اكتملتُ بكِ - قلوب نوفيلا (88) - [حصريا] للكاتبة::منال الشباسي*مميزة ومكتملة*

[منال الشباسي]

الفصل الثالث

فى اليوم التالى ذهبت زهرة ورحيق للشركة لإستلام الاولى عملها الجديد ومتابعة الثانية عملها اليومى ولكن قبل هذا كان من الضرورى أن تذهب لتشكره عما فعله وإتخذتها ذريعة لرؤيته فهى عادة لا تراه كثيرا بالعمل الا فى حدود الاجتماعات..

..طرقت على باب مكتبه ودلفت حين أذن لها وكانت برفقة شقيقتها..

بدأت رحيق الحديث بإلقاء التحية "صباح الخير مستر نائل"
أتبعتها زهرة قائلا " صباح الخير؛ انا جيت حسب كلام حضرتك إمبارح مع بابا "

..أوما برأسه قائلا "صباح النور يا أنسات..طبعا انا عند كلامى وحالا هتستلمى شغلك؛ أما انت رحيق كويس إنك عديتى عليا كنت هبعتلك لكن لحظة نسلم الموظفة الجديدة شغلها"

..رفع هاتف المكتب وطلب مساعدته لتأتى على الفور..
..دخلت هالة "أوامر حضرتك مستر نائل"
..أشار لها على زهرة قائلا "من فضلك خدى الأنسة ووصليها بنفسك لقسم المالية وهناك مستر توفيق عارف هيتصرف ازاى"
..المساعدة بإحترام " حاضر يافندم..اتفضلى معايا( وأشارت لها وغادرا سويا)

..نظر ناحية الواقفة شاردة تنتظر مايريده منها..
قطع عليها تفكيرها قائلا " ياترى انطباع الوالد عنى ايه بعد ما مشيت من عندكم؟

إبتسمت قائلة "والله شكر فى حضرتك قوى واصلا هو دايما كدا حتى قبل مايشوفك من اللى يسمعه عنك وعن عيلتك "

..انفرجت ملامحه لما سمعه عن راى والدها
فيه "طب الحمد..هو كمان طيب ومحترم ربنا يخليه ليكم "
..أمنت على كلامه "امين يارب..وشكرا على توصيلة امبارح وتشريفك لينا"
..رد عليها "مفيش شكر بينا والشرف ليا أنا(وجذب بعض الاوراق وقدمها لها ) ممكن تترجمى الايملات دى بس هنا لانها سرية جدا "

..أخذت الاوراق ونظرت لهم وهى تقول " أكيد حاضر حالا هترجمهم "

بعد وقت بسيط كانت قد انتهت من عملها وقدمته له وتوجهت للمغادرة..
وقبل أن تغادر استوقفها بسؤاله " كنت عايزة أسالك عن البسكوت اللى كلته عندكم امبارح من اى محل
" بتسأل ليه حضرتك؟
قال" بصراحة عجبنى جدا جدا ومدوقتوش فى اى مكان تانى"
..ابسمت قائله " شكلى هتغر فى نفسى "
..تمتم بدهشة " معقول انت اللى عملاها؟
.ابتسمت ثانية " ايوة والله انا اللى عملاها"
رد بتلقائيه " والله كنت حاسس بحاجة زى كدا "
استغربت قائله " ازاى ؟
قال " مع انى اكلت افخر انواع البسكويت لانى بفضله لكن حسيت دا طعمه مختلف "
"انا مبسوطة جدا انه هو عجبك واوعدك انى اعملك علبه مخصوص" (وغادرت بعدها)
.........

..دخل طلال فسأله "طمنى اتكلمت وطلبت منها الجواز ولا لسه ؟

صمت لحظات وأكمل " ياريت فى اخر لحظة مقدرتش وكمان خوفت اكون واهم ان فى مشاعر ليا عندها..بس انا فعلا لازم اواجهها الاول بالحقيقة ولو وافقت هكلم ابوها ووقتها هتصرف بس دا مش دلوقت شوية كدا لما اتأكد من مشاعرها الاول "

..ربت على كتفه "ان شاء الله هيحصل كل خير وهتكون من نصيبك انا واثق من إحساسى..يلا هسيبك واروح اشوف شغلى"

..قبل ان يصل للباب استدار متسائلا " صحيح انت عينت حد جديد فى الحسابات؟
..خبط على رأسه "اه نسيت اقولك دى زهرة اختها خريجة تجارة انجليزى هتمسك قسم المعاملات الخارجية..خلى بالك منها انت عارف توفيق "

..غمز له "ياترى حلوة زى اختها علشان بس اخد بالى بزمة "
..قذفه بفتاحة الاظرف "احترم نفسك واياك تضايقها مفهوم"

..تفادى القذفة "ماشى حاضر ياساتر عليك الواحد ميطلعش بمصلحة من وراك ابدا "

..وغادر سريعا قبل ان يقذفه بالكريستالة التى تقبع فوق مكتبه..

..توجه طلال إلى القسم الخاص للمحاسبة ليرى زهرة ومر أولا على رئيس القسم مستر توفيق ذو الخمسين عاما ورغم أنه حازم وقاسى بعض الشىء ولكنه يتمتع بقلب عطوف..

القى التحية "صباح الخير ياجماعة..يوم موفق ان شاء الله(ووجه كلامه لتوفيق) مستر توفيق مش هوصيك على زميلتنا الجديدة"
..استدار ليرى شكلها فتسمر مكانه يتمتم "زهرة زى إسمها..ايه الجمال دا..فى كدا"

.اخرجه من شروده رد توفيق الحازم عليه" معندناش توصية سيد طلال كل واحد يلتزم بشغله يجزى عليه والعكس طبعا مفهوم"

..رد مؤكدا أكيد طبعا احنا عارفين حرصك على عملك وانا قصدى انك تعطينا تقريرك عنها (وادار وجه وغمز لزهرة ولكنها لم تفهم مقصده فإبتسم وخرج من الغرفة)

..عادت زهرة وأختها بعد اول يوم عمل للاولى يشعرا بالسعادة أن الله من عليهم بوظائف بشركة محترمة..

ومرت أيام متتالية بنفس النمط بين الجميع ولكن كثرت لقاءات رحيق ونائل بالإجتماعات الداخلية والاكثر الخارجية ودائما يعقبها تكملة اليوم بنزهة خاصة بينهما جعلت تقاربهما يزداد وكل مرة يحاول أن يكشف عن سره ولكنه يتراجع فى اللحظة الأخيرة..
علمت زهرة عن حبهما وشهدت على سعادة اختها..كما حدثت ألفة بينها وبين طلال من كثرة المواقف الكوميدية التى تمت بينهما والتى كان يتسبب بها الاول قاصدا لفت نظرها له..
--------
فى يوم جديد وقت استراحة الغذاء كانت تجلس رحيق واختها لتناول وجبة خفيفة فى المكان المخصص لذلك بالشركة وانضم لهما طلال الذى جعل الجلسة عبارة عن قهقهة مستمرة حتى دلوف نائل بملامح واجمة مسلط كل نظره عليها والغيرة تطلق شرارا من عينيه لها..
..القى التحية وتكلم ببعض الغلظة " مساء الخير.. صوتكم جايب الشركة كلها..خير "

..علم طلال انه غار فأراد ان يلطف الجو "معلش أنا السبب قلت لهم كام حاجة ورا بعض وسرحنا كلنا"

..اومأ براسه ووجه حديثه لها مباشرة "لو كنتى خلصتى أكل ياريت تيجى معايا عايزك فى شغل؟

..استقامت قائلا "ايوة خلصت اتفضل انا جاية معاك (وتحركا سويا )

..عادا سويا لغرفة مكتبه وتقدمها ولحقت به ثم بدا الحديث بأسف لطريقته "اسف لو كنت ضايقتك.. عارف ان مش من حقى اكلمك كدا بس بصراحة اضايقت ان كل الناس اللى كانت حواليكم سامعة ضحكتك بالشكل دا "

..ردت عليه نافية "لا أبدت مش اضايقت ولا حاجة واحنا فعلا سرحنا ومكنش يصح صوتنا يعلى بالشكل دا بس إنت عارف طريقة كلام طلال "

..أوما برأسه ثم سألها : قوليلى مفيش مكان نفسك تروحيه ومش عارفة؟ أصل بصراحة عايز أغير جو"

..سكنت لحظات تفكر وقالت بخجل "خايفة اقولك تضحك عليا !!
..تحدث مطمئنا لها "لا قولى ومش هضحك"

..احمرت وجنتيها "نفسى اروح الملاهى..بابا منعنا منها اول ما بقى عندى عشر سنين وطبعا اختى معايا..قال انتم بنات ومعدش ينفع نلعب اصل بابا لسه عايش بعقلية زمان..تصور لحد دلوقت ماسك الفون النوكيا الصغير وبيتابع الاخبار عن طريق الجرايد والتليفزيون..ضد التكنولوجيا"

..علق على كلامها "والله احيانا البعد عن التكنولوجيا غنيمة..طب ايه رأيك نهرب من الشغل ونروح الملاهى وانا كمان من طفولتى مروحتهاش"

..ذهلت من إقتراحه "بجد ممكن نروح سوا (اوما براسه فقالت) موافقة حالا هجيب شنطتى وارجعلك"

..دلفا الاثنان لداخل الملاهى وكانت السعادة التى تملأ وجهها ليس لها حدود فأخذها من يدها ك الطفلة وبدأ فى صعود لعبة تلو الاخرى وكان صراخها يصاحب ضحكاتها وحماسها يذداد مع استخدام اللالعاب السريعة.. وفى النهاية جلسا على احدى المقاعد المنتشرة بالمكان يتناولو المثلجات فبادر بسؤالها "للدرجة دى بجد مبسوطة إننا جينا هنا ؟

ردت بتأكيد "قوى قوى دا كان حلم وانت حققتهولى. مش عارفة اشكرك ازاى"

عاتبها قائلا "كدا يارحيق هو انا بعمل دا علشان تشكرينى..انا نفسى اسعدك وأعملك كل اللى بتتمنيه بس انت عرفينى أحلامك "

..شردت لحظات فسالها " فى ايه روحتى فين؟
..انتبهت موضحة "أصل أنا بحب الاغنية اللى اشتغلت دى قوى "

..ركز كل حواسه ليسمعها "تصدقى لايقة قوى علينا"
..ضيقت حدقتاه "ازاى مش فاهمة "

..صمت قليلا ثم قال "هتفهمى بس مش دلوقت اوعدك قريب جدا"
..هزت رأسها بالموافقة وطلبت منه المغادرة حتى لا تتاخر ثم تذكرت أختها "يانهار أبيض انا نسيت زهرة"
..هدأها قائلا "متقلقيش طلال هيوصلها لحد البيت اكدت عليه قبل ما نمشى من الشركة "

..تحركا سويا وصعدا لسيارته ليوصلها لمنزلها بعد قضاء يوم ملىء بالسعادة والذى جعله يحسم قراره ان يحكى لها كل شئ يوم إحتفال الشركة السنوى..
--------------------------------------------------------
فى منزل رحيق وعلى طاولة الطعام التى تجمعهم ليلا سأل الأب : ليه مرجعتيش مع أختك يازهرة وجيتى لوحدك؟
إرتبكت لا تعلم بما تجيب فتحدثت رحيق "لأن يا بابا كنت فى إجتماع مع مستر نائل وكان صعب نرجع الشركة وهو خلى مستر طلال يوصلها "
..جلال " مين طلال دا ؟
..زهرة " دا ابن عم صاحب الشركة وشريكه كمان"
..تكلمت سعاد " شكلهم ولاد ناس طيبين والاتنين ميتخيروش عن بعض..ربنا يوقف لكم دايما ولاد الحلال"
..أعترض جلال "بس دا ميصحش يابنات بعد كدا لو حصل موقف زى دا تركبى أوبر او تتصلى بيا لو الوقت متأخر ..مفهوم !
..اوما الاثنان برأسهما "حاضر .. مفهوم"
............
فى اليوم التالى ذهبت زهرة ورحيق للشركة كعادتهما وذهبت الاولى لمكتبها أما الثانيه فتوجهت لمكتب مديرها بناءا على طلبه..
..طرقت على باب مكتبه ودلفت حين أذن لها بالدخول..
بدأت رحيق الحديث بإلقاء التحية "صباح الخير مستر نائل"
..رد تحيتهاx صباح النور ثم أشار لها أن تجلس على المقعد أمامه ليتحدث معها فى أمر هام "اتفضلى رحيق "
..جلست ثم سألته "فى حاجة حصلت يامستر؟
..أخذ نفس ليرتب كلماته " أولا مش قلنا بلاش مستر دى..ثانيا إحنا بقالنا شهور بنشتغل مع بعض..ياترى مرتاحة معانا؟
..حركت رأسها "اه الحمد لله كل الناس هنا محترمين ليه بتسأل حد قالك حاجة أو اشتكى منى؟

..توتره جعله لا يستطيع أن يبوح بما يريد..يتمنى قربها ويأبى رفضها إن علمت سره..مشتت هو بين هذا وذاك..
أما هى تمنت لو يفصح عن مشاعره..كلامه تصرفاته غيرته أحيانا تؤكد أنه يكن لها بعض المشاعر..ليته يعلن عنها..

..حاول إستجماع نفسه فقال " لا طبعا محدش قال ولا يقدر يقول عنك أى كلام..بس فى موضوع مهم كنت عايز اقولك عليه واخد رايك ؟

..نظرت له بإهتمام تدعو ان يكون تذكرها: اتفضل خير؟!

..للمرة الذى لا يعرف عددها تخونه شجاعته فقال "شوفى إحتفال الشركة السنوى بعد أسبوعين وإحنا بنعمل حفلة كبيرة بتضم كل العملاء والموظفين وبعض رجال الاعمال..ان شاء الله بعد نهاية اليوم هقعد معاكى واحكيلك كل حاجة وأخد رأيك فى موضوع خطير بالنسبالى"

..شعرت بالقلق فقالت "بس أنا كدا قلقت مش ممكن تقولى دلوقت؟
..أشار برأسه بالنفى "صدقينى صعب دلوقت لان دماغى مشغولة بالحفل بس اوعدك بعده حاجات كتير هتتغير"
..لم تجد مفر من الموافقة وقلبها يؤكد لها أنه يريد ان يعترف بحبها ولكن عقلها ينهرها عن التمسك بحلم احدى طرفى مبتور من تلاه

عادت سريعا من شرودها "إن شاء الله طالما حضرتك شايف كدا..عن إذنك هروح اشوف شغلى"
..أذن لها "اتفضلى "

..عند خروجها دخل طلال ووجد صديقه شارد حزين فسأله "مال وشك إنت قلت لها حاجة؟
..رد بعبوس "ياريت.. للاسف مقدرتش اقول حاجة بس وعدتها احكى لها كل حاجة يوم حفلة الشركة بعد ما تخلص..المهم اقدر انفذ "
تكلم إبن عمه يؤكد عليه "لازم يانائل مينفعش تعيش تتعذب بحبك ليها وخايف من رد فعلها.. صوابعك مش زى بعضها..تشجع ياصديقى"

رد بمرارة "غصب عنى انت نسيت اللى حصل مش كنت موجود وشاهد بنفسك على كل حاجة:

..ثم تسائل نائل " تفتكر اللى عرفتنى من كام شهر وكمان جميلة ومتعلمة وصغيرة هتوافق بيا ومراتى اللى فضلنا نحب بعض سنه قبل خطوبتنا وسنة بعد كتب كتابنا بعاتنى فى لحظة وجرحتنى بأقسى طريقة ولفظتنى من حياتها؟

..اجابه طلال "ايوة افتكر لان لامعة الحب اللى بشوفها فى عينيها لما بتبصلك عمرى ما شوفتها فى عين سلمى لا قبله ولا بعده..اساسا ولا مرة حسيتها بتحبك زى ماكنت بتحبها.. وبصراحة كانت مادية وبتاعة مظاهر وسمعتها بتكلم صاحبتها مرة فى النادى انك العريس اللقطة بالنسبالها..بس طبعا كان صعب اقولك وانت كاتب كتابك عليها والأصعب بعد اللى حصل وحالة الانهيار اللى إنت كنت فيه"

..برقت عينيه مما يسمعه "معقول اللى بتقوله دا..يعنى انا مكنتش عارف حقيقتها وكنت مغشوش فيها..كنت فاكر انها بتحبنى زى ما انا بحبها والحقيقة هى عايزة المركز والفلوس..كان لازم تقولى وقتها "

..رد عليه "خلاص اهى راحت بخيرها وشرها انسى وفكر فى الانسانة اللى ربنا بعتهالك وفكر ازاى متخسرهاش "
..تنهد قائلا " ادعيلى ياطلال"
" بدعيلك ياصاحبى والله"
----------------------
مر الأسبوعان وجاء يوم الحفل وتألق الجميع من أجل أن يكون محط الانظار للغير بعكس زهرة ورحيق اللتان تحليا بالبساطة والأناقة برغم إرتداءهما للحجاب. وأعلمت الثانية والدها أنها سوف تذهب مع مديرها لإجتماع عمل تم تحديده مؤخرا بسبب ارتباط الشركة الأخرى بموعد سفر لن يستطيعو تأجيله وان اختها سوف تعود برفقة السائق الذى سيقلهما أثناء ذهابهما وحصلت على موافقته..

..كان الحفل مزدحم بالكثير من العملاء والمدعوين وأيضا العاملين بالشركة مع وجود بعض المنافسين..

..أما نائل كان يقف على أحر من الجمر فى انتظارها ويجاوره طلال محاولا تهدئته حتى أطلت عليهما برفقة شقيقتها وبرغم بساطة ازيائهما إلا انهم خطفو الأنظار بأناقتهم ورقة اختيارهم للالوان سواء الملابس او الوشاح الذى أضاف عليهما هالة من الجمال الربانى..

القت كلا منهما التحية "السلام عليكم ..أسفين اتأخرنا شوية لأن كان فى حادث فى الطريق هو اللى عطلنا"

..هز رأسه بأنه يعلم "أيوة اتصلت بالسواق وعرفنى وكنت قلقان عليكم قوى بس الحمد لله وصلتم بالسلامة"

..بدات فقرات الحفل واخذ طلال بتحدث مع زهرة حتى أنه حين تحرك لمصافحة عميل طلب منها أن ترافقه ليترك المكان خالي لصديقه لينعم برفقة محبوبته..
.. بعد مرور نصف الوقت وإلقاء نائل كلمته وشكر العاملين معه على حسن أدائهم والتزامهم بواجبهم والاعلان عن المكافأة السنوية كهدية لهم صدحت بعض الالحان الموسيقية ومنهم نغمة لأغنية محددة تعرفت عليها فورا ونظرت له..

اجابها قبل ان تسأل "طلبتها مخصوص علشانك لكن موسيقى بس علشان تناسب اجواء الحفل..ووعد هنسمعها سوا فى المكان اللى هنروحو بعد الحفلة وانا بحكيلك كل حاجة "

..إبتسمت له قائلة "اتفقنا..هروح اجيب حاجة نشربها"

..فى جانب أخر من الحفل يقف شخصان احداهما يترقب اللحظة المناسبة لتنفيذ مخططه اللعين بعدما علم السر الخفى لنائل الشرقاوى أقوى منافس له فى السوق.. وقد قرر ان يستغلها لصالحه ولا يعلم انها اقذر الاشياء استغلالاx لازاحة منافس شريف.. والشخص الأخر ينتظر الإشارة لتنفيذ الجزء الخاص به من الخطة..

[منال الشباسي]

ياترى مين الشخص وعايز ايه من نائل

[منال الشباسي]

حد منتظر يعرف سر نائل ولا اخده وامشى

[م ام زياد]

سبحان الله فيه نفوس كده زباله بتعمل لمصلحتها وخلاص
بس ان شاء الله نائل هيقدر يبقى أقوى وأفضل من الاول

[منال الشباسي]

الفصل الرابع

.. للاسف كثيرا من البشر يخيل له أنه يستطيع أن ينجح على حساب أسرار الأخرين ولا يعلم أن من تتبع عورات الناس تتبع الله عورته..
فى جانب من الحفل وقف الاثنان يتحدثان ..
الشخص الاول "انا هروح دلوقت واقف واتكلم معاه وانت صور كل حاجة من زوايا واضحة لحد النهاية وبعدين نبقى نقص ونظبط اللى عايزينه وتختفى مباشرة اول ما ابصلك..مفهوم ؟!

الشخص الأخر "أوامرك يافندم حاضر "

..تحرك عدنان ناحية نائل يحمل داخله كل الخبث والشماتة مقدما لما سيفعله معه..
..القى تحية مصطنعة "يا اهلا بالغالى واحشنا ياراجل..فينك مش بنشوفك غير من السنة للسنة كدا؟
..رد عليه ببرود "كويس ..الشغل بيضيع الوقت مش فاضى زى ناس مش وراها غير أذية غيرها "

..تجهمت ملامح عدنان بعد حديث نائل وأدار بوجه للشخص الذى ينتظر الاشارة بالبدء وقد كان واستعد هو ايضا لبداية الخطة..
سأله "قصدك ايه يا بالكلام دا؟ خليك واضح"

..لمحها تعود حاملة بيدها كوبين من العصير ففضل
الذهاب اليهاx ليقف معها بعيدا عن الشخص السمج الذى يرافقه.. فهو لن يستطيع ان يتحمل نظرات عدنان لها وهو أكيد أنه سوف يضايقه عن عمد بحركاته المعتادة..

..رفع يده يوقف حديثه "عدنان ملوش لازمة الكلام الكتير..انت فاهم قصدى..عن أذنك متنساش دى حفلتى ولازم ارحب بالكل"

..وبدأ يتحرك نحوها غير مدرك للتصرف الحقير الذى نوى عليه عدنان بأن مد الاخير قدمه مسافة معينه فتعثر نائل ووقع أرضا وهنا كشف المستور والسر الذى أخفاه عن أغلب الناس والأهم عنها هى وكان يتمنى ألا تعلم بهذة الطريقة المهينة..

..عند عودتها حاملة لكوبين العصير تلاقت اعينهما لثوانى بإبتسامة ثم أكملت طريقها له وفجاءة شاهدت ما لم تتوقعه أبدا .. نائل يقع على الارض ولا يستطيع النهوض وقماش بنطاله الذى انكمش بعض الشىء عن احدى ساقيه نتيجة سقوطه و كشف عن ساقه الصناعية!!

وقفت مذهولة مترقرقت العين تنظر له لا تستطيع الحركة ك من شلت أطرافها..
أما هو فاخذ ينقل بصره بينها وبين الشخص الساخر مما فعله والذى تأكد من نظرته الشامتة وإبتسامته الصفراء انه تعمد إحراجه امام الجميع.. وبالنسبة لنظرتها فسرها بالشفقة عليه مما علمته لتوها ولا يعلم أن قلبها شق نصفين لما علمت ما يعانيه وفهمت ما كان يريد أن يقصه عليها.وفى كل مرة يتراجع عن افصاحه..

..هرول طلال يساعده على الوقوف مرة أخرى مهدأ من توتره الحاد الذى اصابه ولكنه نظر للجميع ثم غادر على الفور طالبا من صديقه الاهتمام برحيق واختها لانه يريد الاختلاء بنفسه..

..انتهى الحفل بالأسى من بعضهم والشماتة من أخرين والقلق من الذين يهمهم أمره وغادر الجميع وقبلهم الشخص الذى قام بتصوير كل ماحدث كما طلب منه رئيسه..
فى طريق العودة للمنزل طلبت رحيق من زهرة ألا تقص ما رأته وعلمته لوالديهما فوافقتها لعلمها بحب اختها له بل عشقها وكانت ترى أيضا تبادل المشاعر من ناحيته لشقيقتها ..

..اختفى نائل تماما ولا أحد يعلم مكانه غير صديقه طلال الذى يفهم جيدا حالته الحالية ويترك له مساحة ليهدأ ويستجمع نفسه وافكاره..

كان اليوم التالى أجازة للشركة بسبب العيد السنوى واقامة الحفل باليوم السابق وهذا ما سبب لرحيق ضيق كبير لأنها لا تستطيع الإطمئنان عليه وخجلت أن تهاتف طلال وعزمت ان تتحمل حتى تراه بالعمل فى يوم عودة دوامهم..

لا تعلم كيف مر اليومين عليها حتى ذهبت لدوامها وهرولت لمكتبه لحظة وصولها ولكن مساعدته اعلمتها أنه لم يأتى بعد ولا تستطيع الوصول إليه ..

..هالة : مستر نائل مش موجود ومعرفش هيجى أمتى وتليفونه مغلق :
..رحيق : ازاى وانهاردة اجتماع الشركة الانجليزية؟

..ردت المساعدة تؤكد :عارفة وعلشان كدا اتصلت أفكره كالعادة بس موبايله مقفول وانا منتظرة مستر طلال علشان اعرف هنعمل ايه وهبقى أبلغك :

..أومات لها وغادرت لمكتبها تدعو الله ان يكون بخير ويأتى ولو حتى متأخرا..
..مر اسبوع كامل ولم يظهر نائل أو تستطيع الإطمنئان عليه حتى عن طريق طلال الذى أخفى انه يعرف مكانه..وكانت عندما تختلى بنفسها تبكى بعده وحزنه لحاله وتتمنى لو تعرف عنوانه لتذهب إليه..
----------
فيلا فى منطقة الساحل الشمالى مطفأة الأنوار عدا حجرة واحدة يجلس بها يراجع ماحدث ونظرة الشماتة من بعض الحاضرين والشفقة من الأخرين ولكن كل هذا لا يهمه..هى فقط نظرتها الدامعة الحزينة لشعورها بالشفقة عليه..
ضحكة ساخرة خرجت منه محدثا ذاته..
: كنت عايزها تبصلك ازاى انت ناسى اللى كانت مراتك قالتلك ايه فى وشك

(منذ خمس سنوات)
..يجرى رجل الأعمال ماهر الشرقاوى يتبعه إبن أخيه طلال فى اروقة المشفى ويسأل هنا وهناك عن الشخص الذى وصل منذ قليل بحادث سيارة حتى علما أنه بغرفة العمليات فما كان عليهم غير الإبتهال لله تعالى أن يساعده ويجعل العواقب سليمة..

..بعد ساعات خرج أخيرا الطبيب ليريح قلبهما ويطمئنهم ولكن ما سمعاه شق الروح بأكملها:
ملامح الطبيبة تنذر بما سيقوله: أنتم اهل المريض نائل الشرقاوى؟

..رد الأب متلهفا : أيوه يادكتور أنا أبوه ودا أخوه خير طمنا عليه..هو كويس صح:
تنهد بأسى : هو كويس بس للاسف اضطرينا لبتر رجله الشمال لحد الركبة..أى تأخير كان هيأثر على رجله بالكامل:

..لم يتحمل الأب الصدمة ووقع مغشيا عليه فأسرع طلال بحمله حتى جاءت المساعدة التى طلبها الطبيب ونقله لإحدة الغرفة وإسعافه حتى فاق ليتأكد أن ماسمعه حقيقة قاسية..ولده الذى يبلغ فقط الخمس وعشرون عاما يصاب هكذا..ليس بيده شئ غير أن يحمد الله أنه مازال على قيد الحياة:

..بعد العملية بثلاثة أيام ونقل المريض لغرفة أخرى بعد قضاء الأيام السابقة فى شبه غيبوبة بفعل المهدأت لأنه لن يحتمل الألم حتى استقرت حالته فتم نقله..

..بدأ نائل فى فتح عينيه ببطء ليتفحص المكان ويحاول أن يتذكر ماحدث فوجد والده يقف جواره والناحية الأخرى طلال ابن عمه..
..تكلم ببطء : بابا هو إيه اللى حصل؟ انا مش فاكر غير إنى كنت على الطريق وبعدين جت عربية مخالفه وحاولت افاديها:

..الاب بحزن: قدر الله وما شاء فعل يا حبيبى..انت عملت حادثة خفيفة والحمد لله بقيت كويس وزى الفل وبكرة تخرج بالسلامة:

..توجه بنظره لصديقه: إيه يابنى قافل وشك ليه كدا..اوعى تكون عندك احساس وزعلان عليا(وضحك بخفوت)
..كاد ان يرد عليه ولكن قاطعه صرخة ألم اطلقها ثم حاول تحريك ساقه فلم يشعر بها..فحاول أن ينهض ليرى ما حل به ولكن منعه ابن عمه بان أرتمى عليه حاضنا له يبكى على صدره :

..تذمر نائل وحاول ابعاده : فى ايه؟ انا حصلى ايه؟ ابعد عنى:

..دفعه بقوة واهنة ورفع الغطاء ليرى بعينه انكساره القادم فى حياته..ثم تلجم لسانه گ من اصيب بالخرس للحظات ثم طلب منهم أن يختلى بنفسه ..

..بعد ساعة شعر الأب بالخوف عليه فجازف ودخل ليطمئن عليه فوجده ساكن دموعه تنهمر گ الشلال وكأنه لا يشعر بنزولها..

..مد يده ومسحها ونظر له : سلم أمرك لله يابنى دى مشيئه الله ومفيش فى إيدنا حاجة غير اننا نحمده:

..أرتمى بحضن والده يبكى بحرقة حتى هدأ واحتسب وسلم أمره لله..

..بعد شفائه عاد لمنزلهم ولكنه للاسف ليس مثلما غادر ..إنه يسير الأن برفقه عكاز يكمل النقص الذى حدث له ولكن الأمر لن يستمر طويلا فسوف يستبدل هذا العكاز بالساق الصناعية ولكن فى الموعد الذى يحدده الطبيب بعد إلتئام الجرح ووصول الساق من خارج البلاد ..

..اليوم عودة خطيبته من السفر بل زوجته بفعل كتب كتابهما منذ عام ومحدد فرحهما بعد شهر من الأن فهل ستتقبله بعاهته أما سترفضه..لا لا لن ترفضه فهى حبيبته وهو حبيبها ولن تتخلى عنه مهما حصل..هذا ما حدث نائل به ذاته..

..وصلت زوجته بعد ما علمت عن الحادثة ولكنها لا تعلم ماخلفته فدخلت مهرولة تنادى بإسمه..
: نائل حبيبى نا.. :
..قطعت ندائها وتسمرت مكانها حينما رأته يستند على عكازه ولكنها لا ترى ساقه بفعل ارتداءه لجلباب بيتى طلب هو أن يقابلها به حتى لا تصدم مباشرة بالموقف..

..اقتربت متحدثة : حبيبى الف سلامة عليك..ليه عمى ماتصلش بيا اول ماحصلت الحادثة؟
..ضمها بذراعه الخالى : مرضناش نقلقك حبيبتى وانا اهو كويس الحمد لله :
..سألته: طب ليه حبيبى ساند على عكاز هو انت مجبس رجلك؟
..رفعت الجلباب قليلا لتصعق من هول الموقف ومما رأته..وضعت يدها على فمها وبرقت بعينيها ثم تراجعت للخلف مذهولة..

..أما هو فاغمض عينيه لا يستطيع أن يرى صدمتها واستدار قائلا: تقدرى تروحى دلوقت لحد ما تستوعبى اللى حصل وبعدين بينا كلام تانى :

..لم تنتظر لحظة وكأنه اعطاها فرصة ذهبية فخرجت مسرعة دون ان تلتفت لأحد او ترد نداء والده والذى دخل إليه مسرعا ليطمن عليه..

..دلف ينادى عليه :نائل..ليه يابنى سيبتها تمشى كدا؟
..استدار له : ماهى لازم تمشى هو انت فاكر غير كدا؟
..عارضه الاب :لا ياحبيبى سلمى مراتك وبتحبك هى بس المفاجأة كانت صعبة :
..ابتسم بسخرية : تفتكر ..معتقدش وهتشوف:

..غابت سلمى لمدة اسبوع لم تحادثه حتى تليفونيا وهو قد ترك لها وقتها حتى تأخذ قرارها وكان على استعداد تام لتقبله ولكن ماذبحه ما قالته له ويا ليتها ما جاءت ولا تحدثت..

..دخلت سلمى عليه وهو جالس على المقعد المتواجد بغرفته ثم أخذت نفسا وقالت: نائل انت عارف أنا بحبك ازاى واختارتك من بين كتير كنت حلم بعيد بالنسبالهم وكنا هنتجوز الشهر الجاى بس (وصمتت فأكمل يحثها على التكملة)
: بس.. كملى انا سامعك :
..تلعثمت قائلة : خايفة مقدرش اتحمل نظرة الناس..وكمان انى أكمل حياتى بقيود فى كل حاجة..انا عايزة اعيش واتفسح واسافر مع الانسان اللى هكمل معاه عمرى كله..أخاف النقص دا مقدرش اتحمله بعدين او انى اكون زوجة لشخص عاجز..اعذرينى فياريت ننفصل فى هدوء.(قالت كلماتها وانصرفت دون انتظار)

..هل هذا هو السم المدسوس فى العسل تقول انها تحبنى ولكنها لن تكمل مع رجل عاجز ناقص..ياليتها كذبت وقالت أنها لا تحبنى ولكننى لن ألومها فأنا اصبحت كذلك بالفعل.

..بعد أيام انفصل نائل عن سلمى ودخل فى حالة نفسية سيئه لمدة شهور ..عاد منها بفضل صديقه وأخيه وابنه عمه طلال بمساعدة طبيب نفسى..ثم كرث كل حياته ومجهوده لعمله الذى كبره فى فترة وجيزة واصبح من اهم رجال الإستراد و التصديرx وتغاضى عن الحب نهائيا حتى قابل رحيق الذى اعادت لقلبه النبض من جديد دون فعل اى شىء..

..عاد من ذكرياته الحزينة لأرض الواقع يقول: عندها حق ترفض شخص ناقص زى..
قاطع تفكيره طرق على باب الفيلا فسحب نفسه بصعوبة ليفتح وهو متأكد انه طلال..

..عندما فتح شهق صديقه من منظره المزرى والحالة التى وصل لها كما لاحظ نائل ايضا ملامح التوتر الواضحة على وجه الأخر فسأله.. مال وشك حصل ايه موترك كدا؟

..رد بتوتر : ايوة فى حاجة حصلت بس لازم تهدى علشان نعرف نتصرف:
..أمره بحدة : اخلص وقول فى ايه انا مش ناقص ألغاز:
..أخذ نفس ثم قال: للاسف وقوعك فى الحفلة نزل فيديو على النت وانتشر بشكل سريع وطبعا انا وانت متاكدين مين اللى وراه :
..ارتفع صوته عليه : انت بتقول ايه؟ وفين دا ورينى؟
..فتح له المقطع والذى يتكرر داخله وقوعه أكتر من مرة ثم التقريب و التكبير على موضع ساقه الصناعية وعندما شاهده ثار وقام بتكسير كل ما طالته يده ولم يستطيع طلال السيطرة عليه حتى هدأ بعد مدة طويلة..

اخيرا تمسك به :اهدأ يانائل عصبيتك مش هتحل حاجة وانت اللى غلطان ياما قلتلك دى حاجة مش تعبيك وعيش عادى وانت اللى صممت وحرصت على انك تدرايها بشتى الطرق..انا لو منك انزل واواجه لان دى متقللش من قميتك وإحترام الناس ليك..
..سكن لحظات ثم طلب منه أن يغادر ويتركه بمفرده..فوافق بشرط أن يفتح موبيله ويرد عليه كلما إتصل به.. وعده بذلك فغادر ابن عمه وتركه يفكر ويعيد حساباته وكان اولها أنه اعاد المقطع مرارا وتكرار فهبطت دموعه تتدفق دون إرادة محمولة بقهره على حبيبته التى يعتقد أنه خسرها بسبب إعاقته..
--------
فى منزل رحيق دلفت زهرة إليها مهرولة بعد أن شاهدت نزول المقطع الخاص بالحفلة تنادى عليها
: رحيق .. رحيق تعالى بسرعة شوفتى الفديو دا ؟

..اشارت لها لتهدأ : فى ايه يابنتى اهدى كدا فيديو ايه انا دماغى مش رايقة:
..سحبتها لتجلس على فراشها: شوفى بس وبعدين اتكلمى :

..برقت بذهول مما شاهدته واغرورقت عينيها وهى تتخيل حالته عندما يشاهد هذا المقطع..
ثم سحبت هاتفها بشكل تلقائى وضغطت على رقم طلال وعندما فتح الخط:
..تكلمت بصيغة أمرة : انا لازم اشوف نائل ضرورى وأنا متأكدة انك عارف مكانه:
..تنهد قائلا : أسف مقدرش أوصلك ليه إلا اذا هو وافق :
.. بصوت باكى : ارجوك ساعدنى..طب قوله وهو اكيد هيوافق :
بحزن على حالهما : حاضر هقوله ولو وافق هوديكى بنفسى..
..اغلقت الخط وانهمرت دموعها بشكل هستيرى واخذت اختها تهدئها حتى لا يعلم والديهما بما يحدث وحمدت الله أن والدها لا يتابع الانترنت :
--------------
فى اليوم التالى بالشركة انتظرت وصول طلال حتى تعلم ان كان وافق على رؤيتها ام رفض؟
..قطع شرودها دلوفه اليها قائلا (أسف رفض ) وتركها وغادر لتفكر هى فى طريقة لتساعده :

..فى منتصف اليوم ذهبت لمكتبه لتسأله عن سؤال مهم بالنسبة لها: كنت عايزة اعرف ايه اللى حصل له ومن امتى؟

..نظر لها متسائلا: ودا يهمك فى ايه؟

..ردت موضحة: أولا عايزة اعرف دى حادثة ولا مرض ولا ايه ومن امتى ومين له مصلحة يشهر به كدا وليه ؟

..اجابها : اولا انا مقدرش احكيلك اى حاجة..دا موضوع يخصه ..بس ممكن اقولك انها من خمس سنين ..وان منافس حقير عمل كدا علشان يأذى نفسيته والساحة تفضى له بس انا مش هسيبه:

..حركت رأسها بتمتمة: فهمت عن إذنك :
..غادرت تفكر كيف ستساعده لن تتركه كدا أبدا لن تسمح له بالإستسلام مهما حصل..سيعود وأقوى من الأول..
واثناء مرورها بالطرقة المؤدية لمكتبها سمعت زميل يتحدث هاتفيا ويقول( خلاص هسجل لها فيديو اوضحلها كل حاجة متقلقيش) وهنا لمعت الفكرة ووجدت الحل..ستفعله ولا تعلم نتيجته على الوضع بينهما ولكن لا يهمها بل هو الأهم..

..ذهبت لمكتب طلال وطلبت منه ان تستخدمه بمفردها لبعض الوقت لإنهاء عمل خاص بها ولن تستطيع تنفيذه بمنزلها..فوافق وترك لها المكان للمدة التى تريدها..

..عاد بعد ما يقرب من الساعة وجدها مازالت تجلس على الاريكة ولكنها تشاهد مقطع ما على الانترنت فاخذه الفضول وسألها: ايه دا ؟
..مدت يدها له بهاتفها دون أن تتكلم ليذهل مما يراه ويسمعه ..
نهاية الفصل

[دفنا عمر]

عدنان ده فعلا حقير وخصومته غير شريفة
أما رحيق عجبنى تصرفها انها بتحاول توصل لنائل عشان تدعمه بطريقتها
تسلم يا ايدك يا منال الأحداث اشتعلت ❤️❤️

[ام زياد محمود]

سلمى دى مافيش اغبى منها

نسيت انها فى لحظه ممكن يحصلها اكتر من اللى حصل لنائل وربنا يبتليها فى صحتها اللى عايزه تتفسح بيها دى

عدنان حقير ربنا يهده ويقهره زى ما قهر نائل ورجعه لمراحل من حاله نفسيه سيئة

رحيق بتحاول تساعده وهو خايف يكون اللى شافه فى عنيها شفقه مش هيقدر يتحملها

تسلم ايدك ياجميل

[منال الشباسي]

ياترى رحيق عملت ايه علشان تساعد نائل وتخرجه من عزلته

[منال الشباسي]

=دفنا عمر;15372686]عدنان ده فعلا حقير وخصومته غير شريفة
أما رحيق عجبنى تصرفها انها بتحاول توصل لنائل عشان تدعمه بطريقتها
تسلم يا ايدك يا منال الأحداث اشتعلت ❤️❤️

[منال الشباسي]

مين منتظر الفصل الاخير الليلة ان شاء الله