آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
27-08-23, 03:03 PM
| #12 | ||||
 
|  البارت الرابع بعد صلاة العصر دخل البيت واتجهه لمكانهن دايم مافيه احد غير جدته سلم عليها :شعلومتس اليوم الجده:الحمدلله جلس سحب الدله يصب له قهوه :وين هبوب عنتس اليوم الجده:ياضي عيني هي نايمه سكت يشرب قهوته ويناظر يدين جدته الي تخيط ثوبها سياف:جده الجده:روحها ابتسم لها:ودتس تفرحين الجده رفعت عينها لوجهه:ايه بالله ودي بالفرح محد يبقى بحزنه طول سنينه ناظرها بإبتسامه:حمد خطب هبوب لمعت الفرحه بعيونها من زمان تتمنى تكون من نصيب حمد تركت الي بيدها :الله يفرح قلبك مثل مافرحتني والله انه اسعد خبر باس يدها :ياجعل هالفرحه بعيونتس دايمه الجده وهي بتوقف:اجل بقوم اخبرها رجع جلسها:ارتاحي ياجده هبوب عندها خبر من شهر عقدت حواجبها:من شهر وماعندي علم سياف:ماكان وده احد يدري لين توافق ماوده يكدركم إذا رفضته الجده :افاا حمد ماينرفض سياف:ياجده ياجعلي ماابكيتس الشور لهبوب وانا معها إن رفضت ولاوافقت سكتت وهي تدعي بقلبها انها توافق وين بتلقى مثل حمد اخلاق وطيبة قلب ويكفي انه شايل الام الي ربته ومعتبرها امه ولامره زعلها ودومراضيه عنه ابتسمت لسياف الي توسد فخذها وابتسم لها وهو يبوس يدها:اشتقت للنومه على رجلتس مسحت على شعره بحب وهو غمض عيونه صحيح انه حزين على موت ابوه لكنه مرتاح من صفى قلبه عليه ورضى زفر براحه كلها دقايق وتعمق بنومته عند جدته الي لحفته بشالها الي على كتفها تمسح على شعره جات العمه وجلست قدامهم ابتسمت لسياف النايم رفعت نظرها لامها وكانت بتتكلم اشرت لها تسكت عشان مايصحى تحس برجلها توجعها لكنها تتحمل لاجل يرتاح بنومته تمسح على شعرهوقلبها يدعي لهم حاسه في ضيقه ودها لويفضفض عن الي بصدره لكن كتووم وقفت سحاب الي طلعت جايتهم وهي تشوفه نايم ابتسمت(ياجعلها نومت الهناء والراحه) استحت تروح وتجلس عندهم وهو نايم بينهم لكن رفعت نظرها لامها الي تناديها بهدوء وتأشر لها تجي عدلت نقابها ومشت لهم سلمت على راس الجده وجلست جنب امها مقابل سياف النايم الجده وهي مبتسمه بحب مسحت على وجهه:وشلونتس عساتس نمتي زين تأملت وجهه الهادي ثم ناظرت لجدتها:الحمدلله بخير العمه هبوب:يمه شرايتس نطلع نغير جو بالاسطبل سحاب بإنبساط:ايوا الله خلونا نروح ابي اشوف الخيول الجده ناظرت لسياف وقالت بهدوء:إن وافق انا معكم اعتدلت بجلستها وهي تناظر الجده وامها تخاف يشوفن نظراتها لسياف رجعت تناظر وجهه هالات تحت عيونه تأمل رسمة وجهه لاشعورياً حطت يدها على قلبها : فاتن دقت الباب على افنان لكن لامجيب رجعت بذبول لغرفتها وجلست بالكرسي الموجود بالزاويه تنعي حياتها الي انهارت بعد موافقتها وتطنيش اختها لها ومحد ينصفها في هالبيت فزت بخوف من دخل وقفل الباب سحبها يجلسها وهو يطلع المرهم كشف عن ذراعها الي اثار ضربه فيها حط عليها المرهم وهي كاتمه ألمها من خوفها انه يرجع يضربها حتى عيونهاصارت تحرقها من كبتها لدموعها رفع عينه له:وين كمان اشرت على كتفها وساقها بخوف حط عليهم من المرهم ثم وقف وهو يقول:اسمعيني زين كلها ايام ونطلع من هنا رفعت نظرها له بسرعه بكرهه ماتبي تبعد عن اختها حتى وهي ماتشوفها تحس بالامان وهي بنفس البيت معها انحنى عليها انكمشت بخوف:كم مره اقولتس لاتناظريني بهالنظره زفر ومشى عنها ورجع طلع نفس عادته ماتغيرت يطلع ومايرجع الا بعد ايام يهدد ويهاوش تصير بقلق وخوف منه لارجع شخصيته متقلبه مره حنون ومره عصبي ومره حتى حرف ماينطقه ايمن وهو يمشي ورا نواف بالبقاله:تراك دوختني لف عليه:انت الي مدوخ روحك تدور وراي ليه ايمن :مين مسلطك علي تفتش البقاله نواف ضحك:افتش وراك يمكن انك تبيع شي منتهي وتالف تافف منه وهو يرجع لمكانه:والله انك فاضي وانا راسي مصدع موفاضي لسوالفك ضيق عيونه وهو يشوفه يفتح الدرج ويطلع علبه حبوب ويرجع يوقف بيطلع مشى بسرعه وراه:هييي وين رايح طنشه مارد عليه ورجع يمشي وراه (وش هالعلبه الي اخذها معقوله انه معهم مستحيل البيئه الي حوله. غير )ثم رجع دربه للبقاله تلفت مافيه احد بسرعه فتح الادراج يفتشها لكن مالقى شي كلها اوراق حسابات ودفاتر ديون اهل الديره جلس بتأفف وقف من دخلت ترف ومعها بنت بعمرها ابتسم لها:هلا بالمزيونه ضحكت ترف:بشتري حلاوة قلب لمريم تصالحنا التفتت لها: صح رجعنا صديقات هزت مريم راسها بقوه ضحك عليهن:ياحليلهن الصديقات خلاص انا بشتري الحلاوة لتس ولها ترف وهي تأشر بيدها:لا انا اخذها ببلاش ايمن يقول إذا تبين شي اخذيه كتف يدينه من مريم الي حطت حلاو وشبسات على الطاوله بفرحه اما ترف طلعت ورجعت وهي تسحب ولد معها :ياغبي اخذ الي تبيه ببلاش فلت يده:ماابي شي ضربته بزعل على ظهره:الا تبي جاتهم مريم وهي تأشر على الطاولة:شوفي هذا كله لي وانت ياغبي تقولك بلاش يعني بدون فلوس سحبته معها لرفوف الحلاو ومريم كل شوي تزيد على الطاولة واقف يناظرهم وهو رافع حاجبه جات عنده :يلا بكم هذا كله جلس على الكرسي:موتقولين ببلاش مريم كانت واقفه وتناظره من جات ترف صارت تحط الي تبي بالاكياس ومثلها سوت ترف وطلعن التفت للولد الي واقف وبيده حلاوه قال:بكم هذي حزن عليه واضح ضعيف ومستقويه عليه ترف:ببلاش حطها على الطاولة وهو يطلع ريال من جيبه:بس ماما قالت لاتاخذ شي الا بفلوس ابتسم :اعتبرها هدية مني طيب لكنه ماتحرك الا برجعت ترف سحبت منه الريال: هات ناظرها بعيون تطلق شرار سحب رياله منها وضربها وركض خارج البقاله وراحت تركض وراه ضحك عليهم وجلس والطفش ياكله لكن انتبه لمريم الي وقفت جنبه :وشبلاتس مريم وهي تأشر على كف يده المجروح:توجعك ابتسم لها وهو يحرك يده بمعنى ماتوجع ناظرته ببرائه وهي تلمس يده : بس فيها دم انادي افنان تعالجك تخلي الدم يروح كله فز قلبه لاسمها قرب من مريم:ليه افنان دكتوره ابتسمت بفخر وحب لافنان:ايه انا احبها هي طيبه وماسمعت كلام ابوي صارت دكتوره استغل الفرصه يسألها:هي ساكنه معاكم مريم بكل طفوليه صارت تحكي له: ايه ابوي يقول البيت حقها بس صار لنا وبس يصرخ عليها ويضربها وأمي ماتخليني اتكلم معهن بس انا احبها واحب فاتن عقد حاجبه: هي مالها اخوان مريم هزت راسها :لا حرام ماعندها ام واب بس عندها فاتن ابوي يقول ان افنان شريره بس هي طيبه تنهد بضيق من كلامها واعتدل بجلسته:خلاص بكره اروح اعالج يدي ابتسمت ورجعت من حيث ماجات : صرخت بقوه وهي تتلفت بخوف والنار حوالينها ماتقدر تتحرك وضامه نفسها برعب وعيونها تنتقل بكل الجهات بسرعه عجيبه ركض لها بكل طاقته لكنه يحس انه يركض بنفس مكانه صرخت بإسمه واختفت بين اللسنة النار تلفت حوالين نفسه بضياع وهو يلهث بخوف صار يتحرك بمكانه وتنفسه يعلى ثم فز بقوه يناظر للي جالسات بخوف شوي شوي بدأ يستوعب انه كان نايم وداهمته الكوابيس مسح وجهه وهو يستغفر وصدره يرتفع وينزل بسرعه قربت منه عمته تمسح على ظهره:بسم الله على قلبك ، تعوذ من الشيطان تنهد:اعوذوا بالله من الشيطان الرجيم فز واقف رايح للمجلس الخلفي بدون مايرد على جدته الي تناديه بخوف ومتجاهل الي واقفه ويدها على صدرها بخوف تناظره جلس ويده على راسه: يارب ارحمني رجع وقف يحس انه تايهه نفس الكابوس ينعاد عليه من وفاة امه بالمزرعه بحريق قدام عينه حادث هالحريق موقادر يتخطاه ابد كل مره ينعاد نفس الكابوس لكن هالمره كانت فاتن بدال امه بالحلم تمكنت الرجفه والخوف من جسمه النحيف تفكيره توقف صار يمشي رايح جاي بالمجلس تحرك للباب الي يندق بشرود الا بايمن قباله سلم عليه ومد له العلبه: هذا علاجك نسيت اجيبه لك اعذرني اخذه بشُكر وقفل الباب لكنه رجع فتحه وطلع باتجاه ايمن الي راجع للبقالة:حمد وينه :نايم :انت وين رايح :للبقاله تركت نواف فيها صراحه مااضمنه يقلب البقاله فوق تحت :اجل درب السلامه ودعوا بعض وكلن راح لطريقه بعد ساعه سحاب بقهر تبي تطلع بطمن قلبها عليه بعد ماطلع :وليش لازم احد معي طفشت من البيت ابي امشي بالديره يمه ليش كل شي لا لا العمه هبوب:قلت لا ياسحاب الجده:خليها تروح ترا ديرتنا امان وماتضيع ياكثر ماتطلع هبوب لحالها العمه:ابوهم موصيني عليهم يمه تأففت وهي مقهوره طفشت من هبوب الي من بعد وفاة ابوها ذبلت وطفى نورها بالحياة وقلبها يشتعل على الي انتفض قدامها والخوف بوجهه ودها تشوفه وقفت على الباب ابتسمت بقوه وركضت لها تحضنها :الله ياهبوب منوره بهالابتسامه الحلوه وشهالبس الربيعي يجنن مووت عليتس ضحكت هبوب بذبول:نحاول نهزم الحزن والكأبه ونعيش ضمتها بقوه:ايوالله عيشي ياعيني بعدتها عنها:اسمعي شرايتس نتمشي برا طفشت من البيت ضحكت على طريقة نطقها للسين تقلدهم:البسي عباتتس ويلا ماصدقت خبر طارت لبست ورجعت لها جالس برا البقاله متملل وكل شوي يتأفف :واخيراً جيت كان نمت احسن ضحك ايمن:الي يشوفك يقول من فجر ربي وانت هنا كلها نص ساعه الي غبت فيها نواف:وين رحت بهالسرعه جلس جنبه:نسيت علاج سياف معي بشيل ذنبه برقبتي لوصار له شي عدل جلسته وقال بجديه:وش علاجه سياف مرضان ايمن:الله يشفيه معاه ربو تعبنا نركض وراه بعلاجاته نواف:ليه ماوده بالعلاج ايمن:مايهتم لصحته عايف نواف:لاحول ولاقوة إلا بالله الله يكون معه سكتوا من اقبلوا حرمتين للبقالة عرفها من نقابها الكاشف لعيونها الي حافظها حفظ وقف عند الباب جوا البقالة :ووجع إن شاءالله هذا مايستحي ماينزل عينه ضحكت:وانتِ وشعليتس منه سحاب التفتت عليه:يعع اكرهه اتنرفز إذا شفته هبوب:وين الي تقول لاتكرهين احد بدون سبب قوي مشت بغرور:عاد الكررهه والمحبه من الله هبوب:اقول بسرعه اخذي الي تبين خلصينا ناظرت الثلاجات الخاصه بالايسكريمات وهي محتاره ايش تاخذ:امممم شرايتس مانجا ولافراوله هبوب:يعني بتاخذين الي بختاره سحاب:ايه هبوب:المانجا سحبت ايسكريم الفراوله:احسن اختيار هزت راسها :كل مره تسئلين وتاخذين فراوله ضحكت:وش اسوي اعشقه باست الايسكريم بضحكه مادرت عن العيون الي تراقبها ويسمعهن اتجهن للطاولة لفت تناظره بمعنى تعال بنحاسب لكن ناظرهم وهو واقف عند الباب:والله ماتدفعون خذوه بلاش ناظرن بعض وبعدها قالت :ليه فاتح البقالة سبيل تلون وجهه بإحراج مرتين جات ويحلف ماتدفع لكن هالمره احرجته وياليته لوحده قدام نواف ضربتها على كتفها وهمست:وجع احرجتيه احمدي ربتس مابتدفعين قالت بصوت متعمده يسمعه:حامدته وشاكرته من قبل كرمه الزايد طلعت معصبه وتركت الايسكريم على الطاولة تبي تخفف من الخوف الي بقلبها طوال الطريق تتلفت تدوره لكن ماله اثر انقهرت ( وينك فيه ياسياف ريح قلبي) انحرجت هبوب منها مشت وهي تقوله بأدب:السموحه منك ايمن منزل عيونه:عادي يمنون على الرقبه كل اهل سياف رفع نظره للي جالس وشافه كاتم ضحكته قال بقهر:اضحك اضحك تشمت فيني كانه ينتظره وضحك بقوه وبضحكته لفت الانظار عليهم ضرب كرسيه بقهر :اسكت ياحمار الكل يناظر خفت ضحكته من جلس جنبه وهو يتنهد التفت له رافع حاجبه:وشعندك تناظر ابتسم:من هالبنيه؟ ناظره لثواني ثم التفت عنه:بنت عمة سياف قال بإبتسامه جانبيه: وعرفتها من اقبلت تنهد بضيق:اقولك شي بس مايطلع برا هالمكان ابتسم بفرحه واخيراً بيعطيه سر من اسراره وهذا اقوى دليل انه صار قريب بالحييييل منه :ابشر قول ايمن بهدوء:هالبنت دايم تطري بافكاري فجأه صرت ابتسم من اسمع اسمها شفتها مره صدفه وبعدها ماني بخيير ابد حط يده على كتفه:تحبها مارد عليه وكمل نواف:وليه ماتخطبها ايمن:اخطبها ؟ نواف:ايه اخطبها لهفتك لها واضحه من وقفتك من لمحتها ارتكى بظهره بتنهد:ماادري وقف وضرب صدره بهبل:ودك اخطبها لك من سياف تراني جاهز ارتفعت انظاره له:خبل انت تخطبها لي ماكأن عندي ابو وقف عندهم رافع يده يسلم:السلام عليكم ردوا السلام خالد:ابوك مايبي احد يساعده بالمزرعه ؟ ايمن بنظرات كرهه : لا ماوده مكتفي بالعمال المجتهدين الي عنده شمق لهم بعيونه ومشى ايمن وهو يصر على اسنانه:مستفز هالادمي والله كل ماشفته يفور دمي رجع جلس :واضح عليه راعي مشاكل ايمن:راعي مشاكل وبس هذا ابليس الله يفك الناس منه : وصلت عند الباب مسكتهابقوه: وشبلاتس انفجرتي عليه ناظرتها بغضب:يستاهل لايتكرم علي مااحبه ابوعيون زايغه ماتدري ليه تضحك إذا شافتها معصبه مولايق عليها انفلتت ضحكتها وسحاب ناظرتها بنظره ناريه رفعت يدها بإستسلام ودخلت سحاب اما هي تأملت وردها بإبتسامه وصارت تمسح عليه الا بسياف يوقف جنبها ناظرته بإبتسامه لما قال: كيفها وردتنا اليوم لمعت عيونها:بتكون بخير بجنبك ابتسم لها وحاوط كتفهاوهم يدخلون البيت: متى مااحتجتيني التفتي يمينتس وبكون بهالقرب منتس للممات دمعت عيونها نزلت طرحتها ونزلت عيونها :أنا موافقه على حمد تهلل وجهه حضنها بحُب :يشهد الله ان فرحتي مايعادلها شي هالحين ضحكت ببكي بعدها عنه:ليش هالدموع مسحتهم بطفوليه وابتسمت له بقوه سحبها لمكان جدته :ياجده البشاره جدته فزت:بشرني ياجعلكم تبشرون بالجنة حط هبوب قدام جدته بفرحه:هبوب بتقولتس انصبغ وجهها بحرج كيف بتقول لجدتها انها موافقه واصلاً جدتها ماعندها خبر بالخطبه لفت وجهها له :سياااف ضحك عليها فهمها: جده عندها علم بالخطبه لفت لجدتها ونزلت راسها وتحس بحرارة جسمها ترتفع من الخجل:أنـ ...انا موافقه ضمتها والفرح يغمرها باستها على خدها:ياضي عيني ياضي عيني ياجعل السعاده تغمركم وقف :برووح ابشر العريس عند الشباك واقفه ويدها على قلبها مبتسمه طارت من سمعت صوته وارتاحت من شافت ضحكته دق الباب وفتحت له ام حمد لف على ورا :السلام عليكم ورحمة الله وبركاته ، كيف حالتس ياخاله؟ ام حمد:بخير ياجعلكم بخير وشلونكم انتم ؟ سياف:الحمدلله ، ماعليتس امر ناديلي حمد فتحت له الباب وهي تقول: ادخل تلقاه نايم بالمجلس دخل وقفل الباب اتجهه للمجلس الي اقشعر جسمه من شدة البروده اتجهه للمكيف قفله وجلس بجنب فرشته يصحيه:حمد ياحمد اصحى تقلب لكن فز من قوة الضربه الي جاته:اييي وش هاليد الي عليك حديد كسرتني سياف:تستاهل ماينفع معك الهدوء رجع انسدح ويتمغط:وشتبي ابي انام سياف:ماودك تسمع جواب خطبتك فز جالس وعيونه تتفحص وجه سياف:هاا بشر مارد عليه قال بخوف:سياف يااخوي وش جوابها رفع نظره يحاول يكتم ضحكته على وجه حمد حمد بصدمه:رفضت ! ماقدر يكمل ضحك وهو يقول:مبرووك يالنسيب عليك زينة البنات فز واقف :اسألك بالله تقول الصدق وقف وهو يحضنه :أختي امانه برقبتك إن جاتني بيوم تشكيك بهد حيلك انتبه ضحك وهو يربت على ظهر سياف بفرحه : اختك بكرمها وبعزها وبحارب الدنيا عشانها دف عنه سياف بسرعه :برووح ابشر امي وراح يركض لداخل البيت ينادي امه طلعت من الغرفه باس راسها ويدها:يمه هبوب وافقت علي زغردت امه بفرحه ومن هنا الكل وصله خبر الخطبه بعد ايام :وليش يمه نبي نفرح فيكم هبوب :هذا شرطي ماابي زواج كبير ضمتها من شافت تقوس فمها دال على بداية بكائها بكت خوف من هالزواج الي مايكون ابوها وامهاحاضرينه ربتت على ظهرها: بسم الله على قلبتس دخلت ام سحاب بالقهوه حطتها على الارض وراحت تضم امها وهبوب ضحكت: شاركوني هالحضن ضحكت هبوب وهي تبعد :تغارين ياعمه ابتسمت لها وهي ترجع تحضن امها:مين يشبع من هالحضن دخلت سحاب تركض لهبوب وضربتها على كتفها:ليش ليش مافيه زواج خبله انتِ هبوب وهي تمسد مكان الضربه:اوجعتيني وبعدين وشدخلتس زواجي بكيفي تكتفت :لاموبكيفتس ياعيوني بتسوين زواج ودق ورقص بعد هبوب: هذا شرطي الوحيد وقلته لسياف سحاب:وعساه وافق هو كمان ابتسمت وهزت راسها بنعم قالت بزعل وهي تطلع: بكيفكم بس صدقيني بتندمين هبوب لفت راسها جهة جدتها وعمتها الي يتقهون ويضحكن على هوشتهن: زعلت ! العمه:ماعليتس منها ساعه وتجيتس منطلقه ترتب معتس الامور وقفت وهي تصفق:الله ياعمه يهبل السين على لسانتس ابتسمت العمه وغمزت:اعجبتس : ايمن بفرحه: شرايكم بهالمناسبه نروح للمزرعه مع سياف واهله ابو حمد: لا ياوليدي خلها وقت ثاني اليوم عزمت سياف لكنه اعتذر بيودي اهله للاسطبل هالايام طلع مستعجل من الغرفه متجه لاهله وقفت امه بخوف:وشبلاه وجهك يمه حمد وهو يقفل ازارير بدلته العسكريه: جاني استدعاء مستعجل لازم امشي للمركز الحين سلم على راس امه وابوه: استودعكم الله ، ادعولي قبل يطلع تعلقت فيه ترف :بتروح مره ثانيه نزل لمستواها وباس خدها: ياروحي انتِ بجي بسرعه ماراح اتأخر وبجيب لتس حلاو ابتسمت :ايه ايه الحلاو عند ايمن مو حلو ايمن:شف شف ماكأنها كل يوم توصي على حلاوي ضحكت بشقاوه عليه تمسكت بحمد وتمد لسانها لايمن ايمن وكأنه بيقوم لها: هذي الي بتتصفق اليوم ودعهم حمد بضحكه ومن عادته لازم يمر على سياف طق الباب الخلفي بقوه واستعجال لكن محد فتح فتوجه للباب الامامي طق وبرضو لامجيب لما بيمشي انفتح الباب وسمع صوت حرمه:ميين عطى الباب ظهره: انا حمد ناديلي سياف رجعت قفلت الباب: كيف بناديله سياف ماخلصت حكيها الا سياف بوجهها طالع من بين الاشجار الصغيره بجنب الباب وبيده سلك الاضائات تغطت على طول بالطرحه الي على اكتافها نزل راسه وقال بتوتر:السموحه يابنت العمه ماانتبهت عليتس ماتحركت ولاتكلمت تيبست رجولها من الخوف تنحنح و اشر على الباب:بطلع استوعبت انها ساده الطريق عليه شهقت وركضت للداخل فتحت الباب بقوه وهي تلهث فزت هبوب بخوف: وجعع خوفتيني ركضت للمرايا حطت يدها على راسها : ياغبائي وشهاللبس هبوب: وشبلاتس لفت عليها ووهي ماسكه ثوبها حق البيت:تخيلي شافني سياف كذا ضحكت بقوه عليها :وين شافتس جلست جنبها وحكت لها كل الموقف :بيقول هذي ماتستحي تتمشى كذا فشله والله : ماهو قايل عنتس تسذا ارتاحي عند سياف تنحنح بضحكه عليها وفتح الباب الا بحمد واقف :يالله حييه العريس ابتسم له : مايمديني افرح الا جايني استدعاء انتبه انه بلبس العسكريه:عسى خير حمد:خير إن شاءالله جاي اسلم عليك بمشي الحين سلم عليه :انتبه على نفسك ولاتسرع ابتسم وهويأشر على خشمه ومشى لسيارته وسياف يراقبه لين اختفى عن انظاره تنهد متجه للاسطبل يضبط جلسة لاهله بكره عند العم لافي جالس يتفرج على الاخبار وزوجته تكلم ولدها صقر سجى جلست جنب ابوها:يبه متى بنروح لجده اشتقت لها وللبنات جنى وهي داخله: ايوالله خلونا نروح لهم بكره اخر اختبار ابوهم :تبشرون بس بشرط ابي درجات ترفع الراس سجى بفرحه باست يده:بس هذا شرطك والله تبشر ضحكت امهن وهي تكلم صقر:ايه خواتك مبسوطات بيرحن لجدتك صقر بإشتياق:يوووه يايمه يااني مشتاق لجده وهواء الديره متى ماشين لها؟ امه سألت زوجها وجاوبت صقر :بعد الاختبارات بيومين صقر: حلو انا بكره طالع إجازه اسبقكم على الديره شرايكم؟ امه بفرحه : واخيراً يمه بنشوفك طولت علينا صقر :ياروحي يايمه يلا تأمروني بشي ؟ امه:لا يمه مانبي الا سلامتكم فمان الله قفلت ودمعتها بعينها :يقول إجازته بكره وبيروح للديره قبلكم نطت عندها جنى :صدق يمه كيف وافقت سوسن ناظرتها امها وقالت بتهديد: لااسمع محارش فيها هناك تفهمن ضحكن بناتها وراحت تكمل سوالفها مع جارتها جلست سجى جنب اختها وهي تهمس: فرحاانه من فرحتي ودي ارقص الحين مشتاقه للديره جنى بنص عين: ايه مشتاقه للديره ولا للي ساكن الديره سجى ويدها على قلبها: اخخخ الله يعين قلبي على هالبعد ضربتها وهي تأشر بعينها على ابوها:اصص ياحماره لايسمعتس ابوي سجى بحالميه:وش اسوي والله اني مشتاقه اشوفه واسمع سوالفه : صقر وهو يوقع اوراق إجازته الرسميه بعد يد بنته عن الاوراق:بس يابابا لاتنقطع الاوراق ابتسم على حكيها الغير مفهوم منه الا ماما وبابا :ياسوسن تعالي شيلي بنتتس عني جات وهي تهف على اظافيرها: دقيقه بس تنشف المناكير رتب الاوراق وحطها بالملف ووقف: خلاص خلصت بروح اسلم الاوراق للاداره وبرووح للشباب بالاستراحه إذا بغيتوا شي ارسليلي طيب ابتسمت له وهي تمشي وراه للباب: مع السلامه حبيبي قفلت الباب برجلها وراحت جلست مكانه : تعالي ياماما جاتها تحبي لين وصلت عندها تضحك سوسن :ياحلو هالوجهه __ وبكذا خلص البارت توقعاتكم للاحداث القادمه اعطوني رايكم بالشخصيات تبون كل اسبوع ينزل بارتين ولانخليها كل احد بارت . استغفرالله العظيم واتوب إليه | ||||
|  |
|
02-09-23, 06:11 AM
| #14 | ||||
| ياهلاااااا ومررررحبااا سحاب >>> ما كأنه اوفر الي قاعدة تسوينه!! هذا وانت تعرفين انه كان يحب؟ شوي كرااامة!! حمد>>> الله يستر مانيب متطمنة لروحته هذي!!! نواف >>> شكله بيهمل المهمة وبيركز على إنقاذ افنان من طغيان عمها ههههه تسلم الأيادي كاتبتنا العزيزة والله حنا طماعين وانت كريمة نبي بارتين بالأسبوع تبينها بنفس اليوم او كل واحد بيوم الي يريحك | ||||
|
| |
|
04-09-23, 08:13 AM
| #15 | ||||
| السلام عليكم ورحمة الله وبركاته كيفكم عساكم بخير احلى بارتين للاسبوع هذا استغفرالله العظيم واتوب إليه :: البارت الخامس صحوا من الفجر رتبوا اغراضهم كلها وجهزوها عند الباب سحاب وهي شايله سلة العشاء: ابفهم الحين بتمشون العصر وشهوله نرتب ونجهز من صباح ربي لو نايمين ابرك ضحكت عليها هبوب: ياربي من الكسوله هذي عادتنا من زمان نجهزها يوديها سياف هناك دامه يروح الصباح للاسطبل عشان نخفف بالروحه حطت السله عند الباب بتأفف: ترا ماراح اروح معاتس لام فاهد بنام انا وحده مومتعوده على هالصحوه هبوب بزعل: لييش هذي ثالث مره توعديني وماتروحين :مانمت زين والله مانمت هبوب:خلاص خلاص لاتبكين علينا نامي ماردت عليها مشت للداخل وهي تأشر بيدها مع السلامه انفتح الباب بخفيف :يابنت هبوب : ادخل مافيه احد دخل وهو ينزل شماغه على كتفه ناظر للاغراض: كل شي جاهز هبوب:ايه هذي كل الاغراض ماباقي شي، كيف بتشيلها لحالك؟ ابتسم لها:ماعليتس خفيفه، وين بتروحين؟ هبوب:عساك على القوه بروح لام فاهد اليوم دوري اسويلهم بسبوسه وبجيب لكم منها مد لها شماغه: اييه ياحمد ليتك فيه تذوق البسبوسه نزلت راسها بخجل :سياااف ضحك عليها: الله يوفقكم ويسعدكم شال شنطة العزبه وطلع بها وطلعت وراه حطت شماغه على باب السيارة المفتوح واتجههت لام فاهد وافكارها تدور حول حمد وصلت للبيت دقت الباب المفتوح بهالوقت عشان يدخلن على طول نزلت عباتها وطرحتها ابتسمت من رحبت فيها ام فاهد:يااهلاً بعروستنا هبوب سلمت عليها بإحراج وانحرجت زياده من اجتمعن يسلمن عليها البنات ويباركن لها عفاف وهي تسحبها تجلس همست:ام فاهد ناويه تتركتس اليوم وتدلعتس هبوب:ليه عاد انا جايه متحمسه عفاف وهي تغمز لها:خلاص موبتعرسين ضحكت هبوب بخفيف بدت ام فاهد تعطيهن كم معلومه عن الطبخ وتوزع عليهن مقادير طبختها لليوم بما انها بتعفي هبوب من اختبار البسبوسه لكن هبوب رفضت واصرت تسويها وتذوقهن وتشوف تقيمهن : في المستشفى دخلت مع الباب ووقفت تلفتت تدوره مالقته تنهدت له اسبوع ماشافته من بعد الموقف الي صار بينهم تنهدت وهي تعاتب نفسها( وليش تدورينه وتتفقدينه ياغبيه مايهمني فكه منه ومن وجهه )) جلست على مكتبها الي بجانب مكتب الدكتورة هناء رتبت اوراق المرضى ناظرت بساعتها صار الوقت تبدء تنادي اسماء المرضى فتحت الباب ونادت ورجعت مكانها دخلت المريضه وبكذا مرر وقتها بالمستشفى الدكتوره هناء وهي تمد لها ورقه: وانتي خارجه اصرفي هالدواء واعطيه زوجة عمتس نسيت ماعطيتها اياه امس عقدت حواجبها وهي تشوف اسم العلاج: بس هي ماتشكي من شي الدكتورة :جابت لي العلاج تقول صرفه لها دكتور محمد وخلص وتبي جديد افنان وقفت :طيب ماهي مرتاحه لهم هالايام هالعلاج ضرره اكثر من نفعه الا إذا صح تشكي هالمرض تعوذت من الشيطان الي يوسوس لها اشياء موزينه اتجهت للمصلى صلت الظهر وجلست تفكر وتفكر بنص افكارها سمعت صوته التفتت جهة الباب ووقفت متجهه للباب ماحست بنفسها تلفتت مره ثانيه مالقته استوعبت ضربت خدها بخفيف(( افنان ياغبيه صحصحي وشبلاتس )) تنهدت ومشت للصيدليه تصرف العلاج وذاكرتها تسترجع الي صار معه قبل ايام "دخلت البقاله واخذت كل ماتحتاج وحطتهم على الطاولة وهي تطلع الفلوس مدتها عليه لكن من شافت نظراته لها حطتها على الطاولة بقوه وقهر انتبه لنفسه واخذها وحط اغراضها بالكيس لكنه ظل ماسكه ناظرته بقوه: هات سحب الكيس لجهته وقال: اسمعيني يابنت الناس أنا مااحب الحكي الزايد هي كلمتين وبقولها لتس مباشره انتِ بس اسمعيني وابشري بعدها ماتشوفين وجهي تكتفت تبي الفكه: بسرعه حط عينه بعينها الي تدعي القوه لكنها تبان له العكس بعد كلام مريم قال بصدق: يشهد الله اني ابيتس حليله وإن وافقتي بكون لتس السند ضد عمتس وغثاه انتفض جسمها ابد ماتوقعت طلبه والصدمه كيف يعرف عن عمها وسحبت الكيس من يده بقوه: هاات مااحتاج احد يساندني سمعته قبل تطلع يقول: فكري كل ماتتذكر الموقف تعصب ويشتعل صدرها بقهر من فين عرف بمشاكلها مع عمها مااحد يدري بها الا الدكتورة هناء الي تفضفض لها ومستحيل انها تقوله ضحكت بسخريه وهي تقول بخفوت:كأن الي يصير لتس مع عمتس سر موالديره كلها تدري : هبوب انسدحت جنب جدتها: ام فاهد والبنات يسلمون عليكم العمه هبوب: ماشاءالله ياهبوب البسبوسه يهبل طعمها هبوب بإمتنان لمدحها:تسلمين ياعمه العمه :عسى اعجب البنات وام فاهد هبوب ميلت فمها:ام فاهد تقول بدلعتس والله صلختني نقد ضحكت العمه عليها رفعت راسها لجدتها: جده بنام بحضنتس ساعه عشان اتنشط للطلعه الجده : ياضي عيني تعالي توسدت حضن جدتها ونامت على طول لحفتها بشالها الي دايم يضم احفادها لاناموا عندها وكانها بهاشال تحميهم من هموم الدنيا وغثاها العمه:يمه ماحدد حمد العرس الجده :لايايمه ماحدد اصلاً هو لحق على طول رووح العمه:الله يحفظه ويحميه رفعت يدها :اللهم امين وتحفظ بلدنا من كل شر وترد لكل حاقد كيده بنحره تقابل مع ايمن ونواف عند المسجد سلم عليهم وقف بجنبهم خالد:السلام عليكم ردوا عليه السلام التفت لسياف :سمعنا ان اسطبلك اتسجل رسمي وتجيه خدمات سياف ووده لو الموت بيده ليفتك منه ومن ابوه لكنه مابين له:الحمدلله من فضل ربي خالد بمصلحه:تصدق من زمان ودي اجيه لكن مشاغلي ماتخلص ايمن بسخريه حافظ حركاته: مشغول عشان تسذا ماتنشاف خالد بكرهه:ايه مشغول واسعى مو زي البعض يرتكي بكرسي بقاله ايمن بنرفزه: شقصدك لوى فمه :والله الي على راسه بطحه يتحسس عليها انتفض ايمن لو مامسكه نواف كان هجم عليه سياف وقف بينهم وهو يشتعل اكثر من ايمن لكنه يتحكم بعصبيته قال بحده:توكل على الله ياخالد مانبي مشاكل خالد رفع يده:انا ماقلت شي هو الي حاط علي زفر يتحكم بغضبهاكثر :والحين توكل خالد:قبل اتوكل متى اجيك للاسطبل سياف صر على اسنانه: مانستقبل احد غريب خالد بسخريه وقهر:من زينه عاد الي فرحان فيه مشى عنهم وايمن يدف نواف الي للحين ماسكه ولف سياف له:وانت ليش ساكت له هالوقح سياف بهدوء:ايمن فكنا منه ومن مشاكله هذا واحد يدور الهواش دواره يلا عاد استأذنكم اهلي ينتظروني ايمن بفورة دم وانظاره لسياف الي يضغط على يده: ياكيف متحمل ياسياف التفت على نواف : تصدق احيان افكر انه بدون قلب وشهالبروود الي فيه ضحك نواف بهدوء: انت الي دمك حار موهو البارد وبعدين وش بينك وبين هالخالد يوم انك تكرهه لهدرجه وكل ماتقابلتم صرتوا زيت ونار تنهد ايمن ونار بصدره: صارتلي مشاكل معاه مااطيقه بعيشت الله وكرهته من اخذ خطيبة سياف منه فتح عيونه: حكي جديد عن سياف اول مره اسمعه ايمن: لاحول ولاقوة الا بالله انسى انسى سالفه قديمه سكت نواف مايبي ينبش بحياة احد وهذا طبعه مشوا متجهين للبقالة التفت فجأه على نواف: انت وشعندك لك اسبوع هاجده شياطينك ابتسم: امممم اخطط على شي هز راسه ايمن: ينخاف منك وش خططك ابتسم له بغباء: كل شي بوقته حلو فتح باب البقاله :بسم الله يارزاق ياكريم : قفل باب البيت:اكيد مانسيتوا شي الجده:لاياوليدي مشينا ساعد جدته تركب سيارته قفل عليها الباب واتجهه لمكانه شغل السيارة وهو يكرر اذكاره نطت هبوب بالنص : سياف تكفى مر البقالة نبي ايسكريمات ضربها على جبهتها:ارجعي ممكانتس رجعت ورا الا سحاب تطقها بذراعها:ابي هذاك الي بالفراولة تذكرينه صح هبوب بنص عين:قوليله انتي انا يعرف الي ابي سحاب بقهر:يالنذله اوريتس ابتسم وهو يسمع همسهن التفت على جدته:ودتس بشي الجده:لا ياجعلك تسلم رفع صوته:عمه ودتس بشي من البقالة ابتسمت :لا زايد:ماما ابي انزل عطته فلوس وفتحت له الباب يلحق سياف وهو نازل سمع سحاب تقول لهبوب:ياحيوانه قولي له وهبوب رافضه وزايد قد دخل البقاله ايمن وهو شايل كرتون:مااسرع مااشتقت لنا سياف وهو رايح لثلاجة الايسكريمات: ياكبر الثقه دور على ايسكريم بالفراوله لكنه مالقى فاخذ لها زي هبوب ضحك نواف عليه وهو يساعد ايمن بالترتيب طلع والكرتون بيده وراسه يم سياف:سيافوه لوتحط ريال واحد لازعل عليك سياف وهو يحط الفلوس على الطاوله ويمد لزايد الكيس حقه:يهالعاده الي فيك بتخسرك صدقني ايمن يمثل الزعل:افاا حلالنا حلالك ترا بزعل دفه عن الباب للخارج :اجل بتزعل طول عمرك لحقه للسيارة وكان بيحارش سياف لكنه انتبه ان اهله معه نزل راسه ويحاول مايناظر لها ورفعه من سمع الجده تسلم عليه ابتسم: ياهلا بالياسمينه النادره شعلومتس الجده بضحكه من صغره يناديها بهالاسم ويمون عليها ويعتبرها جدته هو وحمد:كبرنا على الكلام الحلو ياوليدي ايمن بمحبه:افاا من الي كبر وشزينتس قمر اربعطعش هبوب وهي تلوي فمها تقلده بهمس: قمر اربعطعش يعع ياشينها منه ضحكت هبوب:وانتي وشعليتس يتغزل بجدتي سياف وهو يأشر له يروح:يلا اطلب الرزق بنمشي سلم عليهم ومشى للسياره متجههين للاسطبل الجده بإنشراحت صدر:ياالله تحفظه هالايمن والله انه رضي ربي يرضى عليه ابتسم سياف ممتن لايمن على كلامه مع جدته الي دووم يفرحها هبوب وهي تنط مره ثانية : كأن ماودك تعطينا هاتهم مد لها الكيس : هاا امسكي وارجعي مكانتس شهقت سحاب من مدت عليها ايسكريم فانيليا :حرام عليتس والله اني مشتهيه الفراولة مااحب الفانيليا هبوب بعدم اهتمام:قلت لتس قوليله لمتى بتستحين منه مايأكل تراتس بحسبت اختنا سحاب ماعجبتها الكلمة: امسكي امسكي ماابيه لفت عليهن الجده:بس مناقر انتي وهي ماتشبعن وانتي يالرفله هاتيه كانتس ماتبينه هاتييه فتحن عيونهن وناظرن ببعض طلعوا يسمعونهن من اول وهن يالي على بالهن يتهامسن وهجدن طوول الطريق ومن الصدمه سحاب انكتمت على الاخر وهبوب شوي وفتحت ايسكريمها في البقالة: رمى الكرتون وجلس بجنب نواف:وش الدبره معها ؟ نواف عقد حواجبه:مين تقصد تنهد:كل ماشلتها من بالي القاها بوجههي نواف:اهااا انت الي مصعبها واسهل طريق لها خطبه نفض ثوبه:وإذا خطبتها من فين بصرف عليها نواف شيع البقالة بعيونه:وهالبقالة وين يروح دخلها مولجيبك ؟ ايمن بضيق:وتظن هالبقالة تجيبلي الشي الكثير الي يفتح بيت وقف وشال كرتون العصيرات:احمد ربك واشكره غيرك مولاقي شي يأكله لحق نواف الي صار يرتب العصيرات بمكانها : حامده وشاكره بس هذي مسؤليه بيت ومره وبكره عيال ودخلي كله من البقالة نواف: انت خريج هندسة مكانك موهينا روح دورلك وظيفة تناسبك تأفف والضيق ملىء صدره من جديد: وتحسبني جالس حاط يدي على خدي سعيت بكل مكان حتى سياف الله يعافيه ماقصر لكن ... لف عليه وهو متردد من الفكره الي تدور براسه من فتره: اعرف ناس واصليين إن كان ودك اكلمهم لك ايمن : الله ومن وين تعرفهم وانت بهالديره اربع وعشرين ساعه مقابل وجهي نواف ضحك: لاتنسى ان عندي مكتب **** وكل فتره اروح له ايمن اتجهه لمكانهم : اجل تسوي فيني خير طلع من البقالة وفكرته الي متخوف منها وعارف انها بتنرفض وبيده الجوال حاول يتصل لكن الشبكه بالديره ضعيفه ولازم يمشي باقرب وقت يشوف امور الاستراحه والي فيها في مكان بعيد عن الديره بمركز الشرطة مسح على وجهه وارخى ظهره على الكرسي: والعريف حزام عنده علم بهالامر مبارك : اكييد عنده علم ولا تعاون مع مباحث سريه بيخفى عليه حمد: بس يامبارك هالامر خطيير فريقنا ماعمره مسك مثل هالمهمات ودخل بتفاصيلها مبارك: الي يشوفك يقول ماعمرك دخلت بمهمه خطره وقف والقلق واضح بوجهه: لكن هالتخفي وادخل بين صفوف هالتسلاب موهين هذولا ميتين قلب مبارك كان بيتكلم وقطع كلامه من دخل العريف حزام رد على تحيتهم : اظن وصلكم الخبر مااخترت فريقكم بالذات إلا وانا واثق بإتمامكم هالمهمه مبارك : لازم نعرف كامل التفاصيل عنهم العريف حزام: اكيد كلها كم يوم ويوصلنا الملف كامل حسبي الله عليهم ظنينا اننا تخلصنا منهم ويطلع وراهم راس متخفي وفوقها فريق مباحث سري ناظروا ببعض بتوتر العريف: لاتشغلون بالكم الحين لما يوصل الملف بتعرفون كل شي ، جهزوا انفسكم بكره الصباح اجتماعنا مع المباحث وماابي اسئله خارجيه تبادلوا التحيه والتوتر يلمئ قلوبهم من هالمهمه ولو انجزوها بتكون نقطة تحول بحياتهم العمليه : العمه هبوب بإعجاب: ماشاءالله تبارك الله ياسياف المكان يرد الروح من كبره الجده بفخر: هالمكان كله صنع يدينه جعلها للجنه اشتغل عليه ليل نهار هبوب جلست جنب سياف الي جالس يسنع القهوة بطرف الجلسه قالت بغيره: ايه ياعم انبسط المديح كله صار لك حط القهوه على النار وضحك من غيرتها الواضحه الجده: قوم يمه خل عمتك تشوف المكان زين جلسته هبوب قبل يوقف:اجلس عند قهوتك وانا بمشيها الجده تهاوشها:بتعرسين وانتي تسذا ملقوفه تسنه حلالتس هبوب بهمس لسياف:يهالعرس ذا الي تدخله بكل سالفه ثم رفعت صوتها:ياجده حلاله حلالي الجده ضربت الارض بعصاها: حلالتس هناك عند حمد سحبت معها سحاب بقهر وهي تقول:يلا ياعمه العمه وهي تقرب بجلستها قرب امها: روحن انتن بتقهوى معهم لاحقه على التمشيه وقف وقهوى جدته وعمته وجلس يتقهوى التفت على زايد: شبلاك يازايد زايد تكتف ومدت بووز :ابي العب كوره امه بتعجب:عجييب وشهالحركه سياف : اخذ حركات ترف الجده بعصبيه:هالصغيره دلعوها اهلها لين قل حيائها ضحك سياف دايم وجدته تخاصم ترف على حركاتها وعدم مبالاتها للكبار ودلعها الزايد وقف وهو يقول: يبشر زايد اجيبلك الكوره من السيارة ونلعب سوا اتجهه للسيارة وفتح الباب الخلفي شاف اسكريم ذايب هز راسه وهو ياخذ الكورة وقبل يتجهه للجلسة وقفت سيارة صقر عنده نزل له وسلم عليه بحراره : ياالله ياسياف ابطيت عنكم وشعلومك عساك طيب سياف ابتسم بفرحه: يالله حييه كلنا بخير انتم علومكم وكيف دوامك ابتسم بفرحه صقر: مابغوا يوافقون على الاجازه والله اشتقت لسهراتنا مع العيال سياف: ايوا الله مكانك خالي ، حيااكم حياكم صقر التفت وشال بنته ومدها على سياف:وهذي المزيونه بنتي شالها وباس خدها: بسم الله ماشاءالله وشهالزين ياصقير صقر:زين ابوها اكييد اتجهوا كلهم للجلسة اسرع وهو يجلس جدته وجلس يسلم عليها قال وهو ماسك يدهايبوسها:الشوق وصل حده ياجده مسحت على وجهه بفرحه:يسلم هالوجه من كل شر وشمسوي يمه وشهي علومك صقر: الحمدلله كل شي بخير اشغلتنا الدنيا عنكم اعذريني حضنته: معذورين معذورين ياوليدي التفت لعمته وابتسم : واكيد انتس العمه هبوب ابتسمت وسلمت عليه ثم لحقته زوجته وبنتها تسلم عليهن سياف اخذ زايد يلعب معه كوره بعيد عن الجلسة عشان زوجة صقر تاخذ راحتها شوي وانضم لهم صقر : ضربتها بقوه على ظهرها بقهر: خوفتيني ياغبيه هبوب وهي تضحك وتحك مكان ضربتها: وانتِ خبيله تخافين شمقت لها ومشت من عندها سحبتها من عباتها: تعالي تعالي اوريتس الباقي مشت معها لين الخيول الباقي: وهذا الغيهب روح سياف تأملت الخيل بسواده الفاحم وضخامته : يمه يخوف وتعدت الخيل الابيض وهي تسمع هبوب تقول: وهذا لخويي سياف ماله اسم ضحكت بخبث والتفتت : منهو خويه تستحي حتى من اسمه فطنشتها وهي تقولها: تعالي شوفي الي تسواهم كلهم دخلت للفرس البني الفاتح مسحت عليها: وهذي فرسي هبوب الريح فطست ضحك وهي بعيده عن هبوب وفرسها: بالله عليتس مسميتها هبوب الريح قالت بعد ماباستها: ايه وشعندتس التفتت لمن سمعت اصوات استغربت من هالي جاي وهي تعرف سياف مايستقبل احد هنا نادت هبوب وجاتها: مين ذولا هبوب وهي تناظرهم: هذا صقر ولد عمي لافي ماشاءالله حتى زوجته معه سكتت ثواني ثم قالت بحماس: ناظري ناظري لسياف ياروح روحي والله انه يلبق عليه يكون اب تأملته كيف باس الصغيره ثم مدها لجدته ابتسم وابتسمت هي معه وعيونها تراقب سياف الي يمشي بعيد مع زايد مادرت عن العيون الي جنبها تناظرها وتشوف نظراتها لاخوها مسكت يدها وضغطت عليها بإبتسامه: وين سرحتي التفتت عنه: هاا هنا هنا معتس ابتسمت وتأكدت من شكوكها انها تكن لاخوها مشاعر: تعالي اوريتس الاسطبل من ورا مكان ورداتي سحاب: وانتِ بكل مكان لتس ورد هبوب: شسوي احب الورد وريحته | ||||
|
| |
|
04-09-23, 08:16 AM
| #16 | ||||
| البارت السادس مرت الايام وقبل زواج هبوب وحمد بإسبوع))) البنات جالسات على طرف الجلسة سجى قربت راسها منهن وهي تضحك وتأشر بعيونها:بالله طالعن ام كِشره كيف جالسه كأن الارض بتاكلها كل العيون اتجهت لسوسن الي الجو مومعجبها جلسة ارض وتراب وحكي عجايز ابد موجوها كبنت مدينة هبوب ضربتها بعتب على كتفها:حرام عليتس فكيها من حكيتس الفاضي جنى : عاد الله الشاهد هي محترمه ويشفع لها حبها لامي وابوي بس تقهرني إذا جات هنا ماتفك هالكِشره هبوب:خلاص يابنات فكنا كيف مدرستكن الجديدة سجى :يييع يع يع ندمت اشد الندم لما وافقت انقل وعلى نهاية السنة جنى تضحك وتأكل من الحلا: تقول يعع وهي مصادقه كل بنات المدرسة وتتضيحك كل صبح سجى: ووش اسوي غصب عني تبيني مثلك كل يوم اتحلطم اعيش يومي وانبسط كلها كم شهر وافتك هبوب تصب من القهوه:ايوالله اصبرن وتفتكن من الثانوي كلها انسدحت جنى وهي تحط يدها على قلبها: اخخخخ فاض الصبر ثم التفتت على سحاب الهاديه: الحلوه ليش ماتشاركنا ابتسمت لها سحاب للان ماتعودت عليهن هبوب :خليها شوي شوي تتعود عليكن يالثرثارات سجى تطالعها بنص عين: شوف مين يتكلم وقفت سحاب لامها من نادتها وقربت سجى من هبوب: الا سياف وين يرقد يوم هذي ساكنه هنا هبوب:عادي احيان يرقد بغرفته واحيان بالمجلس الخلفي سجى فتحت عيونها:كيف يرقد بغرفته وسحاب ؟ هبوب:اصلاً سحاب تتغطى إذا هو بالبيت سجى لفت بعيونها تناظر سحاب بغيره وقهر ابد موعاجبها الي يصير : الجده تنادي بصوتها العالي:يالعرووس هبوب غطت وجهها :ياربي جنى ضحكت وهي تقول:ياجده تراها هينا قريب موبعيد تسمعتس الجده طنشتها :تعالي اشوف انتي جيبي هالصندوق يمي جابت لها الصندوق وجلست جنبه نادت الجده هبوب تجي تفتح الصندوق تجمعن كلهن حولها فتحت الصندوق فيه فستان ناعم ابيض وطرححه بحجم صغير واكسسوارات وطقم ذهب التفتت لجدتها مابين حياء وامتنان ابتسمت لها ومسحت على ظهرها:ياضي عيني هذا فستان امتس الله يرحمها كانت مخبيته عندي ليوم تعرسين شافت تقوس فمها ببداية بكاء حضنتها بقوه وانفجرت هبوب ببكي :مابتكون يمي محد يمي حتى ابوي العمه تأثرت وتمسح دموعها:وحنا فين رحنا ياعمري كلنا يمتس الجده بعتاب:وسيافتس وين راح والله انه يحرق الدنيا وماعليها لعيونتس لايسمعتس تقولين هالحكي ليزعل حاوطنها البنات بقلوب فرحانه وحزينه عليها وجنى تطقطق عليها عشان تفك : واقف بنص المركز ينتظر جيت رئيسه التفت بقوه لجهة الصوت اتخبى بسرعه بالزاويه بتفأجئ يخالطه خوف انفجع لما انحطت يد على كتفه لكنه ارتاح من سمع صوت رئيسه التفت نص التفاته وارتاح لما ماشافه :مصيبه مصيبه رئيسه:بسم الله وش مصيبته نواف:بالمكتب مايصير هنا دخلوا مكتب الفريق اول راشد وجلس الفريق اول:انطق يانواف خوفتني نواف وهو يقرب من المكتب:حمد ويش يسوي هنا عقد حواجبه: تقصد الملازم حمد بعدم صبر:ايه ريح جسمه على كرسيه:حمد من ضمن الفريق الي متعاونين معهم واليوم لنا إجتماع حط يده على المكتب :حمد يصير اخو ايمن وقف بسرعه بذهول:وشوو نواف:كيف ماركزت بالاسم هذي نقطه بتهدم كثير اشياء وقف قدامه:يعرفك؟ زفر:عز المعرفه حط يده على كتفه وضغط عليها:الاجتماعات معهم لاتحضرها وكل التفاصيل بتوصلك بهالمكتب نواف بقلق:معقوله ماشاف اسماء الفريق تنهد:لا اول اجتماع انت ماحضرته تعرفنا على بعض ولااحد ذكر ان فيه عضو ناقص او انذكر اسمك وهذا الان بصالحنا وبتمشي على نفس الخطه تنهد والخوف يملي صدره فتح الباب والتفت فجأه :لايكون انذكر ايمن بالاجتماع! الفريق اول:انت شفيك لايتملكك القلق سالفة ايمن بيني وبينك ولانسيت تنفس وهو يسلم ومشى بسرعه يخاف حمد يشوفه يكمل مهمته الي تكتم على صدره : شافه يمشي وركض لين وصل عنده التفت عليه باستغراب ايمن:انت ليش بجيبك جوال هااا ارمه احسن لك سياف عقد حاجبه:علامك اخذ نفس :ابد سلامتك بس حمد متصل بي يقول سياف جواله مقفل حط يده بجيبه وطلع الجوال:طافي ايمن بقهر:يوم انك مومهتم للجوال ليش توصيني وتبهذلني عشان اجيبه لك ضحك عليه :ماطلبته الا عشان خاطر حمدالمهم وشبلاه حمد ايمن رفع يده ومشى:ماادري عنه اتصل عليه أنا راجع للمزرعه ولاتنساني بكره نجهز مكان الحريم رفع صوته له:تبشر رجع دربه للبيت يشحن الجوال خفف مشيه وهو يشوف خالد طالع بيده اكياس وشنطة ووراه حرمه متأكد انها هي تنهد بضيق وهو يشوفهم يختفون عن نظره كمل مشيه وهو يقول بصوت خافت : فمان الله فمان الله ياجارة القلب والدار دق الباب بقوه وفتحت له العمه باس راسها:شخبارتس ياعمه العمه:بخير ياروح عمتك التفتت للجلسة:يابنات ادخلن ناظرتهن لين دخلن وزوجة لافي تتغطى فتحت الباب كامل دخل واتجهه لجدته سلم عليها ونزل راسه:شعلومتس ياام صقر ام صقر:نحمده ونشكره سياف:عساكم مرتاحين ولاناقص عليكم شي ابتسمت:مرتاحين الحمدلله ماتقصرون اهل واجب جلس جنب جدته:الحمدلله رفع نظره لهبوب الي واضح على وجهها البكي مبتسمه:دموعتس ماتخلص ياهبوب قربت عنده وسحبت الصندوق بحماس وفرحه:شوف وصات أمي لي يحق لي اصيح ضاق صدره من ذكرى امه ناظر للي في الصندوق ابتسم:ياجعله مبرووك الجده:حمد علامه مارجع للحين والعرس قريب وقف :اكيد مشغول انا استأذنكم مشى بسرعه للمجلس الخلفي دخل وشبك جواله الي يوم شغال وعشره طافي انتظره لين اشتغل تأفف وهو يشوف مافيه ارسال انسدح ينتظر يشحن شوي ويطلع يدور ارسال اخذ نفس عميق وزفره وهو يمسح صدره :ضاق صدرك الحين وشبيت نار قهرك يوم شفتها بيمين غيرك اخخخ ياحرت الندم ااخخخ ليه ماتحركت لخوالها لييه سكت له ياخذها منك اااهه ياوجع قلبك الدايم ياسياف . وقف وهو يستغفر مايبي يفكر فيها وهي حلال غيره مايبي يحرق نفسه وهي مبسوطه مع غيره طلع من المجلس وصار يمشي بسرعه بالحوش الخلفي وهو يستغفر ويسبح يتناساها شاف هالمساحه ماراح تشغله كان بيطلع لكنه تذكر الاغراض الي اعطاها عمته ويحتاج يشغل نفسه فيها اتجهه لهن لكن مافيه احد مشى للباب ودقه بالصاله واقفه قبالها تناظرها بشر:وش كنتي تسوين بغرفته سحاب:وانتي شدخلك قبل تتكلم سجى سمعت صوته عند الباب ينادي هبوب والعمه ابتسمت سحاب واعطتها نظره رفعت صوتها:أمي عند جده بالغرفه تبي شي ضروري سكت شوي ثم قال:لاخلاص تسلمين هنا طارت عفاريت سجى من القهر من سحاب الي واقفه وتكلمه وكانه عادي :انتي ماتستحين سحاب ضحكت بخفه تقهرها ومشت من جنبها رايحه لهبوب وجنى ضربت الارض برجلها وهي نار شابه من حركتها ومن الجده لما توصي سحاب بعشاء سياف : ايمن بصوت عالي: ياعاايد شوف هالخبيل وين حاط الدلاال جلس عايد بمكانه بتعب: تكفى خلااص تعبت نكمل بكره وصل عنده ورمى الي على كتفه : قوم اشوف ماباقي على العرس إلا ايام وحنا ماخلصنا باقي حوش الحريم بيذبحنا حمد جاء عندهم العم مصطفى شايل شنطتين العزبه ركض له عايد شالهم عنه: ياعم نادنا هالحمل ثقيل عليك ابتسم العم مصطفى بحنان: يوم السعد اني اجهز عرس حمد جلسه ايمن بمكان عايد: ماقصرت اجلس وتريح حنا نجهز جهزوا كل شي لليوم وطلعوا من المزرعه راجعين لبيوتهم الا سمع ابوه يناديه التفتوا له ابو حمد:ياايمن تعال وصل عند ابوه ووراه عايد:امرني يبه ابوه:خالد وينه عقد حواجبه: خالد وشتبي فيه ابوه بضيق: جاني قبل ايام يدورله شغله عنديويعين بيته وعطيته يمسك جهة الشمال وراحت علينا فتح عيونه: الشماليه يبه صناديق المزرعه عايد بقهر: كم راح ياعم ابوحمد التفت عليه: مالكم دخل كم بس جيبوه لي اتصرف انا معه كتم قهره وكلام كثير خاف يجرح ابوه فيه : لاوالله انا الي بتصرف معه سكتنا له سنين يكفينا كيف استأمنته وانت عارفه مشى بسرعه والغضب متملكه ابوحمد: روح الحقه لايسوي بالولد شي ركض وراه عايد لين وصلوا بيت ابوخالد دق الباب بقوه وعصبيه فتحت له مريم وماسكه يد اخوها الصغير : وين اخوتس قليل الخاتمه رفعت اكتافها: ماادري ماشفته محد بالبيت حط يده على كتفه: استهدي بالله يارجل التفت عليه بعصبيه وعيونه كلها شر: هالمره بتكون الطعنه بوسط قلبه وبتشهدون عليها كلكم هز راسه عايد: لاحول ولاقوة إلا بالله مع ان كل جسمه يوجعه ماترك ايمن لحاله وين ماراح لحقه لين استقر بين بيتهم وبيت سياف بحيث يشوف بيت ابوخالد ينتظره يرجع حط المركى بينه وبين ايمن ووقف :بروح ازين قهوة لنا ياويلك ماالقاك بمكانك راح عايد لبيته بسرعه ورجع بقهوته مرت ساعه ونص جالسين يتقهون بصمت جاهم سياف وقف عند جلستهم: ماشاءالله وشهالجلسه الزينه عايد بملل: حياك تقهوى في جلسة الصامتون ابتسم له سياف وجلس يسولف مع عايد وكل شوي يناظر ايمن الي جالس بهدوء مانطق حرف على غير العاده التفت لعايد الي وقف وهو يمدد يده:عاد استأذنكم وراي بيت مو مثلكم سهاريه وكمل وهو يأشر براسه على ايمن: مع السلامه رد سياف عليه الي فهمه: فمان الله التفت بجسمه لايمن:شبلاك زفر بقوه:سياف طالبك لاتوقف بيننا عقد حاجبه: مين انتم ايمن وحقده يزيد على خالد: خويلد الخسيس سارق من صندوق مزرعتنا والله ثم والله لاخلي قهر ابوي يطلع من عينه ميل فمه : متى تفكونا من مشاكلكم انت وخالد ايمن: ماراح تخلص إلا بموت واحد منا ضربه بقبضة يده على كتفه بعصبيه:لاتجني على اهلك و روحك يكفيهم الي جاهم المره الي فاتت عدت بسجن شهر هالمره وين تبيها توصل قصاص هاا ايمن انتفض واقف :ايه قصاص كل مره اسكت عشانكم والله ماينام متهني اليوم وقف قباله ومسكه مع ياقة ثوبه:تبي تذبحه ياايمن دفه بقوه لجهة بيت ابوخالد: روح روح اذبحه وضيع نفسك واترك امك بحسرتها ليل نهار وابوك تلاحقه الشماته ضيع مستقبل اخوك ضيعه روح عساك ترتاح بعدها مسك نفسه لايطيح بعد دفت سياف زفر بضيق ونزل راسه : طول عمري ساكت عنه عشانكم سرقني مره وسكت قلت خويي ويمون ومحتاج ورجع عادها مرات كثيير يحسبني ضعيف ماادري عن سواته من وراي دخلني السجن ظلم وسكت شهد علي ببيع مخدرات وانا بري منها ونويتها له ووقفتوا كلكم بيننا رفع راسه بقهر لسياف حط يده على صدره: كان الخوي الي بين ضلوعي اشيله غدر فيني وفي ابوي الطيب الي يبي يعينه ويساعده شفت الحزن والقهر بعيونه وتبيني اسكت له لاوالله هالشنب مو على رجال إذا سكت له هالمره واقف مكانه بقلة حيله مايدري كيف يحل هالمشكلة وتنكسر فرحتهم بحمد قرر انه مايتركه في هالليل لحاله انتهى توقعاتكم للأحداث ؟ اكتبولي شخصيه حبيتوها استغفرالله العظيم واتوب إليه | ||||
|
| |
|
04-09-23, 02:33 PM
| #17 | ||||
 
| اللهم صل على سيدنا محمد وعلى آل سيدنا محمد كما صليت على سيدنا إبراهيم وعلى آل سيدنا إبراهيم وبارك على سيدنا محمد وعلى آل سيدنا محمد كما باركت على سيدنا إبراهيم وعلى آل سيدنا إبراهيم في العالمين إنك حميد مجيد . لا تنسوا الباقيات الصالحات : سبحان الله الحمد لله لا إله إلا الله الله أكبر لا حول ولا قوة إلا بالله العلي العظيم | ||||
|
| |
|
11-09-23, 01:28 AM
| #18 | ||||
| : السلام عليكم ورحمة الله وبركاته صباح الخير جميعاً استمتعوا البارت السابع نزلت من غرفتها تمشي لجهة المطبخ سمعت اصوات همس بينها اسمها وقفت بجنب الباب بهدوء تسمع فتحت عيونها من الي سمعته رجعت لغرفتها بسرعه قفلت الباب و يدها على قلبها: الله ياخذكم انتوا اهل انتوا وصلتوا لهدرجه انا انا يقتلوني ناظرت يدها: ياويلتس ياافنان بيدتس جبتي لهم موتتس ماقد خافت هالخوف كثر هاللحظه عمها وزوجته يخططون بقتلها بهدوء وكأنها ماتت طبيعي بدون تدخلهم وبالدواء الي جابته لهم كل هذا عشان الفلوس لهدرجة الطمع يعمي قلوبهم يذبون روح تشيل نفس الدم والاسم ماجاها النوم طول الليل تفكر وشتسوي ماصدقت سمعت اذان الفجر فزت تصلي وتدعي الله يكفيها شرهم وخبث نواياهم وقفت بعجله لبست عباتها لازم تمشي للمستشفى بدري نزلت بهدوء قفلت الباب وراها وركضت بقوه بوسط نظرات الاستغراب من طلعتها بهالوقت ماوقفت ركض الا عند باب المستشفى جلست على كرسي الحارس تستجمع انفاسها وضربات قلبها تحاول تتمالك نفسها وتهدي روحها عشان تفكر زين وانظارها تدور بالبيوت الي حول المستشفى وقفت نظراتها لبيته وقفت بسرعه تنفض راسها بقوه: لالالا ماانتي صاحيه ياافنان الاهو تقدمت خطوتين: وليش لا محد بيوقف بوجههم غيره لكن ياغبيه بيضحك عليتس ماخليتي سبه ماقلتيها له وتروحين له بقوات عين مر الوقت عليها بحيره وهي واقفه بمكانها لين بدء الدوام والمراجعين يجون حاولت كثر ماتقدر تنغمس بالشغل ولاتفكر بشي زفرت بخوف وهي تشوف ساعتها انتهى وقت الامان وبترجع لهم وقفت تلم اغراضها بالشنطة وهي تقراء اذكارها مشت وهي مقرره تروح له تقول الي عندها اخر حبل للنجاة تنفست بتوتر وهي واقفه قدام باب بيته مرت دقايق وهي بنفس الوقفه قوت روحها وهي ترفع يدها بتدق الباب الا وقف قريب منها رافع حاجبه لفت يمه ومن لمحت وجهه غمضت عينها قالت بسرعه وتوتر : اسمعني للاخر دام عندك علم بالي يصير بحياتي وقويت عليه وصبرت عشاني وعشان اختي جاء الوقت الي احتاج احد يعيني ويفكني من المصيبه الي بتصير فتحت عيونها الي امتلت دموع تطالعه برجاء: ان كنت صادق بنية الزواج تجي لعمي وتخطبني شافت اتساع عيونه بذهول ارتجفت وعطته ظهرها: إن صدقت وجيت فأنت كتبتلي حياة وإن ماجيت ترحم علي ومشت بسرعه تاركته بصدمته ولاانتظرت منه رد الرد الوحيد الي تبيه جيته ظل واقف مده يحاول يستوعب وقفتها عند بيته وكلامها فتح باب البيت ودخل وقف بنص غرفته للان يدور حكيها براسه وعينها المدمعه ماتروح من راسه : مع بداية اشراق يوم جديد ونسمة الهواء العليله وريحة النخل والهدوء الي يجيب العافيه طلعت كالعاده بعد ماصلت بصينية القهوة حطتها ووقفت من شافت جدتها متجهه لها مسكت يدها تجلسها: يالله تصبحها بالخير والسعاده الوافره هبوب ابتسمت بحب لجدتها:ويصبحتس بالنور والسرور يالغالية الجده:اخوتس رجع من الصلاة هبوب وهي تمد يدها للتمر:لا الجده:وين البنيات عنتس ضحكت هبوب بخفيف:تعبانات مانامن بدري نقيس الثياب الي جابتهن ام صقر الله يسعدها الجده:ايه مرقدات انفتح الباب الخلفي من سمعته وقفت وهي تطل تشوفه ابتسمت: سياف تعال تقهوى شافته يقبل عليهن بإبتسامه رغم وجهه الي واضح قل النوم عليه وصل لعندها وسلمت على راسه: صباح الخير ياعزوة هبوب حط يده على راسها:صباح السرور يابهجة سياف ابتسمت بقوه له وجلسوا يتقهوون سياف:مامن خويات اليوم هبوب :ابد مابه بس حنا مثل قبل شرب قهوته بهدوء وهي يفكر كيف بيفقد حسها ومرحها وبهجتها في البيت محد يذكره بعد جدته إلا هي بحسبت بنته مو اخت بس هبوب وهي تلوح بيدها قدام وجهه:وين سرحت الي ماخذ عقلك يتهنى ابتسم :ايوالله جعله للهنى والسعاده الدايمه هبوب صفقت:الله الله تفكر بمين ابتسم لها وهو يحط التمره بفمه:ومين غيرتس الجده وهي تناظره وبدون سابق انذار:تراني بخطب لك وان عييت زعلت عليك هبوب الي كانت عذرك هذي هي بتعرس سياف ووجهه ينقلب:لا ياجده موبالحين الجده:اجل متى لين يغزي الشيب راسك وينحني ظهرك محولك احد زفر بنرفزه من هالموضوع الجده وهي تأشر بعصاها لجهة البيت مطنشه عصبيته الي وضحت بوجهه:هينا ببيتك 3بنيات كلهن طيب تخيير منهن وقف بسرعه وهو يحاول مايعلى صوته لجدته:تكفيين ياجده إلا هن ماابي منهن احد متى مانويت العرس جيتس وتخيري لي على كيفتس لكن الحين لا التفت على هبوب :قومي شوفيلي درب ابي اغراض من غرفتي وقفت بسرعه بدون لاتنطق للبيت قبل يمشي وقف من قالت جدته بزعل:رمم قليبك ياوليدي لايمرضك تنهد ومشى وهو يرفع صوته شوي تسمعه:ادعيله ياجده ادعيله دخل غرفته وجلس على السرير وهو يزفر بحرقه لمتى يعني بيضيق من هالموضوع ولمتى بيرفض مسح وجهه وقف فتح درج مكتبه بيطلع اوراق عقود الاسطبل عقد حواجبه من الظرف الوردي الي محطوط ومرسوم بطرفه قلب صغير ابتسم من توقع انه من اخته حطه بجيبه واخذ اوراقه وطلع بسرعه : بالمركز عند حمد مبارك يجهز الرصاص الي على المكتب التفت له وهو يقفل الستره المضاده للرصاص زفر:وتقولي لاتقلق وهذي اول مهمه بسترة ضد الرصاص التفت عليه:انت من دخلنا بالقضيه وانت موحمد الي اعرفه زفر بضيق:عرسي الاسبوع الجاي وتنزلوني مهمة خطره الحين وبالنهار بعد تبون تذبحوني قلبي مومرتاح وقف مبارك قدامه:تعوذ من ابليس ياحمد وش نذبحك بنخلص اليوم ولك علي احاول ماينرفع اسمك الايام الجايه حمد:انا مااقصد شي منعونا من الجوالات من امس وماعطيت خبر لاحد بيسهرون ليلهم بيقلقون علي مبارك:حمد فيك شي غير اهلك حمد زفر:لا اول مره مااعطيهم خبر بتاخري ماودي يمرهم حزن يامبارك تنهد: توكلنا على الله تجهز كامل الفريق الي يقوده العريف حزام مشوا بسياراتهم لين وصلوا لمقر الفريق المتعاون بدء العريف يعطيهم التعليمات واماكنهم توزعوا حوالين المنطقة الموجوده فيها الاستراحه الصغيرالتابعه لسطام وشلته جاهم بسبب البلاغ عنها العريف حزام بجهاز الاتصال بفريقه:ممنوع اي تدخلات من جهتنا مهما يصير لين ننطلب مفهوم للجميع رد كامل الفريق بمفهوم وانظارهم للفريق المتعاونالي بدء يتقدم بهدوء تام تحركاتهم عكس تحركات حمد وفريقه السريعه راقب حمد الشخص المبهذل الي دخل للاستراحه وبعدها بدقايق فز من سمع صوت الرصاص من داخل الاستراحه وماخطى خطوته الا بمبارك يمسكه يثبته بمكانه التفت على مبارك بقوه:وشفيك حمد:فكني لايموت احد وهم ماتحركوا هالباردين اشر مبارك براسه:اهجد هذولا هم تحركوا التفت يشوف الاشخاص الي متجهزين ودخلوا :خمسه بس بلحظه فك نفسه من مبارك وركض وراهم للداخل ضارب كل التعليمات بالجدار مبارك بسرعه للعريف حزام:حمد توجهه للداخل العريف بعصبيه وهو يلتفت للباب: كييف وانت ليش مامسكته : فتح باب البقاله بقوه بعصبيته الي ماهدت للان سحب الكرسي وجلس برا كالعاده بدون مايكلف نفسه يشغل انوار البقالة ويرتبها وقف من شاف نواف يركض لجهته ومسك يده:طلبتك قل تم ايمن برفعت حاجب :وشبلاك نواف وهو ينزل شماغه ويعدله:بعرس وابيك شاهد ايمن وهو يرجع يجلس:ترا ماني فاضي لسوالفك نواف بجديه وهو يمسح ذقن ايمن برجاء:طالبك امش معي وقف بذهول:انت صادق وليش الحين مع صبح ربي نواف:انا المفروض امشي لمكتبي امس لكن ماقدرت تكفى امش وخلني اخلص اموري وارجع اقولك كل شي ناظره من فوق لتحت:عشان كذا كاشخ وبنت مين نواف يناظره خايف من ردت فعله بعد ماخبره سياف بالي صارله امس:ابو خالد يصير عمها فتح عيونه: وشوو نواف:عشان خاطري لوكان لي خاطر عندك طنش بس لين اخلص اموري تكفى صد بوجهه عنه وهو يكتم غضبه:تبشر لكن إن شفته ذبحته علمتك نواف برجاء:ايممن ناظره بعدم إعجاب:انتظرني هنا اجهز واجي نواف:وليش انتظر هنا ترا بيتهم قربكم وش هالعنى مشوا سوا ووقف نواف ينتظره لين جهز ورجع له ايمن بدون نفس:والشيخ وينه لازم يكون معك نواف:سبقني يمهم وقفوا عند الباب التفت نواف له يناظره بطرف عين:خلاص لاتبلشني مومسوي شي تنفس بعمق وهو يدعي ان خالد مايكون موجود انفتح الباب ابوخالد بعدم اعجاب:حياكم حياكم دخلوا للمجلس والشيخ جالس وجنبه 3شباب ابوخالد يحاول يكتم قهره:هذولا عيال عمها وشاهدين من طرفنا الشيخ التفت لجهة نواف :ياولدي وين اهلك الاصول هم معك تكدر خاطره:متوفين الله يرحمهم ويغفرلهم ومالي اخوه ترحموا عليهم كل الي بالمجلس ايمن حط يده على كتفه :انا اخوه ياشيخ وجاي معاه افرح له التفت له بإبتسامة إمتنان الشيخ لابوخالد:ابي اسمع موافقة البنت اول قبل نبدأ وقف ابو خالد ودخل الغرفة الي بجنب المجلس شافها واقفه بالنص ومتكتفه ميل فمه:هذا الي تبينه وتهددين عشانه يتيم ومقطوع بدون اخوان اندهشت لكنها اخفت تفاجئها بيتمه ورسمت ملامحها الجاده:ايه ابيه وموافقه عليه ابو خالد:منتف حتى مهر ماجاب معه كيف بتعيشين معه ضحكت بسخريه:الله ياعم كأني عايشه بهنى معكم وكل طلباتي اوامر .. كشرت بوجهه:لوانه عايش بالشارع موافقه عليه ومال اي احد كلمة علي اسرع لها ومسكها من ذراعها رحمها وتخلى عن فكرة الدواء لانها بنت اخوه وكان يفكر بخطه ثانيه وتفاجئ بهالخطبه:تخسين تمشين كلمتك علي وتخسين تاخذينه مشى بيطلع ووقف من سمعها تقول: ارفضه وتعرف افنان ايش تقدر تسوي والله اقل شي اسويه اسجنكم انقهر منها ومن قوة مواجهتها الدايمه له صح انه يضربها لكنها تمشي الي براسها عكس اختها وخاف من الفجر وهي تقول كلام كأنها تعرف بالي بيصيرلها قال بقهر:امشي بيسمعون موافقتك مشت بإبتسامة تقهره فيها بعد ماعقدوا وتمموا الامور كلها طلب نواف من عمها انه ياخذها لبيتها بدون حفله ووافقت افنان على طول ماتضمن اي شي بهالبيت بعد ماطلعوا اتجهه ايمن لبقالته ونواف واقف عند البيت ينتظرها التفت اول ماسمع الباب ينفتح طلعت وبيدها كيس كبير وشنطة قماش صغيره قفلت الباب ووقفت بتوترمن هالحياة الي حطت نفسها فيها نواف ماكان اقل توتر منها تنحنح :مبروك علينا ياافنان افنان:الله يبارك فيك سحب الكيس من يدها ورفع الشنطه يشيلها :مشينا رفعت نظرها له بهدوء:ابي اروح لأختي اول ابتسم لها وهو يهز راسه بموافقه وتفهم فتحت الباب عليهن وطفت المكيف صفقت بقوه :يلاا خلاص نوم بيأذن الظهر فزت سجى:بسم الله ماتعرفين تصحينا بشويش هبوب:ايه مرتاحات مو انتن الي بتعرسن رجعت سجى تنسدح:والله مخلصين كل شي اهجدي عنا جنى جلست:بسامحتس عشانتس عروس ومتوتره ماعليه ماعليه ماخلتهن بحالهن لين صحن غصب جهزوا الغداء وتغدن سوا وبدن يرتبن معها الملابس واغراضها الي بتنتقل لبيت حمد بعدها رجعن التؤام ينامن باقي سحاب وهبوب طلعن السطح بقهوتهم سحاب منسدحه تتأمل السماء رفعت يدها لفوق: السماء صافيه ياحلوها اتمنى اطير لها رفعت راسها هبوب ثم ناظرتها:نفس الحكي كل مره ماتملين تناظرين السماء ابتسمت واخذت نفس:احس انها جزء مني ضحكت هبوب:قصدتس انتس انتِ جزء منها ابتسمت :ايوالله اني جزء منها جلست وهي تمد لهبوب فنجانها صبت لها ومدته لها:امس جدتي كلمت سياف على العرس وانها بتخطب له حطت الفنجان وناظرتها بإهتمام:وش قال هبوب:رفض كالعاده بس كأن الفكره براسه يقول مو الحين وانه بيجي ويقول اخطبولي ابتسمت:الله يهنيه تأملتها بإبتسامه وهي تتمنى سحاب لسياف:تدرين اني احبتس ضحكت:الحب متبادل تكت ظهرها على الجدار وافكارها تدور حول سياف ايش بيصير فيها لواختار غيرها : قبل يوم لفت انظار الي بالداخل من قوة دخلته وهو رافع سلاحه وهو يشوف الي قدامه رجالين واقفين جنب بعض واحد رافع يده مستسلم والثاني مصوب بالمسدس اتجاه الخمس الي محاوطينهم ولكن بلحظة غفله بسبب دخلت حمد انطلقت رصاصتين من مسدس الرجال الي بالنص وصابت ساق واحد من رجال المباحث الخمس والثانية بصدر الثاني فضطروا يطلقون عليه رصاصه بساقه ورصاصه بكتفه وقبل يكتفونه اطلق رصاصه بسرعه كتفوه والي معه وجروهم للسيارة ومحلامحهم تدل على غضب ناظره رجل المباحث بحده قاتله:قايل لهم لاتتعاونون معهم دايم وهم طايشين مايحسبون للثانية ابد همهم الانجازات والرُتب مستهترين حمد كتم غضبه :احترم نفسك ولاتغلط ميل فمه بإستهزاء ومشى عنه وهو ينضم للباقي حمد مااستوعب الي صار واقف مكانه يناظر المسعفين محوطينهم لا بالعريف حزام يمر من جنبه الي وضح غضبه : بالمركز نتفاهم سحبه مبارك معاه للسيارة متجهين للمركز فتح مكتبة بقوة ودخل التفت :مبارك لوسمحت برا طلع مبارك وقفل الباب وراه وتنهد ووجهه اصفر: بس كنت اب قاطعه العريف حزام :اوص ولاكلمة ماكأني محذركم من اي تصرف في كل مره اقدمك على زملائك لذكائك وفطنتك ومقدمك وضامنك عندهم وبالصف الاول شصار لك هالمره هاا مارد عليه هو بنفسه مايدري ليش تدخل واستعجل ضرب المكتب بيده بقوة وبغضب:مسؤولية الي انصابوا برقبتك الحين رد علي ايش سبب تدخل خلني اعرف اتفاهم معهم رفع نظره له بدون اي رد تنرفز العريف منه وسدد له لكمه على وجهه لكنه انتبه للي برقبت حمد من لف وجهه تقدم وهو يمسكه مع كتفه ويبعد ياقة الستره العاليه ويضغط بخفيف حوالين الجرح :منصاب !! تفاجىء حمد حط يده وناظرها الا فيها دم كيف ماحس :ماتوقعت الرصاصه لمستني شطفت من جنبي ضربه على كتفه وزفر:الحمدلله جات سليمه واضح موعميقه ولكان ماانت واقف الحين لكن عقابك هالمره بيصدر منهم مومني تجهز له تنهد :جاهز جاهز جلس على كرسيه بقهر وهو يأشر على الباب:لاتغادر المركز اليوم لين نشوف لك حل ضرب تحية وطلع وقف قدامه مبارك :وشقال حمد: ولاشي اكلت ضربه وتهزيئه بس حس بدوخه تداهمه وعلى طول جلس مبارك جلس جنبه بسرعه وبعد يد حمد الي على رقبته كشر من شاف جرحه:ايش هذا مارد عليه سند راسه للجدار مغمض عيونه مبارك:ايش تحس فيه حمد :دوخه دقايق وتروح مبارك وقف ووقفه يسانده:امش اوديك المشفى يعقمون جرحك : : دقت الباب اكثر من مره ولامجيب التفت يمها :يمكن مافيه احد دقت مره ثانيه كمره اخيره وانشرح صدرها لما سمعتها تقول مين قربت اكثر من الباب والتفتت لنواف الي واقف على جنب وبصوت مهتز: افنان فتحت الباب بسرعه دخلت وقفت قدامها وهي ترفع الغطاء عن وجهها ابتسمت وعيونها مليانه دموع لها اسبوعين ماشافتها قالت وهي تتأمل نحافتها وذبولها والكدمه الي على وجهها :شلونتس يافاتن انفجرت تبكي بقوة ضمتها لها بسرعه وهي تبكي معها:سامحيني ياعيوني سامحي غبائي الي خلاني اتركك لهم سامحيني خافت من بدء جسد اختها يضعف ويتهاو للارض بتعب جلست معها وهي لسى بحضنها تبكي بهدوء صارت تمسح على شعرها وظهرها :بسم الله على روحتس ياجعلني للمرض كاني امرضتتس بعدت عنها وهي تقول بقوه:استغفري الله لاتدعين على روحتس ابتسمت وهي تمسك يد اختها بكل يدها:اصبري يافاتن الفرج بإذن الله قريب فاتن بإبتسامتها الذابله:صابره صابره وبكون اقوى إذا كنتِ جنبي لاتخليني اضيع بدونتس افنان بقهر من نفسها:لاتخافين بجنبتس انتِ خليتس قويه ماردت عليها الا بهزة راس موافقه لها مسحت دموعه وهي تقول:باركي لي اعرست اليوم فتحت عينها بقوه :الله لايوفقه كان عمي غاصبتس زيي ابتسمت لها:لاوالله موغاصبني الا انا الي غصبته يوافق ثم ضحكت : اخذت سيد الرجال الي بيوقف معي ومعتس وهقوتي فيه كبيره فاتن:بس يلبق عليتس الفرح والفستان الأبيض افنان وعيونها تشيع البيت:مايهم تدرين اني مااعرف عنه شي الا اسمه اسمه نواف ويكفي حكيه لي يطمن ابتسمت لاختها: يارب يصير حظتس احسن من حظ اختتس وقفت ووقفتها معها:تعالي نسوي قهوة ونسولف عدلت عباتها:سامحيني هالمره نواف برا اوعدتس لي جيه ثانية وبجلس على قلبتس لين تطرديني تقوس فمها بزعل:بس شوي اجلسي مسحت وجهها :بجيتس والله مره ثانية مشت معها للباب :الا خالد وينه ميلت فمها:ماادري عنه له كم يوم ماجاء زفرت:ابو طبيع فاتن:احسن خليه عساه مايرجع مرتاحه بدونه حضنتها بحب:ياروحي انتِ مع السلامه وانتبهي لروحتس طلعت ثم التفتت لها طالعت فاتن نواف من ورا الباب ثم قالت بهمس لاختها:سمح محيا ابتسمت افنان ثم التفتت لنواف بعد ماقفلت فاتن الباب ابتسم لها عوره قلبه عليها من سمع بكائها مع اختها مد يده لها:مشينا بيتنا ظلت تطالع يده تردد وخوف من حياتها الجايه معاه مع انها وثقت فيه لكن الشك لابد له محل بقلبها نزل يده وهو لسى مبتسم لها ومشى بهدوء التفت يتأكد إذا هي وراه تنهد بخفيف وصلوا فتح لها الباب وبعد عنه شوي:تفضلي دخلت ووقفت غرفة وحمام ومطبخ وقدام الباب جلسة صغيره مفتوح سقفها وقف جنبها وهو يحك راسه :اعذريني البيت صغير بما اني لحالي ماجهزته نزلت غطاها على كتفها وابتسمت له:حلاته البيت صغير تأمل وجهها الباكي انرسمت خطوط دموعها وانفها الاحمر ماكانت بذاك الجمال لكن حبه لها جملها بعيونه استحت منه ونزلت راسها ثم التف عليها بكل جسمه:افنان رفعت راسها نواف قرب منها :لاعاد تبكين وتعورين قليبي من هاللحظة اضحكِ وسمعي الناس ترانيم افراحتس واوعدتس وانتِ معي ماتشوفين بحياتتس الا السعاده ماتدري شتقول بعد حكيه الي نشر الراحه بصدرها وحمرت خدودها خجل من نظراته الثابتة عليها وإبتسامته الي ماانمحت من وجهه مدت يدها المرتجفه ومسكت يده :قلتها لك قبل وارجع اعيدها بجيتك يمي كتبت لي حياة ابتسم لها وهو يمشي ويده بيدها:نصلي : سياف وهو جالس على الكرسي قدام البقالة:غريبه مقفل هالوقت وينك فيه ايمن فك اول ازارير رقبة الثوب وجلس:كنت ببيت ابو خالد مسكه مع ذراعه بقوه خاف انه مسوي شي:وشعندك رايح له ايمن:لاتخاف رحت مع نواف اشهد على عرسه سياف :اعرس وليه بهالسرعه وماعندناخبر رفع اكتافه :ماادري عنه جاني مستعجل مافهمت منه شي زفروهو يمد الاوراق لايمن:وصار البيت بإسمك رسمي اخذ الاوراق:ياجعلك تسلم تعبناك معنا حط يده على كتفه ووقف:افا لاتعب ولاشي اخو يخدم اخوه ايمن:وين رايح اجلس بسوي شاهي سياف:بروح اجيب اغراض لجدتي لاخلصت بدري جيتك : صقر بصبر:طيب والمطلوب الحين سوسن متكتفه وواقفه قدامه بزعل:ابي ارجع مااقدر اجلس اكثر وقف:انتِ ماتفهمين قلت لتس مافيه رجعه قبل عرس حمد جلست ماسكه بكيتها:موقادره والله حاولت مااقدر زفر وغمض عيونه يسيطر على اعصابه طنشها:بنتتس وينها سوسن صدت عرفت من تطنيشته لها انه مايبي يدعلها:عند جدتها صقر:قومي البسي نروح لهم سوسن بإستسلام بوزت ووقفت:طيب جلس ينتظرها طفش كل يوم نفس الحكي معها ولاوده يزعلها وتكبر بينهم زي قبل بأسباب تافهه هو مايلومها متعوده على الاجهزه والنت والاسواق مومثل العيشه بالديره ابتسم وهو يشوفها جايه تلبس عباتها بزعل وقف مد يده لها مشت معه قالت بإستغراب:صقر هذا مو طريق بيت اهلكِ صقر:بوديتس للمزرعه نتمشى شوي بدون الدلوعه ابتسمت وهي تقرب منه تعرف قلبه الطيب ماعمره وداها لاهله اولاهلها وهي زعلانه يرضيها قبل :تدري اني احبك اتسعت ابتسامته:ادري : : ام حمد وابو حمد مشغولين بالغرفتين الي جهزوها لحمد الغرفة الي كانت لحمد وايمن فتحوها على غرفه جنبها وصارت اكبر بما ان حمد رفض يطلع لبيت لحاله وايمن بيسكن ببيت صغير جنب بيت ابوه بالضبط كانت ارض وبناها له ابوه لما كان يسهر فيها مع شلته لانه مايحبه يبعد البيت صغير غرفتين ومطبخ وحمام وبحوش فقرر ايمن يسكن لحاله عشان ترتاح زوجة اخوه وفتحو باب بين بيت ايمن وبيتهم عشان تروح له امه تطمن عليه ام حمد بقهر:ذحين ليش يقفلون هالشباك ابو حمد:بس من امس وانتِ تنقين عاد قفلوه وانتهى به شباك ثاني ام حمد :هذولا الي مايمشي وراهم مايسنعون شغلهم زين دخلت ترف وهي تسحب وراها كيس كبير:سياف حطه عند الباب ابو حمد:الله يصلحتس يابنيتي وشهوله تسحبينه وراتس وقفت قدام ابوها:3ريالات ابوحمد:وشهوله ترف وهي تعد على اصابعها:ريال لي ريال لمريم ريال لزايد ضحكت امها:روحي البقاله واخذي الي تبون ترف:لا نواف يقول مايصير ايمن يبكي بعدين مايصير عنده فلوس للبقالة ويصير جوعان ضحكوا عليها ومد لها ابوها الفلوس اخذتهم بفرحه راحت ورجعت تناظرهم:عادي اروح هزت امها راسها ثم طارت تركض للخارج : عند ايمن بالبقالة والعصبيه واصله مراحله الاخير للانفجار واقف على الباب يطالع الكراتين المتراكمه قدامه يبي لها ترتيب زفر استحى يقول لنواف يساعده لانه يعتبر عريس بعرسه الغريب ذا الا بترف واقفه جنبه ومعها زايد ابتسم وهو يشيلها:ياحيها الترفه حاوطت رقبته بيدها الصغيره بإبتسامه:حيه اخوي باسها بقوه على خدها:وااه زين الي تحيي اخوها ناظرها بطرف عينه:هاا جايه ويدتس فاضيه كالعاده تحركت بحضنه تبيه ينزلها ونزلها انتبه لزايد حط يده على راسه: والشيخ شعلومه ابتسم بخجل:طيب التفت لترف الي مدت يدها بالفلوس رفع حاجبه لما قالت:بنشتري بفلوس حقيقية عشان ماتبكي جوع نزل لعندها بإستفهام:ابكي جوع هزت راسها وهي تعيد كلام نواف لها ضحك:يقطع سوالف هالنواف الخبيل سحب من يدها ريالين:هذي تكفي لكم الاثنين حطت الريال الثالث بيده:هذا لمريم ذحين تجي وقف يراقبهم محتارين قدام رف الحلويات اتسعت ابتسامته وهو يسمع زايد :لا سحاب تقول موحلو طعمها ترف:اختك غبيه ماتعرف طعم الحلاو بس جالسه بالشمس يعع زايد بدفاع طفولي:لاتقولين ييعع على سحاب والله انها حلوه ترف وهي تبعد شعرها:والله انها يعع امي تقول البنت الي تقص شعرها لهنا ،تأشر على نص رقبتها تصير وععع زايد:انتِ وععع انا باخذ هذي وهذي عدل وقفته واختفت ابتسامته وهو يقول لنفسه(استح تسمع لوصف بنت مو حلالك ) تنهد وجلس على الكرسي ينتظرهم يخلصون ويقفل البقاله دخلت مريم البقاله تركض لهم تكتف بإنزعاج:كملت : فجر اليوم الثاني رجع من المسجد مضايق انه بيمشي ويتركها لوحدها بالبيت فتح الباب ودخل وهو يشم ريحة القهوة اخذ نفس قوي شافها طالعه من المطبخ بصحن الفطور:الله وش هالريحه الي ترد الروح ابتسمت له :تقبل الله تعال افطر قبل تمشي جلس جنبها اخذ القهوه من يدها وصب لها ثم له :يوووه من متى ماذقت قهوة بالراس نزلت راسها بحياء غصب عنها:بالعافيه اخذ قطعة خبزه صغيره وغمسها بالعسل ومدها لقريب فمها : سمي بالله تلون وجهها خجل رجع يقول:يلا عاد لاترديني قربت وسمت واكلتها ويادوب بلعتها من قوة الخجل والحراره اعتلت وجهها ضحك بخفيف وكمل فطوره بهدوء بعد ماخلصوا قامت تشيل الفطور وهو دخل ياخذ ملابسه واغراضه طلع لابس ثوبه البيج ناداها وجاته وقفت شوي بعيد عنه قرب لها وقال:والله انه ماودي اتركتس لوحدتس لكن مضطر تعرفين مأجل شغلي من يومين افنان : ماعلي خوف روح انت شغلك اهم مسك يدها:لاوالله انتس اهم من كل هالدنيا ضربت على ذراعه بخفيف:يلاعاد ابتسم وحضنها:استودعتتس الله قفلي الباب زين بعدته عنها :ابشر لاتتأخر شال شنطته وملفاته ومشى لين الباب وهي وراه لف عليهاباس باطن يدها:بشتاقلتس فمان الله ودعتها وقفلت الباب وراه وهي تزفر كل نفسها الي كتمته وهي تقول بصوت خفيف لنفسها(يوووه ياافنان وشهالرجال وهذا لتس بس يوم معه ذبتي وشلون لو اكثر ) طبطبت على قلبها وهي تحمد ربها على هالعوض الحلو دخلت تشوف ملابسها تدور على فستان ناعم تلبسه لعرس هبوب | ||||
|
| |
|
11-09-23, 01:33 AM
| #19 | ||||
| البارت الثامن اول ماصار على الطريق العام فتح جواله الا الاتصالات والرسائل من رئيسه وزملائه تنهد (الله يعين على التهزيئ الي بيجي منهم ابتسم يلا يهون كل شي دامها صارت ببيتي مرت الاربع ساعات بسرعه وقف بمسجد على الطريق ولبس لبس الدوام ووصل المركز عقد حواجبه وهو يشوف المركز هادي على غير العاده دق باب رئيسه دخل من سمعه يقول تفضل الرئيس حامد اعطاه نظره وصفق بسخريه:ماشاءالله ماشاءالله الحمدلله على السلامه يانواف نواف رفع يده بإستسلام:ماعندي عذر وقف وصار قدامه: تعرف بسبب تأخرك اضطريت اغير خطة المهمه وكانت النتيجة سعيد بغيبوبه ونادر ماندري بيرجع يمشي ولالا فتح عيونه بقوه:كيف ايش تقول ضحك بقهر:وش اقول هااا وش مبرر غيبتك نواف:انت تدري اني بالديره وان الاتصال فيها معدوم كان بيرد لكن اتصل تلفون المكتب ورد عليه وعيونه على نواف :وينه عندك الحين :ايوه موجود قدامي اسمحله يدخل حامد:لالا انتظر انا اطلع له قفل وهو يقول لنواف: خلك هنا لاتطلع حمد برا وطلع زفر نواف وجلس على الكنبه يهز رجله وهو يتصل يتطمن على زملائه لكن لامجيب : مد يده يسلم عليه:حياك الله ملازم حمد حمد ردله السلام:الله يحيك انا جاي عشان الي صار اخذ نفس:الي سويته غلط ياحمد اعرف انك من الدرجة الاولى لكن هذا مايسمح لك تدخل ابداً حمد:السموحه منكم حامد:مسموح هالمره لكن التعاون الي بيننا نتمنى ماتحضره حمد:لييش رفع حاجب:وتسأل تنهد بخفه:ابشر إذا ممكن ابي اسم المستشفى الي فيها المصابين حامد عطاه ظهر بيمشي:لا فمان الله انقهر منه ومن اسلوبه معه كلهم نفس الاسلوب معه ومع زملائه يشوفونهم موشي طلع من المركز واتصل على مبارك :هاا بشر لقيت شي مبارك يقلب الاوراق الي قدامه:لا قلت لك قبل مستحيل تلقى معلوماتهم هنا مارد عليه الا بزفره مبارك:وشبتسوي بالزواج الحين حمد بقهر :بحاول فيهم مره ثانيه وإذا رفضوا شسوي برضى غصب وبأجله مبارك : الله يعينك شصار كلمتهم حمد:ايه شالوني من هالمهمه مبارك:الحمدلله جات على كذا من جهتهم يلا تعال الغداء على وصول قفل منه وشغل سيارته وحاول يتصل بايمن وابوه وسياف لكن مغلق رمى الجوال على المقعده بجنبه بقهر : قبل العرس بيوم العصر بيت سياف في فوضى حتى النوم ماينامون زين طلعت هبوب للحوش شافت عدد الكراسي والكوشه الناعمه الصغيره بالطرف اتجهت لجلسة جدتها:جده انا قلت ابي العرس صغير بيننا ليش كل هالكراسي الجده تتقهوى:اجلسي وخلي عنتس كلنا نبي نفرح فيكم وتستاهل امه تفرح فيه مستخسره الفرحه لنا جلست بجنبها:بس انا الجده قاطعتها:بلا بس عزمنا الخلق حتى الرجال انعزموا اجلسي احني يدتس جلست ومدت يدها لها تسوي لها الحناء جاتهن سحاب تغني وسجى وجنى وراها يرددن معها ويرقصن بهبل وصلن عند الجلسه سحبن هبوب يرقصنها بعد مالفت الجده على يدها قماش عشان يضبط حناها صفقت الجده مبسوطه فيها بوسط فرحتهن اندق الباب بقوه هبوب وهي رافعه يدها:بسم الله مين يدق كذا الجده:روحي شوفي من ياجنى راحت جنى للباب :ميين سمعت ترف معصبه:وجعع افتحوا الباب تعبت فتحت لها وهي تشوفها تدخل تدف السماعه الكبيره سحبتها منها تدخلها جلست ترف قريب الباب شوي وتبكي:ااااه تعبت ثقيله ضحكت جنى: ليش تجيبينها لو خليتي اخوتس يجيبها ترف تكتفت:انا اخت العريس بساعد زيكم جنى حزنت عليها مسكتها توقفها:تعالي اشربي ماء مشت معها للمطبخ بالجهه الثانية حطت يدها على خصرها :مين حط هذي هنا سجى رفعت حاجبها:انا التفتت لها:مكانها موحلو كنت حاطتها جنب الباب احلى سجى:بالعكس مكانها غبي عند الباب سحاب:لاوالله ان... قاطعها صوت امها الي تناديها التفتت لسجى قبل تروح لامها:رجعيها مكانها فهمتي جلست سجى تتقهوى مطنشتها وصلت لامها :نعم يمه مسكتها امها واتجهت للغرفه دخلتها وقفلت الباب انخطف وجهه سحاب من الخوف:شفيه يمه ابتسمت لها وجلست على السرير:كل خير يايمه تعالي هنا جلست جنبها على السرير مسحت امها على راسها بإبتسامه:ياحلو بنيتي الي كبرت وبتصير عروس فتحت فمها بفهاوه:هااه ضحكت امها وحاوطت وجههاا بيدها:يمه كل بنيه بيجي اليوم الي بيصير لها بيت وزوج وحياة خاصة فيها استحت من فهمت امها ونزلت راسها:ياحلو الي تستحي خطبتس رجال ويازينه من رجال زين ورضى ماكملت امها من الغصه الي جاتها رفعت راسها لامها تناظر عيونها الي تدمع حضنتها وبكت:يمه إذا ماتبيني اعرس والله لاجلس عندتس للموت مسحت ظهر بنتها:لاياعيني والله اني فرحانه وقلبي يرقص سعاده حضنت امها بقوه:راضيه فيه يمه امهامسحت دموعها:يشهد الله اني راضيه من كل قلبي ابتعدت عن امها بإبتسامه:دامتس موافقه انا موافقه امها ضغطت على يد بنتها بفرحه:يابعد روحي يمه الله يكتب لتس كل سعاده ويعطيكم خير هالدنيا ويكفيكم شرها باست راس امها وطلعت من فرحتها اتجهت للسطح صارت تنقز من جهه لجهه بفرحه وسعاده يمتلي فيها صدرها فتحت يدها بالهوى وهي رافعه راسه للسماء:ااااااههه اخيراً اخيراً : عند سياف القلق وضح على وجهه رايح جاي قدام البقاله عايد وقف عنده بإستغراب:سياف شبلاك التفت له:ولاشي جبت الي وصيتك عليه عايد وهو يرفع الكيس الكبير بيده:اكييد اخذه وجلس بالارض يفتش الكيس ويتأكد بالي فيه رفع راسه لعايد:كفووو عرفت مين اوصي ابتسم له عايد الا بايمن الي وقف عندهم:السلام عليكم ورحمة الله وبركاته ردوا السلام وقف سياف:حمد ماتصل فيكم ايمن يشاركه القلق:لاوالله حتى اني طلعت للخط اتصلت مغلق سياف بخوف:لايكون صاير له شي وحنا ماندري عايد: تعوذ من ابليس إن شاءالله انه طيب وبيجي سياف:بكره العرس ايمن:إذا العشاء ماجاء بمشي له سياف :لالا انا الي بمشي له واشوف وش وراه عايد بقهر منهم:اقول لاانت ولاانت كلكم لازم تكونون هنا لاتخوفون اهلكم اذا ماجاء انا اروح له واجيبه الشيطان لايوسوس بروسكم سياف وايمن:إن شاء الله خير ايمن :وشذا الي معك ابتسم سياف: الي خاطر حمد فيه بعرسه ضحك ايمن لما اتذكر حكي اخوه لسياف: من جدك بتاخذ بحكيه اتسعت ابتسامته:اكييد ايمن انفجر يضحك:يووه مااتخيل شكله وبكشخته على حصان عايد شاركهم الضحك:خلوه يتخيل نفسه شيخ القبيلة سياف يهدي ضحكته:بس عاد لاتضحكون على العشير عايد سحب ايمن:امش نكمل ترتيب الخيمه عجزت عنها لوحدي وصقير ابلشته بالمزرعه ابتسم سياف يشوفهم ماشين يتناقرون كعادتهم وقت الشغل مشى لسيارته :الله يردك سالم ياحمد : تدور بالفستان :شرايتس يهبل صح فاتن:يخبل عليتس افنان:قومي جربي هذا اول فاتن بضيق:فكيني قلت لتس مورايحه سحبتها توقفها:والله لتروحين وتفرحين خلاص كل الي فات انسيه قوست فمها:تكفين ياافنان صدت عنها:لا هالمره غصب عنتس لفت لاختها لازم تنسيها سياف وخالد بعد تبيها تفرح وتنسى ضيقها :اقول قومي البسي ذا لبست بزعل وفتحت الباب صفقت افنان:الله وشهالحلاوه مسكت الفستان تناظره :جد حلو ابتسمت لاختها الي مهزوزه شخصيتها:موبس حلو الا يموت ابتسمت لها غيرت الفستان وجلسن يتقهون بحوش افنان الصغير : بالليل طلع من بيته وبيده مفتاح سيارة ابوه الي معه من فتره يشيل فيها اغراض العرس للمزرعه الا بنور السيارة الي وقفت عنده من لمح حمد ينزل زفر بقوه وكأن جبل وانزاح عن صدره جاه بسرعه وضربه بقبضة يده على كتف حمد:وينك انت للحين تلفت اعصابنا ننتظرك حمد بوجهه مرهق من الكرف الي كرفه قبل يجي :حضن اخوه :اعذرني ياخوك من خلصت شغلي جيت دفه بخفيف جهة البيت:رووح روح ارتاح وجهك يحزن حمد التفت:السيارة في... قاطعه ايمن من سحب من يد حمد مفتاحه:روح انت وانا بكمل الي باقي التفت حمد جهة بيت سياف ايمن ركب السيارة:روح طمنه ثم ارجع نام ابتسم لاخوه الي مشى بالسيارة مبتعد ومشى للبيت دق الباب بقوه بدقه معروف فيها انفتح الباب بسرعه وطلع سياف رفع يده حمد على طول من شافه:السموحه ياخوي لاسمعت بتعذرني هز راسه:والله اني عارف انه صاير شي قفل الباب ووقف بجنبه:وش هببت ضحك حمد:عادد مهبب شي كبير اعتدل سياف :شبلاها رقبتك حمد حط يده على جانب رقبته :اصابه خفيفه لاتشيل همها قال له كل شي صارمعه سياف: وفرحان انت ووجهك احمد ربك اسمحو لك تجي حمد مسح على شعره:بعد حب خشوم وكرف اسمحولي بثلاث ايام من غير يوم العرس ايام بس سياف:الله يصلحك ماامدا اختي تفرح الا ترجع تداوم حمد:بتفرح بتفرح يمكن اخذها معي سياف بسرعه:لاوالله ماتبعد هبوب عنا حمد:ولد لاتحلف بروح هناك وارجع عزوبي لا سياف :بيضيق خاطرها لاابعدت والله ماقرى على بعدها يكفيني انها ببيت ثاني تنهد حمد:خير إن شاءالله ، تبي شي بروح ارتاح مااحس بجسمي من قو التعب سياف:باين بوجهك رووح نام توادعوا ارتاح سياف من رجعته رجع للمجلس جلس بنفس مكانه يرتب العزبه الي بينقلها الصباح للمزرعه تذكر الرساله الي لقاها بالدرج فتح صندوق الدلال حقته وسحب الرساله الي دسها فيها رجع فتحها ويقراء المكتوب للمره الالف [ ألا ليْتَ الذي أهوى يراني ويعلمُ أنّ حبّي قدْ بلاني ويَسمعُ منْ كلام الشّعر بيتاً لأخبرهُ حبيبي كمْ سباني وأخبرهُ بأنّي ذبتُ عشقاً وشوقي في عذاباتي رماني !] عقد حواجبه المره الي فاتت تجاهل ترتيب وتغيرات غرفته لكن هالمره ممايقدر يتجاهل وشهالجراءه الي تدخل غرفته وتحط له رساله حرك الرساله بيده وهو يفكر (لاتسيء الظن يمكن الكلام موموجه لك من الاساس بس ليش بدرجي ) وقف ينفض راسه لازم يستفسر من هبوب عن هالمهزله بدون لاتحس ضغط على راسه بقوه اندق باب المجلس دس الرساله بجيبه وجلس مكانه:تفضل دخلت عمته : شفت الانوار شغاله وجيت ليش مانمت للان ابتسم لها:كنت اضبط هالعزبه لبكره العمه:ياروحي عنك نام ياولدي وراكم يوم طويل قفل العزبه ووقف وهو يشيلها :ابشري طلعت وطلع وراها متجهه لسيارته الي مخليها قدام الباب على طول حطها ورجع وقف بالحوش مغط جسمه بتعب ضيق عيونه كأنه لمح احد مسح وجهه يتعوذ من الشيطان وقبل يدخل للمجلس التفت بسرعه على صوت قربعه وصوت انين اتجهه بسرعه لمصدر الصوت الي ورا كنبة الكوشه اول مالف راسه يشوف رفعت يدها تغطي وجهها بخوف اما هو من الصدمه بلم يناظر فيها مااستوعب هالي جالسه ومغطيه وجهها وشعرها القصير ملفلف وصوتها الباكي مكتوم استوعب لما عرفها قال وهو يعطيها ظهره:شتسوين اخر الليل هنا انطلقت شهقه منها ودها الارض تنشق وتبلعها وهو موراضي يتحرك ويبعد سياف:قومي ادخلي داخل تحركت وهي تقول بهمس :ابعد رفع حاجبه ثم انتبه لنفسه مشى بسرعه للمجلس ضرب الباب بقوه على طول وقفت تركض للداخل تحمد ربها الكل نايم انسدحت طولت تتقلب لين نامت : في نفس الوقت بالمركز جالس قدام رئيسه الي يفكر بكلامه رفع راسه حامد:فيها مخاطره كبيره نواف:ماثبت عليه شي والرجال ملتزم بحياته وحاولت كذا مره اجيب له حكي منا ومنا لكن ابد حتى ملامحه ماتبين شي ضده فقلت اعطيه خبر مبدئي يمكن إذا عرف يساعدنا بشي حامد:بتقول بوجهه كنت اراقبك لاننا شاكين فيك وتظن ردت فعله بيتعاون على طول تنهد : متى بنخلص منهم نقبض عليهم ونحقق معهم حامد:بدون دليل مالنا حق نقبض عليهم وقف نواف:امرنا لله نظل نراقبهم لين نثبت شي ، يلا انا اترخص بمشي للديره كم يوم وراجع حامد ارخى ظهره على الكرسي ورفع حاجبه:كأن هالديره زانت بعينك ابتسم له:تبي الصراحه زانت وبالحيييل بعد حامد:ماندري عنك ايش تخبص هناك نواف وهو يفتح الباب:كل خييير فمان الله وطلع متجهه للديره وصل نهاية صلاة الفجردخل بيته هدوء لكن قبل يفتح باب الغرفه استوعب انه لسى ببدلته رجع بسرعه للسيارة الي جنب البيت وغير بثوب عادي تنهد براحه رجع ودخل للغرفه المظلمه ابتسم من لمحها نايمه اول ماجلس جنبها فزت بخوف مسكها على طول:انا انا حطت يدها على قلبها وتنفسها السريع:الله يصلحك اخلعت قليبي توك جاي حط يده على راسها: بسم الله على قليبتس ايه هذي جيتي غمضت عيونها تهدي قلبها:الحمدلله على سلامتك ابتسم لها:الله يسلمتس،يلا قومي صلي الفجر وابي قهوه من يدينتس الحلوات راسي واصل حده صداع اعطته احلى ابتسامه وهي تأشر على خشمها:تبشر على هالخشم مسك خشمها بلطف:يسلم لنا هالخشيم وقفت متجهه للحمام وهو يراقبها لين دخلت تنهد وانسدح مكانها كيف توسطت قلبه من شافها وصار يراقبها من مكان لمكان مايدري يتبع قلبه لين تأكد انه حبها الحسنه الوحيده من مهمته هي ابتسم والتفت براسه عليها من قالت:لاتنام وقف وهو يتعوذ من ابليس توضأ وصلى الفجر الي فاتته جلس بمكانهم دايم جاته بالقهوه وفطير مفتت حطتها وجلست صبت له قهوه ومدتها له استنشق ريحة القهوه قبل يشربها ناظر للفطير:يابعدي والله اني مومشتهي تكفيني القهوة حطت غطى على الفطير:حتى انا مومشتهيه تقهوى ويسولف عليها ودها تسأله عن نفسه وحياته تزوجته ماتعرف عنه غير اسمه وتحس بغباء من استعجالها بس اجلت اسئلتها لوقت ثاني واضح عليه التعب ويدور النوم انسدح مكانه بتعب حطت يدها على كتفه:قوم نام على الفراش بتوجعك الشمس غمض عيونه:مافيني حيييل اتحرك قالت وهي تحاول تقومه:من بعد الغرفه عاد وقف مع وقفتها اخذت القهوه للمطبخ ورجعت للغرفه قفلت النور وانسدحت جنبه بهدوء حست بيده الي تسحبها لحضنه تصلب جسمها خوف وتوتر من قربه استخارة كثيير وكل مره ترتاح لكن فيه شي بقلبها ماتدري هو خوف ولاايش ثبتت بمكانها ولما حسيت انه نام ناظرته ابتسمت تتأمل وجهه ابعدت جسمها عنه وتلحفت ونامت : بيت سياف الكل من الظهر مصحصح تغدوا البنات سوا هبوب دخلت عليهن المطبخ جنى جالسه بالارض وسجى على سطح المطبخ جالسه سرحانه وواقفه قريب منها سحاب اتجهت بدون صوت للقدور الي باقي من الغدا طلعت صحنين حطت من الرز الابيض والملوخيه وحطتهم بالصينيه وكأس ماء الكل يطالعها قالت سحاب:بسم الله العروس مفتوحه شهيتها على الاخر جنى وقفت:هبوب توتس متغديه ماشبعتي التفتت لهن وهي شايله الصينيه بعيون مدمعه:مولي لسياف ياعيني محد يمه ويذكره من بكره تحسبن حسابه قبل الكل غداه وعشاه حتى قهوته تتحضر قبل قهوتكن اهتزت الصينيه بيدها لما بدت تبكي فزت سحاب اخذت الصينيه منها وضمتها جنى:افاا ياهبوب سياف اخونا لاتبكين تعورين قلبي مسحت دموعها وهي ترجع تشيل الصينيه ابتسمت لهن ثم طلعت التفتت جنى للي واقفات قدامها:بتبكي كثير اليوم سحاب وهي طالعه :ماعليتس هذا شعور لابد منه التفتت لاختها:وانتِ شبلاتس لتس كم يوم موعلى بعضتس قربت منها وهي تقول بخوف:حطيت رساله لسياف شهقت جنى وضربتها:الله ياخذتس سلمنا قبل من رسايلتس تبين تجيبين لنا مصيبه الحين سجى شوي وتبكي:هالمره بجد مصيبه جنى:وشوو سجى ببكي:رجعت ثاني يوم باخذها مالقيتها حطت يدها على صدرها :سجى يامجنونه لايكون شافها وش كتبتي سجى بكت وتحاول مايرتفع صوت بكيها:ياربي والله اني خايفه الي مريحني ماكتبت اسمي ولاشي يدل انه انا صارت دور بالمطبخ:الله ياخذتس انتي وهالحب ياما حذرتتس من اول رساله لكن ماتفهمين حتى لواسمتس مومكتوب مايصير والله يصير اسمعي هالمره مالي دخل فيتس دبري روحتس طلعت وهي معصبه تاركه سجى وراها والندم ياكل قلبها اكل تخاف يوصل شي لامها وابوها وايش يفكها بعدين والمشكلة غرفته من الحين مقفله تبي تفتش يمكن هي ماشافتها من الخوف : عند هبوب دقت باب المجلس دخلت من سمعت صوته رفع راسه لها وابتسم :ياحيها عروستنا حطت الصينيه قدامه وجلست: غداك تأمل وجهها وعيونها الباكيه اخته حساسه مايلومها لما تبكي هو وده يبكي معها ويفرغ الي بداخله كيف بتروح وتترك مكان كبييير ببيتهم حتى وهي بيوم عرسها تفكر بغداه:باكيه ياعين اخوتس وسعت إبتسامتها وهي تحاول ماتبكي ويشيل همها:لا تغداء ترا عمه سوته والملوخيه زدتها ليمون تحبها حامضه ابتسم لها :تسلم يديتس ويدها تغدي معي وقفت :عليك بالعافيه تغديت مع البنات انحنت تبوس راسه:تبي شي رفع راسه يطالعها:لا سلامتتس ابتسمت وطلعت وهو كمل غداه وطلع للمزرعه الي بيكون عرس الرجال فيها والحريم بحوش بيتهم : ام حمد:ماصحى للحين قوم صح اخوك ايمن وهو فيه النوم منسدح بالصاله وبحضنه ترف نايمه:يمه شبلاتس لسى بدري خلوه ينام للعصر دخل ابوه بعصبيه:يافضحي هذا نايم وهذا متبطح والرجال محد يمهم قوم جعلك للعافيه قوم عدل جلسته بسرعه توجعت ترف وبكت من فزته الي خلت راسها يضرب بالارض انحنى لها يبوسها:تعورتي قامت ضربته وراحت عند امها تكمل بكيتها ايمن وقف دخل الغرفه شاف حمد بسابع نومه رفسه برجله على ساقه من القهر:قوووم المفروض انت اول من يصحى تمغط بمكانه بكسل ايمن ماطلع من الغرفه لين تأكد انه صحى زين لحقته امه ودخلت لبيته وراه :ايمن التفت لها:عيون وروح ايمن ابتسمت وهي توقف قدامه:عيون ايمن بتكون لغير امه مسك يدها:افا والله انها لتس لحالتس ناظرت ملامحه الي تغيرت من قالت:وسحاب ايمن بغباء:هااه امه: مبرووك يمه سحاب وافقت اتسعت عينه ماتوقعها وقال بفرحه:صدق يمه ضربته على كتفه:عيب عليك يعني بكذب باس راسها:حاشاتس يمه بس رفعت كفها تسكته:عارفه عارفه "شيعت بيته بنظره سريعه " زعلان انك لحالك هذي هي بتنوره لك حضن امه وهو يتغزل فيها بفرحه كان بقلق من يوم ماكلم امه وطلبها تخطب له وخصها بالاسم صار يمشي رايح جاي نسى ايش كان بيسوي من فرحته المغرب بالمزرعه الي امتلت بااهل الديره وريحة القهوه الانوار الي معلقه بين النخل والسجادات الحمراء الخاصه بالمناسبات مرصوصه تغطي مساحة كبيره للضيوف وبالجنب خيمة مفتوحة وقدامها مصفوفه الدلال والفناجيل والمبخره الكبيره شغال فحمها وريحة البخور مع الزرع كانت تملي صدورهم سعاده وفرحه معتليه وجيههم سياف واقف جنب حمد مبتسم يناظر ايمن الي يقهوي الضيوف مع عايد والبعض من الشباب ثم التفت لحمد الي البشت الاسود معطيه فخامه وإبتسامته اتسعت من التفت له حمد:فرحة اليوم مااعطيها احد حمد مارد من الرجال الي يسلمون ويباركون لهم : تأملها بفستانها الناعم بلون عودي قطعة وحده كم طويل وفتحة صدره بشكل سبعه وإكسسواراتها الناعمه الي كانت هديه منه قال بإنبهار وهو يتقدم لها:شهالزين بتغطين على العروس استحت منه وزاد حياها لما حط يده فوق راسها ومسح على شعرها الي خلته على طبيعته الكيرلي الخفيف تسمعه يحصنها ثم باس جبينها ابتسمت له :اخخ ياقليبي تصبر يلا البسي عباتس خلينا نمشي لااتهور من كثر جمالتس ولع وجهها ولبست عباتها الي كانت بيدها بسرعه وتغطت ضحك عليها وطلعوا وصلها لحد بيت اختها افنان وهي تنزل غطاها وتناظر اختها:للحين ماخلصتي ترانا متأخرين مشت وراها ودخلت الغرفه وجلست :حست بنفسي تعالي ساعديني افنان :شبلاتس تعبانه وجهتس شاحب فاتن بتعب:من امس استفراغ هد حيلي افنان نزلت الكحل من يدها:إذا تعبانه مولازم تروحين فاتن تضغط على نفسها:لاماعليتس صرت احسن سويلي الكحل عشان البس يلا تجهزت على السريع وكانت زي اختها بس سوت كحل وروج احمر وشعرها استشورته على السريع لبست فستانها الاسود كمه شوي عريض وطويل وصدره كامل مغطى لين نص رقبتها بلولو ابيض يزين طرفه اختارته عشان يغطي الكدمات واثار ضرب خالد لها اخذت نفس تملى صدرها لما دخلت مع اختها نزلن العبايات وجلسن البيت مزين بعقود اللمبات ممتده من السطح لاطراف سور الحوش ونفس السجادات الحمراء مفروشه على طول الحوش والحلويات تتوزع بأماكن الضيوف والتراحيب بين الجارات والسوالف تملى المكان وفيه كراسي بالطرف للحريم الكبار بالسن الي مايقدرون يجلسون بالارض وبعضها جالسات البنات عليها والسماعه الكبيره محطوطه بطرف للان ماشغلنها سحر بعدم اعجاب:شوفي يمه حتى ماطرى عليهن يجن يسلمن ام خالد وهي شوي وتاكلهن بعيونها:قليلات الحياء ناكرات الجميل فضه والجو الهادي مومعجبها:يعع وشهالعرس الميت وين الطق والرقص سحر تأشر على اختها مريم:بنتتس الفصعه ماكأنتس محذرتها تروح لهن فضه:وانتِ شعليتس منها بزر سحر بقهر من اختها:البزر تتعلم ماتصاحب الحيايه امهن بإنزعاج:اوص اوص انتي وهي حتى هنا مناقر بغرفة هبوب الي تبكي تأففت سحاب بطفش:وبعدين معك كل ماسويت الكحل بكيتي وخربتي كل شي جنى اخذت مناديل ونظفت وجهها:لمتى ياهبوب اخذت المناديل من يدها تمسح دموعها وهي تاخذ نفس وتزفره بهدوء:اسفه والله مااقدر امسك نفسي خلاص اخر مره رجعت سحاب تجهزها :وخلصنا الحمدلله طالعه قمر جنى وهي تناظر لهبوب:سحابوه ليه ماسويتيلي نفس كحلها يهبل سحاب:لا هذا خاص بالعروس فقط فتحت سجى الباب وهي قرفانه:يييع يعع يالعجيز يقهرن ضحكن عليها وقفت عندهن تمدح في هبوب سحاب لابسه فستان وردي لتحت ركبتها بشوي منفوش بحزام فضي بدون اكمام على اكتافه بالطرفين حبلين متقاطعه بلون فضي وكعبها الفضي العالي شعرها القصير ملفلف ورافعه جهه ببنسات جنى فستانها الازرق عادي منفوش بخفيف ميدي وكعب متوسط اكمامه واسعه وسجى نفس الفستان بلون احمر بعد صلاة العشاء اشتغلت السماعه بصوتها العالي والكل يرقص دخلت سجى تجاري سحاب بالرقصه وهي ودها تقتلها من الغيره والقهر من حركاتها للان موعاجبها انها ساكنه ببيته وتكلمه حطت يدها فوق يد اختها الي وضح توترها من لفلفتها للخاتم وتعرق يدها :هدي يافاتن فاتن بهمس: ابي ارجع للبيت افنان ماتقدر تضغط عليها اكثر من كذا وقفت وهي ماسكتها:يلا نمشي هزت راسها بالموافقه ومشت مع اختها لكن وقفهن صوت الجده:ياحيهن بنات حصه الله يرحمها ابتسمت افنان مجامله لها:الله يحيتس ياخاله مبرووك والله يهنيهم الجده وهي تأشر لسحاب:تعالي يمه وديهن لهبوب يسلمن عليها بتفرح بجيتكن فاتن منزله راسها والتعب اخذ من روحها ماتقدر تجلس اكثر تكفي الساعتين الي حاولت تجلسها ضغطت على يد افنان التفتت لها ثم التفتت للجده وسحاب الواقفه جنبها:اعذرونا ياخاله اختي تعبت ولازم نمشي للبيت ترتاح سلموا لنا عليها وباركوا لها بالنيابه عنا الجده ماخفى عليها وجهه فاتن:بسم الله عليها معذورات يابناتي ماصدقت على طول مشت واختها معها لبسن عباياتهن افنان:تمشين معي لبيتي ولالبيتتس فاتن بصوت خفيف:بيتي فتحت الباب وحطت عبايتها وعباية اختها على جنب اسرعت فاتن للحمام مسحت على ظهرها بعد مااستفرغت كل الي ببطنها :انسدحي ريحي وبقوم اسويلتس شي يخفف عليتس انسدحت وهي خايفه من الي يدور ببالها وتتمنى انه مايكون صح لحفتها وهي تدخل للمطبخ تسوي لاختها اعشاب تهدي بطنها ميلت فمها من فتحت الثلاجة فاضيه تحسبت على خالد واهله : عند الحريم تغيرت الاغنية بصوت هادي يعلن زفة هبوب وقفن البنات بجوانب الكوشه وعيونهن مبتسمه والحماس لطلتها والجده واقفه تذكر الله وتستودعها من كل عين حاسده "ياحي الي تقبل بين دعوات ومدد بعيونك اصاله تمشي خطوات الرعود امحصنه بذكر الي عينه ماغفلت طول الابد رافقت عمرك تباريك السعادة وجعله زود عمرك الي تببتدينه بعز يبقى للأبد يامباخر عانقيها بغيم من طيب وعود " طلعت بكل هدوء بإبتسامه حلوه وعيونها للارض تخاف ترفع عينها وتشوفهم وتبكي تمشي بهدوء على تدريب البنات لها وتصارع تقوس فمها بإبتسامه مشاعر اللحظه مسيطره عليها وهي تتمنى لوامها واقفه تنتظرها مبتسمه لابسه فستان امها ناعم جداً كان لونه ابيض مايل للوردي الفاتح جداًمخصر لركبتها ثم يجي واسع اكمامه وصدره كان من الدنتيل المبطن وطرحتها طبقتين اطولها لتحت كتفها بشوي وشعرها مسدول واطرافه ملفوفه كانت قمة في الرقه والنعومه ماكانت راضيه بكل هالشي لكن البنات غصبوها وصلت اخيراً للكوشه تحس انها مشت امياال طويله تحس بنظرات الكل لها وهالشي وترها زياده جاتها جدتها ضمتها وباركت لها مسكت راسها ورفعته:ليش منزله راستس ياضي عيني ابتسمت وعيونها تلمع بالدمع انتبهت جدتها وابتعدت على طول على جنب من شافت البنات تجمعوا عليها هلت دموعها وتمسحها بملفعها : عرس الرجال الكل فرحان والشيلات شغلها ايمن بدون رضى الرجال الكبار وشاش مع نواف الي ماخلوا رقصه مارقصوها نواف جا يركض لايمن :سياف يقولك شغل العرضه النجديه بسرعه تهلل وجهه:جد يلا بنشوف عرض ماراح يتكرر اشتغلت العرضه ودخل سياف لاف شماغه على راسه وبيده السيف معتلي خيله الغيهب الي زين جسده اصالة الاحمر توسط الساحه وهو يشوف عيون حمد الي لمعت سعاده تراقص خيله معه بتناغم من الفخامه والهيبه الكل مصطف حوله بشكل دائري مبهورين الكل يعرف ان سياف خيال لكن ماقد احد شافه لانه مايسمح لاحد بدخول اسطبله نزل عن خيله يصطف مع عايد وايمن يكمل العرضه بعد ماانتهت العرضه مسك لجام الخيل واتجهه لحمد الي رحب فيه بحضن:عز الله يعزك سياف:مبرووك ياخوك ياجعلها حياة مديده بالمسرات والهنى حمد الابتسامه مافارقت وجهه:الله يبارك فيك عايد بهمس لايمن ونواف:للمره المليون يبارك له ضحك ايمن وهو يرفع يده يدعي:يارب عقبال ماتباركون لي نواف ابتسم بهدوء وهو يذكر استقبال ايمن له اول ماجا للعرس وفرحت ايمن لما علمه انه خطبها ووافقت دعا بقلبه ان الله يتمم له كل خير يستاهل ايمن كل السعاده الساعه 11 ونص جاء وقت زفة حمد اعتلى الغيهب الي كان ماسكه سياف وايمن وابوه ونواف على يساره وباقي الشباب من يمينه متجهيين للبيت خلفه نواف يناظر له: شوي شوي لاينشق وجههك من الابتسامه التفت له حمد:غيران يالعزوبي ضحك نواف:وليش اغار نسيت عندي زوجه حمد تذكر:صح نسيت ابارك لك مبرووك نواف بهدوء:الله يبارك فيك زفوه بأصواتهم العاليه والتصفيق لحد باب بيت سياف الخلفي لانه اقرب للكوشه نزل وهو يعدل نفسه دق سياف الباب ورا بعض بعد مامشوا العيال بالداخل الي باقي من الحريم راحوا للجهة الثانيه البنات تجمعن بالمجلس طفن الانوار واتجهن للشباك المطل على الحوش يتفرجن طلعت سحاب تركض متجهه للسماعه:انتظرووا لاتفتحون شغلت الاغنيه الي اتفقت مع البنات باختيارها ابتسمت لهبوب وارسلت لها بوسه طايره وركضت للمجلس تغطت ام حمد وام سحاب واتجهت ام حمد للباب وفتحته كامل ووقفت جنبها ام سحاب وهي تغطرف وبيدها المبخره والجده ترحب فيهم دخل سياف قبله وعينه بالارض ولما رفع راسه شافها واقفه بالابيض والورد الي بيدها ابتسم سلم عليها باس راسها بمحبه:مبروووك يابهجة سياف مبرووك ياجعلها زيجت الدهر تحركت شفايفها بدون صوت :الله يبارك فيك حضن اكتاف جدته بيده:مبروك يالشيخه رفعت يدها تطبطب على يده: عقبال ماازفك وتكمل الفرحه ابتسم لها ولف يناظر حمد رفعت عيونها وطاحت بعيونه الي مقبل عليها ببشته الاسود وبجنبه امه وابوه نزلت عينها بسرعه وشدت على يد سياف الي للان ماسكتها وصل عندها باس جبينها:مبروك ياهبوب ماردت التفت لسياف وناظر يدها الي بيده:ماودك تفك يدها سياف ضحك :اختي حرام امسك يدها حمد وده يصفقه:عارفين انها اختك بس خلاص صارت زوجتي لوسمحت وخر انا امسكها ضحك عليه وهو يحس بضغطت يدها خايفه ومتوتره ومنحرجه منهم طبطب على يدها وابتسم لها:مبروكين ياعيوني الثنتين انتم لااوصيك عليها ياحمد هذي الغالية حمد رفع يده:والله حفظت هالوصيه من الخطبه وانت ترددها علي والله انها بعيوني ولابيقصرها شي ابد لاتخاف مسك يد حمد وحط يدها بيده وضم يدهم بيده:الله يكتب لكم السعاده ابتسموا له وهي دموعها على طرف عينها راقبته لين طلع من الباب التفت عليها حمد:مالنا نصيب من النظر استحت ونزلت راسها جات الجده باركت لهم وترش عليهم الورد ام حمد لبستها عباتها وهي تسمي عليهم وتدعي لهم طلعت معه ويدها بيده وسياف عند الباب يراقبهم لين اختفوا ارتكى بظهره على سور بيته وعيونه على بيت حمد الا بايمن الي وقف قدامه :بتحرسهم طول الليل امش ورانا شغل طويل بالمزرعه تنهد ومشى مع ايمن وهو يسحب خيله وراه وتفكيره عند اخته عند البنات متحاشرات على الشباك الصغير سوسن وهي تتكتف:الحمدلله والشكر سجى وهي تدف جنى وترف :اص انتِ وانتِ يالنتفه ابعدي حاشرتني ضربتها ترف وهي ترجع تتوسط الشباك غصب:بتفرج جنى لفت على اختها:اتركيها عنك بزر سجى بقهر منها:ماادري مين قال لها انها كبيره انقلعي عند امك جنى تتفرج :ياويلي ياهبوب طلعتي قزيمه سحاب الي تناظر بطرف الباب ضحكت:لاوالله بسم الله عليها هو الي عملاق فريده الي دخلت معهن بدل ماتروح مع امها(زوجة عايد) :دايم الي بالسلك العسكري يكونون عمالقه ماشاءالله التفتت لها سحاب ماتدري هذي مين وليش قاطه معهن رجعت تراقب سياف واي حركه بسيطه منه تبتسم : عند معاريسنا الحلوين فتح لها باب الغرفه توسطتها وهو للان ماسك يدها رفع راسها وهو يتنهد:مادريت ان ببيت سياف بنيه تقول للقمر قوم وانا اقعد مكانك ولاكان من زمان خطفتتس منه ابتسم من شاف وجهها حمر خجل حط يده على راسها يقراء الدعاء* اللهم إني أسألك خيرها وخير ما جبلتها عليه، وأعوذ بك من شرها وشر ما جبلتها عليه* ابتسم لها: على وضوء نصلي هزت راسها بلا فلت يدها:اتركتس شوي شوفي هنا الحمام غمضت عيونها وهي تزفر توترها رفعت فستانها بيدها وهي تنحني تنزل الكعب اعتدلت وهي تشييع الغرفه الكبيره والحمام بنهايتها اتجهت للدولاب ابتسمت وهي تشوف كل شي مرتب وقميص شبه ساتر معلق بالطرف وورقه معلقه معه سحبتها تقرأ ضحكت البنات كاتبات لها {تراه اختياري شرايتس يهبل صح عارفه مايحتاج شكراً>جنى الله يسعدكِ ياهبوب ويعطيكِ خير هالزوج العملاق هههه>سحاب امممم ماعندي شي لكن الله ييوفقكم>سجى} تأملت القميص الاوف وايت قماشه ستان كامل واكمامه على اطراف الكتف وفتحتين بالجهتين لفوق الركبه وعليه روب من الدانتيل الثقيل حست بخجل سحبته واتجهت للحمام تجهزت ماتدري تروح تناديه ولاتنتظره يجيها رجعت لبست جلال الصلاة وقفت وهي تشابك يديها ببعض من دق الباب ودخل بثوبه رافع اكمامه متوضي ابتسم يغمض عينه:نصلي ماردت مشت وراه يصلون بعد ماخلصوا وهو للان جالس لف بكل جسمه يقرب منها وينزل الجلال عن راسها وهو يوقفها معاه مبتسم بهدوء وهي من خجلها محليها اكثر بعيونه : : نلتزم بيوم الاحد بإذن الله للتنزيل وبيكون بارتين توقعاتكم للأحداث اكتبولي الشخصيه حبيتوها : استودعكم الله الذي لاتضيع ودائعه | ||||
|
| |
|
11-09-23, 10:53 PM
| #20 | ||||
| الله الله يا امان القلب حبيييت الروايه جميله ورايقه ???? واكثر الشخصيات اللي حبيتها سيااف وسحاب وهبوب . زعلت ان سحاب رح تنخطب ل ايمن حرررام صددمتها كبيرره ياقلبي عليها????.اتمنى يصير شي وما تتم الخطبه وتكون سحاب من نصييب سياف يااا اماان تصرررفي بلييز???????? | ||||
|
| |
|
| الكلمات الدلالية (Tags) |
| رواية.كل مخلص. |
| أدوات الموضوع | |
| انواع عرض الموضوع | |
|
|
191Likes
العرض العادي
