آخر 10 مشاركات
|
| |||||||||||||
| مشاهدة نتائج الإستطلاع: تمنياتكم لنهاية خذني بقايا جروح؟؟؟ | |||
| نهايه سعيده ؟؟ |     | 1,311 | 95.83% |
| نهايه حزينه؟؟ |    | 57 | 4.17% |
| المصوتون: 1368. أنت لم تصوت في هذا الإستطلاع | |||
 |
| | LinkBack | أدوات الموضوع | انواع عرض الموضوع |
11-12-22, 12:28 AM
| #19631 | ||||
|  السلام عليكم ورحمة الله وبركاته... كلنا لهفه للبارت وعداد الشوق للوليد ونجلاه واصل اقصاه ولكن يا اخواتي ...يا حبيبات كل غايب عذره معه وقال عودتنا في حال عدم نزول بارت تبلغنا ...وحتى اذا ما بلغت صدورنا اوسع لها نصبر ونشوف بدون ضغوط... والله اني حاسه بنفس شعوركم...ولكن الكاتب انسان زيه زينا لع ظروفه وحياته... يكفي الدروس الجميلة و المتعه والحماس والمساحه الي اوجدتها لنا والمتنفس الرائع في هالملتقى... وتاكدوا كل ما غابت قال جابت المطر معها... احبكم جميع...❤ | ||||
|  |
|
11-12-22, 12:39 AM
| #19635 | |||||
 
| اقتباس:
ويكون تعويض عن الاسبايع الي قبل انا فقط اتكلام عن نفسي | |||||
|
| |
|
11-12-22, 12:57 AM
| #19637 | ||||
 
| البارت السادس والاربعون الجزء الأول لماذا انت مُهتمُ لأمرها لهذا الحد ياقلبي؟! …………………….-لأني احبها …! الله وحدهُ يعلم .. أي بهجةٍ غمرت نبضاني حين رأيتها ..! هي انثى يسكنها السلام ..وجودها بالقرب مني يمنحني الأمان .. والاكتفاء -لماذا انت حزينٌ اذا؟! -لأنها احزنتني … !! فهي لم تثق بي ورغم هذا مازلتُ احبها .. ………. -لماذا انتي حزينه؟! -لأني .. ظننتهُ رجلاً ظننته سنداً.. ظننتهُ حُباً ظننتهُ إكتفاء ظننتهُ املاً ظننتهُ وطناً فظننت وطننت وظننت صدقت ظنوني وخابت كل وعودي . -ماذا تودين ان تقولي له ؟ -اريد ان أقول .. لأني احببتك كما انت بغضبك بصمتك بتقلباتك بطقوسك بعاداتك بمزاجيتك فاانا قد تقبلتك كما انت بكل ذلك … -اذا اذهبي واخبريه؟! -لااستطيع …. -لماذا ؟؟ -لان الطفل الذي يسكُنُهُ .. خاصمني ..!! -كيف ذلك؟؟؟ -لقد نبذته !! ونهرتهُ….بعدما وعدُته!!! -هناك فرق انتِ لستِ امه؟!! -بل انا اقرب …!!!! ارخى يدينه ماسك جهازه.. عقب انهى مكالمته و نظر للمحيط المظلم الخاوي بصمت .. مستسلم … شعور مهيب اغتشى كيانه يشابه برودة مدينه خاليه من كل روح تدفيها … استشعر خطوات فكره وهاجسوه .. بشوارع هاجرها .. شعاع الشمس وحس العصافير ..خاليه حتى من جذوع الشجر !!! اطرف يم كف يده ..وجواله .. همس مخنوق ..يتصاعد مابين محاني ضيقه .. ماتصور له الا طاري هاجس مختلف لكن مايجهله !!ياترى لو لها رقم وش كان بيسميها؟! ولو هي بهالوجود المجحف شلون ليلته بيقضيها ؟! ماراح يسامح !!! ياكيف تجاسروا اثنينهم يتركونه بلا ثبات!!! شلون قوته تثبت ومنبعها متصدع من اساس!!! تنفس بعمق … ماسح ملامح رسومه.. مستاقف داس مقابض يدينه بحيوبه وملتف يم الشباك ينظر متقدم بخطوات هاديه .. مباديها فقط لكن ادراكه عارف لن كل خطوه خطاها من الصغر .. ناقصه !! ارخى نواظره لعرج رجله .. المرافق له !!! والي ذكره بانتقاص جزء عميق بروحه !! جزء شاف منه النبذ باوضح معانيه !!.. رفع راسه ناظر للسما … سامع الندى للاقامه .. بهتت نظرته .. بشحنة شعور واحساس ضايج … مارسم الا ملامح من صور !!!! فقط من صور!!! همس بلاشعور همس خافت وكن صورتها الباهته المتجسده بذاكرته بلا روح والوان وبلا ذكريات دافيه تحاوط صقيع اوجاعه المتجدده وبكل تجدد يواكبها تقرح مهلك يضوج بكل دنياه .. -وش ضرك لو ماضعفتي !؟ لو خذتيني معك!!!! ؟ ماطلبت الحياه الي وهبتيني!!! استبرقت نظرته بلمعه ساطيه .. متابع همسه يناجي روحن هو جاهلها معاتب ومشتاق للشي الجاهله فيها !! -ناقص انا بدونك … كل ماعندي دونك ولاشي !! سكت مختلج فكه برجفه مريره .. هامس بخفووووت مايسمعه الا كسر روحه وضيم احساسه بمكانه الي يخصه وراح معها … -يمه… حرك نواظره مطرف لامتداد جوانب السما … سحب يده ماسح مدامع عينه بعجل ناشق بصمت ولاف … حوالين مكتبه … اقبل عالباب يبي ينزل ويتوجه للصلاه … تلاقت نواظره مع ام سلطان المقبله وهي تهتف بعجل.. -هه زين لقيتك ياولدي !! قطب هدب عينه بقلق وهي تتابع وهو يتقدم لها -عسى خير ياميمتي ؟! رفعت كف يدها مقربه -خير خير ان شاء الله !! الرحم عندها مسكر وذيا اشارة خير بعون الله!!! مثل ماقالت ام يزيد امكن تجمع دم مابان مع الدكتوره !! عطتها ابرة مثبت !! ونصحتها ماتجهد نفسها وتتحرك بالهون !! كان عقب الصلاه توديها تكشفون بالجهاز الي يصورهم وتطمنن وتطمنا يامي؟! هز راسه بشحنة قلق ماخف ابد -ان شاء الله بنزل اصلي واجي اوديها !! نظرت له بحنو مشحون قلق -.. يابوي لاتشيل هم ان قاله انهم بخير ..! هز راسه بتفهم صامت وسمع لها تتابع -زين انا بصلي واتجهز واجي معكم !! نجول بها خوف زاغين عقلها حبيّبتي !!! الله يطمنها ويطمنك ولايوريني بكم باس لا انتم ولا ذركم !! همس بخفوت واضح -امين .. ياميمتي الله يسمع منك.. قطب هدب عينه سائل -طلعت من عندها دكتورتها ؟! -لا الحين بتطلع تبي تكلمك !!! سمر مع نجلا .. بتساعدها عالوضو والصلاه !!! بتصلي جالسه خل هالابره تجيب فايده !! -ان شاء الله الله كريم !! نظرت له برحمه ناطقه بهادي الصوت الخافت -ياولدي الله ان راد يثبت بيثبت !! لو وش مايصير !!! لاتهوجس يبي لها راحه ذيا طواري الحمل !! كل وحده تختلف !! وهن على وهن يامي !! مب شين سهل !! -الله كريم -بروح اصلي واجهز الدكتوره .. تنتظرك … -يعطيك العافيه .. تريحي انتي اانا معها .. -ماهوب شي يابوي !!! تركته طالعه بخطواتها … تنفس بهدووء .. رافع كفوف يده يزرر قميصه كامل .. تقدم متوجهه لغرفة نومهم هاتف بحس جهور -ياولد !! -تفضل استاذ الوليد .. دخل و … نظر لدكتوره هند .. وممرضتها .. -السلام عليكم !! .. بشري وش اخبار نجلا ؟! -ان شاء الله خير سويت لها كشف مهبلي رحمها مسكر كشفت على بطنها .. وضعها باين تمام بس لازم سونار !! نتطمن اكثر !! عطيتها الحين ابرة مثبت تبتعد عن الاجهاد وشد الاعصاب والحركه !! والعلاقه تمتنع عنها الفتره الجايه .. الين نتطمن على وظعها !! مع وصفتها الي قبل مثبت على شكل اقراص تاخذ منها حبتين يوميا وريتها اياها .. غير كيذا مافي شي !! انا بروح عالمستشفى واننظركم هيناك ابعد نواظره يم السرير ناطق سائل -ماتحتاج نقل باسعاف؟! -لا ماتسدعي الا اذا حاب مافي مشكله هز راسه راجع لها بنواظره متغافل عيونها .. المرخيه -لا دام مايحتاج عقب الصلاه بنطلع لكم !! -تمام بنستاذن احنا ماتشوف شر ان شاء الله !! تراجع .. ووقت تحرك اطرف يم مقدم نجلا وسمر معها .. نظر لخطواتها المتباطيه وكف يدها ملامس اسفل بطنها .. نطق سائل .. بتقطيب -تحسين بوجع ؟! رفعت راسها .. متلاقيه نواظرها به .. هزت راسها نافيه ساحبه عينها ابعد عينه عنها ناطق لسمر -وصليهم للباب… وارجعي ساعديها تجهز بصلي وادق عليكم تنزلون !!! نظرت له سمر هازه راسها .. -ابشر .. طيب همست نجلا لها -روحي سمر خلاص قادره امشي مافيني شي !! شدت سمر مبسمها وهي تلمح الوليد يتقدم طالع .. ونجلا توصل للسرير وتستجلس نطقت بهمس مشحون -نفسي اعرف وش قلب حالكم!!! رفعت نجلا راسها لها .. بصمت .. ونظره بارده هزت سمر راسها -خلاص مابي اعرف بروح وارجع لك !! ترقبتها نجلا الين طلعت .. زفرت بتنهاد … مرخيه راسها وكفوفها تتوسد مكمن ارواح ماتدري وش حالهم … ارتجف فكها بضوجان .. -ياربي احفظهم لي !!! ياربي … لاتفجعني فيهم !! نشقت بخفه رافعه كفوفها ماسحه دموعها .. متنفسه بعمق … تراجعت .. مستنده على ظهر السرير .. موازنه جيدها براحه … معد تحس بوجع .. ظاهري وجسدي … اجهاد بسيط … وقلق… شدت مبسمها .. تنظر .. للفراغ .. رفعت كف يدها بلاشعور تتنشق بكره !! قد غسلت يدها قبل شوي مره ومرتين وثلاث .. ماتبي ذيك الريحه تعلق بها مثله !! مب قال مايقدر!!! زفرت متنفسه بعمق طارده غصتها وقت انزسم امام نواظرها منظر تجرد علو جيده بحظرتهم جميع … انزوى مبسمها بميلان .. قاهر .. عضت شفتها .. مستهجن فكرها العاصي طعم وصله والم يدك قلبها .. متصوره بينهم صور بتذبحها .. فتحت نواظرها ساحبه انفاس .. بهمس ثخين … -اووووه … يالله …. ماصار شي ماصار شي !!! تحركت مستاقفه ببطء … متوجهه لغرفة الجلوس .. جت عينها على باب البلكونه .. كارهه ذيك اللحظات الي مرت .. ابعدت نواظرها يم سجادتها المفروشه .. فيها شده تصلي قربت منحنيه يم شرشفها عالكنب .. مبتديه تلفه … بهدووء قربت مستاقفه … متوجهه للقبله … مكبره .. اول ما نطق لسانها التكبير اقبلت غصتها … وكنها تجري تجري تجري تشكي قلة حيلتها وعمق ضيقها .. للي عارف مكنون صدرها دون تشرح وتبرر… استطرب لسانها قاريه ومصليه .. دقايق وانتهت .. وتمت مستجلسه عقب السلام .. تنظر لمنبع سجودها .. وسجوده قبلها …انحنت بلاشعور متنفسه فرش السجاده .. مشتد مبسمها .. بغصه ثقيله محشوره ماتبي تطلع .. -يارب احفظ عيالي !!! فيني وجع ياربي !! خذ حقي وحقه منهم!!! بلوا حياتي !!!! وحياته!! معي … يارب برد حرة قلبه وقلبي !!! اقبلت سمر .. تدورها نظرت لغرفة النوم .. لقتها خاليه … مشت وهي تنادي | ||||
|
| |
|
11-12-22, 01:00 AM
| #19638 | ||||
| -نجووول ؟! دخلت غرفة جلوسهم شافتها ساجده .. وقفت ثواني ثم تقدمت هاتفه اول ماستجلست -وش عجلك كنت بحط لك كرسي !!الله يهديك!! استجلست نجلا .. ناشقه.. بدون صوت .. دون تنظر لسمر -عاد صليت عادي ماحسيت بوجع مب مجهود صلاتي !! الا راحه !! من كل هم !! شدت سمر مبسمها بتنهاد خفيف.. -قومي يله .. جبت عباتك من تحت .. امي بتجي معكم تبين اجي ؟! عادي بجي ؟! استاقفت نجلا مبعده شرشفها -لا ماله داعي حتى خالتي ليه تجي !؟ شوفيني امشي عادي !! لاتشق بنفسها مارتاحت وانتي مارقدتي !!! قربت سمر مستقبله تقدمها -مافيها شي طار النوم !!! قلقانه على هالصغار !! نجول وش صار ؟! اطرفت لها نجلا .. -بذمتك ماتعرفين يعني؟! مب انتي الي جبتيه معها!!! ؟؟ انلجم لسان سمر مبعده نواظرها .. ونطقت بعجل -حتى !!!يانجلا مايصير توترك ذا !!؟ كل شي بالتفاهم !!! تبسمت نجلا بسمه جانبيه واقفه لافه راسها لسمر -تدرين عاد؟! هي زوجته !!! حلاله!!! كيفه معها لو يسكن عندها !!! دامهم بعيد عني وعن جناحي بالطقاق!!! فتحت سمر نواظرها بصدمه -اوووف لا لا منتي نجلا !!؟ بلاخرابيط نجول انتي معصبه الحين !!! ترا كلام الغضب ماينحسب !!يعني هو قالك بيررح لها؟! لو ماجبت لك طاري مادريتي !!! حكمي عقلك ولاتتهورين !! رطبت نجلا شفتها وهي تتقدم من جنبها .. لحقتها سمر متابعه -بعدين يوم رقا حتى ماسال عنها ولا دورها !!! نزل معك على طول !!! لاتتوهمين !!! التفت نجلا بقل صبر … -سمر!!! قلت لك بالطقاق !!!! كيفه هو وياها !!!! طابت نفسي !!!! اهم ماعلي عيالي !!! مب انا الي انهد عشان رجال !! نصى غيري !!! سكتت مشدده ومتابعه -اهم شي عندي عيالي !!!!! هزت سمر راسها … بقل تصديق -قسم بالله انك مفحومه مابي اكلمك عن احد خلاص مب لزوم !!! اذا هديتي ييسر الله !!! لاتخلين للشيطان عليكم مدخل !!! مب انا الي اعلمك عن الوليد وشخصيته انتي انتي ابخص فيه وتعرفين !!!! هتفت نجلا وهي تبحث عن عباتها .. -وين عبايتي ؟! -عند المدخل … اجيب لك شبشب ؟! من داخل !! حركت هدب عينها وهي تهوجس بالها مب مع سمر .. سمعت حس ام سلطان .. التفت لها -هاه بنتي خلصتي ؟! احتنت نظرة نجلا لها -امي بروح عادي لاتشقين بنفسك والله!! بيكلمك الوليد !!! ويطمنك تكفين ارتاحي والله ماتجين حلفت انا!!! نظرت لها ام سلطان بحنو -يامي بتقدرين؟! هزت نجلا راسها بتاكيد .. متحركه بخفه -اي اي شوفيني ماعلي امشي ومافي وجع !! منا مطولين !! بس ادعي لنا يمه!!!ربي يحفظهم .. احس انا احس انهم بخير فيه احساس داخلي مطمني !! -ان شاء الله انهم بخير ويارب مرت ولاضرت !! تنهدت ام سلطان .. متابعه -يعني منتيب خايفه يامي ؟! قربت نجلا ماسكه كفها -الا خايفه بس احسهم طيبين !! عقب صليت تو اطمأنيت !! اعتلت نغمة سمر المترقبته سحبت جوالها من جيب بجامتها -هذا الوليد !! الوووو! ايه بتنزل ترا امي مب جايه خلاص نجول تقول بتروح هي معك بس انت كلمنا على طول تكفا ياخوي لاتنسى طمنا !! هزت راسها بتتابع -زين يله الله يحفظكم !! ويحفظهم يارب سكرت منه تنظر لامها ونجلا -تحت عند الباب مدخل الحريم!!! رطبت نجلا شفتها متقدمه يم المدخل … -بنزل دعواتكم … -الله يطمنك يامي والله بينشغل راسي معكم !! يابنتي !! لبست عباتها مبتديه تلف طرحتها .. -ان شاء الله خير يارب !! ارتاحي انتي امي انسدحي !! نظرت لسمر -سمر خلك معها !! بالله!! -طيب بنام عندها اساسا!! شدت نجلا مبسمها بحرج -حست فراشك دون قاطعتها سمر -نجول افلحي بلا هبل فداك السرير والجناح كله !!! تبسمت بضيق رافعه يدها تلبس نقابها … -لحظه نجول بجيب لك سليبر استني !! نظرت نجلا تدور شي عند باب المدخل مالقت الا حق البيت .. جتها سمر بعجل حطته ولبسته هي .. فتحت الباب .. متقدمه متلاقيه مع العنود جمدت انفاسها بشعور مقيت … مطرفه يم مبسمها .. بلاشعور ثم اطرفت يم كفوف يدها جامد جيدها برهبه .. لشوفة تي شيرته بين يدينها -سلام اخبارك الحين ؟ عسى خير بتروحين المستشفى؟! رفعت نواظرها ودها تطير .. من وجع ضيقها .. وكنها بهالكفوف لامسته هو !! -ايه برورح ان شاء الله كل شي زين !! تحركت متقدمه تبي تتعداها ونطقت العنود بهتاف -انا جبت غرض الوليد طلع وخلاه !! قربت سمر دون تنتبه امها للي بكف العنود سحبته منه -شكرا !!! باخذه انا هزت نجلا راسها مبعده نواظرها ومتقدمه … تاركتهم … نطقت العنود بعجل -طمنيني ان رجعتي نجلا!! عجزت تنطق .. تغافلت منطوقها ضاغطه زر المصعد اول مانفتح دخلت دون تلتف.. متنفسه بحشرجه … -اوووف … تسكر الباب تساندت مكتفه يدينها .. مستشعره رطوبة قماش نقابها من دموعها .. رفعت يدها تضغط تمنعهم بعجل .. انفتح الباب … تقدمت بالعه ريقها … ونبضها يعتلي … تقدمت بخطواتها يم مدخل النسا .. وقفت ثواني ترتب انفاسها … تطرد كل فكر .. لو صار شي ماجابت اغراضه!!!! لو حصل شي ماستجرت تمسكه وتجيبه !!! ماصار ماصار اي شي !! ليه راح لها ؟!! كانت بتنزل !!! تدوره !! رطبت شفتها حاسه بجفاف ريقها وهي تقبض المقبض وتفتح الباب … مقابلها نسسسيم الصبح … دون الاشراق … لمحت سيارته … ولمحته جالس خلف المقود شذت مبسمها جاذبه عباتها .. بمقبض مشتد وطلعت مسكره وراها الباب … تقدمت ناظره له .. بشحنة ضوجان شعور .. انتبهت لوجود رجال بعجل سحبت طرف طرحتها وفتحت الباب داخله ببطء مستجلسه .. انحنت ساحبه الباب .. لافح طرف نقابها توجهه التكييف… سكرته واستجلست … برهبة سكون دون تطرف له … اشتعرت حركة السياره وتقدم مسيرها … شابكه اناملها .. بتوتر … عينها تنظر للشارع والنخيل الممتد وقت اقبلوا على ممر المدخل … شافت الحراسات وسيارات دوريه داخل بوابة قصرهم … وقت وصل للبوابه انفتح لهم المسار .. طلع متقدم … نظرت يم المرايا شافت سيارتين تتبعهم طالعه من البوابه وراهم .. ضيقت نواظرها … ثم تنهدت بصمت اكيد حراسه … متى تصفا لهم الدنيا دون خوف وترقب ؟ نظرت للسما .. مشتحن فكرها بالساعات الاخيره … غصه مستحكمه معتلى صدرها … ليت يدها انكسرت ولا ابعدته بذاك الشكل !!!! غمضت نواظرها بضيق متنفسه بخفوت مرت دقايق مغلفها الصمت الثقيل… اطرفت بنظرها دون تحرك راسها يم يدينه …. تدرجت نظرتها لافه راسها برهبه متصاعده يم كتفه وجانب ملامحه .. اشتد مبسمها منحنيه جوانبه بانهزام … متضااايقه روحها حيل متضايقه !! شلون يتوعدها بمراحه لها!!!؟ ويروح ؟؟؟؟ .. ابعدت نواظرها وراسها .. مستشعره جمووووده وثقل صمته … واحتزام رسم خلقته ..على احساسها المتخاذل … عليه ومنه …!! شلون قدر سلطان يسرق شي مايستحقه منهم ؟؟ شلون تواجد سمه بينهم وهو بعيد !! لاقربه راحه ولا بعده راحه!!! ثقل بصدرها تلمست مكمن وطن اجنتها … باحتزام مطرفه يم الشوارع ومسار السيارات … خوف مضني تواجد واستكان من فكرة طاري فراقهم .. قد تعلقت فيهم وبنت احلامها بهم ومعهم…! ومعه هو!! … غمضت نواظرها .. متحشرج نفسها … يضيق ويضيق .. ياطول الوقت .. وصمته فيه متجلي … ارمشت بعينها تنظر بصمت .. فيما بين هو ساكت .. ينظر لطريقه بجمود وزنه ثقيل…. داخله مرتعد متوجس من فقد حلمن انتهج فكره يذكره كل وقت وكل ليله…ويعيش فيه حلمٍ استبرق وتحقق وزاد بوجوده خوفه وشدة محاذيره !! تواردت بشحنة افكاره منطوق كل من سعود وسلطان … بتتابع .. رصين .. ماكان يصدق انه ممكن ينهزم ولاقد فكر بانهزامه ابد!! كل فكره بانفاس نصره ملتهف يستشعرها طول مبادي سنينه المجحفه بظلمة كوابيسه.. قد خاصم الخوف من سنين ويوم رجع ؟ جاه كما ااضيف الكريه الشايل بقلبه عليه !! تجرد خوفه واصبح كومة ضلال تبي تحاوط عالمه والي يخصه.. قد ماكان يرغب يدمح ذاك الطريق الا انه انسحب له وبيرجع !! بيرجع يستل رعب قيضه ويبطش بيدينه امام كل من تجرا وحط عينه عليها !! .. استبرقت نظرته باسوداد فاحم طاغي مستملك مجمع افكاره قو وجع الشعور المنغرس بصميم صدره .. من شخص عطاه دون منه!! رغم صده ورغم نفوره ورغم كل ماجا منه ظل خلفه جبل وامامه درع !!!… بأي طاقه واي قدره واي وعي بيجابه فيها حقده ونظرة استحقاقه فيها ؟! .. شوطه مابين محاني صدره تشوط كما البركان الثاير !!!سلطان.. دخل بجهاله حربن مب كفون لها !! برغبة انتصاره ينتهي هو !!!! وان عطاه هالمره الي يبي بعد بينتهي هو!!! ياكيف يستجري يطلبه يطلقها!!! استلمح البوابه تبع المستشفى هدى مسار سيارته واقبل بخفه رصينه محتزم بيدينه مقودها ..استبرقت نواظره مخفي شحنة ضيقه وهو يوقف عند مدخل الطوارئ… عينه تترقبه فك الباب ساحب عصاته من جنبه وطلع شاد ثقله … مسكت المقبض بتوتر فاتحته ونازله … مدركه تباعده وتجاهله … لها … رفعت راسها تبحث عنه .. لقته يوجه كلامه لحارس الامن ماتدري وش يبي ثواني وفهمت وقت شافت رجل الامن يبتعد ثم جت وراه ممرضه بكرسي .. جت لين عندها عجزت ترد او تنطق استجلست ببطء .. وعينها تنظر له وهو يأشر لسايق السياره التابعه لهم .. تقدم ماشي عينه يم الممرضه دون ينظر لها وجه حتى كلامه لها .. يطلب منها توصلها وتسبقه… تحركت الممرضه دافعتها … التفت براسها وقت توجهت للمصعد … دخلت معها وهو معهم .. استكانت انفاسها براحه … وصلوا للعياده توجه للاستقبال منهي اجرائاتها ثواني ودخلوها .. بعجل استقبلتها دكتوره هند .. -هلابك نجلا … وديها عند السرير جهزيها .. -والعلامات دكتوره ؟ -بعد كشف السونار … هتفت نجلا لافه راسها عالباب .. -لحظه رجلي بيجي .. -مب مشكله تجهزي لين يجي يدري انك دخلتي ؟! -ايه .. ابتدت تستاقف وقت وصلت للسرير…. ساعدتها الممرضه تعتلي ببطء منتبهه لخوفها وارتباكها … وشحنة توترها -اهدي ان شاء الله خير .. هزت نجلا راسها دون تنطق .. حاسه برجفة ترقب … -وقف النزيف صح ؟! -ايه معد نزل شي… -تمام … خليني ارفع لك تيشيرتك…. ترقبتها نجلا … واطرفت يم الشاشه وهي تجهزها … اقبلت دكتوره هند … -يله نشوف … ان شاء الله خير يارب استجلست … وقتها سمعت حسه وهو داخل …التفت دكتورتها -تفضل … اقبل وعينها يم الباب تلاقت نظراتهم ببرود من ناحيته .. ابعد عينه يم الشاشه سحبت نواظرها … مطرفه بانتباهها للشاشه -بسم الله بارد الجل ..شوي معليش رطبت نجلا شفتها بشحنة ضيق عامره لوقوفه بعيد .. عينها تطرف له بصمت طردت انفاسها وقت ابتدت هند تحرك راس الجهاز وعينها يم الشاشه .. بتركيز … جمدت انفاسها فيما بين هو واقف ينظر بصمت يعاكس نبض قلبه المستلج … مرت ثواني تشابه سنين انتظار …نطقت هند بتطمين -شوفيهم .. بخير !!ماشاء الله … همست بحشرجه -والله دكتوره؟! -اي حبيبتي خل نسمع نبضهم … بس لحظه بلعت غصتها … منسله دمعتها من طرف عينها ببرود … وقت تعالى نبضهم المتواتر…. بلاشعور نظرت له دون ينظر لها … نطق حتى دون يطرف لو ثواني ..بس لمحت حركة هدب عينه المشحونه قلق -كيف وضعهم دكتوره؟! والنزيف وش اسبابه ؟! له مضاعفات ؟!بنواجهها؟! -وضعهم ممتاز .. لربما النزيف تجمع ماستبان معنا بسبب هالجهاز وامكانيته … يكون متحمع عند عنق الرحم .. غالبا نزوله طبيعي وافضل من تجمعه وازدياده !! بخصوص المضاعفات ماله اي مضاعفات باذن الله لكن ممكن يتجمع مره ثانيه !! وينزل على فترات او يستمر لين الولاده .. بهالحاله بنتابع وننتبه لها بكل مرحله .. لكن غالبا ان شاء الله مايرجع !!!! شوف هينا عنق الرحم هذا هو مسكر الحمد الله … الاهم والمهم انك تحتاجين استرخاء وراحه اطرفت يم نجلا … متابعه -القلق طبيعي للحامل لكن لايزيد دام امورك بخير …! فاستبشري خير تابعي الاهتمام بصحتك وتغذيتك نامي زين !… كثري من وقت استرخائك … نطق بحسه الثابت المتعالي -والحركه دكتوره ؟! -عادي تقوم وتتحرك بس تنتبه لاتشد نفسها !! طلعة الدرج بزود ابتعدي عنها !! كذلك !! حتى المثبت الي عطيتك مب ضار خذيه جاتك تقلصات بعده؟! هزت نجلا راسها .. نفي -تمام … بكتب لك علاج يخففها خذيه مره باليوم … مع الحبوب الي قبل … تمام؟! نظرت لنجلا وقت ضغطت تسجيل سحب الصور … منتظره خروجهم -تبين نسخه او مايحتاج تونا قبل كم يوم ماخذين!! همست وعينها يم الشاشه -ابيها اطرفت يم جيده وقت تحرك لاف وطالع بهتت نظرتها … مترقبته لين طلع … ورجعت تنظر لنزول الصور اعطتها هند وحده والثانيه طلبت من ممرضتها تحطها بملفها طلعت عنهم وهي التفت لنجلا .. ساحبه مناديل … مبتديه تمسح الجل وبواقيه وناطقه بهدوووء -اهم شي تبعدين عن الشد والتوتر … امورك تمام باذن الله .. لكن احتياط لمدة اسبوعين امتنعي عن العلاقه الزوجيه … تحسبا لاغير … اغتشى رسمها شي من الحرج مرخيه نواظرها … هامسه بخفوت .. -صدق دكتوره هم بخير ؟! يمكن يجي هالنزيف زي اليوم بعدين؟! نظرت لها هند برحمه باسمه -هم بخير صدقيني …. وان حصل لاتخافين بس مب جاي خلال هالفتره باذن الله لانه لابد يتجمع وعالعموم بعد اسبوعين موعدك بالتخصصي هيناك اجهزتهم مطوره اكثر وبنعرف قبل بوقت .. ونتصرف ونحتاط … سكتت مترقبه نجلا بصمت متنبهه لشحوب ملامحها واحمرار اجفانها .. شدت مبسمها مستشعره هالة برود بينهم فرق بين زيارتهم السابقه وجيتهم الحين.. استاقفت والممرضه داخله متوجه لنجلا تساعدها -انا بطلع اكتب لك الي قلت !! -يعطيك العافيه ريحتيني!! تبسمت داسه يدينها بجيوب روبها .. -ماسوينا شي واجبنا قدامك العافيه يارب .. تركتهتم طالعه … استجلست نجلا ساتره نفسها … زحفت ببطء … قد مارتاحت نفسها قد ماختلف شعور تواجدها عن الي فات … يبقلبها لوم وعتب وحزن يحرق … مانظر لها حتى … شدت مبسمها بضيق … منغبن فكرها من ذكرى وجود ريحة عطرها بمكان يخصها هي !!! .. عقب دقايق طلعت مالقته حتى عند دكتورتها … ارتبكت وقت دخلت تنظر لها -كتبتي لي الي قلتي؟! هزت راسها مبتسمه .. -خذاها زوجك الوصفه … استمري على توجيهاتي … وانتبهي لنفسك لين الموعد الجاي ان شاء الله … لفت طرحتها بتوهان وفكر سارح .. -ان شاء الله شكرا دكتوره -العفو … طمني امك لاتنسين … ارتجف فكها متلاقيه بنواظر دكتورتها -امي متوفيه!! بس هي حسبة امي !! بهتت نظرة هند برحمه مستجليه -الله يرحمها برحمته .. المعذره حبيبتي من شفت خوفها عليك زمان حسبتها امك!! تبسمت نجلا هازه راسها بفهم عاذر .. -امين .. يعطيك العافيه .. -يعافيك ترقبتها هند بصمت وهي تلبس نقابها .. نظرت لممرضتها نظره واضحه طلعت عنهم ونطقت بهادي الصوت.. -نجلا تسمحين لي اتكلم معك؟! نظرت لها نجلا وتابعت -شوي منيب ماخذه من وقتك .. قربت نجلا مستجلسه راميه حيلها بخفه -امري دكتوره فيه شي ماقلتيه؟! تنفست هند بعمق وهي تتقدم تشبك يدينها وتركز بنواظرها ناطقه بحاني الصوت -لا حبيبتي امورك مثل ماقلت زينه الحمد الله .! بس انا لاحظت انك متضايقه ويمكن ضيقتك اثرت على جسمك وكونك حامل هالشي يأثر .. بزياده .. سكتت تترقب صمت نجلا وتركيزها معها وتابعت -نجلا انتي الان بمرحله جميله تمر عالانثى مرحله مفرحه انتي تعيشين اعجاز وهو خلق روحين برحمك .. دايم قبل حتى تضيقين تذكري هالنعمه الي خصك الله فيها … ولاشي بالدنيا يستاهل نتضايق ونحبس بانفسنا امام هالنعمه العظيمه !! حطي صور ببالك عن جيتهم عالدنيا تخيلي وتصوري فرحتك بشوفتهم .. قريب .. فكري بكل شي مفرح يخصهم ..واعرفي بقرارة نفسك كل مشكله بهالدنيا لها حل !! مثل ماكل عله لها دوى وعلاج .. ان ترك الشخص الضروف المحيطه تاثر فيه بيتعب جسمه وينهد !! انتي مب مسؤله عن الهموم !!! لكن مسؤله عن استقبال هالهموم وتركها تاثر عليك وعلى نفسيتك!! بعقلك الباطني تقدرين تقررين تبعدينها وتصرفينها !! بعزيمتك وحماسك بحملك وبفرحتك ..!! عيشي هالفتره … بانسجام تام … وراحه تامه .. سامحيني ان تجاوزت حدودي بس انا طبيعتي كيذا مع مريضاتي ومراجعاتي اذا قاطعتها نجلا ببسمه مخفيه تحت نقابها -محشومه دكتوره .. بالعكس كلامك حلو .. صدقتي عيالي معجزه ماكانت عالبال ولا بالخاطر ..!…فوق انهم معجزه اشوفهم رحمه من ربي ونعمه كبيره لي !! ولزوجي !! تبسمت هند بحنو .. هازه راسها -فعلا نعمه لاتقدر بثمن !! عشان كيذى وسعي صدرك وابتسمي كل ماشفتي صورهم وكل ماسمعتي نبضهم!! انتي قوتهم الحين!! هم يعتمدون عليك اعتماد كلي متكامل !! وبنفس الوقت يمدونك قوه لاتستهينين فيها !! كونك بتصيرين ام هذي بحد ذاتها قوه !! تمدك بالثبات ! لاتخلين اي شي يكدرك !! لي صديقه دكتوره ممكن تفيدك باي وقت ان حبيتي تشورينها باي شي يخصك !! نظرت لها نجلا بعدم فهم تابعت بعجل -دكتوره استشاريه اسريه وزوجيه …ثقي تماما بسرية تواصلك معها حتى عني انا !! لكني انصحك كااخت ان احتجتي لها بتعينك !! تحبين اعطيك رقمها ؟ ترددت نجلا .. ناطقه بهدووء -ماكلم احد غريب انا … تبسمت هند بتفهم -يحق لك صادقه … بعطيك مدونتها الخاصه اقري مواضيعها والمشاكل الي تطرحها وترد عليها يمكن تستفيدين … وش رايك ؟ -كيذا ممكن عادي عطيني … سحبت هند قلم طارف وابتدت تكتب بعجل بنوته صغيره ثم فصلتها ومدتها لنجلا -تفضلي .. خذي فكره .. والله يطمن بالك ويريحك .. مدت نجلا يدها ماخذه الورقه المطويه فتحتها تترقب العنوان المكتوب تنفست مبتسمه رافعه عينها -شكرا يعطيك العافيه دكتوره ماقصرتي … -لاشكر على واجب حبيبتي .. واي شي تبينه يخص حملك تواصلي على رقمي الخاص مثل اليوم بكون بالخدمه .. استاقفت نجلا … ببسمه خافته -ان شاء الله… يعطيك العافيه … يله مع السلامه -الله يحفظك طلعت من عندها .. لقت ممرضه واقفه بكرسي عند الباب .. بحثت بنواظرها عنه … شافته واقف يكلم معطيها ظهره استجلست واطرف يمهم ماشر للممرضه ومتقدم … تقدمته هي مدركه تباعده عنها … ياكم بها عبره !! طلعوا من البوابه وسيارتهم واقفه نزل منها واحد تقدم للوليد ارخت عينها … وقت قربت كرسيها يم الباب نزلت فاتحه الباب وراكبه … بصمت .. عينها تتبعه .. الين ترك الي يكلمه والتف متقدم يم مكانه دخل شاد ثقله ماد عصاته بجنبه … مسكر الباب ومحرك مسار السياره … همست اول ماطلعوا من البوابه -الوليد ؟ نظرت له … تستشف جموده وتهميشه … متعني… -رد علي!!! نظرت له بترقب … مبهوت … جانب ملامحه ثابت برصانه … تابعت بحشرجه -انت فهمت غلط !!! انا كنت احس بلوعه صدق!! مب شي ثاني !!! حتى كنت بنزل لك ادورك !!! بس انت وين رحت؟؟؟! رحت لها !!! سكتت تنظر له بعبره … الجم وجع ضيقها بصمته وكنه مايسمع وكن وجودها من عدم .. اشتدت مسكة يدها لعباتها … هامسه بعتب لايم ممزوج بحمق -الولييييد !!! ليه رحت ؟؟؟! كيف تقربها وانت واعدني ؟! انهت منطوقها بالعه غصتها … مستشعره تهميشه لمنطوقها ولها حتى مانظر لها ولا اطرف يمها … بلعت ريقها تنظر له بترقب .. ناطقه بخفوت -شميتك عطرها فييييك!!! بصدرك ورقبتك!!! يالوليييد!!! حبست انفاسها … وقت اعتلت نغمة جواله تدرجت نظرتها لكف يده ساحبه ورافعه ناظر للشاشه وراد دون حتى يرد عليها -نعم!! تراجعت متسانده طارده الانفاس … بحمق … متصاعد … ملتزمه الصمت لكامل الطريق حسه الامر فقط الي سمعت … عقب سكر تم صامت .. ولا كنها وجهت له كلام ..قربوا من البوابه لمحت سيارات الدوريه مازالت متواجده … غطت عينها وقت تجاوزوها ودخلوا … متقدم مسار السياره الين مدخل النسا … وقفت وسمعته ينطق دون تنظر -سمر افتحي الباب مدخل الحريم!! قفل .. وتساند تارك جواله .. ناظر لشباكه بصمت ويده محتزمه المقود وكفه الثاني مستريح فوق فخذه … التفت له -منت نازل ؟؟ نظرت له .. -ماعندك شي تقول ؟؟ هاه يالوليد؟! رفعت يدها تبعد طرحتها عن عينها … متابعه -ادري بك ضايق من كلا قاطعها حسه الساكن البارد -انزلي!! نجلا شدت مبسمها متصاعد نفسها بارتباك -وانت!؟ هتفت بحنق -ماني نازله الا معك !! لازم نتكلم !!! انت عصبت جرحتني ونسيت نفسك بس عشان تكلمت مع سلطان !! صرت معد تشوف !! لدرجة رحت لها!!!؟؟؟ رحت لها يالوليد !!!!!! قطعت منطوقها جامده انفاسها وقت التف لها ينظر بعمق عينها دون ينطق ..تابعت .. برهبة وبضيق -وجودها ببيتي عطاك فرصه تفجر غضبك فيني انا عن طريقها !! عصبت ثم نصيتها عشان!! قطعت حسها زافره رافعه اناملها ضاغطه مدامعها -اووووف مابي اتخيل حتى!!!!! ابعدت يدها متابعه بخفوت مشحون .. -بلحظة غضب نسيييييت نفسك يالوليد!!!؟ شدت مبسمها تنظر لعمق عينه المتعمقه فيها دون حس نطقت بتشديد -بس عالعموم !! انت حر!!! ومثل مانت حر انا حره وبنت احرار!! ماتكسرني روحتك لها !!! رح مارس طقوسك الي نسيت جددها لانك قلتها بلسانك كلنا حريمك!!! ..وهينا ابي اقول لك انا مب زيهم كلهم !! افرق عنهم !!! قطعت كلامها ..وهي تلمح برووود نظرته لها …وبسمه بارده قاسيه ماوصلت لعيونه نطق بهادي الصوت و برصانة حس ..وبرود شعووور وصلها للنخاع .. -طقوسي؟! الي نسيت!!؟ وقبلها مهشم !!! وبيتي قزاز مهشم!!! ونفسي حتى مهشمه !! كل الي تبينه انا !!!! بس بعلمك وش انجزتي بهالمهشم !!! عقب تصرفك الارعن!! وكلامك هالي ماتثمنينه!!قبل تقولينه!! حرك مبسمه ببطء متابع وعينه تتمحور بنواظرها -طحنتيه بقاع رجلينك ساويتي هالقزاز المتناثر حواليك بالارض !!واوجعتي نفسك بنفسك !! وانهيتيه !!! بهتت نظرتها .. وهي تشوفه يترقبها بنظره بارده منهي منطوقه برصانه اجفلت مبادي ضيقها …همست بشتات.. مبهوت -انا كنت بلحقك بوض قاطعها بحس ساخر .. بارد هادي -انتي كذابه بياعة هروجن اكبر منك نجلا!! ارعدت نظرته بجمود ساطي وحس بارد ثخين متابع -قد ماداوين جروح غيرك ..!! الا انك ترجعين تدمينها بيدينك!! بلسانك !! بعيونك !!! انا مب همي فعلك ولاهرجك!!! سكت ينظر لها بفراغ مجحف اليم .. مستشعر عمق ضيم احساسه الخاوي وتكبيل يدينه .. من كل صوب .. وتابع محرك هدب عينه -عوقي اني عقب هالعمر شلون طحت لك بليا حساب لدرجة كل مابي ينهد !!! … سكت مشتد مبسمه ناطق بتصميم ونطره كئئيبه .. خاويه.. -انتي؟!!! دون كل من عرفت !! وعاشرت!! رغم كل مانويت وكل ماحققت صارت تجي طيحاتي من سبايبك !! هز راسه ببسمه متوتره مستهجنه بارده و ابعد نواظره متابع بشحنة ضيق -انزلي !! يابنت الاحرار!! النفس طابت!!منك ومن هالدنيا بكبرها !! تنابض قلبها وهي تنظر لملامح رسمه وتسمع حسه برهبة شعور .. موجع مكمن عمق نبضاتها استشعرت رجفه بمبسمها .. منلجم لسانها ..ناطقه بخفوت متردد ومتحشرج -الول التف ينظر لها بنواظر محاوطها احمرار قاني وبهتان واضح مشدد وناطق -انزلي!!! ارخت نواظرها متنفسه بصمت مهيب و التفت فاكه الباب ونازله منتبهه للباب موارب سكرت الباب بخفه وتقدمت داخله دون تطرف له … استقبلها حس سمر -هلا هلا … الحمد الله على السلامه يام الجلاميد خطاك الشر ! …………………………………………?? ?……………………… قبل بوقت …. مسكت سمر الي بيدها …مبعده نواظرها عنها بضيق ترقبتها تنطق لنجلا … ناظرت نجلا متابعتها الين دخلت المصعد!!! مدركه ان بينهها وبين الوليد شياط حاصل سبب نزيفها!!! مقهوره حيل مقهوره اجل لو شافت منظره الي شافت وش بيصير بها زود !!!!!؟؟ قال عندي !!!! قال!!!! حركت هدب عينها لايمه نفسها هو بعد ضايق اخوها !!! وش بيلاحي ؟! بس لو هالنشبه مب فيه بهالبيت !!؟؟ شدت مبسمها وقت اقبلت التفت لها العنود ثم ابعدت نظرتها لامها -الله يطمنكم عليها .. نطقت ام سلطان ناظره لها بتركيز .. مستشف بصمت -امين الله يجزاك بالخير !! -بخليكم بروح انام ..ان شاء الله مافيها الا العافيه -ان شاء الله .. نوم العافيه بنتي .. تراجعت دون تنظر لسمر بس هي ترقبتها الين اختفت وهتفت بخفوت -ماحبها ماحبها !!!! لو تسوي ايش ماتسوي !! منيب بالعتها !!! اكرهها !! وصلها حس امها النافر -سممممر !!!! التفت لها زافره -طيب طيب !!! باكل تبن !!! حركت هدب عينها سائله بضيق -يمه تهقين سقطت نجول ؟! -لا ان شاء الله الله يحفظهم الاسقاط شدة وجعه مثل طلق الولاده !!! الله يجيب العواقب سليمه !!! ماتريح نفسها هالبنت ابد !!! عجلا عالغير ومهملتن نفسها !!! خل تصحصح لي معها كلامن ينقال مايثنى!!! -اووه لو شفتيها اول مانزفت رحمتها !!! عيونها طايره بوهتها كلها طايره!!!! -هي وش جابها عندك ؟! مسحت دمعتها ناظره لامها كاذبه -جت تسولف شوي انا كنت منسدحه عالسرير وجت انسدحت جنبي !!! عادي يمه نسترجع احداث امس !!! بالله مب غريبه ؟! كل شي غريب !!!يمه ؟ شفتي العنوووووود!!!!!!! وش قلب سحنتها مدري !!!! وش رايك ؟! تقدمت ام سلطان … هازه راسها -المواقف ماتظهر الا معدن الانسان !!! معدنها طيب !!! كتفت يدينها لاحقه امها -ان شاء الله لو انه الماس جعله يطلقها !!!! نجلا غثاها هي !!!! حتى لو تنطم وتسكت !!!!! والله ماغثها الا هي !!! -اتركك من الملام الفارغ !! وتعالي معي ان دق اخوك علميني !!! عظامي تنافض ابي اتريح واجلس !!الله لايروعنا يالله ان تحفظهم وميمتهم يالله ان تبشرني وتفرح قليبهم يالله ماعليك صعيب تقدمت سمر بعجل ماسكه كف امها ماشيه معها … سامعه دعاويها … -امين ياررب امين !!! دخلت مع امها .. مترقبتها الين انسدحت … تمت تسولف معها شويات .. وبالها مشغول بذاك البعيد ونجلا والوليد .. نظرت لجوالها … وقت استكانت امها مسبحه ومهلله مدركه انها قلقانه .. وتباري قلقها بالذكر كالعاده… اعتلت نغمه جهازاها فزت بعجل -الو الرليد !! بشر -امورها طيبه كلها … بنطلع الحين ونجيكم … ان وصلت دقيت وافتحي الباب!! هتفت بعجل وهي تمشي بخطوات رايحه وجايه -كل شي ؟؟ والصغار؟! اخبارهم !؟ وضعهم زين!؟ -الحمد الله موجودين ياخوك!! تنفست بعمق لامسه صدرها رافعه صدرها -يارب لك الحمد الف لاباس ياخوي الله لايفجعكم فيهم ابد !!! يمهههه نجول طيبه وعيالها طيبين !!! -امين يله فمان الله -مع السلامه بنتظركم قفلت منه راكضه لامها … قامزه عالسرير -يارب لك الحمد عدت على خير !!! -الحمد الله يارب ياكثير الفضل الف حمد وشكر .. ترقبتها سمر بحنو -خلاص نامي امي ارتاحي اجهدتي نفسك !!! انا بنتظرهم بتجي وترقد على طول !! ترقبتها بخفوت الين استكانت وهي تشكر وتحمد .. مجهده امها بعد .. قامت من مكانها متوجهه لغرفة الجلوس .. عقب سايفت الباب …وانتظرت … لين مر الوقت … ودها تكلم احد تفضفض بس مافيه رنا ساهيه بعالمها وحمولتها .. بها حره من العنود ودها تسمعها كم كلمه !! بس امها كانت موجوده … مفتحل صدرها .. وبنفس الوقت تدرك ان مالها دخل بشي !! ومالها وجه اساسا تعاتب اخوها !! يعني وش بتقول ليه رحت لمرتك !!!!؟؟؟ زفرت تنظر للساعه تاخروا!!!… اعتلى حس جهازها .. انتفضت قايمه -جيتو؟! -سمر افتحي الباب مدخل الحريم!! -طيرااان !!! سكرت طالعه بخفه عجول … نازله من الدرج بعجل متبادي .. متوجهه لمدخل الحريم قبضت مقبض الباب فاتحته .. طاله بترقب شافت سيارته .. وقفت منتظره منتببه بتقطيب ومتابعه.. شافته يلف راسه ينظر لنجلا شدت مبسمها … وهي تشوف نجلا تنزل .. دون ينزل هو .. ترقبت مقدمها … وفتحت الباب هاتفه -الحمد الله عالسلامه يام الجلاميد !!! خطاك الشر !! دخلت نجلا مبعده نقابها .. -الله يسلمك -الوليد مب داخل ؟! التفت نجلا مطرفه لها هازه راسها بسحنة ضيق -مادري !! تقدمت تاركتها متوجهه للمصعد … تبعتها سمر بانقلاق.. -اخبارك الحين ؟! احسن ان شاء الله يقول امورك تمام!! -الحمد الله تعبانه ابي اريح !! امي مهره نامت؟! -اي اتوقع من علمتها انكم بخير طلعت عنها ..! انفتح الباب ودخلت نجلا وسمر تابعتها … تترقبها بصمت ابعدت نجلا طرحتها … مسانده نفسها تنظر للباب .. -نجول وش فيكم ؟! ودي الجم لساني بس مقدر !! علامكم وش صاير وش قلب حالكم !؟ تنفست بحشرجه وكلامه يرتد بقاع روحها -مابي اتكلم سمر .. تكفين ودي ارتاح جسمي منهد !! انفتح الباب .. طلعت وتبعتها سمر … تقدمت نجلا ..نطقت سمر يهتاف خافت -لحظه لاتدخلين بجيب تيشيرت رجلك نسيته عند امي !! جمدت انفاسها من سمعت رد نجلا الضايج -احرقيه!!! مابي اشوفه!! وقفت تنظر لها وانتبهت مطرفه لمقدم العنود احتدت نواظرها منقدمه وقفت نجلا لها -سلام بشري عنك .. عجزت ارقد !! ابي اتطمن عليك! هزت نجلا راسها دون تنظر لها .. ماتبي شوفها … كارهه.. حتى النظر -الحمد الله اموري طيبه .. ماتقصرين!! -الحمد الله الله يتمم لك ويفرحك بتمام حملك يارب !! ترددت العنود مدركه عداء نظرة سمر لها ومنتببه لشحوب محيا نجلا … ودها تقول شي بخاطرها … نطقت سمر -نجول يله روحي ريحي مجهده انتي !!! التفت للعنود .. -خلاص ماقصرتي تمسين على خير !! نبي نخمد كلنا!!! تقدمت نجلا تاركتهم .. نظرت لها العنود .. بضيق … مدركه وجود شي غافله عنه هي … ترقبت سمر مسرى نجلا لين دخلت مدخل جناحها … ونظرت للعنود متقدمه ناطقه بخفوت مشحون -نفسي اعرف وش بعد تبين؟! ليه تحشرين نفسك ؟! ترا كل الي صار امس من سبايب طليقك المجرم!!! الي بمكانك اختفي واحجر نفسي واضفها !!!ماكافاك الي تشوفين؟! نجلا والوليد مالك مكان وسطهم !!! حتى لو نصاك !!! اعرف اخوي انا !!! كلامه مايثنيه!!! ترقبتها العنود بصمت … منتظره تنهي هجومها .. الشايط -ادري سمر مالي مكان !!! عرفت وشفت مايحتاج تعيدين وتزيدين كلامن كررتيه من كم مره !! انا سالت لاني صدق قلقت عليها !! لاتصدقين بس صدق مااتمنى لها مضره ابد!! ماقصرت معي نجلا!! عطتني صفعه صحتني !! كتفت سمر يدينها تنظر لها بشك.. -ماكان ذا كلامك!!! زين فهمتي اخيرا!!! دام كيذا الله يرحم والديك ابعدي عن شوفها وخري عن طريقها !! مب الاسابيع الي راحت مانشوف لك طرف ؟؟؟ خلاص سهله اندسي بجناحك !! لين يفرجها الله علينا جميع!!! احتدت نواظر العنود لها -سمر من جيت وانتي ضدي ومالومك ولا الومك الحين!! لكن لاتقولين شي وانتي ماتعرفين وش حاصل !!! غير كيذا رجاء لاتدخلين !!تحملت تحجيمك وتحملت كلامك الي ترمينه علي وعلى ولدي!! وكله مسموحه اخرتك جاهله ..كل شي !! .. ولايهمني ابرر لك واوضح لك!! اما بخصوص نجلا الي بيني وبينها مايخصك فلو تكرمتي اعفيني من نقاش معك يخصها لها لسان تقول لي وتتكلم !! انهت منطوقها … لافه بجيدها متوجهه لجناحها .. نظرت لها سمر بحمق مشحون .. ماتدري وش لعبتها وكيف تفكر هالمره!!! … هتفت لها متقدمه -لحظه عنووود!! وقفت العنود وتقدمت سمر لها لافه حولها ناطقه بضيق -ترا حركتك مكشوفه جايه تجيبين لبس الوليد لها !!! ياخبثك وخبث فكرك الشاطح ذا!!! بعدين انا مب جاهله الله العالم وش سويتي واستدرجتيه لمك البارح !!! ومع هذا ربي كشفك شفتيه شلون طلع طاير وكنك مب شي حتى مانظر لك !! ماكنك موجوده !! رغم محاولتك قاطعتها العنود .. -انا ماستدرجته سمر !!! جاني بنفسه .. رمى علي يمين الطلاق !!! جمدت انفاس سمر بصدمه … مبهوته… تابعت العنود .. بحس ثابت .. واضح .. مستكين -ليه مصدومه؟! هماك تعرفين اخوك!! فعلا كلامه مايثنى!! ولايتكرر ولا يتغير الا لها هي !!! عرفته خلاص وتاكدت واقتنعت !! … انبسطي !!! انا بددا اعد الايام عشان افارق هالبيت كله !! واطلع من حياته وحياتها!! تحركت مبعده متعديه سمر .. المبهوته بصدمه وعجز .. عقلها يضرب اخماس باسداس … همست لروحها بقل تصديق -طلقها !!! وطبت شفتها ناظره لمسراها الين مدخل جناحها مختفيه … رفعت كف يدها ماسحه مبسمها بتفكير متضارب -طلقها!!! تقول رمى عليها يمين الطلاق!!!! تراجعت بخطوات عجلا … يم جناح الوليد ونجلا .. دقت الباب تدري انها معصبه .. تبي بس تعلمها بس بتقول … -نجووول !!! عادي ادخل !!! نجوووول افتحي شوي !! ادخل عادي !!! دقت الباب من جديد … انفتح الباب .. شافت نجلا تنظر لها بقلق -شفيه سمر ؟! تنفست سمر بعمق -عادي ادخل بقول لك شي ؟! شدت نجلا مبسمها بضيق -سمر انا تعبانه يعني ماتصدقيني ؟! معد ابي اسمع شي كانك ببتتكلمن عن الوليد مابي اتكلم احترمي قاطعتها سمر … بعجل مركزه بعمق عينها -الوليد يوم راح للعنود طلقها !!! بهتت رسوم نجلا بنظره خاويه -ايش؟! افتحمت انفاس سمر -اي طلقها رمى عليها يمين الطلاق !!! مدري وش هببت انتي ماتبين تحكين !!!بس كان عندها وطلقها !!! نطقت بخفوت هازه راسها -نجوووول راسي صاكني وش صار تكفين؟! وش سوت لك ؟! نظرت نجلا بتوهان مهوجس … ترقبتها سمر .. باستدراك لمحاني رسومها وفكرها المتدرج .. -نجوول افرحي اخيرا بيقلعها !!! سكتت تنظر لها وهي تحرك هدب عينها رافعه كف يدها تمسد جبينها شاده مبسمها بعبره … همست برهبه -نجول وش هببتي !!؟ نظرت لها نجلا وتابعت همسها المشحون ضيق -نجلا انا جيتك وطلعتي معي كلها ثلث ربع ساعه ونزفتي وناديته!!! يعني بالله بالعقل بالعقل نجلا !!! وش بيصير فيهم!!!! طلقها طلقها تسمعين!!!! سكتت زافره .. بقل حيله … -خلاص لاتقولين شي صدق صدق معد ابي اعرف شي !!! بروح انخمد !! ابرك !!! تراجعت طالعه من مدخلهم … مشتحنه افكارها … فيما بين نجلا سكرت الباب دون تنظر لها … تحركت بخطواتها يم سريرها … مندسه تحت لحافها … بفكر مبهوت تحاول تجمع … وتجمع … غمضت نواظرها دافنه راسها بالوسايد .. متكمكمه … بصمت ضايج … مصدوم … من الي سمعت … مفتحم فكرها … بصور .. تبي تطردها .. مب فاهمه مب مستوعبه … دام راح لها وقال لاتلومنيني ليه طلقها !!؟ يعني حاولت معه وطلقها؟!! او هو غمضت نواظراها باشتداد … وهمس فكرها يناغشها بلارحمه !! وعطرها !! ريحتها !!! شلون !!!؟؟ … رطبت شفتها تحاول تهدى وتفكر … وتسترجع .. كلامهم … ببطء .. والاوجع كلامه لها تحت ونظرته المشروخه بعينها .. تحركت بقلق.. خافت عينها يم علاجاته .. شدت مبسمها ..بضيق ..وصوته يتغلغل بمدارك سمعها … كما منطوقه .. …………………………………………?? ?…………………….. قبل بوقت دخلت العنود جناحها … مسكره الباب .. متقدمه … بصمت .. كئيب …. معقوله هي نفسها العنود الي استلجت عشان يكون معها !؟ معقوله تتقبل انهزامها بهالبرووود !! والانهزام !!!ولا ؟؟؟تبرر وتبي تشرح !! … استجلست .. بمكانه .. سادحه جيدها ورافعه مقادمها … سحبت اللحاف الي تلحف به .. دقايق بس دقايق … دست طرفه بصدرها … متذكره رهبة دخوله … وارتعاد روحها لشوفته .. بوقت .. كانت مستبعده شوفته … من اساس… غمضت نواظرها .. مستجلبه .. طواري جيته … دخلت عقب نجلا معها يزيد … ودته غرفته ..سادحته وطلعت… لغرفتها … مبدله لبسها .. فكرها سارح… تبي تريح اعصابها من شحنة اليوم ورعب اليوم .. واستدراك اليوم … ابعدت روبها الي شايلته واندست تحت لحافها .. تنظر للفراغ… جمدت وقت سمعت صوت انغلاق باب جامد ارتبك جيدها مستجلسه… اطرفت يم الباب الموارب .. ونبضها يعتلي … بعجل زحفت بخوف ساحبه روبها ولابسته … متقدمه منذكره يزيد .. بغرفته … ارتعد نفسها وهي تطلع من حناحها بشحنة خوف … ووقت لمحت وجوده وقفت بجموود … تنفست بارتهاب وهي تشوفه.. جالس وغارس كفوف يدينه بشعر راسه بحركات منتابعه تراجعت بعجل .. كاتمه انفاسها.. وقت سحب تي شيرته حاذفه .. متنفس بعمق ومتراجع بصمت .. ساند راسه .. بنواظر طافيه مغمضه.. يسحب انفاس بعمق واضح ومهيب …تأملته بسكون جارف كل مافي روحها له ..شدت مبسمها … محتزمه روبها .. ومتقدمه عينها تترقبه .. بشعور ساطي .. فتح نواظره ..متلاقي بنواظرها احتبست انفاسها .. وهو ينظر لها بصمت وقفت مكانها…برهبه…مشحونه بكل شعور ينتعش به قلبها له.. نظر لها بنظره بارده تخفي لهيب ضيقه .. حرك هدب عينه مستجلس مأشر عالكنبه الي قدامه -تعالي اجلسي !! يالعنود … رطبت شفتها ناطقه بخفوت .. -وش فيه يالوليد ؟! شبك يدينه مترقبها وهي تجلس نظرت لعينه بتوجس نطق بنظره ثابته خاويه بارده .. -اليوم اكيد شفتي بنفسك وتاكدتي وش نية ابو يزيد لك!! بعيدا عن الي صار من طرفك من تم عقدنا اتوقع فهمتي جدية وضعك هينا!!؟ مع يزيد !! هزت راسها بتفهم .. تابع بنفس حسه وبرودة نظرته لها -علاقتي بك هينا وصلت حدها ..المتفق عليه!! هتفت بعجل ورهبه -مسكوا مشهور ؟! حرك مبسمه .. ناطق بنظره جارفه متوعده رغم سكونها -بجره انا !! بروح واجره بنفسي !! جمدت انفاسها .. -بتروح لهم؟! شلون تروح لهم تعرف ه قاطعها .. -هالشي مايخصك يالعنود لاتسالين عنه الي بيهمك وضعك مع ولدك بتتمين هينا الين ارجع وفي حال انا مارجعت !! كل شي يخصك مع الدوله وبتكونين بحمايتهم سواء انمسك او لا!!! انا بمشي قريب سواء رجعت او مارجعت ماراح تتمين على ذمتي !! سكت وهي ارخت نظرها مشبوكه يدينها … -ماقصرت لا انت ولا نجلا ولاامك يعطيكم العافيه !! الله يجزاكم خير !! …. سكتت بتردد ثم تابعت .. متنفسه بتوتر واعتراف -تستحق .. نجلا !!! هزت راسها بضحكه مهرومه وعينه تترقبها بصمت -هالبنت غير!! مثل مانت غير! هي الوحيده الي عكست بروحها جانبك الي غفلنا عنه جميع !!…واشرقت به كما الشمس دون تحرق!!!.. تعرف الشمس عقب ليلة القدر ؟! مثلها هي!!!…تماديت انا معها اعترف الغلط مني !! لان نيتي ماكانت مثل نيتها ابد !! حركت هدب عينها .. بتوهان معترف -غير هي غير !!! تنفست مستجلسه رافعه راسها بكبر .. متابعه وناظره له متلاقيه بمكنون عمق نواظره الي تجهلها كما الكثير … -اسمعك يالوليد ..واعرف .. ليه جيت !! قولها!! شدت مبسمها .. بترقب … مرجف رمشها وقت سمعت منطوقه الصادح بخفوت مرخيه راسها -انتي طالق … غمضت نواظرها شاده مبسمها … بوجع .. سحبت انفاس بشهقه رافعه راسها ماسحه دمعتها وناطقه بحجشرجه -الله ينصرك!! كفيت ووفيت!! وقلت وفعلت!! هز راسه بنظره خاويه .. -الله يعوضك خير وبالي ابرك مني !! ويحفظ لك ولدك !! هزت راسها .. بصمت .. مكضوم… تابع منطوقه بنبره هاديه -من بكره تنزلون انتي ويزيد مع الجميع حتى وقت الوجبات!!لك كلمتي محدن بيغثك بكلمه لاانتي ولايزيد ! ارتجف فكها بقل حيله وهي تهز راسها .. وضيق زلزل كيانها .. وقفت بتوتر … ماشيه بخطواتها استاقفت وقت نطق اسمها بصوته المتغلغل بمكامن روحها من سنين .. -العنوود!! تنفست ساحبه نفس .. سامحه لنواظرها تنظر له .. بعمق هالمره بس !! بس هالمره تبي تترك نواظر عينها توادعه .. رمش بعينه ناطق بهادي الصوت .. -يزيد .. بيضل في ذراي بحياتي ومن بعدي بعون الله !! حتى لو لقيتي نصيبك وعشتيه!! ارتجف مبسمها ضاغطه عليه بشده .. ناظره بعمق عينه استدركت انها لاول مره تخاطب روحه مو خلقته ولا مظهره ولا وجوده ..المهيب -امانتك الي تشوفها حياه !!.. بحفظها حفظ عيوني وبحامي عنها لين ترجع !! برقت نظرته بحنو .. ممتن..دون اي حركه ناطق بنبره عامره جزله -شكرا…! هزت راسها بانهزام .. متحركه ولافه … ثواني والتفت وهو باقي ينظر لها -عادي ماانزل ان بغيت!؟ ترقب نواظرها ناطق بخفوت -براحتك.. بلعت غصتها وتراجعت .. بعجل … يم غرفتها… داخله مسكره الباب … لامسه صدرها النابض بعجل متصاعد ..بقلبها له كلام .. ودها تنطق به .. مدركه معد به وقت بيجمعهم كما اليوم وكما الحين!!… من جديد التفت فاتحه الباب بعجل وتقدمت بس وقفت وقت لمحته منسدح بكامل جيده مغمض نواظره… احتنت نظرتها بعشق مجبول … عميق .. تراجعت لغرفة ملابسها فاتحه دولاب اللحف سحبت لحاف .. رفعته تتنفس ريحته قطبت هدب عينها متقدمه يم تسرحيتها بخت عليه معطرته بعجل وتوجهت له ماشيه خطواتها ببطء وعينها تمتلي به دون ينضح شعورها … ابد انحنت .. فارده اللحاف .. فتح نواظراه هتفت بعجل -جبت لك لحاف لاتبرد !! المكيف بارد !! نظر لها بتوهان .. استاقفت مبتعده مرتبكه بضيق … تم ينظر لها متنفس بعمق ساحب اللحاف بصمت مجهد .. مبعد وطارد شحنة غضبه المخذول بانهزام مجهد … دخلت غرفتها مسايفه الباب متقدمه لسريرها جمدت مكانها وهي تسمع خبط عالباب قربت من بابها تحاول تسمع … طلعت والخبط يزيد وحس سمر واصلها شافته يتوجه للمدخل تقدمت وراه وقت فتح الباب .. فتحت نواظرها طارده الذكرى …. القريبه… بضيق … سحبت اللحاف متوسده اطرافه وكله … مهوجسه بمصيرها الحين … وقبلها مصيره هو !!! يعني بيروح!!! برجله بيررح لهم !؟ جاهلن بجرمهم وخبثهم !! جاهلن سواد دنياهم !!!؟غمضت نواظرها بهمس حزين باهت -الله يحفظك !!… …………………………………………?? ?……………………… استاقف الوليد منتبه ليعقوب مقبل … فتح بابه نازل .. نظر له يعقوب هاتف بهمس -كلموا نايف بلغوه بالوفاه … اشتد مبسم الوليد ساحب عصاته .. هاز راسه بصمت .. نظر لامتداد ارض براحة قصره ثم اطرف للديوانيه -استعديتوا!؟ للعزى!! -نفس الحراسه متواجده وبتجدد وبتزيد .. نظر له الوليد .. -بيصلى عليه صلاة الغايب …!! لايغيب عنكم اي احد يدخل عزاه .. لازم احد يكون متواجد داخل بيت غازي .. -ان شاء الله … مرتبين لها مثل ماطلبت .. اشر ليعقوب براسه … -رح ارقد كم ساعه … بنصبح وابيك تكون متواجد بالبيت ان طلعت انا!! -تمام ابشر … اعطاه مفاتيحه … وترقبه يركب سيارته … ويحركها يوقفها بالمواقف …. تنفس ساحب انفاس … سحب من جيبه نظارته الشمسيه ولبسها … بتقطيب ضاغط ازرار ورافع جهازه … -سلام!؟ -هلا الوليد … الحمد الله عالتمام !! -الحمد الله … بلغت ربعكم ؟! -الان توني برسل ايملات وبكلم الجماعه … -الصلاه بتكون العصر .. بجامع الراجحي … لجل يجتمعون العالم .. !! -اي وصلني .كل الترتيبات .. نجلا اخبارها ؟!انشغلت طول الليل انتظر خبر عن سعد !! بغيت اكلمك ادري بك منشغل بالي معها هي حولك؟! -انا برا البيت بدخل شويات واخليها تكلمك … -درت؟؟ اكيد مارقدت ! -ان شفتك علمتك … باللي صار … -وش صار ؟! عساها طيبه شد الوليد مبسمه … متنفس بعمق -اسمع صوتها وبتتطمن … يله بسكر منك … الحراسه بتكون حرالين بيتكم وفيه معك بيتواجد كم شخص .. داخل البيت … -تمام … -فمان الله … -مع السلامه … قفل منه الوليد … محرك هدب عينه بشتات ضايج … داس جهازه .. ناظر للفراغ … الخاوي بجوفه .. اشتد مبسمه بمكنون داخله غضب شاطح ثاير .. معد هو ثارن قديم اصبح الي بينه وبين سعود شي اقبح واكبر واقذر !! زادت ديون سعود عقب منهجه المتسيب !! وزاد معه اصراره انه ينهيه !!من على ارض البريه… قبل خذا طهر طفولته !! لكن الحين يبي ياخذ طهر دنياه اجمع!! وهيهات يسمح له !! هيهات!!! …………………………………………?? ?……. قبل بوقت نزلت سمر بعجل .. متخالف فكرها ودها تشوفه … توجهت للمدخل فاتحه الباب تترقب ماشافت شي تنفست بضيق متراجعه مسكرته ..دخلت المجلس … وجلست عالكنب الطارف … مكتفه يدينها بترقب … وانتظار ..عقب دقايق سمعت صوت مقبض الباب فزت قايمه متوجه خطواتها يم المدخل … جمدت نظرتها وقت لمحت شحنة ملامحه وخفوت برقة نواظره ..واهتزاز رمشه وقت لمحها بنظره حانيه شايخه تنفست بربكه … -هلابك كنت انتظرك … - / \ / \ انتهى ا الجزء الأول | ||||
|
| |
|
11-12-22, 01:39 AM
| #19639 | ||||
| هناك العقلان يا قال بجية زوجك رغم تعلقي بابطال الروايه ومن كثر ما اشتقت لهم رجعت اقرأ من جديد الا ان عذرك معك ومسموحة على قصر البارت بس اني اشتقت لرنا وزناد مالهم حس اتمنى البارت الجاي يطلون علينا اما نجلاء والوليد الصراحه انا اشوف كل واحد معه حق كلهم نفس الطبايع لا زعلوا تغيروا وقالوا كلام يجرح يعني الوليد يوم نجلاء تجيب العنود كسرها وقال كلام كبير بحقها وهي هالمره ماقصرت فيه بس البلا ان الوليد مب مثل نجلاء الوليد اذا زعل يقسى ويتغير ويجرح اذا زعل ارحم نجلاء لانه يصير مايرحم احسه كانه ينتقم منها على لحظه عصبيتها مع انه هو اشد اذا عصب مع ذلك قلبي مايقوى يشيل عليه اتمنى نجلاء تلقى طريقه تراضيه فيها واتمنى الرضا يكون البارت الجاي لان صدقًا معد اتحمل اللي يصير لهم احسه يأثر على يومي ابي يرجعون هذوليك اللي يعطوني طاقه ويصغرون كل شي كبير | ||||
|
| |
|
11-12-22, 01:55 AM
| #19640 | |||||
| اقتباس:
الله يبشرك بالخير 😋 على قد ما نفسي نوصل معاهم لبر الامان على قد مو صعب علي فراقهم ايش رأيك نوصلهم لبر الامان وبعدين نستمتع بيومياتهم>> فكري فكري ماهي بشينه ترى 😂😂 ولا ايش رأيكم يا بنات | |||||
|
| |
|
| أدوات الموضوع | |
| انواع عرض الموضوع | |
|
|
73041Likes
العرض العادي
