آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
27-12-19, 02:22 AM
| #11 | ||||||||
| مراقبة عامة ومشرفة منتدى الروايات المنقولة  
|  #خطوات_نحو_الجحيم (الجزء 2) ،،،،،،، بقلم الكاتبة زينب ماجد ،،،،،،،،، الحلقة_ 6 لا داعي ان تلقي بلومك على الدنيا و الأيام فأنت انت لا غيرك من شق طريقه و اخترت لنفسك ان تكون بهذا النفق الشاق، انت الذي رميت بنفسك الى طوارق الأيام، فلا تلمها بل لم نفسك و كن لها حسيبا. تركيا_أسطنبول الساعة ٩ مساءا -اهلا بيك استاذ -رجائا بلا رسميات احنه الان بعيدين عن اماكن شغلنا و بعيدين حتى عن العراق فياريت يا لجين تسميني زاهر بدون مسمى اخر ....ابتسمت مجاوبت ، اشرلي اتفضل سحبت الكرسي و كعدت جان المطعم او المكان الكاعدين بيه يطل على بحر ، اخذت عيني و اني اباوع لاجواء البحر يجنن و النسيم البارد اليوصل منعش -حلوة الأجواء -جدا -خريجة شنو انت ؟ -صيدلة -جميل مع ذلك تشتغلين بغير الصيدلة -مو هوايتي ولا طموحي من اني و صغيرة الزم جفجير لو خاشوكة و اكعد عود اقدم برامج و العب لو اطلع ملابسي كلهم و اسوي ازياء ، فهذا عالمي الاحبه مالي بالطب و التعقيد و الهوسة -صح كل انسان يبدع بالمجال اللي يحبه -بالضبط -متزوجة انت ؟ -لا ، مطلقة -ما عندج اطفال ؟ -بلي عندي بنت، بس عند ابوها -وليش مو عندج -اخذ الحضانه هو بالحيلة و امور هواية -اذا في مشكله اكدر اساعد.بيها كولي -لا لا اشكرك ، الموضوع اكبر من ان ينحل موضوع بنتي صارلي حلم -ليش ؟ اني اسف لو كان تدخل في خصوصياتك بس ثارني الفضول خصوصا لأني شفت ورا هالجمال و المرأة القوية انسانه معذبة -شلون شفت ؟ -لاحظت اثار تعنيف على ركبتج بأول لقاء تؤكد ان انت تتعرضين للعنف -اهاا ، هو مجرم .. قاتل مأجور سياسي بس خلصت منه -اهاا ، اذا تريدين مساعده بأرجاع بنتج اني حاظر -و شلون تكدر ترجعها ؟ -هالامور شغلنا -مفهمت اشون يعني شغلكم -شوفي ست لجين ، اني من لما شفتج بالقاء اتعلقتي ابالي، فور رجوعي من المكان طلبت الcv الخاص بيج و السيرة الذاتية .. و عرفت شنو انت و اخذت نبذة عن عملج، خليني لا الف و ادور لكن اني اطلب ايدج للزواج ....بقيت صافنة بوجهه -آااااا صراحة فاجئتني بهذا طلبك -اعرف و الج الوقت بالتفكير ، اكيد هكذا موضوع ميجي بالسهولة فمن حقج التفكير -افكر اشون و اني ما اعرف عنك شيء ابدا ، لا عن حياتك اهلك ان كنت متزوج او لا تمتلك اولاد بنات ، اني اعرفك -اي صح ، اني متزوج و عندي ٢ اولاد و بنت وحدة ، عائلتي تسكن بالمنصور ، بس تأكدي ان انت حتكونين بعيده عنهم تماما و مراح يأثر هالشيء -شتقصد زواج سر يعني -لا اكيد و ليش سر اني ما مسوي جريمة و من حق الرجل يتزوج اكثر من وحدة، اطلبج من اهلج حسب الاصول و اسكنج ابيتي بالمنطقة الخضراء -صراحة ما اعرف اني ضد ان اتزوج شخص متزوج ما احب -زوجتي كبيرة بالعمر و دخلت سن اليأس و اذا الله محلل الزواج فليش نحرم -اني مدا احرمة لكن كل القصة انو ما احب -انطيتج مهلة تفكرين اخذ الجواب النهائي بعد.اسبوع، هسه خلينا نطلب شيء ناكله ابتسمت ، سألني اذا احب الأكلات البحرية ؟ جاوبته ب(نعم ) وبعدها دخلنا بنقاش عن السياسة و اللي ديصير بالعراق و عن البرلمان العراقي وعن الشهرة و الاعلانات و الشركة ووو...الخ كملت رجعت للفندق ، طلع حاجز بنفس الجناح اللي حاجز غرفتي بيه بينا غرفة وحدة ... صراحة كل الموضوع ما خش بعقلي غير موضوع بنتي ، بقيت افكر بيه بس جنت تعبانه كلش نمت .. كعدت من الصبح ، فرصة جميلة استرجع ايام بيروت و اركض الصبح بدلت جينز و باته رياضية و تيشيرت ، اخذت الهيتفون و الموبايل و طلعت دخلت للمصعد، دخل هو المصعد هم -صباح الخير -اهلا صباح النور -ان شاءالله الغرفة كانت مريحة و ما نقصك شيء؟ -اشكرك جدا كانت مريحة، بس تكدر تسحب المرافق الخاص اللي خليته حضرتك و اشكرك على دفع الفتورة و تكاليف السفر بس اني راح ابقى يومين زيادة عندي اعلانات و جلسات تصوير اكملهم و ارجع -ماكو مشكلة يبقى وياج و اني تكفلت سفرج كامل ميصير اتراجع بيه -ميحتاج صدكني -ارجوج -اشكرك -وين متوجهه ؟ -اركض للرياضة ،اجواء تركيا جميلة - جميل انك تمارسين الرياضة عادة المراة العراقية مهملة بما يخص الصحة و الرياضة -أغلب النساء العراقيات مضطهدات و مقيدات بالبيوت، في اللي يراى واجبهم خدمة الزوج و الاطفال و اهل الزوج ان كانت ساكنة مع اهله و بهيج حالة يكون همها ان تلكى الها فسحة من الراحة تنسى شيء اسمه صحة و رياضة -صحيح .. انفتح المصعد ، ودعته و طلعت برا اركض ركضت قرابة الساعة، اخذت مي شربت و كعدت ارتاح شوي و خابرت ماما : الوو -الو هلو ماما لجونه، لج عيني بالي يمج و اتصلت البارحة و ماكو ، شنو وصلتي تركيا ؟ -اي ماما اني حاليا بتركيا -اي و شصار -عرض عليه الزواج -ياااا عزا داده هذا شو فايت گبل ! -ههههه والله اني هم استغربت -اي و شجاوبتي -انطاني مهلة افكر - و انت شنو رأيج ، مدام ما انطيتي رفض اكو شي خلاج تفكرين -اي ، كلمني بخصوص بنتي و كال بأستطاعتي ارجعها و اسكنج المنطقة الخضراء و بعيد عن بيته الاول -متزوج يعني -اي و ساكن بالمنصور ابغداد -و كل تفكيرج بنتج -لعد شفكر ليش اني المثلي تتزوج ، كرهت الزواج كله بس ماما اني احتاج بنتي بلكي هذا باب الله فتحلياه ديرجعلي بنتي -والله ماما ما اعرف ، عسى فعلا و يكون طريق خلاصج خاصة اذا اتزوجتي راح يصيرلج حماية و سايق يعني تأمنين على روحج و مرت نائب ما يكدرلج -هو يكول اكدر انهي موضوعه يعني اذا اضطر الامر يقتله -لا اسم الله قابل احنه يماما مجرمين دنقبل بالقتل يكفينا يبتعد منج، بس انت فكري زين هي هم فرصة الج هو نائب و مسؤل جبير و يخطبج كدام الناس ليش لا احسن ما تبقين وحدج يماما تكدرين و تفرين حتى تعيشين نفسج - ان شاءالله ، يلا ماما لازم ارجع للفندق من اوصل اخابرج -اوك حبيبتي - بيباي قفلته من ماما ورجعت ركض للفندق، سبحت و شسورت سعري و مكياجي و لبست الملابس اللي للاعلان و خابرت المصور علاء اتفقنا بكذا مكان ، حتى نكمل شغلنا اخذت ويايه جنطة الملابس و المكياج و الكاوية .. حتى لما نغير المكان اغير الستايل دا اكمل شغلي بأسرع وقت ... التقيت علاء و سوينا جلسات تصوير ، طلعوا يجننون كتله ابعثلياهم لفوني دا انشرهم ع الانستكرام ... بعثلياهم و نزلتهم بعدها بيوم كملت كل شي و رجعت لأربيل ، اول ما دخلت العراق خابرني مخلد : الوووو -الو هلا مخلد -شلونج لجين -زينه الحمد لله انت اشونك -بخير و نعمة الحمدلله، انت وين -بأربيل -شو منزله صور الج بتركيا -اي مو طلع عندي شغل طارئ اضطريت اطلع فورا ، ٣ ايام و رجعت -هااا زين الحمدلله على سلامتج -الله يسلمك -انت وين -بالدوام -يمكن هاليومين اجيكم، مشتاقة لعمامي كلش هوايه -اي هلا بيج ، بس مشتاقة بس العمامج ؟ - لا ولأبن عمي اسمه مخلد ، هسه ارتاحيت ؟ -ههههههههه من تجين انطيني خبر دا اريد احجي اندكت الباب، كلتله : مخلد الباب ديندك من رخصتك -اخذي راحتج رحت للباب فتحتها طلعت صديقتي بالشغل اسمها دانيا ، فتحتلها ادية : لج هلااااو -هلو عيني هلو ، التسافر لتركيا و متكول لاحد -لج بالله العظيم صارت مفاجئة بس شنو غير تجنن ، شوية لخ نصفي امورنا و نسافر اني وياج -اي لج كلش متكأبة فد مره علوااا لو نطلع نترفه شويه -والله خلصتها تصوير و شغل كلشي مشفت منها ، نخلص شغل ناخذ اجازة و نطلع فد أسبوع -ان شاءالله بس سولفيلي صدك هذ النائب زاهر طلبج بموعد -احمد كلج مو ؟ -اي تعرفين احمد ميضم عليه شيء -اي، النائب طلبني للزواج -جذذذذذب -اي والله - لج يرادلها بخت هيج و تتزوجيلج نائب و اطكين و فيلا و حساب كبير بالبنك و اطلعين لأي دوله تريديها اوي اوي لجين لج انفتحتلج ابواب الدنيا -ما اعرف لسه ما قررت -دنجبي لسة ما قررت شنو منتظره احسن من هيج -لج مو هيج بس هذا زواج ما اريد استعجل بيه -اي حقج بس هيج زواجه ما يحتاجلها تفكير، هذا حظ و اجاج لا تضيعين الفرصة -ما اعرف بعد .. ..... على الرغم من ان اني اتأمل ان يرجعلي بنتي و احسه حبل النجاة الوحيد الا انو اكو شيء بداخلي ما قابل، ما اعرف اني كارهة الزواج مدري .... ربحنا العقد و وقعنا و حصلت على مكافئتي، مفكرة استثمر اللي عندي و افتح محل ازياء و احط الستايلات اللي تعجبني استوردها و اعرضها و اني اروج لمحلي بس هذا مو تفكيري، اني تفكيري الان بموضوع النائب، يعدني حايرة ، فخلصت شغلي الخميس و طلعت لبغداد رحت لبيت عمو عثمان هم استقبال و هلا و مرحباو ضيافة، بقيت الليلة و الصبح خابرت على مخلد كتله : اني ابغداد ابيت عمو عثمان، تعال اريد اشوفك ... والله مكال باطل ربع ساعه و هو فات علينا سلم : شلونج و شخبارج -زينة الحمدلله -شو لابسة وين تريدين -اريد اطلع شويه غمزتله و اشرتله ، مفهم اشارتي -تروح وياي -اي يلا طلعنا اني وياه و صعدنا بالسيارة ، حجه : شكو شو تأشريلي قبل شوية -لا ردتك تطلع لأن عندي موضوع وياك -وهو ؟ -لازم نستقر بمكان يلا نحجي رحنا للجندول كعدنا هناك طلبنا لحم بعجين و هو قلق يريد يعرف شنو الموضوع اللي اريده بيه -كولي شكو شنو السالفة -شغلت بالك هههههه -اي لان اشوف احيرة بعيونج فقلقتيني شكو -لا والله فد امر حبيت اخذ نصيحتك بيها لان فكرت هوايه و مقتنعه بس شيء بداخلي ما راضي و ما مقتنع -شنو هو -اول شيء اكولك بداعتي النصيحة الطالبته خليها لمصلحتي لا ترفض لمصلحتك ... شولفي شنو اللي يناسبني بدون انانية -دحجي يمعوده فضيها شطلعت هاي اناني و مصلحتك شنو -هيج دا انبهك من البداية لأن اني كل همي بنتي -بنتج مو حجينا بيها و كتلج مالك ما تكدريلا -مو لكبت طريقة -و شنو هي ؟ -سمعتني ذاك اليوم و اني اكولك عن نائب بالبرلمان عدنا شغل وياه -اييييي -طلب ايدي للزواج ومستعد يرجعلي بنتي من مالك و حتى لو اضطر يكتل مالك نفسه برطم حلكة و كام يهز براسة -و انت صدكتي مو ؟ -الرجال مو جذاب و اتمنى تنظر للأمر بجدية مو بأستهزاء لأن فعلا محتاجه النصيحة سولفتله كل القصة حتى سفري لتركيا -كملتي ؟ -اي -تريدين نصيحتي بعقل بعيده ان اي عواطف مني او مشاعر ، تريدين كلام تقنعين بيه !! -صارله شكد يعرفج هذا النائب ؟ - اسبوع او اكثر يعني -مفكرتي على اي اساس تقدملج للزواج و هو جاهل لأطباعج و اسلوبج و اخلاقج و اهلج وووو و ميعرف غير الcv و سيرتج الذاتية ؟ -ما اعرف -لا اني اعرف ، انعجب بشكلج ، بنت حلوة و ملونه و صغيره و اعلامية و على كامل الاناقة و الشياكة لعابة لهذا راد يحتويج بمنصبة، يعنب حبج بعين عوفينا من موضوع بنتج ، سمعتي فد يوم عين تحب ؟ مالك حبج بعيونه لجمالج، لما شبع منج شسوا ؟ تريدين تعيدين نفس الموضوع ؟ عوفينا من الحب تريدينه يقتل مالك ؟ -لا -لعد -يرجعلياها -يعني مالك يبقى عايش ، زين اكدر اسألج مالك شنو شغلة ؟ -مجرم -المجرمين انواع بيهم اليتاجر مخدرات بيهم اليسرق ، مالك شنو ؟ -قاتل مأجور سياسي -و زاهر ؟ -نائب -يعني سياسي -اي -و مالك ماجور سياسي يعني الحال من بعضه لجين امثال زاهر هم اللي صنعو مالك و غيره و دشوفين يكولج اكدر انهي موضوعه يعني عنده اليكتلون جوا ايده و في حال يوم من الايام وكفتي بوجهه ممكن يأذيج الج يعني انت بعدج ادورين بنفس المستنقع و خله شغلة ابالج ، مالك يعرف كل دروب ذوله السياسيين يعني مستحيل يكدرله لجين هذا طامع بيج و عنده عائله يومين يمل منج و زوجته تكوله طلكها يطلكج و يخلص منج و مجرد ينحسب عليج زواج ثاني و كلها تضل تلوم بيج محد يكول ازواجها قذرين، لا هي تضيع بيتها بس علمود الشهرة و سوالف الاعلانات ما تثبتلها عد رجال -سديتها من مل النواحي -هذه الحقيقة اللي دا افكرلج بيها بصوت عالي علمود تستوعبيها الرجال اللي يكلج اني مستهد اقتل، هذا قاتل و القاتل ما يتأمن مو تأمنينه على نفسج و بنتج هم -يعني ارفضه ؟ -بعد داوري اكتلج عليه بدماغج و شوفي اليناسبج خاف تكولين امنعج ، اني نصحتج و انت شوفي لذا النصيحة اتناسبج -يعني اخذت نصيحة ماما و صديقتي كلهم ايدوني بس اني ما مرتاحة -انتم نسوان و النسوان تفكر بعواطفها، الا الله ليش جعله شهادة رجل واحد بشهادة ٢ نسوان ؟ غير الرجل يمتلك قوة العقل مو العاطفة يكدر يحلل و يستوعب الامور اللي ما تكدر المرأة تستوعبها بعاطفتها، و الدليل هسه انت بانيه قرارج على عاطفة امومه و زواجج من هذا بداعي ترجعين بنتج مو بتعقل ولا بشيء يقنع عقلج -لا كلامك صحيح -كلامي صحيح بس انت ما مرتاحة -اني بس اريد بنتي مخلد تعبت بجيت، اخذ اديه: كتلج خلي عينج بعين الله، لو سعيتي بأديج و رجليج و الله ما كاتبلج بنتح ما راح تشوفيها و لو كتبلجياها وكتها الاكبر من مالك ما يكدرون يمنعون رجوعها الج -شوكت -كتلج لما الله يكتبلج انت ادعي -اني ما ادعي مو حتى الدعاء مل مني مخلد انت شتحجي دكومي كومي خل ناخذ هاللحم بعجبن و نطلب بعد و نروح ناكلهم ويا الأهل -امك ما احجي وياها -ولج من يمتى انت حقودة ؟ -لا مو اخاف تسويلي مشكلة -دكومي لج عاد لخاطر ابوية يلا، معليج بأمي كمنا اني وياه رحنا للبيت فتت سلمت على عمي و عليهم كلهم، هي سلمت عليها من بعيد : شلونج عمه سلمت عليه من وره خشمها كعدنا ناكل احنا و الجهال و هوسة و طيبة و مازن و سوالفهم تموت ضحك .. ثاني يوم زرت قبر بابا و طلعت لأربيل ، مخلد كال كم يوم و اتبعج اريد اخذ اجازة و ارتاحلي ايام بأربيل تعبت من هوسة الشرطة و الشغل اريد انفه نفسي كتله : هلا بيك رحت لأربيل ، خابرت ماما و حجيتلها برأي مخلد كالت : هم صحيح كلامه -يعني اخابر النائب و انطي رفض -رفضي و الله يكتبلج اللي بيه الخير ... و انطيت رفض للنائب و بعثتله و واتساب ان انت انت رجل نبيل و الف انسانه تتمنى ترتبط بيك بس اني ابدا ما مفكرة بالزواج حاولت و مكدرت لأن اول تجربة خلتني انهي هالموضوع براسي و من هالكلام ... فترة التهيت بيها بنفسي بشغلي، حتى انسى بنتي، صالونات مراكز تجميل و للعناية ابشرتي و بقيت مهووسة بروحي و اشغل نفسي بهالامور حتى انساها بس كل ما تزيد ايامي يزيد شوقي الها تبقى نار و تسعر بداخلي و طفى كلشي بداخلي و شوقي الها مدا يطفى ، ابقى الليل اخلصه ادخن و ابجي عليها احسها ضاعت مني خلص، بس بعدين اتذكرت اهله اخابرهم اخابر ابوه بلكي يكدر يحجي وياه او حتى ينطيني رقمه يخليني اشوف بنتي او احجي وياها اخذت رقم ابوه من صديق عندي يعرفه، خابرته و حجيتله -كال اني ما عندي ولد اسمه مالك تبريت من عنده من زمااان -زين عمو بس انطيني رقمه اذا تعرفه فدوة بس اخابره للكي يخليني اسمع صوت بنتي -هسه ابعثلج رقمة و اتمنى بعد ما تتصلين بيه -ماشي اخذت الرقم و دكيت على مالك ، رن رن ما جاوب رجعت دكيت مره ثانية : جاوب -الو -مالك اريد بنتي -هاي انت -مالك الله يخليك بس سمعني صوتها -دا احجي وياه و هي حجت ( بابا نني وينا ) كمت ابجي حيل: خليني احجي وياه انطيها الفون فدوة -تعالي يحلوة تعالي ، انت تريدين نني لو ماما -نني -شفتي ؟ مدا تريدج تريد امها الثانية -بيلا ماما تسمعيني انطى الجهاز الها و كال الها : احجي هي كالت الو لو اني دموعي عشرة عشرة اريد احجي ما اكدر، و هي تكول : هيدي تبكي بابا -بيلا اني ماما لجين اشونج يماما مشتاقتلج كومه فدوه الصوتج ولانفاسج حياتي بقيت احجي وياها و ابجي شوية و اخذه منها و كال : يلا صار لازم تنام -مالك بداعت كل غالي عندك اشونها اشون وضعها . -زينه و ناسيتج تماما مفكرة نني زوجتي اللبنانية هي امها و متعلقة بيها -بس هذه بنتي -يلا روحي كافي خليتج تحجين وياها .. و قفل الجهاز بوجهي بقيت الليل كله ابجي لوجه الصبح يلا نمت اندك الباب الصبح ، كمت فتحت الباب لكيته مخلد كلتله هلو مخلد و فتت -هاي شبيج شو عيونج مورومه -مشابعة نوم ورجعت لفراشي نمت ، اجا ورايا ، كعد ع السرير يباوعلي و اني نايمه ، و اني مغمضة حجيت: خابرت مالك و خلاني احجي ويا بيلا -و هذا السبب اللي مبجيج ! -اممم -قررت قرار -و هو ؟ -اسافر لماما و اطلب لجوء هناك و اعيش يمها -هااا -و هذا القرار عاطفي هم -لا بس بعد شبقالي هنا -هممم -نامي لو جعت ما اخجل امد ايدي و اكل لفيت راسي و درت انام هو بقى يمسح على شعري -تضايقت مو تنهد : هه تعودت بعمرج ما حاسبتلي احساب بس كلبي يمج طفل شما سمع بيج يفز ، و يدورج بكل مكان ، يعبر المسافات حتى يجي يطمن عليج بس اسأل روحي الى متى ابقى شايل همج، شوكت انسى و اطلعج من بالي ، شوكت اعيش و ما افكر و اكول تعود و ترجعلي حبي الج حب ام لطفلها شلتج بداخلي و انت هلكدج بس ما حضيت بيج بيوم لزمت ايده عصرتها و بقيت بنومتي مكمله عافني و كام اني بقيت نايمه بمكاني للعصر يلا كعدت لكيته نايم بالصالة، تقربت منه على كيف ، اخذت خصلة من شعري ، و لعبت بوجهه ، بعد هيج بأيده ضحكت ، رجعت سويت كام يهفي عباله ذبان رجعت سويت لزم بسرعه و كام : هاي انت بنت الكلب متشوفيني نايم -ولك منو هاي بنت الكلب توب تغلط على بابا توووووب ، وبعدين شنو نايم ، قابل انت جاي اربيل تنام لو تطلع تتونس -شمدريني شفتج نايمه ضربتني النومه كاعده من الصبح متعنيلج -اوووي - شفايدت الاوووي و احنا ممحصلين شي - كوم خل نطلع نفتر شويه حتى ناكل برا -شلون معزبه جايج خطار و توكلينه برا -شوف منو الخطار يالله هم حاسب نفسه خطار دكوم كوم -اخ من السانج لا انت ولا كرجيه اثنينجن ما اكدر للساناتجن - هههههههه يلا اكوم ابدل و ارجعلك كمت بدلت و طلعنا اني وياه تعشينا هو غدا هو عشا هو ريوك .. و افترينا شوي و رجعنا للبيت ، بدلت و سويت شاميه و شغلنا فلم جان الفلم رومانسي على الرغم هو فلم اكشن، هو كل شوي يدور وجهه لو يحك بكصته، شفت الفلم ما فادني كمت اخذت الكوابه و سلة الشامية حسيته اجا ورايا ، دا اريد انظفهم ع السنك، جتن مخلد يمد اديه على خصري و وگف ورايا وقرب راسه يم راسي و همس : ما كافي رحمي بحالي ، لج والله اعشكج و اريدج شوكت تصيرين الي ، لج جيش نسوان ما يملون فراغج بيه كافي حسي بيه -مخلد -شششش كافي تحملت هوايه ، لو بس اكدر انساج زين بس اني ما جاي افهم ليش ما تريديني ، شنو البيه ما عجبج - ما اكدر مخلد - شنو اللي ما تكدريله - التفتت دا اريد احجي، مد ايد ورا خصري قربني منهو و ايد سحب راسي و قرب شفته هو يبوس بشفتي بلهفة، احاول ادفعه من عندي ما ديوخر بقى مستمر بعدته من عندي و طلعت للغرفه ،سحبني: كافي لجين ، حسي عاد ، لج شتريدين اكثر من احبج لج مستعد بكل التمأمرين بيه شتردين بعد كافي ، لج عذبتيني -مخلد -انعل ابو مخلد ولج جننتيني تالي تكوليلي اريد اسافر و اني ؟ لج ساعه الكالتلي مرتي اريد الطلاك ركصتلها بجفيه حتى ما يبقى شي يمنعني عنج و بعدج مو الي ليش ليش كل واحد يخطبج تفكرين بيه بس اني لا ، ليش لأن حبيتج بشرف لج كافي مو عذبتيني دمرتيني والله حجاها و بجى ، رجعتله من كل عقلك مخلد ، تبجي شبيك دفعنب من عدنه : وخررري تذليني و تكليلي شبيك بس لا تظنين كل عمري ابقى مذلول الج، كدامج بس هاللحظة تقررين اي لو لا بعدها والله تحرمين عليه و بعمرج ما تشوفين هالوجه بعد وعد -مخلد.شبيك -موافقة نتزوج لو لا -مخلد صوتك الشقة مسموعه -انعل ابو الشقة ، جاوبي -مخلد ضرب الصينيه العلى السنك بيده كسر الكوابه و طشرهم و توجه طلع من المطبخ رحت وراه ، مخلد وين ، اخذ سويج سيارته و باكيت جكايرة و جنطته و و راد يطلع -وكفت كبال الباب: لا تطلع انطيني مهله افكر -جوابج معروف ما يحتاج وخري مني -مخلد اخاف ما اكدر احبك، والله اني من مالك تعبت اخذ نفس و دار وجهه: اني مالك ؟ -لا بس اني تعبت الشفته خلاني اكره شي اسمه حب و زواج و مل واحد فكرت اوافق عليه لمصلحة لا اكثر والله ما فكرت بأحد حب ابد -جربي -و اذا فشلت -خلينا نجرب نتزوج لمدة اسبوع نجرب نفسنا بدون نا احد يعرف اذا شفتي نفسج ما تكدرين انسخب من حياتج و انت حره بعد وين ما تروحين -شلون يعني نتزوج اسبوع -نروح نعقد عقد شيخ و نجرب نفسنا اسبوع تشوفين اذا كدرتي تتقبلين مشاعرج ويايه و هاياني باقي اسبوع هنا بقيت صافنه بوجهه شجاوبة ......يتبع ☆☆☆☆☆ #زينب_ماجد | ||||||||
|  |
|
28-12-19, 11:11 PM
| #12 | ||||||||
| مراقبة عامة ومشرفة منتدى الروايات المنقولة
| #خطوات_نحو_الجحيم ،،،،،،، بقلم الكاتبة زينب ماجد ،،،،،،، الحلقة_ 7 كم اود تفجيرك بقنبلة لا نون فيها ❤ العراق_اربيل الساعة ١١ مساءا مخلد : شنو گلتي ؟ -شگول من عقلك نتزوج بالسر ؟!! -كلتلج اسبوع -اسبوعيش هالامور ما احبها، كلتلك انطيني مهلة افكر -تفكرين بشنو -افكر افكر شنو يعني تفكرين بشنو ، حياتي هذه مو لعبة اخذ رأي امي اشوف رأي المقربين -يلا فكري دشوف صفنت بضحكة : ترا انت مخبل -مخبل بيج والله جننتيني ابتسمت اجا كمبص كبالي : والله اوفق بشنو تريدين انت شتشرطين اوافق بس قبلي -ليش اني ؟ -***** اكلها احبج ورايدج تكلي ليش اني -لا تفشر شوف هذا الأسلوب اني ما احبه بكل كلمه تفشر -لا تخليني ولج اغرد دا اكولج احبج يلكائنات احبببج -حبتك حية برص ابو راس ممصدكه انت تبجي -اي عاد روحي هناك عد اهلي و اشهريني و كولي مخلد بجى عليه و كاعد يم رجليه يتوسل بيه احجيه لا تقصرين -ليش تخجل ؟ -اخجل شنو و كرامتي بنت الكلب وصلة مسح خوما وصلة مسح -هههههههههههههههههه لك لا تغلط على ابويه - شلون راح تخليني ابتلي بيها -شرايد -فكرييييييييي -يا هههههههههههههههههه لا اني صدكت انت انجنيت ، اكوم انام اشرفلي -الجواب شوكت اسمعه -لحيت -شوكت -لحيييت عفته و رحت انام اجا ورايا ، لزمت راسي : بعد ؟ -بس اريد اكولج شي -و هو تقرب مني -شكو لزم راسي بعد شعري من وجهي ، اخذ نفس و اتنهد : اوعدج والله اخليج اسعد انسان بهذا الكون ، انسيج المريتي بيه بعمرج، راح تشوفين مخلد ثاني كلش يعجبج ، مراح اقبل يمسج اي شي -مخلد اللي گالها گبل? باعني -الكالها گبلي ما حبج مجرد انعجب بيج ، انت اللي حبيتي و عقلج طار بي و نسيتي كل الدنيا بسبب و ضربتج توجع على حجم تصديقج و حبج اله، لا تقيسين الكل على واحد ،الدنيا بيها اشكال و اصابعج مو سوا -ما اعرف اكذب لو اكولك اني ممكن اكدر احب لو اعيش طبيعي بعد الصار ويايه، مشاعري كالقطب الشمالي بارده كلش -انطي فرصة لنفسج و ما راح تندمين ، يلا روحي نامي ، اني راح اكطع سفري و ارجع لبغداد باجر و انتظرج اسبوع تفكرين بالموضوع كلش هوايه و تجاوبين هزيت راسي ، ضرب على كتفي و طلع بقيت الليل كله افكر : اني شناقصني بالعراق و اسافر، بيت و راتب و سيارة و شغل اترك كل هذا و اروح للسويد !! يطلع برا المحتاج المتضايق، اني بشنو متضايقة عيشتي بأربيل هنا من اروع ما يكون .. مو بحاجة غير شو جديد بحياتي مخلد!! بشنو يناسبني مخلد لو اشترطت عليه شروطي يقبل ؟ بقيت افكر هواية لحد ما نمت ، كعدت الصبح هو ديبدل رحت : صباح الخير -صباح النور -خل اسويلك ريوك -لا ما اريد هم يالله اوصل -عندي كلام وياك لا تستعجل خلينا نتريگ و نحجي -اوك ... وكفت اسوي الريوك هو واكف يمي منتظرني احجي، اخذ شي كال: اكعدي شو كدامي كولي اللي عندج و بعدين نتريك -بس اكمل -طفيت اكعدي كعدت، كحيت: شوف مخلد اذا تريدني اتزوجك و اقبل بيك ، عندي مجموعة شروط -وهي ؟ -الاولى ابقى هنا بأربيل ما الك حق تجبرني ارجع لبغداد لو اطلع من بيتي -شلون يعني -شنو اللي ما فهمته ؟ -يعني اني ضابط ابغداد شلون ترهم اخليج هنا بأربيل زواجيش هذا -كل اسبوع تجي لهنا او اني اجيك وقت فراغي لهناك -بس هذه مو حالة !! -هذا الشرط الاول ، الشرط الثاني تتهدلي ما تدخل بشغلي ابد ويا منو اشتغل و ليش و كيف هالامور اني اقررها ، الك حق تنصحني و تقنعني لكن انك تفرض مرفوض -و الثالث ؟ -لبسي ، اعتقد انت كانت عندك زوجة سابقة و كانت محجبة، الحجابة قناعة متكدر تجبر انسان على لبسه فممنوع تفرض عليه رأيك بعد يومين الناس تحجي زوجته الاولى شلون جانت و شوف الثانية و يكعدون يخلونه بمقارنات و شوف مخلد شيخليها تلبس هالامور متهمني انت كلش زين تعرف رأي الناس بيه اخر همي ، حجي الناس ميمشيني امشي على اللي اقتنع بيه و بس ...صفن دار وجهه يفكر و هو يحك بشواربه ، رجع باوعلي: گولي انت ما ناويه تضحين بأي شيء منج لهذا الزواج -الانسان يربح ليش دا اخسر و اضحي، هذه اني و هذه حياتي و انت حبيتني هشكل ما الك حق تجي تريد تغير كل شيء على مزاجك تناسبك بنية محجبة روحك اخطب بنيه محجبه مو تخطب بنيه سافره و تطلب منها تتحجب تناسبك مره ما تشتغل روح اخطب بنت بيت لا تخطب بنت عامله و تطلب منها تكعد .. اخذ اللي يناسبك مو شي ميناسبك و تريده يجي على قياسك ، و اذا تكول احب .. اقبل بالشروط -هسه انت لا ادوخيني شغل و لبس اني اتعديت هالمواضيع يمكن بالبدايه قبل جنت امنعج حتى لا ادخلين عمق بهذا المجال بس خلص انت دخلتي مو من حق احد يفرض بعد بس مسألة البيت لجين صعب اني يوميه جاي مناك لهنا لو اخليج انت كل اسبوع تتعنين من اربيل لبغداد و وضع العراق زفت شلون ترهم -صدك نسيت الشرط الاخير -يا ستار بعد اكثر من ذن ؟ -اي و الاهم -و هو ؟ -امك -امي شبيها -مستحيل اكعد وياها لو تكعد ويايه -شلون يعني -يعني اني مقبله على هالخطوة و اعرف امك شنو راح تسوي لحتى تسود عيشتي ، فسالفة اتحمليها اصبري اسكتي ما موجوده بقاموسي هي امك على عينك و على راسك انت تتحملها و انت تصبرلها اما اني فلا ، من تأذيني لا تكولي اسكتي و لا اتحملي يا ترد انت او تخليني اردها -شههههه شنو متحمله للمشاكل كولي يا الله -و النعم بالله انت تعرفني مو راعية مشاكل اما امك فسبق و طلقت زوجتك بسبب مشاكل امك لو غلطانه ؟ هز راسه : اساسا اني ما ناوي اكعدج وياها عندي بيت و نكعد بيه -هذا البيت المنعتك تكعد انت و عائلتك بيه ؟ راح تخليك هسه !! -هاي الامور اني احلها هسه خلصت شروطج لو بعد؟ -هاي شروطي بس تبقى ماما شنو رأيها و شروطها -هاااه صار ساعه امك و امك هسه شروط امي، امج شكو قابل راح اتزوج امج اني -من حقها غير بنتها و لسه لا تحكم اسمع ماما و عود احجي -ان شاءالله اني اروح انت تريگي وحدج لازم اوصل من وقت ودعني و اني خابرت ماما خبرتها بكل شيء، كالت مقبلت اول بدايه مقبلت بقيت احجي وياها و اكوللها شنو شرطت عليه و جبتها منا و رديتها منا كالت اصبري هناية الاسبوع احاول اسافر و اجيكم و اني اللي احجي و اثبت الحجي و الي شروطي -شنو هي شروطج -من اجي تعرفيها و الله انتظرتها اسبوع، اسبوع اللاخ يلا كدرت تجي للامارات و من الامارات ع العراق ، خابرتني كالت اني عند بيتج عمج كلتلها : باجر من الصبح اني يمج خابرت احمد و اخذت منه الاذن بالسفر لمدة ، انطاني الموافقة ، لميت غراضي و بوجهي على بغداد ، طلعت بسيارتي الخاصة الظهر وصلت، دخلت فرع بيت عمي جان مازن واكف بالفرع، بقى معلك عينه معرفني جنت لابسه مناظر شمسية و الشعر رافعته ذيل حصان صفيت اباب بيت عمي عثمان، هو اجا : ولج هاي انت ولا عرفتج والله كلت من هاي الطاكه الفاتت فرعنا طلعت بنت عمي -هههههه سلمت عليه : شلونك شلونك زين طيبة اشلونها -الحمدلله على الله ، منيلج هالسيارة هاي ؟ -مالتي ليش -لا اكول بس لازم امورج توب حتى كادرة تشترين هيج سيارة -نشكر على الله على نعمته ، مخلد موجود ؟ -لا والله بالدوام الظهر يرجع ، تفضلي عدنا -لا مو ماما جايه هنا -والله ما ادري امج هنا -اي متدري -ما ادري تعرفيني مو كلش بهالامور كعدت الصبح وكفت ويا جماعتي بالركن ما ادري منو راح و منو اجا -هههههه احسن لك استمر ، من رخصتك -تفضلي تقدمت لباب بيت عمو دكيت الباب ، فتحلي عمو الباب اخذني بحظنه و سلم عليه باوعت هيج شفت ماما طلعت ، يا الله شكد مشتاقتلها ركضت لحظنها ، حضنتها حيل ، و هي تبوس بيه و تكولي : لج ماما يا الله شكد مشتاقة لطولج و لعطرك و لكلج فدوة لأسمج ماماتي حبيبتي شلونج اني خليت راسي على كتفها و منطقت بعد بس بجيت: يا الله تبجي سوده عليه ماماتي لتبجين فدوه لعيونج حياتي -مشتاقتلج كلش هوايه -اني اشوق يماما اشونج شخبارج -زينه -شصايره يداده غير تفاحة تكتلين من الجمال وجهج متحسن وين جتن اخر مره شفتج بلبنان التعب هاد عيونج و الهالات السود اليشوفج عباله باندا -غير هموم مالك هسه الحمدلله وضعي زين و مرتاحه و مراكز تجميل بأربيل كلش ممتازة كل اسبوع جلسة -فدوة يماما تعالي فوتي تعالي ..فتت و اني انزع بالحذاء مالتي، سألتها : المصرف اللي ابعثه الج ديكفيج هناك لو تحتاجين بعد ؟ -لا ماماتي كفاية و زيادة الله يحفظج بنيتي دخلنا كعدنا و عمو حجه وياية بموضوع مخلد و ماما حجت و عمو كال : هذا الشيء جان لازم يصير من سنين مو هسه ، جان لا هو تزوج و تورط بأطفال خطية و هسه عند خوالهم ولا هي اتمرمرت ويا مالك و ماخذ بنتها و حالها الضيم، بس شنسوي هاي الدنيا و هذا اللي الله كاتبة ... بعدها عمو عزم بيت عمو عمران ابيته ع العشا و كاله : معزومين كلكم يمنا اليوم مسوي ثواب لروح اهلي و شاكر العصر و اجت طيبة و ابنها شايله جدر دولمة دا تضيفة لسفرتنا، شفتها دخلت للمطبخ رحت الها سلمت عليها و باوستها : احجيلي بساع كرجية شسوت من عرفت مخلد حيخطبني -ولج خايبة اسكتي خليني اردح هله هله هله -هههههههه دحجي يمعوده شكو -ولج غير عزفتلهم البارحة و تخبلت و متحلفة بيج اليوم بس تلزمج تكصبج -يا فدوة لله لعد لو تدري ماما شمحظرتلها شتسوي -ولج تكله تالي عمرك تمشي بكيف وداد و بتها و هو يكولها اني اعرف ادير امري انت بس اطلعي من موضوع و هي تصرخ من هسه بت وداد غيرت ابني عليه و ما يريدني امج شمحظرتله كولي -يكعدون و تعرفين -والله بعد ايدي اريدج كون هيج جلطة رباعيه ما تكوم منها بلكي يربي تموت و اخذ وليداتي و اعزل وحدي و اشتم الهوى -خرب بيومج ولج ميصير هيج -ولج خية طك كلبي، سم سنونها تشوفنا متصافين اني ورجلي تموت تحوص لحد ما تسويلها مصيبة دنحجي فات مخلد و هو يكح : السلام عليكم -و عليكم السلام فات للهول و عمي فات وراه ، و انوبه فاتت گرچية عاوجه حلكها و تباوعلي صفح ، سمعت سلامهم جوا ندست طيبة : كملي و تعالي و رايا فتت سلمت على عمو و بست راسه و سلمت على كرجيه و كعدنا كلام و سوالف طبيعية وجهال تلعب و سوالف نسوان ، راسلني مخلد (شكله امج ما ناويه على خير ) -(ليش؟ و اشلون استنتجت هالاموضوع يا توكو موري) -(كلبي حاس ضامتلي ضميمه اهلكبرها و تريد تفجرها بعد العشا ) (والله هي مال ضامه بلي ضامتلك ضميمه كفيلة تزوعك العشا كله ) (لا القران عليج) .. بعثتله سمايلات ضحك شال راسه من الفون و يهز بيه عود يسأل (شكو) هزيت راسي و اني اضحك (تلحك تلحك ) رجع راسلي ( كولي ما اتعشى ) (لا لا تعشى خاف تسمع و تنهبط على الاقل ماكل ) و سمايل ضحك ابتسمت باوعلي اضحك ، باوع لامي تحجي و اشرلي براسه كومي ، فات للغرفة مال بيت عمي رحت وراه سد الباب وراي -شكو -انت كليلي شكو -تسمع بعدين -اي زين دنطيني التصبيرة لعد -يعني شنو -هاليطلع بيدج -سخيف ابعد منا -ممنوع بعد منا و هيج اسلك ابو ابوج اطلع عوض مال ٢٠ سنه حب حامسني حمس -لا والله هههههي دروح بابا روح يلا خل امشي دا امشي ، سحبني: ويييييين دا اكولج اريد تصبيرة -تصبيرتيش منحرف بعدنا ما قررنا الزواج -الحجي البرة ميهمني الجمعة عرسنا -هللللو الجمعة شنو -والله هذا العندي -اوكي اوكي عود بعد الكلام نحدد -كلت اريد -ممنووووع لزم وجهي و اخذ بوسه قوية من شفايفي دفعته : حقير -لو مو حقير طعمها يجنن اااخ شوكت الزمج بعدته و طلعت طيبة صارت كبالي : ولج خية عدلي الحمرة و لا تشهرينا المرة موجر كلبها من تشوف حمرتج خربانه تحطج و تبتلي بيج ضحكت بصوت عالي و رحت للمرايا عدلت الحمرة بعد المغرب صبينا العشا و كعدنا ناكل كل احنا على سفرة وحده رياجيل و نسوان و اطفال ، كملنا كمت وياهم دا اريد اغسل المواعين ما قبلت مرت عمي كالت : اني و طيبة نغسلهم انت اخذي الجاي وروحي اكعدي يم امج هسه نكمل بساع و نجي فاخذت صينية استكاين الجاي و رحت صبيت لعمامي و لامي و فتح عمي عمران الموضوع ويا عمو عثمان و امي عمو عثمان حجه بالخير و احنا نفرح و بميتنا تروح لوليدنا و هو تعب و يستاهل وومخلد سبع و من هالكلام دارو لماما : و انت يا ام لجين شرايج -والله يا ابو مخلد بعد الشروط الشرطتهم لجين اني ما عندي غير شرط واحد عمران: سمعينا شروط لجين بالاول مخلد:- اني ولجين تفاهمنا على هالشروط ما يحتاج ذكرها عثمان: هو زواج عمو هلي كلشي بشهوده حتى لا بعدين يخفى شي و نختلف دنبا هاي كل شي يصير بيها ام لجين : شروطها اول شي ما يفرض عليها تترك شغلها او شنو اشتغلتي لو يعترض هذا مجالها و هو يعرف بيه قبل لا ياخذها و الشرط الثاني لبسها و و اسلوب حياتها و اخيرها تعيش ابيتها بأربيل و ما تعيش ابيت مختلط مع اهله في حال رجعت لبغداد كرجية : انتن تريدن تاخذن ابني لأربيل -ام مخلد احنه مماخذين شيء من احد شوفة عينج ابنج ديطلب الزواج من بنتي و هي دا تكول شروطها و انتم احرار بالرفض او القبول مخلد: عمه اني هالامور وافقت عليهة الجين من زمان كولي شرطج انت شنو كرجيه : يا شرط انت شلون ترضى على حالك بت وداد تمشيك ولك شيكولون عليك يلأغم عثمان: يا ام مخلد ما يصير هذا الكلام احنا هنا دنتفاهم مو نتعارك -شلون ما يصير و هن دا يمشن ابني بكيفهن تالي عمري يقبل مرته تطلع و اطب ابنطرونها ابكيفها شنكول للناس شنكول للعالم ابني يمشي بكيف مرته -هذا اسمه تفاهم بينهم لو قنعها ما تطلع هم راح تكعد فهالشي بينهم هم يتفاهمون يقنعه يقنعها بكيفهم لا تدخلين بحياتهم .. طيبة يمي ندستي و همست : يااا شوف عمي شيحجي هذا والله على نيتي ، وين يمشي هالحجي عد كرجيه اذا مو الكل تمشي بكيفها ولا ترضى -دشوفي بعد شرط امي شراح تسوي -غير لو اسمع الشرط، دنطقي يا عمه عثمان: احجي ام لجين انت شنو شرطج -مثل ما تعرفون اني هنا خطار و ما اكدر ارجع اسكن هنا كلت بنيتي من حفها تعيش حياتها باجر تتزوج تعيش خوما ابقى بركبتها ما تكدر تشوف حياتها بسبب لهذا هناك ساكنه ويا اختي بس بقاء لجين وحدها هنا هم يعز عليه -هي مو وحدها احنا عمامها يمها -و النعم منكم ما تقصرون، اللي اريد اكوله مخلد رجل مطلك سابقا و عنده اطفال و هاي دنيا كلشي بيها ، هي اكيد ما راح تبقى طول عمرها بأربيل لا بد يوم ترجع تسكن يم زوجها هنا ابغداد فاليوم بنتي عزيزة باجر من يملكها و تصير عنده و هاي شروطها و ما يكدر يتحكم بيها منو كال يبقى نفسه ؟ -يعني شلون ما يبقى نفسه -راد يغيضها و رجع مرته و كعدها اشلون ؟ -غير مرته و جهاله شنو انت تمنعينه يرجع مرته و جهاله -رحم الله والديج و هذا الخايفة منه ، يكسر بنيتي و يجيبلها الضرة لنص بيتها و يجبرها تتحمل فشرطي على هالزواج مهر بنتي بيت مخلد البناه بالاعظمية يتسجل بأسمها هي كالت هيج و هم كلهم فزوا: شنو هذا الحجي و ما يصير وكرجية وكفت على حيلها : شلووووووون شلوووون ولج انتييييي تاخذين بيت ابني، ولج لا عشتي ولا صرتي لا انت ولا بنتج وعسى محد اخذها خليها تنام على گلبچ تحمض منو ميت على بنتج و ينطيها بيت ام لجين: بنتي ما تضل على گلبي انسانه مثقفة و داريه و مشهورة و الهامكانتها بالمجتمع و الف واحد يتمناها مو هي التتمنا احد لا ابنج ولا غير خاف تكولين كاتله روحها على ابو ضابط و هالسوالف شفايتلها ذاك اليوم تقدملها مسؤل بالبرلمان و رفضته ، الا هي مو بعينها احد بس ابنج اللي يحبها كل هالسنين و يريدها مخلد: و انت عمه شنو داخله وياي على طمع هي بنت عمي و صبرت هواي يله هسه دا اخذها شنو هالشرط هذا -عمه اني ما راح اخذ طابوكه من بيتك و اخليها بجيبها هالموضوع لمصلحة بنتي و ماكو ام ما ادور مصلحة بنتها ، مالك ذاك الحرامي من تزوجها اول مره انطا مهرها ١٠٠ مليون و سلمهم لعمك الله يرحمه -و تالي شسوالها مالك اللي تقارنيني بيه -والله عمه انتم الزلم كلكم ما الكم امان لا مجرمكم ولا ضابطكم ، اليمشي على رجليه ما ينحلف عليه فأعذرني هالامور لمصلحة بنتي امي تحجي و كرجيه اخذت عمي عمران برا و بس نسمع حجيها و صياحها وياه خبصت الامة، فات عني كال :زواج ماكو -اوكف يابه مو هيج الحجي هو القرار الي بس خل نتفاهم -وداد و بتها ناويات على بيتك و انت ما عندك غير هالبيت سند الك و لجهالك خلصت عمرك تجمع و تكد حتى تشتري تالي تنطي لبنت وداد عثمان: عيب هالكلام عمران البنية بنيتنا و بنت اخونا المرحوم لا تنكرها على مود شوية فلوس اني اشوف كلام ام لجين صحيح و بتالي البيت الهم اثنينهم قابل نواين كم سنه و يطلكون الكان الها او اله ماكو فرق لا توكف بقسمة الولد -لا اوكف و امنع بعد امشي من عين باجر اخطبلك مره اغاتها و حتى ما متزوجه امشي مو احنا اليجن نسوان من الشارع يمشن ابنا بكيفهن ويلعبن عليه و ياخذن بيته ام لجين : الكلام مرجوع عليك ابو مخلد مو احنا اللي جايين من الشارع اصلي و فصلي معروف و بنتي منكم ، انما الحجي الدا تحجي حجي شوارع و عيب ينكال على عرض اخوك المرحوم كام عمي على امي و يصرخ عليها شلون تكوله كلامك كلام شوارع ، كام يفشر و يغلط كالتله امي: اخذ ابنك وروح ما عندي بنية للزواج ولا اسمح الجبن تتزوج ابنك مخلد لازم بابوه يهدي بيه و عمي واكف بين الأثنين و الاثنين يتشامرون بالحجي الى ان كرجية فشرت على امي بمنعى تكولها ( نايمه و يا زلم السويد و جايه هنا تبيع شرف براس ابني ) عمي تخبل شلون تحجي هيج وكف مصايح و عليها و على عمي و طردها من البيت و تعارك ويا عمي و هو يكوله : ما تريد مخلد تمشي مره و انت ماشي بكيف كرجيه و راضيلها و هي تطعن بشرف اخوك لو عندك ذرة غيرة جان رديت مرتك وصارت هوسه بين عمامي و مازن و مخلد يهدون بيهم الى ان اخذوا ابوهم و عمي فات جوا كعدت ماما ترجف بس تحاول تكون هادية ، اخر شي باوعت بوجهي و بجت و كالتلي: ولج تمنيت ابوج اليوم موجود جان فرك حلوك التنفك علينا عمت عين التراب الخذته مني اي والله كامت دموعها تجري بحراره و هي تضرب على زرها بحركة و تحجي، اخذتها بحظني و اني ابجي -لتقهرين نفسج ماما فدوة خيولون ، لا اريدهم و لا اريد ابنهم عثمان: ماكو هيج مرة ما تنجرع طلكت مرته و ما نكسرت ولا تابت واكفه بصلافة تفشر و تطعن بأعراض العالم و هذا اخوي بلايا حظ تابعها لجين: عمو احنا نعرف عمه كرجية و قباحتها و اني من الاول شرطت عليه امك ما اعايشها -والله عمو حقج الله يلوم اللي يلومج ...بقينا كاعدين ويا ماما و نهدي بيها و طلع عمو عشارع و جابلنا موطه و بقلاوة و كعدت مرت عمي خلتهم كبالنا و انجمعنا سمعت موبايلي يدك باوعته مخلد ، رديت : الوو -اريدج اطلعي -كاعده ويا ماما -لا تخليني انزل عشيرتج كلها مو بس امج دا اكلج اطلعي -اصبر بس شويه و اطلع -منتظرج بساع ندست عمو : مخلد يريدني برا راح اطلع اشوف شنو يريد -روحي عمو رتبت نفسي اخذت حذائي لبسته و طلعت ، شفته بسيارته كاعد ، اشرلي براسه (اصعدي ) صعدت، مشى بالسيارة و حجى: عود شنو معناها امج هذا حجيها ؟ -دا تحاسبني انت على كلام امي مسمعت امك شنو كالت -امي هياني تعاركت وياها و طلعت و لا راضي على فعلها و لا قابل بيه ، و مثل ما اني ما ارضى الامي المفروض انت المثل -يعني شنو المثل شسوي هي ماما شسوت و اوكف ضدها -شنو تسجيل بيت -و شبي و اذا سجلته بشنو يضرك ، راح اخذ بيتك و اشرد لو اكلب عليك ترا بيتك كله مو بعيني و انت تعرف كلش زين اكدر اجيب اغاته و كلام ماما حجته لمصلحتي فأذا تريد نفذ -شنفذ اسجل البيت بأسمج ، لج هذا بيتي لليوم مطلوب عليه قروض من البنك و ديون من العالم ما مسددها اجي انطي -اكولك دا تحسسني منطي لغريبة ترا ان كان بأسمك او بأسمي ميفرق مجرد دا اضمن حقي لا اكثر خاف باجر عكبه ترجع مرتك و تذلني بيه ولو ذاك الوكت لا ابقالك ولا تشوفني باوعلي: انت بيج شي -والله اني عقلي براسي انت و اهلك اللي معظمين الامور ، هذا اني و هايه شروطي تقبل بيهم اهلا بيك متقبل اتركني و شوف حياتك -هيج صارت -والله مخلد هذا العندي و كافي اليوم اللي اتحملته من امك لا تزيدها ارجوك، رجعني هز راسه و لف سيارته و رجعني لبيت عمو ، قبل لا انزل ، لزم ايدي درت وجهي، كالي: اليوم عرفت ما الي كل قيمة عندج لو الي ذرة جان حجيتي لو دافعتي عني شويه بس انت و الكل عليه و اني اللي شاريج والله لو گلبي بس ينطيني لجان قلعتج منه وجويت مكانج حتى ما ترجعين لكلبي مره ثانيو و ابتلي بيج و احير بدنيا وياج -اذا هلكد مضايقتك عوفني ولا تفكر بيه هز راسه، عافني و حرك السيارة و طلع دخلت للبيت لكيت بيت عمي فارشين للنوم، اخذت تراك من جنطتي بدلت و تمددت على ايد ماما تلعبلي بشعري و تسولفلي عنها و عن خالتي هناك وياها و شلون انتقلت و اجت يمها ، ما ادري شلون غفيت بيدها اللي اعرفه مثل الطفله ضليت على ايدها للصبح ثاني يوم كعدتني مرت عمي و هي تندهني على كيف: ها عمه -كومي مخلد بالباب يريدج كمت من مكاني لميت شعري و طلعتله واكف بالكراج، كوه افتح بعيوني : ها مخلد -امشي لبسي دا نروح -مو تريدين البيت ، امشي دا اسجله بأسمج و خل اشوف هالسالفة وين توصل -و اهلك -محد يعرف عود من اكمل اكوللهم و اخليهم امام الامر الواقع امشي يلا - فوت تريك - ما الحك ماخذ اجازة زمنية امشي دخلت كعدت ماما كلتلها بقت صافنه، بدلت و ماما كالت العمو، كاللها: الرجال المستعد يسجل بيته بأسمها هذا يعشك ترابها لا تترددين تنطينه تره خطية مخلد ما اله ذنب بقباحة اهله تعذب بحبها هواي خلي يرتاح لبست و طلعت وياه لمعاملة البيت، صعدت السيارة، حجيت وياه: من گلب و رب راضي تنطيني البيت لو مجبور اخذ ايدي: اني من زمان مسلمها الج تراب هالبيت ولا شي من اللي شايله الج بداخلي ، و هسة موافقة تتزوجيني ؟ ......يتبع ☆☆☆☆☆☆ #زينب_ماجد | ||||||||
|
| |
|
31-12-19, 01:51 AM
| #13 | ||||||||
| مراقبة عامة ومشرفة منتدى الروايات المنقولة
| #خطوات_نحو_الجحيم (الجزء2) ،،،،،،، بقلم الكاتبة زينب ماجد ،،،،،،،، الحلقة_8 دخول النار لا يعني البقاء فيها و خطواتك التي سرت بها الى الجحيم ربما ستكون لك يوما خطوات عكسية العراق_بغداد مخلد :-و هسة موافقة تتزوجيني ؟ ...ابتسمت و درت وجهي، هو ابتسم و حرك السيارة رحنا اني ويا لتسجيل الxxxxي قدم مستمسكاتي و مستمسكاته و سوا تنازل الي بالبيت ، كملنا و رجعنا كلت له : شوكت مقرر الزواج ؟ -مستعجله ! -لا يا مستعجله بس حتى اعرف ارتب اموري ارتب البيت اغير ديكوره -اني مأثثه -لا اريد اغير ديكوره على مزاجي - لجين ترا ما عندي فلوس بالقران مطلوب -وشكو بجيت بوجهي ترا مطالبة منك تنطيني -ما تريدين نيشان غرفة نوم غير هاي سوالفجن -اكولك اني ضاربه القاعدة حتى بهذه ترا، يعني نيشان شتريد تشتريلي اني اشتغل اعلان و افخم الملابس و المكياج و الجنط و الاحذية استورد و انشر ، اطلب منك نيشان شتشتريلي مثلا -زين هذا الاعلان هم تستمرين بيه بعد الزواج ! -هلاوووو لعد شتفقنا البارحة مو كلت متدخل بشغلي -ترا دا احجي وياج من باب التفاهم مدا افرض ليش احسج كوه على الله متحملتني -لا بس سؤالك مو معقول تعرف هذا شغلي و اتفقت وياك و تكولي ورا الزواج تستمرين لو تبطلين -اي ماشي ماشي افتهمنا يلا بس اسكتي مو صوجج صوج اليحجي وياج -شبيك مخلد ! -نزلي لجين خليني ارجع لشغلي -اريد اروح للبيت دليني بيه -مو هسه بعدين روحي -هاي اشبيك تنتر و اطرد بيه -لأن انت كوه متحملتني -و شحجيت وياك ؟! -دنزلي يلا انزلي رفعت حواجبي بتضايق و باوعتله ، هزيت ايدي و نزلت مشيت كدام ما فتت للبيت -وين رايحة فوتي للبيت طلعت سويج سيارتي من جوزداني و صعدت، كام يخزرني : وين رايحه -مو مستعجل روح يلا شوف شغلك -طفى السيارة و نزل عصبي و ضرب باب السيارة و اجا يمي فتح الباب و صرخ : شبيج ؟ -والله اسأل نفسك تنتر عليه و تصيح و كأن طفلة عندك هاي بعدنا ما تزوجنا و اذا ناوي تضل على هذا الاسلوب هسه ارجع كلشي و اشك ورقة التنازل ولا تتصدق ولا ابد وكل واحد يرجع لمكانه يلا راد يحجي سحبت باب السيارة قفلته و شحطتها ما اعرف شبقى يصيح ورايا مهتميت ، جانت حارة الدنيا مو مال طلعة ابد كلش مزعج الجو فلفيت الفرع و رجعت لكيته ماكو، صفيت السيارة و دخلت لبيت عمو سألتني ماما و عمو على المعاملة جاوبتهم بس عرفوا من خلال نبرتي بالكلام متضايقة سألو : شكو كلتلهم : ماكو شي بس الجو حار و تعبانه فتت سبحت شويه هديت كعدت ويا ماما بالاستقبال تغدينا و وراها جاي و بقينا متمددين ع السبلت و نسولف للعصر اجا مخلد ردتت افوت جوا ، صاح عليه : لجين اريد احجي وياج تقربت يمه : ها ؟ اخذ حنجي و باس كصتي : اسف - على شنو - جان الجو حار و حسيت بكلامج ما متحملتني فنفجرت بيج - اني مو ما متحملتك انت جنت تحجي و اني جنت اجاوبك و كلتلي متضايق ماديا و كلتلك ما طالبه منك لا غرفة نوم ولا نيشان و لا هالسوالف - اني ما اقبل هالامور انت تشيليها ، اني انطيجياهم كلهم بعيني، بس تغيير اثاث اجليها من يصير عندي -مخلد احنا دا نريد نتزوج يعني الصرف من عندي او من عندك ماكو فرق ، في يوم لو احتاجيت و شغل ما عندي ما راح اتردد اطلب منك بس مدام هسه الله منعم عليه ليش تمنعني اغير ديكور البيت -ما مانعج والله بس اخاف من الكلام ها صرفت عليه و ها هي اثثت يعني متعرفين الحجي انت -اووو هلي من هسه شايل حمل الكلام هذا و ذاك ، لتخاف راح اكول هو انطاني و اثثت بعد ! تنهد : اني مشتري غرفة بالبيت و مأثث الطابق الجوا كله بعد شتأثثين - شوفني الاثاث خل احكم اريده او لا -بدلي و خل نروح نشوفة، بس هاا امج ما اريدها -ترا يومين و تروح مخلد لا تخلي گورك وياها -والله هاي بكيفي مثل ما انت ما تتحملين امي .. اني امج من الله ما اطيقها ولا تكولين مصلحتي و ما مصلحتي اذا ع المصلحة فحتى امي ادور مصلحتي و اني تجاهلهت كلامها و اجيتج - درت من عنده ما عاجبني الكلام رحت بدلت، سألتني ماما : وين حترحون انت و مخلد ؟ -للبيت دا اريد اشوفه -هاا لبست و طلعت وياه ، رحنا للبيت جان ١٥٠ متر بس بناء حديث ، غرفة و صالة و استقبال و طبخ جوا . و الفوك على نفس الاساس بس غرفتين فوك بدل الاستقبال ، هو مأثث حلو و الغرفة عراقية بس اني ابالي غير اثاث .. صرت افتر بالبيت و اخطط درت سألت : ليش ما كعدت زوجتك السابقة هنا و ارتاحيتو من عرك كرجية -ترا كرجية امي و يعز عليه زعلها -و هسه شصار و رضيت على زعلها -تعرفين شصار ما يحتاج تذكريني كل مرة -مخلد اني مدا اعيرك ولا دا احاول اضايقك بس كان المفروض من الاول تخالف امك و تختار راحة زوجتك و اطفالك -جنت مقرر هيج بس هي زعلت و رادت الطلاك -و انت ما عولت على الطلاق بسرعة طلكت -لجين اني وياها جنه ناوين نطلك قبل سنه يعني قبل لا تتطلكين انت ، زواج غلطة لا اني جنت اطيقها ولا هي و اثنينا ايدنا الطلاك هي طلبته و اني انطيته وهاي انتهت لا تضلين تفرين بهالسالفة انسيها خلينا بموضوعنا -براحتك درت وجهي للبيت، هذا الاثاث كله يصعد فوك بنفسي غير اثاث و غير تصميم اني عندي صديقة شغلها ديكور و تصميم اجيبها و اصمم البيت احجي و اني اباوع للبيت، التفتت لكيته منتجي ع الحايط و مكتف اديه و صافن بيه : شبيك -اني بحلم لو حقيقة -ليش ! -يعني هسه انت اليه و هذا بيتنا و تم كل شي ضحكت ، مشيت منه عصرت خشمه و طلعت برا بالكراج اجا ورايا : انطيني مفاتيح البيت قدملي المفاتيح و سحبني من خصري اله: خليج يمي خليني اصدك اني مو بحلم تقربت منه ، همست بأذنه ............. فتح عيونه : لعد باجر نتزوج -لا -ماكو لا اي طلعت برا البيت و صعدت السيارة ، صعد : احبج ابتسمت و مجاوبته مسح على خدي و تقرب باسني : اعشكج ولج حتى العشك حار بگلبي لا فد يوم ملج ولا فد يوم نساج بودي اخذج لمكان ما بي احد هيج اكابلج واكعد كلشي ما اسوي طولي وين تريدين نروح ب١٠ ايام العطلة النتزوج بيها -كلش حابه نقضيهم بالبيت و نسوي عرس تقليدي كلش بين لمة الاهل و الاحباب محابة نسافر ولا نروح لمكان -اممم افهم منج ما تريدين تكلفيني لأن الصبح كلتلج ما عندي مو، ترا مو كلش ما عندي بس ضام الفلوس لطلعتنا مو لأثاث -العندك وفره لحياتنا ، مهما تغيرت الاماكن احنا احنا ما نتغير -يا يابة شكد احبج حرك سيارته و طلع بيه لبيت عمو ، وصلت لهناك نزلت و سولفت لماما عن شنو ناويه اسوي بالبيت و شرايده و اتصلت بصديقتي و اتفقت وياها تجي باجر لتصميم البيت لثاني يوم اخذت ماما و رحت التقيت البنت و كالت من باجر نطلع عمال و نشيل الاثاث الجوا نصعده و نبلش ، كتلها لا بلشي من اليوم كلش مستعجله لازم ينتهي كل شي خلال ايام وفعلا اتصلت بعمال بنفس اليوم نقلو الاثاث و رتبناه فوك ، و ثاني يوم بلشنا شغل .. ٤ ايام يلا خلصت كل شي صار البيت يجنن زينت الصالة للعرس و رتبتها على هالاساس ، مخلد منعته من شوفة البيت كلتله بيوم العرس يلا تشوفه قبل العرس بيوم رحنا عقدنا بالمحكمة .. جان مخلد طاير من الفرح ما يعرف شلون يعبر عن فرحه غير كل شوي ياخذني لحضنه حيل و يبوسني و يكول : ولج اني بحلم لو حقيقة كرصيني ، يعني صرتي مرتي يعني تزوجنا هاي هي ؟ اني اكذب لو اكول عندي مشاعر و طايرة و فرحانة ، الفرحة عندي عاديه كلش تختلف تمانا اول احساس ويا مالك جنت وكتها گلبي يريد يطلع من مكانه على كد ما ممصدكه اني صرت اله .. ما اعرف شلون عمى على گلبي و حبيته بهالطريقة تالي كرهني بكل شي اسمه حب و صرت باردة ما انطي ردة فعل لحب مخلد اللي يكول بركان كدامك و هو فرحان و فرحته واضحه كلش بعيونا اخذني من ايدي و رحنا لبيت اهله .. دخلنا محد استقبلنا غير طيبة و مازن باركولنا اما عمي و عمتي بقوا جوا، فهو تركني و دخل يقنع بيهم عمي يكوله اني ما ارضالك تغضب امك، و امه تكوله مدام تزوجت لجين گلبي و ربي ما راضيين عليك اخر شي ضاج و كال الهم : انتم صدك انانيين و ما تفكرون غير برضاكم و بنفسكم متكولون ابنا اليوم عقد قرانه على بنيه طول عمرة يتمنى هو اني ما اهمكم هي كوة بس مو صوجكم صوجي انب اجي و اتوسل الرضا منكم صار ساعه و انتم ما فرحانيلي بيوم العرس عزمنا كل اقاربنا و معارفنا المقربين بس ما كان عرس جبير، بيناتنا .. اني طلعت للصالون و مفاتيح البيت خليت ابيد ماما هي و عماتي نظموا العرس بالبيت و نظموا الكعدات و الاستقبال و الضيافة لبست البدلة البيضة و رتبتلي ام الصالون التسريحة و المكياج ، لما كملت خابرت مخلد يجي ياخذني رمشلي لما وصلت نزلت البركع و نزلت ، جان لابس قاط اسود و الفرحة تبرگ بعيونه ، تقربت يمه عيونه على كد فرحته و هو يباوعلي من فوك الجو اخذ ايدي و صعدني السيارة ، و مشغل (اريد افرح و اهوس و اكطع السير ) و على كل علاها مع كلامه السخيف : ولج نوصل لو لا والله اموتج اليوم اااخ لو بس الزمج وصلنا للبيت ، جان عمو عثمان مستأجر فرقة موسيقية هدية من عنده النا بزواجنا، فرحان بمخلد و اخيرا تزوجني فاول ما وصلنا اشتغلت الموسيقى و الهلاهل و الكل وكف يركص و يهز حتى المنطقة التمت و الجيران ، كلها فرحانه و تصف و تركص تفاجئت بعمو عمران جان موجود و مازن واكف و اكو خروف لازمة ولد بس تقربنا ذبح يم رجلنا و جرا الدم ، مخلد باس راس ابوه عمو و باركلنا اثنينا و كالي دوسي ع الدم و فوتي دست بالكعب ع الدم و مشيت ، دخلنا للصالة استقبلونا بالجكليت و الهلاهل و الافراح ، ماما و عمه جابولنا كيكه جبيرة و خلوها كبالنا، كمنا اني و مخلد گصيناها و اخذ قطعة و خلاها بماعون و وكلني بشوكة و همس يلا وكليني بس مو تسوين سالفة كل شوي تجرين من يم حلكي اشيل الكيكه و احطها براسج ضحكت ما وكلته كيك اخذت العصير و قربته من حلكه راد يشرب جريته و شربت و كتله : ذاك اكلاصك شنو ما عندك ايد تشرب كلها ضحكت هو ضحك بس شفته تضايق بس ما بينها، اخذت كيكة بالشوكه و كتله : افتح -ما اريد نزليها -قربت الشوكه من حلكه و اكلها، تقربت بسته بخده و هم كلهم صرخوا ( عااااااا) هي بنات عمي كامو يصيحون ( بوسها بوسها ) و كلها تضحك هو انحرج لزم وجهي و طبع بوسه بشفايفي ، و هم صرخوا ( عاااااا كلنالك بوسها مو هنا الظاهر مستعجل كلش اطلعوا اطلعو ) - شسوي متكلولي الاستحيت صحتو بوسها الجرأت و بستها صحتو استعجل شسوي بعد ولد الكلب كلها تضحك و عمتي تكوله : ولك اليوم عرسك مخلد لا تسب كلتلها : كل ايام ربنا زي بعضيها يعمه -يعني لازم اصير حباب غمزتله عمتي: اهم شي تصير حباب دار وجهه عليه و حجة : دخل يطلعون و اشوفج الحباب شلون صاير -عابتلك كامو ياكلو و يضحكون و يصفكون اجا مازن اشرله يطلع برا هو همسلي : اني راح اطلع برا يم الولد اتفقي ويا امج و عمتي شوية و يفضوها ماشي هزيت راسي كام راح و مازن يكوله : ترا متحلفيلك مخلد طك جينكو ترا ******* و هو يكول -شحدا اليتقربلي غير ******* ولد ******* كلها ضحكت ، تقربت ماما : ها ماماتي شنو شعورج -تمام بس جنت اتمنى بابا موجود ، جان يحب يشوفني لمخلد -الله يرحمه لتفكرين بهالامور هسه ، فكري بنفسج و بسعادتج ، فرحانه -اي فرحانه ابتسمت بوجهي : البكلبج ماما خلي بكلبج و سايري حياتج مخلد يحبج هواية و مستعد يسويلج كلشي و بالسياسة تاخذبن الشعرة من راس الاسد .. فسايسي و كلشي بيناتكم خلي بالتفاهم البيت ما يقوم غير بوجود انثى و رجل اذا انت استرجلتي و ردتي رأيج اليمشي و هو استرجل و يريد رايه يمشي ، يوكف المركب و ما يمشي و توكف حياتكم كلشي خلي وياه بالتفاهم مثل ما هو تنازل و قبل شروطج اتنازلي انت تضيق وياه و حسسي انت وياه ع الدنيا مو انت و الدنيا عليه المرأ اللي يعشقها الرجال هي اللي تكون انثى بوجوده و رجل بغيابة فلا تسترجلين عليه ابد كل قوتج اخفيها و حسسي انت بدون متكدرين ادبرين شي ابد نفخي بيه و حسسي هو مالك امرج لا تحطين راسج براس و سايري حياتج وياه يماما مو لخاطر احد .. اخاطرج انت حتى تعيشين حياة بعيدة عن المشاكل -ان شاءالله - عفية ماماتي بالكلمة الطيبة و حبيبي و حياتي مشي امورج باستني و انطتني هديتي محبس ذهب و بيه شذرة فيوزي ، بستها و حظنتها : ماماتي ربي لا يحرمني منج عمتي انطتني هديه و وصتني و اقاربنا حطو الهدايا و تقريبا كلهم انسحبوا بقت بس ماما و عمه و مرت عمي لما صاحلهم عمي : يلا يابه انطو مجال للعرسان ياخذون راحتهم سلموا علينا و مخلد سلم عليهم بالكراج و وصلهم للباب و قفل و اجا اني سويت نفسي دا اتفقد الهدايا بس بالي كله وياه تقرب يمي ، مد اديه على خصري: شدا يسوي الحلو درتله وجهي :- ولا شي صرت بوجهه اباوعله، اتنهد و هو يبتسم رفع اديه : يعني هاي انت الي - هههه اي -شفتي درتي و لفيتي و رجعتيلي ، لج مدا اصدك و القرأن باوعت لأيدا دا ترجف ، ابتسمت ولفيت ادية على ركبته : صدك كلي الك و حلالك و مو من حق احد يمنعك لزم وجهي و كام يبادلني البوسة بلهفه ، بقى طاير ملهوف مجنون و هو ياخذني بين ادية دك الموبايل ، فززنا اثنينا باوعه رقم امه : هاي امي شعدها دا دك عليه -رد خاف اكو شي مهم -هاي رجعوا مازن و ابويه و تضايقت -درد عليها قبل لينقطع -الو ها يمه -ولك يمه سويتها كسرت بأمك ليش يا ابني ليش .. -يمه المفروض تفرحيلي -اخذتك مني بنت وداد عساها لا تتهنى بجاه كلمن عنده جاه اخذت مني وليدي اخ يا كلبي اخ -يمه لا هيج كولي يا الله اني عفته و فتت للغرفة ، شويه و سمعته صرخ طلعت بسرعه : شكو -ولج امي اتخربطت اروح اشوفها حجاها و ركض طلع -بالله هاي من كل عقلها اتخربطت لان تزوجني ، ديلا بالله دخلت للغرفة طلعت روب النوم ، اندرت اريد افتح البدله من ورا ، سحبت ، انفتح الظهر دا اريد انزع فات مخلد رجعتها بسرعه و التفتت عليه -ها -خابرت مازن كال بس ضغطها صاعد خليك بمكانك و اقفل الجهاز امي ما عليها شي -هم زين يعني ما بيها شي دك الجهاز -هههههه يعني ما قفلت الجهاز -هو اني لحكت رد : ها يمه كعد ع السرير يخابرها و يقنع بيها ، اني وكفت بالزاويا نزلت نص البدله و دا البس ملابسي، تشكلت عينه ويايه ابتسم و هو يكول : ديلا يا يمه شنو قصتج متكليلي اخر شي كاله : اي يمه اي وشيل الجهاز اضربه بالحايط وكع مقسوم نصين -تعاي يربج وين مبدله الوحدج ، ولج اذا مو اني ابدلج بأديه ما ارتاح -راح اكمل ابتعد -ولج دتعالي سحبني اله وكام يبوس بيه و هو يقربني بأيده على جسمه، رجعني للسرير و اخذني اله ... لليل كعدت جان بس التيبلام مشتغل، و اني نايمه على ايده و منطيته ظهري ، دا اريد اكوم اسحب الجهاز اشوف بيش الساعه سحبني لحظنه حيل: خليج يمي لا تكومين -بيش الساعه -ما اعرف -بس اشرب مي عطشانه سحبت الروب لبسته و كمت للمطبخ: جان عمه و ماما ماليات الثلاجة فواكه و حلويات كارتونات اشكال الوان و ع الطبخ الاكل و البقلاوة .. اخذت مي شربت حسيت ايد مخلد على خصري باوعته طالع بس بالبجامة عاري الصدر -ها حياتي جوعانه -لا دا استفقد الوضع -بس اني جوعان خليلنا شي ناكله -تمام حظرت شي ع الطاوله ردت اكعد مقبل، سحبني و كعدني على رجله ياكل و يوكلني و يبوس بجسمي : فرق ما بين زواجنا هذا وبين اللي بالموصل -هههههه -جنتي مثل العصفور اللي حابسه تتمنين تقتليني حتى تشردين -و شردت -متندمه ؟ -كلش هوايه باسني بزندي و صار حاول يتقرب -اوو مخلد مو بالمطبخ -ولج اني ناويه عليج نيه ماكو مكان ما اجربه وياج و اكص راسج لو منعتيني ، سلكتي ابو ابويه يلا صرتيلي و هسه تمنعيني اذبحج والله افتهمتيي -هههههههههههه ...بعدها راح كعد بالصاله بعد ألنفاخ و الاوراق و تمدد ع التخم و فتح التلفزيون اني لميت العشا من الطاوله و اخذت ديباج من الغرفة و رحت مغفي ع التخم ، خليت الغطا و كعدت على رجليه و تمددت على صدره و خليت راسي بركبته، تنهد كام يشتم بكصتي مسح على شعري و حظني حيل و غطانا ... غفينا اثنينا للصبح ما اعرف شلون لكيت نفسنا نايمين بالكاع و بدون مخده بس ملتفين ابعض و نايمه على ايده اندكت الباب ، فز هو و اني كعدت على فزته : منو -والله ما اعرف بس ماكو هيج قلة احساس يعني ميكولون عرسان شعدهم جاييهم من الصبح -مخلد باع الساعه ١١ يا صبح، كوم ع السريع البس قميصك و اطلع على ما ابدل گمنا اثنينا للغرفة هو لبس قميص و طلع و اني بقيت اختار لبستي من الصبح شنو ، سمعت صوت ماما و عمتي كعدوا بالهول فات هو : شفتي هاي امج البلا احساس اجتنا من الصبح -ليش تحجي على ماما ، خو امك ام الافلام الهندي لو ما كاسر الموبايل جان حرام البارحة منمنا -بالله امي مرتفع ضغطها و خابرتني امج شكو متحلمه بينا و جايبة الكيمر و جايه اجليها على باجر و تعاي و اذا ما اجت والله محد يعتب عليها -اكول اسكت يلا اسكت و هلا بماما شوكت ما اجت و كلمه ما اسمع عليها افتهمت -مو ترا اقفل الباب و استفرد بيج و اخلي بس نغاويصج توصلها -هههههههه يا منحرف ابعد منا لبست و لميت شعري و طلعت لماما سلمت عليها و على بيت عمو، هو لبس دشداشه و طلع كعد ويانه و ماما تكول : ردنا نجي من ٨ بس كلنا عرسان خليهم يرتاحون شعدنا رايحيلهم من الصبح مخلد : لا عمه لو جايه صدك جذب اذا تريدين باتي الليلة يمنا عدنا خير من الله غرف فارغه عاد انت عمتي كعدتج ما تنمل ندسته حيل صاح : شعدنا غيرج عمه الله يحفظج الله يحفظج ... دار وجه بثلاجة الموتا انشاءالله كرصته حيل : هههههه لا ماما ما عدنا شي -اكولج هذا رجلج شو جنه مراضي بجيتنا رفعت صوتي : لا ماما شلون ما راضي ، يا مخلد شوف ماما عبالها ما راضي بجيتهم و خزرته -لا عمه افا عليج شلون ما راضي هو البيت الكم و اني الخطار ترا ، مو سجلته بأسم بتج بعد شكو ، شوكت ما تجين شنسوي هذا الله كاتبه علينا عمتي ضلت تضحك -ولج هذا رجلج دا يطرد بينا -لا ماما مو هيج ، كل القصة مخلد ديشاقة مو مخلد التفتلي: لا شقا شنو صحيح، ااااا اي اي اشاقى عمه شبيج متكليلي ما تعرفيني شكد اعزج و احبج -ولج هذا بس لا ناصب عليه حجت عمتي: يا وداد الرجال حقة يتضايق اليوم صباحية عرسه خل نكوم مخلد: يا عمه انت على راسي من زمان اني احبج اثنينهن ضحكن من كال هيج و سلموا علينا و كاموا راحوا، قفلت الباب وراهم ورجعته : من كل عقلك مخلد هيج فشلتني كدام امي و عمتي -دنعل امج لابو عمتج وياج ولج اني رجال مسموط جد جدي امج تجيني من الصبح شعدها ما تكول هذا مفطوم صارله سنين دتعااااي -جوعانه اريد اتريك وخرررررر ممليت -ولج فلوس بنت الكلب خل اطلعهن -يا شنو دا نتقم مني انت دعوفني -والله ما اعوفج اذا ما اطلع حك البيت الزوعتينياه لا لا اوكف بس خل احجي وياك انت مكلتلي البيت تصميمه حلو لو لا -اكلج شغله -شنو -اذا واحد جوعان كلش جوعان و حطوله صينية قوزي بنص قصر لو بنص خرابه يفرق ؟ اهم شي يعبي بطنه فتعاااااي خل اتعبى بيج -لاااااااا اندك الباب ، كام من حيله شال النعال و طلع يريد يشحتهم وصل يم الباب خلاه برجله و فتح الباب و اني ميته ضحك فاتت ماما : لك عيني يمكن نسيت جهاز الموبايل يمكم -فوتي عمه فوتي صدك جذب مو كتلج البيت بيتج فاتت كلتلها : ها ماما -اي هذا جهازي شوفي واكع مني لج دادا -اي دادا يا عمه الساعه ١٢ اني اكول لو تتغدين و غداج من ايدي شتكولين -لا لك عيني تروح تخليلي سم بالاكل انت ابن كرجية ما الك امان -فدوة اروحلج عمه فاهمتني -اروح لج ماما لا يروح يذبحني هذا رجلج دا احسه كوه طايقني -يشاقه ماما يشاقه -اي اشاقه عمه شبيج انت لو تعرفين الشقى الضاملجياه بكلبي اقصد الحب و المحبه -اروح ماما -هسه غير تروح و تفضنا -يا شو انت تطردني -مو عليج يا عمه على هالشمس السمطت ابو ابونا مدا اشوفين الجو صار ٥٠ من الحرارة -هااا يلا ماما ديري بالج على نفسج -و اني فزاعة خضرة هنا ادير بالها على روحها -ديرو بالكم على بعض -غير تروحين حتى نشوف بعض و ندير بالنا عليها ضحكت و طلعت و اني هم اضحك على سوالفه ، سديت الباب ورجعت اضحك لكيته يدور شدور ؟ -ولج لا انوب ابوسج و تطلع ناسيتلها بلوة ثانيه فخل اتعب روحي و ادور قبل لا ابلش بيج ههههههههههههههههههه.....يتب� � ☆☆☆☆☆☆ #زينب_ماجد | ||||||||
|
| |
|
02-01-20, 01:16 AM
| #15 | ||||||||
| مراقبة عامة ومشرفة منتدى الروايات المنقولة
| #خطوات_نحو_الجحيم ،،،،،، بقلم الكاتبة زينب ماجد ،،،،،،، الحلقة_ 9 كالضل اثار الماضي تلاحقك لا تقوى على محوه و لا هو لجنبك تاركٌ -وين رايحة -اسبح، تقربت منه كرصته من خدة و بقيت كارصته: اطلع الكاك محظرلي الريوك كامل ماشي يا حباب ؟ -لا بالله خوما تريديني اكنسلج بعد - لا حاليا كلشي نظيف يكفي تسويلي ريوك -يجي من گلبچ تروحين و تعوفيني ؟ حجاها و اجا و حوط اديه على خصري ابتسمت : روح حباب خلي اسبح -لا اتعبيلي روحج اني اسبحج - بهذه ما تريد اتعب بس من اطلب ريوك تعترض ، هممم !! رفعتله بحاجبي بضحكة -بلا حجي زايد حجاها و شالني و اخذني للحمام سبحنا سويا ، بس حرام اذا هذا جان متزوج ، لا بعمره مشايف مره طلعنا من الحمام هو كمل وراح للمطبخ و اني بقيت ارتب نفسي على المرايا ، شويه و جاب صينية الريوك: يمه شنو هالندارة شنو هالدلال -بعدج عروس حياتي تمر كم يوم اسمط ابو ابوج اذا اتأخر الريوك خمس دقايق ضحكت ، خله الصينية بالكاع ردت اكعد ما قبل كال :تعالي بحظني اني اوكلج حط مخده و انتجة ع الجرباية و كعدني بحظنه و اخذ لكمة كاهي بكيمر و خله بحلكي : كلش طيب الكيمر طعمة يجنن -غير امج جايبته يابه، لو جايبته امي جان كلتي ييع كيمر امك حامض -عاد عمه كرجية و يطلع منها كيمر شتتوقعه -تروحيلها فدوة بنت....... قاطعته و اني اخلي اكل بحلكه :كافي تسب -عوفيني من امهاتنا و خليني استمتع بيج جوعان يحجي و صار يهمس و يشتم بركبتي ، التفتت له : ليش حبيتني مخلد -ما ادري من جنتي صغيره و اني اهتم بيج و اخاف عليج و تحول هالاهتمام الى حب -ليش ما كدرت احبك ، صراحة جان حبك يضايقني و مقيدني و جنت اتمنى تشوف غيري و تحب -لأن غبيه ، تريدين اليخدعج بالكلام و يسمعج غزل و هالامور بينما اني كان دمي محترك لنا اشوفج تتزينين و اطلعين و عمي مخليج براحتج احس دا اضيعين نفسج و اردع بيج و ما تردين -مخلد المرأة تعشق بأذنها ، مستحيل تحب شخص يحاول يقيدها و يفرض عليها ، انت جنت ادخل نفسك بأمور بابا ما جان يمنعني منها ،خو تتذكر من اشترالي سيارة شسويت انت، جنت احسك واحد يحب يتحكم بيه لا اكثر -بس اني جنت معبرلج عن حبي -جنت اضوج من تعبرلي لان ما تعبر بطريقة حب، تعبر بعد ما ترزلني و تتأزم بيناتنا تجي تحاول تعتذر و تكلي اني احبج و هالامور لمصلحتج، جنت اضوج اكول هاي يا مصلحة يا حب جنت بس اتمنى اخلص من محاسبتك -و تالي عرفتي كلامي صح -صح بمالك بس انت جنت قبل مالك فارض عليه و تحكمني ، شنو نسيت لما جنت تتعارك ويا ابويه شلون يخليني اسافر ويا الكروب مال كليتي لو من اطلع بسفرة بيها شباب، مرة من المرات ضربتني ضحك: ههه اتذكر -يعني جان من حقي اضوج منك - لا جنت اخاف عليج اعرف الشباب التتقربلج شنو غايتها -غايتيش الله يخليك غير الكلية كلها عرفت اني محجوزة لأبن عمي -ههههههه تالي اخذتج و هسه انت الي ابتسمت، اخذ وجهي باس شفايفي: محد يحبج بگدي -ماكو احد مخبل بكدك ضحك و اخذ وجهي يبوسني ... بقينا يومين بالبيت مطلعنا ابد، اليوم الثالث طلعنا وصلنا ماما للمطار ودعناها و رجعنا ... بعدها خلصناها عزايم ، يوم بيت عمي عزمونا يوم بيت عمتي و اخير شي بيت اهله بس كوه على امه هالعزيمة و هلكد جفصت بالكلام و غثتني بس مخلد جان يكول تحملي لخاطر و اتجاهلي هي كم ساعه و نرجع للبيت بس مبقت كلمة ما حجتها طلعتها لروحي ، بس كملنا غدا كلتله گوم نعست اريد ارجع للبيت وصلت للبيت ، هو بقى يصف بالسيارة اني دخلت للغرفة ابدل لبست بجامه و كيمونه ، شويه و دخل للغرفة ، حط سويج السيارة ع الميز و تقرب يمي اني دا امسح المكياج ع المرايا، حظني و دنك يبوس كتفي -ضايقج كلام امي اعرف -عادي شنسوي مرة جبيرة اتحملها -اعذريني ما كدرت احجي اي شي لان هسه مزوج و عازل عنهم لا اكدر ارد ولا اكدر اسكت ما عولت تخلص العزيمة و نكوم التفتتله، حظنته : حبيبي ليش دا تعتذر عن شي انت مسويته، اعرف جان صعب عليك تجاوبها ولا جان قبلت لو جاوبتها لأن لا مكان ولا الوقت مناسب فلتخلي ابالك و انسى .. لتضوج نفسك بسته بخده -اعشكج -حياااتي انت بس نعسانه حيل - ابدل و اجي انومج بحظني -لا لا ما اقبل ، اني ابدلك بايدي -يربي شلون تخليني اعشكها و اموت بيها ضحكت و اني افتحله دكم القميص، طلعتله تراكسود و بدلتله بأيدي و هو مبتسم و يشاقيني ، كملت تمددت كدامه ع السرير اجا اخذني بحظنه و نمنا كعدت المغرب قبله، فتت سبحت و غسلت ملابسنا اللي نزعناها و سويتله عشا ، سمعت موبايله يدك ، عفت الاكل ع النار و رحت للغرفة دا اريد اصخي لكيته كاعد دا يرد كوه و هو نايم جاي ارجع سمعته يحجي : هسه انت شرايده حجيت ويا نفسي : منو هذه ؟ عفته و رحت دا اكمل الاكل عفته ع النار، شويه و اجا هو بس بالبجامة يتمشى بالمطبخ اخذ من الاكل و وكف دا يضوگ ، سألته : منو الخابرك -زمن عقدت حواجبي : و شتريد منك -ما اعرف ، البارحة دزتلي صور الجهال على الواتساب و هي وياهم طالع نصها كتبتلها الله يحفظهم رجعت دزتلي صور فطومة بنتي الصغيرة بقيت اباوع بصور جهالي و ما رديت خابرتني اليوم تكلي شنو تزوجت و نسيت جهالك ، كتلها انت اللي اخذتيهم و طلبتي الطلاك ، تتكلي اي غير من ضيم امك ، كتلها هسة انت شرايدة ، تكولي جهالك يبجون عليك -مفتهمت المغزى من كلامها شنو تريدك ترجعها لو شنو -ما اعرف -شوف مخلد تريد ترجع زوجتك من حقك تلم شمل اطفالك بس لو رجعت اني اطلكني ، ما اتحمل اعيش و اني انتظر دوري ويا مرة ثانية لو اكعد اتسابق حتى اكسبلي رجال تعرفني هالامور اني ما اتحملها -شنو هالحجي لجين اني ما طلكت حتى ارجعها ، اذا ما عجبها تربي جهالي و تريد تشوف حياتها اسحب جهالي و خل تعيش محد لازمها -ع العموم اكعد دنتعشى ، دا اريد احجي وياك -شكو وكفت اصب و احجي: باجر ارجع لاربيل هز راسه ما حجه ، حطيت الماعون كباله و حظنته من ظهره و كلتله : ادري هالامر صعب عليك بس تعرف شغلي فرك وجهه و حط راسه بين اديه : افتهم همست بأذنه: بس تعرف شغله راح اشتاقلك كلش هواية سحب ايديه و كعدني بحضنه : بس اني من هسه دا اشتاقلج قربت وجهي و طبعت بوسه على شفايفة ، لزم وجهي و بادلني البوسة ..... ابتعدت منا : كوم نتعشى يا وكيح -اريد اسبح -كمل عشى و اني احظرلك الحمام و اسبحك بأيدي بعد !! -ولج انت ليش حرمتيني منج كل هالسنين والله حرام عليج -ههههههههه كملنا عشى و رحت حظرتله ملابسه بالحمام و سبحته و كعدنا اني وياه نسولف و نضحك و نباوع تلفزيون .. لثاني يوم رجعت لأربيل ، بس الصراحة استفقدت وجوده لما رجعت ، حسيت روحي ضلت هناك و اني اجيت بقيت وياه ع الواتساب نحجي ، و حتى بالليل فتحنا كاميرا و بقينا نحجي مع بعض و عفنا الاجهزة مفتوحه الكاميرات و نمنا لحد الصبح لا اني قافله ولا هو سمعت اكو صوت طگطگه بالموبايل فتحت عيوني لكيت يبوس بشكلي بالكاميرا .. ابتسمت -صباح الخير -صباح الانوار ، اني راح اطلع للدوام انت كملي نومتج حياتي -اريدك يمي -ليش اني اللي ما اريدج يمي بس شسوي هذا حكمج بعد و هاي شروطج غطيت وجهي بالمخدة هو باس الشاشة و قفل الاتصال و اني كملت نومتي ، ساعة و كعدت ترتبت و بدلت و نزلت اخذت سيارتي و دا امشي دك جهازي اتصال باوعته، رقم غريب، رفعت الخط : الووو مالك: مبروك يا عروس وكفت السيارة بسرعة : انت شرايد مني -لا ليش وكفتي السيارة كملي ، اووو بس ما يكون ضايقناج يا ست العروسة !! قفلت الخط بوجهه ، و كملت سياقة بس شنو گلبي هبط ، و اني اباوع بالمرايات مال السيارة : مراقبني هذا لو شنو فتت بفرع حتى اشوف اكو سيارة ملاحقتني .. ماكو ما شفت سيارة، طلعت الفرع دك الموبايل ، رديت - انت شراايد مني - منو ؟ -ها مخلد ، لا بس هيج رقم دا يزعجني -دزيلياه دا ارزله - ما يحتاج راح اسويله تحويل مكالمات و اخلص منه -يروح يزعجج من رقم لاخ دزيلياه خل اهدده شويه و ابهذل احواله -شبيك مخلد دا اكولك راح اسويله حظر مو مستاهل الموضوع -لجين صاير شي شو تخربطين شبيج -ما بيه شي وصلت للشركة يلا اخابرك بعدين، بيبياي قفلت الخط و باوعت رقم مالك، دا اريد امسحة بعثلي رسالة ( كملتي مكالمة من رجلج الارعن لو بعد ) اتصلت بشركة اسياسيل و طلبت حجب هذا الرقم ، ساعدني موضف الخدمة و حجبته بعد ما اتصل ابد دخلت للشركة بلشت شغل، هناك و اتذكرت مخلد حجيت وياه بشكل جاف، خابرته ، رد -الو حبيبي -هلو لجين -اسفة حياتي جنت متضايقة و حجيت وياك بشكل جاف - الرقم شصار وياه -اتصلت بالشركة و حجبته -واتصل بعد ؟ -لا مو دا اكولك حجبته بعد ابد ما زعجني - اي زين لعد اذا اتصل من خط لاخ بلغيني -ماشي حبيبي -ديري بالج على نفسج -حترجع لبيت اهلك مو -كم مرة سألتيني هذا السؤال و كلت لج ارجع لبيتنا - مو حبيبي اشيل همك منو يغسلك ملابسك منو يسويلك اكل -ما الج علاقة اني مرتاح بالبيت ، ما الي خلك هوسة جهال مازن -اوكي حياتي على راحتك -احبج -اموت عليك ، امووواح باي سلم و قفل الخط بقيت يوميا على هذا المنوال، نتصل ابعض طول اليوم و نحجي و من انام نبقي الجهاز مفتوح .. اسبوع و كال باجر اني يمج ، اني ما صدكت ديجي يمي، نزلت للسوك اشتريت انواع اشكال ملابس نوم و تراكات مغرية امشي بيها بالبيت كدامه ، و تسوكت للبيت مواد اكل و حلويات انواع نظفت البيت تمام و حظرت الحلويات بصحون مزينه للتقديم و حظرت الغدا من الصبح من اليوتيوب سويت تمن احمر و عليه حشو مال شعرية و لحم و بقيت اتفنن حظرت الغرفة شموع و الحمام هم خليت بيه شموع كبار وبعدها رحت احظر نفسي لبست شورت بنطرون و بدي مكشوف الذرعان و ما بيه حمالات لبست وياه كلادة صار الشكل كلش حلو شمرت الشعر ورا و فكرت ابرمه بس اندكت الباب و ملحكت ركضت للباب و الضحكة شاكة حلكب فتحته ، هو مبتسم شافني عقد حواجبة فات بسرعه : لا تفتحين الباب هيج بنت الكلب كولي طلع احد.غيري و مو اني يشوفج هيج، سد الباب و قفله ، حظنته : مجنون مشتاقتلك اخذني بحظنه : اني اشوق يا حيوانه لزمته من شعره ملشته و كمت اجر بي : كافي تغلططططططططط -ولج اني بودي اكتلج مو بس اغلط على هالمسافة المخليتها بيناتنا، ليش هيج ليش راضية بوضعي هيج اجدي منج شوفتج جداوة -احلى احلى و لتبلش باللوم محظرتلك الاكل حار و طابخته من ادية -اريد ابلش بيج -اووو تلحك تلحك والله تعبانه ع الاكل ، اكل اول وبعدين اخذ راحتك رحنا للمطبخ ، طلع تصفيرة من حلكة : ولج هاي اخلص الاجازة يمج اكوم ما اطلع من الباب -شسوي من كد ما مشتاقتلك رحت اشتريت السوك كله دا احظرلك - كعدته و اصبله تمن و لحم و اخليلة حلويات تالي كال كورشتيني بتل بتل انتي تنقشين و اني تعبين بحلكي .. اخذني و رحنا للغرفة، شافها كلها اشموع نفخ : لج اني هم حاسب نفسي جنت عايش -هههههه سحبني لحظنه و نمنا ع الجرباية بعدها رحنا بالحمام ، ترست البانيه مي دافي و كعدن بحضن بعض بيه و خلصناها رومانسيات ، وكأن بعالم ثاني من كد ما التهينا ابعض نسينا الدنيا، كملنا شيلني من الحمام و اخذني للغرفة و طفى المكيف و ما قبل اكوم نومني على ايده و بس ع المروحة غطيت بالنوم بعد ما حسيت على شي لان كاعده من الصبح لليل كعدت مخلد ماكو .. كمت من مخدتي ادوره مموجود .. بدلت تراك و طلعت لكيته كاعد بالصالة و عاقد حواجبة تقربت منه : ها حياتي دا اكعد بعدني منه و كعد على حافة التخم -هاي شبيك ؟ -منو هذا لجين ؟ -منو ؟!! قدملي موبايلي ، و فاتح رسالة مالك المكتوب بيها ( كملتي مكالمة من رجلج الارعن لو بعد ) ناسية امسحها : و على هايه متضايق ، هذا نفسة الرقم الجان يزعجني ، و بعدين عيب هالاساليب مال تفتش بموبايلي شنو ما عندك ثقة -عوفي الثقة على ***** و كليلي من وين يعرف انت متزوجة و شلون عرف انت جنتي تحجين وياي و هيج ديكولج بالرسالة -ما اعرف المهم سويتله حجب و تكدر تتاكدر اذا مسويتله حجب او لا حتى تأمن لان الظاهر انت تشك بيه -لج ادب سز اشك بيج شنو اللي يكولج هيج ما بيها غير احتمالين يا يعرفج معرفة تامة يا انت داكه وياه سوالف و معرفته بيج و هيج ديكولج -مخلد ميعرفني و هو مزعج و كلتلك حجبت الرقم و بعد ما اتصل عليه انت ليش تلح بالموضوع حجيت هالكلمة و هو فز من مكانه بسرع و طوق ايده على ركبتي خنكني: -هذا منو اليلح بنت الكلب دفعته حيل : لا تغلط و احترم افتهمت، انت دا تسوي مشكله من فراغ -سمعي لج من تحجين وياي بهالاسلوب والقران اكطعج حيوانه -كلت لك لا تغلط -اغلط و نص و كلمة لخ لو سمعت منج والله ابتلي بيج -لا انت صار ما ينحجي وياي ابد ، اكوم منك احسنلي انداريت امشي منه، جان يكول : روحي يطبج طوب اني اعرف شلون اتوصل لصاحب الرقم هسه اتصل بيه و اعرفه التفتت بسرعة، هذا اتصل و طلع مالك و اني ناكرة و اكوله شخص مزعج حرام الا يكلب الدنيا فوك راسي -انت شنو ما واثق بيه دا تتصل تتأكد اتصل ما رد عليه: جريت الموبايل من اذنه و قفلته : انت من صدك ترا دا تهيني و هالاساليب ما ارضى بيها -انت شلون اتسحبين الجهاز من اذني -لان عيب تشك بمرتك ، مواثق بيه عوفني -لج طايحة الحظ اشك بيج شنو هذا اليكولج هيج يعرفج و اريد اعرف منين يعرفج -ترا اني انسانه معروفه و مو غريب بشر تعرفني دا تكبر الموضوع هواية و دة تنطي اكبر من حجمة -انت ليش هلكد خفتي و هذا منو اللي راسلج، سمعي لج الكدامج ضابط شرطة طرن و ما افتهم اعرف اللي داز هالرسالة بهالاسلوب يعرفج لو لا و اذا جان معجب و هيج يكلمج و يكولج كملتي مكالمة ويا رجلج الارعن معناها هذا مراقبج و ناويلج على نية -دكافي مخلد كافي كلتلك والله حجبته و خلص موضوعه ليش دا تخلقنا مشكله من لا شي ...كمت ارجف كدامه و اخربط خفت لا ازلك بكلمة من الأرباك كعدت ابجي ، كلت هسه يشوفني ابجي يجي يلتهي بيه و ينسى الموضوع بس قفل شيل الموبايل و اتصل كمت على حيلي سمعت ام الشركة تكول : ان الجهاز مغلق او خارج منطقة التغطية تنفست الصعداء، و كلت له : الظاهر انت صدك ما تحترم ، عفته و رحت للغرفة كلت هسه حيجي ورايه، شو هذا ما اهتم لكلامي و ما اجا ، يعني مصر يعرف صاحب الرقم منو .. زين هسه الله ستر و مالك مغلق، اذا فتح الخط و اتصل و عرف مخلد هذا مالك شسوي اني غير يذبحني مخلد اروح اعترف و اكوله هذا مالك و خابرني ديستفزني لا لا مهلد شكاك و هسه يكوم يشك بيه ليش ضميت عليه وليش اعترفت و يبقى ابراسة الف ليش و ليش ، لا ما اكوله زين اذا ما كلت له مخلد مصر يعرفة و اذا عرفة راح الوصها على روحي معناها دا اخابر مالك من ورا ظهرا و تعال جيب اليخلصني اخ يا الله ااااخ من غبائي اي مو جنت مرتاحه و ما افكر و اخاف من احد كمت اتزوجت لييييش شناقصني و اتزوج ، احسنلي هالهبطة هسه هاي يربي عديها فدوة .. شبيه غبيه شبيه ما كلتله هذا مالك من البدلية و صلرحته و الا اني شكو عفت الرسالة كلش زين اعرف مخلد دوم يدور بموبايلي ، شنساني هالرسالة هاي يربي رجليه كامت توجعني من الخوف يا الله دا افتر فات هو ، سويت نفسي امشي للميز دا ارش عطر و امشط شعري من خوفتي بالي انشغل وكفت اتمكيج و ما ادري بروحي لما كملت شفت روحي امشطة و امكيجه : يااا اني تمكيجت كدامه اي غير زعلانه منه شعندي تمكيجت هسه شيكول عليه دا تغريني تريدني اصالحها .. امسح المكياج شعندي مبقيته ردت امسح لكفته بالمرايا يباوعلي من جوا الجوا بطرف عينه و يدور وجهه، دا يراقب تصرفاتي و اذا امسح هسه يكول هاي عدها شي و مدا توزن تصرفاتها تتمكيج و تمسح عفت المكياج و توجهت للسرير انام .. انطيته ضهري و نمت ، سحبت الغطا منه و بفيت افكر راد ينام سحب الغطا التف بيه و دار وجه عني كعدت : هذا من كل عقله هو جايني يومين و ينام و ينطيني ضهره ميكول زعلانة سحبت الغطا من عنده و اتغطيت، كعد : مدا تشوفيني منطمر نايم ليش تسحبين الغطا -والله هو غطايه و بكيفي -ها بكيفج يعني اني هنا مجرد لزكة جاي عليج ، اي زين اخذي الغطا و البيت الج و اطلع كلب ابن كلب اذا عتبت هالبيت بعد كام من يمي سحب بنطرونه يريد يلبس -هاي شبيك مخلد ادور الزلة حتى تزعل -اني اللي الاتزعل لج حيوانه لو ما انت اللي كالبة خلقتج عليه ولا تكولين جايني يوم واحد بلا هالسوالف التعبانه بس اني مالي خلك هالسوالف اروح منا و اتفلي بوجهي لو اجيتج بعد بسيطة كمت من مكاني سحبت الملابس من عندة : انت دا تكبر الموضوع حيل اني ضجت منك لان انت دا تشك بيه و مدا تثق -لج مو الساني زفر لا تخليني هسه انزل بيج كلتلج ما شاك ردت اعرف صاحب الرقم منو انت اللي كمتي ترجفين و بكتي هوى و خوفج هذا خايف منه -مخايفة اني على شنو دا اخاف بس انت تلزم جهازي و ادور بيه عيب تقبل اسوي وياك هشكل و ادور وراك هالامور تعبر عن عدم ثقة -هذا جهازي بين اديج ولا مره منعتج تلزميه لو تفتشين بيه، و من حقي ادور جهازج اني اغيب عنج اسبوع شعرف عن شغلج بغيبابي شنو تريدين تنوميني و رجلية تخليهن بالشمس -اي رجلين هاي اي شمس ، تكدر تطلب مني و تسألني و اني و اسولفلك كلشي، عوف الملابس ولا تكبرها و بعدين الزعله زعلتي لا تبوكها -حلو والله زعلتج ليش يابة شسويت، كتلج هذا شاك يعرفج و اريد اعرفه حتى لا اخذ حذري منه و احذرج حتى لا يأذيج ، بس انت مصرة انو خوفي عليج شك و اذا انت دا تخترعين شغلات من بالج و تزعلين اني ما مجبور اراضيج على سوالف اني ما غلطان بيها دا اتحقق من هذا لمصلحتج انت ليش احسج ارتبكتي و كأن دا تخفين شي -اخفي شنو بس تعرفني هالاساليب ما احبها و بعدين انت تعديت عليه و غلطت و حتى خنكتني -من ايدج غير انت تلوصين بالحجي و تخليني اعصابي تطلع عليج -همم اهذت البنطرون رتبته بالكنتور و رجعت للسرير انام -يعني افهم من تصرفج ما تريدين تحضنيني حتى نتعدى الموضوع -وليش مو انت التحضني ليش اني شسويت و بشنو غلطت ضحك و سحبني لحضنه : ام راس اليابس اني رجلج اتنازلي و طخي راسج افتهمتي -بس مو على حساب كرامتج -مو انزل بكرامتج هّي ****** هو منو هاين كرامتج ترا انت المكبرة الموضوع و منطيته اكبر من حجمة سألت منو هذا الكاتبلج هيج كوليلي هذا الزعجني و يا ريت تعرفه منو لان استفزني بكلامه و يغلط ، مو تروحين تكلبين الدنيا -مو كانو لحينا بهاي السالفة هوايه مناوي تتعداها ؟ -لج هي ***** شو زعلانه و صالحني و خابصة نفسج و تكليلي لحيت ، اني لو انت ؟ -اوكي اوكي اقفل و غير الموضوع و احجي بغيرة يلا -ما اريد احجي نامي و خلصيني من السانج و بس حطيت راسي بصدره و دا انام باس راسي و هو يكول : شكد عيارة عود زعلانه و هي وكفت تتمكيج و تتعطر كدامي و تفر منا و تجي منا تحوس تريدني اصالحها ، عود تستحين تقربي و كولي يلا خل نصالح ليش تفرين السوالف على روحج -اووو لا تحجي هيج مالك كافي رفع حاجبه : بس اني مخلد مو مالك لا تخلطين بالامور -اااا اسفة والله اسفة زلة السان ما ادري مخلد الله عليك لا تعتبرها اي شي -لا عادي حبيبتي زمن تصير هالامور عقدت حاجبي : زمن شنو ؟ -اووو زلة السان اسف قصدي لجين كمت من حضنه : ترا ما حجيتها متعمده ماكو داعي تتعمد تغلط كدامي حتى تسويها وحدة بوحدة رجعني لحضنة : دا اتشاقى وياج حبيبتي، يلا نامي -تعشيت -اي اكلت قبل شوية لا تفكرين نامي بقى مخليني على ايدة و يمسح على راسي .. لحد ما غفيت و حتى هو نام الصبح تقريبا الساعة ب٨ الصبح سمعت صوت مخلد دا يدك .. شلت راسي من ايدة ، باوعته لكيته رقم مالك ، فتحت عيوني و انطيته رفض بسرعة شال راسه هو : منو حبيبي -اااا ما اعرف رقم غريب اتصل و غلقة، عوفه طفيت الجهاز بلا ما يدري و دا التفت ارجع انام على ايده جان يكول -لا انطيني الجهاز خاف الرقم من الدائرة دا يتصلون عليه وسحب الجهاز عقد حاجبة و هو منعس و كال: هاي ليش طفيتي -ما ادري هو طفى شغلة دور ع الرقم اللي اتصل ، و رجع اتصل بيه هنا احس كلبي صار طبل من الرعب و الخوف، رد و كال : الوو مالك: منو انت ؟ -انت المتصل -لا اغاتي انت المتصل عليه البارحة باوع مخلد بالرقم و ركز بيه عرفة الرقم البارحة اللي اتصل بيه: منو انت -متصل و تسألني منو -جاوب بلا تنعثل لك - هههههه لك انت منو -معليك اني منو انت مضايق زوجتي من هذا الرقم - زوجتك ! زوجتك منو ؟ انت شارب لو متعاطي يابه ؟ - انجب لك واحد قندرة مثلك ما يحجي وياي بهالاسلوب كول منو انت -ههههه اني اسمي مالك بس ما كلتلي زوجتك منو ؟ التفتلي مخلد و هو فاتح عيونه بخزرة ......يتبع ☆☆☆☆☆☆☆ #زينب_ماجد | ||||||||
|
| |
|
04-01-20, 04:58 AM
| #16 | ||||||||
| مراقبة عامة ومشرفة منتدى الروايات المنقولة
| #خطوات_نحو_الجحيم ( الجزء 2) ،،،،،، بقلم الكاتبة زينب ماجد ،،،،،،، الحلقة _10 قالوا حبل الكذب قصير و مرارة الصدق و ان كانت عصيبة ولكن اهون من السقوط بدائرة الكذب ، فأصدق القول و تحمل عقبات ما تفعل ولا تزيد اخطائك بالكذب 🖤 العراق_أربيل قفل الجهاز و اجا يمي اخذ ايدي : جنت تعرفين هذا مالك -مخلد ايدي ، اني افهمك ضربني راشدي، لزمت خدي و باوعتله : ليش تضرب -لج تضمين عليه و ما تكولين هذا ماااااااالك ، عاجبج الوضع و هو يخابر بنت الكلب -الف مره كلتلك ما اسمحلك تسب ابويه و لا بعمرك اسمحلك تمد ايدك عليه افتهمت -لج اكسر راسج و القران تتملعبين من ورا ظهري انت - ما لعبت كل القصة اتصل مالك و استفزني ولما رديت ع الاتصال وصحت بيه طلعت انت ، بردة فعل سريعة كلتلك واحد حتى لا تقلق عليه و انت ابغداد و تورطت لا اكدر احجيلك ولا اكدر اسكت واذا تشك بيه ولو ١ بالمية اتركني بس ممنوع تضربني مو طفلة كدامك اني حجيتها و درت وجهي و اني اداري بدموعي و امسح، لزم ايدي: اسمعي لج مال تبجين و تلوفيها عليه و القرأن الدنيا اكلبها فوك راسج البارحة تتراجفين لا اعرف الحقيقة و من اتصل قفلتي الموبايل لو ما عندج شي ما ما تتلوتين و تتحايلين هيج حتى لا اعرف، شعندج وياه -من صدك يا اسفي عليك، اكرر للمرة الاخير اذا شكيت بيه طلكني عفته و دا اروح، سحبني حيل : كلمة طلكني ما اسمعها لجيييييين وهسه تجاوبيني على كل اسألتي -اللي عندي كلته و ما عندي شي اضيف، ولا تعتقد بصياحك و صراخك تخليني اخاف لو اكعد ابررلك ، اني غلطت من كذبت بس ما غلطت من وراك تصدك براحتك متصدك انت حر سحبت ايدي و دخلت للغرفة .. هو كام يصيح و يحجي برا و يسمعني ، ما رديت بس عيوني تجري اخذت ملابس و رحت للحمام سبحت ورتبت نفسي، جريت سويج سيارتي و مشيت من كدامه -اوكفي انت وين رايحة -عندي شغلة -اسمعي لج من وافقت على شروطج و شغلج مو معناها ارضى اطلعين و اني هنا اتفرج عليج مثل فزاعة الخضرة -مخلد شرايد مني اني لا رايد اكسر كلامك ولا رايدة اقلل منك، صارلك ساعة تصيح و تسب وصوتك واصل لاخر العالم و ما حسبت حساب ان الي سمعتي بالعمار و مكلت عيب و رغم هذا كعدت جوا و لزمت الساني وما سكتت انت قررت اطلع حتى ما ارد و تكبر ، شرايد اسوي -اكعدي و تحاجيني على كلشي وحده وحده باوعت بيأس، تنهدي و كعدت كدامه ع التخم : هياني كعدت احجي بس اذا سبيت لو حاولت تتهجم لا تتوقع ابقى تريدنا نتناقش بهدوء هياني كاعدة كبالك و اجاوبك -مالك من شوكت يخابرج -ثاني يوم اللي رجعت و كلام سخيف اخر شي انطيته حجب و بعد ما اتصل ابد -و ليش ضميتي عليه ؟ -مو قصدي اضم بس انصدمت بيك لما رديت عبالي مالك و ابتليت و نكرت و بقيت جذبه تجر جذبة حتى لا تكبر المشكلة بيناتنا - اذا انت واثقة ممسوية شي ليش تخافين تصير مشكلة ؟ - ما اعرف خفت وبس ، تهور غبيه شتريد تكول كول ما اعرف ليش نكرت الا مالك من المستحيل اتحمل اسمع صوته -تعالي -عوفني مخلد الله يخليك ضربك صياحك و غلطك لسة يرن بأذني خليني اطلع و اتناسى الحجيته كام من مكانه: يعني اني ضربتج متعمد والله من خوفي عليج مالك واحد قذر واذا جنت خايف عليج من واحد غريب عبالي يراقبج هسه دا اخاف عليج اضعاف من عرفته مالك هذا ما راح يخليج ترتاحين لجين راح يبقى وراج و بهالحالة شلون ائمن عليج هنا -شسوي شغلي هنا ما اكدر -نرجع لبغداد محاج الشغل لجين -راتبك يا دوب يكفيك و يكفي اطفالك و اهلك، و راتبي ضعف راتبك اتكبر على نعمتي و اترك شغلي هنا حتى اكعد ابغداد على مود واحد اعرفه لو وين ما رحت ما راح يعوفني بحالي ، خليني هنا بشغلي بتالي اربيل ائمن من بغداد -بس اني ما ارتاح راح يضل بالي يمج، شلون اعوفج هنا و ارجع لبغداد - هذا كان اتفاقنا من الاول، كأن ما تعرف مالك يلاحقني من قبل لا اتزوجك مو كلتلك اجا و هددني ، يعني مو شيء غريب دا احاول قدر الامكان ابقى بعيدة عنه و بس كمت من مكاني دا امشي، التفتت و كلت له : انت مدين الي باعتذار على ضربك و تجاوزك و الا ما الي كلمة وياك ابد ابتسم، عفته و مشيت ، اجا ورايا : تعالي لج متضايقة لان ضربتج -لا حشا لازم افرح و اهلهل لان ضربتني مو -كافي لا تكبريها كلتلج من خوفي عليج -لا تتكبر و اعتذر -اعتذر على شنو دكومي بابا اني غير رايد مصلحتج -مصلحتي مو بهشكل والا ليكون تعودت تضرب زوجتك و تسكت و ما توكف بوجهك -لا تكليلي مالك ما جان يضربج -لو جنت اكدر اتخلص منه ما اقصر بس جان يهددني بقتل اهلي و يجبرني ابقى بس بتالي خلعته مثل ما خلعته مثل اي قندرة تنخلع لما تأذي الرجل - يعني شفهم من كلامج -مدا احاول اوصلك اي رسالة او مسج ، انت تختلف عن مالك تماما و حشاك منه بس مدا اطلب اكثر من اعتذار ! هز راسه و تنهد : راح اتركج تهدين اطلع شوية و ارجع -اني هادية مخلد اللي طلبته بس اعتذار -ترا صار ساعة دا احاول اراضيج و انت ميسبة راسج دكافي -هلكد كلمة اسف صعبة عندك !! - عافني و طلع ما رد هزيت راسي لما يريد مصلحة براسة يجي يعتذر بس لما واجب عليه يعتذر ييبس راس .. شمرت السويج و كلت : حرام اذا ما تعتذر فلا احجي وياك و دا اريد اشوف منو اللي تكبر راسك عليها رحت لغرفتي، خابرت ماما و سولفتلها كل الصار بيناتنا ووكتلها : ديكبر راسه عليه ضربني ويريدني امشي الامور اعتيادية -ماماتي اعرف انت هسه عصبية و متضايقة بس اذا نحسبها هم حقة محد يقبل طليق زوجته يخابر و زوجته تنكر، ردة فعله نكدر نكول ناتجة عن غضب -اوك اني كلت له اعترف كذبت بس ماما هو يعرف مالك يفتر ورايا يعني شعندي وياه و يضربني -هو شوكت يروح -باجر السبت -كبري راسج و هو يكبر راسه و كبروها و باجر يروح زعلان و خلي اليكرهج يعرف و يتشمت ، شستفاديتي بهشكل يماما ؟ -وحتى لا اخلي احد يتشمت اقبل يهين و يسب و يضرب ؟ -لا خليج زعلانه بس كومي رتبي نفسج لبسيلج ملابس خفيفة و حلوة و سوي اكل و صبي و اكعدوا ولا تحجين اي كلمة، الرجال من يشوف زوجته تادي واجبها و ما تحجي وياه هم يخجل ويحاول يتقرب الها اكثر ...بقت تحجي ويايه و تهديني، شفت كلامها صحيح كمت بدلت و لميت شعري كباية ورحت اسوي غدا فات للبيت و اجا للمطبخ ، اخذ من الاكل و انتجى ع الكاونتر : بعده الحلو زعلان ؟ -ما جاوبت كعد كدام الطاولة ، صبيت اكل، حطيت كدامه الماعون لزم ايدي : عمي اسف ما اضربج بعد بس لا تكبريها كلها باجر و اروح و ابقى اشتاقلج بقيت اباوعله بنظرة شقاوة، اخذ ايدي باسها براحتها و حجه: اعشكج دنكت بسته بخده : و اني هم احبك بس مرة لخ اتمنى تسمع مني و تسمع تبريري يلا تتصرف لو تتهجم -حااااااظر ست ضحكنا و تصالحنا و عدا الموضوع بس بقى يحذر و يوصي من مالك اذا اتصل او زعجني ابلغة و تراضينا مر الشهر و الشهرين و الثلاثة و احنا على نفس الحال ، اني اشتغل باربيل و هو ابغداد و لقائنا بس بأيام العطل ، هو يجي يوم الخميس للسبت يرجع بس دا اشوفة يتضايق من هالموضوع بس ما حجة ابد، و الصراحة اني صح شرطت عليه هالموضوع بس صرت اشتاقله كأي زوجة تريد تكون يم زوجها كل الايام مو بس بالعطلة .. رغم لما وافقت عليه ما جنت احبه بس سبحان الله يخلق المودة و الرحمة بين الزوجين بمجرد ارتباطهم بعقد الزواج .. على كد حبه و اهتمامه صرت احبه مو ذاك مخلد اللي بس يفرض رأيه و يتأمر، بالزواج و التقارب تغيرت نظرتي عليه و تغيرت مشاعري، ما اعرف هو اللي تغير و صار يتنازل لخاطري المهم تراهمنا مره خابرت طيبة دا اسأل على مخلد ان كان عدهم او بالبيت لان اخابر عليه ميجاوب فكالتلي : تعارك هو و امه و طلع و ناسي موبايله ع الشحن -تعارك ليش شصاير -متعرفيها لكرجية شكد تنكد و تعير طلبت من عنده فلوس و هو يكولها ما عندي البارحة مداين من صديقي ٢٠٠ كلتله ع الراتب انطيكياهم و هي اتخبلت تكله وصلتك لجين للدين جانت مرتك ما تطلب ابربع و بنيت براسها بيت و لميت نفسك هسه لجين خلتك تتداين ما كفيت من لجين ما مليت و هي ضاربتك عرض الحايط و ضاله باربيل تتفرفر بقت طيبة تحجي بس الصراحة تضايقت من الكلام، قفلت منها و خابرت على مدير شغلي طلبت اجازة يومين اطبكها ويا الجمعة و السبت تصيرلي فترة اروح اشوف مخلد بيها لميت جنطة اليه و طلعت بساعته من اربيل لبغداد ، وصلت تقريبا بالليل ، رحت لبيتنا ، جان عندي نسخ من مفاتيح البيت، فتحت و فتت للبيت دخلت البيت هوسة و مطفى ، رحت لغرفتنا ، ردت افتح الضوة شفت مخلد نايم ع الجرباية، عفت الضوا نزعت الجاكيت و الحذاء و تقربت يمه كعدت ع الجرباية ، حس بسرعة كام عيونه مغوشه يريد يشوف منو كام يتلمس ويكول : منو -حياتي اني لجين كعد على حيله: شجابج لجين -اشتاقيتلك -اني محذرج تجين من بغداد لاربيل سوالف المفاجأت اكرهه دخلت بحضنه : اسفة بس ضل بالي عليك لان مجاوبت على اتصالي و مكدرت امنع نفسي من انو اجيك -و هاي مره اذا ما جاوبت تجين منك لهنا -ايي ، يعني شنو ممشتاقلي -لجين تعبان -تعال بحضني شو -لا اكوم اروح اجيب موبايلي بقى عد اهلي لا يخابروني الدائرة و ما اعرف بيهم -ماشي براحتك كام بدل ملابسه و طلع، اني رحت باوعت البيت صاير هوسه اكل و مواعين مكومة بالمطبخ باوعت اظافيري مصار يومين من مسويتهم بالمركز ، غسل و جلف كل هذا يعني بيباي اظافيري باعتلهن بوجه مكرمش حزين بستهم و ودعتهم و بلشت شغل، بلشت بالصالة رتبتها و مسحت ارضيتها، فات مخلد و اني امسح كعد يتفرج ع التلفزيون، اني خلصت الهول و رحت للمطبخ خليتله فحم ع النار وسويتله اركيلة .. و كعدت ارتب بغراض المطبخ .. كملت الاركيلة اخذتها لمخلد و كلت عود بعدين اكمل الشغل ، خليتها كدامه كال : اي والله بوكتها ، اخذها من ايدي و كام يدخن و يفحصها و يعدل بالفحم -شبيك حبيبي شصاير -استخباراتج ما كالتلج اتعاركت ويا امي ابتست: بلي كالتلي -بعد على شنو تسألين -اسأل عنك متضايق حيل و ما الك خلك ، اني زوجتك حبيبي افتحلي كلبك و احجي - لو حجيت الحجي ميعجبج -جرب تنهد، و جر الكوشة مال التخم و خلاها على جهة الحافة للتخم و اتمدد : لجين عقلي مشوش و وضعي ما صافي -ليش -لج وصلت مرحلة راتبي ما كام يكفيني -يعني محتاج فلوس -القضية مو محتاج فلوس، اني اخاف احجي و تكولين مو اتفقنا بس وجودج بأربيل اذاني -شلون -راتبي كولي ٣ ملايين ، ٥٠٠ لابوي لمصرف بيته و ٣٥٠ نفقة اطفالي ، غير مسوي سلفة من راتبي على دين البيت ، غير مديون عليه ١٢ مليون ، غير بانزين سيارتي و مصرفي و يجيج مصرف الروحة و الرجعة مال الروحة الج لاربيل اروح بسيارتي اوصل يمج دايخ ما اعول بس انام من عجة الطريق ، و هنه يومين ما الحك حتى اشوفج، اجيج بسيارة اجرة ليوين يلا اوصلج يروح يوم بس طريق ، اجي على مطار بغداد ، اجرت الطيارة تزين الراس ما اعرف شلون احلها حرت تقربت يمه: اذا هلكد شغلي مسببلك ازمه مو بالازم حبيبي اكدر اترك اني متركت لان اعرف راتبك يا دوب يكفي و شغلي ما يتعوض بس اكيد مو اهم من راحتك حبيبي -يعني تتركين شغل اربيل ؟ -حياتي اني هم معاجبني اتركك هنا و اني باربيل اشتاقلك و اريدك يمي و كنت دا افكر اترك الشغل و انتقل لبغداد افتحلي محل ازياء او شيء يناسبني بالفلوس اللي عندي فتحلي ايدى ، تمددت على صدره : اعشكج يبنية -ههههه اموت عليك اكوم اكمل شغلي حتى اتفرغ بس لهالحلو الوكيح لان مشتاقتله غمزلي : و انا بالانتظار بسته بخده و كمت من يمه اضحك، رحت انظف بالمطبخ جاب نركيلته و كعد يمي نسولف و نحجي .... من بعدها قررت اترك شغل اربيل و ارجع استقر يمه، رحت لهناك خبرت الشركة بترك الشغل انطوني اخر راتب و طلعت لميت كل غراضي من اربيل اني و مخلد و انتقلت لبغداد .. يا فرحة مخلد اللي ما كانت واسعته جان طاير من الفرح بانتقالي لبغداد فترة تركت كل الشغل و كابلته لان فرحان بيه ، حبيت اعيش اجواء العائلة و الزوجة اللي تنظف و ترتب البيت و الطبخ و تنتظر زوجها حتى يجي من الدوام و تستقبله و هي بكامل ترتيبها .. طبعا حياتنا ما تخلى من تدخلاات امه بالصغيرة و الجبيرة بس جنت احاول اتحنلها لخاطر مخلد لان مرات يردها و يكولها : يمه دكافي لخاطر الله و مرات يسكت و يكول امي ما اكدر اجرحها و اردها كل مره ، اتحمليها لخاطري اجت للبيت مرة و تحاسب على هذا و ذاك فالتفتت و هي تكولي : ليش ما تسوين لابني فاصولية مكضيتها على هالاكل من برا لو اكل تلزك ما يلزم بطنه ابني يحب الفاصولية - لا عمة والله اسويها بس انوعله غير -دزي فاصولية و سوي افتهمتي و خل اشوف طابختله فطاير لو بيتزا لو هالاكل التمسلت مالتج ضحكت و عديتها بضحكة شسوي و كلتلها : تدللين عمه فد مندله يعني الفاصوليه هسه اطبخ شوية وراحت ، عاد طلعت فاصولية و سلكت، خابرني مخلد و هو يسأل عليه و شسويتي و شنو غدانا كلتله فاصوليه و بقينا نحجي شوية و نهينا الاتصال للظهر حسيته تأخر خابرته كال اني اتغديت يم اهلي اتغدي عمري، خابرني ابوي على سالفة شويه و اجيج كلت له براحتك ، فخابرت طيبة دائما نتخابر و نسولف بمشاكل كرجية عاد لا شغل و لا عمل مشتغلين نقشب بكرجية فكلت لها : شيريد عمو من مخلد ؟ -يا عمج انت ؟ والله بطرانه عمتي كرجية خابرته -و شتريد منه كرجية -جابت سمج و شوته و خابرته كالتله شنو غداك كاللها لجين مسويه فاصولية كالتله يووه ييمه سودة بوجهي خاست بطنك بس من الفاصوليه تعال يمي شاوية شلون سمج يلوك الحلكك ييمه و منها عندي سالفة وياك كال الها اكمل شغلي و اجيج -يا يا يا تحجين صدك ؟ - اي والله -ولج هي الاجت و خبصتني شلون ما تسوين لابني فاصوليه، بالله هاي المرة صاحية بربج ؟ -ههههههههههههههه الله عليج هي كالتلج طبخي فاصولية -اي وروح ابوية شبيج -هههههههههههه هالعجيز بلوة والله -بالله هالمرة شتستفاد من تصرفها هذا -ولج غير اجا تغده عدنا هالسمجة المسلبحة الشاويتها عشتو و تكله اشتريت سمج ب٧٠ الف كال الها يمه بس لا صاديها من مثلث برمودا بعمري ما سامع سمجة هيج سعرها -هههههههههه عاد هو هم ما تعبر عليه سوالفها -لا ولج تكله مو اتسوكت للبيت سمج و جمدته بالمجمدة علوا لو تنطيني ترا والله ييمه ما عندي و خطارنا رايح راد شال الها ١٠٠ الف و انطاها مصرف -ديلا بالله و فاصوليتي وين اوديها ؟ -اكلوها بالعشا -اي عشتو بس لجين تتعشى فاصوليه ولج هاي ناوية اطلكني من رجلي -هستوج دريتي هههههههههههههه بعدج جديدة على سوالف كرجية و مصايبها ولج اني مشيبة راسي هالعجيزه - و شنو السويلفة بربج -على جهاله مو هي و زمن صارن يتخابرن -انوووب ، مو اطلكت من وراها هسه صارو حبايب -اي تريده يرجعها عاد رجلج ما قصر كاللها يمه رجعه لزمن ماكو ما تريد جهالي خل توديهم اني اربيهم عندي ما متعاجز منهم وبقت تحجي وياه على هالسالفة ...اثناء مدا اسولف ويا طيبة دخل مخلد، نهيت وياها -ويا منو جنتي دا تحجين ؟ -ويا طيبه نزعتله ملابسه و طلعتله ملابس و رحت جبت له انجانه بيها مي دافي يرخي بيهم رجليه من التعب و الوكفة : متغدي حبيبي مو -اي حياتي، سولفيلي الاستخبارات شنقلتلج -هههه كالتلي امك تريد ترجع زمن -و بعد -اكو بعد ؟ -لجين مقرر اجيب جهالي و اخليهم هنا -بكيفك حياتي اطفالك ذوله و من حقك -شلون راح تعتنين بيهم -انت كول امهم تقبلن تنطيهم الك، هم مو من حقك تاخذ طفل من امه -هي دا تشكي شنو عايش و ناسي جهاله و مخليني ابتلي بيهم -اذا هي متريدهم جيبهم -ان شاءالله -ردت احجي وياك بموضوع -شنو -عاجبني افتح محل ازياء و اشغل فلوسي بهالمشروع -مو ناجح 100% ، و يتعب و يرادله نقل و استيراد و استنكاه و تعب -اي غير شغل -انت اللي هامج تشغلين فلوسج لو عاجبج محل ازياء -لا دا اريد اشغلهم طبعا بدل ما باقيه اجر و اسحب منهم -خليني اخدمج بموضوع و افتحلج مشروع -شنو هو ؟ -عندي صديق بزيونة يريد يبيع المقهى مالته و يطلع للخارج -مقهى يعني كوفي !! -اي بس مكان راقي و مستعجل على بيعته و هالشغل عجيب بالعراق الوارد مالته توب -زين اني شكدر اشتغل بيه و شعرف ؟ -تثقين بيه لو لا ؟ -اي طبعا اثق -لعد خليها عليه نشتريه و نرتبة و نخليله اجهزة حديثة و طاولات بلياردو و نت و فد ترتيب راقي يطلع توب و الوارد الج -مخلد اني ما افتهم على هالشغلة -نشتري و نشتغل بيه كم شهر اذا ما عجبج اجري المكان و اربحي فلوسه كل شهر هم ما خسرانه -ما اعرف والله عود اني مفكرة بمحل ازياء هيج عاجبني -مو راح اجيب جهالي هم راح تصير عليج مسؤلية شلون اذا اني اطلع و انت اطلعين منو الهم ؟ صفنت بوجهه محتارة -اذا ما تكدرين تعتنين بجهالي كولي انت ما مجبورة ، بس والله شغل الكوفي يفوتج و موقعه ممتاز و تجاري تربحين بيه بشكل مو طبيعي -خل نسأل و ابحث اكثر بهالموضوع و اردلك الجواب -براحتج، هاج كومي اخذي المي و رجعي فركيلي ظهري تعبان كلش بلكت اكدر اناملي فد ساعه -اي هسه ادلل رحت اخذت منشفة لرجليه و شلت المي و رجعت دلكتله ظهره لحد ما نمنا سوية .. الصراحة ممقتنعة بشغل الكوفي و هالسوالف اعرف مخلد محيخليني اشرف على اي شي و هو يتصدر الشغل و ابقى بالبيت و انتظر الوارد بدون اي خبره او معرفه بالشغل اللي يصير باسمي سألت عمامي كالو شغل ممتاز و مربح و بقوا ساعه يشرحولي شكد هذا الشغل راح يفيدنا و نشغلي ولدنا عمال و احنا ندير الشغل و صارو يقسمون الامور بينهم و يحجون بيه و قررو ع المشترى و صفوا بينهم زين شنو اكولهم ما اريد و هم اتفقو و اتحمسوا و نجيب هذا و نحط ذاك و يشجعون بيه و فوتي و خوش شغل و مازن يكول اني الزم كذا و عمو يكول اني اخلي صديق غلاني يفتهم بكذا صفنت و ما انطيتهم خبر و كلتلهم : الله كريم اخذت رأي ماما ، ماما ما كانت قابلة و تكول: هسه انت مستعجله ع الشغل يا داده اتأني و شوفي رجلج شوكت يجيب اطفاله و رتبي وضعج و استقري و ذاك الوقت عود فكري تشغلين فلوسج هسه شعليهم نايمات بالمصرف ما عليهن شي و انت كاعده بالبيت شتصرفين يعني ...شفت رايها صحيح لما يجيب اطفاله و يستقر ذاك الوقت افكر بهالموضوع حجيت ويا مخلد شو ضاج ، و كام يحجي : انت تمشين بحجي امج و ما واثقة بيه و اني دا اكولج هالشغل يفوتج و اذا ما عجبج تكدرين تاجرين وبدل ما فلوسج بالبنك انت ماجرة و يجيج وارد تاليها ضاج و كال : بكيفج بعد اني ما ادخل خاف تكولين يريد يستغلني لو ياخذ فلوسي بس اني اكولج هالمكان يفوتج اذا ما اشتريتي وبقى يحجي ويايه و شفته تحسس من ارفض، عاد كلت اني شخسرانه شو هي فلوسي اللي بالبنك راح تصير بهالمقهى ، اذا ما اشتغل بيه اجره و الي الوارد .. عود وقت اللي استقر و يركز بالي ابيع و اشتغل بالشغل اللي يعجبني .. اتفق ويا الولد و جان السعر اكبر من المبلغ العندي كلش عالي اضطريت ابيع سيارتي و اضيف على الفلوس حتى نشتري المكان لما ردنا نتكاتب، ام مخلد سوتلها سالفة ويا مخلد و تالي عمرك بين الزلم تشتغل بمحل مرتك و باسمها هيج هي ما واثقة بيك و تامنك على حلالها، هاي الكتلت روحك عليها تريد تذلك و سوت النا عرس بالبيت ويا مخلد بس على سالفة المكاتبة .. مخلد ضاج و كام يحجي وياه و يطلب منها ما تدخل بحياتنا بس صرت بموقف محرج ، كلت هو شنو الفرق بيني و بينه ؟ هو من حبه الي تنازل اليه بالبيت و سجله باسمي بلا تفكير ، اجي هسه ما ائمن بمخلد و هو كل عمره حريص عليه و على مصلحتي فكلت له : عمري لا تهتم ولا تخلي ابالك سواء الك او الي ماكو فرق بيناتنا العندي الك و العندك الي خلي المكاتبة تتسجل باسمك ما عندي اشكال و تكاتبنا و خليت المقهى بأسمه .. لما اجيت و كلت لماما ، انجت و لاول مرة بحياتها تنزل عليه غلط و مصايح و تكولي : يا غبيه اكو وحدة تسوي سوايتج سلمتي كل شغلج لرجال ولج ما تبتي من امنتي بمالك ترجعين تثقين بمخلد ولج سجلتي كل تعبج بأسم مخلد على كم حجايه سممتج بيهن امه تبرعتي بكلشي عندج .....يتبع ☆☆☆☆☆☆ رأيكم ؟؟ #زينب_ماجد | ||||||||
|
| |
|
06-01-20, 02:41 PM
| #17 | ||||||||
| مراقبة عامة ومشرفة منتدى الروايات المنقولة
| #خطوات_نحو_الجحيم_ج٢ تنويه من الكاتبه زينب ماجد #تنويه اتوقف بتكملة رواية خطوات نحو الجحيم انما كملت بطلب منكم و احترام مني لرغبتكم بالتكملة لكن اللي دا اشوفة كلام مسيء جدا بحقي ، بطبيعتي اتقبل ارائكم و اذواقكم بنوع القصص لهذا ما رديت على اي انتقاد لأن من حق كل انسان ابداء رأيه لكن الانتقاد وصل حد التجاوز اتغاضى و اتغاضى عن الاساءة لكن وصلت حد لا تطاق لهذا الغي التكملة و ان شاءالله بعد ريام ابلش لكم برواية جديدة .. لذلك وجب التنويه 👍❤ #زينب_ماجد | ||||||||
|
| |
|
06-01-20, 03:24 PM
| #18 | ||||||||
| مراقبة عامة ومشرفة منتدى الروايات المنقولة
| #خطوات_نحو_الجحيم_ج٢ #تنويه من الكاتبه زينب ماجد السلام عليكم اقدر و اقدم محبتي لك من طالب بتكملة الرواية و يعز عليه ان تطلبون انما هذا واجبي و حقكم عليه .. تعرفون جدا اكره استجداء العواطف ولا اقبل احد يكعد يطلب مني لو يترجاني، اخجل من هيج امور واساسا مو شخصيتي ولا من طبعي اهتم ، لكن اللي صار ان دخلت دا اقرأ ارائكم، شفت كم هائل من التجاوز ، مو الانتقاد .. طيب اني كملت لخاطركم لما الكه هذا الكم من التجاوز ، شنو فائدة التكملة ؟ حقيقةٌ تضايقت ولا تكولون انت كذا و وصلتي كذا و ما يصير تتضايقين القرأن يكول ( ولقد نعلم انه يضيق صدرك بما يقولون ) الرسول بعظمته و ثقته برسالته و بشأنه و مقامة يتضايق من كثر الكلام و يتعب تريدون من عندي اني البشر العادية اصير فولاذ و ما اهتم ؟!! دا اشوف ان كلما دا يكبر الكروب دا تنضاف نماذج للأسف متعرف قوانين الكروب و تجاوز كثير و الفاظ مو حلوة .. فأعذروني انطيت ايعاز للادمنز بحظر كل من يتجاوز الله يذكرها بالخير فينوس ارام لما كانوا يتجاوزون عليها و تردهم و تحظرهم، اكولها فينوس اتركيهم الكلاب تعوي والقافلة تسير ، تكول لااا الكلام من تعوي بوجهك تنزل من القافلة تدفرهم و ترد تكمل طريقك 😂 الظاهر صار لازم نتبع اسلوبها و نطرد المتجاوزين اما عن التكملة ، امهلوني كم يوم اجمع الاحداث كلها بحلقة وحدة و انزلها لعيون اليستحقون و اليحترمون فقط .. حتى الينتقد انتقاد بناء على عيني وراسي و له مني كل الاحترام اما اليتجاوزون اترك الصورة تعبر عن مشاعري اتجاههم 👇 احبكم 😘❤ | ||||||||
|
| |
|
15-01-20, 04:14 AM
| #19 | ||||||||
| مراقبة عامة ومشرفة منتدى الروايات المنقولة
| #خطوات_نحو_الجحيم ،،،،،، بقلم الكاتبة زينب ماجد ،،،،،، الحلقة_ 11 و الاخيرة تلك العيوب التي نتغاضى عنها في بادئ العلاقة .. غالباً هي التي تنهيها و تضع النهاية 🖤 Zainab majid العراق_بغداد الساعة ٢ ليلاً غاطة بنومي، تحركت بمكاني و التفيت دا اندار لمخلد، حسيت هو مموجود ، مديت ايدي استفقد الفراش و اني مغمضة اتحسس ، ادور ماكو ! فتحت عيوني، الغرفة ظلمة تقريبا، انداريت للتيبل لام و فتحت و كعدت على حيلي، اباوع مموجود !! -وين راح ؟ سحبت الغطا من جسمي، كنت لابسة شلحة حرير طويله، اخذت فوكه روب ولبست و طلعت للبيت ادوره بالصالة ماكو مشيت للمطبخ ، لكيته كاعد و التليفون بيده و يدخن اركيله ، من شافني عاف التليفون و باوعلي : ها عمري كعدتي -ملكيتك بالفراش طلعت دا ادورك -هياني حبيبي ما جايني نوم و خفت اذا ابقى اتكلب بفراشي ما ترتاحين بنومتج تقربت يمه سحب الكرسي و كعدني على رجليه حظنته و خليت راسي على جتفه و دفنت وجهي بركبته و حجيت بدلع : اريدك يمي ما اقبل تعوفني -ليش اكدر اعوفج اني ، يعشكي انت -كوم دنام بارده هنا -هسه اكمل جكارتي و نكوم بقيت على وضعي بحظنه، سألني : لجين اني اتفقت ويا الولد ع الشغل و كلت لو ارتبه للمقهى و اجيب..... خليت ايدي على حلكه : ششش اني سلمتك هالشغل و انت اعرف بيه و اللي يناسب سوي -يعني ممتضايقة لان سجلتي بأسمي ؟ -شنو اسمك و شنو اسمي ؟ باوعت لجسمنا كنا متحاظنين: دا تشوف حتى الهوى ماكو بيناتنا و مختلط جسمي بجسمك ، لشو بعد اسمي و اسمك و تفرقنا بهالمسميات ؟ احجي و اني اهمس بأذنه و اجر بالكلام نعسانه -هلكد حبيتيني ؟ -و حبيت البيت و تركت الاعلام و شغلي و حياتي كلها بس حتى اصيرلك زوجة تنظم و ترتب كلشي و تتحظر قبل لتجي و من تجي من الدوام اركض لاحضانك ركضة الطفلة لأبوها ابتسم و باسني بزندي : اعشكج ولج تعرفين انت شنو بالنسبة الية و قسم ابألله ما حبيت احد بگد ما حبيتج ، اهلي اخوتي اطفالي عمامي اقاربي ناسي ما اتذكر الله خالق بشر من انت يمي كلهم يمج انساهم - اني ما الي غيرك ، دا تشوف بس ام و بغير قارة ، لا اهل لا اخوة لا اصدقاء، ما الي بهالدنيا غيرك الا انت صرتلي كل الدنيا ، مخلد اني كلش فرحانه و مرتاحه وياك و متندمه على الماضي لما تركتك و مشيت لانسان كسرني و ما قدرني -انت الي لجين طيرة شما اطيرين لكلبي ترجعين بسته بخده : يلا كوم دنام بفراشنا كمت من رجليه، كام هو لف الاركيلة و شالها ، اني مديت ايدي للموبايل دا اخذه للغرفة، شفت بالاشعارات رسالة فتحتها و اني امشي للغرفة ، شفت مظمونها مكتوب ( انت بحال احد غارك بالعسل و ناسي ولدك اني هم من حقي اشوف حياتي ) فتت للغرفة وكفت اعيد بقرائة المسج و اباوع الاسم، دخلت دا اشوف باقي الرسائل ، كلام بينه و بينها دا اصعد للبداية حتى افتهم ، فات هو - بالله خل اشغل التنبيه للصبح انطيته الموبايل و اني اكوله :-زمن مراسلتك !! -اي -شتريد -مضايقيها الجهال - اذا مضايقيها جيبهم -هو دا افكر ، ان شاءالله يلا للفراش حبابه شغل التنبيه و اني رحت لفراشي، ترك الجهاز ع الميز و اجا فتح الغطا و نام يمي . .... بعدها مرت الأيام و هو بين شغل المقهى و شغله بالمركز ، حتى كرهت الشغل لأن ما اشوفه هوايه، و لما يرجع مفرغه كل وقتي اله بعد أسبوع فات للبيت و اطفاله الاثنين وياه، الصغير عمر شايله على جتفة و الجبير احمد لازم ايده و يمشيه ضحكتله و مشيت يمه اخذت عمر من جتفه : الله يساعدك حبيبي -هلا عمري جبت الجهال بس الصغيره ما جبتها بقت على صدر امها ترضع -اي هلا بيهم حياتي التفتت لعمر ابوسه: اليوم شنو هالحلاوة الاجتنا ، خل اكلها و كمت ابوس بيه ، شفته متضايق - متضايقين على امهم هز راسه (اي) ، بجى عمر اخذه من ايدي، و اني سحبت احمد و شلته : الحلو هذا متضايق -اريد ماما -يدلل الحلو شيأمر احنه نسويله، بس هسه ماما بالطبيب من ترجع نوديك يمها ماشي ؟ هز راسه بس مبرطم ما راضي، حظنته : حياااتي لما خليته على گلبي: اتذكرت بنتي : اااه يا ماما يا بيلا هم هيج تضايقتي و بجيتي عليه و طلبتيني و ما لكيتيني اخذت احمد للمطبخ، طلعتله الفواكه و الحلويات و مخلد يقنع و يلعب ويا عمر اللي ما بطل و هو يكول : اريد ماما احمد رضى و قنع الا عمر لليل و هو متوحش و يريد امه، اخر شي رفع الخط مخلد و خابر زمن و كال الها : الجهال يبجون - والله ما الي علاقة مثل ما اني متحملتهم صار اشهور اتحملهم انت لو ضايقوك كم ساعه -بنت الكلب اني مخابرج تقنعيهم بطريقتج ما رايد ارجعهم لشكولج ردته هي ردها هو رادت اطك بيناتهم ،خزرته و اشرتله ينطي لجهاز لعمر يحجي وياه امه ، شمر الجهاز على عمر و كله : هاك احجي ويا الخلفتك و خلصنا الطفل ما صدك خطية اخذ الجهاز و بجى لامه ، مكدرت اتحمل دموعي كامت تجري وياه، اخذته بحظني و كعدته و كلتله : يلا حياتي باجر ماما تجي مو ؟ هي جاوبته اي وبقت تقنع بيه، اشرت لحمودي كاعد و يباوعلنا و يباوع لابوه عصبي، اشرتله بضحكة عود تعال ، اجا ركض اخذ الجهاز و كام يحجي ويا امه قفلنا الخط و كعدتهم يمي: الشاطر الحلو اللي ميبجي باجر اخذه للالعاب و اشتريله ملاعيب هوايه هوايه ماشي ؟ اثنينهم وافقو و قنعو ، اخذتهم للغرفة مالتنا ، فرشتلهم بالكاع و بدلتلهم و نومتهم بمكانهو و تمددت وياهم و اني اسولف وياهم و اضحك و امننهم اذا نامو اشتريلهم حلويات و الاعيب اجا مخلد هم تمدد يمهم و كام يلعب وياهم و صعدهم على ظهره و يمشي بيهم لو ينفخ ابطنهم و يطلع صوت، هنا هم افترهو و كامو يضحكون بصوت عالي الى ان تعبو رجعناهم لفراشهم و خليناهم بيناتنا و نمنا كلنا. من بعدها انشغلت بهالطفلين كلش هوايه لان مخلد طول الوقت برا، صح متعبين كلش بس اعوض بيهم نقصان الامومة اللي بداخلي لبيلا عوضته بيهم اول ايام جانوا حيل مستوحشين لأن امهم ماكو بس صرت اطلعهم متنزهات يلعبون لحد ميتعبون ، و اشتريلهم العاب و حلويات و اكلات سريعة مثل البيتزا و البركر و اخليهم يتسابقون بالاكل حتى ياكلون كدرت شويه شويه انسيهم امهم الى ان صاروا ميذكروها الا ما ندر ، سويتلهم غرفة و جمعت بيها كل العابهم و رتبتها الهم بديكور ولادي و علمتهم ينامون وحدهم بس اني ابقى يمهم لحد ما ينامون انشغلت بيهم بشكل مو طبيعي بس غير لو اخلص من كرجية، يومية تجي و تتفقدهم : ضربتكم مو ؟ ما سوتلكم اكل ، ما تخليكم تلعبون و لو اجت و كالولها مماكلين تكلب الدنيا و تكعدها شلون مموكلتهم ، اكولها : ميقبلون ياكلون لان بس حتى انسيهم امهم صرت شيطلبون من برا اوصي و اجيب فصار اكثر اكلهم من برا و استطمعوا اذا كلت لا يزعلون و ما ياكلون فكمت اتركهم بلا اكل حتى ينجبرون ياكلون اكل البيت و ميبقون متعودين على اكل البرا بس هالحجي ميصرف الكرجية يومية عركه و اكثر من مرة مخلد طك وياها و صار مشد كلامي بينهم و هو يكولها : لا تدخلين يمها و كالعادة : اغم اخذتك لجين و مشتك بكيفها الصراحة هلاك هلكد افتر وراهم و اعلم و افهم بأسلوب البيت ميفيد يلعبون يخبصون الجو، اجت ايام مكمت اتحمل لعبهم و صياحهم مخلد اعتمد و كل مسؤليتهم عليه ، يجي يتغده ينام يطلع يرجع بالليل يردني عروس اله بيوم تركتهم بالصاله ع الفلام كارتون و حذرتهم ميهوسون البيت او يتوكحون و الا عقاب يرحون لغرفتهم و ماكو لعب و مصرف ولا حلويات لمدة يوم و اللي ميسمع الكلام اكول المخلد عليه رحت تمددت بغرفتي و بأيدي الموبايل و أگلب ، هناك و سمعت احمد صرخ فزيت بسرعة باوعت بالهول ماكو ، بالمطبخ هم ركضتلهم لكيت احمد يصرخ و ظهره ينزف دم و عمر خاتل و يبجي شلته للحمام و اني اصرخ : مو كلت الكم لا تتحركون تعبتوني يعني شلون وياكم كعدته بالحوض و نزعته، جريت الدوش اغسله ، هذا مجروح جرح قوي و يصب و الطفل يصرخ باوعت هسه اني اسكت و يطلع الطفل بي شي اخابر ابوه يجي بسرعه، ركضت للغرفه خابرت على مخلد كلت له : الحك بسرعه احمد وكع و انجرح و دينزف قوي طلعت قطن و عقمت الجرح و ضمدته بس يحتاجله خياط و ما اتحمل مسؤليته، يجي ابوه و يتصرف ، رحت بدلتله و الطفل ما يسكت شويه و اجا مازن مخابر عليه مخلد ديجي ياخذ احمد بقى يحجي و يصيح و يغلط و شاله و راح بيه للمستشفى رحت لعمر اصيح عليه و كلتله : بشنو ضربته الطفل بس يبجي خايف مني حاولت اهدئ اخذت نفس تنهدت : تعال ماما لا تخاف بس كولي بشنو ضربته سحبت الطفل و شلت، اشرلي على سجين مطلعيها من الجرار و هاي حادة حيل بقيت الوم بيه و افهم، شويه و فاتت ام مخلد : اخذت الطفل مني و نزلت ذاك الغلط و الصياح هنا مكدرت اسكت و كلتلها : انت على منو دا تصيخين و تغلطين احترمي نفسج ترا تحملت منج بما فيه الكفايه عيب عليج -ولج انت وحدة ساقطة و مكعدينج ابيت و محترميج اتكليلي غيب عليج ، ام ال.... ام ال.... -اطلعي من بيتي و يجي ابنج و اله تصرف وياج و الا والله ما ابقاله مو اني البتفشر عليه بهالطريقة ولا مجبورة اتحمل جهال و مسؤولية كل اللي دا اسوي فضل مني عليكم افتهمتي كامت تلطم على وجها و تصيح اخذت عمر و تكول : يا لجين طلاكج اليوم على ايدي دشوفي -دروحي ما اخلص من شرج هم الرجال اليطلكني على مودج ما اريده عفت البيت و رحت تمددت راسي ذبحني من الوجع، هناك و فات مخلد : شكو لجين اكعدي -شصار ويا احمد ؟ -موديه مازن ٣ خياطات و ذاك هو ابيت اهلي يم طيبه ، شصار غير اديرين بالج وين جنتي -اكولك شوف ، شصار و ديري بالج و وين جنتي كل هذا اني ممجبورة بيه افتهمت -ما تتحمليهم كولي مو تتكفليهم و تالي مصيبه توكعيهم على راسي -اني كلتلك اتعاون وياك بحضانتهم مو تتركهم براسي ليل نهار و تكعد تحاسبني عليهم ، اكعد كابلهم شوفهم ، اني تركت شغلي و تركت كلشي لحتى اكابلك و اكابل اطفالك تالي محد راضي و اطلع اني بالوجه الاسود يا اخي تعبت ممجبورة وكحين مدا اكدر اسيطر هاي غير امك و بلاويها على راسي ، ما اعرف اذا كاعده على كلبها -هسه دكافي ، ما تكدرين كولي محد جابرج ، و امي هم حقها ذوله احفادها -والله حقها تاخذهم يمها مو يوميه تجي لبيتي تحاسب و تغلط -بيتي! ليكون صدك طاردتها اني كالتلي لجين طاردتني بس كلتلها هسه اكسر راسها و توقعت امي دا تكبر الموضوع، يعني طاردتها -اي و اطردها ممجبورة بأمك اني و هالامور كلتلك عليها من البدايه هي امك مو امي و احترمها لخاطرك بس من تكعد تعلي صوتها بالفشار و الغلط و كلام ما ينحجي فلا والله ما اتحملهة تقرب يمي، لزمني من جتفي: انت تهينين امي و اطرديها -وخر ايدك مني بس حجيت ضربني راشدي ، و لزمني من ركبتي: اسمعي لج من تتنفسين اذبحج افتهمتي دفعته من عندي: مرجلتك طلعها على امك اللي تطعن بيه و اني مرتك مو تجي تضرب و تغلط و تعرف ما اللي اليردك تره و مستهين ، اتركلك الجمل بما حنل و اطلع منك -منو اليطلع مرجلته -ابتعد مخلد جابني بكف لاخ: احجي منو اللي يطلع مرجلته -اطلع مني ما اريد اشوفك يمي يلا اطلع -ولج انت اطرديني بنت ****** لزمني من شعري كمت ادفع بيه، و بقينا ندافع ، اخرها تركني و هو يغلط و طلع كعدت ويا نفسي ساعات افكر و احرك بروحي و راسي ذبحني موتني ، اخرها نمت لليل كعدت الساعه ٢ تقريبا ، مخلد ماكو دورته بالبيت هم ماكو خابرته اول مره ماكو رد ثاني مره رد و هو نايم : هاااا -وين انت -و شعليج -شنو شعليه الساعه ٢ حتصير شنو نايم انت -اي عد اهلي -شنو عند اهلك من عقلك ترا هالأمور لا تليق بيك ولا بيه ، شنو زعلان من بيتك ليش تجيب الكلام الروح -روحي ما اريد اسمعج -اي لا تسمعني هو هم صوجي اتصل بيك ، روح قفلت الخط و بقيت معلعله لا اني نايمه ولا اني كاعده ، كمت اخذت كتاب و كعدت اقرأ للصبح حسيته دخل للبيت بس ما فات للغرفة نام بغرفة الجهال، عفته بس بقى فترة ٣ ايام لا اني احجي وياه ولا هو ولا نقرب من بعض هو عنده قدرة تحمل بس اني طلعت روحي و هو مايهتم ، ترتبت و تحظرت بالليل و كعدت بالصالة فات و تجاهلني ، كمت وراه للغرفة: الشغل شلونه التفت عليه بلا مبالات : زين -اريد امر للمقهى دا اشوف سياسة الشغل -رجلج اكسرها تقربت يمه و هو ديبدل :-لا والله غير شغلي ما رد : انت شبيك رجع باوعلي بعيونه و دارهم عني و هو يتمدد على سرير ابنه -احجي -سدي الباب وراج -الاطفال وينهم -يم جدتهم -اني مليت من هالوضع شوكت راح يخلص -من اطلعين سدي الضوه وياج همات ما بيه اكوم -شنو خدامتك تتأمر و ما تحجي ويايه كعد على حيله :-شرايده انت ؟ -اريد ترجع مثل قبل -تعتذرين من امي -مستحيل و لو اخر نفس بعمري لأن هي اللي غلطت بحقي مو اني -لعد اطلعي برا و نص كلمه ما اريد اسمع يلا كمت من المكان متضايقة عفت الباب و الضوه ما سديتهم و طلعت عافني و هم ما اهتم .. لثاني يوم جان عطلة هو بس من كد السهر و التفكير راسي ذبحني مكمت من الفراش ابد بس اون سمعته يشتغل بالمطبخ، و راح طلع ساعه و رجع و اني اون من راسي فات للغرفة ، تمشى يمي اني بس اون ، تقرب حط ايده على كصتي ، تنهد و مسح وجهه بتململ: كومي خل اخذج للطبيب دا اشوف شبي راسج -ما اريد سحب ايدي حيل و كعدني : دا اكولك ما اريد ما اكدر امشي دايخه فتح الخانه طلع ملابسي: هاج يلا البسي رجعت للمخده ، صرخ : مو احجي وياااااج -لا تصيح راسي، ما اريد اروح -و يطبج طوب ضلي رجعت للفراش و هو طلع عصبي، بقيت اون من كد وجع راسي ما اشوف طريقي الكاع تفتر بيه بس اون .. رجع بأيده بندول و كلاص مي : كعدي اخذي بندول -اخذت شريط و مدا يستقر -اي لعد دكومي نشوف شبيج بس نايمه -ما اكد اكولك ما اكدر راسي حجيت و بجيت تنهد و تقرب خله ايده على راسي: اي ابويه انت غير اخذج حتى يطيب ، لا تبدلين بس البسي الجاكيت و اقفلي كومي يلا حجاها و هو ياخذ الجاكيت و اجا لبسني ، خلى اللفاف على ركبتي و لم شعري ذيل سواه جاب الباته و دنك يلبسني : اني البس -استقري بمكانج ما عندي شي لازمه راسي و حجيت : تروح امك تسويلي عرس ما بيه حيل -اي لا تقصرين عود روحي كليليها يلبسني الحذاء كام من مكانه و اخذ ايدي: يلا رحنا للسياره و طلعنا للدكتورة، كعدني و راح يحجي ويا السكرتير ، شويه و فتت وحدي للدكتورة كلتلها راسي و نحول و مدا اكدر اكوم من الفراش كتبتلي تحليل دم ، و كالت : كومي للسونار اشوفج فحصتني، كالت : حامل ماما انت ، ميحتاج تحليل دم ..كتبتلي علاج و كالت اخذيهم عند الضرورة -شكرا دكتورة طلعت من الدكتورة ، هو كاعد يدخن جكارة و صافن ، تقربت يمه دار وجهه عليه : ها شكالتلج ؟ -حامل حجه بنبرة فرح : صدك ! - اي والله -اي ع الخير وكام سلم عليه و باسني ، و عيونه فرحانه -البارحه اراضي بيك متقبل بس هسه لا تبوس و فرحان لأن حامل -تدرين لجين انت ماكو شي يرضيج ابد ؟ باوعتله صفح و انطيته الراجيته :اروح للسيارة و انت جيب العلاج راسي ديوجعني حيل اخذها مني و وصلني للسيارة كعدني و سد الباب وراح هو جاب العلاج و اجا صعد : محاسبة لروحج انت لعد ؟ ليش متدرين حامل -دا اخذ حبوب منع حمل و متاركتهم حتى تنزل عندي الشهرية -تاخذين ليش؟شو اني ما ادري، شنو معاجبج تخلفين مني ؟ -مو معاجبني بس مو وقته دا تشوف وضعنا - رزق الله الحمدلله على كل حال -على كولتك اذا الله يريد محد يكدر يمنعه منتظمة و بس يوم نسيت خلاه بهاليوم .. -خل انزل اخذ نص كيلو بقلاوة و نروح لاهلي فد ساعه شرايج - لا لا رجعني و روح انت -لجين لا تكبريها عاجبج وضعي، اني بصفحة و جهالي بصفحة و امي زعلانه -و متجيب جهالك منو لازمك بس امك اعذرني ما اريد التقي وياها -انت طاردتها من البيت و هالعيب عليه حتى كدام اهلي و كرايبي فضيها -هلله هي من تجي كل يوم و تنزل رزايل و غلط اهلك و كرايبك محد يكول رزلتها لو اذتها، و من اني يطك كلبي و انفجر بيها كلها تصيح لجين تجاوزت -مرة جبيرة و ما عليها عتب -لا المريض و الفاقد عقله ما عليه حرج بس هي مره واعية كل يوم هاده و ادوس بالمصارين ما تصرف عندي،، مال مره جبيرة هاي لا تحجيها ، الجبير بس الله مو بحجة جبيرة ملوعتني - و تالي ؟ -جيب جهالك و فض الموضوع -و امي زعلانه و ما تدخل بيتي ! - مخلد راسي يوجعني خصم الكلام ارجع للبيت خليني انام و اللي تريده سويه هز راسه و ما حجه، درت وجهي عنه، شو شويه و فات بفرع بيت عمي و صف اباب بيت اهله -شعندك ؟ -اجيب جهالي -اي وديني و ارجع -و اضل رايح راد فات و وصى طيبة تطلع حتى تقنعني افوت، و طلعت : فوتي لخاطري و يمعوده شفنا و تحملنا و مرة جبيرة و انت العاقله و لا تخلين الحجاية عليج وبقت تلح حتى ادخل كلتلها : راسي يوجعني والله ما اكدر فتحت الباب و نزلتني بضحكة و جبرتني ادخل، فتت للبيت مخلد كاعد من شافني ابتسم ، هزيتله راسي بمعنى ( اصبرلي ) كعدت و هو يضحك ويا الجهال و كاللهم : روحو بوسو ماما لجين راح تجيبلكم اخو جديد باركولي هم و فرحو ، عمي و طيبة و عمتي كرجيه تكول : هي وحده و ما حامليها انوب تخلف مخلد: يمه لخاطري كافي فضوها ترا تعلعلت والله شذنبي ما ترديها - انت شلون وياك ما تشوف الا شوية جان مات ابنك، و هي نايمه -ما مجبوره بيهم يمه و واحد يحجي مالت الله ما مقصرة و هم يحبوها و هي بسبب نساوتها دا تنام دار وجهه على طيبه : بالنهار راح اجيبهم يم الجهال يلعبون عينج عليهم -ابطن عيني اخليهم خويه جيبهم من الصبح و اني بالليل ادزهم بأيد مازن خطية مدامها حامل خليها ترتاح ... كمنا من مكانا و اخذت محمد من ايده و ردت اطلع ، كال : سلمي على امي قبل لا اطلع - سلم عليها انت اني راسي يوجعني -لجين ليني مخج ترا هي امي -كلتها امك مو امي -لجييين سلمي دا اكولج درت وجهي : نترخص عمو مع السلامة حجيتها و طلعت ، هو صارن عيونه براسه ، صعدنا الجهال و ساق هو ما حجه كلمة بس ينفخ وصلنا ، دخلنا للبيت صحت : احذيتكم ماما انزعوها برا و لغرفتكم فورا ، ابدل و اجيكم فتت للمطبخ اخذت العلاج شربته، و رحت اخذت ملابس سبحت و رتبت نفسي ورحت لغرفتهم لكيته مخلي صينية و طاوة بيها تمن و مرك خابط و محمي و يوكلهم فتت گلبت القناة ع طيور الجنة، طلعتلهم ملابس نوم، و كلتلهم : الكمل يروح يغسل حلكة ويرجع يله راحو همة، هو بقى مدنك يلم بالتمن الواكع: كان المفروض اتضايق لما خليتني امام الامر الواقع و جبرتني انزل لبيت اهلك مو تتضايق لأن مسلمت هز راسه و كام : ابقى يبسي راسج ابقي -لا لازم اقبل اصير بلا كرامه و اتحمل امك اليوميه ساحلتني ذهابا و ايابا و هي تغلط و تسوي افلام ما تخطر على راس بشر حتى تهيني ، هيج اصير مره معدله و عقلي يوزن بلد مو ؟ - من احجي وياج تلصمين و كلمة ما اسمع و الا و رب محمد اندمج ع اليوم الصرتي بيه - لما تريدني احترم انت تحترم والا فاقد الشيء لا يعطيه لزمني من زندي ، فاتو الجهال: وخر ايدك الجهال منا -لو ابو الجهال راسج اكسره من تحجين سحبت ايدي منه ما حجيت بس بقيت اخزر بعيوني، عافنا و طلع بدلتلهم و خليتلهم لعبة تركيب و التلفزيون مفتوح و طلعت دخلت للغرفة هو امدد صفح ع السرير يكلب بموبايله، نزعت التيشيرت و بقيت بالكيمونه و شمرت التيشيرت بوجهه، انتفض من مكانه : انت شنو هالصلافة الصايره عندج حيوانه دخلت للسرير وحظنته : زوجي و بكيفي من تحجي اكص السانك افتهمت - اكسره لراسج والله كومي من يمي يلا -حامل لا تكلمني ابتسم: راح اسكت بس لخاطر ابني البطنج ها رجع راسه للمخده ، تقربت يمه اذنه و همست : متأكد ؟ بقى يباوعلي و هو يضحك، تقرب باس شفايفي ، و همس : اعشكج يصلفة -اموت عليك يبو عقل متخلف بعد راسه متفاجئ: هاي شنو ولج شلون وياج -اووو شكلك مو مال رومانسية ادور انام اشرفلي، و اي اليغلط على زوجته و ميقبل الها ترد هذا عقله متخلف انطيته بوسه بالهوى: احبك يا متخلف و انداريت انطيته ظهري و نمت لزمني من شعري و همس: من تهينيني بحجة رومانسية اطيح حظج بنفس الحجة افتهمتي و عض ركبتي حيل -اييييي وخر سحبني اله بقوه : شششش اذبحج بس تحجين و حط ايده على حلكي ... تركيبتنا عجيبه حتى و احنه برومانسيتنا نتعارك. مرت الأيام و الشهور بشكل طبيعي اطفاله ويانا هوايه تعودو عليه و اني اتعودت عليهم ، و حتى لا فكرت بشغل ولا طلعه من وراهم صح متعبيني بس عمر من الكد و الشغل والسفر يخليك تحتاج فترة ترجع بيها تعيش كعائلة تقليديه و تعيش طبيعي زوجة و مسؤلة عن اطفال و رجال و حامل ما انكر مخلد اله دور يساعدني هوايه ، لما اكون تعبانه ياخذهم لبيت جدهم حتى ارتاح ، يجمع الملابس بالغساله و يشغل المي و يشمر تايت و يشغلها و يكولي :غسلتلج ملابسنا اذا تكدرين نشريهم غير الطبخ و الاكل من برا حتى ميتعبني، و يجمع اطفاله و يلعبهم و يخليهم ينظفون وياه البيت و يرتبون بس منبهني اني و الاطفال منكول لبيت جدو بابا يغسل لو يسوي اكل لو اي شي ، من يسألوكم كولو : ماما لجين الشغل مال المقهى فعلا كان الوارد مالته ممتاز و مخلد خلا اخوه مازن يلزمه و مازن شغله جماعته و اشتغلوا ، خلال كم شهر اشترى سيارة و مخلد بدل سيارته بسيارة احسن بسبب الشغل حالهم تبدل، بدل ما مازن جان ليلة و نهاره سكران و نايم صار يشتغل و يلعب بالفلوس لعب الصراحه ما اعترضت رغم مازن السانه زفر بس طيبة خوش بنيه و حيل ارتاحت من رجلها كام يشتغل ، بدلت غرفة نومها طلعت هي وجهالها سفرة للشمال و طبعا كرجيه وياهم لان لما اني مقبلت احجي وياها كامت ما تجينا بس كل حيلها على طيبة فطيبة تحاول تكسبها حتى تعيش . اذا مخلد يخالف امه لخاطري مازن مستعد يبيع مرته وجهاله لخاطر امه و هم هيج طبعهم ما يتجرأون على امهم و حتى مخلد كان المثل لما جان ويا زمن ، بس هالحجي يمي ميصرف من يحجي اخش بعينه فانجبر يفصل بين اهله و عائلته ميضحي بشي لخاطر شيء ... وهيج مرت الأيام طبيعيه صح تصير مشاكل و امور بس عادي تنحل الى أن صار الشي اللي قلب حياتي رأسا على عقب ...كنت بالشهر الثامن و اني مثل مل ام ربما صعبت عليه حضانة بنتي بس ما انسى و ابقى اتمنى حتى لو صورة منها ، فجنت دا احجي ويا خوات مالك من ابوه و اطلب منها لقاء لبنتي ابيتهم حتى اشوفها لأن سمعت هالفترة مالك راجع للعراق بس ما كالتلي بيلا وياه او لا ، كالت عنده شغل فبقيت احجب وياها انطتني رقمه و كالتلي: خابري و اتفقي وياه لان تعرفين مالك ميسمع لاحد ولا يهتم لاحد و من ادخل يضل يرزل اخذت رقمه و راسلته ، وقتها جان مو على طبايعه ، يضحك و يستهزأ بكلامي جان عصبي و يحجي وياي بنتر و غلط اخر شي انفجرت بوجهه كلت له : احترم نفسك لا تخليني اهينك انت قندرتيش حتى تنتر و تتجاوز دا اكلك اريد اشوف بنتي مو من حقك تمنعني من بنتي بهالشكل ، اقيم دعوة و اخلي المحكمة تقررلي ايام اشوف بنتي بيها كال: قيمي دعوة و شوفي شنو يصير بيج اني هنا بزعت روحي من تهديداته ، كلت شيريد يسوي خيسوي مليت اريد اشوف بنتي و اني مماخذتها منه بس يقررولي ايام اشوفها لان هو مدا يسمح للمقابله كلت لمخلد ما قبل و كال : تالي عمري مرتي تفر محاكم و دعاوي هالأمور اني ما ارضاها ، ارضي بواقعج و انسي بنتج ، شفتيها يوم شحصلتي بس تبقين تشتاقيلها و تبجين خو عوفيها و انسيها ما قبلت بقيت اتجادل وياه و احاول افهمه انو هذه بنتي شلون اترك و ما اشوفها شي طالع مني اتركها شلون هو مقفل راسه و اني مقفله اخر شي انتفضت و كلتله : مو من حقك تمنعني كافي صار قرابة السنة اني كاعده هنا لخدمتك و خدمة اطفالك لا كلتلك اريد شغل و لا عفت بيتك مثل ما محترمتك احترمني، مو هذه مرتك كل اسبوعين تشوف جهالك شنو هي ام و اني حايط ، حس كول اني ام و اشتاق لبنتي شنو محاكم شنو دعاوي قابل شكو بالمحكمة حتى متقبل مرتك تفوت ، بشر حالهم حالنا من يمتى تمنع احد يشوفني انت ماكو قفل راسه : تنسين هالسالفة هنا كلتله : لا والله ما انسى اني راح اروح للمحكمة و اقدم طلب عاجبك اهلا وسهلا معاجبك عاد شسويلك ، هذه بنتي و من حقي كال: خالفي احجايتي و شوفي شسوي بيج ... ولا اهتميت ثاني يوم هو بالدوام وصلت اطفاله يم بيت جدهم و طلعت للمحكمة قدمت طلب من رجع و عرف گلب الدنيا بالصياح و التكسير و الغلط و السب و تعاركنا عركه شكبرها وصلت بيه يكول : لو الج احد هنا جان والله من هالساعة طردتج و ما بقيتج ابيتي ردت اجاوبه و اكوله هذا بيتي و انت التطلع، بس خفت تكبر عاد عفته يحجي و فتت للغرفة بقينا قرابة ٣ ايام احنا منحجي مع بعض رابع يوم اجا نار و شرار من يصير شي برجله يدفرة و ما يكعد ولا يستقر خابر مازن كاله تعال اخذ الجهال يمكم مازن ما اعرف شحجه و مخلد.صرخ بيه : دا اكلك تعال اخذ الجهاااااااال و قفل الجهاز و ركعه بالكاع و يفتر و يمشي و يرجف من العصبية، بقيت مصفصفه : شبيه شصاير وياه اجا مازن طوط بالهورن مخلد صرخ بالجهال يطلعون ، تراكضوا من الخوف و راحو ويا مازن تقربت له : شبيك ليش هيج ويا الاطفال لزمني من شعري: تعاي لج اكعدي بالكاع -شبيك مخلد شعري عوفني طلع سلاحه ، سحب اقسام بحافة حذائه و خلاه براسي: من تنطقين كلمة افجره لراسج ، اركعي و اثني للكاع يلا كلبي رجف من الخوف لما حط المسدس براسي ، التقلصات لزمت بطني: شبيك مخلد شصاير -اسألج و تجاوبين اذا ما جاوبتي طلقه طلقه اخليهن بأطرافج و اعوقج والله كمت ارجف و هو مركعني و المسدس مسحوب اقسام براسي ، اول سؤال جان : صحيح اشتغلتي ابيت دعارة بلبنان ؟ -شنو هالحجي لا سحب راسي من شعري و هو يرفعلي وجهي ، كمت من رجليه لزمت بملابسه لما رفعني صرخ : مكانج اكعدي بهذلني و هو رافع شعري و لا اني كاعده ولا كايمه و بطني شكبرها و هو يكولي: من تتلوتين و تضمين عليه راسج افجره بجيت: مخلد شبيك بطني -لج اذبحج و اذبح اللي ابطني لأنه مو ابني و انت فد وحدة كح..... و بنت ****** -عوفني مخلد وخر السلاح من راسي -احجي جنتي تشتغلين ويا واحد كوا..... اسمه ميشيل -اي بس هذا تاجر اعضاء بشرية مو مثل ما انت متخيل -متقربلج مو -اهدئ و اني احجيلك قصتي وياه -احجي متقربلججججججججج -مالك باعني اله حتى يوفي ديونه -مالك يكول جانت تخوني وياه -والله لا و روح لأبويه لا ما خنته ، هو اللي جان ياخذ مني فلوس و يوفي من خلصت ورفضت انطي باعني اله كأعضاء بشريه حتى يوفي دين الاقمار مالته -و ميشيل شغلج كح... حتى تجيبيله زباين ؟ - مو هيج احجي و كمت اناشغ بالبجي اريد انطق الخوف ملى كلبي كمت بس انشغ و ابجي -اسمعلي لج ساقطة تحجيلي كل الصار وياج لا قسما بالله العظيم افرغ المسدس براسج و اكولهم غسل عار و اريد ك.... يحاسبني ، احجي ميشيل نايم وياج ما جاوبت بس ابجي : ولج احجييييي لا تخبليني احجيييييي متقربلج لووووو لا -مالك باعني اله والله جنت ضحية و هو صرخ: يعني ناااااااايم وياج دفرني براسي اكلبت اني و بطني للكاع ، رجع لزمني من شعري و يضرب براسي للكاع و اني اصرخ بس احاول الزم ايده بهالعصبية ثارت طلقه من سلاحه اجت بالتخم ، هنا فرغ گلبي من الخوف لما سمعت الطلقة كل ضني اجت براسي على كد الدم الينزف مني مكمت استوعب ع الدنيا بس اصرخ ، شمرني من ايده انزف و اناشغ بجي و ثكيله من بطني و تقلصات انتهيت .. هو يفتر و يصرخ : اني متزوج كح.... لج خليتيني اشد مرون و تصير كو..... من وراج تهرمين من وراي كالي و ما صدكته كال جانت تشتغل بالملاهي و تشرب و تتعاطى مخدرات و هاي تقارير تثبت اللي اكوله يحجي و يرجف و يضرب بالتخم و بالغراض ، كسر دمر البيت رجع لزم شعري و يعت و يكول : احجي صح شغلج جياد وياه و استغلج و سكنج ابيته ، احجيييي صح امه طاردتج من بيته لأنج بعينهم عاهرة و ما راضين ابنهم ياخذج احجيي كوه احجي و تطلع مني كلمة: مو هيج والله لزم شعر راسي بأثنين اديه ويعت ويصرخ :-ولج شلون مو هيج و هو ساحب منج بتج لأنج عاهرة و بت ملاهي ولج مو هييييج رجع ضربني للكاع و تولاني دفرات على رجلي و راسي ، دمرني اخرها تعب و تركني ، كعد على التخم يحجي بحركة و يسب و يغلط و دموعه تجري و هو يكولي : ولج سويتيني كوا.... لجين ، و ليش ما صارحتيني بعارج قبل لا اخذذذذذذذج ، ولج تتكبرين عليه انت و الكح.... امج ولج سجلت بيتي و تعب سنيني بسمج بس كون احتويج تالي اطلعيلي بت ليل لجييين ولج اكتلج و اخلص من عارج لو شسويلج فهمينيييييي ، شعلتي راسي احتركت روح ابوج الخلف مثلج ، لو ما الكو.... ابوج اني اخليج تتنفسين و توصلين هالمواصيل ولج كتلت روحي عليج من جنتي شريفه ما رضيتي بيه بعد ما زاعتج الدنيا رجعتيلي وبقى يسب بيه و يفشر على ابوي و يغلط اخرها كام من مكانه سحبني من شعري و سحلني، كمت اصرخ ، حط ايده على حلكي و سحلني على الدرج ، الباب يندك حيل جوا، شمرني بغرفة ظلمة : اذا سمعتلج صوت المسدس افرغه براسج قفل الباب و نزل، كمت ارجف و ابجي بمكاني ، الوجع ذبحني بكل مكان اسمع الكلام جوا يكولوله : ها ابو احمد خير سمعنا صوت سلاح كلنا خاف مو رمي بس صوت المرة تصرخ صاير شي و هو يكولهم : لا دا انظف المسدس و اجا بالغراض و المرة صارت اعصاب لأن تلفت الغراض، ماكو شي ان شاءالله -ان شاءالله الله يهدي سركم يابه احنا نترخص و اذا رايد شي احنا بالخدمة -ما تقصرون رحم الله والديكم كمل من عدهم، رجع صعد اليه فتح الضوه و فات يهددني: اسمعي لج صوتج اذا يطلع بكاتم افجره ، هسه تعترفين اللي ابطنج مني لو منين -ما ارد بس ابجي شالني من شعري وحجه وهو يصك على اسنانه : احجيييي منيييين -والله كل المريت بي انجبرت عليه بعمري ما خنت مالك ولا مشيت بطريق الحرام والله - اييييييه ولج ما فد يوم لزمتلي كح**** و كلتلها على شغلها اذا ما كالت مجبورة ، كلجن شريفااااات و مجبورات محد بيجن بنت ****** تكول عاجبني الشغل - ما مصدكني طلكني بس والله ما جنت هيج -مال اطلكج گطنه و اشلعيها من اذنج لو اكتلج و اغسل عاري منج لو اعوقج و اكعدج بالبيت و اندمج ع اليوم الحطيتي رجلج بالشارع و فريتي اشتعلت روح ابوج الكو.... جنت اكله ولك عمي الشارع مو للبنيه استر عليها ، يوكف بعيني و يكولي بنتي فاهمة بنتي عاقله و مخلي بيدج السيارة تفرين و ادورين بالشوارع لحد ما دنستي راسي و راس الخلفوج ولج اكتلج و احمل خطيتج و انفضح لو اعيشج و اعيش بجالج مگرن كليلي شسوي فهميني راااااااح يوكف گلبي عقل ما ضل عندي ولج بنت ******** كليلي بقيت بمكاني ابجي كمبص كبالي و كعد و ايده على خده و صافن و العيون حمر يمسح بيهم و يرد، و محترك بس يتنهد، سحب جكارة وكعد يدخن و يلون و يحجي ساعه يغلط و يصيح و يدفر وساعه يلوم و يضرب على راسه اني ما جاوبت بس متمدده بمكاني و الدم جف على راسي و حالتي تبجي الكافر، بس ما عجبه لأن هديت و ما كمت ابجي تقرب يمي : تريدين ترتاحين مو ؟ - مخلد عوفني الله يخليك -اني اعوفج ولج بأحلامج لا تسولفيها ، بعد كل السويتي تريدين اعوفج وتعيشين حياتج و ترتاحين، لو يطلع ابوج من كبره ما اعوفج اندمج على كل يوم عشتي بيه و اخليج تصيحين يا ريت امي ما جابتني حجاها و خله الجكارة بجتفي من ورا ، صرخت حيل خله ايده على حلكي و خشمي ، خنكني كمت ارافس بين اديه حسيت حتطلع روحي فقدت بين اديه ، كايم رايح جايب سطل مي من الحمام و شمرا عليه ، فزيت و نشغت و كمت اتنفس سريع و شاهكه عيوني تفل عليه فشر و طلع قفل الباب، كمت ابجي واون من الوجع ، الطفل ابطني سكن ما تحرك ابد جان يخلصها ليل نهار ابطني يفتر و يتحرك ، كل هالضرب تأكدت من خنس ميت بقيت ابجي من صدك حيل ، الفراش تبلل و جسمي مبلل كمت ارجف ، سندت نفسي و نزعت ملابسي جريت الغطا و تلفلفت ع السرير و اني ابجي مسحت ايدي على وجهي، باوعت ايدي حمرة و دم اسود يابس اجا بأيدي وقتها دعيت من كل گلبي الله ياخذ روحي و يموتني بولادتي و اروح لأبويه هناك اعيش يمه هلكد دعيت و توسلت للموت بقيت بفراشي اون و ابجي لحد ما فقدت ما اعرف نمت ما اتذكر ما حسيت غير على مخلد و هو يجر الغطا حيل، لميت نفسي و كعدت اغطي بروحي ، اباوعله يخزر بيه شمر عليه الغطا نزل جوا جاب ملابس خلاهم و طلع اخذت الملابس، البس بيهم كوه، رجليه مورمه من كد ما دفر بيهم و و كل اثر دفرة ازرك و اسود كوه البس الحاجة ، قبل لا اكمل لبس التيشرت رجع المسدس بيده: تعدلي اكعدي يلا -مخلد تريد تكتلني اكتلني و اغسلي عاري، بس خل اولد الطفل مدا يتحرك يمكن مات -انعل ابو الطفل و انعل ابوج لابو عشيرتج ، احجيلي من الألف للياء كلشي صار واذا ضميتي حرف الله بكبره ما يخلصج من اديه حجيتله على الرهن و الاقمار و شلون جان ياخذ مني و هو كام يصيح : و شعندج بقيتي ما اخذتي بنتج و شردتي وليتي ولج تريدين تقنعيني الصار بيج ما راضيه بيه -ما كدرت جان عندي امل ينصلح ، ابد ما خطر ابالي يبيعني لو هيج يسوي بيه ، عندي منه بنيه و متعلقه بيه ما حبيت احرمها لهذا ما عفته شعرفني حيسوي هيج - شعرفج يبنت **** شعرفج ولج اكو رجال يكول لمرته تصلخي و البسي ضيك و مصلخ حتى يطيحون الدين العلينا، ولج انت حاسبتني كديش و اصدكج ي******** -وروحه لأبويه مجنت اعرف والله بقى يسب و يكفر و رجع ضربني و طلع ما اتحمل يكمل، لليل و رجع يكولي كمليلي حجيتله شلون تعرفت على جياد و ساعدني و هو انجن و يصرخ : ولج كح... و لمج من البارات و وكعتي براسي وضل يغلط و يصيخ و يعيط ذيج الليله ما نمت ولا نام لحظة ، يصعد يسمع ينجن يبقى يخبص الدنيا و ينزل و يرد يصعد ... للفجر يلا بطل يصعد، بعد ما صعد ، بقيت انام و ارجع اكعد من الألم اللي ابطني زاد عندي الوجع ، بقيت ادك بالباب اريده يفتح يطلعني ما صعد، احتاجيت حمام ، عادة الحامل متكدر بدون حمام كل ساعه ، بس ما صعد ولا اجا تعذبت حيل متت ، وييين يلا صعد، بس سمعته كمت من حيلي و وكفت بالباب، فتحه صرت بوجه خزر عيونه: وييييين لجججججج -الألم ذبحني والله حجيتها و اني اطلع و لازمه بطني ، تركني استخدم الحمام كملت، تقربت يمه: اللي ابطني ما اله ذنب باللي سويته خل اروح للمستشفى اشوفه عايش لو مات مدا يتحرك من البارحه لليوم -فوتي جواا -مخلد وروح ابويه ابنك حرام عليك شذنبه بيناتنا لزمني من ملابسي و دفعني للغرفة ما فتح الباب ولا اجا للمغرب غفيت ، سمعته فات للغرفة خال يم راسي بطل مي و لفة صمون بجبن بقاني ٣ ايام محبوسة بهالبيت اكوله طلكني ليقبل اكوله اكتلني ليقبل اكوله عوفني اروح مستشفى اشوف ابني ميتحرك ميقبل اسمه كل ما ثارت اعصابه يجي يغلط و يفشر و يضرب و يطلع و بس. التقلصات و الاوجاع تزيد و وضعي وصحتي في تراجع عرفته ديستخدم ويايه الموت البطيء ميريدني اموت بسرعه و ارتاح، يريدني اتعذب و ادمر لحد ما انتهي و اموت بس ما طلعت ويايه ، بالحمام اكو درزن مال ماشات ، اخذت ماشا من المجر و رجعت للغرفه قفلها عليه و نزل ، امنت لما حسيته هو ماكو طلعت الماشة و بنهايتها المدورة اخليها على فرك البرغي و افر بي الى ان كدرت ارخي كل البراغي دكيت الباب هوايه ردت اتأكد هو موجود لو لا .. ما طلع صوته، انداريت للشباك فتحته حاولت اشوف كراجنا بيه سيارة لو لا بس تبين الكراج فارغ ، انداريت للباب و براغيه مفلوله كمت افتح بيه حيل و اجر وكعت يدة الباب ، فتحته حيل و طلعت اخذت ملابس من خانتي لبست و طلعت قبل ليجي هو، توجهت للمستشفى اول شيء رحت لصالة الولادة فحصت الطفل كالو عايش بس نبضه ضعيف و بقت تسألني على حالتي ، اخذتها على صفحة و كلت الها : اني تعرضت لتعنيف و تهديد بالقتل و صار ٣ ايام محبوسة تحت الجبر و التهديد اريد اسجل تقرير و ارفع دعوة اكدر الدكتورة ساعدتني بالتضميد وتسجيل تقرير عنف اسري الي و للطفل اللي ابطني بسرية تامة، كالتلي اخذي التقرير وروحي على مركز الشرطة المسؤل على المنطقة اللي انت ساكنة بيها وقدمي دعوة بحقه و باجر اطلعي للمحكمة الأسرية و ثبتي اقوالج يم المحقق اخذت التقرير و رحت لمركز الشرطة اللي بمنطقتنه و قدمتله التقرير و اشتكيت عليه و حجيت الحادثة، كتب الدعوة و انطيته اسم مخلد و العنوان رفع راسه : زوجج نفسه المقدم مخلد عمران لو غيره -اي هو نفسه - ااا اختي انت زوجته ؟ -نعم و اتمنى هالامر يتم بسرية تامه - اختي زوجج ضابط و هالدعوة ممكن تسببله مشاكل و فضيحة اني اكول لو نكدر نحل الموضوع بيناتنا -حاولت احل الموضوع هو اللي رفض ، كلتله طلكني مقبل كلتله اتركني اكتلني ، هو اللي فضل ان يحبسني بالاقامة الجبرية و اني حامل و طفلي نبضاته ضعيفه و معرض للموت بسببه - اختي الموضوع اللي يخلي الرجال يشيل اسلاحه على زوجته اكيد فضيحة تنزل راسه و هالامر كبير بحق المقدم مخلد انسان -ماكو اي فضيحه كل الامر هو عصبي جدا و عصبيته احيانا تزيد عن الحد و مبقى كدامي غير هالامر هز راسه و كال : ان شاءالله اختي راجعينا باجر و اخذي ملف الدعوة -ليش مو هسه ؟ -لازم اثبت الدعوة ميجوز باجر شرفينا و احنا بالخدمة و اتمنى تعيدين النظر بهالامر ... سلمت و طلعت بس عرفت مراح يمشي الدعوة و هسه يتصل بمخلد و يكوله زوجتك اشتكت عليك تعال تلاحك الموضوع قبل لا ينتشر رحت لبيت عمي الالم ثابحني، احس الطفل نزل عندي بالمثانه متت تعب، دكيت الباب و دخلت عند عمي ابجي و اشكي بس ما كلت له شنو الموضوع، بس كلت له: تخبل عليه ما اعرف شبيه عمي انجن ، رفع الخط و خابر مخلد يرزل بيه ، مخلد انهد بعمي صياح ، قفل الخط و باوعلي : عمو انت مشتكيه عليه بالمركز -اي عمو اشتكيت -يا مصيبتج يا عمي هذا يهادد يكول الزمها اليه اليوم احط طلقة براسها خاف ما كتلتها قبل ولج شصاير بيناتكم و مهند يهدد بالقتل -عمو والله مصاير مخلد عدمني اني و الطفل اللي ابطني نبضه ضعيف و حيموت شنو ذنبه بيناتنا كلتله اقتلني و ما قبل ، بقى حابسني و كل يوم يضرب و يتعدى اذا ما اسجل عليه هالدعوة و اثبت عليه التعنيف يسقط حقي و يبقى يتمادى بقسوته، دنحجي و سمعنا صوت سحك سيارة كلش عالي وكفت بالباب دفر الباب مخلد و فات ..... ☆☆☆☆ اكمل تكملة الحلقة الاخيرة و انزلها فد شويه #زينب_ماجد | ||||||||
|
| |
|
17-01-20, 12:32 AM
| #20 | ||||||||
| مراقبة عامة ومشرفة منتدى الروايات المنقولة
| #خطوات نحو الجحيم ،،،،،، بقلم الكاتبة زينب ماجد ،،،،،،، الحلقة الأخيرة تكملة ٢ دفر الباب و فات و هو يصرخ : وينهااااااا اني بالغرفة و عمتي لازمة باب الغرفة و واكفة و ولد عمي الصغار واكفين بالممر و عمي بالصالة -اهدئ مخلد و اكعد خل نتفاهم بعقل - يا عقل عمي هاي الساقطة بقت عقل براسي تريد تشهرني رايح بالمراكز تشتكي عليه ، لجيييييييييين ولج اليوم انبش ابوج من كبره و اطلعه بنت الكلبببببببب -احترم نفسك مخلد لا تجيب طاري المرحوم على السانك -وينهااااا -اكعددددد -وخر عمي خل الزمها مرت عمي: بداعة الله ييمه المره حامل لخاطري اكعد و اهدئ -هاي تريد تنزل راسي ولكم تريد تكسر عيني ولج انوب كدام الشرطة و الضباط تفضحيني لجييييييين -مخلد انت اللي وصلت الأمور لهالمواصيل كان المفروض تجيني و تكلي بنت اخوك هيج غلطت و تخليني اني احاسبها مو تحبسها و هي حامل فهمنا شنو اللي صاير بيناتكم دا نحلها -عمي رحمة لذاك الطمته التراب ابتعدددددددد مني و عوفني اخذها، ولكم گلبي تعب يااااااا نااااااس گلبي تعبببب تعداهم و فات لزمته عمتي وخرها من جسمه فتح الباب، لزمني من شعري، وكف عمي بوجهه : وحق الأسمه محمد على تصرفك هذا لجين ما الها طلعه من بيتي ولو مديت ايدك عليها تنكسر وسحب ايده من عندي: ما اضربها وخر منها و خليني اتفاهم وياها -ما تتفاهم قبل لتكولي شنو اللي بيناتكم باوعلي و هو يخزر : كولي شنو بيناتنا ، احجي مو جايه تهاددين بي احجي و خلي هو اليكسر ظهرج احجييييي ليش ساكته ما نطقت ولا كلمة، اندارلي عمو : شمسويه لجين -والله عمو ممسويه شي وروح ابويه -اذا ممسويه شيء ليش ساكته -عمي خليني اخذها واني اتفاهم وياها -قبل لا نفتهم ما الها طلعه ، المره حامل مخلد خاف الله - عمي شحجيلك شحجيييييلك هي و امها كح..... لعبوا علييييييه - مخلد الموضوع مبين ما ينسكت عنه تحجي لو نتصرف غير تصرررىرف -عمي ابوس راسك اطلع منها و خليني اني وياها نتجازا لزمت بطني عفتهم و طلعت ، صاح عمي وراي و هوا اجا ، لزمني من ايدي : ولج انت راح اطيرين عقلي الجسارة العندج شنو تعوفينا بالمكان و تمشين ضربني راشدي، دفعت : اااااااخ قسما بالله لو مديت ايدك مرا لخ لو تحبسني جوا الكاع هم احفر و اطلع و افضحك والله لزمني من زنودي اثنينهم و رفعني: الفضيحة لا بصالحج ولا بصالحي امشي وياي لا تخلين الشيطان يوزني و اجرم بيج و ارميج خليني لازم روحي -شلون يعني راح نبقى نباوعلكم و ما نفتهم شي ، مخلد مو سالفه هاي اكعدوا اثنينكم و فهموني البيناتكم شنو لجين: اروح ويا بشرط ما تتعرضلي، مخلد والله الطفل نبضه ضعيف اذا اني ما استحق ابنك شنو ذنبه يموت بسببنا -امشي كدامي عمي مانعه ، رده مخلد : عمي يرحم اهلك اطلع منها سجين ابلعومي من احجي ازوعن دم اتركنيييي اخذ ايدي ومشاني حيل، سحبت ايدي منا لان احس يصير عندي دفع من امشي حيل اتأذى لزمت بطني و مشيت ، صعدت وياه بالسيارة شسوا بالغلط و السب و الصياح، وصلت البيت نزلنا يشي روحه و يشمرها بوده ياكلني و يكولي : فوك شينج تريدين تفضخيني كدام جماعتج ولج شطالبتني انت كليلي رايده تموتيني - ما الي ذنب بكل اللي صار بيش تريدني احلفلك -لا تكولييييين ما الي ذنب كل الصار من ايدج مو هذا الشردتي من بيتي حتى تروحيله، مو هذا الشربتي السم على موده ، كله منج انت الردتييييي -ودفعت ثمن كل غلط غلطته و لليوم دا ادفع حرام عليكم يا ناس، ما سويت شي بس حبيته ، محد يعرف نفسه ماشي للهاويه و يكمل طريقه خسرت اهلي وخسرت صحتي ورضا ابويه مات وما راضي عني و خسرت بنتي و خسرت كل شي و دا اخسرك و داخسر عائلتي لسه شكد راح اخسر بسبب هالحب الغبي والله متندمه كاعده بالكاع و هو كاعد ع القنفه و راكز ايديه على اركبه ، ومخلي جف ايده على وجهه - شسوي هسه ولج فهميني راسي ذبحني لا اكدر احط طلقة براسج ولا ينطيتي كلبي تعيشين مرتاحه على هالنار الشعلتيها بيه ، ليش ما صارحتيني قبل الزواج ليش ما كلتي -كلت لك لما طلبت مني نتزوج ، كلتلك اني مو نفسي ذيج لجين القديمه لو تعرف البيه انت نفسك ما تريدني كلتلي الحديد رغم صلابته يزنجر بس تكدر تجدده و تعيد بيه الحياة مو هذا كلامك الي -ولج كلاميش الاعرفه مالك عار و حط دينه بركبتج و انت وفيتي ، انب ادري انت كح... و اقبل بيج -مخلد ما استاهل كل هالتعامل منك والله كافي عليه اوجاع الحمل دا اموت ما سويت شي استحق اتعاقب عليه بهالشكل تريد تنتقم ذاك مالك و انتقم من اللي سوا بينا هيج، ليش دا تنتقم مني اني ضحيته والله دا نحجي، اندكت الباب: فوتي للغرفة و سوي نفسج نايمه ما اريد اطلعين خلقتج لاحد يلا كمت للغرفة، دخلت، رحت لفراشي اتلفلفت ، سمعت امه و ابوه بالهول و هو يكولهم : ماكو شي سالفة بيني و بينها نحلها و عمو يكوله: مرتك مشتكيه عليك بالمراكز شنو سالفه بينك و بينها من يمتى عدنا نسوان تشتكي علينا بالمراكز -يابه ارحمني راح اطك و اموت من القهر و التعب لا تصير انت و الدنيا عليه كرجيه : يا دنيا يمه ما حجيت اني ما كلت، مو كلت لك يمه هاللجين هاي تشل حالك عوفها لا خلتك تحب مرتك لا تريد عائلتك مدري اشادتلك و شمسويتلك و معلكتك بيها ولك باوع وجهك اصفر و الضيم يا حالك عوفها طلكها و اخلص منها ورجع مرتك و عاىلتك و انساها -يمه فدوة العينج اسكتي -كلي شسوتلك و هيج تريد تكتلها بسلاحك ، خانتك لكيت احد وياها احجي وياه -يمممممممه مو اني التخوني مره ، لا تفكرين بيها هيج الموضوع بعيد عن التفكرين بي كلتلكم بيني و بينها لا تدخلووون -جهالك يبجون عليك -دانعل ابو جهالي عوفوني ، شمروهم على امهم طكت روحي متت -موتتك راح يتمرض وليدي عساها بحظج و ابختج يلجين بيمن ربحي يمه ؤاح تكتل ابني بت وداد الدايحه ... اخذت مخدة ثانيه خليته على اذني ما اريد اسمع كل كلامهم ، و حاولت انام گعدت بالليل ، سمعت صوت مخلد بغرفة الجهال جايبهم كوة اجر خطواتي، الورم و الألم طلع عليه من بعدين جسمي كله يوجعني و ثكيله النفس كوه اجره مشيت للمطبخ دا اكل شي ، طلع هو وراي ، مهتميت كملت طريقي للمطبخ، اجا ورايا -باجر تروحين وياي -وين -تتنازليلي بطابو هذا البيت و يرجع بأسمي، المثلج دينار ما اصرف عليها مو انطيها بيت -ما عندي مشكله اتنازل و انت هم تتنازل الي بالمقهى اريد ابيع و احول فلوسي للمصرف تقرب من عندي و سحبني من زندي حيل :-دا تسوميني انت -لا بس اعرف ما يجمعنا غير هاليومين اللي اولد بيهم و بعدها كل انسان يروح بحال سبيله -اذا مفكره اطلكج واخليج ترتاحين تكونين غلطانه، لأطلع قهري و تعب گلبي من عيونج والله -ما جبرتك تحبني و تقهر نفسك و تتعبها ابتعدت منك و سكنت اربيل حتى ما التقيك و ما كفيت انت اللي جنت تتعنى و تجي -لا تخافين كل هذا اطلعه من عيونج و شوفي شلون راح اعذبج، و البيت تتنازلين بي اليه و كل تنازل الج بالمقهى يمي مال الج - شوف مخلد سابقا مالك شمرني بنص زمرت ذياب و تركني وحدي انازع، لا اهل ولا صديق ولا اقارب، بس ربي كان ويايه و كدرت اسحك الكل و اطلع و اتخلص و اخلع مالك بنفسي ما خليته يطلكني و حربي وياه لليوم على بنتي ولا تضن راح اسكت عنها بيوم بعد كل هذا المريت بيه، لا تعتقد انكسر لو انجبر الضربه الما تموتك تقويك ، و اني قويت اضعاف قوتي، فلا تخليني استخدم هالقوة وياك ، حبيتك و تركت كل شي و قبلت اصيرلك زوجة ابيتك و ام لاطفالك و اسعى بكل جهدي ما اقصر بذرة وياكم لما تقصر و تحاول تكسر ما راح تلكاني ولو مو تحبسني لو تدفني تحت سابع ارض و تموتني ، اصيرلك بزونه بسبع ارواح احفر و اطلع و اتحرر منك لزمني من ركبتي و صرخ بوجهي : تهددين انت -دا احذرك بس ، لأن مو حابه اخسرك -عبالج هالاساليب تعبر عليه قبل شويه تكولين ميجمعنا غير هاليومين و هسه ما اريد اخسرك، ولج اذا ما اطلع روحج كبالي ما ارتاح -ما اريد اخسرك بس اعرف ما راح ارجع لجين اللي بكلبك مثل قبل شكك و غيرتك ما راح يخلونا نعيش مرتاحين -هه تكول راحه اني هنا مبقيج مو لشكولج، مبقيج حتى اهينج و ازيد بكرهي الج لأن كلما دا اباوع لشكلج اشمئز من وحدة كح... تزوجتها -راح تشمئز مني هوايه وراح تحاول تكرهني بس ثق مراح تكدر اطلعني لا من عقلك ولا من كلبك فقط راح تبعدني عنك بأفعالك و تبقى انت وحدك اللي اتعاني مو غيرك...... قاطعني و هو يضربني راشدي بقوة و رجع شد.شعري على ايده: احسبي ساعاتج هنا اذا ما دمرتج ما اطلع اني مخلد - ضربتني لأن ما كدرت تنكر هالحقيقة الكلتها، و ضربك هذا يعبر عن ضعفك مو قوتك لأن عمر المراجل ما صارت بضرب النسوان دفعني من ايده للكاع ، كال: بسيطة هز راسه و طلع و هو يتوعد .. ثاني يوم اجت عمتي اخت بابا اخذتني بحظنها من شافت وضعيتي و الزراك اللي بوجهي وكصتي المضمدة ، تخبلت واصرت الا تعرف و حلفت بروح ابويه ما تحجي لأي بشر سولفتلها الصار ويايه كله ، بقت تلطم على خدها و على راسها و تكلي : لا تلومينه لج عمه زين و ما وكف كلبه للرجال ولج زين و ما حط طلقة براسج الله لا ينطيك مالك ، يمه يالمصيبة يمه ديربالج تحجين لاحد لو تسولفين كرجية لو عرفت ادكلج طبل و تفضحج -ما حاجيه ولا هو ناوي يحجي بس عمه مخلد مراح يكدر يتقبلني بعد لو شكد ميحبني، كشت روحه مني -لا تسبقين الايام و تحكمين اتركي هالامور لربج يحلها من عفتي و شردتي لمالك كال تتحرم عليه بعد بعمري ما اتقبلها، المره الفضلت واحد مجرم و سممت روحها حتى ما تعيش وياي و تنحرم منه تتحرم عليه ومرت السنين و ما نساج ولا كدر يحرمج على كلبه، اتحملي و اصبري و شوفي وين يوصل دنحجي فات مخلد للبيت جاي من الدوام تلكته عمتي بالهلا و المرحبا، بس هو كلش تعبان و كوه تطلع الكلمة منه، سألته اذا يريد غده كال الها ما اشتهي كعدت تحجي وياه و تفاجئ من عرفها تعرف بالشالفه و حلفتله قسم يمين ما تكول لاحد و هي جايه لهنا تريد تصلح بينا هو كال الها : لجين انتهت بالنسبة اليه لعبت روحي منها -لا يعمه هي شذنبها المسكينه -لا تبرون ساحتها و تبررولها عمه كل الصوج منها، و الكاتلني استغفالها الي ما كالتلي بحقيقتها خلتني امشي وراها و هي ازباله -ماضيها يعمه و ما تريد تذكر ماضيها و رادت تعيش وياك و تغير حياتها، ما كعدت تتشرط عليك بالبدايه شغلي و لبسي و بيتي تالي كلهن تنازلت بيهن الك حتى تكابلك و تعوض كل حرمانها بيك -عمه وكحه جسرة ما تنكسر عينها ، راح اجن راح اتخبل عقل ما ضل براسي و من احجي وياها كلمة تجاوبني بعشرة و كلام مثل السجاجين تحطهن بكلبي لا استحت ولا انكسرت عينها ومستمرة تهدد رغم صخام وجهه -ميخالف عمه المرة حامل وكوه تتنفس و الطفل نبضه ضعيف و حالتها حاله هم واحد من القهر ما يعرف شيحجي يبقى يخوط بالكلام ردة فعل للديتعرضله انو الزلمه و مو كدامك عقلك جبير و الراح راح و احنا نعرفها الجين و نعرف نضافة كلبها و صدقها و الله بكبره ما يلوم المجبور عمار بن ياسر من تعرض للضرب نكر الله و ذكر الصنم مجبور و الرسول كاله ( صبرا ال ياسر فأن موعدكم الجنه) و ما اخذ بكفرانه الانجبر عليه فأذا الله بكبره يسامح احنا منو يعمه و ما نسامح، احتوي بيتك و عائلتك ولا تخلي الرايح و الراد يتسائل شسوت لجين و مخلد يريد يكتلها بالسلاح شوفلك عذر و قدمه للناس و لا تخلي الحجايه تلوحكم و لم السالفة و الزمن كفيل ينسيك كل هالامور بقت تحجي وياه هوايه صح تركني و بعد ما ضربني او اذاني بس ما يحجي وياي ولا حتى يخلي وجهه بوجهي مر اكثر من اسبوعين و هو على هالحاله كرجية امه اجت اخذت الجهال و تتعارك وياي و تكلي : شليتي حاله عسى الله يشل حالج ولا يخليج ترتاحين بيوم بقى البيت فارغ هو يطلع الصبح للدوام يرجع بالليل كلش، حتى الظهر ميجي يبقى عند اهله يتغدا ويكعد وياهم، حتى ميرجع ويشوفني و حاكم عليه ما انام يمه ع السرير، انام بالكاع بيوم اللي هو خفر و ما يجي .. انام بفراشي ...بيوم جنت وحدي بالبيت ، عندي الام قوية حيل و هو لسه ما راجع ، صارت ب٢ و هو ماكو و الألم يزيد عندي الى ان طك عندي مي الراس تخبلت ، يعني راح اجيب اخابر مخلد ما يرد ، خابرت عمي هم ما يجاوبني، اخذت جنطة البيبي و جنطة ثانية محظرتها اليه و طلعت الدنيا ليل كوه امش و الوجع يزيد كل ١٠ دقايق اوكف اعصر بروحي لما يروح اكمل طريقي كوه و اني شايله الجنط دكيت الباب على بيت عمي عثمان محد يطلع تعبت من الدك و ماكو احد الى ان تذكرت ماخذ عائلته يونسهم بأربيل تمشيت لبيت عمي عمران ادك بالباب و محد يطلع كعدت ابجي بالكاع من الوجع ، اريد احد يساعدني ماكو فتحت الباب كرجية و ما انسالها هاليوم بعمري من كالتلي ( امشي منا عسى تهلكين و تموتين بهالساعه ويخلص ابني منج) سدت الباب رفعت الخط على عمتي كلتلها : عمي الحكيني فدووووه راح اموووووت -وين انت -اباب بيت عمي عمران و طردتني كرجية عمه طك مي الراس راح اجيب فدوة الحكيني دا احجي، عدنا واحد بالمنطقة كل ليلة هو و الجلب مالته يفارون بالشارع من شافني ابجي و الجنط يمي و كاعده بالكاع ركض خطيه و عاف الجلب مالته و تقرب : ها خويه محتاجه شي من حجه ويايه نسيت التليفون و مديتله ايدي و اني اكوله : امروتك فدوة راح اموووت كومني و احتار بكاعه شيسوي : خويه سيارتي ذيج بالباب بس انتظري اجيبها و اجي والله ما اطول كمت ابجي سمعت صوت الوبايل عمتي تصيح حجيت وياها : ها عمه هذا ولد راح ياخذني -خلي الموبايل قريب منج اني هسه جايتج و انعل شرف عمران اليوم لابو كرجية ال****** الولد شخط السيارة و خلاها كبالي، كعدني ورا وصعدلي الجنط و ساق كمت ساعة اليجي الوجع اصرخ و اعصر بالكشن ، و ساعة اوصي بالولد و اكوله ع الموبايل يبقي يمه حتى عمتي تخابره خطية انضرب راسه مكام يعرف يسرع حتى يوصل لو يبطئ حتى ما اتأذى بالطسات و يزيد الوجع وكلما يوصل سيطرة يصيح: المرة راح تجيب راح تجيب و هم يأشروله : اطلع ع السريع اطلع وصلني لمستشفى اهليه، وصف السياره بالباب وصاح على الحرس و الممرضين يجيبون كرسي حالة طارئة التمو اخذوني، مخلد كام يتصل و الموبايل بأيد الولد و ما اعرف شيغلط عليه من رد عليه ولد غريب من جهازي بقى الموبايل عند الولد و اني دخلوني صالة الولادة، مفوله على الأخر بس خلوني ع السديا و استقريت بوضع الولادة نزل عندي الطفل كمت اصرخ صوت بالسما و صوت بالكاع لحد ما تمت ولادتي، شكل عندي نزيف ما ادري بعدها شصار فقدت كعدت على صوت عمتي ويا مخلد و هو جايب الدم فتحت عيني و اون من الوجع ، باست راسي عمتي : الحمدلله على سلامتج عمه يتربى بعزكم ان شاءالله -وينه الطفل عمه -بالخدج بعده من يطلع اجيبه الج ارتاحي هسه انت اجت الممرضة تشكلي الدم ، باوعت لمخلد عاقد حواجبه و مباوعلي يباوع للباب برا حقدت عليه حقد بكد الدنيا بذيج الساعة تكبر يرد على اتصالي و خلاني افتر بالشوارع بأسوء حاله حتى الكا احد يسعفني بقيت يوم كامل بالمستشفى كالو رحمها تعبان الطفل عنده ولادة من زمان و هي مقاومة فالطفل متضرر و الرحم متضرر ، و لسه الطفل بالخدج ديعالجو مقبلت اطلع من المستشفى الا ابني ويايه، العرفته مخلد كاتب اسمه بالبيان اسمه ( رضا ) كمت على حيلي و مشيت للخدج و استخرجت المادة الصمغية من صدري للمميه حتى ينطوها اله وبقيت رايحه راجعه على طفلي لحد ما انطونياه مخلد ما يحجي ويايه ابد حتى ما كال : الحمدلله على سلامتج بس من شفت طفلي نسيت مخلد و اهله و نسيت كل اوجاعي ، بقيت ابوس بخشمه و اشتم بيه رجعنا للبيت، مخلد يسوق و عمتي ويانا، كلت الها: عمه ياريت تاخذيني عندج على ما اكمل اجرائات الطلاق و استقر ابيت لوحدي اني و ابني رفع عينه يباوعلي بخزرة : عمه كليلها انجوم السما اقربلج عمتي: ارتاحي بنتي و استقري ابيتج و اني يمج و من تكومين بالسلامه الله كريم -عمه ما اكدر اعيش ويا هالعائله بعد و اتقبلهم، عمي و رجلي اللي رفضوا يردون عليه و اني بنص الوجع و عمتي كرجيه تطرد بيه بالباب -عمج تعاركت وياه والله يكول نايم ما سمعت صوت موبايل ، و اجاج و انت جنتي متخربطة بس مخلد كاله روح ارتاح يابه ما عليها شي بس كرجيه و اني منتظرة اوصلج للبيت و اطلع اتعارك وياها لهاليهوديه -حشى اليهود من افعالهم عمه ، حتى اليهودي لو شاف مرة تطلك انسانيته ما تسمح يتركها الا بيت عمي اخترقوا كل معالم الانسانيه و هيهات اضل وياهم بعد مو اني الانجبر على شكولهم -انعل ابوج لابو شكولج بنت الكلب تروحين فدوة القندرة اهلي تشرفج يا........ خليني ساكت لا اطلعين الساني يا ساقطة -اسكت و لا تحجي و انتظر و شوف شلون بنفسي اخلعك و ما ادورك وكتها خلي امك و حقارتها تفيدك وكف السيارة ، اختضت بينا عمتي لزمته: اسكت مخلد و وصلنا على خير -عوفيني خل أدبها دا اشوف شلون تفك حلكها -المرة توها والده يا مهلد اسكت عملتكم وياها ما تنحجي و تريد تضربها و هي نفسه عوفها لا والله هسه انزلها من سيارتك و اخذها لبيتي -من عمايلها و اني كلتلها اذلها و اكسر عينها و الا اخليها هي و المايسوى سوى .. و تحلم بطلاك و كل احترام ما الها -هاي احلامك الها، و عسش و شوف شلون اهدملك احلامك انتفض من مكانه وكف السيارة و نزل فتح باب السيارة و لزمني مز شعري، و عمتي نزلت تتعارك وياه و هو يصيح شاف اكو سيارات تباوع عليه، صعد و كمل الطريق للبيت ، وصلنا و ما نزل بقت عمتي فرشتلي بغرفتي و سوتلي اكل وكلتني و ساعدتني برضاعة الطفل كل هذا و هي تحجي و تنصح : صار عندج طفل و اتحملي و اصبري و شتسوين و الصار مو سهل و صعب على الرجال يتحمل عديت و تحملت و بقت عمتي ويايه يومين لحد ما تعافيت و كمت اكدر اكوم لنفسي لو لأبني ماما ما تركتني كل الوقت ويايه صوت وصورة نحجي بس من يجي مخلد اقفل الخط ، افرش اني بالكاع و ابني بمهده و هو على السرير ولهسه ما لزم الطفل ولا اخذه بحظنه كاش منه و مني و كوه متحملنه، لا هو راضي يطلك ويخليني اروح ادبر نفسي ولا هو يسامح ويعدي كلت يهدأ من يوم من يومين بس ابد ما رضى، قاربت اوصل للأربعين و هو ما يحجي ويايه، يطلع الصبح يرجع بالليل و مسوي البيت فندق كعدت مرة بالليل دا اغسل الممية مال رضا ، لكيت مخلد كاعد بالمطبخ و مخلي وجهه بين اديه ، من فتت فز باوع ورجع لوضعه غسلت الممية و هو على نفس كعدته، تركت المميه، و تقربت منه، مديت اديه على صدره و حظنته و هو كاعد و خليت راسي يم ركبته و صرت اهمس :- صارلنا شهرين و احنا بعيدين عن بعض، لا تنكر انت ما مرتاح بدوني ولا اني مرتاحه بزعلك بسته بركبته: مستعده كولشي اسوي بس نرجع لبعض مثل قبل ، و ترجع تلمني بأديك و تضيعني بسحرك وخر اديه من صدرة و كام، لزمت قميصه: كافي مخلد كافي تحاسبني على ذنب ما سويته بأرادتي، و الله لو جنت راضية فلا الومك بس اني ضحية و دفعت ثمن غبائي بحب مالك و لليوم دا تخسر و ادفع ما اريد اخسرك -انت بالنسبه اليه انتهيتي انت هنا حتى ازيد بكرهي الج بس ما حاسبج مره و احبج -متقنعني بهالكلام مخلد اعرفك و اعرف كل تفكيرك مستحيل تكرهني ولا عندك نيه لهالموضوع انت بس تريد تنسى و مدا تنسى ، خلينا نرجع و ننسى كلشي فات نزل اديه من قميصه و مشى ما اهتملي، تنهدت بتعب، شسوي بعد تعبت و اني انتظرة ينسى اطلك و اروح ما اكدر و هذا ابني بيناتنا ، ابقى اتحمل ما عدت اصبر و حايرة شلون ينحل هالموضوع بقيت ابجي بالمطبخ، سمعت الطفل يبجي رحت اخذته بحظني ارضعه و ابجي هو حس و بقى يتگلب بفراشه الى ان نومت الطفل ، و ما نمت بالكاع رحت نمت ع السرير من الجهه الثانية، بقى هو دافن راسه بالمخدة ما حجه ثاني يوم جان الأربعين مال طفلي، سبحته و عطرته و اني رتبت نفسي و شسورت شعري و نزلته و لبست كيمونه سودا و شورت كابوي و بقيت اتمكيج و ادلل بروحي عاد منو يسوى غير نفسي اهتم بيها جنت فاتحه ادينات رضا و مخليته محلل ع السرير و يلاعب لوحده ، و اني واكفه على المرايا فات مخلد، التفتتله باوعلي و راح كعد ع السرير اخذ الريموت و يباوع بالتلفزيون التلفزيون يصير بصف ميز التواليت من اباوعله الكاه عينه على طولي مو بالتلفزيون من يحس اني باوعت يرجع للتلفزيون بجى الطفل يريد ينام، صحت : هسه ماماتي هسه كملت بس شويه انتبهت لمخلد جر ملحف الطفل و ضحكله و يكوله: ليش يبجي ليش -شيله بس اكمل عفية تنهد و ما باوعلي من حجيت، اخذه و شاله بحظنه و يبوس بيه و يهدي، شمرت شعري و رشيت عطر شويه و وكفت اسوي ممية اندرت اخض بالممة و كلت له : نومه بفراشه دا ارضعه وداه للكاروك خلاه و وكفت خليت الممه بحلكه : ليش ما تشيلي و ترضعي ليش نايم حجاها و هو يخلي ايده على ظهري يتلمس ، ابتسمت: ميصير يتعود ع الحظن ويصير مزعج الطريقة صحيحه ،يكمل رضاعته و ينام -هااا دنكت للطفل بحجة ارضعه و كمت احشر نفسي بيه و اتحارش هو واكف عود ديباوع اشون ارضعه ، ضل يمد ايده عليه يتلمس لو يوخر بشعري من ظهري و يلعب بيه لان ناعم و مفلول خلص الطفل الممية : ها خلص حجاها و هو يحط ايده على خصري و يقربني اله التفتت اله: شكو تنهد ومسح وجهه بارتباك : لا ماكو شي هيج دا اسأل كملي انزعج ابتعد من حس دا اتملعب عليه شلت الطفل خليته على صدري وراسي على جتفي و ادكدكله حتى ينزل الحليب ميتقيئ، تقربت منه انطيته ظهري و كلتله :باعه اشون نايم كأنه ملاك تقرب مني لف ايده على بطني و هو يحظني و دنك يبوس راس الطفل و باس اذني و هو يهمس : نومي عاد ضحكت و رجعت الطفل لمهده ، سحبني لحظنه حيل مثل المجنون يتنفسني و يبوس بيه ما انكر جنت مشتاقتله كلش هوايه و فرحت حيل لما انتهى زعلنا و تصالحنا . كعدت الصبح هو ماخذ اجازة ما رايح للدوام ، رحت للمطبخ اسوي الأكل و هو كعد يمي ، بس ما حجا ولا كلمه يلعب بموبايله سمع صوت الطفل راح جابه و اجا يلعب وياه حجيت :الظاهر جان الزعل مانعك من الطفل، اشوفك ما فاركته من البارحة ما جاوبني تقربت سندت ايدي ع الطاوله و اني اباوعه اشون يلعب وياه و يناغيله و ابتسم، تقربت بست الطفل بحظنه و بست خده هز راسه: كملي الاكل يلا ليبجي الطفل - اروح اسويله ممه -وليش خليتيه على ممه ليش مو على صدرج - ما اريد يرتبط بيه، اطلع اشتغل و هو على صدري -لازم حظرتج ناويه تشتغلين -اي لأن مليت من البيت ما عاد اتحمل الوضع و حجيت ويا صديق اليه ، اكو قناة محتاجة مقدمين و وجوه شابه -و اتفقتي بلا ما اعرف ؟ -لا لسه متفقت مجرد حجي و نيه للشغل، مبلشت -ممنوع تنسين الشغل و الطلعة كافي عليج تربية ابنج - مليت كلش، كلت اخلي الطفل بحضانه او عند مرت عمي كالت اذا اشتغلتي خلي يمي بساعات شغلح -حلووو مرت عمي تدري و شي اكيد عمي يدري بس اني اللي نايم و رجليه بالشمس -ليش دا تكبر الموضوع كلت لك مجرد نيه ما بلشت ولا اتفقت على شي حتى ابلغك و بعدين انت جنت متحجي ويايه شلون احجيلي على نيتي بالشغل -شغل و هالامور تنسيها -بكيفك حياتي ، شغله لخ اريد اكولك بيها ، المقهى اريد ابيعه -ليش؟ -ما عاجبني هالشغل و ممرتاحه لهالسالفة ابد ، كل اللي دا يدخلي من المقهى ٣ مليون شهريا و المقهى وارداته اكثر من هيج بهوايه -يعني دا استغلج لو شنو -مو هيج حياتي بس اني ما حابه هالشغل -مازن ديشتغل و الولد عوفي المقهى ساتر عليهم -و شنو اني اصرف عليهم ، من باب انت مره و ما تشتغلين وكافي عليج البيت، و من باب يردون المرة تصرف ع الرياجيل و يشتغلون براسها خزرني و هو يكول : اقفلي ع الموضوع ماكو بيع و هاج اخذي ابنج نومي عفت الموضوع لأن مو وقته، اخذت الطفل نومته و رجعت خليت الأكل ناكل، هو ياكل بلا صوت او مناقشه -البارحه جنت غير شكل اليوم شغيرك ...ما رد عفت الأكل و ابتسمت له: صدك لو كالو الرجال يحب بعيونه مو بأذنه ما تغريه العواطف لما اجيت و حضنتك و كلتلك مشتاقتلك رفضتني ولا اعترفت بيه، بس لما تحظرت و لبست مدلع و كعدت اغريك اجيت ركض لأن السالفه تخص غريزتك و رغباتك -هسه الرايدته شنو نرجع مثل قبل ؟ -مو قبل، مثل البارحه تنهد، كام من الأكل: اروح اشوف اهلي ساعه و ارجع -شتسوي باهلك خليك ويايه -ارجع اريد المرة الشفتها البارحه كبالي حتى ارجع اصير مثل البارحه اعجبج لفيت اديه على ركبته: تحبني نزل اديه: ساعه و اجي ما اطول الصراحه تضيقت من كبريائة الزايد ، لا مكيجت ولا لبست بقيت على وضعي بس انظف، شويه و رجع باوعلي ممبدله، سوا حركه بحلكه و فات كملت شغلي و رحت يمه: الجهال ليش متجيبهم ؟ .. ما جاوب -شبيك مو احجي وياك -بس اني ما عاجبني احجي وياج صفنت بيه بتعجب : اي لا تحجي فد قضية يعني عفته ورحت للغرفة على موبايلي، شويه و اجا هو تمدد وياي -صاير تجيلي بس وقت رغبتك -شنو تكدرين تقدميلي اكثر من رغبه -اقدملك !! مو انت اللي جنت مجنون بيه و تريدني حتى لو بدون مقابل بس يكفيك وجودي يمك - جنت ، و اليوم صرت هيج -برودك دا يضايقني ، و خل ابالك فكرة اذا تعتبرني مشاكه انت دا تخوني تكون غلطان، اني واثقه منتظرة الزم شيء بأيدي حتى وكتها اتصرف -شتسوين -وكتها من اسوي، راح تعرف -هاا حجاها و اتقرب يتلمسني ، نفرت : دا تضايقني حركاتك -مو مهم، ارجعي لمكانج -مو ابالي -بس اني ابالي -مخلد احترم نفسك -مو اني الوحده مثلج تعلمني الاحترام، اما تريدين احترمج و ما تحبين هالتصرفات، فأعتقد انت اللي رخصتي نفسج و كعدتي تغريني بجسمج و لبسج حتى تثيرين رغبتي و اجيج فليش هسه متضايقه ؟ -كلام بلا معنى بالمرة ، اني زوجتك ولما احاول انهي الزعل فبس حتى احتويك و ارجع العائله اللي تبعثرت بسبب المشاكل ، مو من الشارع و غويتك -ماكو فرق انت و اللي بالشارع واحد والا نسيتي ؟ -صفعته براشدي قوي على وجهه: مو انت التهيني افته...... بعدني ممكمله لزمني و دفعني للكاع صار فوك صدري و استلمني راشديات حاولت اوخره من عندي و اصرخ كام يتقربلي بطريقه مقرفة جدا كمت اصرخ و اتعارك وياه و انهره و ابعد بيه، ابتعد مني و لزمني من شعري: مو هذا مستواج ، لا اطالبين بأكثر منه، ع الاقل صيري كح... لرجلج بس مو للشارع كمت من مكاني ابجي واكوله: اشرفك و اشرف اهلك واحد رخيص مثلك ما يستحق ابقى وياه جريت ملابسي، لبستهم و فتحت الكنتور ، اجا حظني من ورا : وخر مني حيوان وخررر شد شعري بأيده : ما اوخر و بعمرج ما راح تخلصين مني ، دنك ياخذ يبوس ركبتي صرخت :وخر -مشتاقلج هواي و اعترف مجنون بيج رغم كح.. بس ما اكدر اعوفج اعشكج و اريد اطلع حوبة هالعشك بيج و اخلي اله اثار بجسمج عض ركبتي حيل كمت ابعد بيه و اني ابجي خانكني ويا الحايط و تحول الى انسان مجنون استغربت كل تصرفاته كمت ابعد بيه حيل و اصرخ بجى الطفل ، دفعته حيل و اخذت الطفل بأيدي ، حظني من ورا و بعده لازم شعري : مخلد الطفل ليوكع مني -عجزت اكرهج عجزت اطردج عجزت انساج لو اعوفج بس ما عجزت احبج و دا دضايقني هالمحبه كلش لأن ما تستحقيها -انت انجنيت وخر شفت الطفل سكت و رجع لنومته، وخرت منه ، و خليت الطفل بمهده رجع سحبني لحظنه حيل، ما انطيت ردة فعل دا اريد اشوف شيريد ، نام و نومني على ايده خله راسي بصدرة و بقى حابسني بحظنه و هدأ رفعتله راسي، باوعت بوجهه ما حجيت ، حسيته ديعاني هوايه و متشتت و مدا يعرف شيسوي ، رجعت راسي على صدره و حظنته و غمضت كعدت المغرب على صوت رضا و هو يبجي، كمت من مكاني، لكيت مخلد مخلي بأيده و ديسوي ممه بالأيد الثانيه اخذته من ايده: من شوكت دا يبجي -كعد قبل اقل من ساعه و طلعته منج كعدنا بالصاله نام شويه ورجع يبجي كلت اسويله ممه يمكن جوعان ابتسمتله و اخذت الممه من ايده كعدت ارضعه : نومي و فوتي اسبحي اني طالع للشارع اجيب عشا هزيت راسي بمعنى (اي) نومت رضا و اخذت ملابس و فتت للحمام دايخه بموضوع مخلد مو طبيعي و تصرفاته غريبه كلش سمعت حركته بالبيت، بدلت و طلعت -جبت صاج كص لحم و بيبسي تاكلين ؟ -جايه بس انشف شعري بالشسوار راح طلع بلم و حط الصاج ورتب صينيه و جابها للغرفة ، رضا بجا حط الصينية و شاله كملت شعري كلت له : انطينياه -اكعدي اكلي انت خلي عندي حظنته هو و الطفل و خليت راسي بصدره: ما اعرف احقد عليك لو احبك شصاير وياك -انسي الصار الظهر شوي اعصابي تعبانه -اكعد ، من شنو فهمني ليش باقين خايفين من بعض و نأذي بعض ، احجسلي البداخلك كله عسى انو تكدر تتخلص منه -مدا اكدر استقبل الموضوع، اعوفج مستحيل و مستحيل اتقبل حقيقتج -هذه مو حقيقة، الموضوع مر و راح عليه زمان جان اساوء ايام حياتي و عدى -بس ما ينفي انت جنتي تشتغلين بهالمجال -ما اشتغلت ولا خليت احد يتقرب مني فقط اللي خبرتك بيه كدرت اتخلص منهم و اخلص نفسي -لما اتقبلج و احاول انسى، اتذكر اني مرتي جانت تدخل بارات و تغري رياجيل حتى تجيب معلومات للاستخبارات يعني بالضبط مثل بنات الليل اللي نستخدمهم و نبعثهم لناس نريد نوكعهم ، و هذا الشي ما جاي اكدر اتعدى ناقص شرف و اتقبل هالموضوع ؟ -اني مستعده اتحمل منك كلشي و كل حالاتك لحد ما نتعدى هالموضوع و نرجع نعيش مثل قبل هز راسه و دنك يبوس الطفل : نام ارجعه لفراشه -عنك اني ارجعه اكل بقينا نحاول نتفهم بعض ، جان بعد هذا اليوم جمعه و سبت قضاهم ويايه مطلع ابد ، دنرجع حياتنا طبيعي و نرجع نحتضن بعض يوم الأحد داوم سويت اكل و خابرته : حبيبي مو كأنك طولت ؟ -اتاخر بالشغل اليوم، بالليل ارجع -يعني متجي ؟ -لا اتغدي انت و بالليل اجيب عشا ويايه لا تعبين نفسج -اوك حبيبي كلت مدام مخلد ماكو و رضا نايم خل الم الملابس اغسلهم، بقيت الم و افرز القميص الابيض عن الكوبوي عن الالوان استفقدت ملابس هوايه لمخلد هو اخذهم هناك لان من جنا مزاعلين صار ما يرغب يرجع للبيت ، ف اتصلت بطيبة : هلو طيوب -هلو لجونه شلونج -الحمدلله اكولج طيبه لميلي ملابس مخلد و دزيلياهم بأيد علوش دا اغسلهم و اكويهم خاف يحتاجهم دا احجي جان مازن يصيح بابنه : امشي لغرفة عمك مخلد روح جيبلي منه جكاره طيبه منتبهت لكلام مازن جانت ملتهية دا تنطيني عذر على ملابس مخلد فكالت: ااا بغرفة عمتي و هسه بس اكولها ما تقبل و تسويلي سالفه انت وصي مخلد يجيبلجياهم و عود بفير وقت اغسليهم على فراغج -اوكي اخذي راحتج ع السريع تركت الغسالة رحت لبست و بدلت و اخذت طفلي بأيدي و توجهت لبيت عمي، الصدمة جانت سيارة مخلد بالباب تقربت للباب، خابرت مخلد : مخلد وين انت -مو كلتلج ابويه انت طالع بشغل -رضاوي وكع من ايدي مدري شلون و خايفه ليصير بيه شي الحك فدوة اني طالعه بيه هسه للمستشفى -انتظري مكانج اني جايج بسرعه قفلت الخط، و وكفت انتظره، طلع من الباب مستعجل انضرب بيه، باوعلي حس بس تجاهل و سوا نفسه مشغول باله على رضا خليت رضا بأيده و فتت للبيت، اول ما دخلت للمطبخ لكيت زمن كبالي دا تحظر غدا ...... ☆☆☆☆☆ على الرغم دا اختصر بالايام و الشهور و احداث قيامه تعديتها بس مدا اكدر اتخطاها ، الاحداث شيء مرتبط بشي ... مجبورة اكمل عسى ولعل اكدر اختمها لليل و انزل البقية #زينب_ماجد | ||||||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
1Likes
.png)
العرض العادي
