انين النسايم / للكاتب طارق لبيب ، سودانية مكتملة

[لامارا]

الحلقة 19


كدي نحن نخلي نهى تمشي لي سماهر.. بنجيها راجعين . كويس؟ . هناك سلوي بقت تتكلم مع ياسمين بتها قالت ليها .. طبعا انا عارفاك البارح قاعدة تتلبدي لكلام سعد .. وشايفاك اليلة طول اليوم فرحانة..
اها الحمد لله الزول الدايراهو بجيك.. ان شاء الله يبقى عاد زي ما متوقعنو.. لكن الشي العارفاهو انا الزول ده اخلاقو صعبة .. موو زي سعد خليك عارفة .....
قالت ليها عاارفة يا امي وقبلانة ..
اها تاني عندك معاي شنو ؟ كلو مرة بتهددي فيني بالموضوع داك ..
قالت ليها بري يايمة.. تاني ماعندي معاك نضم نهائي ..
ياسمين مرقت وسلوى بقت تنضم براها .. انا ماعندي مشكلة البعرسك منو فيهم .كان هو كان اخوهو .. المهم اعرف لي طريقة وانحشر في بيتهم ده .. والله اصوتو ليهم صواتة .. واخليهم يشربو الموية مايروو فيها ..
بس اصبري خليهو يعرسك .. واليظهر انو الحقد الاعمى في قلب سلوي ..مسيطرعليها سيطرة شديدة ..
وبتكره ام سعد كراهية ماعندها مثيل .. وهدفها في الموضوع كلو انها تكون مربوطة بيها بي شي .
وطبعا" ده حالة غريبة ونادرة .. من سواد الباطن . يعني الحاجة الطبيعية . انو الزول البكره ناس.. مابحب انو يناسبهم نهائي ..
ممكن لوداير ينتقم .. ينتقم من بعيد لبعيد.. لكن تعرس ليهم بتها عشان تنتقم؟ دي ماسمعت بيها .. غايتو نحيا ونشوف .. سعد وصل لي ناس عمتو .. وشايل الفحوصات والتحاليل ..
وسلم عليهم ..
وقالت ليهو والله ياسعد ياولدي.. ربنا يقدرني على جزاك.. تعبتك معاي ..
قال ليها والله ياعمتي انا سعيد كونو القى فرصة واخدمك ..
المهم ياعمتي .. نتيجة الفحوصات ما مطمئنة .. الحاصل انو عندك تقرحات مزمنة والتهابات حادة في المعدة .. وعندك ارتفاع خطر في الكلسترول والدهون الثلاثية ..
قالت ليهو الكلام ده انا مابفهمو .. كدي اشرح لي براحة ..
قال ليها انا زاتي مافاهم كويس .. بس انتي استعملي الادوية دي ..
وفي حاجات معينة ماتاكليها ..
المهم شرح ليها كل التعليمات القالها ليهو الدكتور ..
الحاصل ياجماعة انو . حجة سلوي طبعا مراة سمينة . ومتختخة ..
ووشها ده مدوشش .. ومنفخ .وسيقانها من تحت سمااان كدا زي كرعين الفيل .. وكت تمشي لامن بتهزن .. وماعامله حسابها من اي شي في الاكل اي شي بتدوسو ..
ودي العادة السيئة في السودان والخطرة .. انو غالبية الحريم بعتبرو السمنة علامة من علامات السماحة والجمال ..
حتى البنات الصغار المتعلمات .. تلقاهن يستعملن العقاقير البتفتح الشهية .. عشان الواحدة وزنها يزيد .. وتبقى سمينة .. وتعمل ليها ارداف .. وماعندهن فكرة عن الامراض الخطرة الممكن تسببها السمنة ..
وأسال عن (حبوب النجمة) .. نسال الله السلامة من الجهل وقلة الفهم ..
الناس في الدول المتقدمة .. يخافو من السمنة .. ويعملو منها الف حساب .. ونحن الزول السمين نقول ليك (ماشا الله .. فلان صحتو سمحة) ..ياخي صحتو سمحة؟؟
بالاختصار .. حجة سلوى السمنة عملت ليها مشكلة خطرة.. جدا تراكم الدهون في المعدة .. والامعاء وحول الكبد وداخل الاوردة والشرايين . وسببت اعاقة لي عمل الجهاز الهضمي .. بالاضافة الى ارتفاع الكلسترول.. الذي يؤدي الى الذبحة والسكتة وتصلب الشرايين ..
ولغاية الان حجة سلوى ماقادرة تستوعب حجم الخطر .. وانو المسألة دي اخطر من السرطان ..
قالت لي سعد هوي ياولد ها .. والله ما بوقف اكلي الباكل فيهو .. والجاية من الله التجي.. مافي زول بعيش اكتر من عمره ..
(منطق غريب عند كتير من الناس) ..
قالت ليه .طيب قومة النفس دي من شنو ياسعد؟ .قال ليها معناها يتخيلي الدهن تقيل على القلب ..
وطلامو صح كلما ضاقت الشرايين بفعل الدهون .. الزول نفسو بقوم من اقل مجهود ..
على كل حال سعد انتهى من المهمة .. ودعى لي عمتو بالشفا .. وطلع ..
وقلبو كلو مع نهى .. وكل مايطلع التلفون عشان يتصل يشوف الحاصل شنو .. تاني يغير رايو ويدخلو راجع في جيبو . وقلبو يضرب بابور لستر بس ..
يلا نشوف نهى بي غادي الحاصل عليها شنو؟ نهى وصلت لي بيت ناس سماهر .. ودقت الباب .. وجا اخو سماهر الصغير .. فتح ليها الباب .. قالت ليهو ازيك . سماهر موجودة .. قال ليها سماهر عيانة ..أقول ليها منو ؟ قالت ليهو قول ليها نهى فضل الله .
مشى كلمها وجا راجع بي سرعة.. قال ليها قالت ليك اتفضلي ..
دخلت ليها .. وسلام.. وبوس بيجاي وبيجاي .. بتاع البنات ده ..
ولقتها محمومة .. ونفسها مسخن .. كفرت ليها .سماهر قالت ليها كيفك يانهى؟ وليه مابتسألي مني؟ يخسي عليك .. قالت ليها والله كل ما افكر اجيك انشغل بي حاجة .. اها انتي احوالك شنو .. وعملتي شنو في حياتك ؟
قالت ليها انا يادوب سمعت بي خطوبة سعد اخوك .. ربنا يسعدو .
وقلبي المحروق ربنا يصبرو ..
طبعا بعد كلامك داك يومك الكلمتيني بالوصية زي ما حكيت ليك .. انا كلمت ناس البيت وقلت ليهم انا خليت سعد.. وماعايزاهو لانو ظروف ناس بيتهم مابتنفع معاي .
عشان مايقولو لي خلاك ليه ؟ ولمن يعرفو الحقيقة ما يستحقرو سعد
انا سعد مابرضى فيهو مهما كان ..
وطبعا . الزول الاتقدم لي قبل كدا .. لمن جانا .جاء للتعارف . وانا لاقيتو وقلت ليهو اسمع ياود الناس انا خطيبي الاول ماقدرت انساهو ..
ومابقدر اتزوجك .. الا تصبر لي شوية لو بتقدر ..قال لي انتظرك كم يعني؟ .. قلت ليهو .. عشرة خمسطاشر سنة .. طوالي عمل خط رجعة وهسي اتزوج ..
وتاني كل مايتكلم واحد من بعيد لابعيد مابصل البيت .. لاني انا مجندة صاحباتي يطفشوهم .
ماعندي اي مزاج في ارتباط وبطني طامة من اي شي ..
نهى قالت الحممممد لله .. برااحة كدا ..
اسمعي ياسماهر انا عندي ليك خبر عجيب وغريب ..
سماهر قالت ليها دقيقة النتصلح.. اصلا الشمار ده بعمل لي شلل .. اها قولي ..
كانت قاعدة في نص السرير ومغطية رجليها بي بطانية محمومة لمن بردانة ..
طلعت رجليها ونزلتهم من السرير .سيقانا زي سواري الرخام تبارك الله .. وقالت ليها اها قولي ..
نهى قالت ليها ياسماهر.. سعد ليك والله ان شاء الله ..
قالت ليها قلتي شنو؟؟؟
وكيف يعني ؟ موش هو خطب بت عمتك .. وبنفذ وصية ابوهو ..
قالت ليها دقيقة احكي ليك.. وحكت ليها الفلم والحصل كلو ..
سماهر قالت ليها والله قصة عجيبة وغريبة .. وااااي لكن .. انا قلبي داير يقيف ..
انا ماقادرة استوعب يانهى .. انا حموت الليلة من الفرحة .. يعني هسي سعد ح يرجع لي ؟.. يعني هسي سعد عايزني ؟.. ماتتخيليي الشي الحاسة بيهو يانهى ....
وفجأة كدا سكتت وقالت ليها .. لكن المشكلة انا تاني اقول لي اهلي شنو؟ وانتي عارفة ابوي صعب كيف .. وراسو زي الحجر .. يعني موضوع اخدت منو رجوع براي.. تاني اجي اقول عايزاهو ؟؟
المهم انتي امشي قولي لي سعد سماهر مستحيل ترتبط بي انسان غيرك .. لو قعدت طول عمرها ..
ولا اقول ليك .دقيقة اضرب ليهو .. انا تلفوني مقفول ليهو .. 4 يوم .. اول مافتحت التلفون جاتها الرسالة ..
الى معشوقتي التي تملكت الفؤاد .. وسيطرت على الروح ..
ابعث اليك اجمل التحايا .. كماعلمتي من وصية ابي .. التي وافقتي على تنفيذها .. والله ما منعني من مواجهتك الا الخجل والحياء ..
الحمد لله ان بنت عمتي رفضتني تماما .. ممايعني اني لا قبلة لي الا حبي الخالد .. فهل انت على العهد؟
طوالي دموعها نزلن وباست التلفون وحضنتو ..
طوالي دقت لي سعد .. ونهى تعاين وتتبسم التقول هي العروس ..
الو ياسعدي وهناي .. انا على العهد .. انا راجياك يا الغالي .. انا لما بعدك بقيت عيانة .. انا الليلة يادوب.. نهى جابت ليها معاها الفرحة والعافية ..
وهو بس ماسك التلفون وببكي وماقادر يقول كلمة .. وحاسي بي فرحة كدا ماقادر قلبو يستحملا ..
ولسه هي بتربرب ..انا بوعدك ياسعد .. اني اكون ليك .. اصبر لي خليني اسرب الخبر لناس البيت بالتدريج .. الو ياسعد الوووو..
حست انو متأثر وماقادر يتكلم . قالت ليهو مع السلامة ياسعد .. بتكلم معاك بعدين ..
انا ماقادرة استحمل الفرحة .. انتهت المكالمة وسعد ماقدر قال .لاكلمة .
ونهى رجعت البيت وحكت لامها ولي سعد والاتنين قعدو يبكو .. غايتو ناس حنينين جنس حنان ..

بس ياجماعة ..الفرحة دي ما تمت مع سعد اكتر من 48 ساعة .. وفي اليومين ديل كان سعد متواصل مع سماهر.. وسعيد سعادة مابعدها سعادة.. وهاشم متواصل مع ياسمين.. وكدا الموضوع كان عادي جدا .. والناس كلها مرتاحة ..
بس في خبر جا من البلد .. انو صافيات بت النور .. اللهي بت خالة سعد .. اتوفت في الوضوع ..
وخالتها ام سعد دي اتجرست جراسة شديدة خلاص.. وعم الحزن في البيت ..
وبقو يدبرو في السفر للعزاء ..في البلد واتفقو على انو البسافر البلد هاشم وامو ..
وامهم دي طول اليوم القبل السفر كانت بتقول .. والله السفر ده انا قلبي مابيهو كلو كلو .. لكن الواجب واجب .. اختي بتكون محتاجة لي ..لازم نسافر لازم نسافر ..
وفعلا تاني يوم طوالي الصباح قامو هاشم وامه . وركبو الباصات وسافرو البلد للعزاء ..
وسعد الصباح مشى على الورشة.. واخوانو طلعو على جامعاتهم .
والليلة اليوم التاني في امتحانات كباشي ..
الحصل ياجماعة زي الساعة 11 كدا جا تلفون من ام سعد .. وسعد رد عليها
لقى التلفون مامعاها ..
الو السلام عليكم ..
قال ليهو معاك شرطة الخط السريع .. حصل حادث للبص الفيهو اهلك ديل .. والتلفون ده بتاع مراة لقينا فيهو رقمك الظاهر انها والدتك ..
تعال لينا في الحتة الفلانيه ..
سعد ده نط من مكانه لامن الحديدة جرحتو وماحس بيها ..
وبتكلم الو الو ..
الحصل ليها شنو ايوة ده رقم امي ؟ ان شاء الله هي سلامة .. هاشم اخوي وين؟
والزول داك بتكلم مع ناس تاني..
الظاهر الحادث ده ماحادث ساهل الله يستر .. والتلفون قفل .. ورقم هاشم مقفول برضو .
سعد دا بقى لافي زي المجنون .. ماعرف يعمل شنو .. بي نفس هدوم الورشة جرى على الزلط يركب ..
تاني جاهو تلفون .. من تلفون امه نفس الزول . قال ليهو المصابين والمتوفين كلهم نقلوهم بالاسعافات . تعال على حوادث بحري .



الى اللقاء ..

[لامارا]

الحلقة 20


..
سعد طوالي ركب على حوادث بحري.. وفي الشارع ضرب لاخوهو كباشي . قال ليهو انتهيت من الامتحان؟ قال ليهو طلعت من واحد وخاشي على التاني ..
قال ليهو طيب اقفل تلفونك .. وماتفتحو الا تطلع من الامتحان التاني .. واول ما تفحو اضرب لي طوالي .. ...
كباشي قال ليهو ليه الطلب العريب ده ؟ وريني في شنو؟
سعد قال ليهو اقول ليك نفذ كلامي.. بعدين بحكي ليك مافي حاجة مهمة كويس ؟ بس ماتفتحو .. قال ليهو حاضر ..
وضرب لي نهى . قال ليها اسمعي يانهى . امي ضربت لي قالت البص الراكبين فيهو عمل حادث ..لكن هي كويسة .. وهاشم كويس بس في اجراءات بسيطة وحيجو راجعين البيت ..
لو في زول ضرب ليك ماتنزعجي كويس؟ ..انا بتصل عليك تاني ليك تاني .. قالت ليهو انت متأكد انهم كويسين ؟..
لو انا اكتشفت انو فيهم واحد مخروش خرشة ما بخليك ياسعد ..
قال ليها لالا زي مابحكي ليك ..
وصل الحوادث ..ولسه ماعارف الحوادث الحاصل فيها شنو .
اكتشف انو لسه الاسعافات ماحصلت تجي .. هو في المسافة دي استفرع مرتين .
المهم الزول ده ياجماعة اتجرس جراسة شديدة . في الانتظار ده لمن حس انو عيان ..
ورجلو الاتضربت قبيل ديك نزفت لمن وقفت براها ما حس بيها ..
اتصل على تلفون امو وتلفون هاشم اظن اكتر من مية مرة ..وكلو مقفول مقفول ..
قعد كدا على ضل وقعد يبكي .. ويدعي ياربي تلطف .. ياربي لا اسالك رد القضاء لكن اسالك اللطف ..
اتصل على سماهر ..
قالت ليهو نهارك سعيد يا سعادة قلبي .. قاليها كيفك ياسماهر؟ .. ياسماهر حصل علينا حادث .. ناس امي وهاشم اخوي مسافرين .. حصل ليهم حادث ..ولسه ماوصلو المستشفى ..وماعارف الحاصل عليهم .. سماهر انا محتاج ليك شديد .. ادعي ليهم ..
قالت ليهو كرعلي ياخالتي .. ياربي تلطف عليك وعلى هاشم .. وهسي انت ياسعد ماعارف اي حاجة ؟ خليك واثق في ربنا حبيبي.. ان شاء الله سلامة ..
انا جياياك هسي .. اخد نص ساعة من اسوء لحظات العمر المرت عليهو في حياتو .
بعد شوية جاء الاسعاف الاول .. وقالو ده واحد.. ووراهو تاني واحد .. وسريع سعد قام جاري عليهو.. وتعال شوف منظر الناس الميتين ..والمقطعين ..والمكسرين.. والبكوركو من الالم .. وامو معاهم في حالة لايعلم بها الا الله وخاشة في غيبوبة ..
وحوادث بحري وما ادراك ماهي .. الكل يعرفها .. مامحتاجة نحكي عنها .. حتي اسطوانات الاكسجين عددها لايكفي .. والامكانيات ضعيفة لدرجة الخزي والخذلان ..
يقول الكاتب ..انا ايضا قبل اربعة ايام من كتابة هذه السطور .. حصل حادث لبنت عمي .. ولم تجد في حوادث بحري اسعافات التنفس ..لنقص اسطوانات الاكسجين فكانو يجرون عليها التنفس اليدوي بالضغط على الصدر .. حتى تم تحويلها بعد اربعة ساعات الى مستشفى اخر ..
فان كان هذا مكان لاسعاف الحالات الطارئة ..غير مجهز لانقاذ المصابين .. فكيف يتم انقاذنا عما نحن فيه ..
يا اهل المسؤلية .. انا اصرخ لكم من خلال احرفي ان تسعوا في انقاذ المصاب .
فقد قال الله .. ومن احياها فكانما احيا الناس جميعا" .
وانتم اهل بلد عرف باغاثة الملهوف.. وادراك المصاب .. فاجعلونا نفخر ببلدنا ..
بالاختصار .. سعد بقى يكورك .. ياناس شوفو امي دي مالا ؟
يا دكتور؟ تعال شوف دي .. يادكتورة .. والحقيقة امه في غيبوبة تامة.. لكن ماعليها ثر ضربة ولانزيف ولاشي .. وكل الناس كانو مشغولين مع الحالات الخطرة الاخرى ..
في دكتورة صغيرة في السن حنت على حالو وجاتو .. اسعافات اولية .. انعاش . صور ..وو وغيرا ..
سعد في قمة المشغولية دي.. جات عربية الاسعاف التانية وفيها هاشم ..وكان مصروب في ضهره من اعلى الحوض.. الى السلسلة الفقرية ..
وكان يئن من الالم .. وفي ضربة في وشو صغيرة وعينو مورمة ..
المهم ياجماعة عشان نختصر الجو الكئيب الحصل في المستشفى .. الوالدة كانت بصحة جيدة.. فقط الغيبوبة الحصل عليها بسبب الصدمة الكبيرة .. وضربة خفيفة في اعلى الراس .. بدون اي اثار ..
ويعد ساعة من وصولها ..من الاسعافات وغيرو استعادت عيها وقامت ..وكانت بتتكلم كلام فاضي ..زي الماواعية..
المهم ..لمن قالو جسمها سليم .. اتجهو على هاشم ..كان بعاني من كسر خطر في الحوض تمزق في اربطة الظهر ..
ودي طبعا حالة موت محققة .. لكن ربنا لطف الحمد لله ..
والام لمن استجمعت وعيها ..ولقت ولدها في الحالة دي.. بس اشتغلت بكا ..
الحمد لله انو امهم طيبة ..ومامحتاجة ولا لحبة دواء .. وفي المساء اتصل سعد يادوب على اخوانو الاتنين اهلو المتواجدين في الخرطوم ..وبدات الحالات بتاعات التوافد على المستشفى ..
وسماهر ونهى وكباشي والكل جو ومساهرين وحارسين البوابات ..
بالاختصار حولوه للعنبر المستشفى ولازم السرير والعلاج ..
وبعد يومين جات ياسمين تبكي .. وتستريح ..وقالت ماكنت عارفة ..وكنت مستغربة ليه هاشم قافل مني تلفونو ..
سعد قال ليها انا من اول يوم اتصلت على عمتي وكلمتها ..
قالت ليهو والله امي دي بتبالغ ليه ماكلمتني؟ .. هي ماعارفة انو ده روحي .. انا الله يكتلني .. انا ان شاء الله اموت .. انا ربنا ابتلاني بأسوء ام في الدنيا .. الحمد لله ..
وقفلت تلفونها من امها وبقت ملازمة هاشم الممنوع من الحركة .. اها ياجماعة طبعا .اسوء خبر اتلقتو الاسرة
من الاطباء انو هاشم ما حيقدر يمشي على رجليهو .. وحيصاب بشلل دائم في النصف الاسفل من جسده ..
واليوم ده كان اسوء يوم ليهم في حياتهم ..
ياسمين بعد يومين فتحت تلفونها ..طوالي امها ضربت ليها..
قالت ليها انت قاعدة في المستشفى بتسوي في شنو مع الجنازة ده؟ ..
قالت ليها انا ماجاية والفي راسك اعمليهو.. انا مابفوت الا هاشم يطلع من المستشفى .. قالت ليها اصبري وشوفيني بعمل شنو .
والعمة سلوى 15 يوم ماجات شافت هاشم.. اتصلت كفرت ليهم بس والحيلة كلها انها عيانة .. وكل يومين تلاتة بتتصل غايتو تسأل.. .وهي قالو حايمة الحلة كلها على حسب كلام ياسمين .. وياسمين بقت مافارق معاها امها تطلع سرها ولاتخليهو ..
وهاشم الاربعة وعشرين ساعة يبكي ..ومتجرس من قصة الشلل دي .. وسعد مرهق ارهاق عجيب خلاص.. في متابعة علاج اخوهو .. ومصاريف البيت .. وحاجات كدا تجيب الجنون ..
واي حاجة غالية ..وهو شغال زي الدربكين وماعارف يعمل شنو ؟
لكن ياجماعة كلما تضيق حلقات الحياة ..هنالك بصيص امل وبؤرة ضوء من لطف الله .. تتنزل منها الرحمة واللطف الالهي ..
وحقو ماننسى الحكاية دي ..
في واحد جاء في المستشفى اسمو صالح .. وطبعا صالح ده نحن كلنا بنعرفو .. وهو شقيق مريم .. وخال شذى الصغيرة اللدغتها العقرب .. الزول الشهم الاشترى البيت لي اختو ..
سمع بالكارثة الحصلت على ناس سعد وجاهم ..
وقال لي سعد انا علي دين في رقبتي ..عايز اسددو اليوم واقسم بالله تقول حاجة تاني لا بيني لابينك ..
انا عايز اتابع علاج هاشم.. وانت تطلع من الموضوع ده خالص ..
سعد قال ليهو والله انت ياكا اخوي واخو هاشم ..
وماممكن اقيف في طريقك ..اي حاجة بتقدر تساعد بيها هاشم انا معاك ..
قال ليهو كويس هسي الليلة عايزين نعمل اجراءات تحويل للمستشفى الفلاني.. الدكتور الفيهو صديق شخصي لي ..
وسعد وافق على الموضوع بدون تردد .. وبدو في الاجراءات في الصباحية كدا ..
وهم بعملو في اجراءات التحويل .. وماشين فيها كويس ..
وياسمين دي اي زول يشوفا يقول هاشم ده ..اما راجلها او اخوهاالشقيق .. بس قاعده جم هاشم .. وكل ماتشوفو اخد راحتو ونام تقعد تبكي .. وكت يصحى تقش دموعها وتتبسم .. وبتخدمو خدمة .. سبحان الله مع نهى زي التومات ..
البت دي طلعت اصيلة بشكل غريب ..التقول سلوى ما امها ..
اها في اليوم ده امها سلوى جات ..
تتبحلط وتتكتل السمينة ..ونفسها قايم . جات المستشفى بكل النفاق والكذب ..
كرعلي ياهاشم ياولدي .. والله انا اسبوعين ماقادرة انوم .. يحليلك ياولدي .. ان شاء الله تبقى طيب .. اول الشلل مالو؟
كرسي العجلة ده راقد في الصيدليات .. بس انت اصلك ما تزعل روحك ده قدر الله ياولدي ..
والناس ديل كلهم فرحو بي جية سلوى للمستشفى .. وسعد بالخصوص .. قال ليها والله ياعمتي كونك .. تجي المسافة دي كلها بالمواصلات ..وانتي عيانة بس ربنا يقدرنا على جزاك ..
وان شاء الله هاشم يقوم بالسلامة.. ويرد ليك الدين .. بي احسانه ليك ولي ياسمين الاصيلة ..
والله ياعمتي ياسمين ضربت اروع الامثلة في التفاني والوفاء.. ربنا يحفظها .. وبي وجودها هاشم حاسي انو حي ..
هاشم اخوي لو ماياسمين .. كان مات بالغل والقهر ..
قالت ليهو .. والله يا سعد ياولدي .. هاشم تاني بس ربنا يديهو العافية ..لكن العرس ليهو صعب ..
موش قلتو الدكاترة قالو شلل دايم .. ؟؟
سعد قال ليها .. الامل في ربنا مابتقطع ياعمتي ..
قالت ليهو كدي هسع امرقو لي برة ..انا عندي كلام سر مع هاشم ولدي ده ..
ياسمين دي طيرت عيونها وخافت خوف عجيب .. قالت ليها ده شنو يا امي السر العايزة تمرقي ليهو الناس بره ده ؟؟
انا ما مارقة ومابخلي هاشم براهو ..
قالت ليها انت خليك قاعدة كان دايرة .. لانو الكلام الدايرة اقولو انتي عارفاهو تب ..
الناس ديل مرقو برة ..وهي جات قعدت جم هاشم .. ودايرة تحكي ليهو سر ياسمين الصغير ..



الى اللقاء .. (^_^)

[لامارا]

الحلقة 21

..
حجة سلوى . جررت ليها كرسي وجات قعدت جم هاشم .. وبقت تتكلم براحة .. قالت ليهو اول شي عايزاك توعدني.. الكلام ده مافي زول يعرفو غيرك .. قال ليها بوعدك ..
قالت ليهو .. عارف ياهاشم.. انا من زمان عايزة احكي ليك الحاجة دي .. بس كل مرة بخاف من ردة فعلك.. لكن مادام انتو اتفقتو.. انت وياسمين خلاص تعرسو.. ربنا يتم ليكم بالخير . انا عندي كلام دايرة اقولو ليك .. ...عشان بعدين ماتلومني.. وتقول عمتي دست علي وغشتني بي بتها .. وبعد تسمع الكلام كلو.. كان بقيت عليها .. وداير تغطي قدحك كمان مافي مشكلة .
قال ليها اها قولي .. وياسمين لمن لقت الكلام دخل الحوش.. طوالي طلعت من الغرفة ..
سلوى قالت ليهو ياسمين دي ياهاشم . أول من دخلت الجامعة.. وهي في بداية سنة أولى.. كان عندها صاحبتين .. كدا شكلهم من البداية ماكان عاجبني.. بجو في البيت .. الواحدة فيهم مكفكفة يديها .. ولابسة جزمة رجال .. وقميص رجال .. اناقلت ليها يابتي البنوت الزي الشواطين ديل ابعدي منهن ..
وماسمعت كلامي .. ويومين تلاتة بقت ياسمين تصرفاتها غريبة .. وتتكلم كلام مو عديل .. وبجيب ليها كل مرة كلمة طافرة ..
انا ضربت لي خالها فلان (ده عمو الساكن في الخرطوم) . يمشي يتخصص لي يشوف لي البت الحاصل عليها شنو .. وعمك كلم بنات خالة مرتو اتنين .. وعرفن عنها اي شي .. وكانت الكارثة ..يوم البنات جونا هنا في البيت ومعاهن عمك .. وحكن لي قالن البت بتشرب البنقو.. وبتبلع الحبوب المخدرة .. ومرات بتدك المحاضرات وعندها شلة بتاعة اولاد وبنات .. بمشو مع بعض يتسطلو ويجو .. ونحن ماصدقنا الكلام ده في البداية.. وقلنا يمكن البنات ديل بكيدن فوقها .. دي بنتنا ودي تربيتنا ونحن بنعرفها .. بعد الكلام ده بي اربعة يوم . ياسمين ماجات من الجامعة . لغاية اخر الليل نحن مساهرين وراجنها .. لغاية الصباح ماجات .. وانا ضربت لي اعمامها. ومشو يسألو في الجامعة .. عن صاحباتها وشلتها . وكلهم كانو غايبين من الجامعة . وابوك كان متابع معانا كل الحاصل ده .. والبت تلاتة يوم ماظهرت .. لغاية مابلغنا الشرطة .. ناس الشرطة لقوها في شقة في العمارات .. ومعاها الشلة الشريرة .. وهي مامعروف واعية ولا ساطلة .. وأعمامها دقوها لامن كببوها الدم ومنعوها الجامعة .. بس الحصل في التلاتة يوم دي شنو؟.. الله اعلم انا ماعرفتو .. وحتى اهلها ما تخصصو في الموضوع بس تفو ليها في وشها .. وقالو دي تاني مانافعة .. وابوك قال الموضوع ده اتكتمو عليهو .. لكن للاسف الخبر انتشر في الحلة .. وكل الاهل عرفوهو .. الا ابوك الراجل الصميم .. مانضم وقال لي ماتشيلي هم بتك
اولادي قاعدين يغطو قدحهم ويسترو عيبهم ..
ومن اليوم داك انا بقيت بكرها .. كل يوم بدعي في صلاتي انها تلم فيها حافة في الزلط تفرم لحمها ويجيبوها لي في قفة ..
وقدر ما انتقم منها الفي قلبي مابنفش..
وانا لاهسع مانعارفاها . سليمة ولا ماسليمة ..
وكل الحاصل ده واخوها البارد داك لا بودي ولابجيب .. ولا حرك فيهو ساكن .. ويوم قلت ليهو اختك بتشرب البنقو .. قال لي دي (حرية شخصية) ..
اها بعد داك اتعدلت وصلحت اخلاقها وبقت تصلي زي الناس .. اها اعمامك سمحو ليها بالجامعة بشروط . غايتو هسع النصيحة لله تصرفاتها كلها اتغيرت والقصة دي هسع ليها تلاتة سنة .
المهم ترا كلمتك وانت صاحب الشان .. عشان ماتقع ساكت .. وتقول عمتي ماورتني تاريخ البت .. بس انت وعدتني الكلام ده يكون بينا الاتنين ..
وطبعا ياجماعة الكلام القالتو سلوى ..للاسف كله حاصل .. بعض الجامعات الان تتروج فيها المخدرات.. والبنات بقن يشربن البنقو وبلفن السجارة الخدرا عااادي .. بل واحدات ببيعن بنقو .. وحبوب الهلاويس .. وانحدرن لادنى المستويات .. وده كلو بي سبب الفساد والانحلال .. الاسري .. والمجتمعي الذي انحدرت له البلاد .والقنوات التي تروج للفساد .. والمسلسلات والافلام .. ومواقع الانترنت الاباحية .. والثورة العارمة .للغزو الثقافي الاجنبي .الذي يريد ان يجرد المجتمع من ابسط القيم والمبادئ .. ياريت اولياء الامور يحكمو المراقبة للطلبة الجامعيين خصوصا في السنوات الاولى .. لانو الطلاب بقو يدخلو الجامعة صغار في السن وفي قمة فوران المراهقة والتحول البايلوجي .وده من خلل التدبير في السلم التعليمي الجديد الممقوت..
نرجع للقصة .. بعد هاشم سمع الكلام ده .. قال ليها اسمعي ياعمتي .
شوفتي لو ياسمين دي حايمة الشوارع عريانة .. لو عندها دكان بتبيع البنقو .. انا مابخليها مابخليها ..
ودي وصية ابوي .. ووحتى انا لو بقيت اناني وخليتها ..سعد اخوي بخلي خطيبتو.. ويجي يتزوجها لو كانت شنو وشنو .. يعني في النهاية يا أنا يا هو ..
وبما اني انا بحبها .. وهي بتحبني انا مابخليها .. الا هي تقول ماعايزاني ..
بعدين الكلام ده ليهو تلاتة سنة .. يعني هسي في داعي تنكتي كلام زي ده ؟
قالت ليهو طيب ياهاشم .. هسع انت مشلول .. وشلل دايم .. كيف يعني تمسك البت معاك .. وكيف تقدر تمارس حياتك الطبيعية ..
قال ليها هي قبلانة بي حالتي دي .. امشي اسأليها ..
تانيا ياعمتي . انا املي في الله كبير.. ان شاء الله اتعالج وامشي بي كرعي ..
وبعدين .. لو انا ربنا ماكتب لي الشفاء .. براي بديها حريتها لكن هسي الزمن بدري على الكلام ده .. الا اتأكد واقنع من الشفاء .. ماممكن افرط في ياسمين من هسي .. لو بعدين اتعالجت وبقيت كويس بندم لو فرطت فيها ..
اها هنا طوالي ياسمين جات داخلة .. قالت ليهو هاشم.. ياحبي ياحياتي .. انا كنت واقفة جنب الباب .. وسمعت كل الكلام .. ربنا يخليك لي ياحبيب عمري .. ابدا" ماخيبت ظني .
ياهاشم اقسم بالله اي كلمة قالتها ليك امي صحيحة وحاصلة.. لكن اقسم بالله انا مافي راجل لمسني ..
ان شاء الله ياهاشم لو كذبت عليك.. اتحرم منك ياعمري كل عمري .. انا صاح شربت البنقو .. وبلعت حبوب .. وده كلو من رفقاء السوء والملاعين .. لكن ماحصل يوم من الايام فقدت عقلي.. ودخلت في غيبوبة عشان زول يتصرف فيني.. لاني ماكنت مدمنة .. وكنت عاملة الموضوع فلاحة وموضة وحضارة .. وكنت بستعمل بسيط يعني السجارة بجر منها فد نفس .. لاني بخاف من الغيبوبة ..
وماكنت مستوعبة الضرر الممكن يحصل لي منو .. لكن الحمد لله عرفت ربنا .. ومسكت صلاتي .. وندمت على اي حاجة.. واي زول عندو علاقة بي حاجة زي دي .. انا بقيت بكرهو .. والفضل بعد ربنا يرجع لي ابوك خالي فضل الله .. هو الوحيد القعدني وقعد يتكلم معاي بالعقلانية ..
واليوم داك اتمنيت اني اكون بتو .. عشان هو راجل مربي .. واخلاقو في اخوانو مافي ..
وهنا حجة سلوى مات ليها الكرت الرابح في يدها وما كسبت اي حاجة .. والمواضيع كلها مشت عكس ارادتها ..
والله غالب ..
طبعا يا اخوانا في حاجة نحن لازم نلاحظ ليها .. هاشم املو في انه يتعالج ويكون طبيعي امل ضعيف جدا جدا ..
عشان يقول داير ياسمين ولا مادايرها .. لكن اصر انو هو عايزها عشان مايخلي فرصة لي سلوى.. تتسلبط في سعد مرة تانية .. وتحاول تربطو بي ياسمين وسعد يخسر حب حياتو مرة تانية ..
وهو عارف انو سعد ممكن يضحي باي حاجة ويستر بت عمتو ..
والكلام ده نحن حنكتشفو لي قدام .. يعني هاشم عايز يربط ياسمين عشان يحمي سعد . لكن بالنسبة ليهو هو .. ماعندو امل في القومة ..
طيب ..
في الايام دي كانت العلاقة بين سماهر وسعد في قمة الترابط والود .. وسماهر كل يومين بتجي المستفى تطمئن على هاشم .. ومتواصلة مع سعد ..
وطبعا بالنسبة لي صالح زي ماعارفين جاء من السفر في اجازة . وكل مشغوليتو كانت علاج هاشم .. وحوله على نفقته الخاصة لي مستشفى خاص .. وطبيب مشهور ..
طبعا ياجماعة صالح بقى متواجد مع الناس ديل الاربعة وعشرين ساعة .. حتى لمن سعد يكون مافي .. هو بكون مع هاشم .. وبقى معاهم زي الاخو ..
وتلقاهو طوالي جار نور في نهى .. ونهى زاتها مبسوطة منو .. ومتكيفة من النور الطويل ده .. وميتة فيهو موت .. لكن شايفاهو فوق ليها .. وماعايزة تفكر في حاجة مستحيلة ..
وهو بس كلامو كلو معاها .. يانهى الموضوع الفلاني .. يانهى شنو وشنو .. وحركات كدا .. ولمن يتكلم في موضوع تلقاهو يعاين ليها بي طرف عينو .. المهم نهى بقت بين فاهمة ومافاهمة ..
لامن يوم جات اختو مريم البريئة زيارة في المستشفى .. وفجرت القنبلة .. وقالت لي نهى قدام الناس ..
اها يانهى . وافقتي ؟؟
قالت ليها اوافق على شنو يامريم ..
قالتليها .. صالح اخوي قال داير يعرسك .. انتي دايرة تعرسيهو؟
قالت ليها متين قال كدا يامريم ..؟؟
قالت ليها كل يوم بقول .. انا داير لي فرصة اقول لي نهى .. لكن اهلها ديل الاربعة وعشرين ساعة وافقين معاها.. وما مديني فرصة ..
ههه هنا . صالح جا جاري من بعيد .. وحس انو مريم فجرت العبوة الناسفة ..
قال ليها مريم دقيقة انا دايرك ..
عايز يحصل بتاعة الكوجاك دي قبال ما تكوجك ليك المواضيع ههه ..
هاشم قال ليهو يا صالح الموضوع انكشف ومريم فضحتك .. نحن هسي راجين رد نهى نشوفها بتقول شنو ؟
نهى ضحكت ودنقرت.. وقالت لي مريم انتي يامريم بتكذبي ساي صح؟
قالت ليها منوالبكذب .. انا من زمن المدرسة تاني ما كذبت ..
مرة واحدة كذبت .. هسي مابكذب .. اهو ده اٍسأليهو .. انت ياصالح مالك ساكت ماتتكلم .. قوليها سريع .. نهى دي لو في زول جا عرسها تاني ماتقعد تبكي لي .. ههه
باختصار الموضوع وضح وبدت قصة جديدة .. والموافقة تمت بكل سهولة .. من جميع الاطراف ..
سعد لامن سمع بالقصة .. قال والله صح الطيبات للطيبين ..
اها يازول بالنسبة لي نهى الناس اتفقو في وحددو اليوم عديل ..
لكن نهى ما رضيانة تعمل موضوع واخوها راقد مستشفى . ناس سعد ضغطوها وقالو ليها صالح ماعندو وقت .. لانو في اجازة ..
وصالح قال نسأل الدكتور .. لو هاشم وضعو ما مستقر.. انا ممكن اعقد واسافر اخليك .. ولو مستقر مابخليك وراي ..
اها بعد يومين . الطبيب كلم صالح بي موضوع .. وصالح اتصل على سعد . قال ليهو تجيني سريع الدكتور عايزك .. ودخلو على الدكتور اتكلم معاهم كلام كتير شديد..
ولمن سعد طلع من الدكتور .. وسألوهو ناس هاشم ونهى وياسمين .. سعد نكر اي حاجة وقال الدكتور ماقال حاجة جديدة يعني ..
لكن فوق وشو في تعابير مامفهومة .. لاتعرفو حزين لاتعرفو فرحان .. غايتو ربنا يجيب العواقب سليمة ..



الى اللقاء ..

[لامارا]

الحلقة 22


..
طبعا الموضوع القالو الدكتور لي سعد وصالح ..نحن لسع ماعرفناهو شنو بالضبط .. والناس بقت بصراحة مقلقة ..وسعد مافي زول بقدر يتخصص معاهو الا امو .. وامو هسي في عالم تاني . من الاحزان والقلق على ولدها .. ولاعارفة انو الدكتور قال حاجة لي سعد ..
بالنسبة لي كباشي خلص الامتحانات .. ...
وبقى يمشي الورشة مع سعد .. يسد بدله خدمة.. لانو الورشة دي بقت ميتة كل مرة مقفلة بالشهور ..
المرة دي مصرين يخلوها شغالة ..مهاما كانت الظروف ..

يوم من الايام في سماهر قالت لي امها .. انا عايزة اسوق معاي مصعب وماشة المستشفى .. عشان احتمال اتاخر والجية بالليل صعبة ..
قالت ليها مافي مشكلة امشي بس .. مصعب عندو قراية .. خالك محمد بجي غاشيك .. ويجيبك لينا هنا ..
اصلا هو الليلة جايينا بالمساء .. يغشاك بالمرة يجيبك معاهو ..
واتفقو على كدا وسماهر مشت المستشفى .
وطبعا سماهر بقت تعرف ياسمين معرفة لصيقة .. وبتتونس معاها كتير .. ونشأت بينهم الاتنين محبة ..
اها بالمساء لمن خالها جاء المستشفى وخشا يكفر لي هاشم .. وسلم على الجماعة .. لفتت نظره البت ياسمين.. القاعدة مع سماهر ..
وماعرف علاقتها بالجماعة ديل شنو .. نادى سماهر برة هو كان راكب بوكسي .. ووقفو الاتنين جمب البوكسي كدا .. وقال ليها البت دي بتعرفيها من وين ؟
قالت ليهو دي بت عمة سعد .. وخطيبة اخوهو هاشم الراقد ده ..
خالها قال ليها طبعا انتي عارفة نحن ناس البوليس.. الزول البنشوفو تاني مابننساهو .. (هو ضابط شرطة شكله) ..
والبت دي ياسماهر مدمنة مخدرات .. انا تابعت ليها قضية قبل تلات سنة ..
سماهر دي اتخلعت وقالت ليهو مستحيل .. دي انسانة اطهر من الطهارة .. دي انا بعرفها شديد .. وطيلة ايامي البجي المستشفى بقعد معاها مالاحظت عليها اي حاجة ..
قال ليها مستحيل انا اكون نسيت .. اسمها ياسمين صح؟
قالت ليهو فعلا" .. قال ليها مستحيل انسى حالة زي دي لاني شفتها مع شلة المخدرات .. وقبضنا عليهم في متلبسين في شقة .وكانت ضايعة من اهلها تلاتة ايام . انا حقيقة البت دي اتأثرت عليها شديد الوكت داك ..
انا يادوب بقيت اقلق عليك ياسماهر من الاسرة دي ..
ولسه مامعروف المخفي في الاسرة دي شنو؟ الحمد لله الانا اكتشفت الحاجة دي من هسي ..
اركبي اركبي .. قالت ليهو دقيقة اشيل شنطتي من جوة ..
وياجماعة الكارثة التانيه .انو كباشي كان واقف بي ورا البوكسي وسمع اي حاجة ..
طبعا كباشي انبهط . وانهار لمن قعد في الواطه ..
وسماهر دخلت ودعت الجماعة وهي عليها حالة من الاندهاش والرعب لايخطر على بال .. وشالت شنطتها وطلعت .. ركبت مع خالها ..
بعد شوية والكلام امكن بعد المغرب بي شوية ..
كباشي ده بقى مقلق وماعارف يسوي شنو؟ وشكلو اتأكد من كلام البوليس ده ..
قال انا لازم اعمل حاجة .. واطير البت دي الاسمها ياسمين من حياتنا .. ياربي اكلم منو .. كان كلمت امي.. امي بتقول لي اسكت ساي مالك ومالا..
وكان كلمت سعد بخلق مشكلة بينو وبين هاشم ..
اسلم حل اكلم هاشم بالكلام السمعتو كلو بالتفصيل ..
اها دخل جوة .. وقال لي هاشم في زول موصيني ليك وصية سرية .. اكلمك بيها متين؟
هاشم قال ليهو هسي ماف طريقة .. خلي نهى وياسمين ديل يمشو البيت بعد شوية .. وانت تحكي لي ..
طبعا ياسمين منقطع تماما عن الجرافة .. قاعدة معاهم في البيت .
بس من الصباح تجي تقعد مع هاشم لغاية نهاية اليوم بتمشي مع نهى للبيت .. وهكذا ..
بعد البنات فاتن الاتنين البيت .. كباشي قعد يحكي لي هاشم الكلام السمعو من الضابط ..
هاشم استمع ليهو لامن خلص كلامو .. بعد داك قال ليهو .. ايوة الضابط كلامو صح.
بس يا كباشي الكلام ده كان قبل تلاتة سنة وهسي ياسمين .. تابت ورجعت وندمت ..
نحن كلنا اطرطشنا بي سبب اصدقاء السوء.. والاصحاب الوسخ ..
وماعيب انو الزول يغلط العيب انو الزول يواصل في طريق الغلط ..
وانا شخصيا ماعندي مانع ارتبط بي بت عمتي.. مهما كان تاريخها شنو ..
نحن لو خليناها منو العايز يستر لينا عرضنا .. ؟
انت فاهمني ؟ قاليهو فاهمك ..
هاشم قال ليهو بس طلبي منك.. الكلام ده ماتجيب سيرتو لزول ..
قال ليهو انا اساسا لو عايز اتكلم بيهو ما كان قلت ليك كلام سري .. وخليت الناس كلهم يفوتو ..
او على الاقل كنت كلمت بيهو امي او سعد اخوي ..
هاشم قال ليهو .. بس يا كباشي انت ماعارف المشكلة وين .
المشكلة الكبيرة .. الظروف الح تواجه سماهر مع اسرتها بعد ما خالها يحكي ليهم الحاصل .. المهم انت خليك ساكت وربنا يجيب العواقب سليمة ..
وفعلا اتكتمو على الموضوع الاتنين ..
سماهر انقطعت من المستشفى وما من عادتها .. وتلفونها مقفول ليهو يومين .. ومامعروف الحاصل عليها شنو..
وسعد مقلق عليها ونهى كل يوم تقول ماشة ليها ..
لكن طبعا هاشم وكباشي عارفين السبب العامل ليها مشكلة في البيت .. وسعد مع انشغالو الشديد مع هاشم غفل عنها .. وقال بتكون مشغولة ساي .. وبتجي ..
بالاختصار .. سعد كلم امو واخوانو انو الدكتور.. قرر عملية لي هاشم واحتمالية نجاحها كبيرة .. محتاجة الدعوات اصلا الحمد لله اساسا العملية ماكبيرة .. والدكتور . اتنازل من الرسوم .. هوصديق شخصي من الطفولة لي صالح . بس رسوم التخدير والطاقم والرسوم الرمزية دي .. يعني يمكن ربع المبلغ ....
وقررو ها يوم الاتنين الجاي .. وفي الفترة دي .. سعد فعلا افتقد سماهر
بس يوم امكن بعد اسبوع من الكلام ده ..
اتصلت عليهو سماهر وقالت ليهو .. ليه ياسعدما بتسأل مني .؟
قال ليها والله حاولت اتصل عليك كتير تلفونك مقفول ..
قالت ليهو .. تلفوني قلعوهو مني .. قال ليها في شنو بالضبط كدا؟ ..
القلعو منك منو ؟ قالت ليهو لامن القى لي فرصة الاقيك بحكي ليك هسي وريني هاشم كيف .
قال ليها عمليتو يوم الاتنين دعواتك..
بس انتي الحاصل عليك شنو؟ ان شاء الله ماعندك مشكلة .. وده رقم منو المتصلة منو المتصلة منو؟
قالت ليهو ده رقم واحدة صحبتي ..
قال ليها الليلة لازم تلاقيني .. انا العصرية كدا طالع على بحري . نتلاقى .. نتلاقى .. واتفقو اتلاقو ..
وفعلا حصل ..
حكت ليهو وهي بتبكي .. وقالت ليهو خالي قال وقال ..
سعد قال ليها ده كذب ..
قالت ليهو لالا ما كذب لانو خالي عرفها وعرف اسمها ..
والمشكلة انو خالي وصل الخبر لامي وابوي بطريقة بشعة.. وقال ليهم دي اسرة ماكويسة .. وبناتهم حايمات ساي .. واسرة منحلة لابعد الحدود ..
وابوي ماصدق ورسل اخوي الصغير لي وين كدا ماعارف عشان يتأكد وفعلا اخوي جا وقال .. الكلام صح ..

وأبوي هاج واتعفرت .. وقال لي ماداير اسمع سيرة الناس ديل خالص .. مامعروف احتمال اختهم زاتها تكون بنفس المستوى ..
وشالو مني التلفون .. وحرموني حتى اجي اشوف هاشم في المستشفى ..
قال ليها انا الكلام ده مستحيل اصدقو في ياسمين .. انا حـ ........ فجأة كدا سكت زي القطع كهربا .. اتذكر كلام ابوه .. واصرارو على انو يستر ياسمين .. ومن هنا عرف انو ياسمين يهو ده السر بتاعها الهو ماعرفو ولاسأل عنه ..
قال ليها انتي هسي امشي البيت ..وماتشتغلي بالموضوع.. انا بحل الموضوع ده ..
قالت ليهو بس لو فرضنا انو ياسمين كدا .. انت ذنبك شنو في الموضوع ..
قال ليها ده الظلم الحاصل في مجتمعنا .. ربنا قال ولا تزر وازرة
وزر اخرى ..
مجتمعنا يقول الشر يعم .. ويحكم على المجموعة بسبب الواحد منها ..
بس انتي ماتشيلي هم لو ربنا كاتب لينا نصيب .. بتتحل ان شاء الله ..
لاني هسي مافاضي ..
عملية هاشم يوم الاتنين .. وصالح مضايقنا عايز يعمل العقد الجمعة
لانو زمنو بقى مافي صالحو ..

طبعا" سعد بقى شايل هم هاشم .. لمن يعرف حقيقة ياسمين يعمل شنو؟.. وشايف كمية الحب والولاء الحاصلة بيناتهم الاتنين ..
لانو هو ماعندو خبر انو هاشم عااااااارف..
غايتو بالاختصار.. يوم الاتنين تمت عملية هاشم وتكللت بالنجاح الحمد لله .. على حسب كلام الدكتور
وفاضت الفرحة على الاسرة .. لكن سعد كانت فرحتو ناقصة بالجد ..
وان شاء الله كلها كم يوم وهاشم يقوم على حيلو ..
والحاجة العجيبة انو هاشم اول ما شم العافية قال يعقدو ليهو مع صالح يوم الجمعة ..
اخوهو قال ليهو لالالا .. انا مابعقد ليك الا اشوفك بقيت تنطط ..



الى اللقاء

[لامارا]

الحلقة 23


..
طيلة الفترة دي واللقاءات بين صالح وبين نهى .. عشرة على عشرة .. يوم الجمعة فعلا عملو العقد لي . صالح .. وكان العقد عبارة عن مهرجان بس المشكلة المؤسفة انو هاشم ماحاضر .. وبعد العقد مباشرة .. بدأ صالح يجهز للسفر ..
وكان فرحان فرحة مابعدها فرحة .. ونهى بيغادي الدنيا ماشايلاها ....
اها في اليوم التاني .. اللهو يوم السبت ..
جاها في البيت وقال ليها عندنا مشوار مع بعض .. وطلعت ركبت معاهو في العربية ..
قال ليها عايز اديك هدية .. ماتتخليها .. وانتي تستاهليها ..
قالت ليهو كان داير تشتري لي دهب.. انا مابحب الدهب ..
قال ليها يابت مافي مرة في الدنيا مابتحب الدهب.. ماتكضبي علي ..
قالت ليهو نحن هسي ماشين وين؟ .. قال ليها ماشين مكان حلو نتغدى فيهو ..
قالت ليهو نتغدى قبل الهدية ولابعد الهدية .. قال ليها مع الهدية سوا ..
المهم يازول ساقا مشو قعد في مطعم هاي بروفشنال .
وفي قعدة الغدا .. مدا ليها ظرف ..
عاينت للظرف كدا قال ليها افتحيهو ..
قالت ليهو بفتحو بعدين .. قال ليها افتحيهو هسي .. عشان اشوف شعورك كيف .. وبتعجبك الهدية وللالا ..
قالت ليهو جدا .. فتحت الظرف .. لقت جواهو اوراق .. مطبقة
قالت ليهو ده شنو ؟؟
قال ليها دي اوراق بيت .. مسجل في اسمك ..
قالت ليهو ياتو بيت يا صالح .. قال ليها نفس البيت الاشتريتو عشان تسكن فيهو مريم اختي ..
قالت ليهو بس البيت انت اشتريتو لي مريم ..
كيف تديني ليهو هدية .. ؟؟
قال ليها اولا" مريم انا مامسجلو بي اسمها اصلا .. وهي مامحتاجة ليهو .. عندها غيرو اربعة بيوت .. وهي نفسها قالت انا ماعايزة البيت ده ..
عشان فيهو الxxxxب .. من يوم العقرب القرصت .شذى بقت مضايققة من البيت .. ومتشاءمة بيهو ..
والبيت انا زاتي ما عندي فيهو حوجة .. الحمد لله الخير باسط يا نهى ..
المهم هسي البيت حقك وليك فيهو حق التصرف ..
تبيعيهو .تأجريهو .. تهديهو لي امك .. تعملي فيهو العايزاهو ..
ونهى يازول ماسكة الظرف ودموعها نازلات.. وتعاين لي صالح ..
قالت ليهو انت شنو يازول ؟؟
انت انسان . ولا ملاك .. ولا رحمة نازلة من السماء ..
انا والله قدر ماعشت في الدنيا مالا قاني زول زيك .. انا محظوظة بانسان قلبو طيب .. زيك كدا .. الله يخليك لي ياحياتي ..
صالح الملك ود الملوك .. راجل سخي واجواد خريج صيدلة . قبل 13 سنة وربنا وفقو . بي مساعدة والدو المرحوم ...... المعروف ..
وفتح عدد من الصيدليات داخل العاصمة . وماسك مدير تسويق شركة ادوية عالمية مشهورة مقرها في السعودية .. ماعايزين نقول اسمها عشان تتكشف الحقايق ..
على كل حال ..
صالح ساق نهى ووداها البيت.. وقعد معاهم شوية عشان يشوف ردة فعل الناس ديل بالهدية ..
وخايف انهم يزعلو منو .. وفعلا نهى كلمت امها وسعد اخوها .. كانو في البيت جايين من المشتشفى ..
وخلو هناك مع هاشم ياسمين وكباشي .. وحيرجع ليهم سعد اخر الليل ..
اها يازول .. سعد قال ليها .. والله يانهى انا يتخيلي صالح ده من بعزك معزة شديدة.. ومبروك البيت .. بس نحن ماعندنا فيهو حق .. لانو بعد ده بقى من حقك وحق اولادك ..
امها قالت ليها سعد كلامو صح ..
قالت ليهم طيب لو انا سافرت السعودية.. مابتقعدو لي فيهو .. ؟ قال ليها ابدا .. ده بيتك الح تسكني فيهو انتي وبس ..
قالت ليهو لكن صالح قالي ما حتسكني فيهو .. لاني عامل لي بيت لي نفسي في نمرة تلاتة ..
وكوركت لي صالح كان قاعد في السرير الفي الحوش .. قالت ليهو تعال ياصالح .. صالح جا قالت ليهو شوف.. انا كنت عايز اديهم البيت .. يسكنو فيهو وهم رافضين ..
قال ليها طيب بيعيهو ليهم .. المشكلة وين ؟
قالت ليهو فكرة حلوة .. اها ياسعد تديني القطعة البديت فيها البنيان وتزيدني كم ؟
قال ليها بس ماعندي زيادة تاني .. الا قروش كباشي .. ومابقدر اتصرف فيها ..
قالت ليهو طيب انا قبلانة ... القطعة قصاد البيت .. والباقي اتنازلت منو لي امي ..
قال ليها طيب حقك في التركة؟؟؟ ..
قالت ليهو اتنازلت منو برضو لي امي ..
بس انت امشي اكتب القطعة في اسمي .. وانا بكتب البيت في اسم امي .. واتفقو على كدا ..
شوف بالله النعمة دي .. وصالح قاعد يتبسم .. والله الزول ده فرحان فرح .. ديل ناس ام دوم ياخي ..
وامها دي اتبسطت بسط لامن قعد تبكي .. وقالت لي صالح تعال ياصالح .. تعال .. اديني راسك .. دنقر كدا .وسلمت عليهو في راسو ..
وهو برك في الواطة وسلم عليها فوق يديها الاتنين ..
وقال ليها ماتتخيلي يا خالتي .. انا فرحان بيكم كيف ..انتو الناس الوحيدين الفي الدنيا البشبهو ناس بيتنا .. وذكرتيني امي الله يرحمها ..
حتى طريقة بكاك بتبكي زي امي ..
الكلام ده كان بالليل .. وصالح ودعهم وطلع ..
مرت كم يوم كدا .. وصالح سافر . ومواعيدو يجي بعد شهر . لكن في الشهر ده حصلت حاجات كتيرة خلاص ..
مرت كم يوم كدا .. وفي تلفون جا لي ياسمين .. من اخوها البغل الفي الجرافة .. طبعا سمين زي امو .. وبلبس بنطلون زي شوال الطاحونة ..
تلقاهو يخوجل زي ضكر البط المكتف ..
اتصل على ياسمين ..
قال ليها تعالي سريع.. الحجة دي بقت تعيا بالليل .. وكل يوم بالليل نفسها يتضايق وتقرب تموت .. وانا مابعرف اتصرف ..
وانا ضربت لي عمر ود خالتي.. في حي مكي ابا يجي .. وقال لي امك كدي هوالة ساي وبتمثل ..
لكن بالجد هي تعبانة ..
ياسمين كلمت اولاد خالها.. وقالت ليهم عمتكم تعبانة .. سعد قال لي كباشي امشي معاها شوف الحاصل على عمتي شنو.
لو لقيتها تعبانة فعلا وديها لاقرب مستشفى.. واضرب لي .. ولو لقيت حالتها كويسة خليكم معاها انت وياسمين.. انا بكون مع هاشم بي جاي ..
وفعلا الكباشي وياسمين مشو ..
في الشارع .. كباشي بقى يتكلم مع ياسمين .. قال ليها طبعا هاشم كلمك .. قالت ليهو يكلمني بشنو ؟
قال ليها انا سمعت سماهر وخالها بتكلمو .. وخالها قال ليها كيت كيت ..
وانا كلمت هاشم وهاشم قال لي عارف ..
قالت ليهو وتاني كلمت منو ؟ قال ليها ماكلمت زول . لكن من اليوم داك تاني سماهر ماجات ..
ياسمين قالت ليهو سعد قال سماهر امها مريضة .. وقاعدة معاها في البيت ..
كباشي قاليها سعد بكضب عليكم .. سماهر من يوم سمعت الكلام تاني ماجات المستشفى ..
قالت ليهو بس انا الموضوع ده خليتو زمان ..
قال ليها ايوة انا هاشم كلمني .. بس سماهر فهمت غير كدا .. لانو خالها قال ليها الزولة دي مدمنة .. قايلنك مستمرة ..
قالت ليهو ايواااا .. كدا انا فهمت الحاصل .. ومعناها سماهر حتكون حكت لي سعد ..
وهسي سعد فاهم اي حاجة ..
وفعلاكلامها صح ..
اها ياجماعة .. في نفس اليوم ده .. سعد قعد جم هاشم .. وقال ليهو ياهاشم في موضوع انا عايز اقولو ليك.. ولي كم يوم بحاول اقولو ليك.. بس ماعارف الطريقة الممكن اقولو بيها ..
طبعا انت هسي الحمد لله ماشي تحسن كل يوم .. وبعد تقوم بالسلامة ان شاء الله تبدأ اجراءاتك .. في الزواج ..
بس انا عايزك قبل ماتخطي اي خطوة .. تسأل ياسمين من سؤال .. لاني سمعت كلام .. وخايفك تقوم تكشف الموضوع بعد الزواج وتخرب بيت الزوجية ..
طبعا هاشم فهم طوالي انو سعد عرف الحقيقة ..وقلبو عمل زن.. زن ..
قال ليهو ياسعد قول لي طوالي في شنو؟ ..
قال ليهو انا سمعت انو ياسمين دي مدمنة مخدرات .. وطبعا انت لازم تكون ماخد بالك من الحتة دي .. وتكون عارفها .. وبعد تعرف الحقيقة يكون ليك الخيار ..
يا اما تتزوجها .. وتحاول تهديها وتعدل سلوكياتها.. في النهاية دي بت عمتك وعرضك ..
اما لو كنت مابتقدر .. على الموضوع ده من هسي تبتعد وتصرف النظر ..
هاشم قال ليهو لالا ..ياسمين ما مدمنة .. ياسمين كانت مدمنة زمان وانا عارف.. لكن هسي ياسمين في احسن حال .. ماتشيل هم يا سعد
ياسمين عرضي وما بفرط فيها ..
بس انت الحكا ليك منو ؟.. سعد كشف ليهو الحاصل من سماهر ..
قال ليهو بس ياسعد انا طالب منم طلب ..
انت كلم سماهر .. قوليها ماتقبلي باي زول .. خليني انا اقوم على حيلي والموضوع ده انا مسؤول منو ..
وكدا اتكشفت الحقايق وبانت الامور . وكل شي بقى واضح ..
باكر الصباح بدري كباشي ضرب لي سعد ..وقال ليهو ياسعد عمتي سلوى اتوفت الليلة الصباح .. .. امبارح بالليل نامت عادية .. جات ياسمين تصحيها من النوم لقتها ما بتتفنس وجبنا الدكتور جارهم قال اتوفت قبل ساعة ونص ..
تعالو لينا سريع انا ماعارف اعمل شنو .. بس هسي معاي الجيران
الله رحيم بعباده ..



الى اللقاء ..

[لامارا]

.
الحلقة 24

.
الجماعة طبعا مشو كلهم الجرافة . ماخلو مع هاشم غير اتنين من اولاد الجيران . وكان يوم على هاشم صعب جدا" ..وحزين ووحيد .. واكتر شي حزين على حزن ياسمين.. لفقدانها امها ..
اما انا شخصيا ماعندي رغبة امشي الوفاة دي .. نمشي نعزي منو مثلا" (^_^) ...
حاكون قاعد مع هاشم هنا .. لامن يجو من هناك .. هاشم بدا يقعد على حيلو .. واولاد الجيران في الصباحية كدا بدرجوهو على المشي حبة حبة .. ونهى جاتو تاني يوم من الصباح .. اما سعد وامو وكباشي ..كلهم قاعدين في بيت العزاء ماجو ..
طبعا ياجماعة ..هاشم بقى فاهم انو سعد حيفقد سماهر.. بسبب ماضي ياسمين الغير مشرف ..
قبل الجماعة مايجو نادى نهى ..وحكى ليها بالتفاصيل المملة .. طبعا نهى عروس ماشا الله .. المفروض في الايام دي تكون بتجهز في حالها .. ومركبة الدخان .. لكن القدر شال عمتها .. وعاملة حزينة وكدا ..
هاشم قال ليها عايزك تمشي تنادي لي سماهر.. انا مستعجل شديد .. وماقادر انتظر لغاية ما اقوم على حيلي ..
قالت ليهو صعبة والله ياهاشم .. قال ليها انتي امشي وشوفي الحاصل شنو ؟ وقولي ليها هاشم قال ليك على الاقل تعالي شوفيني.. انا بقيت كويس .. وتعالي عزينا في عمتنا .. ده واجب برضو ..
الكلام ده تاني يوم من البكا بس ..
المهم نهى مشت وهي ما مقتنعة بالموضوع .. وحاسة بانو موضوع سعد فاشل ..فاشل ..
اها مشت تاني يوم الضهرية يعني تالتة البكا .. ولقت البت قاعدة وحزينة وكئبة ..
وبقت تتكلم معاها .. قالت ليها ياسماهر.. انتي عارفة انو العملتو ياسمين كان قبل تلات سنوات .. وتابت ورجعت ..وهسي ماشاء الله عليها زي ما انتي شايفة ..
بعدين سعد اخوي.. اصلا ماعندو ذنب في الموضوع .. نحن كلنا كنا بعيدين من ياسمين ..وعمتنا الله يرحمنا كانت مقاطعانا سنين ..
وانا قريب ده حتن عرفت عندي بت عمتي اسمها ياسمين ..
سماهر قالت ليها .. انااتكلمت مع ابوي .. واهلي .. ورافضين رفض شديد .. بس لكن ماكنت عارفة انو ياسمين اقلعت من الموضوع .. لانو سعد ذاتو اتفاجأ .. وماكان عارف ..
وهسي لو حكيت لابوي.. انو الزولة دي اقلعت من الموضوع.. قبل تلات سنوات .. مابصدقني وبقول لي انتي ماقلتي كدا من الاول ليه ..

اها سماهر امها جات داخلة.. لقت نهى قاعدة معاها ..
قالت ليها تعالي ياسماهر لحظة لو سمحتي .. (امها الاستاذة . فادية مديرة مدرسة اساس ).. نادتها بره قالتلا .ياسماهر البت دي نحن بقينا ما مطمئنين ليها .. واي اسرة تظهر في بناتها حاجة زي دي معناها .. تاني رجالها مامنهم رجا ولافائدة .. المطلوب ..الزولة دي تاني ماتجيك هنا ياسماهر ..
قالت ليها لكن يا امي اطردها .. ولا اقول ليها تاني ماتجيني؟ ..
قالت ليها ياسماهر نحن ما ناس كعبين.. ومابنابى الناس الضيوف.. لكن من حقنا نخاف على بناتنا ..
قالت ليها تخافي علي انا ياامي ؟؟ بعد مابقيت مراة واعية ..وفاهمة كل شي ..
بعدين يا امي والله نهى دي افضل بت انا عرفتها في حياتي .. نهى دي زي سعد بالضبط انتي مابتعرفي سعد ؟
قالت ليها كنت قايلة نفسي بعرفهم . بس الامور الظهرت اخيرا دي ..
كشفت لينا المستور قبل الفاس ماتقع في الراس ..
المشكلة الكبيرة ياجماعة .. انو نهى جوة قاعة تسمع في الكلام بوضوح .. والظاهر الاستاذة قاصدة تسمع نهى.. من دون ما سماهر تخت بالا ..
ولمن سماهر جات داخلة لي نهى عملت فيها ماسمعت حاجة.. وبقت مواصلة في نفس موضوعها ..
قالت ليها بس انا جيت افهمك ..انو الكلام ده عبارة عن ماضي مؤلم..
ونحن كلنا ما مسؤلين منه.. فحرام تعاقبو اخوي عليهو ياسماهر ...
قالت ليها يانهى ..العقاب الحاصل علي.. انا ربنا يعلم بيهو .. بس نعمل شنو؟ هسي انا كل مايتكلمو معاي في موضوع زواج ولا اي زول جاي يتعرف.. بقفل الموضوع طوالي.. واقول ليهم ماعندي رغبة ..
غايتو في النهاية نهى ركبت رجعت لي هاشم في المستشفى ..
طبعا انا ماكلمتكم انو ناس سعد قبل الوفاة كل العفش رحلوهو في البيت القديم ..وقبل ما يرحلو هم . جاهم خبر الوفاة ..يعني اول مايرجعو من الجرافة مابمشو بيت الايجار.. برجعو بيتهم القديم ..

اها وكت نهى رجعت المستشفى لي هاشم.. وحكت ليهو الحاصل..
قال ليها اصبري بس .. والله انا الموضوع ده مابخليهو بالساهل كدي ولو فيهو دمي يسيل ..
بعد اليوم الرابع من البكا سعد وامو جو من الجرافة .. وخلو هناك كباشي مع مظفر وياسمين ..
والبيت في الجرافة بقى فاااضي ومسيخ بدون سلوى..
وطبعا نزلو في بيتهم زي ماحكيت ليكم .. وكان يوم دخولهم في البيت يوم بكا اكتر من يوم بكا سلوى .. لكن كان بكا مختلط ..
بين الفرحة والحزن على الوالد العزيز الحاج فضل الله .. وتجددت ذكرياتو في البيت .. كل مايجو في حتة من البيت يتذكرو موقف لابوهم ..
والعجب الام ..طيلة الايام التلاتة الاوايل دي دمعتا ماوقفت ..
مرت الايام وهاشم بقى زي الحصان ..واتخرج من المستشفى .. وبدا سعد يجهز ليهو في العرس ..
وكان بتمنى انو يتزوج هو وصالح مع بعض.. لكن صالح اتأخر في الجية .. وكانت مواعيدو بعد شهر بس لكن اتأجلت ..
وطيلة الفترة دي كباشي قاعد مع اولاد عمتو في الجرافة .. ايمكن
فترة 20 يوم ما جا ..الا مرة واحدة يوم جمعة ورجع ..
يوم من الايام هاشم مشى الجرافة بي نفسو .. ولاول مرة يعزي مظفر طبعا ..
وقال ليهم انا حأسوق ياسمين .. تشتري حاجاتها ..كباشي ومظفر خلو بالكم من البيت وماتتحاومو .. وساقها ومشى على بحري ..
وهو في الطريق حكا ليها الكارثة الحلت على سعد بي سبب جرايمها الزمان ..
قالت ليهو اها طيب انا اعمل شنو هسي؟؟ .. قال ليها مافي شي ..
الا نمشي انا وانتي ليهم في البيت .. وانا بوريك تعلملي شنو .. قالت ليهو ..بس انا في راي الموضوع ده يكون بعد العرس ..
عشان سعد ذاتو يكون في الصورة .. ونمشي ليهم زيارة عادية قال ليها تمام ..
وطبعا مشى معاها واشتري ليها بعض الحاجات .. وحددو المواعيد بتاعة العرس ..وقالو العرس يكون في بيت حجة سلوى.. في الجرافة لاعتبارات بعرفوها ناس البلد ..
وده كان راي سعد..
المهم حاولو يتصلو على صالح ..عشان يشوف ليهو ان شاء الله تلاتة اربعة يوم .. يجي يحضر العرس .. تلفونو مقفول .. اتصلو عليهو كتير مافي اي فائدة ..
واتصلت نهى على مريم في مدني .. قالت ليها يامريم .. نحن لينا تلاتة يوم بنتصل على صالح في السعودية.. رقمو مقفول ماعندك ليهو رقم تاني ؟
قالت ليهم بكون عيان.. المرة الفات تلفونو مقفول.. عشان كان عيان .. انا اجيكم بدلو ؟ اسمعي يانهى.. عليك الله قولي لي تعالي ..
عشان اكلم محجوب.. والله بجيب ليك معاي شذى البتريديها دي .
قالت ليها يامريم هسي انا مقلقة على صالح ..
خلاص تعالي ..
مريم قالت لها خلاص انتي اضربي لي محجوب .. هاك تلفونو ..
ونهى اتصلت على محجوب.. ومحجوب قال ليها كلنا بنجي للعرس انا وكل اولادي ..
بس طبعا نهى همها كلو في صالح.. الاخبارو مقطوعة ربنا يستر ..
ويحفظ صالح اينما كان ..
على كل حال جات مواعيد العرس ..وسعد مشغول كل الشغلة بتجهيز اخوهو .. وفي الفترة دي كان واقع في الشغل بي يديهو وكرعينو ..
ومع انو الزواج كان مبسط للحد البعيد .. بس برضو ارهقو ارهاق عجيب ..
المهم هاشم عرس.. وموضوعو انتهى..
ومرت الايام ..
طبعا كانو متفقين انو هاشم يسكن في الجرافة مع اولاد عمتو الاتنين ..
بس قبل ما يمشي هناك عندو مهمة.. قاعدة ليهو في وشو .. وهي مسؤولية اقناع اهل سماهر .. المنقطعة تماما من جيهة سعد ..
وسعد اساسا في الفترة الفاتت مافاضي ليها نهائي ..
اها بعد مارجع هاشم من شهر العسل الماتامي شهر ذاتو .. (انتو البتاع ده بقولو عليهو شهر وهو مابتم شهر ليه ؟؟
اول هاشم من رجع قال لي سعد .. اخبار سماهر شنو؟
قال ليهو ما منها خبر.. وانا قربت اموت ياهاشم .. انا بقيت ماقادر .. انا سماهر دي حياتي .. ومن دونها ماعندي اي طعم للدنيا دي ..
قال ليهو طيب .. انا ماشي ليهم زيارة في البيت ..
وعايز اقدم ليك خدمة واحدة بس في حياتي دي ..لانك انت جمايلك في رقبتي .. لايوم الدين ما بتتحلا ..
قاليهو جمايل شنو انت اهبل ؟.. انت قايل روحك ود الجيران؟
امشي اعمل الشايفو.. والزارعا الله فوق الحجر بتقوم ..
هاشم قاليهو طيب.. وريني بلقى ابوها قاعد متين ؟
قال ليهو دايما بعد المغرب بكونو كلهم موجودين ..
هاشم طوالي بعد المغرب ساق ياسمين ومشى ليهم . وفي الشارع قعد يوصي فيها .. ويقول ليها في كلام كتير .. انها لمن تصل هناك تعملو ..
ومامعروف المفروض تعمل شنو ؟
وهل ممكن يعمل اثر في الناس المعصلجين ديل ولا لا ..
المهم يا زول دخلو وسلمو على الناس وياسمين خشت جوة ..وسلمت على سماهر ..ولقتها صحتها نازلة وحالتها محترفة .
لامن ياسمين دي بكت .. ولمن بتسلم عليها بتبكي وبتقول ليها انا اسفة ياسماهر انا اسفة والله مابيدي .. ومافي زول سامعها ..
وطبعا استاذة فادية ام سماهر مابتعرف ياسمين ..
لكن طبعا" ابوها بعرف هاشم .. وعارف الجات معاهو دي زوجته .. لكن ماعارفها دي ست الموضوع ذاااتو .. عشان كدا غير ماقدم الضيافة ماقال شي ..
ولمن سماهر كانت عايزة تقول لي امها دي ياسمين ..
ياسمين قالت ليها اوسس .. اصبري شوية بكلمها براي ..
ياربي ديل دايرين يسوو شنو؟

الى اللقاء

[لامارا]

الحلقة 25

.
طبعا جابو ليهم الضيافة .. لكن قبل مايتناولو اي حاجة .. هاشم قال لي والد سماهر قبل ما نقبل اكرامكم.. نحن عندنا طلب ورجاء جايينو .. قال ليهو اتفضل قول ..
طوالي هاشم قال للولد نادي لي المراة الجات معاي دي .. ...
جات ياسمين ومعاها الاستاذة فادية .. قال ليهم اتفضلو ..
فادية قالت في شنو ياجماعة.. ان شاء الله خير ؟
هاشم قال ليها اتكلمي يا ياسمين ..
قالت ليهم انا اسمي ياسمين . زوجة هاشم وبت عمتو .. وانا الحكا ليك اخوكي .. وخال سماهر .. عني كيت وكيت ..
انا البي سببي رفضتو سعد ..
الاستاذة عايزة تتكلم .. ياسمين قالت ليها لو سمحتي يا خالة .. خليني اكمل كلامي ..
انا ياخالتي والله . اتعرضت قبل تلاتة سنة لخداع اصدقاء السوء . وجربت الحاجة دي.. امكن ما اكتر من اسبوع او عشرة يوم .. وبي وقفة اهلي معاي .. وخالي اللهو والد سعد الله يرحمو .الحمد لله من الوكت داك انا تاني ماقربت حتي من الناس دي..
وهسي الحمد لله انا في امان الله .. وانا جيت مخصوص عشان احلف ليكم على المصحف .. اني صادقة في كلامي ده ..
لو صدقتوني انا طلبي ماتحرمو سعد من سماهر .. ولو ماصدقتوني . انا بعيش طول عمري في عذاب ضمير .. وما ح اسامح نفسي ..
انا كلامي خلص .. اتفضلي ياخالتي ..
قالت ليها كويس يا بتي.. نحن صدقناك انو الحاجة دي كانت في الماضي .. طيب والسمعة السيئة؟ .. وكلام الناس؟.. نحن نقدر نواجهو كيف؟ ..
انتي عارفة انو نحن في مجتمع لايرحم.. خصوصا البنات .. في الامور دي . الحاجة زي وصمة العار تكون فوق جبينهم طول حياتهم ..
والد سماهر قال ليها دقيقة يا فادية .. لو سمحتي بس ..
وهسي انت ياهاشم اتزوجتها يعني .. شكلكم عرسان كدا .؟
قال ليهو طبعا .. دي انا عرفتها كويس .. واتأكدت منها ومن اخلاقها .. ولو ماكدا . مستحيل أتزوجها طبعا"
قال ليهو طيب.. عندكم اي حالة مشابهة في الاسرة.. ؟ يعني بت ولا ولد بتعاطى المخدرات ؟
هاشم .قال ليهو ابدا .. والله ولاسمعنا بي حاجة زي دي .. الا في الايام دي .. اسأل سماهر مننا ومن اسرتنا ..
طوالي ابوها قال ليهو. والله نحن هسي ما بنقدر نديكم راي.. وقرار الا نطلع بي راي اجماعي . انا وامها وخالها .واعمامها برضو سمعو بالحكاية دي .. لانها دي ماحاجة ساهلة .. هاشم قال جدا اخدو راحتكم و نحن في الانتظار .. والله لاننا نحن بنتشرف ونعتز بي نسبكم .. وشارين بتكم بالغالي والنفيس..
قام ابوها قال ليهو .. بس انا عندي سؤال محيرني ..
ليه سعد ما جانا ولا اتصل علينا ولا اثر فيهو رفضنا ده ..
قال ليهو كيف ما أثر ؟ سعد كان جاي بس انا وياسمين كنا مستعجلين اكتر منو ..عشان ياسمين كانت حاسة انها هي المسؤولة عن الحصل.. .
وسعد في الايام الفاتت كان مشغول معاي انا في المستشفى .. وفاة عمتي والدة ياسمين .. وبعد داك زواجي والكلام كلو تم في فترة وجيزة يعني الحاجات جات ورا بعض ..
وبكره سعد بجيكم ان شاء الله بس نحن طلبنا منو نجي اول ..
قال ليهو الف يلامة عليكم واحسن الله عزاكم والله انا طبعا الوفاة سمعت بيها قبل يومين.
المهم يازول غايتو الجماعة ديل ماقصرو.. وقامو بالواجب والزيادة .
لكن غايتو ما معروف البحصل شنو ..
وجو راجعين لي سعد حكو ليهو كل الدار بيناتم .. والتفاوضات .. سعد قال ليهم والله انا اكتر حاجة مؤثراني .. اني ما قادر الاقي سماهر ولا قادر اتصل عليها ولا أي شي ..
والله ياهاشم انا قلبي محروق حريق من فراقها .. ياسمين قالت ليهو .. والله كمان ياسعد سماهر اتقسمت النص ..
وبقت شكلها عيانة عيانة .. غايتو ان شاء الله ربنا يلمكم يجمعكم على خير ..
قال ليهم انا بكرة بمشي ليهم ان شاء الله.. بس انا امبارح حلمت حلم مخوفني شديد ..
حلمان اني مسافر على حتة .. ومجهز كل حاجة .. وجا البص عشان اركب فيهو .. البص فاتني قدر ماجريت فوقو ما قدرت الحقو ..
زعلت زعل على الموضوع.. نفسي قايم من الجري لمان صحيت من النوم ..
هاشم قال ليهو الله يستر والله .. ربنا يجيب العواقب سليمة ..
ان شاء الله خير يازول ..
قال ليهو ياهاشم طبعا انا اشتريت ليك مكنة اللحام .. والمقاطيع والمقصات .. ودايرك لمن تمشي الجرافة .. الدكان القديم الفي بيت عمتك ده .. تظبط ليك فيهو طربيزة وتفتح ورشة حدادة ..
ان بقيت اوسطى كبير ..
هسع تمشو باكر ان شاء الله وتعمرو بيتكم .. وترسلو لي كباشي محتاج ليهو شديد ..
هاشم قال ليهو طيب كدا البحصل شنو؟.. وانا منتظر القرار بتاع ناس سماهر ..
قال ليهو ماتشفق انت موش شالو تلفونك؟ .. بضربو ليك انا متأكد..
انا تلفوني معاهم .. وانا باكر بمشي ليهم واشوف الحاصل بقدر استشف براي ..
سعد قال لي ياسمين .. ياسمين . سماهر لسع ماعملت تلفون؟
قالت ليهو والله ماسألتها ياسعد . ما كان في فرصة ..
المهم باكر العصرية كدا سعد مشى زيارة لي ناس سماهر في البيت على الاقل يشوفها .. بس المشكلة اهلها قابلوهو بي كل برود ..
يعني عادي لكن مازي زمان .. وماقدر يقول ليهم انا عايز اشوف سماهر .. وهم ما قالو ليهو .. وهي ماجات طالعة تسلم عليهو ..
ومامعروف عارفاهو جا ولا ماعارفة ..
غايتو طلع منهم بعد نص ساعة .. وروحو باكية .. والدنيا كلها مضلمة في وشو .. وكل مرة تجيهو العبرة في حلقو ويبلعها ..
اثبت يا ابو السعود انت جبل ..
بالنسبة لي نهى طبعا الاربعة وعشرين ساعة سارحة ومقلقة .. وتشيل وتضرب في تلفون صالح ..
هسي دي قريب التلاتة اسابيع تلفونو مقفول ..
اها يوم جاء واحد من الخرطوم .. لي ناس سعد في البيت وقال ليهم انا مرسلني ليكم صالح ..
صالح سافر مأمورية للنرويج .. وقال نسى تلفونو بي ارقامو في السعودية .. وماحافظ في راسو ولارقم .. الا اتصل علينا في الشركة وطلب مننا نوصل ليكم الرقم ده ..
سعد شال الرقم ودخل بيهو على نهى .
طوالي نهى قامت ختفت منو الورقة زي المجنونة وبقت تعاين للورقة وتدوس في ارقام تلفونها ..
زي الما نصيحة.. الو الو الو ..
الخط فتح معاها .. وقامت ليك فيهو بدون مقدمات ..حرام عليك والله حرام عليك .. ليه يعني ياصالح تخلينا نقلق كدا ؟
وبتسكت تسمع في كلامو.... ـــــــــ(...............)
طيب أسفه السلام عليكم كيف حالك وصحتك؟ ..
..ــــــ(........)
قالت ايوة هاشم اتزوج واتصلنا علي تلفونك لمن زهجنا..كلو مقفول ..ـــــــ(..........)
قالت .. الله يبارك فيك بس والله فقدناك فقدان شديد خلاص ..
.. ــــــ .(........)..
وبقت ماشة مارقة حبة حبة من سعد وامها .
واخدت ليها ضحكة خجولة كدا
وقالت .اهي .. والله غايتو انت يا صالح .. هسي الكلام ده وقتو؟ دقيقة طيب خليني ابعد من الناس ..؟
ومشت برة اتكلمت معاهو لامن رصيدها صفر .. وتاني هو اتصل وحدد ليها مواعيد الجية وكدا ..
غايتو الوضع استقر.. ونهى بقت تبسم سنين سنين .. وتضحك بلا سبب . وبقت نشيطة نشاط غريب .. اي حاجة تقول لي امها لالا يا امي انتي خليك مرتاحة.. بقوم بعملا انا ..
وتكنس وتنوني .. وتغسل العدة وتنوني ..
وبتغني في شنو؟ النغمة بتاعة غناها .. ههههه بتقول
صغارك مشتهين ترجع تضم العش بحنية .. حمام الوادي ياراحل مع النسمة الفرايحيه ..
وبي فرحة نهى كل البيت بقى فرحان ..
ومرت الايام.. وهاشم فتح ورشة في الجرافة .. ونهى وسعد وكباشي قاعدين مع الوالدة في البيت الكبير ..
طال الفراق والاحساس بالمراة في حياة سعد.. بي حرمانو من سماهر .. ولسع اهلها ما ردو ليهو.. وهو منتظر .. وبقى شغال وشاغل وقتو بالشغل .. وبعيد من الناس .. وبحاول بقدر المستطاع انو يكون عادي ويضحك ويتونس ...
وكلو مرة يجيهو هاجس .. يقول ليهو لازم تقنع.. انت الناس ديل ما دايرنك ..
ونظرتهم في اسرتك اتغيرت ..
وسعد طبعا بقدس الاسرة .. وامو واخوانو عندو بالدنيا كلها .. وفرحتو بي ياسمين .. وسعادة هاشم كانت مخففة عليهو كل تعب واحزان ..
اها صالح وصل من السفر.. حددو المناسبة .. ورسلو كرت لي ناس سماهر .. والعرس كان في ام دوم .. وكان عرس في ابهى الصور ..
والحفلة كانت في صالة في الخرطوم .. الحاجة الغريبة .. في الحفلة دي .. انو والشي الزاد الفرحة على الفرحة.. انو سماهر وامها جو المناسبة .. وجو باركو للعرسان .. وكباشي جرى يكلم سعد.. قال ليهو تعال شوف الجا منو؟
وسعد جاهن ولمن شاف سماهر قرب يقع .. ورحب بيهم وكانت فرحة ظهرت فوق وشو طيلة الحفلة ..
وفي منظر تاني غريب في الصالة .. في طفلة لابسه زفاف وخاتين ليها كرسي ..
وقاعدة جمب العرسان .. وماسكة في طرف فستان العروس ..
الناس كلهم بسألو منها .. والناس كانو قايلين العروس متزوجة قبل كدا ووالدة .. لكن نحن عارفين دي منو..
دي (شذى) العسولة .. بت مريم اخت العريس ..
المهم انتهت المناسبة .. وتاني يوم العرسان سافروا .. ونهى لي اخر لحظة بتوصي في سعد يوافيها بالاخبار ..
بعد مرور اسبوع بس سعد اتصل على والد سماهر .. عشان يحسم الموضوع ده .. ابيض ولا اسود ؟
قال ليهو والله ياسعد ماعارف اقول ليك شنو.. لكن نحن اتشاورنا كم مرة في الموضوع ..
خصوصأ اعمامها وخيلانا .. ما قبلانين الموضوع ده خالص ..
وانا كنت عايز اتصل عليك قبل كم يوم ..
هم قالو لو كان بت عمتو ساي ما مشكلة.. لكن المشكلة انها مراة اخوهو .. يعني ياسعد لو هاشم ماكان اتزوجها .. او على الاقل صبر شوية.. كان ممكن الموضوع يمشى ..
سعد قال ليهو .. خير ياعمي .. انا ماممكن أعاقب انسانة بي خطأ قبل تلاتة سنة .. وما ح اتخلى عن عرضي . وما ح أكسر وصية ابوي ..
ولو ربنا ماقاسم لي معاكم قسمة انا راضي بامر الله ..
ودعتك الله .. وانتهت المكالمة ..



الى اللقاء ..

[لامارا]

.
الحلقة 26 .. الاخيرة ..


.
بعد خلصت المكالمة .. ابو سماهر خت يديهو فوق راسو .. واظن قعد في مكانه قريب النص ساعة .. الكلام ده هو كان في مكتبو .. في نهاية الدوام ..
في النهاية شال نفسو وختاهو .. وقام ركب عربيتو .. وماشي في الشارع بتكلم براهو ..بكرر في كلام سعد .. يقول (خير ياعمي .. انا ماممكن أعاقب انسانة بي خطأ قبل تلاتة سنة .. وما ح اتخلى عن عرضي . وما ح أكسر وصية ...ابوي ..
ولو ربنا ماقاسم لي معاكم قسمة انا راضي بامر الله ).. وصل البيت .. محبط ومتضايق .. وحالتو ما كويسة .. دخل على سماهر في غرفتها .. لقاها قاعدة في مصلاية وبتقرا في القران .. وعيونها محمرات زي الزول الكان بدق ليهو في شطة ..
طبقت المصحف .. وطبعت قبله على المصحف فوق الغلاف ..
وقالت ليهو اهلين يا ابوي ..
قال ليها سماهر كيفك وكيف احوالك؟
قالت ليهو ماكويسة والله يا ابوي .. تعبانة ومنهارة .. ومحبطة بس الحمد لله .. انت عودتني ما أكذب عليك .. واحكي ليك باي حاجة في حياتي ..
قال ليها انا اتكلمت مع سعد قبل شوية ..
طوالي قامت من المصلاية وجات قعدت جمب ابوها ..
قالت ليهو قال ليك شنو سعد ؟ عليك الله هو كويس .؟ جاك وللا مشيت ليهو .؟ ولا اتصال ساي ..
قال ليها اتصل علي هو .. وبسأل من الموضوع ..
بصراحة يا سماهر الزول ده ما زول ساهل والله .. والله اختيارك كان في محله .. والله ياسماهر الزول ده راجل ...الزول يختو في يمينو .. الله يحفظه ويكرمو .. وانا خايف قرارنا ده نندم عليهو ..
قالت ليهو ابوي الله يخليك .. قبل كل شي راعي لي انا .. انا والله مابقدر اتعايش مع زول ..
انت قبل كدا حكيت لي معاناتك في حبك لي امي.. والمشاكل الواجهتكم .. وكيف انك قلت لي لو ما اتزوجت امك.. انا كنت بموت بالحسرة ؟
متذكر يا ابوي؟؟؟
.. قال ليها متذكر تمام .. وانا وامك الان قلبنا مقطوع من الالم ..
بس برضو خايفين عليك ..
قالت ليهو ابوي .. اثق فيني . واثق في كلامي .. انا لو حسيت الاسرة مابتنفع معاي.. براي بسيبها .. من دون كلامكم ..
الراجل سكت مسافة وقال ليها.. جيبي يدك .. مدت ليهو يدها .. وقال ليها .. انا معاكم انتي وسعد والرهيفة التنقد ..
خليني هسي اكلم امك.. وننادي اخوالك واعمامك تاني .. ان شاء الله ربنا ينصرنا عليهم ..
بس انا عايز منك انتي موضوع .. بطلبو منك في النهاية ..
قالت ليهو الله يبشرك بالخير يا اعظم ابو في الدنيا .. ابوي ممكن اتكلم مع سعد هسي؟؟ .. كلمتين بس عليك الله..
قال ليها لالا .. اصبري شوية بس ياسماهر.. اديني فرصة نحن ما بنقدر نتخذ قرار انفرادي .. انتي مابتي براي .. نحن كتلة واحدة حبيبتي ..
قالت ليهو خلاص اوكي.. انا منتظراك يا ابوي وواثقة فيك
عايز يطلع منها كدا .. قالت ليهو ابوي؟؟ ..
انا بحبك شديد .. طلع منها وعيونو مليانة دموع .. الراجل ده اتاريهو عاطفي بشكل ..
بي هناك طبعا سعد مشى البيت .. لانو خلاص نفسو اتقفلت.. وبطنو طمت من الشغل ..
والوالدة سألته من المستجدات .. في الامور طبعا امهم متابعة كل صغيرة وكبيرة .. وعارفة الرفض الحاصل والسبب .. اها لمن سألته ماقدر يخفي عليها .. قاليها الموضوع انتهى يا امي ..
قالت ليهو ليه تستسلم بالسهولة دي .. انت عارفنك زول قوي .. وممكن تتحمل .. بس مافكرت ولو لي لحظة بي سماهر.. ؟
والممكن يحصل عليها .. ومافكرت فيني انا ..؟؟
وكيف انا متعلقة بي سماهر .. انا بعد نهى مشت .. مافي زول بسد لي مكانها غير سماهر ..
وياسمين ماقاعدة لي .. شالت مني ولدي وقعدت في بيت امها ..
قال ليها طيب يا امي اعمل شنومثلا" ؟ اقلعها منهم بالغصب . ؟ بعدين هو ناس رفضونا عشان مامقتنعين بينا .. نحن ليه نتمسك بيهم ليه ؟
قالت ليهو ماتبقى زول تفكيرك ضيق .. نحن البهمنا في الموضوع كلو سماهر.. مادام سماهر .. مقتنعة بينا .. نحن ما المفروض نستسلم بسهولة ..
قال ليها اها الفضل شنو تاني عشان انا اعملو؟..
قالت ليهو فضل شي كبير وانت ماجايب ليهو خبر..
قال ليها اللهو شنو؟
قالت ليهو انا... انا يا سعد .. انا بمشي ليهم وما ح ارجع منهم الا يدوني بتي ..
قال ليها لالا.. ما تمشي انتي .. مابتستاهلي الاحراج .. والناس ديل لو سمعوك كلمة المتك انا بخرب الدنيا ..
قالت ليهو ديل ناس اصيلين .. وكونهم يرفضوك ..للسبب ده بس معناها ناس نضيفين .. وما حيسمعوني اي كلمة .. خليني امشي ليهم ..
قاليها .. جدا امشي مافي مشكلة .. قالت باكر من الصباح انا بكون معاهم قبال ابوها يطلع ..

اها طبعا بالليل في نفس اليوم .. ابو سماهر عمل عملية غريبة .. وكانت خطة مجنونة عديل .. ماجمع الجماعة .. اشتغل مع الاعمام والخيلان . تلفونات فرادي اتصل عليهم نفر نفر .. واي واحد بقوليهو .. انا اطمأنيت على الوضع .. وشاورت الجماعة .ووافقو فضلت انت .. ورايك اهم راي ..
وداك يقول انا موافق مدام الناس وافقو .. وسريع يضرب للبعدو .. لغاية ما اخد منهم الموافقة الاربعة.. بدون ما واحد يعرف التاني ..
وباكر الصباح قبل ما يطلع زي الساعة 9 صباحأ .. جاي يبشر بتو والاستاذة فادية لسع لاوية خشمها .. مارضيانة بس حانة على بتها ..
اها جا ابو سماهر .. وقال لسماهر ابشري يا سماهر.. اهلك كلهم وافقو ..
بس فضلت مشكلتك انتي ..
انا تاني مابقدر اتصل على سعد بعد حسمتها معاهو . واقول ليهو .. وافقنا بيك .بعد كلامي الاخير معاهو .. لازم انتي تشوفي ليك طريقة توصلي بيها الاسلاك دي ..
قالت ليهو ده موضوع ساهل خليهو علي .. بس هسي اقوم ادخل شريحتي في التلفون. واجر ليهو سلك ..
في اثناء كلامهم ده الباب دقه .. ومشت سماهر فتحت الباب لقتها دي ام سعد .. سماهر فرحت بيها .وسلمت عليها لامن بكن الاتنين ..
وفادية طلعت عشان تشوف الزولة السلمت علي سماهر تبكي دي منو ؟
لقتها دي ام سعد .. وده المشهد الأثر في فادية وكسر قلبها وخلاها تعرف حاجة.. وكتين لقت الريدة البين سماهر واسرة سعد قدر ده ..
اتفضلي اتفضلي ... دخلوها ..
قالت ليهم انا يا فادية واقعة في عرضكم انتي وابو سماهر .. ماتخيبو ظني .. وماترجعوني .. مكسورة .. انا جيتكم عشان ماتفرقوني من بتي البريدها .. انا عايزة سماهر بتي .. لي سعد ولدي ..
انا مابعرف حاجة من كلامكم .. غير اني انا دايرة سماهر .. مافي زول بسد لي مكان نهى غير سماهر ..
ودموعها ديل كابات .. ابو سماهر قال ليها .. خلاص ياحجة .. والله مانكسر خاطرك ..
عشان جيتك دي نحن وافقنا .. (بالله عليك ههههه. ياخوي انت موافق من قبيل ..هههه ..) المهم ...
قال ليها وسماهر بتك .. وان شاء الله ربنا يتم ليهم على خير .. ويكف شر العوارض ..
والله ما انتو الناس الزول بخليهم .. ياسلام ياخي .. ياسلام عليك وعلى ولدك .. والله فعلا" انتي ولدتي وربيتي .. ونحن والله محظوظين .. وجيتك دي بالدنيا ..
الحجة دي استغربت في سهولة المهمة.. ومسحت دموعها كدا .. وبقت تعاين للاستاذة فادية .. فادية اتبسمت معاها وقالت ليها .. فعلا فعلا .. يا ام سعد ..
نحن تاني ماشغالين بي كلام زول خلاص .. عشان ولادنا مايضيعو من يدنا .. بي سبب اعتبارات كلام الناس المابنتهي ..
اها يازول .بعد اكرموها والوالد طلع .. فادية قالت ليها امشي ياسماهر وصلي خالتك البيت.. وانا اخر اليوم بجي غاشياك ..
ياخي سماهر دي قربت تاخد ليها عرضة وصقرية ههههه ..
وبقت تتبسم وتبلع في ريقها.. وتدعك في عيونها .. وما مصدقة الحاصل ده كلو كلو ..
وهن الاتنين في الشارع قالت ليها دقيقة نضرب لي سعد ياسماهر .. قالت ليها اضربي ليهو.. وما تكلميهو بس قولي ليهو تعال البيت ..
ضربت ليهو امو وهو في الورشة.. قالت ليهو ارمي اي حاجة في يدك وتعال لي بسرعة ..
قال ليها اوعة يكونو سمعوك كلمة ماياها ؟
قالت ليهو قلت ليك تعال سريع بس .. قال ليها مسافة السكة ياغالية ..
اول ما حست بيهو وصل .. قالت لي سماهر خشي جوة سريع مايشوفك .. لمن دخل امو قالت ليهو .. انا موش قلت ليك انا بحل اي موضوع .. انتو ماجايبين لي خبر ومستهونني .. ماعارفني انا بنفع في المفاوضات .. قال ليها الحصل شنو يا امي؟؟ ..
امها قالت ليها تعالي طالعة يامراة ولدي .. سعد استغرب في الموضوع ..بتاع مراة ولدي دي شنو؟؟
قايل ياسمين جات من الجرافة .. وكت جات سماهر طالعة من جوة .. سعد كرعيهو ماتن .. زي الخلعو كلب في شارع ضلمة ..
قعد براااحة في اقرب سرير .. وقال .. سماهر؟؟ اصلو مابصدق ..
امي؟؟ .. انأ .. سمااا .. ياناس فهموني حاجة ..
جاتو ماشة تتبسم وبتقول ليهو .. ده كلو من المراة البركة دي ..
ربنا وفقها يا سعد .. سعد سلم عليها وهو مامركز كويس ومطير عيونو وفاتح خشمو زي الشايف ليهو ملاك ..
وبقى يمسح في راسو بي يدو كدا.. ويقبل جاي ويقبل جاي ..
ويقعد ويقوم ..
قال ليها اقعدي قدامي هنا ياسماهر .. اقعدي احكي لي وانا بعاين ليك .. امو هناك قاعدة بتصلح ليها في سيرمس حقت شاي. القفل حقها المن تحت مفكوك .. وبتلاوي في السيرمس .. وبتعاين لي فرحة سعد ..
وسماهر..
قاعدة قدامو متقابلين كدا وبيحكو .. ياسلااااااااااااااام مشهد والله مايتنسى .انا هسي دمعت .
قال ليها فعلا زي ما ياسمين قالت لي .. انقسمتي النص .. لكن اقول ليك كدا بقيتي احلا .. انتي بالمناسبة نعمة مابعدها نعمة ياسمهرة .. قالت ليهو .. انت ياهودا صحتك زي الفل.. معناها ماكنت مشتاق لي زي ما أنا مشتاقة ليك..
قال ليها لو دخلتي جوة شفتي قلبي الحصل ليهو شنو ..
بتلقيهو حرقان من شوقو ليك ..
قالت ليهو خلاص اسكت خليني بس اشبع عيوني منك ..
هسي الوكت بروح .. وامي تجي ..
قال ليها بس احكي ليك الحاجة دي وبسكت .. عارفة انا الليلة كنت حاسي بي حاجة ح تحصل .. قبل كم يوم حلمت اني لاحق لي بص .. والبص فاتني وماقدرت حصلته ..
امبارح بالليل حلمت بالبص ذاتو جاني راجع براهو. وركبت فيهو ههه
موش حكاية عجيبة .؟.
قالت ليهو يخسي عليك ياسعد.. يعني انا بص؟
قال ليها لالا انتي قطر .. قطر مليان حنان .. مليان طيبة .. مليان خير .. ربنا يخليك لي ..
ربنا يخليكم لي بعض انتو الاتنين ..
ويا ابو السعود انا من زمان قلت ليك ربنا مابضيعك .. وانت زارع الخير مستحيل تحصد غير كدا ..
وسعد سارح في ضياء سماهر وتايه في بحور عيونها ولاجايب لينا خبر .. ولسان حالو يقول ..

الشوق النشف من الفراق واتشقق.
بشوف صابو البلل .أمل العيون اتحقق..
لساني المن غناي. فوق المحاسن بقق..
بغني طروب .. وتاني يقيني مابترقق
.
سجاع البليب الطال. زمان هجرانو .
عاد الليله والعش .شاشا بي عمرانو
قلبي الكان مقفّـل. مــده في افرانو.
جاتو الليلة روحو. وطفطفت نيرانو .

..

والحمد لله على سعادة ابو السعود.. ربنا يسعدكم جميعا وكل من قرأ ويسعد كل مر على سطوري ..
اشكركم شكرا يوافي محبتي لكم على هذه المتابعة ..
محبكم الى الابد ..
طارق اللبيب ..
بحري ..
يناير 2015

[فيتامين سي]