القنديل لـلكاتب/ طارق اللبيب ، سودانية (مكتملة )

[فيتامين سي]

الحلقة 20 ..
بقلم طارق اللبيب ...

قالت ليهو والله يامولاي الشيخ .. المشكلة كلها سببها اهلي .. الناس ديل هم الكانو السبب في كل الحصل .. اول حاجة كان في ولد اسمو عبود .. اهلو من منطقة مكلية .. يعني مسافة اهلو من كوستي 5 ساعات .. المهم هو شغال مع قريبو في جزارة هنا . وساكن معاهم في البيت.. في الحي القدامنا طوالي .. وانا اتعرفتا عليهو يوم مشيت مع صاحبتي لبيتهم . اللهي بت سيد الجزارة دي ذاتو اسمها نايلة .. وزي ماك عارف يامولانا نظرة وبسمة وشنو.. غايتو بدت العلاقة واستمرت .. وانا سويت الدرب ساساق لي ناس نايلة صاحبتي .. اها بعد ماوقعت في غرامو كلو كلو.. وبقيت مابقدر استغنى عنو .. نايلة قالت لي يا مريم انا دايرة اقول ليك كلام .. وان شاء الله بس تقدري تتحمليهو .. عبدو يانايلة بشرب الخمرة .. لازم تكوني عارفة .. عشان بعدين ماتقولي ناس نايلة غشوني .. ودسو علي .. والله اليوم داك يامولانا انا بكيت بكا .. لكن بس السكتني .. نايلة قالت لي عبدو قال انا عشان مريم بسيب السكر.. اها انا لاقيتو وسألتو واعترف لي .. وقال لي والله العرقي بقى لي مرضة.. قدر ماحاولت اسيبو ماقدرت .. واصلا يامريم السكر سببو القرف والزهج والفراغ .. انا بعد لقيتك انتي .. تاني ان شاء الله ولا بحتاج ليهو .. المهم انا وافقت بيهو.. لاني واثقة انو ممكن يسيب العرقي عشاني .. وهو جاب اهلو الساكنين معانا ديل عشان يطلبوني وجا معاهم ابوهو .. وطلبو من اهلي .. اهلي قالو ليهم ادونا فرصة نسأل من الزول ده .. اها بمجرد مامرقو مننا.. اخوي الكبير قال.. ولاتسألو ولا حاجة.. الزول ده سكرجي كبير .. ونحن مابنديهو ..
ابوي قال ليهو ليه ما اتكلمت قدامهم .. المهم بعد يومين
ولاشاوروني رسلو لي اهلو قالو ليهم ربنا ما كتب قسمة .. وانا الجن ركب راسي .. وقفلت الاوضة علي .. وقعدت ابكي . اهلي ولا اشتغلو بي وابيت الاكل.. ولا اشتغلو بي.. لامن جوعت مشيت اكلت براي .. وحقدت عليهم .. قلت والله ما اقطع علاقتي بيهو .. اها بعد كم يوم مشيت لي ناس نايلة في البيت .. وقابلت عبدو .. قلت ليهو الناس ديل رفضوك عشان الخمره .. انت ما قلت داير تخليها؟ .. لازم تخليها من الليلة .. وانا بكلمهم اقول ليهم خلاها .. وهو حلف لي .. قال لي والله من الليلة.. تاني مابخت لي كاس في خشمي .. وانا تابعت اخبارو .. وقالو فعلا ليهو اسبوعين ماشرب .. وانا مشيت عشان اكلم ابوي .. واقول ليهو : قالو عبدو خلا العرقي .. لكن في نفس اليوم جو ناس حسين ود الكتال .. وطلبوني .. وابوي بدون مايشاورني اداهم كلمة .. وانا رفضت رفض شديد .. وقلت ليهم عبدو تاب من العرقي .. ابوي قام كفّتني ولطّشني قرب يكتلني ..وقال لي انتي تاني مشيتي سألتي منو.. بعد نحن قلنا مادايرنو؟؟
والله يابت الكلب.. يا اما حسين ود الكتال.. ولا انا اكتلك .. والله انا اسمعك فتحتي خشمك بي عبدو ده.. غير السكين ماعندي ليك حل ..
وابوي طبعا" انت عارفو.. الله يرحمو كان همباتي وكتال كتلا .. وبسرق الابل من الخلا ..
اها انا خفت وقبلت بي حسين وسكت.. ومثلتا اني قبلانة .. وتم العرس .. لكن بقيت بشتاق اشوف عبدو .. لكن يامولانا والله طيلة.. ماعرفت عبدو .. ماحصل هبشني بي يدو .. كان زول محترم واخو اخوان.. لكن الله يلعن الخمر .. ياها ام الكباير .. عاين المشاكل الجرجرتها الخمرة ..
اها يوم من الايام ابو نايلة صاحبتي .. قال لي تاني ماتجي في بيتنا ده .. انتي بقيتي مرة متزوجة .. خلي بالك في بيتك .. لانو يوم شافني .. بتكلم مع عبدو .. جمب الباب.. بعد عرسي بي ستة شهور يمكن .. اها بعد داك بقيت بلاقيهو برة .. في شارع الله .. وناخد كلمتنا .. وهو يمشي وانا امشي .. وهو دايما بقول لي .. تاني ماتلاقيني يامريم .. الموضوع ده بجيب ليك مشاكل ..
وبخاف من زعلي .. يومي الاقول ليهو لاقيني بلاقيني ..
اها يوم من الايام التوم اخو راجلي .. لقاني وافقة مع عبدو في الشارع .. واتكلم معاي .. وحكيت ليهو .. وحلفت ليهو انو مابيني وبينو غير الملاقاة دي ..
وحذرني وهددني وانا بقيت خايفة ومقيدة .. وبقى مضايقني .. ويمرق وراي يتجسس علي في اي حتة .. وانا كنت خايفة انو الكلام يصل اهلي .. لكن ماخايفة من حسين ولامن اهلو ..
اها يوم برضو لاقاني ماشة في الشارع.. وعرف اني كنت مع عبدو.. ومشى فتشو ودقاهو لامن كببو الدم .. وابا يتكلم بالسبب .. يعني لو اتكلم بالسبب .. اهلي كانو بسمعو .. وبتكون فضيحة لاخوهو .. لكن قال لي ح اكلم اخوي .. وانا خفت فعلا .. قلت انا احسن اتهمو قبل مايتهمني .. قمت كلمت ناس البيت كلهم .. قلت ليهم التوم بشاغلني ..
ويوم قلت ليهم جا متهجم علي في اوضتي .. لكن الحقيقة انا ناديتو .. الله يغفر لي .. قلت ليهو تعال يا التوم .. انا وقعت في مشكلة مع عبدو .. وجاني خليتو قاعد في الاوضة .. قلت ليهو اقفل البوتجاز ..
وجيت جارية ليهم برة ..
سبحان الله ياجماعة ..نفس القصة الحكتها لي امي بالنص .. غايتو يا ام قنديل انتي عندك ذاكرة في الكمبيوتر نادرة ..
لكن في حتة حكتها مريم وامي ماكانت عارفاها .. قالت انا بعد اتزوجت عبدو تاني رجع للشراب افظع من الاول .. واتكتل في محل بتاع شراب .. وانا كنت متأكدة انو كتلو التوم .. لانو هددو وقاليهو بضبحك زي الخروف .. بس يوم امي قالت لي عبدو بتاعك كتلو اخوك .. لانو لقاهو سكران وبهضرب بيك .. وبذكر في اسمك قدام الرجال .. حقد عليهو .. وسقاهو خمر كتيرة .. وخلاهو غمران لامن الناس طلعو من محل الشراب كلهم.. بقى قاعد جمبو وداك واقع ماواعي .. كتم ليهو نفسو بي شال .. وكتلو .. ولاهسي يامولانا الناس ماعارفين القاتل منو .. عشان عبدو اهلو قالو ماعايزين نعرف الجاني .. قالو ولدنا قتل نفسه .. مادام مشى لمكان الشراب برجليهو ..
وانا طبعا وكت لقيت التوم رحل الخرطوم.. استوليت على البيت براي وارتحتا من التوم ومرتو .. اساسا" كنت مضايقة منو..
لكن بعد فترة ندمت على عملتي وماعرفت اصلح غلطي كيف ..
..
المهم ياجماعة باختصار مريم حكت الحكاية الحصلت من طقطق للسلام عليكم .. بي كل صدق وتجرد .. وانا تلفوني ماقصر.. حفظ الكلام كل.. و بدقة عالية ام بي ثري ..
اها بعد خلصت من كلامها.. اب رتينزا ذاتو احتار في اجرام مريم .. وقال ليها والله يامريم انتي مابتخافي الله .. انتي مابتخافي من انتقام الله .. عشان كدا ربنا ابتلاك بالسرطان ..
قالت ليهو اموت ليك ياشيخنا .. اطلب روحي .. بس تعالجني قبل ما اموت على اولادي.. ياشيخنا وليداتي محتاجين لي ..
قال ليها لالا يامريم ..الموضوع خلاص طلع من يدي .. انتي براك جنيتي على نفسك ..
يامريم عندك حل واااحد.. انا ممكن اساعدك بيهو .. لانو هسء الطريق قدامي مقفول بالظلم العملتيهو .. قالت ليهو قول لي الحل .. قال ليها هسي تمشي تكلمي راجلك .. واولادك .. وتقولي ليهم انا كنت بكذب وتحكي ليهم كل الحكاية .. قالت ليهو كيف يامولانا .. اقول ليهم انا كنت بقابل الراجل من ورا راجلي .. قال ليها لازم تحكي كل حاجة ..
قالت ليهو خلاص ممكن اقول ليهم اتهمت التوم بالكذب.. بس حكاية عبدو .. دي مابحكيها .. حتى لو السرطان كتلني ..
قام اب رتينزا كورك .. قال لي تعال يا قنديل .. قالت ليهو قنديل ؟ قنديل منو؟ انا جيت مارق بالباب البين الاوضتين .. عرقان وعيني طالعة .. قلت ليها حبابك يامريم مراة عمي .. قالت لي انت كنت وين ياقنديل؟؟ .. قلت ليها انتي ماعارفة الشيخ ده صاحبي؟؟ والبيت ده بيتي ؟؟
انا يامريم سمعت كل كلامك .. وسجلتو هنا في جهازي ده .. هاك اسمعي .. وفتحت ليها التسجيل صوتو وااااضح ..
يخسي عليك يامريم والله شككتيني في كل الحريم .. وعقدتيني من روحي .. لكن انا برضو تربية ابوي .. وح استرك .. بشرط واحد ..
تكلمي راجلك واولادك ببراءة ابوي .. وماتجيبي ليهم سيرة بي ماضيك الاسود .. لانها دي فضيحة ليك ولينا كلنا .. امشي امشي يامريم .. بعد ما تحكي براءة ابوي لاخوانه واولاد اخوهو .. انا بمسح التسجيل .. امشي امشي يامريم .. الله لايبتلي مسلم بي زولة زيك .. بطني طمت منك ومن خلقتك ..
طوالي طلعت مدنقرة ولاقالت كلمة .. انا قلت ليها .. دقيقة .. ماتمشي انتظريني برة ..
اها قلت للفكي انا ماشي يامولانا .. والله انت انجزت انجاز ماعارف قدرو ساي .. ان شاء الله ربنا يعطيك حتى يرضيك ..
وان شاء الله طول حياتك تبقى تصلح وماتضر .. وتجمع وماتفرق ..
قال لي والله ياقنديل.. اول مرة اعمل لي شغل احس فيهو بالسعادة .. انا من الليلة بغير برنامجي ..
قلت ليهو خلاص نحن المساء بنجيك ونجيب ليك باقي المبلغ .. وضربت لي خالد قلت ليهو الموضوع انجزناهو واب رتينزا ماقصر .. انا ماشي لي ناس عمي حسين عشان اوصل المدام دي ..
قالت لي انت ماشي وين ياقنديل ؟ قنديل ياولدي الله يرضى عليك ماتسمع الكلام لي زول .. قلت ليها امشي امشي يامريم .. ده انا مابطلعو لو قطعو رقبتي الا عند الضرورة .. لو نكرتي حاجة ..
وركبت معاها مشينا البيت .. الكلام ده كان زي الساعة 12 وشوية
وانا فطور مافاطر .. كل الوكت ده انا في بيت الرتينزا ..
وكت وصلنا البيت .. عمي حسين قاعد في الدكان شافنا من بعيد ..
قام طلع برة الدكان واتكفرن وصرا وشيهو ..
وقال ليها الزول لميتي فيهو وين ؟ يازول انا ماكلمتك قلت ليك تاني ماتجينا هنا ؟ يازول انت مالك راسي قوي كدي .. ؟ طوالي هي ردت عليهو وانا ساكت بتبسم .. قالت ليهو هوي ياحسين قنديل جبتو انا .. وما حيمشي اي حتة كان عجبك عجبك كما عجب يعجبك .. ادخل ياقنديل ماتشتغل بيهو .. انا جيتو .. قلت ليهو كيف حالك ياعمي ؟
عاين لي كدي ودخل راجع .. ولارد سلامي .. وانا مازعلان منو اصلا لانو معذور .. بس هرشة مرتو دي وجعتني في قلبي ..
دخلنا لقينا اخلاص واقفة في نص الديوان .. اظنها سمعت الهرجة وجات تتشمر .. طبعا اخلاص متزوجة وساكنة مع راجلها في حي تاني .. هسي اظنها جاية ساي لامها .. اخلاص صورة طبق الاصل من امها شبها وطولها وعرضها .. بس امها سمينة شوية ..
سلمت عليها سلمت علي .. سلام مرض اخير عدمو .. مريم قالت لي اقعد ياقنديل .. لامن يجو الاولاد .. من الشغل .. ونعقد الجلسة ..
اخلاص قالت ليها جلسة شنو يا امي .. قالت ليها وانتي الدخلك شنو؟ دايرة تمثلي لي ور ابوك ادخلي لاجوة ..
انا طبعا عندي احساس انو مريم احتمال تجيب لي سم .. ولا تجيب ليها شي يعمل لي غيبوبة . تشيل مني التلفون تكسرو ..
لانو شكلها كدا ولاخايفة من الموضوع .. ولاشايلة هم .. واحتمال تضرب لاولادها يجو يضربوني بدون مفاهمة .. ويشيلو مني الدليل ..
وبقت تدخل وتمرق زي الزول الداير يعمل ليهو جريمة .. شكلها زي الكديس الزارنو في قفص جداد .. يعني مافي قدامها غير الهجوم ..او الهلاك .. وانا قلبي اكلني .. انا قلت .. اتوكل على الله واخلي عمي يسمع التسجيل؟ ولا انتظر؟ وللا اعمل شنو؟؟
الى اللقاء .

[فيتامين سي]

الحلقة 21 ..
بقلم طارق اللبيب ..

طبعا انا الفار لعب في عبي .. وبقيت قاعد متوتر .. انا ماخايف على نفسي..لكن خايف على الدليل الوحيد الممكن تكون فيهو براءة ابوي.. البراءة البترجعه لي اخوانه..بس خليت ليك مريم دخلت جوة بهنا .. وانا مرقت بالباب بي هنا .. مشيت هناك اخر الشارع .المظلة الركبتا منها المرة الفاتت .. قعدتا فيها وشايل تلفوني في ايدي .. اتصلت على خالد .. قلت ليهو .. اسمع ياحبوب . جيب ليك معاك عكازين وتعال لي في المظلة الفي شارع ناس عمي حسين .. قال لي في شنو ياقنديل؟؟ الاولاد الصعاليق ديل غلطو معاك.؟
ديل انا عارفهم بتاعين مشاكل .. قلت لالا ليهو لسع ماجو .. لكن تحسبا" لاي قلة ادب .. انا خايف لو جو يعملو معاي عكة ..يضيعو مني الدليل الاعترافي.. طبعا خالد عارفها اعترفت .. واعترافها مسجل في تلفوني . لكن طبعا هو ماعارف قصة عبدو. مافي زول عارفها غيري انا وابوي وامي .. واب رتينزا..
خالد غايتو قالي يازول جاييك انا . مسافة المشوار من الدكان لعندك.. وانا قعدت في مظلتي ديك .. مافي زول من ناس مريم عارفني انا مشيت وين . وقعدت افكر واخطط في الامور البتحصل مستقبليا كدا..
ياربي بعد الاعتراف وانكشاف الحقيقة.. البحصل شنو؟
لكن زي ماقالو في المثل . تأتي الرياح بما لاتشتهي السفن .. والمصايب قالو بتجي متوالية..
جاني تلفون من محمدبشير.. اخو العريس الحضرت عرسو في الصالة .. قال لي كيف يا قنديل ؟ قلت ليهو تمام والله .. الحمد لله .. في امن وامان .. قال لي ياخ والله بي وراك حصلت مشكلة كبيرة خلاص..
قلت ليهو مشكلة شنو كفى الله الشر..
قال لي .. الود الاهبل أحمد عامر . اخو ولاء الكلمتك عنو .. عمل مشكلة مع اختو.. وضربها وعوق ليها عينها .. والسبب كلو انت ؟ قلت ليهو كيف؟ انا عملت شنو؟
قال لي لانك بعد الحفلة قمت مشيت وراها.. واتكلمت معااها .. انت في الوكت البتتكلم معاها برة .. في واحد من بتاعين القوايل والشمارات .. جاء قال ليهو .. انت قاعد هنا واختك برة مجكسة؟
هو طلع من باب الصالة عاين ليك .. انت واقف بتتكلم معاها .. انتظرها لامن خلصت كلامها معاك .. وانت مشيت جاها قال ليها نظامك معاي في البيت .. انا اختي كلمتني بالحصل .. قالت ..
اول ما وصلو البيت.. ولاء قالت ليهو الزول ده بسأل فيني من صاحبتي اسمها عبير .. وانا قلت ليهو اتزوجت ..
الزول ده ماعندي معاهو اي علاقة والله .. حتي انا شاكلتو اسأل بلقيس(بلقيس دي البت الطويلة) .. كانت واقفة معاي .. وسمعت كل حاجة ..
قال ليها طبعا" بلقيس لانها صاحبتك وبتضاري ليك ..
ووقع فيها لطيش .. في وشها وفي راسها .. وضربها بونية في وشها وكان لابس خاتم .. شرط ليها جفنها.. الله ستر علي عينها .. والناس كلهم سمعو بي سبب المشكلة ..
وهسي البنات خايفين انو ام ولاء تضرب لي عبير .. ويسألوها. لوعندها معاك علاقة ولالا .. ويمكن المشكلة تصل اهلها وزوجها ..
المهم انا ياقنديل .. وريتك عشان تكون في الصورة .. ..
انا قلت ليهو والله يا محمد.. انا هسي ما فاضي لي ولاء لافاضي لي عبير .. عندي موضوع حساس شغال فيهو .. لمن اتفرغ بشوف الموضوع ده .. اصلا انا ماعامل حاجة غلط .. وصاحبك لو شاكي في اختو انا ماطرف في الشك ده .. انت المفروض تضرب ليهو تكلمو.. تقول ليهو قنديل ماعندو علاقة مع ولاء .. كان بٍسأل فيها من واحدة تانية .. محمد بشير قال لي ياخي ماتدخلني في مشاكلك مع الزول ده ..
قلت ليهو يعني يامحمد مابتقدر تقول الحقيقة عشاني؟.. انا طلبت منك حاجة غلط؟؟ ولا قلت ليك كذب وضاري لي؟؟
قال لي يازول دي مشكلتك .. وانا ما بفتح خشمي ..
غايتو سبحان الله .. شوف بالله الفرق بين محمد بشير وخالد ود يوسف عمي .. خالد الجايب العكاكيز وجاي هسي .. في مشكلة ماعندو فيها ناقة ولاجمل .. وين لي محمد بشير الخملة ..
ومرة وداللبيب قال ..
يامافي المحن راجلا" بيطلع خملة ..
فرسان الثبات مابتنحسب بالجملة ..
في وكت المضايق ويوم حمول الحملة ..
تنفرز الجواهر من سفيف الرملة ..
.والله فعلا دي مشكلة كبيرة .. يعني هسي انا في داعي اقعد اطارد في البنات من حتة لي حتة .. دي عاقبة الشلاقة .. والزول وكت مايكون حاسب خطواتو .. المشكلة عبير المسكينة .. تجيها مشكلة في صمة خشمها ..
والله ماعجبني ليها ولاء .. فصاحتها وقلة ادبها ديك.. كلها اتلقى طارت ليها في راسها ..
وانا هسي غارق في التفكير.. وماعارف اشيل ياتو هم .. هم ناس الخرطوم .. وللا هم ناس مريومة البلومة ..
من هناك شايف خالد ظهر جاني .. الولد الهميم .. ود عمي الغالي .. راكب العربية ولابس طاقيتو .. وخزن بالعربية .. قال لي انت منتظر هنا ليك كم؟ انتظرت كتير ..
قلت ليهو لالا . ما اكتر من اربعين دقيقة .. مافي مشكلة بس انت خليك معاي .. الناس ديل مامضمونين .. والله انا شايف الشر في عيون مريم .. خالد قعد يضحك .. قال لي مريم دي خلاص بقت في قبضتك .. عصور كسير في ايد عيال .. كيف يطير وجناحو مكسور منتني .. ياليل ياليل .. انت تاني انت ماتشيل هم .. هسي هي خايفة من التسجيل اكتر من اي حاجة تاني ..
ارح ارح اركب طوالي على البيت .. قبل مايدور قال لي انت كان تخليها تعترف لي عمك .. على بال مايجو اولادها .. عشان بتها ذاتها تفهم .. الناس ديل الحمد لله ربنا مرقني منهم .. شفت اخلاص؟؟؟
قلت ليهو اي شفتها .. اشوف بيت الله .. ماعارفك انت بتفكر كيف؟ هسع اخلاص دي العجبك فيها شنو ؟؟ .. اظنك قاعد تفكر بي كرعيك .. قعد يقرقر .. بضحك لامن بضرب في الدركسون .. ودورنا مشينا عليهم في البيت ..
قال لي خلينا نضرب الضربة الاولى.. قبل الاولاد مايجو .. ادخل مع عمك في الديوان ونادي مريم .. خليها تعترف ليهو .. بعدين عمك براهو بكلم اولادو .. بالتاكيد ما حيخلي اخوهو وتومو متهم بالباطل والخيانة .. في قلوب اولادو .. ولا رايك شنو؟
قلت ليهو والله كلامك الف في المية.. انا قبيل مافكرت بالطريقة كان هسي كلمتو ومشيت ..
اها يازول وصلنا البيت ووقفنا العربية .. وعمي برضو قعد يعاين لي ويعاين لي خالد .. التقول بالله .. جايين نهدم بيتو .. يعاين كدا بي زعل وغل .. زي سيد المحل وكت يكابسوهو ناس الضرائب .. انا قلت لي خالد خلي اعصابك في تلاجة .. قال لي تلاجة ساي؟؟ ديب فريزر عديل .. ماتشيل هم ..
انا قلت ليهو ياعمي نحن دايرنك في كلام ضروري ومهم وماشين .. ماجايينك زيارة ماتشيل هم .. تعال لينا بي جاي.. عندنا معاك موضوع .. وطوالي ماشين ماعندنا قعدة ..
قال لي موضوع شنو كمان؟؟ متين انا عرفتك عشان تعمل معاي مواضيع؟؟ .. قلت ليهو ياعمي الله يخليك .. تعال بي جاي نحن مستعجلين .. طوالي لبس سفنجتو وقفل الدكان وجانا .. كان لابس عراقي .. بدون فنيلة .. والله التقول بعاين ليهو قدامي .. زي البارح ..
اها جا قال تشربو شنو؟.. قلت ليهو نحن جاهزين.. بس نادي لي مريم .. قال لي مريم داير بيها شنو؟
قلت ليهو الكلام ماينفع الا قدامها .. طلع طوالي وقف في الحوش وكورك ليها.. يامريم ؟ مريم.. تعالي بي جاي .. والاولاد طبعا لسع ماجو..
جات تفرك في يديها .. وقلبها مقطوع.. وظاهر عليها الخوف في وشها بوضوح .. عمي قال ليها اقعــدي يا مريم.. انتي مالك مرتبكة كدا؟ ومــاشة بي طرف اصـــــــابعيك؟ زي البت الجايين يخطبوها ..
سكتت ساي.. وانا طبعا بعاين ليها بعين احتقار .. وخالد قاعد في السرير التاني .. متمحن خاتي يدو تحت حنكاتو ..ومحتار في مصايب الدنيا العند الناس الكبار دي .. خالد عيونو بتقول شفتي يامريم الزمان رفضتيني .. انا كان عارفك كدي.. ولا كنت قبلت عليك ..
انا قلت ليها يامريم .. احكي الكلام .. نحن راجينك .. نط عمي حسين قال ليها .. كلام شنو يامريم ؟؟ .. ان شاء الله مافي عوجة ..
قالت ليهو والله الحقيقة ياحسين.. طبعا في كلام انا ساكتة عليهو سنين .. وماقادرة اتكلم بيهو.. لكن هسي قنديل الله يبارك في ايامو.. اقنعني اني اقول الحقيقة .. عمي قال ليها حقيقة شنو يامريم .. اتكلمي ما تجيبي لي جلطة ..
قالت ليهو الاتهام الانا اتهمتو لي التوم اخوك .. انا ياحسين الله يغفر لي .. ماقلت الحقيقة .. الحقيقة ياحسين التوم ما كان بعاين لي الا زي اختو .. ربنا يسألني .. بس انا كنت بكرهـ نجاة .. وبغير منها .. ومضايقة منها .. ودايرة لي اي طريقة تبعدها من طريقي .. وابليس غشاني.. واتهمت التوم بحاجة ماحصلت ..
عشان يبعدو من حياتنا ..
عمي قال ليها .. شنو؟ ... شنو؟؟؟ شنو؟؟؟؟ قلتي شنو يامريم؟؟
كدي دقيقة .. كرري كلامك ده تاني.. معقول؟؟ انا هسي واعي ولا بحلم؟؟ .. يا مريم انتي متأكدة من الكلام البتقولي فيهو ده ؟؟
يامريم.. في زول مهددك انك تكذبي علي؟؟ وخلاك تغيري في كلامك القلتيهو قبل سنين ؟؟ يامريم.. لو في زول مهددك كلميني ..
قالت ليهو ياحسين.. انا مافي زول مهددني .. وانا ندمانة طول السنين دي .. من اتهامي للتوم .. انت مابتذكر اي يوم انت تجيب سيرة التوم وتنبذو .. انا بقول ليك التوم كان صغير وماواعي .. وربنا بغفر الذنوب .. ده كلو لاني عارفة التوم برئ .. وبقت تسوي ربنا يغفر لي يا حسين .. خليت امو وابوهو يموتو غضبانين عليهو ياحسين .. ربنا يعغفر لي ..
وانقدت بالبكا .. انا ماعارف البكاء ده حقيقي ولا مزيف .. المهم بكا حااااااار والدموع دي تشتت زي العيش ..
عمي ده سكت زي خمسة دقايق كدا زي المبكم .. وقال ليها معقول يا مريم؟؟.. معقول انتي شيطان رجيم للدرجة دي ؟؟.. وكمان بتقولي الله يلعن ابليس ؟؟.. ابليس منو ؟.. ابليس بالنسبة ليك امام جامع يا مريم.. خسارة يامريم.. خسارة سنيني العديتن معاك .. حرمتيني في عمري من اخوي.. اخوي حبيبي العاش معاي 9شهور في رحم واحد .. حرمتيني النص التاني من روحي يامريم .. انتي يامريم ماعارفة يعني شنو التوم اخوي .. اعوذ بالله منك يامريم .. يامريم انتي .. طالق .. طالق ..طالق ..
ودنقر داير يشيل النعال يجدعها بيها .. انا تلبت شلت النعال من قدامو .. عشان مايضربها قدامنا .. وجاتو حالة هستيرية .. وبقى يرجف زي الضارباهو كهربا .. داير يقوم من السرير غلبو.. تاني وقع راجع .. وزي الزول الداير يخش في غيبوبة ..
انا جريت جبت موية.. وسندت راسو كدا .. عشان اسقيهو .. قام مسك مني الموية .. وشرب منها جغمة .. دلاها في حلقو بالغصب .. ..وبعاين لي في وشي .. ودموعو دي كابة شووووو.. ومريم قامت مشت وهي تبكي .. وعمي حسين بقى يقول في كلام كدا زي الماواعي ..
يقول.. واسفي علي سنين عمري.. العديتها بعيد منك يا التوم اخوي .. واسفي على ظني الظنيتو فيك يا التوم اخوي .. واسفي على شيل السكين عليك .. يا لطيف .. انا ياقنديل حاسي بي قلبي اتحرق .. اديني الموية دي تاني .. لا اله الا الله .. انا اقابلك بي يات وشي يا التوم اخوي .. ياريتك يا ابوي لو حاضر .. العملتو فينا مريم .. وحرمتنا من افرس راجل .. ااااخ يا قلبي الانشرط ..عليك يا التوم اخوي .. والله ياجماعة الزول ده يبكي زي الميت ليهو زول والجنازة قدامو .. وانا وخالد ودعمي الاتنين قعدنا نبكي ونقشقش في دموعنا ..الى اللقاء ..

[فيتامين سي]

الحلقة 22 ..
بقلم طارق اللبيب ..

ونحن بقينا نهدئ فيهو .. وانا بقول ليهو يا عمي .. هون على نفسك .. خلاص سحابة غم وعدت .. والحصل ده قدرمن رب العالمين .. عاين لي كدا في وشي.. ودموعو لسع فوق وشو.. وقال لي نفس الكلام البقولو التوم اخوي .. دايما بتستخفو بالمواضيع .. واي حاجة عندكم ساهلة وبتعدي .. شوف الظلم الحصل عليكم بسبب المسكنة .. والطيبة ..
قلت ليهو ياعمي.. عمرها المسكنة والطيبة مابتضر صاحبها .. بالعكس.. البضر هو الظلم والتعدي .. ونحن مافي يدنا غير نسامح ونقططع الباقي قلوبنا .. انت كويس هسي ؟ قال لي ما كويس ولا حاجة والله ياولدي .. انا حاسي بي قلبي كانو مشقوق نصين ..
انا بتكلم معاهو كدا .. جات اخلاص جارية من جوة .. سجمي سجمي . ابوي مالو ؟ .. ياابوي ..امي مالا بتبكي شديد كدا .. المات لينا منو يا ابوي؟؟ ..
ابوي انا حاسة نفسي ح اجهض جناي الفي بطني ده .. وروني في شنو؟ .. وكت قالت كدا .. خالد الحنين .. اخد ليهو نطة من السرير.. زي الفي زول محطو بي سوط .. وبقى يعاين ليها بي شفقة شديدة خلاص .. وداير يتكلم معاها قال حرف واحد وقطع .. ( أ ) .. ابوها مالاحظ لكن انا لاحظت .. والله سبحان الله .. الحب ده مهما طال عليهو الزمن والناس نسته مابموت الى الابد .. الله يحرق الحبكان ويحرق يومو ياخ ..
ابوها قال ليها .. امشي امشي .. اسألي امك انا هسي ماقادر اتكلم ..
قالت ليهو ابوي انت كويس ..؟ في شنو ياخالد؟؟ .. خالد قال ليها مافي شي.. بس كنا ظالمين زول.. وربنا نصره بعد سنين .. وابوك متاثر بس ..
عمي عاين لي كدا.. وقال لي ياقنديل .. انت الحكى ليك بالكلام ده منو؟ ابوك؟ قلت ليهو ابدا والله .. قال لي طيب عرفت من وين ؟ الكلام ده الطلعو منو؟
خالد اتدخل وانقذ الموقف.. وقال ليهو الكلام ده طلعتو اخلاص الواقفة قدامك دي .. كلمت سناء اختي .. وسناء كلمت البيت كلو ..
قال ليهو يعني ابوك عارف يا خالد؟.. قال ليهو ابوي ماعارف مافي زول بقدر يكلمو .. المهم يا عمي مافي داعي للسؤال ده.. قنديل عرف وخلاص .. ولو قنديل ماعرف.. انت ماكان عرفت براءة اخوك.. اخلاص قبل ما خالد يكمل كلامو عاينت ليهو كدا ومشت برااحة دخلت على امها ..
سبحان الله خالد الكلس.. دايما بنقذني في اخر لحظة .. ويمرقني من الورطة .. ياخي الزول ده والله .. الله يديهو العافية بس .. اها طبعا" عمتي الحبيبة مافي زول جاب سيرتها نهائي .. وانا لو كتلوني مابجيب سيرة انها هي الكلمتني .. عمتي الغالية نفيسة بت الكتال هي السبب الاول في كشف الجريمة العجيبة دي .. اها يازول .. تاني عمي سألني سؤال .. ال انت ياقنديل كيف قدرت تخليها تعترف الشيطانة دي؟ .. قلت ليهو والله بس ياعمي انت بعد كدي .. زي ماقال لك خالد .. خلينا نعاين لي قدام وما نحاول نبحت لاورا .. وبقيت طبعا" بتزاوغ من الاسئلة .. واكتر شي شاغل بالي الطلقات الورا بعض ديل .. ابوي لو سمع بيهن بغطس حجري .. لانو عمرو كلو ساكت على السر المؤلم ده .. حفاظأ على بيت اخوهو من الخراب .. انا طبعا" بفهم ابوي كويس .. فتحة خشمو يقول لي (انت القال ليك كوس لي براءة منو؟) وممكن يقول لي (انا قلت لك الاتهام حارقني ؟) .. انا بعرفو كويس وبعرف كلامو الحار داك ..
المهم عمي حسين قال لي يا قنديل.. انت مسافر الخرطوم متين؟ قلت ليهو والله .. ما حددت لسع .. عندي مامورية هنا داير اقضاها وبسافر .. قال لي لازم تستعجل ياقنديل .. انا مسافر معاك.. ماشي للتوم اخوي ..
قلت ليهو لالا يا عمي .. ماينفع .. انت هسي طلقت المراة .. ولو ابوي عرف انو انا كنت السبب في طلاق المراة.. والله يضيق علي حياة الدنيا ..
قال لي يازول انت بتقول في شنو؟ .. والله دي المفروض يدوها تلات طلقات من اربجي .. وللا كلاش .. والله لو الزول بطلق سبعة طلقات كنت طلقتها ..
قلت ليهو ياعمي.. الله يرضى عليك.. انت فكر في الاولاد .. وفكر فيني انا .. وفي ابوي .. وفي ناس المنطقة .. لو سمعو بالطلاق ده ح يسألو يقولو السبب شنو؟
واول ناس بسألو اهل مريم خيلان الاولاد .. ياعمي مادام ربنا كشف ليك الحقيقة .. فكر بي عقل .. وما تجيب فضيحة للاسرة .. كلام كان محفوظ سنوات قدر دي .. وهو كان كلام مؤلم .. الناس يسمعو بيهو بعد اتحلا ..ويعملونا موضوع .. ونبقى ونسة قدام الدكاكين ..
قال لي انت يعني دايرني ارجعها بعد طلقتها بالتلاتة؟.. قلت ليهو انا سمعت انو الطلاق الزي ده مابقع ذاتو .. بعدين الطلقات الفي مجلس واحد لو كانن عشرة بتتحسب طلقة واحدة .. ده السمعتو لكن نسأل مالو؟
قال لي هسي خليها تتقلي بالنار .. ماتسأل خليها تعيش ليها كم يوم كدي مطلقة .. نسافر ونجي .. وان بقى في رجوع يرجعها لي التوم اخوي .. قلت ليهو ياعمي كدا انا بنضر ..وابوي بدخلني في قزازة .. قال والله لو في رجوع .. مافي زول يرجعها الا التوم .. ولو التوم قال ماترجع.. تاني انا ما ترجع لي ولااشوف وشها . وده اخر كلام ..
قلت ليهو طيب لو الناس سمعو بالموضوع ده .. نحن نقول شنو؟ .. انت عارف الطلاق مابندس ..
هنا خالد اتدخل ..قال لي خلاص ياقنديل عمك حلف .. الموضوع ده بتحل تعال اقول ليك .. وقال لي عمي خلاص ياعمي.. اخد راحتك شوية .. خالد ساقني شوية كدا .. قال لي مافي زول عارف غيرنا نحن .. ومريم وبتها .. خلينا نوصيهن .. مايتكلمن ولا لي اولادها .. تعال تعال .. دقينا الباب بتاع مريم ..زي باب صغير كدا فاتح بين الديوان وبيت النساء .. جاتنا مريم لابسة توبها ومدخله طرف التوب في خشمها وتبكي .
قلت ليها يامريم .. نحن طلبنا من عمي انو يرجعك .. ومافي طلاق .. بس انتي كلمي اخلاص.. الكلام ده مايطلع منكم ..
قالت لي والله ياقنديل ياولدي انا استاهل اكتر من كدي .. انا ما زعلانة على الطلاق .. انا زعلانة على الحصل كلو.. شوف عمك الحصل ليهو شنو قرب يموت ..
قلت ليها خلاص يامريم الحصل حصل .. بس انتي خليك ساكتة على الموضوع .. وكلمي اخلاص ماتفتح خشمها نهائي ..
ورجعنا مشينا على عمي.. لقيناهو يتكلم براهو .. يقول (ياحليلك يا التوم اخوي .. انت طول السنين دي ساكت على الالم والظلم؟ والله انا مابقدر على العملتو ده .. ياحليلك يا التوم اخوي ..)
انا سمعتو تاني دموعي كبن .. قبل علي كدا قال لي قنديل ..
ياقنديل عليك الله ارح نمشي سريع الخرطوم .. انا خايف اموت قبل ما اشوف اخوي .. قلت ليهو ياعمي الصبر .. انا هسي داير امشي بكرة اسلم على عمتي في ربك .. وبجيك نمشي .. قال لي انا ذاتي ماشي معاك ربك لي نفيسة .. ماتفوتني.. انا ماداير اقعد في البيت ده الليلة ..
قلت ليهو انا بمشي بكرة .. بجيك هنا نمشي سوا .. قال لي انت ماشي وين؟؟ مخلي بيت عمك وماشي ..
قلت ليهو لالا انا حاجاتي عند ناس يوسف . لانو عندي مواضيع شغل مع خالد .. اول ما اخلص منها بجيك..
قال لي خلاص .. باكر الصباح لازم تجيني ياقنديل .. سبحان الله في نص ساعة بس الزول ده اتغيرت نظراتو.. من نظرات الحقد والكراهية لنظرات محبة وطيبة غريبة .. بالله التقول ماهو عمي البطرد فيني كل مرة داك ..
المهم قعدنا معاهو شوية .. كدا وصيلنا الضهر وطلعنا منو .. وتلفون خالد يضرب ساي .. في ناس في السوق دايرنو .. وهو مابرد على التلفون ..
المهم ركبنا رجعنا السوق .. وقعدنا لغاية العصر كدا.. في امور حقة خالد .. جيها .. ولقينا عمي يوسف مشى البيت براهو .. اصلو وكت خالد يكون عندو موضوع.. مابتقيد بيهو .. بمشي البيت براهو ..
المهم وصلنا البيت.. واتونسنا .. وقلت ليهو ياعمي يوسف .. بالنسبة للموضوع القلنا ليك لمن نحلو وننجزو بنكلمك.. طبعا انا كان عندي مساعي .. عشان اصلح بين ابوي وعمي حسين .. والحمد لله بمساعدة خالد .. قدرنا نرجع المياة الى مجاريها ..
عمي يوسف قعد على حيلو.. بعد ماكان مكوع .. قال لي قلت شنو؟
ياتو مياه الرجعت الى مجاريها؟ ؟ ابوك وعمك حيرجعو لي بعض؟
ياناس ما تكضبو وتسخنو علينا الواطا بعد العصر ..
انا قعدت اضحك .. وبقيت بقنع فيهو.. وحكينا ليهو قصة ملفقة .. انو انا بقيت انقل من ابوي لي عمي.. ومن عمي لابوي .. كلام خير لغاية ما انصلحو .. وهو غايتو اقتنع بالقصة .. وكل الكذب ده عشان نستر مريم .. وما نطلع فضيحتها الكانت قبل اكتر من خمسة وعشرين سنة .. الزول اكان داير يستر زول ـ يتعب شديد .. وكان داير يفضح اسهل مايمكن ..
اصلا الداير يسوي الشر بلقاهو ساهل والطرق متاحة .. والزول الداير يسوي الخير .. بتعب تعب شديد خلاص عشان ينجح
لكن في النهاية والله بحس براحة نفسية عجيبة خلاص .. ماشفتو الفكي اب رتينزا .. عمرو كلو يعمل في الاسحار والكفر .. ويربط في الناس .. بكل سهولة .. يومو الجاي يكشف حقيقة .. ويصلح بين الناس .. تعب تعب شديد .. وانا تعبت معاهو .. لكن قال اول مرة في حياتي اعمل لي عمل احس بالسعادة والراحة النفسية ..
انا والله الليلة اليوم ده.. الرقدة فوق السرير دي شايفها مختلفة .. وحسيت بي نفسي زول عندو قيمة ..
بالاختصار .. بكرة الصباح انا طلعت مع خالد .. ومشيت معاهو السوق .. لغاية مافطرنا وشربنا الشاي.. وساقني وصلنني لي بيت حسين عمي .. لقيتو قافل الدكان ومافيش ..
سألت ناس مريم.. قالو من امس قافل الدكان وقاعد في الجامع وبيت للصباح في الجامع .. انا مشيت ليهو في الجامع .وسألتو قلت ليهو ليه تخلي بيتك ؟.. عشان مريم؟ قال لي ماقادر اشوفها قدامي خايف اضربها بي مصيبة .. قلت ليهو اها الاولاد كلمتهم؟ ..
قال لي كلمتهم.. والله الاولاد ديل قالو ليها كلام .. اصلو الزول مابقدر يقولو لي امه .. قالو ليها نحن كنا ناوين يوم نشوف عمنا التوم ندقو . انتي مابتستحقي تكوني ام .. والله اتكلمو معاها كلام لامن انا بكيت .. ياقنديل ياولدي .. اصعب حاجة في الدنيا انو الانسان ينصدم في والده .. قلت ليهو تكلمني انا ياعمي؟ انت ماشفت حالتي وكت عرفت انو ابوي . اتهجم على مرة اخوهو .. والله الدنيا بقت لي زي خرم الابرة ..
المهم ياعمي هسي انت لازم تنسى وتعيش .. ومريم عرفت غلطها وصلحتو .. مع انها اتاخرت شديد .. لكن قالو لئن تأتي متأخرا .. خيرا من ان لاتاتي .. فانت لازم تسامح وتغفر .. نحن محتاجين ربنا يغفر لينا .. اغفرو يغفر الله لكم .. عيش حياتك عادي .. عشان انا وابوي مانحس بانو علاقتنا معاك عندها تمن.. وهو شتات بيتك ..
عمي قال لي سبحان الله .. ياقنديل بتتكلم كلام اكبر من عمرك .. قلت ليهو انت ناسي اني ود التوم ود الكتال؟
قال لي انا عايز اقول ليك كلام.. ومافي زول بفهمو الا زول يكون عندو توم .. التيمان يا قنديل .. بحسو انهم هم حاجة واحدة .. والاحساس ده مابفارقهم طول حياتهم .. حتى لو فيهم واحد مات .. الحي فيهم بحس انو في جزء من روحو ضاع .. انا بقول ليك الكلام ده عشان تعرف كيف مريم انتقمت مني ومن التوم اخوي ..
يلايلا نحن جاهزين نمشي ربك نقابل عمتك .. وانا ح اصر عليها تسافر معانا الخرطوم.. رايك شنو؟ وبكرة من الصباح نسافر طوالي ..
انا مستعجل شديد ياقنديل ..
قلت ليهو ده بكون يوم السعد على ابوي .. اخوانو الاتنين في يوم واحد معاهو في البيت .. يايوم بكرة ماتسرع.. عشان اشوف الفرحة فوق وجوه اعز ناس في حياتي .. ابوي وعمي وعمتي ..
هسي الان نحن ركبنا واتحركنا من كوستي ماشين ربك معاي عمي .. وانا مبسوط بسط فوق المعدل الطبيعي ..
وكنت في الوكت ده غامراني السعادة . وكنت ناسي تماما المشكلة الحاصلة في الخرطوم .. بس من الصباح حاسي بانو في حاجة حتحصل لكن هي شنو ماعارف .. اها في اللحظة دي جاني تلفون من رقم غريب .. قبل ما افتح الخط قلبي ده شحا بدون مقدمات واسباب ماعارف ليه ..
فتحت الخط .. قلت ليهو.. الو مرحبا ..
الى اللقاء

[فيتامين سي]

الحلقة 23 ..
بقلم طارق اللبيب ..

قال لي عليكم السلام انا احمد عامر.. صاحب محمد بشير..انا طبعا اخو ولاء .. بتعرفني صاح؟.. قلت ليهو ايوة كيف حالك يا احمد .. قال لي عايز اسألك سؤال .. انت علاقتك شنو بي ولاء ؟
قلت ليهو والله صراحة مافي علاقة كدا بقولو عليها ..معرفة بس .. يعني هم زي رباين بجو عندي في الكافتيريا .. قال لي طيب لمن كان في حفلة ناس محمد ..انت طلعت اتكلمت معاها بالليل .. في شنو؟؟ قلت ليهو والله بس انا كنت سألتها عن واحدة صاحبتها .. وقالت لي اتزوجت .. ومافي اي كلام تاني ..في بت كانت واقفة معاها .. طويلة كدا سامعة كل الكلام أسالها ..
يا احمد ياخي اسمع ..انا جاي الخرطوم باكر.. ولا بعد باكر.. وحتما حنتلاقى ..
طبعا ياجماعة .انا عندي خبر بالمشكلة وكت لقى كلامي متطابق مع كلام اختو هدأ وكلامو اتغير..
قال لي انت بتٍسأل عن صاحبتها منو بالضبط كدا ؟ قلت ليهو انا لما الاقيك بقول ليك ..
طبعا الوقت ده انا راكب معاي عمي.. ماشين ربك وانا بتكلم براحة ..وما داير استرسل في الكلام .. وللا ارفع صوتي ..يقوم عمي يخت بالو.. يسمعني بتكلم بالبنات.. تاني مايطن فيني خير ..
اها يازول انا بقيت افكر.. ياربي الناس ديل اتصلو بي عبير .. ياربي بكون الكلام وصل زوجها ..ويسبب ليها مشكلة .. تاني ارجع واقول.. بس انا حبيتها قبل ما هو يتزوجها مافي مشكلة كوني اسأل عنها .. فعلا انا حبيتها لكن ؟ .. يعني هو الحب ده طالق دربو ..وهي اصلا ما ادتني راس خيت اصلها بيهو .. بس انا شكلي اعجبت بيها ساي .. لكن ده ما شكلو حب .. لاني في غمرة الانشغال بنساها ..ومابتذكرها ..ياربي بس هسع البكون حصل شنو ؟؟ ياخي انا هسي اصبر لغاية ما اوصل ابوي بي اخوانو وتاني كلو ساهل .
وصلنا لي بيت عمتي ودقينا الباب وفتحت لينا الباب عمتي براها ..
وكت شافتنا الاتنين انا وعمي مع بعض .. نططت عيونا .. واستغربت .. في الزيارة دي ؟ وانا اللماني في عمي البكرهني ويكره ابوي واي حاجة ليها علاقة بابوي ..
اظن ساكتة خمسطاشر ثانية ماسلمت علينا بعد شوية تعال شوف السلام الحنين ..وبعد داك بكت وبقت واقفة زي الصنم بتعاين لي وتعاين لي حسين عمي .. ودموعها في عينيها .. حسين قاليها .. شنو يانفيسة انتي ح تخلينا مشطوحين كدا في الشارع ولا بدخلينا جوة ..
دخلتنا جوة .. وقعدنا قالت اجيب ليكم موية .. مشت جابت لينا الموية .. وانا بعين بيجاي وبي جاي داير اشوف البت العسل البريئة ديك .. هسع تكون بتغسل او بتمسح .. او بتكون في المطبخ ..
والله ياجماعة انا بحب السماحة عاد اسوي شنو؟ يعني انا عارف سكينة اصغر مني شديد وما جاهزة لي عرس .. لكن بس عاجباني سماحتها ساكت يعني .. ان الله جميل يحب الجمال .. وياسلام على الجمال وكت يكون لسع مكتسي بالطفولة . بعد شوية عمتي جات وجابت العصير ..عمي قال ليها العصير شنو كمان . نحن مافاطرين قالت ليهو خابراكم ..اشربو منو شوية . هسع بسوي ليكم الفطور ..
انا قلت ليها سكينة وينها الليلة مافي بيض بي الزبدة ؟ قعدت تضحك قالت لي سكينة .. بتورق ليها في ملوخية .. كلمتها هسع بتجي تسلم عليكم ..
اها اخدت ليها قعدة في طرف السرير كدا.. وبدت تسأل والدهشة فوق وشيها .. قالت ليهو اها الحاصل شنو يا حسين؟ .. ومالكم انت وقنديل الليلة؟ زايرين ولاغايرين؟؟ نعل مافي عوجة؟؟ .
قال ليها ابدا والله يا نفيسة.. بس قنديل انا باريهو عشان فيهو ريحة التوم اخوي .. وانا مشتاق للتوم اخوي ؟ وكدا قنديل معناها زي ولدي ..
عمتي بعد ماكانت قاعدة متمهلة.. ختت يديها في طرف السرير كدا .. زي الزول الداير يقوم جاري .. وزي الزول الخايف السرير يطير بيهو .. متخيلين المشهد ؟ حسين عمي قاليها مالك يا نفيسة؟ .. مستغربة؟
اي لازم تكوني مستغربة.. لاني كنت بكرهـ اخوي.. وبتمنى اني اقتلو واشرب دمو .. لكن يا نفيسة الحقيقة ظهرت .. والحقيقة انو مريم كذابة .. الحقيقة انو التوم اخوي بري.. براءة الذئب من دم ابن يعقوب .. في اثنا ماعمي بتكلم .عاين كدا للباب وسكت.. قطع كلامو .. دي سكينة جات داخلة .. سلمت على خالها اولا.. وسلمت علي انا .. وكلها حياء وخجل .. البت دي فيها حياء كدا اكتر من اللازم .. والله انا يتخيلي لاهسع ما عارفة ملامح وشي .. بس مدنقرة وتتبسم ..
عمي حسين قال ليها ياسكينة اعملي الفطور .. امك دي هسي مافاضية تعملو .. دايرين نتكلم معاها .. انا قلت ليها وماتنسى البيض بالزبدة ياسكينة .. عاينت لي كدا .. وابتسمت ابتسامة قاتلة قاتلة .. اول مرة عيوني يقعن في عيونا .. والله انا بدون ما احس قلت واااو .. عمي قال لي مالك؟؟ قلت ليهو في حاجة قرصتني في ضهري ده .. وسكينة مشت تضحك ..
هي الوحيد الفهمت انا قلت واااو ليه ..
البت دي كان كبرت شوية ..بتدمر المنطقة دي كلها .. والله بختو البتكون من نصيبو في الزمن داك ..
المهم عمي حسين بدا يحكي لي نفيسة في القصة .. ونفيسة تبكي وتداعي في مريم .. مريم يا يمة بي المر اليفقع مرارتها .. والله يا حسين اخوي.. انا كنت حاسة انو في حاجة غلط .. لكن شوف عليك الله المراة المجرمة دي ..حبكت الفكرة كيف .. قال ليها خليها ربنا بنتقم منها وعينك تشوف .. المهم يا نفيسة انا مسافر مع قنديل لي التوم اخوي .. ودايرك تمشي معاي ..نعمل ليهو زيارة مفاجئة ..
قالت ليهو والله فكرة سمحة شديد .. لكن طبعا سكينة في اجازة .. وبتكون في البيت براها .. وابوها بجي المساء .. وانت عارف البلد دي عاملة كيف .. قال ليها مالو نسوق سكينة واخوانها معانا .على الاقل تتعرف على خالها هي اصلا ماشافتو .. وتتعرف على اولاده ..
قالت ليهو خلاص ياحسين .. يجي ابو اولادي .. واتشاور معاهو .. قال ليها اصلا بس بنمشي بعد بكرة الخميس الصباح.. بنعدي معاهم الجمعة .. ويوم السبت الصباح بنجي راجعين .. قالت ليهو خير ..
وانا والله ياحسين كنت ناوية امشي اهاجم التوم اخوي في البيت .. بس قلت انتظر لامن تجي في بيتو مناسبة .. اي حاجة ان شاء الله عرس قنديل .. وقنديل ذاتو ابا كلو كلو يعرس .. وعاينت لي مبتسمة احلا ابتسامة .. قالت لي ياولد انت راجي شنو ؟
ابوك وكت قدرك كدي .. كان والدك ..
في الوكت ده سكينة جات داخلة شايلة الفطور .. انا قلت ليها مالاقي لي عروس ياعمتي .. البخطبها كلها يعرسوها .. قالت لي الغبا اليطقهن ..انت الزيك منو .. لاقنك وين ؟ ..قلت ليها هوي ياعمتي هسي كان جيناكم.. قلنا ليكم عرسو لينا.. بتعملو لينا اعذار .. انا بتكلم وبعاين بي طرف عيني لي سكينة .. يعني حنك بهظر وكدا .. سكينة خجلت.. وارتبكت لامن كشحت جك الموية ..
عمتي قالت لي ياقنديل الله يهدينا ويهديك .. جننت علي البت ..
انت يعني داير سكينة ..؟؟ والله تقول دايرها ..راجل يمسك ايدها غيرك مافي.. اكان الليلة كان بعد عشرة سنة .. طبعا سكينة قربت تخش في الواطة من الخجل ..
قلت ليها اي والله ياعمتي.. سكينة زولة ملائكة ..واي زول يتمناها لكن بس صغيرة علي ياعمتي .. قالت صغير انت ياود حشاي .. صغرة شنو بعد كدي؟ .. وانت خلاص يعني جاهز ومستعجل ؟ .. قول داير تتهرب ساي .. قلت ليها افو انا؟؟ اتهرب من بت عمتي؟؟ .. اعتبريهو طلب ياعمتي .. بس شوفي كلامي .. انا راي سكينة هسي مابقنعني.. لانها صغيرة .. لازم تكبر شوية وتدينا رايها .. قالت لي ياولدي دي بتي وبعرفها.. والله اوعى مني انا الكبيرة ..
عمي قال لي ياقنديل الامور دي مافيها هظار .. انت لو عندك رغبة في البت .. قول .. ولو ماعندك فيها رغبة .. ما تهظر بي كلام زي ده ..
قلت ليهو ياعمي اعتبروني طلبت سكينة .. وتمامة الكلام عند ابوي .. ورايو هو الاول والاخير ..
عمي قال لي ابوك ده خلو علي انا.. وقال لي عمتي انتي يانفيسة تشأوري بتك وابوها يا نفيسة .. نفيسة قالت ليهو .. سكينة ماها دايرة شورة .. سكينة من يوم جانا قنديل هنا .. هي ماعندها كلام غيرو .. وفي اليوم بتٍسأل منو عشرين مرة لامن انا شاكلتها ..
وكل يوم بتسوي البيض بالزبدة.. وتقول احتمال قنديل ودخالي يجي يفطر معانا .. لانو قال بجيكم تاني ..
انا طبعا" بقيت اتبسم براي .. اخيرا الخط ابتسم لي .. بعد عبير طارت مني . ان شاء الله مايجي واحد يخطف سكينة .. يخلي خشمي طير طير ..
اكلنا يازول ولسع بنتكلم في سكينة .. وبراعتها في الطبخ وخدمة البيت .. وشطارتها في المدرسة .. وخجلها الشديد .. وانا بقيت اسرح هناك وابتسم براي .. في حاجة جواي بتقول لي .. اها احسن ليك الزهرة المتفتحة دي .. ولا عبير الماعارف عنها اي شي .. ؟
بالنسبة للجمال الصوري .. سكينة ما اقل من عبير .. بس عبير لانها خرطومية .. ومنعمة .. ومتمكيجة .. لكن والله سكينة تلقا ليها راحة كدا 3 يوم تبقى حكاية ولامحتاجة لاي رتوش اضافية .. غايتو انا تقريبا اموري ماشة واضحة .. ماكنت خاتي واحد في المية الحكاية دي ..
وبديت جواي امزق في دفتر قديم كدا .. مكتوب عليهو عبير ..
اصلا التفكير في مراة متزوجة . جريمة مبتذلة .. ههه ده انا جواي بتكلم مع روحي ..
اها يازول كملنا الفطور.. وغسلنا ايدينا والحاجة الجميلة.. انو عمتي كانت بتفطر معانا في نفس الصينية ..
ولسة بنتكلم في مواضيع شتى .. شي مريم . وشي يوسف التماري ابوخالد .. وشي سكينة ..
قامت عمتي كوركت ليها ياسكينة سكينة.. تعالي شيلي الصينية وجيبي الشاي .. سكينة ابت تجي ولاردت .. انا عرفت انها سمعت الكلام او جزء منه .. بس انا كان عندي رغبة اشوفها تاني .. ماعارف ليه ..
والله ياجماعة سكينة صغيرة .. وشها ذاتو ظاهر انو صغيرة يعني يمكن لو طارت ماتفوت خمستاشر ونص صطاشر .. يعني انا اكبر منها بي عشرة سنة .. دي الحاجة الوحيدة المجهجهاني ..
لكن مادام هم ماعندهم مانع .. دي مفاجأة انا ماكنت بحلم بيها .. المهم هسع ابوي وردة فعلو .. لانو لو عمل اي درامات .. المباني دي كلها بتتهدم بي رمشة عين .. انا في اللحظة دي داير اعمل عملية .. وماعارف حيكون شكلها كيف العملية دي .. داير اشيل الصينية ادخلها جوة .. ياربي عادي . ولا ماعادي .. يازول اتوكلت على الله .. كب ..
قمت شلتا الصينية .. ودخلتها جوة خليت عمتي بتتكلم مع حسين مندمجة ..
دخلت جوة لقيت ليك سكينة واقفة جمب الدولاب بتاع المطبخ وبتاكل في ضفورها وتتبسم وخجلانة جنس خجل .. مع انو مافي زول معاها ..
غايتو البت دي عسل كيف ههه .. مبالغة ياخ ..
قلت ليها سكينة المسكينة .. انتي يابت مالك مسكينة كدا ؟ قالت لي(هوي القال هوي ليك منو انا مسكينة) ؟.. قلت ليها والله مسكينة مسكينة مسكينة .. انتي لسع بتخجلي زي بنوت زمان ؟ الزمن ده يابت البنات بقن .. يصفرن في الشارع .. قالت لي سجمي .. ده وين ده كمان ؟
قلت ليها في الخرطوم .. قالت لي بنات الخرطوم ديل قالو بلعبن كورة بصح ؟ .. قلت ليها يلعبن كورة وكراتيه .. وبسوقن الدفار والحافلة ههه .. قالت بري يايمة ده هنا ماعندنا .. قلت ليها ياخي انتي لسع بتاكلي ضفورك وبتخجلي ..
اديني الشاي ده سريع ماتجي امك تلقاني تايه .. شلت الشاي .. وداير امشي .قالت لي اسمع ياقنديل .. صحي انتو مسافرين .. ؟ قلت ليها ايوة .. قالت لي ماممكن تكلمو خالي التوم يجي يسلم علينا . انا مشتاقة ليهو وبسمع بيهو عند امي .. ونفسي اشوفو .. قلت ليها ح تشوفيهو ان شاء الله ياسكينة .. (وقفت لي عبرة في حلقي ) قلت ليها .نحن جينا مخصوص عشان نسوقكم ليهو .. قالت عليك الله ياقنديل ؟ يعني انا ح اسافر معاكم ؟ قلت ليها ايوة .. والله البت دي فرحت فرحة لامن وشها حسيت بيهو نوّر ..
اها شلت الشاي ومرقت .. وكبينا الشاي وشربنا وتونسنا ..
وكانت احلى ونسة وقعدنا معاهم لغاية بعد صلاة الضهر .. واتواعدنا بعد بكرة نسافر .. وودعناهم . وسكينة ماجات ودعتنا .. واقفة بي ورا الركيزة حقة الباب . قايلاني ماشايفها .. وهي طرف الاسكيرت بتاعا ظاهر بالجنبة.. ماجايبة ليهو خبر ههه .. جنس براءة .. المهم ودعتنا عمتني .. وطلعنا منها .. على امل نتلاقى بعد بكرة لانو واقع الخميس .
ارح .. الى اللقاء ....

[فيتامين سي]

الحلقة 24 ..
بقلم طارق اللبيب ..

اها يازول انا مشيت نزلت من عمي في السوق ومشيت طوالي لي خالد ود عمي يوسف في الدكان .. واصلو ابيت احكي ليهو منظر التحول الحصل لي في بيت عمتي . قلت ليهو اسمع انت وديت القروش لي اب رتينزا .. اصلا باقي قريشاتي عند خالد .. قال لي يازول اول هو بصبر لامن ارسلهن ليهو .. جاني عديل هنا وشالن ومشى .. بعدين قال مريم اتصلت عليهو تلفون .. قالت ليهو الشيوخ بصلحو انت ضريتني يا شيخنا .. يا شيخنا انا دايراك تخلي راجلي يرضى مني .. صلح لي حياتي .. قال ليها انتي عارفاني انا بعرف اخرب واطلق لكن التصليح ده مابعرفلو ههه
قال ليها تعملي اي حركات كدا ولا كدا انا بطلع حاجات العملتيها عندي زمان كلها ..
انا قلت لي خالد اوعة يكون حكا ليك عملت شنو؟ قال لي لا لا ماحكي .. لكن قال اذا دعت الضرورة بفتها بفتها ..
انا طبعا اتذكرت ليك التسجيل القاعد في تلفوني .. المفروض بعد كدي امسحو ..الظروف مامعروفة.. لو وقع في يد زول او تلفوني اتسرق .. واافضيحتاه يامريومة .. خالد بتكلم معاي طوالي طلعت تلفوني.. وعملت تحديد الملف ومسح .. مسكت تلفوني سلمت عليهو كدا .. وقلت ليهو والله انت العملتو .. رجال بي شنباتهم مابقدرو عليهو .. تحياتي يامعلم .. وكدا الموضوع انتهى ..
طبعا حكيت لي خالد .. ردة فعل عمتي .. وكلام عمي واتفاقهم على انهم يسافرو يوم الخميس وكدا .. بس ماحكيت ليهو عن الموضوع الشغل بالي ‏‎kiki‎‏ رمز تعبيري
خالد قال لي انا استلمت الدكان خلاص .. ومن بكرة ببدا انزل ليك فيهو البضاعة.. فما تتأخر هناك راجيك شغل ..
قلت ليهو والله يا خالد انت العملتها معاي ,, حتكون دين في رقبتي عمري مابقدر اسددها .. قال لي انا بحتاج لك في يوم.. ومتأكد بلقاك .. مر اليوم عادي وبكرة الاربعاء نحن المفروض .. نمشي نجيب البضايع .. وننزلها في الدكان الجديد . والحكاية دي صراحة انا متخوف منها .. يعني هسي طبعا البضاعة دي كلها حقة خالد.. وانا لازم ارجع ليهو راس المال ..
بس كان في موضوع شاغلني اكتر .. الليل كلو وانا صورة سكينة مافارقت خيالي .. وحاسي بي فرحة كدا مدفونة في الضلوع .. وكل ما اتخيل صورتها .. وهي بتقول لي .. القال ليك منو انا مسكينة .. بتبسم براي .. واتقلب بالجيهه التانية .. تاني اتذكر وهي بتقول لي .. سجمي ده وين كمان .. والعجيبة لما عاينت لي كدا ..
وكل مرة بقول معقول هسي قنديل الشايفو انا ده.. سكينة دي تكون من نصيبو؟؟ .. والله بالنسبة للعوارض الشايفها دي .. الموضوع ده
ما مؤكد .. انا خايف اقوم اتعلق بيها واجن فيها.. وبعدين تطير زي طار حمام كتير قبليها ..
لكن في النهاية الزول بخلي املو في ربنا كبير .. وثقتو ثابته .. وانا في النهاية كلمتي قلتها .. وعمتي ختت كلمتها .. بعدين ننتظر نشوف البحصل شنو .. ان شاء الله مايحصل الا الخير ..
وده تفكيري الاستمر لغاية مانمت . باكر الصباح يازول وانا طالع مع خالد .. قال لي رايك شنو تمشي لي عمك حسين .. تتونس معاهو وتفطر وتشرب معاهو الجبنة.. لغاية الضهر كدي تجي علي في السوق .. قلت ليهو طيب .. والبضاعة القلتها ..؟ قال لي ده موضوع ماعندك معاهو شغلة .. انا بجهز ليك اي حاجة .. بس انت تجي تعرف الاسعار.. وتبدا تشتغل طوالي ..
قلت ليهو خير ياوش الخير ربنا يسهل .. وفعلا مشى طوالي وداني لي عمي .. الساعة 8 ونص صباحا .. وعمي فرح فرح شديد وكت شافني جاييهو .. عكس الايام الفاتت ..
قلت ليهو اها اوع يكون الليلة بيت في المسجد برضو ياعمي ؟ قال لي لالا .. رقدت في ديواني ده .. والله ياقنديل ياولدي .. المراة دي ماقادر اعاين ليها في وشها.. المشكلة الكبيرة اولادها بقو يكرهوها .. وهسي اخلاص مشت زعلانة .. وقالت لي انا امي بالنسبة لي ماتت ..دي ما ام .. ده امتحان من ربنا.. وربنا يصبرنا عليهو .. واولادها نفس الشي .. بقو ما بتكلمو معاها.. ومابياكلو عندها .. البارح طلعو جابو العشا من برة.. اتعشينا مع بعض وخلاص.. وقبيل الصباح طلعو بدون مايشربو الشاي.. قالو ح يشربو من السوق ..
ماعارف حردان الاكل لزمو شنو؟.. يعني الاكل جايباهو من بيت ابوها؟ هسي هي طبعا" مطلقة .. لكن ما دايرة تمشي اهلها .. عشان عارفة اهلها ح يسألوها من سبب الطلاق .. وهم عارفني انا لايمكن اطلق في سبب ساهل .. ولو عرفو الحاجة العملتها هم زاتهم بحتقروها .. عشان كدا قاعدة في البيت زي الغنماية الضاربها الهيم ..
والله ياجماعة عمي ده عندو جنس كلام .. زي كلام ابوي .. بعدين صوتو ذاتو وطريقة كلامو طبق الاصل لي ابوي .. لو هــو بتكلم وانا غمضت بتخيلي ده ابوي بتكلم .. بس طبعا مابتشـــابهو في الاشكال زي ماحكيت ليكم قبل كدا ..
قلت ياعمي ممكن ادخل اسلم عليها ؟ قال لي ادخل على كيفك .. اتفضل طوالي ..
دقيت ليها الباب .. فتحت لي الباب.. والله ياجماعة حالتها بقت تحنن .. وشها ده انقلب زي سجم الدوكة .. وخشمها ناشف ومغبش التقول ماكلة قنقر عيش ريف .. شكلها ده اتغير التقول مي الزولة الشفتها اول يوم ديك .. الكانت مجيهة ومميهة .. قلت ليها كيف ياخالة ممكن ادخل ؟ قال لي ادخل ياقنديل .. دخلت قلت ليها انا جيت اسلم عليكم وافطر معاكم .. ..
قالت اتفضل ياقنديل ..حبابك . ياقنديل انا الله انتقم مني .. راجلي طلقني.. واولادي بقو يكرهوني كراهية التحريم .. والله ماقادرة استحمل نظراتهم .. والله كان شفت اخلاص مشت كيف ؟ وهي زعلانة وبتبكي
وبتعاين لي باحتقار .. وانا هسي خايفة عليها .. طبعا هي في شهور حمل .. بس ربنا يشوفا ساي ..
قلت ليها ان شاء الله ياخالة.. كلها ظروف وتعدي .. اصلا الزول بمر بفترات امتحان .. الحمد لله انو الزول برجع لي ربو ..
قالت لي عمك الليلة من الصباح قام يرتب في هدومو .. ويرص فيهن في شنطتو .. اظنو مسافر..
قلت ليها ايوه مسافر لابوي.. وانا ذاتي ماشي معاهو ..وابوي لسع ماعارف الحصل .. قالت لي عليك الله ياقنديل وكت ابوك يعرف قول ليهو مريم ندمانة وسافة التراب .. وقالت ليك انا عارفة ندامتي ماحترجع ليك سنوات الضاعن .. وماحترجع ليك امك وابوك عشان تعيش معاهم اخر عمرهم .. وتسمع منهم كلمات العفو والرضا
انا والله ياقنديل ماعارفة اقابل ابوك كيف .. طبعا زي ما انت عارف هو ح يكون محتقرني طول عمرو الفات ده . وبعد اعترافي ماعارفة ردة فعلو معاي ح تكون شنو .. قلت ليهو ان شاء الله كلو خير ياخالة .. المهم اخدت لي معاها قعدة .. كلها مأسي ودموع .. وقمت مشيت لي عمي .. وكملت معاهو ونستي .. وبقى يحكي لي عن سكينة وابوها .. وانها شايلة طبايع امها .. البراءة والمسكنة .. وابوها وفراستو وكرمو .. راجل اخو اخوان ..
وقال لي لو ربنا قسم ليك سكينة.. انت معناها ربنا رضيان عليك .. لانها هي سمحة ومؤدبة وحنينة وابوها راجل كلس وامها زولة دغرية .. ومازي الحريم من طرف .. نفيسة اختي تسد محل عشرة رجال والله ..
طيب ياجماعة عشان الاختصار.. الضهرية رجعت لي خالد في الدكان.. واول ما وصلت قال لي قوم تعال .. مشينا للدكان بتاعي الجديد هههه .. والله لكن ربنا اصلو مامقصر معاي.. زول في صمة خشمو يلقاليهو دكان في نص سوق كوستي.. والله دي حكاية .. انا ما مصدق طبعا .. لكن نقول الحمد لله ..
وصلنا الدكان .. وخالد طلع المفتاح من جيبو.. وفتح لي الدكان مليان بضاعة لاود عينو .. والله مدفوس دفس .. من السكر لي الكبريت .. وصفايح الطحنية والجبنة والبسكويت بانواعو .. الساردين والمربة والكاستر وشوالات رز ولبن بودرة ووو.... غايتو ماعارف الموضوع ده بي كم .. لكن جاتني شفقة من كترة القروش .. وانا مالي يا خوي.. لو ماقدرت سددت .. بضاعتو قاعدة ..
قال لي هسي خليهو مقفول .. لمن تجي راجع من الخرطوم .. تلقاني حضرت ليك التلاجات .. قلت ليهو يازول ربنا يوفق .. قال ياقنديل انا ممكن اعمل اي حاجة.. عشان انت تكون معاي في البلد دي .. ياخي انت مما جيت انا حسيت بي الحياة.. انت زول نادر والله ربنا يخليك ياخي ..
قلت ليهو ياخالد والله انا قدر ماعرفت رجال .. وخاويت زيك ده مالاقاني .. بس غايتو في كتاب التاريخ زيك في .. قعد يضحك بطول حسو .. وقال ياخي كتاب التاريخ ؟
قلت ليهو وانا كمان اطمنك.. انا البلد دي تاني ما ماشي منها.. بلاخرطوم بلا هم ..
كوستي وربك ..
والريد شبك ..
لازول يأذيك
ولازول يضربك ..
الناس ملايكة ..
وشوفتم بتحببك..
قال لي كمان بقيت شاعر يا قنديل .. قلت ليهو شاعر بي سعادة وبراءة كدا من جواي .. طبعا انا بالي في ربك .. وهو ماجايب لي خبر .. اها مشينا البيت عشان نجهز.. وباكر الصباح السفر للخرطوم .. والذ حاجة في السفرية دي.. انو معانا سكينة .. ياخي سكينة دي سكنت جواي سكون زي السكون ..
والصباح انا رتبت احوالي .. ولاقيت عمي في الموقف بدري.. ولقيتو حاجز كرسي لي عمتي .. قلت ليهو ليه حاجز كرسي واحد؟؟ موش نفيسة معاها اولادها .؟ قال لي لالا .. الاولاد ابوهم قال مافي داعي يسافروا .. خايف عليهم من التعب .. قال بتجي عمتهم تقعد معاهم لغاية ما نفيسة ترجع .. وقال هو اساسا يوم الجمعة بكون قاعد في البيت ..
والله دي عوجة دي .. انا خلاااص استئتا .. يعني انا كنت مؤمل في السفرة دي .. اتونس مع سكينة شوية .. لكن يازول خيرا في غيرا ..
واتحرك الباص وغشينا عمتي في ربك .. والخرطوم طوالي.. الكلام ده يوم الخميس الصباح .. انا في البص اتصلت علي ابوي بمكن 15 مرة عشان اقول ليهو نحن جايين .. مارد علي .. انا ماعارف التلفون ده عاملو لشنو؟
اول ما وصلنا انا طوالي اجرت امجاد ومشينا الكدرو .. وتعال شوف المشهد .. طبعا ابوي مافي .. وامي قاعدة .. دقينا الباب.. فتحت الباب واتفاجأت مفاجأة غريبة .. وكت لقت حسين ونفيسة في وشها .. ماعرفت تتصرف .. وبقت تقول ليها في كلام كدا ما مرتب .. ( حسين ؟.. نفيسة .. اهلا .. ايوة.. تعالو .. ) فجأة كدا لقت نفسها بتلخبط .. نفيسة كبست عليها بدت تسلم عليها .. سلمت على نفيسة عمتي دي سلام ..و قعدن يبكن زي الفي زول ميت ..
وتاني سلمت على عمي حسين .. وقالت ليهم ادخلو ادخلو .. والله الليلة ده يوم السعد .. وماشة داخلة لاجوة . وانا ولاسلمت علي .. قلت ليها امي يا امي ياخي انا بايت معاك؟؟ .. قعدت تضحك قالت لي انا الليلة بي فرحة عمك وعمتك .. ماتؤاخذني.. بقيت زي المانصيحة من الفرح ..
دخلت جوة طوالي قالت لي تعال .. ولاتقلع هدومك دي ولا ترتاح .. هاك ..
بعد المغرب الحلقة 25

[فيتامين سي]

الحلقة 25
بقلم طارق اللبيب..

امي قالت لي هاك .. امشي جيب ليك خروف وتعال سريع .. الليلة لازم نعمل كرامة وندفق الدم .. ودموعها ديل سايلات من الفرح .. وخشمها يرجف .. ياسلام يانجاة .. غايتو لو انتي مابقيتي امي .. كانت المغسة شرطتني .. القروش الادتني ليها شكلها من قروش حوش البقر .. قلت ليها وين مودة ؟ )دي اختي الصغيرة( .. وين عبد اللطيف وياسر .. خليهم يجو يسلمو على عمهم وعمتهم ..
قالت لي مودة نايمة جوة هسي بصحيها .. وياسر وعبد اللطيف مشو لاصحابهم هسي بجو ..
المهم مشيت جبت الخروف وجيت معاي الضباح طوالي .. ولقيت عمي حسين لسع قاعد يحكي ليها في الحصل ..
لمن جيت داخل بقو يعاينو لي التلاتة باعجاب كدا .. معناها الكلام كان عني .. امي قالت لي انا ياقنديل .. انا عافية منك دنيا واخرة .. انا ياقنديل بحمد الله انو اداني ولد زيك .. قلت ليها يعني اتراجعتي من قصة البكر تليفة دي ؟؟ وانا بضحك .. قالت لي تليفة انا ياولدي .. قلت ليها حاشاك يانجاة الكون ..
ضبحنا يازول وعملنا الكرامة واكلنا المرارة.. وامي عملت لينا شية سريعة كدا .. اكلنا فضلة خيركم .. وامي ضربت لي امل اختي وجات .
تسلم علي عمتها وعمها .. وبدت تشتغل مع امها ..
وبعد شوية صحت مودة وجات سلمت على عمتها وعمها .. وبدو يتونسو معاها ويشاغلو فيها .. وهي قالت ليهم يعني انتو اخوان ابوي عديل كدا؟؟ عمي حسين قال ليها ايوة عديل كدا .. ده كلو من مريم الله يعاملها بماتستحق ..
قالت ليهو مريم منو ياعمو .. قال ليها مريم السحارية .. دي واحدة بتخوف الشفع في كوستي ..
وبعد شوية جو ياسر وعبد اللطيف وسلمو على اعمامهم اول مرة يشوفوهم .. غايتو فعلا مريم انتقمت فينا انتقام تقشعر له الجلود ..
اها يازول زمن ابوي جا قبل الغدا بشوية .. كلها لحظات وانا حسيت بشي من الفرح بدا يهل .. وحسيت انو ابوي قرب للبيت ..
بدون ما اكمل تفكيري الباب دقة ..
وانا قلت ده ابوي .. وفعلا هو مشيت فتحت ليهو الباب .. وكت شافني .. قال لي اها اها .. مالك جيت راجع؟ البلد مانفعت معاك؟ قلت ليهو اسكت اسكت.. انا معاي ضيوف .. قدر ماضربت ليك عشان اكلمك ابيت ترد كالعادة ..
وامي ضربت ليك .. برضو مارديت ..
كيف حالك يا ابوي؟ صحتك واحوالك؟ .. وسلمت عليهو بالحضن .. كدا لامن خنقتني العبرة .. وهو طبعا مستغرب في سلامي ده .. سلام حنين كدي مالو .. لكن ماسألني ..
قال الضيوف منو المعاك ..؟ وشنو ريحة الشية ضاربة .. والدم برة انتو ضبحتو بوراي يعني؟؟ وبتكلم وماشي داخل .. فجأة كدا عينو وقعت على أخوهو ..تومو .. نص روحو التاني .. ابوي ده وقف اتسمر كدا زي التقول جاتو نوبة .. حسين عمي وكت شافو.. جاي داخل قاام علي حيلو .. وجا جاري عليهو يبكي .. وبرك في الواطة .. ومسك ابوي من سيقانو .. حضنها كدا ويبكي ويقول .. اعفى مني يا التوم اخوي .. اعفى من يا التوم اخوي .. وابوي ماقادر يتكلم .. والله انا اول مرة اهتز من موقف .. ابوي مسك عمي التوم من اكتافو .. ووقفو على حيلو ومسكو عليهو .. ومتحاضنين ويبكو اكتر من البكا بتاع نفيسة وامي قبل شوية .. ياخي متماسكين قريب العشرة دقايق .. ويبكو ويتمايلوا لامن نفيسة جات فرقتهم كدا .. وقالت للتوم خلاص يا التوم .. الحمد لله ربنا جمعكم .. سلم علي انا مشتهياك زي موية الصيام .. سلم عليها برضو بي نفس البكا .. وابوي مدنهش ومامركز.. وما سأل من الحاصل .. وعمي حسين يكرر في كلمة واحدة .. اعفى مني يا التوم اخوي ..
اعفى مني يا التوم اخوي.. وابوي بس يدمع ويقش في دموعو ..
طوالي حسين عمي قال ليهو.. يا التوم اخوي الحقيقة مرقت بعد خمسة وعشرين سنة ..
ابوي اتخلع قال ليهو الحقيقة ياتها؟ .. قال ليهو حقيقة انو مريم اتهمتك بالكذب ...بي سبب الغيرة والحسادة وقلبها الاسود .. انا حسيت بابوي في الاول خاف .. انهم يكونو كشفو خيانة مريم .. لكن وكت قال ليهو كدا ابوي شكلو ارتاح .. قال ليهو يا حسين اخوي .. انت بتعرفني اكتر من روحك .. معقول تومك يكون كدي؟؟ .. كدي خلونا من الكلام ده .. حمدلله على السلامة.. والله انا فرحان بي جيتكم دي فرح كان وزعوه على البلد كلها يكفيها .. ودموعو دي مابية تقيف .. ياسلااااام ياخي.. والله ابوي ده من جوة زول نضيف لدرجة تعقد .. وتاني قام سلم على حسين بالاحضان.. وسلم على نفيسة فوق راسها ..
وانا بس اعاين وفي حاجة واقفة لي في حلقي ..
والله كانت اجمل لحظات احسها في حياتي .. وانا بعاين للناس ديل اجتمعو بالطريقة دي .. جابو الغدا واتغدينا .
وبقو يتونسو احلا ونسة ونفيسة وامي ديل خشن جوة معاهن امل واتقبلن وبقن يتونسن .. وانا كل مرة ادخل جوة اعاين .. واجي مارق اعاين للتيمان يضحكو ويتونسو .. وابوي بسأل من اصحابو الزمان في كوستي .. وكل بعد شوية يتذكر حاجة والعبرة تحنقو .. بعد الغدا كدا انا قلت اديهم راحتهم . طلعت مشيت على بحري .. اصلا اشتقت لناس يعقوب وعم شاذلي .. وماشي المهم اتصرمح شوية .. بعد الفرحة دي لاني خايف الفرحة تشقني ..
مشيت لي الكافتيريا .. في نفس اليوم .. ولاقيت الجماعة وسلمت عليهم .. وكانت في مفاجأة منتظراني .. اللهي شنو ..
عمك شاذلي .. قال لي ياقنديل ياخي انا منتظرك بي فرق الصبر .. انت موش مرة قلت لي داير تشاركني في الكافتيريا ؟.. قلت ليهو نعم حصل .. قال لي انا الكافتيريا داير ابيعها .. لو انت جاهز والقروش الجبتها من كوستي لسع موجودة .. انا ما بديها زول غيرك .. محل زي ده ياقنديل (خلو رجل) بس بالشي الفلاني .. وانا حأبيع لك كل الادوات والمكنات باقل الاسعار بس تشتغل وتربح .. قلت ليهو ليه لكن؟ انت مالك؟ داير تبيعا ..
قال لي انا طبعا تاني مابقدر اكون بعيد من البيت.. لانو تماضر بتي حتتزوج بعد شهر.. وتسافر السعودية .. ومابقدر اخلي البنات براهن في البيت .. فكرت ابيع الكافتيريا واعمل لي دكان في البيت ..
واكون قريب من بناتي .. قلت ليهو والله خير مافعلت ياعم شاذلي ..
لكن انت اديني فرصة اشاور ابوي في الموضوع ..
قال شاور ابوك واخد راحتك.. انا مابتصرف الا انت تقنع منها ..
والله دي حكاية عجيبة .. يعني هسي انا بعد ما اتشربكت في كوستي .. تظهر حكاية بيع الكافتيريا دي .. لكن مافي مشكلة ربنا بحلها والخير دايما فيما يختاره الله ..
ولاطلعت من الكافتيريا وعندي مأمورية تانية ..الكلام ده كلو قبل المغرب بشوية .. شلت تلفوني وفتشت لي رقم أحمد عامر اخو ولاء .. لاني حفظته ووعدته اني ح الاقيهو ..
وضربت ليهو تلفون .. قلت ليهو انت وين قال لي انا جاي من الحاج يوسف ماشي على بحري .. قلت ليهو بالضبط انت هسي وين؟ قال لي يعني فوق القنطرة بتاعة حلة كوكو .. قلت ليهو تمام طيب انا منتظرك في الكافتيريا بتاعتنا .. تعال لي هناك . قال لي جدا مسافة السكة ..
وفعلا الزول بعد ربع ساعة وصلني.. واناقاعد بتونس مع جماعتي اول ما شفتو من هناك جا .. طبعا احمد عامر من النوع المفتري داك البمشي مفتح زرايرو وعامل فيها .. (دون) .. بتاع مشاكل وكدا
انا النوعيه دي مابخاف منها .. وانا مغسان من دقة ولاء ..
المهم جاء وسلم علي.. وقال لي انت قنديل صاح؟ قلت ليهو ايوة طبعا قنديل ..
قال لي اتلاقينا مرة واحدة مع محمد بشير.. قلت ليهو فعلا حاصل ..
قال لي يازول حصل خير كبير.. وانا اتأكدت انو ولاء اختي كلامها صاح وما كذبت .. وفعلا انت ماعندك معاها حاجة .. لكن انا كنت عايز اسألك من الزولة الانت كنت بتسأل عنها ..
قلت ليهو طبعا والله ولاء دي انسانة اكتر من رائعة .. وانا والله مانظرت ليها غير اخت.. هن جن اربعة بنات وحصل حصل .. حكيت ليهو من يوم السندوتشات .. لغاية يوم الحفلة بالتفصيل .. وحتى بي كل صدق حكيت ليهو انو انا بتصل عليها مابترد لي .. ولمن اتصلت عليها من تلفون يعقوب ردت وتاني قفلت تلفونها .. وانا بقيت شاكي انو احتمال بتكذب علي ..
ولمن لاقيتا سألتها.. قالت لي اخوي كان مراقب تلفوني .. وامي كانت في المستشفى ..
احمد قال لي والله كلامها كلو صاح .. فعلا يا قنديل .. عبير اتزوجت..
وفعلا امي رقدت مستشفى .. وكل القالتو ليك ولاء حاصل بالنص ..
بس انت يوم الحفلة لمن عرفت انو ولاء اختي.. المفروض تلاقيني اول وتسألني انا .. لاني بعرف عبير اكتر من ولاء ذاتها ..
انت عارف عبير كونت صداقة مع ولاء عشان تتقرب مني ؟؟ عبير كان عندها معاي علاقة و باعتني وباعت الخمسة غيري الكانت ممثلة انها بتحبهم .. عبير عندها عقده .. كل ماتشوف ليها زول وسيم زيك كدي .. بتحاول تغريهو بي نظراتها .. لغاية مايقع في حبالها .. وتقعد تكسر بيهو الزمن في التلفون والفيس .. وتتونس بيهو مع صاحباتها .. ولمن تشوف ليها زول عاقل ووجيه وصاحباتها اعجبو بيهو .. هي بتبادر انها ترميهو في حبالها قبل التانيات .. وكلهن عارفاتنها .. بتاعة ملعبة ..
الزولة دي زولة غريبة .. مستخدمة جمالها استخدام سيء..
سبحان الله البت سمحة سماحة تبدع .. لكن من جوة اعوذ بالله .. صفر في التربية .. وهسي ولاء قالت لي انو زوجها دخل حسابها في الفيس بوك ولقى مصايب .. لكن قال ليها الماضي انا مابسألك منو .. لكن لو لقيت اي تواصل مع انسان بعد الزواج بقتلك .. وانا في راي ابو طبيع مابخلي طبعو .. يعني حتغفلو في يوم وتمارس هوايتها في اغواء السذج بي جمالها .. انا كنت بحبها حب فوق القانون ياقنديل ..
وهي كانت مورياني نفس المشاعر .. بس يوم لقيت ليها رسايل في تلفون واحد صاحبي .. قطعتو ليك معاها ستة صفر .. عملت صحبة مع ولاء عشان تلقى ليها طريقة معاي .. المهم في النهاية جاء زول موعارف تاريخها.. زول مغمض وداقس .. وملاها قروش وعرسها ..
والله ياجماعة انا بسمع في الكلام ده .. حاسي بي كرعي ما ثابتات في الواطة ..اخر ما كنت اتوقعو من عبير ؟؟
سبحان الله صدق القال السماحة ماكل شي .. الكلام الاخلاق ..
الى اللقاء ..

.. الى اللقاء ....

[فيتامين سي]

الحلقة 26
بقلم طارق اللبيب..

احمد طلع تلفونو من جيبو .. وقال لي التلفون ده شكى وبكى من رسايل عبير .. واتصالاتها .. دقيقة دقيقة ان شاء الله القى ليك منها رسالة .. وقعد يقلب في تلفونو .. وقال لي ايواااا .. دي اخر رسالة هاك عليك الله اقرا .. انا قلت ليهو مافي داعي . والله ماصح
قال لي اقرا لكي يطمئن قلبك .. قلت ليهو انا قلبي اطمأن من يوم التلاتا .. كدي اشوف .. قريت الرسالة كانت كاتبة ليهو .. عمرو الزواج يا حمادة ماعندو علاقة بالحب .. حتى لو زواجي تم غصبا عني انا بحبك انت وبس .. عبير ..
عاين انا رديت ليها بضحكة .. هاهااهاهاها.. لاني عارفها الرسالة دي احتمال تكون مرسلاها لي 15 نفر .. يازول انا بس اتذكرت كلام سكينة .. وكت قالت لي (سجمي ده وين ده كمان) هه ..
قام احمد سألني قال لي انت قلت لي قلبك اطمأن من يوم التلاتا .. الحصل شنو ؟
قلت ليهو لالا اصلا انا خطبت بت عمتي في ربك .. وتاني لافاضي لي عبير ولا عصير .. خليها تعبر .. انت كيفك وكيف ولاء .. قال لي ولاء انا انفعلت وضربتها .. قلت ليهو والله بالغت عديل ياخي تضرب الانسانة الصادقة ؟ بس هي ذاتها حمقاء زيك .. قال ياهو دا ذاتو الجاب ليها الدقة .. انا بتكلم معاها وهي بتتلاءم معاي .. وانا دمي فار ..
المهم يازول كملنا كلامنا داك واي واحد فينا مشى على جيهة .. والان انا اتاكدت انو ربنا بحبني .. ياخي انا كنت ح اتسيك تسييكه غريبة .. الله مرقني منها عبورة العسولة ههه ..
بعد المغرب بي شوية ركبت مشيت البيت .. ولقيت ابوي بتونس ومبسوط .. امي نادتني قالت لي ؟ انت عمك بصح طلق مريم؟ قلت ليها ايوة طلقها قدامي .. لكن طبعا طلاق بتاع غضب ساي ما اظنو واقع .. قالت لي لانو هسي ابوك كان هايج وقال ليهو كيف تطلقها ؟
قلت ليها يا امي احكي لي بالتفصيل ماتخميني ساي .. الحصل شنو بوراي ..
قالت لي عمك حسين قال ليهو يا التوم اخوي انا مريم تاني مابتلزمني ..خلاص طلقتها بالتلاتة .. بس ولدك قنديل موقبلان وقال لي لازم ترجعها .. ابوك هاج وقام يرجف .. وقال ليهو كيف تطلقها ياحسين اخوي .. الموضوع وانتهى انت داير تاني تقوم مشكلة في الاسرة ؟ الكلام ده كا غلط .. بعدين الزولة عرفت غلطها وتابت واعتذرت .. وقنديل قبيل كلمني قال لي .. مريم قالت ليك اعفى مني
وانا عفيت منها .. تاني شنو؟ وهسي الناس لو سمعو بالطلاق ده يقولو شنو؟ والسبب شنو؟ انت ياحسين اخوي عارف في ناس حاسدين اسرتنا دي من زمان وبفتشو لي كلام يقولوهو فينا .. والله يسمعو كلام زي ده يقعدو يالفو وينسجو ..
انت لازم ترجع المراة دي .. قال ليهو انا طلقتها تلات مرات ..
قال ليهو لالا دي طلقة واحدة .. انت ماقريت الفقه ولاشنو ..؟
ترجعها لازم .. قال ليهو انا حلفت ما ارجعها الا انت وتمشي معاي كوستي واكرمك والناس يشوفو اخوي جاني واعزم الحلة كلها
وانت ترجعها لي بي نفسك على الاقل اكون رديت ليك اعتبارك ورجعت ليك كرامتك ..
قال ليهو يا حسين اخوي كرامة شنو؟ انا كرامتي انت .. وبيتك .. ومرتك واولادك .. المهم ياقنديل . اتفقو انو ابوك يسافر يوم الجمعة الجاية . دور باكر .. يعني بعد اسبوع وحيمشي ابوك يرجع مريم لي راجلها ..
قلت ليها يا امي قالو طلاق الغضبان مابقع .. قالت ليهو ابوك قال ليهو انت لو قنعت ومنها ورفضتها من قلبك .الطلقة واقعة ..كان غضبان ولا رضيان .. قال ليهو انا لاهسع قنعان منها ورافضها .. وبرجعها عشانكم انتو .. ولو خليتوني تاني مابقبل عليها ..
قلت ليها ان شاء الله يا امي ربنا يهدي سرو عمي ده زودها شديد ..
اها يا امي تاني ماجابو سيرة حاجة ؟ قلقالت لي لالا ماعارفة حاجة شنو مثلا؟
قلت ليها اي حاجة عني انا ولا اي شي يعني ؟
قالت لي ياقنديل انا بفهمك وكت تقعد تتخجل وتتدعك في يديك كدا. معناها الكلام بخص البنات ..ماتلف وتدور .. انت قاصد شنو بالضبط كدا؟؟ .. انا موش امك خزينة اسرارك ؟
قلت ليها بلحيل انتي والله حبيبة قلبي .. عارفة يا الغالية انا شفت بت عمتي دي وعجبتني وعمتي ماعندها مانع ..
قالت لي عمتك ياتها ؟ هي عمتك عرست متين وبتها قدر شنو؟ قلت ليها ماشاء الله مراة ساوية .. لكن يعني فيها الصغرة .. قالت لي ياولد هي اصحى عمتك بتكون بتهظر معاك ساي ماتعمل لي فيها جادي البت بتكون صغيرة .. قت ليها انا مامستعجل يا امي ان شاء الله سنتين .. في شنو؟ انا كمان في مشكلة لو اخرت عرسي شوية ؟؟
قالت لي مخير غايتو ابوك مابرضى بالكلام ده كدي كدي براك شوف
والله امي اصلو مابطمن .. وبتبدا ليك الكلام وتمشي ولسه تكون مستمرة تتكلم باقي كلامها مابتسمعو الا تقوم جاري وراها تحصلها ..
اها بالنسبة للجماعة التلاتة الاخوان .. التوم ونفيسة وحسين .. بالمناسبة ابوي اصلا اسمو حسن لكن سايرة عليهو تسم التوم .. يعني التوم دي ما اسمو الاصلي .. يعني انا اسمي في الشهادة قنديل حسن . التيمان حسن وحسين ..
قاعدين التلاتة وخاتين السراير في الحوش وبحكو بي جنس حكاوي. وامي شغالة داخلة ومارقة .. وامل كل مرة تجي تقعد جم عمتها . وتضحك في الونسة وتقوم تحصل امها .. غايتو كانت ليلة لاتنسى ...
وعمتي دي بتريد امل دي ريدة غريبة .. امل وينها ؟ امل تعالي .. امل .. امل .. جننتنا ذاتو .. الناس ديل كانو مشتاقين لي بعض شوق ماعادي .. غايتو ياجماعة الارواح لمن تكون طيبة .. المفروض الزول مايفرق بينها بي فتنة ..
بعد ما اتعشينا فضلة خيركم ابوي ناداني قال لي انا باكر عايز اعمل عزومة وادعي الجيران والاصحاب بعد الصلاة يجو يتغدو معانا ويعرفو انو انا عندي اخو وتوم كمان .. وابوي كان بتكلم ووشو ده بضوي مع اللمبة من شدة الفرحة .. قلت ليهو حاضر يا ابوي انت بس صحيني بدري ..عشان اقوم اظبط الامور .. قال لي شفت كيف حوش البقر نفع وقروشو اافادتنا في احلك الظروف ..
قلت يا ابوي انا عندي معاك كلام مهم .. قال لي بس دقيقة اشوف عمك رقد كويس وبجيك.. الكلام ده جوة في بيت ناس امي .. وعمي راقد في الديوان مشى وانا بعاين ليهو .. عاين لي حسين لقاهو نام بقى يتبسم ويهز في راسو .. وفرتق الملاية الكانت مطبقة جم كرعين حسين وغطاهو بيها ..
وخت ليهو الابريق وصلح ليهو نعلاتو كدا قدامو .. وانا بعاين .. وانا بعاين .. سبحان الله شوف الارتباط ده .. بعد ما اطمأن عليهو جاني طوالي قال لي تعال ياقنديل .. قول لي عايز تقول شنو؟
قلت ليهو يا ابوي طبعا انت عارف الكافتيريا الكنت شغال فيها .. كافتيريا عجيبة وفي محل استراتيجي .. والبيع فيها بيع خرافي .. هسع عم شاذلي طبعا" بتعرفو .. قنع وعايز يبع الجمل بما حمل .. وعرضها علي .. بس المشكلة انا خلاص استلمت دكان في كوستي ومـليتو بضاعة من خالد ود يوسف ,, وح ارجع بعد يومين تلاتة ..
انا عايزك تستلم الكافتيريا دي انت .. وتسيب ناس المصلحة . بلا ليمون بلا طعمية بلاغم .. يازول الكافتيريا دي ايراد اليومي بالملايين والله لو صدقت معاك بتجيب لك جيب صاح اسألني انا ..
قال لي لكن ياقنديل انا الكافتيريا اشغلها كيف انا ماعندي خبرة في الشغلانات دي .
قلت ليهو انت بس وافق وخلي الباقي علي .. والله ترتاح راحة بس تقعد فوق الكرسي بتاع الكاشير .. وتوزع الموارك .. وتاني ماعندك شغلة .. يعقوب والحبشي والجماعة بظبطو ليك الفهم .. والله كمان وكت يعرفو انك ابوي .. يخدموك بعيونهم ياخي ديل بعزوني معزة شديدة .. اها قلت شنو يا ابوي؟.. الكلام ده لي مصلحتك .. انا خلاص دربي مرق واموري وضحت .. ولو ماعايزها بقول لي شاذلي صرفنا النظر .. لكن والله الندامة تشقني ..
المهم في النهاية ابوي وكت شاف اصراري وافق قال لي خلاص بكرة نمشي نسأله من السعر الخاتيهو للموضوع ده ..
وابوي مشى نام.. وانا طلعت على الديوان مع حسين عمي .. حصلت حاجة غريبة خلاص بالليل ده .. انا كنت بسمع بيها سمع ..
زي الساعة 2 صباحا كدا .. عمي قعد يقنت وهو نايم.. وانا صحيت بيهو .. وبيقول في كلام مامفهوم .. يعني بهضرب .. فجأة اتخلع وقعد على حيلو .. وبقى يسوي لا اله الا الله ..بسم الله الرحمن الرحيم .. وقام مشى شرب موية.. وجا قعد وعاين للساعة .. ابوي جا مارق من جوة .. حسين قال ليهوانت صاحي مالك يا التوم اخوي ؟ قال ليهو شفت لي كابوس والله .. اتخلعت قمزت من السرير .. قلت اجي اشوفك نعل ما هلوست معاي زي زمان .. قال ليهو والله هلوست يا التوم.. خلاص امش اتحصن ونوم الساعة 2 ..
انا ياجماعة صراحة .اول مرة اعرف انو التيمان ممكن يحلمو مع بعض.. ويهلوسو الاتنين في نفس اللحظة .. سبحان الله ..
على كل حال صبحت الواطة وضبحنا من الصباح وفطرنا ودعينا الناس .. وغديناهم احسن غدا وابوي عرف ناس العزومة بي اخوه . وامي عرفت الحريم بي نفيسة .. وكان يوم من الايام المذكورة في حياتي .. وكانت احلا لمة وباكر من الصباح سافرو .. بس انا ماسافرت اتاخرت شوية .. وضربت لي خالد قلت ليهو بجي في نص الاسبوع ده .. مابتأخر ان شاء الله بس عندي امور كدا اجيها واجيك .. قال لي يازول اخد راحتك بس البضاعة ماصح تتقفل في الدكان كتير ..
من الصباح يوم السبت سقت ابوي ومشينا لي شاذلي في الكتفتيريا
وبقينا نتفاهم في السعر والزول اتماشا معانا شديد .. والمفروض بعد باكر يتم كل شي في الموضوع .. اشترينا منو كلو حاجة حتى السبت بتاع النفايات ..
وكان السعر مناسب جدا جدا ..
ويعقوب وجماعتي كلهم اتبسطو بسط شديد.. يعقوب قال لي ماتشيل اي هم ياقنديل ..والله ابوك زي ابونا .. واقول ليك سر ابوك شكلو زول كريم .. ويدو مقدودة هه يعني بعدين ببسطنا ..انا متأكد انو ح يتصلح معانا وبنتصلح معاهو ..
وفي نفس اليوم مسكنا ليك ابوي.. انا وشاذلي .. وفهمناهو الشغل من الالف الى الياء ..وقلنا ليهو اي موضوع يستعصى عليك.. العمال ديل زي اولادك وامورك براها بتزبط .. اظن يومين نحن بنشرح لابوي في الشغل لامن وقعت ليهو..
المهم باختصار ابوي مسك الكافتيريا وانا سافرتا كوستي بدون ما اكلم ابوي بي موضوع سكينة .. بس تعالو شوفو الكارثة الحصلت لي هناك .. تأتي الرياح بما لاتشتهي السفن .. وياتيك القدر من حيث لاتدري .. ويافرحة ماتمت .. سبحان ياربي .. اتخيلو الحصل شنو ؟

الى اللقاء ..

[فيتامين سي]

الحلقة 27
بقلم طارق اللبيب..

طبعا" انا لمن وصلت كوستي .. نزلت عند ناس خالد على طول . والكلام ده كان يوم الاتنين .زي 12 ونص كدا .. دخلت شنطتي في الاوضة الفي الديوان .. واستحميت .. الديوان كان فاضي مافي اي زول .. ولادخلت على بيت الحريم جوة.. حتى ولاسلمت على زول .. كنت مستعجل محصل السوق .. وانا طالع ضربت لي خالد .. قلت ليهو انا وصلت .. وهسي طالع من البيت .. قالت كنت تكلمني تقول لي جاي الليلة .. لقيت منو في البيت؟؟ .. قلت ليهو مافي اي زول.. لقيت باب الشارع فاتح .. وختيت شنطتي في اللوضة وقفلتها .. وجاي عليك .. قال لي كويس ..
وصلت لي خالد لقيتو متغير شديد .. وما خالد البعرفو انا .. حتي سلم علي سلام غريب ..
ولا سألني من ناس البيت .. ولا سألني من ابوي .. وشكلو متضايق ضيق ماعادي .. وفي كلام فوق وشــو.. خته لي المفتاح فوق الطربيزة .. واناشلت المفتاح .. وماقدرت اتكلم معاهو اقول ليهو انت مالك .. بس بقيت شغال تفكير ياربي في شنو؟
مشيت فتحت الدكان.. وبقيت بقشقش فيهو .. وبنفض في البضاعة المفروض اليوم الاول لي في الدكان ده.. يكون يوم فرحة.. لكن والله حاسي بالدنيا دي كلها مسيخة .. وخالد الزول البعزو ده.. الحاصل عليهو شنو؟
والله راسي شاطب شطبة.. وماقدرت اعمل اي حاجة .. بس طلعت لي اكياس حلاوة .. وغسلت لي بلح .. وبقيت حايم بقسم لاصحاب المحلات وجيراني .. دي كرامة يا جماعة .. انتو جيراني انا فتحت جمبكم هنا جديد .. دعواتكم معاي ربنا يوفقني .. والناس ديل بدعولي..
في واحد قال لي والله ياخي انت زول شاب صغيير.. لكن بتفهم في الاصول . انت عارف حكاية الزول يفتح محل جديد ويكرم ويقسم للناس بلح وحلاوة .. العادة دي بدت تنقرض .. وهسي بعملوها ناس بالعدد .. ربنا يوفقك ياولدي ..
الزول ده اسمو حاج عمر.. دكانو التالت مني من الناحية الغربية .. انا دكاني فاتح شمال .. مشيت قعدت معاهو شوية .. وقلت ليهو ياحاج عمر.. انت الوحيد القلبي اطمأن ليك من دون الناس.. انا عندي معاك موضوعين بجيك بعد شوية ..
ومشيت قفلت الدكان .. بعد ساعة بس.. وقرش مابعتو .. ماعندي مزاج .. وقافلة معاي قفلة غريبة .. وداير اسأل خالد من الحاصل .. وفي حاجة مانعاني .. ماعارف امكن خايف افقدو .. امكن خايف يكون عندو كلام انا ما استحملو .. امكن مستحي منو؟ ماعارف.. والله ياجماعة احساس.. ان شاء الله ماتضوقوه .. كونو يكون في زول عزيز عليك .. ويفقل منك وانت ماتكون عارف السبب ..
اها يازول مشيت قعدت مع حاج عمر .. راجل وقور في بداية السبعينات.. راجل وشو زي المصحف .. ولابس جلابيه زي ورق كراس الهندسة .. من بياضا ونضافتها .. وشايل سبحتو .. عندو لحيو خفيفة وبيضاء زي لون الجلابية .. ومركوبو ابيض برضو .. والظاهر نيتو برضو بيضاء كدا ..
قلت ليهو ياحاج عمر.. انا عايزك بي خبرتك .. تشوف لي واحد يشتغل معاي في الدكان ده.. ويكون زول امين .. قال لي يازول والله انت محظوظ .. نحن معانا واحد شغال هنا.. اسمو بشرى .. وانا جبت ود اخوي يشتغل معاي .. وهسع متحيرين . نكلم بشرى كيف نقول ليهو استغنينا عنك .. انا بكلمو واقول ليهو في زول فتح جديد ماعندو فكرة عن السوق .. وانا دايرك تدير ليهو الشغل ..
بشرى ده يازول بريحك شديد .. فاهم السوق .. وعارف الاسعار.. وزول امانتو اسألني منها انا ..
قلت ليهو الله يكرمك ياحاج عمر .. والله انا من شفتك قلبي ارتاح ليك ..
طبعا ياحاج عمر.. انا اساسا جديد في البلد .. ويوسف التماري عمي ود عم ابوي .. وانا نازل معاهم في البيت.. وخالد ولدو اجر لي الدكان ده.. وملاهو لي بضاعة .. يعني ماعندي قرش في البضاعة دي.. الا بعد تتباع .. لكن الشهر الاول ده بدفعو ليهو تب .. حاج عمر قال لي يازول البينا عامرة.. لو قصر عليك اي شي رقبتي سدادة ..
لكن والله مافي شي يقصر .. وبراك من باكر بعد باكر بتشوف الشغل كيف .. وبتشوف بشرى حينفعك قدر شنو.. قلت ليهو هسع بشرى وينو ؟؟ قال لي طلع السوق.. يجيب قروش من زول.. عشرة دقايق وبكون هنا .. ان شاء الله .. وانا بكلمو ليك .. لكن لو بقيت حاضر يكون احسن ..
المهم اتونست معاهو شوية.. وبدا يحكي لي عن عمي يوسف التماري.. وسمعتو الفي السوق زي الدهب .. طبعا عمي يوسف زي ماحكيت ليكم هو اصلا ود عم ابوي.. وهو وابوهو اللهو جدي عمي ابوي .. كانو تجار في التمر .. سارت عليهم التمارة .. يعني تجار البلح .. ابو يوسف اسمو بابكر التماري .. مسمين عليهو عمي بابكر الاتوفى .
المهم بعد شوية كدا بشرى ده جا .. زول في نص التلاتينات .. وظاهر عليهو مسؤول .. ووشو وش خير .. وحاج عمر كلمو طوالي وهو مشكور وافق .. وقال ليهو ياحاج عمر انت كان قلت لي اقع في النار بقع .. من باكر انا جاييك ياقنديل ..
انا ودعتهم ومشيت على خالد .. وفي الشارع بشجع في نفسي اسأله
من الحاصل شنو.. والقالبو كدي شنو؟ لكن والله ماقادر.. ياخي الزول ده انا بعزو معزة غريبة ..
المهم يازول مشيت ليهو في الدكان.. لقيتو قاعد في الطربيزة كدا .. وشغال بضرب ليهو في حسابات ..
قلت ليهو كيف ياخالد ؟ قال لي تمام الحمد لله .. وشغال يكتب ساي ومرة يخت القلم في خشمو ومرة يكتب .. وانا قاعد لي فوق شوال بتاع ملح وبعاين ليهو .. ولا سألني من الشغ.. ل ولا اشتغل بي .. وشكلو ماتعرفو زعلان.. وللا متضايق.. وللا حزين .. بس هسي اخش فيهو كيف اسأله؟ .. ياربي بكون مالو الزول ده ؟؟..
اسأله؟ ما اساله؟ اخليهو يحكي لي براهو؟
في النهاية قررت اني اسأله بعد يخلص حساباته .
بقيت قاعد يمكن عشرة دقايق منتظره ..بعد خلص خلاص من حساباتو .. وقفل الدفتر .. ختاهو في الدرج تحت .. قلت ليهو ياخالد ممكن اسألك سؤال؟ قال لي اتفضل طوالي ..
قلت ليهو انت متغير مني كدي مالك؟ .. وسلامك ماعجبني .. انا عملت غلط ولا حاجة ..
قال لي لو ما سألتني انا كنت ح أسالك.. لاني ياقنديل بعزك معزة ماتتخيلا .. وما كنت بتصور الكلام الح اقولو ليك ده .. يصدر منك انت بالذات .. وكانت بالنسبة لي صدمة ..
قلت ليهو كفى الله الشر.. كدي قول لي النسمع ..
قال لي اول حاجة أسالك سؤال .. انت ما كلتنمي قلت لي جاي الليلة لشنو؟؟ قلت ليهو كلمتك قلت ليك انا بجي في نص الاسبوع وانت قلت لي اخد راحتك ..
قال لي انا مضايقاني جيتك في بيتنا .. ونحن مافي .. والبيت فاضي .. وفي الوقت الانت جيت فيهو ده مافي زول في البيت غير سناء .. صح؟؟
قلت ليهو سناء ؟؟ انا ماعارف جوه في منو؟ ولا دخلت .. لكن الديوان مافيهو زول .. قال لي والله يا قنديل غايتو ماعارف اقول لك شنو.. لكن بحكي ليك الكلام الحاصل ..
اتصلت علي اخلاص بت عمك حسين .. وقالت لي سناء شكلها دايرة تخلي خطيبها عشان قنديل .. وبينها وبينو في تواصل ماعادي .. وقالت انت قلت لي سناء .. انا اولى بيك من الغريب انا ود عمك ..
وبتتصل عليها كل يوم .. والعلاقة بدت من اول يوم جيت في البلد دي .. يومنا الجينا لقيناك نايم في البيت .. الفتح ليك الديوان منو؟ موش سناء؟ .. قلت ليهو نعم.. الفرش ليك الملايات وشغل ليك المراوح .. موش سناء؟؟ .. وقعدت اتونست معاك .. وقلت ليها انت عجبتيني شديد .. ومن اليوم داك هي بقت تكره خطيبها.. وتعمل في المشاكل .. وانت متواصل معاها .. بالرغم من انك عارفها مخطوبة .. انت ياقنديل لو داير سناء او اي حاجة زي دي المفروض تكلمني انا .. لانو انا صاحبك.. ودي اختي .. لكن مابتقدر تكلمني لانك عارف البتعمل فيهو غلط ..
طبعا ياجماعة هو بتكلم .. وانا متبكم زي الاطرش.. ومقلع عيوني .. والله حاسي باني لساني معقود .. من هول المفاجأة .. وماقدرت اقاطعو بي كلمة ..
قال لي ياقنديل .. انت ماعارف انو حرام الزول يتكلم مع واحده مخطوبة .. ونحن ادينا الرجال كلمة.. يعني ابوي لو سمع بي حركتك دي .. موش انت .. انا ذاتي ح يمسح بي الواطة ..
بعدين قالو انت مشيت اتكلمت في سكينة بت عمتك في ربك .. وبرضو ماكلمتني .. يعني لو حكيت لي موضوع بت عمتك.. انا كان ممكن ابرء ساحتك من قصة سناء .. لكن مادام دسيت علي دي .. ممكن تدس علي دي .. انت اتكلمت في بت عمتك .. ومن يومك الاتكلمت فيها وسناء سمعت بالكلام ده .. خشت في حالة بتاعة دبرسة وانهيار .. انت البت دي غاشيها بشــــــــــــــــنو؟ والله انا ماعارف .؟ وبتلاقيها متين؟.. وبتتصل عليها كيف ؟ والاداك رقمها منو؟؟ دي كلها اسئلة محيراني.. ومالاقي ليها اجابات ..
خالد بتكلم ومنفعل.. لامن ريقو نشف .. وبقى يرجف من الغضب .. والله ياجماعة انا لو ابوي اتكلم معاي مابتوتر كدا .. حسيت بي توتر غريب.. وفقدت المنطق كلو كلو .. وبقيت ساكت بعاين ليهو وغلبني اتكلم كلو كلو ..
واول مرة اكتشف انو انا زول ضعيف من جوه .. وبرئ براءة الاطفال .. لدرجة اني بعجز ادافع عن نفسي ..
قال لي مالك ساكت وبتعاين لي كدا ياقنديل ؟؟ اتهجمت ؟؟ ماكنت قايل الكلام بصلني ؟ .. انا ماكلمتك قبل كدي .. وقلت ليك اي موضوع عند سناء بكون عند اخلاص .. واخلاص بتفتو .. وبتوزعو بي البلد والبلدين .. والله ياقنديل خذلتني .. انا كنت بتفاخر بيك في اي حتة ..
انا طبعا ياجماعة في اللحظة دي ربنا مداني بقوة كدا فجأة .. وقررت افهمو الكلام .. واديهو كلام زي السيف .. واديهو درس من مدرسة قنديل ود التوم ..
قلت ليهو انا ما ساكت عشان ماقادر اتكلم .. ولا خجلان من حاجة عملتها .. ابدا والله.. انا مكسور من جوة .. كيف زول عزيز علي بالدرجة دي.. يصدق فيني كلام زي ده .. قال لي ياتو كلاام يعني ماحاصل الحكيتو ليك ده ؟؟
قلت ليهو اذن انت لسع ماعرفتني ياخالد .. انت ماعرفت قنديل ولا اظنك ح تعرفو ..

.

[فيتامين سي]

تابع الحلقة 27

وانا بحاول اتناسى في اللحظة دي كل الضيق والاسى الحاسي بيهو.. عشان اوضح ليك حاجات ..
اولا انا لامن جيت بيتكم اول يوم .. صاح فعلا قابلت امك وزوجتك واخواتك .. وفعلا سناء هي الفتحت لي الديوان .. وفرشت الملايات شغلت المراوح .. لكن اقسم بالله لا اتكلمت معاي.. لا اتونست معاي
ولا عبرت ليها عن اعجاب ولا اي شي .. ومن حقك تصدق او تكذب .. لو في شي في اللحظة ديك تجاهـ سناء .. كان شي جواي بس .. لكن خشمي معاها مافتحتو معاها ربما شاهد ..
ولمن جيتو واتعارفنا .. وعرفت انها مخطوبة لي ولد صاحب ابوك .. انا تاني مستحيل افكر فيها مجرد تفكير.. خلي اعمل معاها علاقة او تواصل .. والله هي ماحصل ضربت لي .. ولاانا حصل ضربت ليها .. ولا بينا اي رسالة .. والله من اليوم الاول الجيت فيهو .. تاني لغاية اللحظة .. دي سناء ماوقعت في عيني ولا شفتها ..
بعدين انا الاقيها متين ؟ الاربعة وعشرين ساعة انا لافي معاك .. واتصل عليها كيف؟؟ واجيب تلفونها من وين؟
دي كلها اسئلة انت المفروض تطرحها على نفسك .. وفعلا ماح تلقى ليها اجابات لانها اساسا غير منطقية ..
طيب خليني من اخلاص بت مريم .. انت سألت سناء وقالت ليك بيني وبينها في علاقة؟؟ .. قال لي ابدا ما ٍسألتها.. لكن ما اظنها تنكر .. لانو اخلاص قالت لي . لو عايز تسألها اسألها. لكن تاني لابيني لابينكم .. لا انت لا اختك .. لاناس بيتكم ..
وانا ياقنديل منتظرك تجي انت.. واعمل ليكم مواجهة انت وسناء ..
قلت ليهو بعدين انا فعلا سكينة بت عمتي عجبتني جدا .. واتكلمت مع عمتي في الموضوع .. وعمتي وافقت.. بس لانو الكلام لسه في بداياتو .. وابوي ماعندو خبر .. وابو البت برضو ماعارف .. ماحبيت اكلمك .. او بالاصح مالقيت ظرف مؤاتي .. عشان اقول ليك ..
قال لي بس هسي يا الشاطر .. اخلاص كلمت عمتك وبتها بالتلفون.. وقالت ليهم قنديل بحب سناء.. وسناء اتفقت معاهو تخلي خطيبها عشانو .. عليك الله ياقنديل انت جيت متين كوستي .. عشان تسوط الواطة كدي ؟؟ انا طبعا والله ياحماعة حسيت بانو خلاص .. الدنيا ضلمت في وشي .. واخر قطرة من الفرح في قلبي اتبخرت .. يعني القوالة وصلت عمتي .. وسكينة الامينة ؟؟
قلت ليهو ياخالد الكلام الكتير خليهو.. ارح واجهني بي سناء ..
قال لي .. هسي نحن ماشين البيت .. واواجهك بي سناء .. وح اعرف الكذب من الصح .. قلت ليهو ماعندي مانع يا خالد.. لكن والله كسرت حاجة جواي ما اظن تاني تتصلح .. والله حطمتني تحطيم بس الحمد لله ..
قال لي يلا نمشي البيت وماعايز ابوي يعرف شي.. لكن صراحة ياجماعة انا خايف انو سناء تتبلى علي وتلصق فيني تهمة .. الله يستر والله ..
الى اللقاء .

[فيتامين سي]

الحلقة 28 ..
بقلم طارق اللبيب..

اها انا ركبت مع خالد في العربية وماشين علي البيت.. وقررت جواي دي اخر ركبة في العربية ..وتاني مابقعد معاهم في البيت نهائي .. والله محروق من جوة حريق بس الحمد لله .. ياربي تسترني مع الناس ديل .. والله لا خالد لا ابوهو ..ماقصرو معاي .. ان شاء الله ربنا مايخذلني معاهم .. انا والله بقدر ما زعلان من خالد .. متأثر على الاحساس البكون هو حاسيهو في اللحظة دي ..
وطول الطريق ما اتكلمت معاهو ولابي كلمة .. ولا غشى ابوهو في المحل التاني .. ولا انا سألتو قلت ليهو ليه ماغشيت ابوك ..
طبعا ياجماعة .. انا في الشارع فكرت تفكير طويل عشان اخفف على نفسي .. بحكيهو ليكم بعدين ..
اها وصلنا البيت الحمدلله .. وعمي يوسف مافي .. ماعارفو وين والديوان فاضي بس انا وخالد .. قلت ليهو سريع نادي البت عشان انا مستعجل .. قال لي مستعجل ماشي وين؟ ..
قلت ليهو عليك الله ياخالد نادي لي سناء سريع .. انا متضايق شديد .. قال مافي زول جوة ابوي وامي مشو مناسبة .. واشراقة مافي .. وزوجتي في بيتها باختصار البيت فاضى في سناء بس .. ادخل جوة .. وقام دخل وانا دخلت وراهو .. وقلبي ده يسوي التف التف التف التقول داخل لي قاعة محاكمة .. كورك ليها .. ياسناء .. ياسناء .. جات مارقة بي فستانا وشعرها كاشف .. لمن شافتني زاغت راجعة .. دخلت لجوة .. خالد قال ليها البسي تعالي سريع .. نحن قاعدين في البرندة دي .. لبست ليها توب مكرفس كدا وجات .. خايفة ومرعوبة ..
وقعدت مطيرة عيونا وقالت في شنو؟ ..
انا بديت الكلام وقلت ليها ياسناء .. انتي شفتيني كم مرة من انا جيت كوستي؟؟ .. قالت لي شفتك مرة واحدة .. ياهو يوم انت جيت لينا اول يوم وانا فتحت ليك الديوان .. ودخلت اجيب ليك الاكل جيت لقيتك نمت ورجعت الاكل راجع ..
خالد قال لي دقيقة ياقنديل لو سمحت .. وسألها هو .. قال ليها انتي ياسناء ..قبل ماتمشي تجيبي الأكل.. قنديل قال ليك شنو؟..
قالت ليهو والله ماقال لي اي حاجة.. اسأسا هو كان تعبان ونص نايم ..
قال ليها ياسناء انتي عارفة رقم قنديل ده ؟ قالت ليهو اعرفو من وين ؟؟ انتو بتٍسألو في شنو ياخالد؟
قال ليها جاوبيني وبس .. حصل مرة قنديل ده اتصل عليك؟.. قالت ليهو .. والله ياخالد بتبالغ .. انا قنديل هو عرفتو متين؟؟ .. انا شفتو مرة واحدة بس ؟؟ يتصل علي كيف يعني ؟؟ ويلقى رقمي وين ؟؟ انا ماعارفة انتو بتتكلمو عن شنو بالضبط كدا ..
خالد قال ليها طيب.. انتي المشكلة البينك وبين خطيبك.. سببها شنو؟
قالت ليهو دي حاجة بيني وبينو.. ومابحكيها ليك .. بحلها براي .. قال ليها انا مصر اعرفها .. وهسي كمان .. قالت ليهو طيب بحكي ليك .. خطيبي معذبني .. منجضني .. بشكر لي بنات اهلو . وانا بغير .. لاني بحبو .. بغير .. مابتحمل انو يتكلم عن واحدة تانية قدامي .. كدا انا غلطانة؟؟ .. خالد ده سكت مساااافة .. وانا متمحن.. مربع يديني ومدنقر .. بعاين في الارض.. وبسمع .. قال ليها .. انتي حصل كلمتي اخلاص انك انتي عايزة تخلي خطيبك لي قنديل؟؟ .. قالت ليهو شنووووو؟؟؟.. ابدا والله الكلام حصل .. جيبها لي قدامي الكضابة .. والمصحف بيناتنا .. والله تاني المتخلفة سلام الله ما اديهو ليها .. انا اساسا يا خالد صاح .. كلمتها عن قنديل.. يوم قنديل الجانا .. انا اتصلت عليها .. قلت ليها الليلة جانا قنديل ودعمي التوم .. و شكرتو ليها شديد .. وكنت فرحانة اني شفتو بعد السنين دي كلها .. وهي افتكرتني انا معجبة بيهو .. وقالت لي انتي وكت قنديل ده عاجبك كدا .. موش هو ود عمك واولى ليك هو من الغريب .. انا قلت ليها يختي انا متعلقة بي خطيبي .. ومابقدر اتخلا عنو لاي بشر .. تاني بقيت كل ما اتصل عليها بتسألني عن قنديل .. وبتقول لي قاعدة تلاقيهو ؟ بينك وبينو مافي اي اتصال ؟ وانا بستغرب من اسألتها.. لكن بس بقول هي متمنية لي الخير .. بس هي ماعارفة قلبي في حتة تانية .. عرفت ياخوي ؟؟
انا ماعارفة اسئلتكم دي لشنو؟ لو انتو عايزين تتكلمو معاي في الموضوع ده عشان اسيب خطيبي .. انا ماعندي اي استعداد اسمعكم .. لاني متمسكة بيهو وما ح اتخلا عنو لي زول حتى لو قنديل ودعمي.. وحتى لو ياخالد انت بتريدو اكتر مننا .. شوف ليهو واحدة غيري ... بعدين اخلاص قالت لي ابوها حكا ليها فرحان داير يطير .. قال ليها قنديل خطب سكينة بت عمتو في ربك ..
انا طبعا" ياجماعة نزل مني هم قدر الجبل .. طوالي قلت قلت ليها اطمئني يا سناء نحن ماجايين ننزعك من خطيبك.. ربنا يسعدك ويوفقك .. نحن جينا نبرئك من تهمة .. تهمة الصقوها فيك ناس مابخافو ربنا .. وفي ناس للاسف صدقو التهمة دي .. قالت لي تهمة شنو كمان ؟؟ .. قلت ليها خلي اخوك يحكي ليك ..
وقمت طوالي داير اطلع .. خالد قال لي دقيقة ياقنديل ماتمشي انتظرني كويس .؟.. ابيت اقيف .. طلعت طوالي غشيت الاوضة شلت شنطتي ومرقت من البيت ..
هو قعد يتكلم معاها .. وانا بقيت تايه بي شوارع غريبة عشان مايحصلني .. الكلام ده زي العصرية كدا ..
والله ياجماعة خالد ده وكت عرف الحقيقة .. حصلت عليهو حالة ما بقدر اوصفها ليكم .. بقى يعضعض في يديهو .. و يضرب في ماسوؤة السرير .. ووشو شايل ندامة وخزي .. لامن انا ذاتي حنيت عليهو ..
انا طالع ما عشان زعلان منو .. ولايمكن ازعل منو .. واي زول راجل.. بغير على اعراضو.. المفروض يشك في اقرب الناس .. ومايخلي الثقة تعميهو .. لانو مرات الثقة العمياء بجيب المصايب .. انا والله طلعت من البيت عشان ما اخليهو يدخل في حرج .. ويستحي من المعاينة في وشي .. ومايعرف يعتذر لي وهو في قمة الاستياء والندامة ..
بعدين ياجماعة .. خالد معذور .. بحب اخلاص ومابفتكر انها ح تكذب عليهو .. وشكلو لسع بحبها .. وماقادر يتخلا .. لكن المشكلة دي الليلة حتبقى ليهو صعقة كهربائية تصحيهو من الغبا العايش فيهو ..
ثم انو يتزامن زعل سناء من خطيبها .. بي موضوعي مع سكينة . الموضوع ده خلاهو يشك زيادة ..
تالتا كونو انا اجي انزل في البيت والبيت فيهو سناء بس ؟ وانا ما اتصلت عليهو قلت ليهو انا جاي .. الحكاية دي تمت الناقصة .. وهو ماعارف انو انا جاي اطرش .. وماعارف البيت فيهو منو .. وماعارف سناء ولاغيرا .. ولادخلت جوة من الديوان واتخارجت ..
يعني الحاجات دي مع بعض لو حصلت لاي زول ممكن يشك ومن حقو .. لكن انا عزة نفسي مابية علي تاني مابسكن معاهم في بيتهم .. وانا هسي طالع ماشي وين ماعارف .. عمتي ذاتها يتلقي كارهاني .. وسكينة المسكينة ماعارف الحاصل عليها شنو .. والمفروض خالد يمشي ليهم ويكلمهم انو احلاص كذابة .. لاني لو مشيت ليهم انا مابقابلوني مقابلة كويسة .. لكن والله قلبي في اللحظة دي مشتاق اشوف سكينة وحاسي اني عايز ابكي .. ياربي ماتحرمني منها مهما كان التمن .. والله انا حبيت اقعد في كوستي مخصوص عشان اكون قريب من سكينة .. واشوفها كل مرة .. وهسي في اللحظة دي مافي شي بخفف علي الحاسي بيهو غير اشوفها .. واشوفها كيف وهي حتكون مستاءة ومحبطة من كلام اخلاص .. وعمتي ماضربت لي وتلفوني عارفاهو .. معناها قاطعاهو معاي جاف ..
اها يازول مشيت السوق .. لقيت المحلات اغلبيتها قفلت .. ودكاني قعدت قدام دكاني ومفتاخو في جيبي .. ابيت افتحو بس قعدت كدا فوق حجر بتاع اسمنتي وماعارف امشي وين لا اسوي شنو .. قعدت في مكاني داك .. غاية ما اذن المغرب .. مشيت صليت في جامع السوق .. ودعيت دعوات كاربااات ..وجيت راجع ..
ضربت لي امي .. سلام يا امي كيفك ..
قالت لي تمام الحمد لله ان شاء الله وصلت بالسلامة اها .. كيف الشغل والدكان .. وعمتك نفيسة المراة الفاضلة ؟
قلت ليها لسع مالاقيتها .. لكن بمشي ليهم يابكرة يابعد بكرة لاني يادوب اللية فتحت الدكان ..
قالت لي بالمناسبة ابوك جاء قبل المغرب .. وقال الاسبوع الاول ده كلو ح يقفل الكافتيريا قبل المغرب .. ومبسوط من الشغل وقال الحكاية دي ح تصلح امورنا مية مية .. وانا طبعا وكت لقيتو فرحان كدي .. كلمتو بالسر الاديتني ليهو .. اعفى لي ماقدرت اسكت .. قلت ليها اها اها قلتي ليهو شنووقال ليك شنو؟؟ ..
قالت لي كلمتو وريتو انك شفت سكينة بت عمتك وعجبتك .. بس طبعا" ياهو نفس الكلام .. ابوك قال البت بتكون صغيرة نحن ياقنديل مابنقدر نحكم على البت ماشفناها .. العمر للبت مامشكلا المشكلة وعاها .. وعرفتها للحياة .. لو بت عمتك واعية مافي مشكلة لكن المشكلة تكون لسع شافعة وبتفكر زي الشفع ... وكت تكبر تجي تقول عرسوني صغيرة ومافاهمة حاجة ..
انا قلت ليها يا امي خلاص انا مامستعجل لامن تجو تشوفوها ... وتتاكدو منها .. وانتي وابوي القول قولكم انا مابتعداهو سنتي ..
قالت لي المهم ياقنديل ابوك ماعندو مانع ورحب بالفكرة بس نفس تخووفي .. وخصوصا" انو عمتك ماجابت لينا سيرة .. قلت ليها السيرة مابتجيبا ليكم هي .. نحن بنمشي نطلب يالحبيبة ..
قالت لي خلاص انا بحاول اجي مع ابوك يوم الجمعة واشوف البت ..
اها ودعتها وقفلت التلفون .. وماحكيت ليها اي شي من الموضوع الحاصل واللخبطة العملتها اخلاص .. لاني ثقتي في ربنا ح يحل كل العقد..وماداير ازعج امي بي كلام حرق قلبي .. متأكد ح تقولي سيب كوستي وتعال .. لكن انا كوستي مابفوتها الا اموري توضح يا ابيض يا اسود .. خصوصا انو خالد الحبيب عرف الحقيقة ..
يازول غايتو بعد تلفون امي ده اتشجعت وقلت انا امشي ناس عمتي واواجه الموقف بي شجاعة .. وابرء نفسي بي نفسي ..
لانو سكينة بالذات ح تكون مستاءة .. فاي تاخير مافي صالحي .. طوالي اتحركت وركبت ومشيت .. في الشارع اتصل علي خالد ابيت ارد ليهو .. ماعارف ارد ليهو اقول ليهو شنو .. وهو يعني ح يقول لي شنو ؟؟ يعتذر لي مثلا؟ يقول لي انا اسف ياقنديل ..اتهمتك بدون ما اتاكد .. ماعايز اسمعو هسي .. لكن اساسا مابزعل منو .. خالد راجل ود رجال ومواقفو معاي كتيرة .. ما ممكن ابيعو واحرقو في اول غلطة .. ولو سألوني انا عايز اهدأ شوية .. وامشي براي اتكلم معاهو عادي .. عشان ما يضطر يجي يعتذر لي .. لاني عارف الاعتذار حار وصعب والله .. وخالد مايستاهل الا الخير .. بس انا زعلان منو في حاجة واحدة .. في تواصلو مع اخلاص.. واول ما القى لي فرصة .. بسلخو ليك سلخة تخليهو لافي . هو يزعل مني لو اتواصلت مع اختو المخطوبة .. وهو يتواصل مع بت عمي المتزوجة؟؟ طيب البزعل فينا منو ..
طبعا ده كلو الكلام الكنت بفكر فيهو قبيل في العربية ونحن جايين على سناء في البيت .. وهسي بدور فيهو في راسي . وانا ماشي علي بيت ناس عمتي .. طبعا زي ماحكيت ليك معتل معاي شنطتي
زي الزول المشرد ..الحمد لله ..
اها يازول انا وصلت ربك .. حي زينونة ..
ودخلت الشوارع .. وبرضو قلبي شغال ينتج .. غايتو قلبي ده تعب تعب مع ناس كوستي ديل الله يديهم العافية ..
انا وصلت البيت .. اححح .. ربنا يستر .. من الراجيني جوة .. وكمان سكينة ابوها في الوقت ده بكون موجود ..
الى اللقاء ..