حكايات مرعي الدون جوان ف شهر رمضان ... مكتملة - الصفحة 9

اناهيد · 16-09-09, 06:16 AM

زاهرة مبدعة انت تابعت معك يوميات مرعي حلقة حلقة
بصراحة انا معجبة في اسمه اللي كله رجولة :60:
اسلوبك روعة الاحداث والشخصيات والحوار كلها اعجبتني وشدتني
متابعة معاك حبيبتي وفي انتظار الحلقة المقبلة من يوميات الفتى ميمي

زاهره · 16-09-09, 12:30 PM

اقتباس:

المشاركة الأصلية كتبت بواسطة لـوريــن

ياسلااااااااااااام ..:blushing:

دا انا حبيت الواد مي مي ..:blushing:

مع انو مبهدل ابوووه ..

بس برضوووو سكرة ..

أما حكاية البطة المخطووفة ..:d

دي قطعت قلبي ..

ربنا مايحطنيش مكانها ..

و حكاية البت جنى ..

مالومش مي مي ..

بعد قدرية .. هوا كان بيحلم بزي جنى ..:icon_smile_eyebrows:icon_smile_eyebrows

دااا انا حبيييت اليوميااااااات جداً ..

هأكمل الباقي و أرجع أرد ..

ههههههههههه
حبيبة قلبي انتي اللي سكره
سعيده بانضمامك لصفوف المتابعين لميمي
نورتي

زاهره · 16-09-09, 12:32 PM

اقتباس:

المشاركة الأصلية كتبت بواسطة اناهيد

زاهرة مبدعة انت تابعت معك يوميات مرعي حلقة حلقة
بصراحة انا معجبة في اسمه اللي كله رجولة :60:
اسلوبك روعة الاحداث والشخصيات والحوار كلها اعجبتني وشدتني
متابعة معاك حبيبتي وفي انتظار الحلقة المقبلة من يوميات الفتى ميمي

أناهيد
و الله مش عارفه ارد على زوق كلامك بايه

مشكوره حبيبتي
سعيده جداااااااااا إن يوميات مي مي عجبتك
منتظره رايك ف باقي اليوميات

زاهره · 16-09-09, 12:33 PM

اقتباس:

المشاركة الأصلية كتبت بواسطة لـوريــن

ايه دا .. كترت الردوود ..

بس أعمل إيه ..

لازماً أعلق على كل حاجه ..

وصلت لعند زيارة ست الاشباح خخخخ ..

دي بهدلت نووجة بهدلة ..

ولا لما راح حفلة حمادة ..

والشنبات اللي فيه .. خخخخ

اما جية جنى والشلوت اللي اكلوو ميمي ..

دي لو عرفت جنى باللي سار له هتحبووو ..

ارجع للواد ميمي..

دا انا حبيتوو اوووي ..

دا وااد حنين اووي وبيستااهل ..:blushing:

يلا معليش استحملي ردوودي الكتيرة ..

لا يا روحي
براحتك عالآآآآآآآآآخر

الموضوع موضوعك تردي فيه متل ما تحبي و في الوقت اللي تحبي
بالعكس أنا مبسوطه كتييييييييير إن اليوميات عجبتك

منتظره رايك في باقي اليوميات

زاهره · 16-09-09, 12:35 PM

اليوم الــ24
عزومتنا

- قوم يا مرعي يا حبيبي محتاجه شوية حاجات.
- يووووه يا ماما... احنا مش هنخلص بقه مش إنتي حضرتي كل حاجه من إمبارح.
- ايوه يا روحي بس عاوزه شويه خضره و...
رميت المخده و قعدت:
- متمكليش...اكتبيلي انتي عاوزه ايه و أنا أنزل أجيبه.
- الله يرضى عليك.
- ماما.
- ايوه.
- مين اللي جاي النهرده؟
- عمك أحمد و مراته و عياله التلاته....
- يعنى الطفل الحيوان عبدو جاي.
- بقولك ايه من أولها كده ملكش دعوه بالواد كفايه اللي عملته فيه لما كنا ف البلد.
هههههه هوه لسه شاف حاجه ده أنا هتسلى عليه النهرده، ماما كملت:
- و عمك فاروق و مراته و بنته رباب و ولاد عم أبوك عبدالعزيز و سعد و أيمن و كل واحد بمراته و ولاده و كمان...
قاطعتها:
- بسسسسسسسسسس... في ايه؟ مش اتفقنا عمي أحمد بس اللي هنعزمه.
- مينفعش يا مي مي ابوك كبير العيله و...
- خلاص خلاص متكمليش أنا عارف اسطوانه كل سنه من الآخر العدد هيتعدى العشرين صح.
بابتسامه واسعه:
- التلاتين يا روح مامتك.
- إنا لله و إنا إليه راجعون...حضري طلباتك قدامك دقيقه و إلا مش رايح.
- هوااااا و هكون جيالك بالطلبات و الفلوس.
أخدت الورقة من ماما و نازل السلالم جري فجأة وقفت:
- بسم الله الرحمن الرحيم...بابا؟؟!!
- في إيه يا ابني؟ إنت شفت عفريت؟
عفريت؟ ده إنت لو طلعت لعفريت في الظلمه تخليه يعلن إسلامه:
- لا...لا... إنت إيه اللي جابك يا بابا؟
- ايه اللي جابني؟ هوه ده استقبالك لأبوك ...يعني موحشتكش؟
- لا أكيد...اكيد وحشتني... بس المفروض اللي معتكف ميجيش البيت.
- ايوه... و الأستاذ خيري برضه قالي مينفش الإعتكاف المودرن ده...بس قلتله إن في ظروف خاصة... العيله كلها جايه و كده.
ماما طلت من الباب:
- حاج سيد...
بصيتلها و بصيتله...إيه السعادة اللي همه فيها دي؟:
- ما تلمي الدور يا نوجه مش كده ...إحنا صيام.....آآآآآه
إتكتمت لما بابا هبدني بضهر ايده على ضلوعي...يعني المفروض أراقب الرومانسيات دي و أنا ساكت لااااااااا... الساكت عن سيد و نوجه شيطان أخرس:
- بقولكو ايه...ما أجيبلكم اتنين لمون في الوقفه الشاعريه اللي إنتم فيها دي...آآآآه في ايه يا بابا انت بتهبد في حيطه.
- احترم نفسك يا ولد و بطل تعليقاتك الغير محترمه دي.
ماما:
- جيت ليه يا حاج؟
- جيت علشان إذا كنت هساعدكم في حاجه.
في عقل بالي... تساعدنا؟ من امته يا ابو السيد:
- بابا روح إنت الجامع...روقنا بقه العشر ايام دول.
ماما:
- مرعيييييييييي... عيب تقول لأبوك كده.
- بهزر يا بابا بهزر.
ماما بحنيه:
- خلصنا كل حاجه يا حاج.
- ايوه يا بابا...روح انت و ابقى تعاله قبل الفطار بنص ساعه... و متطلعش فوق... مش الرجاله هتقعد ف الدرو الأرضي.
- شوفي الواد يا نجاة... مش طايقني.
- لااااا يا بابا...إزاي تقول كده...أنا بقول بس علشان الإعتكاف بتاعك ميبوظش.
كنت حاسس إنه هيتف ف وشي بس الظاهر قرر يحافظ على صيامه فاكتفى إنه يديني نظره احتقار عميقه و مشى.

*****************************

الساعه خمسه و نص بدت الناس تهل...أول الواصلين كان عمي محمد و عائلته الكريمة و طبعاً على رأسهم ستي الحيزبونه...قصدي المصونه... بعد شويه سلامات و تلزيق في الخدود مسكت عبدو:
- حبيبي... ابن عمي الجمييييييييل...تعالى اوريك الكمبيوتر.
عمي:
- بس خد بالك لا يبوظلك حاجه ده شقي.
انت هتقولي يا عمو:
- شقي؟... عبووووودي شقي... لا لا متقولش كده.
إن شاء الله الواد ده هيطلع من تحت ايدي بعاهه مستديمه أو شبه مستديمه، ستي:
- أمك فين؟
هتكون فين يعني ... أكيد مزروعه ف المطبخ بتعملكم طفح:
- في المطبخ يا ستو.
- طيب يا حبيبي.
- بعد إذنكم يا جماعه.
جرجرت الواد من قفاه( بس بطريقه شيك و الله) و دخلت الأوضه و رزعت الباب ورايا و رميت الواد على كرسي جنب الباب (اللي قفلته بالمفتاح):
- اقعد هنا يا حبيبي.
الواد قام رفسني في ركبتي.
- آآآآه يا ابن ال... و لا بلاش.
ده إنت هتتروق... شغلت الكمبيوتر و شغلت قرآن و عليت الصوت على الآخر...إيمانيااااااااات يا عاااااااااالم و بدأت رحلة التعذيب.
بعد لما زهقت من شد ودان الواد و عضه و تنتيف شعره ...ايه؟...لا لا لا مش بضربه ده شد ودانه علشان أفردها كده بدل ما هيه عامله زي حتتين اللحمه حوالين وشه...و العض ده نوع من أنوع المساج...أما الشعر فده فرد...ايوه فرد من اللي بيتعمل ف الكوافير...القصد لما زهقت قمت ساحبه من طوقه:
- بقولك ايه ياض.
برهبه أول مره أشوفها على سحنة الواد الشيطانيه دي:
- ايو...ايوه يا عمو مرعي.
- متقولش مرعي.
- قــ...قصدي مي مي.
- حسّك عينك حد يعرف باللي حصل.
- محدش هيعرف.
طبعاً مظاهر البؤس اللي على وشه مخدعتنيش للحظه لكده أول ما فتحت الباب و سبت الولد حاول يرفسني بس انا اتفاديت رجله و اديته وحده في الباك بتاعته طيرته مترين قدامي، لما بقه في الصاله سقفتله:
- برااااااافو عليك يا حبيبي و كمان ليك في الجمباز...بصراحه يا عمو ابنك ده موهووووووب.
و قمت زاغر للواد زغره رزعته في مكانه.
طليت من باب المطبخ:
- ها يا نوجه؟ ايه الأخبار؟ الناس كلها وصلت.
- انا خلصت خلاص يا حبيبي.
- و البنات فين؟
- كانوا بيساعدوني بس راحوا اوضهم يغيروا هدومهم.
- طيب أخرجي اقعدي مع الناس معدش حاجه على الأذان

*************************

الأذان أذّن و الرجاله راحوا يصلوا أنا بقه صليت في جامع جنب بيتنا مسافة ما بيخلص الأذان بيقيم...انا مسميه جامع المستعجلين...ضربت الــ3 ركعات و جريت عالبيت آل ايه بساعد ماما في توزيع الأكل بين الدور الأرضي (حيث هياكل الرجاله) و الدور الأول (حيث هتتلقح الستات)...كنت عاوز الحق حاجه...مش هسمح باللي جرالي ف البلد يحصلي... و طبعاً كنت بدوق من كل صنف ييجي تحت ايدي...أي والله بدوق بس يعني يادوب كلت 5 صوابع كباب و مزمزت ورك فرخه و كم صابع محشي على طبق شوربه صغير و كنت رايح جاي بتطمن على طبق السلطه و البطاطس المحمره...
بس اللي استغربت ليه إن لما قعدت مع الناس آكل لقيت نفسي مش جعان... مش عارف ليه؟
بعد الأكل جت فقرة حلويات نوجه الرهييييييييبه...كنافه و قطايف و بقلاوه ...و طلعت من الحلويات دخلت على الفاكهه و رحت خدت بلانص في العصير و منه إلى التسالي... مش عارف ليه حاسس إني مش قادر أتنفس... و مكنتش شليف قدامي حتى البت رباب كانت قاعده تبتسلمي بس معرفتش الاغيها خالص لاني يادوب بالعافيه كنت شايفها، حتى لما اتصل بيا العدوي قلتله:
- مش خارج النهرده.
و الله خفت أرجع في وش جنا و لا ياسمين.
روحت عليتلنا الكريمه بعد لما أتت على الأخضر و اليابس...ده حتى الأكل و الحلويات الباقيه لفتهم ماما في أطباق و إدتهولهم...مش عارفه آخرتها إيه مع التاتار ده...ساعات بتمنى لو كنت مقطوع من شجره...و خاصة إن شجره عيلتنا مليانه نسانيس...نسانيس؟؟ هذ ما يذكرني بحفلة الوداع اللي عملتها لعبدو ابن عمي ههههههههه...لازم عمي ياخده يعمله اشاعه على ضهره أحسن يكون فيه حاجه...لا سمح الله

اشوفكم بكره يا حلوين
آآآآآآه مش عارف حاسس بتقل رهيب ف بطني...محدش يعرف نوع فوار يكون كويس...أما أروح اشرب ميه طرشي جايز تسلك العمليه

لـوريــن · 16-09-09, 05:30 PM

ياخسااااااااره ..

خلصتها كلها وانا ماحسيتش بيهاااااا ..

دا انا شايلة هم فرااق الواد ميمي ..

بعد مايخلص رمضاااان ..

عايزة اليوميات على طووول ..<طمااعة اوي..

تسلم الإيد اللي كتبت ..

واللي عرفتنا بالسكرة ميمي ..

تسلمي ياقشطة ..

وهاستنى باقي اليوميااات ..

اناهيد · 17-09-09, 08:09 AM

يسعد قلبك يا زيزي والله روعة ياليت كان فيه بارت ثاني
تسلم الايادي حبيبتي ومتابعة معاك

زاهره · 17-09-09, 09:51 AM

اقتباس:

المشاركة الأصلية كتبت بواسطة لـوريــن

ياخسااااااااره ..

خلصتها كلها وانا ماحسيتش بيهاااااا ..

دا انا شايلة هم فرااق الواد ميمي ..

بعد مايخلص رمضاااان ..

عايزة اليوميات على طووول ..<طمااعة اوي..

تسلم الإيد اللي كتبت ..

واللي عرفتنا بالسكرة ميمي ..

تسلمي ياقشطة ..

وهاستنى باقي اليوميااات ..

تسلمي يا عسل
و ولا يهمك في مشروع أكمل مي مي بعد رمضان بس مو أكيد

تشكرات على مرورك الجميل

زاهره · 17-09-09, 10:01 AM

اقتباس:

المشاركة الأصلية كتبت بواسطة اناهيد

يسعد قلبك يا زيزي والله روعة ياليت كان فيه بارت ثاني
تسلم الايادي حبيبتي ومتابعة معاك

مشكوره حبيبتي
الروعه روعة تواجدكم و تفاعلكم
و إن شاء الله هفكر ف موضوع الجزء التاني كويس
لاني خايفه اعمل جزء تاني و يطلع بايخ

زاهره · 17-09-09, 10:04 AM

اليوم الــ25
عودة صاحبة الصوت الحنيّن

بعد عزومه إمبارح الواحد حاسس إنه مش قادر يفيّص و لا حتى يقوم م النوم ...متهيألي إني كلت لإسبوع قدام.
يوووووه مين اللي بيتصل على الصبح ده:
- ألوووو.
- هوه أنا صحيتك من النوم؟
صوتها طير بقيت النعاس من عنيا و قمت منفوض على السرير:
- و لا يهمك.
- طب أقفل و أطلبك وقت تاني.
- لا لا... أنا فقت خلاص.
- مش قلتلك صحيتك من النوم.
استدعيت مهاراتي الدون جوانيه و قلت بهفهفه:
- و الواحد يلاقي أحسن من كده صوت يصحى عليه.
-..........
في ايه البت راحت فين؟
- الوووو... إنتي لسه معايا؟
- ايوه معاك... بس بجد كسفتني بزوقك.
- لا ده من زوق...دي صراحه.
طراااااااااااااااخ...صوت حلوفي:
- قوم م النوم يا مي مي بقه ماما عاوزاك.
من خضتي الموبايل وقع من ايدي....يادي النيله عليكي يا عليّه و على حنجرتك المسلّحه...مسكت التليفون:
- الو.
بتردد:
- هوه مين اللي كان بيناديلك ده؟
كان؟ و بيناديلك؟ و الله البنت معاها حق ...الصوت رجالي بكل معنى الكلمه....و كمان معاها حق ف الرعب اللي مالي صوتها بعد لما سمعت الجاعوره بتاعت اختي الرقيقه اللي رجعت تأوّأ تاني:
- ما تقووووووم بقه... إنت موراكش إلا التليفونات.
أه يا عليّة الكلب إن ما وريتك مبقاش أنا مي مي:
- بقولك ايه يا ... هوه إنتي مش ناويه تعرفيني إسمك.
- لما ابقى اشوفك.
- ماشي يا ستي... لغايه لما اشوفك و أعرف اسمك هسميكي غزال... بقولك ايه يا غزال.
- مممم
يا روحي عليها و على ممم بتاعتها:
- انا هقفل دلوقتي و نتكمل تاني...ده رقمك.
- ايوه.
- طيب باي.
- لا اله الا الله.
اهلاااااااااااا... احنا ابتدينا، بلعت ريقي:
- محمد رسول الله.
كنت هترَفّس في كرش عليّه بس ماما حاشتني بالعافيه

************************

بعد الفطار تليفون رن تاني...اخدت و جريت على الأوضه و أنا بغني... تليفوني رن آآآآه آآآآه ترررن ترررن و اللي ردت آه را عيني صوتها أحن، تحيّه:
- بلاش الأغنيه دي آخرتها وحشه.
- اطلعي انتي منها.
رزعت الباب ف وشها و رديت:
- الوووو.
- الوووو.
ييييييييييه هوه انا مش هاخد على صوتها أبداً تالت مره تكلمني و كل مره اتفاجئ بحنيتها الزايده:
- بقولك ايه؟ أنا زهقت مكالمات... إنتي مزهقتيش؟
- آه و الله زهقت.
إيه ده البت واقعه واقعه:
- خلاص اشوفك بكره؟
- أوك فين؟
ياااااااااااه دي واقعه واقعه واااااااااااااااااقعه:
- في نادي الحوار جنب حمام السباحه أوك؟
- أوك... الساعه كام؟
- مممممم الساعه 8 و نص يناسبك؟
- يناسبني أوي.
واااااااااااااااااااااااا ااااقعه:
- طيب اتفقنا إنتي هتكونني لابسه ايه؟
- بنطلون جينز و فست أحمر ف أبيض و الطرحه أحمر ف أبيض... و إنت.
- هطقّم معاكي و هديها أحمر... بس مش فأبيض يا ابو قلب ابيض.
ضحكه رقيقه:
- إوك باي.
- باي.
خرجت من الأوضه و أنا بغني... تليفوني رن آآآآآآه آآآآآآه.... اعترضت تحيّه طريقي:
- عاوزاك ف كلمه.
سحبتني على أوضتها:
- اسمع يا خايب... مش علشان البت صوتها حلو حنين ترمي نفسك الرميه السودا دي.
- رميه ايه و سودة ايه هوه انا رايح أكتب عليها.
- بلا تكتب بلا تقرا... انا متأكده إن البت دي مش شبه صوتها.
زغرتلها:
- و إنتي سمعتي صوتها منين؟
بصت ف الأرض:
- اخدت نمرتها من على موبايلك و طلبتها أنا و عليه و رقيه.
- عملتي ايييييييييه؟
- الحق علينا كنا عاوزين نتطمن عليك.
- تطمنو على ايه هوه انا هتجوزها...ده أنا همشي معاها.
بتريقه:
- و لوووووو..... لازم متضرش بسمعتك كدون جوان.
فكرت... البت معاها حق و الله:
- طب قوليلي ايه رايك ف مقابلة بكره؟
اوووووبس وقعت بلساني:
- إنت رايح تقابلها بكره؟ أكيد اتفقتهم هتلبسوا ايه علشان تعرفو بعض.
مسكتها من دراعها:
- و عرفتي منين يا بت؟
- آآآآي من الأفلام... سيبني.
سبتها:
- آه أصلي بحسب.
- و لا تحسب و لا تطرح ركز معايا.
- مركز أهو.
- بص إنت تروح بس متلبسش اللبس اللي قلتلها عليه بحيث تعرفها بس هيه متعرفكش و تشوف بقه هتظهر و لا لأ على حسب.
- على حسب ايه؟
- مالك يا مي مي إنت غبي النهرده كده ليه؟
- معلش ياختي اصل البت صوتها حكايه.
- مبقاش تحيّه إن ما طلعت البت مقلب... كنا بنقول ايه...آه تظهر أو لأ على حسب شكلها لو حلوه تروح و تكلمها و طبعاً هتسالك على اللبس قولها اي حاجه من كلامك المعسول (آخ ده أنا نسيت المفروض البس ايه من لهفتي) أو أي حاجه تانيه و لو طلعت وحشه و ده اللي أنا حاساه إخلع.
- اشطه عليكي يا بت يا عليه.

فضلت طول اليوم بفكر في لقاء بكره و ايه اللي هيحصل فيه... و كبر الشك اللي زرعته فيا البت عليه الله يسامحها.. طب لو طلع كلامها صح ايه اللي هيحصل؟ يلا اهو أنا هاخد إحتياطاتي... ربنا يخيب كلامك يا عليه.

اشوفكم بكره يا أمامير
أما اشوف ايه اللي مستنيني بكره... لما أرجع هبقى أحكيلكم بس انتو ادعولي بقه.... سلام
اليوم الــ25
عودة صاحبة الصوت الحنيّن

بعد عزومه إمبارح الواحد حاسس إنه مش قادر يفيّص و لا حتى يقوم م النوم ...متهيألي إني كلت لإسبوع قدام.
يوووووه مين اللي بيتصل على الصبح ده:
- ألوووو.
- هوه أنا صحيتك من النوم؟
صوتها طير بقيت النعاس من عنيا و قمت منفوض على السرير:
- و لا يهمك.
- طب أقفل و أطلبك وقت تاني.
- لا لا... أنا فقت خلاص.
- مش قلتلك صحيتك من النوم.
استدعيت مهاراتي الدون جوانيه و قلت بهفهفه:
- و الواحد يلاقي أحسن من كده صوت يصحى عليه.
-..........
في ايه البت راحت فين؟
- الوووو... إنتي لسه معايا؟
- ايوه معاك... بس بجد كسفتني بزوقك.
- لا ده من زوق...دي صراحه.
طراااااااااااااااخ...صوت حلوفي:
- قوم م النوم يا مي مي بقه ماما عاوزاك.
من خضتي الموبايل وقع من ايدي....يادي النيله عليكي يا عليّه و على حنجرتك المسلّحه...مسكت التليفون:
- الو.
بتردد:
- هوه مين اللي كان بيناديلك ده؟
كان؟ و بيناديلك؟ و الله البنت معاها حق ...الصوت رجالي بكل معنى الكلمه....و كمان معاها حق ف الرعب اللي مالي صوتها بعد لما سمعت الجاعوره بتاعت اختي الرقيقه اللي رجعت تأوّأ تاني:
- ما تقووووووم بقه... إنت موراكش إلا التليفونات.
أه يا عليّة الكلب إن ما وريتك مبقاش أنا مي مي:
- بقولك ايه يا ... هوه إنتي مش ناويه تعرفيني إسمك.
- لما ابقى اشوفك.
- ماشي يا ستي... لغايه لما اشوفك و أعرف اسمك هسميكي غزال... بقولك ايه يا غزال.
- مممم
يا روحي عليها و على ممم بتاعتها:
- انا هقفل دلوقتي و نتكمل تاني...ده رقمك.
- ايوه.
- طيب باي.
- لا اله الا الله.
اهلاااااااااااا... احنا ابتدينا، بلعت ريقي:
- محمد رسول الله.
كنت هترَفّس في كرش عليّه بس ماما حاشتني بالعافيه

************************

بعد الفطار تليفون رن تاني...اخدت و جريت على الأوضه و أنا بغني... تليفوني رن آآآآه آآآآه ترررن ترررن و اللي ردت آه را عيني صوتها أحن، تحيّه:
- بلاش الأغنيه دي آخرتها وحشه.
- اطلعي انتي منها.
رزعت الباب ف وشها و رديت:
- الوووو.
- الوووو.
ييييييييييه هوه انا مش هاخد على صوتها أبداً تالت مره تكلمني و كل مره اتفاجئ بحنيتها الزايده:
- بقولك ايه؟ أنا زهقت مكالمات... إنتي مزهقتيش؟
- آه و الله زهقت.
إيه ده البت واقعه واقعه:
- خلاص اشوفك بكره؟
- أوك فين؟
ياااااااااااه دي واقعه واقعه واااااااااااااااااقعه:
- في نادي الحوار جنب حمام السباحه أوك؟
- أوك... الساعه كام؟
- مممممم الساعه 8 و نص يناسبك؟
- يناسبني أوي.
واااااااااااااااااااااااا ااااقعه:
- طيب اتفقنا إنتي هتكونني لابسه ايه؟
- بنطلون جينز و فست أحمر ف أبيض و الطرحه أحمر ف أبيض... و إنت.
- هطقّم معاكي و هديها أحمر... بس مش فأبيض يا ابو قلب ابيض.
ضحكه رقيقه:
- إوك باي.
- باي.
خرجت من الأوضه و أنا بغني... تليفوني رن آآآآآآه آآآآآآه.... اعترضت تحيّه طريقي:
- عاوزاك ف كلمه.
سحبتني على أوضتها:
- اسمع يا خايب... مش علشان البت صوتها حلو حنين ترمي نفسك الرميه السودا دي.
- رميه ايه و سودة ايه هوه انا رايح أكتب عليها.
- بلا تكتب بلا تقرا... انا متأكده إن البت دي مش شبه صوتها.
زغرتلها:
- و إنتي سمعتي صوتها منين؟
بصت ف الأرض:
- اخدت نمرتها من على موبايلك و طلبتها أنا و عليه و رقيه.
- عملتي ايييييييييه؟
- الحق علينا كنا عاوزين نتطمن عليك.
- تطمنو على ايه هوه انا هتجوزها...ده أنا همشي معاها.
بتريقه:
- و لوووووو..... لازم متضرش بسمعتك كدون جوان.
فكرت... البت معاها حق و الله:
- طب قوليلي ايه رايك ف مقابلة بكره؟
اوووووبس وقعت بلساني:
- إنت رايح تقابلها بكره؟ أكيد اتفقتهم هتلبسوا ايه علشان تعرفو بعض.
مسكتها من دراعها:
- و عرفتي منين يا بت؟
- آآآآي من الأفلام... سيبني.
سبتها:
- آه أصلي بحسب.
- و لا تحسب و لا تطرح ركز معايا.
- مركز أهو.
- بص إنت تروح بس متلبسش اللبس اللي قلتلها عليه بحيث تعرفها بس هيه متعرفكش و تشوف بقه هتظهر و لا لأ على حسب.
- على حسب ايه؟
- مالك يا مي مي إنت غبي النهرده كده ليه؟
- معلش ياختي اصل البت صوتها حكايه.
- مبقاش تحيّه إن ما طلعت البت مقلب... كنا بنقول ايه...آه تظهر أو لأ على حسب شكلها لو حلوه تروح و تكلمها و طبعاً هتسالك على اللبس قولها اي حاجه من كلامك المعسول (آخ ده أنا نسيت المفروض البس ايه من لهفتي) أو أي حاجه تانيه و لو طلعت وحشه و ده اللي أنا حاساه إخلع.
- اشطه عليكي يا بت يا عليه.

فضلت طول اليوم بفكر في لقاء بكره و ايه اللي هيحصل فيه... و كبر الشك اللي زرعته فيا البت عليه الله يسامحها.. طب لو طلع كلامها صح ايه اللي هيحصل؟ يلا اهو أنا هاخد إحتياطاتي... ربنا يخيب كلامك يا عليه.

اشوفكم بكره يا أمامير
أما اشوف ايه اللي مستنيني بكره... لما أرجع هبقى أحكيلكم بس انتو ادعولي بقه.... سلام

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري