آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
01-09-21, 12:03 AM
| #31 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  الفصل الثاني 29 عتمة شعرك-كانت- ليلي , ظلي وحكاياتي نامت رحاب ليلتها مرتاحة من شافت ابوها يرفض الموضوع جملة وتفصيلا و كاطع من رجع للبيت وشافه ظلمة وخواته ماكو وهو الي متعود من تصير هيجي مناسبات لازم يباتن لثاني يوم حس اكو شي وفخرية هم, مو عوايدها من عدها شغلة لو حجاية بكلبها لازم تنتظره باالباب وتحجيله واليوم هي ماكو مع انه الموضوع بيه سالفه لازم تنكال استقبلته ببرود واخذت هدومه منه وهي دتعلكها بالزاوية الخشب اللي بصف الجرباية فسالها كلها شبيج شو مدلغمة خيرج !! شسويتو كالها وهو كاعد على الجرباية ينزع جواريبه وعينه واذانه يم مرته -- والله شكلج ابو سعد طلع الولد متصوب بالحرب و و... رايحة رجليه - ها شلون يعني وكعدت شرحتله الموضوع بالتفصيل كلمة كلمة من البداية للاخير ونص الحجي انعاد مرتين - هشكل لعد جاوبها وهو متضايق لا بويه لا ماننطي ليش شبيها البنية !! كوليلهم ابوها مايرضى ... فخرية هم جانت متوقعة رد كاطع مهما كان هاي رحاب اول فرحته ! @@@ وعلى الرغم انه مرت ايام اكثر من ما مجانت متوقعة رحاب على غياب وسام الا انه هي بداخلها شويه ارتاحت وردت روحها كانه اتحررت من خوف لازمها لفترة وفك عنها وراها حادثة الخطوبة بكم يوم وبعز الظهرية صعدت عهود للسطح تشر هدوم مثل مجانت متعودة اذا مو يومية فبين يوم ويوم و من شدة الحر ماتشوف بشر بالشارع ولا حتى طير بالسما لكن البنية صدفة لمحت واحد يروح ويجي وهاي اكثر من مرة صاير يفوت منا بس جانت خايفة تباوع عليه وتركز لا تروح امها تلكفها مثل ذيج المرة وتسود يومها خلصت الهدوم بسرعة وحطت الطشت على راسها وهي وتنزل جانت تلمح الشاب يباوع عليها وظل يدقق .. كانه ياشرلها او هيجي شي عهود شبخت الدراج ابو الثنعش باية الى درجتين نزلت ركصض على رحاب اللي جانت متمددة على جربايتها ولافة ايدها جوة راسها -لج رحاب كومي حجتها بصوت ناصي فزت البنية شكو شبيج جاوبتها مخروعة نصت صوتها عهود مخروعة ولزمت حلك اختها حتى لايعلى صوتها وشاورتها انه وسام صارله ساعة رايح جاي يفتر يم بيتهم -شهكت رحاب وصاحت عزة شجابة هذا وانت منين عرفتي هذا وسام؟ -روحي هسه شوفي وبعدين نحجي راحت وكامت تمشي على كيف من دتطلع من الغرفة البيت كلهم ينامون هيجي وكت الظهرية وماينسمع غير بس صوت المبردة بالصالة وامها وبيبتها نايمين بيها ومدت راسها على غرفة ابوها شافته نايم ود يشوخر على جربايته وصوت البنكة تفتر على اسرع درجة وميلاد وسعد بالمطبخ ديلعبون بملاعيبهم بسكوت رجعت اخذت فرة لخ بالبيت حتى تتاكدج محد كاعد دغته عهود صعدي فوك واني اراقب وصدك صعدت رحاب وهي حافية حتى لايطلع صوت نعالها وهي تمشي وشعرها منثورعلى جتفها اول مامدت راسها من السطح راسا شافت وسام رايح جاي بدربونتهم الظاهر صارله فترة خطية وجهه مسمرومحمر وينكط عرك وحتى قميصه صاير قطعة مي محتار يروح ويجي ومايعرف شلون يتواصل وياها رفع راسه مرة لخ وجان يلمحها وهي واكفة اشرتله على كيف وشويه كامت تلوب وتكمز على كيف الكاع جانت حارة كلش وكامت تجويها اشرتلها مرة لخ وهو اول مشافها راح بزاوية بعدية شويه حتى لاحد ينتبه عليه ابتسم ابتسامته العريضة ولا اراديا اتنهد تنهيدة قوية كلش ماحس بروحه عليها وشافته حط ورقة صغيرة لفها حيل بين الحايط والسياج صايرة مثل الحفرة صغيرة بيناتهم سلم عليها وراح وعيون رحاب ظلت تلاحقة ماتصدك انه اخيرا شافته نزلت ركض على الدراج ومن لامست برودة الكاشي رجليها حست براحة فظيعة مشت على كيف واشرت لاختها الي ظلت اتابعها بعيونها وراحت على كيف من باب المطبخ وهي د تطلع لحكها سعودي وجرته عهود ودته لغرفتهم راحت خطف جرت الورقة على السريع ووحطتها بصدرها وكبل راحت لغرفتهم وطلعت عهود وسعودي وسدت الباب وبدت تقرا لزمتها الورقة جانت مترطبة من عرك ايده مع ذلك ظلت تشمشم بريحتها وتحضن بيها الورقة جانت بضع كلمات مختصرة ومقتضبة لكنها كانت كطوفان نهر بوسط صحراء بالنسبة لرحاب , اعتذر منها لانشغالة وكاتب هذه المرة الثالة اللي يمربيها بمنظقتهم ومايعرف شلون يكللها انه هو جاي او موجود حتى يسلم عليها وانه فاتح اهله برغبة بالزواج لكن للاسف الموضوع سرعان ماتاجل بسبب استشهاد عمه العقيد بالجيش وكلمات اشتياق كانت مؤلمة اكثر من كونه مفرحة وسام تماما مثل ماذكر في كلماته كان نحلان وتعبان وحتى اي رغبة ماله باي شي وملاحظة صغيرة ذكر بيها ان تمزق كل ورقة ورسالة توصله منها خوفا عليها من اهلها لكن هي ماسوت هذا الشي دخلت عهود عليها وسدت الباب ورة ماسكتت الجهال وانطتهم ملاعيب ظلت عيونها على رحاب اللي جانت الفرحة تتطاير منها ركضت شبكت اختها وكامت تبجي بعدين انتبهت على نفسها وكامت تحجي بصوت ناصي -تعالي ولج انت شمدريج بوسام يالمعزاية اتبلعمت عهود وظلت تمتمت بس رحاب جرتها وكعدوا على الجرباية -احجي ولج - مو اني مرة شفت هذا الدفتر الازرك وقريته فتحت رحاب عينها وماعرفت شتحجي -بس لاتخافين والله العظيم ماحجيت لاي احد ولا فتحت حلكي بشي - زين شمدريج هذا وسام - مااعرفه والله بس شفته رايح جاي وبعدين ظل يباوع عليه يمكن عبالة اني انت !!! فعرفت هذا وسام والا منو يروح ويجي كبال البيت سكتت رحاب وماعرفت شتكول - بعدين سالتها عهود هو ليش مايجي يخطبج ويفظها -- اووف عهود شمدريني يكول عمي استشهد قبل فترة ويستحي يفتح الموضوع ويه اهله -اخاف هذا ديجذب عليج!!! - لا والله هو يحبني شفتي شلون جاي بعز الحر علمودي بس مااعرف اكيد عنده ظروفه اني هم اتمنى يجي يخطبني اليوم قبل باجر بادرت رحاب هي هم تكتبله ورقة صغيرة وتخليها بنفس المكان لكن من تشوفه يجي ووصتها عهود تكتبله انه اجوها خطابة بس هي ماقبلت استحت تذكرله هذا الشي حتى لايحس انه هي ذابه روحها عليه وصارت نوع من المراسلات تصيربينه بينها اسبوعيا لمدة شهر ونص الا ان بدت المدارس مرة لخ بشهر العاشر هالسنة سعودي حيدخل مدرسة وانخبصت فخرية بيه يوميه رايحة للسوك تشتريله حاجة وجانت مرات تاخذ عهود وياها يعني مو مثل قبل رحاب ماتطلع مع ذلك كانت اكثر وحده فرحانه برجعة المدارس على الاقل اكو اكمل تشوف وسام ولو لمرة وحده كافية وصحيح انه هي جانت اشطر من اختها عهود بس الاخيرة هم جانت خوش درجات عدها قنعت امها تكمل سادس واذا ماقبل ابوها تدخل كليه مثل رحاب عود ذاك الوكت ماعدها مانع تروح دار المعلمات. وكلش فرحت من سمعت فرات نجح من الدور الثاني وصارت رحاب توصل ميلاد وسعد لمدرستهم يوميه حتى لو اختلف جدولهم الصباحي والمسائي ومرات تروح عهود مكانها اذا جانت بالبيت ... وبشهر الدعش جانوا الجهال عدهم ظهري ويطلعون بالاربعة ونص العصرية راحت رحاب مثل كل يوم تجيبهم وبطريق رجعتهم بدت الشمس تغرب شويه ... وفجاؤة انطلقت صفارات الانذار... الصوت القوي والمخيف خرع الجهال و دب الرعب بالاطفال وصار الهلع اكثر من انسمعت اصوات الضرب العنيف قريبة عليهم وكاموا الجهال يتراكضون منا ومناك وكلهم اطفال ابتدائية من الصفوق الاولى عمر اكبرهم ما يتجاوزال ثمان سنوات... ركضت رحاب وجرت احوانها ووياها تلاث جانو بصفها ديمشون ... وبطريقهم لكت بيت هيكل مبني على النص راسا ختلت هي والجهال جوا السكف مالته وشافت اثنين اخوان يتراكضون ويبجون مايعرفون وين يروحون ركضت جرتهم وجتي خلتهم بصفها وصاروا لازكين بيها ويتبجبجون من الخوف وكلما تعلى صوت الصفارة تزيد دكات الكلب خوووف اكثر وراها بشويه لحكهم جاهل وهو يصيح ست االله يخليج طلعي مناك ست الله يخليج كلعي وكف كبالها ويصيح انتبهت عليه هذا حسام ابن جيرانهم بالفرع الثاني جاهل ضعيف وملابسه وصخة وسنونه الامامية واكعة ومزينيه صفر واذاناته مشنترة وهاي صار ثاني سنة يعيد الصف الثاني وكف كبالهم وكام يبجي ويصرخ بطريقة هستيرية ست راح تموتون والله هنا الله يخليج طلعي منا صاحت عليه رحاب انت مو حسام تعال ... تعال يمنا ولك تعال اركض اوكف هنا يمنا لا توكف بنص الشارع وجانت تصير صوت طبه هزت البناية طلعت رحاب ووكفت بصفها خافت انوبه لا البناية توكع عليهم حسام من خوفته شمر جنطته وكمبص بالكاع ست الله يخليج طلعوا مناك راح توكع عليكم اتقربت عليه رحاب اتجره يمها كام يبجي ويصرخ بشكل عنيف لا مااريد اجي وياج مااريد اموووت انتو كلكم حتموتون وكام يتلفت يمتى ويسرة ويهز راسه حيل وبدى مثل الوغف يطلع من حلكه الجهال من شافوه بالزايد خافوا ولزكوا بيها مرت عشر دقايق كانه عشر ساعات اتقربت منه رحاب على كيف وحاولت تسحبه يمه كام يبجي ويحجي بصوت مخنوك والله ست اخاف عليكم تموتون مثل امي امك وين ماتت حسام ؟ لعد هاي منو اللي وياكم رفع عيونه الحمر وظل يمسحها بيد المتجرحة والوسخة الله يعلم صارله شكد مغاسلها كالت ويه نفسها ست هذه مرة ابوي امي ماتت بالقصف من جنا ابيتنا القديم والله ست اني شفتهم وكع عليها البيت هي وخواتي حضنته رحاب وجرته يم الجهال وودقايق ومرة ثانية ضربت الصفارات اعلنت حالة زوال الخطر اتنفست رحاب الصعداء وحضنت الطفل اللي ظل يمسح دموعه وانتلبت على الشخوط الكومة اللي بوجهه وجرج جديد على رقبته وحمار قوي وره اذنه سالته يله كوم حتى تجي ويايه اوصلك هاي ليش هيجي ركبتك حمرة هاي هم متعارك مرة لخ ؟ دفعها على كيف واخذ جنطته العتيكة والمشكشكة كلها لا ست والله هاي مرة ابوي كتلتني البارحة علمود ردت تمن لعد عافها وركام يركض للبيت وبدت رحاب تلمح شوف الامهات يدورون على جهالهم واللي واكفة براس الفرع تنتظرهم وصلت الجهال الخمسة لبيوتهم ورجعت وهي متالمة كلش على حسام ودموعها بعينها عليه تمشي وتمسحها ومن حجت القصة لامها عرفت انه حسام جان من اهل بعكوبة وبوحدة من الغارات بينما هو واخوانه يلعبون بالجووله بصف بيتهم وكع صاروخ على البيت وبداخله امه وخواته الاثنين الطفل المسكين انحفرت بذاكرته حادثة سقوط البيت ومنظر امه جوة الحطام ... وراها بكم يوم جان شويه الجو دافي جتي بدرية لبيت اختها تسال عليهم صارلها فترة محد لا يروح ولايجي يمها وخصوصا هي مجانت جارة خط تلفون فخرية جانت طالعة للسوك بذيج الساعة وماكو بس رحاب وبيبتها بالبيت و رحاب جانت كاعدة من الصبح تحضر نفسها عسى ولعل يجي وسام اليوم وتشوفه ومن دتمشط شعرها شافتها بدرية وهي متمددة على الكرويتة ودتدخن جكارتها والجهال ديلعبون بالحديقىة صفنت عليها شويه وجانت تصيحها كالتها تعالي ولج شنوهاي هم مسويه كصيبة - خالة شسويه لعد كلش اسويه راسا ينفل جرتها وطلعت المكص والمشط والجكارة بحلكها ماتوكع وكامت كصتلها برجم وشويه خصل منا ومنا وظلت بالفرجة تلف بيه حتى لاينزل على عينها وخلتلها قراصتها الحمرة الجبيرة صفح وشويه حمرت خدودها وشفايفها وحطتلها كحل جوة وفوك عيونها واتذكرن ام فاضل شلون ماليه عيونها كحل وجارته لاذانها وكامن يضحكن عليها ولبستها قميصها النيلي المشجر باوراق ناعمة سمائية وبيضه طلعت رحاب غير شكل تماما شعرها المفروش ورة ظهرها والخصل المرتخية علة وجهها انطوها حيويه اكثر اضافة الى اللهفة والشوق كانه الحياة تضج صارخة من ملامحها الناعمة وركضت حطت رشتين عطر من بقايا الشيشة اللي ضامتها وهي تمشي الابتسامة مفاركت وجهها الجذاب والبريئ وحست انه فعلا اليوم حتشوف وسام بعد ما ملت من الانتظار وبالفعل قبل ماتوصل للمدرسة سمعته يصيحها بصوت ناصي وكفت شويه قبل متندارو اخذت نفس عميق واقترب هو منها اكثر وقبل لاتباوع عليه كلها شميت ريحتج اول مافتت للفرع بس شفتج ملابسه عباية !! ابتسمت اله والخجل مخلاها تحجي - يالله يالله شكد مشتاقلك وشنو شعرج شكد حلووو وين جنت ضامته ! اتمنى لو اكدر هسه اضمه هيجي بايديه واشبع بيه شم عاد هي انحرجت وكامت تمشي اكثر - اللقاء مدام اكثر من دقائق كانت اكو حركة ناس رايحة جاية براس الفرع فاختصرها ببعض الكلمات وكلها كل ليلة خميس حيحاول يترك رسالة بنفس المكان وهو على وعدة على نهاية شهر الرابع الجاي من تطلع السنة مالت عمه يجي يخطبها بس كون تنتظره وودعها وعيونه مغوركة بدون مايعرف السبب شعر ولاول مرة بالم بصدرة وهو يغادر عيونها الحزينة اندار عليها مرتين وتلاثة وهي دتمشي تروح كانه راد يحفظ على الاقل ملامح شعرها الليلي الاسر غرك مرة اخرى في بحر همومة كيف يروح يخطبها وشلون حيفاتح اهله وهمه اصلا حاجين قبل سنتين ببت عمه بس مستحيل انه رحاب تكون لغيرة ومستحيل لا مستحيل يرتبط باي امراءة اخرى مجرد فكرة انه شخص ما غيرة يلمسها او يلمس هذا الشعر الحريري كانت تثير جنونه يموت اذا احد غيره شم نحرها ومن جانت عيونه تتراكض تسابق الطريق والشوارع كانت لحظات نظراتها اله تمر مع كل شارع وكل محطة ومن يتذكر خجلها وحزنها من يفترقون ينعصر قلبه الم ومرة اخرى نزلت دموعه لا اراديا حاول يفتح عينه بكل وسعها ويركز على امور اخرى حتى تجف الدموع او على الاقل يمنع نزولها لكن ماكدر... واول مرجعت رحاب جانت جايبة الجهال وجاية وراسا طبت ركضت على خالتها فرحانة وتضحك بدرية اشرتلها انه امج موجودة فبلحظة عدلت مشيتها وتعابريها بس وين فخرية راسا لكفتها وصاحت عليها وهي تغسل المسواك على السنك شبيج اليوم شو طيورج طايرة هاي كلها لشوفة بدرية يمه ماتروحين تبقين يمها منو لازمج اندارت على بتها لج يارعنة شو ملابسه العباية !!! ولج لو شايفج كاطع جاان ذبحج ذبح ضحكت بدرية وكالت ها فخورة ليش بدرية شوية عيني هههه ثم هسه كاطع مو هنا دخليها بس هالمرة وعمزت لرحاب اللي راحت لغرفتها طايرة من الفرح فسالتها اختها صدك بدر شوسيتي ويه هذا الضابط سلمان شسويت يعني الله لاينطيه لاليلي ولا نهاري نهارمن وراه -ليش يمه شبيه وياج -فخرية من مرة راح لعلاء ديحجي وياه ماامنطيه وجه ومثل اللي طارده وصاير حجي خشن بيناتهم و كله منطي حجاية لجماعة و مسيرين عليها انوبه هذا جاز من علاء كام كل صبحية جياب المختارو جاي علينا و هاي اول ايام جانت والله عود بحجة معلومات ما معلومات خلصنا من هاي السالفة انوبه كام يجي وحدة والله بحجة شنوهالمرة عود هو اللي مسوي فضل عليه احسن من ميجرجروني بالامن واني من اشوفه تكوم عظامي تطكطك وداعتج ونفسي تكوم تلعب تالي رحت على جيراني ام طارق الله يسلمها ووصيتها ماتعوفنا وحدنا كامت الله ينطيها ان شاء الله كلما تحس اني فتحت الباب لو هو اجى تعرفه من يطبك السيارة بباب البيت ادزلي واحد من جهالها بحجة محتاجين شغلة مني الا ان يروح وهو كلما يشوفهم كام يتنرفز - يا ليش تعرف بيه!! - اي ام طارق صاحبتي حيل جرت جكارة وكعدت مرة لخ وعينها على جهالها ديلعبون كلشي حاجيتله شسوي لعد فخرية لا اطب ولا اطلع مكابله الحياطين وكاعدة على الاقل احجي واسولف وياها هي خوش مرة كلش فقيرة صدك فخرية شوكت يرجع كاطع - بالثنتين -لعد احضر نفسي اروح -دكعدي شعليج بيه -لاخية اروح مااريد اشوف رجلج قلبي ينقبض اعذريني ام كاطع بس اني وابنج مانتوالم هيجي من الله هههه -ضحكت ام كاطع وماحجت تفر بسبحتها اللي طولها شبر ونص -زين بدرية ليش ماتقبلين بيه مدام رايدج -يا شبيج فخرية جنج معايشة هنا هذا كلاوجي كو......د وين يخلوه يمه وهو ضابط يتزوج وحده وياعيني ورجلها معدوم لا يسلخون جلده سلخ - عزة لعد شيريد مو تكولين خطبج -طفت جكارتها بدرية بالسنك واندارت عالة اختها فخرية انت افهميها بعد زواج ايش يكول اني ادبرها عليمن كاعد يقشمر!! لعد اني ليش خايفة على علاء بس لايسوي بيه شي ويروح بالرجلين الف الحمد لله من التحق -صفنت فخرية وصار راسها يودي ويجيب -وقبل لاتطلع صاحت على رحاب اخذتها وياها ها لو تنطبك السما على الكاع لو يكطعوني وصل اني غير اياد مااتزوج لو اموت مااتزوج وراه ادعيلي فخرية الله يفرجها عليه لبست جنطتها وجرت جهالها ورحاب تمشي وراها راحت رحاب وشافت وضعية خالتها هي صح جانت احسن من قبل بس هم جانت تنقهر عليها المجلات والبردات بالكاع والخيوط وقطع القماش مع انه هي نفسها رحاب اتعلمت الترتيب من خالتها بس الظاهر جانت بدرية متازمة نفسيا كلش وهاملة البيت بهالشكل لمت رحاب البيت واثناء ذلك دخلت عليها جيرانهم ام طارق تسال عليها وراسا رحاب سوت جاي وعلى السريع شالت كل الغراض اللي بالكاع ام طارق جانت امراءة بعمر خالتها تماما بس مثل امها متزوجة من وكت كلش صح هي بيضه ووجها صافي ويلمع بس جانت مبينه اكبر من عمرها شي عشر سنوات زوجها ضابط بالجيش وعدها ست اطفال هي امهم وهي ابوهم بغيابه والمسؤوليه كله عليها وماشاء الله جانوا على طول نظيفين ويلمعون وبيتها يبرج برج كعدت ام طارق تجر نفس جكارة ويه بدرية وبدرية تتشاقى وياها كونها ماتعرف تسحب نفس بس مجرد تخلي بحلكها واطلع الدخان المرة هم ماعدها احد اهلها كلهم كاعدي بذاك الصوب وكلمن حاير بروحه وظلن يسولفن ورحاب تكلب بالمجلات وجان تشوف صورعرس لاميرة بريطانية اخذت رحاب الصورة لخالتها وكالتلها شوفي خاله هاي الاميرة شكد تشبه مرة خالو علاء نرجس بس شعرها كصير وخشمها اطول غمزت بدرية لرحاب اللي بسرعة حست على نفسها رجعت المجلة بمكانها وكعدت تاكل باظافيرها من الخوف وظلت تلوم نفسها وخافت من هالحجاية نست همه شكد منبهين عليهم محد يجيب طاريهم النسوان باللي بالمنظقة جانوا يجيون يوميه وحده اثنين لبدرية يطلبون خياطة وياهي اللي تشوفها اول مرة تكول عليها سبحان الله تشبه هاي الممثلة المصرية مديحة كامل خصوصا من شويه ترتب نفسها وتسوي شعرها بس هي جانت ماتهتم لحجيهم ولا تختلط زايد وياهم حتى من يعزموها عرس وطهور ماتروح وكان لازم رحاب ترجع صبح يوم الخميس لانه جان عدها موعد تنتظره هاللية تستلم رسالة من وسام لو هي لو عهود تجيبه حسب وصعية البيت عهود اللي صارت تعرف كلشي عن اختها والرسائل كلها عبارة عن مقتطفات من اشعار وقصائد وتجديد للوعود والعهود وفترة صارت انه اسبوع ورة اسبوع كاموا حزبيين من الفرقة يجيون يسالون بدرية بالتفصيل عن زوجها ويكتبون تقارير عنه وكذلك اسئله غريبة قبل جانوا بس ضباط الامن يعرفون ويجون يسالوها اشو صاروايومية واحد جاي داك الباب وحست الحجاية انطشت بالمنطقة كلها انه هاي رجلها معدوم ويوم ورة يوم بدت الرجل تخف عليها والنسوان مكامن يسلمن عليها من يشوفوها بالشارع والرياجيل نظرتهم صارت متوحشة وغير محترمة كامت تتهرب حتى من عيونهم وقلت كلش طلعاتها طبعا هي عرفت السبب وسكتت وماحجت اي حتى لاخوها علاء مكالت بس وصلت مرحلة تروح تتسوك مال عشر ايام وماتطلع من باب البيت ولاحتى لبيت ام طارق واول بداية شهر الثاني من السنة الجديدة علاء جان كاعد بمحله يجي بالاجازة يومية يجيك الحسابات ويشوف الشغل شلون ماشي وفكر انه يشتري المحل الصغير بصفه ييبيع بيه اقمشة واللي شجعه صاحبه وياه هم تاجر قماش بس محله بشارع النهر بنهاية الشارع كله نفتحه اني وياك شراكة وبين ماهمه كاعدي يتفاهمون اجى الضابط سلمان سلم وراح من شاف الحجي كاعد ووياه وجماعة لخ ماحجى اي شي على كد السلام وبس بس علاء جانت ايده والقامة جان متحلفله ميت يمين بس يحجي ويجيب سيرة اخته يبتلي بدمه خلاص هاهي شيصير خلي يصير عيونه جانت تجدح نار كعده الحجي وهداءة ومن افتهم منه السالفة داورها في دماغة واجى عليه ثاني يوم كله بويه علاء اني رجال شايب وعمري بالسبعين وانت تعرفني حجي واخاف الله وتعرف شكد اعزك واريد خاطرك مثل ابني معزتك خو انت تعرف من ابني راح مظالي احد راح اوكف وياك واريدك توكف لاهلي اذا لاسامح الله صارلي شي ماافتهم علاء وظل صافن عليه كله بويه انت تكول اختك ماترضى باي واحد يريدها وماترضى تتزوج كول الها اني اخذها اتزوجها يعني بس بالاسم لا اوصل يمها ولا حتى توصل يمي مثل مايكولون استر عليها حتى هم هي وهم انت تخلصون من هاي السالفة ولا اني بالحزب ولا عندي شي اخاف عليه وانت براحتك ان عجبك او لا صفن علاء وماحجة شي فكمل الحجي اقلها كدام العالم هي متزوجة وعدها رجال الله شاهد مالي اي غرض لو نية بهالموضوع الا انه استر عليها من هالذيابة هاي سكت علاء مجاوبه بس فكر بالموضوع وبالفعل راح واقترحه على بدرية وخيرها يا اما تقبل بيه او ترد ترجع تكعد وياها بلا عناد ولا مغثات لانه هو هم اعصابه تعبت بدرية كامت تبجي من سمعت بالزواج وعلاء حلفلها ووعدها انه حيكون زواج صووري فقط بس كلش خافت كالتله علاء اخاف هذا يكلب علينا ويجيني للبيت بحجة مرتي ويومية طاب طالع كلها خلص لعد ترجعين للبيت معززة مكرمه وهذا البيت تقفليه وبعد ماتوصليله ومخلالها مجال حتى تفكر شال جهالها ورجعها وياه @@@ كاطع صارله فترة مو على بعضه مهموم وتعبان وصفنة توديه وصفنة تجيبه من يطلع للشغل يمشي ويتلفت ومرات يروح ويجي بالممر مال الحديقة وحده وزوجته وجهاله حسوا بهذا الشي حتى مو مثل قبل يومية يروح يطلع العصرية ولا حتى يسهر يوميه لا صار بالاسبوع لو مرة يطلع لو لا وبالبيت هم مكام يشرب مثل الاول بكلشي ماله واهس قبل جان يخاف من الوضع ويختل بالبيت هسه هو خايف على نفسه يحس اكو ناس تراقبه هاي صار مرتين يروح لسميرة وتاشرله من الشباك ان روح لاتجي وبعدين يعرف انه الامن جايين عليها ويلحون بالسؤال وهم اكو ناس لابسين مدني ساليها وجايبين طاريه عداها بالشغل اكثر من واحد اجى عليه يكله اكو ناس جتي تسال عليك هو جان خايف لاسالفة بدرية ورحاب ومرة علاء عمن عليه فكطع حتى سيرتهم من البيت ولاحتى بيت غازي يوصلوله ومن جهة لخ رحاب مكامت تستلم اي شي من وسام ولا صارت تشوفه هاي يجي شهرين من الثالث وهسه وخلصت الامتحانات و المدارس وهو ماكو جانت تكول ويه نفسها اخاف ملتهي بامتحاناته ومايكدر يجيني الا ان تحديدا في ثاني يوم من شهر حزيران عام تلاثة وثمانين جانت ظهرية يوم خميس نزل كاطع من التكسي ماله يركض حتى الباب ماسدة جان يزار عيونه تجدح نار وشرار حتى السايق ايهاب لحكه عرف صاير شي وظل واكف يعاين بالباب ومن عصبيته يرجف والعرك يكت وكوة يجر رجله ويمشي ويعرج والرغوة ماليه حلكه ويصيح ولكم اني هيجي تسووون بيه يا كح......ب نوريه جانت واكفة بالحديقة دتنطي لسامي فلوس يجيب شويه فواكه ويجي ومن شافت كاطع هيجي انصدمت دفعت سامي على البايسكل يروح ويرجع بسرعة وركضت وره اخوها سامي افتهم انه الموضوع متعلق برحاب بس اللي شافه من شباك الهول كاطع سحل رحاب من شعرها وطببها للغرفة والنسوان جيتن عليه .... | ||||
|  |
|
01-09-21, 12:09 AM
| #32 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| نهاية الفصل الثاني الجزء 30 زجاجة عطري- المحطمة بعدما دخل كاطع لبيته مثل العاصفة الهوجاء كان يزمجر ويصرخ باعلى صوته ومعظم كلماته صارت ممفهومة ارتبك سامي من سمع خاله يصيح ويفشر على رحاب وركض راح بالبايسكل حتى يلحك يرجع بسرعة مافكر يبقى ولا عرف يتصرف ساعتها ...بس ساعتها هو حس وعرف انه الموضوع اكيد متعلق برحاب ...معقولة حيمر مرة ثانية بمعاناة جديدة!!!ماصدك شغلة الخاطب الاخير, فاضل فشلت ....هالمرة المسالة متعلقة برحاب نفسها ...حاول سامي يطرد هاي الفكرة من راسه والشمس تصكع بيه وصار يسوق البايسكل بسرعة سيارة ودموعه تتطايرلا اراديا ليش ...ليش هيجي ليش صار يحجي ويه نفسه ومن خبصته كام يسوق على الارصفة وعلى التراب ليش رحاااب هيجي تسوين بيه معقولة كل اللي سويته الج!!وكل هذا احساسي بيج ماحسيتي بيهولا عرفتولا اهتميتمعقولة الناس والدنيا كلها تعرف الا انت ماعرفتيمعقولة كل هذا الحب اللي عماني عن بنات الدنيا كلها ماشفتيه ...ورجع بسرعة وهو ماحس بنفسه ولا يدري باللي حوالي صاروا يصيحون عليه ويسبوه ببسب سرعته ...وكل لحاظتهم سوى مرت بسرعة البرق على باله الا لحظة وحدة ظلت تتراقض امام عيونه اللحظة اللي طلعت بيها من غرفة الدكتور فرحانة ومبتسمة والحمار طاغي على وجههاكل ظنه كانت فرحانه بوجوده هذه اللحظة شعلت النار بيه وهيجت كل المواجعواول ماطب ذب البايسكل وعلاكة البطيخ بالكاع وركض على خاله ...الي من عصبيته مجان يشوف اي احد.. كاطع اول ما نزل من التكسي ركض للبيت وعيونه دم ...جانت رحاب كاعدة متربعة بالمطبخ دتلعب ويه سعد اخوها وكصيبتها تتمرجح على ظهرها جيت عليها ابوها جرها من ظفيرتها الطويله وضربها ضربه على راسها داخت وانسطرت ماحست بروحها وظلت تتخبك بمكانها وحيل بده يسحل بيها ويفرها بالكاع وهي تصرخ ماتعرف شكو الله يخليك يابه شبيك ..شسويت اني!!-شوستس انت !! نزلت راسي بالطين يا ادبسزماتدري تلزم ايده الي ملخت شعرها لو تدفع برجليه وهو يضربها جلاليق ...لو تلتهي تلم دشداشتها حتى لا تتشلح وتطلع رجليهاركضت عليه فخرية وشكد حاولت تلزم ايده وتبعده عنها مكدرت جانت كلما تجره يدفعها ويكفخها ويفشر عليهم كله من تربيتج ياكذا...كله من عندج ومن اهلج...انتو كذا وكذا ...نوريه راسا طلعت ايهاب السايق ودزته لبيتهم حتى لايعرف ويشوف شي وامه جرت الجهال الصغار ميلاد وسعد اللي بالبداية جلب برجل ابوه خايف ويتوسل بيه يكله بابا كافي لاتضرب اختي اني بعد مااحبكبس من عصبيته كاطع مجان يشوف منو كدامه ضربه جلاق كمز بيه على رجل القنفة واانهزمت ميلاد لازمه لعباتها ووصعدت على القنفة تبجي وتصارخصارت مصيبة بهاالبيت ساعتها الكل يصرخ من رحابواهلها عهود وامها وعمتها كلهم يحاولون يطلعوها من ايد ابوها بس هو سحلها للغرفة وجاب المكص وكص ظفيرتها هذه الظفيرة السودة الطويله والثخينةاتوسلت بيه فخرية يعوفها ماقبل وهلكد ماتجر بيده ويدفعها انجرحت ايدها بالمكص واطشر الدم عليها وعلى رجلها بس هي ماحست ظلت عينها على كاطع وهي يكص شعر رحاب بطريقة فظيعة ومقززةمن شافت نورية ظفيرة البنية ممدة بالكاع كانه طفل صغير مات بعيد عن امه دفعت اخوها وكامت تصارخ بيه ماتكلي شبيجصاحت عليه امه وبدت تضربه بالعوجيهبينما هو نزع قميصة اللي تشكشك بيدينهم ونزع الحزام واتولى فخرية والبنات اي وحدة توكف كدامه صار يضربها بالحزام الا امه كفت كباله ودتحاول تحجيه تفهم منه بلحظتها تماما دخل سامي وسمع خاله يكول هاي الك......ةمسويه علاقة ويه الدكتور مال الاسنان صاحت عهود عزة وهي دتحضن باختها وتلف دشداشتها عليها الي صارت وصلتين من الجر والكتل من سمعت فخرية كعدت تدك وتلطم وتخرمش بخدودهااندارت عليها نوريه وجرتها من بقايا شعرها عزة العزاج رحاب يااادبسز هاي تاليتها بجت وكامت تممت بحلكها اللي انترس دم والله عمة ممسويه شي صاح كاطع وامه لازمه ايده ممسويه شي بر.......كعاااار انوبه الا هذا اهله كلهم بالحزب والامن يوميه واحد جاي سائل علينالج خليتيني امشي واتلفت ورايه ولج اني !!!!اني هيجي تفضحيني !!!اني هيجي تفضحيني بالسوك هاي تاليتها ولج اليوم تيزاااااااب واحركجمسويني طرطور بهذا البيت والله اليوم احركم واحد واحدانعل ابوكم ....يابو اللي ملفيكم فوك تعبي تكسرون ظهرياليوم احرك البيت عليكم مااتحمل سامي اللي بدت النار تغلي بعروكه جيت عليها وضربها جلاق ابطنها طفرها للزاويه اللي بصف التلفزيون وبوكسات على وجهها وراسها وجلاليق ابخصرها انوبه عهود ونوريه يحاولون يلزموه مكدروا كامت فخرية وياهم من شافت بتها انترس حلكها وخشمها دمسامي مجان يحس بروحه يصيح ويعيطلج رحااااااب لج رحاااااب تقشمريني واني اللي جنت بايدي اخذج اله تقشمريني ياكلبه تلعبين عليه ولج انت...وتوابت الضربات بلا رحمة انت رحاب !!! يابت الكلب ياحقيرة ومن عصبيته عروكه ودماراتها كلها برزت بجسمه اللي اتصلب مثل الخشبة ومكدرت اي وحده منهم ان تدفعه عنهابطوله وعرضه وضخماته الا ان عيون امه صارت بعيونه الحمر والدموهو يرجف من اعصاوغف حلكه كامت دموعه تنزل كلتله كااافي يمه كاااافي البنية حتموت جوة ايدك... عوفها حلها بااوع حيل بعيونها وعهود وفخرية ديجروه كلها يمه حركت هذه حركت كلبي يوووماني بيدي جنت اوديها الهاني بدي جنت اسلمها اله بجت عليه امه وكالت يمه اعصابك يمه ميخالف هي الخسرانه والله ماتلكى مثلك ابدلاتسوي هيجي بروحكلزم امه حيل وكلها خسرانه هي اصلا مجانت شايفتني شتلكى مثلي يووووووم ابتعد عنها وعيونها عليها وهيونها عليه باوعت عليه بنظرات توسل والم جانت خالتة ورة التلفزيون وشعرها مكفوش والدم يسيب من حبكها وهشمها وعينها اليسرى وخدودها صارت زرك كام يصيح وينفر من خشمه ااااااخ .... ااااااخ رحاب شسوي بيج وركض لغرفتها جر مكتبتها الصغيرة اللي بايده سواها و دك خشبها ووكع كل الكتب اللي بيها و اللي من مصروفه اشتراهم وضرب مرايتها والميز مالتها كلها ومن اطشرت الغراض انكسرت شيشة عطرها الي مباقي بيه غير خيط رفيع بالجعبجانت رحاب متمددة ومغمى عليها بحضن عهود لكن من سمعت صوت ارتطام شيشة العطر وتكسرها بالكاع فتحت تك عين عليها ونزلت دمعه اخيره منها تعبت فخرية من الصياح والعياط والجروانهارت من شافت الدم كام يوغف من خشم وحلك رحاب اللي غمضت ورات بعالم ثاني الى ان فقدت ومكامت تحس وكعت على على الكاع وماكمت تتاثر بالضربشكت هدومها وظلت تخرمش حيل بركبتها ووجها عهود كامت تغلط عليه وتفشروهنا اجى نزار يركضجر اخوه وطلعه من البيت بس عهود مجازت ظلت تغلط عليه وعلى عمتهادفرها وفشر عليها هي ماهتمت سحبت اختها للغرفة والدم ينسحل وراهااخذت نوريه ولدها ورجعوا للبيت بساعتها وسامي جان يرجف من العصبية وركبته وايدة كلها متخرمشة وام كاطع اخذت ابنها وطببته للغرفة تهدي وبس عهود بقت يم اختها بالغرفة ممدة بين ايديها وتمسح بدم وجهها ركضت ميلاد اللي عيونها ورمت من البجي وبس تشهك راحت جابت طاسة مي ويبخون على وجهها بلكت تصحة مرت ساعتين وفخرية على حطتهاجانت كاعدة بالكاع بصف الكرويته وصافنة على الفراغ واللاشي بعيونها الحمر وبخدودها اللي تمزقت وبرز لحمها وملابسها اللي مابقى منها بس القطع الداخلية ظلت تعاين على الظفيرة المشمورة بنص المطبخ ومنظرها المؤلمطلعت عهود دتغطيها بالعبايةدفعتها حيل وخزرت عليهاوظلت تعيك شكد خفت عليكم من هاي الساعة شكد سويت وشكد اتنبعت وغافلتونياووووف منكم بنات فخرية الله يلعنكم -- يمه والله ...- انجبي بت الكلب امشي طلعي من كداميامشي روحي يم اختج اثنين عااار عليه صرتوا الله لاينطيكم ورجعت تبجي مر اليوم كيوم فقدان حبيب مثل اول ايام العزة تماماكاطع وراها بساعتين عاف البيت وطلع مارجع الا قرب الفجر ثاني يوم ورة طلعته كامت فخرية تلم البيت وتفتر داير مداير نفسها بين ساعة وساعة تصرخ بجملة تطلع بيها قهرها اخ يارحاب لو دافنتج ولا اشوف ابوج هيجي يسوي بينا اخ رحااااب كسرتي ظهري.... الله يكسر ظهرجشالت الظفيرة حضنتها وكامت تبجي وملح دموعها حرك وجهها بالزايدومن المها شالتها وذبتها بسطلة الزبلمرت الليلة مؤلمة وعميقة بدت رحاب تصحى وتتالم بسكوت وجانت تلوب من الم عظام صدرها وجسمها كله اللي تلون ببقع زركة بكل مكان بيها محد دخل عليها ويخفف المها غير عهودمجانت تعرف شتسويبس خلت شويه ثلج على وجههالكن شيفيد رحاب جانت تعاني من التمزق بالعضلات وعدة فطور بالاضلاع هذا اللي كاله الها الدكتور مال المسشتفى القريبه عليهم ورة يومين من جتي بدرية اخذتها وركضت بيهاعهود خابرت خالتها من شافت اختها دتموت جوه ايدها وصارلها يومين مطالعة من الغرفة والا اي احد يتجراء يطع صوتسافر كاطع ثاني يوم للبصرة ومارجع الا ورة اسبوع راح هو وايهاب السايق حزنت بدرية على حالها حيل ومن رجهعوا جانت رحاب بالكوة تمشي ولفت ربطة صغيرة على شعرها واول مارجعو من المستشفى جانت فخرية توها طالعة من الحمام وكاعدة على الكرويته مجتفة ايدها وزامه شفايفها حييل وتنتظرهم اول مارجعوا باوعت عليها بدرية وكلتلها حرام عليكم هيجي تسووون والله حرام كامت فخرية تركض عليها كالت حرام مو لعد مو حرام لعد هيجي تسوي بيه جابت الخاشوكة اللي محميتها على النار وجوتها على ساعدها بصف اثر لقاح الجدري تماما وصارت نفس الدائرةراسا دفعتها بدرية وظلت رحاب تصرخ من الالموصاحت عليها هاخاف تصيرين زينة وتنسين الكتله عمرج ماتنسين هاي الجوية تظل في بالج طووول عمرج وكلما تشوفيها تتذكرينوهاي هم تحذير الج ياعهود يابت فخرية اخاف تفكرين في يوم تسوين مثلهااتبلعمت عهود وسكتت وهي تكول ويه نفسها وهو منو حيباوع عليه !!مرت عشرة ايام وانحبست رحاب بالغرفة ماتطلع منها ابد بس للحمام ومرة وحدة جانت تقبل تاكل من اختها تجيبلها غدى من جهة ثانية ...المعروف عن وسام شخصيته الفريدة وكلمته المسموعة بين اهله كان معروف بثقل وجوده والكل يحسبله الف حسابوفي مرة اعترف باحدى كتاباته انه رحاب كانت في البداية نزوة مثل كل البنات لكن هو نفسه مايعرف شلون انشد الها لا بل اغرم بيها غرام وعشق خياليربما بسبب برائتها او ربما بعمق الحضارة والحياة بعيونها مثل مكان يوصفها ولذلك من رفض الزواج ببنت عمه محد كدر يوكف بوجهه بالعكس انصاعت امه لرغبته وبدت فعلا تحضر نفسها تروح تخطبها لكن قبل كلشي لازم تسال عليها ووصت اخوها يقوم بهذه المهمهوالد وسام كان عضو بارز بالفرقة الحزبيه وكذلك خواله يشغلون مناصب رفيعة باجهزة الامن بالدولة رفض الخال موافقته على زواج ابن اخته من رحاب للمعلومات اللي عرفها عنهموطبعا وسام ماصدك بالبداية امه من كلتله انه هي ارملة شخص اتوفى بالسجن ومرة خالها مسفرة الى ايران وزوج خالتها معدوم ...واتصور هذه اعذار ملفقة حتى يتركها وياخذ بت عمه فصارت مشادات قوية بينه وبين اهله ادت الى طرده من البيت فاتوجه الى ابن عمه المتعين حديثا في كركوك...ووصى اخوه ان يقوم ايضا بالتحري وحتى ابوه هم ماسكت حب يتاكد بنفسةوطبعا تم تمرير المعلومات الى كاطع عن طريق اثنين نسوان بحجة يشترون من محله انهار وسام انهيار تام معرف شلون يواجه الموقف صار محرج كدام نفسه اولا وكدام حبيبته ثانيامستحيل ان تجي الموافقة الامنية بالارتباط بهكذا فتاة والا ستتعرض العائلة الى كارثة حقيقةوفي حالات اخرى في حالة عدم الالتزام بالرفض الامنييتم زج المخالفين السجون مرت الايام سوداء وثقيلة على كل من كانت تربطه خيوط هذه العلافة البريئة انغمس وسام في دراسته بعيد عن اهله واستقر بكركوك بعد ما ياس تماما من موضوع رحاب ومارجع لبغداد طول هذه الفترة وبينمافخرية استمرت لفترة طولة تنام وحدها بالصالة وكانت تسمع صوت بكاء رحاب المكبوت واللي كان يقطع نياط كلبهاراحت عليها وشافتها رافعة عيونها اللي لازال باقي منها اثار الضرب رغم مرور عدة ايام عليها وكفت على راسها ومن شافتها رحاب خافت وغطت وجهها حيل وظلت تتوسل مسامحة امها الهاانقهرت عليها وضمتها لصدرها وكامت تبجي هي الاخرى بسكوتوظلت تذكرها شكد جانت تخوفهم وشكج جانت تنبها من هاي السوالفوذكرته من جانوا مرة كاعدين بالهول ويباعون على فلم مصري لسعاد حسنيسالتها رحاب بكل برائه كلتلها ماما انت هم حبيتي ؟؟؟؟جاوبتها امها بوكتها-كلتلها من اني وصغيرة شفت الحب والعشق وعرفته ذبح ودم وطول عمري اخاف من هاي الحجايةمرة جان عمري شي سبع سنين رحت ويه امي لبيت اهلها جان بلقرية كلش بعيد البيوت كلها طين والناس فقرة وفلاليحوجنت كلش اخاف من الساجية لا اوكع بيها واضوج من الذبان والبكجنت ازن على امي الله يرحمها بس نرجع واخر يوم من دنرجع جان نشوف بالطريق رجال يايمة ولا انساه جان شايل راس بته الصغيرة كاطع راسها وجانت كصايبها ا الشكر مدليه منا ومناك ظافرتهم بشرايط حمريمشي والناس تمشي وراه عاقج شكله ويتعيقل جنه شايل كاس العالم مو بنته الصغيرة يمكن جانت اربطعش حمسطعش سنة يكولون جانت تعشك واحد وابوها شايفهم مااتذكربس اتذكر زين امي لزمتني وكالتي باوعي زين شوفي هيجي يسوون بالبنات اللي يحبن ويعشكن يكطعون راسهن ويذبوها بالزبل ويكتلون امها وخواتهامن يومها واني اخاف من هاي الجلمةومرات من اتزوجت كاطع جنت اسمع ام كلثوم اصفن واكول ياترى يحقلي احب كاطع لو لا !!!!كتلو بينا كل المشاعر الحلوة وحرموها علينا واستحلوها الهم !!!مضت ست شهور على الحادثة ووشويه شويه رجعت علاقتها بامها وصارت رحاب تفتر بالبيت بس من يكون ابوها بره ومن يرجع بسرعة تختل وماتطلع ابد لايشوفها ولا تشوفها ونوعا ما انقطعت علاقة نورية بفخريةمصاروا يروحون ويجون مثل قبل واخر مرة جتي زهوري لبيتهمحاجاها كاطع وكللها لو هذا الولد المعاق لساه يريد رحاب خلي يجي ياخذهاجاوبته زهوري ساعتها انه سمعت الولد خاطب... | ||||
|
| |
|
01-09-21, 08:10 AM
| #33 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| · · الفصل الثالث 31 دميتي الفيكتورية كان دخان سكائر سامي الكثيفة قد اختلطت بالوان الغروب الحمراء ...مع نسمات الهواء الباردة التي كانت تزيد في لذة وحلاوة استنشاق الذكريات الاليمة وهل هناك اجمل من تلك الذكريات الحزينة سامي الي ادمن التدخين كان يفعلها بعيدا عن عيون اهله ,خصوصا ابوه فكان كل مغربيه يصعد للسطح ومرات على البيتونة يكعد بصف برج الطيور او اللي باقي منه بعد ما ابوه زهير فلشه ودمرة ومابقى شي بس اثره زهير كان يحاول دائما ان يجعل اولاده نموذجيين ومتفوقين بالدراسة وبكل مجالات الحياة بذلك كان يشوف انه الطيور صارت تاخذ من وقت الولد فدمرهن وحطمهن وحطم هواية بريئة كان يعشقها ابنها الصغير ... وبينما كان سرحان في خياله سمعت صوت اقدام شخص يقترب منه غمض عينه لحظات وبسرعة شمركطف الجكارة بالكاع وداسه برجله انداروراه كانت نورية امه واكفة وتعاين عليه لافة شعرها الاحمر وعاكدته ليفوك ومجتفة ايديها من البرد مع انه لابسة دشداشة قديفة واللي لاطشة وملفوفة على جواريبها الرجالية مالت زوجها ونعالاتها اللي تشحط بيهن شحط وجانت تكله ---بله ساكم روحك بهالبرد علمود كطف جكارة عني ماتجوز سامي !!! لو يشوفك ابوك بله شيسوي بيك اكلع عليها ودقق ملامح امه الاربعينه اللي لسبب ما او لاخر على الرغم كانت تلدوا اكبر من عمرها وبدت خطوط التجاعيد تظهر حول عيونها وحلكها فجاوبها بهدوء وهو يتامل اخر لحظات الغروب -عوفيني يوم لخاطر الله عوفوني لحالي شبيكم لجيتوا ويايه هسه نازل --ماتكلي شبيك ؟ ممرتاح بكليتك؟ ناقصك لو عايزك شي شو النهار كله كالب خلقتك علينه وماطيقلنا حجاية - ماكو شي والله يوم ماكو شي بس شويه ضايج -- لاتكون ضايج علمود هاي السودة رجلين اللكلك!!!! رفع راسه على امه كالها -- يوم رجلين اللكلك هاي اللي انت تعيبين عليها جانت حب حياتي وكل عمري جانت النفس اللي اتنفسه تعرفين لو لا !!! ---دروح ولي حب حييياتي كلك عمرك مصاير عشرين ياحب ياكلاوات انت شفت من حياتك ثم هي اصلا حبت غيرك وانت شفت بعينك جاوبها وعيونه مغوركة كانما داست على جرحه اللي لساه مااندمل حتى بعد مرور هاي الاشهر كلها - انتي السبب والله كله من صوجج انت اتوسلت بيج مية مرة لا الف مرة تحجين ويه خالة فخرية تكوليلها اريدها وعيني منها اتوسلت بيج قبل ماتنخطب لغازي وورة ماتوفى رجلها همين وانت ابد ولاحسيتي بيه ولا كانه ابنج او هي بت اخوج مااعرف شنو انتو من من بشر عايشين بس لنفسكم عافها ونزل هي ظلت واكفة بمكانها شويه ونزلت وراه بس ماثرت بيها الجمل ولا الكلام ومن دتنزل كامت ادردم عليه ---دشوف البنات وياك بالكلية ياحظي وحدتهن احلى من اللخ لو الله عاميك الا على هاي البنيه لانه ابوك مايرضى بيها. سامي فعلا مكان يشوف اي بنيه وياه ولا اثارت اهتمامة اي وحده بالكليه انعزل بمجموعة من الاصدقاء وحتى صار يثير رغبة البنات حوله اللي يريدون يعرفون سر عزومة عن ملاحقة الفتيات حتى لو بس نظرات !!! نوريه جانت تضوج من تعرف زهوري راحت لبيت اخوها ويعجبها مثل قبل مجانت اللمة والكعدة والهوسه والسفرات طلعاتها صارت كله لبيت عيالها لو للسوك وجانت كل شهر مرتين تلاثة ادز زهير يجيب امها من الباب للباب وهي هم مو مثل قبل كلش ويه الجيران زوجها مايقبل ومن ضوجتها فكرت تصالح فخرية هم لخاطر اخوها وهم منها تطلع هي وبتها سومه بس شلون كرامتها مجانت تسمحلها تتنازل لفخرية وتروح عليها من جهتها فخرية ضاجت شويه من عرفت زهوري كايله لاخوها انه فاضل خاطب وظلت تلومها -- عود هو صدك خاطب لو بكيفج حجيتي زهورة -جاوبتها وعيونه تتدارو بين امه وفخريه ورحاب والله خية اني عبالي ماتردون تنطون كلت اكول خطب حتى ينساه كاطع ولايجيب بسيرته... دنكت فخرية على جدر الباقلا تفلس بيه هيجي وكتها نهاية الثاني وبداية الثالث الناس تشتري كواني وتفلس وتضم بالثلاجة لو تيبسه ومنها تنصبغ الاظافر بلون اسود مايروح الا بالقاصر صفنت شويه وجانت تدردم بصوت ناصي لعد المن ننطي وين اكو زواج وين اكو زلم بعد واللي يرديها بس يعرف بيها ارملة يخلي وينهزم تدرين اخر مره جيرانه عود جايه تريد رحاب لحماها تعرفين يامواليد 47 عيني هواية جبير ولو تشوفيه مبين بكد كاطع فجاوبتها زهوري هي اصلا ماتعرف اخبار فاضل وامه من ذاك اليوم وفكرت انه خلي شويه شعرها يطلع ويطول شيكولون عليها من يشوفها هيجي شعرها حفر منا ومناك رحاب جانت تسمع طول الوكت وتعاين على بيبيتها وهي كاعدة على سجادتها وتفر السبحة بيدها اندارت على عمتها وكلتلها ---عمة اذا شفتيهم انطيهم خبر احنى موافقين مانلكى احسن منهم حجتها وكامت ودمعتها نزلت على عينها والكل صفن على حجايته جانت لحد ذاك اليوم يوميه بالليل تجيك مكان الرسايل ومتلكى شي يمكن هو جان يلعب عليها لو قرر يعوفها جانت مشاعرها الم وعذاب بين اللي صار وبين هجران وسام الها وسام اللي عانى ماعانى بدون ماحد يحس او يعرف بيه نقلوه الى القرى والارياف وبابعد مكان ممكن وهو هم راد هذا الشي راد يبتعد عن اهله وطول هذه المدة مكان يتصل بيهم ولا يعرفون اخباره الا من الاصدقاء ووين ووين جان يوميه يكطع طريق مشي من غرفته الخرابه اللي اجرها للمستوصف اللي يشتغل بيه ساعة ونص روحه ورجعه مايعرف هو ديعاقب نفسه لو الدنيا تعاقبة انحرم من حبيبته من احلى حلم ملى حياته حبيبته اللي مغابت عن عينه يوم كل اهل القرية جان يحبوه ويركضون عليه وحسبوه الدكتور مالتهم ويركضوله بالصغيرة والجبيرة وكام حتى يقرا ويتعلم يعالج الحالات الطارئة بشكل غير رسمي خصوصا وغياب الاطباء وندرتهم وصار معروف بالمنطقة بالدكتور وسام ابو رحاب والكل تشهدله بحسن اخلاقه زهوري من جهتها بدت تسال عن فاضل وتحاول توصل لامه حتى تبلغهم بطرقة غير مباشرة @@@@ وبربيع عام 1984 حصلت بدرية على شغل بمعمل خياطة اهلي زوجة صاحب المعمل تعرف امل مرة علاء اللي رفض بالبداية هذه الشغلة بس اخيرا انصاع لملحة بدرية وهي جانت متعودة كل شهر مرة مرتين تروح تنظف بيتها وترجع حتى لايبين مهجور وياكله الوصخ وجان عدها امل تستقر اوضاعها وترجع تكعد بيه ومناك تمر على ام طارق وبهذه الزيارة لبيتهم جانت بدرية كاعدة على الدجة بالحديقة وورق العنب تارس السقيفة كلها ومسوي بيها ظلال حلوة وخفيفة ومنظر ساحر جانت لابسة ثوب وردي على جوزري وشعرها ملفوف ليورة وحاطه حمرة جوزيه خفيفة جانت كلش فرحانه بالشغل وبدت شويه تطلع من عزلتها بس مديونه هوايه ومحتاجة فلوس صارلها فترة تركض بقيم للدكاترة والمستشفيات صح اغلبه بلاش بالمستشفى بس الدوة بس مصاريف المريض هم هوايه جانوا الدكاترة شاكين بيها عدها ضعف بالقلب نزعت تراجيها والكلادة مالتها على شكل دلة الكهوة جانت مودتها شالتهم وبختله انطتهم لام طارق بلكت ترهنه الها ماتريد تبيعهم هاي اخر شي بقالها وجانت حيل معتزة بيهم عدا ميدالية قران هم جانت لابستها قيم عريضة وبيها مينا ازرك واحمر كلتلها بشكد مجان بس استلم راتب هالشهر ارجعهم انقهرت عليها ام طارق وراحت طلعت شكو فلوس جانت ضامتها وناوشته اياه كالت هاي فلوس رجلها مجمعها علما تروح ترهنهم وترجعهم بمكانه وخبرتها انه قبل اسبوع شافت سيارة الضابط سلمان فاتت منا ورة ماهي خلصت تنظيف وطلعت سالفته هذا الضابط مايجوز منها صار بين فترة وفترة لازم يمرلها للبيت بلكت راجعة ماعدى جماعته اللي كل شهر مرة مرتين رايحين لبيت علاء يسالون ويتتفسرون هي بيا حال وهذا بيا حال حجتها بدرية والابتسامة انمسحت من وجهها فخرية كلبها جان مشلوع بسعودي ويه كل امتحانات اخر السنة ينهزم مايروح يمتحن جانت عهود توصله للمدرسة وتروح ولانه هم صف الاول والثاني صغار جانوا يجمعوهم بصف واحد لو بقاعة المدرسة ويمتحنوهم شفهي الا هذا الولد جان بس تروح اخته ينهزم ويلكوه لو بالقن مال الدجاج مالت الحارس لو خاتل بغرفة الفراشة ياكل من مسواكها الي تبيعه للجهال ولو ما المعلمات يعرفون فخرية ويحبون لسانها الحلو والهدايا الي بكل مناسبه ادزها جان سعد هالسنة هم يسقط بذاك اليوم رجعت عهود شفتها زركة من الخوف جان اخر يوم امتحاناته وهو يكره العلوم ركضت على امها تكلها سعد ماكو طالعة ممن المتحان حتى ترجعه وياها المعلمة كالتها اصلا ماجى يمتحن دوروا المدرسة والصفوف صف صف وحتى غرفة المعلمات والحمامات ماكو انكلبت الدنيا على سعد وجان وياها ايهاب السايق اللي اخر شي هو شافه يم ابوالعربانه اللي يبيع كوجة براس شارع المدرسة بمسافة مو قليلة وكعت فخرية من طولها من لكته اخيرا وهذا الحجي ورا ساعتين من ما هي ادور عليه وكوة طلعه من ايدها ايهاب اتحلفتاه الا ادكه بسط وهي صارلها ساعة مابقت لا ايه ولا سورة حافطتها ماقرته ولا امام ولاسيد مانخته !!! بس اشو هذا اايهاب اخذها فرصة وبدى يوسلف ويه فخرية طريق الرجعة كله حست فخرية بيه يلح بالسؤال على بيت نورية وانه شعجب ماديمرون وصارله فترة ماديشوفوهم ظلت تباوع عليه الطريق كله وصافنة عود هذا شيريد يسال عنهم!!! لايكون خال عينه على سوومه لايومة لا عيني لا بعدها صغيرة لزره ماتوصل زين معقولة يكون عينه على نوريه عزة لعزاج نوريه اذا صدك تصادقين هذا الزعطوط وي يمه هاي منينلج هالسالفة فخرية كعدي راحة عاد كام شكد يسال ماتجاوبه لو تحجي وياه بغير موضوع وبدت تحجيله عن زهير رجل نورية وشكد عصبي ايده والتفكه من يتعارك ضربته والكبر خلاص مايتفاهم سكت ايهاب وظل يتبلعام وبعد مافتح حلكه... بينما نورية جان حال الضيم حالها جانت شايله هم فرات اكثر من امه نفسها ماخلت استاذ خصوصي مادكت بابه وهمه جانوا كلش قليلين تتراكض يمنه ويسرى مابقت لا ملزمة لا ملخص ماشترتهم حتى كامت تبيع ذهباتها عليه كتلت روحها علمود بس فرات ينجح من السادس هالسنة جانت هالسنة ثانية اله بالسادس هالمرة اذا سقط كبل يلبسوه عسكريه وووين بعد ماتكدروشلون تطلب من رحاب ادرسه وهمه صخموها اخر مرة وصدك هم يوكع دور ثاني هطية جان ينجح بكل المواد الا الانكليزي عقدته بيها حتى اربعين مايجيب وسنة على سنة الاسئلة جانت تصير اصعب يعني بس اللي صدك يفتهم يعبرها بشهر الثامن ماتحملت نوريه كالت خلي اروح اذب روحي عليهم والي يصير خلي يصير بس اهم شي فرات ينجح واتفقت ويه اختها يروحون قبل الامتحانات بشي اسبوع هم منها يتصالحون هم منها ترجع رحاب ادرسة ومع انه زهوري حذرتها لاختها انه كاطع مراح يراضاها خصوصا وانه حابس رحاب ذيج الحبسه لباب البيت ماتطلع وان طلعت الا ويه امها الي حتى بالمدارس هي اللي جانت تودي الجهال واترجعهم بس اصرت نورية على الروحة وكالت قابل شنو يطردوني !! اخذت اسمهان وياهم وراحوا زهوري هم جانت جايبه كل جهالها وياها مو مثل قبل من جانت تطلع جانت تعوفهم على عمتها هسه بعد عزلت وصارت بيت ابوحدها وماتكدر تعوفهم جانت عصرية خميس وصيفيه وفخرية كعادتها هي والبنات راشين الحديقة وغاسبين الصبة والكراج وفارشين المرجوحة والكراسي وماعون الركي والبطيخ والعنب عة صفحة وعلى صفحة ثانيه الكليجة والجاي والكعك والحب محضريهن للي يجي يتعلل يمهم من جوارين من صاحبتها كرم اتجيب جهالها وتجي ومن زهوري وجهالها وجانوا يعوفون والصوندة مالت المي مفتوحى برة للجهال من يتعبون يغسلون نفسهم بيها ويشربون مي ويروحون وصوتهم مالي الشارع كبال البيت يلعبون طوبه والبنات على الصبة ويه ميلاد يلعبون توكي ولاستيك اول ماوصلوا انسمعت هوسه جهال زهوري اللي من خبصتهم نزعت العباية وتمشي ونصيح عليهم منا ومناك هي تمشي وبتها تركض وراها وهي ولا يمها وصاحت بباب الحديقىة شوفي منو اجى وياي فخورة ركضت اماني اول شي وطبت تلعب ويه الجهال وفخرية تصيحلها ولج تعالي يالعوبه تعالي بوسي خالتج هلا من جانا هلا بزهوري جنا متانيج تعالي فوتي تعالي طبت وبوست امها اللي ظلت تسال عليهم واحد واحد ودخلت وراها اسمهان بخجل وسلمت على فخرية وبوستها اللي اول مشافتها انكلبت خلقتها وانعقجت حيل وعهود كامت على حيلها تريد تتاكد عمتها جاية وياها لو لا ومن جرتها زهوري ودخلتها رحاب هم كامت هي وعهود طبوا جوة ماسلموا عليها وحتى فخرية جان وجهها كلش ثكيل كلش انحرجت نورية وخجلت وكالت انه هي جايه تشوف امها وتسلم عليها وتروح مع انه امها جان زهير كل جمعة يجي ياخذها يمهم وشكد حاولت زهوري ويه البنات ماقبلن اخر شي راحت عليهن تتوسل مفاد ماقبلن يطلعن ف اخر شي هي نورية بنفسها راحت طبتلهم دتسلم عليهم فحجت بالشقة بالاول شبيجن بنات فخرية شو ماتسلمن على عمتكم لو شنو!!! اشرت زهوري لرحاب فكامت بوستها بهدوء وهي جرت عهود وصالحتهم من دطلع كالتها ها رحوبه ماحد خطبج منا مناك فجاوبتها عهود لاعمة ننتظر سامي يكون نفسه وياخذها مو بت خاله --- انت سكتي ام لسان محد حاجاج جاوبتها نورية بعصبية ومنها حجاية ومن عهود حجاية كبت ذيج العركة ومن عيرتهن بانهن صاحبات علاقات جاوبتها عهود العرج دساس عمة عبيمن مانطلع وهنا هاي الحجاية اللي حركت الاول والتالي طلعت نوريه زعلانه وحلفت يمين رجلها ماتكوس عتبه بابهم بشهر العاشر كريم ابن بدرية اتسجل اول ابتدائي وهي طول هذه الفترة الاربع شهور بقت تشتغل بمعمل الخياكة واخر شي بطلت واشتغلت بشركة ثانية هم صاحبها عرف وصديق الهم ومن تشوف حركات ماتعجبها راسا اتبطل يعني مو كل مرة جانوا يعوفوها بحالها جانت اول ايام المدرسة صعبة على بدرية وابنها صعبة كلش من تشرح انه ابوه معدوم وكيف المعلمات ينفرون منهم احيانا خوفا واحيانا اخرى بغضا شدت المديرة وياها حيل الى ان مرة رجعلها متبول على نفسه من الخوف والبسط طبعا مجان هو الطفل الوحيد الي ينبسط بالمدرسة لانه الامر شي عاادي جداا ان يتعرض طلاب صف كامل للعقوبه حتى لو اخطئ اثنين او تلاثة لكن بدرية كلش نحسه ويه جهالها اتخبلت من شافت ابنها على هذه الحاله جرت بتها ورجعت للمدرسة وهو على هيئته واول مادخلت تريد تروح للمديرة راسا شافتها المعاونه وجرتها على صفحة حاولت تهديها وانه ماتسوي مشاكل ويه المديرة الي جانت تحاول بكل طريقة تنقل كريم من مدرستها مع انه مصارله شهر من بدى الدوام المعاونه جانت متعاطفة ويه بدرية وبجت على بجيها من شافتها غركانه بدموعها ونصحتها تنقلة بهدوء وبدون مشاكل والافضل ماتفتح عليها باب وبالفعل نقلته ورة اسبوع الى مدرسة كلش بعيده عنهم وحتى طريقها ترابي وقبل مايرجع يداوم اخذتله اجازه يمكن حتى هي ترتاح بيها اكثر منه ووصلها اتصال هاتفي انه ام فاضل حتجي تخطب رحاب نهاية ال122 بعد مادزولهم خبر بالموافقة بامتحانات الدور الثاني سقط فرات مرة لخ واول ماستلم النتيجة راح انهزم لبيت خال امه ابلد زهير من عرف اخوه صار متخلف اتخبل راح بيده جابه وخلاه يلتحق وهو يتوسل بيه يكله اخاف والله اخاف واخوه يدكه كتل يكله لك موحيف انت اخو سامي البطل اللي جانت الناس كلها تهابها وجبره يدوام بالعسكريه مع ذلك اول اجازه اله هم انهزم بس هالمرة ماعرف بيه اخوه وين... وعاشت العائله خلال هذه الايام واحده من اصعب اوقاتها صارت كلش عيبه كدام الناس زهير اخوه افرار من جهه مركزه ومن جهة ثانية اهله وعائلته خصوصا امه ونوريه وكفه بوجهه جانوا كلش يخافون على فرات لانه ناعم وفقير كلش ومن ابسط شغله جان يخاف ويرجف من جان نزار يكطع روس الحمامات هو جان يغمض مايكدر يفتح عينه وحتى من لبس كام يبجي بحضن امه مايريد يداوم وجان زهير يدفعه ويكله محد تسويك رجال الا العسكريه هي الي تخليك تصلب طولك اما ابنه نزار فنجح والتحق بالكليه العسكريه حسب رغبة ابوه وهو هم مجان كلش فالح بالقراية @@@ اتحضر الكل للحدث المهم بشهر ال12 بصعوبه كدرت زهوري توصل خبر لام فاضل .. والاخيرة جانت فرحانه يمكن اكثر من ابنها شافت برحاب كل المواصفات والمؤهلات لابنها جانت تعرف ابنها شيريد واي نوع من النساء يفضل المراءة جانت جدا ذكية و شاطرة وسباعية حتى من جتي للمشاية النسوان جتي هي تسوق منها تكشخ ومنها مبين معتمده على نفسها رغم انه عدها سايق بس جانت تحب كلشي تسوي يمكن عيب الوحيد هو انه اطفالها اتبروه بحضن المربيات وبحضن بيبياتهم من وصلت لبيت كاطع نزلت سوبر بيضه احدث موديل بحيث فخرية وعمتها ظلن صافنات عليها جانت اول كعدة شويه صدمة الهم وين راح شعر رحاب هذا الاسود الطويل والثخين بس محد حجى العيون كلها على ام فاضل شتاشر يحجون وكل الطلبات كان موافق عليها واصلا فخرية ماطلبت شي كلش استحت شتريد يعني بيت كامل الها ومقدم ومؤخر محترم عدا المهر الي محد اعترض عليه والاسبوع الجاي جانت كعدة الزلم وراها يروحون للكاظم يعقدون لبست رحاب بيومها كوستم ليموني على خضار واخذتها زهوري كصت شعرها ولادي ولبستها تاج وحطولها مكياج خفيف ومن رجعت من الصالون مجان عدها اي مشاعر بس لا اراديا مدت ايدها بالحفرة الصغيرة اللي صارلها فترة طويله ماشايفه بيها والصدمه انه فعلا لطت ورقة صغبرة ركضت رحاب لغرفتها وكلبها يدك الغرفة جانت هوسه ومليانه ماعرفت شتسوي انتبهت على لعابتها فوك بقايا ميزها وضمت الورقة بايدين فستانها المدنفشوصفنت على اللعابة واتذكرت قبل ست سنين تقريبا اول زيارة لخالته من بلغراد جابتلها هاي اللعابة اتذكرت اول مرة شمتها جان عطرها طيب وغريب جنه ريحة مسك يمكن لا بعد اطيب بدرية جانت تحب تفتر المحلات مال الانتيكة هناك ورحاب هم طالعة على عمتها تمووت على هذه الشغلات القديمة الحلوة رحاب جانت تحب كلشي يعود لذيج الفترة اللي اتعرفت عليها من خلال روايات جالز ديكنز فيكتور هيجو دوستويفسكي وغيرهم من جانت تقراها جانت تحس نفسها البطله وتتقمص شخصية الفتاة الليدي الناعمة والانيقة والراقية وفي مرة من المرات بدرية رايحة هناك وشا يفة هذه العابة وعلى الرغم من ثمنها الباهض لانها تعود للعهد الفيكتوري اشترته الها حتبقى ذكرى منها ويمكن هذه احلى هديه حصلتها رحاب واللي حتبقى وياها لاخر عمرها | ||||
|
| |
|
01-09-21, 08:13 AM
| #34 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| · # الفصل الثالث 32 سبع بياضات دخلت رحاب لغرفتها وهي ترجف بعد ما شافت الرسالة بنفس المكان اللي كان وسام متعود يعوفلها قاات وراق احيانا واحيانا راسئل طويلة الرسالة كانت متبلله وعليها تراب ومتععقجة وراجعة من تيبسة مرة لخ فخافت عليها رحاب لاتفتحها وتتمزق بين ايديها ضمتها بردن لعابتها الفيكتورية و طلعت للصالة وهي تحس نفسها منفصلة عن العالم الخارجي كل همها ترجع تشوف شكو بيها حضروا نفسهم والبيت وشنروا نشرات وهاي السوالف ظلت رحاب تعاين على عيون الكاعدين وادور ولو على صديقة تكدر تحجيلها وتكللها شنو اللي قالقها وشويه صاحوا الجهال جوي جوي صارت ركضة بالبيت والكل اتحضر للخطار ورجعت رحاب لغرفتها وعيونها على لعابتها وعهود جتي وراها حصرت الجهال كلهم يمها نزل فاضل وراسا ابن خالته نزله العربانه وكعد عليها حاول يدفعه بس اشرله انه يعوفه هو يجر نفسه على الرغم من البرد بذاك اليوم بس فاضل جان يتصبب عرك يمكن هذه اقسى لحظة يمر بيها واكثر مرة ينحرج من عوقه اتمنى الكاع تنفتح وتبلعه بس هو صاحب اراده قوية استمر وعيونه تمر خطف على الحاضرين وابتسامة خجولة عليه عهود جان تسرق نظرات على خطيب اختها من شباك الصالة رايحة جاية ركض وتكللها لج هذا شكله حلو ولج عيني كلش حلو واندارت على اختتها من شافتها متجاوب رحاب جانت صافنى كبال لعابتها وسرحانه بعالم ثاني اول مادخل فاضل للبيت ارتفعت الهلاهل والصفكات وبدن جوكه الملايات اللي وراه يدكن على الدف ويصيحن صلوات على النبي واهازيج شعبية وكم جاهل طفر منا ومناك يتزابك ويه الواكفين والكل تغني وتهلل ويه الملايات من امه وعماته وبنات خالته بس خواته جان معاجبهم ومراضين طبعا جانوا جايين بابهى حلتهم اللبس والمكياج والشعر المنكوش والصبغ الاصفر والاحمر وكومة الذهب اللي لابسيه عدى العطور القويه اللي فاحت بالبيت انترست الصالة وبالطوة صار اكو مجال الواحد يمشي وشالو الكرسي الجبير اللي اتوسط الصالة وحطوهكرسيه المقعد بمكانه نزلت دمعتين كيار على خدود فخرية اللي من شافته انهزمت وراحت لهت نفسها بالمطبخ وبدرية راحت وراها تحاول تهديها واتفهمها انه هي تكدر تفسخها وتتراجع باي وقت اذا حست انه هذا الشاب ميناسب رحاب بس فخرية ماحجت ولاجاوبتها جانت دايخة وتفكر ماتعرف هذا اللي سوته يفيد رحاب لو حيكسر ظهرها شلون ياربي وهاي رحاب اول فرحتي هيجي يصير بيها هاي شمعة البيت المنورة هيجي تنطفي اااااه يازمن شلعبت بينا وشويه وصاحوا على العروسة تجي حتى يشوفها خطيبها وراحت زهوري جابتها وجتي وهي تمشي على استحياء وجانت العيون كلها عليها ومن دخلت الصالة هم صارت صفكة وهلاهل ورزادن الملايات دك حيل وعلا صوتهن وبدل مايفرح بيها فاضل اتفاجا وانصدم من شاف شعرها كاصته ولادي وهو اللي ظل يحلم بيها طول ذيجج الايام ويتخايل شعرها اندار على امه اللي جانت واكفه بصفة وفرحانه بيه ومن نزلت تعدل رباطه همس الها اشو هذه شعرها كصير مجاوبته امه وظلت تشغل نفسها تحجي ويه هذا وذاك كعدت بصفه رحاب وهي ذايبه بمكانها من الخجل وخدودها حمر وعيونها بالكاع وابتسامة صغيرة كوة انرسمت على شفايفها فام فاضل جرت كرسيها عليه وكالتها رحوبه سلمي على خطيبج هذا فاضل حبيبتي التفت اله بهدوء ونعومة وهي مدنكه وكالتله شلونك فاضل هو عيونه صفنت عليها وابتسم الها ومن خجله حتى عيونه احمرت مجاوب بس هز براسه يحاول يحفظ ملامحها وصاحت ام فاضل صلوا على محمد وكلها كامت تهلل وتصل على محمد وال محمد والملايات غيرن النغمة للدبج شويه وامه اشرت لاختها تجيب الذهب وظلت تدور على جنطتها ماكو راحت هي بنفسها جابتها وجتي وعيون زهوري عليها تعاين عليها جانت لابسة بدلة صفرة تلمع وكصيرة للركبه بيها كراكش اثنين من ورة ومدنفشة شعرها ولافته ومثل عادتها عيونها متروسه كحل من الحاجب للحاجب وهي هم طبيعة نظرتها حاده جابت تلاث علب ذهب قديفة اثنين حمر ووحدة زركة الاولى جان بيها طخم كلادة وتراجي ومحبس وحلقة والثانية ست سورات وملوي والثالة كالت هاي هدايا خالاته محابس وتراجي وكلادة بمدالية قران وانطت لابنها يلبسها الحلقة والمحبس وايده ترجف وحتى تيه لبسها اول شي ياليسرة فكلهم ضحكوا كالوله شبيك يمعود هيجي مستعجل هسه باليمنة ورة الزواج باليسرة و هي هم جانت فطيرة لبستها وماحجت عاد نزعتها ورجع لبسها اله باليمنة والكل تضحك وتتشاقى وياه ومن دبلسها التراجي وايده طختها وبدى يشم عطرها كال لامه انت كملي العرك كام يكت وانخبص حيل حتى ضاج نزع جاكيت السترة السمائية مالته زبدت امه تلبسها والكل يباوع عليهم ويه كل قطعة تصعد الهلاهل والصلاوات بدرية شاورت فخريه ان روحي جيبي ذهبها مال نيشانها القديم ولبسيها بحساب هذه هديتج وركضت فخرية طلعت الذهب من الكنتور ومسحته على السريع ورتبته وحطته بيدها شلون ياربي مااجى على بالها تشتري للولد حلقة شكد عيب لما انتبهت شافت حلقة غازي وياهم استغربت هاي شلون جتي هنا ؟ رادت تعوفها واتقدمها ويه بقية الذهب بس خافت لايصير فال مو زين على بتها طلعت وحضرت نفسها وانطت الذهب لبدرية تلبسها سالتها وين الحلقة مالته خجلت وشاورتها انه نست تشتريله وحدة واشرت على حلقة غازي افتهمت بدرية ومن شافت امه خلصت التلبيس وركضت عمته هم لبستها محبس لاخ وسوار خفيف اتقدمت بدرية وصاحت وهاي هدية اهلها ابوها وخالتها وعمتها زهوري فزت شوكت هي جابت هديه وماتدري !!! فتحت العلبة وجان نيشانها القديم كامل ماناقص غير بس قطعة انطتها الها وشالت الحلقة مالت غازي وكالت لامه احنة ماندري قياس ايد الولد فالحلقة الظاهر صغيرة عليه انبدلها بوحده اعرض لانه غازي اصلا هوايه اضعف من فاضل فحلقته كلش ناعمة هزت راسها امه واشرتلها انه مو مهم بينما جانت كلش فرحانه بهديتهم شلون هيجي كيفت كدام خواتها وحمواتها وهناك جانت مرة جبيرة كاعدة بعيد وبالكوة تشوف جابوها بناتها اقتربت من رحاب حيل دتباوع عليها جر ايدها فاضل وباسها كالها رحاب هذه بيبتي هي اللي ربتني وهي بعد اعز من امي البيبي باركتله وبوسته وبعيوناتها جعب البطل ظلت مركزة على رحاب وكلته البنية خوش بنيه بس ولك هاي حيل معصعصة ضحك فاضل وخجلت رحاب كلها بيبي هو الاحسن السمن يجي بعدين وركضت فخرية جابت الكيك وكلاصين شربت يافا احسن نوعية بذاك الوكت وانفتحت علبة ماكنتوش كدامهم خالاته الثنين وعمته بدن يطشن الجكليت رحاب بوسط كل هالهوسه سمعت اخته رقية تكول على شنو فرحانين بيها اشو جنها عودتين شخاط محروكه بلعتها ومسكتت وانكصت الكيكه وواحد اكل الثاني وعيونهم التقت مرة لخ واتخيلت رحاب للحظة شنو بيها لو الكاعد كبالها وسام اتهندت وطردت الفكرة بسرعة من بالها بينما انبهر فاضل بجمال عيونها واللمعة اللي بيها جمال شكلها الصارخ بالحياة جانت رحاب فعلا اميرة برشاقتها وملامح وجها الي برزتها اكثر كصتها الجديدة وشويه اجى السايق شايل بدلة المهر مغلفة ووياها شايل كراتين الكيك وصناديق الببسي الي اتوزعت على الخطار وراحت ام فاضل دتلبسها ووعدتها على الحنة اتجيبلها سبع بدلات البدلة اللي جابوها جان لونها احمر على ماروني وحطولها حمرة مارونية طوخ اللون كلش ضرب على رحاب وانطاها حيويو وجمال اكثر بقى فاضل صافن عليها معقولة هذه قبلت بيه !!! بساعتها حس بغصة بداخله ماكدر يبلعها وصارت الحفلة و اتونسوا بيها وركصن البنات على دك الملايات واولهم زهوري وجهالها بس فخرية وبدرية جانت الدمعة بيعونهم وخصوصا من يشوفون رحاب صافنة وعيونها مغوركة مبتسمة بس بغير عالم ومن طلعوا الكل بقت ام فاضل تنتظر تفرغ الصالة جرت رحاب وياها للغرفة ولحكتهم فخرية تريد تعرف شراح تكللها استاذنت ودخلت لغرفة كاطع اللي جان من الصبح طالع وعيب انه يكون موجود بحفلة النسوان كعدتها وكلتها من رخصتج ام سعد اريد احجي هالكلمتين ويه رحاب وانت هم تكونين شاهدة عليه وقبل ماتحجي جتي اخالة فاضل الصغيرة دخلت وسدت الباب وراها كلتها -- شوفي عيوني رحاب الاسبوع الجاي حنكطعللكم مهران شاء الله خوش احنى انجيب السيد ونجي احنى والله هيجي تقاليدنا مااعرف اذا عدكم عادات وتقاليد غير شكل كولوما شتكولين ام سعد؟ -- اي عيوني مابيها شي بيها الخير نفس الشي احنى هم جاوبتها فخرية بدون ماتنطي اي تعبير -بس قبلها اريدج تفكرين زين وتنطينا خبر قبل لانملج انه انت راضية ومقتنعة بالولد وهياته شفتيه زين وشفتي انه معاق وهاي الشغلة سودة عليه مو بيده يعني مصارت باراداته ولا غلطته بعد قسمته ونصيبه والف الحمد لله اصلا اني جبت موسيقى من رجعلي عايش ام سعد تدرين اوووف سودة عليه وجبته كلها استشهدت الحمد لله انه رجعلي وصار بحضتي واشوفه كدامي يتنفس ياكل ويشرب ويضحك هاي تكفيني والف الحمد لله يعني بس رجليه القصد امي انه حتزوجين شخص تصيرين انت امه وابوه وخواته واخوانه يعني حيصير الاعتماد والمسؤليه كلها عليج واني اعرفج سبعه وحتلزمين ظهره والا مجان اختاريتج دونن من كل البنات عيونهاجانت تروح وتجي بين فخرية ورحاب وهي تحاول نقرا جواب كلامهم من النظرات فخرية جانت صافنة مجتفة وبس تهز راسها رحاب مدنكة ماتحجي فكملت ام فاضل وكلتلها - هذا مايعني انه هو مو رجال ماتعتمدين لا اني اكلج وهسه تشوفين بعينج من تعاشريه فاضل سبع واخو خيته عمره مايخليج محتاجة اذا انت ادرايه حبايه هوي يداريج اضعاف وكلشي بالبدايه صعب ... ماتعرفيه مماتعوده عليه .... وهنا قاطع كلامهم دكة الباب حيل جوي الجهال جيتو على الغرفة انه الكل يسالون على ام فاضل انه اتاخرت ويصيحون يله حتى نروح بوستها وكالتها نكمل بعدين ديري بالج على نفسج زين حبيبة واي شتحتاجون وصلولي خبر وبوست فخرية وراحت اللي ظلت عينها على بتها ودمعتها على خدها حضنتها وبوستها وكلتلها يمه اذا ماتردينه بلاها مو لازم مااريد اضغط عليج سكتت وماحجت كالتها -يمه لبسنا الحلقات بعد اذا اكول مااريد ابويه يلزمني ويكطعني للموت هالمرة لا يمه لا هاهي كلشي قسمة والحمد لله بلكت يطلع زين وجوي البنات الصغار التمن عليها صافنات على رحاب العروسة وكلهم عيونهم مفتوحة وفرحانين يطخون بدلتها راحت على كيف لغرفتها وبوستها عهود وباركتلها فشاورتها كلتلها اريد ابقى وحدي بالغرفة اول ماقفلت الباب عيونها ركضت على اللعابة وبايدين ترجف ودموع لا اراديا بدت تنزل جرت الورقة وفتحتها على كيف الورقة جانت متبلله ووسخة عليها تراب لكن وسام ذكي كتبها بقلم الرصاص حتى ماتسيح بالمطر مع اول كلمات بدت تشهك حست كانه وسام هو الي يحجي وياها ابتدت الورقة بكلمات حب واشتياق وندم وانه هذه الرسالة الثالثة خلال اسبوع وهي ماتشوفها نزل لبغداد خصيصا هو ابن عمه حتى يشوفها ويخطبها من اهلها وتاسف الها لانه ماكدر واجهه اهله اللي رفضوا زواجهم لاسباب امنيه وانتهت بنحيب وصراخ من قرت انه اجى للخميس الثالث يفترر يم بيتهم وماشافها ظلت تباوع على الشبابيك واتخيلت صورته واكق بالمطر بالساعات ينتظر بس نظره منها وهي خاتلة جوة الفراش بس الله يعلم بحالها وختم الرسالة انه قرر يطوع بالجيش في حاله رفضها اله الرسالة تاريخها كان قبل اسبوعين يعني كلشي فات على اوانه لزمت رحاب المخده وغطت وجهها وهي تصرخ من الالم الم فظيع مزق داخلها وسبب نزيف عميق اتخبلت وظلت تقرا الرسالة مرتين وتلاثة ودموعها انخلطت بكحلها الاسود والباب ادك عليها وهي ماتحس ولاتسمع ويصيحون رحاب فتحي الباب رحاااب شبيج انعدم اتصالها بالمحيط الخارجي لدقائق الى ان فزت على ضربة قوية مسحت دموعها بسرعة وجرت بدلتها ورجعت الورقة لمكانها بردن اللعابة من فتحت الباب جانت خالتها وامها وبيبتها واكفين قلقين عليها ومن عيونها صارت بعيون خالتها ارتخت ونزلت دموعها انهار تجري وكعت بحظنها وكامت تبجي دفعتهم بدرية وسدت الباب كالتلها خالة جان رايد يجي يخطبني والله العظيم هو كاتبلي هسه شسوي خالة الحكيلي ابتسمت بدرية وكعدتها على الجرباية -رحاب ... حتى لو اجى يخطبج مية بالمية ابوج مايرضى ولا اهله حيوافقون هذا يحلم او يمكن احنى نسميها من حلاة روحه مااتحمل نظرته لنفسه انه عافج نص الطريق حاول يلكى حل بس صدكيني مدام اهله هشكل ووضعج هشكل مستحيل تكدرون تلتقون حتى لو انت قبلت انت ادمرين عائلتين باكملها ويمكن اكثر هم ... حبيبتي انشس الموضوع وشوفي طريقج ختى هو هم يشوف طريقه خلي الولد يعيش حياته ويشوف دربه عوفيه وانسيه اسمعي مني امي خلتها بحضنوها وكامت تربت على جتفها الخميس اللي وراه صار المهر... وزعت ام فاضل كاسات المهرو جانت احلى وارقى شي باسوق اشترتهم كاسه بيضة والململ الملفوف بيها ذهبي وبداخلها انواع ملبس ودزوا مجموعة لبيت اهل رحاب اخذتهم عهود بسله وبدت توزعهم هي وامل على الجوارين والجهال يركضون وراهم لبست رحاب بدلة بيضة مثل الصاية وشال هم ابيض على راسها وكعدوها بغرفة امها وابوها على جرجف ابيض جديد وخلوا قران بحضنها على اية ( انا فتحنا لك فتحا مبينا ) ولازم تكون ايديها مفتوحة وحطوا رجلها بكاسة جبيرة مي ورد ور وونثروا بيه ورد وياس وكبالها صينية البياض او البخت صينية سبع بياضات جانوا اهل بغداد ولحد الان يتفائلون بيها الصينية تحوي على سبع كاسات بيها اي شي ابيض القند (قطع الشكر) ومن السما والمستكة وتمن ولبن وحليب قيمر وليلو ابيض وشنو اكو من مصقول او حلقوم ابيض هم يخلوه حتى تصير سبع كاسات وبالنص مراية جبيرة وبصفها عش مال طاووس وقران فضي مفتوح وانطوها نبات تحطه بحلكها وتمضغ بيه ويظلون زهوري وام فاضلون يحكون كله القند فوك راسها الى ان صاحها السيد وهو شابك ايد ابو فاضل كويكله وايد كاطع وكيل رحاب سالها هل قبلت على المهر المقدم والمؤخر مجاوبت اكثر من مرة سالها يله جاوبت من بعيد كالت نعم وقعوا وصاحت الهلاهل وانطى لكل واحد بيهم زنامة بيها كل التفاصيل المقدم والمؤخر والشهود جانوا ولد عم فاضل وكاموا يبوسوهم واطشر الجكليت على راسهم واتوزع والكيك والببسي حست ساعتها رحاب انها طارت من قفص ابوها اللي سجنها طول هذه الفترة بلا رحمة وبنفس الوقت حست جسمها يكزبر ورغبة بالتقيا من الخوف من شنو ماتعرف هل ياتريى هي سوت الشي الصحيح كاطع هو نفسه كان يعاني من التعب والامراض بالفترة الاخيرة الشرب اذى كبده كلش مصار مثل قبل يسهر يوميه ولا يروح يم سميرة بالعكس صار تواجده بالبيت اكثر وحتى ماله علاقة باحد جان يذبل يوم ورة يوم مجان احد يدري هل هو مريض ويكابر لو مقهور من شغلة ومايحجي وراه بكم يوم سوت ام فاضل ذيج العزيمة الجبيرة والضخمة ابيتها جان على غدى عزمت بيه كل كرايبها العزيمة جانت بالخص للزلم وخصصت صالة صغيرة للنسوان بس كاطع صحته تعبت مراحلها وبس رحاب وامها وخالتها راحوا شويه ورجعوا الكل اتحمس يشوف جنة ام فاضل ماي طولاه شلون حتكون واكيد ماخصلت من لسانهم الزواج او الزفة كان المفروض يكون بشهر الثالث ورة ماتخلص ام فاضل من تاثيث البيت الهم وخصوصا انه هي اتولت كل الامور لانه زوجها جان مسافر وماعنده وكت يشرف على هاي الشغلات وهي هم رادته ودتيها عدلة لكن اللي صار انه بنهاية شهر الواحد اتوفت ام غازي المسكينة اخر ايامها مكامت تشوف بعد راح نظرها ومكامت تاكل وضعفت وتضاعفت الامراض عليها الى ان توفت ورة ماتعذبت هوايه على ابنها فكاطع ماقبل يتزوجون باول الثالث اجلها ليورة العيد الصغير بنهاية شهر الشادس اما سامي ماعرف بخطوبة رحاب الا ورة مدة ومن يومها هو صار متمرد وحتى كام يشرب وعلاقته خربت كلش باهله وصار يتعارك ويه ابوه يوميه وباليل يسهر وجه الصبح يله يرجع جانت الامور كلش متازمة ببيت نورية وخصوصا على زهير منا سامي ومشاكله ومنا اخوه فرات اللي مابقى مكان مادور عليه جان خايف انه ينكمش ويصدر بحقة حكم الاعدام الي جانت عقوبة الافرار بذيج الايام ... بعد ما كطعت رحاب مهر هي وفاضل طبعا ابوها نحس مجان يقبل بشغلة تطب وتطلع وياه بس هي مرتين سووها الاولى عزمها بمطعم فندق بابل وراحت وياهم بدرية وهاي اول مرة يطلعون بعد مراحوا زيارة للكاظم واتسوقوا مناك نيشانها من الهدوم وشغلات العرس جانت رحاب بالبداية كلش حزينه ماكدرت بعدها تصدك انه صارت لغير شخص مو وسام كعدوا كعده رسميه بسرعة رجعوا شعر فاضل بضيق من برود رحاب وحتى بدرية ظلت تلومها وتعتب عليها ووعدتها انه تحاول تتجاووب وياه اكثر ومرة لخ هم اجويهم زيارة فاضل وامه اللي لحت تكون كعدتهم بالحديقة وياريتهم ماكعدوا كل شويه طافر عليهم تكرمون لو نعال لو حذاء جانت النبكة مال بيتهم كبرانه وهاي ثاني سنة تحمل نبك ونبكها حلو وخشن والجهال رايحين للمدرسة يضربون عليها وراجعين يضربون عليها حتى قبل يومين انشمرت طابوكة وكعت بنص صينية الاكل بالمطبخ والا هسه اتحولت الشجرة الى شجرة تك نعال وتك حذاء بدال النبك وجانت عهود كل شويه طالعة تهد عليهم لو تطلع ام كاطع نفسها جانت الكعدة شويه احلى من سابقتها وفاضل كعد بصف رحاب وعيونه مشالها من عليها واول سؤال سالها انت ليش كصيتي شعرج كلش انقهرت من شفته كصير جاوبته بخجل انه جان متعبها وكام يوكع وهو اكيد حيرجع يطول وبعدما تكصه وبدت السوالف ام فاضل كالت البيت حيكمل بقت بس الحديقة تكصها وتبلطه شتايكر تسويها كراج لسيارة فاضل ... بس فاضل جان هذا الحيج كله مايهمه جان يحس اكو هاوية جبيرة بينه وبين رحاب وجان خايف انه مايكدر يعبرها ويسقط بيها معظم الوقت الي تقضيه وياه جانت ساكته ماتحجي حتى من يفتح حوار وياها وفجاءة وفجاءة بنص حجيهم اندكت الباب اتاريه كاطع راطجع للبيت يكودوه اثنين من اصدقاءه جان كاعد براس الشارع يم ابو دكان صاحبه عني مو بعيد واتفاجا من شاف نسيبه يمه لكن مااهتم لانه جان يتلوى من الالم بساعتها ركض اخذته فخرية وعهود للمستشفى هنا هم حس فاضل بالعجزز انه نسيبهم مايكدر يسوي شي اقلها جان هو اللي ركض بعمه للمستشفى مو النسوان رجع للبيت مهموم ومقهور كلش وطلب من امه تفسخ الخطوبهخلاص حس بضيق ومثل شي يخنكه وكللها افسخ بعد مااريد قبل مااورط بت العالم جان منهار كلش بسبب عجزه وبسبب برود رحاب يكولها لامه احس بيها مجبورة عليه لو اتورطت وياهي وتستحي تفسخ حتى لايكولون عليها ارملة ومطلقة يوم مااريد اتزوج اني مو مال زواج بس امه ماهتمت لهذا حجيه هي جانت تريد هاي الزواجه تم وباسرع وقت جانت خايفة على ابنها لايصير بيه شي لو يدخل بنوبه كابة ثانية جان مرات يحس انه هناك احد في باله بس هو كل ظنه زوجها المرحوم وبسبب مرض كاطع صارت حجة انه ام فاضل تدفع ابنها يزورهم بين يوم ويوم ويملي البيت ذاك المسواك ومن رحاب شافت ابوها كلش حب فاضل خجول ومحترم وكلش كريم بدت هي هم بعد زن خالتها وامها عليها ان شويه تميل اله وقبل رمضان بيوم اجى زارهم هالمرة وحدة هو والسايق ومالتهم اللي خطية جان يكعد بالحديقة الجو صيف ومخلصين التحضيارت ومتسوكين كلشي الزيارة جانت ممتوقعة وكاطع جان بغرفته نايم ويشوخر تقريبا ساعة تسعه بالليل اول مااجى كعد سعودي يلعب بالويلات مال عربانته وميلاد كل شويه تروح تجيبله كلاص مي وتجي وهو يضحك عليها علما رحاب بدلت وطلعتله اول مشافها ورفع عينه عليها حست بحنية غريبة نحوه مد ايده الها وسلم عليها فحضن ايديها وبوسها فتحت عيونها رحاب باتساع هاي شلون هيجي يبوس ايدها !!! وهو مغمض كللها ماكدرت اتحمل كلبي نار عليج والله مو بيدي كلش اشتاقيتلج رحاب والله احبج وصارت عيونه بعينها فاضل جان اشكر على امه شعره بني فاتح كلش وعيونه خط اصفر وخط اخضر وبشرته مو كلش بيضه يعني حنطاوي وعنده فركة صغيرة بين سنونه الامامية فكللها وهي صافنة عليه اني انعجبت بيج من اول مرة شفتج بالصورة ومن كثر ماامي حجتلي عنج صورتج بخيالي اميرة بينما بالحقيقة شفتج ملاك اتبلعمت رحاب وترقرت دموع بعيونها بس حبستها كلمات الحب صارت تاذيها بدل ماتفرحها اندارت عليه وجرت ايدها بهدوء وابتسمتله ان شاء الله يارب اكدر اسعدك انت تستاهل كل خير بس فاضل اني مو ملاك ومااريد تعاملني على هذا الشي صفن على جوابها ومعلق @@ وبنص رمصان وعلى الفطور دك التلفون والكل تصيح عهود كومي شيلي بذاك اليوم جانت بدرية هنا من حسن حظها كاطع صار مايهتم منو يطل منو يطلع كلش انشغل بمرضه ويعرف فخرية وبتها ماعدهم احد هو هم جان يريد زواج رحاب باسرع وقت شالته عهود وهي تسب منو يخابر هيجي وكت على الاكل توه الواحد بلل ريكه وماكو كلمتين ركضت على امها تصيح يبوو يبووو يمه لحكينا كعدت بنص الصالة تلطم وتملخ نفسها | ||||
|
| |
|
01-09-21, 08:22 AM
| #35 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الفصل الثالث ...بِأَيِّ ذَنبٍ قُتِلَنا !! 33 كان صوت اذان المغرب يعلن انتهاء يوم اخر من رمضانبينما عيون نوريه تتطلع من الشباك على الشفق وهو يغيب ... كلبها جان مقبوض من البارحة ... كابلها زهيربوجه واجم اكل تمرايتين وعينه على نوريه اللي حتى مالها نفس تفطروهي سارحه بنظرها على اللامكان فسالها --شنو ماحتفطرين -باوعت عليه وبكلبها الف ملامه فجاوبته ومن اله نفس ياكل وولده مو يمه!!! واسمهان تداور عيونها على ابوها وامها وبكلبها غصة اخوانها كملت نوريه شو سامي هاجرنه وحتى ميباوع علينه , ونزار راح يفطر ويه جماعته ومن بدى رمضان لحد الان يتهرب من عدناواووف يمه فرات سودة عليه الله يعلم هسه هو بيا حالياترى صايم لا ؟خايف لا !!يمه كلبي نار عليه زهير --- هم راح نرجع لنفس القوانه --- بس كلي شلون اجى من كلبك تدزه شلوون ماخفت عليه , شلون مانكسر كلبك عليه شلون !!!!!!-يعني لازم على الفطور اتزقنبينا نووريه انت تعرفين كلش زين اذا مادزيته شيصير !!!! يعدموه وندمر كلنا ! على الاقل هسه استفاد من قانون العفو العام وتره مو هينه شغلته كوة سويتها بعد لاتلحين كافيكالت بكلبها والقهر جان متسحر وفاطر بيها هو هذا اللي هامك ندمر كلنا !!وشويه اندكت الباب والزائر جان جايبلهم اقسى خبر وامر بلاغ سدي زهير جينا نبلغك باستشهاد شقيقك فراتصاحت نورية وعاطت لا لا يايمه لا لا لاتكوللون وكامت ترجف ماتصدكاندارت وصاحت على زهير الي من الصدمة بقى مذهول مايعرف شيسوي---كله منك الله لايوفقك حرمتني من ابني يبوووو والله جنت حاسه جنت حاسه الولد بيه شيسودة عليه فرات يمه سودة عليه ماضميتك يمه سوده عليه ماطلعتك من حلك الموتيايييييمه رحت من ايدينا يايمه لك لييش زهير والله جان جاهل والله جاهل يخاف من كلشي ولزم حلكها وحاول يسكتها بس هي راسا انكلبت عيونها وصارت عدها تشنجات مثل اللي بيها صرع فعافها بيدين بتها وركض طش عليها دولكه مي وراح ويه الضباط اللي اجوي عليه بلغوا انه الافضل انه يحصرون جنازته لهنا لان حسبما معلوم عدهم امه والوه كبار بالعمر اضافة الى معرفتهم الشخثية بيهاسمهان ماعرفت شتسوي ظلت تصيح على امها يمه شبيج!!! يمه لاتخوفيني.... ياناس الحكولي يناي ساعالم الحكولي امي حتموت!!!!امي مااعرف شبيها!!!ومافكرت غير تخابر على بيت خالها ومن دكت التلفون وطلعتلها عهود وصوتها يرجف تصيح لحكولنا امي اتخربطت وابويه عافنا وراح الحكولنا عمي فرات استشهد عهود اتخبلت عهود خطية جانت تحمل مشاعر رقيقة وخجوله لفراتالشخص الوحيد الي عمره مسمعها كلمة محلوة ودائما جان يعاملها احسن من البقية وبحنية اكثر منهم كلهم صح مجان اكو اي شي غير بس هذه المشاعر المكبوته ... بس الاثنين جانوا يحسون رغم تنافر اوضاعهم بقرب احساسهمفرات كان ناعم وضعيف وجان عايش بظل سامي ونزار وجان على طول يحس نفسه اخوهم الصغير عمره ماحس انه عمهم مثل مجان متعلق بنوريه اكثر من امه عهود من سمعت الخبر كامت تصيح بنص الصالة يبووو يبووو وتكفش بشعرها جانت ستوها غاسلته من الحنه ومبلل وهو اصلا ثخين ومجعدمن صدمتها فخرية بمنظر عهود انشلت رجليها وماكدرت تكوم من مكانها بس تصيج ولج شبيج احجي !!!لج عهود لاتموتيني احجي كومي رحاب شوفي اختج شبيها هي سوتوكاطع من هول الصدمة كوة كام من فراشه يريد يعرف هاي يامصيبة اللي تخلي عهود هيجي تلطمصاح عليها وهو واكف يم غرفته بت النعال شبيج ولج شصار صاحت يابه فرات استشهد فرات حما عمتي نورية استشهد ...... سكت شويه وانقهر على هذا الولد الصغير اللي جان طفل صغير اتربى بين رجليهم صح هو يضوج منه باعتباره اخو زهير بس من فقرة محد جان يكرهه بالعكس محد جان يفرق بينه وبين ولد نورية اخته وانتبه عليها وانت شكو هيجي كاتله روحج عرف ولف وياه بت الك....ب بت القند....ةركضت عليها رحاب وهي تعرف بقصة اختها وظلت تحضنها تهديها وتكلها سكتي لاتفضحين روحج هاي الحجاية طفرت لمسامع فخرية مثل البرقاللي شاطت نارها من ساعتها وكامت مثل الاعصار عليها الى ان وكفتها عوجيه عمتها تصيح عليها تعوفه لحالهم مو وكتها وكاطع بالبيت لاتصب البنزين على النار بس هنوبه ابوها ظل يغلط عليهم هيجي خرعوه وراد كلبه يوكف من الخوف وعهود هم ماتسكت ظلت تدردم ويه روحها وهو يكللها انجبي سكتي يا كذا وكذ لاترادديني لاتجاوبيني اندارت عليه رحاب كلتله كافي يابه كافي ارحمنا شويه ماتحمل كاطع ركض عليها يريد يضربها جلاق هي واختها ليش ماشيل رجله وهو ناسي لابس دشداشته تضيك عليه ويتزحلق ويوكع جفي على ظهرة حتى وكعته رجعت الحيطان رجوكام يصيح ااااخ ااااخ يابه انكسر ظهرياني اعلمجن بنات فخرية الا احركجن حركلحكووولي لج فخرية........ كومي لحكيليكامت امه اول شي وراحت عليه وهي تسمي بسم الله وتندعي انه مابيه شيوحيل دك بعوجيتها على ظهر االبنات يكومن يشيلن ابوهن بس هو مارضى كلهم لاحد يطخني منجن انت نجسات وكام يصيح ويعيط من الوجع وسعودي لازم دشداشته ويبجي بابا كوم لاتبجي يله بابا كووم لاتوكع ظلت فخرية تدور عليه وتفتر داير مدايرة هي دايخة ماتكدر اطخة يتوجع ويصيح وهو ثكيل ماتكدر تشيله بله هسه شلون بيه اني !!وهنوبه وكت فطور شلون تروح على الجيران ماكو غير تخابر ايهاب سايق التكسي يجيه اخذت رقمه من كاطع وخابرته المشكله ايهاب ماعدهم تلفون بس ابو الدكان اللي براس الشارع عنده ومن يريدوه يخابرون على الدكان وهو يدز عليه ومنا للعشرة بالليل يله بين وكاطع على حطته يلوب على الكاع والبنات يبجن بالغرفة مايعرفن يبجن على فرات لو على ابوهن هيجي صار بيهالى ان اجى ايهاب وحار شلون يساعده وحده مايكدر عليه كاطع جان جثيث ومو مال نفر نفرين يشيلوهفراح على ولد الجيران اللي جانو يتجمعون يم الدكان هيجي وكت ورة الفطور لو بيناتهم بالدرابين يلعبون محيبس وهبوا كلهم وشالو كاطع للمستشفى وبين مجانت فخرية ملتهيه وياه وفكرها يودي ويجيب جانت نوريه تعاين تشييع تابوت فرات اللي انلف بالعلم العراقي وشالته خيرة الشباب وهمه يصيحون لا اله الا الله ويتقدمهم سامي بعيونه التي تهل الدمع الحار ونزار اللي تشتت افكاره وصارت الناس تمشيهيصيحون لا اله الا الله والناس ترد وراهم لا اله الا الله والعالم تمشي وزهير بنصهم ويحرك جكارة ورة جكارة ومن خلصوا على اساس ياخذونه لامه وابوه اتاريهم همه جاييين من سمعوا بالخبرواول ما نزلت من التكسي امه ... مرة جبيرة بداية الستيناتاول مانزلت وكعت على وجهه بالكاع من عينها صارت على تابوت ابنها ومن كامت صارت تعرج من تمشي تصيح وتوكع والناس يكوموها تكلهم اريد بس اشوفه واشمه اخاف هذا مو فرات ياولدبس محد قبل تفتح التابوت الجثة جانت مشوهه ... ومستحيل يخلون امه تعاينه وحتى دمه كام ينز من التابوت ووكع على قمصان المشيعين ---بِأَيِّ ذَنبٍ قُتِل!--جان حلكها مزرك ويرجف ووطعت شيلته واطشر شعرها الابيض المنكوش اللي مابقت خصله بيه ماشلعتها وعيونها الذابلة المصدومهما صدكت انه حتعاني الم فقدان الولد للمرة الثانيةركض زهيرعليها يريد يشيل امه بعد ماطاحت بالكاع للمرة الرابعة والتفت عبايتها المتربة عليها تصيح يمه مابيه اجيك يمه مابيه اشيلك واضمك يمه مابيه اجيك انشلت رجليه عليكهاي ام زهير المراءة المعتدجه الفخورة الي ماهزتها جواحن الزمان والل طول عمرها جانت زاهية بطولها الفارع وجمالها ماتت الف مرة بين ساعة وساعة ماتت وكعدت من صيحة الموت ومن صارت عيونها بعيون زهير ذيج الساعة نزلت دموعها ودفعت ايده وتفلت عليه بنص وجهه كدام الناس كلها والعالم من خجلته مسح المي من وجهه عافها واندار على ابوه وهو يسحل برجليه والعوجيه ودموعه بللت لحيته البيضا والمشيبه انتجى على زهير وكله مبروك وليدي نوط الشجاعة بجى زهير من كل كلبه بذيج اللحظة وكمزت كل ذكريات فرات كدامه فرات وهو طفل يلعب وهو يكمز وهو يغني ويفر بالفريرات فرات اللي امحد شافه غير طفل بريء يبجي على جيس الازبري وكع من ايده واطشرفرات الي جان يضحك من يجيب الشهاده وهو ناجح مرة وحتى من هو ساقط بالاتكليزي اللي جان اكبر همه فرات اللي مجان يكله اخويه جان يصيحله يابه اللي اتوسل بيه ودموعه تجي من اجاه كاله والله اخاف مااكدر خويه مااكدر اشوف واحد ميت كدامياتخبل من الدمفرات اللي اتوسل بيه مايجرة من ركبته ويصعده بالسيارة حتى يلتحقاللي ماقبل يودعه راح وهو زعلانفرات اللي خاف عليه اكثر من روحهاللي خاف عليه من ذيج الرصاصات اللي ينعدم بيهالو من الحبل يلتف عليه فرات .....اااااخ فرات حركت كلبي ونزيفك عمره ماينشف@@@ليلتها باتت نورية على شوك ونار وفخرية بالمستشفى بالها يما يم فرات تبجي مرات ومرات تتذكر جاسم وراضي الله يرحمهمظلت فكرة تاخذها وفكره توديها ياترى لو مخلفة ولد ويه نورية مو جان هسه هم اخذوه ويمكن يتاسر لو ينفقد لو يستشهدلا عيني مااتحمل اموا ولا اشوفن هذا اليومالحمد لله الله مارزقني سعد الا تواليها خطية نوريه هسه كلبها ناربس اووف من البنات شلون مكمت اكدر عليهن معقوله بناتي هيجي يطلعن عود وهاي اني اللي داكتهن دكهم رحمة من الله انه مااستدعوا كاطع جان شلون بيه اربي جهالي لا ابوهم يايمه شنو هالافكار سترك ربي احفظنا اومن الصبح طلعوا كاطع من المشتسفى بفطر خفيف بالحوض وانزلاق بالظهر ووصاهم الدكتور بالراحة واول ماوصلت وانطت خبر لبدرية تجي وراها للفاتحة هي وامل ورة ماغدتهم اخذت عمتها وسعد وراحت للعزةومن دخلت شافت النسوان ملتمات على نورية وعمتها بنص الصالة والجادر منصوب برة جانت نورية شارده وصافنة وحفرت الدموع راسا مجراها على خدودها وعمتها تبجي ساعة وتسكت شويه وترجع تلطم وتكتل بروحها والنسوان يلزموها سلمت فخرية وعزتهم ولفت عبايتها وكعدت بصف حماتها اللي من شافت امها وكعت بحضنها وكامت تبجي وتشهك فخرية كامت حضنتها وبوستها وشويه وسكتت انوبه بس ظلت تترنح هي كاعدة بحركات لا اراديه مثل الملا الي يقرا القران وتون ويه نفسها وامها تبجي وياها اندارت على فخرية وكانمت تحجي بصوت ناصياني كتله زهير لادزه زهير الولد صغير وخايف انطيه مجال بس هالستة والله فخرية اول مرة كلبي مايطاوع زهير جنت اطيعه بالصغيرة والجبيرة الا هاي شكد وكفت بوجهه ماكدرت عليه جنت حاسه والله جنت حاسه اووووووف يمه ومرت ساعة واندارت على فخرية بويه شو ماجبتي البنات وياج وينهن ؟؟؟-- لا خية والله عفتهن يم ابوهن كاطع -- ليش هو هم مااجى للفاتحة !!!لا دادة اسم الله عليكم وين يكدر والله اليوم الصبح طلعته من المستشفى --- سترك ياربي شبيه انوبه هذا المكرود --اي والله سوده بوجي هو سمع خبر فرات منا وجان يوكع من طوله منا ماتحمل دادة هم بحساب ابنا وعزيز علينا ومن ورة الوكعه ركضت بيه للمسشتفىوالدكتورة كله راحة تامه ومايتحرك هوايه--- يايمة ليييش هيجي ليييش هيجي سوة بروحه يايمة وهو وين عنده صحة وعافية اوووف بس اني اعرف بيه كاطع كلبه على خواته حنين سوده عليه حنين علينا مايتحمل اي داده مايتحمل يشوف اخته محروك كلبهادارت وجهها فخرية وماحجت ورة ماغمزتلها عمتها ان عفية عليج اما بدرية من سمعت ظلت حايرة شتوسي محد بالبيت امل ماخذه الجهال من الصبح وطالعة حتى ماتعرف وين وهي نست تكول لفخرية ماتندل بيت نوريه بس تتذكر المنظقةبس هم بدلت لبست وطلعت وكالت من اروح انزل هناك واسال وبالفعل اول مانزلت من التكسي شافت شاب صغير ديريد يعبر الشارع بسرعة نزلت جهالها وصاحته ياوليد عفية ماتعرف وين صايرة فاتحه بيت ابو سامي ابنهم فرات استشهد البارحه فالولد سالها كلها-- الجادر مال فرات لو صامد-- لاعيوني مال فرات سوده-- خاله انت هوايه بعيده عنهم هنا فاتحة صامد الله يرحمه بس طبي جوة بالفروع نهاية الشارع واخر فرع على ايدج اليمنةاتشكرت منه وكامت تمشي حاارة والشمس ادك بيهم والشوارع فارغة نفر مابيه الناس صايمة وخالتة ببيوتهاوبتها كل شويه ماتكدر تمشي توكف وتكعدها على الرصيف ازركت شفتها واصفرت شالتها على جتفها ومشت هي تمشي بهالفروع والشوارع شلون جانت قبل نظيفة المناطق والارصفة مصبوغة اسود وابيض وكدام البيوت مرتين ينرش باليوم الفجر والعصريه وريحمى المي اللي تختلط بالتراب ترد الروح ومن طبت بين الفروع تيهت وتعبت كعدت بتها وظلت صافنة ماتدري وليغاد منها جان اكو اثنين عمال مصريين ديصلحون عمود كهرباءرظلوا يباعون عليها هي هم ضاجت كامت بسرعة وكومت بتها وجرت كريم وياها ومن دتمشي لحكها واحد منهمكلها عاوزة حاكة ياست هانم مجاوبته وجرت جهالها وكامت تمشي سريع اشو هذا هم يمشي وراها خافت كلش وبدت تركض على كيف هو هم كام يركض الشارع فارغ نفر مابيه ماينسمع بس صوت خطواتهم ومن بعيد صوت القران بجادر الشهيد صامد الا ان لمحت حجارة بحديقة بيت بصف الرصيف جرتها حيل واندارت فشخته بيهاوكامت تصيح عليهياابن الكلاب كطعت نفسنا الله لاينطيكوهو يصيح ياست يامكنونة هو انا عملتلك ايه عشان تضربيني ؟؟؟وهي تصيح امشي منا ياحقير ياابسز طلعت صاحبة البيت وطلعوا جهالها ومن صارت هوسه عاد الناس كلها طلعت انوبه من شافوا المصري مفشوخ ودمه سايح عرفوا الولد السالفة شنو وكعوا بيه دك وهو يحلف ويتكفر والله ماعملتها حاكه والله انا كنت ماشي بحالي هي اللي عورتنيدي ست مفتريه واللهشالت جهالها بدرية وكامت تمشي سريع لحكها ولد شاب هيجي بالاربطعش سنة عمره كلها خاله تحتاجين شي كلتله عفية ياوليد وين فاتحة فرات تعرفهكللها خالة والله اني اعرف فاتحة صامد وره فرعين وين مادتسمعين القرانكلتله لا يمه اريد فاتحة فرات-- انت متاكده فرات خالة لو صامد---اي خالة مو دااكلك فرات لاتشلع كلبي فدوة لطولكفلحكه شاب اكبر منه بالعشرين من عمره كلها خالة وين رايدة وبيت منو--كلتله خالة فدوة لعينكم اريد بيت ابو سامي والشهيد ابن اختي فراتجاوبها الولد انه كلش بعيد مو مال تمشيله هي جايه مكان غلط---انتظري اجيب السيارة واوصلجمن ديروح كلتله فدوة فد دولكه مي بارد وياكواتذكرت رمضان وصيام راسا كملت للجهال عيني الله يخليكوصدك وصلها الشاب لصف الجادر واول مشافت العزة نزلت دموع بدرية الموت اله هيبتها ورهبتهطبت وتحضرت تصيح يبووووو وتلطم بس شافت القران يقرا والنسوان كاعدات يسولفن وفخرية راسا لمحتها اشرتلها من شافتهم جيتت على نورية وعزتها وعزت عمتها وكعدتاول ماكعدت بجت شويه وخلت جهالها بصفها طلعت الجكارة من جنطتها اقتربت منها فخرية شلونج شو تاخرتي وجاية وحدج؟؟؟؟!!!وقاطعتهم مريه شابه وكفت على راسهموسالت بدرية حبيبة صايمة لو نجيبلج الغدا فجاوبتها بدرية لادادة جيبي للجهال اني رايده بس جاي اذا مابيها زحمةوورثت جكارتها واندارت على فخرية --شو بناتج ماكو كون ماجبيتهم عزة بعينج اذا صدك وج مو عييب!!!-- لا ماجبتهم بقن يم ابوهن -- اي مو خطية اغه يريد واحد يداريه - اي مو غير ماتدرين ---شدري شصاير ؟البارحة ديضرب البنات وكع على ظهره ونقلناه للمستشفى واليوم الصبح طلعته--دارت وجهها بدرية ودردمت وابو زايد دغتها فخرية ان لاتحجي هيجي بس بدرية ظلت تباوع على النسوان واشرتلها بحركة بايديها وبعدين اقتربت من اختها مرة لخ كلتلها وهو ليش يضربهن بعد شريد يسوي بيهن مايجوز من عدهن كافي عااد--هاي العايقة عهود لزمي روحج وملخيها على فرات وذيج البرب.... ك .....تكللها اسكتي لاتفضحين نفسج ماادري الله شبلاني وياهن يوميه طالعاتلي بشغلة صفح ----بناتج كبرن فخرية مو صغار - لاعيني اطلع عيونهن اذا بعد عرفت عليهن سالفة خلي ارجع واني اعلمهنماكلتي ليش جاية وحدج وينها امل ؟--- والله مااعرف جنت نايمة بس سمعت صوتها كالت بدرية اني طالعة وين مااعرف,, وحتى علاء هم مشفته وماكتله -- عود يرضى يجي للفاتحه اذا عرف ؟-- لعد شلون دادة هذا عزة قابل هينه وزهير مهمها كان صاحبه--وليش لعد هيجي تاخرتي صارلي بالتلاث ساعات واكثر من خابرتج--ضحكت وكالت اسكتي مو لحكني مصري--- وي يمه عزه انوبه مصري هاي منيلج--- اي والله هو هم حظموماكتلج اني مااندل بيت نورية بالضبط من سنين مجاية فنزلت براس الشارع مال ابو العنبة--- حيييل وين نازله وشلون جيتي-- دسمعي ... هو اني مااتذكر غير ابو العمبة من شفته كلت للسايق نزلني هنا سالت ولد شفته صدفة كلي فاتحة فرات نهاية الشارع الفرع اللي على اليمنىوهذا الشارع يخلص لا مايخلصامشي وا اطب من فرع واطلع من فرع وهاي تعبت وكل شويه تكعد تبجي بعد ماتكدر-- صدك شبيها شو حيل مصفرة ---مااعرف فخرية دكتور يكول ضعف بالقلب دكتور يكول لا مابيها وهاي اني محتارة يوميه رايحة واحد--وتالي--- والله مااعرف دااشوف اكو دكتور صديقة امل تعرفه تكول عليه كلش زين بلكت يرسينا على بر--- وكريم ليش هيجي شعره طويل شو ممزينته عود زينيه على العيد---لا لا مازينه فخرية اذاناته كبار ومن ازينه خفيف تبين حيل و الجهال يضحكون عليه يجيني يوميه ميت من البجي ---يا هذا مثل ميلاد يوميه راجعه من المدرسة تبجي يلحكوها الجهال ميلاد سعيد شوكت يخلص عيد ميلادج وهم تبجي ويوميه متعاركه هي وسعودي وياهم ماكتيلي شلون لحكج المصري--- اي خلي اكملجطفت جكارتها وورثت وحده ثاني ---علاء حارمني منها ماصدك الكي مكان اطلع قهري بيه باعت كالت فخرية شوكت العزا جان شو سنطه --- انت جيتي متاخرووهنا جتي المرية شايله ماعون جبير بيه تمن اصفر وعليه كشمش وشعريه وقطع كبار لحم مسلوك صفنت بدريه عليه وراح بالها يم اياد زوجها اتذكرت حتى فاتحه ماسوتله فمطخت الاكل بلكمه بس ظلت توكل الجهال واندارت على اختها كالت اي دااحجيلج --- كعدت قيم على الرصيف داانطيها مي وارش على وجهها شويه حتى ترد روحها وعلى بعد مني اثنين مصريين يصلحون عمود مال الكهرباءظلو لا ساعة لا ساعتين بس يباعون وعيونهم الله اكبر منها --- اي !!!-- اي اني هم شلت قيم وجريت كريم وكمت اركض شو واحد بيهم الحقير كام يركض ورايه وجان اجيبلج طابوكة وعلى كصته---عزة بدريه صدك تحجين !!! فشختي الرجال ؟---يا لعد شسوي؟---يا!!!----اي والله شبيج موتني الشارع فارغ فخريه ويصوصي طير ماكو بالسما وكمت اصيح واعيط والناس كلها طلعت وولد المنطقة من شافوني لابسه اسود وجاره اثنين جهال وهدومي كلها تراب من ورة وهو بدمه سايح فوك ضربتي دكوا كتل انوبه شلون فرع اغبر ماكو بس تلاث بيوت بيه والبقية هيكل --- شوفي الحظ هذا منين طلعلج !!--شمدريني همه ترسوا اللدنيا ابو الخضرة مصري الكهربائي مصري ابو الصمون مصري بعد حظي صار ويهه هذا غير المهم يادادة اجاني ولد شاب ومرتب والله وصلني ليمكم راسا عرف بيت ام سامي وهي توها خلصت جملتها اتمددت ام فرات بحضن النسوان روحها ماعت بعد مابيها والتمن عليها هاي الي ترش مي وهاي اللي تقرا عليها شالوها واخذوها لغرفة ثانيةمرت شي نص ساعة وجان فخرية تسمع بدرية تدردم ويه روحها تكول وخفت اي والله وخفت الزين يروح يبقى العارمن شالت راسها شافت سامي واكف بالباب ديصيح امه فصاحته نورية كلتله تعال سامي تعالي فووت تعال سلم على خالتك فخرية هو من سمع اسم فخرية راسا انحرج ومااعرف يتصرف كل ظنه رحاب هم موجوده فكام يمشي بين النسوان وعيونه تتلفت كون يلمحها بس بينها ماكو والا جانت كعدت يم امهاسلم عليهن وراح وفخرية كرصت بدريه على كيف وفتحت عيونها عليها كون ماتحجي هيجي بعد النسوان بصفها كاعدات يسمعن فكالتلها اموووت منه من اللي سواه الحقير برحاب @@@بالجادر ورة العصر اجوي مجموعة ضباط جماعة زهير د يعزوه ونصهم جان يهنوه انه اخوه بطل انه مات شهيد زهير راسا تراوله بمخيلته صورة ذاك الاب اللي قتل ابنه الافرار بنص الليل وهو ملفلف ببطاينته وشلون كرمه الريس بنوط الشجاعة وشلون الاب جان مثل الميت يمشي والنلس كلها تحيي على شجاعته بينما هو بايده عدم ابنه ودفنه الناس جانت تخاف لانه اي نفر يروح بيها معناها مو بس عائلته لا العشيرة كلها تتاذى@@@ ومن رجعت بدرية جانت توها ليل وامل واكفه هي والجهال بالباب طال بالها علىهاكلتلها ماتكولين وين جنتي---اسكتي امل الولد اين نوريه فرات راح شهيد الله يرحمه -شهكت امل وطلت على صدرها ياسوده عليه مايستاهل فقير خطية لازم نروح نعزيها نوريه ماتستاهل اتممدت بدريه وكالتلها عود باجر اخذج ونروح انت وين جنت؟--رحت لباته اشتري للجهال احذيه رحت للسركة من الصبح على برد الهوا من رجعت شفتج توج طالعة قوري الجاي جان بعده حاار!!@@رجعت فخرية للبيت على ساعة دعش واصر سامي يوصلها مع انه كلتله يجي عليها ايهاب السايق بس ماقبل وصلها ودخل يسلم على خاله من عرف بيه واكع ومطلعيه من المستشفى واول مافات شم ريحة الصابون نفسها طالعة من الحمام روحه ذابت واتنهد تنهديه عميقة ماكدرت تعبر ولا ربع النار اللي بيهبس الحمد لله انه مشافها والا يمكن ينهار كدامهاوعهود هم من سمعت صوته طبت ختلت بالغرفة ماتريد تشوفه ثاني يوم اجى فاضل من الصبح على كاطع سلم عليه وبسيارته اخذوا فخرية للفاتحة حتى هو هم يعزيهم وهنا كانت الصدمة من شافه سامي وعرف هذه خطيب رحاب لاسامي هذا زوجها!!!!!؟؟؟؟ | ||||
|
| |
|
01-09-21, 08:27 AM
| #36 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الفصل الثالث 34 مدينة المئة برج ...براغ اتفقوا يلتقون قرب قلعة فيش اللي تقع بالجزء الشرقي من المدينة ... وبالفعل بعد ماخلص اشغاله اسرعت بدريه للقاء زوجها بنفس المكان الجو كان حلو والشمس شبه خجلوة مختبئة خلف الغيوم البيضاء كانت لابسه فساتنها المفضل الاصفر ابو الورود الناعمة الخضرا وفاتحه شعرها اللي صار يتراقص ويه نسمات الهوا البارده اجى اياد ومن شافته هالمرة كان نفس ابتسامته ونفس خطواته يمشي خطوتين والثالثه يقفز بيها لكن هالمرة اختفى لون شعره الداكن ولاول مرة بعد سنين تحس بدفو ايده مرة لخ ماصدكت بدرية عصرت ايده بقوة حتى تتاكد بس شافته شعره اشيب مو مثل قبل لكن ملامحه هي نفسها فسالته وابتسامة جبيرة على وجهها شو شعرك ابيض اياد حبيبي لييييش!! ابتسم الها وعيونها ضحكت قبل اسنانه وجاوبها شنو رايج نروح نقضي اليوم على جسر تشارلز ونهر الفالتافا اشتاقيت لهذا المكان تتذكرين من جينا اخر مرة ضحكت وكالت اي جنت لابسة نفس هذا الثوب من اندارت وشافت النهر شعرت بغضة بداخلها وصفنت على الثوب واطرافه اللي تتطاير حست بالم كانه تريد تطرد ذاكره مؤلمة من خيالها تمر عليها وتهيج المواجع اندارت على اياد وكلتله اياد اخذني وياك لاتعوفين هنا الله يخليك تعبت والله بدونك لزم ايده وباوعلها بوجه حزين لكن الابتسامة متفارقة --بدريه جبتلج فد شي ويايه !! لزمها من كتفها وركز عليها بينما هي حاولت تشيح بنظرها عنه سمعته يحجي وعيونها على تدفق النهر وصوته من حولهم --بدر ديري بالج على نفسج وعلى الجهال كررها مرتين و بوسها من راسها وعيونها تدمع وهي بحضنه لحظتها فزت من حلمها ودمعتين على خدودها لزمت ركبتها ادور على كلادتها واتذكرت انه ماكو راحت وماكدرت ترجعها كامت من الفراش وفتحت جزدان صغير حاطته جوى البوفية وحسبت الفلوش اللي بيه مجمعتها من الشغل المتقطع اللي جانت تشتغله حتى ترجع كلادتها بس حرامات ماتكفي الفلوس بعديرادلها كوومة وهي من اول رمضان بطلت من شغلتها القديمة بعد ماتعبت من تحرشات سكرتير المدير بالرايحة والجاية تركت الشغل بس على امل انه صديقة الها تلكيلها شغل ورة العيد وبقت ها تنتظر شوف شلون تصير الامور وياها نزلت جوة وشافت امل دتريك كريم وسمير البنات جانوانايمات وراحت للصالة وطلعت جكارتها وكعدت ادخن جانت الشمس توها تضوي المكان وتلف السنادين المرتبه على طول الشباك غمضت عينها وظلت تسرح بالحلم مرتين وتلاثة وتتحجيه ويه نفسها حتى لاتنساه زمن فتحت عينها لكت امل تباوعلها بنظره عتاب فتوسلت بيها وعيونها مغوركة انه بس هالمرة تعوفها ادخن بالبيت وهسه يروحون لفاتحة فرات وهناك تاخذراحتها بين النسوان وبالفعل ماكو اقل من ساعة جانو هناك تقريبا ساعة بالعشرة وستوهم بدوا سامي ونزار يكعدون بالجادر ولانه بيت نورية جانوا توهم كاعدين محد جاي من الناس غيربس اللي البايتين من البارحة وكفت بدرية وامل بالباب مال الكراج يسولفون ويه النسوان والجهال يتراكضون بيناتهم وعلاء كعد ويه زهير يرتب امور للجادر من الكهوة والجاي وهاي السوالف ودزوا الولد يحضرون الريوك ويجيبون الصمون من برة علاء وزهير اتصرفوا وكانه مصاير شي ولا كانه ميتحاجون من سنين وشويه وكفت سيارة بيضا ونزلت منها فخرية وسعودي والسايق نزل العربانة ونزل فاضل وراها التفت سامي لبدرية وهو مستغرب هذا منو ويه مرة خالي بدرية جاوبته هذا فاضل خطيب رحاب انصدم سامي وظل يكول ويه نفسه لا مستحيل !!! هذا خطيب رحاب!!! هذا اللي اخذها مني وحرموني منها!! لا سامي ... جاوبته بدرية وهي تحاول تضوجه اكثر لا قصدي رجلها ولو مو الفاتحة جانوا على العيد يتزوجون طبعا سامي ماسمع جملتها الاخيرة بس باوع بنظرة لؤم وحقد وغيرة لفاضل حتى مرد السلام عليه وظل فاضل مستغرب من ردة فعله مع انه بالكاد اليوم يله عرفه وحتى تغطي بددية على الموضوع ولايصير بيها احراج رحبت بيه وظلت تسولف وياه وسالته عن امه وخواته فكللها امه حتجي وراه فرد شي ساعتين ماتحب تكعد من الصبح ضحكت بدريه و كالت اي حقها ليش لا تدلل المزيونة وظل سامي يروح ويجي بالفاتحة على فخرية ويلح عليها انه ماترجع الا وياه اليوم بحجة يريد يشوف خاله ويسلم عليه فخرية حست اكو شي فكالت لبدرية انه ترجع وياهم وهم بالمرة تسلم على عمتها وكاطع والبنات فاضل من عرف عمته ماترجع وياهم طلع هو وامه من الفاتحة العصرية بس جان ضايج من تصرفات سامي ونزار وخبصها لفخرية الى ان صارت بالتسعة بالليل كلها يله خالة امشي خلي اوصلج يمعودعدل بدل بعد وكت لا الا هسه اي خاله الا هسه وطول الطرييق وهي حاطة ايدها على كلبها وعيونهم تتداور هي واختها كلمة ماحجن .... ومن نزلوا من السيارة اتفاجاءت عهود من شافت سامي بباب الكراج وركضت على اختها حتى يطبون جوه بالغرفة ومايسلمون عليه دخل سلم على خاله سامي وهو ضايج ومعصب ومايعرف شلون يفتح وياه الموضوع خس بيه كاطع خله ها خيرك ابو السوس كله خالي .... اني ابن اختك لا ؟ الي خاطر عندك لا؟ كاطع طبعا معروف عنهو خلكه كصير كله احجي ولك بلا هالحجي مال المسلسلات شتريد كله ---- خالو شلون تنطي رحاب لواحد غريب واني موجود!! معقولة خالو الله عليك تنطيها لواحد مانعرفه لا وفوكاها معاق خالي معاااق !!!! زين ليييييش ؟؟هو بشنو احسن مني؟؟؟؟؟ فجاوبه خاله -- اكلك انت مخبل لو شنو؟! شنو اني موجود شنو هالخريط!!!!!! اي انطيتها للي يعجبني والبنية كطعت مهر وحتزوج هسه انت شرايد اكلك سامي لادوخني روح كول لمرة خالك اريد العشى --- خالي انت ليش مستصغرني هيجي مشايفني رجال وافتح بيت ترى اني مراضي على زواج رحاب من هذا المعوق ومستحيل اتم الزواجه لو على كص ركبتي ---- لا والله واني منتظر حضرة جنابك يمشي رايه عليه لك ولي منا يله انت منو بله ان رضيت او مارضيت بناتي محد يحكمهن غيري افتهمت لج فخرية جوووووعااان وين العشى شو البنات كالن هسه نصبلك ---- عاد هنا طبت فخرية عليهم بعد ماسمعت الكلام كالت اي اي هسه عيني ابو سعد هسه اجيبله الك خيرك سامي يمه شو واكف اكعد ابويه اكعد اتعشى ويه خالك --- لا خاله اني مجاي اتعشى اني جاي اكول لخالي اني مراضي على زواجها من هذا المعوق واني رايد رحاب اليه هي بت خالي واني اولى بيها من الغريب --- صدك انت تحجي يعني من كل عقلك رحابيش انطيك بله!! وجاي تفكر تتزوج واخوك اول بارحة مستشهد لك والله ماتستحي!!! رده كاطع وصاح على عهود تجيبله العشى بس البنات ماطلعن من غرفتهن عاد ام كاطع اشرت لبدرية تكوم تودي صينية العشى لابنها كرع راسهم بعد اتبلعم سامي وماعرف شيحجي واندار على خاله كله خالو هاي كلمة مني الك هاي الزواجة ماتصير لو على كص ركبتي كتلك ها فكاطع اندار على فخرية وهو يشوف سامي ديروح وكللها هذا شبيه بله شحجي وياه واني نايم بفراشي شو هذا هسه يله اتذكر عنده بت خال !!! سكتت فخرية خافت تحجي تصير عركة دخلت بدرية وهي شايله الصينية وحطتها على الطبله كباله وهو اتشكر منها بهمهمه مو واضحة وللحظات فكرت رحاب تطلع تواجه سامي بنفسها بس عهود ردتها وكالتلها لاتكبرين راسه خلي يولي اذا طلعتي ابويه يحجي عليج --يعني من صدك اله عين يجي ويكول اريد رحاب!! بلهشنو نسيناهو شسوة والله لحد الان مناسية الم الضرب اللي ضربنياه اوووف لو طالعة مرزلته -خلي يولي يمعوده لاتخليني اطلعله واسمعه حجايتين بالعظم يسمووه مثل ماسممنه وبلحظتها دخلت عليهم خالتهم وهي مستغربه -هذا شبيه ابن نوريه من خفت اي والله وخفت يوم صاير علينه عنتر يوم روميو مافتهمناه شيريد ديراهق هذه!!! جاوبتها رحاب ---لا والله شكله يشوف هواية افلام عربيه مصدك نفسه حسين فهمي هههههه ___هو هذا مو بالكليه مايشوف البنات هناك شمجلب بينا !! صدك هو يا كلية راح رحوبه ---علوم بغداد يمكن فيزيا خالة مااتذكر ---كطيعة اكلج رحوبه اليوم ام فاضل ماقبلت اتاجلون العرس لما تطلع السنة مالت فرات الله يرحمه تكول علما تخلص السنة رحاب مخلفه وابنها بحضني ههههه ---هههه لا خالة شلون مو عيب من عمه نوريه ---- مااحجيلج النسوان شلون اتخبلن على رجلج وجماله شلون اخلاق شلون ادب وشلون مرتب ومثقف ف ضحكت رحاب ومجاوبت محاولات من الجميع انه يجملون الولد بعينه ولو هو مو بهذا السوءبالعكس حست اخر لقاء جان اكو تقارب بيناتهم كلش هواية لكن ممرارة الحب الاول طغت على حلاوة بقية الامور اللي تصير تحولت كل الالوان الى لون رمادي وكل اللحظات الى ذكريات وحلم وردي توفى في طفولته مجانت لحد هاللحظة تكدر انه انذبحت روحها وية كصة شعرها وية فقدان وساام باتت بدرية ليلتها يمهم وظلت تحجبلهم عن حلمها ويه اياد وشلون اتذكرت هالايام الحلوه بيناتهم ومن جانوا يطلعون سفرات ويروحون لغير مدن وتوصفلهم الاحداث بالتفصيل والبنات صافنين عليها وكل وحده سارحه بعالمها الخاص على الرغم انه معظم القصص كانو لاكثر من مرة سامعيها لكن في كل مرة تنعاد الها نفس السحر الغريب اللي يشدهم ويخليهم يعيشون الاحداث وكانه همه جزء منها ثاني يوم الصبح امل خابرت بدرية كالتها اكو ناس جايين عليها يردوها تجي وعلاء هم موجود يريدها قبل لايلتحق علاقة امل بعلاء ايضا كانت في اوج توترها عكس مكان مرجو من علاء ان يمتن لامل بكم الحنان والعطف اللي عاملت بيها اولاده كانه امهم تماما كان علاء يشعر بالحزن انه ظلم انسانة بريئة وحرمها من اولادها لحد الان يتذكر اللحظات الاخيرة وصراخها بالتوسل حس انه حطم انسانسة ماعدها اي اذية على اي شخص بهذا العالم وكيف انه اتزوجت شخص اخر وهو كل امله بعد ان تنتهي الحرب يروح الها ويرجعها الشك بامل انه سبب ماساة هذه العائلة حول كل الحب العميق والكبير بيناتهم الى جفاء وفجوة كبيرة الى جدار ماكدرت امل بكل طيبتها ووفائها انه تهده بالعكس صارت هي ايضا تشك بوجود امرة اخرى بحياته .... ورجعت بدرية لبيتهم وايدها على كلبها مع انه شكد حاولت تعرف من امل منو هذوله الناس ماقبلت تكول الها جانت تخاف تحجي بالتلفون لانه سامعين التلفونات مراقبة وكل حجاية تنعرف وهمه بلا كلشي عليهم العين واول ماوصلت وشافت الضيف العزيز نزلت دموعها ماصدكت متدري تفرح لشوفتهم لو تبجي جانو جيرانهم في بلغراد نفس العمارة وكلش صديقه لاياد على الرغم من انه كان ضد افكار اياد مع ذلك كانت اخلاقهم وطنيتهم طغت على اي تفكير اخر رحبت بيه بدرية وهي مستغربه انه شلون اجى وزارها خصوصا هو كان مزظف بمركز مرموق بالدوله يعني خوفا عليه كون زوجها معدوم وخافت تجيعليه حجاية فطمنها انه لاتقلق كلهم يعرفوه ويعرفون انتمائاته وولائه الشديد للحزب كانت بجعبته مجموعة من الاخبار من اوروبا منها انه عرف فيما بعد زوج جوري سنان كان يدفعلهم الايجار طول فترة اقامتهم بالعراق الا ان سمع واتاكد بحادثة الاعدام اجى وصفى البيت وبمساعدته ... فرغوا البيت وباعو اللي كدروا يبيعوه والبقية اتبرعوا بيه الا الحاجيات الشخصية بقت عنده وفي كل مرة كان ينزل لبغداد يجيب منها مجموعة الحقيقة هو كان اكثر من مرة يروح يزور علاء في بيته القديم بيت اهل امل وكان يلكى فقط المستاجرين كاعدين بيه ومايعرفون عنوانهم طلع مبلغ خمسة وتلاثين دينار من جيبه وسلمه الها كلها هده فلوسكم من الغراض ومن الديون اللي جان اياد منطيها للناس كلهم من عرفوا انعدم جوي وسلموها اليه وحاليلهم وواهبيهم ترة محد قصر وجماعة اله هناك سووله ماتم صغير حضره بعض الاصدقاء.... اما اخر خبر واللي كان فاجعة مؤلمة بلغهم باصابه جوري بعد ولادتها طفلتها الثالثة بورم خبيث وهي في ايامها الاخيرة انصدمت بدرية واللي حولها بهذا الخبر وظل مدهوشين ومنو حيربي الجهال .... متستاهل لاجورية ولا اهلها ولاحتى زوجها بهذا المصاب!!! بلغ سلام عائلته الهم وبلغهم انه بين فرصة وفرصة حيدز الغراض او الحاجيات الشخصية الهم .... ساعتها بدرية مجانت تعرف شتكول ... الموقف كد ماهيج مواجعها كد مافرحها كلش هوايه وظلت تحضن امل وتبجي تكللها شفتي امل اياد حتى وهو وميت عينه علينا...ويحس بينا البارحة شفتي شلون اجاني بالحلم وانطاني هدية ...امل حيدزولي غراضه حشم ريحته مرة لخ الف رحمه ونورعلى روحك الطيبة ### طبعا لخاطر عمتهم نورية هالعيد ماعيدوا لا بنات فخرية ولا حتى بدرية هم على الواهس جان كاطع توه بدة يرجع يمشي ويروح للمحل مثل قبل وكامت نورية تروح وتجيهم بس البنات مو كلش يكعدون وياها وهي هم شويه همدت من ورة حادثة فرات اول يوم العيد اجى فاضل ورة الغدا والعوائل كلها متجمعة بس ماكو ذاك الصخب مثل قبل جان التلفزيون مطفي وبقت الامور على السوالف كاطع انطى العيديات وطلع بس هالوكعة خلت مشيته موزينه كلش وعرجته صارت اكثر وصار دومه يتشكى من التعب وتجيه حالات مايشتهي ياكل مو مثل الاول صح ينزل وزنه لكن بطنه تكبر ومن اقل طخة يزرك مكانها وتنفخ رجليه بين فترة وفترة لحت عليه فخريه وامه يروح للدكتور لكن رفض بيومها سلم على فاضل وطلع فاضل هم انحرج قرر ويه نفسه يبقى ويه خطيبته شويه ويطلع بوكتها جان ايهاب السايق كاعد بالحديقة وسعد اخذله كليجه وشربت وهالمرة كلش فرحان من عرف بيت نوريه جايين وعرض على كاطع هو يرجعهم كاطع هم دز خبر لنوريه تنتظرهم حتى ايهاب يرجعها فاضل بدوره ماكدر كلش ياخذ راحته بهالجية ابتسمتله وهي تقدمله العصير ... سوتله عصير مشمش جانو مجمديه ومايطلعوه بس للخطار هو هم كلش حبه ... طلع من جيبه علبة صغيرة وقدمه الها هدية العيد الهدية جانت سلسة قران ذهب منقوشه بمينا زركة وابيض ماروني لبسه الها وهي ترجف اكثر منه جانت باب الصالة مفتوحة وفخرية تمد راسها من بعيد تشوفه | ||||
|
| |
|
01-09-21, 08:35 AM
| #37 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #نساءمخمليات الفصل الثالث 35 عودة الياسمين صباح يوم العيد سنة ستة وثمانين زهير هالمرة مراح يعايد بيت اهله مثل كل سنة بعد ما لامه الكل على ا ستشهاد اخوه اللي هو مربيه وحاسبه واحد من ولده ويمكن كان اكثر المتالمين على فقدانه حزنا وصار كل مره يروح لبيت اهله امه تطرده وماتنطيه وجه ف بعد يستحي يروح ويسال عليهم وحتى ماتجرا يدك الباب ويعايدهم كل اللي سواه انه راح من الصبح وذبح عجل صغير بباب البيت والتموا كل الجيران عليه الا اهله محد طلع منهم بس اخته الصغيرة اللي اتعاطفت وياه ووساعدته بالذبح وبتوزيع الثواب على البيوت من رجع ماستقبلته زوجته نورية مثل عادتها تهنيه وتغنيله وتحضرله الريوك العراقي المعروف بالعيد لا ابدا كانت تمسح دموعها على فراك ربيبها اللي هذا اول عيد وهو مو وياهم وواول عيد مايوكف مثل قبل بابتسامته البريئة يطالب بعيديته ولا حيركض يروح يجيب الصمون ولا يكعد بتك عين يباوع تلفزيون وعويونه منعسة جانت ذكرياته وحده وحده تحوم حولهم ومسحت اي اثر من اثار الفرحة بالعيد رجع زهير بيومها مكسور الخاطر وحزين وحتى صلاة العيد مراح الها دخل غرفته وقفل الباب وظل وحده يبجي بصمت وشويه انسمعت هوسة جهال زهوري دخلت عليهم وهي شايلة ابنها الوسطاني محمود رجله مجبسه انسحك بيوم الفاتحة والتهت وياه وهاليوم يله كدرت تجيبه وتجي ومن شافت البيت مكدر وريحة الموت من صدك بيه ماحبت تبقى سامي حتى مطلع من غرفته يسلم عليها ونزار بحجة شغل طالع من الصبح جرت اختها وبتها الي كاعدة وبس تبجي و كوة راحوا لبيت اخوهم كاطع فخرية من الصبح اتعاركت ويه ميلاد وسعد محد بيهم يقبل يروح يجيب حليب من الالبان هي طلعت من الغبشة جابت ذاك الصمون الحار وماعون الكيمر من العربية قبل لايخلص ... هذا صبح العيد والناس لازم تتريك كيمروحتى يوكفون سره عليها ومانست جبن العرب هم حضرته بقى بس الحليب جانوا بعدهم معزلين وطبعا اخر شي دزت ميلاد لانه سعد مدامه كال لا يعني خلص محد يلح عليه وراحت وهي ادردم مراح تلحك على الكارتون ومن شافت خوات كاطع جوي بسرعة ركض هي وبناتها حضرن السفرة والبيت مو من عوايدهم يجون اول يوم العيد ومن الغبشة هي متعلمة عليهم ثاني يوم بس الظاهر علمود فاتحة فرات ونورية تعبانة جوي يمها وفرشن الصينية وطعدن يتريكن بس مدامها زهوري هنا ماينسمع غير صياح جهالها اريد من هذا ومن ذاك اتوزعت العيديات وركضوا الجهال راحوا اشتروا بيها نستله فرندوا وببسي ومصاص من ام صلاح صاحت عليهم فخرية ولكم ام صلاح منو فكللها سعد يمه هذوله جايين جديد وفاتحين دكان بالفرع اللي ورانه وركض سعد للحديقة ولم الجهال يمه ينتظرون ينطيهم الجاكوك والدرنفيز حتى يزرف السيفونة مال بطل الببسي ويشربون منها عمره جان تسع سنين بس كلش وكح وكلش نحس محد يكدر يحجي وياه شافته فخرية كالتله ولك شدتسوي كللها ماما ازرف القبغ حتى لايطلع هوايه واصلا يصير اطيب كلتله ولك يومه لاتشرب من راس السيفونة الجريدية راكضين عليها ولاعبين لعب كاموا يضحكون جهال زهوري وكللوها اي مو هي ساحة قدم عافوها وطلعوا البنات يلعبن على الصبة والولد بالشارع كبال البيت واندكت الباب وطلع فاضل جاي يزورهم ويعايدهم كاطع ماطول وياه يضوج من هوسه البيت والجهال وكل شويه يصيح على واحد بيهم عدى ماكبت عركتين تلاثة بينه وبين امه من بسط ابن زهوري الصغير يركض ويوكع بحضنه وورة ماطلع بقى فاضل وحده بالصالة والتحقت بيه رحاب هو قرر ويه نفسه يسلم على خطيبته وشويه يكعد وياها ويروح بقت رحاب وياه وبالبداية كان الكلام خجول فاول شي سواه انه قدملها هدية العيد مدالية قران وخطية هي كلش فرحت بيها وخجلت انه مافكرت تجيبله هدية اعتذرت منه بس هم ابتسم كللها بس الرجال يجيب هدية بالعيد هيجي احنى طبعا حتى لايحرجها ___تدرين ظليت صافن شيبلج هدية شفت النسوان بالمحل يشترون هاي المدالية ام الموس اشو ماحبيتها شفتها قاسية على ركبتج واني اشوفج ناسكة مو مال موس ههههه ----تسلملي هاي كلش حلوة عجبتني بس اني عبالي تركت المحل مو هيجي كلت اخر مرة --- والله هو المفروض هيجي المحل بيه هواية شركاء والوارد مو ذاك الشي صح الذهب سوكه ماشي بس تعرفين مثل محرم وصفر ماكو بيع وشرا كلش قليل مااعرف اذا بطلت من هالشغلة شفتح مشروع مااعرف والله انت بكيفك --- كلت لو مكتبة لو اسواق بعد خلي اشوف صدك على ذكر محرم وصفر اتفقنا اني وامي نبلغكم الزفة ان شاء الله ورة صفر يعني تقريبا نهاية العاشر شتكولين امي كلش مستعجلة ___بكيفكم كول لابويه اذا قبل بكيفكم بعد --- اي كتله وكال ماعندي مانع ,,, رحاب!! اريد اسالج سؤال يمكن اني لمحتلج عليه قبل بس اريد هسه اسالج ليش قبلتي بيه ...يعني انت ليش قبلتي بيه !! واني معاق!! ويمكن تكولين بكلبج هذا حيصير بركبتي وعالة عليه! ---سكتت رحاب ومردت بسرعة عيونها ظلت تفكر باجابة تكون صادقة وماتجرحة كلشي قسمة فاضل كلشي قسمة ونصيب ولاتنسى اني هم من صغري واترملت وزوجي الله يرحمه اتوفى بالسجن يعني فكرك بهالوكت وزواج ماكو ووو....يعني الشباب ديروحون للجبهة منو اللي يرضى بحالتي مثلا يعني ... ثم انت ...انت خوش ولد وحباب وماكو واحد ماعنده عيوب --- على ذكر زوجج الله يرحمه اسمحيلي اسالج لاول واخر مرة اوعدج صدكيني اخر مرة اسالج بيها عنه بس اريد جواب صادق من كل كلبج وابد لاتضمين عليه ___شنو فاضل شبيك اسال اني ابد مافي يوم كذبت عليك ___ اني عرفت من امج انه انتوا جنتو بس كاطعين مهر يعني ممتزوجين ___ اي صحيح ___هم ...هم جنتي تحبيه !!؟ انقهرتي من مات؟!! __هه والله شكولج انت ماتعرف شلون صارت ابويه منا بطلني من المدرسة منا انخطبت منا لزموا بالحجز وراها انسجن يمكن المرة الوحيدة اللي شفته بيها من رحتله زيارة جان ضعيف ومريض انت تعرف هو اتمرض بالسل واتوفى بيه ___هم جان يدزلج رسايل من السجن يعني مثل مايسوون _فزت رحاب من سمعت كلمة رسايل وفتحت عينها مدهوشة راسا جتي في بالها رسايل وسام ولا اراديا لمعت عينها بدموع ابيه __لا ابدا عمره مدزلي رسالة لانه هو مجان راغب يتزوج يمكن جان يعرف نفسه مو مال زواج بس قبل لانه اهله ضغطوا عليه ...اروح اسويلك جاي ... اتحب جاي بيه شكر مو!! صفن فاضل شنو جاي بيه شكر؟! لعد شلون يشربوه بس ماحجى كامت على السريع واول مادخلت للمطبخ طفرت الدموع من عينها وظلت تصرخ بصمت بداخلها الى متى الى متى رحاااب الى متى صورة وسام حتبقى تجرح بيه ... وهي تسوي الجاي عيونها راحت على مكان الرسايل صار اسبوع من شافتها لازم ورة مايروح فاضل تشوفه زين رحاب واذا شفت رسالة وشنو يعني شحيصير وشحيتغير... جتي يمها فخرية وسالتها شبيج شو تبجين خوما سمعج حجاية !! ---- لاماما لا ماكو شي بالعكس شوفي شجابلي ؟ --- الله شكد حلو هذا القران بالعافية لاتنقهرين امي الولد خوش ولد وهسه تتعودين عليه من رجعت استاذن فاضل من فخرية انه ياخذها ثاني يوم لبيت بيبته بالكاظمية حتى يعايدوها ويسلمون عليها وطبعا عادي ممانعت ... سلم عليهم وسلم على عهود اللي جانت بالكوة لافة شعرها ولابسه دشداشة مال شغل ولا جنه عيد هاي اول مرة ماتحني شعرها ولا راح تحنيه ولا الها واهس لاتلبس ولاترتب نفسها تماما مثل اسمهان هم بس اسمهان هي وتعبانة تبرج برج متبين عليها البهذلة وعلى العصريه جتي بدرية وامل والجهال بس قيم جان كاعدة بصفها طويله وضعيفة هالسنة يله تروح مدرسة جات باجية تريد هي هم ابوها ينطيها عيدية تحب بابا اياد يجي من الجبهة وينطيها فلوةس مثل صديقتها ورود فجانت كاعدة حزينة لازمه لعابتها وكاعدة حتى لعب يه الجعال ماتكدر امها تخاف عليها تتعب وتتخربط جلنو كاعدين يتفرجون تلفزيون والكرزات كدامهم ومن طلعت لقطات لاميرة ديانا كالت فخرية شوفي شكد بيها شبه ونصت صوتها من نرجس الله يذكرها بالخير ولا هاي الممثلة الاجنبية اسمها فرح فوزي --يمه فرح فاوست مو فوزي جاوبتها عهود --فرح فوزي مااعرف منو المهم هي بيها شبه من جوري مو بله بدرية بس بصوت ناصي وكانه يخافون حتى الحيطان تسمع الله يكومها بسلامة ان شاء الله ياربي لخاطر جهالها اكلج صدك بدر هاي كلادتج لو تشبهها شنو رجعتيها --- اي والله خطة ام طارق مبقيتها يمه مموديتها للصايغ ترهنها رحت قبل جم يوم نظفت البيت وبتت ليله وجيت هم الافندي كلما اروح ثاني يوم يجي يمر على البيت بس هزين ماشفته مااعرف شلون يعرف اني جنت هناك؟ --- منو سلمان الضابط فجاوبتها امل عيني هذا عنده عيون وهمه يبلغوه عنج --- هم يجي يوم واخلص منه!! من دترجع نورية جان ايهاب ينتظرهم طبعا من العصرية وكف سيارته كباله البيت وبحجة انه يغسلها لزك بالباب كل شويه يمد راسه بلكت يلمح اسمهان منا مناك تفوت بوكتها جان عمرها سطعش سنة بس مكتملة الملامح الانثويه صح قصيرة لكن مبينه سابقة عمرها بشويه ومن ديصعدون ويوصلهم فخريه ماارتاحت لحركاته وارتباكه راسا انخبص بيهم جان ملمع السيارة ومعطرها من جوة حاير شيسوي ... و هي كعادتهاحست عليه وافتهمت حركاته بس سكتت ماحجت ## وبالفعل اتحدد عرس رحاب وفاضل اول يوم من شهر تشرين الاول وانخبصت فخرية بيها تحضرلها جهازها اللي تاخذلهيا يوميه جانت تروح للاورزدي تجيبلها مناك ارقى الملابس طبعا جانت البضاعة هناك كلها ماركات وبسعر معقول كونها مدعومة من الدولة ويوم ثاني تروح لسوك الكاظم لو اشارع نهر وجارة البنات وراها التهوا شويه بهذا الموضوع ومن بدت المدارس شلون مجان جهزتهم جان عدها بس ميلاد وسعد صغار وشغتهم مكضية ومصارلها اسبوع من الدوام جتي ميلامد مبسوطة متملخة من الكتل ووراها اسعد هدومه كلها متشكشكة كامت تصيح وتعيط عليهم فخرية ولكم منو هيجي سوى بيكم ميلاد مجانت صغيرة يعني عشر سنين واخوها اصغر منها بسنة كاموا يبجون ويشهكون انه بنات كريمة هيجي بسطونه! يمشون ورة ميلاد ويعيبون عليها يغنون ويصفكون ميلاد سعيد وياها غلط عليها وهاي تبجي ماتقبل كومي اتعاركي وياهم هنه تلاث خوات تراسهم بتها الوسطانية جنها ولد لازميها داكيها بسط سعد شايف اخته تتعارك هو هم مجيت عليهم لبست عبايتها فخرية وجرت جهالها وركضت على كريمة هذه هي وبناتها ولما وصلت شافت هذا بيت ابو الدكان بيت ام صلاح يسموهم دكت الباب وطلعت امراءة ضخمة وطويلة بيضة وشعرها اسود مكعكل كصير من السمن كوة تحجي صفنت عليها فخرية فوك هالسمن يمكن حامل من سلمت عليها عرفت انه هي هاي كريمة ام صلاح ولانه عدها كومة بنات متقاربة اعمارهم يسموهم بنات كريمة ظلت صافنة فخرية عليهم عدها سبع بنات واثنين ولد وحامل انوبه صاحت على البينة اللي باسطة جهالها وجتي ام صلاح اتعذرت منها وهي تضحك انه دكت بتها كتل ومن جتي كالتها هاي جمال اوكح وحده بيهم والله ملختها بسط صفنت فخرية كالت هاي جمال !!البنية سمرة وضخمة وشعرها ولادي مكعكل على امها يمكن بعد عكش اكثر من شعر عهود ووجها كله شطب وسنونها الامامية خربانه ضحكت فخرية كالت هاي بله شلون مسميتها اسم ولد جمال ؟؟ فجاوبتها كريمة وهي تضحك ههههه دادة انحرمت من خلفة الولدتننحرم من اساميهم هم اني تالي وكت جبت خيرت على ست بنات باعت عليها وعلى البنية كالتها هاي مالمفروض تسميها جمال هاي تسميها عنتر ... عاصي ... فرهود ... مو جمال ظبت تضحك المرة وكانت تكللها اي والله طالعة فاول دونن عن خواتها اتعذرت منها وحطت بيد كل جاهل نستلة وباكيت عصير سعد من شافهن عاف امه وركض للبيت عاد من رجعت فخرية هي هم كومي وكي كتي كلتله لك هاي الرعنة المجلوبه اكبر منك بسنة هيجي تبسطك من ثول وعمه لكن من يومها اتقوت علاقة فخرية بكريمة الاثنين كلبهن صافي ويحبن يضحكن ويتشاقن فصارت اذا مو يوميه بين يوم ويم بحجة تشتري حاجة يوكفن بباب الدكان لاساعة ولاثنين يسولفن لو عن الجيران لو عن اهلهن رجل كريمة هم جان عطال بطال النهار كله نايم وبالليل شرب المرة تحب الخلفة ومعتمدة على نفسها بكلشي ودلتها على شكم دلالة تروح تتسوك منهن واذا ماعجبها ترجعها الها لانهن كرابتها ويراعنها بالسعر جان شغل الدلالت ماشي ياخذن الحاجة من الاورزدي بنص الازدحام والسرة شطوله والي يروح لو يحصل لو لا هنه يجن من الصبح واول الناس يوكفن وبعدين يعرضوهن بباب الاسواق بسعر شويه اغلى ويعيشن على الربح مو بس هدوم كلشي غراض مدرسة من جنط وقرطاسية غراض مال بيت جدورة ومواعين حتى ملاعيب هماتين ومرات هم الدجاج والبيض واللحوم تتوزع بالجمعيات والحواننيت والسرة شطوله ويكون طبيعي سعره ارخص من السوك لانه مدعوم من الحكومة وجانت هذه شغلة عهود وميلاد يوكفن سرة ومن يجيهن الدور سعد يركض على امه تروح بس تجيبها وتجي وبمرة جان ايهاب واكف ينتظر كاطع يوصلة صاحت عليه فخرية بس ياخذ عهود للجمعية تجيب كم حاجة وتجي الجمعية مجانت بعيدة بس الغراض هواية بالطريق ظل ايهاب يحوص يريد يحجي ويه عهود هي هم حست انه يباوع عليها بالمراية ضحكت ويه نفسها جانت عهود توها ثمنطعش سنة وصح كان كل اهتمامها بدراستها وتتصرف كانه ولد بقوة شخصيتها وحديتها بس اكيد كانت تحن للمراءة اللي بداخلها كانت تتمنى انه ترفع سماعة التلفون وتسمع صوت يهمسلها الله صوتج شكد حلو او تعرف انه هذا الشخص معجب بيها اكيد هي هم بنية و عدها شي حلو فتصورت ويه نفسها انه هذا ايهاب يمكن معجب بيها عادي هي بنية حالها من حال صديقاتها من يحجن يوميه و احد معجب بيهن ويخابر على البيت ومعاكسات ومن هالسوالف يجوز هي هم عدها معجبين وماتدري بيهم اندارت على الشباك بحساب استحت يعني كللها --- ست عهود ممكن احجي وياج كلمة والله خجلان ومااعرف شلون ابدي بس اريد تساعديني ترة والله بصعوبه قررت احجي وياج سكتت عهود واحمرت خدودها وقررت راسا تكله طبعا لا مااقبل تتقدملي انت مو بمستوانه بس خلي اشوف ابويه يجوز مايقبل بسايق تكسي انت شفت اختي رحاب شخذت !!! صايغ ذهب ---ست عهود انت وياي!! - اي اي ايهاب كول شعندك --- ست الله يخليج ولو بيها احراج وزحمة --- لا عادي خير ان شاء الله شنو الموضوع وكف بالسيارة وصلوا للجمعية باوع على المرايه كللها ست شوفي اني هالسنة اخر سنة اليه والله شاهد اني جت اسقط نفسي حتى ماالبس عسكرية بس بعد خلص لازم اتخرج وان شاء الله اكمل نفسي بالزايد هالسنة الجاية --- غاصت عهود بمكانها وانحرجت حيل وصعدت حرارتها وخدودها احمرت اول مرة بحياتها واحد هيجي يحجي وياها مجاوبت فهو كمل --- اي ست فياريت ويعني اتمنى ست بلكت تحجين ويه امج لو عمتج ---راسا قاطعته عمتي ليش؟ --- اي والله ياريت تعرفين اني استحي من خالتي فخرية شو احسها مو كلش تواددني فما اتجراءت اكللها كلت اكيد انت ماترديني واني اعرفج سبعة وكلبج وطيب وبكدها شنو سبعة شنو بكدها هذا شيريد فلوس لو شنو ؟ ظلت صافنة عليه عهود وعاقجة حواجبها --- ست ياريت لو تحجين وياهن وتكوليلهن رايد --!!! -- والله اريد اتقدم لاسمهان اخطبها بس مااعرف شلون البنية حيل عجبتني ومستحيل الكى عائلة مثلكم انتجت عهود شويه على الكرسي وصفنت على الشباك حتى مااهتمت شكال بعدين فتحت باب السيارة ونزلت كلتله عود من ارجع نكمل مايصح هيجي واكفين كدام العالم ونسولف من دبت للجمعية على السريع طلعت الورقة من الجزدان واشترت المواد وهي ماتدري تبجي تضحك على حظها حتى ايهاب السايق طلع مو معجب بيج معجب باسمهان هههه لا والله وعود انت مراضية تريدينه صايغ والله ياعهود شكل حظد نايمة عليه طابوكة من صعدت جان ايهاب كلش خجلان وظل يتعذر منها اخاف غلط من حجى وياها وسالها --- شو حسيتج ضجتي ست -- طبعا اضوج اني مالي دخل بهالسوالف انت رجال روح بنفسك اخطبها اني شنو واصلا عمتي ماترضى بيك ختمتها بهالحجاية بصوت ناصي كانه حتى يكون تاثيرها اعمق عليه هو من سمع ماترضى كلش انعقج وانقهر وظل ساكت طول طريق الرجعة وظل يتعذر منها بس هي جانت كلش ضايجة كلمة مكالتله واول ماطبت للبيت كالت لامها اللي اتخبلت شلون يحجي وياج وانت صغيرة بهاي المواضيع مو عيب وحلفت الا ترزله وهاي اسمهان اللي جنها جمبده تاخذ واحد مثله وعود وين تنطي نوريه لاعيني لا من امها كالت اسمهان جنها جمبد وماتقبل على ايهاب غمت روحها وضحكت عود جان واكع بيدي ومارضيت بيه ههههه وراها بكم يوم صارت حنة رحاب اللي ظلت مو بين يوم ويوم لا يومية تجيك مكان الرسايل بكت شي من وسام كشاية امل تتعلق بيها ويمكن تنقذها او يمكن هو نوع من الحنين بس مجان اكو شي اصلا وسام كان متصوب وبالمستشفى قبل يومين انكلبت السيارة العسكرية بيهم على الرغم من انه كان بعيد عن مواقع القتال بس اجاهم قصف عشواءي تسبب بجرح عميق اله وبوفاة واحد من جماعته والسايق وحتى اهله مايدرون بيه !!! وجماعته من فتشوه بلكت يعرفون معلومة يتصلون بيها على اهله مالكوا بس رسالة طويله الى رحاب !!!! @@@ ومن البارحة جتي زهوري وفاجاتهم بطلتها جانت مسويه شعرها بيرمن على المودة وكاصته مدرج قصير صارن كل النسوان والبنات يسوون شعرهن كفشة البيرمن واخذت البنات وياها وعافت ولدها يم نورية اللي ماقبلت تجي ووشويه هم جني بدرية وامل وكلهم على فد شده راحن ويه رحاب للصالون هنه هم يرتبن نفسهن ولحكتيم ام فاضل جانت تريد تشوف المكياج وشلون يوالم البدلات السبعة اللي جابتهم طلعت بدليتن وحده حمرة على ماروني والثانية اخضر فستقي اتخبلوا عليها حتى بنات الصالون والكاعدات وظلت هي تتباهى بيها على انه كلها توصاة من برة وقرووا يلبسوها الها اول شي وتلبسها بالصالون لانه مدنفشه ويرادلها ترتيب هواية ووياها طرحة شفافة نفس اللون ماطرة بشغل وخرز ناعم وخيوط ذهبية اصرت ام فاضل تحطلها ام الصالون لرحاب مكياج جوزي على مشمشي جان شي جديد بالنسبة الهم وقليل يحطون هاي الالوان لانه الدارج احمر ووردي لو بنفسجي صارخ وبالفعل نجح الاختيار الترتيب فعلا خلى رحاب بلونها البرونزي الحلو وبشرتها الصافية ورشاقتها وطولها تكون مميزة رجعوا الكل والفرحة بعيونهم حتى رحاب نفسها معرفت روحها ومن تدخل للبيت لمحت طير الحنا يكمز فوك الرصيف اللي كبالهم وفوك الاشجار مال بيتهم صفنت عليه وبدريه شايلة بدلتها حتى لا تتوسخ بينما ظلت رحاب صافنة وبهت لونها اشرت لخالتها انه شوفي جان الطير يكمز بسرعة ويطير منا ومناك ابتسمت بدرية وداست على ايدها وبعيونها خمزتلها ان تكمل مشي بس رحاب ظلت تمشي وعيونها عليه وكلبها يدك حست وسام بيه شي عيونها دمعت بس لزمت نفسها ومابجت راحت لغير عالم وانقطع عنها صوت الهلاهل والجكليت | ||||
|
| |
|
01-09-21, 08:38 AM
| #38 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #نساءمخمليات الفصل الثالث 36 زفة زعفران لون السماء كان صافي بزرقة خاليه من الغيوم ونسمات باردة تمر وتسحب معاها كل الذكريات شالت رحاب من احلى حلم ونزلت بخطواتها للكاع ... دخلت للصالة مال بيتهم ورة مارجعت من الصالون وكعدت راسا على الكرسي اللي محضريه الها بمقدمتها وبظهرها الشباك واول مكعدت انهالت عليها الهلاهل والصديقات والاقارب والخطار بالتقبيل والمباركة ولمحت صديقاتها اثنين الها من المدرسة عزمتهم قبل فترة وفعلا اجوي ولبوا العزيمة صديقاتها جانو وياها بنفس الصف واثنيناتهن خلصوا جامعتهن وحتى اتزجوا قبلها !! بالها كان ممرتاح الخوف من حدوث امر سيء او خبر من شخص كان عزيز عليها خلاها تقلق وترتبك الى ان صاحت فخرية بعلوا صوتها وهي ترش مي الورد صلوا على محمد وارتفعت الاصوات معقبة وراها اللهم صل على محمد وال محمد وانمدت الكلمات بالطول والعرض واندعسوا الجهال بين الرجلين يمكن اكثر وحدة جانت فرحانه بيهم .. ميلاد واكفه يم اختها العروسه ولازمة بدلتها وصديقاتها يباعولها وعيونهم تلمع من الغبطة ميلاد صديقتهم تكدر تطخ العروس لا وواكفه بصفها همين وتاخذ صور وهمه كلما وحدة شويه تقترب تندفر ويدفعوها وخري منا لاتسوين هوسه وازدحام بينما المساكين جان كل همهم نظرة من العروس وكومة الجكليت جوه رجليها اللي جانت بمثابة كنز عظيم ملقى على الارض!! ووكعدت زهوري حنت ايدين بت اخوها وطشت عليها الجكليت ودموع امها واختها غسلت ايديها قبل الحنة اهل الولد فرحانه وتركص واهل البنية دموعها تنزل وفكرهم متعلق باجابه صعبة لسؤال صعب شلون حيفاركون رحاب !! حبيبة كلبهم وصاحت خالة فاضل يله اتحضرن ولمن نفسجن اجى الكوستر ## فخرية وكاطع اتعاركوا قبل يوم من الحنة علمود حفلة الحنة نفسها كاطع مجان يقبل فخرية تسوي حفلة لرحاب من جهة هو اصلا مايحب الهوسة والخبصة والصوت العالي ومن جهة لخاطر اخته نورية لكن فخرية عندت وياها واصرت انه تسوي ولو حنة صغيرة لبتها وحجاية منها وحجاية من عمتها وزهوري قبل وهو مامقتنع فخرية مجانت تحل تسمع من الجيران انه زوجوها بسكتة لانه ارملة ومن هالحجي في حين ام فاضل ماهتمت لترتيباتهم جانت تريد تسوي حنة جبيرة كدام اهلها وكرايبها هذا اول عرس الهم وابنها الجبير فقررت تسوي حنة ابنها بالحديقة مال بيتهم وحنة النسوان جوة بالصالة الجبيرة وصدك ماكو شي ربع ساعة وكفت سيارة سوبر بيضة بباب البيت حتى تاخذهم ام فاضل كعدت رحاب وبدرية وجهالها ليورة وكعدت هي وبت اختها الصغيرة بالصدر عهود وميلاد راحوا ويه خالهم علاء وامل وجهاله يوصلهم لهناك اصلا فخرية دزت على علاء خوفا من سامي يسويلهم مصيبة لو فضيحة اما الكوستر التمن بيه النسوان والبنات من المنطقة اللي عاجبها تروح للحنة ووراهم سارتين برازيلي وبدت الاغاني والصفكات الشعبيه زهوري وامها وفخرية مراحن لخاطر نوريه وهم منها يكتلن فتنة ويرضن كاطع من وصلت رحاب لبيت ام فاضل بالكاظمية وهاي المرة الثالثة تجي بيه جانت الحديقة من برة مرتبيها كعدة كلش حلوة حاطين كراسي بلاستيك بيضه على شكل دائرتين ونشرات واضويه مغطيه سكف الحديقة بالكامل وجابت فرقة وارك يعزفون وبس يصيح الو الو اول من استقبلهم جان ابو فاضل بالباب هو واخوه مزين وحالق ولابس قاط حبري يلمع والمحابس الذهب والكولونيا اللي تعط اللي يشوفه يكول هو العريس ابو فاضل مثل زوجته بالضبط صاحب مزاج وونسه طويل ورشيق واحمراني مبين هوايه اصغر من عمره مايبخل على نفسه باي شي لا من صرف لا من سفرات لا من روح مرحه بوس راس رحاب وكالها ماشا الله جنتي كمر فردت عله ام فاضل زوجته عيني عليك لاردة جنك انت العريس وطكتها بضحكة ابتسمت رحاب ومن خجلها انثولت وماعرفت تمشي راحت باتجاه الحديقة وهي تجر بدلتها جروها النسوان بعيطة وضحكة يمعودة مو منا هاي كعدة الزلم للصالة للصالة لمحت فاضل من بعيد وهو محمر وخجلان مثلها وعركه يكت لابس قاط رصاصي على فضي فاتح ورباط رصاصي ونيلي وبصفه اثنين شباب يحجون وهو يهز راس ومدنك على الكاع حست رحاب بلحظتها اكو شي ممرتاحله فاضل وضايج منه عرفت منه بعجين انه مراضي يوزعون شرب بينما همه جانوا محضريه وبايعاز من ابوه رفع راسه وشافها وصارت عينه بعينها ابتسم وهي ردته بابتسامة خجولة كعدوها على الكوشة وجانت الصالة كلش ازدحام وجتي فرقة نسوان هنه والدفوف والدنابك مالتهن بدن راسا اول مشافن رحاب وبدن يركصن والجهال وياهن والبدلات اللماعية اللي تفتر داير مدايرها ام فاضل وبدرية حنوا رحاب وبدرية متردده خافت لايطلع حظ البنية عليها بس ايتحت تكول عينها على البنية اللي جانت تباوع على الناس وتصفن على حركاتهم والهوسة وبعدين جتي مرة بصراويه حنتلها ايديها اليمنى من الطول للطول بنقش مغربي يخبل ووزعوا العشى وبرة هم حنوا فاضل اولاد خواله وعمامه وظلوا يركصون ويدبجون جوبي ويغنون الاغاني الشعبية المعروفة واتصدرته هي وهاي وهي وليش ياامونه وانه المسيجينه وغيرها وجانت بداية كل اغنية تزيد الصيحات وكل شويه يكول هاي الاغنية فلان طلبها وصالة النسوان صياح وهوسه وكل شويه مبدلين لرحاب بدلة ثانية الحمرة والسمائية ويحطولها مكياج ويمسحون مكياج وجابت مصور خاص يصور الحفلة ومن طلعتلها ام فتضل بدلتها الوردية مقبلت رحاب تلبسها جانت كصيرة وحتى الصفرة هم هي وخالتها يلحون عليها تلبسها بس ماقبلت كالت لخالتها تستحي لانه رجليها ضعيفة ماتريد يقلدون عليها وعلى رجليها وهي تتذكر عمتها من جانت تصيحلها رجلين اللكلك وشكد حاولت بدرية وعهود يشجعوها ماكو ماقبلت ماقبلت عهود هم جانت كلش حلوة طالعة لبست بدلة رصاصي على فضي وحطت مكياج كلش خفيف بال12 بالليل خلصت الحفلة من ديرجعون صعد فاضل وياهم بالسيارة حتى يوصلون العروسة واهلها للبيت وبالطريق مرت وجبه شهداء من معركة الفاو اللي تم احتلالها من الايرانين قبل سبع شهور وكان القتال بيها عنيف ومستمر ماتوقف ابدا حتى انه وجبات من الشهداء تسمت باسمه شهداء الفاو اللي كانت طاحونه انطحن بيها اعز ولد عدنا ومن خيرة شبابنا دمعت عيون فاضل عليهم وحس بكسرة نفس طفى المسجل اللي جان مشغل اغاني وكانه طفى فرحة صغيرة راد يسرقها من الزمن من رجعت رحاب للبيت كانت كلش منهكة بس انتبهت امها محضرة الجنط اللي حتاخذها وياها اثنين صغار للفندق واربعة كبار شمرت روحها على الفراش ودوخة الحفلة بعدها براسها ظلت صافنة على السكف معقولة رحاب صارت صدك حتزوجين فاضل هاهي وحتطلعين من بيت ابوج خلص بعد ماتشوفين امج الصبح تكعدج على الريوك ولا عهود يوميه تروح للدوام وصوتها يضوجج ولاسعد يمشي ويضرب بيج لو ظفاير ميلاد الي بس انت تقبل تمشطيها !!! اندارت وشافت خالتها ممدة رجليها وقيم نايمة بحضنها ابتسمت الها من طلعت جكارتها وصاحت على عهود تسويلهم جاي حار يكعد راسهم جان وجه رحاب لساها ملغمط باثار المكياج حتى بعد ان غسلته جتي زهوري ومسويه صينية لفات عروك وجاي وكعدن ياكلن بينما فخرية مخبوصة تطلع حاجة وتحط غيرها بجنط رحاب وتصيح على عهود ووكعت عين بدرية على كارتونه ملفلفة بالتيب زين كلتلها ---فخرية هاي شنوهاي الكارتونه يم الجنط --- مسحت عيونها وخشمها من اثار الدموع وجاوبتها دادة هاي كارتونة المواعين وغراض مال مطبخ ادزهم وياها من يمها صاحت ام كاطع --- ولج يامكموعة هذني كلهن لرحاب؟!! جانت عفتيهن للولد من يتزوج ياخذهن وياه شكو مطيتهن للبنيه المفروض امه تشتريهن --- عمه الله يطول بعمرج علما سعد يتزوج الم كدهن مرتين تلاثة رجعت سالتها بدرية ليش منين لمتيهم -- والله بدر كله من ابو العتيك يبدل مواعين لو تدرين شكد عندي بكد هذني مرتين عدى هذه الزينات اللي بالمعرض محد كايسهن كلت ادزهم حتى لايكولون كلشي مجابت وياها --- وعيني من شوكت البنية تاخذ وياها شي شنو هاي موده جديدة!!! قبل المرة تروح بطرك هدومها وهمه الممنونين --- لا مو قصة مودة بس همه ماقصروا حتى قماشات وزعت ام فاضل للناس كل وحدة جانت كاعدة حطت بحضنها قطعة واندارت على بتها هاي الجنطة يمه رحاب شوفيها هاي البنفسجية هدومج للطلعة كله العلامة بيهن والله بدر كله من الاورزدي وشارع نهر لساني مطلوبه عليهن شوفيهن اربع كوستمات وتلاث بلوزات وتلاث تنانير وخمس قمصان والجنطة الثانية دشاديش مال البيت والثالثة غراضج يمه شغلاتج انت ردتيها والرابعة اشتريت فرش مال جرابي ومال طبلات ومن هالسوالف فاندارت رحاب على بوفيتها --- عهود فدوة لعينج حطيلي اللعابة مالتي بجنطة الفرش امي ناسيتها --- شتسوين بيها يمه عيب ماخذتها --- لايمه لا الا هاي اهم شي لازم اخذها هدية خالتي العزيزة -- فدوة لطولج بعد خالتج وثاني يوم من الدعش الصبح حضرت نفسها رحاب تروح للصالون صاحها ابوها وهو طول هاي الفترة من ورة العركة مالت وسام مايحجي وياها دخلت عليه خجلانه كلها تعالي بويه باعت عليه وكعدت على الكاع بصف جربايته هو جان مدنك ومستند بايده على الفراش باوعت عليه من جوه ليجوه شكد شكله تعبان ومعجز ولا هو نفسه ابوها الاحمراني القوي المتنك ملامح وجهها كلها نازله ومصفر كللها --- رحاب بويه اليوم تطلعين من بيت ابوج لبيت رجلج والله يتمللج بخير اني اعرفج متربايه وحترفعين راسي لاتسوين مشاكل و... خنكته العبرة فتح ايده الها باشاره تعالي بحضني هي راسا جيتت عليه ونامت بحضنه وكامت تبجي هو هم نزلت دموعه بس مبين كلها سبحان الله انت بالذات معزتج غير شكل شكد ماسعد عزيز وجنت اتمناه من الله بكل ليلة وساعة انت من جيتي للدنيا مااعرف هيجي اتغيرت الدنيا بعيوني بويه لاتشيلين بكلبج عليه اني من خوفي عليكم هيجي اسوي هي متجاوب ولاتحجي بس تبلع بريكها ودموعها وتهز براسها بالايجاب بوسها وظل يمتمت بكلمات وسكت مكامت تطلع الحروف شمت ريحته لاول مرة يمكن من شي خمسطعش سنة اخر مرة حظنها وشمته كللها عفتلج فلوس ويه امج وابد لاتنسين هذا بيت اهلج مفتوح اول واخر شي اوصيج سمعي كلام رجلج ابد لاتعصيه شيكولج لاتعانديه بوسته وطلعت وفخرية وزهوري يراقبن من بعيد هزهن الموقف وظلن يبجن راحت رحاب للصالون من الصبح ماطلعت الا بالاربعة ويه دخلتها للبيت جتي الزفة جانوا مزينين سيارة ابو فاضل مرسيدس لونها حبري طوخ وناشرين عليها شرايط ملونه وباقة ورد حمرة بالنص على البنيد لازكيها بدلة رحاب جانت ردنها طويله فاضل وامه اختاروها وعجبتها لرحاب جانت ضيكة من فوك وشغل خفيف اكثره ورد مفتوح ومن جوة مدنفشة حيل البركع مالتها جان شفاف ونازله منه خيوط نهايتها ورد مفتوح حيل داير مدايرها صايرة كانه دناديش وبالكوة لكت حذاء ابيض اشترته وهم شويه ضيك عليها صارت زفة صغيرة على كد ابو المزييقة مدك دكتين تلاثى ركص النسوان وبجى فخرية وعمتها بدرية جانت ملتهية تحضرلها السيارة والجنطة اللي تاخذها وياها للفندق ومن جوي عليها فخرية غركت بدموعها وكفت بباب الهول وهي تراقب الناس تركص كدام بتها هذه رحاب فخرية هذه رحوبه الصغيرة اول فرحتج ومن تمر صور الذكريات كدامها كامت تشهك اكثر اااخ يمه هاي رحوبتي !! البارحة جانت لازمه لعابتها القماش بيدها لابسة ثوبها الابيض المخرم والكصير ضعيفة بس وججها عريض ووعيونها كبار بشعرها الكاريه الاسود الثخين واكفة بباب الحوش تباوع على الجهال يلعبون وكل شويه تندار تشوف امها موجوده دتعاين عليها !! دتراقبها !! تتاكد من صمام الامان مغافل عنها رحوبه اللي من جانت تروح تسال عنها باجتماع الامهات يكلولها ليش جايه تسالين عليها ماكو داعي احسن طالبه بالصف رحاب اللي حتى من تنبسط تبجي بخنكة رحوبه هاي فخرية اللي من عمرها عشر سنين عفتي البيت عليها وربتلج الجهال اللي عمرها مكالتلج لا رحوبه اللي مكدرت ادافعين عنها من بطلها ابوها من المدرسة وهي اشطر وحده هي نفسها اللي مرحمتي بحالها من رادت تطير وتطلع من سجنكم من رادت تصير حالها حال البنات تحب وتتزوج ظلميتها فخرية ظلميتها وهياتها حتعوفج وتروح ماتحملت من كثر البجي اخذتها زهوري وكلتلها البنية عينها عليج وتبجي على بجيج مكياجها كل راح ماكدرت تحجي شي ولاكدرت تفتح حلكها اللي حتى هو انترس من دموعها --- ليش قبلت زهوري ليش شوفيها جنها ورده ليش هيجي ذبحتها --- كولي يالله فخرية كلشي قسمة والحمد لله العائلة احسن عائلة وان شا ءالله الولد يطلع خوش ولد يله كومي غسلي وجههج وودعيها حيروحون رحاب حاولت تمسح دموعها بمساعدة خالة فاضل وتعدللها المكياج وشالتلها البدله ومشن ويم الكراج صعدت الدبجة حيل ويه ابو المزيقة اللي شعل الدنيا كلوله اقوى اقوى هاي الاخيرة فاقتربت منها عهود وعيونها هي اللخ مورمة من البجي لزمت ايد اختها على كيف اندارت عليها رحاب وصاحت عهووود اختي حبيبتي اتحاضنن وكامن يبجن عهود الله عليج ديري بالج على امي وعلى الجهال جاوبتها عهود بشكل جدي وهي عاقجة شفايفها ---شبيج يمه رايحة تستشهدين هنا ابتسمت رحاب لا وضحكت على حجاية اختها وشكلها ووكومي صفكي حييل وتهلهل كدام اختها وجانت صدفة تنضرب ظهر بظهر بشاب كرايب فاضل اندار عليها وهي من خجلها احمرت وانهزمت وهو ظل صافن يباوع عليها علما اختفت ورجع يركص اول مطبت كرصتها فخرية حيل ولج رعنة تركصين كدام العالم وبنص الولد --- اوي يمه هسه وكتها روحي ودعي بتج حتروح يارب يوم اللي يارب واخلص من كاطع ومرته ودعت رحاب امها ووبوست ايدها وراسها وبينما فخرية ظلت تباوع على النسوان خجلت من دكثر البجي وماعرفت شتسوي ظلت لازمة بيد بتها والعالم يجرونها وطلعت الزفة ولحد هسه رحاب تودع بعيونها اهلها وشارع بيتهم كانه مراح تشوفه مرة ثانية فاضل ماقبل ينزل بالزفة انتظرها بالسيارة يمكن استحى من الهوسة والجيران وظلت بدرية تهمس باذنها كلمات قبل ماتصعد وعادي امه كعدت بالصدر والعرسان ليورة ومن علاء ديصعد عائلته وبدرية لسيارته يوصلهم لمح سيارة سامي عافهم وركض عليه ودفع باب السيارة ومخلاه ينزل دفعه وكعد بصفه كلله ---خالو شعندك هنا وهاي شنو ريحة حلكك تكتل هاي شكد شارب جاوبه سامي وهو مسطور ---ليش خالو ليش هيجي سوه بيه خالي كاطع ليش شنو اذيتي عليهم شو جنت ايديهم ورجليهم ---سامي ابويه انت روح منا ولاتوسي مشاكل ميفيد وهو ديحجي جتي عليه بدريه تكله العالم حتروح انطاها سويج السيارة وكللها خلي ذاك فلاح ابو يوسف يوصلكم واشرلها عليه ابو يوسف هذا كان اكبر ولد عم فاضل وبكل المشاية جام اول واحد يجي وطلع يعرف علاء جانو سوى بنفس الكلية بفرق السنين طبعا ساق علاء السيارة واخذ سامي لكورنيش الاعظمية لانه سكران وحتى لاينفضح بغير مكان وبقى يحجي وياه ويفهمه انه مكان مقدر اله ولا من نصيبه رحاب وفهمه انه من اول مرة عرف انه عينه عليها ورايدها رايح هو بنفسه وحاجي ويه رحاب -- خالو والله اني بنفسي حجيت وياها كتلها سامي رايدج شتكولين وجاوبتني حاسبتك مثل اخوها وعمرها ممفكرة بيك غير شكل ---طبعا اذا هذا الك.....د مقشمر عليها شلون تفكر بغيره --- عيب هالحجي سامي شنو هيجي تحجي تره مااقبلها ومدامك هيجي تفكر حتظل طول عمرك تعايرها لو جانت قابله بيك بقى وياه لنص الليل ورجعه وخطية نورية جانت واكفة بالباب تنتظره وايدها على كلبها مصفرة من الخوف والقلق عليه لايروح يسوي شي بنفسه لو شغلة تفضحهم وظلت تبوس بعلاء وتتشكر منها انطلقت سيارة العرس واولها فاضل لزم ايد رحاب وبوسها كان شكله مرهق وتعبان مع ذلك جان يضحك ويبتسم ولاول مرة حست بحرارة ايده وبدى كلبها يدك معرفت من الخوف لو من الخجل لو على دكة الو المزيقة هوهم التهى يسلم على اصدقائه اللي اتفننوا بالركص بالشارع اللي مطلع نص جسمه ويهز واللي يوكف بنص الشارع ياخذ دبجة ويصعد واللي يسوي حركات واللي جايب دنبك وياه وامه كاعده ليكدام تعريفيه للاشخاص شوف فلان ياعيني شلون يركصلك لو هذا ابن فلانه خطية ذب لحم وبوسط هذا سرحت رحاب على الشارع كانت حركة الناس بيه قليلة واكثر المارين كانت اعراس مثلهم بغداد كانت جميلة جدا نظيفة وبراقة متلونه ومضيئة وتسر من ينظر اليها مروا على شرطي مرور وكام يزمر ويصفر ويهز بكرشه وياهم على الواهس وافتروا الشوارع الى ان وصلوا لستوديوا التصوير اخذوا الصور شكم لقطة حرص بيها المصور ان مايظهر اعاقة فاضل ومن طلعوا صارت رشة مطر خفيفة وانطلقوا لبيت فاضل للحفلة اللي محضريها جانت الحفلة اللي احياها احد المطربين المشهورين بذاك الوكت وصار خلاف وكتها بين فاضل وابوه اللي وزع صناديك البيرة بينما كان العريس معارض بشدة حفلة العرس اتركزت للزلم اكثر منها للنسوان اللي اقتصرت على العشى وهوسه الجهال والفضل و كل شويه وحده بيهن تبوسها وتروح وبالنهاية زفوهم لفندق بابل جانوا حاجزيلهم هناك اسبوع كامل وصعدت بدرية وياهم للغرفة وحضرت الجرباية ووصت رحاب على كلشي ومن عافتها جانت خايفة وترجف طمنتها انه الموضوع سهل وهين ولا تقلق ابد من دخلوا للغرفة فاضل ظل يضحك ورحاب خجلانه ماتعرف شتسوي لكن اللي انتبهت اله انه رفض مساعدتها من يكوم من الكرسي للجربايه صح رفضه جان دبلوماسي وبهدوء بس حست انه هو كلش محرج منها مالحت وياه سارت الليله مثل مراد فاضل بكل سلاسة وهدوء @@@@ وعلى ساعة عشرة الصبح اندكت الباب وكام فاضل كوة فتح الباب وجان الروم سيرفر جايب الريوك اخذ فاضل ورجع نام وراها بساعتين جتي امه وبدرية سوى من شافوهم بعدهم نايمين اخذت الجفية و باركتلهم وبدرية هم جانت جايبة صينية صغيرة ريوك يعني شي بالاسم اطمنوا على البنية وراحوا اول يومين جان اكو نوع من الخجل والبرود من الطرفين فاضل جان يشعر بحاجز ويه نفسه مديكدر يتخطاه حتى مديعرف يفتح اي موضوع ويه رحاب ويمكن هي السبب اللي جانت تحس نفسها مو بوعيها متضايقة ونافرة من كلشي جانت ساعة تلاثة العصرية وفاصل كاعد بالبلكونه ورحاب متمدده فاتحة تلفزيون وكلشي ماكو بيه غير اخبار الحرب الملل تعبها وضوجها وماتعرف شلون تتصرف شافت اكو فديو ووياه كاسيتات تلاثة اربعة غريبة منو جابه سالت فاضل كال هو يحب يشوف مسرحيات عادل امام خصوصا من يطلع ونصى صوته خطاب الريس ابو الثلاث ساعات ضحكت على حجايته وحطت ايدها على حلكه وصدك شغلوه ورجعت الضحكة بيناتهم ربما جانوا محتاجين شويه ابتسامة تكسر قيد الخجل بيناتهم وانفتحت المواضيع وحدة وره اللخ وواحد بدى يعرف شي عن الثاني اصلا ماتوقف الحديث بيناتهم جانت هوايه نقاط مشتركة بيناتهم بعضها حقيقي وبعضها افتعلها فاضل حتى يتقرب منها جانت تسمعله بشغف من يحجيلها عن الكتب اللي هو قاريها وعن المواقف اللي صادفها عن طفولته وفي كل مرة كانت القصة تصير مشوقة اكثر وبدات علاقتهم الزوجيه كعلاقة صداقة ومن اجمل مايكون وبعد ماخلصت احلى ايام قضوها العروسين بالفندق وخلالها كان يطلعون طلعات صغيرة لوحدهم اماكن عامة مثل جزيرة بغداد وغيرها علمها على شرب الكهوة التركيه اللي مجانت تعرفها وعلمها على اختيار اسامي الاكلات ويشرحه الها وشويه شويه اتعلمت رحاب عليه و شلون تكون ردة فعلها مع زوجها وشنو المساعدات اللي اتقدمه اله بكل حاله عرفت انه فاضل انسان حساس وبسرعة ينجرح وبطبيعته يحب يداري الاخرين ومايحب احد يحسسه بعوقه اتعلمت انه مياكل الا قليل حتى لايصير وزنه عائق امام حركته ولاثقيل على غيره بالبداية جانت تشوف تصرفاته صعبة وثقيلة لكن بمرور الوقت اعتادت عليها ومصارت تنتبه انه مساعدته واجب لازم تسويه لا ابدا صارت شغلة طوعية هي الي تتقدم بيها تماما كاما الام اللي اداري طفلها مرهمت تصير السبعة رحاب اتمرضت فلاونزا وبيبة فاضل هم دخلت مستشفى اقتصرت على شي بسيط واستقبال العوائل المهنئة والي عدها فضل تنطيه من كعدت رحاب ببيتها جان كامل مكل مناقصة شي بس اللي قهرها الحديقة الجبيرة اللي جانت بيه وجان عاجبها تزرعها بطريقتها انكصت نصها وصارت كراج علمود سيارة فاضل ... جتي فخرية واختها يزوروها وره شي كم يوم من عرفوا بيها فلاونزا بس فخرية هي نفسها مجانت مرتاحه جانت كلش قلقانه من وكعة كاطع قبل يومين ونومته بالفراش فالزيارة جانت سريعة وماطولوا وهم لانه رحاب عدها خطارها من اهل زوجها بقى كاطع يعاني ويون الى ان اخذته فخرية للدكتور ورة اسبوع جانت بدرية توها جايبة جهالها وجايه من المدرسة كعدت دتبدللهم جتي عليها امل مضطربه كلتلها بدرية ...الحكي خيرج امل شكو والله مو خير بدرية ---- ليش شكو؟!!! التكملة في الجزء القادم | ||||
|
| |
|
01-09-21, 08:42 AM
| #39 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #نساءمخمليات الفصل الثالث 37 واكتفيت بالحب كان صباحا عاديا مثل كل صباح شهر كانون الثاني ... عام 87 ساعة اربعة ونص الصبح كعدت امل على صوت علاء وهو يبدل يروح يلتحق شعلت الصوبة وبهدوء حركاتها كامت تسوي ريوك لزوجها لكن ردها بصوت خافت انه ماكو داعي تسوي ريوك حيتريك بالكراج .... بالامس كان شجار عنيف بيناتهم انتهى بصراخ علاء عليها وتدخل بدرية الل كوة سدت الموضوع صار الشجار والعراك بيناتهم يكون بسبب او بدون سبب وربما لاتفه الاسباب بسبب ابتعاده عنها هي كانت تشك بيه يخونها ويعرف امراءة ثانية وخصوصا هي كانت تشتغل وياه لفترة طويله وشافت بعينها مواددة النساء اله بينما هو كان مبتعد عنها بسبب شكه انها لها يد في مصير زوجته وتسفيرها الشك كان الشيطان اللي باعد قلوبهم البريئة وقتل الثقة الحلوة اللي جمعتهم اليوم في هذا الصباح بالذات قررت امل تروح للمستاجر اللي كاعد بيت اهلها وتطلب منه يشيل حتى ترجع تكعد بيه وتطلب الطلاق من علاء علاء حبها الاول والاخير اللي حاربت علموده هوايه واولهم ابوها اللي بقت علموده بالعراق بينما كان بامكانه السفر للخارج يم امها وتعيش حياة اكثر رفاهيه علاء اللي ربته مثل ابن انحرمت هي من ولادته ودارت جهاله يمكن اكثر من اي ام مو بس حبا بيهم او لتعويض الامومة اللي انحرمت منها لا حتى هم لاتتهم بالتقصير وهي اللي اتربت على الكماليات والمثاليات واخيرا يبدوا ان امل سقطت في نفس البئر اللي كانت طول عمرها تحاول تخرج منه بئرالنزاعات والاختلافات الي جانت بين امها المراءة من الطبقة الراقية والمعروفة اللي ربتهم على تعاليم ومفاهيم نفسه كان ابوها نفسه يحاربها بيهم كونه يجي من طبقة ريفية محافظة تاخذ مفهوك العيب اولا اتربت في بيت من التناقض وكان عليها ان تختار ايهما انسب الها وهذا التناقض خلق نوع من ردة فعل عنيفة احيانا وغير متوقعة احيانا اخرى والتجاهل يتخلل الحالتين اكثر مكانت تخشاه هو المرور بتجربة الطلاق مرة ثانية اضافة الى انفصال والديها وهالمرة التجربة حتكون اصعب بهواية لانه هذا علاء الحبيب اللي هي اختارته واللي رمت من اجله كل القيم والمفاهيم الي امنت بيها يوما ما علاءاللي حبها اله مستحيل يتغير لكن بنفس الوقت عشرتها وياه صارت حيل صعبة وخصوصا هو رفض كل ندائاتها ومحاولاتها بترميم ما تصدع لذلك لابد من ردة فعل قويه اما تحطم كلشي او ترجع الامور الى محلها انغمست ساعتها بفراشها ودموعها كانت تنزل بصمت وشويه جتي روان اندحست يمها جوة البطانية وهي تترنح ولحكها اخوها يمشي بمستحى واشرتله و نام بصفها علاء من شاف جهاله راحوا يم امل ومااجوي عليه صفن شويه وفكر يمكن غير امراءة كانت اذاقتهم الويل مثل مانسمع من القصص الكثرانه هالايام بتعذيب مرة الاب لاطفال زوجها وكف شويه بالباب وشافها حاضنتهم حيل راح عليها وبوسها من راسها وجيتو جهاله عليه بوسهم ورجع حضنهامسح بايديه اثار اخر دمعتين يعني برد النار المحترقة بداخلها ودعهم وطلع وظلت هي تدعيله يرجع بسلامات ورة شي ساعتين طلعت هي هم جابت الريوك و الصمون الحار وكوة كعدت بدرية حتى تبدل لجهاله وتاخذهم للمدرسة ومناك تروح لشغلها بدريه جانت حيل تعبانه من شغل تنظيف بيتها البارحة وخلت قطعة صغيرة على الباب للايجار عسى ولعل يجي احد يكعد بيه تستفيد من هالجم فلسين وصلت بدرية جهالها للمدرسة وراحت لشغلها اللي حصلت عليه قبل كم شهر مساعدة لخياطة معروفة كلش وجانت كلش مرتاحة لانه تعاملها اقتصر على النسوان وخصوصا نسوان اصحاب السلطة والنفوذ والمتمكنين وكعادة كل يوم لازم كريم لو قيم من يرجعون من المدرسة ضايجين ويبجون جابتهم بدرية والطريق كله كريم يبجي لانه طلع الاول وماانطوه هدية ووهي هم بعد ماتعرف شتكول خلصت كل المبررات والحيل تقنعه بيها المديرة وام العربي جانوا شادين وياه بس معلمة الانكليزي اللي اصلا ماادرسه هالسنة ست هيام وهم عدها ولد واحد بكد كريم وابوه اسير جانت كلش متعاطفة ويه كريم ومرات جانت شتشري هدايا وبالختلة تنطيه اله وكم طالب ثاني وياه رجعته بدرية وهو يسحل بروحه سحل ماتحملت نعوصته ضربته راشديين تلاثة وبدت تخض بيه بالكراج الى ان طلعته امل من جوه ايدها غسلتله وكامت امه دتبدله دك التلفون لا مرة ولامرتين راحت امل شالته ورجعت تركض على بدرية ولج الحكي بدرية هاي ام طارق على التلفون جرت بدرية البلوزة من راس كريم وهي روحها طافرة --شتريد ام طارق !! ---تكول ... الضابط سلمان كاتليه براس الشارع مال بيتكم -- عزة عزة ولطتام وصخام صحات بدرية وهي تضرب على صدرها كامت على حيلها ولملمت جنطتها لج امل علاء وينه؟؟؟ -- التحق اليوم الصبح بس علاء شعليه!!!! -- يمه يمه منين جتينه هالطلابه انوبه كاتلين ضابط وبالامن يبووووووووو على حظج بدرية دخيلك الله هسه شسوي امل كوليلي --اكلج اشو انت خوفتيني شبيج هيجي تسوين وعلاء شعليه --- هااا لا ماكو شي علاء معليه بس شلون مااخاف امل وهمه كاتليه براس شارعنا يعني اكيد مار على بيتي يعني اول وحده حيجروني للتحقييق يبوووو --- باعي احسن شي نروح لبيت فخرية اي احسن حتى لاحد يشك بينا ---بدرية شبيج انت هيجي تفترين داير مداير نفسج وليش يشكون بيج مو دااكلج اكيد سلمان جان جاي عليه عباله بايته بالبيت و هو الا شعنده بالمنطقة لمي الجهال يله على السريع وخلي نروح لبيت فخرية مانرجع الا بالليل يله على السريع وبالفعل انطلفت بدرية وامل لبيت اختها وماخذين الجهال وياهم اللي ظلوا يبجون الطريق جوعانين بلا غدة واول ماوصلوا شافو سيارة كرونه بيضا عرفت هاي سيارة فاضل فخرية جانت عازمة بتها ونسيبها على باجة لانه رحاب ورغم انه تعرف كلشي تطبخ الا الباجة ماتكدر عليها نفسها ماطيق منظر الراس ولسانها طالع ولاريحة الزفرة بينما امها جانت مشهورة بطبختها والكل يشهدلها وتوهم صبوا الصواني ودكو البصل وريحة العمبة والطرشي عطت سمعوا باب الكراج انفتحت وصوت سمير ابن علاء يصيح احنى جينااا ركضت عهود اخذت الجهال وياها وبوست خالتها بينما بدت بدرية مصفرة ومرتبكة صاحت عليها فخرية تعالي بدورة تعالي شلون باجة طابخة اليوم والله قسمتج تاكلين منها صارلج هوايه ممكالة وجايبة وياه زيتون اخضر محشي من اللي انت تحبيه وجبت عمبة حاارة هم تعالي تعالي امل عوفي الجهال على عهود معليجن بيهم تعالن كعدن فاضل صار منا وبينا منا وبينا مو غريب ابتسمت بدرية وكالت ويه نفسها شكلي اليوم اني اللي حنطبخ باجة كامت رحاب سلمت على خالتها وامل وكعدتهم بصفها ومن فخرية كامت تجيب بقية الغراض لحكتها بدرية عرفت فخرية انه اكو شي سالتها شبيج وجهج اصفر ولج صاير شي ؟ كعدت بدرية حجتلها على السالفة كلها هاي هم كامت تلطم على راسها بسكوت حتى كاطع لايسمع وكل شوية عمتها تصيحهم وينجن يله عاد الاكل حيبرد ظلت بدرية قلقة كلش وبين عليها هذا الشي ... ومن اتجمعوا يشربون جايهم راح كاطع لغرفته يتمدد ساعتها سالتها رحاب عن سبب هذا القلق ... -- لاكين هذا الضابط سلمان مكتول براس شارع بيتي ... --- يا عزة ومنو كاتله __والله مااعرف بس ام طارق خابرتنا تكول كاتليه اليوم هيجي ساعة عشرة الصبح تحجي وتعصر بايديها ففاضل سالها --وخالة انت ليش قلقة شنو الخايفة منه __شلون مااخاف وهو اصلا جاي على بيتي __وشعنده جاي على على بيتج دغته رحاب وكلتله بعدين احجيلك وورة مافتهم السالفة طمنها انه ماكو اي شي عليها وانه لاتقلق ابد السالفة مو يمها مدامها جانت بذاك الوكت بشغلها وكو هم شهود عليها لايظل بالها رجعت للبيت بالليل ساعة دعش ونص ايهاب وصلهم جانت الشوارع شبه فارغة وهي قلقة وخايفة وايدها على كلبها وللصبح مانامت ومثل ماهي اتوقعت اجوي الصبح من الغبشة اخذوها للتحقيق وضابط التحقيق من عرف قصة سلمان سالها انه دائما يجيها م لابس مدني كلتله لا والله كل مرة يجيني عسكري بحجة ياخذ معلومات وعرف منها انه عايفة بيتها خوفا من المشاكل اتعاطف وياها شويه ومجان اكو اي دليل يربطها بالجريمة وخصوصا انه المختار نفسه شهد بصالحها طلعوا بدرية لكن طبعا التحقيق بدى مستمر ضابط بالامن مو هينة انه ينقتل بوقت كانت الجرائم تعد على اليد خلال الاسبوع الاول تم استدعائها تلاث مرات والاسبوع الثاني مرتين الجريمة صارت بوضح النهار معناها القاتل من المنطقة لانه يعرف انه المكان يكون خالي من الناس بهيجي وكت وهو واثق انه محد حيشك بيه لانه معروف حصل تفتيش عام لكل البيوت داير مدايرها وعلى بعد قطاع كامل التفتيش شمل كل الاشخاص القادرين على حمل السلاح واللي يمتلكون سلاح نفس اداة الجريمة مع ذلك مجان اكو اي دليل ولا اي خيط يوصلهم او يربطهم باي مشتبه حتى الشكوك وصلت لزوجة الضابط نفسه واخوانها بعد ماعرفوا كم المشاكل اللي كانت بينناتهم بسبب علاقته النسائية عاشت بدرية ايامها اسوء اوقاتها وجانت كل يوم تحى وتموت الف مرة ومن خوفتها تسمع اصوات وهمية لدكة الباب عدى اسلوب التخويف اللي استعملوه وياها في بداية التحقيقات اللي ماافضت على شي طبعا فاضل كلش ساعدها اتصل بهوايه ناس وعرف من تجار الهم معارف بالسلطة خففت الامور عليها واكثر من مرة طلب منهم يجون يكعدون يمهم فترة لحد ماتهدا الامور وعلى عطلة نص السنة العشر ايام اخذوا موافقة علاء وراحت العائلتين تكعد يمهم كم يوم حضرت نفسها رحاب من الصبح نظفت البيت ورتبته وطلعت الدواشك الجديدة اللي عدها وفرشت الغرفتين الفارغات فوك كلش جان عاجبها تستضيف اهلها لاول مرة صاحت على فاضل انه حتروح للجمعية ماعدهم لحم ودجاج وهو كان يتحضر يروح للشغل كلها اليوم من يرجع يجيب من السوك مياكل مال الجمعية ضحكت وكلتله شنو متاكل مال الجمعية -- اي مااكل اني الا مذبوح --عود ليش يعني طول عمري اشوف اهلي يجيبون مال المصلحة وناكل منه ---واني مااكل مال مصلحة رحاب شمدرني منين جايبيه و شلون ذابحيه ماافتهمت رحاب هذا الموضوع يعني شنو ذابحيه مكتوب عليه اني قاريته على الطريقة الاسلامية --- حبيبتي ليش ادوخين روحج اني كل اسبوعين تلاثة انزل للسوك اذبح واجيب لانه ببساطة مااثق بهذا اللحم الا اشوف بعيني --- اوي فاضل شكد معقد --- لا رحاب اني مو معقد اني انسان اخاف الله واتبع تعاليمه --يعني احنى هسه كفار ومانتبع التعاليم يمعود انت هوايه تبالغ --رحاب مدام فتحتي هذا الموضوع اريد اسالج يعني انت شعرفتي عني هاي صارلنا كم شهر سوى اقترب منها وهي كعدت على ميز الطعام اللي بالمطبخ ---عرفت عنك انه انت حباب وخوش ولد ملتزم ---بالضبط ملتزم -- اي حتى صلاة الليل كل خميس تصليها -- رحمة الله والديج وصلاة الليل ترة هذه رزق مو كل واحد يحصله --- زين --واني بصفتي زوجج اللي يحبج ويموووت عليج اطلب منج طلب انت حره بيه والحقيقة من فترة مفكر بيه ---شنو هذا الطلب عيوني الك تسلملي عيونج يالغاليه اريدج تتحجبين ضحكت رحاب بصوت عالي شنو !! ---تتحجبين رحاب ربطه وتحطيها على راسج اني اعرف وشفتج لبسج كله طويل وعريض شنو اللي يمنعنج من الحجاب مايمنعني بس ممفكرة ولا يعجبني اختنك واحس الحجاب للعجايز باوع عليها نظره صفح وبابتسامة صغيره جاوبها خلص براحتج بس اتذكري عذاب الاخرة ---هههههه عود من عجز اتحجب وعفى الله عما سلف هاي مو حجايتك ضحك وماحجى شي بوسها وديطلع كتلتله تكدر تجي عليه نروح للسوك من تذبح ؟ --- اي حبيبي ليش لا حضري نفسج ساعة ثنتين امر عليج وبالفعل اخذها وراحوا للسوك جان يمشي وهي تمشي وراه سوك الدجاج الحي والسمج يصير بظهر سوك المخضر والطيانة والسيان للركب وريحة الدجاج بالاقفاص وانوب زفرة السمج وريحتة القوية لعبت نفسها حييل تنوبه شافتهم من يذبحون الدجاجة ودمها طفر على صدر الولد اللي يذبحها داخت وركضت على السريع راحت لنهاية السوك ووكفت يم حايط المحل ابو الفحم وغراض الشوي غطت نفسها وبدات تتقيا كانت لحظات مسروقة من جهنم بحد ذاته لحكها فاضل وهو يصيح شبيج رحاب لاتخوفيني جانت السيارة بعيد عنهم فطلعها لراس الشارع واخذلها تكسي ورجعها للبيت والطريق كله تبجي مااتحملت ابد المنظر صح جانت باردة وليلتها ماطرة بس الشمس العمودية جانت تضرب بالراس وبوخة المكان جان شي فوك التحمل طبت غسلت وراحت لفراشها اجاها فاضل وكلبه نار عليها وظل يمها عرف هي من تتعب تحب تشرب الجاي راسا حضرلها كوب وجابه وماكو نص ساعة اندكت الباب وجتي جوكة الجهال استقبلهم فاضل وطلع على السريع يجيب غدى من برة فرشتلهم رحاب صواني الكباب والدجاج المشوي وانتبهت انه زوجها ابد مااكل منه وهي فرحانه عبالها مياكل الا من ايدها اتاريه هو اصلا مياكل اكل بره فرحة رحاب بجية خالتها ومرة خالها نستها ضوجة اليوم كله وزوجها هم طلع واخذ الجهال كلهم وياه يشتريلهم ويلعب وياهم بالحديقة حتى النسوان ياخذون راحتهم حتى بدرية سالتها كلتلها ---اكلج عود صدك رجلج هيجي حباب لو بس كدامنه --- لا والله هو هيجي على طول كلش هادئ وحباب ومو متطلب اصلا مااحس بيه كلشي يسوي بنفسه مرات من يشوفني متاخرة بالنوم ومالي واهس اكعد يطلع ممتريك ولايكعدني - عيناا ابوج --- هههه اي عينا بس اني اكلج ضجت وحدي هو الصبح بالمحل يجي الظهرية ساعتين لو يرجع للمحل وراها لو يطلع ويه ولد خاله بيتهم قريب يخلص شغلاته حتى الجمعة لو اشوفه لو عدنا خطار بيت اهله لو احنى نروح يمهم يعني مااعرف ---لا تشيلين هم هسه يصير عندج نونو تتمنين هالساعات ترتاحين بيها اني بدالج اشبع نوم اهم شي خلصتي من كراب فخرية ----- شفايتلي على كراب امي ريحتها من تفتر بالبيت عندي تسوى الدنيا كلها -- صدك مصار عندج شي ----خالة هاي انت هم خلصت من امه تركض ورايه ورة اسبوع من زواجنا تكولي ها مو حامل وذيج الجمعة تكلي خلي اخذج للدكتور ليش مو حامل واني مصارلي اربع شهور متزوجة --- زاهيتلها الدنيا ليش لا --- حتروح للامارت الاسبوع الجاي يم بتها فطومة طلعت بدرية جكارتها وتنهدت بقوة وربتت على رجلها امل بابتسامة كولي يالله بدرية --- شكالين احنى يالله اموله يالله كون ربج يستر عليه ويخلصني من هالضيكة --صدك خالة شصار من شغلتك --- اسكتي رحاب مااعرف شوكت تفضها والله يخلصني بعد والله شفت الموت الاحمر اني بهالايام --- الله كريم خالة لاتشيلين هم فاضل يكول ماعليها شي لايظل بالها وشويه جتي مرة شايلة ماعون كليجة ووكعك وياها كالتلهم شفت فاضل بالباب ووياه جهاال كلي اهلج هنا فلازم اجي اسلم عليكم فضحكت رحاب الها ورحبت بيها وعرفتهم على جارتها ام محمود --- هلا بيج ام محمد اي وقت انت مو غريبه ودنكت على خالتها كلتلها هاي رجلها بالمخابرات خلت ايدها بدرية على خدها وكالت هذا اللي ناقصني ----بس بالحقيقة خالة والله كلش كلش حبابة تحط تحطيه على الجرح يطيب بقوا يومين يمها و فاضل شالهم بالصلوات وحتى الجهال جان كل عصرية يخذهم للمراجيح هو بطبيعته كلش يحب هوستهم ويوميه يكللها لرحاب اريد تلاث بنات وتلاث ولد اذا مو درزن اني ماارضى واليوم الثالث راحت بدرية لبيت اختهابعد هم تبقالها كم يوم وترجع بس هاي اول مرة امل تبات يمهم والعصرية اجى سعد على امه يصيح ويعيط يريد فلوس طبعا هو مامتغدي وكلما ابوه يزيد مرضه تزيد وكاحته بجى الا يريد يتغدى لحم قواطي هذا الاحمر العليه ثور و يروح يشتريه من ام صلاح وهذا غالي وهي تضوج فخرية كل شويه ماخذ فلوس يروح يشتري ابوه يصيح انطيه لاتخلين بنفسه شي لا تعاندينه بس هي عندت لو ياكل مثلهم لو ماكو فلوس بعد كوم اصعد فوك الميز اللي عليه الفراش ومناك جيت على الكنتور من فوك فخرية جانت حاطة اللحفان الجديدة اثنين ثكال وبقجتين هدوم ولافتهم فوك الكنتور مثل ما كل الناس تسوي وهي تصيح عليه لك انزل هسه توكع علينا لك سعد لاتوكع بنصنا ليش مايدفع كل الغراض وتوكع عليهم وهمه كاعدين بصف الكنتور ويزحلك هو هم ويوكع على قيم البنية مصاحت ولا كلمة بس عيونها جفلت راسا وكعت وبثواني انكطع نفسها وازركت شفتها كامن يصيح ويعيطن بدرية وامل يخضون بيها ويضربوها راشديات حتى ترجع لوعيها وكومي عهود دكي سعد كتل وكاطع جان بالبيت وشاف عهود تكتله بلش هو هم بيها يضربها صارت هوسه ومايشوفون الا كاطع متمدد بالكاع قيم رجعت لحالتها الطبيعية ورة مارشو على وجهها مي وظلت تبجي انوبه القيامة قامت على كاطع خابرت فخرية على الدكان جيران ايهاب حتى يجيهم وطلن النسوان يفركن بايديه ورجليه وهو شبه فاقد الوعي من اخذوا للمستشفى جانت بدرية وياها والمصيبة عرفوا عنده تشمع بالكبد فمنعه الدكتور منع تام عن الشرب والجكاير اندارت بدرية على اختها كلتلها اكلج هو خوما بعده ويه سميرة فجاوبتها --- لا يابه لا اليوم البارحة المرة اتزوجت وصار عدها جاهل من رجلها ---- يا والله بخت هم بيهن حظ -- اي دادة بيهن كل الحظ رجعوه للبيت ودموع فخرية تكت عليه جانت خايفة كلش جنها هالمرة الشغلة من صدك الدكتور ابد ماطمنهم بالعكس خوفهم بالزايد انه حالته تعبانه كلش والمرض بمراحله الاخيرة جتيهم رحاب ثاني يوم العصر جانت فخرية ماخذته لكاطع ورايحين طبيب اختصاص وبدرية متمددة على الكرويته وجكارتها بايدها كريم بصفها يلعب بسيارته الحمرا الحديد وقيم تلعب خرز ويه ميلاد بباب المطبخ جانت رحاب جاية وحدها فاضل وصلها وطلع بوجهها من عرف ماكو احد بالبيت جتي وجانت تبجي على ابوها --- لاتخافين يمه ماكو شي بس شوفي بيبتج نايمة كاعدة اخاف صوبتها مطفية مابيه اكوم --- لعد عهود وين ---راحت وياهم جاوبتها امل وهي تحط الجاي على النار @@@ بعدها بكم يوم حست رحاب صحتها موشي مو مثل قبل ولا الها شهية تاكل وجوة عينها بدى يصير شويه سواد بالبداية عبالها قهر على ابوها ماذيها بس بعدين كاالت لفاضل تروح للمستوصف تسوي تحليل مال فقر دم لانه هي دائما يصير بيها بين فترة وفترة ومن راحت ضحكت الها الدكتورة كلتلتها انت جاية تسوين تحليل مال فقر دم ليش ماتعرفين انت حامل ؟!!! - هااا !!! اني ...حامل!!!؟؟؟؟ اي عزيزتي مبروك وهسه حنسويلج دفتر مال صحة مال الامومه حتى نتابعج اول باول وتاخذين التلاقيح المطلوبة و... راحت رحاب لغير عالم للحظات كانه استرجعت ذاكرتها وهي اللي كل ظنها ماتكون حامل الا من شخص واحد كان الخبر كانه صدمة غريبة الها اخذت الدفتر ورجعت للبيت وبدت تسوي غدى سوت تبسي دجاج من اجى فاضل استغرب كللها انه جان موصيها تطبخله تشريب اصفر ولاحظها مو طبيعية صافنة وبالها بغير مكان --- والله نسيت مااعرف اجى على بالي اسوي تبسي --- كلشي من ايدج طيب ولايهمج اليوم تبسي باجر تشريب ههههه شبيج اليوم حبيبي ---فاضل باوع عليها وصفن --- راح اكلك خبر --- خير يالله --- اني حامل ----شنووووو!!! طبعا المسكين مصدك الخبر راسا بجى دموعه نزلت مثل طفل ينطوه احلى هدية كان يحلم بيها اقترب منها وحضنها وهي هم حضنته شمت ريحته وكانه لحظتها يله عرفت انه هي خلاص صارت حامل من زوجها فاضل لعد شجنت تنظرين رحاب كالت ويه نفسها ومن شافت عيونه احمرت وظل يمسح بدموعه كلش فرحت اله يستاهل انه يعيش هذه اللحظات --- اني ماامصدك تدرين يالله الف الحمد لله والشكر ياربي راح راسا اتوضى وصلى ركعتين شكر وبالليل جتي امه واخوه حتى يباركوله ابوه جان مسافر وهي هم حتروح وراه وصتها لرحاب انه كلشي ماتشتري لا هي ولا اهلها حتجيبلهم كله مناك هدية منها بمناسبة هالخبر الحلو ظل يومها وياها وهو مايعرف شيسوي من الفرة جان بوده الناس كلها تعرف انه حيصير اب!! وبالليل سالها وهي نايمة بفراشها وصافنة على السكف ---رحوبتي ليش ماكلتي لامج ؟؟ ---ماادري والله فاضل كلت خطية هي ملتهية بابويه هالايام مااريد اشغل بالها عليه هم --- يجوز جانت تفرحلج ليش تكولين تشغلين بالها --- ماادري فاضل اشو مدااصدك لحد الان اني حامل هه ---- هههه هو اني ممصدك كل شويه اريد اكلج روحي سوي تحليل ثاني هههه اتاكدي ساد صمت دقايق اندار عليها ---رحاب ---هممم --الله وحده يعرف شكد احبج وانت شنو بالنسبه اليه باوعت عليه وابتسمت -- اني هم فاضل ...... | ||||
|
| |
|
01-09-21, 08:46 AM
| #40 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #نساءمخمليات الفصل الثالث 38 بائع الاحلام مر من هنا احلام اليقضة احيانا تكون لكثير من عدنا المخرج للعديد من الازمات كانت عهود واحدة مثلنا تماما تعيش واقع سعيد بيه مرة تشوف نفسها فتاة طويله ورشيقة ببشرة بيضاء صافية وشعر اشقر ناعم ترفض طبقا لشخصيتها ان تقع غي غرام الشاب الامير الذي يستميت محاولا ان يحصل على قلبها وتستبدله بمحاوله من محاولاتها انصاف المظلومين في هذا العالم فتعشق سايس الخيول وتعيش معه قصة حب عنيفة تنتهي بمجرد اعلان الزواج ثم الدخول في قصة اخرى فهي فارسة شجاعة كالليدي اوسكار وبدلا اني ينقذها حارسها الشخصي اندريه ويضحي من اجلها تموت هي من اجله ومن اجل الاخرين وينتهي هذا الحلم وهي تراقب دموع حبيها الغالي يودعها بينما تموت في ذراعيه ومرى اخرى هي بطله المسلسل الامريكي الشهير ريمنكتون ستيل فمرة تكون بريس برسنان بذاته وتقوم بحل كل الجرائم بتلك النظرة الثاقبة الحدية والابتسامة المصطنعة او احيانا تكون هي ستيفاني زيمباليست التي تنقذ البطل في اخر لحظاته !! وبينما هي في قصة جديدة من احلام اليقضة سمعت صوت ميلاد وهي تركض على رحاب جتي رحوبه جتي رحوبه وبدلع الصغيرات صاحبة الخدود السمينه والشفاه المكتنزة وكفت ميلاد كدام اختها قبل ماتدخل للبيت وهي تلعب بظافيرها وتكمز داير مداير اختها --اكلج رحوبه صدك يكولون زوجج عنده هوايه فلوس ضحكت رحاب على كلام اختها الصغيرة ام لسان صاحبة الدعش سنة ---والله يكولون ؟ هاي منو يكول ؟ شو ماادري اني ههههه شتريدين حبيبتي كولي واني اشتريلج ---اريد تشتريلي قراصات مال ساندي بيل هاي اللي تصير فراوله --- فراوله اني اتذكر هي كرز مو عهود جاوبتها عهود شمدريني طبي جوة دوثه تريد قراصات على اساس هي زعطوطة -- ولج خطية لعد شنو بعدها طفلة ميخالف حبيبتي عود من اروح للسوك اني اشتريلج --- لا انطيني فلوسهن واني من اروح ويه امي للسوك اشتريهن --- ههههه هاج ميخالف طلعت رحاب جزدان مشبك من خيوط ذهبة معدنية وانطتها نص دينار --- صاحت هذا اليه هذا كله اليه --- اي حبيبتي هذا الج خليني افوت لعد اجى سعد ودفرها برجله حيل --- لعد واني لو بس ميلاد !!! ضحك عليه فاضل وصاحة كله تعال تعال يمي اني انطيك هاي الك هم نص دينار اخذها وانهزم حتى ملحكوا يشوفون ظله فصاحت عليه رحاب ادري هو ليش هيجي ضربني ههه!! دخلت للبيت وزوجها يدفع عربانته وراها ويسلم على عهود كان الاثنين يمثلون ثنائي فكاهي ممتاز ينصبون ويقلدون على كلشي استقبلتها امها بابتسامة حزينه نوعا ما حيث ان القلق على زوجها وصحته كان اله اثر على وجه فخريه المتعب والمرهق وقبل ماتكعد راحت يم راس ابوها واتاملته وهو نايم بوست ايده ودعت من كل كلبها انه الله يشفيه وينطيه طول العمر بصحة وعافية جاوبتها امها --والله مااعرف شبيه شو يدعي على نفسه الله ياخذ امانته مااعرف شبيه مو هذا كاطع اللي طول عمره ماخذ الدنيا ونسه وسهر ولا ظنيت في يوم هيجي ينكسر ---اخاف ديتوجع يمه وماكاعد يتحمل وانت اتعرفين ابويه يكابر على نفسه مايحجي ومايكول جانت امه كاعدة بصفه وحاطة القران بايدها تقره عليه الايتين اللي حافظتهم وتسبح وعيونها عليه كاطع هذا ابنها روحها من الدنيا دنكت رحاب على بيبتها وبوستها فسالتها ---شلونج بيبي وشلونه رجلج وشلونه وياج ؟؟؟ يكون ماياذيج --- لابيبي الحمد لله خوش ولد وكلش مداريني --- الحمد يارب الله يستر عليجن بنات كاطع ويريحجن بجاه النبي كومي بيبي حطي القرعان جوة راس ابوج الله والنبي واهل بيته كون يوكفوله ويكوموه بسلامه طلعت فخرية وبتها وهي تمسح بدموعها ---يكوم ويكعد يكلي فخرية سعودي امانه بركبتج يحسسني جنه مفاركنه يمه --- لاتكولين هيجي يمه مابيه شي ان شاء الله راحت فخرية للمطبخ تحضر الغدا وكفت على الطباخ وبطرف ردنها مسحت دموعها وشالت الجمجة وكامت تخوط بالمركة وتصفي التمن لحكتها رحاب وبهدوء حضنت امها من وره لفت ايديها على امها حيل وحطت راسها على جتفها رحاب جانت شويه اطول من امها اللي ماتجازوت الاربعة واربعين سنة ظلت تشمشم بامها ودموعها وكفت بمدامعها كالت اوووفييييششش والله يمه ريحتج جنها ريحة الجنة كل ليلة قبل ماانام اتمنى احضنج وانام ابتسمت امها وكالت وج ياريحة شو كلها ريحة مطبخ وبصل ههه لا والله يمه ماتدرين ورفعت عينها لاحظت خصلا الشعر الابيض امتزجت بقطرات صغيرة من العرق رجعت نامت على ظهرها لو تعرفين شكد اشتاقلج واني وحدي هناك !! --ماما ماما ها يمه ها عيون ماما تعرفين ماما اني حامل وكعت الجمجمة بالجدر وصاحت فخرية دخيل العباس لج يمه صدك انت تحجين --- اي والله التحليل هيجي يكول اندارت وظلت تحضن بيها وتبوسها وج عيني نخيته انه ماتطلعين مثلي وتتاخرين بالحمل ربي فدواتك ربي ماترد عبادك ظلت تبوس بامها وفاضل يباوع بطرف عينه وضحكته حاولت تغطي دموع خجولة ترقرقت بعينه ---كعدي وسولفيلي جرت فخريه بتها وكعدتها على الكرويته المفروشة اللي بالمطبخ شلون وشوكت ____يمه عاد هاي شلون صعبة اشرحها شويه هههههه جاوبته رحاب بصوت ناصي ---ولج عوبة ادبسز دااكلج شلون عرفتي ___هااا اي ماما رحت دااسوي تحليل فقر دم جانت بس دوخة عندي و الدكتورة كلتلي حامل و هاي قبل جم يوم ---وماتنسيتي بشي !! صاح فاضل من يمه لا عمة لا الله يستر شراح تتنسى هههه --- خلي اي شي تتنسى اني بايدي افر بغداد كلها واجيبه الها @@ ورة الغدا بساعت مرت نورية هي وبتها ونزار اللي وصلهم جان كايد امه ودخلها كوة تمشي محنيه ظهرها من الالم اللي بيها من شاف رحاب وفاضل كاعدين بالمطبخ والباب جانت مفتوحة ماسلم عليهم سلم على فخرية وصاح على عهود تجي تاخذ امه فنوريه كلتله روح يمه وايهاب يرجعنا بالليل جاوبتها فخرية لا يمه لا تعال ارجع عليهم محتاجين ايهاب بشغلة احنى وغمزت لنورية اللي ظلت صافنة عليها ماعرفت شنو سالفتها ؟ كالها صار ماشي مرة خالي وركضت عهود كادت عمتها وكعدتها ومن شافت فاضل كالت ---والله يرادلي هيجي عربانه دادة اتسكطت مابيه بعد امشي واتحرك شلونك يمه فاضل شلونج رحوبه مصار عندج شي وقبل ماترد رحاب جتي امها منتجية على عوجيتها جانت تكللها ---شبيهم جهال قدرية شو كلهم وكعوا ويتشكون هاي ياعين نجسة شافتكم وماصلت على النبي عاد همه رددوا بصوت خافت اللهم صل على محمد وال محمد -شلون صار اخويه يمه والله كلبي نار عليه وابو سامي والله راد يجي بس دزوا عليه بالفرقة الحزبية ودزلكم سلامه والله خطية سوده عليه صاير عودتين مو مثل قبل ابد فخرية اي وعيونج ظلوا يسولفون على حالة كاطع وجم دكتور ركضتله فخرية وكلهم نفس الحجي ونفس العلاج ونوريه هم حجت على فكرتها تسوي عملية لظهرها بس جانت كلش خايفة وتنتظر اسمهان تخلص امتحانات ويمكن على العطلة تسويها عهود جانت عايدة السادس هالسنة واخر سنة الها العام مجاوبت زين بالكيميا بالدور الثاني فتركت درس اللاخ اللي جانت ماجلته حتى تعيد السنة وهم وجانت خايفة لا ابوها يبطلها مثل اختها وهمه حسوا سنة ورة سنه ابوم مو مثل قبل ولا حتى يعرف هي وين تداوم او شتسوي مع انه امها جانت واكفة وياها وشجعتها تكمل وتروح كليه لو مهما كان الي مضطرة تسوي الها اتنحنحت نوريه بالحجي وحجت ويه امها بالاول علمود تخطب عهود لنزار امها راسا رفعت صوتها اي عيني ليش لا زين ماسويتي احسن شي والله هذا اخوج خطية ليش يظلن البنات على كلبه اندارت فخرية عليهم وشنو يظلن البنات عمه ؟ فاشرتلها انه بعدين تحجيلها لا كدام فاضل اللي هو هم حس اكو فد حجاية بيناتهم فاخذ زوجته سلم عليهم وطلع ركضت عهود تسمع ورى الباب الحجي اللي دار بيناته فنورية راسا فتحت الموضوع ويه فخرية --- دادة فخرية اخويه مريض واسم الله اسم الله حالته تعبانه واخاف يصير بيه شي ليش البنات يظلن عليج اني رايدة عهود لنزار بس تعرفين مو هسه يعني ورة ما تطلع السنة مالت فرات سودة بوجهي عليه والف رحمة ونور تنزل عليه وعاد انت بعد تعرفين نزار مابقى اله شي ويتخرج من كليته العسكريه ملازم يسد عين الشمس شاب ومرتب وعلى ايدج تربى والبنية بت اخويه مني ومن لحمي وفخرية اني هم تعبت واخاف على روحي لايصير بيه شي ويتيه البيت سامي غسلت ايدي منه اصلا مياخذ من عدنا حجاية والنوب عرف درب البنات الاكشر واسمهان يوميه رايده واحد اذا مو اليوم باجر ازوجها واظل بحالي بهالبيت الجبير ليش مااني الم بت اخوي وهي تلمني وعلى الاقل نسد الموضوع القديم يعني اللي تعرفيه ها شتكولين احنى مالنا احد شو من يوم اللي مات ابويه لا شفنا لاعم ولا ابن عم ولا خال ولا ولد خاله ها !!! فخرية مجاوبت لانه عمتها راسا ردت بمكانها --- يمه كبعيها واخذيها ليش عايزة تاخذين راي احد اصلا كاطع يكيف على هاسالفة ميكيف بته تنسترووين يلكى مثل نزار من زينه الشباب فدوة لطوله ---بس نورية اني البنية عدها نية تكمل كليه ولو على كص ركبتي لازم اخليها تاخذ شهادتها مااريد اكسرها كسرة رحاب --- رحمة الله والديج فخرية ومنو كالج ماتكمل حالها حال بتي اسمهان خلليها تكمل ومصاريف كليتها عليه ها بعد شكلتي صفنت فخرية وظلت تداور الحجي بدماغها اشرتلها نورية انه تجي تكعد يمها تتشاورها لانه متكدر هي تتحرك تروحلها فكلتلها بصوت ناصي حتى عهود لاتسمع خية هي بت اخوية والظفر الي ينشلع الايد كلها تون بت اخوي ومو قصدي اكسر بيها بس انت تعرفين اني اذا مااخذتها منو ياخذها لاتروح تنام على كلبج واني مقنعة الولد يتزوج وهو راضي ماحجى ولا كال شي هو هم رايدها --- ليش هيجي تكولين نوريه ليش شبيها عهود شعايزها !! -- نصي صوتج يمه اني ماكلت عايزها شي بس يعني ها تعرفين خواتها احلى منها يعني هيجي قصدت --- والله ماادري نوريه خلي ابوها يكعد وكوليله ولمحت عهود واكفة تتسنط وره الباب عهود جانت تتمنى اي مرة لخ تصير ام رجلها الا عمتها سبحان الله ابد منتوالم هنوبه اصير جنتها غير بخت اغبر هذا حجت ويه نفسها ومرت عليها صورة نزار اخر شي من صاحها وكلها تعالي اخذي امي هاي تاليتها عهود تاخذين مطيرجي كامت فخرية تسوي العشى والفكرة تاخذها وتوديها وشويه اتسحبت ودخلت على بتها كلتلها اكيد انت سمعتي الحجي هاي عمتج تريدج لنزار شكلتي جانت حاطة الكتاب على وجهها حتى امها لاتشوف دموعها ---يمه اتزوجين لهذوله!!! لنزار المطيرجي زين ليش ادري بيكم تعيبون عليه مو حلوه ومحد حياخذني واكيد كلتلج ابويه اذا مات الله لايكولها حبقى على كلبج وانت ماتتحملين مصاريفي مو بله ؟ يمه فدوة اروحلج والله لو ابقى عانس احسنلي اني مااحبهم والله مااطيق بيت عمتي نورية جانت الساعة تقريبا الستة العصر من دخلت عليهم زهوري وجهالها الصغار حمودي واماني ذيلها المايفاركوها من سمعت صوتهم فخرية مردت على كلام بتها كلتلها ارجعي اقري ماكو تعيدين هالسنة واي اشوف هالسالفة وراحت تسلم عليهم عاطت عليها نورية انه كلش اتاخرت مع انه جانوا متفقين يجون سوى ظلت اطلع اعذار علمود جهالها ماتريد تعوفهم وحدهم ولا بيها اتجيبهم وياها وهناك سمعن صوت كاطع يون ويصيح على فخرية بصوت ناصي ركضن عليه البنات وبوسنه ولفت زهوري العباية جواها وكعدت يم راسه تبوس بيه وتبجي ممصدكين اخوهم هيجي وكعه يوكع وهو بعد صغير بالعمر ها توه خمسين سنة ظلت تبووس بيه ودموعها توكع على كصته وتمسحها تناغيله مثل الاطفال وهو حتى مابيه يرد عليها وكوة كوة كعدت جوة رجليه نوريه تبسمل وتقره عليه - بعد عيوني انت اخونا وابونا خيمتنا وتاج راسنا فدوة نروح لطولك فدوة نروح لشيباتك يمه كون بيه وبجهالي ولا بيك عاد امه مااتحملت عاطت عليهن شبيجن جنجن تنعن عليه الوليد مابيه شي من راس باجر يكوملنا مشافى معافى كافي عاد كومن من راسه خنكتنه وكوة نطق حجايتين ---يمه يوم -- ها بعد عيون امك جاوبته امه وهي تجر الكرسي قريب عليه --- يمه فخرية والجهال بركبتجن تحطوهم بعيونجن خصوصا هذا سعودي وكام يبجي ودموعها حبسته ماكدر يكمل !!! جان.... جان ... بودي يمه اكبره ويكبر ويايه واعلمه يسوق ويوديني ويجيبني للشغل واتباهى بيه كدام صدقاني جان ويمتمت وتنفهم من كلمه وعشرة لا جان بودي بودي اتباهى بطوله كدام الناس --- خويه لاتكول هيج باجر تكوملنا بالسلامة وتفتر بطولك وانت كايد سعودي تتفاخر بيه رافع راسك اندار عليها --- زهورة ديروا بالجن عليه --- ارتاح خويه لاتعب نفسك بالحجي وكامن البنات غسلوله ونظفوا مكانه وشالوه كوه للحملم وانطوه علاجه شويه اكل لكمتين وها فتح عينه وظل يعاين عليهم كانما يريد يحجي كومة حجي بكلبه لس مديكدر راسا نوريه حجت وياه عن عهود هو هم كلش كيف وابتسم كلها لفخرية شتكول نورية سويه انطيها رحاب وانطيها عهود محد يلمكم غير خواتي صفنت عليه فخرية هذا شبيه رحاب شنو ؟ كلتله خويه يا رحاب مو رحاب اتزوجت ضربتها عمتها بالعوجيه انه خلي يحجي لاتقاطعينه وتحسسيه ديخرف بالحجي كعدت على الكرسي بصف الباب وجتفت ايديها وتعاين على خواته يسولفن وياه وهو كلمة يرد لو مايردها ونوريه دفعت زهوري تروح تحاجي عهود علمود تقنعها والبنية معندة ماترضى عهود اللي عاشت من طفولتها وهي تاخهذ حقها بايدها عمرها معتمدت على احد محد جان يكدر يدوسلها على طرف الا وترده لكن هب ممتجاوز الا على الي ياذوها ودوم ابوها وامها مايرضون عل تصرفاتها مع ذلك جانت معروفة حقها تجيبه تجيبه الا هالمرة مجانت تعرف شلون حتجيبه مجانت مقتنعة بنزار مع انه شاب يمكن تتمناه معظم بنات هو جان عكس اخوه جدي اكثر وبعيد عن الرومانسيات والخيال انخرط بالمجتمع الذكوري كلش من وكت وهو هم جان وكح وعينه ماتنكسر وماعنده سوالف بنات وحبيات باله جان يم الشغل ووظيفته والفلوس وشلون يكون نفسه شاب صاحب قلافة وشخصية قويه ونظرة ثاقبة والكل يحسبله الف حساب مع ذلك جانت امه الاول والخير بحياته طول عمره يكره بنات خاله ويشوفهن مدللات ويتعيقلن على حد قوله لكن من امه اقترحت عليه عهود وشافها متحمسه ورايدتها ماحب يكسر كلبها مثل ماسوى اخوه سامي اللي شبه قطع علاقته بيهم رادها تماما مثل مرادتها امه عون وسند الها بالبيت بما انه حيتزوج ويكعد ويه اهله بنفس غرفته بالطابق الثاني ومع كل المحاولات اللي سعتها زهوري ونوريه دكت رجل عهود مااريده ولو اموت مااخذه بس عماتها مانطنها اذن من ديجي يرجعهم وقبل ماتطلع نوريه تصيحه وتكودها اسمهان سالت فخرية بصوت ناصي شعندج ويه ايهاب ليش ماخليتيه يوصلنا --- مو اني نسيت اكلج من قبل فترة والله وفترة طويله هم راد اسما عود اله وكايل لعهود تحجي وياج يجي يخطبها منكم وشكلتليه يااا طبعا كلت بس يكلي ويفاتحني بالموضوع ارزله لعد شلون !!! ---- هههه يا عزة مابقى علينا بس ايهاب يريد اسما لا يمه ولا انطيها لاي احد البنية شاطرة وتريد صيدلة وابوها مشجعها لازم تاخذ شهادتها بيدها اتكرضمت فخرية على هالحجاية لعد شبيكم كلكم صرتوا عصبة على رحاب من رادت تروح كليه وجان ماعدكم بنات يروحن يكملن دراسه!!!! اتنهدت وماحجت ضمتها بكلبها مثل ماضمت هواية شغلات وياها وصاحت نوريه عليه وهو واكف بباب الكراج وسعد واكف يمه ديسولفون ويه مجموعة ولد جيرانهم واكفين بباب البيت كادتها اسما ووكفت بباب المطبخ وصاحت عليه يمه نزار تعال يمه تعال سلم على خطيبتك راحت فخرية من وره خشمها صاحت على عهود اللي وكفت بوجه امها وكلتلها --- ماريده يوم ولا ضغطون عليه ولاتلحين --- يمه لاتسويلي مشاكل طلعي بس سلمي عليه وخلاص --- لا مااطلع واذا طلعت حكوله ماريده زين !! ماتكوليلي الى متى احنى نظل تحت رحمتهم وانت ليش هيجي طول عمرج بس تخافين من المشاكل ؟ اذا انت خايفة اني لا قابل شراح تسولي اتكصون شعري مثل رحاب لو تجويني مرة لخ لو كاطع يكوم يكطع الحزام عليه !!! وحتى لو سويتوا هم اكول لا!!! --- يمه انت ليش هيجي لسانج طويل وممتربايه وظلت نوريه تعيط ولج عهود شدتسوين تعالي يمه انت حلوة مايحتاج اتعدلين نفسج طلعتلها عهود وامها تحاول اتجرها من ايدها حتى لاتحجي ولاتراددهم عهود البنت ذات الاحلام المكبوته اللي حالها حال كل بينه كانت تحلم برجل يكون سند الها يغمرها بعطفه وحنانه شاب تكون فرحانه هي باختياره عهود ذات الملامح البارزة والوجه النحيل ذات البشرة الداكنه والعيون اللوزيه الحاده ذات الشعر الاسود الثائر على من حوله وعلى صاحبته عهود اللي عمرها ماهتمت لجلدات كاطع ولا لاهانات احد كل همها كان رضاة امها اللي جانت تشوفها شلون تفني ايامها عليهم هي نفسها ركضت وطلعت كالت لعمتها ---عمه ابنج مااريده واني متاكدة هو هم مرايدني وما الي نفس بيه زين !!! صاح عليها نزار --- ووجع اتخبلتي انت نمونة على اساس انت واقترب منه وهو متنرفز وضايج عاد دفعته حيل زهوري وكلتله اعصابك عيني ابو الدم الحار من اولها انت هيجي !!! اخذ امك وروح مو وكتها الرجال مريض مانريد مشاكل ونوريه كافي عاد تلحين على البنات البنية مرايدته خلاص واني كتلج من البارحة وانت عندتي وجرت عهود وطببتها للغرفة حتى لاتحجي اكثر وتكب العركة بس هاي نوريه شلون تسكت ---- اني نوريه بت قدرية يا عهود اذا ماكسرت خشمج واخذت فلا اتسمى نورية وهاي اني وهاي انت امشي يله وصلني جرت ابنها وبتها وطلعوا بقت بس هاي التفسة اطلع لسانها عليه ... من جهة ثانية رجعت رحاب والدوخة ساطرتها ظلت تردد ويه نفسها اغنية الاعلان اللي طبعت بالتلفزيون حلويات الطارق بقلاوة بالفستق ههههه --- صدك فاضل اريد بقلاوة ---هينه اجيبلج من الشكرجي اطيب شي عنده --- لا لا الا من الطارق --- صدك تحجين كولي غيرها --- معليه اني والا هسه صدك صارت نفسي بيها عاد طلب من ابو التكسي انه ياخذهم لابو البقلاوة المدام امرت يكله وبالطريق كللها تدرين منو اجى عليه البارحة نسيت اكلج واتذكرت اليوم من جنا بيت اهلج واستحيت اكلج --- منو ؟؟ ابن عم ابويه شايف عهود بالعرس واجى سالني عنها !! | ||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
3Likes
العرض العادي
