[تانياتاني]

رواية " نصيب الورد "
قصة : - د/ تانيا أحمد محمد محسن.

مقدمة

طلب 'عبد الحميد' من أخته 'حنان'
تدور له عروسة مجهولة و مليانة عيوب علشان يأدب مراته الأنانية 'نرجس' و تعرف إنه فضل عليها واحدة بشعة ! ! ! . . .
💓 💓 💓
فحصل إنه قابل 'توليب' بمساعدة أخته 'حنان' ووقع في غرامها وهو ما يعرفش عنها إنها هي مراته المجهولة ! ! ! . . .
و بعد ما كان 'عبد الحميد' رافض انه يشوفها بقى غصب عنه مش قادر يبعد عنها ! ! ! . . .
💕 💕 💕


جميع الشخصيات الموجودة في رواياتي هم أشخاص حقيقين قابلتهم في حياتي، اخذت من صفاتهم وطبائعهم لكن قمت بتغيير أسمائهم وتعديل قصتهم لتناسب أحداث كل رواية"
مع خالص تحياتي ...

الفصل الأول

１- عبد الحميد.


وقف 'عبد الحميد' دقائق قليلة قدام باب بيت أخته 'حنان' وهو متردد قبل ما يشجع نفسه و يضرب جرس الباب ..
فتح له زوج أخته 'فادي' الباب و هو حامل على كتفه إبنه الرضيع 'كريم' و تفاجأ من زيارة 'عبد الحميد' الغير متوقعة ..
'فادي' - بدهشة - : - 'عبد الحميد' !!!
إيه اللي جابك !!

خجل 'فادي' من رده فعله للمفاجأة فإبتسم ..
'فادي' : - اه العفو منك مش قصدي أتفضل دا البيت نور !!

دخل 'عبد الحميد' البيت و هو فاهم نية جوز أخته الصافية ..
'فادي' - بإبتسامة - : - أصل دي أول مرة تزورنا فيها من غير ما تقولِّنا !!
'عبد الحميد' : - إيه مش عاجبك زيارتي !!
اطمن هي دقيقة أشوف أختي و أرجع مكان ما جيت !!
'فادي' : - هاهاها إيه يا راجل ما انت عارف إن البيت بيتك !!
'عبد الحميد' : - متشكر !!
طب لو سمحت خش انده لي 'حنان' أنا عايز أتكلم معاها في موضوع مهم !!
'فادي' : - 'حنان' مش موجوده !!
هي من الصبح في بيت صحبتها !!

'عبد الحميد' : - مين صحبتها !!
اه أنت قصدك 'توليب' !!
'فادي' - بدهشة - : - و أنت تعرفها منين ؟!

'عبد الحميد' - بسخرية - : - ما إحنا ما نعرفش ل 'حنان' صديقة من أيام دراستها في الكلية غير صحبتها 'توليب' دي !!
هاهاهاها فكرتني بحركات 'حنان' !!
تصور يا 'فادي' 'حنان' كانت عايزه تجوزني بيها !!
و فضلت تبعت لي إيميلات تكلمني عنها و تحاول تقنعني و ما هديتش غير لما إتجوزت 'نرجس' !!
'فادي' : - الحقيقة 'حنان' كان عندها حق دي ملاك !!
'عبد الحميد' : - مش مهم بس قول لي دلوقتي هي 'حنان' بتعمل إيه عندها من الصبح !!
عروسة و بتجهزها !!!
'فادي' - بحزن - : - لا للأسف والدها مات النهارده وقت الفجر و 'حنان' راحت علشان تواسيها و تساعدها في إجراءات الجنازة و إستقبال المعزيين !!
البنت مالهاش حد من بعد موت والدها الله يرحمه !!
'عبد الحميد' : - الله يرحمه طيب حاول تتصل ب 'حنان' و أطلب منها تروح دلوقتي لأني مش عايز أمشى من هنا غير لما أكلمها في الموضوع اللي أنا جاي لها علشانه !!
'فادي' : - حاضر دقيقة بس !!

دخل 'فادي' اوضة النوم و أخذ موبايله من فوق الكمادينو و أتصل ب 'حنان' ..

... " 'فادي' 38 سنة ، طويل ، جسم نحيف ، عيون واسعة لون اسود ، شعر خفيف اسود ، بشارب و لحية مهذبة ، وهو جار و صديق ل 'عبد الحميد' من الطفولة " ...

# * # * # * # * #

في بيت 'توليب' ..
بصت 'حنان' بحزن لصديقتها 'توليب' و هي بتبكي على موت والدها ..

... " 'حنان' ، 3٦ سنة ، جميلة ، عيونها سود ، و بشعر اسود طويل ، نحيفة ، متوسطة الطول ، خريجة أداب فرنسي " ...

'حنان' - لنفسها - ... " يا حبيبتي !!
عمي راح بعد عمتي و بقيتي عايشه لوحدك !!
ضيعتي عمرك و أنتي بترفضي كل العرسان اللي أتقدموا لك علشان تخذي بالك من والدك الله يرحمه !!
ربنا يعوض صبرك !! " ...

'حنان' - بتأثر - : - خلاص يا 'توليب' بطلي عياط عمي 'عبد الصبور' ما كنش هيرضا يشوفك و أنتي بتعيطي كده !!
أرجوكي بس على الأقل علشان عمي أنتي عارفة أنه أرتاح من مرضه !!
هو تعب كثير المفروض تقعدي تدعي له و تترحمي عليه !!
'توليب' - ببكاء - : - أنا عارفة يا 'حنان' بكل اللي إنتي بتقوليه و الحمدلله أنا مرتاحة لأني ماسبتوش و لا لحظة واحدة و خدمته بكل طاقتي و جهدي و أخذت دورات إسعافية علشان اقدر اهتم بصحته و أعرف ادي له أدويته و رفضت اتجوز علشان ماتخدنيش منه مسؤولية الجواز !!
'حنان' : الحمدلله انتي مؤمنة و راضية بحكم الله فأحتسبي موته عند ربنا !!
'توليب' : - و نعم بالله بس بفكر البيت العريض ده هيكون فاضي من غيره و هشتاق له كثير !!

... " 'توليب' ، ٣٦ سنة ، جميلة ، عيونها بني غامق ، و شعر بني طويل ، متوسطة القامة ، ممتلئة ، خريجة أداب فرنسي " ...

'حنان' : - خليكي قويه أومال و اهتمي بالناس اللي جايه تعزيكي و سيبي أمورك لربنا هو مدبر الأمور !!

قطع حوارهم صوت رنه موبايل 'حنان' ..
شافت 'حنان' لشاشة موبايلها و قرأت أسم جوزها و إستقبلت المكالمة ..
'حنان' : - أيوااا يا حبيبي الأولاد بخير !!
سمعت 'حنان' كلمتين من جوزها و قامت بسرعة من مكانها ..
'حنان' : - قول له طيب أنا جايه حالاً خليه يستناني مسافة السكة يلا مع السلامة يا حبيبي !!

التفتت 'حنان' لصديقتها 'توليب' و حضنت إيدها بكفها ..
'حنان' : - سامحيني يا حبيبتي أنا عارفة انه ماينفعش اسيبك في الظروف دي لكن اسمحي لي أمشي دلوقتي و هبقى أرجع لك في الليل و هبات معاكي كمان !!

'توليب' : - 'حنان' مافيش داعي تتعبي نفسك و ترجعي بالليل !!
ولادك محتاجين لك أكثر مني !!
'حنان' : - اسكتي !!
انا مش واحدة غريبه خليني بس أروح أشوف أخويا أسلم عليه و أعرف منه هو عاوز مني ايه هرجع لك على طول !!
و دلوقتي امسكي نفسك كلنا لها و ربنا يصبرك على فقدان عمي !!

'توليب' : - الحمدلله متشكره يا 'حنان' !!
'حنان' : - في أمان الله حبيبتي !!
'توليب' : - الله يخليكي ليا تروحي و ترجعي بالسلامة !!
في أمان الله !!

# * # * # * # * #

ألتفت 'فادي' ل 'عبد الحميد' ..
'فادي' : - أهي جايه و على بال ما توصل أنا هستئذنك اروح المطبخ أجهز لنا الغداء !!

'عبد الحميد' : - طب ما تخلينا نطلب أكل جاهز و بلاش تتعب نفسك و ماتقلقش الحساب هيكون عليا !!
'فادي' : - هاهاها لا شكراً !!
أنا و 'حنان' متفقين من بداية جوازنا إنه ما يدخلش بيتنا اي اكل جاهز علشان نحافظ على صحة أولادنا ما إحنا عايزين بيت العز يفضل عز بصحتنا !!

حس 'عبد الحميد' بمرارة و قهر من كلام 'فادي' و حس بالنقص الموجود في بيته و اللي ما قدرش يعوضه بكل الملايين اللي معاه !!
عمره بقى 3٨ سنة و لسه مايعرفش يعني إيه إستقرار و حب العيله !!!

و غاص 'عبد الحميد' بين ذكرياته القديمة ..
ستة عشر سنة لوراء ..

# * # * # * # * #

２- في فرنسا.

بعد نجاح 'عبد الحميد' في الثانوية العامة قرر يكمل دراسته في أوروبا زي بقية أولاد الأغنياء فحقق حلمه ببيع ميراثه من والدته لخاله 'فرحان' و سافر يدرس في أعرق الجامعات الفرنسية ..
و خاله الطيب ماقصرش معاه و وفر له كل ما يحتاجه من مصاريف في غربته ..

أفتكر 'عبد الحميد' ازاي اجتهد بكل طاقته و جهده فكان في الصبح يدرس اللغة الفرنسية و الهندسة المعمارية و في الليل يأخذ دروس ليليه في اللغة الإيطالية و الألمانية و إدارة الأعمال ..

و في السنة الرابعة من دراسته لفت انتباهه البنت الحلوة 'نرجس نصر الدين' اللي كانت في نفس قسمه لكن في سنة ثانية بجمالها و بياض بشرتها و رشاقتها و عيونها الخضراء و شعرها الأصفر القصير ..
تقرب 'عبد الحميد' من صديقاتها حتى يعرف معلومات عنها و عرف منهم إنها بتملك جنسيتين مختلفين من الأب المصري و الأم الفرنسية و انبسط لما عرف ان أبوها رجل الأعمال المشهور في مصر و أوروبا ..

فكر 'عبد الحميد' إنه لازم يزيد من جهده حتى يقدر يوقع 'نرجس' في حبه و يقدر يدخل كل ملايين والدها في جيبه لإنها هتكون الوريثة الوحيدة لأموال والدها ..

خطط 'عبد الحميد' بذكاء كبير إزاي يوقعها في حبه و لإنه كان فاهم بأصناف الناس فهم إزاي يلعب عليها و يصطادها من غير ما تحس إنه عينه كانت عليها و من أول يوم ما شافها ..

عرف عنها 'عبد الحميد' إنها من النوع اللي بيجي لها كل حاجة لحد عندها بسهولة و ترجع تمل منها بسرعة فكان يظهر قدامها و يرجع يطنشها كأنها مش في باله و مش من نوعه المفضل ..
ساب الفريسة تتخيل نفسها إنها الصياد و سابها تدخل في الفخ برجليها من غير محد يسمى عليها ، و انقض عليها الصياد بخفه و قبض عليها بذكائه !!

كلمت 'نرجس' والدها 'جمال' عنه و طلبت منه يجوزها ل 'عبد الحميد' بإي طريقة و لو يشتريه بالفلوس زي ما بيشتري لها كل حاجاتها ..
خاف والدها لو يكون 'عبد الحميد' شاب فاسد زي كل اصحابها اللي قبله فبعث مخبرين يبحثوا في تاريخه و عن ماضيه كله حتى بنوع الحليب اللي شربه و هو رضيع ..

بعد إسبوع وصل ملف 'عبد الحميد' لمكتب 'جمال' و انبسط قوي لما شاف في التقرير إنه شاب عصامي و بيدرس ليل و نهار و مافيش معاه وقت لإشباع رغباته و نزواته و يضيع وقته زي بقية الشباب ..

فكر 'جمال' يقرب 'عبد الحميد' منه و يخليه تحت الأختبار في البداية حتى يتأكد من نزاهته و بعدها يعرض عليه الجواز من بنته و يسلمه أملاكه بعد عمر طويل إن شاء الله ..

# * # * # * # * #

و بعد أيام قليلة ..

دخل 'عبد الحميد' مقر شركة 'جمال نصر الدين' و هو مبسوط من نفسه لأنه قدر يحقق أول خطوة في نجاحه لدخول عالم المليونيرات ..

في مكتب ' جمال ' دخل 'عبد الحميد' بخطوات واثقة من شخصيته و بغرور من ذكائه ..
أبتسم 'جمال' لما شاف 'عبد الحميد' و قام عن مكتبه بتواضع و سلم عليه و أعجب بوسامته و شخصيته و أناقته ..

... " 'عبد الحميد الأشول' ، طويل القامة ، بكتف عريض ، و عيون سوداء ، و شعر اسود كثيف ، أسمر البشرة ، حليق الوجه و بفك عريض " ...



بص 'عبد الحميد' ل ' جمال ' و بدأ يشعر بخوف من نتيجة خطوته و جاء له إحساس داخلي بتأنيب ضمير " هل اللي بيعمله صح !! " ..

... " 'جمال نصر الدين' ، متوسط القامة ، شديد بياض البشرة و بحمره خفيفه على خدوده لأصوله المختلطة التركية البنمية ، ٤٦ سنة ، ممتلئ الجسم ، بشنب عريض ، و عيون زرقاء ، و شعر بني فاتح ، صاحب عقل رزين و ذكاء " ...

' جمال ' - بإبتسامة - : - اهلاً و سهلاً بيك في شركتي اتشرفت بمقابلتك !!
'عبد الحميد' : - الشرف ليا 'جمال' بيه أنا انبسطت قوي لما كلمتني ' نرجس ' إنك عايز تتعرف عليا في شركتك !!
لو تعرف من زمان و أنا نفسي أتعرف براجل ناجح زيك و ب ...!!!
' جمال ' - بلا مبالاة - : - اقعد يا أبني أنا ما بحبش المجاملات كل إنسان و عارف بمقداره !!

'عبد الحميد' - بحماس - : - حضرتك من الناس النادرة اللي ما بتحبش المجاملات و سماع الإطراء
و انت دلوقتي كبرت في نظري أكثر !!
' جمال ' - بجدية - : - و أنت كمان عايزك تكبر في نظري !!
أنا عارف حبك لبنتي هو علشان بس توصل لي أنا و لفلو ... !!!

أحمر وش 'عبد الحميد' من صراحة 'جمال' و كشفه لخطته بكل سهوله فقطع كلامه بسرعة علشان يرجع ماء وشه اللي هيضيع ..
'عبد الحميد' - بغضب - : - لو سمحت أنا مش جاي هنا علشان تهزئني و تفكر إني إنسان إنتهازي و بالخسه دي و اني عايز أستغل عواطف بنتك علشان أحقق أحلامي !!!
أفتكر أنت من طلب مقابلتي و لو أنت فاكر إن حبي ل ' نرجس ' حب مصلح ...!!!

' جمال ' - مقاطع - : - ايواااا بشكرك أنت قلت بالنيابة عني كل الكلام اللي كنت عاوز اقولهولك و انت بكدا اختصرت عليا الطريق !!!
'عبد الحميد' - بتهكم - : - همم يعني انت لسه ما قولتش الكلام اللي كنت عاوز تقوله !!!
اومال انت كنت هتقول ايه كمان لو أنا فضلت ساكت و أنت بتتهمني ...!!

ما قدرش يكمل 'عبد الحميد' فقطع كلامه و قام من مكانه بغضب ..
'عبد الحميد' : - دلوقتي اسمح لي اخرج و أوعدك إني هبعد عن طريق بنتك و مش هتشوفني هنا ثاني !!
'جمال' - بسخرية - : - طبعاً ما أنت واثق من نفسك إنك خلاص وقعت بنتي الوحيدة في حبك و مش هتقدر تسيبك و هتضغط عليا اعمل اللي انت عاوزه منها !!
اسمع يا ابني أنا قادر أخذ بنتي اسفرها لأبعد قارة و ابعدها عنك !!
و هشتري لها شويه مجوهرات و شنط و صدقني هي هتنساك بكل سهولة و من أول أسبوع !!!
ماتفكرش إني بنيت نفسي و حافظت على أملاك جدودي و انا معايا عقل غبي علشان يجي شاب صغير يفكر انه يقدر يأخذ اللي ورايا و اللي قدامي عن طريق حبي لبنتي دي خطة بقت قديمة قوي !!!

خاف 'عبد الحميد' من تهديد ' جمال ' إن 'نرجس' ممكن تنساه بسرعة و تضيع كل تخطيطه و أحلامه و فعلاً هو كان مفكر إنها ورقته الرابحة في الضغط على والدها ..

شاف 'عبد الحميد' انه مافيش فايدة من اللعب مع شخص أذكى منه بكثير فسكت و انتظر من 'جمال' يعرف إيه هي نهاية المقابلة !!!

'جمال' : - أول حاجة أقعد و خلينا نشرب قهوة و بعديها هقول لك ليه أنا طلبت مقابلتك !!

قعد 'عبد الحميد' بهدوء على الكرسي و هم كبير انزاح من صدره لأنه مش هيدخل الأسرة بالمكر و الخديعة فأوراقه بقت مكشوفة !!!

'جمال' - لنفسه - ... " انت معدنك أصيل و هيثمر فيك تعبي أنا عاوز ارجع مصر أستقر و استثمر فلوسي فيها و انت اللي هعتمد عليه !!! " ...

# * # * # * # * #

افتكر 'عبد الحميد' بداية عمله على القرية السياحية في شرم الشيخ و ازاي اشتغل فيها بكل طاقته و إيده و عرقه ..
بإيده رسم كل شبر في القرية و بعرقه بنى كل طوبة من بيوت القرية ..

و بعد المقابلة بإربع سنوات إتحقق ثاني حلم ل 'عبد الحميد' و أتجوز 'نرجس' في افخم عرس و حضور معازيم من كل العالم ، و اكتملت فرحته بولاده أولاده التوأم "بصعوبة" الجميلين 'آدم' و 'آيريس' أخذوا من شخصيته و أخذوا من جمال والدتهم 'نرجس' ..

و دلوقتي أفتكر ' عبد الحميد ' سبب زيارته لأخته ' حنان ' ..
السبب هي ' نرجس' مراته المغرورة ..
في الأيام الأولى من خطوبتهم اكتشف شخصية 'نرجس' الأنانية و خلال شهور الحمل إتحمل طبيعتها العصبيه و جنونها على أتفه الأسباب و إزاي في لحظات عصبيتها كانت تقوم تصرخ و تجري تقطع أوراق رسم تخطيط المشروع و ترمي كل أيام سهره و تعبه في الرسم عرض الحائط ..

و بعد ولادتها سابت تربية أولادهم بالكامل ل المربية الإسبانية و افتكر لحظات تأففهها في وجود أولادهم و خصوصًا لو طفل منهم احتاج لتنظيف فكان يقوم عنها 'عبد الحميد' بتنظيف التوأم و تغيير الدايبرس بنفسه لأن الهانم ماتتنازلش بتنظيفهم لو كانت المربية مش موجودة ..

و أخيراً طفح الكيل بتصرفاتها الغير مسؤولة و قرر إنه يأدبها بعد سفرها مع والديها لفرنسا من غير ما تأخذ إذن منه و كأنها عايشه من غير راجل في حياتها و حلف لها 'عبد الحميد' في اتصال موبايل إنها لما ترجع لمصر هتلاقي نفسها و بقى معاها ضرة تنافسها عليه ..

# * # * # * # * #




３- طلب مستعجل!

دخلت 'حنان' بيتها بلهفة و جريت تحضن اخوها بقوة و هي فرحانة بزيارته المفاجأة ..
و في نفس الوقت سمعوا صوت وصول باص مدرسة بنات 'حنان' ..
نزلوا بناتها 'فرح' و 'سارة' من الباص و دخلوا على البيت و جريوا يحضنوا خالهم مبسوطين بوجوده لانه دايما حنون معاهم وبيديهم مبلغ كويس لإسعادهم ..

دخل 'فادي' الصالة و نادى عليهم ..
'فادي' : - يلا الغداء جاهز و مستنيكم على السفرة و أنتوا يا بناتي الامورات تعالوا بقى أساعدكم علشان تغيروا هدومكم و تغسلوا أيديكم قبل ما تاكلوا !!

أخذ 'فادي' بناته و ترك 'عبد الحميد' مع 'حنان' في الصالة لوحدهم ..

'عبد الحميد' - بإعجاب - : - ما شاء الله معاكي راجل حقيقي مايقدرش بثمن !!!
و في شبابنا كنا في المدرسة بنحترمه لألتزامه و أخلاقه العالية!!
' حنان ' - بابتسامة - : - الحمدلله ربنا رزقني بزوج متفاهم و عمري ما شفت منه حاجة تزعلني و لا حتى بكلمة واحدة !!
'عبد الحميد' - بحسرة - : - ما شاء الله ربنا يخليكم لبعض !!
طب تعالي دلوقتي و خلينا نقعد أنا عايز أتكلم معاكي في موضوع مهم بسرعة قبل ما يرجعوا البنات و يقاطعونا !!!

'حنان' - باستغراب - : - حاضر !!
دخلت 'حنان' مع 'عبد الحميد' أوضة الصالون و قعدت جنبه في أكبر كنبه في الاوضة ..
'حنان' : - أتكلم يا اخويا !!
قولي إيه هو الموضوع المهم !!

سكت ' عبد الحميد ' لحظات و تردد إنه يفتح الموضوع و لكن حسم أمره لما افتكر عمايل مراته 'نرجس' المغرورة ..
'عبد الحميد' - ببطء - : - 'حنان' !!!
أنا عايز اتجوز !!
قامت 'حنان' من مكانها بفرحه و حماس ..
'حنان' : - يعني أنت خلاص طلقت 'نرجس' بنت الإيه مش قادره انطق و اقول عنها أنها كانت مراتك !!
لو تعرف يا أخويا انا كنت مستنيه اللحظة دي من زمان مش مصدقة إنك خلاص خلصت من مراتك المجنونة دي خلت عيشتك طينه مهببه !!!
نفسي اخرج دلوقتي و اوزع حلاوة طلاقك لكل واحد اقابله في الشارع دا أنا من فرحتي عايزه ازغرط !!

رفعت 'حنان' إيدها فوق شفايفها تستعد لزغروطه طويلة لكن 'عبد الحميد' مسك إيد اخته بسرعة و نزلها قبل ما تزغرط و يسمعها حد و يسأل عن السبب ..
'عبد الحميد' - بغضب - : - إقعدي إنتي عايزه تعملي إيه و إيه الكلام اللي أنتي بتقوليه !!
اسمعي اول حاجة أنا ما طلقتش ' نرجس ' و مش بفكر اطلق علشان ولادي مش هحرمهم من أمهم و كمان لاني بحترم والدها اللي أخد بإيدي واعتبرني زي إبنه بالضبط !!!
'حنان' - بعصبيه - : - و يعني هي من أمتى كانت أم لولادك !!
ماتقلقش يا أخويا ولادك مش هيشوفوا فرق في وجودها او من غير وجودها !!
'عبد الحميد' - بحده - : - 'حنان' !!!
'حنان' - بقهر - : - طيب خلينا في المهم طالما انت مطلقتش 'نرجس' فإيه اللي أنت عاوزه مني دلوقتي ؟!

'عبد الحميد' : - زي ما قولتلك عايزك تدوري لي على واحدة اتجوزها !!

'حنان' - بسخرية - : - بس كده !!
طيب و حضرتك عايزني ادور لك عليها من أنهي سوق إن شاء الله ؟!

'عبد الحميد' : - أنا ما بهزرش أنا بتكلم جد انا هتجوز علشان بس أإدب 'نرجس' !!
قرصة ودن يعني !!
'حنان' : - اه و بعدين تطلق العروسة !!
هو أنت عاوز القرصة لكم شهر ؟!
'عبدالحميد' : - ما اعرفش على حسب الوقت اللي تحتاجه 'نرجس' علشان تتعلم إزاي تحترم جوزها !!
'حنان' - بحده - : - 'عبد الحميد' !!!
أنت عارف إنه حرام الجواز و أنت ناوي على الطلاق !!

قربت 'حنان' أكثر من 'عبدالحميد' ..
'حنان' : - أسمع أنا مش هشترك معاك في الذنب يا باشمهندس !!
و لو سيادتك عاوز تأدب مراتك شوف لك على طريقة ثانية أسهل لك و سيب فكرة الجواز بالمرة !!!
بنات الناس مش لعبة تتجوزها و بعدين تطلقها !!!
'عبد الحميد' : - طب خلاص اطمني اوعدك إني مش هطلق أنا هخليها تبقى في ذمتي و هصرف عليها طول عمرها بس على شرط !!!
'حنان' : - و كمان في شرط على المسكينة قصدي على العروسة يلا قول سمعني !!
'عبد الحميد' : - الشرط إنها ما تحاولش تتعرف عليا لاني مش عايز أتعرف عليها اقصد هي تفضل عايشه في مكانها في بيت اسرتها و مصروفها هيوصل لحد عندها كل أول شهر !!

'حنان' - بذهول - : - و مين دي اللي هتقبل على نفسها إنها تتجوز و هي عايشه في بيت ابوها ؟!!

'عبد الحميد' : - و اللهِ في ستات كثير هتوافق !!
'حنان' - بإستهزاء - : - و مين دي المجنونة !!
'عبد الحميد' : - ايوااا هو ده اللي مطلوب منك !!
'حنان' - بدهشة - : - عاوز عروسة مجنونة !!!
'عبد الحميد' : - اسمعيني أنتي يا مجنونة الأمر بكل بساطة أنك هتنقي لي أبشع عروسة تشوفيها !!

فتحت 'حنان' فمها ببلاهة مستغربة من مواصفات طلب اخوها ل العروسة ..
'عبد الحميد' : - أقفلي بقك اول حاجة !!
ثاني حاجة عايزه تعرفي ليه !!

طبقت 'حنان' فمها و هزت رأسها بصمت ..
'عبد الحميد' : - لأني عايز اضرب العصفورتين بحجر واحد !!
'حنان' : - تضربهم إزاي !!
يعني ازاي هتضرب 'نرجس' و العروسة في وقت واحد أنت اليوم مش طبيعي !!
هي ايه الحاجة اللي هيكونوا مشتركين فيها !!
'عبد الحميد' : - لو تشغلي مخك الصغير معايا شويه هتفهميني بسرعة !!
اول حاجة 'نرجس' هتموت لما تعرف اني فضلت عليها واحدة بشعة مش من مستوى جمالها و هينكسر غرورها !!!
و ثاني حاجة 'العروسة البشعة' مش عايزها تجي لي في يوم و تقولي أني حرمتها من الجواز و الخلفة بجوازتها مني و هي في الاصل ماكانتش تحلم تلاقي راجل يقبل بيها !!

هزت 'حنان' رأسها بأسف من تفكير اخوها ..
'حنان' : - و هو في ست بشعة في الأيام دي مع العمليات و الميك اب !!
'عبد الحميد' : - مش أي واحدة تقدر تدفع ثمن عمليه سمكرة و تجديد !!
يعني مش صعبة تلاقيها !!!
'حنان' : - طيب نورني و قول لي الاقيها فين ؟!
'عبد الحميد' : - سهلة جدااا !!!
'حنان' : - و جداً !!
طب سهلها عليا الله يسهل عليك !!
لعلمك انا ماشيه وراك بس لأني عايزه أشوف 'نرجس' و هي ميته من القهر زي ما هي بتقهرني و بتحرق قلبي عليك !!!
'عبد الحميد' : - هاهاها طب إسمعي يا مقهوره إنتي هدوري لي على واحدة فيها تشوهات خلقية و بكدا هتلاقي العروسة المطلوبة منك !!
'حنان' : - يعني انت عاوزني أقول لكل خاطبه هاتي عروسة مليانه عاهات ايه اللي أنت بتقوله !!!
هيفكروا العاهة موجودة في دماغي أنا !!
اسمع يا أخويا واضح انك دلوقتي جعان قوي و مش داري باللي انت بتقولوه !!
'عبد الحميد' - بطفح - : - يووووه أنا جيت لعبد المعين يعن ...!!
'حنان' - مقاطعه بحماس - : - لا لا خلاص يا اخويا اطمن انا لقيت لك العروسة و على حسب طلبك بالضبط !!

'عبد الحميد' - بلهفة - : - يعني هقدر اتجوز الليلة ؟!
ما هي اكيد هتوافق بسرعة تتجوز !!

'حنان' - لنفسها - ... " انا هجوزك صحبتي 'توليب' لأني عارفة بأخلاقها و أدبها و كمان لأني عايزاك تعرف إيه معنى الزوجة الصالحة و تقدر تعرف الفرق
بين الجواز المستورد و الجواز البلدي الأصيل !!! " ...

'عبد الحميد' : - يلا قولي هو أنتي تعرفيها !!
و إمتى هتروحي تكتبي الكتاب مع جوزك ؟!
'حنان' - بفزع - : - يالهوي و جوزي ماله !!!
انت بتفكر تجوزه معاك !!!
'عبد الحميد' : - اجوزه ايه ؟!
افهمي أنا بس هأعمل له توكيل و هو يروح يكتب كتابي عليها بالتوكيل ده !!!
لأني زي ما قولت لك مش عايز اشوفها و لا هي تشوفني !!!
على الاقل في الوقت الحاضر يمكن هحتاج اشوفها مستقبلاَ يعني لو ماقدرتش اسيب 'نرجس' تروح تشوف ضرتها لوحدها !!
'حنان' : - افهم منك إنك مش ناوي تعمل لها فرح !!!
'عبد الحميد' : - هاهاها تعرفي شكلك جميل و انتي بتنكتي !!
و هو مين يا بنتي اللي عايز يحضر فرح واحدة مليانه عاهات و بوش يقطع النفس !!
'حنان' : - أستغفر الله العظيم من كلامك !!
النصيب لما بيجي على الواحد ما بيعرفش لا عاهة و لا سليم كله نصيب !!
'عبد الحميد' : - حاضر يا حضرة الشيخة !!
يلا روحي هاتي جوزك نخرج أعمل له التوكيل و أنتي خلصي لي الموضوع في أقل وقت !!
'حنان' - بخبث - : و انت مستجعل ليه !!
مش عايز تعرف على الاقل اسم العروسة ؟!!

'عبد الحميد' : - مايهمنيش أعرف اسمها لكن يلا مادام انك لقيتي العروسة الحسناء اللي هتتشرف بأسمي فقولي لي علشان أتعرف على أسم عيلتها !!
'حنان' - بسرعة - : - هي من عيلة معروفه و يشرفك النسب !!
أسمع انا هجوزك ب 'توليب' صحبتي بنت العم 'عبد الصبور' الله يرحمه !!

قام 'عبد الحميد' من مكانه بسرعة و التفت ل 'حنان' بعصبيه ..
'عبد الحميد' : - عايزه تجوزيني بصحبتك 'توليب' ما تفكريش إنك هتقدري تعلقيني فيها ما أنا قولت لك مش عايزها بنت عادية !!
'حنان' - بمكر - : - و مين قال لك إنها بنت عادية !!!
'عبد الحميد' : تقصدي ايه ؟!
'حنان' : - دلوقتي 'توليب' عمرها ٣٦ سنة في عمري يعني ما سالتش نفسك هي ليه ما تجوزتش لحد دلوقتي ؟!!
'عبد الحميد' : - فسري كلامك ؟!!

فكرت 'حنان' بأفكار تقدر تجذب انتباه 'عبدالحميد' ل 'توليب' ..
'حنان' : أول حاجة 'توليب' ما فيهاش اي ملامح جمال خالص حلو كده !!
ثاني حاجة والدها مات النهارده الفجر و ما بقاش معاها حد يكون سند ليها في ظهرها يعني انت لو حبيت في يوم تطلقها هتقدر تطلقها و أنت مطمن أنه ماحدش هيجي عندك يسألك ليه طلقتها و تدخل معاهم في محاكم و قضايا لو هي ماقبلتش بالطلاق مثلاً يعني !!!

'حنان' - لنفسها - ... " بس ده بعدك يا اخويا مش هسيبك تفرط فيها دي ملاك بيمشي على الارض !! " ...

كملت 'حنان' كلامها ..
'حنان' : - و ثالث حاجة هي مليانه عاهات زي ما انت عاوزها بالضبط !!

عجبه 'عبد الحميد' كلام اخته و قعد جنبها يفهم كلامها ..
'عبد الحميد' - بحذر - : - بس إنتي عمرك ما قولتي لي إن فيها حاجة !!!
'حنان' : - و انت من امتى كنت فاضي و تسمعني او توافق تتعرف عليها !!
و ايام دراستنا انت كنت مسافر في فرنسا !!
فإزاي أنت كنت هتشوفها أو تعرف اللي فيها ؟!
'عبد الحميد' : - و هو ايه اللي فيها !!!
أنا مش عاوز منها تجيني في يوم و تقول إني ضيعت لها شبابها !!!

افتكرت 'حنان' صديقتها 'توليب' معاها عين واحدة فيها ضعف بصر شديد ..
' حنان ' : - بص هي عميا !!

'عبد الحميد' : - هاهاها ضحكتيني اومال هي درست و تخرجت إزاي !!!
'حنان' : - هي مش عميا بالضبط !!
هي شبه عميا !!!
و اللهِ أنا بقول لك على الحقيقة !!

إسترخى 'عبد الحميد' بظهره على الكنبة و حط رجل فوق رجل ..
'عبد الحميد' : - كملي بدأتي تقنعيني !!!

افتكرت ' حنان ' 'توليب' مرة كلمتها إنه حصل لها خطأ طبي عند ولادتها سبب لها قصر في رجلها الشمال علشان كدا هي بتلبس حذاء طبي يرفع من طول رجلها و تقدر تتوازن في مشيتها ..
'حنان' : - و كمان هي عرجا يكفيك كدا !!!
'عبد الحميد' : - أنتي مش بتكذبي عليا !!
'حنان' : - و الله كل اللي قولت عليه حقيقة !!
دا انت اخويا الوحيد معقولة اخدعك و ادي لك عروسة سليمه !!!
انفجر 'عبد الحميد' ضحك من اسلوب اخته ..
'عبد الحميد ' : - هاهاها حلوه دي خلاص انا هسيب لك كل حاجة !!
و عايز منك بس تبعثي لي ورقة عقد القران و خذي ده الشيك هوقع لك على بياض و أنتي اكتبي عليه المبلغ اللي هتحتاجيه في مصاريف الجواز !!!

وقع ' عبد الحميد ' على الشيك و ناوله ل 'حنان' و هي اخذت منه الشيك بلهفه و ابتسمت بخبث ..
'حنان' : - إبشر يا اخويا دا اللي قولت لك عليه هي العيوب الظاهرة و ما خفي كان أعظم دي العاهات هتخرج منها كل يوم و هتنبسط منها قوي و من اختياري !!!
'عبد الحميد' : - هاه انا مش عايز مشاكل !!
من البداية فهميها بكل حاجة !!

فتحت ' حنان ' شنطتها و دخلت الشيك بحرص و قامت من مكانها ..
'حنان' : - حاضر يلا دلوقتي خلينا نقوم نتغدا أنا ما اكلتش حاجة من الصبح !!
'عبد الحميد' : - يلا !!!
'حنان' : - لحظة هو في حاجة !!!
'عبد الحميد' : - إيه رأسها أقرع !!!
'حنان' : - لا بس مش هنقدر نكتب كتابكم غير بعد أسبوع على الأقل أقصد علشان ظروفها !!
'عبد الحميد' : - و هو كذلك !!
يعني انتي شايفاني هموت نفسي عليها هاهاها !!
'حنان' : - خلاص على بركة الله يا عريس !!!

# * # * # * # * #

. . . - في فرنسا - . . .

خرجت 'ايزابيل' والدة ' نرجس' من غرفة جوزها 'جمال' في المستشفى ..
... " 'ايزابيل' 59 سنة ، جميلة ، رشيقة ، طويلة ، بعيون خضراء مسحوبة شوي للخلف ، و بشعر أصفر قصير كاريه " ...
و شافت بنتها 'نرجس' واقفة سرحانه قدام ماكينة الشراء ..
'ايزابيل' : - مالك سرحانه في ايه !!
باين عليكي زعلانه !!
'نرجس' : - انا رحت للدكتور اعرف ايه اللي تاعب بابا !!
'ايزابيل' : - يعني انتي عرفتي باباكي مريض بالسرطان !!
'نرجس' : - إيوه !!!
'إيزابيل' : - هو أنتي بجد زعلانه عليه !!

'نرجس' - بلا مبالاة - : - اللي مزعلني ان الدكتور رافض ابلغ بابا بحالته !!!
يعني قولي لي ؟!
اقول لبابا ايه علشان يوافق يكتب كل حاجة بإسمي !!
لو هو مات أعمامي هيشاركوني بكل حاجه !!!
و كمان 'عبد الحميد' مش هيوافق نبيع القرية و نسافر نعيش هنا في فرنسا !!
عارفه يا ماما مافيش احلى من أني ادخل لبابا و اقوله على الحقيقة !!
إسمعي انا هدخل له دلوقتي اتكلم معاه !!
و أنتي هتساعديني تروحي تطلبي المحامي يجي يكتب عقد بيع أملاك بابا ليا أنا !!
ما إحنا مش ضامنين بابا هيعيش كم يوم !!

جريت 'نرجس' بحماس و دخلت غرفة والدها مرت دقيقتين و سمعت 'ايزابيل' صراخ 'جمال' ..
'جمال' : - برا براااا !!!
أنتي كذابة أنا مش مريض بالسرطان !!
ليه يتقولي كده في وشي !!
أنتي شايفه الفلوس أغلى من أبوكي دي خطة عملتيها مع مامتك علشان تاخذوا كل حاجة !!
أنا دلوقتي هتصل ب 'عبد الحميد' يرجعني مصر بسرعة قبل ماتتفقوا عليا مع الدكاترة و تقتلوني !!
أخرجي براااا !!

خرجت 'نرجس' من غرفة والدها و وقفت قدام الجدار تتنفس بعصبيه تتمالك أعصابها ..

'نرجس' : - هنعمل إيه يا ماما دلوقتي بابا مش متفهم خالص ؟!
قربت 'إيزابيل' من خلف 'نرجس' و حضنت كتفها و بدأت تهمس في إذنها زي الشيطان ..
'إيزابيل' : - معلش احنا هنرجع معاه لمصر و هناك هنشوف طريقة نقدر نأخذ فيها حقنا بشطارتنا !!

# * # * # * # * #

４- أول خطوة.


بعد مرور إسبوع من موت عم 'عبد الصبور' والد 'توليب' فكرت 'حنان' إن الوقت بقى مناسب إنها تفاتح 'توليب' بموضوع جوازها من أخوها 'عبد الحميد' فراحت في الصباح لبيت 'توليب' و انبسطت 'توليب' بزيارة صديقتها 'حنان' ..
'توليب' - بفرحة - : - أهلاً 'حنان' كويس أنك جيتي في وقتك الفطور جاهز إتفضلي و افطري معايا !!
'حنان' - بغرور - : - اه طبعاً ما أنا دايما موجودة في الأوقات المناسبة !!

دخلت 'حنان' للصالة مع 'توليب' و قعدوا على السفرة مع بعض و بدأو في الأكل ..
و بعد مرور دقائق التفتت 'حنان' ناحية 'توليب' و هي مشغولة بالأكل ..
'حنان' : - 'توليب' !!
'توليب' : - هممم !!!
'حنان' : - هو 'عبد الله' إبن اخوكي المرحوم 'زياد' لسه موجود معاكي هنا !!
'توليب' : - اه 'عبد الله' لسه موجود بس دلوقتي هو نايم في أوضة أخويا القديمة و يمكن يرجع الإسكندرية بعد بكرة بإذن الله علشان يلحق دوام مدرسته !!

توقفت 'توليب' عن الأكل و فكرت في كلام 'عبد الله' معاها ..
'توليب' : - مسكين 'عبد الله' خايف عليا من بعد موت أبويا إني هعيش لوحدي فطلب مني لو أسافر معاه الإسكندرية علشان يأخذ باله مني و أنا
جنبه !!
'حنان' : - و هو أنتي عايزه تسافري معاه !!
'توليب' - بضجر - : - هه !!
هو أنتي فاكره إن مرات أخويا هتوافق إني أسكن معاهم !!
هي أصلاً ما بطقنيش و لا أنا كمان بطيقها و 'عبد الله' مش هيعرف يسكني فين لو أنا وافقته و رحت معاه !!
'حنان' : - خلاص أطمني أنتي مش هتسافري لأي حته لإني بفضل الله لقيت لك على عريس هيعجبك قوي !!

رفعت 'توليب' رأسها عن الأكل بإستغراب و التفتت ل 'حنان' ..
'توليب' - بدهشة مع مزح - : - عريس !!!
مين هو !!
يعني جوزك وافق يتجوزني !!!
'حنان' - بفزع - : - إيه يا أختي و الله حرام ليه الكل حاطط عينه عليه هو أنتي بتفكري تأخذيه مني !!

نزلت 'توليب' راسها تكمل فطورها ..
'توليب' : - أصلاً بستغرب إزاي هتقدري تلاقي لي عريس بالسرعة غير جوزك الطيب !!
'حنان' : - لاااا جوزي مسكين زي ما أنتي عارفاه فسيبيه في حاله !!

افتكرت 'توليب' والدها المرحوم ..
'توليب' - بحزن - : - اسمعيني يا 'حنان' أنتي عارفه أني عايشه دلوقتي في فترة حداد على أبويا و في الفترة دي أنا مش عايزه أسمع لا كلمة جواز و لا حتى طلاق !!
'حنان' - مقاطعة - : - طلاق !!!
فال الله و لا فالك و فترة الحداد المفروض إنها خلاص إنتهت من أيام و إنتي هتتجوزي الليلة !!
توليب' - بدهشة - : - الليلة !!
'حنان' : - ايوا الليلة زي ما سمعتيني عمي 'عبد الصبور' هيفرح إنك خلاص لقيتي الإنسان اللي هيقدر يأخذ باله منك !!
'توليب' : - يعني أنتي بتتكلمي جد بخصوص العريس !!
'حنان' : - أيوا بتكلم جد الجد و الليلة يا عروسة جوازتك على العريس !!
'توليب' : - طب قولي لي مين هو العريس !!
'حنان' - بفخر - : - العريس حلو و لقطه !!
أخويا !!!
'توليب' : - مين أخوكي !!
'حنان' : - ومين غيره أخويا 'عبد الحميد' !!

حست 'توليب' بالغضب الشديد بعدما سمعت إسم 'عبد الحميد' ..
'توليب' - بحده - : - و هو ليه فكر دلوقتي يتجوزني خلاص هو شبع من جوازته من حبيبة القلب !!
لاااا انا عايزاكي تقولي له أني مش موافقة عليه نهائياً !!
'حنان' : - اطمني و لا هو كمان موافق عليكي !!
'توليب' : - نعم !!!
'حنان' : - ماتفرحيش و تفكري انه غارق في حبه ليكي ما انتي عارفه لا هو بيعرفك و لا جيتي في باله يوم انه يشوفك !!
'توليب' : - نعم !!
'حنان' : - دي الحقيقة !!
'توليب' : - طب ايه السبب دلوقتي اللي خلاه يتنازل و يفكر يتجوزني أنا !!
'حنان' : - اسمعي يا حبيبتي الحكاية من أولها !!
اخويا بقى قرفان من دلع مراته و من أسبوع جه لبيتي زارني و طلب مني أدور له على عروسة كدا هبله توافق تتجوزه من غير ما تتجوزه !!
'توليب' : - تتجوزه من غير ما تتجوزه !!
هو ايه ده اللغز العجيب ايه الكلام اللي إنتي بتقوليه !!

و افتكرت 'توليب' إنها سمعت من 'حنان' كلمة هبله ..
'توليب' : - و انتي قصدك اني انا هي الهبلة !!
صح هي أنا !!!
'حنان' - بمزاح - : - هههه ماتزعليش انتي مش هبلا قوي انا بس فكرت تكوني أنتي العروسة لأني عارفه إزاي إنتي بتحبي 'عبد الحميد' من أيام ما كنا بندرس مع بعض في الكلية !!

قامت 'توليب' من فوق السفرة بعصبيه ..
'توليب' : - إيه الكلام اللي انتي بتقوليه و أنتي عارفه إني أنا و لا عمري شفته علشان أحبه زي ما انتي بتفكري !!!
'حنان' : - هو أنتي فاكره إني هبلا زيك مش هقدر أكشف حبك لأخويا !!
أنا كنت بشوفك و أنتي غرقانه في الحب و العشق و أنتي بتبصي بنظرات هايمه على صور أخويا في أوضتي !!!
و ده غير إنك سرقتي ثلاث الصور ل 'عبد الحميد' من ألبوم صور عيلتي فاكره !!
'توليب' - بخجل - : - أنتي ..!!
'حنان' : - أيوه كنت عارفه و شفتك كمان يوم ما انهارت نفسيتك يوم ما سمعتي انه خطب 'نرجس' !!
و أعصابك ادمرت على الاخر يوم ما اتجوز 'عبد الحميد' و قلتي إنك تعبانه علشان مش فاكره قولتي كدا موت إبن بنت عم مرات أخوكي !!!
هو دا كلام يدخل العقل !!!
مافيش داعي يا 'توليب' للإنكار أنتي دايما مشاعرك واضحة على وشك زي الشمس !!
و دلوقتي اقعدي و خليني اكمل كلامي للأخر علشان نتفاهم !!

قعدت 'توليب' بخجل جنب 'حنان' ..
'حنان' : - اسمعي اول حاجة كلامي كله و بعدين فكري و خذي قرارك لكن بسرعة !!
'توليب' - بخجل - : - طيب كملي !!
'حنان' : - أنا هتكلم من غير مقدمات أنتي عارفه ان اخويا اتجوز الست 'نرجس' و يمكن صح اخويا يكون وقع في حبها و ده لانه حاسس انه بيحمل لها جميل لانها ساعدته بفلوسها يطلع لفوق !!
و بعدين اخويا يمكن حبها أكثر لما خلفت له الولد و البنت التوأم !!
'توليب' - مقاطعه - : - أنتي دلوقتي بتقولي ايه !!
عايزه توضحي لي و لا عايزه تقتليني !!
ايه دي حبها حبها !!!
'حنان' : - صبرك عليا خليني أكمل كلامي !!
'توليب' : - اووف أمري لله كملي !!
'حنان' : - بس أنا متأكده ان اخويا عمره ماحب 'نرجس' !!
هو بس حامل لها الجميل على خدماتها !!
'توليب' : - طيب و بعدين يعني إيه المطلوب مني دلوقتي !!
'حنان' : - ولا قبلين انتي بس هتتجوزيه الليلة !!
'توليب' : - انتي مجنونه صح !!
و عندك حق أنا فعلاً هبلا لاني ماعرفتش بجنانك غير النهارده بس !!
'حنان' : - اسكتي !!!
أول حاجة أفهمي كلامي كويس !!
اخويا طلب مني عروسة يتجوزها علشان بس يقهر 'نرجس' و شرط عليا انها لازم تكون بشعة !!
'توليب' - بذهول - : - بشعة !!!
تقصدي إنك شايفاني كمان بشعة !!

تجاهلت 'حنان' كلام 'توليب' و كملت كلامها ..
'حنان' : - اسمعي أنا اخترتك لسبيين !!
السبب الأول هو إنك بتحبي اخويا و الأرواح جنود مجندة فما تعارف منها ائتلف يعني اللي بتحب بتتلاقى وتتآلف مع بعضها زي ما قال لنا رسولنا الكريم عليه أفضل الصلاة و التسليم و أخويا بإذن الله هيجي مصيره و يحبك !!
و السبب الثاني و الأهم هو إني اشوف 'نرجس' قدام عنيا و هي بتموت لأن أخويا نفذ تهديده و بقى راجل و قدر يوقف قصاد غرورها !!

'توليب' : - ااه طيب و أنا ازاي هتجوزه و أبويا لسه ميت من اسبوع بس !!
إسمعي انا بقول ما ينفعش اتجوز الجوازه ديه و اللي انا مش فاهماها !!

'حنان' : - قولت لك يا بنتي ايام الحداد خلاص انتهت و هي ثلاثة أيام بس و عمي ربنا يرحمه برحمته هيفضل عايش في قلوبنا و مش هننساه من دعائنا و انتي خلاص بقيتي في اليوم الثامن و دي فرصة علشانك نعمل لك كتب كتاب من غير حفلة لانه مافيش عريس يشوفوه !!
و كمان الناس هتبقى تحترمك و تعمل لك ألف حساب لأنك بقيتي في عصمة راجل غني و مشهور و بجوازتك دي محدش هيقدر يجيب في سيرتك لو كنتي عشتي لوحدك من بعد وفاة والدك !!
'توليب' : - طيب و أخوكي بيفكر يعيشني مع مراته في بيت واحد و لا هياخذني على بيت ثاني اسكن فيه لوحدي !!
'حنان' - بتردد - : - ما انا نسيت ما اقول لك على شرط أخويا الثاني !!
'توليب' - بعناد - : - و هو لسه باقي شرط غير ما تكون عروسته بشعة !!
ما تقولي على كل شروطه مرة واحدة علشان اعرف اخذ قراري !!
'حنان' : - هو الباقي شرط واحد بس إنتي ماسبتنيش اكمل كلامي في الأول !!
'توليب' : - إيه يمكن عايز أبعد عن خلقته !!
'حنان' : - عبقرية ازاي عرفتيها لوحدك !!
'توليب' : - إيه !!!
لاااا دي ما بقتش جوازه و لا حتى جنازة الطم فيها دي بقت إهانه لإبعد حد !!
'حنان' : - صبرك مافيش اهانه و لا حاجة انتي بس هتعيشي في بيت ابوكي !!
'توليب' : - الله عليكوا يعني أنتوا عايزيني اتجوز و أقعد في بيت ابويا !!
'حنان' : - لا اانا مش هسمح انك تسكني في بيت والدك أسمعي فكرتي أنا جهزت خطة جهنميه هنقدر نلعب بيها على اخويا !!
أومال إزاي هنقدر ننقذه من أنياب 'نرجس' !!
ركزي معايا ابن خالي 'عماد' هيتجوز بعد اسبوعين و اخويا حلف على خالي 'فرحان' تقديرا منه لانه وقف جنبه في دراسته و تربيتنا !!
ان العيلة كلها لازم تتجمع في القرية و نقضي اسبوع او اكثر مع بعض نحتفل بجوازة إبنه 'عماد' !!
'توليب' : - و انا طبعا ممنوع عليا إني احضر مع العيلة لان أخوكي مش عايز يشوفني !!!
'حنان' : - اسمعي بس بقية الخطة انا فكرت انك تسافري معانا كأنك ممرضة و مرافقه لخالتي 'زهراء' ما انتي تعرفيها هي ست كبيرة في السن و عايشه لوحدها و انتي هتكوني معاها في نفس البيت اللي هتسكن فيه خالتي في القرية !!
'توليب' : - و خالتك 'زهراء' هتوافق اني اسكن معاها !!
'حنان' : - قلت لك يا بنتي أنا خلاص جهزت كل حاجة أنا تفاهمت معاها و هي انبسطت انك تكوني ممرضة و مرافقه هتقعد معاها ببلاش !!

'توليب' - لنفسها - ... " 'حنان' فعلاً بتحبني و تعبت كثير علشان خطتها و أنا مش هخسر حاجة لو اتجوزت 'عبد الحميد' بالعكس دا هيتحقق حلمي انه يرتبط اسمي بإسمه في روقة واحدة !!
و لو ماحصلش ليا نصيب معاه في الدنيا !!
ان شاء الله يبقى نصيبي في الاخرة !!! " ...

'حنان' : - هاه انتي سرحتي في ايه !!

التفتت 'توليب' ل 'حنان' و هي مبسوطة من خطة الاخيرة ..
'توليب' : - وااو أنتي طلعتي بجد خطيرة قوي !!
'حنان' : - طبعاً المهم أنتي تجهزي نفسك مع 'عبد الله' الليلة و تستنونا هنا و انا و 'فادي' هنجي و نجيب المأذون معانا و هنكتب كتابك على اخويا بإذن الله !!
'توليب' : - أن شاء الله طب لحظة و لو اخوكي عرف بالخطة مش يمكن يطلقني و انا هعمل ايه !!
'حنان' : - اخويا عارف إنك انتي اللي هتتجوزية و إنتي و شطارتك تخليه يوقع في حبك خلال إسبوع واحد قصدي فترة فرح إبن خالي !!
'توليب' : - و لو ما قدرتش اخليه يحبني اعمل ايه !!
'حنان' : - ما تخافيش انتي هتبقي في ذمة اخويا لنهاية حياتك بس أهم حاجة ما تخليهوش يشوف وشك و يعرف إنك اللي كنتي مرافقة لخالتي 'زهراء' !!
'توليب' - بفزع - : - يا خبر ابيض يعني ازاي هقدر اخبي نفسي منه لنهاية عمري !!
هو إنتي حاسه انه هيزعل لو اكتشف الحقيقة !!
'حنان' : - أكيد هيزعل هو أنتي فاكرة انه هيفرح و يصفق لنا لاننا خدعناه لو كشف لعبتنا !!
خلاص انسى ما تفكريش دلوقتي ايه هيحصل في المستقبل خلينا نعمل اول حاجة الخطوة الاولى !!

يلا دلوقتي قومي روحي لإبن اخوكي 'عبدالله' علشان تقنعيه يجوازتك الليلة و طمنيه إنك خلاص بقيتي في أمان و انتي على ذمة أخويا 'عبد الحميد' !!

فكرت 'توليب' بعرض 'حنان' و إفتكرت الأيام الصعبة اللي مرت عليها و اللي ماكنش يصبرها ويهون عليها الأحزان غير التفكير في 'عبد الحميد' و صور 'عبد الحميد' ..

# * # * # * # * #
،
５- عقد القران.

في الليل حضرت 'حنان' و جوزها 'فادي' مع المأذون و الشهود من الجيران و تم عقد قرآن 'توليب' على 'عبدالحميد' ..

قامت 'حنان' من مكانها و خرجت للبلكونه و طلعت موبايلها من شنطة إيدها و اتصلت ل أخوها 'عبد الحميد' ..

شاف 'عبد الحميد' إتصال اخته و فتح المكالمة ..
'عبد الحميد' : - أيوا 'حنان' !!!
'حنان' - بفرح - : - ألف ألف مبروك يا أخويا أنت خلاص دلوقتي بقيت متجوز الثانية رسمي و أكيد هيوصل خبر جوازك لمراتك الأولى الست 'نرجس' !!

ابتسم 'عبد الحميد' بغرور و هو بيتخيل رد فعل مراته 'نرجس' لما تعرف بخبر جوازه !!
و خصوصاً لما تشوف إنه اتجوز عليها واحدة أقل من مستوى جمالها بكثير !!!

'عبد الحميد' - بسخرية - : - هاه و قولتي لصحبتك على الشرط !!
ما هي لازم تعرف من دلوقتي إني مش عاوز أشوفها و ما تحاولش تفكر تشتاق ليا لأني خلاص بقيت في حكم جوزها فتنسى نفسها و تطلب تشوفني !!

'حنان' - بإستهزاء - : - ههههه أطمن و حط في بطنك أكبر بطيخة ما هي كمان مش عايزه تشوفك سبحان الله دي القلوب طلعت عند بعضها !!

'حنان' - لنفسها - ... " استنى بس شويه و انت اللي هتجري وراها و تترجانا نلغي شرطك !!!
ما أنا عارفاك بتحب الست القاسية و اللي تدلع عليك زي 'نرجس' !!! " ...

انصدم 'عبد الحميد' بقوة و دهشة من رد أخته عليه و حاول يبلع الإهانة بسرعة و فكر بسؤال ثاني يرجع بيها كرامته ..
'عبد الحميد' : - اااه يبقى هي من الناس اللي همها الفلوس بس و ما عندوهمش كرامة !!
اوكي و انا مايهمنيش خسارة الفلوس أهم حاجة تنفذ شرطي !!
لكن بس حب إستطلاع أحب اعرف إنتي قدرتي تقنعيها بكام أقصد يعني هي طلبت منك كام ثمن للمهر و الشبكة حتى وافقت تتجوزني من غير ماتشوفني !!
اكيد طلبت منك مبلغ خيالي !!
'حنان' - بحماس - : - تصدق يا اخويا !!!
أنا كمان ماكنتش مصدقة إيه الخيال ده لما طلبت مني المهر !!!

لوى 'عبد الحميد' فمه بإنتصار و إبتسم ..
'عبدالحميد' : - هاه بكام !!
'حنان' : - تخيل بألفين جنية بس !!!

تشنجت أعصاب 'عبد الحميد' مرة واحدة و حس بتيبس في عضلات رقبته و فكر إن أخته أكيد بتمزح معاه ..
'عبد الحميد' - بجنون - : - إيه !!
إنتي بتستعبطي صح !!!
'حنان' : - عيب يا اخويا دا أنا بقولك الحقيقة !!!
اسمع هي طلبت منا الألفين جنية علشان يكون العقد صحيح بأركانه و قالت لي كمان علشان تقدر تخلعك بسهولة في أي وقت هي عايزه تخلص منك !!!
'عبد الحميد' - بعنف - : - تخلعني !!
هي واثقة من نفسها كده ليه دي المفروض توافق إنها تشتغل عندي خدامة لإني وافقت اتجوزها و هي عميا و عرجا كمان !!!
'حنان' : - إسمعني شويه هي في البداية ماكنتش موافقة تتجوزك !!

'عبدالحميد' - بحده - : - أيوه يا أختي كملي دي بقت أسطورة !!
'حنان' : - لااا أطمن أنا قعدت أتحايل عليها و أقنعها بشطارتي حتى وافقت عليك بالعافية !!
انا اقنعتها بجوازها منك لما قلت لها الناس هتسيبها في حالها لما يعرفوا إنها بقت في ذمة راجل !!

'عبد الحميد' : - اااه أنا فهمت دلوقتي إنتي تقصدي إنها ناويه تمشي على حلة شعرها و مبسوطه بالشرط علشان هتكون مطمنة إني هكون بعيد عنها و نايم على ودني صح بس ده بعدها !!
و أنتي يا أخت يا محترمة بتشجعيها تلعب و هي على ذمتي !!!
'حنان' : - إمتى أنا قلت كده !!
'عبد الحميد' : - اومال هي ليه فرحانه تتجوزني من غير ما نكون مع بعض !!
'حنان' : - مش ده شرطك !!!
'عبد الحميد' - بإرتباك - : - أيوااا بس !!
'حنان' : - اوعى تقولي إنك بتفكر تلغي الشرط !!
هتفكر 'توليب' اني كذبت عليها علشان بس توافق تتجوزك !!
أرجوك ما تقوليش إنك عايزها و بتفكر تشوفها !!
'عبد الحميد' : - لا و الله اطمني أنا بفكر بس احطك إنتي و هي في خلاط واحد أعصركم و أشرب من دمكم !!
إسمعي يا مجنونة أنا دماغي بس بيفكر في حماية سمعتي !!!
دلوقتي تبلغيها إني هبعث عليها رجاله يفتحوا عنيهم عليها ليل و نهار علشان ماتفكرش دقيقة واحدة تلعب من ورايا و تبوظ إسمي و سمعتي !!!

خافت 'حنان' من الحراس إنهم يبلغوا أخوها بسفر 'توليب' معاها لقريته السياحية و تفشل خطتها ..

'حنان' : - لا لا إطمن مش هتحتاج تحط عليها حراسه هي كلمتني إنها هتسافر مع إبن أخوها الإسكندرية و هتعيش هناك و تقضي بقية عمرها تحت رعايته !!
'عبد الحميد' : - بتردد - : - ليه !!
يعني هي مش ناويه ترجع القاهرة !!!
'حنان' - بدلال - : - بالسرعة دي لحقت تشتاق لمراتك الجديده !!!
'عبد الحميد' : - يا هبلا أشتاق إيه و لمين !!
آآه افهمي أنا عاوز بس أعرف إمتى هي هترجع علشان احط عليها الحراس على باب بيتها !!!
'حنان' : - اه فهمت قصدك !!
حاضر انا هكون معاها على تواصل و هبلغك لو رجعت من الإسكندرية فما تقلقش بالك عليها !!
'عبد الحميد' : - و انا هقلق نفسي عليها ليه !!
أنا بدأت اقلق عليكي أنتي هو أنتي عقلك أنضرب !!
'حنان' : - و فيها إيه !!!
طبيعي تقلق عليها مش هي خلاص بقت مراتك !!

'عبد الحميد' - بعصبيه - : - لاااا و لا في أحلامها تفكر إنها بقت مرات 'عبد الحميد الأشول' !!
اقول لك أنا هقفل المكالمة دلوقتي لإني مش عايز اتجنن بسببكم و أرتكب جريمة فيكوا إنتوا الإثنين !!!
مع السلامة !!

قفل 'عبد الحميد' الخط بعنف في وش 'حنان' و هي انفجرت تضحك من نجاحها في أول خطوة في جنون أخوها ..
و بعد ما شبعت 'حنان' من الضحك ضيقت نص عينيها بمكر و فكرت في اللي جاي ..
'حنان' : - و لسه أنت هتشوف يا أخويا الكبير !!
الحاجات الكبيرة !!!

# * # * # * # * #

يتبع الأسبوع القادم ..

روابط الفصول

الفصل 1 .. اعلاه
الفصل 2 .. بالأسفل
الفصول 3, 4, 5, 6, 7 نفس الصفحة
الفصول 8, 9, 10 نفس الصفحة
الفصل 11, 12 نفس الصفحة
الفصل 13 الأخير