07-06-20, 12:09 AM
| #33 | ||||
| نجم روايتي  
|  وأذا ما التقينا لقاء الغرباء لاتقل شأنا فأن الحظ شاء ...... دع الأيام تفعل ما تشاء وطب نفساً اذا حضر القضاءُ ....... دع عنك لومي فأن اللوم اغراء وداوني بالتي كانت هي الداءُ صـفراء لا تنزل الأحزان سـاحتها لو مسـها حجر مسـته سـراءُ ___________ | ||||
|
|
07-06-20, 02:41 AM
| #35 | ||||
| نجم روايتي 
| السلام عليكم ورحمة الله وبركاته.. كيفكم حبيباتي.. بعد البارت الثاني كان فيه كلام ليش سرعتي الاحداث واظهرتي شخصية سديم ويوسف وكشفتي شخصية قصايد وحنين .. عزيزاتي مو معقول أستمر بخمسة او ستة أجزاء احاول اخفي شخصية قصايد وانها حنين..يعني بيكون الوضع سخيف اخبي شخصيتها وهي بتظهر بظهور الاحداث.. مو حابة ابدا الرواية بحشو ماله معنى..الاحداث مو متسرعة ابدا.. هذي احداث الحاضر فقط.. باقي احداث الماضي واسراره المخفية.. وايضا المستقبل وخفاياه.. تعرفوني أحب أعطي كل شي حقه بالوصف بالمشاعر بالكلمات وحتى بالخواطر إن حبيت اضيف خواطر او ابيات شعرية.. الاسرار إلى الحين ما انكشف منها إلا ان قصايد هي حنين.. إبتعدوا عن المقارنة بين رواية أما غرام وهذي الرواية..لا مجال للمقارنة بأي شكل.. اسمحووا لهذي الرواية تلقى مكانها بخواطركم.. أما غرام بتبقى لها الصدارة دائما بالنسبة لي ويمكن لكم..بتبقى الملحمة والملهمة..التوب والنمبر ون دائما هي اما غرام.. مو كأحداث وقصة..بل كذكريات وكفترة زمنية حبيتها بكل مافيها.. أعرف إنكم تحبونها..وأنا أحبها بعد واعشقها .. بس مو لدرجة اعيد نفس أحداثها وشخصياتها واسوي لهم كوبي اند بيست.. الحلوات اللي طلبوا ينقلون الروايــــة .. مسموحين ياحلوات..بس يتم نقل الرواية كاملة بدون حذف او زيادة..وبكلام المقدمة اللي انا اكتبه.. وشكـــرا لنقلكم الرواية.. البارت الثالث... مدخل.. فماذا تقولين قبل الرحيل وعذرك أكذب من غدرهِ ؟ وماذا يفيد اعتذار الذئاب لمن تنشب الناب في صدرهِ ؟ المرحوم ..غازي القصيبي.. قطع كلامهم رعد اللي ابتسم ليوسف وباسه على راسه.. رعد بخبث\يوسف تبي عروسة حلوة..؟ يوسف بسعادة\إيه مثل هذي حقت مساعد.. رعد\هذي مو حقت مساعد هذي اللعبة حقتك انت..تعال نشتريها من زوج عمتها.. يوسف يضم رعد بفرحة\ايه ايه تكفى رعد ابيها. رعد بوعد\أبشر بها ... الصدمة كانت بوجه مساعد وسديم..سديم إللي ادركت من تصرفات الرجل الكبير اللي وقفت وراه ان فيه بلادة غير طبيعية..ويتكلم باسلوب طفولي وكلمات متقطعة غير واثقة.. وادركت حجم مصيبتها لمواجهة هذولاء الثلاثة المجانين بوقت واحد..وتعرف ان زوج عمتها بيعطيها لهم بدون اي اهتمام مدام بيتخلص منها.. التفتت تبي تهرب منهم بس رعد اللي كان ماسك يدها سحبها معه لبيتها..وهي تحاول تفك يدينه عنها..كانت تبكي بصوت عالي وتترجاه يفكها..تناظر مساعد وتقوله ينقذها من رعد والمجنون اللي مبسوط ويخطط لزواجه ولون بشته.. مساعد يوقف بوجه رعد\رعد إعقل..كيف تبي تزوجها يوسف..وانت تحسب اهلها بيرضون يعطونها واحد اهبل.. يوسف بغيض يضرب مساعد\انت اهبل..رعد قال حقتي. مساعد بعصبية يدفع يوسف عنه\رعـــد جينا ندور ولدك..ولا جينا نخطف بنات صغار..؟ رعــد\وانت محسب اهلها بيقدرون يقولون لي لا..هم بيبوسون يدي عشان اخذها.. سديم بقهر\يالكلب ماخذيت حنين الا بحب خشوم..بس طلعت مو كفو لها لو ابوي ماوثق فيك وأمنك على بنته كان ماعرفنا قربك.. رعــد\ابوك اللي ماصدق خبر اخطب بنته؟! سديم باحتقار\كان يحسبك رجال مادرى انك زيادة عدد.. كتم نفسها بيده وصار يهزها بين يدينه\انتي تبين اذبحك هنا ؟؟ اسكتي عني ياسديم قبل أخلي فيك إعاقة دائمة.. مساعد ضرب رعد بلكمة على وجهه\اصحـــى استوعب انت وش تسوي..ماجيت معك استقوي على بنات..وش تبي فيها؟هالبنت هي خذت ولدك؟؟اذا هي بناخذه منها وخلاص ..ما باخليك تزوجها يوسف.. رعــد يكتم غضبه\ماهو بوقت اتلاكم معك بس باردها لك..وولدي وحنين اللي هي زوجتي مابيوصلني لهم الا هالربع اللي واقفة وراك.. فلك الاختيار أما تملك عليها انت او يوسف..بكل الحالات أنا باخذها معي..يعني باخذها..فقرر يا مساعد او ابعد عن طريقي. يوسف بقهر\مافيه ياخذها مساعد..هذي لعبتي لي انت قلته رعد. رعد إللي قرأ الرفض بعيون مساعد وإنه مستحيل يملك عليها..مستحيل يشاركه بشي غير مقتنع فيه.. ومستحيل يسمح له يخلي يوسف يملك عليها.. فتح زوج عمتها الباب اللي كان بيكسره رعد من رفسه له.. وانصدم لما شاف رعد.. رعد بانتصار\عسى ماطولت عليكم ؟! ابو متعب بصدمة\رعد وش إللي رجعك علينا ؟؟ رعد بكره\ابي اقص رقابكم..انقلع جيب الشيخ عمي بيملك على سديم وباخذها معنا.. لحظات لحتى استوعب ابو متعب امر رعد له..وناظر سديم إللي متمسكة بشماغ مساعد اللي على راسها..ويسمع صوت بكاها..وحاول تكون له اليد العليا عليهم..ويستغل الفرصة .. رجوع رعد يعني رجوع حنين..يعني رجوع المال والحلال إللي أختفى كله بعد ما مات ابوها ..وهربت حنين مع رعد.. دخل من بينهم وسحب سديم من راسها وهو يصرخ عليها ويسبها.. ابو متعب\أنا الله باليني فيكم يابنات أبوكم..أنتي وش مسوية وش هالحال اللي انتي عليها..؟..منهو خويك منهم؟ رعد مسكه من رقبته ورصه على الجدار\لا تستشرف عليها ترى نعالها اشرف من شنبك..تراني عارف معدنك الوسخ..كلم الشيخ استعجل علينا ورانا مشوار.. ابومتعب بخبث\لا بالله مافيه شيخ ولا ملكة..والبنت خلها عندنا بنعرف كيف نغسل عارنا.. مساعد وحس بالرعب على سديم إللي مالها ذنب إلا إن رعد يعرفها وناوي ينتقم منها بشي مايعرفه..وهذا الخبيث يقول عار ونغسله.. يسحب ابو متعب من رعد ويهزه\اي عار وش تغسل انت ..لا تتكلم على سمعة البنت الموضوع سؤ تفاهم حسبي الله عليك يارعد وش المصيبة اللي طيحتها على راس الصغيرة المسكينة..يابن الحلال بنتكم والله ماشفنا فيها عيب والموضوع انت فاهمه غلط.. رعد بحزم\أنت من جدك معطي هذا وجه وتكلمه عن شرف.. ترى حتى ماهو وكيلها الشرعي بس ينفعنا الليلة مع الشيخ.. التفت على سديم وغمز لها\ زين لقيتك عنده مو عند عمك.. أو ماكنت باقدر اخذك وارجع حنين وولدي.. مساعد بقهر\رعد خل البنت عند هلها لا تبليها بمصيبة..والله انها في ذمتك لين تموت.. سديم بحسرة\ذمتـــه مليانة ذنوب وهو يشهد على نفسه.. رعد فهم معنى كلام سديم ولا رد عليها..شاف الخيبة بعيونها اللي تنبض بكرهه وحقد عظيم عليه..حس بالحسرة بصوتها اللي انبح من صراخها عليه وهواشها معه..ماكان لها احد الا حنين..وهو أخذ حنين وقضى عليها..وهي قضت عليه ..وسديم بقت وحيدة ومقهورة على اختها..ماله نية يتركها بهذا المكان.. التفت على ابومتعب وضربه بلكمة على وجهه..ولكمة ثانية على بطنه..لانه متاكد من حقارة هالشخص اللي كان يدور على عريس لسديم يقدر من خلاله يكسب مبلغ مهما كان قدره..يفضل يزوجها لمساعد او يوسف..ولا يتركها معهم.. رعد بحقد\هذي دفعة على الحساب..وسواتك بحنين وكذبك والله إن ادفعك ثمنها غالي..انقلع قبل اقتلك وكلم الشيخ.. ابو متعب بخوف وقف وهو يرجف ودخل بيته وهم وراه.. سديم قدرت تسحب يدها المكدومة من قبضة يد رعد.. وابتعدت عنهم متوجهة لداخل البيت.. رعد\سديم..قدامك فرصة تخلصين نفسك..كلمي حنين اما تجيني او اجيها..ولك مني وعد شرف مايلمسك احد ولا يصيبك شر.. سديم بكره\أنت أكذب منافق بالعالم..صفات المنافقين فيك.. اذا حدث كذب وانت اكبر كذاب..اذا أؤتمن خان..والخيانة لعبتك.. اذا وعد أخلف وهذي ما احد يسبقك فيها..حسابك يكبر وديونك تكبر واوعدك تدفعها كلها..وانا وعودي مو وعود منافقين.. دخلت وتوجهت لغرفتها سكرت الباب اللي بدون قفل..وبدت تدور بمكانها ودموعها تحرق عيونها.. استقوي يا سديم مو وقت ضعف الحين..الكلب بيزوجك الاهبل اللي معه بياخذك والله اعلم وين بتروحين..تصرفي قبل تصير المصيبة..لازم اكلم حنين هي لازم تعرف ان رعد صحى وهو عندي وبيزوجني وياخذني معه..لازم احذر قلبي تنتبه على حالها منه.. ركعت على ركبها وخرجت الجوال الصغير القديم اللي هي مخبيته عن عمتها وفيه الشريحة وفيها رقم حنين اللي تتواصل معها فيه.. اتصلت على رقمها وقبل ترد حنين ..دخلت عمتها وهي تصرخ باعلى صوتها.. ام متعب\عساك المووت ياسديم عساك المووت..وش مسوية من هذا الي بيتزوجك وش بينك وبينه..رعد وش رجعه علينا..وينها اختك ماتضفه عنا هو وشره..جاي ياخذك لها تحسبين باخليكم تلعبون علي..تاخذون كل شي وتهجون.. بلحظات كانت عمتها تمسك شعرها وتضربها بقوة..وتشتمها وتلعنها هي وحنين..بس سديم كانت تنتظر اليوم اللي تقهر عمتها فيه وتتخلص منها..دفعت عمتها عنها بقوة وهي تصرخ عليها.. سديم بكره\خايفة من رعد صح؟؟خااافي انتي وزوجك والكلب ولدك..خافوا بس مو منه لا خافوا من حنين..انا اعرف وش تبين مني بس لو تموتين ما تاخذينه.. ام متعب\وليه نخاف خليها هي تخاف على نفسها..وزوجها اللي جاينا بشره شحنت قلبه علينا وجاي ياخذك زوجة لعمه تلعبون علي..تبين تعيشين انتي وهي بحلال اخوي وانا ابقى بدون شي.. سديم\حنيـــن بتاخذ حقي منكم كلكم..هي وعدتني وحنين ماتخلف وعدها..وحلال ابونا لو نحرقه ياحقيرة ماتاخذين منه قرش.. ام متعب بلحظتها عرفت انها خاسرة كل شي مابتاخذ من رعد ولا بتاخذ من سديم..مثل المجنونة صارت تضرب سديم..وتتوعد فيها بالويل..دخل زوجها وسحبها وهو يهاوشها ان رعد بيقتلهم لو يشوف سديم مضروبة.. ابو متعب\اتركيها الله ياخذك معها..بتبلشينا مع رعد خليه ياخذها خلاص صارت زوجة عمه الاهبل زوجتها له..نفتك منها ومن اختها ومن رعد .. سديم بقهر\زوجتني للاهبل الله ينتقم منك..لاشوري بيدك ولا انت ولي امري..بس والله ماتنام الليلة الا وانت تون من كسورك وقل ماقالته سديم.. التفتت عنهم وتاكدت ان حنين سمعت كل الكلام اللي صار من خلال الجوال لما ردت عليها..كانت تسمع صوت حنين وهي تصرخ باسمها وتترجاها تقفل على نفسها لحتى توصل لها.. رفعت الجوال على اذنها وهي تحاول تكتم عبرتها.. سديم بحب\يشهد الله اني احبك..وادري ان فراقنا بيطول دام رعد دخل حياتنا مرة ثانية..حلفتك بالله ياحنين لا تظهرين نفسك له ولا يدري وينك..انا قوية وباقدر اخلص نفسي منهم..اعرف وينك وانا باجيك.. قفلت الجوال وهي تسمع رجاوي حنين لها..وشالت الشريحة من الجوال وكسرته بعد ماضربته بالجدار ثلاث مرات تتاكد من انعدامه..كسرت الشريحة باصابعها وحطتها على شمعتها واشعلت فيها النار.. سديم بالم\والله ماتلقاها عن طريقي يارعــد..تحسبني باخونها مثل مالكل خانها؟؟!بدري على شواربك اخون اختي عشانك.. &&&&&&&&&&&&&&&&&&&&&&&&&&&&&&& قصايد اللي كانت تدور مثل المجنونة بالبيت..وهي تحاول توصل لسديم وماقدرت.. طلعت الدرج تركض..وهي تصرخ باسم سراب.. لقتها بغرفة عيالها تسولف معهم عن الهوشة اللي قاطعها عليهم فهد.. قرناس وللمرة الثالثة\من الناقة ومن البسوس؟؟انتي تقولين سوت حرب زمان وماتوا ناس كثير..هي الناقة راحت تحارب يعني. هيثم\كيف ناقة تحارب؟؟ماتقدر تشيل سيف؟؟سراب انتي تكذبين علينا.. سراب بصبر\راااسي بينفجر منكم..اعرف لما تسوون نفسكم مو فاهمين..البسوس هي انسانة حرمة ومعها ناقة اسمها سراب..ولما الملك قتل الناقة سراب..صارت حرب ليش يقتلها.. قرناس باهتمام\ليش قتلها طيب؟ سراب بطفش\بافتح لكم مسلسل يحكي لكم القصة كاملة..كله من ابن عباد الوسخ قال ناقة البسوس قال..هين يابن عباد.. هيثم\من ابن عباد؟ سراب\الرجال الي جاء ياخذ ايرم من عندنا هو ابن عباد.. قرناس\غريب اسمه بس فخم.. هيثم\ليش ما ضربتيه لما قال عنك ناقة؟؟ سراب بوعيد\من قالك ما باضربه بس مو اليوم..خلني اعطيه ضربة يستاهلها عاد عرفت من الثور اللي يبي يضايق جدي بشغله.. قرناس بمحارش\شكلك خفتي منه كنت اتجهز افزع معك ان ضربتيه بس انتي هربتي.. سراب\عيـــب اتهاوش مع رجال..بس الشغل موعيـــب.. هيثم\شفها تسلك لعمرها.. ضحك هو وقرناس عليها وهي مصدومة من كلامهم..بس معليه كنت ابيه ينصب بريال عشان انصب عليه..بس هو قال عني ناقة البسوس..صح مو سبب للنصب..بس بعد بانصب عليه.. دخلت عليهم قصايد وهي ترتجف وتوجهت لشنطة سفر كبيرة باحد الادراج فتحتها على الارض وشالت مجموعة من ملابسهم واغراضهم ورمتها بالشنطة بفوضوية غريبة على قصايد اللي كانت تحب الترتيب والتنظيم..كانت تتكلم مع سراب وهي تجهز الشنطة.. قصايد بتحذير\خذي العيال لبيت أختك سامية..وابقي معهم هناك..وإياك ثم إياك ياسراب يخرجون عيالي من بيت اختك لحتى انا اجيك واخذهم منك بيديني..حتى الحديقة العامة مايطلعون لها.. سراب وقفت مصدومة من حال قصايد..أول واخر مرة شافت قصايد بهذا الحال قبل كم شهر لما عرفت عن المريض اللي بالمستشفى انه صحى من غيبوبته..سراب مانسيت كم مرة حنين زارته بالمستشفى..مو زياره ودية بقدر ماكانت تزوره لحتى تتاكد من غيبوبته..وانه لازال غايب عن الدنيا.. ومثل هالتصرف كان تصرف قصايد بهذاك الوقت..شالت عيالها واخذتهم لبيت سامية اخت سراب..وظلت هناك لمدة شهرين لحتى تطمنت لشي سراب ماتعرفه..وبعدها رجعت لبيتها.. سراب تعرف ان قصايد تختار بيت اختها سامية لانه فاضي ومافيه ناس لسفر اختها مع زوجها للمغرب..ولان سامية اختها من ابوها ولو تخبي قصايد عيالها هناك ما احد ممكن يفكر في هذاك المكان..لإنعدام القرابة تقريبا بينهم.. تحركت سراب بالغرفة وشالت الاجهزة الالكترونية وحطتهم بالشنطة والاغراض الشخصية الضرورية لعيال قصايد.. وبالنسبة للجوالات شالت قصايد الشرائح منها وتخلصت منهم.. قربت من عيالها جلست على ركبتيها تراقب عيونهم المتعلقة فيها..عيونهم اللي تشع بخوف غريب ليش امهم القوية ترتجف يدينها..ليش صوتها مرعوب وهي الواثقة دائما..وضمتهم لها بقووة وهي تستنشق ريحتهم ..وباست يدينهم الصغار..أبعدتهم عنها بخفة وناظرت بعيونهم وهي تتكلم بحب حازم.. قصايد بحب\تعرفون اني احبكم ولا بيوم ممكن اتخلى عنكم..بس ان صار وافترقنا انتوا بتبقون مع بعض..لازم ترعون بعضكم وتنتبهون على بعض..وإياكم تسمحون لاي شخص..اي شخص يوهمكم اني تخليت عنكم او تركتكم..والحين روحوا مع سراب لبيت خالة سامية..ولا تكلمون اي احد غريب واسمعوا كلامها.. سحبتهم من يدينهم وقالت لسراب تستعجل..وصلتهم للسيارة وهي تسمع رجاويهم لها ونبرة صوتهم الخايفة..ولكن الوقت مايسمح لها تداريهم او توصلهم بنفسها للبيت..قررت تصم اذنها عن اصواتهم وتساؤلاتهم المحتارة كيف تتركهم بدونها.. دخلتهم السيارة وقفلت حزام الامان عليهم..وبهاللحظة خافت.. خافت تكون اخر مرة لها معهم هي تعرف وش ينتظرها ان لقاها رعد..تعرف إنه بينتقم منها وهي بتنتقم منه..هو حاقد وهي حاقدة..هو قاتل وهي قاتلة.. تعرف ومتاكدة إن مواجهتهم الدامية قبل سبع سنوات بتنعاد لما يتقابلون..هي مابتتنازل عن ثارها منه..وهو بالمثل.. بس نظرة عيالها الخايفين طعنتها الف طعنة..لمن بتتركهم..ما احد بيرعى اطفالها احسن منها..نزلت عينها ليدينهم المتماسكة مع بعض..وكانها تشوف يدها هي وسديم قبل يفترقون.. قبل يدخل رعد حياتهم ويفرقهم..وهذا رعد يبي يعيد جريمته ويفرق عيالها..بس مايقدر يفرقهم مايقدر.. ناظرت بعيونهم لاخر مرة قبل تتركهم..يتشابهون بالعيون الحادة والحواجب..احيان ترهبها نظراتهم الحادة الي تذكرها بنظراته.. باست عيونهم وشدت على يدينهم بيدين بعض ونزلت من السيارة.. ألتفتت على سراب\عيالي أمانتك..خالي راشد انا باتصرف معه.. سراب بخوف\وش بيصير معك؟؟انا حتى ما اعرف من اسال اذا صار لك شي ومارجعتي.. قصايد\ان صار لي شي بيكلمك محامي ويعلمك وش تسوين.. سراب تضم قصايد\تكفين ابعدي عن رعد..مدري وش علاقتك فيه..بس هو كان السبب الاول بتهريبك لعيالك قبل شهور..ومتاكدة هو السبب الحين.. قصايد تهز سراب بقوة\اياك تذكرين اسمه لا عندي ولا لايرم ولا لاحد..حتى ايرم لا تعرف وين عيالي..تحركي للسيارة بسرعة..لازم حتى انا اتحرك.. قفلت باب السيارة بعد سراب ولوحت بيدها لعيالها اللي بكوا من تجاهلها لدموعهم لاول مرة..وهم ينادونها تركب السيارة معهم.. الغصة تحرق صدرها تبي تطلع..بس هي مو متعودة تضعف.. سديم وعدت باسم حنين..وهي بتوفي بوعد سديم.. اتصلت للمرة العشرين على رقم سديم بس مغلق.. دخلت البيت وتوجهت لغرفتها اخذت شنطتها وشالت الخنجر من خزنة صغيرة بالغرفة..دخلته بشنطتها ولبست عبايتها وطرحتها.. ونزلت للسيارة اللي كانت طالبتها بحراسها وحارساتها.. فتح لها احد الحراس باب السيارة..وهي اشرت بيدها يتحركون.. هي معها حرس خاص باي وقت تستدعيهم يكونون تحت تصرفها..وحارستين تثق فيهم وبأمانتهم..هي مابتسلم نفسها للظروف لازم تكون محتاطة.. تحركت السيارتين للموقع إللي ذكرته لهم.. وفتحت جوالها تناظر صورة سديم حبيبتها واول طعنة من رعد كانت حب سديم له وثقتها فيه..انكسرت سديم من حقد رعد وهي كانت باول مراهقتها..وثقت انه زوج اختها وحبيبها..ووعدها ياخذها معه ومع حنين ورسم لها حياة جميلة..بس هو اهداهم وهم جميل وبلحظات سلبه منهم بكل قسوة.. اهتز الجوال بيدها برقم سديم وهي ردت بلهفة وشوق..بتقول لسديم عن رعد وبتخليها تترك البيت وتحدد مكان يلتقون فيه وتاخذها.. بس صدمتها بصراخ عمتها على سديم وضربها لها جمد الدم بعروقها..تسمع صوت بكاها وصراخها..تسمع سديم توعد عمتها وزوجها بانتقام حنين..واللي نزع شهقة من صدرها هو ان زوج عمتها زوج سديم لعم رعد الاهبل.. سديم طفلتي تتزوج؟؟! من قريب رعد ..عـــم رعد المجنون اللي تعرفه من كلام ايرم عنه.. وعن الحادث اللي افقده عقله ورجعه طفل..طفل بجسد رجل.. اختها سديم مع رجال والمصيبة مو عاقل.. حن جربنا عاقلهم ياسديم وطلع ابليس فكيف بمجنونهم.. قصايد بوجع\سديم ياروحي لا تروحين معهم قفلي على نفسك اهربي بس لا تروحين معهم تكفين قولي لرعد اني جاية..قولي له ينتظرني هو يبيني مايبيك.. سديم بحب\يشهد الله اني احبك..وادري ان فراقنا بيطول دام رعد دخل حياتنا مرة ثانية..حلفتك بالله ياحنين لا تظهرين نفسك له ولا يدري وينك..انا قوية وباقدر اخلص نفسي منهم..اعرف وينك وانا باجيك.. كلام سديم لها زلزلها وتركها تصرخ باسمها بدون شعور وتترجاها ترد عليها..رجعت تتصل على نفس الرقم بس بدون اجابة.. قصايد بدون شعور\والله باجيك انا والله..الا انتي ياسديم مالي حيلة فيك..ماعاد لي صبر منك..والله ان اذبحه هو وعمه ان لمسك او اوجعك..سديم ياروحي ياسديييم.. وصلت وهي تدري إنها فقدت سديم وأن رعد اخذها معهم.. بعد ما اكد لها لشخص اللي كان يوصل لسديم كل شي ترسله حنين.. وصلت لبيت طفولتها واجمل ايام حياتها قبل مايدخلها رعد.. بيت جدتها اللي قضت عمرها معها وتحت جناحها..بزيارات ابوها وزوجاته المختلفات..مع حبيبتها سديم..هالبيت كان جنـــة رغم ان مافيه ام ولا اب..لكن فيه جدة حنونة طيبة بحنيتها أكملت كل نقصان بحياة حنين وسديم..كان لهم اب يعشقهــم ومايتحمل فراقهم بس تعلقهم بامه اجبره يخليهم في بيتها وهو مع حريمه..بس ماسلى عنهم ولا نساهم كانوا مدلالات يعيشون في بذخ رغم قلة اهتمامهم بالماديات والشكليات..شخصياتهم بعيدة جدا عن السطحية.. جدتهم زارعة فيهم قيم وقناعة جميــلة ونادرة..مكتفين في بعض وفي دراسة وصديقات متواضعات..لهم احلام بسيطة وطموحات غير متكلفة.. كانت بتمد يدها وتضرب الباب..لكن تراجعت لان مالها حبيب في هالبيت يفتح لها مالها الا اعداء لازم تهاجمهم وتنفذ وعد سديم اللي وعدت باسمها تنتقم لها منهم بنفس الليلة الي خانوها وسلموها لرعد.. ياطارق الباب رفقاً حين تطرقه.. فإنه لم يعد في الدار أصحاب.. أرحم يديك فما في الدار من أحد.. لا ترجوا رداً فأهل الود قد رحلوا.. ولترحم الدار لا توقظ مواجعها.. للدور روح كما للناس أرواح .. &&&&&&&&&&&&&&&&&&&&&& أيــن تذهب متاعبنا وأشيائنا الحزينة عندما ننام.. أتنام معنا أم تنتظرنا حتى نصحو فتحتلنا من جديد؟؟! حاولت تفتح عيونها المتورمة من الصياح..تحاول تسحب حالها من الإعياء إللي أحتضنها .. تتمنى كل شي كذب رجوع رعد ومسرحيته الهزلية وزواجها ..بس لما سمعت همس مساعد يسال يوسف اذا صحت فضلت ماتفتح عيونها وتبقى على حالها.. تحس بشي صلب تحت راسها وهي متسطحة على ظهرها..وتحس بالحركة الخفيفة للسيارة اللي باقي ماوصلت لوجهتها.. فقدت كامل قوتها ومقاومتها حاولت تقاومهم كلهم بس تغلبوا عليها.. بعد ماطلعت من بيت جدتها كانوا الثلاثة ينتظرونها عند السيارة ماسمحت لزوج عمتها يلمسها ماسمحت لعمتها تسحبها وتخرجها من البيت ..هي ماسمحت لنفسها تخرج من بيتها ..اللي باسمها وهي تنسحب وتنرمي..فضلت تطلع وهي تمشي بحالها واثقة بنفسها بكبريائها .. كتمت خوفها وصدمتها وقهرها..توجهت للسيارة وركبت ورى السائق وقفلت الباب.. شافت رعد يركب بمكان السائق ومساعد جنبه..اما المجنون فهو جلس جنبها..وبقى لوقت طويل مركز عيونه عليها ولما يمد يده يبي يشيل الغطاء عنها كانت تضربه ويتراجع..بس بعد وقت يعيد نفس الحركة..حست بيده تلمس كتفها المكدوم من ضرب عمتها لها..شهقت بوجع وصرخت فيه تبيه يبتعد عنها.. سديم بوجع\لا تلمسنـــي يامجنون يا اهبل.. التفت مساعد عليهم وسحب يوسف من جيب ثوبه وصرخ فيه.. مساعد بغضب\ ثلاث مرات من مشينا وانا اقولك لا تلمسها خلها بحالها.. يوسف بردة فعل مفاجئة له ولهم لكم مساعد على وجهه.. وهذا الشيء سبب صدمة لمساعد ورعد ولسديم اللي خافت منه ومن عنفه.. ولصقت في الباب الي جنبها.. قطع صدمتهم صوت رعد لما ضحك بخفة\والله يايوسف ما انت هين..كفو برد قلبي فيه..باقي له عندي لكمة مسجلها على الحساب.. سديم حست نفسها مو قادرة تسمع صوت رعد..فكيف لما سمعت ضحكته بعد كل اللي سواه فيها..له عين يضحك ويمزح ..حست بدماغها يحترق من الغضب ومن القهر والعصبية..تحركت بسرعة وبدون تفكير ومدت يدينها ولفتهم حوالين رقبة رعد وهو يسوق..ولصقت راسه على مقعد السائق..وهي تبكي وتصرخ بكلمات تتمنى موته فيهم.. سديم بكره\مووت يارعد موت لا تضحك..انت تستاهل الموت.. رعد شال يدينه من على مقود السيارة وحاول يفك يدينها عن رقبته بس هي كانت لامتها عليه بقوة تبي تخنقه ويموت..هي فاجئته بهجومها عليه ..من ورى ومثبته بالمقعد رغم قصرها وضعف حالها بس مكانها الخلفي مقوي حركتها.. مساعد مسك مقود السيارة وهو يصرخ على سديم تترك رعد وبنفس الوقت يقول ليوسف يسحبها ويبعدها عنه.. تتذكر ان يوسف لم يدينه حوالينها وسحبها من رعد بس هالحركة تسببت انها تكتم رعد اكثر وصارت قوة سديم وقوة يوسف تشد عليه..بعدها ماتذكر ايش الي صار بالضبط.. قبل ماتفقد وعيها بالكامل تذكر ان رعد فتح الباب الي بجنبها وكان بيطلعها من السيارة.. ولكن مساعد منعه ويوسف حضنها بقوة..يمكن فقدت وعيها بهالشكل بسبب يدين يوسف اللي ضمتها بقوة وكتمت عنها التنفس.. إللي ماتعرفه سديم \\ رعد اللي يرتجف من العصيبة ويصرخ على مساعد يبتعد عن باب السيارة المقفول على سديم ويوسف لانه يبي يربط يدين سديم بشماغه.. مساعد بعصبية\ماهي بهيمة تربطها..وبعدين وش متوقع من وحدة عاقلة اجبرتها تتزوج بمجنون..ولك ماضي الله اعلم وش مسوي فيها وفي اختها..وبقوة عين تضحك وهي بقمة قهرها.. رعــد\تبي تقتلني من وراي..تبي تطعني بظهري وتنتقم مني.. مساعد\اجل تبيها تواجهك وجه لوجه وهي ماتجي نصك.. رعد انت وش مسوي فيها وفي اختها..قالت لك اختها خلعتك وهي من اول ماشافتك وهي تحاول تقتلك وتتوعدك بالموت.. وش انت مسوي يا اخوي في هالبنات..ترى مافيه اقسى من قلب البنت ان حقدت..والبنت ماهي حاقدة وبس إلا ناوية تقتلك.. اجل وش بتسوي فيك اختها لو تقابلك..؟ رعد صد عن مساعد ولا رد عليه..وهو يحترق بماضي جمعهم.. بالنسبة لسديم هو ما اذاها الا لما خان وعده لها وفرقها عن اختها.. اختها الي بسبب حركة سديم اليوم جددت فيه حقده عليها..وعلى غدرها له .. ركب مساعد السيارة والتفت على سديم يبي يحذرها من تصرفاتها الغير مسئولة..بس كانت نايمة بشكل غريب بحضن يوسف.. خاف يكون صار لها شي او يوسف أذاها من غير مايعرف.. مد يده بيشيل غطاها عن وجهها بس يوسف منعه.. وحضنها له اكثر..وادرك مساعد ان يوسف بيعامل سديم بنفس التملك الي يعامل فيه ايرم.. مساعد\يوسف بس ابي اشوف هي بخير.. يوسف برفض\هي بخير نايمة انتوا اتعبتوها.. مساعد\طيب خفف ضغطك عليها بتقتلها انت وعضلاتك.. طنشه يوسف وبقى حاضنها ولا سمح لمساعد يلمسها او يتاكد اذا كانت بخير..فتح رعد الباب وقبل يشغل السيارة التفتت على يوسف وسديم..وشاف نفس المنظر الي شافه مساعد.. رعــد ببرود\حية او ماتت يايوسف؟ يوسف\لا ماتموت لعبتي.. رعد\زين أجل انتبه لا تموت لعبتك.. &&&&&&&&&&&&&&&&&&&&&& حست باصابع تتلمس خصلات شعرها ونفس الاصابع تمسح دموعها الي تنزل من عيونها المقفلة..وبعدها سمعت همس حنون يقول لها..أنتي حلوة.. فتحت عيونها والتقت عيونها بعيون يوسف إلي كان وجهه قريب من وجهها مــرة ..تشوف منابت عارضه ورموش عيونه.. خافت لانها اول مرة يقترب منها رجال بهالقرب.. وانرعبت لما ادركت ان راسها على فخذ يوسف ونصف جسمها بحضنه..واحد يدينه على شعرها والثانية على خصرها.. تحركت بسرعة ورفعت نفسها من عليه وهي تضرب يدينه.. سديم بتعب\ابـــعد يا مجنون وش تسوي؟! يوسف بابتسامة سعيدة\وصلنا بيتنا..تعالي تشوفين وين بتنامين..خلاص ايرم مابيها بانام معك.. سديم بكره\باقتلللك تفهم والله باقتلك..ابعد عني لا اجرم فيك.. مساعد يفتح بابها\انزلي بتبقين مع بنت عمي لا تخافين.. يوسف بقهر\انت انقلع خذ حقتك هذي حقتي.. مساعد بضيق\يوسف الله يحفظك لا تزيدها الف مرة كنا بنموت بالطريق..عدي هالليلة بخير.. سديم تنزل من السيارة بسرعة لما شافت يوسف يتوجه لجهتها يبي ينزل من غير مايفكر ينزل من الباب الي بجهته.. وقف جنبها ومسك كفها بقوة ورص عليها..ويناظر مساعد بغضب.. يوسف\هذي لعبتي انا اشتريتها..خل رعد يشتري لك.. سحبها وراه وهو يمشي بعصبية وهي تتحرك غصب عنها بسبب قوته وحركته السريعة..ألتفتت على رعد الي بقى واقف جنب مساعد ويناظرهم.. سديم تبكي\رعــد والله باقلته ولا تلومني..والله باقتله لا تخليني معه..انت مجرب حقد حنين لا تشوف حقدي بعمك..خلصني من المجنون..رعــد لا تخليني معه.. وقف يوسف فجأة والتفت على سديم وصار يهزها مثل الدمية بيده..تملكته حاله عصبيه قوية.. يوسف بغضب يصرخ فيها\أنا مو مجنون..مو مجنون..انتي حقتي انا مو حقت رعد..لعبتــي انتي لعبتي. بلحظات وصل لهم رعد ومساعد لما شافوها جلست على الارض تنتحب بخوف وترتجف من هزه القوي لها.. وقف بينهم رعد وسحب يوسف من سديم..وشاله على كتفه رغم غضب يوسف ومقاومته الكبيرة للتخلص من قيد رعد له.. انتبه على سعود وفهد وجده مساعد لما خرجوا من المجلس على صوت سديم وصراخ يوسف.. فهد لحق رعد وحاول يسيطر على يوسف معه وهو مو فاهم وش الموضوع ومن البنت الي جالسة بالارض تبكي ومساعد واقف عندها بعد ماخلصوها من يدين يوسف.. مساعد اللي يحس الدنيا ضايقة فيه من حال هالبنت اللي مبهذلها رعد..والمصيبة مزوجها ليوسف إللي قبل حادثه شخصيته عصبيه وجاف صحراوي للصمييم..والحين بعد حادثه والاضطراب اللي صاير معه كيف بيتعامل مع هالبنت..بشوي بس كان بيفكك عظامها من كثر هزه لها..اجل لو ضربها وش بيصير.. ناظر لسديم اللي لامة يدينها على ركبها وتبكي بخوف..قلبه يوجعه يتملكه حنان او يمكن شفقة عليها..او يمكن تذكره بالمستبدة ايرم.. قرب منها خطوتين صغيرة يحاول يطمنها ويريحها.. مساعد بمواساة\بتكونين بخيرلا تخافين..يوسف مو عنيف..بس اليوم انضغط كثير ومر بمواقف صعبة نفس الي مريتي فيها.. سديم ماردت عليه وهي ترتجف ومرعوبة..كيف بتعيش مع هالانسان المريض المجنون..بلحظات كانت بتموت تحس بيدينها مخلوعة من الكتف..شهقاتها ونحيبها مو قادرة تسيطر عليه.. هذا الي اسمه مساعد واقف يواسيني على اساس يبي يطمني ان مجنونهم مو كذا دايم..كنت باموت بين يدينه..المجنون يبقى مجنون وماهو مسئول عن تصرفاته.. سمعت صوت عصا تضرب بالارض وخطوات تقترب منهم.. وصوت رجال كبير بالسن وغاضب يهاوش.. الجد مساعد\من هذي؟؟وش مسوي فيها المجنون؟؟هذي والله انها مصيبة رعد..وش اخوك مسوي؟ سعود بصدمة\والله يبه مدري وش العلم..هذاني كنت معك بالمجلس..اسال مساعد.. مساعد بضيق\لا تسالني ولا يسالني..رعــد المجنون ساعي بانتقامه واول من انتقم منه بنت مالها حيل ولا قوة..لا معها ولده ولا معها شي له.. سعود برعب\خطفـــها؟؟! رعـد\لا ماخطفتها زوجتها عمي يوسف..هلها راضين وموافقين.. الجد مساعد بفزع\اعقب ياوجهه..وش تقول يا اسود الوجه؟؟ مزوج عمك؟! وانت تعرف حاله وعقله؟؟ رعد ببرود\ ايه زوجته باللي تستاهله ويستاهلها.. الجد بعصبية\عنبوك صاحي انت واعي وش تقول..عمك فاقد عقله مابه عقل عشان تزوجه..وش ذا الحال الردي الي عليها..هذي ماهي دخلة عروس هذي كنها بجنازة.. من اهلها من خوالها من هالبنت الي زوجتها عمك؟؟ سديم بقهر\تسال عن هلي وخوالي..وكأن لك حق تسال ؟؟خايف لا يكون زوجة الاهبل حرمة ماهي اجودية؟؟ أنا بنت ظافر العبدالله إللي نشف ريق ولدكم رعد عشان ياخذ اختي حنين..وهو ماهو كفو لها.. خوالي ال ماجد ولا يغركم من ال ماجد.. فهد\منهو..انتي بنت مــن؟؟!رعـــد هذي من بنته.؟؟ سعــود بصمدة\أنتي بنت ظافر العبدالله؟! رعــد\إيه هي بنته.. الجد مساعد وهو يتوعد رعد\والله والنعم فيك وفي هلك وخوالك..بس يابنتي وش ذا الحال اللي انتي فيه؟؟.. سديم بانهيار\من عيالك ليتك لا خلفت ولا ربيت.. خذوني بالغصيبة من بيت ابوي زوجوني المجنون غصب عني وخذوني خطيفة..بس انا بابطل الزواج وباشتكيهم..بافضحكم وباخلع ولدك مثل ما اختي خلعت رعد.. رعــد بغضب يصرخ عليها\اقطعـــي ولا كلمة يا سديم..تراني باقي سموح معك.. الجد بعصبية\الا اقطع انت ولا كلمة..وتهددها وهي حرمة ولدي وفي بيتي..وهي بنت ظافر العبدالله..مبهذل بنت الرجال بذا الحال ومزوجها لعمك وهو ماهو بعاقل..ماانا قلت اترك ذا العرب بحالهم..انت متى بيطيح اللي براسك؟؟ فهد بعصبية\وش موصلك لبنته..وليه جايبها لبيتنا وحياتنا.. واختها انت تزوجت إختها؟! سديم\إيــه تزوج اختي بس هي خلعته.. قرب منها رعد اللي كان حالف لها أن ما سكتت يتصرف معها.. بس عصاة الجد مساعد انغرزت بكتفه وهو يبعده عنها.. الجد مساعد\وإللي رفعها سبع ياهزيم إن قربت منها او لمستها.. ان تطلع الليلة جنازة..إنت مابقى فيك وعي..مابقى لحقدك حدود.. سعــود\ياجد اذكر الله..البنت مالنا فيها..وباين انها ماتبي يوسف.. بكرة ان الله اراد نروح انا واياك ويوسف للمحكمة ونبطل الزواج.. رعـــد بجمود\سديم بتبقى زوجة يوسف لحتى القى ولدي..اللي خطفته اختها..هذا الموضوع مابيحكم فيه غيري يا ابوصالح.. فهــد بعصبية\والله ان تبطي..الليلة تطلع من البيت..والليلة نروح وناخذ ولدك وين ماكان..مابقى الا بنت ظافر ترعى ولدنا.. سديم بشماته\والله ان تحفرون الارض وماتلقونها إلا ان هي تبيكم تلقونها..وبنت ظافر جميلها مغطيكم غصب عنكم.. رعــد اللي يعرف عصبية فهد وتهوره..ويعرف حقد سديم اللي يمدها بقوة جسدية كبيرة..يدري انها بتستفزه وتستفز فهد وكل الموجودين بكلامها..كان لازم يبعدها عنه وعنهم.. ألتفت لجهة بيت جده وصرخ بصوته ينادي على ايرم.. ايرم اللي كانت واقفة عند مدخل البيت من سمعت صراخ يوسف وصراخ البنت الغريبة وهي ترتجف بخوف لما سمعت رعد ينادي باسمها لفت جلالها عليها.. ونزلته على وجهها خرجت لهم مرعوبة من حالهم.. شافتهم كيف واقفين حوالين بنت صغيرة وكل شخص يرفع صوته على الثاني..ولا منتبهين لحالة البنت المسكينة..وكانها غير موجودة..ورفعت عيونها لمساعد إللي كان واقف معهم بس مارفع عينه لها واللي اوجعها لما صد بظهره لجهتها..وكانه يذكرها بحكمها عليه..وينفذ لها رغبتها..موجــع هذا الشعور يقهر..تصد عني يا مساعد من غير حق ..انا عفيت من زمان يامساعد..بس انت عاقبتني والى اليوم ماحنيت..وسواتك قبل سنتين كانت الصفعة لي.. رعد بحزم\تعالي خذيها داخل البيت..وخلي بالك منها يا ايرم.. ماناقشته ولا سالت هذي من؟..ولا نزلت لمستوى البنت الصغيرة كتنفيذ لامر رعد الحازم..لا هي انحنت لها وضمتها بدون ماتعرف وش مصيبتها ومن تكون لهم..الظلم الي شافته بوقفتهم حوالينها..والقهر الي سمعته بصوت البنت ونحيبها..وضح لها من الجاني ومن المجني عليه..تمتمت بخاطرها بقهر..شكل هذي ضحية جديدة لكم يا المساعد.. حست بانتفاضة الغريبة بين يدينها وكانها مرعوبة..ضمتها بقوة وهي تهمس لها بكلمات تطمنها فيها من شي هي ماتعرفه.. ايرم بهدؤ\لا تخافين قومي معي..اوعدك محد يقرب لك .. سديم الي ماعادت تحس بعظامها ولا بقوتها..استكانت للحضن الصغير اللي ضمها ولليدين الرقيقة الي احتوتها.. والهمس المواسي الي يهمس لها بالراحة..أمان هذا هو الشعور الوحيد اللي ممكن تحسه سديم رغم ضآلة الجسم اللي يضمها بس حست بامان غريب..وكأن فيه من يحس فيها وبخوفها ووجعها.. وكأنها مو لحالها بمواجهة وحوش ماتعرف عددهم.. حركت يدينها المتالمة من مفاصلها ولمتهم حوالين ايرم..وضمت نفسها لها وكانها تبي تتخبى بداخلها.. وقفت ايرم وهي تساعدها توقف معها ووجهت خطواتها باتجاه البيت..وسمعت رعد يحذر البنت ( سديم ) رعـد\سديـــم..وعــد إن رجعت حنيــــن أحررك من يوسف.. سديم\وعودك وعود المنافقين يارعد.. كملت تمشي مع إيرم مجبورة تسند نفسها عليها..الليلة بتستسلم للاوجاع الجسدية..أكتفت من المواجهة الغير عادلة معهم.. جسمها مكدوم من قبضات رعد على ذراعها وبعدها يوسف وجنونه.. محتاجة تدخل بغيبوبة..بس تخاف تغمض عيونها ويهاجمها المجنون.. الجد مساعد\ابو صالح.. وش مسوين سود الله وجيهكم من عيال؟!وش مسوين في بنت الاصل بنت العرب؟؟رعــد لا بارك الله بالعدو وش الي ضرب عقلك؟؟وانت يامساعد كيف خليته يسوي سواته؟؟الله يسود وجيهكم.. مساعد بقهر\ألحين صرت تشوف مساعد وتعاتبه وتسود وجهه.. لا والله كثر الله خيرك..البنت عندك بحلها ورباطها..والولد ولدك ولاني اللي باحمل ذنب ماهو بذنبي مرة ثانية.. يكفيني ذنب حملته قبل سبع سنين ومالقيت الا طعن بالظهر.. أستودعتكم الله..وقبل امشي ترى هالبنت بذمتك يامساعد الكبير.. وانا امام ربي اخلي مسئوليتي من مصيرها معكم ومع مجنونكم.. مشى عنهم وتركهم وراه..بصدمة الجد مساعد إللي غلبه الشوق والحنين للحفيد الغالي..لاول مرة يقفي عنه وهو موجعه بالكلام.. وانت صادق يامساعد انت حملت ذنب ماهو بذنبك..هو ذنبي انا جريمتي انا..حتى لما عفت عني ايرم ..أنا عن نفسي ماعفيت..شوقي لك اهلكني فاقدك وانت حي..فكيف الوجع لو انت ميت..كل ما اشوف ايرم ينغرس بقلبي الف طعنة لاني حسيت باحساسها ووجعها..ادري انها تكابر وتقول أزمة وعديتها بس أنا اعرف وش صار فيها وكنت باخسرها..ماسامحت نفسي ورجعتك لي.. عساني ما اذوق حزنك يامساعد..عساني ما افقدك ياالغالي.. أنت كنت تحس بذا الوجع اللي احسه وانا اشوفك صاد عني ومقفي..أوجعك صدي عنك وألحين عني صديت.. رعــد إللي أنتبه لرجفة جده وعصاه اللي مالت..قرب منه بسرعة وسنده..عرف ان كلام مساعد وانسحابه بجمود صدم جده.. هو رعد انصدم من رد مساعد..اللي كان ينتهز الفرص عشان يتقابل مع جده او يجبره يوجه الكلام له..كيف انسحب بدون اهتمام.. أشر بيده لفهد وسعود يسكتون عن موضوع سديم..ويتركونه لحاله مع جده.. رعـد\فهد روح ليوسف طلعه معك فوق ينام بجناحك..إياك يغيب عنك او تخليه يروح لبيت جدي.. ضم جده له وهمس له\عطه العذر ذا المــرة وإن عادها جبته مع شنبه وسدحته عند رجلك.. الجد بغبنة\ما الومه..أنا اللي أخطيت وما تعذب الا هو وايرم..تحسبني لاهي عنه ولا ادري وش صار معه..والكلام الي انقال له عن حكم ايرم عليه.. هو صادق شال حكم جاير ماهو بحكمه.. رعـد بفخر\ ماينقال عنه الا وفي وكفو غللي رضى بحكم جده وتحمل حموله.. الجد بتعب\خلني مع سعود وانت ابعد بشرك انت واخوانك عن بنات ظافر.. والي تزوجتها منهم ماخذت ولدك وخلعتك الا وانت ماخليت لها عقل.. رعــد\والله ان اخلع عظامها ان كانت خالعة صدق..ويكفيها سبع سنين عاشتها بانتصارها.. &&&&&&&&&&&&&&&&&&&&&&&&&&&& يا خيــــول الهــجر عودي للصهيل ... جالسة بغرفة سديم بين يدينها الجوال اللي كسرته سديم .. تناظر كل زاوية وكل مكان..تراقب العاصفة اللي افتعلتها سديم عشان تخفي اي دليل يقودهم لحنين.. تلمس فراشها الابيض اللون المعشوق لقلب سديم..كتبها وحاسوبها واقلام ودفاتر مفتوحة على الدسك.. بالطرف الثاني ثلاث رفوف مليانة بزجاجات الشموع الي كانت تعشق سديم تصنعهم من اي شي يطيح بيدها..ابتسمت وهي تتذكر كلام سديم لما تقول انا احب اعادة تدوير كل شي.. اغلب الهدايا الي كانت ترسلهم حنين لها موزعتهم سديم بالغرفة بفوضوية لانها خايفة من عمتها تشك انها من حنين.. فكانت توهمهم انها اشياء ماتهمها.. بهذي الغرفة ضميتك اخر مرة ياروحي..ووعدتك ارجع اخذك.. بهالغرفة توادعنا..كنتي تمسحين دموعي المتحجرة بعيوني..وانا امسح دموعك السايلة على خدك..فديت يدينك الصغار الحلوات..تركتك مع عجوز النار وزوجها..وولدها النذل الي باطلع روحه بيديني.. وقفت بمكانها وبدت تدور وهي تنادي ربي وتترجاه.. قصايد\يارب منعت نفسي عنها من سنين عشان احميها.. علقتها بوعود اني بارجع اخذها معي..ياربي ..مو مجنون مايكون مصير اختي مجنون يعذبها.. والله اني اغليتها على عاقلين وعيال شيوخ قلت مايستاهلون ظفرها..والحين ياخذها مجنون من طرف رعــــد..رعد اللي بس لو ينذكر اسمه احس بالنار تحرقني.. أنهارت اعصابها وكان لازم تبدأ تنتقم منهم..وأولهم عمتها وزوجها..خرجت من الغرفة وتوجهت للمجلس الخارجي الي كانت حابسة فيه عمتها وزوجها.. وأمرت حرسها يخرجون اولادهم الباقين بالشارع ويقفلون الباب.. قربت من زوج عمتها وجلست قدامه بتكبر مكتسب مع السنين.. حنيـن\ إنت إللي زوجت سديم لواحد مجنون؟! ابو متعب بخوف\رعـــد أجبرني..إنتي ماشفتي كيف دخل علينا وهو يسحب سديم وراه..كان مبهذلها وباين انه ضاربها.. كلم الشيخ وأجبرني ازوجها لعمه المجنون.. حنيــن بعدم اهتمام\إنت وقعت أو بصمت؟! ابو متعب\وقعت.. حنين\باي يد اليمين أو الشمال؟ ابو متعب يجاريها\اليميــن.. وقفت بخفة وناظرت حرسها من ورى لثمتها.. وعطتهم أمر مباشر.. حنيـن بحقد\إكســروا يدينه الثنتين.. صمـــت إذنها عن رجاويه لها تسامحه وانه ماكان بيزوج سديم لاحد بس مجبور من رعد والرجال الي كانوا معه.. توجهت لعمتها اللي كانت مرعووبة من هذي الانسانة القوية القاسية اللي دخلت عليهم البيت فجاءة بعد ما كسروا حرسها ابواب البيت.. مو معقول هذي حنين اللي طلعت من البيت شبه حية..بعد الموت الي شافته منها ومن زوجها ومن عمها مبارك.. ماكانت تقدر تتحرك بس هي كانت شاكة ان سديم هي اللي هربتها لرعــد وانقذتها منهم..بس العمة مصدومة مدام حنين هربت مع رعد طول هالسنين ليش توهم يرجعون اثنينهم يبون سديم.. هي تدري ان رعد كان بغيبوبة وهم ما تركوا مكان مابحثوا عنها فيه.. انتبهت على حارسات حنين الحريم يسحبونها مرة ثانية لداخل البيت..وبدت تصرخ بخوف وتبكي وهي تسمع صراخ زوجها المتالم من الحرس الي كانوا ينفذون امر حنين.. طاحت بالارض بعد مارموها بامر حنين.. حنين بكره\إرفعي راسك يامعتوهة وناظريني.. نزلت لثامها وعينها بعين عمتها..حست بالفرح بالانتصار وهي تشوف الخوف والرعب بعيون عمتها..شافت الصدمة بعيونها لجمال حنين وأناقتها..الجمال الي حاولوا يطمسونه بالماضي.. حنيــن ببرود\بأسالك أسئلة وانتي مثل الحمارة جاوبي عليها.. ميـــن كان يسدد فاتورة هالبيت الكبير إللي احتليتيه انتي وزوجك والحثالة اللي انتجتوها؟؟ ام متعب بخوف\ابو متعب ومتعب.. حنيــن بإحتقار\المسترجلين هذولاء الفاشلين معقولة لهم قدرة يسددون فواتير ؟؟! لا يامعتوهة فواتير الكهرباء والماء لعيون سديم أنا اسددها..عشان أختي لا تضماء ولا تنام بالظلام..الخبز إللي يوصل البيت من المخابز لانها تحبه طازج يوصلها..مو لانكم عملاء مميزون مثل ما اوهمتكم..الجوائز اللي يربحونها عيالك المعتوهين مو ضربة حظ ودعاويك لهم ياعار الامهات انتي..لا أنا اللي ارسل لهم الجوائز والهيهم باشياء كثير عشان تبقى سديم مرتاحة..ولدك متعب الي انتي مفتخرة فيه وبشغله..أنا اللي فتحت شغله ورميته بالجنوب واشغلته هناك عشان لا يفكر بسديم ويبعد عنها..ومع الفجر بكرة بيصحى وهو مفلــــس ومديون..وبيرجع هنا يدور سديم يبي حلالها..بس سديم صارت مع زوجها الحين..وانتي وزوجك بتتحملون جنون متعب بس مو قبل لا تتحملون جنوني أنا.. انتي من الليلة مالك بيت ولا لك مكان تعيشين فيه..سديم كانت رحمة لكم من ربي وبسببها كان لك بيت مثل القصر ولعيالك حياة مايحلمون فيها ولولدك المعتوه شركة وهمية انا صنعتها له وشركاء وهميين انا بكرة اخفيهم..صرتوا مشردين لانكم فرطتوا في سديم.. وقفت قصايد ومشت بخطوات واثقة الى المكان اللي جالسة فيه عمتها..مسكت شعرها بيدها وصرخت عليها.. قصايد بحقد\إنتي كذا سويتي بشعر سديم صح؟إنتي بيدينك القذرة ضربتي سديم الناعمة الدلوعة..إنتي ياحثالة اللي حاول أبوي يخليك إنسانة راقية انتي واخوك الحقير..غدرتوا فيه..وبعدها فيني انا.. ولا نسيت سواياك فيني ..والحين تكملين على سديم.. ناظرت حارساتها وأمرتهم يضربون عمتها ..تبي تسمع وجعها مثل ماسمعت وجع سديم وبكاها.. قالت لهم يسحبونها بعد ماضربوها ويخرجونها الشارع..سحبوها بامر حنين وهي تمشي وراهم تبي ترضي نفسها وهي تشوفهم مرميين بالشارع.. رموها الحارسات مع عيالها وزوجها اللي كان يصرخ من الوجع والكسور اللي بيدينه.. سديم بانتصار\هذا حسابي انا معكم..وباقي ما اكتمل..بكرة لما يجي حساب رعــد اتمنى أكون حاضرة ..اليوم صرتوا مشردين ماتسوون قرش واحد..رجعتوا حثالة لمعدنكم الاصلي.. ام متعب بقهر\هذا بيت امي..مو بيتك ولا بيت ابوك تخرجيني منه.. قصايــد بانتقام\لا يا تافهة هذا البيت باسم سديم..كان باسم حنين وسديم وانا تنازلت بحقي فيه لسديم..إنتوا كنتوا في بيت سديم وحلالها..أمك اللي حلفت على ابوي مايكتبه لها او بتطلع منه..وهو عشان ماتتركنا امك نفذ لها طلبها.. ام متعب بوعيــد\والله يا حنين لأندمك على كل شي سويتيه.. قصايد بتمني\ياليـــت تقدرين انا ابيكم ترجعون تتعرضون لي..تعالوا بكل ما معكم من اعوانكم ومن غدركم..انا اليوم مستعــدة لكم أنتـــظركم تعالوا لأني باقي مابديت فيكم .. دخلت وحرسها قفلوا البوابة ووامرتهم يطلبون عامل صيانة يغير الاقفال بعد ما كسروها الحرس ودخلوا بالقوة.. توجهت لغرفة جدتها..الانسانة العظيمة اللي مع الاسف ماكانت لا ام امها ولا ام ابوها..كانت ام عمتها وام عمها..اللي حقدهم على ابوها اعمى بصرهم وبصيرتهم..كانت الوحيدة اللي قدر يأمن بناته عندها من طفولتهم..تعلقوا فيها بطيبتها بريحة الحناء بكفوفها..بجدايل شعرها الابيض..ولما رجع ياخذهم بعد وفاة امهم بمرضها ماقدروا بناته يعيشون بدونها..فرجعهم لها لعمته حرمة ابوه إللي احتوته واحتوت بناته بقلبها الطيب..اللي ماورثته لا بنتها ولا ولدها..نامت على فراش جدتها وبيدها جلال صلاتها..ضمته لها وهي تناجيها.. قصايــد بحنين\حنيـــت لك يمه عذوب..حنيت لصوتك ..لدعاويك الطيبة..حنيت لريحة الحناء بكفوفك..سامحيني مارجعت لك بعد ماهربت..ماهو نكران لك بس ماكنت قوية ارجع..ماقدرت ارجع كان لازم ارعى عيالي واحميهم..رجوعي كان بيتسبب بموتي وموتهم ويمكن نهاية سديم..والله حنيـــت يمه.. فتحت درج السرير الصغير..ناوية تاخذ معها شي من اغراض جدتها..شالت سبحتها وباستها وخاتم عتيق كان دائما باصبع جدتها مع اسوارة ذهب خالص ماكانت تخلعهم عن يدها.. وبنفس الدرج لقت علبة مخملة اسود ما انكرت شكلها قصايد.. وحست مثل الطعنة بقلبها..معقولة باقي هذي عندك.. ماتخلصتي منها بعدي وبعد هروبي..هذي ماتخصني يمه عشان تغلينها وتخبينها هذي خدعة من رعد.. فتحت العلبة ومثل ماتوقعت كان السوار اللي اهداها اياه رعد..سوار ذهبي كان يعني لها الشيء الكبير.. بذكراها تمر طول السنين ايامها معه .. مواعيدهم خطبتهم ملكتهم وزواجهم..مانست ولا تفصيل صغير.. بيومها كانت بالحديقة الخلفية لبيت جدتها العذوب..ورعد ملصقها فيه وآسر يدها بيده.. بابتسامة خجل حاولت حنين تسحب يدها الصغيرة من بين كفين رعد..الي تجاهل حركتها واحكم يده عليها.. حنين بخجل/امي بتهاوشني خلاص تاخرت.. رعد يبتسم/وليش تزعل انا زوجك..مو غريب. وبعدين مو لحالنا السوسة معنا.. ناظرت حنين لسديم الي متعلقة بيدها الثانية وتلعب بدبلتها الي باصبعها..ومبسوطة انها ماخذة وضعية المراقب عليها وعلى رعد.. سديم بزعل/ماني سوسة حنين قالت الصقي فيني..واذا لمسني رعد اضربيه.. رعد يضحك بصوت عالي..على كلام سديم وعلى حنين اللي انصدمت من كلام سديم وانحرجت منه وقفت ومشت مبتعدة عنه بسرعة.. وهو لحقها بخطوات سريعة ومسكها من ورى من خصرها وضمها له .. وهو يتكلم مع سديم/تحبين رعد؟ سديم بتاكيد/اذا تحب حنين اكيد..صرت اخوي الحين مجبورة فيك انا.. رعد يبتسم/فديتك اخت رعد انتي..روحي لامك عذوب قولي رعد راح وحنين بالحديقة..بتتمشى شوي لحالها.. سديم تضحك/والله باقول لها انك مارحت..انت ماجربت عصاتها لما نكذب عليها.. دخلت سديم وهي تضحك وتنادي على امها عذوب.. رعد تورط/اختك بتفضحنا..لازم اكون سريع.. التفتت عليه حنين بخوف وحاولت تبعده عنها.. وهو قبلها على خدها ودفن وجهه برقبتها.. رعد بوله/أبوك عذبني شهور وانا اتمناك..ويماطل بوقت العرس.. حنين برهبة/رعد ابعد عني مايصير.. رعد يدفن وجهه اكثر/بلى يصير.. ابتعد عنها لما حس برجفتها وخوفها..وحاوط وجهها بيدينه..رفعه له وناظر بعيونها المسحور فيها.. رعد/معي هدية ماحبيت اعطيك اياها قدام سديم.. حنين من صعوبة موقفها وخجلها مو عارفة تتصرف معه..هو جريء معها يحضنها ويبوسها..يهمس لها بكلامه الي يبعثرها.. هالانسان دخل حياتها فجأة..بعثرها..علقها فيه.. تحسه صار ملك لها..تحس بحبه واهتمامه..وحبه لسديم..وتعلق سديم فيه بوقت قياسي.. نشب في ابوها لحتى قدر يخليه يوافق عليه..ابوها مصمم يكون الزواج بعد ماتنهي دراستها الجامعية بس رعد حلف ماينتظر سنين.. رفع معصمها له وباس كف يدها الباردة..وبعدها لف الاسوارة الذهبية الناعمة حوالين معصمها..ورفع يدها قدام عيونها لحتى تنتبه للتعليقة الصغيرة الي بالاسوارة..على شكل حصان جامح.. رعد بوعد\هذا إعتبريه هدية ملكتنا..ماقدرت اجيب المهر الى هنا المسافة بعيدة..بس بكرة لما تصيرين عندي بيكون المهر لك.. اسمه ( معدي ).. بوقتها حست انها ماتفقه اي لغة تعبر فيها عن شعورها من مفاجئته الغير متوقعة ابدا.. هي تعشق الخيل ولا بحياتها ملكت واحد او ركبت عليه.. تستغرب كيف عرف عن حبها للخيل..كيف كان يعرف اشياء كثير عنها.. بس مايهمها ماتبي إلا تتمسك بسعادتها معه..هذا الانسان دخل حياتها مثل العاصفة وهي راضيــة يعصف فيها وياخذها لاي ارض المهم تكون معه.. ولأول مرة بحياتها..كانت اول قبلة من رعــد على شفايفها..يسرق منها دهشتها وشكرها ووعد من قلبها إنها تبقى له لوحــده.. إلى الملتقى باذن الله تعالى .. كونوا بخيـــر.. وكونوا بالقرب.. صدووود.. | ||||
|
|
|
07-06-20, 03:41 AM
| #36 | |||||
| اقتباس:
اول شي عوداً حميدان طال انتظاره والحمدلله العوده كانت بقوه وغموض بالبدايه ولكن مع البارتات بدات تتبين الشخصيات وحاسه انه اللي سواه بحنين او قصايد شي كايد وفوق الطاقه والواضح من رعد ان فيه من المراجل اللي تبعده عن العلوم الرديه علشان كذا متشوقه اعرف اللي صار في الماضي واتوقع هم الشخصيات المحوريه بالروايه قفله اليمه صراحه وبانتظار البارت القادم بشوق ودمتى كاتبتنا بصحه وسلامه | |||||
|
|
|
07-06-20, 05:53 PM
| #40 | ||||
 
| السلام عليكم ورحمة الله 💛 ، مساء الخير على الجميع ... على الرغّم أنّ هذه الرواية من الممكن بل وأنا شبه متأكدة أن تصبح أكثر قوّة من أمّا غرام ولكن كما ذكرتي صدوود أمّا غرام تحتل مكانة كبيرة جدًا بقلوب الكثيرين ، أنا أرفض المقارنة جدًا بينهما لكل واحدة منهما جوّها الخاص قصّة مختلفة وتفاصيل شخصيات غير منسوخة ، لا أفهم بعض الناس اللذين يتشوقون لشخصية نسخ لصق من غازي ؟ أو حتّى هديل !! أعزائي ولكل من يقرأ كلماتي هذه جميع قرّاء أمّا غرام مشتاقون لغازي وهديل ولكن رعد ليس غازي ؟ ورحلة أمّا غرام انتهت بخير منذ ٩ سنوات ، ونحن الآن نبحر بأخرى ليست مشابهة لتلك قبطانها صدوود اللي ترفض وبقوة النسخ والتكرار وذلك مايميزها حقًا ؛ بل ونحبها لأجل ذلك ،لتفردها بطرح قصصها وأسلوبها الرائع بسردها .. بالنسبة لسرعة الأحداث وكشف شخصية حنين وظهور سديم ويوسف هو من أكثر الأشياء الرائعة واللي تعجبني فيك يا صدوود القصّة الأساسية مو حنين مين وهل هي قصايد أو لأ لحتى لصدوود تماطل فيها ولو ما كشفت واظهرت وش الأحداث اللي توضع بدالها ؟ صدوود ليست كاتبة مبتذلة عندها نقطة سرد واحدة وسر واحد لحتّى تماطل فيه وباقي كثييييييير أشياء لحتّى تنكشف صارت بالماضي ، والحاضر وإيش يحمل فيه .. ( قصــــايد أو حنــين ) حرفيـًا شخصيتي المفضلة بلا منازع قويّة يا ناس قويّة ، حركتها مع عمّتها وزوجها عجبتني مره مره مره ووالله ثم والله لو فيهم نقطة خير كان ماسوّت فيهم كذا وواضح وبقوّة إنّهم يستاهلون اللي جاهم ، صدمتني عمتها بشيء واحد اللي هو سالفة الهروب هروب حنين مع رعد !!!! ليش تهرب ؟ ليــش ؟ وش اللي صاير ؟ يجي ببالي حاليًا شيء اللي هو معقوله صار فيه علاقة حميمية بينهم قبل الزواج بعد الملكة طبعًا بس قبل الزواج خلونا من هذي النقطة ، العمّة تظن إن حنين هربت مع رعد لمّا هرب ليش يهرب ومن ايش هارب ، هارب منهم يعني وانقطعت أخباره عنهم ؟ ، تم ذكر ان رعد وحنين قاتلين لا أعلم هل مجازيًا أم هم جد قاتلين ، نفترض إن رعد قتل والد حنين وهو احتمال بعيد وهذا ممكن يفسر حرمان العمة حنين من رعد ، بس برضوا نقطة إنّه صار بينهم علاقة هي اللي يفسر وجود ولد لحنين بدون معرفة رعد وممكن هذا اللي خلاها تروح لخال ابوها وهي جثة تقريبًا من ضرب عمها وعمتها لها ؟ بعد دخول رعد بغيبوبة طبعًا .. أفكاري جدًا جدًا ملخبطه لعبتي فينا ياصدوود .. ( رعـــــد ) طبعًا من أكبر الكارهين له حاليًا هي أنا ، باين إنّه ورّا حنين النعيم وغرقها هي وسديم بالحب والحنان بعدين شافت حنين اللي ماينشاف منه ، ربما يكون من غير قصد منه حقًّا وأنا أسمع للطرفين بس هو حتى اعترف لنفسه إنّه حرم سديم من حنين وأذّى حنين بشكل كبير وهائل، و أتوقع إنّه بيحفر الأرض ولا يلقاها إلا إذا هي كشفت نفسها بدري له عشان سديم .. ( سديــــم ) ياعيني على القويّة المدافعة لأختها ومذوّقةً رعد للسّموم من لسانها ، أخت أختك يا سديم أخت أختك ( على وزن بنت أبوك أو أمّك ههههههههههه ) عمومًا ياخي أحبّك مره ترا بعد أختك طبعًا ... ( يوســـــف ) عسكري سابق عصبي متصحّر المشاعر أدّى حادث لرجوع عمره إلى عمر الطفولة [ طبعًا بما أنّه حادث فممكن يرجع طبيعي يوم من الأيام قلت بقرأ عن حالته ولكن للآن ماقريت ولا بحثت ] ، كيف بيكون مع سديم الرقيقة الدلوعة هشّة العظام مقابل عضلاته وصلابتها ؟! غير عن عقله اللي بعقل طفل ، غير تسميته لها بلعبتي ، ممكن يكون جد حنون مما رأيته منه مع ايرم وتصرفاته مع سديم ، ينفع كإبن كأخ ولكن دوره كزوج كيف حيكون ؟ جاني هاجس تو وعلى طول وخّرته ، اللي هو هل راح تكون لهم حكاية ؟ سديم ويوسف أم فتره بسيطة وتنتهي بالإنفصال وتبدأ حكاية لسديم مع شخص آخر أو حتى تنتهي علاقتها به وكُلٌّ في طريق بس أعرف إنّك يا صدوود ما تلفّين وتدورين كذا وتحبّين العلاقات والقصص الصّعبة والعميـــقة [ مثلي ومثل اللذين يتذوّقون القصص تذوّقًا بعيدًا عن القصص التافهة والمكررة والأسلوب المبتذل ] .. ( المســــــاعيد ) صدوود تراهم موجعين قلبي كل واحد من جهة خصوصًا الشاب اللي ماله أي ذنب ولا حتّى يعرف عن عفو ايــرم عنهم ، رغم إنّه لو يعرف ويشوف صد جدّه له للآن راح يتوجّع كثير .. ( ايــــرم ) ماجاء ذكرها كثير بهالبارت ولكن شدتني بسالفة إنّه مساعد سوّا شيء قبل سنتين جاء زي الصفعة عليها ، ألا وهو ؟ سنعرف طرف خيط في البارتات القادمة بإذن الله ونحلّله جيدًا ، عمومًا أنا لسّا أفكّر بإسم ساره ليش فهد يناديها كذا ؟ كرهًا لإسمها مثلًا ؟ وإلا كان أبوها يناديها ساره ويقلده والا اسم أمها سارة؟ [ هذا أبعد احتمال جدًا بعيد بس جاء ببالي ] .. ( ســـــراب & فهــــد ) ناقة البسوس هههههههههههههه والله ضحكتيني وراح أبحث عن القصّة لأن أتوقع إنها حقيقية مو من خيالك صدوود ، المهم البنت الحمدلله ما انتظرت لحتّى ينصب وتنصب عليه راح تنصب عليه على طول تكفيييييين تراني متحمسه لهم ولهواشاتهم متأكدة إنّي بفطس من الضحك عليهم حابّتهم من الآن ترا .. ____________ عمومًا البارت لعب فيني لعب وقرأته مرتين مايفصل بينهم إلا ٣ ساعات تقريبًا ، لازم أرجع أرتّب أفكاري وأقرأ الرواية من البداية واللي جدًا متشوقة له صراحةً لأن جد جد لمن أقرأ لقلمــك صدووود العزيزة أستمتع بالبارت جدًا كأنّي أقرؤه للمرة الأولى ... كتبت الرد وغفوت قبل أن أرسله واستوعبت إنِّ تارة أكتب بعربية فصيحة وتارةً بعاميّة سعودية .. اعذروني جدًا على الإسهاب الطويل الذي كتبته أصابعي بلا وعيٍ منّي .. ( انتهى ) ولكننا لاننتهي أبدًا من صنع أنفسنا . | ||||
|
|
 |
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
20Likes
العرض العادي
