22-12-16, 08:36 AM
| #121 | |||||
| نجم روايتي
|  اقتباس:
تعليقك للاحداث كتير حلو وكتبتي اللي ما عرفت اشرحه وجلوي ما دام قلبه مو صافي من ناحيتها.. ليش رجع تزوجها .. يحبها.. واللي يحب يجرح هو هذا حب البدوي يا جماعة .. والا انا فاهمة غلط بانتظار الفصل الجديد يا احلى كريستال | |||||
|  |
|
23-12-16, 12:50 AM
| #122 | |||||
| نجم روايتي وفراشة الروايات المنقولة 
|  اقتباس:
وفعلا معك حق بجلوي ، سبق وحكيت ان حب البدوي اقوى ، وحتى بعد ما اتضحت الامور اكثر ، المفروض يدافع عن نوق او يتحقق اكثر ، مو يظلم وزاد الطين بلة بزواجاته ، وعذره انه يدورها في باقي الحربم ، على كل حال بانتظار باقي الاحداث يمكن يمكن يمكن نلاقيله عذر صغيرون ما ودي | |||||
|
| |
|
23-12-16, 08:48 AM
| #124 | ||||
| السلام عليكم ...& صبااااح الفل والياسمين ... ياحلى واجمل وافضل كاتبه ... انا تو ماقريت هذي الروايه بس مايحتاج انتي اسطورة الكتابه الله يحفظك ويحميك من متابعينك في السناب والمنتدي واشوف جديدك دايم قبل يومين شفت روايتك الجديده سلمت يديك يارب بالتوفيق ياقلبي ...& ايه نسيت انا عضو جديده بس اقراء روياتك من زمان فسامحيني لني مارد علي روياتك قبل ....~_* | ||||
|
| |
|
23-12-16, 01:05 PM
| #125 | ||||||||||
| نجم روايتي وبطلة اتقابلنا فين ؟ومشاركة بمسابقة الرد الأول ومُحيي عبق روايتي الأصيل 
| صباحكم رحمه من عند الله و جمعه مباركه طيبه عليكم و على أحبابكم لا أعتقد بأن نوير شخصية نكدية او حقودة و لا تنسى كما نتصورها من خلال افعالها و لكنها جرحت و تعذبت بفراق عائلتها ...في مثل بنحكيه انه عندما بتسير مشاكل بين العائلات ..انه الخير يخص و الشر يعم و هاد اللي صار مع نوير و اخواتها و امها ...شر عبدالله و جبروته عندما ظلم ابوه و اخوانه طال بناته و زوجته عندما قاموا بطردهم و فوقهم طلاق اختهن الكبيرة من جلوي ربما قبل سنين نوير كانت اقرب لعواد او انها كانت تشوفه السند و الأخ الذي لا يظلم و لا ينسى لأنه تربى معهم بس النسيان و الجحود لهن طال و اصبح ١٥ سنه ...و كل سنه كانت تتأمل ان يرجع عواد و عمامها حقوقهن و ان يرجعن للعائلة ...نوير مثل الوردة التي قطفت من ارضها و انبتت بأرض قاسية علمتها ان لا ترجع مثل ما كانت و ان الطيبة و المسايرة .ما هي الا ضعف وخنوع باقي خواتها لم يعشن مأساتها و مأساة نوق عواد بهدايا و تحقيق أحلام كانت شبه مستحيلة لوعد و عهد و شيما و هيا ..نال الرضا منهن و يقول بأنه نسي ان يشتري هدية نوير .....عندي ثقه و لا واحد بالمية بأنه نسي ان يشتري و لكن يريد ان يوصل لنوير ..بأنني انساك ِ ان اردت و انك غير مرئية و بأفعالك و بغضبك العم منصور ...و الله و النعم فيه الأحتواء و المحبة لا تكون بالهدايا بقدر ما تكون بكلمه لطيفه و لمسة حنان ام نوق ....أمرأة قوية و أقوى امراة بالرواية لحد الآن ...صبرت على ظلم و طغبان عبدالله و ربت بناتها على الخير و الطييه و مخافة الله ...و لو نشوف طرد من العائلة و اب عاق و ظالم و قلة المال ..ستكون نهاية الابناء و البنات ...استهتار و طيش و ظلم و حقد اعمى لا يفرق بين الصح او الخطأ و لكن بناتها من براءة و جهل و صفاء النية و المسامحه و المصالحه مع النفس بأن كل ما حدث هي اقدار الله عز و جل و البر بالوالدين و هينا شفنا مع كل افعال ابوهن بارات فيه و يدعن له بالخير و يعلمنه الاستغفار و التوبة من الذنب او الذنوب التي جناها بأيديه لقاء جلوي و نوق ...و اكتشفنا سر طلاق و غضب جلوي من نوق و هي اوراق صك الملكية التي لا يعرف مكانها غير نوق سرقت من منزله ..ابو نوق يريد حرق قلب جلوي عندما اخبره بأن نوق هي من سلمته الاوراق تحت التهديد ..نوق لو هي من سلمت الاوراق لن تسأل جلوي عن موضوع الطلاق ...اعتقد بأنها ظلمت و لم تسلم اوراق زوجها لوالدها...اتوقع بأنها مكيده من نورة و عبد الله و هم يريدون هذا الطلاق لا اتصور بأن كمية الشر عند عبدالله عند هذا الحد و لكن هو افعاله اقرب للأنتقام من العائلة اجمع و ليس طمع او غضب و عقوق افعاله تدل انه يريد ان ينتقم و يأخذ حقه من اهله ...ربما عبدالله ضاق ظلما او نكران او شي صار بالماضي و بطفولته خلته ينتقم و يحقد كالاعمى على أهله و هذا كان سبب شفق او نقول مسايرة ام نوق له ...بالسنين التي مضت و رضت به عواد و عطره اللي مضايق نوير و مضايقنا بعد ....يتكلم مع امرأة و يقول لها أجيتس قبل اسبوعين و هذه تكفيك ..ربما زواج مسيار، او عرفي لا اعلم ...و لكنه شخص غامض و وراه كمية اسرار ..و فكرة الزواج المسيار مستهلكه و معاده و لا اظن ستكون ..الا اذا حبكتها بطريقة جديده العزيـــزات كريســـتال و فيتـــو الله يعطيكن العافية و الصحه و راحة البال و بالأنتظار يوم الاحد بأذن الله تعالى  | ||||||||||
|
| |
|
25-12-16, 11:19 PM
| #129 | ||||||||
| مراقبة عامة ومشرفة منتدى الروايات المنقولة  
| بسم الله الرحمن الرحيم أرحبوا تراحيب المطر .. بكل من يتابعني .. ومن أنضم لنا من جديد .. والله بجد بجد .. الأسبوع هذا كان حافل بالتعليقات الناريه .. ههههه .. خصوصا إلي وجه بتعليقاته على عيالي كلهم ماترك أحد ... والله أسعدتوني ضحكت من قلب على بعض التعليقات .. أكثر شخصيه أبدعتوا بتحليلها " نوير " متعاطفين معها الأكثريه بشكل كبير .. وربي حاولت ألقى وقت أرد على الجميع .. بس وقتي يضيع يادوب صايره بس أكتب البارت .. أوعدكم بس أسلم أسئلتي النهائيه لبنياتي .. بكون أرتحت وماعاد وراي شي .. إلا التصحيح وهذا فترة الصبح .. أحبكم .. أحبكم .. والله يجمعني فيكم بالجنه .. ويجعلني عند حسن ظنكم .. ( 8 ) ( ياحرمة حتسيي ماأعيده وأزيد فيه .. لا يعني لا .. ويالله مع السلامة ) لصقت بظهرها على الجدار والخوف أمتلك جسدها .. ماتدري وش إلي خلاها توقف بهالمكان .. وعواد بوسط الغرفه .. رفع يده حتى يضغط على عيونه بقوة ويردد ( أستغفر الله العظيم ) .. أخذ نفس بقوة وزفره حتى يلف بقوة من سمع صوت شي طاح بالأرض .. عقد حواجبه بضيق وتحرك بخطواته الواسعه .. طلع من باب المقلط وهو ينحني براسه حتى يشوف حمد واقف رافع أيديه بذهول وهو ماسك كاسات الشاي إلي مبلله بالماي .. عيونه متسعه وفيه صدمه .. حرك عيونه بسرعه صوب باب الصاله حتى يلمح رجولها وهي تركض فالدرج وطرف من تنورتها .. حمد بصوت فيه ذهول : سلمني الله ولا تسان رحت وطي عواد نطق بعصبيه : وش صاير حمد يطالعه : تسألني ماأدري .. فيه أحد مر بغى يدعمني وأنسدح بالأرض ماأدري من وين طلع .. بسم الله الرحمن الرحيــم ..! عواد وملامحه تغيرت : من وين جاي أنت ..؟ حمد بأستغراب : من وين أبجي يعني .. ( حرك يده إلي متمسك فيها بالكاسات ) أنا هنيا أبوي قالي رح أغسل الكاسات ودخلت الحمام عشان المغسله .. وطلعت .. إلا تطلع هي تركض زل لسانه وهو كان يحاول مايوضح لعواد من شاف ... صغرت عيون عواد وهو ضم شفاته بقوة وتحرك بسرعه عابره صوب مجلس الرجال والربكة وضحت عليه .. تحرك عواد بخطواته الواسعه داخل الصاله متوجه للدرج .. صعده لين ماوصل لباب الطابق الثاني .. دفع الباب بس لقاه مقفل .. ضرب الباب بيده بقهر .. عواد : نوير أفتحي الباب .. شايفتس بعيوني .. نوير طق الباب بصوت مسموع .. لكن مامن مجيب .. رجع يضربه بقوة يبيها تفتح الباب .. وش له واقفه تتسمع له .. ماحب هالحركة نهائي ولا كان لها تدخل قسم الرجال وهي عارفه إن فيه ناس ماهم محرمن لها ..! عواد : إن تسان تسمعيني .. ماسكتس .. ماسكتس وين بتروحين يعني أبعد عن الباب ونزل .. وهي ظلت واقفه وراه .. ترجف من الخوف وتتنفس بقوة .. يالله !! كيف طاحت بهالموقف البايخ .. ظلت ترص أيديها على أذانيها وظهرها لاصق بالجدار بقوة .. قلبها يضرب بقوة من الخرعه .. ثواني مرت والباب ماعاد ينطق .. ولاعادت تحس بوقفته ورا الباب .. أبعدت أيديها إلي متشابكه بشعرها الناعم عن أذانيها حتى تلف براسها لتحت الباب .. تنحني كأنها ساجده وعيونها لصقت بالفتحة الصغيره إلي يبان لها كل شي ورا الباب .. صارت تحرك عيونها يمين ويسار .. نزل .. نطقت وهي تحاول تهدي نفسها " الحمدالله " .. وش فيها خافت منه ..؟ والله خافت ... رفعت ظهرها وهي تمسك ركبها .. من الوجع .. نطقت " آآآآآه " وكأنها ناقصه .. وهو طلع من باب الصاله يمشي بخطواتها الواسعه وهو متنرفز على الأخير .. تعدى مجلس الرجال بس وقف من ناداه منصور .. " ياعواد شف جلوي وين غدى " ! نطق بصوته الرجولي الغاضب " زين " وطلع للحوش .. راح يمشي لجهة اليمين بعبث .. حط أيديه على خصره ووقف .. أندفع باب الشارع إلا مشعل داخل بجسمه الرياضي .. لابس ثوب سكري مخصر على تفاصيل جسمه وغتره ترتمي أطرافها فوق راسه .. النظاره الشمسيه بلونها الرصاصي تغطي تفاصيل وجهه .. وبيده كيسه كبيره متمسك فيها بأطراف أصابعه مشعل : السلام عليكم عواد لف براسه صوبه ومن شاف الكيسه نطق بأستغراب : وش جاب هالكيسه عندك ..؟ مشعل وقف يطالع عواد بتركيز إلي واضح عليه إنه ماهو طبيعي : حمد ياخوك مانت قلت له يحط الهدايا بسيارتك كلها .. مالقى للكيسه ذي مكان وأخذها معه يوم ركب معي بالسياره ..! عواد صرخ : فيكم شي مشعل أنعقدت حواجبه : أنت إلي وش فيك .. عواد رفع يده لفوق بقهر .. يبي يتكلم لكن يعرف إن الكلام هالحين ماله أي فايده : ............... مشعل أنحنى منزل الكيسه عند باب الشارع : هذي هي جبتها لك ولا بغيت إنها تقعد بسيارتي .. تعدل بوقفته .. وتقدم أكثر بخطواته لداخل .. صار يطالع البيت إلي واضح من شكله أنه قديم .. تتحرك عيونه لفوق .. تمر على حدود الصدح .. الشبابيك .. مدخل الباب الحديد .. ولحظات لف يطالع الحوش الواسع على يمينه .. المظله .. السطل الأسود .. كفارات السياره .. حرك عيونه لليسار .. أبعد نظره عن عواد وصار يطالع الدينمو .. والبركة الكبيره ومغطاه بغطى حديد وفوقها حصاة كبيره .. مشعل : والله شي بيت عمي عبدالله .. عواد بعد صمت يبي يبعد إلي يحس فيه : وين كنت مشعل يحرك يده يدفنها بجيبه ويتحرك صوبه بخطوات متوازنه : ماكنت أقدر أظل هينا وعندي إعلان مهم ع السناب عن معرض قريب أفتتاحه .. رحت لبعيد ويوم خلصت جيت في كل خطوة .. كان صوت ثوبه وهو يلامس بعضه يظهر صوت خفيف لا أحتك في بعض .. وقف بجزماته الجلد بلونها البني حتى يكمَل مشعل : تمت أمور جلوي عواد هز كتوفه : للحين .. ترانا مطولين مشعل على طول سحب نظارته لتحت شوي ومال براسه : تسيف مطولين .. عواد لف بجسمه صوب مشعل : أكيد إن نقل عفش البيت والأغراض يبي له وقت .. ولا وش له جاي معنا ..! مشعل أندفع : ترا سيارتي يالله يالله تكفي وش عفشه بيركب فيها .. دق على أي راعي دنه ولا شي ينقلها لك من القصيم للرياض ياخوي .. وش له هالعنا طلع حمد من باب المدخل حتى يوقف قبالهم وهو ماسك بيده كاسة شاي .. لابس ثوب فضفاض يناسب جسمه المليان حمد : وينك ياولد مابينت مشعل : رحت أسوي لي شغيلات فالسناب .. عواد عاد مشتهيه : قبل نمشي للقصيم وش أنا قايل لك حمد فتح عيونه على الأخير : وش قلت .. ماغير طلبت مني أحط لك أغراضك بالسياره عواد هز راسه : أيه .. وش سويت أنت مشعل أبتسم على شكل حمد ألي تغيرت ملامح وجهه وهو يحاول يتذكر : شكلك جبت العيد .. ماتركت بسيارتي كيسه حمد فتح فمه : أييييييييه .. نسيتها ياولد عواد بقهر حرك يده صوب حمد : ماعمري طلبت منك شغله إلا لازم تسبب لي شي فيها حمد رفع يده : لحظة .. لحظة وأنت معطيني شين هيَن .. قراطيس ماغير أشيل فيها وأحط بذا السياره .. وعجزت ألقى لكيسه مكان قلت أخذها معي ولا جينا عطيتك عاد أمر الله نسيت .. وش نسوي عواد بقهر : قراطيس .. !!! ولد عدّل ألفاظك حمد بعبث سحب من جيبه سبحته وصار يحركها بين أصابعه : تامر أمر مشعل جاي لحمد : فيه قهوة ..؟ حمد : بالراسسسس .. لا تفوتك عز الله من مزينها ضابطها ضبببط مشعل يسحب نظارته ويدخل : ماشاء الله . . . في الحوش الواسع .. نطقت .. وهو واقف قبالها .. يطالعها بعيون متسعه .. مذهوله .. " أنا ماطلبتك .. إلا عشان شين في صدري تسان يسألني .. ولقيت الجواب " صوتها يخذلها .. ماضيها .. وكل شي تهادى من علو أوهامها للقاع ! بلعت ريقها تتحرك تاركته بس رجع يشدها بقوة من يدها .. نطق بصوته الحازم " بتوقفين يالنوق وتجاوبين لي عن كل ماسألت عنه .. ماهوب أنا من فتحت الماضي وسألت .. إنتي إلي سألتي .. ودوري أسأل يابنت عبدالله " غمضت عيونها وجسمها بدى يتبلل بالعرق .. أخذت نفس ولفت له .. وقفت مثبته خطواتها بالأرض .. رفعت عيونها له .. " أسأل يلا " جلوي : سألت نوق بصوتها الضعيف وإلي كان الوحيد إلي ماتقدر تخفيه : عده .. خلني أسمع جلوي رفع حواجبه لفوق : ياسلام .. على أساس ماسمعتيه أول مره نوق ظلت تطالعه بصمت : ..................................... ظلت تتأمل ملامحه ... محاولة أخيره حتى تخرج من رحم اليأس للحياة .. محاولة أخيره حتى تستوعب إن هالأنسان رجع للحياه .. بجراحه .. بمواجعه .. بحياته إلي يعيش فيها غيرها .. محاولة أخيره للسؤال .. وهي إلي كانت تحاول تلقى شي يشفع له ماسواه .. والعذر أقبح من ذنبه ! كانت فيها رغبه تلح عليها بسؤاله .. لعل من صفحات هالماضي والسنين شي صار .. لعل فيه ضمير يقول لها " آسف " .. جلوي أنقهر من نظراتها .. سكوتها : قولي لي شي .. عطيني عذر يخليتس تاخذين هالأوراق .. قولي لي إيه هددني .. إيه أجبرني .. تدرين وش سوى أبوتس بالأوراق .. وش سوى في جدي ( حرك يده للبيت بقهر وهو يتكلم بأنفعال وحرقه ) تسيف جرجر أبوه بسبة هالأوراق .. تسيف حرقنا وخلا العرب تحتسي فينا .. نوق هزت كتوفها بنظره بارده : ماعندي شي أقوله .. ممكن تتركني أمشي حس بالأفكار تثور في راسه .. تثقل وتصرخ فيه من جديد " أهانتك وش يفيد الحتسي .." رفع أيديه حتى يحطها على راسه ويلف بقهر معطيها ظهره .. للأسف ماكانت مدركة وش معنى تاخذ الأوراق إلي كانت تتأرجح فيها كفة الأمور وقتها.. إما مايطولها عبدالله وتموت .. أو ياخذها ويشعل فيها سمعة العايله كلها وقدر .. قدر للدرجة إلي خلت عواد بعد ماطال عقوق أخوه .. وأنفصاله عنهم صار لللأبد يروح لأم نوق .. يترجاها تكون معهم عون .. لكن أنطرد ..! تحركت بخطوات متخاذله تاركته .. وراها واقف .. تضم أصابع أيديها مع بعض .. أبعدت والصمت موحش في داخلها .. كان ودها تصرخ في وجهه .. تقوله أنت تدري عذرها .. أنت قلته بنفسك " هددها " .. ولا عذرتها .. تعرف ياجلوي وظلمتها .. تعرف ورميتها بلا رحمة لكلام الناس .. للوحده .. تركتها ياجلوي .. تركتها .. رفعت يدها تلامس مكان قلبها ... ألم غريب يحتويه .. صارت تمشي لين مادخلت البيت .. وقفت ولفت تطالعه من بعيد واقف بمكانهم .. ليتها تقدر تروح له وتقول بعالي الصوت " أكرهك ياجلوي .. وأكره كل مابيجي منك .. أكرهك وليتك تطلقني وترتاح عشان أرتاح " .. بس خذلتها خطواتها .. وترددها وضعفها .. حتى تترك أنصاف الحقيقه على شباك الغياب .. وتروح ! . . . وفي مكان بعيد عن البيت .. بعيد عن أجواء هالديره والضجيج إلي حوى أنفاس ساكنيها .. جالسه على الأرض متربعه .. تبكي وعيونها أنتفخت من كثر القهر والغبنه إلي تحس فيه .. قبالها أمها منحنيه على الذبيحه المعلقه على حديدة كبيره وتسلخها بسكين كبيره .. لابسه قميص أسود بأكمام طويله .. وعباتها تاركتها بسيارة الغمارتين الي جابتهم من البيت لهالمكان .. أصوات الغنم وسط الشبك تتردد وعهد داخله هالشبك وتبي تمسك جفرتها .. بس ماهي قادرة .. كان لابد على أم نوق تذبح هالذبيحه دام حبال الوصل لاحت .. مثل ماتملي عليها مبادئها وتربيتها .. وشيما بنتها واقفه بجنبها تعاونها كل ماأحتاجت معاونه .. هيا قاعده بمكان السايق وتضرب هرن : بسرعه بيمسي علينا الليل شيما لفت بقهر لها : أنزلي من السياره إن تسان فيتس خير وعاونينا هيا طلعت براسها ويدها من الشباك وصارت تحرك يدها بالهوا : لا ياحبيبتي .. أنا إلي جبتكم وبوديكم .. أحمدي ربتس إن لقيتي لتس سايقن يدل الدرب .. مرتن ثانيه ترا لكل مشوار للغنم 20 ريال مسبقة الدفع .. شيما حركت عيونها لوعد : ماخلصت دموعتس وعد تضرب يدها بقهر على فخذها وعباتها تتحرك يمين ويسار من الهوا : ماحلى لكم إلا تذبحون المزيونه .. وبعد تقولين ماخلصت دموعي ..! أم نوق عدلت ظهرها بتعب وأشرت بيدها لوعد : مانيب قايله لتس بنعوضتس وعد وهي تبكي : ذبحتيها يمه وتقولين بعوضتس .. وش الفايده .. المزيونه تعبانه عليها ألعفها وأعطيها كل شي تبيه .. وآخر شي تطيح ببطونهم ! شيما طارت عيونها ورفعت يدها تحركها بالهوا : سلامات وش أعطيها كل شي .. تراها نعجه تسذا ولا تسذا ( مررت أصبعها على رقبتها ونطقت ) كخخخخ .. بتموت وعد صرخت : على كيفتس .. وش يعرفتس وش بيني وبين المزيونه شيما لفت لأمها : يمه .. بنتتس تهرج عن حيوان ولا بني آدم ..؟ تراي ماعدت أفهم .. صرخت عهد بوسط الشبك وهي تمد أيديها للجفر إلي نوت تمسكه لكن هج عنها .. أنتشر غبار بقوة من أنحشر الغنم في زاويه .. أم نوق لفت حتى تصرخ : أطلعي يابنت أطلعي لابارك الله في عدوتس .. مايصير تسذا عهد وقفت وهي ترفع صوتها : يمه بسلم على جفرتي طيب .. أم نوق بعصبيه : أطلعي أحسن لتس ( حركت يدها لهيا ) وأنتي تعالي أنزلي والكروش شيليها وحطيها بظهر السياره يلا هيا أنفجعت : لااااااااااااا .. يمه رجيتس إلا هالمهمه .. خلي من عليها العشا اليوم هي من تشيلها وعد بقهر أنطقت بصوتها الغليض وهي تضم أصابع أيديها لبعض : بعد ذابحين المزيونه وتبوني أطبخها بنفسي .. أم نوق وهي تحاول تمسك ضحكتها : هو أنتي إلي عليتس العشا ...؟ وعد هزت راسها : إيه يمه علي أم نوق بأمر لهيا إلي جالسه بوسط السياره : تعالي يابنت شيلي الكروش .. يلا بنعجّل بالعشا ( طالعت شيما ) هاتي الساطور يمي شيما أنحنت مقربه قدر الذبيحه لأمها وعلى طول أنحنت ساحبه الساطور : هاتس يمه ( طالعت أمها وبفضول ) إلا كم بتعوضين وعد فيه ..؟ أم نوق رفعت يدها تكسر عظم عالق في لحم الذبيحه : بسعرها إلي لا طبت سوق الغنم جابته هيا تمشي جايه يمهم وبفضول : بالضبط يعني كم تعطينها ..؟ أم نوق تقطع من الذبيحه وترمي بوسط القدر : ألف وميتين هيا وقفت رافعه أيديها لفوق .. صرخت : ألله أكبر .. ألله أكبر أوما ألف .. ألف يمه ليه إن شاء الله مستخرجين من بطنها قطعة ألماس شيما منهبله : يمه تمزحين أكيد .. ركضت عهد من داخل الشبك للباب .. فتحته بعجله وسكرته حتى تركض لهم .. وقفت ورا هيا وعيونها طارت .. عهد : ألف يمه .. تسان أخذتي جفرتي وذبحتيها والله طيبه عادي أذبحها أنا بنفسي لو تبين أم نوق شهقت من الكلام إلي قالته : تبين تفضحينا عهد لفت لأختها إلي قاعده متربعه ورايحه فيها من البكا : يرحم الله هالمزيونه إلي ماتت وعطتتس ألف وميتين وعد بقهر : خليهم يسكتون يمه .. مانيب ماخذه ألف عن موت هالمزيونه .. مابدلها بفلوس الدنيا هيا لفت لها : وش عندها هايدي وجفرتها.. ياخيه ( صارت تحرك يده بالهوا ومن قلب ) ترا نفسي أصفقتس كف من بديتي موال البتسا ( البكا ) .. تراها ماتت .. وش مابدلها .. عهد تمايلت على كتف هيا : كم يصير لنا .. أنا وأنتي وشيما هيا تفكر : ألف وميتين على ثلاثه .. دقيقه .. فردت أصابعها وصارت تحسب فيهن من قلب .. أم نوق تطالعهن بطرف عين : 400 يمي .. يطول كل وحدة منكن 400 .. ولاهيب طايله أحدن غير بنيتي شيما : ماتبيها يمه .. خلاص تتصدق فيهن علينا .. عادي ترا والله ناخذها هيا بأعجاب : ماشاء الله .. فعلا 400 .. تغلبينا يمه دايما بالحساب ومن خلصت أم نوق .. أبعدت وهي تتمايل بمشيتها من التعب .. والدم منتشر في كل مكان .. أم نوق : يالله تعاونوا على القدر .. خلونا نمشي بسرعه .. أبطينا يالله عشان نركب الذبيحه على النار ويمديها تخلص على العشا أنحنت هيا وشيما شايلين القدر الكبير إلي بوسطه الذبيحه وتحركوا صوب السياره .. حتى يحطونه في صندوقها .. تتحرك عهد بسرعه وهي تشيل راس الذبيحه حتى تحطها بوسط كيسه وتاخذها للسياره .. غابت الشمس وأضواء ديرتهم تلوح من بعيد لهم .. لحظات .. ويرتفع صوت أذان المغرب .. " الله أكبر .. الله أكبر " | ||||||||
|
| |
|
25-12-16, 11:21 PM
| #130 | ||||||||
| مراقبة عامة ومشرفة منتدى الروايات المنقولة
| أم نوق وهي تعدل أكمام قميصها وتروح صوب حنفيه بجنب شبك الغنم : يلا يابنات عجلوا تنحني وتفتح الحنفيه حتى تبدى تغسل أيديها من بعض الدم إلي عالق في أصابعها .. تردد " لا إله إلا الله محمد رسول الله " .. صوت الغنم وريحتها تفوح في كل مكان .. توقف بتعب وتطالع هالبر إلي يملاه الفراغ في جهاتهم الأربع .. لحظات وتسمع صوت السياره إلي تحاول فيها هيا تشتغل بس ماقدرت .. يطلع صوت من مكينتها قوي وترجع تطفي .. أم نوق تحركت صوبهم وهي تفرك أيديها المبلله ببعضها : لاحول ولاقوة إلا بالله .. وش بلاها عهد بملل : يمه تكفين .. لا نويتي ترتاحين من ذا السياره وديها المتحف هيا وباب السايق مفتوح وهي جالسه بالسيت تحاول تشغلها : عيت .. من عطاها عين شيما وراها تفتح الباب وتركب : وعد .. أسأليها هيا ترفع صوتها : وعدووووه .. أستغفري تسان دعيتي إن هالمزيونه ماتنطبخ بالقدر تفز واقفه وعد من شافت أمها جايه صوبها .. ترفع أم نوق أيديها .. تمسك راس وعد وتسحبه صوب شفاتها حتى تبوس راس بنيتها .. أم نوق : ياوليدي هالمزيونه غيرها بيعوضتس الله .. حنا نبي بياض الوجه والفعول إلي تبقى لكن .. تنذكر وترفع روسكن يمي .. وعد توقف وهي تنزل عيونها بالأرض : ............................ أم نوق تظل ضامه راس بنتها بأيديها .. تمرر أصابعها الصغيره على عيون بنتها .. تمسح دموعها : باتسر لا أنذكرتوا بالطيب .. بتضحكين على دموعتس ذي تبعد أيديها عن بنتها .. وتجر قميصها الفضفاض .. تدفن يدها السمينه بجيبها وعلى طول تطلعها وتسحب يد بنتها .. تحط بوسطها الفلوس أم نوق : هذي لتس .. وإن تسان تبين زود قولي لي وعد على طول حضنت أمها : أحبتس يمه .. والله أحبتس أم نوق : وأنا أحبكن وأتمنى لكن الخير .. عسى الله يقر عيني بصلاحكن ياوليدي يالله .. يالله نتلاحق العشا تتحرك أم نوق ووراها وعد تمشي بخطوات بطيئه .. تشتغل السياره فجأه وعلى طول تسكر هيا الباب .. ومن ركب الكل تحركت السياره صوب الديره .. تمر الساعات الصعبه بالنسبه لأم نوق وهي كل همها .. تفتح صفحات بيضا في حياة بناتها قبال هالحياة إلي بتكون جديدة عليهم .. تغسل الذاكره من كل فعل تعدى فيه عبدالله على أهله .. والضحيه بناتها .. بناتها إلي في الحقيقه مالهم سند إلا هالجد والعمان .. مهما كان قاسي أبو عبدالله .. النهر الراكد لابد يصفى سطحه .. يوقف مشعل قبال المغسله وهو يغسل أيديه .. يتحرك بادي طالع من المقلط .. يرفع أيديه ينطق " الحمدالله " .. يوقف عند باب الحمام ينتظر مشعل يخلص .. مشعل : ماشاء الله .. والله إلي مسويه ذا العشا طباخه بادي بفرح : طبخ خالتي .. مايحتاج مشعل عقد حواجبه وهو ينحني يبي يتمضمض : وش يعرفك أنت ..؟ بادي : نفسها بالأكل هو هو .. أعرفه لو صرت شايب مشعل يرفع ظهره وعقاله متمايل تحت أطراف شماغه : أنا أشهد إنها بنت رجال .. يقول عمي هي من راحت للغنم وذبحت الذبيحه وجابتها وطبختها بعد .. شفت جدي تسيف أنبسط منها .. وتهلل وجهه بادي هز راسه وبصوت واطي : إيه بالله شفت يتحرك داخل حتى يطلع مشعل بس وقف يسحب مناديل من فوق المغسله .. مشعل يطالع بادي وبصوت واطي : أنتظرك أنت وحمد برا .. لاتبطون علي عشان ياخذون راحتهم أصحاب الأمر .. بادي وهو يفتح الماي ويبدى يغسل إيديه : يالله..بس شف ( رفع صوته ومشعل طلع يمشي ) قل لحمد ترا ماهوب قايم من على الصحن لو تركناه .. يمشي مشعل بخطواته المتوازنه وطوله فالممر وهو يمسح أيديه بالمناديل .. يلف بجسمه ويوقف قبال باب المقلط يشوف حمد جالس على الصحن وقباله جده .. وعواد وعلى يساره جلوي مشعل بأمر : حمد يلا حمد يبي يبلع اللقمه إلي ياكلها وهو طاوي أكمام ثوبه : وين مشعل : بنمشي للبدايع .. حمد طارت عيونه : طيب ماتشوفني آكل أبو عبدالله وهو متربع وجلوي يقطع له من اللحم اللين ويحطه قباله : خل الولد ياكل مشعل يمسح على ساعته الكبيره بلونها الأسود : ياجدي ماعندي وقت .. إما نمشي من بدري وأخلص أشغالي وأرجع .. ولا قعدنا ! جلوي حرك راسه لورا يطالع أخوه : هماك قايل لي بتروح للرس مشعل يرفع أيديه يسحب أطراف غترته : لا هونت .. يوقف بادي ورا مشعل إلي كان أقصر طول بالنسبه لمشعل .. ينحني براسه يطالع حمد بادي بصوته الهادي : مانيب قايل لك مشعل بملل : ياولد أخلص .. بتأخرنا تسذا حمد ينفض يده بقهر لأنه بيقوم وماخلص : طيب .. طيب أساسا أكبر غلط جاين معك وماجيت بسيارتي وأرتحت ..! رفع مشعل حواجبه من مر عليه حمد حتى يبتسم نص أبتسامه ويلف لبادي .. ألي حرك كتوفه كأنه يقول " شي عادي " .. يتحركون على طول طالعين من البيت .. يفز عواد بسرعه حتى ينطق " الحمدالله .. بيضت الوجه أم نوق والله " أبو عبدالله على طول هز راسه وصدره منشرح : أيه بالله .. كثر الله خيرها بنت الشيخ يطلع عواد من المقلط .. حتى يتوجه للحمام يغسل أيديه على السريع .. ويطلع واقف عند الباب .. يطقه .. ينطق " ياولد " .. يفتح الباب على خفيف وعلى طول شيما سحبت الباب .. عواد يدخل : الله يعافيتس .. طاسة فيها ماي وطاسه فيها صابون لأبوي عشان يغسل أيديه شيما سكرت الباب وأشرت للمطبخ : جاهزه ياعمي .. تتحرك بجسمها وهي جادله شعرها حتى تدخل المطبخ إلي كان حوسه ووعد واقفه عند المجلي تنظف بالأواني والملاعق والكاسات حواليها .. وقف عواد عند باب المطبخ حتى يشوف هيا وعهد ونوير حوالي قدر الرز جالسات ياكلن .. ومن شافته نوير أرتبكت عواد بأبتسامه فيها خبث تحرك متعمد صوبهن حتى يجلس قبال نوير بالضبط : من إلي ساقت السياره ماشاء الله هيا ضربت صدرها : أنا .. عواد بفضول يختلط فيه أهتمام لسالفتها : غريبه من علمتس ..؟ هيا وهي ترفع يدها عن القدر : أبوي أول ماعرف بالمرض .. يمكن تسان حاس إننا بنحتاج شي .. أو خاف من حاجتنا .. مدري جى تسذا فجأه وقال تعالي .. وبدى يعلمني عواد : والله عاد العشا اليوم .. ماشاء الله وعد تلف تطالع عواد بقهر : ترا ماخلا العشا تسذا إلا المزيونه عواد نطق بأندفاع وهو ماأستوعب : وششش ...! عهد بحماس ترفع يدها تأكد عليه : المزيونه .. المزيونه ماتعرفها .. رفعت نوير يدها حتى تنطق " الحمدالله " .. نوت تقوم بس أنتفض ماسك يدها عواد : على وين ..؟ نوير بخرعه ماتوقعت يمسكها : بروح .. خلاص شبعت عواد : ياإن أحتسي هينا قدام خواتتس .. ولا تروحين معي للغرفه أبيتس بحتسي نوير : لا تحتسي عند خواتي .. ولا أروح معتس عواد صغرت عيونه وبحده : ليش ..؟ نوير بعناد : يالعم .. عندك بدالي 5 .. ومكفينك وموفينك بعد .. أنا بالعربي ماأبي أسمع شي نهائي ولا راح تقدر تغصبني عواد : تتجسسين علي وش بتوصلين له نوير صدت بملامحها عنه وهي ترسم على شفاتها ضحكة : أتجسس .. !! رجعت تطالعه وكأنها قدرت تشحن نفسها بالقوة وهي إلي حست فجأه إنها تطيح في قاع الخوف نوير : عندك دليل عواد بعد صمت : تراتس تناطحين واجد .. أمسكي أرضتس يابنت عبدالله بعض الأمور ماناخذها من مفهومنا .. نواجه ونسأل ونستفسر تسان شفنا شي نوير هزت راسها وحركت أصبعها تمررها على عيونها : إن شاااء الله .. من هالعين قبل هالعين .. أقوم ..؟ عواد وهو يطالعها بقهر .. حرك يده حتى يضرب راسها بأصبعه : شيلي من بالتس سوالف قبل .. وصفي عقلتس وقلبتس من ناحيتي .. لأني قمت أشوف إن عواد في بالتس شي تنفرين منه .. تراي بظل عمتس في الرخا والشده وإن تسان حصل مني تقصير المفروض ماتواخذيني .. كشرت فجأه وتغير وجها .. وعلى طول هو لف للبنات الباقيات .. نطق " يالله كل وحده تجهز نفسها وتلبس عبايتها ثم تروح للمجلس .. ونادوا أمكم بعد " وقف حتى يتحرك صوب طاسة الماي والصابون .. يسحبهم بأيديه الثنتين ويطلع من المطبخ .. هيا تطالع نوير : عمي حتسيه صح .. وتراتس قسم بالله زودتيها وبقوة بعد وعد تسكر الحنفيه وتبدى تمسح أيديها بأطراف ثوبها : نوير تكفين خلاص هيا تطالع أختها بأهتمام : تكرهينه ..؟ نوير بأندفاع : إيه أكرهه .. أكره عواد .. وش عندكم !! شيما وهي واقفه وبصوت واطي : والله عاد إنه حبيب نوير فزت واقفه .. حركت يدها بأنفعال : هالعم هذا أمي ربته .. وتسان أقرب لنا من كل أحد .. لدرجة ماتسان ع بالي مره أقول ياعمي .. أقوله عواد .. ووش سوا فينا .. رمانا تسننا ولا شي ... لا طق الباب .. لا سأل .. ولا شي .. تدرون وش كثر صقعت فينا هالدنيا .. ( طالعت عهد وصارت تأشر لبرا ) الساعه إلي جابها .. قبل سنه .. تدرين وش تسان تقدر تعالج أبوي .. وحنا نترجى فلان وعلان .. نتسلف من فلانه وفلانه .. أمي باعت ذهبها عشان تشري لها حلال وتسترزق الله .. يجينا بكل سهوله تسذا ويصير حبيب .. ماشاء الله .. أنتم تتقبلونه بالعربي ماهمني لكن أنا ما أمشي على الجمر وأنطم عشان أحد .. ثم يجي ويقول يالله .. إنسي .. لاتواخذيني ! هيا وهي رافعه عيونها لفوق : وعمي منصور .. وش معنى صار القريب .. ماهم كلهم في الهوا سوا ياحبيبتي ..؟ | ||||||||
|
| |
 |
| أدوات الموضوع | |
| انواع عرض الموضوع | |
|
|
367Likes
.png)
العرض العادي
