مزاد السعادة / للكاتب طارق اللبيب ، سودانية مكتملة

[لامارا]

	بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته نقدم لكم رواية مزاد السعادة للكاتب طارق اللبيب قراءة ممتعة للجميع.....

[لامارا]

رابط لتحميل الرواية

https://www.rewity.com/forum/t400910.html#post12987264

الحلقة 1

الواطه صباح قدام مستشفى بحري التعليمي . والناس داخلة ومارقة . وفي الشارع هناك يادوب ستات الشاي يرمن في اللقيمات . وناس الاكل غير الصحي بالقرب من المؤسسات الصحية .وناس ماشة وناس جاية ..بس لسه الوكت بدري .
وجوة المستشفى بدن الفرّاشات في حركة الصباح بتاعة النضافة وغسيل السراميك . وبعض مرافقين المرضى حايمين في حوش المستشفى ..وواحدين لسع نايمين في البرندات والبلكونات . وملفلفين بالملايات .. والدكاترة بتاعين الامتياز بدأو في تبديل الورديات .. في دكاترة بكونو بايتين في المستشفى.. وفي واحدين بجو الصباح والورديات بتتناوب ..
في دكتور جاء الصباح .. دكتور جميل وأنيق كدا ونضيف . وشو صبوح . النوع البتكلم براحة داك . اها نادى واحد من الحرس البحرسو الابواب ديل على جمب . وقال ليهو والله ياقاسم ..الليلة بس اسف ..دي تلاتين جنيه ..
اتقسموها انت وبابكر . لكن المرة الجاية ان شاء الله اتمها ليكم الاربعين .. قال ليهو مابتقصر والله يادكتور .. هسي والله اولادي التلاتة بعرفوك .. وطوالي قاعد اقول ليهم دي من عمكم دكتور مدثر . بس الله يخليك ما تتحسس .. البجي منك كلو خير ..وكتر خيرك وربنا يبارك لك ويوفقك .. قاليهو تسلم ياقاسم ..والله انا بحرص على الموضوع ..ده لانو حاسي فيهو بركة .. طيب الله يديك العافية النمشي نشوف الشغل ودخل طوالي على المستشفى ..
الدكتور ده ورديتو الليلة بالنهار ..وليل الليلة ..لي بكرة الصباح .. وكدا يعني الورديات ..
د.مدثر اساسا" من منطقة قريبة للدويم على النيل الابيض . اسرته انتقلت الى الخرطوم من السبعينات.. وابوهو تاجر كبير في السوق . وصاحب اعمال واملاك .
مدثرعندو اربعة اخوان وهو الخامس ووالدته .. واخت واحدة .
انا غايتو الدكتور ده اثار فضولي بالجد .. زول مبالغة تخجل من تعاملو معاك .. رقيق لدرجة ..وزول فعلا المفروض يكون طبيب .. باسم ومهتم بالمرضى . وبجي الصباح يسأل المرضى ديل نفر نفر . ويبتسم معاهم ويطمنهم .. قالو اي مريض يجي المستشفى دي ..بطلع منها وهو ما متذكر حاجة غير دكتور مدثر ..
دكتور مدثر مربوع القامة ..ولونو قمحي فاتح.. وشعرو ناعم وشحيح من قدام كدا . وبمشي بسرعة .. ظاهر عليهو انو ود عز.. بس بالجد الود ده متربى تربية صاح . لو ما الانفعالات العادية تقول ملاك بس وكت يزعل بتغير كلو كلو ..
اليوم ابتدا ..والدكتور ده بالذات ما ملتزم بالبرنامج المحدد .. يعني بمشى يمر على المريض مرتين وتلاتة مرات في الساعة . وبشتغل شغل اكبر من المفروض ..
المهم تابعو معاي المشهدين ديل.. عشان نتعرف على الزول ده عن قرب شوية .
في مراة كدا في عمر الخمسة وستين سبعين . كانت مرقدة في عنبر الباطنبة حريم . ويومين تلاتة رافضة الاكل والشراب .. وشغالين معاها دربات .هي اصلا عندها حاجة في الاثني عشر ..ومحتاجة متابعة دقيقة .. جاء ولدها للدكتور مدثر.. قال ليهو يادكتور امي ماراضية تسمع من زول اي كلمة.. وانا متأكد انو رافضة الاكل والشراب ده ..بتعاقب فينا نحن .. بس بتقول انا اصلي ميتة ميتة ..ودوني اهلي ..
مدثر قال ليهو طيب تعال معاي .. مشى ليها ..
وقف جمبها كدا.. وقال ليها صباح الخير يا امي . المراة اتخلعت من الدكتور البقول ليها يا امي ده ..
بعد ماكانت مقبلة كدا استعدلت.. وقالت ليهو الله يصبحك بالخير ياولدي.
قال ليها الدكاترة ديل ما عايزين يخرجوك.. لكن انا بخرجك .. بس ماتقولي لزول ..
قالت ليهو خلاص.. قول للولد العوقة الجمبك .ده.. يمرق برة عشان مايمشي يكلمهم . (بتقصد ولدها )
قاليهو اطلع برة يابكري .بعد ولدها طلع من العنبر . قعدت توسوس مع الدكتور .. قالت ليهو الشهاده لله ياولدي ..من اول يوم شفتك وشايفاك زي ولدي .. هنيالا امك الولدتك .. انا ياولدي زهجت وبطني طمت من حياة الدنيا .. ودايرة اقضى ايامي دي في بيتي ..
قال ليها ياامي انتي لسع فيك حجة .. وعمرة .. ما مشتاقة تزوري مكة والمدينة ؟
انا هسي داير اعمل ليك علاج بتاع عشرة عشرين سنة لي قدام ..تقولي لي زهجت من حياة الدنيا؟
خلاص كان كدي انا احسن امشي ادي العلاج ده لزول تاني ..
قالت ليهو لالا .. خلاص كلو شي ولازعلك انت ..
قال ليها خلاص بس و عايزاني اكون رضيان منك ..اعملي البقول لك عليهو.. وانا بوعدك اخرجك وازورك في البيت.. واشرب القهوة من يدك..
قالت ليهو اها قول ..
قال ليها بس العلاج ماينفع على الجوع ..لازم تاكلي وتشربي العصير القدامك ده.. وانا طوالي ببدا ليك العلاج . باكر بعد باكر بخرجك ..
يازول المراة مزاجها اتعدل.. وقعدت تاكل ..والممرضات ديل يعانن مستغربات في المراة البحنسو فيها تلاتة يوم دي .. كيف مدثر اقنعها بالسهولة دي..
ولدها بكري قال ليهو والله يادكتور انت عندك اخلاق.. ياخي امي والله جابت لينا ضغط ..
قال ليهو حرام عليك يابكري .. اتذكر لمن انت كنت طفل وبتبكي بالساعات ..ما حصل امك قالت لزول ولدي دي جاب لي ضغط .. ياخي اتحملها شوية ..
اها تسلم يلا بعدين انا بجيها تاني .. خلي بالك منها ..
الموقف التاني في راجل كبير جايبنو اولاد عمو تلاتة.. وزهجانين منو زهج شديد خلاص ..وهو تعبان جدا .. وكل يوم الدكتور بوصيهم عليهو .. وهم دايما مافيشين .. الظاهر هو ماعندو اولاد واهلو بعيدين.. وظروفهم بطالة .. وضيق ذات اليد حاصل ..حتى حق العلاج ماعندو .. والمعاهو ديل شكلهم بس راجنو يموت .. بس هم برضهم بقولو ماعندهم حق العلاج
اها يوم من الايام مدثر اتكلم مع زملاهو.. قال ليهو ياجماعة نعمل شيرنق .. في دواء لي عمنا ادم . واهلو المعاهو ديل ما معاهم قروش .. واحد من زملاهو الدكاترة قال ليهو ياخي ديل مستهبلين ..والله بقروشهم .. ياخي ديل بطلعو بمشو هابي تايم بيأكلو بي ميتين وتلمية ..
مدثر قال ليهو ما مشكلة ..هسي نحن مضطرين للدواء ..
المهم طلعو القريشات وادوهم ..يجيبو ليهو الدواء..
اها الزول الادوهو القروش يحيب الدوا.. تاني ماجا راجع .. وقالو مشى الحلة الجديدة .. ومنتظرينو لي بكرة .. ومدثر ورديتو انتهت ..ووصى زمالهو لمن يجي الدواء يهتمو بي عمك حاج ادم ..
وفات .. اها بعد جات الوردية تاني.. ومدثر جاء يسأل من الدواء بتاع عم ادم.. قالو ليهو الزول المشى يجيب الدواء ماجا .. ورفاقتو حصلوهو .. وبرضو ماجو . وعمك ادم اتوفى بالليل .. ومالقى الزول البعمل ليهو اجراءات الوفاة .. واستخراج الشهادة ..
والله قالو مدثر ده بكى بكى .. لامن قعد في الواطة ..وزملاهو بقو يهدو فيهو ..
يقولو ليهو يازول انت دكتور شنو؟ ..الموت ده هنا زي شراب الموية ..لازم تتعود على المواضيع دي ..
قال ليهم معليش ياجماعة .. دي حاجة خارجة عن ارادتي ..
انا انوم السهر .. انا نايم في بيتنا ..وعم ادم كان ينازع في الموت ومايلقى حق الدواء .وزول جمبو مافي .. والهو حرام البحصل ده ..
والزي عم ادم كتير . نحمدالله على كل حال وربنا يكون في العون.
المهم ديل موقفين بحكو بيهن ناس المستشفى ..وحكايات تانية عن الدكتور ده غايتو ..ربنا يديهو العافية ..
محمد يوسف دكتور من اولاد توتي .. وصديق شخصي لي مدثر .. قال ليهو يامدثر .انا عايزك بعدين الضهريه بعد الصلاة ماتطلع .
قال ليهو انت يا محمد كدا بتعمل لي قلق .. كان ممكن تكلمني بعدين . او فرغ نفسك هسي انا ماعندي حاجة ..
محمد قال ليهو طيب بس لحظات ونطلع المهم طلعو قعد في حتة كدا براهم الاتنين .. محمد يوسف قال ليهو انت .. عملت شنو مع نوسة؟
نوسة دي دكتورة نسرين معاهم في المستشفى .. متعلقة بي مدثر ومدثر ماشغال بيها نهائي .. وعامل رايح من كل تلميحاتها .. وشكلها هسي وسطت محمد يوسف ولاشنو ماعارف ..
مدثر قال ليهو .. اعمل معاها شنو؟ في شنو مثلا؟
قال ليهو يامدثر ماتعمل لي فيها اهبل . الدنيا كلها عارفة انو نسرين ميتة فيك موت .. وبتريدك اكتر من عيونا ..وانت عامل اضان الحامل طرشا ..
مدثر قال ليهو اسمع يا محمد . الحاجات دي مشاعر متبادلة بين الناس . على حسب فهمي . ولايمكن انها تتقدم لي قدام. ما لم يكون فيها اخذ وعطاء .
واي زول يبدأ بي مشاعر مع انسان. المفروض يلقى منو مقابل . او يصرف النظر . والا بكون فارض نفسو ومضايق الطرف الاخر ..
محمد قال ليهو .. حلو .. بس المفروض تصارحها بالحقيقة .. وقول ليها انا ماعندي ليك حاجة لو انت راجل ..

مدثر قال ليهو .. بس هي لغاية اللحظة ماصرحت لي بي كلام .. ياها تلميحاتها الانت ورفاقتك شايفنها دي ..
قال ليهو بس مالها نوسة عيبها لي .. اديني فيها عيب واحد ..
قال ليهو والله يا محمد انا ما مطلوب مني اقعد اعيب في بنات الناس بدون سبب .. حتى لو عندي عليها ملاحظات ما من حقي اتكلم ليك بيها .. لاني انا مابرضى زول بي وراي يتكلم عن عيوبي ..
بس اطمنك لو يوم من الايام نوسة اتكلمت معاي .. انا بوريها براي .. غير كدا انا ماعندي تجاها اي مشاعر ياجماعة انتو بتفهمو متين؟
قال ليهو طيب هي حتجي تتكلم معاك .. خليك مستعد ومحضر شعورك للرد ..
دكتور محمد ده مرات تحس بيهو حشري ومرات تحس انو زول
عايز يوفق راسين في الحلال ..هه (جنس توفيق)
مدثر عاين ليهو قوي كدا . وقال ليهو .. يعني انت موصياك هي ولاشنو؟ شكلها الجلسة دي مدبرة ..
والله لكن يامحمد بالغت .. سبحان الله ..
قال ليهو والله ما موصياني ولاحاجة ..ولا اتكلمت معاي .. لكن انا براي عايز ارسيها علي بر .. لاني شايفها تعبانة شديد .. وطول اليوم سرحانه وكان سمعت صوتك ساي تتخلع ..
قال ليهو طيب ترسيها على بر كيف ؟ وحتفتح معاها الموضوع براك ولاهي حتفتحو معاك؟ وللا الفهم شنو؟
قال ليهو لالا انا بوصي غادة تكلمها . لانها هي بتحكي لي غادة وغادة بتحكي لي .. غادة دي صديقة مقربة لي محمد يوسف بس هل صداقة ساي ولا في علاقة مستقبلية الله أعلم ..
مدثر قال ليهو .. تحكي لي غادة وغادة تحكي ليك؟؟
والله غايتو عندكم جنس حاجات ؟
لكن اقول ليك ياخوي.. خلي غادة تكلمها ..تقول ليها الزول ده قال نفسو يتكلم معاك .. لانك ماحصل صارحتيهو بالجواك .. وماتقولو ليها اي شي من القلناهو هسي ده ..
انا براي بفصح ليها عن الجواي . عشان تكسب زمنها .. اتفقنا يادكتور ؟
قال ليهو جدا على العين والراس ..

الى اللقاء .

[لامارا]

الحلقة 2

تاني يوم نسرين بقت كايسة لي مدثر شكلها خلاص كلموها .وعايزة تتلكم معاهو . لكن شكلها ماقادرة كل ما تشوفو تزوغ .. حياء المراة السودانية . ونفسها يناديها هو ..يقول ليها عايز اتكلم معاك ..
المهم بقت كل مرة تجي مارة بي عندو.. عشان توريهو انو انا هنا ههه
وهو طبعا" ماعندو معاها موضوع ..عشان يقولو ليها .. وقصة الكديس والفار دي مستمرة كم يوم ..
يوم يازول اتوكل على الله وقال ليها نسرين انا داير اتكلم معاك .. يازول البت دي اتبهدلت بهدلة .. وقلبها بقى يضرب بي سرعة الزول المنتظر يوزعو ليهو الورق في قاعة الامتحانات .. وبقت تتلخبط .. انا .. أ أ ايوة يادكتور ..
هو الضحك غلبو .. لامن خت يدو فوق خشمو ..وقبل غادي عشان ما تلاحظ ليهو ..
قش وشو كدا وصرا شوية كدا ..عشان وشو يبقى جادي وقبل عليها راجع ..
قال ليها هسي عندك شنو؟
قالت ليهو فااااضية ماعندي اي حاجة ..هه
قال ليها طيب تعالي نشرب شاي ..
نسرين دكتورة عمرها قريب من عمر مدثر . يعني يمكن اصغر بي فرق سنتين . ما اكتر . مهذبة وخجولة وملامحها جميلة ..وسمينة سمن اكتر من اللازم .. لامن تلبس البالطو ده بتبقى زي شوال السكر المتكول على الحيطة .. ويمكن دي الحاجة المنفرة منها مدثر احتمال غايتو .. وحتى زملاها الباقين مافي زول شغال بيها .. والدكاترة طبعا الغالبية فيهم عندهم ثقافة .. عالية في المسائل الصحية ومدركين مخاطر السمنة .. لكن نشوف هل هو ده السبب وللا لا .. لازم نسترق السمع ونسمع مدثر بقول ليها شنو؟ ..
مدثر الزول الخجول الليلة مقوي قلبو تب ..
قال ليها يانسرين .. قبل مانتكلم اي كلام .. هل من حقي اوصيك ؟ قالت ليهو طبعا يا دكتور مدثر ..
قال ليها والله انا بعزك شديد ..وبحترمك احترام مبالغ فيهو . والله يانسرين اعملي حسابك على صحتك .. انتي وزنك زايد بطريقة مخيفة .. والحكاية دي بتدمر ليك حياتك ..في جميع اشكالها ..
قالت ليهو انت قايل يادكتور انا مرتاحة للحكاية دي ؟ والله مضايقة نفسيا .. بس اعمل شنو؟ قدر ماحاولت غلبني ..
قال ليها بس يانوسة انتي ماعاملة حسابك .. بتاكلي اكل بلا وعا . وسكريات ونشويات .. وفي اليوم بتضربي كم بيرقر .. اليوم كلو تلوكي .. خشمك ده اصلو مابقيف .. وشنطتك دايما ملانة .. باونتي وكيت كات .. شكولاتات انواع واشكال ..
قالت ليهو والله صدقت .. ضعف مني بس .. بحس باني قدام الاكل ضعيفة ..
قال ليها .. هسي انتي لو لقيتي مريض سببو السمنة ..بتقدري تنصحيهو كيف؟
المهم دي وصيتي ليك .. لاني بعزك .. وعايز اشوف نتايج ..
قالت ليهو ان شاء الله بحاول ..
قال ليها طيب الحاجة التانية . انا عايز اسألك سؤال .. انتي حصل حكيتي لزول عن حاجة بتخص مشاعرك تجاهي انا؟
قالت ليهو .. والله بس بنتونس انا غادة .. لكن ماعارفة غادة بتكون حكت ليك ..
قال ليها بغض النظر عن حكت لي ولالا .. انحن عايزين نتكلم عن الحاجة دي وهسي ..
قالت ليهو جدا ما مشكلة ..لكن انا عايز افهم حاجة انت في حياتك في انسانة ولالا ؟ وشعورك تجاهي شنو؟
قال ليها ايوااااا .. ياهو الكلام العايزين نتكلم فيهو . والحمد لله انتي بسؤألك ده سهلتي لي المهمة جداجدا ..
انا ياستي مافي حياتي اي انسانة .. وبالنسبة ليك انتي .. انا عندي الامكانية اغش عليك .. واجرجرك او اقضي معاك وكت في الفاضي .. وفي النهاية اتخلص منك .. باي حٌجة ..اقول ليك ابوي ماراضي اتزوج من برة الاسرة . او اقول لك خاتين لي بت عمي . لكن لا انا ما ممكن اعمل كدا ابدا" .. انا يانسرين مشاعري تجاهك مشاعر اخوة وصداقة وزمالة واحترام لاغير .. واي شي جواك غير كدا مافي ليهو مقابل من ناحيتي ..
قالت ليهو بس انت ما اديت نفسك فرصة تتعرف علي .. ليه بتحكم كدا طوالي ..
قال ليها الحكاية ماحكاية فرصة .. الحكاية مجرد الرغبة في البحث عن الفرصة دي ماعندي والله .. وانا شخصيا ماعندي اي تفاكيرفي ارتباط حاليا. انا في مرحلة تأسيس حياة ..
بعدين بصراحة اي بت موقفها حساس دايما.. وزمنها غالي فانا بقترح اذا ظهرت ليك اي حاجة حكمي عقلك قبل قلبك .. الا قلبك يكون لاقي المراد .. انتي فاهماني يا دكتورة ..
نسرين دي سكتت ساي .. وقلبها دا كش كرش .. اتفقش حته حته الزول لو رخا اضانو ..ممكن يسمع صوت التحطيم جواها .. كانت المسكينة بانية امال .
بس هو بقى يقول ليها ..نسرين الله يخليك ..ماتخليني على الصراحة..
قالت ليهو بالعكس يا مدثر ..كدا انا احترمتك اكتر.. وربنا يديك العافية ياريت لو الشباب كلهم بقو زيك ..
قال ليها يلا انسي الموضوع ده وامشي على شغلك .. وتاني ماعايز زول يلاحظ عليك اي حاجة من النوع ده ..
الحاجات دي مقدرة ومكتوبة .. واي زول ربنا اختار ليهو شريك حياتو قبال مايلدوهو .. قالت ليهو خير يادكتور ..
ومشو على النهاية المؤلمة دي ..
نسرين مشت لي غادة .. غادة على العكس من نسرين رشقية ونشيطة .. ورائعة جدا اي زول يشوفها بحبها ..
اها نسرين قالت ..ليها اوووب على يا غادة من الشاكوش لامن جايب لي صداع ..
قالت ليها اصلو مابصدق .. مالك في شنو؟ .. قالك شنو الزول البارد ده ..؟
قالت ليها قال لي خوة وصداقة تصدقي ياغادة .. ؟
قالت ليها الخوخة التقلع ضروسو .. اها احكي لي بالتفصيل من البداية .. اها يازول حكت ليها من بداية كلامو الاول بتاع السمن وما السمن ..
غادة قالت ليها غايتو الرجال ديل فترنا منهم ..
تضعفي يقولو ليك ياحطبة ياناشفة .. تسمني يقولو ليك يابقرة .. والله غلبنا البنسويهو ..
نسرين قالت ليها لكن يا غادة انا الشي المتأكدة منه .. انو مدثر ده ما مشكلتو الحكاية دي .. لانو ما اداني اي فرصة في اي مباصرة ..
قالت ليها يازولة انتي موش استخرتي؟ .. قالت ليها ايوة من يوم كلمتيني..
قالت ليها لو فيهو خير ليك بجيك براهو ..ولو مافيهو خير خليهو يطير ..
قالت ليها لالا خلاص انا قنعت .. انتي ماشفتيهو بتكلم كيف .. ماعندو اي مفاهمة في الموضوع ..
اها بتكلمن كدي شافنو جاي من بعيد.. في اخر البرندة ..ماشي بي سرعة ومعلق السماعى في رقبتو ..
قالت ليها ياهو داك جا.. انا ماشة ياغادة .. وشوو دخلت اقرب عنبر جمبها ..
وبقت كدا طوالي .. هو جا هي تطلع ..هو طلع هي بتخش ..
كم يوم بالطريقة دي ..
لغاية ماغادة اتكلمت معاها قالت ليها .. كدا ماصح ..ماتعملي ليهو اي اعتبار .. خليك طبيعية واتعاملي معاهو زي المافيش ..
تاني مرة لاقتو في الممر ماشي بي سرعة على نفس العنبر ..
سلمت عليهو عادي . وهو كان منزعج .. دقيقة النشوفو هو ذاتو ماشي كدي وين؟ ..
في مراة مرقده طفلها عشرة سنوات .عندو تضخم في الكوحال وتعبان شديد .. والدكتور ده مهتم بالحالة دي شديد ..
قاليها وين الروشتة الاديتك ليها ؟ ..قالت ليهو .. والله ضربت لي خال الولد
عشان يجيب لي قروش ..قال ماعندو ..وهو زاتو زايغ من جماعة طاردنو في دين ..
قال ليها هو الوالد ده ابوهو وين؟
قالت ليهو ابوهو منفصل مني.. ومسافر قاطع اخبارو ومافي بينو وبينو اي تواصل .. والقروش حقة الموجات الصوتية مديناها من جارتي ..
قال ليها والحل .؟ الادوية مهمة شديد ..هسي الولد ده ماقادر يتنفس
وبطنو مشدودة .
غايتو مدثر ده جرى جاي ..وجرى جاي .. وهبش جيبو . وطلع القروش ولقاها بسيطة مابتسوي شي ..
وفكر يمشي لي زملاهو تاني ..بس من وين ؟ المرتب المابقعد اسبوعين .والدنيا اخر شهر ..
قام اتصل على واحد.. قال ليهو عندنا حالة بتاعة تضخم طوحال.. وانا خايف تتطور ..وتحتاج لي جراحة استئصال . كلم الشباب يرسلو لينا الدواء الفلاني والفلاني .. عسى ولعل نقدر نرجعو لحجمو الطبيعي..
لانو صراحة الناس ديل ماعندهم طريقة عملية .. وانا شايف الموت يحوم حول الولد ..
داك قال ليهو جدا بس اديني دقايق ..
الاتصل عليهم ديل شباب (شارع الحوادث) .. شباب جمعت بينهم اواصر المحبة والرحمة .. ولهم من الاعمال الجليلة ..ماتعجز عن تستطيره الاقلام ..
يجتمعون على فعل الخير.. ومساعدة المرضى المحتاجين .. ودي الحالات بالضبط البقيفو عليها .. ويحسسوك بانها حالة من اسرهم ..
والناقصة بتموها من جيوبهم .. نسال الله ربنا يبارك في ايامهم .
يجمعو حق الدواء وعشان تكون متأكد من انو تبرعك بيصل للمريض بالضبط بدوك رقم مرافق المريض ..قمة الشرف والنزاهة . عندهم صفحة في الفيس بوك ..بكتبو مناشير للخير . والناس تتشارك في صفحاتها ..و برسلو في الواتساب ..والرسالة تصل اهل الخير ..وهم في بلدي راقدين .. ديل شباب عاملين زي ملائكة الرحمة في اسعاف المريض .. وتوصيل الدواء والدم . وكلهم على شاكلة دكتور مدثر وغادة ومحمد يوسف ونوسة ..
تدخل صفحتهم بتلقاهم .. ربنا يبارك في ايامهم ..
المهم بعد ساعة بالضبط كان الدواء حاضر للطفل .. وربنا من جودو وكرمو انقذه .. وكفاهم مؤنة الاستئصال ..
طيب انا لو داير اسأل سؤال ..الشي البقومو بيهو شباب شارع الحوادث .. هو مسؤلية منو ؟
وانا متأكد ما ح ألقى اي اجابة ..
المهم .. اخونا مدثر طبيب في المستشفى.. لكن احساسو بالمرضى احساس المؤمن البحس انو المؤمنين اخوة .
والاحساس والشعور ده قسمة من رب العالمين .. والاخلاقيات في حد ذاتها قسمة ..
كل ما الواحد يقوم بي عمل جليل من اعمال الخير ..يحس بالسعادة تسري في روحو ..
الضهرية كدا مدثر والدتو و اتصلت عليه .. واتكلمت معاهو كلام .. في التلفون ..
وهو انزعج جدا جدا من الاتصال ده ..
ومشى للمدير الطبي واتكلم معاهو وكان متوتر شديد .. تقريبا اخد اذن يمشي البيت ..
وطلع طوالي الوكت ده كان زي الساعة 1 ضهر ..والظاهر دي حاجة ماساهله الخلت مدثر يقطع الشغل بالطريقة دي ويمشي البيت ..

الى اللقاء ..

[لامارا]

الحلقة 3


مدثر اتحرك بسرعة ومشى البيت . هم ساكنين في شمبات الاراضي .. في الجيهة القريبة من شارع الانقاذ .
بيتهم من طابقين .. وفاتح جنوب .. والبيت مستحتو كبيرة .. وكل واحد منهم هو واخوانو الاتنين المامتزوجين .. عندو غرفة . خاصة بيهو .. اخوانه الاكبر منو الاتنين متزوجين .. وفي الطابق الارضي في صالة كبيرة لاستقبال الضيوف ..
بعد وصل البيت .. امه قالت ليهو تعال يامدثر شوف اختك دي.. والله البت دي يوم ح تكتلني بالمغايس .
اخته رحاب . متزوجة قبل شهور . ومشاكلها كتيرة مع نسابتها وزوجها .. وهسي جاية بي مشكلة .. وامه عايزاهو يحل المشكلة دي ..قبل ابوهو يجي من السوق . لانو ابوهو زول صعب شديد ..ومابتفاهم يعني لو جا الموضوع ببوظ ..
اها الحاصل شنو يا امي .. قالت ليهو رحاب جاتني من الصباح..
وقالت لي انا عايزة محمود يطلقني .. وتاني ماراجعة ليهو كلو كلو .. وعايزة تضرب لابوها.. وانت عارف ابوها مابحل الامور.. بالعكس بزيدها تعقيد ..
قال ليها .. غايتو يا امي !!! ..هسي ضربتي لي وقلتي لي تعال شوف المصيبة دي.. وابيتي تقولي لي في شنو؟
وانا قطعت شغلي ..وجيت جاري.. قلبي مقطوع قلت في كارثة .
يعني قصة رحاب مابتقدري تحليها ؟؟
.. والله انا ماعارف رحاب دي مدلعنها كدا فوق شنو؟
يا امي البت دي وريها العين الحمراء ..مش كل يومين تلاتة تجي جارية تقول عايزة محمود يطلقني .. وبعد يومين تقعدهن في البيت.. تقول محمود ده ماضرب لي مالو؟
هسي هي وينها .. قالت ليهو جوة في الاوضه حقتها ..
دخل عليها عليها ..قال ليها في شنو يارحاب ؟
قالت ليهو انا يامدثر تاني ما عايزة امشي لمحمود .. تتخيل يامدثر محمود بخوني .. ؟؟
قال ليها استغفر الله العظيم !! يابت ده كلام كبير شديد ؟
انتي عارفة الكلمة دي يعني شنو؟
قالت ليهو في بت شغالة معاهو في الوكالة .. وكل مرة تضرب ليهو ويضرب ليها؟
قال ليها طيب دي خيانة؟
قالت ليهو يتكلم معاها كتير .. ومرات كلام برة الشغل . وانا سمعتو كم مرة ..
قال ليها برة الشغل زي شنو مثلا ؟
قالت ليهو يوم بتتكلم معاهو عن امها.. يوم عن صاحبتها ..هسي ديل تبع الشغل ؟
انا ماعايزة كدا .. ده راجل خاين وانا ماعايزاهو ..
قال ليها خلاص انا بصل معاك على اتفاق.. انتي عايزاهو يطلقك.. وتاني ماحتتراجعي من الموضوع ده اصلا؟ متأكدة ؟
قالن ليهو ايوة متأكدة ..
قال ليها خلاص انا بمشي اقنعو ..يجيب ليك الورقة براهو.. ولو ماجابها بسجنو عديل ..
بس شرطي معاك ..مافي زول من ناس البيت يعرف المشكلة دي غير امي .. ولا تكلمي ابوي .. انا عايز محمود يطلقك براهو.. عشان بعد الطلاق ناس ابوي مايقولو ليك طلقتيهو براك .. كدا موش حلو؟
قالت ليهو لالا ..
انا عايزة اطلقو براي .. عشان يحس بالاهانة .
قال ليها يابت اسمعي الكلام ماتخليني افقد اعصابي ..
قالت ليهو خلاص كويس .. امشي اقنعو .. المهم انا ماعايزاهو وخلاص انتهينا .. قال ليها .. الليلة عندي شعل بكلمو بكرة.. بس لو كلمتي ابوي انا بكون ماكويس معاك ..
طلع معاها واتفقو مع امهم انها . ماتحكي حاجة للوالد ..ورحاب تقول جيت ساي ونحن كويسين ..
طبعا دي فكرة خطيرة ..زي ما ملاحظين . البت زعلانة ونارها مولعة ..وزي ماقال بعد يومين بتقول ليه محمود ماضرب لي؟ ..
يعني اصلا المشكلة بين الراجل والمرة .. ما بتستمر اكتر من يومين ..
الا تتدخل اطراف خارجية ..
خصوصا اذا كان بينهم محبة عميقة .. لان الله جعل المودة والرحمة بين الازواج وده اعجاز الهي .
يعني اي مشكلة بين الراجل والمراة.. ادوها يومين وما تتكلمو عنها ولاتتدخلو فيها نهائي .. براهم بحلوها الاتنين وبرجعو لي بعض .. ..
لكن كدي نششوف الفكرة دي بتنفع مع رحاب المدلعة دي ولالا؟.. طبعا رحاب عمرها ما زايد فوق 19 سنة .. وهي طبعا البنت الوحيدة في البيت .. واصغر منها في ولد واحد اسمو المغيرة .
وطبعا البت الوحيدة امها بتعاملها زي الرضيعة حتى بعد العرس .. وده كتير ببوظ البنات وبخليهن لتايخ ساي ..
اها يازول .. مثر مشى المستشفى وكمل الوردية بتاعتو لغاية تاني يوم . وجا راجع البيت زي وكت الفطور كدا .. وسأل امو من رحاب . امو قالت ليهو لغاية هسي زعلانة .. وراجلها بتصل عليها بتقفل التلفون في وشو ..
المرة دي مدثر مادخل عليها .. بعد فطر مع الوالدة مشى ركب طوالي . مشى لي محمود في الخرطوم .. محمود عندو وكالة سفر .. مدثر مشى ليهو بدون مايتصل عليهو تلفون ..
شكلو عايز يباغتو ويكتشف الامور بي نفسو ..
اها يازول وصل .. ولقى محمود قاعد براااهو .. وسلامات وتحيات وشاي وكدا . قال ليهو الحاصل شنو يامحمود؟ . يامحمود انت زول واعي . مالك ماقادر تستوعب طبع الحريم؟ ..
قال ليهو والله يامدثر انا ماعملت اي حاجة .. بس رحاب عندها حساسية مع البت الشغالة معانا دي .. وكل يوم بتنقنق فيها .. وعايزاني اطردها من الشغل .. ومفتكرة انا بيني وبينها في حاجة .. لكن والله الا علاقة الشغل..
بعدين انا لو عندي معاها حاجة.. ماكان اتزوجت رحاب من اساسو.. لانو رفيدة شغالة معاي من قبل ما اتعرف على رحاب ..
وانا والله بحب زوجتي .. ورفيدة ذاتها عارفة كدا ..
لكن والله رحاب كرهتني البيت .. طوااالي ماسكة موضوع رفيدة ده لبانة في خشمها ..
قال ليهو طيب يامحمود .هي اصلا شافت رفيدة وين؟
قال ليهو دايما رحاب بتجي هنا بدون سابق انذار .. يعني انا بخليها في البيت .. اصل هنا بعدي بي ساعة يتجي ناطة لي ..
والويل لي . لو لقتني بتكلم مع رفيدة في اي موضوع ..
قال ليهو والله يا محمود انا ماعارف انت شنو؟ .. لكن البتعمل فيهو رحاب ده كلو زيادة ريدة .. عشان كدا لازم تستحملها ..
وهسي رفيدة ذاتها وين؟ شايفك براك .. قال ليهو رفيدة ومحمد مشو السفارة ..
قال ليهو محمد منو؟ ..
قال ليهو الزول التاني الشغال معاي ..
مدثر هز راسو كدا وقال ليهو خلاص بس انا جيت اوصيك وصية صغيرة .. كلم رفيدة دي .. قول ليها تاني لمن اكون في البيت ماتتصلي علي لاي موضوع ..
قال ليهو والله يا مدثر .. بس كان في مشكلة بين ابو رفيدة وامها .. وسببها صاحبة رفيدة ذاتها .. وانا كنت وسيط ..
عشان كدا بتضطر تتصل علي .. وكت المستجدات ..
لكن يازول انا بكلمها تاني ماتتصل .. لاني والله ماعايز افقد رحاب باي تمن ..
قال ليهو انت عارف يامحمود.. لو ابوي سمع بالحكايات دي .. بصوطها ليكم فوق تحت .. ده ابوي وانا بعرفو .. تاني بحلف عليها بالطلاق ماترجع ليك ..
قبل ما يطلع مدثر من محمود .. رفيدة ومحمد جو داخلين .. دكتور مدثر اول مرة يشوف رفيدة .. والبت فعلا عبارة عن خلعة .. زي غزال النتيلة ..
بس من وقعت في عينو . حس بي موية صاااقطه انكبت ليهو فوق راسو .. وبراحة قال.. والله رحاب اختي ليها الحق الغيرة تطيرها من بيتها ..
دخلو وسلمو عليهو .. وبدت البت تتكلم مع محمود .. ومدثر مقهي فيها.
ومحمود يعاين ليهو بي طرف عينو ..
مدثر بعد ما كان داير يطلع .. زحا في الكنبة لي ورا .. وصلح قعدو واتمهل تب .. ههه.. حيلو مات كلو كلو ..
اول مرة في حياتو .. دواخلو تتحرك بالطريقة دي .. وتكتمل عندو صورة البت البتمناها في حياتو ..
ومحمود بقى مركز معاهو .. وهو عايز يخفي شعورو باي طريقة عشان مافي زول يلاحظ حاجة ..
محمود بدا يعرف فيهم ..ده محمد .. ودي رفيدة .. الحكيت ليك بيهم قبل شوية يادكتور ..
وده دكتور مدثر .. صديقي ونسيبي .. ههه .. ممكن تقولو نسيبي قبل صديقي .. شقيق زوجتي رحاب ..
ودكتور في مستشفى بحري .
رفيدة قالت ليهو اتشرفنا يادكتور.. تسلم ..
طبعا رفيدة عارفة اسرة رحاب كويس ..
المهم قعدو كلهم في الكنبات بتاعة الاستقبال في الوكالة ..
ومحمود قال لي محمد .. عليك الله يامحمد كلم البت البرة دي.. تجيب لينا قهوة .. قهوة معاك كيف يادكتور ؟
مدثر قال ليهو جدا ياريت.. مع انو كرهتو في الدنيا القهوة.. زول شاي ساااي ..
رفيدة بعد قعدت وركزت في دكتور مدثر .. اتاكدت بما لايدع مجالا للشك .. انو الدكتور ده دواخلو طاجت فيها بالاعجاب والدهشة .. من خلال نظراتو وحركاتو.. ويدعك في يديهو .. ويطقطق في اصابعيهو .. وكل مرة يغفل الناس ويسرق منها نظرة ..
رفيدة قالت ليهو كيف يادكتور مدثر الاحوال عندكم في المستشفى ؟؟
ان شاء الله الاحوال اتصلحت .. شايفاكم عاملين جوطة .. ومقالات في الجرايد ..
قال ليها والله فعلا .. الظلم الحاصل علينا نحن لاحكى ولا بقى .. لكن نصبر . ونضحي عشان اهلنا ..
الناس يارفيدة في بلاد برة الواحد بصرف على اولادو في التعليم عشان يشتغلو ويعوضوه ..
لكن نحن هنا اهلنا يصرفو علينا دم قلوبهم .. وبرضو في النهاية نتخرج .. وما نجيب ليهم حاجة تعوضهم .. يا اما عطالة . او وظايف احسن منها تبيع فول وطعمية .. عشان كدا كل الكوادر هجرت البلد .. ربنا يصلح الحال ..
قالت ليهو أسالني انا من الهجيج والهجرة .. والله الزول يقول بعد شهر مايفضل زول في البلد دي.. من كترة الناس المارقة ..
والمؤسسات الخدمية بدت تشعر بالخطر .. هل تعلم يادكتور حتى الناس العطالة ماعندهم رغبة يشتغلو في البلد دي .. خيارهم الاول السفر .. بالجد والله .. لانو الوظيفة والعطالة مافي بينهم فرق كبير ..
قال ليها فعلا اي زول قاعد . بكون قاعد مجبور .بسبب ما او بأخر ..
المهم ياجماعة النقاش كان نقاش عالي المستوى .. ومحمد ومحمود بس فاتحين خشومهم ويعاينو .. والبت طلعت مثقفة ومقرمة ..
ودي نقطة الضعف التانية عند دكتور مدثر .. بحب البنات المثقفات جدا ..
مدثر اخد قعدته معاهم .. وكل خمسة دقايق كانت بتزرع جواهو حاجة جميلة من البت دي ..
بس ما معروف البت دي منو؟ .. واهلها من وين؟ .. ووضعهم شنو؟ .. وهل ممكن اهلها يقبلوني؟ .. وهل ممكن اهلي يقبلوها ؟ .. وهل ممكن .. ؟؟ وهل ممكن ؟؟
مستقبل مجهول ..انتو قادرين تحسو بالحاصل ؟


الى اللقاء ..

[لامارا]

الحلقة 4

رجع مدثر.. بي حالة غير الحالة المشى بيها لي محمود .. في الشارع اتصل على محمود .
مدثر: كيفك يامحمود ؟
محمود : هلا بالدكتور .. اتفضل مع اني عارفك داير تقول شنو..
مدثر: انا عايز اقول ليك .. الليلة ماتتصل على رحاب .. لغاية بكرة زي الوكت ده ..
محمود: ليه لكن؟؟ انا مابقدر انقطع منها قدر ده ..
مدثر : انا عندي فكرة معينة.. بس انت اعمل زي مابقول ليك ..
محمود: جدا انا بثق في افكارك جدا ماف كلام ..
لكن يادكتور قول لي عليك الله .رايك في رفيدة شنو؟ عليك البت دي مش ممتازة؟ شفت الادب والتهذيب والفهم ..
مدثر : والله زولة ممتازة جدا .. هسي انا قاعد افكر .. قلت ياربي ليه البت دي .. محمود ما ارتبط بيها ليه؟ مادام انو بعرفها قبل رحاب ..
لازم تكون مخطوبة موش كدا؟ ..
محمود: على حسب علمي لامخطوبة ولاحاجة .. بس بالنسبة لي انا القلب ومايريد .. انا قلبي مافي يدي ..
انا اصلا ما حصل قلبي اتحرك تجاها.. بحس بيها اخت بس .. وبالنسبة لي علاقاتها هي انسانة كتومة شديد .. ماعارف تفاصيل عن حياتها الخاصة ..
بس بصراحة يا دكتور .. انا لاحظت ليك اهتميت بيها شديد ..
مدثر : والله يامحمود البت ممتازة ومثقفة وفاهمة جدا .. عقلها اكبر من عمرها ..
المهم هسي موضوعنا عايزك تتصرف زي ماقلت ليك.. بالنسبة لي رحاب ..
محمود : جدا جدا .. الله يكرمك يادكتور ..
مدثر : .. الله يبارك فيك تسلم ..
وانتهت المكالمة ..
اها لمن وصل البيت قال لي امه .. ان شاء الله المسألة انحلت .. قالت ليهو الحصل شنو؟ اها يا مدثر فعلا الولد ده بلعب على حبلين؟؟
قال ليها حبلين شنو يا امي؟؟ بتك دي هبلة ساي .. اصبري انا بحكي ليك بعدين .. هسي انا داير اسألك .. ابوي قال شنو معاها؟ .. سألها؟؟ ..
امو قالت ليهو انا ما اديتو فرصة يسأل.. طوالي قلت ليهو رحاب جاية تعدي ليها معانا يومين تلاتة ..
اها يازول مدثر دخل على اختو جوة لقاها نايمة ..
صحاها .. وقال ليها كمان نايمة وانتي ح يطلقوك؟ .. والله ياحليلك.. بعد ماكنتي اسمك المدام والعروس.. تاني الجيران يقولو البت المطلقة البي جاي دي ..
قالت ليهو اها الحصل شنو.. ومحمود قال ليك شنو ؟
كلامي طلع صاح ولا لا ..
قال ليها انا غايتو شايف غير الانتي شايفاهو .. البت الاسمها رفيدة دي .. ماعندها علاقة باي زول لا راجلك ولاغيرو ..
لكن انا العلي عملتو .. وكلمتو وهددتو انو يطلقك بدون مشاكل.. وهو المسكين .. حالتو بقت صعبة خلاص واتجرس .. وشكلو بقى زي العيان .. لكن في النهاية انا ضغطا عليهو شديد ..
وهسي بكرة حيرسل ليك الورقة .. ويطلقك .. وتاني نتفك من المشكلة دي ..
لكن يا رحاب انا كنت عايزك في خدمة.. بس بعد يطلقوك مابتقدري تخدميني فيها .. ودي الحسرة هنا ..
قالت ليهو خدمة شنو؟
قال ليها بصراحة انا شفت رفيدة وعجبتني شديد.. كنت عايزك تتقربي منها وتشوفيها لي .. وتتعرفي عليها وتعرفي لي عنها كل شي ..
لاني سألت محمود وقال مابعرف عنها غير الشغل وبس ..
قالت ليهو وانت قلت لي محمود كدا ؟
يعني معناها انت اتاكدت انو محمود ماعندو معاها حاجة ..
مدثر قال ليهو تأكيد قطع شك كمان ..
قالت ليهو طيب ليه قلت ليهو يطلقني .. كان تحل الموضوع براحة ..
قال ليها مافرقت هسي بضرب ليهو يغير رايو.. هو بقى صاحبي شديد .. انتي عارفة كدا ..
قالت ليهو لالا خليهو بضرب ليهو براهو ..
عاين ليها كدا وابتسم وقال .. والله انتن امركن هين خلاص ..
رحاب سكتت مسافة وقالت ليهو .. والله رفيدة بالجد عسل .. وانا بوعدك اظبط ليك امورك.. معاها زي الماحصل شي ..
خلاص اطلع انا عايزة اضرب لي محمود ..
قال ليها بس الكلام ده بيني وبينك .. وماعايز ناس البيت يعرفو حاجة .. لغاية مانشوف نهايتو شنو.
قالت ليهو جداجدا حاضر .. بس انت هسي اطلع لي سريع .. محمود بكون متضايق شديد.. خليني اتصل عليهو .. وماسكة الموبايل بيديها الاتنين ..
قام طوالي طلع وخلاها ..
طلع بشر الوالدة .. والامور مشت والمساء جا محمود وساقها البيت وانتهينا من القصة دي ..
والحياة دورت عادي . والورديات في المستشفى كما هي عليه .. والمعاناه تتجدد .. والموت يخطف الفقراء من بين الاطباء .. كالنسر الجائع .. والحاجات البتحصل قدام مدثر تقطع القلب ..
لكن ده برضو ماينفي انو الاطباء ديل عندهم مشاعر زيهم وزي باقي البشر .. وبحبو وبشتاقو وبيغرمو ..
صاح البشوف الدكاترة ديل .. يقول ماعندهم حكاية الريدة والغرام لكن (ياما تحت البالطو دنيا من ألوان المشاعر .. )
في يوم من ايام الله السبعة .. مدثر لاحظ لي محمد يوسف صاحبو وزميلو .. متوتر وماعلى بعضو ..
ومرتين سألو قال ليهو يا محمد احكي لي امكن اقدر اساعدك .. قال ليهو انت الوحيد المابتقدر تساعدني .. انت زول مجرد من الاحاسيس والمشاعر .. وانا الحاصل على داير زول يقدر يحس .. انت زول جاف من جوة .. ياريتني لو كنت زيك ..
لكن بحكي ليك اشوفك بنقدر تعمل حاجة ..
طبعا انا مرتبط وجدانيا بي البت غادة .. لكن ماحصل فاتحتها في موضوع .. بس انا حاسي بي مشاعرها وهي حاسة بي .. وماقادرين نصارح بعض بالموضوع .. كل واحد فينا عامل رايح ..
المهم شفت تتذكر يومك الانت الوصلت احساسك لي نوسة .. من اليوم داك وغادة متغيرة مني .. وبتتكلم معاي بي قرفة .. حتى في السلام تسلم على زي المجبورة .
انا قلت احتمال عايز توازر نوسة.. وتقيف معاها .. لكن ده كلام ما منطقي صح ..
مدثر قال ليهو صح ما منطقي .. طيب انت ابقى راجل.. وامشي واجها واسألها .. عشان تبقى على بينة .. دي موش وصيتك لي ؟
محمديوسف قال ليهو والله وصيتك.. لكن انا صعبة علي ياخي.. بستحي منها عديل .. بعدين مافي بيني وبينها موضوع اصلا .. يعني اقول ليها شنو؟ انت عارف كل البينا كان صداقة وبس ..
مدثر قال ليهو انا عندي ليك فكرة خطيرة ..
ماعندك حل الا نوسة شوف نوسة .. بتديك كل التفاصيل .. وتعكس ليك الصورة الكاملة عشان ما تتجهجه ساي ..
قال ليهو اي والله ..ده كلام زي الفل .. انا الحكاية دي والله كانت فايتة علي .. بعدين انا بكلم نوسة عديل.. واقول ليها الزولة دي انا باقي عليها .. واخليها تسألها لي من بعيد لابعيد .. ولا رايك شنو؟
مدثر قال ليهو صاح.. لكن عارف يامحمد .. انا في راي في كلام البت دي بتسوي كدي مخصوص عشان انت تسألها وتبدى معاها موضوع .. ياخي بتكون ملت من صداقتك الفارغة دي .. هي ذاتها بتكون عملت كدي دايرة تكون علي بينة من امرها..
محمد ده ابتهج شديد من الكلام الجميل ده.. وقال ليهو ياريت يامدثر ..
اها يازول زي ما اتفقو محمد لقى فرصة في نوسة وقال ليها ..
طبعا يانوسه انتي عارفة علاقتي بي غادة.. واعجابي الشديد بيها .. ومتمسك بيها جدا .. وكل المانعني اني افاتحها في موضوع .. هو ظروفي الانتي عارفاها ..
بس تتخيلي .. ؟؟ اخيرا فكرت اني اتكلم معاها بي صراحة .. اها قامت فاجأتني بي معاملة غريبة جدا جدا .. وبقت تتعامل معاي بي برود غريب .. يعني زمان كنت لمن الاقيها تتكلم معاي بي لهفة واعجاب واهتمام..
هسي الكلام كلو اتلاشى بطريقة غريبة .. وبعدين الغريبة يعني بتتكلم معاي عادي ..ولامقاطعاني ولا محارباني ..
يعني ما في سبب بخليني امشي اقول ليها انتي مالك ؟
انا عايزك انتي تنصحيني .. دي صحبتك وانتي عارفاها وعارفة الجواها .. يعني انا ماعايزك تحكي لي الاسرار البينكم .. بس وريني انا موقفي شنو في حياة غادة ..
نوسة قالت ليهو لو عايز نصيحتي .. غادة دي شيلا من راسك .. واسمع كلامي .. وقول نوسة نصحتني .. ودي نصيحة لله ..
وبصراحة شديدة انا ممكن اديك ســر.. بس تكون قدر الثقة .. عارف يامحمد .. تتذكر يوم انا ومدثر خلينا بعض . غادة قالت لي كلام غريب ..
قالت لي عارفة يا نوسة .. انا والله مافي راجل مالي عيني وبتمناهو زي مدثر .. لكن لمن لقيتك انتي محتوياهو .. بقيت بعيدة .. لانك صاحبتي .. وبحاول بظهر للناس قوة علاقتي بي محمد يوسف ..
طبعا محم يوسف ده اتخلع لامن داير يقع على قفاه ..
والله قرب يبكي ..
ولسع الدكتورة السمينة شغالة بتتكلم ......... قالت ليهو
يعني باختصار يا محمد يا اخوي .. في حاجة كدا عما قريب بتظهر بين غادة .. والمحروس دكتور مدثر .. بس انت اعمل نايم واتفرج ..
قال ليها طيب سؤال مهم جدا بالنسبة لي ..ممكن تجاوبيني عليهو؟
قالت ليهو اتفضل ..
قال ليها دكتور مدثر عندو خبر بي التطورات الاخيرة دي؟
يعني عارف مشاعرها دي .. ؟؟
قالت ليهو .. والله ماعارفة ... لكن صراحة اعتقد انهم متفاهمين ومتفقين عديل ... لانو البت دي حالتها متأخرة شديد ..
قال ليها كان كدا . يبقى مدثر زول خسيس ومابستحق الرحمة ..
ومدثر المسكين ماجايب خبر للبحصل ده كلو .. وقلبو راكن في وكالة سفر في الخرطوم ..

الى اللقاء ...

[لامارا]

الحلقة 5


الليلة يمكن تلاتة ايام من مدثر شاف رفيدة بتاعة الوكالة وبقى يشوفها في في حيالو كل حتة .. في الشارع في الليل والنجوم .. في الفرحة والنيل والقمر ..
وكل يوم يدور يتصل على رحاب مابقدر ..
لكن رحاب بي غادي عاملة عمايل .. طبعا ح احكي ليكم من اول يوم رجعت مع محمود راجلها.. لقاها متغيرة تغيير شديد .. وقابلتو بي كل لهفة .. ركبت معاهو في عربيتو الكلك الرمادية .. كانت مبسوطة وفرحانة . ومحمود ماعارف البت دي سبب البسط ده شنو ؟
والحاصل .. اها قامت قالت ليهو .. انا تاني يامحمود ما ح أتناقش معاك في قصة رفيدة نهائي .. لاني ماكنت مصدقاك.. لكن بعد مدثر جاك .. واتاكد من براءتك .. واكد لي .. انا قررت اصاحب رفيدة رايك شنو؟
قال ليها ايواااااا .. انا يادوب كدا فهمت .. والله انا فهمي طلع تقيل اليومين ديل .. مرحب بيك .. الاخت رحاب .. ياواسطة الخير بين رفيدة ومدثر ..
طوالي فقعتها ضحكة .. وقالت ليها غايتو انت اصلو مابتفوت عليك حاجة .. يعني انت ناقش الفيلم ..
طيب عليك الله يامحمود .. اموت ليك تساعدني في الموضوع ده.. انت مادام عارف رفيدة .. ومتأكد من اخلاقها انا مطمئنة لانها شكلا انسانة عسل جد,,
قال ليها خلاص يا رحاب.. انا بكرة بوديك ليها في البيت . من العصر
لغاية بالليل.. كملي معاها كلامك كلو .. وشوفي واتعرفي عليها تمام.. واتكلمي معاها ..
انا بكلمها بكرة لمن تجي واخليها تطلع على البيت بدري . وبجيك اوديك ليها كدا حلو؟
قالت ليهو انت تسلم لي ..
وفعلا التخطيط تم كما هو مرسوم له ..
يلا في الوكالة محمود رسل محمد على جيهة كدا ما معروفة .. ونادى رفيدة .. قال ليها .. اسمعي اخيرا ربنا ح يفتح عليك .. يفتح راسك ..
قالت ليهو في شنو؟
قال ليها الدكتور مدثر رايك فيهو شنو؟ قال دايرك ..
قالت ليهو تتخيل انا ذاتي من اول يوم كشفتو.. لقيتو مكسر كسيرة عدوك .. ياخي ده بقى يرجف زي القصبة .. قال ليها انا ذاتي لاحظت ليهو .. بس ابيت اقول ليك .. عشان ماتقولي محمود متابعني .
بعدين هو ذاتو سألني منك في نفس اليوم .. وابيت اديهو اي تفاصيل من حياتك .. وعلاقتك بي عقيل . وفكرت براي .. قلت اديك فرصة تفكري انتي .. يمكن تختاري مدثر .. وتسيبي الوهم الاسمو عقيل .. لانو والله لو حكمتي عقلك .. احسن ليك مدثر بالف مرة .. ياخي عقيل تافه .. وفلسان .. واهلو مقطعين ..
لكن عايني ده .. دكتور ومهذب . واهلو عندهم قروش النار ماتاكلها ..
غايتو انا لو في محلك مابتردد ..
قالت ليهو انت يا محمود مابتعرف الحب؟؟ .. انا بحب عقيل .. وماقادرة اتخلص منو .. انا لو قادرة اتخلص من عقيل كان زماااان فارقتو .. لانو مابتناسب معاي.. ياخي ده زول حقير خلاص.. لكن اعمل شنو انا ما قادرة اتأقلم مع اي راجل غيرو ..
لكن اقول ليك حاجة ابتدأء" انت اديهو موافقتي .. قال ليها لالا .. تدي الموافقة انتي براك .. بطريقتك ..
الليلة رحاب حتجيك في البيت .. بجيبها ليكم برااي . وحتفتح معاك الموضوع .. وانا بنصحك .. ما تفوتي الفرصة بتجي مرة واحدة في العمر .. قالت ليهو ابشر يازول ..
قال ليها خلاص انتي الليلة اطلعي من الساعة 2 عشان تجهزي روحك .. لاستقبال الضيفة وحماتك المستقبلية ..
ولمن جات الساعة 2 .. رفيدة جاها صداع من كترة التفكير . طلعت طوالي اول حاجة غشت صاحبتها.. واحدة مقرمة كدا اسمها لبنى . ولبني دي مسلطة وشوارعية جدا" .. وعندها تفاكير ابليسية وبراكم بتشوفو ..
المهم لبنى ساكنة في ناصر .. ورفيدة من بنات السلمة الخرطوم . يازول اتصلت علي لبنى.. وقالت ليها انتظريني في البيت انا عاوزاك في موضوع.. ماينفع في التلفون .. نزلت ليها في ناصر وقالت لي لبني فضي لي روحك.. انا عايزاك في حاجة ضرورية شديد ..
وقعدت حكت ليها ..
قالت ليها انا يا لبنى اتقدم لي دكتور.. اخو رحاب زوجة محمود الانا شغالة معاهو .. واهلو ناس مقرشين مبالغة .. وهو زول مهذب .
لكن والله انا ماقادرة اتخلى عن عقيل.. انتي عارفة بحبو قدر شنو؟
لازم تشوفي لي حل ..
قالت ليها يابت الحب اولا" . اوعك تخلي الزول البتحبيهو عشان القروش .. القروش تطير والدكتور يطير ..
قالت ليها لكن يالبنى .. عقيل لسه طريقو طويل .. وراكب جوكي من كريز لي كريز.. ومن هايس لي هايس .. شغل ثابت ساي ماعندو
وانتي عارفة العمر ماشي .. وانا خايفة من البورة يابت ..
لبنى سكتت ساي .. وقالت ليها طيب في فكرة خطيرة .. بس الاهبل الاسمو عقيل ده مايعرفها ..
انتي تقبلي بي الدكتور .. وتستمري معاهو.. وتتخطبي خطوبة رسمية .. بعداك تسفيهو سف الغنماية للدقيق .. وتصلحي وضعك تمام .. وتفكيهو عكس الهواء.. وكدا تكوني ظبطتي امورك .. وامور عقيل بتاعك ده ..
قالت ليها طيب .. لو عقيل سمع باني اتخطبت لزول بسوط الدنيا .. انا عارفاهو .. قالت ليها لو كشف الموضوع احكي ليهو فكرتك.. اصلو مابعارض ما دام انتي ما حتتخلي عنو ..
قالت ليها والله بس كدا صعب .. وانتي عارفاني انا بخاف قالت ليها يابت تخافي من شنو؟ انتي حتسرقي؟
هو براهو حيجيب ليك حاجاتك .. ويصرف عليك صرف الهبل .. وبعد داك تفسخي الخطوبة براحة في شنو يعني .؟
على الاقل تكوني كونتي نفسك.. وجهزتي لي عرسك .. بي فلاحتك وشطارتك ..
قالت ليها يازولة انا موافقة .. بس انتي تقيفي معاي ..
لبنى قالت ليها والله مايقيف معاك الا انا .. موش بستفيد من وراك .. ولا بتبخلي علي؟
رفيدة قالت ليها .. حبيبتي انتي .. دمي ليك ..
المهم يازول اخوات ابليس الاتنين .. اتفقن على انو رفيدة توافق على دكتور مدثر بقصد السف ..
وركبت مشت معاها السلمة .. عشان ينتظرو رحاب تجي ويدوها الموافقة .. وطول الطريق يتوسوسن ويخططن ويرتبن في الكلام .. المفروض يقولنه ..
اها العصر زي الساعة خمسة .. محمود مشى جاب رحاب زوجته ..
وجابها ليهم في البيت في السلمة .. ونزل معاها .. وقال ليهم انا عندي مشوار الكلاكلة .. بجي بعد العشاء اخدو راحتكم .. بعدين بجي اسوقك يا رحاب .. وودعهم وفات ..
رحاب عاينت للبيت بتاع ناس رفيدة .. فرق المشرق والمغرب من بيتهم .. اول حاجة الحوش عالي.. ومحوش بي حجارة غريبة كدا من برة ومجلطة بي اسمنتي شكلو مبنى في مجرى سيل ولا حاجة ..
والبيت فيهو غرفتين بس.. فاتحات شمال في حوش .. وفي الناحية الشرقية مطبخ وراكوبة بي شوالات ..
يعني ناس فقراء لدرجة العدم .. ابوها مافي .. في امها واختها واحدة مطلقة عندها طفلين .. واخوها عمر 20 سنة ..
رفيده وخالها في السعودية هم المحركين الحياة في البيت ده .. هي طبعا" بي شغلها في الوكالة .. وخالها كل شهر برسل ليهم من السعودية .. والحال ماشي بي يالطيف ..
الاخت المطلقة نقناقة وكلامها كتير.. وتداعي في اولادها قدام رحاب ولبنى .. ربي يغتس حجركم يا اولاد الراجل الفقر ..
المهم يازول طلعن السراير برة في الحوش .. وختن الطرابيز . وبدن يتونسن الونسة العادية ..
والرجال وما الرجال والحياة الزوجية .. وعرجو على حكاية الطلاقات ..
رحاب قالت ليهم .. والله انا كل مرة بقول لي محمود طلقني.. لكن هو بالو واسع .. بس بقول لي بطلقك باكر .. وانا باكر اقول ليه انا اسفة ..
اخت رفيدة المطلقة .. قالت ليها اريتك كان لميتي في طليقي ده .. شدة ماهو راجل فقري وشوم.. يقول ليك انتي مالك مابتقولي طلقوني زي الحريم؟؟ ههههه
والله تقولي لي طلقني احتمال يزغرد .. غايتو متنصل من المسؤلية بي شكل غريب خلاص ..
اها في ونستن دي جا ابو رفيدة داخل يطوطح .. راجل شايب .. وشعرو كتير كدا . وتفة اظنو تلاتة يوم مادخل ليهو فيها مشط .. ولابس جلابية رهيفة وتحتها نكس ينشاف من فوق للجلابية .. وشكلو بتاع سجارة .. غايتو شكلو مربك جدا" هه ..
باختصار بصورة عامة .. البيت ده وضعو عجيب وغريب ..
ومافي اي توافق بينو وبين بيت ناس عباس ابو مدثر .. ورحاب قالت براحة كدا في سرها .. بري يا يمة .. الناس ديل ابوي مابوافق بيهم ..
البشوف رفيدة في الوكالة لابسة نضيف .. وتتقدل زي المضيفة.. يقول الله يوريني بيتهم .. غايتو الدنيا دي فيها جنس عجايب ..
المهم قالت وانا مالي؟؟ انفذ الموضوع الجيت ليهو.. بعدين مدثر يجي يشوف بي عينو ..ويتصرف بي طريقتو .. كان نفعو معاهو يواصل .. وكان غلبو يختاهم بطريقتو ..
اها بعد شربن الشاي .قالت ليها انا عايزاك في كلام يا رفيدة .. قالت ليها اتفضلي يارفيدة تعالي معاي بيجاي ..
بيغادي في الناحية الجنوبية للبيت .. في زي حوش في شكل زقاق بي ضهر الغرف ..
وفي سرير مختوت بدون لحاف.. قعدن فيهو اظنو ده السرير الببيت فيهو ابوها ..
بدن الكلام .. قالت ليها رفيدة انتي طبعا شوفتي مدثر اخوي .. قالت ليها ايوة شفتو طبعا "
قالت ليها مدثر اخوي ده معجب بيك شديد يارفيدة ..
قالت ليها مدثر الدكتور العسل ..؟؟ والله بصراحة انا ذاتي اتكسرت فيهو هههه.. لكن وين لينا انتو ناس العلالي .. ونحن وين وانتو وين؟
قالت ليها ليه يا رفيدة؟ .. الحياة ارزاق واقسام . وهو مدثر اساسا ما دام مقنع بيك .. الفوارق الاجتماعية دي مابشتغل بيها.. المهم الناس تتوافق ولا شنو؟
قالت ليها فعلا كلامك صح.. البشوف دلعك وغنجك يارحاب .. يقول مابتعرفي تتكلمي .. لكن انتي ماشاء الله عليك ..
قالت ليها هوي يارفيدة.. انتي ماتشوفيني كدا.. والله اودي الزول البحر واجيبو عطشان .. قالت ليها فعلا.. انا هسي عطشتيني ..
ورحاب ماعارفة انو ىفيدة ناوية تعطش الاسرة كلها هه

الى اللقاء ..

[لامارا]

الحلقة 6


زي الساعة عشرة كدا ، محمود راجل رحاب جا .. ودق البوري .. رفيدة قالت لي لبنى، لبنى انتي اركبي معاهم ، عشان يوصلوك في دربهم .. المهم ركبت معاهم .. وفي الشارع بتونسو .. نطت لبنى قالت ،، عليك الله شوف الراجل المابخجل ده ، هسي دي صورة يجي داخل بيها قدام الحريم .؟
محمود قال ليها بتتكلمو عن منو يالبنى ؟
قالت ليهو مالو ابو رفيدة المسطول ده؟ .. أسال رحاب ، قول ليها جا داخل كيف ..
رحاب قالت ليهو مبالغة ، منظر بخجل .. المصيبة انو جا داخل من الشارع بالصورة دي ..
محمود قال ليها اها يالبنى ، موضوع زوبا معاهو كيف ؟ ان شاء الله الاشكالية اتحلت ، .. قالت ليهو والله بس زوبا اتقطعت منهم . لكن لسه ام رفيدة شانة الحرب ..
رحاب دايرة تتشمر .. قالت ليها زوبا دي منو يا لبنى ؟..
قالت ليها دي صحبة رفيدة ، كانت بتجي البيت .. وابورفيدة كان بعاكسها .. وهي ابت تتكلم لاعتبارات كتيرة ..
عشان ماتسبب مشكلة في البيت ، بين الراجل ومرتو ..وعشان ماتفقد صاحبتها رفيدة ..
تصدقي وكت ابت تشتغل بيهو ، اتحصل على رقم تلفونها ، وبقى يرسل ليها رسايل زي الواطة .. كلها قلة ادب وعدم حياء ..
وبقى يضرب ليها بالليل .. يوم شاكلته .. وبدا يحنس فيها ، ويعتذر ليها
مراتو صحت ، ولقتو يتوسوس في التلفون ، عملت نايمة .. باكر الصباح سرقت التلفون من تحت مخدتو وهو نايم ، وفتشت المكالمات لقتو كان بتكلم مع . زوبا .. وتعال شوف .. بدل يتكلمو مع ابوهم ويعقلوهو ، شالو العداوة كلها وكبوها فوق زوبا المسكينة .. ونبذوها وشتموها بابشع الشتايم .. قالو ليها انتي صادقتي رفيدة مخصوص ، عشان تخطفي ابوها ، ياخطافة الرجال ..
وزوبا ماشاء الله عليها .. ابت تقول ليهم هو البطاردني .. عشان ماتخرب البيت .. بقت ساكتة ، وفضلت انها تكون مظلومة ..
رحاب قالت سبحان الله .. غايتو الدنيا دي ، تعيش كتير تشوف كتير.. فعلا انا محمود حكى لي طرف الموضوع ، بس كنت قايلاهو بكذب ..
محمود قال ليها الحمد لله الليلة ظهر لي شهيد ..
اها يازول وصلو امتداد ناصر ، ونزلو لبنى وواصلو في سيرهم ..
ورحاب قالت لي محمود .. يامحمود والله اقول ليك الحقيقة ، الناس ديل ماعجبوني .. ياخي كلهم ماعندهم اخلاق .. بس رفيدة كويسة وزولة سكرة بس .. لكن ناس البيت ديل غايتو ، ابوي كان شافهم بتجيهو جلطة.. خصوصا ابوها ده .. مستحيل ابوي يوافق لي مدثر يناسبو .. لكن بالنسبة لي علاقتو مع رفيدة ، انا شايفاها مناسبة ليهو جدا ..
ورحاب بقت تكرر في الكلام كده بس ..
طبعا رحاب بعد عرفت انو في علاقة ح تنشأ بين رفيدة واخوها.. قلبها رقد من ناحية راجلها .. وماعايزة موضوع مدثر يفشل ، وعارفة لو فشل تاني تقوم عليها الوسوسه والشكوك في راجلها ..
وبقت مترددة يومين ماقادرة تضرب لي مدثر ، خايفة انها تكون بتضرو .. وبرضو خايفة من ردة فعل ابوها ، حاج عباس ..
وكل مرة تشيل وتضرب لي رفيدة ، وتتونس معاها ورفيدة خلاص ، بقت قاب قوسين او ادني ، من تحقيق الهدف ..
طبعا هناك مدثر منتظر رحاب بي على جمرا" تهبو الريح .. كلما تلفونو يضرب جرس ..يجري يخطفو يعاين للرقم ..وكت يلقاهو ما رحاب .. تلقاهو يتستس .
اها اليوم ده كانت في المشتشفى في ونسة كدا طريفة ، بين دكتورة نوسه وبين غادة
قالت ليها انتي يا غدغد موش كنتي معجبة بي دكتور محمديوسف وبتمدحي فيهو طول الوكت ؟ الحصل شنو هسي يعني ؟ كل ماتشوفيهو بتصري وشك ..
قالت ليها ما حصل شي هو فعلا انسان كويس .. وماعندي معاهو حاجة خاصة اصلا . ولاحصل اتكلمنا غير الشغل والونسه العامة .
بس ، قبل كم يوم حسيت بيهو عايز يخش معاي في مواضيع كدا ، انا هسي مافاضية ليها
قالت ليها طيب ياغادة ، انتي رايك شنو في مدثر؟ والله اي واحدة تتمناهو ، كان علي انا انتي عارفة انو خلاني .. قالت ليها والله مدثر امنية ، لكن انا خايفاك انتي تتحسسي .. قالت ليها يازولة انا خلاص تاني ماعندي ليهو شي ، ولابهمني بي حاجة ..
بس في اشكالية صغيرة .. انتي لازم تختي بالك ليها .. محمد يوسف متعلق بيك ، وانتي حاسة بالموضوع ده .. ومحمد يوسف صاحبو .. كيف انتي تخلي ده وتربطي مع ده ..
انتي ما حاسة انو الحكاية دي ممكن تسبب حساسية بيناتم ؟
قالت ليها انا اساسا لو فكرت في الموضوع ، ما ح ادي مدثر اي وش ، قبل ما اصوطا مع محمد واوقفو في حدو .. لاني والله ما حبيتو كلو كلو .. بس ياها الزمالة .. خصوصا بعد بقى يقول لي .. نحن مناسبين لي بعض . وشلت صورتك من الواتساب .. ولزقتها مع صورتي وعوارات كدا ، انا ماعندي ليها اخلاق ..
قالت ليها والله ياغادة كلنا كنا حاسين في حاجة بينك وبينو ..
قالت ليها فعلا يانوسة ، انا ومحمد كنا قريبين من بعض ليس الا ..
نووسة قالت ليها طيب انتي كيف حتدخلي في مدثر؟ ده زول قلبو حجر وبارد ، زي ما انتي قبل كدا قلتي لي ..
قالت ليها لالا مدثر انا اليومين ديل حاسة بيهو مقرب علي شديد ، وبجي بستشيرني في ادق التفاصيل .. قالت ليها كان كدي بختك .. امسكي قوي ..
نوسة النار انطلقت فيها ، وانا ماعارف هدفها شنو من ده كلو .. مشت طوالي لي محمد ، وقالت ليهو في مستجدات في الموضوع .. عايزاك تشوف ليك وكت عشان احكي ليك ..
المهم وكت اتلاقو قالت ليهو . حضر شعورك يادكتور .. غادة ناوية تصوطها معاك ، والله قالت لي كدا براها .. لانها خلاص ربطت مع مدثر ، واتفقو زي ماقلت ليك ..
نوسة زي ما ملاحظين غيرت في الكلام الدار بينها وبين غادة ، تغيير بسيط وخبيث جدا ..
محمد يوسف ده زعل زعل عجيب ، وماعرف يزعل من مدثر ، ولايزعل من غادة ..
معقولة يا مدثر العامل فيها صاحبي؟؟ كويس ، انا بوريكم انتو الاتنين ..
اها الدكاترة كانو متلمين كلهم في عيادة واحدة ، كان في مشكلة بتاعة نقص في الامداد الطبي ، في شنو كدا ماعارف ، لانها دي حكاية متكررة ، وطواالي بتحصل .. الدكاترة يكونو متوفرين ,, واقل مقومات وامكانيات العلاج معدومة .. والمرضي قدامهم قاعدين يعانو .. وهم المساكين مافي يدهم حاجة يعملوها ..
وقاعدين متحيرين ..في النهاية طلبو شاي ، وقعدو يتشاورو في اثناء القعدة دي ، محمد يوسف قبل على غادة قدام الناس ،
وقال ليها .. انا عايز اقول ليك حاجة ياغادة .. ماتفتكري احترامي ليك .. ومعاملتي الكريمة معاك دي ، معناها انا عندي معاك حاجة خاصة .. انتي لو بتقيتي اخر واحدة في الدنيا انا مابرتبط بيك .. فرجأء وقفي التشهير .. والادعاء .. وماتحلمي .. احسن تلزمي حدودك ..
غادة قالت ليهو ، بسم الله الرحمن الرحيم .. مالك يامحمد ؟؟ في شنو؟ انا قلت شنو؟؟ ولمنو؟
الدكاترة ديل كل واحد بقى يعاين للتاني ..
قالت ليهو والله لساني ينقطع .. انا ماقلت من الشي البتقول فيهو ده ..
حرام عليك والله ..
مدثر قال ليهو بعدين يامحمد ، ده ماكلام بتقولو على الملأ.. لو عندكم نقاش خاص ، خلوهو بينكم الاتنين .. كدا ماصح ..
محمد قال ليهو انت بالذات يا مدثر .. انا ماعايز معاك اي مفاهمة ، لو عندك نصايح احتفظ بيها لنفسك ، وقام طلع طوالي زعلان زعلة ..
وغادة دي قعدت تبكي ، ووشها انقلب احمر .. والدكاترة ديل بقو يطلعو نفر نفر .. ونوسة ديك اصلا اتخارجت طوالي ..
مدثر ساق غادة من يدها ، ووداها على الماسورة ، وقال ليها غسلي وشك
ولايهمك .. والله نحن نشهد انك انت اروع انسانة ، ومابتقولي اي كلام ماياهو ..
بس انا متأكد في زول خرب بيناتكم .. خلي الامور على الله ..
غادة لمن دكتور مدثر بتكلم معاها ، وبصبر فيها .. ازدادت في البكا .
قالت ليهو والله يا دكتور مدثر ، انا مظلومة والله انا اصلا ماعندي معاهو اي حاجة ، ماعارفة الزول الزور ليهو المعلومات دي منو ..
بتغسل في وشها كدا ، ومدثر واقف جمبها .. ومحمد يوسف من بعيد هناك في اخر المدخل .يعاين ليهم .. واقف على رجل واحدة ، ومتكل على الحيطة ..
ومدثر شافو وما اشتغل بيهو نهائئ ، لانو ماعارف الفي راسو في شنو؟
اها مدثر بعد غادة غسلت وشها ، مدثر عايز يمشي ، غاده مسكتو من يدو .. وقف عاين لي يدها ماسكاهو .. قال ليها في شنو يا غادة؟ ..
قالت ليهو مدثر الله يخليك تقيف معاي ، انا محتاجة ليك .. بالجد محتاجة ليك شديد ..
قال ليها ولاتشيلي هم والله انا بوعد اقيف معاك للنهاية .. ولو ماعرفت . الظلم ده سببو منو مابرتاح ..
غادة الان بقى ارتباطها بي مدثر تحدي وحتمي .. وحتحاول المستحيل تربط العلاقة دي عشان تتشفى من محمد الاهانها قدام الناس ..
وطبعا هي شكت انو نوسة وصلت كلام مغلوط لي محمد يوسف .. بس ثقتها الشديدة في نوسة . كل مرة بتهز راسها وبتقول لالا .. مستحيل .. مدثر يقول ليها هو شنو المستحيل يا غادة .. تقول ليهو ابدا مافي حاجة ..
مدثر من محلو داك مشى على محمد يوسف .. قال ليهو اسمع يامحمد .. انا موضوعي معاك ماعايز اتناقش فيهو ، لكن الكلام الانت قلتو لي غادة ده وراهو كلام .. منو الوصل ليك كلام عن غادة ؟؟
قال ليهو اسمع يا دكتور .. غادة منتظراك امشي ليها ، سيبني في حالي عليك الله .. غايتو سبحان الله .. الزول يتلدغ من اقرب الناس ليهو ..
ده انت يامدثر؟؟ الكنت بثق فيك اكتر من اخواني اولاد امي وابوي ؟
مدثر قال ليهو انا طبعا ما بجبرك تقول الحاصل شنو؟ .. لكن انا ماممكن ادافع عن نفسي الا اعرف عملت شنو..
قال ليهو عليك الله يامدثر ، امشي من قدامي ، ما تعمل لي فيها اهبل ..
قال ليهو جدا بمشي ، لكن في معلومة داير اقولا ليك ، يمكن انت ما خاتي ليها بالك .. غادة يادكتورمحمد بتحبك اكتر من عيونها .. وبكاها ده دليل على كدا ..
محمد بي زعلتو ديك ضحك ضحكة استهتار غريبة خلاص ..
قال ليهو ياااااامدثر الله يخليك امشي مني ياخي .. امشي مني انا ماعايز اسمعك كلام ، انا ما اتربيت عليهو ..
مدثر قال ليهو . يلا سلام فتك بي عافية ، يعني اعمل ليك شنو؟
والايام مرت .. الدكاترة كلهم بقو يتوسوسو .. مع بعض والخبر انتشر ، متل النار في الهشيم ، انو البت غادة ادت محمد يوسف شاكوش ، وربطت مع مدثر ..
وكلها اخبار غير صحيحة ، من تأليف نوسة الجاموسة ..
بالنسبة لي رحاب اخت مدثر ، لحد الان ماضربت ليهو . عشان توريهو الرد بتاع .. بت الوكالة الاسمها رفيدة ..
و مدثر هنا مازال واقف مع غادة ، وبسأل منها ، وبمشي ليها كتير ، وبتصل عليها
كل مرة .. كل مرة ، وماداسي حاجة .. وماعارف الكلام البتقال بي وراهو فيهو ..
وغادة المسكينة افتكرت انو مدثر بقى يحبها .. (غايتو البنات ديل طيبات طيبة هه )
قامت يوم بالليل ضربت ليهو .. قالت ليهو مدثر ، انا عايزة اسألك سؤال وخايفة من اجابتك .. اجابتك يا اما حطمتني .. يا اما خلتني اعظم بت في العالم .. قال ليها اسألي ياغادة ..

.. الى اللقاء

[لامارا]

الحلقة 7


قالت ليهو يامدثر انت بتحبني ؟
مدثر سكت مسافة .. طبعا" اتفاجأ بالسؤال .. وهي بتتكلم لسه .. مدثر ؟ الو؟ مالك ساكت ؟ جاوبني اي اجابة.. صدقني اي اجابة بتقبلا ..
قال ليها .. كيف يعني يا غادة ؟ كان للحب العام . الناس كلها بتحبك والله، وانتي انسانة محبوبة بالجد .. لكن اذا الحب الخاص . انا عارف العلاقة والحب العميق البينك وبين محمد .. فانا مستحيل اكون خاين وغدار للدرجة دي ،
قالت ليهو القال ليك منو ؟.. محمد انا ماحصل حبيتو ..وربنا يشهد..
قال ليها .. طيب والبينكم ده نسميهو شنو؟ ، والكلام القالو ليك قدام الناس .. والبكاء الحار البكيتيهو ، لمن عرفتي انو اتخلا عنك ..
قالت ليهو معناها انت مافاهم اي حاجة .. انت مفتكر انا بكيت عشان هو اتخلا عني ؟ ابدا والله ، انا بكيت عشان الكذب الحاصل ، لاني اصلا ماحصل قلت لزول انا بحب الزول ده .. انا بكيت عشان المهزلة والاهانة الاتعرضت ليها قدام الناس ..
مدثر قال ليها بس هو بحبك ، وعايزك وانا عارف كدا .
قالت ليهو انا مالي ومالو ، ماحصل يوم فاتحني في موضوع . ولو فاتحني انا كنت رفضتو ..
قال ليها اسمعي ياغادة .. الكلام ده ما كلام بتقال هسي في التلفون .. بكرة نتكلم قي الموضوع ان شاء الله ..
النوم طار من عينو .. وبقى يفكر تفاكير كتيرة خلاص ، والداير في راسو شنو؟ ما معروف ، بس المعروف ، ماكان متوقع السؤال ده من غادة . وغادة زي ما حكينا قبل كدا ، جمالها واخلاقها تعتبر امنية لكل شاب ، وجديتها في العمل حايزة على اعجاب كل الدكاترة . بس ما كان في زول بفكر فيها اصلا ، لانو محمد يوسف محتويها احتواء غريب .. وهي ذاتها كانت مامقصرة ، عشان كدا الناس قايلين بينهم علاقة مستقبلية ..
المهم يازول باكر .. في المستشفى بعد الفطور كدا ، اتلاقو مدثر ومحمد يوسف .. ومدثر قال ليهو انا طالب منك طلب ، وبوعدك تاني ما حأزعجك باي موضوع .. قال ليهو اللهو شنو؟
قال ليهو عايزك انت وغادة تتواجهو قدامي .. لانها هي بتقول كلام وانت بتقول كلام ..
قال ليهو يعني يامدثر انت مكذبني انا وبتصدق البت؟
قال ليهو لا بكذبك ولابكذبها .. الكلام الزي ده مافي ليهو حل الا المواجهة ..
محمد قال ليهو جدا .. بس انا هسي مافاضي ..
بعدين المساء بديك خبر ..
محمد في الوكت ده كان بفتش لي نوسة ، وهي كان عندها مريضه متابعة معاها .. في العناية ..
انتظرها لغاية ماخلصت .. وجاتو ..
قال ليها يانوسة .. انا هسي اصدقك كيف ، ؟ انو غادة قالت ليك كدا ؟
احتمال انا استعجلت .. في كلامي مع غادة .. انا عايزك تثبتي لي انها قالت ليك ..
قالت ليهو بثبت ليك ، بس توعدني ماتدخلني في مشكلة معاكم ..
قال ليها جدا وعد .. قولي ..
قالت ليهو انت موش قلت ليها .. (ياغادة نحن مناسبين لي بعض) .. ..موش حصل قلت ليها (شلت صورتك من الواتساب ولصقتها جم صورتي) .؟؟ حصل ولا ماحصل ؟
قال ليها.. لا اله الا الله .. كدا صدقتك خلاص يانوسة ..لانو الكلام ده قلتو ليها براها ، ولو هي ماقالتو ليك .. انتي ما ممكن تعرفيهو براك ..
خلاص يانوسه .. انا اسف اني شكيت فيك لي لحظة واحدة ..
طبعا" دي اخبث حركة عند الناس المفتنين والنمامين لازم نحن نخت ليها بالنا بنقلو جزء من الحقيقة .. عشان يثبتو بيهو صدقهم ..
والباقي كلو بكون عبارة عن بنزين وقشة كبريت .. وقليل البقدر ينجو من الفبركة الزي دي ..
اها محمد يوسف بعد الاثبات ده .. دمو بقى فاير ، ويغلي زي حلة البليلة ..
ولا انتظر العصر عشان يتلاقى مع غادة .. مشى قال لي مدثر امشي يامدثر نادي غادة وتعال هسي .. انا قاعد في الحتة الفلانية ، منتظركم ..
مدثر مشى قال لي غادة .. ياغادة انا عايزك في موضوع ضروري شديد .. المهم يازول اتواجهو .. وبدا الكلام مدثر ..
قال ليهم انتو الاتنين ، انا عايز اعرف طبيعة العلاقة البينكم شنو؟
هل هي صداقة وزمالة ولا في حاجة تاني .؟ عشان نتعامل مع الموضوع بي جدية ..
محمد قال ليهو ابدا موضوعنا موضوع متطور جدا .. واتكلمنا حتى المستقبل والحياة ..
غادة قالت ليهو ابدا يا مدثر ما حصل .. الزول ده مرات بتكلم من منطلق عام .. ومرات بقرر حاجات براهو ، وانا بسكت عشان ما احرجو .. لكن ماحصل اتكلمنا في شي يخصنا الاتنين ويخص حياتن الخاصة ..
محمد قال ليها طيب ، انتي اصلا ما دام ماعايزاني ، كان تواجهيني عديل وترسيني عل بر ، في داعي توزعي كلاماتك ، انك عايزة تصوطيها معاي وما تسوطيها ؟ ما تسوطيها انا همي بيك شنو؟
صننن غادة سكتت ، واتذكرت انها قالت العبارة لي نوسة فقط .. معناها شكها في محلو .. قالت في في سرها يخسي عليك يانوسة .. اتاريك يا نوسة شغالة تخبزي بيني وبين محمد .. وبتمشي تنقلي ليهو اي كلام يحصل بينك وبيني ..
قالت ليهو اسمعني يامحمد ، انا صلا ما اتكلمت مع زول غير نوسة .. والكلام دار بيني وبينها هي فقط .. وانا متأكدة انها هي القالت ليك .. بعدين الكلام الانا قلتو ما داساهو .. انت لو عندك اي تفكير بتاع ارتباط انا ماعندي رغبة .. وكتر خيرها نوسة ، على الاقل خلتك قلت لي الكلام الانا ما قادرة اقولو ليك ..وكدا لابيني بينك خير لاشر يادكتور ..
قال ليها جدا ياغادة .. انا اساسا ندمان على اي لحظة قضيتها في رحابك الطيبة .. يسلم ليك مدثر ..
وقام فات طوالي .. خلاهم الاتنين قاعدين مع بعض .. قالت ليهو تتخيل يامدثر ، نوسة سبب الفتنة دي كلها .. قال ليها البت دي اساسا انا ما بهضمها كلو كلو .. شوفي موضوعك معاها ، وحاولي حلي مواضيعك .. لو احتجتي لي في اي حاجة انا معاك ..
قالت ليهو ماجاوبتني على السؤال بتاع امبارح .. انا لاهميني محمد لاهاماني نوسة ..
قال ليها .. انا مابعرف اكذب يا غادة .. انتي انسانة اي راجل يتمناك .. ولو ما الظروف الحاصلة دي .. كان لقيتي مني اجابه ايجابية ..
لكن الموضوع ده محتاج لي وقت وتفكير .. بعدين انا عندي موضوع معلق مع واحدة من طرف رحاب اختي ، لسه ماعرفت فيهو حاجة ..
قالت ليهو خلاص ، كدا انا موافقة ومنتظرة .. وده مناي في الدنيا .. وانا بعتبرو ده ضوء اخضر في بداية حياتي ..
مدثر ما علق على الكلام ده مشى طوالي ..
بصراحة شديدة .. مدثر بقى يعمل في مقارنات بين .. رفيدة وغادة ..
ياربي ياتها المفروض تكون لي ..
.. اها بالنسبة لي رفيدة ، بكرة اتصلت علي رحاب اخت مدثر ، قالت ليها انتي مدثر تاني قال ليك شنو عني ؟
قالت ليها تتخيلي ماكلمته .. قالت ليها خلاص اتصلي عليهو ، كلميهو عشان نسمع رايو الاخير ، لاني انا بالجد في ناس كتيرين عايزين يتقدمو وانا موقفاهم عشانك .. ومدثر الوحيدة الانا دايرة الاقيهو ..
قالت ليها خلاص يارفيدة بعدين بكلم محمود يوديني بيتنا ، وبحكي ليهو وجها لوجه .. ماتشيلي هم الموضوع حيمشي زي الساعة ، قولي ربنا يكف العوارض ..
وفعلا يازول محمود بالمساء جاب رحاب للبيت . ورحاب اتكلمت مع
اخوها ، قالت ليهو والله يامدثر انا اتكلمت مع رفيدة .. ورفيدة ماعندها اي مانع والله .. لكن بصراحة الناس ديل فقراء شديد .. وحياتهم متواضعة جدا ، وانا خايفة ابوي يدق جرس في الموضوع ده .. انت عارف ابوي كلام كلو ، بتكلم عن الواجهة الاجتماعية .. والسمعة وتقيمات المجتمع ..
مدثر قال ليها .. كدي يازولة ماتشيلي هم ، ما دام هي ماعندها مانع .. الامور التانية هينة .. والله ماكنت متخيل انها توافق .. خصوصا لمن انتي اتاخرتي علي في الرد .. كنت مفتكر انها رفضت وانتي ماقادرة تقولي لي ..
طوالي مدثر مشى لي محمود ، قال ليهو باكر انا يومي اوف .. بجيك في الوكالة ..
قال ليهو عارف ، وماعندك مشكلة ، انا بهئ ليك معاها جلسة جميلة تتفقو على حاجاتكم .. انا متابع يا مدثر ااكتر منك ، بس ماعايز اتدخل ..
اها الليلة مدثر ده فرحان فرحة .. القمريتين الاتنين واقعات في طرفو ،
لي درجة انو ماقادر يختار كويس ..هه غايتو جنس حالة .!!
ياريتو لو كان عارف المغيب عليهو ..
المهم يازول بكرة من الساعة 9 مدثر ركب مشى لي بت الوكالة .. والنار الملالة ..
اول ماوصل وسلم عليهم ، لقاها عندها خبر بي جيتو .. لانها عاملة في روحها عمايل السيح والتلاقيح .. زي التكنها ماشة حفلة ..
والشي الاكيد ، انو محمود راجل رحاب اتصل عليها امس بالليل وقال ليها مدثر بكرة جاي الوكالة يقابلك ..
اول مدثر جاء ، وشافها ، اتكبكب كبكبة شديدة خلاص .. وفعلا هي والله بتخلي الزول يتكبكب . من ناحية شكلها .. لكن الشكل ماكل حاجة ..
ياما تحت الجمال لعنات .. ومافي اجمل من شكل الافعى ، ولمعان جسمها .. ولكنها تحمل السم الزعاف ..
وقعدو يتونسو الاتنين ، برة في الاستقبال بتاع الوكالة .. ومدثر ده خجلان خجلة .. وهي كانت اكتر من عادية ..
بعد شوية طلع محمود يفتش لمحمد الشغال معاهو ..
وبدا الحوار بين رفيدة ودكتور مدثر ..
قال ليها والله انا سعيد جدا بي موافقتك علي .. وان شاء الله ربنا يتم المراد .. وانا هسي جيت ابرمج معاك ، عشان اجيكم في البيت ، اول حاجة براي واتعرف بي اهلك ..
قالت ليهو والله ما يسعدني ، بس اليومين ديل ماينفع تجي لانو عندنا مشكلة في البيت وانت ماعليك مدسة ..
قال ليها مشكلة شنو كفى الله الشر ..
قالت ليهو بس الكلام ده سربيني وبينك .. عارف يادكتور ، انا ابوي كان تاجر كبير ، من تجار امدرمان ، حصلت عليهو نكسة بي سبب زول كان شغال معاهو .. ضربو قروش كتيرة وهرب برة البلد .. وهسي ابوي بقى على الزيرو .. وبعنا بيتنا ، وساكنين في بيت ايجار .. عشان كدا . ابوي مابكون موجود في البيت ، لانو مطلوب قروش ، دايما بكون برة البيت ، عشان الناس الدايرين منو لاقروش فتحو بلاغ وكايسين ليهو ..
وانا ماعايزة اكلم محمود بالموضوع ده ، ياريت يفضل سر بيني وبينك ،
اول ماتتحل والامور وتمشي تمام ، بكلمك عشان تجي البيت ..
ههه الله اكبر .. بالتوفيق .. اول ضربة من ابو كديس .. لكن معقول في اول لقاء ؟؟ بالغتي يارفرف ..

الى اللقاء ..

[لامارا]

الحلقة 8
،

مدثر سمع منها القصة بكل براءة ..واتاثر جدا لحالة الاسرة والوالد .. قال ليها هسي البصرف عليكم في البيت منو؟
قالت ليهو بس ياهو شغلي انا ، وعندي خالي في السعودية ، مرات يرسل لينا ، وشهور مابرسل .. وكمان عندي اختي مطلقة ، قاعدة في البيت بي اطفالا ، غايتو الحمد لله ..
طبعا ياجماعة .. في اليومين ديل ، بقت حكاية انو الزول يحكي عن معاناة الفقر ، ويحكي عن وضع الاسرة .دي بقت حكاية عادية .. حتي فقدنا نخوتنا الزمان .. والكرامة . في زمن قريب كان السوداني ..لوكان راجل لو مراة .. مهما كان فقير ، مابحكي لاي انسان كائنا" من كان .. الواحد زمان يقول لك ، والله بسط شديد.. الحمد لله ، وفي احسن حال .. ومستورة .. وتدخل بيتو يكرمك كرم ، لامن يحيرك ..وهو بكون متدين .. اقل مقومات الحياة ..
هسي بقينا ياساتر ، اي زول تسأله يقول ليك والله الحياة صعبة .. والمعيشة زفت والحالة سجم .. ودي طبعه ماكويسة يا اخوانا .. وبتجلب علينا الفقر ، وبتجيب لينا الشوم .. كوننا نشكي ربنا الخلقنا للمخلوقين ..
يعني هسي رفيدة بتشكي في حالتها ، لي مدثر في اول لقاء ، وماشايفة عيب في الموضوع ده ..
حتى مدثر نفسه ما اتفاجأ بي الشكوى دي ، بل حســه بانو البت دي خاتاهو في مكان مقرب .. لانها ما جابت شي غريب .. كل الناس قاعدة تشكي ..
مدثر قال ليها ما تحزني يا رفيدة .. ولاتشيلي هم ، انا ان شاء الله بقيف معاك قدر ما استطيع ..
هسي المبلغ المطلوب من ابوك كم كدا؟
قالت ليهو والله تصدق هي ماقروش كتير ، بسيطة يعني مافايتة ليها 36 مليون .. لكن من وين؟؟ ..
وانا هسي داخلة في صندوق ، وغايتو مجابدة .. اها انت اخبارك شنو؟
قال ليها والله كلامك ده بس ، اثر فيني وجاب لي هم ..
قالت ليهو لالا يادكتور ماتشيل هم ، تفرج ان شاء الله ، نحن ناس مؤمنين .. (ماشاء الله على الايمان)
وهي سريع غيرت الموضوع ، وبقت تحكي عن الشغل والسياسة .. و بقت الحكايات والقصص دايرة خارج مدار الخطة ..
لكن مدثر كل مرة يسرح في الوالد المسكين المجهجه من اولادو بسبب الديون .. وكيف البت المسكينة دي شايلة الاسرة كلها .. وصدّق يامؤمن ..
ومرت يومين تلاتة ، ومدثر همو زايد بي موضوع ابو رفيدة .. وطبعا الاتصالات بينو وبينها ماشة على قدم وساق ..
وبسأل منها الصباح والمساء .. وهي برضو بالنهار بتضرب ليهو مرتين تلاتة .. واصلو تاني ماجابت ليهو سيرة الموضوع بتاع ابوها ..
وهو متحسس طبعا ، ياربي هسي البت دي حكت لي ، وانا ماحركت ساكن ، عليك الله هسي البت دي قول علي شنو ؟ ، من اول مرة اطلع جبان وماعندي مواقف ..
وطبعا مدثر زي ما كلنا عارفين ماعندو غير المرتب البسيط البتقاضاهو من الشغل وهو طبعا لايكفي .. ولا بشبه مهنة الطبيب ..
وماعندو اي وفر .. وبستحي يشيل من ابوهو اي قروش ، لانو ابوهو صرف عليهو في قرايتو صرف يعيش ليهو خمس اسر معيشة محترمة ..
اها يوم بتكلم مع امو ..وبتونسو هم الاتنين والبيت فاااضي .. قالت ليهو مدثر ياولدي ، ما داير تتحرك تعمل ليك حركة عرس كدي نفرح بيك ؟
قال ليها بي وين يا امي؟؟ .. قالت ليهو البارح اتصلت علي رحاب ، وقالت موضوعك مع البت الشغالة في الوكالة ماشي كويس ..
قال ليها والله غايتو مامعروف لسه ..
يا امي انا محتاج لي لي قروش ، وخجلان اقول لي ابوي ..
قالت ليهو انت ياولد عوير؟؟ ابوك هو شغال لي منو غيركم؟؟ .. والحق ده حق منو ؟
انت لازم تطلب من ابوك العايزو .. لانو ابوك عارف انك لسه ما دخلت في الشغل البجيب لك قروش ، وعارف مرتبك ، انت قايل ابوك ده غافل ؟
خلاص انا بعدين بتكلم ليك معاهو ..
قال ليها لالا يا امي ، انتي لو عندك خلاص ، ولو ماعندك انسي الموضوع ..
قالت ليهو انا بقروشي وبديك الدايرو.. بس والله لازم انا اتكلم مع ابوك ..المطارشك وموجايب لك خبر ده .. يعني انت ماعندك احتياجات؟؟ وللا قريشات المستشفى دي بتكفيك ؟ وقروش ابوك كلها خامنها اخوانك لي حريمن ..
خلو اليجي بعدين ..
مدثر طبعا القصة دي وقعت ليهو صاااقطة .. وعايز يشوف نتيجة مساعي الوالدة في الموضوع ..
ام مدثر من نوع الحريم الانانيات بتشوف انو الخير الماشي من اولادها لي زوجاتهم غير مستحق وما بستاهلنو ههه ..
رفيدة اتصلت علي لبنى ، وقالت ليها في ضربة جزاء شوتها ليك في اخر الشبكة .. قالت ليها عملتي شنو يا الشقية ؟
قالت ليها احتمال تجيك ستة مليون في صمة خشمك يامتخلفة .. بس والله الود طلع مسكين ، الغنماية تاكل عشاهو .. والله قصيت ليو القصة واتاثر قرب يبكي .. يعني زي ما ملاحظين معناها القصة دي متفقات عليها الاتنين رفيدة ولبنى الشفاتية ..
قالت ليها يعني قلتي ليهو كم؟ .. قالت ليها 36 ..
لبنى قالت ليها ياغبية .. هسي لو قلتي ليهو اربعين كان عمولتي بتكون عشرة .. لكن اعمل ليك شنو؟؟ .. شومة وفقرية ..
قالت ليها انتي بس اصبري الغريق قدام ، ودي اول رمية .. خلينا نشوف نتيجتها وهاهاها يضحكن الاتنين ..
لبنى قالت ليها يادوب انتي بقيتي تفهمي زي الناس ..والله انا كان عندي سماحتك دي لا بشتغل في وكالة ولاعباطة ..
يابت البلد دي مليانة ناس هبل ، و بموتو في البنات السمحات وقروشهم زي جبل الرماد .. ومستعدين يدفعو بالملايين ..
قالت ليها كدي انتي اصبري لي ..
لبنى قالت ليها اصبر ليك شنو؟؟ اتصلي على الود الفرحان ده سريع خليهو يسلمنا .. نشوف غيرو ..
ومدثر في المستشفى ومنغمس في العمل ..مع انو باقي ليهو تلات شهور وفترتو في المستشفى تنتهي ..
بس حسه بي انو زملاهو بتعاملو معاهو معاملة بتاعة كراهية وتجنب .. و اتحسس .. طبعا" زمان الزول الوحيد البسأله وبتكلم معاهو عن همومو واحزانو هو محمد يوسف . وهسي شبه مقاطعو .. ونفسو يعرف الناس ديل مالهم ..
طبعا الحاصل انو نوسة ومحمد يوسف فهّمو الناس كلها انو مدثر هو القلب راس غادة وخلاها تسيب محمد .. ودي القصة المتداولة وهي قصة معكوسة تماما عن الحقيقة ..
لكن منو البقدر يصحح مفاهيم الناس ديل ..
ومدثر ذاتو مافاهم الحاصل بالتفصيل ده ..
في دكتورة من بنات الحلفايا اسمها ريان . وسامعة الكلام البتقال عن مدثر والخيانة العملها في صاحبو .. وهي طبعا" شايفة مدثر وشايفة طريقة معاملتو مع الناس واخلاقو .. وماقادرة توفق بين الشايفاهو والسامعاهو ..
اما غادة ليها يومين تلاتة كدا مافي . ومدثر ماقادر يسأل منها . وكان اليوم ده في منتدى طبي ، في قاعة من قاعات جامعة الخرطوم . مدثر مشى المنتدى ده . لانو فيهو اختصاصيين من برة عندهم ورقة عن . الدراسات البيئية . وعلاقتها بالطب النفسي . وريان لاقت مدثر .. والغريبة انو من كل المستشفى هم الاتنين بس الكانو حاضرين المنتدى من اولو لي اخرو ..
مدثر خش في البت شمال من دون اي مقدمات .. قال ليها بالله هسي الناس ديل ليهم ساعة لافين في نقطة واحدة .. كلها شبكوها لينا
the Affecting environment
(البيئة المؤثرة )
. كلام المفروض يتقال في عشرة دقايق .. قالت ليهو طيب ده ماياهو عنوان الورقة . وطوالي واصلت تتكلم قالت ليهو طبعا ده الكلام البتريدو غادة .. لكن ليها يومين مافيشة . الزولة دي وين يادكتور؟ .
قال ليها والله ماعارف.. انتن ماعرفتنها وين ، اعرفها انا؟؟ .. بتكون عيانة ولاحاجة ، فعلا انا يومين ماشايفها ..
قالت ليهو كيف يادكتور؟؟ انت وغادة موش مرتبطين ، ولا انا غلطانة ؟
قال للاسف والله غلطانة..؟
قالت ليهو معناها المستشفى كلها غلطانة قال ليها كيف؟
قالت ليهو كل الناس فاهمين انو غادة خلت محمد يوسف عشانك ، ..
قال ليها ابدا ماصح الكلام ده ، غادة خلت محمد يوسف بدون اي مؤثرات ، وهو خلاها ، وانا ماعندي اي دخل بالموضوع ده .. وانا ذاتي احتمال قريب اخطب .. وغادة دي ماعندي معاها غير الزمالة ..
قالت ليهو يعني انت متأكد هسي مافي اي حاجة بينها وبينك؟ ، قال ليها من حقك ماتصدقي بس انا قلت العندي ..
قالت ليهو جدا انا لازم اصحح مفاهيم الناس ديل ، اغلبية الناس مفتكرينك انت السبب في انهيار العلاقة دي ..
طوالي انتبه المسكين .. وقبل عليها بي جسمو كلو .. قال ليها انتي بتقولي في شنو يا ريان ، يعني هسي الناس ديل بتعاملو معاي بالطريقة دي مفتكرين كدا ؟؟
قالت ليهو اومال شنو؟ ، والكلام ده بتقول فيهو نوسة .. وبي دعم من محمد يوسف .. ومحمد يوسف داخل في دور العاشق المغدور به ..
قال ليها سبحان الله ، والله دي دنيا غريبة ، وانا هسي مستغرب الناس ديل مالم بتعاملو معاي كدا؟؟ ..
لكن اصبري اوعك تصححي لزول معلومة .. خليهم لي . والله اطبق ليك فيهم نظرية تقشعر لها الجلود ...
وبقى يومين تلاتة متحين ليهو فرصة يتلمو فيها الدكاترة المعنيين بالامر ديل في حتة واحدة ..
في حاجة ملاحظة غريبة وعجيبة .. محمد يوسف ونوسة بقو مابتفارقو كلو كلو .. ونظرات الاعجاب المتبادلة .. يا لطيف ههه ..
والظاااااهر محمد يوسف وقع تحت اظلاف الفرزيان.
في الفترة دي ريان عرفت انو غادة سافرت مدني لي وفاة خالتها الكبيرة .. وكلمت مدثر ..وفعلا اول مرة مدثر يحس بي انو غادة مافي ، وحس فعلا انو افتقدها .. شي عجيب غايتو ..
اها يوم الجماعة اتلمو بعد الفطور.. ومدثر جاهم قال ليهم كيفكم ياجماعة للعلم بس ..انا عايز اديكم خبر جميل ..
اولا" انا وغادة اتفقنا .. على خطوات جادة .. والماعجبو يقع البحر .. تانيا غادة لمن انا اتكلمت معاها .. لانها ماكان عندها اي علاقة مع زول ..
تالتا انا اول يوم اتكلم مع غادة وتتكلم معاي .في موضوع خاص .كان بعد يومها الطلعت من هنا باكية . بي سبب انو محمديوسف . مسح بيها الارض بي سبب كلام منقول بالكذب والبهتان ..
رابعا" الفتنة الحصلت بين غادة ومحمديوسف سببها نوسه .. وانا مستعـد اثبت كلامي ده كلو .. نوسة قالت ليهو خاف من ربك يادكتور مدثر .. قال ليها احسن تسكتي .. يانوسة .. نحن كنا ساكتين .. و تاني ما تكلم ..طلع طوالي.. خلا الناس ديل ينقنقو .. بعدين نجي نشوف كانو بتكلمو في شنو ..
غايتو انا ماعارف .لكن مدثر يتخيل لي دقس بي كلامو عن غادة ده .. وح يدفع التمن غالي ..
اها بكرة الصباح في البيت .. مدثر امو نادتو ، قالت ليهو ابوك عايزك . ابوك ده زعلان شديد من حاجة ، ماعارفاهو مالو .. قال ليها انتي حكيتي ليهو شنو؟ قالت ليهو حكيت ليهو كلام عادي .. عنك وعن ظروفك ، ماكلام بزعل ، لكن هو جاي زعلان من حاجة تانية ، امشي شوفها شنو؟ امشي شوفو مالو ؟
مدثر خايف ومرعوب دخل علي ابوهو جوة ، لقاهو بلبس طالع .. قال ليهو صباح الخير يا ابوي ..
مارد ليهو ، بس قبل عليهو بي زعل كدا صاري يالطيف . وقال ليهو ده شنو يامدثر العملتو ده ؟؟ قال ليهو شنو العملتو يا ابوي ؟؟ انا مافاهم ...

الى اللقاء ..

[لامارا]

الحلقة 9 ..

مدثر ابوه قال ليهو ،، ده شنو الكلام السمعتو ده ،، ياريت يكون ماهو حقيقة .. هل فعلا انت عملت فتنة واتسبب في مشكلة بين دكتور وخطيبتو؟ وعملت ليهم فتنة؟ . وعملت علاقة مع الدكتورة ؟
مدثر قال ليهو لا اله الا الله .. معقول الاخبار دي بتنتشر بالطريقة دي ؟ وانت يا ابوي علاقتك بالقصــة دي شنو؟ ووصلتك كيف؟ .. والله دي حاجة تحير .. بعدين الكلام ده ماصحيح ..و القصة دي مغلوطة انا هسي بوضح ليك الحاصل .. بس قبل ما أوضح ليك وريني الكلمك منو؟ ..
ابوهو قال ليهو .. كلمني مزمل اخوك ..قال الكلام جايباهو مرتو .. من مناسبة ناس اقرباهم .. قالت البنات نادوها وكلموها عديل .. ولاهم داسينو ..
قال ليهو طيب يا ابوي كلام بالعقل كدا بيني وبينك .. هو الدكتور البقولوهو ده لو خطيبتو خلتو .. بي سبب قوالة وفتنة .. تاني داير بيها شنو؟
القصة يا ابوي حاصل فيها كيت كيت ..
والله انا لغاية الان البت ماعندي معاها اي علاقة .. بس الدكتور اتكلم معاها قدام الناس .. كلام فاضي بي سبب الناس الجابو الكلام هسي ديل
بس ده كلو ما مزعلني .. انا المزعلني مزمل اخوي .. بدل ما يواجهني بالكلام .. يمشي يكلمك انت؟ .. يعني قصدو شنو بالموضوع ده؟ ..
بعدين يا ابوي انت ماواثق في تربيتك؟؟ .. كيف تصدق انو انا ممكن اعمل عملية زي دي؟؟ ..
قال ليهو ياولدي البنات فتنة .. وياما خربن بيوت .. ودمر علاقات ..
قال ليهو وعشان تعرف انو كلامي صح ..اسأل رحاب انا هسي متكلم في واحدة من السلمة الخرطوم .. وزولة كويسة شديد .. وشغالة مع محمود في الوكالة .. وهو بعرفها كويس .. وهسي بقت صديقة رحاب ..
موش بي كدا معناها ماعندي علاقة بي الموضوع ده ؟ .. قال ليهو طيب كلام جميل ..
امسك الشيك ده .. وحيكون شهريا عندك مصروف.. تستلمو من مزمل انا بنسى ..
واشتريت ليك الشقة .. وجاهزة قدام في المغتربين .. بوريك ليها اخوك .. بس خليك جادي
واتفق مع البت .. خلينا نمشي نطلبها طوالي .. ماتكتر الجرجرة ..
قال ليهو تسلم يا ابوي .. ان شاء الله مانعدمك . وهانت وقريب انا ذاتي دربي بمرق .. وبشتغل شغل بي فهم ..
شال الشيك لقاهو عشرة مليون ..
طوالي ضرب لي البت الحقيرة الاسمها رفيدة ..
قال ليها اسمعي يارفيدة ..لو نحن اتحصلنا على عشرة مليون .. تدوها للناس ديل .. ممكن يدوهو مهلة في الباقي؟؟ ..
قالت ليهو كويس.. انا هسي اتصل عليهم اشوف رايهم شنو؟
طوالي ضربت لي لبنى .. قالت ليها اسمعي الدكتور ده ضرب لي قال اتحصل على عشرة مليون .. اقول ليهو شنو؟
قالت ليها .. طيب انتي راجية الحجاج يجو ؟.. مالك بتتراجفي وبتقطعي كدي؟ .. قولي ليهو جيبهم وقولي ليهو. الناس ادونا مهلة شهر ..
عشان بعد شهر نشيل منو الباقي ..
رفيدة اتصلت عليهو تاني ..وقالت ليهو والله يادكتور انا اتصلت مباشرة مع الزول .. وقال لي ما مشكلة .. بس الباقي مابقدر اصبر اكتر من شهر ..
قال ليها طيب الحمد لله .. على الاقل القصة دي تبقى لي الوالد فرصــة .. يلملم فيها اطرافو .. اها نتلاقى وين؟ عشان اسلمك المبلغ . ؟؟ قالت ليهو بكرة الصباح شفت برج البركة ؟
بس شمالو طوالي .. الحتة الفاتحات فيها دكاكين الموبايلات دي .. زي الساعة عشرة صباحا . بتلقاني هناك منتظراك .. والتلفون بيناتنا ..
خلاص خير ان شاء الله .. خير ان اشاء الله .
داير يقفل التلفون كدي .. قالت ليهو ـ بصوت بتاع عنج ودلع كدا ــ ..
(( مدثر))؟؟؟ ..
قال ليهو نعم يا رفيدة .. قالت ليهو ربنا يخليك لي ..
قال ليها الكلمة دي .. ادفع عمري عشان اسمعها منك .. تسلمي يا رفيدة ..قالت ليهو ماتتخيل الكرب الكنا فيهو.. انت كدا بقيت ملاك الرحمة لاسرة كاملة .. قال ليها .. خلاص نتلاقى بكرة ..
قفلت منو الخط .. وطوالي كالعادة ضربت لي لبنى .. قالت ليها مواعيدي معاهو بكرة جم برج البركة ..
لبنى قالت ليها انا معاك .. (الحجل بالرجل) . .طبعا" لبنى شاكة في رفيدة.. وماواثقة فيها نهائي ..مفتكرة انو ح يديها اكتر من كدا ..
اها يازول بكرة طوالي مشى لاقاها .. كانت لابسة لبس رهيب .. وواقفة وقفة بتاعة دلع تتنى وتتصنع وتتعاور .. بطريقة غريبة شديد ..
وهو طبعا ماقادر يضبط اعصابو من الاعجاب والكبكبة .. لي درجة انو خجلان من العشرة مليون الداير يديها ليها دي.. شايفها شوية عليها ..
ولبنى وقفت ليها هناك .. في الركن بتاع نيفاشا. وبتعاين ملااقبة الوضع عن كثب هه ..
اها جاها و سلم عليها وابتسم معاها احلى بسمة صادقة وبريئة
واحلاتي دي ياناسي على البراءة .
اها في محل كدا بالناحية الجنوبية بتاع مرطبات .. وسندويتشات كدا .. قال ليها تعالي بيجاي تشربي حاجة ..والله يتلقى انتي ولافاطرة .. قالت ليهو لسه الوكت بدري ..
قال ليها ارح بس نديك سندة وامشي . طوالي مشت معاهو بدون اي مقاومة . والمجرمة التانية ديك .. ماشة بارياهم من بعيد .. زي بتاع الامن .. بعد طلب البارد وشربت .. جهز ليها سندوتش بيرجر جامبو سفري .. في كيس .. وسلمها الشيك .. وعاينت ليهو كدا لقت مكتوب فيهو عشرة مليون .. قربت ترقص (التمبلكشه) ..
قالت ليهو يلا ودعتك الله ..بعد كدا محمود بفقدني.. الليلة عندنا شغل كتير .. ومشن الاتنين هي ولبنى صرفن الشيك واتقسمن الغنيمة .. ولبنى ابت ترضى بي اقل من تلاتة . شالتن ستين ورقة امات خمسين .. ورق جديد يجرح ..
ورفيدة بتقول ليها ياخي كفاك اتنين مليون .. قالت ليها هسي كان ما انا اديتك الفكرة .. جنيه واحد كنتي بتقدري تشيليهو منو؟
غايتو الواحد يخدم الناس .. وفي النهاية يتنكرو ليهو ..
قالت ليها لبنى ياحبيبتي.. روحي ليك لو دايراهن كلهن .. بديك ليهن ..
قالت ليها هسي بقبل بالتلاتة .. لكن حقات الشهر الجاي النص بالنص ..
ورفيدة بدت تحس بالانانية والاستقلالية الفي طبعة لبنى .. وبقت تعاين ليها كدا ..
المهم اتفارقن دي مشت على ناصر .ودي رجعت الوكالة .. وخاتة المبلغ في شنطتها ..
العصرية كدا اتصلت على مدثر قالت ليهو حبيبي .. خلاص الزول وصلني وسلمتو القروش ..واستلمت منو وصل امانة . بالشهود ..
قال ليها كدا حلو ..عليك الله ماتحكي لاي زول من ناس البيت .. انها مني انا ..
قالت ليهو لالا ابوي لو عرف بضبحني عديل .. سكتو مسافة كدا ..
قالت ليهو ((مدثر)) قاليها عيوني .. قالت ليهو انا بحبك شديد ومشتاقة ليك فوق ماتتخيل ..
الزول ده قلبو عمل تشششش.. وشال نفسو وختاهو .. وقال ليها : كميات والله .
وبالمناسبة دي طبعا ابوي مستعجل شديد ..وقال لازم تدوهو مواعيد عشان يجو يتكلمو مع اهلك ..
قالت ليهو جدا انا اكلم ناس البيت.. ويومين وبديك الضوء الاخضر تقطعو مواعيدكم .. بس انا محتاجة لي حاجات كمية .. وهسي انت عارف الظروف ..والله حتى الملايات البنفرشهم للضيوف .. ماعندنا .. يعني بس غايتو الحمد لله .. الموضوع ده جانا في ظروف خليها ساي ..
قال ليها ماتحزني يا رفيدة.. انا بقيف معاك للنهاية .. ماتعتبريني غريب ..
نحن موش في النهاية بنكون لي بعض .؟ يبقى انا ماخسران حاجة ..
بيتكم ياهو بيتنا ..
امشي بكرة شوفي لي البيت محتاج لشنو؟
وطبعا دي ضربة جديدة كرت .. وننتظر شوية نشوف الفاتورة الجديدة . المفروضة على الزول ده ..
طبعا ياجماعة الزول مابعلم الغيب .. ومابعرف نوايا الناس المنافقين . والبنات الممثلات كتار شديد .. والبت دي ممثلة ماهرة وبقت تتكلم معاهو كلام الريدة والغرام .. وعاملة ليهو مخدر كامل ..
وهو مصدق تب ..وبقى يحلم يبني معاها بيت السعادة .. لكن هي طبعا راسمة عنو شخصية الاهبل المغفل المغشوش .. المسكين (العنماية تاكل البسكويت الفي جيبو) ..
مدثر مشى لي اخوه مزمل ساكن بي اولاده في حتة اسمها الهجرة بين شمبات الحلة والشعبية ..
مزمل قال ليهو والله دي شقة غريبة يادكتور .. لكن شكلك جاي بي كفوة ..
قال ليهو والله . يامزمل اخوي ..طلعت زول ماعندك اي فهم وترتيب ..
ياخي كلام تقولو ليك مرتك .. بدل تجي تكلمني انا وتوجهني وانا اخوك الاصغر .. تمشي تكلم ابوي ؟؟وانت عارف ابوي وانفعالاته؟؟ ..
ياخي حرام عليك .. بعدين داير اسألك هي وينها احلام؟..
اخلام دي مراة (مزمل عباس) اخو مدثر الاكبر منو طوالي ..
انا عايز اعرف الكلام ده .. احلام مراتك جابتو من وين؟ قال ليهو لحظة اناديها ليك .. والله انا ذاتي استغربت ..
جات احلام وقالت ليهو . والله بالغت يامدثر ..يعني كيف تزحلق صاحبك وتربط مع خطيبتو؟؟ ..
قال ليها خليها الزحلقة والبتاع .. انتي الكلام ده القالو ليك منو؟؟ ..
قالت ليهو العروس المشينا لي مناسبتها دي .. بت خالتها دكتورة معاكم ..هي الجاتني براااها وحكت لي.. وكت عرفت انت اخو راجلي غلبتها القعدة وبقت بارياني من حتة لي حتة ..
قال ليها اسمها منو؟ . قالت ليهو شن خبرني بي اسمها..
قال ليها طيب وصفيها لي .. قالت ليها سمينة كدي لغاية مابتقدر تتلفت زي الناس ..رقبتها غاتسة ..وبتمشي بالجنبة كدي زي الماحطنها صوط ..
مدثر فقعها ضحكة .. قال ليها والله يا احلام انت زولة آفة .. ياخي نوسة دي اصلو مافي زول وصفها كدا .. قالت ليهو بسسس .. اسمها نوسة صح .. سمعت واحدة بتكورك ليها يانوسة يانوسة ..
قال ليها خلاص مايهم امشي انا كدا عرفت .. دي زولة معروفة بالكذب والفتنة وكاجابت جديد..
احلام مشت تجهز ليهم شاي خلتهم الاتنين براهم ..
وبدا مدثر يحكي ويتكلم مع مزمل .. قال ليهو طبعا" يامزمل .. اناعايز البت الشغالة مع محمود ..
مزمل قال ليهو اوع. تقول لي رفيدة بت السلمة؟؟؟؟

الى اللقاء ..