آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
01-05-18, 01:46 PM
| #1 | ||||
|  رواية بلهجة ليبية بعنوان " لوعة الجامعة " للكاتب ديندار الوحيشي اربع بنات صحبات رفيقات انتيمات يِفْدن برواحهن البعضهن من اولى ثانوي لعند الشهادة الثانوية وهنّا صحبات ونفس الفصل لعند مانجحن من الثانوية وخشّن لجامعة بنغازي ونفس الكلية مع بعضهن حنبدوو امعاهن من اول سمتسر,, وشن صار امعاهن من احداث وقصص ومغامرات من ناحية الصداقة من ناحية الحب من ناحية الخيانة والغدر ومن ناحية الاهل والاقارب | ||||
|  |
|
01-05-18, 01:48 PM
| #2 | ||||
| #لوعة_الجامعة الحلقة 1 اروى وحنان ونسرين جَنْ من الصبح بدري للكلية وكان اول سمتر في الجامعة اروى : فرحانات بالجامعة شكلنا نحنا بس اللي ايجينا حنان : انتي سكنان عالواتس تعالوا بدري اهو جينا اللي يشوفنا يحسابنا نحنا اللي فتحناها نسرين : وين مرام غريب ماجتش اروى : كلّمتها قالت ترجى في خوها مزال ماناضش انتن عارفات ونيس امزّطها ديما من أيام الثانوي حنان : باهي توا شن انديرو مثلا مزال بدري مافش حد جاء نسرين : هيا انديروو برمة عالكلية اشوية اروي : هيا ,,,, مرام : مزلنا انقولوو يا هادي ياماما هذا اول يوووم صحباتي كلّهن غادي ام مرام : وسّعي بالك خلاص قاعد ايدوشّ وايشيلك كنك مستعجلة اول يووم مزلتي مرام : يعني حرام كان مشيت بدري مع البنات وهدرزنا وغيرنا جوّنا يعني لازم نمشي علي وقت المحاضرة شكلي حنتعب امعاه في الجامعة ياريتك حي بس يابابا ام مرام : عيب يابنت شن هالكلام صبح يافتّاح كنك مرام : آني سكتت ,,,, اروى : حي حي بحّتي هالخنفوسة مع من امصبيّة حنان : بطلي شن هالهزوة امتاعك اروى : بالله عليك شوفي شكلها بس معش فهمت انا كنهن الشيّنات ماشيا امعاهن الأيام هذينا بحّتي الخنفوسة الاخرة وهذي الاخرة نسرين : هههههههههه شن هالمصطلح هذا عالصبح اروى : شن نبي اندرلكن قانووون الصّحبة امتاعتكم السامط يا انحبوو مع بعضنا يا انعيشو سينقل مشاعري مرتبطات بيكن عليش حنان : هذا قانون الصداقة من أيام الثانوي نسرين : راك تنسي البند الاخر من القانون اروى : شن نسرين : مدام صديقك ماعطش فيك كلمة ولا دار حاجة رسميها معناها صديقنا كلّنا اروى : انا من يوم ما عرفتكن واموّخرة لاورة هيا نمشوو للقاعة مرات نلقوو فيها طلبة ,,,,, ونيس : صباح الخير يا امي ام مرام : هيا حرام عليك لازم اتنكد علي اختك ونيس : غير ردّي الصباح شكلها حمّشاتك عليا هيا تو تنلبس وطالع توا اول يوم هوو ريت هالمحاضرات اللي وراها " مرام تسمع فيه وماسكه اعصابها بالسيف وترجى فيه قاعدة " ,,,,, خشّن للقاعة لقوو في طلبة قاعدين كانن الكراسي كلهن امعبيات اغبار طلعن مناديل وقعدن يمسحن فيهن قعمزن ومسكن مكان لمرام امعاهن نسرين : قاعة كبيرة وطلبة واجد حنان : ربي يمشّي هالسمستر الأول على خير اروى : تو تمشي نفسها نفس الثانوي " علي جيّة شاب شور اروى " جمال : السلام عليكم اروى : وعليكم السلام جمال : عندك منديل نمسح الكرسي امتاعي اروى : تفضل جمال : بارك الله فيك اروى : فيك بارك الله ومشى جمال من تلاهن نسرين : حي حي حي وين يا الله الله الله غير وسّع بالك علينا اروى تحكي بهزوة : شُفتو جاني انا من دون البنات كلّهن حنان : شكلك خنفوسة قعدتي حتى انتي اروى : خنفوسة في عينك نسرين : مش قلتي في الصبح الخنافس بس اللي بحتّو فيهن الشباب اروى : لا مش شرط ,, في حالات خاصة نسرين : ههههههههههه حنان : راك تنسي القانون امتاعنا اروى وهي اتعايب علي حنان : راك تنسي القانون امتاعنا فرحانة يعني انتي بي ريت هالقانون هو يا انحبوو كلنا يانقعدو سينقل نسرين : هههههههههه غصبن عنّك هذا شعارنا في الحياة حنان : غريبة طوّلت مرام لعند توا اروى : تي خوها ونيس بليد بكل ودمّة ثقيل " علي خشّة الدكتورة للمحاضرة " ,,,, كانت وقتها مرام قاعدة في السيارة مع خوها والطريق زحمة كانت مرام : خليك ديما هكي باهي ,, ديما نووض علي مهلك وشيلني متأخر ونيس : كنك راهُ اول يوم عليش امعصبة بس راهي مش مدرسة مرام : انت شن دخلك بيا انا نبي نمشي بدري نبي انكسد مع البنات ونيس ولّع الراديوو ومش امعدل عليها ,,,, دكتورة : طبعا تقريبا كلكم اول سمستر من اللي في السمسترات المتقدمة يرفّع يدّة " رفعوو أيديهم وامعاهم جمال " الدكتورة : حرام مادة ساهلة مزلتوو شايلينها امعاكم وقعدت تسال فيهم بالواحد لين وصلت في جمال جمال : الحق انا ماخشتش راسي بكل المادة هذي صفّيت مواد العام كلهن الا هذي الدكتورة : شن اسمك جمال : جمال حنان ونسرين يبحّت في اروي ويضحكن اروى خذت ورقة وكتبت فيها عليش تضحكن حنان كتبت بعدها " عرفنا اسم حبيبك الجديد " نسرين كتبت في نفس الورقة " راك تنسي قانون صداقتنا " ردّت عليهن وكتبت في الورقة " عشان خذا منّي منديل درتو حبيبي طيّح والله سعدك انتي ويّاها " ,,,,,,, وصلت مرام للجامعة ,, خشت لكلية العلوم لكن مش عارفة وين القاعة وطبعها حشومي مابتش تسال حد وقعدت ادور برووحها اترن عالبنات مايرّدنش عليها ,,,,, حنان بصوت واطي : اترن عليا مرام شكلها جت للجامعة اروى بصوت واطي : دزيلّها مسج قوليلها قاعدة في قاعة 5 حنان : ما انظنش تعرفها القاعة اروى : هيا نطلعووو بما انّ تعارف وخلاص المحاضرة هذي ,,,,,, مرام خشت لوحدة من القاعات لقت بنت ماسكة بنت وتضرب فيها اكفوووف وكانت القاعة فاضية وكانت البنت اللي تضرب واضحة متشردة بكل وشكلها يخووف وبيئة مرام خافت منها مشت اتشوف أي حد لابس امن شافت واحد من بعيد مشتله تجري مرام : تعال ابسرعة للقاعة هذي مشى امعاها امتاع امن للجامعة طلعن مع بعضهن من القاعة وكان واضح عليها الضرب في وجها مرام : اهي اللي كانت تضرب فيها امن الجامعة : صح ضرباتك البنت اللي مضروبة : لالا ماضربتنش بكل هذي تكذب امتاع امن الجامعة : افطني مرة ثانية معش تحكمي عالناس هكّي وخلاص ومشى امتاع الامن وسيبها امعاهن اللي اتخوف كان اسماها اسراء اسراء : شن حصّلتي توا بعد إلقاقة الزايدة مرام خايفة بكل ومتجمدة في مكانها مرام : بس شفتك تضربي فيها اسراء : وانتي شن دخّلك أصلا شكلك كيووت وجديدة عالجامعة قرّبت منّها سمستر اول شكلك صح مرام : حوّلي ماتحكش امعايا قرّبت منها اسراء وهمست في وذنها اسراء : لو جيتي قدّامي مّرة ثانية حندير فيك اشر من اللي درته مع البنت اللي شفتيها راني وقّضتك اسمي اسراء احفظي الاسم هذا زين ,,,, ومشت اسراء والبنت اللي امعاها ,,,, مرام خافت واضايقت وحسّت بدووخة مكان غريب عليها اشكال جديدة روتين جديد لين شافت صحباتها من بعييد جيّات شوورها اروى : كنك شن فيه نسرين : شن صاير حنان طلّعت شيشة ميّة وخلتها تشرب ومشن بيها شور الكفتيريا ,,,,,, والبنت اللي كانت تضرب فيها اسراء قعدت اتبحت في مرام ومنزلتش عينها منها وهي ماشيا مع اسراء ,,,, مرام : خاطي امزاط خويا ونيس اللي خلاها اطير منها النية جيّة الجامعة وخاطي البنت اللي حكتلكن عليها اللي قالت لي اسمها اسراء كثّر خيري مزلت امصبية علي كرعيّة اروى : خلّك منّها وماتخافش نحنا امعاك لوّ فكرت بس اتخش فيك ولا اديرلك حاجة حتشوفي شن انديرو فيها نسرين : صح ليش خايفة هذي مش اول مرة ياما شفنا ودرنا مشاكل مع بنات أيام الثانوي حنان : نحنا مع بعضنا ديما ولازم اتوريها لّنّا مرام : فكّونا منها توا ,, شن درتُ بلايا نسرين : اتصدقي ان اروى حصّلت صديق من اول يوم مرام : اووواووو وين مش للهدرجة بس راك تنسي اروى : اوكي اوكي مش ناسية يانحبوو كلّنا مع بعضنا يانقعدو سينقل خلاص واصلا يبصّرن عليك وانتي مسرع ماصدقّتي حنان : انبصروها عليها صار ,, بعد مادرتيها مخسارة لما طلعنا من القاعة بحّتي لاورة قبل وجت عينك في عينة اروى : ياربّي شن هالنفسّيات نظرة عفوية ,, كنكن انتن هكي مرام : يرّكبن عليك ,, باهي وين الجدول وين القاعات راهُ مش فاهمة راسي من كرعية نسرين : خلونا نفطروو بس وبعدها تو انديرو برمتنا في الكلية ,,, الساعة 2:00 ظهرا حنان : اسفة يابابا مالحقتش اندير الغداء بات حنان : لا عادي ,, اهم شي وكّلي خواتك اصغار بس " ام حنان ميّتة وحنان عندها اختين اصغار مزال مايقرنش وحنان مهتمّة باتها وبخواتها الصغار " بات حنان : اهم شي جامعتك يا حنان ماتلقي الا شهادتك ,, انا مدوّرنش واجد حندبر راسي خواتك الصغار جعانات غديهن جبتلك الحاجات اللي قتيلي عليهن حنان : نجّك ليا يا احلى بابا بات حنان : اسلوبك وطريقة كلامك وابتسامتك اذّكر فيّا بامك الله يرحمها ويجعل مثواها الجنة حنان : اللهم امين .. خلاص عالسريع تو اندير غداء ,, اتغدّى امعانا ..... اروى وحيدة هلها وماعندهش لاخوت لاخوات بعد ما تغدّت قعدت امكسدة في قروبات الفيس ,,,, كانت نسرين اتهدرز مع اختها المطلقة نووور نور : شن جو الجامعة اليوووم نسرين : جو سمح لكن الروتين تغيّر علينا مش نفس الثانوية بكل لكن حنتاقلم مع البنات ,,,,, اروى شافت مرام فاتحة ماسنجر اروى : بس بس مرام : مياو اروى : هههههههه لا معناها جوك رايق اليوم مرام : عليك يووم عدّا عليا تبيلي مش نتعود عالجو هذا اروى : متخافش حنتعودوو وانعيشو احلى جو وبالنسبة للبنت اللي حكيتيلي عليها ماتفكرش واجد فيها وفووتيها مرام : لا أصلا حتى انا طلّعتها من راسي ,,,,, هذه الرواية للكاتب ديندار الوحيشي ,,,,,,, ثاني يووم كانن في الجامعة وكانت المحاضرة الأولى دوبك كيف كاملة حنان : كان هذا انْقِلي منّي خوذي كراستي وجيبيها ليّا بكرة مرام : لالا خليني تو ننقل من السبورة خير مش ناقصني كل اشوية انصور صفحة من كراستك ونقعد اندزلك واتس شعفت من أيام الثانوي حنان : باهي ابراحتك اروى : انا جعانة مووت يابنات راهُ طالعة من الحوش بلا فطووور نسرين : أشر منّك مرام : خلاص عدّوو للكفتيريا وتوو نلحقكم حنان : تمام هيا يابنات وطلعن شور الكفتيريا وقعدت مرام تكتب وهي كم طالبة في القاعة وهي تكتب صبّت قدامها بنت بحتت فيها مرام طلعت نفس البنت اللي كانت تضرب فيها اسراء مرام : نعم تفضلي " اسفة عشان طلّعتك كذابة قدام الامن امس غير كنت خايفة منّها واتهدد فيها " مرام : لا عادي آية : اسمي آية ونقرا في السمستر الثالث في كلية العلوم مرام : عاشت الاسامي ,, قعمزي جنبي " سكّرت كراستها مرام " مرام : شن قصّتها البنت هذي آية : هذي عندها قروب في الجامعة وبنات واجد يخافن منها انا ماسكة عليا حاجة هذا عليش نسمع في كلامها خايفها اتشهدر بيّا مرام : ماسكا عليك حاجات كيف آية : في شاب قعد يبحت فيا ومعجب بيا من قبل كنت نحسابه يحبني ومشيت اللحن امعاه نفس أي بنت تبدا اول سمستر طاهقة علاقات وهكي وتطورت العلاقة لين قعد عنده صوري مرام : باهي وشن دخّل اسراء آية : طلع دازته اسراء ,, انا راهُ ماكنتش هكي ,, كنت بنت شطورة كيووت امتاع دراسة توا خربت واهملت روحي مرام : باهي شن تستفيد اسراء اية : تقعدي تسمعي كلامها واديري اللي تبيه مرام : معقولة في حاجات هكي في الجامعة آية : ماشفتي شي مزال ’’’ هذي ادخّن حتى الدخان في حمام الجامعة مرام : لعند امتى تقعدي تسمعي في كلامها وحبيسه عندها آية : لا خلاص بِعْت القضية وقعد مش هامني آخر مرة طلبت مني حاجة مانبّش انديرها مرام : شن مثلا اية : أي حاجة ,, تقعدي خدامتها وخلاص عشان رفضت ضربتني اللي انتي كلمتي الامن مرام : تقدري تحكي الكلام هذا لصحباتي عادي آية : لا خايفة ينتشر الكلام ,, وبعدها نحصل فيها ,,, نسرين : حنان بحّتي من قاعد غادي حنان : اووو جمال اروى : بالله عليكن فكّنا من السماطة معش اتبحتن فيه تو يحسابنا نحكوو عليه نسرين : نظرات عفوية بس كنّك امركبة انتي اروى : مبردكن ,, رايح دمّكن ثقيل حنان : طولت مرام هذا كلها تكتب نسرين : مرام مزال اتعامل فيها روحها في الثانوي ,,,,, وهنا طالعات من القاعة مرام وآية مرام : ممكن تعطيني رقمك آية : عادي خووذي ليا فخر نكسب صديقة مثلك وعطتها آية رقمها ,,,,, نسرين : والله مانزّل عينه منّك بجديات نحكي حنان : اروى ديري أي لقطة اروى : راهُ انصبي راكن كثّرتن عارفاتني مش ليا الجو هذا انا " علي جيّة مرام " مرام : طوّلت عليكن صح حنان : خذيتلك امعايا بريوش لكن اكيدة صقّع مرام : لا عادي هاتي اورى : تو انجي نمشي انجيب شيشة ميّة نسرين : جيبيلي امعاك " اروى تبي تأخذ شيشة امية جا واحد جنبها فاسد وتحرّش بيها بدون محد يفطن " اروى تعصبت اروى : تحشم علي وجك ياتافه المتحرش : " غير من جا شورك مش داعي الشهدرة شرّيني بحّتو راهُ ينابش فيا " اروى : وقح تافه حشرة والله مانك راجل حنان : حي حي بحتّو اروى تعالن ومشن يجرن شورها المتحرش : غير اوكي انقانك شهدارة اروى : كبّت طاسة الكاتبشينو علي وجه المتحرش : شن هذا اللي درتيه انتي اروى : والله مانك راجل ومزال حنمشي مركز الشرطة امتاع الجامعة جمال : لا مش داعي تمشي خلاص هيا ياخونا شوف حالك وفوت الموضوع اروى : وانت شن دخلك بيا من انت أصلا عشان اتقولي مش داعي جمال : وسعي بالك المتحرش : شكلها فاسدة هذي فوووتها جمال سمع كلمة فاسدة من هنا خش فيه بدماغ طاح المتحرش وقعد يرفس فيه بكراعه جمال جمال : انت اللي فاسد راني شفتك من بعيد شن درتلها لكن نبي نقعد محضر خير قبل مانبّش توصل للدرجة هذي نسرين : خلاص يا اروى وسّعي بالك اروى : في عينة ماشية لمركز الشرطة امتاع الجامعة عشان انبلغ فيه ومزال مش اروى اللي يندارلها هكي واي شاب واي بنت يفكر ادير روحه شاطر علينا حنعرفوو كيف نتعاملوو امعاه وكانت اتبحت في مرام مرام حسّت بالأمان مع صحباتها واعرفت روحها مش حتوحل في الجامعة مدام ربّي رزقها بصحبات كيف هذينا المتحرش قعد جسمه دم كلّا ,حنان : هيا نمشوو شور المحاضرة اروى : لانمشو شرطة امتاع الجامعة قبل لازم نفتح فيه محضر علي تخطيمة امتاع الامن حكتله كل حاجة اروى وشن صار وخذوو وطلّعو من الكفتيريا اروى وهي طالعة من الكفتيريا اخبطت فيها اسراء بلعاني مرام شافت اسراء خافت اسراء : افطني وبحّتي قدّامك اروى : وجك ,, ترا خطيني انتي الاخرة وقتها ماتعرفهش انّها اسراء وطلعت اروى مع صحباتها برة الكافيه ومرام خافت مابتش اتقوللها هذي البنت اللي حكيتلكن عليها اروى : عن نفسي طارت النية من المحاضرة نبي انشوف مكان هادي نبي انقعمز فيه وانريح اعصابي مرام : هيا نمشو شور الحديقة امتاع كلية الاداب اروى : حتى هذا راي حنان : خلاص مش حنخشوو معناها للمحاضرة حنقعدوو امعاك اروى : لا لازم اثنين يخشن هكي نحنا كنا أيام الثانوي وحدة تكتب والاخرة طلّع نقالها واتسجل محاضرة صوت وبعدها نقروها مع بعضنا نسرين : خلاص تو انخش انا وحنان اروى : عدّي يامرام كان تبي اتخشي عادي خليني ابروحي راه مش حنزعل مرام : عارفة البنت اللي خبطاتك امبدري اللي قتيلها وجك اروى : كنها شكلها بيئة بكل مرام : هذي هيا اسراء وامبدري جتني بنت اللي كانت تضرب فيها وحكتلي كل شي عليها اروى : ليش ماقتيلي هذه اسراء مرام : خفت منها اروى : يامرام كنك رايحة هكي متخافش ماتخلش حد يتحكم فيك في الجامعة خليك حرة مستقلة مثّلي روحك ومثّلي نفسك اطلعي من تفكير الثانوية اشجّعي اشوية ارجوك نسرين : خلاص توا نمشورللمحاضرة احكيلنا بعدين علي قصة البيئة اللي اسمها اسراء " ومشن نسرين وحنان شور المحاضرة " مرام : محلاك عجبتيني نفس ماعرفتك أيام الثانوي شُجاعة متخافش بكل اروى : نجك ليا احلى رفيقة مرام : تذكري كيف تعرفت عليك أيام الثانوي اروى : نذكر كنتي ديما بكّايا واتعيطي في الماضي مرام : هاتي شنطتي وحدة من بنات الفصل : لالا مرام : قتلك هاتي " وانا قتلك لالا " مرام جت تبي تاخذها دفتها البنت طاحت مرام وقعدت تبكي وهي تبكي شافت بنت مدة يدّها ليها عشان اتصبيها اروى وهي مبتسمة : صبّي هيا اروى : تي حي عليكن وحي البنات : اروى جتها الحالة اهربن اهربن مرام بدموعها قعدت تضحك علي حركات اروى اروى : هاكي شنطتك ومعش تبكي هيا تعالي انعرفك علي صحباتي قاعدات في الدرج الاخر في الوقت الحاضر مرام : كنت وقتها كيف جايّا من مدرسة اخرة ومانعرفش حد في الفصل وبعدها عرفتيني علي نسرين وحنان ومن يومها قعدنا صحبات ورفيقات اروى : ربي يدووم صحبتنا ياغلايا مرام : باهي ترا عطيني كراستك انكمل المحاضرة اللي امبدري اروى : وعليش طوّلتي امّالاه ماهُو جتني البنت اللي كانت تضرب فيها اسراء وحكتلي كم حاجة عليها تو لما يجن بنات تو نحكيلكن بالتفصيل اروى : باه ,, هاكي الكراسة مرام وهي خايفة : بحّتي وراك اروى بحتت وراها شافت اسراء ومعاها بنتين جايّات شورهن اروى : خليك ورايا متخافش راهُ حرم جامعي مش في الشارع قاعدين اسراء : صار اتقوليلي وجك يادلوعة السمتسر الأول اروى : مسكينة يشوفن فيا هكي هاي اكلاس مايعرفنش من تطلع اروى مش اروى اللي اتخاف من كنايس الجامعة " علي جيّة جمال شور اروى " جمال : السلام عليكم ,, اروى : وعليكم السلام جمال : شن جوك توا ,, حبيت نطمّن عليك بس اروى : لا اكويسة وبارك الله فيك عالموقف اللي امبدري واسمحلي علي ردة فعلي جمال : لا عادي ,, ناقصتك حاجة اروى : لالا ,, بارك الله فيك " لما مشى جمال اختفن اسراء وصحباتها مرام : شكلهن شافن جمال جي شورنا ,, خافن اروى : نسالك مرام مرام : نعم اروى : شن الشي اللي خلاني واخذة راحتي في المدرسة وديما مش خايفة من حد مرام : كان عندك صحبات واجد في المدرسة اروى : شاطرة ,, نبيك توا تحكيلي بالتفصيل شن قالت لك بالنت اللي امبدري علي اسراء وبعدين احكي للبنات مرة اخرة مرام : حاضر "وقعدت تحكيلها بالتفصيل مرام " ,,,,, الساعة 6:00 مساءا يهدرزن في قروب سرّي اسمه قروب العمليات الخاصة عالواتس اب هنّا امسميّاته هكي نسرين : صار قتيلي دايرة قرووب في الجامعة الحشرة اسراء حنان : الحمد الله اللي جا جمال كان هذا قطّعنكن انتن دلوعات وهيا بيئة متوحشة مرام : خاطري نعرف النماذج هذينا كيف يقرن في الجامعة وين هلهن معقوولة في بنات هكي في الجامعة اروى : وفي اشر من هكّي انتي ماتعرفي شي مزلتي ياما حنشووفوو من حاجات في الجامعة سواء من شباب او بنات يعني لازم نقعدو يد وحدة وما اندسو علي ارواحنا شي حنان : واصلا نحنا يد وحدة اروى : لا النفسية والبيئة والجو اتغير في الجامعة مرات وحدة فينا حتغير نسرين : فعلا اختي نور متخرجة من الجامعة وقالت لي صحبات واجد تغيرن في الجامعة كانن رفيقات انتيمات خشّن للجامعة تفرّقن نادر ماتلقي بنات مزالن علاقتهن قوية من أيام الثانوي ممكن تلقي لكن خير خير ومن بعيد ومافش هذكي الدلالة اللي كانت نفس أيام الثانوي اروى : بكرة حنبدو في اول خطوة لنّا لازم نعرفوو رقم تليفونها وين تسكن شن احسابتها عالتواصل الاجتماعي لازم نعرفو كل شي عليها بالتفصيل نسرين : بس مرات تطلع إسراء مش حطتنا في راسها اروى : نحنا حنشوفو كان طلعت ما ادوّرش فينا حنفووتووها وكان طلعت ادوّر فينا وحطتنا في راسها حنتغدووو بيها قبل ما اتعشّى بينا مش نحنا اللي اتحكم فينا بنت بيئة يتبع ,,, | ||||
|
| |
|
03-05-18, 05:19 PM
| #3 | ||||
| #لوعة_الجامعة الحلقة 2 اروى : نحنا حنشوفو كان طلعت ما ادوّرش فينا حنفووتووها وكان طلعت ادوّر فينا وحطتنا في راسها حنتغدووو بيها قبل ما اتعشّى بينا مش نحنا اللي اتحكم فينا بنت بيئة مرام : خلاص بكرة حنرن علي آية وناخذ منها تفاصيل اكثر حنان : انا نستاذنكم لازم انسكر نت الباب يرن قاعد انتقابلوو بكرة نسرين : تم تم بكرة انتقابلو ,,,, " وكل وحدة سكّرت النت وشافت حالها " ,,,, مشت حنان اتشوف من اللي عالباب طلعت خالتها وردة حنان متحبّهش بكل ديما مشاكل هي وامها ويعاملو فيها معاملة بايخة زمان وردة : اهلين حنان كيف حالك حنان : اهلين خالتي انستي وردة : توا كيف جابني خالك فيصل قلت انجي نسال علي بنات اختي حنان : تسلمي والله فيك الخير " خالتها وردة مش كبيرة في العمر عمرها 35 سنة ومش متزوجة " فاطمة : اخويلة جت ليلى : اخويلة وكانت جيبتلهم شوكلاطات وكيكة خشت حنان للمطبخ اديرلها في قهوة ,,,,, نورا : حسّيت بملل وفراغ شكلي نبي انقول البابا نبي نخدم مليت من الحوووش نسرين : مش عندك شهادة تمريض وعندك خلفية عالتمريض خلي بابا ايشوفلك أي عيادة اتمشي وقتك فيها نورا : اها لازم لازم قريب اتجيني حالة نفسية نسرين : انتي اللي عايشة جو النكد هذا جاك اكثر من واحد بعد طلاقك انتي ماتبش نورا : يانسرين يعني نزوج وخلاص اللي جوني كلهم حالات نفسية وكل واحد بشروط مش ناقضني انا انا عارفة بابا وماما يبوني نزوج زايد ناقص لكن استحالة نرضى بواحد متريحتلش نسرين : لا في هذي عندك حق صح ,,,, اروى حاجة وحدة كانت دسّتها علي صحباتها انّ باتها يسكر وامتاع سكير ومرة مرة باتها اتجي علي امّها ويقعد يضرب فيها وهو سكران أمها اسمها سُعاد ,, وبات اروى اسمه اسلام ,,,,, بعد منتصف الليل اروى : كنّك مزلتي مارقدتش ياماما سعاد : اكيدة نفس كل قصة نرجى في باتك مدام طوّل اكيدة حيرّوح سكران والله كان مش انتي راني امسيبتلا الحوش من زمان فدّيت منّا تعبلي نفسيتي ضرب وهزايب وصابرة ومحتسبة انتي لاعمرك حكيتي للناس علي باتك وديما امطلعتيه في احسن صورة وانا ديما ساكتة ونكذب وانقوللهم راجلي يعامل فيا احسن معاملة اروى : خلاص ارقدي انتي ياماما تو نرجى انا عادي سعاد : لالا بكرة وراك جامعة سلّم ابنيتي ارقدي راد الله عليّا انا مكتوبلي بالشقا والهم ,,,, صباح ثاني يوم ناضت اروى وكانت مضايقة لانّها كانت تسمع في الليل متأخر اعياط باتها وامها ودايرة روحها راقدة فطرت وشالها باتها للجامعة ومابتش تحكي امعاه ولا كلمة وكانت قالبة وجهه علي باتها ,,,, كنن يرجن فيها البنات في القاعة وصلت للجامعة وكان باين عليها مش راقدة اكويس او تعبانة او زعلانه باين كل شي في ملامح وجها اروى : صباح الخير نسرين :صباح الورد كنك مريضة ولا شن اروى : لا امس ماجنش نوووم ورقدت متأخر حنان : كان تريحتي وغبتي خير وعارفة انتي مافش محاضرة حتنقصك اروى : لا تو ناخذ كبتيشنوو تو ننشط مرام : المحاضرة قريب تبدا هاكي مشّي اشوية بالكبتشينو امتاعي اروى : نجّك ليّا وخلاص يامرام وجا الدكتور وقعد يعطي المحاضرة عادي ,,,,, سعاد كانت تبرم علي شقتها علي خشّت اسلام عليها سعاد : غريبة كنك ما مشيتش العمل اسلام : انتي امْحمّشة بنتك عليا ولاشن سعاد : كيف اسلام : اروى كل يوم اتصبحي عليا اليوم اتقول في حد امسخنّها عليّا ,, قالبه وجها الطريق كلّها سعاد : لا تهيالك بس وفكنا من الوسواس اللي في راسك راهي اتحبك وامكبدة عليك موووت حرام عليك تظلم فيها هدرزت امعاها الصبح وقالت ماحوتي كيف رقدتت اسلام : اكيدة منّك انتي أصلا مشاكلك واجد امس خلتيني انعيط سعاد : يعني عرفتك حتروح سكران ونرجى فيك عشان نهتم بيك واتقولي كلّا منك اسلام : شن مش عاجبك كلامي اخبطي راسك في الساس سعاد : باه تو نخبطه ,, توا خليني نبرم علي الشقة اسلام : ريت هالحاجة الكبيرة اللي اديري فيها وهو طالع خبّط باب الشقة بالقووة سعاد قعدت تبكي <<<< الساعة 10:00 صباحا اطلعن من المحاضرة اروى : ماشيا للحمام تو إنلّحق عليكن في الكفتيرياء نسرين : تمام حنان : خلاص نرجو وفيك عشان اتقوولينا كنك ضاربة النكد اليوم مرام : بالمرة صقّمي الميكب امتاعك اروى : خلاص يا ,, ريت هالجمال اللي امقطع رووحه عندي ,,, مشت اروى للحمام ومشن البنات للكفتيريا اروى قعدت امصبية قدام المرايا واتبحت في وجها اروى : خلاص يا اروى مش داعي اتوري البنات انك مضايقة وزعلانة شدي حيلك هيا وريهم اروى اللي ديما تضحك وجوّها سمح وهي تحكي مع رووحها علي خشت اسراء للحمام اروى فتتها مابتش اتعبّرها ولا تحكي امعاها صبّت جنب المرايا اللي جنبها اسراء : سمعتي عليها البنت اللي دايرة روحها فاطنة وذاكيّة وهي تمشي ضربتها سيارة وماتت والسيارة اهربت اروى : لا سمعتها منّك توا ,, تفضلي نعرفك عشان تحكي امعايا اسراء : شكلها الدلووعة راقيلها ومضايقة من امزعل العسل اليوووم علي خشت اربع بنات في الحمام طلّعن البنات كلّهن وسكرن باب الحمام عليهن وقعدت اروى امعاهن جوّا اروى : شكلكن امتأثرات بالمسلسلات واجد اسراء : تعجبني الثقة اللي عندك اروى : انتي شن مشكلتك شن تبي بالزبط اطلعي ع راس حاجتك اسراء : عارفة روحك شن درتي .. خبطتيني في الكفتيريا اروى : علي أساس مش انتي اللي ادوّري في الحس والمشاكل راهُ اللي نفسك كنت انقرمش فيهن تقرميش مايغركّش شكلي اللي برة ,,,,,, مرام : مشغولة علي اروى اول مرة انشوفها هكي حنان : سبحان الله اروى اللي يشوفها يقوول كيوت وطيوووبة نسرين : مش منها ,, في بنت اتخش الكونغفو مرام : بس من اول ماخشت للثانوي سيّبتها رياضة الكونغفو حنان : اللي نعرفه باتها واعر بكل لكن كل صيف تمشي اتمرن في كونغفو من الابتدائي لعند ثانية ثانوي لمّا طقينا شهادة ثانوية سيّبتها نسرين : تخيلي مزال لعند توا في الكونغفو راهُ اتشلط فينا كلنا مرام : مش غير ,, لكن صعب تقريبا اترد حاليا معش عندها وقت نفس زمان ودارت عقل ,, زمان كانت هبلة حنان : خلاص ماقرمناها الا واجد ,, باهي شن انجيبلكن تفطرن مرام : انا بانيه نسرين : انا برجر ,, عارفة اروى اتحب الطابونة حنان : تم امسكن الطاولة هذي تو انجيكن ,,,,, اسراء : اليوم حنعطيك درس مش حتنسي طوول عمرك اروى : درسك جا في وقت انا كارهَا ام الحياة وراقيلي ومتمزطة لكن انتي مزال ماتعرفش من تطلع اروى اسراء : اروى عاشت الاسامي يادلوعة اروى : حنوريك من تطلع الدلوّعة حوّلت شنطتها علي جنب اسراء : هيا اضربنها يابنات فيش اتراجن بسرعة جت اول وحدة تبي تضربها بكف مسكت يدّها اروى اروى : لالا مش هكي ياسمووحة وضربتها كف لين وذنها زنّت اسراء : اووو شُجاعة طلعتي اخرة اروى : مانبش اندير مشاكل في حرم جامعي مانبش انجيب البابا ادّواوي فوتوني خير اسراء : شن خفتي قصدك " باب الحمام قعد يخبّط بالقوووة سمعن صوت الامن امتاع الجامعة امن الجامعة : حلّو الباب شن في جوّا اسراء : افتحن الباب يابنات امن الجامعة من برة عند الباب شافو اروى قاعدة عادي عالمراية واسراء جنبها وكأن مافش شي صاير اسراء وهي طالعة اهمست في وذن اروى اسراء : لنا لقاء ياسمّووحة ,,,,, كانن يفرطن البنات علي جيّة اروى اروى : عارفات من قابلت توا حنان : من اروى : اللي اسماها اسراء طلعت مافش اجبن منها وخوافة نسرين : وين اروى : في الحمام مرام : انرن علي اية توا اتجينا اروى : كلميها خليها اتجينا في الكفتيريا مش حنتريح لين انعلّم عالبنت هذي مرام : تم تم تو انرن عليها توا حنان : يابنات بحّتن مش هذا الفنان صالح حسين المشهور اللي يغني اروى : هووو مرام : اها هووو حنان : سمعتن آخر اغنية نزلها علي صفحتها واو اتجنن اروى : اها مش عادية مرام : شفتها عالنت لكن ماسمعتهش نقرا في التعليقات يشكرن فيها البنات حنان : شوفي كلهم يبحتوو فيه ويبو يصوّرو امعا نسرين : حقّاته فنان ومشهووور جت عينه في عين نسرين الفنان صالح اروى : يبحت فينا ولا تهيالي قاعد حنان : انقّانة يبحت مرام : شكله امشبّه علي وحدة فينا صالح احسين مشى شورهن اروى : هذا جي هنا ,, حنان : مرات يبحت في الطاولة اللي ورانا وصل فيهن صالح صالح : السلام عليكم ردن البنات عليه السلام صالح : نسرين انتي صح نسرين : من انا اروى : لا انا حنان : لا انا مرام : لا انا صالح : ههههههههه لا انتي اروى والبنات في نفس الوقات قالن " أي وحدة فينا " صالح : مش انتي اسمك نسرين نسرين : ان شاء الله عليش مرام : طلعت دايرة علاقة من ورانا حنان : هذي اللي كنت انقول عليها احسن وحدة فينا اروى : غير اهدن اشوية بس صالح : ماعرفتنش نسرين : لا عارفة انكّ الفنان صالح صالح : لا حوّلي قصة الفنان غير ركّزي اشوية نسرين جمّعاته لكن باستعباط " لا نعرفك انّك اتغني بس " صالح : انا قريت امعاك الإعدادية من أولى اعدادي لعند ثالثة اعدادي نقرو مع بعضنا في مدرسة خاصة اسماها دار الحكمة " البنات بحّتن في بعضهن نسرين : اها جمعتك توا .. صالح : كنتي لما اتنابشي فيا اتقوليلي يالوحي وانا انقولك يانوسة نسرين : اها اذكرت توا صالح مد يدّة لنسرين عشان يسلم عليها نسرين مدّة يدّها صالح : هذا رقمي خليه امعاك يانوسة لو نقصاتك حاجة دوريني وهذا احسابي عالفيس ابعثيلي طلب صداقة ليا واجد عليك وعلي هدرزتك "نسرين تفلوجت ومعش عرفت كيف تحكي " ومشى صالح من تلاهن حنان : ليش ماقلتي كان يقرا امعايا زمان نسرين : عليش نبي انقولها ريت هالحاجة الكبيرة اللي نفتخر انّ هو صاحبي مرام : متكثروش عليها خافت وتحشمت اروى : عارفة انك كنتي تقري في مدرسة خاصة لكن ماعندش علم انّ عندك انتيم وصديق أيام الاعدادي نسرين : تي طالب امعايا درتو انتيم وصديقي حنان : طريقة كلامه انّ هو كان فاتح امعاك دلالة واجد واقريب منّك كان نسرين : خلاص غيّرو الموضوع وانتن قعدتن اتحققن امعايا مرام : الوو آية تقدري اتجيني في الكفتيريا توا حنان : كنك عصبتي نسرين نضحكو نحنا راه عارفة جوّنا انتي نسرين : لا ماكنّي شي حتى انا نحكي عادي مرام : قالت جايّا توا آية يا اروى اروى : تمام لازم ناخذ منها زبدت اللي اسماها اسراء ,,,,, هذه الرواية للكاتب ديندار الوحيشي ...... الساعة 5:00 عصرا اسلام : اروى ترا ديريلي قهوة اروى : حاضر اسلام : توّا صبّي قتلك انا اروى : حاضر يابابا اني امصبّية سعاد : تريحي ,, تو انصبي انديرها انا اسلام : انا قلت اروى لازم اتخشي وادفي راسك في كل موضوع سعاد : مرات تقرا ولا حاجة اتشوف فيها قاعدة علي اكتباتها اسلام : انا ابجوي كنك انتي زقبتيلي في كل حاجة اروى بصوت عالي : خلاص خلاص خلاص يوميّا هكي .. اهدووو اشوية والله حرام عليكم معقولة علي فنجان قهوة نبو انديرو مشكلة وانسمّعوو الجيران خلاص ياماما تو انصبي انديرها وصبّت شور المطبخ وصبّت سهام من الصالة وخشّت للدار امتاعها ,,,, نسرين في دارها واتفكر وتحكي مع روحها " زعمك مزلت مذكرني صح يا صالح خطّرت عليا احلى أيام كنت ديما تقعد امعايا وديما جنبي معقولة دايرة روحي حبيتك وحبيتني عليك كذب كنت بنت مش عارفه مصلحتي أصلا انسيتك انا ,, ماخطرتش في بالي بكل أيام الثانوي هذا يدل علي انّي ماكنتش انحبك مجرد فترة مراهقة" دارت بحث علي ايميله ع فيس طلع ايميله وكان عنده أصدقاء واجد ومتابعيين واجد لكن مابتش تبعثله طلب صداقة ,,,,, بات حنان : ماقتلكش .. الصبح جت خالتك فاطمة حنان : شن تبي جايّا بات حنان : قالت كانت امخطمة بالصدفة حنان : ماهُو امس جتنا ,, شن قصتها الوليّة هذي بات حنان : كنها اكويسة حرام عليك جايا تبي ادير خير بس عليش انتي دايرة موضوع حنان : اكويسة ,, ياما دارت في ماما واتقولي اكويسة انسيت شن كانُ يقولو عليها انسيت الحرب النفسية من خوالي وخالاتي علي ماما بات حنان : لا مانسيتش لكن اللي فهمته انّ خالتك اتكفر علي ذنبها واتجي اتشوف في بنات اختها وتطمن عليهم حنان : قصدي عرفتني انا مش قاعدة الصبح كيف اتجيك انت وانا مش قاعدة بات حنان : كنك ياحنان دايرة موضوع ياريتني مادويتلك حنان : يابابا خالتي هذي مش تمام حتى لو دارت عمل خير اكيدة في راسها موّال انا نعرفهم اكثر منك انا عشرتهم وبتت عندهم نعرفهم ونعرف اسمومهم بات حنان : مزلتِ شايلة من خوالك بس حاولي تعطيهم فرصة حتلقيهم تغيرو للاحسن ,,,, مرام اتهدرز واتس مع آية مرام : سامحيني امبدري خليتك تحكي لصحباتي كل حاجة علي اسراء لكن لازم نبو انحطوها عند حدها آية : لا عادي مدام تبو اتوقفوها انا مستعدة نتحالف امعاكن عادي اهم شي فيه خير للبنات مرام : من اول يوم شفتك ,, عرفتك اتحبي الخير وماترضش حد يتضرر آية : جميع المعلومات عطيتهن لكّن اليوم مرام : بكرة نبيك اتكلميهن البنات نتقابلو اماعهن في مكان معين ناخذ اقوالهن وانسجلهن عالنقال عشان حنفتحو فيها محضر في مركز شرطة الجامعة آية : بس يخافن مرات مرام : حنمشي انا واروى وانطمنووهن اقوالهن هنّا اللي ايفدنّا اقل شي اتحصل قرصة وذن سمحة آية : خلاص بكرة انتقابلوو ونحكووو .... صباح اليوم التالي سعاد : هيا روحي نووضي وقت عالجامعة اروى : فوتي ياماما ماعندش نية نمشي مليت انصبح عالهزايب وانروح عالهزايب سعاد : فكينا من هرجة باتك ,, هيا سلّم ابنيتي اروى : ياماما حيمشيها ليا في السيارة كلّها ,, امك قالت امك دارت خليني انكمل نووومي سعاد : هيا بس صبّي عشان خاطر ماما اروى : ياربّي شن هالحياة بس هيا تو انوووض ,,,, الساعة 10:30 صباحا كانن دووبك كيف طالعات من المحاضرة البنات حنان : بعد خطرها كنك تاخرتي اليووم يا اروى ان شاء الله خير اروى : لاخير ماتشغلش بالك بابا ناض متاخر حنان : باهي تمام مرام : شن رايك نمشوو للبنات وناخذوو اقوالهن عشان المحضر اللي حنفتحوو علي اسراء اروى : هيا عادي نسرين : باهي نفطروو قبل كنكن انتن مستعجلات اروى : نكذبش عليكن انا فاطرة في الحوش متأخر عندش نية ,, حنان : وانتي يامرام ,,, مرام : عندش نية توا ,, حنفطر بعدين نسرين : خلاص تو نفطر انا وحنان وانتن كمّلن موضوعكن اروى : تم حتى هذا راي مشن حنان ونسرين شور الكفتيريا ومشت مرام مع اروى شور اية متفقات يتقابلن عند كلية الاقتصاد بعيديين كل البعد علي كلية العلوم ,,, حنان : باهي شن قصته الفنان صالح هذا امس مابيتش نحكي امعاك قدام البنات حسيتك ماعندكش جو تحكي في الموضوع نسرين : فعلا صح كان صديقي أيام الإعدادية من أولى اعدادي لعند ثالثة اعدادي وهو يقرا امعايا حنان : بس عليش امس حسيتك ماعندكش جو تحكي امعاه نسرين : مش هكي ,, بس استغربت مع كل المعجبيين اللي عنده واذكرني ’’ خلاني مستغربة بس حنان : عادي مرات غالية عليه نسرين : مرات ومرات لا ,,,,, اروى كانت مع مرام وآية وخمس بنات اروى : اسفة عشان جبتكن هنا ,, لكن لو شفتكن اسراء قاعدات امعايا مرات اتشك في الموضوع اية : مدام عندك حل لموضوعنا عادي انا والبنات كلّنا امعاك مرام : خلاص توا نولع تسجيل النقال وكل وحدة فيكن تحكي شن دارت امعاها اسراء بدون ذكر اسمائكن ,,,, بعد مرور بعض الوقت نسرين : اهُو جن مرام واورى واية مرام : هاي عليكن حنان : هايات شن صار امعاكن اروى : كل شي واتي ,, توّا نبو حد نتعاملو مع من امن الجامعة ونكسبووه نسرين : نكسبوه كيف مرام : قصدها مش أي امن حنحكو امعاه نبو واحد يقعد مضمون عشان البنات مايضرّنش حنان : لا صح في هذي صدقتن اية : نستأذنكن انا ماشية مرام : تمام بارك الله فيك عشان تعاونتي امعانا بيناتنا تليفون يا آية ومشت آية وقعدن يهدرزن عادي علي جيّة جمال نسرين : اروى طيرك جي شوورنا اروى : من بحّتت وراها شافت جمال جي شوره اروى : شن يبي هذا توا جمال : السلام عليكم اروى : وعليكم السلام جمال : ممكن دقيقة من وقتك لو مافهش ازعاج اروى بحّتت في صحباتها وصبّت اروى ومشت شورا جمال : شن جوك اروى وهي مبتسمة ومستغربة : تمام تفضل اكيدة تبيني في حاجة ضرورية جمال : لا بس انا عندي امعاك مادة وحدة و ماشفتكش في المادة الاخرة حبيت نطمن عليك اروى : بارك الله فيك ,, لكن شن المناسبة بصفتك من تطمن عليا جمال : اعتبريها صداقة زمالة أي حاجة اروى : تمام جمال : باهي ارخي روحك اشوية اروى : لا راخية روحي جمال : لا واضح من صوابع ايديك اللي اتحركي فيهن واضح انّك متوترة اروى : اول مرة انصبي مع شاب في حياتي جمال : لو مضايقة تقدري تمشي عادي حبيت نطمن عليك بس ’’’’ حنان : بحّتي بحتي من جا من غادي مرام : الفنان صالح حنان : ماشيا امعاكن يا اروى و نسرين مرام : شكله حيخرب شعارنا في الحياة قعد صالح امصبي من بعيد ويبحّت في نسرين نسرين : تو انجيكن اشوية حنان : وسعن بالكن ,, مزال ماسكّرنش حتى اسبووع مرام : احظووووظ ياسي ,,,, جمال : وين ,, صاحبتك تعرف الفنان صالح اروى : اها كان يقرا امعاها زمان جمال : ممكن انتمشو اشوية اروى : اسمحلي مانقدرش ,, الجو هذا مش ليا جمال : أي جو اروى : ماتفهمنش غلط ومشت اروى شور البنات جمال : مزلت نحكي انا ,, حنان : يارومنسياتك ياغراميّاتك ياحركاتك اروى : الجو اللي في راسه مش شوري بكل انا شكله فاهم غلط هذا مرام : كنّا اروى : مانبّش نفتح امعاه جو دلالة ونقاش خلاص مانبّش يصاحبني ,, حنان : شن قالك اروى : مش عارفة قالي اعتبري علاقتنا زمالة صداقة موضوعه يخوّف هذا مرام : يخوّف كيف اروى : انا حاليا في الوقت هذا مش لاهية بـ هالكلام بكل حنان : داسّة علينا حاجة انتي صايرلك موضوع او مضايقة من حاجة احكيلنا اروى : لا مافش شي ,,,,,, صالح : توقعتك اترني عليا ولا تبعثيلي طلب صداقة معقولة انسيتي جوّنا السّمح نسرين : ياصالح اللي كان أيام الاعدادي كان جو مراهقة ومش عارفة مصلحتي صالح : كيف ,, كنت انحبك وكنتي اتحبيني نسرين : انت مقتنع بحب الاعدادية قصدي كلا ضحك وابسط مثال أنت قعدت ثلاث اسنين بدوني أيام الثانوي صالح : انتي اللي غيرتي رقمك مش انا نسرين : اول شي رقمي مغيرتش نقالي راح ,, والشفرة بابا كان شاريها من واحد والعقد رايح لازم ناخذ شفرة جديدة وماعندي كيف نوصل فيك صالح : باهي مزلنا فيها توا ,, شفتك وشفتيني نسرين : مزلنا فيها كيف ,, شن تبي مثلا صالح : مزلت انحبّك انا .. نسرين : بس انا مافش أي شعور اتجاهك ياصالح ,,,,, يتبع ,, | ||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
العرض العادي
