انين النسايم / للكاتب طارق لبيب ، سودانية مكتملة

[لامارا]

	، بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته ، نقدم لكم رواية منقول انين النسايم للكاتب / طارق لبيب ، قراءة ممتعة للجميع.....

[لامارا]

بسم الله الرحمن الرحيم

السلام عليكم ورحمة الله وبركاته


نقدم لكم رواية
انين النسايم
للكاتب / طارق لبيب

[لامارا]

رابط لتحميل الرواية

https://www.rewity.com/forum/t337375.html#post10855964

الحلقة الاولى .
..

هسي الساعه 9 صباحاَ .. واليوم ده شكلو مختلف.. والاحساس بيهو متغير . ومابيشبه الايام .. اصلو لما تكون في حاجة دايره تحصل . الزول بحس باحساس غريب من الصباح .. ...
في منطقة من مناطق شرق النيل.. فيها ملامح المدنية الباهتة .. لكن الناس لسع عاداتهم وحياتهم حياة الريف .
في الحلة دي.. في شارع ماشي شمال جنوب.. في بيت كبير بوابه تلات ضلف .. انا قاصد البيت ده بالذات .. البيت ده بابو فاتح شرق.. في الشارع .. والبيت تاني ناصية . القطعة الفي الناصية جارتو.. قطعة فاضية .. مسورة بي حيطة جالوص جزء كبير منها مهدم ..
جوة البيت في ديوان بتاع ضيافة كبير.. وقدامو برندة في شكل إل (l). وبي وراهو طوالي
بيوت الحريم تلاتة غرف .. غرفتين خلف خلاف .. وغرفة غربية براها .. ومطبخ وحمام .. وكدا يعني ..
سيد البيت حاج فضل الله.. فوق الستين من عمره .. مريض بالسرطان .. ليهو 8 شهور .. والان في المرحلة الاخيرة ..
عنده تلاتة اولاد وبت واحدة .. وامهم .. سعد الكبير في الاولاد عمره 28.. هاشم 25 يادوب متخرج من اداب . وكباشي 22 سنة في الجامعة.. واصغرهم البت (نهى) يادوب في اولى جامعة .
في اللحظة دي الديوان فيهو كمية من الجيران .. امكن 13 نفر .. او اكتر .. الناس ديل سمعو من الصباح انو حاج فضل الله تعبان شديد .
وجوة في كمية من الحريم ..
والاخوان التلاتة واقفين فوق ابوهم.. وهو تقريبا" في محتضر على فراش الموت ..
في مشهد يخلي الزول ينزف من روحو .. الحاج فضل الله .. كان ركازة قبيلة .... وهسي بلفط في انفاسو الاخيرة .. واولادو الاتنين الصغار واقفين مربعين ايديهم متأثرين .. والاخ الاكبر سعد قاعد فوق طرف السرير ..
ابوهم كان في اللحظة دي بوصي فيهم .. بي صوت خافت وتعبان .. هو اصلا السرطان انتهى من الرئتين ..
ونفسو بقى يشيلو يا الله ويامين .. قال ليهم يا وليداتي .. انا ماخليت لكم شي لاورا . شدو حيلكم .. وانجحو في حياتكم .. زي ما نجحت انا بدون مساعدة ابوي .. انا ضيوف الليل وحوامتي للايتام ما خلت لكم ورثة . وكل السويتو سويتو عشان اليوم ده والقاهو قدامي .. والباقي الفضل قرضو مني المرض ..
سعد ياولدي خل بالك من امك واخوانك ..
سعد قال ليهو يا ابوي قول بسم الله .. انت كويس .. ابوهو عاين ليهو كدا .. وابتسم ابتسامة جميلة .. ابتسامه فيها كلام كتير .. لكن تقراهو فوق العيون .. وبعد لحظات عمض عيونو وبقى يهمهم .. كانه بذكر الله .. تقريبا بياخد في الشهاده ..
وسكت الى الابد ..انتقل الحاج فضل الله ابوسعد ,, الى الرفيق الاعلى ..
سعد. رمى ليهو دمعات كدا تذوب الحجارة .. وقال لاحول ولاقوة الا بالله .. انا لله وانا اليه راجعون ياربي تصبرني ..
سعد انسان طيب طيابة.. سبحان الله.. تاكل وتقش ايدك فوق طرف قميصو .. جواهو عوالم من التسامح والحنية .. سكوت جدا . وكت يكون قاعد في مجلس .. تتمنى تسمع منه كلمة .. مربوع القامة لونو قمحي فاتحي .. زول مسؤول .. لاعندو شغلة بي فارغة .. ولاصياعة .. بار جدا بي امه وابوهو .. وكان شغال مع ابوهو في دكان بتاع حدادة . ومما عيا ابوهو الدكان قفل .. والشغل وقف .. وهو بقى جاري مع ابوهو.. من مشتشفى لي مشتشفى .. جلسات كيماوي وما ادراكا ..
ونهى دي جوه لمن سمعت انو ابوها اتوفى.. صدمت وبقت تتكلم بره من راسا ..
عمك فضل الله.. كان مع اولادو في الحلوة والمرة زي صديقهم .. وكب كل تعب شقاهو عشان يقريهم ويسكنهم .. واشترى البيت ده من قطعة فاضية .. ويبني فيهو من عرق جبينو ومن شغل الحديد.. بس عمك الله يرحمو كان بشرب علبتين سجاير برنجي في اليوم .. لامن النكوتين بوظ ليهو رئتيهو وبقى ليهو بي سرطان ..
انا ما مستغرب في الناس البصنعو السجاير .. ولا مستغرب في الناس البشربوها .. مستغرب في الكلمة المكتوبة فوق صندوق السجاير (التدخين ضار بالصحة ننصحك بالامتناع عنه) ..
والدكتور البحذرك من التدخين .. قدامو فوق الطربيزة تشوف طفاية.. وخشمو اسود من السجاير ..
مفارقات ومناقضات عجيبة .. حقو اي زول بدخن يسوقوهو.. يودوهو مستشفى الذرة .. عشان يشوف ضحايا السجاير .. ده غير الامراض الكتيرة التانية .. امراض الشرايين والقلب وغيرها ..
المهم .. عمك فضل الله واحد من ضحايا السجاير باجماع الاطباء ..
غايتو البكا انطلق والدافنة مرقت .. ودقو الصيوانات .. واولادو التلاتة بقلبلو في الناس واهلو جو من الارياف .. ومن نواحي العاصمة .. وبرضهم بستقبلو في التعازي والفاتحة ..
وبعد انتهت ايام البكاء .. البيت ده بقى كئيب وحزين .. زي الفقد الروح وانشل من اطرافو ..
والوالدة حليمة بت سعد حبست للعدة .. وصابرة صبر يضربو بيهو المثل .. ونهى بتها ديك اصلو البكا ورم عيونا على ابوها .. والحزن غير سلوكياتها .. تشوفها بقت مسكينة ومهضلمة ..
بعد ايام البكاء انتهت تقريبا بعد البكا بي عشرة يوم .. حصلت حاجة ..
هاشم اخو سعد الاوسط .. زول اتخرج من الجامعة وعاطل طبعا .. وماعندو مسؤلية ..انسان وكتو كلو مع اصحابو.. مرة في حلة كوكو ومرة في المايقوما بالترعة .. ومرة في المقرن .. ولغاية اخر لحظة بشيل مصاريفو من ابوهو .. ابوهو مابحب يزعلو .. وبنفذ ليهو رغباتو .. ولامن يعمل حاجة ماياها .. كان حاج فضل الله بقول لي سعد اتكلم مع اخوك ده .. انا لو نضمت معاهو مابرضى ..
والحكاية دي انعكست سلبيا" على سلوكيات هاشم .. لدرجة انو حتى ماحاسي بوضع البيت الاقتصادي.. في فترة مرض الوالد .. بس كل همو انو ينفذو ليهو طلباته .. ويدوهو مصاريفو وكدا ..
كان في يوم عمك فضل الله (الله يرحمو) قال لي سعد .. ياسعد ياولدي اخوك ده وكت ماقدر يشتغل بي شهادتو .. وصيهو خليهو يشوف ليهو شغل .. يكسب من عرق جبينو .. الحوامة مع الاولاد دي بتخرب الولد .. وتاني مابنفع قحف لاقرعوبة ..
وكت سعد جا اتكلم معاهو .. هاشم قال لي سعد ..وانت منو عشان توجهني؟ ..
قال ليهو انا اخوك الكبير ياهاشم ماتنسى .. قال ليهو اخوي الكبير يتسلط فيني .. وابوي حي؟ .. سعد سكت منو .. لانو ماعايز يقوله ابوي هو الكلفني اوصيك ..
في النهاية هاشم قال لسعد .. عليك الله حل عن افكاري انا مافاضي ليك .. في الوكت ده كان بسرح في شعرو وبعاين في المراية .. ولاحتى بعاين لاخوه الكبير ..
المهم المقصود انو هاشم ده زول صعب المراس.. وماعندو اي احساس بالمسؤلية .. وزول مغرور شديد .. ومستغل طيبة ابوهو واخوه الاكبر استغلال سئ ..
واول من سعد فقد ابوهو .. بقى مقلق من كيفية التعامل مع هاشم .. لانو زول راسو قوي .. ومابحترم اخوهو كلو كلو ..
ودايما تلقاهو نضيف .. ومتمسح ولافي .. طالع مع بت.. ونازل مع بت .. واصحابو كلهم بي نفس الشاكلة ..
المهم بعد الوفاة بي عشرة يوم تقريبا .. هاشم جا لي امه .. وقال ليها يا حجة انا شفت ابوي سلم سعد اخوي ورقة.. قبل مايموت بي تلاتة يوم .. وكان بتوسوس معاهو .. وانا متأكد يا حجة انو ابوي كتب البيت بي اسم سعد .. لانو ابوي زي ما انتي عارفة بريد سعد بس والباقين ماعندو معاهم شغلة .. لكن انا بكرهني عديل الحاج ده ..
امو قالت ليهو ياولدي ابوك مات .. لاهسع ماتم اسبوعين .. ليه تتكلم عنه كدي؟ .. بعدين ابوك ماممكن يكتب البيت باسم واحد من الاولاد ويخلي الباقين ..
بعدين ياولدي حتى لو كتبو بي اسم سعد .. سعد ده موش اخوك الكبير؟ ووياهو البقوم بواجب البيت بعد ابوهو .. وانت واجب عليك .. تعاملو باحترام .. وتختو في مقام ابوك ..
قال ليها .. بلاي؟؟ منو؟ انا؟ اعامل سعد زي ابوي ؟
هو ابوي زاتو كان ماسح بي الواطة .. وانا والله لو ماكان عيان اخر ايام كنت عايز ازفتا معاهو ..
امه قالت ليهو خلاص.. انت موش داير تعرف الورقة الاداها ابوك لي سعد.. فيها شنو؟
قال ليها ايوة لازم انا اكون عارف .. لانو انا وسعد في الحقوق مع بعض ..
قالت ليهو خلاص اطلع برة وامشي نادي لي سعد .. مشى لقى سعد قاعد يغسل في الازيار بتاعة الديوان .. ومركب الخرطوش في الماسورة وداير يملا الازيار ..
قال ليهو الحجة قالت ليك تعال ..
سعد قال ليهو يا هاشم اخوي قول امي .. ما تقول "الحجة" .. كلمة امي دي كلمة حنينة .. ودي اقل حاجة ممكن توفيها لي امك .. انك تناديها بي عطف ..
هاشم قال ليهو.. كويس.. كويس .. هسي الكلام ده ما وكتو.. امشي ليها دايراك ..سعد غسل راس الخرطوش ولفاهو لفتين .. ودخلو في الزير .. ومشى بخطوات سريعة لي والدته ..
اول ما دخل عليها .. قال لها كيفك يمه؟؟ قالت ليهو طيبة يطيبن ايامك .. عاد بكون كيف بعد فارقنا الغالي .. ياسعد ياولدي نحمد الله مانقدر نقول غير الحميدة ..
قال ليها هاشم قال لي انتي دايراني ..
قالت ليهو صح ياسعد ياولدي .. الولد المطرطش ده قال لي كلام ..
ودايرة اسألك منو ؟؟
قال هو شاف ابوك قبال ما يموت اداك ورقة صاح الكلام ده؟
قال ليها ايوة صاح يا امي.. لكن ليه بتسألوا؟ .. ما طوالي ابوي بديني في الورق؟
قالت ليهو بس الورقة دي فيها شنو انا دايرة اعرف ..
قال طبعا يا امي من حقك تعرفي .. بس الكلام سري شديد .. واول شي توعديني انك ماتطلعي الكلام نهائي ..
قالت ليهو والله ما بطلعو .. انت ما بتثق في امك .. قال ليها بس يا امي انا بخاف يمرق سر ابوي اداني ليهو امانة ..
مع انو الكلام فيهو جزء كبير انا مافاهمو .. وما سألت ابوي ..لانو لو عايز يفهمني كان فهمني ..
لكن بحكي ليك . واشوف رايك .. وقعد جمبها وبقى يتكلم معاها براحة .. ويتلفت عشان مايجي واحد في اخوانو ولا اخته نهى يسمعو السر ده ..



الى اللقاء ..

[لامارا]

الحلقة 2.
..

سعد بعد خلص كلامو مع امو.. ولاكلمة منو واضحة .. كلام كلو وسوسة بس .. حتى امو كانت مقبلة عليهو.. تعابير وجهها ماواضحة .. عشان نعرف الكلام ده بخص شنو .. وهي قالت ليهو كلام برضها بس ما مسموع .. المهم..
لي قدام بنقدر نعرف الكلام ده شنو ؟ ...
بعد شوية سعد طلع .. على الغرفة الغربية .. وبقى يعزل في هدوم الشغل.. اظنو ماشي يفتح دكان الحدادة المقفول ليهو اكتر من 5شهور .
هاشم جا داخل على امو بعد سعد طلع .. قال ليها اها انا راجيك بي فرق الصبر ..
البشر ده قال ليك شنو؟
قالت ليهو لالا ياهاشم .. الكلام مافيهو شي من الفي راسك .. ده كلام تاني ..
قال ليها ياحجة .. عليك الله انا لي روحي دمي فاير.. وريني ..
قالت ليهو .. ابوك اداهوورقة بتاعة حسابات وديون.. تبع الشغل ..
قال ليها .. المشكلة ياحجة انا مابتغشه .. وكل ماتحاولو تلعبو معاي انا بكشف اللعبة ..
من زمان الحاج كان بدي سعد اوراق وحسابات .. ماكانت سرية ولافيها وسوسة وخساسة ..
يعني الجديد شنو في الموضوع.. ياجماعة انا ماطفل عشان تعملو لي تغفيلة ..
وطلع بنقنق ..
سعد اتلقاهو داخل علي امو .. وهاشم طالع منها ..
قال ليهو ياهاشم في شنو؟ ابا يرد ..
قال ليهو عايزك تمشي معاي الورشة .. داير انفضها وارتب الشغل ونبدا من الصفر .. وعلينا ايجار مالو حد ..
هاشم قال ليهو ابدا والله اسف .. انا ماعندي خبرة بالموضوع ده .. ودي مامسؤوليتي .. امشي براك.. شوف شغلك انا ماعندي علاقة بالقصة دي .. بعدين انا كنت قاعد لمن انت كنت شغال مع الحاج .. الحاج يوم واحد ماقال لي ارح معانا اشتغل ..
خلاص ابوي مات وداير تستغلني ؟؟..
سعد بقى يعاين ليهو من راسو لي كرعيهو .. وسعد دمو فار وعيونو اتقلبن حمر .. وغمت يدو زي الداير يديهو بونيه في وشو .. بس عاين لي امو جوه .. كانت متابعه المشهد .. طوالي بلع ريقو .. وخلاهو فات .. وجا داخل على امو ..
قالت ليهو الله يعينك ياولدي .. على الولد السفيه الماعندو ادب ده .. بس الله يرضى عليك ياولدي خل بالك طويل .. ماتقوم تضربو ..تشتمت فينا الناس .. يقولو ابوهم مات وبقو ماعندهم كبير ..
قال ليها ابشري يا امي .. كلامك على العين والراس .. يلا دعواتك لي انا ماشي اشوف دبارة المعايش ..
قالت ليهو ربنا يوفقك ياسعد .. ويديك لامن يرضيك ..
المهم هو طالع كدا لاقاهو هاشم تاني .. في باب الحوش .. قال ليهو ياسعد انا عايز قروش ..
سعد قال ليهو قروش اجيبها ليك من وين ؟ انا قلت ليك ارح الورشة نشوف الارزاق .. وانت ماعايز تمشي .. انا والله هسي تعريفة ماعندي ..
والديون تشيب الراس .. علي سيد الدكان داير مننا قريب التلتمية ..
وايجارات الورشة .. وحاجات تجيب الوهم .. بس انت زول دمك بقري ومابتحس ..
قال ليهو انا ما شاحدك .. اديني من حق ابوي .. الخلاهو ليك ..
انا طالع مع اصحابي . وما ممكن امشي اترادى فوق الناس .. هم يدفعو وانا ماعندي ..
قال ليهو ياهاشم .. انت كنت حاضر اخر يوم في مرض ابوي لمن قال انا ماخليت لكم حاجة .. بعدن حكاية تطلع مع اصحابك دي ما واجبة .. اعتذر ليهم .. وخلاص ..
هاشم قال ليهو مابعتذر والله.. بشيل قروش دين من على بتاع الدكان .. وانت بعدين رجع ليهو ..
سعد مشى منو وخلاهو .. واقف في محلو .
وهو طبعا مشى لي علي سيد الدكان .. وقال ليهو ياعلي انا محتاج لي مية عليك الله .. خليها فوق الحساب بتاع البيت ..
على قال ليهو اسف والله.. مابقدر.. لانكم حسابكم ده كتر خلاص.. وانا ماعندي استعداد لي خسارة اكبر من كدا ..
بعدين انت هسي كلمت ناس البيت انك جاي تتدين مني؟
قال ليهو ايوة انا كلمت سعد اخوي ..
علي قال ليهو جدا امشي لي سعد خليهو يتصل علي .. وانا بديك الدايرو .. سعد لو اير الدكان ده كلو بديهو ليهو لكن انت لا ..
هاشم قال ليهو انا عارف انو سعد اتصل عليك .. وقال ليك لو جا هاشم هنا ماتديهو قرش ..
ده اخوي وانا بفهمو وبفهم خساستو ..
علي سيد الدكان قال ليهو حرام عليك يا هاشم.. والله انت زول قلبك وسخان ..والله سعد اخوك ده انا مالاقاني زول انضف منو وارجل منو .. بس انت ماحاسي بي النعمة ..
وعشان كلامك ده بديك المية ومتأكد انو سعد بجي يدفعها .. مع اني انا عارف ظروفو وعارفو حيجي اليوم البسدد كل العليهو ..
هاشم شال القريشات ومشى .. طلع مع اصحابو تلاتة .. قالو ماشين الخزان ..
في واحد صاحبو شديد من الجماعة ديل .. اسمو سفيان بقولولي "السونكي" .. لانو زول بتاع خوازيق ومواسير ..
وهاشم اسرارو كلها مع السونكي ده .. وبثق فيهو شديد .. اها في الحافلة
السونكي سأل هاشم .. قال ليهو يازول مالك مهموم كدي.. وقافلة معاك ..
احكي لي انا فردتك البحميك بي دمي ..
قال ليهو والله يا السونكي انا خاشي في مشكلة كبيرة خلاص ..
طبعا ابوي زي ماعارف عمرو كلو كارهني ..
لاني مابشتغل وماعندي خبره في الحدادة .. وطبعا سعد اخوي كان شغال مع ابوي من طلع من الثانوي .. وكنا ساكنين في بيت ايجار وابوي اشترى القطعة ..
وبدو يشتغلو في الحدادة .. ويبنو فيها .. بس عشان سعد كان شغال مع الحاج في الورشة .. الحاج شكلو كان حاسي انو البيت مشترك بينو وبين سعد ..
عشان كدا شكلو كتب وصية.. انو البيت يكون من نصيب سعد ..
السونكي قال ليهو والله منطقيا .. البيت كدا بكون حق سعد.. لانو بانيهو من عرق جبينو مع ابوهو .. لكن شرعيا .. البيت ورثة ..
هاشم المغفل قال ليهو ياخي فهمني .. منطقيا دي يعني شنو؟ وشرعيا يعني شنو؟
قال ليهو منطقيا خليها .. بس شرعيا انو البيت حقكم كلكم .. ولو انت داير تشيل حقك من البيت باكر دي ممكن تشيلو ..
قال ليهو اشيل حقي كيف؟؟
قال ليهو تتقسم الورثة بتاعة ابوك وبس ..
يدوك حقك .. وتاني ماتحتاج تشحد من سعد ولاغيرو ..
قال ليهو كيف يعني .. ؟؟ البيت ده مابتقسم ولاشي يازول ..
السونكي قال ليهو انت زول فاره ولاشنو؟
البيت يتباع وتتقسم القروش.. واي زول يشيل نصيبو.. ويادار مادخلك شر .. وتاني انت تبقى حر، بي حياتك.. ان شاء الله قروشك تحرقها .. لا سعد بتسلط فيك ولاغيرو ..
هاشم قال ليهو والله دي احسن فكرة .. بس في مشكلة .. سعد ما حيبيع البيت .. واوراق البيت عندو .. ولو فرضنا انو ابوي كتب ليهو البيت بي اسمو ؟؟ يطلع شنو؟
قال ليهو يازول اولا البيع بتباع . ولاعلي كيفو سعد .. وبعدين انا عارف انو مافي حاجة اسمها ابوهو كتب ليهو البيت ..
بقولو ياشاطر .الزول البكون من الورثة الوصية ليهو باطله .. فهمت دي ولا اشرحها ليك؟
قال ليهو فهمتها .. يعني حتى لو ابوي كتب ليهو البيت بي اسمو . المحكمة مابتعتمد الموضوع ده صح؟
السونكي قال ليهو عليك نوووور .. يلا انت بعد تشيل حقك . مافي زول بلومك .. وبدل مايكون حقك قاعد في الحيط والغرف بتاعة البيت وانت لافي في الفاضي .. شيل حقك ودخلو في تجارة .. في اي حاجة
القروش وكت تتقلب بتجيب دهب .. وتتزج وتستقر .. وتستقل بي حياتك .
انت لسه قاعد تحت رحمة ابوالسعود يامعلم ..
اهااا هاشم ده سرح مسااافة وبقى يفكر .. وشكلو السونكي رسم ليهو خطة عجيبة جدا جدا كانت رايحة عليهو .
طبعا وصلو الخزان وصياعة ومباراة بنات .. وكانو مواعدين ..بنات بالتلفونات يتلاقو هناك ويطمشو .. ويتصورو بالموبايلات

جوز جوز .. وشايلين معاهم الطبلة بتاعة العازفين ديك .. قعدو يدقو ويرقصو ويغنو .. يتمايلو ويتمايعو.. وفي نص الغنا يفقعوها ضحكة .
حتى في الغنا ماجادين ..
المهم انتهت الرحلة بي كل معاصيها .. ومشو طوالي قريب المغرب . هاشم وصل البيت قريب الساعة 9 ..
دخل جوة لقى اخوه الصغير كباشي قاعد يذاكر .. كباشي زول جاد.. شوية احسن من هاشم .. لكن برضو راسو ملان هوى .. وتقريبا في السنة الاخيرة في الجامعة ..
هاشم قاليهو ياكباشي انا عايزك في كلام سري للغاية ..
كباشي قال ليهو .. متين ياخوي انت قاعد توريني اسرارك ؟
الا الليلة تكون جايب ليك كفوة .. اها قول النسمع .. كباشي خت القلم في نص الكتاب وقفلو وقبل الكرسي عليهو وهو قاعد في السرير مقابلو ..
هاشم قال ليه .. طبعا حصلت حاجة وانت ماجايب ليها خبر ..
الحصل ياحبيبو.. انو المرحوم ابوك كتب البيت ده بي اسم سعد ..
وانا وانت طلعنا من المولد بدون حمص .. وهسي امك زعلانة من القصة دي .. وماقادرة تتكلم ولا تعمل حاجة .. لكن والله تمشي تتكلم بالموضوع ده الا اكسر ليك حنكاتك ..
كباشي قال ليهو .. طيب المشكلة وين؟ مايكتبو.. هسي انت شايف انو سعد طردنا من البيت ولاحاجة ؟
قال ليهو يا اهبل القصة ماكدا .. بكرة امك تموت .. وسعد يعرس و يكون بي بيتو.. وانا وانت ونهى نحتاج ونحن ملوص ..

قال ليهو ياهاشم ياخي مستحيل سعد اخوي يكون بالحقارة الانت بتتكلم عنها دي ..
هاشم قال ليهو طيب هسي هو كلمك؟ قال ليك ابوي كتب لي البيت ؟
امك كلمتك ؟؟ قال ليهو لا ..
قال ليهو عارف ليه؟
لانو ابوهو اداهو الورقة سرا .. وهو كلم الحجة بس .. وكرر عليها انها ماتقول لاي زول .. اها شفت؟ معناها نيتو شنو يعني؟؟ ..

وانا ممكن أذن ليك بي حاجة .. تسال منها الحجة بس تاني ماتزيد على السؤال .. تمشي تقول لامك .. صح ابوي ادا سعد اخوي ورقة سرية ؟؟؟
لو ورتك الورقة فيها شنو انا بكون كلامي غلط ..
كباشي قال ليهو .. مابسألها ما مشكلة انا مصدقك قول اها ..
هاشم قال ليهو بس عايزك تطالب بي حقك.. عشان البيت يتباع وكل زول فينا يشيل حقو .. وانا بمسك ليك قروشك .. رسميا وبي مستندات .. واشغلها ليك.. لامن تتخرج تجي تلقاها ملايين تخلع ..
اها رايك شنو ؟؟

الى اللقاء ..

[لامارا]

الحلقة 3.

..
كباشي سكت مسافة .. بفكر في كلام اخوهو ..وبقى يتخيل في الملايين قدامو .. وقال ليهو ما مشكلة ياهاشم .انا معاك ..بس قروشي مابديك ليها بشتغل بيها براي .. انا بعد تلاتة شهور بكون اتخرجت ومتأكد ما ح القى شغل ..
هاشم قال ليهو يازول ما مشكلة.. بس تعاهدني تقيف معاي للنهاية ..عشان نضع حد لاستغلال الزول ده .....
وانا باكر من الصباح بمشي اشوف لي محامي كارب ..يجي يطلع لينا حقنا ..
كباشي قال ليهو بس انا في حاجة ما مريحاني .. ناس امي يسكنو وين بعد نحن نبيع البيت؟؟ ..
قال ليهو لالا يازول .. حق امي وحق نهى وحق سعد بشتري احسن بيت ..بالاضافة للقروش الخلاها الحاج عند سعد ..
انت بس قول خير ..
قاليه .. تمام طيب معاك ..
يعني هسي كدا هاشم قدر اثر على كباشي بسهولة
..
بالنسبة لي سعد ..ماكان جايب اي خبر بالامور البسوي فيها هاشم ..والمرحلة الخطرة المتطورة الوصل ليها ..
مشى المسكين فتح الورشة ..وبدا شغل من الصفر والشغل في الايام الاولى كان سئ جدا .. بس هو رتب وضعو ..وبقى منتظر الزباين.. العايز ليهو ابواب العايز ليهو شبابيك . وحديد ماعندو .. عشان كدا كانت صعبة ؟
وهو كان مقلق ومتوتر شديد جدا.. من الورقة الاداها ليها ابوهو .. وطول الوقت بفكر فيها ..وكل ما يلقى امو براها.. بجو يتكلمو في موضوع الورقة دي بالساعات ..
بس الورقة دي فيها شنو يارب؟ ..
وهاشم طبعا على حسب الوهم الفي راسو.. بس مفتكر انها وصية لي سعد انو البيت يكون من نصيبو ..
ودي حكاية بعيدة طبعا"..
في الفترة بتاعة الاسبوع دي ..هاشم كان بسأل من محامي .. والسونكي قال ليهو راجل خالتي محامي ..نمشي ليهو ساكن امبده .. وفعلا ركبو مشو ليهو في البيت وسألوهو ..
وطبعا" هاشم زور الحقايق كلها للمحامي.. ومثل دور المظلوم العايزين ياكلو حقو ..
المحامي قال ليهو لو ابوك كتب تنازل او عقد بيع لي سعد ..تاني ماعندكم حق ..
لكن اذا كانت مجرد وصية ممكن جدا يتقسم وررثة.. بس انت اول اتاكد لي من النقطة دي ..
هاشم قال ليهو بس هو مابديني الحقيقة.. الا نفاجؤا بي ورقة من المحكمة .. وانا اول ما استلم الورثة بديك اتعابك ..
قال ليهو مامشكلة ..مادام انت جاي مع سفيان.. يحصل خير ان شاء الله وحددو موعد مشى منو ..
اخونا سعد طبعا مع المشاكل الحاصلة عليهو دي ..
عندو مشكلة تانيه ..
وهي انو كان خاطب ليهو واحدة من الحلة القدامهم.. ودي عندها قصة طويلة وعريضة .. اسمها سماهر.. بقولو انها انسانة جميلة واصيلة..
المهم وقفت معاهو في مرض الوالد.. وكانت مع نهى زي اختها في المحنة ..
وسعد بحترمها وبحبها جدا .. وهي حاسة بانها عندها نعمة الكون كله . لـمجرد انو خاطبها ..
مع انو الزواج حاصلة فيهو عقبات.. لا ليها اول ولا ليها اخر..
كل ما يتيسر امر ..يطلع موضوع جديد .. واخر موضوع كان مرض الوالد وموته .. وفي كل مصيبة كانت سماهر صابرة ..ومشاهدة بي عيونها الظروف القاعدة تمر على سعد ..
وكل ما الناس يسألوها .. يقولو ليها ياسماهر حدكم وين؟
الخطوبة دي فترتها طالت .. ويقولو ليها ياسماهر .. كان حصل يوم وسعد اتخلا عنك تاني بتقبلي على وين؟
هي بتقول ليهم انا بنتظره ..مهما طال الزمن .. ولو ربنا ماقسمو لي ..ماعندي اعتراض في قدر الله.. لكن الحياة من دونو مابتستحق العيشة ..
هي فعلا منتظراهو .. بس هو حالتو ما مطمئنة ابدا .. وكم يوم بتحاشاها .. ومابتصل عليها .. ولمن يتذكر بتضايق وبقلق ..
ياربي الحاصل شنو ؟
خليكم منتبهين للكلام العن سماهر ده كويس ..
..
اها يازول هاشم طبعا" رجع من المحامي .. معاهو سفيان السونكي . والسونكي مشى اهلو ..وهاشم جا راجع البيت .. بس همو الاول والاخير .. يعرف الورقة دي . وصية . ولا تنازل. ولاعقد بيع .. على حسب كلام المحامي ..
قام بالليل لقى خلا الناس نايمين ..وبقى يفتش لي مفتاح الدولاب بتاع سعد . عشان يشوف الورقة دي شنو بالضبط .. اها قدر مافتش مالقى المفتاح نهائي . في النهاية قنع وخلاهو ونام ..
وتاني يوم برضو اصر على الحكاية بتاعة الفتاشة دي ..وبقى يراقب في سعد من بعيد..عشان يشوفو بخت مفتاحو وين ..
اها الليله لي حظو السمح .. سعد كان في مناسبة ..وجا متأخر وتعبان.. وعلق جلابيتو بدون مايطلع منها اي شي .. جزلانو ومفاتيحو كلها في الجلابية ..
بس هاشم انتظر.. اول ما ا اتأكد انو سعد نام ..قام براااحة نزل الجلابية ..
ودخل يدو في الجيب ..وخمش المفاتيح عشان ماتكشكش .. وطلعن بره . وبقى يعزل فيهن واحد واحد .. لغاية ما وقع فوق مفتاح الدولاب.. وفتح الضلفة الخاصة باغراض سعد ..
وفضل يقلب في الحاجات ..والاوراق الكتيرة.. الماليها حد خما الاوراق كلها وطلع بيها برة ..وفتح اللمبة بتاعة البرنده .وبتفحص في الاوراق ..
لقى الاوراق كلها حسابات بتاعات الشغل . وفواتير حديد .مستندات شخصية وحاجات ماعندها علاقة بالبيت ..
امكن قريب نص ساعة .هو مكبس في الورق ماطلع بي نتيجة .. وشكلو مالقى الورقة المقصودة ..
شال الورق ودخلو جوه. ودخلو في الدولاب راجع .. وهو بخت في الورق .لاحظ انو في علبة بتاعة بلاستيك .. مقفولة زي علب الطحنية والجبنة دي .. المهم ..
شال العلبة فتحها .. ولقى فيها ورقة .. طلع بيها سريع برة .. وفتح الورقة وقرا الورقة .. وهي ياها فعلا الورقة المقصودة ..
وهنا أتاكد هاشم .انو الموضوع ماعندو اي علاقة بورثة البيت ..
لامن بعيد لامن قريب ..
والكلام الفي الورقة موضوع تاني زي ماقالت الوالده . بس الموضوع هماهو هم شديد.. مع انو مابتعلق بالموضوع الجاييهو ..

اهااا يازول مع انو اتاكد من سلامة سعد. هاشم العنيد المغفل قال .. انا برضو لازم اشيل حقي .. عشان سعد مايسيطر فيني .. وانا لازم اواصل ..وما ح أكشف المستجدات لي كباشي ..عشان مايغير رايو ..
الحمد لله كدا انا ربحان ..مادام مافي عقد بيع ولا تنازل.. معناها حقي بشيلو بشيلو ..
يعني الود ده المفروض بعد ماعرف انو مافي وصية ..ولافي عقد بيع
ينسى الموضوع ..ويعيش مع اخوانو عادي في البيت ..
لكن برضو مصر يعمل زعزعة ..
وقالو في المثل المقتولة مابتسمع الصيحه ..
المهم مشى لي السونكي .. وقال ليهو نحن لازم نمشي لي راجل خالتك المحامي.. ونقول ليهو يباشر في الموضوع من بكرة ..
قال ليهو بس دقيقة نتصل عليهو ..
وفعلا اتصل عليهو السونكي ..وقال ليهو ايوة يااستاذ ..
صاحبي الجبتو ليك الاسمو هاشم ..مشى بحث بي طريقتو ومالقى لاوصية ولا تنازل .. يعني المفروض باكر نجيك عشان نبدأ الخطوات ولاشنو ؟
الاستاذ المحامي قال ليهم.. يا سفيان انصح صاحبك ده..
قول ليهو ماتزعزع اسرتك وتبيع البيت اللاميهم ..
ولو كان مصر ..خليهو يكلم اخوهو وامه ..ينفذو ليهو بدون اجراءات رسمية ومحاكم وغيرو.. شان ما يعملو ليهم فضايح ساي ..
والسونكي بي دورو وصل الكلام لي هاشم.. وقال ليهو يا هاشم الاستاذ كلامو صاح.. انت اول اتكلم مع اخوك والوالدة ..
وقول ليهم لازم نبيع البيت انا عايز حقي ..شوف رايهم لو وافقو احسن ليك من المحاكم ..
ولو ركبو راس انت برضو اركب راس .. ولاشنو؟
قال ليهو كلامك صاح وانت دايما حكيم ياسونكي ..
المهم طوالي هاشم بقى يتحين في الفرصة.. عشان يلقى قعدة مظبوطة مع امواخوهو سعد ..ويطرح ليهم الموضوع ..
وفعلا لقى الفرصة ..وكان في الوقت ده نهى وكباشي الاتنين في الجامعات .. يعني هم التلاتة بس في البيت ..
قال ليهو ياسعد.. انا عايزك في كلام مهم قبل ماتطلع .. بس مع الحجة جوة ..
سعد دخل معاهـو.. قال ليهو والله ياهاشم انا بتمنى كل يوم انك يكون عندك كلام مهم .. انت لسع حاسي نفسك ما أكملت الرشد ..
يومك التشعر بي اهمية في حياتك ..ده يوم المنى والعيد ..
اها احكي عايز شنو ؟ والحاصل شنو انا وامي سامعينك ..
قال ليهو اسمع يا سعد انا عايز حقي في الورثة ..!!
سعد قال ليهو ياتو ورثة؟
قال ليهو ورثة ابوي حق ابوي ..
قال ليهو معقول ؟ انت ماعارف ابوي ماخلا وراهو قرش ..؟
نجيب ليك من وين عشان نورثك ..
هاشم قال ليهو البيت ده حق ابوي وانا عايز حقي فيهو .. لازم البيت ده يتتباع .. واي زول يشيل نصيبو ..
سعد قام علي حيلو ..وقاليهو يا ود انت دايرني افررط روحك ولاشنو؟
امو قالت ليهو اقعد ياسعد ..
قعد طوالي .. هاشم قال ليهو لالا احسن ماتقعد ..انت داير تعمل شنو؟
فاكرني بسكت ليك؟ والله ترفع يدك علي .. تشوف براك ..
سعد قال لي امو.. سامعة يا امي ؟
قالت ليهو اسكت ياسعد ياولدي ..ماتجيبو لي هبوط تلحقوني ابوكم..
سعد ياولدي انت الوحيد الفضلت لي في الدنيا ..دي ماتبقى لي سبب سكتة قلبية ..
قال ليها حاضر يا امي.. انا سكت خلاص اتكلمي معاهو انتي ..
هاشم قال ليهو تتكلم معاي في شنو؟ انا قلت داير حقي .. ما قلت حاجة غلط..
امو قالت ليهو طيب يا هاشم ياولدي.. بعد نبيع البيت نمشي نقبل على وين تاني ؟
قال ليها اي زول يدبر راسو بي حقو براهو..
انتي ذاتك عندك حق ياحجة ..
وسعد ساكت بالغصب ويرجف من الزعل ..

امو قالت ليهو بس ياهاشم حقك براك مابجيب لك بيت ..وانا حقي براي مابجيب لي بيت ..
انت دايرنا نرجع تاني للايجار ؟
قال ليها انا ده موضوع ما بهمني .. المهم داير حقي وخلاص ..
قالت ليهو انا بغضب عليك طول ماني حية ..
قال ليها مافرقت ياحجة ..انا ماعملت غلط ولاظلمت زول .. لو اديتوني حقي بالتي هي احسن ..كان بها ..
وكان عايزين تركبو راس انا بركب راس.. وبمشي المحكمة ..
بعدين ياسعد تاني ولو حاولت تعمل لي فيها اخوي الكبير وبتاع ومديت يدك علي ..والله بفتح فيك بلاغ جنائي ..
وهسع انا بديكم مدة 48 ساعة تقررو لي فيها انا ماعندي وقت ..



الى اللقاء ..

[لامارا]

الحلقة 4

..
طبعا" سعد ساكت بالتيلة .. وزعلان زعل شديد من هاشم وجبانتو واسلوبو مع والدته ..
في النهاية خلاص لمن قنع من خيرا" فيهو .. بقى يهدي في روحو ويستغفر .. قال ليهو يا هاشم ماتفقدني وتفقد امك واخوانك .. اذا انت مصر ادينا وقت .. شنو ال 48 ساعة دي .....
مافي مشكلة بنبيع البيت.. ونديك حقك .. قال ليهو موش حقي براي . كباشي اخوي برضو داير حقو ..
قال ليهو القال ليك منو كباشي داير يقسمنا .. قاولك وخلاك عليهو وصي ولاشنو ؟
هاشم قال ليهو خليهو يجي وبراك أساله ..
وكت جا كباشي من الجامعة .. طوالي امو سألته .. قالت ليهو ده كلام شنو البقول فيهو اخوك هاشم ده؟ ..
قال ليها ايوة صح كلامو .. نحن دايرين حقنا في البيت .. وممكن تشترو بيت اصغر منو.. انتي وسعد .. ونحن بنأسس حياتنا بي طريقتنا ..
سعد جاهو داخل من بره .. قال ليهو والله ياكباشي خيبتا ظني فيك ..
كيف بترضى تطلع امك من بيتها؟ .. عشان تشيل قروش لي مصلحتك الخاصة ..
قال ليهو ياسعد البيت انا عندي فيهو حق ولالا ؟
قال ليهو طبعا" عندك . ومافي زول نكرك ..
وهسي انت قاعد في حقك ..
المهم النقاش طال مع كباشي .. وهاشم جا من برة ووقف معاهو .. كل مايقرب كباشي يقتنع عشان يتراجع من فكرتو .. هاشم يرمي ليهو كلمة خسيسة يخليهو يصر على رايو ..
الام غضبت شديد ..
وقالت لي سعد .. سعد باكر امشي اعرض البيت للبيع وجيب القروش وقسم ليهم حقهم بشهود ..
وتاني ديل ما أولادي ولابعرفهم .. سعد قال ليها اصبري يا امي .. القصة دي صعبة علينا وتاني مابنلقى بيت بي هين والله ..
قالت ليهو انا بقول ليك نفذ لي الكلام البقولو ليك .. سعد قال ليها حاضر يا امي ..
وفعلا باكر السماسرة جو للبيت.. واخدو معلوميات عن البيت وعرضوهو .. والبيت جاب في الوقت داك مية وستين مليون.. واشتراهو واحد من ناس ام دوم لي اخته ..
وسعد بقى يفتش في بيت ايجار.. لانو سيد البيت الجديد اداهم اسبوعين بس عشان يرحلو ..
سعد قسم لي اخوانو قروش الورثة بواسطة محامي .. واي زول كتب اقرار بالاستلام ..
المية وستين مليون .. تقسيمها على حسب الورثة كالاتي ..
الوالدة نصيبها الثمن .. وهو عشرين مليون ..
والمية واربعين اتقسمت على سبعة .. البت شالت سبع الـ 140.. وهي عشرين ..
والاولاد كل واحد 40 ..
يعني الولدين هاشم وكباشي شالو 80 مليون . وسعد 40 .
على الاربعين بتاعة امو واختو بقت 80 ..
باختصار الباقي نص سعر البيت بس ..
وطبعا التمانين مابتجيب بيت ..
الا قطعة فاضية ..
والام والبت طول الاسبوعين ديل يبكن .. والمراة دي سبحان الله على راجلها كانت صابر ومابكت .. بكت على البيت .. الذكرى الوحيدة الباقية من زوجها فضل الله . اتجرست جراسة شديدة خلاص ..
حتي الاقارب اتفأجأو بي بيع البيت.. لانو تم في جو تكتمي .. عشان سعد وامو خايفين من الفضايح ..
وسعد وامو ونهى .. قاطعو هاشم وكباشي.. مقاطعة تامة وبقى لابينهم سلام لاكلام .. بس ماطردوهم من البيت ..
وهم الاتنين يتوسوسو ال24 ساعة .. ومامعروف هاشم بغشغش في كباشي ده بقول ليهو في شنو؟
المهم بعد كم يوم.. قامو الاتنين لمو هدومن .. وشالو القروش في هانباك.. ودايرين يطلعو من البيت .. ومامعروف ماشين على وين ..
سعد قال ليهم ماشين وين ؟ موش خلاص شلتو قروشكم؟ .. ماتمشو حتة.. استمتعو بالقروش .. وافرحو لامن تكمل . بس ماتبعدو من امكم .. قاسية عليها .. موت ابوي .. وبيع البيت ..وتفقدكم انتو ..
خليكم قاعدين الاتنين .. وترحلو معانا بيت الايجار ..
لكن الام حلفت على سعد ولدها . لايسألهم ولايجيب خبرهم .. وقالت ليهو تاني ماني دايراهم .. ولاهم اولادي ..
اولادي اتنين بس سعد ونهى ..
اها طلعو وفاتو لي مكان مجهول .. حنعرف لي قدام الحصل ليهم شنو؟ لاحظو انو كباشي لسع ماكمل الجامعة .. باقي ليهو كم شهر ..

هسع البيت ده بقى موحق ناس سعد .. وهم قاعدين ضيوف.. لغاية ماجا يوم يوم الرحول لي بيت الايجار ..
المراة دي بكت جنس بكا على البيت .. وسعد قعد في الواطة وخت يديهو فوق راسو وقعد يبكي .. ونهى كمان بدعت اليوم داك بالجواعير ...
سيد البيت جا وقف بره . عشان يستلم منهم البيت .. كان راكب توسان .. وكان في عمال برفعو في العفش في دفار جامبو كبير ..
دخل جوة البيت لقى الناس ديل ببكو في جنس بكا .. المراة على ولدها على البت ..
قال ليهم ياجماعة.. انتو وكت البيت ده غالي عليكم كدا.. عرضتوهو للبيع ليه ؟
سعد قال ليهو والله الضرورة يا ود العم ..
الراجل قال ليهو والله البيت بيتكم .. في اي لحظة كان درتوهو ببيعو ليكم .. والله تأثيركم ده جرسني جراسة شديدة ..
سعد قال ليهو تسلم يا اصيل .. والبيت مبروك عليك ان شاء الله تتهنى فيهو ..
قال ليهو والله انا ماقاعد في البلد دي .. والبيت اشتريتو لي اختي مطلقة .. وماعندها زول غيري.. وعندها اطفال ..
ولو ماظرفها ده والله انا مابخليكم تطلعو من البيت ..
سعد قال ليهو والله كلامك ده بالدنيا .. الله يكرمك والحمد لله نحن بيتنا مشى لناس بستاهلو ..
الراجل اتونس مع سعد شوية كدا .. واتعرف عليهو وخفف عليهم الفاجعة وفات .. اصلا" ناس ام دوم ديل اصيلين والله ..
اها ديل رفعو عفشهم ومشو لي بيتهم الجديد .. المؤجر طبعا"
ورضو بالمقسوم .. وسعد شال التمانين مليون ومشى اشتري قطعة وكتبها باسم امو ونهى .. وهو اتنازل ضمنيا من نصيبو لامو واخته .. وجاب الورق لي امو تمسكو عندها .. وهو طلع ساي ..
..ياخي والله فعلا الاصابع في اليد ماواحد ..
الله يكرمك يا ابو السعود انت فريد والله .. سبحان الله ..
المهم ..
بقى شغال في دكان الحدادة .. ليل ونهار .. ومنقطع من الحبيبة سماهر انقطاع شبه تام ..
وهي طبعا عزة نفسها وكرامتها مانعاها منو .. وبتقول دايما ..
زول ماسأل فيني ولابتصل علي .. ولمن اتصل عليهو بختصرني في الكلام .. معناها ماعايزني .. انا ما بصغر نفسي .. وامشي اترمي عليهو وافرض نفسي ..
وهي طبعا لغاية اللحظة دي ماعندها خبر بالظروف المارة بي ناس سعد .. ولاعارفاهم باعو البيت ورحلو حتة تانية .. ياربي سعد ده مالو ؟..
يوم نهى سألت سعد .. قالت ليهو ياسعد انت سماهر خبرها شنو ؟
ليك كم فترة ماقاعد تجيب سيرتها .. زمان كنت مجنون بيها جنون
وكل لحظة اسمها على لسانك ..
وهي ذاتها مقطوعة مننا قطعة غريبة .. اوعا يكون بيناتكم مشكلة ..
حتى مشكلة البيت ماجابتها لينا .. واحتمال مايكون عندها خبر نحن رحلنا ..
سعد سكت ساي منها ابا يجاوبها .. امو قالت ليهو كلمها ياسعد دي اختك حبيبتك .. والكلام لابد يوم يطلع ..
قال ليها بس يا امي نحن نصبر شوية.. امكن ربنا يفرجها والامور تمشي براها ..
نهى قالت ليهم .. ياخوانا احكو لي في شنو ..؟ يعني انا ماواثقين فيني؟ ..
نهى انسانة طيبة طيبة.. ونسخة من اخوها سعد .. بس بتختلف منو وكت تقوم حمقاء زي ابو الدقيق .. والطبعة دي كانت في ابوها الله يرحمو ..
لونها قمحي بس اغمق من لون سعد شوية . وشايلة ملامح امها الجميلة .. والثابت انها زولة اصيلة .. مازي الاتنين الفاتو ديك ..
اها في اللحظة دي بدت تتحرك فيها طبايع الحماقة .. وبقت تنقنق ..
وبتقول هو ذاتو وكت الزول يكون عايش مع ناس بدسدسو عليهو الاسرار حياتو شن طعمها؟ ..
خلاص ماتحكي لي ماعايزة اعرف .. انتهينا .. وانا ذاتو اسفة لاني سألتك من خطيبتك..
سعد قعد يضحك .. وجا قعد جمبها وخت يدو فوق كتفها .. وقال ليها خلااص انا اسف.. ح احكي ليك هسي كل شي ..
بس الجميل مابزعل .. عشان البت السمحة وكت تمد قدومها بالزعل بتبقى شنينة ..
الحاصل يا الغالية ابوي قبل مايموت الله يرحمو ..
.. حرق لي كرت سماهر..
قالت ليهو كيف يعني ؟.. وبدا يحكي ليها سر الورقة الأنا متشوق عشان أعرفو ..



الى اللقاء .

[لامارا]

الحلقة 5

..
سعد قال ليها عارفة يانهى طبعا" .. ماعليك مدسه .. انا حبيت سماهر دي حب .. ماليني لامن مدفق .. وحاسي بي ريدتها جارية في عروقي والله .. واي يوم يمر وما اتكلم معاها فيهو .. بحس باني بموت في الدقيقة عشرين مرة ..
وهسي اليومين ديل .. منقطع منها مجبور والله .. والله ما قاطعني منها البيت الاتباع .. ولاقاطعني منها المشغولية .. ...
لكن ماقادر الاقيها .. ومستحي منها .. وماعارف اقول ليها شنو ..
طبعا يانهى . عندك عمتك سلوى .الساكنة في الريفي الشمالي لام درمان .. المقاطعانا بالسنين .. شفتيها في ايام مرض الوالد ويوم الوفاة .. مقاطعانا بي سبب مشكلة مع امي.. ليها اكتر من 17 سنة ..
نهى قالت ليهو اها عمتي مالا؟
قال ليها طبعا الزولة دي متواصلة مع ابوي فقط .. ونحن بتكرهنا كراهية شديدة خلاص .. وانا قدر ما حاولت اتواصل معاها.. ومع اولادها .. بتوريني وشي كعب ..
المهم عندها بتها في عمر كباشي اخوي .. مولودين هي وكباشي في شهر واحد تقريبا .. اسمها ياسمين .
وعندها ولد صايع كدا اسمو مظفر .. في عمر هاشم تقريبا ..
الظاهر عمتي عايزة تربط حبل الوصال بينا وبين اولادها .. بعد ماعرفت ابوي بقت ايامو معدودة .. او ماعارف هدفها بالضبط شنو؟ بقت تقول لابوي انا متمنية .. انو ولدي يتزوج بتك . انا متمنية ياسمين يعرسا واحد في اولادك . انا متمنية سعد يكون لي سند بعدك .. ابوي قال ليها مناك بتم ان شاء الله .. وانا بوعدك بي كدا .. وان شاء الله ارتباط الاولاد يبقى بي صلة بينك وبين ناس بيتي ..
وعمتي طبعا منتظرة وعد ابوي ينفذو ليها .. وهو عارف اني انا خاطب سماهر خطوبة رسمية . بس شكلو عندو راي . ورجح مصلحة الاسرة واترباطها على الخطوبة ..وبرضو لانو خاتي احتمال هاشم ظروفو تصلح . ويخطبها ليهو .
وطبعا نحن دخلنا من مشكلة في مشكلة لغاية ما جا المرض اللعين لابوي ..
ابوي لاحظ انو هاشم ماعندو اي مسؤولية ..
وناداني وقعدني وقال لي انا كنت عايز اكلف هاشم بي مهمة . لكن هاشم ماعليهو تكل وزول مامسؤل .. ودايرك توعدني يا سعد انو تنفذ لي وصيتي الاخيرة ..البطلبها منك .وتاني ماطالب منك حاجة .. لاني وعدت زول بترضى لي ابوك يخلف وعدو ويكسر كلمتو؟ ..
وانا قلت ليهو . يا ابوي لو كانت وصيتك فيها موتي انا بنفذها .. وكلمتك ماتنكسر ..
اها قبل مايموت بي تلاتة ايام .. كتب لي ورقة .. وقال لي انا عايز الليلة اقول ليك الطلب الانت وعدتني بيهو ..
لكين ما حأقولو ليك .. عشان ما تجادلني فيهو وانا اتراجع من وعدي وانا في اخر عمري .. كتبتو ليك ..
هاك الورقة دي ماتفتحها الا بعد ما انا اموت .. اوعدني وانا وعدته ..
اها في نفس يوم الوفاة .. انا بالليل .. جيت فتحت الورقة .. لقيتو كاتب لي ..
انت ياسعد لو عايز عفوي ورضاي ..تتزوج ياسمين بت عمتك . وتسترها مهما تكون الموانع الا هي ترفضك .. وحتلاقيك موانع ياسعد .. وياسمين مافي زول بتزوجها استرها الله يسترك ..
ده الكلام الفي الورقة ..
نهى قالت ليهو طيب ياسعد انت الكلمك منو بي كلام عمتي مع ابوي بتحكي فيهو زي الحاضرو ؟
قال ليها انا لمن جبت الورقة لي امي يوم هاشم كلمها . امي حكت لي انها عارفة كل شي في الموضوع .. وحاولت تعترض على الموضوع بس ابوي سكتها وحلفها انها ماتجيب سيرة .. وماكنت قيلاهو حيلزمني بوعد ويموت . الله يرحمك يا ابوي .
المهم يانهى . انا هسي راسي مليان حيرة وظلام ..
من يوم قريت الورقة دي وانا الدنيا ماشايلاني .. من جيهة عمتي ما بتتعاشر .. ومن جيهة تانيه .روحي وحبيبة عمري حافقدها .. والشي المحيرني وماقادر افهمو ..المانع شنو الممكن يقيف قدامي يمنعني من ياسمين .. وابوي عارفو . وليه مافي زول ح يتزوجها .. ؟؟
ياسمين انا شفتها زولة جميلة ومهذبه .. بس انا قلبي مملوك لي سماهر يانهى ..
وهسي بحاول اعمل في مماطلة وتاخير.. وماعايز افتح الموضوع لي بت عمتي عشان تنتظرني . امكن ربنا يقسم ليها ود حلال يريحني منها ..
وماقادر اصارح سماهر بالكلام ده .. لاني عارفها طوالي حتخليني انفذ وعد ابوي .. وح تبعد مني للابد ..
وماقادر اتواصل معاها بالغش والخداع ..على اساس اني حاتزوجها . وانا برتب لي ارتباط بي بت عمتي ..
سعد بتكلم وبيوح من جواهو .. وبقول والله انا ماعارف تجيني المصايب من وين؟ ولا من وين ؟ الحمد لله غايتو ..
وامو قاعدة تسمع ومتمحنة .. وماقادرة تنطق بي كلمة ..
ونهي تسمع ومتأثرة تأثير شديد خلاص.. بالانين الروحي الطالع مع كلام سعد المارق من جوفو زي النسايم المكلومة ..
انتهدت وسكتت مسافة وقالت ليهو . والله انت تستاهل كل خير يا الغالي .. لكن لو بتسمع راي انا بديك كلام مريح ..
قال ليها ياريت والله .. انا عارفك زولة ماشاء الله .. عندك افكار موفقة ..
قالت ليهو عارف ياسعد اخوي .. مافي شي اريح من الصراحة بين الحبايب .. والشفافية في كل الامور ..
وبمجرد مابقى شريك الحياة يدس.. ويخفي حاجات.. الحياة بتبقى مافيها طعم الالفة والمودة ..
انت المفروض تمشي تلاقي سماهر.. وتقعد معاها .. وتحكي ليها الحكاية الحكيتها لي دي بالتفصيل الممل .. وبعد تخلص من كلامك عبر ليها عن حبك الاكيد .. وانو قلبك ليها الى الابد ..
وشوف ردها شنو .. انا متأكدة اي قرار ح تتخذوه بعد داك.. بكون في مصلحتكم الاتنين ..
قال ليها يانهى انت ماحاسة بي حجم المشكلة .. يعني نحن نتخذ ياتو قرار؟؟ ..
لو قررت انها تنتظر معاي لغاية ما ياسمين تتزوج.. ده كلام ما منطقي وانا مابقبلو .. وافرضي انو ياسمين ما اتزوجت .. وانا بقيت مضطر اعقد عليها اعمل شنو؟
وكيف نفسي تسمح لي اتخلى عن سماهر المنتظراني ؟؟
ولو قررنا اننا نفترق .. امكن سماهر تتزوج بي هنا.. وياسمين تتزوج بي هنا .. وانا اكون لافي الجنة ولا في النار ..
قالت ليهو بس كلمها .. واليحصل يحصل ..
عاين لي امه وقال ليها اها رايك شنو يا امي .. ؟؟ امو قالت ليهو ..راي نهى ده ذاتو .. ياهو راي انا البقول ليك فيهو كل الايام الفاتت ..
سعد قال ليهن . المثل الظالم بقول.. "شاورو الحريم وخالفوهن" ..
لكن انا بقول "شاورو الحريم في امور الحريم وامشو بي رايهن" .. خاصة لو كانت اختك وامك .. وانا بمشي والله الليلة دي لي سماهر.. واضرب ليها تلفون .. والاقيها واحكي ليها من طقطق للسلام عليكم ..
وفعلا كان .. ضرب ليها
دقيقة النسمع المكالمة ..
تلفون سماهر دق الجرس الاول.. مارفعت التلفون .
والتاني . والتالت حتن رفعت ..
سماهر طبعا لمن شافت رقم سعد اول مرة.. اتخلعت وحست بي قلبها ضرب زي ضرب البنقز ..
وحيلها مات .. وغلبها ترفع التلفون ..
لامن الجرس قطع .. اها وكت ضرب تاني .. جاها احساس بتاع زعل ..
وقالت يادوب اتذكرني؟ وانا ماقادرة انوم لا ليل ولانهار؟ .. يخسي عليك ياسعد .. ابيت مابرفع .. لامن الجرس قطع ..
ضرب للمرة التالتة .. قالت الليلة بوريهو ليك الكلام ..
قالت الو مرحب ..
قال ليها سماهر ست البنات البريدها ..
قالت ليهو .. بلاي عليك ؟ خلاص اخيرا" اتذكرتني ؟
قال ليها .. حقك علي والله .. انا ماري بظروف مايعلم بيها الا الله ..
ومانسيتك والله ولا لحظة ..
قالت ليهو الظروف البتمنعك تتصل علي دي شنو؟ ان شاء الله دقيقة ان شاء الله عشرة ثواني ..
انت ماعارف انا الحاصل علي شنو وانت بعيد مني ..
حرام عليك ياسعدي وهناي .. انا كل ما تلفوني يضرب بقوم جارية عليهو زي المجنونة ..
وتصيبني خيبة الامل لمن القى ده زول تاني ..حتى لو واحد في اخواني .. ليه يعني ياسعد؟ ليه بتتقطع مني قدر ده؟ .. بالجد انا زعلانة منك ؟
قال ليها طيب لحظة .. نحن الليلة لازم نتلاقى .. رايك شنو ؟
قالت ليهو ده يوم المنى .. قول لي وين؟ ومتين؟ .. قال ليها بجيكم في البيت .. بعد المغرب .. بس عندي معاك كلام سري للغاية ..لازم نكون برانا
قالت ليهو في شنووو؟
قال ليها لمن اجي يابت .. قالت ليهو اموت ليك يا سعد .. الشمار بكتلني ..
قال ليها ابيت .. اصلو مابقول ليك الا بعدين ..
سكتت مسافة وقالت ليهو .. سعد؟ ..
قال ليها .عيون سعد .
قالت ليهو. انا مشتاقة ليك شديد. تعال لينا بدري .. عليك الله .. عارف يا سعد؟ انت لو خليتني. انا بموت. والله بموت. عليك الله ياسعد تاني ماتقطع مني قدر ده ..
سعد سكت ساي .. واتخيل انو اتزوج ياسمين بت عمتو .. وفارق سماهر . ووقفت ليهو حاجة في حلقو ...
واتخيل انو سماهر بي حبها العميق ده. وشوقها العجيب ده .. كيف تتقبل كلام الورقة المنحوسة دي ؟
والله دي مشكلة دي . انا حقو والله ما احكي ليها .. ياربي انا اعمل شنو؟
احكي ليها ولا ازوغ من المواعيد دي؟؟ ..
طوالي فاجأتو. قالت ليهو. الووووووو .
قطع سرحتو واتخلع .قال ليها ايوة ياسماهر .معاك .
قالتليه :سعد انت مشيت مني وين؟ ياسعد؟ .. خلاص ماتقول لي الشمار .خليني انتظرك بالشوق للشمار ولي حبيب عمري ..



الى اللقاء.

[لامارا]

الحلقة 6

..
المساء طوالى سعد لبس واتقيف .. وماشي لي اهل خطيبتو .. اليوم ح يقطع كل عشم في قلبها يعني .. ومستعد غاية الاستعداد ..لكن محرج جدا .. وده اصعب موقف ممكن الانسان يعملو ..
يمشي يقول لي خطيبتو انو الخطوبة حنفسخها .. حكاية حارة شديد طبعا .. ...
خصوصا سماهر الانسانة الرقيقة .. الجميلة البريئة.. لمن تشوفها تحس انو منديل الورق ممكن يجرحها.. من الرقة .. بت متفجرة بالانوثة .. والجمال .. باختصار البت . عبارة عن دمار شامل .. لكن اهم مافيها اصالة معدنها ..
المهم مشى لقاها مستعدة استعداد غريب.. ومفرشة الصالون .. ومعطراهو ومبخراهو .. وخاتة فيهو باقات الورود .. وناس البيت ديل وقفو ليهو على كراع واحدة .. اكرموهو اكرام جد.. محضرين كل شي .. جابو ليهو عصير الكرز اول حاجة .. وتاني جابو ليهو شاي اللبن بالتورتة .. وانواع بسكويتات كدا غريبة مستوردة ..
وقفو ليهو كدا وقفة محترمة .. وسماهر بس تعاين ليهو وتتبسم .. وكل مرة تقول ليهو . انا فرحانة شديد .. سعد.. انا سعيدة شديد ..
شكرأ .. شكرا.. شكرا .. ياسعدي على الفرحة الماقادره استحملها دي ..
والبت تهضرب الوقت كلو.. وسعد من جواهو بتقطع على الخبر الشايلو ليها .. الخبر الحيشتت ليها كل سعادتها ..ويعدم منها الفرحة الجميلة دي ..
بعد شالت منو عدة الشاي .. جات قعدت قصادو كدا.. وختت يديها الاتنين تحت حنكاتها .. وبتعاين ليهو شديد وتتبسم ..
هو قال ليها مالك يابت ؟.. قالت ليهو عاجبني خطيبي وحبيبي ..
مبسوطة من ربنا .. القسمك لي في حياتي ..
اها قول لي ياروحي .. انا متشوقة اسمع كلامك السري .. اسرع اسرع ..
قال ليها لا لا ياسماهر مافي حاجة .. قالت ليهو عليك الله ياسعد.. انت عارف الشمارات دي بتعمل لي شلل كيف..
قال ليها في مشكلة حصلت لينا في البيت.. وبعنا البيت طبعا .ورحلنا الحتة الفلانية . واديت هاشم اخوي وكباشي .. جزء من المبلغ عشان . يشتغلو ويساعدوني
لانو المسؤولية بقت علي تقيلة ..عشان كدا عايزك تصبري لي شوية .
قالت ليهو انت قايلني ماحاسة بيك ياسعد .. انت اصلك ماتشيل همي .. موش في النهاية نحن بنكون مع بعض .. انا ماعندي مشكلة انتظرك لي اخر العمر .. بس انت ماتبعد مني ..
ولاتتخللا عني ..
قال ليها بس يا سماهر الزمن ح يطول عليك .. وفي النهاية القسمة مامعروف تعمل فينا شنو؟
قالت ليهو بس انت اتفائل يا حبي . ربنا مابفرقنا.. انا متأكدة .. بس انت ماتشيل همي .. لوعلى ناس البيت هنا .. والباقين البتكلمو ديل .انا قادرة اسكتهم .. لانهم ماحاسين بظروفك زي انا ..
قال ليها بس عليك الله ادعي كتير .. والله انا محتاج لي دعواتك.. وقدر ماداير يحكي ليها .. فرحتها والاستقبال والسعادة اللقاها عندها منعتو يفتح خشمو كلو كلو ..
قال ما مشكلة انا بكلمها بكرة ولابعد بكره بالتلفون ..
ومرت ايام كتيرة وماقدر قال ليها .. وكان متواصل معاها وكل مايدور يقولها .. في حاجة جواهو بتمنعه ..
ولسع ماعمل اي خطوة مع بت عمتو ياسمين ..
طبعا ياجماعة سعد ربنا وفقو ..والشغل مشى معاهوكويس شديد واشترى حديد .. وووسع الشغل في الورشة .. وبقى يشتغل من الصباح للمغرب يوميا.. وحتى ايام الجمعة ..
وسدد الديون كلها والحمد لله .. ونزل طوب في القطعة الفاضية ..
وناوي يبني فيها.. ان شاء الله غرفة واحدة تلمو مع امو واختو ..
ويرتاح من الايجار الهدا حيلو هد ..
يوم من الايام قال لي امو انا ناوي يوم الجمعة الجاية امشي لي ناس عمتي .. واشوف الحاصل شنو .. قالت ليهو ربنا يوفقك للخير ويصرف عنك الشر ..
وقبل مانحكي عن مشوار سعد لي ناس عمتو ..
تعالو شوفو الحكايات الغريبة الحاصلة .. مع الوهمانين الاتنين .. هاشم وكباشي ..
اليوم داك وكت شالو القروش .. ولمو هدومهن وطلعو مشو اجرو شقة صغيرة ..غرفة ومطبخ وحمام . في كوبر على جيهة المنطقة الصناعية كدا .. عشان مافي زول يعرف هم وين ..
ودفعو فيها مقدم.. طبعا من قروش الورثة .. اها باتو يومهن داك وبالليل بتشاورو ..
هاشم قال لي كباشي انت لازم تكمل دراستك دي.. وقروشك في الحفظ والصون ..
لو دايرني اشغلها ليك بشغلها ليك.. ولو داير تخليها قاعدة في البنك لامن تتخرج تتصرف براك ..
بس في حاجة لازم تلاحظ ليها .. الايجار لازم تدفع نصو والمصاريف الاكل والشراب وغيرو .. يكون بناتنا بالنص .. يعني تصرف منها لامن تنتهى السنة.. غايتو بتلقاها ياكملت ولا فضل فيها بسيط ..
عشان كدا نصيحتي ليك .. خليني اشغلها ليك.. وانا ادفع حق الايجار
واتصرف في الاكلوالشراب .. وانت تواصل قرايتك لمن تتخرج تلقاها زادت ..
كباشي قال ليهو خلاص اهدي القروش معاك اتصرف .. وكدا هاشم ارتاح شديد . وفعلا شال القريشات ومشى وردهن في البنك.. حساب ادخار .
وبقى يشيل منهن حبة حبة ..
وكل يومين تلاتة يلاقوهو اصحابه.. يمشي يعزمهم ويعشيهم احسن عشوات .. ويشتري لي كل واحد صندوق سجاير ..
يوم من الايام ضرب ليهو السونكي.. ومعاهو صاحبو من السلمة الخرطوم .. قالو ليهو نحن جايينك عندنا ليك موضوع خطير وتحفة .. هاشم قال ليهم انا موجود في كوبر .. ركبو الاتنين جوهو الكلام ده كان بالنهار .. وكباشي كان في الجامعة ..
السونكي قال ليهو .. صاحبي ده اسمو عزام .. وزول علاقتي بيهو سنين .. جاني امبارح وبايت معاي.. اها امبارح بالليل كان بحكي لي .. قال بعرف زول من الناس الخطرين.. البتعاملو مع الجن.. بنزلو القروش ..
هاشم قال ليهو بنزل القروش كيف يعني ؟..
قال ليهو انت مثلا تديهو خمسة مليون ؟يعمل تحضير يعملا ليك خمسمين مليون ..
هاشم قال ليهو ياخي ده دجل وكصب ساي .. هو مادام بجيب خمسمين .. الخمسة حقتي عايز بيها شنو؟
قال ليهو بس انت ارح معانا زيارة ليهو ماخسران حاجة .. قال ليهو انا ماعندي قروش اديها للدجالين ..
قال ليهو ياخي ارح بس بالعندك نشوف .. شوف العين ما كتل ليهو غزال ..
هاشم قال ليهو ارح ياخي.. انا وراي شنو؟؟ اصلا مافي برنامج.. خلينا نكسر زمن ..

هو الزول ده ساكن وين ؟ عزام قال ليهو والله في الازهري .. مرة مشو ليهو ناس عمي .. وانا مشيت معاهم .. تقريبا ساكن مؤجر . بس ما متأكد من البيت كويس .. لكن لو وصلت الحتة بعرفو ..
المهم ركبو ومشو الازهري . ووصلو الحتة وبقو لايصين قريب النص ساعة .. غايتو في النهاية لقو البيت .. بيت من تلاتة غرف شكلو مبني جديد وفاتح في فسحة .
عزام قال ليهم ياهو ده البيت.. ووقفو دقو الباب .. طلع ليهم الراجل فتح الباب .. في الخمسينات اخدراني . لابس عراقي شفاف ولباس قصير .. ظاهر من ورا للعراقي وشايل ليهو سبحة .. ولابس طاقية خضرا..
قال ليهم مرحبا بيكم عليكم السلام اي خدمة .. ؟؟
عزام قال ليهو انا جيتك مع اعمامي عبدالحميد والطاهر .. قبل اسبوعين .. وكان عملنا جلسة تنزيل بي عشرة مليون .. متذكر؟
قال ليهو ايوة متذكر .. وهم ناس عمك واعديني يجوني بكرة .. جايبين شغل كبير ..
اتفضلو انتو عندكم شنو؟
دخلو معاهو على غرفه خاصة كدا .. شكلها غريب .. وفيها هتش كدا وجلود قديمة .. وحاجات منسوجة بالشعر .. واللحافات منجدة بالجلود .. واي حاجة موجودة في الغرفة من مخلفات الحيوانات ..
هاشم ده يازول نطط عيونو.. وجاتو ليك وهمة ..
طوالي بدا ليهو عزام قال ليهو.. ده صديقنا عندو قريشات .. وعايز جلسة تنزيل .. وشكلو ما مقتنع ..
عمك ابوطاقية خضرا .. قال ليهو جيب . انت عندك كم؟ انا هسي بثبت ليك ..واخليك تمشي فرحان .. اي قرش بضربو ليك في عشرة ..
هاشم دخل ايدو في جيبو يرجف .. وقال ليهو جيبي مافيهو غير .. مية جنيه ..
قال ليهو جيبها .. جيب المية جنية.. واتفرج في التنزيل بتعمل كيف ..
اداهو المية جنية ..
الزول ده بي حركات بهلوانية وخفة يد كدا عجيبة خلاص .. سلم ليك هاشم مليون مربوط ..
هاشم طبعا" منطط عيونو وراسو بقى يزنزن ..
وقال ليهو هسي دي قروش حقيقية؟؟ .. الراجل قال ليهو اتا كد بي نفسك.. اول حاجة عدها .. وامشي غسلها برة في الماسورة وتعال ..
هاشم قاليه .. قالو بعد يومين بتتقلب ورق ابيض صح؟
عمك قال ليهو خليها معاك سنة.. لو اتقلبت ورق جيبها لي .. بديك مفتاح العربية البرة دي ..
هاشم عد القروش .. ومندهش دهشة عجيبة خلاص ..
والراجل سقاهم القهوة.. واتونس معاهم.. وبقى يحكي ليهم في بطولاتو .. وفي قصص الناس العملهم اغنياء ..
وقصة سيد العمارة الفلانية .. وسيد المصانع الفلانية .. ورجل الاعمال الفلاني.. ديل كانو مفلسين ومقطعين ساي .. انا العملت منهم رجال ناجحين في الحياة .. وانا وانا و..المهم ..
يازول لامن هاشم مرق من عند الراجل ده.. مرق مخدر تب .. قال لي ناس السونكي .. اسمعو ياجماعة .. والله انا اول مرة في حياتي اقتنع بالحاجات دي.. وماكنت بقتنع لو ما شفتها بي عيني ..
انا باكر بمشي البنك .. واجيب القروش حقتي.. وحقة كباشي اخوي .. اساسا في عشرة مليون انتهت .. يعني باقي زي سبعين ..
لو الزول ده حولا لينا سبعمية مليون .. انتو اي واحد فيكم بديهو عشرة ..
وبقى يخطط .. نشتري بيتين .. ونعرس انا وكباشي في يوم واحد .. وباقي القروش .. نشغلا تجارة .. يازوول والله ده حظ عجيب ..
انت يا عزام الزول ده الوراكم دربو منو؟
والله ده زول خطير شديد ..
لي متين تصبح الواطة وامشي اسحب القروش من البنك ..

الى اللقاء ..

[لامارا]

الحلقة 7


.
هاشم لمن مشى كوبر.. والجماعة الاتنين اي واحد فرتق على اهلو.. هاشم كان مفتكر انو الموضوع ده بالساهل كدا حيتوفق فيهو. زي ما اتوفق في الحاجات الفاتن.. لكن حصلت ليهو معاكسات بسيطة . منها يازول كباشي جا بعد المغرب . من الجامعة . ولقى هاشم فرحان فرحة غريبة .
قاليو مالك ياهاشم؟ الحاصل شنو؟ فرّحنا معاك .. ...
هاشم قال له . طبعا ح افرحك يا خوي .. والله ح تفرح فرحة تشكرني عمرك كلو .. لمن تجي تسكن في بيتك السطوح.. ح تتذكر كيف عندك اخوك . بفكر في الامور بطريقة صحيحة ..وبفكر في مصلحتك مع مصلحتو ..
اول حاجة انت عندك معاي كم موش خمسة وتلاتين تقريبا" ؟ طيب رايك شنو لو انا عملتها ليك تلتمية وخمسين مليون؟ .
وبدا يحكي ليهو في الحاصل .والقصة الحصلت حكاها ليهو بالتفصيل الممل .
كباشي قال ليهو .. لالالا انا ما موافق.. ده حرام ..انت ماعارف السحر حرام ؟.. والناس ديل بستخدمو الشياطين .. والشياطين بتاعتهم بتمشي تسرق من البنوك .. انا سمعت بي الكلام ده كتير ..
بعدين كدي تعال نسألك . لو اديت زول قروش ورجعها ليك زايدة موش ده ياهو الربا؟
انت من وين تقدر تستحل القصة دي؟ .. انا يا هاشم لمن سمعت كلامك.. وفارقت اهلي وامي واخوي.. وهم في اشد الحوجة لي. انا والله ندمت لكن ما كنت داير اخذلك.. واخلف وعدي معاك ..
...........ههه.......
"شوف الغبي" .. "طيب انت خذلت امك الولدتك.. عشان اخوك التيس المعاك ده.."
غايتو في ناس بتفكر تفكير غريب خلاص !! ؟؟ يعني الواحد تلقاهو مابعرف يوازن الامور كلو كلو.. .تلقى واحد مخالف ابوهو في موضوع .. مثلا ماشي مكان . وابوهو منعه . يقوم يرفع صوتو على والدو . ويعترض ويقول لابوهو انا ما ممكن اخذل صاحبي عشان كدة لازم امشي ويعصى ابوهو عشان صاحبو !!! .. ياخي صاحبك؟؟
المهم . نفس التفكير المقلوب .. كباشي دمر اسرته . وشتت شملهم وعصى امه .. وباء بالعقوق .. عشان مايخذل هاشم . سبحان الله ..
زي زول . جدع التفاحة عشان يشيل البصلة .
..........
قال ليو يا هاشم بي اختصار.. انا ما موافق تشيل قروشي .. انت عايز تتصرف شيل قروشك براك .. انا ماعايز الموضوع ده ..
قال ليهو ياكباشي ماتبقى عنيد وراسك قوي .. بعدين لمن تلقى قروشي انا كترت وبقيت عندي مليارات بتندم ..
كباشي قال ليهو ما ح اندم على الحرام.. والحرام عمرو مابتقدم .. انا عايز اشتغل بقروشي براي ..
المهم يازول قدر ماحاول معاهو المستحيل.. بس ده ماسك ليهو في حرام .. وربا .. وشواطين ..
في النهاية هاشم قال ليهو طبعا انا ما ممكن اجبرك على حاجة انت ماعايزها .. انا بمشي بسحب قروشي من البنك.. لكن والله انا قرش مابصرفو عليك.. كدا اتفصلنا اي زول ياكل نارو ..
قال ليهو مافي مشكلة ياهاشم .. انا راجل وبعرف اتصرف . ولو عايزني ارحل منك برحل ..
قال ليهو لالا انا مابخليك ترحل .. لانو السكن ده اجرناهو الاتنين .. لازم تقعد وتدفع حقك ..
كباشي قعد يهز في راسو .. وقال ليهو والله ياهاشم انت زول غريب خلاص .. وبتقيم القروش اكتر من اي شي في الدنيا دي ..يعني لو في زول قال اكفر وانا بديك مليونين تلاتة طوالي بتكفر ..
هاشم قال ليهو ياولد خلي عندك ادب .. انت بتتكلم مع اخوك الكبير .. قام كباشي قعد يضحك ..وقال ليه البسمع بتتكلم عن احترام الكبار مايشوف تصرفاتك مع اخوك الكبير .. زي ماقالو المصريين .. اسمع كلامك اصدقك اشوف عمايلك استعجب ..
هاشم طلع من الغرفة مشى يتعشى براهو ..وكل يوم كانو بطلعو الاتنين مع بعض للعشاء .. الليلة عمل فيها زعلان منو .. وكل واحد مشى اتعشى براهو ..
ان شاء الله يكون ده بداية فراق بينهم ..
كيف ح يتوفقو في حياتهم بالطريقة دي؟ مستحيل طبعاَ ..
تاني يوم مشى هاشم براهو وسحب قروشو.. واتصل علي السونكي وجوهو الاتنين السونكي وصاحبوعزام . ومشو طوالي للراجل ..
وطبعا المرة دي أجرو امجاد عديل . الاولاد شايلين قروش كتيرة وكدا ..
والراجل قال ليهم لازم تبيتو معاي.. لانو القروش دي كتيرة ومحتاجة . لي وقت شوية عشان التنزيل مايضرنا ..
قالو ليهو طيب ممكن نمشي نجيك بكرة .. قال ليهم للضمان .. تعالو لي بعد يومين .. عشان قدامي نفرين عايز انزل ليهم مبلغ كبير.. وهم قدامكم ومستعجلين ..
دقيقة بس اكتب ليكم وصل امانة بالمبلغ .. وفعلا كتب ليهم وصل امانة بي اسمو الحقيقي لدرجة طلع بطاقتو .. وقال ليهم عشان الشغل يبقى قانوني .. من ترك شيئا" من الشرع احوجة الله اليه ..
وكدا طبعا وصل الامانة من الراجل الاسمو حسين مين كدا ماعارف ..لي هاشم فضل الله بشهادة الاصحاب الاتنين ديل السونكي وعزام .. وهو اساسا" ماكانو محتاجين للقصة دي.. لانو وثقو فيهو ثقة شديدة ..ياخي الزول ده بيتو كل مصاحف سبح .. وعندو رادي شغال فيهو قران طول الوقت .. طبعا" مستحيل يكون عايز يغشنا .. وكدا يعني ..
سلموهو 33 مليون وهاشم شال معاهو 2 مليون .. وشالو منو ورقة الوصل وطلعو .. وطول الطريق السونكي بوصي في هاشم اوعك الورقة دي تضيع منك .. لو ضاعت منك بتركب التونسية .. نحن مافاضين لي تلتلة ومشاكل ..
بالاختصار هاشم مشى الشقة ..وتاني يوم نوي يمشي لي ناس عمتو في الجرافة . يلى لو انتو ملاحظين . الاتنين ح يمشو الجرافة .. سعد بي غادي ..وهاشم بي هنا ..
بس طبعا هاشم مشى قبل سعد بي مدة لاننا نحن هسي بنحكي في قصة هاشم بي اثر رجعي ..
يعني قبل الزمن الافتراضي .. يعني كانت احوال ناس هاشم متقدمة بي ايام للاحداث الجارية .. وانا عرفتها مؤخرا" تمام؟

طيب . اتصل هاشم على عمتو في تلفونها . كان شال منها التلفون قبل وفاة الوالد وكت جاتهم هناك .. واتصل عليها ..
يلا اعزائي .اسمعو المكالمة دي كويس .. وافهموها .. وخليكم اذكياء ..
هاشم قال لها : انا طبعا" ياعمتي شلت قريشاتي من الورثة .وقمت بي حياتي . وفصلت عيشتي ..
وقلت ما حأتصل عليك الا كوون . نفسي وانجح نجاح كبير ..
والليلة عملت .. الخطوة الكبيرة .. بس داير دعواتك .
وان شاء الله انا العصرية كدا بجي اسجل ليكم زيارة .. قالت ليهو انت تسلم .. وده الكلام ..براك عرفت الحاصل تراك ..
قال ليها بس ياعمتي في مشكلة ؟
قالت ليهو في شنو ؟ وريني الحاصل ..
قال ليها انا لقيت ورقة كاتبها الحاج لي سعد اخوي بتبوظ اي حاجة ..
قال ليهو فيها تتزوج ياسمين .. !!
قالت ليهو الحاجة دي في يدنا نحن . كدي انت لمن تصل تعال بدري بس .. قال ليها كويس لمن اجي احكي ليك ..
المهم العصرية كدا ركب مشى ليهم.. والحصل هناك شنو؟ .. وحكو قالو شنو؟ .. والحاصل بالضبط بين هاشم ده وعمتو شنو؟
لسه ماعندي خبر .. والمصريين قالو ..
ياخبر النهارده بفلوس بكرة يبقى ببلاش ..
ننتظرنشوف ..المهم قعد معاهم لغاية وكت متأخر من الليل . ومشى منهم .. عشان مواعيدو باكر يمشي يستلم القروش .. اللهي .. تلتمية وتلاتين مليون ..
ضرب لي السونكي .. والسونكي قال ليهو بتلقاك فوق في لفة كبري كوبر ..انا الليلة عزام مالامي فيهو وتلفونو مقفول .. وفعلا اتلاقو هناك .وركبو الاتنين مشو الخرطوم الازهري للراجل . لقو البيت مقفول .ومن فوق مطبول بي طبلة وجنزير .. قدر مادقو الباب مافي زول جاهم..اظنهم بدقو قريب نص ساعة .. بعد شوية مرقت مرة من الجيران .. قالت ليهم الناس الساكنين هنا ديل رحلو ليهن اكتر من شهر .. وحتى الراجل الكان حارس البيت سافر امس الصباح...
هاشم ده حيلو مات وكرعيهو رجفن لامن قعد في الواطة ..
وقال ليها سافر وين؟ .. الزول ده عندنا معاهو قروش..
قالت ليهو عاد انا بعرفو كيفن سافر وين ؟
هاشم قال ليها عليك الله لو سمحتي ..يعني بس نحن بنسأل من سيد البيت .. قالت ليهو سيد البيت ده في السعودية والله.. وبيتو ده موكل عليهو اخوهو شغال في سوق اللاماب ..
وطوالي قفلت الباب ودخلت .. وهم الاتنين قعدو كدا محتارين زي بتاع الكارو الحمارو مات ..
طوالي هاشم قام على السونكي .. ده كلو منك انت وصاحبك.. انتو خوزقتوني ..والله انت اسجم زول في الدنيا ..
السونكي بي كل برود قال ليهو.. بس يا هاشم نحن شاورناك وانت جيت بي ارادتك وسلمتو القروش براك ..
بعدين نحن نعرف من وين انو الزول ده نصاب وحرامي ..
قال ليهو طيب اضرب لي عزام ده ..شوفو وين ..والله الليلة انا عزام ده الا اقتلو ..
طوالي السونكي ضرب لي عزام .عزام رد عليهو قال ليهو مالك في شنو ؟
السونكي قال ليهو خود . اتكلم مع هاشم .. وفتح السماعة الخارجية ..
هاشم قاليو . انت وين يا عزام؟ .. نحن موش عندنا مواعيد مع صاحبك؟ .. قال ليهو ايوة المواعيد انا ما ناسيها .. بس انتظروني مع الراجل.. اجيب اعمامي معاي جايبين قروش تقيلة . وجايين ..
طوالي السونكي قال ليهو .. لالا ياعزام الراجل صاحبك ده زاغ بي قروش هاشم .. وهسي في البيت مافي ..
عزام قاليهو .. معقول؟؟؟ ده زول من الصالحنين ياخي بكون مشى قريب وجاي ..
هاشم قال ليهو صالحين في عينك .. ياوهم .. تعال هسي نحن راجنك قدام باب الزول ده ..
قال ليهم اوكي مسافة السكة انا جاي عليكم .. النكلم عمي بالحاصل .. واجي عليكم ..
هاشم قال لي السونكي .. والله الليلة صاحبك ود الكلب ده.. لو مايجيب لي قروشي ويطلع لي الزول ده من طقاطيق الارض . الا اقتلو .. واقطع لحمو قدامك ..
ومنتظرو يجي بس فاير وزعلان زعل شديد ..



الى اللقاء

[لامارا]

الحلقة 8

..
طبعا هاشم والسونكي منتظرين عزام يجيهم.. قاعدين في الضللة لغاية الساعة 3 .. بعد داك جاهم يتجرجر ..
ومن هناك جاء يعتذر وكاتل حيلو .. وبقول والله ياهاشم الزول ده لو بقى في الارض السابعه نطلعو.. بس انت ماتنزعج .. ...
هاشم هجم عليهو داير يخنقو .. اصلا عزام ضعيفوني قدر السوسيوة .. وهاشم عاتي وليهو فقره .. يعني كان غفسو بجيب اجلو .. بس السونكي مسك هاشم . وقال ليهو اهدا ياهاشم واصبر لو مالقى لينا الزولده بعدين انت اعمل الدايرو معاو ..
هاشم قال لعزام .. اتحرك امشي ورينا الزول ده وين . قال ليهو والله انا ماعارفو لكن بنفتش ليهو .. انتو بس روقو.. كل حاجة ح تظهر ..
السونكي قال ليهم تعالو نسأل الجيران ديل تاني ..
دقو الباب .. طلعت ليهم المراة القبيل ذاتها ..
هاشم قال ليها لو سمحتي ياخالة.. نحن الزول الكان قاعد في البيت الجاركم.. ده زايغ مننا بقروش .. ووصل الامانة معانا .. بس عايزين نعرفو او تدلينا على اي زول يدينا خبرو ..
قالت ليهم والله الزول ده من جا دخل في البيت ده.. ماشفناهو مرق نهائي الا مرات بمشي الدكان قالو الصلاة مابمرق لها .. بس انتو اسألو محمود اخو سيد البيت الوكيل ..
قالو في سوق اللاماب ..
دقيقة شفتا بتاع الدكان الفي الشارع التاني ده .ببقى ليهم امشو اسألوهو ..
قال ليها شكرا يا خالة . مشو لبتاع الدكان . قالو ليهو نحن بنسال من الزول الكان ساكن في البيت ده .. قال ليهم ده الحرامي بن الكلب .انا داير منو قروش . وسافر بدون مايكلمني . قالو ليهو طيب محمود الموكل بالبيت نلقاهو وين نساله منو؟ ..
قال ليهم محمود ذاتو مابعرف الزول ده .. هو اصلا اتصل على سيد البيت في السعودية.. اسمو طه اخو محمود ده ذاتو .. وقال ليهو انا عايز احرس ليك البيت .. وسيد البيت ..وافق واتصل على اخوه محمود . ومحمود اتصل علي قال لي اديهوالمفاتيح .. وانا اديتوالمفاتيح وهو مما سكن ماعدى ليهو شهر .
وهسي المفاتيح ذاتو ماعارفو ختاهن وين .. طبل البيت بي جنزير وفات .. انا ذاتي كايس ليهو ..
بس انتو امشو افتحو بلاغ .. مادام عندكم مستند .. وناس الامن بجيبوهو ليكم .. لكن لا محمود .. ولا اخوهو طه.. مابعرفو الزول ده .. وماكنا مفتكرين انو زول حقير للدرجة دي ..
لانو عامل فيها شيخ كبير ..ولمن جا جو معاهواتباع.. امكن زي تلات او اربعة ..
اها طبعا من هناك مشو لي مركز الشرطة وفتحو بلاغ .. وصورو الوصل وادوهو ليهم .. بس لمن المتحري سألهم القروش اديتوهو ليها في شنو؟ بقو يتمتمو وماقدرو يقولو الحقيقة .. بسسلموهو الوصل .لكن كان في مشكلة برضو انو ماكاتبين رقم البطاقة..
ودي اضعفت الامل .. لانو الاسم فقط صعب . والضابط قال ليهم احتمال يكون الاسم غير حقيقي او في تزوير في البطاقة ..
انتو امشو ونحن بنعمل تحرياتنا.. لو في اي جديد .. بنديكم خبر .. لكن والله بالجد ماتتوقعو حاجة شديد يعني ..
وهم حسو انو الضابط .. بسخرمنهم .. لانو المتحري عايز بيانات كاملة في القضايا الزي دي . ماممكن تجو انتو وتقولو في زول شال مننا قروش . وما تقولو شالها مننا بياتو سبب .. ده كلام فارغ ساي ..
بالاختصار ..
كدا تلاشت الامال .. وبقت تتضاءل زي النجوم .. مع استمرار ساعات الصباح ..
وهاشم شعر بالمرارة.. والاحاسيس الخاسرة .. ودموعو بقت تتناثر في وشو اربعة اربعة .. وبقى يقول خللاص يا سفيان انا انتهيت .. خلاص ياسفيان انا كل البنيتو ضاع ..انا خسرت اخوي واختي وامي كلهم في لحظة واحدة.. عشان القروش دي .. وهسي كلها راحت في رمشة عين .. الله يدمرك يا سفيان الله.. يدمرك ياعزام ..
وخلاهم واقفين في محلتهم ديك قدام مركز الشرطة .. ومشى تاني لي مكان البيت.. وبقى قاعد حارس الشارع .. على امل انو الزول ده يجي بالليل .. الساعة هسي ماشة على ستة مساء ..
هو قعد لغاية قري بالساعة 9 .. وبراهو ركب تاني مشى كوبر .. وامالو محطمة.. وعندو احساس ..زي احساس الزول الراجع من المقابر بعد مادفن ولدو الوحيد .. لي درجة انو بجرجر في كرعيهو يا الله .. وطبعا" من الصباح ماخت لقمة في خشمو ..
المهم وصل كوبر وودفر الباب .. وكباشي كان قاعد جوة بذاكر عاين ليهو كدا ..
قال ليهو هاشم؟؟ هاشم .. مالك؟؟ .الحاصل شنو ؟ انت ياهاشم الليلة شربت حاجة ؟ مالو شكلك ده عامل كدا؟؟ رد علي ..
وهاشم ساكت ويعاين للباب من تحت ومركز كدا .. زي الزول المنتظر ليهو كديسة تجي داخلة ..
وكت كباشي كتر معاهو الاسئلة .. قال ليهو اسمع ياكباشي .. انا عايزك تشيل قروشك وترجع البيت.. وتسلم باقي القروشالعندك دي دي لي امك وتطلب منها الرضا ..
كباشي قال ليهو وانت .. قال ليهو انا زي اللبن الطلع من الضرع تاني مابدخل راجع ..
انا بكرة بجيب ليك قروشك وترجع البيت.. انا ماشي اشوف لي شغلة استرزق منها ..
كباشي قال ليهو .. ايوااا اخيرا أنا فهمت الحصل .. الدجال زاغ بقروشك صح ؟
قال ليهو .. صح.. انا زول ربنا غضبان على .. شوف انت ربنا نجاك كيف ؟ وانا اتخوزقت .. وبقيتي ماشي ورا السراب زي السكران.. وما وعيت الابعد كل انتهى ..
كل شي انتهى ياكباشي .. كل شي انتهى ..
كباشي قال ليهو ليه كل شي انتهى .. انا بديك نصيبي كلو ..واعتبر القروش الضاعت قروشي انا.. بس انت ما تتحطم قدر ده ..
الجاتك في مالك سامحتك يا هاشم والقروش بتمشي وتجي بس الصحة غالية ومابتتعوض .. قاليهو مستحيل اشيل قروشك انا ..
قاليهو طيب بس انت ما تنهار ياهاشم كل شي بيد الله وان شاء الله الامور تتصلح والعترة بتصلح المشية ..
وكباشي بتكلم وكانه باذن في مالطة.. وهاشم داخل في عوالم غريبة من الاسى والاحزان ..
بالاختصار قام بكرة الصباح بدري .. ومشى جاب القروش بتاعات كباشي.. شايلها في كيس.. ولافيها بي جريدة قديمة ..وانتظرو بعد جا راجع من الجامعة .. وادها ليهو..
كباشي قال ليهو طيب انا اديك منها جزء تتدبر بيهو امورك .. قال ليهو لالا والله ماعايز ولاقرش .. امشي انت ربنا يوفقك .. وسلم على الوالدة ..
كباشي قال ليهو طيب احكي لي انت من هنا ح تمشي على وين؟ .. قال ليهو بمشي ناس عمتي سلوى.. في الجرافة ومنهم بدبر اموري .. لكن مابقدر ارجع البيت .. ماعندي وش برجع بيهو لي ناس البيت ..
قال ليهو عمتك سلوي ؟؟ انت ماخايف المراة دي تسممك.. ولا تعمل فيك مصيبة .. بعد المصايب العملتها والحكتها لينا امي ؟
قال ليهو ابدا امك ظالماها شديد ..
طبعا ياكباشي المراة دي.. لمن جات لي مرض الوالد .. انا قعدت معاها كتير.. واتعرفت بيها عن قرب .. الزولة دي بتريدنا ريدة شديدة .. وكانت بتحب الحاج محبة فوق القانون .. وهي الاختارت ليهو انو يتزوج الوالدة.. بس الوالدة الله يهديها.. لمن شافت الحاج بحب سلوى شديد.. شالتها غيرة الحريم العادية.. وبقت تنقل فوقها القوايل والكضوبات ..
والمشكلة انو الحاج بصدقها.. وعمل مشاكل مع اختو .. وقاطعها مرتين .. وكل مرة يظهر الحق وتطلع امك هي الغلطانة ..
كباشي قال ليهو انت الكلام ده الحكاهو ليك بالطريقة دي منو؟
قال ليهو حكت لي عمتي براها ..
في وقت مرض الوالد انا كنت قريب منها شديد . وهي قالت لي اعمل حسابك ..انا سمعت انو ابوك عايز يكتب املاكه وبيتو بي اسم سعد .. وفعلا انا شفت ابوي ادا سعد ورقة .. لكن الظاهر سعد عرف انو ده ظلم واتلف الورقة .. وابا ينفذ الوصية .. واحتمال الوالدة منعته ..
لاني مالقيت الورقة كلو كلو ..
اها طبعا عمتي حبتني حب شديد خلاص.. وبقت تقول لي .
الوصية حقة ابوك دي وصية ظالمة يا هاشم .. انت لو قدرت شلت حقك .. واتغلبت على سعد . انا بعرس ليك بتي اجمل بت في امدرمان .. لاني بريدك وبحس بيك زي ولدي .. وقالت لي انا ح اكلم ابوك .. لكن انا في الوقت داك كنت بحب ابتهال . عشان كدا ماكنت مهتم بالموضوع ..
وحتى لمن لقيت الورقة الابوي موصي فيها سعد انو يتزوج ياسمين .. ما اهتميت بالموضوع شديد .. لكن زعلت انو ابوي ماشايفني اهل للمسؤلية .. وعايز يحمل مسؤولية ياسمين لي سعد.. .مع انو سعد خاطب .. ولا خته اي اعتبار للبت المخطوبة وشنو الاثر النفسي البترتب عليها..
في انو سعد يتخلا عنها عشان بت عمتو ..
بالمناسبة يا كباشي ابوك كان حقير الله يرحمو ..

اها بعد شلت قروشي وكشفت انو ابتهال بت واطية وحقيرة ..
ابتهال بالرغم انها كانت عندها معاي علاقة .. بوراي بتطلع مع محمد ود الجزار . خليتها وقطعتعلاقتي معاها ومشيت طوالي لي جامعة ياسمين جامعة السودان في الغربي .. ولاقيتها .. وحكينا مع بعض عن الموضوع ..وابدت الموافقة ..و كمان فرحت بالموضوع شديد .. وانا هسي كنت بعد الشغل حق الليلة ده.. كنت حأبدا طوالي في ترتيبات الخطوبة .. لكن شوف الحصل علي .. والله وانا في حالة اخير منها الموت يا كباشي ..
كباشي قال ليهو ..
من خلال حكايتك دي.. انا حاسي انو عمتي دي انسانة خسيسة .. وهدفها تدمر بيتنا وتفرقنا .. وفعلا" نجحت .. ودي زولة كذابة والله.. ولو ما دمرتك ورمتك في الواطة دي ما بترتاح ..
هاشم قاليو . والله انا ذاتي بقيت ماعارف الصح وين ..
المهم كباشي شال قروشو وهدومو وقاللو . انا ماشي للبيت ياهاشم لكن بوصيك امشي اي حتة ..بس ماتمشي لي عمتي دي..
بس هاشم ما اشتغل بي كلام كباشي ده ..
وباكر بدري .. مشو سلمو المفتاح لي صاحبو .. وكباشي مشى على بيت ناس امو ..وهاشم مشى على الجرافة ..



الى اللقاء ..
...