آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
18-12-22, 09:53 PM
| #31 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  البارت 29 عند نياف * عصب من اتصل عليه ابوه وغصبه يجيب اخوه معه ركب السيارة وركب نايف بجنبه والبنات وراء عم الصمت بالسيارة والوضع توتر بينهم كلهم نياف :تاخذ لك شقة وتذلف من البيت ولا ابي اشوفك فاهم نايف :القرار مب لك نياف :الاوامر علي والتنفيذ مطلوب منك تدخلت سُلاف من شافت نظراتهم لبعض :نياف خلاص وقفل الموضوع ما يستاهل المشاكل الي بينكم نياف وهو يناظر نايف :للحين ما نفذت تهديدي لاهلي بس اذا تبي نهايتك على ايدي جرب تعارض اوامري تنهدت سُلاف ورجعت راسها على وراء وهي تناظر نياف من المراية —— بعد دقايق وصلوا للبيت ونزلوا كلهم دخلوا البيت وكان باستقبالهم ام نياف وابوه وعائلة وجد ناظرهم نياف وهو عارف الموضوع جلس بدون ما يسلم وبدا الكل يسلم على نايف ويتحمدون بالسلامه ابو وجد :كيفك يا نياف ؟ نياف :يسرك الحال ابو نياف : بما ان الكل موجود قررنا نطلب يد بنت عمكم وجد لاخوكم نايف على سنة الله ورسوله استحت وجد واستانس الكل وسرعان ما تلاشت وناستهم من قال نياف :مراح يتزوجها لف الكل عليه وناظر نايف ورفع حاجبه وتنهد نايف من تذكر تهديده نياف وهو يناظر وجد : ما قدرتي تلبسين خاتمك من ايدي ومتوقعه بتلبسينه من ايد اخوي لو تحلمين ما تزوجك وانا موجود وقام وهو يوقف قدامهم :ان تزوجها بنفذ وعدي لكم وبقلب فرحتكم لعزاء وفهمكم كافي وانتي ان شفتك ببيتنا مرة ثانية ما ارحمك اعتبريها طرده بالخط العريض وبكل صراحه وسحب دخانه ومفتاحه وطلع لغرفته ناظر الكل في بعض وعصب ابو وجد :ما هقيت ان ولدك يطردني يا خوي ومالكم نصيب عندنا وسحب بنته وطلع هو واهله رفع ابو نياف نظره لام نياف :ولدك ماله قعدة ببيتي وخليه يلحق عمه "صلوا على محمد" عند عز واهله * ركبوا بسيارة عز الثانية تنهد عز براحه من شاف امه بجنبه وخواته وزوجته وراه وكانه خاض معركة واعلن انتصاره بوجودهم حوله اسماء : يمه ام عز : هلا اسماء : يمه نعتذر اننا سبب في طلاقك من ابوي ام عز : لا تشيلون همي وانا مرتاحة لانكم قريبين مني وطلاقي منه كنت ارتجيه من زمان وجاء الوقت الي ارتاح واعيش معكم بدون هموم ومشاكل حضنتها اسماء من وراء : الله يخليك لنا ابتسم عز لكلامها ومسك ايدها وهو يبوسها بكل حُب عز : باخذ لنا شقة نرتاح فيها وبعدها ندور لنا بيت يناسبنا كلنا وبشتريه لكم ابتسم الكل بفرحة ورجعت اسماء لوراء وهي تحضن مرام بكل تعبير عن الفرحة ووناستها ابتسمت ملاك على فرحتهم وضحكاتهم وحمدت ربها على نعمة عز وهي تناظره بالمراية بكل حُب انتبه لنظراتها وبادلها النظرات وهو يتأمل عيونها استحت ملاك وصدت بسرعه وضحك عز ونزل نظراته —— بعد نص ساعة من تدوير شقة حصلوا شقة تناسب البنات وعلى ذوقهم نزلوا بعدما اشتروا قهوة واكل - بداخل الشقة اسماء وهي تنزل عبايتها : اوف واخيرا راحه مرام : اخيرا حرية وبدون قيود عز وهو يصب قهوة لامه : امشي اقعدي انتي وياها قعدوا البنات وهم يتقهون مع امهم ام عز وهي تناظر عز : ليه رفضت ولد خالك لما خطب اختك ؟ عز : اذا يبيها يدق بابي مو يقابلني بالشوارع وياخذها بدون لا مهر ولا زواج وكأن ما وراها سند ابتسمت ام عز : والله معرفت بخبر خطبته الا لما سمعت جدتك تقول لابوك مرام : اي والله جدتي تخطط على مستقبلنا وابوي ينفذ ولفت على عز : الله يخليك لنا عز بضحكة : شفيك تحمستي اهدي مرام بضحكة : صادقه معاد الا هي تقعد بالصاله ويالله زوجوا مرام للسربوت ذا عند نياف * دخلت عليه سلاف وقالت له كلام ابوه وقام وهو يفتح دولابه : هو يبيها من زمان ، جهزي اغراضك سكت سُلاف وقربت من دولابها وهي تطلع ملابسها وتحطها معه فالشنطه ، قفلها نياف ولف عليها : البسي عبايتك ومن اليوم انا لك وانتي لي ومالنا قعدة عند احد لو نقعد على الحديدة مثل باعوك اهلك وطردني ابوي من بيته بلمك باحضاني لو ما يبقى بالدنيا مكان يلمنا ، بكون لك الام والاب والسند والزوج بس الي ابيه منك وجودك معي لو تغيرت احوالي وساءت حياتي ابيك عون لي بكل اوقاتي وان ضاقت الدنيا فيني ابيك ملجأي توعديني تبقين معي وان كان بجيبي ريال ؟لاني عارف حركات ابوي ابتسمت سُلاف وتجمعت الدموع بعيونها وقربت وهي توقف قدامه : صدقني لو افطر واتعشى على قطعة خبر انا راضية ، في حضنك بلقى كل الي ناقصني والي اتمناه وجودك معي ووجودي معك هذا يغنيني عن كل ملذات الدنيا قرب منها وهو يحاوط خصرها وابعد شعرها عن وجهها وطبع قُبلاته بشفايفها بكل حُب بعد كلامها بعد عنها ومسك وجهها بايدينه : دخلت عليك لاول مره وانا كارهك والحين لو ابيع الدنيا كلها ما كرهتك ، انتي اجمل اقداري ابتسمت سُلاف وهي تناظر عيونه : كانت عيونك اكبر مخاوفي من شفتك اول مرة والحين صرت اعشق العيون وصاحبها ابتسم نياف وضحك لحياءها من لفت وهي تلبس عبايتها ونقابها وهي مستحيه من بعد كلامها ، مسك شنطتهم وهو يسحبها ولف وهو يمسك ايد سُلاف وطلعوا من البيت بدون اي كلمة وتحت انظار الكل بكت لينا وهي تلف على ابوها : وش استفدت يبه من طردته ؟ ابو نياف وهو يقوم : نايف وقف صرافات اخوك وطلع لمكتبه بتجاهل لسؤال لينا بكت لينا وطلعت لغرفتها بكل حزن من طلع نياف وسُلاف —— ركبوا السيارة ولف نياف عليها : حافظ حركات ابوي وضمنت مستقبلي قبل يجي الوقت الي ينسى فيه اني ولده وتوجه للبيت الي اشتراه بفلوسه ونزل ونزلت معه سُلاف وهي تناظر البيت بانبهار من تصميمه ومساحته وجماله نياف وهو يغمز لها : ناقصنا عُمر ؟ بشقة عز واهله * دخل الكل غرفته ودخلت ملاك على عز بعدما غسلت وجهها شافته قاعد على جواله وقعدت قدامه وهي تطلع الكريم من شنطتها وترطب ايدها : تدري اني محظوظة فيك رفع نظره من الجوال وهو يناظرها : وشطاري ؟ ملاك : ابد بس ابي اقولك اني محظوظة فيك وحيل بعد عدل جلسته وهو يتأمل ملامحها : كلامك مو من الله اكيد فيه سبب ؟ سحبت ايده وهي ترطبها معها ورفعت عيونها له : شفت فرحة خواتك وامك فيك وحمدت ربي مليون مرة لاني تزوجتك عز : طيب شيلي ذا الي على ايدي ملاك : طيب والكلام الي قلته ؟ عز : يعني انتي مو فرحانه زيهم ؟ ملاك : اقولك حمدت ربي ويقول مو فرحانه ؟ تصدق ندمت الحين ضحك عز : امزح معك وانا المحظوظ اكثر منك ابتسمت ملاك باحراج : طبعا اكيد محد يعرفني ولا يكون محظوظ عز وهو يناظرها بنص عين يسحب اللحاف : طفي النور وراك ملاك بضحكة : اسمع متى بندور بيت ؟ ابي بيت كبير ويكون له حديقة ومساحته مرة كبيرة عز وهو يسحبها بجنبه : بخصوص البيت ابي اكلمك بموضوع ملاك : وشو ؟ عز وهو يناظرها : من بعد ما تزوجتك نفذت شرطك الاول وحولت كل املاك ابوك بأسمك والحين ابي استاذنك واذا تسمحين ابي اخذ مبلغ لجل اشتري بيت وبرده لصرافتك بس يتوفر عندي ملاك وهي تتأمل وجهه : تستهبل ؟ املاكي هي املاكك وانت بتشتري بيت لي ولك ولاهلك خذ الي تبيه ولا تسألني عز بابتسامه : يعني راضيه ؟ ملاك : ايه قرب منها وهو يطبع قبلاته بخدها استحت ملاك وهي تبادله النظرات بكل صمت عز : دامك فاضيه وبتقعدين تتأمليني حطي المنبه عشان تصحيني الصبح بدور لكم بيت ملاك بحماس : يويلك تدور لحالك كلنا نبي نشوف ونختار عز : على خير بس حطي المنبه "صلوا على محمد " ببيت نياف وبالظهر * صحت وهي تدخل دورات المياة وتتروش وسرعان ما طلعت من تذكرت ملكة لينا وسحبت جوالها وهي تتصل عليها سُلاف بحماس :وينك ؟ لينا بتوتر :مو عارفه وش اسوي الميكب ارتست تطلبني اللوكيشن وبيتنا قايم وقاعد والكل في حالة استنفار سُلاف : برسلك اللوكيشن وتعالي انتي وياها نسوي شعرك ومكياجك عندي لينا بفرحة : تمام ارسلي لي قفلت سُلاف وهي تناظر نياف الي صحى وهو يمسح على عيونه سُلاف : صباح الخير نياف بابتسامه : صباح النور الساعة كم ؟ سُلاف : المفروض انه مساء الخير ، الساعة ٢ ظهر قام وهو يتروش وبدات تجفف شعرها وهي تنتظر لينا بعد نص ساعة * وصلت لينا والي معها وابتسمت لينا من قالت سُلاف هذا بيتنا لينا وهي تتأمل البيت :يجنن يجنن سحبتها سُلاف وهي تجلسها بالصاله : مافيه وقت ورفعت راسها للميكب ارتست :شوفي شغلك تقدمت وهي تبدا في تنظيف بشرة لينا وبشغل الميكب وطلعت سُلاف من سمعت صوت نياف :طالع بجيب غداء تبين شي محدد ؟ سُلاف :لا ، بس اخذت ثوبك عشان تكويه؟ نياف: جاهز بس جهزي شماغي وقرب منها وهو يبوسها بخدها وطلع استحت سُلاف ورجعت للينا والابتسامه شاقة وجهها لينا :كلذا عشان بوسه ؟ اثقلي اقول سُلاف :نشوف مين بيصير خفيف لا شاف الحب حمر وجه لينا وهي تضيع نظراتها باحراج —— بالليل خلص الكل ونزل نياف للسيارة وهو يعلق على البوري سُلاف وهي تدور خاتم :انزلييي له قولي جايه لينا :انزلي معي بياكلني الحين سحبت سُلاف اقرب خاتم ونزلت معها وهم مستعجلين نياف :سنه ؟ سُلاف وهي توريه ايدها :اخذت اخيس خاتم كله بسببك نياف وهو يشوف فستانها الاحمر : لو انك قايله ان فستانك لونه احمر كان انتظرتك دهر لينا وهي منتبه لنظراتهم لبعض :اعجل انت وياها ودوني حرك نياف وهو يتخطف النظرات لها وهي تركب اظافر ولافه على لينا ومفتوحه عبايتها نياف :نقطه تفتيش قفلي عبايتك سُلاف وهي تركب اظافرها :دقيقه خلها تضبط ذي قرب منها هو يسحب عبايتها ويقفلها لها :اقعدي زين "صلوا على محمد" نتوقف هنا | ||||
|  |
|
18-12-22, 10:02 PM
| #32 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| البارت 30 والأخير عند عز وبالظهر * دخل الشقة وهو يصحيهم ويدق الباب على امه وخواته وينادي باسماءهم ودخل على ملاك وهو يصحيها ملاك وهي تحط ايدها على عيونها :قفل الستاير شمس عز :قومي ما ودك تشوفين البيت ؟ فزت ملاك وهي تناظره :اشتريت ؟؟؟؟ عز وهو يفصخ شماغه :اي وعلى حسب طلبك وفيه حديقة ملاك :خير قلتلك صحيني بختار معك عز :لو انتي معي مراح نخلص ملاك وهي تقوم وبعصبيه : في الاخير متاكدة ذوقك خايس عز بضحكة: مقبوله منك، تعالي للفطور بالصاله وطلع للصاله وشاف امه وخواته :افطروا وراكم مشوار اسماء وهي تصرخ على ملاك : ملاك امشي الفطور طلعت ملاك وهي تمسح وجهها : لاحقه على الفطور تصارخين ليه اسماء بحماس :ورانا مشوار امشي اخلصي —— افطروا بشكل سريع باستثناء عز الي ياكل بهدوء ويناظرهم من لبسوا عباياتهم بحماس اسماء :يالله قوم اخلص عز :صبي لي شاهي ملاك وهي تقرب منه :اي والله بارد لانك شفته ، هيا حنا نبي نشوفه بعد عز وهو يقوم :السيارة شغاله اركبوا لين اجيكم —— ركبوا البنات السيارة وركب عز بجنب امه ومر على كوفي واخذ نجلاء منه بعد ما خطط معها يقابلها وياخذها ركبت بجنب البنات وهم متحمسين للبيت الجديد بعد دقايق وصلوا ووقف عز سيارته بالمواقف الخاصة ونزلوا البنات بسرعة وهم متحمسين ضحك عز ونزل من السيارة :المفتاح معي انتي وياها ركضت ملاك وهي تسحبه معهم وفتح الباب ودخلوا البنات وهم يوسعوا عيونهم من المساحة والحديقة الي بمقدمة البيت وتصميم البيت مرام باعجاب :هذا شكله من برا كيف من داخل ؟ ضحك عز ولف على امه :منزل مبارك يا ام عز ابتسمت ام عز وتجمعت الدموع بعيونها وهي تناظر عز بكل فخر وحب ،، قرب منها وهو يبوس راسها :بعتبرها دموع فرح ولف على ملاك : بشري كيف ذوقي الخايس ؟ ملاك : اسحب كلامي بسيارة نياف * مروا من عند نقطة التفتيش وفصخت سُلاف بكتمه :بس شوي لين تضبط اظافري لينا:نياف استعجل ليه تمشي على بيض ؟ نياف : عشان الاخت تحط الي على اظافرها سُلاف وهي تفتح علبه المناكير : صدق لا تسرع لين اخلص نياف وهو يفتح الشباك من ريحة المناكير : رشي عطر كتمتيني سُلاف :بالعكس ريحتها تهبل نياف وهو يتلثم بشماغه :اخلصي ماني متعود امشي اربعين سُلاف :لا تسرع لين اخلص اظافري لينا بنرفزة :اخلصي انتي وياه الناس جو الا انا نياف :دوري لها صرفة وش علي انا؟ لينا :ساعدها ما تعرف تحط مناكير بايدها اليمين سُلاف :صدق ساعدني عشان اخلص وقف نياف بجنب الرصيف ولف عليها وهو يشد على لثمة شماغه من الريحة :هاتي بسويلك سُلاف بضحكة :كنت امزح نياف وهو يسحب ايدها ومسك المناكير وبدا يحط على اظافرها بسرعه صرخت سُلاف : مو كذا يحطون !، ابعد ابعد لا تحط خربت ايدي نياف وهو يناظر ايدها : بالعكس احلى من الي حطيتيها انتي لينا بعصبية : ممكن تتحرك ترا تاخرت نياف وهو يلف على الدركسون وحرك : ما تتاخرين وانا موجود لينا : بتاخر بسببك ——— بعد دقايق وصلوا للقاعة ونزلت لينا بسرعة وجلست سُلاف بالسيارة وهي تطلب من نياف يشغل المكيف عشان المناكير تجف نياف وهو يلم اغراضه : مطوله انتي ؟ سُلاف : لا بس طلع نقابي من الشنطه سحب شنطتها وهو يطلع نقابها وحطه بحضنها : اعجلي بقفل السيارة سُلاف : طيب لسى ما جفت شسوي نياف وهو يناظر عبايتها الي انفتحت وطلعت رجلينها : فستانك قصير ؟ سُلاف : لا مو مرة نياف : وريني اياه سُلاف : شلون اوريك افصخ الحين ؟؟ نياف : انتي مفصخه طول الطريق والحين تقولين لا سُلاف : بس الحين وقفنا الوضع يختلف وبعدين شوف المعازيم نازلين ما يمدي اوريك ولمست اظافرها : جفت المناكير ، يالله سلام نياف : البسي نقابك "صلوا على محمد" عند ملاك والبنات * دخلوا البيت وهم منبهرين من جمال الديكورات والمساحة مرام : الله كلشي ابيض يجنن اسماء : اي احلى ونحط الاثاث بالوان هادية ملاك وهي تلف على عز : وين غرفنا ؟ عز وهو يسحب امه : هذا غرفة الوالدة حطيتك بالدور الي تحت عشان ما تتعبين دخلت ام عز غرفتها وهي تتأمل جمالها ولف عليهم : وانتم غرفكم فوق ركضوا البنات بحماس وهم ينادون عليه من فوق طلع لهم وهو يوريهم غرفة كل وحدة ملاك بحماس : يالله جاء دوري ابتسم ومسك ايدها ومشى باتجاهه غرفتهم وهو يفتح الباب : وهاذي غرفتنا انرسمت الابتسامة على وجهها وهي تدخل وتناظره : انت الي اخترت الاثاث ؟ عز : اي اثاث غرفكم كلكم انا اخترته لا يكون مو عاجبك تقدمت لعنده : تشبهني وكثير حتى ذوقك مثل ذوقي ابتسم عز وهو يحاوطها بايدينه : مو بس ذوقي الي تشابهيني فيه وقرب منها اكثر وهو يبوسها بشفايفها وبعد عنها وهو يناظرها : تذكري انك السبب في فرحتنا كلنا فهمت قصده وخزته : فلوسي هي فلوسكم لو ما انت حفظتها لي كان لعبت فيها انا عز وهو يتأمل عيونها : انتي الثريا ؟ عقدت حواجبها : ما فهمت ؟ عز : انا علم السعودية والي كنت تفضفضين له والي كنتي تسبينه ضحكت ملاك باحراج : كنت اكرهك بالبداية كنت احسبك مثل عمك وابوك ،،، كيف عرفت اني ملاك ؟ عز بنفس ضحكتها : الله يسامحك كنت تكتبين اسمي صفحة كامله وانتي تفضفضين توقعت ان ذبحت لك احد على السب الي قريته ،،، فوق ذا حتى الي تسبينهم تكتبين اسمهم الكامل وتحسبيني ما عرفتك ؟ ملاك : شسوي كنتم قاهريني كلكم ، وليه ما قلت لي انك تعرفني ؟ عز : ما عرفتك الا قريب من بعد سالفة التبن خالد تذكرت كلامك وعرفت اني كنت مغفل ولا فهمت قصدك ملاك : بس كنت انت الوحيد الي قلت له وانت الوحيد الي ساعدتني وامحيت كلشي كان يضايقني بسببه عز : توعديني الي يضايقك تقولين لي ؟ حتى لو كنت انا الي مضايقك فضفضي بالبرنامج "وبضحكة" وحتى لو ترجعين لسبك لي بس المهم ما تتضايقين بدون علمي وبوجودي ملاك وهي تناظره بكل حُب : وشلون اسمح لنفسي تتضايق وانت معي وبجنبي ،، انت السبب بضحكتي وابتسامتي لا تفكر بيوم انك بتكون سبب في اختفاءها قرب منها وهو يطبع قُبلاته بشفايفها بكل مشاعر الحُب وتعبيرا عن الحظ الحلو الي ساقته الاقدار له ، ابتدى حظه من طلبها باسمها وانتهى وهي بحضنه وارتبط اسمها بأسمه ،، كانت النور واخرجته من ظلامه واكتئابه ،، وكان الامان لها من خوفها الي مصاحبها من عمر صغير ،، ابتدى خوفها من وافقت بزواجها منه وتلاشى من صار زوجها واغلى من روحها عليها عند نياف وسُلاف * نزلت وهي تدخل قسم الحريم وتوجهت لدورات المياة ونزل وهو يتوجه اقسم الرجال وبدا يسلم على الضيوف —— طلعت لغرفة لينا ودخلت عليها لينا : شوفي ذا اللون يصلح مع فستاني سُلاف : لا ابدا خذي الي بشنطتي ،،طلعته وهي تعطيها مناكير لينا وهي تناظر فستان سُلاف الي راسم جسمها ومبرز بياضها : يجنن اخوي ما شافك ؟ سُلاف وهي تضبط شعرها : لا لينا بتأمل : لا وحاطه روج احمر راح فيها اخوي ضحكت سُلاف : امسحه ؟ لينا : يويلك خليه يشوف جمالك وعاد جبتيه من لبستي الاحمر عارفه اخوي وذوقه وعشان كذا اخترت لك الاحمر لفوا ام نياف الي دخلت وهي تنادي لينا تنزف سُلاف بابتسامه : صار وقت اطلع لينا بصراخ : لااا خليك معي تكفين والله متوترة انزلي لينا وهي تسحبها : انزلي معي والله ما انزل لحالي تنهدت سُلاف بابتسامه : طيب اهدي بيخرب مكياجك بعد دقايق نزلت لينا وسُلاف بجنبها وعلى انغام اغنية هادية وتحت انظار الكل وهم يناظرونهم سُلاف وهي تحاول تهدي لينا وبهمس : غطيتي علي بطلتك ضحكت لينا بخفيف وكملت وهي تنزل ووقفت سُلاف بنص الدرج من طاحت عينها على الي طلع من المطبخ وبايدينه فنجانين الشاهي وانتبه للي نازله مع اخته وبفستانها الاحمر وهو يتأمل تفاصيلها بكل فهاوة لف على العامله وهو يعطيها الفناجين وانتبه للحريم الي تجمعوا على لينا ورفع ثوبه وهو يركض لسُلاف وسعت عيونها من لف عليهم الكل ويهمس : نيااف انزل نياف وهو يناظرها بفهاوة : لابسه الاحمر قاصده ؟ سُلاف بتوتر من انظار الكل : نياااف الكل يناظر ابعد نياف وهو متجاهل الكل والي وراه ويرجع شعرها لوراء اذنها : متوقعه اشوفك بذا الجمال واهتم للي وراي سُلاف : نياف بعدين بعدين بتخرب على اختك نزل نظراته لشفايفها وسرعان ما اشرت سُلاف ب لا من فهمت نيته : لا يوي قطع عليها وهو يبوسها بشفايفها وتحت انظار الكل وضحكت لينا من تعابير وجه سُلاف وهي فرحانه لحركة اخوها بعد عندها وهو يناظرها : وين عبايتك ؟ سُلاف : بلا استهبال ابعد بنزل للينا نياف : لينا لاحقه عليها بس فستانك وطلتك مرة وحدة بشوفها ومسك ايدها وهو يطلع فيها لفوق وتوجه لاقرب غرفة سُلاف وهي تبعد ايده عن ايدها : مراح اغيب بس بنزل للبنت ساقت الاقدار لنهاية روايتنا وقصص ابطالي كبير الحُب وصغير التعبير لا كلمات ولا حروف ممكن تعبر عن شعور النهايات وخصوصا النهايات المحبة انهيت روايتي الرابعة بكل مشاعر الحُب وكانت من الروايات المختلف تصنيفها وكنت خايفة ما تنجح القصة وبارشفها بس تغيرت الاقوال والحين اكتب نهايتها وانتم اكبر الداعمين لنجاحها ولاستمرارها من اول بارت لحتى ٢٠٥ بارت ،، عظيم الحُب وعظيم الشعور والمشوار الي توصلنا له بفضل الله وثم فضلكم والى هنا "اشكر كل من كان سبب في استمرار الرواية سوا ب لايك ، كومنت ، فولو ، تشبية ، دعم من كل النواحي اشكركم جزيلا على كومنتاتكم الاحب لقلبي والي احب ارجع اقراها ولا انسى الكومنتات الي ضحكتني "كنتم انتم السبب " اتمنى انكم احببتم كل ،حدث ، حوار ، بطل ، بطلة ، بيت شعر ، وكل الكلمات الي انكتبت بكل بارت اتمنى انها نالت على اعجابكم من كل النواحي ولتكرار " انتم السبب لنجاح الرواية بعد الله ❤️" انتهت قصة ابطالي "نياف *سُلاف" انتهت قصة ابطالي "عز *وملاك " تمت بحمد الله "٧/١٠/١٤٤٣ ابيحوا بأراءكم ستُقرا بكل حُب ❤️ "صلوا على محمد" النهاية | ||||
|
| |
|
02-06-23, 06:21 PM
| #36 | ||||
 
| اللهم صل على سيدنا محمد وعلى آل سيدنا محمد كما صليت على سيدنا إبراهيم وعلى آل سيدنا إبراهيم وبارك على سيدنا محمد وعلى آل سيدنا محمد كما باركت على سيدنا إبراهيم وعلى آل سيدنا إبراهيم في العالمين إنك حميد مجيد لا تنسوا الباقيات الصالحات سبحان الله الحمد لله لا إله إلا الله الله أكبر لا حول ولا قوة إلا بالله العلي العظيم | ||||
|
| |
|
| أدوات الموضوع | |
| انواع عرض الموضوع | |
|
|
31Likes
العرض العادي
