|
هذيان بين جمر وجليد الفصل ٥٢ نورا ناصر - لايگـين لبعض ترا بگـد مآ يلوگ الگيمر بحضن ڪاهيه . مهيب .. انصدمت من كلامها شمرت البطانية وكمت معصب وجهت الها كلامي بحدة على كيفج عمة شنوو هالحجي هذا ؟ لو انتي بس تردين الحجة علينا ؟ وبعدين ريلام وينها ووين راحت اني الصبح رحت عليها للكلية كالو ممداومة .. عاطت شنوو شون شون ممداومة لك اليوم هيه من الصبح راحت لدوامها .. بس اني كشفتك انت واحد عوينجي ولا تعرف حلال الله ولا حرامه ومخلي عينك عليها وهيه تعتبر اختك .. عصبت صرت احس النار تمشي بشراييني كتلها عمة بالله لا تخليني اتجاوز عليج هسه شنووو هالحجي هذا ؟ اشو محملة هواي وهاي مال اختك نكعيها وشربي ميها ريلام مووو اختي وللمرة الاولى والاخيرة راح اكولها الج وهسه من رخصتج اروح ادور عليها ماعندي وقت اضيعه وياج سديت المكالمة وياها غيرت ملابسي واني اغيرهم كل شويه اخذ تليفوني ادك رقمها ماكو بس هو مغلق ركضت طلعت من البيت سقت السيارة اجت على بالي هواي امور ، هيه جانت تعبانة البارحة كلش ومن صوتها مبينة باجية هواي .. خاف راحت لبيت رحاب !! وعمتي فاتها تخابر رحاب لو على بجيها مال البارحة اكيد اكو سبب واكيد رحاب تعرفه .... طلعت التليفون وخابرت رحاب حاجيتها .. جاوبتني بقلق وكالت مو يمها .. كتلها ترة البارحة هيه جانت تعبانة متعرفين شكو وشصار بيها هيه وعمتي ؟ كالت بارتباك ها اي متعاركة هيه وهيام على شغلات تافهة بعد خوات بيناتهن كتلها لعد وين راحت ريلام واذا عركة تافهة بيناتهن يخلي ريلام تترك البيت وتطلع ؟ ريلام ماتسويها اكو شي جبير احجي رحاب اذا تعرفيه حتى اتصرف .. عزااا مهيب خاف اختي انخطفت .... عطت بيها معصب سكتي سكتي شنووو هالحجي عفية مهيب شووفهه وين عفيييية مهيب اختي الله يخليك روحي هسه روووحي خلي اخابر ابو الخط مالتها امج خابرته لوو لا ؟ متعرفين ؟ كالت لالا ماعدها رقمه لعد هيه ليش خابرتك عمود بلكي تخابر على ابو الخط مالتها ولج هيه اول مافتحت خط استلمتني سوتني ساقط وممتربي وبعد شويه تسويني اني نفسي الشيطان بجلالة قدره بس متنكر شسوي يامهيب ام قلقة على بنتها شتريدها تسوي .. اعذرها اي اي اقنعيني عود اصلا هيه امج السبب لا تخليني ابلش هسه هيه لو حريصة تاخذ رقم ابو الخط ... وتحسب حساب هيج شي ... اي يمكن غفلت او فاتها هذا الشي شمدريها .. ماكو شمدريها وماكو غفلت هيه ام المفروض تكون حريصة عليها وتعرف كل تفاصيلها ويله هسه اشطحي خلي اخابر ابو الصخام .. حباب لمن تعرف طمأني .. خوووش .. سديته منها وخابرت ابو الخط .. اني اعرفه واني الي خليته الها رجال كبير بالعمر وسمعته طيبة .. لمن حجيت ويا كال خابرتني وهيه بالكلية الظهر رحت عليها وديتها لبيت عمك حسان هيه طلبت مني .. كتله تمام ماقصرت .. فريت السيارة وتوجهت لبيت عمي حسان .. رحاب خبصتني خبص بالمكالمات .. رديت عليها كتلها لكيتها بمكان امن لتخافين عليها .. كالت وينها عليك الله .. كتلها بعدين بعدين روحي هسه وطمني امج خاف تريد تطمأن عليها .. وسديت الخط .. ماردت اكول الها وين هيه حتى لا يجون ردت انفرد بيها واحجي وياها واعرف شصاير .. خابرت على عمي حسان تليفونه مغلق احتاريت كلش وخفت عليها اكثر .. وصلت لبيت عمي ونزلت من السيارة رحت اركض وصلت يم الباب شفتهه كاعدة ورى الشجرة حاضنه رجليها لصدرهه ومخلية راسها على ركبها ومغمضة عيونها .. كرفصت يمها وخليت ايدي على راسها ، فتحت عيونها حمرة ومتفاجئة بيه .. ريلام .. قبلها كعدت الصبح لبست وداروح للكلية حتى مالي نفس اتريك وعيوني مورمة حتى خليت كحل بلي يضيع الورام مافاد وياهن .. ماكدر مااداوم اليوم لان اذا اظل بالبيت من صدك اختنك .. توة نازلة من الدرج صار مقابيلي ماما .. همست بغصة صباح الخير كالت صباح النور ... تعالي وياي للغرفة عندي حججي وياج .. كتلهه بتوسل ماما الله يخليج فدوة اروحلج والله مابيه حيل مشاكل من الصبح كالت بهدوء امشي وياي مو مشاكل عندي حجي اسمعي مني اني امج وتعلمي تطيعيني كافي خبال لزمتني من ايدي ووجهتني صوب غرفتها ، فتت وهيه ورايه فاتت وسدت الباب وراهه .. كالت سمعيني ماما اني اليوم من الصبح حجيت ويه جدج يخطبج لواحد من اولاد عمج احسن انصدمت عزااا ماما شدتحجين ؟ شنو هاي عناد لوو شنوو ترة والله مهيب وخالو يكلبون الدنيا وبعدين مو عيب ترخصيني بهالطريقة جدو شيكول عني طالعة عن الطريق ؟؟ كالت اشش ولا حس اسمعلج ولا نفس الي اكووله يتنفذ مفهوووم ولج والهم عين يحجون مو كافي جاي اتعير بسببهم مسمعتي البارحة بيبيتج شون عيرتني بطردة خالج من البيت ماما ترة بيبي من قهرها هيج حجت وله هيه ماتعيرج بس انتي جنتي قاسية ويايه ولج عوفي بيبيتج هسه الناس شتكوول عني ؟؟؟ اذا عرفوا بيج تحبين مهيب ولج الكل يعرف هو اخوج بالرضاعة لا مووو اخويه خوووش مووو اخويه مية مرة اكوولهه ولج شمسوويلج وغاسل دماغج عزااا لايكوون بعد مسوويلج غير شي احجيي شمسويلج بعد واني مادري عزااا ماما صدددك تحجين انتي ؟ ع الاقل اذا ما الج ثقة بيه المفروض الج ثقة بخالو وتربيته اخووج انتي تدرين كولش زين هم مايتدنون للحرام بس انت مووو طبيعية والحقد عمى بعدني ممكملة ضربتني على وجهي وعلى راسي ، وكعت كتبي والملازم مالتي بالارض وشالي تخربط وملابسي .... ظليت ابجي بقهر وحركَة دنكت بانكسار والم ، لملمت كتبي واني اشهك واناشغ وهيه تدردم عليه طلعت من غرفتها ورحت وكفت يم البيت واني امسح دموعي وانتظر ابو الخط لمن اجه صعدت وياه واخذنا للكلية ، كعدت بالاخير بدون مااحجي ويه احد بس سلمت وفتت وصلني للكلية ماشفت اي وحدة من صديقاتي ولا حضرت اي محاضرة بقيت افتر بغير كلية وافكر بلي كالته ماما اكيد جدو هسه يسايرهه ويجبروني واني ماريد غير مهيب وهالوضع كلش صعب وماريد تتوتر الامور اكثر امي مهما كانت قاسية ويايه هيه تبقى امي بس ضايجة من بيت خالي ، شلون اذا من صدك جبرتني اتزوج وتصير مشاكل فكرت اخابر خالو شرار يحجي وياهه بس هيه اصلا مترد على اتصالاته شكد يخابر مترد ماكو غير خالو حسان اخابره واليوم يحل هالمشكلة قبل لا توصل وتصير كلش خابرته جهازه مغلق ... حسيت روحي بدوامة ودخت كلش دخت ولو اموت ماارجع للبيت بعد الي سوته بيه ماما الصبح ، طالبة كلية اني انضرب قبل لا اطلع لدوامي ليش يا ربي والله ظلم هذا .. صار الظهر اني بالكلية خابرت ابو الخط وكتله يوصلني لبيت خالي هو يندله واصلا هو يعرف خوالي ومهيب ويعرف عائلتنا .. نزلت دكيت الباب مافتح الي بعدها رفعت راسي ليفوك انتبهت الباب جان مقفول بقفل .. اكو شجرة بصف السياج مال بيته ويمها زرع شويه عالي ، لميت روحي وكعدت وراها وارتكيت ع السياج وماحسيت بنفسي لمن غفيت لان صداع موتني ودوخني جنت افتح عيوني واكعد واسمع اصوات سيارات تفوت بس احس مالي طاقة لكل شي واريد اعتزل الدنيا كلها تفاجئت واني غافية بمهيب كدامي وصايرة دنيا المغرب فتحت عيوني بفزع شجاب مهيب هنانه اكيد هسه قلقانين عليه ويدورون عليه وخابصين الدنيا صخاام شسويت اني!!! همست بتعب مهيب شجابك كال انت شعندج هنا انتظر خالو عندي حجي وياه هيه هاي سوايه تسوينها ... كووومي .. لزمني من ايدي وكومني طلع مفتاح فتح باب البيت وتليفونه ماسكت .. جاوب كال رحاب شبيج لكيتها وجايبها بالطريق بس اصبري .. وسد المكالمة بسرعة ... كتله هاي رحاب دتسألك عني؟ كال اي مخبوصين عليج هيه هاي تسويها ؟؟ اجيت احجي وي خالو واخذتني نومة ... صدك جذب ريلام مالكيتي اله هذا المكان تنامين بي ؟؟ مهيب تعبانة تعبانة رجعني لاهلي.. وداروح ولزمني من ايدي وكال بحدة مو قبل منحجي .. فتح الباب وطبينه جوة بالبيت وكعدنا بالاستقبال .. اجه كعد يمي .. كال يله احجي شكوو اكو شي اني ما اعرفه ليش تضمين عني درت عنه ماريد ملامحي تفضحني .. مهيب اني وامي وهيام بيناتنه مشكلة اني مالجئت لخالو علي ولا لخالو شرار لان العلاقة متوترة اجيت لخالو حسان حتى يحجي وياهه .. كوليلي اني اكدر احلها ليش ضامة عني .. لا مهيب ما اكولك لان انتوا وماما العلاقة متوترة هسه وماريد اعقدها بالزايد .. وعمودنا همين وابتسمت بقهر هو هم ابتسم وكرصني من خشمي .. انفتحت الباب ودخل عمو حسان احسه نقذني من الحاح مهيب .. تنفست براحة .. شافنا تفاجئ كال هاي شسوون ابيتي دتسوون منكر لاااا البيت داااا طاهر ضحكنا ومهيب كال بس اريد اعرف تليفونك وين جاوب هو اني ادري بروحي حتى ادري بتليفوني ؟؟ جاوبه مهيب لازم مكثر منكر ولج كومي ريلام هذا ميفيدج سكران .. كال عمو حسان لك مطي اكو واحد يشرب المغرب ونزع قمصلته وفرك باديه واجه كعد بصفي وكال خيرج بابا شكو هيام .. مهيب : هاااك استلم مو هستوة كلت كدامك اسمها هاي ريلام ولج مو اكلج كومي والله سكران .. لااا تحلف لك وبعدين اله تصيرن توأم مو سطرتوني سطر .. مهيب كال اي والله انكس شي هاي لمن صرتي توأم هيام كاله خالوو حسان .. وووين موولي .. ؟ رد عليه مهيب رايح اجيب عشى واجي هيه عدهه موضوع وياك بين ما اروح خل تحجيلك .. هز راسه وكام من مكانه اخذ قمصلته طلع منها خمسة وعشرين الف وشمرها على مهيب اخذها كاله هاي شنووو كال عشاكم عليه خو ما تروح تجيب العشه ع حسابك معزب انه واعرف الاصول مهيب كال بضحكة وتشرب عرك همين .. هو خالو كعد وخله رجل على رجل غير ننسى هم الدنيا .. مهيب كله اي صدك خابر عمتي بلقيس وكللها ريلام يمك ترة هواي جاي تخابر عليه .. هز راسه وطلع تليفونه راح خلاه ع شحن طلع مهيب واني بقيت يمه اعصر باصابيعي وما اعرف من وين ابدي ويه خالو . . راح خابر ماما وتليفونه ع شحن وجان يطمنها بكلامه عليه كاللها بلقيس يمي هيه لا يظل بالج شويه واجيبها سكت شوية وصاح عليه كال تعاي بابا حاجي امج .. بلعت ريك وكمت ع حيلي اخذت الفوون منه بس كلت الو اجاني صوت ماما تعد وتصف طرشت اذني ولج ادبسز الدايحة هيج تصخمين وجهي احتاريت شكول لبيبيتج وجدج خليتي اجذب عليهم واكول بيت اختها واذا مارجعتي للبيت الليلة اله اتبرى منج العمر كله ...... مجاوبت ومحجيت انطيت التليفون لخالو وهو حجه وياهه وعدهه يرجعني بيده .. كعدت خانسة وهو اجه كعد يمي وكال كولي بابا شعندج ؟ كتله خالو ماما هالايام كلش مأذيتني تضرب بيه وتريد تجبرني على الزواج ليش ولج تضربج وانت بهالعمر خو ماتتجاوزين عليها وتطولين لسان وياها اشرتله باصبعي برفض وبلعت ريك لا لا خالو والله انت مو تعرفني ترة اني مو هيام .. فرك وجهه كال هاا اي ومنو هذا الي راح تتزوجيه ؟ هيه كالت واحد من اولاد عمي ... اي شبيهم اولاد عمامج اعرفهم زلم وسمعتهم زينة .. بس اني ماريد اتزوج خالو اريد اكمل دراسة اساس المشكلة بينج وبين امج شنوو ؟ غير افتهم سكتت ماعرف شنو احجي وياه كال لازم اكو سبب .. بقت عيني ع الباب اني .. بوية ريلام انت احد ضاحك عليج ؟ الدنيا ما تتأمن وانت بنية الله يستر عليج ميخالف صارحيني وكليلي اكو احد بحياتج .. صرت الهث بانفاسي ماعرف شنو اجاوبه واستحي حيل كتله خالو اني بس جايتك تكوللها ماتنفذ قرارها لان جدو اكيد راح يطاوعهه ويجبروني واني ماريد اتزوج اريد اكمل دراسة كال خوش سمعت منج راح اسمع من امج همين ولتخافين حلها يمي خالو فدوة القلبك متقصر وبعد شغلة ثانية عفية لاتكول هالحجي الي حجيته الك لمهيب هو ابتسم بمكر وكال هااااااا مهيب .. وكرص خدي ليش ولج ؟ خجلت كلش وكتله بارتباك ها مو خاف خاف هو يكول لخالو او يتدخل وتصير مشكلة اني مردت ادخل احد غيرك احسن دخل علينا مهيب جايب العشى وجاي واني كمت للمطبخ حضرته تعشينا وخلصنا وصار وقت اروح لبيتنا بس خايفة حيل من ردة فعل ماما .. مهيب بقى ببيت خالو حسان يمكن جان ينتظر يحجيله عن مشكلتي .. لمن طلعنا من البيت مية مرة وصيته ميحجيله .. وصلنا للبيت جدو دكينه الباب طلع النه سمير ابن عمي فتح ودخلنا لمن شفت ماما ظلت بس تخزر بيه .. كعد خالو يم جدو وظلوا يسولفون وبعدين ترخص اخذته ماما ودخلنه بالصالة وظلت اول شي تحجيله عن خالو علي وبيش طردنا هو باوع لهيام وكاللها الله يطيح حظج هيام ... كلتله ليش خالو حتى انته عليه مووو انته صديقي ... كاللها ادري صديقج تشتغلين من وراي جان كتيلي نخطط سوى اني وياج ونطلعها تووب .. عرفت خالو مشكلته ويه فرح ازلية ومراح تنتهي مستحيل وبعده حاقد ... بعدين كلي كومي روحي لغرفتج وارتاحي واني احجي ويه امج .. ترخصت وكمت .. لمن راح خالو اجتي هيام كالت نزلي الدايحة ماما تريدج كتلها انجبي دايحة شنوو لعد شسمين سوايتج اليوم ادبسز مرحت مكان اني رحت لبيت خالو وعفتها نزلت جوة لغرفة ماما عادي تعودت حتى لو تضربني خل تضربني .. شسوي بعد .. من شافتني فتت كالت سدي الباب وراج سديته وهيه لزمتني من ايدي وتشد عليها قوي ومن بين اسنانها تحاجيني تردين تلوين ذراعي بخوالج ها ولج ؟ رايح تشتكين عليه ادبسز شوفي هالمرة سويتيها المرة الثانية من صدك اسلمج لعمامج يكتلووج والله طايحة الحظ فلتت ايدي منها اني رحت لخالي مرحت لاحد غريب حتى مهيب هم مالجأت اله اني ماريد اتزوج افهميني ولاتجبريني حرام عليج شووفي اني وعدت حسان مراح اجبرج بس والله اذا سمعت بيج متواصلة ويه مهيب اكسر راسج مو بس ازوجج ويله ولي ع غرفتج ماريد اشوووفج كدامي .. واني هم ماطولت يمها فتحت الباب وطلعت صارت بيبي مقابيلي وظلت تحقق وياي شاكة صاير شي طمانتها انو اني رحت ويه خالي لبيت رحاب تعشيت عدهم ورجعت .. ورى فترة اجه خالو شرار النا يعزم ماما على عرسه ... خطية كعد فووك الساعة الكاملة بالاستقبال يم جدو وبيبي وماما ما طلعت اله خطية .. لمن هو ترخص من جدو وكله بضحكة وشقة من رخصتك حجي اروح اشوف ام رحاب هيه زعلانة عليه جاوبه جدو هيه زعلانه على ابو مهيب انته ليش تزعل عليك ؟ كلتله بيبي مو هم ماخذين خوات ... كله جدو لا بويه ابو محمد لا تخلون النسوان يفرقون بينكم كاله لااا افا مو هيج بس شوية مشاكل عائلية .. رد جدو اخذ راحتك ابو محمد البيت بيتك .. اخذته ورحنه للصالة هو طب يصيح بنبرة مرحة _ بلقييس ياااا بلقييييس .. عود يحجي بالفصحى .. طلعتله ماما من المطبخ تنشف باديها وتباوعله بزعل هو راح سلم عليها وباسهه على راسهه كلتله ذاكرني اليوم ؟ جاوب ليش منو الي يخابر عليج ومتردين عليه ؟ المهم اني مجاي افتح اي موضوع بس جاي دااعزمج على عرسي يوم الخميس .. اعذرني مااجي اني الاربعاء اريد اروح للنجف البنات صار هواي مازارن ابوهن ولا خالهن .. كال الها ورى العرس نروح كلنا سوى .. كلتله لا عيني اخوك الشيخ طردنا من البيت علمود اخت الي راح تتزوجهها .. رد عليها اكلج بلقيس شنو هالحجي ترى مرتي عدها اسم وشغلة ثانية ترى علي هو اكد عليه اعزمج وانتي هم طعتني بشرف موج وهي على ذمتي اني مانسيت بس اكول الدنيا ماتسوى وانتي اختي الجبيرة والوحيدة واني كلها يومين ومسافر خلت ايدها على كتفه شايف الف خير اخويه بس انته لو متزوج غيرها جان اجيت ومايهمني شي بس هاي لا خويه تعذرني وليش شبيها موج انتي صدك تحجين شنو هالحقد هذا ؟ مو كافي ؟ وترى كلامج هذا مراح يغير شي اني احبها وهيه هم تحبني اي الله يسعدكم .... اي عود ادعيلنا اني الي عليه سويته وبيت ابوج مفتوح الج تعاي وجيبي البنات وهسه من رخصتكم .. خطية طلع ضايج من كلام ماما ركضت بوسته وكتله لاتزعل ... حضني وباسني على راسي ابتسم مقهور وراح .. رجعت لماما .. كتلها ماما اني اروح لعرس خالو كالت اتبرى منج والله .. حرام عليج خطية خالو اجه لهنانه رغم كل شي وهماتين رفع راسج كدام جدو وبيبي .. هيام نزلت من فوك وهيه حتى مطلعت سلمت على خالو كالت خلي يولي منروح لعرسهم الجان أخووو خيتهَ صار طلي لمريتهَ باوعتلها ضايجة وصعدت والله تمنيت اروح للعرس اني احب خالو شرار وكلش احب موج همينه ومشتاقة لفرح ودانيال صار اشهر مشايفتهم دانيال حبيبي شكد جان متعلق بيه شكد جان ينام يمي اغيرله ملابسه وانطي اكل هسه يمكن نساني .. موج ... بقيت ساكتة هو كمل كلامه كال علاقتي ويه مرتي مابيها حب الحب الج انتي ... اني وياهه علاقتنا منتهية بس علمود الطفل لعد كول الها شرار كول الها حتتزوج اسمعي موج بس يصير ابني زين ويتصفر المرض عنده اني انفصل عنها .... اني راح افهمه لحمودي بس يكبر شوي انو اني وامه ميرهم نبقى سوى دتفهميني هسه موج ؟ ولج انت نصابة ومخادعة ورغم هذا كله مجاي اكدر اكرهج اني كوة حصلتج ترة لاتحلمين اعووفج وصيح بعلووو صووووته ولجججج مووووووت احبببببج .. ضحكت بصووت عالي .. كال افهم من ضحكتج هاي انت ترديني ؟ كلت واني صاكة سنوني أي .. كال شكد الوقت من بغداد لكركوك ؟ بس مسافة الطريق واني يمج ... ختمت المكالمة واني اضحك واكوول والله مخبل واني مخبلة اكثر منه .. لمن اجه احمد حاجيته على شرار ... كتله راح نعقد محكمة وهو راح يجي وهم نتفاهم كال كيفج انتي شنو تردين ؟ كتله مادري بس احسه هو قسمتي ونصيبي كال هذا هو الله بكيفج اني ما اجبرج والله يسعدكم .. ....... فتحت اله الباب الشقة .. شفته واكف مرتجي ع الاطار مال باب الشقة بس شافني رفع تك حاجبه وكفت كباله صافنة وكاتمة ابتسامة .. هو كال ها الكطعية النحيسة الحيالة النصابة شلونج جاوبته بصدمة مصطنعة اوف اوف هاي كلهم اني فات جوه وطبك الباب وراه وحضني حيل وباسني بخدي .. دفعته مرغمة واباوع وراي اشوف انين جانت بالصالة وشردت تركض دخلت بالغرفة كتله شبيك شرار ترة اختي واكفة عيب كدامها كال ختسد عيونها ضروري تباوع يعني ؟؟ طوق اكتافي و سحبني ، ضربته على صدره كتله هم اذا رحنا لروسيا تبوسني هيج كدام مرتك بالله ؟ لو تخاف كال لا والله اشبكج وابوسج واكطعج من البوس ورجع يبووس بخدي بنهم كتله اخخخ هسه حتى لو انين متشوف البوسة سمعت صوتها اصلا صوت بوستك وصلت حتى للجيران شبيك مشايف شفطت خدي شفط ... بالليل ... فرشت اله بالصالة ، لان الشقة بس غرفة وحدة وصالة احمد وانين ناموا بالغرفة راح تمدد ع الفراش وباوعلي مبتسم باستمتاع _ تعاي يمي شويه وطفي الضوه وغمزلي فتحت عيوني لا يا منحرف مدري شنو يريد اريد احجي وافهمه بس خاف صوتي يطلع عالي ويوصل لأحمد وأنو رحت كعدت يمه وسندت جسمي بركبي كتله بهمس شرار شتريد نام هسه ورانا كعدة الصبح حتى نطلع كال برجاء ويأشر باصابعه وهيه ملمومه بس حضنه حتى انام كتله ياحظنه هسه حيصير نص الليل غير النومه بحظنج نص الليل تسوه الدنيا بس انته حظنك يخوف مالك امان واني مايتأمن عليه بحظنك طفت الكهرباء بهاللحظة كال وهسه راح تصير احلى بعد تعاي ادفيج ولج ... شعلت ضوء موبايلي ... جاوبته .. والله مايدفيني غير البطانية والبلوز والجواريب ولج الكهرباء طافيه والدنيا تمطر والجو بارد ثلج يصير الدفو رهيييب.. تقررب باااسني بشفايفي دفعته حيل هو كال بنت المسلوك موحلك تكول حلقومه خزرته وضربته على صدره بقبضة ايدي وكززت اسناني شرارررر ابويه ميت دير باااالك ديررر بالك تغلط عليه الله يرحمه ، لج هاي مو غلطه والله اسف حبيبي اسسسف متتكرر وربي وتعاي ابوووسج اعبرلج عن اسفي ببوسة دفعته ماريد وبعدين تعال الجذاب انته شون تكول لأحمد محد داس الهن على طرف!! اني وشفايفي ملصتهم ملص نسيت لوو اذكرك ضحك ومدد خله اديه جوه راسه ويباوعلي وكال عاد حلالي مريتي محد يكدر يحاسبني .. اي حلالك عشتو اصلا انته هسه تريد تترس مني حتى لمن تسافر انت شبعان واحتمال حتى تمل همينه ضحك وضرب عكس يباوعلي مبتسم لج اترس منج شنو برميل انتي ؟؟ وهمس بهيام لج اني امل منج امداني اي والله ... ليش انتي ينمل منج لوو ينشبع لو ابقى مكابلج العمر كله بدون ما ارمش هم ما امل وعض شفته حيل احبج ولج احبج .. اكووم اني اروح انام ... سحبني من ايدي ورجعني يمه غصب خلاني على صدره ، ايده وره راسي ويقرب بوجهه عليه ، عيوني بعيونه بلحظات حب وشغف صك اسنانه بقووة وكال بتملك ولج موووت أحبچ امووووت عليج انت صدك صرتي الي الماي والهوا ولا اكدر اعيش بدونج ولج احضر المستمسكات واريد احجز وارجع اسافر بس شي يمنعني شفت نفسي ويا بدون ارادة .. مددت يمه وراسي على كتفه بيده خصلة من شعري الوت بيها وهو اصابعه داخل شعري ويعبث براسي بحركات دوختني ونعستني كعدت الفجر مفزوعة شفت نفسي نايمة بصفه وهو غافي بأمان كمت بسرعة من يمه ، فتحت باب الغرفة انين نايمة ع سرير واحمد جوة بالكاع ظليت ادعي كون ماشافوني نايمة بصفه رجعت باوعت عليه نايم يربي شكد ووووكح بالله كعد احمد شافني بصفه اله انتقم منه هسه رحت للمطبخ ترست الكلاص مي وكبيته بوجهه ..... كعد مخروع يباوعلي عيونه منعسة ويمسح بوجهه كال ولج انتي شكد ظالمة هيج اني نومي ثكيل حتى ترشين على وجهي مي لحتى اكعد جاوبته لع بس ليش تخليني انام بصفك بالله طلع احمد شافني غافية بصفك شيكول!!! كال معصب هو هذا هم سبب حتى تكعديني هيج صبرت عليج هوواي اطفري بريشاتج ابويه ترة وصلتيها لهنا ويأشر على خشمه ... بعدها ودعت احمد واخذت انين وانطلقنا لبغداد .... بالسيارة كتله ودينه لفرح كال والله مانلحك موج ورانا تحاليل والعقد والصخاام ولازم اطلع مستمسكات وبعد انت هم لازم تجهزين والله اوديج الها بس اصبري ... هدى .. لمن طلعنا من بيت عمو عطلت سيارة لهيب ووصلنا مهيب بالسيارة كتله .. عفية مهيب الله يخليك ممكن تنزلني للسوك اريد اشتري شغلات محتاجتها .. كال اي تدللين بس خلي المفعوصة يم ابوها لاتضوجنا بالسوك .. اندار عليه لهيب خازرني شسووين نازلة للسوك مو اني اجيب شغلات التحتاجيهه وممقصر كتله عندي نواقص اريد اشتريها دار وجهه كتبيها الي اني اجيبها الج عود لا اني ميعجبني ذووقك اريد اشتري ع ذوقي ضحك مهيب ويباوع لأخوه طننن اين جبهتك انا لا اراها كاله اكل نعل وماعليك بيها ودينه للبيت يله كاله لا تنتختني هيه بعد ماكدر اتفاشل وياها .... صك سنونه لهيب يباوعلي شنو تردين تشترين بالله اريد اشتري ملابس غير الي انته تجيبهن الل الل للللل مدري شنو يسموها الطاكين والمثقفين اريد اتذكرها ماكو هو خزرني ودار وجهه ماكو امل اتذكرها اصلا امل طلعت تقاعد تالي ياااا تذكرت يكولون بيئة وحتى هو هواي يستخدم هاي الكلمة المتعجرف هو اصلا كله يشتريلي ملابس كصيفه وقصيرة حتى البرنص مال الحمام مشتري قصير كلش واني بيه لحمه شويه مربربة وهو يكوم بهالكصيف اريد اشتري شي مستور احسن يسترني عن عيونه الي اربعة وعشرين ساعة ياكلني بيها .. ومرات اسمعه يتحسر .. نزلني مهيب يم مول وبقت ديما عنده ... لمن رجعنا للشقة تعارك ويايه واجه يريد يضربني عضيييته بيده حيييييل صفكني راشدي يله فلتت منه .. رجع لوى ايدي ووجعها الي وورمت وكعدت ابجي ... رحت شفته نايم يم ديما ع الجرباية جريت الغطا منه وغطيت بس بنته هو كعد .. ظل يباوعلي خازرني كال شكد كلبه بس رغم كلبه بس احببج كتله اي هو اني ما يحبني بس الكلب والطفل وهو هجم عليه خنكني ليش ولج تغلطين مكفاج قبل شويه اكلتي كتله كتله بخوف شمدريني سامعتها من مرة ابووي تكول ما يحبني بس الجلب والطفل تركني وراح ويمشي بغرور كال..يالله راح انام وتعالي غطيني تتخصرت اله كتله يااا والله ما تغطي روحك حتى بهاي ما تخدم نفسك رد عليه وهو يتمدد على الجربايه ثواني اذا ما غطيتيني اطيح صبغج وبعدين ترة جنت نايم وانتي ازعجتيني وجبتي خباثة مرة ابوج وشمرتي الغطا مني اجيت اباوعله بعصبية ولفلفت الفراش عليه واخوزر بي وغطيته كال بخبث ..غطي صدري وعضلاتي كتله باستهزاء .عشتووو منيلك عضلات كلهن نفخ وبعدين عضلاتك لا تطلعهن عليه وتكسر ايدي باوعلي بنظرات سخيفه...اهااا تمام نطلعهن بغير شي كمت غطيت حتى وجهه ... وشردت واشوفه شمر الغطا ويصيح بنت الكلب خنكتيني حقج تردين تموتيني حتى تلعبين بكيفج لان صكارج اني بس قسما بذات الله اطلعلج من الكبر اخنكج خنك شردت للصالة ورفعت اديه بالدعاء عساك يا لهيب بنار تلهب صدرك وكوون هييج تحبني تموت عليه واني هييج من الله اكرهك امووت منك كسر ايدي كوون هيج اصير قويه واكسر خشمك يا متعجرف بس بسيطه اكسره اكسره وين ترووح ... فرح .. اجاني علي كال حضري روحج اخذج لبغداد عرس اختج مابقاله شي ... اني لو ما حامل جان ظليت اكمز من الفرحة ورحت حضرت الجهال واخذت كومة ملابس اجه كال ترة راجعين هنانه لا تاخذين هواي اغراض باوعتله بقهر يعني شكد نبقى هناك ... باوع لساعته مو هواي ورى العرس نجي ... رحت تقدمت باتجاهه كتله شلون يعني ماابقى يم اختي وهيه عروس فرح ليش تلحين وتأخرينه ؟ كتلج نجي ورة العرس حددت ؟ هزيت راسي بقهر وبلعت ريك .. هو خله ايده على خدي كال يله محبوبتي خلصي حتى نروح ابتسمت ورحت كملت .. وبعدها صعدنا كلنه بالسيارة وانطلقنا لبغداد ..... بالطريق صار ازدحام وكفنه وجان اكو سوك وبسطيات مال مخضر باوعت واشوف جزر بالبسطية وظليت امطك اني هو انتبه عليه اباوع ع الجزر حرك السيارة وطبكها يم البسطية ونزل منها واسمعه يحجي ويه البكال يكوله البكال كم كيلو جزر تريد ؟ رد عليه لا انه اريد الصندوك هذا كله عندي ارانب بالسيارة .. كاله ها الله يكثرهم اخذلهم خس فجل هم يحبوا كله لا ارانبي رابطهم بس ع الجزر ظليت اضحك ... جاب صندوك الجزر وخلاه وره واجه كعد واني مديت ايدي واخذت جزراية بعد ما اتحمل هو اخذه من ايدي ورجعه كال ان شاءالله تردين تاكليها وصخة كتله علي يشهي يشهي بعد ماتحمل وصار كومة مماكلته هو ضحك ونزل من السيارة كال هسه اجي .. باوعتله راح صوب المحلات .. ولمن رجع بيده سجينه انطاهه الي كال هاج نظفي بسرعة خليت جوه علاكة ونظفتي لمن خلصت اريد اكله سحبه مني وطلع بطل مي وغسله ورجع انطاه الي وظليت اكرط بي ودانيال حايلني على هالراس الجزر وظل يبجي يريده كله وهيج طول الطريق اني انظف جزر واكل وعلي ينزل يغسله كال ماشبعتي ... خجلت منه صدك لهكت ع جزر .. وصلنا للبيت ورجعتلي ذكرياتي هنا ، فوت السيارة جوه ومبين اكو ناس جايين من هسه لعرس شرار ... نزلت من السيارة وسديت الباب ع الجهال جانوا كاعدين يمي اثنينهم وفتحت باب الورى اريد اطلع صندوك الجزر علي كال هاي شجاي تسوين ؟ كتله اريد اصعد الجزر لغرفتي وبعدين ارجع ع الجهال كال صدك جذب منج تركي هسه اخليهم يودونه للمطبخ كتله لالا خاف ياكلوا كله كوومه عالم بالبيت واني اريده .. هو محتار ظل يباوعلي يضحك يصيح مايدري .. حسيت على روحي ورحت طلعت الجهال من السيارة وطبيت جوووة .. سلمت عليهم كلهم افتقدت ريلام من بيناتهم مشتاقة الها كوومة ولا جاي اعرف اخبارها .. شكد ضحكنا وتونسنا اني وياهه وجانت الي اخت وصديقة فعلا بس تفركنا .. سلمت على الحجية وبست راسها وكعدت يمها شوية .. بيوم حنة موج اخذني علي وداني الها ابيت خالو وهناك شفت خالة وأنين ميتة على شوفتهم ومشتاقة الهم ... وهيه موج ماسوت حنة لان بابا توة متوفي بس تجمعنا احنه البنات بنات خالاتي وخوالي وعزمنا بيت عمتي وسوينه كعدة بسيطة ظلينه نسولف ونضحك وسوينه كيكة وشموع بس لا صفكة ولا اي مظاهر فرح .. هاي قبل العرس بيومين اخذني مهيب بالليل ورجعني للبيت يوم ثاني الصبح اجت هدى ولهيب .. وكعدنا بغرفة الحجية وكلساع يجي واحد يكعد .. سألت هدى يعني لمن اجيناج للسماوة اني وعلي جنتي حامل ؟ هدى .. اي فرح جنت حامل بس والله مادري بروحي وحتى تحليل مجنت ماخذة .. _ يا والله حسيت بس مالحيت عليج عبالي تخافين من الحسد وماتحجين.. ضحكت .. لا يا حسد بس والله كتلج مجنت اعرف .. _ يله من تحبلين مرة ثانية عود كليلنا ههه حتى نعرف تخافين من الحسد لو لا نفس اول مرة .. لهيب: على بختج ام جاسم بيش مفاولتنه ؟؟ _ هاا شنو ابو فخرية ماتريد اطفال بعد ؟ _ فخرية منوو _ لعد شنو ام جاسم تقبل اكولك ابو فخرية .. _ لا والله غير ابوي يكلج ام جاسم ... كتله اي ابوك يصيح لابني ام جاسم وبنته سماها نوران لا والله اله اسميها كاظمية لا تخلوني احلف ضحكوا .. هو كال على طاري الجهال ترة كافي عندي جهال اثنين وحدة منهن تعض مثل الجلبة .. ضحكت ولزمت بنته من خدودها داحاول اخليها تفتح حلكها اشوف عدها اسنان لو لا .. يا فداوي الله ماعدها اسنان فخرية شون تعضك .. كال بحنق وباوع لهدى ... لا بس امها عدها .. هدى مدري شبيهه حست بالفشلة وكالت بتوتر لا والله حصير ست اشهر وبعدها ماعدها اسنان .. كتله لهيب لعد خاف تحك اسنانها بايدك خطية لان يردون يطلعولها .. الحجية كالت يمه لهيب اذا اجيت من الشغل انزع جواريبك وخلي اصبعك الجبير مال رجلك بحلكها حتى يطلعون سنونهه بسرعة وماتشلع كلب امها ... تسخن لو تلج لو تصير اسهال .. مهيب غص بالجاي من الضحك وكاللها شلونج انتي زينة حبوبة شايفة جواريبه من يجي من الشغل عبالك بيهن جلب ميت شنو ذنبها الطفلة ؟ كالت اي يمه هيبة خلي يغسلهن ويحطها بحلكها .. كال مهيب يرادله طن معقم يله وهو ماتسلم الطفلة خطية منين جبتي هاي الفكرة .. كالتله يمه والله عوايد اهل كبل .. لهيب كال لمهيب ... لا ياجلب لك لهالدرجة وصخ اني لو تشوف روحك جواريب عبالك بيهن عتوي فاطس .. و لزم موبايله يطكطك بي كال ترة جورابي مخلص طب اسنان .. منو عنده شلع قلع حشوه خل ييجي اخلي جورابي بحلكه .. وعدل كعدته وكال..افتح حلكك شرار .. شرار رد عليه دكل نعل روحي طلع سن لهذا الي كسرت سنه وخلاك تبجي ... رد : هسه احط جورابي بحلكه واطلعله سن استيراد ما مطروق من قبل ... خربنا من الضحك على سوالفهم .. ام حسام كلتلي فرح سمنانة على الحمل بس لايكلج السمن ... كتلها مو عندي ضغط حوامل يخليني اورم ... شرار كال لا تخافين عادي ترة حسان هم جان بي ضغط حوامل وبعدين طاب منه ... حسان كال حجه دكتور العائلة عود هو يفتهم .. تركتهم يتناكرون وصعدت فوك ... للمغرب البيت انترس لان حنة شرار وهم مخلوا احد عزموا الكل البيت صار يرووش اوادم .. اني جنت بغرفتي تمددت اريح رجليه انفتحت الباب بسرعة عبالك مثل الهجوم ودخلت وحدة جانت لابسة بركع نزعته واني انصدمت بيها ..... يتبع .... مالحكت اكتب تفاصيل العرس 😬😬😬على بارت ٥٣ ان شاءالله .. |
الذين يشاهدون محتوى الموضوع الآن : 37 ( الأعضاء 10 والزوار 27) فيتامين سي*, hiba77, حروراء, نبض الحياة ٢, فووووووز, wijdanوجدان, أقمارالمجرة, Meroi, "جوري", جنات محسن |
الذين يشاهدون محتوى الموضوع الآن : 39 ( الأعضاء 14 والزوار 25) فيتامين سي*, masmoumati, روين فهد, فووووووز, Hajer a, هدووووش, Meroi, جنات محسن, hiba77, حروراء, نبض الحياة ٢, wijdanوجدان, أقمارالمجرة, "جوري" |
هذيان بين جمر وجليد بارت ٥٣ نورا ناصر لا تقاس قوة الرجل بحجم عضلاته.. أو كثرة ماله ، بل بحجم الضحكة التي يرسمها على وجه أُنثاه ... فرح .. نزعت البركع واشوفها سحر تفاجئت ، جان وجهه محتقن ومعصبة ونظرات الحقد تنط من عيونها .. تذكرت لمن هجمت عليه هيه وامها من قبل اكثر من سنة .. الجهال يمي امددين على السرير ابني وبنتها .. عدلت كعدتي ومددت رجليه وقلبي نبضاته صارت اسرع ، خفت منها واني وحدي هنا.. وهيه مسبقاً ضربتني وأذتني.. هيه وكفت كبالي عيونها رعبتني تقربت من السرير خطوات وكالت ولج انتي موو ام انتييي ؟؟ شون تخلينه يحرمني من بنتي ؟ تقبلين احد يحرمج من بنتج متخافين من دعواتي اني أُم متخافين دعواتي تأذيج ظليت اتنفس سريع حسيت راح اختنك .. كتلها بتلعثم : اني معليه عليه جابهه الي وبعدين انتي شجابج هنانه ومنوو دخلج اطلعي برة اطلعيييي لا والله اصرخ واخليهم يجووج يطلعوووج منا سحل تقربت اكثر واني احس لزكت بمكاني كالت اخذ بنتي واطلع منانه مدت ايدها دفعتها من كتفها رجعت ميلت روحهه وهيه دفعتني حيل ظليت اصرررخ وكعدوا الجهال هيه تركتني واني كمت من الجهة الثانية للسرير وخمطت ويايه ابني واباوعلها مدت اديها وتكول لبنتها يمه فطومة تعاي اني امج تعاااي اخذج ونرووح تحجي بقهر رغم كل الي سوته بيه رق قلبي عليها اني ام وهيه ام واحس بيها ... سمعت صوت قريب خليت الشال على راسي فتحت الباب وطلعت بالممر شفت لهيب ومهيب وحسان جايين باتجاه غرفتي ركضت عليهم ومهيب سألني شنوو هذا الصوووت ؟؟ ليش صرختي .. كتله هاي سحر هنا بالغرفة .. احجي والهث واشر ع الغرفة ودانيال لشويه يوكع من ايدي ، اخذه لهيب مني وهو يبجي .. كال بصدمة سحر شجااابهه سحر وراح للغرفة وهيه طلعت لازمة بنتها تبجي مفزووعة وهيه لازمتها حييل وتتوسل بيهم بنظراتها وكلامها : عفية خلوني اخذهه حرام عليكم بنتي هاااي بنتييي انتوا ظلام ظلااام موو الشيخ سجن امي وبنات عمتي بعد شنووو حاضنة بنتها وتصيح والبنية مخرووعة وتبجي وتأشر عليه .... اني من العصبية باوعت لحسان وكتله _ حسان انته تحل هاي المشكلة انته الي جبتها علينا يله هسه تحلها باوعلي كال بسخرية شووونج انتي زينة خاتون اني جبتها عليكم شنووو ؟ كتله لاااا والله لعد منوو جابهه ابوويه لوو امي طلعوا من الكبور اصلا كله منك ورطت حمدان وورطتنا كلنا عاط ولج انت تظلين مخبلة وماتعرفين تحجين شبيج شبيييج .... شهالتمسلت هذا .. مهيب ولهيب يعرفون اني وحسان مثل نار وبانزين وراح تعلك .. تدخلوا بيناتنا لهيب لزمني بعدني عن حسان ومهيب اخذ سحر من ايدها ودفع حسان من ظهره ونزلهم جوة .. دخلت بالغرفة ارجف اجه لهيب وراية ودانيال بيده كعدت ع السرير كتله حباب لهيب كول لابوك خلي ينطيها بنتها وتروح اني ممتعاجزة منها بس هاي تدغي عليه واني ام وهيه ام وهايه بنتها ضناهه حررام .. كال تحجين صدك فررح ؟ هاي تولي ساقطة ريحتها فايحة وفطومة بنية وبنتنه من لحمنا ودمنا شلون نأمنها عدها .. دخلت هدى كعدت يمي تهدأ بيه وبيدها ديما .. كتله للهيب ميخالف تتعدل علمود بنتها خلوها هنا وخلي حسان يتزوجها .. لهيب كال : ... مادام البصل ميصير مربى صعب العاهرة تتربى ... ودخل حسان وبيده فطومة .. كال وشنو اني صخل فدوة حتى اتزوجها .. ووراه علي الدر .. اخذ منه فطومة وكاله انزل جوة بسررررعة .. هدى اختفت بلمح البصر هيه صح لمن اجت البارحة وكعت على ايد علي وباستها هو سحبها منها ورد عليها سلامهه بس بعدهه تخاف منه ومن تشوفه بمكان تشرد دانيال جلب بلهيب واخذه وياه وبس فاطمة ظلت عند علي ، لمن الكل راح هو طبك الباب وانطاني فاطمة .. كتله علي شنو رجعتها ترة مايصير هالحالة هاي بنتها بنتها اني والله ممتعاجزة منها بس خله ايده على شفتي وسكتني .. كال فرح ماريد حجي اكثر بهذا الموضوع البنية هاي تبقى عندج انتي امها .. سحر ماتفيد تربيها وحدة ساقطة ورادت تلوي ذراع حمدان بالطفلة هاي لمن خلفتها وجذب لا حبيبته بالكلية ولا صخام فد وحدة جذابة والله كشفهه كدامي هو يحجي وواكف مقابيلي وخرت ايده من شفتي ولزمته من رسغه ، ظل يمر ابهامه على خدي واني احجي وياه كتله علي هاي والله تدعي عليه خاف يصير بينا شي من ورة دعاويها والله يستجاب لدعوة المظلوم ميخالف خلي هيه هم ساقطة تتوب وخليهه هنانه امك الحجية تموت عليها وخلي تربي بنتها وخلي حسان يعقد عليها وهم يربيها كال سمعتي حسان توة شكلج لوو ماسمعتي ؟ حسان مايريدها ، ولهيب شكالج هم ؟؟ ترة انه مالفي ساقطات ابيتي وهيه لو صدك حريصة على الطفلة وماتتركها عند الجيران وتروح .... استغفر الله ياربي خليني ساكت احسن فرح لا تحجين رحمة لابيج ... وبعدين شنو نسيتي انتي ترة اختج راح تجي تسكن بهذا البيت وسحر مو خيرة فكري بيها شويه .. اخذت الطفلة الي جانت تناشغ ورحت كعدت على الجرباية تربعت وخليتها بحضني وظليت اهزها وهو استمر يحجي واني بس اسمع والتزمت الصمت .. كال وبعدين اذا انطيتها لامها وبقت على هاي سوالفها الطايح حظها ابنج من يكبر شكله هاا ؟؟ تخليت عن اختك عند وحدة تربية سزز ؟ والناس تظل تعيره بأخته اذا لا سمح الله مشت بنفس طريق امها ؟؟ باوعتله : هذا الشي مستحيل يصير موو صح علي ؟ دا اكوولك استروا على امها احسن ظل يصيح بعلوو صووته ولج كتلج مالفي الدايحات ابيتي شبيج ماتحسين اله اكلج حتى صورها يدزونهه الي على التليفون تعالوا شوفوا ام بنت اخوكم والناس وحجيهه مايرحم وتريد بس تشووه بصورتنه ... كتله عزااا هاي منوو ليدز صورهه الكم ... اجه كعد يمي كال شمدريني حسابات تدز الصور وتتعطل وناس متقصدين يسوون هيج بس يردون يطلعونه ك***د ... استغفر الله ياربي .. باوعتله علي لا عبالك اني ماريد اربيهه .. مد ايده سحب الشال من راسي وفتح شعري يمرر اصابعه بي كال ادري بيج بويه ادري ماكو احن من گلبج .. وهسه تربينها احس تربية جااا ليش جبتهه يمج .. فطومة نامت بحظني بس بعدها تناشغ وهيه نايمة باوعتله مبتسمة .. كتله اني ابقى هنانه علي ؟ زم شفايفه وتنهد وسحب ايده من راسي .. كال شفتي هاي ماصارلج يومين من اجيتي وصارت مصيبة ورى العرس ترجعين لبيت المزرعة حضري روحج .. كال هيج واخذ فطومة من حضني وراح خلاهه بسرير دانيال .. كمت وكفت يمه كتله لا اني اريد ابقى هنانه يم مووج وهيه بعدها عروس .. كال اختج ماباقية هنانه هواي اول شي عدهم سفرة شهر العسل وبعدين انه حالف ماخليج هنانه فرح ومارجع بحلفاني انه حجايتي وحدة مايصيرلج هذا المكان كتله لعد شلون ها شنو شلون شبيهه عيشتج بالمزرعة احسن عيشة عايشة لا موو احسن عيشة علي موو احسن عيشة اني دااختنك هناك اااختتك ... تنهد وباوعلي بنظرات باردة .. كال يله لو تنزلين جوة يم العالم لو ترحين تتمددين وترتاحين وكافي لغوة اي هو انته كله تسكتني .. عاد هسه اذا سكتتج تسكتين شو نفس الشي هم ترجعين تلغين عدل البشت مالته وطلع من الغرفة .. تبعته كتله وين راحت سحر ؟ كال رجعها مهيب لبيتهه شدعوة هلكد مهتمة الها لو ما طيحان الحظ كله من وراها ... هو دار وجهه واني صكيت سنوني كلت لا والله طيحان الحظ الي اني بي كله من ايدي ... موج ... طلعنا اني وشرار نشوف بدلات العرس ، هو ابد ماخلاني وحدي كله ويايه عجبتني بدلة تصير مفتوحة من يم رجليه وكفت يمها كال ان شاءالله تردين هاي باوعتله اي تريدها اني راح البسها خو ماتتدخل بذوقي كال لا والله وشون تنزلين من السيارة شون يشوفوج بيها ؟؟ كتله البس ستريج رد ليش ماتلبسين بجامة الفلاح ابو محمود احسن دكووولي غيرها واستري على كراعينج ضجت اني وبرطمت وبعد كل البدلات محلوات بعيني صارن بس هاي .. بعدها اختارلي هو وحدة حلوووة تجننن وجديدة حتى بالحركة زينة وماتقيد .. ورجعنا للبيت هو مافاركني بالتجهيز بالصالون بكل شي يكول يخاف عليه من جلاب اووس .. مهيب .. حنة شرار والدنيا انكلبت ابيتنا .. جبنه مطرب والشباب تركص .. بعدها كعدنا نحني اصبع شرار بالحنة .. لهيب كال حنتك عليه عمي العزيز .. حنه اصبعه ولفه بجيس وبعدهه طلع ربع دينار يريد يلف اصبعه كاله حسان والله فشلتنا ربع يالجلف ررببع كال جا شسوي والله ديما فلستني وابوي كاطع وياي هاي اذا انخطبت لواحد اول مااطالبه بفلوس الحليب والحفاضات يله انطيهيا .. وكعدنا ننطي لشرار نصايح عود احنه خبرة وكذاااا حسان كله شوف ولك شرار خلي اعلمك تره لا عبالك الروسية سهلة ترة العراقية تتعبك اني خبرة اسألني متزوج ومطلك .. كتله اي ومضروب بووري همين .. كال اسكت اسكت لا تخليني هسه اسب مرة ابووك اله تقلب عليه المواجع ... يوم ثاني العرس تجمعنا بغرفة شرار لبسناله القاط مشطنه شعره ... اخذت العطر رشيت عليه ورشيت على ملابسي اجه لهيب اخذه ورش على ملابسه .. اجه حسان بعد شوية ويسبح بالعطر حتى على راسه رش وشرار شيل روحه ويركعها بالكاع خلصناله العطر مبقى اله شويه .. موج ... بالعرس راحت ويايه انو وبنت خالي للصالون ورة مخلصتني الكوافيرة الدموع عبالك تتحارش بيه شكو شي حزين اجه على بالي تذكرت ماما الي ما شبعت منها ولا شبعت مني ، وتذكرت بابا االي بعده كبره اخضر ... وظليت ابجي .. وانو عبالك هم محملة كومة دمووع وبجت بجي مصاير .. سمعنا صوت هورنات وخابرني شرار ع التليفون كال اجينه . لفلفوني وطلعت من الصالون صار كبالي هو بالقاط مال العرس ابتسمت من شفته وهو هم يضحك والفرح مرسوم بعيونه تعلقت عيوني بعيونه و شرار نظراته اسر امواج نظراتي .. تقرب مني وهمس يم اذني طالعة تخبلين يا موتي مايصير هسه اخطفج ونروح مكان بس بي اني وانتي ضروري نروح للبيت يعني بنص الهوسة مو راسي صار هلكدة صار اسبوع دك وركص .. ضحكت وخليت ايدي بيده وصعدنا بالسيارة ... سوينه جلسة تصوير واني تمنيت البدلة الي شفتها بس كلت يله ممقسوومة .. رجعنا للبيت لبيت خالو كعدوني .. خابرني احمد باركلي وبجيت واني احجي وياه .. خالو مقبل اله نعزم بيت عمي ابو سالم كال ماتسوى الدنيا ولازم تبلغينه بزواجج هاي الاصول ورحنه عزمناهم .. بعدها اجوي عليه بالزفة ودخلوا علينا بالهوسات كسرنا كل خشم عالي جبنالك بت الهلالي ... شرار حلوه زفته بين عمامه واخوته .. شرار رايد راته وعايف بنات ولايته .. اجه باسني على راسي ويريد يبوس بعد دفعته وخزرته ضحك كال هاا نسيت وهمس يم اذني مو متعود خلاني ارجف من الخجل كون اضربه بووكس هسه كعد يمي والهوسات مستمرة والجوكليت ينشمر علينه وهو يلكف بيهن ويرجع يشمرهم عليهم وبس يضحك بعدها كمنا دنروح لبيتهم نكمل الزفة وحدة من بنات عمة كالت اخذنا شمعة بيتكم والفلوس متفيدكم ردت عليها امال بنت عمتي باع الجذب ماطلبوا فلوس همه شرار دنك همس يم اذني كال راح تصير عركة خل نفلت بريشاتنا ولج يله امشي بسرررعة ... هاي اخر فرصة اخذج بيهاااااا .. أنين .. موج اعتبرها امي مو اختي ، لمن شفتها اخذوها من بيت خالو عبالك اخذوا روحي زدت بالبجي وبنت خالي جانت لازمتني واني عيوني انعمت تالي اخذتني من ايدي لفرح جانت كاعدة بالسيارة عمو الشيخ ماخلاهه تنزل لان هوسة خاف عليها يدفرون بطنها رحت كعدت ورة واخذت الجهال يمي وهيه تسولف وياي واني بس ابجي نزلنا ببيتهم وهوسة العرس والطبل والدفوف مابطلت وكفنه بالحديقة هم وكفوا وذبحوا الذبايح جوة رجليهم باوعت بعيون دامعة ..شفت احسان لابس قاط نيلي ويهوس ويدبج ويا الولد ... وجودي ويا بنفس المكان تثير حواسي بطريقة تزعجني ... فوتوا موج وشرار والهوسات مستمرة والطبل والدبج وكعدوهم بالصالة هوسوا ..شفته احسان وياهم باوعلي بنظرة خاطفة ودار وجهه يمكن ماعرفني وبعدها راحوا بقوا بس النسوان رحت كعدت يم موج وهيه باوعتلي مبتسمة بوستني فرح كاعدة من ذيج الجهة لابسة فستان نيلي مال حوامل .. اني كضيتهه مطنكرة وهم محتارة بخالتي ... تجي منا وتروح منا ... بعدها صار العرس وشرار اخذ موج وصعدوا لغرفتهم صاحتني فرح ورحنه صورنا وياهم بالغرفة لمن دار الحلقة من اليمين لليسار شرار كلش جريء مدري فرحان بيها ، ماخله مكان مابوسهه بي على اكتافها وظهرها لان البدلة مفتوحة من فووك وهيه تدفع بي وهو يصيح حلالي ومرتي .. نزلنا جوه اني وفرح كتلها اني وصيت خالو يجي علينا حتى نروح كالت شبيج ابقي هنانه باتي رديت وخالتي يمعودة لالا ماترهم ابات اريد اروح .. كالت شبيج عيونج حمرة ترة هيه مخطوبة اول وتالي تتزوج وانتي هم يجي يوم ووتتزوجين ونفرح بيج جاوبتها فرح اني راح ارجع لكركوك وابقى بعيدة عنكم وضايجة وهناك اصلا ضوجة اني اريد ابقى هنا هيه تحسرت وفركت وجهه باديها لان السبب هو زوجهه الي نفانه .. كتلها اني طالعة انتظر خالو خاف يجي كال ورة الزفة يجي .. كالت هسه اخابرله من اي تليفون واخلي ميجي وهسه خالتي انومها بالغرفة فوك شبيج لالا فرح هاي عمتج بس تباوع لخالتي خاف تكول عنها مخبلة نروح احسن .. طلعت وكفت يم الباب مال الاستقبال وعيني ع الباب الكبيرة .. شفته اجه من بعيد لازم بيده دانيال ويمشي ، نازع سترة القاط وباقي بالقميص والرباط .. باوعلي ورجع باوع لطريقه وكأنه مايعرفني .. فات من يمي عطره تحارش بيه ، صكيت اسناني هو فات من الباب وبيده دانيال سحبني من طرف فستاني وظل يجر بي .. فستاني قصير حد الركبة ، بف ومن فوك ابيض نص ردن والتنورة مالته رصاصي وتوول اسود فوكاهه الجو دافي ع الهوسة صارت حارة .. هو دانيال سحبني لزمت ايده حيطلع رجلية كدام العالم .. هو رجع وظل يباوعلي بعمق بعدها ابتسم ... كال هاي منو ؟ معرفتج طالعة جنج باربي .. بقيت ساكتة اباوعله كال اشو مسلمتي عليه ؟ كتله اني هم ماعرفتك تقرب اكثر مني ويباوعلي بتفحص كال مو جان شعرج اسود ؟ شعري صبغته اشكر بالصالون لمن رحت ويه موج عجبني اغير شكلي خصوصا اني مكتآبة هالايام كلت بلكي يتعدل مزاجي لزمت ذيل حصان مالتي لان تهوس شعري رفعته قبل شوي .. ومعرفت شنو اجاوبه سكتت كال شعندج هنا ؟ درت وجهي جاوبته انتظر خالو يجي علينا دنروح اي طبي جوة وانتظري من يجي هو يخابرج .. كتله ماعندي سيم بجهازي ... عندج رقمه انطينيا اخابره اكله ليجي واني اوصلكم .. موج ... لمن طلعوا الكل من الغرفة ، شرار فتح الكنتور وطلع الفستان الي عجبني انذهلت كال بالله مااستاهل بووسة .. رحت حضنته وبسته بخده هاي جان اول مرة اعبر عن مشاعري كدامه كال امداج على هالبوسة ضحكت لعد شتريييد .. رد الله عليج موت تحبيني ضحكت اي والله احبك لو ما احبك مستحيل اتزووجك ... اخذت الفستان لبسته وهو شغل اغنية وظلينه نركص بالغرفة ، الغرفة واسعة وبيها مساحة نكدر نركص بيها جان محترف بالركص يحركني مثل لعابة كتله مبين هواي جنت تركص ويه مرتك اشوفك محترف خله جبينه على جبيني وكال اني بس وياج انحرف ضحكت محترف محترررررف مووو منحرررف ... اندكت الباب وهم رادوا كال هسه اجي هاي سوالفهم ومتفقين عليه يخربون ليلة عرسي اروح اطيح حظهم واجي ضحكت وهو غمزلي وطلع واني رحت كعدت على السرير ، هو طول شويه ، فتحت مسج جايني من حساب وهمي مكتوب الف مبرووك يا عروسة بس تره هاااا حسابنا بعده ما انتهى ... هدى.. بعد عرس عمو شرار رجعنا لشقتنا ، جنت كاعده ارضع بديمه واني افكر بحياتي البائسة ويه لهيب هو اسلوبه ابد محلو بس،يغلط الغلطه بطرف لسانه ولا جنه دارس ومثقف وعايش بالغرب... اخذ من الغرب بس،الشي المو زين اما الشي الزين لا خلاه بروسيا واجه يعني مثلا احترام المرأة واجب وحق من حقوقها هذا الشي نساه هناك واجاني،بس بالغلطه ابن الشيخ... بس والله اني متأكده لهيب لو متزوج وحده غيري ومقتنع بيها مو هذا تصرفه بس شافني،وحيده نفخ روحه عليه... ما اسمع بس الباب تفلش تفلش كمزت من مكاني وديما ضلت تصررخ بصوت عالي انرعب من الصياح والضرب على الباب... شلتها وركضت للباب بخوف ولهفه صحت بصوت مرعووب بعد ما فتحت الباب شفته السكران كتله بغضب : شبييك شبييك انت يا ما تستحي متكول عيب جيران شلون هيج تفلش الباب... ضرب الباب بغضب بقبضة ايده وصرخ بوجهي _ وييينه وييبنه الكوا....مالتج طلعيي اليوم اسحله سحل جاوبته بغضب وصريخ...هووو وينه الكوا...موجود وما اخلي يطييح حضك دفر الباب وهو يصيح...بنت الكلب الكح...روحي خلي يگو...عليج رجلج العار صرخت بصوت عالي واني ابجي ودموعي غسلت وجهي. يا ساقط يا كلب يااا عار امشي ولي،منا لا اخليهم يطيحون حظك... هو هجم عليه يريد يضربني والعالم لزمته واخذوه وهو يتهدد ويغلط ويفشر فشار ما ينلبس عليه ثوب ويالف قصص حتى شككني بروحي... دخلت وسديت الباب واني ابجي وحاضنه بنتي الشبعت طن بجي ياربي شسوي هسه كون تفض على خير شكول عليك يا عمو علي خليته ملطشه بيد السكارى وهذا لهيب ما الي حجايه وياه والله مذله يلعن الزواج وساعته ... عيوني ورمت من البجي صعبه واحد سكران يطعن بعرضي وكدام العالم والله صعبه هسه لهيب غير كون يعوفه ويفضني شويه ودخل لهيب كالعاده عاگد الحواجب وروحه بخشمه اني همين محاجيته ولا ناقشته ولا نطقت بحرف كعد ضل يبوس ببنته ويلعبها واني كاعده عيوني مورمه باوعلي باستغراب كال...شكوو شبييج منو مات وتبجين ؟ وكفت بعصبية واني ااشر على نفسي بانهيار. .ماتت روحي ماااتت روحي ارتاحيت باوعلي بنظره مشمئزه من فوك ليجوه ...وللجير وللجهنم شكو تصيحيين استفزني حييل غمضت عيوني واني استغفر ربي يعني لهالدرجه كارهني شنو ذنبي صح غلطت بس هو اغلاطه اكبر من اغلاطي كرهني بروحي عفته الوحده وخليت ورحت دخلت للغرفة شويه وصاح عليه كال... هذا هم اجه لو لا جاوبته بنفي واني بالغرفه ..لااااا اني تقصدت ما اكوله لان اكيد حتصير مشاكل الها اول ما الها تالي لذلك فضلت السكوت غير اذا اكوله يكول عليك الگوا ... مالتي يكتله حلال... شويه وسمعته يخاير بعمه حسان اكيد هم راح يحلوها ياريت يحلوها ونخلص والله متت يوميه نفس الفضيحه والصياح هسه كون ابو الشقه يطردنا ونشوف النه غير شقه بس هو وين ما يصدك ننطي فلوس الاجار حتى لو من صدك نگو...ما يطلعنه عند الفلوس تعمى العيون والشرف يصير واحد صاح عليه مره ثانيه...هدييوه جيبيلي غير هاي السترة فتحت الكنتور وطلعت اله سترة بس والله حيل مقهوره منه على يوم اهج باليله ضلمه . انطيته اله وهو لبسها بدون ما يهتم اليه ولا يباوعلي لهالدرجه ناكرني دنك وباس ديمه حييل وتنفس الصعداء...اووويلي بوستج ترد الروووح شكد بيها طعم باوعت الديمه وابتسمت بحزن عليها الحمد لله هو يحبها وما يشكك بيها بس خال دوبه من دوبي... الله يحننه علينه احنه شنريد ... لهيب... رجعت للبيت واني مهموم دخلت لكيت هدى كاعده على القنفه لابسة روب قديفه وشعرها منثور على وجهها وخشمها احمر الضاهر جانت تبجي... اني اول ما شفتها ثارت عاطفتي هيه رغم اللسان بس تضل قارورة ولو والله هيه مو قارورة هديوه تانكي حديد لا تنكسر ولا تنزاح... اتمنيت احضنها واطيب خاطرها بس شي يبعدني عنها واتذكر سوالفها واضووج منها اكثر سوالفها ما تتسولف شو هاي بعدني ما محاجيها كمزت بوجهي وصرخت ماتت روحي مدري شنو عاد اني ما قصرت لساني فلت اني ما احب الغلط بس هي تستفزني .. بعدها خابرت عمي حسان وكال مضبط الوضع كيفت بلكي الله وتفض على خير. . وصلت للمكان الوصفه اليه شفته واكف من بعيد وهو فاتح باب سيارته والمعكلين واكفين بصفه وشيخ معمم جايب خرب يومك حسان داهيه مدري منين لام الوادم... اني مسبقا انطيته كل المعلومات الي تخص السكران وهو شغل المحقق كونان مالته واحد منهم اصبعه مكطوم والثاني حاجبه مطبور بس الشيخ صاحي بيهم اجيت وسلمت عليهم وحسان كلهم...اعرفكم هذا ابن اخوي الي تعارك ابو ديمه اريدكم اليوم ما تقصرون وياه.. ردو عليه...افاا يدلل ابو ديمه ان شاء الله اليوم مگضيه... تقرب مني وهمسلي بعد ما غمزلي...دهنت زردومهم بچم فلس لو تعيينلك محامي مراح يدافعولك هيج خخخخ ضحكت ..بس كون تكضي على خيير باوعلي وعض شفته بلووم...افااا لا تشكك بقدرات عمك وربعه يبعد عمك يا ابو ديمه ضربته على كتفه...ونعم منك ومن ربعك والله خلينه ورحنه للعالم وحسان كال ان شاء الله اني فهمتهم على السالفه وهم راح يديرونها عليهم دخلنه للبيت جانوا ثنين شيوخ كاعدين واحد منهم ضعييف حيييل ومعگل وحسان كل شويه يكلي ...باع شيخهم يذكرني بالمتحف البغدادي... باوعتله...ولك كافي استحي لا انوب تصير عركه مو عيب تقلد على العالم رد عليه وهو يعدل كعدته...اي هم صدك اعتذرت بكلبي صار الكلام بالبدايه جان الحجي الهم والطلبات الهم كالوو. بويه انتم ناس معتدين علينه وكاسرين سن ابنه واحنه نريد فصل وفصلنه تلاثين مليوون... اني من كال تلاثين مليوون حسيت هطروني براشدي ضليت بس اصفن وكلبي يدگ سرييع .. واحد منهم من جماعة حسان استلمهم _ تدللون وتآمرون امر انتم تفصلون واحنه نلبس اني ندست حسان...هذا شيحجي لو ابيع روحي ما اجيب تلاثين مليون واخوك طاردني واني مفلس رد حسان ندسني وهو يستمع الهم...انلصم خليهم يكملون جاوبه واحد من كباريتهم...وين شيخكم العام شو ما موجود صديق حسان رد عليه...اي صح الشيخ علي الدر عنده فاتحه اليوم وطالع محافظات وهو حييل يعتذر منكم و وصل سلامه الحار الكم وكلفنه احنه نحل المشكله جاوبوا...اهلا وسهلا ونعم منكم بعدها ضلوا يتفاضون ويحجون لحد ما وصل الفصل خمس ملايين وانوب تعارفوا كالو الصديق حسان....انت من يا عمام انت ابن عم علي الدر خليصه ؟ بلع ريكه...هااا لا اني منگول بس احجي بإسم عشيرة علي الدر واحنه ناس مصلحين وما نريد المشاكل وانتم ونعم منكم وناس خيره و وجوه طيبه ونعم منكم وانوب الشيخ حجه وضل يسولف اجه واحد منهم دخل باوعله هذا ابو اصبع مكطوم كله وهو يقلص عيونه. اني اعرفك انت مو مره ضربتني كطمت اصبعي .. هو ركز بي وهز راسه كله..ايي حييل صار خمس سنين ابو اصبع مكطوم ما صدك كله وهو يرفع اديه _ اهااا والله هي من الله تريد تنحل بدون فصول اني ضربني ابنكم من زمان و وكعناها لابو فاضل وهسه هم نريدكم توكعوها لخاطري ولخاطر هل وجوه الطيبه ... ضلوا يحجون ناس ايدت وناس اعترضت واخيرا شيخهم كال : هذا هو الفصل طايح الخاطر هالوجوه الطيبه بس راح نخلي انظباطيه اذا واحد اعتدى على الاخر يصير عليه فصل مربع تفادي للمشاكل جماعة السكران اعترضوا. لا شنوو مربع احنه مكسور عدنه سن ما يصير هل حجي وجماعة حسان اخذوهم بالصوت العالي والشيخ المعمم خصمها _ هذا هو عمي احنه ناخذ الكلام من جبيركم وان شاء الله فضت الحمد لله فضت و وكع الفصل جوه الفراش وخلينه ورجعنه بعد ما تشكرنه منهم... وحسان اختفى بسرعه حتى ما لحكت اتشكر منه حلها وانهزم ههههه اول مره عمي حسان يسوي شي بي خير واني فخوور من حليتها بدون تدخل ابووي خل يوصله خبر ان شاء الله اصير شييخ واخلي هو بحاجتي ههه .. بارت بدون قفلة لان مستعجلة 😂القفلات جايه مانستعجل عليها .. وسرد سريع همين ومو بالمستوى بس تفعلكم مايسوي واهس ابد تردون نشر يومي وانتوا ماتصوتون خايبات شنهي ☹ يمكن يمكن راح اسوي النشر بين يوم ويوم |
:Ts_012:يسعد قلبك اضحك ما قلبي على قصه الجواريب والاصبع الجبير ويطلع السنون :304872356: فرح جد ارنبه ما الومها هو الجزر كلش زاكي (الاسماء تكتل كتل فخريه وكاظمية ):240567671: اعتقد اللي دخلت يا سحر يا ختام اللي بدهم ذبح:eLeBDa3_15[1]: بس يمكن هم ممنوعين وتكون اللي دخلت حد من طرف احسان :heeheeh:لانه يكره فرح عاشت ايدج ورده تسلمين احلا ناقله فيتامين سي :elk: |
السلامُ عليكم ... رواية هذيان بين جمر وجليد بارت ٥٤ نورا ناصر ملاحظة مهمة جداً جداً ...... انذكر بالبارت السابق كعدة حسان ولهيب بعد عرس شرار بس هو العكس قبله ... اعذروني دايخة ويه رجعة المدارس 😑 ... *** دعني اخاطبك ايها الشقي ، ارحم قلبي الذي مازال يخطو اول خطواتهِ في عالم العشق ، اشفق على عيناي التي تجوبان العالم بحثاً عنكَ ، عن ابتسامتك التي لطالما الهبتني واسرتني نعيما وعذابا في اقاصي الفؤاد هل تعلم بأن محاولات غلق قلبي على حبي بائت بفشلٍ ذريع ، الا يلين قلبك على عاشقة متيمة !! "بقلمي ، لسان حال أنين" *** لهيب .. خابرت ابوي .. سلمت عليه وكتله يابه حليتها .. كال اي ع الخير .. كتله وهسه شنو ارجع للقصر لوو لا ؟ كال ليش ؟ ماتذكر وعدتك ترجع ... بس هو لا لو حالها بدون ما تستعين بعمك الساقط حسان جان خليتك ترجع .. وهالساقط هذا مدري لشوكت راح يبقى هيج يعاند مايلتزم بالكلام الي اكوله ويتمرد الى ان يوكع بمصيبةويحلم اطلعه منها . ادري يابه شنو هالذلة وها وشمدريك انته يابه عمي حسان حلاهه؟ كال مايخفى عليه شي بس هم حضر نفسك هالفترة اشوفلك بيت قريب ع القصر تكعد بي بس ترة مو لخاطرك لا والله لخاطر حفيدتي اريدهه قريبة عليه .. كتله ماتقصر يابه مشكور خاف نتعبك ... رد .. ان شاءالله تعلمت من اخطائك .. وانتبه على نفسك خووش .. أنين .. دخلت جوة شفت فرح مقابيلي لازمة بطنها وبيدها فطومة تريد تصعد الدرج هيه وياهه .. تبعتها كتلها فرح فرح وين خالة حنروح البيت التفتت عليه تعبانة كالت صعدتها فوك لغرفتي ونامت ليش ؟ كتلها خوش صاعدة اكعدها دنروح .. ويه ماخليت رجلي ع اول بايه لزمتني من ايدي ونزلتني سألتني اجه خالو ؟ رديت عليها بنبرة سريعة خايفة من ردت فعلها واريد بس انهزم منها .... كتلها لاء راح يوصلونه رجعت لزمتني ولج منوو حيوصلكم التفتت عليها باوعت الها شبيج فرح هو تحقيق حيوصلونه وخلص خزرتني ولج منو حيوصلكم ووثووول احجي شجاج ؟ مدري منين اجه حسان ورد عليها اني راح اوصلها ان شاءالله عندج مانع .. جان تكول فرح بعصبية تاكل تبن وتنجب .... هو تقرب عليها معصب كاللها منووو ارتبكت بنبرتها كالت هيه بعد منووو تاكل تبن وتبات هنانه لو تروح ويه خالو رد عليها وليش بالله هيه تروح تروح ماتريد تكابل شكولج شعليج بيها انتي ؟ جاوبته : ماكو موووو بكيفها اني اختها الجبيرة اعرف مصلحتها وتاخذ كلامي ... وماخليها تروح وياك لوو تطيرررر هسه رد عليها : منووو يطييير ؟ كالتله : ها هيه انووو كال : ايبااااه صايرة تأمر وتنهي عود هيه شيخة بصخلة مااسرحج اني ... كلتله وانته منو حتى تسرحني ترة اني هم ما اعترف بيك وانين والله اذا رحتي وياه اطيح حظج بالقرآن اخابر احمد اكوله عليج ... احسان بعناد كال لا اشووو اله اوصلها اني وغصبا ماااا عليج .... صعدت اركض ع الدرج عفتهم يتعاركون .. ورحت لغرفة فرح القديمة فتحت الباب شفتها خالة نايمة ومغطاية رحت كعدتها كعدت مخرووعة كالت هااااا يمه شنووو طبوووا علينه الامريكااان ؟ كتلها لا خالة احنه هسه ب ٢٠١٥ ماكو امريكان اكو دواع١١ش بس مو هنا ببغداد بغير مكان يالله كومي نروح لبيت خالو لبستها شالها و عبايتها وطلعنا من الغرفة وصلنه للدرج دننزل شفت فرح كبالي بيدها فاطمة ولازمة سياج الدرج تصعد وانفاسها تلهث خزرتني وكالت امشي احجي وياج بالغرفة كتلها اريد ارووح مستعجلة ترة اختنكت هنا شبيج ؟ خزرتني خزرة اقوووة وصاكة على اسنانها كالت امشي وووولي بس خليني احجي وياج ... رحنا للغرفة كالت شيلي فاطمة خليها بسرير دانيال وانطيهه ممتها .. سويت مثل مكالت الي كتلها شنوو دتتعمدين تأخريني .. كالت لااااع بس ولج انت شون تثقين ترحين ويه حسان ولج متخافين يتحرش بيج ؟ لطمت خدي عزااا فرح شهالحجيي اي هذا واحد سكييير وقبل من جنت على ذمة اخوه هم تحرش بيه كتلها ماصدك بيج ... كالت الصدكتي ولماصدكتي يطبج طووب ماتعب روحي وياج بس والله راح تندمين يا انين يا مطية... هو اني اكدر عليج دواج موج واحمد بس وينهم عني وحدة يم رجلها واحمد بعيد عني مئات الكيلو مترات واني تعبانة مابيه اطول خلك وياج ولج لاتروحين وياا لا ترووحين .. كلت يله خالة تأخرناااا .. كالت ولج اخلي لو لهيب لو مهيب يوصلوج لاترحين ويه حسان .. لا لا فشلة بعد هو خطية خابر خالو وفهمه رحت بوستها من خدودها حيييييل دفعتني وتدردم عليه وعلى حسان شكلها يضحك .. ادري بيها خايفة عليه بس اكيد حسان ميأذيني .. اخذت خالتي وطلعت من غرفتها واسمعها تتدردم وتتحسر .. بس بقى بالي ويه كلامها لمن كالت تحرش بيها ، هو ولا مرة قلل ادب وياي ماعدا لمن اجينه من حفلة نرجس حبيبته السابقة وجان شارب بعد ابد ماتجرأ وهذا الي يخليني واثقة منه ....... نزلت شفته مشكل ردانات قميصه و واكف يم لهيب ومهيب ويمهم دانيال .. البيت فرغ من المعازيم بقوا بس الخطار وقليلين ، شافني داانزل من الدرج باوع على طولي بنظرات خاطفة .. بعدها طلع قبلي من البيت واني تبعته اني وخالتي شفته واكف يم سيارته لمن شافني اشرلي وفتح بوب السيارة الصدر والورا رحت خليت خالتي بالورا هيه بسرعة خطية مددت على المقعد مال السيارة سودة عليه نعسانة وكعدتها من النوم اني .. بس والله استحي ابقى ابات يمهم وهماتين اضوج .. كعدت يمه بالصدر بس قلبي مدا اكدر اسيطر على دكاته .. هو اجه كعد يسوق وباوعلي كال ليش مابقيتي ؟ ارتبكت درت وجهي ع الجامة كتله لا عيييب استحي اني ... كال لا عادي مو عيب مو اخواتج اثنينهن موجودات شكوو بيها .. رديت عليه لا اني ممتعودة .. هو سكت وظل يسووق .. فرح ... حسان مايتوب مني ويسوي كل شي بقصد يعصبني وهاي المطية انين مدري شمسويلها تعاندني ومتاخذ حجايتي .. غاسل دماغها غسل .. ظليت الوب بالغرفة ورة مطلعت .. اله اروح اكول لموج عليها هيه تطيح حظها .. هسه حالا فورا .. خليت شالي على راسي وتوجهت لغرفة موج هيه هماتين فوك غرفتها .. همزين والله تكسرت رجلية من الدرج .. هستوة دااضرب ع الباب انلزمت ايدي من وره التفتت شفته علي يباوعلي بعصبية .. اخذني على جهة واني اكووله اووي علي شبييك ؟ وجعت ايدي حرام عليك ... كال شتردين منهم ؟ ولج عرسااان عرساان جافته عليهم نص الليل شعندج حتى وهم عرسان مايفكون منج ؟ كتله اخوووك اخوووك مايفك مني ماايفك عصبني وشيطني واخذ اختي وراح فتح عيووونه مصدووم يمكن عباله تخبلت ومابقت ذرة عقل براسي ....وهو مايدري شنوو اقصد كال ولج ووواخذها غير مرته مرررته شبيييج ؟ فرح شجاج امشي للغرفة فوتني للغرفة كال كعدي وسكتي بلا خبالج بهالليل .. كتله لا موو مرته موو مرته حتى ياخذها ويروح هوو مو بكيفه بس هو يسوي هيج عناد بيه فرك جبينه بايده كال شبي شرار وياج بعد هااا شبي شسوالج ؟ مووو شرار اقصد ذاكه حسان .. هز راسه وظل يستغفر ورايحة على شرار ومرته شسووين اكول لموج على انين ترزلها .... تحسر ولج ام جاسم يمته تعقلين ؟ مو شيبت من وراج والله ... ماتفتهمين انتي ..تردين تطبين ع العرسان بليلة دخلتهم رحت تمددت على السرير شمدريني علي هذا حسان اخذ انين وراح وين اخذها وراح يوصلهم للبيت .... وحدها ؟ لا هيه وخالتي بس والله مايتأمن وياها هو خبيث يكرهني وانت تدري بخالتي شويه مو صاحية .. عاط بعصبية والله محد مووو صاحي غيرج وتردين تبقين هنا حتى كل شوية مشكلة .. لا والله باحلامج والله ... ظليت ادردم كلهم صح بنظرك واني غلط هذا حسان السكير صح واني غلطانة مووو ؟ كال سكتي سكتي ، حبوبتي الله يرحمها ماتحجي بكدج جنج عجوز بدو لا والله عجوز البدو تضوج منج قنقينة .. كتله واني اشر على روحي هاي اني علي ؟؟ كال لأ بيبيتج ... اي حسرة على واحد يحجيله حجاية .... كال ولج حجاية حجايتين موو مية بالدقيقة ... انتي دواج بس بيت المزرعة هناك .. احسن الج بعيدة وسعيدة .. كتله اي يم الخرسان موو ؟؟ حتى البنغلاديشي الجايبة مايحجي كلمتين عربي من الضوجة اريد احجي واسولف ويا يكولي انا مايعرف حجي انته بابا اني بابا البنكلاديشي من وراك سواني بابا . كال غير لو جايب يمج ناس يحجون ويردون عليج جان طكت رواحتهم من وراج شون انه طاكة روحي وكفت اباوعله حزينة ومقهورة والدمعة بعيني ... كتله لعد مدام طاكة روحك من وراي شجابرك عليه وليش تخلف مني ... ماانتظرت اجابته ركضت دخلت للحمام وكعدت ابجي هو مايتحملني اني مرات صدك ما اسيطر على نفسي واتصرف تصرفات بلا وعي اله لمن احد يوعيني عليها بس هو مايفهم حالتي .. نزعت الفستان النيلي هذا وشمرته بسلة االملابس الوسخة .. هو اختاره اله هذا الفستان لمن اجينه من بيت المزرعة جان جايب للجهال ملابس على ذوقه ...لعرس شرار . بس اني نزلني يم محل خاص بملابس الحوامل وكال نزلي اختاريلج شي للعرس .. اني ردت اللبس على ذوقه وهو بقى بالسيارة يم الجهال وهماتين احب اشلع كلبه رجعت للسيارة كتله مجاي الكي شي يعجبني كال نروح لغير محل عادي بس انه اشوف بي ملابس حلوة شعجب ماعجبج ؟ كتله لعد تعال اختارلي مدا اكدر اختار اني احتاريت كال لعد والجهال ؟ رديت عليه ننزلهم ويانه عادي اني الزمهم .. نزل ونزلهم واختارلي هذا الفستان نيلي مال حوامل وجوة الخصر كسرات تصير وكله مبطن وفوك البطانة قماش كيبور بس الرداين والصدر ممبطنة .. رجعت من صفنتي واحس رجليه مكسرة من الفرة مالة اليوم بالعرس حيل تعبت سبحت و لبست كلبية وطلعت انشف بشعري بالخاولي جان واكف بباب الحمام يمكن لان طولت جان يريد يدكه عليه واني طلعت بس طلعت حضني اني زعلانة منه بس احس الزعل راح وتعبانة حيل وبحظنه يروح كل تعبي ، خليت راسي على صدره هو ظل يلعب بشعري ياخذ خصلاته ويشمها ويبوس براسي ، تمنيت يسمعني كلمة حلوة ويسألني خو مازعلتي!! بس هو معتبرني غلطانة فمراح يسألني هالسؤال .. وخرت راسي من على صدره باوعت لعيونه كال يله تعالي ارتاحي .. كتله خابر على حسان شوفه وصل اختي لو لا ؟ تدري بالي يمها .. كال ولا يهمج ارتاحي .. رحت كعدت ع السرير وانشف بشعري وهو خابر خلى التليفون على إذنه هواي والظاهر ماكو رد اني عدلت كعدتي وظليت اباوعله بقلق وخر التليفون من اذنه وكال مايجاوب!!!! موج ... بهاللحظة دخل شرار باوعلي وابتسم ، ديسد الباب صاحته بنت عمه وبيدها الاكل مال العشى ، هو اخذه منها مبتسم وتشكر منها وراحت خلاه ع الميز وسد الباب .. نزع سترته وشمرهه ع الزاوية .. باوعلي اني مطنكرة وكاعدة على السرير والاغنية تدك براسي اتمنى اخذ موبايله واجعصه كال من مكانه ... هااا شوو طنكرنا ؟ كلبتي الخلقة شبيج ؟؟ تعااال شووف شنوو اجاني تعااال .. اجه كعد يمي واخذ الموبايل من ايدي وباوع بالشاشة مالته قرا المسج وكال منو هذا ؟ رديت عليه شمعرفني منووو ؟ حساب وهمي مدري سوالي حظر مدري عطل الحساب كله .. شمر التليفون وره ظهره وكع ع السرير كال باعي الليلة ماريد نكد لا انكد راسج والله هاي الليلة منتظرها اني صار اكثر من سنة كمت على حيلي : يا ليلة يااا صخام هذااا اووس ماكو غيره بعده ديهدد وواثق من نفسه وبزوده هو هماتين كام ولزم وجهي باثنين اديه كال شيسوي مثلا والله ايده الي تنمد عليج اكسرها واعلكها بركبته .. وخرت اديه مني وابتعدت عنه .. كتله شبيك شراارر شبيك طزز بيه اني ما هامتني رووحي اني شايلة هم اخويه اختي شبييك!!! تخصر ، تنهد وكال اخوج رجال ويحمي نفسه وبعدين هو احمد مو هنا ابغداد بكركوك مايوصل اله اطمئنيى واختج هم راح تتبعه بعد ليش خايفة ... رفعت ايدي اشر بسبابتي وارجف .. انت بنفسك شرار بنفسك لمن رحنه نعقد محكمة ولمن رحنه نجهز كلت الي جلاب اوس بكل مكان يعني موو بعيدة يوصلون حتى لكركوك غمض عيونه وبس يتنهد وايده على ركبته يحك بيها متوتر .... ونظراته تتجول بكل مكان بالغرفة رجع وكف يمي ، لزمني من رسغي وسحبني طخيت بي كال تعاي نتعشى هسه وباجر اني اتصرف ، فدوة اروحلج بلا نكد ، خلي هالليلة تمر على خير .... بعدت نفسي منه وتسحبت ، حركت ايدي برفض وكتله بحديه _ ماريد عشى انته اكل لوحدك اني انسدت نفسي ... جر نفس بعصبية وهو يفتح الرباط ودكم قميصه .. باوعتله ودرت وجهي ع الحمام دااشرد بسرعة لزمني من زندي وايده الثانية حوط بيهة خصري وسحبني عليه ، قيدني داافك رووحي منه ماكدرت اهدد بي .. اتركني اتررركني والا والله ، صفنت ثواني افكر بتهديد مناسب بس مالكيت .. سفطني على السرير ، صار ظهري ع الدوشك ... وهو عليه .. مقيد اديه بيد وحدة .. تسارعت انفاسي وغمضت عيوني واني احس بارتطام انفاسه بجانب وجهي الساخن وهو يهمس بكلمات تطمئني ... موج ولج لتخافين ترة هو انكسرت شووكته وصار مثل الجريدي مايدري وين يختل يخاف لا يجيله نعال ..ولج والله هو محتار شيسوي هسه اصلا وصله خبر عرسنا ومتخبل اكيد محد يعرفه بكدي .. ابتسمت على كلامه وهو هم ضحك يباوعلي بحميمية مخدرة .... خلت عظامي تذوووب .. ضمني اله بقووة بقوووة عااشق مجنون ، حسيت نفسي تلاشيت وصرت اني وياه واحد جسد واحد روووح وحدة .. وبعدها صارت شفايفه تلتقط شفايفي بقبلات شغوفة وحركات رقيقة.. ويتلمس جسمي المستقر بين احضانه بجنون .. قبلاته خلت قلبي يرفرف بين اظلاعي .. بادلته العناق وتسارعت دقات قلبي اكثر واكثر ، حسيت بالافكار العقلانية تتسرب ، تتبخر وتختفي من عقلي .. حسيت نفسي اذوب بين ادين الرجل الي احبه بشغف خاصة بعد ماامتدت ايده لتداعب خصلات شعري برقة .. واني اموووت على هاي الحركة .. وهو يسويها بطريقة فعلا يخليني استسلم اله واني مغمضة .. رفع راسه يمرر ابهامه على شفايفي الي تحمل اثر قبلاته .. عيوني بعيونه .. كال بانفاس لاهثة .. مووج انتي متدرين شكد اني احبج وشكد اني مجنون بيج... ابتسمت ادري والله ادري .. رد : لعد ارحميني ولا تعكرين صفو ليلتنا هاي ، هاي الليلة اني احسها امنية عمري متمنيت شي بكد ماتمنيتج بلعت ريك وحضنته وجان هذا ردي على كلامه .. هو دفن وجهه بعنقي يقبل النبض البطيء الي صار متسااارع ظل يضمني اله بقوة ويعبث بخصلات شعري واني امرر اديه فوك عضلات ظهره .. ريلام .. بيوم المصادف عرس خالو شرار احنه جنه بكربلاء .. زرنا الامام الحسين ووكفت ودعيت الهم الله يهنيهم ويسعدهم .. جنت اتمنى اكون وياهم بهاي المناسبة ، هيه مرة بالعمر اكيد خالو مو كل يوم متزوج وزواجه الاول كان بروسيا حتى مفتهمنه منه شي .. وخاصة اني كولش احبه خالو شرار وهماتين احب موج ومشتاقة لفرح كولش هوايه بس شسوي لماما الله يسامحها .. تعمدت تاخذنا رغم خالو شرار كال الها انو خالو علي الدر اكد عليه يعزمها بس هيه حاقدة .. ورة الزيارة رحنا للفندق ، ماما تعبانة استسلمت للنوم من وقت .. هيام استغلت الفرصة وخلت السماعات بإذنها واخذتلهه زاوية بغرفة الفندق ، دحست روحهه وظلت تحجي همس واني لزمت موبايلي فتحت نت واجتني اشعارات ع الوتساب من رقم مهيب .. فتحت المحادثة مالته راسلي فديوات وصور عن العرس ابتسمت واني اشوف بيهم .. واني داتفرج عليهم اجاني مسج منه ... شلونج حبيبتي زيارة مقبولة ان شاءالله مرتاحة ولج والله مكانج فارغ حيل ومحد يسده تحسرت بقهر رديت عليه تونستوا شلونهم العرسان .. ؟ كال فرحانيين ويوم الالنه .. خليت ايدي على قلبي وهزيت راسي بقلق ... باوعت لهيام مندمجة وتهمس .. رديت الله كريم .. وصلني منه مسج كاتبلي افتحي فديو دا اشووفج شي هسه .. كتله شنوو ؟ رد .. شي تحبيه يله بسرعة قبل لا يرووح ترة وكح وميكعد .. ضحكت اخذت فوني ورحت للحمام واني متوجهه للحمام اشوف هيام تباوعلي بنظرات كلها شكوك .. مهتميت الها لعد من جانبها غفور رحيم ومن يمي شديد العقاب مووو عدل هذا .. فتت ع الحمام وسديت الباب وراية ، وصلني مسج ها هسه اكدر اتصل ؟ خليت الكلاو على راسي واتصلت اني وفتحت كاميرا صار بوجهي دانيال حبيبي.. لابس قميص ابيض فوكاه بلك احمر وفيونكة حمرة بس مبهذل نفسه لان هسه دنيا الليل والعرس خلص فرحت لمن شفته تمنيته يمي قريب كلت ياااي حبيبي داني فدوة اموت عليك ولك شووونك مشتتاقتلك والله لوو يمي هسه جان كطعتك من البوس وخر الكاميرا من وجه دانيال وطلعلي هو كال تكطعين منوووو من البوس ولج ترة اطيح حظج .. ضحكت .. كال ماتكطعيني اني من البوووس شبيج يحظي .... كتله اووو مهيييب لاتحرجني .... كال انتي الي تجيبينهه لنفسج ودانيال ظل يحووص بحضن مهيب وهو يكوله اكعد حيووان اكعد شجاك اكعد لا اسطرك براشدي مو محترمك ودااشوفك هالوجه الحلوو شبيك ماتحمد الله وتشكره كتله عليك الله مهيب لا تعذبه خطية خاف يريد يروح يلعب عوفه رد مو ادري بس اعوفه تسدين المكالمة ضحكت مو اخاف انلزم .. رد وليش تخافين ولج سنين كضيتيها يمي هسه تخافين مني او يخافون عليج مني ؟ كتله مو الوضع اختلف هسه .. مو نفس قبل .. هو رجع يصيح على دانيال كتله عووفه شكد تحب تعذبه عووفه ولا تحب الجهال انته رد اي ما حبهم وكحين زعبوولين بس جهالنا اني وياج احبهم وامووت عليهم ... ضحكت باستهزاء وقهر ... رد اي والله شبيج ترة كل اثنين متزوجين يصير عدهم اطفال لوو اني غلطان!! كتله وين راح دانيال ؟ رد اي ادري بيج تغيرين الموضوع ... يله مهيب اني راح اسد هسه المكالمة صار بيها احراجات .. جاوب اي يجي يوم اجيبج يمي وغصبا عليج متنحرجين بعد ... كلامه يأذيني لان احس بيناتنا جبال من نار وحقد وعداوة ومستحيل نصير لبعض .. ختمت المكالمة ودااطلع من الحمام صارت مقابيلي ماما وعيونها حمرة ويمها هيام تضحك سحبت التليفون من عندي وقبل حتى مااحذف شي ... وهو شنو الي احذفه !! هيه صور خوالي واقاربنا والحجي كله جان بالمكالمة ظلت ترزل بيه ولج ادبسز وصلت بيج القباحة تفتحين ويا كاميرا حقيررة رحت كعدت على الجرباية كتلها وشنوو يعني ترة لابسة اني وحتى شعري مغطيته وهو اتصل يشوفني دانيال وانتي تدرين بيه شكد احبه حبتج حيييه كوون ... كالت هيج وهيه تدور بتليفووني .. كتله ماتدورين بتليفوون هيام متشووفين شنوو عدهه لو بس عليه اني كادرة ، صدك لو كال المثل ابويه ميكدر بس على امي هيام انطت تليفونها لامي وتباوعلي بشماتة هاج مام هااج فتشي عن قلبها عبالها الكل مثلها ادري بيها حذفت كل شي وانطت الفون لماما ، عفت تليفوني عدها ورحت للفراش لفيت راسي ونمت .. كعدت مشفت احد يمي ، يمكن نازلين يزورون رحت غسلت وجهي وصليت صلاة الفجر وجان الوقت بعده فجر ولا مخلين الي قيمة حتى ماكعدوني انزل اصلي وياهم .. شفت تليفوني على الدولاب رحت اخذته ورجعت اباوع ع صور العرس والفديوات سوالف خوالي مينشبع منها انتبهت على صوت اشعارات تجي ع المسنجر ، بس مو على تليفوني لا على تليفون هيام مخليته بالغرفة مماخذته اثارني الفضول ورحت سحبته بي رمز بس الرسايل توصل للاشعارات واكدر اشوفهه شفت صديقتها كاتبة الها لج فلوسكم اكبر من عدد عشيرتنا ومكادرة تسوين سحر وتسحلين محمد من شواربه وتخلينه يتزوجج يالعوبة ؟ ترة اني اعرف واحد سحار يخلي يتزوجج بس هو يريد منج شي كولش غالي مو بس فلوس عود نتفاهم عليه اني وياج من ترجعين ظليت ارجف بسبب كلامها هااي شنو هالنفسيات التعبانة الي تمشي وياهم اختي ؟؟ طيح الله حظج هيام يا ادب سز ونوب تحجي عليه وتحرض امي عليه وهيه بس الله يستر منها ..... عفت تليفونها لان لعبت نفسي .. سمعت صوت باب الغرفة تندك ، رحت فتحتها شفته سمير ابن عمي لان احنه جايين وياهم ظل يباوعلي بنظرات سخيفة درت وجهي منه كال صباحووو ياا قمر انتي هيام لو ريلام ؟ بلعت ريك وجاوبته اني ريلام .. كال امشي امج خابرتني وكالت اخذج للمطعم نتريك يله .. كتله زين بس خل اللبس ، يريد يفوت للغرفة ، دفعته وصيحت عليه كتله شبييك دااكولك اريد اللبس متفتهم .. هز راسه بووقاحة لبسي يابه لبسي احد لازمج سديت الباب بوجهه ورحت لبست عبابة وجواريب وطلعت ، صعدنا بالمصعد هو تقرب مني وكال امج خطبتني الج ماكووو مبروووك .. باوعتله مصدوومة ووهو يضحك تمنيت مهيب موجود حتى يضرب بووكس يوكع سنونه بحلكه ويخلي يبلعهم .. واخيرا وكف المصعد حسيت بهالثواني هاي الي وكفت بيهم يمه اني اختنكت مااعونت شفت ماما واني انفجرت بووجهه كالت اني كايلتلج متتواصلين ويه مهيب بس انتي عاندتي انجبي وسكتي ويله تزقنبي زقنبوت كاعدين بالمطعم احنه موو وكته هالحجي لا تفرجين العالم علينا .. أنين .. بالسيارة هو جان يسوق وكفنا بازدحام ، باوعلي كال صدك نسيت اسألج انتي شنوو هالقلة الذووق هاي ؟ ليش تحظريني من الفيس متحارش بيج اني ؟ داك عليج نص الليل ؟ مسويلج شي ليش تحظريني ؟؟ اني من الفشلة كتله لا والله مو اني حظرتك هاي اختي .. وتالي تفشلت خليت ايدي على حلكي كال بصدمة هاااي شنووو ليش بالله ؟ هزيت راسي ودنكت .... كال منو منهم حظرتني هاي عليها فصل انه رجال عايل ووياكم بوويه؟ ضحكت لالا ابد والله كال زين منو منهن ؟ المخبلة لو المسترجلة هاي اكيد مرة شرار لان ذيج فرح فاهية شفهمها كتله مو عيب تحجي هيج عليهن ترة هنه اخواتي وهم نسوان اخووتك كال لا تخليني اسب اخوتي هسه كليلي ليش حظرتني حاجيه عليه انتي كدامها بشي كتله واني اضحك لا والله هيه من كيفهه .. كال باصرار لا والله السالفة بيها انه اعترفي اعترفي ... قبل لاجاوب حسيته توتر وظل يتلفت .. الظاهر اكو سيارة تابعتنا .. انوب فتح الجكمجة وطلع مسدس انرعبت .. عطت شنووو هذاااا شكووو ليش طلعت مسدس ... رد ااششش سكتي ماكو شي بس اهدي .. ظليت اني اتلفت همين .. مد ايده لزمني من زندي كال شجاااج ركدي شكوو هالحوسة ... اني قلبي دكاته الف من الخوف احسه يدك ببلعومي واتوسل بي يكوولي شكوو دخل بفرع عود ديضيعهم بس هم تبعونا وكسروا علينه وجبروا يوكف السيارة فوت المسدس بالبنطرون من ورى وفتح باب السيارة دينزل لزمته من طرف قميصه حاجيته بتوسل لاتنزل الله يخليييك وخر ايده مني ونزل بسرعة ... ومن ذيج الجهة نزلوا اثنييين وهو واجهم كال هااي شكووو هم انتوااا اني حجيت كل الي عندي وما الكم شي يمي بعد رد عليه ذاكه لا والله لااا مو بهالسهووولة بعدنا ماصفينا حسابنا رد عليهم وياي عائلة اني هسه روحوا عووود بعدين نتفاهم .. كال باستهزاء ووينهم العائلة وطل بالسيارة اني كاعدة كدام وخالتي منجطلة ورى وتشخر .. خالة من تنام جنهه فرح لو تنفجر يمها قنبلة ماتكعد .. ظل يضووي عليه بضوة تليفوونه وكاله هاي منوووو لووياك من ورانا وللك ؟؟ هو انجن طلع المسدس مالته وظل يعيط عليه عينك عنهاااا ووولك لا افكسهااااا الك والله .. اني من الخوف فتحت باب السيارة ورحتله ارركض لمن وصلت يمه دفعني كال بحدة ونتر ومبين من عيونه شكد خايف علينا .. _ اخذي خالتج وروحي مشي لبيت خالج يله الوضع يمي موو امااان ... همست بخوف وقلق : مما اروح ابقى وووياك اني .. دفعني من زندي بسرعة وصااك اسنانه ومعصب ووولج رووحي روووحي هذول ماوراهم غير الموووت تردين تموووتين انتي ؟؟ كتله بصوت متحشرج وعيون مليانة دمووع _ اي اني اريد المووت وياك ... ! يتبع ... |
هذيان بين جمر وجليد البارت ٥٥ نورا ناصر .... البارت اهداء لادمن سما بمناسبة عيد ميلادها .. العمر كله حبيبي ❤ .... انه أسف لو يمر يوم وَكلامي وياچ يبرد و اعتذر لو جفني قَبل عيونچ الحِلوات ينسد ولا يظل بالچ اذا ما بسِت ايدچ لو جرحها بيوم معضد انه ما اتغيّر وتدريني باقي حتى اذا ما يبقى أحد ولو يگلولچ تره مَحد يحبچ هم اصيرَن انه مَحد .🤍 انين ... جاوبني .... حسان؛ امشي لج وسوالف الهنود والاتراك عوفيها لخاطر العباس ... ويله للسيارة .. شهكت واني متصنمة بمكاني ماادري شصار بيه اني مرات احس اني مديونة اله بحياتي.. و مرات احس الي اني بي عاطفة زيادة و امتنان وماعرف شنو احساسي ... شافني واكفة بمكاني ، سحبني من ايدي وخلاني ورة ظهره وكاللهم : من رخصة الجماعه بس وياي الاهل خلي اامن عليهم واجي.. اجانه صوت واحد يصيح _ حسااان ترة انت مطووق لاتسولك نفسك وترمي او تسويلك خطه رد عليه حسان...دنجب هسه مو جايينك بدون خطط .. كله ترة ماعدنا الليل بطووله ووياك .. عاط حسان : افتهمنا افتهمنا ... و ظل يدفع بيه من زندي لحد باب السيارة وظل يأشرلي واني اناشغ .. كال اخذي هذا الشارع وروحي مشي يله بقيت اكعد خالة وهو راح عليهم ظل يحجي وياهم ويبعد بيهم عن مكان سيارته .. كوة كعدت خالة واخذتها منعسة وتدردم عليه وتكفخ بيه .. كلساع اجاني صواب على ظهري هاي فرح ماقابلة اطلع ويا احسان لذلك هيج صار بيه مدري حظي فستاني قصير بس لابسة جواته ستريج ، واني امشي بالشارع واتلفت عليه اشوفه هو هم كل شويه والتفت يباوع عليه ياريت الشي الي مالنا نصيب بي مانشوفه ولا نلتقي بي ابد .. هذا جان رجائي الوحيد مشينا مسافة واني ميتة من الخوف الدنيا ليل ورجلية ظلت تووجعني الكعب اذاني حييل .. واخاف اخذ تكسي من الشارع رغم وصلنا للشارع العام حسيت بسيارة وكفت يمنه متت خووووف ولزمت قلبي بيدي ... واجرجر بخالتي الي صارلهه ساعة تسب بيه وتغلط وتعد وتصف اشكال المسبة والشتيمة انفتحت باب السيارة وسمعت صووته اصعدي يله ... عرفته هو التفتت عليه شفته بالسيارة كاعد وفاتح باب الصدر .. سديته وفتحت باب الورة وفوتت خالتي وكعدت يمها ودنكت راسي واعصر باديه هو حرك السيارة ومشى بيها ... وكلساع يجي اتصال يخابر ويحجي .. ويصيح بصوت عالي احجي وياه وكله كافي كل شويه ولزمني بطريق ... وكمل بنبرة غرور : ااااااي هذا هو اني بعد فكيت الشراكه وياه لا يظل ينعثل .... اي يابه علاقتي ببيت خالي واوس تحديدا انتهت صحيح بس ترى اني اخو الشيخ علي الدر اكدر كلشي اسوي .. وكمل كلامه وكأن يقاطع الشخص المتصل ايييي اييي اتفاخر اني زلمه اتفاخر بنسبي ديله كافي ودخل بالخير وكلهم يكفوون عني لا قسما بذات الله اسوي شي ميعجبهم ... غلق المكالمة بعصبية شمر الفون ع الدشبول .. بعدها اجاه اتصال رد عليه وتغيرت نبرته وصوته عرفته ديحجي ويه الشيخ .. اخر شي مد ايده وبيده التليفون كال هاج هاي اختج تريد تحجي وياج استغربت وبعدها اخذت التليفون منه ايدي ترجف واصابعي طخت باصابعه الدافية وكع التليفون ودنكت ادور عليه اخذته وخليته على اذني اجاني صوت فرح ولج احجيييلي خو ما اسوالج شي .. غمضت عيوني وتحسرت وبقلبي اكول ياريتني باقية يمج ياريت سمعت حجايتج الخوف عدمني العافية .. والله احس هنت نفسي وذليتها وخجلانة من روحي وكارهة حالي كره مو طبيعي طمأنتها بس كوة مسيطرة على نبرتي ... لا فرح شبيج شسالفة هياته بيت خالي رح نوصل اطمأني كالت شبيج صووتج معاجبني!! والله مابيه شي فرح بس داا ابجي على موج مقهورة هم راح ارجع من دونها!!! تحسرت هيه وكالت من توصلين بيت خالو خابري على تليفون علي احجي وياج واطمأن عليج ميخالف فرح وصلنا ترة ولتخافين عليه مابيه شي والله شون ما اخاف عليج ولج من رحتي لهسه واني افوور رغم انت حقيرة وجذبتيني طلعتيني جذابة اي اسفة حقج عليه خاني التعبير معرفت شون اوضح الج والله بس جنت مخنوكة ومندفعة بس دااريد اطلع من البيت ميخالف مثل ماوصيتج .. ختمت المكالمة وياهه انطيته التليفون ، هو رجعه عليه كال باقتضاب _ سجليلي رقمج عليه .. رجعته اله كتله ماعندي سيم والله مو كتلك لمن جنت ابيتكم .. وكف السيارة قريب على بيت خالو والتاف عليه كال بس ترجعين ارفعي الحظر وحاجيني عندي موضوع مهم وياج ماجنت اريد احجي وياه ضايجة من جفصتي .. كتله ماكدر افتح نت بيت خالو ماعدهم نت اصلا .. كال انطيني تليفونج . رديت : شسوووي بي!! رد ببرود : انطينيا بسسسرعة . طلعته خليته بيده .. ظل يطكطك بي ورجعه اليه كال هذا رقمي حاجيني من اي رقم ثاني ، بس رمشي اني اتصل عليج ماشي ظليت محتارة بس هزيت راسي ، رجع حرك السيارة .. وانطلقت بينا وكفها يم بيت خالو بالضبط .. و قبل لا انزل التاف عليه وكال مثل مكتلج هااا انتظر منج اتصال ... بس هزيت راسي ، بين ما اني نزلت خالة هو راح قبلي دك الباب على بيت خالو .. اباوعله واتحسر .. يكولي لاتسووين نفس الاتراك والله قهرني كلامه .. هسه بالله الاتراك بيها باب وجواب حلوين ورومانسيين بس الهنود يطيرون فياله معقوله اني اطير فياله .. !!! هزيت راسي بعدم رضى ، هو التفت باوعلي بسرعة شحيت نظراتي منه ولازمة خالتي من ايدها طلع خالو فتح الباب وتشكر منه واني بس اريد ادخل واختفي من انظاره ... دخلت للبيت وسلمت عليهم وخالتي ركضت نامت ع القنفة كوة كومناهه ووديناهه للغرفة واني رحت بدلت ملابسي ورحت لخالو اخذت تليفونه بس عمود احجي ويه فرح وحجيت وياهه وبقى الموبايل بيدي بس ابد مافكرت اخابره بعدني خلانة منه كولش .. موج ... كعدت الصبح .. باوعت على شرار شفته نايم ، صفنت بوجهه ، وبعدها مديت ايدي لوجهه مررتها على بشرته هو حرك وجهه ولزم ايدي وباسهه براحة كفي .. ابتسمت وهو كال بنبرة كلها نوم احبج من الصبح ... رديت عليه احبك على الريك .. عدل نومته ضرب عكس ويباوعلي بذوبان ورغبة كال تعال على الريك لعد سحبت ايدي منه كتله يبوووي ماريد مااااريد مووووتني البارحة ورحت ركضت للحمام ... سبحت وطلعت وكفت ع المغسلة داارطب بشرتي هو اجه ووكف ورايه طوق خصري وسحبني عليه باس ركبتي وبعدها ظل يهمس يم إذني شردتي مووو ؟ ولج لاتتعلمين تشردين مني .. ضحكت وفتحت شعري من الخاولي كتله لا والله ماشردت منك بس انته ملهووك جعصتني جعص .. كال اييي غيررر احبج .. رديت عليه واني اخلي اديه حول رقبته ... واني هم احبك بس ماجعصك جعص .. رفعني عن الارض كال اني احبج اكثر والله انت قليل تحبيني .. داارد عليه سمعت صوت ضرب ع الباب .. هو باوع صوب الباب كال هذا منو ليكعدنا من الصبح هاي اكيد اختج كتله لا والله خااف اخوك حسان اكيد بايت هنانه اختي مؤدبة ماتسويها كال يعني اخويه عار ويسوويهه .. هزيت راسي بعدم معرفة اي خل نفتح ونشوف .. كال منو اجه صوت فرح .. باوعلي رافع حاجبه .. كال هاي وين الشيخ عنها شهالازعاج هذا من الصبح .. باوعتله عضيت شفتي وفتحت الباب وهيه جرتني ولج تعاااي صار ساعة انتظرج تكعدين .. وانوب جيت كعدتج تعاي خلي اسولفلج شسوت انو البارحة غير فرفرتني فتح شرار الباب وسحبني منها وفوتني للغرفة .. كاللها هاي شبيج فرح الناس تكول للعرسان مبروك وبعدين انتي شون تطلعيها من الغرفة ببرنص الحمام .. خلت ايدها على حلكها هاا اي موو نسيت واجت حضنتني حييل مبرووك حبي الف مبروووك مهناية ان شاءالله واني هم حضنتها حييل .. باوعتله واني حاضنتها .. شرار ترة احنه عادي مابيننا رسمية .. كال يله اني طاب للحمام تهني انتي واختك كال هالكلام بدون نفس فرح جانت بعدهه فشلانة من سوايتها واني اعرفها تتصرف بدون وعي ومتسرعة ، يله عادي مصار شي .. اخذتها وكعدنا على السرير .. كتلها شبيها انو ؟ تأفافت كالت والله عيب وخلت اديهه على وجهه عزااا والله اذا درى علي بيه اني هجمت عليكم من الصبح يطيح حظي .. حبابة كولي لشرار لايروح يكووله ..... رديت عليها لا ولج شسالفة يروح يكوله هيج شي تافه مصار شي داكلج شبيها انونه؟ لطمت على فخذهه ولج غير البارحة فورت دمي راحت للبيت خالي ويه حسان اكوللها تحرش بيه دكولي ماصدكج شايفة هيج صلافة ؟ تنهدت وضجت حيل اني اعلمها هاي شوون وياهه يربي مراهقة وتعلقت بي لان انقذها ومتكدر متشوفه بطل بنظرها .. خليت ايدي على كتفها ميخالف خليهه عليه اني احجي وياهه .. كامت وكفت اني اروح غيري ملابسج .. وميلت روحهه بوستني وحضنتني وكالت الله يهنيج يااعمري .... بوستها وحضنتها وهيه طلعت بدلت ملابسي ومر اليوم بين الخطار كل شويه يجون يباركون .. والحجية بس تخوزر بينا اني وفرح من الله ماتحبنا وتبسبس باذن شرار وهو يضحك ويغمزلي ونظراته تكولي مشي مشي .. للظهر صعدت للغرفة ، فتحت الباب شفته كاعد بنص السرير السماعات بأذنه والفون كباله بدون وعي منه حسيته رسلي نظرات تحذيرية .. اني رأسا طلعت وسديت الباب .. وكفت بنص الممر ، محتارة ومقهورة ، هو حقه لان هوسة العرس مخلته يتواصل ويا عائلته طول هاي الفترة بس اني هسه وين اروح!! ماكدر اروح يم فرح لأن هسه الشيخ يمها واستحي شعندي اصلا رايحة بينهم هيه ورجلهه نزلت جوة داروح يم الحجية بس سمعت صوت مهيب واحسان يمها وخطار همينه .. استحيت اني غريبة عنهم اصلا وهي من غير شي ماتطيقني شسوي رايحة يمهم ماكو غير المطبخ اروح بي ، اذا اكعد بالصالة وحدي شيكولون عليه .. رحت للمطبخ بس ام حسام هناك ، هيه ارملة وبس عندها بنات متزوجات ومن راحت بلقيس هيه استقرت هنانه يم الحجية من شافتني جانت تصب جاي كالت ها العروسة الحلوة تردين شي ؟ هزيت راسي وبلعت غصتي .. لا تسلمين كالت اي شي ترديه كوليلي وروحي يم رجلج انت عروسة ميصير تشتغلين .. ارتبكت شكللها زوجي ديخابر مرته وماكدر ابقى يمهم .. خليته ياخذ راحته !! مجاوبتها .. ابتسمت وهزيت راسي ، بعدين كتلها لا اريد اصب لي جاي مشكورة كالت اني اصبلج روحي انتي .. جاوبتها لا والله متقصرين اني اصب .... ردت براحتج ... سويت نفسي دااريد اصب جاي وهيه طلعت .. وكفت ع الطباخ وكعت دمووعي ، انقهرت حيل ، اني شسوووويت بنفسي!!! وبعد شراح يصير الي وشراح اشوووف بعد وبعد وبعد.. حسيت بشخص فات للمطبخ سمعت صوت خطوات بسرعة مديت ايدي لخدودي وعيوني و مسحت دموعي .. حسيت انحضنت عرفته هو اجه وراية بسرعة ياربي كون ميحس بيه داابجي.. ماريده يشوفني بهالوضع . همس يم اذني كال صار كم يوم ممخابر حمودي انشغلت بالعرس ... حسيته ديبرر الي ، هزيت راسي وحاولت اسيطر على نبرة صوتي .. _ اي شلونه حمودي زين .. باسني بخدي وكال اي زين بس مشتاقلي يكول ويريدني اروحله .. وضحك ضحكة بدون نفس .. كتله بغصه اي روحله خطية .. لزمني من زنودي ودارني عليه .. اني دنكت مارفعت عيني بعينه ابد .. هو رفع وجهه باصبعه الي مخلي على حنجي كال ويهون عليج فراكي .. سكتت وصكيت اسناني بقووة مااعرف شنوو احجي .. خلاني على صدره وخرت منه كتله شرارررر احنه بالمطبخ ترة لاتنسى نفسك احد يفوت يشوفنا سحبني من ايدي كال لعد امشي للغرفة .. سحبت ايدي منه كتله ماريد اريد اكعد اشرب هنا جاي . كال لا تطنكرين ترة والله كطعت مخابرتي علمووودج رفعت وجهي بوجهه باوعت لعيونه كتله ومنوو كلك تكطعها ترة اني مالي علاقة خابر عادي .. ظل يمسح على خدي بأبهامه كال مو شفتج ضجتي ... وانت ممجبور تداري خاطري هذا ابنك اهم مني رجع حضني غصب وكال انجبي احبج لاتحجين هيج .. سكنت بحضنه ثواني رمشت بعيوني ومجاوبته سمعنا صوت مهيب واحسان بالصالة تركته بسرعة ودرت ع الطباخ .. وهو طلع يمهم اسمعهم يسولفون وواحد يقصف الثاني ويحششون اني اكره الجاي وما احبه شربت تلث كلاصات وحار حيل مدري شجاني وصعدت للغرفة هو جان مموجود دخلت بالفراش ونمت ، بعد دقايق حسيته اجه يمي حضني ويبوس متجاوبت وياه وسويت نفسي نايمة .. هو تركني اخذ تليفونه وطلع .. فرح .. صباحية شرار وموج تعبنا حيل خطار وهوسة واني بس اركض ورى الجهال وعلي الدر ماشفته كله يم الخطار .. للظهر دخل للغرفة جنت انوم بالجهال ، هم اثنينهم يتعاركون على حضني .. عاد اني علمتهم ينامون بصفي وكوة علمتهم على هيج بالبجي وشلعان القلب يله تعلموا وهو اني اريد واحد يعلمني .. هو اجه يمي وكعد كال هاا خلص العرس حضري روحج باجر نرجع للمزرعة ..... اني كمت كتله لا برووووح جدك ... هو باوعلي كاتم ضحكة : .والله احس جدي كمز من كبره وكلج ولج شذكرج بيه .. كتله : بروووح ابووك برووح امك ... خزرني ..... كتله لا امك طيبة الله يطول بعمرها ، علي حس بيه اني والله هناك اختنك والله جر نفس وزفره ويباوعلي بنظرات عدم رضى .. نزع اليشماغ وراح وكف يم الزاوية ، واني رحت اخذته منه .. كال لعد بطلي تسوين سوالف مال مزعطة .. باوعتله منو كالك ؟ التاف عليه كال يعني مسويه شي فاين ؟ هزيت راسي برفض وحاضنة اليشماغ على صدري .. قلص عيونه وكال احجي احجي شسويتي ... ماسويت شي والله علي بس ها رحت كعدت العرسان من النوم سلمت عليهم وباركتلهم .. سلمت عليهم وباركتلهم وريكتهم كاهي وكيمر هاي اصول العشاير عاي انت شيخ لازم تعرف كال بلا جذب وبعدين وليش ترحين تكعديهم جان خليتيهم براحتهم .. _ اني ماريد حسان يتقرب من اختي ابد ابد علي الله يخليك احجي ويا والله البارحة عناد بيه اخذها وصلها لبيت خالو عكد حواجبه شنوو تحجين انتي ؟ واذا حسان وصلها وشنوو يعني ؟ فوكاهه بعد ..... لاتسوي زين شر مايجيك اي انته هم ماتنطي بأخووك علي واخوك مرة تحرش باختي هااا شفتي نفسج شكد تحبين المشاكل هسه خلصنا من حسان كتل حمدان راح نبدي بحسان يتحرش باختج وتردين تظلين هنا موو ؟ هزيت راسي لالا والله هو مو راحة ويتحرش ... كال خوش جا اجيب اختج واسألها اذا طلع متحرش بيها البارحة اطيح حظه واذا لا الليلة انتي بالمزرعة .. دنكت راسي هيه تحبه وتمووووت عليه مستحيل ماتنطي بي ابد ابد يربي شورطني وحجيت بس اني ماريد انين لحسان خاف يأذيهه .. وينتقم مني بأذيتها .. كتله هاااا لالالا هيه ماكالت بس اني هيج خمنت .. كال هااا فرح ؟ شوو بدلتي ؟ لزمته من ايده تعال نام عمري انته تعبان وكاعد من الفجر .. لزمني من زنودي ويباوع لوجهي وبعيونه غضب مكتووم .. فرح لاتحجين حجاية انتي موو كدها لا تهمين الناس بالباطل مفهووم ؟ باوعت بعيونه بتوسل كل الموضوع اني ماريد اخوك يتقرب من اختي .. هز راسه وكال سهلة هاي بس لا تظلين تلفين وتدورين وتشمرين بتهمج ع الناس بالباطل مايعجبني هذا الاسلوب عقلي شويه باوعتله بحزن وكتله خووش اسفة ماتتكرر .. راح شال الجهال خلاهم بالسرير وتمدد واني رحت تمددت يمه اتوسل بي يبقيني هنانه ... كال انتي ماتكعدين راحة انتي تجيبين المشاكل لروحج شوفي ماصار ايام وانت تحفرين وتدورين مشاكل ويافلتان ويا علان ضربت عكس واني يمه وايدي على صدره .. لا والله ماتنعاد بس شسووي اخاف على اختي .. اختج شكتلج ؟ لو هاي انتي من وحدج تألفين السيناريو ؟ لا ماشكت بس اني اضوج من حسان وماريده ابد ابد يتقرب من شغلات تخصني سواء دانيال او انين اختي .. كعد على حييله ولج دانيال ابن اخووه شبييج انتي ؟ وانين مجرد وصلها ومن قبل هو نقذها ولج فرح انتي متأكدة اكو ذرة عقل براسج ؟ اني هم كعدت وتربعت : واني شمدريني ما يكون اله غاية بهذا الشي كله ؟ كال بعصبية لااء ما اله غاية اخوج استنجد بي وهو راح سوه الي يملي عليه ضميره وغيرته بس انت شيفهمج يله كافي لغوة لو تنامين لو تخليني انام .... لهيب... اليوم اني معزب ومفتخر بنفسي يمكن هاي اول مره اعزم واحد بحياتي حسيت روحي جبير العشيره واني اسوي وليمه للجماعه لا ومو بس هيج ضربت عصفورين بحجر كلت اني يوميه عازم خلي اعزم العرسان شرار ومرته هم استغل الفرصه وهم مقتصد وابوكم الله يرحمه... رحت جبت مسواك قبل بيوم سمج ولحم كلت اخلي هديوه تسوي تشريب وهم جبت باميه تسوي تمن ومرك اخاف ما يكفي... كعدت من النوم من وكت رحت غسلت وطلعت دخلت لكيت هدوه بالمطبخ تطبخ لابسه بجامه ورديه وبيها دبب رصاصي صغار ولابسه تشيرت رصاصي وبي وردي ورافعه شعرها... ضليت صافن عليها بنت الذين حلوووه وتغري بس المشكله لسانها طووويل وزفر وسوالفها ما تنوصف تفوق الخيال... فركت وجهي منعس وهي باوعتلي كالت بتردد : اكولك اني خلصت طبخ التمن والمرگ وهمين سويته مركه بيضه مال لحم حطيت الها شويه كركم صارت صفره وهمين حطيت الها ورق عار حتى توخر الزفره ونومي بصره وبص... كطعت كلامها بملل : دكافي كافي ادري شنو كتلج انطيني المقادير هنه كلهن تمنات ومركات وهسه تطلع مرگه ملطيه جنها مي.. بينت على وجهها علامات الانزعاج ودارت وجهها وهي تحرك بالتمن...وايدها على خصرهه .. تنهدت على شكلها تقربت منها صرت وراها واني اشم بريحة التمن هو ماكو ريحه عجيبه غريبه وطيبه ومدري شنو لا شي عادي كلتلها _ اووويلاه ريحة التمن فدشي باوعتلي ابتسمت كالت. ايي اول شي حمست البصل اني كوولش احب اخلي بصل ويه التمن وبعدها خليت التمن وملح وانوب المي ومن نشف هدرته لزمت خدودها المتفحه كلتلها : هداوووي من واحد يحمدج لا تنطين الوصفه لان هاي سر المهنه صيري مثل مستر سلطع محد يعرف الوصفه مالته... ضحكت كالت...تتابع سبونج بوب ؟ باوعت بضيق للمطبخ بدون ما اباوعلها...والله من الملل بروسيا مو بس تابعت سبونج بوب تابعت حتى سالي وحقدت على الانسه منشن... حطيت ايدها على خصرها ياستنكار...ليش يابه ما جنت تطلع نوادي لو سهرات ليليه وليالي حمر ويه الشگرات ضحكت على كلامها من داخلي كلتلها بنفي...لا يابه ما عندي هيج شغلات لان صديقي جان يقضي ليالي حمر ويه الشگرات وتالي تمرض جاوبتني ببراءه : ليش النوم يمرض؟...لعد همزين بعد لا تنام وياي وبعدين وين اكو نوم يمرض اشوكلها تنام ويه نسوانها وزلمها ومدري اييش اشو محد تمرض ومات بس صديقك شنو هل كلاوات رفعت حاجب : واني شوكت نايم وبعدين هذاك نوم بالحرام اكيد يمرض ايدز انتقال عدوى افتهمتي ولو انتي لو اشرح منا الباجر ما تفتهمين ... دارت وجهها : مدري والله خوفتني راح اتطلگ لزمت ايدها ودرتها عليه : شنو نايم وياج بالحرام؟ هزت ايدها : شمدريني درتها عليه وباوعت بعيونها بغضب _ لعد منو يدري ابوي ضحكت بفرح : الله اشتاقيت العمو علي اعزمه باوعتلها من فوك ليجوه : اي حتى يركعني مية جلاق اردفت بقهر : من وراج ومن وره سوالفج حتى ابووي طردني رجعت تخصرت وهي متعصبه وشكلها مغرري حييل وخدودها من حرارة المطبخ صايره نااار جمر كالت بغضب : لا والله وسوالفك اني ضليت اباوع الأنحاء وجهها المغري ولزمتها من راسها من وره وقربتها عليه بستهااا والتهمت شفايفها بعنف وهي جمدت بين اديه وتعمقت وياها... ابتعدت عنها واني باوعلها من فوك ليجوه وهي رجعت تخبط بالمركه وانطتني ضهرها...واحسها متوترة .. تنهدت كلتلها : انطيني السمج خلي بعلاكه خلي اخذه اشوي عند ابو المسكوف هي راحت بدون ما تباوعلي وخلت السمج بعلاكه وانطتيناهم ورحت اخذتهم للشوي ما ردت اتعبها اكثر اني انسان شكد حنين وكلبي طيب وراعي مشاعر الناس وهاي رايح اشوي السمج اني... شويتهن وكملت واخذتلي فره جبت لبن وطرشي وبعد إحتياجات... ورجعت للبيت لكيت عمي شرار ومرته عدنه سلمت عليهم وباركت الهم وكعدنه اذن المآذن وحسان وربعه ماكو واتصل وماكو صلينه وبعدهم ما جايين وين وله هو هذا مال عزيمه ؟ وشرار كل شويه وكال : يالله يمعودين صبوا مو كتلنه الجووع ومرته جاوبته : يمعود اصبر هسه تريكت ... شويه واندك الباب بطريقه مثل الموسيقى...طم حطحط طم ططح رحت فتحته واشوفه حسان وصديقه الشيخ يدك بالباب بهاي الطريقه بس مجان لابس عمامه لا جاي رسمي دخلوا جووه بعد ما سلمت عليهم بيهم سته وحسان السابع عازم العفطيه كلها... دخلتهم بالصاله لان شقتنه صغيره شافهم شرار انصدم وعدل كعدته وحسان اجه بسرعه عليه وهو فاتح اديه ويضحك : هلااااا بخووووي الغالي هلا بحزام الضهر هلا بالعريس والله وراده رووحك شرار وكف وحضنه كله : اي تزوج خلي ترد رووحك حسان : اني روحي راده بدون زواااج مدللها وناعشها وما مخلي بنفسها شي ضحك شرار وسلم على جماعة حسان وكعدوا واني رحت حضرت الاكل الهم شفت موج تساعد بهدى ويصيبن بالأكل واني اخذته جان حسان صوته عالي وهو يسولف _ الشييخ محمد وشيخ محمد وكف شرار وتقرب مني كال : منو هذا شيخ محمد وهو وينه شيخ محمد باوعتله وضحكت : اي هذا صديق عمي حسان هذا تدري هو معمم ذاك اليوم اجه بالفصل معمم بس هسه هو مدري شبي نازع العمامه باوعله شرار باستغراب : شنو هالمهزله شهالشيخ ذويله وهو هو هذا الشيخ جان شعره طوويل من وره مسوي شلون الذيل ...اندري شو السالفه مليوصه مدري حسان جذاب مو شيخ وهو ملبسه عمامه كعدنه ناكل وشرار يباوعلهم بقرف عبالك ما ماكليين هذا ابو حاجب مطبور شال الكاسه مال المرگه ويسفت بيها...سسسسس... يطلع صوت مقزز وابو اصبع مكطوم ياكل تشريب بيده ويلحس باصابعه من المرك وكل شويه وغص وسفتله بطل مي ... و واحد منهم جاب الكاسه مال مركة الباميه وخلاها كلها على التمن انوب حط فوكاها المركه البيضه والزلاطه والطرشي خبطها كلها سوه وكعد ياكل ضربه حسان بقرف : اكل عدل يااا وحش لا تكعد تخبط رد عليه والتمن بحلكه ويطلع منا ومنا ويحجي حجي ما مفهوم كوه فهمته...عادي عادي كلها تروح للمعده قابل ما راح اكلهن كلهن واكو معدة تخبط وامعاء تصفي ومدري شنو اكو بعد والثاني نسف السمجه نسف ياكلها بخبز وحتى عظام ما يطلع وما يغص و واحد منهم عنده بس سنين بحلكه بقية الاسنان مدري وين طالعات ايفاد وياكل اكل مو طبيعي وكل شويه غص وحسان يدك على ظهره وشرار حسيته راح يتقيئ وهو يباوعلهم خله و وگام اكيد لعبت نفسه ... وحسان متونس عليهم وخلصها بس يراسل ما اكل بس هم انسردوا وبعدها كملوا بعد ما اكلو الاخضر واليابس وحتى مي الطرشي شربوا وانوب شربوا جاي وتشكرت منهم وراحو .. موج... اليوم معزومين عند بيت لهيب اني لبست تنوره طويله وقميص وشال وخليت شويه مكياج وشرار هماتين حضر نفسه ورحنه... وصلنه هناك سلمنه عليهم وهم باركولنه ضلينه كاعدين منتظرين العزيمه وماكو اثاري طلع لهيب مختصر الموضوع وعازم جماعة حسان ... وبعدها اجو راح شرار كعد بالصاله واني وهدى بالمطبخ ضلينه نحضر بالاكل ... اني سويت الزلايط وكصصت الفاكهه بعد ما غسلتها وانوب هداوي خلصتها عليه ...عفيه مووج سوي جاي بين ما اشوف ديمه عفيه موج اغسلي المواعين بين ما ارضع ديمه ..عفية موج حضري الكلاصات لهيب لا يتعصب بين ما ابدل حفاظة ديمه واني اركض هيج وهيج انوب اجت لزمت كتفي بحزن كالت...والله اني كووولش اعتذر تعبتج بس ما الحك الوحدي همزين اجيتي وبعدها ابتسمت كالت...هسه اصبلج اكل حتى ناكل اني وياج لزمتها بحنان خطيه انقهر عليها يتيمه وما عندها اخوات ولا احد يساعدها ويرشدها كلتلها...لا بالعكس ادللي دا اتصب اكل وصاح عليها لهيب كلها هدى كويتي قميصي ؟ باوعتله بصدمه وبعدها كالت...هااا اي اي كويته من زمان خلته راح وهي طكتها ركضه كالت...فدوه موج صبيلنه غدا نسيت اكوي قميص لهيب وبس يدري يتعصب اني اكوي القميص وانتي صبيلنه غدا... تنهدت كلتلها...اوكي اوكي بس روحي هي راحت تركض واني صبيت واخذت السفرة بغرفة النوم مالتها وفرشتها وخليت الاكل كلتلها...يالله هداوي حبي تعالي اكلي لا تستحين بشرفج البيت بيتج جاوبتني وهي تكوي...هااا لا موجه عند البطون تعمى العيون اكيد ما استحي هههه كعدنه ناكل اني وياها واجه شرار لعبانه نفسه كعد اكل ويانه كال لهدى...هذا لهيب المطي رجلج عازم وحوش مدري شنو كل شويه واحد غاص ومطلع اللكمه من حلكه و واحد عنده سنين ولخضره كل شويه وحشرت بين السنين وكعد يحاول يطلعها لعبو روحي اجيت اتقيئ ضربته على ايده...اييع مو دناكل كال...جا اني شلون متحمل واني اشوفهم صوت وصوره انوب اكلنه وكملنه راحت هدى سوت جاي واني غسلت المواعين وهي خطيه ساعدتني ... وانوب راحو وشرار رزل لهيب بدل ما يتشكر منه واخذني وراح كال...العار عبالي صاير ادمي وعازمني طلع عازم العفطيه واني ضيف شرف جايبني... ضحكت كتله...واني صرت ميري اركض هييج وهيج حتى ضهري انكسر جاوبني...خوش بس نرجع اسويلج مساج اعدل ضهرج ضربته بيدي على كتفه وضحكت ...لا شكرا ... ريلام ... رجعنا لبغداد .. وبيوم اجتي هيام كالت هاي ندى صديقتنا بالمدرسة تريد تحجي وياج اخذت التليفون منها وحاجيت ندى ، مرت من يمي هيام لازمة الخاولي .. كالت من تخلصين خلي الفون ع الشحن .. هزيت راسي بقبول .. وظليت احجي ويه صديقتي هيه تزوجت وماعرفنا اخبارها بعد وهسه مدري منين جايبه رقم هيام وتواصلت وياها .. لمن خلصت مكالمة اجت رسايل لهيام بالغلط انفتحت باوعت جانت المسج بيها .. لتخافين لتخافين تسوين عملية ترقيع وترجعين بنية بس لمن تسوين هذا السحر مراح يبطل لنهاية عمركم انصدمت صدمة عمري ، خليت ايدي على قلبي مخروووعة واثارني الفضول حتى اشوف باقي الرسايل وكعدت اقراهم جانت هيام تشكي لصديقتها تكوللها ماعندي حظ حبيت ابن خالي وهو مايحبني يحب اختي رغم محرمة عليه وظل ياذيني لحد ما انطردنا من البيت وكرهته وبعدها حبيت محمد وهو يكول احنه اصدقاء ومن يبوسني يكول الاصدقاء كولشي يصير بينهم وذيج تحرضها تسوي سحر يم الساحر وتكوللها سوي بالنكاسة حتى يستمر ومحمد بسرعة يجي يخطبج وتكوللها انطي عذريتج للساحر وبعدين سوي ترقيع عادي بالفلوس كولشي تكدرين تسوين شمرت الفون واني اغلي ماعرف شنووو اسوي .. بعدها اخذته دااودي لماما حتى تشوفه وتتصرف بسرعة قبل لا هيام تضيع عمرها وتضيعنا احنه وياهه .... يتبع ....... تسألوني عن اعمار الابطال جبتلكم مواليدهم ... علي الدر ١٩٧١ .. فرح ١٩٩٢ .. موج ١٩٨٩ .. شرار ١٩٨٤ .. احسان ١٩٨١ .. انين ١٩٩٧ .. وخاف صار غلط باعمارهم بالبارتات اعذروني اكره احسب وحتى عمري مدري شكد جان ب ٢٠١٤ 😂🙊 ردتوا شبيه حسان هو يشبه حسام جنيد بهاي صورته وهو اسمر ...  وانين تشبه هاي البنوتة  هاي للي طلبوا شبه حسان وانين .. وشغلة عيب تطعنون بالشرف والعرض انتم هم بنات والدنيا دوارة هاي للي طعنوا بعرضها انين مراهقة ترة وغلطت صح هالشي مو صحيح بس انتوا عيب عليكم الي سويتوا البارحة تدعون عليها وحدة تكول كون يغتصبوووج وحدة تكول كون تموتين شنو هاي وتردون الله يرحمنا اذا احنه ننهش بلحم بعض شون الله يرحمنا بعد الحمدلله والشكر |
هذيان بين جمر وجليد الفصل ستة وخمسين نورا ناصر "لا تهتم بي لتنتقم من شخص آخر .. أنا لست خنجرك" - خلف الأسلمي . ريلام .. دااخذ الفون لماما ، طبت هيام وعلى راسها الخاولي باوعتلي وشالت الخاولي من راسها ظليت اباوعلها ثواني ، مدت ايدها دتسحب الفون من ايدي التافيت ابعد التليفون عنها واني بقمة عصبيتي منها وقرفانة منها ومن الشكول التعبانة الي مرافقتها صااحت جيبي تليفوووني شبيييج وجع ... كتلها وخرري ادبسززز ماتاخذينه اودي لماما خلي تشوف سوالفج التعبانة والشكول الي تمشين وياها والي راح تضيعج وتجيب اجلج فتحت عيونها باوسعها وكالت شكوو شبيج ريلام تخبلتي مدا اعرف عن شنوو تحجين ؟؟ عطت بعصبية متعرفييين موو متعرررفين ؟؟ صاحت وسمم وكبر شكوووو وليش تباوعين بتليفوني هيه هااي الثقة حقيرااا باحتجاج وجهت كلامي .. لج مطية هيه ظلت ثقة ظل طيحاان حظج ادبسز تردين انوب تمشين بدروب عووجة ساافلة بعدها تحاول تاخذ الفوون مني واني التاف اريد اطلع من الغرفة بس هيه تصير مقابيلي .. وراحت ركضت قفلت الباب اخذت المفتاح وظلت تباوعلي كالت احجي ريلام غير افتهم شكوو ؟ كتلها ولج هاي الادبسز الي تمشين وياهه الطايحة الحظ شتكولج وفتحت المحادثة دااشوفهه من بعيد حتى لا تخمط التليفون قربت وجهه بهدوء واني رجعت ليورة كالت تره مداا اشوف شنوو كاتبة هيه هاي سافلة وساقطة واني اريد احظرهه انتي شعليج بيهها ؟ وشعليه اني تكول الي تكوله قابل راح امشي بكلامها جاوبتها بقوة واني اقفل التليفون تريدج تسووين سحر لهذا مصخم صاحبج الي يبوس بيج وانتي مكيفة كالت لا والله ماااخلي عطت جذااابة وتكوليلي مهيب هيج يسوي بيج وطلع هذا صاحبج تنهدت كالت اني من اكول لماما عليج وعلى سوالفج ويه مهيب اني اريد مصلحتج ريلام انتي ميصير تتزوجيه اصلا هو باعتبار اخوج وشغلة لخ هم طردونه من بيتهم كرامتج وين كرامة ماما وين ؟ وترة اني صح جنت احبه بس سوالفه ويانا كرهتني بي ضحكت باستهزاء : لااااء انتي مجنتي تحبيه الحب اسمى من ان يكون هيج انت مجنتي تشوفين غيره ولمن شفتي بالكلية محمد وغرج بالكلام المعسول وسيطر عليج نسيتي مهيب بسرعة لان اصلا ماجنتي تحبيه دنكت ، حكت كصتهه وهسه شلون دنطيني تليفووني الله يخليج وهسه هاي راح احظرها ومحمد هماتين انساه نفس ما نسيت مهيب ترة سهلة حيل مراح اخسر الجنة اذا تركتهم واكدر اعيش حياتي بعدهم مثل معشتها قبلهم خوش كتلها خوش بس ماما لازم تعرف بسوالفج حتى تتأهب خاف متلتزمين بكلامج وهماتين خلي تخليلج حد كافي تفرعنتي وتجبرتي كالت ببرود وهدوء .. اووكي بس انطيني تليفوني اطيح حظ و احظر هاي السافلة الادبسز وبعدين اني شذنبي قابل اذا هيج تحجي قابل راح امشي بكلامها ميخالف اني احظرها هسه ليش لااا ، داافتح الفون قفل وماعرف الرمز نسيت اني قفلته قبل شوي انطيته الهه وهيه فتحته طلعت المحادثة وخابرت عليها جاوبت ذيج وبدت هيام تعد وتصف ... ساافلة حقيررررة انتي شنو اشايفتني وتكوليلي هيج طايحة الحظ لو دتروجين لصاحبج السحار ويمكن يطلع مسوي بيج نفسي الشي تفو عليج .. غلقت المكالمة وانوب حظرتها وشوفتني شون حظرتهه كتلها مو صعبة ترفعينه بعدين ادري بيج وبسوالفج مو غبية اني ترة يا هيام ردت اي اني ادرى بمصلحتي موو نفسج الفاهية خطيبة سمير الفاهي .. وطكتهه ضحكة وظلت تصفك وتضحك والقرآن لايكين لبعض انت وياه .. اصلا لايكلج اكثر من مهيب يلفلفج ويخليج جوة ذراعه ويسيطر عليج تزوجي سمير احسن قوست شفايفي ننننن ترة ماتضحك ... وبعدين سؤال هيام انتي ليش دتحاربيني بمهيب ليش هلكد مقابلة نرتبط ماعتقد راح نأذيج اذا ارتبطنا اني اختج مو عدوتج انتي حقيرة ريلام كوولش حقيرة ويايه جنت اكولج احبه بعنادي جنتي تتقربين منه وخليتي يحبج لو مبتعدة عنه جان هو ظل يحبني لا ميحبج تدرين ليش لان انتي حقيرة ولو اني مثلج هم مجان راح يحبني ابد ، مهيب مايحب شكلي يحب روحي لان دائما يكولي انتي حنينة وتنحبين لج انتي حتى دانيال الطفل هم جنتي تاذينه وهو مهيب يشوفج شون ترديه يحبج كالت اهووو شجاب دانيال نعال بالنص تخوطين بصف الاستكان وراحت فتحت الباب من القفل وكالت دطلعي برة شكد اكرهج عفتها ونزلت جوة ورحت كلت لماما على كل شي شفته وقريته .. كالت روحي صيحي عليها خل تنزل بسرعة .. صعدت شفتها دتنشف شعرها بالسشوار كبال المراية نترت بيها امي تصيحلج نزلي يله ، طفت ع السشوار باوعتلي ببرود ونظرة مسيطرة ووخرت الخاولي من على كتفها وشمرته عليه كالت روحي نشري وتعدل بشعرها بكل ثقة وغرور وبقته مفتوح نص مبلل نص ناشف .. وطلعت اني شمرت الخاولي ع الميز وتبعتها اركض هيه رجعت دفعتني استغربت ليش رجعت راحت اخذت التليفون وتأشرلي عليه بثقة وراحت نزلت جوة يم ماما جانت واثقة من نفسهه حيل ، حتى خلت الفون بيد ماما وتشوفهه شلون حظرت صديقتها ...وظلت تحجيلها بكل ثقة ماما اني لا عندي علاقه بمحمد ولا شئ هو مجرد زميل وبعدين هو معجب بيه وهذا جو الجامعه مو شئ جديد وهو حاجي ويه صديقتي يريد يخطبني ويحجي وياج انتي شخصيا وهذا كل الي صار وبعدين ماما ريلام دومها هيج ويايه ولا كان اني اختها عبالك عدوتها وهي من يوم يومها تصاحب الغريبه عليه واني ترئ ما متفاجئه منها ومن طعنها بشرفي لان هي عبالها عود اني احب مهيب واخذه منها واني لا اعترف بمهيب ولا شئ حطت ايدها على وجهها وبجت بصوت حزين...ليش ماما ليش يعني اموت واعرف ريلام ليش هيج تسوي بيه كله الخاطر مهيب والله عجيب لهالدرجه مهيب اعز مني وبعدين اني مو تركت الها مهيب وفضلتها عليه هي ليش ما تصير مثلي وتضحي ليش ... انوب تحاربني وتتهمني باطل الله على الظالم وصدك لو كالو تنام عين الظالم بس المظلوم يدعي عليج وعين رب العالمين ما نامت واكيد يعاقبج واني وروح بابا ما اتذكر بفديوم دعيت عليج رغم سوالفج وحقارتج ويايه ترى ميصير هيج تحاسبني على الكلمه وتتدخل بخصوصياتي اني فد يوم تدخلت بخصوصياتج ! اريد احجي ماما سكتتني .. وهيه وتكمل ببكاء ونهيار ...شلون ماما اكتل روحي حتئ ترتاح ريلام والله ذاك اليوم فكرت انتحر بس من وراها تحسسني اني مو راحه تحسسني اني وحده حقيره وكلبه واني ضميري يالمني ليش هيج ماما يعني معقوله اني ادبسز وبس هي الشريفه يعني سوتلها قصه شكبرها واجت فضحتني يمج بس لان ولد انعجب بيه وحاب يخطبني لهل درجه الغيره تكتل وحتئ لو غلطت تعالي وانصحيني ليش تشهرين بيه .. تنهدت ماما وانطتها التليفون شمرته عليها هااج اخذي عيوني راحت مدري شلون نهار كله عيونكم بي وانتي ياريلام مو ترديها حجة على اختج وبعد لا تتدخلين انتي مو ولي امرها ولا احسن منها عطت ماما شنو اريدها حجة عليها تحجين صدك ترة هيه الحجي هذا يخلي بدني يقشعر وانت بنفسج قريتي والله ماما لا تثقين بيها اسكتي بالله سكتي هذا هو حظرتها هيه وبعد هذا محمد لو يجي يخطبج لو بعد ماتحاجينه افتهمتي لو لا كالت بثقة صار ماما من عيوني تدللين وراحت تبوس بيها وتحضنها وتبوس براسها واديها وتتلوك ماما حبيبتي فديت الثقة يعيوووني انتي اني مستحيل انزل راسج ابد واني كد هاي الثقة كتلها هو انت حتى من ورطت فرح ماحجيتي وياها ولا عاقبتيها وهسه هماتين حتسويلنا مصيبة ومن امن العقاب اساء الادب وهاي اني كتلج والي عليه سويته والبقية بعد عليج وبقت يمج انتي وبنتج ماما كالت اوووو ولج انتي شنوو ذابين سرتج يم فرح تكومين فرح وتكعدين فرح شوون وياج انتي والله يا ريلام اذا بعد جبتي سيرتهه بهذا البيت اله اطيح حظج هيام نطت زوجيها ماما زوووجيها خل نخلص منها اووي ردت ماما هو دااطبخهه على نار هادئة بس اصبريلي .. رديت بعصبية ؛ والله والله مااتزوجيني غصب مو بكيفج احرك روحي انتحر انهزم بس مااتزوجيني لا سمير ولا نعال خووش التفتت داروح واجه النعال بظهري خليت وصعدت للغرفة بدون ولا كلمة متتت مليت فوكاهه بعد فوك مخايفة على هيام العار وماريدها تتورط اوكع بيها اني ويفروهه عليه بعدها ورة ايام قليلة اشوف هيام تعبانة معصبة وضايجة وروحهه بخشمها تعارك بالتليفون ومدري شبيهه حاولت بس اتقرب منها ابين الها اني اختها بجانبهه مهما صار بيننا بس هيه ابد قافلة كتلها شبي محمد وياج تردين اخلي مهيب يطيح حظه اذا مسويلج شي ؟ بس كوليلي والله هو مهيب مايرضى ع الغلط وراح يساعدج اكيد عاطت بووجهي لا تخليني اسبج واسب مهيب هو منو يلي طيح حظي غيره اني بس ردت انسى حبه من خلال محمد بس محمد طلع انكس منه دااحاجيهه اخذت تليفونهه وطلعت وهيه تناشغ .. ....... أنين .. عزمونا بيت عمو الشيخ احنه كلنا بيت خالو وبيت عمو هماتين وقررنا نروح كلنا سوى لبست سترة نيلي وبيها نقاط حمرة وجواتهه بدي احمر وجينز وحذاء فلات احمر ورفعت شعري ليفووك .. ورحنا كلنا دخلنا سلمنا ونظرات اخواتي اليه غريبة واني تجنبت نظراتهم وكضيتهه مدنكة ، رغم هيه موج خابرتني ورزلتني رزالة غسل ولبس على الي صار بليلة عرسهه وهماتين فرح كوومة هددتني بأحمد واني خفت وبعد حتى فيس مافتحت .. وتمنيت من قلبي يسدون الموضوع ادري غلطت بس شسوي خو ماا كتل روحي حتى اكفر عن ذنبي بعدها اشرت اليه فرح كالت امشي ويايه وتبعتها يم الدرج همست بإذني خاف يجي إحسان اليوم ماريد اشوفج يمه افتهمتي واذا صار وشفتج مراح اتردد لحظة واكول لأحمد وبعد شي ثاني خاف تشوفيه تركضين تصعدين فوك لغرفتي القديمة افتهمتي لو اعيد واني مدنكة هزيت راسي وحجيت الها ماشي فرح بس كافي والله افتهمت ولج اني اريد مصلحتج يللعوبة لج هذا مايخاف الله ولج حتى ع القرآن يخلف جذب والي يسوي هيج كولشي يسوي ، لج هو ديقربج اله حتى ينتقم مني والله كتلها كافي والله لعبت نفسي كاافي انت شكد تلحين ترة فهمت فهمت اني بس هاليوم وباجر اخلي خالو يرجعني يم احمد اصلا طكت رووحي اصلا اني لوو كاتلني اووس جان احسن والله عليش اني عاييشة هيه هااي هم عيشة وظليت ابجي دااروح طخيت بموج حضنتها وظليت ابجي وهيه هم حضنتني واسمع فرح تكوول اووو شون سالفة هاي والله اني اريد مصلحتها والله شبيها بسرعة تبجي اني هم راح ابجي والله اني مو قصدي وسمعتها ظلت تبجي ظلت تسكت بينا موج اثنينا وكالت لفرح كافي سدي الموضوع وصعدت فوك لغرفتها جان شرار مموجود وطلعتلي شغلات واغراض هيه مشتريتها الي ، كالت طلعت للسوك قبل كم يوم ويه شرار واشترتهم .. بس اني مافرحت ابد لان جانت الدنيا مظلمة بعيوني هم راح ارجع اروح لكركوك وهناك ضوجة لان لا دوام ولا اخواتي يمي روتين ممل حيل باوعتلي كالت ها شبيج معجبوج ؟ رديت لا والله عجبوني انتي تدرين شكد احب اللبس على ذوقج بس اني ادري حيلبسهم الكنتور لمن ارجع لكركوك لان مااطلع واحمد مافارغ يطلعني خطية مشغول ميخالف حبيبتي تجيج طلعة وتلبسيهم وهمينه حترجعين تداومين مبقى شيء وتروح الضوجة وهم لتنسين تكعدين تقرين دروسج للسنة الجاية اووو موج بعدها هالسنة مخلصت واني الضوجة كتلتني كتل رحت وكفت ع الشباك وخرت البردة شفت سيارة تاهو سودة دخلت للكراج ونزل منها هو لبسه رسمي اسود بأسود ، بس نزل من السيارة نزع السترة خلاهه على ايده ويتلفت ويرفع بشعره ليفوك واجاه مهيب تلكاه وظلوا يحجون حسيت بنار تجوي ضلوعي ، دفعات من الالم انبعثت بداخلي ، اريد اسيطر على نبضات قلبي ، بلعت ريك احس غصيت بي .... واسمع موج تحجي وياي ، سديت البردة وباوعت عليها كالت وين صفنتي مو دااحجيج ؟ هزيت راسي واني رحت يمها كعدت ع السرير مماكو شي بس الحديقة مالتكم كولش حلووة .. كالت اي يهتمون بيها ورفعت تك حاجب وكملت بس انتي على شنو جنتي دتباعين ؟ وراحت باتجاه الشباك ، واني ظليت اعصر باديه ، يربي كون فات للبيت كوون متشووفه .. هيه وخرت البردة باوعت ثواني واندارت عليه هيه هاي الحديقة الحلوة الي تقصدين عليها ؟ كمت على حيلي لا والله موج موو قصدي .. ءءء ااكوولج فرح خطية ظلت تبجي انقهرت عليها خلي نروح نشوفهه اني اريد اغير الموضوع بس من دون قصد جفصت هسه عبالها اريد انزل حتى اشوفه هيه كالت اكعدي هنا هسه اكيد تجي وهيه كل دقيقتين تبجي هرمونات حمل وهيه اختج هم ام دميعة نفسج هزيت راسي وظليت اكلب بالملابس واحس نظراتها تحاوطني وحتى استحي اشيل عيني واباوع عليها ، اجت كعدت يمي خلت ايدها على ظهري تربت عليه كالت انو ، بنبرة رجاء .. باوعت عليها بنبرة توسل فدوة موج والله اعرف الي راح تكولينه اعرف واحاول اتعافى منه وحروح يم احمد بعد لا اشوفه ولت يشوفني .. كالت اريد مصلحتج اني .. بلعت ريك وجاوبتها افتهم والله خو متكرهوني حتى فرح همين تريد مصلحتي واني واعية على هالشي اصلا اني ماردت اجي اليوم لهنا بس شون ابقى وحدي وشنو اكول الهم ليش ماروح!! حضنتني واني كوة لازمة نفسي حتى لا ابجي واحس حيل مختنكة وغصة بنص بلعومي .. شوكت يخلص هاليوم وشوكت يجي باجر وارووح والله من صدك احسن الي .. بعدها نزلنا اني وموج جوة ، ورحنا للمطبخ نساعد فرح وام حسام ، بعدين موج صاح عليها شرار وصعدت فوك .. وفرح راحت تغسل لدانيال وبقّت فاطمة يمنا ام حسام هدرت ع جدورة وطلعت من المطبخ واني بقيت وحدي واستحي اطلع اروح يمهم الخطار كلهم كاعدين بالصالة اكو باب بالمطبخ يطل على البستان بظهر البيت جان باقي مفتوح وبي درج ينزل للجوة ، رحت كعدت ع البايات مالته وبحضني فطومة شكد حلوة وتنحب واني هم احب الاطفال واني كاعدة سمعت صوت ورايه : هاي انتي هنا واني ادور عليج.....؟ فتحت عيوني على أوسعها وحسيت بنبضات قلبي تثور بلا رحمة .. التفتت باوعتله شفته مبتسم .. وحسيت بنظراته عليه تعذبني .. كمت على حيلي وكفت يم الثلاجة لزكت روحي بيها ونزلت فطومة من حضني وهيه راحت تمشي باتجاهه كرفص وظل يبوس بيها واني بسرعة اريد اطلع من المطبخ خفت لان صرت بوحدي وياه بس هو لزمني من ايدي ثواني باوعت لعيونه هو كال لحظة مو كتلج خابري انتظرج ليش ماتواصلتي وياي جنت اريد احجي وياج على حياتي وعلى الي صار بذيج الليلة مو اكثر من هذا .. والكلام لمصلحتج بقيت ساكتة بس اباوع بعيونه وهو ترك ايدي .. كال بابتسامة : لا تباوعين هيج ترة عيونج فضيحة وماتحفظ الاسرار .. وضحك خجلت دنكت وطلعت اركض من المطبخ احتاريت وين اروح عبالك اريد اشرد منه .. وحتى نسيت فطومة صعدت الدرج بدون وعي وتوجهت لغرفة فرح لان موج يم شرار استحي افوت عليهم للغرفة ، بس اعرف الشيخ علي مموجود باقي يم خطاره .. دخلت عليها للغرفة فتت وسديت الباب واني هم غبية من شافتني تفاجئت بمنظري واني مرتبكة واعدل بشعري كالت شكوو شبيج راكض وراج جلب ؟ فتحت عيوني ع اوسعها وهيه لطمت صدرها وللج بس لا حسان شافج لو شفتي لو حجيتي ويا؟ انين اعترفي شبيج بلعت ريك كتلها ماكو شي والله .... كالت وين فاطمة ؟ ها ؟ مادري بقت بالمطبخ .. ولج منو يمها وبقت بالمطبخ ام حسام ؟ رديت ها اي يمكن .. انووو بلا جذب وينها فاطمة .. رديت نزلي شوفيههه .. ولج موو امنتهه يمج ثوولة وين خليتيها .. شون اكولها اخذها عمها!!! ومنو احسان!! حتسويلي فضيحة والله .. شون اطلع!! خاف انزل واشوفه مقابيلي همينه .. عاطت دطلعي شوفيها بين ما اغير ملابس دانيال فتحت الباب وطلعت ومشيت بهدوء نزلت الدرج وكفت يم باب المطبخ وهو طلع منه عكد حواجبه كال ليش شردتي!!!! واسمع صوت فرح فووك الدرج تكول اي صدك انو ليش شردتي احجي شسوالج ؟ هو صعد كم باية وبيده بنت اخوه ومعصب كاللها بلا حجي ماااااصخ انتي ماتتوبين مكافي الي سويتي من قبل ؟ اني رحت ركضت على فرح اتوسل بيها حبابة فرح ترة مصار شي والله شبيج شسالفة لاتكبرين الموضوع وهاي فاطمة عند عمها امشي للغرفة وخرتني وكالت اسمع حسان ابتعد عن اختي احسن الك .. رد لااااا لهنا وكافي انتي لازم واحد يخليلج حد والله لو الي سلطة عليج اله ارتكب بيج جريمة بس للاسف وهسه راح اخلي الشيخ هو يتصرف وياج احسن ....... ومن تدخل في مالايعنيه يجي بوكس يعمي نزل فاطمة بالكاع ودينزل فرح صاحت عليه .. اووكف حسان لا تدخل علي الدر بالموضوع رجاءً .. كل ما بالموضوع ماريدك تقترب من اختي ابد ، اخاف عليها منك وهذا من حقي اخت خايفة على اختها كال بعصبية ويوجه نظراته بحقد صوب فرح حتى اني خفت من نظراته .. اي كولي هذا الحجي لرجلج لاتكولينه الي هو جبير هاي العائلة وشيخ العشيرة المفروض يحلها .. كال هالكلام وراح واني باوعت لفرح بقهر وهيه خلت ايدها على حلكها وتباوعلي .. حاجيتها بعتب ليش هيج فرح هاا ليش ؟ اني لمن طلعت من يمه بسرعة بس عمود اطبق كلامكم انت ليش تضخمين الامور ؟؟ هزززت راسها وكالت امشي وياي للغرفة .. رحنا للغرفة ورة شوية اجت ام حسام وكالت الشيخ يريدج انت واختج بغرفة المكتب مالته .. •~•~•~•~☆~•~•~•~• فرح ... لمن اجت ام حسام وكالت هيج انرعبت من صدك هسه هذا حسان شدعوة مكبر الموضوع شحجيت اني ماريده لاختي هيه كوووه ... اخذت انين ورحت واني متأكدة راح احصل رزالة ناشفة من علي اجيب لروحي لمشاكل ، اني شمدريني كلت نحلها بيناتنا احنه الثلاثة انين كالت وين موج .. والله استحي خلي تجي ويانا اني وياج منعرف نحجي .. تنفست كتلها لا موج وشرار هسه اكيد نايمين وكملت بقلبي نايمين بالعسل هذا شرار لا يهمه خطار اكو لا يهمه شي ... صاح عليها وتبعته وصارلهم شكد بالغرفة حتى عيب من اهلنه كاعدين بالصالة ويمهم الحجية انين كالت متسائلة وكت نوم هسه!! رديت عليها اي هم ينامون باي وقت عادي .. اخذت انين ورحنه لغرفة المكتب واني حتى بطني مغصتني ووجعتني حيل و اتمنى تطول المسافة وما اوصل .. دخلنا وشفنه حسان كاعد على الكراسي ويضرب رجله بالارض بتوتر وغضب .. اجت نظراته علينا ظلينا نتبادل النظرات بغضب صامت .. وورى المكتب كاعد علي الدر ووجوده مهيمن على كل شي .. باوعلي بصراع غاضب و ركز بنظراته عليه وصمته يخوفني اكثر من ثورة الغضب الي متوقعتها منه .. دخلنه وعلي كال بغضب مسيطر عليه سدي الباب وراج .. سديته وبقيت واكفة ولزمت بطني .. حسان وهو كاعد كال .. شيخي هاي كدامك خلي يصير الحجي اني البنية لا مواعدها ولا واهمها بشي .. مجرد بينه سلام وكلام وهاي هي أسألها اذا كالت غير هالكلام فهي جذابة .... واني بريئ من اتهام فرح مثل براءة يوسف من زليخة ... عود هو يوسف ابو العرك كلت بقلبي ، باوعتله كتله اني ما اتهمتك بشي بس ماريدك تتقرب من اختي ابد وترى اني مناسية لمن كطعت علينا الطريق قب بعدني ممكملة قاطعني علي الدر وكال فرح خلينا بالجديد هسه واي شي قبل اليوم انسي .. كتله بس اني خوفي ع اختي اله مبرر .. كام على حيله حسان وجه كلامه لعلي .. شيخ اذا فرح تتهمني بشئ ماصاير وتشوه سمعة اختها على الخالي بلاش اني اريدها واخطبها واكص لسان العكارب عزا عزااا عزااا اني عكرب يااا ثعبااان!!! علي متشووفه .. علي كال بعصبية شووف حسان من تحجي احجي باحترام وانت فرح تظلين ساكتة ماتفتحين حلكج الا لمن اذن الج وهسه اثنينكم تلصموون افتهمتوا ؟ لا اطلعكم اثنينكم برة واحد باوع للثاني اني وحسان بنظرات حقد وكره وسكتنا .. اني دنكت وهو يفر بسبحته بيده بعصبية وعلي سأل انين : عمو احجيلي انتي حسان متحرش بيج مسمعج كلام .. ؟ يطلب منج شي محلو احجي لا تخافين اني انسان حقاني وهو اخوي والله اذا غلطان وياج او متجاوز وياج لو بكلمه هسه اطرده واتبره منه هي جاوبته : لا عمو والله ابد اصلا احسان كووولش حباب واني مديونه اله .. تمنيت اسطرها على راسهه .. بس هيه يمكن حجت الحقيقة .. ! هو كالها متأكدة بوويه ماعندج شي تكولينه ؟ احجي هسه احسن ... كالت لا عمو بس هيه اختي لان تخاف عليه واني اصلا باجر حروح لكركوك والله يم اخويه اصلا مباقية هنا علي باوعلي مقلص عيونه واني اعرف هالنظرة بيها تهديد بيها عدم رضى ويمكن اليوم راح ياخذني سحل للمزرعة احسن شي اسوي روحي مريضة .. بس مو هسه خل اتغده لان والله جوعانة والطبخ يجننن طلعنه اني وانين وحسان بقى يمه .. سدينه الباب كتلها انو شفتي شلون يحجي يقصد ياخذج عناد بيه والله يعلم شيسوي بيج .. كالت كافي فرح والله لعبت نفسي والله وعافتني وراحت .. بعدها صبينا الغدى النسوان وحد والزلم وحد .. والعصر لمن رادوا يروحون ودعنا انين اني وموج وشكد بجينا وهيه ملخت روحهه من البجي خطية متتت قهر عليها ... صعدت لغرفتي وكملت بجي .. دخل علي جان معصب وعيونه بيها بريق لنار مأججة خوفتني .. زدت بالبجي وخليت راسي على ركبي اجاني صوته ليش تبجييين ؟ فوووك شينج بعد ؟ كلت باحتجاج ودموع اني ماسويت شي موزين اني خايفة على اختي اخوك سحبها من السيارة بنص الليل بالشارع وكدامي تحرش بيها تريدني ماخاف عليها هسه والله سمعته يكلها ليش شردتي معناهه هو جان ملاحكهه وهيه شردت اجه كعد يمي سحبني اله صار راسي على رجليه .. سمعته تحسر كال كافي بجي كافي بالله بجيت شويه وسكتت وكمت خليت ايدي على صدره العب بدكم دشداشته ومااباوع بوجهه كتله علي الله يخليك كافي اختي باجر تروح واحنه متنا من البجي اني بعد مااكدر ابتعد اكثر عن اخواتي الله يخليك انته بيدك تلم شملنا كافي خلصنا من عقابك لزم اديه وكال ولج انت جبتي العيد وياج واجيتي ركع مشاكل وحدة ورى الثانية وماتشبعين والله لو ما تعبان جان هسه شلتج ووشمرتج بالمزرعة وخلصت منج تدوخين الراس انت ولج حتى بكلبي طلع شيب من وراج والمشكلة ما اكدر اذيج ما اكدر يمصخمة وجهي اي والله مصخمة وجهي سحبت اديه منه والله انته ماتحبني والله .... انته يمكن من توديني للمزرعة حتى تجيب مرتك هنانه اني اشك بيك متزوج ضحك والله كافي عليه بلوى وحدة الي هيه انتي بس انتِ شكوكية زايد ... اي والله وانت سبب هالشكوك .. هاي الشكوك الي تشتغل مثل الجاكوج فوك راسي ليل نهار انت سبب عذابي انت ماترحمني ولا تريحني سحبني وحضني حيل وكال اريحج ليش لا هو شكم فرحة عندي هيه وحدة وروحي من الدنيا وشاعلة عشيرتي شعل بخبالها من اول واحد لاخر واحد .. وخرت من حضنه كتله كول والله مامتزوج عليه علي ؟ رد وحق الحق حتى بعقلي مافكرت بوحدة غيرج انتي مدري منين تجيبين هاي السوالف علي لعد ليش تريد توديني لبيت المزرعة ... الي اسبابي وانتي انتبهي على تصرفاتج من يوم اجينه لحد هذا اليوم صرعتيني بالمشاكل فرح انه ترة هم تعبان انتي ليش تتعبيني اكثر انه ما صار الي كم شهر من طلعت من الموووت انت ليش ماتفكرين بيه بس يهمج نفسج ؟ وبس تفكرين بروووحج ؟ حسي بيه شويه شجاج ترة انه مالي خلك مشاكلج بعد هناك احسن الج من هنا واحسن الي انه همين لان ماريد دوخة راس ومايهون عليه ائذيج .. لفيت اديه على ركبته كتله اسم الله عليك ان شاءالله عمرك طويل بس انته هم حس بيه يعني محبوسة هناك لا تليفون لا اهل لا شي ولا انته الي تجي يومية رد تليفون مايفيدج سويت بي بلاوي ، اجيج بالاسبوع مرة كلش كافي عليج تخابرين اهلج من تليفوني على طول اليوم من تليفوني وكدام عيني اي مكيف جايني بالاسبووع مرة موو؟؟ والله يا ام جاسم هاليوم الي اجيج بي ارجع منج صاعد الضغط والسكر وطالعتلي جم شيبة براسي كال هيج ورجع ظهره ع تاج الجرباية بقيت اباوعله وايدي على شفافي .. سحبني من ايدي وخلاني على صدره .. كال وايده تتلمس بطني شونهه بنتي نوران ؟ محضرلج مفاجأة بس تولدينها رفعت راسي باوعتله ... كال صدك شنوو هيه ؟ رد ولدي بالسلامة وساعتها الله .. بس فرح توووبي من حسااان كافي اني والله تايبة من عنده بس هو يريد ينتقم .. ماكملت جملتي خله ايده على حلكي وسكتني .. هدى كعدت من نومي على صوت ديما الصاخب تنهدت بضيق ياربي واحد ما ينامله ساعه اذا ما بده الواق والويق... لميت شعري بتعب جنت لابسه تراك نيلي متطوره وصايره البس واخلي مكياج اريد احرك كلب لهيب لا كل ممنوع مرغوب... واكو مره جيرانه دائما تجيب ملابس وتراكات وتبيع بالقسط باليوم الف عاد اني اشتري منها تراكات وكذا ولهيب اذا انطاني مصرف اوفيها واني كايلتله حتى لا يكول تتصرف من كيفها... بس بصراحه بصراحه مره هي هاي المره اسمها ام سعدون كالت ادخلي على الفايبر اكو بيجات يبيعون ملابس خدمة توصيل انطتني البيج واني تواصلت وياهم اشتريت منهم تراك يجنننن يجننن كالو ب 15الف هو والتوصيل اتفقت وياهم وكلت بلكي اكول للهيب يجيبه او هي ام سعدون تجيبه... وجان عندي 15 الف مخليتهن بالكنتور انتظرت لهيب ماكو كلت ادك على ام سعدون وهي تجيبها اتصل عليه صاحب البيج واني بسرعه خليته يتصل ورحت اطلع ال 15 الف ادور ادور ماكو فص ملح وذابن ... استغفرت ربي يبووو بس لا لهيب اخذهن شلون ورطه وابو البيج يتصل فتحت عليه خط كتله بفشله...هااا عمو تفضل كال..علمود خدمة التوصيل الطلبيه جاهزه واني بشارعكم تعالي اخذي بلعت ريكي بتوتر وفشله...هااا بس بعد ما نريده اشكرك تعبتك واني اعتذر بس ما اريده كال بقهر : نعله على ابييج جايبتنه مناك لهنا وتالي دكولين ما اريده .. دا اريد احجي قفل الخط بوجهي ...بيومها فشلت فشله واجيت ابجي موقف يفشل اني حتى لو مشايفه صاحب البيج بس فشلت عبالك خنت الدولة العظمى... كعدت ارضع ببنتي واني منعسه واغفي شفتها نامت وانتظمت انفاسها وبعد ما كملت رضاعه خليتها بسريرها وطلعت اشوف ابوها الروسي وين صار... رحت لكيته نايم على القنفه وبيده الريموت وتارس الطاوله كشور حب ورجل على القنفه ورجل على الطاوله بالله هذا شكل مهندس دارس بروسيا ؟ هزيت ايدي ورحت جبت ديباج غطيته واخذت الريموت من ايده خليته على الميز بس رجله الي على الطاوله ما غطيتها حيره شلون تتغطى ما ادري؟ بعدها رحت شفت المآذن مآذن توضيت وصليت وصليت الامي الله يرحمها ودعيت لابويه الله يشافي ورجعت نمت تعبانه ونعسانه حييل... تقريبا ساعتين وما احس بي اله هو يفوزني بيده جنها ساطور كعدت واني افرك بيدي ...هااا شكووو هم تعاركت ويه السكران جر نفس كال...اول شي صباح الخير ثاني شي لا سكران ولا شي بس كومي حضري نفسج نروح للسماوه فزيت مرعووبه من مكاني...عززا ابويه بي شي الله عليك لا تضم عني... تنهد بهدوء...لا بس هو طالب يشوفج ما بي شي مهيب .. اجانه امر القاء قبض على بيت مشبوه ، سحر وشعوذة ودعارة طلع ضابط ووياه شرطة بالواجب بقيت اني بالمركز وهم جابوا المطلوبين واشوفهم دخلوهم لغرفة ضابط التحقيق وحدة منهم شكيت بهيئتها فتحت عيوني مصدوم طلعت من المكتب مالتي وهيه جانت واكفة ويا المطلوبين تلث نسوان ورجال المشعوذ وبنات اثنين لزمتها من كتفها درتها عليه جانت تبجي واديهه على حلكها من شافتني شهكت مهيييب ؟؟ تمنيت افرغ مسدسي براسها بهاللحظة .. بمساعدة الضباط طلعتها من المركز وهيه اصلا ماعليها دعوة واخذتها بسيارتي الطريق كله ارزل بيها وهيه بكل عين صلفة ترادد .... وديتها لبيت عمي حسان دفعتها بي وخابرت امها ماكو هيه ربع ساعة واجت ، رحت فتحت الها الباب ودخلت تصيح شبيهه هياااام وييينها بنتي شسووويت بيها وليش جايبها لهناااا ليييييش هيه من شافت امها ظلت تصيييح ماماااااا لحكييييني مهييب اعتدى عليه مهييييب اغتصبني . ... بلقيس : عزااا بعينك مهيييب الله ياخذك شسووويت ببنتي وولك ... يتبع ..  |
عاشت ايدج يالغلا الحل مع فرح عشان تتفادى المشاكل تشوف خواتها يمها واحسان راح يتزوج اختها انين رغم انها ما موافقه هيام ما راح تكعد راحه بلى ما تخلي مهيب يستر عليها وتتبلاه بمصيبتها انها محمد اخذ عذريتها برضاها مو غصب الغلط على اريام شلون ما تحفظ المسجات بتلفونها وهي تعرف اختها تخطط لشي كبير بلقيس راح تخلي مهيب يستر على بنتها هيام وتحرق قلب بنتها اريام تسلمين احلا ناقله فيتامين سي |
هذيان بين جمر وجليد الفصل سبعة وخمسين نورا ناصر ***** فأفترقنا انا وانت ... كغمامتين في سماء واحدة لكل منا وجهة يقصدها ، انت الى ماتريد وانا الى ما تركته من اجلك ! انها الحياة التي تفعل بنا ماتشاء لكنها لا تفعل ذلك وحدها ، للحياة اعوان ... وانت منهم ، اعنتها على قلبي مزقته إرباً ، ثم هززت كفيك في الهواء ، ، ، كأنك لاتعلم ، لكن الامر لا يتعدى مغفرة مني كي اقتل ذكرياتك ، ورغم ذلك لا اغفر لك لا لاني لا احبك ، بل لانني ارغب باستيعاب الدرس هذه المرة ! نعم هذا ماقررته اليوم ، اننا سنفترق انك لن تراني مرة اخرى الا في ظل تحبسه الوان الصورة ، وانني لن اراك الا في كل ما يجعل الدمع يطفر من عيني ، واننا لن نلتقي ، الا في دعاء انت تدعو لاغفر لك وانا ادعو الا نلتقي ابدا ، فافترقنا انا وانت ، كقلبين هذه المرة تحت سماء واحدة ، انت ذهبت لما لا اعرفه وانا ذهبت الى الله والى الله ترجع القلوب . فرح 💔علي الدر ... ***** مهيب... جنت كاعد بالسيارة وهي بصفي وتناشغ بصوت عالي وتتوسل بيه وكل شويه تريد ابوس ايدي...فدوه مهييب والله مهيب مظلومه مظلومه لا تسوي بيه هيج وين راح تاخذني... باوعت لعيونها الذابله من البجي عيون رغم كلشي بيهن دهاء وحقد وكره وحب... ان شاء الله راح انهي كل شي بعيونها السواد والشر والحقد بعدت عيوني عنها وبعدها سقت بسرعه قصوى... همست بصوت جريح وعيون دامعه كالت...تعذبت اني يا مهيب والله تعذبت صار الوقت الي تعرف بي الحقيقه صار الوقت الي تعرف اني شريفه وغيري هو الورطني تعرف منو الي ورطني اختي من امي وابووي ... صرخت بوجهها بغضب...اسكتييي لا تذبين تهايمج على العالم انتي شنو ما توبين ما تنصحيين انتي،شنووو ولج انتي عااااااار عاااااار علينه وعلى اهلج وعلى كل ناسج ليش تخليني اعاملج برخص لو مهما حجيتي وكلتي مستحيل اصدكج اذا حجيتي على اختج ... صرخت وهي تبجي وحطت ايدها على قلبها...ليش ما تصدكني لييش والله اني مظلوووومه وهي حيه اسأل ماما اتعاركنه قبل كم يوووم وهي الي،ورطتني وتدري هي الي كلتلي روحي لهذا السحار حتئ يجمعج بمهيب... لك اني يا مهيييب احبببببك اعشقك تعرف هذا كلبي ما دك الغيرك ابببد شباب الجامعه لا شي عندي من اشوفك انت الكل يختفي بنظري... ضربت على قلبها بقوه عدة ضربات...شسوووي شسووي اذا هذا يحببك مستعده اموت مو اروح للساحر حتى انجمع بيك اني هيج واصله مرحله بييك حس بيه حسس حطت راسها على الكشن وهي تنحب بصوت عالي...انت ما تعرف شنو البيه انت كسرت كلب يحببك وركضت وره وحده ما تحبك ليش اني شبيه حتئ هيج تكرهني شنو فرقي عنها اني حبك ضميته من سنين اني كووولشي اسوي حتى احظي بحبك مو بس اروح عند ساحر وهل ساحر دلتني عليه ريلام شفت هي متحبك واني احببك ضربت الستيرن بكل غضب وتخبلت من كلامها...انلصميييي لا تحاوليين تشوهين صورتها بنظري انتي عنها تختلفين انت ما تتقارنين وياها هي نسمه وانتي حييه... ريلام ما تعرف هيج ناس ولا تعرف هيج شخصيات ريلام تربية ابووي وانتي تربية امج وانتي وياهه ما تتراهمين شعجب هسه اخذتي كلامها... صرخت بانهيار...خدعتني خدعتني ورب العرش خدعتني بسبب غيرتها وحقارتها... مسحت وجهي بحيره...ماكو غيرج حقيره... اخذتها البيت عمي حسان لان اني ما جنت اريد الها الفضيحه تضل بنت عمتي وشرفها من شرفنا ... خابرت على امها تجي تأخذها من بيت عمي حسان امها للامانه خافت وضلت كل شويه تتصل... مر وقت مو طويل واجت امها دخلت وهي ملهوووفه...يمه بنيتي هيام شبيها هيوومه ؟ ولك شعندك جايبها هنا شكو شصار بينكم... هيام ركضت على امها وهي تصرخ وتضم نفسها مني وتباوعلي خايفه...ماما ماما مهييييب ممم مهيي مهيب لزمتها امها بخوف وثبتت وجهها بديها وصرخت بوجهها برعب...شبيييي شبييي ولج احجي احجييي شسوالج ضلت تفتش بملابسها وتباوع على جسمها ... صحت بيها بغضب...هييييي شكووو كلبتنها دراما تعاي يا عمتي مخليه بنتج تسرح وتمرح الزميها وربيها بنت اليوم لو ما اني جان جابتلج مصيبه صرخت هيام وحضنت امها وهي خايفه مرعووبه مني حسستني معتدي عليها... ضربتها امه بقوه على وجهها...احجي شجابج هنا كالت بخووف...ماما طلعيني منااا ماما اجيت من دوامي وهو كال تعالي اخذج بسيارتي وتالي جابني هنا ماما ماما اغتصبني ضيع شرفي وكعت بالكاع وهي تملخ بشعرها وتلطم على خدودها واني جنت بحالة ذهووول منها من تمثيلها البارع ... هيام بصراخ ولطم...والله اكتل روووحي ما اضل ماما اعتده عليه ماااما الحكيلي راح اموووت تحارش بيه بالحرام ميلت راسي بصدمه وهجمت عليها بس امها دفعتني وصرخت بوجهي. عوووف بنتي لا تندسها وتوصخها بقذارتك ولكم انتوا االشرطة كلكم نفس الصنف الله ينتقم منك يا ساقط وياخذ حق هل مظلومه اليتيمه منك ما حصلت من اختها جاي تحصل من هيام .. والله اذا ما لعبت بيكم لعب ما اطلع ام هيام ولك انت شنو تلمس شعره من شعر بنتي والله ما جابته امه الي يمس عرض بناتي يا گوا.***د.. باوعتله بصدمه من كلامها ومن اتهامهن الباطل هزيت راسي بقهر...والله حرام بيجن المعروف اني المطي لو مخليها بالسجن جان هسه ضليتن تفرن باذاناتج مثل الجحش... امها عقدت حواجبها ...يا سجن ؟ ضحكت باستهزاء ..ههه ما تدرين بنتج جان عليها القاء قبض لان جانت عند ساحر يتعامل بالدعاره والشعوذه وبنتج جانت وياهم واني جبتها... هيام بصراخ وانفعال...جذاااااب ماما جذااااااب بالقران جذاب وروح بابا جذاب هو اخذني من دوامي ومن بعدها جابني هنا وسحلني للغرفه وضل يتحرش بيه ويبوس بيه كوه خلصت نفسي منه جذاب يريد يديرها تهمه عليه لا تصدكيني... ماما اني بنتج لا تنطين بيه هذا جذاب وين اكو سجينه يطلعونها من السجن حتى لو بمساعدته لا تصدكيين ماما لا تصدكيين... تقربت مني عمتي بجبروت ورفعت ايدها رادت تضربني بس اني لزمت ايده ودفعته وصحت بوجهها...والله هل ايد الما عرفت تربي ما تنمد عليه واني اعرفج راح تصدكين هل كلبه مالتج لان ماكو ام تنطي ببنتها... ضلت تلطم على وجهها بانفعالات وتصيح...ولك شلون تدني نفسك على بناتي شلووون والله حسابي مو وياك ويه ابوووك اني احجي الابوك وهو يحلها يا ساقط... اخذت بنتها وهي تمشي بيها وذيج شابعه طن بجي والله شككتني بروحي معقوله اني معتدي عليها وما ادري بروحي...!! سدت الباب بقوووه وراحت واني ندمت الف مره لان ما خليتها عفنت بالسجن وانفضحت بس بسيطه والله اذا ما ندمتها على تهمتها اليه ما اطلع مهيب اني هيج تسوي بيه... خليت وطلعت بعد ما قفلت بيت حسان وجنت اتجول بشوارع بغداد مصدوم صدك لو كالو كيدهن عظيم ... بس معقوله هل عار اخت ريلام البريئة...؟ اني جبتها بيت حسان حتى استر عليها بيتنا مايخلى من الخطار وبيت جدها بعد اكثر بس هيه متستاهل وفرتها عليه .. هدى .... ما اعرف ليش قلبي عصرني اني خلصت عمري حياطين غرفتي تفتقد لريحة امي وحنانها وما اريد روحي تفتقد لابويه كذلك ... رغم اعرف مقصرة ويا ومن اشهر مرايحتله بس اخابره كل يوم واسأل عنه .. مرحتله كل هالفترة لان المسافة بعيدة بين بغداد والسماوة واحنه هم تبهذلنا لمن اجينا لبغداد وما استقرينا اول ماجيت بغداد بقت بالمستشفى ويه بنتي وبعدين عمو جان بغيبوبة ولهيب ملتهي وياه وبعدين انطردنا من البيت وظلينا من بيت لبيت ومن شقة لشقة وتالي سالفة لهيب ويه هذا السكران هم اخذت نصيب من عدنا وبهذلتنا .. وعشاير وكعدة ووو كومة سوالف ... وبعدها عمو انطانه بيت وانتقلنا اله وديمه تمرضت ويه انتقالنا وظليت اراجع بيها .. رجعت لواقعي .. حضرت نفسي بسرعه ولبست وحضرت بنتي واغراضها وبعدها طلعت للصالة باوعتله جان عينه بموبايله ومبين هستوة يختم مكالمة لان قبل شويه سمعت صوته يحجيى... باوعلي و كال...انتظري شويه ابوي راح يجي ويانه عصفت تيارات من القلق بداخل صدري شعجب عمو شيخ علي راح يروح ويانه معقوله بابا يريد يموت اوو يمكن ماتت ؟؟ ضربت على خدي وارتجفت اديه واجت ديما توكع من ايدي .. هو بسرعة اجه اخذهه وعاط شبيييج صدك جذب هدى على كيفج ليش هيج تسوين بنفسج رديت عليه لهيب خاف تجذب عليه خاااف ابوويه مات رد ليش تفاولين عليه كوولي ياالله ما ميت واذا تردين خابريهم خابرت سهام ماترد .... يمكن مشغوولة .. تمتمت ... ياربي سترك شافي ابويه ياررربي انت العافي وانت المشافي... ياا الله .. شويه واجه عمو علي جان لابس دشداشه سوده وعكال وجفيه وعبايه رجاليه فوكهن ، شكله يرهب وهيبه اني بصراحه اخاف منه من زمان وما الي كلمة بوجوده... سلمت عليه وردت ابوس ايده بس هو سحبها وسحبني من راسي وباس راسي وبعدها اخذ ديمه من ابوها وهو يبوس بيها ويلاعبها... سألته عمو اصب الك جاي تريد ريوك ؟ رد : لا بويه بس خفي ايدج يله نروح ورانه طريق طويل .. رد لهيب : اي يابه مخلصين ماعدنا شي جنه ننتظرك .. باوع لساعته وكال اي تأخرت دقايق الازدحام اخرني رغم طلعت على وقت .. طلعنا من البيت ... صعدنا بسيارة عمو هو كدام يم السايق واني ولهيب وبنتي ورى .. عمو تليفوونه مايسكت ونفس ديمه بالضبط ضاجت وظلت تبجي .. وصلنه لبيت اهلي دخلت لكيت الناس ملتمه خفت حييل طلعت مرة ابويه لابسه ثوب ابو الفحه مشجر لونه اخضر وبي ورد وبرتقالي وازربري ...طالعه جنها المزرعه السعيدة بس بصراحه اني ارتاحيت من شفتها معناها بابا ما بي شي سلمنه عليها ودخلنه جان اكو زلم بالاستقبال ما ادري عقلي ضل يضرب اخماس واسداس... دخلت جوه لكيت ابويه نايم بوسط الغرفه على جربايه حديد ام النفر ومتغطي ويصارع بروحه سوده عليه جان شكله كووووولش مؤذي ويشلع القلب من مكانه ضعييييييييف حييييل بس العظام و وجهه بس الجمجمه بحيث العظم مال عيونه بارز بشكل مو طبيعي ويجرح القلب... جان يجالع وعبالك روحه تصعد وتنزل وبطنه مخسوووفه عبالك بعد ماكو اعضاء بداخلها ... من شفته بهالحاله هاي الي تذبح القلب وتدميه صرخت بصوت خايفه ولطمت على وجهي...لك يابه يابه سوده عليه هذا حالك واني ما ادري بيك صخام بوجهي عزا العزاني لزمني النسوان وهن يهدن بيه ويكولن...يمه على كيفج لا تفززينه ادعيله واقريله سورة يس تخفف عنه سكرات الموت ... تركتهن ورحت اركض عليه كعدت على ركبي واني ابجي لزمت ايده وبجيت واني حاضنتها وكل شويه وابوس بيها... لزمت وجهه المرهق وهمست عنده...حبيبي يابه اني هداوي اجيتك كووم تلكاني فدوه اروحلك لا تيتمني يابه عشت عمري يتيمه وبدون ام فدوه لا تروح وتعوفني ما الي سند من بعدك ... مجان اله جووواب اصلا ما عنده نطق بس دار عينه عليه ودموعه تنزل بصمت وعذاب .. خلصتها بجي وهو يجالع ودموعه تنزل واخويه كاعد بصفي ويبجي ولازم كنلكس ويمسح بدموع بابا... بعدها كالو النسوان راح يدخل عم هدى يقره عليه ويجبله .. كلامهم خلى انياب الالم تنهش بيه ... التفتت شفت عمو دخل باس بابا براسه وضل يحجي وياه بهمس ما عرفت شنو يكول اله .. وبعدها كعد على الكرسي قريب من بابا لبس نظارته الطبيه واخذ القران الكريم وضل يقره صورة يس بصوت جهوري ... وانوب ضل يقره عليه ادعيه تخفف عنه سكرات الموت ابويه هوايه طول وهو ينازع بروحه تقريبا تلث ساعات هو على هذا الحال وبس يدمع ... واني احس دالفظ انفاسي ويا واريد اموت احس روحي بوسط هذا الموت البطيء ، سكرات الموت تنتابني وما تنتهي .. بعدها مات ابويه وروحه ارتفعت للسماء و مثل الوغف طلع من حلكه وسلم الروح لباريها...هو ارحم من هالمرض الخبيث الي استفحل بجسمه عمو علي بعدنه عنه وغطا وجهه وهو يكبر...الله اكبر انا لله وانا اليه راجعون والرحمه والمغفره على روحك يا ابو هدى اني جنت حاصره روحي بالزوايه واني منهاره ومصدومه اول مره واحد يموت كدامي موقف يهز الابدان ويشوفنه عظمة الباري عز وجل... جنت الطم واصرخ بانهيار واني حاضنه اخويه المنهار على ابويه عمو علي صاح بصوت عالي...ابو ديمه بووويه جببولنه التابوت بسرعه انت والشباب خلينه ناخذ المرحوم للمستشفى نسويله ورقة وفاه اجو الشباب ولهيب وبعد عمي اقاربنه خلوو بالتابووت وشالو وهم يكولون. لااله الا الله لبست حجابي وطلعت اركض ونسيت حتى بنتي وزوجة ابويه تلطم وتصرخ وشاكه ثوبها.... طلعت وراهم اركض حافيه وحجابي مخربط لزمني عمو علي وحضني كال...بويه على كيفج كل من عليها فان إلا وجه ربك ذو الجلال والإكرام...هذا يومه وهاي ساعته ادعيله بالرحمه والمغفره ...والله يصبر قلبج ان شاءالله باوعتله بدموع عابره على كل وجهي...عمو فدووه عمو اخذووني ويه ابووي فدوه الله يخليك الله يخليك لا تكسرني عمو شفت لهيب باوعلي وهو حزين على حالي وبعدها راح واجه جابلي نعال وخلاه كدام رجليه كال...البسي هدى حتى اخذج للدفن عمو كله...اي يا لهيب لا تحرمها من هاليوم خليها تودع ابوها وما يضل بنفسها وتكسرها... لهيب راسه بطاعة لابو وهو لازمني من زندي واني اناشغ وابجي ... صعدني بالسيارة بالورى واني منهارة واسمع ابوه يكوله : روح وصي وحده من البنات على بنيتك وانه وهدى منتظريك بالسياره... كال صار يابه ... ورجع كاله وجيب علي اخو هدى ويانه هذا وحيد وطفل ويشبع بجي ومحد بحاله خلينه احنه نهدي من روعه وحزنه ونهياره ونصبر عليه رد : ان شاءالله هسه اجيبه ... وراح رجع للبيت واني بقيت مخليه راسي على الكشن الكدامي وابجي واسمع عمو يردد اذكار .. لا حول ولاقوة الا بالله انا لله وانا اليه راجعون الله يصبرج بنيتي وعد ربج هذا وامانته واخذها وكلنا على هذا الطريق يا بويه .. الانبياء والائمة والصالحين ماتوا احنه منو ومانموت ..... يا هدى يا بنيتي .... اني اجاوبه بنحيب واكول اي والله عموو الله يرحمك ياابويه الله يرحمك بابا ..بعد عمري سودة عليه واتمتم بكلمات تشكي حالي بهذا الوضع .. رجع لهيب وابوه طل عليه من جام السيارة وكله يله بوويه سرررع خل نلحهكم .. هو رد وهو يشيل علاوي من الكع ويركض _ اي يابه جيت واجه صعد كعد يمي .. وخله ايده على ظهري يسكت بيه .. واني حضنت علاوي وشهكت بجي ... التاف عمو عليه وسأله هاا بويه لهيب وصيت على بنيتك ؟ كال.. اي يابه وصيت ... سألته بخووف والبكاء مسيطر على مخارج انفاسي والكلام يطلع من حلكي كوووة .. وصيت منو لهيب فدووة ؟ رد ... وصيت مرة عمج وهم حبوبتي راح تجي بالطريق يجبوها الولد وياخذون ديمه وياهم... طمأنيت شويه وبعدها انطلق بينا للمستشفى ومناك للنجف واني اباوع للتابوت الي يحوي جثة ابويه واحس روحه طايره مثل الطيير بس احسها تحووم عليه وعلى اخووويه المسكين .. وصلنه للنجف اخذوا غسلو ببير عليوي وبعدها رحنه للمقبره لكينه حافرين اله قبر... جنت ابجي واحط بالتراب على راسي ولهيب حاضني ومانع مقاومتي واخويه المسكين يبوس برجلين ابويه المكفنات ويبجي ويمسح بدموعه شكله يكسر الكلب... عمو علي جان واكف على راس الدفان ويحجي وياه وكل شويه ويقره ايات قرانيه وسورة الهاكم التكاثر حتى زرتم المقابر... شفت بابا من خلووه بالحفره واني شعور مال براسي ضربت حتى لهيب وتخربطت ضليت اتقيئ وهو تخبل عليه يمسح بوجهي ويهدي بيه... كملوا دفن وبعدها كالوا يالله روحي نريد نلقنه اخذني لهيب كوه بس عمو علي ضل ويه الدفان واسمعهم يكلوله...اذا جاءك منكر ونكير وقالو لك من هو ربك قل الله ربي ومحمد نبي وعلي إمامي وبعد ضلوا يحجون وياه واني صابتني رجفه من كلامهم ورجعنه ودفنه ابووي وبعد ما يزورنه بس بالاحلام همست بداخلي...يابه سلملي على امي كلها هداوي تلطش بيها الدنيا من كل حدب و صوب ومفتقده الحنانج ... مرت تلث ايام الفاتحة واني الحزن مغلفني ، لهيب بقى ويايه بس اني ما ادري بي وبنتي يا دوب ارضعها وياخذوهه البنات طبيت للصالة وطليت من الشباك شفت عهود بنت خالي هيه واهلها اجوي بالفاتحة ... واكفة طول بطول ويه لهيب وتسولف ، هو متكتف ويباوعلها ويحجي وهيه شعرها طالع من وره ومن كدام ويا دوب مخليه الشال حجة على راسها ولابسة ثوب اسود ضيك او مدري شيسموه بينصل مدري شنو وبيدها موبايلها وهو يأشر ع البيت مدري شيكولون ... اني موو بحاله ولا حتى بحالهه روحي مطايقتها ، عفتهم وفتت جوة بس النار استعرت بيه وگلبي ظل يوجعني وهيه ورة شويه دخلت وظلت تحجي ويه اختها ... وتضحك ... تسوي نفسها مشافتني واكفة قريبة عليه خجلانه وتفرك بيدها تكول يالله استحيت لهيب لزم ايدي ... استغفر الله شكد عيب هههه انوب عصرها لايدي عصر ... وطلب رقمي .. بس هو يمكن مو قصده بعد ما اطلع كدامه .. والتافت عليه كالت يااا هدى هاي انتي هنانه مشفتج شوكت جيني صكيت اسناني كتتلها من لمن لهيب لزم ايدج .. كالت هاي شبيج ترى احنه اصدقاء من زمان خليج سبوورت خزرتها ... كالت صدك ترة هو كال اطلعيله يريد يحجي وياج مدري شنوو يريد .. درت وجهي ورحت فتت بغرفة ابويه ... لزمت ديما وكعدت حتى الدمعة عصت بعيني ، باوعت بمكان ابويه الحزن بداخلي محتار شون ينهش بيه .. من خذلان لهيب من ضيمي من غربتي ووحدتي .. لشويه اندكت الباب باوعت ع الباب ثواني وانفتحت وفات لهيب لابس قميص اسود وجينز باوعلي مبتسم واندار سد الباب واجه كرفص يمي واني جنت مطايقته اباوعله اخوزر بي واتمنى اصفكه راشدي ، مايحترمني ابد كرفص وكال شونج اليوم هدى ، مجاوبته واباوعله بنظرات كره وحقد .. هو مافشل روحه دنك على بنته باسها .. ويحاجيها وهي تباوعله تضحك كتله وخر عنها خليها تنام اخلص منها كال بنبرة بدون نفس : شبيييييج ؟ رديت واني اشح نظراتي منه وادور وجهي عنه ... مابيه شي .. كال شوكت نرجع بغداد ؟ كتله مارجع دتشوف اني بحال رجعة هسه .. كعد يمي وتربع كال هدى ابوج الله يرحمه راح لرحمة الله وهو هو عانى من هالمرض هسه اكيد ارتاح وانت خو ماتبقين لعمر كله هنا رديت عليه اي ابقى هنا العمر كله واذا شنو هالحجي هذا هدى شبيج ؟ رووح لهيب ولا تجي منا للاربعين ومنا للاربعين افكر اذا ارجع وياك لوو لا ؟ كال بغضب مكتوم هاااي شنووو شبيج تخبلتي ؟ ليش دتسووين هيج لخاطر الله كلت بعصبية ... شووف نفسك راجع رووحك ابويه ديمووت يله جبتني اله وهسه مصار تلث ايام من مات ابوويه وانتتتته!!! سككت وباوعتله ... هو جن حسه رفع تك حاجبه بمكر وكال واني شنو كملي ؟؟ رديت عليه بارتباك وانته جاي تريد ترجعني وياك ما ارجع .. كال تمام وكام على حيله وينزل بقميصه .. اني راح اروح لبغداد راح انطرد من شغلي ترى والاسبوع الجاي اني يمج كتله لا لتجي ... رد اللهم طولج ياروحي كومي انطيني بيان الولادة كال ديمه خلي اسويلها جنسية كتله رووح لهيب اني لا بحالك ولا بحال بيان بنتك روووح لخاطر الله .... موج .. بيووم كعدت الصبح ، فرح رجعها علي لبيت المزرعة وعيوني ورمت من البجي عليها ... بالله انين اتواصل وياهه الا فرح ممنوع عنهه التليفون شفت ام حسام كالت هاا عروسة كعدتي ماهان عليه اكعدج بس اني بنتي على وشك ولادة خطية بيها وليد وفرحانة اني وراح اسمي ابنها على اسم المرحوم حسام ابني وهيه تكولي اذا ماجيتي وحضرتي ولادتي فلا اسمي حسام ... ضحكت الله يرحم حسام والله يسهل ولادتهه خطية روحي الهه .. هو لازم اروح يمها اني بس والله قلبي ضعيف مايهون عليه اشوفهه تتألم ووجع الولادة ماينحمل يوم الالج ان شاءالله عروسة .. همست واني مبتسمة ان شاءالله .. شرار ورايه كال احنه مثقفين منريد جهال هسه خلي مرتي تخلص الماستر يله عود نفكر بعدين .. اني ضوجني كلامه وتأثرت بس مابينت هالشي ، اول مرة اسمع منه كلام ع الجهال ولا مرة جايبين سيرة الاطفال وهيه كل مرة تتزوج غريزة الامومة ترتفع عدها وخاصة اني تعديت ال٢٥ سنة وهم يالله اخلف هسه ... هيه ردت عليه وهيه تعدل عباتها ان شاءالله الله يرزق الكم كل الي تتمنوا .. وكملت الحجية توهه كعدت وماقبلت تتريك ويه الشيخ زعلانة عليه تريده يطيب خاطر بلقيس بكلمتين على كولتهه وهو مو راضي انت سويلهه ريوك اني لازم اطلع هسه .. بنتي خبصتني خبص ضروري اروح يمها الليلة خاف تجيب الدكتورة انطتهه ابرة .. رديت صار ان شاءالله تكوم بنتج بالسلامة تشكرت مني وكالت يوم الالج حبيبة وطلعت وشرار راح يم امه ... واني رحت للمطبخ سويت بيض سلك وخليت جبن ومربى وخيار وخليته بالصينية ووديته لغرفة الحجية هو جان مخلي راسه على رجليهه ... خليت الصينية بالكاع واسمعها تأفافت تضوج مني واني دا احاول اكسبهه .. هو نزل من السرير وكعد كبال الصينية وديسوي لامه لكمه حتى تاكل ، دفعت ايده بعصبية كالتله شنوو تريدون تموتوني بهذا اكلكم ماااريده انه ماكل بيض سلك اكل مال موتى وين ام حسام تسويلي كلي اني حيل انقهرت وجيت تبجي وبعد حتى ولا باوعت بوجه شرار وبقيت مدنكة هو كام على حيله وكاللها ام حسام راحت اني هسه اكوم اسويلج بيض كلي ولا يهمج هو طلع واني ركضت طلعت وراه شفته ديطلع بيض من الثلاجة ... شافني سد الثلاجة وخله البيض ع الكاونتر واجه لزمني من خصري وشدني اله وباس راسي واني جلبت بملابسه كال لتضوجين منها حبيبي شويه شويه تظل تحبج ترة والله هيه قلبها طيب مسحت دمعتي بملابسه ورديت بغصة .. ميخالف مو يكولون الف عين لأجل عين تكرمُ .. اني لأجل عينك أكرم مليون .... حضني حيل وظل يبووس براسي .. ويكول بعد عمري وانيي اموووت عليج اعششقج ... وبعدين ظل يكلي البيض لأمه واني واكفة على جهه انتظره يخلص لمن خلص وكفت على السنك حتى اغسل المواعين الي سوا بيها كال امشي تريكي .. باوعتله شفت نظرات التوسل بعيونه وبعدها اردف : لخاطري موووج حبابة ، مرة كبيرة وانتي عاقلة هزيت راسي وتبعته هو بيده الصحن الي بي البيض .. وهيه امه مااكلت من البيض الي سواه اصلا اكلت بس بياض البيض المسلوك واني سويت نفسي مااشوفهه .. بنفس اليوم سمعنا ابو هدى توفى خطية الله يرحمه ، كعدت ابجي عليه وتذكرت بابا لمن توفى .. بعدها اجه مهيب جان متوتر وعصبي سأل على الشيخ جاوبه شرار راح للسماوة طلع من الصبح ويه لهيب ابو هدى توفى وقرروا يروحون وياخذون الحجية وياهم وشرار كلي امشي ويانا .. عود داصعد احضر نفسي سمعتها تصيح شسوووي رايحة ويانه شسسوي هااا شسووي مو عود عرووسة ويجون خطار منو يطلع الهم كتله خلص شرار مراح اروح اني وصعدن للغرفة هو تبعني وطيب خاطري بكلمتين كال غير مرة اخذج ومراح اطول ارجع باجر .. كرص خدي وبوسني اني تفهمت الموضوع وكتمت دمووعي وقهري بعدها راحوا تلاثتهم واني بقيت وحدي ، القصر حيل كبير حسيت بووحشة ، نزلت كعدت بالصالة اخاف فوك وحدي فوك .. بقى موبايلي بايدي وشوية اندكت باب الاستقبال بقووة ، كمت طليت بالكاميرات شفت بلقيس وهيام وشكلهم جان يخوف واني متت خوف واحتاريت افتح الباب لو لاء .. !!! فرح .. قبل لنطلع من القصر دنرجع للمزرعة ، شكد بجيت وشكد توسلت وكل هذا مافاد عبالك دااحجي ويه حجر مو بشر ان جان الحايط يسمع ويرد هو مايرد لا يرد ولا يتجاوب وياي حتى مخلي الجهال بحضنه ويلعبهم واني واكفة الغي يم راسه بعدها نزل فطومة من حظنه وتمطط كال مادري عجوز العرب خلصت لغوتها لو بعد اكو تأخرنا ولازم نطلع اعرف يقصد اني ، اني هم فشلت ورحت للكنتور طلعت الملابس وحضرت كل شي وهو طلع من الغرفة لابس ملابسه ودعت الكل وطلعت من القصر وياه بالسيارة ، بعدنا ببغداد وكفنا يم بيت بعده ماكامل بس بناء مرتب حيل طابقين نزلنا يمه فتح الباب ودخلنا والجهال انطلقوا بي واني اباوعله مستغربة كال هذا العش مالتج ام جاسم ... ضحكت مصدومة وفرحانة ياا صدووك عوود حلووو واباوع مذهولة وفرحانة حييل واكتشف ارجاء البيت .. كتله عليك الله علي صدك ؟ .. رد منين نجيب خبزة نحلف عليها هسه وام جاسم ماتصدك .. كتله يعني حرجع لبغداد واعيش هنا ؟ رد اي والله ارجعج بس يكمل وهو هم مبقى شي سلمته لشركة وست اشهر تسلمني المفتاح .. كتله يعني اذا كمل قبل ولادتي تجيبني هنانه ؟ رد : اي والله بس يكمل اجيبج .. شونهه المنطقة حلوة موو ؟ وهنا هم بيت لهيب قريب عليج مو احسن الج من القصر كله مشاكل ؟ تقربت منه لعد والقصر المن يبقى اذا احنه تهجولنه ؟ كال يبقى للعائلة وانت ماترحيله بس بالمناسبات ... احسن الج ام جاسم رحت عدلت عبايته كتله يعني مناوي تجيب على راسي ضرة وتسكنها بي ابو كاظمية .. عكد حواجبه ابو كاظمية منووو ... طخيت بطني باصابعي واني اضحك .. بنتك ... ضحك كال ولج يا ظالمة شهالاسم هذا ؟ لعد بس انته تسمي ابني دانيال جاسم وتخرب اسمه .وبنتك تسميها اسم حلو وكيوت . ليش هيه كاظمية بس بنتي اوو نوران بس بنتي هيه بنتج همين .. لا تغير الموضوع ابو مهيب انته مناوي تزوج عليه وتجيبها وتسكنها القصر واني هنا كال شوفي ام جاسم اذا تظلين تلحين بهذا الموضوع اسويها والله وتزوج وانتبهي شوفيني حلفت ترة هاااا ترة شيطاني قوي .. لالا هذا هو خيطت حلكي والله بعد ماافتح هذا الموووضوع .. جر حسرة واشرلي ع الغرفتين الي بالصالة كال هاي وحدة لدانيال ووحدة لفطومة ونوران وانت شدي حيلج ورة نوران اكيد دانيال يريد اخو .. ضحكت يااااه صدك بعد تريد بس اني والله تعبت واريد ارتاح واكمل دراسة .. حك لحيته وكال انتي بالبيت وماكعدتي راحة جبتي العيد وهلاله انوب تداومين اكوول ام جاسم غيري الموضوع وامشي نصعد فوك اشوفج العش مالتنه .. دااصعد كال نزعي العباية بووية لا تعثرين بيهااا وانطينياهه .. نزعتها وانطيتها اله وصعدت فووك شفت تصميم الغرفة الفوك كلش حلو عبالك شقة مصغرة بيها كولشي ونزلت جوة وانطلقنا بعدها لبيت المزرعة ورجعت للكآبة هناااااك ... ........................ لمن رحنه للمزرعة ، فطوومة اني والله معتنية بيها واحبها بس هيه مدري شبيها .. وليش هيج انتكست حالتها .. والله رغم تعبي اسبحها واغير ملابسها ولمن يعاركهه دانيال اني مااقبل واخذهه اسكتها والعبها رغم دانيال ابني وهم يتيم .. واني مريضة مرات اكعد اشوف نفسي مصروعة شفتي تنزف عاضتها مادري بنفسي ولو ما المرة يمي يمكن اعض لساني واموت والله اكول هيه خطية هم يتيمة واني هم عشت اليتم مرررات مو مرة وحدة .. اني هم خايفة الله بيها فطم ، اكول اني ما ظامنة نفسي ، خاف الله ياخذ روحي امانته الي خلاهه بهذا الجسد المتعوووب ... وبنتي الي ابطني ودانيال يبقون بلا ام وهم ينظلمون من بعدي والدنيا دوارة وكل شي دين .. بذاك اليوم المشؤؤؤؤم هو اخذ فطومة وراح بعد ما صارت بيناتنا عركة كولش قوية تعرضت ع اثرها للضرب هو اصلا مدري شجان شبي ماعرف شصاير هناك عدهم كال مشاكل قووية حيل بس ماعرفت شنوو .. يمكن شي يخص اولاده مهيب بالذات لان جنت اسمعه يحجي بالفون ... لمن راح هو اخذت ابني للملحق بعيدا عن الخرسات لان ماطيق روحي .. قفلت الباب عليه من جوة .. خليت ابني يمي .. اباوعله والعب بشعره .... سألته انته شكد تحب فطومة كال لبع ((ربع)) كتله شكد تحب بابا علي كال اربعة سألته ... واني شكد تحبني كال احبج ... كررت سؤال .. شكد ردت بنبرة طفووولية مقلص عيونه وشفايفه الكرزية مبوزهم ..ويردد احبج .. وشكد سألته شكد تحبني ماحدد بس يكول احبت احبت ... عرفت حبه الي ماله نهاية ... حضنته ونمت .. كعدت على ريحة الدخان والنار شابة بالغرفة وابني يمي لا حس ولا نفس ... يتبع ...... اغلفة حلوووة من المتابعات مشكورات حبيباتي فديتكم .... https://img.wattpad.com/4ae9a25d13d3...it&w=720&h=720 https://img.wattpad.com/87b492f5a9f5...it&w=720&h=720 https://img.wattpad.com/2cec22f3d6f1...it&w=720&h=720 https://img.wattpad.com/10b942e4e530...it&w=720&h=720 |
| الساعة الآن 07:49 AM |
Powered by vBulletin®
Copyright ©2000 - 2024, vBulletin Solutions, Inc.