حصلت علاقة بين استاذ
وطالبة .
طوالي تقنع من المدرسة .. وتقنع من خيرا فيها ..
تتخيل يا استاذ .. انو في اساتذة بعملو علاقات مع
البنات .. وحب في المدرسة وحكايات مقرفة الواحد
بسمعها ..
لكن طبعا " انا بقول ده من اولياء الامور .. لازم الواحد
يربي بنتو تربية سليمة .. ويفهمها انو المدرسة مكان
لتحصيل العلم .. موش مكان لقصص الغرام في طور
المراهقة ..
وبرضو المفروض يختار ليها مدرسة سمعتها كويسة ..
واساتذتها مسؤلين واولاد ناس ..
الزول ده بحكي كدا فارس قرب يدخل تحت الكرسي ..
وحس انو ابوها ده كاشف القصة وفاهم اي حاجة ..
وكأنه بطاعن فيهم بالكلام ..
الحقيقة حسن لسه ماعارف حاجة .. لكن من حركات
سارة شك بالحس العسكري .. انو البت دي ما اتعاملت
طبيعي مع هدية المدير والخطاب بتاعو ..
المهم لامن قال كلامو ده .. عبدالرحمن قال ليهو ..
والله يا سعادتك اي علاقة تكون نزيهة وشريفة .. كان
في المدرسة كان في الجامع محمودة ..
والعلاقات السيئة ماعندها مكان مشكور ..
حسن قال ليهو صدقت .. بس انا بعتقد انو العلاقة مع
بت المدرسة
علاقة غير مسؤولة لانها لسه عقلها مانضج .. انا بعتبر
بنات المدارس اطفال ..
ومحتاجين لاباء وموجهين اكتر من حبايب وعشاق ..
وفارس ساكت ساي زي الكاشحين فوقو جردل تلج ..
وتعابير وشو غير مفهومة لا بتبسم لاصاري ..
بعد نهاية الكلام ده قامو استأذنو وشكرهم شكر شديد ..
لمن طلعو فارس قرب يدق عبدالرحمن .. هايج هيجة ..
وبقول ليهو انا موش قلت ليك ما تجيبني هنا .. ؟ انا
موش قلت ليك ما ماشي ؟؟ شوفت بي عينك .. انا صلا
احساسي مابقع واطة .. اهو ابوها عارف اي حاجة ..
عبدو قال ليهو ياخي انت بتتوهم ساي الزول ده بقول
في كلام عادي .. وكلام عام ..
فارس قال ليهو ماتحاول تطمني براك بتعرف بمرور
الايام ..
. وهنا في البيت حسن بعد ودع الاساتذة الاتنين .. رجع
دخل البيت . ومشى على الغرفة بتاعة سارة ..


الى اللقاء ..

[لامارا]

لحلقة 18


حسن خش غرفة بتو سارة .. وقعد يكورك .. قال ليها سارة تعالي هنا .. جيبي المفتاح .. جاتو جارية .لقتو قاعد في سريرها .. قالت ليهو المفاتح فوق راس الدولاب يابابا .. قال ليها تعالي افتحي طلعي لي الورقة القبل شوية دي .. دخلت ترجف .. واكتر شي خايفة انو ابوها يقرا الدفتر .. او يطلبو او يشوف الورقة ..
وهو يعاين ليها .. منتظرها تفتح الدولاب ..
طبعا هو عارف انو في ام جي ال .. ولا ورقة رد ..
المهم فتحت الدولاب.. وبراحة مدت ليهو الورقة بتاعة التهنئة .. كانت عبارة عن ورقة مزينة بزخرفة حمراء.. على الجوانب ومكتوب فيها التهتئة العادية الكتبها فارس ..
ابوها قراها ومداها ليها راجعة ..
وقال ليها في شنو ياسارة ؟
قالت ليهو في شنو يابابا ؟.. مافاهمة؟ .. قال ليها شايفك فرحتي فجأة لمن جا المدير .. وفرحتي بي هديتو .. وشلتيها من دون الهداية ختيتيها في دولابك سريع .. وقريتي ورقتو بطريقة غريبة ؟
في شنو احكي لي ..
سكتت ساي.. ودنقرت .. قال ليها ياسارة انتي عمرك ماكذبتي علي.. ولادسيتي علي حاجة ..
قالت ليهو خلاص تحكي ليك ماما .. ماما عارفة عني اي حاجة يا بابا انا ......... وسكتت ..
قال ليها خلاص ما مشكلة انا مابضغطك ..
حسن انسان لبق ومهذب لمن حس انو بتو اتحرجت واستحت .. ماحاول يضايقها بالكلام ..
قال ليها اطلعي امشي نادي لي امك ..
امها عايدة مشغولة في المطبخ .. بتعمل في شنو ماعارف.. وماجايبة خبر للفيلم الشغال بيهنا ..
سارة قفلت الدولاب بعد ختت الورقة من فوق للهدوم ..
وخلت ابوها قاعد في غرفتها ..
وحمدت الله انو ابوها ماقرا الدفتر ولا الورقة الخطيرة ديك ..
المهم مشت لامها سريع قالت ليها .. ماما .. ماما .. اسمعيني سريع ..
بابا كشف الموضوع .. بس ماقرا حاجة من الدفتر والاوراق .. كلميهو بس الله يخليك ماتجيبي ليهو سيرة بيهن .. انا ماعايزاهو يقراهن ..
عايدة قالت ليها.. عليك الله ؟.. بالله ؟؟؟
والله ما ادس عليهو حاجة امشي كدا ..زحي من قدامي انا طالعة ..
وطلعت مشت لي حسن.. لقتو قاعد لسه في غرفة سارة ..
قالت ليهو في شنوياحسن ؟
قال ليها من متين ياعايدة انتي بتخفي علي الامور ؟
قالت ليهو والله كنت عايزة احكي ليك.. بس لقيت الموضوع مكحلة مايملاها ..
قال ليها احكي لي يلا الحاصل شنو ؟
قالت ليهو سارة معجبة بالمدير ده شديد خلاص.. وشايفاهو احسن راجل ..
قامت يوم كتبت في دفتر من دفاترها بتكتب براها يعني ..
زي الخواطر كدا .. زي خواطر البنات البكتبنها دي ..
وكاتبه عنو واعجابها بيهو وكانت كاتبة اسمو ..
انا كنت براقبها كل يوم بتكتب ..بس ماعارفاها بتكتب في شنو ..
اها يوم الاستاذ الجا معاهو ده اسمو عبدالرحمن ..كان في المدرسة في فتاشة عادية .. لقى الدفتر في شنطة سارة ..وقرا الكلام الفيهو .. وراهو للمدير فارس ده ..
اتاريهو المدير هو زاتو ميت فيها .. لكن مافيهم واحد مظهر للتاني ..
قام المدير رسل ليها ورقة وعبر ليها عن شعورو.. ووراها انو المفروض تخت بالا في دراستها . لغاية ماتمتحن . وتاني ماتكتب حاجة وتشرط الدفتر وكدا .. وتقفل الموضوع ده نهائي ..
وانا قريت الدفتر والورقة الاتنين ياحسن ..
والله بتك اكتر بت مؤدبة في الدنيا .. ويوم واحد ما اتكلمت معاهو.. ولا لاقتو .. بس هي مشاعر جواها كتبتها فوق الدفتر.. ولاكانت عايزاهو يشوفها لكن قدرها خلاهو يقراها ..
وانت عارفني .. لو حسيت احساس انو بتي عندها حاجة زي دي.. ما بسكت دقيقة بجي اكلمك ..
قال ليها .. طيب فهمت ياعايدة .. وانا عارف سارة كويس .. ؟
يعني هسي سارة دايراهو وهو دايرها .. ؟
قالت ليهو ايوة دايرها ودايراهو .. بس الموضوع ما راكب لي نهائي وكلمتها ..
يعني هسي ياحسن .. يعرسها كيف وهي زولة دايرة تدخل الجامعة ..ودايرة تتفرغ لقرايتها .. بعدين .. لو انتظرها لغاية ما تخلص بكون عجز وضهرو انحنى ..
قال ليها الموضوع ده خليهو علي.. انا بنهيهو ليك بطريقة دبلوماسيه .. عشان هي ماتحس انو نحن وقفنا ضد رغبتها في حاجة ..
اول حاجة انا عايزك توصليها كلامي ده .. تقولي ليها ابوك قال .. انا ماعندي مانع ولا اعتراض ..
عايز منك حاجة واحدة من اتنين .. وعليك الاختيار ..
قاليك لو الزول ده عايزك وانت عايزاهو.. الزواج يكون الان الان في فترة عشرة خمستاشر يوم ..وطوالي يرحلك ويسوقك وتقري جامعتك ولا ماتقريها تاني مخيرة ..
يا اما ماعايز اسمع اي خطوبة وارتباط وحب وكلام زي ده .
اي حاجة زي دي في حياتك مرفوضة تماما ..يعني تاني ماعندنا ليهو اي وعد واعتماد ....

عايدة قالت ليهو يعني كيف ياحسن ؟ .. تتزوج هسي وتقرا مابتجي ..
البت دي قرايتها حساسة .. مابتقدر توفق بينها وبين زواج ..
قال ليها مخيرة هي .. انتي تاني اطلعي من الموضوع .. وماتتدخلي في الموضوع ده ..
انا متأكد انو الاستاذ المبروك الشافتو عيني ده .. ماعندو اي ظرف بخليهو يتزوج في القريب العاجل .. وماعندو مقدرة يفتح بيت .. ويرحلا في زمن زي ده ..
وهي ذاتها ماحتقبل تتزوج هسي .. لانها نفسها ومنى عينها تخش الجامعة.. وتعبها وسهرها ده كلو عشان كدا ..
والاستاذ انا بعرف اتكلم معاهو .. امشي انتي كلميها ووريني بتقول ليك شنو؟
عايدة قالت ليهو غايتو انت ماغلبت ربك ..
غايتو عليك جنس افكار ؟
اها مشت امها قالت ليها ابوك عرف اي حاجة وقال ليك ...
انا موافق بس ماعايز خطوبة نهائي .. زواج طوالي في ظرف 15 يوم بس ..
وطوالي يرحلك مننا .. وكان داير يقريك يقريك من بيتو ..
سارة قالت ليها بس كدا صعب ياماما .. الفترة دي ضيقة وهو ماحيقدر يعمل حاجة .. لاني عارفاهو وعارفة ظروفو شنو ..
قالت ليها عرفتيهو كيف .. ؟
قالت ليها مرات حق الفطور بتدينو .. الدايخ بتاع الفول عامل ليهم فضيحة هو وعبدالرحمن .. كل مرة يقول داير منهم كدي ..

فعلا ياجماعة زي ماتابعتو انو بكون عندو حسابات مع الدايخ .
بس دايما .. فارس قاعد يسدد ليهو حساباتو .. لكن في ناس اصلهم مابسترو الزول البتدين منهم حتى لو بسدد ..
ديل التعامل معاهم ذاتو عيب ..

اها سارة قالت ليها يا ماما ماهية الاستاذ.. بتكمل من اول اسبوع يعني ابوي كيف يقول ليهو بعد 15 يوم .؟

قالت ليها اها براك جيتيني .. وقلتي الحقيقة .. دام هو زول ماهيتو بتكمل في اسبوع يوم انتي عايزه بيهو شنو ياسارة .. ح تعيشي معاهو كيف ؟
قالت ليها يا امي . لو كان الحب حقيقي بناكلها انا وهو بموية. وبجوع معاهو زي ماهو بجوع ..
اقول ليك حاجة يا ماما .. ؟؟؟
قولي لابوي انا موافقة بالكلام البقولو استاذ فارس .. اي كان حتى لو قال لي سيبي الجامعة بسيبها ..
قالت ليها يابت انتي مخك ده ماراكب في مكانو ؟؟؟
كيف يعني تخلي الجامعة؟؟ عشان تعرسي الاستاذ المقطع ده ..
سارة قالت ليها : ده بالنسبة لي انا ما مقطع ده بالنسبة لي ملاك في ثوب انسان ..
هو لو قدر اتزوج وماعندو مقدرة يقريني انا ماعايزة قراية ..
قالت ليها انتي بتقولي في كلامك.. ده لانك عارفة لا أنا لا ابوك مابنقدر نرفض ليك طلب ..
خصوصا في الزواج لانها دي حياتك وانتي مخيرة فيها ..
ابوها جاء داخل عليهم الاتنين قاعدين في غرفة عايدة ..
عايدة قالت ليهو ياحسن..
البت دي قالت الكلام البقولو فارس هي موافقة عليهو ..
قال ليها وانا ثابت على كلامي .. وعلى الطلاق هسي يقول جاهز انا جاهز ..
سارة طوالي قامت دخلت جوة ..
حسن قال ليها مالا ؟
قالت ليهو قالت ده شرط تعجيزي ياحسن .. البت ذكية ومخها يوزن
بلد ..
حسن قال ليها خليها تقول كان قايله ..
انا بكرة من الصباح ماشي اتكلم مع الاستاذ .. وبقول ليهو شرطي يا يقبل بيهو الان يا اما يختانا جاي ولاجاي ..
ماعندي ليهو اي فرصة غير اسبوعين.. وماعايز سارة تكون في البيت بعدها ..

الى اللقاء....