القنديل لـلكاتب/ طارق اللبيب ، سودانية (مكتملة )

[فيتامين سي]

الحلقة 10 ..
بقلم طارق اللبيب ...

قلت لي خالد .. هم يتخيلي ساكنين في (العايدين) صاح ؟؟ قال لي نعم .. قلت ليهو بس وصف لي البيت بي دقة .. وانا بمشي ليهم براي .. خالد قعد يعاين لي كداا .. وشكلو بفكر في حاجة .. وابوهو لبس نعلاتو وقام دخل لاجو.. على بيت الحريم ..
انا قلت لي خالد .. ياخالد في شنو بالضبط؟.. انا شايفك من انا قلت ماشي لي ناس عمي.. انت قلقت قلق واضح ..
قال لي ابدا مافي حاجة .. بس انت خليني امشي معاك .. قلت ليهو انا مصر امشي براي.. انت لو خايف علي منهم.. انا ماخايف الا من الله الخلقني .. شايفك بتعاين لي.. زي التقول انا ماشين يشنقوني .. نظراتك بتقول كدي .. قال لي بصراحة يا قنديل.. ناس عمك ديل ناس سيئين بمعني الكلمة .. وانا مابستبعد يضروك باي سبيل.. انت شكلك ماعارف الحاصل في الاسرة دي .. ياخي ديل ناس بكرهوكم كراهية غريبة .. انا بس ماداير احكي ليك الحاصل شنو .. لكن ابوي ذاتو شكلو فاهم الصورة ناقصة ..
طبعا انا ابدا ماخايف من المشوار ده.. لكن نظرات خالد وكلامو.. بدل على انو انسان شفوق ورائع بمعني الكلمة .. والحاجة دي زادت قيمتو جواي والله ..
وفي نفس اليوم بالليل.. اتونسنا انا وخالد كتير شديد .. وطلعنا كدا لي شربنا قهوة .. وحكى لي جنس حاجات عن ناس عمي حسين .. غايتو حاجات غريبة وعجيبة ..
منها قصة حصلت ليهو شخصيا .. قبل ما يتزوج مرتو دي الهسع معاهو دي .. قال لي . انا كنت اصلا داير اخلاص بت حسين .. وابوي نفسو انا اتزوج من اعمامي .. عشان يزيد الرباط بين الاسر .. اصلا انت شايف ابوي بحب انو الناس تتواصل.. وبكره الجفاء والعداوة ..
اها يازول ابوي قال لي انا بمشي اخطب ليك بت عمك الحسين .. وان شاء الله بس قول يدوني ليها.. لاني عارف مراتو بتكره اهل ابوي كلهم .. بس اخلاص بتها ما زيها مختلفة شديد .. وحتي كانت اخلاص بتقول لي .. عليك الله ياخالد حاول اعمل اي حاجة.. طلعني من جو الناس ديل .. الناس ديل منم . اتخيل !!
امها وابوها واخوانها ..
اها فعلا ابوي مشى ليهم في البيت .. وطلب منهم اخلاص .. واخلاص اليوم داك كان اكبر فرحة ليها في حياتها .. بس امها دقت جرس كبير .. وقالت لابوها .. لو البت دي اديتها خالد ود يوسف.. انا تطلقني طوالي ..
قال ليها يهوداك بيت اهلك .. كان ماعجبك الباب يفوت جمل .. قالت ليهو كان خالد يمسك يدها .. انا اكون بياعة مريسة ..
المهم ابوها مضاها لينا ووافق .. ونحن بدينا نجهز في امورنا .. بس بعد اسبوع عمك جانا في البيت .. وقال ياجماعة انا عايزكم تعفوني من الموضوع ده .. انا الموضوع ده مامرتاح ليهو .. وكل يوم بشوف لي حلم اسوء من القبليهو ..
ابوي قال ليهو ياحسين.. ده حلم ولا دي اوامر مريم بت جعفر؟ ...
مريم دي ياها مراة عمك حسين ووالدة اخلاص .. الغريبة في نفس اليوم الجا ابوها قال لينا الكلام ده .. اخلاص اتغيرت معاي 180 درجة .. وبقت ماطايقة مني كلمة .. وقالت لي انت كاتم على نفسي.. وانا مضايقة حتى من ذكرة اسمك .. اول مرة اسمع منها كلمة اقطع وشك ..
وقالت لي اهل ابوي ديل اسوء نأس في الكون .. نفس الكلام البتقولو امها كل مرة .. المهم ببساطة الموضوع انتهى .. ومريم نفذت وعدها القالتو لي عمك .. وانا عانيت كتير عشان اتحلحل من قيد الاهانة .. والحمد لله بعد شهرين من الكلام ده.. ربنا قسم لي ام اولادي دي .. والحمد لله انو ربنا مارماني في اخلاص ومريم .. ياخي والله انا الله بريدني .. زوجتي دي مراة صالحة.. واهلها ناس اصول .. باختصار يا قنديل نحن ماعندنا اهل .. ولو الزول ممكن يبدل اهلو ويختار غيرهم.. انا واحد من الناس كان بدلت قبيلتي كلها خلي الاسرة .. لكن والله انا من شفتك .. حسيت انك انت مختلف ..
انا قلت ليهو طيب ياخالد .. انا عندي ليك سؤال .. حول القصة بتاعة خطوبتك لي اخلاص بت حسين .. ماعرفت كيف مريم قدرت حولت المعركة لصالحها .. وقلبت النتيجة.. وخلت حسين وبتو يمشو بي رايها؟
قال لي والله ياقنديل .. نحن متأكدين .. موش شك ولاظن.. انو مريم زولة بتاعة فقرا .. وبتحب الدجالين.. والمشعوذين زي عيونها .. وجنها الحاجات دي.. وماعندها ونسة غير كدا .. فانا يتخيل لي المراة دي مشت عملت ليها سحر.. ولا مصيبة عشان تقلب الصينية فوق راسي انا وابوي .. والحمد لله الحصل كدا ..
عارفين ياجماعة .. طبعا انا ماكنت بتوقع حاجات زي دي في الدنيا ..
لكن الحمد لله كل شوية.. انا بتضح لي انو ابوي على حق .. يعني لو كلام خالد ده حقيقي .. يبقى ابوي ما غلطان.. لو قاطع النوعية دي من البشر ..
صبحت الواطة.. وانا متردد ياربي امشي ولا ما امشي .. في النهاية استقر بي الراي اني امشي . واستحمل النتيجة ..
ومشيت العايدين .. وصلت البيت على حسب الوصف .. زي الساعة 10 ونص ..
طبعا خالد البارح وراني الصورة بالكامل.. انو عمي حسين عندو بقالة في البيت ..وانا من بداية الشارع بعاين لي باب البقالة فاتح .. البقالة فاتحة في شارع كبير .. وبالاحرى كدا فاتحة ناصية في شارعين موقع مبالغة .. والحي ذاتو الحتة دي راقية ..
وصلت .. انا كنت لابس لي بنطلون كحلي.. وقميص سماوي .. اكمامو طويلة .. وجزمة سوداء . يعني قاشر قشرة مزبوطة .. ومتريح بي ريحة اسمها بوس boss بحبها جدا.. حاسي شوارع كوستي دي كلها شامة ريحتي .. واي زول يشوفني بعاين لي كدا حاسي غايتو
المهم يازول.. وصلت لقيت ليك عمي حسين قاعد .. مامعاهو زباين خاتي ليهو كرسي في نص البقالة .. وماسك ليهو مصحف وبقرا ..
اول ماشافني مفتكرني انا زول جاي للدكان اشتري .. وقف على حيلو ..
وقال لي مرحب .. اتفضل ؟ عايز حاجة؟
قلت ليهو ابدا ماعايز حاجة من الدكان .. انا زول ضيف ..
قال لي اتفضل .. طيب تعال بالباب التاني داك ..
وقفل باب البقالة من جوة .. قفل باب الدرابزين .. وخلا الباب بتاع الحديد فاتح.. ودخل بي باب سري صغير كدا من البقالة للبيت .. وفتح لي الديوان .. ودخل جوة جاب لي موية ..
واصلو ماركز في وشي .. بس خت لي الموية ودخل راجع .. بعد ماجا قعد شوية كدا .. وقال لي حبابك والله .. انا وشك ده ابدا ماغريب علي .. قلت ليهو ياعمي الحسين انا قنديل ود اخوك التوم ..
والله الزول ده ارتبك ارتباك .. وماقدر يقول اي كلمة .. والتعابير فوق وشو ماقدرت افسرها .. ظهر عليهو خوف .. وفرح .. وشوق .. وغضب .. كلها في ان واحد .. يعني الزول ده عاين لي كدا بكل فرحة .. وقام وقف .. وصر وشو.. وطير عيونو .. وقعد يتنهر ..
واتنفخ نفحة كديس زارنو بس .؟ انت الوصف ليك بيتي ده منو؟ والقال منو انا عمك ؟ والقالك منو انو ابوك اخوي؟ .. انا اخوي بابكر ومات ..
لو سمحت اطلع من بيتي ده ..
انا طبعا" حسيت بانو في نار ولعت في قلبي .. الزول ده لو ماكان عمي.. كان كشيتو بالطربيزة القدامي دي .. قلت ليهو والله لو كتلتني مابطلع .. انا مشتاق ليك انت عمي .. وانت ذاتك مشتاق لي .. انا لحمك ودمك.. كيف يعني تطردني من بيتك؟ .. انا جاييك من اخر البلد .. حتى ابوي ماعارف جيتي ليك دي.. ولو عرفها ماعارف البحصل علي شنو؟
قال لي يازول الله يرضى عليك .. اطلع امشي محل ماجيت .. انا اولادي ديل لو جو لقوك هنا .. ما عارف البحصل شنو؟
قلت ليهو ياعمي.. انت اولادك مابتقدر عليهم ؟ خليهم يجو ان شاء الله مايحصل الا الخير .. الشي الانا حسيتو انو عمي شخصيا .. ماعندو مانع من وجودي بل بالعكس فرح بي جدا .. لكن في خوف جواهو .. من شنو ماعارف.. يا خايف من مراتو .. يا خايف من اولادو .. وهسي صرررح عديل ..
انا طبعا عايز اغتنم الفرصة دي انو براهو .. وأعرف منو سبب المشكلة البينو وبين ابوي ..
قلت ليهو ياعمي حسين.. الله يرضى عليك انا عايز اسألك سؤال واحد .. لو جاوبتني .. طوالي بطلع .. والله تاني وشي ماتشوفو ..
قال لي سؤالك شنو؟؟؟ .. قول بجاوب ليك وتطلع طوالي .. قلت ليهو ياعمي حسين.. دام انت وابوي اخوان شققا .. وتيمان كمان .. كيف يحصل بينكم الحاصل ده .. وتتقاطعو بالسنين الطوال؟
انا عايز اعرف السبب في المشكلة دي شنو؟
قال لي ابوك مالو ما وراك ؟.. قلت ليهو. ابوي بقول لي دي مشاكل ورثة ..
قال لي ورثة ؟؟ ابوك عشان عارف نفسو ماعندو لسان يحكي ليك الحقيقة .. يقول ليك ورثة.. ورثة كيف والمشكلة حاصلة قبل وفاة ابوي بي سنة وشوية .. ورثة كيف وريني ؟؟ ..
انا ياجماعة صراحة شلت هم عديل والله .. شكلو ابوي ده عامل ليهو جريمة ماساهلة .. وعمي ده شكلو زول متدين يهودا لقيتو يقرا في القران .. وشخصيتو مختلفة من الشخصية الرسمها لي خالد .. يعني عمي ده مستحيل يكون بتبلى على ابوي بالكضب ..
وشكلو زول بسيط ومسالم .. انا عايز اعرف سبب المشكلة البينو وبين ابوي .. وخايف من مواجهة حقيقة ابوي.. انتو قادرين تفهمو احساسي؟
بس اصريت على عمي انو يكلمني.. وهو رافض قال لي .. والله لو انطبقت السماء والارض .. العملو ابوك انا ما بنضم بيهو .. امشي ارجع ليهو هو خليهو يكلمك ..
ابوك نحن نفضناهو من نصنا .. لا انا لا ابوي لا اخواني .. انتهينا منو .. ابوهو لامن مات مو رضيان منو .. واخوهو بابكر مقاطعو
لامن مات .. وهم كلهم ماتو بالمغسة على ابوك .. دايرني اجي انفش انا واقولك؟
امشي خليهو يكلمك هو .. لو عندو الشجاعة ..
..
الى اللقاء

[فيتامين سي]

الحلقة 11 ..
بقلم طارق اللبيب ...

انا قلت ليهو اسمع ياعمي حسين.. انت لو ما حكيت لي انا ما ح امشي منك .. خلي اليحصل يحصل .. انا ما خايف ..مادام انتو برفضو الضيف .. وبتعادو انسان ماعندو اي ذنب .. فرضنا ابوي .. انا عملت شنو؟ وليه ترفضني؟ ..
قال لي كويس خليك قاعد ..وارجا النتيجة انا عندي ولدين .. شفاتة ومتلقين حجج . وبفتشو للمشاكل فتاشة .. قلت ليهو حبابهم عشرة ..انا ما ماشي .. الا تحكي لي الحصل بينك وبين ابوي .. وصوتنا ارتفع .. اظن مرتو جوة سمعت الصوت ..جات فتحت الباب البدخل من الديوان لي البيت الداخلي.. لابسة توب ..
زولة قيافة كدا .. وقفتها ذاتها بي فهم . نعم كبيرة لكن زولة مهتمة بي روحا .. وشكلها مراة متجيهة ..
قالت ليهو في شنو ياحسين؟
قال ليها مافي حاجة زول ضيف .. انا نطيت قلت ليها اهلا بيك يا خالة.. انا ماضيف انا سيد بيت .. انا قنديل و التوم ..
قالت لي اهلا اهلا بي قنديل .. كيف احوالك ..وامك وابوك واخوانك . ان شاء الله طيبين .. والله سلمت علي ورحبت بي احسن ترحيب .. قالت لي .انا سامعة حسين بقول ليك امشي تعال لينا وقت تاني ..
في شنو ياحسين؟ .. وقنديل ذنبو شنو في مشاكلكم انت واخوك؟ اسمع ياقنديل ياولدي .. البيت بيتك.. كان ماشالك البيت.. يشيلك الراس .. قام عمي قعد يعاين ليها كدا باستغراب .. والعين دي انا عملت عليها علامات استفهام من هنا للخرطوم ..
وطوالي قام دخل على الدكان.. خلاني قاعد والمراة واقفة .. وهي تعاين ليهو لامن دخل الدكان .. جات ماشة علي .. وقعدت فوق طرف السرير .. وقالت لي عارف ياقنديل عمك ده . قدر ماتحنسو عشان يوريك المشكلة بينو وبين اخوه ..مابوريك ليها .. لكن لوانت بقيت زول بتحفظ السر .. بكلمك . قلت ليها سرك في بير قولي .. قالت لي .المشكلة كلها فتنة من عمك يوسف .. النزلت عندو ..
قلت ليها القال ليك منو نزلت مع عمي يوسف؟ ..
قالت لي في خبر بندس يا قنديل؟ .. وشنطتك وينا طيب؟ .. ان شاء الله حوش البقر ينباع .. والله انا قربت اقوم جاري من محلي .. ياربي ده شنو الحاصل ده؟ .. المراة دي اظنها عنها شواطين ..
قلت ليها .. طيب طيب .. ياخالة كيف الفتنة حصلت؟ والحصل شنو بالضبط؟ . قالت لي ابوك ما غلطان في اي حاجة.. بس عمك ده بسمع كلام الناس .. وابوهو الله يرحمو زيو واحد .. المهم عمك يوسف الله ينتقم منو .. قدر يقنعهم بي انو ابوك اسوء زول في الدنيا .. في مشكلة معينة كدا ..
وهم معاهدين يوسف فوق المصحف انهم مايتكلمو بالمشكلة .. اظنها مشكلة بتاعة تزوير في املاك جدك تزوير بملايين في الزمن داك .. لكن الموت حار مابعرفها .. كلامي ده اوعك تمرقو لي زول ..
قلت ليها طيب قصة التزوير دي كاتمنها ليه؟ يعني المانع شنو يتكلمو بيها؟؟ ماعادي الدنيا كلها بتزور .. شنو يعني؟؟ في النهاية يتعاقب الظالم.. والحقوق ترجع لاصحابها ..
قالت لي هوي اوعك تتكلم انا وثقت فيك.. وحكيت ليك لو نضمت بالموضوع ده انا ما بريحك ..
انا طبعا ضحكت .. قلت ليها مابتريحني كيف يعني؟؟ ح تعملي لي شنو مثلا؟؟ .. انتي قايلة انا بخاف من تهديد الحروم؟ والله كمان ما اسكت .. لازم اتقصى من الحقايق .. لانو قصتك دي مامنطقية .. مادام ابوي سارق ومزور في الحقوق .. كيف يطلعو ليهو حوش البقر في حقو؟
قالت لي ايوة قالو ابوك ظالم وخلوهو لي الله.. لكن مابياكلو حقو .. المهم ياقنديل.. انا القصة مافاهماها كويس.. انت عارف اهلك مابدخلو النسوان في مشاكلهم .. بس الشي المتأكدة منو انو الثعبان السام في المشكلة دي . عمك يوسف .. وانا خايفة عليك من قعدتك معاهو ..
انا قلت ليها خير ياخالة المهم هسي انا بمشي لكن .. حتما ح اجيكم راجع .. ومابنقطع منكم .. ولو ابوي شايل منكم حق انا البرجعو ليكم ..
طلعت طوالي ولا وعت عمي .. مرقت بالشارع وراسي ده ملان ملي عجيب .. والله وصلت اخر الشارع واللاقاني في الشارع شنو ماعارف .. بس غاطس في التفكير .. لقيت نفسي واقف في اخر الشارع .. في اللحظة دي جاني تلفون من يعقوب ..
الو السلام عليكم .. الكلام ده قريب صلاة الضهر .. وانا طلعت من بيت ناس يوسف بلا فطور .. وناس عمي حسين غير الموية تاني يسمني ..
يعقوب بسأل من اخباري وقال لي المكان فاقدك .. وعمك شاذلي بسأل منك .. قلت ليهو الشغل ماشي كيف .؟ ومافي زول جا سأل مني .. قررقررقرر .. فقعها ضحكة وقال لي مافي اي زول متذكرك اصلا الا نحن ..
قلت ليهو بكرة العرس .. انت عندك خبر .. ضحك قال لي دي المرة الرابعة تكلمني بي العرس .. ياخي ما تقنع شوية انت مالك زول لايوق كدي؟ ..
قلت ليهو عاد كان قنعنا ولا ما قنعنا .. ياهو الحاصل والواقع المفروض نستسلم ..
عليك الله .. سلم علي عمك شادلي وباقي الجماعة .. انا والله الليلة يادوب ماشي اشوف موضوعي الجيت ليهو ..
مع السلامة مع السلامة ومشيت على السوق جوة لفيت وضربت سمك شبعت تب وشربتا شاي .. وبعاين في البلد العزيزة على قلبي .. واخدت لي قعدة كدا ومشيت على خالد في دكان الجملة بتاع ابوهو .. طبعا زي ماحكيت ليكم قبل كدا ابوهو عندو كم دكان بتاع جملة اها واحد فيهن قاعد فيهو خالد .. وسايق عربية كرولا .. ومرتاح ماشاء الله ومنغنغ ..
مشيت ليهو هناك وقعدنا اتونسنا شوية قال لي زي الساعة 4 بنقفل
نجيب ليك شنو؟ قلت ليهو انا هسع شربت الشاي ماتجيب لي اي شي ..
قال لي اها احكي لي الحصل شنو والله انا هسع تكون جيت مفلق .. قعدت اعاين لي راسك نعلو مو مضروب .. قلت ليهو ياخي انت خوفتني ساي الناس ديل ناس مساكين الله والرسول الراجل على مراتو ..
قال لي مالقيت حمزة وماهر ؟ قلت ليهو لالا ولا سألت منهم .. قال لي ديل لو لقوك قاعد كانو عبو معاك مشكلة .. لانهم قالو مرة مسافرين لي عمهم في الخرطوم يدقوهو ويجو .الا ابوهم حلف عليهم وختا ليهم عدم العفو ..
قلت ليهو عمهم منو الماشين يدقوهو ؟؟ اوع يكون ابوي ؟
قال لي ايوة ابوك .. قلت ليهو والله يجو حايمين بي جيهة ابوي بي غادي الا ارسلهم ليكم في صفحة طحنية .. انت ماياكا؟ .. كل شي ولازول يرفع عينو على ابوي .. قال لي انت هسي مشيتك دي ماعرفت المشكلة سببها شنو ؟ قلت ليهو والله للاسف ماعرفت اي حاجة ..
لكن المراة دي قالت لي كلام ماعارفها صادقة ولا كذابة .. قالت المشكلة في تزورير ممتلكات جدي؟
قال لي والله برضو احتمال يا قنديل طيب نسأل ابوي من الموضوع ده ..
قلت ليهو .. لكن المراة دي اخدت مني عهد اني ما اتكلم .. وفي النهاية هددتني .. وقالت لي لو نضمت انا مابريحك .. وانا والله ما اسكت النشوفها دايرة تسوي لي شنو؟
قال لي يا قنديل المراة دي مرة فقراء .. وقالو هي العملت العمل لي عمك بابكر ومرضتو لامن مات ..
قلت ليهو ماني خايف منها .. اتحداها واتحدا قبيلتها كلها .. كمان قنديل بخاف من دجل الحريم؟ .. لكن يا خالد في حاجة داير اسألك منها .. المراة دي الكلمها منو؟ اني انا نازل عندكم وجاي لي بيعة حوش البقر .. لقيتها عندها خبر بالموضوع ده ..
خالد قال لي لا اله الا الله .. والله غايتو سناء دي الحبة في خشمها ماتنبل. انت عارف امبارح انا وابوي بنتكلم في الموضوع ده وخايفنها تسمع لانها متواصلة مع اخلاص .. وبتوصل ليها اي خبر..
سناء اختي يا قنديل زولة مبلية بالقوالة ونقل الاخبار .. لو سمعت ليها كلام وما اتكلمت بيهو بتعيا عديل .. غايتو البت دي ماعرفنا نعمل معاها شنو؟؟
انا شلت نفسي وختيتو .. وجواي قلت خسارة السماحة ياسنوية .. غايتو الحمد لله .. غايتو الله غالب .
اها يا زول قال لي بعدين نمشي البيت ونسأل ابوي من حكاية التزوير دي .. والله انا ذاتي نفسي اعرف الموضوع ده .. لكن مايتخيلي .. لانو لو هو تزوير وماتزوير . ليه ما بتكلمو بيهو . ومابسمحو لاي زول يتدخل فيهو ..
قلت ليهو انا ذاتي قلت كدا بعدين كونوا ابوي زور اوراق وشال حقوق المفروض يخلصوها من ورثتو في حق ابوهو موش يدوهو حوش البقر ال بالملايين ..
المهم يازول خالد شكلو اتلخبط اكتر مني .. وبرضو الحكاية بتاعة مريم ماركبت ليهو في راسو ..
لغاية ما ركبنا ومشينا غشينا ابوهو في الدكان التاني .. وركبنا الاربعة وجينا .. معانا محمد راجل اشراقة بت يوسف الكبيرة .. لكن خطيب سنوية الليلة ما معاهم ..
طبعا ماقدرنا نتكلم قدام الزول الغريب .. لامن وصلنا البيت واتغدينا فضلة خيركم .. وشربنا الشاي .. ومحمد راجل اشراقه دخل على بيتو.. الظاهر صاحبنا ده ساكن مع نسابتو هنا .. الله يديهو العافية .. لكن انا شخصيا مستحيل اسكن مع نسابتي .. ولابسكّن مرتي في بيت امي .. لازم يكون عندي كينونتي الخاصة .. ومرتي تحس بانها ملكة في بيتها وحياتها .. لكن صاحبي ده شكلو مستسلم تب عفيت منك آجنا ..
اها يازول بعد دخل لاجوة .. لقينا فرصة في عمي يوسف انا وخالد .. قعدنا وطبعا عمي يوسف طيلة الرحلة مأسألني قدام نسيبو .. من مشواري الحصل فيهو شنو؟ ولا انا جبت ليهو سيرة ..
هو خاتيها لي وانا خاتيها ليهو ..
الى اللقاء ..

[فيتامين سي]

الحلقة 12 ..
بقلم طارق اللبيب ...

طبعا قعدنا انا وخالد ود عم يوسف.. قدام يوسف ابوهو .. والحتة فاضية.. والفرصة مؤاتية انو الكلام يتقال .. قام هو طوالي بدا لي بالسؤال .. أها ياقنديل بشر .. ان شاء الله مشيت ناس عمك..
قلت ليهو اي والله مشيت .. وعمي استقبلني كويس .. واكرمني اكرام شديد .. وانا سألتو من سبب المشكلة البينو وبين ابوي .. وهو رفض يتكلم كلو كلو .. لكن مراتو خالتي مريم .. شعرت بوجودي وجات سلمت علي ورحبت بي.. وحكت لي القصة الحاصلة ..
طوالي عمي يوسف قاطعني .. يهز في راسو .. لاحول ولاقوة الا بالله .. هسع تكون نسجت ليك فيلم من الخيال.. ولقت فرصتها فيك ..
اها حكت ليك قالت ليك القصة الحاصلة شنو؟ قلت ليهو .. والله ياعمي يوسف قالت المشكلة فتنة من زول .. ماخد عليهم عهد انهم مايجيبو سيرة لانسان .. وانو ابوي مزور في املاك جدي..
عمي قال لي والله غايتو المراة دي مستحيل تصدق .. لكن انا الشي البعرفو عن ابوك .. من هو صغير مابشيل حق زول نهائي .. ايوة ابوك احمق واخلاقو ضيقة .. وكلامو كتير .. بس يشيل حرام دي مستحيلة .. وكمان يزور ؟؟ سبحان الله .. والله التوم لو كتلوهو مايزور .. انا بعرفو .. ياخي انا بحكي ليك قصة حصلت زمان .. مرة انا وابوك كان عندنا قطعة في حتة مشتركنها الاتنين .. الكلام ده قبل مانتزوج .. هي قطعة صغيرة .. اشتركناها لانو واحد فينا مابقدر ياخدها .. كويس؟
اها جا اشتراها مننا واحد .. ودفع جزء من المبلغ .. وقال سلموني الورق . وانا بسدد ليكم الباقي بعد شهرين .. انا قلت ليهو لالا مابنسلمك .. بس ابوك قال ليهو يازول نحن واثقين فيك شيل ورقك .. و بعد شهرين تسلمنا الباقي .. وهو كتب لينا وصل امانة بي باقي المبلغ .. اها يازول بعد شهرين سسلمنا باقي المبلغ .. بس مالقينا الوصل عشان نديهو ليهو ..
قال ما مشكلة الوصل ياحماعة .. انا واثق فيكم متى ماتلقوهو شررطوهو .. اها قمت انا لقيت الوصل بعد تلاتة شهور .. وكنت مفلس ..
قلت لابوك يازول .. انا لقيت الوصل بتاع الراجل .. تعال نمشي المحكمة نقول الزول ده ماسلمنا حاجة .. هههه والله انا كنت مجرم خلاص ياقنديل ..
بس ابوك قال لي ده كلام شنو البتقول فيهو ده يايوسف .. الزول وثق فينا .. وسلمنا باقي المبلغ بدون مانديهو الوصل نجي نخونو ؟؟
قلت ليهو لكن نحن مفلسين .. قال لي والله انا لو داير اموت بالجوع ما بدخل علي حرام .. وانت لو مشيت قلت كلام زي ده.. انا بشهد انو سلمنا .. وانت اخدت نصيبك .. انا طبعا فعلا كنت ناوي . اشيل قروش الراجل وامطوحو ليك .. وادفعو مرتين .. لكن هو الوقف لي .. ياخي ابوك ده مافي زيو .. بس عين ساكت وقعت فيهو واخوانو ..
انا طبعا" نططت عيوني.. وبقيت اعاين لي عمي يوسف .. وقلت في سري .. اتاريك ماك هين ألحبوب .. عشان كدي ابوي قال ذمتك واسعة ..
بعد خلص من قصة وحكايات بطولاتو . قال لي . بس ماقلت لي ياقنديل .. المراة دي ما كلمتك بالزول النقل القوالة والفتنة ده منو؟ بعدين كونو الزول ده يكشف ليهم التزوير . ده زول بكون عمل عمل خير.. مافي داعي يقول ليهم ما تتكلمو .. الا يكون نيتو سوداء.. وللا مشترك في التزوير من الاول .. وللا رايك شنو؟
بعدين في حاجة انا عايز اقولا ليك .. جدك ممتلكاتو معروفة ومحصورة .. وكلها اوراقها سليمة .. واتقسمت في المحمكة.. ايوة كانت فيها جرجرة.. وجلساتها طالت سنين لانهم مختلفين.. لكن في النهاية طلعت كلها .. وهسي حوش البقر وقع من نصيب ابوك .. يعني قصة تزوير دي انا ما مقتنع بيها من الاساس ..
من خلال كلام عمي يوسف .. انو ماعندو اي علاقة بالفتنة القالتها مريم ..
المهم سكت مسافة كدا وسرح .. وقال لي يعني يا قنديل نحن طيلة السنوات الفاتت دي .. ماعرفنا سبب مشاكل اهلك ديل .. داير تجي تعرفها انت في يومين .. ياولدي القصة دي احسن ماتشغل بالك بيها ..
خلص شغلتك الجيت ليها .. وامشي علي اهلك ديل ناس مامنهم رجا ..
بالمناسبة انا طبعا" ياقنديل .. كلمت كم نفر بالحوش .. وفي نفرين وعدوني لي بكرة ان شاء الله .. خليك قريب.. قلت ليهو جمبك انا بس قول عوك ..
انا حقيقة بقيت ماعارف افكر .. لانو الامور كدا مسيوطة في راسي ..
وماعارف اتهم ابوي ولا ابرئه .
قلت ليهو طيب ياعمي.. انا بكرة عايز امشي (ربك) لي ناس عمتي نفيسة . واسلم عليها وعلى اولادها .. وان شاء الله تكون لي صلة رحم مع المأمورية الجيت ليها من الخرطوم .. انا بسجل ليك رقمي
اول ما يظهر زول للحوش وتحتاج لي.. اضرب لي وانابصلك في اقرب وقت ..
قال لي خير يازول .. والله ياولدي خيرا ما عملتها .. قالو غلط الكبار بدفعوهو الصغار .. ربنا يوفقك .. والله انت ود حلال ..

اها يازول امسى الليل .. وعادك الحنين ياقلبي .. والفكر مشتت شي في عبيير وشي في الكافتيريا وشي في حوش البقر . وشي في مشاكل اهلي .. اقرب اقول أه قلبي الصغير لايحتمل ..
المهم عدينا الليل انا وخالد نتونس لغاية بعد العشاء برانا الاتنين ..
وماخلينا حاجة والزول بقى صاحبي شديد .. وحكيت ليهو قصة عبير .. ومشكلتي الكانت مع شادلي ..
قال لي يازول انت لو بقيت معاي هنا في كوستي والله اشغلك احسن شغل .. لكن انت تاني مابتحتاج ان شاء الله الحوش ده بريحكم تب.. بس عليك بالتخطيط قبل الاستثمار ..
بالاختصار صبحت وطات الله . طبعا الصباح في كوستي شكلو مختلف .. وفيهو نوع من الالفة والحنين حكاية جميلة والله .. يعني الزهجة الصباحية الفي الخرطوم ديك .. في كوستي مابتحس بيها تشعر انك انت صحيت منتعش ونشيط ..
من الصباح كدا عمي يوسف قبل مايطلع وصف لي بيت ناس نفيسة في حي في ربك اسمو حي (زيتونة) ..
طبعا ربك فاصلها من كوستي بس بحر ابيض . دي بالغرب وربك بالشرق .. ورابط بينهم الكوبري .. ربك طبعا عاصمة الولاية .. وفيها اكبرنشاط للقوة الشرائية في الولاية كلها .. والايقاع فيها سريع شديد .. والماشاف كوستي وربك نص عمرو ضايع ..
المهم غشيت السوق في ربك وفطرت فطرة ليها راس وقعر .. يعني الجوعة حقة امس ديك .. ادبتني . تاني مابفرط في روحي .. وامشي لناس .. يدوني موية ويطردوني هه .. امشي جاهز يامعلم تاني زي ماتجي تجي ..
اها مشيت حي زيتونة القالوه لي ده.. وانا حافظ الوصف صم . ووصلت بيت ناس عمتي نفيسة ودقيت الباب وانا طبعا بعرفها شديد من اشوفها بعرفها.. لكن هي ما اظنها.. الناس ديل انا مشيت منهم شافع ..
فجأة كدا اجيهم بي شنبي ودقني .. طبيعي انهم مايعرفوني ..
دقيت الباب..
فتحت لي الباب عمتي اول ما شفتها بقيت اتبسم .. اصلو ما اتغيرت سبحان الله .. تشبه ابوي هههه
هي طبعا اصغر من ناس ابوي ..
يعني هي قالو اصغر زول في البيت .. الكبير بابكر تاني بعدو التيمان .. تاني ولد اسمو عمر مات صغير .. حتى نفيسة اخر العنقود .. المهم قعدت تعاين لي مستغربة .. انت منو؟ وانا بس بعاين ليها واتبسم .. قلت ليها ماعرفتيني .؟ قالت لي ماعرفتك والله
قلت ليها عايني لي بشبه منو؟
قالت لي والله انا عيوني ديل مطششات من المطبخ ..وريني انت منو وداير منو؟
قلت ليها انا قنديل ود التوم اخوك يا عمتي نفيسة ..
طوالي جرتني من يدي لي جوه ..وقالت ياحليلو ياحليلو .. قنديل .. ماشاء الله كبرت .. وسلمت علي جنس سلام ..وبكت لامن بقت تنهف وتتمخت .. غايتو سبحان الله ناس قمة الجفاء والصعوبية .. وناس قمة الحنية .. ياخ والله المراة دي دخلتني جوة وقعدتني بس خاتاني قدامها وتبكي .. وتسوي يا حليلكم يا قنديل .. كيف ابوك؟ وكيف امك؟ .. طبعا ابوك مقاطعني يا قنديل .. وقال لي لا انا لا أولادي تاني مابتشوفينا ..
والسنة الفاتت انا كنت في الخرطوم.. ضربت ليهو عشان اجيهو في البيت واسلم عليكم .. قال لي ماتجيني ولاداير اشوف وشك .. وتبكي .. قلت ليها لكن السبب شنو يا عمتي ؟ مالكم ياكافي البلا .. انتي غلطانة فيهو بشنو؟
قالت لي دي قصة طويلة ياقنديل .. ونحن ساكتين عليها طول السنوات دي زول عارفها مافي الا نحن وناس بيتنا انا وامي وابوي واخواني وبس ..
هسع انت خليك من الكلام ده ..انت جيت متين ؟ ويتلقي ولاك فاطر .. تعالي يا سكينة.. تعالي سلمي على ودخالك .. سكينة جات بت في بداية عمر الزهور احتمال زي 15 سنة .. قالت لي دي بتي الكبيرة .. قلت ليها ماشاء الله .. جات حفيانة وايديها ورجليها مبلولات بي موية ..شكلها كانت بتمسح ولابتغسل ولا شنو .. سلمت علي وكلها حياء وخجل .. ودخلت راجعة سريع .. امها قالت ليها جيبي ليهو كباية شربات يا سكينة .
وامها بس تعاين لي ومبسوطة بي جيتي بسط عجيب .. انا كان عارف بتقابلني كدي كنت نزلت معاها عديل والله .. لكن ياربي ابوي ده مالو مع المراة الطيبة دي .. والله دي مشاكل عجيبة ..
قالت لي طبعا ياقنديل انا اصغر بت واحدة عند امي وابوي .. واتزوجت بدري .. بس قعدت فترة ما جبت جنا الحمد لله ربنا قسم لي سكينة دي .. وتاني جبت تلاتة اولاد .. وراجلي شغال في السوق
هسي سكينة الحمد لله السنة الجاية ماشة تانية عالي .. والاولاد واحد في تامنة واحد في سادي .. وعمر الصغير في الروضة مسمياهو خالو الله يرحمو .. طبعا بتتكلم وحركات يديها زي حركات ابوي .. وتعابير وشها .. ..
اها انا صراحة" جاني أمل كبير انو عمتي دي حتحكي لي حكايات الزمان الما انحكت .. وشكلي ح اكتشف المخبأ كلو الليلة .. بس الله يستر مايقوم عمي يوسف يضرب لي بيعة الحوش ..
وتاني عمتي كوركت ياسكينة خلاص خليها الشربات جيبي ليهو فطور .. وهي من جوة (حاضر يا امي .. بس دقايق) ..
انا ابيت اقولها فاطر .. قلت والله لازم اضوق اكلها .. بصراحة انا جسيت بالراحة النفسية في بيت عمتي ..
ان شاء الله الراحة دي تتم وعمتي تحكي لي المشكلة .. كان قلبي يهدأ شوية بعد اعرف الحاصل ..
الى اللقاء ..

[فيتامين سي]

الحلقة 13 ..
بقلم طارق اللبيب ...

سكينة بتسوي في الفطور ..وانا قاعد بعاين لي عمتي ومبسوط بسط ..هي تتكلم وانا اعاين ليها .. قالت والله نحن جينا ربك هنا.. وخلينا كوستي كلو كلو .. حتي عمك حسين انا طولت منو .. المشغوليات والجري المابنتهي ..
قلت ليها طبعا" انا مشيت لي عمي حسين في بيتو .. قالت لي عليك الله؟.. يحليلوعليك الله هو كيف ؟ ووليداتو .. قلت ليها والله الحمد لله كويس .. انا اولادو مالاقيتهم لاقيت خالتي مريم ..
قالت لي مريم المر اليفقعها .. شحدت ربي عليها المرة الشوم .. قالت لك شنو؟
قلت ليها .. والله رحبت بي احسن ترحيب .. واكرمتني ..
عمتي عوجت خشمها كدا في سخرية وقالت لي ....
عليك الله خليني منها هسع انت بتقرا ولاشغال ولا بتسوي في شنو؟
قلت ليها والله انا طبعا اتخرجت .. وهسع شغال لكن طبعا شغال بدون شهادتي ..شهادتي يهديك قاعدة وجع قلب ساي ياعمتي .. شغال لي في كفتيريا في بحري ..
انا طبعا في الوقت ده شميت ريحة البيض بالطوة .. سكينة شكلها حمرت البيض بي زبدة او بسمن بلدي .. ماعملت زيت . انا ريحة الاكل بفرزها . في شم الاكل انا اخطر من الكلاب ..
والله بالرغم من اني فاطر ماتميت لي ساعة .. الريحة جوعتني .. بعد شوية سكينة جابت الاكل .. وختتو قدامي .. فول وجبنة . وبيض
وصحن شعيرية وصحنية في صحن صغير كدا ..
قلت ليها يا سكينة البيض ده عملتيهو بي سمنة؟ ولا بي زبدة ؟ ..قالت لي بي زبدة ..مابتاكلا؟ اعمل ليك واحد غيرو؟
قلت ليها لالا .. دي الذ حاجة ..تكرمي يابت عمتي .. هي دنقرت في الواطة ودخلت طوالي ..
وعمتي بدت تحكي لي عن زوجها .. وعن الحياة في ربك . وعن سكان حي (زينوبة) .. اقصد حي زيتونة .‏‎kiki‎‏ رمز تعبيري.
اها يازول فطرت.. وسقوني الشاي فضلة خيركم .. وشفت اولادها التلاتة ماشاء الله .. واتونستا معاهم احلا ونسه ..
قلت ليها ياعمتي ..قبل مايجي ابو الاولاد من الشغل.. عندي كلام معاك برانا كدي داير احكيهو ليك ..
قالت لي تعال لي على الاوضة القدامية دي.. زول بجينا فيها مافي واتكلم براحتك .. وتنضم براها ..والله يحليلك ياقنديل ..
مشت قدامي فتحت الاوضة القدامية.. ونفضت اللحافات كدي بي طرف توبها ..وقالت لي اقعد .. فتحت الشباك وشغلت المروحة .
وانا بديت ليها الكلام .. ووريتها سبب جيتي لي كوستي .. وقعدتي مع ناس يوسف . ومشيتي لي ناس عمي حسين .. وحكيت ليها الحكاية الحكتها لي مريم مراة عمي حسين ..
قلت ليها الزولة دي قالت لي ابوك حرامي ومزور .. وقالت لي زور قي حق جدك .. واعمامك اتبرو منو وكلام كتير .. اها ياعمتي انتو وكت عارفين ابوي ربانا بالحرام.. ليه ما خلصتو الحقوق منو.. عشان نحن ناكل حلالنا ؟
وهي تسمع في كلامي وساكتة .. اول ما خلصت قالت لي .. اها تاني قالت ليك شنو؟
قت ليها تاني عاد تقول لي شنو .. وفي شنو اصعب من كدا ؟
عمتي اتمهلت في السرير ..وملصت سنفجتها ..وقعدت لي قعدة مريحة..
وقالت لي ابوك حاشاهو مابشيل حق زول .. ولازور ولاشي .. وكان ابوك زور كان عمك كلمك ..
قلت ليها طيب ياعمتي ليه اعمامي مقاطعين ابوي .. وبابكر عمي لامن مات وجدي لامن مات كلهم مقاطعين ابوي .. ابوي سوى شنو لو ما زور؟؟ ..
قالت لي كويس انا بحكي ليك .. لكن والله ياولدي الكلام ده كلام بجيب رقاب كان مرقتو .. عشان كدي نحن ميتين فوقو.. وماقلناهو لاي زول ..
قلت ليها بس انتي احكي ساي ..وخليك واثقة فيني والله مابجيب لك مشكلة ..
قالت لي .. طبعا" ياقنديل.. ابوك وعمك حسين تيمان ..وقامو سوة ويطلعو سوة ..وينزلو سوا .. وجدك الله يرحمو قال يعرس ليهم في يوم واحد .. ومشو شهر العسل سوا .. اكلهم واحد ..وشرابهم واحد مابتفرقو الا للنوم ..
وامك ومريم .. من الاول كانن بغيرن من بعض.. ومابترايدن نهائي ..التقول ضرات .. بعد كم سنة من العرس.. وهن ساكنين في حوش جدك .. مرت السنين .. الوكت داك انت مولود لكن صغير .
اها ابوك بدا ينظر لي مريم زوجة اخوهو نظرات خيانة ..وهي طالعة يشاغلا ..وهي نازلة يشاغلا .. ومريم حكت لي امك .. وحلفتها ماتسألو ..عشان مايسويلا مشكلة .. وامك كانت زعلانه منه سبعة شهور.. وهو ماعارف امك زعلانة منو في شنو ... وبرضو ماوقف من حركاتو .. مريم هددتو قالت ليهو انا بحكي لاخوك ..
وفعلا.. يوم كلمت حسين ..قالت ليهو اخوك ده خاين .. قال ليها والله تاني تقولي كدي انا اضبحك .. قالت ليهو قاعد يشاغلني .. قال ليها ده اخوي يامريم ..احتمال بهظر معاك ساكت .. انتي زي اختو .. قالت ليهو ابدا.. انا الهظار بعرفو ..
المهم انا وامي وابوي وبابكر اخوي سمعنا بالكلام من حسين .. وقال ما تٍسألوهو.. الحكاية دي ما مؤكدة .. مستحيل التوم يكون كدا .. مريم دي زي اختو ..
اها يوم الكارثة الكبيرة.. انا بتذكرو زي البارح ..نحن كلنا قاعدين في بيت امي . جاتنا مريم جارية من بيتها وهي خايفة ترجف .. قالت والله التوم جاني في غرفة نومي.. واتهجم علي .. انا خايفة.. انا تاني مابقعد في بيتكم ده ..
وقمنا كلنا جرينا جوة لي بيت حسين لقينا ابوك .. يادوب طالع من غرفتها .. وكت شافنا اتهجم وخاف ..
وحسين بقا ينبذ فيهو .. وامي قالت ليهو انت ماولدي ..وابوي قال ليهو هادا طرفي منك ..
هو قال والله براها نادتني.. قالت لي دايرة اقول ليك كلام سر.. حسين مايعرفو .. وقالت هي واقعة في مشكلة..
حسين قال ليهو يعني انت .. داير تتكلم مع مرتي كلام .. وانا ما اعرفو يا خاين ..
وابوك بقى يتحلف انو قلبو نضيف .. لكن طبعا" نحن شفنا الحكاية بعيونا .. وطبعا" عارفين انو من فترة ..وهو بحاول يقرب منها .. ونحن بنستر عليهو .. ومريم دي اليوم داك .كانت بتبكي وخايفة ..وقالت الزول ده من زمان بحاول فيني .. وانتو ساكتين.. انا تاني مابقعد في البيت ده .. ياحسين وديني اهلي ..
طوالي ابوك قال ليها لالا .. ما تمشي اهلك بمشي انا ..
وابوي قال لينا لو في زول اتكلم بالكلام ده انا بقتلو .. وقال لابوك لو المشكلة دي حكيتها لزول ..انا ماعافي منك .. قام ابوك قال ليهو يابا في كلام كتير ..انا ماحكيتو .. ولابحكيهو .. ودعتكم الله .. انا بالنسبة ليكم.. من الليلة (ميت )..
ابوي قال ليهو انت ميت من لحظة فكرت في مرة اخوك ...
ومن اليوم داك ..ابوك ساقك انت وامك ..ورحــــــل الخرطوم ..وتاني ماعرفناهو وين؟ .. ابوي ماتم سنيتن اتوفي ..وابوك جا وحصلت مشكلة بينو وبين حسين .. انا اتزوجت ماجا وبعد فترة.. بابكر اخوي اتوفى ..ابوك جابكم وجا.. يسلم على اهلو ..برضو حسين هاجمو بالسكين
لامن الناس حجزوهم .. ومافي زول عارف الحاصل بينهم.. ولا اقرب الناس ..
انا بي طول الزمن اشتقت لاخوي التوم.. ولميت في تلفونو .. وبضرب ليهو بشاكلني ..وبقول لي انتي الصدقتي فيني التهمة ؟ انتي ما اختي ولابعرفك .. اخر مرة ضربت ليهو.. وانا كنت في الخرطوم ..قلت ليهو انا جاياك اسلم عليك . وجاية ازور اولادك في البيت .. قال لي اوعك تجي .. انا ماعايز اشوف وشك ..
ابوك كانت تصرفاتو كويسة .. بس مريم بتمرق قدامو بي فستانها.. .. وبتدلع قدامو .. وعاد الحالة واحدة ..لكن الشيطان غشاهو .. بس ياقنديل الكلام ده طول شديد .. والناس المفروض تسامح وتعفا ..
لكن حسين اخوي.. راجل حاقد زي الجمل ..حتى اولادو سقاهم العداوة .. وحكى ليهم انو عمهم اتهجم علي امهم ..
وقال ليهم انا كان حي كان ميت .. تاني ما عندكم عم .. .. بابكر ومات .
والغريبة انو مريم امهم.. كل مرة بتهديهم ..وتقول ليهم ماتسمعو كلام ابوكم ..
عمكم غلط وهو كان صغير .. واي زول بغلط .. هسع كبر وعقل
.. عليك الله ياقنديل شوف هسع مريم.. الله يديها العافية ..كتمت منك القصة الحقيقية ..
والفت ليك قصة من راسها ..عشان ماتتهم ابوك في شرفو ونزاهتو .. وتسقطو من نظرك ..
انا ياجماعة طبعا بسمع في الكلام عن ابوي .. وحاسي باني .. انشليت .. ولساني اتبكم .. اصلو ما كنت قايل القصة دي قدر كدي .. معقول ابوي يكون بالحقارة دي ..
بالله شوف مريم الانسانة الطيبة .. قابلتني بي ترحيب عجيب .. واصلو ماجابت لي سيرة.. ولفقت لي قصة تانية كلو كلو .. عشان تبرئ ساحة ابوي ..
معقول يا ابوي العزيز.. ده انت كدا ؟؟ عاد الناس شافوك بعيونهم .. انا تاني حجتي شنو؟
بالرغم من انو احساسي بقول انو ابوي برئ .. وماكان جواهو شر..
لكن هسع الدلايل والوقائع ضدو بكل قوة ووضوح ..
طبعا انا بقيت قاعد في السرير.. وخاتي يدي في راسي ..وبعاين في الارض.. زي الزول الجابو ليهو خبر ولدو الوحيد مات ..
ياريت لو سمعت انو ابوي سكير او حتي بتاع حريم . او اي مصيبة . لكن ابوي يكون خاين شيقيقو وتومو .. والله دي قمة الوضاعة ..
ياريت لو في بصيص يعمل ليك براءة ..
قدر ماعمتي بقت تفتش ليهو في الاعذار.. انا حاسي بقلبي اتهدا وحيطانو اتهدمت ..
زي ماقال اللبيب ..
اخر نقطة من ضو الامل في جوفي.
راحت وانطفت .غرقان بقيت في خوفي..
اشكي الكلام ده لمنو؟؟ واحكي لمنو؟؟ .. ومين يقدر يساعدني امرق من الحالة الانا فيها دي؟؟ .. انا كان عارف الكلام ده كدي.. ماكان جيت كوستي من اساسو .. وينو وشي البقابل بيهو الناس ديل ..
وانا غرقان في تفكيري ده ..ضرب لي عمي يوسف ..
الو يا قنديل ..
قلت ليهو عليكم السلام اهلا بيك ياعمي يوسف ..
قال لي يازول مالك، صوتك ده منكسر كدي؟؟ .. زي الزول الميت ليهو زول ؟
قلت ليهو مافي شي عادي ياعمي ..
قال لي انا بعرفك ياقنديل .. ده ماصوتك ولا اسلوبك ..
المهم في زبون جاهز.. وانا وعدتو باكر الصباح ..
قلت ليهو خير ياعمي .. انا الليلة بالمساء بجيك ..
الى اللقاء ..

[فيتامين سي]

الحلقة 14 ..
بقلم طارق اللبيب ...

عمتي قالت لي .. ياقنديل ياولدي انا شايفة الكلام ده اثر فيك شديد .. انت ماك عارف طيش الشباب؟.. ابوك كان شاب وتفكيرو كان مشوش .. اصلو الحريم فتنة ..والواحد راسو بكون مشوش بالشيطان .. وطوالي غيرت الموضوع .. وبدت تحكي لي عن زوجها (الطيب علي) .. وعن جسارتو ورجالتو .. وانو راجل صميم واخو اخوان .. ولايوم واحد ماسألني انتي اخوانك مقاطعنك ليه ؟ ياريت ياقنديل يجي بدري وتتعرف عليه .. وطبعا" عمتي بتحكي لي .. عشان تخفف علي بي كل الوسايل.. طبعا زي ماسامعين عمتي انسانة واعية.. وفاههمة وكليمة ..متعلمة .. وبتحاول تشوف لي في تهدئات تخفف علي هول الخبر.. لكن صراحة انا فكري في بيبحث عن تبرئة لابوي .. موش عن اعذار لتبرير الحصل منو..
بديت بي مخي من جوة بربط في الاحداث.. وحبيت اني اكون براي في اللحظة دي .. قلت ليها ياعمتي الله يخليك اعملي قهوة ..
قالت لي خلاص انطرح شوية.. ارتاح على بال ماجبت ليك الجبنة .. وانا طبعا غرقت في التفكير .. وربط الاحداث من الاول ..
قبل كل حساب.. ابوي دايما كان بقول لي البخون العشرة اخير منو الكلب .. وكرر لي الكلام ده كتير وكتي الكنت عايز اخد حقي من شاذلي .. معقول ابوي يكون بقول لي كدا وهويكون كدا ؟ بعدين دايما" امي بتقول لي انا وابوك اتزوجنا عن حب.. استمر من قبل الزواج .. ماحصل يوم شاف غيري .. انتو ياشباب الزمن كل يوم مع واحدة.
وانت ياقنديل كل يوم تجي تشكر في بت وفي سماحتها .. اصلك مازي ابوك ..
بعدين ابوي دايما بقول لي (اعمل ماشئت كما تدين تدان) .. وبقول لي لو شاغلت ليك واحدة في الشارع .. في زول ح يشاغل اختك .. يعني دي حاجاتو البقولا دايما .. معقول تكون كلها مزيفة وكلام مريم حقيقة؟؟
بعدين شوف الحكايات البحكيها عنو عمي يوسف .. كلها بتدل على شرف ابوي ونزاهتو ..بعدين لو ابوي بتنزه عن قروش الناس .. معقول يمد عينو على حرمة اخوه؟
تاني في حاجة .. مريم دي لمن اتكلمت معاي.. كانت بتتكلم بصدق وقالت لي في فتنة حاصلة .. وقالت لي عمك بسمع كلام الناس .. وكانت بدافع عن ابوي .. معقول لو فعلا ابوي عاكسها في يوم واعتدى على كرامتها .. يجي يوم وتدافع عنو . حتى لو بالكذب .. ؟؟
ومادام ابوي ظلمها .. هي ليه بتدس علي الحقايق ..موش انا ولدو واستحق الانتقام والمفروض اعرف فعايل ابوي .. لانو ابوي ؟ تاني ارجع واقول طيب ليه حاولت تفتني مع يوسف .. وعايزاني اكرهو ووصفتو بانو ثعبان سام؟ تاني ارجع واقول كان ممكن تفتني مع ابوي .. !!
مريم مادام تابعة للدجالين والسحرة .. ماصعب انها تكذب وتتهم برئ . السحر والشحوذة اسوء من الكذب واتهام الناس ..
المهم يازول قعدت افكر واحلل .. في النهاية .. قلت مع انوكل الوقائع والادلة بتقول انو ابوي مذنب .. بس التحاليل المنطقية
كانت بتقول لي انو المراة دي مكرت بابوي.. بي سبب ولي هدف .. بس السبب شنو و الهدف شنو ده الانا ماعرفتو.. بس انا لازم اعرف الحقيقة.. ولازم اتقصى من الامور بطريقتي الخاصة .. وبقيت غرقان في التفكير.. قلت لو دعا الامر اني اواجه ابوي بالحقيقة المرة بواجهو .. واختو في الكرسي الساخن.. ماعندي مانع .. ماممكن انا اعيش طول عمري كاره ابوي.. ومحتقرو بي جريمة انا ماعارفانو عملا ولا ماعملا ..
غايتو التفكير والتحليل ده حفف علي شوية.. وخلاني منتظر فرج من الله بي حقيقة القصة .. اتمنى من الله تكون القصة دي ماصحيحة ..
اها جابو لي القهوة ولاشربتها قاعد بس افكر ..
يازول المساء زوج عمتي جا من الشغل.. ورحب بي واتونس معاي .. راجل بالف راجل .. بس الفرصة ضيقة .. ماقدرت اتعرف عليه . وانا هسي ودعت ناس عمتي واولادها .. ووعدتهم اجيهم راجع قريب .. طلعت ماشي كوستي .. عشان ابيت مع ناس عمي يوسف .. والصباح نقوم نمشي نكمل الشغلانة بتاعة بيع الحوش .. وفي الشارع التفاكير ما وقفت من راسي ..
انتو عارفين الليلة عرس عبير ؟؟ .. وانا ولاشغال بالموضوع ..ايوة صح زواج عبير وفقداني ليها .. مأثر في قلبي .. لكن والله الكلام الفي ابوي اكبر منو كتير.. زي الزول الجرحتو موس في اصبعو ومتـالم منها ..
فجأة كدا جا زول طقاهو بي فرار في راسو .. مستحيل يقول اااخ يا اصبعي .. يعني الكوارث الكبيرة تنسيك الصغيرة ..
يازول الله يسعدها بت الناس ويسهل عليها .. واتمنى ليها من كل قلبي حياة سعيدة مديدة .. انا هسي لاجاهز ليها ولافاضي اصلا .. خلي الامور علي الله .. ربنا يساعدني امرق من الحالة الانا فيها دي..
قمة التوتر والانزعاج ..
بعد ماوصلت بيت ناس عمي .. لقيت خالد منتظرني .. قال لي والله خفت انك تبيت مع عمتك.. ياخي عودتنا عليك ..
قلت ليهو ياخالد والله انا الليلة ماعندي مزاج لي ونسة .. قال لي ياخي انا هسي جاييك بي بشارة .. تجي تقول لي ماعندي مزاج .. قلت ليهو قول بشرني الله يبشرك بالخير ..
قال لي في دكان في السوق في حتة مبالغة .. عرضوهو لي للايجار.. وايجارو بسيط جدا .. ومقدمو تقريبا 3 شهور ما اكتر .. لو ناس السوق سمعو بيهو مابقعد ساعة .. بتأجر ..
عشان كدا انا داير امسكو ليك رايك شنو؟
قلت ليهو والله ياخالد انت طيب طيبة .. تمسكو لي اعمل بيهو شنو؟
قال لي ياخي انت بس تقعد فيهو .. انا بملاهو ليك بضاعة.. كان اجمالي كان قطاعي .. انت ناسي اني انا ملك السوق .. ؟؟
والله بس انا دايرك تقعد في كوستي .. كل ما اتذكر انك ح ترجع الخرطوم تجيني غمة ..
هههه انا قلت والله الزول متكيف مني كدي مالو ماعارفو .. هسي كان عرف قصة ابوي بغير رايو .. قلت ليهو والله ياخالد انا مزاجي عكران .. وداير ارجع الخرطوم في اقرب فرصة ..
قال لي .. انا حاسي انو مشيتك لي عمتك دي اثرت عليك اثر سلبي .. ياخي انت جيت من ربك مقلبن كلو كلو .. الحصل شنو؟؟ عمتك ما استقبلتك كويس؟ قلت ليهو ابدا والله يا خالد .. عمتي دي زولة ملكة والله.. ربنا يحفظها ويخلي ليها وليداتها ..
قال لي. طيب وريني الحصل شنو ؟ فتحتو سـيرة المشكلة بتاعة ابوك مع اهلو؟ وبعاين لي في وشي شديد .. مع انو نحن قاعدين في الحوش والواطة بالليل .. واللمبة المولعة واحدة ..يعاين لي بطريقة غريبة .. انا طبعا" حسيت انو خالد كاشف اي حاجة ..
قلت ليهو ايوة فتحناها طبعا" .. قال لي عمتك حكت ليك الحصل صح؟.. قلت ليهو نعم .. قال لي .. القصة المتعلقة بي مريم مراة عمك ..
قلت ليهو نعم حكت لي انت عارف يعني ؟.. قال لي طيب يا قنديل انا عايز افاجأك.. انا عارف المشكلة.. وامي واشراقة وسناء كلهم عارفين .. بس ابوي ماعارفها .. ولافي زول حكى ليهو ..
طبعا زي ماحكيت ليك.. اخلاص بت عمك حسين صديقة مقربة لي سناء اختي .. مع فارق العمر طبعا .. عشان كدا انا كتير بحس انو اخلاص بتستغل سناء .. لكن الحقيقة ..
كل واحدة فيهم بتحكي اسرار الاسرة للتانية بالتلفون .. يوم من الايام قامت اخلاص بت الحسين .حكت لي سناء اختي . السر ده وقالت ليها اوعك تحكي لناس بيتكم القصة دي.. لو سمعو بيها اهل امي .. بمشو الخرطوم يقتلو عمي التوم ..
يعني نحن بس في اطار البيت عارفنها .. وانا والله ماكنت عايز احكي ليك .. خايف من ردة فعلك ..
طبعا وكت خالد بقول في الكلام ده . انا حسيت بانو في موية صاقطة انكبت فوق راسي .. يعني الناس كلهم عارفين قصة ابوي
..واخجلتاه ..
ده انا طلعت اكبر فارة وداقس .. هسي حالي ده اتفاصح مع الناس .. وقاعد معاهم بي كل فخر وعزة.. وهم كاشفين فضايح اسرتي .. يالطيف ..
قلت ليهو طيب ياخالد .. انا متأكد انو مريم دي بتتبلى على ابوي.. واتهمتو زورا" وبهتانا .. بس كيف اقدر اثبت الكلام ده يعني انا
كيف اقدر اطلع ابوي من الحتة دي ..
قال لي انت اصبر لمن تمشي الخرطوم.. أسال ابوك من القصة دي نحن هسي كلنا سمعناها من طرف واحد ..
قلت ليهو انا مابقدر أسال ابوي من كلام زي ده .. انت ماعارف انا ابوي ده خاتيهو وين .. والله مابقدر نهائي .. انا لو بقدر اسأل ابوي .. ما كان بٍسأل من اصل المشكلة شنو ..
قال لي بس الحاجة المتأكد منها انو مريم مراة سيئة .. ومابتخاف من ربنا .. وعشان مصلحة نفسها ممكن ترتكب اي جريمة .. والغريبة ياقنديل .. اهلك كلهم عارفنها وعارفينها زولة كذابة وافاكة وبتاعة مصايب ..ماعارف مصدقنها كيف.. يعني انا غايتو على حسب (ان جاءكم فاسق بنبأ فتبينو) ..
مريم دي ياها الفاسق المفروض الناس تتبين منو ..
ياخي دي انا مجربها .. وحكيت ليك بي كل الحاصل ..
قلت ليها وانا برضو متأكد من الحكاية تأكيد شديد .. انو مريم الفت قصة مدروسة ومرتبة .. وقدرت تسيطر على عقول اعمامي وجدي . وابوي لانو انسان برئ وطيب من جوة .. وقع في الفخ وخسر الجولة ..
ده موضوع انا اتيقنت منو ..
بس انا هسي كيف اقدر اثبت براءة ابوي ..
نحن بنتكلم كدا .. ابوهو جا داخل.. الكلام ده بعد العشاء بشوية ..وسلم علي وسألني من عمتي واولادها ..
وكلمني قال لي في زول قبل الحوش .. بسعر مجزي.. ووراني السعر ..
وانا وافقت طوالي.. لانو اكتر من السعر المتوقعو ابوي اصلا .. وقال لي باكر تمشي معاي عشان تديهو الاوراق وتمضي ليهو التنازل .. وتشيل شيكك وتمشي ..
قلت ليهو شيك شنو؟؟ حاجة اسمها شيك دي مابتنفع معانا ..
نحن ناس كاش ياحاج ..
قعد يضحك ..
قال لي لالا اول حاجة الزول الداير يشتري منك تاجر كبير في كوستي .. وحسابو جاري بالمليارات .. والشيك حال يعني باكر بتصرفو على داير المليم ..
المهم انا قلت ليهو لالا .. الا اتصل على ابوي واشاورو .. كان قال لي وافق بوافق ..
طبعا" انا طوالي اتذكرت كلمة (ذمتو واسعة) هه.
ماتقوم كمان تظهر لي مشكلة تانية بعد الانا فيهو ده ..
قال لي اسمع ولا تتصل على ابوك.. نحن بنديك القروش بتشيلا معاك في شوال؟.. ولا حتعمل شنو؟ .. ياولدي الزول ده انا واثق فيهو ..
قلت ليهو خلاص مافي مشكلة .. خير ان شاء .. ووافقت على اني ابيع الحوش بي شيك ..
بس (ذمتو واسعة) دي قاعدة لي في راسي .. وماقادر اتمسك معاهو يقوم عمي يوسف يفتكر انو انا بشك فيهو ..
الى اللقاء

[فيتامين سي]

الحلقة 15 ..
بقلم طارق اللبيب ...

صبحت وطات الله وباكر شلتا الورق ومشينا السوق .. وقابلتا الزبون .. اللهو عمك في كدا في دور ناس ابوي .. زول نضيف وظريف وجلابيتو دي التقول جايبنها من المكوجي هسي .. مكوجي شنو؟ ..
ديل الظاهر ناس الغسيل الجاف . والعمة ام ركامة . والشال الماخمج فوق كتفو.. وشو ناااعم واملس . نوع الناس ديك الحياتهم كلها في المكيفات . مكيف في البيت . مكيف في العربية . مكيف في المحل . لكن الشهادة لله .. شكلو ماشكل زول بياكل قروش قنديل ود التوم .. اها وكت شافني قال ليهو ..
وينو صاحب الحوش؟ يهوده ؟ عمي يوسف قال ليهو .. ايوة ده ولدو ..وشايل توكيل باسمو .. قال ليهو ما مشكلة النمشي على المحامي ..
انا طوالي اتذكرت ليك حسن شربوك ..
وبقيت اتبسم براي قلت بس ان شاء الله مايكون زي حسن شربوك .. مشينا المحامي وخلصنا الاوراق .. وسلمتو كل الورق بتاع الحوش .. واستلمت منو الشيك .. مواعيدو وتاريخو بتاريخ اليوم .. والله شغل نضيف .. بس ان شاء الله مايبقى كاشف .. المهم الحوش بقى حقو .. انتو عارفين الحوش ده وين انا ماعارفو ولاشفتو .. المهم حوش بقر في كوستي ههه ..
كدا انا اديت المهمة .. بالرغم من اني قلبي ماكلني .. لكن والله بالشي الشفتو من عمي يوسف.. وتعاملو معاي.. وصراحتو وطيبة قلبو . خلاني اكون واثق في ثقتو في الزول ده ..
بعد كدي انا ابقى زول سفر .. وماعارف اقابل ابوي كيف .. لانو صراحة الكلام الاتقال ده .. شوش افكاري شديد .. انا واثق في ابوي .. لكن سبحان الله .. كلام الناس حتى لو ماصدقتو بأثر فيك .. حتى لو اثر طفيف .. زي ماقالو العيار المابصيب يدوش ..
المهم يازول طبقت الشيك وختيتو في نص جزلاني .. واتصلت على ابوي .. الاصلا دايما تلفونو مقفول .. لدرجة انو انا بكسل اضرب ليهو .. ماعارف تلفونو ده مشتريهو لشنو؟؟.. الاربعة وعشرين ساعة .. هذا الرقم لايمكن الوصول اليه حاليا" ..
من مكان المحامي واتحركت على خالد . في دكانو . وكلمتو قلت ليهو انا خلاص تميت البيعة ومسافر ..
قال لي تسافر كيف.. وانت لسه عندك موضوع ما خلصتو .. قلت ليهو موضوع شنو؟ قال لي يعني تمشي شايل تهمة ابوك.. بدون ما تثبت ليهو براءته ..
قلت ليهو يعني انت دايرني اعمل شنو مثلا؟.. امشي امسك المراة ادقها عشان تقر لي بالحقيقة ؟
قدر مافكرت لقيت مافي حل . انا ابوي ذاتو فكرت اني ما أسأله
لاني واثق فيهو .. ومافي حاجة بتخليني اصدق مريم مرة حسين .. واكذب ابوي البعرفو اكتر من نفسي ..
قال لي بس يا قنديل لو قدرت عديت ليك معانا يومين.. تكون ماقصرت .. قلت ليهو ابدأ ماعندي طريقة.. لو انت عندك فكرة براءة لابوي وريني ليها .. لو مافي خليني اكسب زمني ..
المهم يازول قعدت اتونستا مع خالد .. ووعدتو قلت ليهو انا بجيك راجع قريب .. والله اصلا ما انقطع من كوستي بعد عرفتك .. وهو وعدني انو متى مايجي الخرطوم مابنزل الا معاي في الكدرو .. انا طبعا المفروض ارجع لي ناس عمي حسين تاني .. واقابل اولاد عمي الاتنين.. القالو شفاتة ديل .. لكن تاني ماعندي وش بلاقيهم بيهو .. لانهم بكونو مصدقين امهم .. زي ما انا واثق في ابوي .. والمفروض برضو ارجع لناس عمتي .. برضو مافي طريقة اشيل لي قروش قدر دي في شيك اختو في جيبي واقعد في كوستي .. حزمت امري على اني اسافر الصباح .. وعندي حاجات كتيرة في كوستي ما انجزتها.. لكن وعدأ ياكوستي بجيك راجع وعد ..
عديت الليلة ديك كلها.. ونسة مع خالد . وخالد بس دايرني اقعد في كوستي .. وانا خلاص كوستي بقت لي لي زي خرم الابرة ..
باكر من الصباح قبل الشرقة سافرت .. مشيت الخرطوم .. في سفرية انا متغير من راسي لي كرعي .. يعني انا زمني كلو بتمنى امشي كوستي.. واقابل اهلي واعمامي واولاد عمي .. هسي اجي القى الوضع مخجل للدرجة دي ؟؟ يالطيف ..
والافكار في راسي تتقاطر وتجوط .. وتصدقو برضو خايف من الشيك ومن خوازيقو ..
المهم وصلت الخرطوم في نفس اليوم الساعة 10 ونص ..ومن هناك ما مشيت البيت .. مشيت على البنك .. طوالي علي الموظف مديت ليهو الشيك .. والموظف بدا يراجع .. وانا قلبي يضرب خايف يكون الشيك ده ماسورة عظيمة ..
بعد شوية ناداني باسمي.. وبدا يرص لي في القروش زي الطوب .. مربطات لكد لكد .. كل عشرة ربطات مربوطات مع بعض .. انا بالجد قروش قدر دي ما شفتها .. غايتو الليلة حاج التوم بختو .. كلها ابوخمسين .. المهم لميتها كلها وحشرت جزء في الشنطة بتاعتي الجاي بيها من السفر مع الهدوم ماشالتهن .. الموظف اداني كيس من جوة عندو .. شلت فيهو الباقي .. وعلقت شنطتي في كتفي وطلعت ..
مافي زول ممكن ينقش انا شايل شنو الا زول مراقبني ..
اول بتاع امجاد قلت ليهو .. كدراوية يامعلم .. الكدرو شمال .. واتفقت معاهو على اول سعر قالو .. وشلت القروش ومشيت .. الحمد لله هم ونزل من فوق راسي .. والله عمي يوسف طلع زول (ذمتو ضيقة) ههه .. والراجل القيافة ده اظنو القروش دي .عندو زي عشرة جنيه .. هسع انا شايلا وخايف.. التقول شايل لي مخدرات ههه ..
غايتو الزول وكت يكون مستجد ..
وكت وصلت بحري قصاد الكافتيريا.. قلت لي بتاع الامجاد عليك الله هدن شوية .. وبقيت اعاين.. لقيت ليك الشغل راشي رش صاح .. ويعقوب مركب الكاب بتاعو فوق راسو .. وشغال يقلب في البيرقر .. والحبشي شغال فرم .. والزباين كويسين.. يعني مافي زحمة والحتة مافاضية .. وعمك شادلي راكب فوق كرسيهو .. وبكتب في حاجة متكل على طاولة الكاشير ..
اتبسمت كدا .. وقلت ليهو خلاص حرك .. واصلنا على البيت ..
وصلت البيت .. وسلمت على ناس البيت .. وابوي طبعا في الوكت ده بكون في الشغل .. كالعادة .. سلمت امي القروش قلت ليها صبنيها في اخر ركن في الكرة الارضية .. وبعدين بجي احكي ليكم عن كوستي والفيها.. ومشيت استحميت وجريت لي نومـــــة من امها ..
ماصحيت الا العصرية كدا بصوت ابوي جا .. المهم يازول بعد قمت سلمت عليهو وصليت واكلت وقعدت معاهم بنتونس .. وريتو البيعة ومجريانها .. وابوي اتبسط جدا من انجازي للمهمة بالسرعة دي .. وبديت وبحكي ليهم عن كوستي ..
وطبعا" وريتهم اني مشيت سلمت على ناس عمي حسين .. ومشيت ربك لي عمتي
لكن اصلو ماجبت سيرة الموضوع داك ..
ابوي قال لي .. اها عمك ان شاء الله كويس .. قابلك كيف ؟ قلت ليهو احسن مقابلة .. وزوجته مريم قابلتني احسن مقابلة.. واكرموني لغاية ما مشيت منهم ..
وعمتك نفيسة قالت ليك شنو؟ اتونستو بشنو؟ يقرب يقول لي نعل ماجابو لك سيرة مشكلتي معاهم .. وانا فااااهمو .. وعامل رايح ..
وحكيت ليهو عن طيبة عمي يوسف .. وولدو خالد .. وفرحتهم بي واكرامهم لي .. وقلت ليهو خالد دايرني اشتغل في كوستي.. انت رايك شنو؟
قال لي مافي مشكلة.. انت زول راجل ودربك اخدر .. محل ماتمشي انا قاعد اتسيطر في حياتك ومشاريعك؟ المحل البريحك تمشي ليهو .. المهم انا عايز اشوفك ناجح ..
قلت ليهو طيب يابوي القروش عايز تعمل بيها شنو؟
قال لي بفكر اعمل لي مشروع استثماري لاخوانك الايام ما معروفة .. قلت ليهو طيب مابتديني منها ملخة ؟
قال لي لمن اعرف عايز تعمل بيها شنو؟ وانا جاهز ماعندك مشكلة .. قلت ليهو هسي لمن نشوف المشروع العايز تعملو انت .. اذا فضل فيها باقي بشيلو .. واذا انصرفت كلها انا بدبر اموري ..
انا هسي ما داير افرط في شغلي في الكافتيريا .. لو عمي شاذلي قبل لي ادخل معاهو في شراكة .. بكون مشروع ناجح مليون في المية ..
ابوي قال لي شاورو والبتبقو عليهو كلمني ..
المهم يازول ابوي ارتاح جدا.. وكت عرف اني ماعندي خبر بي مشكلتو الفي كوستي .. امي ذاتها شكلها كانت متخوفة.. اني اعرف حاجة عن الموضوع .. وشكلها فاهمة اي حاجة.. لانها بعد ابوي مشى تاني سألتني .. قالت لي عمك ولا زوجتو ماحكو ليك اي حاجة عن ابوك؟.. قلت ليها حاجة زي شنو يعني ؟ ..
قالت لي لالا اصلا زمان كانو بكرهوهو.. وممكن يكذبو فوقو اي كذبة .. قلت ليها لالا مافي شي زي ده ابدا ..
لكن ياجماعة اقول ليكم صراحة .. انا يادوب كدا لقيت لي راس خيط .. افكفك بيهو طلاسم الموضوع .. يعني امي دي الممكن اصل بيها لاي معلومة .. لاني بقدر عليها .. لكن ابوي ممنوع الاقتراب والتصوير ..
المهم يازول ختيت امي في راسي .. وبلقا لي فيها فرصة ان شاء الله ..
بالليل كدا تصلت علي يعقوب.. وقلت ليهو ياوهم .. انا وصلت .. انت كيف .. وكيف الجماعة والشغل ماشي كيف ؟ (ياوهم دي بين الاصحاب عادي ماتتخلعو) اصلا يعقوب زميلي وصاحبي شديد..
قال لي باكر طوالي تجي تنزل.. والله الفجة بعدك خرابة .. قلت ليهو انا الاسبوع ماتميتو يازول قول بسم الله .. قال لي والله شايفنها سنة . وعمك شاذلي قد اضانا قد .. قلت ليهو جدا يلا في امان الله .. قال لي دقيقة دقيقة ..
في سؤال ماسألتني ليهو.. قلت ليهو سؤال شنو يايعقوب ..
قال لي .. سؤال المعتاد (في زول جا سأل مني هنا) ؟ ههههههه
والله غايتو يعقوب مستهبل استهبال .. قلت ليهو يا يعقوب دا موضوع بقى ذكريات ..وانا خلاص صحيت من الاحلام .. في امان الله لاباكر ان شاء الله ..
اها يازول صبحت الواطة والصباح بدري انا طلعت على بحري قبل ابوي .. ومشيت وضبت اموري تمام .. لمن جا عمك شاذلي لقاني شغال بركب في لحمتي ..
الزول ده فرح بي فرح .. التقول بالله انا غايب لي سنة .. وفتحة خشمو قال لي والله عندي بشارة ح تفرحك فرح شديد خلاص .. وبرضو داير مشورتك اصلك انت بقيت زي ولدي ..
قلت ليهو احكي .. قال لي تعال نقعد هناك برانا .. في الضل داك نشرب شاي .. الكلام ده الصباحية قبل الشغل يدور ..
قال لي عندي ود اختي الفي السعودية .. الانا اشتريت منو البيت بتاعي ده .. اها الزول ده خطب تماضر لي اخوه الاصغر منو.. واتنازل لي من باقي اقساط البيت .. والله انا في حيرة .. مع اني فرحان بي زواج بتي .. وبحل مشكلتي .. لكن تماضر زي ماعارف باقية لي في البيت زي الام لاخواتها .. يعني لو اتزوجت ماعارف اعمل شنو؟
قلت ليهوي ياحاج ربنا كريم ..مادام قسمتها جاتها .. ومن ود عمتها ما تتردد ربنا يسعدها .. واهو الموضوع طلع معاك سعيد وبخيت واتفكيت من الدين ..
قال لي يعني ده رايك انت؟.. قلت ليهو ولا تتردد .. البنات ربنا كريم عليهن .. خليهن هن برضهن يتحملن المسؤولية ..
قام بعد فات . يعقوب ناداني براي .. قال لي عمك قال لك شنو ؟
قلت ليهو موضوع خاص .. يعقوب قال لي موضوع خاص بتاع شنو؟ عمك ده كان بجس في نبضك .. ودايرك تكون نسيب ليهو ..
قلت ليهو مافاهم يا يعقوب ..
قال لي الزول ده فعلا ود اختو طلب بنتو .. لكن قال .. لو قنديل قال لي دايرها .. برفض ود اختي واديها قنديل ..
قلت ليهو بس هو حكى لي الموضوع حكاية .. وما عرض علي حاجة .. يعني انا اعرف كيف .. ؟؟ طيب انت ليه ما حكيت لي من الاول .. وانا بتو ماشفتها اصلا".. يعني اقول دايرها كيف؟
عمك ده مخو طرشق ولاشنو؟
يعقوب قال لي فرصة وفكت منك ياوهم.. امشي فتش لي عبير .. قسما" بالله بتو دي عبارة عن قيامة .. جمال وادب واخلاق .. اصلك ماعندك حظ ..
قام عمك تاني ناداني .. وانا قلبي قعد ينتح ..
ياربي تاني داير يقول شنو عمك ده ؟؟
الى اللقاء ..

[فيتامين سي]

الحلقة 16 ..
بقلم طارق اللبيب ...

اها عمك شادلي وكت ناداني .. انا مفتكرو داير يفتح لي موضوع بتو تاني .. قال لي : انا ياقنديل حاسي بيك زي ولدي .. عشان كدي شاورتك .. والله ياقنديل الايام البسيطة الفاتت دي وانت في كوستي .. نحن حسينا بي الكافتيريا دي مسيخة مسيخة .. ياريت يا قنديل ما يجي اليوم وتخلينا وترحل .. لانك قلت لي انك مشيت تبيع قطعة ارض حقتكم في كوستي ..
قلت ليهو : والله ياعمي شادلي اقول ليك الصراحة .. عندي ود عمي في كوستي.. مصر على امشي اشتغل في كوستي معاهو هناك ..
ولسع ماقررت اعمل شنو .. لكن هسي بواصل معاك لمن اشوف القدر برسيني على ياتو بر ..
قال لي : يازول بس غايتو انا متفائل بيك .. وبعدين البسويهو الله كلو سمح ..
اها بعد مشيت من عم شادلي قام نادي يعقوب .. وقاليهو كلام كدا .. انا ماسامعو .. لكن سمعت يعقوب قال ليهو : .حاضر جدا يا حاج .. وكت سألت يعقوب .. قال لي : عمك وصاني اني ما أكلمك بكلام البارح .. انك داير تناسبو .. وانا قلت ليهو حاضر .. انت اوعك تجيب سيرة ..انا زي الماكلمتك فاهم؟
قلت ليهو : جدا يايعقوب انسى الموضوع .. اصلا موضوع ما منطقي .. وماجايب حقو ..
ومرت القصة بتاعة تماضر بت عم شادلي مرورا لطيفا وانتهت قبل ماتبدا .
وانا بديت في الشغل .. والجيران في السوق بقو يجو يسلمو علي.. من بعيد ومن قريب بالله التقول عديت لي سنة .. اكتشفت انو انا عندي قيمة عند ناس بحري ..
ومرت يومين تلاتة وانا بي نفس الوتيرة .. مافي اي جديد.. لا سألت امي من الموضوع .. ولا عرضت فكرة الشراكة على شاذلي . ويوميا خالد ود عمي يوسف بضرب لي من كوستي .. ونتونس .. وانا بتكلم وهو بس يضحك .. انا شخصيا ماشايف كلامي بضحك .. لكن هو الكلمة والتانية يموت كنيشة ..
وبقول لي : والله يا قنديل انت عندك جنس كلام لذيذ خلاص .. والله الزول اصلو مابمل من ونستك ..
اها يوم كدي .. حسيت بصداع تقريبا بعد تلاتة يوم من جيت من كوستي .. وكل الفترة دي انا شايل حمل في قلبي من الكلام الاتقال فوق ابوي قبل سنوات .
قلت لي شادلي : انا داير امسك الولد المكنة وامشي ارتاح مصدع شديد ياخال ..
قال لي : اتفضل طوالي ياقنديل .. ربنا يشفيك ياولدي .. ارتاح عشان تشتغل كويس .. ماتشتغل بتعبك اصلك.. والله عمك ده بقى زول اصلي كيف؟
المهم مشيت البيت ولقيت امي برااااها ودي الفرصة الوحيدة البقدر اخد منها كل المعلومية ..
قلت ليها : يا امي انتي فاضية؟ انا عندي ليك كلام داير اقولو ليك وكلام مهم شديد وهاميني .. امي في الوكت ده كانت بتغسل ليها في عدس .. في صحن كبير ..
قالت لي : بس دقيقة النشد العدس ده فوق النار .. واغتيهو واجيك ..
امي انسانة جميلة بمعنى كلمة الجمال .. الناس بقولو كل فتاة بابيها معجبة .. وانا بقول كل ابن معجب بامه .. وانا في اللحظة دي بقيت بعاين لي امي باعجاب شديد .. وبدعي في سري .. ربنا يديها العافية ويطول عمرها .. ومايحرمنا منها .. مراة اصيلة وطيبة والله ماعشان امي .. لكن لمن جيت اقارن بينها وبين مريم .. امي اجمل منها .. والطف وارق .. نعم مريم مراة متجيهه .. ونايرة ومنعمة ..
وشكلها مامرة خدمة ..
لكن امي النهار كلو شغالة في البيت زي الدربكين .. وبعدين امي تنشاف اصغر من مريم بي عشرة سنين ..
اها بقت تدخل وتمرق.. وتكب في وتغطي .. خلصت وغسلت يديها ونفضتن كدي وجاتني .. قالت لي : اها جيتك ياقنديل هسع يتلقي كلامك المكحلة مايملاها .. ضحكتا وقلت ليها : تعالي اسمعيهو والله كلام يملا الصهريج خلي المكحلة ..
جات قعدت واتمهلت قالت لي : اها داير تعرس ؟ اظنك من شفت القريشات ديل خلاص.. جن العرس ركب ليك في راسك ..
قلت ليها : لالا الموضوع غير كدا خالص يا امي ..
بس يا امي انتي الوحيدة الما حصل وصيتك وقلت ليك الكلام ده سر بيني وبينك بس ..
الموضوع ومافيهو .. انو انا لمن مشيت قعدت مع عمي يوسف. قال لي : امشي سلم على عمك حسين .. ومشيت لي حسين وقابلني مقابلة كعبة .. وسالتو من الحاصل بينو وبين ابوي .. وقال قال .. وجات مريم سلمت علي وقالت لي كيت كيت .. حكيتلها الحصل بالتفاصيل دون زياده ولا نقصان ..
اها حكيت ليها الكلام الحكتو لي عمتي بالتفصيل الممل .. وقلت ليها هسع انا شايف ابوي ده اكبر مجرم وبقيت اكرهو .. ليه انتي يا امي ماكلمتيني بالحصل من ابوي ..يخلي اخوانو يكرهوهو بالطريقة دي .. ولا انتي ماعارفة الكلام ده ..
طبعا انا بتكلم معاها وهي حاصلة عليها حالة من الذهول وبقت تتململ في السرير ماقادرة تقعد .. وانزعجت جدا .. و الان انا متأكد انها عارفة كل تفاصيل الموضوع الفيهو جزء كبير غايب علي..
سكتت مسااااااااافة .. وسرحت في الواطة وقالت لي :
زي ما انت وصيتني يكون الكلام سري .. الكلام البقولو ليك برضو سري .. ومافي زول عارفو غيري انا وابوك فاهم ؟؟
قلت ليها انتي قولي وجربيني .. لكن ياجماعة صراحة انا نويت ما امسك السر ..
لانو السر الزي ده السكات عليهو مضر ..
قالت لي : اولا ابوك وعمك اتزوجو في يوم واحد .. انا ابوك كان عندي معاهو علاقة حب عديلة قبل الزواج .. لكن عمك حسين مريم شافها قبل تلاتة اسابيع من العرس واختارتها ليهو حبوبتك ..
مريم كان عندها علاقة مع واحد غريب في الحلة من حي تاني في اخر البلد وبجي لناس قرايبو .. المهم لاقاها واتعرف بيها وبقو مرتبطين شديد .. بس اهلها ماعايزنو ورفضوهو شديد ..لانو زول بتاع سكر وخمالات .. اها وكت عمك اتقدم ليها .. وافقت بيهو.. ونحن ما كنا عارفين ماضيها كان شنو؟
المهم بعد العرس ابوك يوم شاف مريم واقفة مع واحد غريب .. وجاء سألها .. حكت ليهو قالت ليهو : ده زول اسمو فلان من الحتة الفلانية .. انا كنت بحبو واهلي رفضوهو.. قال ليها : طيب ماصاح تقابليهو بعد اتزوجتي يا مريم .. قالت ليهو : ماقادرة والله يا التوم .. قدر ماحاولت امنع نفسي ماقدرت.. لكن انا بعاهدك تاني مابقابلو .. انت عاهدني .. ماتكلم زول .. وابوك عاهدها وسكت على الكلام .. والله انا ماكلمني .. لكن بقى مراقبها مراقبة شديدة .. كان مشت بكا ابوك بمرق يمشي البكا ..حتى لو مابلزمو .. وانا براي لاحظت انو كل ما مريم تمرق ابوك بمرق معاها .. وشكيت في الموضوع .. لكن سكتا .. اها هي وكت مريم حست بانو ابوك مضيق عليها الخناق .. وعرفتني انا اتضايقت من مروقو وراها كل مرة ..
لاني مرة سألتها قلت ليها :يامريم؟ انا شايفة التوم ده كل ماتمرقي بمرق وراك .. الحاصل شنو ياريت اعرف ؟؟
وهي عاد طبعا لقتها فرصة .. قالت لي : والله بصراحة راجلك ده مكرهني حياتي .. وكل مرة بقول لي كلام انا لامن بخجل منو .. وباريني من حتة لي حتة بتغزل فيني .. وانا مادايرة اكلم اخوهو .. يقوم يخسرو .. ويتعادو الاخوان بي سببي..
عشان كدي عليك الله يا(نجاة) .كلامي ماتمرقيهو لزول ..
انا قلت ليها : ولا انت عليك الله ماتتكلمي بيهو .. خليني لامن اشوف حلي مع الراجل الخاين ده ..يخسي عليهو .. كمان مراة اخوه ؟؟الراجل ده ماطبيعي .. انا لازم افارقو .. قالت لي : لالا لو فارقتيهو الناس بسألوك من السبب .. عليك الله يانجاة عشان خاطري خليك عادية .. وانا سكت ياقنديل وبقيت شايلة في قلبي من ابوك .. يمكن سبعة شهور .. هو بسأل فيني : انتي متغيرة مني مالك؟ .. بقول ليهو : مافي حاجة انا طبيعية بس لو سمحت ماتقرب مني .. انا ما طايقاك .. ومريم عشان تزيل ابوك من طريقا بقت تحفر ليهو .. وتكلم في اهلو نفر نفر .. تقول ليهم : بشاغلني .. والبتكلمو كلو توصيهو تقول ليهو اوعدني ماتقول لزول ..
وجدك وحبوبتك وعمتك .. وعمك حسين كلهم بقو شاكين في ابوك وماقادرين يتكلمو معاهو ..عمك حسين في الاول شاكلها لكن تاني صدق .. وانا لسع مقاطعاهو ..
اها كل الفترة دي ماحصل شاف عليها حاجة ..وقرر يسترها وخلاص ..
بس يوم من الايام .. شافها جاية من مشوار .. ماشة على البيت .. تابع خطواتها عشان يشوفها جات من وين .. لاقا الزول داك مسكو لطشو ودقاهو دقة الكلب .. وقال ليهو : تاني لو شفتك في الحلة دي.. والله اضبحك زي الخروف .. والزول داك فعلا خاف .. وفات خلا البلد ..ماعارفة مشى وين .. وابوك بقى متردد يكلم راجلها .. راجلها ح يحصل طلاق .. يسترها يبقى عيب في حقو .. قال تاني كان شفت الزول ده في الحلة بكلم حسين اخوي ..
ومريم اكتشفت قصة الدقة دي .. اها يوم من الصباح خلت راجلها دخل على امو وابوهو .. وقالت ليهو تعال يا التوم انا داير احكيلك كلام .. انا واقعة في مشكلة بي سبب الزول داك .. بس تعال سريع مافي زول يشوفك .. جاها بي كل صفاء نية .. قالت ليهو اقعد دقيقة النقفل البوتوجاز واجيك خلتو قاعد في الغرفة .. بس جات جارية .. بيغادي كلنا قاعدين ..عمتك وعمك وانا وجدك وحبوبتك .. وحصل زي ماحكت عمتك .. واخوهو شتمو ونبذو نبذ ..الزول مايقدر يجيبو في خشمو .. وابوك قال ليهم نادتني براها .. ماصدقوهو جدك كشحو بالتراب.. وقالو اسكت يا خايب انت لاولدي ولابعرفك .. قام قال ليهم انا الساكت عليهو كتير ..
الكلمة دي انا وقفت لي في قلبي .. لاني عارفة ابوك مابكذب ..
اها وكت بقى يلم في عفشو .. وداير يرحل ..قال لي لملمي حاجاتك نحن ماشين من هنا .. قلت ليهو : انا ماماشة معاك .. وديني اهلي وارحل مكان راحل ..
قال لي يانجاة انا بحبك ..انتي الوحيدة في الدنيا .. وقسما بالله ماحصل فكرت في مراة غيرك .. انتي لو واثقة فيني وبتصدقيني انا بحكي ليك .. ولو ماواثقة امشي اهلك ..
قلت ليهو احكي النسمع .. الوكت ده نحن في غرفتنا الاتنين وانت كنت صغير .. حكا لي كل الحاصل عن مريم وحبيبها .. وقال لي : انتي بالذات لو مامصدقة انا ممكن اثبت ليك ..
انا طبعا صدقتو طوالي والله .. وقلت ليهو طيب كلم اخوك بي عمايل مراتو .. قال لي بعد الحصل ده .. مافي زول بصدقني .. خلاص كدا انا في نظرهم خاين وكذاب .. خليهو يكشفها براهو انا مامسؤول .. وانا سترتها ..
والزول حبيب مريم داك رحل من البلد .. مافي داعي اخرب ليها بيتها .. انتي الكلام ده ماتمرقيهو لي زول .. واتعاهدنا ندفن فضيحة مريم .. الى الابد ..
ابوك قال لي نحن هسع نسكت.. لكن مهما طال الزمن مصيرو الحق يظهر ويبين .. وبعد جينا الخرطوم ابوك بقى مقلق .. وماقادر يسكت .. مشى سافر كوستي تاني داير يستعين بي عمك يوسف.. هناك سمع بانو زول مريم كتلوهو في محل مريسة .. ومريم مفتكرة كتلو ابوك .. لانو هو كان كلم مريم قالها التوم حالف يضبحني زي الخروف .. ابوك وكت سمع بالزول مات .. طوالي جا راجع الخرطوم .. ولاكلم يوسف باي حاجة .. وقال لي اها يانجاة شر وانتهى الحمد لله الماخربنا بيت الناس .. وبقينا ساكتين وبعيدين وابوك اتحرم من اهلو .. ودايما بقول ربنا كريم .. يوم القيامة ابوي بعرف انو كان ظالمني .. ودعواتو اصلو ماوقفت من امو وابوهو ..
ابوك ياقنديل مافي راجل زيو في الدنيا .. اوعك تشك فيهو .. ابوك انت المفروض تفتخر بيهو طول عمرك ياولدي ..
والله ياجماعة انا بكيت بكا في الدنيا دي .. من القصة دي .. وفي سري بقيت بضج ضجة : ياحليلك يا ابوي .. ربنا يحفظك ويخليك .. راجل والله .. يا التوم ود الكتال .. اشهد بالله انا بحبك فوق حد التصور .. ولفت الايام وجاك الزمن يا ابوي .. والزول البظهر الحق ولدك الجبتو من ضهرك ..
الله اكبر عليك يامريم ....
الى اللقاء

[فيتامين سي]

الحلقة 17 ..
بقلم طارق اللبيب ...

قلت ليها يا امي .. والكلام ده كلو انتي وابوي ساكتين عليهو الزمن كلو ؟
قالت لي ياولدي ابوك بقول .. نحن نعفى ربنا يعفى عننا .. ونخلي امورنا لله.. ربنا مابضيعنا .. الحصل حصل مافي داعي .. نضر الناس ونخرب البيوت .. بس ابوك رضى يكون كبش الفداء ..
طبعا انا خلاص بعد الكلام ده النار ولعت في قلبي .. وبقيت زي الزول العندو ملاريا وقرصو دبيب في قلبو .. في البرد الشديد داك .. انا عايز اعمل اي حاجة.. انتقم من مريم باي طريقة .. بس انا لو انتقمت منها .. منو الح يبرئ ابوي .. انا مابسكت.. واليحصل يحصل.. بس لازم افكر .. واطلع ابوي براءة .. بس كيف كيف .. يازول باختصار .. انا قعدت انسج في الخطط والافكار لامن صدعت .. واي خطة افكر فيها القاها فاشلة وقادة .. الا يمكن واحدي غايتو احتمال تنجح واحتمال تفشل ..
يازول انتظرت لغاية ابوي جا من الشغل وبقيت بعاين ليهو .. بنظرة تانية خالص .. يدخل انا بعاين ليه.. يمرق انا بعاين ليه.. وماعارف احساسي جواي كان الوكت داك شكلو شنو.. اعجاب .. عطف .. شفقة .. فخر.. حاجات كتيرة كدا مع بعض ..
قال لي انت الليلة مالك ياقنديل .. الجابك من الشغل بدري كدي شنو؟
ومالك قاعد متمحن ..
قلت ليهو مافي حاجة يا ابوي .. مستعجب في الدنيا الغريبة دي .. قال لي ياولدي الدنيا دي.. الزول يعيش فيها بطيب النية .. وطيب الخاطر . هي كلها ايام معدودة.. والناس كلها بترحل .. والحياة الدايمة بعد الموت .. ازرع البعجبك بعدين حتحصدو هو ذاتو ..
والله ياجماعة الكلمات دي .. وقعت فوق قلبي زي حبات المطر .. كل الغيط الجوة قلبي انطفا .. زي الجمرة الكبو فوقا موية .. قربت ابكي بس قبلت منو كدي .. والرغبة في الانتقام من قلبي بردت شوية .. لكن زادت عزيمتي اثبت ليهو براءتو ..
قلت ليهو يا ابوي انا محتاج لي اتنين مليون .. قال داير بيهن شنو؟ خلاص شفت القروش وداير تبعزقا على اخوانك؟ ..
قلت ليهو تاني مابطلب منك غيرا .. انا مسافر كوستي .. قال لي كوستي تسافر باتنين مليون ماشي تسوي بيها شنو؟
قلت ليهو والله زي ماحكيت ليك ..عندي مشروع مع خالد ود يوسف .. قال داير يأجر لي دكان .. ويملاهو لي بضاعة .. بشيلا وبمشي اذا شفت قصة الدكان ناجحة بتوكل على الله وبخش في الموضوع .. واذا القصة ماجايبة حقها بجي راجع وبجيب ليك القريشات معاي ..
قال لي مافي مشكلة انا اصلا القروش دايرهن لمنو؟ موش ليكن انتو؟
بس انا خايف من البعرقة والتشتيت .. هسي لو بدينا نصرف منهن بطيرن محل ما انصرفن مانعرفن ..
المهم يازول قال لي خلاص وكت تكون مسافر كلمني .. بديك ليهن قلت ليهو انا ماقاعد كتير ..بعد باكر بسافر.. باكر بمشي بحري عندي امور كدي ارتبها .. وبعد باكر الصباح ان شاء الله بسافر..
اها باكر مشيت الكافتيريا الصباح بدري وابيت اشتغل .. قاعد بي بنطلوني وقميصي نضيف .. الحبشي قال لي : (قنديل الليلة مايشتغل؟؟) قلت لي اي يا المبروك قنديل الليلة مايشتغل ..يشتغل انت الليلة .. قال لي انا بتكون شغال تول اليوم ؟؟ قلت ليهو ايوة .. ادعك ساي
خلي الكلام الزي السلطة الخدرا ده ..
بقى شغال وانا جريت لي كرسي وقعدت فيهو زي رئيس اللجنة الشعبية .. خالف كراعي .. وبعاين للشارع .. للماشي والجاي .. بعد شوية ععمك شادلي جاء .. ولقاني قاعد خالف كراعي ونضيف استغرب .. طوالي جا علي قال لي .. قنديل نعل مافي عوجة ياولدي مالك الليلة حارن كدي ..
قلت ليهو دايرك في كلمتين ياعم شادلي .. قال لي خلاص تعال جاي..
ان شاء الله مايكون في زول غلط عليك ..
قلت ليهو ابدا.. قعدنا كدا .. قلت ليهو والله يا عمي شادلي.. ماعارف ابدا ليك من وين .. لكن انا شغل المرتب ده بقى ما مغطي معاي ..
انا داير اخش معاك شراكة في الكافتيريا دي .. وادفع ليك نص الاصل ..
ونتقاسم الارباح .. والشغل ده اسألني منو انا ..
قال لي والله ياقنديل ياولدي .. لو قلت لي الكلام ده قبل موافقتي على على ود اختي .. كنت وافقت .. لكن هسي انا ما محتاج لقروش الحمد لله ..
اصلا كنت متاضيق في اقساط البيت البدفعهن لاخوهو .. وهسع عشان النسب عفوهن لي ..
والبت فرحانة بانو الاقساط اتعفت.. اكتر من فرحتها بعرسها .. عشان كدا قصة شراكة دي انا ما محتاج ليها الان ..
قلت ليهو خلاص ياعم شادلي .. بس دايرك تعفى مني لاني مسافر كوستي .. واحتمال القى لي مصدر رزق هناك .. لانو مرتب العامل هنا مابأسس لي مستقبلي .. انا زول راجيني عرس .. وبيت ومسؤولية .. والعمر بمشي ياعمي شادلي ..
قال لي انا مستعد اديك مرتب عاملين .. يعني اضاعف ليك المرتب..
ماتمشي نحن محتاجين ليك .. قلت ليهو ليهو والله ياخال ماقصرت.. انت زول اصلي .. لكن القصة برضو مابتجي معاي .. انا اتحصلت على راس مال وداير استثمرو .. لكن بوعدك وعد الرجال .. لو مشروعي في كوستي الماشي ليهو مانجح .. بجيك راجع اول خيار ..
المهم يازول عمك اتجرس .. وبقى يحنس فيني .. والله قربت ارضخ ليهو .. لكن انا كان في راسي في هدف كبير ..
اكبر من القروش والكافتيريا وغيرو .. في النهاية عمك قال لي خلاص يازول انا في رجاك .. البسويها الله كلها خير .. انا بتكلم معاهو كدا .. تلفوني دقه .. في جيبي .. مارديت عليهو لامن قطع ..
كملت كلامي مع عمي شادلي وودعتو وطلعت .. طلعت التلفون من جيبي لقيتو ده رقم واحد صاحبي ساكن في الصبابي .. طولت منو
ماعارف امكن اكتر من 8 شهور مالاقيتو ولا أتصال مابينا ..رجعت ليهو ..
الو محمدبشير ؟؟ قال لي اووو قنديل.. ياخي وين انت ؟
قلت ليهو وين انا ياكعب عليك الله هسي من متين ماضربت لي ولاسألت من اخباري ؟
قال لي وانت مالك مابتسأل تلفوني ما معاك؟
قلت ليهو والله ياهو الكلام .. اللوم متبادل بس قلت اهاجمك اولا؟
قال لي لكن دي على انا؟
المهم ياخي انا ضربت ليك داير ادعيك لزواج اخوي سامي .. اخيرا جا من ليبيا وداير يعرس .. وان شاء الله المناسبة بكرة .. وانا ضربت ليك مخصوص انت عشان مايكون عندك عذر في الغياب ..
قلت ليهو انا والله يامحمد مسافر بكرة كوستي ..
قال لي انا مابعرف كوستي ولا ربك .. والله بكرة ماتجي عرس سامي تاني لابيني لابينك .. يعني شنو؟ ماممكن تأخر السفرية يوم؟.. انت محصل شنو؟ العرس ده بجي مرة واحدة في العمر وسامي اخوي بسأل منك .. وقال داير يشوفك .. لانو سمع بيك كتير انا بحكي ليهو عنك ..
انا سكت مسافة.. ولقيت كسرة الخاطر لي محمدبشير مابتشبهني .. يازول مافرقت لو اتاخرت يوم ..وحضرت العرس ومشيت ..
قال لي بس باكر المساء تجي تتعشى معاي في الصالة الفلانية .. وتاني عفيت منك .. قلت ليهو خير يامحمد.. والله ما بكسر بي خاطرك ابدا ..
على كل حال اتاخرت اليوم ده .. وباكر بالمساء لبست واتقيفت .. وركبت مشيت الصالة المعنية .. وماعارف القدر كان محضر لي شنو؟ اتاريهو التاخير ده لي سر يعلمه الله .. مخصوص ربنا اخرني من سفرة كوستي .. للعرس ده شوفو الحصل ..
مشيت يازول لقيت ليك محمد بشير واقف برة.. في مدخل الصالة .. بستقبل في الناس.. معاهو اخوانو واولاد اهلو .. سلم علي بي ترحيب شديد .. ودخلني جوة قعدت في واحد من الكراسي الملتفات حول الطرابيز .. الكرسي ده ملبس بي قطيفة بيجية .. والطربيزة كبيرة ومدورة .. وفوقا فوطة والله تنفع كيس لي مراتبي الفي اوضتي .. يازول الصالة دي مليانة ملي غريب .. وباااردة كندشة عجيبة .. والناس ديل قاعدين حول الطرابيز زي طرابيز الكشتينة في نوادي ام درمان .. والنسون ديل اشكال والوان .. وجنس لبس بس تقول علبة حلاوة شتتوها ..
والشاشات دي شغالة .. تجيب في صور البنات السمحات .. وانا قدامي شاشة كبيرة .. بس تقول موجهة لي انا بالخصوص .. وانا طبعا بعاين للشاشة بي طرف عيني .. اسرق النظر مرة مرة .. عشان الشباب القاعدين معاي في الطربيزة ديل مايلاحظو لي خفتي وطيارة عيني ههه..
ربنا يهدينا.. لكن انا الجمال بيأسرني طبعا" زي ماقالو .. ان الله جميل يحب الجمال .. لكن في قرارة نفسي .. سماحة الشكل دي ماكل شي .. الكلام الاخلاق .. امي وكت اقول ليها فلانة ديك سمحة.. تقول لي قرد يونسك . ولاغزالة تزوزيك.. لكن كان ربنا بريدك يديك واحده خلقة واخلاق ..
المهم في اللحظة دي .. ظهرت صورة بت قدامي في الشاشة .. البت دي ماغريبة علي .. وبتاع الكميرا ركز فيها الكميرا .. وثبت الصورة عديل التقول قاصدني .. وكت دققت فيها .. لقيتا ليك دي ولاء .. ههه .. بالله شوف البت دي.. والله عاملة في وشها عمايل السيح والتلاقيح .. لمن متغيرة كلو كلو .. والله التقول ما ياها البت البتجي الكافتيريا ديك ..طوالي بقيت اعاين للكميرات الموجهات على الناس .. لقيت الكميرا الفي النص دي الرافعنها بي شي زي الونش .. موجهة على الحريم .. وانا بقيت اناوط واعاين لي عدسة الكميرا موجهة وين .. لغاية ماوقعت عيني على ولاء .. قاعدة في الناحية الجنوبية الغربية .. ونحن في الجانب الشمالي .. بقيت اعيان للبنات القاعدات جمبها .. مايبقى عبير فيهن ؟
عبير البجيبها هنا شنو؟؟ لاهسع تكون ماجات من شهر العسل .. واحتمال تكون معسلة في المانيا ولا النرويج ..
لمن ختيت بالي لروحي.. لقيت الشباب القاعدين معاي في الطربيزة بعاينو لي بسخرية كدا .. وانا عامل زي الاهبل .. مادي رقبتي زي الطيرة وبتلفت .. وبعد ده كلو ما لقيت واحدي قاعدة معاها .. من البنات الكان جن معاها الكافتيريا لاعبير ولاغيرها .. وبعدين رجعت بسرق في النظر من الكاميرا .. ياربي ولاء دي علاقتها شنو بي ناس محمدبشير ؟ احتمال تكون بتبقى للعروس؟ والله ماعارف .. والكاميرا شغالة بتجيب في البنات .. واحدات فتوات واحدات معرسات .. ومرات يجيب اليدين والحنة والغويشات .. غايتو المصور ذاتو التقول بالله بصور ليهو في اعلان .. لي فلم وثائقي .. والفنان ده يتعاور ويتراقص .. ماعارفو حاسي بشنو؟ وبغني في كلام
نصو كلام شوارع .. والله انا الراجل خجلان منو .. وانا لسع بعاين في الكاميرا بي طرف عيني بي كل انتباه زي الكاني كايس لي لزول .. وعندي احساس اني ح اشوف زول .. والكاميرا شغالة تتجول في وشوش البنات ..
الى اللقاء ..

[فيتامين سي]

الحلقة 18 ..
بقلم طارق اللبيب ...

يازول قدر ماعاينت جاي وجاي ..ماشفت اي جديد .. وجابو العشاء .. واتعشيت .. طبعا ياهو صحن الصيني الملبس بالكيس.. وجواهو الاكل البارد وناشف ومسيخ ده .. اصلو ما بحبو الكوكتيل ده .. والعرسان دخلو القاعة .. والعريس اخو محمد .. بشبهو شبه صورة بالكربون .. لابس البدلة السوداء .. ورابط ليهو شريط وهلال.. والحنة في يديهو سوداااء .. والله الزول يشتهي العرس .. والعروس جميلة ..ماشاء الله .. ياخي الناس ديل كلهم سمحين ..
المهم يازول فتاشتي الما منطقية ديك.. باءت بالفشل طبعا".. ناديت محمدبشير ..مع انو مشغول شديد .. واي زول يمسكو بي جمبة يتكلم معاهو .. اشرت ليهو قلت ليهو تعال .. عمل لي يدو كدا ، لمه اصابعيهو لي فوق . يعني (لحظة بس) ..
انتظرتو شوية كدا ..وانا خايف ولاء تقوم تمشي ..ومستحي ماقادر امشي ليها مع الناس .. وماعارف القاعدين معاها ديل ببقو ليها شنو ؟
المهم محمد بشير جاني .. قلت ليهو عاين معاي يامحمد .. اديني اضانك .. وسوست ليهو في اضانو .. عشان صوت السماعات عالي شديد .. قلت ليهو. في بت هناك .. في الناحية الجنوبية الغربية .. لابسة فستان كحلي ..لامع .. عن يمينها واحدة لابسة فستان سيتان دهبي .. وشمالا مراة كبيرة لابسة توب رمادي بالكوبي . ماتعاين ليهم ولا تأشر ..محمد قعد في الكرسي.. وشال قزازة موية الصحة من الطربيزة.. وبدا يشرب وبحلق عيونو ..بعاين هناك .. شافها ..
قال لي .. ولاء ؟؟؟
قلت ليهو ايوة.. بتعرفها؟؟ .. قال لي ايوة بعرفها دي اخت احمدعامر .. كان مرة انت شفتو معاي متذكرو؟.. قلت ليهو ايوة ايوة .. قال لي طبعا" الزول ده صاحبي شديد .. وهو امو واخواتو كلهم جو العرس .. بس ماقلت لي بتعرفها من وين الهبلة دي ؟
قلت ليهو ولاء وصاحباتها .. زبائني في الكافتيريا طوالي بجو يشترو مني .. قال لي طيب انت عندك معاها علاقة.. ولا ساي كدا معجب وكدا؟
قلت ليهو لاهذا ولا ذاك.. انا كنت مكسر في صاحبتها وعرسوها .. كنت عايز اسألها من اخبارها ..
قال لي بس هسي مافي طريقة تتكلم معاها ..لانو احمد اخوها ده حايم فوقن يمشي ويجي .. ودي مشكلة جاهزة ..انت ماعارفو احمق ومعقد كيف .. قلت ليهو صاح والله .. شكلو ذاتو مرعب . لكن انا بلقى لي طريقة ماتخاف.. بس طلب شوف ليك واحدة من بنات اهلك تمرق بيها برة الصالة .. مادامت نيتي طيبة مابتحصل مشكلة صدقني ..
قال لي جدا دقايق بس ..
بعد شوية لقيتو ليك ماشي مع واحدة طويلة كدي .. هو ينشاف ماشي معاها قصير .. ياخي دي طول المصور .. ماشاء الله عمود كهربا بس .. ماشي معاها وبتكلم معاها.. الظاهر دي الحتجيب لي ولاء .. اها مشي منها كدي على شرق الصالة.. وهي مشت على ناس ولاء .. وساقت ولاء وجن طالعات .. وانا في اللحظة دي بقيت افتش لى احمد اخوها عشان اتحاشاهو .. انا شايفو قبل كدا.. لكن قدر ماحوصت بي نظري ماشفتو .. الناس ديل كتار كترة .. والفسحة القدام الفنان دي مليانة ناس .. فايرين يرقصو ولايصين في بعض .. برضو ما ممكن يتعرف .. المهم قويت قلبي وقمت حصلت البنات الطلعن من الصالة .. مشيت وراهن ..كانن ماشات في ممشي كدا ..في نص نجيلة جيت بي وراهن .. وبكورك عادي .. ولاء .. يابت دقيقة .. وقفن .. قالت لي مرحب ..
قلت ليها كيفك ياولاء .. وسلمت على الطويلة دي .. صنقعتا ليها كدا.. وسلمت ..
قات ليها ياولاء انتي ماعرفتيني ؟ قالت لي عرفتك ياقنديل.. مرحب بيك .. قلت ليها ياولاء ليه انا بتصل عليك ومابتردي على ؟
قالت لي لانو كان عندي ظرف .. قلت ليها ظرفك شنو؟ ان شاء الله خير ..
قالت لي انا امي كانت راقدة مستشفى .. ومرافقنها انا واخوي .. واخوي اي مكالمة تجيني برخي اضانو .. وبشيل تلفوني كتير .. وانا عاملة تلفوني صامت . مابرد الا على صاحباتي وزميلاتي ..
قلت ليها والله انا اتعقدت عديل .. قالت لي والله نحن يادوب خرجونا اول امبارح .. وانا كنت ح اتصل عليك .. بس تلفوني لاهسي عند احمد اخوي .. وما حافظة منو ولارقم ..
قلت ليها وكيف اخبار البنات .. قالت لي انت قول بالاصح كيف اخبار عبير .. عارفاك داير تسأل منها هي وبس .. ياخي انا كلمتك . قلت ليك الزولة دي عرست.. وخلاص بقت في خبر كان ..
انت مالك كدا لايوق ؟؟ .. ماتشوف غيرها ياخي . حواء والده .. قلت ليها هسي القال ليك منو انا بسأل من عبير جبتلك سيرتها ؟
انا بسأل فيك من زميلاتك وبس.. كلكن يعني .. انا اكتر زول عندي علاقة معاهو فيكن الاربعة .. انتي .. لو ماعارفة اعرفي ..
قالت لي نعم؟؟
انا ؟؟ علاقة شنو ياقنديل ؟؟ يعني لاقيتك مرتين خلاص سميتها علاقة؟؟ عليك الله .. ما تخليني انسبك .. للناس البيئة ..
غايتو البت دي محرجة بشكل غريب .. اعوذ بالله .. غايتو لاخلقة لا اخلاق ..
المهم انا خليتها ورجعت .. وجواي اصريت اصرار شديد ..اني تاني ما أسال من حاجة اسمها عبير .. مادام ديل صاحباتها .. بس بصراحة انا حاسي انو ولاء دي .. مضايقة من اعجابي بي عبير .. وكنت شاكي في انو ولاء عايزاني لروحها .. وبتحاول تطفشني من عبير .. حتى لو كذبت في قصة زواجها ..
لكن هسي الشك ده زال .. لانو ولاء شكلها ماعايزاني .. واسلوبها معاي في الكلام زي البتكرهني ..
وأكدت لي معلومة زواج عبير للمرة التانية .. وقدام البت الطويلة دي .. يعني مافي سبب بخليها تكذب قدر ده.. ليه يعني ؟
المهم انا رجعت على الصالة ..واخدت لي عشرة دقايق ..وقمت مشيت ..عشان ابارك للعرسان .. لقيت العريس كان مخلي العروس قاعدة براها . وبيرقص مع اصحابو .. المهم يازول هبشتو في كتفو كدا .. وسلمت عليهو ..وقلت ليهو الف الف مبروك .. انا قنديل صاحب محمد .. قال لي اووو قنديل .. عليك الله ماتمشي .. دقايق بس ..بجيك هسي.. انتظرني هناك .. قلت ليهو حاضر منتظرك .. مشيت مكان أشر لي .. قعدت انتظرته .. جاني معاهو محمد .. قال لي والله ياقنديل ..جزاك الله خير ياخي.. طبعا محمد مقطع مصارينا بالضحك.. وهو بحكي لينا في قصصك.. ونوادرك وتعليقاتك .. اتمنيت الاقيك والله ..
قلت ليهو يازول .. انت امشي خلص عسلك وتعال.. بتلقاني قاعد .. بس جيب لي معاك طاقية وسبحة من شهر العسل .. قعد يقعقع .. ويضحك .. انا طبعا عشان قال لي كلامك بضحك .. حبيت اديهو واحدة بمناسبة العرس .. ان شاء الله تكون بايخة ذاتو.. القحة ولاصمة الخشم ..
المهم ودعتهم واتخارجت .. وخشمي ملح ملح .. كنت بتمنى اشوف عبير .. ان شاء الله معرسة .. بس شوفة واحدة من بعيد .. لاني هسي بفتش لي صورتها في وجوه الناس ..
لكن تاني من الليلة ح اتصرف بي عقلي.. وامسح الخيالات من خيالي .. يارب تقسمنا لنا الخير ..
يلا انسى يازول .. خلي الامور على الله ..
المهم يازول الحفلة ديك كانت لي خير لي .. وقطعت من جواي اخر سبيبة ..امل في الزولة دي وخلاص.. القناعة كنز لايفني .. لكن صراحة دي اول عاصفة تدخل قلبي بالطريقة دي.. وزعزعت كياني .. وداير لي فترة عشان اتشافى من الموضوع ده ..
جيت راجع البيت بالليل .. شديد .. ولقيت ابوي نايم .. بقيت متردد ياربي اصحيهو .. يديني القريشات .. ولا انتظرو لغاية الصباح .. واطلع متأخر ..
فضلت اني اخليهو ينوم واتأخر شوية الصباح .. عشان القى طريقة اودعو ..وتصبحو على خير ..
باكر صباحات الله بي خيرا .. قمت بدري الحمد لله وصلينا .. وشربنا الشاي
وودعتهم وشلتا الاتنين مليون من ابوي واتحركت ..
على كوستي .. طيلة الطريق وانا بحاول انزع من قلبي اي بقايا من الانسة فلانة ديك .. وقلت كلام كتير خلاص ..
من الكلام القلتو .. ــــــــــــ..
المقادير اصلو كاينة .. واي زول ياكل نصيبو ..
البكون شاطر مفتح .. ممكن الخذلان يصيبو ..
والبكون اطرش مقفل .. قد يفوز بي ريد حبيبو ..
مهما زول حاول يجازف .. للقدر قدرو بيجيبو..
ـــــــــــ .. ـــــــــ
والحمد لله وصلت بالسلامة .. وخالد اتلقاني في الموقف .. ركبت معاهو ..والله الزول ده فرح بي فرح .. ياريت لو اي زول بعزني زي مابعزني خالد ود يوسف عمي .. وانا ذاتي والله بقيت بعزو معزة غريبة .. الخرطوم دي بي وساعا ده.. مالقيت لي فيها زول صافي وطيبوبي زي خالد .. مشينا الدكان فطرت معاهو وشربنا الشاي ..
قلت ليهو ياخالد انا جيتك .. ومواضيعي معاك كتيرة .. وانا عايز اخليك بير اسراري .. قال لي يازول والله حبابك .. والله ما اخذلك
قلت ليهو اها اول حاجة موضوع الدكان شنو؟
قال لي الدكان انا مسكتو .. كان نفع معاك الحمد لله.. كان ما نفع معك ..
بشغلو انا وبشوف ليك الحاجة النافعة معاك .. قصرت معاك؟
قلت ليهو والله انت التقصير مابتعرفو تب .
قال لي هسي تعال معاي نشوفو ونجي .. جيت عاينت للدكان .. في حتة كويسة شديد .. ودكان كبير شديد ..
قال لي ومأجر بي رفوفو وطرابيزو .. يعني بس تجيب بضاعتك وتشتغل ..وانا ماداير منك قرش لاتعريفة .. بملاهو ليك لامن يدفق .. تبيع وتجدع لي .. انا بستفيد وانت تستفيد ..
انا صراحة حسيت الموضوع ده معاي كويس شديد ..
قال لي كمان اقول ليك حاجة ؟ مقدم تلاتة شهور من الايجار دفعتو ليك من جيبي .. هدية ليك ساااكت ..بس محبة ..
قلت ليهو والله ياخالد كدي خجلتني كلو كلو .. ياخي كدا كتيرة علي.. انت كدا بتخليني مديون ليك طول حياتي .. قال لي افو يا قنديل انا اخوك والله .. والله ختيتك اخوي ود امي وابوي ..
قلت ليهو بس يا خالد.. انا داخرك لي حاجة اصعب من القروش.. ومن الدكان.. ومن اي حاجة تشوفا في حياتك ..
ومافي زول ممكن يساعدني .. فيها غيرك انت .. وانا جيت مخصوص للحاجة دي ..يعني الشغل بالنسبة لي هدف نمرة اتينين ..
قال لي قول ..والله أكون بقدر عليهو ..لو بي دمي ما بتلقاني منفزر..
قلت ليهو انت نسيت اني انا مشيت من هنا شايل فوق راسي تهمة ابوي ؟ انا جيت عشان ابرء ابوي .. انا الوالدة حكت لي اي حاجة .. يا خالد وعرفت انو ابوي برئ ..
قال لي امك حكت ليك شنو ياقنديل؟؟ .. انا سكتا مسافة .. وقلت ليهو حكت لي انو مريم كذابة وبس .. امي كانت شايفة ومراقبة الحقايق .. وطبعا" ياجماعة ابيت احكي لي خالد جريمة مريم .. لانو حاجة ستروها ابوي وامي .. انا مستحيل اكشفها وافضحها .. الا تفضح روحها براها ..
قال لي يا قنديل ما اختلفنا ابوك برئ .. ومريم كذابة .. مافي خلاف .. اها ح نقدر نثبت الكلام ده كيف ؟
قلت ليهو انا اوريك كيف نثبتو . اسمعني كويس وركز معاي ..
الى اللقاء

[فيتامين سي]

الحلقة 19 ..
بقلم طارق اللبيب ...

اولا انا فكرت في خطط كتيرة شديد.. لقيتها مابتنجح .. مافي داعي اسردها ليك لانها كلها (فشلنك) .
اي زول يا خالد ..داير ترميهو وتهزمو.. هزيمة تاني مايقوم بعدها ..تشوف نقاط الضعف بتاعتو وين.. وتضربو ضربة قاضية في نقطة الضعف .. ينهار انهيار عنيف .. مريم دي الشي الانا متأكد منو ..انها زولة ضعيفة جدا قدام الدجالين والفقرا.. صاح؟
قال لي ايوة ..ياخي دي دينها وايمانها فقرا وشيوخ وشعوذة .. قلت ليهو حلو حلو شديد .. اول خطوة دايرين نعرف الفكي البتمشي تعمل عندو الاعمال.. وتنجز عندو المهمات .. يعني شيخ عقيدتها ..
دايرين نعرفو منو وساكن وين؟.. خالد قال لي داير بيهو شنو ؟ قلت ليهو بس انت نفذ معاي حبة حبة .. قال لي باكر من الصباح بجيب لك خبرو واسمو ومكانه .. اها تاني محتاج لاي معلومات ؟؟
قلت ليهو والله في معلومة صغيرة.. لو قدرت اتحصلت عليها .. مريم دي اشتكت من اي علة في حياتها ؟ .. يعني مرضت حصل ليها اي شي ؟ ..
قلت ليهو والله قبل فترة سمعت قالو مشت تتعالج في الخرطوم لكن من شنو بالضبط ماعارف .. وبرضو بجيب ليك المعلومة دي ..
اها يازول اتونسنا .. وحكيت ليهو حكاياتي مع الجماعة بتاعين الصالة والدرامة الحصلت لي مع ولاء ..
قال لي انت عارف ياقنديل .. اي بت قليلة ادب ولسانها فالت دي بتكون جبانة جدا".. واقل هرشة بتخليها قدامك زي الحمل الوديع.. .. انا كان في محلك كان رشيتها كف .. قلت ليهو معناها دي لو رشيتها كف بقوم تحبني .. الحبة التقوم لها تحت لسانها .. قال لي ياخي انسى بنات الخرطوم ديل .. خليني اشوف ليك من بنات بحر ابيض.. عشان تعرف الاحترام على اصولو .. قلت ليهو الاحترام عندكم ظاهر في مريومة .. قال لي طيب والدتك من وين ؟ وحبوبتك؟ .. وعمتك نفيسة؟ . وقعد يضحك .. انا خجلت وسكت ساي .. قلت ليهو والله ختيتها لي خته بي فهم ههه
قال لي اها وبعدين انت عامل كيف .. قلت ليهو والله بديت اعالج في نفسي بي نفسي ..
المهم اتونسنا كتير .. ولفينا السوق مشى ليهو مشوارين برة السوق والاتنين ساقني معاهو .. وشنطتي قاعدة في العربية .. لغاية المساء كدا .. غايتو مشينا غشينا ابوهو.. وسلمت عليهو وبرضو استقبلني احسن استقبال .. وقال لي خالد فرحان بي جيتك.. ان شاء الله تتعاونو الاتنين مع بعض .. وتستفيدو .. خالد ولدي ده ياقنديل فقد الثقة في الناس.. بي سبب اخلاق ناس السوق .. لكن شكلو وثق فيك.. ودي حاجة ماساهلة .. قلت ليهو ان شاء الله ربنا يجعلنا عند حسن الظن ياعم . الكلام ده كان في العربية.. وماشين البيت ..
انا قلت لي خالد انا ماعايز زول من ناس البيت يعرفني جيت.. لا أمك ولازوجتك ولا سناء .. قال لي ايوة كويس .. وانا قلت كدي مخصوص .. عشان ابوهو .. ما يكلم ناس البيت بي جيتي .. لانو سناء بتوصلا طوالي لي اخلاص .. واخلاص بتكلم مريم امها .. والخطة بتفشل .. ابوهو قال انتو دايرين تعملو شنو؟.. خالد قال ليهو عندنا موضوع مصيري.. وكت ننجزه بنكلمك .. ابوهو قال ليهو انا بحي الانجاز وانا مابتكلم ..
طبعا" زي ما ملاحظين.. الليلة محمد زوج اشراقة مافيش.. ماعارفو وين .. انا اصلا ما سألت منو ..
على كل حال وصلنا البيت .. وونسة وشنو وشنو .. وخالد كل مرة يدخل جوة البيت ويجيني مارق .. وتاني يدخل ويجيني مارق ..
المهم يازول.. الصباح قال لي الموضوع ماشي على قدم وساق .. نصل الدكان واوريك الحاصل ..
طلعنا الصباح .. في الدكان قال لي اسمع الحصل.. اول حاجة اتكلمت مع اشراقة الصميمة حافظة الاسرار.. قلت ليها علاقتك شنو بي اخلاص ومريم ؟.. قالت لي علاقة عادية يعني بس مابريدهم الاتنين ..
قلت ليها انا عايزك تضربي لي مريم.. تحكي ليها كضبة .. قولي ليها انا عيانة .. وماعايزة اكلم ناس البيت .. وبتجيني خوفة وخيالات .. اي حاجة .. بس المهم يكون مرض عزيمة وفقرا .. قولي ليها عايزة لي شيخ بتثقي فيهو امشي ليهو .. يكون شيخك انتي شخصيا يامريم ومجرباهو.. اها اشراقة ماقصرت واتصلت على مريم وقالت ليها الكلام بالنص ..
مريم قالت ليها والله بس تمشي (ابو رتنزا) .. وحات الله تاني الحبة دي ماتجيك .. ابو رتنزا يا اشراقة عنو الخدام .. (قرناء مساعدين من الجن) .. والله يديك بخرة واحدة .. التانية ماتحتاجي ليها .. ده شيخي الاول والاخير .. وماعندي غيرو ..
قالت ليها خلاص يا مريم.. بس وصفي لي محلو .. وماتقولي لاي زول .. وصفت ليها قالت ساكن في حي (..........) حتى ادتها رقمو .. يعني ياهو الفكي بتاعها الاساسي ..
اها طبعا خالد كدا خلص ربع المشوار .. والباقي قدامنا كتير .. .. قلت ليهو . اسمعني ياخالد.. يلا هسي حار حار.. اتصل على الفكي ده .. خالد قال لي انت عايز تعمل شنو بالضبط؟ .. المهم وريتو خطتي بالكامل واقتنع بيها مية المية ..
طوالي خالد طلع تلفونو.. وجبغ جبغ ضرب لي ابورتينزا .. (طبعا الرتنزا دي جهاز كهربا في مكنة العربية .. وبرمزو بيهو للحجاب .. التميمة البلبسوها في الرقبة وفي الضراع وكدا ) اها نحن ماعارفين اسمو الحقيقي منو وابوهو منو.. بس الظاهر مشهور با بو رتينزا ..
خالد قال ليهو الو .. السلام عليكم ..
وداك برد عليهو وانا ماسامع بس بعاين في عيون خالد ود يوسف ..
قال ليهو سلام ياالشيخ؟ ده تلفون الشيخ؟
كيف حالك يامولانا .. انا خالد يوسف .. ابوي يوسف التماري كان بتعرفو ؟ .... ايوة بس ياهو انا ولدو ..
انا والله عندي معاك موضوع مهم يامولانا .. وضروري وعايز اصلك هسي انت موجود؟ ..... خلاص.. مسافة السكة وانا معاك ..
اها خالد قفل التلفون وقال لي يلا ياقنديل .. قوماكا .. الكلام ده زي الساعة 11 صباحا .. خالد خلا الولد الشغال معاهو في الدكان.. قال ليهو لو في زول جاني هنا انا ماشي قريب وجاي ..
وركبنا العربية ومشينا لي الفكي .. الوصف كان دقيق ومظبط ..
لقينا البيت كبير وعالي.. ومضروب لون بالبصلي بالابيض .. وفيهو بوابة كبيرة فاتحة غرب .. بوابة عااالية الزول الا يطلع ليها بي درجات زي المنبر .. المهم وقفنا عربيتنا برة .. وطلعنا الدرجات على الباب .. ودقينا الباب وكتير مافي زول جانا .. خالد طلع تلفونو واتصل عليهو .. وانا شايل كيسي معاي فيهو الاتنين مليون الجايبهن من ابوي ..
رد على خالد .. خلاد قال ليهو يا مولانا نحن قدام الباب .. جانا شافع كدا عمر 11 سنة فتح ليما الباب .. قال لينا ابوي جوة قال ليكم تأالو جوة ..
خالد قال ليهو جوة وين؟ .. قال شفتو الاوضة الهناك ديك .. اقعدو جمبها هسء ابوي بجي ..
اها يازول في كرسيين بتاعات حديد كدا . مجلدات بحبال .. قعدنا انتظرناهو .. والاوضة القالوها دي مقفولة.. وفاتحة جنوب .. بعد شوية جانا الفكي مارق من جوة البيت .. لابس لبسة افريقية كدا .. زي اللبسة البلبسها جون قرنق ديك.. ولابس ليهو طاقية سودا بي بني .. قافلة كدا تشبة طواقي العمانيين .. وشايل ليهو سبحة .. ووشيهو ده نضيف يلمع.. زي حبة الزيتون ..
قال لينا مرحب مرحب .. حبابكم يا (خالد يوسف) .. اتفضلو جوة..
فتح باب الاوضة دي.. ودخل ودخلنا وراهو .. الاوضة فيها سريرواحد وتلاتة كراسي .. وفيها فرشة كبيرة في الارض .. وخاتي فوق الفرشة تقريبا" زي 30 علبة .. وكمية من الفتايل .. وهتش كدا وجلود .. وراس غزالة يابس ؟؟ وهيكل ارنب ..
وحاجات تجيب الخوفة ..
قال اقعدو في الكراسي .. وهوقعد اتفرجع في الارض .. عندو زي مخدة كدا.. قعد فوقها والفتايل ديل قدامو ..
خالد قال لي جيب الكيس ياقنديل .. مديت ليهو الكيس الفيهو القروش .. شال الكيس وطلع منو الاتنين مليون.. مسكن بره وبدا يتكلم مع الفكي .. قال ليهو يا مولانا .. نحن عندنا عمل خير.. مافي زول بقدر يعملو غيرك انت .. ونحن جاهزين من الالف للمليون ..
يازول الفكي ده وكت شاف القروش كدا.. قرب يقوم يرقص .. قعد يتمطق .. ويبلع في ريقو .. ويتململ زي التقول قارصاهو ام ريش ..
قال ليهو .. ياخالد انت زي ولدي .. وابوك صاحبي من زمان .. (عان كضبو) .. اي طلب تطلبو بنفذو ليك خسوسن عمل خير ..قول بس طلبك شنو؟
خالد قال ليهو عندي مراة عمي .. عندها فيك عقيدة قوية خلاص .. والمراة دي .. اتهمت عمي التاني .. ابو قنديل ده .. بتهمة كذب .. ونحن بس دايرنها تعترف .. بالحقيقة .. وتقول الحق .. عشان ترفع التهمة عن الراجل المسكين ده .. بتقدر تقوم بالعملية دي .. ولانشوف زول تاني؟
قال لينا دي اسهل حاجة .. بس هي تجيني كيف ؟ والله لو جاتني اخليها تقول الحقيقة .. وكان دايرني اسجل ليكم الكلام بتلفوني ده بسجلو ..
خالد قال ليهو تجيك دي ساهلة باكر بتجيك .. انا بكلم اختي تقول ليها الشيخ قال ليك لازم تجي .. وانت لمن هي تجيك تقررها بالحقيقة .. خليك عارف هي عاملة عملية مرارة قبل خمسة سنة
قال ليهو عارف عارف ..
انا طبعا ياجماعة .هنا اتدخلت .قلت ليهو ياشيخنا .. انت بس ماتسجلها .. لكن خليني انا اكون سامع ان شاء الله لابد في حتة هي ماتشوفني ..
قال لي خلاص بس خلوها تجي بكرة.. وانت تكون متواصل معاي بالتلفون .. واتفقنا على كدا .. وخالد عدا ليهو 500 الف اداهن ليهو.. وقال ليهو .. عندك 500 تاني بعد انجاز المهمه ..
قال لا بعد انجاز المهمة مليون كامل .. قال ليهو مافي مشكلة .. نقول مليون ..
وودعناهو طلعنا .. انا عندي رجفة من التوتر .. والله الزول ده محلتو دي مخيفة وكئيبة خلاص .. اول مرة اخش لي زول زي ده في حياتي ..
المهم يازول بي اختصار بعد رجعنا .. خالد قال لي اشراقة .. تضربي لي مريم.. وقولي ليها أنا مشيت للشيخ .. والشيخ قال مريم لازم تجيني .. والظاهر في حاجة خطرة يا مريم ..
واشراقة اتصلت علي مريم وبلغتها الرسالة .. ومريم طبعا" اتلخبطت لخبطة شديدة خلاص.. وقالت ليها باكر من الصباح انا بمشي ليهو ..
ونحن اتصلنا علي الشيخ في نفس الليلة وبلغناهو .. وقال قنديل يجيني قبليها ..
انا يازول من الصباح بدري طلعت مع خالد.. وصلني بيت الفكي .. وخلاني هناك ورجع .. والفكي جاب لي الشاي.. واتونس معاي وبحكي لي عن حكايات مريم .. وكمية الناس المربطاهم عندو ..
بس مافي داعي للفضايح.. ونبش الماضي.. انا عندي مهمة معينة ..
اها يازول زي الساعة 9 صباحا كدا الباب دقه .. الولد مشى يفتح..
ابوهو قال ليهو لالا امشي .. بفتح الباب انا براي ..
مشى الباب لقى مريم وصلت ..
قال ليها ادخلي جوة على بيت الحريم .. بجيك هسي انا .. وجاني دخلني في اوضة تانية.. ملصوقة مع الاوضة بتاعة العمليات دي ..
وبيناتن شباك .. وباب .. وقفني بي جوة .. وقال لي اقعد هنا واسمعني بقول ليها شنو.. وبتقول لي شنو..
وانا بقيت لابد في الاوضة.. ومنتظر وهو مشى نادها وجات .. انا سامع ليك صوتها واااضح .. طلعت تلفوني وعملت وضع الطيران.. وشغلت التسجيل طوالي ..
الفكي قال ليها يامريم.. في موضوع خطر .. وانتي باقي ليك ايام معدودة في الدنيا دي .. تتذكري قبل خمسة سنةعملتي عملية مرارة ؟
قالت ليهو ايوة صح .. قال ليها العملية دي بدا فيها سرطان ..
وانا شفتك في الخيرة .. وكنت عايز اعالجك قبل تجيني هنا .. لكن في مشكلة وقفت لي في طريقي ..
قالت ليهو مشكلة شنو؟ ..
قال ليها انت قبل سنوات.. اتهمتي زول من اهل زوجك.. تهمة بالكذب .. وحصلت فيها فتنة كبيرة .. وده السبب المنع علاجك ..
قالت ليهو بس الكلام ده كان زمان .. قال ليها احكي لي الحصل شنو يامريم وبالتفصيل .. وماتنسي اي كلمة ..وبعدين انا بوريك تعملي شنو؟ احكي يامريم وسرك في بير .. واسرارك كتيرة معاي يامريم .. وبدت تحكي .. وانا شغال تسجيل .. وتعالو اسمعو معاي القصة
الحكتها المراة دي ..
الى اللقاء