ضياء الماء / للكاتب طارق لبيب ، سودانية مكتملة

[لامارا]

الحلقة التاسعة عشر

عمك البشرى استمع لكلام عمر بكل تروي وحكمة وقال ليهو .. إن شاء الله ربنا يسوي الفيها خير ..انت هسي كدي ركز لي في الشغل في الأيام دي ..
وإن شاء الله ما يحصل إلا الخير .. والبشرى أصلاً ما ابدى أي انزعاج بالموضوع ..
وبالليل كدا طلعو سرايرهم بي غادي في الزقاق الفي ضهر البيت من الناحية الشمالية .. ودي أول مرة البشرى يقعد مع عمر فترة في الونسة قدر دي .. وشاف كيف الزول بفكر وشنو هي طموحاته وحاجاته .. لأنو كل مرة بلف الونسة وبجي راجع لموضوع رفض الوالد ..
قال ليهو يا عمر يا ولدي أنا شايفك شفقان .. أنا عايز أقول حاجة بتعرف كيف تفوض امورك لله ؟
يعني خلي الأمور على الله .. والحاجة الفيها خير ليك اتأكد أنو ربنا بسهلا ليك .. واذا حاجة انت دايرها وما تمت .. برضو بكون لخير ليك ..
انا داير أحكي ليك قصة ..
كان عندنا هنا في امدرمان جماعة أنا بعرفهم .. المرا ست البيت كان نفسها ومناها في الدنيا تشوف السعودية .. عندها بت خالتها الظاهر في المملكة .. وبتحكي ليها ..
وهي دايره تمشي تحج وتسوي ليها عمرة .. وتشوف السعودية القالواها دي للزمان ..
اها عندها تلات بنات وزوجها راجل خير وعندها ولد واحد وما قاعد في البلد ..
اها يا زول راجل المرا دي عمل المستحيل عشان مرتو تسافر وتحقق مناها .. وجهز ليها كل حاجة .. لدرجة المرا دي ماشة على المطار .. حصل ليهم حادث لا منو لا عليهو في الشارع ..
يعني واحد بتاع بوكسي .. خاشي الشارع بالغلط .. دقش الصدام بتاع العربية .. من الخلعة المرا دخلت في غيبوبة ومشو بيها على الحوادث الطيارة فاتتها ..
المهم في المستشفى لقوها كويسة خرشة ساي ما عندها .. جابوها راجعة البيت ..
وبقت تنقنق .. أنا اصلي ما عندي حظ .. أنا اصلي شوم ..
اها يا زول بالليل كدي .. بتها الوسطانية عيت عيا شديد ..
وقربت تموت ساقوها لقو دمها ضعيف شديد ومحتاجة لنقل دم عاجل ولقو مافي زول بوافق فصيلتها إلا أمها .. وحالتها مستعجلة ..
شديد والحمد لله نقلو ليها دم من أمها وربنا انقذها ..

عمر بعد سمع القصة . قال ليهو سبحان الله .. هسي المرا دي تقول الحمد لله الطيارة فاتتني ..
ومرة قال اللبيب..
الأقدار غيوب والحكمة ديمة خفية
رب الكون مخــــير ونحن ليهو رعية
الحاجة التحبها قد تكـــون لك ازيـة
والقدر الصعيب قد يبقى نعمة هنية

اها يا زول من أول يوم مدرسة عم البشرى فتحت ابوابها لي عمر ود مرغني وبقى من الطلبة المعتمدين ..
طيب باختصار وبمرور الأيام اتعلم حاجات كتيرة من اسرار التعامل مع الحياة ..

وتاني يوم طوالي مشى الشغل مع عمو وعرفو على الناس ووراهو طريقة الشغل ..
وعم البشرى بقى ماخد راحة كويس؟
ثويبة لمن رجعت تاني يوم للشركة دالية قابلتها باسوأ مقابلة وبقت تفتعل معاها المشاكل ..
وثويبة بس تضحك ..
اها مشت ليها في نهاية الدوام في المخزن براها .. ولأول مرة تزور المخزن ..
وبرضو داليا قابلتها بي طمام بطن .. ثويبة قالت ليها أنا عايزة اطمنك .. عامر ليك ليك .. بس إنتي هدي نفسك .. تعالي جاي نقعد برانا وأحكي ليك ..
انا طبعاً عايزة ود عمي وما عندي أي قضية بي عامركم ده ..
والزول ده حباك إنتي الوحيدة بس إنتي تصرفاتك هي الخلتو يبعد منك ..
عامر لسه بعزك وبعز ناس بيتكم .. بس إنتي الحاجات البتعملي فيها دي .. هي البتفشل ليك مواضيعك .. البنات الإتنين الكانو شغالين هنا .. إنتي طيرتيهم بلا سبب صاح؟..
وقطعتي أرزاقهم بي سبب أنانيتك .
انا عارفة كل الحاصل بس ماحكيت لي عامر أي حاجة . لاني بالجد عايزة المكم مع بعض ..
قالت ليها عليك الله بالجد يا ثويبة ؟؟ .. وفجأة مسكت ثويبة من يديها .. قالت والله أنا اسفة ما كنت فاهماك .. طيب إنتي ركبتي معاهو ليه .. قالت ليها عايزة احرق قلبك لانك إنتي عارفة عملتي شنو يا متخلفة ؟ عايزة ترميني في مشكلة صاح؟
دالية قالت ليها والله بس أنا خايفة أنو عامر يكون كشفني .. حكا ليك حاجة عن الموضوع؟
قالت ليها أبداً .. هو احتمال يكون شاكي .. لكن أنا بقدر أطلعك منها براحة ما تشيلي هم ..
قالت ليها كيف حتعملي شنو؟
(لاحظ دالية اعترفت بالسرقة بكل سهولة ) ..
ثويبة قالت ليها بس إنتي باكر سلميني المبلغ .. وتاني ما تشتغلي بالموضوع .. ولا عايزة اسألك عملتيها كيف ..
المهم الحصل حصل ..
بس عندي معاك شرط واحد .. أي حاجة أقول لك اعمليها تعمليها وتنفذي أي كلام اقولوا ليك ..
قالت ليها خلاص كويس .. تعالي جاي اديني خدك ابوسك ..
واخدو ليهم ونسة كدا .. طبعاً الوقت ده نهاية اليوم والعمال فاتو والغالبية من الموظفين مشو ..
ودالية اطمأنت شديد جداً لثويبة .. لكن ثويبة ما مطئنة ليها .. ولسه بتتكلم مع دالية عن الاخلاص .. وانو الزول لمن يكون عندو رغبة في حاجة المفروض يمشي بالطريق الصاح عشان ربنا يوفقو ويلقاها ..
وثويبة بتتكلم ودالية بتعاين ليها .. فجأة كدا دالية قالت لي ثويبة ..
انا عايز اسألك سؤال يا ثويبة .. إنتي وشك ده عاملة ليهو شنو؟
قالت ليها ليه يعني السؤال؟ .. قالت ليها إنتي شكلك بتستعملي حاجة بتخلي الوش مضوي ..
والله أنا قدر ما استعمل حاجة .. تعمل لي حساسية .. لامن جاتني نفسيات ..
قالت ليها العاملاهو أنا ده .. كريم .. اسمو (ضياء الماء) ..
قالت ليها موية شنو يا بت ؟؟ قالت ليها موية الوضوء .. إنتي ما عارفة الوضوء سموهو الوضوء ليه ؟؟
قالت ليها اها ليه ؟؟
قالت ليها لأنو بدي الوجوه وضاءة .. ونور .. إنتي بس واظبي على الصلاة وتاني ما بتحتاجي لاي كريم ..

اها يا دالية ما عايزة تحكي لي عن علاقتكم إنتي وعامر وبدت كيف .. والحاجات الحصلت .. وكدا.. نفسي اسمعا ..
قالت ليها طبعاً يا ثويبة هسي الوقت اتأخر .. لكن بوعدك أحكي ليك بالتفاصيل ..
قالت ليها بس سؤال واحد جاوبيني عليهو .. وتاني نمشي ..
يعني إنتي هسي في زول في حياتك غير عامر ؟
قالت ليها برضو بوريك بكرة ... هسي أنا عندي مواعيد ضرورية .. عشان ما اتاخر على البيت .. قالت ليها طيب نطلع مع بعض .. قالت ليها بس أنا ماشة على الصحافات ..
في اللحظة دي عامر جا خاشي لقاهم قاعدين مع بعض .. وسمع طرف الكلام ..
قال ليها اسأليها يا ثويبة .. قول لي ليها ماشة الصحافة لي شنو؟

\

ودعتكم الله ،،،

\

إلى اللقاء في الحلقة القادمة ،،،،

[لامارا]

الحلقة العشرون

طبعاً دالية اتفاجأت بدخول عامر العشوائي جداً .. وثويبة شكلها زعلت من عامر .. ولا شنو ما عارف .. قامت قالت ليها دالية خلاص عن اذنك أنا ماشة ..
وما ردت على عامر سؤالو .. بقت ثويبة طالعة وعامر خاشي ..
طبعاً ثويبة طوالي مشت على البيت ..
وعامر وقف في خشم الباب بتاع المخزن .. دالية قالت ليهو انت لسه يا عامر شاكي فيني ..؟
انا والله ماشة الصحافة لي بت خالتي الليلة سمايتها ..
وحتى كمان بلاقي أمي هناك .. ولو ما مصدق ارح وصلني وشوف براك ..
قال ليها إنتي عارفة أنا أصلاً زمان ما شكيت فيك لمجرد ظنون .. انا شفت بعيوني رسايلك معاهو ..
وكيف كنتي بتتكلمي معاهو عني أنا بالذات .. اعملي البريحك يا دالية ..
المهم خلاها ومشى .. وطلع على البيت ..
بعد وصل البيت واخد ليهو شوية انجمامة كدا .. واستحم ومنتظر الغدا .
وفكرو شغال في ثويبة .. وطبايعها وحاجاتها الغريبة .. مرة يقول البت دي ملائكة .. ومرة يقول البت دي هبلة .. وحتدخلني تاني في دالية ودوامة مشاكلها الما بتنتهي ..
وبدا يتخيل في شكلهم وهم بتكلمو مع بعض .. وكيف دالية ارتبكت لمن هو قال لي ثويبة اساليها ماشة الصحافة لي شنو؟ .. وطبعاً قبيل راودو الشك أنو دالية بتكذب ..
لكن مشى ليها الموضوع.. اها البقنع ثويبة منو أنو داليا حياتها كذب ومراوغة ..
دي كلها أفكار وخواطر جايلة في في مخ عامر ..
يا زول فرترب قام علي حيلو.. وسريع لبس وغير .. ودور العربية واتوجه على بيت ناس دالية ..
ولقى عمي الأمين وسلم عليهو .. وحق الله بق الله ..
عامر قال ليهو يا عم الأمين .. أنا فجأة كدا قررت اجي اتغدا معاك .. لاني اشتقت ليك والمشغوليات ما .. مخلية لي وكت عشان ازورك بشكل منتظم ..
وين خالتي؟ .. قال ليهو جوة .. طبعاً زي ما كان متوقع لافي سماية ولا غيرو .. والأم القالت دالية تلاقيها في الصحافة قاعدة في بيتها تسوي في غداها ..
وكلعادة دالية بتكذب .. ولمن عامر سأل أمها .. قالها دالية ما وصلت ؟؟ .. قالت ليهو دالية .. الصباح قالت بتتاخر في الشركة .. لغاية المساء كدا .. عندها جرد في وحسابات .. وحاجات كدي قالتن أنا ما بعرف شغلكم ده يا عامر ..
قال ليها يا خالتي دالية طلعت من الشركة يمكن قبل ساعة ونص ..
وقالت ماشة الصحافة .. البت دي يا خالتي بتكذب .. وانتو لازم تختو بالكم ليها .. قاعدة تمشي وين .
وانا بس ما عايز أقول لعم الأمين .. هو طبعاً عيان والحكاية الزي دي ممكن تأثر عليهو ..
أمها مسكينة وطيبة قالت ليهو خلاص .. أنا بتكلم معاها ..
هنا عامر اتأكد بما لا يدع مجال للشك أنو دالية ما زالت على علاقة بالود القيافة الساكن الصحافة ..
وبقى متضايق من الجهود العايزة تقوم بيها ثويبة ..
ولمتين يجي الصباح عشان يكلم ثويبة .. بالحربوية دي ..
اها يا زول .. باختصار باكر الصباح طوالي نادى ثويبة .. في المكتب .. وحكى ليها الحاصل ..
ثويبة قالت ليهو بس انت اصبر ياخي .. اديني فرصة ..
انت كدا ما اديتني أي فرصة .. المواعيد بتاعة الصحافة دي كانت ماخداها قبل ما الاقيها أنا ..
انت ما واثق فيني ؟؟ كدي انت اصبر بس ..
وعامر ما عايز يغلط على ثويبة .. ويثبت ليها أنو هو كعب .. وما عايزها تمشي في الطريق ده ..
وحاسي أنو ثويبة حتضره أكتر مما تنفعو ..
لكن هو طبعاً بريد ثويبة شديد وبخجل يرفض ليها طلب ..
اها طبعاً امس بعد ما جات دالية البيت من مشوارها داك .. أمها شاكلتها . وورتها أنو عامر جاء هنا وقال وقال ..
اها يا زول دالية طبعاً الليلة جات الشركة .. وأصلاً ما ظهرت بس مكرنة في المخزن ..
وما عايزة تلاقي عامر ..
في المكتب ثويبة قالت لي قرشي .. عليك الله اتصل على دالية واديني ليها ..
قالت ليها اسمعي يا دالية .. أنا اللية شغلي كتير وباكر الجمعة .. يعني رايك شنو نتلاقى بكرة يا اما تجيني او اجيك ..
داليا قالت ليها خلاص بوصف ليك تعالي لي إنتي ..
وفعلاً وصفت ليها .. دالية من سكان بحري
اها يا زول بالاختصار وتسارع الأحداث ثويبة يوم الجمعة .. مشت لدالية في البيت من بعد الفطور ..
اها طبعاً ثويبة بقت تحكي لي دالية حكايات خرافية واكاذيب .. عن علاقتها بعمر ود عمها ..
وورتها انها بتحبو حب شديد .. وانها ما ممكن تتخلا عنو مهما كانت الظروف ..
وقالت ليها أنا عمر ود عمي يا داليا مالي روحي فرحة وسعادة .. وقريب حنتزوج وإنتي تكوني الوزيرة ..
يلا طبعاً داليا هنا اطمأنت طمأنينة شديدة .. أنو ثويبة ما عندها حاجة لي عامر جواها .. واخدت راحتها في الحكايات .. وحكت لي ثويبة كل التفاصيل الدقيقة بتاعة قصتها ..
قالت ليها .. اولا حاجة أنا كنت عندي علاقة بي عزو من الجامعة.. عزو ده الود القيافة الساكن الصحافة .. وبحبو أكتر من روحي..
بس هو زول فلسان وما عندو الحبة .. ولمن اتعرفت بي عامر .. وعرفت علاقة أبوهو بابوي ..
واني حأكون معاهو في الشركة .. فكرت فيهو من ناحية مادية بس ..
وطبعاً أنا لو اتزوجت عامر .. حاكون صاحبة املاك .. وبريح أمي وابوي ..
لكن بكون فقدت عزو .. اللهو بالنسبة لي نفس وحياة .. والله ما عارفة اسوي شنو زاتو ..
ومع مرور الوقت بقيت بريد عامر وبريد عزو .. واي واحدة تجي في الشركة .. تحأول تتقرب من عامر تولع فيني نار ..
قالت ليها يعني هسي لو اتزوجتي عامر ما بتقدري تنسي عزو؟
قالت ليها أنا بالجد قدر ما حاولت ابعد من عزو ما قدرت .. وهسي كلمتو قلت ليهو أنا ما بقدر اتزوجك .. لكن انت بتفضل حب حياتي وخيار قلبي ..
وهو قال لي اتزوجي العايزاهو أنا مرا بتدخل حياتي غيرك مافي ..
وانا قلت ليهو .. حتى لو أنا اتزوجت وبقيت حبوبة .. ما بقدر اتخلا عنك يا عزو ..
انا يا ثويبة لو عديت يومين وما شفته عزو بموت ..
قالت ليها طيب يا دالية إنتي ليه ما تتزوجيه بي حالتو دي لو كنتي بتحبيهو قدر ده ..
وبعد الزواج ربنا بفتح عليكم وتبنو حياتكم كأحسن ما يكون ؟؟
قالت ليها هو حق العرس ما عندو ..
وقاعد عاطل ..
ثويبة قالت ليها والله إنتي في مشكلة حقيقية .. لكن أنا ما عايزاك تظلمي عامر .. عامر إنسان طيب.. وما بستاهل تظلميهو ظلم قدر ده .. تتزجيهو وقلبك مع إنسان تاني ..
بعدين إنتي كدا ما بتسعدي في حياتك ..
قالت ليها يا بت الزمن ده السعادة بقت في القرش .. والفلس ملعون .. قالت ليها .. والله يا دالية فعلاً إنتي زولة مسكينة وما فاهمة الحياة ..
لو القروش مهمة في السعادة تعالي شوفي بيتنا .. أنا والله السعادة البحسها في بيتنا .. في قصور الملوك ما أظنها في .. أنا أبوي يا داليا عامل بسيط في طرمبة .. ودخلو بس قدر الأكل والشراب .. وطبعاً اهو ظاهر علي ما محتاجة أحكي ليك .. جزمة بتلاتين جنيه ما قادرة اشتريها .. لكن والله السعادة الحاسنها .. لو في زول عارفها يحسدنا عليها ..
في النهاية إنتي مخيرة .. أنا بنصحك تتمسكي بي حب حياتك .. لأنو السعادة معاهو ما مع القروش .. غايتو أنا كان بقيت في محلك .. بقيف مع حبيبي .. وما ببدلو باي إنسان تاني .. مهما كان غنى .. وفي النهاية لازم تقرري .. واحد في الإتنين ..
والبتبقي عليهو أنا بقيف معاك والله ...
وعايزة اسالك يا دالية القصة دي كلها عامر عارفها ولالا .. قالت ليها ابدا ما عارفا .. بس عارف اني عندي علاقة مع واحد ساكن الصحافة .. بس ما عارف التفاصيل دي ..
وانا كلمتو مرة قلت ليهو خليتو ..
لكن والله يا ثويبة حاولت كتير اسيبو عشان عامر.. بس ما قدرت ..
زي العصر كدا مشت ثويبة لأهلها وهي حزينة ومتأثرة لحالة عامر أكتر من داليا ..
وحاسة أنو عامر مظلوم ظلم حقيقي .. وبقت شايلة هم أكتر من الأول ..
وبعد ما كان هدفها تلمهم الإتنين صممت انها تبعد داليا من عامر باقصى سرعة ..
بس تعمل شنو؟ غايتو جنس حالة !!

\

ودعتكم الله ،،،

\

إلى اللقاء في الحلقة القادمة ،،،،

[لامارا]

الحلقة الحادية والعشرون

عم البشرى في البيت .. قاعد بحكي ليوسف الصغير في قصة ..
ثويبة جات .. ظاهر عليها مهمومه ومغمومة .. وحالتها بالبلا .
أبوها قال ليها الحاصل شنو ..؟؟ قالت ليهو مافي حاجة يا أبوي .. عندي زولة صاحبتي كدا واقعة ليها في مشكلة ..
قال ليها .. ايوة ده وقت الصديق بحتاج للصديق .. لازم تقيفي معاها للاخر .. وتحسي أنو المشكلة مشكلتك ..

شوية كدا وعمر دقا الباب يادوب جاي .. وسلم ودخل بي غادي .. ثويبة حضرت ليهو الحمام والغيار النضيف.. والحاجة جهزت ليهو الغدا المتاخر .. المغرب قرب ..
البشرى طلع على الصلاة ،،

اها وكت عمر ثويبة جابت ليهو الأكل ..
قال لها .. ها بت أنا ها .. إنتي ما بتنضمي مالك؟ . قالت ليهو كيف يا عمر .. ما بنضم؟ ..
بس ما لقيت لي فيك فرصة .. والله ابراك بري انت قايلني هينة ؟
قال ليها والله بنات الخرطوم ديل مسلطات .. لكن إنتي ما زيهن ..
هسع أنا كنت داير اشاورك في موضوع .
لكن لقيتك مسكينة ساي بنوت البلد هناك افلح منك..
قالت ليهو بالله عليك ؟.
الما عارفو يقول عدس .. يا ما تحت السواهي دواهي ..
والناس البتمسكنو وكاتلين ضلهم ديل .. اعمل حسابك منهم ..
اها موضوعك شنو؟ ..
قال ليها أنا حكيت لأبوك .. أنا داير اسما بت خالي.. وابوي واقف دوت ..
قالت ليهو ايوة أنا سمعتك كان بتحكي لابوي ..
قال ليها كمان بتتسنطي؟
قالت ليهو انت أساساً ما محتاج لزول يتسنط .. بتكورك بطول حسك .. زي الشايل ليك مكروفون ..
الجيران ديل بكونو عارفين قصتك مع اسماء وأبوك ..
قال ليها اها .. ابو الأفكار .. إنتي رايك شنو؟ والله أنا في ضيقة شديدة ..
وبقى يهضرب .. واسماء .. واسماء .. هسع أنا ما مشتاق لي حاجة في البلد إلا اسماء .
انا كان ما عرست اسماء بحن ..
قالت ليهو .. انت ليه شايل هم قدر ده؟ انت ما عندك ايمان أنو ربنا مقسم الأمور دي من زمان ..؟
يعني يأخوي خليك مرتاح .. الزولة دي كان مقسومة ليك بتلقاها .. وكان مقسومة لزول غيرك .. قدر ما تنطط ما بتلم فيها .. أحسن توفر الأفكار والتعب ..
ولو عندك سعي اسعى في حدود المعقول والصاح..
المهم ثويبة عرفت مدى التمسك المتمسكو عمر بي اسما بت خالو .. وكيف هو بحبها ومخلص ليها واتكيفت جداً من القصة دي ..
قالت ليهو انت لمن حكيت لابوي قالك شنو؟
قال ليها أبوك ده والله نعم الرجل .. أنا كل مرة بتمنى أنو يكون أبوي ما عمي ..
ممكن نتبدل ؟ اديكم أبوي واشيل أبوكم؟
قالت ليهو .. بتبالغ لكين نتبدل كيف .. ونحن ابونا مرغني .. وابونا بشرى الإتنين .. ما بنستغنى عن أي واحد فيهم ..
اها ما قلت لي قال ليك شنو ؟؟
قال ليها .. أبوك قال لي أنا بتصرف .. وإن شاء الله ما يحصل إلا الخير ..
قالت ليهو طيب خلاص .. ده أبوي وانا بعرفو .. موضوعك اعتبرو منتهي ..
دي أول مرة عمر يلقى فرصة يتكلم مع ثويبة ..
اعجب بي شخصيتها جدا.. بس الزول قلبو ملان زوت ما فيهو نفس .. اسما جايبا ليهو اكتفاء نفسي..
اها يا زول البشرى جا لقا ثويبة قاعدة بتتونس مع عمر .. ويوسف راقد ليها في كرعينها .. وكانت بتحكي لعمر عن صاحبتها في الجامعة كانت أمها رافضة خطيبها ..
المهم البشرى جا وقعد والونسة جرت .. وعمر لسه بهضرب بموضوع اسماء ..
ومن خلال الونسة.. البشرى عرف أنو عمر حكا مشكلتو لثويبة ..
اها البشرى قال لي عمر يا عمر .. تلفون خالك بدوي .. كم؟ قاليهو اكتب .. ملاهو ليهو ..
البشرى ضرب لي بدوي ابو اسماء وخال عمر طبعاً..
اها ثويبة .. وعمر ..
سامعين كلام البشرى ..
لكن كلام بدوي ما سامعينو ..
البشرى .. السلام عليكم يالبدوي الكبير شيخ المشايخ ..
كيف الحال .. وإن شاء الله طيبين .. ..
...-
- البركة في الجميع ..
-.....
والله أنا عندي معاك موضوع وما عارف ابداهو معاك كيف ..
بس اهم شيء في الموضوع ده السرية التامة ..
...... (اطنو قاليهو سرك في بير ^_^)..

طبعاً ثويبة وعمر بسمعو في المكالمة فاتحين خشومن ..
واصل البشرى وقال ..
طبعاً قبل ايام جوني ناس مرغني أخوي للعزاء ومرغني .. اتكلم عنك كتير وقال هو بعزك معزة كبيرة ..
وقال نفسو يزيل الجفا .. ويجي يطلب اسماء بتك لي عمر ..
لكن هو شايفك انت متباعد منو ..
وخايف يجيك وانت تحرجو .. أنا يابدوي بطلب منك طلب الأخو من الأخو ..
دايرك تمشي تسجل زيارة لي مرغني .. وتطيب خاطرو .. وبي أفكارك وزكاوتك تحأول تصفي البيناتكم ..
وده طلبي الوحيد .. وما اظنك .. تخيب ظني ..
عمر اليومين دي معانا بيجاي ومافي خشمو سيرة غير اسماء ..
وبتك مافي زول بسعدها زي عمر الأصم ود أخوي ..
بشرى سكت يسمع وبدوي اتكلم كتير .. والبشرى يتبسم ..
وقال ليهو الله يجزيك خير يا بدوي وياها المحرية فيك .. ياخي الله يكرمك .. بس اهم حاجة تقسم لي هسع اتصالي ده مافي زول يعرفو ..
اها الله يسلم الله يبارك فيك .. وقفل التلفون..
وعاين لي عمر وقال ليهو ابشر يا المبروك .. دي أول خطة في خطة عمك البشرى الما بتجلي ولا بتخيب ..
نشرب الشاي ونضرب الضربة التانية ..
والله عمر ده فرح فرحة .. ما قادر يتنفس .. بقى يبلع في ريقو ويرمش زي الضارباهو كهربا ..
بعد الشاي وكانت الونسة سمحة سماحة ..
شال البشرى التلفون وضرب لي مرغني أخوهو ..
قال ليهو مرغني أخوي كيف حالك والله عمر اليومين ديل معانا بي جاي .. وجايب لنا الفرحة والخير ..
والأمور ديك ماشة تمام .. الحمد لله بس لسه مافي حاجة واضحة كدا ..
لكن شكلو الزول صاحبنا باقي على قديمو ..

طبعاً ثويبة وعمر ما فاهمين اللغز ده يعني شنو؟
قاليهو عارف يا مرغني .. صاحبك بدوي ضرب لي هسع داير يعزيني .. وسعلتو منكم وقال لي .. والله .. أنا أكبر خسارة لي في الدنيا .. الجفا البيني وبين مرغني ..
وقال لي أنا داير أمشي ليهو .. لكن خايفو يحرجني .. عارف يا مرغني أخوي الزول ده بعزك .. أنا أول مرة اكتشف الموضوع ده .. عشان خاطري كان جاك انت جبل الكرم الما بوصوهو..
مرغني ........ برضو اتكلم كتير
بشرى : قال ليهو والله ياها المحرية فيك يا فارس المدرعات هع عفيت منك أخوي ..
الله يسلمك وتصبح على خير ..
وقفل التلفون ..
وقال لي عمر ابشر يا بوعميرة الموضوع انتهى خلاص .. وبراك بتشوف سحر عمك البشرى كيف بياكل جبل العداوة بي نارو ..
ومرة قال اللبيب..
كريم الطبعة ديمة بلمـلم المفروق
وكان ما اصلح الناس من هموم ما بروق
أوعك من منافق فعـلو كلو فروق
يقول للشـر هلا . ومن السمح محروق
..
وزي ما شايفين أخونا ابوعميرة امورو وضحت .. وربنا يتمم ليهو مراده ..
وسبحان الله .. شوف جايبنو لي شنو .. والحصل شنو؟..
صباحات الله بي خيرا يوم السبت نشوف الشركة ودراماتها ..

\

ودعتكم الله ،،،
\

إلى اللقاء في الحلقة القادمة ،،،،

[لامارا]

الحلقة الثانية والعشرون

الصباح شايل عجايب .. وعندو بسمات سخرية .. في الشركة .. والوضع عادي والشغل ماشي زي الساعة ..
وكان في زحمة عملاء .. وثويبة كانت كايسة ليها فرصة .. تتكلم مع دالية .. أول ما لقتت ليها عشرة دقايق فاضية .. برضو قالت لقرشي .. اضرب لي دالية .. قال ليها شنو يا جماعة ما تسوو ليكم تلفونات .. أنا تلفوني ده بقت تجيهو حساسية من دالية دي ..
قالت ليهو خلاص يا قرشي .. ولا يهمك بمشي ليها براي .. قال ليها لالا يا بت تعالي بهظر معاك ..
ما اشتغلت بيهو مشت ليها طوالي .. أساساً هي لفة الشارع بس لأنو الباب الداخلي الصباح بكون مقفول .. بفتحوهو اخر اليوم ..
ثويبة قالت لي دالية .. كيفك وكيف صباحك اها جبتي البتاعات ؟ قالت ليها جبتهم بس في مشكلة .. اتصرفت في ال 230 .. قالت ليها ما مشكلة تتحلا برضو بعد تفضي شوية جيبيهم وتعالي لي بي غادي ..
ومشت .. اها يا زول ثويبة شافت عامر مرتين تلاتة بمر بي قدام مكتبها .. ولا سلام ساي ما بسلم .. ياربي الزول ده مالو معاي؟ .. المهم اتعمدت تطلع تلاقيهو .. وهو كان مشى على مكتب الكمبيوتر .. وهي طلعت من مكتبها زي كانها ماشة لسوزان هناك .. في مكتب الكمبيوتر ..
قبل ما تصل هو كان طلع واتصادفو في الممشى ..
سلام عامر ..
قالها عليكم السلام ثويبة .. كيفك وكيف ناس البيت ..
قالت ليهو الحمد لله.. عامر ممكن سؤال ؟
قاليها اتفضلي .. قالت ليهو في شنو يا عامر؟ انت ما طبيعي..
قاليها ابدا والله يا ثويبة الموضوع عادي ..
قالت ليهو طيب .
بس أنا شايفاك ما راعيني أي اهتمام ..
قال ليها صراحة في موضوع شاغلني شوية.. بحكي ليك مرة تانية ..
قالت ليهو خلاص بعدين توصلني؟ .. قال لالا اسف ما بقدر والله ..
قالت ليهو طيب مر علي اخر اليوم في موضوع ضروري.. لازم اكلمك فيهو ..قال ليها ان شاء الله وخلاها واقفة وفات ..
الزول ده فعلاً ما ياهو أول مرة يتعامل معاها بالطريقة دي ..
رجعت مكتبها وبقت منتظرة دالية .. وبقت منتظرة داليا تجيها ..
قالت لي قرشي يا قرشي الحمد لله القروش اتلقت ..
قاليها الشالا منو؟ قالت ليهو دي داليا .. لكن شالتها بس مكازاة لي أنا عشان ترميني في مشكلة مع عامر ..
مفتكرة بيني وبينو حاجة.. لكن هي أساساً لا سراقة لا حرامية..
قال ليها كويس .. لكن والله الموضوع ده أنا ما بمشيهو ساي .. قالت ليهو عشان خاطري يا قرشي كانك ما سمعت حاجة .. سكت ساي ودنقر في شغلو .. زي الساعة واحدة كدا ..
جات دالية وشايلة حاجة ملفوفة في قرطاس اصفر زي الجلاد بتاع الكتب الزمان داك ..
جرت كرسي وقعدت قريب من ثويبة .. عشان قرشي ما يسمع ..
قرشي لمن حس بي كدا شال ليهو ملفات وطلع ..
قالت ليها اهو دي القروش.. بس الله يخليك أنا ما عايزة الكلام ده يصل لابوي . ولا يصل لعمي مصطفى .
قالت ليها طيب إنتي عامر ما شايلة همو شايلة هم أبوهو ..؟
قالت ليها دي صداقة سنين بين أبوي وعمي مصطفى .. ما عايزة اخربها ..
ثويبة قالت ليها إنتي لو مانفذتي البقولواا ليك أنا البمشي اكلم عمي مصطفى والله العظيم ..
قالت ليها عليك الله يا ثويبة لا .. إنتي بس قولي لي أنا بدون ما تهدديني بسمع كلامك اقسم بالله ..
ثويبة قالت ليها إنتي كلمتي كم موظف وقلتي ليهو .. عامر غشاني وخلاني ؟
قالت ليها اربعة بس .
عبد القادر وتوفيق وقرشي وصديق . وفي بتين سابو الشغل .
قالت ليها هسي تكلمي قرشي تقولي ليهو كلامي القلتو في عامر ما صاح .
وتطلعي فوق تكلمي عبد القادر وتوفيق ..
وصديق الليلة ما جا .. بكرة تكلميهو قبل أنا ما اعمل ليك البراءة من التهمة دي .
قالت ليها حاضر.. باختصار داليا بدت التنفيذ في نفس اليوم . وقرشي وكت كلمتو وقالت ليهو الرسايل الجات للبنات زاتها رسلتها انا.. عشان اطفش البنات . قال لهيا أنا كشفت انك كضابة لكن للاسف اكتشافي كان متأخر إنتي زولة رمة أمشي عليك الله ..
عليك الله هسي إنتي ماخربتي سمعتك .. كونك تقولي كدا .. في النهاية عامر ولد وما بضرو الموضوع زي ما بضرك يا مغفلة ..
والله لو ما أنا قرشي وعيب علي اضرب بت .. اقشطق كف كدا .. تقولي وقعت فوقي حيطة ... وعبدالقادر كان عايز يضربها بي علبة الختم .. قالها طيري من قدامي ... أعوذ بالله منك يا شيطانة ..
البت بقت مسكينة وحالتها بتحنن .. وثويبة ماسكاها من يدها البتوجعها . والجماعة بقو خجلانين من روحهم من الاتهامات الكانو لاصقنها في عامر بلا سبب ..
بس بي كلام البت الغريبة دي .. وده ياهو الغلط زااااتو ..
ومرة قال اللبيب ..
.
أوعك تظلم إنسان بي كلام ناقلنو .
أطرد شك فؤادك ولا أكد ظنو.
إبقى تقربو ويازاكا قربك منو .
وامكن تنظلم بي ابتعادك عنو .
.
شن بتسوي بي خبر البعيد والداني .
غير ما ساي تشيل هم الخلوق وتعاني .
كان جاك الخبر لازم تكون حقاني .
وان كان انت أفاك يبقى موضوع تاني.
.
بالاختصار يا جماعة .. دالية قدرت تمسح كل الأفكار المسمومة الزرعتها في أفكار الموظفين ضد الود عامر ..
كل الناس كانو مفتكرين أنو عامر راجل تافه واستغلالي .. وكلو بي سبب كلامات دالية ..
وسبحان الله هو المسكين ما عندو أي خبر لا بالتهمة ولا بالبراءة .
لكن الله مع المسكين لأنو هو ما جايب خبر .. وزول واجبات .. ربنا دافع عنه وحقق ليهو البراءة وهو غايب ..
اها يا زول في نهاية اليوم . عامر جا لثويبة .. في المكتب وثويبة قالت ليهو يا عامر أنا طلبت منك كتير وانت ما رديت لي طلب عايزة اطلب منك اخر طلب ..
قال ليها قولي يا ثويبة في شنو؟
قالت ليهو هوي هسي انت مالك منفعل كدا وزهجان ومتضايق ..
قال ليها قولي مافي حاجة ..
قالت ليهو اوكي المهم ياخي دالية دي غلطت في حاجة معينة .. وانا عايزاك تسامحها ..
القروش الاتفقدت المرة الفاتت هي شالتهم ومحتفظة بيهم عشان تعمل مشكلة بيني وبينك .
بسبب الغيرة . يعني هي ما سراقة ولا حرامية ..
ولو كانت سراقة او حرامية كانت اتصرفت فيهم .. جابتهم كاملات وتامات ..
عامر زي الما مركز معاها .. قال ليها خلاص خلاص يا ثويبة .. أنا كنت متأكد شالتهم.
خلاص مادام رجعتهم مكتملين يبقى مافي مشكلة .. . ورديهم وخلاص .. قالت ليهو طيب طلب تاني صغير تابع لنفس الموضوع ..
انا عايزة سلفية 230 لاخر الشهر اشيلها منهم وبنزلا في اليوميات ..
وبي كدا دالية مرقت من المشكلة زي السبيبة من العجين ..
لكن في مشكلة تانية ثويبة ما حتقدر تتلافاها .. وهي أنو قرشي زعلان زعل شديد ..
وطبعاً هو زول احمق ما بقدر يتحكم في روحو نهائي ..
مشى طلع لي عبد القادر .. قال ليهو شفت الهبالة بتاعة الناس الكبار بتسوي شنو؟
هسي انت بتودي وشك وين من البت المسكينة الاسمها ثويبة دي.. بعد سمعتها الكلام داك .. انت عارف انها هي الاجبرت دالية تقول الحقيقة ؟
لكن والله أنا الليلة لازم اطير دالية دي من الشركة ..
ياهي يا أنا .. في المكان ده .. دي زولة سجم الله يقطعا ويقطع يوما ..
عبد القادر قال ليهو انت متنفش كدي داير تسوي شنو ؟؟ وكت سيد الحق راضي .. وشايفها بتعمل في شنو.؟
قال ليهو سيد الحق منو ؟عامر كلتشي؟ عامر ما قادر يتكلم معاها خايف من أبوهو ..
انا بمشي بكلم أبوهو براي ..
واكشف ليهو كل عمايلها .. وحركاتها من طق طق للسلام عليكم .. واوريهو أنو عامر فقد السيطرة على الشركة بسبب دالية .. وغرامها الأهوج ..
وانا من دربي ده بمشي ليهو حتى تاني أمشي البيت..
وفعلاً قرشي في نهاية اليوم طلع ومشى على بيت ناس عامر ..
ولقى عامر مافي.. زي الكأنو ما وصل البيت او غشا ليهو مكان.. ودي طبعاً فرصة كبيرة ..
البيت طبعاً عبارة قصر عجيب .. ومنظره من برة يجيب الخوفه ..
وقرشي أول مرة يخش فيهو .. وهو شغال في الشركة 3 سنوات .. مافكر يوم يمشي بيت ناس عامر مصطفى نهائي ..
اها سلم على عم مصطفى .. وهو طبعاً بعرفو شديد .. لقاهو قاعد في صالة كبيرة .. فيها شاشة 50 بوصة .. ومشغل قناة الجزيزة والتكييف المركزي .يجيب الصقطة ..
قال ليهو كيف يا قرشي .. والله الليلة الجابك لي في البيت ده الشديد القوي ..
انت معروف ما بتزور الناس في بيوتهم إلا اقرباءك صاح؟
قال ليهو بس يا حاج مصطفى انت زي ابونا .. ونحن فعلاً مقصرين فيك ..
انا المفروض اجيك زيارة عديل .. بس الليلة والله جاييك بي مشكلة صغيرة كدا حاصلة في الشركة
في المقر الرئيسي في الخرطوم ..
للعلم يا جماعة الشركة دي عندها فروع في بحري وامدرمان ..
وكلهم عامر فيهم المدير العام وعندو مدراء فرعيين ..
وعامر بسموهو رئيس مجلس الادارة .
اها يا زول قرشي بدا يحكي لي عم مصطفى .. عمايل دالية بت صاحبو الأمين في الشركة.. وقلة أدبها واستهتارها ..
وتحمل عامر ليها مراعاة لي صحتك ولي علاقتك با بأبوها .. وقاعد يحكي ليهو في حركاتها بالتفاصيل المملة ..
وقال ليهو الموضوع في يدك انت يا حاج.. شوف عايز تعمل شنو لأنو ولدك بخاف عليك.. وهسي لو عرف أنا حكيت ليك بغطس حجري ..
قال ليهو ما تشيل هم يا قرشي.. اعتبر الموضوع منتهي.. وانت لأحكيت لي حاجة ولا شيء ..
اها نغير الموضوع أنا عايز اسألك من حاجة ..
انا عايز عامر ده يعرس والله في العيد القدامنا ده .. وعندنا بت عمتنا في الدويم عندها بت زي القمر.. وانا امبارح اقترحتها ليهو ..
عليك الله كان انت قريب منو اتكلم معاهو في الموضوع ..
انا فتحت ليهو السيرة وهو قعد يطنطن .. أنا قلت ليهو في بت في راسك؟ .. قال لي مافي .. أنا كنت قايلو خاتي راسو مع داليا بت الأمين دي .. اها مدام كدي أنا باكر برسل لي بت عمتي تجيب بتها وتجينا زيارة ..
قرشي قالوا يا زول هو ما بدور دالية دي كلو كلو .. اسالني أنا ..
قاليهو اتكلم لي معاهو يا قرشي الله يبارك فيك.. ولازم نغتنم الفرصة دي قبل يمشي يسوي ليهو قصة مع بت تاني ..
والظاهر دي الحاجة المضايقة عامر قبيل .. يعني عامر كان راغب في ثويبة فعلاً .. وثويبة لمن قالت ليهو عايزها ود عمها .. بقى ما عندو طريقة يرفض عرض أبوهو ..
وما معروف لقدام بحصل شنو؟


\

ودعتكم الله ،،،

\

إلى اللقاء في الحلقة القادمة ،،،،

[لامارا]

الحلقة الثالثة والعشرون

كل الأمور ماشة في الشركة بالطريقة المقلبنة دي .. نحن هسي في العصرية .. في البيت ثويبة ..
كانت اليوم عندها حالة بتاعة توتر ..ما عارفة سببها شنو؟
وزهجانة بطريقة غريبة خلاص .. وقالت لأمها يا أمي أنا حاسة بنفسي متضايقة .. وقلبي واجعني شديد .. أمها قالت ليها قولي بسم الله يا بتي ..بتكوني اتذكرتي أخوك ..
قالت ليها لالا والله الموضوع ما كدا .. بس ما عارفة مالي ..
قالت ليها قولي بسم الله .. أمشي اخدي ليك نومة .. بكون من الارهاق .. واليوم داك كلو ما قدرت نامت .. ومقلقة بس ما حكت لأبوها .. وأبوها كان مشغول بالونسة مع عمر وعمر احتمال يسافر باكر اوبعد باكر .. وأمها كمان نست تحكي لأبوها عن حالة ثويبة دي .. وافتكرت الموضوع طبيعي ..
ثويبة بالليل قامت صلت وقعدت ..
ورقدت في السرير ..جواها أفكار كدا بتنازع فيها منازعة عجيبة ..
بقت تفكر في الحاجة المضايقاها ..اكتشفت انها الطريقة الكان بتعامل بيها عامر معاها في الشركة .. والحالة بتاعة الاهمال الحست بيها ..
وكل ما تفكر في طريقة كلامو معاها تقرب تبكي .. وتاني تقول لنفسها يعني شنو..
انا بالنسبة ليهو شنو؟
ماهو المدير وانا موظفة عادية ..
انا مالي كدا؟ .. والبحصل علي ده شنو يا ربي ..؟
انا هسي عايزة انقذو من شرور دالية .. مافي مشكلة كان اهتم بي او ما اهتم بي ..
قامت علي حيلا والساعة تقريبا 3 صباحا .. ويوسف نايم جنبها .. ولعت النور وبقت تفتش في دولابها ..
وطلعت دفتر قديم كدا من زمن الدراسة وجابت قلم وقعدت تكتب ..
كتبت "مال قلبي يئن .. ولماذا اشعر به يحترق شوقاً .. لقربك يا حبيبي .. ماذا الذي جرى عليك ايها القلب المسكين .. مالي اراك بدأت تتحرك بعد ركود طويل ..
ماذا فيه حتى يجعلل تعاني كل هذه المعاناة ..
لقد كان قريبا منك .. وكان يحوم حولك .. بعد ان صددناه بدأت تعذبني وتناديه ..؟
ايها القلب الكسير .. لم يجور عليك احد .. أنا التي ظلمتك بنفسي.. فاربط جأشك .. وتوكل على ربك .. فليس في الكون أمر إلا بتدبيره ..
يا الهي ما هذه الحسرة التي اتذوق مرارتها ؟.. ما هذا الشعور الذي يتملكني؟
بعد ان حسبت انني قوية كالجبال ..اخيرا اصابني ما يصيب غيري من الوله .
يا الهي ما هذا الشوق الذي لا أعرفه ..
قفلت الدفتر وسرحت كدا مسااااافة واخدت ليها بكية وقامت ..
رقدت شعرت انها ارتاحت شوية ..
واخدت ليها نومة ما أكتر من ساعة .. وبدأ اليوم الجديد ..
وطلعت من البيت سريع وطبعاً كم يوم كدا .. يوسف بوصلو أبوهو للمدرسة .. لأنو البشرى اليومين دي .. في اجازة .. افتعالية ..
اها يا زول ثويبة مشت الشركة على طول .. وطول الطريق مافي فكرها .. شيء غير انها تشوف عامر ولو لبرهة .. في قلبها احساس بالعطش لرؤياهو ..
مع انها بتحأول المستحيل انها تطلع الشعور ده من جواها.. لكن ما قادرة ما قادرة ..
وكل ما تتذكر كيف كان متمسك بيها وعايزها .. وهي ما عندها تجاهو إلا القليل من الاحترام والتقدير .. تتحسر .. بس ده شنو الشي الجاني مؤخرا ..؟
وبقت تتذكر انها كانت بتفرح لما تشوفو .. وبتتوتر لما يكون مافيش في الشركة ..
وعرفت أنو كانت دي بدايات المرض الغريب الاسمو الحب ..
وأكتر شيء طبعاً مضايقها انها قفلت عامر .. بي ود عمها .. لأنها كانت عايزاهو يرجع لداليا ..
ولمن اكتشفت أنو داليا ما بتستحق عامر .. كان الزمن فات .. وعامر خلاص بقى في عالم تاني ..
لأنو قنع منها ..
اها يا زول .. مشت على مكتبتها وبدت الشغل عادي .. وبقت بتحأول كل الوقت انها تركز في الشغل .. اها طبعاً قرشي طوالي بدا معاها الكلام ..
قال ليها طبعاً يا ثويبة أنا مبارح مشيت لبيت ناس عامر وقابلت أبوهو..
قالت ليهو خير إن شاء الله عل مافي عوجة ..
قال ليها الحقيقة مشيت كشفت ليهو بعض الأمور .. ووريتو الحاجات البتعمل فيهن داليا ..
لأنو عامر بقى ضعيف قداما وما قادر يتصرف ..
ونحن صراحة تاني ما بنقدر نتعايش مع الزولة دي في شركة واحدة ..
قالت ليهو والله يا قرشي بالغت شديد .. ليه ياخي بتعمل كدا .؟
قال ليها الزولة دي مضرة .. وممكن تضر الشركة .. وتضر عامر .. وتضرك إنتي وتضرنا كلنا ..
وبعدين لازم تتعاقب على الظلم العملتو ..
إنتي ما متذكرة انها قطعت معيشة بتين .. وشوهت سمعة عامر وسرقت وووو ..
ده كلو يمر ساي .. نحن ارحم من رب العالمين الفرض العقوبات من السماء ..؟
بعدين نحن لو بقينا نضاري ليها .. كدا بنضر عم مصطفى في شغلة التعب عليهو عمرو كلو ..
بي سبب بت لا بتساوى حجر ولا طوبة ..
قالت ليهو بس انت شايفها ندمت .. وبدت تصلح في الحاجات .. ورجعت القريشات .. وصححت المفاهيم ..
يعني لمن الزول يرجع من الغلط .. نحن بدل ندعمو .. نخليهو يندم على الحقيقة ؟
بس غايتو يا قرشي تاني التوبة .. ما بدخلك في اسرار .. ولا بكلمك بحاجة ..
اها طبعاً .. عامر لمن جا رسل لثويبة .. وكت الود العامل كلمها وقال ثويبة مطلوبة في مكتب المدير .. ثويبة هجمت عليها مشاعر عجيبة وغريبة .. فرحت وخافت وقلقت في لحظة واحدة .. وقالت لي قرشي اهو عامر بكون أبوهو كلمو بكلامك .. قال ليها ..لا ما بكلمو وعدني أنو ما يكلمو .. قالت ليهو طيب حيتصرف كيف؟ .. قال ليها أمشي ليهو سريع .. في باقي كلام ما قلتو ليك .. لمن تجي راجعة بحكيهو ليك ومحتاج لمساعدتك .احتمال تقدري تساعديني ..
اها مشت لي عامر .. دقت الباب برااااحة ..
قال ليها خشي ..خشي ياخ ..
وكت شافها جاتو داخلة .. كان شكله مستاء .. وبمسح في وشو بيدو كدا ؟؟
ومتكل كوعين يديهو علي الطربيزة ومتكي ..
عاين ليها لقاها مبتسمة ابتسامة صغيرة كدا ..
عاين ليها كدا معاينة بتاعة غضب وزهج شديد .. وحست بي اكوام كراهية مرسومة على وشو ..
غيرت ابتسامتها سريع .. وقالت ليهو السلام علي قال ليها .. مرحب اتفضلي أقعدي ..
إنتي كلمتي زول بي حاجات دالية البتعمل فيها دي ؟
قالت ليهو أبداً ليه في شنو؟
قال ليها ما تكذبي علي يا ثويبة . قالت ليهو انت أحكي لي ..
قال ليها في مزامنة غريبة في الأحداث .. مع الاعتراف بالسرقة .. أبوي امبارح اتكلم معاي ..قال لي أنا دالية بت الأمين دي ما عايزها تواصل شغل في المقر الرئيسي..
حولها تشتغل في الفرع بتاع بحري .. عشان هو قريب ليها ..
وانا طبعاً بعرف أبوي كويس .. لمن يكون في راسو في حاجة وما عايز يقولا ..
قالت ليهو يا عامر طبعاً انت عارف .. أنو دالية قصدها أصلاً تنتقم منك .. وده الكلام الانت قلتو لي . وموظفينك كلهم عارفين الحتة دي ..
بس ليه انت بس اتهمتني أنا ؟
قال ليها بس لأنو الأحداث اتزامنت مع بعض .. وانا حاسي بانك مشغولة بيها أكتر من اللازم ..
قالت ليهو مشغولة بيها؟؟ أنا ؟؟ سبحان الله ..
باختصار شديد يا عامر أنا أصلاً ما عندي شغل بالموضوع ده من اساسو ..
وبراي بديت اتحشر في مالا يعنيني.. الكان مفروض يعنيني هو اني ابرء نفسي من السرقة وبس.
بعدين انت عارف أنو داليا مضرة .. وانت متضايق منها .. وكنت أصلاً على حسب كلامك خايف من أنو كلام يصل أبوك .. ويزعل والحاجة تأثر عليهو .. صاح؟
طيب لما في زول خدمك خدمة قدر دي .. وبلغ أبوك بالحقيقة بدون تحصل أي اضرار .. انت متضايق مالك ..؟
قال ليها بس أنا كنت عايز اعرف منو الكلم أبوي وبس ..
قالت ليهو أنا قلت ليك أنا ما عندي علاقة بالموضوع .. أمشي اسأل غيري .. وعن اذنك والله أنا عندي شغل ..
قال ليها يا ثويبة إنتي مالك .؟ هسي كلامك حار كدا ؟
دي ما من طبايعك نهائي ..
قالت ليهو أنا اديك مراية تشوف وشك؟ قابلتني كيف؟ .. ورديت علي السلام كيف .
واتكلمت معاي بياتو طريقة ..
سبحان الله .. انت مفتكر اني سيئة وكذابة ؟ ومتضايق مني للدرجة دي ..
قال ليها ابدا أنا ما متضايق منك .. أنا في موضوع تاني جايب لي توتر وكاره نفسي ..
قالت ليهو خير ربنا يعينك أنا ماشة ..
وطلعت طوالي وهو بنادي فيها ثويبة أنا بتكلم معاك .. أبداً ما التفتت عليهو تاني .. وحاسة في غصة واقفة ليها في حلقها .. واتأثرت شديد ..
لما وصلت المكتب .. قرشي قال ليها أحكي ليك باقي الكلام ؟..
قالت ليهو لالا ما تحكي لي أي شيء .. انت دخلتني في مشكلة لا ليها أول ولا ليها اخر ..
وعامر اكتشف أنو في زول مشى شكى لأبوهو ..
ومتهمني أنا عندي يد في الموضوع ..
قال ليها يتهمك إنتي كيف يعني؟؟ هو ممكن يتخيل انك إنتي تمشي تكلمي أبوهو ؟
ده ود اهبل ولا شنو؟ والله فعلاً عامر كلتشي ..
قالت ليهو لو سمحت يا قرشي.. أنا ما بسمح ليك تتكلم عنو أي كلمة جارحة ..
قال ليها ليه ياختي بديتي تقعي في غرامو ؟ قالت ليهو القصة ما كدا يا شاطر ..ده في النهاية مديرنا .. ونحن شغالين تحت خيرو .. المفروض على الأقل يكون في وفاء ولو بسيط ..
قال ليها نحن شاحدينو؟ .. ماشغالين بعرق جبينا ..
قالت ليهو ماح تفهم يا قرشي ..انا عايزة اشتغل ..
قالها : يعني ما أحكي ليك؟ . .. قالت ليهو لا ما تحكي لي ..
قال ليها بس بكون ده الموضوع المضايق زولك أحسن ليك تعرفيهو ..
قالت ليهو لا ما عايز اعرف وبس ..
اشتغلت شوية وما طلعت للفطور الناس كلهم طلعو الفطور وهي مكبسة في الشغل ..
بعد خلصت من الفي يدها مشت لداليا في المخزن ..
نادتها بعيد قالت ليها داليا لو سمحتي يا داليا ..انا محتاجة للمبلغ باقي القروش ..
قالت ليها هسي ما عندي والله .. قالت ليها المهم باكر بعد باكر بالكتير تجيبيهو لي ..
لأنو أنا ما عندي حاجة اسددو بيها ..
داليا قالت ليها عامر عرف أنو أنا شلت القروش يا ثويبة ؟
قالت ليها ايوة عرف .. ما كان في زول تاني ممكن نتهمو بيها .. طبعاً لكن أنا اتكلمت ليك معاهو ودافعت عنك بوارك .. وما ح يسالك ..
بس جيبي القروش ده كلو موضوعي ..
دالية قالت ليها ثويبة إنتي مالك الليلة .. والله ما طبيعية ..
قالت ليها مافي حاجة ..
دالية قالتلها .. لالا في حاجة .. إنتي الليلة ما ثويبة البعرفها أنا ..
لما جات راجعة من دالية سمعت في مكتب عامر في نقاش حاد
وعامر رافع صوتو وهايج في زول ..
وكت دخلت مكتبها لقت قرشي مافيش ..
معناها الشكلة بين قرشي وعامر ..
غايتو الشركة دي فيها جنس دفسيبة ..
ربنا يجيب العواقب سليمة ..

\

ودعتكم الله ،،،
\

إلى اللقاء في الحلقة القادمة ،،،،

[لامارا]

الحلقة الرابعة والعشرون

طبعاً ثويبة زي ما لاحظتو ابدا ما حاولت تتسنط عل الشكلة .. عشان تشوف الحاصل شنو .. اولا هي أساساً بتخاف من الكواريك والأصوات العالية .. . وتانيا ده ما من طبعها.. اها لمن جات لقت قرشي في المكتب مافي.. انتظرته بفارغ الصبر عشان يجي وتسالو اذا كانت الشكلة دي معاهو ولالا .. اها قرشي بالجد اتاخر شديد .. بعد مسافة جا .. وجا يتبسم زي الكانو مافي مشكلة .. قالت ليهو إن شاء الله خير يا قرشي ..في شنو في مكتب المدير.. قال ليها طبعاً هايج فيني أنا .. لاني مشيت وريتو اني أنا الكلمت أبوهو .. عشان ما يتهمك ساي .. ثويبة قالت ليهو وطبعاً كدا هاج فيك .. قال ليها لا أنا بديت ليهو البداية .. وكشفت ليهو عمايل دالية الداسنها منو لينا سنتين .. والباقي كملو عبد القادر .. قالت ليهو ما قادرة افهم شيء ..
قال ليها أنا يا ثويبة كلمت عامر .. قلت ليهو البت الاسمها ثويبة دي.. اﻻنت بتتهم فيها دي .. هي الشغالة زي النحلة عشان تزيل منك التهمة الملصقاها فيك دالية .. قام قال لي تهمة شنو ؟ قلت ليهو دالية مفهمانا انك انت .. (شليتا وخليتا) .. فاهم يعني شنو شليتا وخليتا ؟
قال ايوة فاهم لكن والله يا قرشي البت دي كذابة .. اقسم بالله ما لمستها بيدي ..
انا قلت ليهو ما تحلف يا عامر .. نحن عرفنا انك برئ .. بسبب ثويبة .. هي الجرجرتها .. وخلتها تعترف ..انها بتكذب . واجبرتها انها تحكي لينا الحقيقه..
ثويبة تسمع في قرشي مستغربة شديد ..قالت ليهو .. عاد يا قرشي ما تتبلا في خشمك فولاية ..
قال ليها اصبري اتم ليك . اها طبعاً عامر هاج فوقي .. وقعد يكورك .. وقال لي موش أنا معاكم ؟..زي أخوكم ؟..ليه ما كلمتوني؟ .. أنا قلت ليهو والله يا عامر.. نحن كنا مصدقنها ..لو ما جات ثويبة وكشفت لينا كضبا ..
اها هو في اثناء ما كان هايج كدا ..جانا عبد القادر .. وانا قلت لعبد القادر أحكي ليهو .. قام عبد القادر حكا ليهو الرسالتين .. الاترسلن للبنات فلانة وفلانة .. وقال ليهو .. واحدة جاتها رسالة منك في ورقة . والتانية جاتها رسالة في تلفونها من رقمك ..
وورونا الرسايل وخلو الشغل بالسبب ده .. ونحن صراحة كنا خاتنك أكبر تافه بتاع بنات .. لكن البنية ثويبة دي الله يبارك فيها .. كشفت الحقايق .. والله أنا هسع خجلان منها.. لاني قابلتها مقابلة كعبة .. يوم التعيين .. بتكون حكت ليك يا عامر .. قاليهو ابدا والله ماحكت لي.. وما بتتكلم عنكم إلا بالخير ..
وقرشي مواصل بيحكي لي ثويبة قاليها ..عارفة يا ثويبة لأول مرة أشوف عامر ببكي .. وقال أنا البت دي غلطت معاها غلط كبير ..
انا البت دي ماحصل شفت زيها.. لافي الرجال لافي الحريم ..
ده كل الحصل يا ثويبة ..
ثويبة قالت ليهو والله يا قرشي .. أنا دالية دي كان قصدي استرها .. لكن ربنا براهو اراد ليها كدي ،، لأنها همها توسخ سمعة الناس بالكذب .. أصلاً الزول البفضح الناس .. بجي يوم وينفضح .. والزول البستر .. ربنا بسترو ..
في حديث الرسول عليه الصلاة والسلام .. بقول فيهو من ستر مسلما ستره الله في الدنيا والاخرة .. اها معناها من اشان سمعة مسلم اكيد ربنا بسقيهو من نفس الكاس كان طول كان قصر ،،
ومرة قال اللبيب..
الببرا الفضايح شان يشيللو خبار ..
تأكد مــــره عنو بتنقل الأخبار ..
تابع العورة خلو اليبقى زول خببار..
ويومو الينفضح بتأكد أنو حماااار..
..
.. اليوم انتهى وعامر أصلاً ما جا في مكتب الحسابات الليلة .. وبالرغم من أنو ثويبة كانت زعلانة منو .. لكن كانت متشوقة لجيتو في المكتب.. إن شاء الله دقيقة واحدة .. تشوفو قبل ما تطلع البيت ..
المهم اليوم انتهى بطريقتو الغريبة دي وثويبة مشت البيت ..
في البيت هناك .. لقت أمها خلصت من الأكل وبتعمل في خبيز .. قالت ليها اها يا أمي الخبيز شنو ؟ عندك مناسبة قريبة ولا حاجه؟
قالت ليها والله كان عندي دقيق موفر .. وحبة زيت .. قلت اعمل لي هدية .. لناس عمك ارسلها مع عمر ..
ما صاح يرجع مننا ايديهو خلا ..
قالت ليها دايما إنتي زولة واجبات يا أم (أحمد) ..!!! فجأة الإتنين سكتو .. صننن ..
والعبرات وقفت في الحلوق والدموع ملت العيون ..
ثويبة عاينت لي أمها لقت أمها دموعا ذرفن .. وهي برضو الغصة حامياها تبلع ريقها .. مسكت يدين أمها .. وقالت ليها الحمد لله .. يا أمي الحمد لله .. نحن بيدنا شنو ؟ كل شيء بيد الله ..
أمها قالت ليها .. احححيي يا ثويبة من النار الباقة في قلبي.. وما دايرة تخمد كلو كلو على أحمد ولدي ..
ثويبة قالت ليها .. والله حاسة بيك يا أمي .. وما قادرة اسوي ليك حاجة.. ياريت لو في يدي شيء .. اشيل منك النار وازيدها فوق ناري ..
طبعاً يا جماعة مازالت ذكريات أحمد مثل السكاكين في القلوب ..
وكلنا نفتقدك يا ابوحميد ..
عبرت في قصتنا كالنسمة في فجر الصباح ..
لا اله إلا الله ..
ااهـ .. على كل حال .. عمر مسافر بكرة .. وهدومو كلها مغسلة ومكوية ومرتبة ومعطرة .. وثويبة شغالة ليهو زي النحلة ..
بالليل كدا قعدو كلهن يتونسو معاهو .. وهو يحكي ويضحك .. بكل براءة ..
حكا ليهم قصة حمار حقو .. كان سرقوهو جماعة من الحلة القدام .. وقصو للحمار شعرو ..عشان أنا ما أعرفو .. وودوهو السوق .. قال اها أنا اليوم داك مشيت السوق .. ومن شدة ما حماري اتغير ما قدرت اعرفو.. وجيت فايت بي عندو .. اها الحمار اظنو عرفني .. بس أول ماشافني .. بقى يهنق .. هاااق هاااق .. طوالي عرفت ليك حس حماري ..
وناس البشرى ديل يموتو بالضحك ..
وثويبة وأمها ويوسف كلهن قاعدين مع عمر.. في أجمل قعده اسرية كلها طيبة وبراءة .. بس ثويبة كل مرة تسرح برة الونسة .. البشرى قال ليهو .. أنا بعد شوية بخليكم وبمرق برة انضم مع مرغني أخوي في موضوعك ..
وفعلاً البشرى لمن اتصل على مرغني.. قال ليهو عارف يا مرغني أخوي .. بتي مي دايرة ولدك.. وولدك مو داير بتي .. انت بس قول ربنا يقسم ليهم الخير في الغير ..
اها مرغني قال ليهو خلاص خليهو يجي .. بت خالو الدايرها دي .. بنعرسها ليهو .. هنا البشرى قعد يتبسم .. وعرف أنو الأمور هناك سالكة سلكة جد .. سريع انهى المكالمة ..
وجا داخل على عمر .. قال ليهو عمر قوم علي حيلك .. تعال .. تعال .. ومسكو حضنو .. وقال ليهو مبروك يا عمر .. مبرووك عمك البشرى سواها يا عمر .. أبوك وافق ..
عمر ده قرب يقع في الواطة يغمر ..
وقال الكلام اسوما .. وكت تسمع بالخبر ده بجيها سكري .. إلا الزول يكلمها بيهو حبه حبة..
بالاختصار الونسة كانت طاعمة طعومية شديدة .. وكان العشاء عيش بي لبن .. ومشو على النوم ..
لكن برضو الليلة ثويبة .. تايهة في خيال الزول الشال القلب .. وحرم العوينات من منامن ..
وطبعاً ما عندها خبر .. أنو عامر أبوهو حا يزوج ليهو بت عمتو .. المهم يا زول الليلة برضو نزلت الدفتر وبدت تكتب ..
كتبت (حبيبي ونور عيوني .. أنا لا استطيع ان اري احد ينتقص من قدرك .. ولا احتمل احدا ان يتكلم عنك بالسوء ..
لماذا يا حبيبي تجرحني بكلماتك القاسية .. لماذا يا حبيبي تنظر الي هذه النظرة القاتلة .. ياليتك تستطيع ان ترى مافي قلبي من حبك ومعزتك ..
كيف اسمح لاحد ان يشوه سمعتك .. وانت في قلبي ملك متوج .. انت بدر انار حياتي ..
لقد جرحتني يا حبيبي .. ولكني اشعر ان قلبي يتجرع عذابك شهداً لذيذاً..
لقد قلت لي يا حبيبي انك متضايق من امر .. ولكن أنا الغبية لم اقف معك ..
ولم اسألك مما يضايقك .. ولم اخفف عليك .. يالي من انانية ..
حتى اني لم اهتم بقرشي.. حينما اراد ان يخبرني بسبب ضيقك ..
ساسال قرشي غدا .. عن سبب ضيقك لعلي استطيع ان اخفف عليك ..
حبيبي كان نفسي اقولك .. أنا لك .. لكني لا أستطيع .. كان نفسي على الأقل أقول لك الطريق قدامك فاتح .. لكن فات الأوان ..
انت بقيت ما بتحبني .. انت صرفت النظر والقلب عني ..
ساحأول اليوم ان أقول لك كلمة واحدة ليتك تفهم .. وارجو ان تفهم عني ما ارمز به اليك ..
سازف لك خبر خطوبة ابن عمي من اسومة ..
اليوم سافتح لك الطريق يا حبيبي .. فهذا باب امل لن ادعه ..
انت املي يا مناي .. انت انفاسي ..
وكتبت كتبت .. ونزفت كل الحسايس الحاساها .. وما قادره تبوح بها إلا إلى نفسها ..
والى دفترها الأصم الذي يحفظ الأسرار .. وقفلتو وختتو تحت هدوما في الدولاب .
واخدت نومتها ولفت الساعات والصباح جا ..
وعمر سافر الدغش .. وحملوهو كل الهدايا والتحايا .. وكانت ايام جميلة القضاها معاهم .. قال ليهم بعد العرس أول زيارة لي مع اسومة بنزل عندكم ..
وثويبة كالعادة ساقت أخوها المدرسة .. ومشت الشركة .اها طبعاً الليلة اليوم ثويبة ناوية تقوي قلبها وتقول لي عامر أنو ود عمها خطب بت خالو ..
لكن طبعاً المسكينة ما عارفة أنو عامر أبوهو داير ليهو القمر الجاي من النيل الأبيض ..
بس يا رب هل بتقدر تقول ليهو قبل ما تعرف القصة دي لأنها لو عرفت ما حتقول تاني ..
ولو لحلقت وقالت ليهو .. يبقى عامر حيرفض بت عمتو بدون شك ..
ويتجه اليها .. نشووف البحصل ..

\

ودعتكم الله ،،،

\

إلى اللقاء في الحلقة القادمة ،،،،

[لامارا]

الحلقة الخامسة والعشرون

اها يا زول ثويبة وصلت للشركة .. وكانت شوية الليلة مبتهجة وما متوترة .. وحاسة أنو اليوم ده حلو .. وناوية تسأل قرشي من السبب الكان مضايق عامر ..
بس لقت قرشي مافي .. وما كانت عارفة أنو قرشي قاعد مع عامر.. وبتشاورو في الموضوع الح يدمر ليها امالها ..
اها لمن جا قرشي .. قالت ليهو أنا ماشة لي عامر .. معاهو زول؟ .. قال ليها براهو لكن .. عايزاهو في شنو؟.. قالت ليهو طبعاً الزول ده بكون محرج من موقف امبارح .. ومن امس ما قادر يجي بي هنا ..
فانا ماشة اطيب ليهو خاطرو .. وافهمو أنو الموضوع عادي .. واي زول ممكن يخطئ في تقدير الأمور ..
لكن هي طبعاً حتزف ليهو خبر عمر في اثناء الكلام .. عشان تفتح ليهو طريق قفلتو زمان ..
قام قرشي قال ليها .. والله الزول ده لاهسي متوتر شوية من الموضوع بتاع امبارح ..
قالت ليهو اها ما قلت لي يا قرشي ..
هو عامر امبارح المضايقو شنو .. الموضوع شكلو كبير .. لغاية هسي انتو بتتناقشو فيهو ..
قال ليها فعلاً والله .. يا ثويبة موضوع مصيري في حياة عامر ..
يا ستي .. أنا لمن مشيت بيتهم أبوهو قال لي حنس عامر يقبل ببت عمتو .
أبوهو مصر أنو يزوج ليهو بت عمتو من النيل الأبيض ..
ثويبة بعد ما كانت واقفة قعدت برااااحة .. وحست بانو كريعاتها ماتن .. وقلبها نزل في بطنها ..
وسرحت كدا وبقت تعاين للباب ..
وقرشي ما فاكر للملامح المبكية.. الاترسمت في وشها.. وخيبة الأمل الفظيعة ..
قالت ليهو اها إن شاء الله يكون بس وافق بيها ..
قال ليها والله هو ما بقدر يرفض طلب أبوهو طبعاً.. بس متضايق شديد .. لأنو شكلو ما عايز البت .. وده ما اختيارو ..
اها طبعاً ثويبة .. اتلاشت عندها أي امال .. وماتت الأماني في قلبها قبل ان تحيا ..
لكن غايتو البت دي عبارة عن جبل اصم .. سبحان الله عدت اليوم ده طبيعي ..
واشتغلت شغلها كلو .. فقط حاسة بي حمى غريبة .. وقلبها شدة ما محترق قربت تشم ريحة دخانو

ولسان حالها يقول كما قال اللبيب..
.
عصفور الأماني الكان مؤانس صوتو ..
اعلن حظي في نشرة حداشر موتو ..
لوكان تركو طار .خلاهو حي في فوتو.
كان خلا الأمل عايشلي رغم خفوتو ..
.
الريد من حياتي ومن مصير اتخلا..
دنقر شال عصاتو ومني هجا وولى ..
مادام اصلو راحل وخيرو شحه وقلا..
ما كان يأذا قلبي ولي يســــبب عله..
.
كل ما أقول خلاص حظي البعيد اتدلا ..
القى الفرحة طشت والأمل بتغـلا ..
من جمر الوجيعة الفي فؤادي مصلى ..
انهارت قواي وانا روحي دار تنشلا..
.
وهي في الحالة الغريبة دي نادتها دالية وقالت ليها يا ثويبة .. أنا طبعاً من بكرة ح ينقلوني لي فرع بحري ..
بالرغم من اني حافقدكم .. لكن بحري أحسن لي لأنها قريبة لبيتنا ..
ويا ثويبة أنا ما عارفة اشكرك كيف .. أنا خلاص خليت عامر .. وبقيت على حبيب عمري .. عزو .. وتاني ما بتخلا عنو إن شاء الله نعرس بي بلح في الجامع ..
عارفة يا ثويبة الليلة الصباح عامر جاني في المستودع وتف لي في وشي ..
وقاللي إنتي اخبث من ابليس .. وقال لي أنا ما حأرفدك من الشركة .. بخليك تقعدي هنا وتحرقي براك .. والظاهر يا ثويبة .الموظفين أولاد الكلب ديل حكو ليهو .. أنا متأكدة إنتي ما بتحكي .. لكن بكون ده عبد القادر العجوز الهايف ده ..
ثويبة قالت ليها خلاص خير في أمان الله خلي بالك من شغلك ومن عزو .. ود أحسن قرار ..
اليوم ده مر وثويبة ما شافت عامر بي عينها برضو هسي كدا يومين ما شافتو ..
وحاسة بكمية من الاحباط .. والحسرة ...
في نهاية اليوم وثويبة في قمة الاحباط والألم .. قرشي قال لي ثويبة.. أنا يا ثويبة والله كل يوم بكتشف فيك حاجة جديدة .. وبالجد إنتي زيك في البنات قليل .. وانا عندي موضوع عايز اطرحو ليك ..لكن بس خايف من ردة فعلك .. ومع كدا أنا مطمئن لانك إنسانة متفهمة .. وما ممكن تظلمي ولا تحرجيني ..
قالت ليهو في شنو يا قرشي .. جبت لي خوفة بكلامك ده .. انت عايز تقول شنو بصراحة ؟
قال ليها والله ما عارف ابدا ليك الكلام كيف ..
طيب أنا عايز اسالك سؤال.. أنا بحب لي واحدة شديد.. وهي ما عارفاني بحبها .. وكل يوم بعاين ليها واسرق النظر وهي ما ملاحظة .. وانا ما قادر اصارحها وما بقدر اوسط لي زول عشان يوريها .. تفتكري اعمل شنو عشان تفهم مشاعري ..
ثويبة دي قلبها بدق يدق وخافت من كلام قرشي شديد.. وبقت تفكر انها ترد عليهو كيف وهو زول حساس وما بقبل الاحراج.. وهي ما عندها ليهو ولا صفر في المية جواها .. وحست بالكلام أنو قاصدها .. بقت تبلع في ريقها ..
وقالت ليه والله فعلاً يا قرشي السؤال صعب .. طيب انت بس حسسها باي حركة من بعيد لي بعيد .. وشوف ردت فعلها لو اتجاوبت .. معناها موضوعك ظابط ،، ولو عملت رايحة معناها شوف غيرا ..
قال ليها ثويبة إنتي أكتر زول بعرفني.. أنا الحركات دي بتاعة الشفع دي ما بعرف ليها نهائي ..
لازم افكر لي في حاجة بتاعة رجال وناس ناضجين ،،
قالت ليهو طيب فكر ووريني فكرتك.. لو ظابطة بقول ليك .. ولو بيش بقول ليك ..
قال ليها بصراحة أنا فكرت اكتب ليها ورقة ،، وابوح ليها فيها بكل مشاعري،،
لكن المشكلة أنا مابقدر اسلمها الورقة دي كلو كلو .. أنا جبان قدام الحريم ما تشوفي هوشتي دي ..
لو اديتك الورقة بتخليها تقراها وترد لي .؟
قالت ليهو نعم كدا تمام واوعدك الرد يجيك .. قال ليها اتفقنا ،
اها يا زول ثويبة بقت مربوكه ربكة غريبة . قرشي ده اخر من تفكر فيهو.. واليوم خلاص بقى في نهاياتو.. وقرشي مستعجل عايز يطلع سلم ثويبة ملفات قال ليها قبل ما تطلعي راجعي الملفات دي،،
اها لمن قرشي طلع فتحت الملفات وبقت تراجع فيها لقت الملفات كلها قرشي مراجعها مرتين وماضي عليها ..
طيب يا ربي اداني ليها ليه الأوراق دي ..؟
لفت نظرها في نص الأوراق في ورقة مطبوقة .. فتحت الورقة لقت قرشي كاتب فيها كلام كدا وحولو راسم ليهو وردتين .. سمحات سماحة ..
كاتب .. إلى الإنسانة الأنيقة التي سرقت احاسيسي.. على حين غفلة مني ..
الى الإنسانة التي اشعرتني ان في الدنيا هنا ..نساء تستحق الحب والغرام .. أنا اكتب اليك هذه الأحرف لاني امتلئ بالأمل ان تكوني أميرة احلامي وشريكة حياتي ..
انا لا أعرف العلاقات الملتوية ..
ولا هاوي قصص حب عقيمة أنا اريد العفة لنفسي ..
فلو كنتي كما اتمنى واشتهي فردي لي على الورقة دي ..
وان كنتي ترفضين يكفيك ان لاتردي علي
عارفة يا حبيبتي (سوزي ) ؟
انا بقيت كان داير انادي اختي في البيت بقول ليها تعالي يا سوزان..
في أمان الله وانتظر ردك ..
.. المعذب قرشي ..
ثويبة كتمت ضحكة وختت ايدها فوق خشمها .. طبعاً الطبعة دي شايلاها من أمها .. وكان بعملا أحمد كتير ..
ثويبة طبعاً كانت مفتكرة أنو قرشي خاتي عينو عليها ..لكن طلع الزول مكسر في سوزان بتاعة الكمبيوتر ..
المهم شالت نفسها وختتو وقالت الحمد لله اني ما استعجلت وسبقت الحوادث ..
وقالت براها كدا بينها وبين نفسها ..حاضر يا قرشي اوعدك اني اخدمك في الموضوع .
شالت الورقة سريع ومشت لي غرفة الكمبيوتر عشان تلاقي سوزي ..
بس لقت سوزي طالعة تصلح في نظاراتها ..
سلمت عليها ..
ثويبة قالت : أنا حالي ده جاياك في موضوع لكن .. ما مشكلة الورقة دي مرسلها ليك قرشي ..
اقريها في سرية تامة .. وانا منتظرة ردك ..
قامت سوزان قالت لثويبة اديني رقم تلفونك .. ثويبة قالت ليها يخربني تلفون ما عندي ..
لكن بديك تلفون أبوي .. ادتها تلفون البشرى ..
ومشو .. وفعلاً العصرية كدا سوزان اتصلت ..على ثويبة في تلفون البشرى .. سوزان ساكنة في امدرمان العرضة .. المهم البشرى سلم التلفون لبتو وقال ليها زميلتك اسمها سوزان ..
وسوزان سلمت عليها .. وقالت ليها يا ثويبة أنا عايزة اسألك سؤال ..
إنتي قريتي الرسالة الرسلها لي قرشي ؟ قالت ليها ايوة قريتها ..
قالت ليها .. انتهينا خلاص .. وانا قرشي لو بقى اخر راجل ما عايزاهو .. لأنو جاني من طريقك ..إنتي إنسانة حقيرة ..
ثويبة قالت ليها دقيقة يا سوزان انفهمك ..
قالت ليها اسفة .. ما عندي معاك كلام تاني .. وقفلت الخط ..

\

ودعتكم الله ،،،
\

إلى اللقاء في الحلقة القادمة ،،،،

[لامارا]

الحلقة السادسة والعشرون

ثويبة انزعجت جداً من ردة فعل سوزان .. وأبوها كان قاعد في السرير وبراقب.. قال ليها عيدي الرقم ودقي ليها تاني.. ثويبة عادت الاتصال .. وادتا جرسين وتاني عمل مشغول ..
ثويبة قالت لأبوها .. والقلق ظاهر عليها.. ماحترد تاني يا ابوي.. اوووب علي أنا هسع اسوي شنو؟ دايره اكحلها عميتها..
عم البشرى قال ليها هدي روحك كلو بتحلا .. تعالي أحكي لي. جات حكت ليهو الحصل من طقطق للسلام عليكم .. البشرى قال ليها .. إنتي ما غلطانه لانك قريتي الورقة فاكراها ليك صاح؟ .. وهي زاتها ما غلطانه أي زول في مكانها . يحس بانو في زول قرا رسايلو الخاصة بهيح وبزعل..
ثويبة قالت لأبوها.. طيب الحل شنو يا أبوي .. أنا ما بقدر أقعد كدا لي بكره..
قام علي حيلو ولبس طاقيتو وعندو شبشب كدا اكل عليه الدهر وشرب من ابو اصبع داك ..كشتو . وقالها هي ساكنة وين سوزان دي ..
قالتلو ساكنة في العرضه بس ما عارفة وصف بيتهم بالضبط.. قال ليها قولي يا رب نتوفق.. البسي تعالي..
طلع بالشارع التاني في واحد بتاع بقالة .. البشرى قاليهو.
عليك الله يا خالد اتصل لي على الرقم ده .. قال ليو حاضر يا خال من عيوني .. ضرب للبت وسمع الجرس وسلم التلفون لي البشرى وثويبة واقفة مربعة يدينها تتفرج..
سوزان فتحت الخط . قاليها أنا البشرى والد ثويبة. أنا جاييكم في البيت زيارة ممكن؟
قالت ليهو تتفضل طوالي قاليها وصفي لي البيت ..
وصفت ليهو .. قفل السماعة وقال لثويبة .. مع البشرى موش حتقدر تغمض عينيك .. يلا يا بت على العرضة . أنا بوصلك ليها وتاني إنتي وفلاحتك ..
وشكرو خالد بتاع البقالة ومشو ركبو على العرضة ..
اها يا زول في الشارع بوصي فيها قاليها عارفة يا ثويبة .. أي حاجة في الدنيا دي بتتحل بالهداوة وطولة البال.. وطال ما الإنسان بعيد من الغضب والانفعال بحل الأمور باسهل ما يكون..
سمعتي ود اللبيب قال شنو؟ اها قال شنو ..؟
قال . غرضك بنقضى ويتنفذ المطلوب ..
أكان هديت كلامك وقلتو بي اسلوب ..
الطالبلو شيء . وقال الطلب مغضوب .
بصد شايل قماحو وربما مضروب ..
بعدين يا ثويبة سوزان دي معاها حق ..يعني حست انك اتجسستي على خصوصياتها مهما سمعتك من كلام جارح ما تغضبي . وتنتصري لنفسك . يكون هدفك الانتصار الأكبر وهو تحقيق الهدف الجيتي ليهو ..
قالت ليهو حاضر يا بروف .. المهم وصلو واستقبلهم أخو سوزان .. ضعيف زيها كدا ولابس ليهو برموده وسفنجة .. ومعلق السماعات في اضنيهو ..
اتفضلو ودخلو ثويبة خلت أبوها برة في البرندة مع الود..
ودخلت على سوزان .. سوزان سمراء نحيفة نخرتها سيف عيونها حلوة بتلبس نظارات نظر. كلامها بسيط وجادة جدا.. وأصلاً مافتحت موضوع مع ثويب لغاية صلو المغرب
وختو ليهم الشاي .. والونسة كانت . عادية وجميلة مع سوزا وأمها وأخواتها . بعد الشاي ثويبة قالت لي سوزان عايزاك في كلمتين..
دخلت معاها على غرفتها.. وبدت سوزان .. قالتلها.. ثويبة ده شنو العملتيهو ده.. كيف تقري رسالة خاصة .. أنا والله ما كنت مفتكراك بالمستوى ده..
حقيقة زعلت منك شديد . وكرهت قرشي زاتو . هو ليه ما يسلمني الورقة براهو . وثويبة ساكتة خلتها لامن خلصت كلامها .. قالتليها . عارفة يا سوزي حبيبتي . أنا قبيل كنت .. مستاءة وحزينة وقرشي فتح معاي موضوع .. وبدت تحكي ليها .. كيف قرشي زول مهذب وبستحي . وانا كنت فاكراهو .. قاصدني . واتضايقت جداً لاني صراحه بحب زول تاني .. مع أنو علاقتنا مستحيله بس ما بقدر افكر في غيرو في الوقت الحالي .. وكنت شايله هم كيف ارفض قرشي وهو زول حساس .. فلمن شفت الورقة افتكرتها لي ولمن قريت. اسمك الاخر .. بقيت اضحك على غباي..
انا عليك الله الدايرني منو ..؟.
سوزان سكتت ساي .. وكانت مدنقرة وتسمع .. لمن خلصت ثويبة.. قالتلها يا ريت يا ثويبة أنا قبيل سمعت كلامك للاخر.. وخليتك تفهميني براحة .. يا زولة ولا يهمك .. بعدين قرشي والله متيمة بيهو أكتر بس المخوفني منو حماقتو ولتاختو .. قالت يا سوزي مافي زول مكمل..
قرشي حقاني وزول واجبات وأخو أخوان.. وبعرف ربنا . وإن شاء الله ما يظلمك.. بس بخاف من الحريم قال..
سوزان قالتلها .. خلاص أنا باكر برد ليهو .. واهرشو ليك من أول يوم ..
بس عليك الله .. أحكي لي ده منو الشايل قلبك يا ثويبة..
ثويبة اتنحنحت وقالت : طبعاً إنتي عارفة أنو دالية كانت عايزة تموت في عامر .. وانا لمن جيت أول ايام عامر بدا ليهو معاي موضوع .. وانا ما كان عندي نفس في أي حاجة .. أخوي متوفي يادوب.. وحاسة بي دالية متمسكة بيهو فحاولت اجمعهم .. وقلت ليهم الإتنين عايزة ود عمي .. وخلاص عامر صرف النظر مني .. لكن اكتشفت دالية غاشة عليهو وبتحب واحد تاني ..
سوزان قالت ليها أنا عارفة كدا وهي حكت لي كل شيء .. دي زولة مكارة وعمرها ما بتتعدل .. اها وتاني الحصل شنو؟
قالت ليها الحقيقة أنا ود عمي ما عايزني ولا شيء .. حسيت نفسي متعلقة بي عامر ده بدون ما احس .. وبقيت لاقادرة اصارحو ولا قادرة انساهو .. لكن هسي الباب اتقفل في وشي .. وقالوا حيتزوج بت عمتو ..
شفتي يا سوزان الحاصل علي هههه واخدت ليها ضحكة .. إنتي أحمدي ربك أنو في زول مغرم بيك وشاريك .. أنا كان عرضوني في الدلالة ما بجيب قرشين .. سوزان قالتلا .. يا زولة قسمتك بتجيك..
ثويبة : ونعم بالله .. اها يا سوزي حبيبتي أنا بمشي إن شاء الله ربنا يتم ليك على خير وعليك الله زي ما وصيتك القرشي ده جواهو زي اللبن ..
بس إنتي افهمي شخصيتو زول اتجاه واحد ..
قالت ليها ما تشيلي هم يا زولة أنا قادرة عليهو والله اظبطو ليك ظبيطة..
اها يا زول طلعو من ناس سوزان وكانت ثويبة فرحانة زي الكانها عرسوها هي .. عكس المشاعر الجات بيها من هناك .. وحكت لأبوها طبعاً .. والبشرى مبسوط يعاين لي بتو تتبسم فرحانة ..
قال ليها مبسوطة يا ثويبة .. قالتلو معقول زول يكون برفقتك ما يكون مبسوط .. انت يا أبوي ربنا يخليك لي ..
وفي البيت وصلت مبسوطة لدرجة أنو العملية القامت بيها دي.. خففت منها بعض العذاب والأسى الوجداني من فقدان عامر ..
المهم يا زول وصلت البيت .. والليلة ما مشت على الدفتر ..
أصلاً .. بس قبلت علي الحيطة .. واخدت ليها بكية كدا ونامت..
صحت الصباح بدري .. وقالت أمي أبوي تعالو .. أحكي ليكم شفت شنو في النوم .. أمها قالت ليها .. يا لطيف من حلمك إنتي يا ثويبة .. عليك الله كان حاجة كعبة ما تقوليها لينا ..


ودعتكم الله ،،،

إلى اللقاء في الحلقة القادمة ،،،،

[لامارا]

الحلقة السابعة والعشرون

ثويبة قالت لي أمها لالا ما حلمة كعبة إنتي موش قلتي الحلم الكعب ما تتكلمي بيهو ..
دي سمحة شديد .. البشرى قال ليها أحكي يا ثويبة ..
خليني من زينب دي .. قالت ليهم .. أنا شفت اني دخلت الأوضة بتاعة ابوي .. ولبست جلابيتو .. وطلعت الشارع .. وكان جيب الجلابية ملان بلح عجيب ..
مبالغة لونو وطعمو وشكلو حاجة تجنن ..
اها طلعت الشارع وبقت بوزع للمساكين من البلح .. وهم بياكلو بي استمتاع ..
وبتبسمو .. وبعاينو للبلح متعجبين في جمال شكلو وطعمو ..
اها كل ما بوزع بحس أنو البلح ما بنقص ..
كانو في زول بكب لي حاجة مع البلح بتزبدو .. حاسة بكدا .. بس ما شايفة البعمل كدا منو ..
اها لمن الناس كلهم شبعو ومشو .. رجعت البيت لقيت جيبي ملان جواهر ودرر .. واحجار كريمة .. اها موش رؤيا حلوة ؟؟
البشرى قال ليها الله أكبر .. الجلابية دي تربية أبوك .. وتوزيع البلح اخلاقك وسعيك لمصلحة الناس .. اهو ربنا ح يكافيك مكافأة فوق حد التوقع .. ربنا يكرمك يا بتي ..
أمها قالت ليهو إن شاء الله من خشمك ولي باب السماء ..
..
اها اليوم ده كان ثويبة مبسوطة كدا ساي بدون سبب .. وحاسة برضا وأمال عجيبة .. مع أنو كل الخطوط مافي صالحها ..
ومشت الشركة وصلت متأخرة شديد .. وصلت اعتذرت لي قرشي .. قال ليها ولا يهمك يا ست الكل .. اكان غبتي أسبوع بسد ليك شغلك .. إنتي زيك كم في الدنيا دي؟ .. اها ثويبة فهمت أنو قرشي مواضيعو ظبطت .. واليوم كان طبيعي غير أنو في حركة غير طبيعية بين قرشي وسوزان .. وابتسامات كدا عجيبة وغريبة ..
وكل مرة يطلع .. يمشي ليها ويجي .. والموبايل كل مرة توت توت رسالة ..
الجماعة ديل يا ربي متين انشبكو ..
في نص اليوم كدا عامر رسل لي ثويبة .. ومشت ليهو .. ودقت الباب براااحة قال ليها اتفضلي يا ثويبة ..
دخلت .. قال ليها طبعاً زعلانة مني ؟ قالت ليهو ابدا والله .. والله من أول يوم بس زعلة صغيرة كدا وراحت ..
ولا يهمك انت كيف وصحتك .. ؟
قال ليها والله تمام .. وكيف عم بشرى؟ قالت ليهو في أمان الله ..
تتكلم معاهو وقلبها شغال التف التف تف تف..
قال ليها والله يا ثويبة.. أنا مقدر احترامك لي ودفاعك عني وانا غايب .. وخجلان من هيجتي فيك شديد .. قالت ليهو بس انت تستاهل كل خير والله ..
قال ليها خلاص أمشي بس أنا ناديتك اعتذر ليك ..
واستمرت الأيام .. والحال في حالو .. وناس الدويم اتأخرو شديد في الجية ..
والعلاقة بين عامر وثويبة علاقة عادية .. بس كل واحد جواهو اشواق وشجون لا تحتمل .. ومافي زول قادر يحكي للتاني ..
بس في يوم جا تلفون من البيت لعامر .. أنو ناس الدويم وصلو.. الكلام ده بعد تقريبا عشرة او خمسطاشر يوم من الحلمة ..
طبعاً لمن مشى البيت .. وسلم على عمتو وولدها .. ولاقى البنية .. اسمها تغريد .. كانت فعلاً قمر واية في الجمال .. بس ما حركت أي ساكن جواهو ..
وشكلها ما فاهمة جايبنها الخرطوم لي شنو ؟؟
لكن هو طبعاً فاهم .. المهم كان مستاء .. بس قرر أنو يوافق على أي عرض .. مادام فيهو رضا أبوهو .. خصوصا طبعاً البت مافي زول ممكن يرفضها ..
اها الأيام مرت تلاتة اربعة يوم.. وكل يوم العمة ترسل بتها عشان تقعد شوية مع ود خالها .. تودي ليهو الشاي .. وتجهز ليهو هدومو .. وهو يعاين ليها بي طرف عينو .. واصلو ما بتتكلم معاهو ..
المهم البت نقشت الحنك .. وعرفت أنو جايبنها عشان كدا كدا ..
وكانت في محادثات سرية تجري في الخفاء .. بين . عمكم مصطفى ابوعامر .. وبين اخته أم تغريد ..
لكن القدر مخبي موضوع تاني ..
في يوم قرشي من الصباح جا لي عامر في المكتب.. وقال ليهو اقفل المكتب ده أنا عندي معاك كلام سري للغاية ..
انت يأخوي مالك ماك داير تعرس .. ؟
قال ليهو والله يا قرشي بطني طامة من أي حاجة .. قال ليهو أحكي لي موش أنا بير اسرارك ..؟
قال ليهو والله طبعاً ما ادس عليك.. أنا كنت داير زميلتك.. بس هي ما عندها لي أي حاجة .. ومغرمة بود عمها في البلد ..
قرشي قال ليهو قوم علي حيلك يا كبير .. وتعال أحكي ليك ..
اولا سوزان حكت لي حكاية غريبة ..
قالت ثويبة مافي ود عمها عايزها ولا شيء .. ود عمها خطب بت خالتو . وعرسو في العيد . وهي قالت كدا عشان تجمع بينك وبين دالية ..
ولمن دالية اتلاشت .. قالوا انت عايز بت عمتك .. وهسي هي محطمة لأنها حست انك ضعت منها ..
قال ليهو ده شنو الوهم ابتقول فيهو ده يا قرشي ..؟
قرشي قال ليهو اقسم بالله .. زي ما أقول لك .. ولو انت ما مصدقني ناديها أسالها ..
يا زول عامر ده غلبو البسويهو .. قال ليهو يا قرشي لو كلامك ده طلع صاح
بشارتك عندي عشرة مليون ..
قرشي قال الله أكبر .. بختك يا سوزي الموضوع اتسهل
هسع أنا بمشي انادي ليك ثويبة واسألها ..
عامر قال ليهو دقيقة خليني اتلمه على روحي .. أنا حاسي باني منهار من الفرحة ..
قال ليهو طيب وبت عمتك .؟
قال ليهو ده موضوع مقدور عليهو .. كدي نادي لي ثويبة ..
قرشي مشى قال ليها .. أنا عايز اسدى فيك يا ثويبة قالت ليهو في شنو؟
قال ليها أمشي .. عامر قال عايزك ..؟ والليلة والليلة ..؟ قالت ليه في شنو يا قرشي ما تخوفني .. قال بس أمشي أنا ما عارف في شنو.
اها يا زول مشت بنفس النسق ودقت الباب براحة قال ليها خشي يا ثويبة ..
دخلت قالت ليه السلام عليك قال ليها عليكم السلام مالك خايفة ؟
انا بس عايز اسأل سؤال .. تجاوبيني بكل صدق وصراحة وانا عارفك ما بتكذبي .
هل فعلاً ود عمك عايزك .. سكتت مسافة وعيونها إتملن..
قال ليها أنا منتظر اجابتك يا ثويبة .. قالت ليهو ابدا .. لا كان عايزني ولا أنا كنت عايزاهو ..
انا قلت كدا لاني حسيت حأكون حجر عثرة بينك وبين دالية ..
قال ليها اها وبعد دالية مشت في حال سبيلا .. ليه ما كشفتي لي الحقيقة ..؟
قالت ليهو ليه يعني ؟
قال ليها بصراحة يا ثويبة أنا ما عندي وقت عشان عندي قرار مصيري.. لازم اتخذو الليلة .. إنتي عندك رغبة ترتبطي بي ؟
قالت ليهو وانت عندك رغبة ترتبط بي .. ؟
قال ليها إنتي انفاسي والله .. ومصدر فرحتي..
قالت ليهو وانا برضو انت بالنسبة لي كدا .. لكن برضو ما ممكن اكون سبب لي غضب أبوك عليك .. عشان كدا كلامنا ده مافي ليهو أي فايدة ..
قال ليها طيب رايك شنو لو أبوي نفسو اتصل عليك وطلبك .. قالت ليهو إن شاء الله الخير في ما يختارو ربنا ..
نحن بيدنا شنو . واكيد ربنا ما بختار لينا إلا الخير .. قال ليها خلاص أمشي ربنا يحفظك ..
هي وصلت كدا وقرشي عاين ليها كدا لقا وشيها محمر من الخجلة ..
جاء راجع طوالي لمكتب عامر .. لقا عامر واقف متاكي الباب وبغني ويرقص في نص المكتب زي المجنون ..
الليلة عيدك يا قلب .. ترري تترري لالا..
الليلة فرحك يا قلب تررري ترري لالا ..
قرش يفتح الباب كش وقعد يضحك .. قال ليهو خلي ترري لالا .. جهز لي القريشات .. قال ليهو اجهز ليك شنو هاك .. طلع دفتر الشيكات كتب ليهو وشيطك قطع ليهو شيك بعشرة مليون ..
بس القدر مخبي حاجات فوق المعقول .. وعندو كلام تاني خالص ..
في نفس اليوم ده .. وعامر في قمة الفرحة .أبوهو اتصل عليهو تلفون وقال ليهو لازم الليلة تجي بدري لأنو ناس عمتك مسافرين ونحن دايرين نحدد يوم الزواج ..
قال ليهو حاضر يا أبوي بس لازم أول حاجة اطلع مع البت براي ..
واتفاهم معاها وأشوف البت دي بتنفع معانا ولالا ..
قال ليهو تطلع معاها شنو يعني .. في البيت ده اتفاهم معاها بي راحتك بس ادينا النتيجة الليلة لانهم مسافرين ..
وبعدين النتيجة كدا ولا كدا بت عمتك ومجبور عليها .. عليك الله هسع دي بت بتتفوت ..؟
الا داير تعاكسني ساكت ..


\
ودعتكم الله ،،،
\

إلى اللقاء في الحلقة القادمة ،،،،

[لامارا]

الحلقة الثامنة والعشرون

عامر حس بي أنو الكلام دخل الحوش ، والحاج ده شكلو مصر اصرار شديد..
قال ليهو حاضر يا أبوي ، بس أنا اصل البيت ومافي أي مشكلة من الناحية دي ، ابشرك ..
انا رضاك عندي فوق كل شيء ..
وطبعاً بقى راسو يودي ويجيب .. يا ربي اتصرف كيف ؟ يا ربي اتصرف كيف؟ .
مشى لي ثويبة في المكتب قبل ما تطلع ،
قال ليها اها أنا ممكن اوصلك .. الليلة ولا لا .؟
قالت ليهو طبعاً ممكن مافي مشكلة وانا لاقية ؟..
انت ما عارف مقدارك جواي قدر شنو؟ ، قال ليها والله عارف .. والحمد لله أنو في آخر المطاف لقيت الإنسانة الصادقة العفيفة .. الممكن الزول يثق فيها ، ويطلع من البيت وقلبو مطمئن .. على بيتو ، وعلى عرضو وعلى حياتو ..
خلاص أنا عندي كم حاجة اخلص منهم ، واجي اوصلك وأمشي البيت ..
لأنو عندي مهمة كبيرة في بيتنا .. ومسألة مصيرية بالجد ..
انا لازم انتصر فيها واشيل كاس .. قالت ليه خلاص أمشي خلص سريع ، أنا قربت اخلص ..
وبعدين موش بعيدة عليك تمشي الثورة وتجي راجع المنشية
قال ليها مع الكزس تنطوي مسافات الطريق ويسهل الوعر ..هه
المهم .. خلص حاجاتو سريع وجا ساقها وداها الثورة .. وهي جواها امال بدت تستفيق .. لكن برضو هي طبعاً ما عارفة الاصرار المصرو عمك مصطفى ..
في الطريق قال ليها غايتو يا ثويبة أنا لو ربنا بحبني في الدنيا دي ..
يقسمك لي في حياتي .. والله أنا واثق أنو ربنا بحبني .. ومتأكد أنو ما حيخذلني ..
انا بصراحة خشيت في علاقات كتيرة مع البنات ..
والله يا ثويبة . الزول يفتش لامن راسو يدوش بت متصفة بصفات الصدق والأمانة ..
والأخلاق الطيبة والحنية .. العندك دي ما يلقاها بالساهل ..
قالت ليهو بس في النهاية بلقاها .. وامة محمد بي خيرا يا عامر ..
انا عندي صاحبتي .. معاي في الحلة والله تشوفها تقول دي جاية من زمن الصحابة ..
طبعاً صاحبتا دي انتو بتتذكروها الجاتها يوم وفاة أحمد تصبر فيها ..
البت المربوعة المنقبة ديك ..
اها هي قالت ليهو عارف يا عامر .. أنا طبعاً ما ندمت على حاجة في حياتي أبداً
لكن الحصل علي معاك انت بالجد الندم سيطر علي شديد ..
يعني أنا رديتك من حياتي عن إنسانة ما بتستاهل .. وكذبت عليك بود عمي ..
وفي النهاية لمن حسيت بقلبي اتملا بحاجة اسمها عامر ..
لقيتك خلاص اتجاهك مشى حتة تانية ..
قال ليها ليه يا ثويبة بتقولي كدا زي الكانك قنعانة من الموضوع ..
انا قلت ليك إن شاء الله أنا بعمل المستحيل واقنع أبوي .. بانو الموضوع ده ما عايزو
وقصة أنو افشل في الحتة دي عندي 20في المية فقط
المهم يا زول وصلها البيت .. قالت ليهو دقيقة ما تمشي عشان خاطري اجيب ليك موية تشرب .. لامن دخلت جوة مالقت زول في البيت .. وحتى يوسف ما جاء .
وأبوها مافي وأمها مافي .. وعامر رجع ..
استغربت الناس ديل وين يا ربي .. جابت ليهو الموية جوة وقالتلو .. ناس البيت كلهم مافي ما عارفة الحاصل شنو أنا قلبي ما كلني شديد ..
قال ليها اتصلي عليهم .. قالت ليهو أول أنا عندي تلفون .. حليلو هو يا يمة ..
قال ليها طيب ثويبة ما يكون عندها تلفون تاني أصلاً مافي بت تستحق تشيلها تلفون في يدها ..
دقيقة بس .. فتح الطبلون عندو تلفون ما شغال بيهو .. طلعو وقال ليها اشتغلي بالتلفون ده لغاية بكرة .. دقيقة افرمطو .. جبق جبق فرمطو واداهو ليها ..
قال ليها مليااااااااان رضيد .. لغاية بكرة نشتري تلفون جديد ..
قالت ليهو طبعاً لو من أي زول تاني ما بشيلو لكن انت غير مع السلامة ..
وفات طوالي خلاها بتحأول في رقم أبوها ..
ونحن ماشين مع عامر البيت ..
عامر يا زول ماشي في الشارع ويغني ساي .. ويهز في اكتافو ويتبسم براهو .
احساسو بقول مجرد أنو ثويبة حبتني ده براهو مكسب في حياتي ..
المهم وصل البيت .. زي الساعة تلاتة عصر كدا ..
بيت ناس عامر فاتح في شارع النيل ، قريب من كبري المنشية ، فاتح على الشارع الرئيسي .. فيلا كبيرة وفيها حوش جنينة حدادي مدادي .. من البلكونة بتعاين للبحر لغاية الضفة الشرقية ..
البناية مطلية بالبصلي .. وكل مناسبة بغيرو ليها لون الطلاء .. غايتو جنس شيء !
ووقف العربية برة .. وقبل ما يدخل ضرب في تلفونو . الأداهو لي ثويبة ردت عليهو ..
قال ليها الزول الجميل اخبارو شنو؟
قالت لي فاقدك بس والله وبتمنالك الخير والسعد والعافية ..
قال ليها ..
إنتي الفرحة يا عطر السعادة الزاكي ..
ليك في قلبي احلام يوم أجيب ذكراكي ..
بالجد يا ملاك أنا من زمان كت شاكي..
الا النسمـــة يادوب قاصـدت شباكي.
.
الليلة الفرح في روحي فارش وردو..
بــ ثويبة الملاك محن المساهر عدو..
في زينتك تجي ويتحيرو البتحدو ..
تقدلي في البلاط ست البلد لاحدو.
.
قالتلو ربنا يخليك
عامر قالا ..اها . اها ناس الحاج لقيتي منهم خبر؟.. قالت ليهو ايوه .. كان عندنا جارتنا اتضايقت ومافي زول معاها أبوي وأمي ودوها للدكتور ..
قال ليها ايوة انتو كلكم كدا مفطورين فطرة على الكرم والشهامة ..
ويوسف وين ؟ قالت ليهو يوسف ساقوهو معاهم عشان ما بقعد في البيت براهو بطلع الشارع طوالي ..
قال ليها طيب أنا اتصلت عليك داير دعواتك.. قالتلو ربنا يوفقك لرضاء الله ورضا والديك ..
اها يا زول دخل على أبوهو لقى أبوهو قاعد براهو قالليهو يا عامر .. أنا منتظرك نتغدى سوا ..
حاضر حاضر .. جابو الغدا .. وبدا أبوهو الكلام .. عارف يا عامر أنا أصلاً عايز اربطكم بي عمتكم .. لاني شايفها بعيدة منكم .. وما بيناتكم أي تواصل . لكن عارف لو عرست البت دي .. تاني العلاقة بتكون وطيدة ..
قال ليهو يا أبوي الله يبارك في ايامك . نحن عمتنا ما بنفرط فيها .. وبي عرس بلا عرس أنا بوعدك .. اسافر ليها في الديوم وازورها . واجيبها بي عربيتي من هناك ..
قال ليهو انت بتلف وتدور داير تقول ما داير البت ولا شنو؟
لكن قسماً عظما يا عامر .. تلحق تقول ليك كلمة كدا ولا كدا .. لي عمتك ولا بتها .
وللا يشعرو انك رفضتها .. انت لا ولدي ولا بعرفك ..
قال ليهو لالالا يا أبوي معقول؟ البتقولواا يا أبوي يمشي .. أنا البت عاجباني ودايرها عديل .. خليني اتكلم معاها وأشوف شعورها تجاهي شنو؟
قال ليهو خلاص .. بعد تتغدى وتشرب الشاي وتروق شوية .. سوقها وأمشي بيها كدا على طرف البيت .. في الجنينة القدامية .. أقعدو واتفاهمو كويس ..
قال ليهو مافي مشكلة ..
اها يا زول فعلاً عامر مشى خت كرسيين . هناااااك .. والمرا كلمت بتها .. قالت ليها عامر ود خالك دايرك يتكلم معاك شوية ..
قالتليها دايرني في شنو كمان ؟ .. قالت ليها أمشي اسأليهو أنا شن خبرني ..
المهم جاتو ماشة زي مشية الأوزة .. البت زاتها ما شاء الله تبارك الله ..
عاين ليها كدا .. وقال ليها اتفضلي يا تغريد .. قعدت .. قال ليها .. إنتي عارفة جايبنك هنا الخرطوم عشان شنو؟
قالتليهو ماني خابرة .. كدي قولي انت ..
قال ليها يا ستي أبوي وأمك .. اتفقو انهم يجيبوك هنا .. عشان أنا أشوفك .. وكان عجبتيني اعرسك .. اها إنتي رايك شنو؟
قالت ليهو أنا اصلي غنماية جالبني في السوق؟ .. وليه ما كلموني ..؟ وانا ما عندي راي زي البنوت ولا شنو؟
قال ليها يا زولة الكلام الكتير ما عندو فايدة .. بس إنتي قولي عشان نتفق على كلام .. والكلام البتقوليهو لي أنا بمشي عليهو .. سيبي الفلسفة ..
قالت ليهو والله بالله ؟ .. انت قايل روحك شنو يا أخوي ؟
اقول الحقيقة .. انت أصلاً ما راكب لي في راسي .. ولا ناس بيتكم ماحبيتكم كلو كلو ..
بتتعاملو بفشخرة كدي .. التقول أول مرة تشوفو القروش ..
وابوي أصلاً ما بحبكم .. وانت عارف كدا كويس .. وأمي بتتكلم ساي .. هسع وكت نبقى في الجد .. أبوي هو الليهو الكلمة الأخيرة .. وابوي هسي لو سمع بي حركتها العملتها دي بقلب الدنيا فوق راسها .. لأنو مستحيل يقبل بيكم انتو .. قاليها خليهو أبوك .. إنتي رايك شنو ؟ .. قالت ليهو أنا يا شاطر مع أبوي طبعاً ..
قال ليها غصباً عنك وعن أبوك أنا بعرسك .. أنا لازم انفذ كلام أبوي ..
قالت ليهو يا سلام ؟؟ حلاتك دي يا يمه .. وانا ما عايزاك يا حلوو .. النشوفك بتجبرني كيف .. بالله عان ده كمان .. انت قايلني هينة ولا هينة ..
وهو طبعاً من جواهو مبسوط أنو الأمور مشت بالطريقة دي ..
قال ليها خلاص بعرسك بالحسنة .. عليك الله ترضي بي .. اموت ليك أنا هسي ايييي..
قالت ليهو وانا برضو بعرف الاستهتار والحقارة .. سيب الاستهبال والاستخفاف .. مع السلامة .. قال ليها بالجد أنا خلاص جنيت فيك .. ما تمشي قولي لي رضيانة .. قالت ليهو اقسم بالله لو السما انطبقت على الأرض ما تمسك يدي ..
قال ليها ما تمشي أنا بنصدم أنا بموت .. قالت ليهو بالله روح عليك الله .. وقامت ماشة وصارة وشها حلات صرة هههههه ..
وعامر من جواهو مبسوووط قرب يفقعا ضحكة .. وقال والله دي تكون دعوات ثويبة .. احبك أنا يا ثويبة ..

\
ودعتكم الله ،،،
\
إلى اللقاء في الحلقة القادمة ،،،،