مُبعثر فيك ِ مالا الحـزن لايُشفى ، للكاتبة/ ايمان يوسف "مميزة " ( مكتملة )

[منـال مختار]

مساء الخير على الجميع💗💗💗


واخيراً وصلت معاكمم ي بنات💃🏻💃🏻 🤪🤣
ماشاء الله رواية جميله تسلم يدك الكاتبه ايمان حماسسس لللفصل القادم 😭♥♥♥

[فيتامين سي]

المشاركة الأصلية كتبت بواسطة منـال مختار

مساء الخير على الجميع💗💗💗


واخيراً وصلت معاكمم ي بنات💃🏻💃🏻 🤪🤣
ماشاء الله رواية جميله تسلم يدك الكاتبه ايمان حماسسس لللفصل القادم 😭♥♥♥

يسعد مساك منال

حياك والحمد لله على سلامة الوصول هههههه

[فيتامين سي]

المشاركة الأصلية كتبت بواسطة ايمان يوسف.

‏بناتي..متابعاتي المتحمسات.والله انتوا سعاده وربي والحاحكم.. تبوني اقدم البارت.. والله خلاني استحي اكسركم😭❤️
لاعبين علي والله
المهم.عشان العطله والنتايج.. بنزل البارت الليوم هديه.. بس كل وحده تقراه تعلق وماتتجاهله.. لا اغضب عليكم وانا اسوي انقلاب
كونوا قريبين🕊️🖤

لا لا أموني خلينا حلوين وبلاش انقلاب والا بعدين بنعمل مظاهرات

ونعلي سقف المطالب ونطالب ببارتين بدل بارت هههههههههه

[هيدراانجياا]

يعني البارت ينزل باليل والا الحين ؟؟

[هاجر جوده]

المشاركة الأصلية كتبت بواسطة هيدراانجياا

يعني البارت ينزل باليل والا الحين ؟؟

اظن نقصد بالليل مثل العاده

[ايمان يوسف.]

البارت الرابع عشر

خذت بلقيس سيف ولفلفته بمنشفه كبيره ..
سيف خذ منشفه من ع الكرسي ويتلفت ..:
وين مهره .. غريب ماطلعت .. !
بلقيس شالت سيف: عاد هي قالت بتطلع .. بس يمكن راحت تساعد امي ..
فارس يتلفت وهو قاعد على كرسي :
او تلاقيها راحت تقصص في الزاريع ..ماتوب هالفلاحه ..
ضحكت بلقيس :
تموت في الأعمال الشاقه ..
سيف دخل .. وراح يناديها .. طل على امه في المطبخ..: مهره يمك ..
موضي : لاا ماشفتها .. ماطلعت لكم .. ؟!
استغرب .. وطل من باب المطبخ بره على ابوه ونواف يشعلون الفحم ..:
مامرت مهره يمكم ..
ضحك سعود وغمز لنواف :
ولدنا قضا يانواف .. يدور على مهره .. كنها بزر وشرد..
نواف يضحك : يسمونها خرفنه يبه .. كبيرنا تخرفن
سيف :الشرهه اوب عليكم .. علي جاي اسئل ..
.......
مهره كانت تمشي في اراضي المزرعه .. كأنها تهرب .. بس ماتدري وين ..
تتخيل ذاك الليوم .. بتفاصيله ..
وقفت وهي تحط كفها على جذع شجره .. شردت بصدمه ..
عساف ..
هو عساف ..
اصلاً ياما مواقف .. شفت عساف بعيونه .. شفته في حدته وألفاضه ..
لما يرمي علي بالحكي .. !
لما يطالعني نظرة اتهام .. !

مسكت راسها بقووه :
ايشششش بسوي .. راح اجن .. والله بجن .. كيف ينخدعون كلهم فيه ..
تلفتت .. وباهستيريا .. :لازم اخذ ولدي واختفي عن هالمريض .. ماراح اخليه يلعب بعمري من جديد ..
ارجعت للفيلا .. !!
مالقت اغراضها .. اكيد صعدتهم الخادمه فوق ..
راحت بسرعه .. في الغرفه اللي لها ولسيف .. دخلت ..
بعصبيه ..راحت تجمع اشياءها .. جسمها كله يرتجف ..
طلع سيف من دورة المياه .. باستغراب : وينك مختفيه .. من مساع ..
مهره تقفل الشنطه .. : ابي ارجع .. سيف .. ابي اروح لجديده ..
عقد حواجبه .. : تستهبلين .. ؟!
مهره وقفت .. وبانفعال ماهي عارفه تسيطر عليه .. :
لااا ماستهبل .. مابي اظل ولادقيقه .. اخذني من هنا .. اصلا ًولاابي ارجع بيت ابوك .. ابي اروح مزرعتنا .. ابي اروح لجديده ...
سيف مصدوم من تصرفها ..
راقب تحركاتها.. وهي تمسك شعرها عن جبينها ..وتوقف كذا وتطالع الجدار بصدمه .. قرب منها ..
وقف قدامها .. حط كفوفه على كتوفها ويبي يتمالك اعصابه لأنه مو لاقي اي مبرر لتصرفها :
مهره حبيبي .. وش فيك .. ايش صار ..
طالعته بعصبية .. وبعدت عنه وهي تمسك كتوفها :
لاتلمسني .. سيف لاتقرب مني .. لاتحط يدك علي .. احنا زواجنا كله غلط في غلط .. سيف خذني لجديده .. وخلينا نخلص المهزله هذي كلها ..
توسعت عيونه بصدمه ومو فاهم شي ..
صاح فيها :
خببببببله انتي .. ما انتي صاحيه ..
مهره بتوتر .. تتكلم بعصبيه ..وكنها تكلم نفسها : اللحين لو نطلع من هنا ونتوجه على طول للمزرعه .. كم نوصل .. ايه لاني مااراح امر بيتكم ..اتوقع ساعتين .. صح او اقل .. يلا .. بتوديني ولا بكلم ايوب يجي ..

رفعت عيونها وكنها تنتبه وبهلع : سيف وين سيف .. لايكون تركته مع اخوك في المسبح .. والله يتركه يغرق .. عادي يذبحه ..والله يخليه يغرق ويسوي انه مات بدون قصد ..

توها بتطلع..
سحبها .. وضمها بقوووه .. حسها في كابوس .. في جاثوم .. مب مستوعبه شتقول وتتخبط ..
مهره .. مثل الطير المذبوح ..تتلفت بخوف .. لو انه عساف ..
ولو انه نواف ..
وجود الحرق فيه يعني مصيبه .. !
حاولت تبعد عن سيف .. وهي تصيح :
وين سيف .. جب ولدي ..
سيف خاف عليها .. مسكها .. : مهره سيف مع بلقيس .. طلعته من المسبح .. من يغرقه .. مجنونه انتي ..اصحي يابنت وش جاك ..

مهره وعيونها في عيونه .. بدت تستوعب ..
حاولت تهدا ..
الموضوع بحجمه وهوله .. سيف لازم مايدري عنه ..
لو اخسر سيف اموت ..
والله اموت ..
عقد حواجبه .. : مهره .. وش صاير .. وش فيها انقلبت احوالك .. حد قايل لك شي ..شايفه شي..
بلعت ريقها وهزت راسها نفي ..
يطالع شحوبها ..
بقلق: مهره ..! .. تكلمي .. لاتجننيني معك ..
هزت راسها نفي .. :
مادري .. مادري كذا خفت .. يمكن لما شفت سيف في المسبح .. انا كل اخاف يغرق .. او يصير له شي..
ماصدقها .. طالعها بشك ..
مهره بعدت وجلست على طرف السرير .. ضغطت على جبينها .. :خلاص سيف روح لهم وتغدا .. محتاجه اكون لحالي ..من جد مادري وش فيني ..
سيف وشياطين الشك تداهمه ..
بهدوء :
براحتك ..
وخلاها وطلع ..
........
مر الليوم في المزرعه ..
ومهره شارده ..خايفه .. لاهي عارفه تتكلم .. وان اسكتت داخلها بينفجر ..
تسائلات .. وافتراضات .. وقدر خارج عن سيطرتها ..
كانو يتقهون بره ..
جلست عشان ماتثير الشك اكثر وخاصه انها ماتغدت ..
كانت مجلسه سيف على حضنها وتأكله الكيك ..
وكانت تختلس النظر غصب عنها لنواف .. كأنها تبي تشوف شي يقطع الشك باليقين ..
كل مادققت شافت عساف اكثر ..
سيف ..
هادي .. كان يدخن .. ولاحظ نظرات مهره لنواف ..
وابليس يتضخم داخله .. !
لاحظ حتى عيون نواف وقت تلاقت بعيونها .. وكيف ابتسم بتهكم.. وهو يرجع يناظر في جواله ..
يحاول يصب جليد على نفسه ..
ويصبر عشان مايقتل أحد ظلم ..

وطبعا ً عشان نهاية الاسبوع .. الجماعه كلهم مقررين يقضون الويكند في المزرعه .. وبينامون فيها..

___بالليل .. والكل نام .. مهره .. عجزت وهي تتقلب .. ارتفعت عندها الحموضه ..
اصلا ً ماعرفت تقرب من سيف ولا حتى تضب نفسها عنده ..
قامت .. وافتحت باب سحب على شرفه وطلعت ..
وقفت وتكت على الدربزين .. والجوو جمده .. اختنقت .. غصت.. حست تبي تصرخ ..
احد في العالم انحط في المعضله هذي ..
راحت تتخيل .. نفسها وهي تشيل الرتوه وتحرقه ..
المشهد يتكرر بذهنها ..
بتصرخ اللحين .. بتدعي ان الله ياخذها ..
لا بتروح تشيل سيف وتهرب .. وتختفي عن العالم ..
بس ليه اهرب .. ليه وهو هنا .. ليه ما أواجه ..
عقدت حواجبها ..
وهي تنتبه للمبنى الصغير شكل كوخ .. مكان فيه جلسه وحطب..
انتبهت ان الانوار الخافته شغاله ..
وهذا نواف بره يكسر قضا .. ويرجع يدخل ..

بعجاله وتهور. ..
راحت دخلت من الشرفه وطلعت من الغرفه ..
ونزلت ..وطلعت من الفيلا .. وراحت تمشي في المزرعه الظلمه .. ولاخايفه ولا مرعوبه .. وهي اللي حياتها كانت بالمزارع ..

وبدون تردد .. افتحت الباب .. اللتفت نواف عليها .. وطالعها بصدمه ..
واقفه بكنزا وبنطلون ولاحجاب ولاشي على راسها ..
المكان مشعل فيه نار كبيره ..مليان ادوات وحطب .. وفيه جلسه صغيره ع جنب ..
نواف بذهول وعصبيه :
صاير شي .. ؟!
مهره سكرت الباب .. وبحده ..:
اللحين بيصير.. اللحين ابي اعرف كل اللي سويته .. وش هالكذبه الكبيره اللي عيشتنا فيها كلنا ...
نواف حاول يكون هادي.. كان ينتظر حوار معها ونقاش .. بس مو هالوقت ولا بهالصوره .. : مهره .. اطلعي .. واستري نفسك .. بينا كلام بس مو هنا . ولا بهالوقت .. لايجي سيف .. ولا احد ..
مهره بحده وانفعال:
خل يجي اللي يجي .. ماعاد يهمني في هالدنيا شي .. انا انتهيت .. من رضيت وتزوجتك يالمختل ..
عقد حواجبه .. عند هالنقطه ..

مهره وقفت قدامه .. رفعت سبابتها قدام وجهه ..وبانفعال:
والله ماراح تنجو من عقاب الله ..كيف تكون عايش .. وتسوي هاللعبه الكبيره كلها .. اجل اخوك وينه ..مين اللي مات جنبي .. من اللي طلعت روحه يمي ..

نواف عقد حواجبه وهي تتكلم .. انتظر تقول اكثر ..
بس مهره كانت في حال ذهول .. مسكت راسها :
كيف خدعت اهلك .. كيف امك تشوف عيونك على انك نواف .. اللحين انا وسيف شوضعنا .. انا ارمله ولا وش .. انا تزوجت سيف .. يالمريض .. تزوجت غيرك ياحيوان .. ليتني ماتأكدت .. ليتني ظليت على جهلي ..
نواف بعصبيه وانفعال:
شتخربطين انتي .. وش اللي أكد لك وما أكد لك ..لاتجيبين العيد ..
مهره بعيون مليانه دموع وبذهول :
انا اللي حرقتك .. في كتفك ..شفتك وانت داخل من المسبح .. وش التأكيد اللي اكثر ..اناا اللي شلت الرتوه المغليه وكبيتها وراك ..انا ..عساف انااا..

نواف بعصبيه : يابنت اطلعي قبل يجي احد .. لاتكررين هالكلام .. اسكتي .. اتفاهم معك بعدين .. مهره خلاص .. قفليهاااااا...

نواف بتوتر .. يطالع من النوافذ ..:
روحي .. قلت لك .. الحوار ذا ماهو مكانه هنا ..
مهره ببكي ومن بين اسنانها :
ماااراح اظل كني لوح في بحر هايج .. وكلن يكفخ فيه .. ..اقسم بالله نظرتك ماتروح عن بالي اول ماشفتني..طالعتني على اني مهره .. ماهو مرت اخوك اللي ماتعرفها ..

نواف بانفعال: سيف بيفقدك ويجي والله ماحد خسران غيرك .. بقول كل شي ..اعرفه .. وبتنتهين يامهره .. بتنتهين ..

مهره تدور بعيونها .. بعصبيه .. وشالت اداه حاده حقت خشب .. رفعتها في وجهه .. :
عساف لاتمتحني .. ترى ماعدت الوحيده اللي تلعب عليها وتضربها وتسكت من الخوف .. قوى عودي .. والزمن رباني .. انا في ديرتي ومو مرعوبه من الغربه .. والله اذبحك واروح اعدام راضيه ..

عقد حواجبه ..وبحذر: انا ضربتك .. ليش اضربك ..ايش سويتي عشان اضربك ..

ضحكت بانهيار وبكي .. مسكت بلوزتها من جهة خصرها .. وارفعتها .. وبعصبية :
نسيتهم .. نسيتهم ..؟!.. انا ياسافل .. ماقدر حتى اوري سيف جسمي ..نسيت حلقة الحزام .. نسيت انك تركتني بجروحي لمن تقيحت .. ورجعت وهي كلها صديد .. نسيت الكلبه دكتورتك كيف عالجتني بالشقه .. وتسترت عليك ..
نواف وبدون قصد شااف خصرها اللي بان ومشرشح بندوب واضحه ..انصدم.. مذهول ..
كان يبيها تكمل بس صااح ..:
مهره انا نواف .. نواف .. ماهو عساف .. نواف .. بس ليش سواااا عساف فيك كذااا لييييش ..ليش...!!! اقنعيني ...!!..

نزلت بلوزتها برجفه.. ارجعت تحدق في عيونه ..:كذاب .. والله كذاب
وارفعت الاداه الحاده في وجهه .. :الحرق انا حرقتك .. وش اكبر من هالاثبات ..
نواف .. بحركه سريعه .. سحب اللي بيدها ورماها بعيد ..:
قلت لك انا نواف .. حرقتيني صح .. بس انا نواف .. وانا اللي كنت جاي بفيلا هيوستن وكنتي لحالك واشتكيتي انو عساف مخليك كم يوم فيها ومختفي .. مهره الفيلا هذي تبع ابوي .. وكنت داخل فيها بالمفتاح ..عادي ..يعني لو سيف جاي .. دخل نفس ماجيت .. الفرق انك فكرتيني عساف .. وانا فكرتك بنت من هاللي يماشيهم .. ومشيتها عليك ...
مهره تطالع بصدمه .. وتسترجع حدث الفيلا .. وتوقيت وجودها هناك ..

راحت اشهقت وسكرت فمها وهي تستوعب كل شي صار ..
التوقيت ..الشهر .. السنه .. كان ظل ثلاث ايام تقريباً ..كانت مع نواف .. عساس انه عساف ..
مسكت راسها ..وحست عروقها بتنفجر ..
نواف شاف عرق جبينها ..
وبعيون مفجوعه ودموع قالت:
ايش مخلوقين منه انتوا ..تخدعون .. وتلعبون .. .. ماتخافووووون من الله ..
صاحت : نواف .. مرت اخوك ..كيف تقوول مشيتها علي .. كيف تستحل شي الله حرمه عليك ..
نواف بانفعال وعصبيه : اوووووه .. لاتحمليني الذنب والخطأ.. رجعي بمخك .. ترى حاولت اعرف اسمك .. وش جايبك .. هنا .. وانتي اللي ماتجاوبتي .. ومسويه اني استهبل عليك لأن الشرب كل مخي.. انا فكرتك عشيقة عساف .. والوضع عادي .. ماكنت مفكر اني مستحل شي حرمه الله علي .. لاتشطحين.. بس السؤال .. عارفه توقيت وجودي بالفيلا ولا اذكرك ..
مهره .. تهالكت ع الأرض .. وبعيون زايغه تحدق في الجدار ..
جاها صوته بارد كالثلج .. حاد كالسيف .. يقتلعها ..ويرميها كالثوب المهترئ:
سيف .. منهو ولده ..؟! ...
............
قبل سنوات .. في فيلا صغيره بهيوستن .. كان تاركها عساف فيها ايام .. وحيده .. وبدون جوال ولا وسيلة اتصال .. كانت مقهوره ومغبونه ..
كانت جالسه بوسط الصاله .. لما فتح الباب ودخل ..
حدقت فيه .. وهو حدق فيها .. وسكر الباب .. وتقدم ناحيتها .وعينه ماتفارق عينها.. ابتسم وبانجليزي :
ماذا تفعلين هنا .. ؟!
مهره باخلاق معفنه : على ** .. جايني من كلباتك وتتكلم معي نفسهم ..
طالعها بانبهار وضحك : ايش هذا .. كلام ولاعسل ..تكفين سبيني ثاني ..
مهره قامت : يالمريض يالمعفن .. تاركني كم يوم لحالي .. لو صاير فيني شي .. لو ابي شي .. بس والله لاشتكيك ..واقاضيك .. والله لاخذ حقي منك .. يابن الكلاب ..
عقد حواحبه : لا عاد ماهو كذا ..
مهره بعصبيه وهي تبكي: الله يلعنك ياعساف .. على قد ماانت قاهرني ..
عقد حواجبه ..
وتركها تبكي وتسب وتقول كل اللي تبيه ..كانت تتكلم بحده وانفعال .. وهو يسمعها.. بعدها قام وبلامبالاه .. : لاتتقطع احبالك الصوتيه .. انا بروح انام ..تعبان حدي .. الا ذكريني شسمك نسيته .
طالعته بذهول : احر ماعندي ابرد ماعندك ..
غمز بعينه .. : اتوقع اسمك كريم كراميل لايق عليك ..
مهره شالت فازا .. ورمتها عليه .. تحرك .. وتحاشها .. ضحك : استغفر الله ..واضح اني ماتعرف الا على مجانين ..
ودخل المطبخ ولحقته .. كان واقف فاتح الثلاجه ويشرب ماي ..
ويقول: جد شسمك .. مامزح..نسيته..؟!
صاحت : مو منك من شربك طول الليوم .. وبكل غلها وغضبها ..
خذت الرتوه اللي مركبه على النار .. وصفقت الماي اللي فيها على كتف عساف .. صرخ بألم : ايش سويتي يامجنووونه ..
مهره ببرود : والله اشوي عليك ياولد سعود ..

مسك رقبتها وكان بيخنقها ..بغضب .. :
قد اللي سويتيه .. قدها..
مهره بحقد وهيستيريا: والله ولو بيدي المووت كان هديته عليك ...*

وبعد هواش حاد وانفعال..

جات مهره له.. طالعته وهو يحط المرهم على الحرق ولاهو طايله عدل ..
بلعت ريقها وبندم :
خليني احطه ..
بعصبيه : اطلعي بره ...
مهره خذت المرهم .. : ماهو عشانك .. عشان ضميري بس .. خليني احط بالمكان اللي مو طايله ..
بدت توزع مرهم الحروق .. وبدت تهبط من شكل الحرق .. اللي صار ..
هو ساكت .. وملامحه قاسيه رغم الألم ..
مهره: ماتخيلت اقدر اضرك مثل ماتضرني ..خايفه من نفسي والله .. خايفه كيف بصير .. بعد جورك ..
اللتفت وطالعها.. عيونها كلها دموع وشفايفها مالها لون ..
بلعت ريقها بغصه : رح المستشفى .. حيل حروق هايله .. الماي كان يغلي ..
مسك معصمها .. : ليش انتي صابره علي اذا انا اضرك .. وش ماسك عليك عشان تتحملين ..
مهره برجا:اتركني واروح .. اخذني لاهلي ومابقى معك .. عساف انت حابسني ..وخانقني .. كيف تقولي اروح .. لاتستهبل علي ..

تغيرت ملامحه .. ألم من الحرق ..
مهره ارجعت تطالع الحرق وبانهيار : قم المستشفى .. والله طلعت من طوري .. والله ماقصد .. ماقصد ..
راحت تسحب في كفه ببكى واصرار طفولي : امانه .. والله ماقولك ارجع ثاني .. والله ماكلم خواتي .. ولا جديده .. قم رح المستشفى ..
كان يطالعها بتعجب ..
ضحك :والله يطيب .. بالله .. بالله .. انا كيف عرفتك .. معقول في حياتي .. احد حلوو كذا ..
مهره طالعته .. وبعصبيه :
انا حرقت كتفك .. ولامخك .. شفيك الليوم ..

وراحت قربت من وجهه وشمته.. : اللحين عرفت ايش هالتغيرات .. ماااشااء الله صاحي الليوم .. شف وش زينك .. بدون الشرب والعفن ..
قامت تشيل في الاغراض ..
نواف يطالعها ويراقب تحركاتها : بالله ذكريني باسمك .. جد نسيته ..
رفعت حاجب .. : احسسن ..
(كانت تفكره يستهبل ويجننها .. كان نواف وفعلا ًمو عارف اسمها ..)
(كان نواف ولايدري انها زوجة عساف .. وحب اللعبه .. وانو يستهبل عليها لما حس انها ماتدري ان له توأم.. كان مخمن انها احد تعرف عليه هنا .. وباسلوب عساف يهددها بشي .. او يصرف عليها .. عشان كذا مقيدها ومو عارفه ترجع لاهلها .. )
(ظل ولاقدر يتواصل بعساف .. ولايستفسر .. ولاحتى يقوله عن وجوده .. ) ..
(يوم اللي مشى صحى بدري وهي نايمه وطلع .. رجع بعد ايام .. وكان فيه فضول اتجاهها .. بس مالقاها ..
صار بينه وبين عساف مكالمه .. حاول يتطرق لفيلا هيوستن وقال يمكن اجي فيها .. عساف بلامبالاه .. عادي تعال .. انا اصلا ً ماجيها .. ولا امرها .. عندي مكان خاص فيني ..
وهالأمر حير نواف .. ولاعرف يطرق معه لهالموضوع .. )
(مرت الايام واندثرت الأحداث .. لما نواف شاف مهره بيتهم وانصدم .. وبدت الأحداث تترتب في مخه ..)
.......
سيف واللي كان مو نايم اصلا ً فتح عيونه بس طلعت مهره ..
انتظر شوي ..
ولما مارجعت طلع ..
طلع يدورها .. والغضب ياخذ منه ماتخذ .. مايبي ضنونه تصدق .. !
انتبه للنور بالكوخ الخارجي .. قلبه يضخ الدماء بشكل مجنون ..
المكان اللي يسهر فيه نواف ..
حاول مايصدر صوت .. وهو يقرب .. ويبان صوتها وصوته وكلام منفعل بس مو واضح ..!!

لما وصل قريب من الباب .. وسمع آخر الجُمل في الحوار ..
كانت كلمات كالمدفعية ..اللتي اخترقت جمجمته ..
مهره بتحدي وانفعال: مايهمني ولد اي حيوان فيكم .. لاتفكر تلوي ذراعي وتاخذه ... في النهاية ولدي .. ولو الدوله ماعطتني اياه .. تراه سيف عنده الجنسيه الامريكيه .. اطالب فيه هناك .. وتحاليل وشغل عيال حرام واثبات نسب ماعرض ولدي لها ... !

وافتحت الباب بقووه وطلعت .. راحت وسيف يطالع فيها بصدمة .. بفاجعه ..
اذهله الكلام .. خروجها بهالمنظر من عند نواف وبدون حجاب ..
*اهتزت الدنيا في عيني .. وكأني في وسط زلزال ..ثارت دمائي كالبراكين .. سئلت الله حُلما ً وثبات .. لو دخلت من الباب بجانبي قتلت نواف .. لو لحقتها قتلتها هي ..
الشيطان بداخلي يتضخم .. !
حتى اني خططت في ثواني قتل الاثنين .. وغسل عار .. لايُغسل ..
لكن ان قتلت الان .. الفضيحه اعظم ..
تحركت ابتعد .. عن المكان ..
حتى لا اقتل نواف ....
الهمني الله ان اتريث .. !
لن افجع امي بالثاني .. يكفي فقدها لعساف ..

تحركت بدون تفكير .. دخلت سيارتي ..واجريت بعض الاتصالات ..
قررت في تلك اللحظه التعامل .. بروية .. قررت ان اقتلع قلب مهره .. كما فعلت بي.. قررت ان احرمها ..
وان تحل عليها لعنتي ..
كانت تخدعني ..
جعلت مني لعبة في يدها .. عشقتها .. اصبحت محور حياتي .. !
مثلت .. صدمتها بنواف .. وهي كانت .. *

راح سيف يضرب الدركسون بقووه ..
*كم كنت اعمى ومغفل .. !
لكن عليك اللعنه .. يامهره ..*
.....
صعد سيف .. ولقاها تطلع من الغرفه اللي نايم فيها فارس وسيف .. باينه عيونها غايره من البكي ..
بس حاولت تتنحنح وهي تسئله كانت مفكرته بالغرفه .. : فكرتك نايم ..
سيف حدق فيها ببرود .. وهدوء النايمين يمنعه ..
مهره بدت تقلق .. خافت انه شاف شي او سمع ..هي ماتدري انه جاي من تحت .. تفكره طالع من الغرفه : سيف .. وش فيك .
مشى للغرفه .. بدون يتكلم ..
لحقته ..
وباسلوب بارد : اخذي لك اذا لك شي ضروري هنا .. بننزل البيت ..
مهره قلبها انخرط .. : ليه .. وش فيك سيف ..
ماللتفت عليها .. وهو ياخذ .. شغلات تخصه .. :عندي شغل ضروري وابي آخذك معي ..
مهره وبدت تخاف من الاسلوب : سيف ..!
خذ العبايه ورماها عليها وبانفعاال:
البسيها وتعالي .. انا تحت ..
توسعت عيونها .. وبخوف : بجهز سيف برد بره .. سيف لاتخوفني شفيك ..
هو يلبس جاكت ع الثوب .. رد ببرود :
خلي سيف يجيبونه معهم بكره .. ابي اروح معك انتي وبس .. ممكن .. ؟! ..
مهره خافت تتكلم ..
الواضح ان سيف شافها ..
ترجته : باخذ سيف ..تكفى لايقوم ومايشوفني ..
سيف ببرود مخيف: مهره .. مثل ما انا ابي استر ولا اعلي صوتي .. رجاءً.. اطلعي معي .. بدون مانثير الوضع هنا ..
وارتجفت مهره من راسها لمن رجولها ..
ماتدري هل سمع .. طيب اذا سمع وش ..؟! ..

لبست عباتها ونقابها ..
وطلعت معه ..!!!
........
*كنت في السياره معه .. وكانت ملامحه جامده .. عضلات وجهه مشدوده .. عظام فكه بارزه .. عروق يده خرجت بشكل مخيف ..
احسست ان الله بيوريني عزرائيل في صورة سيف ..
مادري ..
لكني شعرت بدنو منيتي ..
لاهو متكلم .. ومخليني اعرف وش عرف .
ولاقادره اتكلم انا واجيب العيد ..
يمكن ماوصل لعمق السالفه كلها ..

تلفت حولي ..
ظلام مخيف .. في ليله غاب فيها القمر .. الضباب نازل .. وسيف داعس ولاهامه ..
تشهدت بداخلي عشرات المرات ..
ان ماقتلني .. رحت في حادث .. ان الله سلمني من الحادث ..
بموت بسكته قلبيه من الخوف ..
بشكل مخيف .. قمت أوؤرخ تاريخ وفاتي . .
اصلا ً لاحظت ان بيصير قريب .. من تاريخ ميلاد سندس.. ميلادها بعد يومين ..
وفجأه شطحت واكتئبت .. ان تاريخ وفاتي راح يصير ذكرى شينه تخرب ميلاد سندس .. !

صمت سيف مخليني .. اهلوس في داخلي ..
والرعب رسم اسمى لوحات جنونية في مخيلتي ..
تخيلت عساف .. بعد ماجا خذني من الفيلا وكنت هاديه .. طالعني بجنب عينه وقال: غريبه ماصارختي وقليتي أدبك كالعاده ..
مهره برواقه: خلاص قليت ادبي بما فيه الكفايه .. كيف حرقك اللحين .. ؟!
طالعها باستغراب ولمس جبينها:
مهره مسخنه ..؟!
مهره تبعد كفه عن جبينها :
زين تذكرت اسمي .. قلت سكير وزهايمر .. مب ناقصه .. والله .. *

انصدمت من الموقف .. وهي تربطه بالحدث ..
وجمت وحست بصفير حاد باذنها ..
اللتفتت لسيف ..
وهو يشعل سيجار ..
وينفث دخانها .. قالت : طيب قول شي ..؟! ..
سيف ببرود حاد : لااسمع صوتك .. !
ابلعت ريقها .. ورجعت سكتت .. اصلا ً الطريق مو باين ..من الضباب .. !
ارجعت لهلوستها وجنونها ..
*الحرمان من سيف ..
ومن سيف..
فارس بفقد احترامه ..
راح افقد عيالي اثنينهم ..
راح.. تتلاشى احلامي .. وامالي ..
جديده ..وخواتي ..
يالله سندس .. وزينه.. من زمان ماشفتهم ..(عشتنا) .. فقدتنا هالشتوية.. كنا نشوي فيها كستنا .. ونسوي حليب زنجبيل ..
كنت.. اتخيل انها آخر ليله ..في حياتي .. وجاني رضا بقضاء الله وقدره ..
حتى اني وبفهاوة او تبلد ..
فتحت مفكرة جوالي ..
وبديت اكتب وصيتي ..!

جاني صوته اخترق افكاري ..:
انزلي ..
تلفت .. وصلنا ..
نزلنا ..
دخلت معه ... وصعدنا للغرفه ..
* شعرت ان السُلم ..سيهدم من تحت اقدامي ..
اصلا ً شعرت اني اصعد لمنصة المشنقه .. !
اللعنه عليك ياعساف .. ويانواف ..
اللعنه على كل من اجرم في حياتي .. !*

الى الآن .. وانا لا أدري .. مامدى مايدور في ذهن سيف ..
في الغرفه ..سيف وبملامحه المخيفه يفتح شنطه دبلوماسيه :جهزي اغراضك ..

توسعت عيون مهره : اي اغراض.. سيف تكلم .. عندك شي قوله .. ترى اعصابي ماعادت تتحمل ..
سيف فتح الخزانة وخذ منها اوراق .. وبطاقات .. وجوازات ..
مهره بتبكي : سيف حرام عليك .. ايش قاعد تسوي .. ارحمني .. وتكلم ..
صاح فيها بثوره مخيفه :
وش تبيني اقول .. عن خشمي اللي نزلتيه بالقاع .. عن طلعتك من عند نواف بنصاف الليول .. وداخله عليه بهالمنظر .. عن كذبك واحتيالك .. وتمثيلك ..ياسافله انتي خليتني احبك واعشقك .. انتي كرهتيني ببنات حوا .. والليوم كرهتيني فيهم بزود ..

مهره عيونها تتوسع بصدمة ..لااااامو كذاا ..

سيف يكمل وهو مثل الذيب الجريح .. ضرب صدره :
انا اتزوجك وانتي لاعبه لعب مع اخواني التوووم .. ماتدرين ورعك من وين جاي منهم .. واول ماشفتي نواف .. سويتي منصدمه ..ومرعوبه .. تغديتي فيه قبل يتعشى فيك ..

سكرت اذانها بقوووه .. من هووول الإتهاااام .. صاحت : خلااااص خلااااص .. لاتقوول شي .. لاتكمل ..سيف الله بيعاقبك .. شرفي .. لاتجيسه ..

سيف .. بحده وصياح :
وانتي بقيتي فيها شرف .. وانا اقوول البنت ضابه نفسها عني ..قلت معقده ..وفيها وفيها .. اثاري باقي واحد خاطرك فيه .. ورحتي له الليله ..
مهره طاحت على ركبها .. وبصياح :
بسسسس .. اص .. اص .. اص .. ورب الكعبه .. مادريت ان لعساف توم .. وراس ابوي .. ماكنت ادري .. واقسم بالله رحت لنواف الليوم وكنت افكره عساف .. والله كنت افكره عساف ..

سيف ومايسمع لها .. ولا لحلفها .. ولا لتبريراتها اللي مو مفهومه:
عساف اجل .. ياسافله تدرين ان عساف مات .. ومات جنبك .. انا رحت استلمت جثته .. لاتفكريني .. ولد امس وتخربطين على مخي .. خلاص يامهره .. كل شي وضح وبان ..

صاحت وهي توقف في وجهه :
وش وضح وبان .. والله ولافيكم رجال ياعيال سعود .. كل واحد أردى من الثاني .. اذا اخوانك لعبوو علي لعبه .. رح اسئل نواف .. لاتتقيوى علي ..نواف جاني في بيت ابوك بامريكا .. وماعندي علم انه توم عساف .. مشاها علي .. اللي حصل ..
سيف دفها من وجهه :
لاتكملين كل هالعفن والكذب .. والله حتى العمي يشوف ..تراه نواف مطابق لعساف .. بس فيه اختلاف ..تعرفين ان ذا آدمي وذاك ثاني...
انهارت مهره وتضرب برجلها الأرض:
ماكنت ادري .. ماشفتهم سوا .. مادري انهم توم .. خاااف الله فيني ..

سيف مسك راااسه وبانفعال:
والله باااااايعتها .. سمعتك وانتي عادي ماتفرق معك من ابو سيف .. عادي .. عندك مهره .. عادي ..

صاحت وبغضب : والله ماتفرق معي اي كلب ابوه ... ولدي ولايفكه عني الا الموت ..ماعندي لك اي تبرير ..طلقني .. وجب ولدي ..وادفن هالعار اللي انت رميته علي ..

ضحك بتهكم واعصاب فلتانه: حلم ابليس في الجنه .. شوفي اذا سيف نتيجة المزبله اللي صارت .. يظل في النهاية ولد زفت من اخواني .. يظل عند جدته .. وانتي والله لاحرمك منه لليوم الدين ..

اختفى اللون من مهره .. : لا سيف ..ماتسويها فيني .. سيف روحي المعلقه .. سيف ماهو كذا .. تراك تظلمني ..

طالع ساعته : جهزي اغراضك الضروريه بس .. طيارتنا الصبح ..
مهره بانهيار وصياح : شطيارته.. كيفك انت .. ولدي ..ماروح محل من غيره ..والله يجيه شي لو مالقاني ..
سيف ببرود يقفل الشنطه .. : ماراح يموت ..يكبر وينساك ..
مهره تبكي: سيف تظلمني ..ربي بيعاقبك والله ..
سيف : ماعندي وقت حق بكاك وتمثيلك الرخيص .. قومي حطي لك كم شغله بشنطه .. ولابتروحين بهالشكل ..بكيفك..
مهره صاحت : ماراح اروح مكان ..ماتقدر تغصبني.. والله اتهمك في المطار .. واسوي لك سالفة ..
سيف ببرود: سوي شي .. والله اقط ولدك بملجأ .. وبتلفون مني .. عاد لاتعرفين له سما ولا أرض..

تطالعه بصدمه .. وكنه مخلوق غريب .. تحول الى انسان مايشبهه أبد ..
لارحمة سيف ولاحنانه..
كرهته ..
ايه كرهته ..!
كيف حبته في يوم..
كيف يظلمها ويرميها هالإتهام ..
كيف مايبي يسمعها .
كيف يكذبها .. ويقفل اذانه عن اي تبرير..
تشوه بعينها ..
تقززت منه ..
خافت منه ..
خافت يسوي شي لسيفها ..
خافت تعرض سيفها لكلام ونقد .. وسمعه ..!
لو احد درى عن كلامه اللحين .. وجوره ..
آاااه يايوومه ياسيف .. كانك جرح قلبي اللي مايندمل ..
آاااه ياسيف ياضعف أمك وخوفها ..
دخلت هالبيت عشانك ..
وبطلع منه عشانك .. !!
...........
نرجع لنواف .. بعد ماسمع صوت سيارة سيف .. طلع من المكان اللي هوو .. فيه .. بس شافه يطلع من المزرعه ..
وانتبه لمهره جنبه ..
رجع وشال جواله .. وبعصبية يتصل على سيف وذاك جواله مغلق ..
طلعت سيف اللحين .. اوما ان مهره قالت له شي .. او هو سمع وشاف ..
حس انه مقيد من الإقدام على اي خطوة .. خاصه مايدري .. ايش العلم بالضبط ..
ولا وش صار .. !!
........

يتبع .....

[ايمان يوسف.]

في الصباح ..
متوجهين للمطار ..
*صمت بعد آخر كلام منه .. وتهديده لي بسيف ..!
حين رأيتيني .. بهذا الحجم الوضيع في عينه .. فقدت شهيتي للحياة ..
فقدت إرادتي للدفاع والتبرير ..
مرارة في حلقي .. كالعلقم ..
ضاقت الدنيا .. وتمنيت ميته من الله ورحمه ..
عندما توقعت الموت البارحه .. !
لم اتوقع ان أُقتل بهذه البشاعه والشناعه ..
لم اتوقع ..
ان يتركتي سيف كالجيفه المصلوبه للطيور ضنونه ..!
كنت أنظر للشوارع مودعه..
فعليا ً شعرت اني ذاهبه الى الاعودة .. ولن أعود .. !
لم تعد الدنيا تستهويني ..
فقدت القدره حتى على الشعور ..
احسست بتبلد .. واني لاشيء ..
ذبلت هامتي ..
وسقطت علاقتي بالحياة ..
لم اعد ارى سيف .. الا قاتلي ..
وسيفي .. يتيم .. تركته الدنيا .. تحت عمالقة لاترحم ..
اختنق داخلي ..
فأنا لم أودعه ولم اشمه.. ولم استودعه ..!
لم اقبله لم اشبع منه ..
ماذنب هذا الصغير .. !
في وضاعة كباره ..! *

طلعت جوالها من الشنطه .. وقبل ماتفتحه .. سحبه من كفها ..
وحطه مع جواله ..
مهره:خليني اعطي جديده خبر ..
سيف : لاوصلتي عطيهم خبر .. لاتشغلين ..
*حدقت فيه ..
وكأني في كابوس مريع ..
كيف ينفر مني هكذا ..!
هل يحسب ان الله غافل عن الظالمين ..!*
.........
في المطار ..
سيف كان يكلم جوال .. افهمت مهره .. ان الوجهه فرنسا .. وان كان عنده شغل هناك وقدمه ..
واكتشفت ان مسوي فيزا لها .. وحتى لسيف وفارس .. وكان بياخذهم معه ..
قدم الرحله ..
وخذها بس ..
طيب هو وش يبي .. ياخذها .. اذا هذا نظرته .. وقناعته فيها ..
ليه ماقتلها ..
ليه ماطلقها وحرمها من سيف .. !
ليه يروح فيها آخر الدنيا ..

مهره شارده في الرخام ..
*اكيد يبي يقتلني بعيد .. عشان مايتوهق هنا .. *
قفل ..
وجاه اتصال .. رد :
هلا يمه ..
موضي : وينكم .. ماتبون تفطرون .. ماصارت نوم ..
سيف بسخرية : صباح الخير .. يمه .. اي فطور .. انا ومهره مشينا من المزرعه ..
موضي : تمزح ..؟! .وين رحتو. شعندكم ..
سيف وبغزل . جارح لمهره:
والله يايمه .. مسوي مفاجأه للحب .. عاد عارف لو قايل لكم من قبل خربتوها .. انا ومهره مسافرين يمه ..
موضي : تستهبل .. شهالسفر اللي كذا .. وين بتروحون ..
سيف : باريس .. وبعدها لندن ومطولين .. فارس وسيف بأمانتك ..
موضي بصدمه : شمطول .. من جدك ..وهالصغير وش بنقوله لادور امه ..
سيف : عارف ان حنانك ينسي الوالدين .. اللي صار على فارس يصير عليه .. مهره معي .. ماراح ترجع الا في خير .. دعواتك ..
وقفل قبل يترك مجال لأمه .. في النقاش ..

*لم أُعلق ..
كنت انظر الى الماره ..
وكأننا في يوم الحساب ..
مايحدث معي ..
وكأن القيامه قامت ..
وسيف الزبانية اللتي سترميني الى الجحيم*
.......
طبعا ً كان موضوع سفر سيف ومهره صادم للجميع ..
بدون مقدمات ولا استعدادت ولا سلام ووداع ..
سيف الصغير .. يحوس ويدور أمه .. ويبكي .. بشكل يوجع القلب ..
فارس وبلقيس .. وراه .. خذوه لكل فعاليه ممكن تعجبه في المزرعه بس الولد ماسكه معه .. بكى ونواح ..
نواف .. وغاص ..سفر سيف بذي الطريقه وراه عيد .. في باله مهره راحت اعترفت بكل شي ..
وشكله بيوديها بستين داهيه ..
سيف مايرد عليه ..
وحتى لو رد .. انا مادري ايش قالت له .. ايش عرف .. بالضبط.. !
حس قلبه يوجعه .. وهو اللي مايحب احد ينظلم ويظل واقف .. !
راح لسيف الصغير ..
فارس على الأرض .. وهو دافن راسه في كتفه .. ويبكي .. وينادري مهره ..
فارس يربت عليه : بتجي راحت مع أوبه .. كم يوم وتجي ..
سيف ينوشق : اتروح .. وديني معها .. ابيها.. فالس .. ابي ماما .. فالس وديني ماما ..
بلقيس تداعب شعره :
يلااا سيوف خليك شاطر .. ونروح الملاهي الليوم ..
نواف .. جاا ومخنوق .. وبكى سيف .. طحنه .. :
سيف ابوي .. تعال ابيك ..
سيف لاصق بفارس .. اللي ماد رجله بجبيرته ..
ومايبي يوخر ..
سعود كان داخل وبغضب :
ولدك متى بيكبر مخه .. ماكفاه رميته لفارس .. رايح ياخذ ام هالضعيف .. وطاير بها ..لا عارفين نسكته ولا ندلهه ..
موضي .. بعصبية :
فجعني .. مهره ماتخلي ولدها ..بيمووت الفقير .. ساعات ماسكت .. سعود خل ننزل البيت .. كود العيال يغيرون له مكان ولاشي ..

بره نواف .. انحنى وشاله .. طلع مناديل .. نشف دموعه وخشمه .. :
شرايك توصلني البيت .. ابي امشي وماعرف اسوق ..
سيف يشهق وينوشق ..ويطالع عيون نواف ..
وبلقيس ساعدة فارس يوقف ..
نواف يبتسم له .. :
ها من يبي يروح معنا .. سيف بيسوق الليوم .. ويوصلنا ..
فارس وبلقيس .. مسوين متحمسين :
انا انا .. انا
سيف يطالعهم .. ويبولع .. ودموعه تنزل ..
يلمس ياقة نواف .. وكنه الفكره استهوته ..
بعدين قال : الوح ماما ..
نواف : اول توصلنا البيت .. نبدل .. ونمشي الملاهي .. واذا رجعنا نكلمها بالجوال .. ونشوف وجهها بعد .. شرايك ..
سيف بتقويسه فمه : تمام ..
اشر نواف لهم : عطوو امي وابوي خبر وانتظركم بالسياره ..

جلس نواف في السياره .. وسلم القيادة لسيف بحضنه .. اوهمه انه يسوق .. وقدر يلعب عليه ويلفت انتباهه ..!
.......
وبعد مده من الإنتظار في مطار ابو ظبي .. تم الاقلاع الثاني ..للرحله المباشرة للعاصمه الفرنسيه باريس ..
مهره وسيف ..غزاهم صمت رهيب .. مخيف ..
وكأنهم جثث تتنقل بين المطارات .. ومقاعد الطائرات ..
من شوي في المطار .. جلس معها في مطعم .. طلب ..بدون يسئلها وش تبي ..
بس جاب الشغلات اللي تستسيغها وتحبها ..
لكن مهره رفضت ..
وماكلت ..
اللحين ..تحس بوجع معدتها .. جوع وضيم .. وضغط جوي.. ومانامت .. ولا حصل لها اي اتصال تطمن على سيف .. !!
مالت براسها على الكرسي ونامت ..
سيف ماكان حتى يلتفت عليها .. رجع راسه ورى ..
ظل تسائل كبير في باله ..
ليش ماتخلص من مهره .. هناك .. ليه ماطلقها .. وانهى هالشي من حياته ..
كيف هو .. اللي مقفل على قلبه سنين .. تلعب عليه مهره .. وتاخذ عقله .. !
كيف صدق تمثيلها وعقدها .. اللي مالها أي مبرر..
انتقامه منها حرمانها من سيف .. !
ومن كل شي تحبه ..
اذا هي كانت ساكته على كل شي وانا رحت زي المغفل .. وطقيت الصدر وتزوجتها ..
انا اعرف كيف اطلع .. احتيالها .. من عينها ..

لو سوا شي لها او لنواف ..
كانت بتصير فضيحه عظيمه ..
راح اتأثر على الكل من ابوه لعايلته .. لسيف الصغير اللي ماله ذنب .. في كل القذاره اللي صارت .. !
ابتعد .. عشان مايشوف نواف .. ويذكره بخيبته ..
ابتعد وخذها ..
عشان مايتركها وتكمل لعبها ..
ابتعد وخذها ..
لأن اصلا ً مايدري كيف بيتصرف صح .. قدام الكارثه .. !
طلع جوالها .. من جيب جاكيته .. افتحه .. وطلعت له خلفية الشاشه .. صورة سيف الصغير ..
زاحها .. وكان الجوال مفتوح على نوتة .. كانت مهره تكتبها وماقفلتها ..
شاف توقيتها .. وقت كانو طالعين من المزرعه .. ومتوجهين للبيت ..
كان بيقفلها .. بس لفت انتباهه .. بدايتها .. وراح كملها .. واعتصر قلبه .. لما لقاها كاتبه وصيتها ..:

*اوصيكم بتقوى الله .. والصلاة..
سندس وزينه .. اوصيكم بجديده وسيف .. سيف . سيف ياخواتي ..
الله عطاني اياه .. في اشد ظلمة من حياتي ..
كتب الله موتي . والحمدلله .. !
ستكف ملائكتي عن الكتابه .. ويرفع قلمي .. اوصيكم بالدعاء لي ..
وسندس عليك رفوف مصاحف .. تملينها مصاحف في مسجد ديرتنا ..
زينه .. حطِ لي براد مويه جنب مدرستنا حقت ثانوي ..
ونصيبي من ورث ابوي .. خلوو ايوب .. يبني لي فيه مسجد بالهند ..
ايه صح .. كل شهر .. طلعوا من محاصيل المزرعه .. وزعوها بالنيه انها مني ..
ولاجا رمضان ادعو لي .. قبل تفطرون ..
السنه .. ضحو عني ..
وترى انا .. ماحجيت .. يالله .. كنت متوقعه بحج وانا عجوز .. !
بس مير ماوصلنا الثلاثين ..

زينه .. سندس .. انا انظلمت في حياتي .. حتى اظلمت ..
في اشياء كثير ماتعرفونها والأفضل ماتعرفونها ..
عندي شعور قوي الليله بالموت بس ماني عارفه الطريقه ..!

سيف .. حبيبي .. احبك .. ومسموح طال عمرك ..!
بس شكلك الليوم .. بتسلمني للأرض ..
وبتعلي روحي للسما ..*

ارتجف الجوال بكفه ..
كيف كتبت وصيتها بثقه وجساره ..كيف حست انها بتموت على يدي ..

همس بداخله :
والله ومتي .. يامهره بداخلي .. وحتى اني اكرمك بدفن .. والله ماتستحقين .. !..

وراح لوصيتها وحذفها ..
امثالك المفروض ينمسحون من الدنيا بدون ذكرى .. ولاوصيه .. ولادعوة .. ولاحتى صدقة جارية .. !

وخلال امتعاضه .. وسخطه منها ..
مرت المضيفه ..
وكانت تعرض .. بعض الخدمات ببتسامة .. لما تغيرت ملامحها :
سيدي .. زوجتك تنزف ..
ماستوعب كلامها على طول .. كررت وهي تأشر لمهره ..
اللتفت .. وقام بسرعه مفزوع ..
كانت شيلتها شبه مفكوكه .. ونايمه .. وشفايفها مفتوحه اشوي ..
وانفها ينزف .. ومتخذ طريقه على وجنتها ..
وواضح انها ماتتنفس عدل ..
صحاها .. وفي داخله خووف رهيب :
مهره .. مهره اصحي .. كلميني

بخفوت يوجع القلب : همممم ..
ضرب خدها .. وهو ياخذ مناديل من المضيفه ويمسح الدم :
اصحي مهره .. كلميني ..
كانت في حاله شبه اغماء ..
فك شيلتها ..وبعض العيون الفضوليه تراقب الوضع ..
افتحت عيونها بخفوت ..طالعته .. وكانت واضح متعمقه في النوم ..
استعدلت .. بعدم استيعاب ..
سيف ماسك مناديل في انفها :
انفك يرعف .. ماتحسين ..
مهره بفهاوه .. مسكت المناديل : بالله .. والله مانتبهت ..خلاص انا اعرف لنفسي ..
سيف مسك بين حواجبه وياخذ نفس .. ولعن حتى نفسه انه خاف عليها ..
عدلت شيلتها فوق راسها ..
وخذت من المضيفه مناديل زياده وهي تعتذر .. عن اثارة القلق .. لما شافت وجهها الخايف طلبت منها ماي بارد و ثلج ..
ورجعت مهره .. ماسكه انفها ومنزله راسها شوي .. سيف جلس يمها ويحاول .. مايعطي اهتمام .. هو مو راغب انه يبان ..
كان يختلس النظر لها وهي تبدل مناديل وواضح ان الوضع مستمر..
جابت المضيفه الثلج وخذه منها ..
مده لها ..
مهره جمعت مكعبات الثلج بمناديل .. حطتها ورى راسها .. ومسكتهم ..
واشربت شوي ماي ..عقد سيف حواجبه .. وهي تفتح شاشة الخريطه قدامها .. وتشوف كم باقي ع الرحله ..
ماسئلته ..
طلعت من الخريطه .. وقامت ..وضربت رجله برجلها يعني زيح ..
سيف بعصبيه ويشوف كيف شاحبه ..: اقعدي وين بتروحين ..
مهره : بغسل وجهي كله دم .. كبدي قلبت ..
فتح الطريق لها ..وشي يقول قم اسندها .. وشي يقول خليها فاستين داهية ..
توها بتتحرك في اللممر .. الا اختل اتزانها ..
سيف لا ارادي مد يده ناحيتها ..
بس هي مسكت مسند المقعد ..وتمالكت نفسها وراحت ..
سيف يهز رجوله بتوتر .. وكل مامرت دقيقه ولاجات توتر زيادة .. شوي ويقوم ..
بس جات وكانت حاطه الشيله على وجهها .. مرت من قدامه ..
وجلست .. مدت كفها : عطني جوالي ..
سيف طلعه بدون تعليق وحطه بكفها ..
رجع يتسند ويحاول ينام ..
فجأه انتبه لها تاخذ سيلفي لنفسها ..مو هنا المشكله ..
كانت تغمز في الصوره .. وفتحات انفها مقفلتهم بمناديل ..
بعدها سجلت صوت: بالذمه زيون ماكني جثه مجهزه للدفن .. وضحكت ..انا وجهي وجه باريس .. شوفي ولوف خشمي افتحت مع الضغط الجوي..
انصدم منها ومن تصرفها ..
راقبها وهي ترسله مع ان مافي نت .. وتحط الجوال بالشنطه ..وترجع تسكت وماكنها ضحكت ..
وترتب البطانيه عليها وترجع بتكمل نومها ..
سحب سيف الهوا .. واللتفت عليها .. :
انتي ماتبين تاكلين شي ..
مهره وعيونها شبه مقفلين تحدق فيه .. ظلت تطالعه بجمود .. بعدين هزت راسها نفي .. :
شكرا ً شبعانه حد التخمه ..
سيف باخلاق معفنه: كيفك .. عمرك ماكلتي ..

مهره غمضت .. كذابه مانزفت من الضغط الجوي . والله من قو الضغط النفسي .. !
خايفه من المجهول والقادم ..
خايفه.. من النقله الجديده والمفاجأه لحياتها ومشاعرها ..
هربت للنوم ..
ماتبي تستشعر اللحظات هذي ابد ..!
..........
وصلنا باريس ..
من المدن اللتي حلمت ان ازورها .. لكني الليوم تمنيت ان ظلت حلم ..
ولم تصبح حقيقة مشوهه .. !

ويكون سيف من يشوهها ..
هذا والله فوق احتمالي .. !
تحجبت .. وكنت اعدل عبايتي .. لما قال سيف .. شيليها .. وخلي عليك الجاكت ..
شال السكارف تبعه .. :
لفيه على راسك .. العباية والحجاب .. هنا يلفت الانتباه ومومرحب فيه ..!
مهره سوت اللي قاله .. وحطت الشيله والعباية بالشنطه الصغيره اللي جنبهم وشالها سيف .. وخلاها تتقدم عليه ونزلوا من الطياره ..
*توشحتني رائحة سيف .. وعطره..العالق بالاسكارف.. لتشعل فيّ الرغبه العارمه في البكاء ..
لكني لم ابك ِ..
ولم استفز حتى دموعي لتخرج في محاجري ..
رحت امشي معه ..
تماما ً..
مثل المريض اللذي فقد الرغبه على العلاج .. فلم يعد يكافح .. ولاحتى يتناول الدواء ..*

استقبلنا رجل ببدلة رسمية يعامل سيف باحترام ..
وبدا لي ان سيف يعلوه مركز ..
قام بأخذ امتعتنا خارج المطار .. وفتح لنا الباب الخلفي .. للسيارة روزرايس ..
ركبت .. انا وسيف .. ..
وانطلق ذاك الرجل بنا .. *

كان يتناقش مع سيف .. عن شخص يدعى الدوق ادوورد ..
مهره افهمت الحوار كله .. لأن كان بانجليزي .. وهي تتقنها ..
فهمت ان ذا موظف عند ادوورد ..واسمه ادريان ..
وان في لوحة نادره وغاليه مسروقة ..
وشاكين في وجودها في احد الأماكن .. !
وان ادوورد .. متكل على سيف وكله ثقه .. ان لو دخل المكان المشكوك فيه .. بيقدر يتعرف على اللوحه ..
وراح تتم استعادتها ... !

مهره ..
*خفت .. حسيت الأمر فيه مخاطره .. بس ماتكلمت .. و هالموظف يشرح كيف بيعدي سيف العراقيل الأمنيه باسلام .. بالتعاون .. مع سيكورتي شاطرين .. يشتغلون عند ادورد ...فجأه ماعدت مهتمه بالحوار .. وشردت في النافذه ..
واحنا نمر على محلات في شوارع باريس .. مضاءة بالانارات وزينة الكرسميس .. واشجار الميلاد ..
بصراحه .. كان الوضع اشبه بفلم كرتون ..
كان سيفي ..
بيتشنج لو شافها..
.انصدمت للشي اللي انتبهت له توي..( لذي الدرجه كنت خارج التغطيه .. الدنيا بيضه .. والثلج يكسو كل مكان ..
منظر الثلج وكل هالجماليات .. اضاءت داخلي بشيء ليس أمل ..
لكن ..
تحاورت مع ربي ..
*بما أنك قادر على ملء الدنيا ببياض .. كهذا .
املئ قلبي المفتوك به .. ببعض السكينه .. !
كن معي يالله ..
انت تعلم الخفايا .. وانت غافر الذنوب ..!*

وقفت السيارة ..
أدريان تبادل بعض الكلمات مع سيف وهو يضحك ..
وسيف : سآخذ بعض الأوراق المهمه .. واتفق مع آلان ..انتظرني وانتبه للسيدة ..
أدريان : حسنا ً كُن مطمئنا ً..
تكلم بدون يطالعها .. : انتظريني .. بقابل رجال بمكتب داخل البناية .. وبرجع ..
ماردت ..
ونزل .. اختفى في البناية ..
مهره .. تنهدت .. وتتأمل الرايح والجاي .. والأماكن الحلوه .. افتحت الباب ..
أدريان بسرعه :
الى أين ياسيدتي .. هل تحتاجين شيء ..
مهره: سأحرك قدمي قليلا ً لن ابتعد ..
ارتبك ..وخايف يتوهق مع سيف..
مهره :صدقني لن اتسبب لك بمشكله ..
سكرت الباب .. وشهقت من البرد .. ورجولها تنغرس في اكوام الثلج ..
نهار والسما ملبدة بالغيوم .. وخلال تأملها للغيم .. طاحت عينها ..
على جزء من قمة برج إيفل ..
ولا أرادي ابتسمت .. وهي تقول( شفته قبلك يازيون .. شفته) ..
وراحت ابتسامتها بسرعه ..
وشردت .. وكلام سيف .. واتهامه وتكذيبه لها .. يرن في اذنها ..
وظلمت الدنيا .. بعينها .. حست الثلج سواد .. وكل هالجمال تحول لشيء تافه .. وماله معنى..
وقفت قدام فاترينا .. مليانه تحف تخص الكرسمس .. بابا نويل والغزلان وكسار الجوز .. وغيره ..
ايش هالجمال .. !
راحت تتمشى .. في المحيط .. وتوقف قدام المحال ..
اجمعت يدينها ونفخت داخلهم .. والجو مره بااارد .. والجوع ذبحها ..
وريحة خبز وكيك يجيها من عدة اماكن .. خذتها رجولها .. عند مقهى ..تصدر منه روائح شهيه .. حركت عصافير بطنها ..
تأكدت من وجود بطاقتها الصراف..في شنطتها ..
وراحت طلبت روتي فرنسي.. محشو بالمربى .. وقهوه ..
توهقت ان اللي تبيع ماتتكلم انجلش ..
بس تعاملت مع الوضع .. واشرت على اللي تبي ..
وقفت تنتظر ..
الموظفه ببتسامة .. تقول لها الحساب .. قبل ماتعطيها مهره .. امتدت يد سيف ببطاقة .. وتكلم مع الموظفه بفرنسيه سليمه ..
وحاسب عنها ..
اشرت الموظفه ع الطلب ..
سيف : ليه ماطلبتيه سفري ..
مهره تاخذ الصحن ..وبصد :
ماعرفت اقول سفري بالفرنسي ..
وراحت جلست ع طاوله خارجيه ..
نفخ سيف .. بس حسها معانده .. فاعطاها جوها.. ع الأقل تاكل شي .. لاتموت .. حتى وهم بمزرعة بيتهم ماتغدت ولاتعشت ..
طلب قهوه .. ونوع يعرفه من البسكويت ..
خذه وراح طلع عندها..
شافها شارده في الماره .. وتاكل..
وقف يطالع عيونها الحزينه وانفها الشامخ .. *مهره والثلج ..
اراها الآن لوحه كارثية ..
ولو.. وجدتها بهذا الشكل قبل يومين .. لاخرجت هاتفي .. واللتقطت صورة .. !
لكن ..
اجدها الآن جميله .. محتاله .. جميله خائنه .. قذره ..اسوء بشرية مرت في حياتي .. ! *

جا وجلس في المقعد المقابل .. ماتحركت مهره .. وهي تاكل اللي بيدها .. ببطئ .. وصمت ..
تنهدت ..
والدخان المكثف يخرج من فمها .. كاسحابة ..
واضح ان داخل مهره يحترق ..
خذت قهوة وشربت ..
سيف يشرب من كوبه .. وحاط رجل على رجل ..
تسائل .. عن صمت مهره لذي الدرجه .. وخروجها .. عن الطبيعه .. في انها تحاول تبرر اللي حصل ..
اما بالكذب او تقول الحقيقه كامله ..وتطلب السماح والمغفره .. !
لكنها.. وكلما اختلس النظر لها ..
ماشاف عينها عليه ..
ولاشاف اي تعبير .. ولا خوف ولارجفه ..
استغرب لما حس .. انه جالس مع شخص مايعرفه ..
وكنه جا والمقهى مكتض .. وشارك احد الزباين الطاولة .. !
اوجعه قلبه .. مع شعور الفقد .. للشخص مهره الليي عشقه وحبه ..
كيف اختفت بريئته فجأه ..
كيف تلوثت بهالشكل المخيف .. !
هل ممكن تكون مظلومه وجد ماتعرف عن وجود ثاني بالسالفه .. !
بس هي كانت بايعتها ومو فارقه معها من ابو ورعها ..!
خلصت مهره القطعه اللي معها ..
سيف وكأنه يجامل شريكه بالطاوله زاح البسكوت قدامها .. : ذوقيه بيعجبك .. !
مهره رفعت عيون خاويه .. له..
وشربت قهوتها ..
وهي شارده في عيونه .. بدون تنكسر .. وبدون تتكلم ..
هي .. وهو .. وسكون عجيب .. نظرات خاوية .. وذنب ..اتهام .. وضياع ..
كيف يجلسون تفصلهم طاولة صغيره ..
لكنها في الحقيقه وادي سحيق .. في قعره جهنم ..!!!!!!
...........
جمان لأمها : وليه متضايقين .. باللعكس خلوو هالأثين يختلون في بعض .. يمكن يعرفون ايش يبون بالضبط .. !

موضي بعصبية : عاد كذا ياجمان .. لامهدوا لهالصغير ..ولا حتى عطونا خبر ..
ضاعت براهينا بالمزرعه .. ولاهو ساكت .. نزلو فيه نواف وبلقيس وفارس .. من العصر لهالحين .. وهم ماظل ملاهي .. ولا محل العاب .. الا راحوه .. والى الآن ماجاوو ..
جمان تطالع الساعه: اذا باريس المفروض وصلوا ..
موضي : دقيت مايردون .. مغلقه جولاتهم .. يمكن رايحين ترانزيت ..
جمان .. تدق على سيف : حتى لو ترانزيت .. سيف مايختار رحلات فيها تطويله بالمطارات .. يعني صدقيني وصلوا .. بس خير مايردون .. !

ديم : ماما وين سيف .. ابيه ..
جمان : راح الملاهي مع خالي نواف ..
شهقت بيان وبغت تموت :
يروووحون ملاهي .. ولاياخذونا ..
فجأه ديم مدت البوز : ابي ملاهي ..
وبيان تهاوش ..وديم تبكي..
موضي بعصبيه :
وانتي ماتعرفين تسايسين بناتك .. قولي اي شي ..تقولين ملاهي .. كل وحده فلت شريطها .. انا ضغطي مرتفع من بكا ولد عساف طول الليوم ..
ضحكت جمان : يووو يمه شجاك .. مب متحمله .. الأطفال ..خليهم يعبرون عن شعورهم ..

انفتح الباب ودخلوو الجماعه .. ونواف شايل سيف اللي نايم ..
بلقيس تفسخ شيلتها وبعصبية لبيان وديم : خلاص اسكتوا .. لايصحى .. جمان سكتيهم .. تكفين..
خذتهم جمان .. وتهجدهم ..
موضي تطل بوجه سيف .. اللي جفونه حمر وانفه .. وبحنية:
يمممه عليه .. حسبي الله عليكم ياسيف ومهره .. كان سفرتكم بتطلع من عين هالورع ..
نواف بخفوت يتوجه للدرج:سيف بينام معي ..
وصعد ..
فارس .. جلس ورفع رجله ع الطاوله : ذمه .. انا يوم ماتت امي وسافر ابوي .. سويت كذا .. ؟! .. اعوذ بالله ..
موضي بتعزيز : عاااد انت الهدي الرضي .. اللي ماينسمع حسك .. ليت في الدنيا فارسين كان ماعلى الدنيا خلاف..

جمان بنص عيون: يمه بلاش كذب .. سوا كذا وألعن ..بس ماشاء الله الرضا تام .. عليه ..
فارس يضحك : ابوووك يالغيره .. خفوو .. عوذه ..

****نواف .. سدح سيف على فراشه ..
وغصه هايله تحتل روحه ..
ويفكر بمهره ..
ايش ممكن يصير عليها ..
سيف .. بيصير عقلاني .. ولا ..
ياخ البنت جابت العيد وقت وافقت على سيف .. عشان سيف.. غلط ..
في النهاية سيف هنا..
وهي الله اعلم .. وش بيصير فيها ..
لعن عساف داخله..
والشبه اللي بينهم اللي يجيب العيد..
ليتني ماشفت مهره قبل ..
وليتني جهلتها ..
ليتني شفتها مثل ماشافها الكل ..
ولاعرفتها ..
سيف نايم ويون ويناديها..
راح شاله وضمه :
نذر .. اجيبها لك يابوي .. وماحد يفرقكم ..عطني وقت ياعينه .. عطني وقت ..
........
وصلوا الفندق ..
مهره تتلفت بدون تعليق على الجناح الكبير ...وفخامته ..
للمره الأولى تتواجد بفندق .. مع سيف .. ولحالهم ..
لكن مع الأسف . كل مره اولى مع سيف سيء .. والله يستر من القادم .. !

ظلت واقفه لمن نزل العامل كل اغراضهم .. دفع له سيف بقشيش .. وطلع ..
اللتفت عليها ..
تبين عشا ..؟!
مهره باختصار : لا .. ..
قالت كذا وهي تشيل الجكت والاسكارف ..
تركها وراح دورة المياه ..
مهره ظلت تحاول تتصل من جوالها بس المشكله ماعندها خدمه دولية ..
كانت منسدحه ع السرير .. وغفت .. والجوال بكفها ..
طلع سيف .. وينشف شعره .. انتبه لها كيف نايمه كذا بملابسها وجزمتها .. واضح تعبانه حدها .. احساس انها مظلومه يجيه ..
بس يشيله ..
ولايلقى لها اي تبرير .. !!
لبس ملابسه وعيونه مافارقت وجهها الشاحب البريئ.... تدفى كويس .. بجكت ثقيل وسكارف ..
خذ اشياءه وقبل يطلع قرب منها .. وشال جزمتها رماها في الأرض ..
وفك البطانية ولحفها ..
دق رقم : هلا حسين .. يلا جايكم ..لا بالمطعم احسن ..
حسين بشقاوه : ولك كايلك عزي .. هاي عنده حجايه بالفندك .. ليش ماراضي انجي فيه ..
طلع وسكر الباب ..
وعزيز يضحك :
عاد احنا ندور السوالف ها بو فارس وش عندك ..
سيف : ياخي انتوا كلاب ونيتكم ** .. ابي اتعشى .. جايع .ماعندي سالفة ولاشي ..
حسين : يخسى الجوع يابه ...يلا خلينا نتلاگى ريد قل لك الهوايل اللي اطلعنا عليها الليوم باللوفر ..
سيف ياخذ سيارة استأجرها مع ادريان من شوي .. ركب .. :
كم يوم وانتوا هنا ..؟!
حسين : الليوم خامس .. لو رابع عزي .. ؟!
عزيز : خامس ..
حسين : خمسه .. بس بشرفي ياسيف .. حقيقة مثل عين الشمس .. فرنسا .. ديرة مليانه تاريخ .. متاحفها .. بيها اشيا .. تشيب الجاهل والله ..
ضحك سيف : من مليون سنه وانت تعيد نفس الديباجه .. والله حتى لو انك اول مره تزور اللوفر ياحسين ..
ضحك عزيز: والله انك صادق .. الليوم مسوي مبهور .. اصلا ً الموظف يدري ان حنا بنسوي تقرير ..حق السنه .. الا ان حسين .. مسوي سائح .. مشحوف ..
عزيز يقلده : عزيز بشرفك .. اللوحه لو تُباع .. كم تعطيها ..عزيز بشرفك .. مصر مافرطو باثارهم للأوروبا .. عزيز بشرفك هسا العِراق ..بلاد الرافدين .. بيها حضارة بابل ... وآشور وسومر .. هذا كله وين .. ليش مابيه ولامتحف واحد بقوة هاي المتحف الضخم ..

ضحك سيف:
والله جبته ياعزيز .. نفس اللحه واللجه .. المهم ارسل موقعك .. انا بلف ع الشنزليزيه..
......
صحت مهره .. بعد ساعات وماتدري كيف غفت بدون تحس ..تلفتت وماشافت سيف ..
حست بتعب رهيب .. وصداع.. وتتسائل يعني من جده سيف مخليني كذا لحالي .. وين راح ..؟! .. الرجل والله بايعني ..
قامت توضت .. وصلت المغرب والعشاء على قبله بالتخمين ..
ماتعرف فرق التوقيت بين باريس والسعودية ..بس ساعة اليد اللي عليها تشير انوو بالسعودية الساعه ثلاث الفجر ..
اكيد نامو .. تبي تطمن على سيف .. اكيد .. سوا مناحه ..
راحت جنب تلفون الغرفه .. وطلبت الرسبشن .. اسئلتهم لو فيه واي فاي ..
الموظف علمها ان الرقم موجود .. على كرت جنب المنيو .. شكرته ودخلت الرقم ..
وانهالت عليها الرسايل ... في الواتس .. والسناب .. من كل جهه .. من جهة بيت سعود .. ومن جهة خواتها ..
لفت انتباهها رقم غريب في الواتس .. افتحته ..
عقدت حواجبها لما لقت نواف ويعرف عن نفسه .. ويعتذر لان خذ الرقم من جوال فارس .. لأن سيف مايرد عليهم ومقفل جواله ..
لقت تسجيل صوتي وافتحته :
واضح ان سبب هالسفر .. جيتك .. والكلام اللي صار الليله الماضيه .. مهره .. انا من عرفتك .. اول ماجيت ومابغيت اضرك والله يعلم ...والله مو فاهم لأي مدا وصل سيف وعرف .. بس انتبهي لنفسك .. عشانك وعشان هالضعيف .. ولدك ..ولو بيضرك .. دافعي عن نفسك وارمي اللوم للكل الا نفسك .. ولو بيضرك اهربي .. وتواصلي معي .. وانا ماخليك ..

مهره ابتسمت بغصه ..
وراحت كتبت باختصار ..: سيف .. كيفه..؟!
ارسل لها صورة سيف نايم ..
وكتب : نام .. وعدناه بكره يكلمك فيديو .. الورع واضح مايعيش من غيرك ..
مهره وغصتها تكبر زيادة .. وتختنق ..
*لكن مابال دموعي .. وكأنها جفت .. مابال عيني تصحرت .. مابالني لا أقوى على البكاء كما يجب في هذا الوضع وهذه اللحظات ..

كتبت : هو يقولك بابا .. قوم بالدور كويس .. وانتبه له.. لو استعصى الوضع .. اخذوه مزرعة جديده وخلو زينه اختي تجي له ..هي تعرف له ..
كتب : اوكي ..سلام ..
قفلت..
راحت دورة المياه .. رشحت وجهها .. حطت يدها على حنجرتها ..
وقاامت تطلع الآاااه بصوت خافت .. وتزيد.. كانت تحاول تبكي وعجزت ..
استحضرت كلام سيف واتهامه ..
استحضرت صورة سيف التعيسه اللي ارسلها نواف .. وعجزت ..
استحضرت وفاة ابوها وفجيعتهم ..
استحضرت وفاة عساف .. وكل شي ..
كانت تبي تبكي ..
وخااافت من فقدناها لأوفى مواسي في هذه اللحظات ..
ماهي عارفه تبكي أبد ..!!!!

عادي و لو كل الوجيه أفتقدها
‏إحساسي البارد .. ذبحني وأنا حي

‏أنا وصلت لـ مرحلة ما بعدها
‏لا تشدّني حاجة ولا يهمني شي
...........


وش رايكم بالبارت ...
ادري راح تكون في ردود فعل قويه ..نترقب ..

واشكركم من جد على تفاعلكم واصراركم لتقديم البارت ..
والله يحسب لكم اقسم بالله ..

قراءه ممتعه ..

[هاجر جوده]

البارت بعنوان " صدمة عمر مرت علي و لا حسبت حسابها !!!"
انا مصدوووومه من حقارة نواف 😨🤯🤯
كيف يعمل هيك !!! يعني معقول الي فهمته صححح مو قادرة استوعب و لسه ادحض الفكرة بعقلي و اقول يمكن ييكون في شي غلط
في عندي امل انه ما يكون صار بينهم شي بس كيييف و هو يقول لها من ابو الولد 😵😰
حسبي الله عليك يا نواف طلعت مو بعيد عن عساف شو التوام الواحد فيهم اسوا من الثاني

مهره
كيف ما قتلت نواف بعد كلامه
اعرف انه ابنها الاهم لها بس الوضع رهيب تخيلتها بتصرخ و تهد الدنيا على راسه مو تقول ما يهمني !!
يمكن هذا يلي خلا سيف ما يسمع منها و ما يقتنع ببراءتها و يغمض عينه ع الحقيقة ..
هدوءها الظاهري و سكوتها و عدم تبريرها شي عادي لانه سيف في كل الحالات ما رح يصدق و هو في هذيك الحاله ..
وهي وصلت لمرحلة انه خلص الي يحصل يحصل ما عاد فارق شي ..
الشي يلي خلاها تكتب وصيتها بدم بارد

سيف ..
ما اقدر الومه على غضبه من الاول لانه الفكرة وصلتله بطريقة تخليها تتفهم غلط ..
و منيح انه قدر يسيطر على نفسه و ما يعمل كارثة
و من الجيد انه ابتعد من البلد كلها لحتى يصفي ذهنه و يركز في كل الاشياء من اولها
و يقدر يفهم تصرفات كل احد منهم و عليه يربط الامور ببعضها و يطلع بتفسير ..
و يارب ما يعند كتير و يسمع منها او يطلب منها توضيح لكل شي
الشي صعب عليه كتيير كرجل بس لازم يحكم عقله ...

امونه كنا متوقعين بارت يبردنا شوي فنلاقيكي عليتي في الصدمات 🙄
خفي علينا شوي يا بنت 😓 الررررحمة 😭
تكفي البارت الجاي يكون قريب بدنا نطمن على مهره 😭

[لجين بيري]

ماشاءالله عشنا القصه بجميع احاسيسها روعه ابدعتي ومقنعه للاخر
بس سيف المفروض اتغض من غلطه مع فارس نتيجة التسريع ومايعيدها مع مهرة بس الله ايعينها عليه استمري في انتظار القادم

[فيتامين سي]

الذين يشاهدون محتوى الموضوع الآن : 27 ( الأعضاء 10 والزوار 17)
‏فيتامين سي*, ‏هيدراانجياا+, ‏سجى الإحساس, ‏لجين بيري, ‏منـال مختار, ‏ايمان يوسف., ‏Maha bint saad, ‏نفوسا, ‏روجا جيجي, ‏كريستنا


قراءة ممتعة لكم ......... وردود ممتعة لنا ........... وللغاليه ايمان ...........