البيت الكبير / للكاتبة عبير الكبسي - يمنية ، مكتملة

[لامارا]

ايه بخوف : يماااه مادراش ابسرتيني ؟

الاء : يعني هو انتي صح

ايه : لا لا مش انا من قال ؟؟ من ابسرني

الاء : كيف مش انتي ومن ابسرني ! اذا مانزلتي الان تفهمي عيال عمش انه كنتي انا وانا ماليش دخل شادخل احاكي ابي بالموضوع

ايه : يوو قوا يا الاء لاقد تتحاكي طنشيهم وبس

الاء : كيف اطنشهم قلك كنت واقفه مع واحد سيري قليلهم انه انتي وسدي معهم..

اكرم كان بيسمعهن ف الدرج سمع الموضوع كله..: ايه من الي كنتي بتكلميه

ايه بكيت: اكرم لاتفهم الموضوع غلط

اكرم : سالتش عشان لافهمه غلط فهميني ايش الصدق واوعدش اوقف معش

ايه بكيت: بس ماينفعش اتكلم

اكرم :خلاص ترجعي تكلميني وقت ثاني والان قلي انه جا واحد مكنش ملازم وقال لش تناولي اكرم

الاء شافت كيف هو مختلف عنهم وطيب : انا بخرج من الموضوع وتكلمو براحتكم.. مشيت

اكرم : ولاتتكلمي بشي انتي تمام

الاء هزت راسها ب تمام

اكرم : اطلعي الان غرفتش وماتنزليش وانا بخرج اتصرف معهم واقفل الموضوع وم

ايه بتبكي : ومازن ؟

اكرم : اهدأي من البكا اسمعيني لو سالش قليله مدري اكرم اتصل للبيت وجاوبته قال افتح الباب لصاحبه اشل الوداعه

ايه : تمام

اكرم: اطلعي سريع شاخرج اقفل الموضوع معهم قبل مايوصل للي داخل

ايه طلعت مسرعه.

الاء رجعت بثياب اخوها

امها : مالش ماتضحي ؟

الاء :ظلام مابينستضي شي

امها : لابعدا واخوش يجي معش

الاء : طيب

ف الحوش

اكرم : الان ماهو الخبر حاكينا بهدوء

مجد : وماقلت لك اول ؟

اكرم : مافهمت شي من صياحكم فهمت انه جا واحد صح

مجد : ايوه وفتحت له الباب

اكرم : ها صاحبي له يومين بيدور البيت يدي لي الملازم اتصل وانا خارج خليت ايه تشلهن منه

مجد : اعفاااط ملان البيت تخلي ايه تشلهن منه مابتستحي ع نفسك

اكرم : هيا وانت زيدت بها رحلك

من المشاكل هذه والهدار ..

مجد : الله يهديك بس خليتني احرق البيت حريق وانت من اول ساكت

اكرم : اعتذر من الاء غلطت عليها قوي

مجد : تعتذر هي قليله ذوق عادها بتراكز كلمه بكلمه متوحشه ، بيشوف اصبعه ويتذكر صورتها الي شافها وزعلان انه تسرررع ف رده فعله عليها

اكرم : خلاص غلقو الموضوع وهيا عشا بيداعونا

فوق العشاء الكل جالس دخلو وجلسو بينهم

الاء شافته بيشوف لاعندها فلتت اللقمه وقامت ...

امها : ليش ماتتعشي ؟

الاء شافت لمجد : نفسي مسدوده الحمدلله.

ف الدرج جنب الطاقه عشان التغطيه مستغله وجودهم كلهم بيتعشو واتصلت تكلم عمار الي حصل ..

عمار : اسف والله ياريتني سمعت كلامش

ايه : رجاء ياعمار بطل عناد ولاعد تجي

عمار:طيب وعد اني اجي

ايه بنرفزززه : لاعد تتصل بي ولا تكلمني انساني...

ت.ع.خ

[لامارا]

عمار رسلها رساله : اوعدش انها مش اخر مره والجايات كلهن جيات مشرفات واول جيه شاجي اتقدم لش فيها .. ايه حست بذنب ضحكت واتصلت له : سامج كنت تقل لي هكذا من الاول بس من صدق الان نبطل اي تواصل لما تجي وتتقدم وبعدا سهل

اكرم كان بيسمع مجابره طلع وهي بتتكلم خاف تكون مش طارحه حجاب ع شعرها : ايه ..ايه ..؟؟ ايه قفلت بسرعه ونزلت درجتين وهي خايفه : ايوه اكرم !

اكرم :من كنتي بتكلمي ؟

ايه:صحبتي
اكرم : العذر هذا لمجد ومازن اما انا اشتي اعرف الموضوع كله وبدون ماتخبي شي عني كيف لحقش للبيت

ايه : شوف يا اكرم تعرفنا ع بعض ف الجامعه وهو وعدني انه يتقدم ب اقرب فرصه ولحقني يعرف فين بيتنا
اكرم : وانه صادق ومابيلعب عليش ومعتبرش واحده من خواته وانه بيخاف ويغير عليش .. ايه احنا كلنا الشباب بنقول هكذا للبنات امد نجابر ونضحك ونمشي فتره وبعدين خلاص نلقى واحده غير نفلت الاولى ونلحق بعد الجديده ولما نمل وهكذا

ايه : بس انا واثقه من عمار يا اكرم وعتبسر

اكرم : اسمه عمار ! وايش مخليش واثقه فيه هكذا ومراهنه

ايه : مدري اشياء كثيره اكتشفتها من تعامله معي وحاسه انه عيجي صدق

اكرم : ايه انا احذررررش اليوم وقفتي معش ابدا مش معناه اني سامح لش بالي بيحصل انقذتش لاني اعرفش واعرف اخلاقش واثق فيش واول مره انصدم بشي منش .. عمار ممنوع تتواصلي معه وبدون ماهددش ولو يشتيش صدددق يدق الباب وهو واثق من نفسه مش ساع اليوم جيه سرق وبلاطجه .. ايه : والله اني قلتله نقطع تواصل واوعدك يا اكرم مازيد اكلمه ولاشي .. اكرم شافها وابتسم : الا كلميه بس لو جا وطلبش من الباب ولاعند الرجال ساعتها محد يقدر يقل فيش كلمه

ايه ابتسمت وخزيت ودمعت : تسلم يا اكرررم الله يحفظك ويرزقك بنت الحلال الي تسعدك تسااهل كل خير
اكرم : امين ، يلله انزلي اتعشي لاحد يحس بشي

ايه : تمام اسبق انت وانا بعدك.

ف الحوش خرجت لحالها تكمل ضحاي ملابس اخوها

مجد حس انه زعلها قوي لحقها للحوش جلس يفعل اصوات ويخوفها... الاء : من ؟؟ مجد ولع فلاش تلفونه لاوشها : ليش ماتقصي اظافرش ساع الساحره !

الاء : استغفررر الله العظظظظيم بس
مجد : شكلي فهمت غلط الموضوع وزد مش انتي العفو لاني تسرعت

الاء : العفووو ! لو تتأسف لابكره
مجد ضحككك وبهنجمه : اتأسف !! يعجبني فيش فارررحه بروحش قووووي عايشه ف عالم ثاني ..عمري ماتأسفت لامي وابي قالت اتاسف.. الاء : وتفتكرها سيمخه انك ماتتاسف لهم ولا تتاسف لما تغلط ع حد انت الي مهنجم وشايف نفسك ع ايش !! ام مجد خرجت ترفع العشا قربت لاعندهم وبنبره حاده : زادت جلستكم ومجابرتكم مع بعض ولا بيتخايل لي !! مساء الخير....

[لامارا]

ام مجد خرجت ترفع العشا قربت لاعندهم وبنبره حاده : زادت جلستكم ومجابرتكم مع بعض ولا بيتخايل لي !!

الاء : لا فعلا كلامكم صدق قد.زيد بها ثيابات اخي ماقدرت اضحيها من اول قلت استغل انه بيتعشى ولحقني لهنا .. واشهدكم انه لو يزيد يدور هدار معي لاكلم ابي

مجد ضحككك تخبى ورا امه : يماااه خبوووني عمو عماد الي بيدلع جهاله عيضربني

امه ضبحت منه وتصرفاته هزرته بشميزه وضربته ف كتفه : ايحين عتعقل وتبطل لك لقانه مع خلق الله استحي ع نفسك ايحين عتعقل

مجد ضحككك وبيتخبى ورا امه وبيمسك يدها ..

الاء شافت له بنظره محانكه بحواجبها ضحكت ومشيت ..

ام مجد رجعت تتم الرفاع

مجد جلس وبيتذكر كيف كانت الاء وهي صغيره دلوعه وتروح تشتكي لابوها ول ابو مجد وينضرب هو ولو هي الغلطانه. حس انها كبرت وجالسه معانده وماتخاف من شي ..

الصبح ..

ايه شافت الاء بتفتح ستاير الغرفه دخلت لاعندها : صباح الخير مسرع قمتي ؟

الاء بابتسامه : صباح النور الساعه 8 اشتي اسير الان الجامعه معي محاضره وتأخرت

ايه : هاااا قلي هكذا.. اصلا بينحسش من النوع الي مايبكرش من الصبح يعني حق رقده للظهر

الاء : ليش حسيتي هكذا

ايه : يختي حااالي معش شغاله مامعش تبكري ساع بعض ناس اقوم قبل ماتقوم الشمس نفسها

الاء ضحكت : كان نفسي اساعدش ف الصبوح بس قدني متاخره قوي سوووري

ايه : عادي كل واحده تغطي بدل الثانيه

الاء : ايوه صح مازد فعلتي امس ؟

ايه سمعت جدتها بتداعي: يوووو شرجع اكلمش لما تروحي باروح اجاوب..

الاء : طيب ،، تمت لبست وتجهزت تروح الجامعه.

ابوها كان جالس مع جدتها..

الاء: الان شاسير الجامعه ؟

ابوها : طيب ليحين محاضرتش ؟

الاء للساعه 11 تقريبا

ابوها : طيب شلي السياره محتاجهاش الا من بعد الظهر

الاء شافت يدها : تسلمو ، تاخرت

ابوها خرج المفتاح من جيبه ورجمه لها

جدتها : طيب راعي اشربي بن او تمره

الاء خرجت بسرعه : تسلمووو شاكل هانك

ف الحوش واقف بيلف ادواته من المخزن الصغير الي ف الحوش وبيتجهز يروح عمله..

الاء مستعجله فتحت الباب رجمت شنطتها والكتب و طلعت السياره شغلتها .. نسيت الباب رجعت وقفت ونزلت تفتح الباب..

مجد تم يجهز ادواته ومشي قرب للباب وهي بتفتحه فتح الباب الصغير

الاء : افتح لي الباب تاخرت

مجد شافها بنص عين وخرج وصرع الباب

الاء بضببببح : غبيه ليش اكلم واحد مثله استااااهل

مجد اول ماخرج سحب الخطاطيف حق الباب من الوسط وهزره افتتح..

الاء شافته استغربت : شكرا

مجد : هيا اطلعي السياره ولما تخرجي غلقيه ..سلام

الاء : سامج كان يتم الجماله ويقفل الباب

مجد لفت لها وبيمشي : سااامج هااا !

[لامارا]

مجد لفت لها وبيمشي : سااامج هااا !
زبط حجره ف الشارع ورفع رجله صاح

الاء خرجت بالسياره وخلت الباب مفتوح مشيت من جنبه وهو بيدهف الحجره الي تكحول بها

الاء بتمشي من جنبه نزلت الزجاج: وغلق الباب عادك قريب لانه كشف ع النسوان..ومشيت بسرررعه

مجد تبرررقط ورجم الحجره عرض الجدر ورجع يقفل الباب ويحطم (يكلم نفسه ) : زنااااطه وتتحدى الكل عيني عينك..

بعد الغدا..
الاء خرجت تدي ملازمها الي نستهن فوق السياره وبتسمع صياح ف مخزن مجد صوتهم كان مرتفع

ابو مجد : انا مابينرسلك تسير تشتغل لنفسك بينرسلك تساعدني ..راتبك تديه ليدي بتبسر اعمامك كيف بيخزنو كل واحد علاقيه نوع وشكل وغير السيارات وانا تمت زلطي لكم وعاد انت بتحسب كم تدي وكم تخلي

مجد : طيب مابش معي حل غير اني ادي المبلغ لصاحب يختبر بدلي قد انا مداوم صبح وليل وعصر وعاد انا مش عاجب لكم عادنا فااشل وكل ماتبدأ المعايره انا اول واحد ف وشكم وهذا بسببك طول عمرك بتقارن وتصغرنا ف عين نفسنا

ابوه تعصب ولطمه : تكلم معي باحترام ياوووسخ يالله انقلع من هنا اخرج من البيت سير اشتغل واشقى واصرف ع نفسك وخبرتك مع السلامه هيااا

مجد متعجب من ابوه ورده فعله ..هزر تلفونه من فوق الطاقه وخرج وابوه بيداهفه..

الاء انصدددددمت وماعرفت كيف تتخبى وطت وجلست امد ماخرج مجد ورجعت وقفت فتجت باب السياره خرجت ملازمها..

عمها خرج شافها : ماشاءالله ناس بتذاكر وتشقى وناس بتدفع زلطها لخبرتها تخازين تمتحن بدلها

الاء سكتت كانت خايفه من عصبيه عمها اووول مره تشوف لطم وضرب مجد وهو بهذا السن رغم انه ف صغره تعودت تحارش وينضرب بسببها اغلب الاوقات
..

ف غرفه ايه..

ايه :مالش مفجوعه هكذا

الاء بصدمه : عمي خبيث قوي لو تشوفي كيف ضرب مجد

ايه : يهياه مش اول مره

واصل قولته يربيه ويفحسه مش هو داري انه عيضيعه هكذا

الاء : بس حرام مابيداوم ولا شي عشان يشتغل

ايه : عمش يشتي زلط ويشتي يوقع متفوق مش داري كيف الحضور له درجات

الاء بغمزه تهديد: المهم وانتي ايش قصتش ايش الي حصل امس مش داخله مزاجي انه صاحب اكرم الي جا

ايه : ايوه القصه انه بنحب وهو بيحبني ووعدني يجي لي

الاء : ياهبلا الي يحب يخاف عليها وهذا كيف جا امس لهنا ماخاف عليش

ايه : لاتتفلسفي ف الحب لما تحبي عتجربي تمشي ف الحياه هذه بدون قوانين اهم شي ماتتجاوزي ولا ملم من الحدود

الاء :طيب اتحداش تخليه يتجاوز عتبه البيت ويجيلش كم يانااااس وعدت وخدعت

ايه : وانتي ب تحبي !

الاء : للأسف بنت عمش طبيعتها ماخلت لها حد يحاول يعجب بها وزد عمش كل مابدء استقر نفسيا اسمعه يقل يلا نسافر.

سمعين صوت صياح وكلمه : مات

ت.ع.خ

[لامارا]

ايه شافت الاء : من الي مات ؟؟

الاء خااافت مشيت هي وايه سررريع للصاله : من الي مات ؟

ام ايه : جارنا ابو محسن

الاء : الله يرحمه افتجعناا ( فكرت انه حصل لجدها شي )

ايه : يووو عادو صغير ايش حصل له !

امها : جلطه هيا البسين نروح نبسرهن ولو يحتاجين شي

الاء : بس خزا ماعرفهمش

ام ايه استغربت من ردها: ليش وانتي جي واعرفيهم

الاء : طيب اكلم امي واجي

ام ايه: قليلها تجي معي انا ومرت عمش محمد

الليل.. فوق العشاء

الجده :وين مجد تأخر ؟

الاب مطنش وبياكل : تعشو كما جا عتفعل له امه اي شي .

الاء حشت بالفرررق بينه وبين ابوها كيف هو قاسي ومافي حسه منه وكيف ابوها مهتم بهم قوي

اكرم خرج تلفونه وضغط اتصال ع رقمه: شاتصل ابسر وين هو

الاء ملتفته لاكرم كانها منتظره تعرف جواب

اكرم سمع رفضه قام من فوق العشا وخرج يكلمه: كيف ماعتجيش ليش حصل معك شي!

مجد : تصايحت مع خالك كالعاده

اكرم :طيب وين عتسير الان روح سكته وادخل غرفتك

مجد : اسير ملح عاد الشارع احسن من العيشه معه وهرمه..

اكرم : هي لحظه غضب وهو ابوك ارجع من الخباله واعتذر

مجد : غلق الله يرضى عليك غلللق.. مع السلامه.

بعد العشاء ..

ام مجد : الغسوله على الاء اليوم ، تبدء تشتحط اليوم سارت بيت الجيران وضحكو عليها ماتعرف تفعل شي

ام الاء : هي سارت تعزي ولا سارت تحمش

ام مجد : ولو مافيها لو ساعدت والله انحنا حاليات هنا نتبادى ع بعض ونتعاون عرس موت ولاد كل شي

الاء قامت رفعت الصحون : شاغسول مابش داعي للمحانبه.

ام مجد لفتت لها :هو لمصلحتش يابنتي

ام الاء بضحكه : مابلا عشان دورش .ماعليش شي عتغسول

ف الورشه جالس ضابح بيشتغل ويهندس السيارات

صاحبه : ماعتروحش نشتي نقفل

مجد : انا شجلس هنا غلق

صاحبه : وتتحمل المسئوليه انت لو ضاع شي

مجد : ناهي شويه خرده قال اتحمل مسئوليه

صاحبه : ماعتتعشاش اقفل و ارحلي

مجد : الله معك

بيت عمار..

عمار : ذلحين ماقلتو ؟

امه : انا قلتلك ماعندي مانع اقنع ابوك

عمار: وابي قال نسد انا وانتو لو سرتي واقتنعتي بها عيخطب

امه : وانا مادخلني بها انت الي تعرفها وجننتنا عليها ادي خبر اكيد وبعدا سهل

عمار : خبر اكيد من ذلحين اقلكم اخطبو لي واشلكم ينفسي

امه :تمام اجهز الشنطه واقلك تفتح الموضوع معها تحاكي اهلها

عمار : ماعد بش تواصل بيننا اجهزو ويوم ارجع اشلكم انتو وخواتي تبسروها وتفاتحوهم ف الموضوع

امه : الله يكتب لك مافيه الخير..

عمار فتح تلفونه يرسل يقلها .... ورجع حذف الرساله

مساء الخيرات

[لامارا]

الاء وهي بتغسول

ام مجد دخلت : الاء معش رصيد

الاء : ايوه احول لكم ؟

ام مجد عوجت فمها :لاين ياحسره مابش تلفون احنا نرحم مش احنا ساعكم.. ماجيت لش الا ومابلا انتي معه رصيد ف البيت هذا

الاء فتحت تلفونها وناولتها

ام مجد ضغطت رقمه واتصلت : الو

مجد شاف رقم غريب: من معي ؟

ام مجد :امك قلك من معي ماعرفت صوتي؟

مجد : رقم غريب ماسمعت

امه : فين انت ؟

مجد : معي عمل

امه : تصايحت انت وابوك ؟

مجد : ماشي من فين بتتصلي ! خرجتي ؟

امه : ماشي تطمن المهم ايحين عترجع

مجد : ماشرجعش الا لو ماجمع لي حق بيت

امه : ماتفعل بالبيت يامجنون او بتفكر تتزوج

الاء بتتفرج لاسلوب مرت عمها وبساطتها وعرفت سبب حسدها منهم لانها بتعاني مع عمها البخيل

مجد :اين اتزوج مابلا اعز نفسي من الطرد كل شويه

امه : يعني تصايحت مع ابوك ؟المهم قال انبيك تجي بكره تقبرو

مجد : قد كلمني مازن ناهي

امه : تعشيت ؟

مجد : ماشي

امه بتشوف الاء تغسول شويه وتدفي يدها من البرد : طيب برد كيف عتفعل واين عتجلس

مجد : الرصيد حق الناس عيتم لاتقلقي عليا شادبر نفسي تطمني

امه شافت ل الاء : يلله اوبه لنفسك خزا من الاء تمينا لها الرصيد

مجد : مع السلامه قفل وسجل الاسم ب اسم
( الساحره )

الاء: عادي تشتو تتكلمو اتصلو

ام مجد غلقت وناولتهت :مع خلاص تسلمي اقطبي غسلي عيتم الماء وماقد تميتي الا صحنين

الاء طنشتها شلت التلفون لاجيبها

ام مجد مشيت..

مجد ذكر العلاج حق امه باقي معها او لا اتصل

الاء جاوبت بعد ماشافت انه رقمه : الو

مجد : عاد معش علاج

الاء : شفتني ف مستشفى المجانين ايش من علاج

مجد : اين امي من اللقانه

الاء: وانا ايش دراني او بينراقبها

مجد : سيري دوريها واساليها لو معها علاج

الاء : كما تكلمت باسلوب سوا بعدا سهل

مجد قفل لاوشها التلفون واتصل لرقم البيت

الاء تنرفزت من همجيته قفلت وخبت تلفونها ف جيبها : فاعل نفسه حنون ومظلوم وطبعه زباله يخ..

ف الغرفه..

مرت عماد : ليش بينحس مرت محمد طارحها راسها براسي انا وبنتي

زوجها : بطلي البعسسه مابش شي

مرت عماد : والله اني اشوف تصرفاتها مختلفه وتعاملنا غير

زوجها : يمكن متحسسه وضع اخي زفت له فتره ولا تحسنت ظروفه طبيعي بتبسر فرق كبير

مرت عماد : الله يعين ويفرجها عليهم

زوجها : وانتي كوني افعلي العمل بدل الاء خلي البنت تدرس وتهتم سهل فتره لو تعبتي

مرته :ان شاءالله.

ثاني يوم الصباح

ام ايه : بكره عيجو بيت خالي يشتوش لأبنهم..

ايه بضبببح: مش قلتلش مش موافقه

امها : خلاص قد.ابوش وافق وردلهم كلمه...

[لامارا]

وانا مش موافقه داريه انه انتي الي مصممه تكثر ابي لو اكلمه عيقتنع..

امها :لو تفعلي هكذا لا انتي بنتي ولا ازيد اعرفش يوم، ما اقلهم ؟ بنتي بتتدلع بتزيد الغنج وهو مابش احسن منه متعلم متوظف معه بيت مامعش ترفضي

ايه : مارتحت ولا اقتنعت والزواجه مش غصب

امها: انا قد قلتلش كلمه وانتي اخبر

ايه جلست تبكي

امها : امسحي وجهش وانزلي اعجني امد ماتم عملي واجي

ايه لفت شعرها بالمقرمه ونزلت بسرررعه وهي بتبكي وخرجت للحوش لاوجه اكرم

اكرم : خير مالش

ايه مشيت ع جنب وخرجت من الباب للمطبخ ولا ردت

اكرم لحقها :حد عرف بالموضوع او شي

ايه : اص لاحد عيسمعك مابلا شي ثاني

اكرم : ماقدرش اساعدش بشي

ايه : ماعتفعل قدهم عيجو اليوم ناس يخطبوني

اكرم : مش انتي موافقه ؟

ايه : لا طبعا مستحيل وامي بتهددني ياهي او الخطبه لابن خالها

اكرم : من منهم ؟

ايه : هادي ابن خالي حميد

اكرم هز راسه : ماعليش شي مابش شي عيتم بدون رضاش

ايه : خلاص اخرج امي عتجي الان لاتسمع الموضوع

اكرم :خاطرش بس اين قلتيلي اين بيشتغل ابن خالش ؟

ايه : في وزاره الماليه

اكرم فلتها ومشي وخرج .

ايه لحقت للحوش : يامنعاه يا اكرم لاتفعل شي عتوقع مشاكل

اكرم هز راسه واشرلها تدخل.. خرج وقفل الباب

بعد المقبار

مجد كان ف الحاره شاف ابوه ملتهي بيجابر عمه دخل سريع البيت.

طلع لغرفته لفلف ادوات وشاحن وثياب

الاء ع خرجتها من غرفتها شافته داخل مستغربه كيف رجع يعني تصالحو نزلت لاعند.جدتها

الجده واقفه باب الحوش وبتكلم ابو مجد اين مجد يعبي لهم ماء

ابو مجد : مابحد كلمو علي او مازن او اكرم

الاء : الا طالع قد جا

ابو مجد : مجد ف البيت ؟

الاء سكتت حست انه مش داري

الجده : اين ابنك مش انت داري وين هو

ابو مجد شاف الاء: ايحين جا ؟
الاء: مدري يمكن بيتهيء لي ان في حد ف غرفته

ابو مجد فلتهن سريع وطلع بسررعه للغرفه

الاء مسكت راسها حست انها تسرعت ودفت

طالع ف الغرفه..

ابو مجد دخل : الحمدلله انك رجعت من نفسك لاني حلفت يمين لو ماترجع اليوم للبيت لايوقع خبر ثاني

مجد : جيت اشل قلافدي وانقلع

ام مجد مسكت يد ابنها : قوا يا ابني اعقل وافهم ابوك واحترمه

مجد : مافعلت وايحين مابينحترمه

ابو مجد شافه بيتليقن بعصبيه: هذه تربيتش لو عيخطى من هنا يشلش معه من البيت لانه ماعرفتي تربيه

ام مجد شافته قال هكذا وخرج بكيت

مجد شافها تأفف ضبح ورجم الكيس حقه للارض

ف الوزاره.

اكرم بعد ماسال ع كل الاقسام دري فين مكانه دخل لاعنده وعرفه عن نفسه

هادي : بس ماقلت لي سبب الجيه

اكرم : عرفت انك متقدم لبنت خالي حبيت اقلك انه انا وايه بنحب بعض.

ت.ع.خ

[لامارا]

اكرم : ماينفعش اتكلم ع بنت عمي والي كانت مفروض تكون خطيبتي لاعندك بس حبيت اوضح لك الامور كلها انها لو وافقت عتكون مجبوره من امها والسبب عشان مصالح ، ع العموم افضل انك ماتجي وتنحط بموقف محرج لان البنت عترفضك واحنا ك أعمام ماعيتم الموضوع الا بموافقتها ف مش حالي وانتو اهل تخرجو هكذا برفض قدام الناس..

هادي بضبح وووقف : تميت الي عندك !! اعتقد هذا شي يخصني انا الي اقرر مش انت

اكرم شل تلفونه من فوق الماسه وع مشيته : لانك بتفكر تشل واحده تخصني..ابتسم له وغمز رفع اصابعه..سلام..

هادي بيشوووفه واخر كلام قاله بيتردد ف اذنه.. اتصل لامه..: ماعد اشتي اخطب ايه كنسلي الموضوع

امه : ليش ماحصل او سمعت عليها شي ؟

هادي داري ان امه تحبها وهي الي مصممه عليها بس هو عادي ماتفرق معه ولذلك انكسرت نفسه انه يخطبها بعد الي سمعه : لا بس خليها بعد فتره ماشقدر الان ع التزامات خطبه وعرس

امه : طيب نخطب وبعدا سهل

هادي: اذا واحده غير ايه طيب مالم مشتيش اتزوج من مره .

البيت الكبيرر (ف الحوش)

الاء بتتفاقد بطاريه السياره وتعبي لها ماء

مجد شافها من الطاقه ونزل جلس يتفيضل ويتفاقد السياره

الاء تشتي تغلقها ..

مجد مارضي يبعد يده

الاء : هيا شرررق تأخرت ابعد

مجد : فين رايحه ! مابش جامعه هذا الساع

الاء : خارجه مع صحباتي المطعم

مجد : مطعممم !

الاء بنرفززه تشتي تقفل : اصلا انا ليش اجاوووبك ماددددخلك تسأل ؟

مجد : ابن عمش كيف مالي دخل

الاء بمسخررره : ابن ع م ي ، يعني لا انت ابي ولا زوجي تتفلسف

مجد سمع كلمه زوجي ارتبش وبعد يده : ياااي انتي هنا مش انتي ف الدول الي كنتي ع مزاجش فيها بتسمعي

الاء علت صوت الاغاني وخرجت تفتح باب الحوش : لا مابينسمعك..

مجد دخل راسه من الطاقه ونقص صوت الاغاني : ليش يعجبش
العناد؟؟

الاء فتحت باب السياره وهو واقف طلعت ورفعت الصوت وخرجت راسها : لانك فضوووولي ، ابعدني من راسك ولا شاكرهك روحك ومش انت ناقصني وريووست بالسياره وخرجت من الباب واشرت له للباب يغلق وفعلت له بيباي ومشيت

مجد بضبح فلت باب الحوش مفتوح و دخل البيت

ايه شافت الباب مفتوح دخلت مستغربه تسألهم والكل بدء يلوم مجد لانه عاده دخل من الحوش

مجد : هي الاء خرجت بالسياره وخلته مفتوح..

بدأو اخوته ينتقدوه ليش سامح لها تسوق بيتهم بعيد من الجامعه وانه ماينفعش والي يتعذر بالاوضاع..

عماد : هي قررت وتتحمل نتايج قرارها والحافظ الله

مجد بضبح بيشوف اعمامه وابوه المتشددين بيسكتو عند تصرفات عمه عماد وعياله ..

ف الحوش..
اكرم: لو وصلش خبر الكنسله كلميني

ايه : ليش ايش فعلت ؟؟

اكرم : قلتله انحنا بنحب بعض....

[لامارا]

ايه انحرجت : بغير خباله عيفعل مشاكل لو يكلمو امي ما عتقل ؟؟

اكرم : ولا شي عنقل انش مش موافقه

ايه بتتخيل سبعين حاجه لو تحصل: يووو والودافه يا اكرم ذلحين اجلس اهم

اكرم : لو هو عيفهم ع نفسه عيرحله منش ولو ملغج ودنس عيواصل الموضوع

ايه : مدري كيف اخاف يقولو لامي انك قلت هكذا

اكرم : ممم ماظنش ولو حصل شي ف عيكون اهون من انش تتزوجي واحد ماتشتيه

ايه : ليش انت متحمس لموضوعي هكذا بينحس الاسلوب هذا فيه شي صح انت طيب بس ماتوقعت تكون متفهم لهذه الدرجه

اكرم كان ساررررح وهي بتكلمه تنهددد ومشي بدون مايجاوبها

ام ايه خرجت راسها من الطاقه تدعيها: اااايه جي لاعندي اشتيش

اكرم لفت لاعندها واشر لها تطلع

ايه مشيت سريع للدرج بتطلع

اكرم : وارجعي قلي ايش حصل

ايه بخوووف اشرت له يروح : طيب

مجد شاف امه زاعله وحابسه نفسها ف غرفتها خرج يتمشى وهي ف حسه بيقارنها ببقيه نسوان عمومه
على رجعته شاف مطعم صغير لقي السندوتش الي يعجبها دور ف جيبه جمعهن طلعت تسعميه وخمسين شل لها عشا وروح دبابات وف اخر اشاره قريب بيتهم وقف الباص وسياره الاء جنب بعض ..

جلس واحد قدامه يتفرج لاعندها ويدقو لها الزجاج ويتجابر هو والي جنبه عليها ويعلقو عليها لفت يشوف من هي !

الاء كانت بنظره ع جنب لاعندهم مبهرره شافته لفت لها ورجع يهزور الي قدامه من شميزه ..

فتحت الاشاره وهي بتتفرج ايش بيحصل والسيارات بيضربين هاوون رجعت مشيت..

وصلت البيت ودخلت الحوش ومراعيه يوصل تطمن ايش حصل معه

ف غرفه امها..

ايه : ايش قد حصل ؟

امها بصياح : انا نفسي ادرى ايحين عتتعلمي الحذق وتوقعي مثل بنت عمش

ايه : ليش مالها !

امها : خارجه مطعم واحنا لو نعتب المطاعم لاتكتسر ارجلنا ليش ماسرتي معها وتصاحبيها وتتفسحي معها بدل الغريبات صحباتها

ايه تأففت بعد هممم انه مش موضوع العريس : الاء والله طيبه وحاليه انتي ماقد عرفتيها سوا يمه.

امها : طيبه تخرج من جنبش بغير عزومه سياره وزلط وبتسير اين ماشتت

ايه : ابي طبعه هكذا وابوها طبعه غير

امها : كلمي ابوش يا يسمح لش ساعها ياما يجلسها مثلش ف البيت..

ايه تشتي تخلص من الموضوع: حاااضر شاكلمه ولايهمكم..

ف الحوش..

الاء بعد مراعاااه تشتي تدخل سمعت الباب وقفت

مجد دخل معصب..

الاء متجمله منه كيف دافع عليها: تسلم يا مجد ع الموقف الي حصل

مجد بضبح : اسلم ع ايش بدعتي بي ف الشارع تضاربنا بسببش

اكرم خرج للحوش وشافهم بيتصايحو.....

[لامارا]

الاء : وانا ايش فعلت شفتني ضحكت لهم ولا دقيت لهم الطاقه يرجمو لي ارقامهم

مجد بعصبيه صيح : احترمي نفسش والله لاقص رقبتش

اكرم جري لاعند مجد : وبعدين معك انت وياها عتبطلو مجهاله عيب عليكم استحو ع نفسكم والله لو انتو اغراب واعداء ماتفعلو هكذا

الاء : اشهد عليه يا اكرم يحترم نفسه ويبعد مني ومايتدخل فيني

مجد : لي دخل غصب عنش فارحه بروحها الحجه مش عندش عند الي زيدو لش الدلع

الاء : ماسمحلك تتفلسف عليا وع امي وابي مالك دخل افهم ولا قد روحك ف المشاكل تعودت اصلا البهذله ... ذكرت وسكتت

اكرم صيح : يلا ادخلي الاااان

مجد : من اين جت هذه والله لو اطرحها ف راسي لاكرها حياتها

اكرم : ع ايش هذا كله مالك دخل منها ياخي

مجد :كيف مالي دخل شويه فرغ ف الباص بيتخيبلو عليها وهي بتتفرج للباص يعني من نفسهم خورو يتليغجو الا لو ادت وش..

اكرم :الله المستعان يامجد هي بنت عمك ماينفع تطلعها بهذه الصوره

مجد بضبح حس انه غلط ف الكلمه : يا اخي ابعد من قبالي مش ناقص وجع راس.. طلع لغرفه امه

اكرم راح للدرج كانت بتسمعهم سألها : قال انه عصب لانش بتتفرجي لاعندهم

مجد سمعهم ووقف ماعد طلع

الاء ماشافته كانت مقفيه : لاني خفت يتضارب معهم شفته تهازر هو وياهم وخفت لايتضاربو

اكرم : اها لاتخافي عليه عيخارج روحه المهم انتبهي لنفسش..

مجد فلتهم وطلع لاعند امه وهو نادم انه تسرع وتكلم هكذا

اكرم : يالله خير

الاء فلتته دخلت الغرفه وقفلت..

اكرم بدء يعجب بشخصيتها حسها طيبه قويه متواضعه

ف الغرفه..

مجد جلس جنب امه : تعشيتو؟

امه : لا مابش نفس

مجد : هيا ناااهي جلست البج ساعه واطوبر لكم خوره وتقولو مابش نفس

امه ضحكت : ماشليت لي

مجد ناولها الكيس: كم لكم خاورين من هذا

امه : يو تسلم والله افتتحت نفسي حين انت

اديته لي الله يحفظك ويكابر بك ويحنن قلب ابوك عليك.

مجد تأفف : هيا قبل مايبرد

امه قسمت السندوتش اكلت النص

مجد: انا شابع كلوه كله

امه :قسمت لابوك لايغثى ويدخل ف نفسه انك ماذكرته

مجد قام وقف يشتي يخرج: كلوه بس هو مايعجبه اي شي مني ولا اكل السوق ..ماتشتو شي

امه :جلست تدعيله

مجدخرج من الغرفه على جيه ابوه..

ابوه : فين كنت لاذلحين؟

مجد: بينلوي

ابوه بهنجمه : ولاتستحي ياوسخ بتقل لاوشي بتلوي بتصيع ف الشوارع

مجد: سبحان الله مفلتين البنت تلوي ع مزاجها لهذا الساع وانا قدنا صايع

ابوه : من هي ؟

مجد دخل غرفته: من ماكانت

ابوه بصياح : اوقف وانا بينتحاكى معك

الاء ع طلعتها لغرفه امها شافت عمها وردت السلام: مساء الخير

عمها بهنجمه: كنتي خارج لهذا الساع !!

عماد سمع وخرج من غرفته : خيررر ؟؟

ت.ع.خ