آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
03-05-19, 09:50 AM
| #11 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب  
|  الحلقه العاشره ساري كانت ماشيه كالعاده في طريقها بتدور في كل الوشوش يمكن تلمحه او تشوفوه كانت اقصي امنيه ليها انها بس تشوفوه وهيا بتعدي الطريق فجأه لقت عربيه جايه عليها بسرعه ولسه هتجري لقت نفسها بتقف وهتجري ليه ؟؟وهتعيش لايه؟؟مش يمكن دي فرصتها وتنهي حياتها ؟؟؟كفايه جري ..استسلمي للواقع...محمود مش ليكي ابدا وخلاص نسيكي واستمر في حياته وانتي خلاص فقدتي كل حاجه غاليه يبقي استسلمي للموت ..قدامك اهوه بينك وبينه خطوه... فعلا غمضت عنيها واستنت العربيه تدوس عليها فجأه العربيه وقفت وصاحبها نزل جري يشوف هو داس علي القطه ولا لأ واخيرا سمعت صوت بتتمناه من زمان قوي ::::انتي ايه بس؟؟؟انتي كويسه ولا ايه فوقي بقي كده؟؟ فتحت عنيها وشافته حبيبها محمود قدامها وشايلها كمان بين ايديه...طيب تعمل ايه ولا تعرفه ازاي انها هيا؟؟؟ محمود: شكلك فعلا كويسه؟؟المهم اوقفي علي رجليكي كده حطها علي الارض ولقاها كويسه فقام هيمشي فمشيت وراه وهيا بتجر رجلها وراها لان رجلها اتخبطت .. محمود: لا لا انتي رايحه فين؟؟؟بصي انا بحب كل الحيوانات الا القطط مش بستحملهم ابدا ..امشي بقي بعيد شوفي كنتي رايحه فين حاولت تمشي وراه بس زقها وركب عربيته ومشي .... حلمها بيهرب تاني من بين ايديها ..لازم تفضل جنبه او تقرب منه .... فضلت تجري وراه بالعافيه وهيا بتجر رجلها وراها والالم بيزيد مع كل خطوه بتخطيها بس لازم تلحقه ..لازم ما يتوهش من قدام عنيها ... فضلت تجري وتجري وتجري ...وقف في اشاره وبص في المرايا لمحها لسه بتجري وراه... محمود: ايه بقي القطه المجنونه دي؟؟؟وبتجري ورايا كده ليه؟؟؟ تابعها بعينه في المرايا ولقي نفسه بيمشي براحه ...وفجأه القطه وقعت .. استناها تقوم تكمل جريها بس ما قامتش وقعت في نص الطريق ... زي ما تكون خلاص استسلمت للموت... ساري جريت علي قد ما قدرت بس خلاص تعبت من كل حاجه حواليها طيب لو اخدها هتعمل ايه يعني؟؟؟هتعرفه نفسها ازاي؟؟؟هو بيكره القطط من كل النواحي هيا خلاص خسرته ..يبقي بتجري ليه كفايه جري وكفايه تعب خليها ترتاح بقي ...هتغمض عنيها وكل حاجه هتبقي كويسه ..وفعلا غمضت عنيها.. محمود لما القطه وقعت وما قامتش تاني نزل من عربيته وجري عليها خاف ان اي عربيه تدوس عليها قرب منها وشالها بس كانت مغمضه عنيها حاول يصحيها او يفوقها ما فاقتش..خاف عليها ومعرفش يعمل ايه؟؟ اخدها ومشي بيها وهو طول الطريق بيكلم فيها ..اوعي تموتي ؟؟اوعي تموتي؟ وصل لحد بيت وخبط كان الجو اخر الليل بس فضل يخبط ويخبط اخيرا الباب اتفتح عصام: محمود خير في ايه؟ محمود: في دي كشف القطه اللي كان لفها بالجاكت بتاعه ووراهاله عصام: هو انا يعني علشان اخو خطيبتك ده يديك الحق تجيلي اخر الليل وعلشان قطه ؟ محمود: انا خبطتها بالعربيه ..وايوه انت المفروض تساعد اي حيوان مش دي وظيفتك ولا ايه؟؟؟ عصام: ماشي هعديها علشان نسمه اختي هاتها خلينا نشوف مالها دخل محمود بالقطه وعصام كشف عليها محمود: ايه مالها؟؟فيها ايه؟ عصام: القطه دي غريبه قوي ...دي نوعها ايه دي؟؟انا مش عارف احددلها نوع معين محمود: وبتسألني انا؟؟؟معرفش انا خبطتها في الشارع..المهم حالتها ايه؟ عصام: الخبطه ما اثرتش عليها..اعتقد انها مجهده او تعبانه او جعانه... اكيد صاحبها بيدور عليها ..قطه بالشكل ده اكيد صاحبها اتجنن محمود: ومين قالك انها ليها صاحب ما يمكن تكون قطه شوارع عصام: انت شايف ان دي شكلها قطه شوارع...القطط اللي بتشوفهم في الشارع يشبهولها حتي من بعيد...بلاش دي ..شوف لابسه سلسله وعليها اسم اهوه...اسمها .....تقريبا ساري محمود باستغراب: ساري اول ما نطق الاسم القطه فتحت عنيها وبصتله قوي..وهو حس بدقه غريبه في قلبه وبصلها باستغراب عصام: ايه مالك؟؟الاسم بيفكرك بحاجه؟ محمود: لا ابدا بس اسم غريب مش اكتر هنا القطه ريحت دماغها تاني .كأنها بتقول مفيش فايده ومفيش امل عصام: المهم هتعمل ايه فيها؟ محمود: ما تخليها عندك وانا هنزلها اعلان ولما صاحبها يجي ياخدها عصام: انا؟؟؟انا اخدها؟؟؟ محمود: انت دكتور بطري وبتحب القطط فيها ايه يعني؟وانا ممكن اتكفل بأكلها عصام: تتكفل بأكلها؟؟اطلع بره يا محمود.. محمود: سوري يا عصام بس انا مش بحب القطط نهائي وما اعتقدش امي كمان هتتقبلها في البيت؟؟؟ممكن تديها لاختك عصام: طيب ما تديها انت لخطيبتك.. محمود: معلش انت اتصرف بقي خليك جدع بقي.. عصام: هخليني جدع ..نزل انت الاعلان وانا هخليها مؤقتا بس لو محدش ظهر انت هتتصرف فيها محمود: اوك يا جميل ما نتحرمش يا غالي سابها ومشي ....سابها لعذابها ومشي تاني ....حتي الموت مش عارفه تروحله طيب تعمل ايه بس؟؟؟ جتلها امها ووقفت جنبها تاسهيك: وبعدين هتفضلي كده؟ ساري: عايزاني اعمل ايه يعني؟؟ تاسهيك: اتمسكي بيه ساري: وبعد ما اتمسك بيه؟؟؟اعمل ايه برضه؟ تاسهيك: انا اللي هعمل..انا هقربك منه وزي ما بعدتك في يوم هرجعك تاني راحت تاسهيك لعصام ومراته وورتهم اسوء الكوابيس ...جننتهم طول الليل لدرجه اول ما النهار طلع ..مراته قالتله يا هيا يا القطه في البيت .. اضطر عصام يتصل بمحمود ويبلغه باللي حصل وانه يجي ياخد القطه من عنده فعلا اخدها ووداها لخطيبته ونفس اللي حصل عند عصام حصل عند خطيبته واتضطر ياخدها عنده البيت محمود: طيب اعمل ايه انا فيكي؟؟ارميكي في الشارع؟؟مش هاينه عليا اوديكي فين؟؟وامي هتتقبلك ازاي؟لو مواضيع الكوابيس اتكرر في البيت مش عارف امي ممكن تعمل فيكي ايه؟؟؟انتي بتبصيلي كده ليه؟؟؟ الظاهر ان انا بقيت مجنون وبكلم قطه؟؟بس مش عارف ليه حاسس انك فاهمني ..مش انتي فاهماني؟؟ فعلا انا اتجننت رسمي لاني مستنيكي تردي عليا شالها ودخل البيت واول ما امه شافته فاطمه: ايه اللي معاك دي يا حبيبي؟ محمود: مش عارف اوديها فين؟؟ومش عارف اعمل ايه؟ فاطمه: دي جميله قوي ..هاتها تلاقيها جعانه ..تعالي يا جميله انتي...اسمك ايه بقي يا تري؟؟ محمود مستغرب من امه طول عمرها بتخاف من القطط ومش بتحبهم ابدا محمود: اسمها ساري... فاطمه: غريب قوي الاسم ده بس حلو اخدتها اكلتها وحمتها ونشفتلها شعرها بالاستشوار ومحمود هيتجنن من امه اللي بتعامل القطه كأنها نونو جديد دخل البيت فاطمه: انت بتبصلي كده ليه؟؟؟مش لازم نهتم بيها مش مخلوق دي زينا وروح بتتألم وتحس ولا ايه؟؟ محمود: هو انا اتكلمت؟؟؟بس انتي بتعامليها زي النونو فاطمه: هيا فعلا نونو وجميله ..انا حبيتها قوي يا محمود محمود: لا ما تحبيهاش قوي يمكن صاحبها يظهر وياخدها فاطمه: ان شاء الله مش هيظهر وهتفضلي معانا يا جميله انتي.... راح محمود ينام ولسه هيقفل باب اوضته دخلت ساري وراه محمود: لا بقولك ايه؟؟انا مش بحب القطط ..روحي عند امي ..هيا بتحبك وهتاخدك في حضنها..انا لأ..امشي يالا دخلت القطه وقعدت علي سريره ونامت ولا كأنها سامعاه محمود: بتتجاهليني ؟؟؟؟وبعدين بقي؟؟؟ ايه يا محمود انت هتعمل عقلك بعقل قطه ولا ايه؟؟؟خليها بقي وخلاص غير هدومه ورقد علي سريره محمود: ابعدي بقي كده شويه واياك تصحيني ..فاهمه؟؟؟ نام محمود علي بطنه ولسه هيروح في النوم حس بيها طالعه عليه من عند رجله وبتمشي خطوه خطوه لحد ما وصلت علي ظهره وراحت نايمه فوقه هو مش عارف ليه مع كل خطوه كانت بتخطيها بيحس للحظات انها مش قطه ..بيحس انها واحده وبتحاول تغري واحد...استغبي نفسه من احساسه ده بس ما حاولش ينزلها من فوقه وسابها نايمه عليه... هنا تاسهيك جاتلها تاسهيك: اخر حاجه اقدر اعملهالك اني هديلك القدره انك تدخلي احلامه حاولي تفكريه انتي مين؟؟؟ ساري: هدخل افكاره ازاي .؟؟؟مش هقدر استخدم اي قوي وانا كده تاسهيك: حاولي لحد ما تقدري..حاولي توصلي لاحلامه با ي طريقه سابتها تاسهيك ومشيت وهيا طول الليل بتحاول تدخل افكاره بس هيا سبق وحمته بارتباطها بيه..حمته من اي حد يقدر يدخل افكاره الا بمزاجه قام محمود تاني يوم وهو احساسه غريب...اول ما فتح عنيه شافها محمود: اجمل عنين ممكن الواحد يشوفها صح؟؟؟عنيكي غريبه قوي؟ مش عارف ليه حاسس اني شفتها قبل كده..نفس اللون ده شوفته قبل كده محمود: ومعنديش ادني فكره انا بكلم فيكي ليه؟؟؟ ساري بقت شيئ مهم ومميز في البيت الام وابنها روحهم فيها ..مشكلتها الوحيده كانت زياره نسمه ليهم...كل ما بتزورهم هيا بتتعذب...كل ضحكه محمود بيضحكها معاها بتقتل قلبها واحده واحده... في مره كانت معاهم وهيا ومحمود لوحدهم فمحمود قرب من خطيبته وباسها كانت بوسه طويله وجميله بس كان ديما بيحس بفراغ لما يبوسها ..كأنه في حاجه اعمق من كده مليون مره وهو مفتقدها ..الاحساس ده بيحسه كل ما يحاول يقرب من خطيبته ..وهو بيبوسها خطيبته بعدت مره واحده محمود: ايه مالك؟ نسمه: قطتك دي بتبصلي بطريقه غريبه محمود: قطتي؟؟؟؟ما تبص وايه يعني؟ نسمه: مش عارفه حاسه كأنها درتي محمود ضحك بصوته كله: درتك؟؟؟القطه؟؟؟انتي الظاهر اتجننتني نسمه: قطتك مش بتحبني ابدا وانا بخاف منها..مش عارفه ليه بس بخاف منها قوي وبحس اني كل ما المسك انها عايزه تقتلني ويمكن لو سيبتيني لوحدي معاها تقتلني فعلا محمود: ههههه انت فعلا اتجننتني؟؟؟ تعالي يا ساري جت ساري وطلعت علي رجله وقعدت وبتبص لنسمه نسمه: شايف بتبصلي ازاي؟؟كأنها بتقولي ده بتاعي انا؟؟؟ محمود باس ساري علي راسها واخدها في حضنه محمود: بجد يا ساري انتي بتقوليلها كده؟؟؟؟ نسمه: انت مش كنت بتكره القطط؟؟ محمود: كنت...بس ساري مميزه نسمه: شكلي كده هغير منها...وانت ضاممها كده ..مش حاسه انها قطه ابدا محمود: فعلا دي درتك ضحك محمود وفضل يتريق عليها اليوم كله ..بس شيئ جواه مخليه مش يلمس خطيبته تاني...يمكن تكون نظرات ساري ليه؟؟؟ محمود لنفسه:الظاهر مش نسمه بس اللي اتجننت انا كمان اتجننت رقد محمود علي سريره والغريبه انه بيستني ساري تنام في حضنه كل يوم نام علي ظهره وحاطط ايديه تحت راسه وجت ساري طلعت علي رجليه وبتمشي خطوه خطوه لحد ما وصلت عند صدره راحت ماده بقها عند رقبته وحركت مانخريها الصغيره علي رقبته والحركه دي مش عارف ليه فكرته بحاجه حصلت قبل كده ..زي ما يكون حد كان بيعمل معاه الحركه دي نام محمود وهيا في حضنه والمره دي حلم بيها شافها جميله بشعر احمر طويل ..فضل يبصلها باستغراب محمود: انتي مين؟؟؟ انا شفتك قبل كده؟ ساري: انت مش فاكرني؟؟ فكر وهتعرفني محمود: انا ما اعرفكيش ساري: انت تعرفني فوق ما تتخيل محمود: طيب فكريني بيكي..بس واحده زيك ما تتنسيش ساري: هفكرك بيا قربت ساري منه ولمست شفايفه وحس محمود ان روحه بتتسحب منه وقلبه هيقف من دقاته ..ومن جواه حس ان الاحساس ده مش جديد عليه هو سبق وحس بسحبه الروح دي ...ولما بعدت عنه ساري: افتكرت؟؟؟انت فاكر بس مش راضي تعترف من جواك محمود: اسمك ايه؟؟ ساري: ساري وانت عارف ان اسمي ساري صحي من نومه مفزوع ولقاها واقفه جنبه بتبصله كأنها عايزه تكلمه محمود: لا انا اكيد مجنون ...بتخيلك واحده في منتهي الجمال وبتخيلك حقيقه ده جنون مش اكتر ... غصب عنه محمود كل يوم بيقرب من قطته اكتر واكتر وبيعاملها انها شخص مش قطه وكل يوم احلامه بتزيد وتزيد لدرجه بقي عايز ينام كتير علشان يفضل يشوفها طول الوقت وبيبعد كل شويه عن خطيبته امه خافت انه يغير رأيه فطلبت منه انه يكتب كتابه بقي وهو مع كتر زنها وافق طلبت منه بطاقته علشان يجهزها وهو معندوش فكره هيا فين فقالها تدور عليها في اوضته وهيا بتدور لقت صندوق صغير فوق دولابه وفتحته واتفاجئت باللي فيه ياتري امه هتعمل ايه؟؟؟ هيتجوز محمود تاني ولا هيفتكر حبه الضائع؟؟ ساري هتعمل ايه؟؟؟ استنوني تعرفو ShiMoOo | ||||||||||
|  |
|
03-05-19, 09:51 AM
| #12 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه ال 11 ام محمود وهيا بتدور علي بطاقه ابنها لقت صندوق صغير فتحته واتفاجئت باللي فيه...لقت فيه بطاقتين واحده لمحمود والتانيه لواحده اسمها ساري واتفاجئت جدا لما قرت الاسم حست برعشه غريبه في جسمها كله ولقت دبلتين عليهم نفس الاسمين ولقت كمان عقد جواز شرعي ....فضلت كتير قاعده مكانها ومعرفتش تعمل ايه او حتي تتصرف ازاي؟؟؟مين ساري دي؟؟؟ وليه لما هو متجوز مخبي ليه؟؟والف سؤال وسؤال من غير اجابه....والقطه اللي بره اللي اسمها ساري دي ليها علاقه بالموضوع ولا ده مجرد اسم ؟؟؟ اخيرا قررت انها تروح للشيخ عبدالله تسأله تعمل ايه؟؟؟ استنت ابنها جه البيت وكانت عايزه تسأله بطريقه مش مباشره بس مش عارفه ازاي محمود: مالك يا بطه بتلفي وتدوري حواليا كده ليه؟ فاطمه: لا يا حبيبي سلامتك..بس محمود: انا عارف ان فيها بس...بس ايه قولي يا جميل فاطمه: وانا بدور علي بطاقتك في اوضتك لقيت صندوق كده فوق الدولاب فيه شويه حاجات كده محمود: طيب وايه يعني؟؟افتحيه اللي ليه لازمه خليه واللي مالوش لازم ارميه..يالا انا نازل تاني عايزه حاجه مني؟؟ فاطمه: هو انت لحقت ده انت يا دوب داخل؟؟ محمود: معلش بقي ضغط شغل ..سلام باس امه وخرج وبعدها راحت للشيخ واول ما دخلت عليه فاطمه: السلام عليكم يا شيخ عبدالله اسفه كده اني جيت من غير معاد ولا تليفون .. الشيخ عبدالله: لا ازاي ده احنا اخوات وعشره عمر ..ده بيتك تشرفينا تشربي ايه بقي علشان نخلي ام محمد تعملك حاجه فاطمه: ولا اي حاجه ..انا بس هسألك سؤالين واتكل علي الله الشيخ: وده كلام برضه؟؟معلش يا ام محمد كوبايتين شاي من ايديكي الحلوين دول وتسلميلنا ام محمد: من عنيا ثواني فاطمه: والله ما له لزوم التعب ده الشيخ: اولا ولا تعب ولا حاجه..ثانيا انا عملت كده علشان تتكلمي براحتك يا ام محمود فاطمه: انت تعرف اسم الجنيه اللي ابني كان متعلق بيها دي؟؟ الشيخ: تاني يا ام محمود مش الموضوع ده اتقفل من زمان..وانتي بنفسك قلتي انك حاسه ان ابنك رجع لطبيعته ...ايه اللي فكرك تاني بيها؟انسيها علشان تنساكم... فاطمه: ده اللي فكرني بيها طلعت الصندوق وورته للشيخ وهو شاف كل اللي فيه الشيخ: وهو رايه ايه ؟وقالك ايه؟ فاطمه: سألته عليه من بعيد كده ما عرفش صندوق ايه او ما افتكروش مش عارفه بقي الشيخ: انتي لازم توريله اللي جوه الصندوق وهو يقرر يعمل ايه؟ فاطمه: ولو كان متجوز الجنيه دي ولاي سبب نسيها ارجع افكره انا تاني بيها وارجعه ليها تاني...لا يمكن الشيخ: ولو دي مش جنيه وبنت عاديه؟؟ فاطمه: لو بنت عاديه انكرها ليه وهيخبيها ليه؟ وهينساها ليه؟انا مش عارفه اعمل ايه؟؟وبعدين ساري ده اسم القطه اللي عندنا الشيخ: قصدك ايه بقي؟ فاطمه: مش يمكن هيا جايه عندنا علشان ترجعه تاني ليها؟ الشيخ: انتي عايزه تقولي انها عايشه معاكم في البيت بشكل قطه؟ فاطمه: ليه لأ؟؟؟ الشيخ: لا ده انتي كده زودتيها قوي فاطمه: وليه لأ الشيخ: اولا لانك اكيد بتصلي في البيت..بتشغلي قران ..هتعيش معاكم ازاي يعني...الا اذا كانت بتختفي وتظهر؟؟ فاطمه: لا مش بتختفي...بتقعد جنبي وانا بصلي ساعات الشيخ: تبقي جنيه ازاي؟؟؟كفايه اوهام وواجهي ابنك واتكلمي معاه وياريت بقي لو تصارحيه بالحقيقه كلها...ابنك كبر ومن حقه يعرفها فاطمه بخوف: حقيقه؟؟؟حقيقه ايه اللي عايزني اقولهاله دلوقتي ؟؟ لا ابدا ...انا هتصرف مع ابني الشيخ: فاطمه ابنك من حقه يعرف فاطمه: لا مش من حقه ده ابني وانا اللي اقرر ايه اللي يعرفه وايه لأ؟؟انا كل اللي عايزه اتأكد منه القطه اللي في البيت عندي انا هجيبهالك بعد المغرب عند الجامع وانت تشوفها الشيخ: براحتك...بس افتكري كلامي كويس سابته ومشيت وهيا في حال غير الحال... هو فعلا لازم تقول لابنها الحقيقه؟؟؟ لا مش لازم ...هو هيستفاد ايه لما يعرف يعني؟؟؟ دي حاجه خاصه بيها هيا وهو مالوش علاقه بيها ابدا..ومحدش لازم يعرف الحقيقه ابدا ابدا بعد المغرب اخدت القطه ونزلت وراحت بيها للجامع وقابلت الشيخ ساري كانت معاها مش فاهمه هو في ايه؟؟؟وفاطمه غريبه كده ليه؟ بس خافت انها تكون هتمشيها من البيت اخدها الشيخ وفضل يقري قران وساري جنبه ومتأثرتش نهائي وخصوصا انه كان بيقري ايات كلها خاصه بصرف الجن ساري نفسها استغربت انها ازاي متأثرتش بالقران ده كله الشيخ: استحاله يا ام محمود تكون دي جن...دي قطه عاديه جدا والاسم ده صدفه مش اكتر ...كبري دماغك بقي فاطمه: طيب اعمل ايه ومين ساري دي؟؟؟ الشيخ: اسألي ابنك مين هيا؟؟؟ ساري حست انهم بيتكلموا عليها...المهم روحوا البيت والام دخلت اوضتها ودخلت ساري عندها لانها عايزه تعرف في ايه؟واول ما دخلت كانت الام ماسكه في ايدها البطاقه وعليها صوره ساري ..معرفتش تعمل ايه الصندوق كان قدامها دليل حبهم اهوه ...محمود لازم يشوف الصندوق ده قبل ما يتجوز فاطمه:شوفتي يا ساري...اعمل ايه؟اسأل محمود ولا اخبي عنه؟؟ ساري كان نفسها تنطق في اللحظه دي بس ما باليد حيله سمعوا محمود داخل راحت الام بسرعه قفلت الصندوق وحطته تحت السرير بسرعه لانها عارفه ابنها بيدخل عليها الاول وساري هتتجنن .....لازم محمود يشوف الصندوق........ تاني يوم محمود صحي متأخر قوي من نومه وكانت امه خرجت السوق محمود: ساري الجميله...فطرتي ولا نفطر انا وانتي مع بعض شالها وراح المطبخ لقي امه محضراله فطار محمود: شوفتي بقي ..دي الامهات ... ساري كانت عايزه توري محمود الصندوق ...سابته وراحت اوضه مامته بس لقت الباب مقفول..رجعت لمحمود وبتبصله وكأنها بتقوله انها عايزاه محمود: في ايه مالك كده؟ عايزه ايه؟ شدته من بنطلونه وفضلت تشد فيه علشان يقوم معاها محمود: يوه يا ساري بقي...عايزه ايه؟؟؟ وقف وراح وراها .وقفت قدام اوضه مامته وبتخربش علي الباب بايديها .. محمود: عايزه ايه من هنا؟اوعي يكون في فار ولا حاجه...ما علينا فتحلها الباب وهيا جريت تحت السرير وهو مستنيها تخرج محمود: هاه لقيتي الفار اللي بتدوري عليه...امي اصلا لو عرفت ان في فار في الشقه ممكن تعزل ولما ما خرجتش وطي يشوفها..لقاها واقفه جنب الصندوق وعايزه تفتحه محمود: عايزه ايه من الصندوق ده؟ شدها من تحت السرير محمود: دي خصوصيات امي...ما ينفعش نتطفل عليها...فاهمه؟؟ ولسه هيخرج راحت ناطه من ايده وراحت تاني للصندوق وحاولت تفتحه وفعلا اتفتح معاها محمود: يووه بقي يا ساري ؟؟تعالي هنا علشان بدأتي تضايقيني شدها بس كان في بوقها ورقه محمود: برضه فتحتيه؟؟؟هاتي الورقه دي كانت مطبقه نصين اخدها وشد الصندوق يرجعها مكانها ونكمل بكره يا تري محمود هيبص في الصندوق ولا هيقفله من غير ما يشوف فيه ايه؟؟ ساري هتستسلم كده ولا هتحاول تاني؟ ايه الحقيقه اللي ام محمود مخبياها عن الكل؟؟؟ ده اللي هنعرفه مع باقي الاحداث مستنيه تعليقاتكم وكالعاده مش عايزه حلوه وتحفه عايزه توقعات واراء ShiMoOo | ||||||||||
|
| |
|
03-05-19, 09:54 AM
| #13 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه ال 12 محمود اخد الورقه من ساري وشد الصندوق علشان يرجعها مكانها واول ما فتح الصندوق لفت نظره صوره البطاقه..صوره البنت كانت جميله جدا محمود: مين دي؟؟؟هو في حد جميل بالشكل ده؟؟؟ايه ده اسمها ساري؟؟ شوفتي بقي( بيكلم قطته) علي نفس اسمك..علشان كده عايزاني اشوفها؟ انتي مش عاجباكي نسمه اصلا ؟ بس يا تري مين دي؟ما علينا لسه هيرجعها مكانها ويحط الورقه راحت ساري حطت ايدها في الصندوق فشد ايدها بس لمح الدبل ... محمود: وبعدين معاكي دي خصوصيات ..قفل الصندوق وشال ساري وخرج حست ساري ان محمود خلاص ضاع منها ومفيش اي امل ممكن يرجعه تاني ليها محمود راح شغله بس طول النهار صوره البنت مش مفارقاه...وسرحان ومش عارف يركز ... احمد: مالك يا بني النهارده؟؟؟ مش علي بعضك ليه؟ محمود: لقيت بطاقه عند امي عليها صوره بنت من اجمل ما يكون ..جمال لاشفته ولا هشوفه بعد كده احمد: بنت؟؟؟ علي فكره التفكير في بنات بيجي بعد الجواز مش قبله..يعني الواحد بيتجوز بعدها يندم بعدها يبص لبنات حلوه محمود: اتنيل ...انا بس مستغرب مين دي؟ وبطاقتها مع امي ليه؟مش اكتر احمد: طيب ما تسأل امك؟ محمود: المفروض اصلا ما اعرفش بالبطاقه لانها كانت مخبياهم احمد: ولما هيا مخبياهم عرفت بيهم ازاي؟ محمود: مش هتصدق...ساري اللي ورتهالي احمد:قطتك؟؟؟اللي مش بتحب خطيبتك؟؟؟انت مش كنت خفيت رجعت اتجننت تاني امتي؟ محمود: تصدق اصلا انا غلطان اني اتكلم مع واحد زيك سابه ومشي واخيرا خلص اليوم وروح ونام وكالعاده شافها في احلامه كان بيبصلها قوي قوي ومستغرب قوي قوي ساري: مالك؟بتبصلي كده ليه؟ محمود: انتي هيا؟؟صح؟ ساري: انا هيا مين؟ محمود: انتي اللي في الصوره...انا ازاي ما اخدتش بالي؟ الاسم كمان انتي مين؟؟؟وتعرفي امي منين؟ وليه صورتك معاها؟ ساري: انا ما اعرفش امك...انا اعرفك انت...وانت المفروض تجاوب علي الاسئله دي مش انا ..وياريت تعرف الاجابه بقي سابته ومشيت وهو صحي من النوم مفزوع لقي ساري جنبه وكأنها مستنياه يصحي وبتبصله قوي محمود: انتي بتبصيلي كده ليه؟؟؟انتي عايزه مني ايه؟؟؟انا اكيد اتجننت اكيد فعلا اتجننت محمود معرفش ينام تاني والفضول هيقتله يشوف باقي اللي في الصندوق اخيرا النهار طلع فاطمه: صباح الخير يا حبيبي ..انا جهزتلك الفطار ...انا نازله مع جارتنا مشوار ساعتين كده وراجعه عايز حاجه??? محمود: لا يا حبيبتي سلامتك ..بس خلي بالك من نفسك اول ما امه خرجت جري علي اوضتها علشان يشوف الصندوق بس مالقاهوش مكانه فضل يدور عليه في كل مكان في الاوضه وفقد الامل انه يلاقيه محمود: ايه بتتفرجي عليا يعني؟ ما تقوليلي هو فين؟ ساري بتبصله ومش عارفه مكانه بس لازم تعمل حاجه..سابته وجريت وفضلت تنادي علي امها تجيلها ...فعلا امها جت وحكتلها ساري اللي حصل وطلبت منها تعرف مكان الصندوق ..بالليل وفاطمه نايمه جاتلها تاسهيك واقتحمت افكارها وعرفت مكان الصندوق وقالت لساري ... محمود شاف ساري في حلمه محمود: برضه مش هتقوليلي انتي مين؟ ساري: كانت الاجابه بين ايديك وانت ضيعتها محمود: واالمفروض اعمل ايه؟ ساري: دور علي الصندوق هتعرف انا مين محمود: مش لاقيه ساري: دور عليه وهتلاقيه وهتعرف محمود صحي تاني يوم ولبس هدومه المفروض ان خطيبته جايه عنده النهارده وهو اجازه من شغله ..محمود بقي في مسافه بينه وبين خطيبته هو نفسه مش عارف ايه اللي خلق المسافه دي بينهم ...كانوا بيتكلموا ويهزروا بس كأصحاب مش كأحباب ابدا....وساري قاعده متعزبه بتتفرج عليهم وفجأه قامت ومحمود ماسك عصير ودلقته عليه نسمه: حاسبي يا قطه يا غبيه انتي محمود: ايه يا نسمه حصل خير...عصير واتدلق...بعد اذنك هغير هدومي دخل محمود يغير هدومه واخد هدومه اللي مش نضيفه ودخلها الاوضه اللي فيها سبت الغسيل كانت اوضه كده مليانه كراكيب ..حط الهدوم ولسه هيخرج حاجه جواه خلته يقف مكانه ويفتح ضرفه رف صغير ويدور فيه ولقي الصندوق جواه...قلبه كان بيدق بسرعه جدا ..ساري دخلت لقته ماسك الصندوق في ايده هيا كمان قلبها بيدق محمود: لقيته..... مستعده تشوفي فيه ايه؟؟؟تعالي قعد في الارض وفتح الصندوق وفتح الورقه لقاها قسيمه جواز ....كانت الصدمه لما شاف صورته عليها وصوره ساري..حس ان مخه هيقف اصلا محمود: مراتي انا؟؟؟؟ ازاي وامتي؟؟؟وهيا فين اصلا؟؟؟ دور في باقي الصندوق شاف المنديل وشاف الدبل وعليها اسمه واسمها حاس انه مصدوم ...مشلول ...طيب اتجوزها امتي؟؟؟ وهيا فين؟؟ماتت مثلا؟؟؟ طب ليه مش فاكرها نهائي؟؟؟طب امه دخلها ايه بالموضوع ده؟؟؟وقطته بتبصله كده ليه كأنها مستنيه منه حاجه محمود: انتي بتبصيلي كده ليه؟؟انتي ايه اصلا؟؟؟عايزاني اعمل ايه؟؟؟ انا مش عارف مين دي؟ولا فاكرها ولا عارف هيا فين؟ اخيرا قفل الصندوق وقام من مكانه وطلع لخطيبته وهو مش عارف هيعمل ايه؟ خطيبته مشيت وهو قاعد متوهه فاطمه: مالك يا محمود فيك ايه؟ فاطمه: قوليلي انتي انا فيا ايه؟انا مش فاهم اي حاجه فاطمه: مالك يا حبيبي؟؟انت تعبان محمود: انتي جبتي الصندوق ده منين؟؟؟ فاطمه بارتباك: صندوق ايه؟ محمود: من غير لف ولا دوران...ده اقل شيئ استحقه منك....جبتيه منين؟ ومعاكي من امتي اصلا ؟؟؟وتعرفي ساري دي منين؟ فاطمه: انا ما اعرفهاش اصلا محمود بصوت عالي: ما تكدبيش عليا فاطمه: مش بكدب...انا لقيت الصندوق في اوضتك لما كنت بدور علي بطاقتك كان فوق دولابك..وسألتك عليه وقلتلي اشوفه ولو مالوش لازمه ارميه محمود: وانت شفتي ان اللي فيه مالوش لازمه؟ فاطمه: معرفتش اتصرف ازاي؟ محمود: تسأليني انا؟؟تقوليلي فاطمه: احنا لسه فيها ...مين ساري دي واتجوزتها امتي وخبيتها ليه؟؟؟؟وهيا فين؟ محمود: هههههههههه(بيضحك وبيضحك جامد) انتي عايزاني اجاوبك؟؟؟؟؟ انا معنديش ادني فكره مين دي ...بس مكتوب في عقد الجواز اني اتجوزتها من سنه ونص تقريبا ..ايه رأيك؟؟؟...ما اعرفش هيا مين ولا فاكر اني اتجوزت اصلا فاطمه: انسي يا حبيبي..انت خاطب واحده زي القمر وبنت ناس وكمل حياتك محمود: افندم؟؟؟انسي ايه؟انسي اني متجوز اصلا؟؟؟ولو كنت مخلف منها وهيا فين ولو ظهرت تاني؟؟؟انسي ايه فاطمه: مش هتظهر تاني كمل حياتك محمود: انتي عارفه حاجه ...انتي عارفه ايه قولي؟ فاطمه بارتباك: انا مش عارفه حاجه ..بس لو هتظهر كانت ظهرت في السنه ونص اللي فاتوا دول ...ما ظهرتش ليه؟؟؟ محمود: انتي مخبيه حاجه عني...علي العموم انا هعرف بطريقتي مين دي سابها ومشي وهيا بتجري وراه وتنادي عليه راح شغله ونادي علي احمد صاحبه احمد: مالك في ايه؟ محمود: اقعد وشوف الورقه دي احمد: ايه المزه دي؟؟ايد ده ده عقد جوازك انت؟؟؟اتجوزتها امتي؟ومين دي؟ وهيا فين اصلا؟ محمود: معنديش اي فكره مين دي؟ احمد: يعني ايه؟ محمود: فاكر لما قلتلك اني شوفت بطاقه مع امي احمد: اه فاكر محمود: هيا دي( وطلع البطاقه وورهاله) احمد: ما سألتش امك ليه؟ محمود: متعرفش حاجه هيا لقت الصندوق في اوضتي من حوالي اسبوع ومعرفتش تعمل ايه؟ احمد: وانت يعني ايه مش فاكرها؟ محمود: معنديش اي ذكري نهائي اني اعرفها او اني قابلتها او شوفتها قبل كده غير في... احمد: غير في ايه ؟قول محمود: هتقول اني مجنون احمد: انت فعلا مجنون...شوفتها فين بقي محمود: بشوفها من فتره في احلامي احمد: تاني احلامك يا محمود هو انت مش كنت نسيت الجني...... قطع كلامه فجأه وسكت محمود: نسيت ايه؟؟؟جنيه؟؟؟انت عايز تقول جنيه؟؟؟جنيه ايه ؟؟؟ احمد: لا دي تخاريف ..تعال ندور عليه في قاعده البيانات وهنلاقيها محمود: وانا مستنيك يعني...ملهاش اي عنوان او اثر هيا ظهرت فجأه من سنه ونص تقريبا ... زي ما يكون حد عملها اوراق مضروبه احمد: ويا تري الحد ده مين؟؟؟؟ محمود: بتلمح لأيه؟؟اني اكون انا اللي عملتها الورق ده؟؟وليه؟ احمد: طيب تعال نمشي خطوه خطوه...تعال نتأكد الاول القسيمه دي بجد ولا مضروبه ونروح للمأذون ونشوفه ونشوف الشهود دول مين يمكن حد فيهم يوصلنا لاي شيئ محمود: يالا بينا وهما في العربيه كانت حاله صمت مسيطره علي الجو محمود: احكيلي عن الجنيه اللي انت قلت عنها دي احمد: ما تشغلش بالك انت دي كانت فتره وعدت محمود: والفتره دي مش كانت من سنه ونص؟؟؟احمد ارجوك احكيلي اللي حصل احمد: انت ازاي اصلا مش فاكر ..ده انت مكنش عندك سيره غيرها محمود: انا؟؟؟ ارجوك احكيلي بالتفصيل احمد: من ساعه لما رحنا المقابر في الليل وانت دخلت وري الحرامي اللي كنا بنطارده واتصبت هناك فاكر محمود: فاكر ده وفاكر فعلا اني اتصبت وبس احمد: لما فقت سألتنا هيا فين وبعدها حكتلي ان في بنت ظهرتلك ...وعالجتك محمود: في المقابر؟؟؟وانت صدقتني؟؟؟اكيد اتخبطت علي دماغي وقتها احمد: ده اللي قلتهولك ساعتها بس انت كنت مصر ...وبعدين... محمود: وبعدين ايه انت بتنقطني بالكلام ليه؟ احمد: الجرح بتاعك ..الرصاصه كان ليها اثر لدخولها وخروجها بس من جوه ملهاش اثر زي ما يكون حد عالجها فعلا وبعدها قلتلي ان في واحده بتجيلك في احلامك وبعدها امك اتدخلت وجيبت الشيخ عبدالله وصرفتها من حياتك وده كل اللي عندي عن الموضوع ده محمود: انا صرفتها بنفسي ...وامي عارفه كل ده؟؟؟ احمد: امك عايزه مصلحتك محمود: ومصلحتي انها تخبي عني؟ المهم تعال ننزل نشوف المأذون هيقولنا ايه دخلوا عليه وعرفوه انهم ضباط وعايزين يسألوه كام سؤال واول ما محمود وراه القسيمه افتكره المأذون علي طول المأذون: افتكرتك افتكرتك... محمود: افتكرتني؟؟؟ انت شوفتني قبل كده المأذون: انا اللي جوزتك محمود: انت عايز تقول ان القسيمه دي سليمه المأذون: طبعا سليمه انا وثقتها بنفسي في المحكمه وطلعتهالكم احمد: وانت بتفتكر كل اللي جوزتهم حتي بعد سنين كده؟؟؟؟ المأذون: لا طبعا بس لا مؤاخذه عروسته ما تتنسيش محمود: يعني ايه ما تتنسيش؟؟؟ الماذون: يا ابني بص انا مش قصدي حاجه بس هيا كان جمالها غير طبيعي محمود: يعني ايه مش طبيعي اهي بنت حلوه وخلاص؟ الماذون: لا يا ابني ..دي مكنتش حلاوه عاديه دي كانت حاجه كده كأنها مش بشر اصلا ....عنيها شعرها بياضها زي ما تكون ملاك او جنيه محمود: جنيه؟؟؟ المأذون: انت اصلا كنت هتتخانق مع الشهود علشان مكانوش عارفين يشيلوا عنيهم من عليها ..ما كانتش زي اي بنت حلوه لأ محمود: وما شوفتهاش تاني بعدها؟ المأذون: لا يا ابني انا جوزتكم وانت اخدتها ومشيت محمود: انت متأكد انه انا مش حد تاني شبهي مثلا المأذون: انت بنفسك...هو انت فقدت الذاكره ولا ايه؟؟؟ محمود: تقريبا سابه ومشي واحمد وراه وراحوا للشهود ونفس كلام المأذون جميله بطريقه مش عاديه ومحدش افاده بأي شيئ محمود: وبعدين اعمل ايه؟؟؟ طيب هيا فين؟؟؟ احمد: لو انت عايز رأيي؟؟؟انساها وكمل حياتك ...عايز تفتكر ليه شيئ الله اعلم وراه ايه...لو هيا فعلا جنيه يمكن ربنا بيحبك وبعدها عنك محمود: احمد انا اتجوزتها.... ونمت معاها وهتجنن من التفكير احمد: وانت ليه فاكر انك نمت معاها؟ محمود: مش فاكر بس الصندوق كان فيه منديل عليه دم..فاعتقد اني نمت معاها احمد: ومين قالك ان ده دمها؟؟؟وبعدين هما الجن بيبقوا عذروات ؟؟؟ محمود: وانا ايش عرفني انا؟؟؟انا خمنت كده؟؟؟امال هحتفظ بيه ليه؟؟؟ احمد: شوف الشيخ عبدالله هيقولك ايه روحله ؟؟؟يمكن يكون هو المفتاح محمود: فعلا هروحله حالا واول ما وصله استقبله الشيخ عبدالله محمود: كأنك كنت مستنيني؟ الشيخ: فعلا مستنيك من اسبوع ونكمل بكره ايه اللي هيحصل يا تري الشيخ هيفيد محمود ولا هيسيبه في حيرته؟؟؟؟ مين هيجاوب محمود علي اسئلته دي؟؟؟ محمود هيفتكر ولا هيفضل مغيب كده؟؟؟ كل واحد يقول توقعاته ونشوف حد هيقدر يتوقع اللي هيحصل؟؟؟ مستنيه ارائكم ShiMoOo | ||||||||||
|
| |
|
03-05-19, 09:55 AM
| #14 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه ال 13 محمود اول ما وصل استقبله الشيخ عبدالله محمود: كأنك كنت مستنيني؟ الشيخ: فعلا مستنيك من اسبوع محمود: يعني عارف جايلك ليه؟لان طبعا اكيد انت اول واحد امي جريت عليه الشيخ: ادخل نتكلم محمود دخل واول ما قعدوا محمود: تعرف ايه عن موضوع الجنيه اللي المفروض ان انا حبتها؟ الشيخ: اعرف اللي انت قولتهولي محمود: وانا مش فاكر اي حاجه عن الموضوع ده نهائي .كأنه حصل لحد غيري ...ومش عارف ليه؟ الشيخ: كل اللي اعرفه انك شوفت واحده في المقابر واعتقد انها جنيه ووقعت في حبك وانت كمان حبتها وامك طلبت مني اتدخل وفعلا انت وافقت وصرفناها عنك.... محمود: بس كده؟؟ الشيخ: بعدها بفتره جيت سألتني هو ينفع نتجوز من الجن ولا لأ؟ محمود: وانت جاوبتني بأيه؟ الشيخ: قولتلك ان احنا علمنا محدود بس اعتقد ان جوازنا او ارتباطنا بيهم يعتبر نقمه من ربنا لانه ضد الطبيعه محمود: وبعدين؟ الشيخ: وبعدين بقي عندك انت...انت اللي تعرف بعدها حصل ايه؟ محمود: وانا كأن ذاكرتي ممسوحه او فاقد الذاكره اصلا ومش عارف ليه؟ الشيخ: وليه عايز تفتكر شيئ ممكن يضرك...طالما ربنا انعم عليك ونسيت وكملت حياتك تبقي محظوظ..بطل تنبش في الماضي..يمكن اللي يظهر ما يعجبكش محمود: واللي انا متجوزها دي انساها ازاي هاه؟؟؟انسي ازاي اني معايا قسيمه جواز من واحده معرفهاش ولا فاكرها الشيخ: مش عارف يا ابني بس الموضوع ده مش هيجي من وراه خير فانساه محمود: معندكش اي حاجه تانيه تضيفها؟؟ الشيخ: للاسف لأ...اتكلم مع والدتك يا ابني محمود: ربنا يسهل ان شاء الله بعد اذنك سابه محمود وهو برضه في نفس الحيره الشيخ محمود ما افادهوش بشئ جديد روح محمود وحاولت امه تتكلم معاه بس حاليا كانت دماغه مشغوله بساري وبس مين هيا واختفت ليه؟؟ ....دخلت ساري عنده شالها وفضل يتكلم معاها محمود: عاجبك اللي بيحصل ده؟؟ مين هيا؟؟؟طيب ومشيت ليه؟؟؟ دماغي هتنفجر من كتر التفكير.........وانتب بتبصيلي كأنك فاهماني وعايزه تتكلمي وانا والحمد لله بقيت مجنون وبتكلم معاكي ومستنيكي تردي كمان فاطمه بتدخل علي ابنها فاطمه: انت بتكلم مين؟؟؟ محمود: بكلم نفسي عندك مانع؟؟؟ فاطمه: حبيبي كفايه تفكير بقي ....وتعال نحدد معاد كتب كتابك وسيبك من اللي فات محمود: وانسي اني متجوز اصلا ولا اعمل نفسي مش واخد بالي ولا ايه مش فاهم؟؟؟ فاطمه: يا حبيبي لو هتظهر كانت ظهرت من زمان ... سيبك من الموضوع ده واقفل القصه دي بقي ...انسي يا حبيبي بقي...نسمه بنت حلال ومش تستاهل منك ده محمود: عارف انها بنت حلال وتستاهل كل خير وعلشان كده ما ينفعش اتجوزها وانا متجوز اصلا وفي اي وقت ممكن تظهر هيكون موقفي ايه؟ .وهقولها ايه؟ اصلي معلش كنت ناسي اني متجوز...لازم ارسي علي بر الاول فاطمه: يا ابني..... قاطعها: كفايه كلام في الوضوع ده ...ارسي علي بر وبعدها اشوف موضوع نسمه لو سمحتي انا عايز انام... سابته ومشيت وهو فضل سهران شويه وبعدها نام..كاالعاده نام وجتله جميله الجميلات في احلامه ساري: مالك مهموم ليه؟؟؟ محمود: مش فاهم اي حاجه...طيب انتي قوليلي انتي مين ؟؟ومشيتي ليه؟؟ ولو انتي حقيقه اظهري بقي؟؟ ساري: انا ما ينفعش اقولك انت لازم تعرف وتحس بنفسك...لو ينفع ماكنتش اتاخرت عليك ابدا محمود: وانا مش بايدي حاجه غير اني اشيلك خالص من افكاري وانهي الموضوع ده نهائي واعتبر نفسي ما شفتش حاجه وكفايه حيره...ابعدي عن حياتي لسه هسيبها ويبعد عنها راحت شداه عليها وحطت شفايفها علي شفايفه وخطفت انفاسه وخلته داب معاها في اجمل بوسه ..بوسه حس انها ملت الفراغ اللي كان بيحسه لما يبوس نسمه....بوسه حسسته ان دي ما كانتش اول مره يحس بالاحساس ده....بوسه شوقته لحاجه مجهوله مش عارفها ...بوسه خلت قلب ساري دقاته تقوي شويه..... ساري بقي عندها امل انها تعرف ترجع محمود ليها ...امها جتلها لما حست بيها تاسهيك:: ايه الاخبار ؟افتكرك؟قلبك دقاته قويت شويه ساري: ما افتكرنيش...ومش لازم يفتكرني تاسهيك: يعني ايه مش لازم؟ ساري: يعني هو هيبدأ يحبني تاني... وده كفايه المهم ان قلبه ينبض ليه تاني تاسهيك: وانتي متأكده انه هيحبك؟؟؟ ساري: لا مش متأكده بس حاسه ...هيحبني تاني زي ما حبني قبل كده راحت تاسهيك وراحت في السر لايتوكان اللي كانت موات حابساه لانها خافت منه هو فعلا بقي ضعيف بس مفقدش قوته كلها وممكن يعمل اي حاجه فحبسته ايتوكان: تاسهيك عملتي ايه؟وساري اخبارها ايه؟؟مفيش اي جديد تاسهيك: بتقول انه هيحبها تاني ايتوكان: فعلا ده الصح لان مستحيل ترجع ذكريات ممسوحه بس ممكن فعلا قلبه يدق تاني وده هيرجعها تاني لقوتها وطبيعتها تاسهيك: المهم انت دلوقتي حاول تستريح علشان تسترد قواك ونقدر نواجه موات ونوقفها عند حدها ايتوكان: اللي بيحصل ده عقاب لينا علي انانيتنا ..كان لازم نقف جنب بنتنا ونفضل مصلحتها علي اي شيئ تاني...لو كنا تقبلنا حبها مكنش كل ده حصل تاسهيك: غلطنا ايتوكان: وبندفع ثمن غلطتنا بس المشكله ان اكتر حد بيتعذب هو ساري تاسهيك: هترجع تاني وهيرجع حبها ليها انا واثقه من ده ايتوكان: اتمني...المهم امشي انتي قبل ما حد يشوفك ويحذر موات مشيت تاسهيك بس طبعا موات كان ليها حراسها المخلصين اللي رفعتهم جنبها واحد من الحراس سمع كل الحوار بين تاسهيك وايتوكان وراح بلغه بالحرف لموات موات :: طلعتي مش سهله يا ساري حتي وانتي مجرد حيوان ضعيف وعاجز.. انا لازم اتصرف قبل ما قلبه يدق تاني...ساري لو استردت قدرتها ممكن مااقدرش اقف قدامها لازم اتصرف...طيب اعمل ايه؟ الحارس: اقتليها موات: اقتلها؟؟؟؟مش حل...انا عايزه محمود نفسه..لو قتلتها المملكه هتقف ضدي لانها كانت محبوبه ..الكل عارف انها اختارت الحب ومشيت وراه بس لو قتلتها هتبقي شهيده الحب وومكن يتقلبوا ضدي ...لكن لو قتلت محمود محدش هيهتم بموته الحارس: وهتقتليه ازاي؟؟؟احنا ممكن نأذي البشر بس عن طريق عقولهم ..بنلعب بعقولهم وهما بيتصرفوا او يقتلوا نفسهم لكن ده بجوازه من ساري بقي محصن من اي حد يقتحم افكاره موات: هندخل افكاره بنفس الطريقه اللي مسحوا بيها افكاره....ههههههههههه ضحكت ضحكه عاليه شريره لان الخطه كامله اترسمت في دماغها الحارس: وايه اللي هيخليه يسمحلك تدخلي افكاره؟؟؟ موات: فضوله للحقيقه..هو عايز يعرف مين ساري واراضيها فين..انا هكون العصفوره اللي توديه لارض حبيبته الحارس: هتجبيه هنا؟؟؟ موات: هخليه يدخل هنا بمزاجه.ههههههههههههههه الحارس: ومفيش حد بشري بيعيش لو دخل هنا ..ههههههههه انتي فعلا شريره وبكده هيموت من غير ما حد يلمسه موات: بالظبط ودلوقتي لازم اروح اقنعه يجي...وساري كمان هجيبها تشوف حبيبها بيموت قدامها الحارس: وهتعمليلها ايه بعد كده؟ موات: ولا اي شيئ كفايه عليها موت حبيبها.هههههههه راحت موات لمحمود كان لوحده بره البيت وبيفكر في ساري ظهرتله بهيئتها العاديه ...بس هو حس انها مش بشريه لانها ظهرت فجأه محمود: انتي مين وعايزه ايه؟؟ موات: انا مين؟ انا عندي الاجابه لكل اسئلتك ..وعايزه ايه؟عايزه اساعدك محمود: وتساعديني ليه؟ موات: بصراحه مش بساعدك انت..بساعد اقرب حد ليا في الوجود محمود: مين؟ موات: ساري محمود: انتي تعرفيها؟( بلهفه) تعرفي مكانها؟ موات: مش بقولك اغلي حد ليا في الوجود محمود: هيا فين؟ واختفت ليه وايه اللي مسح افكاري ليها موات: اسئلتك كتير محمود: وانتي قلتي عندك اجابه لكل اسئلتي موات: عندي فعلا..تعال معايا وهجاوبك علي كل حاجه محمود: اجي معاكي فين؟؟؟ موات: لمكان ما بدأت الحكايه كلها مدت ايدها ليه بس هو رفض يمد ايده ليها محمود: روحي انتي وانا هاجي بنفسي وراكي موات: انا اسرع محمود: وانا بقولك هاجي بنفسي موات: خلاص براحتك مستنياك هناك اتردد محمود كتير يروح ولا لأ؟ فضوله قوي جدا وبوسه ساري ليه في حلمه مخلياه مستعد لاي شيئ علشان يحسها بجد بين ايديه او يبوسها في الحقيقه مش مجرد حلم...واخيرا قرر يروح يعني هيخسر ايه؟؟؟ راح للمقابر ونزل من عربيته ودخل برجله للمكان اللي المفروض انه شاف فيه ساري لاول مره مكان ما اتصاب وهناك لقي موات مستنياه محمود: فين ساري؟ موات: متعذبه ومتسلسله وانت الوحيد اللي تقدر تخلصها من عذابها محمود: ومين اللي بيعذبها؟ موات: اهلها ...لما عرفوا باندماجكم حبسوها وسلسلوها محمود: وانا ليه مش فاكرها؟ويعني ايه اندماجنا موات: اندماج بلغتكم يعني جواز اما ليه مش فاكرها ده لانهم مسحوا افكارك كلها علشان ما تحاولش تنقذها محمود: وانا انقذها ازاي؟ موات: بانك تدخل تفك سلاسلها وتضمها ليك وهيا هتكون قويه بحبك وهتقدر تواجه اهلها وبعدين بجوازها منك بقيت انت محصن من الكل ومحدش يقدر يأذيك لكن هيا اللي بتدفع ثمن الحب ده وبتتعذب لوحدها وانت كملت حياتك وارتبطت بغيرها كمان وكل ده بيعذبها زياده محمود: وانا ايه اللي يخليني اصدقك واخاطر بحياتي علشان واحده مش فاكرها حتي؟ موات: لانك في يوم حبيتها وكانت هيا اغلي من حياتك ..براحتك عايز تمشي امشي وانساها وسيبها لعذابها وروح للي ارتبطت بيها يا اما تحاول علي الاقل تنقذها وبضمه منها هتفتكر كل اللي نسيته وترجعوا لبعض..قرر هتعمل ايه؟ قبل ما حد يحس بينا ويبلغ اهلها ويعاقبوني انا كمان محمود كان متردد بس من جواه حاسس انه لازم يعرف كل حاجه ..لازم يشوفها محمود: هدخل ازاي؟ موات بابتسامه نصر: كل اللي عليك تمسك ايدي وانا هدخلك مملكتنا مدت ايدها ليه والمره دي مسك ايدها علشان يدخل معاها وهو معندوش ادني فكره ان حياته هتنتهي بدخوله للملكه....دخوله معناه موته الاكيد دخل معها واول ما وصلوا حس بقلبه بيدق بسرعه جدا كأنه هيقف ومش قادر يتنفس محمود: انا مش قادر اتنفس موات ضحكت: وحد قالك ان في هوا هنا علشان تتنفسه..هههههههههه ضحكت بصوت عالي جدا وهيا بتشوفه بيتخنق شويه شويه ونكمل بكره ياتري دي نهايه قصتنا؟ موات هتنتصر علي الكل في النهايه؟ ولا في مفاجأه مستنيانا؟ استنوني بكره مستنيه ارائكم وتخيلاتكم للي هيحصل ShiMoOo | ||||||||||
|
| |
|
03-05-19, 09:55 AM
| #15 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه ال 14 محمود دخل مع موات للملكتهم تحت الارض وهو ما يعرفش ان دخوله معناه موته الاكيد ...وده كان هدف موات محمود: انا مش قادر اتنفس موات ضحكت: وحد قالك ان في هوا هنا علشان تتنفسه..هههههههههه ضحكت بصوت عالي جدا وهيا بتشوفه بيتخنق شويه شويه نادت علي الحارس الامين بتاعها موات: جبتها؟؟؟ الحارس: جبتها وهيا في انتظارك ...وانتي جبتيه اهوه؟ موات: طبعا ..ودلوقتي خده علشان يلفظ انفاسه الاخيره عند ايتوكان خليه يشوف قلب بنته بيموت قدامه وكل امل ليه في استرداد عرشه بيموت الحارس: مش ممكن يساعده؟؟ موات: كان ساعد نفسه الاول اخد الحارس محمود ووداه عند ايتوكان وطبعا لما ايتوكان شافه بيموت عرف انه بموته هيفقد اي امل ان بنته ترجع لطبيعتها او اي شيئ يرجع زي ما كان موت محمود معناه انتصار موات للابد راحت موات لعرشها ولقت ساري في انتظارها موات: ساري الجميله اللي ما بقتش جميله مسكينه انتي يا ساري ساري: كله منك انتي؟؟؟انتي اللي عملتي فيا كده موات: انا؟؟ انا اكتر واحده حاولت تساعدك انك تروحي لحبيبك.. مش ذنبي ان اهلك رفضوا حبك ده؟ اعتقد مش انا اللي مسحت لمحمود ذاكرته؟ ومش انا اللي سلسلتك وعذبتك علشان توقفي قلبك؟ ومش انا اللي اضطريتك تروحي تندمجي معاه في السر؟ ...انا حاولت ابعدك عن هنا وتروحي لحبيبك ساري: علشان عرشي؟؟؟مش حبا فيا موات: مهما كان السبب انا كنت عايزه العرش وانتي عايزه محمود ساري: العرش ده اصلا مش من حقك موات: خلاص بقي من حقي وللابد ساري: محمود هيرجعلي وساعتها... قاطعتها: محمود؟؟؟هههههههه...محمود خلاص بيلفظ انفاسه الاخيره في حضن ابوكي ساري: ايه؟؟؟ محمود هنا؟؟؟ هنا دخلت تاسهيك تاسهيك: ساري ايه اللي جابك هنا؟؟؟وانتي يا موات جبتي محمود ازاي هنا ؟ انتي مش عارفه ان ده معناه موته؟؟؟؟؟ولا ده اللي انتي عايزاه ؟يموت؟ وتضمني عرشك للابد موات: مش بحب اي شيئ يهددني ابدا ووجود محمود بيهددني ساري: ارجوكي يا موات هتنازلك عن العرش نهائي بس خلي محمود وخرجيه من هنا موات: خلاص يا ساري محمود زمانه مات وانتهي تاسهيك: لا يا ساري لسه ما متش وانتي لسه قدامك فرصه تتنتصري علي موات وقفي قلبك قبل ما قلب محمود يموت وبكده هترجعي لطبيعتك وهتنتصري عليها ساري: ايه اوقف قلبي؟؟؟ تاسهيك: محمود خلاص كلها لحظات ويموت وانتي هتفضلي كده تتعذبي وقفي قلبك علي الاقل مش هتخسري كل حاجه ساري هنا افتكرت كل لحظه حب عاشتها في حضن محمود...كل كلمه حب نطقها كل وعد وعدتهوله ..وعدته ان قلبها هيفضل ينبض بحبه طول ما هيا عايشه وعدته انها هتفضل تحبه حتي لو مات هو حبه هيفضل جواها ...ازاي بقي توقف قلبها؟ تاسهيك: مفيش وقت يا ساري وقفي قلبك...اختاري مره مصلحتنا فوق مصلحتك ************* نروح لمحمود ************* محمود عند ايتوكان مش قادر يتنفس وجسمه كله بينتفض وخلاص بيموت ايتوكان: انت ايه اللي دخلك هنا؟انت مجنون ؟مفيش بشري بيعيش هنا محمود: خد عت ني ايتوكان: اهدي كل شيئ هينتهي بسرعه دي كانت نهايه كل امل لايتوكان وهو بيراقب جسم محمود بيهدي شويه شويه بيراقب موت امل بنته ترجع لطبيعتها في يوم من الايام..بيراقب نهايته هوه في السجن ده بص لمحمود وجسمه هادي بس غريبه ايتوكان: قلبه لسه ما وقفش ...جسمه هدي ونبضاته هديت بس ما وقفش يا تري ما متش ليه؟؟ حاول ايتوكان يفوق محمود اللي لسه قلبه بينبض نبض ضعيف بس موجود صدره مش بيتحرك نهائي بس عايش مش ميت ايتوكان: فوق يا محمود فوق فضل يفوق فيه لحد مره واحده جسمه انتفض كله ووقف مره واحده محمود: انا فين وايه اللي حصل؟ ايتوكان: انت عايش ليه؟؟؟ محمود: يعني ايه عايش ليه؟؟؟ وايه اللي هيموتني هنا ايتوكان: انت مش ملاحظ انك مش بتتنفس ولا ايه؟؟؟شايف اي اكسجين هنا؟؟ محمود بص حواليه وهو مش عارف هو فين اصلا محمود: ايه المكان ده وانا جيت هنا ازاي وبعدين يعني ايه مفيش اكسجين؟؟ ايتوكان: انت ملاحظ انك بتتنفس ؟بص لنفسك كده لحظه محمود مستغرب كلام الراجل اللي قدامه بس لاحظ ان هو فعلا مش بيتنفس امال عايش ازاي؟؟؟ محمود: انا لازم اخرج من هنا ...انا هتخنق كده ايتوكان: اهدي لو هتتخنق كنت اتخنقت من بدري..قولي بقي انتي ايه بالظبط؟ محمود: يعني ايه انا ايه؟ ايتوكان: يعني انت لو انسي كنت مت من بدري انت ايه؟ محمود: ايه تخاريفك دي؟ اكيد في اكسجين هنا واكيد في تفسير لكل اللي بيحصل احنا لازم نخرج من هنا الاول حاول محمود يفتح الباب بس معرفش ايتوكان: الباب مقفول بالسحر مش هتعرف تفتحه...انت ايه؟ محمود: انا ايه؟ انا ايه؟ انت معندكش سؤال غير كده؟ انا بني ادم عادي ايتوكان: لو انت بني ادم عادي كنت هتبقي ميت من بدري محمود: معرفش انا ايه؟ كويس بقي ايتوكان: انت اكيد فيك اصل من الجن اكيد والا مكنتش هتعيش هنا محمود: اصل من الجن؟؟؟انت اكيد بتخرف ايتوكان: انا معنديش قدرات اكتشف بيها انت ايه ...بس يا تري ايه اسواء كوابيسك؟ لانها مش الموت اكيد..اغلب البشر بيخافو من الموت لكن انت لأ لو بتخاف من الموت مكنتش نزلت برجلك هنا ؟؟؟تسمحلي اعرف اسواء كوابيسك لسه هيقرب منه محمود بعد عنه محمود: اوك. انا سمحت لكتير قوي يلعبوا بيا بس لحد هنا وكفايه بقي ابعد عني ايتوكان: اسف بس لازم اعرف انت ايه وبعدين انت هنا فقدت حصنك اللي حصنتهولك ساري..لازم اعرف انت ايه؟ قرب ايتوكان منه وحط ايده علي دماغ محمود ومسكه جامد علشان يشوف اسواء كوابيسه ايتوكان شاف مخلوق مخيف جدا مخلوق ضخم له راس علي شكل جمجمه وبيطلع نار وجسمه كله اسود بيطلع نار وماسك كرباج من نار ايتوكان اول ما شاف المخلوق ده بعد عن محمود وهو بينهج ومحمود وقع في الارض من كتر الخوف والتعب ايتوكان: ايه علاقتك بالمخلوق ده؟؟؟ محمود: معرفش ايتوكان: انت بتكدب محمود: مش بكدب ..معرفش المخلوق ده بس بيطاردني في احلامي من صغري ده اسواء كوابيسي ايتوكان: بيطاردك؟؟؟بس مكانش بيطاردك كان ....مش عارف...شكله مستنيك مش بيطاردك محمود: يعني ايه مستنيني؟ده بيطاردني ايتوكان: انت اصلك ايه؟ محمود: هترجع تاني تقولي انت ايه؟ قولتلك انا انسان عادي معنديش اصول من الجن وامي اكتر حد بيخاف منهم امي.............. سكت محمود فجأه وافتكر حوار دار بينه وبين امه فلاش باك ***** فاطمه: محمود حبيبي انسي بقي البنت دي وكمل حياتك ارجوك محمود: يوووه بقي قلتلك لما ارسي علي بر واعرف راحت فين؟ او اختفت ليه؟ اعرف اي حاجه عنها او ترجع تاني؟ فاطمه: مش هترجع تاني ريح نفسك محمود: وايش عرفك انها مش هترجع؟ فاطمه: هيا خلاص اخدت اللي عايزاه منك ومشيت محمود: وايه بقي اللي كانت عايزاه مني؟ بما انك خبيره كده فاطمه: كانت عايزه تنام معاك وبس محمود: هههههههه تنام معايا وعلشان كده اتجوزنا؟؟؟؟ فاطمه: اتريق براحتك...بس ساعات بيبقوا عايزين يخلفوا مننا وبس فظهرتلك بشكل جميل ونامت معاك محمود: وحملت مني وحاليا انا عندي عيل جني صح؟؟؟ فاطمه: انت بتتريق؟؟؟ومش مصدقني وعمرك كله هيضيع وانت مستنيها ترجع ومش هترجع محمود: علي افتراض ان كلامك كله صح؟ عايزه تخلف مني ليه؟ فاطمه: اللي اعرفه ان العيل اللي بيتولد من خليط زي كده بيكون قوي جدا لانه بيجمع صفات الاتنين محمود: حلو قوي خيالك الواسع ده فاطمه: هتضيع عمرك صدقني محمود: عندك دليل علي كلامك ده ولا مجرد كلام؟؟؟؟ فاطمه عايزه تصرخ بصوتها كله وتقوله انت اكبر دليل بس ما نطقتش وما عرفتش ترد علي ابنها باي شيئ محمود: كنت عارف مجرد كلام وخلاص لسه هيمشي فاطمه: صدقني يا محمود مش هترجع دول مالهمش امان ابدا محمود: انتي مخبيه حاجه عني ومش عايزه تقوليها ..براحتك انتي حره بس انا كمان حر في تصرافاتي..وطالما مش هتصارحيني باللي جواكي مالكيش دعوه باللي جوايا..اتفقنا *********** فاق محمود من ذكرياته علي صوت ايتوكان ايتوكان: انت بتفكر في ايه؟؟؟لو انت عندك اي قدرات ده الوقت اللي تستخدمها فيه محمود: قدرات ايه انا مجرد راجل عادي ايتوكان: انت مش عادي ابدا...انت شفت ساري جميله من اول مره غيرك كان هيشوفها بهيئتها المخيفه وهيترعب بس انت شفتها علي حقيقتها انت عديت اندماجك بيها عادي ...انت ابعد ما تكون عن الراجل العادي امن بقدراتك وبقوتك وامن بحقيقتك محمود: حقيقتي ؟اللي هيا ايه بقي؟؟اني جني؟ ايتوكان: مش شرط انت ....حد ورثت منه صفاتنا ********** نروح لساري تاسهيك: ساري لمره اسمعي كلامي وبطلي عناد...وقفي قلبك موات: وتخون ذكري حبيبها؟؟؟هتخونيه يا ساري؟ ويستاهل العرش انك تتخلي عن حبك علشانه؟ ساري ساكته ومش عارفه تعمل ايه ؟الحب اقوي واهم عندها من اي شيئ تاني تاسهيك: علشان خاطر ابوكي اللي محبوس ده...علشان خاطري انا... علشان خاطر العشيره كلها اللي هتبقي تحت رحمه موات ...موات اللي عملت فيكي انتي كل ده مع ان انتي اقرب الناس ليها ..تخيلي هتعمل ايه في العشيره ؟ او في اي حد هيعارضها؟ علشان خاطرنا كلنا وقفي قلبك ساري من جواها عارفه ان الصح تنقذ عشيرتها بس قلبها مش مطاوعها تتخلي عن حب محمود حتي لو ميت...بس العشيره اهم ساري: حاضر يا امي علشان خاطركم هوقف قلبي والرد ده مجاش ابدا في حساب موات ...متخيلتش ابدا ان ساري ممكن توقف قلبها او تبطل تحب محمود يا تري موات هتعمل ايه؟ ساري هتوقف قلبها وحبها خلاص هيخلص؟؟ ايه السر في قوة محمود؟ انتو ايه رأيكم هستناكم بكره نكمل حكايتنا ShiMoOo ونكمل بكره | ||||||||||
|
| |
|
03-05-19, 09:57 AM
| #16 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه ال 15و الاخيره ساري من جواها عارفه ان الصح تنقذ عشيرتها بس قلبها مش مطاوعها تتخلي عن حب محمود حتي لو ميت...بس العشيره اهم ساري: حاضر يا امي علشان خاطركم هوقف قلبي والرد ده مجاش ابدا في حساب موات ...متخيلتش ابدا ان ساري ممكن توقف قلبها او تبطل تحب محمود ساري لسه هتوقف قلبها بناءا علي رغبه امها ...في كل الاحوال هيا ميته يبقي تختار مصلحه العشيره بموت محمود قلبها مالوش قيمه ولسه هتوقف قلبها دخل الحارس بتاع موات بيجري موات : في ايه ؟؟وبتجري كده ليه؟ الحارس: محمود؟؟؟ موات: ماله؟مات خلاص؟ الحارس: بالعكس ...ده بقي كويس جدا كأنه واحد مننا ساري فرحت جدا بمحمود انه ما متش بس مستغربه هو ازاي عايش هنا موات: يعني ايه واحد مننا الحارس: يعني عايش طبيعي بكامل قوته وصحته موات: يبقي احنا لازم ندخل ..هاتوهولي هنا هو وايتوكان خلينا ننهي المهزله دي بقي كفايه طولت قوي ساري: سيبينا يا موات نمشي انا وهو ومش هرجع تاني هنا ..اوعدك يا موات موات: وفي يوم قلبك يدق وتحني لعشيرتك وترجعي تاني بكامل قواكي اسفه يا ساري بس معنديش ادني استعداد للمغامره..محمود خطر ولازم ينتهي دخل الحارس ومعاه ايتوكان ومحمود ....محمود مستغرب من كل حاجه حواليه بص لقي القطه بتاعته ومستغرب من وجودها محمود: ساري انتي ايه اللي جابك هنا؟؟؟ موات: اه اعرفك...دي ساري مراتك بلغتك محمود: مراتي ؟؟؟؟وايه اللي خلاها كده؟؟؟وازاي اصلا؟؟ موات: كانت عايزه اي طريقه تهرب بيها من اهلها علشان تروح لحبيبها اللي نسيها وتفكره بنفسها وانا ساعدتها محمود: وانتي بتسمي دي مساعده ؟؟والمفروض بقي انها تفكرني بنفسها ازاي يعني؟؟ موات: ده اللي قدرت عليه...انتو ايه محدش بيشكر خالص ..المهم خلص الكلام ده وقت موتك اسفه بس وجودك خطر ليا محمود: انتي فاكراني خايف منك؟؟؟ موات: بصراحه انا اللي خايفه منك ومن وجودك ومن قلبك لو دق لساري هتكون خطر وانا مش بحب حد يهددني فبزيل التهديد نهائي تاسهيك: بلاش يا موات ما تعمليش كده ايتوكان: بلاش يا موات احنا طول عمرنا بنعاملك زي ساري موات: كخدامه....انا زهقت منكم انتو الاتنين...بحكم عليكم ب.... احكم بأيه؟؟؟يا تري؟؟؟ لازم حكم يليق بيكم ساري: كفايه يا موات سيبينا نمشي من هنا موات: واعيش عمري كله خايفه؟؟؟عرفت الحكم ...بحكم عليكم بالعذاب الابدي ساري: حرام عليكي..... موات: ههههههه بس الاول تشوفو محمود وهو بيموت مدت ايدها ناحيته وتمتمت بكلام مش مفهوم وساري بتصرخ بس موات خلاص محدش قادر يقف قدامها..حاول ايتوكان يقرب منها بس ثبتته مكانه هو وتاسهيك بتعويذه وكملت تعويذتها ناحيه محمود ومره واحده قفلت قبضه ايدها كأنها ضاغطه علي حاجه محمود وقع في الارض وهوماسك قلبه وحس ان في حاجه بتعصر قلبه كأن ايد ماسكه قلبه بتعصره ..وقلبه بيقف شويه شويه ايتوكان: محمود جه الوقت اللي تتقبل في حقيقتك ...الكائن ده مش بيطاردك الكائن ده مستنيك ..تقبل حقيقتك قبل ما يفوت الاوان خلاص قلبه وقف........هنا موات سابته اول ما قلبه وقف ساري مذهوله محمود مات؟؟؟معقول خلاص انتهي ؟؟؟عيطت بكل جوارحها ابوها وامها كمان دموعهم نزلت ولحظه من الصمت سيطرت علي المكان نفسه حتي موات نفسها مش مصدقه انها خلاص خلصت من اي حد ممكن يهددها في يوم من الايام ...كل شيئ انتهي .... ********* محمود في لحظه موته شاف حياته كلها بتمر قصاده شاف كل حاجه في حياته زي شريط سينما قدام عنيه...شاف المقابر وشاف ساري لاول مره شاف كل لحظه عدت بينهم اول بوسه واول ضمه واندماجهم وجوازهم شاف كل حاجه قدام عنيه بس يا خساره حياته بتنتهي ومش هيلحق يقلها قد ايه هو بيعشقها ...ولسه هيستسلم للموت شافه واقف قصاده ...كائن مخيف قوي جسمه كله بيطلع نار (صورته علي الغلاف) ...خاف للحظه وبعدها افتكر كلام ايتوكان...ده مستنيك.... محمود: انت ايه وعايز مني ايه؟؟وبطاردني ليه؟ الكائن: انا انت..ومستنيك تتقبلني في حياتك محمود: يعني ايه انت انا؟؟؟ الكائن: يعني انا حقيقتك اللي انت بتنكرها من يوم ولادتك ..انا انت ومستنيك محمود: ولو تقبلتك ايه اللي هيحصل انا ميت اصلا الكائن: وجودي في حياتك هيمنحك قوه كبيره جدا..قوه تخلي قلبك يدق من تاني قوه تقدر تسيطر بيها بسهوله علي كل حاجه حواليك محمود: والمفروض اعمل ايه؟؟ الكائن: تتقبل حقيقتك ************** موات: ودلوقتي دوركم انتو الاتنين ..تروحوا للجحيم تعيشوا فيه..تروحوا للعذاب الابدي ساري: حرام عليكي كفايه كده... موات: انتي بقي هتفضلي هنا معايا ..جنبي تشوفي كل حاجه بعملها وتخليني استمتع بمرارك الابدي وحياتك اللي هتقضيها قطه مسكينه ساري: ده انا اقتلك قبل ما تحاولي تخليني حيوانك الاليف ونطت عليها حاولت حتي تخربشها بضوافرها الطويله بس موات بسحرها رمتها بعيد موات: الظاهر انك عايزه تتأدبي ولسه هتضربها يدوب رفعت ايديها توجه سحرها لساري ..فجأه لقت نور كتير بيحاوط ساري نور لفها من كل جانب هاله من نور حواليها بيلف ويلف حواليها ..الكل غمض عنيه من النور القوي ده وبعدها هدي النور لقوا ساري واقفه قدامهم بهيئتها الجميله وشعرها الطويل ..ساري الجميله رجعت تاني ..الكل مستغرب من رجوعها هنا ساري حولت نفسها لهيئتها المخيفه علشان تقدر تقف في وش موات وفعلا بدؤا الاتنين يتحاربوا مع بعض بس موات كانت اقوي بالسحر والخيانه وقدرت ترمي ساري في الارض ولسه هتهجم عليها تقتلها لقت كرباج من نار لف حوالين رقبتها..بصت باستغراب لقت كائن غريب واقف وراها جسمه كله مولع الكل مستغرب الكائن ده جه منين الا ايتوكان اللي عرف ان محمود تقبل حقيقته محمود: اوعي تفكري تأذيها تاني فاهمه ؟؟؟ شدها بالكرباج اللي في ايده موات: انت مين انا عمري ما اذيتك؟؟ محمود: عمرك ما اذيتيني؟؟؟؟ انا محمود ..لسه مصره ان عمرك ما اذيتيني؟؟ موات: محمود؟؟؟ازاي؟؟؟ محمود: ازاي بقي ؟؟؟دي تعرفيها بعدين في رحله عذابك الابدي محمود عذبها بالكرباج اللي في ايده حاولت تقاوم بس كان اقوي منها بمراحل فضل يضرب فيها ويضرب ويضرب كأنه بيطفي نار جواه محمود لما تقبل حقيقته ..شاف كل اللي حصله وافتكر كل حاجه وشاف قد ايه ساري اتعذبت في بعدها عنه وكل لحظه عذاب بيشوفها بيضرب اكتر في موات محمود: ودلوقتي نحكم عليكي بأيه؟؟؟؟ياتري ايه الحكم اللي يليق بيكي؟؟؟ اه نحكم عليكي بالعذاب الابدي وهنا ساري فتحتله نافذه بطل علي حته كأنها جهنم كلها نار في نار محمود: استمتعي برحله عذابك الابدي بضربه من الكرباج لفه علي رقبتها ورماها في النار وهيا بتصرخ موات: لا لا لالا لا لا واتقفلت النافذه وانتهت موات للابد ...محمود هدي شويه ولسه هيبص لساري لمح تاسهيك فرفع كرباجه وضرب تاسهيك ضربه قويه ولف الكرباج علي رقبتها محمود: اونتي كمان تستاهلي رحله للعذاب الابدي هنا جريت ساري ووقفت قدامه ومسكت الكرباج بايدها ساري: محمود لأ دي امي..... محمود: دي اللي مسحت ذاكرتي ساري: لا دي امي محمود: دي اللي فرقتنا عن بعض ساري: دي امي محمود: دي سبب عذابنا كله ساري: دي امي...ارجوك لو بتحبني سيبها ارجوك محمود: لو بحبك؟؟؟؟ هنا ساب محمود الكرباج من ايده....ساري كانت مع كل كلمه بتقرب من محمود اكتر واكتر واول ما ساب الكرباج من ايده شدها هيا عليه محمود: لو بحبك؟؟؟؟ لو بحبك يا ساري؟؟؟؟انا مش بس بحبك انا بعشقك بعشقك حتي بهيئتك دي انتي جميله في كل حالاتك ساري: انت شايف هيئتي المخيفه؟؟؟انت شايفني يا محمود محمود: دي مخيفه دي...انت اجمل شيئ حتي بصورتك المخيفه دي... هنا محمود شدها اكتر وباسها ودي كانت اول بوسه ليهم وهما بهيئتهم المخيفه كانت بوسه ملحميه اخدت وقت طويل جدا واول ما بعد عنها ساري كانت هتقع لولا ان محمود مسكها وابتسم محمود: مالك؟؟؟؟ ساري: انت خطفت انفاسي مكنتش اعرف انت تقصد ايه لما كنت بتقولي خطفتي انفاسي محمود: ودلوقتي عرفتي يعني ايه خطفتي انفاسي؟؟؟؟ جاوبت ساري بأنها شدته هيا علشان تبوسه وتخطف هيا انفاسه بس معرفتش لان محمود اقوي منها بمراحل ايتوكان: احم احم...مممكن تأجلوا الحب ده لما تبقوا لوحدكم؟ محمود: او ممكن انتو تسيبونا لوحدنا وده اسهل ايتوكان: هنسيبكم بس انا عندي طلب الاول محمود: اطلب ايتوكان: ممكن نعمل اندماجكم تاني هنا ونحتفل بيه...المملكه من حقها تفرح برجوع ملكتها واندمجها بحد قوي زيك محمود: حد قوي زي؟؟؟امال مين اللي كان رافض ارتباطنا من الاول؟؟؟ ايتوكان: ده كان ماضي ياريت ننساه كلنا ونبدأ من الاول وجديد تاسهيك: سا محوني انتو الاتنين انا اكتر حد غلطت في حقكم محمود: طالما ساري مسمحاكي فأنا عادي بالنسبالي ايتوكان: قلت ايه نجهز للاحتفال؟ محمود: جهز ..بس ممكن حد يقولي اطفي نفسي ازاي اانا مش عايز افضل مولع كده؟؟ ساري بتضحك: اهدي وفكر في حاجه جميله..ومع الوقت هتعرف تتحول وترجع لطبيعتك عادي محمود: افكر في حاجه جميله...وهو في اجمل منك انتي هنا ساري رجعت لطبيعتها الجميله وحطت ايدها علي وشه : اهدي هنا محمود رجع هو كمان لشكله الطبيعي وضمها جامد قوي ليه ضمة عاشق اخيرا رجعتله حبيبته ساري: تعال معايا افرجك مملكتنا محمود: وقت فرجه ده؟؟ ساري بضحك: احتفظ بافكارك لنفسك لان امي عندها المقدره تقري افكارك محمود: واحشاني اعمل ايه؟؟...اوعي صح تفتكري اني هوافق تلبسي السلاسل دي وتقوليلي دي لبس العرس هنا ساري: دي فعلا لبس العرس هنا محمود: دي سلاسل ومش هتلبسيها دوري علي غيرها ساري: هلبسها وطلعت تجري منه وهو وراها محمود: شكلي هطلعلك الكرباج يا ساري من اولها اتعمل ليهم اجمل حفل للاندماج حضرته المملكه كلها الكل كان فرحان برجوع ساري للملكه واندماجها بحد قوي كده خلص الاندماج وساري اخدت محمود لاوضتها اول ما دخلوا محمود: دلوقتي بقي ممكن تلبسي السلاسل اللي انتي عايزاها علشان بس ما تقوليش اني حرمتك من حاجه ضحكت ساري بصوتها كله ساري: ما تقول ان انت عايز تشوفني بيهم انت ناسي اني بعرف اقري افكارك محمود: وانتي نسيتي اني منعتك قبل كده تقري افكاري؟ وبعدين ايوه عايز اشوفك بيهم عندك مانع ساري: مانع؟؟؟لو تعرف انا مشتقالك قد ايه؟؟واتحرمت منك قد ايه؟ واتعذبت في بعادك قد ايه؟ وكل لحظه كنت بتضم فيها خطيبتك قدامي كنت بموت قد ايه؟؟؟ لو تعرف اتعذبت قد ايه يا محمود؟؟؟ محمود مسح دمعه نزلت من عيونها محمود: اسف يا حبيبتي بس اوعدك اني هعوضك عن كل لحظه عذاب عشتيها هعوضك يا ساري ومش هبعد عنك تاني ابدا ومحدش هيقدر يفرق بينا تاني ابدا وهنا سكتت ساري عن الكلام المباح واتكلموا بلغه العشاق ولغه المشتاق كل واحد طفي ناره من حبيبه واتقابلوا في لقاء هيفضل صداه العمر كله لانهم بقم نديين محدش اقوي من حد ...محمود عنده نفس قدرات ساري واكتر وعرفها معني الحب بجد *********** محمود عايز يرجع لحياته كأنسي محمود: انا لازم ارجع ايتوكان: وساري؟؟؟ محمود: ساري هترجع معايا وهعملها فرح برضه فوق وهعلن جوازي بيها وهتعيش معايا فوق تاسهيك: واحنا محمود: انتي وايتوكان تفضلوا علي العرش وساري هتقوم بأي شيئ تتطلبوه منها وانا كمان هساعدها لو احتاجت مساعده بس تفضل معايا فوق وهنعيش بين هنا وهنا لكن انا مكاني فوق وهيا مكانها معايا ايتوكان: خلاص اختار المكان اللي يريحك ودي بقت عشيرتك ومرحب بيك في اي وقت محمود اخد ساري وراح لبيته وخبط علي الباب وامه فتحتله واتفاجئت لما شافت ساري في ايده ورجعت خطوه لوري محمود: ايه مستغربه ليه؟؟؟ اول مره تشوفي حد من الجن ولا ايه؟؟؟ فاطمه: ايه جن؟؟؟ بسم الله.... محمود: التعويذ مش هيأثر فيها لان بجوازها مني بقت علي نفس ديانتي ودلوقتي جه معاد الحقيقه فاطمه: حقيقه ايه؟؟انا مش عارفه بتتكلم علي ايه؟ محمود: مش عارفه ؟؟؟ مش عارفه يا امي؟؟؟ محمود اتضايق جدا من كدب امه عليه محمود: طيب فسريلي ده معناه ايه وراح متحول قدامها ووقف بشكله المخيف..امه صرخت وخافت جدا من ابنها وفضلت تعيط وتعيط فاطمه: كنت خايفه عليك من اللحظه دي..حاولت احميك ديما محمود: تحميني من ايه؟؟؟تحميني من طبيعتي؟؟؟تحميني بانك تخبي عليا فاطمه: كنت عايزني اقولك ايه؟؟؟؟ محمود: تقوليلي الحقيقه؟؟؟ هنا ساري قربت منه ومسكت ايده ساري: كفايه يا محمود اهدي واتكلم براحه هدي محمود ورجع لطبيعته وقعد جنب امه وضمها محمود: اسف لو كنت خوفتك بس كان لازم تقوليلي فاطمه: اقولهالك ازاي؟؟هاه؟؟ اقول ازاي لعيل اني حبيت واحد من الجن وان ابوه جني اقولها ازاي؟؟؟ حتي لو كان موجود كان ممكن يظهرلك ويعرفك حقيقتك ويعلمك كل حاجه بس هو اختفي شافك مره واختفي محمود: ولما كبرت ما قولتيش ليه؟؟؟ فاطمه: نسيت انك مش طبيعي وضحكت علي نفسي وقلت انك شاب عادي وهتعيش عادي ومحدش هيعرف السر ابدا ...متخيلتش ابدا انك تحب جنيه وتتجوزها انت كمان محمود: من شابه اباه...احيكلي الحكايه من اولها فاطمه: كنت شابه وصغيره وحلوه وقابلته بس ظهرلي كراجل عادي حبيني وحبيته وبعد ما حبيته عرفني انه مش راجل وانه من الجن خفت في الاول وبعدت عنه بس حبي كان اقوي مني ..كنت وحدانيه وماليش حد وهو كان الصدر الحنين ووافقت ارتبط بيه وارتبطنا فعلا وعشنا مع بعض احلي ايام واكتشفت اني حامل مكنتش عارفه اعمل ايه وساعتها اتعرفت علي الشيخ عبدالله وكان صديق مقرب ليا ووثقت فيه وحكيتله كل حاجه عني ونصحني ابعد عنه بس ما سمعتش كلامه اما ابوك فرح جدا بالحمل ده وانه هيكون عنده ولد قوي وقالي ان الهجين بيكون قوي جدا وانه هيتفاخر بيك في كل الممالك بس انا رفضت رفضت انه ياخدك مني وساعتها امومتي اتغلبت علي حبي ..طلبت منه ساعتها انه يبعد عننا وانه يسيبك ليا انا اربيك وانه ينهي الجزء الجني فيك وتعيش انسان عادي قالي انه مينفعش ينهيه بس ممكن يبطله فتره لحد ما تكبر شويه وساعتها هو هيرجع وهيقوم بدوره كأب ويعلمك ..بس اختفي ومظهرش تاني ابدا محمود: ومن ساعتها وانتي منتظراه وهو مرجعش علشان كده قولتيلي ان عمري هيضيع في انتظار ساري فاطمه: خفت عليك عمرك يضيع زي محمود: مش معني ان حد وحش فالباقي كله وحش كل حاجه فيها الحلو والوحش ساري: مش يمكن حاجه منعته يرجعلكم تاني؟؟ليه افترضتوا انه وحش؟؟سبق وقلتلك يا محمود ان احنا لما بنحب بجد مش بننسي احبابنا ابدا فاطمه: وايه اللي خلاه ميرجعش الفتره دي كلها ساري: وايه اللي بعدني عن محمود سنه ونص ؟؟؟مش يمكن ظروفه اقوي منه؟ فاطمه: ارجوكي انا ما صدقت عرفت اكمل حياتي ما تفتحيش جراح قديمه ساري: طيب اسمه كان ايه؟؟؟ فاطمه: عايزه تعرفي اسمه ليه؟؟ ساري: فضول مش اكتر فاطمه: اسمه كان سيزريوس اسكافندر ده اللي اعرفه قفل محمود الكلام مع مامته واستعد يعمل فرح لساري وطبعا راح لخطيبته واول ما قابلها مسكها من دماغها وسيطر علي عقلها محمود: انتي مش بتحبيني ولا طيقاني واول ما امشي هتقولي لاهلك انك مش قادره تكملي معايا وهتحبي وهتعيشي حياه جميله مع حد يستاهلك اكتر مني فاهمه نسمه: فاهمه وبكده نهي محمود قصته مع نسمه قبل الفرح ساري مع محمود ساري: محمود انا طلبت من ابويا يسأل عن ابوك وعرفنا انه.... محمود: انه ايه يا ساري؟؟ ساري: انه مات تقريبا وعمرك عشر سنين مات في معركه كانت بين العشائر محممود سكت ومردش ساري: ارجوك ما تزعلش محمود: انا معرفوش ويمكن يكون موته احسن من فكرة انه اتخلي عننا بس امي هتزعل راح محمود وقال لامه وهيا كمان زعلت بس فرحت انه ما اتخلاش عنها استعد محمود لفرحه مع ساري ومحدش عرف طبيعة ساري غير اتنين الشيخ عبدالله واحمد صاحب محمود ...وفي الفرح احمد: بقولك يا محمود؟ محمود: عايز ايه؟ احمد: هيا ملهاش اخوات ولا ايه ده انا صاحبك؟ محمود: انت عايز تتجوز جنيه؟؟؟ احمد: يعني لو زي مراتك كده طبعا محمود: روح للمقابر بالليل وجرب حظك احمد: انا؟؟؟المقابر وبالليل ؟؟؟ده انت طيب ...طب انت وطلعلك اصل فيهم وانا محمود: هيسيحوك هههههههه احمد: اضحك اضحك ما هو اللي يتجوز قمرايه كده لازم يضحك محمود: قمرايه؟؟؟شكلي هتحول واولع فيك حالا احمد: وعلي ايه الطيب احسن ...سلام قولا من رب رحيم محمود: ايوه كده اتلم لان انا مش هتعرف تصرفني فخلي بالك خلص احلي فرح لاحلي عروسين ....بيتحولوا وبيرجعوا براحتهم وعاشوا بين المملكتين في منتهي الحب والسعاده ومنتظرين حاليا بنوته جميله اجمل من ساري ومحمود وساري بيتخانقوا حاليا هيسموا البنت ايه؟؟؟وطبعا ما ننساش فاطمه وتاسهيك اللي عاشوا في دور الحموات قوي وبقم اصحاب جدا........... وبكده تكون خلصت قصتنا اتمني تكون عجبتكم عايزه ارائكم وتقييمكم للقصه طبعا القصه ملهاش علاقه بالواقع والجن مش حلو قوي كده ولا بيرتبطوا بالبشر ولو جن حب انسان بيكون زي المس وربنا يعيذنا ويعيذكم منهم ...القصه للتسليه وبس يارب تكونو استمتعم معايا استنوني في قصتي الجديده مر العمر ShiMoOo | ||||||||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
.png)
العرض العادي
