05-11-18, 09:35 PM
| #921 | ||||||||
| نجم روايتي 
|  يسعدلي يومك ياغالية بارت روعة الصراحة رغم قصره لكن ابدعتي نبدأ بسم الله شوفي سعود رغم شهامته والرجولة الطاغين الي عنده لكن عنده لمحة غرور مو عيب ع الرجال اذا حي بالألم أو توجع بالعكس وخصوصاً اذا أنصاب لأجل يحمي عرضه ودينه وبلده عجبني بكل خطوة إبتداءً من إنقاذ وعد لحد رجوعك للبيت لكن غروره وتكبره على نفسه أولاً قبل تركي ومصغر من شأن الاصابه لأجل عيون وعد أشوفها صعبه بالعكس هي ادا درت ان سعود تصوب وشافته نزف دم كثير ومراح ع المستشفى بتزعل كثير لانها تعتبره حالياً صمام الأمان بالنسبة لوعد الله يكون في عونها الي مرت في صعب كثير وخصوصاً مواجهة الذيب وسعود صعبة وكان لا سمح الله تخسر سعود لولا لطف رب العباد بالنسبة ل رعد وجوري أكيد بيستاهل احلى فرصه حبهم نقي مبني ع الثقة وليس المصالح جوري أهدت رعد قلبها على طبق من ذهب وان شاء الله يكون قد الأمانة ويعوضها عن أيامها السوده راكان عندي احساس الأيام القادمة حتكون صعبة كثير وخصوصاً دخول هادي باللعبة لان الواضح ان يعرفه حق المعرفة ويعرف كافة التفاصيل مااعتقد هذه صدفة أكيد في لغز وأتمنى يتضح في الأيام القادمة بالنسبة لخطوبته من ديما ربي يوفقهم لكن فرحته ناقصه وأتمنى ماظهر مفاجأت عكس التيار تغير مجرى السفينة لانه حالياً حيكون شايل روحه على كف يده هو وسعود خصوصاً بعد مواجهة الذيب وهادي محمد ياترى هادي فاقد الوعي عن جد وإلا انكشف لميس اعتقد حان الوقت حتى تنسى الماضي وتعطي فرصة لنفسها قبل نواف وتعيش بسعادة بعد هذا الحزن الذيب وما ادراك بالذيب جالطني الصراحة رغم هزيمته مع سعود لكن تعتبر هذه الجولة الأولى وخصوصاً شخص مثله مستحيل يتقبل الهزيمة من اول مره ياترى شنو الفكرة الي لمعت في باله حتى يأذي سعود وينتقم فيها معقوله يكون اخوه مثلاً أو والده لان عند سعود العائلة ككل تعتبر خط احمر الله يستر من القادم عزيزتي ابدعتي رغم قصر البارت لكن مليء بالأحداث الصراحة ننتظر البارت القادم يكون مثير ويحمل مفاجأت حلوه وأنتي طيبة احنه نستاهل 😉😉😉😉😉😉 تقبلي مروي المتواضع ورود المحبة 🌹🌹🌹🌹❤❤❤❤❤ | ||||||||
|  |
|
07-11-18, 03:33 PM
| #922 | |||||||||||||
| نجم روايتي وكاتبة في قصص من وحي الاعضاء وبطلة اتقابلنا فين ؟ وراوي القلوب وكنز سراديب الحكايات ونجم أسماء أعضاء روايتي وأميرةخباياجنون المطر 
|  اقتباس:
ويسعد مسائك يالغلا يالبى هالتعليق إلي يرد الروح 🤩🤩 انتي الاروع ورود وتواجدك معي يسعدني والله فوق ماتتصورين تحليلاتك للشخصيات جميله وحيل تعجبني فعلا انا محظوظه بمتابعه مثلك ☺☺ صحيح الفصل قصير لك يتعوض بفصل بكرا بإذن لله نجي ل سعود انسان فعلا رجولي وشخصيته جميله لكن هذا هو يقدم حياته على الغير صحيح كلامك ممكن فيه لمحة غرور وتكبر لكن قلبه فيه جرح عميق ووجع محد يعرفه يمكن عشان كذا تصرف هالتصرف هو مايبي أحد يتألم ولا احد يحاتيه مازال منطوي على نفسه والسبب مجهول لوقت لاحق ^_* وعد هل بتعرف بإصابة سعود ووشلون بتكون ردت فعلها يا ترى والي عايشته ابد ماهو قليل فكرة فقدان سعود تأرقها كثير لكن دامه جنبها بتحس ان كل هالدنيا بخير رعد وجوري بداء طريقهم يزهر بالورود أعطته قلبها على طبق من ذهب واكيد انه بالمقابل بيصونه ويحطه بين عيونه علاقتهم فعلا بعيده عن النفاق والاقنعه المزيفه راح نشوف مع بعض كيف بتكون حياتهم ... راكان ممكن احساسك يصيب وممكن يخيب حياته الجديده ترسم له منحنى جديد الله العالم وش يحتويه ومثل ماقلتي هادي ماتكلم معه كذا الي فيه لغز ولازم ينفك مع الايام راكان وحياته مع ديما خليه سر لحتى وقته اوكيه ^_^ اما سفينة راكان وديما ياترى راح ترسى على بحر الأمان من البداية والا الأمواج راح تلعب فيها وتأخذها للبعيد .... محمد هل بينكشف من هادي والا لا بنشوف بالقادم ... لميس نواف لا تعليق بنشوف تغيرات بحياتهم بالجاي لكن هل هو للأحسن او للاسوء راح نشوف مع بعض الذيب هالانسان منفيه الانسانيه منه توقعي منه الادهى خسارته اكيد ماراح يتقبلها ووش الفكره إلي لمعة بباله خليها سر لوقتها يمكن لو حكيت ماراح اسكت ^_^ الله يستر منه ويكفي سعود شره تسلمين ورود المحبه على تعليقك فعلا أدخل السرور لقلبي كوني بالقرب غدا باذن الله مع الفصل الجديد وإن شاء الله يكون عند حسن ظنك ويعجبك وتستاهلون فصل مثير^_^ وترا لعيونك وعيون قرائي بيكون طويل ويحمل بطياته الكثير .. تسلم لي طلتك يالغلا 😘😘🌹🌹🌹❤❤❤ | |||||||||||||
|
| |
|
08-11-18, 04:53 PM
| #924 | |||||||||||||
| نجم روايتي وكاتبة في قصص من وحي الاعضاء وبطلة اتقابلنا فين ؟ وراوي القلوب وكنز سراديب الحكايات ونجم أسماء أعضاء روايتي وأميرةخباياجنون المطر
| اقتباس:
اسعد الله كل اوقاتك عزيزتي تسلمين لي وهذا من ذوقك 🌹🌹🌹 | |||||||||||||
|
| |
|
08-11-18, 04:54 PM
| #925 | ||||||||||||
| نجم روايتي وكاتبة في قصص من وحي الاعضاء وبطلة اتقابلنا فين ؟ وراوي القلوب وكنز سراديب الحكايات ونجم أسماء أعضاء روايتي وأميرةخباياجنون المطر
| الفصل على وصول عزيزاتي قراءه ممتعه للجميع | ||||||||||||
|
| |
|
08-11-18, 04:56 PM
| #926 | ||||||||||||
| نجم روايتي وكاتبة في قصص من وحي الاعضاء وبطلة اتقابلنا فين ؟ وراوي القلوب وكنز سراديب الحكايات ونجم أسماء أعضاء روايتي وأميرةخباياجنون المطر
| ياليت قلبي يستطيع الزياره اقلع برحله من جميع المطارات اهجم بشوقي والمحبه بغاره وارفض محاكم في جميع القرارات واعمل بجلدي لك مضله ستاره واصنع لقلبك من عيوني اطارات واسمر معك في كل ليله ب أثاره نفطر بلندن والعشاء بالامارات واجعل عيوني لك تولع اناره واقسم ضلوعي لك شوارع وحارات؟ {{الفصل السادس عشر }} رفع يده يناظر ساعته الوقت تأخر وهو للحين ينتظر ماهر على ما يخلص محاظرته الملل واصل حده وضغطه واصل اتش من هالجامعه إلي بالنسبه له هم بهم سحب جواله وصار يطقطق فيه عساه يزيل الملل ضحك وعيونه تتفحص مشعل من بعيد :ههههه شف وشلون شكله اول مره اشوفه طفشان اشر بيده وهو يناظره بنظرات غريبه:مين قصدك هذا :ايه مشعل ماتعرفه هذا ولد العز يا ولد وشلون ماتعرفه رفع حاجبه ونظراته مازالت على مشعل تكلم بإستنكار : قلت لي اسمه مشعل واذا ولد عز وش يعني هز رأسه :ايه مشعل سلطان ال.. يااخي ابوه راعي شركات واخوه بعد ضابط كبير وله مكانته مسح على ذقنه وهذا هو وصل لفريسته بسهوله ماتوقع يلاقي بهالسرعه طلب معزبه بيجره معه للظلام مهما كان حرك رأسه للي جالس جنبه ببتسامه خبيثه :واذا جبته وش لي ضحك بخفه :هههههه مين قصدك مشعل لا لا ماهو يم مصايبك ابد دور لواحد غيره رفع حاجبه وميل فمه وابتسامته مرسومه على وجهه : قلت لك وش لي رد له الابتسامه :لك إلي تبي لو جبته تكلم ببرود :دخل مزاجي وبجيبه وقف من شاف مشعل واقف وواضح انه بيطلع اخذ كتبه ومشى بهدوء شد مشعل على جواله وهو يمشي وعيونه على شاشة الجوال يقرأ رسالة ماهر زاد بخطواته يبي يطلع بسرعه ويسحب ماهر مع اذانه طالع برا وهو هنا ينتظره وطقت كبده ضرب صدره بشخص تراجع لورى وطاح جواله وكتب الشخص إلي قباله رفع نظره وانحنى بسرعه اخذ جواله نزله بجيبه وصار يجمع الكتب رفع رأسه وابتسم :اسف يااخوي ما شفتك حرك رأسه بالنفي :لا تتاسف حتى انا ماانتبهت لك اعتذر وقف مشعل وهو يمد له الكتب : هاذي كتبك واكرر اسفي كنت مستعجل يا .. ابتسم بهدوء وهو يأخذ كتبه :معك عزام ابتسم مشعل بحرج :والنعم فيك ياعزام وانا مشعل عزام بنبره غريبه:تشرفت فيك يامشعل مشعل ببتسامه هاديه :تسلم ابتعد عنه بسرعه وهو يوزع ابتسامات على إلي يعرفه والي مايعرفه كالعاده همس عزام وعيونه تتبع مشعل :وهذا بداية تعارفنا يامشعل والجاي أعظم ضحك وهو ياشر لخويه ب اوكيه وهذا هو تعرف على مشعل ومع الايام بيجره معه بطريقه وما يكون عزام لو ماجابه واثبت وجوده لمعزبه .... ، ، ، طلع من الجامعه وهو مايدري عن العيون الي ترميه بسهام بظهره ونوايته الشر حرك عيونه حوله يدور ماهر شافه متسند على سيارته زاد بخطواته لجهته قرب منه وهو حده معصب :الحين انا ملطوع بالجامعه انتظرك وانت هنا بهالاجواء لا حشى مالك صاحب يامويهر ضحك ماهر على ملامح مشعل:ههههه تعرف انه مايصير تعصب ولاهي لايقه عليك العصبيه لانت ملامح مشعل ورفع حاجبه :وش يليق علي ماهر يجاريه :الهبال وانا اخوك اما الغضب دربه معك ماش قرب مشعل منه زود وسحب اذنه :حلفت اني اشدها وهاذي شدت اذن ياماهر وان عاد سحبت علي ورحت يكون لي معك كلام ثاني ضحك ماهر وهو يتألم :اي اي فك خلاص ههههه والله وصرت زوجتك تسحبني معك وين مارحت حرك مشعل حواجبه بخفه وهو يترك اذن ماهر : مشكلتي احبك يااخي ابتسم ماهر وهو يفرك اذنه إلي صارت حمرا :طيب دامك تحبني عازمك اليوم على الغداء توهم الأهل داقين علي تراه جاهز حط مشعل يده على بطنه :اي والله تسوي فيني خير الجوع عامل عمايله بس اصبر خلنا نسوي لسيارتي اشتراك لانها هاليومين صارت تبرد مسكينه وتنام لي بكل مكان ضحك ماهر بخفه :ههههه من عرفتك وسيارتك بكل مكان نايمه حرك حواجبه بطريقه تضحك :ومع البرد يزيد نومها فديتها اشر له ماهر يركب :اقول اركب معي وبعد الغدا نرجع نشوف لها صرفه ميل مشعل فمه بفهاوه :هقوتك تقوم ركب ماهر سيارته وفتح الشباك تكلم بضحكه على شكل مشعل :تقوم بعد الانعاش الله يخلف على عقلك بس اقول اركب بسرعه ركب مشعل وحركوا متوجهين لبيت ابو ماهر .... """"""" يشتاق قلبها لفرحه مشرقه تتسرب له لذة غامره حتى يرجع مثل العصافير يشدو بأعذب الالحان ويطربها ويطرب كل إلي حولها مثل ماكان... عيونها تتأمل كل شي قبالها قطرات المطر تلامس زجاج شبابيك السياره وتطيح كأنها تدق بابها وتقول لها الحياة مازالت بخير والعمر قدامك انرسمت ابتسامه هاديه على شفاتها وهي تشوف بيت اختها يوضح لهم من بعيد لفت جهة نواف وتكلمت بفرح :نواف وصلنا حس بنبرة السعاده من صوتها ابتسم :ايه وصلنا اشوفك متلهفه حيل على ريوف شدت وريف على مقبض الباب تبيه بس يوقف وتنزل وشلون ماتتلهف عليها وهي اختها وامها وكل شي بالنسبه لها :وانت لهفتك اكثر مني صح ضحك وهو يوقف قبال فلة ابو رعد :هههههه في هاذي معك حق مشتاق لها فوق ماتتصورين فتحت وريف الباب بعجله : اجل يلا خلنا ننزل ونفاجئها نزل بهدوء تقدم من أخته مسك يدها وتنفس براحه هذا هو رجع رغم أن بداخله أوجاع لو طلعت بتحرك سكون الأرض وتشتت الغيوم وتشطر الصخور انصاف مشى معها متوجه لباب الفله المفتوح دخل بهدوء ووريف معه مرر عيونه محد حوله وهذا إلي يبيه دخل مع السيب إلي يفتح عليه باب المطبخ همس بهدوء :اششش لاتطلعين صوت ابد شد على يدها وصاروا يمشون بهدوء وعيونه تبرق بسعاده :تتوقعين نلاقيها بالمطبخ ابتسمت وريف:اكيد الساعه اثنين واكيد تسوي الغدا بهالوقت بادلها الابتسامه فيه من الشوق لأخته مالا نهايه فتح باب المطبخ وطل بهدوء توسعت ابتسامته وهو يشوفها تحرك بالقدر إلي على الغاز تقدم بهدوء ووريف معه وقف وراها وتكلم بصوت هادي :ريوف نزلت الملعقه الخشبيه بالقدر وعقدت حواجبها:بسم الله الرحمن الرحيم كأني سمعت صوت نواف حركت رأسها بالنفي ولفت لكن تجمدت حركتها وهي تمرر عيونها على نواف ووريف الي واقفين قبالها نزلت دموعها بإنسياب دموع الفرح رجعوا اغلى ناسها رجعوا اخوانها يا سعادة قلبها فتحت يدينها لهم : تعالوا يادنيتي أنتم تعالوا لصدري يا نور عيوني وضيها ياريحة الغوالي ارتموا اثنينهم بحظنها هي الروح بالنسبه لهم يحيون بيدها الي تحتوتهم بهالحياه هي اروع انسانه على الوجود و منبع وطنهم ياما ضحت عشانهم ياما قدمتهم على نفسها كانت لهم مثل السيف تحمي ظهورهم و تمسح همومهم تكلم نواف بنبره كلها شوق :رجعنا رجعنا ياريوف ومايفرقنا بعد اليوم الا الموت ابعدتهم عنها وعيونها تناظرهم بشوق :ياهلا بكم يااغلى ما في الكون نورتوا دنيتي ياكل ناسي وريف وهي تمسح دموعها :اشتقت لك ريوف كنت بموت من الغربه بس الحمد لله لحق علي نوافوه ورجعني لديرتي ضحكت بخفه وهي تمسح دموعها :الحمد لله إلي رد عقله لرأسه نواف ببتسامه حزينه : وبعد من زود العقل بعرس رمشت بعيونها وهي تتفحص ملامح وجهه إلي مازال الحزن طاغي عليه :اخيرا قررت تنهي معاناتك وتقشع قناع الحزن الي لابسه يانواف حرك رأسه بالإيجاب وهو يجلس على احد الكراسي بالمطبخ :ربك كريم بس ماظنتي قناع الحزن ينجلي بسرعه حتى يصفى القلب من إلي فيه وانا اخوك ابتسمت وهي تشتت نظرها على وريف ونواف :بيصفى بس انت شوف الحياة بإيجابيه غمضت وريف عيونها وهي تحاول تغير مجرى حديثهم :يا زين ريحة طباخك ياريوف حدي جوعانه ابتسمت ام رعد بسعاده :ثواني ويكون جاهز لو ادري بجيتكم كان سويت كل إلي يحبه قلبكم نواف بحب :اي شي من يدينك حلو ياوخيتي ... التزم الصمت وعيونه تراقب خواته يتبادلون الاحاديث مع بعض بسعاده لكن ليش هو فرحته ناقصه ليش دنياه سودا مظلمه ماظنته ينقشع قناعه مثل ماقالت ريوف دام لميس محملته ذنب فوق ماهو محمل نفسه ذنوب صعبه بالحيل المشاعر المخبيه جواته والاصعب انه مايقدر يتخلص منها لابالحكي ولا بالكتابه ولا بالفهم وياليت لويقدر يمحيها كان محاها من زمن.... | ||||||||||||
|
| |
|
08-11-18, 04:59 PM
| #927 | ||||||||||||
| نجم روايتي وكاتبة في قصص من وحي الاعضاء وبطلة اتقابلنا فين ؟ وراوي القلوب وكنز سراديب الحكايات ونجم أسماء أعضاء روايتي وأميرةخباياجنون المطر
| نزل الملعقه على سفرة الطعام وعيونه على ماهر رفع يده ببتسامه : والله ياطبخ خدامتكم شي ماذقت مثله ضحك ماهر وهو يمسح فمه والله لو تسمعه ريما انها تفجر فيه الدنيا :ههههه بالعافيه على قلبك مشعل وهو يوقف :الله يعافيك ..الا وين الطريق بيتكم متاهه يا اخي واول مره ادخله قوم دلني على المجلس ماهر بهدوء :روح مع السيب الباب الي على يدك اليمين يطلع على القسم الثاني تلاقي المجلس قبالك الحين اخلص اكل والحقك هز رأسه ببلاهه والله يحس نفسه مضيع طلع مع السيب إلي اشر له عليه ماهر صحيح دخلوا مع بعض بس ماحفظ بيتهم إلي اول مره يدخله... الحديقه وش كبرها والبيت بعد يضيع من الداخل .. انتبه لبابين على اليسار وباب على اليمين كتف يدينه وهو يتذكر وش قال له ماهر و اي باب سمى بلله وفتح الباب الثاني على اليسار دخل بهدوء وهو يمرر عيونه حوله غرفه مجهزه من الى وكأنها روضة اطفال استقرت عيونه على البنت الي جالسه بالوسط بلبس بناتي وردي طفولي وبيدها ببغاء وحولها قطه بيضاء توسعت عيونه وصار يرمش بفهاوه حركت يدها على راس يعقوب وهي تحاكيه بصوت انوثي: يعقوبي يعقوب يالبى هالوجه تدري يعقوب اني احبك حرك يعقوب رأسه وكأنه حس على الباب الي انفتح ودخل شخص غريب :ريماااا ...ررروووويوم..أحببك تتا ..تااا ...باااب ..واااك... ووواك رفعت نظرها وعقدت حواجبها وهي تشوف شخص غريب واقف وعيونه مثبتها عليها صرخت وهي توقف بخوف رمت الببغاء عليه وتراجعت للخلف حس بالطير يلامس وجهه ومنقاره يضرب جبينه وريشه يحركه عليه وقف شعر جسمه تراجع للخلف توه يستوعب هو وين دف الببغاء عن وجهه وطلع وهو يتنفس بسرعه فتح الباب الثاني ما يدري وين يوديه دخل معه وصار يمشي لحتى طلع للحديقه مايدري كيف ووشلون صار هنا رفع يده وهو يدعي على ماهر واخته وهالطير انتبه لباب الفله توجه له وطلع بسرعه وعيونه تدور تاكسي ما فيه يظل دقيقه وحده بهالبيت والله واخت ماهر عرفت وشلون تخلي شعر رأسه يوقف مرر يده على وجهه وتكلم بضحكه :حسبي الله عليك من بنت حشى مسويه حديقة حيوان بالبيت ياالله مو انا قلت من قبل ان هالعايله مسويه تعاقد مع الحيوانات اقشعر جسمه من طاري الحيوانات :الله لا يعوده من يوم دخلت على البنت مع حيواناتها ضحك بخفه وهو يتذكر شكلها وشلون خافت ورمت عليه الطير واضح انها طفله بريئه اول مره يدرى ان اخت ماهر صغيره بالحيل وشكلها اذا ماخاب ظنه تدرس بالمتوسط .... """"""""""" غاب الشفق الاحمر و بدا الليل يسدل ستاره ونسمات الهواء البارده تهب وريحة المطر تنتشر بالمكان النار مشتعله ورعد يزيدها حطب والدخان ينتشر من حوله عيونه تتبع جوري الي جالسه بين امه وديما ووريف و كأنها بدت تندمج معهم بحايتهم مرر نظره على اسامه يلعب بالحديقه ياهالطفل الي رسم له القدر مجرى ثاني لحياته لا ام ولا اب لكن هو قدها بيكون له الاب والام والاخ ابتسم بهدوء وهو يناظر أخته :ديما اذا ماعليك امرx هاتي ابريق الشاي بضبطه لكم على الحطب وقفت ديما وقربت منه وهي تمد له الابريق إلي مجهزته :والله اني نفسي فيه يا اخوي مع هالجو يطلع كلام ضحك بخفه وهو يأخذه :ابشري كم ديمو عندي الحين اضبط لك شاي ماعمرك ذقتيه ضحكت ديما: لا عاد دوم اذوقه بس في ايام البرد ابتسم وهو يناظر وريف :وانتي مثل بنت اختك ماتذوقينه الا بالبرد ابتسمت وريف بهدوء :اي والله مانذوقه هنا الا بالبرد بس في مصر منتشر بكل مكان هز راسه وهو ينزل الابريق على الحطب معهم حق من راح الغالي محد تجرئ وشب النار ولا حتى اجتمعوا مثل اول يحس انه مقصر معهم كثير رفع نظره لجوري إلي ملتزمه الصمتx : وانتي جوري تحبين الشاي همست ببتسامه هاديه:احبه وصل له صوت همسها توسعت ابتسامته :اجل بتذوقينه من يديني نزلت رأسها متجاهله نظرته الحنونه إلي تحسسها بشعور غريب حياتها بدت تصفى حتى اللون الاسود بدا يتلاشى تدريجيا .. ، ، عيونها تناظرهم بصمت نزلت دمعه على خدها وهي تتأمل جمعتهم اخوانها رجعوا وردوا لها روحها صحيح نواف رفض يظل عندها وترك وريف ورجع لشقته مع هذا تطمن قلبها عليهم وهدى بالها ... وجوري بعد بدت تملى الفراغ إلي تركته وعد لكن هاذي هي ديما اكيد انها بتروح مسحت دمعتها بسرعه قبل لأحد يلحظها ووجهت نظرها لديما همست بهدوء :ديما حبيبتي تعالي هنا عندي عقدت حواجبها ديما بإستغراب اول مره تسمع نبرة امها هاذي :سمي يمه ام رعد ببتسامه هاديه :سم الله عدوك يا يمه بس بغيت اقولك شي جلست ديما جنبها بقلق:وشو يمه طيحتي قلبي حركت رأسها بالنفي:هو شي زين يا بنتي بقولك بإختصار ام راكان كلمتني اليوم قاطعتها ديما ببتسامه حلوه :اها اكيد بدر يبيني ابتسمت بحب:لا مو بدر إلي يبيك هالمره راكان إلي يبيك رمشت بعيونها كم مره وهي تبي تستوعب كلمة امها بدت تربط الكلام مع بعض ونبرة امها الغريبه اكتسى وجهها الخجل وبدت تفهم وش تبي تقول نزلت رأسها وتكلمت بهمس :يمه وشلون يعني ضحك رعد بخفه وهو يراقب أخته إلي وضح عليها الخجل :يعني راكان خطبك يا بنت ام رعد ببتسامه حنونه :ايه يمه راكان خطبك وامه تنتظر الرد لأنهم مستعجلين وش قلتي يا بنتي الولد الكل يشهد له وانتي عارفه انه صديق سعود من زمن وماشفنا منه الا كل خير هو وامه رفعت نظرها لامها و رعد ووريف حست بحراره ماهي طبيعيه بجسمها رغم برودة الجو وقفت وتكلمت بحياء قبل تروح :الي تشوفونه وقفت وريف وتكلمت بضحكه :يازينها ديموا وهي مستحيه بروح اشوفها ياريوف توسعت ابتسامتها :شوفيها وانا اختك لفت لرعد وكملت كلامها :ماقلت لي وش رايك يارعد حرك رعد الابريق وصار يعدله على الحطب : راكان رجال والنعم فيه ورأيي من رايك يالغاليه ام رعد :اجل برد للحرمه احسن ماتنتظر... ديما موافقه وهذا واضح من ردها واحنى بعد موافقين ابتسم رعد : وهذا رأيي دقي عليها واعطيها خبر الموافقه ابتسمت بهدوء وهي توقف انسحبت من بينهم ودخلت للفله تبي تخبر ام راكان بالموافقة ويحددون موعد مناسب وكلها امل ان الله يوفق بنتها ويسعدها وبكذا تكون نفذت الوصيه وكل وحده من بناتها بتصير ببيت زوجها بالحفظ والصون مثل ماتمنى المرحوم... """""""""""" وجع..خيبه ..جمود الموج يرتفع ويضرب برجله وصوت البحر يزيد التسأولات بعقله كتف يدينه وغمض عيونه يحاول يترجم الأحاسيس المبعثره جواته يجاذب نفسه بين الماضي والحاضر بين الرفض والقبول بين الألم والاه بين النعم وال.. لا بين القرار والاختيار حياته مجرد لغز محد يعرف جوابه الا امه او ابوه الغايب قربت منه وهي تشوفه بعيونها وشلون الآهات تسخى وتجود على ولدها تعرف ملامحه الاكيد اليوم صاير له شي مبعثر كيانه ما يقدر يخفي عنها ابد تعرفه بكل حالاته همست وهي توقف جنبه :راكان رد ببهوت من وصل له نبرة صوتها الحانيه :همم نزلت كفها على كتفه :ما تقدر تخفي عني إلي جواتك يا يمه تكلم قول وش إلي مكدر خاطرك ومتعبك حرك رأسه لجهتها : بدر نام ام راكان بهدوء :ايه نام فديته بعد مالعب حتى تعب.. ماتبينا نرجع البيت حالك ماهو عاجبني ولازم ترتاح ياولدي حرك رأسه بالنفي ووجه نظره للبحر :لا يمه بننام اليوم هنا بالشاليه وعدت بدر بكرا بعد بلعبه بالدبابات ماابيه يزعل و يتكدر خاطره ..هاليومين مقصر معه بالحيل ابتسمت بحب :مامنك قصور يا ولدي ودامك تبينا نظل نظل والحين لاتصرف و قولي وش إلي مغير حالك تنهد ورسم ابتسامه باهته على شفاته ما يقدر ابد يكذب عليها بتكشفه وتكشف إلي بقلبه :يمه بسألك سؤال وجاوبيني على قده عقدت حواجبها ونبضات قلبها زادت وش إلي يبيه تكفى يايمه لا تفتح جروح الزمن لاتوجع قلب امك بأسئلتك همست بنبره غريبه:أسأل همس بصوت خالي من الحياه :وش كان شغل ابوي وليش راح وتركنا انا عارف انك تعرفين كل شي ومخبيه عارف انك ماتبين توجعيني عارف ان قلبك مجروح وجرحه غائر بس تكفين ريحيني من هالاسئله إلي تتضارب جواتي بلعت ريقها وهي تشتت نظرها عنه تكلمت بإرتباك :راكان ماهي بعوايدك تسأل عن ابوك غمض عيونه وتنهد بهم :مجرد فضول لا أكثر ولا أقل شدت على يدها تخفي توترها :دامه مجرد فضول فسكر على الموضوع ابوك شغله كان عادي ب أحد الشركات واختفى بإرادته تركني وترككم مارف جفنه ولا شفته او سمعت عنه خبر من هذاك اليوم لف لجهتها وابتسم : دامه كلامك هذا ف انا مصدقك بس تعرفين قلبي يقول غير الكلام إلي قلتيه وابوي ورى إختفائه سر وبكشفه مو حب فيه لا حتى اعرف وش اللغز إلي محيرني اما هو بالنسبه لي مات من زمن همست بإرتباك :مات بالنسبه لي ولك وانت طلبت مني ما اجيب طاريه وهذا انت جبته خلنا نقفل على هالموضوع وعندي لك خبر يسرك بلل شفاته الجافه وتوسعت ابتسامته عرف وش تبي تحاكيه فيه :بشري ابتسمت بحنان :ابشرك ديما وافقت وينتظرونا باي وقت ضحك بفرح والسعاده غزت مشاعره المتارجحه نسى همه ونسى ابوه وطاريه :من جدك يمه تحكين الصدق ضحكت من شافت ملامحه تبدلت :هذا الصدق وانا امك قبل شوي كلمتني ام رعد وخبرتني بالموافقه قرب من امه وضمها بحب وهو ينزل ذقنه على كتفها : ياجعل عيوني ماتبكيك يادنيتي... يمه ماتعرفين وشلون انتشلتي الحزن والهم من قلبي بهالخبر ضمته لصدرها ودمعاتها تنرسم على خدها هذا هو ولدها بيتزوج ويستقر بحياته :ياعسى هالحزن ما يعرف طريقك وعسى السعاده دوم دربك | ||||||||||||
|
| |
|
08-11-18, 04:59 PM
| #928 | ||||||||||||
| نجم روايتي وكاتبة في قصص من وحي الاعضاء وبطلة اتقابلنا فين ؟ وراوي القلوب وكنز سراديب الحكايات ونجم أسماء أعضاء روايتي وأميرةخباياجنون المطر
| يتبع النت بطيئ احاول اضيفه بعد دقائق | ||||||||||||
|
| |
|
08-11-18, 06:12 PM
| #929 | ||||||||||||
| نجم روايتي وكاتبة في قصص من وحي الاعضاء وبطلة اتقابلنا فين ؟ وراوي القلوب وكنز سراديب الحكايات ونجم أسماء أعضاء روايتي وأميرةخباياجنون المطر
| تمشي بدرب عكس دربها بأيام الشباب تتسائل كثير عن الافراح والأحلام وصدى الضحكات إلي تمسح دموع الاحزان من طريقها بعض الذكريات تراودها منها الحلو ومنها المر تسندت على عصاتها وهي تمشي وعيونها تدور اي احد يونس وحدتها تكلمت بتعب :هييييه يا ابو سلطان رحت وتركتني لحالي وينك يا عين ابوي :هنا يمه ابوي بقلوبنا يارب يرزقه الجنه ودار احسن من دارنا لفت لجهته وابتسمت وعيونها الباهته تناظره بحب :انت هنا كنت اظنك فوق يا ولدي قرب منها تركي باس رأسها بحب ومسك يدها وهو يمشيها معه :توني راجع من المسجد يمه وتاخرت كنت اسمع محاظره الا ما فيه احد معك هزت رأسها :لا يمه محد يمي كلن لاهي بحياته ابتسم تركي : وين رحت انا.. حياتي ما فيها الا انتي وجنى انتم رأس مالي ياجنتي ابتسمت بحزن على حاله صحيح حياته خاليه ولازم يملأها بس مو الحين بعد ماتطمن بالها على لميس بتلتفت له:تسلم يا يمه.. الا ماقلت لي سيارة سعود برا بلع ريقه وحاول مايبين ارتباكه :ايه سيارته برا وطمني قلبك رجع ولقاك نايمه مر علي وخبرني انه جاك وماحب يزعجك ووعد بعد كانت معه والاكيد انهم نايمين بالعسل يمه ضحكت بفرحه :الحمد لله طمنت قلبي الله يطمن بالك يا يمه :امين ويطمن بالنا جميع لفوا لمصدر الصوت تكلم تركي بضحكه :هلا والله بوجه باتمان وينك فيه ضحك مشعل بخفه وهو يبوس رأس جدته ويجلس جنب تركي :ياهلا بك زود والله ان باتمان جاب العيد اليوم شكل الوالد داعي علي تركي ببتسامه:وليش جبت العيد قل وش مسوي ارتسمت ابتسامه غبيه على شفاته :لا ابد بس دخلت على اخت خوي بالغلط وجبت العيد وانا ولد اخوك ضحك تركي من قلب :هههههه من جدك انت صاحي وشلون دخلت على البنت ووش هالخرايط إلي بوجهك حرك يده على وجهه الي يحرقه هز كتوفه وهو يناظر جدته الهاديه غير عن العاده : دخلت وانتهى الأمر وطيرها ماقصر فيني لعب بحسبة وجهي وقف وتقدم لجهة جدته جلس على ركبه قبالها :غزوله غريبه ماجتني العصا طايره ميه وثمانين ابتسمت ام سلطان بهدوء :وكيف شفت البنت أعجبتك تبينا نزوجك ايها دامك دخلت عليها.. حرك رأسه بالنفي وهو يتخيلها مع حيواناتها جالسين معه عجن ملامحه بشكل يضحك :لا لا تكفين ماابيهاxوبعدين شكلها صغيره حرك يده وهو يبتسم ورجع تكلم :بس اذا بتزوجيني على يدينك غزوله اثق بذوقك اما اخت ماهر لا والف لا ضحكت على ملامحه :هههههه ابشر بس دخلت هالبنت برأسي وبشوفها واحكم عليها قبل اذا صغيره والا لا عقد حواجبه ببلاهه:وشلون يعني حركت حواجبها بخفه :يعني بعزمها لزواج لميس وهذاك الوقت أحكم عليها رمش بعيونه ونسي أمر اخت ماهر همس بنبره مستنكره:زواج لميس متى وين وكيف وانا آخر واحد يعلم سندت ذقنها على عصاتها وببتسامه تزين وجهها المجعد :يوم الخميس اذا الله كتب """""""""" تحاول تهرب من احزانها تقنع نفسها ان الخوف و الرعب صار بقاع النسيان مع هذا تلمع بداخل عيونها حكايه يمكن تفتك فيها اذا ماحطت لها حد وسدت منافذها ويمكن بعد تقودها لطريق الظلام رغم النور إلي بدأ يتخلل حياتها خوفها من فقده يخلي جسمها يقشعر لازم تمنع الخوف لازم تقنع نفسها ان كل شي تمام وما راح يصيبه شي بتقتلع هالجرثومه قبل ماتتشعب داخلها وتمرضها النوم جافاها والخوف مازال مستوطن قلبها بس دامه جنبها وتحس بأنفاسه هي بأمان من كل شي مرت ساعات وهي على هالوضع تحاول تنام لكن وين هي ووين النوم قررت تقوم تأخذ لها شور وتبدل قبل يصحى توجهت للحمام اخذت لها شور سريع وطلعت لبست بنطلون اسود وبلوفر ابيض لمت شعرها بشكل عشوائي رشت من عطرها وتنفست براحه يخالطها بعض من القلق توجهت ل السرير وعيونها تتأمل سعود إلي نايم بتعب ولاحس عليها انحنت وباست جبينه انرسمت ابتسامه على شفاتها تحمد الله انه بخير ولاصابه شي همست ببحه :يابعد كل العرب والطوايف انت يا سعود بتشافيني وتخليني اتنفس الهواء وعبيره تلاشت ابتسامتها وهي تسمع صوت انين يصدر منه عقدت حواجبها ونبضات قلبها زادت الخوف اجتاح خلايا جسمها توسعت عيونها من ملامح وجهه الي باين عليه الألم جلست بسرعه جنبه وهي تمسح وجهها تبي تستوعب انه يتالم و الاكيد فيه شي حركت يدها بإرتباك ونزلتها على جبينه همست بخوف :سعود..سعود حس ب لمست يدينها على جبينه وهمس صوتها الخايف يتردد على مسامعه رأسه حيل ثقيل ولا هو قادر حتى يفتح عيونه رد بألم:همم ارتجف صوتها :سعود تسمعني تكلم فيك شي يألمك شي حاول يفتح عيونه ماقدر تكلم بدون وعي : رجلي..رجلي نزلت يد على صدره ويد سحبت فيها الدفى وعيونها تتفحص رجله :وش فيها رجلك ... أنلجم لسانها من شافت بقعة دم كبيره مبلله رجله وبالتحديد بفخذه ارتجفت شفاتها وتكلمت بجنون : سعود افتح عيونك وش هالدم لا يكون لا يكون ... ارتفعت صوت شهقاتها عرفت وايقنت انه انصاب وهو ينقذها الا من وين له هالجرح ...هي الغبيه إلي مالاحظت تعبه وجهه كان شاحب حيل وباين انه يتألم ويكابر ليش ..ليش يتعب نفسه ليش يتألم لحاله وقفت وتراجعت للخلف وهي تحرك رأسها بالنفي : لمتى بتظل كذا لمتى بتعاني لوحدك ...وتتألم لوحدك ليش ماقلت لي انك انصبت لييييش يا سعود استوعب وش قال فتح عيونه بثقل وهو يسمع كلامها همس بتعب وصوت ناعس : ماكنت ابي اوجعك صفقت وعد بيدينها ودموعها تنزل بصمت :هذا انت اوجعتني زود متى بتفهم ان وجعك وجعي تقدمت منه ورجعت جلست جنبه :شلون انصبت طلقة نار والا سكين سحب نفسه وتسند على ظهر السرير هو الغبي إلي ظن انها ماراح تكشفه مادرى ان حبيته ذكيه بالحيل مادري انها تتألم ل ألمه مادرى انه بيوجعها كذا تكلم ببحه :طعنة سكين بس لاتحاتين أمرها بسيط صرخت بجنون :وشلوووون بسيط قلي انينك كان مااالي الغرفه انت تتوجع تفهم وشلون تتوجع لا تخجل اذا تألمت تراك من ضمن البشر تحس مو جماد تفهم ابتسم ابتسامه شاحبه :صحيح من البشر لكن اذا تألمنا او توجعنا وكتمنا هذا شي طيب أحيانا الألم يحسسنا اننا بخير وعايشين لا تحاتين يا قلبي انا بخير حاولت تهدي من انفعالها بلعت ريقها وتكلمت بصوت باكي :طيب رحت المستشفى حرك رأسه بالنفي :لا تعالجت هنا غمضت عيونها وفتحتها بسرعه : ومين عالجك هنا لا يكون صرت دكتور وانا مدري حرك رأسه بالنفي وابتسامته مرسومه على شفاته نسي ألمه ونسي كل شي بهالحظه خوفها عليه رسم له منحنى ثاني لحياته : لا ياطويلة العمر الدكتور تركي تولى الأمر و سوالي اسعافات اوليه وخيط الجرح توسعت عيونها من بروده يبتسم ولاكأنه يتالم مسحت على وجهها تصبر نفسها وقفت توجهت لجلالها رفعته على رأسها ولفت لجهته تكلمت بزعل :من اليوم و رايح لاتحاكيني حتى يرجع عقلك براسك .. همس سعود ببحه وعيونه تتبعها :تعالي وين رايحه فتحت الباب وناظرته بنظرات عتاب:رايحه برا يمكن لو اظل هنا اصير دكتورتك وماتعرف وش بسوي فيك يمكن اقص خيوطك ويمكن اخيطه من جديد مو جرحك مثل القماش عادي ايا كان يصير لك دكتور طلعت وضربت الباب بقوه تدل على غضبها .. رجع رأسه لورى تنهد وبعدها اطلق ضحكه متمرده على تصرفها معها حق ماكان لازم يقلل من أمر إصابته وهاذي حبيته زعلت ولازم يراضيها.. الحين بس حس بحياته فيه من يحبه ويخاف عليه ليت عمره ينعطى لها عطا كان اعطاها عيونه والسنين... | ||||||||||||
|
| |
|
08-11-18, 06:24 PM
| #930 | ||||||||||||
| نجم روايتي وكاتبة في قصص من وحي الاعضاء وبطلة اتقابلنا فين ؟ وراوي القلوب وكنز سراديب الحكايات ونجم أسماء أعضاء روايتي وأميرةخباياجنون المطر
| ضمت دبدوبها لصدرها مشاعر غريبه اختلجت قلبها دقات مضطربه شعور غريب وراحه تسللت ل اعماقها ماتدري وشلون ردت على امها بهالسرعه ووافقت غمضت عيونها وانرسمت ابتسامه حلوه على شفاتها وهي تتذكر وشلون كانت تنطق اسمه مع بدر ماجاء على بالها واحد بالميه انه يفكر فيها أو حتى يبيها :ديما ...هيه ديمو فتحت عيونها ورجعت للواقع على صوت وريف تكلمت ببتسامه :وريف احس بشعور غريب ودي اطير واغني وارقص بعد ضحكت وريف من تعبير ديما :ههههه ديموا هذا وانتي عاقله بتسوين كذا اجل وشلون لو كنتي مهبوله توسعت ابتسامتها وهي تضم دبدوبها زود :ماادري اقولك شعور غريب احس بسعاده وحزن احس بفرح وذهن مشتت ماادري كل البنات لاانخطبوا يحسون كذا والا انا بس الي ضاربه فيوزي ابتسمت وريف وهي تسحب يد ديما وتشد عليها:افرحي ..افرحي يا قلبي مين قدك وبتصيرين عروس قريب يعني يوم رجعت بتعرسين وانا بظل لحالي تكلمت ديما وعيونها على وريف الي واضحه ملامح الحزن على وجهها : عقبالك وريف حركت رأسها بالنفي :جربت حظي مره ومعاد ابي اكرر التجربه مره ثانيه حست انها بتجرحها زود لو استمرت بنفس الموضوع حركت يدها الثانيه وصار تتحسس معصمها :تدرين فرحتي ناقصه وسوارتي ماهي معي وريف بتسأل:وين راحت حركت كتوفها والحزن طغى عليها اختفت سوارتها إلي تحسسها بوجود أبوها معها :ما ادري بس أدعي اني الاقيها قبل تتم خطبتي حتى تكتمل فرحتي بوجودها رفعت يدها تدعي :يارب ياديما تلقينها وتتم فرحتك يا قلبي نزلت وريف يدها وتكلمت بضحكه :بس انتي اركدي ولا تفصلين قدام ولد الناس ويقول هالبنت مشفوحه على الزواج رفعت ديما الدب وهي تضرب فيه وريف وضحكاتهم ماليه الغرفه وكأنها تنسج لوحده عالم جديد وللثانيه مستقبل مجهول ..... """"""""" قفلت الباب بغضب وتنسدت عليه عيونها تحرقها من الدموع يا كثر الخيبات الي توجعها و تعلمها وش كثر كانت غبيه يظن أنه بيخفي عنها وجعه يظن أنه يقدر يتألم لحاله تلوم نفسها حيل كان المفروض تنتبه انه تعبان ويعاني عشانها هذا هو كالعاده مازال ينثر باقي خصاله عليها شوي شوي حتى عرفت اسوء خصله فيه... يكابر على ألمه وياخذه عنها بعيد وماهي بعيده يوم من الايام يقتل نفسه بنفسه... ما يدرى انه عالمها إلي يحتويها وانه قصه بقلبها ما تقدر تعبر عن محتواها.. اخذت نفس تزيل اثار البكاء والتوتر شدت على جلالها وتغطت فيه توجهت للدرج ونزلت بخطوات هاديه تسللت أصوات جدتها ومشعل وتركي لمسامعها رسمت ابتسامه مثل ابتسامته وكأنه اعطاها درس برسم الابتسامات المزيفه تكلمت بهدوء :السلام عليكم ردوا السلام باصوات متفاوته رفعت ام سلطان نظرها وهي تاشر لها : ياهلا ببنيتي تعالي يايمه وش هالغيبه قربت من جدتها سلمت عليها وسلمت على تركي ورجعت جلست جنب جدتها وهي تناظر مشعل همست بهدوء:وشلونك مشعل ابتسم مشعل :ياهلا فيك وعد الحمد لله بخير انتي وش اخبار وأخبار سعود معاد صرنا نشوفه ابد من جاب طاريه ضاق صدرها نزلت عيونها بحظنها تخاف تنزل دموعها تخاف حيل أحد يكشف إلي بقلبها ردت بإختصار :بخير الحمد لله هز رأسه مشعل وطلع متوجه لغرفته عشان تاخذ راحتها مع عمه وجدته .. من راح مشعل نزلت جلالها على كتفها ثبتت عيونها على تركي ووجهت له نظرات عتاب كان المفروض مايطاوع سعود ويسوي إلي يبيه حس بنظراتها له عرف وايقن انها اكتشفت كل شي تكلم بإرتباك : وعد ردت بزعل :سم ابتسم من نبرة صوتها :سم الله عدوك بس ابي اسالك سعود صحى حركت شفاتها تبي تتكلم لكن قاطعها نزول سعود مع الدرج بطلته الحلوه يمشي بثقه وهدوء كعادته عكس إلي داخله هذا هو ما يقدر يغير من نفسه عاش طول عمره يعزز هالثقه وماراح يتألم ولايتنازل ان أحد يتألم بداله تكلم ببتسامه تزين وجهه :ايه توني صحيت رفعت نظرها له واقف كعادته بوجهه الشاحب و يبتسم وكأنه يعاني ... ليش يبتسم معقوله هذا كله غرور .. كبرياء لا الاكيد انه من عناده ومحد بيفك هالعناد غيرها لفت لجدتها وتكلمت بزعل: جده انا داخله على الله ثم عليك خذي حقي منه تراه مزعلني بالحيل عقدت ام سلطان حواجبها ورفعت نظرها لسعود :افا يا سعود ماهقيتك تزعل الكل بالاول قلبي زعلان عليك شوي والحين وعد ابتسم وهو ينحنى ويقبل رأسها بهدوء اعتدل بوقفته وعيونه تتفحصها بحب :ما عاش من يزعل عيوني الثنتين يمه انتي عيني اليمين وهي عيني اليسار بدونكم انا انعمي وتظلم الدنيا فيني انرسمت ابتسامه على وجهها المليان بالتجاعيد ماتقدر تزيد على كلامه كلام ..بنبرته الهاديه تنسى الدنيا وما فيها هذا هو واقف قبالها بشموخ وعزه واقف ووجه منور رغم شحوبه واضح ان زعل وعد عليه زعل محبين يا كثر ما كانت تتمنى هالحظه لفت لوعد وهي تمسك يدها :وش تبيني اسوي فيه وانا حاظره أشرت بيدها عليه :بس كل إلي ابيه انه مايحاكيني ولايحتك فيني ضحك وهو يجلس جنب تركي :ههههه واذا قلت لك مقدر امنع نفسي عنك ناظرته ورجعت ناظرت جدتها وعيونها تعلن عن نزول الدموع ماقدرت تكبتها أكثر من كذا بنفسها ليش يضحك وهو هامل نفسه ليش يبعد نفسه عنها وهي قريبه :مالي كلام معه ياجده.. انتبهت لدموعها حن قلبها حيل رفعت عصاتها وتكلمت بنبرة حانيه :لا الواضح انه زعلك بالحيل تبيني اطقه حبيبتي بطقه عشانك وانا ما عمري سويتها رفعت عصاتها وقربتها من فخذ سعود رفعتها بهدوء فوق ونزلتها بسرعه وهي تعد بنفسها واحد اثنين ثلاث... وقفت بخوف وهي تصرخ قبل تلامس العصا فخذه :لاآآا لاآا ياجده اتركيه نتصافى انا وياه انهت كلمتها وابتعدت ركض عن الكل قبل لاتنفلت منها شهقات تزعزع البيت وتحرك سكونه ... نزلت عصاتها وهي تغمز ل سعود بضحكه : الحق زوجتك وتصافوا عنا بعيد واياني واياك تزعلها يا سعود فهم على جدته وقف اشر لها ب أوكيه: لاتحاتين يمه تتدلع علي فديتها بس تدرين محد بيعرف لها غيري وقف تركي جنبه وهو يهمس له بصوت خافت:تتدلع عليك والا كاشفتك البنت همس ببتسامه :بعدين نحكي تروك ابتعد عنه وزاد بخطواته متوجه للحديقه يتبعها ..نبرتها جرته وضيعت علومه يدري انها زعلانه ومن خوفها عليه تصرفت كذا يتمنى يكون سبب سعادتها مو تعاستها تنهد من شافها واقفه وضامه جلالها عليها كتوفها تهتز بصمت عارف انها تبكي عارف انه نزل دموعها بدون قصد تقدم منها بخطوات سريعه وقف وراها وهمس ببحه :وعد ماردت عليه حاوطها بيدينه مع خصرها ونزل ذقنه على كتفها همس مره ثانيه :حبيبتي الجو بارد بالحيل بعد ماردت شد بيدينه على خصرها وحاوطها زود :حبي انا اتكلم معك غمضت عيونها وانفاسه تداعب رقبتها حضنه هو الشئ الوحيد إلي يلامس روحها ويخليها تترك كل اوجاعها بين احظانه بس كيف لو كان هالوجع منه وعليه والله يبي يذبحها والاكيد انه بيجلطها من بروده ردت ببحه :وانا ماابي اكلمك عقاب لك همس بنبرة عشق :وتقدرين تعاقبيني يمكن اموت يا بنت لو ماحاكيتك يوم واحد تفهمين وشلون اموت عضت على شفاتها متجاهله كلامه :لارد عقلك عليك ذاك الوقت كلمتك همس ببتسامه :واذا كان عقلي راح بحبك وصرت بلا عقل وش السوات حركت كتوفها وهي تبي تحرر نفسها من حظنه : نجيب تركي يمكن يقدر يزرع لك مخ جديد وش رايك ضحك وشدها له زود همس بهيام :محد يقدر يرده غيرك بلعت ريقها والله محد اخذ عقلها غيره : انت الوحيد الي تقدر ترده سعود تعرف ان الموت أرحم لي من اشوفك تتألم عشاني... تكفى اترك غرورك وحرر نفسك ابتسم بحزن وهو يسند جبينه على كتفها :ممكن غروري يقتلني بيوم لكن هذا طبعي يا وعد ومستحيل ابدله حطت يدينها على يدينه :سعود فكني رفع رأسه ودفن وجهه بشعرها :ماراح افكك حتى ترضين وش قلتي حست بحرارة أنفاسه حركت رأسها بالنفي يمكن لو تظل كذا معه بيجننها زود : لا قلت لك لا همس بحب وريحة شعرها تخالط انفاسه : طيب بفكك بس على شرط فشلت بتحرير نفسها منه :وشو ابعد سعود وجهه عن شعرها :عازمك على العشاء و ماابي اعتراض ابد انرسمت ابتسامه باهته على شفاتها :موافقه بس اسبوع ماتكلمني وهذا شرطي واقل منه مااقبل و هذا عقابك يا سعود ابتسم وهو يبعد يدينه عنها همس بحب :موافق بس يلا طيران جيبي عبايتك وانا انتظرك ابتعدت عنه من دون ما تحط عيونها بعيونه بتظل تتجاهله هالاسبوع غصب عنها حتى يعرف ان على نفسه حق توسعت ابتسامته وقلبه يخفق بسرعه وهو يراقبها تبتعد عنه مايدري لو جمع لها عطفه وشوقه ولهفته ودقة خفوقه ونثرها لها يمكن ماتعبر عن الي يحتويه... بيتحمل هالاسبوع عشانها مع انه عقاب من المعيار الثقيل لكن لجل رضاها يبيع نفسه ويشتري الغالي والنفيس .... """""""" مرت ايام الاسبوع يوم ورى يوم وكانها تثبت أن الزمن يمشي مثل الرياح العاتيه وتثبت أنهم يواجهون الصعاب ويحافظون على صبرهم وهدوء أعصابهم وتفاؤل قلوبهم هاذي هي الحياة يمكن يحزنون يبكون يتالمون مع هذا راح يلقون قلوب تحتوي الحزن العميق إلي يتخلل قلوبهم المتعبه .... ، ، ، البيت في حالة استعداد الخادمات رايحين جايين يجهزون للحفل كل شي تمام ومجهز الصاله الداخليه الكبيره صارت مجهزه بتصميم رائع وكأنها قاعة أفراح الورد منتشر بكل مكان حتى درابزين الدرج كله ورود تحمل اللون الابيض والأحمر وهذا طلب ام سلطان وبتنسيق ام رعد تنفست ام رعد بسعاده وهي تمرر نظراتها حولها :كل شي تمام ياخاله الله يوفقهم ويسعدهم بس يا خالتي مو كأننا عجلنا بملكة ديما وخليناها مع زواج لميس ونواف حركت رأسها بالنفي وهي تمشي وتتعكز على عصاتها اليوم رجلها توجعها بالحيل تكلمت بتعب :لا وانا امك خير البر عاجله ودام العريس يبي كل شي بسرعه ف الله يوفقهم مع بعض ابتسمت بحب لهالانسانه :معك حق يالغاليه عاد ام راكان احس انها هي المستعجله ضحكت ام سلطان وهي تجلس على أحد الكراسي :ههههه اكيد هذا قلب الام واول ضنى لها الله يبلغها وتشوف عياله و هالولد دامه خوي سعود فهو دخل قلبي قبل لا اشوفه ضحكت ام رعد :ههههه اكيد ياخاله دام فيها سعود فكل شي تمام حركت رأسها بالإيجاب:ايه فديته هاليومين حاله يسر قلبي حتى ابتسامته تفتح النفس احس انها تغيرت كثير والله ماهي بسيطه بنتك ياريوف قدرت عليه ابتسمت ام رعد بسعاده:حتى انا ملاحظه وعد يا قلبي عليها احسها متغيره حيل تنهدت براحه حالهم هالاسبوع أدخل السعاده لقلبها انزاح هم كبير عنها أخيرا سعود بدأ يرمي ماضيه خلفه وصار يشوف الحياه بنظره ثانيه توسعت ابتسامتها وهي تشوف البنات مقبلين عليهم وتوهم راجعين من المشغل وكل وحده احلى من الثانيه وجهت نظرها لوريف : بسم الله ماشاء الله ربي يحفظكم يابناتي تحصنوا فديتكم وعد ببتسامه:فداك كوني يالغلا تحصنا الحمد لله همست وريف بحيا :تحصنا يا خاله يسلم لي قلبك تامرين على شي نسويه قبل لايجون المعازيم ام سلطان بهدوء :ابيكم تروحون للميس ماادري وش مسويه مع الكوفيرا تاعبتني هالبنت لازم تسوي إلي براسها وجابتها هنا وريف بهدوء :ابشري ياخاله الحين بنروح لها راحوا البنات وعيونها معلقه على وريف وجهت نظرها ل ام رعد ببتسامه :الله يرزقها بولد الحلال إلي يعوضها ويسعدها ام رعد :امين يارب الله يسمع منك ياخاله :يا ولد فيه احد يمه يا يمه رفعت ام رعد جلالها وتغطت فيه من وصل لهم صوت تركي ام سلطان:تعال ياولدي مافيه الا ام رعد محد حولك دخل بهدوء وجهه نظره لامه : يمه كل شي جاهز تامرين على شي قبل لا اروح ابدل ملابسي ام سلطان بهدوء :لا يا ولدي ماقصرت والله يكتب إلي فيه الخير ابتسم براحه من اليوم وهو رايح جاي لعيون اغلى ناسه لميس ونواف لف لام رعد وعيونه بالارض :وشلونك يا ام رعد عساك بخير ام رعد بهدوء:بخير دامك بخير انت وش اخبارك عساك بخير يا اخوي تركي ببتسامه :بخير جعلك بخير الا يا ام رعد نواف كلمك ماجاء للحين قلبها انقبض الساعه صارت ثمانيه والمعازيم على وصول همست بقلق :قال لي بيروح مشوار العصر وللحين ماكلمني تكفى ياتركي شوفه هز رأسه بقلق :ابشري بس انتي لاتحاتين ...انا طالع ابدل قبل لايجي أحد وبشوفه ام سلطان ببتسامه :مر على جنو من اليوم وهي تسئل عنك ابتسم من جابت طاري بنته هز رأسه وابتعد عنهم طلع بخطوات سريعه وكل أفكاره معلقه بنواف غريبه تأخر وهو طالع من العصر يدعي بقلبه انه مايسوي شي يندم عليه كفايه الندم إلي ذاقه طول هالسنين.... """"""""""""" مرت عامين وهي تتنتظره و ميته ضمى لشوفته ما فيه شي بداخلها ماتمناه كل مشاعرها في غيابه قامت تحاتيه ليته بس يعرف ان الهوى سهم ذباح وقلوب عشاق المحبه رقيقه وليته يعرف انها بقربه ترتاح و قلبها ينفك اسره وتتحرر دقاته السجينه رمشت بعيونها تبي تداري دموعها لاتطيح خايفه من الجاي أحاسيسها مضطربه حيل رفعت نظرها للبنت إلي جالسه تعدل تسريحتها الهاديه حاولت تعدل صوتها وتكلمت:لو سمحتي يكفي كذا ابتسمت الكوفيرا :اوكي كل شي جاهز ياعروسه طالعه قمر الله يوفقك ماردت عليها ودها تختلي بنفسها تبتعد وتلغي هالواقع إلي تعيشه ما كانت تتمنى حياتها ترتبط بنواف بهالطريقه كانت لها أمنيات وآمال لكن هاذي هي بكل بساطه تلاشت واختفت واحتل مكانها الواقع إلي يفرض نفسه على قلوبنا احنى البشر نزلت نظرها لحظنها متجاهله كل شي حولها :وش فيها العروسه زعلانه رفعت نظرها وابتسمت ابتسامه باهته وعيونها على البنات إلي دخلوا :ابد ماهو زعل بس تقدرين تقولين خوف ياوريف جلست وريف جنبها وهي تهمس :لموس حبيبتي ترا اخوي مايخوف يا كثر ماكان يتمنى هاليوم ابتسمت وعد: اي والله وش حلاته خالي والله ماني مصدقه إنكم بتجتمعون رفعت نظرها لوعد ودمعتها على وشك تطيح : ولا انا مصدقه ابتسمت وريف بهدوء :لا صدقي يا قلبي بينتهي شتاتكم وبتجتمعون بلعت عبرتها ما تبي تبكي فرحانه وزعلانه تبي قربه وتبي بعده تبي جنة حبه وتكره نار فراقه توها تتذكر همست ببحه :وين ديما جهزت وعد ببتسامه :على وشك تخلص احنى خلصنا وجينا وهي توها مكلمتني تقول طالعه من عند الكوفيرا مين قدها حتى هي عروسه وريف بضحكه:عروسه فاصله والله ماادري وش جاها من انخطبت وهي بس تتبوسم وفكرها بعيد هذا وهي ماشافت عريس المستقبل اجل لو شافته وش بيصير فيه ضحكت وعد بخفه :ههههه هاذي ديمو اعرفها ماتعرف تخفي احاسيسها كل شي يوضح عليها دخلت بهدوء بطلتها الجميله :كأنكم تحشون فيني رفعت وعد حواجبها بخفه: يالبى هالطله طالعه قمر ديما... لا وانا اختك بس يقولون الطيب عند ذكره ابد كنا نمدحك وجهت نظرها لوريف برفعة حاجب : لوفي ماقلتي كلمه من هنا ولا من هناك من نطقت اسمها ب لوفي ابتسمت بحزن :قلت إلي شفته حبيبتي قربت ديما وجلست جنب لميس :ليه ماجيتي معي المشغل لميس بهدوء :ما فيني لحوسة المشاغل ابتسمت ديما بهدوء : اعرفك بس طالعه قمر بينجن خالي نواف ويطير عقله ابتسمت لميس بارتباك والتزمت الصمت ما فيها ترد وتعبر باي كلمه همست ديما بخجل وفكرها عند زوج المستقبل :لميس ابي اسئلك انتي خايفه مثلي والله احس قلبي بيوقف من الخوف حركت رأسها بثقل:مو خوف بس توتر من الجاي تنهدت وصارت تلعب باظافرها حتى هي التوتر واصل حده تتخيل شكله الوسيم صحيح ماشافته زين لكن قدر بكل جداره يترك بصمه بقلبها قدر يحرك مشاعرها الساكنه وهي الي كانت ماتؤمن بالحب من اول نظره صارت سجينته .. """""""""""" واقف ابو سعود وابتسامته مرسومه على وجهه وهو يرحب بالضيوف إلي بدوا يحظرون رفع ساعته إلي قريبه من التسعه الوقت تأخر واغلب الضيوف وصلوا لف لتركي الي واقف جنبه وواضح عليه التوتر :وين راكان ونواف للحين ماجوا العرسان ياتركي شد على يده يبي يزيل التوتر عنه راكان واثق من جيته واكيد انه على وصول اما نواف الله العالم هو وينه فيه تكلم بنبرة ارتباك :هاه راكان قريب توه سعود قايل لي ونواف كلمني قبل شوي جاي بالطريق هز رأسه ابو سعود بالإيجاب ولف يصافح أحد الضيوف انسحب تركي بهدوء من عنده وطلع برا بسرعه رفع جواله وهو يدق على نواف لكن مثل ماتوقع إلى الآن جواله مغلق عض على شفاته ونزل الجوال بجيبه وصار يمشي يمين ويسار رايح جاي يحاول يهدي نفسه بيقوده هالانسانxللجنون :وين رحت يانواف وين تذكر شي غافل عنه الاكيد ان نواف بهالمكان لكن ليش الحين وبهالوقت بذات... ما يدري إلى متى بيظل ينظر للحياه بنظره سوداويه زاد بخطواته لسيارته لازم يجيبه ماراح يسمح له يهدم حياته مره ثانيه ماراح يسمح له يعيد الماضي يعرفه مجنون ويسوي إلي برأسه .... """""""""""" يالغلا صدري من البعد محدود وماهو صحيح ان الصبر من صفاتي تدري احبك موت واموت بك زود واحبك اكثر لو تحس بغلاتي اوعدني ان الوصل ماعاد مفقود واوعدك لحظة ماتفارق حياتي... رن جوالها رفعته بسرعه وتوسعت ابتسامتها وهي تشوف رقمه ردت بصوت خافت وهي تتصنع البرود :هلا :تعالي وعد ابيك بالحديقه وعد بهدوء:اوكيه جايه قفلت وابتعد بهدوء طلعت من عند البنات نزلت مع الدرج الخلفي بخطوات سريعه اكيد يبيها بشي ضروري الا ماكان دخل وبعض المعازيم فيه مررت عيونها بالحديقه ماشافته عرفت وينه أكيد انه عند قفص الحمام زادت بخطواتها و ترددت كثير من هالمكان إلي انخطفت منه لكن ماراح تخاف سعود حط حراس وكاميرات بكل مكان قوة نفسها ورسمت ابتسامه هاديه على شفاتها من شافته واقف وكاشخ بثوبه مررت عيونها عليه ابتسامته المعهوده مرسومه على وجهه كالعاده رفعت نظرها لنسفت غترته الي زايدته وسامه وزادت نبضات قلبها تقدمت منه :هلا سعود بغيت شي عيونه مركزه عليها وهي تمشي لجهته جذبته بجسمها الممشوق وجمالها الفاتن فستانها الخمري مفصل جسمها وشعرها تاركته مفتوح مثل مايحبه ووجها فتنه بمكياجها الهادي ما يدري هـو العشق إلي يخليه مجنون والا بس المجانين هم إلي يعشقون همس بحب :ابد كنت ابي اشوفك مشتاق لك اليوم ماشفتك وانتي حارمتني من شوفة هالزين كتفت يدينها وتكلمت بزعل :مابيننا كلام حتى يتم هاليوم ضحك سعود بخفه :ههههه افا ليش يا قلبي باقي زعلانه هذا اليوم آخر يوم من العقاب مافيني زود التزم الصمت معك وعد وهي عاقده حواجبها بزعل فيه من البراءه الكثير :باقي كم ساعه وينتهي العقاب ابتسم وتقدم منها زود : اعفيني من كم هالساعه وبعتذر لك من جديد ..اسف ياعمري والله ماكنت ابي اوجعك كتفت يدينها وتكلمت بنبرة عتاب :يعني لو ما انتبهت لك تتألم هذاك اليوم كان ماعرفت ابد انك مصاب وتعبان وجالس تخفي عني انا الغيبه الي ماانتبهت لك مرر اصبعه على حواجبها :افرديها مايلوق عليك الزعل لانت ملامحها من حست بلمسته:قلت لك لاتكلمني قبل ينتهي العقاب ضحك بصوت عالي :ههههههه يا لبى إلي يخافون علي وعوده مادريت انك تخافين علي لهدرجه اسف والله من جد ماكنت ابي اخوفك هذا انا بخير وطابxالجرح وفكيت الخيوط اليوم رفعت حاجبها :ومين فكها لا يكون الدكتور تركي تنهد بضحكه :ترا ماراح اقولك التفاصيل مره ثانيه وتطمني هالمره رحت المستشفى لعيونك الا انا ماني حق مستشفيات ابد ضربته على كتفه بخفه وتكلمت بحزن :سعود لاتهمل نفسك مره ثانيه على حساب احد ثاني همس بحب:انتي مو أحد ثاني انتي قلبي ونور عيوني نزلت رأسها بخجل :سعود همس بحب:قلبه نزلت رأسها بخجل من نبرته إلي حركت كل مشاعرها تكلمت بهمس :لاتحرجني ضحك بخفه ورفع طوق الورد إلي بيده اشر لها تقرب منه زود:تعالي تقدمت منه حتى صارت قريبه منه حيل انحنى ولبسها طوق الورد الابيض : حبيت اجيب لك ورد ابيض تعرفين ليش رفعت نظرها له وسندت كفها على صدره تكلمت بخجل :ليش همس وهو يمرر يده على خدها : لانه يدل على التسامح والصفاء والنقاء ويجيب لنا السلام ...الورد الأبيض يعبر عن الي يحتوينا ياوعد ركزت بعيونها على ملامح وجهه إلي تعشقها وجهها قريب من وجهه رفعت نفسها زود وطبعت بوسه هاديه على خده همست بحيا:مشكور سعود ... ابتعدت عنه وكملت كلامها :روح اكيد اغلب المعازيم وصلوا حط يده مكان بوستها إلي اول مره تسويها قلبه ضاع وسرح بتفاصيلها اشر على خده وعض على شفاته : مستوعبه وش الي سويتيه خليتيني اضيع يابنت وتبيني بعد اروح نزلت رأسها بخجل :سعووود غمض عيونه وقلبه بيطير من مكانه كيف حياته تغيرت بهالشكل تكلم بنبره حلوه :وعد ردت بهدوء:لبيه حط يده على قلبه : احبك قد النجوم وقد الغيوم احبك وقد الهموم احبك في كل يوم احبك زود يابنت سكت لحظات وهو يناظرها منزله رأسها ...ينتظرها تقول اي شي لكن عارفها من يقول لها احبك تخجل ويصير خدها مثل جوريه حمراء ماتدري انها بخجلها هذا تبعثر رجولته همس بحب:اشوفك بلليل ابتعد عنها بهدوء وراح تاركها تغوص ببحر الحب همساته الرقيقه تزرع الراحه بقلبها وتمتص الخوف إلي عاشته من كم يوم نبرتنه سوت سواتها فيها واخذتها لعالم ثاني عالم مليان ب اسمى عبارة الحب عرفت بهالحظه ان ورودها بدت تزهر مثل هالطوق إلي على رأسها... انـتـهــــى الـفـصــــل اتمـنى- ينال… على' اعـــــجـابـكــم} والـقـادم< اجــمـــل: باذن الـله* اراكــم؛ تهمــــــنــــيـʼ وتـعـليقاتكــــم؟ بعـد\ اتـمنى› لكم‘ قراءة¨ مـمـتعة و< انـــتـظر« تـعـلـيـقاتـــــكم' بشـوق تحـيـااااااتـــي› عـيـون الــــريم ^_^* | ||||||||||||
|
| |
 |
| أدوات الموضوع | |
| انواع عرض الموضوع | |
|
|
29Likes
العرض العادي
