وخُلقتِ مِن ضِلعي الأعوجُا=خذني بقايا جروح ارجوك داويني * مميزة *

[نووررهه]

من جمال هالبارت ودي اتمسك فيه لين نهاية الروايه وكل شوي اعيدها مدري قال وش ناويه عليه بس ترانا ماعينا خير عقب فرحتنا بسفرتهم للجزيره عقبها انكبت عليهم المصايب من كل صوب وياخوفي عقب كل الفرح يجينا المر دفعات بس قال طلبتك خلي عيدهم يعدي على خير وعقبها سوي اللي تبين 🤗بس ترفقي بقلوبنا مع الجاي

اسأل الله العظيم ان يجمعنا على خير دوم وان يوفق كل طلابنا ويفتح على بصيرتهم ويسهل لهم اختباراتهم ويفرح قلوبهم بالدرجات العاليه بالدنيا والأخره يارب ياكريم❤

ان شاء الله لي رجعه لتعليق على البارت اكثر في تفاصيل كثيييير ما شبعنا منها 😍اسأل الله العظيم ياقال ان يرزقك من واسع فضله بالدنيا والأخره ويفرح قلبك ويشرح صدرك دوووم 💛



❤لا تنسون الوتر ياجماعة والفجر واذكار الصباح
الله يرزقكم خير الدنيا والأخره يارب❤

[فطوم ال عمر ..]

يالله وش هالابداع والجمال ياقال متابعتك من كنت ع مقاعد الجامعه واليوم اتابعك وانا ام ووليدي بكره عنده اول اختبار عسى الله يوفقهم

كل مره تاخذينا للبعيد للحب للرابط المقدس بين للزوجين للوفاء هالبارت الليله جاء جبر خاطر بكل حروفه

على ان بالي مشغول وضايقع فيني الدنيا ولد اخوي بعمر 9 سنين الصبح عمليته استئصال ورم بالدماغ ودخلت ابي اسلى شوي عن التفكير وكان الكلام والحوار موجهها لي مابع. الضيق الا فرج ورحمة الله واسعه

شكراً لك ولقلمك ولحرفك ياجميلة القلب والقالب

اخواتي هنا دعواتكم الليله لعل منكم لو اقسم على الله لاابره

[ساره فانتي]

الله ينجحهم ويبارك لك فيهم يا رب ويعلي مراتبهم آميييييين
الجزء هذا غلب جميع الاجزاء بجدارة
ابداع ما بعده ابداع ووصف دقيق لمشاعرهم جميع عيشتينا معاهم لحظه بلحظه
بوركت يداك وابداعك المنفرد المميز 🌹

[الشمـوخ]

يااااااهه ي حلااوة هالبااارت ي ناااس، نبتسم مع ابتسامتهم و تخنقنا العبره مع خنقتهم و ننحرج مع حرجهم 😅 و نبكي فرح معهم
عشنا معهم بتفاصيل التفاصيل ، مبدعه ي قال ولو فيه شي فوق الابداع بتكونين تخطيتيه بمراااحل ، ي زين شعور الفرح و السعاده عقب الحزن و الهم
احس بقلبي فراااشااات والله 😅♥ ، احتاج وقت اطلع من نشوة الفرح الي انا فيها وارجع باستفهاماااات واجد وعن سعد بالذات هههههه

(( الله يوفق عيالك ويلهمهم رشدهم ياارب و يفتح عليهم فتوح العارفين و يبارك في وقتهم و جهدهم ويبلغك فيهم ما تحبين يارب ))
وصلو على محمد اللهم صلِ وسلم عليه وعلى آله وصحبه اجمعين ♥

[مناااااوي]

سبحان الله
الحمدلله
لااله الا الله
الله أكبر
لاحول ولاقوة الا بالله

[ثراااوي]

اااههه يا الله شكرررراااا شكررااااا لاجمل و اعظم بارت وشششش هذااااا صدق شكرا انعشتي روحي ياعل روحك ما تضيم ولا تضيق ♥♥♥♥ هذا اللي نسميه جببببر الخواطر.... لي تعليق ثاني باذن الله والله يوفق طويراتك ويجعلهم من المتفوقين وتفرحين بتخرجهم من الجامعه يارب ❤❤❤

[جنان32]

ياهل البيت ...جينا والشوق ذابحنا به مكانن لنا ؟
سمع حسها المرحاب ..
-ارحب ارحب ..بمكانك ومطرحك .. ان ضاقت عليك الوسيعه لك داخل قليبي وسعن محدن بيضيمه ..يالله حيه ..
تبسم وهو يدخل .. متلاقيه نواظرهم ... الاثنين هي مستجلسه ... بسبحتها .. وشليتها ملفوفه بترتيب... وحواليها ممرضتها ... ترتب علاجاتها بشنطه خاصه ..
-السلام عليكم ..
-وعليكم السلام يالله حيه يالله حيه ..
رفعت يدها .. الثنتين باسطه كفوفها مسعدها بهجة ملامحه ونظرة عينه ..وناطقه بحبور الصوت ..
-يابو قلبن اطهر من ثيابك ليا صليت ..
ويابو ضحكتن من تبتسم يبتسم كوني
ارحب يالغالي ياولد الغالي ..انهت ..منطوقها وهو يكرر قوافي قصيدها الي قالت ..
-كوووني ... ونعم صح لسانك ياميمتي ..
-أي بالله انه صح ..لساني ماينطق لك الا الصح ... اقلط يا حبيّبي .. يله حيه ..تبي عصير ؟؟ هذي قهوتي .. نسوي لك جديده اجلس .. اجلس ..
جت بتنادي ...
-رفع يده..
-لالا مابي قهوه جيت لك انتي ...
-ياغلى من دخل علي .. مباركن عليك وعلينا زوال الغمه ياوليدي ..هنيك خير وقرة عينك بسلامة بنيتنا ...
-الله يبارك فييييك ... مبارك لك وللجميع..كلكم ماقصرتوا وانتي عاد شلتينا شيل الله يقدرني اجازيك بالطيب يارعبة الطيب ..
-بيض الله وجهك وطيب حالك ... انت بشرني عنك ! اخبااارك علومك ؟ عساك ارتحت ؟
تراكا متسند بظهره باسط يدينه وماد رجله ..
-الحمد الله الف حمد وشكر ... ازمه وعدت .. بتصير كلها زي الحلوم ..
ازين مافيها وجودك معي
ترقبها ببسمه حانيه ..
-ان ماوقفت معك واسندتك ...وش فودي ؟؟
نطق بهادي الصوت ..الرصين
-الله يطول بعمرك ..ويبلغك بالي تبينه !
-امين لنا ربن كريم ... كل مقادريه بميعاد .. حنا علينا نحسن الظن !!
رفعت اصبعها ..
-وهو رحمن رحيم مب رادنا ابد ..
عينه تناظرها ... مستمهل النواظر ... مدرك خافي صدرها ... نطق .. بدون أي مقدمات لانها ماتحتاجها ..
-سلطان انا حوله وحواليه ! لاتشيلين همه .. انا هينا بس يدي تطوله وتصد عنه مثل قبل ودوم .. ! وبصد عنه لين الله يأخذ امانه مني !!
بهتت نظرتها ويدها وقفت من تحريك خرز سبحتها ... تابع هو وعينه مركزه فيها بحس حاني وواضح مطمن ..
-عندي ايقان وايمان ان الولد الي جا منك فيه خير وبيظهر بوقته باذن الله !..
هز راسه .. بتأكيد ..
-لك مني عهد ياميمتي اخوي ماتركه لاحدن يظره لو لنفسه .. حد يدي تطول بحرص عليه دون نفسي !!
نطقت بحشرجه وعينها على ملامحه ..
-يالله تجبر خاطرك .. جبرن يتهول منه ابليس .. واعوانه ... يالله ان يسر قليبك بكل مسره ...
رفعت يدها تمسح دمعتها ... تحرك منحني ماد يده مفاجئها وهو يمسح دمعتها قبل شيلتها ..
-غاليه هالدموع وهالعين ياميمتي ... لاتطلع وانا حي ! لاتشلين هم انا موجود ..عشانك وعشان اخوي وخياتي !..علميني ششلون الله مايقبل دعاك ؟؟..ويجبر ضيقك وخوفك ؟؟
/////////////////////////////////////
مشهد سكرت عنده قريته كم مره
مشهد السكوت فيه أبلغ من الكلام
مشهد من اول مادخل عندها الين قام عنها
يأسر العقل 😍
دائما مشاهدهم هالاثنين اعشقها جدا جدا وجدا
اعشقها كعشق الوليد لنجلاه
يدري وش تفكر فيه من دون تقوله او تتكلم معه
يعرف وش اقصى امنيتها 💔 هداية سليطين
كلامه لها جبر خاطرها ادخل الفرح على قليبها
كلامه فيه كمية حنااان وهدوء ومحبه جزلة لهذه المهره العظيمه
تستاااااااااهل منه الكثير والكثير
وضعية جلسته عندها وضعية الابن البار بأمه
تقبيل يدينها مسحه لدموعها كل هذا تفتقده من ولد بطنها
الوليد عوضها الجميل الوليد سوى لها اللي ماسواه سليطين
مثل ما هي عوض له 😍

[سما وقمر]

البارت فيه سعااده
نجلاااء تشافت وطابت
كثير اسعدني تجاوز المرحله الصبعه


طلال وامه راحعين كيف رجعهم الوليد وكيف قدر وسعود يعرف ولاتهريب وجواسيس بمساعده اكيد ابو يزيد باقي نتطمن عليها الواضح حالاتهم الصحيه صعببه

سعد كيف سجل لنجلاء صوته معناته لسى حي يرزق

الصراحه البارت فيه كثير اشياء مانعرف تفاصيلهااا

الوليد يحكي لام سلطان انه بيحمي سلطان حتى جنونه من نفسه طيب يعرف سعد عنده علشان كذا سجل له صوت وقدر يوصل له

الصراحه اسعدني البارت شكرا قال قلمك فوق الوصف

الله يعين الان ننتظر اسبوعين ومممكن اكثر
مااخبي عليكم لقريت البارت اشيل هم امتى يجي البارت الثاني

[برق الشمال]

صبااااح الخيييييير ياوجه الخيييير😍

اول شيء وقبل كل شيء الله يوفق اولادك ويفتح عليهم فتوح العارفين وربي يبلغك فيهم مايسرك 💖

وثاني شيء شكرا شكرا شكرا شكرا عدد كل حرف من بدأت خذني لين امس 🤩
والله والله انك اهديتني سعاااده ربي وحده يعلمها لان مايعلم الحال الا الله ربي يسعدك ويعطيك ويزيدك ولا ينقصك 💓

صدق صدق والله ماني عارفه عن اي شيء اعبر واقول لكن اقصى شيء بقدر اقوله تدرين اني مبسوووووطه وراضيه عن رنا وزناد متخيله انه اول مره اقرا لهم مشهد مااكون مشتحنه وقاهرتني رنا ودي انها معطيته وجهه مايستاهل والله <<<< تررررى اقول هالكلام من سعاااااااادتي بالبااارت🤩🤩🤩

اول مره اشوف الوليد فرحاااان يااااااارب يااااارب تمم له كل افراحه وتسعده وتبسطه وتزيده😍 شفتو كيف تعبيره عن الفرح مااحنا كذا بالله يابنااااات لمن فرحنا فرح عجزنا نعبر عنه على طول نسجد لربنا نشكره < خذني واقعيه جدا جدا فيها من تفاااااصيب حياتنا كل شيء طبعا الا الوليد🙈 هذا شخص ملائكي لم ولن يجد مثله ابداً ابداً ابداً💓

نجلاااا اخييييييرا طابت نجلاااا ورجعت مرت شيخنا وبنيتنا قويه وشاااااامخه🤩
اصعب شيء مر عليها وعلينا الباااارت الساااابق واسعد شيء مر علينا هالبارت منتصرين فرحانين ممبسووطين عيونا تبرق فرررررررح وعلى سعد متطمنين << شفتو هديته بنات طمن قلبهااااا مره مره خلااها تثق فيه اي رجل انت يالوليد 😢

امي مهره انسااانه عظيمه قلب معطااااء وقفتها مع الوليد ونجلا الله صدق صدق هي ام اليتامى من هالمنبر اعلن ان ودي سلطان يسامحه وليدي ماهو عشانه الاقشر عشان امي مهره 🥺 شفتو بنات شلون مشهدهم وكيف دخلته بس عليها يااهل البيت حنا جينا🤩 ياناااااس بس شفتو وهو قاعد عندها ويكلمها ويطمنها والله والله اني تمنيت انه ولدها وان ماعندها سلطان ابد لسببين الاول ماودي الوليد يسامحه والثاني عشان مهره مايشقيها هالولد وبعد طلعة الوليد وكلامها مع سمرررر رضيت انه يسااااااامحه ومن قلب بعد تستحق مهره يتوالفون عيالها

امممممم برجع مرتن اخرى بكتب بعد احسني طولت << ماابي احط ميثا ومهره برد واحد🙈

قبطاننا ياعمري والله مدري ايش اقولك احس لساني يعجز اعبر لك واكتب لك شعوري😢

احس هالبااااااارت جبر خااااااطرنا مره مره مره🙈🙈

[ترانيم السحر]

صباح الخيرات للجميع
ماقرأت البارت
جايه اطمن نفسي قبل اقرأ البارت من الردود 😅 انه مافيه مواجع🥺😔😩💔