24-07-19, 12:11 AM
| #1242 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  // اللهم اني أستغفرك وأتوب إليك اللهم صل وسلم على نبينا محمد ( صلو عليه ) @ @ قبل البارت حابه اعيد كلامي عشان اللي تنقل روايتي اخاف ماشافت كلامي مابين الردود وتنقل البارت ...لموقع.. ياليت فيني اذكر اسمه هنا بس مع الاسف القوانين ماتسمح ابيش توقفي نقلش للرواية ... لاني قبل كذا حذرت قلت ياليت في الردود ذوق أفضل من كذا بسبب مطالبة البارت بس مع الآسف الردود ماترضي اي كاتبه تسمح للمتابعين يتكلمون عليها كذا الله لا جابها من روايه تخلي كرامتش تهون عليش واي احد يتكلم عليش كأنه شي فرض عليش تسوينه ومهما حاولت اطنش بس والله شيء يقهر تكتبين وتتعبين وفي الآخير بس لو تأخرتي يردون بهاالطريقه ومن الاصل نقلتي الروايه بدون اذني مع الاسف لهذا الموقع وانا ماسمحت تنقل الروايه إلا للمنتدى المجاور بس والحين توقفي النقل وتحذفينها من الموقع كله ومشكوره على تعبش في نقلها بس مع الآسف بعض متابعينش بالموقع ماحبيت اسلوبهم في الرد واللي حاب يتابعها من متابعيني المحترمين هناك يحصلها بالمنتدى وياليت تدخلي صفحة الروايه اليوم وتشوفي كلامي الحين واحترامي للجميع • • {55} • • انصدم وتكررر الآسم عليه ولد خالك مبارك ... مبارك اللي... أكثر واحد ...تسبب في أذية أمه .. طالع منيف ...وشلون تعرف عليه ورجع طالع ياسر اللي باقي ماد يده ...حاول يستجمع.. صدمته مد يده وقال ببحه :هلا وسكت ماقدر يتكلم ...صراخ أمه يتكررر عليه وهي تقول خالك ...مبارك ظلمني ...معاهم وطردني يحس شوي ويفقد أعصابه ويطرده ...طالع منيف بقهر يوم قال وهو يرفع يده : سلام انتظرك برا ياسر الله معاك ...... ياسر طالع منيف ورجع طالع مصعب حس بصدمته وعذره ..أول مره يشوفون بعض ...وجت بدون مقدمات ... حتى يوم ماتت أمه ماقدر يجي مع أبوه وعمته نوفه ..ويومها خلاص أبوه حرم عليهم حتى ذكر موتها قدامه ...واللي يبي يترحم عليها بينه وبين نفسه بس قدامه ممنوع ...قال بهدوء : عساك الحين احسن مصعب هز رأسه وقال بضيق : الحمدلله وأشر على الكنبه بسخريه : تفضل تفضل جلس ياسر وهو يحس نفسه بعد متوتر مابينهم اي صله من قبل أول مره يشوفون بعض بس انصدم يوم قال له: وشلونه أبوك ياسر أخر شي يتوقعه انه يسأل عن أبوه على طول آه لو تدري انه مايدري بجيتي هنا حتى قال : الحمدلله ابتسم بسخريه وقال:لو مت أكيد مارآح يقصر بيجي يشرفنا مثل قبل ياسر عرف قصده بالكلام بس المفروض يقول له كذا وهو جاي له ومتعني ومايبي الكلام يروح لمشاكل واشياء صارت الاثنين مالهم ذنب فيها قال :الله يطول بعمرك وصدقني أبوي لو يجلس معك كان ... قاطعه بعصبيه :يجلس مع ولد النايفه اللي طردها وشلون لاتجي وتجلس تمدح في أبوك ترى عارفه أكثر منك ... ياسر وقف مايبي يفقد اعصابه وقال : حبيت اجي اطمن عليك والحمدلله تطمنت يالله بحفظ الراحمن مصعب بحده : فيك الخير والله أفضل من أبوك اللي مايجي إلا على جنازة مطروحه طالعه بعصبيه بيرد عليه بس مسك نفسه زفر أكثر من مره اهدى ياسر اهدى أنت جاي تقدم الواجب وتروح اعطاه ظهره وقال : بحفظ الرحمن مصعب ابتسم بسخرية : باقي ماجلست ياسر مصدوم حده باقي يعزم عليه حضرته قال :مره ثانية .... مصعب ابتسم بسخريه عارف انه يتهرب أول ماطلع كور يده بقهر ..بيذبح منيف بس يشوفه رفع الجوال وكتب ( توصل اللي جبته معك وترجع ابيك ضروري ولا تفكر ترد برسالة لو رجآل تعال ) ياسر أول ماطلع شاف منيف بوجهه وخويه اللي استقبلهم جالس قال : لو بتجلس عنده باقي خلك وأنا أخذ لموزين يوديني للفندق منيف بسرعه قال : لا والله ماغيري يوصلك بس بعد العشاء ترا منير محرص علي ماخليك اليوم ياسر : ترى قنعت منير يكنسل العشاء عشان ماهو فاضي والله قاطعه منيف : ايه اعطاك على جوك بس حرص علي وقال يزور مصعب ورد لي ... وطالع عادل وانت تعال معنا بدل جلوسك قدام الغرفة عادل قال بطفش من غثاثة منيف : توكل بس وماعليك فيني منيف طالع ياسر وقال : مغربل عمره معاه ومعطيه جوه بدل مايدخل ويعطيه كم كف ولا بوكس يعدله ياسر رفع حاجب وقال بسخريه : ماشوفك قدرت له من توو ماغير هربت من الغرفة منيف بقهر عض شفته: ليه ياخي كذا عادل ضحك بصوت عالي وقال وهو يشوف منيف مقهور : تستاهل جبت الكلام لنفسك ياسر ابتسم لعادل يحس براحه له سبحان الله عكس مصعب بكل شي وشلون اصحاب حط يده على كتف منيف وقال بتريقه : يالله بس يابطل مشينا منيف دف يده وقال : والله بس لو ماتقرب لمصعب كان سدحتك جنبه ياسر بسرعة مسكه من ياقة ثوبه وقربه منه وقال : تسدح مين منيف بسرعه قال وهو يطالع عادل : ذا شكله اخلاقه نفس أخلاق مصعب خوينا عادل ضحك بصوت عالي : لاتنسى القرابه تلعب دورها وقرب من ياسر وهن يفك منيف منه وقال ودي اعزمك والله ... قاطعه منيف وقال : وين تعزمه وأنت بس مرابط قدام غرفة مصعب وليته بعد بس يشفق عليك ويدخلك ماغير ضميره ميت امش معنا اللحين وتعشى وبعدها ارجع امسك خفاره قدام ذا الباب وطالع ياسر وقال بضحكه قد شفت حد مرافق مريض المريض داخل والمرافق برا عادل تضايق مسخها منيف قدام ياسر وهو أول مره يشوفه ضرب على كتف ياسر مطنش سخرية منيف : بكره فاضي ياسر ابتسم له وقال : مشكور والله مابي أكلف عليكم يكفي منير اللحين وبكره والله وراي سفر لتركيا وحجزي الظهر بس اوعدك يوم ارجع ان شاءالله بقبل عزيمتك وعد مني وطالع منيف بس الغثيث ذا مابي اشوفه منيف : ضيف مانقدر نقول شي عادل ابتسم له وسلم عليه وقال : بحفظ الله وخلك على وعدك أنتظرك @ @ @ بالديرة همست له : عواد لا تحرجني مع خالتي ابتسم لها وقال وهو يرفع صوته :عسى بس ماهو بعاجبتس أسم أبوي شمسه عضت شفتها بقهر ضربته على كتفه : عواد وطالعت خالتها وقالت بخجل :وربي اسمه حلوو بس وكاد بنت عواد ضحك بقوه وقال : تصريفه مالها داعي شموس أم عواد قالت وهي ناقده عليه : خلي مرتك بحالها وطالعت شمسه يمه سمي الأسم اللي تبينه ماعليتس فيه ذا يتسبب شمسه انحرجت حدها قالت وهي تتحلف في عواد : ماعليتس لو ولد مافي حد يسميه غيرتس عواد :وأمي بتسميه على أبوي شمسه صغرت عيونها بقهر وقالت : وأنا موافقه أول مانزلت من الدرج سمعت أخر كلامهم قربت منهم وقالت بقهر : وش فيه أسم أبوي بالله يازينه انتِ يحصلتس تسمي عليه شمسه ..تعوذت من إبليس وطنشتها ... ندمت انها نزلت مع عواد ..ليتها انثبرت بجناحها حياة وهي تصب لها فنجان قهوه وطالعت الطاوله : هوو ياكافي الشر حتى تمر ماحطيته لأمي ولرجلتس قهوه تسذا بلحالها ... شمسه حسيت بقهر ...طالعت خالتي اللي قالت بحده :احمدي الله نعمه وعندتس المطبخ روحي جيبي لتس حياة : ايه بروح وبجيب لكم بعد عواد رفع يده وقال: لا لا أنا مابي والله فيني النوم حدي تعبان .... ومابي أكثر من القهوه وتطير النوم شمسه انقهرت حدي توقعت يسكتها بشي يرضيني اتاري الأخ مايبي يزود قهوة حياة جلست وهي تقول : أجل مدام ماتبي ماراح اجيب شي وأنا الله يعيني بشربها تسذا حافه ماهو احسن منك ومن أمي ... عواد وهو يتمغط بكسل : بالعافية حياة ابتسمت بخبث وقالت : إلا اخبار رجل أختس شمسه بصبر : الحمدلله بخير أخذت رشفه من القهوة وقالت بسخريه : عوذه اختس ذي شوم طرحت الرجال زفرت بصبر وهي تطالع عواد اللي أبد مسوي كأنه مايسمع أخته وش تقول بس لو هي فتحت فمها عليها على طول ينشب لها قالت بقهر : مقدر ومكتوب والحمدلله مافيه شي الحين بخير قلت لتس علامتس تبيه مريض غصب حياة عقدت حواجبها : هووو علامتس تسذا اكلتيني وبعدين وشلون بخير خافي ربتس يقولون مابه شي صاحي بجسمه ولا تحاولين تكذبين ذا كلام رجلتس شمسه : والله مشكلتس لو ماتبين تصدقين عواد وقف وقال : بروح انام يمه تبين شي ام عواد وهي تأخذ رشفه من فنجانها : لا يمه نوم العافية عواد : يعافيتس يارب وطالع حياة بس انام لي ساعتين وبعدها ابشري بوديتس تتقضين لبنتس حياة ابتسمت له بحب : فديتك والله ماتقصر روح نام لك هالساعتين وطالعت شمسه لا تنسين صحيه ولا نطيت جناحك شمسه معصبه حدها... من المهزله اللي ..تصير قدامها وحتى خالتها مافتحت فمها على بنتها والثاني ذا بعد مسوي يعتذر منها يعني ماشاف كلامها ونقد عليها ..وقفت ماتبي تغلط بشي وترجع علاقتها تخرب مع عواد أبد مافيها ..بذات مع الحمل اللي متعبها حيل ...بس لا لا زودتها قال ايش اصحيه عشانها ..طالعته وقلت بحده : صحيه بنفستس وابتسمت بسخريه يوم طالعني وكأنه ردي ماعجبه ضربت على كتفه وقلت : وش فيك بعد يمكن انام معك وتروح علي نومه وتزعل دلوعتك واعطيته ظهري ومشيت قدامه وأنا اسمعها تقول : دلوعته غصبن عنتس يالغيور عضيت شفتي بقهر يوم رد عليها :ماعليتس بحد ياناس اذبحه واذبحها دخلت جناحي وجلست على الكنبه وأنا ازفر بقهر لمتى بتحمل ..كنت اصبر عليها يوم اشوف خالتي تقوم تهاوشها بس الحين لا الكل ساكت عنها وش دعوه ...طالعت عواد الي دخل واضح اللوم بعيونه قلت بعصبيه : لا تفتح فمك علي ولا اقسم بالله الحين أخذ عباتي وانقلع لبيت أبوي رفع حاجب وقال : ومين الحين تكلم معتس عشان تهبين تسذا وبيت أبوتس اللي تهددين به تدلينه قلت بعصبيه : بعد ماهي فارقه معك عواد : شوفي كلامتس أول وبعدين عاتبي شمسه وقفت وقابلته وقلت بقهر : عارفة والله قبل تفتح فمك ترا أختك أبد ماعطتني مجال عشان احترمها ومن الحين أقولك مدام تتغاضى عن كلامها وتنشب لي ماراح تدوم حياتنا مع بعض قال بحده : الحين هذا هو استقبالتس لي مشكورة ماقصرتي اعطاها ظهره واتجهه للغرفة ... شمسه عضت شفتها بقهر ...أختك خلت فيها استقبال ..حسبي الله عليها ليت شايبها يردها على ذمته ويفكنا منها ..وقفت بلحقه الغرفة ..بس رجعت غيرت رأي ..وجلست هو اللي غلطان مدام ساكت عنها ...حسيت بقلبي يغلي خربت علي فرحتي بجيته ..ماتوقعت يصير كذا بيني وبينه بذات اليوم ...والله لا اطنشه ويعرف يدور رضاي بعدها وقفت بروح لأبتسام اصحيها وحشتني حيل ..طلعت من الجناح وجت عيني على غرفة حياة سبيتها بنفسي ...اتجهت لغرفة ابتسام فتحت الباب بشويش ودخلت البنت رايحه فيها قربت منها وسحبت المفرش وهمست لها : بسومه ماتبين تقومين تسلمي علي زفرت بضيق وهي تسحب المفرش وتغطي رأسها وقالت : تكفين بنام وبعدها بسلم عليتس شمسه تمددت جنبها ورفعت نفسها وسندت ظهرها على الكرسي وقالت بخبث : الأخ شكله امس مسهرتس وماخلاتس تعرفي الواجب بعد الحين جايه غرفتس وماتقومين تسلمين ياللي ماتستحين ابتسام طلعت يدها من تحت المفرش ومدتها لها : يالله هااه سلمت شمسه صغرت عيونها بقهر وهي تشوف يدها ممدوده دفت يدها وقالت بقهر : روحي زين ذا سلام ابتسام لفت واعطتها ظهرها ورجعت نامت شمسه حست بنوم نزلت نفسها وهي مكسله تروح لجناحها ...همست لها : شكلي أنا بعد بنام قالت من تحت المفرش : تقلعي شقتس لا تبلينا مع عواد.... شمسه بقهر : خليه يدورني .... وخلاص انكتمي بنام أخذ رشفه من القهوه ..وعينه من الملف اللي بيده القضيه صعبه حيل اللي مسكها ويبي يدرس كل شي فيها عشان يقدر يحامي بدون ولا غلطه .. ...رن الجوال طنشه ..مايبي أحد يفصله عن دراسته للقضيه اللي بالملف .. .بس يوم رجع يرن مد يده يبي ...يحوله صامت ..بس عقد حواجبه يوم ..شاف رقم أبو شموخ ..قال بهمس أبد ماهو ناقص لأنه عارف وش بيقول له .وخلاص معاد يبي يسمع شي من طرفها بس قلبه حكم عليه وماقدر يطنش فتح الخط وقال بضيق : هلا رد السلام عليه وقال وهو يطالع زوجته مكسور حده بنته ذبحته قال بغصه : لو يمديك تجي جدة عقد حواجبه وقفل عيونه بصبر مايبي يقابلها خلاص الحين هو جالس يمشي في أمور الطلاق ومايبي شي يخليه يغير رأيه وعارف نفسه بيضعف لو يروح ويشوفها الحين اتصال ماقدر يطنش وشلون لو شافها ..قفل الملف وقال بجمود : مايمدني هالفتره مشغول قال بضيق : طلبتك تجي قلبه عوره يوم قال كذا عرف الحين وتأكد انها قايله لهم بس ياترى طلعت نفسها وحاولت تركبه الغلط ولا قالت اللي صار بالضبط جاء يعترض بس قاطعه وقال بصوت مكسور : طلبتك ماتردني ياعناد وأنت راعي الأوله قال بضيق :تم الليله ان شاءالله امشي وقفل ورمى الجوال بقهر ..ماقدر يرده ويقول له خلاص بنتك مابيني وبينها شي كلها ورقه وبتوصلها وهالباب يتسكر... وبدون ماجي ولا اروح يمكم ليه كذا يضعف يوم يسمع شي من صوبها سب قلبه هو اللي منزل قدره لها ..بس عادي بيروح وبيقول لها قدام أبوها انه ...مايبيها مهما ...قال له أبوها او طلبه انه ..يردها الحين بعد... الفضيحه مستحيل عاد تكون بذمته ...طالع الملف فتحه ورجع قفله مستحيل عاد يركز فصله الله يسامحه ..رن الجوال قفل عيونه بصبر شاف رقم موكله فتح الخط وقال : هلا تطمن الملف جالس اشوفه واي شي جديد بخبرك فيه قال والخوف واضح بصوته: مدري احسها معقده وهالمره شكلي .... زفر بضيق هذا وشلون يفهم قاطعه بقهر : قلت لك لا تخاف وأنا بسوي جهدي كله عشان تأخذ حقك ... @ @ @ حست بقهر من زوجها من بعد ماكلم عناد قالت : لايكون ناوي ترخصها وترجعها له طالعها بسخريه وقال :بنتك رخيصه من غير مارخصها وليت فعلاً يرضى ترجع له بعد مصيبتها أم أميرة بعصبيه : راشد بنتي مظلومه قاطعها بعصبيه : وش مظلومه وهي بنفسها تقول كلمته ولا تحاولي تدافعي عنها وأنا اشوف القهر بعيونك فعلاً تكذب لو تقول ماهي مقهوره إلا ودها تذبحها بس تحاول تمسك نفسها عشان خايفه عليها منه لا يذبحها قالت بتوتر : تقولك مثلت وهذا جهل منها ولا تنسى انها ماكانت تبيه وأنت غصبتها وتعرف بعدها تهور الشموخ ودلعها أبو أميرة بقهر : أنا اللي دلعتها وجت علي في الأخير أم أميرة : والحين يوم تردها له بتثبت له ان بنتك فعلاً سوت هالشي فكر وخلك واقف معاها على الأقل قدامه قال بغصه وغبنه :بنتك سودت وجهي منه اعطاها ظهره وقال بقهر :نزلت رأسي بالأرض وكسرت عيني قدام رجلها ... أم أميرة حست بقلق وخوف ..من جية عناد لا تكبر المشكله أكبر ...والشموخ تروح فيها خايفه حدها طالعت أميرة اللي طلعت من المطبخ وبيدها أكل قالت بحسره : ضيعت حالها عضت شفتها بحزن :قولي يارب تطوع بس رافضه كل شي وماغير بفمها أبي اموت وترتاحون رفعت يدها وغطت وجوها وانهارت تصيح بوجع وقهر ..ليه الشموخ سويتي كذا ودها تعرف وين عقلها يوم تهورت بذي الطريقه ليتها صملت على رأيها انها ماتبيه ولا فضحتنا بهالطريقه طالعت أميره اللي قالت : يمه لاتصيحي يكفي الشموخ حالتها حاله وتكفين لا تصدي عنها تعالي معي ويوم تشوفك يمكن تأكل ابعدت يدها وطالعتها وقالت بوجع : آه ياحرقة قلبي على اللي سوته فينا ... أميرة : ماعليه يمه بس تعالي خليها تشوفك يمكن تأكل وقفت وراحت مع أميرة أول مادخلت طالعتها بحسره على حالتها اللي وصلت لها قربت منها وطالعت أميرة يوم قربت منها الأكل قالت بحده : قومي كلي منكسه رأسها مافيها تشوف نظرة عيونها لها ..تذبحها حيل ..هزت رأسها بلااا مدت يدها ورفعت الملعقه وقالت وهي تناولها : قلت لك كلي شوي وتموتي قالت بهمس ودموعها تنزل : ياليت وطالعت أميرة خذيه يا أميرة مابيه قربت منها وقالت بحنان وهي تأخذ الملعقه من يد أمها وتحطها بصحن الأرز وتأخذ منه وتمدها لفمها : يالله ي عمري أفتحي فمك عشان خاطري بس هاللقمه صدت الشموخ بدون ماتفتح فمها طالعت أمها يوم صرخت بعصبيه : خليها يا أميرة وقالت من ورا قلبها فعلاً موتها أفضل من عافيتها ولا ترجع له مذلوله أكثر من الذل اللي هي فيه حالياً وهزت رأسها بحسره يا حسافه لأ أنا قادره اتقبلك ولا تهوني علي ترجعي له بعد ما أبوك يرميك له برخص آه يافضيحتي يوم تدري الجوهرة تبي الزله علينا ...سكتت يوم صرخت أميرة : يمه حرام عليكم خلاص ارحموها حست بكلام أمها سكاكين بقلبها ياناس مظلومه وشلون يصدقون ..انه كذب الي صار .. بس لفتها بكلام أمها ان أبوها يبي عناد يرجعها قالت وهي تمسح دموعها : مستحيل ارجع له والله ناركم ولا جنته صفقتها على فمها وقالت بعصبيه : بعد تحلفي أحمدي ربك لو وافق يردك له وتفت عليها وهي قرفانه منها وقالت بقهر : ليتني ماجبتك ولا متي قبل سواتك وكاد اتذكرك بشي زين أميرة ندمت يوم قالت لأمها تجي تشوفها توقعت يوم شافتها تبكي عليها وتدافع عليها عند أبوها انها بتحن عليها بس طلع العكس صح طول هالفتره ماكانت تتكلم وساكته وطول وقتها تهدي بأبوها بس أبد ماتوقعتها بتسمعها ذا الكلام قوي حيل عليها ضمتها لصدرها وهي تهمس لها : ماضاقت إلا بتفرج صدقيني وأمي تعرفيها وقت ماتكون معصبه ماتدري وش تقول رفعت رأسها من حضن أختها وقالت وهي تصيح : مابي ابوي يحرج عناد حرام عليه يستغله خلاص يتحملني هوو ويعاقبني مثل مايبي بس لايحمل عناد فوق طاقته يكفي اللي جاه مني ويكفي انه مافضحني حرام والله يحرجه كذا تكفين كلمي أبوي مايقول لعناد شي أنا ماقدر أكلمه موقفي ضعيف قدامه وماراح يقبل اي كلمة مني تكفين هوو يسمع كلامك وشهقت بصوت عالي حرام حرام اللي يصير فيني والله .... ضمتها وهي تهدي عليها... أختها راح تنجن وهم مايفكرون إلا وشلون سوت كذا وليه غلطت حالتها أبد ماهو حق عتاب قالت بهمس :ياعمري صدقيني والله لو رجعتي له وكاد يكون ارحم من أبوي وأمي صرخت منهاره : لا لا نار أهلي اهون علي من نظره بس بعيونه أميرة كنت اشوف القهر والحقد بعيونه بس مايدري وش يسوي وربي كنت اموت في اليوم مية مره وأبوي وأمي حلال اللي يسوونه فيني ... أميرة ماقدرت تتتكلم ليت أمها ماخبرتها ان أبوها طلب من عناد يجي ...منهارة حدها وماهي قادره تسيطر عليها او تهديها فتحت عينها بصدمه يوم وقفت بسرعة وقالت :وين جوالي وينه ونزلت نفسها تدوره بالدرج طلعته وقالت وهي تفتحه : بدق عليه بحذره مايجي بسرعة مدت يدها تبي تسحب الجوال بس الشموخ صرخت تمنعها :اميرة ابعدي عني وبدق عليه مايستاهل عناد يحرجه أبوي خلاص يكفي تحملني هالفترة وعارفة لو جاء ماراح يرد أبوي وبيردني له وهو مغصوب ... سكتت تشوف أختها وش راح تسوي طالعت الباب بخوف خايفه لا أبوها يجي ولا أمها وتروح فيها رايحه جايه بالغرفة وهي تقول : رد رد تكفى نزلت الجوال بقهر وصرخت : ماهو وقت عنادك ي عناد تكفى رد رفعت الجوال ودقت رقمه مره ثانية قفلت عيونها يوم يقفل بوجهااا ....لا لا عناد أبد مو وقت عنادك بسرعة فتحت الواتس ورسلت له ( عناد تكفى رد ضروري ) رجعت دقت رد على طول وقال بحده : ايش عندك مزعجتني قلبها وجعها من اسلوبه معاها قالت وهي تصيح : عناد لا تجي ابوي بيحرجك وبيخليك تردني لك غصب تكفى لا تجي والله مافيني احملك أكثر عن كذا أنت ماتستاهل وماقصرت معي سترت علي هالمده كلها وخلاص أنا وأنت مابينا حياة وأنا اللي دمرتها كان يسمعها تتكلم وهي تصيح ..يعني فعلاً قالت لهم كل شي ..وابتسم بسخريه وقال : يعني أبوك يبيني اجي عشان يحرجني مثل ماتقولين وانتي طبعاً حضرتك ماتبين كذا خرب عليك مخططك مع الزفت الشموخ انصدمت انه فهمها غلط بس مافيها تبرر له خليه يفكر مثل مايبي قالت بسرعة : ايه هذا اللي بيحصل المهم الحين لا تجي وخلاص عيش حياتك مع عبير وأنا استاهل اللي يصير فيني قال بقهر : أكيد هذا اللي بيصير يالله بقفل قالت بسرعة وهي تحس عمرها مكسورة حيل : تكفى لو رجع دق عليك لا تزيد عليه اعتذره بلطف تراه مافيه يتحمل اي كلمه زيادة يكفي اللي صار فيه مني تكفى عناد احترمه ولا تغلط عليه قاطعها بعصبيه : لا تسوين فيها اللحين تعلميني وشلون اتعامل معاه ولا توصين عليه لو خايفه عليه كان ماسويتي سواتك وقولي لأبوك رده ماراح اردك خلاص والحين جالس امشي بأمور الطلاق وانتهينا وقفل بوجهااا طالعت الجوال ..مكسورة حدها ودموعها تنزل أميرة بقلق : ياخوفي يقول لأبوي عن مكالمتك له الشموخ ماردت عليها ...تمددت على السرير وتكورت على نفسها وغطت نفسها بالمفرش وكلمته تردد برأسها (انتهينا ) ويمشي بأمور الطلاق ...تحسه متغير حيل حتى لهفته اللي قبل تلتمسها بصوته حتى وهو زعلان هالمره ماحست فيها أبد فعلاً انتهيناً ياعناد ====== === ركب سيارته وهو معصب ناقص مكالمتها الحين يقال تحذره ..مايجي عشان مايرجعها معاه ..قهرته حيل هو اللي مايبيها ...توقع تطلب فزعته ..ماهو تحذره صرخ بقهر يقال تسوي معروف فيني الحين رجع البيت وهو معصب حده ..أول مادخل شاف أم عبير قدامه وعبير حس بضيق مايبي يشوف احد سلم مجامله وبعدها دخل غرفته وتمدد وهو يفكر وشلون الحين يروح ولا لا ...بس هو قال كلمة لأبوها ومستحيل يرجع فيها .... وقف بسرعة سحب شنطه صغيره تكفيه لمدة يومين ..وبسرعة رمى الملابس اللي بيحتاجها وطلع وقفت مصدومه وهي تشوف شنطته على كتفه قالت : لا عناد لا تقول بتسافر عض شفته وش يبي يفكه لو قال لها أبو الشموخ هو الي طالبني قال بكذبه وهو يطالع أمها اللي أبد مايرتاح لها : شغله ضروريه تخص موكلي مثل ماقلت لك في اوراق معقده في قضيته ولازم اسافر معه واشوف بنفسي وكلها يومين وجاي ان شاءالله وابتسم بضيق لا اوصيك انتبهي على نفسك وعلى البطل صدقته وقالت بفرحه وهي تحط يدها بطنها : لا توصي هذا حبيب أمه وطالعت أمها اللي شمقت ضربتها على كتفها بقهر بعد ماطلع عناد : الحين ياغبيه صدقتي بسرعة كذا قالت بدلع ماسخ : ماما عناد يحبني ومايكذب عليه وابتسمت بحب له من بعد ماطلعت العقرب من حياتنا مره متغير معي واحسه كذا طاير فيني قالت بسخريه : ايه مره واضح طاير فيك حتى وداع مثل الناس ماودعك يالله شايف نفسه على وشهوو بس قالت بقهر : هوو كذا ثقيل حبتين ومايحب يظهر مشاعره قدام أحد وبدلع من حقه يشوف نفسه طول وعرض وسامه ربي يخليه بس قالت بقهر : ايه مره وسامه تف عليك وعلى ذوقك بس وطالعت جوالها وقالت بهمس حضرته ذا بعد مادق انشغل حيل بعد حادث ولده وكل مادقت تعذرها عبير صغرت عيونها بشك : مين ماما وقفت وهي تسوي طرحتها قالت بتوتر : مين يعني زيد زفت ابيه بشغله بس مشغول حضرته كشرت من سيرته وقالت : وع ماما هذي الاشكال وش تبين فيها أخذت شنطتها وقالت : وش نسوي ولد أختي ولازم نتحمله وبعد نستفيد يجيب أخبار عبير بفضول : أخبار مين ماما طلعت النظاره الشمسيه من شنطتها وقالت : ماهو شغلك يالله باي وانتي تجهزي وبرسل لك السواق يجيبك الفله هزت رأسها وقالت : اوكيه بس قبلها بروح لخاله جوجو بجلس عندها اليوم كشرت بوجهاا ياشين ماطريتي رفعت يدها بدون مبالاة : كيفك استغربت وقالت : ماما ماتبين تجي معي قالت بحقد : ماهو فاضيه ويالله سلام حط يده على كتفه وقال :عزيز أنا واثق فيك من ثقة مصعب بك ابتسم بخبث وقال : تسلم والله وتطمن كل شي يمشي مثل ماتبي والحين أنت بس خليك جنب مصعب لما يرد وينور الشركة ياشينها بدونه والله له فقده أبو مصعب وهز رأسه وقال : بإذن الله وطلع ... عزيز جلس على الكرسي ومسك ضحكته وهمس ...واثق يالشايب ...ارسل للجوهرة ( من حقتس تلعبين من وراه ) رمى الجوال وهو يقول ...آه لو تدري يالواثق بس وقف مصدوم وهو يشوف زيد قدامه ماتوقع واحد في الميه يجي الشركة ..قال بعصبيه وهو مخفض صوته : وشلون تجي هنا افرض حد شافك قاطعه بضيق : مين بيعرفني هنا مصعب ومرقد وأبوه مادخلت لهنا حتى طلع تطمن الحين اعطني حــل بس عصب من قلب هذا اللي بيفضحه قال وهو صاك على سنونه : يعني ماكفاك رميت حالك والعجيز بغبائك جاي تكمل علي قاطعه بقهر: عزيز ليه ماتبي تفهم أقولك السي دي اللي أول اعطيت مصعب هذا بعيد عن السي دي الثاني ليه ماتبي تفهم الأول يخص الجوهرة بس لحالها وبعيد عن الموضوع مجرد تتكلم مع صالح كان وقتها وكان انتقامي بس منها عشان يطلقها أبو مصعب ..يوم يشوف وشلون تتكلم مع رجآل غريب من وراه وكله يعتبر تافهه حتى الجوهرة ماضربت حساب له وسامحتني يوم احتاجت عليه يوم خطف زوجة مصعب اما هذا طاح بيده غيرر عن الأول ويعتبر مصيبه وماندري مين سلمه هوو ومن الأصل ماندري مين صوره قرب منه وهو وده يضربه وقال بقهر : بعد وكلتك تخطف زوجته ومافلحت زيد بقهر : عزيز مو موضوعنا عزيز أشر للباب : يالله تقلع لا احد يشوفك هنا ويخبر مصعب ماهو ناقص يشك ان لي صله فيك والحل ماهو عندي روح عند معزبتك تعطيك حل يالله فارق زيد بقهر عض شفته : به خاين بينا ودي اعرفه اذكر يوم كنت بخطف زوجته مافي حد يدري إلا صالح ويومها الجوهرة شكت فيه بس نكر بس أنا شاك فيه ان له صله ببندر وهو اللي يرسله علينا ويوجهه ايش يسوي تعرف علاقة الجوهرة وبندر وشلون صايرة بعد ماخونت فيه وكانت بتضره في أهله وشكل بندر حاب ينتقم منها بس أنا وش ذنبي يورطني معاها جلس على الكرسي وعقد حواجبه وقال : بندر مين بعد ذا الله يأخذك ويأخذها مصايبكم وش كثرها زيد هز رأسه بكرهه له : هذا كلب يأكلك ويجحدك المهم خلينا من سيرته دبرني وش اسوي عزيز عصب هذا ناشب له نشبه أعوذ بالله قال بقهر وهو يضرب على المكتب :اقسم بالله لو شفتك قدامي عاد وتقول دبرني ذبحتك ياخي فكني وش دخلني بينك وبينها خلاص روح وخلك فطين لو مره واعرف مين اللي خاين بينكم ويالله تقلع مابي فضايح هنا زيد وقف وهو مقهور الله يقلعه طمعان في ذكائه ويبيه يدبره ماتوقع كذا بيصده ...طلع وهو ناوي يروح لخالته سحر يتسلف منها مبلغ عشان يعطي الزفت هذا مبلغ مدام يدري بكل شيء ويساعده يدري فيه كلب فلوس ...طالع عزيز يوم قال وابتسامه خبيثه مرسومه على وجهه: تبي عادل طالعه وقال وهو عاقد حواجبه مستغرب : وش ابي ب عادل ضحك بقهر : صدق مفهي ومنتهي ماهو الجوهرة تقول الشرطه سلمت اغراض مصعب اللي بالسيارة لعادل وأكيد السي دي عنده وش رأيك نخطفه ونعطيه علقه محترمه يطلع السي دي من فوق خشمه حس بتوتر مايبي عاد يبتلي بمصيبه ثانية بس ماعنده إلا يوافق قال وهو مغصوب : تم وقف وقرب منه وقال بخبث : كم تدفع ولا تنسى تزود شوي عشان بوكل اثنين بعد يخطفونه ادعي بس يقدرون مايطلع مصيبه مثل خويه عنده مية روح عض شفته مقهور من فين له حافي منتف من وقت ماقلبت عليه الجوهرة والفقر قدامه ...وخالته سحر ترفض تعطيه يالله تعترف فيهم ...هو وأمه والحين بروح لها وعارف ماراح تعطيه المبلغ اللي بيرضى فيه عزيز قال بقهر وهو ياشر للباب : مدام كل ذي المده تفكر تفضل يلا برا وفكر على راحتك ماهو ناقص شبهه انسحب زيد ...وطلع دق على الجوهرة يبي يعطيها خطة عزيز عشان عادل عشان تدفع بس ماردت انقهر... الزفته ذا وقت تطنيشها .... @ @ @ اصايل جلست اتقهوى معاهم وأنا مغصوبه بس استحيت ارد أبو مصعب ...يوم عزمني ...بس حسيت الجوهرة ماهي على بعضها بذات يوم رن جوالها شوي وتفز من مكانها فيها رعب واضح بوجها ..تذكرت كلام مصعب ..شكيت معقول لها يد بحادثه ..بس اشلون ...مستحيل ماتوصل لقتل الجوهرة توترت يوم شافت رقم ..زيد خلاص مافي على القلق والرعب اللي مسويه فيها ...طالعت زوجها جت بتقوم بس ماقدرت ..تحسه صاير يتضايق بذات يوم قال: ذي اليومين جوالك مايهجد غريبه وبعد احسك ماهو طبيعيه حتى كلامك قليل وكل ماسألت عنك الخدم يقولون بغرفتك فيك شي قالت وهي تحاول تخبي رجفة يدها :معليش بس عناد وضعه مع حريمه موترني رفع حاجب وقال : وش دعوه ترى مكبره السالفه على الفاضي وبعدين أخوي أخذ بنته صفي الجوو لبنت خويتك اصايل اسمعوو الكذب قال ...ايش وضع ولدها مع حريمه يا الزفته انتي ...تفكري في أحد غير نفسك إلا وراك مصييه يعلم الله فيها صغرت عيوني ..يوم عمي قال بنت (خويتك ) يمه شوفو ذا بعد عليه تمثيل ماكأن عبير بنت سوسو حبيبة قلبه ..وقفت بس على طول أبو مصعب مسك يدي وقال : ماتقهويتي يبه ابتسمت له وقلت : ماعليه بشوف عادل اخاف يصحى ونانوو متغلبه معاه تدري ميري اللي تصبر عليه طلعت اليوم رقيت الدرج ..وأنا أفكر في خوف الجوهرة .. دخلت الغرفة على طول نانوو ...ناولتني ..عادل وطلعت ...نيمته جنبي ومسكت جوالي ودي ادق عليه اشوفه وش مسوي ...بس عضت شفتها محتاره ...تحسه يتضايق يوم تروح له ..وشلون الحين تدق ... حطت الجوال وصمتته وجت تنام تقلبت وتقلبت عيا النوم يجيها فكرت تدق عليه وتشوف وضعه .. وقتها ترتاح ..عارفة نفسها ليت عمها ماخبرها انه راح بالجوال له ...كان هجدت شوي ... دقت عليه وأول ماسمعته يرن حست قلبها يدق خايفه لا يوجعها بكلامه او يهاوشها ليه دقت بس حمدت ربي يوم فتح الخط وقال ببحه : حيا الله أم عادل استبشرت خير وجلست متحمسه : وشلونك اللحين قال بضيق : تسألي بعد ماسحبتي علي انتي وأبوي كشرت من عتابه مجنون ذا يطلع وهو تعبان قلت وأنا احرجه : لهالدرجة تبي تطلع عشان تجلس معي قاطعها وقال : لا ابي اجلس مع ولدي ماتهنيت بشوفته حست بقلبها تحطم قالت بقهر : طيب وش بيضرك لو جمعتني مع ذا الاقرع وهي تطالع ولدها النايم ابتسم وقال : حدك عاد لا تتريقين عليه اصايل ابتسمت : طيب اسفين مصعب : المهم بكره لو كنتي جايه جيبه معك ولا طردتك من الغرفة ودها تقطع شعرها منه ومن غروره قالت :راح اجي وبدونه وبدخل غصب عنك يا المكسح قال ايش اطردك انت يالله تحرك يدك وعضت شفتها يوم قال : تتشمتين فيني .... قالت بسرعة : لا لا بس أنت بديت عكيت معي في الكلام وأنا ماقصرت مارد عليها قالت متحسفه خلاص اسفه لاتزعل بس ماحست إلا الخط ينقفل بوجهاا نزلت الجوال بقهر هذا وش فيه ..كذا صاير نفسيه وحساس بزيادة ...هوو من أول كذا متقلب بس الحين صاير مدري ..وشلون عجزت تفهمه طالعت ولدها وقالت ماعليه يمه نصبر عليه ..هذا أبونا ومبتلين فيه .... فتحت الواتس ورسلت له (اللحين أنا الي زعلت وشوف كيف برضى عنك راح تتعب لما ترضى عليك أم عادل ) انتظرت ثواني يرد علي بس الزفت حظرني ....اخخخ ليه كذا الحين زفرت بقهر منه مالت علي وش ارتجي من مصعبوه @ @ @ شدن صحيت من النوم ..تلفت حولي ..الغرفة فاضيه ..اف ذا للحين ماجاء ...تحركت بقوم من السرير بس سمعت صوت الباب يتحرك ..أكيد رجع طالعته يوم دخل ..قلت بضيق : ليه تأخرت قرب منها ورمى نفسه على السرير وقال :بدينا .. شدن رفعت شعرها ولمته لفوق وقالت بقهر : لا يكون من الرجآل الي ماتحب حد يسألها حرك رأسه وقال : ايه مثلهم وفتح جواله وجلس يقلب فيه ورجع طالعها شافها تطالعه بقهر قال : تبين اطلب لش عشاء أنا تعشيت مع خويي شدن بعد تعشى برا قلت بقهر من اسلوبه معي : مابي ياسر نزل عينه للجوال وقال بيرود : احسن شدن وقفت ..وهي مهقوره منه ..وشلون كذا يكلمني اسلوبه جاف تذكره خيخه قدام عفاف ...والبنات دايم يقولون كان مايناديها.. إلا حبيبتي وحياتي ...وش معنى أنا ..أخذت شور سريع ولبست وطلعت وأنا انشف شعري شفته جالس على جواله باقي .. ياذا الجوال اللي مايفارقه صغرت عيوني لايكون بعده يطالع بصور عفاف رميت المنشفه من يدي بعصبيه وقلت : لايكون للحين تشوف صور عجيزك ياسر ماتفقنا كذا تذكرك وعدك لي بمصر ... طالعها مصدوم من كلامها آخر شي يتوقعه تقول له كذا بذات بعد ما تعدلت علاقتهم مع بعض عض شفته بقهر وقال :هذا تفكيرش فيني الحين شدن بعصبيه وهي تأشر على الجوال : أجل ايش تطالع من اليوم وبعد لاتنسى قبلها سويتها وبيوم فرحي يالظالم لو نسيت أنا مانسى ياسر وقف بعصبيه وقرب منها وده يذبحها على كلامها بس تعوذ من إبليس مسكها وقربها منه وهو يحط الجوال بوجهاا هزها بقهر : شوفي وش اطالع شدن عضيت شفتي متفشله يوم شفت يقرأ عن اماكن السياحه في( طرابزون) صدق اني غبيه ومتسرعه بلعت ريقي وقلت : آسفه ياسر رفع حاجب وقال بحده وهو يأشر لراسها : طلعي اي تفكير وسخ من راسش وبذات وهي ماتحل لي ..ترا اخاف ربي شدن نزلت رأسي ماعندي شي أقوله بعد تهبيبي وشكلي اللي ماله داعي ..قلت بسرعه يوم رجع تمدد على السرير والزعل واضح عليه : ياسر اسفه وتدري فيني غبيه بس سكت يوم صرخ :اسكتي خلاص مابي اسمع منش شي بذات الحين تراجعت لوراء بخوف من صرخته ...لا لا مابي عصبيته القديمه ترجع ...ليتني تأكدت قبل اظلمه ..أفضل شي اسكت عنه بذات هالوقت هو من اصله رجع معصب ...وانا كملت عليه .. فرشت السجاده ..وصليت فرضي ..وبعدها جلست على الكنبه وعيني منه ..ابيه يعبرني بس أبد وقفت وأخذت جوالي من الشاحن ..وجلست اقلب فيه بطفش طالعته يوم وقف ومره من جنبي وقال : والله ماتستاهلين حد يسفرش صرخت مصدومه : لااااااااااااااااا سكت يوم طالعني حسيته مفزوع من صرختي بس بعدها هز رأسه وقال : استاهل الي يصير فيني عصبت من جد وزعلت الحين قلت : ندمان ياسر عشان رجعتني معاك عارفة اني ثقيله عليك وعارفه انك ماتحبني ويوم نرجع ابها بتتزوج علي تدري وشلون قلبي محروق وأنا عارفة مصيري معاك ايش والخوف والقلق اللي عايشته وفرحتي ولهفتي اللي تشوفها الحين للسفر عشان عارفة وش منتظرني بعدها من عذاب وصحت بقهر ..ماقدرت اكمل احسني انهرت خوفي وقلقي كلها طلع بسبة كلمه قالها ماكنت اتمنى اسمعها منه ...صح انا غلطت بحقه بس ..ماكان ودي يحسننني اني ثقيله عليه ...وأنا بديت تعلق فيه ياسر حزن عليها قرب منها وقال وهو يلطف الجو : الحين الزعل لي وشلون قلب لش اخخخ بس شدن صرخت بقهر وأنا اصده : ابعد عني بس الآخ ماصدق على طول ابتعد وقال : وفري ذي الدموع للي جاي قلبي نغزني وش يقصد أكيد أبوه ..قلت بسرعة : أبوك دق عليك وانت عشان كذا رجعت معصب من برا صح طالعني وقال :بأخذ شور وبعدها بنام شدن بقهر قاطعته : ياسر ابوك دق عليك شي طمني تكفى لا ترمي كلام كذا طنشها واعطاها ظهرة ودخل الحمام ..عض شفته بقهر منها ..خليها تجلس بقلقها عشان ثاني مره تتأدب ..وتثمن كلامها قال ايش اطالع ..صور عفاف ..آه ولا الثاني هذا بعد قهره ..وماتوقع يكون كذا اسلوبه معه ..وهو أول مره يعرفون بعض مفروض قدر زيارته له .. طلع بعد ما أخذ شور شافها واقفه قدام الباب فتح عينه بصدمه ..بس ابعدها عن طريقه بدون مايتكلم ... شدن بسرعة وقفت بوجه ودموعها تنزل وقالت : واللحين السفرية كنسلتها عشانه صح ياسر رجع ابعدها عنه وقف قدام المرايه سرح شعره و أخذ عطر وبخ منه ....ونظف نظارته بدون مايرد عليها وبعدها رمى نفسه على السرير وهو يسمعها تصيح وتلطم بخدودها ومسويه مناحه ..تقولون ميت لها أحد ..ابتسم بتشفي خليها تتأدب وتموت بقلقها حالف مايريحها اليوم .. شدن زدت بصياحي يوم طنشني عرفت يعني صدق ابوه دق وهو اللي خرب علينا السفرية ..الله يأخذه ذا الشايب مثل ماهو متسلط علي قلت بعجز : ياسر تكفى طمني بس سكت يوم غطى رأسه بالمفرش عرفت وقتها انه ماراح يرد لو أموت وخفت لو ازيد عليه يسفرني لمصر بدل تركيا اللي جالسه أبكي عشانها .... اصايل اليوم البيبي مشرفتنا ..ومستغربه للحين ماراحت من المغرب وهي مسنتره ..هنا والحين شوي وتجي عشره ..بس والله حامت سبدي من دلعها ..الله يعينتس يالشموخ .. قلبي معتس طالعت الجوهرة.. أبد ماهي معاها ..وهذي ساعة ورفعت الجوال توريها بشي ماركه وتبي تطلبه ..ويقال تأخذ رأيها ابتسمت بتشفي يوم قالت لها : عبير حبيبتي اطلبي الي تبين أبد ماهو فايقه اللحين اختار معاك بغيت افكها ضحك ..على صدمة البيبي يمه يمه شوي وتصيح ..بس وققت وقالت والزعل واضح بصوتها : اسفه يالله بروح تأخرت على ماما ابتسمت بسخريه توك تحسين يالغثيثه بس كشرت يوم وقفت الجوهرة وضمتها لصدرها وقالت بآسف : بيبي عمري لا تزعلي مني بس بالي مشغول شوي بسبة صقر ذي اليومين وأنت عارفة ايش اللي صار .. هزت رأسها وقالت بدلع : عادي خالتوو خلاص بروح صغرت عيوني بقهر اسمعوو من شوي تقول لعمي صقر انها مشغول بالها عشان عناد وحريمه ..والحين عندي ذي ..تقول بسبة عمي صقر .. يالله وش ذا الكذب تحذفه عشان تخفي مصيبتها حسبي الله عليها الحين شكلي بصدق مصعب يوم قال تسببت بالحادث وكل ذا الخوف عشان لايكشفها يوم يطلع .. فرحت يوم عبير لبست عبايتها ودي اقوم ارقص اخيراً مابغيتي تفكين عنا حطيت رجل على رجل وأنا فيني قهر منها كل ماتذكر وشلون مصعب كان يبيها وبتجي على رأسي قلت :سلمي على الشموخ طالعتها بقهر وقالت : عندك جوال دقي عليها لو كان وحشتك اصايل رفعت حاجب وقالت : ايه وحشتني وبدق عليها وبعد بزورها قريب خبريها لاتنسين عبير طالعت الجوهرة بقهر وقالت : هذي ماتفهم وشلون وهي مسافره رجعت طالعتها وقالت بحقد صديقتك خلاص قلعها عناد لأهلها .... اصايل حسيت بقهر ودي اتف بوجهاا ماتستاهل الشموخ يبدلها بذي الحقيرة .. ابتسمت بتشفي وقلت : صدقيني بيردها جمال وأدب ماتعوض لو جاب فوقها اربعه وطالعتها من فوق لتحت بتصغير عبير مافيها تتحمل كلامها صاحت بقهر وهي تقول : سمعتيها وش تقول حرام ايش سويت أنا عشان تسمعني الكلام ذا الجوهرة بعصبيه هي ناقصه اللحين صياح عبير قالت : وش ذا الكلام ياصايل وفعلاً خلاص عناد بيطلق الشموخ وبعدين هذي جزاتي عزمتك تجلسي معنا تقومي تسوي كذا بعبير وش سوت لك الحين بالله عشان تسمعيها كلامك السم ذا اصايل وقفت وقلت : مفروض ماقبل عزيمتس واجلس معتس ومعاها وقربت من عبير وقالت بسخريه : ياي يالدلوعه الحين تصحين يقال ضربتس حق ذا الصياح كله الجوهرة صرخت : والنهايه يعني اصايل بقهر من صرختها قالت : هيي حدتس لا تصرخين ولا دقيت على مصعب وقسم بالله يجي يحوستس بمكانتس لا تغرتس رقدته بالمستشفى الجوهرة فتحت عينها بصدمه من تهديدها لها قالت بقهر : الحين يقال بخاف منه خليه بس يقوم بنفسه اصايل وربي اني شوي وبضحك على نفسي من تهديدي لها كأني بزر بس كملت استعباط وقلت :ايه تخافين منه لا تنسين كم مره مسطرك طالعت عبير مفزوعه يوم صرخت : ايش ضربك جوجو وحطت يدها على فمها مصدومه كيف ضربك وانتي قد أمه والله هنا ماقدرت امسك نفسي ضحكت بصوت عالي بذات يوم قالت الجوهرة وهي معصبه : انتي بعد معاد إلا هي يضربني ولد المجنونه عبير : مدري ماما تقول ماله ضمان لدرجة يقتل عادي اصايل حسيت بقهر باي حق يتكلموا عنه كذا هي وأمها صرخت عليها : ليته صدق يفقد عقله ويقتلتس انتي وامتس خطافة الرجآل .. عبير بصدمه من كلامها : ماما خطافة الرجال الجوهرة عقدت حواجبها وقالت مستغربه من كلمتها : اي رجال أمها خطفته عشان تقولي كذا اصايل اعطتهم ظهرها وقالت : مدري دوري حولتس وانتي تعرفين وطلعت الدرج بسرعة تحس عمرها ندمانه تسرعت وياويلها من مصعب .. لو يدري هي اللي مخبصه بالكلام ..والجوهرة ذكيه بتجيب المستخبي ... وبيروح فيها الشايب وربي مايستاهل تفتن عليه ماقصر معاها ذي الفترة ... سامحني عموو نقدت على نفسي وش فيني اليوم أتكلم كذا الله يقلعتس ياعبير شوي واتكلم مثلتس من كثر ماقابلتس اليوم ...قربت من الجوال اشوف شيخ الشباب هون عن زعله ودق علي ولا لا بس ماشفت اي مكالمة له عصبت حدي افف قلعه تقلعك وربي مادق عليك ... @ @ @ اليوم الثاني طالعها وهو يلبس ساعته قال : شدن اصحي ورانا طيارة بس أبد ماتحركت قرب منها وقال : شدون كنت اسمع صوته مثل الحلم ...يالله هذا متى يفهم لو أنا نايمه مايصحيني ...فتحت عيني شفته واقف فوق رأسي ....اعطيته ظهري وطنشته بزعل .. ابتعد عنها وقال :خمس دقايق لو ماصحيتي وجهزتي بسافر واخليش بسرعة جلست وقلت بفرحة : بنسافر تركيا وربي قلت ماراح تخليها بنفسي وماهون عليك وقفت وقربت منه وهو واقف قدام التسريحه يضبط نفسه وضربته على كتفه وقالت بعتب : ليه كذا خليتني الليل كله اصيح وأنت بالاخير بتسفرني وحشرت نفسها تطالع بالمرايه افف شوف عيوني كيف تنفخت من كثر الصياح ابتسم بخبث وقال وهو يشوفها بالمراية : لو قلت لش بيزيد صياحش وعشان كذا قلت حرام ازيد عليش مهما كان ماتهوني علي ورفع حاجب شدن قلبها نغزها قالت وهي تقابله : بتردني مصر ولا بنرجع أبها اشر على شعرها اللي طاير وقال : نفسي يوم اشوفه هاجد بسرعة رفعت يدها ورفعت شعرها الغجري عندها ترجع أبها ولا ترجع مصر قالت بخوف وقلق: أبها صح ياسر ابتسم وقال بستعباط : لا مصر صرخت بصوت عالي : ايششششش لا ياسر عاقبني باللي تبي بس تسفرني مصر لا ياسر وهو ينزل نظارته على خشمه ويرجع يرفعها قال بسخريه وهو يقلد صوتها : مصر لا امشي بس تجهزي مافي وقت .. شدن تحركت من عنده وأنا اصيح ...خلاص تعبت من أمس وأنا اصيح وذا مايحس قلبه جلمود أخذت شور سريع ...ولبست وطلعت صليت وأخذت اغراضي ورتبتها ولبست عباتي وقلت بغصه وانا اشوفه يطالع حبيبه (الجوال) : جاهزة قفل جواله وقف أخذ الشنطه من غير مايتكلم وبعدها توجهوو للمطار .... شدن طول الطريق وأنا عايشه بقلق ..طالعته بعيني مقهوره حدي ...منه ...أول ماوصلنا المطار نزلنا على طول شحن الشنط وقطع البوردينق أول مانتهى تحولنا للصالة الحين بعرف وين رايحين له ... لانه رفض يخليني اشوف التذاكر ...إلا كنت بعرف بس يوم عرفت انا جالسين بصاله رقم .. واللي جالسين فيها رايحين ... لتركيا طالعته وقلت بهمس :قوم جيب قهوة تركيه بسرعة خليني اعدل مزاجي اللي عكرته طالعها وصغر عيونه بقهر وهمس : رجعنا لسخافتش شدن حسيت قلبي طاير من الفرحة على سواته فيني وقهره بس وربي احس بسعاده معاه غير قربت منه وهمست : ربي مايحرمني منك ياسر رفع حاجب وقال :زعلان لا تكلميني شدن عضت شفتها وقالت : اسفه طيب وربي توبه معاد اجيب سيرتها أبد ياسر تلفت حوله وقال :. بنت لاتفضحينا اقصري صوتش شدن افف غثيث يتحول لو اجيب اسمها صديت بزعل كيفه أنا اعتذرت منه واللي علي سويته طالعته يوم وقف وجاب لي قهوة ..أخذته منه بزعل جلس جنبي وقال بهمس : تصدقين وش يقهرني يوم ينقلب الزعل لش كيف مدري شدن طالعته وقلت بهمس : لأن ربي يعرف اني على حق ودايم ينصرني عليك ياسر هز رأسه بعجز وقال : الحمدلله يارب شدن أخذت رشفه قهوة من تحت النقاب وقلت : ياسر متحمسه حدي وربي كان حلم شكراً ياسر فرح من قلبه بسبة سعادتها وقال : يارب بس ماتنكدين علينا وطلعيني من طوري بسبة الكلام الحلووو اللي يطلع من لسانش شدن بسرعة قالت وهي تطمنه : لا تطمن ماراح افتح فمي أبد طول السفريه ساكته ياسر هز رأسه وقال : احسن شيء تبدين من الحين شدن : ابشر هذي أخر كلمه اقولها وبعدها راح تفقد صوتي ياسر هز رأسه وهو ماسك ضحكته مايبي ينفضح قدام الخلق .... أول ماصاحووو عشان طلوع الطياره وقف ومد يده لها يبيها توقف هزت رأسها وحطت القهوة بالسله اللي جنبها وشكبت يدها بيده ومشت معاه ... أول ماركبووو الطيارة جلست وهو جلس جنبها ياسر طالعها وقال : الشاحن وين بسرعة فتحت الشنطه وطلعته وناولته هووو بدون ماتكلم أخذه منها وهو ماسك ضحكته حتى وهي ماتتكلم حركاتها هبله ...بعد ربع ساعة حس بطفش طالعها بطرف عينه شافها تطالع الدريشه قال : غريبه خوفش ودلعش من الطيارة اشوفه راح وانتي رايحه للمكان اللي تبينه ويوم حنا رايحين مصر صرعتينا بخوفش طالعته وأشرت بيدها وتقصد ان المكان اللي رايحه له عشق نزلت يدها عشان اللي جنبهم ماينتبهون لحركاتها وتنشب معاه سوت اشارة (قلب ) ياسر طالع يدها وقال بضحكه :خلاص مسموح لش تكلمي هزت رأسها ورفعت اصبعها واشرت بلااااااا ضرب يد بيد البنت ذي بتطير العقل اللي برأسه ... يعني الحين مسويه بتوفي بالوعد والله أفضل شي تسويه ..فتح الشاشه اللي قدامه وجلس يدور شي يتفرج عليه ... (المستشفى ) من أمس يفكر يطنش رسالته ومايروح له ..بس ماقدر راح له لأنه عارف خويه بيحقد عليه زود ... دخل شاف عادل قدامه انصدم حده من متى امس مطرود برا.. رد السلام ...رفع حاجب يوم قال مصعب بسخريه واضحه بصوته :توقعت ترد برسالة هذا آخر شي عندك ...بس تجي لا لا صدمه صراحه صاير بطل منيف رفع حاجب وقال : ايه بطل ولا شايفني جبان مثل عادل .. عادل اللي متمدد على الكنبه قال بقهر : منيف لا تحشرني معاك اوكيه ترى ماسك نفسي عليك بالقوة منيف ابتعد شوي وقال وعينه من مصعب : أكيد من عاشر القوم مصعب صغر عيونه وقال : ابتعد أكثر بعد منيف قرب شوي وقال بتحدي : يالله هااه اشوف وش يطلع معك اتحداك تقوم وهو يطالع رجلسه المكسوره مصعب عض شفته بقهر وطالع عادل وقال : قلعه بسرعة عادل وقف بس بسرعة صرخ منيف وقال: وشلون تسمع كلامه كذا ياخي خلى عندك شخصيه بس ماقدر يكمل كلامه يوم عادل رفعه وطرحه بالأرض وجلس على ركبته على صدره وقال بقهر وهو شاد عليه : ليه لسانك طول مصعب : أدبه بدون ماتسأله الاشكال هذي ماينفع تأخذ وتعطي معاها منيف صرخ بقهر وهو يحاول يبعد عادل عنه : حاط حيلك علي لأني نحيف وقصير بس ذا المسدوح وهو يأشر على مصعب ماتقدر عليه ناطلك برا وقبلها مصفقك عادل وقف وقال بقهر وهو ينفض يده : اضيع وقتي معك ليه منيف قام وهو يعدل بلوزته وقال : أنا رايح ولا اشوف احد يدق يعتذر مصعب بسرعة قال : قبل تنقلع وشلون عرفت ياسر منيف لا لا من أول يستهبل يبي يلهيه طالع عادل ابتسم له بشماته مثل اللي يقول له خرج نفسك اللحين قال : خوي أخوي تدري فيه ممرض بالجنوب ويوم جاء هنا عزمه وسألته تعرف حد بالرياض قالي أخوي انه يعرف خويك مصعب وبينهم قرابه بس سألني عنك قلت له عن الحادث حب يزورك بس مافكرت انك بتضايق بشوفته وتوقعت تعرفه وقد شفته من قبل بس اللي اتضح لي ان الوصل مقطوع بينكم مصعب هز رأسه وقال بسخريه : وأنت مسوي فاعل خير وتصلح رفع نفسه وقال : الله يقدرني على فعل الخير مصعب أشر لعادل يقربه منه بس فهم وبسرعة شرد صرخ بقهر : جبان وطالع عادل يوم قال : أنا بروح تبي شي مصعب قال : لا تتعب نفسك عاد وتجي أنا بخير واليوم أبوي بيجي وبطلع والله معاد لي جلسه فيها ...وسكت كان وده يسأله عن السي دي لو حصله بين اغراضه بس يبيه هو يجي ويقول له عنه بيختبره لأخر شي ولو صار معاه وافي ذي المره بيسامحه عن الأولى عادل هز رأسه وقال : ابشر ماراح عاد تشوف وجهي مصعب انصدم ماتوقع واحد بالمية يكون رده كذا توقع يطنش مثل العادة ..بس كابر وقال : المطلوب وأشر للباب تفضل عادل طالعه وهو متحسف على صداقتهم مهما حاول يتغاضى عن تصرفاته وكلامه اللي يرميه عليه بس مافيه يتحمل مصعب غلط بحقه كثيرر اول ماطلع عادل مصعب بسرعة دف عمود المغذي بعصبيه وحاول يقوم وهو معصب دق رقم أبوه وقال اول مافتح الخط : بطلع يبه ولا والله كسرت عليهم المستشفى وقفل وفعلاً كلها ثواني وشاف الممرضه جت تجري وهي تطالع عمود المغذي مصدومه صرخ بقهر : لا تطالعيني كذا اطلعي برا .... جت بتقرب وهي تقول: لا لا مافي تتحرك مشكله صرخ عليها بقوه : مالك دخل ابعدي صرخت مفزوعه وطلعت تركض تخبر اللي بالاسقبال عن الحاله اللي هو فيها .... @ @ @ بالصالة جالسة تسمع لنانوو وهي تخبرها كم لها هنا وليه مصعب يفضلها عن الخدم كلهم ... بس وقفت مفزوعه وهي تشوف عمها طالع من غرفته وهو معصب بسرعة ناولت ولدها نانوو وقفت بوجهه وقالت بخوف : لا يكون مصعب فيه شي أبو مصعب بعصبيه : آه من مصعب بموت ناقص عمر والله بسبته اصايل تحس قلبها بيوقف : طمني وش فيه قال وهو يحط شماغه على كتفه بقهر : قالب عليهم المستشىفى ومسوي مشاكل إلا يطلع والحين دقيت على عادل رفض يتدخل يقول تصرف معاه أنت أنا مالي دخل ومدري وش بينهم هم بعد والحين بروح اقنعه يجلس ...وماظنتي بيقتنع بعد ماسمعت صوته الحين يوم دق علي معصب حده اصايل عضيت شفتي بموت من ذا الرجال قلت بعجز :وشلون طيب سكت وأنا اشوفه يعطني ظهره وهو معصب ويقول : بطلعه وبنطله بالمجلس وخليه يجلس يصيح من وجعه هناك جالس مرتاح يعطونه مسكنات ومتابعين حالته ومريحنه على الآخر بس ولدي ماهو بوجه نعمه وطلع وقفل الباب جلست على الكنبه وشلون يطلع وكذا حالته ... @ @ @ الجنوب قلقانه حدها من هدوئه اللي نزل عليه فجأة ...صح وقت ماخبره خالها ..عصب وقلب عليهم البيت ..ودق على ياسر ومارد عليه ...بس بعدها هجد وأبد ماهي مرتاحه لسكوته .. تحس انه ناوي عليهم نية ....الله يهدي ياسر ...نور دقت لي عليه بس جواله مقفل ... بحذره لا يعصى أبوه ويكمل اللي سواه ...خايفه مبارك يأخذ روحها ولا روحه ناولته فنجان القهوة وقربت منه الرطب .. توترت يوم طالعها بنظرة وراها مصيبه عارفه : دق عليش هزت رأسها بلااااا وقالت بمحاوله عشان عارفه عناد ولدها وعناد زوجها كل واحد اعند من الثاني وخايفه تصل بينهم للدم تدري بعقلية زوجها المتخلفه : مبارك خليك منهم وياسر لو مايبيها كان تخلى عنها بس شكل ولدك يبيها ومتمسك فيها تكفى لاتكسر قلبه يكفي اللي صار من عفاف وأهلها وقف وقال : خليه ينبسط يومين مع البزر اللي معاه ومصيره يرجع ولنا تفاهم قلبها وقف يوم قال كذا قالت بخوف وهي تمسك يده وترتجيه : تكفى يامبارك طلبتك تخليهم اطرده من البيت ومن الجنوب كلها بس لا توجع قلبي عليه ابعدها عنه وقال : بعرف اتصرف معاهم والكلام منتهي بسرعه طاحت عند رجوله وهي تصيح : يجعلني اخذ ضيمك ماتوجعني بولدي حس بقلق عليها لا ترجع صحتها تنتكس رفعها وقال : يصير خير خلاص اهدي الحين ولما يرجع ياسر لنا كلام وطلع بسرعة نور قربت منها من أول واقفه تسمع كلامهم بس خايفه تقرب وتقول شي أبوها يعصب بذات وهو عارف قد ايش متعلقه بشدن ...ضمت أمها وصاحت معاها وقالت بخوف : يمه أنا افداش لا تصحي كذا وترجعي تتعبي وصدقيني ياسر بيعرف لأبوي ... أم ياسر وهي تصيح : الله يفكنا شر الأيام الجايه يمه ليتش ترجعي تدقي عليه يمكن فتح جواله وتقولي له لا يرجع نور فتحت عينها بصدمه : وشلون مايرجع يمه وظيفته وحياته هنا أم ياسر ضربت على وجهااا: مدري مدري بس لا يجي وينوجع قلبي عليه عندي فراقه وهو حي ارتجي رجعته ولا ميت ومعاد لي أمل برجعته نور : يمه حبيبتي مستحيل أبوي يذبح ياسر لا تفكرين كذا صرخت بقهر : ماتعرفين أبوك ماتعرفينه قلبه قاسي @ @ @ من أمس واصل وجالس بالفندق ..متردد مايبي يروح ...بس لمتى بيأجل ماهو هو يبي يرتاح وينفك خلاص يعجل يروح ينهي كل شي ..مسك جواله وارسل لا أبوها ( أنا بجدة ارسل موقع البيت ) كلها ثواني ورسله أخذ مفاتحه وجواله وطلع من الفندق اتجههه للموقع اللي رسله له وصل رفع جواله ودق عليه يخبره بوجوده جنب البيت ..كلها دقايق وشافه يفتح له الباب نزل من سيارته وقرب منه سلم عليه ببرود قال وهو يأشر له: تفضل حياك عناد بضيق مشى معاه ودخل المجلس .. طالعه يحسه ماهو قادر يحط عينه بعينه أبو أميرة وهو منكس رأسه : دقايق بس واجي عناد هز رأسه .... وهو يحس بتوتر مايدري وشلون يقدر يتكلم معاه بعد اللي صار منها كلها دقايق وشافه جاي والشموخ وراه ...انصدم ماتوقع رايح يقول لها بوجوده ...وبذي السرعة.. توقع يتكلم معاه وينهي كل شي قبل ماتجي ... لأنه ماهو في صالحه يخاف يضعف ومايسوي اللي ناوي عليه وبعدين مصدوم حده وهو يشوف حالتها غير غير عن يوم طلعت من عنده صح ..كان واضح عليها التعب بس هنا ... وبعد على وجها اثار ضرب جت عينها بعينه ذبحته نظرتها ..مكسوره حدها بذات يوم نزلت رأسه حس ان مافيها تطالعه قلبه وجعه من منظرها وقف بدون شعور ... بس انصدم يوم مسكها بشعرها قدامه وقربها منه ورماها عند رجوله وقال : أنت رفعت راسي بوسط المجلس وهذا جميل لحاله ماينتسى بس هذي الكلبه وطته ورفع نفسه وسلم فوق رأسه وقال : أعتذر منك ماقدر يرد عليه بسرعة نزل نفسه وجاء بيرفعها من الأرض قال بحده وهو يمنعه : خليها مكانها هنا والحين قبل تطلع ارمي عليها يمين الطلاق كتتتتتتت حلوو لعيونكم فانز الشموخ لا يكون ماعندها فانز ومسويه كتتتت يقال يقهرهم ههههههه & نونــي بنت الجنوب & ماراح اسامح اي أحد ينقل الرواية بدون اذني وبعد اي أحد يسوي اقتباسات ولو حرف من الروايه سبحان الله وبحمده سبحان الله العظيم (الوتر أحبتي ) "الله يرحمك يامن وجعني فراقك " | ||||
|  |
|
26-07-19, 12:19 AM
| #1250 | ||||
| اشوف انه الشموخ تتطلق وتبدأ حياة جديدة لانه صعب ترجع لعناد وهو مو مصدق برائتها..... حتى لو فترة زمنية تستعيد نفسها وتثبت انه ما لها علاقة بسلطان... انه ترفضه لو طلبها بعد طلاقها مثلا الحياة صعبه تستمر اذا راح الاحترام بين الشركاء | ||||
|
| |
 |
| أدوات الموضوع | |
| انواع عرض الموضوع | |
|
|
20Likes
العرض العادي
