الحب الخجول / للكاتب طارق لبيب ، سودانية مكتملة

[لامارا]

الحلقة 19

..قبل مايمشي حسن ابو سارة لي فارس .. في نقاش هناك كان دائر بين عبدالرحمن وفارس ..
عبدالرحمن قال لي فارس : انت حتعمل شنوو مع سارة؟ .. اها الامتحانات انتهت .. وانت وعدتها .. انو بعد الامتحانات يصير خير .. ووصيتها بالقراية .. وهي قرت ماقصرت.. واحرزت النتيجة العالية .. انت المفروض تمشي تطلبها من ابوها ولاشنو؟
فارس قال ليهو عاين ياعبدو ..
نحن بنتكلم في الحقيقة ولا في الخيال؟؟ .. انا هسي ظروفي مابتسمح لي حتى اشتري فستان لي اميمة .. اميمة اختي تحنس فيني ليها شهر دايرة ليها فستان .. ماعندي حقو .. المرتب كلو بطلع سداد ديون ..
تقول لي امشي اطلبها اطلب شنو؟
هسي فرضنا وافقو لي .. اقول ليهم شنو ؟
لو سألوني حتتزوج متين؟ .. وسد المال وينو؟ .. وقولة خير وينها؟ .. واخليها تقرا الجامعة واتزوجها .. ولا اتزوجها واقريها انا ؟
واقريها كيف؟ واسكنها وين ؟
انا منال شطة سابتني عشان ظروفي الزفتة دي .. وشكلها سارة حأفقدها بي نفس السبب ..
يعني اعمل شنو يا عبدالرحمن ؟ البلد صعبة.. واي حاجة غالية..
وانا مرتبي مابكفي اي حاجة ..عملنا حصص اضافية ..عملنا دروس خصوصية .. وبرضو ما قادر اوفر اي قرش .؟
اتزوج كيف يعني؟ .. الله يسألك المرتب بتاعنا ده معاهو عرس ؟
وانا امي مريضة بالرطوبة والسكري.. وعلاجها دايم .. مافي زول غيري بصرف عليها ..
والله انا ماعارف اسوي شنو؟ ..والله بس الزول ماباقيلو الا يبكي ..ولايكورك ..
يعني بس امشي اقول ليهم احجزوها لي ؟ انا بعد تتخرج دايرها ؟
والله دي حاجة انا شايفها ماجاية ؟ واضمن من وين ظروفي تتصلح؟
عبدالرحمن قال ليهو طيب والحل .؟ سارة منتظرة منك اي حركة .
فارس قال ليهو وريني انت الحل بتاعك .. انت موش كتبت ليها الورقة ؟ ووعدتها على لساني ؟
انا ماعندي مانع اوفي بي وعدي .. لكن كيف؟ قول لي كيف؟ ..
الجزء حقي الفي بيتنا الفي الاملاك.. بعتو السنة الفاتت عشان الوالدة كان عندها عملية .. هسي ماعندي التكتح ..
انت ياعبدالرحمن ما ملاحظ انو نحن مرتباتنا مامكفية الاكل والشراب؟
حتى لو عندي قروش انا ما من انصار انو المراة تقرأ وهي متزوجة الايكون عندها خدامات في البيت لانو البيت ماببقى بلا ستو ؟
ولازم طيل سنين قرايتها ماتجيب اطفال ..
انت ماعارف البنات البقرن في الجامعة متزوجات ديل بتعبن كيف؟
امشي اسأل واحدة جربت الموضوع ده ..
انا صاح حبيتها ..وبحبها اكتر من روحي.. ولمن اتذكرها ساي . والله ياعبد الرحمن بتجيني فرة قلب ..
لكن اسوي شنو؟ وعيونو اتملن ...
اول مرة عبدالرحمن يشوف دموع فارس ..
عبدالرحمن طلع بره طوالي هو ذاتو في حاجة وقفت ليهو في حلقو ..
اصلو زول حنين خلاص مع انو صعب ..
الحقيقة المرة يا اخوتي .. انو الاساتذة في بلدي (لهم الله فقط) ..
من تردي الاوضاع وعدم الاهتمام .. يعني والله ياجماعة انا كنت
بحسب اليوم في توزيع الدخل لمدير المدرسة على ايام الشهر .
لقيتو بساوي اجرة طلبة خرصانة .. موش اوسطه لا..
طُلبة بضم الطا ..
يعني لو فرضنا جدلا ..انو المدير بتاريخ اليوم . ونحن في ديسمبر 2014 .. لو فرضنا انو بياخد الف وخمسمية .. .. في الشهر ..
وهو الواقع فعلا . في الحدود دي بس.. ترحيلو عليهو .. وترحيل اي مسلزمات تخص المدرسة .. واكلو .. وجباتو التلاتة .. ومنصرفاتو اليومية العادية .. تتخيلو المرتب ح يخلص في كم .. اسبوع ؟ عشرة يوم ؟ اها وباقي الشهر يجيب من وين؟ ويتوصل كيف .؟ ويعمل شنو؟
ومرات ناس التعيينات الجديدة شهرين تلاتة مابتجيهم مواهي ..
ومواهييهم اصلا مافايتة الستمية سبعمية لوطارت ..
الاساتذة القدام بتضطروا يعملو ليهم حاجة كدا شيرنق يدوها ليهم ولو بسيطة ..
الكهربا تقطع في المدرسة.. بجيبوها من جيوبهم .. يشترو الطبشير
واي حاجة في المدرسة تبوظ . من جيوب الاساتذة.. زير انكسر ..شباك انقلع..
ماسورة حلجت .. لمبة ضربت . مروحة وقفت .. كلو .. كلومن الماهية القليلة الأنفة الذكر ..
كان في فترة الامتحانات الدورية بعملوها الاساتذة بي رسوم رمزية
على الطلبة . شوية بتساعدهم . هسي بقت المحليات تطبع الامتحانات الدورية وتستفيد هي من العايد .. والاستاذ اتحرم ..
غايتو الوجع راقد ..
ولك الله يا فارس.. وعبدالرحمن .. وكل الكواكب المنيرة المحترقة في بلادي ..
نرجع لي قصتنا ..
يومين تلاتة العقيد حسن ما اتكلم .. لاقال كدا لاقال كدا .. ولامشى لي فارس ولا اتكلم معاهو .. ولاشال تلفونو ولا شي .. قامت عايدة سألتو.. قالت ليهو انت عملت شنو في موضوع المدير .. قال ليها على حسب كلامك انتي قلتي الموضوع ده مُكحلة مابملاها ..
وانا فكرت كتير .. وفي النهاية قلت انسى موضوع الزول ده ..
اظنو بجاري في البت ساي ..وماعندو ليها اي مشاعر واحاسيس ..
وتقريبا هو مهتم بي نجاح مدرستو .. بعد مانجحت البت ورفعت ليهو
مستوى المدرسة تاني ولابسأل فيها ..
بس انا بنتظرو يجيني .. هو لو جاهز بجيني .. ولو ماجاهز مافي داعي .. انا امشي احرجو بي كلام .. الزول ده شكلو طيب ..
قالت ليهو والله كلام عقل ..
قال ليها بس ياعايدة في حاجة .. ناخد عهد من سارة انها ماتتواصل معاهو وماعندها معاهو اي علاقة .. الا يجي يخطبها رسمي ..
ولا أقول ليك انا واثق سارة ما حتضرب ليهو تقول ليهو تعال اخطبني ..
لانها خجولة لحد التعقيد .. دي بتي وانا بعرفا ..
ومرت الايام وسارة منتظرة وفارس ماعارف يعمل شنو .. وهو امبارح مشى اتدين من عبدالرحيم جارو 215 الف عشان يجيب ادوية للوالدة لغاية اخر الشهر ..
بعد ما ارهقو التفكير في سارة وكلام عبدالرحمن انها في انتظارو
فكر في حاجة ..
كانو طوالي كل يومين تلاتة بتلاقو هو وعبدالرحمن. في نادي في شمبات الاراضي . قريب من لفة جنوب .. وبحكو الوجع
والاجازة كانت اجازة مسيخة ومافيها اي نكهة ..
مرة قال لي عبدالرحمن .. انا عايزك تتصرف باي طريقة توصل لي سارة اني انا ماجاهز لاي خطوة في الايام القريبة ولا الشهور ولا سنة .. انا والله مابقدر اوصل ليها كلام ولابقدر اواجها لاهي لا امها .. انا بخجل من روحي ..
وعليك الله قول ليها واصلي دراستك من غير ماتربطي مصيرك بي فارس
لانو فارس ظروفو مامعروفه ..
عبدالرحمن قال ليهو والله يا فارس الحكاية دي صعبة عليها ..
فارس قال ليهو .. والله اناعارف .. وانا قلبي بنزف دم . علي روحي وعليها هي .. لكن دي الحقيقة ولو كانت صعبة احسن من اربط مصير البت بدون مايكون عندي استعداد ..
الرسول عليه الصلاة والسلام قال يا معشر الشباب من استطاع منكم الباءة فليتزوج .. انا ما مستطيع الباءة ) ..
موش دي الحقيقة ؟؟؟..
المهم عبدالرحمن تاني مالقى الكلام البقولو وشكلو .. كرت النص بتاعو .مات قدامو ..
اها يازول بي اختصار .. عبدالرحمن بعد مشى البيت كان محتار حيرة شديدة خلاص .. هو ذاتو حالو ما أحسن من فارس لو كان عندو اي تصرف بقدر يساعد فارس لو بي دمو كان ساعدو .. لانو بحبو محبة عظيمة وبحترمو احترام جليل مع انو فارس اصغر من عبدالرحمن شوية لكن فرق العمر ما ملحوظ ابدا ..
اها في البيت هناك نادى اختو غادة ..
غادة اخت عبدالرحمن عاقد عليها ود خالتها مقيم برة وين ماعارف
وزله بتحب اخوها زي عيونها ..
قال ياغادة انا عايز احكي ليك حاجة لاول مرة احتاج لي رايك ومساعدتك ..
المدير فارس بتعرفيهو؟ قالت ليهو وهل يخفى القمر ؟
قال ليها حاصل حاصل حاصل .. حكا ليها القصة من طقطق للسلام عليكم ..
قال ليها ونحن هسي أتفقنا نوصل ليها الكلام عشان ماتربط مصيرها بي فارس .. ولا أنا وفارس ماقادرين نوصل ليها ..
غادة قالت ليهو كدي خلوني في المشورة توصيل الخبر هين ..
الظاهر من كلامك انو فارس ماقنع منها.. بس ماعندو ظرف انو يتكلم الان .. صح؟ قاليها نعم ..
قالتليهو طيب خلي يديها الخيار .. يقول ليها هسي ماعندي طريقة .. ولا عندي استطاعة مادية لاي خطوة ..
وحتى ماعارف ظروفي لي قدام .. انتي لو بتقدري تقرري انك ترهني نفسك بي وتنتظريني ..
انا ماعندي مشكلة .. ولو مابتقدري ..انا عافي ليك في اي قرار ..
اها رايك شنو؟ ..
عبدو قال ليها والله كلامك عين الحقيقة .. بس لو شاورنا فارس برضو ما حيقبل ..
عشان كدا انتي اتصرفي .. وامشي ليها .. وانا واثق فيك وفي حكمتك وتصرفك .. وانا اديتك كل المعلومات والحصل ..
وصف ليها البيت .. وحتمشي غادة توصل ليها الخبر الفاجعة ده
ونشوف البحصل شنو؟


الى اللقاء...

[لامارا]

الحلقة 20


هذه الحلقة طولها اربعة سنوات .. لذلك قد تشعرون بتسارع الاحداث ..
غاده اخت عبدالرحمن بي دورا .. مشت تاني يوم طوالي من الكلام ده .. وصلت ناس سارة زي الساعة 9 صباحا ..
ودقت الباب .. سمعت صوت من جوة ناعم زي صوت جنيه الحديد الرموه في كباية شاي فاضيه . .. "دي سارة" .. قالت .. عليكم السلام منو؟
قالت ليها السلام عليكم انا غادة .. عايزة سارة ..
ساره فتحت ليها الباب .. عشان تشوف غادة دي منو .. وقالت ليها اتفضلي معاك زول ؟
قالت ليها ابدا" براي.. السلام عليكم كيف.. الحال وماكن طيبين .. وكدا .. السلام السوداني بكل مافيه من حفاوه .. "انتي سارة ؟
قالت ليها نعم انا سارة اتفضلي خشي ..
دخلت غادة لابسة توب .. وشبشب عالي.. التقول طالعة فوق علبة صلصلة .. تسمع كجك ..كجك .. مثل مشي الحصان في الزلط ..
وسارة مستغربة في الشخصية دي .. ياخوانا الزولة وشها ابدا ماغريب علي .. تشبه لي زول او شفتها قبل كدا ..
من جوة امها عايدة كوركت ليها .. ده منو الفي الباب ياسارة ؟ قالت ليها واحدة ضيفة ياماما ..
امها جات سلمت عليها .. الله يبارك فيك و كيف الصحة والاحوال ..
قالت ليها انا اسمي غادة.. اخت استاذ عبدالرحمن الوكيل.. الفي مدرستكم ..
وجيت ابارك ليك النجاح ياسارة ..
ان شاء الله عقبال الدكتوراة .. ونشوفك كدا دايما موفقة يارب ..
قالت ليها الله يبارك فيك يا غادة.. تسلمي والله ماقصرتي واستاذ عبدالرحمن ومعاهو المدير الاتنين جوني هنا وباركو لي والله .. عليك الله كيف هو؟ وكيف صحتو؟ .. قالت ليها والله تمام الحمد لله ..
المهم قدمن ليها الواجب السوداني .. في كرم الضيف .. ورحبن بيها جدا ..
عايدة قالت ليهن انا مشغولة شوية .. اخدن راحتكن . ومشت ..
هنا طوالي غادة فتحت الموضوع .. قالت ليها طبعا عبدو حكا لي.. عن المدير وقصتو السرية معاك ..
سارة قالت ليها القصة دي.. انتي النفر الرابع يعرف بيها .. (استاذ عبدالرحمن . وامي .وابوي .وانتي بس ).. لاننا نحن الاتنين مستحين وماقادرين نحكي لزول .. انا حتى خجلانة من امي وابوي ..
قالت ليها ليه؟ انتي عملتي شنو اصلك ..؟
قالت ليها والله ماعارفة بس خجلانة من روحي ..
قالت ليها المهم ياسارة .. انتي عارفة طبعا" فارس شغال مدير مدرسة حكومية .. وعارفة الاساتذة وظروفهم المادية .. الزول ده والله بحبك حب عجيب.. زي ماحكا لي عبدو اخوي ..
لكن المشكلة الواقفة قدامو المادة ..
وطبعا ماممكن يجي يتقدم ليك وايدو خلا ..
قالت ليها انا بس كنت بتمنى يجي يتكلم مع بابا .. بس كلام ومايعمل اي خطوة ان شاء الله .. عشان انا اكون عندي حجة ارفض اي زول يتقدم لي .. ولي قدام ربنا كريم..
قالت ليها انتي خلي حجتك انا دايرة اقرا .. وواصلي دراستك ولي قدام زي ماقلتي نشوف ظروفو والبحصل ..
بس هو قال حتي لو حصل واتقدم ليك زول وامورك مشت هو عافي ليك ..
قالت ليها كيف يعني انا اموري تمشي مع زول ..معقول قال كدا ياغادة ؟؟
غادة قالت ليها انتي داخلة على جامعة.. وحياة جديدة .. ومجتمع مختلف .. والافكار ذاتها بتتغير ..
سارة ابتسمت ابتسامة ساخره وقالت ليها نشوف ..
قالت ليها المهم انا العايز اوصلو ليك يا سارة ..انو الزول ده مابقدر يعمل اي خطوة .. ولابقدر يضمن لي قدام .. ولابقدر حتي يجي يتكلم مع ابوك بظروفو الحالية ..
سارة قالت ليها يعني بي اختصار .. استاذ عبدالرحمن قاليك . انو فارس خلاني .. ؟؟
قالت ليها تقدري تقولي كدا أيوة ..
ساره سكتت كدا .. وسرحت برة الغرفة .. وعيونها اتلقبن حمر ..
وقالت ليها .. البسويهو ربنا كلو انا راضية بيهو .. مافي زول بختار قسمتو .. واخفت اي الم شعرت بيهو من غادة .. لانها عارفة الخبر حيوصل فارس وهي ماعايزاهو يتألم لي المها ..
المهم غادة خلت سارة في اسوء الشعور والحالات النفسية ..
ومشت ..
سارة المكلومة .. اول حاجة مشت .. حرقت الام جي ال والورقتين بتاعات فارس ..
وطوت صفحة اسمها فارس ..
غادة .مشت كلمت عبدالرحمن .. بي الحصل وقالت ليهو خلاص كلم صاحبك قول ليهو موضوعك انتهى ..
وفعلا" اتلاقو عبدو وفارس .. وكان مجلس حزائني .. وقال ليهو يا فارس نحن لازم نسيب التدريس ونمشي نشوف لينا شغلة تعيشنا زي الناس ..
فارس قال ليهو .. ما أنا البخلي رسالتي عشان القروش .. انا ما حأسيب المدرسة .. ومصر اني اواصل واطلع اجيال السودان قمة في الادب والتربية والتعليم ..
قال ليهو طيب نشوف لينا مدرسة خاصة ؟ بدل ماكل مرة احلامنا وامالنا تتحطم قدام عيونا .. قال ليهو مدرسة خاصة دي ما ح أفكر فيها ابدا .. طيب لما كل المعلمين الاكفاء يمشو يفتشو المدارس الخاصة .. اولاد الفقراء البقريهم منو .؟
انا مواصل في مدرستي لامن ربنا يفتحها علي .. وحقوقنا مابتضيع عند الله ..
وبالنسبة لي سارة كلمت امها قالت ليها غادة وصلتني خبر انو فارس خلاني .
قالت ليها الحمد لله يابتي اصلهم الرجال كدي ..
ماتشتغلي بالموضوع اساسا هو ماشبهك انا دايراك تقري الجامعة وتتخرجي وبعدين نشوف ليك عريس يناسبك ..
ونهائي سارة ابت تقول لامها فارس خلاني مضطر عشان ظروفو مابتسمح ..
وسارة دي كملت الدموع في انصاص الليالي بعد الناس ينومو تقعد تبكي والصباح تقوم عادية ..
ومرت الايام ..
وانتهت الاجازة وسارة نزلت جامعتها وفارس رجع للمدرسة واكمال الرسالة المقدسة البؤدي فيها ..
ومافي اي تواصل بينو وبين سارة وماعارف عنها اي شي .. وهي كمان بقت تحاول تنسى .. لانها فعلا" قنعت منو ..
وبقى بالنسبة ليها ماضي وحلم جميل ..
ومرت السنين بسرعة كان كل شي كان امس ..
وكل ما مرت السنوات فارس ماشي متلاشي من افكار سارة ..
ولاعارفة عنو اي حاجة ..مع انو المدرسة ربع ساعة من بيتهم بالرجلين ....
ماعارفة فارس الحصل عليهو شنو . وعبدالرحمن اخبارو شنو ..و ونحن ذاتو ماعندنا منهم اي اخبار منهم ..
بس سارة منهمكة في دراستها زي الالة .. وفعلا بقت آالة ..
في سنة رابعة سارة كان عندها صديقتها شديد من سنة اولى .. اسمها "مبتغى" . كل مرة تقول ليها والله انا ياسارة دايراك لي اخوي ..
وسارة بتتهرب من الكلام . يوم البت اصرت تسوق سارة معاها البيت .لي هدف . في الشارع قالت ليها انا سايقاك معاي عشان حكيت لاخوي عنك.. وعايزاك تشوفيهو ..ويشوفك .. وتاني تدوني رايكم .. وسارة ماحبت تكسر بي خاطرها .. سارة ماعندها رغبة في برنامج قبل التخريج .. المهم شافت الولد اسمو أمين . الولد القيافة البملا العين لامن تدفق .. وماعندو اي عيب يرفضوه بيهو ..
غير انو زول ماعندو علاقة بالقراية .. لامن بعيد لامن قريب .. زول تاجر وابن تاجر ومن اسرة تجار ..
العشرة مليون عندو زي العشرة جنيه .. وزول باسم طوالي ضاحك
وروحو طيبة ..
المهم بي اختصار الزول ده لامن شاف سارة جن جنونه ..
لكن سارة كانت احساسها عادي يعني .. الولد مع انو وجيه وجاهة فتاكة..
بس برضو سارة كانت زي المافي شي .. ما أثر فيها لاوضعهم المادي ولا شكل الولد ..
قامت سارة قالت لي مبتغى خلاص يا مبتغى انتي اديني فرصة اتعرف عليه .. وفي نيتها حبة حبة تحاول تتخارج من الزول ده ..
عشان مايعمل ليها برنامج قبل التخرج ..
مبتغى . قالت ليها اها يعني انتي موافقة موافقة مبدئية؟ .
سارة قالت ليها يصير خير ان شاء الله ..
بعد يومين امين وامو واخواتو جو زيارة في البيت ..وسارة كانت مافي .. كانت في الجامعة الكلام ده زي العصرية كدا ..
ناس عجيبين خلاص .. ناس امسك لي اقطع لك .. الامور دي بياخدوها بي بساطة غريبة ..
اها ام امين قعدت اتونست مع عايدة وقالت ليها سارة شافت ولدي ووافقت بيهو .. ولدي صفتو ونعتو .. ونحن ووضعنا كيت كيت .. وبنعرس سارة عرس الهنا والمنى .. وولدي حباها ..
وطبعا" اشكالهم ولبسهم زاتو يوريك وضعهم الاقتصادي شكله شنو؟
المرة دي يديها كلهن دهب والتوب اللابساهو بالشي الفلاني ..
..
المهم عايدة باركت الموضوع .. ونادت حسن براهو كدا كلمتو بي طلب المراة ..وحسن قال ليها ما دام سارة موافقة والزول كويس ووضعو مطمئن .. نحن دايرين شنو لي بتنا تاني؟ .. الناس ديل يا عايدة ناس مشهورين في مجال الاعمال ..الناس ديل انا بعرفهم . اديهم الموافقة .. هم يعني ده الموضوع الجو ليهو ؟
قالت ليه نعم ..
مشى طوالي الزول الاتجاه واحد ده ..
قال لي امين انا ماعندي خطوبة .. اول ما تجهز تعال طوالي .
امين قال ليهو انا جاهز كان الاسبوع الجاي ده ماعندي مشكلة .
..
اها لمن جات سارة امها وابوها باركو ليها ..وقالو ليها نسابتك جو هنا وليه ماكلمتينا ؟.. انك مربطة ربيطة بي فهم زي دي ..
عايدة قالت ليها اها ياسارة دي العرسة البتتمنى ..
طبعا" سارة اتفاجأت جدا ..وبقت مطيرة عيونها ..
لكن لامن شافت امها وابوها فرحانين ..
قالت ليهم الله يبارك فيكم .. وهي زاتها فرحت لي فرحتهم ..
اتكيفت جدا من الخطوة الشجاعة القام بيها امين .. وبقت جواها تقول ده الراجل الصح .. طوالي جاء دق بابا بيتنا .. وفرح الناس .. اناعايزة شنو في الدنيا غير فرحة امي وابوي ..
ولاقتو مرة ومرتين والعلاقة استمرت وكل يوم تزداد تعمق ..
وكانو ماكان في يوم من الايام مدير مدرسه اسمو فارس ..
لكن هل بتم العرس دا بالطريقة دي ؟ وفارس خبرو شنو؟
نشوووووووف


إلى اللقاء....

[لامارا]

الحلقة 21 ..

سارة بتحاول بكل مالديها من قوة واصرار .. انها تواصل
في العلاقة دي .. وكل ماتمر عليها خاطرة فارس ..
بعد يومين تلاتة .. تتذكر كلمة غادة ..
لمان سألتها .. قالت ليها يعني ياغادة فارس خلاني ..
قالت ليها تقدري تقولي كدا .. ايوة ..
طوالي تتبدل عندها الاحاسيس وتتحول لي ضيق ..
وغم .
يوم أمين جاها في الجامعة الوكت ده كان هي في نص
سنة رابعة
قال ليها انا عازمك غدا وعايز اوصلك البيت بعد داك .
قالت ليهو مامشكلة يلا . بس انتظرني هسي الساعة
واحدة . قعد في حتة كدا ..واتصلات اتصلات .. هي
انتهت من حاجاتها وخشت صلت الضهر
وجات لقتو قاعد في مكانه .. ولسع تلفونو مدور ..
حتى لمن جات قالت ليهو انا جاهز هو تلفونو شغال ..
الشيك بحل الليلة ..
القروش لازم تصلنا بكرة ..
البضاعة وصلت .. وووو ..
التلفونات كلها بالطريقة دي ..
المهم وقف على حيلو وريحة عطرو طاقة .. ويتبسم ..
كيفك سارة؟ يلا خلاص جاهزين ؟
قالت ليهو يلا ..
وفي العربية مركب السماعة وكل مرة يرد على عميل ..
وكل مرة يتكلم مع زبون ..
وهي ساكتة قاعدة زي التمثال . اخيرا قفل التلفون ..
وطلع السماعات من ضنيهو .. وقال ليها ياخي والله
دوشة الشغل اصلو مابتنتهي ..
انا اسف ياسارة .. كيف الصحة والاحاويل .. قالت ليهو
الحمد لله ..
مشى طوالي على السلام روتانا ودخل عربيتو جوة
العربية ودخل ..
لقتو مجهزين ليهو طاولة اظنو اتصل عليهم او متفق
معاهم المهم مافهمت .. الناس ديل خدموه خدمة زي
خدمة الرئيس ..
والغدا الختوهو يأكل ليهو عشرة انفار لامن يشبعو
ويفضلو .. ومن اصناف عجيبة وغريبة ..
وطبعا سارة اتضايقت جدا من البزخ والتبذير ده ..
واساسا هي ما بتاكل كتير .. بقت تنقرش في الاكل كدا
بي اطراف اصبعين بس ..
ومتكفرنة .. وحالتها كلوكلو مامستقرة ..
قال ليها مالك ياسارة في حاجة ؟؟ في حاجة
ماعجبتك ؟
قالت ليهو بصراحة كل شي ماعاجبني ..
اولا انت قبيل قاعد منتظرني .. تتصل وتتكلم في القروش
والدنيا والشغل صلاة الضهر جات وفاتت وانت قاعد في
مكانك .. ماصليت ..
قال ليها .. الله .. اقسم بالله مرقت من بالي .. !!
ثم ثانيا كيف تطلب اكل قدر ده؟ وزي ده ؟ .. نحن اصلا
عايزين نتغدى ولا نتفاخر ؟
هسي الاكل اقلاهو يكون بي مليون ونص ..
قال ليها مليون وتمنمية ..
اتذكرت مواهي الاساتذة طوالي .. وكلام غادة عن
ظروف فارس ..
تاني ماقدرت تدلي لقمة ..
قالت ليهو الحمد لله انا شبعت لكن لي علمك يا امين ..
حق الغدا ده في ناس بصرفوهو لي شهر تلاتين يوم ..
تختو انت قدامك لوجبة .. ماتكل عشرها بعدين يدفقوه
في الزبالة؟
قال ليها ياسارة ده حكم ربنا يرزق من يشاء .. قالت
ليهو بس ربنا الرزاق قال ان المبذرين كانوا اخوان
الشياطين
قال ليها خير ياسارة دي اخر مرة .. ان شاء الله اكون
اقتصادي والله بس دي اعفيها لي .. وماتزعلي ..
وخلاها قاعده في حتتها وطلع برة صلى . وجا ..
المهم بي اختصار لمن سارة مشت البيت قالت لابوها بابا
حبيبي .. الموضوع بتاع الزواج ده انا عايزة أأخرو
شوية .. ماتستعجلو علي ..
قال ليها في شنو ياسارة انتي الليلة لاقيتي الود ده ؟
قالت ليهو ايوة .. قال ليها خير انشاء الله مالو؟
قالت ليهو والله زول كويس وطيب اكتر من مما تتصور ..
واصلا مابكسر لي كلام .. بس محتاج لزول يقيف معاهو
ويوجهو ..
قال ليها الولد ده صغير يا سارة وانت لازم تقيفي
معاهو وتوعيهو ..
اوعا يكون بتعاطى حاجة كدا ولاكدا . ؟ . قالت ليهو ابدا
زول مهذب جدا .. والله طول المشوار ما رفع عينو
عاين لي ..
لكن بس انا حاسة المفروض اتمهل شوية .. قال ليها
مافي مشكلة بس بعد كدا مافي طريقة رجعة ونكسة ..
نحن ادينا الناس كلمة ..
امها جات من جوة قالت ليها غايتو ياسارة لو نضمتي
في امين ولا يوم قلتي مادايراهو اقسم بالله ابلع حبوب
وانتحر ليك قدام عينيك ..
سارة قالت ليها هسي انا قلت كدا يا ماما . ؟
انا والله ما رافضاهو ولا في سبب يخليني ارفضو انتي
ليه بتقولي كدا ؟ ..
بس انا عايزة ماتفتحو موضوع قبل ما اخلص رابعة ..
على الاقل اكون عرفتو كويس ..
ابوها قال ليها مافي مشكلة ياسارة قلنا خير ..
يوم من الايام في زول دق الباب بتاع ناس سارة .. فتحت
امها لقتها دي غادة اخت عبدو .. وشكلها مختلف ..
وشكلها كدا زي الجاية من برة البلد .. ولابسة جنس
لبس عجيب وغريب ..
بعد سلمت وقعدت . قالت ليها ان شاء الله سارة
موجودة .. ؟ قالت ليها والله لسه ماجات من الجامعة .
لكن ده وقتها البتجي فيهو اتفضلي ..
والله انا جاية من الخليج لي يومين تلاتة .. وعندنا
قريبتنا جنبكم بيهنا زوجها اتوفى جيت اعزيهم .. قلت
اغشاكم ..
اها على بال ما اخدت ليها قعدة كدا .. وشربت ليها
كباية شاي .. سارة جات داخلة .. وشايلة شنطتها ..
ومعاها مسطرتها ديك في شنطة مشمع سودا ..حاقباها
في ضهرها .. زي عارف الجيتار ...
اول ماجات عرفت غادة طبعا .. وسلمت عليها بشوق
عجيب . وكيف الصحة والاحوال وسارة فرحت فرحة
شديدة ..
المهم قعدن مع بعض .. وبتسأل فيها اها ياسارة عملتي
شنو؟ .. قالت ليها والله الحمد لله مواصلة في
دراستي .. وهسي قبل شهر يمكن تقريبا في واحد اخو
صحبتي ارتبطت بيهو ..
قالت ليها يازولة خير ان شاء الله .. ربنا يوفقك ويتم ليك
على خير ..
سارة قالت ليها كيف اخبار استاذ عبدالرحمن ؟
قالت ليها وقولي فارس برضو ههه ..انتي من متين
ماعندك اخبارهم الناس ديل ..
قالت ليها والله من الزمان داك .. تاني ماعندي خبر من
اي حاجة في المدرسة ..
قالت ليها والله ياسارة ..فارس الدنيا دي اتعذب فيها
عذاب .. بس الله يديهو الاجر ويعوضو الجنة .. وعمرو
كله ضاع قصاد امو ..
اول حاجة الزول ده طبعا .. زي ماعارفة ابوهو متوفى
بدري وخلا ليهو مسؤلية البيت .. وعندو اختو واحدة بس
اسمها اميمة .. وامو مريضة بالسنين .. رطوبة
وسكري .. واخيرا جاها فشل .. وهي ليها سنتين
بتغسل .. والله انا ماعارفة الزول ده ممشى الامور دي
كيف .. وعايشين كيف غايتو بس نقول سبحان الله ..
هسي طبعا " عبدالرحمن اخوي اتزوج اخت فارس دي
زاتها .. ليهم زي ستة شهور كدا .. واميمة وفارس
شغالين مع امهم بالوردية ..
النهار اميمة بتقعد مع امها .. لمن يجي راجع فارس من
المدرسة .. براعيها لغاية الصباح .. تاني تجي اميمة من
الكدرو .. وكداطوالي .. والمراة تعبانة تعب السواد
والرماد .. كان شفتيها تقولي تموت هسي ..
وعبدالرحمن مما اتزوج اميمة .. ماضاق طعم السعادة كلو
كلو ..
مع انو أميمة ماشاء الله عليها .. ادب وجمال .. لكن
همها كلو في امها .. قلنا موضوع عرسها يخفف على
فارس .. بس تعبو زيادة وامو رافضة اي زول يخدمها ..
عشان كدا هو شايل فكرة الزواج نهائي من راسو .. بس
لانو امو مابتقبل اي مراة غريبة .. طبعا لانها الجلطة
عملت ليها شلل نصفي خفيف كدا .. بحموها ويطلعوها
الحمام ويغسلوها .. وكل يومين تلاتة قالو راقدين
مستشفى ..
سارة قعدت تبكي .. قالت ليها مالك ياسارة .. قالت
ليها كان نفسي امو دي اخدمها انا .. وابقى ليها بت ..
لكن والله امي كانت تعذبو عذاب .. وتعمل ليهو حالة
نفسية .. لانها امي بمجرد ماتسمع سيرتو بتتوتر .. وتهيج
وتقعد تنبز فيهو ..عشان انا اكرهو .. ايمكن الحصل ده
لي خير لي وليهو .. لانو في النهاية الزواج سعادة
وتفاهم وانسجام .. ولو كان الزول بدخل على ناس
مابتقبلوهو .. وماراضين بوضعو .. يبقى مابشوف معاهم
سعادة .. وحتى لو تم المراد وانا وفارس كنا اتزوجنا ..
لا انا بسعد معاهو ..ولاهو بسعد معاي .. لاننا الاتنين
حساسين .. وانا اهلي مابعرفو غير المادة .. العجب
ماما .. واهلي . كلللهم حتي خالاتي وعماتي واسرتنا
كلها .. امي ممكن تمرض عديل . ناس سبحان الله .
غايتو الحمد لله .. على كل حال ..
قالت ليها طيب فرضنا امك راضية بيهو بي وضعو ..
انتي حتقعدي تخدمي امو ولاتقري جامعتك؟ ..
بعدين انتي ماقصرتي هو براهو قال ماعايزك نسيتي ؟؟
قالت ليها مانسيت والله .. لكن متأكدة هو قال ماعايزني
عشان مضطر .. وعشان مصلحتي ..
المهم الحمد لله .. وهو ربنا يوفقو .. والسعادة تكون
حداهو يارب .. والحكاية ماوقفت علي انا .. ان شاء الله
ربنا يقسم ليهو السعادة مع انسانة احسن مني .. ..
طبعا " ياجماعة زي ماسامعين .. في احداث كتيرة حصلت
في الاربعة سنوات دي .. لكن مازالت في حاجات غايبة
عننا .. نحن لازم نمشي المدرسة برانا ونسلط الاضواء
ونشوف الحصل بورانا في السنين الفاتت .. والح يحصل
شنو؟ ..


الى اللقاء

[لامارا]

الحلقة 22 ..


لقاء صحفي مع الاستاذ عبدالرحمن محمداحمد وكيل المدرسة ..
نحن وصلنا المدرسة وعبدالرحمن قاعد في مكتب المدير براهو ..مامعاهو اي زول .. ودي فرصة ..المدير مافيش ياربي مشى وين ..مامعروف طيب بما اننا ماعندنا فكرة في الحصل خلال الاربعة سنوات دي ..عايزين نسأل عبدالرحمن يورينا .. امبارح غادة اختو ورتنا كلام مختصر.. ما استفدنا منو كتير ..
السلام عليكم استاذ عبدالرحمن ..
عليكم السلام .. يا طارق اللبيب وجناة الثمر .. حبابكم ..
طبعا" ياعبدالرحمن نحن كنا متابعين معاك ..كل التفاصيل الحصلت سنة 2007 لغاية الامتحانات .. والنتايج .. السنة الامتحنو فيها ناس اريج ..وسارة حسن ..
عايزينك تحكي لينا الحصل شنو وبالتفصيل لو سمحت ..
قال : طيب جدا اول ما دخلنا السنة الجديدة .. كنا متوقعين انو اريج تجي . تعيد السنة ..بس مضت الاسابيع وهي ماجات .. فارس قال لي .. يا عبدالرحمن .. أريج دي لو دايرة تعيد المفروض تكون وصلت.. .. انا قلت ليهو ماتشتغل بيها .. انا من زمان قلت يارب تاني لاتجينا لانشوفا .. امكن ربنا استجاب لي ..
المهم رسلنا الفراشة اسمها مسرة.. تمشي ليهم في البيت ..وتسأل منها ..
وده كلو كان اصرار من فارس .. المهم مسرة جابت لينا خبر كدا ماياهو ..قالت اريج ماجاية المدرسة ..ومادايرة تعيد .. اهلها منعوها ..قالو كان عندها علاقة مع واحد بتاع ركشة ..
وابوها حلف تاني ماتطلع من البيت .
وهسي تقريبا عرسوها لي ود عمها.. لكن تاني ماعارف تفاصيل اكتر من كدا في قصة اريج . ..
اما بالنسبة لي فارس المدير ..
السنة الجديدة كانت سنة عادية وطبيعية .. وفارس طيلة الايام ماقاعد يجيب سيرة سارة كتير ..
وانا لمن اجيب ليهو سيرتها .. بقول لي ده موضوع انتهى ..خلينا نشوف المستقبل ..
سارة دي ياعبدالرحمن انسانة جميلة النفس ..فتحت نفسي للدنيا .. ربنا يسعدها اينما كانت .. طبعا ده بعد ماجات غادة اختي ..وكلمتنا انها وصلت سارة .. وقالت سارة اتقبلت الموضوع بي برود .. فارس ارتاح راحة شديدة خلاص .. لانو فارس كرامتو وسمعة مدرستو.. عندو اهم من الحب والحاجات دي .. وطبعا في حاجة لازم تلاحظو ليها .. اصلا فارس كان مستحي وخجلان من حبو لي طالبتو ..
اها يوم مشينا زيارة عشان نبارك لي سارة.. ابوها قال كلام لو انتو متذكرنو .. قال انو حكاية علاقة بين استاذ وطالبة دي حكاية مقرفة .. هنا فارس قنع انو يعمل اي خطوة لي سارة ..حتى لو ظروفو اتصلحت .. ومسح حكاية سارة دي من فوايلو .. الموضوع كدا بقى انتهى ..
فارس زول منطقي ..وماضعيف قدام الحب نهائيا ..انا ياريت لو اكون زي فارس .. اول ماشاف انو قصة لقاهو بي سارة شبه مستحيلة ..أبدا ما اتعلق ..ولا اثرت المسألة على نفسياتو ..
همو كلو في الدنيا امو وعلاجها وشفاها وراحتها . ..
وانا كتير بمشي معاهو البيت ..ومرات بقعد معاهو الخميس والجمعة..
لانو كان عندنا نقص في الاساتذة ..
عندنا استاذة واستاذ ..سابو المدرسة ومشو للمدارس الخاصة ..
ونحن اصرينا انو نقوم بواجبنا تجاة طالباتنا برانا.. لدرجة انو المدير بكون عندو تلاتة حصص في اليوم .. وانا برضو بدرس وتعبنا تعب شديد ..
اها انا في اثناء مشي معا فارس لي بيتو .. كنت لصيق بالاسرة ..
لفتت نظري اختو الوحيدة اميمة .. وشفت حنيتها على امها .. وقلبها الكبير .. وابستامتها الدايمة .. ووجها المشع بالطيبة والنور ..
وجد اتعلقت بيها .. بس كنت برضو مستحي اطلبها . وانا شايف اهتمامها بي امها .. وحوجة فارس ليها .. بس كنت خايف يتقدم ليها زول غيري .. وبقيت كل مرة الاحظ اهتمامها الزايد بي انا .. وفرحتها لمن انا اجي مع فارس ..
وطبعا انتو عارفني انا عيني قوية ومابخجل .. يوم جابت لي شاي
واغتنمت فرصة فارس في الحمام .. وقلت ليها بحبيني يا اميمة ؟
ضحكت وطلعت .. وابت ترد علي.. طوالي فهمت براي ..
اميمة طبعا يا اخوانا طلعت من اولى جامعة.. بي سبب مرض امها برضو ..
اها مرت الايام وانا كل يوم ماشي غرقان ..في ريدة اميمة ..ومتعلق بيها اكتر ..وبقيت بتونس مع اميمة بالدس وبالرسايل عشان فارس مايحس بي حاجة .. ومشيتي مع فارس للبيت كترت .. وحسيت لي حياتي طعم مختلف والله .. البت دي طيبة لي درجة مبالغ فيها.. بس نسخة من فارس ..
اها تقريبا في نص السنة التانية ام فارس بقت تنقنق .. وتقول انا بقيت عارض للبت .. انا حأموت وما اشوف سعد بتي .. البت دي يافارس قاطعة قلبي .. حرمتها من جامعتها عشان مرضي.. وهسع عريس ساكت مابجيها ..
فارس طول الايام كان طبيعي.. بس قلق امو ده . قلق بيهو شديد ..
يوم انا اتوكلت على الله وقلت لي فارس يافارس .. انا عايز اميمة .
فارس قال والله انا يوم ياعبدو دايراقول لك تعال نعرس ليك اميمة ..
لكن بس باقية لي تقيلة ههه
فارس قال هو اكتشف انها بتريدني . وبتحترمني شديد .. وحكى لي كلام امو عن الموضوع .. وقال لي مافي راجل انا بوثق فيهو وبطمن على اختي معاهو.. اكتر منك ..
طوالي انا قلت ليهو طمن امك قول ليها لقينا ليها عريس ..
والحمد لله ربنا قسم لي مناي في الدنيا ..
وبتمنى كمان فارس اخوي يلقى مرادو وتتحقق امانيهو ..
يلا انا بقيت بساهم معاهو في البيت.. عادي يعني الحمد لله شلت منو مسؤلية اميمة نهائي .. مصاريفها ولبسها وكل احتياجاتها ..
لكن برضو الام ابت تسكت يا..فارس قول لي صاحبك ده اعمل حاجة ..انا دايرة اشوف بتي دي معرسة قبال ما اموت ..
فارس طوالي قال لي حدد العرس ..وكان زواج بركة بي اقل التكاليف ..
عملنا دعوتنا في المدرسة ..
الصباح عملنا عزومة فطور صغيرة كدا للاهل والاقارب والاصدقاء والزملاء ..وعقدنا بعد الفطور والموضوع انتهى ..
وكان زواج في ايسر مايكون.. والحمد لله نحن ناس متفاهمين وفاهمين ظروف بعض ..
بدون اي تكاليف وبزخ ..وفعلا اقلهمن مؤونة اكثرهن بركة .. لقيت اميمة احسن مرة ومبروكة بركة زمزم ..
وهسي نحن كلنا متعاوين على مرض خالتي علوية.. ربنا يرفعها بالسلامة .. وكلنا متساعدين والحمد لله ..وهي كتير بتقول ربنا اداني ولد تاني اسمو عبدالرحمن .. ودخلتي عليهم كانت فيها ليها فرحة مايعلم بها الا الله .. وانا زاتي ارتبط بيها زي امي ..
وبخلي معاها اميمة بالايام .. لانها دي ظروف ..واميمة والله تعبانة شديد .. كل يوم عندها مشوار من هناك لي هنا ..
وانا قلت ليها خليك مع امك .. لكن هي رفضت .. وقالت لي زوجي برضو عندو حقوق والله بسألني منو ..
المهم غايتو الحياة اصلا مع الغلابة صارة وشيها .. لكن نحن كاسرينها بالمحبة والتفاهم والفرح ..
اها يوم من ذات الايام .. ربنا اكرمنا وجاتنا استاذة جديدة في المدرسة اول تعيين .. اسمها هبه .. ونحن ماصدقنا تجي استاذة ..لانو زي ماحكيت ليكم عندنا نقص في الاساتذة .. وقلنا ليها انتي وقعتي لينا فوق جرح .. بس كانت مختلفة عن كل الاساتذة ..من اول يوم جات .. ادب واحتشام وجدية..
وشغالة شغل سبحان الله التقول المدرسة دي حقتها.. وبنت علاقات طيبة مع البنات .. ومرات بتعمل في اليوم اربعة حصص .. تطلع من الفصل ده وتخش في ده .. لابتكل ولابتمل ولابتزهج .. ولا يوم تشوفها صارة وشها ..
والحمد لله بي جية هبة ..انا وفارس شوية كدا انجمينا .. لانها عقدت الاساتذة التانين ..وبقو يعملو بي ضمير.. خايفين من نظرتها .. لانها عندها كارزما غريبة ..مع انها اصغر استاذة في المدرسة ..
بس الناس كلهم بحترموها احترام عجيب ..
وانا لاحظت لي فارس بقى يتراشق معاها كدا .. ومتكيف منها كيف ماعادي .. ياهبة هاك .. وياهبة تعالي .. ونادو لي هبة .. قرب يسويها الوكيلة بدلي هه ..
وكلنا كنا مفتكرين انو فارس مستلطف الاستاذة الصغيرة دي..
تشوفها تقول طالبة في الجامعة مابتقول استاذة .. لكن ماشاء الله حضورها حضور سفيرة ..
الكلام ده في بداية السنة دي ذاتها ..
انا يوم قلت ليهو يافارس .. انت هبوية دي وقت بقيت تتريدها قدر ده .. ماتجدع ليك فوقا حبل وتعقد عليها ..
قال لي لالالا .. انا تاني التوبة .. مابفكر لي في عرس نهائي .. لاني متعود على الشلوت .. راسي ده اتورم من الفليق بالشواكيش ..
واحتمال تكون مخطوبة ولا مرتبطة .. ياعبدالرحمن السماحة الزي دي مابتقعد ..
قلت ليهو سألت منها قالو لامخطوبة لامرتبطة ..
قال لي لالالا انسى يا عبدو عليك الله ..
هسي اعبر ليها عن مشاعري ..تخليني وتشوف غيري .. والقرش
يعمل عمايلو .. اصلو القروش دي التقول عندها معاي تار .. كل مرة ضارباني بي خازوق ..
انا قلت ليهو انت عايزها ؟؟ لو انت عايزها قول لي .. انا بتم ليك الموضوع ..
ضحك وقال لي انا مجربك.. قبل كدا موضوعك خستك معاي ..
المهم قال لي ..والله يا عبدو البت دي ..ياها البت الممكن تخلي الزول يرتاح باقي عمرو نفسيا ..
لكن انا لسه مابقيت لي على عرس .. اولا ماعندي التتعك الرمادة ومديون وحالتي بالبلا .. انا هسي لو مانص البيت الساكنين فيهو ده حق امي ..
ماعارف كنت اودي امي وين.. لاني مابقدر ادفع لي ايجار بيت ..
وبعدين انت عارف امي ماعايزة اي مراة غريبة تخدمها عشان ظروف مرضها .. وانا مابقدر اسكن بعيد من امي ولا ابيت بعيد منها ولا ليلة .. يازول دي امي العرس يطير ..
والله لو انطبقت السما والارض. مابفوت امي وهي بالحالة دي ..موضوعك ده برضو محكوم عليه بالفشل..
لو سمحت اقفل الموضوع ده . وانسى الموضوع ..
وانا نسيت الموضوع ..وهسي امبارح غادة حكت لي بي موضوع زواج سارة حسن ولسع ما كلمتو بيهو .. بعد شوية حيجي وبكلمو ..

الى اللقاء

[لامارا]

الحلقة 23 ..


بعد عبدالرحمن خلص كلامو واحاطنا علما.. بكل التفاصيل الحصلت بي ورانا ..
فارس جا متأخر من البيت ..يمكن زي الساعة 11 تقريبا .. سبحان الله رغم انو اربعة سنة مرت من حياتو.. الا انو بنفس الاناقة والجمال .. كانو بصغر مابكبر .. انا قلت في الاربعة سنوات دي يتلقى صلع.. او شيب .. لكن فارس روحو نشطة ..
جاء ماشي على المكتب ..بخطوات سريعة .. كانه مستعجل لي موضوع ..
والبنات يادوب دخلن على الحصص البعد الفطور ..
البنات طبعا وجوه جديدة ..غير الوجوه الشفناها زمان ديك .. وتصرفات جديدة .. واصوات اكتر .. والهدوء الكان في زمن ناس سارة داك الليلة مافي .. والبنات شكلهن عمرهن اصغر .. واحجامن اقل ..
والتصرفات الطفولية اكتر .. بس الفهم.. والخساسة ..والفوضى.. والفساد .. نسبتو زادت جدا ..
السبب انو كل مايوم البلد ماشة غالية .. واولياء الامور بزدادو مشغولية .. عشان يوفرو لقمة العيش ..ومابلقو فرصة لتربية بناتهم.. ومتابعتهن المتابعة الصحيحة ..
نحن هسي في سنة 2011 في نص السنة تقريبا .. وفارس مشغول شغلة عجيبة خلاص ..
سلم على عبدالرحمن ..وعبدالرحمن سألو من الوالدة ..
قاليهو والله ياعبدو ده السبب الاخرني .. امي حالتها ما مطمئنة .. وانا خايف عليها خوف شديد .. وهسي عندي شغل مهم شديد .. عايز اخلصو وارجع سريع ..
قال ليهو ليه؟ موش اميمة وصلت .؟
قاليهو ايوه جاتنا من الصباح ..بس لازم اكون معاها.. لانها امي تعبانة شديد ..
وطلع ملفات كدا من درجو.. وبقى يخت فيهن قدامو .. وانهمك في الشغل ..وعبدالرحمن زاتو مشغول .. وماقدر حكا ليهو باي شي من القالتو غادة عن سارة ..
واليوم ده مشى غير عادي جدا ..وفارس طول اليوم متواصل مع اميمة في البيت..
امي كويسة ؟ سقيتيها الدواء .. بلعت الحبوب ؟ استفرغت تاني ؟
الورم نزل؟
المهم بالو مع امو.. وشغال في المدرسة بي نص تركيز ..
في اخر اليوم الناس ديل كلهم طلعو من المدرسة وفارس وعبدالرحمن مشو البيت مع بعض .. عبدالرحمن اصلا عايز يطمئن على حجة علوية ام فارس.. ويسوق معاهو اميمة .. والمدرسة فضت ..الا استاذة هبة اتاخرت شوية معاها مسرة .. هبه بتصحح في اختبارات .. ومسرة قالت ليها بستنى معاك شوية.. مابقدر افوت اخليك براك .. اصلا مسرة بتحب هبة محبة شديدة ..
وبتحب تتونس معاها بس هبة دايما مشغولة ..
مسرة : انتي ياهبة يابتي التقول استاذة براك في المدرسة اي شغل شايلاهو براك ..؟
قالت ليها ياخالتي مسرة .من اخذ الاجر حاسبه الله بالعمل ..
قالت ياهبة يابتي هو وينو الاجر ؟ ..هسع انتي ليك كم ماصرفتي ؟
قالت ليها ان شاء الله ربنا بهونا.. احسن لي من اقعد في الجحيم ..
احسن لي اشغل وقتي بالتدريس..
قالت ليها الله يجيرك من الجحيم يابتي . احكي لي .. مالك في شنو؟ هبه قالت ليها بس خليني اخلص من الكراسات دي باقي اربعة .. وبحكي ليك ..
مسرة قالت ليها الليلة ماتمشي معاي زيارة لي بيتي يااستاذه .
تتغدي معاي وتزوري وليداتي .. والله متمنية ياهبه يابتي يوم بس تزوريني في البيت واكرم مثواك ..
هبه اعتذرت ومسرة الحت واصرت عليها .. في النهاية هبة اتصلت على البيت ..وقالت ليهم انا بتأخر ..ماشة مع خالتي مسرة الفراشة المعانا في المدرسه . عازماني غدا ..
ومسرة طبعا مع محبتها لي اساذة هبه .. كانت عايزة تعرف الجحيم البتتكلم عنو هبة ده شنو ..
المهم هبه مشت مع مسرة البيت.. بالمواصلات بعيد.. الحافلة دي تخبط قريب النص ساعة في حتة اسمها طيبة الاحامدة .. من كوبر وتمشي شمال ..وتاني تمشي شرق ..وتاني شمال.. وغايتو المهم وصلت معاها ..
ودخلت البيت .. المتواضع جدا .. البيت المافيهو اقل مقومات الحياة.. لاتلاجة لاسراير لا دواليب ..
بس عبارة عن غرفيتن بتاعة جالوص.. وقدامن راكوبة بتاعة عيدان ..وعناقريب حبال ..فوقها ملايات قديمة مهترئة.. ومخدات مكيسة ..
هبة قالت.. اليشوف مصيبة الغير تهون عليهو مصيبتو ؟
مسرة سمعتها .. بعد جابت ليها كباية ليمون ..
وقعدت جمبها ..
قالت ليها احكي لي يا استاذة مالك انتي شايلة هم الدنيا ..
قالت ليها ياخالتي مسرة ..انا حياتي عبارة عن لغز محير ومميت ..
انا امي وابوي انفصلو وانا عمري سبعة سنوات .. وابوي سافر عطبرة واتزوج واستقر هناك .. وانا قعدت مع امي . في بيت حبوبة في الجريف غرب . مع خالاتي الما متزوجات بالكوم وخيلاني العطالة ..
وبقو يضايقو امي.. يقولو ليها نحن ماصدقنا انك اعرستي .. تاني تقومي تطلقي وتجي تضايقينا ..؟؟ وبقت امي قاعدة في ضيق .. والليل والنهار تبكي .. وانا كنت كنت لما ابكي واقول ودوني لابوي .. ويسوقني خالي يسفرني عطبرة.. بتذكر انو ابوي بهيج ويقول.. ماتجيبوها لي ماعايزها طيروها لي امها .. لانو مرة ابوي الفي عطبرة كانت مشترطة معاهو انو انا ما ادخل في حياتو ..
كنت بفتكر انو ممكن اقعد مع ابوي ..عشان اخفف على امي الضغط الحاصل عليها من حبوبة واولادها ..
في النهاية امي اضطرت تتزوج ..اول راجل اتقدم ليها .. وهنا بدت معاناتي الحقيقية ..
انا لمن امي اتزوجت كان عمري 12 سنه .. وزوج امي انسان قذر
وبضايقني مضايقة عجيبة ..
لدرجة انو بحرش اولاد اخوهو عشان يضايقوني ..
وبصحى مرات من النوم ..بلقاهو قاعد خاتي الكرسي ويعاين لي جسمي.. وانا بكون في عز نومي ..
وكتمت الكلام ده من امي وقطعتو في مصاريني ..ماكنت عايزة امي تتطلق للمرة التانية.. وتبقى ليها عقدة نفسية .. قلت اصبر امكن ربنا يفرجا ..
والحمد لله صبرت ..وعملت حسابي على روحي.. وبقيت لمن انوم بقفل علي باب الغرفة من جوة ..
وانا بالجد كرهت حياتي .. وبقيت بتشرد من البيت ..يوم مع ناس خالي فلان.. ويوم مع خالتي فلانة ..ويوم مع صاحبتي فلانة .
الحمد لله لمن دخلت الجامعة طلبت من امي تخليني اسكن داخلية ..عشان اجيب نتيجة كبيرة ..
امي اساسا بقت مافارقة معاها حاجة ..وشكلها بقت ماطبيعية من معاملة ابوي وناس حبوبة ..
بس الراجل الوسخ دا.. بعاملها معاملة كويسة ..وبخاف من زعلها عشان كدا انا ساكتة على سجمو ورمادو ..
المهم قريت الجامعة كلها ..وانا ساكنة داخلية ..واهلي قاعدين في خرطوم السجم دي ..عدا ابوي المابعرف ليهو غير انو سبب دمار حياتي ..
وهسي والله ساكنة في بيت امي زي الغريبة.. كل الوقت لابسة عبايتي ..ومتسترة وخايفة على نفسي من الراجل الكلب ده
وبقفل علي اوضتي ..حتى لو الكهربا قاطعة ..والسخانة تقلي مابقدر انوم مطمئنة الا اقفلا ..
(ومسرة دي تسمع وتبكي) ..
وانا ياخالتي مسرة مفهمة امي اني بخاف من الحرامية ..
وبالنهار لما امي تطلع ليها على جيهة..راجلها يجي ويقعد يتكلم معاي كلام تافه
ويحوم قدامي بملابسو الداخليه ..
غايتو ياخالتي انا عايشة عيشة اخير منها الموت ..
بس هس الحمد لله المدرسة خففت علي شوية .. والاساتذة والطالبات بقو لي زي اسرتي .. حتى لو ما صرفت قرش ماعندي مشكلة .. كوني بفطر معاهم .. وتاني الوجبة دي مابزيدا الا بكرة ..
اسألي لي ربنا يديني ود حلال يخاف فيني ربنا ..
والله ياخالتي تعبت تعبت .. وقعدت تبكي .. جنس بكا لامن مسرة قامت جات قعدت جمبها وبقت تهدي فيها ..
بعد شوية هدأت ..وقامت غسلت وشيها من القلة البرة في الراكوبة ..
وجات قعدت ..مسرة قامت تعمل الغدا ..
وجابت الغدا الطابخاهو بتها .. كسرة بي ملاح ام شعيفة ..
ام شعيفة دي ملاح ويكة بس بدون لحمة .. واكلو كلهم هبة ومسرة ووليداتها ..
مسرة عندها بتها مشاعر 16 سنة.. ماسكة البيت تعوس وتغسل وتعمل الملاح ..وماقرت ولاسنة اولى .. وعندها ولدين صغار هدومن اللابسينهن مشرطات وحالتن بالبلا.. وكرعيهن غبش .. وممكن تتصور حالة العيشة .. اقرا وغمض عيونك وتخيل .. يا كانز المليارات
وانت ياسارق حقوق الشعب .. وانت يا مختلس المال العام ..
مسرة زوجها شغال ببيع فاكهة بي درداقة.. حايم السوق بي كراع كلب ..من صباحات الله جا داخل قريب الغيبة .. بعد داك قامت قدمت الاستاذة هبه للمواصلات وجات راجعة ..
الوجع.. الوجع ..

قبيل طبعا نحن خلينا عبدالرحمن وفارس طلعو على البيت ..
لما عبدالرحمن وفارس وصلو البيت.. لقو حاجة علوية تعبانة شديد ..
وجسمها كلو مورم .. وبتتكلم بالجلالة ..
عبدالرحمن قال ليهو يافارس.. الوالدة دي تعبانة شديد خلينا نوديها المستشفى .. قال ليهو كل مرة قبل الغسيل بي يوم هي بتتعب كدا .. نوديها باكر مواعيدها .. امي تعبانة مابتقدر على التلتلة مرتين ..
قالت ليهو يافارس ياولدي انا والله تعبتك تعب .. ان شاء الله ياولدي ربي يخدر ضراعك ويجعلك من اهل الخير .. وقبلة للضعفا .
والله ياولدي انا حاسة بي تعبك معاي.. وحياتك كلها واقفة عشاني ..
قال ليها يا امي الله يخليك.. الكلام ده هسي خليهو.. انتي تعبانة ماقادرة تتكلمي .. اتنفسي بي هدوء عشان تقدري تاخدي ليك نومة .. وقاعد جمبها في طرف السرير .. جم كرعيها بعصر ليها في عرعيها والكرعين وارمات .. لدرجة انو اثر يد فارس بتظهر فوق ساق امو زي العصر ليهو عجينة ..
ربنا يخفف عليها .. وفارس قلبو بنزف دم على الم امو ..وماقادر يعمل ليها حاجة ..
قامت امو قالت ليهو ..يافارس قول لي عبدو ولدي واميمه ديل امرقو بره انا عندي معاك كلام ..

الى اللقاء

[لامارا]

الحلقة 24 ..


اها وكت عبدو واميمة طلعو برة .. بتكلمو مع بعض ..
قالت ليهو والله انا ياعبدو مقلقة.. ماعارفاها امي دايرة تقول شنو؟؟
عبدو قال ليها.. اظنها دايرة تقول ليهو عرس ياعجوز هه
اميمة قالت ليهو عمرك مابتبقى جادي .. انا خايفة عليها ياخ..
قال ليها انا بس معاك انتي بكون جادي جدادة شديدة .. قالت ليهو اسكت خلاص.. النرخي اضاني اسمعا بتقول ليهو شنو؟
قال ليها حرام تتسنطي وتتجسسي .. بعدين دردقي فارس بقول ليك براهو .. ويضحك وخات يدو فوق خشمو ..عشان مايسمعوه جوة ..
حاجة علوية قال لي فارس ..تعال قرب اقعد جمبي هنا.. النقول لك .. قام من جم كرعيها .جاها و قعد في الواطه وبرك على ركبتيهو وبسمع فيها ..
قالت ليهو بتعرف ناريمان بت سيدة.. جيرانا ديل ؟
قال ليها ايوة بعرفا من هي شافعة .. مالا ؟.. قالت ليهو عايزاك تمشي تخطبها البت دي عاجباني ..
قال ليها بس ياامي انا دي مابتنفع معاي.. انتي عارفة.. قالت ليهو عارفة بس انت بتقدر تعالج اي حاجة .. ماتعصى كلامي ..
البت بتسمع الكلام وبتحترمني ..
قال ليها يا امي الله يرضى عليك .. كدا بتدمري لي حياتي .. الاصلا هي مدمرة ..
قالت ليهو ابدا ما بتدمر ..انت مابتفهم اكتر من امك .. كان دايرني اموت بي حسرتي .. واكون مارضيانة منك .. كسر كلامي ..
.
قال ليها حاضر يا امي .. امرك منفذ.. بس المشكلة امشي اخطبها هسي كيف؟ وبي وين؟ . انتي عارفة الحالة النحن فيها .. والظروف المارين بيها ..
قالت ليهو بس خلاص ..بس توعدني يوم ظروفك تتصلح .. قال ليها بوعدك .. بس انتي هدي نفسك وارتاحي .. واعتبري الموضوع منتهي ..
قالت ليهو خلاص ياهو ده كلامي.. الدايرة اقولو ليك .. خلي عبدو واميمة يدخلو ..
لامن دخلو الاتنين ..لقو فارس ده مغموم ..وهم الدنيا كلو ظاهر فوق وشو ..
وقدر ماحاول يخفي شعورو ماقدر ..
عبدالرحمن واميمة حسو احساس ..انو الحجة اتكلمت عن الموت او بتوصي او شي من هذا القبيل ..
بس مابقدرو يسألو من الكلام ل..انو اساسا الحجة طلعتم برة ..
المهم عبدالرحمن قال لي فارس .. انا الليلة ماعايز اسوق معاي اميمة .. بخليها معاكم .. باخد قعدتي وبمشي ..
فارس قال ليهو خير كويس ..
وخيم الصمت دقايق على الجلوس.. والحاجة شكلها مرتاحة كدا لدرجة اخدت ليها نومة ..
وعبدالرحمن ودعهم وطلع .. واميمة طلعت معاهو لغاية الباب .. وبتقول ليهو .. خلي بالك من نفسك .. البشكير تحت الهدوم .. وصابونة الحمام بتلقاها في درج التوليت .. وفرشتك في الحتة الفلانية وكدا .. يعني .. المهم .. اميمة مراة من النوع الراقي ده ..
وجات راجعة لقت فارس متمحن.. وخاتي يديهو فوق راسو .. وامو نايمة قالت ليهو .. فارس تعال .. جاها قالت ليهو امي دي قالت ليك شنو .. خلتك مهموم كدا .. قال ليها والله كلام عادي ولاسري ولاشي .. بحكي ليك في وقت تاني .. هسي خليني ..
قالت ليهو خير ما مضايقاك ..
ومرت الايام وفارس ابدا ما اتكلم لي زول بي كلام امو ..
وامو اتحسنت غايتو شوية ..من الحالة الكانت عليها .. وهو تاني مافتح معاها الموضوع ..

يوم من الايام .. مسرة كانت بتكنس الصباح في المدرسة .. وعبدالرحمن جا بدري المدرسة .. الكلام ده تقريبا بعد اسبوع من كلام ام فارس ..ووصيتها ووعدو ليها ..
عبدالرحمن قال ليها يامسرة تعالي دايرك ..
انا قبل كدا سألتك من هبة ..قلت ليك مخطوبة ؟.. قلتي ما مخطوبة .. رايك شنو نحاول نعمل عملية كدا ..انتي بي دورك انتي وانا بي دوري .. ونشبكها في فارس ..
قالت ليهو والله يااستاذ هبة دي مافيها كلام .. ياسلاام علي استاذة هبة .. انا شغالة في المدرسة دي 12 سنة مالاقتني استاذة زي هبة .. وهبة يا استاذ . مارة حالة لايعلم بيها الا الله.. لكن بس زولة كتومة ومابتتكلم .. قال ليها مالا؟ عليك الله احكي لي .. لازم تحكي لي عشان ما نتصرف غلط .. قالت ليهو انا بكلمك انت بس.. لكن الله يخليك كلامي ده ماتمرقو لاي زول ..
حاصل حاصل حاصل .. حكت ليهو كل المأساة بتاعة هبة .. عبدالرحمن قال سبحان الله .. هبة العاملة فيها اسعد مخلوق في الدنيا .. اتاريها صابره فوق جمرا تهبو الريح ..
قال ليها بم انك انتي صاحبتها ..كدي اتكلمي معاها عن فارس شوفيها ....
مسرة قالت ليهو.. والله انا حسيت بيها بتتكلم عنو كتير ..يوم سألتها انا براي ..
قالت لي ((والله فارس اي واحدة في الدنيا تتمناهو .. لكن انا مابطولو ..عشان كدا مابعشم نفسي ساي .. يكون عندو واحدة مربط معاها .. وهو اساسا ماحصل يوم لمح لي بي حاجة .. ايوة بيني وبينو محبة واحترام .. لكن مافي شي من الحاجات دي .. ))

عبدو قال لمسرة .. ليها تماااام يا مسرة ..والله انتي الخير كلو بين ايديك اتصرفي ..
فارس ده خليهو علي انا .. والموضوع ده اعتبريهو منتهي .. فارس معجب بي هبه اعجاب شديد .. وماحيصدق الكلام ده .. انتي بس عليك انك تتكلمي معاها تحضر شعورها ..
قالت ليهو حاضر ياعبدالرحمن.. الله يقدرك ويقدرني على فعل الخير.. .. والله زي مااستاذ فارس موجعك .. انا برضو هبة دي قاطعة قلبي ..
وبقى عبدالرحمن بس داير فرصة في فارس ..
وقال انا اول حاجة لازم ازف ليهو خبر زواج سارة حسن ..عشان لو لسه مكتول فيها ..يزعل ويقبل طوالي بالموضوع ..
المهم في اخر اليوم ده زاتو .. سألو قال ليهو ..اها اميمة قالت الوالدة كيف.. ؟
فارس قال ليهو والله الحمد لله اليومين ديل افضل بكتير ..
قال ليهو يافارس ..طبعا غادة اختي لسع متواصلة مع سارة..
فارس قال ليهو سارة منو؟
قال ليهو ..الله ؟؟؟ .. لحقتا تنسى سارة حسن ؟
قال ليهو ياعبدالرحمن اخوي انا والله نفسي نسيتها .. ومخي دا عايز يطرشق ..
اها ان شاء الله خير . مالا سارة .. وعملت شنو؟
قال ليهو خطبوها ..وخطبها واحد رجل اعمال.. .وعرسها الشهر الجاي .. ولسه ماكملت الجامعة باقي ليها سنة ..
وحكا ليهو بعض التفاصيل الحكتها ليهو غاده .. انو امها بتكره فارس .. وانو اهلها ماديين ..فارس قعد يضحك .. وعبدالرحمن عايز يعمل مقدمة للموضوع العايز يفتحو .. على حساب سارة ..
المهم وصل ليهو خبر العرس وتأكيدو ..
فارس قال ليهو ماشاء الله والله ان شاء الله ربنا يسعدها واله خبر مفرح وفرحت ليها من جوة قلبي ..
اهم حاجة انها كملت دراستها عشان التعب التعبناهو معاها داك مايضيع ..
وتهائي ما اهتم بي قصة عرسها دي .. بس عبر عن فرحتو وخلاص ..والخطة بتاعة عبدالرحمن مانجحت يعني الموضوع ما زعله ماظاهر عليهو اي شي ..

قام عبدو بدون فواصل قال ليهو انت يافارس رايك شنو في استاذة هبة ..
قال ليهو كمان هبة فيها راي ؟؟.. دي الماس الما بتشقق .. والحلم الما بتحقق .. راي فيها هبة دي .. حظ البتكون هبة ست بيتو .. بس اكيد زول قروش وجيبو تقيل .. لكن انت عايز راي فيها لي شنو؟..
قال ليهو عايز اتكلم ليك معاها.. والله انا دايرها ليك ..
قال ليهو اسمع ياعبدالرحمن عشان اريحك من الموضوع .. انا هبة دي ما عايزها نهائي .. حتي لو هي عايزاني .. طبعا عشان وصية امو ..
قال ليهو بس ليه؟؟ وريني؟؟ .. هي لا مضايقاك في عرس ولاخطوبة وعارفة ظروفك .. وكل تفاصيلك ..
فارس قال ليهو لالا ماعشان كدا .. انا بس ماعايزها ..
قال ليهو طيب عشان شنو؟ احكي لي ماتفور دمي ..
قال ليهو لاني انا في راسي في واحدة وعايز اتزوجها هي وبس ..
عبدالرحمن قال ليهو متين انت بتسوي ليك حاجة ومابتكلمني؟؟
والله طلعت زول سجم ورماد .. والله تاني كان داير تموت مابكلمك بي حاجاتي .. كمان عامل فيها صاحبي.. بالمناسبة انت زول معقد وموهوم وماعندك موضوع .. وقام منو زعلان قرب يقول ليو انعل ابو اهلك زاتو هههه ..
قام داير سريع ماشي لي مسرة يكلمها يقول ليها ماتتكلمي مع هبة .. وبقى يجري جاي ويجري جاي زي المجنون .. ياناس مسرة وينها ؟..
في استاذ قال ليهو مسرة طلعت معاها استاذة هبة .. قبل ربع ساعة ..
شكلهم كدا مشو البيت خلاص.. ما اظنهم برجعو لانو هبة سلمتني . مفاتيح المكتب ..

اوو والله عبدالرحمن ده اتلخبط لخبطة.. وماعرف يعمل شنو ..
وراسو ضرب ضربة قوية خلاص ..
طبعا مسرة الليلة برضو قالت لي هبة انا سايقاك معاي البيت تتغدي معاي ..وعندي ليك بشارة ما ح تصدقيها ..
وركبت مشت معاها طيبة الاحامدة . اخر حاجة فكر فيها عبدالرحمن انو يتصل في تلفون هبة ..ويقول ليها اديني مسرة ..
عشان يقول ليها ماتكلميها .. لكن ياربي بحصلها قبل ماتقول ليها .؟؟

الى اللقاء

[لامارا]

الحلقة 25 .. قبل الاخيره ..

اتصل عبدالرحمن على هبة وهبة ردت .. الو يا استاذ قاليها وصلتو يا استاذة ؟ .. قالت ليهو لسه ..
قال ليها عليك الله اديني مسرة دي .. ادتها ليهو ..
قال ليها .. اسمعي يامسرة حكيتي لي هبة حاجة؟؟
قالت ليهو لسه والله .. قلتا لغاية ما أصل البيت ..
قال ليها الحمد لله .. ماتحكي ليها اي شي .. الموضوع فيهو مستجدات .. لمن تجي بحكي ليك ..
وجا راجع لي فارس .. قال ليهو انا اسف .. والله كوركت فيك.. لاني فقدتا اعصابي ..
قال ليهو ولايهمك.. انا عارفك انت شنو.. سيب الاعتذارات دي .. ما حقتنا ..
طيب انا أحكي ليك ياعبدو .. امي طلبت مني كيت كيت .. وقالت قالت .. وانا البت دي ماعايزها نهائئ .. ماعايز اقول ليك هي مالا.. بس مابتنفع معاي نهائي .. وامي مصرة عليها ..
وماعارف اعمل شنو؟ .. قال ليهو خلي الموضوع ده علي انا اخوك ات ..
المهم مرت الايام .. والايام في المدرسة جارة على قدم وساق ..
بعد ايام قليلة من الموضووع ده .. وعبدالرحمن طبعا" حكى لي اميمة الموضوع ..
اميمة قالت ليهو والله ناريمان دي اسوء انسانة .. انا بعرفها .. كل الصفات
الذميمة فيها .. بس امي مابتعرف عنها شي .. عشان كدا انا لازم افضحها لي امي واشوف ..
اها لامن اميمة جات اتكلمت مع امها .. امها قالت ليها انا عارفاهو فارس مابسكت على السر .. مشى كلمك طوالي ..
قالت ليها ايوة يكلمني يا امي انا اخته ..
يا امي البت دي بت تافهة وما بتستاهل فارس اخوي .. قالت ليها هوي يابت ماتتهمي البت بي كلام الناس حصل شفتي حاجة بي عينك ؟
قالت ليها الدنيا كلها عارفة يعني الا اشوفها انا .. ؟؟
حتي لو كدا ليه يا امي نحن ندبس لينا بت سمعتها ماكويسة وسط الناس في فارس اخوي حرام عليك يا امي ماتنتقمي من ولدك ..
حاجة علوية قالت ليها المشكلة .. انا وعدت امها .. هي قالت لي مناي فارس يعرس ناريمان .. وانا قلت ليها بعرس فارس ولدي لي ناريمان بتك .. وانتي عارفة سيدة سيدة صاحبتي وحبيبتي من زمن بعيد ..
قالت ليها يا امي سيدة زاتها مراة طماعة.. يتلقي خططت لي نص البيت ده الموحايق فينا ده .. وان شاء الله عمرك طويل .. عشان يبقى من نصيب بتها ..
عليك الله سيدة دي بتجينا غير ماتكون دايرة تشحدلها حاجة ؟.. انا ما موافقة غايتو يا امي ..
امها قالت ليها خلاص انا كلامي قلتو .. الشي البتبقو عليهو بعد انا اموت سووهو ..
اميمة قالت ليها ان شاء عمرك طويل يا امي . وسكتت ساي..
انتظرت عبدالرحمن وجا ساقها .. وخلت فارس مع امو .. وامو ماجابت ليهو اي سيرة من كلام اميمة ..
اها وكت اميمة وصلت البيت .. مع راجلها عبدالرحمن .. قالت ليهو نحن لازم نمنع الموضوع بتاع ناريمان ده.. في اسرع فرصة
وحكت ليهو النقاش الحصل بينها وبين امها ..
عبدالرحمن قال ليها اظبطي لي كباية قهوة .. وخليني ارسم ليك خطة جهنمية ..
المهم جابت ليهو القهوة .. وقعد يفهم فيها تعمل شنو .. وكرر ليها الكلام حتة حتة .. عشان ماتغلط ..
باكر طوالي اميمة لمن مشت البيت.. من الصباح لبست توبا وخفست على ناس سيدة .. وقالت لي ناريمان انا عايزاك في كلام مهم جدا جدا ..
ولي مصلحتك .. وتاني ماتلوميني ..
ناريمان قالت ليها مرحبا بالشمار.. واهل الشمار .. والليمون والشطة ..انا هسي بجي طايرة هوا وراك ..
خمس دقايق وجات لاحقاها ..قعدن برة في الحوش في ضل .. عشان حاجة علوية ماتسمع ..
اميمة قالت ليها ..اول حاجة تحلفي لي يمين مغلظ انو الكلام ده ماتمرقيهو ..لو مرقيتهو انا بسجمو رمادي ..
قالت ليها اقسم بالله انا ما امرق الكلام ده .. ولو مرقتو ان شاء الله سيدة تموت . سيدة امها ..
قالت ليها طبعا زي ماعارفة.. فارس اخوي نهائي ماعايز يتزوج .. ورافض الزواج .. لانه عيان ..ونحن ناس البيت ماعايزين نضغط عليهو ..عشان عارفين عياهو ..
قالت ليها عياهو شنو؟.. قالت ليها عندو ضعف .. فهمتي ؟؟
قالت ليها ايوة فهمت ..يالطيف ..ربنا يشوفو ..والله حكاية صعبة خلاص ..
اتاريهو فارس ده ..من زمان ماعندو علاقة مع البنات نهائي .. والله انا زاتي قلت كدا .. سبحان الله احساسي طلع في محلو ..
قالت ليها المشكلة الواقعة فيها انتي ..ماعارفاها شنو؟
قالت ليها انا؟؟ ..مالي انا كمان ؟؟
اميمة قالت ليها امك وامي.. اتفقو يعرسوهو ليك .. وهو قال مادام ناريمان عارفة مشكلتي .. انا ماعندي مشكلة بس بعدين ماتقعد تفنجط ....
قالت ليها انا اعرسو ؟؟.. ليه يا اختي انا بايرة ولا بايرة؟ ..
انا يمة عايزة لي راجل يمتعني ويرتعني.. واجيب منو الاولاد ..
مالي يا يمة بعرس لي راجل ناقص .؟؟
قالت ليها خلاص حصلي سريع ..الحقي المشكلة قبل الفاس ماتقع في الراس ..
غايتو البت مرقت زعلانة وتبرطع ..زي الفي زول تشاها بي جمرة .. وكلها ربع ساعة وجابت امها وجات .. دخلن علي حاجة علوية .
سيدة قالت ليها حجة علوية ..انا والله خجلانة من الكلام الدايرة اقولو ليك .. لكن البت المجنونة دي.. قالت لي انا لو خطبني فارس بنتحر.. وشالت الموس ..دايرة تقطع عروق ايدها ..
حاجة علوية قالت ليها .. اظنها بتحب ليها واحد .. خلاص خليناها يا سيدة ..ماتغصبيها على حاجة مي دايراها .. هو زاتو فارس مو رضيان .. مخيرين ..
واميمة تسمع قربت تاخد ليها زغروده ..
ولمن جا فارس امو كلمتو وموضوع ناريمان اتلاشى ..
بعد 9 يوم فقط من الموضوع ده ..
فارس كان في المدرسة.. واميمة مع امو في البيت.. اتصلت عليهو .. اميمة..
قالت ليهو ..فارس.. فارس .. تعال سريع يافارس.. امي دي ماعارفاها مالها .. اميمة حايفة ونفسها قايم ..
فارس ساق عبدالرحمن ..وجو البيت بي سرعة البرق.. لقو الحجة علوية ام فارس في سكرات الموت ..
وفارس حصل امو في اخر رمق.. علوية قالت ليهو يا فارس اثبت وابقى راجل .. الموت جا ياولدي ..
انا حاسة بي الروح مرقت من كرعي ..يافارس انا عافية منك ورضيانة عليك .. ان شاء الله ربي يسعدك ..

ودعت ليهو دعوتها المعروفة المكررة ..
وهي "ربي ينفعك بي ذريتك زي مانفعني بيك".. وبدت تقطّع ..كلمة تقولها وكلمة.. تروح ..اميمة انا عافية منك يابتي .. وبوصيك على عبدوولدي .. وبقت تقنت وتقطع.. فارس لقنها الشهادة .. وكان ثابت ثبات عجيب .. بس تشوفو تعاين لي عيونو حمر.. ومليانات دموع .. الحجة علوية روحها فاضت الله يرحمها ..
وفارس جرا فووق وشها التوب وقال ليها .. ود عتك الله ..يا اعزا ام في العالم .. ودعتك الله يا اماني المسافر ..
ارتاحت ام فارس ..من العذاب والالم الاستمر معاها قريب السبع سنوات ..
ان شاء الله ربنا يكفر ليها سيئاتها ..
المدرسة اجزت تلاتة ايام.. الاربعا والخميس والجمعة .. والاساتذة كلهم قاعدين مع فارس في العزا ..
والاستاذتين مفيدة وهبة.. برضو قاعدات مع اميمة.. وكانو معاها زي اخواتها .. وهبة دي وكت تشوف فارس من بعيد متأثر.. دموعها ينزلن بدون ماتشعر ..




إلى اللقاء.....

[لامارا]

الحلقة 26 .. الاخيرة ..


اها في اليوم التالت من البكا .. في شافع جا قال لي فارس في راجل ومرة ..بي عربية واقفين ليك في الشارع التاني.. قالو نادو لينا استاذ فارس ..
فارس لبس سفنجتو ..ولابس جلابية وطاقية ومشى عليهم .. نزل الولد السايق العربية ..ورفع معاهو الفاتحة .. والمراة لابسة توب ومتبلمة ..ومطلعة عيونا بس .. رفعت الفاتحة مع فارس .. فارس شاف يديها حمر شديد من اثر تكرار دخان الطلح ...وهي عادة سودانية للعروس . قالت ليهو ربنا يصبرك يا استاذ ويجعل البركة فيكم ..
فارس الصوت ماغريب علي .. لكن حياهو ماقدر يقول ليها انتي منو .. ياربي دي منو العروس الجاية تعزيني ؟
لكن الولد قال ليهو انا اسمي امين فلان فلان .. ودي زوجتي "سارة حسن" كانت طالبتك ..وقالت لازم تجي تعزيك ..وندعوك للمناسبة بتاعتنا ..
طوالي هي بدت تتكلم ..قالت ليهو نحن يا استاذ عقدنا الخميس الفات.. ومناسبتنا يوم الجمعة البعد الجاية .. ياريت تشرفنا ..
قال ليها ان شاء الله ياسارة ..مبروك الف مبروك .. ان شاء الله ربنا يسعدكم ويوفقكم .. فارس ده حس بي حيلو كلو مات .. وقلبو قعد ضرب ضرب عجيب ..
وماعرف السبب شنو ؟ مع انو نسى الشخصية دي نهائي .. المهم شكرهم ودعهم .. ولاحظ انو العريس ده بحترم سارة.. وبحبها لدرجة ..انو مشى بي غادي فتح ليها باب العربية .. وخلاها ركبت وقفلو . حتى جا ركب ودور ..
طبعا .. ده كان اول لقاء لي سارة وفارس من اربع سنين ..
سارة دي لامن شافت فارس قلبها شحه شحيح .. زي الكشحو فوقو رصاص مذاب .. قلبها بضرب اليوم داك لغاية بكرة .. لكن طبعا القدر فرقهم .. فرقهم المرة دي الى الابد .. و الحب الخجول اتنفذ فيهو حكم الاعدام .. الحكمو عليهو فارس قبل اربعة سنوات ..
لي حكمة يعلمها الله ..
طبعا بعد كم يوم ..فارس مشى عرض نص البيت ده للبيع .. وباعو بي سعر كويس شديد ..
لانو كان في حي غالي شديد في بحري .. والبيت ضيق .. فهو عايز يدي اميمة حقها .. بس اميمة فاجأته بي ورقة تنازل من المحكمة .. و مشى اشترى بيت في الكدرو ..قريب لناس عبدالرحمن ..وفاتح في الزلط ..وفيهو تلاتة دكاكين .. اتنين اجرهم ..واحد استلمو براهو .. خت فيهو طربيزة فاضية .. وجاب لافتة مكتوب عليها فارس للxxxxات .. وقعد فيهو اخو عبدالرحمن الاصغر اسمو "جمال . .. "وامورو مشت زي الباسطة ..
في وقت الترتيبات دي .. ساره كان عرست ..ومشت شهر العسل في القاهرة .. وطبعا فارس ماقدر يمشي المناسبة .. ماعارف ليه ؟
وماوضح السبب .. ولاحكى لي عبدالرحمن .. جية سارة للتعزية ..
المهم ..
بعد مارتب امورو تمام .. يوم كانو قاعدين هو وعبدالرحمن ..في المكتب .. قال ليهو يا عبدو اها انا جاهز ..والليلة بتكلم مع هبوية الغالية .. وماعايزك تتحشر في اي موضوع تفشلو علي هههه ..
قول ان شاء الله ربنا يسهل ..
عبدو قال ليهو.. والله انا بسأل في ربنا كل يوم ..البت دي ما تطير منك ..
قال ليهو خلاص اطلع لي برة وناديها لي ..
وفارس طبعا موعارف انو عبدالرحمن هو السبب .. في تنازل امو من ناريمان بي سبب خطته هو واميمة ..
المهم طلع عبدالرحمن مشى مكتب المعلمين .. لقاها شايلة كراس التحضير.. وماشة الفصل .. قال ليها سيبي اي حاجة في يدك .. واديني الكراس ده المدير عايزك ..
انا بمشي بديهم الحصة بدلك ..
مشت هبة لي فارس في المكتب ..
قال ليها هبة كيف حالك؟ .. هبه انا والله ماعارف ابدا ليك من وين ..
انا ياهبة معجب بيك فوق حد التصور.. وبحب اي طبعة فيك .. وكل حياتك وكل تفاصيلك ..
قالت ليهو ده كلو يا استاذ؟؟ انا الليلة يوم سعدي ..كوني اسمع الكلام ده من المدير .. بس دي واجباتي يا استاذ ..
قال ليها ابدا انتي انسانة عندك ضمير.. وروح اكبر من الزول يستوعبا .. المهم ياهبة ..انا عايزك تكوني شريكة حياتي.. بدون اي مقدمات كتيرة .. رايك شنو ؟؟
قالت ليهو .. انا؟؟؟ معقول يا فارس ؟؟ اصلو ماقدرة اصدق ..
كدي دقيقة اقرص يدي ..
قال ليها اي والله.. يا ما اتمنيتك وكنت خايف افقدك .. بس ماعارف ظروفك الاسرية شنو ؟ وهل حيقبلو بي ولا لا ؟؟
هبة دي قعدت تبكي وتنتحب . الدمعة دي تنزل فوق خدها زي قطرة الندى السايلة في صفحة الوردة .. وبكاها زاد لامن فارس قام قفل باب المكتب عشان مافي زول يسمعها ..
قال ليها هبة ؟ ياهبة بتبكي ليه ؟؟ في مشكلة ؟؟
قالت ليهو ببكي من الفرحة يا فارس ..والله انا في اي لحظة من حياتي بتخيلك ..انت ملاذي الوحيد .. واماني البفتش عليهو عمري كلو .. وحاسة بي مشاعرك تجاهي.. وفي كل صلاة بدعي بقول ياربي فارس ده يفتح خشمو يقول لي حاجة . واقعد ابكي .. غايتو دعيت جنس دعا لو دعيتو لي فلسطين كانت اتحررت ..
بس الحمد لله ربنا ستجاب لي .. وماتشيل هم من ناحية اسرتي ده موضوع في يدي ان شاء الله ..

والليلة هبوية ح تكلم امها بالبشارة الح تكون بالنسبة ليها فرج الله القريب ..من العذاب الاتعذبتو كل عمرها ..
نخليها ونمشي ..نسافر لي سارة وامين في مصر .. كانت اسعد ايام حياتها ..
سارة رغم انها في الايام الاوائل كانت حاسة انو الشخص ده.. مابناسبها لكن سبحان الله امين حباها حب المخلصين .. ودفع الغالي والنفيس لي امها عشان ترضى عليهو وتحبو ..
وكل يوم ماشي متحسن للاحسن .. وهي ابدأت تحبو ..وتتمدد خلايا حب امين .على حساب الحب الخجول الهالك ..
بس في يوم من الايام ..في شهر العسل ..سارة جاها مغص شديد .. لدرجة ماقدرت تستحمله ..
وامين اتدربك دربكة شديدة خلاص .. وختفها على المستشفى بالليل داك.. رغم انها هي كانت بتقول ليهو المغص ده كل شهر بجيني بالطريقة دي ..
بس المرة دي شديد .. قاليها لازم نشوف اسبابو ..
باختصار الطبيب قال ليهو ..البت دي كانت عندها التهابات حادة ..في تجويف الرحم بي سبب الختان .. والالتهابات المتكررة ..سببت تيبس في الرحم ..
يعني باختصار مافي امل بنسبة 1% انها تنجب .. ولازم تعمل عملية استئصال للرحم عاجلا او آجلا .. عشان مايسبب ليها مشاكل تانية خطرة على حياتها ..
.
وطبعا الخبر وقع متل الصاقعة على امين وسارة ..
وهنا ..في الوقت ده ..انا يادوب عرفتا سبب فشل العلاقة بين سارة وفارس .. وسبب هلاك الحب الخجول ..
ماكان هو فرق السن . ولا لانو هو استاذها وهي طالبتو ..
ولا السبب هو طمع امها وكراهيتها لي فارس .. ولا ابوها الكان بشوف علاقة الاستاذ باالطالبة علاقة قرف ..
دي كلها كانت اسباب فرعية ..
السبب الرئيسي . انو فارس امو داعية ليهو بالذرية الصالحة ..
وسارة ربنا سبحانه وتعالى ماقاسم ليها ذرية .
عشان كدا مستحيل يلتقو الاتنين ..
وسارة قالت لي امين تختار واحدة في اتنين يا امين ..
يا اما تطلقني ..ي اما تتزوج واحدة تاني تجيب ليك اولاد ..
امين قال ليها اقسم بالله لا اتزوج عليك ولا اطلقك .. وانا عايزك انتي وبس .. وماعايز اي جنى ولاذرية ..
انتي بتي وانتي ولدي وانتي حياتي .. واتعاهدو الاتنين انهم يكتمو الكلام ده .. ومايكلمو اهلهم بيهو نهائي .. لكن في النهاية الخبر طلع .. من سارة لي امها ..
وهنا كلامنا عن سارة انتهى .. ربنا يصبرها ويعوضها الصبر .. وكتير زي سارة .. كانو ضحايا العادات السيئة في بلدي .. "ختان الاناث" .. الذي قتل ومازال يقتل اخواتنا وامهاتنا ..
فارس حدد زواجه من هبة .. وكان زواج يسير وطيب ومبارك ..
في اوائل عام 2013 .. وقمة في التواضع ..
وام هبة حبت فارس واحتضنته بي حب الام .. وعاش في سعادة ماكان يحلم بها مع هبوية ..
والان فارس عندو طفل واحد من هبة عمرو تلاتة شهور اسمو (عبدالمنعم) وساكنين الكدرو .. واميمة يادوب حامل في الشهر السابع ..اها يوم ناريمان جات زيارة لي اميمة في الكدرو قالت ليها .. انتي زمان موش قلتي لي فارس كداكدا . بتكضبي علي يعني ؟ يهدا جاب ليهو ولد حلاااتو ...
اميمة قالت ليها سبحان الله ..ربنا قادر على كل شي .. ههه




وكانت هذه قصة الحب الخجول ..
لكم التحية والاجلال ..
واشكركم على حسن المتابعة والتفاعل ..
كتبها طارق اللبيب
ديسمبر 2014

[فيتامين سي]

[شموخ البدر السعد]

الاوضة ..
وبقت تفتش بي دقة شديدة .. وقلبت الكتب والدفاتر.. الفي طربيزة المذاكرة ..دفتر دفتر ..
وجرّت الكرسي ..وطلعت فوق تعاين فوق راس الدولاب ..ولقت مفتاح الدولاب .شالتو ونزلت .. وفتحت الدولاب ..