خطوات نحو الجحيم (الجزء 1) / للكاتبة زينب ماجد ، عراقية ، مكتملة

لامارا · 29-03-19, 08:52 AM


	بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته نقدم لكم رواية خطوات نحو الجحيم للكاتبة زينب ماجد قراءة ممتعة للجميع....

لامارا · 16-04-19, 03:49 PM

رابط لتحميل الرواية هنــــــــــا

بسم الله الرحمن الرحيم

السلام عليكم ورحمة الله وبركاته

المقدمة

ما بين القلب والمقابر، علاقةًُ بالاسم والمعنى ودفن الضحية، الفرق بأنّ المقبرة تدفن أموات، وأنا دفنت أشياء بالقلب حيّة..💔
ذكريات لا نريد من الدنيا غير نسيانها🔇.. تدق بالرأس ك الناقور .. رغم موتها الا انها .. لا تزال تنبض في القلب الماً
قالو ان الحب فاصل بين العقل والقلب.. ف في الحب.. يتوقف العقل عن التفكير.. ويكون القرار قرار القلب..
ومن مات عقله.. مات قراره.. ف القلب خُلق لينبض بالحياة لا ليفكر ويقرر..❌
لكن لو قرر القلب عن العقل.. هنا ستكون خطواتكَ نحو الجحيم.. 👎🔥

☆☆☆خطوات نحو الجحيم☆☆☆

لامارا · 16-04-19, 04:09 PM

الحلقه 1
#خطوات_نحو_الجحيم
////بقلم الكاتبه زينب ماجد////

الحلقه_1

ما بين القلب والمقابر، علاقةًُ بالاسم والمعنى ودفن الضحية، الفرق بأنّ المقبرة تدفن أموات، وأنا دفنت أشياء بالقلب حيّة
..💔
ذكريات لا نريد من الدنيا غير نسيانها🔇.. تدق بالرأس ك الناقور .. رغم موتها الا انها .. لا تزال تنبض في القلب الماً
قالو ان الحب فاصل بين العقل والقلب.. ف في الحب.. يتوقف العقل عن التفكير.. ويكون القرار قرار القلب..
ومن مات عقله.. مات قراره.. ف القلب خُلق لينبض بالحياة لا ليفكر ويقرر..❌
لكن لو قرر القلب عن العقل.. هنا ستكون خطواتكَ نحو الجحيم.. 👎🔥
☆☆☆خطوات نحو الجحيم☆☆☆
بغداد_ الأعظميه_ الساعه الحادية عشر ضهراً
....نزل الضهر وحسيت الشمس صارت قويه.. اخذت جهاز التحكم وعليت المكيف.. انفتحت باب الصيدليه..
باوعت .. رجال بالثلاثينيات.. دخل.. بلا زحمه بس شوفيلي هذا العلاج.. وحط الراجيته كبالي..
اخذت الراچيته.. باوعتها.. ورحت اجمعله الدواء المكتوب.. جريت كيس الخاص بالصيدليه خليت بيه كل الدوه..
وحطيته كدامه..
-شكد السعر.. ؟
-23 الف..
-شدعوه يمعوده.. منا منا
-والله هو هذا سعرهم.. طلعت الدوه وعديتله اسعارهم.. مابيها اعذرني والله..
-ماشي..
-طلع المبلغ انطانياه.. وطلع.. شمرته بالدرج.. وكعدت.. الدنيا حيل حاره.. باوعت التلفزيون جانت طالعه اغاني .. بس ناصي.
سمعت الجامع يمجد.. درت من الاغاني خليت قران.. دك موبايلي.. باوعت الاسم ورديت..
-الووو هلا مؤيد..
-هلا لجين..
-هلا عيوني
-تسلملي عيونج.. شلخبار..
-والله ماكو.. كاعده بالصيدليه.. وقرب الاذان يأذن.. والدنيا تكتل حر برغم التبريد اللي بالصيدليه..
-بعد الاذان تخف الناس محد يجي.. قفلي الصيدليه وطلعي..
-هو هم هيج.. انته عود استلمها من الساعه 5 فتح واكعد..
-ان شاءالله..
-يلاا مع السلامه.. خلصت منه.. دخلت بنيه..
- هلا خيه..
-هلا خيتي
-اكلج خيه.. جهاز مال حمل عدج
-جهاز كشف الحمل اي نعم عندي.. بس اي واحد منه تردين..
-ياهو الاحسن..
-اكو سعره 5 الاف واكو سعره 8 واكو 12 الف.. منو منهم تردي؟
-هو عود شنو الفرق بينهم ؟
-الاغلى تكون نسبته اضبط..
-لا حبي بس الاغلى يكشف حمل مبكر اكثر من الرخيص..
-لعد انطيني ابو 8
-ادللي.. رحت جبتلها كاشف حمل وانطيتها..
-شلون استخدمه
-موجود التعليمات بداخله قلبي
-هااا مشكوره خيه..
-انطتني الفلوس وراحت.. هلا بيج عيوني.. باوعت للتلفزيون اذن.. والجامع هم اذن..
طفيت المكيف والتلفزيون والاضويه وطلعت..قفلت المحل ونزلت الجدار الحديد.. قفلته وتوجهت لسيارتي..
ركبت وطلعت للبيت يبعد عن الصيدليه 10 دقايق.. وصلت للبيت.. صفيت السياره ونزلت..
دخلت من المطبخ.. لكيت ماما واگفه علسنك.. حظنتها هلووو ماما..
-هلا بنيتي حبيبتي الله يساعدج..
-يساعد بختج ماماتي.. ميته جوع شمسويه..
-مسويه حامض شلغم.. بالعجل صعدي بدلي دا اصبلج..
-اووووكي.. حياتي ماماتي.. بستها من كتفها وصعدت فتحت باب غرفتي.. يبوووه يلبوخه.. مو حر يكتل كتل..
شغلت تبريد بسرعه ومروحات.. وارتميت علسرير.. اخذتلي دقايق من الراحه واني مسطحه..
وكمت طلعت ملابس.. ردت ابدل.. حسيت نفسي عركانه كولش.. اخذت الملابس ورحت للحمام
اخذتلي شاور انتعاش بارد.. وطلعت بثوب قصير ونص ردن.. نثرت شعري بدون تمشيط ونزلت..
وداد... لج ماما مشتغل تبريد بلبيت ليش هيج فاكه شعرج بهشكل.. تتمرضين يا بنتي..
-ماما مابيه اصعد اشسور والله .. واذا امشطه وهو مبلل يتگرطف ويوكع.. خليه كولشي ميصير بيه شي وعيونج الحلوه..
-اوووف منج دگُعدي خل اصب..
-اني اصب عنج حبيبتي.. دا نحجي دخل بابا.. رحت حظنته حبيبييييي..
شاكر.... حبيبتي لوله الحلوه..
وداد.... الله يساعدك يابا شلونك..
شاكر... هلا بيج عيوني ام لجين..
-بدل حتى تاكل ويانه..
-لا صبي اكل حتى اروح انام مابيه ابدل واجي..
لجين... شلونه حبيبي شو مبين عليك حيل تعبان.
-والله يا بابا الحر كتلنه.. المحل صدك بيه تكييف بس هم حر..
-الله يساعدك حبيبي باباتي.. كعدت يمه وبست خده.. باس راسي.. وسئلني
-شلونج بالصيدليه..
-واللهي زين الشغل ماشي الحمدلله.. و مؤيد خوش ولد حباب..
-هو لو ما اثق بيه ما اخليج تشتغلين وياه..
-كمت من يمه صبيت وي ماما وخليت الاكل وكعدنه ناكل.. كملت اكل.. اخذت المواعين... خليتها بالسنك وقفلته المجره.. ونكعتهم بمي حار..
لبست كفوف بلاستيكيه.. وغسلتهم ونضفت.. كملت شمرت الكفوف بالزبل.. وصعدت الغرفتي..
نمت شوي.. ل3 صحيت على صوت الموبايل.. باوعته.. المخرج محمد الهلالي.. رديت هلا والله ب محمد..
محمد... هلا ب لوله.. شلونج عيوني..
-والله تمام..
-الاعداد.. جاهز موضوع الحلقه الخيانه.. وصلج على الايميل..
-هسه اشوفه..
-يلا واحرصي على الساعه 6 تتواجدين بالاذاعه اوك.. لا تتأخرين..
-ان شاءالله.. قفلت الخط.. فتحت الايميل.. باوعت الموضوع قريته كملت وگمت..
فتحت شعري شسورته وكبسته.. رحت جبت مي ورد وليمون نقعت اضافري وطليتهم.. مكيجت خفيف..
ولبست قميص ابيض نص ردن وبنطرون اسود.. رشيت العطر ونزلت.. ماما كاعده بالمطبخ وتباوع للتلفزيون..
ها ماما حبيبيتي اني طالعه..
-شنو اليوم البرنامج..
-اي والله مو تعرفين.. كل يوم احد وثلاثاء وخميس.. وليوم ثلاثاء..
-الله يسهلج بنيتي عل8 افتح الراديو واستمعلج..
-حبيبتي ماماتي.. بستها براسها وطلعت شغلت سيارتي.. ومشيت..
لحظه لحظه.. للان معرفتو شنو اني..
اسمي لجين شاكر مقدام.. مواليد 1985 من اهالي الاعظميه.. خريجة كلية صيدله.. والوحيده لماما وبابا..
كانت ماما كل ما تجيب طفل يموت.. قبلي حملت ب3 ينولدون ويموتون.. لحد ما صرت اني.. نذر بابا لسلامتي..
وخرجت للدنيا وذبح كبش فداء عني.. والحمدلله الله كتبلي حياة.. من بعدي صار حمل واسقاطات عند امي لكن ما نجحت..
الى ان صار عدها فايروس بالرحم.. سبب الها عقم.. ف كنت اني الوحيده لأهلي..
بابا صاحب محل مجوهرات بشارع الاعظميه المطل على جامع ابو حنيفه النعمان...
بعد التخرج.. بحثت عن شغل. ف اشتركت مع ابن صديق ابويه.. اسمه مؤيد.. رجل خلوق.. متزوج ويبلغ من العمر 34 سنه..
فتحنه صيدليه.. امام مستوصف صحي.. وصرنه نتناوب عليه اني ومؤيد.. الصبح اني الزمه من ساعه 8 لحد ساعه 12 او 1 الضهر..
ومؤيد.. يستلم من بعد ال5 لحد الساعه 10 يعزل.. وهيج مقسمين الشغل.. واحيانا ينزل الصبح يكعد ويايه..
او اني اساعده واشيل عنه اذا كان مشغول او عنده شي.. استلم بمكانه.. يعني متفاهمين..
اضافه الى شغلي بالصيدليه.. كنت بمنتدى مع مجموعة بنات وشباب.. وقررنه في يوم نلتقي ونتعرف بالواقع..
وبالفعل حددنه مكان.. وطلعنه وتعرفت على صديقة عمري .. سرى.. بنت جدا طيوبه.. رغم عندي كثير صديقات من الجامعه.
الا هذه البنت كانت غييير.. حسيتها مثلي توأمي.. فصرت تقريبا كل يوم التقيها ابيتها او ابيتي او نطلع مع بعض..
　
سرى تشتغل باذاعة دجله.. ف يوم من الايام.. عرفتني على اصدقاءها بالاذاعه.. ومنها تعرفت على محمد الهلالي..
شاب حنطي رشيق القوام.. مرتب.. كان يجذبني بثقله ورزانته.. ورغم رزانته الا ان هو جدا محبوب ومرح.. وطيب..
شفت كل صفات الرجل الي احبها بيه.. ف حبيته.. وكمت افرح بشوفته.. وافرح لو يوم كالت سرى تعالي وياي للاذاعه..
هو جان يدخلني وصار صديق مقرب.. وتعرفت عليه بشكل شخصي مراسلات على الايميل وكثير مرات نلتقي..
حسيت بحب من جانبه.. او بادلني المشاعر.. وعرض عليه.. تقديم برنامج.. ليل وگمره.. اقدمه وهو المخرج..
جنت خايفه وهو شجعني ووقف وياي ودربني وعلمني.. والحمدلله اشتغلت بالبرنامج..
وكنت جدا سعيده.. بتواجدي ببرنامج هو يوجهني ويكلمني كل ثانيه بي.. الى ان اجه اليوم.. اللي كانت محفظته موجوده علطاوله.
واني كاعده يمه.. دنتعشى.. ديطلع فلوس يدفع العشا.. وكعت جنسيته.. شلتها.. وشفت بيها متزوج.. واسم الزوجه نوال..
عقدت حاجبي وسئلته.. انته متزوج.. جاوبني بأنحراج اي.. رغم جنه نعرف بمشاعر بعض.. لكن ممصارحين بعض ابد.. لا اني ولا هو فقط مشاعر
ف قررت من يومها ادفن مشاعر هالحب بقلبي وما ابادلها.. خطي مرته ..احبه واخذه منها على اي اساس لو اني بمكانها ما اقبل وحده تاخذ زوجي ف كيف اقبلها على غيري..
هو حس ان اني انتبهت على هذا الموضوع بس بقى مبادلني مشاعر الحب.. لكن كنت اصده بكلمة اخيي الغالي.. يتضايق صح بس هذا اللي لازم يصير..
.......
قربت اوصل للأذاعه.. دا استدير.. ما احس الا سياره صارت بوجهي.. انصدمت بيها فورا.. بس انخضيت خض.
نزلت من السياره بسرعه.. لاااااا يا الله سيااااارتي.. نزل السايق يصيح
مالك....هاي شسويتيييييي ادري عميييييه متشوفين.. صوج الخله سياره عد هيج ناس ثوله وخلاها تدعم بالعالم..
لجين.... لحظه لحظه لحظه ع شنو تتجاوز.. متقصده مثلا... دا استدير طلعت بوجهي.. شسويلك..
مالك.... ادور اتكول شسويلك.. لج بابا دباعي عقجتيها للباب باااعي..
-المطلوووب شنو لتصيح..
-انتي لتصيحين هييييي..
-اكولك انته من شنو مخلوق وشلون تحاجيني بهشكل.. يا اخي احترم.. سيارتك دعمتها صلحها واني انطيك فلوس التصليح.
-لج يا تصليح اروح اصبغ ما صار 3 ايام من اشتريتها لا تخبليني..
-اهوووووو.. وهسه شتريد فهمني.. دنحجي التمو ناس علينه.. كالوله سمي بالرحمن الگدامك مره مو رجال وتصيح عليها..
صرخ بيهم اذا مره شعدها تسوق.
-حظرتك منو وتحاسبني.. فضني اللي تريده شنو تره عندي شغل مو فاضيه..
-تاخذيها وتصلحيها..
-ش اخذ.. عندي برنامج ما اكدر اتأخر هذا رقمي .. وانطيك عنواني.. ومن تصلحها خابرني..
-ماكو تصلحيها انتي.. مو اني..
-اهوووو شلون مصيبه هاي.. شيخلصها وياه.. كتفت اديه وكمت اتأفف..

يا خيي فضني دخيلك شنو تريد.. ولله انطيك بس خل اروح.. صاح الرجال دفعيله افلوس التصليح وتوكلي..
رحت للسياره.. طلعت الجنطه.. واخذت 200 دولار.. وانطيته اله بس هذا العندي اذا طلع اكثر.. انطيتك رقمي وخابرني..
اشو مديتله الفلوس.. اخذهم وشكهم.. وشمرهم بوجهي وكال بسيطه اني الج.. ركب سيارته وحرك... باوعت هزيت ايدي..
خو حظي وين الزبايل يشيلها ويكومها گبالي.. باوعت سيارتي.. المقدمه شوي اتأذت.. اخذتها ورحت للاذاعه..
وصلت 7 الا ربع.. التقيت ويه المصور علي.. شو تأخرتي.. طلع محمد بوجهي... هاااا..
-ش هااا دعمت سيارتي وانلاصت عليه..
محمد.. سلامات خو ما صار بيج شي.
-لا الحمدلله بس الدعمته عقده طلع روحي..
-ونحلت
-شمدريني انطيته فلوس شو هذا شكها بوجهي وشمرهم.. وراح وهوه يتوعدلي..
-خيولي.. يلا اكعدي حظري.. تره مابقى للبرنامج غير ساعه..
-ان شاءالله.. كعدت ابحث الموضوع واستعدله ل8 الا عشره انتقلت للاستوديو.. باوعت لمحمد. خليت السماعات الكبيره براسي ..
اخذت نفس عميق.. بدت موسيقة البرنامج.. انطاني الاشاره محمد انطلقي بالجو ..
هزيتله راسي وتقربت من المايك...مساءكم حب و ورد حبايبي المستمعين.. و اجمل مساء مع اجمل برنامج ليل وگمره ويايه اني بالتقديم لجين شاكر والمخرج محمد الهلالي
ابتعدت عن المايك.. اشتغلت اغنية القيصر... كن منصفا يا سيدي القاضي..
باوعت لمحمد.. كلمني خليج ريلاكس لجين.. هزيت راسي.. قطع الاغنيه.. ورجعت للجو..
القيصر يكول كن منصفا يا سيدي القاضي.. ف انا رجل له ماضي.. موضوعنه اليوم هو موضوع الخيانه..
لكن اني ما اريد ابحث باسباب الخيانه.. لااا اليوم اريد اتناقش بموضوع الخيانه ببحث اخر..
وهو الانصاف.. هل من الانصاف ان لما يخون الرجل.. نگول صوج المره او مرته.. خان لان ممداريته او ما منطيته حقه او او او
بس ابد.. ميتحاسب الرجل ع الخيانه.. لا وفي بعض الاحيان تعتبر رجوله.. ما فد يوم احد حاول يحاسب الرجل الخائن..
لكن لو خانت المرأه هنا الكل ينادي اقتلوها اذبحوها ابيحو دمها.. اني مو مع احد ضد احد ... لااا لكن الخائن هو خائن مهما كان جنسه..
بما ان العراق هو بلد اسلامي.. نرجع للقران ونشوف الحكم بهل قضيه شنو ؟؟
{{الزَّانِيَةُ وَالزَّانِي فَاجْلِدُوا كُلَّ وَاحِدٍ مِّنْهُمَا مِائَةَ جَلْدَةٍ وَلا تَأْخُذْكُم بِهِمَا رَأْفَةٌ فِي دِينِ اللَّهِ إِن كُنتُمْ تُؤْمِنُونَ بِاللَّهِ وَالْيَوْمِ الآخِرِ وَلْيَشْهَدْ عَذَابَهُمَا طَائِفَةٌ مِّنَ الْمُؤْمِنِينَ}} سورة النور ايه 3
يعني القران ما فرق.. لا ويكول ولا تأخذكم بهما رأفة.. طيب الرجل ليش ما يحاسب.. ليش فقط المرأه هي الملامه..
ومحد يبحث باسباب خيانتها مثل ميبحثون بخاينة الرجل ويكولون صوج مرته.. لااااا هنا يواسوه للرجل.. ويكولوله اغسل عارك..
نعم اغسل عارك.. امنا بالله.. بس لما انت تخون.. وتكون عار.. يا ترى من يقتلك ويغسل عارك؟
ولا تبقى تسود وتطغي بعارك.. ليكون مجتمع ذكوري يدعي الاسلام.. وما يمد له بصله.. فقط يتبع اباءه واجداده متناسي شي ذكر بدستور القران عن الحلال والحرام..
استقبل اتصالاتكم حبايبي المستمعين حول موضوع الحلقه.. على هواتفنا التاليه 0770*********
وسؤال الحلقه يقول.. من اسم حبيبة هتلر التي خانته في ما بعد.. شاركوني ارائكم واجاباتكم حول سؤال الحلقه لتدخل معي على قرعة الجائزه..
وناخذ اول اتصال ونكول الوووووو............ بقيت اكمل البرنامج.. ساعه يله كملت البرنامج..
نهيت الحلقه.. وجابولي قوطية عصير بارد.. فتحتها وطلعت من الاستوديو.. هاااا محمد.. شرايك..
محمد... مبدعه من يومج..
-هههههههه منك نتعلم يا معلمممم..
-الجمعه افتتاح قناة جديده.. ترحين وياي
-ممممم ما اعرف اشوف..
-شووفي ووافقي لان عرض مو قابل للرفض.. ما اكدر اروح وحدي ولا اكدر ما اروح عيب من الاستاذ سامر عزمني واكد على حظوري..
-ان شاءالله اشوف واجي.. واذا اكو مكان لسرى ويانه ياريت اكون اسعد..
-الا بوجود سرى تكونين سعيده ؟
-شلون يعني ؟ غير صديقتي
-واني
-محممممممد لتدلل عاد تعرف سروش حبي الاول والاخير لتفكر تاخذ مكانها ممنوووووع ههههه
ضحكت وياه ومشيت لسرى.. حظنتها.. حب حب وينك..
سرى.... هلا لولي حياتي..
-لج ميته جوع خل نطلع نتعشى بره..
-اي وربي اني هم جوعانه.. يلا خلصت خل نطلع..
-يله.. دنطلع صاح محمد وين.. كتله نتعشى تجي.. صاح اي ليش لااا.. نزلنه قريب على الاذاعه نزلنه اكل... واكلنه..
داي اكل ومحمد قريب عليه يباوع بوجهي.. ادور المصور علي هم كاعد وهو صافن. باوعتله ها حمودي شو صافن..
-لاااا هيج..
-شلونها عائلتك.. صفن بوجهي اخذ نفس حيل ودنك بالأكل مالته وهز راسه بخير يسلمون عليج...
-الله يسلمهم ان شاءالله اعزمني وعرفني عليهم.. اوك.. ملتله راسي.. باوعلي.. وخله اللكمه بحلكه ودنك راسه ياكل ما رد.
ندستني سرى.. ابتسمت.. همستلي.. هو انتي ناويه تموتي للولد يختي.. خفي عليه شويه..
- خرتها حيل.. وعضيت شفتي الها... لان اعرف محمد حتى النمله يسمعها... حاجيتها... يلاااا سراوي كومي عيني الساعه 10 و خمسه.. بابا يتضايق ارجع وره ال11.
-يلااا.. اخذت سرى.. ونزلتها بمكان اخذت سياره وراحت لبيتهم.. واني توجهت للاعظميه لبيتنه.
ومشغله اغنية.. شيرين عبد الوهاب... عايزه الملم البي واحظن نفسي وامشي بعيد.. عايزه اطيب جرحي ايوا هطيب جرحي اكيييد....
امشي وليل ومستمتع باجواء الاغنيه ما احس الا شي ويصدم سيارتي انركع راسي بالستيرن.. گلبي راح. حسيت حالي متت..
بعدت.. مديت ايدي لراسي.. نزل دم.. شفت ايدي مدمايه.. ومن راسي تخبلت هميت انزل بسرعه..
فتحت الباب وانصدم بشخص كبالي.. طويل وضخم.. ركزت بيه نفسه اللي انصدمت بيه اليوم..
دفعته حيل انته مخبل اجيت تموتني.. دفعني علسياره وتقرب.. كتلج انتقم منج صدقيني ولسه ما شفتي شي..
-انته شنو تريد مني.. اباوع الشارع فارغ.. ادور حتى مو شار عام.. رجعت باوعتله.. يخوف احسه جن مو بشر من طوله وضخامته..
ما ردت اكثر حجي وياه .. درت وجهي.. ورحت شفت السياره كسرها تكسر.. حجيت حسبي الله ونعم الوكيل..
انداريت.. واكف گبالي.. الله يخليك اخويه اتركني بحالي يابه اعتذر والله..
-عبالج ما سمعتج من كلتي اليوم وين ما اكو زياله يطلع بطريقي..
-مو عليك صدقني بس وخر..
-دفعني ولزمني من رگبتي.. هلعب مو عليه يا حلوه اني مالك.. مو بسهوله تخلصين مني.. وحسابج مو هيج يتقفل..
-شتريد بالضبط..
-انتي..
-دروووووح لخاطر الله رووووح.. دفعته وركبت سيارتي بساع... فتح الباب وحجه لا عبالج تفلتين..
جريت الباب توكل يابا.. سديتها بساع ومشيت.....يتبع
☆☆☆☆☆☆☆☆
☆☆☆☆☆☆☆☆

شرايكم بالبدايه.. ع فكره تم تغيير اسم القصه من في ثنايا المافيا... الى خطوات نحو الجحيم.. لكثرة اسم المافيا بالقصص.. حبيت اغير..
نوروني بارائكم وتعليقاتكم.. على شخصيات القصه الجديده.. ❤ متابعه ممتعه

#زينب_ماجد

لاتنسو تابعوني حسابي حتى يوصلكم اشعار من انزل القصه

لامارا · 16-04-19, 04:21 PM

#خطوات_نحو_الجحيم
////بقلم الكاتبه زينب ماجد////
الحلقه_2

جريت الباب وسديته.. ومشيت.. بس الخوف ماكل گلبي.. وصلت البيت.. صفيت السياره.. باوعت منا منا
..
ماكو احد.. دخلت.. طلعت ماما..
ماما... ها حبيبتي شو تأخرتي ابوج ضل باله عليج
لجين.. اي شسوي يا ماما.. غير بالاذاعه وخلصت وطلعت ويه الجماعه.. تعشينه واجيت..
حجيت.. ودخلت جوه.. لكيت بابا..بست راسه وكعدت..
الاب... ها بنتي وين صرتي.. برنامجج خلص ب 9 وهسه 11 الا ثلث.. مو زين عليج تتأخرين ابنيتي.. االوضع مو امان..
-شسوي باباتي.. ااحاول ما اتأخر.. ادور اندعمت سيارتي.. وابتليت..
الاب... اخخ ليش.. شلون اندعمت.
-شمدريني.. دا استدير ما احس الا سياره بوجهي كسرت سيارتي تكسر.. انوب الكلب ما كفاه ... رجع دعمها مره ثانيه..
الام... شنو القصه وليش يدعمج مره ثانيه.. شنو تايها..
-ماما شسوي اني بنيه لو تصايحت بالشارع وي رجال حتى لو الحق الي اني اللي انلام.. فتركته احسن .
يلاااا اروح انام تصبحون على خير.. شلت جنطتي.. ومشيت لغرفتي.. دخلت...سحبت موبايلي خليته علشحن..
طلعت ثوب نوم.. ورحت للحمام.. سبحت وبدلت. واجيت للغرفه.. شغلت التلفزيون وتمددت.. اباوع برامج..
ما لكيت شي.. طفيت التلفزيون.. دا اريد انام.. شفت الجهاز يلمض .. صامت.. باوعته..
جريته.. رقم غريب ديدوك... رديت الو .. ماكو رد.. منو ويايه...
-للان عطرج بيه يسحر اوووف لو الزمج..
-منو حظرتك..
-كابوسج
-ما عندي كابوس.. اصحى واقتل كابوسي..
-جربي تصحين مني..
-عرفته ابو السياره.. اتذكرت انطيته رقمي.. انته شتريد مني..
-عمري كله ما وكفت مره بوجهي.. تجين انتي ادعمين سيارتي.. وتصيحين عليه لا وتكليلي زباله..
اذا ما خليتج تتوسلين بس اعوفج وارحمج ما اطلع اسمي مالك..
-يا اخي اتركني.. الله يخليك.. الحادث مو مقصود والله.. وبعدين افلوس التصليح انطيتيالك وانت شگيتهم بوجهي..
زين شنو اسويلك بعد..
-ب تمسكنج هذا تخليني اتعلق بيج اكثر تره..
-نعم.. ؟
-تعرفين شنو اللي يخلي الاسد يطمع بالغزال..
-سكتت
-ضعفها.. يعشق ضعفها بحيث يصير يجري وراها مثل المجنون لحد ما يمسكها.. وما يرحمها يبقى يستلذ بيها براحته.. وانتي غزالتي والا اصيدج..
-ع فكره انت مجنون.. قفلت الخط بوجهه.. يربي شلون بلوه هاي شيخلصني منه بالله
رجع خابر... يااااابووووووه.. لغيته المكالمه.. بعث رساله.. اذا متردين اندمج.. بعدني دا اقره المسج..
خابر.. لا يااااا الله.. شلون مشكله هذا.. رديت بعصبيه.. لك يا عيني شرايد.. شنو ابتليت على عمري دعمت سيارتك..
ما اعرف.. والله مو متقصده.. والنبي ممتقصده..
-ههههههههههههههه
-يضحك بحقاره... انته ع شنو تضحك..؟
-تراج عجبتيني صدگي..
-انت متستحي..
-ليش هلكد حلوه..
-ابتعد مني الله يخليك
-ما اكدر.. بقيتي بنفسي.. واني ما احب اخلي شي بنفسي..
-لا اله الا الله.. يا اخي انت شنو ما عندك احساس..
-زين تعالي لبيتي يوم.. بس اطلعي من نفسي.. ما احب اخلي شي بنفسي واذا ما اجيتي بالمعروف اجيج غصب..
-سؤال بربك.. انت عندك خوات
-ميخصج
-تقبل واحد مثلك يخابر بهلوقت ويكول لاختك انتي بنفسي..
-هشششششش لتلغين زايد
-متقبلها على خواتك مو .. هاي اذا ما طلعو مثلك
-بسيطه.. وداعتج الا اعلمج واشوفج شلون تجيبين اسم اخواتي على السانج..
-ياااا اخي مو قصة اجيب خواتك بس..........قطع الخط بوجهي.. استغفرك ربي واتوب اليك.. شهلغضب هذا..
شمرت الجهاز.. وحاولت انام.. الف فكره وفكره.. تجي براسي شراح يسوي...
حاولت انام.. ماكو.. اخذت الموبايل وتركت الغرفه ونزلت جوه.. باوعت الساعه ب الصاله 1 الا عشره..
رحت للمطبخ فتحت الثلاجه.. وطلعت جبن.. ونص صمونه.. سويت لفه.. نزلت ماما.
-هاااا شو كاعده..
-دا افكر بسيارتي.. تفلشت اليوم فد مره.. شيوديالي للتصليح بالله..
-اي الصبح خابري ابن عمج مخلد.. ويجي ياخذها هوه ويصلحها..
-اووو لا ما اريد مخلد.. يوم يبزعني بنظراته و بساميره المتخلص
-اي غير يحبج ويريدج يا ماما.. لشوكت ناويه تبقين بليه زواج مو تخرجتي صار سنتين.. شمتانيه..
-يوم يعني التتخرج.. لازم تتزوج.. تره الزواج مو كولشي.. واني كامله مو بحاجة رجل يكملني ..
-ماكو واحد كامل ماماتي.. الزواج نصف الدين.. والمره بليه رجال مترهم.. حتى وان كان عندج اهل يبقى الرجال والاطفال هم السند والاستقرار..
-لا والله ماما بهلزمن.. وضيفة البنيه سندها.. الرجال ماهو الا سقف عن كلام الناس .. لا يسمن ولا يغني عن الجوع.. وكلهم خونه..
-ليش تحجين هشكل قابل انتي جربتي وهيج تكولين..
-والله ماما الاشوفهم كدامي.. خير مثال.. مثل المخرج محمد.. صح صديقي واعزه.. بس تعرفين رغم متزوج..
يدورني.. ويريدني اله.. ولا كأن اكو زوجه بحياته.. الزوجه من يطلع من البيت ينساها.. ويرجع يراهق.. هذا عود المثقف والواصل واله سمعته بالوسط.. كيف بالبقيه اذن ؟!
-مو كل اسابعج سوه ماما..
-لا ماما اصابعي لو ضميتهم.. كلهم يطلعون نفس الطول.. ليخدعج المنظر..
-هههههه وهسه
-هاي شنو يوم.. هيج ماله مني وتردين تزوجيني.. لو ما بس اني عندج.. جان شسويتي.
-وداعتج يا ماما مجرد اتخيل انتي اطلعين من البيت دموعي تجري وحدهم.. بس يا ماما ما اكدر اصير انانيه واوكف بحياتج..
اني ام وادور مصلحتج.. والبنيه مالها غير بيت رجلها والا اشكال الوان الحجي تسمع..
-ماماتي لو بقينه على الكلام ما نعيش.. هي الناس لو بيها خير تشوف اخطائها وتلتهي بتصحيحها... مو تارك نفسه وينتقد بالناس ويحجي..
اللي يخلي كلام الناس براسه عمره ما ينجح.. لان الناس مراح ترضى.. وراح تحجي على اي حال
ما تزوجت.. يكلون.. عنست..
تزوجت... شوكت تحبل...
طولت.. كالو عاجر..
الحبلت.. كالو شبساع ..
الحبها زوجها.. كالو مسويته طلي..
اللي يعاملها اعتيادي.. كالو لابسها مايديرلها بال
والتركت كل هذا ورفضت تتزوج وتستقل الوحدها.. يكولون.. عوبه محد يدورها. ماما الناس متسكت ولا راح تسكت. مدام عدها السان..
الحياة نعيشها مره.. وجمالها لما تعيشها بمزاجك.. مو بمزاج غيرك..
-براحتج ماماتي الله بوفقج.. اني صاعده انام طفي ضوه المطبخ من تخلصين
-ان شاءالله.. كعدت بالصاله شوي ع تلفزيون.. وصعدت نمت.. لل6 ونص كعدت..
سبحت وشسورت شعري.. وبدلت ونزلت.. صارت طلعتي وي طلعة بابا.. صباح الخير حبيبي..
-هلا باباتي صباح النور.. هاي شنو سيارتج ياب ليش هشكل تلفانه..
-مو كتلك دعمتها البارحه.. بالله كولي شون اروح بيها..
-امشي واصلج بسيارتي.. واني اخابر واحد من الولد ياخذها للتصليح..
-اوك.. رحت بوسته بخده وصعدت وياه وصلني للصيدليه.. فتحها وياي.. وكال فد شريط براسيتول احتاجه..
-اي ادلل.. انطيتهياله.. وراح.. فتحت قران بالصيدليه.. وبديت اعدل بيها.. كامو المراجعين يجون وبده الشغل..
لل10 خابرني مؤيد... كال راح يجي ناصر يوصلج مجموعة الادويه.. كتله اوك..
بقيت ارتب بالادويه حسب الاحرف بالادراج.. دايره وجهي للادويه ومنطيه ضهري للباب..
سمعتها نفتحت.. درت وجهي تفضل.. انصدمت نفسه اللي دعمني البارحه.. لا يا الله.. شلون بلوه هذا..
سويت نفسي ممهتمه.. بقى يباوعلي بدون ميحجي.. بس صافن بوجهي ومبتسم بحقاره واديه بجيب بنطرونه..
.. تفضل اخويه كول شنو محتاج..
-محتاجج..
-نعم ؟
- الله ينعم عليج لا اطوليها تره لعبتيها لنفسي.. دفعيلي حسابي واطلعي من بالي..
-دفعت حسابك وشكيتهم..
-لااا حسابي مو فلوس غير شي..
-اخي لو سمحت اطلع..
-واذا مطلعت..
-دا احجي.. طب مراجع.. طلب علاج.. وكفت اجمعله علاجه.. واللي اسمه مالك.. للان واكف ويباوعلي خطوه بخطوه..
انطيت العلاج للولد.. اخذت المبلغ خليته بالدرج.. وشلت راسي.. شنو اللي تريده ممكن افهم..
-اريد باكيت ********* ويغمز
-طلب شي سخيف.. اخذت نفس.. ما عدنه..
-ما اعتقد ما عدكم.. بكل صيدليه يتواجد هلشي وضروري للتواصل الاجتماعي... ويمغز..
-شلون يا الله بسخافته.. دايحجي طب مؤيد.. هلا لوله..
-هلا مؤيد.. جيت بوقتك.. شوف طلب الرجل..
مؤيد.. تفضل..
مالك.... شكرا ما محتاج شي..
مؤيد... لعد ع شنو واكف اذا ممحتاج شي.. خزرته..
مالك..... وانته شكو..
مؤيد..... الصيدليه اليه.. وما اسمح لنماذج تعبانه تدخلها..
مالك.... شتقصد..
لجين... مؤيد....اترك الموضوع واصرفه لتسوي سالفه دخيلك.. دارلي مالك وكال بسيطه اني الج.. وطلع
مؤيد..... تعال تعال هاي تتحلف لمنو.. ركضتله لزمته من قميصه.. ضربني كله براسه.. رجعني ليوره..
درتله بقوه.. اريد امشي.. لجين ماسكتني.. صرخت.. عوووووفي شبيج خل أئدبه..
لجين.. شفته مالك ضرب مؤيد... بساع لزمت مؤيد حيل.. اتركه يروح الله يخليك.. مالك ضربه وراح لسيارته صعد وحرك..
-لج دعوووووفي.. خرب راح .. انتي شبيج تشوفي ضربني تلزميني لييييش..
-مو مال تسوي مشكله بالصيدليه مؤيد.. هذا مخبل اتركه.
منين تعرفينه..
-دعم سيارتي البارحه. وبلاني بلوه..
-اشتكي عليه... شبيج انتي فهميني ..
-مؤيد اتركه لخاطر الله.. تره هسه اترك الصيدليه واطلع.. والله لعبت نفسي مو متحمله سيرته لهلمخلوق ابببد..
-انتي خايفه منه لو شنو..
-مخايفه منه... اني اريد اتكفى شره..
-رقمه عندج... انطيالي.. الا العب بيه طوبه والله
-ما عندي رقمه وانسى الموضوع مؤيد... دنحجي صفة سيارة المندوب.. دار وجهه مؤيد ومشى للمندوب وبقى ياخذ بالدوه..
دخلناه بالمستودع.. اذن الاذان.. دارلي مؤيد.. اخذي راحتج .. نقفل الصيدليه عود اني بالليل اصفط الغراض
-اوك...
-سياره عندج لو اوصلج..
-لا والله ياريت توصلني حاره الدنيا مو مال امشي..
يلا...
-صعدت وياه...
-لجين هذا لو تعرضلج.. تجين تكوليلي انعل شرفه والله.. مفهوووم..
-ان شاءالله... وصلني للبيت... دخلت صارت ماما بوجهي..
-هااا الله يساعدج..
-هلااا يوم..
-كملي ونزلي تغدي..
-ما اشتهي اكلو وحدكم..
-شبييييج اكو شي ؟
-لا يوم تعبانه والله..
-ارتاحي حبيبتي.. مخلد اجه واخذ سيارتج.. ديصلح بيها
-هزيت راسي وصعدت.. دخلت غرفتي شمرت الجنطه وكعدت.. دنكت واديه على راسي.. منين طلعلي هالمالك هذا..
جريت الجنطه.. دكيت رقم سرى.. دك.... الووو..
سرى.... هلا لجين..
-هلا سرو.. حبي عندج شي العصر.. محتاجه اطلع اني وياج.. نتكلم شوي متضايقه..
-ليش صاير شي.. ؟ محمد ضايقج
-لاااا ابدا... ما متواصله وي محمد... بس شغله لخ.. من اشوفج احجيلج اوك..
-مااااشي..
-اشوووفج... يلا باااي.. قفلت وشمرت الفون علسرير ورجعت مدنكه .. شحيخلصني منه.. شسويله.. هذا الضاهر صدك مخليني براسه..
شلون اندل الصيدليه اشلون اجالي.. كمت للكنتور.. طلعت ملابس وبدلت..ورحت نمت فورا..
للعصر كعدت على صوت الموبايل.. سرى.. رديت.. كالت اني ع الباب.. اوك.جايه..
نزلت بساع لكيت ماما فاتحتلها الباب.. ركضت حظنتها هلا سوسايتي...
-هلا لوله حياااتي.. لج ضل بالي و الله شصاير..
-خزرتها.. وباوعت لامي طبت. تعالي تعالي دنطب... دخلنه للاستقبل وكعدنه..
-شكو احجيلي..
-لج البارحه مو دعمت سيارة الولد..
-الشگگ الفلوس بوجهج.. شبيه ؟
　
-خابرني البارحه ويكول اريدج..وكلام سخيف .. ومكفاه اجالي اليوم للصيدليه وطلب طلب اسخف منه.. خلاني بنص اهدومي..
وادور اتمشكل وي مؤيد وبعده يتحلفلي كوليلي شأسوي وياه هذا..
-ووو مشكله.. اشتكي عليه..
-لج دسُكتي.. المن اشتكي.. هو ليش اكو قانون يحمينه من هيج نماذج.. راح تطلع عليه ما يحموني..
-زين والحل..
-هو دا اسئلج يا فهيمه..
-زين خابري وتواعدي وياه واتفقو ليش تصيرلج مشكله..
-يااااا تحجين صدوك..
-اي دكوليلي شتسوين.. هذا الضاهر مخبل .. ومتفتكين منه..
-والله ما اعرف.. زين اخابره..
-خابري بلكت تقنعي.. بلية مشاكل..
-اخذت موبايلي.. خابرته... كمزت... لج دك دك... رد.. الوو.. دا اريد اكول الو.. اندكت باب الاستقبال..
تكامزنه اثنينه وقفلت الخط بوجهه... وكمت للباب.. لكيته مخلد..
مخلد... السلام عليكم..
لجين.... هلا مخلد وعليكم السلام شلونك.. تفضل.. دخل ووكفت سرى على حيلها سلمت عليه.. واجت يمي هذا كيك لو جكليت..
-تؤ هششش عيب.. كعدنه ثنينه وهو كاعد... طبت امي.. شايله صينيه بيها كعك.. وعصير 4..
اخذته منها وقدمت لمخلد ولسرى واني وماما.. وكعدنه نسولف.. دارلي مخلد..
-هاي شداعم سيارتج هيج.. مطحون طحن الوره..
-شسوي بعد.. انضربت..
-تره متعمد هذا الحادث تعرفينه الضربج..
-ااااا لا لا ما اعرفه.. كرصتني سرى..
-لج مو تردين تخلصين منه.. فرصه مخلد نقيب يطيح حظه والله..
-دسُكتي انتي .. هذا لو ساعدني ملكني بعتباره.. متعرفين اسلوبه وتصرفاته عبالك الله خلقه وكسر القالب..
-لج بس باعي الشوارب تكتل والله.. انوب السمار يمه السمار.. حنطي مدري عسل
-انطمي لا تنكتلين.. حجيت وكمت.. ماما اني صاعده ابدل.. ح اطلع اني وسرى شوي..
-براحتج بنيتي..
-كومي وياي.. صعدت للغرفه.. وسرى وياي..
-اكولج خو ما ابوج موجود
-لا عيني دخني براحتج.. بابا مموجود..
-اموووت عليج تفهميني
-هههههه... مكيجت وصففت شعري وبدلت.. وكتلها يلا دنطلع..
-كامت وياي ونزلنه لكينه مخلد ديريد يروح.. كتله سلملي على عمه گرجيه..
-الله يسلمج... وين راح ترحين..
-على شارع الضباط. شوي نفتر..
-اصعدي اوصلكم..
-تسلم.. ما اريد اتعبك.. احنه نروح..
-هو باچر توصل سيارتج اصعدي دا اوصلكم واروح..
-صعدت وياه بالصدر.. وسرى وره.. احس متضايقه بكعدتي وياه.. سكوت تام لحد ما وصلنه وصلنه للشارع..
نزلت سرى.. كتله شكرا تعبتك.. ودا انزل حجه
- لجين..
-درت نعم..
-انتي شنو اللي رايدته..
-نعم.. ؟
-ما ناقصني شي.. والف وحده تتمناني 4 مرات اخطبج وترفضين ليش..
-اي روح للالف التتمناك تخطبني ليش..
-شرايده بالضبط..
-مو رايده شي.. وصراحه.. الضابط عندي عليه خطوط حمره ما احب ارتبط بي..
-تردين ابطل من دوامي ..
-لا.. صدقني انت اخويه ما اشوف بيك اكثر من هيج.. انسى الطفوله ووعد الاهل اني الك ولجين لمخلد... احنه كبرنه.. وعقليتنه كبرت..
-بس اني ما كبرت.. وللان اريدج.. وانتي جاي تذليني كدام الناس برفضج الي..
-اي زين لا تخطب.. الزواج مو جبر او استخطاء.. او واستخطيك واوافق.. الزواج مشاعر.. وهلمشاعر مموجوده وياك..
مخلد.... همممم اخذي راحتج..
-اشكرك.... نزلت.. ورحت لسرى..
-هاااا شكو..
-ولا شي كلعاده اخطبج ليش متوافقين..
-غبيه امشيييي..
-خليت الذكاء الج...
-لج تره تخسرين بهذا تفكيرج.. ليش هيج كارهته..
-اني مو كارهته.. كاره كل رجال.. مو ادور ضابط.. رب الخيانات والسوالف ال.... خلينه ساكتين..
-تره مو كلهم هيج.. ومخلد خوش ولد صح مستثقل.. بس رايدج.. ليش رافضته.. تره وصلتي عمر ال 25 وين ناويه توصلين..
-حسستيني عمري 50... لج بابا افهمي.. ما عندي مشاعر وياه حتى لو جان خوش ولد.. والله ماكو مشاعر شلون بس اسمه زواج تراكم دمرتوني بهسالفه..
وبعدين بدل مجايه تنصحيني.. اقلبي النصيحه واخذي بيها واتزوجي.. شكو جايه تزوجيني..
-والله لو متقدملي مثل مخلد اوافق واني مغمضه..
-يااارب يتقدملج مثله ونفتك... دمشي امشي خل نتسوق بدل هسوالف ماكو غير الرجال سيرتنه مال الكبر.. هسه هم لو مهتمين بينه بكد ما احنه نسولف بيهم جان زين..
-ههههههههه
- هههخخ... امشي ....مشينه نفتر.. ونشتري ونسولف.. لهناك... خابرني مؤيد.. انتي وين.. كتله بشارع الضباط..ليش
-لا مو علمود البضاعه.. محتاجج اذا ما عدج برنامج..
-اي ولا يهمك.. دقايق واني يمك.. رحنه اني وسرى.. اخذنه تكسي وللصيدليه..
دخلنه .. لكيت عليه 3 يردون علاج.. واصدقائه واكفين.. صيدليه وكلها رياجيل..
اخذت سرى ودخلنه للمستودع.. دخل ورانه.. كتله ابقى على المراجعين واني وسرى حنرتب المخزن..
مؤيد... هااا اي زين مشكوره..
-كعدنه نعدل اني وياها وانظم.. سمعت هوسه يم مؤيد.. طلعت... اخذت من المراجعين.. وكمت امشي وياه.. خاصه النساء..
طلعت سرى كالت لجين اني رايحه.. بوستها وسلمت عليه ورجعت اشتغل..
امشي بالمراجعين.. ما احس الا الدوا وكع من ايد مؤيد.. صحت الله الله.. شبيك مخبوص.. كال مرتي عفتها تتوجع..
-شنو دتطلگ..
-اي..
-هههه فديت الباله مشغول بمريته.. روح خيي واني اصفي واطلع..
-لااا ما امن عليج وحدج بليل بالصيدليه عوفي وباجر رجعي الغراض الجوه..
-اوك.. طلعت اني وياه وقفلنه الصيدليه.. كال اصعدي.. وياي.. كتله لا اروح وحدي..
-دصعدي يمعود
-ههههه اوك... هستوه صعد.. خابرته تبجي.. كاللها لحظات واني جاي..
-دارلي.. باوعتله امشي.. اروح وياك..
-صدك والله
-اي والله..
-فضل ما انساه الج والله.. بس امي وياها بالبيت وتعرفين الوالده ثكيله والجهال يمها واهلها بسامرا.. ما لحكو يجون..
-اي دمشي يا خيي شصار اني اختك قابل غريبه.. مشينه اني وياه لبيته سلمت على امه واخذت مرته وطلعنه..
خطيه تعصر بيدي من الوجع.. ركظنه بيها للمستشفى.. وصلنه لباب المستشفى.. كالت ما اكدر بعد..
نزلت من السياره وطلبت سديا فورا.. ركض مؤيد كبالي يجيب واني بقيت وياها لازمه ايدها واكولها كولي يا الله
اقري قران... لازمتها وارتل الزلزله.. جابو السديا ونوموها.. وركضو بيها.. واني ومؤيد وراها..
خطيه روحه تلوب عليها.. تقربت منه لتخاف تطلع بالسلامه..
-ما اعرف شلون اشكرج والله..
-لتكول هيج احنه اخوه.. دا احجي رن تليفوني.. باوعته بابا.. رديت الو بابا..
-وين انتي بابا..
-وي مؤيد بالمستشفى مرته دتطلگ خطيه ومحد وياها.
-تجين لو تباتين وياها باباتي..
- والله بابا ما اعرف..اني اخابرك ليضل بالك..
-ان شاءالله يابا.. اخذي بالج على نفسج..
-اطمن حبيبي.. قفلته منه.. طلعت السستر كالت مبروك اجتك بنيه.. خطيه فرح وكام يصلي على النبي..
شال فلوس ووزع على سلامة بنته ومرته.. رادو ملابس الطفل.. انطيتياهم.. لشوي طلعوها النه..
اخذتها بحظني.. يمااااي ردت اموووت صدك بهلحظه اتمنيت اتزوج حتى اجيب هيج ملاك يجنن..
هو اخذها ويبوس بيها واني واكفه وياه اباوعلها.. شلت راسي اله شتسميها.. ضحك بوجهي وكال لجين.
-لا لا ههههههههههههههه تحجي صدوك..
-ليش هو عندي اغلى منج وما اسميها عليج اخيتي انتي..
-يمممممممه فدوووووه.. ههههههه بوستها وكتله تتربى بعزك ان شاءالله..
لشوي طلعو الام.. بغرفه.. رحنه يمها وكلتها عصير وكيك وشربتها مي.. كالو طلعوها.. ما عليها شي..
طلعناها.. باوعت الساعه 1. وصلنه للبيت.. نومنه الام.. صاح مؤيد.. يمه جيبي فراش اللجين تنام..
كتله لا والله اروح ..
-وين تأخر الوقت حييل باتي شعندج
-وان يكن لازم اروح مو بعيد البيت شارعين.. طلعت من جنطتي 25 الف وخليت يم راس البنيه ما قبل مؤيد.. صاح بس وكفتج كافي والله..
كتله ميصير والله واجب هذا .. طلعت طلع وراي.. كال صعدي اوصلج.. صعدت.. وصلني لباب البيت وراح
خابرت ماما طلعتلي..
الام... شو تأخرتي ...
-غير جنت وي مرت مؤيد.. خطيه ماتت من الوجع..
-شلونها جابت.
-اي يماما جابت مو ابنيه ملاك اوووف تخبل ذبت من شفتها..
-هههههه يوم الالج تتزوجين وتخلفين مثلها..
-ههههه ان شاءالله اريد انام مسطوره فد مره والله..بوستها و صعدت كبل بدلت ونمت
لثاني يوم غسلت ونزلت.. ماما بالمطبخ..صباح الخير..
-صباح الأنوار..
-مخلد مجاب سيارتي
-اليوم يجيبها..
-هاا.. بابا وين.. بعده مكعد..
-فوك ديسبح..
-يلا اني اروح..
-تريكي..
-لا عود اشتري لفه من المطعم البصفنه.. بوستها وطلعت.. جريت موبايلي دا اشوفه واني امشي..
لكيته مغلق.. فتحته.. 7 مكالمات من رقم يا ستار ياربي هذا بعده .. ادور رساله دازيالي .. كاتب بيها ...
لازم اشتاقيتي وخابرتي لتخجلين احجي... ... لا اله الا الله.. حذفتها ورجعت الموبايل بجيبي..
بقيت اتمشى للصيدليه.. وصلت فتحتها.. اجه عمر الكهوجي.. اخذت منه كهوه.. وكتله عمر تكدر تروح لصلاح الحر تشتريلي
عمر.... ششتريلج فلافل
-لااا يا فلافل من الصبح.. شوفلي شي خفيف وجيبيالي..
عمر.... ان شاءالله..
دخلت الصيدليه.. رشيتها مي ومعقم.. ومسحتها بالماسحه ورجعت ثبتت المنشفه بالماسحه ومسحت..
دخل عمر.. جايبالي لفة خميره.. مشكور.. انطيته الاجره وبقشيش .. شكرني وراح..
اخذت معقم سائل .. عقمت اديه.. وكعت اكل.. كملت.. اخذت قطعة قماش ومسحت زجاج الصيدليه والميز والغراض..
كملت سديت الباب وشغلت المكيف.. ما جان اكو زبائن.. دخلت للمستودع انظم على راحتي الغراض..
حسيت باب الصيدليه نفتحت .. درت وجهي صحت منو.. ودا ارد اطلع .. صار بوجهي مالك وابتسم بمكاره.. ودخل للمستودع..
-ش شر شرااايد.. شرايد.. انته.. وشعندك دخلت هنا..
-كتلج رايدج ومتفلتين مني.. قفل الباب وراه
-اطلع منا لو سمحت.. عيب هلتصرف.. بعده يمشي.. واني ماده ايدي وابعد بيه وارجع لليوره..
لتخليني اصيح والله الدنيا المها عليك اطلع بره
-صيحي ونادي اللي يعجبج.. مو خايف من احد اني
-اتراجع وهو يتقدم.. بلعت ريكي يربي شسوي لو صرخت الشبهه تصبر عليّه مو عليه
الله يخليك والله ما سويتلك شي حرام عليك والله.. انضربت بالديلاب بضهري وقفت واحاول ما اخليه يتقرب اكثر..
لزم اديه ثنينهم.. كمت اباوعله ودموعي جرت من الخوف فدوه اطلع.. مد ايده لشعري لج تجننيني بخوفج مني تخبليني..
يربي شسوي ساعدني.. ابتعد الله يخليك والله اني ما متقصده ائذيك.. كعدت من الخوف رجليه ما شالتني..
خليت راسي بين رجليه وتكرفصت ابجي.. كعد لمستواي.. رفع راسي بأديه.. دموعي تجري..
تقرب لأذني و همس احبج وعاجبتني تزوجيني
-بعدت راسي منه وباوعتله.. اتزوجك شنو ابتعد الله يخليك
- لاتجبريني ائذيج.....يتبع
☆☆☆☆☆☆☆

متابعه ممتعه..❤
#زينب_ماجد
لاتنسو تابعو حسابي

حتى يجيكم اشعار من انزل القصه

لامارا · 16-04-19, 04:48 PM

#خطوات_نحو_الجحيم
////بقلم الكاتبه زينب ماجد////
الحلقه_3

تقرب لأذني و همس احبج وعاجبتني تزوجيني
-بعدت راسي منه وباوعتله.. اتزوجك شنو ابتعد الله يخليك
- لاتجبريني ائذيج..
-مسكني من ايدي حيل.. كمت على حيلي.. وكف وياي.. اخي ليش متفك عني ما سويتلك شي والله مو متقصده اضربك..
-لتخليني اتعصب.. كتلج اريد اتزوجج..
-يحجي.. ويجر بخصلات شعري.. ويشتم بيهن ويهمس بأذني..
-شلون اكدر اتزوجك.. ما اكدر فدوه وخر.. رجع يهمس
-حتى لو بس يوم المهم طلعي من نفسي..
-اخي.......قاطعني وهو يشيل حنكي بأيده حيل.. ويكوول.. اني مووو اخووووج.. افتهمي.. ولا تختبرين اعصابي اكثر من هيج..
اكدر بكل سهوله.. اخذ اللي بنفسي بهالحظه واطلع.. بس دا احترم لان مبينه انتي محترمه وصيدلانيه واعلاميه ووو...وغمزلي
-يا الله شلون بهذا اني منين طلعلي..يهمس ونفسه قريب مني.. حتى لحيته احسها بأذني تنغش.. ريحته ممزوجه بين العطر وجكاير
لعبت روحي منه.. حاول يعض اذني.. بعدته حيل.. دفعته ورحت اركض للباب..
بعدني اريد افتحه.. دفعني علباب حيل وسحب اديه ليوره.. بأيد وحده.. والايد الثانيه لزمني من شعري حيل..
ويكول الضاهر انتي مو مال عيني واغاتي..
-وخرررررر مني.. اكلك وخرررررر..
-كتلج اني رايدج ولتحلمين اعوفج..
-لك شنو لعبه عندك دوخر.. ما عندك خوات حرام عليك..
-كتله هيج.. من شعري.. ودفعني حيل للكاع وكعت.ليوره.. نزع حزامه بسرعه. ولفاه على ركبتي..
كمت الزم بالحزام.. واحاول ابعده واضرب برجليه واحاول اصرخ اختنكت. وهو يحجي
-بنت الكلب الضاهر انتي مال كتل واهانه مو مال احترام.. وخر الحزام ولزم شعري.. اني بس اكح واتنفس
حسيت واحد بالصيدليه صاح منو موجود هنا.. ردت اصرخ.. جرني من راسي حيل وخله ايده على حلكي..
احاول اوخر ايده.. ماكو.. لشوي فلتت ايده.. لزمني من شعري وسد حلكي وهو يبوسني.. لعبت نفسي منه كمت ارفس حيل..
لحد ما كدرت اوخر.. لزمني قوي من شعري وهمس لو سمعت نفس لذبحج .. حاول ينزع قميصه. كمت ابجي..
كمت اهز براسي.. لااااااا فدوه لاااا دخيلك.. شتريد اسوي بس لتسوي هيج.. اتزوج اتزوجك بس عوفني وابجي..
كام على حيله.. وجرني.. وكف كبالي.. اذن امشي كدامي
-لاااا مو هسه.. دخيلك.. ما اكدر هسه..
-اوك انتضرج لليل تخلصين البرنامج واخذج نعقد بالشقه.. وتنطيني اللي اريده والا قسما.. تشوفين شي بعمرج ما شايفته.
وخل يكون بعلمج.. اذا حاولتي تلعبين بذيلج.. محد يخسر غيرج..
-هزيت راسي.. ودموعي تجري. اول مره احس نفسي بهلضعف.. ليش خايفه هلكد.. مو كادره اضهر اي قوه.. احساس كرهت نفسي بيه
تقرب.. لزم راسي بأثنين اديه.. دنكت ابجي.. مسح دموعي بأديه.. انتضرج يحلوه..
وصدكيني مراح ائذيج.. طبعا اذا صرتي خوش بنيه.. بس اذا لعبتي وراي.. يا ويلج .. انتضرج.. غمزلي..
وشال حزامه لبسه.. وفتح الباب وطلع.. طلعت من بعده.. محد بالصيدليه.. كعدت ابجي حيييل.. دخلت مره عجوز..
طلبت دوه مال ضغط.. انطيتها.. سألتني شبيج خاله. كتلها مابيه شي.. سلمت وطلعت.. شسوي يربي..
لو اشتكيت عنه يضايقني.. هسه يطلب دليل واني دليل ما عندي.. اكول لاهلي.. اي اكول لاهلي شنو تايهتله اني.
بس خاف هذا ساقط.. يأذي اهلي..مخلد.. اي مخلد.. ماكو غيره.. اروحله احسن.. بس وين هو هسه واروحله.. ؟
خل اتصل بيه.. رحت لموبايلي ع الشحن كان.. اخذته ودكيت على مخلد.. الووو
-الووو هلا لجين تفضلي
-مخلد اريد اشوفك..
-هسه اني بالمركز مو بالبيت.. ليش شصاير.. اذا على سيارتج.. ف اليوم توصلج اكيد..
-مو قصة سياره.. لحظات واجيك للمركز وافهمك..باي
-هييي اصبري يا مركز شبيج تخبلتي تجيني المركز شنو.. كولي شصاير..
-شغله تخص حياتي.. وشرفي بالذات..مخلد الله يخليك ساعدني انته بمثابة اخويه. ما عندي غيرك
-لحظه شنو شرفج شنو حياتج انتي شجاي تخربطين.. جايج فورا.. انتي وين هسه..
-بالصيدليه..
-انتضري دقايق اخذ رخصه واجيج. لا اطلعين.
-اوك.. قفلته منه ودنكت راسي وضميته بأديه.. يارب عونك..
بقو يجون زبائن وامشي بيهم.. لهناك اتذكرت.. صدك.. خاف مالك يطلع مراقب الصيدليه.. و مخلد يجي بملابسه العسكريه وابتلي..
احسن شي اعزل واروح للبيت.. طفيت الصيدليه.. قفلت الباب.. دا اريد انزل الباب الحديد.. صفت سيارة مخلد..
باوعتله.. ورجعت.. انزل بالجدار..
مخلد... شصاير لجين
-قفلت الصيدليه ودرت اباوع منا منا.. ما اعرف.. كوم سيارات.. لا ادور يشوفنه. بس هم زين مخلد ما لابس عسكري..
درتله.. نصعد ونحجي..
-انتي شنو ناويه تخبليني.. تكليلي شرفي.. وهسه تكليلي نصعد ونحجي.. دحجي بسرعه فضيها دمي اشتعل نار من خابرتي لسه..
-عفته ومشيت السيارته. كام يغلط ويسب ويضرب برجله.. واجه صعد بعصبيه لج بت الاوادم فضيها احجييييي
-ليش تصيح.
-دار على الستيرن مالته. ضربه وشغل سيارته بحرگه وساق..
-راح تحجين لو تخليني اتخبل عليج.. واكلب السياره والله.
-وقف السياره بمكان خالي حتى اكدر احجي.. باوعلي وهو مخنز.. هز راسه ومشى حيل.. وكف السياره بساحه ودارلي..
-فورتي دمي ولعبتي باعصابي اذا متحجين صدك العب بيج طوبه والله.
-اكو شخص حاول يعتدي عليه .. حجيت قبل ليكمل كلامه.. قطع باوعلي وصرخ
-منوووو ...
-اخذت نفس.. ودمعت عيوني.. مخلد........
-شبيج ما تحجيييييين.. اتوسل الكلام منج تواسيل ..
-ما اعرفه مخلد ما اعرفه. دعمت رجال قبل ايام.. ونزل عليه رزايل بالشارع... ولم الدنيا عليه..
انطيته فلوس شكهم بوجهي.. وبقى يتحلفلي.. ودعمني بيومها وما اكتفى بقى يهددني يريدني اطلع وياه.. وتجاهلته
واليوم اجه للصيدليه حاول يعتدي عليه بس......جاي احجي.. ضربني راشدي.. رفعتله راسي بأستغرب ليش تضرب..
-انتي شتخربطيين..
-لزمني من ايدي حيل..
-شنو حاول يعتدي عليج شنو من ايام يهددج.. انتي ممخليه ابالج احد. من اتجرأ وهدد ما تعرفين تبلغينه.
-وخرت ايده مني.. هو صوجي اني كتلك.. ثق لو اعرف تاكلني الكلاب بالشارع ما اخليك تساعدني..
حاولت انزل.. لزمني من ايدي ويغلط ويسب.. هيج منج لا من اهلج تصعدين لو ا گلب الدنيا فوگ راسج.
جريت ايدي منه حيل ونزلت. نزل بسرعه ولزمني اصعدي لا تخليني اكفر بيج..
-ع فكره همجيتك كلش ما اطيقها وهذا اللي يخليني مستحيل اتقبلك..
-اسمعي لج.. تحجين شمخربطه وي هذا.. وتسولفيلي من البدايه للنهايه لا تخلين خبالي يطلع بهلضهريه ومسدسي هذه افرغه براسج واخلص منج والله..
-مخلد وخررر مني.. اني اروح اشتكي لشرطه ما احتاجلك..
-ولج احجي فورتي دميييي احجيييييي..
-اباوعله وجهه صار دممم والجو حار.. صعدت بالسياره.. ضرب الباب حيل.. هيه ضربه هي سده.
لا اله الا الله.. يربي ما يطلع بوجهي واحد صاحي كل مخبل شامره بطريقي.. صعد.. صاح احجي نشف ريگي والله.
كتلك حاول يعتدي عليه.. كمت ابجي واتوسله.. طلبني زواج عرفي.. واليوم بالشقه يريدني بالليل ..
-منين هذا
-مو كتلك دعمته..
-لا ما دعمتي.. هذا هو متعمد يدعمج. وسألتج منو دعمج.. رفضتي تحجين... ومهددج وساكته. شمنتضره مثلا تصخمين وجوهنه يلا تجين تحجين.
-مخلد اني مو طفله لا تكلمني بهلاسلوب رجاءا.. حاولت ما اكبر الموضوع شعرفني بي هيج يتمادى.
-انتي ما خربج غير ذوله اهل القنوات والبرامج لعبو بعقلج وانتي هنا براسج امدد حمار كلشي ما يفكر.. يردون يزحلكوج ويخلوج للعب وانتي مستمره وياهم.
-هم رجعت لسالفة القناة.. مخلد هلشي ميخصك.. واني ما اخصك. طلبت مساعدتك بدل ما اروح اشتكي للغريب
ف لا تكعد تحسب نفسك ملكتني لان طلبت مساعدتك.. افتهم اني مو ملكك.. ولا راح اصير الك فد يوم
حرك سيارته ومشى.. شسمه الكلب..
لجين - يا كلب
- استغفرك الله ويكلك ليش تكفر
-شبيك مخلد احجي عدل..
-الثور اللي يهددج شسمه افهمي عااد مخليه طلي براسج مو مخ .
-لا اله الا الله.. اخذت نفس.. مالك.
-رقمه عنوانه رقم سيارته ..
-بس رقمه عندي..
-بالصيدليه عدكم كاميرا.
-اي ليش
-خل نرجع ناخذ التصوير حتى نثبت بيها
-هو بالمستودع حاول يعتدي مو بالصيدليه.. خنزر وباوعلي ورجع يسوق بحركه.. طلع جكاير وكعد يدخن..
وصلنه الصيدليه.. نزل هو صاح.. المفاتيح بساع.. طلعته وانطيته اله. فتح الصيدليه. وراح للحاسبه
وصاح شغلي النعل متنا حر..
-درت.. شغلت التكييف.. وكعد هو على الحاسبه يدخن ويطلع بالتصوير.. صاح تعاااي..
-هااا
-هذا هو..
-اي هذا.. دا احجي.. دك موبايلي.. دا امد اخذه.. صرخ طفيييي..
-هاي شبيك.. تره خبلتني..
-مو تشوفين جاي ابحث.. طفي..
-اكلك صدك.. البارحه صارت عركه بين مالك ومؤيد يمكن موجوده بتصوير البارحه.
-وهسه اتذكرتي تكولين.. ليش تعاركو.
- هو اجه هنا وهم يحجي كلام سخيف وطلب اشياء سخيفه واجه مؤيد وتعارك وياه.
-اي وبعد شنو ضامه.. اذا حتى مؤيد يعرف ومتعارك واحنه نايمين على وجوهنه ورجلينه بالشمس
-يابه شلون طلعت روحي من عنده.. اعرفه اعصاب.. بس اول مره اشوف اعصابه على حقيقتها.. جدا همجي تصرفه لعب نفسي..
-بقى يبحث.. جمع المعلومات بسي دي.. واخذه.. ودارلي.. باعي.. راح افتح قضيه وبعده اروح للبيا اوديج .. يخابرج.. شيحجي وياج.. تسجليه..
بليل من يجي يريد ياخذج الزمه واستلمه...
واني اعرف شلون انعل الخلفه لهلكلب.. كومي هسه خل نروح و طلعه ممنوع افتهمتي.
-هزيت راسي.. ودرت اخذت جنطة ايدي.. وطلعت كباله.. سد الصيدليه وصعدنه كملنه ووصلنه للبيت..
ودخل حجى لامي وابويه كولشي.. بقى ابويه يحجي وعصبي.. كتله بابا شعرفني بيه هيج يتمادى..
بالشارع الف واحد باليوم يكسر عليه ويعاكس ويلاحكني وما انطي وجه يمل ويروح..
مخلد - تفتخر الف واحد... اخخخ لو بيدي.. حتى السوك ما تشوفيه ومحمد..
-صبرك يا اللهي.. درت منه وصعدت فوك.. اخذت ملابس ورحت سبحت.. دخلت للغرفه.. الموبايل يدك..
دا اشيل الموبايل.. كح مخلد ودك الباب.. فوووت..
-هو الجاي يخابرج
-هزيت راسي.. اي
-جاوبي وفتحي سماعه خارجيه..
-رديت.. وفتحت سبيكر.. الووو
-الووو .. ع الوعد يحلوه مووو حبيت اذكرج.. ومنها اسمع هلصوت الحلو هههههه
-اخذت نفس.. لزم ايدي مخلد.. واشرلي عود سجلي.. طلعت تسجيل وسجلت..وحجيت.. اتركني الله يخليك والله ما سويتلك شي..
-لا تحاولين تلعبين بذيلج.. وطفي التسجيل.. متخلصين الا تنفذين اللي براسي افتهمتي..
وخلي اكلج شغله.. واسمعيها عدل.. لو حاولتي تبلغين او تخبرين اي شخص.. ما تلومين الاااأ نفسج..
افترض ما اجيتك شتسوي..
-طفي التسجيل..
-تخاف..
-لا كتلج ما خايف.. بس اخاف احقد عليج. ومن احقد .. اجرم ..
-منين طلعتلي انته .. والله مو صاحبة مشاكل اني.. ولا من البنات اللي تعرفهم.. شعندك وياي لخاطر ربك
-تگدرين تكولين حب من نوع اخر..
-حب... انته شتعرف عني وتكول حب.. مالك اتوسل بيك اتركني.. لزمني من ايدي مخلد.. وهمس قفلي الخط..
مالك... وداد شلونها.. ان شاءالله بخير..
-فتحت عيني لمخلد... هو هم انصدم..
مالك... ماكو شي يخصج ما اعرفه..
- اشرلي مخلد بأيده قطعي.. قطعت الاتصال..
-هذا يعرفج..
-ومنين يعرفني.. ما شايفته گبل
　
-نحاول نعرف اليوم..
-دار وجهه.. يريد يطلع.. ورجع باوعلي.
-لجين
-نعم
-اني اسف..
-عقدت حاجبي.. على شنو..
-اني اعصابي دمار.. ومن اعصب افقد.. وفقدت وياج وحجيت كلام بتجاوز اسف..
-همم يلا مصار شي..
-اذا خابر خبريني..
-هزيت راسي اي.. صاحت ماما.. لجين نزلي تغدي.. صحت اي ماما..
-نزلت ومخلد كدامي.. يمشي بالبطرون والفانيله الداخليه.. لان نزع قميصه بمجرد وصولنه البيت.
نزلت اكلت شوي.. وما اشتهيت كمت.. صاح مخلد اني طالع اجيج ب8
-عندي برنامج اليوم.. من بعد البرنامج نلتقي..
-اي برنامج لجين.. بحال برنامج هسه.. هاي حياتج..
-وبرنامجي من ضمن حياتي..
-اتركي البرنامج اليوم.
-هو مو لعب جهال.. وهالشي مابي مناقشه. اني منطيه عقد لازم التزم.. بس انته كولي سيارتي شوكت تجي.
-الدنيا وين وانتي وين.. على هذا برودج.. سبي اهلي اذا فلحتي .. هاي حياتج يابه مو لعب انتبهي.
-ما رديت عليه.. درت وجهي وصعدت.. خابرت سرى.. حجيتيالها الموضوع..
-تحجين صدوك انتي..
-اي والله..
-وشراح اسوين..
-هو مجبوره اخلي مخلد يتصرف.. الضاهر هذا مالك مو بشر.. لج دمي جمد من طب عليه للمستودع اليوم..
الله وكيلج الا شوي متت..ادور خنگني..
-ديربالج منه يمعوده لا ادور يهرب وما يلزموه وشيخلصج منه..
-الله موجود.. ان شاءالله .. يلا اشوفج بليل..
-ان شاءالله باي..
-رحت لسريري.. نمت شوي.. ادور كعدت شسورت شعري ومكيجت وطلعت.. سيارتي بالباب وبيها سايق..
-منووو؟
-اني بعثني النقيب مخلد.. اوصلج للبرنامج..
-اهاا.. صعدت وياه دليته مقر الاذاعه.. وصلني.. نزلت للاذاعه.. دخلت.. سلمت هلااااو.
كلهم ردوو.. هلاوو.. صاح من وراي محمد.. هلا بالثكيل يابه..
-درت وجهي.. هلا محمد..
-شونج عيني
-الحمدلله..
-مجهزه امورج مو اطلعتي علموضوع..
-هزيت راسي..
-يلا لعد استعدي.. ما بقى نص ساعه للجو..
-اوك.. كعدت استعد للموضوع واجهزه.. بعدها انتقلت للاستوديو.. طلعت للجو.. على نص البرنامج.. اجه مخلد..
واني بالبرنامج.. مالك اتصل.. طفيت الجهاز حتى ما ارتبك بالجو ..
كملت من البرنامج فتحت جهازي. اتصل مالك..
-لج بس صوتج يخبلني.. شحال لو كلج يمي..
-سكتت.
-منتضرج اباب الاذاعه..
-نعم...
-موجود جوه ليش مستغربه..
-بس اني جايه بسيارتي..
-مو مهم .. منتضرج بسااع..
-قفل الخط.. درت لمخلد.. واقف جوه..
-وهو المطلوب.. يلا انزلي..
-دا اريد امشي.. صاح محمد..
-لجين..
-نعم..
-الحفله باجر مال الافتتاح .. اريدج موجوده اوك.
-دا اريد اكول ان شاءالله... سبقني مخلد.. وجر ايدي ويكوله مو وقتها..
نزلنه.. وقفني جوه.. كال ابقي هنا.. عرفناه.. خابر جماعته الزموووه..
-بقينه واكفين. هسه نطلع لو لااا..
-لحظه بس خل ينطوني خبر بالقاء القبض عليه. اتصلو عليه.. كالو لزمناه..
-يلا اطلعي.. خلصت لزمناه.
-طلعنه.. شفته من وره السياره كاعد لازميه.. ويطبك طوب يا نذل.. ندارلي مخلد وحجه..
-اني رايح وراهم للمركز.. انتي اخذي سيارتج ورجعي للبيت..
-اوك.. مشيت منه.. ورحت للكراج.. دا اطلع سيارتي..
محمد.... لجييييين..
-نداريت.. نعم...
-مخلد ابن عمج مووو
-اي
-طبعا لخاطرج سمحت يدخل للاستوديو.. لان ممنوع.. ياريت اذا اكو شي يكون خارج العمل..
-ان شاءالله..
-اكوول..
-هاا
-شبيج.. ليش مو على بعضج.. مضطربه.. وحتى علجو ما كنتي مرتاحه.. شفت التوتر باين عليج. اكو شي
-لا بس ضروف شوي..
-خير..
-لا ماكو شي.. بس بالبيت اكو شوية مشاكل..
-اذا ممرتاحه . عادي اخذي استراحه.. واني اخلي بديل عنج بالبرنامج على ما ترتاحين.
-لا ابدا.. مو قصة البرنامج.. بس كتلك ضروف..
-اهاااا.. اذا تردين شي او محتاجه.. كولي تره احنه اصدقاء لتنسين هل شي..
-والنعم منك.. طيب متقصر.. ربي يحفظك..
-يسلمج الله.. الا اكول باجر حفلة افتتاح القناة تحضرين وياي موو
-ما اعرف والله اشوف..
-حاولي تجين.. هم تغيير جو.. وهم اعرفج على فنانين ورجال اعمال يفيدوج بالمستقبل لو تقدمتي بالمهنه..
-ان شاءالله..
-يلا اخذي راحتج..
-الله وياك.. درت صعدت سيارتي.. اخذت نفس الحمدلله يارب خلصت من الكابوس اللي اسمه مالك..
حركت سيارتي ومشيت للبيت خابرت ماما.. رديت.. الوو..
-وينج يا بنتي بقلبي النار عليج ليش متجاوبين.. عجزنه اني وابوج نخابر وماكو..
-ماما جنت بالبرنامج والموبايل صامت ومنتبهت على المكالمات..
-شصار وي هذا النذل
-انمسك.. لزمه مخلد.. وراحو..
-اييييييه الحمدلله.. شلون لزمتو..
-ماما دا اسوق هسه.. من اجي اسولفلج بالتفصيل..
-هاااا لعد اخذي راحتج حبيبتي انتضرج..
-تحتاجين شي من بره ماماتي.. مشتهيه شي..
-والله هي خميس والسهره حلوه.. اني مسويه كيكه.. بس انتي جيبي كرزات..
-ادللي من عيوني حياتي انتي.. بااي.. مشيت وصفيت يم محل لبيع الكرزات.. اخذت نص كيلو وطلعت للبيت..
وصلت..صفيت السياره بالكراج.. دك هورن بابا.. ودخل وراي بسيارته.. بقيت واقفه منتضرته يصف وينزل..
نزل.. رحتياله.. وحظنته.. حبيبي..
الاب....خابرت مخلد وكال لزمو ..
-اي لزموه
-باباتي درس الج شيصير وياج تجين تحجيلنه.. يعني هس لو مأذيج كان شسوينه احنه..
-بابا شعرفني راح يتمادى هلشكل.. كلت ما اسوي اكبر القضيه واتجاهله حاله حال غيره بس هذه طلع نذل..
-الحمدلله خلصنه منه. يلا بابا.. فوتي..
-هاي شجايب
-كرزات لامج..
-ههههههههه واني هم جبت.. وصتك..
-لا والله ما وصتني بس اعرف هي تحب تكرز بليل واليوم ليلة جمعه وسهر.. كلت تتونس بيهن..
-فديت ابو الاحساس باباتي ههههه .. دخلنه لماما.. كعدنه يمها وسولفتلها على مالك من الطئطئه للسلام عليكم..
من ضربة السياره للان.. حتى ما صعدت لغرفتي بقيت وياهم.. كاعده اسولف وادردش.. دار بابا فيلم تايتنك.. على النص
ولا ينمل هلفلم.. رغم شايفينه الف مره.. ونرجع نباوعه. نباوع وناكل كيك ونكرز.. خلص ب12 ونص
بابا كال اني رايح انام.. امي لحكته.. باوعت الغرفه الكلاصات والمواعين بمكانها..
اي وداد خانم اكلت وراحت للبابا.. نگوم انضف احسن.. نزعت القميص وبقيت بالبدي التعلاكه..
نظفت الصاله.. خابر مخلد.. رديت.. الوووو
-هلا لجين
-هلو مخلد.. بشر
-هو لزمناه وكعدت وياه تحقيق ابن الكلب ابد ما نطق كلمه ضربنه ردنه ابد ما حجه.. شمروه بالتوقيف..
لباجر استلمه تعذيب وانعل الخلفه والله.. حتى على سالفة الحادث احقق وياه لان متعمد هذا..
-ان شاءالله..
-اخذي راحتج بيباي..
-باي.. قفلت منه.. ورحت نظفت المطبخ وصعدت سبحت.. طلعت.. للغرفه نشفت شعري ومشطته.
دورت تلفزيون كولشي مابيه.. نزلت للمكتبه.. فتحتها اريد كتاب اقرا بيه.. ادور شختار كتاب حكايات لو علمي .. لو ديني..
اممممم اخذت كتاب خاص بالروايات.. كمت اكلب بيه انواع القصص .. حب ورعب وجرائم.. شختاااأاار..
لفت انتباهي قصه رعب.. اسمها الجحيم.. كلت خل اقرا رعب.. اني شوي خوافه.. بس عندي فضول بالرعب احب اقره بيه رغم خوفي..
اخذت الكتاب وصعدت لغرفتي.. عليت المكيف تبريد.. وطفيت الضوه.. وشغلت تيبل لامب..
تمدد علسرير وتغطيت وكعدت اقره.. الروايه كانت تتحدث عن فتاة زوجها متعصب ويقتلها كل يوم..
الى ان فقدت فد.يوم ونهالت عليه بالسكين وقتلته. ومن خوفها دفنته بالبيت.. وكالت انفقد.. بس بعدين كامت تحس بروحه..
الى ان كامت تتخيله على شكل نار.. بروح شريره.. ف تسمي الجحيم وهو من يجي.. ما ينطق غير كلمة الجحيم..
لعب عليها بالبيت.. ودمرها تحاول تشرد ومقيدها كامت تشوف اشباح كثيره بالبيت.. قصه مرعبه جدا..
كمت اقرا واتلفت.. اتخايل روح الجحيم بغرفتي من كد ما مندمجه بالروايه.. بقيت كاعده اقره لل4 الصبح
وصلت لمقطع.. دتهرب وطلع شبح الجحيم بوجها صرخ..
وي ما قريت هذا المقطع.. انطفت الكهرباء وصار صوت كلش قوي .. من كد خوفي شمرت الكتاب وصرخت..
سلاما قولا من رب رحيم.. يا رب شنو هذا الصوت.. معقوله جن.. استغفر الله شنو القصه.
كمت اتلمس واحاول اكوم.. ادور علموبايل ضلمه ماكو شي.. ومن اتضرب اتخايل جن واصرخ..
عفت الغرفه من الخوف وطلعت.. وكفت اباب غرفتي.. البيت اظلم.. زين ماما وبابا مسمعو الصوت السمعته.
متأكده انفجر شي مدري طك.. شنو معقوله اتخيل.. اسمع خطوات بالبيت.. صحت ماما هاي انتي..
مشيت.. بابااااا... ماكو رد.. خطف شي من يمي.. جمد دمي من الخوف يا الله اني اتخيل لو صدك.. مديت ايدي لوجهي معقوله دا اتحلم.
دا الزم خدي.. وما احس الا ايد انخلت على حلكي وانلفت الثانيه على جسمي.. تقيدت.. احاول اصرخ اوخر ماكو..
انسحبت للغرفه.. وانضربت للحايط.. ردت اصرخ.. صم حلكي ... كولشي ما اشوف شي غير خيال شي ضخم جدا.. لو انذبح ما يطلع مني قطرة دم.. علخوف البيه..
جسمي من فوك لجوه يرجف.. قلبي دكاته 10 /10 ..
مالك... تتوقعين اتركج بهالسهوله.. كتلج لتحاولين تلعبين وياي.. اكبر واحد ما يكدر يسجني.. افتهمتييي.....يتبع

☆☆☆☆☆☆

يعينها الله على الجحيم.. 😔

لامارا · 16-04-19, 04:50 PM

#خطوات_نحو_الجحيم
///بقلم الكاتبه زينب ماجد///
الحلقه_4

ظلمه ردت اتلمس خدي.. دا اريد اشوف اني بواقع لو حلم... ما احس الا ايد انخلت على حلكي واتلفت الأيد الثانيه على جسمي.. قيدني..
احس عيوني طلعت ليبره..احاول اصرخ اوخر ماكو.. احساس بين الرعب والخوف المرهب
للحظه انسحبت بخفه للغرفه.. وانضربت للحايط... كولشي ما اشوف غير خيال شي ضخم .. واسناني تضرب سن بسن تحت الايد اللي مقيده حلكي..
لو انذبح ما يطلع مني قطرة دم.. ع الخوف البيه.. جسمي من فوك لجوه يرجف.. قلبي دكاته 10 /10 ..
مالك:- تتوقعين اتركج بهالسهوله.. كتلج لتحاولين تلعبين وياي.. اكبر واحد ما يكدر يسجني.. افتهمتييي.....
لجين :- اني سمعته مالك لو راد يوكف كلبي .. شهكت من كل گلبي ومن الصدمه والخوف انسحنت روحي وتخربطت.. وما حسيت بعد شنو صار
لحظات لو شكد ما اشرح رعبها.. مستحيل اوصفها.. اصعب شعور عند الانسان.. لما يفقد امان الامان..
لما صحيت كان طالع الفجر.. اخذت لفه بعيوني على سقف الغرفه لحتى اتذكر شنو صار بيه.. واسترد ذاكرتي من نومي
اتذكرت مالك.. فزيت من مكاني فور تذكري لهذا الاسم.. باوعت ...اني فوك السرير..
على الجانب اللي كنت نايمه عليه البارحه.. بالضبط ..
شجابني هنا كنت واكفه يم الباب..
.. باوعت كتاب الجحيم بالكاع.. اخذته گلبته يمنه يسره..
رجعت انظر للغرفه.. شجابني للسرير.. ؟
اخر شي ممكن اتذكره هو سحبني ووكفني يم باب الغرفه.. اللي يبعد عن سريري تقريبا متر ونص..
باوعت الغطا ملتف على رجليه.. لما منزله اقدامي من السرير.. اني كنت احلم لو شنو.. اني متأكده شفت مالك..
بس وينه ؟؟
وخرت الغطا من رجليه وكمت ابحث عن موبايلي.. يا اااااااااااللله وينه..
ابحث بغرفتي ماكو.. وكفت متخصره.. انوب شلت شعري كلبته ليورا.. وبقيت افكر يا الله معقوله مالك اجه لهنا..
زين والبارحه اللي شفته اخذوه بالسياره.. اني متأكده هو.. مستحيل يكدر يطلع .. مخلد قبل لا انام كال هو بالسجن..
رجعت ادور موبايلي كلبت فراسي ماكو...انزل اخذ موبايل امي واخابر مخلد بسرعه.. نزلت ركض ع الدرج حافيه امي.. واكفه تسوي ريوك لبابا.. وبابا كاعد يحجي وياها..
بساع حجيت ماما وين موبايلج.. فزو ثنينهم وبقو يباوعون عليه..
الام... شبيج ماما يا ستار خير..
الاب.. بيج شي باباتي.. شبيج من الصباحيات مرعوبه
-انتو ما سمعتو صوت قوي مثل الانفجار البارحه والصوت اللي بالبيت.
الام... يا انفجار يا ستار.. كلشي ما سمعنا
-شنو يعني ما سمعتو البارحه مالك دخل للبيت واني سمعته .. يحجي
الاب... يا مالك هذا
-اوووووه بابا مالك اللي اشتكيت عليه لتخبلوني اني البارحه سمعت صوت مرعب مثل الانفجار بالبيت وفزيت.. وبعدها مالك صعدلي للغرفه.. وسمعت صوته والله سمعته
الاب... بس اهدئي باب كولي يا الله.. وداد انطيها مي .. هسه اخابر مخلد وافتهم منه..
-مسحت على وجهي واني احاول اشيل بشعري واشمره.. وامشي منا ومنا... بابا افتح سبيكر دا اسمع وياك..
فتحه.. ديرن.. رد مخلد.
مخلد:- الو هااا عمي ..
الاب:- صباح الخير ابني.
مخلد:- صباح النور
ما تحملت هلرسميات واني دمي محترك اخذت الموبايل من ايد بابا وكتله من رخصتك ... الووو مخلد..
-هلا لجين صباح الخير
-اكولك هذا اشوون طلع
-منو ؟
-يعني منو غير مالك.. انته مو سجنته البارحه شلون طلع..
-محد مطلعه وموجود بالسجن..
-مستحيل اني متأكده شفته. والله شفته وسمعته هم مو بس شفته
-لجين سهرانه البارحه.
-اي ليش..
-اي يا عيني هاي من وره السهر والتعب والتفكير بهالحقير تحلمتي بي
-مو حلم والقران مو حلم اكولك متأكده سمعته باذني هاي مخلد والله صدكني
-لج بابا شتحجين الرجال مسجون ... انجنيتي انتي وله شنو
-اه والله انجنيت.. اوك مخلد باي..
-لج لاا موووو قصدي هيج لجييييي....... قطعت الخط بوجها وانطيته لبابا..
-تأكدتي ؟
-لا .. متأكده الشفته مو حلم والله مو حلم صدكوني بابا والله شفته.. خليت اديه على عيون وكرفصت ابجي وانتجيت ع الكاونتر..
دنكت ماما تسكت بيه.. وبابا صاح سمي بسم الله يا بنتي شبيج تعوذي من ابليس وكومي صلي واتركج من التفكير بهذا الوسخ.
رفعت راسي.. يعني للان انتو ممصدكيني.. وتعتقدون تفكير مو حقيقه؟!!!
-ماما حبيبتي شلون يفوت للبيت بدون ما نحس عليه .. وبعدين الانفجار السمعتي لو صدك جان احنه هم سمعنه شي بس كولشي ما سمعنه..
بقيت اباوعلها.. وكمت من يمها بدون ما احاجيها.. رحت لباب الكليدور دا اشوفه مكسور.. باوعته كولشي مبيه..
رحت لباب السطح كذلك.. رحت لباب بلكونة غرفتي.. غرفة ماما وبابا البيبان اللي بالبيت كلها اقفالها ممكسورات وسليمات..
اذن شلون دخل مالك.. ومنين.. طيب الصوت القوي السمعته شنو ؟؟ رجعت الغرفتي اباوع اتلفت بيها..
زين شجابني بمكاني منومني.. معقوله مالك شالني ورجعني لفراشي وغطاني . چچ چچ چچ مستحيل
هذا لو صدك لازمني كان اقل شي يسويه يعتدي عليه.. ناقص هذا اعرفه.. بس ملابسي هيه هيه ولو صايرلي شي كان حسيت..
معقوله نمت لما جنت اقرى الروايه.. وكمت اتخيل مالك اجه مثل الجحيم بالروايه.. ؟!!
بس اني متأكده سمعته يا الله شديصير ويايه.. دا احجي.. دك جهازي.. باوعته بالكاع جو الجربايه واكع..
هذا الموبايل شوداه جوه السرير.. جريته خلصت الرنه... مخلد ...صدك اتذكرت اخر مكالمه البارحه مخلد خابرني بليل ورجعت خليته على الميز..
طيب البارحه من دورته بالظلمه ليش ما لكيته.. معقوله جنت احلم صدك.. رن الجهاز مره لخ.
هم مخلد.. رديت.. الووو
-شبيج لجين شصايرلج من صباح الله
-ما اعرف مخلد دايخه فد مره.. متأكده اني شفت مالك البارحه..
-وين شفتي بغرفتج..
-اي
-لجين ثقي بالله العظيم مالك بالتوقيف.. خابرت الشرطه وتأكدت منهم كالولي سيدي موجود بالتوقيف..
-زين واللي شفته..
-تعب وارهاق وتفكير.. الضاهر كنتي تفكرين بي هوايه.. وخايفه لهذا حلمتي بيه..
-ما اعرف والله ما اعرف مخلد..دخت..
-ارتاحي واليوم جمعه ما عندج شغل.. استرخي ولتطلعين وريحي اعصابج..
-اوك ان شاءالله..
-يلا اخذي راحتج..
-مع السلامه... قفلت الخط.. اخذت نفس .. سمعت ماما تصيح من جوه لجين ماما متنزلين..
صحت اي حبيبتي نزلت هياتني.. كمت من فراشي نفضته وعدلت الفراش وطلعت .. وكفت اباب الغرفه..
غمضت واسترجعت ذاكرتي.. وكأن اسمع الخطوات اللي مرت مني.. اتذكرت لما قيدني وسحبني للغرفه
بقيت استذكر.. ضربات اسناني ع بعض والعطر اللي بأيده.. عطر رجالي مخلوط مع ريحة جكاير بأيده..
لما اتذكرت ريحته وملمس ايده ع شفايفي قشعر جسمي و فتحت عيوني .. دموعي نزلن..
يربي كل هذا اللي اتذكره حلم.. حتى عطره دا اتذكره.. اذا هذاحلم لعد الحقيقه شلون تصير .. ؟!!!
مسحت دموعي واستنشقت نفس.. ورحت للحمام غسلت وجهي ومشطت شعري وغسلت اسناني ونزلت..
مشيت لامي كاعده بالهول..
الام.... عاشت ايدج حبيبتي منظفه البيت البارحه.. نزلت لكيته يلهث..
-ابتسمت ورحت لحظنها اخذت اديها وبستهم وتمددت على رجليها والله ماما اني مقصره وياج
المفروض عندج بنيه وترتاحين بجالي واني اللي اشتغل بمكانج بس شسوي اتعب واجي الكاج مخلصه الشغل كله..
- يداده هههههه تفكر بيه الحلوه.. انتي بس ارتاحي اني ارتاح وقابل شعندي واتعب يا ماما..
اشو النهار كله على التلفزيون والبيت ما يتوصخ غير من تراب الجو.. لا عدنا الطفل اللي يوصخه ولا ابناء هوايه ويهوسون..
امل واكسر الملل اكوم اتلهى بالطبخ. واتفننلكم بالطبخ.. شسوي وين اروح..
-شلت راسي الها.. طيب شرايج الكالج شغل
-لا يداده ششتغل .. ابوج خطيه يجي تعبان يريد لكمه طيبه فراش نضيف ملابس معطره..
اذا اشتغلت منو يخدمه..
-يوم ما تملين وانتي تخدمينه لابويه. متحسين بيها ذله هو يطلع ويشوف الدنيا وانتي هنا.. مرات احسدج على الطاقه العندج اللي تخدمين بيها بابا..
-لا يماما قابل هو من يطلع وين يروح غير هم يشتغل حتى يعيشنه عيشه زينه وميخلينه بعازه..
حقه عليه من يشتغل بره اني اشتغل ابيته هو يأمن راحتي واني امنله راحته احترام متبادل..ولو ابوج لو اخدمه بماي عيوني هم ما اجازي..
الرجال الغيره جان تزوج عليه من زمان في سبيل الخلفه..
واني بنفسي لحيت عليه يتزوج .. وما قبل يكلي اني اقهرج على مود خلفه.. وهاي يا خلفه تستاهل اقهرج عليها.
عدنا لجين مثل الورده نشتم بيها تسوه الدنيا..
-ههههههههه هلكد تحبون بعض..
-هو الهوى الاشتمه شبعت اطنان كتل يله اخذته
-من جدو
-لا من خوالج ميقبلون بيه.. لان جانو يعرفون بيه يسكر ويمشي وي شقاوات بالمحله..
-وبعدين شلون وافقو
-هو سعى واخذ مختار المنطقه وناس خيره ووكعو على الحجي جدج.. وانحرج وقبل بالزواج بعد ما شافوني اني رايدته..
-تدرين شكد اتمنى اعيش حالة حب والكى اليحبني نفس بابا..
-مو الا حب يا بنتي.. مو كل حب ينجح.. مرات الحب يتحول جحيم.. بعد الزواج
-ليش
-لما طرف يخفي حقيقته ويضهر فقط الجوانب الجميله من شخصيته بعد الازواج ينصدم بالطرف الاخر بشخصية الشخص اللي حبه
او احيانا الحب يسبب عمى.. فيكون الواحد اعمى عن صفات السيئه بالشخص اللي يحبه وهذا اقسى شي ممكن يتعرضله الانسان.. يبقى يعيش حياته بلوم
.......بعدين نفضتني منها وكالت كومي اكليلج لكمه حبيبتي لتبقين هيج..
كمت منها ورحت للمطبخ طلعت جبن ناشف قطعت منه شرائح خليت بصمونه وقطعت نص خياره هم..
ووكفت اكل..
-لا تاكلين وانتي واكفه بنيتي حرام.. اكعدي
-جريت الكرسي وكعدت.. شفتها اخذت الخياره وقطعتها شرائح رقيقه..
هاي شدسويين؟
-اريد ابلل وجهي بمي ورد واخلي الخيار على عيوني احس بشرتي تعبانه.. وسواد جوه عيوني صاير قوي
-اييييييون هههههه وخرت اللفه خليتها على الميز.. وكتلها ماما اني هم اسوي..
كالت كعدي.. جابت قطن.. ومي ورد.. بلت ومسحت وجهي بخفه ورجعت راسي لوره وخلت خيار على كل وجهي..
تحنطت هههههع.. طيب يا ماما شغلينه شي على الاقل ننطرب و نسمع مو بس متحنطين..
اي اي ماشي.. شغلت موبايلها وربطته بأم بي ثري.. صغير مثل الصندوق مخليه يم الأوفن ..
شغلت يم داركم .. وكامت تغني وياها بصوت مسموع.. وسدت باب المطبخ حتى لا يطلع صوتنا ليبره..
وتنشد بصوتها.. والتمت بروحي المحنه واشتهيت اخباركم... واني اصيح الله الله..
بقت تقرقل يمي ودندن وي الاغنيه واني مرجعه راسي والخيار بوجهي.... يوم شكد ابقي على وجهي
-فد ثلث ساعه
-بقيت نايمه بمكاني واتنفس بأريحيه حتى ترتاح بشرتي.. ما اعرف واني على كعدتي غفيت..
احداث قصة الجحيم بذهني صرت اتحلم بيها مثل الطيف اتخيل احداث الروايه.. للحظه تخيلت وجه مالك بالجحيم ..
انتفضت من مكاني بسرعه وفزيت.. وكع الخيار من وجهي على حظني وبالكاع.. بقيت اتلفت يمنى ويسرى..
ماما على الكرسي الثاني مخليه خيار ومرجعه راسها.. ودندن..خليت ايدي على قلبي يدك بسرعه.. سلام قولا من رب رحيم..
هاي ليش هيج اتخيل مالك بالجحيم... وليش هو ابالي واتحلم بيه كلما غفيت.. يعني البارحه الشفته اكيد كان حلم..
يا الله ليش اتحلم بيه.. احسه كابوس يملي عيوني كلما غفيت.. مراح اخلص منه .. خليت ايدي على راسي يوجعني حيل..
سحبت شرائح الخيار البقيه اللاطشه وتوجهت للحمام.. غسلت وجهي.. صاحت امي بمي ورد غسلي مو عادي لجييين..
مهتميت.. بقيت اغسل من الحنفيه .. رفعت راسي للمرايا.. واني ارفع شعري.. يربي شديصير بيه..
بقيت اركز بوجهي.. عيوني ذابلات.. بقيت افرك بيهن..سحبت الخاولي.. نشفت وطلعت.. ماما بعدها بمكانها..
حجيت.. ماما اني ح اصعد لغرفتي ارتاح شوي..
-ما اتريكتي لجين اللفه مالتج على الميز..
-اكلت لكمتين ما اشتهي اكثر.. عفتها وصعدت.. اخذت موبايلي.. وخابرت على سرى.. دك
-الوووو
-الو هلا سرى
　
-هلا حبيبتي لجين..
-بالبيت انتي
-بلي بالبيت ليش؟
-اوك ح اجيج..
-التقيج بالمطعم عادي .. بالبيت صايرين هوسه تعرفين اخويه جاي من السفر وخواتي ملتمات..
-اوك.. ااا زين لحظه.. تعالي انتي لبيتنا..
-لا ما اكدر والله لوله..
-اوك حبي.. قفلت الخط منها.. لبست بنطرون ثلجي وتيشيرت اسود نص ردن.. ولميت شعري لفوك..
واخذت الموبايل والجنطه وطلعت بالسياره للمطعم.. الشارع ازدحام ووقت صلاة الجمعه..
كوه طلعت ووصلت للمطعم.. دخلت بحثت عن سرى لكيتها كاعده بزاوية اليمين.. رحت يمها
تباوسنه وكعدنه.. شلونج
-ولله زينه انتي شخبارج..
-شخباري يمعوده.. مبتليه بهالجحيم اللي نزل على راسي بلوه..
-قصدج مالك..
-اي الغضب مالك..
-مو كلتي انسجن..
-هو انسجن .. ومخلد يكولي بالسجن.. بس...... اخذت نفس عميق.. فركت وجهي
-بس شنو ؟
-سرى دا اشوفه وكأنه حقيقه..
-شلون يعني
-ما اعرف شلون اوصفلج.. البارحه كنت اقره روايه وطفت الكرباء وسمعت صوت بالبيت.. اني اتذكر هالأمر كلش زين..
وشخص ضخم مسكني حيل وصم حلكي.. وحجه وسمعته والله مالك بنفسه.. ما اتذكر بعدها شصار..
اتفاجئ اكعد الصبح الكى نفسي بمكاني على السرير و ونايمه وكلشي طبيعي ولا كأن احد دخل .. وكأن الصار حلم..
بس ما اعرف.. اني متاكده سمعته واتذكر الصار مو معقوله احلام..
-زين هسه مالك وين ؟
-اخذت نفس عميق وضربت على الطبله خفيف.... بالسجن
-طيب اذا بالسجن شلون متأكده من اللي شفتي حقيقه.
-وهذا اللي مدوخني سرى.. رجعت فركت وجهي بثنين اديه بتعب..
سرى:- لتهتمين يروحي انتي تعبانه اكثر من اللازم.. وصاير عندج ضغط نفسي مسببتلج كوابيس مخيفه وتوهمج ان هي حقيقه..
بس هذا كله من تخيلات العقل الباطن لا اكثر بسبب التفكير المستمر والاجهاد..
اجه النادل قدم عصير ثنين كوكتيل.. قربت عصيري .. ورجعت اباوع لسرى..
لجين:- وبعدين سرى تعبت والله
-ارتاحي ..
تحجي وتشرب وتباوعلي من اطراف عيونها..
-ليش اني شنو مسويته.. اني مرتاحه بحياتي بس هل كلب دخل وگلب حياتي فوك جوه الله لا ينطي منين طلعلي..
-اخذيلج اجازه وابتعدي منا روحي سافري تونسي غيري جو.. مطاير الشغل.. اطلبي اجازه من محمد ميكول لا .. و مؤيد هم خوش ولد..
-لا خطيه محمد.. كالي البارحه اذا تردين ارتاحي.. وحتى مؤيد ما عنده اشكال.. بس ما اعرف.. دايخه مو بنفسي اسافر ابد..
-والحل..
-فتحتلها اديها وملت راسي وسويت حركه بحلكي.. ما اعرف..
-شنو برنامجج اليوم.
-جمعه اليوم ما عندي شي.. بس محمد عازمني على حفلة افتتاح القناة.. انتي موجوده بيها مو
-اي موجوده من ضمن الكادر ان شاءالله.. يعني ح تجين على الحفل..
-والله هو اني تعبانه نفسيه.. بس اعتقد احظر..
-اذا تحظرين هم يلا تجهزين نفسج.. من 8 الحفل يبدي
-خل اخابر محمد.. لحظه.. اخذت الموبايل وخابرت المخرج.. كال اني امر اخذج بسيارتي كتله اوك..
قفلته وباوعت السرى ماكو..منتبهت كامت من مكانها واني اخابر.. بقيت التفت.. شفتها اجت من جهة الحمام وتخلي موبايلها بجيب بنطرونها..
تقربت يمي حجيت...
لجين:- هااا
سرى:-رحت للحمام شوى وخابرت امي.. لازم اروح.. شالت جنطتها
-اوك حياتي.. اذن اشوفج بالحفله
-ان شاءالله..
-بوستها ورحت لسيارتي.. شمرت جنطتي.. وفتحت مكيف والراديو.. طلعت اغنية الجسمي.. والله ما يسوى.. عليتها وبقيت اسوق..
وصلت للبيت.. بابا جان موجود.. بوسته.. سلم عليه وكال شلون صرتي..
-الحمدلله زينه..
الاب:-وين جنتي.. سألت امج عليج .. اليوم مو ما عندج شغل..
-اي ما عندي طلعت شفت سرى شوي.. وبليل عندي حفله.. مدعوه على افتتاح قناة جديده..
-خير ان شاءالله بنتي
-ان شاءالله.. كمت من الكرسي.. صحت .. ماما ح اصعد
انام لل4 كعديني
الام:- تغدي واصعدي يا بنتي
-ماما لتخافين عليه اني سيارتي معبيتها بسكت اسوق واكل.. ف لديرين بال
-اي يا امي البسكت شيشبع.. ما يلزم ضلعج..
-ههههه ماماتي اذا بقيت عليج اصير هلسمني وتالي انطرد من الاذاعه هههههه
-وطردتهم محتاجتلهم انتي يا ماما.. وراج طلوك وراج ضيم هلنمنمات متقويج يا امي..
-شمرتلها بوسه بالهوى وصعدت.. دخلت سبحت ورجعت للغرفه نمت..
لل4 دخلت امي تكعدني .. فزيت على ايدها.. وارتجيت على حيلي وكمت..
فتحت كنتوري هاي بيا فستان اروح.. اكلب بيهن وعاقده حاجبي توني كاعده من النوم وما لاكيه شي اروح بيه..
لا يا الله يعني لازم اروح للسوك.. اووووف مو وكتها كلشش..
مشطت شعري.. ولفيته ولبست اي شي.. ود اطلع.. فتحت الجنطه اتأكد منها.. 7 اتصالات ورساله لمخلد..
يا ستار يا ربي شنو الصاير.. فتحت الرساله (لجين فتحي خط ضروري)
رجعت خابرته مغلق.. رجعت خابرته مرت الخ . مغلق.. چچ شصاير وهيج مخلد مخبوص.. اخر اتصال منه ب3 الا خمسه.. شلقصه
اخذت جنطتي ونزلت.. احاول اخابر مغلق.. خابرت على عمتي گرجيه.. كتلها مخلد اجه
كالت اشو تأخر ما اعرف اني هم اخابر عليه مغلق.. يوميه ب3 وعشره هو يدخللنه.. ب3 يحل من دوامه..
لجين:- عفيه عمه اذا اجه او خابرج خل يخابرني.. قفلته منها وباوعت لامي تباوعلي
الام:- هااا..
-ما اعرف مخلد متصل 7 مرات واني نايمه والموبايل بالجنطه ابد مستفقدته من اجيت من بره.. وداز رساله يكولي ردي ضروري واتصل ومغلق..
-لتهتمين خاف خلص شحن شوي ويرجع يخابرج خلي تليفونج قريب منج..
-ان شاءالله.. يلا باي.. اخذت جنطتي ورحت للسياره وموبايلي خليته يم الكير حتى اذا دك اشوفه..
رحت لمركز تجميل..صعدت لطابق الازياء.. اختاريت فستان باربي لون بيج ومطرز بخرز ناعم .. كولش نازك..
اخذته البنت وتوجهت لطابق الحلاقه والمكياج.. اول شي سوتلي تنضيف بشره وترطيب.. وبعدين رسمت المكياج..
مكياج سهره دخاني بيج.. وعليه رموش صناعيه خفيفه.. عرضت عليه عدسات.. كتلها لا لأن اصلا عيوني ملونه وفتحت اكثر بالمكياج..
كل الوقت بالي يم الموبايل.. ابد متصل مخلد.. خفت لا صاير شي ودينبهني منه.. معقوله شي يخص مالك؟؟
فكرت اتراجع عن الحفله لان حيل خفت.. بس اتصالات محمد عليه وهو يسألني خلصت لو لا انحرجت ..
كلت اخابره يجي ياخذني من الصالون ويرجعني للبيت بأيده شيريد يصير .. عفتها على الله..
خابرت محمد كال اوك نص ساعه واني يمج.. الكوافيره خلصت تسريحتي.. برمتلي شعري ورفعته رفعه نازكه بخفه..
ونزلت كم خصله على عيوني وعلى اذاناتي.. طلعت عطر.. ورشيت.. خلتلي سواره رفيعه كرستال بزندي
لبست حذائي كعب عالي بمسار انيق.. والساعه ايضا كرستاليه. وخلصت.. طلبت مني تخليلي وشم لصق على كتفي.. كتلها شكرا ما احب الوشم
لحظات واتصل محمد.. كال اني جوه.. لبست جاكيت تأجير من عدهم.. ونزلت بيه..
شلت بداية الفستان ونزلت.. طلعت لمحمد.. بقى متصنم بمكانه واني بالي كله بمخلد واتصالاته.. بساع كتله هاي شبيك يلا..
محمد:- تدرين اليشوفج حلال عليه يطلك 10 نسوان
لجين:- ليش
-والله ما تخلين عقل براس احد انتي ..
-هااا هههههه عبالي مدري شكو.. ديله يمحمد.. من غير هيج اني خايفه ومرتبكه ..
تقرب فتح السياره واخذ ايدي وساعدني اصعد.. وسد الباب.. ودار صعد من مكانه.. وكعد.. وحجه
محمد:- ليش خايفه.. من الحفله لو من شنو
لجين:- ما اعرف بودي ارجع ما احس اني بحاله اكدر ادخل حفله حيل متوتره ومضطربه.. ارجع احسن مو..
التفتلي
-تحجين من كل عقلج.. متأنقه بهشكل وما اجملج وترجعين للبيت تمسحين كولشي وتنامين
-بلعت شفايفي حيره.. وبقيت اباوع على الشارع.. لحد ما وصلنه لقاعة الحفله.. صف محمد ونزل فتحلي الباب اخذ ايدي ونزلت..
باس ايدي ودنكلي
-اهلا بكِ يا مولاتي الأميره..
-هههه محمد بطل سوالفك عاد.. من غير غزلك اني متوتره..
انطه سويج السياره لشخص اخذ السياره.. وخله ايدي بأيده.. ودخلنه الحفل.. نزعت الجاكيت انطيته.. ودخلنه..
سلمنا اني وياه على مدير الحفل ومؤسس القناة والكادر.. سرى كانت من بينهم هم سلمت وضحكت بوجهي..
وكفنه شوي و بعدها كعدنه اني ومحمد على طاوله كان اكو مطرب يغني ومدير المؤسسه يقص بالكيكه كبيره كولش على كد الطاوله
ومكتوب عليها اسم القناة وقفو يقصصون كيك وحفل.. المخرج محمد كام من عندي وراح لمدير المؤسسه وبقو يحتفلون ويتناقشون ..
اجه المصور علي كعد كبالي.. كتله ها علي ..
-گلنه نگعد يمج اذا ما بيها زحمه..
-هههه هلا بيك.. درت وجهي على الحفل واللي يرقصون اجت سرى شاورت علي.. كام بسرعه وراح..
حجيت... شكو..
الاستاذ محمد طلبه.. ديتفقله على شغل بالقناة ..
-هااا...
-حلو الحفل مووو
-كولش حلو.. وراقي..
-وين مكياجج يخبل..
-انطيتها اسم المركز..وانوب سألتني على الفستان وبقينه نحجي..
سرى:- بعدج متوتره
لجين:- قبل لا ادخل الحفل اي.. بس هسه لا الاجواء حلوه.. بس بعدني بالي على مخلد.. وولان اتصل بيه مغلق
-مخلد شنو قصته..
-ما اعرف خابر الضهر ودز رساله ردي ضروري.. واختفى.. واتصل وماكو
-خاف انشغل تعرفين شغله .. هوسه
-ان شاءالله يكون هيج قلبي ممطمن..
-ليش... دنحجي.. رج جهازها.. باوعت لمحمد.. كالت اروح اشوفه شرايد.. وارجعلج..
بقيت كاعده بمكاني مابيه اروح واحتفل واحجي وياهم بالي كله عند مخلد..
بقيت دايره وجهي و مركزه بالمطرب والفرقه وهو يغني اجيبك للدرب .. وصل لجملة انا راسي قفل الا اجيبك..
سمعت شخص وراي حجه.....
مالك:- سمعتي انا راسي قفل الا اجيبك..
لجين:- انداريت بسرعه وبقيت مركزه بعيونه بخوف.. وهو عيونه مو عليه على المطرب ومبتسم.
دارلي بطرف عينه ونزللها.. وضحك اهههمم... وهز راسه..
-اريد كلمه تطلع من حلكي انشليت.. بس مركزه بوجها وكل معاني الخوف مبينه على وجهي..
كاعد كبالي بكامل اناقته.. مو مال واحد مسجون ابدا.. يربي شنو اللي ديصير.. ردت اكوم...
لزم ايدي.. ورفعلي عيونه بأبتسامه... :- لو سمحتي ممكن تكعدين..
-كعدت.. ايدي ترجف بيده.. القاعه بارده وكلها مكيفات والعرك ينزل من كل جسمي..
اخذ ايدي فتحها وباسها وهو يشمها براحتها... قشعر جلدي من بوسته لايدي...خلاها على الطاوله.. ورجع عدل جاكيته.. ويطق بركبته..
-بس فهمني شرايد مني.. احجي وياه.. وهو مبتسم وعيونه على المطرب .. مد اخذ العصير من كدامي..
شرب.. ورجعه على الطاوله ويمشي باصبعه على دائرة الكلاص.. واني عيوني تراقبه ابد مباوعلي.. حجه
مالك... في يوم كنت طالع .........يتبع

☆☆☆☆☆☆☆

#زينب_ماجد

لامارا · 16-04-19, 05:00 PM

#خطوات_نحو_الجحيم
////بقلم الكاتبه زينب ماجد////
الحلقه_5

لجين:- بس فهمني شرايد مني.. احجي وياه.. وهو مبتسم وعيونه على المطرب .. مد اخذ العصير من كدامي..
شرب.. ورجعه على الطاوله ويمشي باصبعه على دائرة الكلاص.. واني عيوني تراقبه ابد مباوعلي.. حجه
مالك... في يوم كنت طالع .. يحجي وعيونه بين ينزلها وبين يرفعها يباوع على المطرب..
كنت طالع من البيت.. تنهدت... وروحي طالعه مسوده الدتيا بعيني.. وامشي بشوارع بغداد.. واحس النار توج من راسي كد الغضب الجنت بيه..
حاولت اصرخ او ابجي.. شفت هالشي ما يليق بيه اسويخ.. اني مالك واني اكبر من هلامر لازم اتحمل..
ف فتحت الراديو لحتى انسى.. فطلعلي صوت مذيعه... وهي تكول رجعنا وياكم حبايبي المستمعين وناخذ اتصال ... وبقت تحجي..
كلامها وصوتها وبحتها طيرت لب عقلي.. صوتها مشى بجسمي مثل المي اليمشي بأرض تربه جافه..
انتعاش كانت بالنسبه اليه
لجين:- يحجي واني عيوني مركزه بيه وهو يتكلم وما استقرت عينه بعيني...سحب جكاره من باكيته وحطها بين شفايفه..
وكام يسحب وويغوش عيونه.. طرد الدخان من حلكه وكمل كلامه... وهو يطفي الجكاره
مالك:- كنت مثل الرجل المشتعل بنار.. وحسيت صوت هذه المذيعه.. بحيره اغرق بيها واطفي النار البيه..
ف بديت ابحث عنها.. ما كلفني هوايه حتى عرفت الcv الخاص بيها.. و كلشي يخصها من الالف للياء
فصرت اراقبها.. الا ان ادركت ان اكو مكان يوميا تمر من عنده .. فتعمدت بيومها ادعمها واوهمها هي الدعمتني..
ف نزلت حجي عليها واني عيوني تراقب كلشي بيها.. من يومها صارت هي استراحتي بعد الشعل انزل واراقب كل تحركاتها..
خوفها كدامي وتلافيها للمشكله .. كان يجذبني اكثر.. خلتني اتخبل اريدها بكل طريقه بس ما اعرف شلون..
ما كان يهمني شسوي حتى تجي.. كل همي احصل عليها.. وكأني ولد صغير وعاند على لعبه.. ياخذها ياخذها
-بس اني مو لعبه.. حجيت باوع بوجهي.. وحجه..
-فعلا مو لعبه.. كانت اشرس.. رغم تحذيري الها.. اشتكت وحاولت تسجني.. هههه بيني وبينج حتى السجن من وراها حبيته..
-يحجي واني مصدومه بكلامه يعني هو كان مدبر الحادث..
-بس ما كدرت ابقى بالسجن ولو ليله.. اضطريت اطلع واجيها وادخل لنص بيتها واخذها بأديه واسمع انفاسها
-ي...يع.. يعني م.. مو حلم .. كنت حقيقه..
-هههمم.. كان المفروض اخذ اللي نفسي بيه بهذيج الليله واقتلها وافض السالفه حتى لا تكبر..
رفع حاجبه- بس ما كدرت.. بدل متقاومني .. ذابت ووكعت بين اديه.. شلتها ورجعتها لسريرها..
العجيب ان عجزت ان اسويلها شي.. المفروض اقتلها والا تنقتل على ايد غيري.. لكن ما كدرت.. ولا كدرت حتى المسها..
يحجي وعيونه منزلها.. ما اعرف شسوت بيه.. يمكن حبيتها...رفع عينه بعيني.. او عشقتها..
-منو اللي يريد يقتلني..
-سبق وحذرتج.. ان تشتكين.. لكن ما سمعتي ورطتي نفسج وورطتي ابن عمج وياج.
-گمت من مكاني.. ابن عمي شنو شسويتوله احجي..
.. ابتسم وكام... لزمت ايده .. ابن عمي وينه احجي..
-لازم يدفع ثمن غبائج.. وخر ايده من عندي ومشى.. كمت دا اروح وراه.. لزمني محمد من عكسي..
:- منو هذا لجين..
-لحظه محمد.. بس اروح اشوفه..
-هو منو..
-دا اجر ايدي من محمد.. اريد الحكه.. ما لكيته.. بقيت اباوع بالقاعه.. بالوجوه.. تمشيت ادور.. طلعت ماكو..
اجه ورايه محمد..
-شنو القصه لجين ما عرفت منو هذا..
-محمد لازم ارجع للبيت..
-ليش بعدها الحفله
-محمد ارجووووك.. لازم ارجع..
-طيب ليش ترجفين بهشكل.. اهدئي..
-تركته ورجعت للطاوله.. اخذت جنطتي.. لفت انتباهي بطاقه.. اخذتها مكتوب عليها مالك قيس جابر..ورقمه وعنوان الشقه الساكن بيها..
بقيت اباوع بيها.. اخذتها خليتها بجنطتي ومشيت.. استلمت الجاكيت لبسته وطلعت للشارع.. اباوع يمين يسار.. بلكت المحه..
محمد:- ها لجين.. يلا..
-باوعت محمد فاتح الباب ويصيحلي صعدت.. رفع اذيال الفستان ودخلها للسياره وسد الباب ورجع لمكانه ساق وطلع..
طلعت موبايلي اتصل بمخلد.. ماكو.. توترت اكثر.. شلون يا الله.. بالله شسوي.. محمد يحجي .. ما اعرف شنو يحجي بالي مو يمه كلش..
وصلني للباب.. شكرته ودا انزل.. صاح لجيين..
درت.. هااااا
محمد:-شنو القصه..منو هذا الرجال
-يعني شفته؟؟
-اي شفته منو ؟
-اني مدا اتخيله هو حقيقه.. سديت الباب ومشيت صاح وراي محمد بالي مو يمه
دخلت للبيت.. لكيت ماما كاعده..
الام:- فدوه يمه شطالعه لعابه.
-كعدت بدون حجي.. دنكت راسي وبجيت..
-هاي شبيج ؟؟؟
-كتلكم مو حلم متأكده حقيقه .. كذبتوني.. ونزلت اشهك بثتين اديه..
-يمه اسم الله الرحمن بنيتي شصار .. شبيج احجي
-بابا وين ؟
-بعده مجاي..
-ماما ما اعرف شحجي وشتصرف.. البارحه الكتلج عليه حلم طلع حقيقه.
-شلون يعني ؟
-يعني مالك طاب لبيتنه وصاعد لغرفتي.. والشفته مو حلم.. ماما مو حلم.. وكعت بحظنها ابجي..
-يمه عزا العزاني .. يعني فايت لبيتنه.. شلون ولج احجي..
-ما اعرف.. ومخلد مختفي وهم ماخذي اكيد.. يا خوفي قتلوه من ورايه لو الله عالم شسوو بيه..
-يقتلوه شنو.. وبعدين منو هو .. وليش هيج قوي وشلون كدر يطلع من السجن ..
ومخلد كال موجود.. وهو يكول اجيت.. وهسه مخلد.اختفى شديصير ماما
-هذا اللي ذابحني اجهل منو هو .. ماما عقلي ح يوكف والله ميته خوف .. بقيت ابجي بحظنها. وهي تمسح على شعري..
سمعنا باب الكراج البره انفتح.. بساع كمت من مكاني.. ماما لتخبرين بابا بأي شي..
-ليش
-ماما خل نعرف مصير مخلد بالاول .. ما اريد اعرض ابويه للخطر هم.. شفتي مخلد ادخل ومنعرف شصار بي.. بعدي بابا عن الموضوع هسه
عفتها وصعدت.. دخلت لغرفتي وقفلت الباب... سحبت الموبايل من الجنطه.. خابرت مخلد.. للان ماكو..
خابرت عمه گرجيه.. سألتها.. كالت واني بالي عليه مشغول للان ما بين.. بس يمكن عنده شغل واضطر يسافر محافظات..
لابد يخابر ويطمنه.. بس ليش انتي هيج بالج مشغول عليه.. كتلها لان مخابرني هوايه ومراده ودازلي رساله ردي ضروري ..
....صرخت يمه وليدي شبي شصاير..
.... اي يا عمه هو اني دا اسئلج .. تجين تسئليني.. يلا مع السلامه..
قفلت الخط منها.. دخلت امي..
-هاااا..
-يا ها متكليلي عقلي حيوكف.. متأكده هلكلب سوه شي لمخلد..
-زين والحل ننتظره يجي يقتلنه ..شلون..
-ما اعرف امي.. هسه اخابره واحجي وياه عسى ولعل يرف قلبه..
اخذت الموبايل.. بحث رقمه.. ما عرفته كثير ارقام بالسجل.. رجعت جبت البطاقه ودكيت الرقم..
اتصلت.. امي صاحها ابوي ونزلت.. رد يصيح صياح الوووو.. صوت يمه قوي كلش.. غنا ورقص .. ما عرفت شلون ابدي وياه..
سديت الخط.. دزيت رساله وكتله اني لجين. ممكن احجي وياك دقايق تبتعد عن الصوت اليمك..
دزيت الرساله.. يمكن بعدها ما واصله.. اتصل.. كلت الو.. صاح رايح للبيت.. الولد الثاني يجاوبه .. يعني متكمل السهره.
صاح لا لا وسمعته تحرك.. وطبك باب السياره وحجه.. اي لجين احجي..
-كال احجي.. لو انضرب على راسي اريد كلمه تطلع ماكو ف حجيت وياريتني ما حجيت. .ااااا وين انته..
-شنوو؟؟
-كبر لفني اي والله شهسؤال الغبي .. قصدي..
-ههههههه اني بالنادي وهسه طلعت يهمج تعرفين اكثر او ويه منو جنت.
-لا ااااااا قصدي يعني .. مالك شنو التريده مني.
-كتلج احبج
-اي حب التحجي عنه.. جحيم مو حب هذا
-همممم ومتصله بس علمود تكوليلي هيج لو اكو شي لاخ.
-يعني شنوو ...
-شنو
-شبيه انثولت.. قصدي ابن عمي.. وينه..
-وشعرفني.. امه اني وادري بيه..
-كل الزين تعرف وينه... الله يخليك هو معليه والله.. حسابك وياي ابن عمي شعليه..
-اوكفي دقيقه..
-دا احجي وياه قاطعني وجاوب على اتصال بجهاز ثاني.. ويكول نايم ليش تكعديني.. ضل يحجي وسد ورجع كلمني..
-اي لجين.. كملي شنو جنتي تكولين..
-صفنت.. هذا يتصرف وياي كأنه يعرفني من سنين وبينا علاقه وميانه.
-تره ليروح بالج بعيد.. اختي خابرتني علمود زوجها وكذبت عليها وكتلها نايم..
-واني شكو .. وليش يروح بالي بعيد.. انته متخصني..
-منا وجاي ما اعتقد..
-شنو يعني..
-كلمه والخ كلتي شنو يعني.. بطيئة استيعاب انتي..
-دتتجاوز هوايه وهلشي مو من حقك.. فهمني التريده شنو..
-تره مليت واني اكلج شنو الاريده.. للان مفتهمتي.. الضاهر عجبتج سالفة اجي لبيتج واكولج شنو الاريده.. ..
و خاف ذيج المره محبيت اعتدي عليج وانتي نايمه.. هلمره لا.. باللي تحبي
-وقح..***قفلت الخط بوجها.. شكد شفت ناس تافهين.. مثله ابد مشفت.. ادور اني قفلت الخط بوجهه
خاف صدك ويسويها ويجي لبيتنا.. يمه شنو ما رايده نفسي فضيحه بنص بيتي.. رجعت خابرته .. ما جاوب..
عزااااا بعيني.. هذا بس لا يجي.. يا الله شلون اخلص من هلبلوه.. رجعت خابرته مرت اللخ.. هم ميرد..
لا يا الله... بس اريد افتهم منيله هلقوه.. وشنو هو.. وشلون يدخل لبيتي وهو مقفول..
_____________
قيس:- من شوكت هيج انته فهمني..
مالك:- هالشي ما يخصك..
قيس:- لك اني ابوك شنو ميخصني.. يا ابني مرضتني لك جوز من سوالفك.. وارجع لعقلك
مالك:- اطلع بره
-تطرد ابوك ؟ هاي تالية تربيتي بيك.. انته تخبلت
-اعتقد الزياره خلصت مع السلامه... فتحت الباب.. تقرب عليه..
-انته بالطريق الخطأ احذر.. وخلي الله بين عيونك شجرالك انته..
- ما رديت عليه.. وبقيت فاتح الباب.. طلع.. سديت وراه.. اخذت نفس.. مجبور يابه.. لازم اضحي بيك.. حتى تعيش..
كرفصت على رجليه.. خليت وجهي بين اديه.. احس النفس كوه يطلع من ريتي...اختنكت..
رحت اخذت سويج السياره وطلعت افتر بشوارع بغداد ... فكرت اخابر ايهاب.. بس ما الي نفس احجي وي احد..
بحاله ما احب احد يشوفني بيها.. غوشت عيوني بدموعي.. بس ما اريد ابجي سلكت طريق بأرادتي وانتقام مني..
بس المشكله لا اگدر اتراجع عنه ولا اكدر استمر.. مجبور اتبرى عن كل اللي يخصوني حتى لا يتأذون.
تجمعت الدموع بعيوني.. غوشت ما اكدر اشوف طريقي.. قبل لا تنزل دموعي مسحتها..
مو لازم ابجي.. اني مالك.. اي اني بالقمه.. الف واحد يتمنى يعيش بنفس عيشتي ومكاني.. اني مالك ما احتاج لاحد.. اي ما احتاج..
اباوع لاديه لازم بيها الستيرن.. ترجف من التوتر.. مشيتها للراديو فتحته.. وردت ابحث عن اغنيه اي شي المهم انسى..
طلع برنامج اذاعي.. وكانت المذيعه تحجي بصوت ناعم.. الصاحي يخدره وينومه.. للحظه نسيت نفسي واني استمعلها..
رجعت راسي للكشن.. وبقيت استمع.. مثل واحد ميت وترجع بيه الروح من اسمع صوتها.. بيه دفء واحساس مو طبيعي..
ضحكت بالبرنامج.. لو قشعر جسمي.. صكيت على سنوني اريدها.. هاي البنيه اريدها..
اللي كدرت تنسيني بمجرد سماع صوتها.. اكيد راح انسى الدنيا واني بين احظانها.. كمت اتخايل شكلها على جمال صوتها..
كمل البرنامج.. وعرفت اسم الاذاعه واسم البرنامج لما كالته بأخر الحلقه.. انتبهت على نفسي واني جنت اسمع صوتها.. بغير عالم نسيت الدنيا كلها.
شغلت سيارتي وانطلقت.. وهي على بالي من لحظتها ما غابت ابد.. كلما اتضايق فقط اكوم اتذكر صوتها..
من عدها ورحت ابحث عن معلوماتها.. استفقدت هاي الاذاعه.. طلع اسمها لجين..
بقيت مناطر على باب الاذاعه اراقب.. وصيت الحارس بس تطلع ست لجين يأشرلي عليها مقابل مبلغ مادي رشيته بيه..
ساعات.. وطلعت بنيه.. هلكد انيقه تجنن من راسها لجعب رجلها.. تمنيت الحارس يأشر ويكول هي.. باوعت للحارس.. كال اي واشر باصبعه عليه..
غير طار عقلي خدرت بمكاني.. هاي لو حصلتها راح اكون اسعد رجل بالعالم.. مستعد ادفع نص عمري بس كون اجيبها..
رحت تبعتها.. تسوق على مهل وبحذر.. ردت اكسر عليها بس كلت لا مو وكتهاا.. لازم اجمع عنها معلومات اكثر وبعدين اتقربلها..
　
دخلت الاعظميه.. بويه انوب عظماويه.. شگت گلبي ونامت بي.. وصلت لحد بيتها.. ترجلت من سيارتها..
لابسه بنطرون بيج.. وقميص اسود وحذاء سوده والشعر جوه كتفها شامرته يطاير وراها..
دنكت تفتح الباب وتجره وتعدل الحديده.. غفيت على منظرها.. دخلت سيارتها وسدت الباب.. نزلت من سيارتي..
تقربت لباب بيتهم..اشم عطر.. وكأنه عطرها.. ما شام عطرها من قبل ويمكن بالجو ماكو اي عطر بس اني دا اتخيله ما اعرف شلون..
بيتهم جبير ومزخرف وكله اضويه.. بقيت اراقب بيتهم لحد ما نمت بسيارتي.. كعدت الصبح على صوت واحد يكلي انته منين وشعدنك واكف هنا..
ما حجيت وياه.. مشيت لراس الشارع.. نزلت جبت كيك وعصير جواعان... جاي امشي..
وشفتها عبرت بسيارتها.. شمرت الكيك والعصير وركضت لسيارتي لحكتها.. وصلت لباب صيدليه كفرصت على رجليها وكعدت وفتحت القفل..
ورفعت الجدار الحديدي.. وفتحت باب الصيدليه وطبت.. بقيت واكف كبال الصيدليه تلث ارباع الساعه مدري شبيه تكول انفطمت عليها..
فتحت الخانه.. واخذت نظاراتي.. لبستهم.. ونزلت.. دخلت للصيدليه.. هي كانت ترتب بالدوى على الرف..
تقربت مني بأبتسامه وكالت تفضل.. بقيت صافن بملامحها مو حاب ارمش دقيقه..
مسويه ضفيره صفح.. وخصلات كذلتها من الجوانب رفيعات ونضارات طبيه .. والقميص ابيض والبنطرون زيتوني..
هلكد حلوه عيونها مدري اني اشوفها هيج تجنن ما اعرف.. بقيت هايم بيها.. حجت تفضل عزيزي
انتبهت.. وحاجيتها.. گلبي يوجعني.. عقدت حواجبها..
-العفو اني مو دكتوره.. اني صيدلانيه.. وقلبك تروح تفحص عند دكتور وهو يكتبلك العلاج واني انطي يالك..
بقيت صافن بيها... حجت ..صار معلوم..
-انتي سامعه گبل كوم يا دكتور خليني اموت انته ما عندك دوه يشافيني .. دواي عد واحد اجه هسه يفوت من ضوه عيوني عمر ينطيني..
-لا ما سامعه.. اذا ما عندك شي اخر مع السلامه..
-ما حجيت اكثر.. طلعت.. وركبت سيارتي.. حتى ردها لليعاكسها بتهذيب.. صرفتني بطريقه دبلوماسيه..
اوووف مذيعه بليل وصيدلانيه بالنهار.. اكو احلى من هيج. وجان تنفتحلك ابواب السعاده يا مالك
رحت ايام واني هايم بيها.. تقربت لكل اللي يعرفونها.. حاولت اخذ معلموات منهم.. حتى لابوها رحت بمحل مجوهراته..
واخذت من عنده كلاده ذهب ناعمه.. وكعدت احجيله على اللي احبها.. وهو رجال ضحوك.. استقبلني برحابة صدر وبقى يمزح وياي..
ويسولفلي شلون جان شقاوجي المحله.. ويحب وحده واستقتل عليها.. وكتله وتاي كال اتزوجتها طبعا..
اليحب ما يخيب.. بس لازم يسعى.. كتله وهو هم هيج ..
بحثت معلومات اكثر.. وعرفت وين تكعد وين تروح.. وحتى علاقة المخرج بيها وعرفت هي متريده..
جمعت ادق المعلومات عنها لحد ما عرفتها اكثر من نفسها على مدار شهر ونص.. اني مراقب طريقها..
واعرف منين تجي ومنين تروح.. ف قررت اتعرف عليها خلاص.. فكرت بيا طريقه.. اتقرب
و اعرف لو اموت واني اغازلها مديرلي بال..
فقررت اجيها بغير طريق.. وتربصتلها ودعمتها.. نزلت هي تتعذر.. وتأفف .. كلبتها على راسها وسويتها هي الداعمتني ومتشوف ورزاله غسل ولبس رزلتها..
واني استمتع بردات فعلها عليه.. انطتني مبلغ مال بس كون اسكت.. مدتلياهم.. الايد بيها سوار والمحبس كرستال شكد انيقه..
اخذت الفلوس وشكيتهم.. وعرفت هلشي حيطبع ابالها وسويلها ردت فعل قويه وتتذكره.. عفتها ومشيت واني عود معصب واتوعدلها.
حركت سيارتي.. جان تكول هو وين ماكو ازباله الله يشمرها بطريقي.. سقت بسرعه.. وابتسمت..
وج راضي اصير زبالتج. بس تعاي مو متت..
صارت هي الشغل الشاغل.. اللي احسها استراحتي بعد الشغل مراقبتها وبديت باستفزازها..
دعمتها بليل.. كامت ترجف مني.. شردت لسيارتها.. وطلعت.. احس النار تشب بيه من اتقربلها..
خابرتها واني اصلا من زمان ماخذ ارقام تلفوناتها وكلشي يخصها. خابرتها والخوف بصوتها..
اكز على اسناني من احس هي خايفه.. بدي اخذها الحظني واضيعها بكمية المشاعر الضامها الها بگلبي..
جبتها منا منا ما اجت... تعاركت وي ابو الصيدليه وما اجت.. ثاني يوم دخلتلها وقفلت الباب ومثل المخبل هجمت بلا شعور بس اريدها.
بس استخطيت ائذيها.. تركتها.. خابرت الضهر.. سجلت صوتي.. لك يا عصفور شدتسوي ههههه
تريد تشتكي وتسجني.. هههه.. ما اهتميت.. وحتى لو انسجنت عادي.. السجن بيتنا الثاني يوميه ماريله.. شحلاته لو نمرله من وره هلحلوه.. تستاهل ننسجن على مودها..
وما كذبت خبر.. اجيتها بليل.. كالولي ابن عمها ضابط وياها .. انتجيت على السياره وضحكت.. اي يحلوه خل اشوف هلضابط شكد يريد. يحميج مني..
شوي واجو الشرطه مسكتني .. واخذوني.. رحت وياهم بلا معارضه.. دخلت تحقيق.. ابن عمها الضابط حقق حقق ما انطيته جواب يريح گلبه..
ضربني كم بوكس وراشديات.. ما اهتميتله يتلكاهن اكيد.. رجعوني للسجن واني امسح الدم من شفايفي..
قفل السجن.. شرطي كبير بالعمر.. صحت ابو اسماعيل دارلي.. تليفونك بس اخابر..
كال ممنوع.. كتله 5 دقايق ب50 الف.. دارلي شتسوي بي..
-بس اخابر صديقي.. يجي يطلعني.. تره اني من جماعة فلان.......
ما كال.. انطاني الموبايل فورا.. دگيت رقم ايهاب..
مالك:- الووو
ايهاب:- منو
-لك ساقط ما عرفت صوتي
-هلا بالملك.. وينك..
-بالسجن ههههههههه
-لا صدك هههههههههه
- اي وداعتك خخخخ
-هم عركه ولك
-لا هلمره علمود وحده حلوه
-بشرفك هههههههههههاي
-ههه ابن السكط هو منيلي شرف اني دتعال طلعني يابه..
-بيا مركز
-انطيته العنوان.. وكال جايك..
نص ساعه واجه ايهاب.. كتله هااا
-خابرت جماعتنا وكالو سهله بس خل يخف مشاكل...
-وهسه..
-النقيب اللي حجزك طالع للصبح يلا يجي امر اطلاق سراحك وتطلع..
-مو سالفه هاي اريد اطلع هسه.
-متوازي نام اليوم هنا
-لك مو اريد اروحلها للبيت الا اخلسها ههههههه
-حلوه هي.. عاد تستاهل صدك
-لك مذيعه بأذاعه بليل.. وبالنهار صيدلانيه وانته قيس..
-اخ بويه وجعني گلبي ما اتحمل..
-مو بس هاي ابوها صاحب محل مجوهرات بشارع ابو حنيفه النعمان بالاعظميه.
-اخ لك شلون صيده لوز..
-دطلعني هسه.. لازم اطلع ضروري.
-انتضر اروح اتفق وي الملازم الخفر بلكت نرشي منا منا..
-دروووح.. وانطيني باكيت جكايرك والجداحه..
اخذتهم... وراح نص ساعه واجه هو والملازم وكال ب5 الصبح انتو هنا تره اتعاقب وانفصل لو عرفو مطلعكم.
-ممنون منك سيدي.. حصتك موجوده..
طلعت.. وحجيت وي ايهاب... شتفقت وياه..
-اول شي رفض.. بس عرفته عليه وعلى جماعتنا وعرف ان اكيد يجي امر اطلاق صراحك الصبح..
لهيج اتفقت وياه على 300 دولار مقابل يهربك هليله ويجي الصبح قبل جية النقيب.. ما رفض بساع قبل.
تندل بيتها للحلوه لو تروح اديحنه ونظل ندور..
- وسفه عليك.. اني ادخل السجن علمود وحده ما اعرفها.. لك حتى جدها السابع عشر عرفت لون حظينته الكمطوه بيها ههههههههه
ايهاب:-خرب عرضك ههههههههههههه دهاك اخذ السويج وخل نطلع..
مالك:-اخذت سويج السياره وگبل على بيتها.. وصلنه كبال البيت.. صفيت السياره شوي عنه.. ورجعنه..
ايهاب:-منين نطفر
مالك:-من سياج الحديقه افضل..
ايهاب:-وهي منين الحديقه
مالك:-منا تعاااال.. تكدر تچيت لو احطلك ايدي..
ايهاب:- زرافه بطولك اني .. دحط حط خل نشوف اليوم لو بالهدف لو بالنجف.
-ذكرتني بالهدف سلاحك وين..
-بالسياره
مالك-خرب غيرتك. اصعد اطفر اجيب السلاح واجي وراك.. چيت.. اني ركضت للسياره اخذت السلاح وكمزت جلبت بالسياج..
وتشلبكت.. و چيتت على حديقتهم.. ايهاب طلع السجينه من جيبه بيها عدة سكاكين مقفولات بغلاف صاجي..
حجيت هاي شتسوي... يا فهيم اول شي من تريد تفوت على بيت واحد وتبوكه لازم اطفي الكهرباء..
حتى شغلتك تصير عل المضبوط..
مالك:-بس او شي لازم نتأكد الكل نايم..
ايهاب:-لك دكوم الساعه 3 ونص منو تلكاه كاعد وانته تكول هي وحيده اهلها وهم شياب يعني اكيد ميسهرون..
-اوك بس اول شي لازم نفتح الباب وبعدين نطفي الكهرباء
ايهاب:-علمود يشوفون وجوهنا..
-لك لا .. انته دتشوف المطبخ اظلم.. والمكيفات فوك صوتها عالي مشتغله .. يعني هم بغرفهم
دام الكهرباء موجوده وصوت المكيف عالي وطاغي على اذانهم.. مراح يسمعون واحنه نقلع الباب على كيفنه
بس انته لف وجهك عدل.. وسلاحك.. شكله الكاتم بي.. ولو شفت احد.. تصوب على شي زجاج او حديد.. حتى يشرد ويلتهي اني اخذ السلاح و ادخل جوه بسرعه..
وانته اطلع بالعجل واوهمهم ان احنه شردنا.. لفيت وجهي.. ولزمنه الباب من يداته.. 1...2...3.. شيل..
قلعنا الباب من رزاته وهو مقفول... بقينه نشيل بيه اكثر لحد ما قلعناه.. وخليناه على صفحه..
مشيت على اطراف رجليه.. كنت لابس بوتين مابي صوت عالي.. دخلت البيت كله مطفي ونايمين..
رجعت لايهاب.. خل نرجع الباب ونقفله.. فتحت القفل منه.. وشلناه وثبتناه بالرزات مالته.. ورجعت طبكته وقفلته وكأنه ما بي شي..
فتحت الشباك .. وحاجيته طفي الكهرباء.. طلع فتح الميزانيه... سديت الشباك.. ودا امشي بالبيت ما احس الا طكت الكهرباء بصوت عالي..
رجعت لايهاب.. صحت بصوت مبحوح.. هاي شسويت.
-لك طبكت الواير .. وانفجر الجنجوفر عطب.. خخخ راح طلبي
مالك:- چطلها.. وشغل الكهرباء قبل لتطلع حتى اشوف بلا لايت يحسون عليه..
ايهاب:-دفووووت انته معليك بيه...
-درت ضهري.. جان اسمع لجين صاحت مامااااا.. عرفت صوتها منين..
تلمست المحجر مال الدرج.. وصعدت.. عرفت اكو احد بالبيت.. صاحت منوووووو .. فتت كدامها.. انرعبت..
اجيتها من ورى صميت حلكها بايدي.. وقيدت جسمها بالايد الثانيه.. حاولت تبعد راسها وتصرخ..
رفعتها على صدري.. وانسحبت بيها لغرفه.. ورديتها للحايط.. دا اسد الباب رادت تصرخ.
رجعت صميت حلكها.. رديت الباب برجلي على كيف. وتحسست القفل وقفلته بأيد.. والايد اللخ على حلكها..
دقات قلبها من الخوف صرت اسمعها ... نفسها عالي كلش.. تقربت وهمست بأذنها..
تتوقعين اتركج بهالسهوله.. كتلج لتحاولين تلعبين وياي.. اكبر واحد ما يكدر يسجني.. افتهمتيي..
بس حجيت.. وعرفت صوتي.. شهكت وذابت تخربطت بين اديه.. قبل لا توكع.. لزمتها..
تخربطت بيدي.. سحبت اللايت من جيبي.. وفتحته.. باوعتلها مغمضه وشحلاتها صكيت على اسناني..
شلتها وخليتها على السرير.. وكعت صفح.. جاي اكعد.. وكع شي وانشمر برجلي جوه..
كعدت وجهت اللايت عليها.. الايد ناعمه وبيضه وبياضها بصفار مو ناصع... بس ترفه..
اجت الكهرباء.. واشتغلت تيبلام غرفتها.. والمكيف وصوته.. وبرودته.. مديت ايدي على ايدها تلمست نعومتها..
سحرتني.. رجعتها على ضهرها وتحولت كعدت من يم خصرها.. مديت راسي.. بقيت اشتم بركبتها.. وابوسها بوسات خفيفه..
ردت افتح دكم قميصي.. وارتوي منها.. بس ما اعرف.. حسيت هلشي راح يضوجها ويكسرها..
مو بالعاده اهتم لمشاعر احد.. ليش اهتميت لمشاعرها وخفت تضوج ما اعرف.. تركت قميصي ما فتحته..
ونمت على حافة السرير.. مديت ايدي جوه راسها والثاني على بطنها.. واشتم بركبتها وبشعرها..
حسيتها مثل الميت بيدي.. خفت لا وگف گلبها من الخوف.. خليت ايدي كدام انفها.. تتنفس مميته..
قربت راسي وبستها بوسه خفيفه على شفافها وجريت نفس من انفاسها وگمت..
غطيتها.. واخذت نظره على عليها وعلى غرفتها.. وفتحت باب البلكون مالتها وسديته وراي..
من البلكون تسلقت للسياج.. نزلت عليه.. ومشيت لحد ما وصلت وكمزت للشارع..
رحت للسياره جان ايهاب منتضرني.. كعدت.. كال هاااا بشر حمامه غراب..
-ايهاب سحرتني
-هلكد.حلوه ولك..
مالك:-مو شغلة حلو او لا.. ايهاب كلبي يمها ما يدك.. يوكف ويستمع لدكاتها
ايهاب-هلله عليك يا نزار قباني
- معقوله كمت احبها.. ؟؟
-هو انته لو ما تحبها تنسجن من وراها..
-لا ايهاب.. ما اعرف اشلون اوصفلك شعوري يمها.. غير يم النسوان نشوه وجنس.. هنا شعوري غير..
اصلا تصدك ما تقربت خفت تضوج ..
-تحجي صدك يعني هسه انته دخلت كلشي ما سويت وهلمغامره كلها بلاش..
مالك:- ايهاب اني احبها واريدها.. مو يوم يومين لااا رايدها الي ايهاب.....يتبع

☆☆☆☆☆☆☆

#زينب_ماجد

لامارا · 16-04-19, 05:03 PM

خطوات_نحو_الجحيم
////بقلم الكاتبه زينب ماجد////
الحلقه_6

لجين:- بقيت الليل كله عايشته بخوف.. قافله باب البلكون وباب الغرفه وكاعده.. ل3 بليل يلا غفيت من التعب..
ما كعدت.. غير ب9 الصبح.. فزيت من فراشي.. مرعوبه راح الوقت وللان الصيدليه ما فتحت.. ركضت بسرعه...
غسلت وجهي ومشطت شعري ولبست شنو طلع كبالي وركض نزلت..
لجين:- صباح الخير ماما.
الأم.:- هلا ماما صباح النور.. ما خابرج مخلد
-لا والله مخابرني ..
-امه خطيه باقي بالها عليه.. وعمج اتصل على ابوج البارحه ويحجي وياه بهلموضوع..
-كون كلتيله شفت مالك..
-وليش ما اكُله.. ؟
-ماما ما اعرف مالك هذا شنو.. الكدر يطلع من السجن ويجي بليل.. كولشي يسوي والله عالم شسوه بمخلد ينخاف منه هذا..
خل ندرس الوضع اول وبعدين نخبره لا نروح نورط بابا هم..
-عود اني ناويه من يرجع اكله..
-لا اصبري.. خل نشوف الامور شلون تصير.. يله اني اروح تأخرت..
-الله وياج بنيتي. ديري بالج على روحج
-ان شاءالله...طلعت ركض للسياره.. سقت و للصيدليه فتحتها وكعدت.. فتحت التلفزيون على قران.. مر عمر الكهوجي..
عمر:- هلا ست لجين..
-هلا عموري..
-كهوه لو جاي..
-جاي .. واريد تشتريلي لفه من حمزه..لان ممتريكه والصداع ذابحني بسبب قلة الاكل والنوم ..
عمر:- اي ادللي ست..
راح اشترالي لفه جبن عرب واجه... انطيته الفلوس وفوكاها بقشيش وراح.. توني دا اكل دخل رجال ..
خليت الاكل .. وكمت نفضت اديه وعدلت قميصي.. نعم تفضل..
يباوع للصيدليه ويدور براسه ويباوعلي من فوك لجوه.. صحت نعم اخويه تفضل
:- اسمج لجين
-ليش؟؟؟
-همممم..
لجين:- شفته يباوعلي من فوك ليجوه ويعض شفه.. احممم اااا اخويه اذا ممحتاج شي مع السلامه..
-جاي اطرديني
- لا بس انته مجاي تطلب دوا.......دا احجي... دك موبايلي.. طلعته من جيبي.. الجحيم...
هيج كتبت على رقم مالك البارحه لما دونته بسجل الهاتف.. لان اشبه بالجحيم اللي مجاي اخلص منه..
باوعت.. يربي ارد على هذا المسوي حياتي جحيم.. لو هذا النحفه الكدامي.. شلون بلوه.. تبتلي بنيه تشتغل بهلبلد.. كل شوي ملطلط ناط بطريقها..
رديت على الاتصال وكلت الووو.. مالك..
بمجرد ما حجيت الكلمه.. الرجل الكدامي باوع لوجهي.. اندار وطلع بسرعه..
عقدت حاجبي شبي؟؟
معقوله مالك دازه ؟؟..
لا جان ما كمز من سمع مالك.. بس خاف عباله واحد من اهلي وشرد. يخاف تصيرله مشكله.
سمعت مالك يصيح الوو
صحت الووو.. الصوت مقطع...سمعت صوت طائره عسكريه بالجو .. لهيج الشبكه ضعفت..
قفلت الخط.. بقيت صافنه.. يارب شنو اللي ديصير.. ارجع اخابر مخلد.. بلكت فتح خط..
اتصلت.. طلعتلي موضفة الخدمه.. عذرا ان الجهاز مغلق او خارج نطاق التغطيه.. من تطلع ايالي بدي اشيل الجهاز واكسره..
متتت هذا وينه.. شصار بيه يا ربي.. خابرت امي.. عمتي گرجيه يمهم... تبجي تكول خابرنه المركز ماله البارحه.
طالع بعد ممخلص الدوام.. وبعد ممار عليهم..واليوم غياب.. حتى مماخذ اجازه..
سألتني امي شوكت اجي.. كتلها الضهر كالت ابوج يمرلج لا تجين وحدج..
سديته منها.. دخل زبون.. عاملته ورجعت كعدت.. خابرت مالك مغلق.. تركته.. لل12 طب بابا..
كمت على حيلي ورحبت بي.. ابتسملي وحجه اشلونه الشغل..
-تمام الحمدلله.
الاب:- اكول بنتي.. اختفاء مخلد اله علاقه بالرجال اللي تعرضلج..
-ارتبكت شگُله.. اگُله اي مالك..!! وبعدين...؟
لا اعرف اهله ولا ناسه.. وهو الگدر يطلع بين ليله ويوم.. يكدر ابويه يواجهه وهو حتى مخلد عسكري ومدري وين وداه.
اروح اضحي بابويه صعب.. ف كتله ما اعرف بابا ما اعتقد.. الولد انسجن.. شيوديه لمخلد
الاب:-لا بنتي طالع.. رحنه اني وعمج للمركز على مخلد وقضيتج.. الرجل طالع وكأن ماكو قضيه مرفوعه حاولت احجي الملازم
يكلي يجي نقيب مخلد ويشرحلك.. القضيه يمه مو يمي.. ومخلد مختفي .. وعمج وعمتج يكسرون الخاطر.. بالهم مشغول عليه وليلهم ما نايمي..
لجين:-طيب والحل..
-حليش يابه.. ننتظر والله كريم.. وين نروح بلاغ وبلغنه.. وهو الوضع تايه يا خوفنه كتلوه بقضية طوائف
-لا اسم الله ان شاءالله يرجع.. اخذت جنطتي وقفلت الصيدليه اني وبابا وطلعنا سوه..
وصلنه للبيت عمي عثمان وعمران.. موجودين ونسوانهم هم.. رحت سلمت عليهم بالصاله وكعدت.. وهم يحجون..
حجه عمي عمران..
عمران:- لجين بنتي يكول ابوج مخلد مراسل لجين وكايل الها ردي ضروري.. تعتقدين شنو هذا الضروري..
لجين:- ما اعرف عمو.. هو اني هذا الشي اللي اريد اعرفه.. شنو الشي الضروري
عمران:- زين شنو هذا الرجال المتعرضلج شمسويلج..
لجين:- دا اريد احجي سبقني بابا..
الاب:- اي مو كتلك يا ابو مخلد الرجال كاسر عليها بسيارته بالشارع.. وشامر جم كلمه مو زينه ومخلد اتصرف وياه..
عمران:- والولد طالع..ماكو مموجود.. يعني هو المتعرض لمخلد بسبب لجين..
لجين:- عمو للان ممبين كولشي.. لنسبق الاحداث.. مخلد وحده يعرف السبب ويارب نلكاه ونعرف منه الحقيقه..
گرجيه:- كله من وراج مخليه الرجال يركض وراج ووره بلاويج وتالي ضاع ابني والله اذا صار بابني شي يا لجين محد يخلصج من اديه..
-ما رديت عليها امي وابويه ردو.. كلبها على ابنها حقها.. عفتهم.. وصعدت لغرفتي
كعدت على الكرسي الكبال مرايتي.. وصافنه افكر بيه.. مالك اكيد يعرف شي عن مخلد.. كالي يدفع ثمن غباءج .. اوف ربي ساعدي
دنكت وثبتت اديه ع الميز وبقيت افرك راسي بتعب.. شسوي لهذا مالك واخلص منه ياربي..
كمت من مكاني نزعت ملابسي.. شميتهم عركانه.. اروح اسبح حتى ارتاح .. اخذت ملابس ورحت للحمام..
كملت وطلعت.. تركت شعري مفتوح ونمت.. بعدني هستوني غفيت.. دك جهازي.. رفعته محمد..
-الو ها محمد..
-هلا لجين شلونج
-تمام الحمدلله..
-ضل بالي عليج.. البارحه وضعج معجبني خير خوما صاير شي..
-لا الحمدلله زينه..
-اي زين. اكول المؤسسه طالبه موضفات .. تشتغلين معاهم اني سولفت لمدير القناة عنج.. وكتله تمتلك مضهر جميل تطلع بيه للشاشه
-من ذوقك تسلملي..ما اعرف هسه.. هستوني دخلت من الصيدليه.. وتعبانه باجر التقيك ونحجي.. ماشي
-ها اوك براحتج. وشي ثاني عندي موضوع خاص اريد احجي ..
-شنو هو؟؟
-شي يخص حياتج.. بعدين من نلتقي.. نحجي مع السلامه..
-الله وياك.. شمرت الجهاز ونمت.. ما اعرف شكد نايمه وسمعت صياح جوه.. فزيت بساع.. ونزلت..
لكيت ماما لابسه وتريد تطلع وابوي يصيح بساع وداااااد.. وعمي عثمان يفوت مني يصح كله منج يم القنوات .. خلي تفيدج القنوات.. ضيعتي الولد الله لا يبارك بيج
ركضت وره ماما شكو .. طلعت للكراج.. لكيت عمتي كرجيه متخربطه فد مره.. صحت بابا شكو..
كال خابرونه على جثه نفس مواصفات مخلد...ورايحين نشوفه وعمتج اتخربطت ديري بالج ع البيت وقفلي زين لجين.
طلعو كلهم بلحظه وفضى البيت.. بقت تنزل دموعي معقوله مخلد مات بسببي.. ركضت للبيت صعدت وطلعت جهازي..
خابرت مالك.. رن رن... ردت عليه بنيه..
لجين:- الوو
:- الو منو
-مالك وينه
-وانتي منو
-انطي الجهاز المالك وكوليله لجين
-لجين منو ؟
-دا اكولج انطي الجهاز لمالك اريد احجي وياه. قفلت الجهاز بوجهي.. بالله هاي منو ادور
يا الله شسوي هسه.. وين اروح.. يا رب بس كون مخلد ما بي شي.. يارب بجاهك.. احفظه .. يارب كون مو هو..
لساعه كامله قافله البيت وكاعده وحدي.. وابجي.. خابرت امي.. رفعت خط بساع.. وصحت هاااا بشري مخلد لو غيره
الام:- الحمدلله مو مخلد.. شخص ثاني..
-دنكت ابجي بحرگه.. الحمدلله ربي .. اشكرك واحمدك..
كمت من مكاني بساع بدلت واخذت مفاتيح سيارتي وطلعت بساع من البيت وقفلته وانطيت القفل لجيرانه.
وخابرت ماما كتلها.. كالت وين رايحه..
-اصفي الحساب
-وج داده يا حساب لجين كعدي راحه.
-يوم شننتضر يموت.. لو نبقى عايشين بهلخوف طول عمرنا..
-وج ماما استري علينه كولشي ولا العار..
-العار ولا النار يمه.. تعبت واني اخاف منه.. اروح اواجه واشوفه شيسوي.. يلا مع السلامه ادعيلي.. وهي تحجي قفلت الجهاز..
مسحت دموعي.. باوعت بمراية السياره الاماميه.. شعري مبروم كله.. لان مشطته وعفته مفتوح ونمت.. بلا ما المه.. بس زين ناعم..
بقايا كحل بعيوني وجهي مبي اي مكياج.. طلعت البطاقه من جنطتي.. وباوعت عنوانه..
شغلت السياره وطلعت.. اديه ترجف ما اعرف مصيري شنو.. ممكن انطي نفسي مقابل حياة مخلد.
احاول ما ابجي.. بس عيوني وحدهن يجرن من الخوف.. وصلت للعماره اللي هو ساكن بيها..
اخذت نفس.. فتحت الچكمچه.. بيها سجين صغيره.. مخليتها احتياط امني.. جريتها وخليتها ابنطروني من وره..
واخذت موبايلي ونزلت.. خليته بجيبي وصعدت.. البطاقه بيدي.. رقم شقته 12 .. صعدت الدرج
وصلت للشقه.. هي لو لا.. بقيت اباوع علمكان.. درج نازل ودرج صاعد.. و 3 شقق موجوده بهلمكان..
هاي 12.. معقوله مكانه مضبوط.. ادك واشوف.. دكيت الجرس... وبعدين دكيت الباب وياها..
انفتح الباب وطلع هو نفسه مالك.. تف لا هله بوجهك..
مالك:- اهلاااا شنو هالمفاجئه الحلوه..
لجين:- مالك وين مخلد.....
قوس عيونه وحجه..
-شنووو
-جاي اكولك مخلد ابن عمي وينه....متاكده انته تعرف مكانه الله يخليك هو معليه.. . واني احجي بجيت
-هش هشش .. فضحتينا بالعماره تعالي ادخلي..
-بقيت متصنمه بمكاني خفت ادخل.. جر ايدي وكال لتخافين تعالي..
فتت وسد الباب وراي.. باوعت للشقه اكو رجال موجود. شايفته بس وين.. بقيت استعيد ذاكرتي
مو كلش اتذكر الناس لكثرة اختلاطي مع اشخاص كثر يمرون للصيدليه وبشارع..اتذكرته اليوم اجه للصيدليه..
شفته كام بأتجاهي.. كلبي وكع من الخوف من كام.. تراجعت.. انضربت بمالك وراي.. يا الله هاي بيا مصيبه حطيت نفسي..
بقيت اباوع لمالك وللولد بخوف.. حجه
ايهاب:- اهلا ست لجين نورتي ..
-كمت اتراجع واتلمس بمالك من الخوف.. وكأني اهرب من وحش واتخبى خلف وحش اخر... بدون امل للسبيل منه..
مالك:- لتخافين هذا صديقي..
لجين:- بگلبي گلت هو لان صديقك مثلك لازم اخاف منه. .. بس التزمت بصمت بس عيوني تعبر عن خوفي..
لحد ما طلعت مره من الغرفه ما اعرف مطبخ.. حجت منو هايه.. باوعتلها بساع..
مالك:- ميخصكم.. انتهت زيارتكم يلا ولّو شوفوني اجتافكم..
-دفعني وره ضهره وفتح الباب ووكف اشرلهم بره.. المره اخذت جنطتها بعصبيه وطلعت بساع..
والولد شال باكيت جكايره وموبايله وقبل لا يطلع صار وجه بوجه ويه مالك وغمزله وكاله بالعافيه يااااا ملك.. وباوعلي
متت خوف من غمزته.. بسرعه مديت ايدي للسجينه بضهري.. خليت ايدي عليها. مالك طلعهم وسد الباب
شال راسه وباوعلي ..ضحك و اندار مشى وحجه
مالك:-شمري سجينتج يا حلو... مو ناوي ائذيج..
لو ردت.. ما تمنعني سجين.. كان من زمان اخذت الاريده..
اباوعله طويل حيل.. وجسمه تارس ومعضل.. بس عنده بطن شوي... لابس تشيرت اسود ربع ردن.. اديه كلها وشم.. اللي لفت انتباهي بالوشم مالته على ايده..
حرف a حولها دائره.. مثل الآت @ بس كابتل .. مفتهمت شنو هذا الرمز بوقتها..
اندار.. وابتسم.. تعالي لتخافين.. اتفضلي كعدي.. واشرلي اكعد..
-تركت السجين بضهري ونزلت ايدي.......ابن عمي وينه
كعد كبالي وخلى رجل على رجل ورجع ضهره ويباوعلي بابتسامه..
مالك:- ما اعرف
-تقربت اكثر.. حسابك وياي مووو طيب اترك ابن عمي وصفي حسابك وياي الله يخليك لا تقتلوه
مالك:- هلكد تحبي
- كعدت...لا بس ما احب احد يتأذى بسببي..
-هممم.. زين شنو اللي تكدرين تقدميه مقابل حياته .
- هو عايش .. بقى يباوعلي بدون جواب..
-جاوبي..
-انته شنو اللي تريده..
-ابتسم.. لهدرجه ضعفتي..
-لا .. بس دا احاول احمي شخص بريئ..
- نزل رجليه وثبت اديه عليهم وقدم راسه وحجه.. لجين اني اريدج.......اريدج انتي
-بلعت ريگي ... اريد اكولها.. اخذ اللي تريده بس ما جاي تطلع من حلكي..
بس اني بنيه وهالشي ممكن يخسرني حياتي..
مالك:-قصدج عذراء
　
لجين:-ما رديت.. اكتفيت بس اباوعله..
-هذا ميمنع.. افتهمي كتلج اريدج ميهمني ان كنتي عذراء او غيره..
-ما اكدر افتهمني ما اكدر.. اني مو مثل التعرفهم.. مو رخيصه اني .. ما اكدر ..نزلت دموعي واني احجي
كام من مكانه كعد يمي... كمزت من يمه ووكفت على حيلي وكمت اتراجع..
كام ويه كومتي ومد اديه.. لتخافين شبيج..
-ابتعد.. ابتعد الله يخليك وبجيت.. لزمني من زنودي حيل.. رفعت اديه وبحركة دفاع نزلت راسي بخوف
-لجين اني احبج صدكيني احبج و مو ابالي اذيج ابد..
-حجه هيج.. باوعت بوجه وهو لازمني.. انفجرت بالبجي.. بس هذا مو حب والله مو حب اني جاي اخاف حيل .. الله يخليك اتركني
جرني واني احجي وضمني لصدره حيل.. ولف اديه عليه .. ايد على ضهري وايد على راسي.. ويطبطب ويكولي
-هششش تنكسر ايدي لو اذيتج.. لتبجين.. لجين احبج صدكيني..
-رفعت راسي من صدره.. بس التطلبه صعب ما اكدر
-لج افتهمي اني رايدج الج .. مرايد جسمج.. ولا الي رغبه اتقرب.. كان سويتها من زمان بس اني اريدج الج..
اخذ راسي بأديه.. وبقى يمسح على شعري ويحجي.. احبج صدكيني.. ورجع حظني حيل ويتنفس ويشم وكأنه يتنفسني ويحجي..
لجين اني تعبان .. كلش تعبان.. اخذيني بعيد.. صوتج بلسم لجروحي عطرج نسيم بارد ارتاح بي.. لجين اريد ارتاح من العالم يمج اخذيني..
يحجي همس وهو يشتم بشعري وحاظني.. رفعتله راسي.. باوعلي.. استقرت عيوني بعيونه..
وعيونه لحظه على عيوني ولحظه على شفايفي.. لحد متقرب وباسني..
احساس ما اعرف شلون اوصفه غريب.. لاول مره اكون مع رجل بهلموقف.. بعمري محد مبوسني..
احساس بين الدفء و الخوف والرغبه .. للحظه لكيت روحي وقفت على رس اقدامي واديه تحاوط خديه لحتى اوصل لوجهه وابادله المشاعر..
ضعت باحساس غريب... كان المفروض اتضايق.. بس متضايقت... وكأني مرتاحه لهالشي.. صراع بين عقلي وقلبي ورغباتي..
عقلي يكول ابتعدي هذا الجحيم وممكن يحركج.. وكلبي يكول هذا يحبج من صدك.. لتبتعدين.. ورغباتي ذابت بين اديه
لكن كان العقل سيد الموقف.. وابتعدت.. مديت ايدي وبعدته من عندي ومنزله عيوني بالكاع.. خجل وحيره وصدمه باللي سويته..
عيوني بالكاع ادور وكأني ابحث عن نفسي.. اللي ما اعرف امتلكها بوجوده..
اني اتبادل مشاعري مع رجل.. كل الوقت عايشه لحظات الجحيم بخوف منه
رفعتله راسي.. اني مو هيج.. هو يباوعلي مبتسم.. اتقرب.. خليت ايدي على صدره وبعدته حتى ليرجع يحظني..
صدقني اني مو هيج ... مو بهالرخص
مالك:- اعرف
لجين:- شتعرف..
مالك:- اعرف ان انتي اجمل امرأه بالعالم.. بالحظه اخذتيني من عالم ونسيتيني بيا كوكب اني في
-تعرف الانسان احيان.. من يخاف من شي .. وميبقى كدامه غيره.. يلتجئلى..
مالك:- مفتهمت
لجين:- انته اللي اخاف منك... قررت التجئلك حتى احمي نفسي منك.. حتحميني ؟؟
اتقرب بسرعه واخذني لحظنه مره لخ.. احميج صدقيني احميج.. بروحي بعيوني .. افتح گلبي واحميج من كل رغباتي ونزواتي..
-رفعتله راسي وهو يباوعلي.. اوعدني
مالك: وعد
لجين:-ابتسمتله.. باسني بگصتي.. لازم اروح ما اكدر اتأخر..
-طيب اني اوصلج..
مشى من عندي بسرعه.. بقيت اباوع لجسمي... وهو يبعد جسمه عني..
اخذت نفس.. ماكو داعي سيارتي ويايه..
-اهااا.. سيارتج وياج.. اوك
-هزيت راسي.. ودرت للباب دا افتحه.. صاح لجين ..
درت وجهي.. هااا
مالك:- هاج سجينتج اخذيها وياج هههه والافضل مره لخ تشيلين سلاح.. مو سجين صغيره لو خليتيهة بجسمي تنعقج وما تدخل
لجين:- انصدمت هاي شجابها لايده.. باوعتله وشلون اخذتها.. اقترب مني.. وكرص خدي..
-ههه واني ابوسج.. سحبتها من ضهرج. مو اكولج كلج احساس بسرعه تتفاعلين.. خليج نبيهه اكثر المره الجايه..
-شكد خجلت من حجه هيج. امدايه اي والله شلون فشله شايله سجين ومسويه نفسي فد وحده متنكدر.. واني مسلبه وما ادري..
اخذتها من ايده.. ونزلت.. ضغطت مفتاح السياره.. ضوت السياره وانفتحت.. دا اريد افتح الباب..
جان يخلي ايده علباب.. ويكولي اني اوصلج ممكن..
-بقيت اباوعله.. مد ايده واخذ السويج من من ايدي.. وغمزلي واشرلي براسه.. اي يعني اصعدي..
-صعدت بالسياره.. ومشى.. فتح اغاني طلع باسم العلي مشتاقلك موت..
يمشي وهدوء بالسياره غير الاغنيه وهو يدندن وياها.. التفتلي وهو يغني لو تشوووف شصار بيه والله تبجي دم عليه..
-شصار بيك..
اخذ نفس عالي وزفر.. وحجه..
مالك:- لو بس تدرين شصاير بيه..
-شصاير
دار وجهه.. ومد ايده على جيبه.. اخذ جكاره وخلالها بحلكه وشغلها وسحب نفس.. وبقى يتنهد.. وما حجه
شتشتغل انته ؟؟
- موضف بمطار بغداد الدولي
-وغيرها
-ابتسم.. وشنو غيرها
-شغلة تطلع من السجن بليل وترجع .. والصبح يطلقون صراحك والقضيه تنسد والنقيب يختفي..
هالشي معناها وراك قوه وجماعه ساندتك.. الا شغلة موضف طيران عادي ويسوي اللي تسوي لتحاول تقنع احد بيها.
-ابتسم.. والتفت....شكد حلو السانج وهو يحجي
-ابتسمتله.. وحلو لما تغير الموضوع بطريقه غزليه
- ههههههههههه.. حلوه وتفهميني بساع.. دار راسه وغمز تعجبني التفتهمني..
-ما رديت.. سكتت... وبدلت بسؤال اخر... منين تعرفني انته .. ؟؟ ومره ذكرت اسم امي.. شمدريك بهلمعلومات.
-اعرفكم واحد واحد.. ابوج امج.. عمامج.. حتى اقاربكم اللي بديالى وتكريت اعرفهم..
-عقدت حاجبي ومنين تعرفهم.. رفعلي حواجبه ويكولي سر المهنه..
-انت عجيب
-ليش
-لان قبل ساعات اني ابجي خوف منك.. واكول يارب خلصني.. وحاليا كاعده يمك لا وتسوق سيارتي..
انته شلون خليتني اطمنلك بهسرعه
-ببساطه الحب.. ممكن قلبج حس باللي احسه واطمئن..
-انت تحبني.. اخذ اديه شبكها بايده.. باسها.. ورجع حرك الگير وهي بأيده ..
حركات بسيطه.. بس الها معاني كثيره. واني اباوعها... احساس غريب من ايدي بايده.. واني ممهتمه وكأني مطمنه..
ولا كأنه ذاك اللي قبل ساعه ابجي منه.. معقوله هلكد ارتاحيتله بهسرعه.. فزيت من تفكيري على صوته وهو يحجي..
مالك:- هذا فرعكم.. تردين اوصلج للباب لو هنا وانتي تكملين..
-تخاف تدخل وياي للفرع.. ؟؟
-اخاف ؟!!! لا طبعا.. بس اعتقدت هلشي ممكن يسببلج مشكله او احراج..
حرك وراد يمشي.. صحت لا لا اوكف لهنا اني اكمل ..
نزلت.. وهو نزل.. درت لمكان المقود.. صار بوجهي..
-راح اشتاقلج..
-ابن عمي مالك .. اترجاك اتركه واذا تعرف عنه شي خبرني.. اذا صدك تحبني بس ريحني بمكانه..
مد ايده وبأبهامه مسح على خدي.. وعد تكعدين الصبح.. تسمعين اخبار تسرج.
-ابتسمت.. اكون شاكره الك..
-مد اديه بجيوبه.. واخذ نفس وتنهد..احبج..
-بانت ابتسامه من وجهي لوجهه رغم محاولتي بكتمانها.. ما طلعت ويايه غير كلمة باااااي..
اخذت سيارتي وحركتها.. ومشيت للبيت.. صفيت السياره.. البيت بعده مقفول.. دكيت الباب ع الجيران اخذت المفاتيح..
ورحت فتحت البيت ودخلت .. للان مجايين.. سديت الباب وصعدت لغرفتي.. شمرت الجنطه والمفاتيح والموبايل ع السرير..
وشمرت روحي وياهم متمدده.. اخذت نفس.. واني اخذ خصله من شعري والعب بيها ومبتسمه.
واغني .. اول مره تحب يا البي واول يوم اتهنى يما على نار الحب ئلولي والئيتها من الگنه
هههه هذا اللي كنت اتوقعه نار الجحيم.. معقوله يصير جنة نعيم الي.. حسيت بحبه مع كل كلمه.
باوعت لاديه.. هاي اللي جانت بين اديه.. كمت للمرايا ووكفت اباوع لروحي واتلمس شفايفي .. واتذكره..
العجيب متضايقت منه ليش.. واحساسه عجيب وهو يبوسني.. لا لعبت نفسي ولا اختنكت ولا تضايقت..
مال واحد متمرس ويفتهم.. عزززه يفتهم.. يعني صاير بنفس الموقف ويه بنات غيري.. وهيج يحبهم ويبوسهم..
عابت شدا احس.. شنو غيري شنو حب.. اني تخبلت والله لو هذا خبلني.. رجعت اباوع لشعري..
يبوه واني رحت اله بهلكفشه.. والله زين وما اخترع.. لا ويكلي حلوه.. وكفشتي هلكبرها خرب ببليس..
شغلت التلفزيون.. نانسي عجرم.. عليت الاغنيه وكمت افتر بالغرفه واغني وياهة
يااااي سحر عيونو ونظراتو.. اول متلائينه عين بعين
ياااي شو مهظومه كلماتو ..... وكمت اركص.. كلمه وصار بسمه ع بسمي .. البي احتار نساني اسمي مدري كيف ووين
سمعت الباب الخارجي انسحب وانفتحت.. فزيت طفيت التلفزيون بسرعه.. ونزلت..
فتحت باب الصاله الهم.. دخلت امي وشايله عمتي وهي تصيح ابني يمه وينك حبيب كلبي..
امي تباوعلي وتخزرني تريد تعرف شصار.. طب بابا انطاني اسويج السياره وحجه.
الاب:- شنو جنتي طالعه..
-دا اريد احجي صاحت امي لجييييين.. وخرتني ورفعت راسها عود لتحجين..وحجت.. روحي جيبي مي لعمتج بساع..
-هاااا اي اي هسه اجيب.. ركضت للثلاجه طلعت ثلج.. كسرته وخليت بدولكه. وصبيت عليه مي وجبته هو والكلاص..
صبيتلهم كلهم مي.. وصلت لبابا صبيت وانطيته..
الاب:- مكلتيلي جنتي طالعه.. اشوو مبدله ولابسه بنطرون.. وشرب مي
لجين:- لا بابا مطلعت بس بدلت ملابس البيت كلت خاف احد يجي..
كمل شرب وحمد الله وانطاني الكلاص وكال الله يرضى عليج بنيتي.. رجليه اذتني من الفره جيبلي مي حار ودلكيلي رجليه بعد ابوج..
-اي ادلل حبيبي.. ركضت للمطبخ.. عبيت الكتلي مي وخليته ع النار ورحت جبت طشت صغير.. وصابونه..
واخذت الكتلي صاير دافي على حار.. ومشيت للصاله وكعدت يم رجلين بابه اغسل وادلكله رجليه بالصابون حتى يرتاح
بقى عمو عثمان وعمران يحجون ويه بابا على شنو تارك بنتك تشتغل بالاذاعه وذوله ناس مو زينين وهي بنيه..
اني ما احجي تاركه الحجي لابويه.. كاللهم اني واثق بيها.. اعرفها طيبه وخلوقه مستحيل تنزل راس ابوها..
ومسح على شعري.. باوعتله ابتسمت.. واني اتذكر شلون اليوم ردت انطي شرفي وانزل راسه علمود احمي مخلد الحمدلله الله لطف ومالك تفهم..
باوعت لامي بطرف عيوني واني اغسل. تتنهد وتخزر.. وتهز براسها.. دنكت منها وبقيت ادلك لبابا..
كامت امي وراحت للمطبخ وصاحت لجيييين.. كال باب اتركي رجليه بالمي الدافي وروحي شوفي امج شتريد..
كمت من عنده.. شطفت اديه. ورحت ايالها .. اول مدخلت المطبخ جرتني حيل تعالي يولي فهميني شصار كلبي مثل النار
بنت الاوادم شلون تقفلين جهازج بوجهي.. خليتيني كاعده على نار.. احجي شبيج.
-ماما مصار شي.
-يعني شنو .. ما رحتي لمالك..
-لا بلي رحت بس الولد يكلي اني ما اريد جسمج.. اني اريدج الج اريد كلبج واحبج ومن هلكلام.
ويكول لو رايد جسمج جان من زمان اخذت اللي اريده يقصد بيوم اللي سطى على بيتنا..
الام:- وتعتقدي صادق شعجبت استشرف..
لجين:- ما اعرف يكول احبج.
الام:- كون سوالج شي.
-لا مو دا اكولج لا يا امي.. بس يكول احبج واحبج .. هاهيه.
-وانتي..
-شبيه اني
-والله يداده چنچ انتي هم وكعتي..
-لا وكعت ولا ابد.. بس مكمت اخاف منه.. وهو يكول يحبني وعلى مخلد كال باجر الصبح تسمعين اخبار تسرج.
-يعني شنو
-يعني اذا فعلا يحبني ومشاعره صادقه.. مخلد باجر يبين. واذا كذاب.. يروح بيها مخلد..
الام :-ننتظر ونشوف.. بس ها اسمعي تعاي هنا. مو ترحين توكعين بحب هذا.. تره ينخاف منه.
لجين -هزيت راسي اي..
-عفيه بنيتي.. يلا ساعديني نسوي السفره اني وابوج جبنه اكل من بره بس نمد السفره ونگعد..
-اي ان شاءالله.. جريت السفره من الكاونتر ورحت للصاله مديتها.. حجه بابا
-الاكل بصندوق السياره اخذي السويج وروحي جيبي.
-اخذت سويجه ورحت نزلت الاكل اني وماما.. وعقلي كله ضايع بمالك.. دا اريد اشيل الاكل..
فلتت مني علبة شوربه.. ووكعت بالكاع..
الام:- بالج يول بالج.. خلي براسج لتخلين الحراميه ياخذوه.. تحجي ومبتسمه.
- ضحكت اوووو ماما عفيه لتحجين هيج والله اخجل..
الام:- ههو ههو .. يمه منج امشي نعشي الناس امشي..
لجين:- ههههه اوك يوم اوك..
دخلنه مدينه العشى واكلنه عمتي ما اكلت.. حاولت ماما تنطيها صدر دجاج ما قبلت بقت تصيح كله من لجين ضاع ابني..
وامي تبتسم من جوه لجوه بوجهي حتى لا اضوج.. واني تركتها على هواها ابد مرديت..
كملت عشى.. رحت غسلت المواعين والمطبخ. وعزلت البيت ومسحته.. بيت عمي راحو.. دا اصعد.
صاحلي ابويه.. تقربت اله باس راسي..
الاب -كون تضايقتي من حجي عمتج
- لا حبيبي متضايقت.. اصلا مقهوره عليها خطيه ابنها حقها تحس اني السبب
باسني بكصتي.. تذكرت مالك من باسني اليوم بنفس المكان.. ابتسمت.. بست بابا بخده وكتله تصبح على خير..
صعدت.. واني امسح على كصتي.. بين بوسة بابا ومالك اختلاف بالشعور..
من يبوسني بابا احس بحنانه.. ومن باسني مالك.. حسيت باحساس مختلف جدا.. ما اعرف اي تسميه اطلق عليه.. غير الراحه والحب..
حتى لو ما كان يمكن بقلبه حب حقيقي.. بس اني حسيت بحبه من خلال بوساته ولهفته.. وكأنه جان يشرب مي من عندي وهو مدنك عليه..
بقيت افكر بيه طول الوقت.. اصلا محسيت شوكت وصلت الغرفه وبدلت ملابسي

وطفيت ونمت بفراشي.
كل هذا سويته واني مو حاسه من كد التفكير.. وبقيت ضايعه بي لحد ما نمت.
كعدت الصبح على صوت امي..
-لجين لجين اكعدي بساع.
-فزيت ها ماما شكو.. راح الوقت.. الصيدليه.
-لا مخلد هذا باالباب يريد يحجي وياج..
وسمعته كح ودك الباب وصاح.. لجين كاعد.....يتبع

♡♡♡♡♡♡♡♡♡
　
رومانس عالي.. مو كلتلكم حلقه لا ينصح بها الاطباء 😁
#زينب_ماجد

لامارا · 16-04-19, 05:06 PM

#خطوات_نحو_الجحيم
//// بقلم الكاتبه زينب ماجد ////
الحلقه_7

كعدت الصبح على صوت امي
..
-لجين لجين اكعدي بساع.
-فزيت ها ماما شكو.. راح الوقت.. الصيدليه.
-لا مخلد هذا باالباب يريد يحجي وياج..
وسمعته كح ودك الباب وصاح.. لجين كاعده.... فزيت من مكاني بسرعه.. ردت اطلع اله.. تذكرت لابسه ملابس نوم كيمونه وبجامه.
جريت جاكيت من الزاويه لبست وفتحت الباب.. باوعتله.. الايد ملفوفه ومعلگه بأيده.. والوجه بيه شوية وراگ
سلمت عليه بساع.. يمعود متتخيل شكد ضل بالي عليك.. دا اسلم بعدني من يمه ودخل للغرفه..
الحواجب مطابگه.. والعصبيه مبينه بوجهه.. يا ستار. شبيه .. ولو هو من يوم يومه هيج.. شال البطانيه نصها واكع بالكاع..
عدل وكعد..امي تسأل بيه وتحجي شلونك عمه. امك بالها يمك ما شفتها.. هو يكلها زين زين ان شاءالله اروح الها..
بس عمتي.. اذا تسمحين شويه صغيره احجي بيها وي لجين.. امي كالته اي اخذ راحتك.. دارت وباوعتلي وخزرت عيونها..
فهمتها تكولي لتكولين عن مالك.. اتقربت وكعدت ع السرير يمه.. الحمدلله على السلامه مخلد.. وربك انجنيت من الخوف عليك..
مخلد:- لجين شنو ثمن حياتي..
لجين:- مفهمت ؟؟
دارلي.. وايده بركبته.. ويحجي ويشمر بأيده الثانيه
مخلد:- شنو القدمتي مقابل اطلع من اديهم بلا ما يقتلوني.. لتجننيني وافتهمي بسااع.. واحجي
-مقدمت شي..
-انتي دتريدين تلعبين عليه لو شنو.. فهميني منو هذا وشيريد منج. تعرفي
-هسه هلحجي هذا مو وقته.. ارتاح وخل نفرح بيك وبعدين نسولف..
صرخ بوجهي جاي اكلج احجيييييييي..
فزيت..و اخرسيت شحجي.. من الصرخه كلشي ضاع من بالي..
بلعت ريكي.. يعني شحجي.نطقت وما احس الا شال ايدي .. حيل ودفعني للحايط.. وخله ايده على ركبتي.
اذبحج والله ومحد يخلصج مني.. مال تفرين بذيلج وتلعبين علي.. انجوم الضهر اشوفجياهن..
-دفعته من صدره وبعدته.. اشو وخر.. انته هواي تتجاوز.. الف مره اكولك احترم..
دارلي وصرخ ولج خبلتيني احجي.. ولج حركتي دمي.. روح ما ضاله بيه.. احجي منو هذا...صار يومين نايم بزنزانه وجد جدي مشتعل خايف سوه بيج شي من طلع..
وهسه جاي تكليلي احترم..
دخلت امي..
مخلد:- اطلعي عمه فدوه خليني احجي وياها..
الام:- بس يا امي الحجي مو هيج. بالتفاهم كلشي ينحل..
اندارلها بعصبيه ويكلها اييييي وبالله كليلي شينحل.. الكلب اسجنه بليل .. يجيني امر اطلاق صراحه من فوك.. بدون مناقشه..
ولازم اسد القضيه.. ليش .. كالو هذا امر من القياده العليا اطلاق سراحه فورا.. ولكم هذا متعرض لبنيه متحارش بيها..
يجيني سد القضيه فورا وهذا امر ينفذ.. تحت التهديد.. اطلع محترك من الدائره اخابر الخانم.. 26 الف مره ولا يمها ولا ترد..
ادز رساله ولج ردي.. الدنيا مو بعينها لجين.. كل اليهمها طكت البنطرون والسياره ولزمتها فراره..
ولج الدنيا سايبه اكعدي يا لجين .. ما ترد.. ولج ذول اهل القنوات مو زينين وانتي بنيه.. يا لجين ابتعدي.. ولا ابالها..
وكله صوجكم.. انتي وعمي... انتم المرخيلها الحبل
الام:-مخلد تره اذا الكلام مو مقبول منك.. ابن عمها على العين والراس بس مدام راس ابوها يشم الهوه انته فدوه لا تدخل بحياتها دادا
بتنه مربينه وواعيه ومثقفه وتعرف شتريد.. كلامك وتشكيك هذا خليه بشغلك لا تفرضه عليها.
مخلد:- هاااااه.. من يصير بيها شي مخلد تعال.. انظربت سيارتها مخلد فدوه صلح.. اتعرضت لتهديد مخلد فدوه الحكنه.. وهسه لا تدخل.. موووو
لجين:- اكولك مخلد انته دتمنن عليه لو شنو.. كلما طلبت منك شي تعيرني بيه.. ولو اطلب من غيرك تكلي انتي ما تحترمين.. مو اني ابن عمج
شرايد كُلي.. حجيت ..جرني من ايدي حيل اهتزيت كلي من جرت ايده.. شمرني يم الميز ويكلي خلي ايدج ع القران احلفي وكولي
والله مالك مال التقيته ولا اجه يمي ولا حجيت وياه.. احجيييي..
بقيت صافنه بوجها..
مخلد.. ولج احجي ريحيني احلفيييي..
لجين:- مخلد كتاب الله مو لعبه..
مخلد:- هااااه يعني تعترفين الجاي تسويه لعب وما تردين القران ادخلي بالنص مو.
لجين:- رحت بلي رحت وحجيت وياه وترجيته يتركك..
مخلد:- اي والمقابل..
لجين:- بدون اي مقابل.. هو كال تسمعين اخبار تسرج الصبح.. وانته اجيت الصبح..
مخلد:- شايفتني كدامج مهبول. مكتوب على كصتي اغم.. شفتيني زوج واصدك.. تحجين لا بالقران افلشج..
الام:- تره ميصير هيج.. مخلد انته دتتجاوز عليها هواي وهاي بنص بيت عمك..
مخلد:- لا تخليني اسب عمي وعشيرتي كلهم والله.. اطلعي عمه خليني اتفاهم وياها..
الام:-انته شنو محد بعينك.. شكد قبيح
لجين:- ماما اتركي..
مخلد:- قبيح مووووو ولكم اني طالع بشرف بت عمي.. شنو كوااااااااا...... بت عمي تنطي روحها لواحد رخيص حتى اني اطلع.. ادري مكرن ..
لجين:- مخلد.مصار اللي ابالك والله صدكني كولشي مصار... جر ايدي وخلها على القران..
مخلد:- احلفي والله ما لزمني ولا حتى باسني او لزم ايدي.. كولي..
-انخرست شحلف..حجيت.. مخلد بس اهدئ
-احلفييييييي..
-ما حجيت
-تف الله لا ينطيج اني اعلمج كلبه.. لاشوفج انجوم الضهر والله.. من ايدي وشمرني للسرير حسيت ايدي انفسخت من الشمره شاغت روحي..
هو وطلع وضرب الباب وراه بحركه..
اباوع لايدي..احسها ازركت من لزمة ايده.. بقيت افرك واني ابجي.. اتقربت امي.. اطبطب على كتفي..
الام:- خيولي هالهمجي من كل عقله ابوج يكول مخلد انسب انسان لبتنا..
-اي انسب صحيح.. هذا اتزوجته اخلصها عنده حبس وكتل واهانه.. عنده المره بس طبخ وتنظيف.. متخلف..
نزعت الجاكيت.. رشيت عطر.. لبست تيشيرت.. وبنطرون واخذت الجنطه .. وامي كاعده علسرير تحجي وياي..
بستها وطلعت من البيت للصيدليه.. كاعده. والدمعه بطارف عيني من مخلد. ابويه ما يحاسبني مثله هو شكو..
اباوع لايدي واشوف الزراك وادمع عيوني.. الله لا ينطيك شوهت ايدي.. حتى توجعني..
مالك:- شبيه الحلو زعلان.
لجين.. فزيت على صوته ورفعت راسي وكمت.. هاا اااا لا بس ايدي شوي.. شاف ايدي شايلتها ما اكدر اشمرها توجع..
مالك:-شبيها ايدج.. تقرب... اخ اخ اخ هاي ليش هشكل.. منو مسوي بيج هيج.
-مو اي احد فدوه روح لا يجي واحد.
-طلع من المكان ورجع وكف وره الخانه الزجاج.
-بس كليلي شبيج.. منو مأذيح احرك والديه صدكي.. بس كولي
-استغفر الله.. ماكو احد صدكني.. بس تزحلكت وانلفت ايدي..
-طيب خل الفا الج..
-لا ماكو داعي ... جر من الصيدليه بونستر.. واجه كال اشو..
-لا شدتسوي اطلع مالك تسويلي مصيبه والله ليجي احد يشوفك المحلات المجاوره كلها تعرفني.
-طيب اخذي استراحه وكولي المؤيد تعبانه وتعالي دا اسوي ايدج..
-درت اله واني لازمه ايدي.. وانته شعرفك ابو الصيدليه اسمه مؤيد..
-ابتسم. كتلج اعرف كلشي عنج وصار شهرين مراقبج.. دخابري يلا.. محطير الصيدليه لو انسدت نص يوم..
جريت موبايلي وخابرت مؤيد وكتله على ايدي.. كال طلعي اني هسه اجي اوكف بمكانج..
اخذت الجنطه.. وسديت الصيدليه وطلعت .. مالك بسيارته.. عفته ورحت صعدت بسيارتي..
ترك سيارته.. صفها بالفرع.. واجه.. نزلي اني اسوق عنج. نزلت بلا ما احجي..
صعدت بالكرسي الثاني.. ع فكره هذا مستوصف كدامنه اروحله مو احسن..
مالك:-بيه اشعه ؟؟
-ما اعتقد لا
-تركي لعد.. اني اخذج لغيره..
-مشى واني اباوعله.. مالك
-ها
-ليش ما حاولت تتقربلي بطريقه غير اللي تهجمت بيها عليه.. كان ممكن احبك
مالك :- جربت 6 مرات اغازلج ما باوعتيلي ولا شلتي عينج عليه..
-ما اتذكرك.. يعني حاجي وياي قبل ؟
-قبل الحادث 3 مرات طاب للصيدليه واحاولة احجي واتصرفيني..
-ما اتذكر.. باليوم هواي اليمرون واكو اللي يزعجون وكل واحد مسوي روحه امرؤ القيس..
-ابتسم..
-باوعت لايده والوشم.. صدك شنو معنى حرف الa على ايدك بالوشم..
-وين هنا.. وحرك ايده اليمنى
-لا هناك باليسرى..
-هيج ولا شي.. مجرد رسم
-طيب شتشتغل..
-كتلج موضف طيران
-اقصد غيره..
- شي ميخصج.. مو كلشي لازم تعرفي..
-هممم.. سكتت.. شكد حسيت رخصت روحي واني احجي وياه وهو لو يجاوب بكلمتين لو يكتفي بابتسامه او سكوت..
حتى بعد ما احجي.. واصلا اني شكو قبلت يصعد يسوق.. هو فصخ بسيط قابل تعوقت..
اكله انزل ما اريدك لو شلون.. دا افكر قطع سلسلة افكاري وهو يسأل.. :-ابن عمج شفتي..
-اي
-اجاكم
-اي
-شعاجبج بي..
-نعم. ؟؟
- على طول يغلط ويفشر وفد واحد مخبل.. ع شنو مهتمتله هلكد..
- عفوا اولا اني ممهتمتله.. وثانيا.. هو ابن عمي واخويه ما اسمحلك تغلط عليه. وثالثا ...
-وثالثا اني ما غالط عليه واحترمي نفسج وكصري السانج..ونزلي لان وصلنه..
-ردت ارد.. صاح شبيج نزلي خل اصف بالكراج واجي..
نزلت وضربت الباب حيل وراي .. تذكرت سيارتي هاي خرب.. نزلت راسي وهو يريد يتحرك.. ع فكره انته وقح.. ...
ما رد..اخذ السياره وراح صفها.. واني واكفه بالشمس.. طبعا متعمد يتأخر حتى يصلبني هنا..
ردت اروح ادخل المستشفى.. اجه هوه يتمايل باكتافه يمين ويسار.. اتقرب..:- يلا امشي..
-ع فكره اكدر ادخل وافحص وحدي..
-ع فكره اعرف..
-ادور يقلد عليه شكد وقح.. امش وراه وهو يمشي .. وكفت.. اندار هااا..
-انته مو ع اساس موضف متروح لدوامك.. ابتسم وهز راسه..واجه اتقرب مني.. سحب ايدي الثانيه شبكها بايدي ومشى..
يجر بيه واني اباوعله شلون لازمني.. سأل الاستعلامات عن الاشعه.. لازم تروح طبيب يكتبلك..
اخذ باص منه.. وجرني وراه.. دخلنه المصعد.. و2 صعدو ويانا.. اباوعله شكد طويل.. رغم اني مو قصيره طولي 168سم
واوصل لحنچه تقريبا.. او اقل منها.. انفتح باب وهو جر يجر بيدي .. تكول كايداله طفله مو ابنيه بكدي
اخذني للطبيب.. كانو كدامنه 3 حتى يدخلون.. كعدنه على الكرسي.. اني اراقبه.. هو ساع ينزل راسه وساع يباوع علباب.. ابد مباوعلي..
سحبت ايدي منه.. التفتلي بابتسامه..
لجين:- شكو اجيت وياي..
ما رد.. ولا كأنو حجيت.. واندقيت كلش من هسالفه احجي وميرد.. اسئل وميجاوب..
اوف ربي اوووف.. كل واحد اشمره عليه امر من اللاخ.. ذاك يحجي ويكلب الدنيا واعصابه نار.. وهذا اعصابه ثلج ورحمة الله لو رد على سؤال ..
باوعت .. شو هي ايدي جنها طابت.. ما احس بوجع.. شنو هلعياره خل اكوم اروح.. جاي اكوم. لزم ايدي..
-كعدي مضل شي..
-تره مبيه شي.. ما رد ودار وجهه علباب.. يبوووه راح اضرب روحي بالحايط.. هاي اول يوم اتعرف عليه وهيج دقني لو اضل وياه شلون..
-بقيت اهز رجلي بتوتر.. باوع ودار وجه وهو مثبت عكوس اديه على رجليه..
صاح السكرتير وكال فوتو.... طبينا.. ردت اكوله ماكو داعي اطب وياي.. بس عود يسمع.. يجر بيه تكول بهيمه مو بشر..
كعدت جر الدكتور ايدي.. كمزت... ااااخ.. كام يلزم الدكتور ويفحص.. من يلزمها ما توجع بس من يجرها توجع.
كال رض ميحتاج اشعه.. لف ايدي وضبها.. وكاله بالسلامه كلشي ما بيها ان شاءالله بس لتخليها تشيل بيها..
والافضل.. ترفعها لرگبتها حتى متوجعها واطيب بساع.. احسن ما تتأذى بالجاذبيه..
شكره وكال يلا امشي.. مشيت وحجيت مو كتلك مابيه شي.. ردت اروح ما قبلت..
هم مايحجي مخلي ايديه بجيبه ويمشي كبالي.. بالله شنو الميانه وامشي وياه.. وشبيه امشي مثل الثوله..
انفتح المصعد.. صعدنا.. اباوعله شو ميحجي هواي .. جان يحجي هواي هسه شبي عطل
مالك:- ما مليتي وانتي تغلطين عليه ابعقلج
-نعم.. ؟؟ غالطه عليك شنو وبعدين هاي مو اخلاقي ابد..
-هممم.. انفتح باب المصعد.. اندارلي وعقج عيونه وخشمه ويكولي ع فكره انتي وقحه .
صفنت.. هذا يبسمرني لو يضحك عليه.. طلعت من المصعد... شلون يحجيها اني هيج اتنعوص بكلامي
يمشي واني امشي.. اباب المستشفى اكو ماركت.. وكفت طلبت مي بارد.. هو اجه وكف.. باوعت بعيونه..
-اني وقحه.. ابتسم..
-احبج
-ابتسمت ودرت وجهي.. اخذت المي.. ردت اشرب مديتله البطل تفضل.. هز راسه لا.. شربت نص البطل..
دا اسده.. جره من ايدي وهو يمشي ويشرب.. ويغمزلي ويكولي هيج انعش واطيب.. اتعلمي..
- ضحكت.. شكد سرسري بس سوالفه ما اعرف احسها حلوه.. طلعنا المستشفى.. صحت مالك..
　
اندار :- نعم
-اشكرك لانك خفت عليه ورافقتني للمستشفى وتتأكد من سلامتي.. انتجه على السياره وكتف اديه..
:- وغيرها..
-شنو يعني..
مالك:-هههههه اموت عليج من تكولين بكل غباء شنو يعني.. اصعدي..
لجين:-صعدت.. وهو فر صعد..مالك..
-نعم
-شكرا..
-عفوا
-لا مو على هاي..
-ههههههههه لعد
- على وفائك بوعدك.. وتركك لابن عمي.. هز راسه.. وكال ادللي .. وحرك السياره ومشى.. ديسوق اتصل بابا..
لا تحجي فدوه بس ارد... رديت عل بابا.. الو ها بابا.
الاب:- انتي وين
-هسه طلعت من المستشفى جايه بالطريق ليش
-خير مستشفى شنو.. ؟ شبيج شصايرلج. .
-مصاير شي..
-بس لا مخلد..
-بابا لتهتم هو شوي معصب يهدى ويعتذر.. بقى يحجي.. كتله اوصل ونتفاهم..
سديته.. ودا قفل الموبايل..
مالك- اذن مخلد
-انداريت اله بسرعه لاااا مو هو..
-هز راسه..
-مالك.. صدقني مو هو..ما رد... ملتزم يسوق وعينه للطريق..حجيت... مخلد طيب بس عصبي .. مالك اوعدني متتهور..
هز راسه وهو يسوق وميباوعلي..
-لا تهز راسك اوعدني.. يا ربي اني قابله بالالم شلون بلوه..... مالك لخاطري..... اني شلون نسيت وحجيت بالتليفون..
مراح تسويله شي مو.. يكفي مشوهين وجه وكاسرين اديه من وراي..
-حظرتج خايفه عليه لو شنو.
-طبعا .. مخلد ابن عمي .. ومثل.........قاطعني..
-خوفج هذا بده يضايقني.. شيعنيلج هو... داس بالسياره حيل وهو يسوق.. .. صرخ احجيييي..
احس الاورده راح تنفجر من ركبته.. واذانه صارت حمره... مالك كتلك ما عندي شي والله..
داس بريك ووكف السياره فجأه اختضيت وانركعت بالجام.. نزل.. نزلت وراه.. ما اهتم.. تركني ووكف تكسي وصعد...اخذت سيارتي ورجعت للبيت..
لكيت بابا واكف بالباب.. خطيه فتحلي الباب وخلت.. وسدها وراي.. تخبل من شاف ايدي ملفوفه..
وكاله اني اعلمه شلون يمد ايده عليج .. لزمت ايده.. بابا اتركه ارجوك.. مو متعمد.. سد الموضوع..
خصر اديه..انتي صدك ملتقيه وي الاسمه مالك..
دا اجاوب.. طلعت امي نزتني بايدي وصرخت سوده عليه باع ايدها باع.. انكسرت.... عمى بعينك مخلد.. على هسالفه هاي..
تعاي طبي ارتاحي تعاي.. اخذتني وكعدتني جوه وراد يحجي ابوي يعيد السؤال.. صاحت امي
الام:- اي هسه يا شاكر متشوف الابنيه حالتها حاله.. ترتاح واسأل..
خطيه سكت بابا وعيونه ادور على ايدي ويتوعد لمخلد.. شلون فاصخها.. رغم ما توجعني حيل بس لا اشمرها لجوه تبقى تنز عليه من ارفعها مابيها الم..
رجع عاد السؤال.. انتي صدك رايحه لهذا الاسمه مالك..
لجين :- ما رحت بابا..هو طلعلي بالطريق وحجيت وياه وترجيته ما يأذي مخلد.
-وشنو المقابل..
-بابا تصدكون متصدكون براحتكم بس والله ما طلب مقابل.. ولا تعرضلي.. وكال اني مستحيل ائذيج ووعد ما اعترض طريقج..
-وشنو سبب تغير تصرفه.. اكو شي مخفي لجين مدا افتهم بنتي هذا انسان كلب وساقط.. بين ليله وضحاها يصير ادمي..
-والله بابا ما اعرف .. اني مثلك متعجبه..
-جذاب هذا ناويلج على نيه.. بابا لجين اتركي شغل القناة واكعدي .. عمامج شلو راسي بهسالفه..
دكول مخليج تشتغلين رقاصه مو مذيعه..
-طيب بابا الى متى عمامي يتحكمون بينا.. وليش نهتم لحجي الناس اذا احنه ممسوين شي غلط..
الناس لو شتسوي مراح تقبل.. وحتضل تحجي.. بابا ارجوك حبيبي اني سانده ضهري بيك لا تساندهم. على الاقل انته عقليتك متفتحه ومتحظره..
مو مثل عقولهم للان ينظرون للمرأه على ان هي صالحه للشغل وخدمة الرجل والبيت لا اكثر. عادي الرجال يشتغل اي شي بس توصل يم المره عيب..
الاب:- بابا اني ما خاضع الهم.. بس بنيتي اني ما عندي غيرج والله اخاف عليج من الدنيا. والوضع مو امان ..
-شيريد يصير بابا.. كولشي الله كاتبه انشوفه.. واذا علموت.. ف جبان اليخاف من الموت ويكعد بالبيت ..و الله كال ويدرككم الموت ولو كنتم في بروج مشيده..
الام:- هسه ارتاحي حبيبتي لتعبين نفسج... وشاكر هذا ابن اخوك تلزمه لا والنبي صدوك توصل حدها.. كومي ماما جوعانه اكيد مو.. سوده بوجهي..
-اسم الله عليج ماما تره مابيه شي والنبي.. اخذتني من ايدي وابوي رفع موبايله ودك عرك وي عمامي شلون مخلد هيج مسوي بيه..
كعدت بالمطبخ.. ماما مسويه محشي شجر.. صبتلي ماعون وخلته كبالي.. اكلت لان جنت حيل جوعانه..
كعدت كبالي واني اكل..
الام:- لوله حبيبتي هذا مالك شنو.. تره كلبي يداده ممرتاح منه.. وراه سالفه جبيره..
لجين:- والله ماما ما اعرف.. الولد صح بالبدايه تعرضلي.. بس هسه ممأذيني.. ولا شايفه منه شي..
الام:- شوفي ماما.. هو صح وفى بوعده وطلع مخلد مثل موعدج.. بس ديري بالج.. اتصرفي وياه بعقلج مو كلبج..
تره ماما الگلب ما يفكر.. الگلب يشمر الواحد بالنار وما يطلعه .. ف خلي عقلج براسج ولا تخضعيله ابد..هذا قوي وراح يستقوي اكثر..
حاولي تبتعدين عنه بدون متضايقي او تحسسي تره يأذيج.. ولا اطاوعي ابببببد.. سايري ولا اطاوعي..
لجين :- ما اعرف والله ماما.. الله كريم انتي بس ادعيلي..
الام :- والله يماما دوم ادعيلج. الله يسهل طريقج ويبعد عنج ولد الحرام
-بست راسها وكمت غسلت و رحت لغرفتي بدلت ونمت.. ل3 كعدت..
خابرني محمد كال ب5 انتي بالقناة.. كتله ان شاءالله.. شسورت شعري .. صح ايدي شوي توجعني بس اكدر احركها..
مكيجت خفيف.. ولبست وطلعت.. وصلت القناة.. خابرت محمد اجه طلعلي.. سلمت ودخلت..
بقى يعرفني علكادر.. كان مخرج برنامج تلفزيوني.. وكفت وياه بالاستوديو.. التصوير والمقدم..
حياة غير الحياة العايشيها.. الكواليس كولش حلوه.. دوم اشوف البرامج بس مشايفه الكواليس والاستوديو شلون يسوون الديكور..
جان باعتقادي المذيع يكعد بغرفه.. طلعت مكان مفتوح ويسوون بيه ديكور على كد الكاميرا..
جدار من فلين قوي.. مثبت ومرسوم كأنه حايط.. بقى المقدم يحجي.. واني اباوع.. محمد واكف.. ويشتغل..
دخل رجال.. كال اااالله منين طلعت الشمس.. البرنامج طلع اعلان.. اندار محمد.. وعرفه عليه.. وعرفني عليه الوكيل مال القناة..
محمد:- هي اللي حجيتلك عنها وكتلك تمتلك مضهر جميل للشاشه..
شاهين:- اي واضح جدا.. يحجي ويباوعلي من فوك لجوه..
محمد:- انتضريني لجين نخلص ونطلع للاذاعه اوك.
لجين:- براحتك.. عفته وطلعت من الاستوديو.. بنات يمرن يباوعلي من فوك لجوه..
اعتقدت روحي لابسه فد شي مو حلو.. ليش يباوعون هيج.. اجت وحده.. تعلج.. وتكولي شسمج.
كتلها لجين.. باوعتلي من فوك لجوه.. لزمت ايدي وادورني منا ومنا.. وتكلي همممم..
عافتني وراحت.. هاي شبيها.. هزيت ايدي...اجه شاهين مر.. وكف وياي..
شاهين-فرصه سعيده ست لجين.. اتشرفنا بحظروج..
-يسلملي كلبك اني الاسعد..
-من وين انتي
-من الاعظميه..
-حي الله اهل الاعظميه.. اطيب ناس
-من طيب اصلك.. طلعلي بطاقه من جيبه.. وانطاه يالي
-هذي بطاقتي اذا حابه نتواصل اكون سعيد..
-ان شاءالله بالتأكيد.. تركني ومشى.. سمعت صوت من ورايه.. اجه الحب مالي .. التفت سرى.. حياااتي.. رحت حظنتها.
-شلونج يروحي..
سرى- والله زينه اني بس المايسأل علينه شلون بي..
لجين:-بالله حقج.. بس متعرفين ضروفي بهليومين.. دماااار..
سرى-شصاير ولج سولفيلي
-مو وقتها.. نلتقي ونسولف..
-اوك تعاي اعرفج على الجماعه..
اخذنتي وعرفتني على شباب وبنات.. و كثير اشخاص جنت اشوفهم بالتلفزيون.. تعرفت عليهم بالقناة..
اجه محمد.. طلعنا اني وياه.. ورحنا للاذاعه ..حظرت الموضوع وكعدت ادرسه واستعدله..
شوي وطلعت للجو.. تقربت للمايك.. وحجيت بصوت هادئ وواضح.. يسعد مساءكم بكل خير حبايبي المستمعين..
ودخلت الجو.. انسى الدنيا من اقدم البرنامج واستمع لاراء المستمعين .. واني دا اقدم.. واتناقش بموضوع الحلقه..
اتصل شخص.. عرفته من اول كلمه.. مالك.. ورغم معرفتي اله.. كتله منو ويايه.. كال مالك من بغداد..
-اهلا بيك يا مالك.. شنو رأيك بخصوص موضوع حلقتنا لليوم... دا ارد اكمل اله.. قاطعني..
-صدكيني ما منتبه للموضوع.. ولا اعرفه.. كل اللي اريده اكولج اني احبج.. وعيونج الحلوه احبج. صوتج بالنسبه اليه حياة..
ابتسمت.. اشكرك من ذوقك.. دا اكمل.. قطع محمد الاتصال وكال اطلعي اعلان فورا.. طلعت اعلان ومديت اخذت مي شربت شوي..
حجه وياي محمد من الكنترول.. لجين تعرفين الاتصل.. هزيتله راسي واني اباوعله من وره الزجاج لا..
نكرت..بس بداخلي شي فرحان.. فرح ما اعرف شنو سببه.. رجعنه للبرنامج من الاعلان بأغنية
اجمل احساس في الكون انك تعشق بجنون.. ودا حالي معااك.. كمل مقطع صغير من الاغنيه.
واني استمع للاغنيه ومخليه اديه ع السماعات وابتسم...رجعت للجو.. واول ما نطقت..
-همست بالمايك.. اااااااه يا حلاة الحب لو صار جنون..هههه .. ونرجع معاكم لموضوع الحلقه....... وكملت البرنامج..
وطلعت من الاستوديو.. خابرت سرى.. عندج مجال نطلع.. كالت لا هسه اني بالبيت.. واختي هنا تسلم عليج.
كتلها الله يسلمها.. سلميلي عليها.. قفلت الخط.. وضميت موبايلي .. طلع وراي محمد..
-لجييين..
انداريتله...نعم
-عندج مجال نطلع شوي..
-كنت اتمنى بس اعذرني والله حمودي دايخه.. دخت من الجو.. عادي باجر.
-اوعديني نتعشى سوى باجر..
-هههه وعد..
-اوك اخذي راحتج..
-عفته وطلعت من الاذاعه.. باوعت للشارع مالك بعيد واكف ومنتجي على سيارته ومبتسملي.. لا اراديا ابتسمت..
دا اريد.. امشي.. جان سمعت صوت على اليمين.. لجييين.. جمد دمي بمكاني.. انداريت.. مخلد..
بطرف عيني باوعت لمالك جان مكتف اديه ومبتسم ومنتجي.. شافه شمر اديه ووكف يباوع وعاقد حاجبه..
-هلا مخلد..
-امشي..
-راد يلزم ايدي وخرت منه.. ومشيت للسياره. دا اريد افتح باب سيارتي.. لزم ايدي وجرني.. صحت ااااخ مخلد تره دتأذيني..
رخه ايده بس بعده لازمني.. وكال اسف.
-اي عادي جدا صارت عندك تجرحني وتكول اسف..
-لجين افتهمي اخاف عليج والقران.. قابل اني شمحصل من احرك اعصابي غير من خوفي وباعي وين وصلت.. معوق الله وكيلج..
-طيب اصعد نحجي بالسياره مو واحنه واكفين.. صفن بوجهي
- وانتي تسوقين ؟
-تكدر تسوق.. ايدك مكسوره..
-خل نمشي تكسي..
-مخلد بطل سوالفك واصعد.. ماكو فرق بين مره ورجال بس افتهم هلشغل مو عقدتني..
هز راسه.. وركب صعد.. باوعت لمالك هم زين ما لمحه مخلد جان انكتلت بالشارع والله اعرفه هذا مخبل كلشي يسوي..
انتبهت لمالك معصب.. قفل سيارته ويريد يجيني.. سويتله حركة توسل بعيوني وطبطبت على صدري .. بمعنى لخاطري عوف وعديها..
دار وجها للسياره وصعد.. بحركه.. صاع مخلد.. شنو القصه.. دنكت راسي..وصعدت للسياره.. ولا شي.
دا اريد احرك السياره.. مد واخذ ايدي.. اللي بيها الفصخ. وكال :صدقا اسف ما جان قصدي ائذيج..
بس لجين اني حيل خايف عليج.. اذا تحبين الله صدك تركي الاذاعه.. واكعدي.. الصيدليه اني اعينلج سايق ياخذج ويجيبج بس اتركي الاذاعه..
لجين:- جريت ايدي.. محجيت شغلت السياره وطلعت.. اخذ نفس وهو يصك على ايده..
مخلد:-زين سولفيلي هذا شلون اجاج بالليل.. جان مسجون انتي متأكده شفتي.. اني حققت وي الشرطه والملازم الجان خفر وحلفو ممطلعينه..
-ما اعرف حقيقه لو حلم.. اني مو مره تحلمت بيه مرتين.. بس بالنهار صدك طلع..
-زين بالنهار شكالج.. شحجه وياج تعرفين عنوان بيته.. خليني اتصرف وياه بعيد عن القانون..
-ماكو داعي صدقني .. الولد حاليا ممأذيني
-واكعد انتظره يأذيج ؟!!
-لا مو هيج مخلد.. شلون اوصلها الك.. المشكله التعامل والحجي وياك صعب بس ولله ماكو داعي تخاف..
الرجال اكدلي ما يتعرض بعد.. دا احجي لمحت سرى صعدت بسياره.. ما شفت لون السياره ولا الرجال.. كانت ظلمه
فقط مشتغل لايت بداخل السياره وجه الرجل وره الكرسي مشفته بس سرى.. طيب هاي مو كالتلي هي بالبيت.. هذا منو
رجعت انتبهت لمخلد وهو يحجي
مخلد:-ما تقنعيني ابدا بهذا الحجي .. لجين رحمه لوالديج رحمه لموتاج .. اتركي الاذاعه..
-مخلد الاذاعه شعليها..
-ولج هذا تلكي منهم .. ذوله ما يتأمنون. لجين اني ضابط ومار عليه الفنان والحرامي والساقط والمتدين.. واشكال الوان
مگلب الوادم وجه وكفه .. والله ما يناسبوج...
-مخلد وتالي .. شلون يعني تره هذه عقدك اللي مجايه تخليني اطيقك..
-انتي ليش تسميها عقد.. ليش ما تكولين اعرف الناس اكثر منج واعرف نواياهم واخاف عليج.
-واني اكولك ماكو داعي تخاف.. شيردون يسون مثلا يموتوني .. كلمن يروح بيومه..
-باع هاي تكول يموتوني.. ولج بابا منو يستفاد بموتج افتهمي لجين انتي بنيه وكل واحد بيهم يشوفج بعين نزواته.. لخاطر محمد افتهمي تعبت منج والقران
-مخلد اني اللي تعبت اترجاك يكفي.. سد

الموضوع طلعت بخير وسلامه.. واني اقسملك.. ما قدمت روحي لاي بشر.. وكل الكلته الك حقيقه بس فكني..
هز راسه ودار وجهه.. بقيت اسوق لحد ما وصلت للبيت.. وكفت السياره بالباب.. ونزلت دا افتح باب السياره.. ونزل مخلد
ما احس الا سياره شخطت من عدنه ورمت.. ويه صوت شخطتها قبل لا ترمي مخلد جرني للكاع.. بظل السياره واتصوب بكتفه وهو ديدنك.. ووكع عليه..
كمت اصرخ.. من الخوف مخلددددددددد.. لا تموووووت ياااااااااااااااناس مخلدددددد
المسلحين بلمح البصر اختفو..الناس كلها طلعت على صوت الرمي وصياحي.. اشيل بيه واصرخ للناس الحكوووووولي راح يموت..
فقد الوعي على رجليه والدم يفيض من منه.. طلعو امي وابوي والناس تتراكضلي
اخذه ابوي مني.. امي كامت تصرخ الجيران كلها التمت.. شالوه وخلوه بسيارتي.. واخذ ابويه السويج وطلع.
امي طبت تخابر اهله.. واني واكفه بمكاني ابجي ودمه بيدي وعلى بنطروني.. تخبلت.. نسوان الجيران واكفات يسكتن بيه والرياجيل تحجي وتستغفر وتسب بالوضع..
　
دخلت للبيت بحركه.. وصعدت اخابر مالك.. اول ما كال الو.. انهديت بي .. تقتله لييييش انته وعدتني متأذي.. كتلك الخاطري.. تحب تأذيني ليييييييش
الله لا ينطيك العافيه الله ينتقم منك.وبجي واصرخ بالجهاز بلا وعي.........يتبع

♡♡♡♡♡♡♡♡♡♡
#زينب_ماجد

لامارا · 16-04-19, 05:08 PM

#خطوات_نحو_الجحيم
////بقلم الكاتبه زينب ماجد////
الحلقه_8

دخلت للبيت بحركه.. وصعدت اخابر مالك.. اول ما كال الو.. انهديت بي .. تقتله لييييش انته وعدتني متأذي.. كتلك الخاطري.. تحب تأذيني ليييييييش
الله لا ينطيك العافيه الله ينتقم منك.وبجي واصرخ بالجهاز بلا وعي... وهو يصيح
:-شصاير فهميني لجين .. بس احجي تركي الصياح واحجي..
-انذل منك ما شفت احقرررررر منك مااااااشفت.. كلب .. وسديت الخط بوجه.. واعصابي نار..
فتحت الكنتور بسرعه.. اخذت ملابس ورحت للحمام.. نزعت البنطرون كله دم.. وشطفت رجليه وطلعت ركض..
نزلت جوه.. صحت مامااأا.. وينج ماااااما.. اجت تركض.. مفاتيح سيارة بابا وينه..
الام:- لج عيني كوليلي شصاير بنتي الله يخليج اعصابي ادمرت.. بيتنا ينضرب شمسويين..
-يوم الله يخليج مو وقتها.. انطيني مفاتيح بابا دا اروح..
-لحظه اجي وياج..
-بس بسرعه ماما الله يخليج.. افتر والدم يفور بجسمي .. صوت الرمي بأذني والموقف البشع وهو يتصوب ويوكع عليه.
كامت تنزل دموعي واني افتر.. واصيح يله يا اميييي بساااااع.. اجت عليه بسرعه..انطتني المفاتيح..
اني طلعت وهي قفلت البيت.. طلعت السياره.. قفلت بابا الكراج وصعدت ويايه.. يوم خابري بابا شوفي بيا مستشفى..
خابرت.. وانطتني العنوان.. وصلت المستشفى.. صفيت بالكراج ونزلت اني وماما..
دا امشي.. دك موبايلي.. سحبته من جيبي.. شفته سرى رديت..الوو ها سرى..
-شكو شصاير لجين.
- هجمت سياره مسلحه ورمت علينه اباب بيتنا ومخلد تصوب..
-يااا عزاااا وهسه .. بيا مستشفى انتو
-ما اعرف سرى دا ادخل للمستشفى.. انطيتها العنوان ..من اكمل اخابرج..
-لج بس كليلي منو اله مصلحه بقتلج وقتل مخلد..
-اكو غير الغضب مالك عسى الله ياخذه.. مفخخه على كده ان شاءالله واخلص منه.
- وشمدريج مالك شفتي..
-سرى فدوه لربج بعدين احجيلج والله هسه اني دخلت باب المستشفى باي..
-ها اوك باي انتظرج. لا تنسين
-قفلته منها ورحت للاستعلامات.. كتلهم الحاله... دلوني على صالة العمليات.. رحنا اني وماما..
لكينا بابا وعمي عمران ومرته گرجيه.. ومازن ابن عمي اخو مخلد.. بس اصغر منه و متزوج..
اول ما شافني بابا.. رحت اله بساع وهو فتحلي اديه. دخلت لحظنه ابجي .. وهو يمسح على راسي.. واني اشهك بقوه..
الخوف والصدمه والرعب والحيره والغضب.. كل هلمشاعر طلعتها على شكل بجي وشمرتها بحظن ابويه..
وماما واكفه ويايه ولازمتني..بعدني بابا.. شنو الصار حبيبتي كوليلي منو ذوله وشلون هجمو.. هو جان وياج موو
جاي احجي جان تصرخ عمتي كرجيه.. كتلتي الولد الله لا ينطيج عساها بحظج وابختج.. يمن عسى الطلقه بكلبج مو بكتف مخلد..
ابوج يصرگع على راسه بالنهار وانتي تكتلينه بليل.. يمممممه من عسى حركة كلبي بيج يا لجين يا ام القنواااااات..
صرخ ابوي بيها وباوع لعمي كاله تسكتها لو واكف حايط انته.. تحاجى عمي وابويه.. عمي يكله صوج بنتك انته ما ضابها..
وابويه يكله احترم نفسك.. لجيت تاج على روسكم.. الى ان اجه موضفين المشتشفى والحرس.. طلعو عمي عمران وهو بعده يصيح..
وكالولنه رجاءا اي خلافات تخلوها برى المستشفى.. اكو مرضى وجرحى نايمين يحتاجون راحه ميصير هالصوت..
اني كعدت على الكرسي ابجي.. كعد بابا وماما يمي..
الام:- ولج امي احجي شنو الصار فدوه لعينج مو انطحنا..
-ماما والله اني ما قتلته.. طلعت من الاذاعه لكيته متانيني.. اجه اعتذر مني لان هيج سوه بايدي ورفعت ايدي..
وبعدها صعد وياي بالسياره.. ورجعنا للبيت.. نزلت دا افتح الباب.. ما اسمع الا شخطت السياره.. وجرت مخلد اليه ونزلني جوه السياره.
وانضرب بكتفه وهو ينزلني.. ووكع عليه.. غيرها ما شفت.. وبقيت ابجي.. تقرب مازن.. كال الرمي جان موجه عليج لو على مخلد
ما اعرف ما شفت المسلحين ولا شفتهم من رمو.. كل الشفته مخلد جرني وخلاني بكتر السياره..
گرجيه:- سوده بوجهي مخلد يمه تضحي بروحك على هاي .. من الله ياخذها ويريحك كلبك..
مازن.. هو صوج ابنج.. مولع بوحده سزز..
-كمت على حيل تعال هنا منو السزز.. كام ابوي وصاح شو انته ما تحترم.
مازن:- وشكلت اني.. ضب بتك والزمها باع لبسها كله لزك.. وتحصر وتفتر بالشوارع بسيارتها..
لجين:- اسمع لك.. انته وامثالك.. قندرتي اشرف منكم فهمت.. غلطت اني وابوي يغلط وياي ويتعارك وياه..
غلطت عليه.. وهو صرخ اني قندرتج اشرف مني.. ولج الدايحه الساقطه ول ول ول.. غلط وفشار بنص المستشفى عليه..
اني سمعته يفشر ويغلط.. وابوي يتلاوى وياه والموضفين التمو.. شلت حذاءي بنص بوجه.. وكتله هذا مستواك.. يا زفر..
هو كام يشيل روحه ويركعها يريد بس يفكوه مثل الوحش يريد يفترسني.. واني واكفه وانكث بيدي واحرك بدمه واغلط
جاي تستشرف على راسي.. سكط.. وانته مكضيها عرك ومكسرات .. اشرفك واشرف عشيرتك والله.. وزلمتكم ما يوكف بعيني افتهمتتتتت.. اعدل عشره منك خاف تكول مره..
تفشر عليه.. يا عار جان استحيت.. ابوي دار يغلط عليه ويصيح بامي اخذيها والسسترات تجر بيه..
نكثتهم من ايدي ومشيت.. ومازن طلعوه الحرس بره.. مو اقارب والله الغريب احسن منهم.
كلما كامو وكالو ام القنوات وام السيارات.. هلتخلف هذا.. عدهم المره بيت وكنس وتنظيف.. غيره هيج ساقطه. همج..
انعل حتى اليوم العرفني بيكم يا متخلفين.. اسوى راسكم اني.. امشي بممرات المستشفى واحجي وي روحي مثل المخبله.. وجسمي من فوك لجوه يرجف من العصبيه
ممرات المستشفى هادئه.. ماكو لا موضف ولا طبيب هدوء لان الساعه تقريبا 1 بليل..
واني ما اعرف وين متجهه.. بس امشي واغلط وابجي.. سمعت صوت مشي وراي..
درت وجهي.. لكيته مالك.. انداريت عليه بكل غضب.. ركضت اضرب بيه.. كله منك. يا حقير يا كلب.. واغلط واصك على اسناني واضربه
مالك:- هششش هشش .. مو اني صدكيني.. ثقي وعيونج مو اني.
اضرب بيه وهو يحاول يسكت بيه ويجرني.. واني مستمره اغلط بس بصوت ناصي اخاف يشوفوني وياه والمشفى هدوء..
جرني لمكان مضلم تقريبا واساسه مصعد بس متروك مدري عاطل.. مصعد مال عمال.. بابه اصفر..
.. وخر مجرم حمار الله ينتقم منك. كتلك اوعدني متأذي تحب تأذيني .. قتلته ليش الله لا ينطيك.. ومستمره اغلط
وهو يخلي ايده على حلكي ويصك اسنانه ويصيح هش وج هششش.. ويحاول يسكتني..
اخر شي حظني حيل بصدره.. وقيدني.. وكأنه ديحاول يلم اعصار غضبي بين اكتافه ويهديني
مالك:- لج بس اسمعيني شنو مصلحتي اقتله وانتي وياه.. خو انفرد بيه لو رايد بس مو اني لجين صدكيني مو اني.. مستحيل اذيج .. احبج صدكي احبج..
ارتخت اعصابي من الشد والغضب.. بقيت لازمه قميصه حيل وابجي...
والله مخلد ما اله ذنب. كل ذنبه يريد يحميني ليش تأذوه... ابجي وهو يهمس ابأذني مو اني صدكي موواني..
وحاظني.. ويبوس بخدي بأذني بركبتي مثل المهووس.. قشعر جسمي منه.. بعدته لعبت نفسي واني اعصاب.. وهو تفكيره غير
. لزم راسي.. ورجع تقرب.. مثل المجنون.. يبادلني مشاعره وهو يبوسني..
احس جسمي كان مثل النار من الغضب.. بلحظه.. طفت كل براكين الغضب بداخلي وتحولت مشاعري من غضب الى عالم اخر..
عالم ضيعت نفسي بيه. واني اديه ترخي من قميصه.. وواكفه اشعر بكل همسه ولمسة حب منه.. تذوقت حبه بشغف..
ما اعرف ليش اضعف كدامه بهيج موقف وانسى نفسي.. مجرد ما حسينا اكو خطوات تمشي بالممر..
انتقلنا من عالمنا الى الواقع وبعدته بسرعه.. مسحت وجهي وشعري.. وطلعت بسرعه من المكان اللي جنه بيه.
لكيت موضف ديمشي.. دنكت ومشيت.. دا الوف الممر..انضربت بأمي..
الام:- هاي وينج.. صار ساعه ادورج..
-اااا اهنا .. اااقصد جنت امشي بالممر..
الام:- خل نرجع للبيت يا ماما شعدنه باقين هنا.. اشو حتى احترام مديحترمون ع شنو باقين بعد.. عمى بعينهم شلون قبيحين.. اللي يكول احنه كاتلي
-ماما ومخلد..
-خلصت عمليته حبيبتي وطلعو الرصاصه من كتفه وبعدى بالانعاش.. لما يستقر شوي نجي.
-اوك.. يلا.. مشت كدامي.. درت وجهي للممر.. مالك واكف منتجي على الحايط ويتصنت.. باوعت لوجهه ابتسملي..
ارتسمت بوجهي ابتسامه خفيفه ومشيت.. ياربي ليش اضعف كدامه.. ليش من اصير بين اديه افقد نفسي..
شعور عقلي كارهه جدا وممتقبله.. بس قلبي حيل مرتاح بوجوده.. انسى العالم للحظه وانسى وين اني وبيا عالم من اكون بين اديه..
بس لو اعرف ليش اضعف.. والعجيب ليش اصدكه.. كل كلمه يحجيها احسها صدك.. واجهل حقيقتها.. بس عقلي يستسلم لقلبي ويصدقه بكل عفويه..
رحنا البابا.. تروح ويانا.. ما حجى وياي.. عرفته زعلان مني ومن تصرفي لان شلت الحذاء بوجه ابن عمي وغلطت كدام الناس..
ردت احاجيه واعتذر.. لزمتني ماما مو وقتها...امشي.. تركت ورحت للسياره.. طلعنا بيها للبيت اني وماما..
اول ما دخلت البيت.. نمت بالصاله.. حجت ماما رادتني اصعد.. مقبلت بقيت نايمه على وجهي حتى بدون مخده.. للصبح.. بس ازار غطتني ماما بيه..
دخل بابا الصبح خطيه.. كمت رحت ياله.. كاعد ومدنك من التعب.. بست راسه.. صاح امشي وخري مني.
واني اللي اكول مثقفى وواعيه وادافعلج. تالي تشمرين حذائج بنص وجهه بوجودي وبوجود الموضفين..
خليتيهم صدك يكولون وكحه وومتربايه.. مع الاسف عليج والله..
-بابا حبيبي والله مو قصدي بس سمعته شلون يفشر افشار مقرف ويغلط عليه..
-لعد اني واكف طرطور مو جاي ادافعلج. تخجليني بتصرفج القبيح هذا ليش..
-حقك عليه والله.. اسفه .. بابا والله بلحظة غضب.. تعرفني كل عمري ممتجاوزه على احد بهشكل.
بس بابا اخوك وعائلته يكومون يكعدون.. يوصوفوني بابشع الكلمات الدايحه وام القنوات..
اي يعني اشتغلت بالاذاعه شسويت.. زنيت لو قتلت.. كل الدا اسوي اقدم برنامج اجتماعي يغلطون عليه ليش..
ما حجه.. بقى ساكت.. بست ركبة رجله... وخليت راسي عليها.. مسح على راسي.. وكال تعبان بنتي اريد ارتاح..
كام وراح نام بالغرفه الجوه.. ما صعد تعبان... شغلتله المبرده.. وصعدت جبتله بطانيه وغطيته.
جرها وغطى راسه.. وطلعت سحبت الصونده وخليتها بالمبرده وترستها.. دخلت امي نزلت..
الام:- هااا ابوج اجه..
-اي نام بالغرفه الصغيره.
-ليش ما صعد..
-تلكي تعبان.. دا احجي صاح بابا... يمكن سمعنا نحجي بعده منايم.
الاب:- لجييين ارتاح شوي واخذج يردوج تقدمين افادتج بخصوص الحادث البارحه..
-صحت ان شاءالله بابا..
اخذت موبايلي من الصاله وصعدت لغرفتي مكالمات خير من الله.. مؤيد بصفحه وسرى بصفحه ومالك بصفحه.
اول شي خابرت سرى.. رن رن ما جاوبت.. بقيت اتذكر اتصالها البارحه. منين عرفت اني صاير ويايه حادث ؟
ومنو اللي التقت وياه البارحه ومتريدني اعرفه. ونكرت ومكالت اني رايحه وياه..
يمكن شي خاص بيها وخجلت تكولي... براحتها.. رجعت رفعت الموبايل..
خابرت مؤيد.. كال اخذي اسبوع استراحه لطلعين اني اطلع ما عندي شي.. شكرته ونهيت الاتصال..
ورجعت خابرت مالك.. رفع خط.. يحجي وهو نايم.. الوو..
-بعدك نايم.
-اييييي... يحجي وهو نايم..
-انته مو ع اساس موضف بالمطار.. شو مداوم.
-ايييي..
-الضاهر بعدك نايم.. يلا مع السلامه.. دا اريد اقفل الخط.. سمعت وحده حجت.. بس كالت منو.... انقطع الخط..
حتى ما لحكت اسمع صوتها بس كلمه.. ما اعرف شنو اتحرك بيه.. ورجعت اتصلت.. فتح خط.. صحت هاي منو يمك.
-. منو
-اللي حجت وياك قبل شوي وسألتك منو..
-هااا اختي يمي.
-اختك بالشقه يمك..
-لا اني يمها. ليش هو تحقيق.. شعليج وين اروح ووين اجي..
-على كيفك وشحجيت.. شعليه... احقق وياك شكو.. واصلا صوجي خابرت باااي.. قفلته
شكد مستفز لخاطر الله.. شكد ما ارتاحله.. ارجع بلحظه اكرهه.. دا احجي وي روحي.. دك هو
رديت.. كال اسف.. نايم وما اعرف شحجيت وللان الشرب براسي فاعذريني..
-انت تشرب..
-ليش ممنوع ؟
-لا سلامتك وين ممنوع لا اصلا لا حرام ولا ابد.. حلل براحتك حلل
-اتركيني من هالسالفه وكليلي شصار وراي البارحه..
-اشصار رجعت نمت وبس..
-اخذو افادتج لو بعد..
-لا بعد..
-اذا كالولج على المسلحين او اي شي يخصهم لتعترفين.. كولي كلشي ما اعرف..
-ليش؟؟
-مثل ما اكلج
-تابعين الك مووو ومتريد اعترف عليهم.
-يابه اعترفي .. اني اكلج اعترفي انتي فد وحده مو مال نصيحه.. جاي اكلج هيج. لان ممكن يكون واحد من المسلحين بينكم.. او عداوه ويه النقيب..
فراح يراقب اقوالج.. لو عرف بيج شايفه شي او تعرفين شي عنهم.. بسرعه يقتلوج حتى لا تعترفين عليهم وتنسد القضيه اول وتالي..
-بس بهيج يصير تستر على المجرم..
-افترضي حجيتي يا قانون هذا اللي راح يحميج.. هو المسلح يكدر يدخل بفرع شطوله شعرضه ويرمي بنص حي سكني ويطلع.. لوما لاكي القانون فاشل ومحد يلزمه..
-هو على العموم اني فعلا كولشي ما شفت منهم.. جرني مخلد جوه السياره قبل لا اشوفهم..
-بطل يسوي نفسه.. وهو جربوع.. بس حتى يكبر بعينج ويكول ضحيت من اجلج وهلكلاوات..
-مالك مو غريبه على مخلد هلتصرف .. متوقعه يضحي بروحه ولا يضحي بيه..
-وشنو السبب..
-السبب......قاطعني
-يحبج مووو..
-مو بس يحبني هو رجال غيور وطيب رغم عصبيته والسواه اكبر دليل.. دا احجي قفل بوجهي
هذا شبي.. هو هم حظي.. يلا بقت عليه.. شمرت الجهاز ع السرير ونزلت وي ماما اسوي ريوك..
لكيتها تكلي بيض.. خليت التيشيرت مالتي فوك خشمي ودخلت راسي من الريحه شكد اكره البيض..
انطوني سم ولتكولولي اكلي بيض.. عشقي بالريوك جبن وخيار.. انتعاش وصحه بلا حدود..
ماما تكلي فتحت الساحبه و الباب.. كملت.. وخلته بالصينيه.. اني طلعت جبن كصصت بماعون جبير وخليت خيار مكشر مقطع وزيتون..
خليته وي ماما بالصينيه وجاي ورحنه بالهول شغلنه تلفزيون وكعدنه نتريك.. دا اريد اكل... باوعت لماما .. شنو بابا مياكل خطيه خاف مماكل من البارحه..
الام:- تعبان عوفي نايم .. دنحجي وطب يصيح فدوه للتحس بأبوها..
واجه فرك متني حيل.. ااااخ بابا توجعني.. وخرت متني منه.. وكعد تمدد على رجليه..
　
الام:- مو نعسان متنام.
الاب:- مو مال نوم.. حتجي الشرطه لمكان الحادث وتاخذ اقوال لجين.. كملي وبدلي بابا خاف يجون..
-كام من حظني وتربع.. وكال يا اسم الله.. اني كمت بسرعه رحت جبتله استكان واجيت..
تريكنا.. ورحت سبحت وبدلت ونزلت ويه بابا لكيت الشرطه بالباب.. شرحتلهم الحادث.. ورحت انطيت الافاده مالتي..
ومناك طلعنا للمستشفى.. لمخلد.. وصلنه كال بابا سلمي ونطلع.. ما نبقى ميستاهلون..
دخلنه للردهه مالته.. ناس هوايه جماعته.. عاد طلعت بره.. لحد ما خفو.. دخلت سلمت عليه.. كوه يحجي ونايم صفح..
تقربت يمه مغمض عيونه بس منايم من الوجع.. سألت الممرض كان واكف.. كال ما اعرف.. فتح عيونه وحجه...
:- زييين زين بس لتبقين هنا ارجعي.. جماعتي عيب جاي يجون لا تخليهم يشوفوج..
-بس اجيت اطمن.. منو ذوله انته تعرفهم..
-اسلاحهم جان عليه مو عليج.. هسه روحي مابيه احجي..
-اوك ماشي براحتك.. عفته ورحت للطبيب كال حالته احسن الطلقه جايه بكتفه وطلعناها..
طلعت دا انزل على الدرج .. دك جهازي.. باوعته الجحيم. ..رديت الو
-هلا لجين وين انتي
-بالمستشفى.. ليش
-خبلتيني تره شتسوين رحتيله بعد..
-شنوو
-لجين شعندج وياه فهميني امرج..
-غير اجيت اشوفه.. كان مات بسببي..
-اووووووه كان مات بسببي ضحى بحياته علمودي
وتالي مراح نخلص من هلقذر..
-انته بيك شي..
-اكلي تبن واعرفي شلون تحجين لا اجي اكص السانج..
-سديته منه.. بدون ما احجي.. بالله هذا شنو يصيح ويغلط وعبالك ملكني.. هههي يا الله.. كل واحد يجيني اضرب من اللاخ رحمتك يارب..
دز رساله تقفلي بوجهي بسيطه... .....اخ يا الله شلون بي .. اتصلت..مغلق.. اخذت نفس وزفرت استغفر الله
نزلت .. خابرت بابا.. كال روحي اني اجي وراج.. عفته وطلعت من المستشفى.. لبيت سرى دكيت الباب..
طلعتلي امها.. سرى موجوده.. كالت تفضلي خاله.. دخلت.. حجيت سلمى وينها شكد مشتاقتلها ..
جان تكول.. خاله سلمى صار شهر مجايتنه.. ردت اكولها البارحه سرى كالتلي.. سكتت.. عافتني امها بالاستقبال وطلعت تصيح سرى...
طيب ليش كذبت عليه.. مو البارحه كالت موجوده.. ويه منو سرى جانت. شوي وطبت سرى حظنتني وسلمت باوستها.. كعدت..
سرى:- شلونج..
لجين:- الحمدلله.. انتي شلونج.. سلمى وينها اجيت اشوفها شكد مشتاقه لسوالفها... سويت نفسي ما سائله امها..
سرى:- يا راحت من البارحه اجه زوجها اخذها..
لجين:- هممم اي انتي شلونج شكو ماكو.. منا منا.. وغمزتلها شغل القناة واكعلج..
ضحكت...:- لا شبيج يا حسره كولشي ماكو.. عوفج مني سولفيلي انتي شصاير وياج.. حياتج صايره ذئاب الليل واني ما اعرف..
لجين:- ههههه صدك ذئاب الليل.. شسوي غير بفضل الاسمه مالك..
-شنو سالفته هذا مالك..
-لج دوخني والله.. ساعه اشوفه محبوب ساعه مخيف وساعه....... اخذت نفس..
-اي كملي..
-هزيت راسي
- هاهاها شمسوي بهاي الساعه الاخذتي بيها نفس.. احجي لج..
-هههههههه لج ما اعرف.. ليش اضعف كدامه.. جدا كارهه ضعفي لما........
سرى:- لا لحظه لحظه.. هو انتو شنو صاير بيناتكم..
لجين:-ضربت على رجلها لج ذاك اليوم من كتلج مخلد مفقود.. بعد مرحتي اجه هو.. طلع لا مسوي حادث ولا ابد.. كل هذا تخطيط منه..
صفنت بوجهي..وكالت ايي...كملت.. رحت اتوسله للشقه حتى يترك مخلد.. سرى شفته انسان اخر.. باللحظه تغيرت كل نظرتي عنه..
سرى:- لحظه وشسويتو بالشقى..
-باسني..
-بس
-هزيت راسي.. اي
-وبعدها..
-ماكو شي وصلني للبيت بعدها ووعدني يطلع مخلد وفعلا طلعه.
-اي وانتي حبيتي مو..
-لا مو حبيته بس ما اعرف شعور بداخلي تغير ما اعرف اوصفه.. سرى تعرفين عمري ما لمسني رجل .
سرى لما مالك يتقرب مني ويبوسني.. جاي اضيع.. ومدا اضبط مشاعري وياه..
كامت من عندي وصاحت لجين انتي شجاي تخربطين.. تحبي شنو .. هو هذا ينحب..
-ليش تعرفي..
-لاااا منين اعرفه.. بس لجين هذا حاول يعتدي عليج والف طريقه وسخه سواها حتى يوصل الج.. مفكرتي شنو غايته..
-يعني شنو ممكن تكون.. هو ديكول احبج..
-لو يحبج صدك جان ما اذاج.. لجين فكريلها زين.. هذا مو بس ديتلاعب بحياتج هذا ديتلاعب بمشاعرج..
-انتي ليش هلكد انفعلتي اني لا حبيته ولا ابد.. كل الكلته دا احس احساس غريب وياه..
-ابتعدي عنه..
-انتي تعرفي .. ؟؟
- لا لا كتلج لا ما اعرفه.. لجين ابتعدي منه..
-ما اعرف سرى دا احس انتي تعرفين شي وضامته احجي..
-ماكو شي بس ابتعدي عنه فدوه..
-وقفت على حيلي وتقربت منها.. مالك متعرضلج..
اندارت بارتباك:- لا
-طيب منو البارحه اللي جنتي وياه.. وكذبتي عليه كذبة سلمى وهي سلمى صار شهر مجايتكم..
اندارتلي فاتحه عيونها... اااااا باعي لجين.. دتحجي.. طبت امها..
-سرى الاكل حيحترك علنار.. شوفي
سرى:- اي جايه ماما.. نتغده وبعدين نحجي..
-شلت جنطتي.. لا اخذي راحتج.. ولا تنسين.. كدامج حساب تكوليلي بكل جذباتج.
-ههههه اوك بوستني..
-بس ابتعدي من هذا مالك ماشي..
- نشوف... باي... حطيت جنطتي بعكس ايدي وطلعت علشارع العام واني افكر بكلامها. ما اعرف احسها تعرف شي وضامته عني..
اشرت تكسي ورحت للبيت..دخلت باوعت هاي سيارتي خررب باع الطلق شمسوي ببيها مزرف الصندوك مشووها.. الجام مكسر
لا يا الله مو وكتها كلش تعبت.. هنوب سيارتي.. اخذت نفس.. يلا فدوه هسه جان متننا زين اجت بالسياره..
اتقربت اتلمس الزروف.. سوده عليه حبيبتي اوووي تقهر.. عفتها ودخلت.. شسوي
طبيت.. بابا نايم على رجل امي ويسولفلها.. من دخلت عدل كعدته..
الاب:-وين جنتي
-رحت لسرى..
-هاااه..
-اكول بابا هاي سيارتي صارت خرده شلون ابيعها..
-شتجيبلج هسه.. اصلحها وبيعيها..
-حجه وكام.. كال اروح انام فوك راسي صاير كراج العلاوي ينز من كل مكان موتني..
صعد.. كعدت يم امي..
الام: اجو بيت خوالج اليوم يتحمدولنه بالسلامه على الحادث وسئلو عليج وكالو سلمونه هواي.
-الله يسلمهم..
-والعصر راح يجونه هم ناس .. حظري نفسج..
-وخرت الجنطه وتمددت ادري جايين خطابه .. ع شنو احظر نفسي..
-شبيج انتي شو تعبانه..
-سريوان دوختني وخلت الف فكره ادور ابالي..
-شنو هي ..
- ادوخج وياي اذا احجي اروح انام احسن.. اذا اجو خطار عود كعديني شلت حذائي وجنطتي وصعدت..
كبل شمرت روحي ع السرير ونمت.. لشوي جو بيت خالي.. بدلت ومكيجت كامل وعدلت نفسي ونزلت..
سلمت عليهم.. جايبين علبة حلويات لو صناديق بيبسي.. للسلامه.. كعدو يسألون على الحادث وكيف وشلون صار..
سولفتلهم.. واترخصت منهم.. همست لبابا اني طالعه.. كال وين
-المخرج محمد البارحه كلمني على موضوع شغل بالقناة وكذا اشوف منه شنو الموضوع وارجع.. اوك..
هز راسه وكال بس لا تتأخرين.. بوسته وطلعت.. سيارتي الجام مالتها مال الوره مكسر.. ومزرفه..
ما طلعت بيها.. تركتها واخذت تكسي ورحت للقناة.. محمد بالبرنامج.. وكفت يمه هلو محمد..
اندارلي اهلا لجين.. بقيت اباوع عليهم وهم يصورون وهندسة الصوت والمقدم والضيف..
تركتهم وطلعت.. مر من عندي شاب.. حجيت بلا زحمه سرى حامد وين الكاها...
-والله هي اكثر شي تتواجد يم الوكيل تساعده شوفيها اذا مموجوده هنا روحي لمكتب الوكيل..
-ااااه اوك اشكرك.. مشيت ملكيتها.. صعدت لغرفة الوكيل.. دكيت الباب.. اتسمعت... دكيت.. ودخلت..
لكيت سرى مبتعده عن الوكيل.. وتعدل بشعرها وقميصها من صدرها مفتوح وهو يسد دگم قميصه.. انصدمت بالمنظر.
شاهين:- من المفروض تنتظرين كلمة اتفضل ياله ادخلين.. مو من كيفج
-سوري .. اسفه جدا.. تهيئالي ان سمعت الاذن.. جدا اعتذر.. تراجعت..
شاهين:- لا عادي اهلا بيج ست لجين.. تفضلي
-ما رديت عليه طلعت فورا.. نزلت ركض.. نزلت وراي سرى..
-لجين لجين.. لحظه.
درتلها...:- نعم ووقفت اباوعلها بعتب..
-نمشي نحجي عادي..
-لا مو عادي.. درت.. لزمتني..
-لجين شبيج افهمج السالفه..
-اللي شفته البارحه وياج بالسياره شاهين.. وكذبتي عليه.. حتى اطلعين وياه مووو..
-هزت راسها ودنكت..
-مع الأسف رخصتي نفسج.. والمن... لهذاااا
محمد:- هاااا لجين..
:-انداريتله.. وسكتنه اثنينه
محمد:- اكو شي.. شصاير شبيجن..
لجين:- لا ولا شي.. يلا.. انداريتلها.. نحجي بعدين اوك...
سرى:-اوك
لجين:- مشيت وي محمد.. وطلعت...
محمد:- شعجب جايه وحدج.. سيارتج وين..
-صار حادث البارحه.. ووو اتكسرت..
-خير يارب شكو
-ربك ستر كان متنا.. مسلحين هجمو علينا اباب البيت.. وصوبو مخلد ابن عمي..
-لاااه تحجين صدوك شنو القصه. منو ذوله وشيردون منكم..
-عداوه وي مخلد ما اعرف مسلح طائفي والله ما اعرف للان مثبت اي شي.. بس مخلد ادلى بشهادته ان المسلح كان قاصده والمسدسات نحوه..
-يا ستار.. يارب.. صاير الكتل بفلس .. حتى الواحد ميأمن على نفسه يكعد هنا..
-يمعود يعني اذا تسافر تهرب من الموت.. هو مصير واحد.. وكلنا نموت بساعتنه.. حرك السياره ومشى.. وحجه
-والله اني راح اسافر .. اطلع لسوريا..
-ليش
-هناك شغل اكثر.. وعندي عمل هناك.. اروح اشتغل.
-والبرنامج..
-مو هسه اسافر.. بعد رمضان ان شاءالله.. حاليا عندي كثير برامج..
-خير ان شاءالله.. وصلنه للمطعم.. نزلنه اني وياه.. كعدنه.. راد يطلب اكل.. كتله لا ممشتهيه..
فطلب عصير خوخ طبيعي بارد..
-كتلي عندك موضوع... شنو هو..
محمد:- طبعا كل ما اريد افتح وياج هذا الموضوع اتردد يصيبني التوتر والخوف من الصد..
لجين:- لا ليش اسمعك..
-لجين يمكن انتي تعرفين اكو مشاعر الج بداخلي.. واني حاس بمشاعر عندج.. جنت احس بيها بعيونج واهتمام نظراتج.
لكن...... ع كلا... اني حاب اتقدم اطلب ايدج..
-صفنت بوجهه... اخذت نفس.. اجه النادل.. قدملنه العصير.. وراح..
شوف محمد... ما انكر صح كنت معجبه بيك واحبك ربما من طرف واحد او من طرفك ما اعرف.. لكن كنت املكلك مشاعر بداخلي..
لكن وبصراحه.. من اكتشفت انت متزوج .. حسيت بغلطي.. وصرت اعمل على محي المشاعر الاحملها الك.. من قلبي..
محمد:- بس لجين اني احبج.. وطالبج على سنة الله ورسوله.. والشرع حلل 4.. وزوجتي اني وياها موو متفقين..
وزواجنه تقليدي كان.. حتى بدون عواطف ومشاعر وكأن واجب مقدس عليه انفذ طلباتهم.. ما احمللها نفس المشاعر اللي احملها الج... وشتان ما بينج وبينها..
-محمد ما اكدر اصير انانيه .. لو بمكانها مستحيل اقبل وحده تاخذ زوجي.. ف شلون اقبلها على نفس واجي اخذك من عائلتك..
او بغض النظر عن كل هذا.. اني بنت غيوره.. وفي الحب اكون او لا اكون على كولة القيصر ههههه
-ههههههه
-اي والله ارفض اشارك زوجي مع اي احد.. لو حبيت احب بأنانيه.. اريد اللي احبه الي وبس مو ممكن اشاركه مع احد ابدا..
-بس لجين اني احبج... وصدكيني ما اقصر وياج بشعره.. وشقه خاصه بيج بعيده عنها وعن اهلي..

-محمد صدكني ما اكدر...صعب.. انت عندك اطفال.. ما اكدر اخذ شخص من عائلته..
-طيب شلون.. صدكيني احبج..
-لو تحاول تحب زوجتك افضل..
-لجين متتقارن وياج .. لا بلبس ولا باناقه .. لج مخلصتها وياي بجلابيه.. والمكياج ميمر وجهه..
-محمد ارفض تشكيها يمي.. كل انسان عنده عيوب.. بس اذا تحب عائلتك علمها وهددها اذا منصلحت تشوف غيرها وهي تتغير
ولتنسى هي صاحبة 3 اطفال صغار ممكن يكونون متعبيها لهيج متلحك تهتم.. اني بنت فاضيه لنفسي يمكن لو صارو عندي اطفال اصير مثلها شمدريك..
هم تروح تتركني...؟!! ...الام تنسى نفسها لما تهتم باطفالها..
-هذا اخر كلامج..
-لتزعل صدقني انته غالي والك مكانه بقلبي لعلها تكون مكانة صديق.. ارجو ان رفضي ميكون عائق بيناتنا ونبقى اصدقاء..
-لا طبعا قبل لا احبج كنتي صديقتي وغاليه وان شاءالله راح تبقين هيج..
-يسلملي كلب يا طيب.. نكووم
- يلا...
-كمت خابرت سرى.. اريد اشوفج.. كالت خلينا نلتقي بالكورنيش نحجي على راحتنا
كتلها اوك ..حجه محمد اوصلج للبيت.. كتله لا طالعه للكورنيش اشكرك جدا.. سلمت عليه
واخذت تكسي ودخلت الكورنيش اتمشى بالحدائق..
شوي وخابرت سرى.. دليتها مكاني واجت .. مشتريه لفتين همبركر وبيبسي ..
كعدنه على السياج النازل للنهر.. خلينه الاكل. وكعدنه.. رادت تفتح الاكل... كتلها استوب.. ماكو اكل قبل لنحجي..
شعندج وي شاهين.. نزلت عيونها..
سرى:- لجين اريد اعيش ..
-وترخصين نفسج.. ؟؟
- انطاني برنامج تلفزيوني برمضان..
- وبهيج طريقه مقرفه.. دتبيعين نفسج مقابل برنامج.. ليش ..
-شسوي .. راتبي هيج مديكفي.. وامي تريد.. واني اريد والدنيا كلها تريد.. اذا ما عندج فلوس محد يحترمج..
لج سياره صغيره ما عندي.. باقيه اروح واجي تكسيات. مليت من هلوضع لجين.. وارجوج تسدين الموضوع لان تعرفين ما اضم عنج شي لكن خجلت اكولج هيج امر..
　
- بقيت اباوعلها منصدمه.. جريت ايدها.. سراوي حبيبتي.. ما احب احرجج.. بس هالشي غلط
-اعرف لجين ... لخاطري غيري الموضوع.. ورجعيلي لمالك..
-اوووه حتى مالك اتركيني منه..جريت قوطية الببسي فتحتها.. وخليت القصبه.. وبديت اشرب..
فات واحد.. يحجي.. خايب جا انه شبيه ما تشربيني بلون الببسي والله.. خليت القوطيه بيناتنه.. واضحك ودايره وجهي عنه..
سرى تاكل وتضحك.. رجع يحجي بويااااي ولج كيمر موش مره ادور چنها تفاحه خضره.. جنت لابسه قميص تفاحي اخضر...
دنكت اضحك.. هاي سرى شركت ودنكت يمي تضحك.. لج باعي شلون يحجي..
سرى:- لج عيني شروكي حجيه
-اي حلو ههههه .. اخذت اللفه.. ودا اكل هم حجه وكعد على السياج شوي عنه.. انتي كييمر وانه دبس نصير نخبل شحلاته شمالج دعايني علي شويه..
-اريد ابلع اللكمه غصيت.. بس الكتاف تهز من الضحك بدون صوت ودايره وجهي منه.
اخر شي.. غيرت وجهي بجديه ودرتله.. عفوا عيب تره .. اذا تريد لفه وجوعان اخذ بس امشي منا..
الكل باوعو من حجيت.. هو خجل ومشى.. كملت اكل.. دك جهازي... باوعت الجحيم .. رديت.. الو.. صرخ وين انتي.
-شبيك بكونيش الاعظميه ... قفله بوجهي..
سرى -شكو
-اكو غير مالك اللي مو راضي يفكني.
-اهوووو لجين فدوه ابتعدي عنه..
-شاكه بيج تعرفين شي عنه وضامته..
-لا يولي شضامه.. بس هذا مو مال حب صدقيني.. يدمرج
-ومنين تعرفي.. مو مال حب.. دا احجي انشمرت قوطية الببسي بيناتنا..
لج لاااا يلعن يومج... تركتها ورحت للمغاسل غسلت.. وكتله خل نطلع.. الساعه صارت 9 ونص هم ياله نرجع..
طلعنا من الكورنيش نتمشى.. للشارع.. ما احس الا سيارة مالك شخطت كبالنه ونزل..
خليت ايدي على صدري من الخوف.. راد يجرني من ايدي تكول وحش مو بشر.. وكفت كباله سرى اتركها يا كلب كتلك ابتعد عنها..
لزمها من ركبتها وطلع المسدس من خصره وخلاه براسها ويكولها حجايه ثانيه اطشر راسج ..
صرخت ماااالك لااا.. اكو ناس قليله خافت تدخل..جرني من ايدي حيل.. وشمرني بسيارته.. وانطلق........يتبع

☆☆☆☆☆☆☆☆☆

#زينب_ماجد

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري