11-04-18, 08:44 AM
| #1 | ||||
|  أفنان " رواية بلهجة ليبية " #أفنان الحلقة 1 أفنان من مدينة بنغازي تخدم صحفية شن قصتها وشن صاير امعاها حنعرفووها بالتفصيل لما نبدو في الرواية ,,,,, افنان ناضت الصبح بدري وفطرت ومشت شور اللاب توب ولّعاته وقعدت تكتب عاللاب توب في مدونة عشان تبي تنزلها عالنت " إسمي أفنان , مرّن ثلاث أيام عالاحداث اللي حنحكي عليهن في هذه التدوينة اللي قررت انسمّيها التدوينة الآخيرة طبعا انتم تابعتو اللي كنت نكبت فيه لكم خلال الفترة اللي فاتت من غير ماتعرفو اسمي ولا شخصيتي او أي شي عنّي واللي اخفيتهن لأسباب حتعرفووها بعدين في أسباب واجد اتخلي تدوينتي هذي التدوينة الآخيرة وحتعرفوو شن الأسباب خلال الأشياء اللي حنكتبهن لكم واللي حيكتشف عليكم حقائق كثير من الناس وانا انخاطر بعلاقتي بيهم وانخاطر بكشفي عليهم درست الصحافة في لندن وروّحت ليا شهر عشان انمارس الحاجات اللي تعلمتهن في لندن واللي هنّا اهمية كشف الحقائق للرأي العام بس في هذه المدة اكتشفت انّ الحقيقة عبارة عن مخلوق ضعيف يتصارع علي الجميع وينقسم الصراع الى قسمين ,, قسم يريد ان يكشفها وقسم يريد ان يخفيها واكتشفت انّ من يريدون اخفائها أقل بمن يريدون كشفها وانا اخترت ان أكون من القسم الأقل والبداية كانت لما روّحت من لندن بعد غياب وكان بابا في انتظاري في المطار في الماضي جا بات افنان وخذاها من المطار وامروح بيها شور الحوش بات افنان : الحمد الله علي سلامتك يابنتي افنان : الله يسلمك يابابا بات افنان : شن جو الرحلة وشن جو الدراسة في لندن افنان : الرحلة كانت متعبة بكل .. قعدت امكسدة عاللاب تو نتفرج أفلام مسلسلات عشان انمشي الوقت بس الدراسة ماكنتش متوقعتها هكي واعرة بكل يابابا بات افنان : يعني مش نادمة عشان خشتيتك للصحافة من الأول افنان : لا صح انت تبيني نقعد صحافيّة لكن حتى انا من طفولتي حبيبت الصحافة منك يابابا وقولي انت شن داير في الجريدة بات افنان : لا خلاص باتك كبر عالعمل قعدت نكتب مقال او اثنين يعني عالجو ومعش قعد عندي جهد نفس زمان افنان : ربي يخلّيك ليا بات افنان : بس ليش ماهدرزتش امعايا بكل وانتي في لندن وانقطعن اخبارك لين خلاص تبي اتروحي كلمتيني انشغلت عليك انا بس افنان : لا مافضيتش بس يابابا بات افنان : افنان راهُ مش معناها ازوجت وليّة غير امّك الله يرحمها معناها راني اهملتك او فتّك ولّا معش دوّرتك لا بالعكس بس انتي ماعطيتنش فرصة جاتك البعثة سافرتي علي طووول افنان : انت عارف يابابا انا انحب الصحافة واجد والبعثة جت في الوقت المناسب ماقدرتش انفووتها كان هذا معش انحصلها مرة اخرة بات افنان : بعد خطرها داليا دايرتلك غداء حاجة ماتفهم شي حيعجبك واجد فتلاكة بكل في التسواي وحتشوفي ابروحك لما اذوقي افنان : خلاص حنذوقو وانشوفوو لكن متاكدة نفس طعام ماما مافش بكل بات افنان : بعد خطرها هي اتحبك واجد بكل نفس ولدها سامي بالزبط افنان : انا متاكدة انها انسانة اكويسة بابا وعارفة ذووقك انا بات افنان : في أوقات واجد هي اللي اتقول رن علي بنتك اسال عليها دوّرها افنان : متخافش يابابا حنعاملها معاملة اكويسة ما اتيشلش هم واتفكر واجد بات افنان : باهي شن تبي اديري توا انتي تبي تخدمي انشوفلك عمل ولا شن حاطة موضوع في راسك افنان : اكيدة نشتغل خير لكن صعب حاليا اتحصل عمل حكوومي حتى لو كنت بشهادتك بس حندور حتى جهة خاصة وخلاص بات افنان : راكي تنسي باتك قاعد امعاك وحيصبي امعاك وحتى انا حندورلك ونسألك بعد الغداء عندي لكي مفاجئة سمحة ,, افنان : نجك ليا يا احلى بابا ,,,, وصل بات افنان لفيلتّهم طبعا همّا عائلة هاي كلاس ويسكنو في طبلينوو ,,,,,, بعد ما وصلووو للفيلا انزلوو خشت من هنا افنان طلعت عليها داليا داليا : اهلين اهلين الحمد الله علي سلامتك نوّرت بنغازي وقعدت تحضن فيها واتبووس فيها افنان : النور نورك داليا داليا : هيا تعالي تعالي انخشو جو وكانت داليا بارمة عالحووش كلّه وامغيرة كل شي وكأن الفيلّا مزالت جديدة داليا : حتعجبك الفيلا ,, وتيت جناح خاص ليك ,, حتقعدي فيه اتحطي فيه حاجاتك كلّهن ويقعد مستقل بيك وخليت جناحك بعيد عن جناح ابني سامي مش كل حد يأخذ راحته "داليا بحّتت في بات افنان " داليا : قتلّها علي ابني سامي صح ياخالد بات افنان : اها اكيدة قتلها في السيارة داليا : هيا تعالي توا انوريك جناحك اللي خاص بيك كل حاجة كانت في دارك القديمة حطّيتهن لكي في الجناح امتاعك افنان : من اللي حوّل حجاتي من داري داليا : كلهن قاعدات في جناحك هيا بس تعالي وركبت معا الدروج للدور الثاني .... قعدت افنان اتنظم في دارها واتستّف في حاجاتها علي خشّت باتها للدار بات افنان : ان شاء الله مش مشغولة بس افنان : يابابا كنك تحكي امعايا برسميات خش واحكي عادي بات افنان : ان شاء الله ماتقعدش اضايقتي عشان داليا غيرت مكان دارك ودارتلك جناح خاص بيك هيا علي ولدها سامي بس عشان تاخذو راحكتم افنان : لا بالعكس حلوو كلّه بس خفت يقعدن حاجاتي اللي كانن في داري زمان ريحات لكن الحمد الله لقيت كل حاجة كيف ماهيّة بات افنان : الحمد الله اهم شي عندي ماتضيّقش بس قعد باتها يساعد فيها ويستّف امعاها في الدار بات افنان : راهو مش حننسى امّك الله يرحمها افنان : انا مش ناسيا ,, عشان هكّي خشّيت صحافة داليا قعدت اضبّح من لوووطة بات افنان : شكله الغداء واتي هيّا ننزلوو نتغدوو شكله سامي جا ,, فنان : عندش نيا ,, تغدوو انتوو ,, مش جعانة بات افنان : هيا عاد ما اتجشش اول غداء لنا مع بعضنا وحتى سامي جي للغداء عشان يحمدلك عالسلامة فنان : هيا هيا تو نلحقك بات افنان : هيا عشان انقولك عالمفاجئة اللي قتلك عليها امبدري في السيارة ,,,,, سامي يتغدى مع امّه بات افنان لما ازوج داليا كان عندها طفل اللي هو حاليا سامي وهو اكبر من افنان داليا : شن الجو العمل ياسامي سامي : الحمد الله قاعد انفكر في مشروع جديد نبني عيادة لكن حنخلي فيها مستثمرين اكبار عشان يصير منها داليا : ان شاء الله موفق يا اعيووني ,, ديما ندعيلك سامي : ربي يخليك ليا ..افنان جت شفت سيارة خالد برّة ,, اكيدة ,, جابها من المطار داليا : اها جت اشوية اخرة نازلين اسمع راك اتعاملها معاملة مش اكويسة سامي : لا بالعكس حنعاملها احسن معاملة علي نزلت بات افنان وافنان من عالدرووج بات افنان : اهلين طولّنا عليكم داليا : لا عادي نرجوو قاعدين سامي : اهلين افنان انستي ونورّتي " وسلّم عليها افنان : اهلا سامي ,, النور نورك سامي : شن جو الرحلة افنان : اكويسة مشت بالجو سامي : باهي تمام اهم شي طيبة وبدووو يتغدوووو داليا : شن حتقعدي نفس خالد في عالم الصحافة ولا حدوّر عمل في مكان آخر افنان : حندور أي جريدة ونقعد امعاهم محررة والباقي انخولها على الله سامي : تمام ,, قبل مادوري أصلا ’’ شن رايك نحنا اندّورو علي موضفات علاقات عامّة شن رايك تخدمي امعانا في الشركة داليا : بس هي تبي صحافة ياسامي بات افنان : عرفها افنان نفس باتها اتحب الصحافة واتحب ادوّر عالحقيقة سامي : الحقيقة ما اتوكل عيش توا افنان : بس اتخلي ضميرك متريح سامي : بس الفلوس ماعمرها تعارضت مع راحة الضمير يعني توا مثلا قاعدين عالطاولة هذي نحنا والفيلا الكبيرة والفلووس والعز اللي عايشيين فيه هل معناها نحنا مش متريحيين الضمير افنان : لا مش شرط ممكن تقعد متريح وممكن لا داليا : شكله يقعد عندنا نقاد واجد في الحوش ,, اسمع شن اسمه صاحبك اللي يخدم في الإنتاج سامي : طارق بس هو خصّائي يوتيووب ويخدم عالسوشل ميديا شن دخلّ في موضوع العمل داليا : يعني مرات عنده معارفة بات افنان : معلش معلش نبي انقاطعكم خليتكم من امبدري اتهدرزوو علي قصة العمل أصلا انا عندي مفاجئة لافنان وليد صاحبي رئيس جريدة بنغازينو وافق انّ يخليك تخدمي عنده من قبل ما اتجي لبنغازي ونسّقت امعاه انا في كل حاجة سامي : اوووو ماشاء الله ,, الف مبرووك امالا عليش اتخلوونا انهدرزو من الأول قبل نبي انديرلك راي علي عمل اهو طلع عملك واتي من قبل حتى ما اتجي لبنغازي افنان : الحمد الله يارب سامي : بس مزلت امسكر راسي الصحافة مافهش مستقبل وماتوكلش عيش بات افنان : خليها في بالك افنان اتحب الكتابة وماتحبّش الفلوووس سامي : يالله كل واحد عندة وجهة نظر انا تاخرت عندي شغل واجد طلعت من الشركة بس عشان انسلم علي افنان وانحمدلها عالسلامة افنان : تسلم بارك الله فيك سامي : نستاذنك ومزال عرضي سائر يا افنان لو عرفتي انّ الحقيقة ماتوكلش عيش تقدري تدويلي لان مكانك قاعد واتي افنان وهي مبتسمة : حاضر الساعة 5:00 عصرا قاعدين افنان وباتها وداليا في الصالة امكسدين افنان تلعب بالنقال وداليا اتفجرع التلفزيون بات افنان : كان هذا تريحي يوم او يومين بعدها امشي لصاحبي وليد خووذيلك كم يووم راحة افنان : لا بالعكس متحمسة يابابا اقعاد الحووش يمرضني انا ,, أصلا توا حنرقد اشوية مش بكرة يقعد جوي تمام بات افنان : خلاص انا اشوية اخرة ماشي للكافية اكيدة حنقابله غادي حنهدرز مع وليد داليا : معقولة بنتك اليوم كيف امروح لبنغازي واتسيبها وتمشي للكافيه بات افنان : عندي موضوع ضروري لازم ننهي ,, وافنان تبي ترقد اشوية أصلا حنجي في الليل وانهدرز امعاها داليا : انا جارتي دايرة لمّة مابيتش نمشي عشان نقعد وانهدرز امعاكم طلع بات افنان ,, وافنان رقت للدار امتاعها ,,, وداليا امكسدة عالتلفزيوون ,,, ثاني يوم الصباح شالها باتها للمقر امتاع الجريدة ,, مشت شور مكتب الاستعلامات افنان : السلام عليكم موظفة الاستقبال : وعليكم السلام افنان : وين مكتب الأستاذ وليد رئيس التحرير موظفة الاستقبال : عندك مع موعد افنان : نعم هو عارف انّي جايْته اليوم موظفة الاستقبال : تمام اشوية تو انشوفه لكي تريحي اشوية هنا افنان قعدت ترجى اشوية موظفة الاستقبال : تفضلي يرجى فيك وخشّت افنان للمكتب وليد : افنان صح افنان : ان شاء الله وليد : ماشاء الله الوقت عندك وقت مافش تأخير طبعا باتك صديقي الروح بالروح وانتي اعتبري روحك منّا وفينا افنان : تسلم أستاذ وليد ,, هذا من ذوقك وليد : طبعا انا ليا 20 سنة نخدم في المجلة ممكن توا كيف غيرنا اسمها لبنغازينو لكن انا نفس باتك قديم في عالم الصاحة زمان الصحافة كانت تعتبر حاجة أساسية في حياتنا وتعتبر السلطة الرابعة ,, واللي اتحكم في الاخبار وكان الخبر امتاعها كلها ترجى فيه اول بأول لكن توا الوقت اختلف بعد عصر التكنولوجيا والسوشل ميديا افنان : نعم صح كل توا عصر السرعة وبالذات في الاخبار وليد : ينزل الخبر عالجريدة يقروه كلهم بعدها الناس التفاعل امعاه ويبقى حديث المجتمع حاليا لا ,, اصبح الناس يتفاعلوو بسرعة مع السوشل ميديا كل واحد يوصلّه الخبر عالسريع ويتفاعلوو بسرعة سواء هشتاقات حملات وهكذا افنان : تمام صح وليد : والوضع هذا لازم يخلينا انواكبوو العصر وننقلو الحاجات المطلووبة حاليا للناس وعلي ضجة إعلامية يعني توا قعدت الناس معش ادور علي نوعية الاخبار قعدت ادور علي اخبار المشاهير والموضة وهكذا للدرجة هذي جبنا وحدة مشهورة عالسوشل ميديا اسماها دعاء عشان اتواكبنا التطورات اول بأول مش عارف لو مارّة عليك ولا لا افنان : لا مش مارّة عليا ,, وانا شن طبيعة عملي وليد : طبعي انتي مش حتبدي في العمل دغري حتبدي امعانا تدريب انجربووك قبل وبعدها باذن الله تبدي امعانا رسمي افنان : شن المطلوب مني وليد : نبيك اديرنّا أي تقرير أي مقال افنان : علي شن انديره وليد : علي أي حاجة تبيها ابجوك انتي مش حنحصرك في موضوع معين ابراحتك انتي افنان : حاضر .. عندي مكتب نبدا فيه ولالا وليد : لا مكتب مافش حاليا ,, حتخدمي عشوائي لكن اول مايصير منك واتوضفي امعانا رسمي حنوفروولك مكتب ,,, طلعت افنان من المكتب ,, حسّاته يوزع فيها حسّاته يحكي امعاها بلا نيا حسّاته وكأنها مش دايرلها قيمة واجد اختبار وسوشل ميديا وهكذا طلّعت نقالها ورّنت علي سلوى صحبتها افنان : خلاص سلوى انا كمّلت المقابلة تقدري اتجيني توا سلوى : شن مافش شغل اليوم دوام حاجة افنان : لا مزال كانت مجرد مقابلة بس سلوى : هيا جايتك في الطريق بعدك امرايفة عليك ,,, بعد مرور ربع ساعة طلعت افنان لسلوى كانت ترجى فيها قدام مقر الجريدة افنان : سلوى حبيبتي سلوى : افنان العسل رايفت عليك ياسمووحة فيه وحدة تبدا من ثاني يوم عمل اول ما اتروح من لندن افنان : عرفتيني من أيام الجامعة ديما مستعجلة بس ماشاء الله رايحة سمووحة سلوى : شن قصدك انا شينة من قبل افنان : لالا سمووحة ورايحة اسمح من قبل سلوى : نجك ليا ,, امرايفة علي جو الجامعة افنان : شن جوك شن دايرة سلوى : عمل حوش , حوش عمل لو نبّي انهيّج نمشي للمطعم هذا روتيني اليومي افنان : نجك ربي يحفضك سلوى :وانتي شن جو لندن افنان : جو سمح دراسة وخلاص روّحت القيت حاجات واجد متغيرات بابا ازوج وحدة اسماها داليا سلوى : اها عرفتها داليا حكتيلي عليها عالنت ,, شن جوها امعاك افنان : لعند توا اتعامل فيا اكويس الحق سلوى : باهي تمام ,, وعندها أولاد افنان : اها عندها سامي يخدم في شركة مقاولات او حاجة كيف هكي تقريبا سلوى : ماشاء الله يعني كبير افنان : اها كبير ,, هيا نركبوو في السيارة حرقتني الشمت سلوى : هيا هيا وركبن للسيارة ومشن مع بعضهن ,,,,,, سلوى : صار قتيلي وزّعك افنان : اها حسيته مش متحمس واجد غير يمشي فيا عشان بابا بس وكلامه كلّا سوشل ميديا وخلاص والناس مش مهتمة بالاخبار وحاليا الناس تهتم بالفضايح ووحياة المشاهير ويبيني اندير تقرير في أي موضوع يبي يختبرني شكلها مبدائيا الوضع امعا مقرف مانش متفائلة خير سلوى : مقرف :: امالا انا شن انقوول درست طب اقرف شي خاصّة السنة الأخيرة دارسة وتمشي للمستشفى وبعدها حسيت روحي ندمت بعد الحاجة اللي سمعتها افنان : شن سمعتي سلوى : اليوم تقابلت مع ممرضة اجنبية في عيادة خاصة تخيلوو نقلووها من العيادة العيادة عليش افنان : عليش سلوى : عشان واحد من المرض تحرّش بيها في مستشفى 7 يناير لما جت تبي تدوي نقلوها من العيادة عشان ما اتخربش سمعة المستشفى والمريض مادرولا شي وهي اللي نقلوووها وسكّرو عالموضوع عشان ماتنفضحش المستشفى سلوى : وصلنا للمعرض اللي قتلك عليه امتاع للوحات الفنية ننزلوو انغيرو الجوو اشوية نزلت افنان وسلوى وقعدن يتفرج عاللوحات الفنية افنان : فاهمتي حاجة من الصورة هذي سلوى : لا مافهمت حسيتها تخربيشة وخلاص عاللوحة كان سامي قاعد في المعرض حتى هووو يتفرج سامي : انا نشرحلكم عادي لو مش فاهمين هذا اسمة الفن التجريدي غالبا الفنان يجرد الشكل من جميع التفاصيل عشان يطلع جوهر للوحة افنان : ماعرفتكش ,, سلوى صاحبتي هذا سامي ابن داليا سلوى : نحسابك تخدم هنا وتشرح في اللوحات اهلين سامي سامي : اهلين سلوى كيف حالك سلوى : الحمد الله بخير سامي : تتشرفت بمعرفتك سلوى : انا اكثر افنان : شكرا عالشرح لكن الحاجات هذينا مش من اهتماماتي اوكي نفترج انتمع نظري لكن مش هامني شن معناها اللوحة هذي طارق : اهلين سامي سامي : اوووو حتى انت قاعد هنا انعرفكم طارق صاحب شركة " يو اكشن " امتاع اليوتيوب المعروووفة وهذي افنان وهذي سلوى طارق : تشرفت بمعرفتكن افنان : انا اكثر سلوى : بارك الله فيك سامي : افنان قاريا في لندن الصحافة طارق : ماشاء الله سامي : حاولت نقنعها اتجي تخدم في الشركة ماتبش تبي تقعد صحفية تقليدية طارق : كلنا نعترفو ان الصحافة التقليدية شي مهم لكن توا عصر السوشل ميديا خلاص معش فيه ناس واجد تقرا في المجلات نفس زمان افنان : بس توا السوشل ميديا قعد يقدم في حاجة تافه وبلا محتوي عندي نقرا اكتاب او جريدة احسن ما انضيع وقتي عالسوشل ميديا طارق : يقدم في حاجة تافه قتيلي عندك شهادة في من لندن غريبة عندك شهادة وتحكي نفس هالكلام لازم اديري ابديت لمعلوماتك افنان بحتت في تبحيتت استحقار : ابديت لمعلوماتي ومشت وسيبّتهم ولحقتها سلوى طارق : دويت عادي انا ,, قصدك زعلت سامي : خف عليها اشوية طارق : صحفية مفروض اتحمّل النقد عادي سلوى : تعالي هنا وين ماشيا كنك عديتي افنان : شفتي شن قال ومزال تبيني نقعد امعاكم سلوى : كنك تحسستي اكيدة يعبّر عن راي امتاعه بس افنان : التعبير عن الراي شي والاستخفاف بالكلام شي آخر سلوى : انا امعاك في كل حاجة لكن كنّك أي حد يحكي امعاك او يقعد ضدك اديّري عدووك خفّي علي روحك اشوية مرات يساعدك افنان : يساعدني ؟؟؟ ,, صح انتي حتساعديني تذكري الممرضة الأجنبية اللي حكتيلي عليها نبي انشووفها ,,,,, وصفتلها سلوى وين قاعدة حاليا الممرضة اللي تحرشوو بيها ومشتلها للعيادة قعدت تحكي امعاها بالانجليزي طلعت الة التسجيل الصغيرة امتاعها وطلعت الدفتر امتاعها وبدت اتسجل وقعدت تحكي الممرضة " اعرفت ان الممرضة زعلانة ومافش حد يبي يسمعها او يأخذ الشكاوي امتعاتها ومافش حد يبي يساعدها في مستشفى 7 يناير " طمنتها افنان وقالت لها انا حنساعدك ونقعد في صفّك وحنوصل صووتك واللي تحرشوو بيك حينالو جزائهم ,,,, هذه الرواية للكاتب " ديندار الوحيشي " ...... في المساء كانت افنان تكتب واتوتّي في التقرير وتكتب في اقوال الممرضة سمعت باب الدار يخبط بعدها خش عليها باتها بات افنان : شن صار امعاك مع وليد افنان : والله يابابا حسيّته يوزّع فيّا بات افنان : يعني حتكملي امعاه ولالا افنان : اها حنكمل طلب منّي موضوع يقعد مثير للجدل واخترت انا موضوع معين بادية فيه بات افنان : لازم يكوون عندك اكثر من مصدر وماتعبش علي مصدر واحد ديما خلي عندك أكثر من مصادر عشان ماتخشش في مشاكل افنان : حاضر بات افنان : كنك مضايقة من حاجة افنان : لا اذكرت اللي صار مع ماما ومادرولها حتى اعتبار لمكانتها بعد انكرت مش هيا اللي سرّبت أسئلة الإمتحانات واللي قهرني يابابا مايبوش حتى يسمعوو طرفها من القصة بات افنان : الله يرحمها افنان : امين يارب .. سيورة جوّي حيتعدل ماضيقش روحك انت ,,, ثاني يوووم كانت سلوى قاعدة في المستشفى وحطت علي رقم افنان واتصلت بيها افنان : اهلين اعيوووني سلوى : اهلين افنان ,, قتلك افنان : نعم سلوى : كلمتني ممرضة اجنبية اخرة قالت تبي تشكيلك بعد اعرفت من صحبتها انّك حتساعديها بس ماتبش تشكي في العيادة تبي أي مكان برة العيادة افنان : شن موضوعها حتى هي تحرش سلوى : اها نفسها تحرش من نفس المستشفى افنان : لما اتروحي من المستشفى 7 يناير جبيها امعاك للحوش سلوى : تم خلاص ,,,,, سلوى جابتها لحوش افنان وخذت اقوالها كلهن افنان سلوى : شن حدّيري توا افنان : حتى هيا صارلها نفس الممرضة الأولى وتحرشت ولما جت تبي تحكي نقلوها من عيادة اخرة احتمال الفصل ومرات توصل يرحلووهن لو فكّرن قدمّن شكوى سلوى : في ممرضات واجد هكي بس خايفات وسكتات خلاص مش عندك جميع القصص انشريهن وافضحي المستشفى افنان : الموضوع مش هكي بس خذيت كلام الضحايا لازم ناخذ كلام المتهمين لازم نبي أي مسؤول في المستشفى بس مش عارفة كيف سلوى : ليش ما اتكلمي سامي افنان : شن دخل سامي في الموضوع سلوى : انا عارفتك مش طايقتي سامي واتمشي فيه وخلاص لكن هو معارفة واجد مرات يحصلك واحد ,,,, يتعشوو مع بعضهم افنان وباتها وداليا وسامي افنان وهي تاكل بحّتت في سامي افنان : شن جو العمل امعاك سامي : ضغظ لكن الحمد الله افنان : باهي انا قاعدة اندير في تقرير عالمستشفيات والعيادات نبي حد يقعد ماسك في مستشفى 7 يناير مدير او أي حاجة المهم واصل سامي : نعرف مدير المسشتفى ,, اصلا عندنا معاه بزنز واجد خلاص حنديرلك مع موعد وخوذي منّا المعلومات اللي تبيهن افنان : تسلم سامي بارك الله فيك ,,,,, بعد مرور يوم افنان قاعدة في مستشفى 7 يناير وفرحانة عشان حتطلع بموعد مع مدير المستشفى مدير المستشفى : السلام عليكم افنان : وعليكم السلام مدير المستشفى : انتي افنان صح افنان : ان شاء الله مدير المستشفى : معلش عالتاخير افنان : لا امقدرة اشغالك ونشكرك انّ فضيت بعض الوقت ليا اكيدة سامي عرّفك عليا لكن انحب انعرف بنفسي انا افنان خالد حاليّا متدربة في مجلة بنغازينو الأسبوعية حابّا اندير امعاك التقرير هذا بخصووص المتسشفيات ومشاريع الصحة في البلاد مدير المستشفى : تمام خوذي راحتك عادي افنان : ممكن تسمحلي انسجل كلامك مدير المستشفى : لا عادي سجلّي واسألي افنان : اول سؤال عندي كم مريض تستقبلو يوميا مدير : من 200 لــ 300 مريض ممكن يوميا افنان : كم طبيب عندكم في المستشفى مدير المستشفى : 150 طبيب خاطي المعيدين والمساعدين من جامعة العرب الطبية لانهم كل مرة يتغيروو افنان : ماشاء الله ,, وصح المستشفى حصلّت علي تكريم وزاري قبل ثلاث اشهوور رئيس المستشفى : الحمد الله افنان : هل اتواجهُ في بعض الصعبات او بعض المشاكل المستشفى رئيس المستشفى : لالا اموورنا تمام بكل افنان : يعني مافش شكاوي من الموظفيين رئيس المستشفى : ابدا مافش امورنا تمام ومافش حد قدم شكوى افنان : شن ردك عالممرضات اللي قدمن شكوة تحرش ضد المستشفى مدير المستشفى : شن ؟؟؟؟ ماسعمتكش افنان : بعض الممرضات تعرضن للتحرش من الموظفين اوالمرضى في المستشفى ولما يشكوو مافش حد امدورهم ولا يسمع فيهم بالعكس ينقلووهم لعيادة اخرة بعيدة عن المستشفى شن ردّك انت عالكلام هذا مدير المستفشى : من وين جبتي هالكلام هذا انتي اطلعي برّة اطلعي برّة بسرعة افنان : اشوية بس انكمل لقائي امعاك مدير المستشفى خبط بيدّة بالقووة عالطاولة مدير المستشفى : قتلك اطلعي برّة ومعش اتبّلي علينا وتكذبي علينا طلعت افنان خايفة ومتنكدة عشان لزّها من المكتب روّحت للحووش ,,, الساعة 8:00 مساءا جا سامي مستعجل للحوووش وراقيله بكل وكانت افنان قاعدة في الدار تسمع في التسجيل امتاع مدير المستشفى وتكتب في اقوالة وردّات فعله وهي تسمع باتها خش عليها في الدار بات افنان وهو متعصب : ممكن تنزلي لووطة اشوية افنان : اشوية بس تو ننزل بات افنان : قتلك انزلي توا يبيك سامي لووطة نزلت افنان لقت سامي وداليا يرجو فيها سامي : شن اللي درتي اليوم افنان : شن درت سامي : تكذبي عليا اتقولي نبي اندير مقابلة افنان : اها درت مقابلة سامي : كذابة ماشية تتهمي فيهم بقضايا تحرش افنان : لا مانتهم كلامي صح هذا سامي : كلامك صح انا مش شوري ولا ,, ماشية عن طرفي اخرة زلطتيني مع مدير المستشفى ياريت الكلام اللي صار اليوم معش ايتعاود مفهووم في الوقت الحاضر مزالت تكتب افنان عاللاب توب " البداية ممكن مش حتبيّن شن اللي حنواجه الأيام الجايّا ولكن كانت كافيَّا اتوريني انّ كشف الحقيقة ليس هدف الجميع بالعكس في ناس واجدة تريد إخفاء الحقيقة البداية هذي ورّتني اني لو نبي انواجه الحقيقة لازم انواجهم وجه لوجه ,, يبتع ,,, | ||||
|  |
|
12-04-18, 12:15 PM
| #2 | ||||
|  #أفنان الحلقة 2 افنان مع الساعة 5:00 عصرا فتحت اللاب توب عشان اتكمل كتابة التدوينة امتاعها اللي قالت في اول حلقة سمّتها التدوينة الأخيرة هيا تعالوو انشووفوو شن قاعدة تكتب في التدوينة " للحقيقة سحر خاص يربط بالغموض الذي يحيط بها هذا الغموض هو يسحر من يسعى لكشفها فلا يرى غيرها ويختفي كل شي فيها عائق للوصول اليها ولكن حينما اردتُ كشف الحقيقة وجدت نفسي اتسائل هل الحقيقة تسعى اليّ ام انا من اسعى اليها في الماضي قاعدة سلوى وافنان في كافي للعائلات سلوى : ممكن تعطيني نقرا التقرير اللي كتبتيه افنان : هاكي وعطتها لاب توب وقعدت تقرى سلوى سلوى : كنّا جوك متنكد افنان : علي امس صار مع سامي زعل واتهمني انّي انشوه في سمعة المستشفى سلوى : شن حالديري باهي افنان : والله ماني عارفة ,, حسيت انّي فتحت علي روحي موضوع كبير سلوى : لازم تدفعي ضريبة الحاجة اللي اديري فيها راهوو معش فيه حد توّا ادور عالحقيقة كلّها نفسي نفسي : علي جيّت شاب قعمز امعاهن : عمر : السلام عليكم سلوى : وعليكم السلام افنان : من هذا سلوى : عمر خويا انسيتي افنان : ماشاء الله كبرت كم عمرك توا عمر : 19 ونص افنان : اهم شي النص قبل 19 سلوى : ههههههههه اكيدة عمر : اتشفطن عليّا افنان : لا انبصرو بس سلوى : تبي تعطي التقرير لوليد ولا شن افنان : مزال مش عارفة عمر : من يطلع وليد هذا افنان : رئيس تحرير المجلة اللي ندرّب عليها توا سلوى : زعمك حينشرة ولا لا افنان : نتوقعه عادي ,, انا لما كنت في لندن كان عادي نفس هالمواضيع ينشرو فيهن بس حسيت وليد امعقد الموضوع اشوية سلوى : قصدك التّعب هذا كلّه عدّا عالفاضي عمر : انتي مش حتعرفي هل حينشره ولا لا لين اتشيلي ابروحك , ولو مابش ينشره كلميني عندي لك اكثر من حل سلوى : هيا نمشو عمر وقت عليا طمنيني وقوليلي شن صار امعاك مع وليد وطلعت سلوى مع خوها عمر ,,,, سلوى : ياريت مرة ثانية لما نقعد نحكي مع صحباتي معش تدخل وتقعد تعطي في راياتك حطيت روحك في موقف بايخ مابتش حتى اترد عليك عمر : عارفة شن مشكلتك انتي امصغرتيني بكل وتستخفي بيا مع انّك عارفة انّي مش غبي سلوى : بس اللقطة اللي امبدري كنت غبي بنت ماتعرفهش كيف اتخش وتقعد تعطي في رايك عمر : اووووو تمام امس من الساعة 9 لعند 2 كنتي في الجامعة بعدها مشيتي للمستشفى وبعدها كنتي مع افنان في حوشهم وبعدها روّحتي سلوى : تجسس عليا انت ولا شن عمر : لا داير برنامج امتاع الموقع علي نقالك يورّي فيا وين كنتي وين مشيتي قتلك شغلي برنامج الحماية عشان معش حد يعرف الاي بي امتاع نقالك ويقدر تجسس عليك الزبدة في الموضوع معش تستخفي بيا واطلعيني غبي سلوى : خلاص اوكي وانت معش سكتت ,,,,, مشت افنان شور مقر الجريدة وسلّمت التقرير لــ وليد افنان : دزيتلك نسخة اخرة عالايميل امتاعك وليد : تمام افنان : عموما انا مشيت على كل معايير الصحافة الموضوعية في التحقيق وليد : معلش ممكن ترجيني برّة افنان مستغربة ومزالت قاعدة في المكتب وليد : هيا تفضلي فيش ترجي وطلعت افنان من المكتب وقعدت امقعمزة عند صالة الانتضار وليد مسك النقال وحط علي رقم معين عشان يرن عليه قعدت افنان ترجى فيه وليد يطلعلها وتقرا في المجلات اللي قاعدات في صالة الانتضار ومستغربة ليش قاللها اطلعي برة وارجيني بعد مرور اكثر من ربع ساعة جا بات افنان لمقر الجريدة بات افنان : افنان افنان : بابا عليش جيت هنا بات افنان : وليد اتصل بيّا قالي نبيك في موضوع يخص افنان افنان وهي متعصبة : شن نحنا قاعدين في مدرسة ولا شن دايرلي استدعاء والي آمر عليش يكلمك يكلمني انا علي طووول بات افنان : با بنتي اهدي اهدي اشوية بس مزال مش عارفين شن الموضوع افنان : امتى كلمك بات افنان : امبدري اشوية علي طلعة وليد من المكتب وليد : السلام عليكم ,, اهلين خالد بات افنان : وعليكم السلام اهلين كيف حالك وليد : الحمد الله وبارك الله فيك عشان جيت امورك طيبة بات افنان : الحمد الله وليد : يلّا تفضلوو امعايا عالمكتب خشت افنان وباتها وراء وليد للمكتب ,,,,,, وليد : شوف ياخالد بيني وبينك عشرة وعيش وملح وعارف معزتك عندي ياغالي بات افنان : اكيدة بدون ماتحكي وليد : لو مش انت من اعز اصحابي راني عزقت التقرير في الكناسة ولزّيتها بكل ومعش انخليها تخدم في الصحافة مرة ثانية بات افنان : بارك الله فيك ,, ونشكرك واجد بس ممكن انشوف التقرير شن فيه وليد : هاك تفضل اقرا وخذا بات افنان قد يقرا في التقرير وليد : هذا كلام واتس اب كلام لمات صبايا لكن مش كلام صحافة بكل " قعد وليد يبحّت في افنان " وليد : مافش واحد ايدير تقرير بدون ادلة بدون اثبات بدون براهين تثبت كلامه ,, لكن كلام من راسك هذا مش شغل افنان : هو أصلا مابش يثبت كلامه او ينفي او يعطيني فرصة مدير المسشتفى بات افنان : انا امعاك ياوليد كلامك صح بنتي افنان شن دليلك علي كلام اللي قلتي في تقريرك مصدرين وبدون ذكر حتى أسماء افنان : حس الصحفي وليد : حس صحفي شن ,, تي انتي كيف بادية مزلتي يالله اتقولي ياهادي أي حس صحفي تحكي عليه عندنا طريقة معينة ماشيين بيها للصحافة علي أي أساس اتقولي حس صحفي بات افنان بحّت في بنته بات افنان : انا امعاك مش ضدك لكن لازم في أي تقرير صحفي يقعد عندك دليل ومصدر موثوق منا " أفنان قلبت وجها وقعدت مضايقة في المكتب " وليد : كيف ماشية لمدير المستشفى اتقولي اندير امعاك مقابلة لكن انتي دايرة امعاه تحقيق اقل شي ايديرا اكيدة يطردك من مكتبه حنقولك شي ياخالد انا ماكلمتكش في المكتب عشان اتهزبها او اتعاركها لكن نبيك اتعلمها الحياة كيف ماشيا في الوقت الحالي بات افنان : حاضر ,, وبارك الله فيك وليد : نحنا مزلنا مستمرين وحتكمل امعانا عادي وان شاء الله تفطن الرووحها معش اتعاودها " وليد بحّت في افنان " وليد : عرفتيها دعاء اللي قتلك تخدم عالسوشل ميديا دايره حفلة نبيك تمشي غادي اديريلي تقرير عالحفلة وفرصة اتعرفي عالناس اللي غادي اغلبهم يخدمووو امعانا وعطاها كرت الدعوة امتاع الحفلة بات افنان خذا كرت الدعوة ,, وافنان مابتش اترد عليه ولا كلمة واطلعووو من المكتب افنان وباتها ,,,,,, افنان قاعدة في السيارة مع باتها وامروّح بيها شور الحوش افنان : انا شفت اليووم انّ داير دعاية للمستشفى في مجلّاته هذا عليش دار هكي هو يابابا ومابش ينشر التقرير امتاعي مش نفس هالكلام الفاضي اللي قاله بات افنان : اسلوبك وعصبيتك نفس امك بالزبط وكأن امك قاعدة قدامي ناس ماعندهش ضمير ومتخافش حتى امك اتهمووها وقالولها اتسرّبي في الامتحانات وانا طول عمري ماشكيتش في براءة امك وعارفها مظلوومة ,, ربي يرحمها افنان : امين يارب بات افنان : عارفك زعلانة علي امك ,, واتحاولي اتفشي في غضبك عشان اطلعي الحقيقة لاي موضوع في حياتك وتقعدي مناصرة للحق ,, لكن اللي درتي في المستشفى غلط ومعش اتشكي في كل الناس وكأنك في حرب يا افنان خوذي المواضيع ببساطة افنان : خلاص انا غلطانة عرفت يابابا بات افنان : انتي كيف بادية امعاهم ومافش حد حيمشي بحسّك الصحفي اللي تحكي عليه ولا حيدّورك ويصدق كلامك ومش هكي بس مرات نفس هالتقارير اتحطي روحك في مشاكل انا ابروحي مش حنقدر انطلعّك منهن ,, افنان : يعني شن المطلوب مني توا يابابا بات افنان : انا انقول شغلك مع دعاء حيفيدك واجد ويوريك المجتمع اكثر اللي كنتي بيعدة عنّا ومعش يخلي عندك تصادم مع الناس واتأقلمي مع الوضع عادي افنان : انا شن حنستفيد من دعاء ,, مستغربة بابا الانسان المثقف ينصحني نتعامل مع بنت اغلب كلامها عالمكياج والعطور بات افنان : حتى انا كنت نفسك انقول هكي ,, متاكد حتستفيدي منها واجد افنان بهزوة : اها صح حتعلمني كيف انصقمّ الميكب امتاعي بات افنان : هازية انتي افنان : ان شاء الله خير يابابا ,,,, ,,,,,, ثاني يوم ,, كانت افنان في مقر الجريدة وهي امروحة للحووش رنّت علي سلوى افنان : اهلين سلوى سلوى : اهلين كيفك افنان : اكويسة .. قتلك سلوى : نعم افنان : اليوم ماشيا للحفل امتاع العطر ومانعرفش حد غادي فنبيك تمشي امعايا لو مافهش ازعاج لكي سلوى : صح قصدك حتى انتي ماشيا ,, القيته الإعلان امتاعه عالفيس حنتقابلو غادي معناها افنان : تم ,,,, وصلت افنان للحوش خشّت لقت داليا امكسدة عالنقال وقاعدة في الصالة افنان : كيف حالك داليا : الحمد الله ,, افنان : كيف بابا مزال ماروّح داليا : اها مزال ,, اسمعي خالد حكالي كل حاجة نبّيك تعرفي راني في صفّك ولو احتجتي لاي شي انا حنصبّي جنبك افنان : بارك الله فيك داليا داليا : سمعت انّك ماشية للحفلة حتى انا ماشيا ,, نمشوو مع بعضنا شن رايك افنان : لا نبي نمشي متأخر امشي وتو نلحقكم ,,,,,, هذي الرواية للكاتب ديندار الوحيشي ,,,,,,, الساعة 5:00 عصرا افنان ادير في ميكب خفيف وشالها السواق للحفلة نزلت تبي اتخش للحفلة الامن : وين تذكرة الدعوة افنان فتّشت شنطتها افنان : اسفة انسيتها في الحوش بس هذيما اللي جوّا كلهم اهلي واصحابي الامن : معلش لو ماعندكش بطاقة دعوة مش حنقدروو انخلووك اتخشي نفس هذووما اللي قاعدين جنبك يلّا حوّلي من تلا الباب علي جيّة طارق يبي يخش للحفلة شافهم لما مخلووهش اتخش طارق بحّت في الامن امتاع الحفلة طارق : ماتعرفهش من هذي انتم هيا تفضلي خشي خلّك منهم " وخشوو مع بعضهم طارق وافنان " طارق : أسف علي ابصارتي هذكي اليوم ماكنتش نحسابك تاخذي الموضوع بجدية هكي افنان : لا عادي حكالي سامي قالي راهُ مش قصدة ينزّل من قدرك طارق : اتشوفي في هالناس كلهم اللي في الحفلة جيين هنا عشان يمولو مشاريعهم الصغيرة عالسوشل ميديا يعني الحفل هذا في صالحهم كلهم افنان :بس انحس في هالناس هنا كلهم ساطحيين ويتصنعوووو طارق : لا حرام عليكم مش كلهم ,, جيين ايديرو دعايات علي منتجاتهم افنان : تقدر ادير دعاية علي المنتج امتاعك بدل هالقطاف الفارغ حفلة وشوو قدام الناس طارق : آه مرات الواحد لازم يدفع من جيبه عشان يمشّي المنتج امتاعه نفس مادارت دعاء دايرة حفلة مش ادير دعاية عالعطر اللي هي اتوسق فيه وهكذا يعني افنان قعدت تضحك في ضحكة خفيفة طارق : شن اللي يضحك افنان : لا ,, بس ماتوقعتك اتفكر بنفس هالطريقة علي جيّة سامي سامي : سلام افنان وطارق طارق : اهلين سامي افنان : اهلين داليا جت امعاك أصلا مش قاعدة في الحووش سامي : آها جت وقاعدة غادي سمعت اتقولي ماتوقعتك هكي علي شن تحكوو افنان : لا نحكي علي طارق طلع تفكيره غريب بس يفكر بطريقة غريبة ماكنتش متوقعة هكي واحد معروف عالسوشل ميديا وهكي تفكيره طارق : توا تونحكي تو تزعلي حنمشيها وخلاص سامي :شن صار في التقرير امتاعك بعد خطرها افنان : لا ماصر شي .. ومش حينشروو أصلا جايّا اليوم عشان يقعد عندي شغل مع دعاء طارق : مدام حتشتغلي مع دعاء معناها حتشتغلي امعايا افنان : كيف قصدك انت ودعاء تخدمو مع بعضكم طارق : دعاء معروفة عالسوشل ميديا وانا شغلي كلّه عالسوشل ميديا .... جوو أصحاب سامي وطارق سيبتهم افنان علي خشّة سلوى للحفلة افنان : اهلين باهي اللي جيتي ,, انا توا كيف جيت سلوى : عمر مزطني ماحوت ماشالني افنان : هيا تعالي نبرموو اشوية في الحفلة سلوى : قوليلي شن صار في تقريرك قبل افنان : ماصار شي رفضوو حاليا نبي اندير تقرير علي عطر دعاء ومنتجات دعاء عليك وقت شين وخلاص ,,,,, جت دعاء للحفلة وكانُو كلهم يرجوو فيها وكلّها رحبت بيها دعاء : اهلين انستوو كلكم ونورتوو الحفلة ها من فيكم يبّي يشم العطر وقعدت اتبخ عالناس اللي كانُو اقريبيين وتشرحلهم عالعطر واديرله في داعية ,,,, كانت داليا مع صحبتها شافت دعاء مشت شووورها داليا : اهلين دعاء دعاء : داليا ليك وحشة وين اختفيتي داليا : اشوية اشغال دعاء : تمام تبينا تكسيدة في مطعم وانهدرزو علي راحتنا داليا : تمام ,, شن جو العطر دعاء : هاكي شمّي ونبي رايك بصراحة بختلها علي يدّها داليا : واو ,, تحفة دعاء : تحكي جد داليا : بنّته اتهبل وسمحة داليا شافت من بعيد افنان كلمّتها وشيّرتلها جتها شوورها افنان وسلوى داليا / افنان انعرفك دعاء دعاء انعرفك افنان افنان : اهلا سهلا دعاء : اهلين كيف حالك افنان : الحمد الله ,, انعرفكم علي سلوى صاحبتي هذي داليا اللي حكيتلك عليها داليا : اهلين سلوى سلوى : اهلين داليا ودعاء افنان : سلوى صحبتي من ايّام الجامعة " دعاء بحّتت في داليا " دعاء : ماكنتش نحساب عندك بنت داليا : لا مش بنتي افنان : لا مش بنتها داليا : هذي بنت زوجي خالد بس هيا زي بنتي دعاء : اها اوكي يعني خالد زوجك الثاني والزوج الأول أبو سامي شن اسمه داليا : احسين دعاء : مفروض ياداليا اللي يزوج مرة وحدة خلاص معش يزوّج "افنان بحتت فيها بطريقة مستفزة " افنان : يعني شن فيها لو ازوّج مرتين دعاء : يعني لان اللي ازوج مرة ثانية معناها التجربة الأولى فشلت عليش ايجرب مرة ثانية افنان : يعني اللي مانجحتش تجربتها الأولى خلاص تقعد في الحوش معش تزوج دعاء : لا مش قصدي انتي عارفة بنات جيلنا توا مش هامنا الزواج اهم شي عندنا الشهادة والعمل افنان : علي حسب اختلاف الأجيال " داليا حسّت الموضوع سخن بين افنان ودعاء هيا هيا نمشوو اشوية في الحفلة وغيرت الموضوع داليا " داليا : تعرفي انّ رئيس مجلة بنغازينو عيّن افنان تكتب التقارير الأسبوعية امتاع شغلك اكيدة توا مع الهرجة مش حتقدروو تتفقوو بس خوذوو ارقام بعضكم ونسّقو بعدها مع بعضكم دعاء : بكرة عندك حاجة قبل الساعة 5 العصر يا افنان افنان : لا فاضية دعاء : تمام بكرة حنتقابلو ياريت متأخرش عليّا ان شاء الله تو نحكي امعاك عالشغل هاكي تلفيوني وسجّلي رقمك خذت افنان تليفونها وسجلت رقمها عندها دعاء : تمام حندزّلك عالواتس اب بعدين افنان : تمام دعاء : شميتي العطر امتاعي افنان : لامزال لكن اكيدة حنشّمة اشوية اخرة دعاء : اوكي نستأذنكم عشان نبي انسلم علي باقي صحباتي " ومشت دعاء " داليا : وليّة مستفزة بكل سلوى : انا اللي مش شوري ونسمع فيكم رقالي من طريقة كلامها واستفزارها " علي جيّة سامي عليهم " سامي : امّي تعرفتي علي سلوى داليا : اها تعرفت حكتلي افنان انّها صحبتها من أيام الجامعة سامي : بس انا ماصدقتش في البداية افنان : عليش سامي :شخصيتكم مختلفة واجد عن بعضكم سلوى : شن حسيت باتجاه شخصيتنا سامي : واضحة قاعدة افنان :شن رايك انسيبك امعاها واتهدرز امعاها عشان تكتفش شخصيتها اكثر سامي : لا بس حسيت انّك شخصية وانّ سلوى شخصية مختلفة عليك واجد "علي جيّة مدير المستشفى شوورهم " سامي : اهلين دكتور كيف حالك مدير المستشفى : الحمد الله سامي : امنور المكان واللهِ مدير المستشفى : النور نورك " وقعد مدير المستشفى يبحّت في افنان " مدير المستشفى : أفنان " مابتش اترد عليه وقلبت وجها عليه وطلعت من المكان وسيبتهم " شافها طارق وهي طالعة من الحفلة مشى شوورها طارق : افنان افنان افنان : نعم كنك شن فيه انت الآخر طارق : لا شفتك طالعة متعصبة قلت نسالك بالك في حد ضايقك في الحفلة افنان : اسمحلي انحس في روحي تعبانة ولازم انروح طارق : المهم مكتبي مفتوح لك فاي وقت " بحّتت فيه وطلعت من الحفلة " وهي طالعة رن نقالها فتحت الخط افنان : نعم سلوى سلوى : كنك طلعتي افنان : واحد لزني من المكتب امتاعه تبيني انسلم ونحكي امعاه المشكلة السوّاق تبيله وما ايجي وسامي مش حيروّح توا مش عارفة شن اندير سلوى : خويا عمر قاعد اقريب من هنا يرجى مني في تليفون حنرن عليه ايجيك افنان : باه حتى هذا راي ,,,,, بعد هكي اشوية جا عمر ركبت مع للسيارة وشايلها شور حوشهم افنان : اوووف عمر : شكلك راقيلك معناها رئيس التحرير رفض ينشر التقرير امتاعك افنان : ياعمر فوت وغيّر الموضوع ماتحكلش علي قصة التقرير اليووم كلّه يحكووو علي نفس الموضوع عمر : باهي اسمعي منّي قبل وبعدها انغير الموضوع افنان : مانبّش نسمع منك شي عمر : حتّى لو يحل مشاكلك وتقريرك ينتشر في كل مكان افنان : شن عمر : الدّيب ويب سامعة عليه افنان : لا شن يطلع هذا عمر : هذا عالم افتراضي في الانترنت لكن السمحة اللي فيه مافش لارقابة لاشي يعني مافش حد يقدر ايجب حتى الموقع امتاعك ولايعرف الاي بي امتاع لاب توب امتاعك لما اتنزلي تقاريرك افنان : يعني كيف يساعدني في نشر تقاريري ممكن تشرحلي اكثر عمر : ليش رئيس التحرير رفض ينشر التقرير امتاعك افنان : لان قال مافش دليل ,, قالي صح كلام الممرضات لكن لازم نبي دليل عمر : لو لقيتي الدليل ,, شن تبي اديري افنان : حنزعق الدليل في وجه عمر : غلط غلط غلط افنان : شن اللي غلط عمر : الغبي بس اللي ادير نفس اللقطة مرّتين افنان : قصدك انا غبية .. عمر : اها لما اديري نفس اللقطة مرتين تقعدي غبية افنان وهي هازية : و باهي عمر: عشان ماتقعدش غبية لازم تسمعي الكلام اللي حنقولة لكّي توّا تاخذي تقريرك وتنشري في مكان آخر افنان : اها قصدك مجلّة ثانية عمر : لا غلط ,, أي مجلة ثانية او جريدة ثانية مجرد ماتعطيهم التقرير حيقوولوولك لاااااااااا افنان : باهي وين تبيني ننشره عمر : حنقولك بعدين اول شي عطيني رقم مدير المستشفى افنان : عليش تبي رقمة ,, شن تبيه فيه عمر : عشان نقدر نوصل للبيانات امتاعاته " طلّعت نقّالها عشان تعطي الرقم " افنان : شن تبي تستفيد من البيانات امتاعاته عمر : انتي عليش مستعجلة اصبري اشوية " وعطاته رقم مدير المستشفى " افنان : خلاص وصلنا للحوش ,, تمام خليني ننزل توا وخشّت افنان لحووشهم عزقت جاكتّها اللي كانت لبستها بعدها سمعت مسجّات صوتية واتس المسج الصوتي الأول سلوى : عارفك انّ اليوم كان يوومك شين وحسيت مزاجك مش اكويس المهم رد بالك اتشيلي في قلبك وتضايقي وعلى فكرة دعاء هذي مستفزة بكّل ماتعدلش عليها ومادوّرهش ياريت اول ما اتنووضي اتكمليني المسج الصوتي الثاني دعاء : مرحبا افنان انا دعاء ,, حبّيت انوقّضك علي موعدنا اللي بكرة عشان انا انحب ديما نعرف مواعيدي قبلها بيووم دزيّتلك موقع مكتبي اللي قاعدة فيه يلّا سي يوو المسج الصوتي الثالث طارق : انا طارق يا افنان معلش خذيت رقمك من سلوى حبّيت نطمن عليك ,, ان شاء الله اتكوني بخير وزي ماقتلك مكتبي مفتوح ليك في أي وقت المسج الصوتي الرابع كان عبارة عن رقم غريب داز تسجيل صوتي لمكالمة "مدير المستشفى : يعني توا انا حاطّك مدير تسويقي وندفعلك في افلوس عشان انفكر بدالك مدير التسويقي : لا دكتور محمود انا كلمّتك عشان نعرف كيف نصرّف مدير المستشفى : كلّم وليد توّا وقولّا لو نشر التهديد اللي امسجلينّا في المقابلة ليا مش حيشووف خير لا هو لا البنت اللي امعاه وهدّدة انّ مرات حنسحبو إعلانات المستشفى من مجلّته يعني معقولة اشوية ممرضات اديرونّا مشكله كيف هذي مافش قدامي حل كانن يبّن يفضحَنّا لو ماحولناهنش لعيادة اخرة راهوو دارن مشكلة والمواضيع اللي نفس هذينا صعب اتسكّتهن بفلوووس ,,,, في الوقت الحاضر مزالت افنان تكتب في التدوينة الأخيرة امتاعتها " حينا ينزاح بعض من الغموض الذي يعطي للحقيقة سحرها تجد نفسك امام اختبار جديد ,, فلم يعد مايجذبك لمواصلة صراع الحقيقة هو مالا تعرفه عن الآخرين بل ماتعرفه عن نفسك وهي كيف ستتعامل مع معرفته عنه , اكتشفت في تلك اللحظة انّ المعرفة في حد ذاتها هدف نبيل غير انّه يجب ان استخدمها بشكل لا يمثل النبل بصدق لتحقيق ذالك الهدف فلم اكن اعرف بعد هل لدي القدرة على ذالك ام لا " يتبع ,, | ||||
|
| |
|
14-04-18, 04:42 AM
| #3 | ||||
| #أفنان الحلقة 3 افنان كانت ادير في كبتشينو في المطبخ بعدها ركبت شوورر دارها عشان تبدا اتكمل كتابة التدوينة امتاعتها هيا تعالوو انشووفوو شن كتبت اليووم " أول مابديت نسمع عالحقيقة كنت متخيلّه انّها نفس الوردة الحمراء اللي تجذب الناس عشان تقرب منها واتشم عطرها لكن لما بديت نعرف الحقيقة فعليا بديت انشك انشوف الشوك اللي مختفي تحت أوراق هذه الوردة اللي يسبب الألم لكل واحد يقرب ويلمس الوردة وننسى انّ مصير الوردة تذبل ومش حيبقى منها الّا الشوك والألم لأن أحياناً كل اللي ناخذو من الحقيقة هو الألم " في الماضي افنان كانت مع سلوى في الكافيه في الصبح وسمّعتها التسجيل اللي جا من رقم غريب امتاع صوت مدير المستشفى دكتور محمود " مافش قدامي حل كانن يبّن يفضحَنّا لو ماحولناهنش لعيادة اخرة راهوو دارن مشكلة والمواضيع اللي نفس هذينا صعب اتسكّتهن بفلوووس " افنان : اتصدقي بعد ماجاني مسج دعاء وطارق جاني المسج هذا علي طوول شفت التايم امتاعهن اقرّيب من بعضهن سلوى : بس غريبة شن معنى جاك بعد مسج طارق ودعاء وخاصّة هما اول مرة يعبثولك واتس افنان : خطرها علي طارق عليش عطيتي رقمي سلوى : غصبن عني ,, تو قريب ايجي عمر تو نحكو بعدين افنان : وحنحكوو حتى علي موضوعك انتي وسامي سلوى ابتسمت : حاضر ,, بس اسمعي انتي ماعطتش عمر التسجيل صح افنان : لا ,, مزال سلوى : احتمال كبير يقعد هووو افنان : عليش لو هو ادزّه برقمه الشخصي عليش دازّة برقم غريب سلوى : والله مش عارفة بس هو شاطر في الحاجات هذينا بس رد بالك اتقوليله انا اللي قتلك لانّ رايح مستفز بكل افنان : معش فهمت شي انا سلوى : الوضع قعد ايخّوف ,,,,, كانُ طارق وسامي قاعدين في صالة الحديد " الجّيم " يتمرنووو طارق : شن مشكلتك مع افنان سامي : مش عارف ,, ممكن لانّها روّحت من لندن وجتنا في الحوش طارق : اوكان روّحت من لندن شن المشكلة سامي : نفس اللي كان برة وايجيك فجأة ويبّي ايغير كل حاجة في الحووش ومش عاجبهم جو البلاد وشرّيني يبو يغيروها وهمّا مش عارفين راسهم من كرعيهم طارق : تمام امعاك بس انحس افنان شاطرة وفاهمة مش بالسذاجة اللي تحكي عليها انت سامي : توا انا قلت سذاجة ,, ماتقولش كلام انا ماقلتش أفنان اكويسة بس مش واقعية اللي يبّي ادير بزنز في مجال نفس امتاع افنان لازم يخلّي المبدأ في الحوش افنان يمشي جوّها مع دعاء اكسسوارات مكياج عطور واتسوق افضل بس بزنز وصحافة تنسى خير طارق : باهي شن عندك عالغداء سامي : لا ماعندي شي ,,,,, جا عمر يبّي يروح بسلوى من الكافيه افنان بحّتت في عمر افنان : هاك اسمع مافش قدامي حل كانن يبّن يفضحَنّا لو ماحولناهنش لعيادة اخرة راهوو دارن مشكلة والمواضيع اللي نفس هذينا صعب اتسكّتهن بفلوووس " عمر : كيف حصلّتي الدليل هذا سلوى : تستعبط انت ولا شن عمر : نستعبط كيف سلوى :يعني مش انت اللي دزّيته عمر : لا الجو هذا بعيد عن مستوايا بكل افنان : باهي عليش امس طلبت مني رقم مدير المستشفى عمر : عشان نقدر نوصل لبياناته وانا فعلا وصلت لبياناته لكن المشكلة مش هنا المشكلة انّ نفس البيانات مش امخزنة عالنقال يعني خافي بياناته هذا يدل على انّ هو شخص خطير يعني عارف انّ مرات أي حد يخترق معلوماته سلوى : عليك قصة عمر : أحسن حل انّك تنشر المقال امتاعك بالطريقة اللي قتلك عليها اليووم او في اقرب وقت " افنان معش عرفت شن اترد " سلوى : حنكملو كلامنا بعدين توا مستعجلة هيا شيلني افنان : انا اليوم عندي مقابلة مع دعاء ونبي اندير تقرير علي بعض منتجاتها بالك اتجووني غادي بعدين في الاستديو اللي قاعدة فيه اتروحو بيا وانهدرزو علي راحتنا سلوى : تم اوكي ,, هيا عمر صبّي ,,,,, بعد ما طلعوو من صالة الحديد " الجيم " مشوو لمقر الشركة طارق وسامي همّا اثنين نفس الشركة حتى المكتب امتاع كل واحد فيهم في نفس الممر طارق وهو في المكتب فتح عالواتس وبعث رسالة ,,,, افنان وهي اتراج في التقرير امتاعها سمعت صوت مسج الواتس فتحت الرسالة طلعت من طارق " شن رايك اتجيني للمكتب اليوم " شافت الرسالة وردّت النقالة في مكانه ,,,,,, "بعد مرور بعض الوقت" ،،،،،، نزلت من دارها افنان ترجى في السوّاق لقت داليا لابسة افنان : انتي طالعة داليا : اها طالعة توا ,, تبّي السواق افنان : اها عندي مشوار داليا : باهي هيّا شن رايك نمشو مع بعضنا افنان : بس خلّي السواق يحطني انا قبل داليا : حاضر ,, اقل شي انهدرزو اشوية مع بعضنا في السيارة ,,,,, داليا : تعرفتي علي حد امس في الحفلة افنان :لا ماتعرفت ,, يعني لازم نتعرف علي حد داليا : مش لازم ,, بس مدام تبي اتخشي مع دعاء لازم حتعرفي علي ناس اخرة اتساعدك في مجال عملك افنان : والله شن انقولك مانكذبش عليك اللي امس حسيتهم متصنعين واجد انحس في روحي مش لازم نتعرف عليهم وانخش فيهم داليا : لا غلط يابنتي لازم اتخشي في الناس واتخالطيهم في المجتمع افنان : باهي شن حيفيدني الشي هذا داليا : كيف شن حيفيدك ,, حيفيدك في شغلك طبعا افنان : انحس انّي مش حنطلع منهم الا بكلام صبايا داليا : كلام الصبايا هذا هو اللي ينتشر عالفيس ويندارله هشتاق افنان : ممكن كلام صح ,, حاليا حنركز مع دعاء وخلاص داليا : حتى لو ركزتي مع دعاء ,, ورزكزتي في مجالك امعاها حينتشر وتقعدي متفوقة ,,,, طارق مشى للمطعم وجاب ثلاث وجبات غداء وحطّهن في الطاولة اللي في مكتب امتاعه وفتلك الجو تلاهن ,, اميّة ومشروب ..... داليا : اسمعي يا افنان ,, الحياة توا اختلفت مش نفس قبل ما اتسافري لازم اتحاولي انّك اتأقلمي مع التغيرّات هذينا ولازم حيصير بينك وبين الناس تصادم هذا شي طبيعي يعني نبيك اتعوّدي انّك تاخذي الأمور بكل هالبساطة افنان : فجأة قعد كلامك نفس كلام بابا داليا : عشان هكي ازوجّنا ,, الاتفاق مهم في الزواج عالعموم انا عارفة انّ موضوع امّك متحسسة منّا مزلتي وفي بعض الناس يبووك تنسي افنان : مستغربة من الناس اللي يبوني ننسى حاجة كيف هكي داليا : ماتفهمنش غلط ,, مافش حد يبيك تنسي بس انا نبيك اتعيشي حياتك الطبيعية لايمكن انّي نطلب منّك انّك تنسي حاجة كيف هذي ,, راجي كيف صار افنان : شن داليا: هذا نفس طريق شركة اللي يخدم فيها سامي انتي ماشيا مكتب سامي افنان : لا ماشيا الطارق عشان عندي معا كم شغل داليا : انتي عارفة انّ هما قاعدين في نفس المبنى حتّى مكاتبهم امقابلات بعضهم افنان : اها اوكي داليا : باهي شن حتجي الحفل الخيري بكرة ,,, وصلت افنان للشركة امتاع طارق وقعدت تبرم امعا طارق ويورّي فيها اقسام الشركة التصوير الصوت كل شي في الشركة طارق : هذا استديو التصوير ,, اغلب المشهورين عالسوشل ميديا ايجي يصوّروو هنا افنان : اها حلوووو بكل طارق : هيا انكملوو باقي الجولة افنان : ياريت طارق : هذا مقر تسجيل الصووت وقعدوو يبرموو لين وصلوو للمكتب طارق : هذا المكتب امتاعي افنان : واو ماشاء الله حلوو مكتبك " وهي تبرم في المكتب افنان طارق خذا الكاميرة طارق : افنان افنان بحّت وراها طارق صوّرها افنان : كنك صورتني طارق : هذينا اهم طقوسي أي حد ايجيني اول مرة للمكتب لازم انصوره وانعلقّها عندي افنان : ان شاء الله تقعد صورة حلووة " كان داير نفس لوحة الإعلانات يعلق فيها الصور الصغار " الكاميرة اللي صور بيها افنان نوعيتها اطلّع الصورة في نفس الوقت " وعلّقها علي لوحة الإعلانات مع باقي الصور اصغار افنان : عليش داير ثلاث وجبات عالطاولة في حد امعانا طارق : اها كلمت سامي اشوية اخرة جي انتي عارفتيه صاحبي ومكتبه جنب مكتبي افنان : تمام طارق : شن جو الشغل امعاك افنان : مفرووض بعدين حنمشي لدعاء عشان انسّق امعاها وانشوف شغلها ’’’’’ دعاء قاعدة في المكتب امتاعها في الاستديو زميلها في العمل : أستاذة دعاء وصلت امانة ليك دعاء : بارك الله فيك شكرا خذاته وفتحتها وكانت عبارة عن طاقم فضة كامل دعاء مسكت السلسلة امتاع الرقبة وقعدت إتّأمل فيها ,,,, كانت داليا قاعدة في السيارة ورنّت علي رقم معين فتح الخط داليا : ايوا ,, انا قربّت منك خلاص ,, يلّا باي وسكّرت الخط ,,,,, كانُو ياكلو مع بعضهم سامي وافنان وطارق في المكتب طارق : كيف كانت حياتك في لندن افنان : انا ماكنتش عايشة في لندن نفسها كنت عايشة في ضاحية من ضواحي لندن حياة عادية اتنوض بدري ترقد بدري نمشي للجامعة ,, ممكن كنت انخاف من أيام الامتحانات امّا الباقي حياة عادية وحلوة حتى الناس غادي بعد فترة يتاقلمو ويتعودوو عليك سامي : فعلا موضوع الضواحي اكثر من مشروع درناه في كم قرية اتحس الناس يحبوو بعضهم ومتفاهمين عالآخر واتحس انّ اهمومهم اقل من اهمووم اللي يسكنو في المدن نفس بنغازي وطرابلس ومصراته والزاوية وغيرهن حياتهم بسيطة وبالهم واسع طارق : الموضوع هذا موضوع عالمي مش لندن بس تقريبا كل الدول هكي اللي يسكنو في الضواحي افنان : توا لازم نستاذنكم ماشيا لدعاء سامي : هيا تو انشيلك انا افنان : لا تمام تو نمشي مع السواق سامي : لا السواق شايل امّي لمشوار مافش حد يوصلّك ,, حنوصلك انا ,, يلّا طارق : بكرة راكم اتغيبو في الحفل الخيري ,,,,, سامي هوو وافنان في السيّارة شايّلها شور دعاء سامي : سمعتي عالحفل الخيري اللي بكرة افنان : اها سمعت ,, لكن مش عارفة هل حنمشي ولالا سامي : لا ننصحك تمشي خير افنان : عليش سامي : امشي وتعرّفي علي وحدة اسماها ولاء هي صاحبة الحفل وصاحبة امّي اخرة ولّية نفس هذي حتفيدك واجد في شغلك مع دعاء افنان : معش فهمت انت اتساعد فيا ولا هازي عليّا ,,,,, كان عمر قاعد في الدار امتاعة مليانة لابتوبّات وهكر وبرامج اتقوول دار واحد يخدم في الاستخبارات قاعد عاللاب توب ويخدم عليه ,,,,,, وصلت افنان في الاستديو اللي قاعدة فيه دعاء كان في واحد يصوّرفي دعاء بالاكسسوار اللي تبي تعرضه للناس اكثر من صورة عشان ادير دعاية عالمنتج امتاعها وكانت ترجى افنان وبدت اتمل لأن دعاء طولّت بكل وهي كل مرة واخذة وضعية لصورة معينة " بعد مرور نص ساعة " جت سلوى للإستديو حتّى هيا سلوى : كنها راقيلك ,, كنا وجك هكي افنان : هذي مزطتني بكل اكثر من ساعة وهي إتصور شن هذا وكل مرة واخذة وضعية سلوى : تحكي من جدك افنان : وحق ربي اول مرة انشوف وحدة هكي نوعيتّها سلوى : تحمليها وخلاص بعد كمّلت الصور جت شورهم دعاء دعاء : اهلين بنات , اسفة عطلتك يا افنان افنان : لا عادي ,, على راحتك دعاء : انا كمّلت شن رايك نحكوو في الشغل افنان : ياريت دعاء : خلاص هيا تعالن انقعمزو غادي خير ,,,, مزال عمر قاعد اللابت تووب يخترق في حاجة معيّنة وحطّله ملفات في الفلاش رن علي رقم غريب بدون اسم بس هو عارْفة من " فتح الخط عمر " ألووو ,, لالا ساعة بالكثير وتقعد كل شي واتية حملت البيانات كلهن ,, ساعة وانكوون عندك " وسكّر الخط عمر .... هذه الرواية للكاتب ديندار الوحيشي ,,, افنان طلّعت مفكرتها عشان تبدا تكتب في كلام دعاء افنان : شن تبي ايكون مُحتوى الصفحة امتاعك دعاء : طبعا هي صفحة أسبوعية ونبيها يطلع فيها كلامي انا بس حنحكي عالميكب والاكسسوارات بطريقة مختلفة مش نفس باقي الصحف وهذا يعتمد عليك انتي يافنان افنان : تمام ,, وشن أخرى دعاء : يعني نبي اللي يقرا يتسفيد مانبش نظام شاف دعاية عالصحيفة وخلاص وحنقولو بعض النصائع لست البيت انّها لازم تهتم بنفسها وبجمالها وهكذا يعني وانتي لو عندك أي اقتراحات قوليلي عادي افنان : لا تمام حنمشي علي كلامك ’ باهي معناها اول حاجة حنبدا نكتبها عالاكسسوارات اللي كنتي اتصوري بيهن امبدري اشوية دعاء : توا اللي نبيك منك تهتمي بالاكسسوارات وتاريخهن وديري سيرش عالنت وتقري وتثقفي اكثر واكثر لانك خلاص حتبدي امعايا باهي ماقتّلش وليد كم دايرّلك فناء : مزال ما اتفّقنش علي حاجة دعاء : طبعي حتقعدي تاخذي افلوسك منّي لانك حتقعدي تخدمي امعايا افنان : بس انا نبي نقعد صحافية مانبّش نقعد شن انقول مثلا دعاء : مش حتلقي اسم معين ماشي امعاها مش حتكوني سكرتيرا لكن ممكن كاتبة محتوي او محررة ومتخافش مش حنقصر امعاك وحتاخذي باياتك كاملات وبزيادة افنان : خليني انفكر ,, توا اهم شي عندي انديرلك اول تقرير علي اكسسواراتك دعاء : تمام ,, بكرة حتجي الحفل الخيري ولا لا افنان : سمعت عليه بس مرات مش حنمشي دعاء : لا ,, لازم اتجي خير ,, عشان اتعرفي عالناس اللي غادي وبالذات في وحدة اسماها ولاء حتفيدك واجد افنان : ساهل دعاء : حتى انتي ياسلوى لو تبي اتجي عادي تعالي سلوى : ان شاء الله دعاء : خلاص انا تأخرت لازم نمشي توا كان خاطري انطوّل امعاكم اكثر واكثر افنان فكّري في كلامي لو تبي تخدمي امعايا رسمي قوليلي وانا نتمنى انك تخدمي امعايا لانك مش حتلقي عرض نفس عرضي بكرة حناخذ ردّك افنان : ان شاء الله دعاء : سي يو وطلعت دعاء من الاستديو امتاعها سلوى : عسولة دعاء افنان : عسولة قالت سلوى : باهي حصلتي عمل علي حالك افنان : نقرى في لندن عشان انجي اندير تقرير عالاكسسوارات شي يضحّك سلوى : راكي تنسي قالت لكي ديري سيرش افنان وهي تضحك : عالاكسسوارات اخرة سلوى : نصيبك هذا الله غالب افنان : بس شن قصة الحفل الخيري اللي ايجي اليوم يحكيلي عليه ويقوولي امشي وتعرّفي علي ولاء سلوى : بكرة حنعرفو عادي افنان وهي تضحك : خلاص هيا تعالي انديرو سيرش عالاكسسوارات سلوى : هيا ,,,,, كان عمر في السيارة يرجى في سيارة معينة عشان يعطيه افلاش فيه ملفّات جت السيارة جنبه واحد طلّع يدّة من روشن السيارة وخذا الفلاش من عمر ,,,,, بعد مرور 10 دقايق جا عمر عشان يرّوح بيه افنان وسلوى وركبن مع في السيارة سلوى : كنك طوّلت عمر : كان عندي موضوع بس افنان : شن حيصير في التسجيل اللي وصلني زعمك نعطي الوليد وخلاص ولّا نعطي لجريدة اخرة عمر : انسي انّك تنشري عالمجلات والجرايد لانهم كلهم حيقولوو لالا سلوى : يعني مش حتطعي الدليل لوليد يا افنان افنان : والله مش عارفة ياسلوى ,, وانت ياعمر تبي اساعدني ولا اتسكّرها في وجي عمر : عطيني فرصة نحكي قبل افنان : باهي تفضّل عمر : اللي حيصير حاليّا حنعزقوووه في البحر افنان : بحر كيف ,, شن تحكي انت عمر : البحر هو الموقع الديب ويب انتي حتكتبي التقرير واتحطي مع التسجيل الصوتي وحنديرلك اسم وهمي وباسورد وانزّلوو عالديب ويب حينشهر بدون مايعرفوو منّك افنان :بس هذي تعتبر جريمة ياعمر عمر : الجريمة لو كانت باسمك الحقيقي لكن انتي حتنشري باسم وهمي سلوى : خايفة الموضوع يكبر واديرنّا مشاكل عمر : الله غالب ,, هذي الطريقة الوحيدة اللي نقدرو ننشروو بيها افنان :باهي ياعمر الموضوع هذا مش حيضر باهلي ولّا أي حد نعرفة عمر : مافش حد حينْضر مدام الموضوع ماطلعش منّي ومن سلوى ومنّك انتي لو حد عرف غيرنا معناها انتي حتملي المسؤوليّة افنان : معناها عالحالة هذي تبيلي اسم وهمي ننشر بي سلوى :شن رايكم في المحقق كونان افنان : والله ماوقت ابصارتك عمر : سمّيه المدّون افنان : المدوّن عمر : سهل في الكتابة افنان : خلاص معناها حنبدو في التدوينة الأولى عمر : تم سلوى : خايفة تكون اول تدوينة واخر تدوينة افنان : لا ,, انا حنختار امتى اتكون التدوينة الأخيرة ,,,,, كان طارق في المكتب قاعد ويتأمل في صورة افنان بعدها حس ان الوقت تأخر طلع من المكتب و حط صورة افنان في دفتر امتاعه وسكّر المكتب كان وقتها مزال سامي قاعد في المكتب امتاعه ماكمّلش شغله طارق وهو طالع يمشي في الممر طاحت صورة افنان بدون مايفطن سامي شاف طارق وهو طالع من المكتب طلع وراء " يبّي يكلمّة ويلحق عليه لما طلع شاف صورة طايحة في الممر طبّس عليها شافها طلعت شور افنان استغرب وخذا الصورة وحطّها في جيبه ,,,,, ,,,,, وصلت افنان لحووشهم خشت لقت داليا قاعدة عاللاب توب افنان : هاي داليا : اهلين ,, شكلك مبسووطة اليوم كيف كان يوومك ,, شكلك تاقلمتي مع دعاء افنان : الحمد الله يووم حلوو نوعا ما وكل حاجة مشت تمام وكيف بدينا مع دعاء حنشوفو شن ايصير داليا : تمام اهم شي ديما خليك مبسوطة وجوّك رايق افنان : حاضر داليا : باهي نسألك شن قررتي تمشي للحفل الخيري اللي بكرة ولالا افنان : واو ناس واجدة دولتي عالحفل الخير وحكولي علي وحدة اسماها ولاء داليا : ولاء هي صاحبة الجمعية اللي راعية الحفل مش عارفة كيف انسيت نحكيلك علي ولاء ولاء معارفها واجد وممكن حتساعدك في شغلك لازم اتجي بكرة واتعرّفي عليها افنان : اوكي , حنشووف ,, تصبحي على خير داليا : قدامك كل خير وركبت شوور دارها افنان ,غيرّت دبشها وفتحت اللاب توب امتاعها وقعدت تصفح عالانترنت واتشوف في الاكسسوارات لاب توب امتاعها اخترق وتهكّر وطلعت رسالة مكتوبة عالشاشة " بكرة أسألي ولاء عن الطفل الأسمر اللي اعيونه زرق " استغربت افنان وخافت """"""" نظن انّ كشف الحقيقة عمل بطولي لكن قبل ماتمشي في طريق الحقيقة واتحاول تكشفها لازم اتكون متأكد إنّك حتأذي ناس واجدة المشكلة مش في كشف الحقيقة انما المشكلة في اللي يتألم بسبب ماكشفته من الحقيقة فهل انت حاسس بيهم وبألمهم ممكن مستعدين نتحملو الم الحقيقة وتأثيرها عالناس مع انّ الشعور بالنّاس في حد ذاته هو العمل البطولي يتبع ,,, | ||||
|
| |
|
14-04-18, 06:58 PM
| #4 | ||||
| #أفنان الحلقة 4 ولازالت افنان تحكي لنا في تدوينتها الأخيرة ماذا حدث لها من أحداث بالتفصيل في الماضي سلوى جت لحوش افنان في الصبح بدري بكل قبل ماتمشي لعيادتها وقعدت مع افنان في الدار وقعدوو يحكوو مكالمة فيديو باللاب توب مع عمر عمر : عليك معيلة قاعد قدام الحديقة اللي جنب حوشكم ونحكي امعاكن اتصال فيديو افنان : والله اسمحلي غير اليوم ماعندش مزاج نطلع وجوّي متنكد وخايفة اشوية وانفكر في مشية الحفلة امتاع ولاء عمر : تي انبصر امعاك عادي افنان : توا خلينا نحكوو في المهم قبل مانبدو نحكو في التدوينة الأولى نبي نعرف شن صار امس من يطلع هذا اللي اخترق اللاب توب امتاعي وقالي اسألي ولاء قعدت مش قادرة نرقد وخايفة سلوى : انا انقول لازم انوقفوو كل شي اقل شي نعرفو من يراقب فينا عمر : مستحيل نعرفوو من هوو لين هو يعرّف عن نفسه كان هذا انديرو ما انديرو اتسحالة نعرفو من يكفي انّ قاعد يساعدنا افنان : كيف يعني يساعدنا عمر : يعني مرات يبيك تعرفي حاجة علي ولاء بعثلك التسجيل الصوتي قبل ,, توا عطاك تلميح علي ولاء افنان : امس كلهم سكنولي اللي يقابلني يقوولي امشي للحفل الخيري وتعرّفي علي ولاء داليا سامي طارق دعاء حتّى بابا قالي تعرّفي علي ولاء ومرات يقعد واحد من هذيما هوّا اللي يراقب فيّا هو اللي يعطي فيا معلومات دزلي مقطع صوتي التسجيل وامس قصة الطفل الأسمر اللي اعيونة زرق عمر : كل شي وارد عادي لكن مزلنا مش عارفين شي اهم شي توا لازم اتكملي التدوينة امتاعك عشان انزلوها عالديب ويب وخليك عادية ومتخلش حد يشك فيك سلوى : صح حتى شغلك مع دعاء حيفيدك حيقعد كفر مناسب لكّي افنان : انا اليوم حنقابل دعاء في الحفل وحنقوللها اوكي انا موافقة نخدم امعاك عمر : حتى هذا راي افنان : خلاص ياعمر نبّيك اتشوفلي قصة ولاء والطفل الأسمر بالك تطلع بحاجة ونعرفو شن الموضوع عمر : حاضر ,,,,,, كانُو طارق وسامي قاعدين في الشركة يهدرزووو سامي : شكلك امخوّط عالزمّار من ورانا طارق : كيف سامي : قصدي انت صاحبي وزميلي في العمل مش حنلقى واحد كيفك بس ليش اللف والدوران طارف : فيش تحكي انت " سامي طلّع الصورة امتاع افنان من جيبة " طارق : شن ادير هذي عندك سامي : القيتها طايحة في الممر قدام المكتب امتاعك طارق : انت عارفني يا سامي أي شخص اول مرة يزورني لازم انصّورة وانحطّها عندي في لوحة الذكريات سامي : علي أساس نعرفك اليوم ولّا امس كلامك مايمشش عليا طارق : توّا بالله عليك شايفني فاضي للقطاف اللي في راسك سامي قعد يضحك ومبتسم سامي : والله فرحتلك طارق : انا اللي فرحتلك ,, بعقلك اللي ماشي البعيد ,,,,, عمر قاعد قدام حوش افنان ,, يرجى في سلوى تنزل يلعب بالنقال جاته رسالة مكتوب فيها " لازم نتقابلوو ضروري " ,,,, سلوى : والله ماني عارفة هل الحاجة اللي انديرو فيها صح ولا غلط " افنان بحّتت فيها وقعدت ساكتة " سلوى : خايفة عليك واجد افنان : الحق انا مش هامني اذا كان صح او غلط حلمي من وانا اصغيّرة نقعد صحفية نكتب تحقيقات ومقالات وننشرها للناس يعني من حق النّاس انّها تعرف الحقيقة وهذا اللي قاعدة انا اندير فيه توّا تعالي هنا بعد خطرها شن موضوعك مع سامي "سلوى تحشمت,, وجها قعد حمر" افنان : شن قصدك اتحبّيه سلوى : لا مش قصة انحبّة افنان : هو صح عايش امعايا في نفس الحوش لكن اكيدة مش حنقولة شي احكيلي لو في حاجة سلوى : نكذبش عليك انا مش من النوعية اللي ننعجب بواحد بسرعة ويخش خاطري ,, لكن سامي عنده إيجابيات واجد في شخصيته و في حياته يعني الحق مانش عارفة شعوري اتجاها بالزبط " رن نقال افنان شافت الرقم طلع دعاء " افنان : الوو دعاء : اهلين ,, اليوم حنجيك تو ناخذك مش نمشو مع بعضنا للحفلة افنان : تمام ,, بس نسالك عليش نشرتي تقرير الاكسسوارات ونحنا مزال ماتفقنش عليه دعاء : لاني حسيته سمح واكويس ,, تو لما نتاقبلو تو نحكو افنان : تمام اوكي دعاء : باي " وسكّرت الخط دعاء " ..... نزلت سلوى ركبت مع عمر عشان يشيلها للعيادة اللي تخدم فيها سلوى : انت مش خايف من الحاجة اللي انديرو فيها نحنا توا عمر : لا مش خايف سلوى : قصدي من مساعدتنا لافنان وهكي عمر : انتي خايفة ولا شن سلوى : يعني ,, مش خايفة واجد ,,,,,, لما طلعت سلوى مع خوها عمر نزلت افنان شور المطبخ لقت داليا وباتها قاعدين يفطرو في المطبخ افنان :صباح الخير داليا : صباح النوور ,, انديرلك امعايا حليب وشاهي افنان : ياريت " أفنان بحّتت في باتها " افنان : اليوم ماشيا الحفل مع دعاء بات افنان : ماشاء الله حتخشي من باب الناس المهمة افنان : لا مافكرتش هكي ,, لكن نبي انحاول نبتعد علي شغل وليد خصوصا دعاء توا تبيني نقعد المحررة الخاصّة امتاعتها داليا : احسن مادرتي فكرّتي صح ,, اتريّحي راسك شفته المقال امتاعك روعة تحفة ,, انقانك ابداع في الكتابة استحالة دعاء تلقى وحدة نفسك مثقفة ومتعلمة ولا حتّى في الاحلام اتحصلها افنان : احرجتيني وقعدت افنان تفطر واتهدرز مع داليا وباتها ,,,, كان مدير المستشفى الدكتور محمود قاعد عند طارق عشان يبيه اديرله دعاية عالمستشفى شاف صورة افنان قاعدة في لوحة اللي في مكتب دكتور محمود : اكويس افنان عرفت كيف تشغل روحها احسن ماتقعد تضلم في الناس وتقطع ارزاقها طارق : افنان من قصدك دكتور محمود : افنان بنت خالد ’’ زوج ام صاحبك سامي طارق : كنها شن دارت دكتور محمود : هذي اللي ضملتني في المستشفى وطلّعت عليّا تهمة التحرّش طارق : بس انت ليش مضايق انت عارف روحك اكويس وماشي تمام في عملك دكتور محمود : فعلا صح انا ماشي تمام في عملي بس الناس في وقت توا قعدوّ يشككوو في الأشخاص الاداريين ورجال الاعمال حتى لو كانو ماشيين تمام وماعليهم شي طارق : اللي عمله سليم ماشي تمام مش مستحق الحد يدافع عليه بالعكس الناس اللي تقعد اتبرر ديما والدافع علي رووحها هي اللي عندها حاجة غلط ودسّتها عالنّاس دكتور محمود : مش كل بِزْنز ماشي تمام ياطارق طارق : مافهمتش ,, كيف يعني دكتور محمود : لو كان كل بزنز ماشي تمام راهُو ماجيتك وقتلك ديرلي حملة تسويقية للمستشفى طارق : بس الدعاية والاعلان ماعندهش صلاحية بالموضوع اللي تحكي عليه يعني مفتووحة عادي مافش رقابة معينة دكتور محمود : بس قول الكلام هذا للناس والصحافيين طارق : الناس والصحفيين ,, هذيما قصتهم قصة طويلة أسألني عليهم أنا شوف هذا البريزنتيشن اللي حنديرو عالسوشل ميديا للمستشقى تويتر انستقرام فيس دكتور محمود : على بركة الله ..... هذي الرواية للكاتب ديندار الوحيشي ,,,,, الساعة 8:00 مساءا كانت دعاء ماشيا شوور افنان لحووشهم مش تاخذها للحفلة ,,,,, داليا اتجهزة لنفسها للحفلة الخيرية ,,,, وافنان حتى هي في دارها اتشوف شن تلبس للحفل الخيري وترجى في دعاء اتجيها في أي وقت وهي تلبس سمعت صوت مسج عالواتس مسكت النقال اتشوفه طلع من طارق " مبروك " دزتله هي مسج في نفس الوقت " مروك عليش ,, انتمنى يقعد آخر مقال ينكتب اسمي عليه من قال نقعد نكتب عالاكسسوارات " دزلّه طارق مسج واتس " حتى لو اكسسوارات حتعرفي انّ هي خطوة عظيمة مع الوقت " دزلته افنان مسج " شن اللي يخليك اتقولي هكّي " رد عليها مسج طارق " اليوم كنت امقعمز مع مدير المستشفى وقرا التقرير امتاعك ,, إعجبه التقرير فاكيدة مبسوط وسامحك ومع الوقت حينسى المشكلة اللي بينك وبينه وحتقعد علاقتكم احسن من قبل " حطّت افنان نقالها عالطاولة وقعدت اتجهز في نفسها ,,, وبعدها بعثت التقرير والتسجيل الصوتي لعمر ,,,,, وصلت دعاء في افنان وخذتها بالسيارة ومشت بيها شور الحفلة وهي في السيّارة فتحت اسناب شات دعاء وقعدت أتصور في فيديو دعاء : اهلين متابعييني الحلوين ,, حبيت انقوللكم انّي توا ماشية الحفل خيري وشوفي من امعايا هذي افنان المحررة الجديدة لاخباري عارفيّنا التقرير اللي اليوم امتاع الاكسسوارات هي اللي كتباته ,, يلّا باي " افنان اتبحّت فيها وفي حركاتها دعاء : كنك شن فيه أفنان : ماتوقعتش انّك حتصوريني دعاء : ياهبلة الشهرة ماستأذنش حد وبعدين شن فيها ,, ولّا ماتبّش حد يعرفك اكيدة عندك ناس في محطيك او جيرانك واصدقائك يعرفووك شن فيها لو قعدتي مشهورة اكثر واكثر افنان : بس انا مش هامني الشهرة دعاء : يافنان نحنا في 2018 لو ماتبش حد يعرفك ابني كهف واقعدي فيه واعزقي نقّالك افنان : طريقة تحليلك للامور اتخلي فيّا نتفاجئ اكثر واكثر اللي ايشوفك هكي يقوولك انتي اصغيرة ولا انتي اتصغري في روحك بلعاني دعاء : التجارب مدخلّهنش بالعمر بعدين وراء الميكب والشكل الخارجي في عقل افنان : باهي ليش اتحاول ادسّي حقيقتك او عقلك دعاء : عشان لو مادسيّتش عقلي مش حنلقى شغل ولا لقمة عيش لحياتي من واحد خاطرة يشتغل مع وحدة مسوقة منتجات وعندها عقل واتفكر مافش ,, كلهم يدفعلونا في افلوس عشان مانجادلهمش ولا اناقشو فيهم نسمعو في الكلام وانقولو حاضر همّا يبونا انكوونو حطّين ميكب ولابسات احسن لبس شعرنا طويل جسمنا اكويس نبتسم للكاميرة وبالنسّبة عليش داسّة شخصيتي او عقلي كل شخص فينا عنده حاجة داسّة عالاخر انا عندي حاجة دسّتها عليك الصوّاق امتاعي عنده حاجةّ داسّه عليا وانتي عندك حاجة اكيدة دسيتيها عليّا مافش حد واضح ومكشووف مية في المية افنان : مش الشرط الناس كلهم يادعاء دعاء : خُلاصة الموضوع مافش واحد واضح مية في المية حتى انتي يا افنان تبي تقنعيني انّك مش داسة حاجة علينا افنان : لا مش داسّة حاجة دعاء : خلاص قريب نوصلووو وحنكملوو كلامنا بعدين توا اهم حاجة عندي شن قررتي في عرض الشغل امعايا افنان : لا خلاص قررت نخدم امعاك دعاء : احسن خبر سمعته منّك ,, اول طلب نطلبه منّك خلي امعاك الطاقم هذا الفضة في شنطتك لمّا انقولك طلعيه طلعيه افنان : حاضر ,,, كانت داليا واصلة في الحفلة وقاعدة مع ولاء " ولاء من جيل داليا من ناحية العمر " ولاء وداليا يستقبلوو في ضيوف الحفل الخيري ,,,, وكان قاعد طارق مع أصحابه في الحفلة ,,,, وكان سامي يهدرز مع سلوى في الحفلة ,,,,,,, علي جيّة دعاء وافنان داليا : اهلين دعاء انستي دعاء : اهلا داليا كيف حالك ولاء : اهلا انستي ونورتي الحفل دعاء دعاء : النور نورك داليا : اهلين افنان,, انعرّفك علي افنان ياولاء افنان : ماشاء الله لاقوة الا بالله الخالق الناطق فريدة اهلين كيف حال افنان : الحمد الله ,, دعاء : من فريدة هذي افنان : فريدة ماما الله يرحمها وداليا : شن رايك اتصورينا بالسناب امتاعك يادعاء عشان جمهوورك يتبرع دعاء : حاضر طلّعت نقّالها دعاء وقعدت أتصور في فديو سيلفي وتعرضي في عالاسناب وطالع امعاها في الفيديو داليا وولاء دعاء : هاي متابعيين الحلوين انا حاليا قاعدة مع المُنظمين للحفل الخيري ناس ذووق بكل اكيدة متابعييني حيبيَضوو وجهي ويتبرعووو للجمعية باااااااااااي ولاء : تبيلي تقعميزا مع بعضنا وانهدرزو علي راحتنا يافنان افنان : ان شاء الله , اتخف الزحمة ويهدا صوت الموسيقى حنهدرزو مع بعضنا دعاء : افنان تعالي اشوية نبيك وخذتها دعاء من يدّها ومشت بيها وقعدن يبرمن في الحفلة دعاء : اول حاجة نبيها منّك نبيك اتشوفي من اللي حاضرين لابس أي نوع من اكسسواراتي اللي أعلنت عليهن من قبل عشان انصوّرها بالاكسسورات افنان : في السيارة كنتي فيسلوفة توا قعدّتي ماديّة دعاء : ياحبيبتي الفلوس هي اللي اتوفرلي رفاهية انّي نتفلسف بعدين لمّا يقعد المنتج امتاعي قاعد بين وحدة من الحضور في مكان كيف هذا حتجي دعاية سمحة افنان : حاضر ,, حنشووف وعدّت وسيبّتها دعاء وقعدت اتبحّت افنان في الحضور واتشوف من لابسه اكسسوار شافها من بعيد طارق اتسأذن من أصحابه ومشى شورها طارق : اهلين افنان : اهلا طارق : فيش اديري انتي قاعدة اتحبتي في كل مكان شكلك ناوية تسرقي المكان افنان : بلاش تشفيط " تلقيح " اللي فيّا امكفّيني دعاء قالت لي نبيك اتشوفيلي وحدة لابسة نفس هالاكسسوار عشان انصّورها طارق : عندك صورة له في نقالك انشوفه افنان : عندي اها طارق : ترا وريها ليّا وشافها طارق ,, طارق : حندور امعاك افنان : لكن افطن تو مرات يحسبنّك اللي قاعدات في الحفل اتعاكس فيهن طارق : واتوقعي يزعلوو لو عاكستهن افنان : لا توقّعت انّك شايف روحك طارق : اوو طلعتي اتفكري فيّا افنان : هيا بس خلينا انشوفو وقعد طارق وافنان يبحّتو في الحضوور ويبرموو في الحفلة افنان : هذكي لابسة الاكسسوار ياطارق تبي تمشي شوورها قبل جا جنبها الدكتور محمود ,, طلعت مراته طارق شاف افنان وخّرت طارق مشى بدالها دكتور محمود : اهلين طارق طارق : اهلين دكتور كيف حالك دكتور :شن انت نفس الجن ولا شن كل مرة انشوف فيك في مكان طارق : ربي يحفضك يادكتور امعايا زميلتي تبي تأخذ كم صورة للاكسسوار اللي في يد المدام دكتور محمود : لا تفضل عادي جت افنان شورهم دكتور محمود : اهلا افنان ,, هذي زميلتك افنان تحكي من راس خشمها : اهلا دكتور : بعد خطرها مبروك عليك العمل الجديد افنان : الله يبارك فيك ,, ممكن تسمحلي انصوّر الاكسسوار امتاع المدام دكتور محمود : تفضلي وقعدت أتصور افنان في الاكسسوار علي جيّة دعاء خلّت دعاء اتكمل الجو ابروحها واتصوّر سمت صوت سمج من نقالها افنان طلع من رقم " عمر " " الأمانة امتاعك معزوقة في البحر " خافت واضايقت واعرفت انّ عمر نشر التقرير والتسجيل الصوتي عالديب ويب قعدت امصبّية علي طاولة ابروحها جاها طارق طارق : آسف لو احرجتك مع زوجة الدكتور محمود افنان : انت اصلا من قالك تطلب منّا انا ماطلبتش منّك شي عليش تجتهد من راسك شفته جا شورها انا رديت طارق : خلاص كنك درتي موضوع افنان : هذا انسان حقير ومتحرش طارق : حرام عليك ’’ تقعدي تضلمي في الناس هكي وخلاص افنان : انا مانضلمش فيه انا عندي دليل علي كلامي طارق : ماشاء الله عندك دليل ,, افنان اللي جايّا من لندن اوكي انتي الملاك بس كان سامي يهدرز مع سلوى ابروحهم بعد شاف أيديهم يتحركن واجد عرف ان ّ في مشكلة صايرة بيناتهم مشى هو وسلوى شورهم افنان : وطي صوتك راهُ قاعدين في مكان عام شن تحساب روحك انت طارق : صقّمي اسلوبك قبل افنان : اسلوبي ابجوي انت شن دخلك بيّا علي جيّة سامي وسلوى سامي : كنكم شن فيه كنكم شن هالفضايح هذينا هدّو اعصابكم سلوى خذت افنان ومشت بيّا مكان اخر في الحفلة سامي : شن فيه ياطارق كنك طارق : مافش شي ..... سلوى : كنك امعصبة شن صار افنان ورّتها الرسالة اللي دازها له عمر افنان : انتشر التقرير سلوى شافت احسابها عالنت سلوى : حي حي داروله حتّى هشتاق عالتويتر افنان : عارفة خليني نمشي خير نطلع من الحفلة خايفة سلوى : لو مشيتي توّا كلّها حتشك فيك خليك افضل ,, بالعكس اقعادك في الحفلة حيحوّل عليك الشبهات افنان : صح كلامك تو انحاول ننشغل مع دعاء اشوية توا سلوى : تمام حتّى هذا راي "ومشت افنان شور دعاء " ومشت سلوى شور طارق وسامي ,,,,,, سامي : البنت هذي فيها حاجة سلوى : افنان حتنشغل مع دعاء اشوية طارق : احسن سلوى : مسكينة مزال متأقلمتش عالوضع سامي : كلمّيها انصحيها ياسلوى مش عارف كنها شن صارلها سلوى : البنت مافيها شي ,,,,,, دعاء : العِقِد امعاك ,,, " العقد = سلسلة رقبة فضة " افنان : اها قاعد ,, تبي اتصوّري لولاء دعاء : هيا تعالي نمشو لولاء ومشن شور ولاء .... دعاء : هاي داليا : هاي ولاء : اهلا دعاء : جتني فكرة سمحة نبيك تمسكي العِقِدْ امتاع الفضة ونبي انصورك امعاه و10% أرباح للجمعية داليا : فكرة سمحة بكل ولاء : يلّا عادي هاتي العِقِد دعاء : هاكي نقّالي صوّري فيديو اسناب يا افنان " وخذت افنان النقال أتصور " قعدت ماسكة ولاء " العِقِدْ " دعاء : اهلين متابعييني الحلوين شن رايكم في العِقِد الجديد اللي ماسكته ولاء ولاء صاحبة الجمعية الخيرية اللي يشري منّا هالعقد حيمشي 10 % أرباحه للجمعية ,, يلا باي متاعبيني الحلوين افنان : تمام " افنان عطت دعاء نقّالها وبحّتت في ولاء " افنان : ولاء ممكن نسألك ولاء : تفضلي عادي افنان : عمرك شفتي طفل اسمر اعيونة زرق ولاء : بصراحة مش مذكرة ,, بس عليش تسألي افنان : لا بس شفت عالنّت انّ في طفل اسمر وايعونة زرق في البداية توقّعته فوتوشب تركيب ,, فقلت نسألك بما انّك اتشوفي في أطفال واجد ولاء : في الحقيقة لا ,, ممكن مار عليا في الصورة والله ماني مذكرّه دعاء : حي حي حي دعاء شفات حاجة عالنقال وانفجعت ولاء " شن فيه دعاء كنك " دعاء حطّت النقال علي وذنها وتسمع " وكل اللي في الحضور جتهم رسائل علي قروبّاتهم عالواتس والهشتاق انتشر بسرعة وكل واحد فيهم قعد ايشووف في الرسالة ويشووف في الهشتاق وماسك النقال وحاطّة عند وذنه دعاء :حاجة غريبة بكل ,, عليك فضيحة ولاء : شن فيه دعاء : اسمعي انتي ابروحك قعدن ولاء وداليا يسمعن مع بعضهن مافش قدامي حل كانن يبّن يفضحَنّا لو ماحولناهنش لعيادة اخرة راهوو دارن مشكلة والمواضيع اللي نفس هذينا صعب اتسكّتهن بفلوووس داليا : شن حيصير ولاء : خلّك كلام نت بس وشرّيني افنان خذت نقال دعاء وتسمع حتّى هي مستغربة " انتشر المقطع بسرعة في الحفلة وقعدت كلّها اتبحت في الدكتور محمود ومراته وبعدها طلع الدكتور محمود هو ومراته من الحفلة بعد ماشاف التقرير والتسجيل انتشر والناس كلهم يبحتو فيهم " وهمّا طالعين مزال الحاضرين مانزلّوش عينهم من عليهم ,,,,, سامي : مسكين الدكتور محمود خبر كيف هذا انهى مستقبلا تقريبا طارق : بس كيف ايسرّب تسجيل صوتي كيف هذا سلوى : ممكن التسجيل الصوتي هذا يوم يومين وينسو الناس سامي : موضوع كيف هذا صعب ينسُو طارق : شكله راح فيها الدكتور محمود خلاص .... داليا : واجعني الدكتور محمود هذي مش تهمة بسيطة ولاء : انترنت راس ماله تشويه الناس دعاء : لا مش كلّها تشويه للناس مرات اللي صار مع الدكتور محمود صح نحنا ما نندرووش افنان : كلنا سمعنا الكلام بالصوت لو كان مفبرك لازم يدافع علي روحه ,, ويطلع وينفي هالكلام عادي ولاء : مسكينه مراته ,, حوشهم حيخرب دعاء : لو كان صح ومثبوت عليه يستاهل ولاء : هذا لو انثبت عليه أصلا داليا : انا خايفة يتأثر علي تبرعات الحفلة ولاء : لا متخافش دايرة احساباتي انا من الناحية هذي انقّاني تعبت ونبي انروح خليك انتي مكاني داليا واشكري الناس بالنيابة عنّي داليا : حاضر ولاء : افنان تعالي وصلّيني للسيارة ,,,,, افنان قعدت تمشي مع ولاء شور السيارة ولاء : سمعت انّ كانت في مشكلة بينك وبين مدير المستشفى موضوع المقابلة اللي درتي امعاه انفان :لا الموضوع انتهى خلاص من اول ما رفضت المجلة انّها تنشر التقرير خلاص مافش بيني وبينه مشكلة شخصية وانسيت الموضوع انا ولاء : انتي شكلك شخصيتك قوية وانا متأكدة اللي يبّي شي يُوصِلّة حيوصّله باي طريقة طبعا شي هذا مش ساهل بس حنقولك ديري بالك ع روحك وديما حطّي الاعتبار اللي صار الامك ماتنسش بكل افنان باستغراب : حاضر ولاء : عالمهم انا فرحانة عشان شفتك اليوم بس حنستناك اتجيني زيارة للجمعية عشان انهدرزو اكثر وانعرّفك عالأطفال اللي عندي في الجمعية افنان : ان شاء الله ولاء : مع السلّامة افنان : باي ومشت ولاء شور سيّارتها افنان وهي رادّة للحفلة سمعت صوت مسج من النقال طلعت رسالة من عمر " مش حتصدّقي شن القيت علي ولاء " يتبع ,, | ||||
|
| |
|
15-04-18, 04:55 PM
| #5 | ||||
| #أفنان الحلقة 5 ولازالت افنان تُحدّثنا عمّ حدث لها في الماضي قبل ان تعلن عن تدوينتها الأخيرة في الماضي في الصباح الباكر كانت تفطر افنان وباتها وداليا افنان : بابا نبيك اليوم اتشيلني للعمل مانبش نمشي مع السوّاق بات افنان : كنك عليش ضايقك ولا دارلك حاجة افنان : لا , بس ليا فترة معش مشيت امعاك بالسيارة ونبي انهدرز امعاك في موضوع وانا ماشيا للعمل بات افنان : حاضر علي نزلت سامي من داره داليا : صباح الخير سامي : صباح الورد سامي : ترا صبّيلي قهوة داليا : من اعيوني بات افنان : كنك قالب وجك عالصبح شن فيه سامي : موضوع المستشفى هذا خلّا ناس واجد تسحب تعاهدات وتعاقداتها وشكله حتى انا مشروعي مش حيصير منّا اللي قبل اتفقت نبي انديره امعاهم افنان : عادي شن المشكلة .. المهم الواحد توا فطن بدري بدري لعله خير خليك متفائل سامي : فكيني من الفلسفة عالصبح ترا كلّا اللي جانا من تحت راسك افنان : انا نبّي انخفف عليك مانبّش انديرلك مشكلة سامي : اتخففي عليا ,, انتي تستعبطي ولا شن كلّنا عارفين انّك انتي اللي سرّبتي الخبر " افنان وجها انقلب " افنان : لا ياراجل ,, وانا من وين نبي انجيب مكالمة كيف هذي ولو فرضنا عندي هالمكالمة راهُ حطّيتها في التقرير امتاعي وعطيتها للأستاذ وليد وحاطّة اسمي عليها عادي مانخافش داليا : ياسامي استحالة افنان ادير حاجة كيف هذي متأكدة انا ياريت يا افنان ماتحكش مع حد في الموضوع هذا عشان النّاس ما اتشكّش فينا افنان : قصدك المدام ولاء داليا : ولاء ولّية محترمة ,, ونعرفوها واجد واستحالة اتشك فينا في موضوع نفس هذا افنان : انتي ليش خايفة علي سمعتك عندها يا داليا سامي : يا افنان اوزني كلامك مش امّي اللي ينحكى امعاها هكي ماتفهمش في الأصول ولاخايفة علي سمعة هلك افنان : انا نفهم في الأصول اكويس ونعرف اهلي اكويس بات افنان : خلاص خلاص احترمونا عاد خليتكم تاخذو راحكتم معش اسكتو انهُو الموضوع خلاص " بعدها بات افنان سمع نقّاله رن شاف الرقم طلع غريب بات افنان : الو الشرطة : امعايا خالد مخفوظ بات افنان : اها خالد محفوظ تفضل الشرطة : مركز الشرطة يبيك اتجي انت وبنتك في واحد فاتح فيكم محضر كلمتك مش اتجي انت وبنتك احسن مانبعثلكم وحدين وينفجعوو الاهل نرجوو فيك بات افنان : مركز الشرطة ؟؟؟ ,,,,, كان عمر قاعد في الكافيه ويرجى في شخص معين بعد مرور 10 دقايق جا الشخص الغريب عمر : قتلّي هكّر ايملها وهكّرته قتلي جيب جميع الصور والمحادثات وجبتهن لكّي الغريب : وعطيتك رقم نقالها عشان اتراقبها تعرف هي تحكي مع من وتطلع مع من عمر : انا شن قتلك من الأول ,, اسمع راك مش تقعد حاط نتيجة في راسك وتبيّها الحقيقة الغريب : انا عطيتك افلووس بس ,, مادرتش حاجة بالبلاش وكنت متوقع نطلع بيها بنتيجة عمر : انت دفعت افلووس مقابل خدمة انديرها لكي لكن مش ذنبي لو طلعت خطيبتك صادقة امعاك وماتخونش فيك الغريب : شن قصدك عمر : قصدي انت تبي اتفوت خطيبتك وادورّلها علي سبله ,,, ومشى الشخص الغريب وقعد عمر في الكافيه حاط السماعات ويسمع في الأغاني ,,,, كانُ بات افنان وافنان في مركز الشرطة لكن اطلعوو بعدها تمام بعد حققو مع افنان كان الدكتور محمود فاتح محضر في افنان وحاليا شايلّها شور الاستديو امتاع دعاء بات أفنان : مش عارف الدكتور محمود في شن يفكّر انا متأكد انّك مالكش علاقة بموضوع التدوينة هذي الحمد الله درت راي في موضوع الشرطة ومعارفي واجد فيها افنان : الحمد الله بات افنان : بس شن الموضوع اللي كنتي تبيني فيه افنان : الموضوع شور الحفلة اللي امس وبالذات علي ولاء سألتها علي حاجة معينة لكن ردّة فعلها كانت غريبة اشوية بات افنان : سألتيها علي شن افنان : مانش مذّكرة ,, بس وكأني سألتها علي حاجة غلط حتّى ردّها كان في اشوية تهديد والغريب في الموضوع لما خلاص جت تبي تمشي قالت لي رد بالك تنسي موضوع امّك بات افنان : مش عارف شن تقصد زعمك تعرف حاجة نحنا مانعرفووهش بعدين نحنا تكلمنا في موضوع امك اكثر من مرّة وانهينا منّا خلاص سألتك بالله فكينا من القصص والمواضيع راهُ الحياة ماشية والحياة مش اموقفة علي موت حد افنان : عارفة يابابا الحياة مش اموقفة علي حد بات افنان : كلنا عارفين انّ امك انظلمت وتبهدلت بس نحنا عايشيين وهي عند ربّها توا خلاص ريّحينا من هالمواضيع ومعش تفتحيهن اخرة افنان : صح كلامك ,, لكن هل في حاجة انا مانعرفهش علي قضية ماما هذي بس اللي خاطري نعرفها بات افنان : صدقيني انا ماعندش اي علم بحاجة واللي نعرفه قلته لكي كلّا الانسان مايقدرش يعرف كل حاجة وهذي من رحمة ربّي فينا حاجات بسيطة نعرفوها لكن مانقدروش نعرفو سببها كيف لو مثلا عرفنا كل حاجة ,,,, كانت سلوى وعمر يرجوو في افنان في الاستديوو وكانت دووبك واصلة للاستديووو افنان : السلام عليكم عمر : وعليكم السلام سلوى : وعليكم السلام ,, عادي خشّينا للاستديو ومزال ماجشش حد افنان : عادي أصلا مزال مش توا ايجو كلهم عمر : كنّا جوّك مش تمام افنان : تخيلوا , امبدري اشوية كيف جيت من عند الشرطة سلوى : كذّابة افنان : والله كيف مانحكيلك ,, دكتور محمود فتح محضر فيا عشان ماعندهمش دليل مشّووني عارفين قعدت غادي اكثر من 10 دقايق كثّروو أسئلة واجد عليّا لكن الحمد الله مشت علي خير سلوى : يعني مزال يبّووك اخرة افنان : لا خلاص كل شي تمام توا انتم قولولي شن آخر الاخبار سلوى : السوشل ميديا مزال ساخن من امس علي نفس الموضوع افنان : باهي شن حيصيير هل حيديرو لقاء مع الممرضات هل حيحبسو الدكتور محمووود عمر : لالا اكيدة ,, لكن الشجرة هذي حتقعد كل مرة اطيح منها واحد افنان : بس كلنا عارفين الدكتورمحمود غلطان اليوم شفته في مركز الشرطة ومافش ولا واحد قالّة كلمة عمر : مش داعي تحرقي انتي خلاص المهم النّاس كلّها اعرفت شن صار والباقي خليّه مع الوقت " عمر فتح الشنطة امتاعه وقعد ايدور في ورقة معينة " افنان : الشنطة جديدة هذي عمر : لا قديمة بكل , دقيقة بس امس وانا نبحثلك عالنت علي أي حاجة علي ولاء لقيت خبر قديم ممكن حيفيدنا الخبر كان عبارة عن " لغز اختفاء الأطفال الأجانب في المولات " وكانت في صورة طفل اسمر اعيونة زرق ومكتوب تحت الصورة طفل افريقي ذات عيون رزقاء اختفى في احد المولات واللي كاتب المقال اسمة " مازن عدْلِي " ,, عمر : هذي صورة ناس افقدوو أطفالهم في مولات واغلب الأطفال أجانب لعند توا مافش شي ملفت صح شوفي الصورة هذي " افريقي ذات عيون زرقاء " افنان : ومن يطلع هذا مازن عدلي سلوى : ترا عطيني انشوف الخبر افنان : باهي شن دخّل الخبر هذا بموضوع ولاء عمر : مش معقولة اتكون صدفة واحد قالك اسأليها عالطفل الأسود اللي اعيونة زرق وانا جبت هالخبر حيفيدنا افنان : توا لما دزيتلي مسج امس في الحفلة انّ عندك شي لولاء توقعت انّك جايبلي حاجة مربوطة مباشرة بولاء الخبر هذا مالش أي علاقة بي ولاء عمر : دوّرت في النت في السوشل ميديا ماعندهش ولا حاجة الشي الوحيد اللي رابطها المصدر اللي جاك بس افنان : لو كان الطفل هذا لَه علاقة بولاء حنلقو الإجابة في الجمعية الخيرية في الملفات اللي عندها امتاعات الأطفال القُدامة ,, هذا اذا كان فيه بس لازم واحد فينا يمشي للجمعية ويشووف ابروحه سلوى : طبعا ولاء كانت غادي وشافتني انا وياك يا فنان فصعب نمشوو انا وياك سلوى وافنان بحّتن في عمر عمر : كنكن بحّتن فيّا راكن اتقولن امشي انت بس علي جيّة دعاء شوورهم افنان بصوت واطي : دعاء دعاء جت افنان : خلاص حنتقابلو بعدين ,, نفس ما اتفقنا ياعمر سلوى : هاي دعاء دعاء : هاي ومشوو سلوى وعمر دعاء : هلووو افنان افنان : اهلين دعاء ’’ كيف حالك دعاء : اكويسة ,, لكن قوليلي شن فيه افنان : كيف شن فيه مافهتمكش دعاء : شن كانُ اديرو اصحابك هنا افنان راني مش دايرتلك تحقيق انا بس نبي يقعد في بيني وبينك ثقة انا خليتلك الاستديو لكي اديري فيه اللي تبّيه بس مش لدرجة تستغليه في حاجة غلط افنان : حاجة غلط زي شن مثلا دعاء : انتي ادرى افنان : ماكنّش انديرو في حاجة غلط كنّا انديرو في مُنتاج للحفل الخيري اللي امس دعاء : مزال تحسابيني غبيبة " أفنان بحّتت فيها ومابتش اترد عليها وقعدت قاعدة عاللاب توب " ,,, عمر كان في الحووش يدوّر علي لاب توب قديم عنده , قلب الدار كلّها عليه .... دعاء : اليوم حتصور حلقة يوتيوب عندنا الإعلامي المشهور يوسف منصور هو اللي يبي يصور عندنا تعرفيه افنان : نعرفه دعاء : اكيدة حيحكي عاللي صار امس افنان : عالحفلة قصدك دعاء : لا عالمستشفى افنان : يعني طارق جي دعاء : لا قبل مايبّش ايجي لكن بعد اعرفك انّك قاعدة قال يبّي ايجي افنان : غريبة مع انّي شفت الاستديو امتاعه دعاء : اها عارفة بس عنده الإضاءة مشكلة عشان مايبّوش يأخرو التصوير جيين يصورو عندنا ,,,,, هذي الرواية للكاتب ديندار الوحيشي " ...... عمر لقا لاب توب القديم امتاعه ومشى بيه شور الجمعية امتاع ولاء وهو خاش للجمعية قابل الغفير امتاع الجميعة عند الباب الغفير : تفضل عمر : عندي لاب تو قديم بما انّي شريت واحد جديد نبي انعلم الأطفال كيف يلعبو بالالعاب اللي عالاب توب احسن مايقعد في الحوش عالفاضي قلت نتبرع بيه للجمعية ممكن الغفير : عندك موعد عمر : لا انا نسكن هنا اقريب ’’ وهذي اقرب جمعية تلايا الغفير : اشوية انرن عالادارة قبل عمر : خوذ راحتك الغفير رن عالادارة الغفير :في شخص عندة لاب توب قديم وقال في العاب ويبّي يعلم الألعاب للأطفال ويبّي يتبرع باللاب توب ** تمام ** حاضر " ** = تعني انّنا لا نستطيع سماع الشخص المراد الاتصال به ويضهر لنا في الحلقة صوت الغفير فقط لا غير " الغفير : تمام هيّا تفضل امعايا وخش عمر امعاه ,,,,, وكانت سلوى قاعدة في عالعيادة واتركّب في توبو التغذية لواحد من المرضى سمعت تليفونها يرن شافت الرقم طلع سامي مابتش تفتح عليه لانّها قاعدة مع المرضى ومشغولة ,,,, قاعد عمر بين الأطفال عمر : توا حنلعبو العاب بس لازم نبو نت " وكان في نت في الجمعية " من يقدر ايجيبلي الباسورد وحدة من الأطفال : انا انا انا انا عمر : هيا عدّي جيبي الباسورد عمر : من يبّي يلعب اول واحد الأطفال : انا انا انا انا انا انا انا ... علي جيّة الطفلة جايبة باسورد النت في ورقة وعطاها الها الغفير ’’’ خشش الباسورد صار منّا ودارله حفظ بحيث اول مايفتحو يعلق النت طوول عمر شاف اكبر واحد فيهم عمر : انت حقتعد اللاب توب امعاك وحتقعد اتلّعب فيهم بالدوور بس ديما عشان نلعبو لازم نتاكدو من الإشارة هذي فيها نت ولا لا كان مافش نت ماتقدروش تلعبوو وقعد يجرب فيه ويختبر وطفّى اللاب توب ولّعه يشووف في الطفل فهم ولا لا ,,,,, وصل طارق وجماعته للاستديو دعاء : هاي طارق : اهلين دعاء : كيف حالك ,, طارق : تمام ,, شن جوك انتي دعاء : اكويسة طارق : احتمال اليوم مش حنقدروو انصّورو دعاء : عليش راهُ كل شي واتي طارق : الكاتب لعند توا مزال مادزلش النص حتى عالايميل مابعثهنش ليا دعاء : لو كانت عالكتابة المشكلة محلولة افنان قاعدة احسن من تكتب عندنا وحنصّورو اليووم " كانت افنان بعيدة منهم وقاعدة عاللاب توب " شيّرّتلها دعاء وضبحتلها مشلتهم افنان افنان : هاي دعاء : الكاتب امتاعهم ماصارش منّا تقدري انتي تكتبيلهم افنان : عادي مش مشكلة حنكتبلهم طارق : ياريت دعاء : خلاص خشو للغرفة هذي ,, هدوء وتفاهموو واكتبو علي راحتكم وخشوو مع بعضهم افنان : شن الكاتب فاتكم ولا صارله موضوع طارق : قالي حنبعثلك ولعند توا ماجاني شي منّا انرن عليه ومايردّش افنان سمعت نقّالها يرن طلع عمر افنان : نستاذنك اشوية بس عالسريع وطلعت برة افنان : نعم عمر عمر : الحمد الله خشيت للجمعية وكل شي تمام توا كيف طلعت منها افنان : شن عرفت حاجة عمر : كنك مستعجلة ,, خليني انروح وانجهز كل حاجة وبعدها حنقولك شن ايصير غير حبّيت نعطيك المعلومات اول بأول افنان : تمام ومشت افنان شور طارق .... كان سامي في المكتب امتاعه بعدها طلّع تليفون ورن علي سلوى سامي : اهلين سلوى : اهلا ,, اسمحلي امبدري غير كنت مشغولة مع المرضى سامي : لا عادي ,, عرفتها قلت اكيدة مشغولة شن جوك شن دايرة سلوى : الحمد الله ,, شن جوك انت سامي : ماشية تمام ,, كنت نبي نسالك ,, سلوى : تفضل سامي : يعني عندي لك عرض معين ,,,,, افنان : انا اسفة طارق : شن ماسمعتش افنان : انا اسفة عارفة امس اسلووبي كان اوفر امعاك في الحفلة بس كنت مضايقة ومتوتّرة وصارلي كم موضوع طارق : اسمعي راك مش محتاجة اتبرري موقفك انا صح اضّايقت وقتها ونرفزت اشوية بس انا من النوع اللي ما انشيلش في قلبي يعني ماتشغلش بالك جو تمام افنان : على فكرة انا نعتذر علي اسلوبي مش علي كلامي يعني مش هامك تعرف السبب ليش درت هكي طارق : يهمني نعرف عليش اضّايقتي بس انحس انّ مش من حقي نسالك وندخل في حياتك الشخصية لكن امتى ماتبي تحكيلي علي اي حاجة امضايقتك او امزعلتك راه حتلقيني نسمعلك في أي وقت ,,, سامي مزال يهدرز بالتليفون مع سلوى سامي : شن رايك اتجيني عالمكتب نتفاهموو خير سلوى : خليها بالجو لو قدرت انجيك حنجي سامي : تمام ديري جوّك ,,, افنان : شن الموضوع اللي تبيني نكتبلك فيه طارق : انا والشباب قرّرنا انديرو حلقة علي مدون اكس افنان : من مدون اكس طارق : المدون اللي دار فضيحة الدكتور محمود افنان : عليش امسّمينا اكس طارق : اكس لان مافش حد عارف هو من مجهوول الهوية ,, يعني اكس مجهول ,, او اكس غلط ومجرم اكثر من معنى اتجي عادي افنان : هل في رايك اللي داره صح او غلط طارق : والله شن انقولك ,, نسبيًّا في ناس حيشوفو صح وفي ناس حيشوفو غلط اكيدة اللي انظرُّو منّا حيقوولوو غلط واللي استفادوو حيقولو صح هو غامض ماكشفش علي روحه وقاعد يفضح في خلق الله ويكشف فيهم يستخدم في طرق ملتوية غير أخلاقية يتجسس وادير في هكر مانقدرش انقولك هل صح او خطأ افنان : انا انقول اللي يستفيدو الضحايا ,, لما يشوفو الشخص اللي ضلمهم قاعد يأخذ حقّة من القانون طارق وهويضحك : مانبيكش تزعلي منّي ,, انتي مثقفة وذكية ومتعلمة حتّى حسّك الصحفي ممتاز بس مرة مرة انحس فيك كأنك كيف طالعة من الدحية ومش عارفة الدنيا كيف ماشيا راهُ الواقع مش نفس الكتب اللي قريناها المبادئ والاخلاقيات هذينا كلهن مافش منهن بكل ,, ممكن صح يعني اليوم اكتشفو ان الدكتور محمود كان امعلق مشاريع واجد واللجنة الجديدة قبلت المشاريع ومنهن مشروع سامي افنان : يافرحته اليوم كان قالب وجه عليا في الصبح طارق : اسف حسيت روحي فسويت عليك واجد افنان : لا بالعكس الحكي امعاك حلوو وبعدها طارق سمع صوت مسج شاف الرسالة " بعثتلك النص عالايميل اسف عطلتك امعايا " طارق : باهي تمام صاحبي صار منّا قالي دزلي النص عالايميل بس تعالي هنا قتيلي ,, لا بالعكس الحكي امعاك حلوو قصدك انا فيّا جو علي خشّت دعاء عليهم دعاء : كمّلتي افنان : اها كمّلت دعاء : باهي ممكن نشربو قهوة مع بعضنا افنان : باه " وطلعت افنان امعاها " طارق : البنت الباردة هذي خرّبت عليا الهدرزة ,,,, ,,,, عمر بعد روّح للحوش فتح اللاب توب امتاعه الاخر وقعد يتفرج عالشاشة ,,,,, افنان وهي تشرب في القهوة مع دعاء سمعت نقّالها يرن طلعت سلوى افنان : اهلين سلوى سلوى : اسمعي بس افنان : شن سلوى : سامي قالي نبيك تخدمي امعايا افنان : شن حتخدمي امعاها وانتي أصلا شورك طب سلوى : حتى انا قتله هكي قتله طالبة طب شن حتستفيد منها في مواضيع بناء وهندسة افنان : باهي شن ردّ عليك سلوى : قالي نبي استشارات في البناء امتاع المستشفى وحتكون حاجات بسيطة اللي نقدر انساعده فيها افنان : راك اتقوليلي اقنعك سلوى : لا مش قصة قنعني , بس قتله انفكر في الموضوع بس حبّيت انقولك افنان : نجك ليا ,, شوفي انتي جوك عادي سلوى : حاضر ,, المهم راك تنسي مش اتقولي الباتك علي اسم الصحفي مرات يقعد يعرفه بحكم هو قديم في مجال الصحافة افنان : حاضر حنسأله سلوى : سلام توّا افنان : سلام افنان : معلش قطعت كلامك يا دعاء دعاء : لاعادي ,, بعد خطرها بكرة تمشي امعايا عادي لمعرض الكتاب افنان بحّتت فيها باستغراب : شن بالديري غادي دعاء : نقرا افنان : تحكي من جدك انتي دعاء : انا انحب القراءة واجد وقبل مانرقد لازم نقرا من كتاب معين مش عارف ليش الناس مش امصدقة هالكلام افنان : اكيدة وحدة مشهورة عالسوشل ميديا و24 ساعة عالنت دعاء : ونفس الوقت في مصلحة ليّا افنان : عرفتك مافش حاجة تمشيلها بالجو هكي باهي نسألك في حاجة بينك وبين طارق زمان دعاء بتنهيدة : انا وطارق قصتنا من زمان بدينا نخدموو مع بعضنا في السوشل ميديا وركبنا في نفس الموجة بدون لف ودوران نقعد امعاك صريحة صح زمان كان حبيبي طارق افنان : باهي توا مش حسيين انكم اتفادو في بعضكم واجد هكي لحظت انا امبدري عليكم دعاء : قصة صارت من زمان خلاص نسيته حاليّا بيْناتنا شغل بس افنان : يعني توا معش في أي مشاعر نفس قبل واتحبّي دعاء : يا افنان اللي بيني وبينه انتهى من زمان حاليا اللي يجمعني بيه ضرورية الشغل فقط لاغير افنان : يعني عادي لو دار علاقة حب مع بنت اخرة صح دعاء : اكيدة عادي مش فارقة عندي أصلا هذا الشي يخصّا , انا مادخلّنش بي ,,,,,, كان طارق يصوّرو في شخص مشهور عالسوشل ميديا اسمه يوسف منصور وداير مقطع قصير عالمدون اكس يوسف منصور : شن قصة المدون اكس ,, توا علي أساس بطل خارق باهي انت تبي تفضح ناس اخرة ولا خلاص باهي قولنّا حسابك عالفيس عالتويتر باهي قولّنا أي حاجة عليك نبي نعروف انت من بس حتّى باهي شن رايك انكلمو محقق كونان يحقق امعاك ولا حنديرو نداء لقاعدة الديجتال وخلاص عشان نعرفوو انت من طارق : كت " وقفّوو التصوير " طارق : مانك عادي يالغالي يوسف : انت الغالي يالغالي ,,,,, الساعة 9:00 مساءا افنان نزلت من الدار شور المطبخ لقت باتها قاعد في الصالة يقرا في اكتاب جت شووره افنان وعطاته بوسة علي راسه افنان : فاضي ممكن نسالك بات افنان : اسألي عادي افنان : لو قتلك اسم واحد من الصحفيين القُدَامَا تعرفهم بات افنان : نعرف اطيبيين فيهم والاكويسيين زمان افنان : باهي في صحفي اسمه مازن عدلي مار عليك بات افنان : من قالك انتي عالاسم هذا افنان : بالصدفة شفت ماقالات قديمة عالنت القيت اسمه قاعد فيهن حسّيت انّ صحفي اكويّس بات افنان : اها نعرفة ونعرفه اكويس بكل ومش حتصدقي لو قتلك من هو ,,,,.. بعد مرور 10 دقايق افنان كمّلت نقاشها مع باتها ورقت شور دارها وخذت نقّالها ودارت تسجيل صوتي عالواتس لسلوى وعمر " امبدري اشوية سالت بابا علي مازن عدلي تخيّلووو من يطلع طلع الأستاذ وليد امتاع مجلة بنغازينو كان زمان يكتب في الجرايد باسم وهمي عشان يطلّع دخل إضافي ولمّا سألته عالاسم ,, قالي كيف عرفتي ناس قليلة بكل تعرف هالاسم " ودزّت المسج الصوتي لِيهم يتبع ,,, | ||||
|
| |
|
17-04-18, 10:04 AM
| #6 | ||||
| #أفنان الحلقة 6 ,,,,,,, ولازالت افنان تُحدثّنا عن بعض الخفايا والاسرار التي تعرّفت عليها عندما قامت بنشر اول تدوينة باسم وهمي في الماضي مشت افنان مع دعاء لمعرض الكتاب كان عبارة عن مبنى صغير علي دورين الدور الاولي كافية للبنات والدور الثاني مكتبة للقراءة دعاء : صباح الخير ’’ ممكن اديرّنا اثنين نسكافيه صاحب الكافيه : حاضر دعاء : بعد خطرها يا افنان اليوم ولاء جايا ولاء من عشاق القراءة حتّى هيا افنان : باهي تمام دعاء : هذي فرصتك اتعرّفي عليها اكثر في مكان خاطي الحفلة افنان : ان شاء الله سمعت صوت مسج طلع من عمر " رد بالك اتقابلي ولاء عندي لكي حاجة اتخصّها واجد " لازم انشوفك ضروري " افنان بعد قرت الرسالة دارت نقالها صامت وحطت نقالها في الشنطة شافت ولاء نازلة من عالدروج ماشيا للكافيه وجت عينها في عين ولاء ,,,,,, عمر كان في السيارة يبي افنان ضروري يرن عليها ما اتدرّش عمر : هيّا ردّي كنّك,, حرام عليك ,,,,, سلوى قاعدة مع سامي في المكتب سامي : زي ماقتلك ,, مشروع جديد ونبوو ناس عندها خبرة كنك مبتسمة قولي حاجة سلوى : نكذبش عليك ’’ انحس في روحي مش مقتنعة بكلامك سامي : تمام انا نقنعك ,, نحنا نبو نبنو مستشفى جديدة ونبوو ناس عندهم خبرة او دكاترة ,, لكن مزانيتنا اشوية .. مانقدروش ندفعوو للدكاترة فقلت انجيب اللي يقرو في آخر سمستر في الجامعة نستغلووهم واكيدة عندهم خبرة سلوى : والله مانعي عارفة ,, هل نقدر انساعدكم ولا لا انا سامي: ليش لا ,, بالعكس سمعتك ماشاء الله عند افنان الا اذا كانت تكذب عليا افنان سلوى وهي تضحك : توقع تكذب عادي سلوى سمعت نقالها رن سلوى : دقيقة توو انجيك وطلعت برة المكتب سلوى : نعم عمر عمر : وين قاعدة سلوى : قاعدة في الشركة اللي يخدم فيها خو افنان انشوف في شغل جديد معروض عليا كنك شن فيه عمر : نبي افنان ضروري انرن عليها مانحصلش فيها سلوى : في معرض الكتاب قاعدة ,, تو تطلع حترن عليك عمر : لا لا توا ضروري نبيها ,,, اني جايك في الطريق انزليلي لووطة سلوى : باه نرجى فيك تعال خشت سلوى للمكتب وخذت شنطتها سامي : وين سلوى : معلش لازم نمشي سامي : شن فيه ان شاء الله خير سلوى : لا صاريلي ظرف عائلي ضروري لازم نمشي سامي : تمام خوذي راحتك ,, لكن حنكوونو على تواصل سلوى : اكيدة ,, يلّا باي .... كانت افنان مع دعاء وولاء وجت حتى داليا في المعرض وقعدوو يناشقوو في اكتاب معين مع اللي حاضرات وحدة من الحاضرات : حسّيت انّ المؤلف مايبّنَش نعرفو بطلت الرواية من بداية الحلقات افنان بحّتت في دعاء افنان بصوت واطي : مش عارفة شن اندير هنا ماعندش أي فكرة عن الكتاب وحدة ثانية من الحاضرات : صح حتى انا ماعرفتش من تطلع بطلة الرواية الا في في الحلقات الأخيرة ,, حسّيت انّ الكاتب خدعنا ولاء : انا انقول انّ الكاتب ماخدعنش ,, الكاتب خلق أجواء خصّات بي هوو ,, ممكن يكون خيال ممكن يكون واقعي مش هذا المهم ,, المهم انّ لكل كاتب منطق معين افنان : مانبش انقطاعكن بس انا الكتاب ماقريتش وماعندش معلومة عليه لكن انا انقول ماعمرنا ننتقدو رواية تقعد مبنية بشكل كامل عالخيال ,,,,,, سلوى كانت في السيارة مع عمر وماشيين شور أفنان عمر : بس وين رايحة دايرة امنيّاتك امطفية جي بي اس ودايرة برنامج الحماية قعدت معش نعرف انراقبك سلوى : توا خلينا في المهم , شن تبّي فيها افنان عمر : اعطي افنان الورقة هذي سلوى : ليش ماصوّرتها ودزيتها له في مسج عمر : مايصير شي نبعثلها مسج لازم تحكيلها حاجات انا نحكيهن لكّي توا وانا حنكملّها الباقي سلوى : خلاص تو نخذووها من غادي وانروحو بيها واحكيلها كل حاجة انت عمر : مانقدرووش انخلوها تطلع كان تطلع توا مرات حيشكّوو فيها سلوى : باهي شن انقوللها افنان لما نوصل فيها ,,,, سامي قاعد في مكتب طارق ويهدرزو مع بعض طارق : باهي دارووه امعاها تحقيق ولا لا سامي : مافش عليها دليل طلقوووهم هي وباتها الدكتور محمود مش عارف شن ادير نفس الهبل ,, صح مافش حد جا شوره بس اتحّسة وكأن جت ضربة قسّمتله إضهره طارق : توقع افنان هي اللي فضحاته سامي : عادي توقع ,, بس مافش دليل ,, تي كان فيه دليل استحالة يفوووتها الدكتور محمود طارق : مشكلة افنان متهوّرة بكل ,, شكلها طالعه الامّها سامي : تي اشر من امّها ,, اقل شي أمها كانت عارفة احدودها لكن هذي مش امعدله علي حد يادنيا مافيك الا انا مش حتشعف لين اتحصّل قرصة وذن اكويسة طارق : بس هيا شافت شن صار الأمها اكيدة فاهمة الشي هذا سامي : بيني وبينك امّها تستاهل اللي جاها طارق : استغفر الله شن هالكلام ,, امّها ميّته سامي : كلّنا حنموتو عادي ,,,,, ومزالن يناقشن في موضوع الكتاب " افنان ودعاء وداليا وولاء " افنان كانت ماسكة النقال في يدّها شافت النقّال دار ضي وطفى جاها مسج من سلوى " انزلي لووطة " افنان : نستاذن منكن دقايق وتو انجي ولاء قعدت اتبحت فيها وهي نازلة افنان : شن فيه ياسلوى سلوى : شفتي المسج اللي دازّة لكي عمر افنان : اها شفته بس كنت مش فاضية عشان انرد عليه ,, شن كان يبّيني سلوى : لما ماردّيتش عليه خاف وقالي انوريك الورقة هذي افنان : شن هذا سلوى : طبعا هو اخترق المنظومة امتاع الجمعية وهو يفتش في المنظوومة لقى عيل اسمه خالد اسمر واعيووونة زرق لما شاف تاريخ ميلادة طلع نفس ميلاد الخبر شفناه مع بعضنا امتاع الطفل الاسمر افنان : يعني سلوى : هذي شهادة ميلاد مزّورة واللي زوّرها واحد من المستشفى افنان : باهي شن دخّل هالكلام كلّه بولاء سلوى : هو يتوقع انّ لما جمعيتها خشّت عالافلاس هي قررت اتّاجر بالأطفال افنان باستغراب : شن ,,, لو فرضنا كلام عمر صح لازم من دليل ,, اسمعي توا مش حنقدرو نحكووو حندوركم بعدين انتي وعمر وخلّي الورقة امعاك المهم لازم نتقابلوو اليوم ,, هذي الرواية للكاتب ديندار الوحيشي ,,,,, بعد ما كمّلن النقاش عالكتاب داليا : شن رايك انروح بيك ,, جايني سامي في الطريق افنان : تمام حتى هذا راي ولاء : ها افنان شن رايك ان شاء الله اعجبك الجو في معرض الكتاب افنان : عجبني واجد ماكنتش متوقعة هكي حتى الكلام وتبادل وجهة النظر شي اكثر من رائع ولاء : ديري طلّة او تكسيدة في الجمعية نشربوو قهوة وانهدرزو مع بعض افنان : اكيدة باذن الله " ومشت افنان شور دعاء " افنان : قتلك يادعاء ,, نقدر ناخذ باقي اليوم راحة انحس في روحي تعبانة اشوية دعاء : عادي بس بكرة تعاليلي بدري للاستديو ,, في ندوة بكرة في الجامعة الاهلية وعندي كلمة نبي نلقيها نبيك اتساعديني في كتابتها افنان : حاضر ,,,,, بعد مرور ربع ساعة """"" سامي قاعد مع افنان وداليا في السيارة وامرّوح بيهم شور الحووش افنان : مبروك عليك عقد المتسشفى الجديد يا سامي سامي : الله يبارك فيك ,, بس كيف عرفتي افنان : طارق امس قالي داليا : طارق هذا ولد حلال وماشاء الله عليه افنان : بس فيه حاجة امحيرتني يعني اذا كان مدير المستشفى رافض المشروع امتاعك من البداية ليش زعلت اول مادرت تقرير عليه وقتولي هذا تحقيق مش تقرير سامي : انا في البداية ماكنتش عارف انّ هو رافض المشروع وبعدها بديت نستوعب في الموضوع بعد قعد يلمّحلي انّي لازم ندفع ولازم يبّي مقابل عشان يشقى بموضوعي افنان : اووو رشوة يعني سامي : تقدري اتقولي حاجة كيف هكي بس انا رفضت افنان : واو ,, غريبة ,, ماتوقعتش انّك ترفض حاجة كيف هكي " داليا بحتت في سامي وماعجبهش رد افنان " داليا : معقولة اتقولي هكي ,, انا سامي عرفته استحالة يرضى بحاجة كيف هذي سامي : على فكرة يا افنان انتي بديتي اتلخبطي مابين انا نستفيد من شي معين او انّي انحقق الحاجة اللي نبيها افنان : كيف مافهمتش سامي : يعني فكّرت ندفع افلووس ,, أي بمعنى رشوة زي ماقلتي انتي بس عارف حضِرّني مش حتفيدني في اكثر من طريقة تنفعني بدون ماندفع ولا قرش افنان : نفس انّك اتسرّب هذكي المكالمة وتفضحه سامي : لا وين مش للهدرجة ,, عقلك عدّى البعيد داليا : شن كانت سلوى تبّي منك امبدري سامي : قصدكم سلوى جت هنا امبدري افنان وهي مبتسمه : اها جت كنك تسال سامي : لا شي ,, باهي تبي اتجي للكافيه ولّا لا افنان : أي كافيه سامي : كافيه عائلي امتاع مدام رزان بكرة افتتاحه افنان : ,, من تطلع هذي مدام زران سامي : هذي زوجة الأستاذ وليد رئيس تحرير المجلة افنان : مش عارفة ,, عندي اشوية اشغال ,, مرات انجي ومرات لا ,, عالمهم متخافش كان جيت حنجيب سلوى امعايا ,, خطرها داليا نسالك هي ولاء كانت تعرف ماما اكويّس داليا : رايحة تسألي في أسئلة واجد علي ولاء في حاجة بينك وبين ولاء افنان : لا ,, نسال بس عادي ,,,, الساعة 1:00 ظهرا افنان بعد ماتغدت مع باتها وداليا وسامي رقت للدار ودزت رسالة صوتية لعمر " انا اليوم خذيت إجازة من دعاء لازم نتقابلو في كافيه عشان نحكو عالتدوينة الجديدة نبي نعرف مكان الطفل وين عايش توا اللي ورتّني سلوى شهادة ميلادة نبي نعرف من هو " ,,,, امكسدة عالنت دارت برمة علي الموقع اللي امنزّل الندوة امتاع الجامعة الأهلية اللي يبووو يمشوولها بكرة سمعت افنا نقالها يرن ,, طلع طارق افنان : الوو طارق : الوو ,, كيف حالك ,, شن دايرة افنان : الحمد الله ,, انت شن جوك طارق : مية المية ,, قتلك افنان : نعم طارق : نبي نعزمك علي عشاء بكرة في مطعم افنان : شن المناسبة طارق : يعني لازم ايكون في مناسبة ,, اقل شي ناخذو راحتنا ,, بدون أي حد يقاطعنا افنان : والله شن انقولك ,, خليها بالجو وبالنصيب غير عندي شغل واجد طارق : انا عموما حندزلك الموقع امتاع المطعم عالنقال وكان قدرتي اتجي يقعد تمام افنان : حنحاول ,, طارق : تمام ,, ديري بالك علي روحك ,, افنان : حتى انت طارق : سلام ,,,, الساعة 5:00 عصرا تقابلو عمر وسلوى وافنان في كافيه افنان : قررت نكتب تدوينة الثانية عالطفل الأسمر اللي اعيونة زرق واضح من المعطيات اللي عندنا انّ في شي غلط قاعد يصير وفي شخص هو اللي متورط فيه عمر : علاقة ولاء بالجمعية بالشهادة الميلاد المزورة في اكثر من لغز يبيلهن حل افنان : أصلا ولاء واضحة داسّة حاجات واجد ومن ضمنهن حاجات علي ماما لكن توا مانبش انركز في الموضوع هذا واجد ونبي نشقى بالاهم التدوينة الثانية حنحكي علي شهادة الميلاد وهذي دليلنا انّ كان في طفل مخطوف قاعد جوّا الجمعية هذا بعد ماخذُو وغيّرو اسمه عمر : وهنا المشكلة أصلا وانا امس قاعد نبعث عالفيس لقيت صفحة واحد اسمه طارق مُباطق لشهادة الميلاد حتى هو اسمر واعيونة زرق سلوى : خلا حصلّنا دليل عمر : لا مش هكي بس ,, لقيت 7 اشخاص شباب وبنات ومن جنسيات اخرة حتّى هما كان عليهم بلاغات مخطوفين من المولات زمان نفس بلاغات الطفل الأسمر وكلهم عندهم شهادة ميلاد مزّورة ومش باين اسم الدكتور اللي اموقعها كلهم قاعدين في بنغازي لكن مع عائلات مختلفة يعني كلهم متزوعين حاليّا بشهادات ميلاد مزوّرة افنان : زعمك شن انديروو توا سلوى : الموضوع كبر ,, وقعدت مسؤولية كبيرة افنان : بس لازم الناس تعرف الحقيقة ,, حنشوفو شن ايصير ,, توا لازم نمشي ,, دزلّي جميع المعلومات اللي قتلي عليهن عمر : تم حاضر افنان : ربي يعطيك الصحة عللي ادير في امعايا مش عارفة هل نشكرك ولّا انخاف منّك ياعمر يلّا باي ,,,, ثاني يووم الصباح ناضت متأخر افنان وقعدت تعجّل في روحها عشان تمشي للاستديووو ,,, كانت دعاء ترجى في افنان وفي نفس الوقت ماسكة اللاب توب واتفرج علي افنان وعمر وسلوى وهمّا يهدرزوو مع بعضهم في الاستديو قبل كم يوم " كانت دعاء امركبة في كل مكان كاميرة في الاستديو قعدت مستغربة وقالت في بالها زعمك فيش يحكوو هذيما " ,,,,,, بعد مرور نص ساعة ,,,,,, افنان : صباح الورد ,, آسفة تأخرت عليك خذتني نوومة كنت عابية عالنقال لكن كمل شحنة دعاء : صباح النور ,, لا عادي مش موضوع ,, المهم جيتي افنان : تسلمي دعاء : مش عارفة شن نحكي اليوم في الندوة مانبش جو النصايح والأسلوب هذا اوكي عالسوشل ميديا نعطي عادي ,,, لكن ندوى ونعطي نصائح عالدراسة مش ماشية امعايا النصائح يبّن واحد كبير مرّن عليّ تجارب واجد في حياته قبل ما انكمل هدرزتي امعاك شن تعليقك عالفيديو هذا يا افنان " ورتها الفيديوو اللي كان امسجل في الاستديو " افنان : قصدك في كاميرات هنا دعاء : اكيدة في كاميرات في الاستديو ومتعرض لاي وقت للسرقة افنان : بس غريبة مافش صووت دعاء : هذي الحاجة اللي هبلتني جميع المقاطع طالع فيهن صوت الا المقطع هذا ,, انتي و أصحابك طالعين صورة بلا صوت والغريب اول ماجو اصحابك الصوت اختفى اول ماعدّو من الاستديو الصوت رد حاجة غريبة بكل افنان : حتى انا متسغربة نفسك دعاء : انا فاهمة انّ الاصحاب يكون بيناتهم خصوصيّات واسرار مايبّوش حد يعرفهن لكن حنقولك شي لمّا يقعد خاطركم اتقعمزو واتهدرزو اسراركم ياريت تمشو الكافيه او أي مكان آخر هذا مكان خاص للعمل فقط وخليها في بالك راني متساهلة امعاك بكل واخذة جميع صلاحيتك في الاستديوو يلّا مش مشكلة حصل خير توّا انردوو للكلمة اللي نبي نلقيها ,,,,, بعد مرور ساعتين وصلن افنان ودعاء للندوة امتاع الجامعة الاهلية وافنان حضّرت لدعاء شن تحكي واتقول في الندوة وهنّا خاشّات للمسرح اللي فيه الندوة " بنت في قمة الجمال قاعدة عند المسرح اتشيّر لدعاء " دعاء : هذي السمر ,تو انعرفك عليها افنان : باه دعاء : مش حتوّقعي لو قتلك بنت منُ هذي افنان : من دعاء : حنقوولك " وصلن عند سمر " دعاء : هاي سمر سمر : هاي دعاء : انعرفك هذي سمر بنت الأستاذ وليد رئيس تحرير المجلة افنان : معقولة مافش أي تشابه بينك وبين الأستاذ وليد دعاء : اها لا شكل لا شخصية ,, سمر مختلفة عن الأستاذ وليد واجد سمر : الناس كلّها اتقوول هكي مافش تشابه بيني وبين بابا بعد خطرها عجبني التقرير امتاع الاكسسوارات دعاء : كتبتها افنان ,, شاطرة بكل في الكتابة سرقتها من باتك سمر : شن واتية للكلمة اشوية اخرة دعاء : شوفي انا متعودة عالسوشل ميديا عادي لكن قدامي ناس واجد هكي صعب ,, لكن تدربت انا وافنان مع بعض سمر : خلاص تو نستأذنكم انشوف صحباتي افنان : خوذي راحتك " علي خشّت مدير الجامعة الاهلية للمسرح " دعاء : اهُو بابا جا افنان : باتك مدير الجامعة الاهلية دعاء : اهلين بابا مدير الجامعة : اهلا دعاء دعاء : هذي افنان المحررة اللي حكيتلك عليها هذا بابا الدكتور إبراهيم مدير الجامعة : اهلين افنان كيف حالك افنان : الحمد الله ,, دعاء : ساعدتني واجد في كتابة النص اللي نبي انقوله في الندوة مدير الجامعة : بارك الله فيك عشان ساعدتيها افنان ,, اهم شي مخارج الحروف يا دعاء نفس ماورّيتك امس في الحوش ,, وارخي روحك متخافش دعاء : حاضر يابابا افنان : نستاذنكم انا ,, دعاء : خوذي راحتك ,, افنان قعزمت في آخر صف في المسرح البنات قعد يصوّرن في صور سيلفي مع دعاء ,,,, ركبت سمر عالمسرح عشان أتقدم دعاء للحضور سمر : اليوم امعانا شخصية مميزة جدا بدت من الصفر ولها شعبية متواصلة على مواقع التواصل الاجتماعي رحبّو امعايا بعارضة الأزيا والمسوقة لجميع مايخص المرأة الجميلة دعاء إبراهيم " قعدوو كلهو يصفقووو ورقت عالمنصة دعاء دعاء : حابّة نشكر سمر عالتقديمة الحلوة ونشكركم كلكم اول شي انقولها لكم استغلووو فترة الجامعة هذا وقتكم انا لو في حاجة نتمنى اتعاود هي الجامعة ,, " وقعدت اتقوول في كلمتها للحضور " افنان طلعت من المسرح ومشت للحمام علي أساس تبي اتصقم الميكب امتاعها فتحت الواتس ودزت مسج صوتي لسلوى وعمر " تخيلوو طلعت في كاميرة في الاستديو وامصورتنا نحنا الثلاثة مع بعضنا الحمد الله كان مافش صوت كان هذا رحنا فيها " جتها رسالة صوتية من سلوى " يعني ممكن هي اللي ادزلك في الاخبار " ردت افنان " والله ماني عارفة ,, بس انقول مش هي اللي تبعثلي في الاخبار " عمر " تبيني انراقب نقّالها انشوف مع من تتصل وشن اتقول " افنان " لا اكيدة مش كل شخص انشكّو فيه انتجسسو عليه الجو هذا مش حنديرو الا اللي عندنا ادلة عليهم " سلوى " يعني توا شن المطلوب منّا " افنان " عمر كيف صار في البروفايلات الأشخاص اللي قتلي امزوريلهم شهادة ميلادهم قتلي تو تبعثلي صفحاتهم عالفيس وهمّا اكبار " عمر " تو اندزهن لكي توّا ,, لكن خليك مستعدة عشان فيه مفاجئة امعاهن " افنان " يعني مزال في مفاجئات " عمر " مزال ماشفتي شي انتي ,, حتشوفي توا ابرووحك " بعدها جتها شهادة ميلاد مزورة بعدها دزّلها صورة " كانت الصورة فيها شبه من سمر " بعدها دزلها مسج عمر " لما درت بحث عالصورة طلعت هذي بنت وليد رئيس المجلة " ,,,,,, يتبع ,,, | ||||
|
| |
|
19-04-18, 02:27 PM
| #7 | ||||
| #أفنان الحلقة 7 افنان في دارها وامكسدة عاللاب توب ولازالت تكتب في تدوينتها الأخيرة ,,, فلنقي نظرة على ماتكتب ثم نذهب معها للماضي " ناس واجدة ماتعرفش اتفرّق بين الاستسلام او الانسحاب ويحسابووهن نفس المعنى لكن هنّا مختلفات ومش شور بعضهن الاستلام هو التفريط في آخر ذرّة امل بالانتصار بينما الانسحاب هو المحافظة على استقلالية نفسك وفي ناس اتحب انّها تقتل املها من اول تجربة لكن لو عرفنا انّ مهزومين مثلا من البداية يبقى السؤال هو هل نختارو الانسحاب او الاستسلام " في الماضي ,,,,,,, بعد ما انصدمت بقصة سمر بنت وليد طلعت وحدة من الأطفال الأجانب جت دعاء تبي اتروح بيها للحوش اذّكرت انّها عندها موعد عشاء مع طارق وشالتها شووور المطعم ,,,,, افنان : السلام عليكم ,, طارق : وعليكم السلام ,, افنان : اسف عطلت عليك ’’ غير كنت حاصلة في الندوة وجيت مع دعاء وحصلنا في الزحمة طارق : لا عادي ,, اهم شي جيتي شن نطلبلك عصير قبل افنان : غير توا جيبلي ميّة انبل ريقي انحس في روحي عطشانة طارق : حاضر ,, معلش قرصون ممكن إمية ,, عارفة أفنان انا ميت جووع اليوم ماتغديتش عشان نتعشو مع بعض افنان : اها ,, بعد خطرها راهُ كذبت علي بابا وسامي قتلهم متعشيّة مع سلوى را تطلع منك وتدوي طارق : علي أساس امدورك سامي ,, تقريبا مش دايرك اخته بكل وامخليك علي راحتك افنان : مش هكي القصة ,, مانبش يطلعن دواوي والجو هذا انت عارف وفاهم قصدي طارق : شن نطلبلك تاكلي افنان : والله اعصابي متوترة وماعندش جو ناكل شن رايك انخلووها مرة اخرة بدون زعل طارق : انتي جيتي جيتي خلاص وانا من النوعية ما انحبش ناكل ابروحي في وجبة ادير فيها المطعم هذا حاجة ماتفهم شي ,,,, بات افنان كان يرجى في واحد قدام الحووش جا شخص غريب نزل من التكسي وماسك امعاه شنطة سفر بات افنان احضنة بالقوووة بات أفنان : الحمد الله عالسلامة ياماجد ماجد : الله يسلّمك ياباتي " وخشّووو جوّا الحووش " ,,,,, افنان : ما انحبّش من يراقبني وانا ناكل طارق : من فينا مش متراقب كلّنا متراقبين افنان : مش قصدي المراقبة اللي في بالك بس تقعد اتبحّت في الشخص وهو ياكل انحس فيها بايخة طارق : خلاص تو انبحّت غادي افنان : عليك اللي يزّعل طارق : باهي ممكن نسالك عادي افنان : تفضل طارق : عليش كنتي مضّايقة هذكي اليوم يوم حفل الجمعية الخيرية افنان : خلاص انحب مانبش نحكي في الموضوع طارق : براحتك ,, نطلبلك قهوة افنان : لا ,, اكيدة نبي انروح نبّي نرقد مانبّش نسهر طارق : عليك اللي حاصلة في روحها كلّا انتي افنان : نسالك طارق , لو تبي تأخذ قرار كيف تعرف انّ القرار صح ولّا غلط طارق : يعتمد عالموقف اللي يصير بعد القرار ممكن الصّح يطلع غلط وممكن الغلط يطلح صح افنان : بس لّما المشاعر تدخل في قرارك تلقى الحقيقة تطلع ناقصة طارق : كان تبي الحق نادر ماتقعد الحقيقة كاملة ديما نص الكلام غايب شن انتي في موضوع في راسك ومش قادرة تاخذي القرار فيه " افنان سمعت نقّالها يرن طلع باتها " افنان : نعم بابا بات افنان : ممكن اتروحي توا في شخص يرجى فيك افنان : هيا امروحة , توّا تو انخلي سلوى اتحطني عند الحوش " طارق : كنك ماشيا افنان : بابا يبيني ضروري نبي نمشي توا طارق : تم اوكي " جا السفرجي عطا طارق ورقة الحساب وسلّكه وشالها شور الحووش " ,,,,,, افنان : ما اتخشش بيا شور الحوش حطني قدام الشارع مانبش نطلع كذابة قدام اهلي طارق : خلاص تم بيناتنا آلووو " نزلت افنان ومشت شوور حووشهم " خشت للحوش وصلت للصالة لقت باتها يهدرز مع ماجد قعدت امصبّية في مكانها وملامح وجها تغيرن وماجد يبحّت فيها ومبتسم وهي مابتش اتبادله للابتسامة وكأنها شافت واحد حاقدة عليه وما اتحبّش بشار : اهلين افنان ,, كيف حالك بات افنان : افنان افنان ,, كنك ,, سلّمي علي خوك كيف روّح من السفر " مابتش اتسلم عليه وركبت للدار امتاعها " غيرت دبشها وقعدت عالسرير سمعت باب الدار يدق داليا : فاضية افنان : خشّي عادي داليا داليا : كنك مابيتش اتسلمي علي خوك هذا امر واقعي ولازم اتقبّيلي ومش معقولة واحد يقطع علاقته باهله عشان زعلان منهم خوك هذا ,, مش براني المهم هو توّا جا افنان : فاتني في اكثر وقت كنت مستحقّتله مش انا بس ,, حتى ماما فاتنا وسافر خاف علي سمعته أي خو هذا اللي تبيني انسامحه داليا : مع الوقت كل حاجة حترد نفس قبل بس اللي نبي منّك انّك تعطيه فرصة ثانية صدقيني متاكد حتردوو نفس زمان حبايب توا انخليك اتفكري علي مهلك واتريّحي تصبحي علي خير ,,,,, بعد منتصف الليل ناضت افنان وكانت جعّانة لانها ماكلتش اكويس مع طارق قبل ماتنزل للمطبخ مسكت نقّالها لقت رسالة من عمر " نتقابلو بكرة الصبح عشان التدوينة امتاعك " ردت افنان عليه " تمام حنتقابلوو في الكافيه " بعدها نزلت للمبطخ ادير في سندوتش جبنة علي خشت ماجد للمطبخ ماجد : احم احم افنان : مابتش اترد عليه ماجد : او اديري في ساندوتش ,, ممكن اديريلي امعاك واحد وخذا تفاحة من المطبخ وقعد في المبطخ ماطلعش " افنان صبّت كباية عصير ابرمت تبي تأخذ السندوتش لقت ماجد واخذ الطاسة ويشرب فيها افنان بحّتت فيه وهو يشرب ماجد : العصير حامض اشوية افنان : ماجد اطلع برّة ماجد : نبي انحاول انهدرز امعاك وانخش فيك افنان : مانبّش نحكي امعاك ماجد : بس بما انّ عايشيين تحت صقف واحد لازم حنحكو ونطمنو علي بعضنا افنان : صقف واحد صار ,, اطلع برّة المطبخ ,, وفوتني توا " ماجد كمّل طاسة العصير وبعدها حطّها عالطاولة " ماجد : في معلومة ممكن انتي ماتعرفهش امّك هي اللي قالت لي لازم اتسافر " وطلع ماجد من المطبخ " ....... هذي الرواية للكاتب ديندار الوحيشي ,,,,,,,, ثاني يوم الصباح طالعة افنان تبي تركب للسيارة مع السوّاق لقت مكان السوّاق ماجد ماجد : صباح الخير خيّتي افنان : فيش ادير انت هنا ماجد : عنجد فيش اندير , باتي مش فاضي ,,, وسامي مش فاضيلك بما انّي انا روّحت خلاص السواق معش نبّو حنقعد انا انشيل فيك وانروح بيك أي مشوار تبيه افنان : عليش ماما قالت لك سافر ماجد : عشان الاتهامات اللي جَنْهاَ خافت انّها توصل فيّا هي عميدة جامعة وجنها هالاتهامات مش حيتهموو ولدها اللي يقرا في نفس الجامعة كان لازم انسافر افنان : اها ماجد : وعلي فكرة باتي ماعندش علم انّي كنت امسافر عشان هكّي اللي يعرفة انّي سافرت عشان انغيّر نفسيتي وانروح افنان : بابا ماكانش يعرف من البداية ماجد : لالا افنان : عليش لا ماجد : عشان خلاص بدا حياة جديدة وقعد عايش حياته افنان : شن اللي خلاك اترد بعد هذا كلّه قالولي كنت عايش اللحظة برّة ماجد : انا روّحت عشان انتي روّحتي اكيدة محتاجة لخوك امعاكي افنان : انا ناسيا أصلا انّ عندي خوه ,,,,, كانُ عمر وسلوى يرجُو في افنان في الكافيه سلوى : امس حلمت حلم يخّوف الفترة الأخيرة صايرلي وقعدت خايفة من الأجواء اللي انديروو فيهن حسيت روحي خشيّنا في حاجات اكبر منّا بواجد واللي انديرو فيه غلط في غلط عمر : انتي شن عرّفك صح من الغلط لو خايفة تقدري تنسحبي وخليني انا وافنان " علي جيّة افنان " سلوى : كنك طوّلتي افنان : خويا ماجد روّح ,, وقعدت انهدرز اشوية انا وياه في الطريق وكان يمشي علي إمْهَله ,, سلوى : ماجد روّح ,, الحمد الله علي سلامته انسكم افنان : تسلمي سلوى ,, تمام انا قعدت انفكر في المعلومات اللي قاعدات عندي ’’ عمر : المعلومات اللي عندك حتفجر السوشل ميديا بالكامل سلوى : انت مش هامك الا سوشل ميديا في ناس واجد حتضّرر عمر : المشكلة عارفة وين ,, لو ماقلنش والنّاس اعرفت لازم يعرفو الحقيقة افنان : عموما نحنا عندنا معطيات اكثر وادلّة واجد ,, وانا عندي طريقة في بالي بدوون كشف أسماء الأطفال يعني حندير تقرير علي تجارة الأطفال وهكذا والتدوينة بشكل تام واتية لكن مش حننشرها لين انقابل ولاء وانهدرز امعاها قبل نبي نعرف شن موقفها بالمعلومات اللي نحنا عندنا عليها وهي أصلا لمّحتلي اكثر من مرة انّها زارقة علي موضوعنا او حاجة كيف هكي مدام هكّي ,, لازم نحكيلها وخلاص واللي يصير يصير حنخليها قدام خياريين وعلي حسب ما اتقوول يا نحنا ننشروو يا ماننشروش التدوينة انا حندزلّك التدوينة توا علي ايميلك وتقعد واتية وارجى منّي تليفون عمر : تمام حتّى هذا راي " طلعت افنان لاب توب امتاعها وبعثتها العمر علي بريده وحذفتها من اللاب توب امتاعها " افنان : خلاص توا نستاذنكم لازم نمشي الولاء حنقوللكم شن صار امعايا " وصبّت افنان ومشت " سلوى : تخيل بس ياعمر تلقى تقرير وتقرا وتكتشف انّ هذيما مش هلك شن حيصيرلك عمر : ياااااااارب تطلعو مش هلي سلوى : انا نحكي من جدّي كنّك واخذ الموضوع بتشفيط " تلقيح " انت عمر : شن تبيني انقولك ,, انا هكّي انحب الفضايح انموووت في بنّة الفيضحة ماعندش روح امعاها ومتقبّل الشي هذا وعايش حياتي ونفس ماقتلك لو خايفة تقدري تنسحبي وخليني انا وافنان انكمّلو عادي سلوى : هيّا حسيّتك عصبتني , خلينا نمشوو للعيادة ,,,, بعد مرور نص ساعة ,,,, كانت ولاء اتلعّب في الأطفال في الجمعية الخيرية علي خشّت افنان عليها ولاء : نستاذنكن يابنات ,, ولعبووهم انتم توا اشوية تو انجيكم افنان : اهلين ولاء ولاء : اهلين ,, باهي اللي تواضعتي وجيتي افنان : اشوية اشغال بس ,, شن جوك ولاء : الحمد الله ,, هيا شن رايك انديرو برمة عالجمعية وانوريها لكّي من جوّا ,,,, بعد ما عمر شال سلوى للعيادة خشت سلوى شافت سامي قاعد جوّا استغربت سلوى : شن فيه طمنّي ان شاء الله خير من عندك هنا يعالج سامي : لا جي نبي انهدرز امعاك اشوية سلوى : فجعتني ..... ولاء : اتحبي الأطفال افنان : من مايحبش الأطفال ولاء : عادي في ناس يحبوهم بس من بعيد البعيد وفي ناس يحبووهم لاسباب إنسانية افنان : انا انقول حبّنا للأطفال واحد لكن طريقة تعبيرنا للحب تختلف ولاء : ممكن وجهة نظر , عارفة الدار هذي كانت مكتبي ,, لما زاد عدد الأطفال عطيتهم مكتبي ودرتها دار يرقدوو فيها كملت عمري كلّه عشان راحة الأطفال افنان : هل حبّك للأطفال يخّيلك اديّري أي حاجة عشان خاطرهم ولاء : اكيدة مدام فيها مصلحتهم اندير أي حاجة افنان : لو فرضنا في حد يعرف حقيقة اباء الأطفال اللي عندك هل هو مسؤول انّ ينشر حقيقتهم ولا لا ولاء : الشخص هذا لو يحب الخير مستحيل ادير حاجة كيف هذي لان في الاخر الضرر الأكثر حيجي عالاولاد وهّما اللي يحقعدو الضحية افنان : خلاص حينشر اسم الشخص المسؤول بدون ماينشر اسامي الأطفال عشان حياتهم ما تدمّرش ولاء : ولو رفض هذا الشخص انّ يتحمل المسؤولية او يعترف شن حيصيير افنان : الحقيقة ملك لكل الناس ومن حق الناس تعرف من هو المسؤول ولاء : انتي مش فاهمة حاجة يا افنان موضوع النشر هذا مش حيضّر الأطفال بس حيضر صاحبك اللي حينشر التدوينة افنان : صاحبي مش حيضرّر وانا متاكدة انّ مش حيتراجع علي قرارة ولاء : كنت نحسابك كيف امّك طلعتي اشر منها مش داعي اندمرو عائلات الناس وانتي مش مصلحتك تعرفي الحقيقة " افنان اقلبت وجها عليها وطلعت من الجمعية طلّعت نقالها واتصّلت بـ عمر عمر : الو افنان : ايوا عمر ,, انشر التدوينة توّا ,,,,, سامي : كنك انحس فيك مضايقة سلوى : بصراحة في موضوع نبي ناخذ رايك فيه بس خايفة يطلع منّك , نبيك توعدني انّ مايطلعش منّك الحد سامي : مش داعي نوعدك ,, بس اكيدة مش حنقول الحد ,,,,,, الساعة 6:00 مساءا كانُوو كلهم ماشين شور الكافية الجديد امتاع مدام وليد العائلي وكانت دايرة افتتاح للكافيه وقتها كان في هشتاق جديد انتشر علي ولاء بالمتاجرة بالأطفال وقعدت كلها تحكي عليه في الكافيه علي خشّت افنان جت شورها دعاء دعاء : شفتي الفضيحة الجديدة اللي نشرها المدون اكس افنان : لا ,, بس فتحت التويتر القيت هشتاق علي ولاء شن صاير شن فيه دعاء : الموضوع شور جمعية ولاء تخيلي قالوو يخطفو في الأطفال ويبيعو فيهم والموضوع كبر اكثر وخشوو علي دار ايتام وحدات إِخرى وجمعيات إخرى وانا خايفة بكل افنان : عليش خايفة دعاء : لاني ياما درت إعلانات لولاء عالسناب شات والانستقرام ممكن ايجيبو سيرتي في الموضوع افنان : لا ماتشغلش بالك ,, ان شاء الله خير نستاذنك اشوية انسلم علي الأستاذ وليد وسمر انباركلهم الافتتاح دعاء : خوذي راحتك " سمر شافت افنان جايا شوورها افنان : السلام عليكم سمر وهي مبتسمة : وعليكم السلام وليد : وعليكم السلام افنان : مبروك عليكم الافتتاح سمر : الله يبارك فيك " كان وليد ماسك النقال ويتفرج عليه وكان مضايق من قصة الهشتاق " افنان : ماشاء الله ديكور الكافية حلوووو سمر : تسلمي هذا من ذووقك افنان : وين مامتك نبي انباركلها سمر : قاعدة غادي مع صحباتها وليد : لاحول ولا قوة الابالله مسكينة ولاء الناس اتقطّع فيها عالسوشل ميديا سمر : مفروض كانت جايا صح يابابا للافتتاح وليد : المفروووض .. لكن صعب اتجي توا مع اللي صارلها اليووم افنان : وين داليا وليد : الله اعلم ,, " وطلع برّة الكافيه وليد " افنان : شكله باتك زعلان علي ولاء سمر : شكله اها افنان : هو يعرف ولاء من زمان سمر : مش عارفة ,, انا مش خاشة واجد في الحياة الشخصية امتاع بابا " افنان شافت من بعيد سامي ودعاء يحكوو مشت شورهم " ,,,,, سامي : الموضوع هذا حيضر ناس واجدة دعاء : الناس كلّها اتسب في ولاء في التعليقات وانا خايفة بكل ,, اكيدة معش يصدقووني المتابعييني تو يحسابووني نفس ولاء افنان : وين داليا سامي : وين اتجي ,, الناس كلها عارفة انّ ولاء صحبتها الروح بالروح خايفة الناس يقعدوو يسألو فيها افنان : ماتوقعتش ان داليا علاقتها قوية بكل بولاء سامي : كنك امتفّهَ موضوع ولاء ,, بعقلك انتي ولا شن دعاء : خلاص فكوونا عاد كنكم طارق : شكلكم تحكو علي فضيحة ولاء شكلنا حنخدموو عالسوشل ميديا كلمني اكثر من شخص يبو يصورو حلقات خاصة عالمدون اكس قاعد انّطلع في افلووس من هالموضوع انا افنان : يعني انت مش هامك الا افلوس وبس طارق : انا قلتها من قبل وحنقولها اخرة المدون هذا ايفيد ناس وحيضّر ناس وانا مستفيد منّا شن ذنبي انا ومش هكي بس المدون اكس يفضح في هالناس وخلاص مش داير احساب البكرة بكل " علي خشّت ولاء للكافيه " كلّها سكتت وقعدت اتبحّت فيها ولاء : اهلين وليد كيف حالك وليد : اهلين ,, ولاء : كم عند متابع علي قناتك يادعاء دعاء : فوق 750 الف ولاء : وانت ياطارق طارق : فووق المليوون متابع ولاء : خلاص طلّع نقالك وصوّرني نبي نزل مقطع فيديو ليّا للناس نبي انوضح كم حاجة طارق : حاضر " وطلّع طارق النقال وقعد يصور فيها " ولاء : السلام عليكم انا ولاء عبد الرحمن صاحبة جمعية الأطفال الخيرية بالنسبة للتّهم التي تم تداولها عني وعن الجمعية انا انفيها نفيّاً قاطعا وابَري ذمّتي منها ومستعدة نوقف قدام القضاء انا وبدون مِنّة على أحد سخرت كامل حياتي للاهتمام بالأطفال اليتامى ورعايتهم وحرصا على مصلحة الجمعية والأطفال والموظفين انا انقدم استقالتي وحنخلي الإدارة لشخص آخر أكفأ منّي ,, " أفنان مانزلتش عينها بكل علي ولاء " ,,,,, افنان وهي مع باتها في السيّارة امروّحة للحوش واتفكر وسرحانة ومش عارفة هل اللي دراته صح او غلط سمعت صوت مسج من النقال شافت الرسالة طلعت من ولاء " قولي لصاحب التدوينة انّ ولاء تنصحة انّ مايجرش وراء فضولة واجد ,, عشان الحقيقة الكاملة مش حتفرّحه " بات افنان : افنان افنان انفان : نعم بابا بات افنان : امعايا انتي ولا وين عقلك افنان : امعاك اها , بات افنان : شفتك سرحانة في النقّال في حاجة افنان : لا مافش شي ,, ,,,,, بعد منتصف الليل قبل ماترقد افنان خذت نقّالها ودارت تسجيل صوت ودزّاته لسلوى وعمر " شكر عمر وسلوى عاللي اديرو في امعايا مش حنلقى أصحاب كيفكم " عمر رد عليها بمسج " هذا واجبنا ,, بكرة انتقابلوو ,,, بعدها لقت مسج جايها من طارق عالواتس " شن رايك بكرة نفطرو مع بعضنا في المكتب " ابستمت افنان و دارت نقّالها صامت وطفّت الظي امتاع الدار وغطت روحها ورقدت جتها رسالة من رقم دولي وهمي بدون اسم " الدكتور إبراهيم داس علي روحه حاجات واجد حاوّلي إتعرّفي عليه " ,,, يتبع ,,, | ||||
|
| |
|
26-04-18, 01:37 AM
| #8 | ||||
| #أفنان الحلقة 8 طبعا افنان جازفت ونزّلت تدوينة علي ولاء وطلّعت فضائح ولاء هيا تعالوو نعرفوو شن صار مع افنان لمّا نزّلت التدوينة على ولاء ,,,, في الماضي ناضت افنان الصبح لقت من نفس المصدر برقم وهمي رسالة بخصوص الدكتور إبراهيم " افنان تحكي مع عمر وسلوى مكالمة فيديو في الصباح الباكر " افنان : والله مش عارفة شن يقصد بالرسالة لكن الدكتور إبراهيم آخر واحد جاء في بالي انّ المصدر يدّزلي معلومة عليه بس بغض النّظر ياعمر حاول انّك اتشوفلي أي حاجة عليه في الجامعة سلوى : لازم انفكّرو في الموضوع مش معقولة نحنا انديرو في أي حاجة يبيها المصدر ونحنا مش عارفّينا من افنان : مش هامني من يطلع هو ,, المهم اللي يقولي عليه يطلع صح افنان : بس نحنا هكّي اندمرو في حياة ناس عمر : يستاهلوو ,, أي حد ماشي غلط في المجتمع يستاهل لازم انتقابلو يا افنان عشان نتفقوو شن انديروو افنان : خلاص تمام تو نتقابلوو ,, توا لازم انسّكر منكم عشان عندي مشوار ضروري بس نفس ماقتلك ياعمر دوّرلي أي حاجة علي الدكتور إبراهيم في الجامعة ,, اوكي نتقابلوو بعدين ,, ,,,,, كان طارق يوّتي في الفطور الصباحي في مكتبه عشان عارف انّ افنان حتجي شور المكتب امتاعه قبل ماتمشي باقي مشاويرها ,,,,, وهي نازلة من الدروج افنان شافت دالية تحكي بتليفوون داليا : خلاص اوكي حنكلمك بعدين باي باي " سكرت الخط وبحّت في افنان " داليا : افنان ,, ممكن تقعدي اشوية نحكووو افنان : والله مستعجلة طالعة متأخر ,, ممكن نحكو بعدين داليا : عالسريع بس افنان : لكن حنتاخر ياداليا داليا : خلاص تو نركب امعاك في السيارة ونحكووو داليا لبست عبايتها وركبت مع افنان ,,,, وهمّا قاعدين في السيارة افنان : انتي عارفة استقالة ولاء جت فجأة ومش متوقعين انّها حتصير لذالك اطلبو منّي نمسك الجمعية بدالها وبصراحة مالقيتش وحدة تقعد امعايا الا انتي خير افنان : بس انا مشغولة مع دعاء الفترة هذي داليا : عارفة انك مشغولة بس انتي اكثر شخص نوثق فيه افنان : بس غريبة مش عندك صحبات ومعارف واجد خليهن يسعدّنك وهِنا يعرفن في المجال هذا احسن مني داليا : نكذبش عليك نبي نبتعد عالدائرة هذي مانبش نخدم مع وحدة كانت تخدم مع ولاء مانبش انجيب كلام الرّوحي افنان : خاطي شغلي مع دعاء ,, عندي اشغال إخْرى لكن متخافش نعرف بنت أستاذ وليد اسماها سمر هذي اتحب الاعمال التطوعية وعندها حتى خبرة في المجال ممكن اتساعدك واتفيدك حنسألها أصلا ماشيا بعدين للجامعة ونبي سمر عشان ناخذ مقطع الفيديو امتاع الندوة تبّيه دعاء حنسألها متاكدة مش حتقولك لا داليا : بس ليش تبي تمشي للجامعة ليش ما الدكتور إبراهيم ياخذة من سمر ويعطيه لدعاء افنان : هي هكي اتحب اتخلي في الشغل علاقتها مع باتها رسميّة داليا : نفس امّك لما كانت عميدة في الجامعة اتعامل في ماجد وكأنها ماتعرفش افنان : اها ربي يرحمها ان شاء الله داليا : باهي قوليلي مافش أي شي جديد انتي وماجد افنان : لا ,, بس حنمشي بكلامك وحنعطيه فرصة في الاخيري خوويا هوو ,, باهي انتي تعرفي ماما اكويس داليا : يعني ,, بس كل شي سمعته من باتك ولّا الدكتور ابراهيم افنان : هو الدكتور إبراهيم يعرف ماما واجد قصدك داليا : هو كان ماسك الكلية وقتها لما كانت تخدم عميدة افنان : بالنسبة للمتلقى اللي بكرة اللي امنظمته الجامعة الاهلية امتاع المشي هل مزال قاعد ولا لغيتوووه بعد قصة ولاء داليا : لا ان شاء الله مزال قاعد وبكرة كل شي حيمشي عادي افنان : اها تمام ,,,,, بعد مرور ربع ساعة وصلت افنان لمكتب طارق وقعدو يفطروو مع بعضهم طارق : وتيت الفطور الصباحي لكن ماتوقعتكش اتجي افنان : قلنا انشوفو شن يفطر طلعت تفطر في بريوش وكابتشينوو عايش اللحظة في فطورك طارق : لا عشانك بس انا عادةً كيكة وقهوة افنان : خلاص معناها يوميا تو انجيك نفطر امعاك طارق : تعالي المكتب مكتبك في أي وقت افنان : بس شكلك متعود ايجو ناس يفطرو عندك ديما طارق وهو مبتسم : مزال بدري عالاسئلة هذينا افنان بابتسامة : تبيني نسالك علي دعاء مثلا طارق : انا كنت ناوي نحكيلك علي دعاء لكن بما انّك فتحتي الموضوع ابروحك خلاص حنخليك اتكملي تحقيقك ومش حنحكي شي وحنخليك اتكملي التحقيق امعايا افنان : معلش لو كانت اسئلتي بايخة بس الفترة اللي فاتت كانت صعبة عليّا بالذات مع دعاء وولاء وخويا قبل يومين روّح ,, لمّا سافر كانت ماما وقتها في عز مشاكلها مفروض يقعد امعانا لكن سافر واللي تقهرك لمّا روّح كأن ماصار شي خايف انرد نوثق فيه يسافر ويفووتني في وقت نقعد مستحقتله واجد طارق : عليش حاطّة أسوأ الاحتمالات انتي مش خاسرة شي لو وثقتي فيه مرة اخرة افنان : الثقة صعب اترد كيف ماكانت طارق : انتي تحكي امعايا معناها واثقة فيا افنان : نكذبش عليك بديت نوثق فيك لكن خايف ايجي يووم نندم عشان وثقت فيك وحتى شخصيتك غامضة طارق : يعني مثلا نبي نطلع مدون اكس افنان : ليش لا ,, مرات انت طارق : خطرها علي قصة مدون اكس شن اتوقعي مواصفاته افنان : انا انقول اجتماعي واقريّب من الناس واجد واقريّب من المجتمع وهذا الشي اللي يخلّيه يطلّع هالفضايح طارق : مش املاحظة انّ انتي وغيرك يحكو عالمدون اكس علي أساس شاب ليش مايقعد بنت افنان : ليش متوّقعة بنت مثلا طارق : الاسرار اللي طلعهن والمواضيع اللي حكى عليهن هذينا مواضيع لمّات صبايا او يقعد مدون اكس شاب بس عنده مصدر بنت انا متاكد انّ بكرة المتلقى امتاع المشي حيقعد المدون اكس موجود او المصدر امتاعه موجود انا متاكد مية في المية افنان : ممكن ,, توا انا لازم نمشي اهم شي فطرنا امعاك عشان ماتقولش فشاكة وشايفة روحك طارق : شن فطرتي حتى بريوشك ماكملّتي ,, من ناحية فشاكة لا قلتها من اول مرة لكن خلاص بديت انغير في فكرتي عليك افنان : مزال عندي مشية للجامعة ,, ومزلت انقولها لكي وحنقولها اخرة انت شخصيتك غامضة ,,,, هيا خليني نمشي توا " وافنان وهي طالعة من مكتب طارق شافت سلوى قاعدة في المبنى " افنان : اهلين سلوى سلوى : اهلا افنان : ماقتلش جايا هنا سلوى : ماكنتش عارفة انّك حتجي كان هذا رنيت عليك افنان : شن اديري هنا سلوى : يعني جايّا هنا عليش مثلا اكيدة عارفة بلاش استعباط افنان وهي تضحك : باهي شن مزلتي قاعدة ولا ماشيا سلوى : لا ماشيا للجامعة افنان : هيا تو انشيلك امعايا ,,,,, وهمّا في السيارة افنان وسلوى افنان : حنقولك شي ,, انا ماعندش اعتراض علي علاقتك بسامي ,,, بس رد بالك اتحطي ثقة في أي حد بسرعة وبالذات لما قتيلي عالمصدر هل هوو صح يبّي يورّي الحقيقة ولا يستغل فينا المهم راك تطعلي قايلة لسامي أي شي عن موضوعنا سلوى : لا اكيدة مستحيل انديرها بس انا فضفضتله اشوية افنان : لا ياسلوى ,, شن قتيلا سلوى : لا ماقتلش حاجة علي قصتنا وهكي ولا جبت تفاصيل قصتنا حكيتله بشكل عام افنان : لازم تعرفي انّ الوضع توّا قعد خطير ومانقدروش نوثقو في حد لا سامي لاطارق لا داليا لا دعاء وشاكّة في طارق عادي قالي توقعي يطلع المصدر بنت سلوى : نكذبش عليك في البداية نحسابك انتي اتجيبي في المصدر من عندك واتمشّي فينا وخلاص ’’ وبعدها قلت لالا اكيدة المصدر يعرف الناس هذيما اكويس كان هذا مايقدرش ايجيب معلوومات دقيقة بكل افنان : معقولة مش واثقة فيا سلوى : لو مش واثقة فيك راهُ ماصرحتكش ,, قتلك نحكي علي بداية الموضوع مش توا عالمهم مانبّوش نستعجلوو في موضوع الدكتوووور إبراهيم عشاااان مانقعدووش لعبة في يد المصدر افنان : ان شاء الله خير سلوى : سامي طلب منّي رقم عمر عشان يبيه في خدمة معينة افنان وهي تضحك : عشان خدمة ولا خطوبة سلوى : لالا قالي نبيه في موضوع افنان هي تضحك : باه اوكي خدمة خدمة ,,,,, افنان حطّت سلوى في جامعتها وبعدها مشت شور الجامعة الاهلية ,,,, سمر : اهلين انستي افنان افنان : كيف حالك سمر : الحمد الله ,, وانتي شن دايرة افنان : الحمد الله اكويسة ,, كمّلتي الفيديو امتاع الندوة سمر : من امس قاعدة عليه ,, انعاني فيه لكن خلاص كمّلته وواتي توا "وفكّت الفلاش من اللاب توب وعطاته الفلاش " افنان : حبيت نسالك سمر : تفضلي افنان : داليا مرات بابا حاليا ماسكة الجمعية بدال ولاء فكانت تبيني قبل امعاها بس انا مشغووله لكن ودّيتها بيك لانك عارفة اتحبي الجو هذا اسمر : اكيدة ماعندش مانع انحب الاعمال التطوعيية افنان : حتى انا قتّلها هكي من البداية تو نعطيها رقمك عشان اتواصل امعاك دعاء وين ’’ شفتيها اسمر :قاعدة في مكتب باتها افنان : وين المكتب اسمر : هيا تعالي ورايا تو انوريه لكي " وقعدن يتمشّن مع بعضهن في الممر امتاع الجامعة " افنان : شفتي الكلام اللي انتشر علي ولاء سمر : اها توا في نكته منتشرة في الجامعة لازم ادير تحليل dna مرات هذووما مايطعلش اهلك افنان : شن النكته في الموضوع سمر : تي انا لو مايطلعش هذا باتي احتمال حنطرشق لاني معش نبي الا بابا وليد ربي يحفضه ويرعاه افنان : اللهم آمين ,, " وصلن مكتب الدكتور إبراهيم " سمر : خلاص انا حنسيبك توا افنان : المهم موضوع داليا متفقين فيه صح سمر : قتلك تم انا خلاص ,, يلا باي " خشت للمكتب افنان ,, لقت دعاء مع الدكتور إبراهيم " افنان : السلام عليكم إبراهيم : وعليكم السلام ,, دعاء : نحسابك مش جايا ,, قلت تو انجيبه انا وخلاص إبراهيم : خذيتي الفيديو ’’ انا تفرجت عليه فيديوو ابداع’’ دعاء رايحة شاطرة بكل افنان : لا ماشاء الله عليها رايحة متفوقة الأيام هذينا ربّي يكمل عليها ان شاء الله إبراهيم : اتصدقي ليا اربع سنوات ماصرفتش عليها ولا قرش هيا اللي تصرف عليها روحها قعدت ممتازة في عالم التسوق افنان : اها روحها محبووبة حتى انا في البداية ماكنتش متوقعتها هكي لكن بعد تعرفت عليها طلعت شخصيتها حلوة دعاء : خلاص احرجتووني سادكم ترا عطيني الفلاش يا افنان عشان انشووف الفيديوو طلعت دعاء من المكتب وقعدت مع الدكتور إبراهيم إبراهيم : انتي عارفة انّ انا نعرف امّك الله يرحمها افنان : لا ماكنتش نعرف توا كيف عرفتها منك ممكن كانت علاقتي بالوالد اكثر افنان " بابا ؟؟؟ إبراهيم : كنك استغربتي افنان : غريبة ماقلّش انّ يعرفك إبراهيم : انتي عارفة بعد ماتت امك معش قعدت علاقتي باتك قوية خلاص توا نستاذنك عندي موعد انتي جايا للملتقى صح افنان : ان شاء الله جايا إبراهيم : خلاص نتقابلو غادي " طلعت افنان من المكتب وطلّعت نقّالها ورنّت علي ماجد عشان ايجيها في الجامعة " .... ,,,,, هذه الرواية للكاتب ديندار الوحيشي ,,,,, كان وقتها عمر راقي من ادرووج وماشي شور مكتب سامي ,,,,, بعد مرور 10 دقايق كانت افنان ترجى في ماجد في الباركي علي طلعت دعاء من الجامعة دعاء : من امروح بيك افنان : جايني ماجد دعاء : مااااااجد ؟؟؟ ,, قصدك ماجد قاعد هنا وصل لبنغازي افنان : اها جا دعاء : باهي تمام بالمرة اتوصلوني للاستديو وانسلم علي ماجد ليّا وااااااااااجد عليه افنان : خلاص حتى انا حننزل امعاك للاستديوو ’’ نسألك انتي كنتي عارفة انّ باتك يعرف ماما وبابا من قبل دعاء : اها كنت نعرف ,, لكن حسّيت مافش داعي نحكيلك الموضووع وبالذات علي موضوع موت امك افنان : لاعادي خلاص معش قعد يضايق فيا موضوع ماما أصلا قعدت هالفترة هذي نمسع فيها واجد ,,,,,,,, سامي : انجيبلك حاجة تشربها عمر : لا شكرا سامي : كنك انحس كيف متخزّرِط " متوتّر " عمر : لا جو تمام سامي : انا نبي منك خدمة ,, وحتاخذ عليها افلوووس عمر : خدمة شن سامي : انا سمعت انّك شاطر في الحاسوب وهكر قوي عمر : كيف عرفتها سامي : افنان قالت لي ,, توا مش هذا المهم المهم نبيك تعرفلي هوية المدون اكس عمر : عليش تبي تعرفة سامي : الموضوع امتاع المستشفى انا استفددت منّا واااجد حاب نشكرة بس عمر : شكلي اصغير لكن مش هبل عشان تضحك عليا قال نشكره قال سامي : لا مش قصدي هبل وقتلك شاطر في الحاسوب وحتاخذ باياتك من هالموضوع عمر : عطيني وقت طويل عشان نعرفة من الموضوع صعب اشوية سامي : حتاخذ المبلغ اللي تبيه ,,,,, علي جيّة ماجد بالسيارة دعاء : الحمد الله علي عالسلامة توا كيف عرفت من افنان انّك روحت ماجد : الله يسلّمك ,, ليا يوميين تقريبا امروح افنان : قصدكم تعرفوو بعضكم من زمان دعاء : اها نعرفه من زمان ماجد : شكلك متغيرة واجد يادعاء دعاء : صح ’’ باهي شن سمحة ولا شن ماجد : اكيدة سمحة افنان : توا نبو انطولو في الهدرزة خلوونا نمشو خير وهدرزوو في الطريق علي راحتكم ,,,, سامي : المدون هذا اينزّل في حاجات خطيرة لكن نفس الوقت مفيدة لبعض الناس يعني هو صح ضر ناس واجدة لكن نفس الوقت في ناس واجد استفادت منّا وانا نبي نعطيه ليستا باسامي ناس فاسدة ينشر فضايحهم عشان ناس ثانية تستفيد عمر : اول واحد من الناس اللي حتستفيد انت سامي : سمّيها مصلحة مثلا عمر : حنفكر في الموضوع ونفس الوقت لازم تعرف انّ هو شاطر ناس واجدة حاولت تعرف هو من لكن ماعرفووش سامي : لكن انت اشطر منهم عمر : افنان شن قالت عليا بالزبط سامي : لا هي دوّة عادية جابت سيرتك بعدها قالت عمر هكر في النت والجو هذا جت في بالي الفكرة هذي عمر : خليني انفكر وحنقوولك لكن نفس الوقت مش حنوعدك بشي سامي : خلاص انا نرجى فيك ,,,, عمر طلع وكان راقيله مستغرب كيف افنان حكت لسامي ومعش فهم شن صار ,, ومش خاشّة راسه انّ افنان حكت لسامي طلّع نقّاله ودز مسج صوتي لافنان "لازم نتقابلوو ضروري اليوم في العشية في الكافيه " ,,,, افنان وصلت مع دعاء للاستديوو وشافت التسجيل الصوتي امتاع عمر لكن ماعرفتش كيف تسمعه لان دعاء كانت امعاها " قاعدة دعاء تختار في لبسة معينة تقعد جديدة للملتقى اللي بكرة عشان اتسوّقها واتساعد فيها افنان في الاختيار ,,,,,, الساعة 5:00 عصرا قاعدين عمر وسلوى يرجوو في افنان عمر : يا انتي يا افنان اللي حكت السّامي سلوى : قتلك انا ماحكيتله شي عمر : معقولة افنان تحكي الخوها مابتش اتخش راسي اكيدة انتي سلوى : براحتك ما اتصدقش عمر : ياسلوى افنان مشغولة اكيدة انتي سلوى : كنك تحكي امعايا هكي انت " علي جيّة افنان " افنان : كنكم شن فيه عمر : سلوى قالت لسامي انّي هكر وامتاع حاسوب سلوى : قتلك مش انا اللي قلت ماتعصبنش ياعمر افنان : اشوية شن فيه عمر : سلوى عطت رقمي لسامي اليوم كنت عنده قالي نبيك تعرف من هو المدون اكس قالي افنان هي اللي قلت لي انّك هكر وامتاع حاسوب وانا طبعا ماخش راسي هالكلام افنان : لا طبعا مش انا اكيدة شن يبّي فيه سامي المدون اكس عمر : قالي يبي في عمل يخصّة هو عنده ناس يبي يفضحهم انا قتله صعب مانقدرش لكن حنحاول وخلاص افنان : زعمك من المصدر هذا اللي يستفيد بالفضايح اللي انطلعو فيهن عمر : انتي من اتوقعّي سلوى : انا نستبعد سامي عمر : عليش تستبعدي مرات هو داير ملعوب علينا نحنا الثلاثة سلوى : ليش مايقعد طارق ولّا دعاء افنان : توا المهم انّ مانوثقش في حد ياريت الكلام اللي بيناتنا مايطلعش الحد راني وقضتكم افطنووو ما اتحطو ثقة في حد لانّ مرات يطلع واحد فيهم هو المصدر توا خلوو موضوع من هو المصدر علي جنب وخلّوونا انفكرو في قضية الدكتور إبراهيم عمر : دوّرت ملفّات الجامعة أوراق مستندات كلهن تمام,, افنان : باهي في فترت كان مع ماما مافش حاجة عمر : الحق بعد قصة امّك حوّلو القضية عالنيابة العامة مافش شي لعند توا سلوى : هكّروو نقاله افنان : لا نقاله عادي لا فيه كاميرة لاشي عمر : ممكن في حل ونقدرو انهكروو بس فيه اشوية مخاطرة لازم يكون يدوي افنان : كيف يدوي يعني عمر : يعني وحدة منكن تاخذ وصلة امتاع يو اس بي وتحّطة في نقال الدكتور إبراهيم ونقالها هي والباقي عليّا اكيدة في مدخل يو اس بي نقال دكتور إبراهيم افنان : انا بكرة حنقابل الدكتور إبراهيم في الملتقى وحنحاول اندير اللي قتلي عليه سلوى : انتي متخافش يافنان عمر : اس اس غير انتي اطلعي منها ياسلوى ,,, بعدها عمر طلع وسيّبهن وقعدت افنان وسلوى في الكافيه العائلي سلوى : انا مضّايقة واجد من سامي حسيّته يستغل فيّا افنان : سامي وعرفته أي فرصة لازم يستغلّها مع انّ اكويس لكن كل انسان لازم عنده عيووب انا فيا عيوب انتي فيك عيووب يانتقبلوو الشخص بالعيووب ,,, يا انفوتووه سلوى : ماشاء الله رايحة عاقلة واجد افنان : من اول ماروحت من لندن تغيّر تفكيري واجد من المواقف اللي صارن قدامي هالفترة اللي فاتت سلوى : قصدك طارق افنان : سامي اهون بواجد من طارق طارق معش فهمته حسيت شخصيته غمووض في غمووض سلوى : غريبة مع انّ البنات يحبّن الغموض في الراجل افنان : بس انا مش منهن ,,,,,, الساعة 10:00 مساءا جتها رسالة من عمر " متاكدة انّك عرفتي الخطوات وشن اديري قبل ماتعلقي الوصلة في نقالك ونقال الدكتور إبراهيم " ردّت عليه بمسج " خلاص قتلك حفضتها متاكدة انا " ,,,, ثاني يوم في الصباح كانت افنان ترجى في السيارة عشان تركب امعاها داليا ويمشن للملتقى وهي ترجى جتها رسالة من رقم دولي وهمي " حتعرفي حاجات واجد علي امّك الأيام القادمة وشن المواضيع اللي خشّت فيهن " يتبع ,, | ||||
|
| |
|
26-04-18, 01:38 AM
| #9 | ||||
| #أفنان الحلقة 9 كانت افنان ترجى في السيارة عشان تركب امعاها داليا ويمشن للملتقى وهي ترجى جتها رسالة من رقم دولي وهمي " حتعرفي حاجات واجد علي امّك الأيام القادمة وشن المواضيع اللي خشّت فيهن " " أفنان قعدت متوترة عالصبح وبعدّها اذكّرت انّها عندها مُهمة اليووم لازم اديرّها تبي اتحاول اتفكر في مهتمها انّها كيف توصل في نقال الدكتور إبراهيم ,,, ... علّقت الوصلة في نقالها وخلّاته في شنطتها وفتحت البرنامج ناقص بس تأخذ نقال الدكتور إبراهيم وتعلق فيه ,, علي طلعة داليا من الحوش وركبت امعاها في السيارة " داليا : آسفة طوّلت عليك افنان : لا عادي أصلا مزال بدري نسالك داليا ,, مزال الجمعية حتشترك بكرة في الملتقى ولّا بعد قصة ولاء خلاص معش فهمت انا هو شور من الملتقى ,, الجامعة ولا الجمعية الخيرية " داليا : لا هو أصلا اللي داير الملتقى الجمعية لكن الجامعة همّا الراعي امتاعه ومتكفلين بكل حاجة وبعدها حنلقّطو التبرعات باسم الجامعة وحتى طالبات الجامعة اطّوعن في التنظيم افنان : يعني ولاء علاقتها كانت اكويسة بالجامعة والمنظمين داليا : اها علاقتها اكويسة لكن بعد قصة التقرير اللي طلع عليها ,, اكيدة كل واحد منهم حيخذ موقف معينة منها افنان : شن جو علاقتها مع الدكتور إبراهيم داليا : علاقتها مع الدكتور إبراهيم ممتازة هي أصلا تعرف الدكتور إبراهيم من زمان بس مانش عارفة شن وضعه توا بعد قصة ولاء وشن الموقف اللي واخذة منها افنان : باهي امتى خشيتي في بابا داليا : لا هذي لازم باتك هو اللي يحكيلك عليها كيف خش فيا وتعّرف عليّا وحبّني ’’’’ وصلن للجامعة داليا وافنان مشن شوور الملتقى دعاء : هاي افنان وداليا .. جابك ربّي يا افنان هيا تعالي صوريني نبي انزّل لبستي الجديدة عالسناب شات داليا : اهلين دعاء افنان : اشوية بس ,, نبي انعرّف داليا وسمر علي بعضهن دعاء : اوووووووووف هيا وتعالي عندنا شغل واجد مع بعضنا هنا "مشن افنان وداليا شور سمر " افنان : اهلين سمر سمر : اهلين افنان : سمر انعرّفك بداليا ,, داليا انعرّفك بسمر داليا : اهلين سمر ,, كيف حالك سمر : الحمد الله بشوفتكم افنان : طبعا ياداليا انا كلمّتها علي جمعيتك وقالت ماعندهش مشكلة تخدم امعاك عادي توّا حنسيّبكن عشان اتنسّقن مواضعيكن مع بعضكن ,,, " مشت افنان شور دعاء عشان اتصورها سناب " ’’’’ افنان خذت النقال واتصور في دعاء دعاء : اهلين يابنات كيف حالكن ’’ طبعا عارفين انّ انا انحب الرياضة واجد واشتركت في ملتقى امتاع المشي اللي في الجامعة واليووم عارضة عليكم اللبسة هذي خذيتها من الوكيل " بنطلون وابلووزة " واسعة ومستورة وتاخذي حتى راحتك وانتي تمشي او اتريَضي عادي وتمتص حتى في العرق " افنان وهي أتصور فيها شافت الدكتور إبراهيم " افنان : هاكي نقالك اشوية دعاء : كنّك سكّرتي فجأة هكي مزلت نحكي انا افنان : دقيقة بس تو انجيك دعاء : أي دقيقة انا متزطة من غادي ما اتزيدش عليا " كانت سلوى وقتها كيف جت للملتقى " مشت شوورها افنان افنان : هاي سلوى انستي ,, نبيك تقعدي اشوية مع دعاء واتصوريها نبي نهرب منها ماقدرتش مش حتطلقني خليك امعاها لين نعرف كيف ناخذ نقال دكتور إبراهيم سلوى : فكيني منها دمّها ثقيل افنان : عشان خاطري بس هيا " ومشن شور دعاء " افنان : تو تقعد أتصور فيك سلوى غير نبي انشوف داليا شن تبّيني بس عالسريع مش حنطول عليك دعاء : وقت داليا توّا ,, كنّك اليوم افنان : عالسريع مش حنطول ,, دقايق وانجي ,,,, " افنان وهي ماشيا شور الدكتور إبراهيم عرضّلها سامي " سامي : افنان افنان : شن جابك انت هنا سامي : انكسد وبعدها نبي انروح بأمي افنان :باه تمام سامي : اسمعي بس ,, نبي منّك خدمة افنان : اللي بينك وبين سلوى انا مش شوري طلعني من موضووعكم سامي : مش شور سلوى ,,, لو عمر قالك صح انتي قلتي لسامي انّ هو هكر نبيك اتقولي اها افنان : انت عندك ناس في الشركة يفهموو في الهكر عليش تبي عمر بالذات سامي : موضوع خاص بيّا ,, افنان : حاضر سامي : ضروري راك طلعيني كذّاب قدام عمر افنان : حاضر قتلك " وكملّت طريقها شور الدكتور إبراهيم كان وقتها الدكتور ابراهيم قاعد مع " سمر ووليد وداليا " داليا : وهذا اللي صار مع ولاء وليد : قصة ولاء ,, قصة كبير ,, ربي يكون في عونها الدكتور إبراهيم : وناس واجدة استفادت من الموضوع هذا وليد : صح اكيدة افنان : السلام عليكم ابراهيم : وعليكم السلام ,, وين دعاء افنان : دعاء قاعدة غادي ترجى فيك عشان أتصور امعاك عالسناب شات الدكتور إبراهيم : شن انصور امعاها افنان : أتصور امعاها عالسناب شات ,, ماتعرفش السناب شات الدكتور إبراهيم : لا مش قصة مانعرفش لكن بحّتي نقالي مش امتاع نت لاشي افنان : تي لا مش من نقالك حتصور من نقال دعاء عشان الدعاية عالملتقى اللي امنظمته الجامعة وليد : شن فيها كان صوّرت راه سناب شات عادي داليا : تدعمها واجد كان صورت امعاها سناب افنان : بالعكس حيقعد اعلان حلووو للجامعة دكتو إبراهيم : خلاص كنكم هديتو عليّا مرة وحدة افنان : هيا بس هيا تعال ادير امعاك مقابلة وتسألك كم سؤال عالملتقى " ومشت بيه شور دعاء " افنان : دعاء ,, خلي دكتور إبراهيم يصور امعاك عشان اديري دعايا حلوة للملتقى دعاء : واو فكرة حلوة بكل دكتور إبراهيم : ضحكتي عليا قتيلي دعاء هي اللي قالت لك افنان : يعني عشان نبيكم اتصوروو بس دكتور إبراهيم وهو مبتسم : احسابك امعايا بعدين " وقعدت دعاء أتصور مع باتها في كم صورة واتصور فيديوو " وقتها افنان بحّتت فيه سلوى من بعيد وعطتها الإشارة " دعاء : هاي متابعييني حاليا امصورة مع بابا دكتور إبراهيم : شن شكلي اكويس طالع دعاء : يابابا معش اتوقف وانا في نص التصوير " سمع نقّاله يرن الدكتور إبراهيم رنّت عليه سلوى برقم غريب " طلّع نقاله من جيبه شاف الرقم ماعرفش افنان : هات هات نمسكه لكّي وانت كمّل تصويرك مع دعاء " عطاها النقّال الدكتور إبراهيم " حطت النقال في شنطة ودغري حطّت فيه الوصلة امتاع يو اس بي دعاء وهي تحكي مع المتابعيين دعاء : حابّا انعرفكم عالدكتور إبراهيم عميد الجامعة ,, هو مش مهم في حياة الجامعة بس مُهم حتّى في حياتي انا عشان يقعد بابا طبعا هو اللي امنظم الملتقى هذا شن حاب اتقول للمتابعيين يابابا دكتور إبراهيم : شن انقول ,, انتي قلتي كل حاجة انا فخور بيك كابنتي وفخور بالمجهود اللي اديري فيه امعايا ونطلب من المتابعيين يتعاونوو ويتبرعوو عشان انساعدوو الناس المحتاجة " وهو يحكي دكتور براهيم رن نقالة وهو في شنطة افنان دكتور إبراهيم : ترا هاتي نقّالي يرن قاعد افنان : اها صح ,, " فكاته من الوصلة وعطاته له " دكتور إبراهيم : شن الوصلة اللي كانت فيه افنان : لا شكلي نبي نشحن نقالي لخبطت شحنت نقالك دكتور إبراهيم : نفس الشحن هو افنان : اها تقريبا دعاء : طلع الفيديوو سمح بكل ,, فرحانة عشان صوّرت امعايا " جن صحبات دعاء " دكتور إبراهيم : نستأذنكن انا يابنات افنان : تو انجيك يادعاء اشوية بس دعاء : اوكي حبيبتي " ومشت افنان شور سلوى " افنان : قبل فضحتيني ,,, كنّك رنيتي مرة اخرة سلوى :لا رنّيت مرة وحدة بس انا اكيدة واحد آخر اللي رن مش انا افنان : من اللي يبي يرن هذا " علي جيّة عمر " عمر : شن فيه كنكم افنان : اتصلت مرة اخرة علي دكتور إبراهيم ماطوّلش النقال في الوصلة سلوى :قتلك مش انا اللي رنيت ,, كنك انتي ماتبش اتصدقي عمر : خلا خلاص ,, عادي اهم شي حطيتي نقاله في الوصلة أصلا الموضوع كلّه مايبش الا ثواني بس افنان : سمحيني عصبت عليك سلوى سلوى : لا عادي ,, متعودة علي جوّك افنان : اليوم المصدر دزلي حاجة شور ماما قالي حتعرفي حاجات جديدة علي امّك الأيام القادمة وفي مواضيغ خشّت فيهن واحصلت فيهن او انضحك عليها او برمووها رسالة تعني اكثر من معنى " مانبش انفكر فيها واجد الرسالة حاليا عمر : صح خلينا في موضوع دكتور إبراهيم افنان : شن حدير مع سامي عمر : حنوزّعه حنقّوله ماعرفتش او مزال عيطني وقت سلوى : كيف حتوزّعه " علي جيّت سامي شوورهم " سامي : السلام عليكم عمر : وعليكم السلام سلوى : اهلين عمر : انا نستاذنكم ,, سلوى امتى ما تبي اتروحي رني عليا سامي : عارفة افنان وسلوى انا معجب بصداقتكم افنان : تسلم سلوى : كيف يعني سامي : يعني معجب بصداقتكم ,, ديما مع بعضكم ,, شن قلتي علي عرض الشغل امتاعي ياسلوى سلوى : مزلت انفكر في الموضوع سامي : اقنعيها يا افنان افنان : ان شاء الله سامي : شفتو الراجل الكبير في العمر هذا اللي مع امي غادي افنان : اها كنّا سامي : هذا الحاج فيصل عرفتوو سلوى : لا اول مرة انشوفة بس مار عليا الاسم سامي : الحاج فيصل مليونير واقوى رجال الاعمال في المنطقة الشرقية لو نحكي عالمشاريع اللي هو ماسكهن مش حنكمل الا بكرة وانا نحكي افنان : واو سلوى : ماشاء الله سامي : قرمّناه ,, جانا من بعيد هو وامي افنان : اسكت اسكت داليا : هذا ابني سامي الحاج فيصل : اهلين سامي سامي : اهلين كيف حالك داليا : وهذي سلوى وهذي افنان بنت خالد الحاج فيصل : اهلين سلوى وافنان كيف حال بابا افنان : الحمد الله اكويس داليا : انعرفكم الحاج فيصل ماسك اكثر من مشروع في المنطقة الشرقية سامي : معقولة امي غني عن التعريف الحاج فيصل الحاج فيصل : سلميّلي علي بابا ,, ليا زمان ماشفته افنان : يوصل حاضر,, توا انا نبي نستاذنكم " ومشت افنان وسيّبتهم مع بعضهم " ,,,,, دعاء : يا افنان توا انا لازم نمشي ضروري في موضوع شور بابا لازم ننهي عالسريع توو انجي بعدها للملتقى مانبّش حد يفطن انّ انا طلعت افنان : بس حتى انا مانقدرش انطول جايني ماجد طالعة انا ويّاه دعاء : باه خليك امعاهم علي ما ايجيك ماجد ,, اليوم تعالي للمكتب امتاع طارق في العشية حنسقّوو كيف انديرو مهرجان بكرة افنان : مهرجان امتاع عرض أزياء ملابس الأطفال .... " في شركة ملابس أطفال اعرضت علي دعاء ادير نفس عرض الأزياء للأطفال عشان اتسوق لمنتجاتها " ...... دعاء : ان شاء الله , نتقابلو العشية غادي افنان : حاضر ,, خلاص العشية انجيكم غادي ,,,, هذه الرواية للكاتب " ديندار الوحيشي " ,,,, دعاء طلعت شور مشوارها وافنان كانت تبرم في الملتقى لين جاها تليفون من ماجد قاللها راني قريب نوووصل طلعت برة الجامعة قعدت ترجى في ماجد علي طلعت وليد من الجامعة شاف افنان مشى شوورها وليد : شن امرّوحة خلاص افنان : ان شاء الله وليد : من جايك افنان : جايني خويا ماجد وليد : حبيت نشكرك علّي اديري فيه مع سمر رغم اللي درت لكّي كلّه لكن عاملتيها احسن معاملة افنان : سمر بنت طيبّة وتستاهل كل خير وليد : تسلمي ربي يحفضك ,, ونفس ماقتلك باب الجريدة مفتوح لكّي في أي وقت امتى ماتبي اتجي تعالي افنان : نكذبش عليك حاليّا متريّحة مع دعاء كل يوم نتعلم حاجة جديدة لو كنت في مكتب راهُ ماتعلمتهنش يوم بعد يوم بادية ننضج احسن من قبل وليد : فعلا النظّج شي مهم نحنا لما كنا اصغار كان عندنا أحلام وتطلعات وانّ انغيرو الدنيا والعالم بس بعد كبرنا قعدنا واقعيين اكثر افنان : كل شي عنده ثمن صح وليد : اكيدة كل شي بالثمن امتاعه افنان : حتّى الحقيقة وليد : حتى الحقيقة بالثمن امتاعها شفتي الناس هذيما كلهم كل واحد عنده تعريف خاص بالحقيقة وكل واحد فيهم ايشوف الحقيقة بشكل مختلف عمرها الناس ماحتتفق علي حقيقة وحدة افنان : بس انا انقوول مافش حاجة تقدر تخسرها لو تبي تبحث عالحقيقة وليد : مش شرط تخسري انتي حاجة يعني مرات انتي مش حتخسري شي لكن حتخسري اهلك شخص عزيز عليك عملك ,, عمل اهلك ,, ديما حطّي في بالك الحاجة هذي والمدون اكس اللي يحساب روحه مافش حد عارفة منُ سيّوورة حيطيح طيحة كلهم حيشمتوو فيه ’’ اللي فضحهم ومش هكي بس ,, الطيحة هذي مش حيقدر ايصبّي منها " علي جيّة ماجد " افنان : مرات نختلفو في الآراء لكن مزال الود والمحبة بيناتنا وليد : ربّي يحفضك ,, وفي أي وقت احتجتي لاي حاجة حتلقيني في المكتب ,,,,, بعد مرور نص ساعة ...... اطلعو داليا وسامي وسلوى من الجامعة وكان عمر يرجى في سلوى برّة جا شوورهم عمر سلوى : هيا توا جايتك ياعمر سامي جت عينة في عين عمر سامي : نبّيك اشوية عمر برواحنا "وخذا علي جنب " سامي : شن صار امعاك مافش أي حاجة جديدة امبدري خليتك تمشي مايتش نفتح الموضوع قدام البنات عمر : حنقولك شي ,, القيت الموقع اللي ينزل الفضايح قبل مايوصلن لمواقع التواصل الاجتماعي بس ماعرفتش هويّته من سامي : غير حاول بس وعجلّي مرات تطلع بحاجة ونعبى عليك قتلك حتاااااخذ بياتك مافش حاجة بلاش عمر : صعب صعب نعرفة من سامي : انت حاول بس شن خاسر ,,,,, افنان : ماكنتش متوقع انّك شايلني للمطعم ولا بابا اخرة هنا ماجد : اها باتي عازمنا عالغداء في المطعم بات افنان : وانتم اصغار جميع مطاعم بنغازي كليتوو فيهن ماجد : خلاص يا افنان صفّي النيّة باتي جابنا هنا في المطعم عشان يتصافن القلووب افنان : خلاص جو تمام والله مش زعلانة منك نفس قبل بات افنان : كان امكم حيّة راهي افرحت لما شافتكم هكي مع بعضكم ماجد : اسمعي اسمعي يا افنان قالك أمنا تقعد فرحانة افنان : الله يرحمها ماجد : بما انّ توا ملتمين نبي نسالك علي صحبتك شن وضع شكيرا افنان : شكيرا من ماجد : البنتت تخدمي امعاها افنان : مش شكيرا اسماها دعاء ماجد : اللي هو افنان : اسال بابا كان صاحب باتها زمان بات افنان : كان صاحبي من زمان بكل وبعدها انقطعنا علي بعضنا افنان : كان يخدم مع ماما صح بات افنان : اها كان يخدم امعاها افنان : قابلت اليوم الحاج فيصل يسلم عليك بات افنان : نستاذنكم توا انخليكم اتكملوو غداكم عندي مشوار انا اهم شي نبيكم تصّالحوو ويقعد جوكم تمام "وقعدوو ياكلوو مع بعض" ,,,, في العشية كانت افنان مع طارق ويرجوو في دعاء بدوو يتناقشوو في كيفية اعلان المهرجان امتاع عرض أزياء الأطفال عالسوشل ميديا افنان : كيف نقدروو انخلوو مهرجان ينتشر بسرعة طارق : انديرو هشتاق باسم دعاء وانخلوو الأعضاء اللي شاركوو في المهرجان يشاركوو في الهشتاق افنان : كلامك تمام ,, بس هيا تبي اتقسم الفيديوهات وتنشرهن علي أساس بوستات عالسوشل ميديا وهي تحكي افنان سمعت نقالها يرن طلع عمر افنان :نستاذنك اشوية طارق : خوذي راحتك افنان : نعم عمر عمر : مش حتصدقي شن لقيت علي دكتور إبراهيم افنان : شن احكي عمر : ادلة واثباتات ان هو من قبل هرّب أسئلة الامتحانات افنان : نفس تهمة ماما عمر : اها نفسها بالزبط ومش هكي بس خليني انكملك افنان : باه نسمع فيك عمر : القيت تحويلات مصرفية من ارقام والقيت انّ هو قعد وسيط عشان يعطيهم أوراق الامتحانات توا شن اندير انا افنان : حاليا قاعدة في مكتب طارق بعدين حنقولك شن ادير عمر : خلاص حندزلك مسج صوتي لدكتور إبراهيم نبيك تسمعي وحتستغربي افنان : تمام نرجى فيه دزّة عمر : خلاص اشوية تو ايجيك ,,,, كانت دعاء واصلة وقاعدة في المكتب مع طارق وكانت مضايقة وزعلانة علي خشّت افنان سمعت طارق لما قال لدعاء كنّك شن فيه افنان : معلش عطلتكم ,, انستي دعاء دعاء وهي زعلانة : تسلمي افنان : كنك شن فيه دعاء : بصراحة مضايقة ومالقيتش حد نحكيله غيركم امبدري كيف خذيت تحاليل بابا وطلع عندا السرطان افان : لاحول ولا قوة الا بالله طارق :يا لطيف دعاء : سرطان في الكبد ,, سألت الدكتور قالي حالته خطيرة لكن مش عارفة كيف نحكي البابا " سمعت صوت المسج افنان عرفاته من عمر " قرّبت الاسبيكر علي وذنها وطّت الصوت واجد بحيث هي اللي تسمع بس التسجيل كان عبارة عن مقطع صوتي لمكالمة بين الدكتور إبراهيم وخالد " الدكتور إبراهيم : والله سامحني ياخالد والله بدون قصد دويت بحسن نية وماكنتش نحساب بنتك حتمسك حاجة كيف هكّي " ’’’’ دعاء : والله مش عارفة كيف نحكي البابا موضوع كيف هذا بابا هذا اهم انسان في حياتي طوول عمره وهو امصبي امعايا ماعمره حتى قالي كلمة وحدة زعّلتني افنان : ان شاء الله ربي يشفيه دعاء : مانش متخيّلة انّ هو يخفتي من حياتي انا في نظري بابا انسان كامل افنان : مافش انسان كامل يادعاء صح هما هلنا وانحبووهم لكن لازم نذكّر انّ هما بشر زيّنا زيّهم مش ملائكة مثلا انا علاقتي بابا اكويسة وهو أصلا اكويس معايا ولاني مش عارفة علي حاجة معناها مش حنشوف الا الحاجة الكويسة اللي علي بابا طارق : انا عن نفسي مش حنقدر نحكي عالابوّة والأب لان باتي مات وانا اصغيّر بس الكلام اللي جاني علي باتي خلاّني نعرف انّ باتي كان اكويس افنان : بس هذا مش معناها انّ مش لازم نعرفو ماضي أهلنا يعني في ناس اتشوف في هلنا مش اكويسيين لكن هذا مش حيغيّر رأينا في هلنا كل واحد فينا عنده بات واحد وكلهم يغلطوو مرّات دعاء : بس نفهم من كلامك انّ مش هامّك سُمعة اهلك ابسط مثال امّك اسمحيلي يعني افنان : لا احكي عادي مش فارقة امعايا لانّي قعدت ناخذ في موضوعها بأكثر نضج وتفكير طارق : يعني مش فارقة امعاكي قصة امّك بكل افنان : لا مش قصة مش فارقة امعايا لكن قعدت انفرق بين انحبّها كأم او بين انّها صح كانت غلطانة حتّى لو كانت غلطانة وسرّبت الامتحانات صح هذا الشي مش حيأُثر علي حبّي وغلاوتها عندي دعاء : مستحيل مستحيل ,, انحط روحي مكانك مستغربة كيف قعدتي اتفكري هكي انا لو قالو شي علي بابا وشوّهُو سمعته مستحيل انصدقهم انا عارفة بابا اكويس وان شاء الله ايجيبووو مليووون دليل طارق : توا خلينا في الموضوع المهم انتي لازم اتقولي الخبر الباتك وموضوع كيف هذا ماتجش ادسّيه عليه انتي بنته وهو باتك حيعرف كيف ادير راي لازم تعطي علم افنان : لازم القرار اللي تاخذي يقعد في مصلحة باتك مرات لمّا اتقوليله صحّته اتخف اديرولا راي فعلا لكن حتى انا نفس طارق انقولك انك اتقوليلا خير دعاء : شكرا ريحتوووني ,, حنفكر في كلامكم واجد انا لازم نمشي توا افنان : خلاص تو بكرة انكلم المنظميين للمعرض اللي دارتييه لملابس الأطفال وحنقوللهم انك مش جايا وانا حنمسك كل حاجة دعاء : لالالا توو انجي بالعكس المعارض والملتقيات هِنا اللي يطلّعن فيها من الأجواء هذينا خلاص نستأذنكم خففتو عليا واجد ربي يحفضكم يا احسن أصحاب " وصبّت دعاء وطلعت من المكتب " افنان : كنك اتبحت فيا ,, إتقول راقيلك طارق : انتي صح قريتي صحافة لكن الواحد يكوون انسان قبل مايقعد صحفي انتي مارعيتش مشاعر البنت ولا مرض باتها كيف بس تحكي امعاها بالأسلوب هذا يتبع ,, | ||||
|
| |
|
26-04-18, 02:51 AM
| #10 | ||||
| #أفنان الحلقة 10 افنان : كنك اتبحت فيا ,, إتقول راقيلك طارق : انتي صح قريتي صحافة لكن الواحد يكوون انسان قبل مايقعد صحفي انتي مارعيتش مشاعر البنت ولا مرض باتها كيف بس تحكي امعاها بالأسلوب هذا افنان : باهي كنّك عصّبت عليّا هكي مرّة وحدة طارق : بس انا مانقدرش انشوف شخص غالي عليّا ويقعد يغلط قدّامي افنان : انا عارفة روحي شن اندير طارق : انقولك شي ,, غيري الموضوع وديري اللي اريّحك افنان : معناها حتّى انا نبّي انصبّي خليني نمشي خير ,,,, كانُو امكسدين في صالة الحوش سلوى وخوها عمر وكان عمر قاعد عاللاب توب سلوى : شن ادير انت لكّي ساعة عالاب توب عمر : مزلت اندور في ملفات علي دكتور إبراهيم بس كِلا يطلعلي مرتبط بفضيحة امّ افنان سلوى : شكلنا خشينا في طبيخة مش وقتها بكل باهي شن تبي ادير مع سامي انت مش قتلي معش اتعامليني كأني عيّل اصغير عمر : نبّي انمشّيه علي قد عقله وخلاص قتله القيت الموقوع اللي ينزل منّا بس مانعرفش شخصيا من سلوى : بس مرات كذبة كيف هذي اتأثر علي علاقتنا عمر : انا حاليا نفس باتمان انساعد النّاس سلوى : اوكي ياباتمان انت يلّي اتساعد في الناس ,,,, روّحت افنان للحوش وكان راقيلها من طريقة كلام طارق مابتش تحكي مع حد من الحووش وخشت الدارها ,,, ثاني يوم تقابلووو افنان وسلوى وعمر في كافي عائلي افنان : المدونة الجايا حتكوون علي الدكتور إبراهيم لكن حنحطوو جميع الاسامي ومش حنخفو شي نفس ما درنا مع ولاء لانّ الموضوع مربوط بالغش والأمانة يعني لازم ننشروها كيف ماهُو سلوى : مافكّرتش في ردة فعل دعاء باتها مريض راه افنان : ردّة فعلها مشكلتها مش مشكلتي سلوى : كنك قعدتي هكي انتي لاعندك مشاعر لا احاسيس افنان : تي كنكم انتم معايا اللي ايجي يقولي كنك هكي قعدتي توا قعدت قدّامكم ماعندش لااحساس لا مشاعر راهُ الجو اللي اندير فيه مافش حد يتحمل عواقبة الا انا يعني عشان نعرف دعاء وصاحبتي انفكر اشوية باهي افرضي مانعرفهش ومش صاحبتي باتها يستغل منصبة في حاجات غير قانونية سلوى : باهي خلاص كنك عصبتي مرة وحدة افنان : راني انحس بالناس ونهتم بيهم بس مش علي احساب مبادئي ولو خيّروني بين الناس ومبادئي اكيدة حنختار مبادئي عمر : نحنا من اول يووم بدينا في الجو هذا قلنا حيتـأثر علي حياتنا الشخصية لازم انوسّعو بالنا وانركزوو اشوية هدفنا العدالة وانطلّعو الصّح توا خلوني نبي نمشي عندي موعد مع سامي افنان : كنا سامي شن يبي فيك عمر : نبي نخترعلة قصة او كذبة عشان يخاطاني هيا نستأذنووكم " وطلع عمر من الكافيه " سلوى : كنك امعصبة ,, هل عصبيتك هذي عشان المقطع اللي دزّه لكي عمر لباتك والدكتور إبراهيم افنان : والله كل يوم بعد يوم انشوف حاجات يبّن منّي صبر وقوة قاعدة انحاول نقعد قوية مع انّي من الداخل ضعيفة بكل بالذات قصة دعاء قعدت حايرة ننشر ولالا لالا قاعدة انحاول نقنع في روحي انّي انحارب علي قضية عشان مانضعفش سلوى : ربي يكون في عوونك ان شاء الله الحاجة اللي انتي اديري فيها توّا مافش حد يقدر اديرها ولا حيفكر ايديرها معش اتقولي انا ضعيفة انتي قويّة ونحنا امعاك في كل حاجة بس لازم تعرفي أي قرار تاخذي راهُ قرار مصيري حيأثر علي حياتهم الشخصية والمهنية وفي الاخر القرار قرارك افنان : انا حنمشي شور المهرجان عشان انساعد لجنة المنظمة غادي ونبي انشوف دعاء هل جت ولا لا لانها مارنتش عليا قالت تبي اتجي سلوى : عليش قبل مش جايا افنان : باتها طلع عنده السرطان سلوى : لاحول ولا قوة الا بالله حقاتك اتعصبي معش تعرفي شن اديّري في الموقف هذا عشان باتها مريض افنان : الحق مش قادرة انركز ونفس الوقت يهمنّي الظروف دعاء اللي قاعدة فيهن انقول مش عارفة ومرات انقول لازم الناس تعرف الحقيقة انحس في راسي يبي يطربق خليني نمشي توا خير سلوى : تمام وانا حنجي مع داليا علي وقت بداية العرض امتاع المهرجان انغير جوي افنان : تم انتلاقوو غادي معناها ..,, وقتها كان طارق قاعد مع اللجنة المكلفة للمهرجان ويساعد فيهم ويحطو في الكاميرات في الأماكن المناسبة ,,,, عمر : حنقولك شي هو ماعرفتش من لكن عرفت المكان اللي ينشر فيه او يأخذ منّا المواضيع اسمه الديب ويب سامي : بس انا نبي نعرف من عمر : هو مانقدرش نعرفه بكل هكر قوي سامي : باهي لو نبي نوصله كيف عمر : مافهمتش سامي : يعني مثلا لو نبي نعطي معلومات معينة في نشاط مشبوه عو عبارة عن غسيل أموال عمر : انت شن هامك من الموضوع هذا سامي : انا مش هامني واجد بس نبي الناس تعرف هالمعلومات وينتشرن بسرعة عليه عمر : يعني معلومات اكيدة سامي : اكيدة اها "عمر طلع ورقة وقلم من الشنطة وقعد يكتب " سامي : شركة اجنبية متخصصة في توريد الأجهزة الطبية من اوروبّا عمر : شن اسمه قبل سامي : تمام هذا المهم ,, اسمه الحاج فيصل عمر : الحاج فيصل رجل الاعمال قصدك سامي : اها ,, اكتب توا عندك التفاصيل ,,,,, افنان بعد طلعت من مكتب مشت شور الحوش جهّزت التدوينة ودزّتها لعمر وقالت له ماتنشرهش لين انقوولك انشرها بعدها مشت شور المهرجان وصلت افنان لمكان المهرجان شافت طارق مابتش تحكي معا ولا اتقوله خير مشت شوور دعاء دعاء : افنان وينك كنك طوّلتي قبل توا نبي انرن عليك افنان : اها كنت مشغولة اشوية دعاء : انا حنصبي هنا وانقول الكلمة امتاعي والأطفال حيخشو من الممر هذا وان شاء الله يمشي مهرجان علي خير افنان : باذن الله حيمشي تمام دعاء : هاكي شيّكي عالكلمة امتاعي مرات فيها أخطاء افنان : المقدمة تمام ,, واو مشاء الله شبه اكويسة دعاء : قصدك صار منّي افنان : اها خلاص حتى تستغني عني عادي دعاء : لا وين انتي استحالة نستغنى عنّك افنان دارت لفّة عالمكان اتشوف في التنسيق شافها طارق مشى شورها طارق : الناس اتخش اتقول السلام عليكم اهلين أي حاجة افنان : طارق انقانك فووتني بالجو توا طارق : كنك انا نحكي امعاك عادي امس تعصبت من طريقة كلامك بس افنان : خلي نقاشنا شور العمل طارق : باه نبيك اتشوفي الأطفال واتيين ولا مزال افنان " باه طارق : افنان افنان : نعم طارق : انا آسف علّي صار امس . مابتش اترد عليه ومشت شور الحضوور لقت سلوى وداليا قاعدات امقعمزات مشت شوورهم افنان : ماشاء الله وين هالسماحة ياسلوى سلوى : غير فكينا عاد افنان : انستي داليا داليا : جينا بدري صح افنان : اها استغربت داليا : ماجد مستعجل قالي نبي انجي للمهرجان افنان : اكيدة جي عشان دعاء داليا : مشّي الجو , عارفة حركات الشباب الأيام هذينا سلوى : اها صح مهما دسّيت عالناس يفضحنّك حراكاتك داليا : اكيدة نفس سامي بالزبط مفضووحات حركاته افنان : لا سامي خلّيه ابرووحه سلوى : توا شن دخّل سامي نحكوو علي ماجد شن جاب سيرة سامي داليا : يعني نحكو بس افنان : تو حنسيّبكم عشان انشوف باقي التنظيم ,,,, افنان طلّعت نقّالها وقعدت اترن علي عمر ومايرّدش عليها وهي تبرم في المهرجان شافت ماجد امصبّي مع طارق ماجد : اهلا افنان : ماشاء الله تعرفوو بعضكم قصدكم ماجد : اها انا وطارق قرينا مع بعضنا زمان افنان : بس غريبة ماقتّلش ياطارق انّكم أصحاب طارق : ماجتش فرصة انقوولك طارق سمع نقّاله يرن مشى من تلاهم افنان : فيش ادير انت هنا ماجد : كنك ,,, جي عشان جبت داليا افنان : جي عشان جبت داليا ولا اتشوف دعاء ماجد : انتي كنك شن تبي كل مرة بشكل قاعدة افنان : المكان اللي نقعد فيه ياريت ما اتجشش فيه انت ماجد : مش قتيلي قدام باتي صفّينا النية خلاص هيا اوكي طالع اقعدي فيها هالبنت النفسية هذي ومشى من تلاها ماجد "طارق كان امعصب عالنقال " افنان : قبلت اسفك راك تحسابني مزلت شايلة منك لكن جوي املخبط طارق : حتى انا اشر منك الشريك اللي نخدم امعاه امتعبني بكل يبّي يوسع الشركة ويبي سيولة وانتي عارفة وضع البلاد توا مافش سيولة والسوق راقد افنان : نكذبش عليك مش فاهمة كلامك سيولة وسوق راقد لكن ان شاء الله ربي يسرّلك وين ماتمشي طارق : صعب اتيّسر انا غلطت من الأول عشان خشيت مع الحاج فيصل شراكة افنان : الحاج الفيصل المليونير قصدك طارق : اها هو ,, في حد غيره خاش فيه نص مشاريع الابلاد أي مشروع يلقى عالسوشل ميديا لازم ايخش فيه وبعدها تحصل فيه افنان : حتى مهرجانات واحتفلات وملتقيات دعاء طارق : تي أي حاجة هو الراعي الرسمي فيها حتى امتاعات الجمعية الخيرية حتى امتاع الجامعة لازم يحط يدّة في أي مشروع في البلاد افنان : العرض بدا امتاع الأطفال توا خليني نمشي انشوف التحضيرات مع دعاء بكرة لازم نتقابلوو او تو نحكو واتس طارق : تمام ,... هذه الرواية للكاتب " ديندار الوحيشي " ,,,,,,, بعد مرور ربع ساعة من العرض مسكت نقّالها افنان ورنت علي عمر عمر : نعم افنان : انشر التدوينة امتاع الدكتور ابراهيم توّا عمر: متاكدة مش اتقولي ندمت بعدها افنان : لا متاكدة انشرها بكل الاسامي والأدلة اللي عندك عمر : تم حننشرها توا افنان : خلّي الناس تعرف انّ المدون اكس مش داير احساب الحد عمر : بس حنقولك شي افنان : شن عمر : سامي عطاني فضايح للحاج فيصل وافنان : شن جاب الحاج فيصل لسامي عمر : حتى انا مش عارف لكن اللي فهمته انّ سامي حيستفيد من الموضوع هذا واجد افنان : انقولك حاجة ,, ماتنشرش توا خلينا انشوفو شن قصة الحاج فيصل رايحة نسمع في واجد الأيام هذينا عمر : شن اندير توا افنان : نبيك اتشوفلي شن علاقة الحاج فيصل بولاء ووالاستاذ وليد والدكتور إبراهيم حاول اتشوفلي شي يجمعهم عمر : خلاص توو انشووف وانقوولك افنان وهي تحكي مع عمر بالنقال شافت دعاء تجري وطالعة بسرعة مشت وراها تجري افنان : دعاء دعاء كنك شن فيه يادعاااء كنك تجري "معدّلتش عليها وطلعت تجري وركبت السيارة ومشت دعاء علي طلعت طارق من المهرجان افنان : شن صار كنها طالعة هكي شن فيه طارق : جا تليفوون انّ باتها دروله دخول للمستشفى افنان : لا حول ولا قوة الا بالله طارق : هيا توا خلينا انمشّو الجو عادي مانبش الناس تفطن بس مانبوش يخرب العرض افنان : هيا هيا وخشوو شور العرض ,,,,, وصلت للعيادة ركبت تجري لقت باتها قاعد في العناية تبكي قدام غرفة العمليات وطاحت قدام الباب من ابكاء دعاء : يابابا حرام عليك در بالك اتسيبني يابابا ارجووك يابابا نوووض يارب اشفي بابا وتبكي ,,,,,,, بعد ماكمّل المهرجان مشت افنان مع سامي شوور العيادة اللي فيها بات دعاء لقووو دعاء من البكاء لين الميكب امخرب وجها وحالتها حالة افنان : شن صار طمنّينا دعاء : خشوو للعناية لكن توا طلّعوو قاعد بس راقد مزال سامي : ان شاء الله ربّي يشفيه خليك متفائلة بس دعاء : يااااااارب يافنان ماعندش الا هذا في حياتي مانبّش نخسرة وقعدت حاضنة افنان وتبكي وافنان كانت اطبطب عليها علي جيّة طارق سامي : شن قالك الدكتور طارق : قالي حالته خطيرة بكل ولازم يقعد في المستشفى حاليا سامي : لاحول ولا قوة الا بالله يافنان نرجى فيك لووطة ,,,,, بعد منتصف الليل كان طارق راقد عالكرسي في الغرفة اللي قاعد فيها الدكتور إبراهيم وافنان وسامي روّحوو للحووش دعاء : طارق طارق طارق طارق : اها نعم شن صار دعاء : خلاص تقدر اتريح واتروح لو احتجت حاجة حنرن عليك طارق : تمام ,, في أي وقت رنّي عادي ,,, ثاني يوم الصبح ناض الدكتور إبراهيم ومش قادر يحكي واجد لقى دعاء مبستمة وترجى فيه يفتح اعيوونة دعاء :صباح الخير يا اعيووني ياحلى بابا دكتور إبراهيم : صباح الورد دعاء : اسفة يابابا مابيتش انقولك كان عندي علم بالسرطان بات دعاء : لا عادي ,, لاني انا أصلا كنت نعرف من قبل لكن مابيتش انقولك عشان مانبيكش تنشغلي دعاء : باذن الله حتصبّي كيف قبل واحسن وتقعد نفس قبل تلعب امعايا واتصبي وتجري انحبك مووووت ياحلى بابا بات دعاء : نجّك ليا يابنتي ..... كانت افنان تحكي في مكالمة فيديو باللاب توب مع عمر وسلوى سلوى : عليش أجألتي التدوينة امتاع الدكتور إبراهيم أفنان : الفترة هذي شفت حاجات واجد مرتبطة بالحاج فيصل ونحنا مش عارفين من المصدر أصلا وشن الموضوع اللي يفكر فيه ممكن يستغل فينا عشان أهدافه الشخصية احسن حل توّا انأجلو التدوينة امتاع دكتور ابراهيم سلوى : وقاعد في المسشتفى اخرة موضوع كيف هذا يقتله افنان : شن الحاجات اللي قالك عليهن سامي علي الحاج فيصل عمر : طبعا الحاج فيصل ايجيب في معدات طبية من سويسرا يستوردُوو فيهن وايبيع فيهن في المنطقة الشرقية لكن اللي اكتشفته الشركة السويسرية شركة وهمية مافش منّها بكل يستورد فيهن من الصين علي أساس من اوربا وايبيعهن بالسعر الأوربي مش بالسعر اللي واخذة يعني خاطي انّ يكذب عالناس يبيع حتى بالسعر الغالي غسيل أموال مية في المية سلوى : باهي كيف عرفت هذا كلا انت عمر : سامي لمّا حكالي عالموضوع هكرت الشركة واحسابات الشركة عشان نتاكد هل كان صادق ولا يجري بيّا وطلع صح الحاج فيصل تاجر خطير عالمنطقة الشرقية ولازم ينفضح افنان : خلاص حنمشّو اللحن وحنزلو التدوينة الجايّة عالحاج فيصل وحنشووفوو هل حتتأُثر عليه ولا لا سلوى : بس عليش سامي يبي ينشر معلومات نفس هذينا افنان : الحق مش هامني واجد اهم شي الكلام اللي قاله صاح عمر : توّا خلّو موضوع سامي علي جنب سلوى :باهي توا نحنا شن استفدنا اللي كنا انديرو في للمصدر توا انديرو فيه لسامي افنان : اهم شي النشر ,, مرات حيبانن علينا حاجات إخرة : في سر مختفي من زمان وكل يوم بعد يوم يبان السر قاعد يربط ف جميع الاطراق مع بعضهن وبالذات الماضي امتاعهم في شي في الماضي يجمعهم كلّهم مع بعضهم سلوى : حسيتك متعمقة واجد هكي افنان : نبيك اتجيلبي جميع الأدلة والاثباتات ولو في صور دزّيهن ليا عالبريد عشان انوتيهن في تدوينة .. توا انا لازم نمشي حنقعدو علي اتصال لو في أي شي جديد ,,, وطلعت افنان ومشت شور العيادة افنان : سلام عليكم ,, نهارك سعيد بات دعاء : وعليكم السلام دعاء : جيتي في وقتك نبي حد يمشي امعايا للكفتيريا امتاع العيادة افنان : شن حالك دكتور إبراهيم بات دعاء : انحس في روحي احسن اليوم رد بالك علي دعاء وربي يحفضكن البعضكن دعاء : هيا افنان نمشو للكفتيريا اشوية افنان : هيا وطلعن من الغرفة وقعدن يتمشّن في العيادة دعاء : انا حاسة ان في شي شاغل هم بابا هذا عليش قعد هكي ماكنتش متوقّعة انّ اطيح هكّي فجأة افنان : هانت سيّورة حيخف متخافش دعاء : لما خذيت تحليل قالي انّ حالته صعبة لكن ماقلّش ان مش حيقدر ايصبّي واطيح فجأة افنان : شن اتوقعي هل قالك حاجة هل صارت حاجة الفترة اللي فاتت دعاء : تخيلي انّ كان عارف انّ هو مريض من قبل المشكلة نحنا مانقدرووش نعرفوو اسرار اهالنا يقعدوو داسيّن علينا الماضي لعند ما انمووتووو افنان : هذا شي طبيعي اهلي واهلك عندهم اسرار كيفنا بالزبط من اللي ماعندش سر في حياته وممكن اسرارهم اسوء اخرة دعاء : بس عادي في فرق بين السر والحاجة الغلط افنان : اعقولنا اللي اتقوولنّا انّ أي حاجة سر معناها حاجة غلط وانقوولوو عليش أصلا من الأول خلّاه سر دعاء : مش شرط ممكن خلّاه سر عشان يحمي اهله يحمي اولادة يحمي عمله المهم انّ مايضرّش حد " علي جيّة طارق وماجد مع بعضهم للكفتيريا امتاع العيادة " طارق : توا كنا عند باتك قالنّا قاعدات هنا ماجد : ان شاء الله لاباس علي باتك دعاء : الله لايوريك باس ماجد طارق : نكره حاجة اسماها عيادات افنان : عليش كنك طارق : زمان جاني تمزق قعدت أسبوعين في المستشفى مشن عليا سنتين ماجد بس اللي كان ايجيني ويكسد امعايا ,, مش عارف هل هو كان ايجيني صح ولا عشان الممرضة اللي كان غاوي فيها دعاء : اوووو صح كمّل كمل احكي بالك نبدا انغير فكرتي علي ماجد افنان : طلّع فضايحة زيد ماجد : تي كذّاب يبي يبدا يألف توا فكنا من طواجينك انت الآخر طارق : اوكي اوكي سكتت كنك خفت دعاء : عندي بعدين امعاك موضوع ياطارق ماجد : خلّي يجري بيك مش شوري انا افنان : بس مش حسّين ان كلنا نعرفو بعضنا وحتّى أهلنا يعرفوو بعضهم طارق : لا عادي زمان مايهتمووش هلنا باهل اصحابنا لكن توا تغير الوضع قعدو الاهل يتعرفو علي اهل أصحاب ولدهم او بنتهم دعاء : حتى انا مستغربة ,, ماكنتش نعرف انّ هلي يعرفوو هلكم من زمان ,, انا ماكنتش نحساب ماجد خوك أصلا في البداية ماجد : انا انقول عشان السوشل ميديا ,, قرّبت الناس من بعضها دعاء : فعلا حتى انا معش قعدت نسأل علي صحباتي بالنقال قعدت عالواتس ماسنجر فايبر انستقرام وهكذا حتى اللي نبيها في موضوع انراسلها هكي ماجد : باهي ياطارق شن صار امعاك مع الحاج فيصل طارق : شكله يبي يمشيّني وايجيب واحد آخر مكاني ماجد : عليش طارق : يبّي يوسع الشركة ومافش سيولة بيني وبنيك احسن ,, انا حنفتح شركة ابرووحي دعاء : ابرافوو عليك , انا حندمعك وحنكوون امعاك افنان : حتى انا اعتبرني من اليوم امعاك المهم مرتب احسن من دعاء دعاء : حرام عليك ماعمرش قصرت امعاك افنان : انبصر كنّك ,, خطرها عالحاج فيصل عليش الحاج فيصل يعرف أهلنا كلّنا طارق : عادي الحاج فيصل يعرف نص الليبيين كلهم وخاش في نص مشاريع الشباب " وقعدووو يهدرزوو مع بعض ,,, " ماجد شال افنان عند وليد رئيس مجلة بنغازينو " وليد : بما انّك مش جايا بخصوص دعاء معناها جايا بخصوص الموضوع اللي هدرزنا عليه في الجامعة عن ثمن الحقيقة افنان : صح وانا كنت انفكر واجد ونعرف الثمّن اللي انت خذيته عشان تنشر مقالاتك علي ماما واتشوه سمعتها وليد : عليش انتي ماتبش اتصدّقي عليش مزلتي مقتنعة انّ امك بريئة افنان : باهي لو فرضنا مش انت ,, ممكن نعرف الصحفي اللي نشر مقالات علي ماما وليد : اسمعي مافش دخان بلا نار وانتي لازم إطلّعي علاقتك بامك واتعمليها كأنها مش ام مرات حتبان عليك الحقيقة اكثر واكثر افنان : مش هذا جواب سؤالي قتلك تعرف الصفحي اللي كان ينشر في تقارير علي ماما وشوّه سُمعتها وليد : انتي صحفية وعارفة لو مافش دليل ومادة راهُ ماطلعش بتقرير علي امك هذا يدل علي انّ امك كانت غلطانة افنان : انا متاكدة مليون في المية انّ ماما ماعندهش يد في موضوع تسريب الامتحانات وليد : مشكلتك مزال مقتنعة انّ امك بريئة ومتستحيل حتطلعي بنتيجة افنان : باهي قولي اسم الصحفي بس ارجوك وليد : مش حتستفيدي بحاجة الصحفي مات في حادث قبل سنتين افنان : تمام شكرا ,, عشان عطيتني من وقتك وليد : اسمحيلي عشان ماقدرتش انساعدك افنان : لا عادي خلاص مش حنلوومك ,, كل شخص بعذره باهي اخر سؤال عندي وليد : شن افنان : باهي ممكن نعرف رئيس التحرير وقتها من اللي وافق عالحملة علي ماما وبدوو في نشر المقالات لتشويه سمعتها وليد : اسف مانقدرش انقولك افنان : تمام .. نفس ماتوقعت ,, سلام وليد : سلام " وطلعت من المكتب امتاع وليد " روّحت شور الحووش وبدت في كتابة تقرير عالحاجات اللي بعثهن عمر ليها علي الحاج فيصل وكتبت كل حاجة بعد مرور ساعة كملت التدوينة ودزّتها لعمر خذت نقالها واتصلت بعمر عمر : وصلت التدوينة عندي افنان : انشرها توا ,, لو صار اللي في بالي معناها حنقعد شبه عرفت حاجات واجد عمر : شن الحاجات افنان : حنقولك بعدين ,, المهم انشرها توا الدوينة امتاع الحاج فيصل يلّا سلام يتبع ,, | ||||
|
| |
 |
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
العرض العادي
