آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
03-05-19, 02:44 PM
| #1 | |||||||||||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب  
|  رواية لعبة القدر / للكاتبة شيماءمحمد ShiMoOo، مصرية
التعديل الأخير تم بواسطة Just Faith ; 10-05-19 الساعة 12:28 AM | |||||||||||||||||||
|  |
|
11-05-19, 12:24 AM
| #2 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
|  الحلقه الاولي قاعد في مكتبه سرحان تماما بيفكر في اللي فات وفي اللي جاي مش عارف الدنيا وخداه لفين او هيعمل ايه؟ خبط الباب ودخل دراعه اليمين علي علي: تمام يا افندم بلغني ان حضرتك عايزني حازم: فعلا عايزك اقعد يا علي..... الموضوع ده خاص وهيكون بيني وبينك تمام؟ علي: طبعا خير يا حازم باشا في ايه؟ حازم: في بنت اسمها شوق سيد عبد المقصود ممرضه عايزك تجيبلي عنوانها بالظبط على: خير؟ ليه؟ حازم: من غير ليه هتعرف ولا اكلف حد غيرك؟؟؟ علي: 48 ساعه بالكتير وهتكون كل المعلومات عندك بعد اذنك خرج علي وساب حازم في مكتبه وسط ذكرياته الانتظار طول عمره شيئ صعب جدا والوقت بيعدي ببطء وملل اخيرا علي جاب المعلومات كلها عن شوق علي: كل حاجه في الملف اللي قدام حضرتك حازم مسكه وفضل يقلب فيه شويه حازم: هيا لسه متجوزه؟؟ علي: لا اتطلقت من كذا سنه وعايشه لوحدها هيا وبنتها رهف حازم: اتطلقت ليه معرفتش؟؟ علي: محدش عارف هيا اتطلقت ليه او سابت ابوها ليه؟ حازم: هيا مش عايشه مع ابوها؟؟ علي: لا يا افندم لوحدها زي ما سبق وقولت حازم قفل الملف ورماه علي مكتبه حازم: عايزها تترفد من شغلها علي تنح: نعم؟؟؟ حازم: ايه ما سمعتش؟؟ ولا مفهمتش؟؟ تترفد علي: يا افندم بقول عايشه لوحدها هيا وبنتها لما هتطردها هتعيش ازاي؟؟ حازم رفع راسه بنظره صارمه هزت علي حازم: هو انا ليه النهارده محتاج اعيد كلامي مرتين معاك؟؟؟ يا تخليها تترفد من شغلها يا انت هتترفد وهيا برضه هتترفد فاختار؟؟؟ علي: اوامرك بعد اذنك حازم ابتسم بعد ما علي سابه حازم: ان مخليتك تمدي ايدك للي يسوي واللي ما يسواش علشان بس تلاقي تمن رغيف تاكليه لبنتك ما ابقاش انا حازم... هدفعك التمن غالي قوي تاني يوم علي دخل لحازم وبصله علي: تمام اترفدت حازم: تمام عينك عليها علشان لما تلاقي شغل تاني تبلغني يومين عدوا ودخل علي لحازم علي: اشغلت في مستوصف حازم: تترفد علي: طيب هلي الاقل افهم ليه؟ حازم: تترفد يوم وري يوم وعلي بينفذ اوامر حازم ويوم تترفد ويقوم تشتغل وهكذا وحازم ما بينطقش غير كلمتين تمام و تترفد وبس علي: فات شهر ونص وانت مش مديها فرصه حرام عليك اديها اي فرصه البنت اشتغلت جرسونه في كافيه حازم: جرسونه؟؟ طيب يالا علي :يالا فين؟ حازم: وديني الكافيه علي: ناوي علي ايه؟ حازم ببرود: اشرب قهوه وصلوا الكافيه وحازم وساب عكازه ونزل ودخل وطلب من علي يستناه حازم دخل واقرب تربيزه قعد عليها وبيتلفت يشوفها قلبه دقاته بتزيد ومتوتر جدا... هيشوفها اخيرا... لمحها جميله زي ما هيا... لا لا اجمل بكتير.... بس مطفيه شويه... ابتسامه متكلفه علي شفايفها جايه ناحيته وهو عمل نفسه باصص في المنيو شوق: اتفضل حضرتك رفع راسه وبصلها شوق الدنيا لفت بيها... مش مصدقه عنيها ابدا... معقوله هو بنفسه قدامها؟؟ معقوله ولا ده حلم زي الف حلم حلمته قبل كده؟؟ اكيد بيتهيألها حازم: عايز قهوه لو سمحتي شوق فاقت علي صوته طالما اتكلم يبقي حقيقي مش حلم حازم قال كلمته وبص للمنيو علشان يهرب من عنيها شوق: حازم انت مش عارفني؟؟؟ حازم رفع راسه وبصلها بمنتهي البرود حازم: حازم وبس؟؟ شكلك تعرفيني قوي بقي علي كده؟ رجع لوري في كرسيه وبصلها بتكبر شويه شوق مستغربه استحاله يكون نسيها ابدا؟؟؟ لا ده مش حلم ده كابوس وكابوس بشع كمان شوق: انا شوق يا حازم حازم: حازم تاني؟؟؟ اممم شوق شوق... مين شوق؟؟ شوق بانهيار: شوق الممرضه حازم عمل نفسه بيفكر وفجأه: اه اه شوق... ياه بجد؟؟ الدنيا صغيره فعلا،؟؟ عامله ايه؟ شوق: كويسه حازم: طيب ممكن قهوه بقي؟ شوق: حاضر هجيبلك قهوتك المظبوط حازم: قهوتي ساده مش مظبوط شوق: كنت بتشربها مظبوط؟؟ حازم للحظه كان هيبتسم انها فاكره قهوته ايه بس رجع للبرود بتاعه حازم: انتي مش هتعرفي قهوتي اكتر مني.. ساده اذا سمحتي مشيت من قدامه بالعافيه تقدم رجل وتأخر رجل يااااه كل العذاب ده وفي الاخر حتي مش فاكر اسمها دمعه نزلت غصبا عنها جابت القهوه وحطتها قدامه وبصتله بوجع ابتسم ابتسامه بارده واخد القهوه وبص لورق في ايده اتصل بعلي يدخله وكأنه كان في انتظاره علي دخل وقعد معاه وشوق دخلت تجيب طلبات فحازم انتهز الفرصه ومشي بسرعه قبل ما تخرج وركبوا العربيه علي: وبعدين؟ حازم: تترفد علي: حرام بقي؟؟ ارحمها حازم: ادخل كلم صاحب الكافيه علشان يرفدها ومش بس كده عايز اشوفهم بيرموها بره الكافيه هستني هنا في العربيه علي مش مصدق نفسه ولا مصدق حازم ابدا... كام سنه يعرفه وعمره ما كان قاسي او شرير كده علي: طيب فكر في بنتها حازم بص لبره ومردش عليه فاضطر علي ينزل وينفذ كلام حازم شويه ورجع وقعد في العربيه علي: هنستني ونتفرج حازم عينه علي الباب مستني وفعلا اتنين رجاله شادين شوق لبره المحل ورموها جامد لدرجه انها وقعت في الارض وعدت الرصيف هنا كانت عربيه جايه بسرعه وبتحاول تدوس فرامل وعملت صوت جامد قوي حازم نزل جري من العربيه علشان يلحقها بس العربيه وقفت ومخبطتهاش فوقف مكانه ورجع عربيته بسرعه قبل ما حد يشوفه علي مذبهل من اللي شافه ومش فاهم اي حاجه علي: طيب ايه ده؟ بتخاف عليها ولا بتكرهها؟؟؟ حازم ما ردش عليه بس بيراقب شوق اللي قعدت في الارض علي الرصيف وحطت راسها بين ركبها وبتعيط وحازم بيراقب بصمت فجأه سمعوا صوت عيله مامي... مامي حازم بص لقي واحده جايه ومعاها عيله صغيره وجريت علي شوق اللي قامت بسرعه ومسحت دموعها وحضنت بنتها علي: علي فكره دي بنتها حازم ما ردش بس بيراقب بصمت عند شوق سمر: اتاخرنا عليكي؟ شوق: لا ابدا متشكره يا سمر انك اخدتي بالك منها سمر: لا يا حبيبتي بس انتي ورديتك خلصت بدري ليه النهارده ولا انا اللي اتأخرت؟؟؟ شوق: لا يا سمر انا اترفدت يالا بقي اشوفك بعدين ادخلي انتي علشان ما تتأخريش سمر: اتأخر ايه؟ سيبك مني اترفدتي ليه؟ وايه اللي حصل؟؟ شوق: الله اعلم... شهر ونص اهو وانا بترفد من اي شغل... يمكن يكون عقاب من ربنا؟؟ الله اعلم المهم يدوب اروح انا وانتي ادخلي اشوفك بعدين شوق اخدت بنتها وبتمشي وبنتها كل ما تيجي تشدها يركبوا شوق ترفض والاخر شالتها ومشيت بيها علي: هنفضل ماشيين وراها لحد امتي؟؟ حازم: هيا مش بتركب ليه؟ هيا ساكنه فين؟ علي: في حته شعبيه في الوراق حازم: بعيده يعني؟؟ امال مش بتركب ليه؟ علي اتنرفز: لان اكيد معهاش تمن تذكره تركب بيها حازم بصله بصه سكتته تماما وفضل ماشي بصمت حازم لاحظ ان البنت بتشد شوق كل شويه كل ما تشوف اي محل اكل او اي سوبر ماركت وسأل نفسه هو ممكن يكون فعلا قسي عليها قوي؟؟ ممكن يكون وصلها لمرحله ان معهاش فلوس تأكل بنتها؟؟ شوق اخيرا مع زن بنتها وقفت علي عربيه فول واشترت ساندوتش واحد وعطته لبنتها وقعدوا لحد ما بنتها اكلت رهف: طيب يا مامي خدي انتي نص وانا نص شوق ابتسمت لبنتها: لا يا قلبي انا اكلت في الكافيه انتي كلي واشبعي مبتسمه لبنتها وبتلعب في شعرها الرائع وكأن معندهاش اي مشاكل علي: علي فكره انت مجوعهم الاتنين!! حازم: ______ علي: يعني افهم انت بتتبرع بالملايين ليه بقي!؟؟ حازم :______ وبعد ما فضلت تمشي لاكتر من ساعتين وصلت حته شعبيه ودخلت في حاره علي: المكان ضيق مش هينفع ندخل وراها بالعربيه حازم: روحني وماضفش اي حرف زياده بس دماغه هتنفجر من التفكير والوجع اللي ما بينتهيش ابدا شوق دخلت بيتها اللي فوق السطوح اللي عباره عن اوضه واحده وبس فيها فرشه في الارض وشعله واحده وبس وحاجه تشبه الرف عليها هدوم بسيطه قوي قوي دخلت وبنتها نامت من التعب وهيا رقدت جنبها علي فرشتها وافتكرت مقابلتها لحازم اللي مفتكرهاش حتي وعيطت عيطت من قلبها... عيطت علي شبابها وسنين عمرها اللي ضاعوا... عيطت علي حالها وعلي بهدلتها... عيطت علي جوعها اللي مش عارفه تسكته بايه؟؟ عيطت علي كتير قوي ضاع منها... حازم روح هيتجنن من التفكير وحرب شنيعه جواه خناقه جواه مش عارف يتصرف فيها وصوت الخناقه عالي قوي لدرجه انه هيتجنن ويدوب فكر يحن بس عقله عمله ديجافو... او اعاده لذكرياته حازم: والله لاخليكي تشحتي في الشوارع علشان تلاقي لقمه تحطيها في بوقك... انا وراكي والزمن طويل قفل تماما باب الحنيه ولبس قناع القسوه والبرود علي: اشتغلت يا باشا حازم: اسبوع اهوه وهيا بتدور علي شغل ياتري اشتغلت فين؟ علي: اشتغلت في عياده صغيره كده حازم: طيب كويس... ( ابتسم) تترفد علي: لا لحد كده وكفايه بقي حرام كده حازم رفع تليفون سماعته الداخليه وكلم سكرتيره حازم: سعد تعال عايزك سعد دخله: افندم حازم: علي مش عجباه اوامري... شوفلي حد ينفذ اوامري علي: يا حازم انا هنفذ كل كلامك بس علي الاقل فهمني ليه كده؟ حازم: سعد مستني ايه؟ علي: حاضر يا حازم هتترفد بعد اذنك علي مشي متضايق ورجع بعد كام ساعه وبلغه انها اترفدت يومين عدوا وعلي دخل لحازم علي: اشتغلت حازم يدوب هينطق بس علي وقفه علي: ما تقوليش تترفد لانه مش هتعرف نرفدها دي بتمسح سلم عماره... مش شغل يعني حازم: خدني ليها حازم وقف بعصايته علي: من امتي انت سادي كده؟ حازم: ده شيئ ما يخصكش اتفضل راح حازم يراقبها من بعيد وعلي نزل ورجع تاني علي: عرفتلك هتاخد كام حازم: كام؟؟ علي: 10 جنيه علي مسح السلم... البواب بيستغلها وطبعا لان اكيد هيا بنتها هتموت من الجوع وافقت حازم: روح ادي البواب خمسين جنيه خليه يدهملها علشان بس بنتها تاكل علي: انا مش فاهم من لهجتك انت حاليا بتتريق ولا بتتكلم جدا؟ حازم: لا بجد روح علي راح وعطي السواق فلوس يديها لشوق شوق خلصت واخدت الفلوس وطارت بيها وطلعت تجري بسرعه علي اقرب سوبر ماركت واشترت اكل علي عينه دمعت علي حاله شوق اللي فرحت بخمسين جنيه علشان بس تأكل بنتها حازم لاحظ ومعلقش نهائي شوق جريت علي بيتها واخدت بنتها من عند الجيران وعملتلها اكل واكلتها وده كان يوم عيد حازم كان بيستمتع يتفرج عليها بتلف في الشوارع تغسل عربيه او تمسح مدخل بيت علشان تلم تمن اكلها وعلي هيتجنن منه شوق قاعده في الارض بتريح بعد هدتها وعدي عليها شاب عاكسها بس ما اهتمتش بيه حازم: علي انا هنزل هنا وانت هتروح لشوق علي: اروح اعملها ايه؟ اديها فلوس؟؟ حازم: لا طبعا انت بس هتعرض عليها فلوس علي: وبعدين؟ حازم: هتطلب منها انها تروح معاك شقتك وبالتمن اللي هيا عيزاه علي فتح بوقه: انت عايزني اخدها شقتي؟؟؟ حازم: اغريها بكل الطرق... زغلل عنيها بالفلوس وافرشلها الارض ورد لو تحب كمان... واي مبلغ مهما يكون وافق عليه علي: ما اعتقدش انها من النوع ده حازم: الجوع وحش... وجوع بنتها اوحش... اتفضل هتصل بيك وخلي الموبيل مفتوح بحيث اسمع ردها ايه اتفضل علي: ولنفترض انها وافقت اعمل ايه؟ حازم: مبروكه عليك علي: سيادتك اكيد ناسي ان انا متجوز صح؟ حازم: خلاص لو وافقت خدها لاي مكان واحدف في وشها المبلغ اللي اتفقت معاها عليه وارميها بره العربيه تمام كده؟؟ حازم نزل ووقف يراقب وعلي واقف قدامه متردد حازم: سبق وقولتلك اشوف غيرك طالما انت مش قادر علي: حازم انت مش بس رئيسي انت صاحب واخ وعمرك ما كنت كده ابدا مالك؟؟ حازم: اتفضل وروح علي راح وحازم ماسك التليفون ولقي قلبه بيدق بخوف وعنف وخايف من انها توافق علي وقف لشوق وبيحاول يغريها فهيا مشيت بسرعه علشان ما يكونلوش فرصه بس علي مصر وفاضل وراها يغري فيها وشوق ولا كأنها سمعاه اصلا علي: الف الفين الرقم اللي يعجبك حدديه بس ليله واحده يالا محدش هيعرف ولا حد هيخسر شوق وقفت مكانها وبصتله وعلي قلبه بيدق بسرعه وحازم هيتجنن شوق:...... ونكمل بكره ابدعوا ووروني توقعاتكم شوق هتروح شقه علي؟؟ ايه سبب العداوه برأيكم؟؟؟ ShiMoOo | ||||||||||
|
| |
|
11-05-19, 12:25 AM
| #3 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه التانيه علي وقف لشوق وبيحاول يغريها فهيا مشيت بسرعه علشان ما يكونلوش فرصه بس علي مصر وفاضل وراها يغري فيها وشوق ولا كأنها سمعاه اصلا علي: الف؟ الفين؟ الرقم اللي يعجبك حدديه بس ليله واحده يالا محدش هيعرف ولا حد هيخسر شوق وقفت مكانها وبصتله وعلي قلبه بيدق بسرعه وحازم هيتجنن شوق: لو ما بعدتش هصوت وهلم عليك امه لا اله الا الله غور بقي من هنا هيا مش ناقصه بلاوي شوق مشيت وعلي بيسأل حازم علي: هاه امشي حازم: اركن عربيتك وانزل منها وروح وراها وطلع اي فلوس اغريها تاني بهداوه وقولها انك مستعد لاي حاجه تطلبها مهما تكون علي: عارف لو اتقبض عليا!؟ حازم: مش هيتقبض عليك ما تخافش انجز علي نزل وراح وري شوق ووقفها وطلع فلوس زي ما حازم قاله علي: حددي المبلغ وزي ما تحبي وفي المكان اللي تحبيه... فكري مفيش طريقه اسهل من دي تجيبي بيها كل اللي نفسك فيه؟ شوق سكتت للحظه وعلي تخيل انها بتفكر توافق وحازم كمان قلبه هيخرج من مكانه وعقله بيفكر لو وافقت هيعمل ايه؟ ؟ هيسيبها فعلا لعلي؟؟؟ سؤال مش عارف اجابته ايه؟ شوق: انت... احقر... من اني ارد عليك؟؟؟ جت تمشي فعلي مسكها من دراعها علي: بس استني نتفاهم مكملش جملته لاني شوق ناولته بالقلم خلاه قطع الكلام علي مش مستوعب ايه اللي جراله حازم ابتسامه اترسمت علي شفايفه وفرحه غريبه مش عارف سببها اول ما سمع صوت القلم شوق: المسني تاني وانا قسما بالله لا باللي في رجلي سابته ومشيت والمره دي علي رجع لعربيته ورجع لحازم اللي ركب العربيه بصمت علي ساق لحد ما وصل حازم بيته ونزل فتحله العربيه وحازم نزل مشي خطوه ورجع لعلي وقف قصاده حازم: انا اسف اعذرني... متخيلتش انها ممكن تعمل كده؟ علي: وحده شقيانه وبتجري علي بنتها ومحترمه ده الطبيعي انها تعمله حازم: مين قال انها محترمه؟؟ علي الاقل مكنتش اتطلقت لو محترمه؟! علي: نعم؟؟ لمجرد انها اتطلقت تبقي مش محترمه؟؟؟ معقول تكون دي وجهه نظرك؟؟؟ انت مين؟؟ حازم: لا طبعا مش معني الطلاق عدم الاحترام مش ده قصدي بس هيا مش محترمه تقدر تقول كده معرفه قديمه!!! علي: الله اعلم معرفتك القديمه دي ايه؟ بس الناس بتتغير وبتتبدل... وبعدين الانسانه دي في اي مكان اتواجدت فيه الكل بيشهدلها بالاحترام والكل مكنش عايز يطردها لولا ضغطنا عليهم... الانسانه دي اكتر من محترمه فانت راجع نفسك حازم دخل فيلته وعلي مشي وروح بيته هو كمان حازم كلام علي بيلف ويدور جواه مش عارف فين الصح وفين الغلط؟؟؟ بس اللي عارفه انه لازم ينتقم مهما يكون الثمن؟؟؟ شوق في بيتها وبنتها نايمه وهيا سهرانه بدموعها وحالها وبتفكر في بكره... هتعيش ازاي هيا وبنتها؟؟ هتدخلها مدرسه ازاي؟؟ هتصرف عليها منين؟؟ بنتها اهي 7 سنين والدراسه هتبدأ هتدفعلها مصاريفها منين؟؟ ليه الحظ ملطش معاها كده وليه بتترفد تاني يوم في اي شغل؟؟؟ هل في حد بينتقم منها؟؟؟ علامه استفهام كبيره... حازم كمان علامه استفهام اكبر؟؟؟ ممكن يكون فعلا ناسيها؟؟ ممكن يكون هو اللي وري اللي بيحصلها ده؟؟؟ لا حازم لأ؟؟؟ وبعدين ده حتي اسمها مكنش فاكره وبعدين هيا اتطردت قبل ما تقابله بكتير لا لازم تشيله من تفكيرها بقي هيا اقل من انه يفتكر اسمها مش يفكر ازاي يطردها لا لا مش حازم ابدا اه والف اه منك يا حازم.......... طلع النهار وشوق بتبدأ رحله عذابها وحازم بيراقبها من بعيد لبعيد ومش عارف ولا يسيبها في حالها ولا يستمتع بعذابها قدامه حازم: علي انزل روحلها علي: نعم؟؟ لا يا حازم اسف شوف غيري بقي حازم: انزل اتأسفلها واعرض عليها شغل في الفندق وبراتب معقول بس يدوب يكفيها هيا وبنتها اكل بس فاهم؟ علي: هتشغلها عندك!؟ حازم: انت اللي هتشغلها انا مش هظهر في الصوره خالص علي: ولو سألتني انا عرفت مكانها منين؟؟؟ حازم: قولها اي حاجه... شوفتها صدفه؟؟ ندمت؟؟ توبت وحبيت تصلح غلطك... اي حاجه... ألف... علي نزل وهو مش عارف هيقولها ايه؟ حازم نداله وقاله يفتح تليفونه علشان يسمعه شوق بتمسح في عربيه وشافته شوق: انت تاني؟؟ عايز قلم كمان ولا ايه؟؟؟ حازم ابتسم علي: اسمعيني،.. انا كنت معدي صدفه من هنا وشوفتك شوق: وقولت انزل اشوفها غيرت رأيها ولا لأ؟؟ علي: لا لا ابدا والله انا بس لمحتك وندمت علي اللي عملته من كام يوم معاكي وبعدين قلمك نوعا ما فوقني ولما شوفتك حسيت انها فرصه من ربنا اني اعوضك واني اتوب واصلح غلطي شوق: ربنا يتقبل اتفضل شوق كملت شغلها ومتجهلاه وهو لسه واقف شوق: وبعدين؟ اعتذرت وخلاص اتفضل علي: عندي ليكي عرض شوق: اسفه اتفضل علي: لا انتي فهماني غلط عرض شغل واعتقد انه احسن من غسيل العربيات شوق وقفت وبصتله مستنياه يكمل علي: عندي فندق وهتشتغلي فيه في المطبخ... هاه ايه رايك؟ شوق: هشتغل ايه بالظبط؟ علي: علي حسب ما يقولولك... غسيل اطباق.. تنظيف اي حاجه يعني؟ ايه رأيك؟ شوق: فندق ايه؟ علي: فندق (.....) شوق: الفندق ده بتاعك؟؟؟ علشان كده كنت متخيل انك اول ما تقف بعربيتك هيضربولك تعظيم سلام.. علي: هاه هتقبلي اسفي وعرضي ولا ايه؟ شوق: للاسف مضطره اقبل تحب اجي امتي؟؟ علي مستني حازم يقوله في السماعه اللي في ودنه حازم: قولها دلوقتي لو تحب علي: دلوقتي لو حبيتي شوق: خلاص اتفضل حضرتك وانا هخلص العربيه دي واحصلك حازم: قولها تسيبها من العربيه وتيجي معاك علي: سيبك من العربيه انتي حاليا مش محتاجلها شوق: اسفه قبضت عربون لغسيلها وصاحبها اتكل عليا وانا ما بحبش اخلف كلامي مع حد حازم استغرب من كلامها وكان نفسه يرد عليها بنفسه شوق استلمت شغلها وحازم مراقبها بكاميرات المراقبه كل لحظه وثانيه كل شويه يبلغ علي بشغلانه جديده ليها من تنظيف لترويق لشغل جرسونه لغسيل اطباق لتنظيف الاوض من الاخر كل انواع الشغل بيشغلهالها وهيا ما بتقولش لأ ابدا او تتعب ابدا حازم نفسه يشوفها بتشتكي او تتألم الي انها بتاخد يوميتها وابتسامه علي وشها وتحمد ربها وتروح كان هيتجنن سر الابتسامه دي ايه؟ وما بتتعبش ليه؟ واخيرا قال لعلي يروحلها ويسألها بطريقته علي: شوق ازيك شوق: اهلا يا افندم علي: عامله ايه في الشغل؟؟ عاجبك ولا حد مضايقك؟؟ شوق: لا عاجبني جدا تسلم يا افندم علي: كل الشغل ده وعاجبك ازاي؟؟ شوق: كتر الشغل ما يهمنيش المهم في الاخر اقبض يوميتي واروح بيتي معايا تمن اكل بنتي ودي اقصي امنياتي علي: انك تأكلي بنتك!؟؟ شوق: اه اأكلها وطبعا بكره تبدأ المدارس وانا اهو بحوش تمن مصاريف المدرسه فعلشان كده بمشي بالابتسامه علي وشي لاني معايا قوت يومي علي رجع لحازم وهو عايز يضربه وحازم عقله هيوقف من التفكير حازم في بيته سرحان كالعاده وامه جت تكلمه وفضلت تتكلم كتير بس ابنها مش معاها اصلا صفيه: حازم... حازم؟؟ حازم انتبه: خير يا ماما في ايه؟ صفيه: مالك سرحان في ايه؟ حازم: مشاكل في الشغل ما تشغليش بالك... بقولك فاكره شوق؟؟ صفيه قلبها دق بسرعه واترددت: شوق؟؟ شوق مين؟؟ حازم: الممرضه؟؟ شوق الممرضه؟؟ صفيه: ايه اللي فكرك بيها دلوقتي؟؟؟ حازم: جت في بالي،... هيا ما رجعتش تاني ابدا صح؟؟؟ صفيه: انت كنت مستنيها ترجع؟؟؟ حازم: رجعت ولا ما رجعتش وانا مسافر؟؟ صفيه: لا يا حازم ما رجعتش وبعدين الموضوع ده مر عليه يجي سبع سنين ايه اللي فكرك بيه؟ خلينا في المهم حازم: ايه المهم اتفضلي صفيه: مكرم السعدني جاي هو وعيلته هيتعشوا معانا النهارده حازم: يا اهلا بيهم بس عشي عادي ولا عندك غرض؟؟؟ صفيه: الاتنين... هو مجرد عشي عادي بس في نفس الوقت تشوف بنته شاهندا حازم: اممم كنت متأكد ان الموضوع فيه بنات صفيه: حازم لامتي قاطعها حازم: حاضر هتعشي معاهم وهشوف شاهندا خلاص؟؟؟ وقت العشا حازم بيراقب شاهندا في كل حركه لدرجه خلت البنت ترتبك قدامه خلصوا عشا واخدها يتمشوا شويه في الجنينه مشيوا كام خطوه حازم: تعالي نقعد علي البيسين شاهندا : تعبان ولا حاجه؟؟ حازم: لا مش تعبان حاليا بس افضل نقعد شاهندا : اوك اتفضل... بعد فتره من الصمت شاهندا : هو انت فعلا كنت في فتره من الفترات قاطعها حازم: مش حابب اتكلم عن الماضي لو سمحتي وخصوصا الفتره اللي انتي هتسألي عنها شاهندا : اسفه.،. اخبار شغلك ايه؟ فضلوا يتكلموا كتير واكتشف حازم انها بنت رقيقه ومثقفه وفوق كل ده جميله.. الصبح بيفطر هو وصفيه صفيه: هاه؟؟ ايه رايك؟ حازم: اه الفطار حلو تسلم ايدك صفيه: فطار ايه يا حازم انا بسأل عن شاهندا حازم: شاهندا ؟؟؟ مش عارف صفيه: يعني ايه مش عارف؟؟ حازم: هيا ليها كذا معني؟؟ مش عارف... محتاج وقت احط النقط علي الحروف فلسه مش عارف صفيه: خد وقتك وفكر هيا علي العموم بتبقي موجوده في النادي الفتره من الساعه 5 لحد بالليل حازم: امم طيب متشكر حازم بيراقب شوق من ناحيه وبيروح يقابل شاهندا من ناحيه وواقف مش عارف يخطي لاي اتجاه حازم: علي خفف الشغل علي شوق وخليها وظيفه عاديه براتب معقول علي: اخيرا هيبقي عندك قلب!! حاضر... انسه شاهندا اتصلت بيك وبتأكد عشاكم مع بعض حازم :تمام مش هتأخر علي: هو انت حاليا مع شاهندا ولا شوق؟؟؟ حازم: شوق مين دي اللي انا معاها... دي مجرد خدامه ولا راحت ولا جت علي: ولما هيا مجرد خدامه حطها في بالك ليه وبتراقبها طول الوقت ليه؟ ؟ احنا بقالنا اكتر من 3 شهور ما وراناش غيرها حازم: تقدر تقول حساب قديم بصفييه وبعدين يا ريت ما تتدخلش في اللي ما يخصكش واتفضل احجزلي لعشا النهارده بالليل حازم اخد شاهندا وخرجوا يتعشوا مع بعض شاهندا كانت انسانه جميله روحا وشكلا اتعشوا واتكلموا في مواضيع كتيره شاهندا : هو انا ينفع اطلب طلب؟؟ حازم: شاوري شاهندا : ينفع نقوم نرقص؟؟؟ حازم اتردد شويه بس وافق ومسك ايدها وقاموا يرقصوا شاهندا بتقرب وكل ما تقرب قوي لمحه من الماضي بتيجي في بال حازم ذكريات بتهاجمه زي الومضات اللي بتبرق وتختفي ذكريات بتحاول تظهر وهو بيمنعها ذكريات بتوجع قوي قوي شاهندا : في ايه مالك؟؟ انت تعبان؟ حازم: اسف يا شاهندا شاهندا : لا اسف ايه تعال استريح اقعد... انا اسفه اني ضغطت عليك سامحني حازم: انتي ما ضغطتيش عليا ابدا ومالوش لازمه ابدا تتأسفي يالا نروح؟؟ شاهندا : اه طبعا يالا علشان ترتاح كمان حازم روحها وهو روح بيته يحاول يكبت الذكريات اللي بتظهر ويرجعها تاني للنوم شاهندا مع امها ساميه ساميه: هاه يا حبيبتي اتبسطي معاه؟ شاهندا : جدا يا ماما... حازم انسان جنتل قوي قوي.. رقيق مراعي للي حواليه... جدع... من الاخر كله علي بعضه حاجه كده مالهاش وصف ساميه : انتي حبيتيه ولا ايه؟ شاهندا ابتسمت وبصت للارض بكسوف فامها رفعتلها وشها ساميه : ما تتكسفيش يا حبيبتي هو انسان محترم وكويس وعيلته كويسه فليه لأ؟؟؟ شوق في بيتها بتحسب حسابتها وتشوف وفرت ايه وفاضلها ايه؟؟؟ المدارس خلاص علي وشك تبدأ سرحت في ماضيها وافتكرت احلي ايام في حياتها وافتكرت لما كانت لسه في بيت ابوها مش شايله اي هموم ابدا... افتكرت لما كانت لسه بنت الحياه فاتحالها دراعاتها... ومش عارفه ايه اللي جرالها؟؟ وليه الدنيا عطتلها ظهرها بسرعه كده؟ وليه شالت الهم بدري كده.؟؟؟ دي كانت مجرد عيله لما شالت المسؤليه؟؟ شالتها بدري قوي.....، اه منك يا حازم والف اه!!!!!!!!!! شهر بحاله عدي وحازم بيراقب شوق.... فجأه قرر انه ينزل يقابلها ويتكلم معاها يمكن يرتاح!!! يمكن يفهم منها ايه اللي حصل وحصل ليه؟؟؟ يمكن يلاقي اجابات علي اسئلته؟؟؟ يمكن يرتاح!!!! هي امله الوحيد انه يرتاح!!! مش عايز غير انه يعرف لييييييييييه؟؟؟؟ نزل حازم بعصايته وقرب خطوه خطوه لعندها وهيا في المطبخ بتغسل الاطباق شوق بتغسل في الاطباق وبنتها معاها قاعده علي كرسي بمنتهي الهدوء وفجأه البنت بتقوم تنط رهف: بابااااا ماما بابا اهوه شوق بتسيب اللي في ايدها وتبص للي داخل عليهم شوق: محمود ازيك؟؟ سلمت عليه وهو فضل يضحك ويهزر مع رهف رهف شويه وسابتهم لوحدهم وقعدت تلون وترسم في مكانها بهدوء محمود: عامله ايه؟ شوق: انا الحمد لله كويسه؟؟ وانت؟؟ محمود: زعلان منك؟؟ ليه ما طلبتيش مساعدتي لما اتطردتي من الشغل!!! كده تقلقيني عليكي!! شوق :ما تخافش عليا انا كويسه محمود: شوق اسمحيلي يا حبيبتي اساعدك شوق: صدقني يا محمود لو احتجت لمساعده انت اول واحد هروحله... المهم شغلك عامل في ايه والدنيا عامله ايه؟ محمود: انا الحمد لله كويس ما تشغليش بالك بيا...شوق!! شوق: نعم محمود مسك ايديها الاتنين وقرب منها قوي وبعدها مسك وشها محمود: انا جنبك انتي مش لوحدك انتي فاهمه؟ انا موجود وعمري ابدا ما هتأخر عليكي فاهمه يا غاليه؟؟؟ طبعا كل ده وحازم واقف بره الباب سامعهم وشايفهم انسحب بهدوء وطلع مكتبه وجواه كميه غيظ وغضب ممكن يحرق كل حاجه ومره واحده مسك فاظه وحدفها علي الشاشه اللي فيه صوره شوق ومحمود بيضمها واتكسرت الشاشه مليون حته دخل علي يجري علي: في ايه اللي حصل؟؟ مالك؟؟ حازم: تترفد علي: تاني يا قاطعه بصوته كله: تترفد حالا علي اول مره يشوف حازم بالشكل ده وبالتالي انسحب من قدامه محمود مع شوق لسه بيتكلموا محمود: لو احتجتي اي حاجه ما تترديديش شوق: اتفقنا المهم صح عيالك ومراتك عاملين ايه؟ محمود: جوز عيال قرود يا شوق... ايه ده؟؟؟ مجننيني انا وسميه مش عارفين نقعد لحظه هاديه؟؟؟ شوق: ربنا يخليهملك ملك وعمر ربنا يحفظهم سلملي عليهم كتير مشي محمود وسابها علي فعلا رفد شوق من غير ما يبررلها اي سبب ومع انها حاولت تكلمه بس رفض حتي يكلمها لانه مش هيعرف يديها اي اسباب روحت بخيبه املها ومش عارفه هتعمل ايه تاني؟؟ هتدور علي اي شغل مهما يكون ورجعت تاني لدوامه الشغل وحازم وراها يرفدها من مكان لمكان لدرجه انها اتضطرت تشحت اكل بنتها دموعها مش مفرقاها ابدا وهو بيتفرج ومستلذ بعذابها بس للاسف دموعها زي سكاكين في قلبه؟؟؟ ومش عارف هو ازاي بيستلذ بعذابها وبيتألم ويتوجع اكتر منها؟؟؟ ازاي عنده الاحساسين دول مع بعض؟؟ شوق مش عارفه تعمل ايه؟ وتروح فين ولمين؟؟؟ فكرت تروح لمحمود لا لا محمود وقف جنبي كتير وعمل علشاني اكتر... وبعدين عنده عياله اولي يصرف عليهن... لا لا محمود لأ.... كفايه اللي عمله مش كل مره هجري عليه واخيرا قررت تعمل خطوه مجنونه وهيا وحظها راحت مش عارفه هيحصل ايه بس لازم تجرب يمكن تكون السنين خففت شويه حازم وراها مستغرب هيا رايحه فين؟ اخيرا وقفت قدام بيت ومتردده تطلع ولا لأ؟ واخيرا دخلت وده كان بيت ابوها خبطت وفتحولها ودخلت وحازم بره عايز يشوف ايه اللي هيحصل؟ شوق قاعده مستنيه لحظه خروج ابوها ويشوفها وخطواته اهي بتقرب وتقرب وهيا وقفت هيا وامها واخواتها وكلهن مستنين مواجهتهم واخيرا دخل واتفاجئ بيها وبصلها سيد:........ ونكمل بكره ياتري ابوها هيساعدها؟؟؟ حازم هيفضل يعذبها لامتي؟؟ توقعاتكم ShiMoOo | ||||||||||
|
| |
|
11-05-19, 12:28 AM
| #4 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه الثالثه شوق قاعده مستنيه لحظه خروج ابوها ويشوفها وخطواته اهي بتقرب وتقرب وهيا وقفت هيا وامها واخواتها وكلهن مستنين مواجهتهم واخيرا دخل واتفاجئ بيها وبصلها سيد: ايه اللي دخل دي هنا؟؟؟ شوق: بابا ارجوك سيد: اخرسي ما تنطقيش الكلمه دي ابدا ويالا اطلعي بره امها: ياسيد بس سيد: قسما بالله كلمه منك زياده لتطلعي معاها... اتفضلي بره راح سيد ناحيتها وبيشدها جامد يخرجها شوق: انا بنتك ارجوك سامحني بقي سيد ضربها بالقلم وقعها في الارض سيد: اخرسي بنتي ماتت من زمان يالا بره بيتي اخدها جرجرها من شعرها لحد ما خرج بره البيت ورماها في الشارع حازم واقف ومتابع اللي بيحصل وكان نفسه للحظه ينزل يطبطب عليها فضلت تعيط شوق كتير وقامت تروح لبنتها وقعدت علي الرصيف بعد ما تعبت من المشي وفضلت تعيط قلب حازم مش مستحمل عياطها وكسرتها بالشكل ده بس مش قادر برضه يعملها حاجه فضل وراها لحد ما روحت بيتها واختفت من قدامه فرجع بيته كان مكرم وساميه وشاهندا في البيت فاضطر يقعد معاهم بس كان تايه الجو مره واحده قلب وبدأ يمطر جامد والليله كانت برد جدا لدرجه مش طبيعيه طول الليل المطر بيمطر والبرق والرعد قالب الدنيا وكأن الطبيعيه حست بالاعاصير اللي جوه حازم فبتشاركه فيها اخيرا المطر وقف والشمس طلعت والدفا ملي المكان حازم نزل وشيئ لا ارادي وداه بيت شوق يطمن عليها فضل واقف كتير تحت البيت مستنيها تنزل تبدأ رحلتها اليوميه بس ما نزلتش علي: تلاقيها نزلت هنفضل نستني كتير؟؟ حازم: لا كفايه يالا واخيرا قرر يمشي ويدوب علي هيدور عربيته لمح رهف نازله الشارع تجري حازم: خليك هنا وهو نزل وراها وماشي وراها يشوف رايحه فين لوحدها كده ويسألها عن امها فين؟؟ دخلت رهف صيدليه وهو دخل وراها فالدكتور راح لحازم الاول يشوفه حازم: معلش شوفها الاول عايزه ايه؟ الدكتور: عايزه ايه يا قمر؟؟ رهف طلعت عشره جنيه وحطتها قدام الدكتور رهف: دي اللي معانا في البيت الدكتور مستغرب: ايوه وعايزه ايه؟ رهف: عايزه دوا لماما حازم قلبه بيدق بسرعه ووطي سألها: مالها ماما؟؟ رهف: ماما نايمه ومش بترد عليا ابدا وبتترعش من البرد وغطيتها بس برضه بتترعش حازم هنا اختفي كل التردد جواه حازم: رهف حبيبتي؟؟ خديني لماما رهف: انت تعرفني؟؟ حازم: مش انا عارف اسمك ومامتك اسمها شوق صح؟ انا زميلها وريني مالها حازم اخد رهف وراح وراها بيتها طلعت البنت وحازم وراها السلالم قديمه ومتكسره لدرجه ان حازم مكنش عارف يطلع وصلوا فوق السطح وهو وراها مستغرب ان في بني ادمين عايشين اصلا في مكان زي ده فتحت بابا قديم ودخلت وهو وراها لقي اوضه واسعه شويه سقفها جريد مبلوله كلها ميه فيها شعله وتربيزه عليها كام حله وكام طبق حازم مش مصدق ابدا ان ممكن حد يعيش فاق علي صوت رهف رهف : ماما اهي بص حازم لقاها نايمه في الارض علي فرش قديم حتي مفيش مرتبه قرب منها كانت بتترعش فعلا وسخنه جدا وزي ما تكون عندها حمي وكمان هدومها مبلوله والفرش مبلول حازم: هيا نامت هنا؟ رهف: ايوه مع اني قلتلها تنام معايا بس مش رضيت حازم: انتي نمتي فين؟ شاورت رهف علي تربيزه وتحتها فرش ومحاوطاها بكراتين علشان تحميها من البرد والمكان ضيق ميكفيش غير عيله يدوب حازم مش مستوعب ايه اللي عمله ده؟ هو ممكن وصلهم للحاله دي؟؟؟ هو عارف ان في ناس فقراء بس ما تخيلش انهم للدرجه دي او ان شوق تكون منهم!! حاول يفوق شوق بس مش بتفوق ابدا اتصل بعلي يطلعله بسرعه حازم: رهف هاتي هدوم لماما ناشفه رهف: مفيش غير دي واتبلت شاورت علي هدوم متعلقه علي حبل وفعلا مبلوله دخل علي ونفس دهشه حازم بالمكان وقسوته وبص لحازم يلومه بس من غير كلام حازم: تعال ساعدني ننقلها مستشفي علي: اشيلها؟؟ حازم: طبعا انا مش هقدر انزل بيها السلم ده... شيلها يا علي رهف: انت هتاخد ماما فين؟ حازم : المستشفي تعالي يالا حازم مسك ايد رهف وعلي نزل بشوق لحد العربيه وحطها وري وحازم دخل جنبها ورهف ركبها قدام جنب علي واخيرا وصلوا المستشفي واخدوها منه الدكتور: هيا فعلا عندها حمي بس كمان عندها انيميا شديده وكأنها ما بتتغذاش هيا حاليا نايمه واحنا هنحاول نرويها ونغذيها شويه ما تقلقش حضرتك حازم دخل يطمن عليها وفعلا الارتعاش وقف ورهف جنبها خايفه عليها ودموعها نازله حازم قعد قصاد رهف واتقابلت عنيهم في نظره طويله ومره واحده رمت نفسها في حضنه تعيط حازم اتفاجئ من ده ومكنش عارف يحس بإيه؟ بس اكبر احساس حاليا مسيطر عليه هو احساس بالذنب مش قادر يشيل منظر الاوضه اللي عايشين فيها ولا شكلها وهيا بتترعش من البرد وعمال يتخيل طول الليل والمطر والبرق والرعد وهو في بيته وهيا تحت المطر كده وبتغطي بنتها بكراتين حس ان هو كمان هيعيط مع رهف فشدها بعيد عنه ومسح دموعها بايديه حازم: ما تعيطيش ابدا يا قمر انا موجود اوعي تخافي تاني رهف: ماما هتبقي كويسه؟ حازم: اه هيا بس نايمه وبردانه من ليله امبارح بس خلاص هتنام شويه وتفوق وتبقي كويسه رهف: هيا ماما ممكن تزعل اني خرجت من البيت من غير اذنها وخرجتها هيا كمان؟ حازم: لا يا حبيبتي انا هفهمها تمام.... بقولك اكيد انت جعانه وانا كمان جعان ايه رأيك نفطر ونيجي تكون ماما صحيت؟؟ البنت فعلا جعانه لانها متعشتش رهف: انا جعانه قوي بس مش عايزه اسيب ماما حازم: هننزل ونيجي بسرعه قبل ما تصحي يالا حازم خرج ورهف جنبه ويدوب كام خطوه لقي رهف مسكت ايده مش عارف ليه كل لمسه من البنت دي بتخلي قلبه يدق يمكن لانه اتمني في يوم انها تكون بنته؟؟؟ وان شوق تكون مراته؟؟؟ ايه يا حازم تفكيرك ده فوق من الوهم ده فوق لنفسك؟؟ حازم اخدها وفطروا مع بعض واكتشف قد ايه هيا بنوته مؤدبه ورقيقه وجميله وذكيه وبتتكلم كانها كبيره مش عيله عندها سبع سنين اخدها حازم اشترالها هدوم كتير علشان يغير شكلها لبست وبقت قمر بس شعرها معرفش حازم يعمل فيه ايه فاخدها كوافير يسروحلها وخرجت بنوته زي بنات الغلاف حازم شالها واخدها ورجعوا علي المستشفي يستنوا شوق تفوق النهار كله نامته والليل رهف بتنام وحازم جنبها رهف: ممكن تفضل جنبي لحد ما انام!؟ حازم اتردد لانه عمره ما كان مع عيال صغيره قبل كده بس فضل جنبها واخدها في حضنه لحد ما نامت هو قام وقف يبص لشوق وضعفها ورقدتها دي فضل يراقب كل التفاصيل الصغيره... كبرت عن الاول دبلانه... ضعيفه... شعرها رجع طويل ،.. الابتسامه اختفت تماما من وشها ورجع لذكرياته سبع سنين فلاش باك صفيه: اهلا بحضرتك يا دكتور... اتفضل الدكتور: اهلا يا هانم انا المره دي جبتلك ممرضه شاطره وذكيه وهيا اللي هتعرف تراعي حازم بيه وهتخلي بالها منه وهتعرف تتعامل معاه صفيه: تاني ممرضات تاني؟؟ واكتر واحده بتفضل عشر ايام قبل ما تقول حقي برقبتي الدكتور: المره دي مختلفه وهتشوفي بنفسك... تعالي يا شوق اتفضلي... دي صفيه هانم والده الاستاذ حازم وزي ما سمعتي فقدت الامل شوق: ان شاءالله يا هانم اكون عند حسن ظنك وما تقلقيش انا بالي طويل جدا وهعرف اتعامل مع الاستاذ حازم ماتشيليش هم نهائي صفيه: لما نشوف تعالو طلعوا ودخلوا عند حازم صفيه: حازم الدكتور جه ومعاه الممرضه الجديده حازم: انتي ما بتشبعيش صح؟ ولا بتزهقي؟ هتمشي زي اللي قبلها فيستحسن لو تمشيها دلوقتي الدكتور: استاذ حازم حضرتك محتاج لحد يديلك الحقن والمحاليل في معادها ومحتاج رعايه طبيه فيا تفضل في المستشفي او تقبل بالرعايه هنا؟ حازم: او اطردك واقولك ولا عايزك انت ولا رعايتك صفيه: حازم؟ وبعدين؟ عيب كده؟ الدكتور: سيبيه انا مقدر ظروفه حازم: ايوه خدي المجنون ده علي قد عقله وهاوديه صح؟ الدكتور: يا ابني انت بس اعصابك تعبانه ومحتاج ترتاح فريح نفسك حازم: ارتاح؟؟ ما انا بقالي سنتين مرتاح... حد قالك اني كنت مثلا بجري ولا بشتغل ولا حتي بقوم من السرير ده؟ ما انا راقد اهوه ارتاح ايه تاني؟؟؟ سنتين وانا ماشي وري كلامكم وبتنقل من سرير لسرير والنتيجه في الاخر واحده... مشلول وراقد مكاني الدكتور: احنا اتقدمنا كتير احنا كنا فين وبقينا فين فتره بس كمان جسمك هيتقبل العمليه وهتقدر تتحرك حازم ضحك: مين بقي ضحك عليك وقالك اني هعمل عمليات تانيه؟ انا اكتفيت فاكتفوا انتو بقي مني الدكتور: با ابني حازم: اطلع بره وخد ممرضتك معاك الدكتور خرج وصفيه معاه والممرضه فضلت واقفه حازم: انتي مش شفتيهم بيطلعوا بره يالا وراهم الممرضه سحبت كرسي وقعدت قصاده الممرضه: استاذ حازم انا اسمي شوق ومش ناويه اروح في اي مكان حازم: انا بقولك اطلعي بره شوق: وانا بقولك ما تتعبش نفسك معايا لاني مش همشي مهما تعمل حازم مش عارف يعملها ايه؟ وهيتجنن منها حازم بينادي : عبدالمنعم.... عبد المنعم شويه ودخل واحد كبير شويه عبد المنعم: خير يا ابني؟؟ حازم: طلع البنت دي وارميها بره عبد المنعم بص للمرضه الجديده: انتي الممرضه الجديده؟؟ شوق: ايوه انا عبد المنعم: اعذريه يا بنتي اعصابه تعبانه ومش متقبل وضعه شوق: لا عادي ما تشغلش بالك بيا حضرتك انا هعرف اتعامل معاه حازم بذهول: علي فكره انا هنا وسامعكم انتو الاتنين ولا مش هتقبل وجودها ولا مش هتعرفي تتعاملي معايا ولا اعصابي مش تعبانه وانت يا عبد المنعم انت مطرود انت وهيا اتفضلوا بقي مع بعض بره عبد المنعم: ما تشغليش بالك بيه انتي ما تتخيليش انا اتطردت كام مره في السنتين دول حازم: المره دي بجد اتفضل بقي بره عبدالمنعم: انت ما تقدرش تستغني عني فاسكت حازم هنا حس بقمه العجز وكان عايز يعيط للدرجه دي مش عارف يعمل اي حاجه... هو فعلا ما يقدرش يستغني عن عبد المنعم لان ابسط حاجه ما بيقدرش يعملها... ما يقدرش حتي يسند نفسه ومحتاج حد يسنده ويشيله ويحطه حازم: انت عندك حق انا مقدرش استغني عنك قالها باستسلام رهيب... شوق حست بوجعه قوي شوق: هو ينفع يا عمي عبدالمنعم توريني البيت ده ولا ايه؟ سحبته وخرجت بره علشان تدي لحازم فرصه يستجمع نفسه وما يضعف قدامهم عبد المنعم: ليه خرجتي؟؟ انتي فعلا عايزه تشوفي البيت؟؟ شوق: لا انا بس بديله فرصه يتنفس وما يحسش بعجزه اكتر من كده عبدالمنعم: انا متفائل خير بيكي المهم تعالي اوريكي اوضتك طالما خرجنا اهي جنب اوضه حازم علي طول بحيث تكوني قريبه منه شويه وشوق دخلت لحازم حاطط ايد علي دماغه مداري بيها وشه شوق: انا سيبتك اهوه لوحدك شويه بحيث تتقبل وجودي حازم: مش هتقبل وجودك ممكن بقي تمشي؟ شوق: ريح نفسك... المهم بما اني هنا تحب تعمل ايه؟ حازم رفع ايده وبصلها: احب اتفرج عليكي وانتي خارجه بره البيت ايه رأيك؟ شوق: لا مش عاجبني غيره حازم: ايه رأيك تقومي تعلقي نفسك في السقف وتشنقي نفسك شوق بصت للسقف: لا برضه غيره حازم: طيب ايه رأيك لو تعلقيني انا؟؟؟ شوق بصتله وكان بيتكلم بجديه وده وجعها شوق: هو اغراء بس لا غيره حازم: لأ ليه؟ شوق: انت تموت وترتاح وانا اتعلق وراك صح؟ لا شكرا انا عايزه رقبتي حازم ابتسم لانها قالتها بطريقه تضحك بس الابتسامه اختفت في لحظه بس عطت شوق امل حازم: هاتيلي علبه السجاير اللي في درج التسريحه قامت قلبت عليها وهو وصفلها مكانها وجابتهاله وهو مستغرب حازم: شوفيلي كبريت او ولاعه شوق جابتله ولاعه من درجه برضه وجت تناولهاله حازم: ولعيلي بس الاول عايز اتعدل شوق قربت منه ورفعت دماغه شويه وبتحاول ترفعه لفوق علشان يقعد شويه وكان تقيل عليها بس اخيرا قدرت كان حاطط ايديه حواليها لحد ما رفعته شوق ولعت وقربت منه وهو مسك ايديها لحد ما ولع سيجارته واتقابلت عنيهم في نظره طويله تهكميه منه حازم: مش هتديني محاضره في اضرار السجاير؟؟؟ شوق: هو انت محتاج لمحاضره؟؟ اعتقد ان دي حريتك الشخصيه وبعدين انت مش عيل صغير وتقدر تحدد انت عايز ايه؟ حازم: وطالما انا مش عيل ما تسيبوني في حالي سيبوني اموت شوق: والله وانا مش موجوده اعمل ما بدالك بس مش وانا هنا اوك عايز حاجه تانيه؟ حازم: لأ شويه وشوق قاعده زهقانه شوق: ما تيجي نتمشي شويه في الجنينه الطويله دي حازم: نتمشي!!!! رجليكي فيكي وانزلي اتمشي شوق: بقول نتمشي مش اتمشي حازم: انتي مش واخده بالك اني مشلول ولا ايه؟ شوق: ماهو في ناس بيبقوا خارجين بالعربيه ويقولو نتمشي بالعربيه وغيرهم بيتمشي بالعجله احنا هنتمشي بالكرسي ايه المشكله؟؟؟ حازم : المشكله اني مش طايقك ولا قابلك ولا عايز اتمشي لان التمشيه دي عندي تبقي بالرجلين وبس شوق رفعت ايديها باستسلام: انت حر قعدت وسكتت وكل شويه تقول اقتراح وهو يرفضه جه معاد الحقن بتاعته وقامت جهزتهم وجاتله حازم: مش هاخد حقن شوق: وبعدين؟ حازم: مش هاخد انا حر ولا ايه؟ شوق قعدت مكانها: طبعا انت حر حازم استغرب منها لعدم اصرارها وخناقها معاها فضلت تقلب في مجله قدامها حازم: بس كده مش هتتخانقي معايا وتطلبيلي الامن يكتفوني ويدوني الدوا بالعافيه شوق من غير ما تبصله: لأ انت حر حازم: وبعدين؟ هتفضلي قاعده تموتيني بالملل كده؟ شوق: هو في احلي من القعده دي... جو رائع... تكييف.. استرخاء... بقلب في مجله... ولا بتوع السيما حتي... هو حد يلاقي الراحه ويقولها لأ؟؟؟ ده حتي يبقي اهبل حازم: اه انتي بقي جايه ترتاحي هنا..... للاسف ما تتعوديش علي ده لانك مش هتعمري هنا شوق استرخت في قعدتها وغمضت عنيها وكأنها هتنام شوق: طالما مش هطول يبقي سيبني بقي استمتع بالفتره البسيطه اللي هقضيها هنا... عايز حاجه اطلبها مش عايز اسكت وبطل تعمل زي العيال الصغيره الزنانه حازم معرفش يرد عليها فسكت بس نفسه لو يطولها ويضربها ويرميها بره فات ساعه وهيا قاعده قصاده وافتكر انها نايمه ففضل يراقبها واخد باله انها جميله وجميله قوي كمان شعرها اسود طويل بشرتها قمحاويه شويه ملامحها رقيقه قوي وفيها جمال طبيعي رهيب مش حاطه اي ميكب نهائي فتخيلها لو حاطه ميكب هيكون شكلها ايه؟ استغبي نفسه من تفكيره ده وقرر انه لازم يمشيها لانه مش عايزها قدامه ومش عايز يتحسر علي شبابه وهيا وجودها بجمالها ده بيحسره علي اللي ضاع منه واللي كان ممكن يبقي ملكه لو هو بصحته لازم يمشيها باي طريقه كان سرحان ومركز عليها قوي ففتحت عنيها شوق: هتفضل باصيصلي كده كتير؟؟ عاجباك؟ حازم ارتبك: لا طبعا انتي ايه علشان تعجبيني؟؟ انا بس بفكر هخلص منك ازاي؟؟ شوق: وعرفت ولا لسه؟ المهم هتاخد حقنك ولا لأ؟ حازم: مش هاخدها شوق: طيب لما تتعب وتحتاج للحقن والمسكن اللي فيهم ابقي قولي اديهملك حازم: معلومه صغيره ليكي... انا علي طول تعبان والحقن دي ما بتعملش اي حاجه شوق: متهيألك وعلي العموم اديك اهو هتجرب من غير الحقن وهتشوف بنفسك الفرق، لما تتعب قولي حازم تجاهلها وسابها وكأنها مش موجوده وفضل يقري في كتاب معاه او هو بيتظاهر انه بيقري لانه مقلبش الصفحه ولا مره شوق: انا هنزل اتغدي عايز حاجه مني؟ حازم: تروحي بيتكم شوق: اوكي هتغدي واجيلك نزلت هيا تتغدي وكان معاها عبد المنعم عبد المنعم: عمل ايه معاكي؟ شوق: بيحاول يطردني باي طريقه حتي الادويه مش عايزها عبد المنعم: وانتي وافقتيه؟؟ طيب كنتي ناديتيلي ونديهاله غصب شوق: لا طبعا... انتو ليه بتعاملوه انه عاجز مسلوب الاراده كده.. انتو بتجرحوه قوي عبد المنعم: ازاي؟ احنا عايزين نريحه وبنتمناله انه يخف شوق: طريقتكم غلط... انتو بتحرموه من ابسط حقوقه... كل حاجه بيعملها غصب عنه بتعاملوه كأنه عيل صغير مالوش اي حق يقرر اي حاجه ابسطها انه ياخد دوي او لأ؟؟؟ هو بيعترض لمجرد انه يقولكم انه موجود... ما ينفعش تتجاهلوا كل حاجه عايزها لمجرد انها مش علي هواكم... هو زعلان علي نفسه وانتو استكترتو عليه الزعل ده... كان لازم تسيبوه يزعل ويعترض ويرفض وبعدها هيهدي ويتحول الغضب اللي عنده لاراده تشجعه انه يحاول يخف بدال ماهو كاره كل حاجه وحتي العلاج رافضه كده عبد المنعم: والله عندك حق بس احنا لو سمعنا كلامه اول حاجه هيعملها انه هيطردك شوق: ماهو مش كل حاجه هنسمعها ضحكوا الاتنين شوق: يعني علي الاقل نديله حريه ومساحه شويه عبد المنعم: يا بنتي شوفي هتعملي ايه واحنا هنساعدك علي قد ما نقدر شوق :اول حاجه ترجعوله سيطرته علي نفسه... اللي يطلبه يتنفذ حتي لو مش هياكل او مش هياخد دوي او كدا هو مش عيل صغير... هيجوع هياكل... هيتعب هياخد الدوا هو بس محتاج يحس انه بيسيطر علي اي حاجه حتي لو الحاجات البسيطه دي وهو مع الوقت هيهدي وهيتقبل الامور بس انتو ساعدوه شوق خلصت اكل وطلعتله كان التعب بدأ يتملكه وللاسف بيكابر ويعاند وهيا قاعده بهدوء قامت جابت فوطه مبلوله وقربت منه مسحت وشه شوق بهدوء : هتاخد ادويتك؟؟ حازم شد الفوطه من ايدها ورماها بعيد حازم: لأ شوق رجعت مكانها بهدوء وفضلت قاعده تراقبه وهو بيتألم بصمت لحد ما وصل لمرحله مش قادر يستحمل اكتر من كده شوق قربت منه ووقفت جنبه شوق: لحد امتي هتكابر كده؟ انت تعبان وادويتك هتريحك هيا ايوه مش هتخليك تقوم وتقف بس علي الاقل هتخفف وجعك ده حازم: وايه الفايده؟؟ شوق: ما تتألمش كده ارجوك بقي شوق اتجرأت وايدها علي شعره بتحاول تطبطب عليه زي العيل الصغير ومش عارفه ليه ألمه بيوجعها هيا شوق: ارجوك سيبني اديكي الحقن هتخفف الالم شويه شيئ في صوتها خلاه يستسلم.. او يمكن حنيتها... او يمكن المه الشديد.. في حاجه هو مش عارفها خليته يسكت وما يرفضش هيا راحت جابت الحقن وعطتهاله حقنه وري التانيه وهو مغمض عنيه وساكت قعدت جنبه علي السرير بتمسح علي شعره زي العيل الصغير لحد ما لاحظت انه نام فقامت وخرجت اول ما قفلت الباب قابلتها صفيه صفيه: اخباره ايه؟ شوق: كويس هو نام حاليا صفيه: اخد ادويته؟؟ شوق: اه اخدها صفيه: ازاي؟ حازم كل يوم بنكتفه ونديله الحقن غصب عنه ولان الشيئ الوحيد اللي ينفع نديهوله هو الحقن فادويته كلها حقن!! ازاي اديتهالو لوحدك شوق: هو بيرفضها علشان انتو بتجبروه وانا ما جبرتوش رفض ياخدها سيبته لحد ما هو طلبها بنفسه لما تعب صفيه: افندم؟؟ انتي سيبتيه يتعب لدرجه انه يطلب الادويه؟؟ انتي اتجننتي ولا ايه؟ الادويه بمواعيد سيادتك تلتزمي بيهم.. هو يتكتف وياخد الادويه غصب عنه انتي فاهمه؟؟؟ مش هتقدري قولي اشوف غيرك شوق: هو محتاج يحس انه مسيطر علي حياته الاول وساعتها هو مش هيعترض لكن طول ما انتو بتجبروه هيفضل يرفض صفيه: انتي هتعلميني ازاي اتعامل مع ابني؟ انتي مرفوده اطلعي بره!؟ شوق: لا يا افندم العفو بس انا بجرب اسلوب جديد مع ابن حضرتك واهو جاب نتيجه ولاول مره بياخد الادويه من غير تكتيف صفيه: بانه يتعب لا طبعا صفيه نزلت واتصلت بالدكتور وجابته وحكتله الوضع كله الدكتور: والله يا مدام هيا فعلا عندها حق... النهارده من سنتين اول مره ياخد الادويه من غير تكتيف... اعتقد ان احنا نديها فرصه... اسلوبها صح احنا نخليه يرجع ثقته في نفسه وسيطرته اللي فقدها بحالته دي... علي الاقل في الامور البسيطه دي... اسلوبك صح يا شوق ميه في الميه!!! اعتقد انك انتي هتقدري تقنعيه يعمل العمليه... مطلوب منك خلال التلات شهور دول تقنعيه بالعمليه دي صفيه: انت متخيل ان دي هتقنعه؟؟ الدكتور: عندك حلول تانيه؟ صفيه: يعملها غصب عنه الدكتور: العامل الاساسي في العلاج هو العامل النفسي يا مدام... وبعد العمليه محتاج لشوط طويل في العلاج الطبيعي تقدري تقولي هتقنعيه ازاي؟ لازم يدخل العمليات بارادته ويقوم يقف بارادته احنا مضطرين نفضل مع شوق ونجرب طريقتها صفيه: نجرب احنا هنخسر ايه؟ وليكي عليا لو اقنعتيه يعمل العمليه ليكي مكافأه 100 الف جنيه هديه مني ليكي شوق: يا افندم انا مش عايزه مكافأت صفيه: ده تعبك اقنعيه واول ما يسافر هتاخدي الشيك والدكتور شاهد بينا اهوه شوق طلعت جنب حازم لحد ما صحي وشافها كانت قدام المرايه فارده شعرها وبتلعب بيه عجبه شعرها المفرود ده حازم: هتتجنني من المرايه؟؟ شوق: دي اشاعات طلعوها البنات الوحشه حازم: ايه هيا الاشاعه؟ شوق: ان اللي يقف قدام المرايه يتجنن حازم: وانتي شايفه نفسك حلوه بقي؟؟ شوق: انا تخطيت الحلاوه من زمان... انا بدر منور حازم: بدر؟؟؟ انتي عندك الأنا عاليه قوي... يا اما نظرك ضعيف.. ياحد ضحك عليكي وقالك كده؟ شوق: يا انا فعلا حلوه وانت كبريائك مانعك تعترف بالحقيقه دي وعايز تطردني لانك خايف تتسحر بحلاوتي وما تقدرش تستغني عني ابدا هنا حازم ضحك بصوته كله وتقريبا دي اول مره يضحك فيها خلال السنتين دول عبدالمنعم كان بره مع صفيه هيدخلوا عندهم عبد المنعم: حازم بيضحك.... سيبيهم يا مدام... اعتقد ان شوق مختلفه اديها فرصتها صفيه: انت شايف كده يا عبدو... انا عارفه انك بتعتبره زي ابنك وانت اللي مربيه عبدالمنعم: وانا بقولك اهو حازم بيضحك... شوق ضحكت: كلامي صح؟ صح؟ حازم: انتي مش بس الأنا عاليه!!! انتي مجنونه رسمي شوق: وانت عاقل خدت منه ايه العقل.... هتفرق ايه مجنون او عاقل؟؟ في الاول وفي الاخر كل واحد فينا نصيبه وقدره مكتوب هنستفاد بقي ايه نبقي عاقلين او مجانين... احنا بس بنقول يارب يخلينا نتقبل قدرنا ونعيشه بفرحه علي قد ما نقدر ارضي بقدرك واستمتع بكل اللي تقدر عليه حازم: استمتع اني بقيت مشلول وبقيت عاله علي الكل؟ شوق: انت بتملك خدم وحشم لو رفعت صباعك هيجروا حواليك حازم: باماره اني مش عارف اطردك؟؟ ولا باماره انهم بيكتفوني ويدوني ادويتي غصب عني؟ ولا باماره اني بحتاجهم علشان ادخل الحمام؟؟ هاه ردي شوق: انا عارفه ان وضعك صعب ومهما اقول ايوه مش هحسه زيك بس تخيل للحظه لو انت فقير!!! في غيرك مشلول وفقير... معندوش تمن الادويه اللي انت بتاخدها دي وبيفضل يتألم طول الوقت... معندوش ام بتخاف عليه وتجيبله كل يوم ممرضه ويطفشها... معندوش اللي يساعده ويدخله حتي الحمام... فتحمد ربنا انك احسن من غيرك ولا تبكي علي اللي ضاع منك؟؟ فكر بالطريقه دي هترتاح حازم: ممكن تسيبيني لوحدي؟ شوق: انا الليل جه وهروح خالص اشوفك بكره حازم: مش عايزك تيجي شوق: لا هاجي حازم: شوفتي بقي اني ما بسيطرش علي الخدم والحشم اللي انتي بتتكلمي عنهم؟ شوق: هو انت اول ما تسيطر هتسيطر عليا انا؟؟ وبعدين انت ما تعرفش امك عملالي راتب قد ايه؟ سيبني استرزق بقي.. سيطر علي الباقيين وبعدين انا لو مشيت هيجيبوا غيري... انا احسنلك حازم: احسنلي في ايه؟ شوق: انا بسيبك براحتك مش بتقول بيكتفوك... انا مش النهارده نفذت كل طلباتك... سيبني استرزق تمام؟ واوعدك اني مش هطلق سحري عليك... انت في امان يا ابني معايا حازم ابتسم: هسيبك تسترزقي بس قعدتك هنا مش هتكون سهله وانا مش هسهلها عليكي... وهخليكي تقولي حقي برقبتي وتجري من هنا شوق: بالراتب ده مش هجري حازم: هنشوف شوق: هنشوف تصبح علي خير شوق سابته ومشيت وهيا جواها احساس جديد مش عارفه معناه او تفسيره طلع النهار وهو صحي علي صوتها بتفتح الشبابيك والنور بيدخل حازم: يووووه اقفلي الشبابيك دي شوق: ما تقوليش انك هتقضي اليوم نايم كده حازم: احنا اتفقنا انتي تقبضي وتسيبيني انا في حالي شوق: اعمل بلقمتي طيب قوم يالا حازم: اطلعي بره وسيبيني انام شوق: الفطار اهوه افطر ونام قوم اتعدل شوق عدلته وهو بيعترض بس هيا متجهلاه جابت الاكل ويدوب هتحطه قدامه حدف الصينيه من ايديها وطيرها حازم: قولتلك مش عايز شوق: علي فكره انت كان ممكن ترفض باسلوب كويس حازم: ده اسلوبي لمي اللي في الارض واطلعي بره وقفلي الشبابيك عايز انام شوق سمعت كلامه وسابته وخرجت ورجعت بعد ساعتين كان صاحي شوق: طبعا سيادتك مجالكش نوم تاني... ادويتك ولا هتعمل زي امبارح؟؟ حازم ما ردش عليها فجابت الحقن وعطتهالو فضلت تحاول تقرب وهو بيصدها وحتي الكلام مش عايز يتكلم معاها فضلت الحرب مستمره بينهم لمده عشر ايام وهو مش بيسمع كلامها في اي حاجه وعلي طول بيصدها حاسس انها مختلفه بس رافض هو يستسلم او يحن بدأ يحن بس رافض يعترف... مايقدرش يستغني عنها بس ما بيقولش او يوضح... لو اتأخرت يتجنن بس عناد رهيب كانت واقفه قصاد المرايه وهو في ايده مجله بيقلب فيها حازم: بقولك في مقص عندك هاتيه عايز اقص صوره من هنا شوق جابت المقص وراحتله وعطتهولو حازم: تعالي شوفي الصوره دي ايه رأيك فيها؟ شوق قربت منه تشوف الصوره فمسكها حازم جامد تحديدا مسك شعرها اللي كانت عملاه ضفيره واحده طويله حازم: علشان تاني مره ما تنسيش نفسك المقص في ايد وشعرها في ايده وهيا مش مستوعبه هيعمل ايه؟ بصتله وهيا بتترجاه بس ماسمعهاش وفي لحظه كانت ظفيرتها في ايده وحدفهالها في وشها حازم: ورينا بقي جمالك الفتان... ولا اشتري غيره بالراتب اللي امي بتديهولك؟؟؟ شوق عندها حاله ذهول وشعرها يدوب عند رقبتها نزل علي وشها وهيا اصلا مش مصدقه رفعت وشها وبصتله واتقابلت عنيهم ومعرفش حازم يفسر نظرتها معناها ايه؟ او رد فعلها هيكون ايه؟ ونكمل بكره رد فعل شوق ايه؟ حازم هيفضل لامتي كده؟ توقعاتكم ShiMoOo | ||||||||||
|
| |
|
11-05-19, 12:30 AM
| #5 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه الرابعه حازم قص لشوق شعرها الطويل شوق عندها حاله ذهول وشعرها يدوب عند رقبتها نزل علي وشها وهيا اصلا مش مصدقه رفعت وشها وبصتله واتقابلت عنيهم ومعرفش حازم يفسر نظرتها معناها ايه؟ او رد فعلها هيكون ايه؟ فضلت شويه مش مستوعبه وبعدها بصت لضفيرتها اللي قدامها وبصتله بعنين مليانه دموع ومره واحده قامت تجري من قدامه حازم: شوق استني بس كانت نزلت جري من قدامه قابلها عبد المنعم في وشها بس معرفش يوقفها نزلت لتحت تجري وشافتها امه صفيه كانت بتتكلم في التليفون فلمحتها فقفلت التليفون ونادت علي شوق بس شوق بتجري فقامت وراها صفيه: انت يا شوق شوق وقفت وبصت للهانم صفيه: ايه اللي حصل؟ بتعيطي كده ليه؟ شوق بتعيط ومش بترد وعبد المنعم وصل عندهم عبدالمنعم: شعرها؟؟؟ الاتنين استوعبوا ان شعرها كان طويل عبدالمنعم: حازم اللي عمل كده؟ شوق شاورت بدماغها صفيه: وايه اللي ودي المقص في ايده؟؟ شوق بعياط: طلبه وقالي هيقص صوره وعطيتهولوا صفيه: يبقي تستاهلي واحمدي ربنا انه مقتلكيش بيه الاتنين بيبصولها باستغراب صفيه: بتبصولي كده ليه؟ حازم كل تفكيره غلط في غلط... ده ادويته رافضها.. الاكل بيرفضه... وساعات كتيره بيفكر يموت نفسه يبقي من الغباء ان اننا نديله مقص في ايده... المقص فين دلوقتي؟؟ ردي شوق: معرفش... معاه صفيه: لو ابني جراله حاجه انا هقتلك جريت صفيه علي فوق تشوف ابنها واول ما دخلت كان حازم ماسك المقص في ايد وشعرها في ايد ومش عارف هو ازاي عمل كده اصلا؟ حازم: انا بقيت مجنون بجد صح؟ صفيه: لا يا حبيبي لا حازم: ماهو مفيش واحد عاقل يعمل كده؟ انا قصتلها شعرها... انا قصيت شعرها... صفيه شدت من ايده المقص وشعرها صفيه: حبيبي هيا غبيه... ما تفكرش كده... انت تعبان بس ومحتاج ترتاح حازم بصوت عالي: انا مش تعبان علشان ارتاح... هيا راحت فين؟؟ صفيه: اعتقد انها لسه تحت حازم: طيب ممكن تجيبهالي؟؟ صفيه: سيبها دلوقتي وشويه وهيجبهالك... ولا ايه رأيك اشوفلك غيرها؟؟ حازم: لا مش عايز غيرها انا عايزها هيا هاتيهالي صفيه خرجت ونزلت لشوق اللي رفضت تماما تطلعله عبدالمنعم طلع لحازم وصفيه اخدت شوق وخرجت حازم: هيا فين؟ اوعي تكون مشيت؟ عبد المنعم: هيا حاليا محدش عارف هيا ناويه علي ايه؟ الست الهانم اخدتها وخرجت اعتقد هتوصلها حازم: كلمها وقولها تجيبها.. شوفها راحت فين بيها عبد المنعم: انا عايز افهم انت عملت كده ليه ولا ازاي؟ كنت بتفكر في ايه؟ حازم: مكنتش بفكر.. انا اصلا مش فاهم انا عملت كده ازاي؟ عبد المنعم اتصل بصفيه ورجع لحازم حازم: هاه هيا فين؟ عبدالمنعم: الهانم اخدتها وودتها كوافير بحيث يخلي شكل شعرها مقبول علشان تعرف تروح بيتهم بكره بقي هنشوف هيا هتيجي ولا لأ؟ حازم: طيب انا عايز اكلمها عبدالمنعم: معاك تليفون ليها؟؟ ولا انا اصبر لبكره شوق كانت رافضه تروح كوافير بس صفيه اجبرتها وودتها لاكبر كوافير... شكلها كان رائع بالشعر القصير صفيه: شكلك كده احلي بكتير بتعيطي ليه؟ المبلغ اللي انتي عيزاه حدديه شوق: انا متشكره مش عايزه عوض وزي ما حضرتك قولتي ده كان غلطي انا صفيه: هتيجي بكره ولا اشوف غيرك من دلوقتي؟؟ شوق: الله اعلم هشوف بعد اذن حضرتك روحت شوق وطول الطريق الخوف بيكبر جواها هتقول لابوها ايه؟ هتقولهم ايه في البيت وليه قصت شعرها؟؟ ابوها اصلا ما يعرفش بطبيعه شغلها دي؟ ابوها كل اللي يعرفه انها ممرضه في مستشفي لان دي كانت اول مره ليها تروح البيت لمريض وطبعا ابوها لو عرف مش بعيد يقتلها مش يحبسها روحت ودخلت علي طول لاوضتها وامها دخلت وراها واول ما شافت شعرها مفيش امها سميحه: يا لهوووي يا لهوووي يخربيتك عملتي ايه؟ عملتي ايه يا مصيبه؟ شوق: في ايه؟ عملت ايه؟ سميحه: شعرك فين يا مصيبه؟؟؟ شوق: قصيتو ايه المشكله شعري وانا حره فيه؟ سميحه: طيب ابقي اوقفي قدام ابوكي وقوليله كده وقسما بالله ليشرب من دمك.. عملتي كده ليه ردي؟ شوق: ماما بقي سميحه: انت بتكدبي عليا قولي الحقيقه دلوقتي شوق حكت لامها اللي حصل كله سميحه: برضه هتقولي لابوكي ايه؟ ابوكي لو عرف اقل حاجه هيعملها هيقعدك من الشغل شوق: هو ماله هو بشعري اصلا؟ سميحه: ابوكي راجل دقه قديمه وما بيعترفش باي بنت تقص شعرها... وبيكره حركات البنات ودلعهم وبيكره اصلا خلفتهم ومقتنع ان البنات بتجيب العار بس ومالهاش اي لازمه تانيه!!! وعلشان كده ربنا خلي خلفته كلها بنات... شفتي عمل ايه في اختك مروه لحد ما خلصت منه واتجوزت ده حتي يوم فرحها حرج عليها تقص شعرها.... واختك سمر كمان يدوب بالعافيه بتروح دروسها واقنعته بالعافيه علشان بقت في اعدادي اهي ... انتي بقي شوفي هتعملي ايه معاه؟ شوق: طيب انتي قوليله اي حاجه سميحه: علشان يرقعني يمين طلاق علي اخر الزمن انا ماليش دعوه محدش قالك تروحي بيوت... كل يوم هو يطردك وانتي برضه مصره تفضلي... تستاهلي عشر ايام كل يوم تحكيلي عن المهاذل اللي بيعملها فيكي وانتي مستحمله.. استحملي بقي للاخر شوق مستنيه رجوع ابوها ومش عارفه تقوله ايه؟ لبست ايشارب دارت شعرها خالص اختها سمر دخلت وهما بيتعشوا سمر: انا جيت بتاكلوا من غيري سيد: اتاخرتي كده ليه يا بت؟؟ سمر: والله ما اتأخرت انتو اللي بتتعشوا بدري قوي... انا يدوب مخلصه الدرس... بت يا شوق لابسه الايشارب ده ليه؟ ملحقتش ترد او تنطق كانت سمر شداه من علي دماغها ولانه ناعم جدا وقصير جدا فاتفرد علي وشها يدوب واصل لدقنها ابوها تنح اول ما شافه وسمر كمان وشوق قلبها هيخرج من مكانه فقامت بسرعه وبترجع لورا وابوها وراها بيبصلها بذهول سيد: ايه ده؟ شعرك راح فين؟ بقيتي ولد كده ولا ايه؟ ولا الموضه؟؟ ولا ايه؟ انطقي شوق: هو بيضايقني علشان طويل والدنيا بتبقي حر فقصيته سيد: نعم يا اختي قصيتيه نزل علي وشها بقلم وقعها في الارض من قوته سيد: انتي من اول يوم اتولدتي فيه وانا عارف انك هتجيبيلي العار بدأ يضرب فيها وامها مهانش عليها وقفت قدامه فاضربت هيا كمان سيد: غوري من وشي انتي سميحه: البت ما اذنبتش يا سيد اوعي بقي هتموتها سيد: تموت... انا بقولك اهوه البنت دي هتجيبلي العار سميحه: مالكش دعوه بيها بقي... شعرها وهيا حره فيه ابعد بقي... سايق عليك حبيبك النبي لتبعد سيد: عليه الصلاه والسلام بس قسما بالله غلطه كمان ليها وهتشوفي هعمل فيها ايه؟ سابلهم البيت وخرج... شوق مكانها بتعيط واختها جت جنبها بتعيط سمر: انا اسفه يا شوق مكنتش اعرف اسفه شوق: لا وانتي ذنبك ايه؟ فضلت شوق الليله كلها تعيط ومش عارفه هيا بتعيط ليه؟؟؟ مش اول مره ابوها يظلمها ويضربها؟؟ يمكن بتعيط علشان امل كداب جواها؟؟ او يمكن علشان لازم تفوق من الوهم اللي هيا فيه؟ عشر ايام بتحاول مع حازم وهو رافض حتي يكلمها ومهما تعمل بيرمي اللي تعمله في وشها؟؟ لازم تسيبه بقي!!! لازم تبعد!! كفايه بقي كده!! حازم طول الليل يفتكر من اول لحظه دخلت فيها عليه حنيتها... رقتها... تفهمها... محاولاتها كلها انها تسعده.. او انها تنفذ رغباته... حس انها لو مشيت هيكون خسر خساره كبيره... خساره اكبر حتي من رقدته دي.. اتمني بس لو ترجع وهو هيصلح الامور بينهم الصبح طلع وحازم اصلا معرفش ينام غير نوم متقطع مستني شوق هتيجي ولا لأ؟ شوق قامت ومتردده هتروح ولا لأ؟ قامت فطرت مع اهلها وابوها بصلها شاف وشها مكان القلم ازرق بس ما اهتمش ولا اتاثر... او تظاهر بكده فطرت وفضلت رايحه جايه... تفكر هتعمل ايه؟ تروح ولا كفايه كده؟ ؟ سميحه: هتعملي ايه؟ هتروحي المستشفي ولا ايه؟ شوق: اه هروح المستشفي يالا انا نازله راحت شوق ولقت نفسها قدام بيته مش قدام المستشفي واستغربت هيا ازاي جت هنا...قررت انها هتدخل تعتذر لصفيه هانم وتطلع علي طول دخلت وصفيه اول ما شافتها صفيه: اتأخرتي ساعتين ... معاد ادويه حازم بسرعه اديهملوا شوق فعلا طلعت لحازم تديلوا الحقن بتاعته اول ما دخلت هو بصلها بلهفه حازم: شوق انا اسف... سامحيني ارجوكي... انا مش عارف انا عملت كده ازاي؟ شوق تجاهلته وراحت لمكان الحقن جهزتهم وراحتله شوق: معاد حقنك حازم: بصيلي هنا شال من ايديها الصينيه اللي عليها الحقن وبصلها وهنا شاف اثر قلم ابوها حازم: ايه اللي في وشك ده؟ مين عمل كده؟؟ شوق: ما تشغلش بالك... الحقن حازم: مين عمل كده وعمل كده ليه؟ ردي عليا الاول شوق: ما تعملش نفسك مهتم لو سمحت... انت بس كفايه عليك تقعد طول النهار تعيط علي حظك وبس انت ما بتهتمش بحد او بتسأل في حد... انت بتجرح كل اللي حواليك بانانيتك وكأنك الوحيد في الدنيا اللي حصلتله مشكله وللاسف فلوس مامي وبابي معرفوش يحلوهالوا حازم بيبصلها بذهول وساب ايدها اللي كان ماسكها وشال القلق والخوف اللي كان علي وشه وحل مكانهم قناع من الجمود والبرود ساعتها شوق حست انها زودتها قوي معاه شوق: حازم انا قاطعها حازم: الحقن عطتله الحقن وحاولت تتكلم بس مالقتش كلام تقوله عبد المنعم دخلها وفضل يتكلم معاها شويه فضلت قاعده ساكته وحازم ساكت وسكوته بيوجعها شوق: عايز اي حاجه اعملهالك؟؟؟ حازم: لا متشكر شوق: انا اسفه علي الكلام اللي قلته حازم: حاجه قصاد حاجه عادي بقي شوق: بس انا قاطعها: انا عايز انام ممكن تطلعي بره؟؟ شوق: حاضر هساعدك كانت هتساعده يرقد بس هو رفض فطلعت بره نزلت الجنينه تتمشي كانت الجنينه جميله ومليانه ورود جميله قابلها عم خليل الجنايني عم خليل: ازيك يا بنتي... الباشا عامل ايه؟ كان علي طول بيجي يتمشي هنا ويشوف الورد ويقطف احلي ورد للهانم... كان مالي البيت ضحك وفرح... عمره ما زعل حد ابدا ويتعامل معانا كلنا وكأننا اهله مش خدم شوق: انت بتتكلم عن مين؟ حازم اللي فوق ده؟؟ عم خليل: ايوه هو... هو بس موجوع ومش عارف يعمل ايه؟ لكن هو انسان قوي... انسان حنين وجميل.. ما يستحملش ابدا يشوف حد تعبان او متضايق الا لما يساعده عمره ابدا ما اتاخر عن حد محتاج شوق: انت متأكد انه نفس الشخص؟؟؟ الانسان اللي فوق مفيهوش اي حاجه من الصفات اللي انت قولتها دي ابدا عم خليل: الوجع وحش وهو اتشل وقعد ودي صدمه كبيره هو مش عارف يتعامل معاها هو بس مش عارف شوق فضلت مع عم خليل كتير يحكيلها عن حازم وهو يحكي وهيا قلبها بيدق زياده.... طلعت لحازم تاني علشان معاد الحقن تاني جهزت الحقن وقربت منه شوق: الحقن!! حازم مد ايده لها تديله الحقن واخدهم وصمت مسيطر عليهم حازم كان عايز يشرب مد ايده يجيب الكوبايه مش طايلها فشوق مدت ايدها الاتنين مع بعض فالكوبايه وقعت في الارض واتكسرت حازم: انا مطلبتش منك تتدخلي شوق: انا وظيفتي هنا انت راحت جابتله ميه وعطتلوا يشرب وراحت جابت حاجه تنظف القزاز والميه اللي اتكبت شمرت ايديها بتنظف وحازم مراقبها وعينه عليها خايف انها تتعور لمت القزاز ونشفت الميه وهيا بتشيل القزاز لمحت قزازه تحت السرير مدت ايدها تجيبها عورتها شوق: ااهه حازم: في ايه اتعورتي؟؟؟ وريني شوق قامت وهتبعد تغسل ايدها حازم: بقولك وريني شوق قربت منه وهو شد ايدها وبمناديل مسح الدم شوق: ده جرح بسيط جدا عادي حازم: اسكتي انتي نظف الدم وكان فعلا جرح بسيط هنا هو لمح زي كدمه في دراعها فلمسها فشدت ايدها حازم: مش هتقوليلي مين عمل فيكي كده؟ شوق بصتله: انت عايز تعرف ليه؟ حازم: مش عارف بس عايز اعرف شوق: ابويا اللي عمل كده حازم: ابوكي؟؟ ليه؟؟ شوق: علشان هو مقتنع ان البنت ملهاش اي حقوق نهائي لحد ما تروح بيت جوزها.. ملهاش حق تتكلم او تتنفس او تعمل حاجه نفسها فيها غير لما تروح بيت جوزها قبل كده هيا مجرد عاله في بيته حازم: هو في حد لسه بيفكر كده؟؟ شوق: هو في حد ما بيفكرش كده؟ ؟ حازم: علي العموم انا اسف انا ماقصدش اني ازعلك وبصراحه انا مش عارف انا عملت كده ازاي؟ ممكن تقبلي اسفي وتسامحيني؟؟ شافت اعتذار حقيقي وحاجه تانيه في عنيه معرفتش تفسرها شوق: هقبل اسفك بس بشرط حازم: ايه هو؟؟ شوق: توقف الحرب اللي اعلنتها عليا وتوافق ننزل نتمشي في الجنينه شويه؟؟؟ حازم: هوقف الحرب وبس شوق: وهننزل الجنينه يالا حازم: مش عايز انزل شوق: يبقي انا لسه زعلانه حازم بنرفزه : اخبطي دماغك في الحيط شوق بصتله: مفيش فايده فيك... انا ماشيه مردش عليها وهيا مشيت وهو بعد ما مشيت اتضايق من نفسه جدا رجعت بيتها كان ابوها في البيت واول ما شافها اتخانق معاها سيد: انتي من هنا ورايح مش هتخرجي من البيت ولو خرجتي تداري شعرك ده فاهمه؟ امها سميحه مع جوزها لوحدهم سميحه: نفسي افهم انت ليه شوق بالذات حاططها فوق راسك وزاعق؟؟؟ اشمعني هيا؟؟ سيد: لانها حلوه... حلوه قوي كمان... بتمشي في الحاره الكل بيبصلها مفيش راجل بيرفع عينه من عليها وده بيجننيني... وعلي طول ببقي حاطط ايدي علي قلبي من ساعت ما تخرج لحد ما ترجع.،. واحساسي بيقولي ان جمالها ده هيوقعها في مصايب محدش يقدر عليها سميحه: وانت ليه ما بتقولهاش كده؟ ليه مخليهم يفتكروا انك بتكرههم وشايفهم عاله عليك؟؟ سيد: هو في حد بيكره عياله؟؟؟ سميحه: بناتك فاكرين كده سيد: لانهم اغبيه... عمري ما اتأخرت عن واحده فيهم ولا واحده طلبت طلب بايدي واتاخرت عنه... فكريني كده بحاجه نفسهم فيها وفي ايدي وانا اتأخرت.... انا بس بغير عليهم وخايف عليهم سميحه: وليه اتجننت علي شوق اما قصت شعرها؟؟؟ هيا حره شعرها وهيا حره فيه؟ سيد: علشان احلوت كده... احلوت اكتر ما هي حلوه... وهيا راجعه الرجاله علي القهوه هيتجننوا عليها.... كل راجل عينه تندب فيها رصاصه وده بيجنيني.... ياه لو تتحجب ولا تتنقب... اهو اللي زي شوق دي فرض عليها النقاب.... تصبر لما تتجوز تبقي تعمل ما بدالها سميحه: وايه اللي هيفرق لما تتجوز؟؟؟ سيد: انها تكون في حكم راجل.... نادرا ما حد بيبص لواحده علي ذمه راجل.... خلاص بيبقي جوزها عامل ساتر عليها لكن طول ما هيا بنت العيون عليها.... تاني يوم سيد حبسها ورفض انها تنزل ومهما امها تحاول تقنعه الي انه رافض تماما ينزلها تاني يوم صحي بدري ونادي علي عبد المنعم عبد المنعم: خير يا باشا؟؟ حازم: هاتلي الكرسي بتاعي وقعدني عليه عبدالمنعم بفرحه: حاضر يا ابني ثواني جابله الكرسي وقعده عليه واستني شوق تيجي بس انتظاره طال قوي معاد حقنه جه واتفاجئ بواحده غريبه داخله عليه نادي علي امه حازم: مين دي وفين شوق؟؟ صفيه: شوق ماجتش والدكتور بعت دي تديك الحقن حازم: انا مش عايز حد تاني صفيه: الله اعلم هيا اعتذرت ليه؟ شوف انت عملت معاها ايه؟ انتي اسمك ايه يا بنت؟؟ نجوي: اسمي نجوي يا هانم صفيه: طيب اديله الحقن واي طلب تنفذيه فاهمه؟ نجوي: فاهمه يا هانم صفيه: حبيبي انا نازله عايز حاجه؟؟ حازم: لا متشكر اتفضلي انتي نجوي جابت الحفن وبتديهملو وايديها تقيله جدا حازم: تصدقي بقالي سنتين باخد حقن واول مره يوجعوني بالشكل ده نجوي: ده علشان في ايدي الشفا يا بيه.... بس انت حليوه قوي... والله خساره تبقي حليوه كده وراقد بس عارف ولا يهمك يعني انت قمر برضه مز كده حازم قلق منها: متشكر ابعدي بقي كده بعدت شويه بس هو قلقان منها ومن مراقبتها اللي ما بتتنتهيش نجوي: مش عايز اي حاجه،؟ اي حاجه مهما تكون انت بس شاور حازم: لا متشكر مش عايز نجوي: يعني اي حاجه لو عايز مثلا تاخد دش انا ممكن اساعدك حازم اذبهل تماما: افندم؟؟؟ اخد دش؟؟؟ اطلعي بره وناديلي عبد المنعم اتفضلي نجوي: يا باشا بلاش عبد المنعم انا اهوه حازم: اطلعي بره يا مجنونه انتي... عبد المنعم... عبد المنعم جاله عبد المنعم يجري ودخله عبدالمنعم: خير يا باشا حازم: خرج البنت دي بره ولما يجي معاد الحقن تدخلها وانت معاها عبدالمنعم خرجها ودخل هو لحازم عبدالمنعم: في ايه؟ مش انت اللي طفشت شوق استحمل بقي نجوي... وبعدين مالها؟ حازم: عايزه تحميني عبدالمنعم مش مستوعب ومره واحده انفجر في هستيريه ضحك لدرجه خلت حازم يضحك هو كمان عبد المنعم: تستاهل... ده انا هخرج ادخلهالك اهليها تخلص فيك القديم والجديد... علشان لما ترجع شوق تبوس ايديها حازم: لا اخص عليك يا عبدو اهون عليك تسيبني مع نجوي؟؟؟ وبعدين انا هبوس ايدين شوق من غير نجوي بس اوعي تسيبني لوحدي معاها عبد المنعم فضل معاه لحد ما نام فخرج ولقي نجوي عبد المنعم: هو نام دلوقتي وفاضل ساعتين علي معاد الحقن نسيبه يرتاح نجوي: تمام اباشا ما تقلقش عبدالمنعم نزل يقضي كام مصلحه وطلع يجري علي صوت حازم بينادلوا بعد ما عبدالمنعم نزل نجوي دخلت لحازم فضلت مرقباه وهو نايم كان عاجبها قوي فقربت منه وفضلت جنبه ومره واحده باسته جامد فصحي لقاها فوقه فصرخ بينادي لعبد المنعم دخله وشدها من فوقه وخرجها بره وهو بيشدها نجوي: انا بحبه قوي... سيبني ارجوك ده روحي... بحبك يا حازم بحبك خرجها لحد بره الفيلا وهيا بتصرخ. بحبك يا حازم رجع لحازم: انا قولتلك ما تسيبنيش وتطلع صح؟ عبدالمنعم: اللي يمشي شوق تطلعله نجوي حازم: عمي عبدو انا لازم ارجع شوق اتصرف حازم خاف انها ما تجيش تاني عدي يوم واتنين وهيا ملهاش اثر وحازم رجع لكآبته تاني وبعد ما كان مستعد يخرج للدنيا قفل علي نفسه تاني رابع يوم فتح عنيه لقاها قصاده حازم: هو انتي بجد ولا انا بحلم شوق: ياتري لو حلم حلو ولا كابوس؟؟ حازم: بجد انتي هنا؟؟ شوق لمسته: انا اهوه حازم: بتعاقبيني؟؟؟ شوق: علي اساس ان وجودي يفرق من عدمه؟؟ حازم: انتي حاسه ان وجودك زي عدمه؟؟ شوق: لو باللي انا حساه يبقي عدم وجودي اهون عليك مليون مره من وجودي حازم: يبقي انتي عندك مشكله في جهاز الاحساس بتاعك شوق: طيب انا عندي مشكله صلحهالي حازم: ايامي كلها كانت شبه بعض وكانت سودا وظلمه وانتي دخلتيها غيرتيها وبدلتيها وحاسس اني شايف الدنيا بشكل جديد وحاسس اني ممكن اواجه اي حاجه واعمل اي حاجه بس شرط انك تكوني موجوده شوق: بجد يا حازم وجودي يفرق معاك؟ جاوبها بانه مسك ايدها وباسها وكده قلبها رقص من فرحته شوق: ايه رأيك لو تفطر في الجنينه؟؟ حازم :المكان اللي يعجبك عبدالمنعم ساعده لحد ما قعد علي الكرسي ونزلوا تحت الجنينه ولاول مره حازم يخرج بره اوضته لمكان غير المستشفي من سنتين حازم: ينفع اقولك حاجه؟؟ شوق: طبعا حازم: شكلك كده احلي بكتير جدا من شعرك وهو طويل.. من هنا ورايح عايز شعرك كده علي طول شوق: بس انا بحبه طويل حازم: وانا حبيته اكتر قصير شوق ابتسمت وبصت للارض وغيرت الموضوع شوق: عملت ايه في اليومين اللي فاتوا؟؟ حازم ابتسم وكان عبدالمنعم جه جايبلهم ساندوتشات وعصير عبدالمنعم: وقع في نجوي ضحك وحازم ضحك معاه وشوق مش فاهمه سابهم ومشي شوق: يقصد ايه عم عبدو؟؟ مين نجوي دي؟ حازم: دي علي راي عبدو اللي يزعل شوق تطلعله نجوي شوق: عملت فيك ايه؟ حازم: عملت فيا ايه؟ مش هقولك غير حاجه واحده... كانت عايزه تحميني شويه شوق ساكته ومره واحده انفجرت من الضحك حازم: بتتضحكي؟؟ شوق: هههههههه تستاهل نجوي فعلا... مين نجوي دي؟ اوعي تكون نجوي سهوكه حازم: نجوي ايه يا اختي؟؟ شوق بتضحك: سهوكه... دي ممرضه بتمشي تحب علي نفسها... بتحب اي حد تشوفه وخصوصا لو امور حبتين حازم: قولتيلي بقي؟؟؟ اوعي تكوني انتي اللي بعتيها مكانك؟؟؟ شوق: ايوه انا متضايقه منك بس مش للدرجه دي... المهم بس كده مشيتها؟؟ حازم: اقولك ايه بس؟؟؟ كنت نايم وصحيت علي حاجه كاتمه نفسي واللي اقدر اقولهولك ان عبدالمنعم شالها من فوقي وخرجها بره وانتي بتتضحكي ومش مخلياني عارف اتكلم شوق ميته من الضحك وحازم ضحك معاها لما افتكر اللي حصله صوت ضحكهم كان عالي قوي قوي عبد المنعم كان فرحان لكن صفيه متضايقه ان دي اللي عرفت تخرج ابنها من عزلته حازم بيشوف الدنيا من جديد مع شوق ولما بتغيب الشوق بيوصل لمنتهاه شوق بقي يومها بيبدأ وينتهي بحازم وبس اي حاجه تانيه ملهاش معني ابدا القلبين دقوا والحب عشش ما بينهم ووصل لاقسي درجاته بس محدش فيهم عنده المقدره انه يعبر عن حبه بصوت واضح او صريح ثلاث شهور فاتوا وهما غرقانين في الحب الصامت في يوم شوق اتاخرت شويه وحازم مستنيها حازم: هيا اتاخرت كده ليه؟ عبدالمنعم: الله اعلم يا ابني بس الغايب حجته معاه حازم: تفتكر ان ابوها ممكن يكون ضايقها علشان اتأخرت امبارح؟؟ عبد المنعم: جايز... بس انت طالما عارف ان ابوها صعب بتأخرها ليه؟ حازم: غصب عني... ما بحسش بالوقت معاها... وعايزها علي طول معايا عبد المنعم: انت حبتها... صح؟ حازم زي ما يكون اتفاجئ بالقرار ده... هو مكنش عارف ده اسمه ايه ومش عايز يسميه حب بس الحقيقه واضحه وصريحه... هو حبها..... للاسف حازم: حبيتها؟؟؟ بس ما ينفعش عبد المنعم: وليه ما ينفعش؟؟ ايه المانع؟؟ حازم: انا ما انفعش لوحده زيها عبد المنعم: ايه؟؟ اول مره اعرف انك بتفكر كده.. حازم: امال انت عايزني افكر ازاي؟ هيا فين وانا فين؟ عبد المنعم: عمرك ما كنت بتفكر في الفوارق الطبقيه دي ايه اللي جرالك؟؟ حازم استغرب: فوارق طبقيه؟؟؟ انت بتتكلم عن ايه؟ عبدالمنعم: مش انت بتقول انت فين وهيا فين؟ حازم: انا قصدي ان هيا ملكه جمال وانا نص راجل... راجل مشلول عبدالمنعم: انت بتقول ايه؟ شوق عمرها ما بتبصلك كده حازم: تبقي متخلفه وعايزه حد يفوقها عبدالمنعم: انت ليه بتقلل من نفسك؟؟ حازم: اقفل الكلام في الموضوع ده واياك تجيب سيره لحد شوق جت وطول النهار وهو مخنوق وبيبصلها بطريقه غريبه وكأنه اول مره يشوفها!! هو مش بس بيحبها هيا بقت جزء من روحه ومش ممكن يتنفس حتي من غيرها بس لازم يشيلها من تفكيره ويبعدها عنه ده الافضل ليها هيا ايه اللي يخليها ترتبط بواحد زيه كده عاجز!؟؟؟؟ شوق: هاه وبعدين؟ فاق علي صوتها حازم: وبعدين ايه؟ شوق: هتفضل سرحان ومخنوق كده لامتي؟ ومخبي عني ليه؟؟؟ ايه اللي خانقك كده؟؟ حازم : انا مش مخنوق وبعدين انتي مين انتي علشان اخبي عنك او اقولك.. انتي مجرد ممرضه هنا ما تنسيش نفسك كلامه وجعها قوي لانها بطلت تعتبر نفسها ممرضه واعتبرت نفسها مسؤله عنه وعن راحته حازم ندم علي كلامه ده بس قرر ما يتراجعش عنه شوق رجعت حازم لاوضته بصمت وخلصت يومها ومشيت وسابته هو طول الليل ندمان وموجوع بس هو بيحبها وما يرضالهاش ترتبط بواحد زيه!! تاني يوم شوق جتله وعاملته كممرضه وبس تتكلم علي قد المطلوب... تديله حقنه وادويته.. تجيبله اكله... تناوله حاجه وصمت تام حازم كان متخيل انه هيكون مبسوط كده او هيعرف يتعامل معاها عادي بس اكتشف انه غلطان انه مش قادر يتحمل سكاتها ده ابدا... مش قادر يتحمل بعدها عنه كده اخر النهار وصل لاخر صبره حازم: وبعدين معاكي؟؟ شوق: خير يا افندم في اي حاجه حضرتك محتاجها؟؟ حازم: ما تكلمنيش بالاسلوب ده شوق: انا مجرد ممرضه هنا وما ينفعش انسي نفسي حازم: شوق!!! شوق: افندم حضرتك حازم: انا اسف خلاص... ما تعاملينيش بالشكل ده... انتي اكيد عارفه اني ما اقصدش اللي قلته امبارح شوق: لا ما اعرفش... انا اعرف بس اللي انت بتقوله حازم: ليه؟ ما بتحسيش!! مش عارفه ان انا ما اقدرش استغني عنك شوق: كممرضه اه حازم: بطلي تعملي نفسك مش فاهمه شوق: انا فعلا مش فاهمه.... مش فاهمه انا ايه بالنسبالك... حازم: انتي كل حاجه بالنسبالي... انتي بقيتي حياتي شوق: امال بتبعدني عنك ليه؟ حازم: علشان ما ينفعش شوق: ايه هو اللي ما ينفعش؟؟؟ حازم بصلي حازم بصلها شوق: انا بحبك..... ب ح ب ك حازم فضل باصصلها وهو معندوش رد ليها شوق وقفت: والظاهر ان الحب ده من طرف واحد وانا مش عارفه افرق بين الحب والارتياح او الاحتياج انت بترتاحلي ومحتاجني بس مش بتحبني سوري يا حازم حازم: ممكن تقعدي وتبطلي التخلف اللي انتي بتقوليه ده؟ شوق مش عايزه تقعد فحازم شدها وقعدها غصب وفضل ماسك ايدها حازم: انتي غبيه ليه؟ شوفي نفسك ايه وشوفيني انا ايه؟ شوق وقفت تاني: انت مليونير وانا حته ممرضه لا راحت ولا جت قولتلك انا اسفه حازم شدها تاني ووقعها علي الكرسي لانها مش عايزه تقعد حازم: نفس التخلف بتاع عبد المنعم... انتو بتفكروا كده ليه؟ شوق: لان هو ده الواقع... انت مليونير وانا ممرضه حازم: ايوه بس انا ما بفكرش كده ولا اقصد كده شوق: امال تقصد ايه؟ حازم: اقصد ان انتي اجمل من انك تكوني حقيقه وانا مجرد واحد مشلول بتحبي فيا ايه هاه؟؟؟ وانا هقدملك ايه؟ ؟ هتخدميني وبعدين؟؟؟ هتستحمليني لامتي؟ شوق: انا عارفه انك غبي بس ما تخيلتش ان غباءك وصل للمرحله دي حازم: دي عندك حق فيها... غبي اني احب واحده زيك الف راجل وراجل يتمنوها شوق: لا يا غبي... انت غبي لانك مش عارف قيمه نفسك... انت عندك كتير قوي انا محتجاه منك حازم: عندي ماده... لو اللي انتي عيزاه فلوس ده اقدر احققهولك شوق: مش بقولك غبي... فلوس ايه اللي بتتكلم عنها... هيا من امتي الفلوس بتشتري السعاده ولا الصحه ولا الحب؟؟؟ انا عايزه حبك... عايزه قلبك.... عايزه حنيتك اللي بتخبيها... عايزه خوفك عليا... عايزه افضل جنبك انام واصحي في حضنك... عايزه افضل قريبه منك علي طول.... عايزه ابقي مسؤله عنك وانت مسؤل عليا... عايزه حبك يا حازم... ده اللي عيزاه تقدر تقدمهولي؟؟؟ حازم: دي كلها حاجات جميله بس مش واقعيه.... دي حاجات بتنتهي بسرعه وبعدها هتتصدمي انك مرتبطه براجل مشلول... مش هيعرف يكون مسؤل عنك... مش هيقدر يقوم بواجباته كلها ناحية حبيبته... مش هيعرف يغنيها عن شلله ده... وهتفوقي بواقع انك مرتبطه بواحد مشلول وفجأه هتحسي اني بقيت حمل علي اكتافك وبقيت عاله... وبعد ما يروح الانبهار وتشوفي الحقيقه مجرده هتقولي ايه الغباء اللي انا عملته ده؟ انا كان عقلي فين؟ شوق: لو في حد هيقول الجمله دي هتكون انت... اول ما تملكني وابقي عادي معاك هتقول ايه الغباء ده انا ازاي ارتبطت بحتة ممرضه لا راحت ولا جت... وتيجي والدتك وتديك كلمتين وتفوق حازم: انا من صغري لحد النهارده عمري ما بصيت لماديات ابدا... فاكيد لما احب مش هبصلها شوق: يبقي تسيبك من الصح والغلط والواقع والخيال وتخلينا في حاجه واحده بس حازم: ايه هيا؟؟ شوق: ان انا بحبك حازم: وانا كمان يا شوق بحبك شوق: بس كده حازم: لا مش بس ابدا... وبعدين؟؟ واخر الحب ده ايه؟ في رأيك انتي ايه اخرته؟؟ شوق: ما ينفعش تسألني سؤال زي ده حازم : في الطبيعي ما ينفعش لكن في حالتي دي يبقي لازم اسأل وانتي لازم تجاوبي... عايزانا نعيش حب افلاطوني وخلاص كده ولا عايزه ايه؟ شوق: انا عايزه اعيش معاك يا حازم!!! ده لو علي اللي انا عيزاه عايزه اشيل اسمك!!! عايزه افضل معاك حازم: بالظبط.... عايزه تشيلي اسمي.... عايزانا نتجوز..... وتفضل برضه حقيقه واضحه انتي مصره تتجاهليها شوق: ايه هيا؟؟؟؟ حازم: ان انا عاجز يا شوق... ما انفعش اكون زوج فهمتي بقي انا ليه كنت ببعدك عني... انا عاجز ونكمل بكره ياتري رد فعل شوق ايه؟ حازم هيعمل ايه؟ صفيه هتتفرج عليهم كده كتير؟؟؟ توقعاتكم ShiMoOo | ||||||||||
|
| |
|
11-05-19, 12:30 AM
| #6 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه الخامسه التفاعل كل يوم بيقل وده شيء مش عاجبني فزي ما انا بقدركم وبنزلها تقدروني وتتفاعلوا شوق كل محاولاتها انها ترجع لحازم ثقته بنفسه كانت فاشله هيا عارفه انه مش عاجز ابدا هو بس فاقد الثقه في نفسه وهيا محتاجه ترجعاله باي طريقه حبيبها محتاجلها وهيا لازم تقف جنبه حبه كان اكبر من اي شيئ... اي شيئ غيره مالوش اي معني نهائي مفيش حاجه غير حازم وبس مفيش غير حبيبها وبس في يوم كانت معاه الصبح وامه دخلت عليهم صفيه: حبيبي انا عندي النهارده اجتماع مع الجمعيه الخيريه بتاعتنا وهنقضي اليوم كله بره وهرجع اخر الليل... في اي مشكله؟؟؟ حازم: لا طبعا اتفضلي روحي صفيه: معلش يا شوق النهارده اجازه الخدم وعبدالمنعم هيرجع اخر النهار هو راح يزور حد مش فاكره مين... انتي مسؤله عن حازم لحد ما يرجع شوق: ما تقلقيش يا هانم ابدا صفيه:طيب يالا اسيبكم باي مشيت وسابتهم لوحدهم في الفيلا الطويله العريضه شوق: علي فكره انت بقالك فتره بعيد حازم: علي فكره ده الصح شوق: انا ماليش دعوه بالصح والغلط انا ليا دعوه اني بحبك وبس حازم: طالما مش هنقدر نتحمل تكلفه الحب يبقي مالوش لازمه شوق: انا اقدر حازم: وانا ما اقدرش وعلشان كده انسحبت شوق: انت كمان تقدر انت بس خايف تحاول... واقف بتتفرج من بعيد خايف تورط مشاعرك حازم: خايف اورط مشاعري؟؟؟ انا مشاعري اتورطت من زمان قوي شوق: امال خايف تكمل حبك ليه؟ حازم: في فرق بين خايف وبين انه شيئ خارج عن ارادتي شوق: بيتهيألك لكن كل حاجه في ايدك... انا كمان اهو بين ايديك ولانها بتحبه قربت منه وسلمتله نفسها علي طبق من ذهب................... اخر النهار قبل ما عبد المنعم يجي حازم: انتي ما تعرفيش انتي عملتي فيا ايه؟ ؟ انا بحبك قوي شوق: انا معملتش اي حاجه غير اني حبيتك وبس حازم: انتي رجعتيلي حياتي كلها شوق: تتجوزني يا حازم؟؟؟ حازم بصلها باستغراب ان هيا اللي بتتطلب منه ده شوق: ايه هو لازم يعني الراجل اللي يقولها؟ حازم: لا طبعا بس مستغرب لاني هضطر اصدق انك بتحبيني بجد شوق بصتله ومسكت وشه بايديها الاتنين شوق: انت لسه عندك شك في حبي يا حازم؟؟ بعد كل اللي حصل بينا ده؟ ؟ ازاي؟؟ حازم: ايه اللي حصل بينا؟؟ احنا ما حصلش بينا حاجه؟؟ شوق: لا طبعا حصل وحصل كتير كمان حازم: اهدي شويه... انا مش قصدي اقلل من قيمه اللي حصل لان معناه كبير قوي... انا بس عايز اسمعها منك كل شويه انك بتحبيني شوق: انا بحبك وبعشقك وبموت فيك وحياتي كلها بقت بين ايديك... انا مش بس سلمتك نفسي انا سلمتك كياني كله... وانت لسه مجاوبتش علي سؤالي تتجوزني؟؟؟ حازم: هو ده سؤال اصلا.... طبعا هتجوزك وهعيش علي طول في حضنك ومش هتبعدي عني تاني... بس انا عندي شرط شوق بعدت عنه فمسكها علشان ما تبعدش شوق: شرط؟؟ شرط ايه؟؟ حازم: ما تخليش شعرك يطول عايزو علي طول قصير ضحكوا الاتنين وهنا عبد المنعم جه وخبط ودخل كانت في ابتسامه صافيه حقيقيه علي وشوشهم عبدالمنعم: الوقت اتاخر عليكي يا شوق حازم ماسك ايدها ومش عايز يسيبها حازم: ولو مش عايزها تروح!؟؟ شوق: هجيلك بدري اتفقنا بس علشان بابا حازم بص لعبدالمنعم وهو مش فاهم هو عايز منه ايه؟ عبدالمنعم: مش فاهم انت عايز ايه؟ حازم: اطلع بره هكون عايز ايه؟ سيبنا لوحدنا شويه عبدالمنعم: ما انتو من الصبح لوحدكم حازم بصله فخرج علي طول حازم: ما تتأخريش عليا شوق: مش هتأخر ابدا يا حبيبي حازم: عايز افتح عيني الاقيكي شوق: طيب ما تصحاش بدري بقي سابته ومشيت وهو في قمه سعادته وكأن الدنيا فتحتله ايديها من جديد عبدالمنعم رجعله: انت مبسوط كده ليه؟ انا اول مره اشوفك كده؟ حتي قبل الحادثه ماشفتكش كده حازم: علشان دي اول مره احب يا عبدو اول مره..... عبدالمنعم: هيا انسانه جميله وتتحب الصراحه حازم: جدا... بقولك هاتلي الموب بتاعي واللاب عايزهم عبدالمنعم: اللاب؟؟؟ اشمعني؟ حازم: عايزو انا حر ممكن ولا لأ؟ عبدالمنعم جابله اللاب بتاعه وسابه لوحده.... النهار طلع وعبدالمنعم دخل لحازم يصحيه وجايبله فطار حازم: شوق فين؟؟ عبد المنعم: طيب فتح عينك الاول.... علي العموم شوق لسه ماجتش حازم: هو الوقت ايه؟ عبدالمنعم: الساعه 10 الصبح يعني لسه بدري هتيجي ما تقلقش حازم ابتسم وهو بيفتكر اوقاتهم امبارح حازم: عمي عبدو عبدالمنعم: أؤمرني حبيبي حازم: انا كلمت امبارح الدكتور وقررت اسافر النهارده هاعمل العمليه عبدالمنعم بفرحه: بجد يا حازم.. بجد؟؟ حازم: عايز لو في امل ولو حتي بسيط استغله... عايز اروح لشوق اطلب ايديها وانا واقف علي رجليا عبدالمنعم: ربنا يسعدك حبيبي... بلغ مامته قراره وفرحت بيه جدا بس مقلهاش انه ناوي يتجوز شوق فضل مستني شوق تيجي وللاسف مجتش وكل شويه قلقه بيزيد حازم: عبدو انا بفكر أأجل سفري لحد ما اقول لشوق هنا امه دخلت: اعملهالها مفاجأة طالما هيا مهمه قوي كده حازم: مش عايز اسافر من غير ما اشوفها الاول صفيه: انت حجزت خلاص وهيا بكره لما تيجي انا هقولها فين المشكله؟ المهم انا مش هقدر اسافر معاك حازم استغرب: مش هتسافري معايا؟؟ صفيه: مش هينفع اسيب الشغل والشركه من ساعت ما انت سيبتها وكل حاجه بقت فوق راسي حازم: مش هينفع تسيبي الشغل لكن عادي تسيبيني انا!! علي العموم براحتك صفيه: ما تزعلش مني انا طبعا عايزه اكون معاك حازم بتهكم: طبعا صفيه: انا غيرت تذكرتي وخليتها باسم عبدو.... عبدو هيسافر معاك حازم: عبدو عنده حياته هنا عبدالمنعم: مالكش دعوه بحياتي... مراتي واتوفت وعيالي وكل واحد في بيته... وانت اصلا بعتبرك زيهم وعمري ابدا ما هسيبك لوحدك حازم حس ان عبدالمنعم بيحبه اكتر ما امه بتحبه صفيه سابتهم حازم: وشوق يا عم عبدو؟ عبدالمنعم: والله ما اعرف يا ابني.... بس ما اعتقدش ابدا انها هتزعل لما تعرف انك سافرت تكمل علاجك بالعكس دي هتفرح جدا حازم: انت شايف كده؟ كنت حتي اجلته لبكره او اروحلها الاول اطلب ايدها عبدالمنعم: مش هضحك عليك يا حازم بس الحقيقه مش اي اهل هيوافقوا يجوزوا بنتهم لواحد..... حازم: مشلول كملها.... خلاص يبقي اسافر واقف علي رجليا وارجعلها واقف صح؟ عبدالمنعم: ده الصح وهيا هتتفهم ده... ما تقلقش هيا هتروح فين؟ وبعدين علشان تتطمن اكتر اكتبلها رساله وسيبهالها مع منيره.... انا اضمنلك منيره توصلهالها حازم: خلاص هكتبلها رساله فعلا عبدالمنعم جابله ورقه وقلم وسابه يكتب رسالته لحبيبته علشان تستني رجوعه مع وعد انه مش هيتأخر عليها حازم اخر النهار مشي هو وعبدالمنعم واتحركوا وحازم حاسس انه سايب قلبه بعيد عنه ومسافر شوق مقدرتش تروح لحازم لان ابوها كان رايح البلد يحضر فرح و أخد عيلته معاه وما تقبلش اي اعذار ابدا ورفض انها تفضل لوحدها في البيت لانهم هيباتوا يومين شوق كل لحظه بتعدي بساعه كان حازم واحشها قوي حازم وصل تاني يوم واول حاجه اتصل بامه حازم: ماما هيا شوق جت النهارده؟؟ احنا الظهر اهوه صفيه: انا الحمد لله كويسه حازم: انا اسف يا ست الكل اعذريني طبعا حضرتك اهم معلش صفيه: لا يا حبيبي ولا يهمك المهم لا شوق مجتش النهارده كمان حازم: معقوله ليه طيب؟ صفيه: انا ما اعرفش المهم عملت ايه طمني؟ حازم: هعمل العمليه بكره ان شاءالله صفيه: ان شاءالله تقوم بالسلامه بس انت ركز بس انك تقوم وسيبك من اي حاجه تانيه حازم: ربنا يسهل... انا هدخل العمليات زي الوقت ده فلو شوق جت كلميني... محتاج اكلمها يا امي.. لو جت في اي وقت كلميني صفيه: حاضر حاضر اي اوامر تانيه؟؟ حازم :العفو يا ست الكل العفو تاني يوم حازم بيجهزو للعمليه وهو متوتر وقلقان وخايف حازم: عمي عبدو انا خايف عبد المنعم مسك ايده: دي مش اول مره تدخل العمليات حازم: بس دي اول مره النتيجه هاماني قوي عبدالمنعم: لو علي شوق فهيا بتحبك انت ومهما تكون النتيجه هتفضل تحبك ما تخافش ابدا حازم: اتصل بامي يمكن تكون جت؟ عبدالمنعم اتصل بامه وعطاله التليفون صفيه: حبيبي خلاص هتدخل العمليات؟؟ حازم: ايوه يا ست الكل ادعيلي صفيه: يارب ترجعلي بالسلامه يا عمري كله حازم: شوق ما جتش يا امي؟؟؟ انا محتاج اكلمها صفيه: انا مش قادره افهم ايه اهتمامك ده بالممرضه دي يدوب بتتكلم والباب خبط ودخلت شوق ولقتها قدامها جت تتكلم فشاورتلها تسكت صفيه: يالا ان شاءالله خير هكلمك تاني سلام..... قفلت التليفون بسرعه عبدالمنعم: ايه؟؟ حازم: قفلت الظاهر حد من اصحابها جه وطبعا زي ما انت عارف دول اهم مليون مره من ابنها اللي هيدخل العمليات عبدالمنعم: ما تقولش كده هيا بتحبك... هيا بس حبها غريب حازم: ما علينا... شوق ما جتش عبدالمنعم: ما انت عارف ابوها وحركاته...، اول ما تطلع باذن الله هتكلمها خلاص حازم دخل العمليات وجواه خوف كبير من بكره شوق دخلت وصفيه قفلت التليفون شوق: اهلا بحضرتك يا هانم انا اسفه اليومين اللي فاتوا سافرت البلد مع عيلتي وما قدرتش اجي... بعد اذنك صفيه: استني هنا انتي رايحه فين؟ شوق: طالعه لحازم صفيه: حازم كده؟؟؟ علي العموم حازم مش فوق شوق قلبها بيدق بسرعه: مش فوق!؟؟ في الجنينه يعني هروحله صفيه: استني هنا حازم مش في البيت اصلا شوق بقلق: امال فين؟ صفيه طلعت دفتر شيكاتها ومضته وقربت من شوق وعطتهولها صفيه: سافر يكمل علاجه وسابلك ده عطتها الشيك شوق: ايه ده؟ صفيه: شيك ب 100 الف زي ما اتفقنا اتعابك ومتشكرين شوق قطعت الشيك شوق: اتعاب ايه انا عايزه اشوف حازم نفسه؟؟ صفيه: بقولك سافر وبعدين الشيك اللي قطعتيه ده قاطعتها شوق: انا مش عايزه فلوس منه صفيه: امال انتي عايزه ايه؟ حلمتي بايه اكتر من الفلوس؟؟ بيه هو شخصيا؟؟؟ صفيه ضحكت ضحكه عاليه بتريقه صفيه: شكلك فعلا حلمتي بيه!!! يا حبيبه قلبي انتي الممرضه رقم 30 مثلا هو انتي فاكره نفسك الوحيده شوق: لأ انا غيرهم صفيه.: بجد؟؟؟ غيرهم ازاي؟؟ شوق: هو بيحبني وانا بحبه صفيه: انتي تحبيه اه هو لأ طبعا انتي هبله؟ شوق: هو بيحبني صفيه: طيب بيحبك هو سافر عايزه ايه بقي؟؟ شوق: طيب خليني اكلمه صفيه: هو لو عايز يكلمك كان هيكلمك هو مسافر من تلات ايام وماسألش عليكي شوق: تلات ايام؟؟؟ فكرت شوق ان ده بعد اللي حصل بينهم علي طول صفيه: يالا يا شاطره العبي بعيد لاني مش فضيالك... عايزه الشيك ولا هتقطعيه؟؟؟ شوق: انا مش عايزه فلوسه لأ صفيه: وهو معندوش غير فلوس انتي بقي طمعتي في اكتر من كده تبقي غبيه اتفضلي يالا صفيه مشيتها من قدامها ويدوب خرجت وقفلت باب كان منيره جايه تجري وراها صفيه: استني عنا انتي رايحه فين؟ منيره: انا هروح لعم خليل بره كان عايزني صفيه قربت منها: ايه اللي في ايدك ده؟؟ منيره بتخبي الجواب وري ضهرها منيره: ده عادي جواب جايلي من البلد صفيه شدتها من ايدها وفتحته وقرته ""حبيبتي شوق ما تعرفيش انتي بالنسبالي ايه!! انا حبيتك اكتر روحي انتي اصلا بقيتي روحي... انا مهما اوصفلك انا بحبك قد ايه برضه مش هوفيكي حقك ابدا.... وخصوصا بعد اللي حصل بينا حبي ليكي بقي مالوش حدود انتي رديتيلي حياتي اللي خسرتها... انا سافرت اكمل علاجي وهرجعلك حبيبتي واقف علي رجليا... مش هتأخر عليكي ابدا... استنيني وانا هجيلك واقف وادق بابك وهاخدك من ايدك علي بيتي ومحدش ابدا هيفرقنا عن بعض تاني حبيبك حازم" " صفيه قرت الرساله وكلها غيظ ان ابنها حب الممرضه دي قطعت الرساله ورمتها في الباسكت وبصت لمنيره صفيه: قسما بالله لو حد عرف بالرساله دي لاخليكي حته لقمه العيش ما تلقيهاش فاهمه؟ منيره: بس حازم بيه صفيه: حازم المشلول ولا انا؟؟؟ اوعي تتخيلي اني هسمح لجربوعه زي دي تدخل بيتي بصفه غير انها تشتغل فاهمه؟؟ ولا افهمك بطريقه تانيه؟ منيره: فاهمه يا هانم شوق روحت بيتها دموعها سابقاها مش عارفه تفكر اصلا بس لأ هو بيحبها عمره ابدا ما يكون تفكيره كده هيا هتستني يرجع وتشوفه اكيد مش هيتاخر نهائي ماهو ما ينفعش تفكر غير كده ابدا ابدا ما تتحملش اي تفكير تاني هو بيحبها وبس حازم خرج من العمليات وعبدالمنعم فضل جنبه الدكتور: طبعا لما يفوق هنقدر نحدد مدي نجاح العمليه... عبدالمنعم: بس انتو متفائلين صح؟ الدكتور: اكيد طبعا.. انا اصريت ان حازم يجي هنا بالذات لان ده اكبر دكتور اعصاب في العالم كله انا نفسي جيت مع حازم علشان اكون معاه واتعلم شويه منه ما تقلقش عليه حازم فاق اخيرا وبيبص حواليه الدكتور: اخبارك ايه طمنا عليك حازم: انا تعبان الالم صعب قوي الدكتور: لا انت لازم تجمد ده لسه الالم الحقيقي ما بدأش المهم حاول تحرك رجليك او صوابعك اي حاجه حازم: مش قادر الدكتور: اي حركه ولو بسيطه حازم: الالم صعب راح تاني في النوم عبدالمنعم: هو ما اتحركش ده معناه ايه؟ الدكتور: معناه انه لسه بدري اننا نحكم وبعدين لسه ما فاقش كويس ما تقلقش عبدالمنعم: بس هو ما حركش حتي صوابعه الدكتور: ادي فرصه لاعصابه تشتغل ده احنا لسه بنقول يا هادي لسه فضل يوم بحاله نايم وصحي تاني وعبدو نادي علي الدكتور الدكتور: اعتقد كده احسن؟؟ حازم: ااااااه لا الالم بيزيد ااااااه الدكتور: معلش هديك مسكن بس حاليا انت لازم تحرك رجلك علشان نقدر نحدد العمليه نجحت ولا لأ؟ الدكتور اللي عمله العمليه جاله ومستني برضه يشوف نتيجه شغله حازم حرك صوابع رجله حركه بسيطه بس كانت بالنسبالهم حاجه كبيره جدا الدكتور: كده اقدر اقولك ان العمليه نجحت المهم حاليا الالم ما بعد العمليه هيكون لا يحتمل... فخليك جنبه الالم اصعب من ان حد يتحمله لوحده... فلو في حد مهم في حياته يستحسن انه يبقي جنبه حازم كل لحظه بتعدي بيموت فيها مليون مره... مكنش متخيل ان في وجع اكتر من اللي عدي عليه السنتين اللي فاتوا... مكنش متخيل ان في وجع زي ده اصلا يوم واتنين عدوا وهو بيموت حازم: عمي عبدو ارجوك انا عايز شوق... انا ممكن اتحمل اي حاجه وهيا معايا هاتهالي ارجوك... او حتي بس اسمع صوتها ارجوك حازم من كتر الالم دموعه نزلت وده كان قمه الالم لعبدالمنعم فاتصل بصفيه حازم شد منه الموبيل وبيكلم امه بصوت تعبان مخلوط بعياط مخلوط بوجع حازم: ارجوكي يا امي انا عايز شوق... هاتيهالي من تحت الارض باي طريقه اتصرفي... صفيه: وبعدين معاك يا حازم؟؟ حازم: ارجوكي يا امي اكيد ابوها مانعها تيجي انتي روحيلها اعملي اي حاجه ارجوكي صفيه: لا يا حازم ابوها مش مانعها تيجي هيا جت من يومين واخدت حسابها ومكافئتها ومشيت حازم تنح: جت؟؟ وما سألتش عليا!؟ صفيه: لا طبعا سألت وقولتلها انك سافرت وخلاص قبضت ومشيت حازم: امي انا مش فاهم... يعني ايه قبضت ومشيت؟؟ صفيه: ايه اللي مش فاهمو يا حبيبي؟؟؟ هيا كان ليها وظيفه قامت بيها قبضت تمنها مشيت ايه بقي اللي انت مش فاهمو؟؟؟ حازم: امي لأ... انا وهيا بنحب بعض انا بحبها يا امي صفيه: بتحب مين الممرضه دي؟؟؟ انت الظاهر انك اتهبلت حازم: انا محتاج اكلمها ارجوكي هيا كمان بتحبني صفيه: حازم حبيبي شوق كان مطلوب منها تقنعك تعمل العمليه وبس مهما يتطلب منها الامر ده وهتقبض في الاخر... الدكتور قال ان العمليه دي لازم تعملها بمزاجك ما ينفعش اجبرك عليها ووعدت شوق لما لقيتك تقبلتها انها تقنعك بالعمليه وهتقبض وفعلا فرحت لما انت سافرت وقبضت 100 الف ومشيت وهيا مبسوطه بس ما تخيلتش بقي انك انت غبي وهتحبها بجد حازم: لا لا انتي بتضحكي عليا... انتي ما بتحبيهاش صفيه: ايه اللي حصل بينكم في اليوم اللي قضيتوه لوحدكم؟؟ حازم: محصلش... امي انا لازم اكلمها بنفسي صفيه: حبيبي شوق طلبت انكم تقضوا يوم لوحدكم ولانك انت رافض تخرج فانا فضيتلكم البيت فلو في حاجه حصلت فدي مترتبه انت فاهم؟؟ شوق جت وقبضت ومشيت حازم رافض يصدق امه: طيب منيره فين؟ صفيه: انت عايزها في ايه؟ حازم: امي هاتي منيره منيره جت وكلمته وصفيه عينها عليها حازم: منيره انتي اديتي جوابي لشوق بنفسك؟؟ منيره ساكته مش عارفه تقول ايه؟ صفيه ضربتها علشان تتكلم منيره: ايوه يا باشا اديتهولها حازم: وبعدين؟ عملت ايه؟ منيره عينها متعلقه بصفيه: فتحته وقرته وضحكت وعطته للهانم حازم مش مصدق اللي بيسمعه صفيه: حبيبي ركز انت بس في علاجك واقف علي رجليك وارجع وانا اجيبلك ست ستها وبعدين يا حبيبي انا اسفه بس انت مشلول وهيا جميله مليون راجل يتمناها لجمالها ده هتبصلك ليه؟ الا اذا كانت قابضه وقابضه كتير قوي كمان صفيه مش عارفه ان كلامها ده بيدمر ابنها تماما حازم قفل التليفون وهو في حاله صدمه... الالم اللي جوي قلبه حاليا اكبر بمراحل من الالم اللي حاسس بيه فضل كتير ساكت مش مستوعب اصلا ايه اللي حصل؟؟ عقله زي ما يكون مشلول عن التفكير جسمه مشلول وعقله مشلول دخل عبدالمنعم شافه في الحاله دي... حاول يكلمه ما بيردش ولا بيتألم ولا بيتوجع نادي للدكتور اللي برضه معرفش هو ماله عطوله مهدئ علشان ينام يمكن لما يفوق يتحسن شوق قلبها مليان وجع راحت تاني لصفيه تترجاها تسمحلها تكلم حازم ولو مره وصفيه طردتها من بيتها حازم فاق وبيتألم بصمت ومهما عبدالمنعم يحاول يخليه يتكلم او حتي يتوجع الي ان حازم رافض تماما حتي الكلام عبدالمنعم اتصل بصفيه يفهم منها ايه اللي حصل وحازم ماله؟ حكالها حالته وان صحته اتدهورت تماما بعد ما كان بيتحسن وبيستجيب للعلاج صفيه قالتله علي اللي حصل وان شوق قبضت ومشيت بس عبدالمنعم ما صدقهاش اتصل بمنيره وقالت نفس الكلام تاني رجع لحازم وفضل رايح جاي يتكلم وحازم مش بيرد عبدالمنعم بزعيق: ماهو ما تقنعنيش انك مصدق انها ما بتحبكش... انا لو الدنيا كلها قالت انها ما بتحبكش مش هصدق... امك بتكرهها وانت عارف ده كويس... ليه ما افترضتش انها بتضحك عليك؟؟ حازم انتبه وبصله زي الغريق اللي عايز اي امل ولو حتي كداب يتعلق بيه عبدالمنعم: ايوه امك تعملها... تمنع شوق انها تكلمك علشان ما تتماداش في حبك ليها... حازم اخيرا نطق: ومنيره؟؟ عبدالمنعم: منيره خدامه لا راحت ولا جت وبكلمه من امك هتقول كل اللي تطلبه منها.. انا شوفت في شوق انسانه حبت بجد... مكنتش مجرد ممرضه لأ... شوق بتحبك يا حازم بجد واوعي تصدق حد يقولك غير كده تصدق في حاله واحده حازم بصله باستفسار عبدالمنعم: ان شوق نفسها تقولك انها ما بتحبكش... ساعتها بس صدق... شد حيلك بقي علشان ترجع لحبيبتك بسرعه امل جديد انتعش جوه حازم وبدأ يحاول يقف ويقوم علشان يقدر يرجع لحبيبته بسرعه بدأ علاجه الطبيعي وده كان قمه العذاب لدرجه انه بدأ يرفضه... مش قادر يخطي او يقف... بيوقفوه في الممر المخصوص وعايزينه يتحرك وهو اخره لحظات ويوقع فمابالك انه يتحرك!!! عبد المنعم: بص يا حازم تخيل ان شوق واقفه في اخر الممر ده ولما توصل للاخر هيا جايزتك... تخيل عينها.. تخيل حبها... تخيلها قاعده دلوقتي وامك لاعبه في دماغها ولا الله اعلم قالتلها ايه؟ ... شوق مستنياك قوم اوقف علشان نرجعلها احنا بقالنا شهر اهوه حازم الكلام اداله دفعه كبيره انه يحاول يوقف او يتحرك علشان خاطر حبيبته كل ما بيوقع بيفتكر اللحظات الخاصه اللي قضوها مع بعض... بيفتكر عنيها متعلقه بعنيه... فبيوقف تاني ويضغط علي نفسه اكتر واكتر.... لازم يوقف علشان يرجع لحبيبته الايام بتعدي وشوق الخوف والقلق بيكبروا جواها شهر بحاله كل يوم تروح تسأل عنه وبرضه ما رجعش لحد ما وصلت لمرحله ماعدش ينفع فيها الانتظار راحت لصفيه وتاني طلبت منها انها تكلمه ولو مره صفيه كان لازم تتصرف لانها هتستني حازم ومسيره هيرجع وان لقاها مستنياه هيرجعلها صفيه: ولو خليتك تسمعيه بنفسك ان هو مش عايزك وانه ما بيحبكيش؟؟؟ شوق: حازم بيحبني... حازم بيحبني صفيه: طيب ماشي انا هطلع اجيب تليفوني وهكلمه قدامك وهخليكي تسمعيه بنفسك بيقول انه ما بيبحكيش اتفقنا؟ صفيه طلعت اوضتها واتصلت بحازم صفيه: حبيبي انت لازم تشوفلك حل حازم: في ايه يا امي مالك بس؟؟ صفيه: الممرضه اللي جننتني دي حازم بلهفه: شوق؟؟؟ صفيه: شوق شوق شوق... لا طبعا مش شوق.... حازم بخيبه امل: امال مين؟ صفيه: العاشقه الولهانه اسمها ايه؟ نجوي حازم: ييييه امي اخلصي منها صفيه: هيا مصره انك بتحبها وان بينكم قصه حب رهيبه اقولها ايه؟ دي كل يوم تيجي وتقولي انها بتحبك.. عطيتها فلوس... طردتها.... برضه تقولي انك بتحبها وانها تسمعها منك بنفسها حازم: يووووه يا امي انتي عايزه ايه مني دلوقتي؟ صفيه: انا هنزل بالتليفون وهفتح الاسبيكر انت بقي سمعها انك ما بتحبهاش وانها مجرد ممرضه لا راحت ولا جت خلاص حازم: يووووه... حاضر اتفضلي صفيه: حازم انا مش عيزاها ترجع تاني حازم: حاضر يا امي انزلي صفيه نزلت وفتحت الاسبيكر زي ما اتفقت مع ابنها صفيه: هاه يا حازم قولي اعمل ايه في الممرضه دي؟؟ حازم: اديها قرشين ومشيها اتصرفي يا امي صفيه: حبيبي اديتها قرشين حازم: امال هيا عايزه ايه؟ صفيه: عيزاك انت يا حبيبي حازم: بقولك ايه انا مش ناقص... متخلفه دي ولا ايه؟ هو انا برضه هبص لممرضه!! اتصرفي معاها.. تلاقيها طمعانه في قرشين زياده صفيه: حبيبي بتقول انكم بتحبوا بعض وان بينكم حاجات كتيره حازم: امي انا مش فاضي لدلع الممرضات ومايصتهم دي... نسيت نفسها دي ولا ايه؟ ممرضه ايه اللي انا هحبها علي اخر الزمن!!! مش كل وقت حلو بيبقي حب... امي اتصرفي اديها قرشين اطرديها اعملي اللي تعمليه بس ما تكلمنيش في التفاهات دي... قال ممرضه قال... بقولك الممرضه جايه تديلي العلاج سلام بقي صفيه: ممرضه تاني يا حبيبي؟؟؟ حازم: لا يا ست الكل ممرضات هنا مختلفين تماما عن اللي عندك دول وبعدين دول عارفين اخرهم ما بيطمعوش زي اللي عندك... سلام دلوقتي هكلمك بعدين قفل حازم وشوق كانت هتنطق شوق: قفل صفيه: مشغول مش سمعتيه!!! اتفضلي بقي شوق: لا انا مش مصدقه انا عايزه انا اكلمه صفيه: انتي هتشتغليلي ولا ايه؟ انتي سمعتيه بنفسك وانا عملتلك قيمه علشان بس انتي ساعدتيه.... وتعبك تاخدي قيمته فلوس اكتر من كده ما تطمعيش اتفضلي شوق: حازم بيحبني عيطت شوق وهيا بتقول نفس الجمله دي صفيه: طيب حبيه يا حبيبتي براحتك في احلامك اتفضلي بقي شوق: انتي مش فاهمه حاجه صفيه: ومش عايزه افهم اتفضلي شوق: انا حامل........... ونكمل بكره ياتري رد فعل صفيه ايه؟ شوق هتعمل ايه؟ حازم هيعمل ايه؟ توقعاتكم ShiMoOo | ||||||||||
|
| |
|
11-05-19, 12:31 AM
| #7 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه السادسه عيطت شوق وهيا بتقول نفس الجمله دي صفيه: طيب حبيه يا حبيبتي براحتك في احلامك اتفضلي بقي شوق: انتي مش فاهمه حاجه صفيه: ومش عايزه افهم اتفضلي شوق: انا حامل........... للحظه صفيه مش مستوعبه ايه اللي بيحصل صفيه: نعم يا اختي؟؟؟ لا انتي زودتيها قوي كده... انتي جايه ترمي بلاكي علينا ولا ايه؟ حازم ابني مشلول فشوفي غيره ترمي بلاكي عليه... اطلعي بره وما تدخليش البيت ده تاني فاهمه ؟؟.... يكون في علمك لو ما شيلتيش حازم من دماغك هضرك انتي فاهمه؟ اتفضلي بره صفيه طردت شوق ورفضت تسمعها نهائي شوق الدنيا ضاقت بيها ومش عارفه تعمل ايه او تروح فين؟ وبرضه مقتنعه ان حازم بيحبها ورافضه تصدق كلام صفيه او اللي سمعته بنفسها منه؟؟؟؟ كام يوم عدوا وهيا في خوف وحيره وقلق وحازم كمان في نفس الحاله عبدالمنعم: هو انت ليه ما اخدتش تليفونها بحيث تعرف تكلمها؟؟ حازم: قصدك مين؟؟ شوق؟؟ عبدالمنعم: ايوه شوق هو في غيرها؟ حازم: مش معاها موبيل ورفضت اني اجيبلها واحد لان باباها رافض الفكره تماما ورفضت تديني تليفون البيت خافت... فمش بايدي عبدالمنعم: بس لو كان معاها موبيل كانت كل الامور وضحت حازم: الموبيل مع فئه معينه من الناس يمكن بعد كام سنه ينتشر اكتر من كده المهم هانت اهي كلها اسبوعين او شهر بالكتير وانزل مصر عبدالمنعم: اسبوعين ايه وشهر ايه ؟ وعلاجك؟؟ حازم: لا هكمل الكورس ده بتاع العلاج الطبيعي وانزل اطمن علي شوق وافهم الدنيا ماشيه ازاي ويمكن كمان اتجوزها وبعدها اجيبها واجي اكمل علاجي... حتي بعد ما اخرج من العمليه تكون هيا معايا... مش هقدر اعمل عمليات تاني لوحدي عبدالمنعم: علي اساس ان انا خيال؟؟؟ ماشي ربنا يسامحك حازم: لا والله يا عبدو مش اقصد انتي زي ابويا واكتر كمان... بس شوق غير عبدالمنعم: امم يعني انت بطبق المقوله ان وقفه الراجل بميت ست بس اذا جت الست يغور الراجل حازم ضحك: مش كده بالظبط بس اه تيجي هيا بس عدي اسبوع وشوق راحت تاني تسأل علي حازم رجع ولا لسه اول ما صفيه شافتها صفيه: يوووه احنا مش هنخلص بقي شوق: يا هانم انا مش عارفه اعمل ايه واروح فين؟ انا حامل من حازم فعلا صفيه: انتي حامل دي مش مشكلتي لكن تجيبي سيره حازم هقطعلك لسانك ده... حازم مين اللي يبص لواحده زيك؟؟ وعلي افتراض انه بص هيعمل ايه؟ انتي مش واخده بالك ان حازم مشلول ولا ايه؟ شوق: مشلول لكن مش عاجز وبعدين احنا بنحب بعض صفيه: تاني حب؟؟ هو انتي مش سمعتيه بنفسك؟؟ انا هطلبلك البوليس وهعملك محضر ازعاج وهخلي ابوكي يجي بنفسه يستلمك من الاسم وهقوله انك بتضايقيني وبتتهمي ابني انك حامل منه وهسيبه هو يتصرف معاكي شوق قلبها كان هيقف من الخوف وتخيلت للحظه ابوها ممكن يعمل ايه لو ده فعلا حصل؟؟؟ شوق: لا يا هانم ابوس ايدك صدقيني... اللي في بطني ده حفيدك صفيه: اخرسي... اطلعي بره قبل ما اطلب البوليس شوق: طيب خليني اكلم حازم مره واحده... مره واحده بس ومش هتشوفي وشي تاني صفيه فكرت للحظه وبعدها طلعت موبيلها واتصلت بحازم صفيه: ايوه يا حازم انت لازم تشوفلك حل حازم: خير يا امي؟؟ مالك بس صفيه: الممرضه بتاعتك دي حازم بلهفه: شوق؟؟؟ صفيه: لا طبعا المجنونه الولهانه هنا بقي فتحت الاسبيكر علشان شوق تسمع حازم بنرفزه: يووووه تاني يا امي؟؟ مش هنخلص بقي من السيره الزفت دي؟؟ مش معقوله يعني مش عارفه تتصرفي مع حته ممرضه لا راحت ولا جت؟؟؟ انا مش فاضي ورايق للعب العيال ده؟ اتصرفي بقي وما تكلمنيش تاني عنها صفيه: لا يا حبيبي اكلمك لما تيجي الممرضه دي وتقولي انها حامل منك يبقي لازم اكلمك حازم: ايه؟؟ حامل مني؟؟؟ بتهرج دي ولا ايه؟؟؟ انتي كمان بتسمعي لتخاريفها دي صفيه: يا ابني انا تعبت حازم: اطرديها اطلبيلها البوليس اتصرفي... بقولك ايه ناديلي علي خليل ومكرم الجنايني صفيه: ليه؟ حازم: ناديهملي صفيه راحت نادت عليهم وقفلت الصوت علشان حازم ما يسمعش لو شوق اتكلمت شوق: طيب خليني انا اكلمه صفيه: انتي تخرسي خالص كفايه حرقه الدم اللي انتي حارقاهالنا دي كمان عايزه تحرقي دمه هو؟؟ سيبه في اللي هو فيه خليل ومكرم الاتنين جم ووقفوا قدام صفيه صفيه: حازم عايزكم فتحت التليفون صفيه: حازم الاتنين قدامي والممرضه كمان والاسبيكر مفتوح حازم: انت يا راجل انت وهو.. قسما بالله لو الممرضه اللي قدامكم دي عتبت باب الفيلا تاني لاشردكم في الشوارع فاهمين؟؟ اياك تدخل البيت تاني تضايق امي فاهمين ولا لأ؟ ولو حاولت تدخل تطلبولها البوليس من بره مفهوم؟ الاتنين بصوا لبعض خليل: بس يا باشا دي قاطعه حازم: ما بسش مفهوم ولا اشوف غيركم يفهم؟؟ الاتنين: مفهوم يا باشا حازم: وانتي يا امي مش عايز اسمع حرف واحد تاني عنها وقبل ما حد ينطق حرف قفل السكه في اللحظه اللي شوق بتنطق فيها اسمه شوق: حازم حازم قفل بس ليه قلبه بيدق وصوت مين اللي سمعه ده؟ هو يدوب سمع حرف ح بس ليه قلبه هيخرج من مكانه؟؟؟ صفيه: سمعتوا البيه خرجوها بره شوق: انا مكلمتوش طيب انا اعمل ايه؟ صفيه: انا هعمل باصلي للاخر والشيك اللي سبق وقطعتيه هيدهولك غير كده ما تحلميش شوق: انا مش عايزه فلوس انا عايزه الستر صفيه: اللي عايزه الستر ما بترميش نفسها في حضن راجل وبعدها تيجي تعيط روحي للي عمل فيكي كده وعيطيله يمكن يحن لكن ابني ابعد من نجوم السما... طلعوها بره وما تعتبش البيت ده تاني سابتهم صفيه ومشيت وهما خرجوا شوق بره وهيا تايها مجروحه مش عارفه تعمل ايه؟ خليل: انا مش فاهم ده حازم بيه بيعزك جدا ازاي يقول كده؟ عمره ما طرد حد ابدا من بيته؟؟ معلش بكره يرجع ونفهم منه في ايه؟ معلش يا بنتي استحملي لحد ما يرجع شوق: وهيرجع امتي؟ وهصبر لامتي؟ انا حياتي اتدمرت تماما خليل: انا بنفسي هعرف منه ايه اللي حصل وده وعد مني صفيه سمعت الحوار ده من بلكونتها وحست ان خليل ده خطر عليها شوق مشيت مش عارفه تروح فين او تعمل ايه؟ وصلت قدام حارتهم وبتفكر تختفي وخلاص ومحدش يعرفلها طريق قعدت علي محطه الاتوبيس تفكر وسرحانه لحد ما الدنيا ليلت واتفاجئت بحد واقف قصادها # شوشو واحشاني ايه اللي مقعدك كده؟ شوق رفعت دماغها ومسحت دموعها وحاولت تبتسم بس ما عرفتش # انتي بتعيطي؟؟ في ايه؟ مالك؟ شوق: ما تشغلش بالك انت يا محمود المهم انت اخبارك ايه و سميه اخبارها ايه؟ محمود: سيبك مني ومن سميه وقوليلي الاول بتعيطي كده ليه؟ هنا انفجرت تاني من العياط... ساعات الانسان بيوقف العياط لكن بيكون مستني بس حد يقوله مالك وينفجر من تاني وما يعرفش يوقف عياطه وده اللي حصل لشوق ومحمود قدامها هيتجنن محمود: يا بنتي في ايه قلقتيني؟؟ عمي جراله حاجه؟ امك؟ اخواتك؟؟ في ايه؟ كل ده وهيا بتشاور لأ بدماغها شوق: انا لازم امشي من هنا... انا لازم اختفي ومحدش يعرفلي طريق سابته وماشيه وهو مسكها من دراعها وشدها ووقف تاكسي واخدها علي كافيه وقعدوا لوحدهم وهيا طول الطريق تعيط سواق التاكسي: هو الراجل ده خاطفك يا انسه؟؟ شوق بصتله ووقفت عياطها : ليه بتقول كده؟ سواق: اصلك مش مبطله عياط لو خاطفك قولي شوق: لا مش خاطفني ده ابن عمي محمود: عاجبك كده بطلي عياط بقي شوق مسحت دموعها ونزلوا وقعدوا محمود: احكيلي عايزه تهربي ليه وفي ايه اللي حصل معاكي؟؟؟ شوق رجعت تعيط تاني محمود: من غير عياط لو سمحتي ما تفرجيش علينا الناس شوق: علي فكره انا كده هتأخر وبابا قاطعها محمود: مالكيش دعوه بابوكي انا هتصرف معاه قوليلي في ايه؟ وما تخبيش عليا شوق اترددت للحظه بس محمود وهيا اصحاب جدا من صغرهم.. وعلي طول كان هو درع الامان والحمايه ليها.. والعيله كلهم عارفين انهم ما بيستحملوش علي بعض حاجه.. محمود كان اخ لبنات عم سيد وخصوصا شوق بس ده اللي العيلتين مش فاهمينه شوق حكت لمحمود كل اللي حصل من ساعت ما دخلت بيت حازم لحد ما هيا قاعده معاه دلوقتي هو سمعها بصمت تام واستناها لحد ما تخلص وتسكت محمود: يعني انا مش عارف اقولك ايه؟ شوق: حازم بيحبني علي صرخ فيها محمود: اخرسي ما تكمليش... يعني في الزمن ده ومع النت والتليفزيون والافلام وبرضه تيجي بنت متخلفه واحد يقولها كلمتين حلوين تقوم مسلماله كل حاجه... يعني انا قلت اكيد البنات المتخلفه دي انقرضت من التوعيه لكن اتفاجئ ان بنت عمي تربعت علي عرشهم... يعني شاب مستهتر حصلتله حادثه عمال يندب حظه وكل يوم امه تجيبله واحده جديده يقولك بحبك تصدقيه ده ايه كميه التخلف دي؟؟؟ للدرجه دي لغيتي عقلك؟؟؟ اهو رماكي رميه الكلاب وسابك وسافر يعني حتي مش هتعرفي توصليلو. هتعملي ايه بقي سيادتك؟؟؟ خدتي ايه من حبه؟؟؟ شوق بتعيط: انا حاسه ان في حاجه غلط حازم مش كده... حازم بيحبني يا محمود محمود هيتجنن من بنت عمه وعايز يضربها محمود: طيب بيحبك مصدقك... هو فين؟ سافر ليه؟؟ ليه ما قالكيش قبل ما يسافر؟؟؟ انتي اقل من انه يهتم انه يعرفك انه مسافر؟؟؟ انتي مجرد خدامه عنده بتريحه باي طريقه ان كانت... انتي بقي متخلفه وسلمتيله نفسك فدي مشكلتك انتي مش مشكلته هو.. انتي غبيه فده مش ذنبه.... وبعدين ده مشلول يعني حتي لو حبيتي ترفعي عليه قضيه انه اغتصبك او غرر بيكي نظره واحده ليه وهتتحبسي انتي... هيقولولك ده مشلول يعني انتي اللي روحتيله برجلك ومحدش ضغط عليكي... انتي بكل الاحوال والطرق متخلفه شوق رافضه تسمعه وبتهز دماغها شوق: حازم بيحبني محمود: فوقي واعرفي حاجه مهمه مفيش راجل بيحب واحده يعمل فيها كده..... اللي بيحب بجد ما بيمسكش حتي ايد حبيبته وبيحميها من نفسه قبل اي حد تاني... عمر ما كان الحب كده ابدا.... الحب يعني خوف علي حبيبتك... بتحبها هتروح بيتها وتدق بابها غير كده مش حب.... معادله بسيطه قوي بتحبها تروح بيتها ما بتحبهاش اتسلي واتمتع هيا بسيطه قوي بس نعمل ايه بقي للبنات المتخلفه امثالك... اول ما الشاب يقولها كلمتين حلوين تقول اه بيحبني وتسلمله كل حاجه... هاين عليا اقوم افضل اضرب فيكي لحد ما اقتلك لان هو مش غلطان.... هو مش غلطان شوق: خلاص انا هسيبلكم الدنيا واطفش محمود: وابوكي؟؟ وامك؟؟ واخواتك؟؟؟ وسمعه بيتكم؟؟؟ والعيله؟؟؟ طبعا الحاجات دي اخر اهتماماتك صح؟ شوق: طيب اعمل ايه انت قولي؟؟ محمود: ما حكيتيليش ليه عنه من الاول واخدتي رايي فيه ليه؟ جايه دلوقتي تقوليلي اعمل ايه؟ ما اعرفش انا تعملي ايه؟ ما اعرفش... شوق: بابا لو عرف.... محمود: دلوقتي خايفه من ابوكي؟؟ انتي لو ابوكي عرف هتاكدي نظريته عن البنات انهم فعلا بيجيبوا العار وبس... بس هو كمان غلطان... هو حرمكم من الحب والحنان يمكن لو كان شبعكم من حبه وحنانه مكنتوش تضعفوا قدام كلمه حلوه من اي راجل قومي اروحك وبكره اشوف حل المهم صح انتي حامل في قد ايه؟ شوق: خمس اسابيع محمود: يعني لازم نتصرف بسرعه قومي وربك يسهلها محمود اخد بنت عمه روحها واستسمح ابوها انه اخرها شويه وابوها تقبله لانه بيتمني....... تاني يوم شوق اتفاجئت بمحمود وعمها احمد ابوه عندهم في البيت مع ابوها شوق الفضول والقلق هيقتلوها خايفه لمحمود يقولهم ويحاول يتكلم بالعقل مش عارفه طيب تهرب ولا تروح فين؟ لازم تهرب بسرعه ويدوب هتتحرك لقت ابوها بيناديلها بصتله والخوف هيخليها تقع من طولها شوق: ن نن نعم سيد: مالك يا بنتي خايفه ليه؟ تعالي... النهارده اسعد يوم في حياتي شوق مستغربه: خير؟؟ سيد: محمود طلب ايدك وانا وافقت وفرحكم اول الشهر شوق مش مستوعبه اللي حصل وعقلها توقف عن التفكير ومره واحده وقعت من طولها ابوها نادي علي محمود والكل طلع يجري عليه سيد ماسك بنته ومحمود جاله وشالها وحطوها علي سريرها سيد: سمر روحي هاتي الدكتور اللي علي الناصيه بسرعه محمود خاف وقلق انهم يكتشفوا حملها محمود: لا مالوش لازمه هيا بس من فرحتها ما استوعبتش هاتي قزازه البرفان دي يا سمر محمود فوقها وفاقت فعلا وبصتله ويدوب هتنطق محمود: خضيتينا عليكي يا شيخه... يعني توقعت انك تعيطي من الفرحه مش يغمي عليكي... الكل حواليكي اهوه خوفتيهم وابوكي عايز يجيب دكتور شوق اتعدلت وفهمت: لا انا كويسه يا بابا احمد: خضيتينا يا شوشو قومي بقي خلينا نجهز للفرح.. انا اصلا مش فاهم هو متسربع علي ايه؟ اقوله نستني شهرين تلاته نجهز مش راضي و مصر الشهر ده... شوق بصت للارض وما ردتش وهما فهموا ده كسوف احمد شد اخوه سيد: تعال عايزك في كلمتين اخده وطلع بره وسمر سابتهم وخرجت هيا وامها شوق: انت ايه اللي عملته ده؟ هو ده الحل؟؟ محمود: عندك غيره؟؟ شوق: ايوه ان انا اهرب محمود: وتفضحي العيله كلها صح؟ بطلي انانيه بقي شوق: طيب وسميه؟ مفكرتش فيها؟ حبيبتك؟؟ محمود: فكرت فيها بس مش كل حب بيكمل... هيا هتتفهم او لو ما اتفهمتش هتكمل حياتها وعادي بقي المهم حاليا ان احنا نتصرف صح... شوق: انت بتدمر حياتك محمود: احنا متربين مع بعض وطول عمري انا مسؤل عنك ايه اللي اتغير؟؟ شوق: مسؤل عني كأخ مش تتجوزني محمود: بقولك ايه الكلام خلص وده الحل الوحيد وكويس اصلا ان العيله من زمان فاكرينا بنحب بعض وعلشان كده ما استغربوش اني مستعجل نتجوز بسرعه شوق: وهنتجوز فين؟ محمود: انا اشتريت شقه صغيره ويدوب مخلص توضيبها هتتفرش بس شوق: اشتريتها علشان سميه...، لا انا مش هوافق انا جربت جرح الحبيب ومش هرضهالكم انتو الاتنين سميه هتتجرح قوي وخصوصا انها ديما كانت شاكه ان في حاجه بينا محمود: الموضوع خلص خلاص واخر الشهر هنتجوز العيله كلها بتجهز للفرح والكل فرحان ومبسوط الا تلاته.. شوق.. محمود.. سميه سميه عرفت بخبر خطوبه حبيبها وكانت هتتجنن حست قد ايه كانت مخدوعه وغبيه قررت انها لازم تشوف محمود بنفسها راحتله شغله واول ما شافها كان عايز يجري عليها وياخدها في حضنه ويطبطب عليها بس معدش ينفع اخدها ونزلوا يتكلموا بعيد عن زمايله سميه: انا بس عايزه افهم.. انت اكدتلي ان مفيش حاجه بينكم محمود: مالوش لازم الكلام انا فرحي خلال عشر ايام سميه: من حقي عليك بس افهم... يعني انت كنت بتتسلي بيا ولا محمود: انا عمري ما اتسليت بيكي ابدا سميه: طيب فهمني... انا غلطت في حاجه؟ زعلان مني مثلا؟؟ طيب لو غلطت او زعلان قولي وانا اصلح غلطي او اصالحك ما تسيبنيش كده... طول عمرك راجل معايا بتتخلي عني ليه كده؟؟؟ نص كلامها مش مفهوم من عياطها محمود هيعيط هو كمان... دي حبيبته اللي قدامه ومنهاره من العياط سميه: طيب ما حبتنيش مثلا؟؟؟ ماهو انا لازم افهم... ريحني ارجوك محمود: لا ما حبتكيش... كنت فاكر اني بحبك وان اللي بيني وبين شوق اخوه بس مره واحده اكتشفت اني بحبها هيا وبس... خلاص كده ريحتك؟؟ انسيني بقي وشوفي طريقك وربنا يوفقك مع حد يستاهلك محمود مشي من قدامها لان ده كان فوق طاقته دي حبيبته اللي دبحها بسكينه بارده دمعه نزلت غصب عنه وهو بعيد مراقبها واقفه مكانها زي التمثال ولا قادر يكمل طريقه ولا قادر يرجعلها تاني شوق محتاجاله لان لو اتخلي عنها هتكون حياتها التمن لان عمه مجنون وهيقتلها ببساطه شوق اولي حاليا بمساعدته... مشي وما بصش وراه تاني سميه روحت بيتها في حاله انهيار واول ما امها فتحتلها الباب وقعت بين ايديها نقلوها المستشفي وهناك عرفوا ان عندها انهيار عصبي شوق عرفت اللي حصل لما راحت المستشفي تعزم صحباتها علي فرحها بناءا علي رغبه امها هناك شافت ام سميه وعرفت بحالتها امها كانت عارفه باللي حصل واول ما شافت شوق بصتلها بقهره ان دي اللي عملت في بنتها كده شوق جريت من قدامها وروحت علي بيتها واتصلت بمحمود يجلها وفعلا جالها وحكتله اللي حصل محمود: وبعدين؟ بتقوليلي ليه؟ شوق احنا فرحنا بعد اقل من اسبوع شوق: غلط غلط غلط مكانك مع حبيبتك مش معايا محمود: يمكن الزمن يعوضنا المهم دلوقتي خليكي في نفسك واوعي حد يعرف بالحمل محمود مشي و الدنيا ضاقت بيه راح للمكان اللي بيشوف حبيبته فيه وهناك عيط لوحده بصمت وقفل صفحه حبيبته ورجع بيته شوق تاني يوم راحت بيت حازم وسالت عليه وعم خليل قابلها وقالها ان لسه حازم ما رجعش شوق بتفكر: اه لو ترجع يا حازم وتصلح الدنيا كلها؟؟ محمود يرجع لحبيبته وانا ارجعلك والحياه تتضحك من تاني؟ بس طبعا دي احلام وامنيات اخيرا جه اليوم الموعود يوم الفرح الظهر البنات نازلين الكوافير ويدوب وصلوا شوق: بنات انا ورايا مشوار مهم الاول لازم اعمله سمر: يا مجنونه رايحه فين؟ شوق: ساعه بالكتير وهرجع سلام سابتهم ومشيت تروح بيت حازم مره اخيره حازم: ياااه حاسس ان بقالي سنتين بعيد عن مصر مش شهرين عبدالمنعم: علشان بس بعيد عن حبايبك... يالا بكره تشوفها حازم: مين قالك اني هصبر لبكره؟؟ النهارده هشوفها النهارده هروح لابوها اطلب ايدها.. النهارده شوق هتبقي معايا... خرجوا من المطار وركبوا عربيتهم شوق قدام الفيلا والباب مقفول بتنادي واخيرا طلعلها عم مكرم مكرم : والله ما جه يا بنتي شوق: طيب ما تسأل الهانم هيرجع امتي؟؟ مكرم: الهانم مفيش وبعدين ما تجيبلناش مشاكل بقي واتفضلي من هنا قبل ما الهانم ترجع وتشوفك شوق: طيب عم خليل فين؟ مكرم: عم خليل؟؟ ساب الشغل وسافر بلدهم اتفضلي بقي شوق مشيت تقدم رجل وتاخر رجل وقفت تاكسي وركبت ويدوب التاكسي اتحرك كان حازم قدام الباب ومكرم جري يفتحلهم البوابه حازم دخل الفيلا وكل الشغالين طلعوا يستقبلوه نزل عبدالمنعم وصفيه وفتحوا الباب لحازم صفيه: حمدالله علي السلامه في بيتك حبيبي الكل سلم عليه وباركوله وهو ماشي علي عكازه حازم سلم علي الكل حازم: ماما امال عم خليل فين؟ مش شايفه صفيه: طقت في دماغه مره واحده انه يسافر بلدهم ويقعد مع عياله وجنب احفاده وبعدين ده كبر قوي يا حازم ومعدش قادر حازم: مش قصدي يشتغل بس اللي يريحه المهم راتبه يفضل شغال يا امي صفيه: اكيد طبعا حبيبي من غير ما تقول... يالا ادخل ارتاح اكيد تعبان حازم: جدا... انا فعلا محتاج ارتاح شويه دخلوا كلهم وامه ساعدته لحد ما وصل لسريره وقبل ما تخرج حازم: امي صفيه: ايه يا حبيبي؟ حازم: النهارده هروح لشوق اطلب ايدها؟ صفيه: طيب ارتاح النهارده ونروح بكره؟؟ حازم: لا يا امي النهارده مش هقدر استني لبكره صفيه: ولو رفضتك؟؟ ولو لقيتها مش مستنياك ومش في بالها اصلا؟ حازم: ارجوكي مش هنرجع للموضوع ده تاني... انا عارف انا بقولك ايه؟ وبعدين شوق بتحبني فاهمه؟؟ شوق بتحبني صفيه: بتحبك بتحبك.... بس ما تبقاش تيجي تعيط لو لقيت نفسك عايش في وهم.... حازم: مش هعيط ما تخافيش انا واثق في حبي صفيه: طيب ارتاح دلوقتي واللي يريحك هنعمله سابته وخرجت راحت اوضتها اللعبه كلها ماشيه تمام زي ما هيا عايزاها فاضل بس تظبط معادها ان حازم يروح في الوقت المناسب هيا ما سابتش اي حاجه للظروف...هيا عارفه بمعاد الفرح لانها باعته اللي يراقب شوق ويجيب اخبارها... وهيا اللي حجزت لابنها تذكره الطياره... ومنيره ضمنت انها مش هتنطق ابدا وخليل مكانتش ضمناه لانه بيحب حازم زي حفيده ولا هينفع تسكته ولا تطرده ولا تديه فلوس فمكنش قدامها غير حل وحيد وافتكرت هيا عملت فيه ايه فلاش باك صفيه نازله من اوضتها زي المجنونه تزعق وتصرخ والكل اتجمع حواليها صفيه: انا اتسرقت... اطلبولي البوليس بسرعه خليل: يا هانم خير في ايه؟ ايه اللي اتسرق منك؟ ندور عليه الاول صفيه: ماشي ندور الاول... اتسرق مني طقم الماس قيمته ربع مليون جنيه اتفضلوا دورولي عليه الكل فضل يقلب في الفيلا ومالوش اثر صفيه: مالقيتوش حاجه صح؟ بلغ البوليس يا مكرم وخليهم يجوا بسرعه وفعلا البوليس جه وفضل يدور ومش لقينله اثر الظابط اخد صفيه علي جنب وطلب منها تقوله لو شاكه في حد؟؟ صفيه طبعا قالت انها شاكه في خليل لانه كبر وعجز وعايز يسيب الشغل باي طريقه وان دي مش اول مره حاجه تختفي منها بس مش بتدقق لانها حاجات بسيطه كل مره بتبقي فلوس بس المره دي مش هينفع تسكت لان الطقم ده كان اخر هديه من المرحوم جوزها رجاله البوليس بدؤا يفتشوا في الجنينه وفي اوضه مكرم البواب وخليل الجنايني كان اخر واحد وطلعوا حاجات كتيره مسروقه من اوضته الكل استغرب ان الراجل الطيب ده يسرق خليل: انا لايمكن اسرق ابدا... يا هانم قوليلهم اني لا يمكن اخون العشره كده؟ قوليلهم اني لحم اكتافي من خيركم واني ربيت عيالي بفضلكم صفيه سكت وما ردتش والراجل الطيب اتقبض عليه متلبس بجريمته اتسجن عم خليل ظلم وكده معدش تهديد لصفيه صفيه طبعا جمعت الكل صفيه: طبعا انتو كلكم عارفين ان حازم بيحب خليل جدا زي جده او اكتر واللي حصل ده هيوجعه قوي فياريت نسيبه يحبه ويحتفظ بفكرته الحلوه دي مكرم: ولما يسأل عليه؟؟ صفيه: هنقوله سافر بلدهم لعياله وعايز يرتاح بقي من الشغل وحازم هيصدق واياك حد يوسخ صوره الراجل ده في عنين ابني مفهوم؟؟؟ واتقفلت صفحه الراجل الطيب اخر النهار شوق كانت عروسه جميله بس للاسف عروسه حزينه بتبكي بدموع من دم محمود راح ياخدها من الكوافير واول ما اتقابلت عنيهم الاتنين عنيهم فيها دموع لان الاتنين اتحرموا من حبايبهم مسك ايدها واخدها وراحوا للكوشه ولفرحهم اللي اتعمل في الشارع زي اي فرح شعبي حازم جهز ولبس وامه كمان جهزت حازم: يالا يا امي ارجوكي بسرعه وانت يا عبدالمنعم يالا انت كمان جهز العربيه صفيه: انا جاهزه يالا عبدالمنعم: والعربيه قدام الباب... يالا عقبال ما ازفك ان شاءالله مع حبيبتك اتحركوا هما كمان يروحوا لحبيبته اللي طال انتظارها قوي واللي قلبه عايز يسبقه ويروحلها اخيرا وصل المنطقه وهو مش عارف اصلا فين بيتها عبدالمنعم: الظاهر ان في فرح في الشارع هتضطروا بقي تمشوا علي رجليكم صفيه: وماله نمشي يالا يا حبيبي لما نشوف اخرتها ايه؟ نزلوا التلاته وعبد المنعم وقف واحد ساله علي بيت سيد @ هو البيت اللي قدامه الفرح ده... انتو تبع العروسه ولا العريس؟؟؟ المهم البيت ده قربوا كام خطوه وهنا حازم شاف العروسه بيبصلها قوي ومش مصدق اصلا عنيه... اتمني انه لو كان اعمي في اللحظه دي وما يشوفش حبيبته في الكوشه مع راجل تاني مش قادر يتحرك من مكانه زي ما يكون اتدبس في الارض صفيه ابتسمت ان خطتها نجحت علي الاخر حازم وقف جنبه اتنين بنات صوتهم عالي # شوفتي اهم اتجوزوا @ دول حب قديم بقي؟؟؟ # يوووه دول قيس وليلي... دول من وهما عيال بيموتوا في بعض محمود ما يستحملش الهوا عليها.. ولو حد بس كلمها ولا عاكسها ياكله @ بحب انا قصص الحب اللي تنتهي بالجواز دي #يالا عقبالنا تعالي نباركلهم حازم مش مصدق ولا اللي سمعه ولا اللي شايفه عبدالمنعم كمان مصدوم جنبه... هو حس ان شوق حبت حازم... هو شجع بنفسه حازم وعطاله امل كداب يعيش عليه... يمكن لو كان سابه يزعل في المستشفي كان هيزعل شويه ويفوق لكن هو عطاله امل وكبره جواه ودلوقتي الامل اتقتل بطريقه متوحشه حازم يدوب هيتحرك لان قلبه بيصرخ جواه بس امه مسكته صفيه: انت فاكر نفسك رايح فين؟ حازم: لازم اكلمها... اباركلها علي الاقل دمعه نزلت من عينه صفيه: حازم انا طاوعتك وطاوعت جنانك كتير لكن لحد هنا ولأ والف لأ كمان... مش كفايه بهدله ولا ايه؟ ولا هيا فضايح وخلاص... ما انا قلتلك انها قبضت ومشيت انت حبيت تعيش في الوهم دي مشكلتك مش مشكلتها حازم: انا حبيتها وهيا حبتني... شوق بتحبني صفيه: وعلشان كده في اقل من شهرين بعد سفرك اتخطبت واتجوزت واديك سمعت بودنك البنات بيقولولك انه حب قديم... هيا كانت عايزه فلوس تتجوز بيهم وقبضت واهي اتجوزت حازم: شوق مش بتاعت فلوس صفيه: امال بتاعت ايه؟ استحملت اهاناتك ليه؟ استحملتك انت ليه؟؟ قصتلها شعرها ورجعت تاني ليه؟ اشمعني هيا يعني؟ انت عملت معاها اكتر ميت مره من اللي عملته مع الممرضات قبلها بس كان عندهم كرامه وبيمشوا لكن هيا كانت بتاعت فلوس وبس ومستعده حتي لو تبيع نفسها علشان الفلوس حازم افتكر كل لحظه مع شوق... افتكر لما قالتله انها بتقبض كتير من امه ... افتكر لما اترجته يسيبها تستمع بالفلوس والجو الرفاهيه ده؟؟ افتكر رجوعها بعد ما قصلها شعرها؟؟؟ افتكر كلام امه انها قبضت 100 الف ومشيت... افتكر كلام منيره لما قالتله انها استلمت جوابه وضحكت ومشيت بصلها كان البنات بيشدوها هيا وعريسها علشان يرقصوا مع بعض سلو ساعتها محمود مسك ايديها وضمها ورقصوا وهيا خبت وشها في كتفه وعيطت بس طبعا حازم شافها بتهرب من الدنيا في حضن حبيبها فجأه حس ان رجليه مش شيلاه وعكازم مش شايله وكان هيوقع في الارض عبد المنعم وامه سندوه ودخلوه العربيه وعبدالمنعم ساق ورجعه بيته حاول حازم ينزل بس ماقدرش يقف تاني علي رجليه مقدرش نهائي جابوله كرسيه وطلعوه اوضته وحطوه في سريره ورجع تاني لنقطه الصفر رجع مشلول من تاني ونكمل بكره مفيش اي اسئله توقعاتكم انتو ShiMoOo | ||||||||||
|
| |
|
11-05-19, 12:32 AM
| #8 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه السابعه بعد ما روحوا البيت حاول حازم ينزل من العربيه بس ماقدرش يقف تاني علي رجليه مقدرش نهائي جابوله كرسيه وطلعوه اوضته وحطوه في سريره ورجع تاني لنقطه الصفر رجع مشلول من تاني صفيه: حبيبي حازم في ايه مالك؟ حازم: انا وعدتك مش هعيطلك... ممكن تسيبيني لوسمحتي لوحدي ارجوكي صفيه: حبيبي يعني هيا مش مستاهله حازم: ابوس ايدك سيبيني لوحدي صفيه مع اصرار ابنها سابته وخرجت وجواها ارتياح رهيب انها عملت الصح كده.... لو في حاجه غلط عملتها هيا حبس خليل وهتحاول تصلحها تاني بس مش وقته... عبدالمنعم دخل لحازم اللي كان راقد علي سريره في الظلمه جامد ولا بيتحرك ولا بيتكلم ولا حتي بيعيط عبدالمنعم: انا اسف يا ابني سامحني... حقك عليا حازم: وانت عملت ايه علشان اسامحك؟؟ عبدالمنعم: انا كبرت الامل جواك والدتك قالتلك وانا مخليتكش تصدقها وزرعت الامل جواك انا السبب حازم: لا يا عمي انت بس كنت مخدوع فيها زيي مش اكتر... انت كنت مصدقها زيي... ما تتأسفش عبدالمنعم: طيب حاول تنام شويه وترتاح حازم: انام؟؟ النوم ده بقي حاجه بعيييده قوي... روح انت ارتاح وسيبني لوحدي لو ممكن عبدالمنعم عارف ان حازم في الحالات دي بيحب يفضل لوحده فسابه وخرج حازم راجع شريط حياته مع شوق وافتكر كل كلمه قالتها #لا عادي ما تشغلش بالك بيا حضرتك انا هعرف اتعامل معاه #هو انت محتاج لمحاضره؟؟ اعتقد ان دي حريتك الشخصيه وبعدين انت مش عيل صغير وتقدر تحدد انت عايز ايه؟ #هو في احلي من القعده دي... جو رائع... تكييف.. استرخاء... بقلب في مجله... ولا بتوع السيما حتي... هو حد يلاقي الراحه ويقولها لأ؟؟؟ ده حتي يبقي اهبل #طالما مش هطول يبقي سيبني بقي استمتع بالفتره البسيطه اللي هقضيها هنا... عايز حاجه اطلبها مش عايز اسكت وبطل تعمل زي العيال الصغيره الزنانه #تخيل للحظه لو انت فقير!!! #نت ما تعرفش امك عملالي راتب قد ايه؟ سيبني استرزق بقي.. سيطر علي الباقيين وبعدين انا لو مشيت هيجيبوا غيري... انا احسنلك # بالراتب ده مش هجري #... انت عندك كتير قوي انا محتجاه منك صوتها عمال يرن جوه دماغه ومش عارف يوقفه نهائي او يخليه يسكت افتكر مامته وهيا بتقوله انها قبضت ومشيت افتكر منيره وهيا بتقوله قرت الجواب وابتسمت وعطته لامك افتكر كتير وحس قد ايه هو كان غبي؟؟ قد ايه هو كان عايش في وهم كبير؟؟؟ وهم الحب صرخ بصوته كله: لااااااااااااااااااااا كفااايه حراااام كفايه بقي عبدالمنعم جاله يجري لقاه بيعيط فاخده في حضنه حازم بعياط: ليه عملت فيا كده؟ ليه كسرتني بالشكل ده؟ انا غلطت في ايه معاها؟؟ انا حبتها بجد؟؟ انا حبتها بجد يا عم عبدو امه واقفه بره الباب بتقنع نفسها ان اللي عملته ده هو الصح وان ابنها في محنه وهيعديها الصبح الدكتور جاله يطمن عليه واتفاجئ بيه كده وكان هيتجنن الدكتور: انا سايبك واقف ايه اللي جرالك؟؟ الدكتور حاول يعرف سبب الانتكاسه ايه بس محدش قاله نقلوه علي المستشفي وهو وافق يروح معاهم من غير حتي ما يعترض وكأنه مسلوب الاراده مفيش اي شيئ فارق معاه او هامو شوق محمود اخدها وروحوا اخر الليل واول ما دخلوا شقتهم واتقفل عليهم باب واحد شوق اتفتحت في العياط ومحمود محاولش يسكتها لان هو كمان كان عايز يعيط زيها دخلت اوضه صغيره ونامت فيها وهو دخل اوضته الرئيسيه وتخيل لو سميه هيا اللي هنا معاه شوق دموعها نزله... حازم كمان دمعه نزلت غصب عنه سميه بتعيط بألم... محمود بيعيط من فراق حبيبته وكانت ليله صعيبه علي الكل.... عدت الايام ببطء... شوق نفسها تخرج تسأل علي حازم لان لسه في امل بسيط جواها بس ابوها وامها مانعينها تخرج علشان عيب العروسه تخرج حازم فضل فتره في المستشفي ومره واحده قرر يسافر تاني صفيه: هتسافر تاني ليه؟ حازم: عايز اقف علي رجليا... مش هرجع غير وانا واقف... عبدالمنعم جهز نفسك لو هتسافر معايا؟؟ عبدالمنعم: طبعا يا ابني هسافر معاك حازم اخد عبدالمنعم وسافروا شوق اخيرا جوزها خرج لشغله وهيا كمان رجعت شغلها واول يوم تخرج فيه جريت علي بيت حازم وهناك قابلها عم مكرم شوق: هو حازم قاطعها مكرم: مشي خلاص شوق باستغراب: مشي؟؟ هو كان هنا؟؟ مكرم: بقاله يجي اسبوعين هنا ويدوب مشي بالليل شوق: اسبوعين هنا...وما سألش ولا مره عليا؟؟ مكرم: ويسأل عليكي ليه يا هانم؟؟ اذا كان بنفسه امرنا ما ندخلكيش يبقي يسأل عليكي ليه؟ شوق هنا اي امل ليها اتدمر ومات اسبوعين بحالهم يا حازم وما تسألش عليا؟؟؟ ليه يا حازم كده؟ ده انا حبيتك حازم كان جواه اصرار وعزيمه انه لازم يكمل ولازم يقف تاني علي رجليه... مش عايز يبقي ضعيف كده... مش عايز شفقه حد تاني... مش عايز حد يستغله تاني... عمل عمليه تانيه واتحسن بيها ورجع لعلاجه الطبيعي 7 شهور بحالهم فاتو من ساعه ما رجع تاني عبدالمنعم: مالك يا ابني سرحان في ايه؟ حازم: انا هنزل مصر عبدالمنعم: اشمعني؟؟ حازم: عايز اشوف شوق مره اخيره... عايز اسألها ليه سابتني وليه اتخلت عني كده؟ محتاج اجابه نزل حازم لمصر تاني علشان يبرد النار اللي جواه شوق حملها كبر وعايشه مع محمود بابهم مقفول عليهم بس الاتنين بقوا اغراب جدا بعد ما كانوا اصحاب جدا اتفق محمود مع الدكتوره اللي هتولدها انها تقول ان البيبي ابن سبع شهور لان اهل مراته صعايده وهو غلط مع مراته قبل الجواز والدكتوره وافقت تساعده طالما هما متجوزين علي سنه الله ورسوله اخيرا جه معاد الولاده وشوق كانت في منتهي تعبها وبتولد والدكتوره جت تكشف عليها شوق: لو سمحتي ولديني قيصري الدكتوره: ليه انتي امورك طبيعيه؟؟ شوق: انا عايزه قيصري ارجوكي الدكتوره مع اصرار شوق ومحمود كمان اتدخل بناءا علي رغبه شوق وطلبوا منها تولدها قيصري فوافقت وفعلا ولدتها قيصري واخيوا ولدت بنوته صغنونه ما تتعداش الاتنين كيلو نتيجه ضعف شوق وده ساعد ان الكل يصدق انها فعلا بنت سبع شهور بعد ما شوق فاقت الدكتوره دخلتلها وكانت هيا ومحمود لوحدهم فدخلت وقفلت الباب الدكتوره: انا عايزه افهم بقي ايه اللي بيحصل ده؟ محمود: خير يا دكتوره ماهو انا فهمتك الوضع كله الدكتوره: لا مفهمتنيش حاجه.. انتو ليه اصريتوا انها تولد قيصري؟؟؟ انا اقولكم... لان سيادتك لسه بنت محمود :ايه؟ بنت؟؟ ازاي يعني؟ امال الحمل ده ايه؟ الدكتورة: انت بقي وضعك ايه؟ محمود: ازاي بنت وازاي حامل؟؟ فهميني انتي الاول؟؟ الدكتوره: هو ممكن تكون مراتك غلطت مع حدوانت ابن عمها فاتجوزتها مثلا تستر عليها وبالتالي ما لمستهاش صح؟ سيناريو مقبول محمود: لو سمحتي فهميني حضرتك الاول الدكتوره: افهمك ايه؟ محمود: ازاي حامل وازاي بنت؟؟ الدكتوره: خطأ شائع بتقع فيه البنات وبتطمن نفسها انه طالما مفيش علاقه كامله تمت مش ممكن تحمل وده غلط لانها عادي ممكن تحمل وبسهوله مش شرط ابدا تمارس العلاقه كامله وده اللي حصل مع بنت عمك.. صح كده ولا ايه؟ انتي معملتيش حساب انك ممكن تحملي؟ بس المفروض انك ممرضه وفاهمه ده؟ ولا ايه؟ ياتري كان يستاهل اللي انتي قبلتي تخاطري علشانه؟ ؟ شوق غمضت عنيها بوجع وتعب: ارجوكم انا عايزه ارتاح سابوها لوحدها وهيا فضلت تفتكر حبيبها وكل حاجه عملتها علشانه وازاي قابل حبها في الاخر خرجت شوق من المستشفي وراحت بيت ابوها حازم نزل مصر واول ما نزل راح علي بيت شوق ووقف بعيد هو وعبدالمنعم مراقبين البيت لان حازم متردد يدخل وقفت عربيه قدام البيت ونزلت منها شوق وجوزها جنبها مسندها حازم قلق عليها وخاف واستغرب ليه مسندينها بس الاجابه عرفها علي طول لما نزلت امها تزغرد وتستقبل بنتها وتشيل البيبي عبدالمنعم: اعتقد يا حازم مالوش لازمه بقي... سيبها في حالها مع جوزها وابنها دول... بقي في بيبي في النص سيبهم ومنهم لربنا يالا يا ابني حازم مشي معاه وقرر انه يسافر بس المره دي بلا رجعه وفعلا سافر تاني بس المره دي لوحده وعبدالمنعم سافر يقعد في بلدهم يراعي عزبه حازم واراضيهم صفيه بعد ما عدت سنه واتاكدت ان ابنها ما بيفكرش في الرجوع قررت انها تروح تخرج عم خليل من حبسه وفعلا خرجته وعطتله تعويض مناسب مكنش قابله نهائي بس عياله قبلوه وسافر معاهم بلدهم وبكده صفيه بتنام مرتاحه البال بس معندهاش فكره انها دمرت اربع اشخاص اولهم ابنها وحرمتهم من نوم الليل وحرمتهم من الراحه شوق كانت مراقبه محمود ابن عمها اللي كانت بتحبه وبتتمناله السعاده شايفاه بيدبل وبيموت قدامها في اليوم ميت مره قررت انها تساعده زي ماهو ساعدها في يوم خرجت وراحت لسميه استنتها وهيا خارجه من شغلها سميه اول ما شافتها سرعت خطواتها شوق: استني يا سميه سميه: عايزه ايه مني؟ معدش عندي حاجه تاخديها مني شوق مسكتها من دراعها وقفتها شوق: اسمعيني وبس وبعدها امشي هما كلمتين... هجاوبك علي السؤال اللي تعبك الكام شهر اللي فاتوا سميه: سؤال ايه؟ شوق: ليه؟ محمود بيحبك ف ليه؟ سميه: علشان هو واطي وكان بيتسلي شوق: انتي من جواكي مقتنعه بالاجابه دي؟؟ تعالي اسمعيني وامشي راحوا وقعدوا مع بعض سميه: اتفضلي قولي اللي عندك علشان بس ابقي مرتاحه وابقي عملت كل اللي عليا شوق: لازم الاول احكيلك حكايتي من اولها وحكايتي بدأت من شغلي يوم ما رحت عند مريض البيت علشان اراعيه وهناك بدأت قصه حبي..... حكتلها شوق لحد ما اتقابلت هيا ومحمود علي المحطه شوق: وعلشان محمود كان طول عمره اخ لينا ومهتم بينا كان لازم يساعدني ودي كانت مساعدته سميه: انتي عايزه تقولي ايه؟ شوق: عايزه اقولك انه مبطلش يحبك ابدا... وانه كل يوم اخر الليل بيدخل اوضته يعيط زي العيال الصغيره.. كل يوم بسمعه اخر الليل... احنا التلاته اتظلمنا... مين بقي غلطان مين اللي ظلمنا الله اعلم؟؟ محمود ما بطلش يحبك ابدا... بس مش في ايده حاجه سميه: ودلوقتي؟؟ في ايدي انا ايه؟ شوق: في ايدك انكم تعيشوا بقي... ارجعوا لبعض... عيشوا مع بعض سميه: يا سلام بالبساطه دي؟؟؟ شوق: ايوه بالبساطه دي... انتي بتحبيه وهو بيحبك وانا اخت ليه وبس سميه: وانتي هيكون وضعك ايه؟ شوق: يا اما يطلقني يا اما تقبلي اني افضل موجوده لفتره مؤقته باي وضع حتي لو خدامه في بيتكم سميه: وانتي هتقبلي وضع زي ده اصلا؟ شوق: محمود جميلو فوق راسي وهقبل باي وضع انتو تختاروه... الكوره دلوقتي في ملعبك قرري بقي انتي هتعملي ايه؟ بعد اذنك روحت شوق وهناك لقت محمود مستنيها محمود: كنتي فين واتاخرتي ليه؟ شوق: كنت مع سميه محمود: سميه؟؟ ليه؟ شوق: عملت اللي كان مفروض انت تعمله من زمان محمود: واللي هو ايه بقي سيادتك؟؟ شوق: تبقي فاهمه ليه انت سيبتها... ما تسيبهاش في حيره وقلق وتفضل تقول ليه زيي انا كده.... كل يوم بسأل نفسي ليه حازم عمل معايا كده؟ ليه خاني وخدعني بالشكل ده؟ فحرام اسيب سميه تفترض انك خنتها وخدعتها لانه احساس وحش قوي محمود: وبعدين استفدتي ايه لما عملتي كده؟ ايه اللي المفروض يحصل؟؟ شوق: تتجوزوا محمود ضحك: نتجوز بجد؟ انتي هبله ولا ايه؟ وانتي ورهف؟؟ شوق: انا بشتغل وراتبي هيكفيني انا وبنتي وانت اتجوز سميه وعيشوا بقي مع بعض مستني ايه؟ اما تتجوز هيا كمان محمود :سؤال واحد بس... تقدري تقوليلي هقول لابويا ايه؟ ولا لعمي ايه؟ انتي ناسيه انك بنت عمي شوق: مش ناسيه بس احنا مش اول اتنين يطلقوا محمود: لو ابوكي كان وحش معاكي قراط بعد ما تتطلقي هيبقي 24 قراط شوق: مالكش دعوه بيا بقي انت عملت اللي عليك واكتر زياده إلحق بقي حبيبتك لاني سمعت ان متقدملها مهندس عايش بره.. يعني عريس من النوع اللي ما يترفضش فالحقها قبل ما تطير... انا نصحتك وانت حر بقي محمود سابها وخرج يتمشي وراح لمكانه المفضل واول ما وصل اتفاجئ بسميه هناك فحب ينسحب بسرعه قبل ما تشوفه بس شافته ونادلته سميه: ما قولتليش ليه؟ محمود: انتي ما استنتيش تسمعي انتي اتهمتيني سميه: انا اتصدمت بخبر خطوبتك كنت مستني اعمل ايه؟ انا بشر محمود :واديكي عرفتي الحقيقه اهوه سميه: وبعدين؟ محمود: انا مش عارف وبعدين؟ انا معنديش بعدين؟؟ انا مش عارف اعمل ايه او ايه الصح؟؟؟ انا بحبك وده شيئ واضح وضوح الشمس بعد كده بقي مش عارف سميه: وانا كفايه عليا حبك محمود: تقصدي ايه؟ سميه: اقصد اني بحبك واي قرار هتاخده انا معاك فيه محمود: والعريس بتاع الخليج؟؟ سميه ابتسمت: هياخد استماره 6 زي غيره محمود ابتسم: انا بحبك فوق ما تتخيلي... انا اتعذبت في بعدك كتير قوي... واكتر حاجه وجعاني هو اني مش قادر اقولك اني مبحبش غيرك سميه: ربنا ان شاءالله مش هيفرقنا عن بعض وهيجمعنا بامره هو محمود: بإذن الله... روحي بقي علشان ما تتأخريش وانا اول ما اعرف راسي من رجليا هبلغك وصلت لايه؟ محمود وشوق فضلوا فتره طويله يتخانقوا لانها عيزاه يتجوز ويطلقها وهو رافض الحل ده نهائي شوق راحت لسميه وخرجوا واتصلت بمحمود يقابلها وجالها اتفاجئ بيهم مع بعض محمود: وبعدين؟ مراتي وحبيبتي؟؟؟ شوق: طلقني واتجوزها محمود: مش هطلقك انتي كده بتحكمي علي نفسك بالذل العمر كله... شوق: محمود انا غلطت يوم ما نسيت تربيتي وسلمت نفسي لراجل باسم الحب وده عقاب ربنا ليا وانا متحملاه انت مالكش ذنب ولا هيا ليها ذنب محمود: سيادتك ساكته ليه؟ سميه: لاني ما اقدرش اقولك طلقها ولا اقدر اقولك اتجوزني ده قرار في ايدك انت بس محمود: وانا هخليه في ايدك... تتجوزيني يا سميه وشوق علي ذمتي؟؟؟ شوق: لا يا محمود ما تحطنيش في النص بينكم محمود: شوفوا وافقنا او رفضنا احنا التلاته في مركب واحده ويا نوصل مع بعض لبر الامان يا نغرق سوا ده الحل اللي عندي... الامور كلها واضحه قدامك سميه... شوق مراتي علي الورق لكن ربنا يعلم انها اختي وبعاملها علي الاساس ده ولو اتجوزتيني هتبقي انتي بس مراتي وحبيبتي بس هتضطري قدام الناس يكون ليكي دره فقرري ولما توصلي لقرار بلغيني بيه شوق: يا محمود قاطعها محمود: ده اللي عندي وقولته ما ينفعش اطلقك كده انتي بنت عمي وطلاقنا هيفرق العيله نصين وانا مش هختار سعادتي علي حساب دمار العيله كلها فاللي عندي قولتو ومش عايز كلام تاني،... انتي روحي علشان ما تتاخريش وانتي يالا علشان بنتك اللي سيباها لوحدها عند امك روحو بيتهم وشوق معاها بنتها اللي نسخه من حازم ضماها في حضنها وافتكرت حازم واحلي ايام قضتها معاه وافتكرت حبهم البسيط اللي مات وهو في المهد لسه سميه روحت وسرحانه وامها كل شويه تكلمها وهيا مش بترد عليها. امها: بت يا سميه ردي عليا مالك؟؟ سميه: محمود اتقدملي امها تنحت: محمود مين؟ سميه: انتي عارفه محمود مين امها: هو طلق مراته؟؟ سميه: لا مطلقهاش ولا هيطلقها امها: امال عايزك دره عليها... لا بقي كده كتير قوي... وانتي بتفكري في ايه هاه؟ مقلعتيش ليه اللي في رجلك وعطيتوله فوق دماغه؟؟ بتتنيلي تفكري في ايه؟ انتي نسيتي رميتك في المستشفي؟؟؟ انتي عايزه تموتيني بقهرتي عليكي؟؟؟ سميه: امي اهدي دي كانت ظروف امها: ظروف اه!!! وانتي بقي زي الحماره صدقتي وحنيتي صح؟ بت انتي انا هوافق علي العريس اللي جالك وهتسافري معاه علي الكويت انتي فاهمه؟ سميه: لا يا ماما مش فاهمه... انا بحب محمود ولو هتجوز هيبقي هو امها: طيب معاكي هتتجوزوا فين؟ هو عنده شقه تانيه؟ سميه: لا هنتجوز في شقته... امها: نعم؟؟؟ كل واحده اوضه يعني؟؟؟؟ قسما بالله لاقلع اللي في رجلي وانزل علي دماغك لحد ما تعرفي ان الله حق سميه: ياماما انتي مش فاهمه حاجه امها: ومش عايزه افهم ده انتي اتجننتي علي الاخر ام سميه رافضه تماما الموضوع ده شوق وسميه بيتاقبلوا وبتحكيلها علي اللي حصل شوق: قولي لامك الحقيقه وساعتها هيا هتتطمن وهتوافق سميه: بس انا ما اضمنش امي تسكت شوق: ياما دقت علي الراس طبول هتعمل ايه يعني؟؟ خليكي انانيه في حبك شويه... قوليلها خليها تقتنع والباقي اللي ربنا رايده هيكون سميه اخر محاولاتها مع امها انها حكتلها كل اللي حصل وامها قصادها مش مستوعبه كل ده امها: يعني شوق مش تعتبر مراته؟؟ مظاهرها؟؟؟ سميه: ايوه يا امي امها: وبنتها مين بيصرف عليها؟؟ سميه: هيا بتشتغل وبتصرف علي نفسها هيا وبنتها وبعدين هيا طلبت منه يطلقها بس محمود رافض علشان اعمامه وابوه ما يزعلوش بسببه... شوفتي بقي محمود راجل قد ايه؟ مش عايز يتخلي عن بنت عمه حتي لو علي حساب نفسه امها: وانتي مين قالك بقي ان اهله هيوافقوا علي جوازكم!؟؟ سميه: دي بقي مشكلته هو وهو يحلها امها: امم بقي شوق يطلع منها كل ده؟ سميه: ما تظلميهاش هيا حبت امها: حبت؟؟؟ دي قله ادب مش حب... من امتي الحب يبقي قله ادب كده... لو هيا محترمه كانت عرفت تحافظ علي نفسها ويمكن ساعتها كان هو يحترمها ويجي يطلب ايدها لكن هيا رخصت نفسها وبالتالي هو عمره ما هيغليها تاني... اللي يبع نفسه رخيص يفضل طول عمره رخيص... اهي هتفضل طول عمرها مذلوله ومهما تندم عمرها ما هتعرف ترفع راسها تاني... سميه: المهم مش قضيتنا شوق دلوقتي... اقول لمحمود اني موافقه؟؟ امها: قوليله وربك يسهل بقي سميه بلغت محمود قرارها وهو قال لشوق محمود: هنعمل ايه؟ شوق: هتروح تبلغ عمي احمد انك عايز تتجوز سميه محمود: وانتي متخيله بقي انه هياخدني بالحضن ويقولي مبروك يا ابني؟؟؟ شوق: لا هتحصل مشاكل كتير بس هنواجهها واحده واحده اتكل علي الله وربنا هيوقف جنبك محمود كلم ابوه وقامت القيامه في بيتهم وحصل اللي كان متوقعه وابوه رفض تماما الفكره شوق راحت لعمها وقالتله انها موافقه وان الشرع محلله فليه نرفض؟؟ عم احمد: انتي عاقله وموافقه ان جوزك يتجوز عليكي؟؟ شوق: ايوه يا عمي... انا ومحمود بنحب بعضنا من صغرنا بس كأخوات وده اللي اكتشفناه لما اتجوزنا وسميه دي كانت حبيبته وظروف كده فرقتهم عن بعض والظروف دي اتحلت والامور وضحت وهما بيحبوا بعض وانا سعاده محمود تهمني فليه بقي ما يتجوزش حبيبته؟؟ انت ابوه والمفروض سعاده ابنك تهمك عم احمد: وانتي بنت اخويا وبنتي واللي مرضهوش علي بنتي ما ارضاهوش ليكي شوق: وانا يا عمي موافقه ومبسوطه كمان... اللي اكتشفته اني فعلا بنتك ومحمود زي اخويا مش بينا يا عمي حب الازواج فليه يضيع عمره مع واحده زي اخته وهو بيحب اصلا عم احمد: ورهف؟؟ مفكرتوش فيها؟ شوق: مالها؟ هتعيش في بيت مليان حب وبدال ما يبقي عندها ام واحده هيبقوا اتنين عم احمد: علي رأي المثل مرات ابوك بتحبك قال تبقي اتجننت شوق: ليه بس؟؟ انا وسميه اصحاب ومتفاهمين ومتقبلين الوضع اوقف جنب ابنك انت وساعده عم احمد: وابوكي؟ معملتيش حسابه؟؟ شوق: في الاخر كله هيقبل بس انت اوقف جنب محمود الدنيا كلها قايمه والكل معترض علي الجوازه وخصوصا سميحه مامت شوق سيد ابو شوق اعتراضه كان خفيف وخصوصا لما لقي بنته موافقه واقتنع بفكره ان الشرع محلله اربعه فليه يرفضوا طالما الاطراف موافقه سميحه رافضه تماما فكره دره لبنتها سميحه: لما السما تنطبق علي الارض مش هوافق... وبعدين ده محمود طلع ندل قوي شوق: محمود ابعد ما يكون عن النداله... انتي متعرفيش محمود عمل علشاني ايه وضحي بايه؟ سميحه: هو عاملك غسيل مخ يا بت ولا ايه؟ شوق: ماما محمود وافق يتجوزني علشان يحميني من ابويا وساب حبيبته علشاني وحماني من الفضيحه ورضي يكتب بنت مش بنته باسمه وفي الاخر جايه تقولي عليه ندل؟؟ سميحه مش مصدقه: انتي بتقولي ايه؟ شوق: بقولك ان بنتي بنت 9 شهور مش 7 رهف مش بنت محمود سميحه: يا لهوووي يا لهوووي فضلت امها تلطم علي خدودها وتقول يا لهووي شوق: اهدي يا ماما بقي سميحه قامت تضرب في بنتها زي المجنونه لحد ما هديت مره واحده وفضلت تعيط شوق: انا استاهل اكتر من كده بس محمود عمل باصله للاخر وافقي بقي انه يتجوز سميحه: انتي متخيله لو ابوكي عرف ايه اللي هيعمله؟ شوق: ابويا مش هيعرف سميحه: مين ابو بنتك؟؟ شوق: حازم سميحه: المشلول؟؟؟ المشلول يا شوق... يعني انتي اللي رحتيله هو ما غصبكيش... ليه كده؟ كنتي بتفكري ازاي؟؟ شوق: كان فاقد ثقته بنفسه وانا حبيت سميحه: حبيتي ايه؟ ترجعيلي ثقته بنفسه؟؟ قالك كلمتين يضحك عليكي بيهم صدقتيه وسلمتيله نفسك.. ياغبيه يا متخلفه.... هو في راجل يحب واحده يعمل فيها كده؟ اللي بيحب واحده بيخاف عليها ويحميها من نفسه قبل الناس ده اللي بيحب شوق: عارفه عارفه عارفه... كل واحد يجي يقولي نفس الكلمه دي سميحه: لان ده الصح... فين دينك؟؟ فين تربيتك؟؟ فين عزه نفسك؟؟ ليه فرطتي في كل ده؟ وعلشان خاطر مين؟؟ اهو رماكي ومشي وامه رمتك بره زي الكلاب... اخدتي ايه؟ شوق: امي كفايه بقي سميحه: كفايه ايه؟ وزفت ايه؟ بقي دي اخرت تربيتي فيكي وتعبي وشقاي... تضيعي عمرك كله كده؟ ربنا يسامحك يا شوق مش هقولك غير كده ربنا يسامحك واخيرا الكل اقتنع وتم فرح محمود وسميه الفرح كان غريب لان في الفرحان من قلبه وفي اللي مش عايز يظهر فرحته وفي اللي زعلان كل واحد جواه حاجه مختلفه شوق راحت لبيت ابوها كام يوم علشان تسيب العرسان براحتهم.... والكل مستغرب من فرحتها او بيسموه برودها.... بتعدي الايام وشوق بتحاول تكون مختفيه في بيت محمود وتسيبهم لوحدهم وتقفل باب اوضتها عليها سميه وشوق متفاهمين جدا لان سميه شافت شوق فعلا اخت ليها ولجوزها بس الايام ما بتفضلش كده علي طول سميه حملت وكانت حامل في توأم وده فرح كتير وزعل اكتر شوق خدمت سميه جامد بس المشكله كانت في الحموات ام سميه وام شوق كانوا علي طول يتصادموا مع بعض اخيرا سميه ولدت وجابت ولد وبنت وسموهم ملك وعمر وكانوا فرحه محمود وسميه وفي مره كانت العيلتين معزومين في بيت عم سيد ابو شوق وكانت الشقه مزحومه سيد: الوضع كده يا محمود مش هينفع انت تجيبلك شقه كمان لبنتي اذا كان بيتنا وكبير وزحمه امال شقتك الصغيره بتعمل فيها ايه؟ الكل اتصدم بجملته دي شوق: بس انا مش عايزه شقه تانيه سيد: اسكتي انتي،... دلوقتي انتي معاكي بنتك وهو معاه تؤام وانتي اتنازلتي ووافقتي انه يتجوز عليكي لكن اكتر من كده مش هينفع شقتكم اوضتين اوضه انتي فيها انتي وبنتك واوضه هما الاربعه فيها تقدري تقوليلي لما يكبروا بعدكام شهر هتعملوا ايه؟ الوضع كده ما ينفعش احمد: فعلا عندك حق وده حق بنتك يا اخويا... محمود انا هساعدك بكل اللي اقدر عليه وتجيب كل اللي معاك وتشتري لبنت عمك شقه تليق بيها تقعد فيها هيا وبنتها محمود: ربنا يسهل يا بابا سيد: ابنك بياخدنا علي قد عقلنا يا احمد احمد: لا يا سيد لأ محمود راجل وطالما قدر يتجوز تاني يبقي يتحمل نتيجه قراره ويفتح بيتين حتي لو لو هيشتغل الصبح وبعد الظهر او يطلع يومه كله بره اللي ياخد قرار يبقي قده ويتحمله للاخر محمود: حاضر يابا هشوف شغل تاني حاضر يا عمي هحاول ادور علي شقه ام سميه: اهو ده اللي كنت خايفه منه.... انهم يشأطوك لبعض وانت ما تقدرش حتي تفتح بوقك وانا المفروض انا وبنتي احط جزمه في بوقي واسكت... مش كفايه كل اللي عملته لا كمان تاخدلها شقه لا كده كتير قوي محمود: حماتي اهدي لو سمحتي سيد: انتي يا وليه رضيتي بنتك تتجوز واحد متجوز ومخلف احمدي ربنا واسكتي كمان جايه تتطولي لسانك امها: انا اللي احمد ربنا سميه: ماما اهدي لو سمحتي امها: اهدي ليه؟ بكره عيالك دول يكبروا ومحتاجين لكل قرش ابوهم بيقبضوا لكن تيجي الهانم تشاركك فيه سيد: تصدقي الواحد كان غلطان انه وافق انه يتجوز طالما انتو قلايل الاصل كده سميحه:اهدي يا سيد سيد: لا مش ههدي وانت يا احمد ما تشوفلك حل ولا عاجبك كلام حماه ابنك احمد: لا مش عاجبني يا ام سميه انتي وافقتي تجوزي بنتك لواحد متجوز وعنده بنت ودلوقتي جايه تنكري حقوقها لا دي مش اصول ام سميه: لا اصول ونص وكفايه بقي انه مخليها في بيته وبيربي بنت مش بنته وستر عرضها وحماكم من الفضيحه لكن تيجوا علي بنتي فلأ والف لأ ده مش هسمح بيه ابدا الكل سكت تماما ومحدش مستوعب هيا قالت ايه؟ شوق بتبص لابوها والكل بيبص لبعض ومحدش عارف ايه اللي هيحصل في الدقايق الجايه دي سيد: بنت مش بنته؟؟ وستر عرضها؟؟ انتي اتجننتي يا وليه انتي ولا ايه؟ قسما بالله انا اقتلك مكانك هنا؟ محمود: عمي اهدي وانتي يا حماتي اسكتي بقي واتفضلي دلوقتي سميه: ماما كفايه بقي اسكتي سيد: لا تسكت ليه؟ هيا ترمي بنات الناس بالباطل وبس.. قسما بالله لولا انك ست كبيره لكنت ربيتك من الاول وجديد ام سميه: لما تربي بنتك الاول ابقي تعال ربيني سيد رايح ناحيه الست وهيمد ايده عليها سيد: اخرسي يا وليه محمود وقف في وش عمه ومسك ايده والكل هيمسك في خناق بعض سيد: بت يا شوق ردي علي الوليه دي واخرسيها ردي قوليلها انك اشرف من الشرف وان دي بنت محمود شوق بصت للارض وعيطت وسكتت سيد: انتي يا بت ردي ام سميه: ترد تقول ايه؟ ماهو الجواب بيبان من عنوانه امال انا ليه وافقت ان بنتي تتجوزه... لانه وعدني اني بنتي بس اللي ليها حقوق عليه وان شوق اخته وبس وانه جوازهم كان علشان يسترها ويحميها من الفضيحه لكن دلوقتي بقي خلاص كده كفايه الناس وعرفوا انهم متجوزين وان دي بنته واهو كتبها باسمه يبقي خلاص بقي يطلقوا وكده هو عداه العيب وعمل باصله للاخر مع بنت عمه ويشوف بقي عياله وبيته ومراته سيد: انتي كدابه.. محمود رد علي حماتك محمود سكت وبص للارض شوق: لا يا بابا مش كدابه كل كلمه نطقتها صح سيد :..... نكمل بكره ShiMoOo | ||||||||||
|
| |
|
11-05-19, 12:33 AM
| #9 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه الثامنه ام سميه قالت الحقيقه قدام الكل وسيد رافض يصدقها نهائي شوق: لا يا بابا مش كدابه كل كلمه نطقتها صح سيد وقف شويه مش مستوعب بنته قالت ايه؟ سيد: نعم قولتي ايه حضرتك؟؟ ايه اللي صح؟ لما دي مش بنت محمود امال بنت مين؟ هنا محمود اتدخل محمود: يا جماعه معلش كل واحد يروح بيته يالا بابا خد ماما واتفضل وانتي يا حماتي اتفضلي بقي خدي سميه معاكي وروحوا يالا كله يروح بيته.. الكل انسحب وفضل محمود وسيد وسميحه وشوق سيد: قولتي ايه انتي بقي؟؟ لما دي ماتبقاش بنت محمود تبقي مين؟ شوق معرفتش ترد ولازقه في الحيط سيد: وانت اتصدمت بعد ما اتجوزت؟ طيب مطلقتهاش ليه؟ ما قولتليش ليه؟ مقتلتهاش ليه؟ محمود: ايه يا عمي اللي بتقولوا ده؟ هيا غلطت وايوه غلطه كبيره بس مش معني كده اني اقتلها او ارميها لا يا عمي تفكيرك غلط سيد: غلط؟؟؟ انت كنت عارف بده قبل ما تتجوزها؟؟ محمود ساكت ومش عارف يرد سيد: رد عليا محمود: ايوه كنت عارف واتجوزتها علشان احميها سيد: تحمي مين؟؟ دي؟؟ انت اتجننت؟؟ سيد كان هيتجنن وراح ناحيه شوق ووقف قصادها شوق: بابا انا اسفه سامحني سيد فضل واقف شويه ومره واحده نزل يضرب فيها بالاقلام يضرب ويضرب ويضرب محمود اتدخل وحاول يدافع عنها بس سيد بيزقه بعيد ويرجع يضرب فيها تاني محمود اخيرا قدر يشد سيد قبل ما يموت شوق في ايده وماسكه جامد وسميحه شدت بنتها ووقفتها وسمر اختها الصغيره بتراقب من بعيد دموعها نازله وساكته سيد: سلمتي نفسك لواحد ضحك عليكي بكلمتين ولا بمزاجك؟؟ ردي؟ محمود: خلاص بقي يا عمي؟ هو ضحك عليها وانتهي الموضوع وخلاص وربنا سترها ومحدش عرف بحاجه سيد: يا سلام؟؟ كده الموضوع خلص؟؟ حصل خير؟؟ انت سترت عليها وخلاص؟؟؟ انت مجنون..... والبنت اللي خلفتها دي؟ مصيرها ايه؟؟ انت تتحملها ليه؟ ذنبك ايه تتجوز واحده زي دي؟؟؟ انا لازم اقتلها واغسل عاري شد نفسه من محمود وراح ناحيه شوق ومسكها من رقبتها بيخنقها وكلهم بيحاولوا يشدوه بس ايده ماسكه جامد في رقبتها لحد ما محمود شده اخيرا محمود: اهدي يا عمي مش كده سيد: يا اقتلها يا تطلع بره بيتي وبره حياتنا كلها محمود: حاضر هاخدها واروح سيد: لا بره حياتنا كلها انت ترمي عليها يمين الطلاق دلوقتي... اللي زيها دي ما تتحطش في بيت ابدا... لا انتي بنتي ولا اعرفك ...انا متبري منك ليوم الدين قلبي غضبان عليكي ليوم الدين اطلعي بره سميحه: والنبي يا سيد اهدي سيد: عليا الطلاق بالتلاته لو جبتي سيرتها لتتشردي ببناتك بره يا تتطلع بره البيت يا تطلعي انتي وبناتك معاها اختاري؟؟ محمود: خلاص يا عمي سيد: الحلفان عليك انت كمان... الليله تطلقها ما تدخلش بيتك محمود: ياعمي استهدي كده احنا بالليل هتروح فين؟ سيد: عليا الطلاق ما تبات في بيتك انت كمان هتكسر كلامي يبقي خد معاك مرات عمك وباقي بناتها يالا اطلعي بره شوق: يا بابا ارجوك سيد: اخرسي اوعي تنطقي الكلمه دي تاني... انتي مش بنتي... بنتي ما تعملش كده ابدا...، اياك اشوف وشك في البيت ده تاني... بره بيتي محمود اخد شوق ومشي ومش عارف يعمل ايه؟ اخدها بيت حماته اخر ما زهق واول ما دخل كان مراته وحماته هناك واتفاجؤا بيها حماته بتبصله بنظره احساس في الذنب محمود: يعني كان لازم يا حماتي تقولي صح؟ اهي الدنيا اطربقت حماته: كنت عايزني اسكت؟؟؟ وبنتي؟؟؟ محمود: لما تلاقيني انا مش بتصرف تكلميني مش تعملي كده المهم شوق هتبات عندك الليله حماته: اهلا وسهلا بس اشمعني محمود: عمي طردها من البيت وحلف بالطلاق ان حتي بيتي ما تباتش فيه والصبح ان شاءالله هشوفلها مكان تعيش فيه حماته: هتجيبلها شقه؟؟ محمود: حماتي؟؟؟ سميه: هتعمل ايه يا محمود؟؟ محمود: عمي حلف عليا اطلقها ومش عارف اعمل ايه؟ شوق: ما تعملش كفايه اللي عملته لحد النهارده... الصبح هشوفلي اوضه بالايجار اعيش فيها وانا بشتغل واقدر اصرف علي نفسي وكتر خيرك لحد كده وشوف بيتك بقي يا محمود ام سميه: يابنتي اعذريني بس والله ما كنت اقصد اضرك شوق: اعذرك علي ايه بس؟ الموضوع كان وقت مش اكتر.. كان لازم الحقيقه هتبان.. انا غلطت ولازم اتحمل نتيجه غلطي محمود شافلها اوضه بمنافعها بالايجار ووقف معاها لحد ما ظبطت امورها حماته كانت بتاخد رهف عندها فتره شغل شوق لحد ما شوق عرفت جيرانها واتصاحبوا عليها وعرضوا مساعدتهم عليها واستمرت الحياه لحد ما عمر رهف بقي 7 سنين........ ####################### نرجع للواقع بقي في المستشفي كل ده حازم واقف بيفتكر كل اللي فات وكل اللي حصل من سبع سنين فاق من ذكرياته علي صوت عياط رهف حازم: رهف مالك في ايه؟ ما تعيطيش انا جنبك اهوه هشششش بسسس شالها حازم واخدها في حضنه يهدهد فيها لحد ما رجعت نامت تاني كل ما يجي يقوم تمسك في رقبته جامد لحد ماهو كمان نام جنبها... فاقت شوق الصبح مستغربه هيا فين؟ بتبص حواليها مش فاهمه اي حاجه وفجأه افتكرت بنتها فاتعدلت بسرعه بس شافتها في حضن واحد بتتاكد لقته حازم مش فاهمه هيا فين؟ او ايه اللي جاب حازم هنا؟؟ مش فاهمه اي شيئ؟؟ دخلت الممرضه الممرضه: كويس انك فوقتي عامله ايه دلوقتي؟ حازم صحي علي صوت الممرضه واتعدل الممرضه: اسفه لو صحيت حضرتك حازم: لا عادي ده شغلك... عامله ايه دلوقتي؟ شوق مش مستوعبه انه بيكلمها ده يدوب من فتره مكنش فاكر حتي اسمها الممرضه: انتي تعبانه ولا ايه؟ شوق فاقت: لا لا انا الحمد لله كويسه.. كويسه خالص وممكن اخرج كمان الممرضه: لا الدكتور اللي يحدد حضرتك تخرجي امتي؟ عطتها ادويتها وانسحبت بهدوء وسابتهم الاتنين قصاد بعض محدش فيهم عارف يبدأمنين؟؟؟ شوق: انا جيت هنا ازاي؟ حازم: انا جبتك شوق: ايوه برضه ازاي؟؟ حازم فكر ومش عارف يقولها ايه؟ ازاي يقولها انه كان مراقبها؟؟ حازم: صدفه مش اكتر،.... كنت في طريقي ومحتاج لمسكن فوقفت في اول صيدليه قابلتني شوق مش فاهمه: وبعدين؟ حازم: وبعدين لقيت بنت صغيره عايزه دوا لمامتها علشان مش بترد عليها وعماله تعيط فقررت اساعدها فاخدتها وورتني بيت مامتها واتفاجئت انه انتي وجبتك هنا.... زي ما قولتلك صدفه مش اكتر شوق: وانت من امتي بتساعد اي حد؟؟؟ حازم: انتي ما تعرفينيش علشان تحكمي عليا شوق: انا فعلا اكتشفت اني ما اعرفكش نهائي حازم: طيب شوق: طيب انا لازم امشي من هنا حالا لاني مقدرش اتحمل تكلفه مكان زي ده يدوب هتقوم فحازم مسكها وثبتها مكانها حازم: انتي مش هتروحي في اي مكان ... انا هتكفل بكل حاجه .. شوق: انا مش هقبل مساعدتك حازم: انتي معندكيش غير مساعدتي فاسكتي رهف صحيت واول ما اتعدلت شافت امها صاحيه فجريت عليها رهف: ماما حبيبتي اخيرا صحيتي؟؟ انا كنت خايفه قوي يا ماما؟؟ لحد ما شفت عمو حازم وهو ماسبنيش من امبارح ابدا ابدا شوق بصت لحازم اللي بص بعيد ووقف قدام الشباك يداري مشاعره سابهم شويه يتكلموا براحتهم وبعدها اتدخل حازم: المهم روفي انا واقع من الجوع انتي ايه نظامك؟؟ رهف: مين روفي دي؟ حازم: انتي ضحكت رهف ضحكه هو عشقها مش عارف ليه رهف: انا كمان جعانه يا زومي حازم باستغراب: مين زومي ده؟ رهف: انت ههههه حازم: اممم انا!!! ماشي براحتك المهم هتاكلي معايا ولا هتسيبيني لوحدي؟ رهف: مامي ينفع!؟ شوق: اه يا حبيبتي ينفع روحي حازم اخدها وخرج واول ما خرجوا مسكت ايده هو بص لايديهم وابتسم وسكت فطروا وضحكوا وهزروا اكتشف حازم قد ايه رهف بنت جميله رقيقه متكلمه كان متخيل انه هيزهق منها او يمل او يحس انها مفروضه عليه بس العكس تماما كان حابب قعدتها وهزارها وضحكها علي اتصل بيه علي: هتيجي الشغل النهارده؟ حازم: معتقدش المهم شوفلي شقه صغيره ينفع شوق وبنتها يقعدوا فيها علي: شقه ازاي يعني؟ حازم: يعني ايه شقه ازاي؟ مكان يعيشوا فيه انا مش هخليهم يقعدوا في الخرابه اللي كانوا فيها اتصرف وبسرعه لانها ممكن تخرج النهارده علي: انا اخدت شقه جديده اللي اتجوزت فيها وشقتي القديمه موجوده وبفرشها عايزه بس تتنظف تنفع؟؟ حازم: تنفع مؤقتا لحد ما اشوفلهم مكان يستقروا فيه... ابعت حد ينظفها وابعتلي المفتاح علي: تمام اخر النهار اخدهم الاتنين وروحهم واتفاجئت شوق بمكان غير بيتها شوق: ايه ده احنا فين؟؟ حازم: انزلي واسكتي شوق نزلت معاه وهو رهف في ايده واخدهم وطلعوا وفتحلهم باب الشقه الشفه كانت صغيره بس جميله ومرتبه ونظيفه شوق: دي شقه مين؟ حازم: مؤقتا تبعك لحد ما اشوف مكان مناسب غيرها شوق: تبعي ازاي؟ وبعدين انت تشوفلنا ليه؟ انت مالك بينا؟ حازم: انا مش عايز كلام كتير... انتي مش هترجعي ببنتك الخرابه اللي كنتو فيها فاهمه؟ شوق: وانت هتساعدنا ليه؟ حازم: انا بساعد ناس كتير هعتبرك منهم شوق: انا حاله خيريه يعني لسيادتك؟؟ حازم: مش عاجبك المسمي ده؟ بلاش سميها رد جميل لانك انتي كنتي ممرضتي في يوم من الايام خلاص؟ الخلاصه انك هتفضلي هنا... هاسيبكم ترتاحوا كل حاجه ممكن تحتاجوها هتلاقوها هنا نزل تحت كان علي مستنيه اول ما خرج من باب العماره سند علي الحيطه لانه كان تعبان جدا وعلي جري عليه يسنده لحد ما ركبه العربيه علي: افهم بس ليه ما بتستخدمش عكازك؟؟ حازم: خليك في نفسك علي: انت بتتعب جدا لما بتحمل علي رجلك حازم: برضه خليك في نفسك سكت علي وساب حازم لافكاره حازم مش عايز يحس بالضعف تاني قدام شوق... مش عايز يتألم او يتوجع تاني... مش عايزها هيا بالذات تشوفه عاجز او مش قادر يتحرك فاق من افكاره علي صوت علي بيكلمه علي: هاه هتعمل ايه؟ حازم: هعمل ايه في ايه؟ علي: بقول لحضرتك دكتوره شاهندا اتصلت بحضرتك هتقابلها ولا ايه؟ حازم: هكلمها اتصل حازم بيها حازم: الو ازيك،..... عامله ايه؟ ..... علي بلغني انك كلمتيني شاهندا: فعلا يعني... كنت هقولك.... لو ينفع يعني نتقابل او اشوفك؟؟ بس لو مشغول او تعبان عادي نأجلها براحتك!!! حازم: انتي فين دلوقتي؟؟ شاهندا: انا في البيت حازم: وتاخدي وقت قد ايه تلبسي فيه؟؟ شاهندا: البس؟؟ (فهمت يقصد ايه) ثواني طبعا... عشر دقايق ماكسمم حازم: اوك اجهزي وهعدي عليكي هكلمك اول ما اوصل طارت شاهندا لبست في سرعه البرق ونزلت تستناه باباها: خير رايحه فين؟ شاهندا: حازم كلمني وهيعدي عليا ينفع اخرج معاه؟ باباها: انتي بتسأليني بعد ما لبستي؟؟ شاهندا: لا عادي لو حضرتك مش موافق عادي باباها: لا يا حبيبتي حازم انسان محترم وموضع ثقه بس مش عايزك تتعودي علي الخروج معاه.. انا سايبكم بس تتعرفوا علي بعض.. فيا ياخد خطوه يا يبعد؟؟ لكن خروج كده مش هينفع فهماني؟؟ شاهندا: طبعا فاهمه حضرتك تليفونها رن وخرجت لحازم ركبت وعلي وصلهم مكانهم اللي هيقعدوا فيه فتح الباب لشاهندا نزلت ولف يفتح لحازم اللي كان نازل علي بهمس: هتستخدم عكازك ولا؟؟ حازم :هستخدمه طبعا هاتو ناوله العكاز ومشي بيه وجت شاهندا جنبه حست بتعبه فسندته من الناحيه التانيه وهو من غير اي اعتراض تقبل مساعدتها دخلوا وقعدوا وهو فرد رجله قدامه شاهندا: طيب لو انت تعبان مكناش خرجنا؟؟ حازم: شاهي انا بقالي اكتر من تسع سنين تعبان فاتعودت اتعايش مع الوجع عادي ما تشغليش بالك شاهندا: طيب مفيش عمليات تانيه ينفع تعملها؟؟ حازم: لا مفيش ولو في معدش عندي استعداد اعمل عمليات تانيه شاهندا: حتي لو هتعالجك؟؟ حازم: مفيش اصلا حد يقدر يعمل حاجه... وبعدين انا كنت فين وبقيت فين!!! انا كنت مشلول خالص فالحمد لله قوي كده شاهندا: احكيلي عن الفتره دي..... ينفع؟؟ حازم سرح وافتكر شوق وحبهم وكل حاجه حلوه وكل حاجه مره عدت عليهم شاهندا: لو الموضوع بيضايقك خلاص حازم: مش حكايه يضايقني... حكايه ان مفيهوش كتير يتحكي... انا عملت حادثه سابتني مشلول فضلت فتره في المستشفي وتعبت منها فرحت البيت وكملت علاجي في البيت وكل يوم بممرضه شكل شاهندا: اشمعني؟؟ حازم: كنت بكره الممرضات قوي وخصوصا انهم كانوا بيحسسوني بمدي عجزي... وانه انا محتاج لواحده تقومني او تأكلني او تديني دوايا... كنت برفض وللاسف امي كنت بتخليهم يجيبوا الامن ويكتفوني ويدوني ادويتي غصب عني وده كان قمه الالم بالنسبالي... مكنش ليا رأي في اي حاجه تحصلي... امي اعتبرت الشلل ده اني فقدت قدرتي حتي علي التفكير.. كانت بتعاملني كأني عيل عنده سنه مالوش اي حق ياخد اي قرار شاهندا: محاولتش تكلمها ليه او تفهمها او تخليها تحس بيك؟؟ حازم: مالهاش في موضوع الاحاسيس ده... هيا عندها 1+1=2 وبس ماينفعش اي حاجه تانيه... كنت محتاج لوقت اتعود فيه علي وضعي الجديد واستوعبه وازعل شويه وهيا مفهمتش الوضع ده شاهندا: وبعدين؟ حازم: فضلت اطفش في الممرضات واحده وري التانيه شاهندا: وبعدين؟ حازم: انتي عايزه توصلي لايه؟ شاهندا: عايزه اوصل لبعدين... حاسه ان في حاجه حصلتلك... مش عارفه ليه بس حاسه ان حكايتك ليها جزء غامض حازم: ماهو ممكن الجزء ده ما يعجبكيش؟؟ شاهندا: ده ماضي انت عشته واثر فيك ماليش حق اعترض او احكم اذا كان يعجبني ولا لأ!!! بس محتاجه اعرف علشان اقدر افهمك اكتر حازم: ... فضلت اطرد في الممرضات لحد ما جت واحده كانت مختلفه تماما... مختلفه في كل حاجه... رجعتلي اول حاجه حريه الاختيار... اكل براحتي.. اشرب براحتي... اخد الادويه وقت ما احب.. اشرب سجاير اذا حبيت... من الاخر اي حاجه كنت بحب اعملها كنت بعملها شاهندا: طيب ووالدتك؟؟ حازم: طبعا اعترضت علي اسلوبها واتجننت بس لما لاحظوا اني باخد ادويتي من غير تكتيف او اكل مثلا بمزاجي او اتكلم او اهزر.. عرفوا انها مميزه شاهندا: وطبعا حبيتوا بعض؟؟ حازم: للاسف حبيتها بجنون... حبيتها لدرجه اني رجعلي الامل في الحياه ورجعت رغبتي اني اقف... وبالفعل سافرت اعمل العمليه علشان اقف علي رجليا وارجعلها واقف شاهندا: هو الكلام ده كان بعد الحادثه بقد ايه؟ حازم: بعدها بسنتين شاهندا: طيب وهيا فين؟ سيبتها ليه طالما اديتلك الامل ولما رجعت مرجعتلهاش ليه؟ حازم: انا ما سيبتهاش شاهندا: اوعي تقول انها ماتت؟؟ هزعل قوي لو كانت ماتت حازم ابتسم: بجد هتزعلي؟؟ شاهندا: علشان ما ابقاش كدابه هزعل شويه وافرح حازم ضحك: طيب هتزعلي ليه وتفرحي ليه؟ شاهندا: هزعل لاني مبحبش قصص الحب اللي زي كده تنتهي بالشكل ده حازم: امم وهتفرحي ليه؟ شاهندا: افرح ليه بقي اقولهالك بعدين... المهم حصل ايه طالما ما سيبتهاش ؟؟ حازم: هيا سابتني.... شاهندا: ما اعتقدش يا حازم ان راجل زيك ممكن واحده تسيبه!! حازم ابتسم: سافرت وكلمت امي كذا مره اسأل عليها قالتلي انها قبضت ومشيت واكتشفت ان امي كانت مواعداها بمبلغ كبير لو هيا قدرت تقنعني اعمل العمليه... فلما سافرت قبضت مكافئتها ومشيت شاهندا: معقوله؟ كانت بتمثل عليك؟؟ مش عارفه ليه بس مش داخله دماغي الحكايه دي... طيب لما رجعت ليه ما روحتلهاش؟؟ ليه ما واجهتهاش؟؟ مش يمكن تكون والدتك منعتها تجيلك او هيا فرقت بينكم؟؟ مامتك من النوع اللي ممرضه مش هتدخل دماغها حازم: عملت زيك كده وفكرت نفس تفكيرك ورجعت اخدت امي وروحت بيتها علشان اطلب ايدها ونتجوز شاهندا: وبعدين؟ رفضتك؟؟ معقوله؟؟ حازم سرح وافتكر اتعس يوم في عمره وافتكر لما رجع مشلول من تاني حازم: كنت رايح بفرحه الدنيا كلها جوايا... كنت عايزها تشوفني واقف... اينعم كنت بعكازات اتنين بس واقف سكت شويه علشان يقدر يكمل شاهندا: وبعدين حصل ايه؟ حازم: وصلت بيتها ونزلت من العربيه وشفتها... شفتها يا شاهي كانت اجمل ما يكون شاهندا: وكلمتها؟؟ حازم: لا ما كلمتهاش شاهندا: ليه ما كلمتهاش؟؟؟ ليه تراجعت؟؟؟ حازم: كانت في الكوشه مع عريسها هكلمها ازاي؟؟ كانت بتتجوز بفلوسي اللي اخدتها من امي... حبيبتي كانت بتتجوز بفلوسي شاهندا عنيها دمعت وكانت هتعيط لانها حست بمدي وجع حازم شاهندا: عملت ايه ساعتها؟ حازم: ما عملتش انسحبت بهدوء ورجعت عربيتي... مش قادر انسي اليوم ده... تخيلي انك تفقدي هدفك في الحياه وتعيشي بتتمني الموت في كل لحظه وفجأه تتفتحلك طاقه امل وتحاولي ترجعي للحياه تانيه وفي نور ماشيه عليه وفجأه الطاقه دي تتقفل وتكتشفي ان مكنش في نور ولا حاجه ده كان وهم او سراب انتي عايشه فيه... رجعت البيت حاولت انزل من العربيه او اقف تاني بس رجليا خانتني ومقدرتش شاهندا: مش معقوله حازم: للاسف رجعت مشلول زي الاول بالظبط... مش بقولك كنت عايش في وهم... كل حاجه كانت وهم... حبي كان وهم... وقوفي علي رجليا كان وهم... كابوس وصحيت منه علي كابوس اسوأ... انا مشلول شاهندا: بس انت اهو واقف علي رجليك؟؟ حازم: ماهو بعدها قررت اني لازم اقف واني مش محتاج لواحده اقف علشانها فسافرت تاني وفضلت كذا شهر من عمليه لعمليه لحد وقفت تاني شاهندا: وما شفتهاش تاني ابدا حبيبتك؟؟ ما حنتش انك تشوفها او تعرف منها ليه سابتك؟؟ حازم: حنيت.. بعد كذا شهر لقيت نفسي بحط اعذار وافتراضات يمكن ويمكن ويمكن فقلت لازم اقطع الشك باليقين واكلمها وزي ما يحصل يحصل شاهندا: اكيد بقي المره دي كلمتها!! قول اه والنبي حازم: للاسف مكلمتهاش شاهندا: ليه بقي ايه اللي منعك؟؟ اوعي تقول جوزها!؟ حازم: لا محدش منعني بس لما رحت بيتها فضلت واقف كتير قدام البيت وبفكر انزل ولا لأ؟ طيب اسأل عليها ولا اعرف من بعيد عنوان بيتها الجديد واروحلها المهم لقيت عربيه وقفت قدام بيتهم وهيا نازله منها وجوزها جنبها مسندها وامها نزلت تزغرط وتستقبلها ولقيت بيبي في الموضوع... بس فهدخل ليه؟ واحده اتجوزت واهي خلفت يبقي لازمته ايه انغص حياتها او اسببلها مشاكل مع جوزها؟؟ وبعدين في بيبي بينهم فاملوش لازمه اي كلام... بس يا ستي وسافرت ولسه راجع اهو من كام شهر وانتي عارفه الباقي... وما تسأليش اي سؤال تاني في الموضوع ده شاهندا: لا لازم اسأل حازم: مش هجاوبك شاهندا: هو سؤال واحد لازم تجاوبني عليه حازم : اسمعه بس ما اوعدكيش اني هجاوب... شاهندا: لو قابلتها دلوقتي هتعمل ايه؟ او لو هيا جاتلك واقالتلك مثلا انها غلطانه وندمانه هتعمل ايه؟ يعني انت لسه بتحبها وممكن تسامحها ولا لأ؟ ولا حازم قاطعها: حملك حملك شويه خمسين سؤال وري بعض وتقولي سؤال واحد!؟ شاهندا: مش عارفه اصيغ سؤالي اصلا حازم: طيب انا هجاوبك من غير ما تسألي اوكي... (مسك ايدها) اللي انا حكيتهولك ده قصه قديمه وانتهت واتقفلت تماما ومفيش اي شيئ ممكن يفتحها تمام؟ دي كانت ماضي وانتهي... واحده سابتني في وقت..... اتجوزت وخلفت وقصتها انتهت لحد كده... فما اعتقدش ابدا اني ممكن اسمحلها تدخل حياتي تاني او يكون لها اي دور في حياتي... كده جاوبتك صح؟ شاهندا بفرحه اطفال: كده جاوبتني... ناكل بقي؟ انا جعانه حازم: وانا ميت من الجوع شاهندا: انا هطلب الاكل وانت تاكل علي ذوقي؟؟؟ حازم: اممممم ربنا يستر شاهندا طلبت الاكل وحازم بيتفرج عليها ومبتسم... بيبصلها وكأنه اول مره يشوفها... ملامحها الرقيقه... جمالها الهادي... واتفاجئ ان شعرها طويل نسبيا واستغرب انه عاجبه كده... كل حاجه فيها متناسبه شاهندا بكسوف: وبعدين معاك بقي؟ حازم باستغراب: بعدين معايا في ايه؟ شاهندا: بتبصلي بطريقه مجنناني... حاسه انك بتقيمني؟؟ حازم: يمكن اكون فعلا بقيمك؟؟ شاهندا سندت علي التربيزه: واخدت كام من عشره ؟؟ حازم: 100 /10 عندك شك في ده؟ هاه هتاكلينا ايه؟ شاهندا: هتشوف حازم: هنشوف جه الاكل واكلوا واتبسطوا وهزروا والمفروض يمشوا بقي شاهندا: علي فكره انا اتأخرت ولازم امشي حازم: تتجوزيني؟؟؟ ونكمل بكره شاهندا هيكون ردها ايه؟ حازم هيعمل ايه مع شوق؟ شوق هتعمل ايه مع حازم؟ حازم امتي هيعرف الحقيقه ولا مش هيعرفها؟؟ توقعاتكم ShiMoOo | ||||||||||
|
| |
|
11-05-19, 12:34 AM
| #10 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه التاسعه حازم وشاهندا اكلوا واتبسطوا وهزروا والمفروض يمشوا بقي شاهندا: علي فكره انا اتأخرت ولازم امشي حازم: تتجوزيني؟؟؟ شاهندا: انت قولت ايه؟ حازم المواضيع دي مفيهاش هزار لو سمحت حازم: انتي شايفاني بهزر؟؟؟ سؤال واضح وصريح.. تتجوزيني؟؟ شاهندا: يعني انت بجد عايز تتجوزني؟؟ حازم: في ايه يا شاهي؟؟ السؤال مالوش اي معاني هو معني واحد شاهندا: اصل انا مش مستوعبه حازم: اه فهمت... طيب يالا اروحك شاهندا: اقعد واهدي كده... فهمت ايه بقي سيادتك؟ حازم: فهمت اللي انتي مش مستوعباه شاهندا: وايه هو ده؟ حازم: شاهندا خلاص... اعتبريني مقلتش حاجه تمام؟ انسي... انا وانت اصحاب كويسين شاهندا: انت ندمت انك سألتني السؤال ده؟ حازم: فوق ما تتخيلي شاهندا: طيب خلاص هعتبرك مقولتوش... بعد اذنك انا اتأخرت ولازم اروح حازم: هوصلك استني قام حازم وراها بعكازه بس هيا كانت ماشيه شاهندا: لا متشكره خليك مرتاح قالتها وجريت من قدامه ورمت نفسها في اقرب تاكسي وهو فضل كتير مكانه علي دخله بعدها بفتره علي: انا مستنيك تطلع بس ما بتطلعش انت عندك مواعيد تانيه هنا؟ حازم: لا معنديش علي: طيب مستنين ايه؟ انا عايز اروح لمراتي حازم ابتسم :انا بنسي كتير انك متجوز... طيب ممكن تساعدني؟؟ علي وقف حازم وسنده لحد العربيه ولاحظ ان حازم ماشي بالعافيه علي: ممكن اسألك ايه اللي مضايقك؟ او الدكتوره مشيت ليه زعلانه؟؟ حازم مردش وفضل ساكت فعلي احترم سكوته وما اتكلمش وبعدها بفتره رد حازم: ساعات كتيره بنسي يا علي اني مختلف واتخيل نفسي راجل طبيعي علي: علي فكره انت راجل طبيعي انا مش شايفك مختلف في اي حاجه حازم: ده انت لكن غيرك لأ.... قبل كده كنت مشلول ونسيت نفسي وحبيت وفقت علي صدمه عمري وعرفت اني مجرد وسيله تجيب فلوس مش اكتر علي: انت تقصد شوق؟؟ حازم: ايوه هيا... حبيتها لدرجه متتخيلهاش وهيا رمت حبي في وشي وقبضت وراحت اتجوزت حبيبها وخلفت منه وعاشت حياتها علي: مش يمكن الحكايه يكون ليها جانب متعرفوش؟؟ حازم: سافرت شهرين بالظبط رجعت لقيتها بتتجوز ايه الجانب التاني؟؟ عارف لو غبت سنه مثلا لكن دول يدوب شهرين علي: اعتقد ده موضوع قديم ايه اللي مضايقك دلوقتي؟ اوعي تكون قلت لشاهندا انك لسه بتحب شوق مثلا وما بتحبهاش لان شاهندا بتحبك حازم: لا يا علي انا كمان كان متهيألي كده بس طلعت متوهم... علي: لا مش وهم هيا بتحبك حازم: انا طلبت ايدها للجواز وهيا رفضتني يبقي متوهم؟؟..... ايه سكت ليه؟ علي: طيب ليه هترفضك؟؟ حازم: وليه شوق رفضتني قبلها؟؟ نفس السبب... انا راجل مشلول وعاله علي: انت مش مشلول يا حازم ممكن ايام شوق لكن دلوقتي قاطعه حازم: دلوقتي ايه؟ بتعب لو وقفت كام دقيقه.... مابقدرش امشي كتير او اصلا امشي غير كام خطوه.... مش هقدر اجاريها واجاري شبابها... طول الليل ببقي تعبان ومحتاج لرعايه خاصه،... ايه بقي اللي يجبرها ترتبط بواحد زيي؟؟؟ علي: علي فكره انت بتنزل من مكانتك جامد... انت طبيعي جدا انت بس اللي شايف الوضع ده حازم: علي انت سألتني انا ما طلعتش ليه من شويه... عارف ليه؟ لاني مقدرتش اقف واطلع كنت محتاجك تيجي تسندني.... علي: اللي بتحب واحد هتستحمل انها تكون عكازه حازم: اللي بتحب؟؟؟ اديك قولتها روح بيته وعلي دخله وطلعه لحد اوضته علي: لو تحب افضل معاك؟ حازم: لا لا روح لمراتك انا كويس ما تقلقش عليا علي سايبه وخارج حازم: علي علي: افندم حازم: انا متشكر قوي لكل حاجه بتعملهالي... واعذرني لو في مره اتنرفزت عليك علي: اولا انا مش محتاج منك شكر ثانيا انا مش بزعل منك او مستني منك اعتذار ثالثا والاهم انا بعتبر نفسي صديق ويمكن اكتر من صديق كمان الله اعلم انت ايه نظامك؟ حازم: انا بعتبرك اخ علي رجعله وحضنه: واكتر كمان لو محتاج اي حاجه كلمني ومسافه الطريق حازم: تسلم علي سابه وخرج وهو غرق في بحر احزانه وذكرياته المره ووجعه الجديد شاهندا روحت بيتها تعيط وقابلت امها وابوها بس تجاهلتم وطلعت جري علي اوضتها وده جنن ابوها وامها ابوها: اطلعي لبنتك شوفي ايه اللي حصل؟ امها طلعتلها بسرعه امها ساميه: شوشو بيبي مالك يا قمر بتعيطي ليه؟ ابوها مكرم واقف هو كمان قلقان علي بنته الوحيده شاهندا بتعيط ومش بترد مكرم: انا هتصل بيه واهزقه واشوفه زعلك ليه يدوب هيتحرك فشاهندا وقفته شاهندا: لا يا بابا ما تتصلش بيه.. هو مزعلنيش مكرم: امال ايه اللي حصل؟ ما تجننيناش وقوليلنا اترددت شويه وبعدها حكتلهم كل اللي حصل... حكتلهم عن حبه القديم ومأساته معاه وحكتلهم طلبه للجواز وندمه بعدها وسكتت مستنيه ردهم فضلوا شويه ساكتين وبعدها ابوها نطق مكرم: علي ما اعتقد يا شاهي وعلي حسب معرفتي بحازم انه مش ندم بالمعني اللي انتي فهماه.... شاهندا : يعني ايه مش فاهمه؟ مكرم: يعني هو سبق واتجرح قبل كده بسبب حالته وحبيبته اللي كان بيحبها سابته علشان مشلول او الله اعلم سابته ليه بس ده تفكيره.... وحاليا انتي بتعيدي نفس القصه تاني... شاهندا : بعيدها ازاي؟ انا بحبه يا بابا بجد مكرم: وانتي قولتيله انك بتحبيه؟ شاهندا: لا بس اكيد هو حسها مكرم: ماهو حس واعتمد علي احساسه قبل كده واتصدم فمعتقدش ابدا انه هيثق في احساسه تاني شاهندا: انا مش فاهمه حضرتك ما تتكلم علي طول يا بابا قولي تقصد ايه؟ مكرم: اقصد يا حبيبتي انه بيحبك وطلب ايدك وانتي رفضتيه شاهندا: انا ما رفضتوش مكرم: عدم تصديقك لكلامه او انك تعتبريه هزار وتطلبي منه يتكلم جد ده جرحه وافتكر انه بيفرض نفسه عليكي وانه ازاي يتجرأ ويفكر كده وبالتالي انتي تخيلتي انه بيهزر فتراجع بسرعه شاهندا: انا مكنتش مصدقه من فرحتي مكرم: وهو ما يعرفش ده.... اعتقد انك لو رحتيله حاليا هتلاقيه في حاله غير الحاله وهتلاقي جروحه كلها متفتحه... انتي بدون قصد فهمتيه انه ما ينفعش وانه مشلول لسه او هو مش كفؤ ليكي... ده والله اعلم شاهندا: ده يبقي متخلف لو فكر كده مكرم: اللي اتلسع من الشوربه..... هو اتجرح قبل كده ومش عايز يتجرح تاني بنفس الطريقه فانسحب بهدوء شاهندا قامت وقفت مره واحده مكرم: رايحه فين سيادتك؟ شاهندا: لازم اشوفه مكرم: الصبح ان شاءالله شاهندا: بابا ارجوك... لو كلامك صح مش عيزاه يبات مجروح مني وفاكر اني مبحبوش او انه بعتبره مشلول او عاجز... بابا انا بحبه ومش عيزاه ينام مجروح ومهما اعترض ابوها الي انها اصرت علي رأيها ونزلت بسواق ابوها الخاص يوصلها ساميه : انت سايبها كده ليه ؟؟ انت ايه اللي عاجبك في حازم ده ؟ ده مشلول مكرم : راجل محترم ... محترم في زمن مفيهوش اي اخلاق وبعدين هو مش مشلول ساميه : بيمشي بعكاز وكام خطوه ويقعد مكرم : مش مهم بس عنده كتير يعوض عيبه ده .. ده اذا كان عيب اصلا .. المهم سيبي بنتك براحتها تاخد قرارها بحريه حازم في اوضه نومه الذكريات والالم والوجع محاوطينه... حاسس بمنتهي الوحده... منتهي الوجع والالم.... الم ظهره بيزيد وبيزيد وبيوصل لقمته كل ما يفتكر انه اتعود علي الالم بيكتشف انه غلطان وان في الم اكتر واكتر وكالعاده بيتجرع الامه لوحده... اخد مسكن لارضاء ضميره بس منفعوش باي شيئ وهو لوحده الباب خبط واستغرب مين هيخبط علي اوضه نومه بالليل كده؟ امه وبتسهر بره وما بترجعش غير اخر الليل والخدم ما بيطلعوش الا لو هو نادي عليهم؟؟؟؟ حازم: ادخل الباب اتفتح واتفاجئ بشاهندا قدامه.... بصتله كتير جدا وشافت ألمه اللي بيحاول يداريه وعرفت انه تعبان ومجروح نظره واحده كانت كفيله انها تعرف انه في قمه وجعه شاهندا: ممكن ادخل؟ حازم: اتفضلي... خير؟ نسيتي تقوليلي ايه؟ او في ايه؟ شاهندا: نسيت اجاوبك علي سؤالك حازم: انا قلتلك اعتبري نفسك ما سمعتيش حاجه شاهندا: بس انت قلت وانا سمعت حازم اتنهد: عايزه ايه يا شاهي؟ ما انا قولتلك هنفضل اصحاب وعلاقتنا زي ما هيا فما تخليش ضميرك يأنبك انتي مش ملزمه بحاجه.... ولا مضطره انك ترتبطي بانسان شبه عاجز تضيعي عمرك معاه ولا... مخلتوش يكمل جملته وحطت ايدها علي بوقه تمنعه يكمل وقعدت قصاده شاهي بهمس : انت بتتكلم كتير قوي.... ومش مديني فرصه اتكلم حازم مسك ايدها وحركها بعيد: بسهلهالك مش اكتر شاهندا: انا اعرف اتكلم نيابه عن نفسي كويس ومش محتاجه تسهيلاتك دي وبعدين مش معني انك اتجرحت مره انك تبص للكل بنفس النظره حازم: عايزه ايه يا شاهندا؟؟؟ شاهندا: نادرا ما بتقولي شاهندا... افهم من ده انك لما هتقولي باسمي كامل انك زعلان؟؟؟ حازم: برضه مارديتش عليا عايزه ايه مني؟ انا تعبان ومش قادر وعايز ارتاح شاهندا وقفت ومسكت ادويته بتقلب فيهم شاهندا: دي كلها مسكنات!!! ليه بتاخد مسكنات كتيره كده؟ حازم: شاهندا!!! شاهندا: ليه المسكنات دي كلها؟؟؟ حازم: يعني هيكون ليه؟ اللي بياخد مسكنات بياخدها ليه؟؟؟ تعبان اكيد شاهندا: بس ده غلط انت لازم تعالج اللي بيسبب الالم حازم: مفيش علاج خلاص!! الدكاتره اكتفوا مني... وانا اكتفيت منهم والالم بيستمر كام ساعه وبيعدوا جاوبتك اعتقد... جاوبيني انتي بقي؟ جايه ليه؟ كانت مدياله ظهرها وبصتله مره واحده شاهندا: جايه اقولك بحبك............ هكون جايه ليه يعني؟ حازم مش مستوعب هيا قالت ايه: نعم؟ انتي قولتي ايه؟ شاهندا: قولت..... بحبك..... حازم سكت وهيا قربت وقعدت تاني قصاده شاهندا: وموافقه اتجوزك.،.. حازم: بس انتي.. شاهندا: انا ايه؟ انا مكنتش مصدقه نفسي من فرحتي ان حبيبي اخيرا نطق ويدوب هفرح لقيتك اتراجعت وقولتلي انك ندمان فاتصدمت حازم: انتي افتكرتيني بهزر شاهندا: لاني كنت خايفه تكون بتهزر.... كنت عيزاك تأكد كلامك مش تتراجع كده؟ حازم: انتي ايه اللي يخليكي ترتبطي بواحد زيي؟ ؟ شاهندا: ايه واحد زيك دي؟ مالك انت يعني؟ حازم: عارفه لما جريتي من قدامي كنت عايز اوقفك بس مقدرتش.... رجليا خانتني.... ودي مش اول مره ولا هتكون اخر مره... انا ما بقدرش امشي كتير.... وطول الليل تقريبا بقضيها مسكنات ولو وحطي كذا خط تحت لو دي... لو عملت كام مشوار النهار او اتحرك زياده حبتين بيكون ليلي جحيم لا يطاق زي الليله دي كده... وزي ما انتي عارفه المسكنات ما بتعملش حاجه او بتعمل بس ما بتفرقش كتير شاهندا: انت بتقولي كل ده ليه؟ المفروض بقي اني اعمل ايه؟ اتراجع مثلا؟ او اقول لا دي هتبقي عيشته صعبه؟؟ ايه متوقع مني ايه؟ حازم: متوقع منك تفوقي او تكوني علي الاقل صريحه مع نفسك شاهندا: انا فايقه وصريحه جدا مع نفسي وبعدين انا دكتوره وعارفه كويس قوي انا داخله لايه ورايحه فين؟ ايوه انا مش دكتوره بشريه بس صيدلانيه ودرست الالم وعلاجه وعارفه ان في ألم مالوش علاج بس كل ده مقدور عليه المهم بقي الالم النفسي وألم القلوب ده بقي اللي مالوش اي حل بجد... بص يا حازم علشان نبقي صرحا جدا وتبقي كل الامور واضحه... انا بحبك ودي حقيقه وكنت متخيله انها واضحه ليك بس ما علينا... لو انت اتراجعت في عرضك للجواز علشان تخيلت او فكرت اني ما بحبكش او اني مش هستحمل او انك مثلا مش هتكون مناسب فارجوك سيبلي انا القرار انا عارفه هستحمل ايه ومش هستحمل ايه؟ انا بحبك وعارفه انت هتقدر علي ايه ومش هتقدر علي ايه ومستعده احط ايدي في ايدك ونكون سند لبعض وتسحملني ان انا اكون عكازك وساعات الالم دي نعديها مع بعض... ماشي اوكي؟؟؟؟؟ اما بقي لو كان تراجعك ده سببه كان حبك القديم وانك حاسس انك مش هتقدر تتخطي حبها وانها لسه عايشه جواك ف هنا بقي حازم حط ايده علي بوقها علشان ما تكملش حازم: حبي القديم صفحته اتقفلت يوم فرحها علي راجل تاني انا بس حكيتلك علشان الامور كلها تكون واضحه قدامك ومفيش اسرار تكون بينا... ولو انتي واثقه في قرارك ده انا هكون اسعد راجل في الدنيا دي بس ارجوكي خدي وقتك وفكري الاول قبل ما تاخدي قرار نهائي شاهندا: انا بحلم باليوم ده من اول مره شفتك فيها حازم: معلش برضه خدي وقتك وشوفي والدك ووالدتك شاهندا: حبي كان واضح للكل الا انت الظاهر... كلهم عارفين اني بحبك ومحدش فيهم اعترض حازم: ممكن يكونوا مفكرينه اعجاب او صداقه مش جواز المهم خدي وقتك كلمهيهم وبلغيني شاهندا طلعت موبيلها ويدوب هتتكلم شده من ايدها حازم: انتي هتعملي ايه؟ شاهندا: هبلغهم حازم: مين فينا بقي اللي بيهزر دلوقتي؟ شاهندا: انت ليه مش مستوعب ان حبي ليك كان ظاهر للكل؟؟؟ حازم: وانتي ليه مش مستوعبه ان حالتي خاصه وما ينفعش الامور تتاخد بالبساطه دي؟؟ شاهندا: انت عايز ايه دلوقتي؟ حازم: النهارده الخميس صح؟ الخميس الجاي هستني رد نهائي منك ومن النهارده لحد الخميس احنا اصحاب تمام؟ شاهندا: هستني اسبوع؟؟؟ اممم ده هيريحك يعني؟ حازم: جدا شاهندا: خلاص اتفقنا... ممكن بقي تقولي حاليا حاسس بإيه وتوصفلي وجعك بالظبط ايه؟ حازم: ليه بقي ان شاءالله؟ شاهندا: لاني حاليا بسألك السؤال ده كدكتوره مش كحبيبتك حازم ابتسم: كا ايه؟ شاهندا: حبيبتك هو مش انا حبيبتك ولا ايه؟ حازم: اكيد اكيد وصفلها وجعه وهيا كتبتله مسكن جديد مختلف تماما وبعت حد من الخدم يجيبهوله هو و حاجات تانيه هيا كتبتها شاهندا: اتفضل بقي ده ويارب يكون في فرق اخد الدوا من ايديها وبصلها شاهندا: ودلوقتي بقي عايزه حضرتك تنام علي بطنك وتخلع تيشرتك الاول حازم باستغراب: افندم؟ شاهندا: علي فكره انت مريض متعب ومش متعاون ابدا حازم: لا خلاص يا دوك قلع تيشرته ونفذ كلامها... اتفاجئت شاهندا بكميه اثار الجروح والعمليات اللي في ظهره لدرجه انها مقدرتش تنطق وحازم لما طال سكاتها بصلها واتفاجئ بدمعه نازله من عينها فاتعدل بصعوبه ومسح دموعها حازم: ايه؟؟ اتفاجئتي؟؟ لو الوضع هيكون صعب قاطعته شاهندا: اتفقنا ان انا اللي هقرر.... بس متخيلتش الشكل ده... انت عملت كام عمليه؟؟ حازم: يووووه بطلت اعد بعد ما عديت السبعه شاهندا: انت عملت اكتر من سبع عمليات في ضهرك؟ حازم: شوفتي بقي ليه عطيتك مهله اسبوع تفكري؟؟ شاهندا: انا ما بتهزش بسهوله والشيئ الوحيد اللي ممكن يخليني اغير رأيي هو انك انت متبقاش عايزني في حياتك... المهم علي بطنك يالا ابتسم حازم ورجع لوضعه وهيا المره دي كانت اقوي فتحت مرهم وبدأت تدلك ظهره في اماكن الالم اللي هو بيشاورلها عليها في الاول كان مش قادر يستحمل تدليكها وبيمسك نفسه بالعافيه من الوجع ولولا انها بنت وهو راجل كان عيط من الوجع شاهندا: معلش استحمل عارفه انك تعبان بس ادي وقت للمرهم يشتغل والتدليك تاعبك بس مهم وبعدين انا مستغربه اصلا انك مش بتعمل جلسات علاج طبيعي حازم: كنت بعمل وتعبت... سنين ومفيش اي تحسن ولا ليها لازمه فبطلتها وجع وعلي الفاضي شاهندا: ازاي علي الفاضي؟ انت كنت فين وبقيت فين؟ جلسات العلاج الطبيعي مهمه جدا شويه وبدأ حازم فعلا يرتاح وجسمه يهدي والالم يقل ومع تدليكها ومع سكوتهم اتفاجئت شاهندا بان حازم نام من التعب او من الارتياح المهم انه نام فانسحبت بهدوء وابتسامه علي وشها وفرحه جواها وروحت بيتها ولقت ابوها وامها في الانتظار وحكتلهم اللي حصل مكرم: يعني فعلا رأيي كان صح؟ المهم ناويه علي ايه؟ شاهندا: هديله الاسبوع اللي هو عاوزه وبعدها نتجوز بإذن الله ده اذا كان مش عند حضرتك مانع؟ مكرم: يا حبيبتي انا تهمني سعادتك وبس وهو انسان محترم وكويس وسمعته كويسه وله وضعه... اما بقي وضعه الصحي فده شيئ انتي تقرريه اذا كنتي هتتحمليه ولا لأ؟ واوعي تتخيلي ان الموضوع مش هيفرق معاكي!!! هيفرق وهيفرق كتير جدا كمان شاهندا: يفرق في ايه؟ اي حد معرض انه يتعب او يحصله حاجه مكرم: ماشي بس في فرق انك تكوني متجوزه وجوزك يتعب او يحصله حاجه وانك تتجوزيه تعبان اصلا!!!!! في فرق... انتي بتتجوزي واحد محتاج لمعامله خاصه.. مش هيقوم بكل واجباته كامله... هتلاقي حاجات ناقصاكي.... شاهندا: ايه اللي ممكن حازم ما يقدرش يعمله وهفتقده قوي... مش هيقدر يمشي كتير؟؟؟ مش مهم المجهود الجامد بيتعبه... وانا مش محتاجه منه حاجه تتطلب مجهود مكرم: نعم؟ ده ابسط حقوقك كزوجه محتاج لمجهود ولا انتي جاهله ده انتي دكتوره واكيد انتي فاهمه انا اقصد ايه؟ مش هيكون زي راجل طبيعي شاهندا: انا عارفه النقطه دي كويس... واكيد فاهمه وعارفه برضه يا بابا انه هيقصر في حاجات غصب عنه بس ارجع واقولك كلمه واحده انا بحبه وكله يهون في سبيل اني افضل جنبه مكرم: الحب ساعات بيكون له لمعه ورونق بيختفوا بعد الجواز وتشوفي الحقيقه مكشوفه مجرده شاهندا: انا مش انسانه عاطفيه او هوائيه وعارفه انا داخله علي ايه.... ارجوك ما تقلقش عليا مكرم: وظيفتي كأب هيا اني اقلق عليكي تاني يوم الصبح حازم فتح عنيه. مستغرب شويه هو نام امتي او ايه اللي حصل؟ بس هو قايم مبسوط اتعدل واستغرب انه قايم مرتاح مش تعبان ابتسم من ذكريات ليله امبارح ولقي نفسه بيتصل بشاهندا وردت بصوت نعسان نايم حازم: اسف اني صحيتك تحبي اقفل؟؟ شاهندا: لا طبعا... صحيت امتي؟ حازم: يدوب حالا... وحسيت اني عايز صوتك ابدأ بيه يومي شاهندا بكسوف: بجد؟ وده نسميه حب مثلا ولا ايه؟ حازم: ولا ايه.... شاهي!! شاهندا: عيوني حازم: انا متشكر جدا علي ليله امبارح.... انت نقلتيني من حاله لحاله مختلفه تماما شاهندا: متشكرنيش ارجوك علي حبي... محدش بيشكر حبيبه انه بيحبه حازم: انا نازل الفندق دلوقتي وانتي فوقي وابقي كلميني اوك شاهندا: ماشي حبيبي قام حازم ونزل وراح لشغله... علي استغرب ان حازم مبسوط وده شيئ نادرا ما بيحصل علي: خير؟ كنت قلقان عليك امبارح بس شكلك النهارده غريب حازم: غريب ازاي؟ علي: يعني ما تخيلتش انك هتيجي مبسوط ابدا وكنت شايل هم النهارده يعدي ومحضر نفسي لكميه صدمات منك حازم ضحك: لا يا عم مفيش صدمات ولسه هيسأل اكتر تليفونه رن فحازم ابتسم ورد حازم: ايوه يا قمر شاهندا: انت فين بقي في الفندق الطويل العريض ده؟ حازم: انتي هنا؟؟؟ شاهندا: اهمممم عند الكافيه جوه حازم: لحظه وهنزلك قام حازم ورايح لشاهندا وعلي وراه مبتسم علي: اتصالحتو امتي؟ انا سايبك بالليل حازم: موت بفضولك علي: بقي كده؟ ماشي... دي اخرتها!!! حازم: لا يا عم مش دي اخرتها،... احنا اتصالحنا بعد ما انت مشيت اتكلمنا وكان فيه سوء تفاهم وضحناه علي: يعني انت اتصلت بيها ولا هيا اتصلت بيك ولا ايه؟ حازم: انت مش ملاحظ ان اسئلتك كتير؟ علي: اسف لو ضايقتك حازم: لا مضايقتنيش... خلاصه الكلام ومتسألش اي اسئله بعدها.. شاهندا جاتلي بالليل واتكلمنا خلاص ارتحت؟ علي: طيب الحمد لله انكم اتصالحتو... المهم حازم: ايه المهم؟؟ علي: خليها بعدين شاهندا هناك اهي حازم وقف وبصله: ايه المهم؟ علي: الشقه اللي انت طلبتها جاهزه حازم: جاهزه!! طيب ابعت حد ياخدهم من شقتك للشقه الجديده علي: ياخد مين؟ حازم: شوق وبنتها هيكون مين يعني؟ ابعتلهم حد يوديهم اخيرا وصل لشاهندا اللي كانت جميله فوق العاده حازم: هو انتي جميله النهارده عن كل يوم ولا انا بيتهيألي؟؟ شاهندا: هو انت ما تعرفش ان الحب بيحلي اكتر واكتر حازم هيرد بس لاحظ ان علي واقف مبتسم وراه حازم: انت واقف ليه؟ مستني حاجه؟ علي: لا كنت بطمن عليك بس لتكون محتاج اي حاجه حازم: طيب مش اطمنت!! اتكل شوف اللي قولتلك عليه سابهم علي ومشي وهما قعدوا مع بعض شاهندا: نفسي افهم انت بتيجي هنا كتير ليه؟ يعني ايه سر حبك للفندق ده بالذات؟؟؟ حازم: بتهرجي صح؟ شاهندا: لا بجد حازم: الفندق بتاعي يا شاهي وبتابعه... سلسله الفنادق دي بتاعتي شاهندا: بجد؟؟؟ مكنتش اعرف حازم: ماهو والدك عايز يضم فنادقه لمجموعتي وده سبب تعارفنا شاهندا: انا مبتكلمش مع بابا في الشغل... وبعدين ده من حسن حظي انا حازم: الله اعلم يمكن يكون من سوء حظك!!! المهم فطرتي؟؟ شاهندا: لا طبعا اوعي تكون انت فطرت؟؟ حازم: لا كان عندي امل نفطر مع بعض شاهندا: طيب مستني ايه؟ خليهم يجيبولنا الفطار علي بعت لشوق السواق ياخدهم ويوديهم شقتهم الجديده وسط استغرابهم شوق: طيب فهمني السواق: يا هانم كل الاوامر اللي عندي اني اخد حضرتك واجيبكم هنا وبس شوق: اوامر مين؟ السواق: حازم بيه طبعا شوق: وهو فين؟ السواق: الله اعلم يا افندم بعد اذنك... محتاجه مني اي شيئ قبل ما امشي؟ شوق: لا متشكره بس بلغ حازم بيه اني لازم اتكلم معاه ضروري اخر النهار عند شوق الباب خبط وفتحت اتفاجئت بحازم قدامها حازم: بلغوني انك عيزاني؟؟؟ شوق:.... ونكمل بكره ياتري حازم بيحب شوق ولا شاهندا؟؟ شاهندا انتقام حازم؟؟؟ شاهندا هتعرف بشوق ولا لأ؟ توقعاتكم ShiMoOo | ||||||||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
.png)
العرض العادي
