قضية طلاق للكاتبة/ أسيل "عراقية" (مكتملة)

[فيتامين سي]

قضية طلاق ..

بقلم Aseel...

بارت ٢٨ ....

..............

كمت اصعد بالرسائل .. واني معدتي صارت تكلب من القرف الي اقراه ...

وصلت الصورة لجسم ... وراها صورة صدر ..

ضليت اصور بجهازي المحادثات والصور اسحبهن ..

اخر شي وصلت لصورة شلت حالي .. وخلتني افقد النطق الثواني .. اذاني اسمع صوت صفارة بيها واني اشوف كبالي الي خايني زوجي ..

هية سجى مرت عماد ...

دموعي غوشن على المنظر الي داشوفة .. .
مدري انقهر على روحي لو على عماد لو على مهيمن الي فاقد عقلة وميعرف شصاير بي ..

خرجت بسرعة وطلعت الخط ورجعتة لمكانة ..
بس بقيت البرامج بتلفوني مفتوحة ..

رحت رجعت الجهاز وطفيتة وخليتة ع الشحن ...مثل ماجان ..

امشي واسحل بروحي .. صارت لوية ببطني واحس بطني تتكطع ماعرف ليش ..

ماعرف وين اروح ...

اتصلت على سهام .. هاي الملجأ الوحيد الي حاليا .

اتصلت ودك ... طولت يلا جاوبت ..

سهام :الووو ها رشا شلونج.

رشا :بصوت بجي وخنكة وغصة كوة يطلع صوتي ..
سهام الحكيني ..

سهام: ولج رشا احجي شبيج عيني .. مهيمن سوالج شي احجي شبيج ..

رشا :سهام .. مهيمن ... يخوني ويا ... طكيتها بجية متحملت ...

سهام :ولج احجي ويامن احجي ...لتخبليني ..

رشا: ويا سجى ..

سهام ولج ياسجى يمعزاية ..

رشا :شكم سجى نعرف احنة ..

سهام: انهجم بيتج يرشا .. ولج شلون عرفتي ..

رشا: فتحت الصفحة مالتة وشفت الكلام وال.... اختنكت بدموعي وصرت كوة اطلع الكلمة ..

سهام :اهدي حبيبتي بس يصبح الصبح اجيج والله اني وسامر وخل يولي لا تبقين يم هذا النذل ..

رشا: سهام مهيمن مو بوعية .. انتي تصدكين مهيمن يدور خيانة وفوكاها ويا متزوجة وانتي تعرفين عقدتة شنو ...
ماكدر اعوفة الها .. ماكدر ..

سهام: لعد تضلين ملطشة الهم لحد ميجيبها فوكاج ..
واني اكول ليش تريد تطلك هلكلبة هاي

رشا :ماعرف شسوي احس بنار تشتعل بصدري ..
شوفيلي حل راح اموت راح انفجر ماعرف

حدزلج المحادثات وكولي لسامر يسويلي حل بدون ما مهيمن يعرف وفهمي للوضع مال مهيمن ..

ماريد احد يجبرني اعوف مهيمن .. هوة هسة بحاجتي حتة لو ميريدني بس لازم اساعدة .. مستحيل اتخلة عنة ..

سهام :انشالله حبيبتي الله يهدي الج يبعد عنكم هلحية هاي .. احتمتل باجر اخذ سامر ونشوف شيخ سيد لازم نلكة حل وانتي ابتعدي عن المشاكل لا تخلي يصير عصبي عليج ويعاندج ..

وديري بالج تكليلة كشفتك لو عرفت منو هية خليج هيج سوي روحج غبية .. ترة بس يدري بيج يسويها شغلة عناد ويكوم كبالج يحاجيها ..

رشا :اموت غير ..حروح اسبح اشوية راح اموت من البوخة احس نار تطلع من اذاني ..

سهام :يلة حبيبتي سبحي بمي بارد وارتاحي ..باجر لصبح نمرلج ..

رشا: انشالله .. مع السلامة .
سديتة منها ورحت اخذت برنص وسويت ممة لصوفي شربتة وهوة نايم حتة نومتة تطول اريد ابقى بالحمام هواي ..

رحت سبحت وبقيت صافنة بالحمام ماكو دمعة تطلع بس هيج واكفة جوة الدوش .. والمي بارد والفجر راح يطلع .. واني بالحمام ..

مر شريط ذكرياتي من طفولتي لهسة .. مافد يوم فرحت بشي لازم اخسرة ..

كملت سبح ولفيت روحي بالبرنص وطلعت امشي سحل ماعرف رجلي شلون اخذتني لغرفتنا ...جان نايم على بطنة وراسة باتجاه الباب ..

رحت وكفت يم راسة وكعدت على ركبي ...
شتاقيت اشم عطرة .. حيل مشتاقتلة ..

قربت يم ركبتة حتة اشم ريحة ركبتة الي ياما وياما جنت اذوب بيها ..

بهفوة مني بستة بوسة خفيفة من ركبتة ..
فتح عيونة بنعس جرني ونومني بحضنة صار وجهي بوجهة ..

ضليت اتامل بوجها وامسد بلحيتة الي جانت عشقي ..

فتح عيونة حجة ووياي ..

مهيمن :حبيبتي وين جنتي مشتاقلج هواي ..

رشا: يمك اني بس انت عايفني ..

مهيمن: شوكت نرجع لبيتنا .. والله شتاقيت لهاي النومة ..

رشا: ليش هذا مو بيتنا ..

مهيمن: لا هذا البيت مامرتاح بي .. اريد نرجع لبيتنا الاول ..

رشا: انت دتحجي ويامن ..

مهيمن: وياج غير ..

رشا :اني منو ..

مهيمن :. حبيبتي رشا ..

رشا :لعد شبيك ليش ممرتاح بهذا البيت ..

ميهمن: ماعرف احس روحي غريب .. اريد اطلع لغير بيت نعيش مثل قبل وهم حتة ترجعين وياي للبيت كافي هواي طولتي علية ..

رشا: جنت احجي وامسد بلحيتة وهوة يلعب بشعري ..حسيت بهاي اللحظة انو مهيمن القديم يحجي وياي .. دمعت عيوني ونزلت على زندة ..

ميهمن: ليش حبيبتي تبجين .. تعالي يمي والله مشتاق لحضنج .. يومية افز بليل ادور عليج .. وبالنهار ماشوفج ليش مترجعين .. تعبني فراكج ..

رشا :مسح دمعتي وباسني بحلكي .. وضل يبوس بية وكام يتجرأ .. ويا كل حركة منة جنت ازيد بدموعي ..

ميهمن: شبيج ليش تبجين .. ضايجة مني

رشا: لا مضايجة بس مشتاقتلك حبيبي .. متتصور شكد مشتاقتلك ..

مهيمن: مو بكدي والله ....
...............

رشا: بعد ما كملنة رجع نام بعد ما ضل يشبك بية وحضني حيل ويتوسل ماعوفة .. حسيتة طفل وتايه ميعرف وين يروح ..

حسيت بي محتاجني .. ولازم احارب وارجعة الي ..
اليوم حسيت بامل انو ترجع حياتي مثل قبل ويرجع حبيبي الي ونتهنة بابنة الي لهسة ماشاف شي من حنان ابوه ..

اشوية وحسيت صوفي يبجي ..
تسحبت بدون مايحس ورحت جبتة وجيت بعد ماسويت الة ممة .. جان حلمي ارضع بس من الشوطات نشف صدري .. وصار ميريدة ..

بدلتلة بسرعة ونيمتة وانطيتة ممة .. ورجعت نمت بحضن مهيمن واني فرحانة ..

جنت اعرف هذا الوضع مؤقت بس حبيت اشبع منة لاخر ثانية ..

كملت نومتي وكعدت الصبح وضليت صافنة بوجهة وامسد بلحيتة وابوس بركبتة ..

جان يحضني اكثر وهذا الشي فرحني اكثر وخلاني استمر بالي دسوي ..

فتح عيونة على كيف ..

رشا :صباح الخير حبيبي.. وبستة بشفتة بوسة خفيفة .

فتح عيونة حيل .. وكام لحيلة كعد ..
ميهمن: انتي شسوين هنا ..

رشا :انت كتلي ابقي ..عرفت اجتة الحالة ..

ميهمن: امشي طلعي برة ماريد اشوف شكولج .. انتي شنو حتة تنامين يمي انتي خنزير تفهمين شنو يعني خنزير .. تلعب نفسي منج ..

رشا: اسفة راح اطلع ..
ماريد اتعارك وياه لان عرفت مو بوعية .. اخذت صوفي وطلعت الي فز على عياطة ..

اخذتة واسمعة يعيط بالغرفة ..
ميهمن: اطلعي انتي حيوانة ماعندج كرامة ماريدج ماريدج بعد ... اخخ. راسي ... الحكولي ... يمممة ..

رشا :سمعت صوتة يعيط .. حطيت ابني بالكاع وركضت عليه اشوفة لازم راسة ودمارات وجهة كلها طالعة وعيونة حمر ..

رحت ركض لعمتي اكعد بيها ماعرف شبي ..
خطية كوة صعدت واني رحت خابرت سامر حتة يجي ياخذة ..

رشا :الو سامر .. الحكلي فدوة ميهمن تخربط ..

سامر: يلة جاي جاي بس ابدل ..

رشا: رحت ركضت لميهمن اشوفة يتقيئ ويعيط من بطنة وراسة ...

وعمتي لازمتة تقرة ايات ...
رحت ركضت عليها ..

رشا :عمة كافي دتأذي مدتساعدي ..كافي تقرين براسة ..

ام مهيمن :ولج الولد حيموت ماكو مشافي غير القران ..

رشا :عمة ابنج مسحور مو بيدة .. القران يأذي عوفي متشوفين وضعة ..

ام مهيمن: .. لعد اعوفة هيج ولج هذا ابني الجبير ..

رشا: خابرت سامر حيجي ياخذة ..

ام مهيمن: ولج خابري اخوتة مو عندة اخوة ليش تخابرين اخوج ..

رشا :عمة ولدج بعاد وعما يجود اخاف تسوء حالتة سامر جاي هيانة بيتنا ..

ضلت عمتي تبجي وتمسد براس ابنها الي شبه فقد من التعب والتقيئ...

صوجي خليتة اعصاب .. لو كايمة قبل لا يكعد ويزهك وتصير هيج حالتة ..

ضليت اعاتب بروحي واندب حظي ..

اجة سامر ركضت فتحتلة الباب جان جايب وياه سهام ..

شمرت روحي بحضنة ..
سامر الحلكي راح يموت .. فقد وصار ازرك .

راح يركض وصعد فوك واني عما لبست جبة وحطيت شال على راسي من شالات عمتي .. جنت بوضع مو مال ابدل ..

نزلنا اني ومهيمن كوة يمشي .. عبالك واحد سكران شامر روحة علينة وبس يون ..

صعدنا بسيارة .. وعمتي صعدت ويانا وسهام ضلت يم الجهال ..

رحنا كبل بوجهنا للمستشفى ..
سوولة تحاليل .. وسونار .. بس كلها نظيفة ..
دخلو مفراز هم ماكو شي .. الدكتور كال احتمال قرحة بالمعدة بس ممبين شي ..

حطولة مغذي حتة يعوض الي فقدة بالتقيئ.. جان يتقيئ شي اصفر وحتة بالمستشفئ من يفحصون بي تقيئ عليهم ..

جنت صافنة عليه وهوة نايم بالسدية ولازمة ايدة ..
جنت اتمعن بوجهة الي جان ابيض هسة صاير ازرك مطعون ..

وسواد جوة عيونة ..حتة ضعفان ... ولحيتة الي طولانة وشعرة مهوس ولا عبالك مهيمن ابو الاناقة والكشخة ..

جنت صافنة ودموعي تنزل وعمتي كاعدة على الجرباية الي مقابيلنا وايدها على خدها وتمسح بايدها الثانية دموعها .. اسمعها تناشغ ..

اجة سامر جايب النا اكل ..

سامر: هاج رشا اكليلج لكمة حبيبتي .. جبتلكم ريوك .موزين عليكم تتعبون ..

تفضلي ام مهيمن ..
رشا :منو الة نفس ياكل .. شوف حالة شلون ..

ام مهيمن: اعذرني خالة .. ماحط لكمة بحلكي وابني يموت كبال عيوني ..

سامر : همس باذني ..رشا ترة عرفت الوضع سهام كالتلي .. بس لازم تاكلين لخاطر مهيمن متريدين تساعدي .. وخطية عمتج لا تتخربط ..

خليج قوية انتي اخونة السبع ماتذكرين .. ياما وياما صبرتي وحاربتي .. لا تضعفين هسة مهيمن بحاجتج

رشا: انشالله الله ينطيني القوة ..

سامر :هاج اكلي وروحي قنعي عمتج تاكل .. قبل لا تجي الهوسة ..

رشا: منو راح يجي ..

سامر :خابرت على اخوانة .. وراح يجون كلهم وامي وابوية .. يعني بعد متكدرون تاكلون وحتضلون لليل ...

رشا :كمت بدون ماجاوب اخذت لفات اثنين ورحت يم عمتي وكتلها ..

رشا :عمة هاج اكليلج لكمة ... ترة مهيمن يزعل من يدري بيج ماماكلة .. والله يعمة تعبت اني وماكدر اتحمل شخص ثاني عزيز علية يصير بي شي ..

ام مهيمن: ولج كلبي ميطيني والله ..

رشا: والله اني هم مينطيني . بس لازم نتقوة ..هاج حبيبتي .. اكلي حتة تسندين نفسج ..

ام مهيمن: انشالله ...بس اكو مي احس ريكي ناشف .

رشا: اي هاي موجود .. انطيتها شربت مي واكلت نص اللفة وماكدرت لا اني ولا هية نكمل .. جنت اكل واباوع لمهيمن وتذكرت اخر ليلة النة سوة الي هية البارحة ..

شلون جان متمسك بية حتة ماعوفة ..
رحت كعدت يمة وكمشت ايدة ... وعصرتها ..
همست يم اذنة ..

يمك اني وماعوفك ابد .. بس لا تستسلم ..
جان نايم هوة بفعل المسكنات بس حس علية ولزم ايدي وضل لازمها ...

اجو اخوانة وتشكرو من سامر على وكفتة .. ضلينا لليل يلة طلعو ..

جان ميريدني اتقرب منة لا اني ولا امة .. ولا حتة سامر ..

الشخص الوحيد الي يريدة هوة اخوانة ..
تحملت لاجل راحتة ماريد يتعصب ..

دخلو بالبيت واخوانة ساندي .. نيمو بغرفة عمتي ..
عمتي تريد تحضنة يعيط بيها ويكلها وخري عني اكرهج..

ضلت تباوعلة من باب الغرفة وهمة ينيموه .. ومقداد قرر يبات يمة هليلة ..

اهلي جانو كاعدين بالاستقبال .. رحت سويت جاي ..ورحتلهم ..

اجة مقداد طب يمنا ..

رشا: ها نام مهيمن ..

مقداد :اي نام .. ممكن احد يفهمني شديصير وليش هيج اخوية صاير ترة وضعة مو منطقي ..

رشا :ماعرفت شلون ابديها ماريد انزل من قيمة عماد ..
بس نقذني سامر .. كال ..

سامر :شوف اخوية مثل متكول غيرة نسوان .. واكو وحدة مسويتلة سحر وانت انسان مؤمن وتعرف السحر حتة بالقران انذكر ..

ولازم نشوفلة حل ترة يموت .. وهاي كدام الكل ..من اليوم لازم نبدي بعلاجة والموضوع يضل بيناتنة ....

منريد احد خارج هايي الغرفة يطلع الحجي .. نريد نعالجة حتة الي سوة هلشي ميدري بي تعالج ..

نريد نفضحة بس بطريقتنا ..

مقداد :يعني افهم من كلامك انتو تعرفو مو ..

سامر: اي نعرفة بس كتلك شغلة نسوان وماكدر احجي اكثر من هيج ..

مقداد :واتريدني اشوف اخوية يموت وكتالة معروف وماتصرف ..

سامر: الي تريدة يجرالك بس بلاول نعالج مهيمن ونتخلص من الي كان السبب وراها اسلمة بيدي الك مو بس هاي حتة دلائل وياه .. ها شكلت ..

مقداد :اي شي يخلص مهيمن اني وياك بي.. بس كون يتعالج ..

ابو سامر: اسمحولي بوية .. باجر ناخذة نزورة للعباس ابو فاضل وللحسين وهناك نسأل على شيخ او سيد يعرف بهالسوالف ..

ام سامر: بس لا تكلولة رايحين نزور ترة يمانع المسحور يعارض شكو علاج الة ..

رشا: اني اروح وياكم ماكدر اعوفة وحدة ..

سامر: لا رشا انتي ابقي هنا وديري بالج على جهالة ..
هوة هيج او هيج ميريدج .. ليش تعذبي وتعذبين روحج ..

ناخذة نشوف شكد نضل هناك ونعالجة .. .بيج قصص عراقيه حقيقيه من واقعنا.روعه الطائي
ام مهيمن :ييمة وليدي راح يموت ييمةةولك مقداد اخوك موات كلبي ناغزني والله ...

مقداد :يمة هاي ابدال ماتدعيلة لخاطر الله .. خليج مؤمنة اشوية ميصير هيج ..

ام مهيمن :ولكم كون الزم الي سوة هيج وطفة شمعة شبابة الي ماتهنة من يوم ما تزوج الاولى وحتة بالثانية ماسلم من الحياية .. ربي الطف بحالة راضية عليه دنيا واخرة .....

ابو سامر :حجية الشغلة سهلة انشالله الولد ياخذوه ويعالجوه ويرجع احسن من قبل بس لازم يحتاجلها صبر وقوة ..

رشا: جنت اسمع وادموعي تنزل ... هاي تاليتك يمهيمن .. هيج يابو طول الحلو يالهيبة .. تاليها توكع بيد النسوان الي متخاف الله .. جنت احجي بكلبي وصافنة ..

حسيت على سهام ضمت راسي لصدرها .. بوكتها جنت محتاجة هيج شي .. شهكت شهكة ضلو الكاعدين يباعون عليةة..

ولك ربي كافي عااااد ارحمنا .. تعبت والله شوكت ارتاح كل مااكول فرجت .. ترجع اسوء من قبل ..

كمت املخ بروحي واهلس براسي ...

اجو لزموني .. وابوية لازم ايدي وسامر مجتفني .. كعدوني وسهام جابتلي مي ..

سهام :هاج شربي حبيبتي اهدي ميصير هيج ..

رشا :مهيمن ضاع مني .. حيموت ومحد يكدر يسوي شي للحية .. اريد اذبحها بس كون اعرف مكانها ..

اريد اشعوط كلبها على عزيزها .. اريدها تحس بلوعة كلبي على مهيمن ..

جنت احجي وارافس اريد اروح الها كل ضني بوكتها انو بس اتحرر منهم اروحلها ..

سامر: اهدي لا تتخبلين كلنا باجر ناخذة .. هاي عود فهمتج بالمستشفى ..

ام سامر: عوفها يمة خل تطلع الي بكلبها ..

سامر: مو حيطلع حتة كلبها ..

رشا :سامر اريد عماد ... اريد هوة يشوف حل مثل مجاب هاي الحية اريد هوة يطلعها ..

ابو سامر :انتي تخبلتي .. عود هاي كلنة متطلع السالفة تريدبن توصليها لعماد الي ميندل دربة منين ..

سامر :كومي سهام شوفيلها حباية فاليوم وشربيها خل يهدء خبالها ..

ام مهيمن: يمة بنيتي شوفي بجنطة. ادويتي تلكين كلشي .

سهام :صار حجية ..وين حاطتها ..

ام مهيمن :حطيتها قبل اشوية على الكاونتر ..

رشا: جابتلي سهام حباية شربتها وورة اشوية احس اعصابي ارتخت .. بس ماكدر انام واحس بس جسمي خدران ..

ابني ماعرف وينة حتة ماذكرتة .. رحت امشي كوة واسحل بروحي ..طليت عليه من ورة الباب .. شفتة شلون نايم كتمت صوت بجيي بايدي ...

سودة علية جان نايم على ظهرة .. ويلوب وهوة بنومتة .. مامرتاح .. جنت مشتاقة اله .. واحس بي بحاجتي واني اتذكر كلامة وياي الصبح ..

اووف ياروحي انت .. كون احضنك هسة واسحب شكو وجع بيك واحطة بية راضية اموت ولا اشوفك تتوجع ..

سديت الباب وكملت دربي .. رحت لغرفتي وشبعت بجي .. اجتني سهام مبدلة ..

رشا: سهام ضلي ماكدر ابقة وحدي ..

سهام: والله ماكدر يعمري والله لو بيدي ابقة يمج بس البنات وحدهن عفتهن يم اختي ولهسة ماعرف عنهن شي اكلن شربن ..

انشالله منا وهيج اجيبهن وياي لحد ماتتحسن اوضاعكم انشالله..

رشا :احس بي محتاجني ..
كعدت اسولف الها على الي صار وياي الفجر ..

سهام كلبي يكلي راح يموت .. ماعرف جنت احس هاي الليلة اخر ليلة الي وياه ..

سهام :لا تحجين هيج اسم الله لا تفاولين عل الرجال ..ادعيلة .. وكومي صليلة ..

رشا :والله نذر علية اتحجب والتزم بس يطلع منها مهيمن ..

سهام :انشالله بس خل يرجع سالم باجر راح يغبشون يجون ياخذو .. واجي وياهم واجيب بناتي واجي هنا ..ابقة يمج ماعوفج .

رشا :شلون راح انام اني وهوة يتعذب ..

سهام :تكضي حبيبتي خلي ايمانج بالله جبير ..
يلة ديري بالج على روحج .. وابنج .. لا تنسيه

رشا: انشالله

سهام :يلة تحملي بس اليوم وحدج باجر اجيب هوستي واجي .

رشا :هلة بيج بس حبابة لا تتاخرين ترة احتمال اموت من الخوف .

سهام :يلة الله كريم بيباي .

رشا: عافتني ونزلت رحت لصوفي بدلتلة ونيمتة .. خطية اليوم مشافني .. ضليت حاضنتة ونيمتة بحضني....

ضليت اتخيل شلون اتصرف شسوي اذا صار على مهيمن شي حلفت اروح اكتلها بيدي ..

صارت تقريبا ب٤ الصبح ..
سمعت صوت دك الباب شلت صوفي من حضني ونزلت افتح الباب .. جان جاي سامر ..

سامر :السلام عليكم .

رشا :هلة سامر . . ها حتروحون هسة ..

سامر :لا دنتظر مقداد .. هسة على جية حتة ناخذة .

رشا :وابوية ميروح وياكم ..

سامر: لا يمعودة كوة قنعتة يبقة يروح يتعب ورانة طريق ومبيت وبهذلة .. وين بي حيل يروح يوكع علينة نحير بي بمهيمن ..

رشا :هم صحيح .. ماكتلي شحضر مااحضر غراض ..

سامر: لعد انتي لهسة محضرتي ..

رشا :ماعرف شحضر .. صدك وين سهام مو كالت اجي ويا سامر الصبح ..

سامر: يمعودة البنات يتمرضن مطلعهن هسة .. ب٧ هيج تجي هية وامي لتخافين محضرة صرة هدوم مبينة باقية يمج ..

رشا: انشالله بس مكتلي شحضر..

سامر: هدوم لبستين وداخليات .. وخاولي وصابونة يعني غراض سفر .. كلشي يصير ..

رشا :اكل تريدون ..

سامر :شنو السالفة ترة احنا رايحين كربلا مو للصين ..

واكو مطاعم وفنادق ترة مرايحين للجول.

رشا :وشبيك اكلتني غير بالي مشغول وياكم ..

سامر :ارتاحي واطمني ..

رشا :انشالله كمت فتحت الباب من سمعت صوت هورن .. طب مقداد وشايل جنطتة وياه ..

مقداد: السلام عليكم ..

ردينا وعليكم السلام ..

مقداد :ها يلة مكملين حتة نروح من وكت هم يلة قبل الازدحامات..

رشا: شنو متبدلون ملابسة . .. جان بدلتلة بس تدرون ميريدني اتقرب منة ..

مقداد :يلة هسة اطب احضرة .. منو يمة نايم ..

رشا: بس عمتي .. تالي الليل من رحت حتة تحضر غراضك كالت ماكدر اعوفة ..

مقداد: يلة لعد جيبيلي ملابسة خل احضرة ماريد نتاخر ..

رشا: يلة ...
رحت انطيتة ملابس ورحت ركض حطيت القوري وسلكت بيض ..وقسم طكيتة بدهن وسويتلهم الريوك ..

سامر: هاي شمسوية ولج منلحك نتريك ..

رشا: لعد تطلعون هيج ..

سامر: لا ناكل بالطريق ترة كلة طريق اكثر شي ساعتين ...

رشا: لعد خل اسوي سفري ...

سامر :يلة بكيفج ..

رشا :ع السريع لفيتة سفري وحطيتلهم الجاي بالترمز ..

اخذو مهيمن وطلعو وعمتي تدعي وتحصن بيهم من الطريق وتوصل سلام وياهم للائمة ..

درت مي بارد وراهم عسى يرجعولي بسلامة ..
ضليت اباوع للسيارة من مشت لحد مصارت نقطة واختفت ..اجتي سهام وامي طبن جوة واني ضليت اراقب ..

طبيت وطبكت الباب وراية وضليت منتجية عليها ..
بجيت بوكتها احس دموعي ناشفات .. مينزلت .. حتة عيوني تعبن .. اريد اشوف غوشن كعدت يم الباب وغمضت ..اريد اريحهن ..

حسيت على ايد تسحب بية حتة اكوم ..
كوة فتحت عيوني لكيت الشمس قوية وتضرب بالراس ..

سهام :بالله انتي مخبلة عاقلة نايمة هلنومة ..
والله لما الطفل اسمعة فاحط وانتي ماكو جان مااستفقدتج ..

رشا :مادري بس حسيت بتعب وردت اريح عيوني معبالي اغفة ..ماخابرو وصلو لو لا..

سهام :اي من زمان وصلو .. وحاليا كاعدين بفندق يرتاحون اشوية ويطلعون يزورون ويدورون على سيد قوي يكدر يعالج حالتة ...

رشا :مكالج سامر شلونة مهيمن ..

سهام :يكول نايم حتة الطريق كضاه نايم ميدري وين ماخذي وحتة ماسأل واول ماوصلنة هم رجع نام ..

رشا :سودة علية ... والله كلبي يوجعني عليه ..
رحت لتلفوني انتظر اتصال من احد ..
طلعت المحادثة مال مهيمن ويا سجى لكيتها دازتلة رسايل عتب ..
(ليش مجاوب لازم احد يمك )

(ولك ميتة عليك تعال وشبعني منك )

(شنو رأيك نتشاوف اليوم )

(ولك خبلتني ليش مجاوب )

( ترة راح اسوي شي ميعجبك اذا مترد )

(اوك ماشي براحتك )

رشا :طبعا الرسائل باوقات كلش بعيدة يعني بين رسالة ورسالة اقل شي ساعتين ..

شايفين من يكون عدوك حاط سجينة بركبة بحبيبك ومتكدر تسوي شي لان تخاف لا ينذبح بيدة ..

هيج جان شعوري اشوف شلون تسولف وي حبيبي وماكدر احجي لان اخاف تسوي شي لمهيمن ..

اريدة يتعالج بالكامل حتة اتخلص منها ..
......
مر اكثر من اسبوع واني حالتي حالة .. لا اكل ولا اهتمام ..ابني شبه نسيتة .. الة تذكرني بي سهام الي معافتني ابد .. وكفت وياي اكثر من اخت ..
جانت هية مهتمة بشغل البيت فوك حمل الجهال..

اما اني التزمت الصلاة .. وبس ادعي ..
يمكن لو قبل كم شهر لو واحد كلي راح تصيرين ملتزمة جان كتلة انت مخبل ..

مجنت اتصور بيوم من الايام اصير هيج .. السجادة متفاركني ..كلة في سبيل ربي يستجيب دعائي ويشفي مهيمن ..

جانو تلفوناتهم مغلقة .. محد يتصل .. بس نسمع الاخبار من ابوية .. انو وضعة صار اسوء ..

جنت اكضيها بجي على سجادة الصلاة واني اناجي ربي يرحم بحالنة ..
مجنت رايدة شي بلحظتها غير بس يرجعلي مهيمن ..
خل يرجع مثل قبل ميريدني بس ماريدة يموت ماريدة يتعذب ...

جنت اسمع شلون اوضاعة تصير من يبدي السيد يرقي بي ..من عياط وضرب وتقئ مادة لزجة وحتة يكول سامر سلابيح تطلع ..

بس وضعة كاعد يسوء .. والسيد يكول لازم الشغلة يرادلها صبر ...

واني صابرة ..ومؤمنة بقضاء الله .. بس عندي امل انو فد يوم يرجع مهيمن الي ..

الاسبوع صار شهر ... وبدة الدوام .. اخذت الة اجازة مرضية ومقداد خابر العميد حتة يكدر ياخذ اجازة مفتوحة لمهيمن لان محد يعرف شكد تطول شغلتة ..

جنت دائما افتح رسايل سجى .. بس مااجاوب.

هية سامعة انو هوة مسافر ويا سامر .. بس متدري وين ..لان عماد صاير مخبر الها ..

هذا هم يرادلة جلسة وحدة بس مو وكتها لان مهيمن وضعة اسوء من عماد ..

بدينا نداوم اني وريم الي صارت ثاني ..
ودائما اتهرب من اسألتها شوكت بابا يجي ...
جنت دائما ابررلها غير جواب ...لو تريد تسمع صوتة ..
اخلي ابوية يحاجيها ومن تسالة على صوتة يكلها مريض والجو بارد ..

جنت ابجي واني اشوف فرحتها من تسمع صوت عبالها ابوها .. جنت اتمنة اسمع صوتة ...

منعرف وضعة شنو .. ينطونة بس مختصر .. بس احس بي دايتعذب ..
احس كلبي بين فترة وفترة ينغزني .. احس مهيمن محتاجني واني مو يمة ..

جنت اداوم لخاطر مهيمن ماريدة يزعل. . ذبيت حملي بالقراية .. ولبست الحجاب .. لان جان هذا نذري لله حتة يشافي مهيمن ..

مر الشهر وصار كم يوم ..
وماكو خبر .. كلبي نار .. وعمتي ماخلت دعاء مادعتة ..ولا نذر .. حتة اذكر جانت كاتبة النذورة بورقة لان هواي ..واتكول اخاف انسة نذر ويصير بركبتي ..

فديوم كاعدين العصريات ..
لازمة السبحة بيدي وصافنة .. بفراغ ..
هيج جانت ايامي من راح مهيمن لهسة ...

جانت عمتي تثرم بصل وخضرة حتة تسوي كباب عروك ...

وسهام لازمة ابني الي نسيتة ونسيت مسؤوليتة ..
بناتها جانن يلعبن يمي ..

اندك الباب وراحت سهام تفتح ..
باوعت للساعة ب٤ ونص العصر ...

هيج وكت جية ابوية يجي يشوفني هوة وامي ..
دائما يجون العصر ..

واني دايرة راسي للساعة ...سمعت صوت هلهولة سهام ..
عمتي كامت وكلبت الغراض بكومتها ..

اني اتجمدت بمكاني جنت كاعدة يم باب المطبخ ..
درت راسي للباب باوعت سامر جاي وسهام حاضنتة ..

وكعت السبحة من ايدي محسيت بيها من وكعت..
احس جسمي خدر ..

نزلن دموعي واني اشوف ابو بيتي يمشي بطولة ..
راح شايلي .. واجة يتمختر بطولة ...

اريد اكوم ماكدر ...احس رجلي انشلت ..

كمت اتحسر بس اريد اكوم لحيلي ..اشوف عمتي ركضت عليه وتشابكو ووكعو بالكاع ...

اباوعلهم واني عاجزة ماعرف شبية ..
باوعلي وكام لحيلة واجة يمشي باتجاهي ..

كرهت روحي بهاي اللحظة ...
مدري شبيهن رجلية .. حطيت ايدي على وجهي وكمت ابجي ..

حسيت بايدة لامست ايدي .. مثل الكهرباء سرت بجسمي وبكل اطرافي ..

وخر ايدي من وجهي وكعد مقابيلي .. ابتسملي بتعب ..
جان وجهة ضعفان وكلش اصفر مو مثل قبل ابيض

مهيمن :مامشتاقتلي ..

رشا: اني هوة كال هيج اني طكيتها بجية وشبكتة ..
ضل شابكني ويشم بركبتي مثل قبل ...

وخرت منة ولزمت وجه بثنين ايدية اباوعلة وممصدكة هذا مهيمن رجعلي ..

رشا :ضعت بلياك ..

مهيمن :بعز شدتي واني اشوفج وياي .. طيفج مافاركني ....

رشا :مهيمن رجلي ماكدر اكوم ..
يمكن انشليت ... ممصدكة رجعتلي ..

مهيمن :ههههههه هاي من الفرحة كومي اني اشيلج ..

رشا :شالني ووداني بالهول .. والكل فرحان بوكتها ..
لزم صوفي وضل يبوس بي .. جان بوكتها هسوتة بادي يكبر وينشنش .. وخدود عندة لان الله يخليها سهام تجيب وتحط بحلكة مميات ..

سامر :راح يجيب عشة .. ماقبلت عمتي كالت اني اسوي .. بس سامر اصر لان يكول هاي فرحة من العمر ...

رشا :اباوع لمهيمن شلون شايل ابنة .. وريم مجلبة بركبتة ...

مهيمن :عيونة ..

رشا :شراح نسوي ..

مهيمن: اووووف الله كريم يجيج الصافي ..

........

[فيتامين سي]

قضية طلاق ..

بقلم Aseel...

بارت ٢٩ والاخيررررررر....
.......

مهيمن :الفترة الي ضاعت من حياتي ماجنت اعرف شلون مرت .. مااذكر منها اي شي .. مرات تجيني شرايط مامفهومة ...

الي ستفاديتة من الي صار هوة عرفت معدن رشا ..
وحدة غيرها جان تطلكت وعافتني ..

بس هية بقت وحاربت وصبرت ... في سببل متتخلة عني وماتتركني اتدمر ...

رغم الي جنت اسوي بيها بس هية ضلت وياي ..
ماعرف شلون اجازيها ..

لذلك قررت اخذ حقي بيدي ..
مااسمح لاحد يأذي رشا واسكت حتة لو جنت اني. ..

رجعت لسجى .. جنت احاول اتصرف طبيعي. .
طبعا هاي جانت الخطة من سامر ...
ورشا ماعدها علم بالي صار ماحبيت اقلقها ..

خابرت سامر ..

الووو ها سامر .. شلونك .

سامر :هلة بيك .. ها بشر لوين وصلتو .

مهيمن: بعد مفاتح وياها موضوع الطلاق ..

سامر :يمعود شمنتظر .. ترة عماد منتهي ..

مهيمن: انشالله بليل اكللها .. لان ترة اني الي لعبت نفسي من هلحالة .. يااخي مااتقبلها .. معدتي تكوم تكلب على درجة الانحطاط الي بيها هاي ..

سامر :اني ادري منين لفت علينا هلحية ..دمرت اخوية والله ..

مهيمن: كلشي محسوب حسابة بس خل اول شي نخليها تتطلق وتتنازل عن كلشي ..

سامر :اخاف متقبل تعوف غايبها هاي طماعة ..

مهيمن :اني اقنعها .. احاول اقشمرها بفد شي ..

سامر: الله يسهل انشالله .. بس دير بالك تكول لرشا هاي تضل تزن براسك وتخليك تبطل كلشي ..

مهيمن: هههههه لا توصي حريص .. يلة سلمنة .

سامر :يوصل في امان الله ..

ميهمن :ختمتة منه ورحت راسلت سجى ..
اتفقت وياها انو نتصل كامرة بليل ..

سديتة منها وحاير شلون اخابرها بليل ورشا موجودة
هاي تفضحني ..

رحت لسامر للبيت ..

سامر :ولك هستوني جنت اخابر بيك .. شجابك ..

مهيمن: هي هاي التفضل مالتك ..

سامر: هههه مو غريب انتة حتة اكلك تفضل .. البيت بيتك ترة ..

ميهمن: تسلم حبيبي... بس اريد منك شغلة ..

سامر :كول عيوني الك ..

مهيمن :اريد منك تجيب ام زهراء وتجونا ..

سامر: ليش شكو .

ميهمن :مو اتفقت ويا سجى تفتحلي كامرة .. اريد اسجل كلشي ..واخاف لا رشا تطب علية وتخرب الاول والتالي ..

سامر: زين احنة شكو جايين .

ميهمن: مو حتة سهام تبقة بالغرفة وتبات وياها .. واني بحجة مرتك يمنا انزل انام جوة ..

سامر :واني شنو ذنبي انحرم من مرتي ..

مهيمن :عمي عود تعال بات انت هم ..بس فضنا شكلت

سامر :والله هية فكرة حلوة بس تضوج ..
يلة ب١٠ نجيكم ..

مهيمن: ولك يا ١٠ .. هوة اختك تنام ب٩ ..

سامر :ههههه دروح هسة ونجي وراك خل نتحضر نكول لاهلي ..

مهيمن : اوووف .. ترة حدك لل٥ اذا ماجيت اجي اسحلك انت وياها .. مو تكول ماكلت ..

سامر :عمي والله جايين انشالله وراك بنص ساعة نجي بس خل نحضر اوضاعنة ..

مهيمن: يلة ماشي اخيك اني .. ترة تورطت ونسيت رشا استخبارات وماكدر اكعد بحديقة ..

سامر: عمي والله فهمنة .. جاييييين اعيط بعد .

مهيمن: ههههه لا ميحتاج سمعت ..
رحت من يمهم للبيت ..

طبيت واستقبلتني حبيبتي .. صايرة تخبل من سمنانة ..

رشا :هلة الله يساعدك .

مهيمن: ويساعدج .. بستها وطبيت سلمت على امي .
ها شلونكم .

ام مهيمن: هلة يمة هلة شلونك يبعد امك ..

مهيمن: الحمد لله .. مددت على رجلها وتلعب بشعري ..

اكوول يمة ..

ام مهيمن: كول يبعدها لامك ..

مهيمن: غالية .. يمة ادعيلي ايصير الي ببالي ..
باوعت كبل لرشا ..

شفتها رفعت تك حاجب .. ونزلت راسها ونظرها بعدة باتجاهي ..كانما تكول شنو هاي انوب ..

ام مهيمن :الله ينطيك على كد نيتك ..

مهيمن: لا يمة جفصتي بالسالفة كلها .. اذا على كد نيتي فنيتي. تعبانة .. (طبعا احجي بكلبي )

ام مهيمن: بس مكتلي ييمة شنو الي ببالك وتريدة يصير .

مهيمن: يجي وكتة يمة .

شفت رشا دخنت وطلعت ..
كمت وراها .. شفتها طبت للغرفة رحتلها ...
حضنتها من ورة واهمس بركبتها ..

شبي الحلو ضاج .

رشا :مابية شي ..

مهيمن: يابووية ... كل هذا الدخان وتكولين مابية شي ..

رشا: كتلك ماكو شي وخر ..

مهيمن: درت جسمها علية .. حطي عينج بعيني وكول مابية شي...

بس صفنت بية دمعت عيونها ..

ليش تبجين متكليلي ..

رشا: انت شنو الي ببالك .. هم حترجع مثل قبل .. ترة مابية حيل..

مهيمن: رشا اني كلشي مراح اكولج .. غير بس كلمتين ..
رشا انتي تثقين بية ..

رشا: هذني اربعة اذا احسب اسمي كلمة وياهن ..

مهيمن: هههههه لا بس همة هيج يكولوها ..
هسة كليلي انتي تثقين بية لو لا ..

رشا :صفنت بعيونة وتذكرت الي سواه بية ..
ماكدر مهيمن .. الي صار مو هين ..

مهيمن :يعني شلون نكضي عمرنا بالشك .. اذا متثقين بية ليش باقية وياي اني خاين وكلب ابن كلب ..

طلعت وطبكت الباب وراي ..
رغم الي صار والي تعرفة بس بقت متخوفة مني ..
مالومها .. اي شخص بمكانها يسوي الي سوتة .. ويجوز اكثر ..

بس اني ماكدر اتحمل ماتثق بية .. .
لازم انهي هاي السالفة ماابقة طول عمري اعيش واعيشها بشك ..

ضليت جوة ماصعدت بعد للغرفة حتة ماحاجيتها .. صارت تقريبا ب٤ اجوي سامر وعائلتة ..

بين سوالف وضحك وعشة مر اليوم ..

مهيمن: سامر خل البنات ياخذن راحتهن بالغرفة واني وياك ننام هنا ..

سامر :يمة مريتي ياخذوها مني ..

رشا: وشدعوة عيني .. ترة هية الايام كلها يمك ومابقت على هليوم ..

مهيمن: يمعود خل ياخذن راحتهن .. غمزتلة بس ولا فاد .

سامر: لا عذروني اني مانام دون مرتي ..

مهيمن: احس اذني دخنت من الاعصاب ..وكوة كاتم غضبي .. سامر شنو السالفة .. شافني فتحت عيوني ..

سامر: يلة هلمرة سماح .. بس غير مرة لا والله نجي سوة انام سوة نروح سوة ..

مهيمن: يلة رشاوي .. جيبيلنا فراش وانتو صعدو الجهال فوك ..

رشا: ماشي كايمين اخذووو راحتككمممم .

مهيمن :وشبيج عيني انغثيتي ..

رشا :وعلى شنو انغث ... يلة كومي سهام ..

مهيمن :طلعت رشا بس مبينة شاكة بشي ..
ضلينا نسولف اني ومهيمن سوالف عادية بين مكملو الفراش وسدينا الباب ..

انت وتالي وياك متبطل شقة ..

سامر: ليش شسويت ..

ميهمن: يعني لما جيتك واتفقنة تباتون حتة سهام تنام يم رشا ..

ليش تخليني هسة اكوم اشتم سابع جد .بيج قصص عراقيه حقيقيه من واقعنا.روعه الطائي
سامر :هههههههههه والله اموت ضحك على منظرك من تتعصب تصير هيج احمراني .وعيونك يطلعن ..

مهيمن: يمعود اني على اعصابي متحمل هاي البلوة ..
والله تجيني ساعات اريد اروح اسحلها وكطعها تكطع..

سامر: يمة يمة صاير عنيف .. معرفتك هيج قاسي اوووي .

مهيمن: سامر بلة شقة ..ترة روحي طالعة اني

سامر: ههههه يلة اوك . بس شراح تسوي ..

مهيمن: اول شي روح انت شوف الوضع نامو لو لا حتة نأمن الوضع مو بنص السالفة ووحدة منهن تنبص ويانة وتخرب الامة .

سامر :ومتروح انتة هوة بيتك لو بيتي ..

مهيمن :شكد شفت اغبياء مثلك مشفت .. غير مرتك نايمة فوك شلون اروح .

سامر :ها هم صح ... اعذرني والله الفراك ياأذيني ويخليني ماعرف اشوف درب..

مهيمن :غير يكعد مجنون ليلى .. دمشي فضنة يمعود ..

راح سامر يأمن الطريق .. واني راسلت سجى ..

الووو موجودة ..

سجى: هلوو موجودة حبيبي جنت انتظرك .

شلونج

سجى: زينة انت شلونك

.....
اجة سامر ..

ها بشر امان لو لا ..

سامر :امان بس هم نصي صوتك لا وحدة منهن تكعد وتجي تتصنت .. ترة هذني جنيات ..

مهيمن: تعلمني باختك ..

سامر: يلة كمل سوالفك بين مااكلب بالفيس اشوية ..

مهيمن: رجعت راسلت لكيتها دازتلي ..

سجى: الووو وين رحت ..حبيبي .

الو ها وياج بس رحت جبت جكايري ..

سجى :اممممم

مهيمن: شكو

سجى :لا ماكو شي بس كلش مشتاقتلك ..

مهيمن: (حسيت بقرف من روحي من اجاوبها .) اني هم مشتاقلج .. يلة افتحيلي كامرة اريد اشوفج حبي...

سجى: ثواني خل اصعد فوك واتحضر ..

مهيمن: اجة ببالي نور .. هم جانت تحجي هيج . هم جانت تتحضر ..

جنت ممقصر وياها .. ولا هسة عماد مقصر ويا سجى بس ليش تدور غيرة .. شنو هلطمع ..

اجتي كالت ..

سجى :جاهزة يلة اتصل ..

مهيمن: بس اكلج اني ضلمة يمي ماكدر افتح الضوة

سجى :عادي بس انت شوفني ..اهم شي اروي عطشي بصوتك ..

مهيمن :بسرعة دفرت سامر الي جان نايم جوة رجلي ..

سامر: ولك شكووو .

مهيمن بسرعة افتح تصوير بجهازك راح افتح كامرة

سامر: وقبل اشوية كتلي اني غبي .. ولك بابا اكو برنامج يصور الشاشة فيديو ..

مهيمن: لا بربك .

سامر: والله .. تعال خل اسوي الك .

مهيمن: اخاف يطول ..

سامر: خليها تستوي .. حتة تصير احلة ..

مهيمن :سوالي البرنامج وهاي خبصتني بالرسايل ...

سجى :وينك شنو بطلت ..
الووو وينك ليش متجاوب .

جاوبتها ..
هياني جيت جنت اجيب شاحنتي جهازي صفر شحن .

سجى: اممممم يلة اتصل محضرتلك مفاجأة ..

شنو هية ..

سجى :اتصل وشوف ...

مهيمن :صحت سامر شغلي التصوير .. واني اتصلت .
ردت بصوت مايع يكرهني بشكو انثى ..

سجى: الوووووو ..

مهيمن :هلوو .

سجى: اروح فدوة لهلصوت .

مهيمن :يلة افتحي كامرة مشتاق اشوفج ..

سجى :اوك ..

مهيمن :هية فتحت واني جنت حاط اصبعي على الكامرة الامامية . ماريد وجهي يطلع ..

فتحت الكامرة وراحت وكفت بعيد حتة تشوفني شلابسة ..

ماكلكم شكد كرهت روحي لان حجيت ويا هيج وحدة رخيصة .. اباوعلها شلون تستعرض واني اتخيل نور ابدالها ..

كوة ضبطت اعصابي .. اجة ببالي عماد .. هم مثلي من جنت غشيم ..

عايفها زعلانة يم اهلها وهوة مخلة شي مسواه حتة ترجعلة .. حتة باس ايدها ..

اكوول حبي ..

سجى :كول حبي .

مهيمن: الى متى نبقة هيج .. ترة بعد مااصبر ..

سجى :وشنو الي تريدة .. كول واني اسوي .

مهيمن: اريدج الج ..

سجى :واني تحت امرك شوكت متريد اجيك بس انت متقبل ..

مهيمن :شكد جانت بنظري رخيصة بس هسة نزلت اكثر ..

لا اني ماريد حرام .. اريدج مرتي ..

سجى: بس ميصير اني متزوجة شنو نسيت ..

مهيمن: اتطلكي منة واني اساعدك .

سجى: لا يمة واعوف عماد ..

مهيمن: شنو تحبي ..

سجى :لا اييع شنو علزعطوط احبة بس مثل متكول هذا حاطتة جوة ايدي للزمن اخاف اعوفة والزمن يشمرني بيد الي يسوة والي ميسوة ..

مهيمن: اطمني من هلناحية .. اني انطيج وعد .. شتريدين اسوي .. حتة تثقين انو بس تتطلكين اني اتزوجج..

سجى :امممم اي شي اي شي ..

مهيمن: اي شي ..

سجى :اوك اذا هيج .. اريد تسجل بيت من بيوتك باسمي واشوف العقد يلة ..

مهيمن :يرخصلج البيت وصاحبة ..جنج على بيت .

سجى :اوووي فدوة لحبيبي..
ترة اني ماابالي فلوس لو شي بس اريد اضمن حقي ..

مهيمن :لعد انتي مو اول مزعلتي ردتي تطلكين ..

سجى :والله جنت عصبية ولحظة غضب مافكرت بالمستقبل .. بس زوج امي فهمني وقنعني ابقة ويا ..

مهيمن :امممم امبين يفتهم رجل امج ..

سجى: ايييي كلش ... اوووف ..

مهيمن :شكو جريتي حسرة صاير شي ..

سجى :لا مصاير .. بس هيج ..

مهيمن :هسة المهم باجر تطلبين طلاق واني ابدي بمعاملة البيت ..

سجى: ماشي حبي ..

مهيمن: يلة حروح اني ..

سجى :وين بعد وكت لعد المن متحضرة اني ..

مهيمن :اممممم لا دشوفج عبالي نسيتي ليش متحضرة ..

بدت تسوي حركات وتسولف سوالف علاقة ..واني اسجل ..

جنت لازم اعصابي كوة .. المفروض غيري ينسجم من يشوف هيج شي خاصة هية جسمها مثالي .. بس ابد مااثرت بية ... لان جنت اشوف عماد بعيوني ..

ولمصلحتة لازم اخلصة منها ...

كملت وسديتة منها ..

سامر :ماجنت متصور بقمة الانحطاط هاي ..

مهيمن :اوووف ادعيلي بس الله يصبرني .. وماافضح روحي لان واصلة حدها ..

سامر :تعال كلي شنو سالفة البيت بس لا تريد تسويها صدك ..

مهيمن: هية هاي العايزة اسجل بيت من تعبي للكحاب ..

سامر: لعد شلون ..

مهيمن :عادي اسوي عقد مزور .. مو فد مشكلة ومبينين الجماعة ثولان واهم شي عدهم الفلوس ...

سامر :الله يكضيها على خير من دون خسائر ..
مهيمن :انشالله ..

بعد مدة عرفت طلبت الطلاق .. واكيد حاولت اقنعها تعوف كلشي وتتنازل على الغايب مالتها حتة تخلص بسرعة واني اعوضها ..

ماصدكت لحد مشافت العقد بيدي ووعدتها بس تتطلك يصير العقد الها ..

اطلكت سجى من عماد ..
وهسة صار وقت انتقامي منها ...

المشكلة مو هنا المشكلة اني اعرف الي تتطلك تلزم عدة .. بس هاي ولا كانو .. اصلا صارت اجرء من قبل... وهلشي ساعدني هواي بالتسجيل..

بعد مدة واعدتها حتة بشقة صاحبي ..
طبعا هية قبلت كبل .. بس فهمتها انو اعقد عليها هناك اول شي ..

جنا ننتظر اني وسامر ...
دكت الباب ورحت فتحتلها ...

طبت جوة وشافت سامر كاعد على. ..التخم

سجى :مهيمن .. هذا شيسوي هنا ..

مهيمن :غير لازم شهود على العقد

سجى: وملكيت غير هذا تجيبة ..

سامر: وشبي هذا معاجبج ... اصلا المفروض تكيفين حماج موجود .. حتة يشهد على سوالفج ..

سجى :كامت ترجف ..ياسوالف ..

مهيمن :رحت قفلت الباب هية تعيط ..

سجى :وخر افتحها شدسوي ..

مهيمن :لو تعيطين منا لباجر محد يسمعج .. محد غيرنا يسمعج لان الشقق معزولة عن الصوت .. يعني لو تلطخين راسج محد يدري.

سجى: انت تخبلت .. جانت تحجي بهستريا ..
وخر حيوان اني صوجي اجيت ..

مهيمن: رحت جبت صوندة يابسة ...من هاي الي تعجب الامهات ..

شافتها وشهكت وكامت ترجف ...
سجى :هاي شدسوي ... اياك تلزمني والله اكلبها كلاب ..

سامر :اي ويابة شسوين هم تسحريلنا ..

مهيمن: اباوع عليها كامت تنطي الوان ..

سجى: ياسحر .. اني ماعندي هاي السوالف ..

مهيمن: لا يابوي .. ضربتها على زندها شاغت روحها ...

احجي ليش هيج سويتي ...
شنو جان ناقصج وخربتي حياتي ..

جانت ساكتة زبس تشهك من الضربة ...
ضربتها مرة ثانية على فخذها ..

عاطت بكل حيلها ...

سجى: لاااا حباب كافي ...والله مجبورة ..والله مجبورة ..

مهيمن :غمزت لسامر الي جان بس صافن ويباوع عليه ..انتبهلي ... معناها افتح كامرة وسجل ..بدون متدري .

احجي شنو الي جبرج احجي ..

سجى: اريد اخلص من رجل امي اريد اخلص منة كلت ماكو غيرك يخلصني ..انت عندك قدرة تسافر لاي مكان اذا تريد ..

مهيمن: ليش عماد شناقصة ...

سجى :ناقصة فلوس .. كلشي ناقصة .. اصلا غلطة عمري اتزوجتة .. واحد زعطوط ميفتهم كلشي ..ههههههه هوة حتة ميعرف البنية من المو بنية ...

مهيمن: فتحت عيوني .. شلون يعني انتي جنتي متزوجة قبل ..

سجى: لا طبعا ..

مهيمن: لعد مافهمت شنو مو بنية يعني انتي مو بنية ..ضربتها حيل على رجلها ... احجييي لا تكفريني..

سجى :اخخخخ كافي تضرب والله احجيلك. كلشي بس لا تضرب ..

مهيمن: احجي لعد ..

سجى: لا مو بنية .. وعماد لان جان اعمى ماعرف بية .. جان همة بس يتزوجني ..

مهيمن: شنو مو بنية ..

سجى :ههههههه يعني وحدة عايشة وية واحد سكير ونسوانجي .. تريدني ابقة بنية واحافظ على نفسي..

مهيمن: يعني رجل امج ..عندج علاقة وياه ..

سجى :غصب والله غصب .. ردت بأي طريقة اتزوج واخلص منة .. انت شايف شنو شعور وحدة يغتصبها واحد .. وعايش وياها بنفس البيت ..

لو من يكمل من امي يجي علية .. وريحتة كلها عرك ...تدري شنو حالتي من يخلص مني .. تدري شكم مرة حاولت انتحر ..

والله ماجنت هيج .. بس امي جابتة النة ماعرف منين ..

مهيمن :وماكلتي لامج مارحتي لعمامج ...

سجى :ومنو يصدكني من عمامي .. اذا امي بيوم الي كلتلها يتحارش بية شبعتني كتل وحاولت تحركني لما هوة وكفها ..

وراها هوة هم كتلني .. تعرف شنو شعور لذل .. متعرفة لان عمرك مراح تعيشة ...

لو هسة من تطلكت ..

مهيمن: كامت تشهك حيل ... عطت بيها ..
احجييي كملي ..

سجى :شتريد اكمل .. هاا كلي شتريد .. تريدني اكلك كام يجيب اصدقائة حتة ينامون وياي .... هيج تريد تسمع ..

عرفت ليش كاتلة روحي على الفلوس .. اريد انهزم اريد اعيش بكرامة .. ولك صرت موزينة بس حتة واحد ياخذني وينطيني فلوس اسافر بيهن ..

مهيمن: الصراحة اشفقت عليها .. حياتها مو سهلة ..
ويجوز هواي مثلها واكثر .. بس هذا ميبرر الي سوتة بينا ...

شوفي سجى راح انطيج فلوس بس اريدج تختفين بيها من الوجود .. بس اريد يكون بعلم اهلج .. مو عبالهم خاطفيج ..وين متريدين تروحين روحي .. المهم مااشوف وجهج ..

وشغلة ثانية كل مكالمة .. وكل محادثاتج وياي مسجلة وحتة هذا اعترافج ... سجلتة ..

يعني بس اسمع بيج بديتي تتحارشين بواحد من معارفنا حتة لو عماد .. كبل هلفيديو لعمامج ..

سجى: والله .. يعني حتنطيني فلوس اسافر بيها ..
والله ماتشوف وجهي .. بس اسافر اني الي ماريد اشوف احد بعد ...

اسفة على كل الي سويتة وياكم بس والله من ضيمي ..

مهيمن: ترة مو محبة بيج راح اعوفج .. بس اني بشر وعندي ضمير .. وضميري ميسمحلي اأذيج اكثر مما انتي متأذاية ..

باجر اخابرج وانطيج موعد اسلمج فلوس بيها ..
بس على اتفاقنة .. مااشوف وجهج بعد ..ماااااشي عطت بيها ..

سجى: ماشي والله .. ممنونة منك

مهيمن :نزلت تبوس ايدي .. دفعتها .. مو لخاطرج لخاطر بيتي ماريد اهدمة

فتحتلها الباب وراحت تركض سديتة وراها واجيت كعدت يم سامر الي جان ماخذ الوضع الصامت ..

هااا خيرك الصفنة مو الك ..

سامر :والله مادري شكول بس شغلة تعجب .. يعني شلون امها متصدك بيها ..

مهيمن :والله صعبة حياتها جنت ناوي اشوهها بس من حجتلي سالفتها ... تندمت لان ضربتها ...

سامر: لا هية تستاهل الضرب .. بس الي عجبني عماد .. شلون ماعرفها بنية او لا..

مهيمن: انت مو سمعتها تكول جان اعمى .. احتمال هية سوتلة شي خلتة ميشوف ..

سامر: اكول اشو سوالفك صارت مال نسوان كلة بالسحورة تحجي ..

مهيمن :هههه ليش الي صار ويانة قليل ..

سامر :والله الله يساعدكم ...

مهيمن :رحت للبيت وحضرت مبلغ زين .. صح جبير بس لازم اسوي شي حتة تبتعد .. هسة اني اكدر مااساعدها واهددها وغصبن عليها تعوفنة بس غيرتي متسمحلي بعد الي سمعتة ..

مهما يكون تبقى مكسورة .. لا اب ولاام براسها خير .. وباقية للجلاب تنهش بلحمها .. مااصير اني والزمن عليها ..

صح هية غلطت هواي واغلاط ماتغتفر .. بس لو مامجبورة متسوي هيج ..
ثاني يوم واعدتها ورحت واني وسامر انطيناها الفلوس .. وضلت تتشكر منا ووقعت على تعهد انو متتقرب من اي احد من العائلة ..

رحت للبيت واني بالي مرتاح .. هسة اكدر ارجع لحياتي بدون قيود او واجبات .. لازم ارجع انظم حياتي ..

......

رشا :بعد الي صار ويا مهيمن رجعت حياتنا حلوة .. بس مهيمن جان اشوية يتصفن ..

واحس اكو غموض بحياتة ..
جنت متضايقة من تصرفاتة .. ومرات اشك ..
ويتعارك وياي .. بس مو بيدي . الي صار وياي خلاني افقد الثقة ..

طبعا سامر سولفلي بعدين كلشي صار ويا مهيمن وحلفني مااكولة شي الة هوة يفتح وياي الموضوع ..

فعلا بعد مدة صارحني مهيمن وسويت روحي متفاجأة عود ...

شكد كرهت روحي بوكت الي شكيت بمهيمن ...

.......

بعد مرور ٣ سنوات ..

رشا :مهيمن دكوم حباب ماضل وكت كوم وصلني للصيدلية راح اتاخر ..

مهيمن :اهوووو ولج اليوم مجاز ماعندي دوام ..روحي وحدج ..

رشا :اووف مهيمن يومية نفس الحجي دكوم عاد ياعيني ليش تسوي هيج بية يعني انت مجاز مافكرت منو يوديني ..

مهيمن: عوفيها اليوم لا تفتحيها الصبح اني عود بشفتي افتحها العصر

رشا :مهيمن اني نازلة اسوي ريوك هدومك محضرة عود ..
عفتة ونزلت ..
يومية هاي العركة .. ميقبل يوديني للصيديلة الي فتحناها اني ويا.. اني الصبح .. بوكت الي هوة يكون بالجامعة .. وبعدين نرجع الظهر ويا رجعتة يرجعني .. نتغدة ويرتاح ويرجع يفتحها العصر ...

صار عندي ولد ثاني اسمة مؤيد .. مدري منين جابة مهيمن هذا الاسم يكول يوالم اسمي ..

سهام حامل حاليا ومندري شنو بيها ..

امي وابوية الله يحفظهم ويطول بعمرهم بعدهم بنفس طيبتهم .. وعمتي كذالك

عماد .. هذا جان حالتة حالة .. حتة بعد مااتعالج من سحر سجى وعرف الي سوتة بينا....بس بعدة لهسة يبجي عليها .. يمكن جان يحبها صدك .. بس هية ضيعتة من ايدها ..

لحد هسة رافض فكرة الزواج .. وضال يدور عليها الي اختفت ومحد يعرف وينها .. كل الي يعرفوه انو هية سافرت ...

ولهسة مامل من البحث عليها .. حبة غريب .. رغم ماانطتة شي .. بس هوة جان منطيها كل روحة ..

حتة كمت اضوج اروح لبيت اهلي بسببة .. اشبع قهر .... من اشوفة مكابل صورة عرسهم وصافن بيها ويبجي ..
اتمنة فد يوم يلكة حب حقيقي ..
ويرتاح وياها ...

لهنا وتنتهي قصتي ..

انشالله تعجبكم ..واكون خفيفة عليكم ..
قصتي يجوز لبعض يكول خيالية وماكو هيج شي ..
بس اني اكول اي اكو وصار وياي ..

كل واحد الة حياتة .. وكل واحد عندة معاناة وقصة بيها الف عبرة ..

ادعولي الله يوفقني بحياتي .. ويحفظلي اولادي وزوجي..

اودعتكم في امان الله ...

مع السلامة ..

......

وجااان تخلص القصة .. اتمنة عجبتكم ..

تحياتي ..Aseel..

انتظروني بقصة جديدة ..

احبكم ..

[Topaz.]

[الزمن القديم]

القصه جميييله بس العنوان ظلم القصه ..

[ندى تدى]

رائعه وجميله جدا جدا



شكرا حبيبتي ويعطيك العافيه