آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
06-02-24, 06:57 AM
| #112 | ||||
 
|  السلام عليكم ورحمة الله وبركاته صباحكم ومسائكم خير جميعاً كيف حالكم  اعتذر منكم على الغيبه انشغلت ومع تعب الشتاء وماكملت احداث البارتات هالاسبوع كتبت بارت ونص يعني الاحد القادم بإذن الله فيه بارت وصح ترانا قربنا من النهاية فحابه اشكركم جميع من كتب تعليق او قرئها ممتنه لكم خلوني اشوفكم وافرح بتعليقاتكم انتظروني يوم الأحد  | ||||
|  |
|
11-02-24, 10:03 PM
| #116 | ||||
| البارت الثاني عشر جابك الله يوم قالوا معوّض خير اشهد ان الخير وجهك وترحابك : : بعد عدت ساعات سجى جالسة على المرجيحه بطفش تنتظر جيت سياف بتروح لاهلها هي اكثر وحده خوافه ماتروح مكان لحالها وقفت من دخل من الباب الخلفي وشماغه بيده ووجه الذبلان ارتفعت انظاره لها مشى لداخل البيت وهي وراه قبل يفتح باب غرفة فاتن شي كتم على صدرها ماتبيه يروح لها قالت بسرعه: ابي اروح لاهلي قال بدون مايلتفت لها:اجهزي اشتعلت بقلبها نار من دخل وقفل الباب قالت بنفسها( احسن تستاهلين انتي الي رضيتي بهالشي تظنين بيلتفت لتس وهالفاتن قباله) قفلت باب غرفتها بقوه لبست عباتها بعصبيه وطلعت طقت الباب بقوه وهي تنافخ:خلصت يلا بالداخل زفر يعطيها العلاج بهدوء وهي بعد هاديه هاليومين ماتفزع منه لحفها وطلع وهي تراقبه بعيونها الفارغه تحس بفراااغ كبير بروحها تشوفهم لكن ماتحس اتجاههم باي مشاعر غمضت عيونها الي تحرقها طلع من الغرفه شافها جالسه على كرسي جدته عيونها بالارض وتهز رجلها لف شماغه بعشوائية على راسه:يلا وقفت تمشي وراه تتأمل ظهره(حتى بيمينه ماقدرتي تمشين) صدمة بظهره من وقف فجاءه حطت يدها على جبهتها تناظره سياف التفت لها:اسمعي الكل حاله مايسر بعد خبر ايمن ابيتس تكونين لهم العون بعد الله لاتبكين إذا حد بكى خليتس قويه واهم شي جدتي انتبهي لها زين سجى :بدون ماتقول لاتخاف اخذ نفس يناظرها سجى طيبه وحنوونه كثير على الرغم من الي سواه تهتم فيه ابتسم لها ومشى رمشت كثير ثم ابتسمت من ابتسامته الي اول مره تشوفها بهالشكل وقف عند الباب:ادخلي دخلت ثم رجعت بسرعه له كان بيمشي:سياف من التفت لها قالت : تعشيت سكت ثواني مااستاهل منتس هالحنيه هز راسه بايه ظلوا يطالعون بعض لثواني اقترب للباب بهدوء:بعد الفجر بروح الاسطبل تجين معي ناظرته بغباء تأشر على نفسها:انا اروح معك ابتسم من شاف عيونها تضيق بسبب ابتسامتها هزت راسها بايه سياف:اجل بعد الصلاة القاتس جاهزه نفطر هناك ويلا الحين ادخلي دخلت بدون لاتقول شي تمشي للداخل تهمس لنفسها احبه ياناس والله لاملك قلبك واتوسطه ابتسمت بقوه مشجعه نفسها رفعت راسها من دخلت الصاله امها وجنى جالسات والجده نايمه عندهن جو البيت كئيب سلمت على امها ثم جنى وجلست:وين الباقي جنى :ابوي عند عمه هبوب وزوجها سجى:وسحاب جنى:نايمه مر اليوم عليهم بحزن وسكوت من بكره الظهرتجمعوا كلهم عند ام حمد الي جالسه تناظر الارض وتصيح كلن يواسي الثاني من حريم ورجال وقفت هبوب بتعب وبيدها عباتها :بروح لسحاب العمه هبوب:اجي معتس هبوب:ارتاحي ياعمه راحت لبيت عمها فتحت عليها الغرفه اول مارفعت راسها وشافت هبوب انهارت بتعب من امس مانزلت دمعتها من الصدمه والتفكير اسرعت لها وضمتها سحاب بقوه تشاهق شدت عليها تهديها ابعدت وشهقاتها تتابع بكت اكثر:ا احبه والله احببه غبيه لما ماسمعت كلامك تركته يروح زعلان راح بعد ماتهاوشنا قلبي يعورني حيللل ياهبوب خليهم يرجعونه ابيه تنهدت هبوب بقوه تعبت حتى هي من امس تواسي وتهدي في امه وجدتها والحين سحاب مسحت على ظهرها وهي الي ياما كررت عليها بتندمين لاابعد عنتس وبتبكينه ليل نهار وفعلاً هذا الي صارلها ظلت على حالها حاضنتها وتمسح عليه وتسمي لين تعبت من البكي ابعدتها وجهها الاحمر ودموعها مسكت يدها:قومي ياقليبي توضي وصلي ادعي له مالنا الا الدعاء لاتخافين حمد يقول معه شخص يحميه راقبتها لين دخلت الحمام وعلى طول انسدحت بألم ظهرها تحسه انشق نصفين ونغزات ببطنها حطت يدها:الله يحفظك لي ولابوك لفت راسها من قالت سحاب بشهقه:تعبانه ابتسمت لها:شوي يلا روحي صلي وارتاحي غمضت عيونها تسمع شهقات سحاب وهي تصلي ماحست بروحها الا نامت سحاب بعد ماخلصت صلاة جلست تدعي انسدحت بجلال الصلاه حاضنه نفسها تبكيه ببيت ام حمد دخلت المطبخ:يمه جده تقول زيدي الرز ام صقر:تعالي ساعدينا جات سجى بجنب امها شالت الصحون ترتبهم بالصينيه مقهوره وينه ماجاء انتظرته لين ملت اكييد انه عند فاتن والحره تأكل قلبها فزت من لمست العمه كتفها العمه هبوب:بسم الله عليتس ماقصدت اخوفتس اناديتس ماتردين ابتسمت بخفيف:ماعليتس ياعمه امري العمه هبوب:مايامر عليتس ظالم سياف يبيتس برا نطت بسرعه طالعه للحوش غبيه اي احد قال سياف راحت تراكض ناسيه زعلها استوعبت ورجعت بتدخل ماتبي تشوفه قبل تدخل فز قلبها من سمعته يناديها يالسجيه بنبره مرت حلوه على مسامعها التفتت له بسرعه اقترب اكثر لها مسح شعره:شحالتس سجى:طيبه سياف:امم انشغلت وماقدرت اجيتس الفجريه انتظرها ترد ساكته تناظر الارض انحنى براسه يناظر وجهها:زعلانه توسعت عيونها بدهشه من اقترابه المفاجئ ابتعدت اول ماطلعت الجده:سياف اسرع لها باس راسها ويدها:يابعد زولي هالزول ورجع باس يدها :كيف اصبحت يمه سياف زفر:اصبحت مثل مااصبحتي الجده بحزن مسحت دمعه بطرحتها:يالله ترجع لنا الغايب سياف:اللهم امين امه شخبارها الجده:الله يكون بعونها التفتت على سجى الواقفه:ليش واقفه يمه ادخلي تغدي معهن ماكلتي شي من الصبح كانت بتدخل بس مسكها سياف:جده انا وسجى بنتغدى بالاسطبل ناظرته اما الجده رجعت تدخل:اجل حطي قسمكم وتوكلوا سياف يناظرجدته وهو للان ماسك يد سجى التفت عليها: بروح اجهز الغداء ترك يدها وعلى طول دخلت بسرعه اخذ نفس وزفره نقل عينه للمجلس له ساعتين جالس بجنب حمد مانطق كلمه ولافضفض له بموضوع ايمن لهدرجة ابعدنا عن بعض مسح وجهه:كله منك انت سبب هالمشكلة طلع ينتظرها بالسيارة مسح صدره الي يحس فيه نغزات كعادته مطنش علاجه شغل السيارة وتحرك اول ماركبت ساكتين وصلوا ونزلو بنفس السكوت اخذ منها السله يمشي قدامها وهي مذهوله من الاسطبل الفوضوي مافيه شي بمكانه مقلوب فوق تحت ناظرت مكان الخيول مافيه الا خيله تعرفه زين ابتسمت واسرعت بمشيها له جلسوا قبال ورد هبوب لانه المكان الوحيد المرتب :تجدد الاسطبل تنهد بخفيف:لا سكتت وهي تفتح الحافظة الي فيها رز ابيض وحافظة ثانية اصغر ايدام صبت له ماء وحطته بجهته ناظرته مااكل سرح بتفكيره دايم سارح بتفكيره حركت يدها قبال وجهه:سياف انتبه لها اعتدل واكلوا ساكتين الا نظراتها الي غصب عنها تروح له ارتفعت عيونها معه لما وقف يحمدالله وراح يغسل ابتسمت من المشاعر الي تدغدغ بطنها كل يوم تاكل معه على نفس السفره ليش اليوم تحسه غير حتى الاكل حست بلذته رتبت المكان وقفت تناظر حولها اخر مره جات هالمكان وهي بالمتوسط وكانت زيارة سريعة جاها صوته من وراها يأشر:غسلي من هناك غسلت ورجعت لكنها وقفت بخوف تناظره كيف منحني كانه ساجد ويضرب صدره اسرعت جلست جنبه برجفه وبكيها يعلى :سياف ياروحي علامك نفض يدها اول ماحطتها على ذراعه ونفسه عالي ومكتوم:ابعدي وقفت تتلفت ماتدري ايش تسوي له رجعت جلست لفت يدها على اكتافه ترفعه رجع دفها بصوت متقطع:ال البخاخ شهقت بخوف تعرف انه فيه ربو لكن ماعمره شافته يعاني منه:وينه لكنه مارد عليها راحت تركض تدور اي احد يساعدها لكن مافيه احد وقفت بنص الاسطبل ضايعه كانت بتتحرك ترجع له لكنها راحت السيارة فتحتها تفتشها من الخوف تفتش تحت المقاعد اخر شي فتحت الدرج اكياس كثيره وبخاخين سحبت كل الي بالدرج وراحت تركض حطتهم قباله:ايت سياف اي فيه تحتاجه انمدت يده للبخاخ على طول سحبته منه فتحته لكنه اخذ البخاخ منها قبل تقربه له بخ بفمه لين ارتاح انهد جسمه مايدور بعقله الحين الا انه ينام مثل كل مره تجيه هالحاله انسدح مرخي جسمه بيستسلم للنوم لكنه لف بعيونه للي شهقت سجى واقفه وعيونها تدمع يدها على فمها:تعالي اقتربت منه وجلست عند راسه رفعت يدها على جبينه:صرت احسن هز راسه بخفيف رفع راسه وحطه على المخده الصغيرة:بنام مر عليهم الوقت وهي جالسه تناظره واكثر من مره ترفع يدها تتلمس وجهه تخاف تجيه حراره ويدها الثانية تتلمس راحة يده واصابعه اخذت نفس صار وقت العصر هزته بخفيف:سياف قوم يلا صل ونرجع تريح بالبيت مارد عليها الا بهمهمه وقفت تتحرك شوي جسمها يوجعها من جلستها ماابعدت تمشي حول الورد المزروع وتفكيرها محصور بتعبه جلست قبال الورد تتلمسه مبتسمه التفتت من حست فيه واقف وراها على طول وقفت تسأل بلهفه:كيفك احسن ابتسم لها:بخير بخير لاتخافين متعود عليها كم ساعه وكل شي طبيعي سجى تتفحصه:متأكد سياف يداري تعبه عشانها مايحب يشوف احد قلقان عليه:ايه متأكد يلا نصلي نتقهوى والمغربيه نرجع سجى بأعتراض:لانرجع ترتاح م قاطعها:قلت لتس انا بخير : : انتهى لاتحرموني تعليقاتكم وعطوني رايكم في البارت تبقى القليل وننتهي من الرواية كونوا في الإنتظار وخلوني اشوف تفاعلكم وتوقعاتكم "سبحانك اللهم وبحمدك، أشهد أن لا إله إلا أنت، أستغفرك وأتوب إليك" | ||||
|
| |
|
04-03-24, 07:07 AM
| #120 | ||||
| :: :: البارت الثالث والعشرين (قبل الاخير) قالت ابي منك امان وقلت كلي امان انتي ب امان الله وفي وجهي وف شنبي : هبوب بعباتها:يلا امشي معي سحاب بصوت رايح من البكي :والله مااقدر اشوفها هبوب مدت لها يدها توقفها بتشجيع:سمي بالله تحتاجك الحين بجنبها يلا ناظرت يدها ثواني مسكتها ووقفت بتعب:إذا ماقدرت برجع ابتسمت مشجعتها تروح معها لام ايمن مشت مساندتها اول مادخلت الصاله وسلمت فزت جالسه تناظرها بلهفه سحاب تحركت من دفعتها هبوب بخفيف تقدمت جلست قبالها سحبتها ام ايمن لحضنها بقوه وتصييح:اخخخ ياريحة الغالي بكت سحاب معها وكل وحده تتصبر بالثانيه والكل يهديهن وهبوب ماقدرت تتحمل تشوفهن وتهديهن طاقتها انتهت دخلت غرفتها وانسدحت بتعب حتى العبايه مانزلتها رفعت راسها من دخلت الجده بخوف:فيتس شي ابتسمت لها وجلست من وقفت الجده قبالها باست يد جدتها:لابس اريح ظهري شوي جلست الجده على طرف السرير بتنهيده:الله يكون بالعون رجلتس متى بيروح لهم اسندت ظهرها وهي ماسكه يد جدتها:يقول هالاسبوع التفتن للعمه هبوب :قومي تغدي هبوب:والله مالي نفس العمه هبوب:كلنا مالنا نفس لكن لازم نأكل قومي لو كم لقمه عشان الي ببطنتس وعشان سحاب بتأكل إن شافتس تاكلين وقفت الجده بتعب:نادي بنتتس هنيا وياكلن غصب عنهن عند سجى الي للان خايفه ترجع له الحاله وقفت:وين راح مشت تدور عليه وقفت تناظره يمسح على خيله ابتسمت وهي تقترب سياف تقدم يفتح البوابه على الادهم وتركه يطلع واستند على الجداروقفت عنده سجى تناظر الخيل الي يركض ساكتين يتأملون حركات الادهم لفت بنظرها له من قال:بعت الاسطبل عقدت حواجبها :كيف يعني اخذ نفس يناظرها:هالمكان صار ملك لغيري حتى الادهم بعته انتفضت بصدمه: كيف تبيعهم وانت ؟ ابتسم بضيق مارد عليها تقابلت عيونهم من وقفت قباله بعصبيه:جاوبني ليش تتخلى عن شي تحبه وتلقى نفسك فيه ليييش سكتت ماتدري ايش تقول تفاجئت وعصبيتها لانها تدري قد ايش يعني له هالمكان الي كان حلمه من صغره كيف يتركه بهالسهوله سياف: لاني احتاج الفلوس للمزرعه عقدت حواجبها:اي مزرعه شتت نظراته عنها واخذ نفس قوي يملي صدره فيه:مزرعتنا لمتى ببقى حابس نفسي بذكررى الحريق لمتى بيصير المكان مهجور وهواكثر مكان تحبه امي بلع غصته من مرت عليه الذكرى غمض عيونه الحاره من تقدمت سجى تحضنه بحنيه مطبطبه على ظهره هالحضن ابلغ من كل الكلام المتلخبط في صدرها وصدره ظل دقايق واقف وهي حاضنته بدون لايبادلها هالحضن الحنون على قلبه ابعدها من سمع الاذان لف عنهايداري نفسه:اذن المغرب اتجه للادهم يرجعه مكانه حط اغراضهم بالسيارة وهي تراقبه تفكر سياف كتوم وصعب اي احد يحدد مشاعره اوايش يفكر فيه تقدمت تعدل عباتها وتركب السيارة بهدوء جالسات حول العشاء بهدوء غير المعتاد بجلساتهن سحاب وقفت فجاءه وطلعت لحقتها جنى :سحاب انتظري شبلاتس وقفت تناظرها بدموع:خلاص مااقدر اجلس اكثر تعبت مسكت يدها ومسحت وجهها قبل تتكلم قاطعتها ام ايمن جات مسرعه وتصيح:وين بتروحين لاتروحين مثل ماراح شهقت سحاب وهي تتقدم تشد على حضنها:تكفين ياعمه لاتقولين راح بيرجع والله بيرجع الجده بعصبيه وهي تبعدهن عن بعض:لاحول ولاقوة الا بالله ليش هالصياح كله اذكرن الله قالكم حمد انه بخير يكفينا انه عايش اشوف كل وحده تكفكف هالدموع جنى اخذت نفس مسكت يد سحاب:برجع معها لبيتنا ناظرتها ام حمد لين اختفن من قدامهن مسحت على كتفها الجده:اذكري الله افرشي السجاده وادعي له مر يومين وهم على نفس الحال عند افنان الي فتحت باب بيتها الا دخلت زوجة عمها ببناتها ناظرتهن بدون لاترد السلام ام خالد:حتى السلام ماتردينه يالخايبه ردت الباب بدون لاتقفله ميلت طرف فمها وظلت ساكته فضه بعصبيه:وراتس ماتردين ولامالتس وجهه ياقليلة الخاتمه انتي واختتس راميات عمكن وولده بالسجن[ماعندهن خبر بخروج خالد لانه سافر على طول] اخذت نفس تعبت من كثر ماتعصب وتتهاوش معهن ولايفهمن رجعت فتحت الباب وهي تأشرلهن لبرا ام خالد توسعت عيونها:تطردينا افنان بحده:ايه اطردكن هنا انتن ببيتي ووالله ان ماطلعتن ان ماتشفن خير وانتوا اخبر بافنان ام خالد تنزل برقعها: هين هين يابنت حصيص هيين فضه وهي تمشي ورا امها:نفشتي ريشتس يوم تزوجتي اول ماطلعن صفقت الباب بقوه وصدرها يطلع وينزل شيعت البيت بنظره وقالت بصوت مليان سخريه على حالها:وينه الي تزوجته وينه اسرعت بقهر تلبس عباتها طلعت متجهه لجارتها اول مافتحت لها تقدمت:تكفين يانجلاء طالبتس نجلاء بخوف:ادخلي وابشري افنان :طالبتس ابيتس تنادين احد اخوانتس يوديني اتصل على زوجي تكفين نجلاء:انتي فيتس شي محتاجه شي افنان بنفاذ صبر:لا بس ضروري اكلمه نجلاء:ابشري الحين دخلت وماهي الا دقايق جايه ومعها اخوها ركبت معهم اول ماوقف السيارة مد الجوال لاخته :إذا خلصتوا نادوني اخذت الجوال من نجلاء وهي تراقبها تنزل لاخوها عشان تاخذ راحتها مع كل مره يرن قلبها يتسارع من الي تفكر فيه انفتح الخط وصوته من قال الوو كانه سمح لعيونها تنهمر ويتلخبط كل الكلام الي جهزته نواف عقد حواجبه من صوت النفس والشهقه قال بشك:افنان افنان وشهقاتها تتابع من تراكماتهاالي بصدرها:تعبت ابيك ابيك تعال لي فز واقف بخوف:افنان علامتس ماردت عليه تصيح بقوه انفجع قلبه عليها ارتفع صوته:افنان ياروحي علامتس فيكم شي وش صاير تكلمي يابنت افنان من بين شهقاتها:وينك عني تعبت تعبت من كل شي ابي اختي ابي امي وابوي حتى عمي ابيه ابيهم كلهم ليش يبعدون ماحد يمي محد من زمان اتصبر واتحمل من شقى لشقى من ضرب لتجريح بالكلام ولما بديت ارتاح وتضحك لي الدنيا رجعت نفسي القديمه ارتفع صوت صياحها:ابي اضحك ابي اعيش ماافكر بخوف ابي الامان ابي الامان ابيك يانواف غمض عيونه بقوه وهو يبلع ريقه اوجعه كلامها:انتي بااماني طول ماانا حي كلي لتس بس انتي اهدي ل ماكمل كلامه من سمع الي قالته توسعت عيونه و نفسه انكتم من الصدمه رجعت تكرر عليه:طلقني طلقني ظل دقايق يستوعب صوتها الي انقطع نزل الجوال يناظر فيه وش صاير لها عشان تقول هالكلام رجع اتصل الرقم مغلق سحب اغراضه من على المكتب ووجهه مخطوف مستحيل يجلس هنا بيروح لها قبل يوصل لسيارته وقف من سمع الجرس الي ينبه الي بالمركز بإجتماع ضروري التفت لصالح الي يناديه:نواف اسرع اخبار جديده لايمن شد على قبضة يده وعيونه بمكان صالح الي اختفى بين نارين يروح لافنان الي تناقضت بكلامها واربكه صياحها ولا يروح يشوف وش جديد قضية ايمن ضغط على اسنانه ضرب برجله الارض بقهر واسرع لداخل المركز وقلبه يستودع افنان الف مره عند افنان الي قفلت الجوال ضامه نفسها وتصيح من تعبت وتحس انها بدت تهدا اخذت نفس ونزلت جاتها نجلاء الي وصلهم صوت صياحها:انتي بخير هزت راسها:ثقلت عليكم ابتسمت لها:افا والله لاثقلتي ولاشي حنا اهل افنان وصوتها متغير من صياحها مدت لها الجوال ماتبي شي الحين الا انها تنام :ابي ارجع البيت بعد ماخلص صلاة العشاء تلفت حوله يدوره بين المصلين ماشافه تنهد طالع من المسجد قابل العم لافي سلم عليه:الحمدلله على السلامه شعلومك حمد:بخير الله يسلمك الا ياعم وين سياف مااشوفه العم لافي:تلقاه بالاسطبل خلااص صبره ينفذ هالبعد مازاده الا هم وضيق يعرف سياف بيطول لين يجيه معتذر فيطوي هو هالصفحه ويتنساها كعادته يحتاجه هالوقت اكثر من اي وقت وقف مندهش على باب هالاسطبل الي منقلب فوق تحت شيع المكان بعيونه حدايد على خشب مرميه من غير الصناديق الكبيره تقدم داخل التف حول مكان الخيول شافه مرتكي برجله على السور يراقب خيله الي يتمشى براحته رافع اكمام ثوبه وشماغه لافه حول راسه بإهمال اخذ نفس هالبُعد سبب ربكه لمقابلته له لوهله طرى بباله انه يرجع دربه لكنه تعوذ من الشيطان طول واقف اخذ نفس وزفره رفع صوته وكأنه بهالصوت يكسر حواجز انبنت بينهم:مساك الله بالخير يالعضيد التفت بسرعه له توه يفكر فيه ولقاه عنده مارد ظل واقف يطالعه بعيون ذبلانه والإبتسامه تشرق على وجهه ببطئ ابتسم حمد يمازحه:تعرس وحمد ماهوب بيمينك قرب منه بسرعه يحضنه وهو يضرب بقبضة يده ظهر سياف:كذا ياسياف تصد اخوك وتتركه للهموم والمشاكل تنهد عليه سياف ابعده وهو يحاول يبوس راسه الي يبعد عنه وغصب باسه وعيونه تدمع :اقبل خطأ اخوك والله يالحكي طلع بلحظة غضب سامحني وادمح زلة رفيقك وانت اخبر بالي بقلبي لك حمد يمسح دموع صاحبه بطرف شماغه وهو يداري دمعته:يشهد الله اني مسحتها من صدري ومسموح يالغالي مسموح ياعضيد حمد سياف ابتسم ونبرة صوته تغيرت سحبه لصدره بقوهضرب ظهر حمد :رديت فيني الروح ياحمد حمد ضحك وبطرف عينه دمعه مسحها بكفه بسرعه وابتعد عن سياف والإبتسامه مافارقته سياف:فيك حيل صيد حمد ضحك يعرف ان ورىا هالسؤال حكي كثييير بصدر خويه يعرف سياف عز المعرفه مايتكلم او بالاصح مايعرف يعبر عن الي بداخله فدايم يغلفها بجملة وحده فيك حيل نصيد لان لما يطلعون للصيد تتصافى قلوبهم وكل واحد ينطق بالي بقلبه ولو انها ماتكون مباشره هز راسه بالإيجاب وهو يضحك ظل واقف لثواني يناظره قبل يتجهه لكتوف حمد يحضنها بيده ويمشيه معه وكل واحد يزفر هالحاجز الي انهد قدام قوة الاخوه بينهم :: انتهــى . البارت الاخير بإذن الله بيكون قبل رمضان مافيه وقت محدد ينزل فيه اول ماانتهي من المراجعه بينزل على طول اتمنى من كل الي يقراء الرواية يسعدني بكومنت خاص في الرواية واحداثها لان احنا الكاتبات نتعب ترا بربط الاحداث والمحاور فأكيد نبي نشوف ثمرة هالجهد انا والله تسعدني ارقام المشاهدات للرواية انها ترتفع لكن برضوا نحتاج دفعه من حروفكم الطيبه وشكراً لكم كونوا بالانتظار "سبحانك اللهم وبحمدك، أشهد أن لا إله إلا أنت، أستغفرك وأتوب إليك" | ||||
|
| |
|
| الكلمات الدلالية (Tags) |
| رواية.كل مخلص. |
| أدوات الموضوع | |
| انواع عرض الموضوع | |
|
|
191Likes
.gif "Eh S(7)")
العرض العادي
