04-12-21, 09:56 PM
| #291 | ||||
|  السلام عليكم ورحمة الله وبركاته الذين يشاهدون محتوى الموضوع الآن : 140 ( الأعضاء 12 والزوار 128) شجنّ العُذوب, لا مجال, بدوية انيقة, غزالتي الحلوه, العآتي, اماني راكان, Abeero Alanqazi, yasser20, N0n_70, عزيزة يسلم, أمل ال, سليمة مساهل حرفياً الحماس مو طبيعي للببببببببببببببببارتتتت ماتتاخري ععععععععلينا بروووو | ||||
|  |
|
05-12-21, 12:19 AM
| #295 | ||||
 
| بارت ١٩ اعتلت ملامحه الصدمه من كلام جده لذي الدرجة كان مكشوف قدامهم ...يمكن جده يبالغ ويبغى يأخذ منه كلام ...وبإنكار نطق: جدي جالس تتمسخر؟! أي حب وأي خرابيط؟! ترى اول مرة اجلس معها واشوفها ..ما عمري شفتها!! وإذا ناظرتها من حقي اشوفها ..يعني نقدر نقول شوفه شرعيه!! عقد حواجبه أبو فيصل باستنكار: كيف للحين ما شفتها الا اليوم؟! انت بأي عصر عايش علشان تتزوج بنت بدون ما تشوفها ؟!! وليه ما شفتها ؟! هز كتوفه ببرود: رفضت إني اشوفها ..واليوم لولا إنا دخلنا فجأة كان ما شفتها قاطعه بعدم رضا لتصرف رحيق: وليه حضرتها رافضة إنك تشوفها؟!! أحس هالبنت كارهيتك بقوة!! لاحظت إنها ما كلفت نفسها تناظرك لو نظره ولو بالغلط !! وبنظرة شك نطق وهو يتابع كلامه : انت عملت معها شيء وكرهتك؟!! فارس كتم ضيقه من الكره الي تحمله له رحيق ..ما يبغى توصل الأمور بينهم لهذه الدرجة ...ما يبغى البنت الوحيدة إلي نبض قلبه لها يكونون أعداء ... المشكلة ما هو قادر يرتب أوراقه من جديد بعد هالحقيقة الصادمة...تنهد ونطق بدفاع عن نفسه: اقولك يا جدي اول مرة اشوف وجهها واجلس معها بهذه الطريقة ...يعني وش رح اعمل لها ؟!! هز رأسه باستفسار: يعني بالشركة ما تضايقها بالكلام ؟!! اليوم لما طلعت من الشركة كانت تبكي قاطعه بتبرير: يمكن من وجع الطيحة ..تعرف بنات هالجيل مدلعات زيادة!! ناظرابو فيصل للأمام وهو يفكر بكلام رحيق لما قالت ليت كل وجعنا كسر وينجبر!! لزوم يتعرف عليها أكثر ما يدري ليه متعاطف معها كثير !!! وكلام زوجته عنها ما دخل رأسه!!! ** ** ** اليوم حفلة تخرج حصة ...حمدت ربها انها تخرجت وترتاح من خشتها ... وما عاد تشوفها بالجامعة رفضت تروح تحضر الحفلة ما لها خلق لهم ...التفتت على امها وهي تنطق بانتقاد: وش فيك ساكته من لما وصلت؟!! رحيق ببرود نطقت: ولا شيء!! أسماء مطت شفتها بسخرية: والا متضايقه على زواجك الي كنسلوه؟!! ايه خليك غبية وهبلة يزوجونك على كيفهم !! أنا لو مكانك بنفس اليوم أكون بالمحكمة واخلعه مثل الحذاء بدون ما أناظر خلفي!! لا تمشين نفس طريقي وتتزوجين واحد متزوج .. ترى عملوها فيني قبلك وزوجوني غصب عني قاطعتها رحيق وبداخلها قهر من امها كل الي فيه بسببها: عمره ما كان الزواج من رجل متزوج يحملك تكونين أم مهمله قاطعتها اسماء بتحذير: إياك تجلسين تنظرين علي!! هذا الي ناقص بزر جاهل تتفلسف فوق رأسي!! رحيق مطت شفتها بملامح مكتئبة وما نطقت بحرف واحد ... أسماء لما شافت سكوتها نطقت: امي ما هي عندي مسكينة مكسور عليها اجرة البيت .. وقبل شوي اتصلت فيها تشتغل قاطعتها رحيق وجذبها الموضوع: وش تشتغل؟! اسماء بهدوء : لها جارة تطبخ في بيتها وتبيع اكلات شعبيه وأمي تشتغل معها ! تقول تحس ظهرها انكسر من الشغل رحيق تذكرت ام صديقتها تاج تشتغل كذا ... وبانتقاد نطقت: كيف تتركين أمك تشتغل كذا وبدون ما تساعديها قاطعتها أسماء بانفعال وعصبيه: ما تشوفيني مكسورة ؟!! وش أشتغل معها؟!! رحيق بانفعال من غضب امها: ما احد قالك تشتغلين معها ... أنا اقصد من فلوسك الي بالبنوك اعطيها قاطعتها بغضب وهي تهز رأسها بتعجب من وقاحتها: فعلا إنك وقحة ...تبغين اوزع فلوسي الي قضيت عمري اجمع فيهم ببلاش! وبعدها اجلس على الصدقة!! لا يا حلوة غيرك كان اشطر ...اذا متأثرة هالكثر طلعي فلوس واعطيها رحيق تأثرت لحال جدتها حرمة كبيرة تعمل وتتعب : لو معي فلوس ما رح أقصر ...بس أنا ما معي أسماء وصلت لمربط الفرس: روحي ساعديها واشتغلي مكانها يا حنونه!! ناظرتها رحيق بعد ما بهتت ملامحها ...تروح تساعدها؟!! لو يعرف جدها الا يمسح فيها الأرض ... ناظرت أمها الي نطقت بهجوم: هذه انت وما رح تتغيرين ...بس شغل تتفلسفين فوق رؤوسنا وبدون تطبيق!!! رحيق ما لها خلق لكلام أمها: قلت لك لو معي ما رح أقصر معها... اسماء خزتها: ايه صدقتك! عموما انا بس اتعافى رح أسافر قاطعتها رحيق بتعجب من حياة أمها: تسافرين أسماء بملامح متجهمه : ايه رح اسافر يعني وش أبغى بالجلوس هنا ...جيت اخذك بس انت متزوجة وما اقدر اخذك الا اذا تطلقتي واخترتيني..وبما اني اعرفك عاقة مثل اخوانك ما رح تختاريني رحيق مطت شفتها بحزن لعائلتها المشتتة: كم تمنيت نعيش كلنا مع بعض حياة اسرية سعيدة بدون مشاكل ووجع رأس!! يمه تقدري تتغيرين ونبدأ صفحه جديدة .. أنا وعدت ابوي رح ابحث عن ياسمين ويرجع شملنا من جديد سكتت بانتكاسة وهي تشوف امها دخلت بموجة ضحك ... اسماء من بين ضحكاتها: صدق انك غبيه وعاطفيه زيادة عن اللزوم! أي شمل تقولين عنه ؟!! ياسمين الله اعلم عايشه والا ميته ؟! وإن كانت عايشه الله اعلم بأي صحراء الحين!! وأبوك وضعه الصحي متدهور بأي لحظة تسمعين عظم الله اجرك مع اني اشك احد يقولها !! قاطعتها رحيق بقهر مستحيل تكون ام وتتكلم بهذه الطريقة وكأنها تتشمت فيهم : انت قلبك ما فيه إحساس ...قلبك ما يحترق على ياسمين؟!! وليه تقولين عن أبوي كذا ؟! تراه طيب وما فيه شيء والأهم انت كيف تعرفين اخبار أبوي مطت شفتها اسماء بشماته: أبوك هذا الي راسمه احلامك عليه وضعه تعبان على الأخير ..لو كان فيه خير ما وصلتم لهذه الدرجة! نطقت رحيق بوجع من حياتهم.. ونظرات عتب : انت الي وصلتينا لهذا الحال ...الام هي الي تربي ...بس انت ما ربيتينا وما اهتميت فينا !! حسرة هنا بداخلي تحرقني كلما اناظر الحال الي وصلوا له إخواني ..ليه تكرهينا كذا ؟!! حياتنا تدمرت قاطعتها أسماء بحده: لا تجلسين تحطين كل اللوم علي ...وبعدين اخوانك وش فيهم ؟!! ياسمين متزوجه واكيد الحين عندها عيال ..وفيصل بعد وقت رح يطلع من السجن ورح يتزوج قاطعتها رحيق بعدم تصديق: يتزوج؟! ومين رح يتزوج ومتى ؟!! أسماء مطت شفتها بسخرية: ذول اخوانك الي ذابحه عمرك علشانهم ..المهم رح يتزوج ابنة واحد كان معه بالسجن من منطقة (.........)ولما يطلعوا رح يروح معه ويترك هالمكان كله!! تلبسها الصمت والصدمة ما معها خبر ...والغريب امها من وين لها كل هالاخبار؟!!! رفعت راسها وللحين مصدومه ونطقت : ورياض طلع؟! هزت رأسها بالنفي : لا بعده بس قريب رح يطلع!! ولا تسأليني عن العاق الكلب مشعل؟! حست الزمن توقف فيها من ذكرى مشعل ..وبدون وعي وبلهفه نطقت: وينه مشعل ؟!! تعرفين مكانه؟!! ابتسمت بسخرية وهي تشوف اللهفه بعيونها : مشكلتك قلبك طيب وتفكرين بغيرك كثير ... ايه اعرف مكانه ...قبل فترة زرته والكلب طردني وما يبغى يشوف وجهي ...متبري منا كلنا وما يبغى يسمع او يعرف عنا اي شيء...تخيلي متزوج أجنبية ومعه طفل ومعه جنسية زوجته وما يبغى يرجع ولا يشوف احد!! حست نفسها وكأنها سقطت عن اعلى الجبل ...ما توقعت مشعل يعمل كذا وينساها ....بغت تسأل وش وظيفته وش عمل بمستقبله ..لكن كنسلت السؤال إلي باعها رح تبيعه ...ما كلف نفسه يسأل عنها او يهتم لها او ينتشلها من هذا المكان ...ادار وجهه عنها وتركها وحيده بهذا العالم !! كتمت ضيقها ووقفت تبغى ترجع للبيت ...كلام امها ضيق خلقها !!! أسماء باستغراب: وين رايحه؟!! رحيق ببرود نطقت: راجعه للبيت!! حملت نفسها وطلعت من المكان وهي تحس بالاختناق من كل شيء .... أكثر شيء زعلها مشعل ..دوم تفكر فيه وتنتظر اللحظة الي تلتقي فيه وتفتخر فيه وتقول هذا اخوي! لكن الظاهر على طول رح تبقى بدون سند!! أخذت اختها من الحضانه وتوجهت للبيت ...أكيد جدها وجدتها بالحفلة ...ناظرت الساعة ما بقى وقت على المغرب ...دخلت البيت والهدوء والسكون يخيم عليه... وضعت اختها على السرير متجاهله صوت البكاء..بدلت ملابسها ... وتوجهت لأختها حملتها وبدأت تتجول بالغرفه حتى تسكت .... بعد وقت جلست على السرير وفتحت الجوال وهي تشوف الحالات .. رفعت حاجب وهي تشوف مرح منزلة حفلة حصة .... مطت شفتها رحيق بحسرة عمرها ما جربت احد يحتفل فيها كذا ... ناظرت صور فارس مع حصة والابتسامة شاقه حلقه ..ما تقدر تستوعب كيف انسان يحب وحده ويتزوج غيرها وينجب منها ويرجع يتزوج الثانية !! طيب الي يحبها وش وضعها؟!! يمكن مع الايام نسي ليلى وتعلق بحصة!! هي ما لها وجود معهم أبدا ..ما لها تواجد مع احد أبدا ...رح تبقى الغريبة بينهم ... ناظرت أختها الي نامت بحضنها ...التقطت صورة لها ...عملت اقتصاص حتى ما تظهر صورتها ...كتبت على الصورة " مهجة روحي اعلمي أن طيفك لا يفارق خيالي حتى وأنت نائمة، فأراك وكأن صورتك مطبوعة على حدقة عيني".منقول *** *** بعد انتهاء الحفلة ...جالسين جلسة عائلية...ابو فيصل باهتمام: وين رحيق ما اشوفها؟!! فارس ناظر جدته الي ردت بهدوء: تعبانه شوي زم شفته بضيق ...يتمنى يكسر كل الحواجز الي بينهم ويكون عندها الحين !! متأكد إنها ما فيها شيء وجدته قالت كذا من باب التبرير ... ناظر اخته مرح وسيرين والابتسامه شاقه الحلق وهم يشوفون الصور الي نزلوها للحفلة سحب منها الجوال بجمود: هات اشوف وش نزلتي..يا ويلك اذا شفت صورة ما عجبتني مرح بتبرير: ترى كله بنات عندي!! هز رأسه وهو يناظر الاشياء الي نزلتها مرح ...ناظر سجل المشاهده ..رفع حاجب وهو يشوف اسمها رحيق ...شافت هالصور...مباشرة توجه للحالات ..عقد حواجبه وهو يشوف في حالة لرحيق ...فتحها وهو رافع حاجب... صورة أختها بحضنها بس مو باين وجه رحيق ..ما هو باين الا يدينها الي محتضنه فيهم اختها ...كتم ضيقه وهو يتخيل الناس تشوف يدينها ...هاي اليدين الي مرة تمنى يشوف صاحبة الوجه من جمالهم !! يا الله كانت ليلى وهو ما يدري !! عقد حواجبه وهو يشوف الكلام الي كاتبيته!! قفل الجوال ..والضيق تلبسه وهو يفكر مين عندها بقائمة الاتصال وشاف حالتها!! عقد حواجبه وهو يفكر معقول يكون عبدالرحمن عندها؟!! يحس يدينه مكبلات مع تأجيل الزواج .. قاطع افكاره لما وقف جده وهو ينطق: اسمحوا لنا تأخرنا على البيت!! زفر بضيق وهو يشوف حصة تتكلم مع سمر والضحكة تزين ثغرها ... ما رح يعكر فرحة تخرجها ..رح ينتظر بعد سنة ... رح يعتبر نفسه ما اكتشف إنها رحيق..ويرجع الوضع لنفس البرود والهدوء! ما يدري حتى هذا الحل ما ريحه ...رجع فتح جوال مرح الي ما زال بيده ...ورجع قفله بتوتر ناظر مرح ما هي موجودة بالصالة ...ناظر ابوه الي اشر له يطلع مع جده ....وقف مع جده وجدته يوصلهم لعند السيارة وبداخله نار مشتعلة ما يعرف سببها... بعد مغادرة جده وجدته ...فتح الجوال ومباشرة على حالة رحيق منزله حالة جديدة " لَمْ يَف بِعَهدِهِ مَعْهَا فبَاتت تَعْتقِد بِأنَّ كٌلِ مَن عَلى هَذِه الأرْضِ يَخْون". منقول قفل الجوال وهو يفكر بكلامها مين تقصد؟!!! *** *** بالشركة رحاب باستغراب: انت من عقلك تقولين هالكلام لابن المدير؟!! اكيد عقلك ضارب!!! عائشه بتعجب: أنا توقعت من كشتك يرميك برا!! وحتى لما ما داومت توقعت عملوا لك شيء!! ابتسمت رحيق على تعليقاتهم بدون ما تنطق حرف واحد!! ليالي ناظرتها بتأمل: غريبة وين نظارتك؟! رحيق بهدوء نطقت: انكسرت !! رحاب تكتفت : طيب والحين وش رح تعملين؟! رحيق ببرود هزت كتوفها: جالسة على قلبهم . عائشه بابتسامة: لا واضح انك انجنيت رسمي!! شوفي ابو ناصر جاء الله يعينا على ثقل طينته؟!! اول ما دخل ناظر رحيق الي تعبث بجوالها: اتوقع كلام الاستاذ فارس واضح ما لك مكان هنا!! رفعت رأسها رحيق بهدوء ونطقت بنبرة وعيد: كلمة ثانية ما رح يعجبك تصرفي!! وقفت بثقة وتوجهت خارج المكتب وهي ناويه تروح لابو ضاري وتتفاهم معه!! ابو ناصر نطق بغيض وقهر من تجاهلها المستمر له: لاااا هذه وقحة بزيادة!! وقفت رحيق لما شافت حصة مع فارس وباين إنه يعرفها على الشركة..التفتت للخلف لما نطق أبو ناصر: هذه زوجة الاستاذ فارس رح تتوظف هنا مسؤولة بقسم قاطعته ليالي لما اقتربت وهي تناظر حصة: بعد مسؤولة يحطونها؟!! دوبها متخرجة...صدق الواسطة وشغلها!! حنا لنا سنوات ننحت مثل الحمير ولا أعطونا قاطعها ابو ناصر باحتقار: من زين شغلكم!! انا لو كنت المدير كان من زمان فصلتكم!! ليالي وهي ترجع مكانها وبهمس:الله يأخذك ونخلص منك!! واقفه تسمع كلام ابو ناصر وعيونها على فارس وحصة ... وش تفرق حصة عنها ؟؟! هي زوجة ولدهم بالضبط!! ولها سهم بالشركة ...ما طلبت منهم منصب ولا هالخرابيط .... كل الي كانت تبغاه تدريب حتى تلقى فرصة للوظيفة بأي مكان!! تكره التكبر والغرور الي بداخلهم ... يحسسونها ما تسوى نعال بالنسبة لهم!! غمضت عيونها للحظات تفكر وش تعمل ....تنسحب من المكان والا تبقى شوكة بحلقهم؟!! أبو ناصر يقطع عالم الشتات إلي يحيط فيها: لا توقفين هنا مثل النخلة..ادخلي داخل المكتب او سكت وهو يشوفها تتحرك بعيد عن المكتب ... شد على قبضة يده من القهر دوم تتجاهله وكأنه بزر!! التفت لرحاب الي تضحك عليه بشماته!! شتمها بداخله بسيل من الشتائم وابتعد عن المكتب وهو يتوعد برحيق!! قدر يلمحها وهي واقفه خارج المكتب مع ابو ناصر...يحس النيران مشتعله بداخله...ما يبغى احد يكلمها او يسمع صوتها ...كيف يطلعها من الشركة ما هو عارف!!! رفع حاجب لما مرت قريب منهم بخطوات هادئة متزنه.... التفت على حصة الي نطقت بغيض: يا كرهي لها ...رافعه خشومها على قلة سنع!! فارس بصوت حاد: وأقسم بالله أي مشكلة تصلني سواء كنت غلطانه او مو غلطانه ما يصير خير... رحيق اعتبريها ما هي موجودة وحطي تحتها خط احمر ..احترامها من احترامي...وانت نفس الشيء ما اسمح لاحد يغلط عليك بحرف ... فهمت!! مطت شفتها على مضض: إن شاء الله!! وبداخلها تفكر كيف تقلع رحيق عنها... ** ** ناظرت السكرتير لما نطق بمهنية: الاستاذ ابو ضاري مشغول سكت للحظات لما شافها تجاهلت كلامه وتوجهت للباب طرقته وفتحته بهدوء...السكرتير من خلفها نطق بتبرير: استاذ قلت لها إنك مشغول بس هي قاطعه أبو ضاري بهدوء: خلاص تقدر تروح...ادخلي يا رحيق!! دخلت رحيق بخطوات هادئة ...تتمنى تمسك النعال وبنص جبهته لأنه احقر مخلوق على وجه الارض...مسكت أعصابها وردت بهدوء : السلام عليكم ابو ضاري بترحيب: هلا هلا تفضلي اجلسي ! ردت بهدوء متجاهله طلبه منها تجلس: بالنسبة لتدريبي هنا قاطعها بهدوء: يا ابنتي انا قلت لك حاليا الشركة وقفت التدريب قاطعته بهدوء ومن داخلها قهر : اها وقفت التدريب وفتحت باب توظيف مسؤولين!! حصة دوبها متخرجة مباشرة وظفتوها مسؤولة هنا قاطعها بضجر: بدأنا سوالف الضراير والغيرة ردت بترفع عن هذه الأمور: لا ضراير ولا غيره أصلا ما همتني هي وزوجها واذا موجودين على سطح الارض ما معي خبرهم!! قاطعها بنرفزة: لا يا شيخه..قليل من التواضع! رافعه خشومك على ولدي وكأنه قاطعته بثقه مزيفه: يحمد ربه إني وافقت عليه ... انقهر من هالثقة الي تتكلم فيها وكأنه فارس شيء حقير ونزلت مستواها له..ونبرة ساخره نطق: صادقه الحمد لله وافقت عليه...تدرين للحظة نسيت انت ابنة مين وفارس ولد مين؟!! سكتت للحظات من كلمته وكأنه يذكرها إنها بالقاع وهم فوق ..الفروق بينهم كبيرة ...ومع ذلك تنازلوا وخطبوها !! بلعت غصتها ..وبهدوء نطقت باتهام متجاهله كلامه : الله اعلم وش الصفقة المشبوهة الي تعاونت فيها مع ابوي والي جبرتك تزوجني لولدك غصب عن شواربكم... متأكدة ابوي لوى ذراعك بشيء وجبرك حتى توافق على هذا الزواج إلي ما هو من مستواكم... لكن أحب اقولك أبوي بالسجن وما رح يعرف بانفصالنا ..تقدر بأي وقت نلتقي بالمحكمة وننهي هذه المهزلة! ونبقى قدام أبوي اننا متزوجين ...وكذا قاطعها بغضب من كلامها استفزته بقوة: تخسين يكون بيني وبين منصور صفقات..ما هو ابو ضاري الي يوقع على صفقات مشبوهة!! وساخة ابوك تخسين إنها تلوثنا!! وأنا ابو ضاري ما احد يلوي ذراعي بس انا حزنت عليك وابوك يعرضك علي حتى ازوجك واحد من عيالي!! فإذا زوجتك واحد من عيالي ووافقت على وجودك بالشركة هذا الشيء ما يسمح لك تأخذين بنفسك مقلب ...وتتكبرين علينا!! أنا نخوتي حملتني اعمل كذا ...فهمت الحين؟!! لا تنسي مكانك ونسبك واصلك وتجلسين تتطاولين علينا!! تحس بالاختناق من كلامه ...ذبحها من الوريد للوريد...وين ما تروح بصمة العار من اهلها تلاحقها ....يبغى يكسر عينها بكلامه بس ما رح تعطيه مراده وتخليه يكسرها ...هي معتزه بنفسها وواثقه منها وما رح تسمح له يزعزع هالثقة .. وبنبرة قوية نطقت: نخوتك هذه ما ابغاها ولا احتاج منك نظرات شفقة وحزن ...ولا انتظر منك تتصدق علي بفلوسك الي فرحان فيهم ... أنا جيت هنا اشتغل واتعلم بعرق جبيني ... واذا تظن إني انسحب بهذه السهولة تكون غلطان. ..انا ما رح اطلع من هالشركة ورح ابقى مثل الشوك بحلق الي يكرهني قاطعها بابتسامه على كلامها: ومين قال اني اكرهك ..بالعكس والله إني أحبك واعتبرك مثل بناتي.... اسمعي يا ابنتي أنا قاطعته بنبره وضح فيها الكره..وعيونها تلمع لمعة قهر : انا مو ابنتك ... لو كنت مثل ابنتك ما عاملتني بهذه الطريقة ولا سمعتني هالكلام ... بناتك ماتسمح لأحد يهينهم بنظرة أما أنا بأي لحظة تستغلها حتى تهيني... قاطعها بتبرير: الله يسامحك ..كم صار لك بالشركة ومع ذلك ما قلت لك تطلعين واحترمت رغبتك بالوجود قاطعته وهي تهم بالخروج: البركة بولدك إلي طردني قدام الموظفات قاطعها بتعجب: فارس عمل كذا ؟!! والله عجيب!! اجلسي يا ابنتي خلينا نتكلم قاطعته بقلب ميت: ما في شيء نقوله .... والحين بالإذن قاطعها وهو يتحرك نحوها : لحظة! ناظرته لما وقف أمامها وبنبرة نادمة على كلامه: لا تحملي كلامي على محمل الجد...ربي يعلم كم امدحك بغيابك ...بس انا لما اتنرفز ما اعرف وش أقول...لا تزعلي مني قاطعته بغصه : بالإذن قبل ما تكمل كلامها مسك يدها ونطق بهدوء: انتظري ابتسم وهو يشوف كيف تحاول تسحب يدها منه ومنحرجه..وبابتسامه نطق: ترى انا ابو زوجك يعني أنا محرم لك وانت مثل بناتي! ترك يدها ونطق بهدوء بعد ندمه على كلامه القاسي :اسمعيني زين رح تبقين بالشركة قاطعته بهدوء: مشكور غلبت نفسك كثير بهذا القرار .... رد بتبرير: وش يطلع بيدي شريكي ما يبغاك تشتغلين وش اقول له؟!! ردت بحدة: يأكل تبن من زين شركته... ابتسم بهدوء: لا تقولين كذا ...المهم أنا اعتذر عن كل كلمة قلتها قبل شوي ... والحين تقدرين ترجعين لشغلك ردت بشك: وابو ناصر؟! عقد حواجبه باستفسار: وش فيه؟! نطقت بصراحة: انت طلبت منه يطفشني من الشركة؟! لأنه واضح من أسلوبه يبغى اطلع من الشركة ...انا للحين ساكته عنه لكن اذا خرجت عن صمتي ما احد رح تعجبه رد فعلي!! اتمنى تطلب منه يبعد عن طريقي يكون أفضل قاطعها بهدوء: أنا رح اكلمه وما رح يتعرض لك ..وللمعلومه الي قال لك حصة توظفت مسؤوله كذاب... ترى جاءت مع فارس زيارة على الشركة فقط لا اكثر!! نطقت بتعجب من الاشاعات الكاذبه: يعني ما توظفت؟! هز رأسه بالنفي: لا فارس رافض وظيفتها!! ما ادري من وين تطلع هالإشاعات ... عموما تقدرين الحين ترجعين لمكانك اهم شيء تكونين راضيه وما تزعلين مني! هزت رأسها بهدوء واستأذنت وطلعت من المكتب ...زفر بضيق من تصرفه ...ما يعرف كيف فقد أعصابه...كلامه كان قاسي عليها ... كسرت خاطره بعيونها اللامعة ..تظهر قوتها وثباتها ومن الداخل طفلة تبغى تبكي...هو ما يكرهها لكن بعض تصرفاتها ما تعجبه أبدا !!! ** ** ** جالسه بالمكتب تتصفح بعض اوراق بيدها تتجاهل وجود فارس بالمكتب عندهم... احيانا تحس بسخافتها لما تتجاهل وجوده لأنه بكل بساطة يتجاهل وجودها نهائيا ..تشك أصلا إذا شايفها بعيونه!! ناظرت ليالي الي توضح بعض الاخطاء الواردة في بعض الاوراق: يعني أنا اقول يمكن الخلل ما هو من عندنا يعني صار لي ايام مع البنات ابحث عن الخلل بس ما عرفنا وش هالسبب؟!!! مطت رحيق شفتها بملل وفتحت الجوال تضيع وقت...سرعان ما نقزت وقلبها يدق طبول لما نطقت رحاب : أنا أستاذ اقترحت على البنات نعطي الاوراق لرحيق تشوفهم ...ما شاء الله البنت فطينه واكيد رح تعرف الخلل الي فيه تحس وجهها تحول مثل لون الطماطم حمدت ربها انها لابسه نقاب حتى ما احد يشوف تغير لون وجهها ... وكأنه تم ترشيحها لجائزة اذكى شخص بالعالم ... حست بالانتكاسه لما نطق بدون ما يطالعها او يلتفت لجهتها: هذه اوراق مهمه كيف نعطيها لمتدربه للحين ما تخرجت ؟!! عائشه : طيب زوجتك يا أستاذ بما انها متخرجه جديد اكيد المعلومات بعقلها قاطعها بهدوء: اعطيني نسخه من الأوراق ورح اشوف كيف نحل هالمشكلة!! أخذ نسخة من الاوراق ونطق بتنبيه: اتمنى يكون عملكم اكثر دقة... تنهدت رحيق بعد خروجه وبداخلها ضيق من تجاهله لوجودها وكأنها نكرة... رحاب تحركت لرحيق واعطتها نسخه من الورق: شوفيهم احس عيوني اصابها الحول !! بغت ترفض بس عائشه بتشجيع: شوفيهم واثبت وجودك .. وخليهم يعرفون إنك تصلحين تكونين مدربه مو متدربه! ابتسمت رحيق على كلامها: كأنك تبالغين!! ليالي تحثها: شوفيهم عندي فضول اعرف مكان الخلل؟!! رحيق مسكت الاوراق وهي تناظر الأوراق بدقة ...والموظفات يناظرن بحماس!! بوسط اندماجها نطقت بهدوء: في هنا خلل ليالي اقتربت منها وهي تناظر الورق: اشوف ...تدرين ما انتبهت وأنا اراجع فيهم! وبفرح ضربتها على رأسها : يا اختي من وين لك هالذكاء!! رحيق ناظرتها بعبوس: مشكلتكم ما تعرفون قاطعتها عائشة: قولي مشكلتنا أبو ناصر ما نعرف نركز منه!! ابتسمت رحيق على كلامها: الله يهديه...المهم الحين رح اصحح الغلط رحاب بنظرة إعجاب تناظر رخيق وهي مندمجه بالاوراق وتصحح فيها ...هذه البنت ملفته للانتباه بكل شيء ...وبابتسامه نطقت: ولدي اصغر منك بسنتين وش رأيك فيه ؟!! الحين ملكة والزواج بعد ما تتخرجين.. ترى البارحة كنت أكلم ولدي عنك وعن جمالك ..والله تحمس واليوم يطالبني ييجي معي للشركة!! يقول حبيتها بدون ما اشوفها! ضحكت رحيق بخفه على كلامها !!! عائشه بابتسامة: الواضح انها موافقه شوفيها ضحكت! ليالي بمداخله: بما إنكم فتحتم هذا الموضوع بصراحة أنا كلمت أمي البارحة حتى نخطبها لأخوي ... عائشه باندماج: الدكتور؟! ليالي بفخر: ايه اخوي الدكتور والفصل الجاي رح يسافر للخارج ... وأمي استانست وقالت نهاية الأسبوع رح نكون عندكم ونخطبك ...صدقيني ما رح تندمين ..الكل يمدح بأخوي وبأخلاقه ...يكفي انه حنون وإذا تبغين تشوفينه صورته معي!! كملت اخر جمله والتفت بصدمه لما نطق فارس من خلفهم بغضب: ما شاء الله ظنيت نفسي إني داخل مكتب خطابه!! عائشه بانحراج: أستاذ حنا قاطعها بغضب ونظراته النارية: حنا عندنا خلل ومشكلة بالحسابات وحضراتكم ولا عبالكم مشغولين بهذه السخافات!! ليالي بتوتر: استاذ يعني وجدنا الخلل ..وجلسنا نسولف بس قاطعها وعيونه مركزه على رحيق الي تجاهلت وجوده وما ناظرته: رح تأخذ كل وحدة فيكم إنذار..والعروس لها إنذارين!! رفعت رأسها بصدمه واستنكار ليه يعطيها انذارين ما عملت شيء!! التقت عينه بعيونها الفاتنة ..اليوم بدون نظارات تحجب جمال هالعيون....بداخله نار مشتعل من كلام الموظفات وحضرتها مدندنه اذانها لهذا الكلام وتضحك مبسوطة..اعطاها نظرات ناريه والتفت على رحاب الي نطقت: استاذ خذ هذه الاوراق جاهزة! ناظر الأوراق لما مدتها رحاب...كتم غضبه ..سحب الاوراق بجمود ...وغادر المكان... زفرت ليالي براحه: يا ربي توقعت يقلعنا من الشركة...اول مرة اشوفه كذا معصب ويعامل الموظفين بهذه الطريقة! ناظرت رحيق بتعاطف: أنا اسفه رحيق بسببنا اخذت انذارين وانت ما لك ذنب ... أنا رح اكلمه بنفسي حتى يتفهم الموقف رحيق بهدوء وكأنه الموضوع ما يخصها: انسي السالفة .. خليه يحط بدل الانذارين ثلاث... لأنه ما يقدر يطلعني من الشركة... أنا الي اعتذر منكم بسببي اعطاكم الانذارات عائشه بعدم فهم: كيف يعني؟! رحيق ببرود نطقت: المسألة مسألة شخصية هو قاصدني أنا ويبغى يطردني من هنا بأي طريقة!! ليالي بعدم فهم والفضول صار عندها الف: انت بينكم علاقه؟!! اقصد يعني تعرفينه قاطعتها رحيق بنفس البرود: في قرابة بيننا....قفلوا السالفة عائشه هزت رأسها بتفهم: وأنا اقول لما قلت ابو ضاري الحين طلع بينكم قرابة!! رحاب بإحباط: ما رح نستفيد من هالقرابة وتتواسطين لنا لأنه واضح بينكم مشاكل عائليه!! وقسم بالله نظراته تخوف وهو يناظرنا وخاصة انت يا رحيق ليالي تتلفت حولها تتأكد إنه ما رجع ..وبجديه نطقت: أنا وأمي رح نكون نهاية الأسبوع عندكم!! ضحكت رحيق بدون نفس ..وبهدوء نطقت: انسي السالفة ليالي بإصرار: ليه رافضه ..خلينا نزوركم واذا ما عجبك يا دار ما دخلك شر!! وش قلت؟!! عائشه بتشجيع: لا ترفضين يمكن ربنا يكتب لكم نصيب ..ترى انا اعرف اخوانها ما شاء الله الكل يمدح بأخلاقهم رحاب بشك لرفضها: انت مخطوبة؟! سكتت رحيق للحظات تحس نفسها ضائعة بين العزوبية والزواج يعني لا هي مخطوبة ولا عزباء..وبخفوت نطقت: ايه ليالي بتعجب: صدق؟!! بس غريبه ما لبست خاتم قاطعتها رحيق بتكتم: للحين ما اشهرنا الخطوبة بس بين الاهل! عائشه بفضول: وش يقرب لك العريس وش يشتغل؟!! رحيق اشرت بعيونها للخارج: أنا اقول نقطع هالكلام افضل ما يطلع احد بوجهكم ليالي بإحباط وهي ترجع مكانها: صادقه ...يكفي خسرنا هالعروس الجميلة ما ابغى أخسر الوظيفه !! رحاب وهي ترجع مكانها: ربي يسعدك ويوفقك يا رحيق تستاهلين كل خير! عاد سبحان الله بيني وبين نفسي كنت اقول ومستغربة كيف للحين ما انخطبت ..ربي يحفظك رحيق بابتسامه باهته ... لو يعرفون أبوها واخوانها رح يستغربون إنه احد خطبها!!! .. وبنبرة هادئة نطقت: ربي يسعدكن !! ** ** ** جالس مع ابوه بفناء البيت ويحس بداخله قهر من كلام الموظفات ... بصعوبه حتى مسك اعصابه!!! وإلي قهره ضحكها الأخت عاجبها الموضوع ..بدل ما توقفهم عند حدهم ...شد على قبضة يده بقوة ..يتنرفز ويضيق صدره كلما يتذكر هالموقف... تنهد وناظر أبوه الي يكلمه ...نطق بهدوء بعد ما اكمل ابوه حديثه: مضبوط كلامك رحيق هي الي وجدت الخلل ابو ضاري وهو يسند ظهره للكرسي بأريحية..وهو يناظر للبعيد : البنت هذه ذكية وسريعة بديهة لزوم نستغل هالنقطة فيها ..لكن بنفس الوقت ما نقدر نضع ثقتنا فيها !! الا اذا خلينا بعض الموظفين عيونهم عليها حتى لا تغافلنا!! هذه ابنة منصور تعرف وش يعني منصور؟! الظاهر ورثت عنه نباهته بأمور الصفقات والحسابات..رح تكون مكسب لنا!! قاطع ابوه بمعارضه : قلت لك من قبل ما ابغى رحيق بالشركة .. لأني بكل بساطة ما اثق فيها ! أبو ضاري بتفكير عميق: انا أعارضك وأوافقك بنفس الوقت على هذا الشيء..صحيح إنه ما نقدر نثق فيها ثقة عمياء .. وما ننسى إنه منصور أبوها....لكن أنا أثق بإحساسي ونظرتي للناس... أنا أثق برحيق حتى لو ما خالطتها.. أنا أقدر أتعرف على الناس وأعرف معدنهم... صدقني هذه البنت فيها الخير عكس أسماء ... أسماء لما تناظرها تقدر تشوف كمية كبيرة من الخبث بعيونها... أما رحيق لما تناظر عيونها تشوف كمية من البراءة بعيونها... البنت مختلفة عن أهلها ... يعني من الظلم نأخذها برجلين اهلها!! فارس رفع حاجب وهو يتكتف ما عجبه كلام أبوه لو يطلع بيظه يحطها بغرفة ويقفل عليها حتى ما يشوفها احد او يسمع صوتها... وباستفسار نطق : اليوم كانت بمكتبك؟!! ابو ضاري تنهد بضيق : ايه جاءت عندي .... تكلمنا عن وظيفتها ....نرفزتني بكلامها وطبعا ابوك ما قصر معها..سمعتها كلام ثقيل حيل عليها...توقعت إنها بعد الكلام تزعل أو تبكي أو تترك الشركة ...بالرغم إنها حاولت تظهر عدم المبالاة من كلامي لكني قدرت أحس بقسوة كلامي عليها ... زم شفته ابو ضاري بندم وهو يتابع كلامه : كسرت خاطري بعد كلامي...حسيت نفسي بحجم النملة وأنا جالس أقهر يتيمه ....الله يلعن الشيطان ...علشان كذا أنا سمحت لها بالدوام مثل ما تبغى بالشركة. حس بضيق بداخله من كلام أبوه للحين يشعر بالشتات ما بين قلبه وعقله ...لكن كفة عقله الى الآن راجحه..حتى لو كانت البنت الي حبها هذا الشيء ما رح يدفعه ويكون مثل المجنون خلفها...ابتسم وهو يتذكر عيونها المستنكرة لما قال لها انذارين ..تنهد وهو ينطق بهدوء: وش قلت لها؟!! أبو ضاري بضيق وهو يبرر: انا والله ما احب اكون قاسي بكلامي مع الناس لكن استفزتني رافعه خشومها علينا!!! تخيل تقول عنك تحمد ربك إنها وافقت عليك!!! فتح فارس عيونه باستنكار: هي تقول كذا؟!! أبو ضاري مط شفته بعدم رضا: وتبغى نلتقي بالمحكمة وتطلقها بدون ما يعرف ابوها حتى تنهي هالمسخرة!!! قهرتني بكلامها !! فارس نطق بقهر : ايه معلوم تقول كذا...حضرتها كبر رأسها بعد كلام الموظفات ..ذابحات حالهن حتى يخطبنها!! اكيد ظنت نفسها شيء كبير وقررت بالانفصال يمكن حنا مو قد المقام؟!!! أبو ضاري باستغراب: انت وش عرفك نطق فارس بمزاج متعكر: اناسمعتهم وحتى يكون بعلمك اعطيتهم انذار ... تاركين الشغل ومنشغلات بهذه السوالف!!! ابو ضاري هز رأسه بتفكير : أنا اقول يا فارس اذا كنت ناوي تتركها وما تبغى تكمل معها ما له داعي تربط البنت معك .... اتركها تشوف نصيبها رد بانفعال: اتركها؟!! بالنسبة له هذا الشيء مستحيل ...ما يقدر يتركها حتى لو كانت بينهم حواجز كبيرة وجودها على ذمته يكفيه حاليا ...وبتبرير حتى ابوه ما يفهم غلط: ما أقدر اتركها...انا وعدت جدي اتمم هالزواج وما رح اتخلى عن وعدي!! أبو ضاري هز رأسه بتفهم: بما إنك مصمم على الزواج ...ما يصير تترك البنت كذا لا سائل ولا مسؤول ...لزوم تروح تزورها ...تأخذ لها هديه تفرحها فيها ....البنات ينجبر خاطرهم بهذه الأشياء...وخلي يكون بينكم اتصالات وقبل ما يعترض فارس تابع ابوه كلامه: اسمعني يا فارس البنت بعدها صغيرة تحتاج اهتمام ورعاية ...لا تنسى كلام الموظفات يمكن يؤثر عليها ... انا افكر اخليها تداوم عندك بالمكتب وكذا تشتغل تحت عينك ... وش قلت!! هز رأسه بالرفض وبجدية نطق: يبه انا أبغى ابعدها عن الشركة وانت تبغى قاطعه أبو ضاري بهدوء. : طيب معك وقت تقدر تتعرف على البنت وتعرف أخلاقها قاطعه بضيق: الحين اترك المركب يسير كذا ....يصير خير *** ★ *** ★ *** ★ *** ★ جالسه عند امها وتناظرها وهي تصرخ بغضب ...ما بقى على جنونها الا لحظات .... ما قدرت تكتم ابتسامتها الشامته ... صدق الدنيا دوارة مثل ما نصبت على الناس جاء مين ينصب عليها ويأخذ كل فلوسها الي جمعتها .... ومن اقرب الناس لها !! حالها لا يرثى له بعد ما صارت مطلقه وما معها فلس واحد...ناظرت انحاء الشقة بتأمل ...ما كان عندها علم بشيء من هذه الأحداث ... اتصلت فيها جدتها وخبرتها حتى تشوف امها يمكن تقدر تعقلها... لكن الواضح انها امها انجنت ... اسماء الي ذابحها الكسور الي فيها ما هي قادرة تقوم وتقدر تتصرف ...ما يطلع بيدها شيء بعد ما سافر زوجها ...ناظرت رحيق الي باين عليها الشماته ...وبصراخ نطقت: جايه تتشمتين فيني يا ****** ضحكت رحيق بروقان ورضا ومن بين ضحكتها نطقت: الجزاء من جنس العمل!!!! سرعان ما عبست بألم لما استقر الجوال بجبهتها...تحسست المكان وهي عافسه ملامحها من وجع الضربه!! ام اسماء بغضب من جنان اسماء: مجنونه انت ؟!! وش عملت ؟!! اسماء والشرار يطلع من عيونها ؛: كلبه جايه تتشمت فيني ...والله لأنتقم منكم كلكم .. رحيق ناظرت جدتها: ليه ما اخذتيها للمستشفى؟! أم اسماء بلا مبالاه: خليها ترافس على كيفها ...باكر يطيح الحطب من رأسها !! انت بخير يا ابنتي؟! خليني اشوف وجهك مكان الضربه!! اجيبلك ثلج رحيق بهدوء نطقت: ما توجع عادي!! ... أنا بخير..مشكورة! ام أسماء بلطافه: إن شاء الله دوم تكوني بخير وعافيه ..أنا أقول يا ابنتي تأخرت على البيت ارجعي وانا ان صار شيء اكلمك!! بلاه يزيد جنانها وتضربك بشيء أكبر ..ما لي حمل على المشاكل بعد هالعمر...والله تعبت من كل شيء ...كل يوم انتظر الموت لعله يأخذني وارتاح من مشاكل اسماء!!! رحيق ناظرتها بحزن على حالها ...حرمه كبيره بالسن وتراكض حتى تحصل لقمة العيش...حالها يحزن ويقطع القلب ...إلي بعمرها جالسات معززات ومكرمات ...وبنبرة حانيه نطقت : رح احاول ارجع باكر ...سكتت للحظات وبتردد نطقت: جدتي محتاجه شيء؟!! ام اسماء بنفي: يا ابنتي ربك هو الرزاق .... مشكورة ما نبغى شيء!! رحيق هزت رأسها بهدوء وغادرت على سيل من الدعوات والكلام الجميل من جدتها!!! *** *** جالسة على الارض متربعة وتضحك من قلبها ...ما تعرف اليوم هو يوم السعادة...فرحانه او شمتانه ما هي قادرة تحدد شعورها ... لكن الي تعرفه إنها مبسوطه على هذا الشيء...يمكن بسبب المشاكل الي واجهتها بحياتها وكان السبب أمها ..تركتها علشان الفلوس والحين طارت الفلوس!!! التفتت على جدها الي يناظرها باستغراب:علامك تضحكين كذا؟! رحيق بابتسامه ردت وهي تؤشر على الجوال: شفت مقطع يضحك !! رجعت تقلب بالجوال وعقلها عند اسماء تضحك بدون وعي ... الحين لما رجعت على الصفر وش رح تعمل!! ام عبدالرحمن بفضول : وش الي يضحك بالجوال هالكثر!! رحيق والضحكه تزين ثغرها : ولا شيء...بس أنا مبسوطة اليوم كثير ابو عبدالرحمن وعيونه على الواقف قريب من الباب ويناظرهم: ان شاء الله دوم هالضحكة!! تفضل يا فارس ليه واقف عندك!! حست الضحكة انمحت من وجهها وهي تشوفه يتقدم لهم بملامح باردة ...نطق بجمود: السلام عليكم اقترب من جده سلم بيده وقبل رأسه: كيفك يا جدي!! ابو عبدالرحمن يناظره بمحبه وافتخار: الله يسلمك بخير نطق فارس بتبرير لدخوله: جرس بيتكم متعطل ابو عبدالرحمن هز رأسه: ايه صحيح على بالي أتصل بمحسن ونسيت!! اقترب فارس من جدته وهو يحاول بصعوبه يلبس قناع البرود ويتحاشى النظر للي جالسه قريب من جدته على الارض....حس بحركتها لما ابتعدت وجلست على الكنبة....سلم على جدته وقبل رأسها وهو ينطق باهتمام: كيف حالك يا جدتي!! ام عبدالرحمن بمحبه ناظرته: ربي يسلمك ويوفقك يا ولدي!! ألقى نظره عليها خاطفه وهي تناظر الجوال باندماج : كيف حالك!! تحس بالاختناق من وجوده ... وكأنه مصمم دوم يشوفها كذا فجأة بدون سابق إنذار ...وبخفوت ردت : بخير! ناظر جده بتعجب لأنه بكل بساطة ما وصله صوتها ... وكأنها ترد بدون نفس!! ..مط شفته بعدم رضا ... ابو عبدالرحمن ما عجبه تصرفها ...وبحزم نطق: رحيق رفعت نظرها لجدها باستغراب من طريقته بالكلام بدون ما تنطق حرف واحد!! انقهر منها فارس ما يدري ليه لما تشوفه يصيبها خرسان وما تتكلم!! ما يدري وش تقصد من هالحركة!! ابو عبدالرحمن بحزم وصرامه نطق: كذا البنت تستقبل خطيبها؟!! رفعت كتوفها ببراءه ما عملت شيء ليه جدها يناظرها ويكلمها كذا ...اتسعت عيونها لما نطق بأمر حازم: قومي سلمي على فارس بيدك ..تراه بحكم زوجك ...قومي أشوف ... وباعتراض نطقت: جدي أنا قاطعها وهو شاد على اسنانه: رحيق عبست ملامحها ووقفت بهدوء...اقتربت من فارس ..تحس بالاحراج والتوتر...كيف جدها يضعها بهذا الموقف ....استغلت انه فارس مغطي جدها عنها ...دخلت يدها تحت ثوب الصلاة ومدت يدها له ...بحيث يكون ثوب الصلاة حائل بينهم..رفعت نظرها له وابتسمت بتوتر وهي تشوف نظراته المرعبة من تصرفها ..وبترقيع همست حتى ما يسمعها جدها: قريب آذان المغرب أنا على وضوء!! واقف بجمود عكس دقات قلبه المتسارعة...ناظر يدها الممدوده وهي مغطيه بثوب الصلاة ...ابتسامتها جمال الكون كله فيه .... لكن بنفس الوقت مقهور منها ومن تصرفها ..وش هالتصرفات البزرانية ..توقعها اعقل من كذا ؟!! ما يدري وش تقصد من هالحركة؟!! وبنفس الجمود حتى يداويها وما تكرر هالتصرف... لحظات أحكم قبضة يده على ساعدها وهو يقدمها أمام جده.. نطق بحدة : شايف يا جدي هالحركات المبزرة؟!! ليه قالوا لها إني معي مرض معدي حتى تعمل كذا؟!! ترى أنا ساكت احترام لك يا جدي لكن إن تكرر هالفعل ما رح يعجبكم تصرفي ... أنا اعتبره قلة احترام لي. ختم كلامه وهو ينفض يدها بقوة.... أبو عبدالرحمن بتبرير وهي يشوف فارس يجلس قريب منه والدخان يتصاعد من رأسه: ما هو قصدها يا ولدي..هي منحرجة ومتوترة !! رحيق يا ابنتي عادي تراه بحكم زوجك لزوم تتعودين على فارس!! أم عبدالرحمن ما عجبها تصرف رحيق وبنفس الوقت ما عجبها تصرف فارس بالغ بانفعاله ...وقبل ما تنتقد رحيق ناظرت فارس بانتقاد: وانت ليه منفعل هالكثر؟!! فارس بتعجب: يعني ما شفت سلامها؟! زفر بضيق وناظر رحيق للحظات إلي جلست مكانها بعد ما طلب منها جدها تجلس!! أم عبدالرحمن بترقيع: يمكن تمزح معك فارس كتم انفعاله ورد بهدوء : هذا المزح ما هو مقبول أبدا ..في شيء اسمه احترام بين الزوجين..أتمنى مثل هذه التصرفات ما تتكرر لأني ما احب حركات البزران!! رفعت نظرها على كلامه. ...حركات بزران؟!! وش هالانسان المعقد إلي انكتب نصيبها معه ؟!! حتى المزح ممنوع عنده ؟! كل حياته جديه .. لا ما هي طبيعته كذا ...شافته اكثر من مرة مع حصة يضحك ومبسوط....هو قاصدها هي بالذات ...ما يبغى بينهم اي مزح أو أي احتكاك ...مجرد علاقة رسمية لا اقل ولا اكثر ....وبأي لحظة يموت جدها رح ينهي هذه العلاقة.. ما تدري ليه هو يكرهها لهذا الحد !! أبو عبدالرحمن انزعج من اول اللقاءات بينهم ويصير كذا فجوة بينهم ...نطق حتى يعدل العلاقة: لا تكبر السالفة قاطعته رحيق بهدوء وهي توقف : ما صار شيء..بالإذن أكيد نورة الحين صحيت!! تحركت خارج الصالة...دخلت غرفتها ناظرت أختها وهي تغط بالنوم ....غبطتها على هذا الاستغراق..تتمنى تنام بعمق وتنسى كل هالعالم ومشاكله...جلست على طرف السرير وهي تبلع غصتها...ضايقها تصرفه معها وخاصة لما نفض يدها بهذا الشكل..... إذا كذا امام جدها عمل ...بعد الزواج وش رح يعمل ؟!! احتضت رأسها بين يدينها وهي تفكر كيف تتخلص من هالزواج حتى تطلع بأقل الخسائر؟!!! *** *** *** أبو عبدالرحمن بعتب وزعل بعد خروج رحيق: وش فيك على البنت كذا ؟!! هذا وأنا اخترتك لأني متأكد رح تصونها وتحترمها ؟!! هذا قدامي عملت كذا ..لوحدكم وش رح تعمل فيها؟!! فارس زفر بضيق: ضايقني تصرفها قاطعه بحزم: في شيء اسمه التفاهم بالحسنى...اجلس معها وقول لها هذا التصرف ما عجبني وما ابغاه يتكرر...متى ما تجاهلت كلامك وقتها ما نلومك!! فارس اذا لهذه الدرجة ما تبغى البنت خلاص أنا راضي بانفصالك وما رح أزعل منك ... لأني ما اقبل تهينها وأنا دخلتها بيتي معززة مكرمة!! أنا أعرفك ما عندك هذه التصرفات قاطعه بهدوء وهو متأكد انه جده يعرف انه ليلى نفسها رحيق : أنا اعتذر اذا ضايقتكم بتصرفي قاطعته ام عبدالرحمن: اذا احد تبغى تعتذر منه فهو رحيق ...احرجتها بتصرفك معها...على الاقل هي تصرفها ما احد شافه منا ..يعني كان بينك وبينها...لكن انت كسرت بخاطرها وبنبرة رجاء تابعت:يا ولدي لا تكسرها يكفي الحياة الي شافتها ...البنت تتزوج حتى تستقر وتلقى بيت يحتويها نطق بهدوء: لا تحكموا علي من موقف ..يمكن أنا انفعلت بس قاطعه أبو عبدالرحمن: أنا اعرفك واعرف المشاعر الي تحملها لرحيق ...بس لا تخلي تصرفاتك عكس الي بقلبك!!! فارس ما يبغى جدته تفهم شيء او تعرف شيء ..نطق حتى يقفل على الموضوع: ان شاء الله خير!!! ما رح يصير إلا الي يعجبكم!! انتهى البارت ...دمتم بخير 🌹 | ||||
| |
|
05-12-21, 12:51 AM
| #296 | ||||
| الذين يشاهدون محتوى الموضوع الآن : 405 ( الأعضاء 44 والزوار 361) شجنّ العُذوب, صل على النبي محمد, ريحانة ابي, Nor sy, NASIMALSHOQ, Nadiakh90, آمـــال, Fa565, لا مجال, غزالتي الحلوه, Hmas, سما وقمر, زهرورة, عيوش66, قطر االندى, رفيقه التقى, يااسر, قصصية, Maymo, زموردة, نونه الحلوة, جنون امراه, مملكة الصمت+, لونا البلوي, بدوية انيقة, هاتي الفلوس, لينوسارة, N0n_70, سما وسمر, سحارري, مُلهَم, Abeero Alanqazi, انبثاق فجر, كيم ف, سماء المساء, ابتهال نور اليقين, حميدة حميدة, حلاوة الميم, معمارية ر, N.S.D, جين ايرر, عزيزة يسلم, حنيني ليك, رندالقرشي واضح اننا طمعانين بشككككككل، ماشبعت من الأحححححححداااااث 💔🏃♂️ | ||||
|
| |
|
05-12-21, 01:37 AM
| #298 | ||||
| بارت حلو هادي اسماء هاي ام يخرب بيتها ما اوسخها .تستاهل اللي صار فيها . بطلنا نعرف الزين من العاطل .من ورا الهنديه وابو ضاري اذا ابو ضاري صاير يتكلم بادب ومثاليه شو بدنا من هالدنيا اكثر العمى يعميه . قال رحم رحيق جلطني ما هو اساس البلا والله بدو يعيش دور الطيب ويمثل الدور . مهو اكثر شخص رفضها وحتى لما زوجها لابنو المتزوج اللي يعرفو اكثر واحد بيكرهها . منين هسه صاير حنون .الله يهديه ويظل هيك بس ما يكون في إنه وراه . فارس يغار على رحيق وهو بيعرف انو هي بتكرهو وهي كمان تعرف انو يكرهها هل بلحقو يفهمو بعض قبل ما يطلقو !! لأن رحيق مظلومه بهالزواج من كل النواحي . يا بطيرولنا الحربايه حصيص . | ||||
|
| |
|
05-12-21, 02:11 AM
| #299 | ||||
| الصراحه روووعه رغم تمنيته اطول عن العاده بس ماقصرتي يكفي التزامك علاقه رحيق بامها ماارحت لهاا وسالفه خسرت فلوسها ممكن كذبه ع رحيق الجده الهنديه الكلام المنمق الصراحه احس في فخ لرحيق ممكن بسبه يتعجل زواجها من فارس فارس وموقفه مع رحيق كل مره يشوفها مكشوف وجهها الاجداد دافعوا عنها ممكن يطلع لغرفتها او يرسل لها يعتذر طبعا رحيق مقفله عيونها وفارس راح يخفى المشاعر ولبس ليلى برحيق حبييييت ابو فيصل تمنيت يلتقى مع رحيق مره ثانيه وثالث ممكن يحبها وينقذها ويدااافع عنهاا احساسي في حدث بيصير اما يعجل بزواجهم او يتطلقون ويطلع لنا بطل مثل باقي روايات ابرار البطل يظهر بشخصيات جديد ممكن اقارب زميلاتها بشركه بلييييز ماتطولين | ||||
|
| |
 |
| الكلمات الدلالية (Tags) |
| ... |
| أدوات الموضوع | |
| انواع عرض الموضوع | |
|
|
4017Likes
العرض العادي
